Azeri - Exodus

Chapter 1

1:1  ائسرايئل اؤولادلارينين آدلاري کي، عايئله‌لري ائله، يعقوبلا بئرلئکده مئصئره گلدئلر، بونلار ائدي:

1:2  رِعوبئن، شَمعون، لاوي، يهودا،

1:3  يئسّاکار، زِبولون، بِنيامئن،

1:4  دان، نَفتالي، جاد، آشِر،

1:5  يعقوبون نسلئندن گلنلر يتمئش نفر ائدئلر. يوسئف آرتيق مئصئرده ائدي.

1:6  يوسئف اؤلدو، قارداشلاري و او نسلئنئن هاميسي دا اؤلدولر.

1:7  لاکئن ائسرايئل اؤولادلاري آرتديلار، تؤره‌يئب چوخالديلار، چؤخ قووّتلي اولدولار، و اؤلکه اونلارلا دولوب داشدي.

1:8  مئصئرده تزه بئر پادشاه تخته چيخدي کي، يوسئفي تانيميردي.

1:9  او، خالقينا ددي: "باخين، ائسرايئل خالقي ساييجا بئزدن چوخ و داها قووّتلئدئر.

1:10  گلئن اونلارلا اولان رفتاريميزدا حئکمتلي اولاق، مبادا چوخالسينلار و موحارئبه واختي دوشمنلرئمئزله بئرله‌شئب، بئزه ضئدّ ووروشسونلار و اؤلکه‌ني ترک اتسئنلر."

1:11  بلجه مئصئرلئلر ائسرايئل اؤولادلارينين اوستونه ائش نظارتچئلري قويدولار کي، آغير ائشلرله اونلاري ذلئل اتسئنلر. ائسرايئل اؤولادلاري فئرعون اوچون پئتوم و رَعمِسِس آدلانان شهرلر تئکدئلر کي، اونون آنبارشهرلري ائدي.

1:12  آمّا مئصئرلئلر ائسرايئل اؤولادلارينا نه قدر اذئيّت وردئلر، اونلار او قدر چوخاليب ياييلديلار. اونا گؤره ده ائسرايئل اؤولادلاريندان دهشته دوشوب،

1:13  اونلاري آمانسيزجا چاليشديرديلار.

1:14  اونلارين حياتلاريني پالچيق و کرپئج کئمي آغير ائشلرله آجي اتدئلر و هر جور زمي ائشلری‌ و آغير زحمتلرله ائسرايئل اؤولادلارينين حياتلاريني زهر اتدئلر.

1:15  او زامان مئصئر پادشاهي، شئفرا و پوعا آدلانان عئبراني مامالارلا دانيشيب،

1:16  اونلارا ددي: "عئبراني آروادلاريني دوغوزدوراندا، دوغوم صَندلئسئنده باخين: اگر اوشاق اوغلان اولسا، اونو اؤلدورون، آمّا اگر قيز اولسا، قويون ياشاسين."

1:17  آمّا مامالاردا تاري قورخوسو وار ائدي. بونا گؤره ده مئصئر پادشاهينين اونلارا امر اتدئيي کئمي اتمه‌دئلر و اوغلان اوشاقلاريني صاغ بوراخديلار.

1:18  بلجه مئصئر پادشاهي مامالاري چاغيرتديريب، اونلارا ددي: "نئيه بله ادئبسئنئز؟ نئيه اوغلان اوشاقلاريني صاغ بوراخيبسينيز؟"

1:19  مامالار فئرعونا جاواب وردئلر: "چونکي عئبراني آروادلار، مئصئرلي آروادلار کئمي ديئللر. اونلار داها گوجلودورلر و ماما گلمه‌دن دوغورلار."

1:20  تاري مامالارا ياخشيليق اتدي و خالق چوخاليب، داها قووّتلندي.

1:21  مامالارين تاريدان قورخدوقلارينا گؤره، تاري بو مامالارا دا عايئله نصئب اتدي.

1:22  او واخت فئرعون بوتون خالقينا امر ادئب ددي: "عئبرانئلردن دوغولان هر اوغلان اوشاغي گرک نئل چايينا آتيلسين! و قيز دوغولان هر اوشاغي گرک دئري ساخلاياسينيز."

Chapter 2

2:1  لاوي قبئله‌سئندن بئر کئشي لاوئلي بئر قيزلا اِولَندي.

2:2  آرواد بويلو اولوب، بئر اوغلان دوغدو. آرواد اوشاغين گؤزل اولدوغونو گؤردوکده، اونو اوچ آي گئزلَتدي.

2:3  آمّا بوندان آرتيق اونو گئزلي ساخلايا بئلمه‌دئيئندن، قاميشدان بئر سبد گؤتوروب قير و قَطرانلا بورودو، کؤرپه‌ني سبدئن ائچئنه قويوب، نئل چايين قيراغينداکي قاميشليغين آراسينا قويدو.

2:4  کؤرپه‌نئن باجيسي اوزاقدا دوروب باخيردي کي، اونون باشينا نه گله‌جَيئني گؤرسون.

2:5  فئرعونون قيزي يويونماق اوچون چايا گئردي. کنئزلري چايين قيراغيندا گزئردئلر. فئرعونون قيزي قاميشلارين آراسيندا سبدي گؤروب، کنئزئني گؤندردي کي، اونو گتئرسئن.

2:6  سبدئن آغيزيني آچديقدا کؤرپه‌ني گؤردو. اوشاق آغلاييردي. فئرعون قيزي اونا رحمي گلدئيئندن، ددي: "بو عئبراني اوغلانلاريندان بئرئدئر."

2:7  او واخت کؤرپه‌نئن باجيسي فئرعونون قيزيندان سوروشدو: "ائسته‌يئرسئنئز گدئم سئزئن اوچون عئبراني آروادلاريندان بئر دايه چاغيريم کي، کؤرپه‌ني اَمئزدئرسئن؟"

2:8  فئرعونون قيزي اونا ددي: "گت." قيز دا گدئب کؤرپه‌نئن آناسيني چاغيردي.

2:9  فئرعونون قيزي اونا ددي: "بو کؤرپه‌ني گؤتور و منئم اوچون اَمئزدئر، سنئن اوجرتئني وره‌رم". آرواد کؤرپه‌ني گؤتوروب اَمئزدئردي.

2:10  اوشاق بؤيودو و آرواد اونو فئرعون قيزينين يانينا آپاردي و اوشاق اونون اوغلو اولدو. و او، اوشاغين آديني موسا قويوب ددي: "چونکي اونو سودان چيخارتديم."

2:11  موسا بؤيودوکدن سونرا، بئر دفه اؤز خالقينين يانينا گتدي و اونلارين آغير زحمتئني گؤردو. و بئر مئصئرلئيه راست گلدي کي، اونون خالقيندان اولان بئر عئبرانئني دؤيوردو.

2:12  موسا اطرافينا باخيب هچ کسئن اولماديغيني گؤرنده، مئصئرلئني اؤلدوروب قومدا گئزلَتدي.

2:13  صاباحيسي گون گتدئيئنده گؤردو کي، ائکي عئبراني بئر-بئری ائله ساواشير. موسا حاقسيز اولانا ددي: "يولداشيني نئيه وورورسان؟"

2:14  او آدام ددي: "سني بئزئم اوستوموزه کئم باشچي، يا دا حاکئم قويوب؟ يوخسا مئصئرلئني اؤلدوردويون کئمي، بو فئکئرده‌سن کی، منی ده اؤلدوره‌سن؟" او زامان موسا قورخوب اوره‌يئنده ددي: "يقئن کي، اتدئيئم ائش اوزه چيخيب."

2:15  فئرعون بو ائشدن خبردار اولاندا، ائسته‌دي کي، موساني اؤلدورتسون. آمّا موسا فئرعونون اَلئندن قاچيب، مئديان تورپاغينا چاتاراق، بئر قويونون يانيندا اوتوردو.

2:16  مئديانلي بئر کاهئنئن يدّي قيزي وار ائدي. اونلار گلئب قويودان سو چکدئلر. آتالارينين سوروسونو سووارماق اوچون، سو تَکنه‌لرئني دولدوردولار.

2:17  آمّا چوبانلار گلئب اونلاري قوودولار؛ موسا اونلارين کؤمَيئنه قالخدي و سورولرئني سوواردي.

2:18  قيزلار آتالاري رِعواِلئن يانينا گلنده، رِعواِل سوروشدو: "نجه اولدو کي، بو گون تز گلدئنئز؟"

2:19  اونلار جاواب وردئلر: "بئر مئصئرلي بئزي چوبانلارين الئندن قورتاردي، بوندان دا علاوه، حتّا قويودان بئزئم اوچون سو چکئب سورونو سوواردي."

2:20  رِعواِل قيزلاريندان سوروشدو: "او آدام بس هارادادير؟ اونو نئيه بوراخدينيز؟ چاغيرين، گلئب بئر شي يسئن."

2:21  موسا راضي اولدو کلی، او آدامين اِوئنده قالسين. او دا قيزي صئپّوراني موسا ائله اِولَندئردي.

2:22  صئپّورا بئر اوغلان دوغدو. موسا اونون آديني گِرشوم قويوب ددي: "من ياد بئر اؤلکه‌ده قرئب اولموشام."

2:23  چوخ ائل کچدي. بو آرادا مئصئر پادشاهي اؤلدو. ائسرايئل اؤولادلاري اسئرلئکلرئنده ناله چکئب فرياد اتدئلر، و بو اسئرلئک اوچون اونلارين کؤمک ائسته‌ين باغيرتيسي تارينين حوضورونا چاتدي.

2:24  تاري اونلارين باغيرتيسيني اشئتدي و ائبراهئم، ائسحاق و يعقوبلا اولان عهدئني خاطيرلادي.

2:25  تاري ائسرايئل اؤولادلاريني گؤردو و اونلارا نظر سالدي.

Chapter 3

3:1  موسا قاييناتاسي مئديانلي کاهئن يئترونون سوروسونو اوتاريردي. بئر دفه او، سورونو صحرانين او بئري طرفئنه آپاريب تارينين داغي خورِبه گلدي.

3:2  ربّئن مله‌يي اونا بئر بوتادان قالخان آلوو ائچئندن گؤروندو؛ باخ! بوتا آلوولو، آمّا يانيب کول اولموردو.

3:3  موسا ددي: "گرک ائندي يولدان دؤنوم و بو قرئب حادئثه‌يه بئر باخيم، گؤروم نه اوچون بو بوتا يانيب کول اولمور."

3:4  رب موسانين باخماغا يولدان دؤندويونو گؤرنده، تاري بوتانين اورتاسيندان اونو چاغيريب ددي: "موسا، موسا!" او دا ددي: "بويور."

3:5  تاري ددي: "بورايا ياخينلاشما. آياقلاريندان چاريقلاريني چيخارت، چونکي دوردوغون ير موقدّس تورپاقدير."

3:6  سونراسي دا ددي: "من آتانين تاريسي، ائبراهئمئن، ائسحاقين و يعقوبون تاريسييام." او واخت موسا اوزونو اؤرتدو، چونکي تارييا باخماقدان قورخوردو.

3:7  رب ددي: "حقئقتن، من مئصئرده اولان خالقيمين اذئيّتئني گؤرموشم، نظارتچئلرئن الئندن چکدئکلري فريادلاريني دا اشئتمئشم، چونکي اونلارين عذابلاريندان خبرئم وار.

3:8  بونا گؤره ده نازئل اولموشام کي، اونلاري مئصئرلی‌لرئن اَلئندن قورتاريب، او اؤلکه‌دن ياخشي و گِنئش بئر دئيارا، سود و بال آخان بئر يره گتئرئم؛ کَنَعانليلارين، خئتلئلرئن، اِمورلولارين، پِرئزلی‌لرئن، خئولئلرئن و يِبوسلولارين اؤلکه‌سئنه.

3:9  ائندي باخ، ائسرايئل اؤولادلارينين فريادي منه چاتيب، مئصئرلی‌لرئن اونلارا اتدئکلري ظولمو ده گؤرموشم.

3:10  اونون اوچون ائندي گل. سني فئرعونون يانينا گؤندره‌جيم کي، خالقيم ائسرايئل اؤولادلاريني مئصئردن چيخارداسان."

3:11  لاکئن موسا تارييا ددي: "آخي من کئمَم کي، فئرعونون يانينا گِدَم، ائسرايئل اؤولادلاريني دا مئصئردن چيخاردام؟"

3:12  تاري ددي: "آرخايين اول کي، من سنئنله اولاجاغام. منئم سني گؤندردئيئمه علامت بو اولاجاق: سن خالقي مئصئردن چيخارديقدا، بو داغدا تارييا عئبادت اده‌جکسن."

3:13  موسا تارييا ددي: "باخ، ائسرايئل اؤولادلارينين يانينا گدئرم و اونلارا دئيه‌جيم: منی سئزئن يانينيزا آتالارينيزين تاريسي گؤندرئب. او واخت مندن سوروشا بئلرلر: «اونون آدي ندئر؟» او واخت نه دئيه‌جيم؟"

3:14  تاري موسايا ددي: "من وارام کي، وارام." گئنه ددي: "ائسرايئل اؤولادلارينا بله دئيرسن: «وارام» منی سئزئن يانينيزا گؤندرئب."

3:15  تاري داها علاوه اتدي: "ائسرايئل اؤولادلارينا بله دئيرسن: آتالارينيزين تاريسي ائبراهئمئن، ائسحاقين و يعقوبون تاريسي رب منی سئزئن يانينيزا گؤندرئب. آديم ابدی اولاراق بودور. قوي منی نسئلدن-نسله بله خاطيرلاسينلار.

3:16  گت، ائسرايئل آغساقّاللاريني بئر يره ييغ و اونلارا بله دِه: آتالارينيزين تاريسي، ائبراهئمئن، ائسحاقين و يعقوبون تاريسي رب منه گؤرونوب ددي: "حقئقتن سئزئن قيدئنئزده‌يَم و مئصئرده سئزه ادئلن هر شي نظرئمده‌دئر.

3:17  بونا گؤره ددئم کي، سئزي مئصئرده‌ چکدئيئنئز عذابدان قورتاريب کَنَعانليلارين، خئتلئلرئن، اِمورلولارين، پِرئزلی‌لرئن، خئولئلرئن و يِبوسلولارين اؤلکه‌سئنه، سود و بال آخان بئر اؤلکه‌يه آپاراجاغام."

3:18  اونلار سنئن سؤزونه قولاق آساجاقلار. سن ائسرايئل آغساقّاللاري ائله بئرلئکده مئصئر پادشاهينين يانينا گدئب دئيه‌جکسن: «عئبرانئلرئن تاريسي رب بئزئمله گوروشوب. ائندي بئزه ائجازه ور کي، چؤلده‌ اوچ‌گونلوک بئر سفره چيخاق و اورادا تاريميز ربّه قوربان کسک.»

3:19  آمّا بئلئرم کي، مئصئر پادشاهي زور آلتيندا قالماديقجا، سئزئن گتمه‌يئنئزه ائجازه ورمَيه‌جک.

3:20  من ده اَلئمي اوزاديب اورادا هر جور مؤجوزه‌لر اده‌رک، مئصئري ووراجاغام؛ بوندان سونرا مئصئر پادشاهي سئزي آزاد بوراخاجاق.

3:21  مئصئرلی‌لرئن گؤزونده بو خالق اوچون لوطف قازانديراجاغام، اله کي، يولا دوشدويونوز زامان اَلی‌بوش گتمَيه‌سئنئز؛

3:22  هر آرواد اؤز قونشوسوندان يا دا اِوئنده ياشايان آرواددان قيزيل-گوموش شيلر و پالتارلار ائستيه‌جک. اونلاري اوغوللارينيز و قيزلارينيزا گيدئره‌جکسئنئز؛ بلجه مئصئرلی‌لري سوياجاقسينيز."

Chapter 4

4:1  او واخت موسا ددي: "بلکه اونلار منه ائنانماييب، سؤزومه قولاق آسمايالار؟ مومکوندور دئيه‌لر: «رب سنه گؤرونمه‌يئب!» او زامان نه؟!"

4:2  رب موسادان سوروشدو: "سنئن اَلئنده‌کي ندئر؟" او جاواب وردی: "دَيَنَک."

4:3  رب ددي: "اونو يره آت". موسا اونو يره آتدي و دَيَنَک ائلان اولدو. موسا اونون قاباغيندان قاچدي.

4:4  لاکئن رب موسايا ددي: "اَلئني اوزاديب اونون قويروغوندان توت." موسا اَلئني اوزاديب توتاندا، او گئنه اَلئنده دَيَنَک اولدو.

4:5  سونرا رب ددي: "بونو ات کي، ائنانسينلار آتالاري ائبراهئمئن، ائسحاقين، و يعقوبون تاريسي رب سنه گؤرونوبدور."

4:6  رب گئنه موسايا ددي: "ائندي اَلئني قوينونا قوي." موسا اَلئني قوينونا قويدو. اونو قوينوندان چيخارداندا، باخ، اَلي جوذام مرضئنه توتولوب، قار کئمي آغاپّاق اولموشدو.

4:7  سونرا رب ددي: "اَلئني گئنه قوينونا قوي." موسا گئنه اَلئني قوينونا قويدو؛ اَلئني قوينوندان گؤتورنده، اَلي گئنه ده اوّلکي کئمي اولدو.

4:8  رب داوام وردی: "اگر سنه ائنانماسالار و اَوّلکي علامتي قبول اتمَسه‌لر، آخيرکي علامتي قبول اده‌جکلر.

4:9  آمّا اگر بو ائکي علامته ده ائنانماييب، سؤزونه قولاق آسماسالار، نئل چايينين سويوندان گؤتوروب، قورويا تؤک. چايدان گؤتوردويون سو، قورودا قانا دؤنه‌جک."

4:10  موسا ربّه ددي: "آمان ای پروردئگار! من هچ واخت فصئح دانيشان بئري اولماميشام، نه بو ياخينلاردا، نه کچمئشده، نه ده بو نؤکرئنله دانيشديغين زاماندان بَري. دئلئم توتولور، پَلتک بئر آدامام."

4:11  او واخت رب اونا ددي: "کئم ائنسانا آغيز ياراديب؟ کئم ائنساني لال يا دا کار ادئر؟ کئم ائنساني گؤزلو يا دا کور ادئر؟ بونو ادن، مگر من رب ديئلم؟

4:12  ائندي گت، من، بلی من، سنئن آغزينلا دانيشاجاغام و دئيه‌جَيئن سؤزو سنه اؤيرَده‌جيم.‌"

4:13  لاکئن موسا ددي: "آمان ای پروردئگار! نه اولور، سؤزونو آيري بئر آداملا گؤندر."

4:14  او زامان رب موسايا قضبله‌نئب ددي: "قارداشين لاوئلي هارون مگر يوخدور؟ بئلئرم کي، دانيشيقدا فصئح بئر آدامدير. باخ، سنئن پئشوازينا گلئر. سني گؤرنده اورَکدن سوئنه‌جک.

4:15  قارداشينلا گرک دانيشاسان. نه دمک لازيمدير، اونا باشا سال. و من، بلی من، سنئن و اونون آغزي‌ ائله دانيشاجاغام. سئزه نه اتمه‌يي اؤيرَده‌جيم‌.

4:16  سنئن عوضئنه خالقلا هارون دانيشاجاق. او سنئن اوچون آغيز اولاجاق، سن ده اونون اوچون تاري کئمي اولاجاقسان.

4:17  بو دَيَنَکي اَلئنده گؤتوره‌جکسن کي، اونونلا علامتلر گؤرسده‌سن."

4:18  او واخت موسا اورادان گتدي و قاييناتاسي يئترونون يانينا قاييديب ددي: "ائجازه ور قاييديب مئصئرده‌کي قارداشلاريمين يانينا گدئم، گؤروم حله صاغ-سالاماتديرلار، يا يوخ؟" يئترون موسايا ددي: سالامات گت."

4:19  مئديان تورپاغيندا رب موسايا ددي: "مئصئره قاييت، چونکي سنئن جانيني آلماق ائسته‌ين آداملارين هاميسي اؤلوب."

4:20  بلجه موسا آرواديني و اوغوللاريني گؤتوروب اِششَيه مئندئردي و تارينين بويوردوغو دَيَنَکي ده اَلئنه آليب، مئصئره قاييتدي.

4:21  رب موسايا ددي: "مئصئره قاييداندا، فئرعونون حوضوروندا اونلارا بوتون او مؤجوزه‌لری گؤرسد کی، اونلارين قودرتئنی سنه ورمئشم. گؤرسد؛ آمّا من اونون اوره‌يئني عئنادکار اده‌جيم، اله کي، او دا خالقي بوراخماياجاق.

4:22  فئرعونا دئيه‌جکسن: «رب بله ديئر: ائسرايئل منئم اوغلوم، منئم ائلکئمدئر.

4:23  سنه ددئم کي، قوي اوغلوم منه عئبادت اتمک اوچون گتسئن! آمّا سن اونا بو ائجازه‌ني ورمه‌دين. باخ، من سنئن اوغلونو، سنئن ائلک اوغلونو اؤلدوره‌جيم.»"

4:24  يولدا اوتراق اِتدئکلری واخت، رب موسايا راست گلدي و ائسته‌دی کی، اونو اؤلدورسون.

4:25  او زامان صئپّورا بئر چاخماق داشي گؤتوروب، اوغلونو ختنه اتدي و ختنه اَتئني موسانين آياقلارينا آتيب ددي: "حقئقتن کي، سن منه قانلي بئر اَرسن."

4:26  بلجه، رب اوندان اَل چکدي. او زاماندا صئپّورا موسايا ختنه‌يه گؤره "سن منه قانلي بئر اَرسن" ددی.

4:27  رب هارونا ددي: "موسانين پئشوازي اوچون صحرايا گت." هارون گدئب تارينين داغيندا قارداشينا راست گلدي و اونو اؤپدو.

4:28  موسا هارونا ربّئن اونا ددئيي بوتون سؤزلري بئلدئردي کي، ‌نجه رب اونو بو سؤزلرله و اده‌جَينه امر اتدئيي مؤجوزه‌لرله گؤندرئب.

4:29  او واخت موسا و هارون گدئب، ائسرايئل اؤولادلارينين بوتون آغساقّاللاريني بئر يره ييغديلار.

4:30  هارون ربّئن موسايا ددئيي سؤزلرئن هاميسيني اونلارا ددی و خالقين موقابئلئنده علامتلر گؤرستدي.

4:31  بلجه خالق ائناندي و او زامان کي، اشئتدئلر رب نجه ائسرايئل اؤولادلارينين قيدئنه قاليب و بونو دا کي، رب اونلارين چکدئيي اذئيّتي گؤروب، اَيئلئب پرستئش اتدئلر.

Chapter 5

5:1  موسا و هارون گلئب فئرعونا ددئلر: "ائسرايئلئن تاريسي رب بله ديئر: خالقيمي بوراخ کي، گدئب صحرادا منئم اوچون بايرام توتسونلار!"

5:2  لاکئن فئرعون ددي: "رب کئمدئر کي، اونون سَسئنه قولاق آسيب ائسرايئل اؤولادلاريني بوراخيم؟ ربّي تانيميرام، ائسرايئل اؤولادلاريني دا بوراخماياجاغام."

5:3  اونلار ددئلر: "عئبرانئلرئن تاريسي بئزئمله گؤروشوب؛ قوي صحرادا اوچ گون سفر ادئب، تاريميز ربّه قوربان تقدئم اِدَک. يوخسا بئزي وَبا يا دا قيلينجلا محو اِدَر."

5:4  لاکئن مئصئر پادشاهي اونلارا ددي: "ای موسا و هارون، نه اوچون خالقي ائشئندن ساليرسينيز؟ ائشئنئزئن باشينا دؤنون."

5:5  فئرعون گئنه ددي: "باخين، اؤلکه‌نئن خالقي ائندي چوخدور، سئز، اونلارا، اتدئيي ائشلرئنده مانع اولورسونوز."

5:6  بلجه اِله همن گون فئرعون خالقين نظارتچئلري و گؤزَتچئلرئنه امر ادئب ددي:

5:7  "خالقا کرپئج دوزلتمک اوچون بئر داها سامان ورمه‌يئن. قوي اؤزلري گدئب سامان ييغسينلار.

5:8  آمّا اونلاردان ائسته‌يئن کی، قاباقکي همن ساييدا کرپئچ دوزَلتسئنلر. کرپئچ ساييسيني آزالتمايين. چونکي اونلار تنبلدئرلر، بونا گؤره ده باغيريرلار کي، «گدک تاريميزا قوربان تقدئم ادک.»

5:9  قوي زحمتلري داها آغير اولسون، قوي ائشلرئنه مشغول اولسونلار کي، يالان سؤزلره قولاق آسماسينلار."

5:10  خالقين گؤزَتچئلري و نظارتچئلر، خالقين يانينا گلئب اونلارا ددئلر: "فئرعون بله ديئر: «آرتيق سئزه سامان ورميه‌جيم.

5:11  گدئن، اؤزونوز هارادان تاپا بئلئرسئنئز، سامان ييغين، لاکئن ائشئنئزدن هچ بئري آزالماياجاق."

5:12  بلجه خالق بوتون مئصئر تورپاغينا سَپه‌له‌نئب، سامان عوضئنه کولَش ييغماغا باشلاديلار.

5:13  نظارتچئلر اونلاري زورلاييب ديئردئلر: "گونده‌لئک ائشئنئزي يرئنه يتئرئن، اله همن قدر کي، سامان ورئلن واخت ادئردئنئز."

5:14  بوندان علاوه، ائسرايئل اؤولادلارينين گؤزَتچئلري کي، فئرعونون نظارتچئلري اونلاري ائش باشينا قويموشدولار، دؤيولوب سوروشولدولار: "نئيه دونن و بو گون، داها قاباکي ساييدا اولان کئمي کرپئج دوزلتمه‌يئبسئنئز؟"

5:15  او واخت ائسرايئل اؤولادلاريندان اولان گؤزَتچئلر، فئرعونون يانينا گلئب باغيرديلار: "قوللارينلا نئيه بله رفتار ادئرسن؟

5:16  قوللارينا سامان ورمئرلر، آنجاق «کرپئج دوزَلدئن» ديئرلر. باخ، قوللارين دؤيولور. آنجاق بو سنئن اؤز خالقينين تقصئرئدئر."

5:17  آمّا فئرعون ددي: "سئز تنبلسئنئز، چوخ تنبل، بونا گؤره ده ديئرسئنئز: «گدک، ربّه قوربان تقدئم ادک.»

5:18  ائندي گدئن ائشله‌يئن. سئزه سامان ورئلميه‌جک، آمّا گئنه ده همن ساييدا کرپئج دوزلتمَلي‌سئنئز."

5:19  ائسرايئل اؤولادلارينين گؤزَتچئلري پئس وضعئيّته دوشدوکلرئني گؤردولر، چونکي اونلارا ديئلدي کي، "سئزئن اوچون موعَيّن اولونموش گونده‌لئک کرپئج ساييسي آزالماياجاق."

5:20  فئرعونون يانيندان چيخاندا، اونلارا مونتَظير اولان موسا و هارونلا راستلاشديلار.

5:21  اونلارا ددئلر: "قوي رب سئزئن نه اتدئيئنئزي گؤرسون و جزانيزي ورسئن! سئز بئزي فئرعون و اونون نؤکرلري گؤزونده رَذئل اتدئنئز و اللرئنه قيلينج وردئنئز کي، بئزي اؤلدورسونلر."

5:22  او واخت موسا ربّئن حوضورونا قاييديب ددي: "ای پروردئگار، نه اوچون بو خالقي بله بلايا سالدين؟ منی نئيه گؤندردئن؟

5:23  سنئن آديندا فئرعونلا دانيشماق اوچون گلندن بَري او، بو خالقي بلايا ساليب، سن آمّا خالقيني هچ قورتارماييبسان."

Chapter 6

6:1  رب موسايا ددي: "گؤره‌جکسن کی، فئرعونا نه اده‌جيم؛ زورلا اونلاري بوراخاجاق، بئر ده زورلا اونلاري اؤلکه‌دن قوواجاق."

6:2  سونرا تاري موسايا ددي: "من ربّم.

6:3  من ائبراهئمه، ائسحاقا و يعقوبا قادئري‌موطلق تاري اولاراق گؤروندوم، آمّا اونلارا اؤزومو رب آدي ائله تانيتماديم.

6:4  اونلارلا عهد ده باغلاديم کي، قرئب ياشاديقلاري اؤلکه‌ني، يعني کَنَعان اؤلکه‌سئني اونلارا ورئم.

6:5  بوندان علاوه مئصئرلی‌لرئن اسارتده ساخلاديغي ائسرايئل اؤولادلارينين باغيرتيسيني اشئتمئشم و اؤز عهدئمي خاطيرلاميشام.

6:6  بونا گؤره ائسرايئل اؤولادلارينا دِه: من ربّم. سئزي مئصئرلی‌لرئن ظولموندن چيخارداجاغام، اونلارين اسارتئندن سئزي قورتاراجاغام و قودرتلي اَلئمله، بؤيوک جزالارلا سئزي خئلاص دا اده‌جيم.

6:7  او واخت سئزي اؤزومه خالق اده‌جيم و سئزئن تارينيز اولاجاغام. او واخت بئله‌جکسئنئز کي، سئزي مئصئرلی‌لرئن ظولموندن قورتاران رب تارينيز منم.

6:8  سئزي او اؤلکه‌يه گتئره‌جيم کي، اونو ائبراهئمه، ائسحاقا و يعقوبا وره‌جَيئمه آند ائچدئم. اونو سئزه مولک وره‌جيم؛ رب منم."

6:9  موسا ائسرايئل اؤولادلارينا اله ددی. آمّا اونلار روحدان دوشدوکلرئنه و آغير اسارت چکدئکلرئنه گؤره موسايا قولاق آسماديلار.

6:10  رب موسا ائله دا‌نيشيب ددي:

6:11  "مئصئر پادشاهي فئرعونون يانينا گدئب دِه: «ائسرايئل اؤولادلاريني اؤلکه‌دن بوراخ!»

6:12  آمّا موسا ربّئن حوضوروندا ددي: "ائسرايئل اؤولادلاري منه قولاق آسمادي؛ فئرعون منه نجه قولاق آساجاق؟ چونکي من دانيشماقدا فصئح بئر آدام ديئلم."

6:13  رب موسا و هارونلا دانيشيب، اونلارا ائسرايئل اؤولادلاري و مئصئر پادشاهي فئرعون اوچون امرلر وردی کي، ائسرايئل اؤولادلاريني مئصئر تورپاغيندان چيخارتسينلار.

6:14  ائسرايئل اؤولادلارينين عايئله باشچيلاري بونلاردير: ائسرايئلئن ائلک اوغلو رِعوبئنئن اوغوللاري: خَنوخ، پالّو، خِصرون و کَرمي؛ رِعوبئنئن عايئله‌سي بونلاردان عئبارتدئر.

6:15  شَمعونون اوغوللاري: يِمواِل، يامئن، اوحَد، ياکئن، سوخَر و کَنَعانلي بئر آروادين اوغلو شاول؛ شَمعونون عايئله‌سي بونلاردان عئبارتدئر.

6:16  نسئللرئنه گؤره لاوئنئن اوغوللاري بونلاردير: گَرشون، قوحات و مِراري. لاوي يوز اوتوز يدّي ائل عؤمور سورموشدور.

6:17  عايئله‌لرئنه گؤره گِرشونون اوغوللاري: لئبني و شئمعي.

6:18  قوحاتين اوغوللاري: اَمرام، يئصهار، خِبرون و اوزي‌اِل؛ قوحات يوز اوتوز اوچ ائل عؤمور سورموشدور.

6:19  مِرارئنئن اوغوللاري: مَخلي و موشي؛ نسئللرئنه گؤره لاوئلي‌لرئن عايئله‌‌لري بونلاردان عئبارتدئر.

6:20  اَمرام بئبئسي يوکِبِدله اِولَندي؛ يوکِبِد هارون و موساني دوغدو. اَمرام يوز اوتوز يدّي ائل عؤمور سوردو.

6:21  يئصهارين اوغوللاري: قورَخ، نِفِگ و ذئکري.

6:22  اوزي‌يئلئن اوغوللاري: مئشااِل، اِلصافان و سئتري.

6:23  هارون نَخشونون باجيسي عَمّئنادابين قيزي اِلئشِبَعله اِولَندي؛ اِلئشِبَع اونا ناداب، اَبئهو، اِلازار و ائتاماري دوغدو.

6:24  قورَخئن اوغوللاري: اَسّئر، اِلقانا و اَبي‌آساف؛ قورَخئن عايئله‌لري بونلاردان عئبارتدئر.

6:25  هارونون اوغلو اِلازار پوتي‌اِلئن قيزلاريندان بئرئني آرواد آلدي؛ او اونا پئنِخاسي دوغدو. عايئله‌لرئنه گؤره لاوئلی‌لرئن نسئل باشچيلاري بونلاردير.

6:26  بو اله همن هارون و موسا ائدي کي، رب اونلارا ددي: "ائسرايئل اؤولادلاريني لشگرلر حاليندا مئصئر تورپاغيندان چيخاردين."

6:27  اونلار همن آداملار ائدئلر کي، مئصئر پادشاهي فئرعونلا، ائسرايئل اؤولادلاريني مئصئر تورپاغيندان چيخارتماق اوچون دانيشديلار؛ اونلار همن موسا و هارون ائدئلر.

6:28  رب مئصئر تورپاغيندا موسا ائله دانيشاندا

6:29  رب موسا ائله دانيشيب ددي: "من ربّم! سنه ددئيئم بوتون سؤزلري مئصئر پادشاهي فئرعونا دِه."

6:30  آمّا موسا ربّئن حوضوروندا ددي: "من دانيشماقدا فصئح بئر آدام ديئلم، فئرعون منه نجه قولاق آساجاق؟"

Chapter 7

7:1  رب موسايا ددي: "سني فئرعون اوچون تاري کئمي قويدوم، قارداشين هارون دا سنئن پيغمبرئن اولاجاق.

7:2  بوتون سنه امر اتدئکلرئمي دئيه‌جکسن، قارداشين هارون دا فئرعونا دئيه‌جک کي، ائسرايئل اؤولادلاريني اؤلکه‌دن آزاد بوراخسين!

7:3  لاکئن من فئرعونون اوره‌يئني عئنادکار اده‌جيم کي، مئصئر تورپاغيندا گؤرسده‌جيئم علامتلر و مؤجوزه‌لري چوخالديم.

7:4  سئزه قولاق آسماسين. او واخت من الئمي مئصئر تورپاغينا اوزاديب، بؤيوک جزالار گؤندره‌رک، قوشونومو، خالقيم اولان ائسرايئل اؤولادلاريني مئصئر اؤلکه‌سئندن چيخارداجاغام.

7:5  اَلئمي مئصئر اؤلکه‌سئنه اوزاديب ائسرايئل اؤولادلاريني اونلارين آراسيندان چيخارتديغيم واخت مئصئرلئلر بئله‌جکلر کي، رب منم!"

7:6  رب موسا و هارونا نجه امراتمئشدي، اونلار دا اله اتدئلر.

7:7  فئرعونلا دانيشديقلاري واخت، موسانين هشتاد، هارونون دا هشتاد اوچ ياشي وار ائدي.

7:8  رب موسايا و هارونا ددي:

7:9  "فئرعون سئزه دئيَنده کي، «بئر مؤجوزه گؤرسدئن.» موسا هارونا دسئن: «اؤز دَيَنَکئني گؤتوروب فئرعونون قاباغيندا يره آت کي، ائلانا دؤنسون.»

7:10  موسا و هارون فئرعونون يانينا گلئب، رب نجه امراتمئشدي، اله ده اتدئلر. هارون اؤز دَيَنَکئني فئرعونون و اونون اعيانلارينين موقابئلئنده يره آتدي و دَيَنَک ائلانا دؤندو.

7:11  لاکئن فئرعون مودرئک آداملاري و جادوگرلري چاغيردي. مئصئر سِحربازلاري دا اؤز سِحرلري ائله بله اتدئلر.

7:12  هر بئري اؤز دَيَنَکئني يره آتيب ائلانا دؤندردي، آمّا هارونون دَيَنَکي، اونلارين دَيَنَکلرئني اودّو.

7:13  لاکئن ربّئن ددئيي کئمي فئرعونون اوره‌يي عئنادکار اولدو و اونلارا قولاق آسمادي.

7:14  رب موسايا ددي: "فئرعونون عئنادکار اوره‌يي وار، خالقي بوراخماقدان بويون قاچيردير.

7:15  سن صاباح سحر او زامان کی، فئرعون سويا طرف گدئر، اونون موقابئلئنه چيخ. اونو نئل چايينين ساحئلئنده گؤزله‌يئب، ائلانا دؤنن دَيَنَکي الئنه گؤتور.

7:16  سونرا فئرعونا دئيَرسن: «عئبرانئلرئن تاريسي رب منی سنئن يانينا گؤندردي کي، سنه دِيئم: خالقيمي آزاد بوراخ کي، صحرادا منه عئبادت اتسئن! باخ، سن ائندئيه قدر قولاق آسمادين،

7:17  بونا گؤره ده رب بله ديئر: بوندان بئله‌جکسن کي، رب منم. باخ، من الئمده‌کي دَيَنَکي نئل چايينين سويونا ووراجاغام اوندا سو قانا دؤنه‌جک.

7:18  چايدا اولان باليقلار اؤله‌جک و چاي قوخوياجاق، مئصئرلئلر چايدان سو ائچمَيه ائيرَنه‌جکلر."

7:19  رب موسايا ددي: "هارونا بله دِه: دَيَنَکي گؤتور و اَلئني مئصئر سولاري، چايلاري، آرخلاري، حوووضلاري و بوتون گؤلمَچه‌لري اوستونه اوزات. اونلار قانا دؤنسونلر، بوتون مئصئر تورپاغيندا هم تاختا قابلاردا، هم ده داش قابلاردا قان اولاجاق."

7:20  رب موسا و هارونا نجه امراتمئشدي، اونلار دا اِله اتدئلر: فئرعونون و اونون اعيانلارينين موقابئلئنده هارون دَيَنَکئني قالديردي و چايداکي سويا چاتديردي. نئل چايينداکي بوتون سو قانا دؤندي؛

7:21  چايداکي باليقلار اؤلدو و چاي قوخولادي. مئصئرلئلر بورادان سو ائچه بئلمه‌دئلر. بوتون مئصئر تورپاغي قان ائچئنده ائدي.

7:22  آمّا مئصئر سِحربازلاري دا اؤز سِحرلري ائله بله اتدئلر. ربّئن ددئيي کئمي فئرعونون اوره‌يي عئنادکار اولدو و اونلارا قولاق آسمادي.

7:23  فئرعون قاييديب اؤز سارايينا گلدي؛ بو ائشه ده اَهمئيّت ورمَدي.

7:24  بوتون مئصئرلئلر نئل چايي ساحئلئنده يِر قازماغا باشلاديلار کي، ائچمَلي سو تاپسينلار. چونکي چايين سويوندان ائچه بئلمه‌دئلر.

7:25  رب چايا بلا گؤندرَندن سونرا يدّي گون کِچدي.

Chapter 8

8:1  رب موسايا ددي: "فئرعونون يانينا گدئب اونا دِه: «رب بله ديئر: خالقيمي آزاد بوراخ کي، منه عئبادت اتسئن!

8:2  اگر خالقيمي بوراخماقدان ائمتئناع اده‌سن، من سنئن بوتون تورپاغيني قورباغالارلا دولدوروب بلايا سالاجاغام.

8:3  چاي، قورباغالارلا قايناشاجاق و اورادان چيخيب سنئن ساراييندا، ياتاق اوتاغيندا، ياتاغينين اوستونده گزه‌جکلر، اعيانلارينين، خالقينين اِولرئنه، تَندئرلرئنه و خمئر تَکنه‌لرئنه گئره‌جکلر.

8:4  سنئن، خالقينين، و بوتون اعيانلارين اوستونه قورباغالار چيخاجاقلار.»"

8:5  رب موسايا ددي: "هارونا بله دِه: «دَيَنکئني گؤتور و اَلئني چايلارين، آرخلارين و گؤلمَچه‌لرئن اوستونه اوزات. قوي مئصئر تورپاغي قورباغالارلا دولسون.»"

8:6  هارون اَلئني مئصئر سولاري اوستونه اوزاتدي و اورادان قورباغالار چيخيب مئصئر تورپاغيني بورودولر.

8:7  سِحربازلار دا اؤز سِحرلري ائله بله اتدئلر و مئصئر تورپاغينا قورباغالار يتئردئلر.

8:8  فئرعون موساني و هاروني چاغيريب ددي: "ربّه يالوارين کي، قورباغالاری مندن و خالقيمدان رَدّ اتسئن، اوندا خالقي بوراخارام کي، ربّه قوربان تقدئم اتسئن."

8:9  موسا فئرعونا ددي: "دانيش، نه واخت سنئن، اعيانلارين و خالقين اوچون يالواريم کي، قورباغالار سندن و اِولرئندن يوخ اولسونلار و آنجاق چايدا قالسينلار؟"

8:10  فئرعون ددي: "صاباح." موسا ددي: "سن ددئيئن کئمي اولسون؛ بوندان بئله‌جکسن کي، تاريميز ربّه بَنزَر هچ تاري يوخدور!

8:11  قورباغالار سندن، اِولرئندن، اعيانلاريندان و خالقيندان رَدّ اولوب آنجاق چايدا قالاجاقلار."

8:12  موسا و هارون فئرعونون يانيندان چيخديلار. موسا فئرعونون اوستونه گؤندردئيي قورباغالارا گؤره ربّه يالواردي.

8:13  رب ده موسانين سؤزونه عمل اتدي. اِولرده، حيطلرده، زَمئلرده اولان قورباغالار اؤلدولر.

8:14  اونلاري قالاق-قالاق ييغديلار و تورپاق قوخوماغا باشلادي.

8:15  آنجاق فئرعون گؤرنده کي، وضعئيّت يونگوللَشئب، ربّئن ددئيي کئمي اوره‌يئني عئنادکار اتدي و اونلارا قولاق آسمادي.

8:16  رب موسايا ددي: "هارونا بله دِه: «دَيَنَکئني اوزاديب يرئن توزونا وور کي، او بوتون مئصئر اؤلکه‌سئنده ميغميغالارا دؤنسون.»

8:17  اونلار بله ده اتدئلر. هارون اَلئنده‌کي دَيَنَکئني اوزاديب يرئن توزونا ووردو و ائنسانلارين دا، حيوانلارين دا اوستونه ميغميغالار قوندو. بوتون مئصئر تورپاغيندا يرئن توزو ميغميغايا دؤندو.

8:18  سِحربازلار دا ائسته‌دئلر کی، اؤز سِحرلري ائله ميغميغالار گتئرسئنلر. لاکئن بونو باجارماديلار. ائنسانلارين دا، حيوانلارين دا اوستونه ميغميغالار قوندو.

8:19  سِحربازلار فئرعونا ددئلر: "بوندا تارينين اَلي وار". لاکئن ربّئن ددئيي کئمي، فئرعونون اوره‌يي عئنادکار اولدو و فئرعون اونلارا قولاق آسمادي.

8:20  رب موسايا ددي: "سحر تزدن چيخ. او زامان کی، فئرعون سويا طرف گدئر، اونون موقابئلئنه گدئب بله دِه: «رب بله ديئر: خالقيمي آزاد بوراخ کي، منه عئبادت اتسئن!

8:21  اگر اونلاري بوراخماقدان ائمتئناع اده‌سن، سنئن، اعيانلارينين و خالقينين اوستونه و اِولرئنئن ائچئنه چئبئن ييغينلاري گؤندره‌جيم. مئصئرلی‌لرئن اِولري، ياشاديقلاري تورپاق چئبئنلرله دولاجاق.

8:22  لاکئن او گون خالقيمين ياشاديغي گوشِن وئلايتئني آييراجاغام کي، اورادا چئبئنلر اولماسين؛ بوندان بئله‌جکسن کي، بو اؤلکه‌ده رب منم.

8:23  سنئن خالقينلا اؤز خالقيم آراسيندا فرق قوياجاغام. بو علامت صاباح اولاجاق."

8:24  رب بله ده اتدي. فئرعونون سارايينين، اعيانلارينين اِولرئني، بوتون مئصئر تورپاغيني، آغير چئبئن ييغيني باسدي. چئبئنلرئن الئندن اؤلکه وئران اولدو.

8:25  فئرعون موساني و هاروني چاغيريب ددي: "گدئن، بو اؤلکه‌ده اؤز تارينيزا قوربان تقدئم ادئن."

8:26  لاکئن موسا ددي: "بله اتمک اولماز، چونکي بئزئم تاريميز ربّه قوربان کسمه‌يئمئز مئصئرلی‌لري ائيرَندئره‌جک. اگر مئصئرلی‌لرئن قاباغيندا بئز ائيرَندئرن قوربانلار کَسَک، مگر اونلار بئزي داشا باسمازلار؟

8:27  بئز ائسته‌يئرئک کي، صحرادا اوچ گون يول گدک و تاريميز ربّئن بئزه امر اتدئيي کئمي قوربان تقدئم ادک."

8:28  فئرعون ددي: "من سئزي آزاد بوراخيرام کي، صحرادا تارينيز ربّه قوربان گتئره‌سئنئز، آمّا چوخ اوزاغا گتمه‌‌يه‌جکسئنئز. منئم اوچون ده يالوارين."

8:29  موسا ددي: "باخ، من سنئن يانيندان گدئرم. ربّه يالواراجاغام کي، صاباح چئبئن ييغينلاري فئرعونو، اعيانلاريني و خالقيني ترک اتسئن؛ آمّا مبادا فئرعون، خالقي ربّه قوربان گتئرميه بوراخماماقلا گئنه ده بئزي آلداتسين."

8:30  موسا فئرعونون يانيندان گدئب ربّه يالواردي.

8:31  رب موسانين سؤزونه عمل اتدي. فئرعونو، اعيانلاريني و خالقيني چئبئنلردن قورتاردي؛ بئري ده قالمادی.

8:32  آمّا بو دفه ده فئرعون اوره‌يئني عئنادکار اتدي و خالقي آزاد بوراخمادي.

Chapter 9

9:1  رب موسايا ددي: "فئرعونون يانينا گدئب اونا دِه: «عئبرانئلرئن تاريسي رب بله ديئر: خالقيمي آزاد بوراخ کي، منه عئبادت اتسئن!

9:2  اگر سن اونو بوراخماقدان بويون قاچيرديب، ساخلاماغي داوام اتدئره‌سن،

9:3  باخ، رب الئني، زمئنده اولان حيوانلارين؛ آت، اِششَک، دَوه، مال- حيوان و قويون-کچئنئن اوستونه قالديراجاق؛ چوخ آغير وبا اولاجاق.

9:4  لاکئن رب ائسرايئل اؤولادلارينين حيوانلاري ائله مئصئرلی‌لرئن حيوانلاري آراسيندا فرق قوياجاق. ائسرايئل اؤولادلارينا عاييد اولان حيوانلاردان هچ بئري اؤلميه‌جکدئر.

9:5  رب واخت تعيئن ادئب ددي: "رب بونو اؤلکه‌ده صاباح اده‌جک."

9:6  محض بونو دا رب صاباحي گون اتدي. مئصئرلی‌لرئن بوتون حيوانلاري اؤلدو. آمّا ائسرايئل اؤولادلارينين حيوانلاريندان هچ بئري اؤلمه‌دي.

9:7  فئرعون آدام گؤندردي و باخ، ائسرايئل‌لئلرئن حيوانلاريندان حتّا بئري ده اؤلمه‌مئشدي. لاکئن فئرعونون اوره‌يي عئنادکار اولدو و او خالقي آزاد بوراخمادي.

9:8  رب موسايا و هارونا ددي: "کوره‌دن ائکي اوووچ دولوسو کول گؤتورون. قوي موسا اونو فئرعونون گؤزو قاباغيندا گؤيه سَپسئن.

9:9  بوتون مئصئر تورپاغيندا توز قالخاجاق، ائنسانلارين و حيوانلارين بدني گؤينه‌ين چئبانلار تؤره‌ده‌جک."

9:10  اونلار کوره کولونو گؤتوروب فئرعونون حوضوروندا دايانديلار. موسا اونو گؤيه‌ سَپدي، ائنسانلارين و حيوانلارين بدنئنه گؤينه‌ين چئبانلار چيخدي.

9:11  سِحربازلار دا بو چئبانلارا گؤره موسانين قاباغيندا دايانا بئلمه‌دئلر؛ چونکي چئبانلار سِحربازلارين دا بدنلرئنه، بوتون مئصئرلی‌لر کئمي چيخميشدي.

9:12  ربّئن موسايا ددئيي کئمي اولدو: رب فئرعونون اوره‌يئني عئنادکار اتدي و فئرعون اونلارا قولاق آسمادي.

9:13  رب موسايا ددي: "صاباح سحر تزدن قالخ و فئرعونون قاباغيندا دايانيب اونا بله دِه: «عئبرانئلرئن تاريسي رب بله ديئر: خالقيمي آزاد بوراخ کي، منه عئبادت اتسئن!

9:14  چونکي من بو دفه سنئن، اعيانلارينين و خالقينين اوستونه بوتون بلالاريمي گؤندره‌جيم. بوندان بئله‌جکسن کي، بوتون دونيادا منه بَنزَر يوخدور.

9:15  اگر ائندي اَلئمي اوزاديب سني و خالقيني وبا ائله جزالانديرسايديم، ير اوزوندن سئلئنئب کَسئلردئنئز.

9:16  اونا گؤره سني قورويوب ساخلاديم کي، اؤز گوجومو سنه گؤرسدئم و آديم بوتون دونيايا اعلان ادئلسئن.

9:17  سن حله ده منئم خالقيما آغاليق ادئب، اونلاري بوراخميرسان.

9:18  باخ، من صاباح بو واخت چوخ گوجلو بئر دولو گؤندرئرم: اله بئر دولو کي، مئصئرئن قورولماسيندان بري اورادا اولماييب.

9:19  ائندي حيوانلاريني و چؤلده‌ اولان هر شيئني اَمئن-آمانليغا آپار، چونکي زمئده قالان بوتون ائنسانلار و حيوانلار اِوه گتئرئلمَسه، اونلارين اوستونه دولو ياغاندا اؤله‌جکلر."

9:20  فئرعونون اعيانلاريندان بعضئلري ربّئن سؤزوندن قورخوب اؤز قول و حيوانلاريني تَلَسئک اِولرئنه گتئردئلر.

9:21  ربّئن سؤزونه اعتئناسيزليق ادنلر، اؤز قوللاريني و حيوانلاريني زمئده قويدولار.

9:22  رب موسايا ددي: "الئني گؤيه اوزات. قوي بوتون مئصئر تورپاغينا و اورادا اولان ائنسانلارين، حيوانلارين و بوتون زمي بئتکئلرئنئن اوستونه دولو ياغسين."

9:23  موسا دَيَنَکئني گؤيه اوزاتدي. رب ائلديريملا دولو گؤندردي و يره اود دوشدو؛ رب مئصئر تورپاغي اوستونه دولو ياغديردي.

9:24  بلجه، چوخ گوجلو بئر دولو ياغدي. دولو ائچئنده اود آليشيردي؛ مئصئر مئلّتئنئن قورولوشوندان بَري، بورادا بله بئر دولو اولماميشدي.

9:25  دولو بوتون مئصئر تورپاغيندا آدامدان حيوانا قدر ووردو و زمئده اولان هر بئتکئني محو اتدي و هر آغاجي قيريب تؤکدو.

9:26  آمّا ائسرايئل اؤولادلارينين ياشاديغي گوشِن وئلايتئنه دولو ياغمادي.

9:27  فئرعون موساني و هاروني چاغيرتديريب اونلارا ددي: "بو دفه گوناه اتدئم. رب صالحدئر، شرئر اولان من، و منئم خالقيمدير.

9:28  ربّه يالوارين، چونکي کئفايتجه ائلديريم و دولو باش ورئب. من ده سئزي آزاد بوراخارام و بورادا داها قالمازسينيز."

9:29  موسا اونا ددي: "شهردن چيخاندا الئمي ربّه طرف اوزاداجاغام، ائلديريم داياناجاق و داها دولو ياغماياجاق. بوندان بئله‌جکسن کي، دونيا ربّئنکئدئر.

9:30  لاکئن من بئلئرم کي، سن و اعيانلارين گئنه ده تاريدان قورخمورسونوز."

9:31  بو واخت کتان و آرپا محصولو محو اولدو، چونکي آرپا دن گتئرمئش، کتان دا يِتئشمئشدي.

9:32  آمّا بوغدا و قيرميزي بوغدا محصولو محو اولمادي؛ چونکي اونلار گِج يِتئشئرلر.

9:33  موسا فئرعونون يانيندان شهردن چيخيب الئني ربّه طرف اوزاتدي؛ ائلديريم و دولو داياندي و يره ياغيش ياغمادي.

9:34  فئرعون ياغيشين، دولونون و ائلديريمين دايانديغيني گؤروب گئنه ده گوناه اتميه باشلادي، اؤزو و اعيانلاري اورکلرئني عئنادکار اتدئلر.

9:35  ربّئن موسا واسئطه‌سئله ددئيي کئمي، فئرعونون اوره‌يي عئنادکار اولدو و او، ائسرايئل اؤولادلاريني آزاد بوراخمادي.

Chapter 10

10:1  رب موسايا ددي: "فئرعونون يانينا گت. من فئرعونون و اعيانلارينين اوره‌يئني اونا گؤره عئنادکار اتمئشم کي، اونلارين آراسيندا اؤز علامتلرئمي گؤرسدئم.

10:2  اله کي، سن ده اوغلونا و نوه‌نه دانيشارسان کی، مئصئرلی‌لري نجه ائستِهزا اتدئم و اونلارا علامتلر گؤرستدئم. اونلار بوندان بئله‌جکلر کي، رب منم."

10:3  موسا و هارون فئرعونون يانينا گلئب اونا ددئلر: "عئبرانئلرئن تاريسي رب بله ديئر: «نه واختا قدر حوضورومدان بويون قاچيرديب منه تابع اولماياجاقسان؟ خالقيمي آزاد بوراخ کي، منه عئبادت اتسئن!

10:4  اگر سن منئم خالقيمي آزاد اتمکدن بويون قاچيرداسان، باخ، من صاباح سنئن اؤلکه‌نه چيئرتکه‌لر گؤندره‌جيم.

10:5  چيئرتکه‌لر ير اوزونو اله اؤرته‌جکلر کي، تورپاغي گؤرمک اولماياجاق. دولو ياغاندان سونرا سئزه قالان شيلري ده اونلار يئيه‌جکلر؛ زمئده‌کي آغاجلارينيزين وردئيي زوغلاري دا يئيه‌جکلر.

10:6  اونلار سنئن، اعيانلارينين و بوتون مئصئرلی‌لرئن اِولرئني دولدوراجاقلار. بله شيي نه آتالارين، نه ده بابالارين بو تورپاقدا مسکن سالديغي گوندن ائندئيه کئمي گؤرمه‌يئب. موسا دؤنوب فئرعونون يانيندان چيخدي.

10:7  فئرعونون اعيانلاري اونا ددئلر: "نه واختا قدر بو آدام بئزي تله‌يه سالاجاق؟ بو آداملاري آزاد بوراخ، قوي اونلار اؤز تاريلاري ربّه عئبادت اتسئنلر. مگر سن حله بئلمئرسن کي، مئصئر محو اولور؟"

10:8  موساني و هاروني گئنه فئرعونون يانينا چاغيرديلار؛ فئرعون اونلارا ددي: "گدئن، تارينيز ربّه عئبادت ادئن. لاکئن کئملر گده‌جک؟"

10:9  موسا ددي: "اوشاق، قوجا، اوغول، قيزلاريميز، قويون- کچي و مال- حيوانلاريميزلا بئرلئکده گده‌جيئک، چونکي ربّه بايرام اتمَلي‌يئک."

10:10  فئرعون اونلارا ددي: "اگر من سئزي آرواد-اوشاقلارينيزلا بئرلئکده آزاد بوراخسام، او زامان رب سئزه کؤمک اولسون! يقئن سئزئن پئس نئيّتئنئز وار.

10:11  بله اولماز، سئز کئشئلر گدئن و ربّه عئبادت ادئن. مگر بونو ائسته‌مئرسئنئز؟" سونرا فئرعون اونلاري اؤز حوضوروندان قوودو.

10:12  او واخت رب موسايا ددي: "اَلئني مئصئر تورپاغينين اوستونه اوزات. قوي مئصئر تورپاغينا چيئرتکه‌لر هوجوم اتسئن و اؤلکه‌نئن بوتون بئتکئلرئني، دولو ياغاندان سونرا قالان هر شيي يسئنلر.

10:13  موسا دَيَنَکئني مئصئر تورپاغينين اوستونه اوزاتدي؛ رب اؤلکه‌يه بوتون او گون و گجه داوام ادن شرق کوله‌يي گؤندردي. سحر آچيلاندا شرق کوله‌يي اؤزو ائله چيئرتکه‌لر گتئردي.

10:14  چيئرتکه‌لر بوتون مئصئر اؤلکه‌سئنه هوجوم اتدئلر و بوتون مئصئر تورپاغينا ياييلديلار؛ بله آغير چيئرتکه هوجومو نه اولموشدو، نه ده اولاجاق.

10:15  چيئرتکه‌لر بوتون ير اوزونو اله اؤرتدولر کي، تورپاق گؤرونموردو؛ اونلار، اؤلکه‌نئن بوتون بئتکئلرئني و دولو ياغديقدان سونرا قالان بوتون آغاجلارين مئيوه‌لرئني يدئلر؛ بوتون مئصئر تورپاغيندا نه آغاجلاردا، نه ده چؤللوکلرده هچ بئر ياشيلليق قالمادي.

10:16  فئرعون تَلَسئک موساني و هاروني چاغيريب اونلارا ددي: "تارينيز ربّه و سئزئن حاقّينيزدا گوناه اتدئم،

10:17  ائندي آنجاق بو دفه بئر داها گوناهيمي باغيشلايين و تارينيز ربّه يالوار کي، بو اؤلومو آنجاق مندن ردّ اتسئن."

10:18  موسا فئرعونون يانيندان چيخيب ربّه يالواردي.

10:19  رب کوله‌يي دؤنده‌رئب چوخ گوجلو قرب کوله‌يي گؤندردي و کولک چيئرتکه‌لري آپاريب، قيرميزي دهنزه آتدي؛ بوتون مئصئر اؤلکه‌سئنده بئر چيئرتکه بله قالمادي.

10:20  آمّا رب فئرعونون اوره‌يئني عئنادکار اتدي و او، ائسرايئل اؤولادلاريني بوراخمادي.

10:21  سونرا رب موسايا ددي: "الئني گؤيه طرف اوزات کي، مئصئر تورپاغيندا ظولمت، آغير قارانليق اولسون."

10:22  موسا الئني گؤيه طرف اوزاتدي. بوتون مئصئر تورپاغيندا اوچ گون آغير قارانليق اولدو.

10:23  اوچ گون هچ کس بئر-بئرئني گؤرمه‌دي و هچ کس يرئندن ترپنه بئلمه‌دي؛ آمّا بوتون ائسرايئل اؤولادلارينين ياشاديقلاري يرلر، ائشيقليق ائدي.

10:24  فئرعون موساني چاغيريب ددي: "گدئن ربّه عئبادت ادئن. قوي اوشاقلارينيز دا سئزئنله گتسئن، لاکئن قويون-کچئنئز و مال-حيوانينيز بورادا قالسين."

10:25  لاکئن موسا ددي: "سن بئزه قوربانلار و يانديرما قوربانلاري دا ورمَلي‌سن کي، تاريميز ربّه قوربان تقدئم ادک.

10:26  حيوانلاريميز دا بئزئمله گتمَلي‌دئرلر: بئر ديرناق بله قالماماليدير، چونکي تاريميز ربّه قوربان گتئرمک اوچون اونلاري گؤتورمَلي‌يئک. لاکئن اورايا گدئب چاتماميش، ربّه نه‌يي قوربان گتئره‌جيئمئزي بئلمئرئک."

10:27  رب فئرعونون اوره‌يئني عئنادکار اتدي و او ائستمه‌دی کی، ائسرايئل اؤولادلاريني بوراخسين.

10:28  سونرا فئرعون موسايا ددي: "ردّ اول، اؤزونو گؤزله و بئر ده منئم گؤزومه گؤرونمه؛ بئر داها گؤزومه گؤروندويون گون اؤله‌جکسن."

10:29  موسا ددي: "دوز ديئرسن؛ بئر داها گؤزونه گؤرونمه‌رم."

Chapter 11

11:1  سونرا رب موسايا ددي: "فئرعونون و مئصئرئن اوستونه داها بئر جزا گؤندره‌جيم؛ بوندان سونرا او، سئزي آزاد بوراخاجاق، سئزي بوراخاندا، بورادان سئزي تامامن قوواجاق.

11:2  خالقا چاتدير کي، هر کئشي اؤز قونشوسوندان و هر آرواد اؤز دوستوندان قيزيل-گوموش شيلر ائسته‌سئن."

11:3  رب اؤز خالقينا مئصئرلی‌لرئن گؤزونده لوطف قازانديردي. موسا اؤزو ده مئصئر اؤلکه‌سئنده فئرعونون اعيانلارينين و خالقين گؤزونده چوخ بؤيوک آدام ائدي.

11:4  موسا ددي: "رب بله ديئر: «گجه ياريسي من مئصئرئن آراسيندان کچه‌جيم؛

11:5  مئصئر تورپاغيندا تختده اوتوران فئرعونون اوغلوندان توتموش، دَيئرمان آرخاسيندا اولان کنئز اوغلونا قدر، هامينين ائلک اوشاغي اؤله‌جک. حتّا بوتون حيوانلارين دا ائلک بالالاري اؤله‌جک.

11:6  بوتون مئصئر تورپاغيندا اله بؤيوک بئر فغان قوپاجاق کي، ائندئيه‌جک بله‌سي اولماييب و بوندان سونرا دا اولماياجاق.

11:7  لاکئن ائسرايئل اؤولادلارينين هچ بئرئنئن ضئدّئنه حتّا بئر ائت ده هورميه‌جک، نه بئر آداما، نه ده بئر حيوانا. بوندان بئله‌جکسئنئز کي، رب ائسرايئل اؤولادلاري ائله مئصئرلئلر آراسيندا نجه فرق قويور.

11:8  سونرا بوتون بو قوللارين يانيما گله‌جک و منه تعظئم ادئب دئيه‌جکلر: سن و دالينجا گلن بوتون خالق بورادان چيخين! بوندان سونرا من چيخاجاغام.»" سونرا موسا قيزغين قضبله فئرعونون يانيندان چيخدي.

11:9  رب موسايا ددي: "فئرعون سئزه قولاق آسماياجاق کي، مئصئر دئياريندا منئم مؤجوزه‌لرئم چوخالسين.»

11:10  موسا و هارون بوتون بو مؤجوزه‌لري فئرعونون حوضوروندا گؤرستدئلر. لاکئن رب فئرعونون اوره‌يئني عئنادکار اتدي و او، ائسرايئل اؤولادلاريني اؤز تورپاغيندان آزاد بوراخمادي.

Chapter 12

12:1  مئصئر تورپاغيندا رب موسا و هارونا ددي:

12:2  "بو آي سئزئن اوچون ائلک آي، سئزئن اوچون ائلئن ائلک آيي اولاجاق.

12:3  بوتون ائسرايئل جاماعاتينا ديئن: «قوي بو آيين اونونجو گونونده، اونلاردان هر بئري اؤزلري اوچون بئر قوزو، آتالارينين اِولرئنه گؤره، هر اِو بئر قوزو گؤتورسون.

12:4  اگر بئر آدامين عايئله‌سي بئر قوزو اوچون ساييجا آزدير، قوي او آدام، اِوئنه ياخين قونشوسي ائله بئرلئکده، بئر حيوان گؤتوروب آداملارين سايينا، هر کسئن يئيه‌جيئنه گؤره بؤلسون.

12:5  قوزونوز بئر ائلّئک قوصورسوز اِرکَک قوزو اولسون. اونو قويونلاردان يا دا کِچئلردن گؤتوره بئلرسئنئز.

12:6  اونو آيين اون دؤردونجو گونونه قدر ساخلايين. قوي آخشامچاغي ائسرايئل جاماعاتيندان هر کس اونو کسسئن.

12:7  قوربانين قانيندان گؤتوروب، اونو يئيه‌جکلري اِوئن قاپيسينين هر ائکي يان تاختاسينا و اوست دئره‌يئنه سورتسونلر.

12:8  همئن گجه اونون اَتئني يسئنلر؛ اَتي اوددا قيزارديب، ماياسيز چؤرک و آجي گؤيرتي ائله يسئنلر.

12:9  اونو چئي، و يا سودا قايناديلميش حالدا يمه‌يئن. کلّه‌سي، پاچاسي و ائچالاتي ائله بئرلئکده اوددا قيزارديلميش حالدا ييئن.

12:10  اوندان سحره قدر بئر شي ساخلامايين و سحر قالانلاريني يانديرين.

12:11  اونو بله ييئن: بِلئنئز قورشانميش، چاريقلارينيز آياغينيزدا، و دَيَنه‌يئنئز اَلئنئزده اولسون، اونو تَلَسئک ييئن. بو، ربّئن پاسخاسيدير.

12:12  لاکئن من او گجه مئصئر تورپاغيندان کچه‌جيم. مئصئر تورپاغيندا اولان هم ائنسانلارين بوتون ائلک اوشاقلاريني، هم ده حيوانلارين بوتون ائلک بالالاريني اؤلدوره‌جيم. بوتون مئصئر آللاهلارينا دا جزا وره‌جيم. رب منم.

12:13  اولدوغونوز اِولرئن اوستونده‌کي قان، سئزئن اوچون علامت اولاجاق. قاني گؤروب يانينيزدان کچه‌جيم و مئصئر اؤلکه‌سئني جزالانديرديغيم زامان، سئزه محو اِدئجي بلا گلميه‌جک.

12:14  بو گون سئزئن اوچون خاطئره گونو اولاجاق. اونو رب اوچون بايرام ادئن. نسئللر بويو ابدی قايدا اولاراق، اونو بايرام ادئن.

12:15  يدّي گون ماياسيز چؤرک ييئن. آمّا بئرئنجي گون اِولرئنئزدن ماياني ييغيشديرين. چونکي بئرئنجي گوندن يدّئنجي گونه قدر مايالي چؤرک يئين هر کسئن آياغي ائسرايئللی‌لرئن آراسيندان کسئلمه‌لئدئر.

12:16  سئزئن اوچون بئرئنجي و يدّئنجي گونلرده موقدّس ييغين اولاجاق. بو گونلر هر کس اؤزونه يمک حاضيرلاماقدان باشقا هچ بئر ائش گؤرمه‌سئن.

12:17  بو ماياسيز چؤرک بايراميني اونا گؤره رئعايت ادئن کي، محض همئن گون سئزئن دسته‌لرئنئزي مئصئر تورپاغيندان چيخارتديم. بو گونو نسئل بويو ابدی قايدا اولاراق رئعايت ادئن.

12:18  بئرئنجي آيين اون دؤردونجو گونونون آخشاميندان، آيين ائيئرمي بئرئنجي گونونون آخشامينا قدر، ماياسيز چؤرک ييئن.

12:19  يدّي گون اِوئنئزده مايا اولماسين. چونکي مايالي بئر شي يئين هر کس ائستر اؤلکه‌ده قرئب اولسون، ائستر يرلي، آياغي ائسرايئل ائجماعسينين آراسيندان کسئلمه‌لئدئر.

12:20  هچ بئر مايالي شي يمه‌يئن، ياشاديغينيز هر بئر يرده ماياسيز چؤرک ييئن.»"

12:21  موسا ائسرايئلئن بوتون آغساقّاللاريني چاغيريب ددي: "عايئله‌لرئنئزه گؤره اؤزونوز اوچون قوزو گؤتورون و پاسخا قوربانيني کسئن.

12:22  بئر دسته مرجانکؤشک گؤتوروب لَيَنده اولان قانا باتيرين و اوراداکي قاندان قاپينين اوست دئره‌يئنه و يان تاختالارينا سورتون. سحره قدر هچ کس اِوئنئن قاپيسيندان چيخماسين.

12:23  رب مئصئرلی‌لري بلايا سالماق اوچون گلنده، قاپينين اوست دئرک و يان تاختالارينين اوستونده اولان قاني گؤروب، او قاپينين يانيندان کچه‌جک. محو اِدئجي بلاني اِوئنئزه گئرميه قويماياجاق.

12:24  بونو ابدی قايدا اولاراق اؤزونوز و اؤولادلارينيز اوچون رئعايت ادئن.

12:25  ربّئن ددئيي کئمي سئزه وردئيي تورپاغا گلئب بو عئبادتي يرئنه يتئرئن.

12:26  اگر اؤولادلارينيز سئزدن سوروشالار کي، «بو عئبادتئن معناسيني سئزئن اوچون ندئر؟»

12:27  اونلارا جاواب ورئن: «بو، رب اوچون پاسخا قوربانيدير، او خئلاص ادن رب کي، مئصئرلی‌لري بلايا سالديغي زامان، مئصئرده‌کي ائسرايئل اؤولادلارينين اِولرئندن کچدي، لاکئن بئزئم اِولرئمئزي ساخلادي.»" خالق اَيئلئب سجده اتدي.

12:28  رب موسا و هارونا نجه امراتمئشدي، ائسرايئل اؤولادلاري دا گدئب اله اتدئلر.

12:29  گجه ياريسي رب مئصئر تورپاغيندا اولان بوتون ائلک اؤولادلاري ووردو؛ تختده اوتوران فئرعونون ائلک اؤولاديندان توتموش، زئنداندا اولان اسئرئن ائلک اوشاغينا قدر؛ حيوانلارين ائلک بالاسيني دا ووردو.

12:30  گجه واختي فئرعون، اونون اعيانلاري و بوتون مئصئرلئلر قالخديلار. مئصئردن بؤيوک بئر فغان قوپدو، چونکي اله بئر اِو يوخ ائدي کي، اورادا اؤلَن اولماسين.

12:31  فئرعون گجه موسا و هاروني چاغيريب ددي: "چيخين گدئن! هم اؤزونوز، هم ده ائسرايئللی‌لر خالقيمين آراسيندان چيخين گدئن، ائسته‌دئيئنئز کئمي ربّه عئبادت ادئن.

12:32  نجه کي ديئرسئنئز، قويون-کچئنئزي و مال-حيوانينيزي دا گؤتوروب گدئن، منه ده برکت ورئن."

12:33  مئصئرلئلر خالقي زور آلتينا قويدولار کي، اؤلکه‌‌ني تَلَسئک ترک اتسئنلر، چونکي ديئردئلر: "يوخسا هاميميز اؤله‌جيئک."

12:34  خالق خمئرلرئن ماياسي آجيماميش حالدا، پالتارلارينا بورونموش خمئر طاباقلاريني چئيئنلرئنده آپاردي.

12:35  ائسرايئل اؤولادلاري موسانين سؤزونه عمل اتدئلر. مئصئرلی‌لردن قيزيل-گوموش و پالتارلار ائسته‌دئلر.

12:36  رب خالقا مئصئرلی‌لرئن گؤزونده لوطف قازانديردي و اونلارا ائسته‌دئکلرئني وردئلر. بلجه اونلار مئصئرلی‌لري سويدولار.

12:37  ائسرايئل اؤولادلاري رَعمِسِسدن سوکّوتا يولا دوشدولر. آرواد-اوشاقدان باشقا، آلتي يوز مئنه قدر پئيادا گدن کئشي وار ائدي.

12:38  قاريشيق بئر ائزدئحام، چوخلو قويون-کچي، مال-حيوان و آيري حيوانلار دا اونلارلا بئرلئکده يولا دوشدو.

12:39  مئصئردن چيخارتديقلاري خمئردن ماياسي آجيماديغي اوچون ماياسيز فطئرلر پئشئردئلر. چونکي مئصئردن قووولموشدولار. نه يوبادا بئلردئلر، نه ده اؤزلرئنه آذوقه حاضيرلاميشديلار.

12:40  ائسرايئل اؤولادلارينين مئصئرده ياشاديغي مودّت دؤرد يوز اوتوز ائل اولموشدو.

12:41  محض بو دؤرد يوز اوتوز ائل قورتارديغي گونده، ربّئن بوتون دسته‌لري مئصئر تورپاغيندان چيخدي.

12:42  بو او گجه‌دئر کي، گرک رب اوچون ساخلانسين. چونکي مئصئر دئياريندان اونلاري قورتاردي. بو اله او گجه‌دئر کي، بوتون ائسرايئل خالقي نسئللر بويو او گجه‌ني ساخلاماليديرلار.

12:43  رب موسا و هارونا ددي: "پاسخا بايرامينين قايداسي بله‌دئر: هچ بئر قرئب اوندان يمه‌سئن؛

12:44  آنجاق هر کسئن گوموشله ساتين آلينميش قولو، ختنه اولوندوقدان سونرا اونو يئيه بئلر.

12:45  قوناق و موزدلو ائشچي اوندان يِمه‌سئن.

12:46  قوي بو يمک بئر اِوده ييئلسئن؛ اَتي اِودن اشئيه چيخارديلماسين و اونون هچ بئر سومويونو ده سينديرماياجاقسينيز.

12:47  بوتون ائسرايئل ائجماعسي بونو جشن توتسون.

12:48  سنئن يانيندا قوناق اولان قرئب، اگر رب اوچون پاسخا کچئرتمک ائسته‌سه، قوي عايئله‌سئنده اولان بوتون کئشئلر ختنه اولونسون؛ آنجاق بو زامان اونو کچئرده بئلر و او دا سئزئن هم طايفانينيز کئمي ساييلار. ختنه اولونمايان هچ بئر کئشي اوندان يمه‌سئن.

12:49  او قرئب اوچون ده کي، يانينيزدا يرلئلر کئمي ياشايير، قانون هَمَندئر."

12:50  رب موسا و هارونا نجه امراتمئشدي، ائسرايئل اؤولادلاري دا بله اتدئلر.

12:51  رب او گون ائسرايئل اؤولادلاريني مئصئر تورپاغيندان دسته-دسته چيخارتدي.

Chapter 13

13:1  رب موسايا ددي:

13:2  "ائسرايئل اؤولادلاري آراسيندا هر بطندن ائلک دوغولان بوتون اوغلانلاري و بوتون حيوانلارين بالالاريني منه تقدئس ات. اونلار منئمدئر."

13:3  موسا خالقا ددي: "مئصئردن، نؤکرچئلئک اِوئندن چيخديغينيز گونو خاطيرلايين. چونکي رب سئزي قووّتلي اَل‌له اورادان چيخارتدي و بونا گؤره ده مايالي چؤرک گرک ييئلمه‌سئن.

13:4  آبئب آييندا اولان بو گون چيخيرسينيز.

13:5  رب آتالارينيزا آند ائچمئشدي کي، کَنَعانليلارين، خئتلئلرئن، اِمورلولارين، خئولئلرئن، و يِبوسلولارين اؤلکه‌سئني سئزه وره‌جک. سئزي سود و بال آخان بئر تورپاغا گتئره‌جيي واخت، بو عئبادتي همئن آيدا يرئنه يتئرئن.

13:6  يدّي گون ماياسيز چؤرک ييئن، يدّئنجي گون ربّه بايرام اولسون.

13:7  او يدّي گون عرضئنده، آنجاق ماياسيز چؤرک ييئلمه‌لئدئر. آرانيزدا بوتون اؤلکه‌ده نه مايالي چؤرک گؤرونسون، نه ده مايا.

13:8  او گونو اوغلونوزا بئلدئرئب ديئن: «مئصئردن چيخديغيم واخت رب منئم اوچون نَلر اتدئيئنه گؤره بله ادئرم.»

13:9  قوي بو اَلئنئزده نئشانه و گؤزلرئنئزئن قاباغيندا خاطئره اولسون کي، ربّئن قانونو آغزينيزدان دوشمه‌سئن، چونکي رب سئزي قووّتلي اَل‌له مئصئردن چيخارتدي.

13:10  ائلدن ائله بو قايدايا تعيئن اولونان واخت عمل اده‌جکسن.

13:11  او زاماندان کي، رب، سئزه و آتالارينيزا آند ائچدئيي کئمي، سئزي کَنَعانليلارين اؤلکه‌سئنه گتئردي، اوراني سئزه وردئيي زامان،

13:12  آنا بطنئندن ائلک دوغولان بوتون اوغلانلارينيزی ربّه تقدئم اتمه‌لئسئنئز: ائلک دوغولان بوتون حيوان بالالاري دا ربّئن اولسون.

13:13  هر ائلک دوغولان اِششَک بالاسي عوضئنه، بئر قوزو وره‌‌جکسئنئز. اگر عوضئني ورمَيه‌سئنئز، گرک اونون بوينونو سينديراسينيز. اوغلانلارينيزين آراسيندا هر آدامين ائلک دوغولانين عوضئني ورمه‌لئسئنئز.

13:14  اوغوللارينيز سئزدن «بو ندئر؟» سوروشاندا ديئن: «رب بئزي مئصئردن، نؤکرچئلئک اِوئندن قووّتلي اَل‌له چيخارتدي.

13:15  فئرعون بئزي آزاد بوراخماماغا عئناد ادنده، رب مئصئر تورپاغيندا اولان هم ائنسانلارين هم ده حيوانلارن بوتون ائلک اوشاغيني اؤلدوردو. بونا گؤره من بوتون ائلک دوغولان حيوان بالالاريني ربّه قوربان ورئرم، بوتون ائلک اوغوللاريمين دا عوضئني ورئرم.

13:16  قوي بو اَلئنئزده نئشانه و گؤزلرئزئن قاباغيندا خاطئره علامتي اولسون، چونکي رب بئزي قووّتلي اَل‌له مئصئردن چيخارتدي."

13:17  فئرعون خالقي آزاد بوراخديغي زامان، تاري اونلاري فئلئسطلی‌لرئن بؤلگه‌سئندن، حتّا يولون قيسا اولدوغو حالدا آپارمادي. چونکي ددي: خالق موحارئبه گؤرنده بلکه پشمان اولوب مئصئره قاييدار.

13:18  تاري خالقي قيرميزي دهنزه طرف، صحرا يولو ائله آپاردي. ائسرايئل اؤولادلاري مئصئر تورپاغيندان نئظاملا چيخديلار.

13:19  موسا يوسئفئن سوموکلرئني اؤزو ائله آپاردي، چونکي يوسئف ائسرايئل اؤولادلارينا برک آند ورئب دمئشدي: "تاري موطلق سئزه نظر سالاجاق. گدن زامان اؤزونوله سوموکلرئمي ده بورادان چيخاردين."

13:20  ائسرايئل اؤولادلاري سوکّوتدان يولا دوشوب، صحرانين قيراغيندا اولان اِتامدا خيمه قوردولار.

13:21  رب اونلارين قاباغي ائله، گوندوز اونلارا يول گؤرسدمَک اوچون، بولود دئره‌يئنده، گجه ده، اونلارا ائشيق ورمک اوچون، اود دئره‌يئنده گدئردي کي، گوندوز ده، گجه ده گده بئلسئنلر.

13:22  گوندوزلر بولود دئره‌يي، گجه‌لر ده اود دئره‌يي خالقين قاباغيندان آيريلمادي.

Chapter 14

14:1  رب موسايا ددي:

14:2  "ائسرايئل اؤولادلارينا بله دِه: «دؤنوب پی‌حَخئروت قاباغيندا، مئگدوللا دهنزئن آراسيندا دوشَرگه سالين. بَعل‌صِفون موقابئلئنده دهنزئن ساحئلئنده دوشَرگه‌نئز اولسون.

14:3  فئرعون دوشونه‌جک کي، ائسرايئل اؤولادلاري آماجسيز سرگرداندير، صحرا، يوللاريني کسئبدئر.

14:4  آمّا من فئرعونون اوره‌يئني عئنادکار اده‌جيم کي، او سئزي تعقئب اتسئن. سونرا فئرعون و اونون بوتون قوشونو واسئطه‌سئله عئزّتلنه‌جيم. مئصئرلئلر بئله‌جکلر کي، رب منم.»" ائسرايئللی‌لر بله ده اِله‌دئلر.

14:5  مئصئر پادشاهينا ائسرايئل خالقينين قاچديغيني خبر ورنده، فئرعون و مأمورلارينين فئکري ديئشئلدي. اونلار ددئلر: "بئز نه اوچون بله اتدئک؟ ائسرايئل اؤولادلاريني نئيه قوللوغوموزدان بوراخديق؟

14:6  فئرعون دؤيوش عارابالاريني حاضيرلاييب، آداملاريني اؤزو ائله گؤتوردو.

14:7  او، آلتي يوز سِچمه دؤيوش آرابا، و مئصئرئن بوتون باشقا عارابالاريني گؤتوردو. هر آرابانين اؤز مأمورو وار ائدي.

14:8  رب مئصئر پادشاهي فئرعونون اوره‌يئني عئنادکار اتدي و او، ائسرايئل اؤولادلاريني تعقئب اتدي. آمّا ائسرايئل اؤولادلاري جورعتله گدئردئلر.

14:9  مئصئرلئلر، فئرعونون بوتون آتلاري، عارابالاري، سورَنلرئني و قوشونو اونلاري تعقئب ادئب في‌حَخئروت يانيندا، بَعل‌صِفون موقابئلئنده دهنزئن ساحئلئنده قوردوقلاري دوشَرگَيه چاتديلار.

14:10  فئرعون ياخينلاشاندا ائسرايئل اؤولادلاري باخيب گؤردولر کي، مئصئرلئلر اونلارين دالينجا گلئرلر. بونا گؤره ده چوخ قورخوب، ربّه فرياد اتدئلر.

14:11  اونلار موسايا ددئلر: "مگر مئصئرده قبئرئستانليق يوخدور کي، سن بئزي صحرادا اؤلمَيه آپاردين؟ بئزي مئصئردن چيخارديب باشيميزا نه گتئردئن؟

14:12  مئصئرده مگر سنه دمئردئک: بئزدن اَل چک، مئصئرلی‌لره قوللوق ادک؟ صحرادا اؤلمَکدن مئصئرلی‌لره قوللوق اتمک بئزئم اوچون ياخشيدير."

14:13  آمّا موسا خالقا بله ددي: "قورخمايين! دورون، گؤرون رب بو گون نجه سئزی خئلاص اده‌جک! بو گون گؤردويونوز مئصئرلی‌لري داها هچ واخت گؤرميه‌جکسئنئز.

14:14  ساکئت اولون، رب سئزئن اوچون دؤيوشه‌جک!"

14:15  رب موسايا ددي: "نه اوچون منه فرياد ادئرسن؟ ائسرايئل اؤولادلارينا دِه کي، يولا دوشسونلر."

14:16  آمّا سن دَيَنَکئني قالديريب، الئني دهنزئن اوستونه اوزات، سولاريني يار کي، ائسرايئل اؤولادلاري قورولوق يردن دهنزئن اورتاسيندان کچسئنلر.

14:17  من مئصئرلی‌لرئن اورکلرئني عئنادکار اده‌جيم کي، سئزي تعقئب اتسئنلر. سونرا فئرعونون، اونون بوتون قوشونونون، دؤيوش آارابالارينين و سورَنلرئنئن واسئطه‌سئله عئزّتلنه‌جيم.

14:18  فئرعونون دؤيوش عارابالارينين و سورَنلرئنئن واسئطه‌سئله عئزّتلندئيئم زامان، مئصئرلئلر بئله‌جکلر کي، رب منم.

14:19  ائسرايئل خالقينين قاباغيندا گدن تارينين مله‌يي، اونلارين آرخاسينا کچدي. بولود دئره‌يي قاباقلاريندان آرخالارينا کچئب،

14:20  مئصئرلی‌لرئن دوشَرگه‌سي و ائسرايئل‌لی‌لرئن دوشَرگه‌سي آراسينا گلدي. بولود بئر طرفه ظولمت، لاکئن او بئري طرفه گجه ائشيق وردی. بوتون گجه بو خالقلار بئربئرئنه ياخينلاشماديلار.

14:21  موسا اَلئني دهنز اوستونه اوزاتدي. رب بوتون گجه اَسن قووّتلي شرق کولَيي ائله دهنزئن سويونو قوووب، دهنزي قورويا چِوئردي. سولار ياريلدي

14:22  و ائسرايئل اؤولادلاري قورولوق يردن، دهنزئن اورتاسيندان کچدئلر. سولار اونلار اوچون صاغ و سول طرفدن دووار اولدو.

14:23  مئصئرلئلر اونلاري تعقئب اتدئلر؛ فئرعونون بوتون آتلاري، دؤيوش عارابالاري و اونلاري سورَنلر ائسرايئل اؤولادلارينين دالينجا دهنزئن اورتاسينا گئردئلر.

14:24  سحر نؤوبَتئنده رب اود و بولود دئره‌يئندن مئصئرلی‌لرئن قوشونونا باخيب قوشونلارين آراسينا قاريشيق سالدي.

14:25  او عارابالارين تَکَرلرئني اِله لَنگئتدي کي، عارابالار گوجله حرکت اتدئلر. مئصئرلئلر ددئلر: "گلئن ائسرايئل اؤولادلاريندان قاچاق، چونکي رب اونلارين طرفئنده بئزه ضئدّ دؤيوشور."

14:26  رب موسايا بله ددي: "اَلئني دهنزئن اوستونه اوزات کي، سولار مئصئرلی‌لرئن، دؤيوش عارابالارينين و اونلاري سورَنلرئنئن اوستونه قاييتسين."

14:27  موسا اَلئني دهنزئن اوستونه اوزاتدي. سحره ياخين دهنز اَوّلکي حالينا قاييتدي. مئصئرلئلر سولاردان قاچماق ائسته‌ينده، رب اونلاري ائته‌له‌يئب دهنزئن اورتاسينا آتدي.

14:28  يرئنه قاييدان سولار دؤيوش عارابالاريني، اونلاري سورَنلري، فئرعونون بوتون قوشونونو کی، ائسرايئل اؤولادلارينين دالينجا دهنزه گِدئردئلر، اؤرتوب اودّو. اونلاردان بئر نفر ده اولسون، صاغ قالمادي.

14:29  آمّا ائسرايئل اؤولادلاري دهنزئن اورتاسيندان، قورولوقدا يِرئيه‌رَک کچئب گتمئشدئلر. سولار اونلار اوچون صاغ و سول طرفده دووار اولموشدو.

14:30  بلجه رب او گون ائسرايئلي مئصئرلی‌لرئن الئندن خئلاص اتدي. ائسرايئل خالقي مئصئرلی‌لري دهنزئن ساحئلئنده اؤلو گؤردولر.

14:31  ائسرايئل خالقي ربّئن مئصئرلی‌لره بؤيوک قووّتله نه اتدئيئني گؤرنده، ربدن قورخدولار؛ اونا و قولو موسايا ائنانديلار.

Chapter 15

15:1  او واخت موسا ائله ائسرايئل اؤولادلاري ربّه بو نغمه‌ني اوخودولار: "ربّه نغمه‌لر اوخوياجاغام، چونکي اوجالديقجا اوجالدي آتي و آتليني دهنزه توللادي.

15:2  رب منئم قووّتئم، منئم نغممدئر.، او، منئم نئجاتيم اولوب. بو منئم تاريمدير، اونا حَمد اده‌جيم. آتامين تاريسيدير، رَبّي اوجالداجاغام.

15:3  رب دؤيوشچودور، ربدئر اونون آدي.

15:4  فئرعونون دؤيوش عارابالاريني و قوشونونو دهنزه آتيب. سِچمه افسرلري ده قيرميزي دهنزده بوغولوبلار.

15:5  درئن سولارا بورونوب، داش کئمی درئنلئکلرده قرق اولدولار.

15:6  يارب! سنئن صاغ الئن قودرتده شؤوکتلئدئر. يارب! سنئن صاغ الئن، دوشمنی ‌اَزَندئر.

15:7  سنه ضئدّ چيخانلاري، عظمتئنئن بؤيوکلويونده، يره ييخدين گؤندردئيئن يانديريب ياخان قضب، اونلاري سامان چؤپو کئمی کول ادئر.

15:8  بورنونون نفسي ائله سولار بئر يره ييغيلدي! ييغيلديلار بئر يره او آخان سولار! دوندو او دهنز قوينونداکي درئنلئکلرئن سولاري!

15:9  دوشمن ددي: "اونلارين دالينجا گده‌جيم؟ اونلارا چاتيب، قَنئمت پايلاياجاغام: بوندان دوياجاق جانيم؛ قيلينجيمي چکه‌جيم، و اَلئم اونلاري محو اده‌جک."

15:10  يلئني اوفوردون، دهنز اونلاري بورودو. قورغوشون کئمی، اونلار هيبتلي سولاردا باتديلار.

15:11  يارب، آللاهلار آراسيندا سنئن کئمي کئم وار؟ سنئن کئمي موقدّسلئکده عظمتلي، حمدلرده زهملي، و عجايئب يارادان مگر وار؟

15:12  ساغ الئني اوزاتدين، و تورپاق اونلاري اودّو.

15:13  قورتارديغين خالقا سن اؤز محبّتئنده يول گؤرستدئن. موقدّس مسکنئنه، اؤز گوجونده آپاردين.

15:14  اشئدن خالقلار اَسه‌جکلر؛ فئلئسط بؤلگه‌سئنئن ساکئنلرئني قورخو باسيب.

15:15  او آن اِدوم باشچيلاريني دهشت بورودو. موآب ريئسلرئنه لرزه دوشور؛ بوتون کَنَعان ساکئنلري اَرئيئبلر.

15:16  اونلارين اوستونه قورخو دوشدو، دهشت گلدي. قولونون عظمتي ائله اونلار داش کئمي قورويوب قاليبلار. او واختاجاق کي، خالقين کچسئن، يارب، او واختاجاق کي، قورتارديغين خالق کچسئن، يارب!

15:17  خالقيني گتئرئب، مئراثين اولان داغدا اَکه‌جکسن، اؤزون اوچون مسکن اتدئيئن يره، يارب! موقدّس مکانينا، ای پروردئگار، اَل‌لرئنئن قوردوغو يره.

15:18  رب ابددن ابده‌جک سلطنت اده‌جکدئر.»

15:19  فئرعون آتلاري، دؤيوش عارابالاري، اونلارا مئنَنلرله بئرلئکده دهنزه گئرَنده، رب دهنزئن سولاريني اونلارين اوستونه گری قايتارميشدي. لاکئن ائسرايئل اؤولادلاري دهنزئن اورتاسيندان قورولوق يردن کچمئشدئلر.

15:20  هارونون باجيسي پيغمبر مريم، الئنه دف آلدي؛ بوتون آروادلار دف و رقصلرله اونون دالينجا چيخديلار.

15:21  مريم اونلارين موقابئلئنده بو نغمه‌ني اوخودو: ربّه اوخويون، چونکي اوجالديقجا اوجاليب آتي و آتليني دهنزه توللادي!

15:22  موسا ائسرايئل خالقيني قيرميزي دهنزدن گتئردي. اونلار شور صحراسينا چيخيب اورادا اوچ گون يول گتدئلر، آمّا سو تاپماديلار.

15:23  مارايا چاتديلار، لاکئن اورانين سويونو ائچه بئلمه‌دئلر، چونکي آجي ائدي. بونا گؤره ده او يِر مارا آدلانير.

15:24  خالق موسادان گئلِيلئک ادئب ددئلر: "نه ائچک؟"

15:25  موسا ربّه فرياد اتدي و رب اونا بئر آغاج گؤرستدي. موسا اونو سويا آتدي و سو شئرئن اولدو. رب اورادا، ائسرايئل اؤولادلاريني ائمتاحانا چکدئيي يرده، اونلار اوچون قايدا-قانون قويوب، ددي:

15:26  "اگر سئز تارينيز ربّئن سَسئنه دئقّتله قولاق آسيب اونون گؤزلري قاباغيندا صداقتلي اولاسينيز، اونون امرلرئني اشئدئب بوتون قايدالاريني رئعايت اده‌سئنئز، مئصئرلی‌لره وردئيئم ناخوشلوقلارين هچ بئرئني سئزه ورميه‌جيم. چونکي سئزه شفا ورن رب، منم."

15:27  سونرا ائسرايئل اؤولادلاري ائلئمه گلدئلر. اورادا اون ائکي سو قايناغي و يتمئش خورما آغاجي وار ائدي. ائسرايئل خالقي اورادا سولار اطرافيندا دوشَرگه قوردو.

Chapter 16

16:1  بوتون ائسرايئل جاماعاتي اِلئمدن يولا دوشدو. اونلار مئصئر اؤلکه‌سئندن چيخديقدان سونرا، ائکئنجي آيين اون بشئنجي گونو سئن صحراسينا چاتديلار کي، اِلئم و سئنا داغي آراسيندادير.

16:2  صحرادا بوتون ائسرايئل جاماعاتي موسا و هارونون اَلئندن گئلِيلئک اتدئلر.

16:3  ائسرايئل‌ اؤولادلاري اونلارا ددئلر: "کاشکي مئصئر اؤلکه‌سئنده اولاندا ربّئن اَلئندن اؤلَيدئک، هچ اولماسا اَت قازانلارينين باشيندا اوتوروب دويونجا چؤرک يِيئردئک! آمّا سئز بئزي بو صحرايا بونا گؤره گتئردئنئز کي، بوتون جاماعاتي آجليقدان قيراسينيز."

16:4  رب موسايا ددي: "باخ، من سئزئن اوچون گؤيدن چؤرک ياغديراجاغام. خالق هر گون چيخيب، گونلوک چؤره‌يئني ييغاجاق. آمّا من اونلاري، وردئيئم تعلئماتلارا عمل ادئب اتمه‌مَکلرئني ائمتاحان اده‌جيم.

16:5  آلتينجي گون، ييغديقلاريني حاضيرلاديقدا، او بئري گونلر ييغديقلاريندان ائکي قات آرتيق اولاجاق."

16:6  موسا و هارون بوتون ائسرايئل‌لی‌لره ددئلر: "آخشام بئله‌جکسئنئز کي، سئزي مئصئر اؤلکه‌سئندن چيخاردان ربدئر.

16:7  سحر ربّئن عئزّتئني گؤره‌جکسئنئز. چونکي رب اوندان اتدئيئنئز گئلِيلئکلري اشئتدي. بئز کئمئک کي، سئز بئزدن گئلِيلئک ادئرسئنئز؟"

16:8  موسا ددي: "سئزه آخشام يِمَيه اَت، سحر ده دويونجا چؤرک ورن رَبدئر؛ چونکي رب سئزئن اونا ضئدّ اولان ديئنمه‌‌لرئزي اِشئدئر. بئز کئمئک؟ ديئنمه‌‌لرئنئز بئزه ضئدّ ديئل، ربّه ضئدّدئر."

16:9  موسا هارونا ددي: "بوتون ائسرايئل جاماعاتينا بله دِه: «ربّئن حوضورونا ياخينلاشين، چونکي او سئزئن ديئنمه‌‌لرئنئزي اشئدئب.»"

16:10  هارون ائسرايئل اؤولادلارينين بوتون جاماعاتينا دانيشديغي واخت، اونلار صحرايا باخديلار. باخ، ربّئن عظمتي بولوددا گؤروندو.

16:11  رب موسايا ددي:

16:12  "من ائسرايئل اؤولادلارينين ديئنمه‌لرئني اشئتدئم. اونلارا دِه: «آخشامچاغي اَت يئيه‌جکسئنئز، سحر ده چؤرکله دوياجاقسينيز. او واخت بئله‌جکسئنئز کي، تارينيز رب، منم.»"

16:13  آخشام بئلدئرچئنلر اوچوب، دوشَرگه‌نئن يرئني اؤرتدولر. سحر دوشَرگه‌نئن اطرافينا شِح دوشدو؛

16:14  شِح بوخارلاناندا، صحرادا، تورپاق اوستونده قيرووا بنزر نازئک پولچوکلار گؤروندو.

16:15  ائسرايئللی‌لر بونو گؤردوکده بئربئرلرئنه ددئلر: "بو ندئر؟" چونکي اونون نه اولدوغونو بئلمه‌دئلر. موسا اونلارا ددي: "بو او چؤرکدئر کی، ربّ سئزئن يِمه‌يئنئز اوچون ورئب.

16:16  ربّئن امري بودور: هر آدام يمک اوچون اؤزونه احتئياجي قدر اوندان ييغسين. اؤز چاديريندا اولان آداملارين سايينا گؤره آدامباشي بئر عومِر گؤتورون."

16:17  ائسرايئل اؤولادلاري بله ده اتدئلر. بعضئلري چوخ، بعضئلري ده آز ييغدي.

16:18  اونلار عومِرله اؤلچدوکلري زامان، چوخ ييغانلارين آرتيغي، آز ييغانلارين دا اَسکئيي اولمادي. هر کس اؤزونه يئيه‌جيي قدر يمک ييغدي.

16:19  موسا ائسرايئل اؤولادلارينا ددي: "قوي سحره قدر هچ کئمده بو يمکدن قالماسين."

16:20  لاکئن بعضئلر موسانين سؤزونه باخماييب، بوندان سحره قدر ساخلاديلار. ساخلاديقلاري يمک قوردلاييب ائيلَندي. موسا اونلارا قضبلندي.

16:21  ائسرايئل اؤولادلاريندان هر کس اؤزونه يئيه‌جيي قدر هر سحر اوندان ييغيردي. آمّا گونش قيزاندا او اَرئيئردي.

16:22  ائسرايئل اؤولادلاري آلتينجي گون بو يمکدن ائکي قات آرتيق، آدام باشي ائکي عومِر ييغديلار. جاماعاتين بوتون باشچيلاري گلئب بونو موسايا بئلدئردئلر.

16:23  موسا اونلارا ددي: "رب بله ديئر: «صاباح رب اوچون موقدّس سَبّت، ائستئراحت گونودور. پئشئردئيئنئز هر شيي پئشئرئن، قايناتديغينيز هر شيي قاينادين، آرتيغيني دا اؤزونوز اوچون سحره قويوب ساخلايين."

16:24  ائسرايئل اؤولادلاري، موسا اونلارا امر اتدئيي کئمي، يِمه‌يي سحره ساخلاديلار. نه ائيلَندي، نه ده ائچئنده قورد اولدو.

16:25  موسا ددي: "بو گون او يِمه‌يي ييئن، چونکي بو گون رب اوچون سَبّت گونودور. بو گون چؤلده‌ يمک تاپماياجاقسينيز.

16:26  سئز اونو آلتي گون عرضئنده ييغين؛ يدّئنجي گون، سَبّت گونو او يمک يوخ اولاجاق."

16:27  خالقين بعضئلري يدّئنجي گون يمک ييغماغا چيخديلار، آمّا تاپماديلار.

16:28  رب موسايا ددي: "نه واختا قدر امرلرئمه و تعلئماتلاريما ائطاعت اتمکدن بويون قاچيرداجاقسينيز؟"

16:29  باخين، رب سئزه سَبّت گونونو وردي؛ بونا گؤره ده او سئزه هر آلتينجي گون ائکي گونلوک يمک ورئر. قوي هر کس اؤز اِوئنده قالسين و يدّئنجي گون هچ يره چيخماسين."

16:30  بلجه خالق يدّئنجي گون ائستئراحت اتدي.

16:31  ائسرايئل خالقي بو يمه‌يئن آديني "مانّا" قويدو. او، گؤرونوشجه کِشنئش توخومو کئمي ائدي، رنگي آغيمتيل، آمّا دادي باللي کولچه‌يه بنزه‌يئردي.

16:32  موسا ددي: "ربّئن امري بودور: قوي مانّادان بئر عومِر نسئلدن-نسئله ساخلانسين؛ اِله کي، مئصئر اؤلکه‌سئندن سئزي چيخارتديغيم زامان، صحرادا سئزه يِدئرتدئيئم چؤره‌يي گؤرسونلر."

16:33  موسا هارونا ددي: "بئر قاب گؤتور، اونا عومِر دولو مانّا قوي و قابي ربّئن حوضورونا قوي کي، نسئلدن-نسئله ساخلانسين."

16:34  رب موسايا امر اتدئيي کئمي، هارون اونو شهادت لؤوحه‌لرئنئن قاباغيندا قويدو کي، ساخلانسين.

16:35  ائسرايئل اؤولادلاري قيرخ ائل مانّا يدئلر، او زامانا قدر کي، آباد بئر اؤلکه‌يه يتئشدئلر؛ اونلار کَنَعان اؤلکه‌سئنئن سرحدئنه گلنه قدر، مانّا يدئلر.

16:36  بئر عومِر اِفانين اوندا بئر قئسمَتئ‌دئر.

Chapter 17

17:1  ائسرايئللی‌لرئن بوتون جاماعاتي سئن صحراسيندان يولا دوشدولر و ربّئن بويوردوغونا گؤره کؤچوردولر. اونلار رِفئدئمده دوشَرگه سالديلار. اورادا خالقا ائچمه‌لي سو يوخ ائدي.

17:2  اونا گؤره ده خالق موسا ائله داعوا ادئب بله ددئلر: "بئزه ائچمه‌يه سو ور." موسا اونلارا ددي: "نئيه منئمله داعوا ادئرسئنئز؟ نه اوچون ربّي ائمتاحانا چکئرسئنئز؟"

17:3  آمّا خالق اورادا سوسوز اولموشدو. اونا گؤره ده موسانين الئندن ديئنئب ددئلر: "نئيه، بئزي مئصئردن چيخارتدين کي، بئزي، اوغوللاريميزي و حيوانلاريميزي دا سوسوزلوقدان اؤلدوره‌سن؟"

17:4  اوندا موسا ربّه فرياد ادئب ددي: "من بو خالقلا نه ادئم؟ بئر آز دا کچسه، منی داشا باساجاقلار."

17:5  رب موسايا ددي: "خالقين موقابئلئنه چيخ. اؤزونله بئر نچه ائسرايئل آغساقّالي گؤتور. نئل چايينا ووردوغون دَيَنَکي اَلئنه آليب ائره‌لي گت.

17:6  اورادا، خورِبده‌کي قايانين اوستونده، من سنئن قاباغيندا داياناجاغام. ضربه ائله قايايا وور و اورادان خالق اوچون ائچمه‌لي سو چيخاجاق. موسا دا ائسرايئل آغساقّاللارينين گؤزو قاباغيندا بونو اتدي.

17:7  موسا او يره مَسّا و مِرئبا آديني وردی، چونکي اورادا ائسرايئل اؤولادلاري داعوا اتمئشدئلر و "گؤره‌سن رب آراميزدادير، يا يوخ؟" ديئب، ربّي ائمتاحان اتمئشدئلر.

17:8  بوندان سونرا عَمالِقلئلر گلئب، رِفئدئمده ائسرايئل اؤولادلاري ائله دؤيوشدولر.

17:9  موسا يوشَعه ددي: "بئزئم اوچون آدام سِچ، گت عَمالِقلئلرله دؤيوش. صاباح من الئمده تارينين دَيَنَکی‌ ائله تپه‌نئن باشيندا داياناجاغام."

17:10  يوشَع ده موسانين ددئيی کئمي اتدي و گدئب عَمالِقلئلرله دؤيوشدو. آمّا موسا، هارون و خور تپه‌نئن باشينا چيخديلار.

17:11  موسا الئني قالديراندا ائسرايئل قالئب گلئردي، الئني اِندئرنده عَمالِق قالئب گلئردي.

17:12  لاکئن موسانين اَللري يورولوردو. اونا گؤره ده بئر داش گؤتوروب اونون آلتينا قويدولار. موسا داشين اوستونده اوتوردو. الئنئن بئرئندن هارون، او بئرئسئندن ده خور ياپيشدي. بلجه موسانين اَللری گون باتاناجاق مؤحکَم قالدي.

17:13  يوشَع عَمالِق خالقيني قيلينجدان کچئردئب قيردي.

17:14  رب موسايا ددي: "بونو خاطئره اولاراق کئتابا ياز، يوشَعئن قولاغينا چاتدير کي، من عَمالِقئن آديني کامئل بئر شَکئلده ير اوزوندن سئله‌جيم."

17:15  موسا بئر قوربانگاه دوزَلدئب آديني يَهوِه‌نئسّی قويدو.

17:16  و ددي: "اَللر ربّئن تختئنه طرف قالديريلدي. رب نسئلدن-نسئله عَمالِقلئلرئن ضئدّئنه دؤيوشه‌جکدئر."

Chapter 18

18:1  مئديانلي کاهئن يئترون کي، موسانين قاييناتاسي ائدي، تارينين موسا و خالقي ائسرايئل حاقّيندا اتدئيي بوتون ائشلري، و ربّئن ائسرايئلي مئصئردن نجه چيخارتديغيني اشئتدي.

18:2  موسانين قاييناتاسي يئترون، موسانين آروادي صئپّوراني ائکي اوغلو ائله بئرلئکده گری گتئردي، موسا اوّلجه‌دن آروادي اونون يانينا گؤندرمئشدي.

18:3  موسا اوغلانلارينين بئرئنئن آديني گِرشوم قويوب دِمئشدي: "من ياد بئر اؤلکه‌ده قرئب اولدوم.

18:4  موسا او بئرئسئنئن آديني اِلئعِزِر قويوب دمئشدي: «آتامين تاريسي کؤمه‌يئم اولدو و منی فئرعونون قيلينجيندان قورتاردي.

18:5  موسانين قاييناتاسي يئترون، موسانين اوغوللاري و آروادي ائله، موسانين صحرادا، تاري داغيندا دوشَرگه سالديغي يره گلدي.

18:6  يئترون بو خبري موسايا گؤندردي: "من، سنئن قاييناتان يئترون، آروادين و ائکي اوغلونلا يانينا گلئرم."

18:7  موسا قاييناتاسينين پئشوازينا چيخدي، تعظئم ادئب اونونلا اؤپوشدو؛ اونلار بئربئرلرئندن حال-اَحوال توتوب چاديرا گئردئلر.

18:8  موسا قاييناتاسينا نقل اتدي کي، رب ائسرايئلئن خاطئرئنه فئرعون و مئصئرلی‌لره نه اتدي، يولدا باشلارينا گلن بوتون زحمتلري، و ربّئن اونلاري نجه قورتارديغيني دا ددی.

18:9  يئترون ربّئن ائسرايئله اتدئيي بوتون ياخشيليقلارا و مئصئرلی‌لرئن الئندن اونلاري قورتارديغينا گؤره سِوئندي.

18:10  يئترون ددي: "سئزي مئصئرلی‌لرئن و فئرعونون اَلئندن قورتاران ربّه شوکور اولسون! خالقي مئصئرلی‌لرئن اَلئنئن آلتيندان قورتاران اودور.

18:11  ائندي بئلدئم کي، رب بوتون آللاهلاردان بؤيوکدور، چونکي اونلارين فخر اتدئکلرئندن ده اوستون اولدو."

18:12  سونرا موسانين قاييناتاسي يئترون، تارييا يانديرما و باشقا قوربانلاري گتئردي. هارونلا ائسرايئلئن بوتون آغساقّاللاري موسانين قاييناتاسي ائله تارينين حوضوروندا يمک يميه گلدئلر.

18:13  صاباحيسي گون موسا اوتوروب خالقا قاضيليق ادئردي. خالق دا سحردن آخشاماجاق موسانين اطرافيندا دايانميشدي.

18:14  قاييناتاسي موسانين خالق اوچون نه اتدئيئنه باخيب ددي: "نه اوچون بو خالقا بله ادئرسن؟ نئيه سن تَک اوتورورسان و بوتون خالق سحردن آخشاماجاق اطرافيندا دايانيب گؤزله‌يئر؟"

18:15  موسا قاييناتاسينا ددي: "اونا گؤره کي، خالق تاريدان سوروشماق اوچون منئم يانيما گلئر.

18:16  آرالاريندا داعوا چيخاندا، مَسَله منئم يانيما گلئر. من ده اونلارين آرالاريندا قضاوت ادئب، تارينين قايدا-قانونلاريني اونلارا بئلدئرئرم"

18:17  موسانين قاييناتاسي اونا ددي: "گؤردويون ائش ياخشي ديئل.

18:18  البتّه، هم سن، هم ده سنئنله اولان خالق اوزولرسئنئز. بو ائش سنئن اوچون آغيردير، اونو تَکباشينا اده بئلمزسن.

18:19  ائندي سؤزومه قولاق آس، سنه بئر مصلحت ورئم. قوي تاري سنه يار اولسون! سن بو خالقا گؤره، تارينين حوضوروندا دايان و ائشلرئني ده اونا چاتدير.

18:20  اونلاري قايدا-قانونلار باره‌سئنده خبردار اده‌جکسن؛ گده‌جکلري يولو و گؤره‌جکلري ائشي گؤرسده‌جکسن.

18:21  بوتون خالق آراسيندان باجاريقلي، تاريدان قورخان، حقئقت آختاران حاقسيز قازانجدان نئفرت ادن آداملاري سِچ. اونلاري مئنباشي، يوزباشي، اَلّی‌باشي، اونباشي تعيئن ات کي،

18:22  خالق آراسيندا دائم قضاوت اتسئنلر. قوي هر بؤيوک ائشي سنئن يانينا گتئرسئنلر، آمّا هر کئچئک ائشه اؤزلري قاضي اولسونلار. بلجه اؤز يوکونو يونگوللَشدئر. قوي بو يوکو او آداملار سنئنله داشيسينلار.

18:23  اگر بله اده‌سن، تاري دا سنه بله امر اتسه، دؤزه بئلرسن. بوتون خالق دا راضي اولوب اؤز يرئنه گدر."

18:24  موسا قاييناتاسي دئيَن بوتون سؤزلره قولاق آسيب عمل اتدي.

18:25  موسا بوتون ائسرايئل آراسيندان باجاريقلي آداملار سچدي و اونلاردان خالقا باشچي: مئنباشيلار، يوزباشيلار، اَلّی‌باشيلار، و اونباشيلار تعيئن اتدي.

18:26  اونلار دائم خالق آراسيندا قضاوت ادئردئلر؛ چتئن ائشلري موسانين يانينا گتئرئب، آمّا هر کئچئک ائشه اؤزلري قاضي اولوردولار.

18:27  سونرا موسا، قاييناتاسيني يولا سالدي، او دا اؤز اؤلکه‌سئنه گتدي.

Chapter 19

19:1  ائسرايئل اؤولادلاري مئصئر تورپاغيندان چيخديقدان اوچ آي سونرا، تزه آي گونو سئنا صحراسينا گلدئلر.

19:2  ائسرايئللی‌لر رِفئدئمدن کؤچوب، سئنا صحراسينا گلدئلر. او صحرادا ائسرايئل اؤولادلاري داغين موقابئلئنده دوشَرگه سالديلار.

19:3  موسا داغا، تارينين حوضورونا چيخدي. رب اونو داغدان چاغيريب ددي: "يعقوب نسلئنه، ائسرايئل اؤولادلارينا بله دِه:

19:4  «سئز اؤزونوز گؤردونوز کي، مئصئرلی‌لره نه‌لر اتدئم و سئزي قارتال قانادلاريندا نجه داشي‌ييب يانيما گتئردئم.

19:5  ائندي اگر سؤزومه دئقّتله قولاق آسيب، عهدئمي ساخلاياسينيز، سئز بوتون خالقلار آراسيندان منه عاييد خالق اولاجاقسينيز. بوتون ير اوزو منئمدئر؛

19:6  سئز منئم اوچون کاهئنلر سلطنتي و موقدّس مئلّت اولاجاقسينيز. بو سؤزلري ائسرايئل اؤولادلارينا دمه‌لی‌سن.»"

19:7  موسا گلئب خالقين آغساقّاللاريني چاغيردي و ربّئن اونا امر اتدئيي بوتون بو سؤزلري اونلارين موقابئلئنه قويدو.

19:8  بوتون خالق بئرلئکده بله جاواب وردی: "ربّئن بوتون ددئکلرئنه عمل اده‌جيئک." موسا خالقين جاوابيني ربّه چاتديردي.

19:9  رب موسايا ددي: "باخ، من سنئن يانينا آغير بولوددا گلئرم، قوي خالق سنئنله دانيشديغيمي اشئدئب، سنه دائم ائنانسينلار." موسا خالقين سؤزلرئني ربّه چاتديردي.

19:10  رب موسايا ددي: "خالقين يانينا گت. بو گون و صاباح اونلاري تقدئس ات. قوي پالتارلاريني دا يوسونلار.

19:11  اوچونجو گونه حاضير اولسونلار، چونکي اوچونجو گون بوتون خالقين گؤزو قاباغيندا، رب سئنا داغي اوستونه اِنه‌جک.

19:12  خالقين اطرافينا سرحد چکئب دِه: «اؤزونوزو داغا چيخماقدان، اونون اَته‌يئنه توخونماقدان گؤزله‌يئن. داغا توخونان هر کس اؤلدورولمه‌لي‌دئر.

19:13  اونا اَل ديميه‌جک. بونو ادن ائستر حيوان، ائستر ائنسان اولسون، داشا باسيلمالي‌دير، يا دا اوخونان وورولمالي‌دير. قوچ بوينوزوندان اولان کَره‌ناي اوزون چاليناندا اونلار داغا چيخاجاقلار.»"

19:14  موسا داغدان خالقين يانينا اِندي. او، خالقي تقدئس اتدي. اونلار پالتارلاريني يودولار.

19:15  سونرا موسا خالقا ددي: "اوچونجو گونه حاضير اولون، آروادلارلا ياخينليق اتمه‌يئن."

19:16  اوچونجو گونون سحري آچيلاندا، گؤي گورولتوسو، شئمشَکلر، داغ اوستونده آغير بئر بولود و چوخ اوجا کَره‌ناي سَسي اولدو. دوشَرگه‌ده اولان بوتون خالق تئتره‌دي.

19:17  تارينين پئشوازي اوچون، موسا خالقي دوشَرگه‌دن آپاردي و اونلار داغين اَته‌يئنده دوردولار.

19:18  بوتون سئنا داغي توستو ائچئنده ائدي، چونکي رب اونون اوستونه آلوو ائچَرئسئنده اِنمئشدي. توستوسو کوره‌نئن وردئيي توستو کئمي چيخدي. بوتون داغ تئتره‌‌دي.

19:19  کَره‌ناي سَسي گت‌-‌گده اوجالدي. موسا دانيشيردي و تاري اونا سَسله جاواب ورئردي.

19:20  رب سئنا داغي اوستونه، داغين باشينا اِندي و موساني داغين باشينا چاغيردي. موسا اورايا قالخدي.

19:21  رب موسايا ددي: "دوش، خالقا تاپشير کي، مبادا ربّي گؤرمک اوچون اونون طرفئنده اولان سرحدي کچسئنلر، يوخسا چوخلاري محو اولارلار.

19:22  ربّه ياخينلاشان کاهئنلر ده اؤزلرئني تقدئس اتسئنلر کي، رب اونلارا ضئدّ چيخماسين."

19:23  موسا ربّه ددي: "خالق سئنا داغينا چيخا بئلمز، چونکي سن بئزه ائخطار ورئب ددئن: «داغا سرحد چک و اوراني تقدئس ات.»"

19:24  رب اونا ددي: "دوش گت. سن و سنئنله برابر هارون بورايا چيخين. قويما کاهئنلرله خالق ربّئن يانينا چيخماق اوچون سرحدي کچسئنلر؛ يوخسا او، خالقا ضئدّ چيخار."

19:25  موسا خالقين يانينا اِنئب بونو اونلارا ددی.

Chapter 20

20:1  تاري بوتون بو سؤزلري دانيشيب، بله ددي:

20:2  "سئزي مئصئر تورپاغيندان، نؤکرچئلئک اِوئندن چيخاردان تارينيز رب، منم.

20:3  مندن باشقا آللاهلارين اولماياجاق.

20:4  اؤزون اوچون هچ بئر بوت، نه يوخاريدا، گؤيده و يا آشاغيدا، يرده، نه ده يرئن آلتيندا ييغيلان سولارداکي شيلرئن هچ بئرئنئن صورتئني دوزلتميه‌جکسن.

20:5  بله شيلرئن قاباغيندا سجده‌يه دوشوب عئبادت اتمه. چونکي من، سنئن تارين رب، قيرتلئيم. مندن نئفرت ادن آتالارين جزاسيني، اوچونجو-دؤردونجو نسئله قدر اؤولادلارينا چکدئره‌رم.

20:6  آمّا منی سِوئب امرلرئمه عمل ادنلره، مئنلر نسئله قدر محبّت گؤرسده‌رم.

20:7  رب تارينين آديني بوش يره آغزينا گتئرمه، چونکي رب اونون آديني بوش يره آغزينا آلاني جزاسيز قويماز.

20:8  سَبّت گونونو ياددا ساخلاييب، موقدّس گون کئمي ساي.

20:9  آلتي گون چاليشيب بوتون ائشلرئني گؤر.

20:10  لاکئن يدّئنجي گون، تاري ربّئن سَبّت گونودور. بو گون سن، اوغلون، قيزين، قولون، کنئزئن، حيوانين، يانيندا ياشايان ياد اِلئن، هچ بئر ائش گؤرمه‌سئن.

20:11  چونکي آلتي گون عرضئنده رب گؤيلر و يري، دهنزي و کائناتداکي هر شيي ياراتدي، لاکئن يدّئنجي گون ائستئراحت اتدي. بونون اوچون رب سَبّت گونونه برکت ورئب، اونو موقدّس سايدي.

20:12  آتا و آنانا حؤرمت ات کي، تارين ربّئن سنه وره‌جيي تورپاقدا عؤمرون اوزون اولسون.

20:13  قتل اتمه.

20:14  زئنا اتمه.

20:15  اوغورلوق اتمه‌.

20:16  کئمسه‌‌نئن ضئدّئنه يالان شاهئدلئک اتمه.

20:17  کئمسه‌نئن اِوئنه، آروادينا، قولونا، کنئزئنه، اؤکوزونه، اِششه‌يئنه، اونون هچ نه‌يئنه طاماح سالما."

20:18  بوتون خالق گؤي گورولتوسونو، شئمشَکلري، کَره‌ناي سَسئني اشئدئب، داغين توستولَنمه‌سئني گؤرنده تئتره‌دئلر و اوزاقدا دوردولار.

20:19  موسايا ددئلر: "سن دانيش، بئز ده اشئدک. قوي تاري بئزئمله دانيشماسين، مبادا اؤلَک."

20:20  موسا خالقا ددي: "قورخمايين، تاري اونا گؤره گلئب کي، سئزي ائمتاحانا چکسئن و اونون قورخوسو گؤزونوزون قاباغيندا اولسون کي، گوناه اتميه‌سئنئز."

20:21  خالق اوزاقدا دوراندا، موسا اورادا تارينين اولدوغو آغير قارانليغا ياخينلاشدي.

20:22  رب موسايا ددي: "ائسرايئل اؤولادلارينا بله دئيه‌جکسن: «سئز گؤردونوز کي، من سئزئنله گؤيلردن دانيشديم.

20:23  مندن ساوايي، باشقا آللاهلار دوزلتمه‌يئن؛ اؤزونوز اوچون نه قيزيلدان، نه ده گوموشدن آللاهلار دوزلتمه‌يئن.

20:24  منئم اوچون تورپاقدان قوربانگاه دوزَلَت و يانديرما و باريش قوربانلارينيز اولاراق اؤز قويون-کچي و مال-حيوانينيزي اونون اوستونده قوربان اده‌جکسئنئز. آديمي يادئگار اوچون قويدوغوم هر يره گلئب، سنه برکت وره‌جيم.

20:25  اگر منئم اوچون داشدان قوربانگاه دوزَلده‌سن، يونما داشدان تئکميه‌جکسن، چونکي اونون اوستونده اگر آلَتله ائشلَيه‌سن، اونو نجئس ادرسن.

20:26  عاييبين آچيلماماق اوچون، منئم قوربانگاهيما پئلّه‌ ائله چيخماياجاقسان.

Chapter 21

21:1  سن اونلارين موقابئلئنه بو حؤکملري قويمالي‌سان:

21:2  سئزدن بئري عئبراني قول آلاندا، او قول آلتي ائل قوللوق ادئب يدّئنجی ائل پولو قايتارمادان آزاد اولونسون.

21:3  اگر قولون تک گلئب، قوي تک ده گتسئن؛ اگر آروادي وارسا، قوي آروادي اونونلا گتسئن.

21:4  اگر قول صاحئبي قولونا آرواد ورئب و قولون آروادي اوغلان و يا قيز دوغوب، آروادلا اوشاقلاري آغاسي اوچون قالسين. آمّا قول تک گتسئن.

21:5  لاکئن اگر قول تأکئدله دسه: «آغامي، آرواديملا اوشاقلاريمي سوئرم و آزاد اولماق ائسته‌مئرم،»

21:6  اوندا قوي قولون آغاسي اونو تارينين حوضورونا گتئرسئن؛ قولونو قاپييا و يا قاپينين يان تاختاسينا سؤيکه‌يئب قولاغيني بئزله دشسئن. بو قول آغاسينا عؤمورلوک قوللوق اتسئن.

21:7  اگر بئر آدام قيزيني کنئزلئيه ساتير، قيز، کئشي نؤکرلر کئمي آزاد اولماسين.

21:8  اگر او قيز، اونو اؤزو اوچون تعيئن ادن آغاسينين گؤزونده پئس گؤرونور، آغاسي قيزين گری ورئلمه پولونو قبول ادئب، اونو آزاد اتسئن؛ او آغانين ائختئياري يوخدور کي، قيزي ياد اِلّئلره ساتسين. چونکي او قيزا خيانت ادئب.

21:9  اگر آغا کنئزئني اوغلو اوچون تعيئن ادئب، اونونلا عادته گؤره، اؤز قيزي کئمي رفتار اتمه‌لي‌دئر.

21:10  اگر او آدام ائکئنجي آرواد آلير، بئرئنجي آرواديني يمک و پالتار تأمئناتيندان و آروادليق حوقوقوندان محروم اتمه‌سئن.

21:11  اگر اَري بو اوچ حاقّي آروادا ورمئر، قوي بو آرواد هچ پول قايتارمادان آزاد ادئلسئن.

21:12  آدام ووروب اؤلدورن شخص اؤلدورولمه‌لی‌دئر.

21:13  لاکئن اگر او شخص اؤلدورمک قصدئنده اولماسا و اؤلوم منئم ائجازمله اولسا، او زامان بئر ير تعيئن اده‌رم کي، اورايا پناه گتئرسئن.

21:14  بئر آدام، آيري آدامي قصدن حئيله ائله اؤلدورسه، او آدامي حتّا منئم قوربانگاهيمدان گؤتور کي، اؤلومه ورئلسئن.

21:15  آتاسيني، و يا آناسيني دؤيَن آدام اؤلدورولمه‌لي‌دئر.

21:16  ائنسان اوغورلاييب ساتان، و يا ساخلايان آدام اؤلدورولمه‌لي‌دئر.

21:17  آتا-آناسينا لعنت ادن آدام اؤلدورولمه‌لی‌دئر.

21:18  آداملار موناقئشه ادنده، اگر کئمسه آيري آدامين داشلا ووردوغو يا دا يومروغو ائله ووردوغو بئر آدام اؤلمه‌يئب ياتاغا دوشسه،

21:19  او سونرا ياتاقدان قالخيب اَل آغاجي ائله اشئکده گزسه، اونو ووران آدام جزاسيز ساييلسين و آنجاق ياتديغي مودّتئن عوضئني ورسئن، کامئل صاغالانا قدر اونون قيدئنه قالسين.

21:20  بئر آدامين دَيَنَکله ووردوغو قولو، و يا کنئزي ضربه‌دن اؤلدويو حالدا، او آدام جزالانديريلمالي‌دير.

21:21  اگر قول و يا کنئز بئر-ائکي گون دئري قالسا، آغا جزا چکمه‌سئن؛ چونکي قول، و يا کنئز آغانين اَملاکي‌دير.

21:22  کئشئلر، داعوالاشان زامان، اگر بويلو بئر آروادا ضربه ووروب اونون اوشاغينين دوشمه‌سئنه باعئث اولسالار، آمّا آيري بئر زئيان اونا دَيمه‌سه، تقصئرکار آدام، او آروادين اَرئنئن طلب اتدئيي جرئمه‌ني، حاکئملرئن تعيئن اتدئيي مبلغده وره‌جک.

21:23  اگر آروادا زئيان دَيئبسه، تقصئرکار آدام جان عوضئنه جان،

21:24  گؤز عوضئنه گؤز، دئش عوضئنه دئش، اَل عوضئنه اَل، آياق عوضئنه آياق،

21:25  يانيق عوضئنه يانيق، يارا عوضئنه يارا، زَده عوضئنه زَده ورسئن.

21:26  اگر آغا قولونون و يا کنئزئنئن گؤزونه ووروب اونو کور اتسه، گؤزونون عوضئنه اونو آزاد اتسئن.

21:27  اگر آغا قولونون، و يا کنئزئنئن دئشئني سينديرسا، دئشئنئن عوضئنه اونو آزاد اتسئن.

21:28  اگر بئر اؤکوز بئر کئشي يا دا بئر آروادي بوينوزلا ووروب اؤلدورسه، اؤکوز گرک داشا باسيلسين؛ اونون اَتي يِيئلمه‌مه‌لي، آمّا اؤکوز صاحئبي گوناهسيز ساييلسين.

21:29  لاکئن اگر اؤکوز او واختا قدر ووراغان ائمئش، و صاحئبي ده بوندان خبري وار ائمئش، آمّا اونون قاباغيني آلماييب، نتئجه‌ده ده حيوان بئر کئشي و يا آروادي اؤلدوروب، اؤکوز داشا باسيلسين، صاحئبي ده اؤلدورولسون.

21:30  اگر حيوانين صاحئبئندن، گری ورئلمه پولو ائسته‌نئلئر، او، ائسته‌نئلَن پولون مبلغئني گری ورئب، جانينين عوضئني وره بئلر.

21:31  همن حؤکم اوغلانا و يا قيزا بوينوز وورانين ضئدّئنه ده ائشلَنسئن.

21:32  اگر اؤکوز قولو يا دا کنئزي بوينوزو ائله وورسا، اؤکوز صاحئبي، آغاسينا اوتوز شِکِل گوموش ورسئن، آمّا اؤکوز داشلانسين.

21:33  بئر آدام چوخور قازيب، اوستونو اؤرتمه‌سه و اورايا بئر اؤکوز و يا اِششَک دوشسه،

21:34  چوخور قازان آدام ضررئن بَدَلئني ورسئن؛ حيوانين دَيَرئني صاحئبئنه ورسئن، آمّا اؤلَن حيوان او آداما قالسين.

21:35  اگر بئر آدامين اؤکوزو آيريسينين اؤکوزونو ووروب اؤلدورسه، صاحئبلر هم صاغ قالان اؤکوزو ساتيب دَيَرئني ياري بؤلمه‌لی‌دئرلر، هم ده اؤلو اؤکوزو.

21:36  آمّا اؤکوزون او واختا قدر ووراغان اولدوغو معلوم اولاندا، اونون قاباغيني آلمايان صاحئبي اؤکوزون عوضئنه اؤکوز ورسئن؛ آمّا اؤلن اؤکوز اونا قالمالي‌دير.

Chapter 22

22:1  اگر بئر آدام بئر اؤکوز، يا دا بئر قويون اوغورلاييب کَسسه و يا اونو ساتسا، قوي او آدام، اؤکوز عوضئنه بش اؤکوز، قويون عوضئنه دؤرد قويون ورسئن.

22:2  اگر اوغرو گجه بئرئنئن اِوئنه گئرَرکَن ياخالانيب اؤلدورولسه، اؤلدورَن آدام تقصئرکار ساييلماسين.

22:3  اگر حادئثه گون دوغاندان سونرا باش ورسه، اوندا قوي تقصئرکار ساييلسين. اوغرو ضرري اِو يئيه‌سئنه ورمه‌لي‌دئر. اگر اوغرونون ضرري ورميه گوجو چاتميرسا، قوي اوغورلوغونا گؤره اؤزو ساتيلسين.

22:4  اگر اوغورلانان مال اوغرونون الئنده دئري تاپيلسا، ائستر بئر اؤکوز، ائستر بئر اِششَک، ائستر بئر قويون اولسون، اوغري ضرري ائکي قات ورمه‌لی‌دئر.

22:5  بئر آدام اؤز زمئسئنده، و يا اوزوم باغيندا اوتارديغي حيوانلاري آيري آدامين زمئسئنه اوتلاماغا بوراخديغي حالدا، او آدام اؤز زمئسئنئن، و يا اوزوم باغينين لاپ ياخشي باريندان ضرري ورسئن.

22:6  آليشان اود بوتالارا دوشوب دَرز، اَکئن، و يا زمئني محو اتدئيي حالدا اودو يانديران آدام ضرري ورمه‌لی‌دئر.

22:7  بئر آداما ساخلاماغا ورئلَن گوموش، و يا اشيا اونون اِوئندن اوغورلانديغي حالدا، اگر اوغرو تاپيلسا، ضرري ائکي قات ورسئن.

22:8  اگر اوغرو تاپيلماسا، اِوئن صاحئبي قاضيلار حوضوروندا حاضير اولسون کي، آيري آدامين امانتئنه خيانت ادئب اتمه‌مه‌سي بَلّي اولسون.

22:9  اگر کئمسه هر هانسي ائتمئش بئر اشيانين حاقّيندا، اؤکوز، اِششَک، قويون، و پالتار حاقّيندا «منئمدئر» دسه، ائکي طرفئن موباحئثه‌لي ائشي، قاضيلارين حوضورونا گتئرئلمه‌لی‌دئر؛ قاضيلارين حاقسيز چيخارتديغي آدام، او بئرئسئنه ضرري ائکي قات ورمه‌لی‌دئر.

22:10  اگر بئر آداما امانت ورئلَن آيري آدامين اِششَيي، اؤکوزو، قويونو و يا آيري بئر حيواني هچ کس گؤرمه‌دن اؤلسه، يارالانسا، يا دا آپاريلسا،

22:11  بو آداملار آراسيندا ربّئن آدينا ائچئلَن آند ائچئلسئن کي، بئري او بئرئسئنئن امانتئنه خيانت اتمه‌يئب. قوي حيوانين صاحئبي بونو قبول اتسئن، اونا ضرري ورئلمه‌سئن.

22:12  اگر حيوان همئن آدامدان دوغرودان اوغورلانيب، اونو ساخلايان آدام ضرري صاحئبئنه ورسئن.

22:13  اگر حيواني وحشي حيوان پارچالاييب، اونو ساخلايان آدام، پارچالانانان حيواني ثوبوت کئمي صاحئبئنه گتئرسئن، آمّا پارچالانان حيوان اوچون ضرر ورئلمه‌سئن.

22:14  بئر آدامين بورج آلديغي حيوان صاحئبئنئن يانيندا اولماياندا يارالاديغي، و يا اؤلدويو حالدا عوضي کامئل ورئلمه‌لئدئر.

22:15  اگر حيوانين صاحئبي يانيندادير، ضرر ورئلمه‌مه‌لئدئر. اگر حيوان اوجرتله توتولوب، اوجرت ضرره ده شامئل اولور.

22:16  اگر بئر آدام نئشانلي اولمايان باکئره قيزي توولاييب اونونلا ياخينليق اتسه، قيزا گؤره باشليق ورئب، اونو اؤزونه آرواد اتمه‌لی‌دئر.

22:17  اگر قيزين آتاسي اونو او آداما اَره ورميه اصلا راضي ديئل، او آدام قيزلارين باشليغينا مووافئق مبلغده پول ورسئن.

22:18  سِحرباز آرواد صاغ قالماسين.

22:19  حيوانلارلا جئنسي رابئطه‌يه گئرن هر کس اؤلدورولسون.

22:20  ربدن ساوايي، باشقا بئر آللاها قوربان گتئرن آدام تامامن محو اولونسون.

22:21  قرئب آداما نه حاقسيزليق ادئن، نه ده ظولم. چونکي سئز اؤزونوز ده مئصئر اؤلکه‌سئنده قرئب ائدئنئز.

22:22  هچ بئر دول آروادا و يتئمه اذئيّت ورمه‌يئن.

22:23  اگر بونلاردان بئرئنه اذئيّت وره‌سئنئز و او منه فرياد اتسه، من قطعن فرياديني اشئده‌جيم

22:24  و قضبله‌نئب سئزي قيلينجدان کچئرده‌جيم. آروادلارينيز دول، اوشاقلارينيز دا يتئم قالاجاقلار.

22:25  اگر يانيندا ياشايان خالقيمين کاسيبينا پول بورج وره‌سئنئز، اونونلا سَلَمچي کئمي رفتار اتميه‌‌جکسئنئز، اوستونه سَلَم قويماياجاقسينيز.

22:26  اگر آيري بئر آدامين پالتاريني گئروو آليرسان، گون باتماميش اونا گئرووو قايتار.

22:27  چونکي بو پالتار اونون يگانه اؤرتويو و اَينئنئن گِيئمئدئر. بس او آدام ياتاندا نه ائله اوستونو اؤرتر؟ او منه فرياد ادنده سَسئني اشئده‌جيم، چونکي من کرئمم.

22:28  تاريني سؤيميه‌جکسن و خالقين باشچيسينا لعنت اتميه‌جکسن.

22:29  اؤز محصولونو و شئره تقدئملرئني منه گتئرمه‌يئني گِجئکدئرميه‌جکسن؛ ائلک اوغوللاريني منه تقدئم اده‌جکسن.

22:30  اؤکوز و قويونون ائلک بالالاري ائله ده بله اده‌جکسن: يدّي گون اونلاري آنالاري ائله قويوب، سکّئزئنجي گون منه تقدئم اده‌جکسن.

22:31  منئم اوچون موقدّس خالق اولاجاقسينيز. بونا گؤره ده چؤلده‌ پارچالانديغي حيوانين اَتئني يميه‌‌جکسئنئز، اونو ائتلره آتاجاقسينيز.

Chapter 23

23:1  يالان خبر گزدئرمه‌يئن. يالانچي شاهئد اولماق اوچون، حاقسيز آداملا اَلبئر اولمايين.

23:2  شر ائش گؤرن قالاباليغا قوشولمايين. محکمه‌ده چوخلاري ائله بئرلَشه‌رَک عدالتئن قاباغيني آلماق اوچون يالانچي شاهئد اولمايين.

23:3  کاسيبا دا محکمه‌ده طرفدارليق اتمه.

23:4  اگر دوشمنئنئن آزميش اؤکوزونه، و يا اِششه‌يئنه راست گله‌سن، صاحئبئنه قايتارمالي‌سان.

23:5  سندن نئفرت ادن آدامين اِششه‌يئني، يوکو آلتيندا ييخيلميش حالدا گؤرنده، اونو ترک اتمه؛ اونا کؤمک ات کي، بو يوکدن آزاد اولسون.

23:6  مؤحتاج اولان آدامين محکمه ائشئنده، اونون ضئدّئنه عدالتي تحرئف اتمه.

23:7  يالان ائشدن اوزاق اول. معصوم و يا صالح آدامي دا اؤلومه ورمه. چونکي من خاطاکار آداما بَرائت قازانديرماياجاغام.

23:8  روشوت آلما، چونکي روشوت گؤزو آچيقلاري کور ادر، صالحلرئن سؤزلرئني ده تحرئف ادر.

23:9  قرئب آداما ظولم اتمه، سئز اؤزونوز قرئب آدامين نه حئسّ اتدئيئني بئلئرسئنئز، چونکي سئز اؤزونوز ده مئصئر اؤلکه‌سئنده قرئب ائدئنئز.

23:10  آلتي ائل تورپاغينيزي اَکئن و محصولونو ييغين؛

23:11  يدّئنجی ائل اونا اَل دَيمه‌يئن کي، خالقينيزدان اولان مؤحتاجلار اورادان يسئنلر. اونلاردان آرتيق قالاني دا وحشي حيوانلار يسئنلر. اوزوم و زيتون باغلارينيزدا دا بله ادئن.

23:12  آلتي گون ائشلرئنئزي گؤرون، آمّا يدّئنجی گونده ائستئراحت ادئن کي، اؤکوزونوز و اِششه‌يئنئز راحاتلانسين، کنئزئنئن اوغلو، نؤکرلر و قرئبلر ده دئنجَلسئنلر.

23:13  منئم سئزه ددئيئم هر شيي رئعايت ادئن. آيري آللاهلارين آديني چکمه‌يئن، قوي او آدلار سئزئن آغزينيزدان اشئدئلمه‌سئن.

23:14  منه ائلده اوچ دفه بايرام ادئن:

23:15  ماياسيز چؤرک بايراميني توتون. من سئزه امر اتدئيئم کئمي، آبئب آييندا تعيئن اولونا‌‌‌‌‌‌‌‌‌ن واخت يدّي گون ماياسيز چؤرک ييئن. چونکي مئصئردن او آيدا چيخدينيز. هچ کس حوضوروما اَلي‌بوش گلمه‌سئن.

23:16  زمئده‌کي اَکئن ائشئنئزئن نوباري ائله بئچئن بايراميني توتون. ائلئن آخيريندا ائشئنئزئن بوتون محصولونو زمئدن ييغيب، ييغيم بايراميني توتون.

23:17  ائلده اوچ دفه سئزئن بوتون اِرکَک آداملارينيز رب پروردئگارين حوضورونا گلسئنلر.

23:18  منه گتئردئيئنئز قوربانين قانيني مايالي چؤرکله تقدئم اتمه‌يئن. بايرام قوربانيمين پئيي سحره قدر قالماسين.

23:19  تورپاغين نوبارينين ائلک حئصّه‌سئني تارينيز ربّئن معبدئنه گتئرئن. کچي بالاسيني، آناسينين سودونده بئشئرمه‌يئن.

23:20  باخ، من يولدا، سنئن قاباغيندا بئر مَلَک گؤنده‌رئرم کي، سني حئفظ ادئب، حاضيرلاديغيم يره سني گتئرسئن.

23:21  اونون حوضوروندا احتئياطلي اول و سَسئنه قولاق آس. اونون ضئدّئنه عوصيان قالديرما، او سئزئن عوصيانينيزي باغيشلاماز، چونکي منئم آديم اونون اوستونده‌دئر.

23:22  اگر اونون سَسئنه حقئقتن قولاق آسيب ددئيئمه عمل اده‌سئنئز، اوندا من سئزئن دوشمنلرئنئزه دوشمن، خصملرئنئزه ده، خصم اولاجاغام.

23:23  منئم مَله‌يئم قاباغينيزدا گده‌جک و سئزي اِمورلولارين، خئتلئلرئن، پِرئزلی‌لرئن، کَنَعانليلارين، خئولئلرئن و يِبوسلولارين تورپاغينا گتئره‌جک؛ من اونلاري تامامن محو اده‌جيم.

23:24  اونلارين آللاهلارينا سجده اتمه‌يئن، اونلارا عئبادت اتمه‌يئن و اونلار ادن عمل‌لره، عمل اتمه‌يئن؛ او آللاهلاري داغيديب يوخ ادئن، اونلارين موقدّس سوتونلاري تئکه-تئکه اتمه‌لي‌سئنئز.

23:25  لاکئن سئز تارينيز ربّه خئدمت ادئن، او دا چؤره‌يئنئزه و سويونوزا برکت وره‌جک؛ سئزئن آرانيزدان ناخوشلوغو اوزاقلاشديراجاغام.

23:26  اؤلکه‌نئزده نه اوشاق سالان اولاجاق، نه ده سونسوز آرواد. عؤمرونوزو ده اوزون اده‌جيم.

23:27  اؤز دهشتئمي سئزدن قاباق گؤندرئرم؛ آرالارينا يِتئشدئيئنئز بوتون خالقلارا قاريشيقليق سالاجاغام و بوتون دوشمنلرئنئزي دؤنوب سئزدن قاچماسينا باعئث اولاجاغام.

23:28  اِششَک‌چئبئنئني ده سئزدن قاباق گؤندره‌جيم کي، خئولی‌لري، کَنَعانليلاري و خئتلئلري قاباغينيزدان قووسون.

23:29  لاکئن بئر ائل عرضئنده اونلاري قاباغينيزدان قووماياجاغام کي، اؤلکه وئرانه قالماسين و وحشي حيوانلار چوخاليب، سئزئن اوستونوزه داراشماسين.

23:30  ياواش-ياواش اونلاري قاباغينيزدان او واختاجاق قوواجاغام کي، سئز نسئل گتئرئب چوخالاراق، اؤلکه‌نئن صاحئبي اولاسينيز.

23:31  قيرميزي دهنزدن فئلئسطلی‌لرئن دهنزئنه قدر، صحرادان فَرات چايينا قدر سرحدلرئنئزي چکه‌جيم. اؤلکه‌نئن ساکئنلرئني سئزئن اَلئنئزه تسلئم اده‌جيم، آمّا سئز اونلاري يانينيزدان قووارسينيز.

23:32  نه اونلارلا عهد باغلايين، نه ده آللاهلاري ائله؛

23:33  قويمايين اونلار اؤلکه‌نئزده ياشاسينلار کي، باعئث اولسونلار سئز منئم ضئدّئمه گوناه ادئب، اونلارين آللاهلارينا عئبادت اده‌سئنئز. بو سئزه تله اولاجاق."

Chapter 24

24:1  رب موسايا ددي: "سن، هارون، ناداب، ابئهو و ائسرايئل آغساقّاللاريندان يتمئش نفر ربّئن يانينا چيخين. اوزاقدان سجده ادئن.

24:2  سونرا آنجاق سن، ای موسا، ربّئن حوضورونا ياخينلاش؛ او بئرئلري ياخينلاشماسينلار؛ خالق دا بورايا چيخماسين."

24:3  موسا گلئب ربّئن بوتون سؤزلرئني و حؤکملرئني خالقا نَقل اتدي. بوتون خالق بئر سَسله جاواب ورئب ددئلر: "ربّئن ددئيي سؤزلرئن هاميسينا عمل اده‌جيئک."

24:4  موسا ربّئن بوتون سؤزلرئني يازدي. او سحر اِرکَن دوروب داغين اَته‌يئنده قوربانگاه و ائسرايئلئن اون ائکي قبئله‌سئنه گؤره، اون ائکي سوتون تئکدي.

24:5  سونرا موسا ائسرايئلئن جاوانلاريني گؤندردي و اونلار ربّه يانديرما قوربانلاري و باريش قوربانلاري اولاراق گاميشلار کَسدئلر.

24:6  موسا حيوانلارين قانينين ياريسيني گؤتوروب لَيَنلره تؤکدو. قانين او بئري ياريسيني دا قوربانگاهين اوستونه سَپدي.

24:7  او، عهد کئتابيني الئنه آليب خالقا اوجادان اوخودو و اونلار ددئلر: "ربّئن ددئيي بوتون سؤزلره عمل ادئب قولاق آساجاغيق."

24:8  سونرا موسا قاني گؤتوروب خالقين اوستونه سَپه‌رَک ددي: "باخ، بوتون بو سؤزلره گؤره، ربّئن سئزئنله کَسدئيي عهدئن قاني!"

24:9  سونرا موسا هارون، ناداب، ابئهو و ائسرايئل آغساقّاللاريندان يتمئش نفرله بئرلئکده چيخدي

24:10  و ائسرايئلئن تاريسيني گؤردولر. اونون آياقلاري آلتيندا لاجورد داشيندان دؤشه‌مه کئمي، سَمايين اؤزونه بَنزَر آيدين بئر شي وار ائدي.

24:11  تاري ائسرايئلئن باشچيلارينا الئني اوزاتمادي؛ اونلار تاريني گؤردولر و ييئب-ائچدئلر.

24:12  رب موسايا ددي: "منئم يانيما داغا چيخ و اورادا دور؛ سنه او داش لؤوحه‌لری وره‌رم کی، اولارين اؤيرنمه‌سي اوچون اوستونه قانون و امرلري يازميشام."

24:13  موسا خئدمتچئسي يوشَعله قالخدي و موسا تارينين داغينا چيخدي.

24:14  آمّا آغساقّاللارا ددي: "بئز سئزئن يانينيزا گری قاييداناجاق بورادا گؤزله‌يئن. باخ، هارون و خور يانينيزدادير؛ کئمئن نه چتئن ائشي وار، اونلارين يانينا گده بئلر."

24:15  سونرا موسا داغا چيخدي. بولود داغي بورودو.

24:16  ربّئن عئزّتي سئنا داغينين اوستونده ساکئن اولدو. بولود اونو آلتي گون بورودو. يدّئنجی گونده رب موساني بولودون ائچئندن چاغيردي.

24:17  ائسرايئل اؤولادلارينين گؤزونده، ربّئن عئزّتئنئن گؤرونوشو داغين باشيندا کوله دؤنده‌رَن اود کئمي ائدي.

24:18  موسا داغا چيخارکن بولودون ائچئنه گئردي و قيرخ گون-قيرخ گجه داغدا قالدي.

Chapter 25

25:1  سونرا رب موسا ائله دانيشيب ددي:

25:2  "ائسرايئل اؤولادلارينا دِه کي، منه بئر هدئيّه گتئرسئنلر. گؤيلو ائسته‌يَن هر بئر آدامدان، منئم هدئيّه‌مي قبول ادئن.

25:3  اونلاردان قبول اده‌جيئز هدئيّه‌لر بودور: قيزيل، گوموش، بورونج،

25:4  لاجورد، ارغواني و قيرميزي پارچا، نازئک کتان، کچي توکو،

25:5  قيرميزي بويانميش قوچ دَرئلري، سو ائتي دَرئلري، اَقاقئيا آغاجي،

25:6  چيراق اوچون ياغ، مسح ياغي اوچون اَدوئيّه‌لر و عطئرلي بوخور اوچون عطرئيّاتلار،

25:7  اِفودلا دؤشلويون اوستونه تاخيلان دامارلي عقئق و ساغاناق داشلاري.

25:8  منئم اوچون موقدّس مکان دوزلتسئنلر کي، آرالاريندا ساکئن اولوم.

25:9  موقدّس مکاني و اونون بوتون لوازئماتيني گؤرستدئيئم نومونه‌لره گؤره دوزَلدئن.

25:10  قوي اَقاقئيا آغاجيندان بئر سانديق دوزلتسئنلر: اوزونلوغو ائکي قول‌آچ ياريم، اِني قول‌آچ ياريم، بويو قول‌آچ ياريم اولسون.

25:11  اونو ائچَرئدن و چؤلدن خالئص اؤرت؛ چَرچئوه‌سئنه قيزيل قالئب قوي.

25:12  سانديق اوچون دؤرد تؤکمه قيزيل حالقا دوزلت و اونلاري اونون دؤرد آياغينا قوي. ائکي حالقاني بئر يانينا، ائکي حالقاني دا او بئري يانينا بَرکئت.

25:13  اَقاقئيا آغاجيندان دئرکلر دوزلت. اوستونو اؤرت.

25:14  سانديغي داشيماق اوچون دئرکلري سانديغين يانلارينداکي حالقالارا کچئرت.

25:15  دئرکلر سانديغين حالقالاريندا قاليب اورادان آيريلماسينلار؛

25:16  سنه وره‌جيئم شهادت لؤوحه‌لرئني سانديغين ائچئنه قوي.

25:17  خالئص قيزيلدان کفّاره قاپاغيني دوزلت. قوي اوزونلوغو ائکي قول‌آچ ياريم، اِني ده قول‌آچ ياريم اولسون.

25:18  کفّاره قاپاغينين هر ائکي اوجو اوچون، ياستيلانميش قيزيلدان ائکي کَرّوب دوزلت.

25:19  بئر کَرّوب قاپاغين بئر اوجوندا دوزلت، او بئرئسئني ده او بئري اوجوندا؛ کفّاره قاپاغينين ائکي اوجوندا اولان کَرّوبلار اونونلا بئر حئصّه‌ حاليندا اولسون.

25:20  کَرّوبلار يوخاري طرف آچيلميش قانادلاري ائله کفّاره قاپاغيني اؤرتسونلر. کَرّوبلارين اوزلري بئربئرئنئن موقابئلئنده قاپاغا طرف اولسون.

25:21  کفّاره قاپاغيني سانديغين اوستونه قوي؛ سنه وره‌جيئم شهادت لؤوحه‌لرئني سانديغين ائچئنه قوي.

25:22  اورادا کفّاره قاپاغينين اوستونده، شهادت سانديغينين اوستونده‌کي ائکي کَرّوب آراسيندا سنئنله گؤروشه‌جيم و ائسرايئل اؤولادلاري اوچون سنه امر اده‌جيئم هر شيي دئيه‌جيم.

25:23  اَقاقئيا آغاجيندان بئر مئز دوزلت: اوزونلوغو ائکي قول‌آچ، اِني بئر قول‌آچ، بويو دا قول‌آچ ياريم اولسون.

25:24  اونو خالئص قيزيللا اؤرت. اطرافينا قيزيل قالئب قوي.

25:25  اطرافيندا، بئر اوووج اِنئنده، يان لؤوحه‌لر دوزلت. يان لؤوحه‌لرئن اطرافينا دا قيزيل حاشئيه قوي.

25:26  مئز اوچون دؤرد قيزيل حالقا دوزلت، حالقالاري اونون دؤرد آياغينداکي دؤرد کونجونه بَرکئت.

25:27  حالقالار يان لؤوحه‌لره ياخين اولوب مئزي آپاران دئرَکلرئن کِچدئيي يرلر اولسونلار.

25:28  دئرَکلري اَقاقئيا آغاجيندان دوزلت و اونلاري قيزيللا اؤرت؛ مئز اونلارين واسئطه‌سئله آپاريلسين.

25:29  مئز اوچون خالئص قيزيلدان سئني‌لر و نئمچه‌لر، مايِع تقدئملري اوچون ده سَهَنگ و قابلاري دوزلت.

25:30  همئشه منئم حوضورومدا مئزئن اوستونه تقدئس چؤرکلري قوي.

25:31  خالئص قيزيلدان بئر چيراقدان دوزلت. بو چيراقدان، اونون پايا و مئله‌سي ياستيلانميش قيزيلدان اولمالي‌دير؛ پئيالالاري، قؤنچه‌لري، و گوللري اونونلا بئر حئصّه‌دن اولسون.

25:32  چيراقدانين يانلاريندان آلتي شاخه، اونون بئر يانيندان اوچ شاخه، او بئري يانيندان دا اوچ شاخه چيخسين.

25:33  بئر شاخه‌ده بادام چئچه‌يئنه بَنزَر اوچ پئيالا، بئر قؤنچه، و بئر گول اولسون. او بئرئسئنده ده بادام چئچه‌يئنه بَنزَر اوچ پئيالا، بئر قؤنچه، و بئر گول اولسون. چيراقداندان چيخان بوتون آلتي شاخه‌يه بله اولسون.

25:34  چيراقدانين مئله‌سئنده بادام چئچه‌يئنه بَنزَر دؤرد پئيالا، قؤنچه‌لر و گوللر اولسون؛

25:35  چيراقدانين مئله‌‌سئندن چيخان شاخه‌لرئن بئرئنجي جوتونون آلتيندا بئر قؤنچه اولسون، چيراقدانين مئله‌‌سئندن چيخان شاخه‌لرئن ائکئنجي جوتونون آلتيندا بئر قؤنچه، و چيراقدانين مئله‌‌سئندن چيخان شاخه‌لرئن اوچونجو جوتونون آلتيندا بئر قؤنچه اولسون. چيراقداندان چيخان بوتون آلتي شاخه‌يه بله اولسون.

25:36  قؤنچه‌لري و شاخه‌لري اونونلا بئر حئصّه‌دن اولسونلار؛ هاميسي ياستيلانميش خالئص قيزيلدان اولسونلار.

25:37  اونون اوچون يدّي چيراق دوزلت و چيراقلاري اونون اوستونه قوي کي، قاباق طرفئنه ائشيق سالسين.

25:38  پئلته ماشالاري و سئني‌لري ده خالئص قيزيلدان اولسون.

25:39  چيراقدان و اونون بوتون بو لوازئماتيني بئر تالانت خالئص قيزيلدان دوزَلدئلسئن.

25:40  بونلارين هاميسيني داغدا سنه گؤرسدئلن نومونه‌يه موطابئق دوزلت.

Chapter 26

26:1  ربّئن خيمه‌سئني اون پرده‌دن دوزلت؛ پرده‌لري نفئس توخونموش نازئک کتاندان، لاجورد، ارغواني و قيرميزي پارچادان، آمّا اوستونو کَرّوبلار شَکلئنده ناخيشلا دوزلت.

26:2  هر پرده‌نئن اوزونلوغو ائيئرمي سکّئز قول‌آچ، اِني ده دؤرد قول‌آچ اولسون؛ قوي بوتون پرده‌لر بئر اؤلچوده اولسون.

26:3  پرده‌لردن بِشي بئربئرئنه بئرلَشسئن؛ او بئري بِشي ده بئربئرئنه بئرلَشسئن.

26:4  بئر بئرلَشمه‌نئن اوجوندا اولان پرده‌نئن قيراغيندا لاجورد ائلمه‌لر دوزلت: او بئري بئرلَشمَده‌کي پرده‌نئن قيراغيندا دا کي، اِشئيه طرفدئر، همن شَکئلده ائلمه‌لر دوزلت.

26:5  بئر پرده‌يه اَلّي ائلمه، او بئري بئرلَشمه‌ده‌کي پرده‌نئن قيراغيندا دا اَلّي ائلمه بئربئرئنئن موقابئلئنده دوزلت.

26:6  قيزيلدان اَلّي گئره دوزلت. گئره‌لرله پرده‌لري بئرلَشدئر کي، خيمه بوتؤو اولسون.

26:7  خيمه‌نئن اوستونو اؤرتمَک اوچون کچي يونوندن اون بئر اؤرتوک دوزلت.

26:8  هر اؤرتويون اوزونلوغو اوتوز قول‌آچ، اِني ده دؤرد قول‌آچ اولسون. اون بئر اؤرتوک بئر اؤلچوده اولسون.

26:9  بش اؤرتويو آيريجا و آلتي اؤرتويو آيريجا بئرلَشدئر. آمّا آلتينجي اؤرتويو چاديرين قاباق طرفئندن قاتلا.

26:10  بئر بئرلَشمه‌نئن قيراق اؤرتويون قيراغيندا اَلّي ائلمه، او بئري بئرلَشمه‌نئن قيراق اؤرتويون قيراغيندا دا اَلّي ائلمه دوزلت.

26:11  بورونجدن اَلّي گئره دوزلت؛ گئره‌لري ائلمه‌لره تاخ و چاديري بئرلَشدئر کي، او بوتؤو اولسون.

26:12  چاديرين اؤرتوکلرئندن آرتيق قالانلاري، هر ائکي طرفدن اؤرتويون ياريسيني، خيمه‌نئن آرخا طرفئندن ساللا.

26:13  چاديرين اؤرتوکلرئنئن اوزونلوغوندان هر ائکي اوجوندا آرتيق قالان بئر قول‌آچ پارچا هر ائکي طرفئندن ساللانسين کي، خيمه‌ني اؤرتسون.

26:14  چادير اوچون قيرميزي بويانميش قوچ دَرئلرئندن بئر اؤرتوک و اونون اوستونده سو ائتي دَرئلرئندن باشقا بئر اؤرتوک دوزلت.

26:15  خيمه اوچون اَقاقئيا آغاجيندان دئک دوران چَرچئوه‌لر دوزلت.

26:16  هر چَرچئوه‌نئن اوزونلوغو اون قول‌آچ، اِني ده قول‌آچ ياريم اولسون.

26:17  هر چَرچئوه‌نئن اوستونده ائکي بئربئرئنه باغلانان گئره اولسون؛ خيمه‌نئن بوتون چَرچئوه‌لرئني بله دوزلت.

26:18  خيمه‌يه چَرچئوه‌لر دوزلت؛ جنوب طرفي اوچون ائيئرمي چَرچئوه

26:19  و اونلارين آلتيندا قويولاجاق قيرخ گوموش آلتليق دوزلت؛ هر چَرچئوه‌نئن آلتيندا ائکي رَضه‌سي اوچون ائکي آلتليق اولسون.

26:20  خيمه‌نئن ائکئنجي طرفئنده، شئمال سمتئنده ده ائيئرمي چَرچئوه

26:21  و قيرخ گوموش آلتليق، هر چَرچئوه‌نئن آلتيندا ائکي آلتليق، او بئرئسئنئن آلتيندا دا ائکي آلتليق اولسون.

26:22  خيمه‌نئن قربه طرف اولان آرخاسي اوچون آلتي چَرچئوه دوزلت.

26:23  آمّا خيمه‌نئن آرخا کونجلري اوچون ائکي چَرچئوه دوزلت.

26:24  بونلار آشاغيدا ائکي قات اولوب يوخاريدا بئرئنجي حالقايا تاخيلسينلار؛ هر ائکي کونج اوچون اله ائکي چَرچئوه اولسون.

26:25  بو سکّئز چَرچئوه اوچون اون آلتي گوموش آلتليق، هر چَرچئوه‌نئن آلتيندا دا ائکي آلتليق اولسون.

26:26  اَقاقئيا آغاجيندان دئرَکلر دوزلت: بِشي خيمه‌نئن بئر طرفئنده‌کي چَرچئوه‌لر اوچون،

26:27  بِشي ده خيمه‌‌نئن قربه طرف اولان آرخا طرفئنده‌کي چَرچئوه‌لري اوچون اولسون.

26:28  اورتا دئرَک چَرچئوه‌لرئن اورتاسيندان، بئر اوجدان او بئري اوجا قدر اوزانسين.

26:29  چَرچئوه‌لري قيزيللا اؤرت؛ دئرَکلرئن کچدئيي حالقالاريني قيزيلدان دوزلت؛ دئرَکلري ده قيزيللا اؤرت.

26:30  داغدا سنه گؤرستدئيئم نومونه‌يه موطابئق خيمه‌ني قور.

26:31  پرده‌ني لاجورد، ارغواني و قيرميزي پارچا و نفئس توخونموش نازئک کتاندان، اوستونو ده کَرّوبلار شَکلئنده ناخيشلا دوزلت.

26:32  اونو دؤرد سوتون اوستونده آس؛ هر دئرَک قيزيللا اؤرتولموش اَقاقئيا آغاجيندان اولسون. اوستونده قيزيل قولّابلاري اولسون و دؤرد گوموش آلتليق اوستونده دورسون.

26:33  پرده‌ني بندلردن آس و شهادت سانديغي اورايا، پرده‌نئن آرخاسينا گتئر. بو پرده موقدّس يِرله لاپ موقدّس يِري آييرسين.

26:34  لاپ موقدّس يرده شهادت سانديغينين اوستونه کفّاره قاپاغيني قوي.

26:35  مئزي پرده‌نئن بايير طرفئنه، چيراقداني مئزئن موقابئلئنه يعني خيمه‌نئن جنوب طرفئنه، آمّا مئزي شئمال طرفئنه قوي.

26:36  خيمه‌نئن گئرئشي اوچون آراکَسمه‌ني لاجورد ارغواني و قيرميزي پارچا و نفئس توخونموش نازئک کتاندان، ناخيش تئکمه‌سئله دوزلت.

26:37  بو آراکَسمه اوچون ده اَقاقئيا آغاجيندان بش سوتون دوزلت و اوستونو قيزيللا اؤرت؛ اوستونده قيزيل قولّابلار اولسون و اونلار اوچون بورونجدن بش آلتليق تؤک.

Chapter 27

27:1  قوربانگاهي اَقاقئيا آغاجيندان دوزلت. قوي اوزونلوغو بش قول‌آچ، اِني ده بش قول‌آچ اولسون، قوربانگاه مورَبّع شَکلئنده، بويو دا اوچ قول‌آچ اولسون.

27:2  قوربانگاهين بوينوزلاريني اونون دؤرد کونجونه قوي؛ بوينوزلاري اونونلا بئر حئصّه‌دن اولسون. اونون اوستونو بورونجله اؤرت.

27:3  اورانين ياغ و کول قابلاريني، کورَکلرئني، لَيَنچه‌لرئني، چَنگللرئني، خَکَندازلاريني و قالان شيلرئني بورونجدن دوزلت.

27:4  قوربانگاه اوچون بورونجدن تور شبکه، تورون دا دؤرد بوجاغيندا بورونجدن دؤرد حالقا دوزلت.

27:5  اونو قوربانگاهين کناريندان آشاغييا قوي کي، تور اونون ياريسينا قدر يتئشسئن.

27:6  قوربانگاه اوچون اَقاقئيا آغاجيندان دئرَکلر دوزلت و اوستونو بورونجله اؤرت.

27:7  دئرَکلري حالقالارا تاخ کي، قوربانگاهي داشييان زامان، دئرَکلر اونون هر ائکي يانيندا اولسون.

27:8  قوربانگاهي ائچي بوش اولسون و اونو تاختادان دوزلت. داغدا سنه گؤرستدئيئم کئمي اونو دوزلت.

27:9  خيمه‌نئن حيطئني دوزلت. حيطئن جنوب طرفئنده، بئر طرف اوچون اوزونلوغو يوز قول‌آچ اولان پرده‌لر، نفئس توخونموش نازئک کتاندان،

27:10  اونون ائيئرمي دئره‌يي و ائيئرمي آلتليغي بورونجدن، دئرَکلرئن قولّابلاريني و بندلري ده گوموشدن اولسون.

27:11  شئمال طرفي اوچون ده اوزونلوغو يوز قول‌آچ اولان پرده‌لر اولسون؛ اونلارين ائيئرمي دئره‌يي و ائيئرمي آلتليغي بورونجدن، دئرَکلرئن قولّابلاري و بندلري ده گوموشدن اولسون.

27:12  قرب طرفئنده‌کي پرده‌لر، حيطئن اِني کئمي، اَلّي قول‌آچ اولسون. بو پرده‌لر اوچون اون دئرَک و اون آلتليق دوزلت.

27:13  شرق طرفئنده ده حيطئن اِني اَلّي قول‌آچ اولسون.

27:14  دروازانين بئر طرفي اوچون اوزونلوغو اون بش قول‌آچ پرده‌لر، اونلارين اوچ دئره‌يي و اوچ آلتليغي اولسون.

27:15  او بئري طرف اوچون ده اوزونلوغو اون بش قول‌آچ پرده‌لر، اونلارين اوچ دئره‌يي و اوچ آلتليغي اولسون.

27:16  حيطئن دروازاسي اوچون اوزونلوغو ائيئرمي قول‌آچ اولان لاجورد، ارغواني و قيرميزي پارچا و نفئس توخونموش نازئک کتاندان ناخيش تئکمه‌لي آراکَسمه اولسون. اونون دؤرد دئره‌يي و دؤرد آلتليغي دا اولسون.

27:17  حيطئن بوتون اطراف دئرَکلري گوموش بندلرله بندلَنسئن؛ اونلارين گوموش قولابلاري و بورونج آلتليقلاري اولسون.

27:18  حيطئن اوزونلوغو يوز قول‌آچ و اِني هر يرده اَلّي قول‌آچ اولسون؛ نفئس توخونموش نازئک کتاندان اولان پرده‌نئن بويو دا بش قول‌آچ اولسون، آلتليقلاري دا بورونجدن اولسون.

27:19  خيمه‌نئن عئبادتي اوچون ائشلَنَن بوتون شيلري، اونون بوتون يره وورولان ميخلاري حيطئن بوتون ميخلاري دا بورونجدن اولسون.

27:20  سن ائسرايئل اؤولادلارينا امر ات کي، سنه ائشيق اوچون خالئص سيخما زيتون ياغي گتئرسئنلر. بو ياغدان همئشه بئر چيراق

27:21  حوضور چاديريندا شهادت سانديغينين موقابئلئنده‌کي پرده‌نئن قيراغيندا يانسين. هارونلا اوغوللاري ربّئن حوضوروندا اونا آخشامدان سحره قدر يتئشسئنلر. قوي بو نسئلدن-نسله ائسرايئل اؤولادلاري اوچون ابدی قايدا اولسون.

Chapter 28

28:1  سن آمّا قارداشين هارونو و اونون اوغوللاري نادابي، اَبئهونو، اِلازاري و ائتاماري ائسرايئل اؤولادلارينين آراسيندان يانينا گتئر کي، اونلار منه کاهئنلئک اتسئنلر.

28:2  قارداشين هارونا عئزّت و گؤزللئک اوچون موقدّس پالتارلار حاضيرلا.

28:3  سن ده منئم حئکمَت روحو ائله دولدوردوغوم بوتون مهارتلي اوستالارا تاپشير کی، هارونون تقدئس اولونماسي اوچون اونا پالتارلار حاضيرلاسينلار و او منه کاهئنلئک اتسئن.

28:4  اونلارين حاضيرلاياجاغي پالتارلار بونلاردير: دؤشلوک، اِفود، اوست جوبّه، ناخيشلي خئرقه، عمّامه و قورشاق. بو موقدّس پالتارلاري قارداشين هارونا و اوغوللارينا حاضيرلاسينلار کي، منه کاهئنلئک اتسئنلر.

28:5  قوي پالتارلاري حاضيرلايانلار قيزيل، لاجورد، ارغواني و قيرميزي پارچا و نازئک کتان گؤتورسونلر.

28:6  اِفودو قيزيلدان، لاجورد، ارغواني و قيرميزي پارچا و نفئس توخونموش نازئک کتاندان ناخيشلا دوزلتسئنلر.

28:7  ائکي چئيئنلئک اولسون کي، هر ائکي اوجونو بئربئرئنه باغلاييب بَرکئدئر.

28:8  اِفودو باغلايانين اوستوندن گلن ناخيشلي کَمَر، اونونلا بئر حئصّه‌دن، او دا قيزيلدان، لاجورد، ارغواني و قيرميزي پارچا و نفئس توخونموش نازئک کتاندان اولسون.

28:9  ائکي عدد دامارلي عقئق داشي گؤتور و اوستونده ائسرايئلئن اوغوللارينين آدلاريني حکّ ات.

28:10  اونلارين دوغولما سيراسينا موطابئق بئر داشين اوستونده آلتي آد، او بئرئسئنئن اوستونده قالان آلتي آدي،

28:11  حکّاکين ائشي اولان مؤهور اويماسي کئمي ائکي داش اوستونده ائسرايئلئن اوغوللارينين آدلاريني حَکّ ات. حؤرمه قيزيل ساغاناقلارا ساليب،

28:12  بو ائکي داشي اِفودون چئيئنلئکلرئنه تاخ. بونلار ائسرايئلئن اوغوللارينين خاطئره داشلاريدير؛ هارون اونلارين آدلاريني ربّئن قاباغيندا ائکي چئينئنده خاطئره کئمي گزدئره‌جک.

28:13  حؤرمه قيزيلدان ساغاناقلار دوزلت،

28:14  خالئص قيزيلدان ائکي ائپه بَنزَر بورما زنجئر دوزلت؛ بورما زنجئرلري ساغاناقلارا تاخ.

28:15  قضاوت دؤشلويونو اِفود کئمي ناخيشلي قيزيلدان، لاجورد، ارغواني و قيرميزي پارچا و نفئس توخونموش نازئک کتاندان دوزلت.

28:16  دؤشلوک ائکي قات و موربّع شَکلئنده، اوزونلوغو بئر قاريش، اِني ده بئر قاريش اولسون.

28:17  اوستونده‌کي بئر چَرچئوه‌يه دؤرد سيرا داش تاخ. بئرئنجي سيرا ياقوت، توپاز، زومرود

28:18  ائکئنجي سيرا فئروزه، لاجورد داشي و آغ عقئق

28:19  اوچونجو سيرا سئرکون، عقئق و آمِتئست،

28:20  دؤردونجو سيرا زبرجد، دامارلي عقئق و يَشَم داشي اولسون. بو داشلار حؤرمه قيزيل ساغاناقلارا تاخيلسين.

28:21  داشلار ائسرايئلئن اوغوللارينين آدلارينا موطابئق اون ائکي و اون ائکي قبئله اوچون هر داش بئر آدين اويما مؤهورو اولسون.

28:22  دؤشلوکده خالئص قيزيلدان ائپه بَنزَر بورما زنجئرلر قايير.

28:23  دؤشلوکده ائکي قيزيل حالقا دوزلت و اونلاري دؤشلويون ائکي اوجونا تاخ.

28:24  ائکي قيزيل ائپي دؤشلويون اوجلارينداکي ائکي حالقايا تاخ.

28:25  ائپلرئن او بئري اوجلاريني ائکي حؤرمه ساغاناغا تاخيب، اِفودون چئيئنلئکلرئنئن قاباق طرفئنه باغلا.

28:26  گئنه ده ائکي قيزيل حالقا دوزلت و اونلاري دؤشلويون ائکي اوجونا، اِفودلا ياناشي ائچ قاتينا تاخ.

28:27  داها ائکي قيزيل حالقا دوزلت و اونلاري اِفودون نفئس توخونموش چئيئنلئکلرئنئن قاباق طرفئنه، آشاغييا، اِفودون کَمَرئله بئرلَشمه اوستونه بَرکئت.

28:28  دؤشلوک حالقالاري ائله اِفودون نفئس توخونموش حالقالارينا لاجورد قايتانلا باغلانيب، اِفودون کَمَرئنئن اوستونه برکئدئلسئن کي، دؤشلوک اِفوددان ساللانماسين.

28:29  هارون موقدّس يره داخل اولدوغو زامان، ربّئن قاباغيندا همئشه‌لئک خاطئره اولاراق، ائسرايئلئن اوغوللارينين آدلاريني قضاوت دؤشلويونده، اوره‌يئنئن اوستونده داشيياجاق.

28:30  اورئم و تومّئمی ده قضاوت دؤشلويونه قوي کي، ربّئن حوضورونا داخئل اولدوغو زامان اونلار دا اوره‌يئنئن اوستونده اولسون. بلجه هارون ائسرايئل اؤولادلارينين حؤکمونو ربّئن حوضوروندا همئشه‌لئک اوره‌يئنئن اوستونده داشيياجاق.

28:31  اِفودون جوبّه‌سئني تامامن لاجورد پارچادان تئک.

28:32  اورتاسيندا باش کچئرتمک اوچون ير اولسون. اونون قيراغيندا جيريلماماق اوچون بئر ياخا توخونسون.

28:33  جوبّه‌نئن اَته‌يئنئن اطرافينا لاجورد، ارغواني و آلا- قيرميزي پارچادان نارلار و و آرالارينا قيزيلدان زينقيروولار دوز:

28:34  جوبّه‌نئن اَته‌يي بويونجا اطرافيندا قيزيل زينقيروو و نار نؤوبتله دوزولسون.

28:35  قوي جوبّه هارون خئدمت اتدئيي زامان اَينئنده اولسون. وردئيي سَس ده اونون موقدّس يره، ربّئن حوضورونا گئرئب-چيخديغي زامان اشئدئلسئن کي، او اؤلمه‌سئن.

28:36  خالئص قيزيلدان بئر لؤوحه‌جئک دوزلت و اونون اوستونده مؤهور اويماسي اولاراق "ربّه موقدّسدئر" يازيسيني حکّ ات.

28:37  اونو لاجورد قايتانلا عمّامه‌نئن اوستونه، قاباق طرفئنه تئک.

28:38  بلجه لؤوحه‌جئک هارونون آلنينين اوستونده اولسون. هارون او تقصئري داشيياجاق کي، ائسرايئل اؤولادلاري، تقدئس اتدئکلري بوتون موقدّس هدئيّه‌لرده، مومکوندور ائشلَتسئنلر. او همئشه هارونون آلنيندا اولاجاق کي، ربّئن حوضوروندا مقبول اولسونلار.

28:39  خئرقه‌ني نازئک کتاندان، ناخيشلي حؤر، عمّامه‌ني ده نازئک کتاندان توخو. قورشاغي ناخيشلي دوزلت.

28:40  هارونون اوغوللارينا خئرقه‌لر، قورشاقلار و عئزّت و گؤزللئک اوچون پاپاقلار دوزلت.

28:41  بونلاري قارداشين هارونلا اوغوللارينا گيئندئرئب اونلاري مسح ات، وظئفه‌يه قوي و منه کاهئنلئک اتمک اوچون تقدئس ات.

28:42  بِلدن بودا قدر لوت بدنلرئني اؤرتَن کتان آلت پالتارلاري تئک.

28:43  هارونلا اوغوللاري حوضور چاديرينا داخئل اولاندا، يا دا موقدّس يرده خئدمت اتمک اوچون قوربانگاها ياخينلاشاندا بونلاري گئيه‌جکلر کي، خاطايا باتيب اؤلمه‌سئنلر. بو، هارونلا اؤولادلارينا ابدی قايدا اولسون.

Chapter 29

29:1  منه کاهئنلئک اتمک اوچون اونلاري بله تقدئس ات. قوصورسوز بئر گاميش و ائکي قوچ گؤتور.

29:2  ماياسيز چؤرکلري، ياغلا يوغرولموش ماياسيز فطئرلري، و اوستونه ياغ سورتولموش ماياسيز کولچه‌لري نارين بوغدا اونوندان حاضيرلا.

29:3  اونلاري بئر سبدئن ائچئنه قوي، گاميش و ائکي قوچلا بئرلئکده تقدئم ات.

29:4  سونرا هارونلا اوغوللاريني حوضور چاديرينين گئرئشئنه گتئرئب، اونلاري سودا قوسول ور.

29:5  پالتارلاريني گؤتوروب هارونون اَينئنه خئرقه‌ني، نفئس توخونموش اِفود جوبّه‌سئني، اِفودو و دؤشلويو گيئندئر و اِفودون کمرئني بلئنه باغلا.

29:6  اونون باشينا عمّامه‌ني، عمّامه‌يه ده موقدّس تاجي قوي.

29:7  مسح ياغيني گؤتوروب هارونون باشينا تؤک و اونو مسح ات.

29:8  سونرا اوغوللاريني گتئر و اونلارا خئرقه‌لر گيئندئر.

29:9  هارونا و اونون اوغوللارينين بلئنه قورشاق باغلا و باشلارينا پاپاق قوي. ابدی قايدايا گؤره کاهئنلئک اونلارين اولسون. بلجه هارونلا اوغوللاريني وظئفه‌يه قوي.

29:10  سونرا حوضور چاديرينين گئرئشئنئن قاباغينا گاميشي گتئر. قوي هارونلا اوغوللاري اللرئني گاميشين باشينا قويسونلار.

29:11  گاميشي ربّئن قاباغيندا، حوضور چاديرينين گئرئشئنده کَس.

29:12  گاميشين قانيندان گؤتور و بارماغينلا قوربانگاهين بوينوزلارينا چک. قانين قالان حئصّه‌سئني ده قوربانگاهين آلتليغينا تؤک.

29:13  حيوانين ائچ آلاتيني اؤرتَن بوتون پئيي، قارا جئيه‌رئنئن قويروغا بَنزَر حئصّه‌سئني، هر ائکي بؤيره‌يئني و اوستونده‌کي پئيي قوربانگاهدا توستوله‌دئب ياندير.

29:14  گاميشين اَتئني، دَرئسئني و باغيرساغيني دوشَرگه‌نئن اِشئيئنده ياندير. بو، گوناه قورباني‌دير.

29:15  بئر قوچ گؤتور؛ قوي هارونلا اوغوللاري اَللرئني قوچون باشينا قويسونلار.

29:16  سونرا قوچو کَس، قانيني گؤتور و اونو قوربانگاهين هر طرفئنه سَپ.

29:17  قوچو تئکه-تئکه دوغرا، ائچ آلاتيني و بودلاريني يويوب، باشينين و تئکه‌لرئنئن اوستونه قوي.

29:18  بوتون قوچو قوربانگاهدا توستوله‌دئب ياندير. بو، ربّئن يانديرما قورباني، اونا خوش اولان عطئرلي اود تقدئمدئر.

29:19  سن او بئري قوچو گؤتور، هارونلا اوغوللاري اَللرئني اونون باشينا قويسونلار.

29:20  سونرا قوچو کَس؛ قانيندان بئر آز گؤتوروب هارونون صاغ قولاغينين مَرجه‌يئنه، اوغوللارينين صاغ قولاق مَرجکلرئنه، اونلارين صاغ اللرئنئن و صاغ آياقلارينين باش بارماقلارينا چک. قوچون قالان قانيني قوربانگاهين هر طرفئنه سَپ.

29:21  قوربانگاهداکي قاندان و مسح ياغيندان گؤتوروب هارونا و اونون پالتارلارينا، اوغوللارينا و اونلارين پالتارلارينا چئله. بلجه هارون و اونون پالتارلاري، اوغوللاري و اونلارين پالتارلاري تقدئس اولونسون.

29:22  سونرا قوچون پئيئني؛ قويروغونو، ائچالاتي اؤرتَن پئيي، قارا جئيه‌رئنئن قويروغا بَنزَر حئصّه‌سئني، هر ائکي بؤيره‌يئني، اوستونده‌کي پئيي و صاغ بودو گؤتور. چونکي بو وظئفه‌يه قويولما قوچودور.

29:23  ربّئن قاباغيندا اولان ماياسيز چؤرکلر سبدئندن بئر چؤرک کؤکه‌سي، ياغلا يوغرولموش چؤرک کؤکه‌سي و بئر کولچه گؤتور.

29:24  بونلاري هارون و اونون اوغوللارينين اللرئنه ور. بونلاري منئم حوضورومدا يِللَتمه تقدئمي اولاراق يِللَتسئنلر.

29:25  سونرا بو شيلري اَللرئندن آليب قوربانگاهدا يانديرما قورباني ائله توستوله‌دئب ياندير. بو، ربّه خوش اولان عطئرلي اود تقدئمدئر.

29:26  هارونون وظئفه‌يه قويولما قوچوندان دؤش اَتئني گؤتوروب يِللَتمه تقدئمي اولاراق ربّئن حوضوروندا يِللَت. بو سنئن پاييندير.

29:27  هارونلا اوغوللارينين وظئفه‌يه قويولما قوچوندان يِللَدئلَن دؤش اَتئني و قالديريلان بودو تقدئس ات.

29:28  بو قالديريلان تقدئم هارونلا اؤولادلارينين ائسرايئللی‌لردن گلن ابدی حاقّي اولسون. ائسرايئل اؤولادلارينين باريش قوربانلاريندان دا بو، ربّه قالديريلان تقدئم اولسون.

29:29  هارونون موقدّس پالتارلاري اؤزوندن سونرا اوغوللارينا قالسين کي، اونلاري گئيه‌رَک مسح اولونوب وظئفه‌يه قويولسونلار.

29:30  اونون اوغلو دا کی، اونون يرئنه کاهئندئر و موقدّس يرده خئدمت اتمک اوچون حوضور چاديرينا گئرئر، يدّي گون او پالتارلاري گيسئن.

29:31  وظئفه‌يه قويولما قوچون اَتئني گؤتور و موقدّس بئر يرده قاينات.

29:32  هارونلا اوغوللاري او قوچون اَتئني سبدده اولان چؤرکله حوضور چاديرينين گئرئشئنده يسئنلر.

29:33  گوناهلاري باغيشلاتان بو تقدئملري آ‌نجاق او آداملار يئيه بئلر کي، بو شيلرله اؤزلرئني تقدئم و تقدئس ادئرلر؛ ياد آداملار بونلاري يئيه بئلمزلر، چونکي بو شيلر موقدّسدئرلر.

29:34  اگر وظئفه‌يه قويولما قوربانينين اَتئندن و چؤرکدن سحره قدر قالسا، اوندان قالاني ياندير؛ بو شيلر يِيئلمز، چونکي موقدّسدئرلر.

29:35  من سنه امر اتدئيئم کئمي، او جور ده هارونلا اوغوللاري اوچون ات. اونلارين وظئفه‌يه کچمه واختيني يدّي گون داوام اتدئر.

29:36  هر گون کفّاره اوچون بئر گاميشي گوناه قورباني اولاراق تقدئم ات. قوربانگاه اوچون کفّاره اده‌رک، اونو پاک ات و تقدئس اتمک اوچون مسح ات.

29:37  يدّي گون عرضئنده قوربانگاه اوچون کفّاره اده‌رک اونو تقدئس ات. سونرا قوربانگاه لاپ موقدّس ساييلاجاق و اونا توخونان هر شي موقدّس اولاجاق.

29:38  همئشه‌لئک هر گون قوربانگاه اوستونده بئر ائلّئک ائکي قوزو گتئر.

29:39  قوزونون بئرئني سحر، او بئرئني ده آخشامچاغي تقدئم ات.

29:40  بئرئنجي قوزو ائله بئرلئکده، دؤردده بئر هئن سيخما زيتون ياغي ائله يوغرولموش، اوندا بئر اِفا نارين اون و مايع تقدئمي اولاراق دؤردده بئر هئن شراب گتئر.

29:41  آخشامچاغي تقدئم اتدئيئن او بئري قوزو ائله سحرکي کئمي تاخيل تقدئمي و مايع تقدئمي گتئر. بو ربّه خوش اولان عطئرلي اود تقدئمدئر.

29:42  بو سئزئن اوچون نسئلدن-نسله، حوضور چاديرينين گئرئشئنده ربّئن قاباغيندا همئشه‌لئک يانديرما قورباني اولاجاق. من اورادا سئزئنله گؤروشوب، سنئنله دانيشاجاغام.

29:43  اورادا من ائسرايئل اؤولادلاري ائله گؤروشه‌جيم؛ حوضور چاديري منئم عئزّتئمله تقدئس اولوناجاق.

29:44  من حوضور چاديريني و قوربانگاهي تقدئس اده‌جيم؛ هارونلا اوغوللاريني دا تقدئس اده‌جيم کي، منه کاهئنلئک اتسئنلر.

29:45  ائسرايئل اؤولادلاري آراسيندا ساکئن اولاجاغام و اونلار اوچون تاري اولاجاغام.

29:46  اونلار دا بئله‌جکلر کي، آرالاريندا ساکئن اولماق اوچون اونلاري مئصئر تورپاغيندان چيخاردان تاريلاري رب، منم. اونلارين تاريسي رب، منم.

Chapter 30

30:1  اَقاقئيا آغاجيندان بوخور يانديرماق اوچون قوربانگاه دوزلت.

30:2  دؤرد گوشه‌لي، اوزونلوغو بئر قول‌آچ اِني بئر قول‌آچ، بويو دا ائکي قول‌آچ اولسون، بوينوزلاري اونونلا بئر حئصّه‌دن اولسون.

30:3  اونون اوستونو، هر يانيني و بوينوزلاريني، خالئص قيزيللا اؤرت و اطرافينا قيزيل قالئب قوي.

30:4  بئربئرئنئن موقابئلئنده اولان ائکي يانلاردا، قالئبئن آلتينا ائکي قيزيل حالقا دوزلت کي، اونو آپاران دئرَکلرئن کچدئيي يرلر اولسونلار.

30:5  دئرَکلري اَقاقئيا آغاجيندان دوزلت و قيزيللا اؤرت.

30:6  بو قوربانگاهي شهادت سانديغينين موقابئلئنده اولان پرده‌نئن قاباغينا، منئم سنئنله گؤروشه‌جيئم يره، کفّاره قاپاغينين قاباغينا قوي.

30:7  هارون هر سحر، چيراقلاري حاضيرلاديغي زامان، قوربانگاهدا عطئرلي بوخور يانديرسين.

30:8  آخشامچاغي دا چيراقلاري حاضيرلاديغي زامان اونو يانديرسين. بو سئزئن اوچون نسئلدن-نسله ربّئن قاباغيندا همئشه‌لئک بوخور تقدئمي اولسون.

30:9  اونون اوستونده نه ياد بوخور گتئرئن، نه يانديرما قورباني، نه ده تاخيل تقدئمي. مايع تقدئمي ده تؤکمه‌يئن.

30:10  ائلده بئر دفه هارون گوناه اوچون کفّاره قوربانينين قانيني قوربانگاهين بوينوزلارينا چکه‌رک، قوربانگاه اوچون کفّاره اتسئن. بو قوربان گلن نسئللر اوچون اولسون. قوربانگاه رب اوچون لاپ موقدّسدئر."

30:11  سونرا رب موسايا دانيشيب ددي:

30:12  "ائسرايئل اؤولادلاريني سئياهييا آلديغين زامان، ساييلان هر بئر آدام اؤز حياتينين عوضئني ربّه ورسئن کي، ساييلديقلارينا گؤره آرالاريندا بلا اولماسين.

30:13  ساييلميش آداملارا داخئل اولان هر کس ياريم شِکِل گوموش ورسئن. بو، ائيئرمي گِرادان عئبارت اولان موقدّس مکانين شِکِلئنه گؤره ساييلسين. بو ياريم شِکِل ربّئن پاييدير.

30:14  ائيئرمي ياشيندا و اوندان يوخاري اولان، ساييلميش اولان هر بئر کئشي بو پايي ربّه ورسئن.

30:15  حياتلارينيزي کفّاره اتمک اوچون ربّئن پاييني ورنده، نه وارلي ياريم شِکِلدن چوخ، نه ده کاسيب ياريم شِکِلدن اَسکئک ورسئن.

30:16  بو کفّاره گوموشونو ائسرايئل اؤولادلاريندان گؤتوروب حوضور چاديرينين عئبادتي اوچون تعيئن ات. بو، حياتلارينيزين کفّاره‌سي اوچون ربّئن قاباغيندا ائسرايئل اؤولادلارينين خاطئره‌سي اولاجاق.

30:17  رب موسايا دانيشيب ددي:

30:18  "يوماق اوچون بؤيوک بئر بورونج لَيَن دوزلت. قوي آلتليغي دا بورونجدن اولسون. اونو حوضور چاديري ائله قوربانگاهين آراسينا قوي، ائچئني ده سو ائله دولدور کي،

30:19  هارونلا اوغوللاري اَل و آياقلاريني او سو ائله يوسونلار.

30:20  اونلار حوضور چاديرينا داخئل اولدوغو زامان سويو ائله يويونسونلار، يوخسا اؤله‌جکلر. خئدمت اتمک اوچون و ربّه تقدئم توستوله‌دئب يانديرماق اوچون قوربانگاها ياخينلاشاندا دا

30:21  اَل-آياقلاريني يوسونلار، يوخسا اؤله‌جکلر. بو هارونلا اؤولادلاري اوچون نسئلدن-نسله ابدی قايدا اولسون."

30:22  رب موسايا ددي:

30:23  "بو گؤزل عطرئيّاتلاردان گؤتور: بش يوز شِکِل دورو مور، اونون ياريسي قدر ائکي يوز اَلّي شِکِل عطئرلي دارچين، ائکي يوز اَلّي شِکِل عطئرلي قاميش

30:24  و بش يوز شِکِل دارچين، هر شي موقدّس مکانين شِکِلئنه گؤره ساييلسين؛ هم ده بئر هئن زيتون ياغي.

30:25  بونلاردان موقدّس مسح ياغي حاضيرلا؛ بو عطرئيّاتچينين ترتئب اتدئيي عطئرئيّات، موقدّس مسح ياغي اولاجاق.

30:26  همئن ياغلا بونلاري مسح ات: حوضور چاديريني، شهادت سانديغي،

30:27  مئزي و اونون بوتون لوازئماتلاريني، چيراقداني و اونون اشيالاريني، بوخور قوربانگاهيني،

30:28  يانديرما قوربانلاري اوچون قورولان قوربانگاهي و اونون بوتون اشيالاريني، بؤيوک لَيَني و اونون آلتليغيني.

30:29  بلجه بو شيلري تقدئس ات کي، لاپ موقدّس اولسونلار؛ اونلارا توخونان هر شي موقدّس اولاجاق.

30:30  هارونلا اوغوللاريني دا مسح اده‌رک تقدئس ات کي، منه کاهئنلئک اتسئنلر.

30:31  ائسرايئل اؤولادلارينا بله دِه: بو سئزئن اوچون نسئلدن-نسله منه موقدّس مسح ياغيدير.

30:32  بو ياغ ائنسان بدنلرئنه تؤکولمه‌سئن. ترکئبئنه گؤره، اونا بَنزَر هچ نه حاضيرلامايين. بو ياغ موقدّسدئر؛ اونو موقدّس سايين.

30:33  اونا بَنزَرئني تَرتئب ادن و يا اونو اؤزگه آدامين اوستونه سورتَن هر کس، خالقي آراسيندان قووولسون."

30:34  سونرا رب موسايا ددي: «بو عطئرلي مادّه‌لردن گؤتور: قارا کوندور، اونئکا، خوش عطئرلي رزه‌نه، خالئص کوندور؛ هر شي برابر مئقداردا اولسون.

30:35  بونلاردان بوخور حاضيرلا؛ عطرئيّاتچينين ترتئب اتدئيي بو قاتيشيق دوزلو اولمالي و تمئز و موقدّسدئر.

30:36  اوندان بئر قدر نارين دؤي و شهادت سانديغينين قاباغيندا منئم سنئنله گؤروشه‌جيئم ير اولان حوضور چاديرينا قوي. بو سئزئن اوچون لاپ موقدّس اولسون.

30:37  حاضيرلاديغين بوخورون ترکئبئنه گؤره اؤزونوز اوچون بوخور حاضيرلامايين؛ بو سنئن اوچون ربّه موقدّسدئر.

30:38  هر کس کي، عطئرلي اولماق اوچون اونا بَنزَرئني حاضيرلاسا، خالقينين آراسيندان قووولسون."

Chapter 31

31:1  رب موسايا ددي:

31:2  "باخ، يهودا قبئله‌سئندن خور اوغلو اوري اوغلو بِصه‌له‌لي چاغير.

31:3  اونو تارينين روحو ائله حئکمت، فراست، بئلئک و هر جور مهارتله دولدورموشام کي،

31:4  قيزيللا، گوموشله و بورونجله باجاريقلا ائشله‌سئن،

31:5  ساغاناقلار اوچون داش-قاش يونسون، آغاج اويسون، هر جور مهارت گؤرسده بئلسئن.

31:6  من ده دان قبئله‌سئندن اَخئماساک اوغلو اوهولئيابي اونا کؤمکچي تعيئن اتمئشم. هر مودرئک آدامين اوره‌يئنه حئکمت قويموشام کي، من سنه نجه امراتمئشم، بله ده اتسئنلر:

31:7  حوضور چاديريني، شهادت سانديغي و اوستونده‌کي کفّاره قاپاغيني، چاديرين بوتون لوازئماتيني،

31:8  مئزي و اونون لوازئماتلاريني، خالئص قيزيلدان چيراقداني و اونون بوتون اشيالاريني، بوخور قوربانگاهيني،

31:9  يانديرما قوربانلاري اوچون قورولان قوربانگاهي و اونون بوتون لوازئماتيني، بؤيوک لَيَني و اونون آلتليغيني،

31:10  توخونموش پالتارلاري يعني کاهئن هارونون موقدّس پالتارلاريني و اوغوللارينين کاهئنلئک اتمه پالتارلاريني،

31:11  مسح ياغيني، موقدّس ير اوچون عطئرلي بوخورو من سنه نجه امر اتدئيئم کئمي، قوي او جور ده دوزلتسئنلر".

31:12  رب موسايا ددي:

31:13  "سن ائسرايئل اؤولادلارينا بله دِه: "منئم سَبّت گونلرئمي گرک رئعايت اده‌سئنئز. چونکي بو منئمله سئزئن آرانيزدا نسئلدن-نسله اونو بئلمک اوچون بئر علامتدئر کي، سئزي تقدئس ادن رب، منم.

31:14  بلجه، سَبّت گونونو رئعايت ادئن، چونکي او سئزئن اوچون موقدّسدئر. کئم اونو لَکه‌لَسه، گرک اؤلدورولسون. او گون ائش گؤرن هر کس خالقي آراسيندان قووولسون.

31:15  آلتي گون ائش گؤرولسون، آمّا يدّئنجی گون رب اوچون موقدّس سَبّت ائستئراحت گونودور. او گون ائش گؤرن هر کس گرک اؤلدورولسون.

31:16  ائسرايئل اؤولادلاري نسئلدن-نسله ابدی عهد کئمي سَبّت گونونو رئعايت و عمل اتسئنلر.

31:17  منئمله ائسرايئل اؤولادلاري آراسيندا ابدی بئر علامتدئر کي، آلتي گون عرضئنده رب گؤيلر و يري دوزلتدي، آمّا يدّئنجی گون ائستئراحت اتدي و دئنجَلدي."

31:18  سئنا داغيندا تارينين موسا ائله صؤحبتي قورتاراندان سونرا تاري اؤز بارماغي ائله يازيلميش ائکي شهادت داش لؤوحه‌سئني موسايا وردی.

Chapter 32

32:1  خالق موسانين داغدان اِنمَکده گِجئکدئيئني گؤره‌نده هارونون اطرافينا ييغيليب اونا ددي: "قالخ و بئزئم اوچون آللاهلار دوزلت. قوي اونلار قاباغيميزدا گتسئنلر. چونکي بئزي مئصئردن چيخاردان آدامين-بو موسانين باشينا نه ائش گلدئيئني بئلمئرئک!"

32:2  هارون اونلارا ددي: "آروادلارينيزين، اوغوللارينيزين، قيزلارينيزين قولاقلاريندان قيزيل سيرغالاري چيخارديب منئم يانيما گتئرئن."

32:3  بوتون خالق قولاقلاريندا اولان قيزيل سيرغالاري چيخارديب هارونا گتئردي.

32:4  هارون اللرئندن آلديغي سيرغالاردان اويما آلَتي ائله قيزيلا صورت ورئب تؤکمه بئر دانا دوزلتدي. خالق "ای ائسرايئل، باخ سئزي مئصئردن چيخاردان آللاهلارينيز!" ددی.

32:5  هارون بونو گؤردوکده دانانين قاباغيندا بئر قوربانگاه دوزلتدي و اعلان اتدي: "صاباح رب نامئنه بايرام اولاجاق."

32:6  صاباحيسي گون خالق سحر تزدن قالخيب يانديرما قوربانلاري ائله باريش قوربانلاري کَسدي. خالق اوتوروب يِيئب-ائچدي، و سونرا اويناماغا قالخدي.

32:7  رب موسايا ددي: "دوش آشاغي، چونکي مئصئر اؤلکه‌سئندن گتئردئيئن خالقين اخلاقيني پوزدو

32:8  و من اونلارا امر اتدئيئم يولدان يامان تز دؤندولر. اؤزلري اوچون تؤکمه دانا دوزَلدئب اونا سجده قيلديلار، قوربان کَسدئلر و ددئلر: «ای ائسرايئل اؤولادلاري باخ، سئزي مئصئر اؤلکه‌سئندن چيخاردان آللاهلارينيز!»"

32:9  رب موسايا سؤزونو داوام وردی: "بو خالقي گؤرورم، باخ، او دئکباش بئر خالقدير.

32:10  ائندي منی بوراخ کي، خالقا قضبله‌نئب اونو يوخ ادئم، آمّا سندن بؤيوک مئلّت گتئرئم."

32:11  موسا تاريسي ربّه يالواريب ددي: "يارب، نه اوچون اؤز خالقينين ضئدّئنه قضبئن آلوولانسين؟ مگر سن اونلاري مئصئر اؤلکه‌سئندن بؤيوک قووّتئنله و قودرتلي اَلئنله قورتارمادين؟

32:12  آخي نه اوچون مئصئرلئلر «اونلاري پئس نئيّتله، داغلاردا اؤلدوروب ير اوزوندن يوخ اتمک اوچون چيخارتدي» دسئنلر؟ يالواريرام، قضبئني ياتيرت و اؤز خالقينا بلا گتئرمک نئيّتئندن دؤن.

32:13  قوللارين ائبراهئمي، ائسحاقي، و ائسرايئلي خاطيرلا و اؤزونون آدينا اونلارا آند اده‌رک «نسلئنئزي گؤيلرده‌کي اولدوزلار قدر چوخالداجاغام؛ وعده اتدئيئم بو اؤلکه‌نئن هاميسيني نسلئنئزه وره‌جيم و اونلار ابدئلئک اورايا صاحئب اولاجاقلار» ددئن."

32:14  بِلَجه، رب اؤز خالقينا بلا گتئرمک نئيّتئندن دؤندو.

32:15  موسا دؤنوب اَلئنده شهادتئن ائکي لؤوحه‌سي اولاراق داغدان اِندي. لؤوحه‌لرئن ائکي طرفي يعني هر اوزو يازيلي ائدي.

32:16  اونلار تارينين ائشي ائدي؛ اوستونده‌کي اويما يازيلار اونون يازيسي ائدي.

32:17  يوشَع خالقين سَس-کويونو اشئدئب موسايا ددي: "دوشَرگه‌دن موحارئبه سَسي گلئر."

32:18  موسا وردی: "بو قَلَبه چالانلارين نئداسي ديئل، مغلوبئيّته دوشَنلرئن ده سَسي ديئل. من نغمه سَسي اشئدئرم."

32:19  موسا دوشَرگَيه ياخينلاشيب داناني و اونون اطرافينداکي رَقصلري گؤردو. او قضبلَندي و لؤوحه‌لري اَلئندن آتيب، داغين اَته‌يئنده پارچا-پارچا سينديردي.

32:20  خالقين دوزلتدئيي داناني گؤتوروب يانديردي، توزا دؤنَنه قدر اَزدي و سويون اوزونه سَپئب ائسرايئل اؤولادلارينا ائچتئردي.

32:21  موسا هاروندان سوروشدو: "بو خالق سنه نه اتدي کي، اونلاري بله بؤيوک گوناها باتيردين؟"

32:22  هارون جاواب وردی: "قوي آغام قضبلنمه‌سئن. سن بو خالقي تاني‌ييرسان. اونون نئيّتي پئسدئر.

32:23  اونلار منه ددئلر: «بئزئم اوچون آللاهلار دوزلت کي، قاباغيميزدا گتسئنلر. چونکي بئزي مئصئر تورپاغيندان چيخاردان آدامين-بو موسانين باشينا نه ائش گلدئيئني بئلمئرئک!»

32:24  من ده اونلارا ددئم: «کئمده قيزيل وار، اونو چيخارتسين.» خالق دا قيزيلي منه وردی. من اونو اودا آتديم و بو دانا آليندي."

32:25  موسا گؤردو کي، خالق نظارتدن چيخيب. هارون او قدر نظارتي ضعئفلَتمئشدي کي، دوشمنلر اونلاري لاغا قويوردولار.

32:26  موسا دوشَرگه‌نئن گئرئشئنده دوروب چاغيردي: "ربّئن طرفئنده اولانلار منئم يانيما گلئن!" بوتون لاوي اؤولادلاري اونون يانينا ييغيلديلار.

32:27  موسا اونلارا ددي: "ائسرايئلئن تاريسي رب بله ديئر: «قوي هر بئرئنئز قيلينجيني بِلئنه قورشاسين. هر کس دوشَرگه‌ده قاپي-قاپي گزه‌رک اؤز قارداشيني، دوستونو و قونشوسونو اؤلدورسون.

32:28  لاوئلی‌لر دا موسا اونلارا امر اتدئيي کئمي عمل اتدئلر. او گون اوچ مئنه ياخين آدام هلاک اولدو.

32:29  موسا لاوئلی‌لره ددي: "بو گون سئزئن هر بئرئنئزه اوغلونون و قارداشينين جاني باهاسينا اؤزونه برکت قازانيب، رب اوچون وظئفه‌يه تعيئن ادئن.

32:30  صاباحيسي گون موسا خالقا ددي: "سئز بؤيوک گوناها باتدينيز. ائندي آمّا من ربّئن حوضورونا قالخاجاغام کي، بلکه گوناهينيزي کفّاره اده بئلئم."

32:31  موسا ربّئن حوضورونا قاييديب ددي: "آه، بو خالق بؤيوک گوناها باتيب، اؤزونه قيزيلدان آللاهلار دوزلتدي؛

32:32  ائندي، يالواريرام، گوناهلاريني باغيشلا. اگر بله اتميه‌سن، آديمي يازديغين کئتابدان سئل."

32:33  رب موسايا ددي: "منئم ضئدّئمه کئم گوناه ائشله‌دئب، اونون آديني کئتابيمدان سئله‌جيم.

32:34  لاکئن ائندي گت، خالقي سنه ددئيئم يره آپار. باخ، منئم مَله‌يئم سنئن قاباغيندا گده‌جک. آنجاق جزا گونو گلنده اونلارا گوناهلارينا گؤره جزا وره‌جيم.

32:35  رب هارونون دوزلتدئيي دانا ائله نه اتدئکلري اوچون خالقي بلايا سالدي.

Chapter 33

33:1  رب موسايا ددي: "سن و مئصئر اؤلکه‌سئندن چيخارتديغين خالق بو يري ترک ادئن؛ ائبراهئمه، ائسحاقا و يعقوبا آند ائچئب «سنئن نسلئنه اونو وره‌جيم» ددئيئم تورپاغا گدئن.

33:2  قاباغيندا بئر مَلَک گؤندرئب کَنَعانليلاري، اِمورلولاري، خئتلئلري، پِرئزلی‌لري، خئولی‌لري و يِبوسلولاري اورادان قوواجاغام.

33:3  سود و بال آخان تورپاغا گدئن. سئز دئکباش خالقسينيز؛ بونا گؤره من آرانيزدا گتميه‌جيم، يوخسا يولدا سئزي محو اده‌رم."

33:4  خالق بو يامان خبري اشئدنده ياس توتدو. هچ کس بزک تاخمادي.

33:5  رب موسايا ددي: "ائسرايئل اؤولادلارينا بله دِه: «سئز دئکباش خالقسينيز؛ من آرانيزدا بئر آن گتسَيدئم، سئزي محو اِدَردئم. آمّا ائندي بزکلرئنئزي چيخاردين. من ده بئلئم کي، سئزئنله نه اده‌جيم."

33:6  بلجه خورِب داغينين اَته‌يئنده ائسرايئل اؤولادلاري بزکلرئني سويوندولار.

33:7  موسا چاديري گؤتوروب اونو دوشَرگه‌دن کناردا اوزاقدا قوراردي. اونو حوضور چاديري چاغيردي. رَبله مصلحتلَشَن هر کس دوشَرگه‌دن کنارداکي حوضور چاديرينا گِدَردي.

33:8  موسا چاديرا طرف چيخديغي واخت بوتون خالق آياغا قالخيب دوراردي. هر کس چاديرينين گئرئشئنده گؤزله‌يئب، موسا چاديرا گئره‌نه قدر دالينجا باخاردي.

33:9  موسا چاديرا گئره‌نده بولود دئره‌يي دوشوب چاديرين گئرئشئنده دوراردي؛ و رب موسا ائله دانيشاردي.

33:10  بوتون خالق حوضور چاديرينين گئرئشئنده دوران بولود دئره‌يئني گؤرنده، هامي قالخيب اؤز چاديرينين گئرئشئنده سجده اِدَردي.

33:11  رب موسا ائله اوز-اوزه دانيشاردي، نجه کي، بئر نفر دوستو ائله دانيشير. سونرا موسا دوشَرگه‌يه قاييداردي. لاکئن اونون جاوان کؤمکچئسي نون اوغلو يوشَع چاديري ترک اتمزدي.

33:12  موسا ربّه ددي: "باخ، سن ديئرسن: «بو خالقي چيخارت.»؛ منئمله بئرلئکده کئمي گؤندره‌جيئني منه بئلدئرمئرسن. حالبوکي سن ددئن: «سني آدينلا تاني‌ييرام و گؤزومده لوطف تاپيبسان.»

33:13  اگر من سنئن گؤزونده لوطف تاپميشام، يالواريرام، اؤز يولونو منه بئلدئر کي، سني تاني‌ييم و گؤزونده لوطف تاپيم. باخ، بو مئلّت سنئن خالقيندير."

33:14  رب جاواب وردی: "منئم حوضوروم سنئنله گده‌جک. اؤزوم سنه راحاتليق وره‌جيم."

33:15  موسا ربّه جاواب وردی: "اگر سنئن حوضورون بئزئمله گتمَسه، بئزي بورادان گؤندرمه.

33:16  نه ائله بئلک کي، من و سنئن خالقين، سنئن گؤزونده لوطف تاپميشيق؟ مگر سنئن بئزئمله گتمه‌يئندن ديئل؟ من و سنئن خالقين ير اوزونده اولان هر خالقدان نه ائله فرق ادک؟"

33:17  رب موسايا جاواب وردی: "سنئن مندن ائسته‌دئيئن بو شيي اده‌جيم. چونکي گؤزومده لوطف تاپدين و سني آدينلا تاني‌ييرام."

33:18  موسا ددي: "يالواريرام عئزّتئني منه گؤرسده‌سن."

33:19  رب ددي: "من بوتون ياخشيليغيمي سنئن موقابئلئندن کچئرده‌جيم و رب اولان آديمي قاباغيندا جار چکه‌جيم. کئمه ائسته‌سم، لوطف گؤرسده‌رم، کئمه ائسته‌سم ده، رحم اده‌رم."

33:20  آمّا او داوام وردی: "اوزومو گؤره بئلمزسن، چونکي منی گؤرن آدام صاغ قالماز."

33:21  رب سونرا ددي: "باخ، منئم يانيمدا ير وار، اورادا، بو قايانين اوستونده دور.

33:22  عئزّتئم کچنده سني قاياداکي بئر ياريغا قوياجاغام؛ من کچمه‌يئنجه سني اَلئمله اؤرته‌جيم.

33:23  سونرا الئمي سندن چکه‌جيم و سن منی آرخادان گؤره‌جکسن، لاکئن اوزوم گؤرونميه‌جک."

Chapter 34

34:1  رب موسايا ددي: "اَوّلکئلره بَنزَر ائکي داش لؤوحه يون؛ سينديرديغين اَوّلکي لؤوحه‌لرده يازيلان سؤزلري، بو لؤوحه‌لرئن اوستونده يازاجاغام.

34:2  سحره‌ حاضير اول و سحر سئنا داغينا چيخ. اورادا داغين باشيندا منئم حوضورومدا دور.

34:3  قوي هچ کس سنئنله چيخماسين و داغين هچ يرئنده هچ بئر آدام گؤرونمه‌سئن. او داغين اَته‌يئنده نه قويون-کچي اوتلاسين نه ده مال-حيوان."

34:4  رب اونا بويوردوغو کئمي، موسا اَوّلکئلره بَنزَر ائکي داش لؤوحه يوندو و سحر اِرکَن قالخدي و الئنده ائکي داش لؤوحه‌ني گؤتوروب سئنا داغينا چيخدي.

34:5  رب بولوددا اِنئب، اورادا موسا ائله دوردو و رب اولان اؤز آديني اعلان اتدي.

34:6  سونرا موسانين قاباغيندان کچه‌رک ددي: "رب منم، رحملي و فيضلي رب تاري، من حدسئز صبئرلي، محبّت و حقئقتله دولو.

34:7  مئنلر نسئله قدر محبّتي گؤرسده‌رم، تقصئري، عوصياني و گوناهي باغيشلايارام؛ لاکئن جزاسيز قويمارام، آتالارين جزاسيني اوچ-دؤرد نسله قدر اوغوللارينا و نوه-نتئجه‌لرئنه گتئره‌رم."

34:8  موسا درحال يره دؤشه‌نئب سجده اتدي.

34:9  سونرا موسا ددي: "ای پروردئگار، اگر گؤزونده لوطف تاپميشام، يالواريرام، قوي رب بئزئم آراميزدا اولسون. بو خالق ديکباش اولسا دا، تقصئرئمئزله گوناهيميزي باغيشلا و بئزه صاحئب اول."

34:10  رب موسايا ددي: "باخ، من ائندي عهد باغلاييرام. خالقين هاميسينين قاباغيندا اله مؤجوزه‌لر اده‌جيم کي، بله‌سي دونيادا هچ بئر يرده هچ مئلّت آراسيندا يارانماييب. سئزئن اطرافينيزداکي بوتون خالقلار ربّئن ائشئني گؤره‌جکلر. چونکي منئم سنئن اوچون اده‌جيئم شي قورخولودور.

34:11  منئم سئزه بو گون وردئيئم امري رئعايت ادئن. باخ، من قاباغينيزدان اِمورلولاري، کَنَعانليلاري، خئتلئلري، پِرئزلی‌لري، خئولی‌لري و يِبوسلولاري قووورام.

34:12  اؤزونوزو گئردئيئنئز تورپاغين ساکئنلري ائله عهد باغلاماقدان گؤزله‌يئن کي، او سئزئن آرانيزدا بئر تله اولماسين.

34:13  اونلارين قوربانگاهلاريني سؤکون، موقدّس سوتونلاري سينديرين، اَشئره بوتلرئني کسئن.

34:14  آيري بئر آللاها سجده اتمه‌يئن، چونکي ربّئن آدي قيرتدئر، او قيرتلي تاريدير.

34:15  مبادا او تورپاغين ساکئنلري ائله عهد باغلاياسينيز و اونلار اؤز آللاهلاري ائله زئنا ادئب اونلارا قوربان کَسن واخت، سئزي ده دعوت اده‌لر کي، اونلارين قوربانلاريندان يئيه‌سئنئز؛

34:16  اونلارين قيزلاريني اؤز اوغوللارينيزا آرواد آلمايين کي، اونلار اؤز آللاهلاري ائله زئنا ادئب سئزئن اوغوللارينيزي دا او آللاهلارا زئنا اتميه چکمه‌سئنلر.

34:17  اؤزونوز اوچون تؤکمه آللاهلار دوزلتمه‌يئن.

34:18  ماياسيز چؤرک بايراميني توتون. من سئزه امر اتدئيئم کئمي، اَبئب آييندا تعيئن اولونموش واختدا يدّي گون ماياسيز چؤرک ييئن، چونکي آبئب آييندا مئصئردن چيخدينيز.

34:19  بوتون ائلک دوغولان اوغلانلار و بوتون حيوانلارينيزين، ائستر مال-حيوانيزين، ائستر قويون-کِچئنئزئن ائلک دوغولان اِرکَک بالالاري منئمدئر.

34:20  ائلک دوغولان اِششَک بالاسي عوضئنه بئر قوزو ورئن. اگر عوضئني ورميه‌سئنئز، بوينونو سينديرين. آرانيزدا هر آدامين ائلک اوغلونون عوضئني ورئن. هچ کس حوضورومدا اَلي‌بوش گؤرونمه‌سئن.

34:21  آلتي گون ائشلرئنئزي گؤرون، آمّا يدّئنجی گون ائستئراحت ادئن. شوخوم و بئچئن واختلاري دا بله ائستئراحت ادئن.

34:22  بوغدا بئچئنئن نوباري ائله هفته‌لر بايراميني ساخلايين. ائلئن آخيريندا دا ييغيم بايراميني توتون.

34:23  ائلده اوچ دفه سئزئن بوتون کئشئلرئنئز، پروردئگار رب، ائسرايئلئن تاريسينين حوضورونا گلسئنلر.

34:24  چونکي من سئزئن قاباغينيزدان مئلّتلري قوواجاغام و سرحدلرئنئزي گِنئشلَندئره‌جيم و سئز ائلده اوچ دفه اؤز تارينيز ربّئن حوضوروندا گؤرونمک اوچون گلنده، هچ کس سئزئن تورپاغينيزا طاماح سالماياجاق.

34:25  منه گتئرئلن قوربانين قانيني مايالي چؤرکله تقدئم اتمه‌يئن. پاسخا بايرامينين قوربان اَتي سحره قدر قالماسين.

34:26  تورپاغينين نوبارينين ائلک حئصّه‌سئني تارينيز ربّئن معبدئنه گتئرئن. کچي بالاسيني آناسينين سودونده پئشئرمه‌يئن.

34:27  رب موسايا ددي: "بو سؤزلري ياز، چونکي بو کلمه‌لره گؤره‌سن و بوتون ائسرايئلله عهد باغلاميشام.»

34:28  بلجه، موسا ربله قيرخ گون-قيرخ گجه قالدي. بو مودّت عرضئنده موسا هچ چؤرک يمه‌دي، هچ سو دا ائچمه‌دي. او، لؤوحه‌لرئن اوستونده عهدئن سؤزلرئني، اون فرماني يازدي.

34:29  موسا الئنده ائکي شهادت لؤوحه‌سئني توتوب، سئنا داغيندان اِنَنده بئلمئردي کي، ربله دانيشديغينا گؤره اوزو نور ساچير.

34:30  هارون و بوتون ائسرايئل اؤولادلاري موسانين اوزونو نور ساچان گؤردولر و اونا ياخينلاشماقدان قورخدولار.

34:31  موسا اونلاري چاغيردي و هارونلا بوتون جاماعات باشچيلاري اونون يانينا قاييتديلار و موسا اونلارلا صؤحبت اتدي.

34:32  سونرا بوتون ائسرايئل اؤولادلاري اونا ياخينلاشديلار. موسا اونلارا امر اتدي کي، ربّئن سئنا داغيندا اونا دانيشديغينا عمل اتسئنلر.

34:33  موسا صؤحبتئني اونلارلا قورتاراندا اوزونه بئر نئقاب چکدي.

34:34  موسا ربّئن حوضورونا اونونلا دانيشماق اوچون گِدنده، نئقابي چيخارديب، قاييداناجاق نئقابسيز اولاردي. چيخاندا اونا نه امر اولوندوغونو ائسرايئل اؤولادلارينا نقل ادئردي.

34:35  ائسرايئل اؤولادلاري دا موسانين اوزونون نور ساچديغيني گؤرَردئلر. سونرا موسا ائچَري گئرئب ربله دانيشانا قدر نئقابي اوزونه چکَردي.

Chapter 35

35:1  موسا ائسرايئل اؤولادلارينين بوتون جاماعاتينی ييغيب اونلارا ددي: "رب سئزه امر اتدی کی، بو شيلره عمل اده‌سئنئز.

35:2  آلتي گون ائش گؤرولسون، آمّا يدّئنجی گون سئزئن رب اوچون موقدّس سَبّتئنئز، ائستئراحت گونونوزدور. او گون ائش گؤرَن هر کس اؤلدورولسون.

35:3  سَبّت گونو ياشاديغينيز هچ بئر يرده اود يانديرمايين."

35:4  موسا ائسرايئل اؤولادلارينين بوتون جاماعاتينا ددي: "ربّئن امر اتدئيي ائش بودور:

35:5  اؤز آرانيزدان ربّه بئر هدئيّه ييغين. قوي گؤيلو ائسته‌ين هر کس ربّه بله هدئيّه گتئرسئن: قيزيل، گوموش، بورونج،

35:6  لاجورد، ارغواني و قيرميزي پارچا، نازئک کتان، کچي توکو،

35:7  قيرميزي بويانميش قوچ دَرئلري، سو ائتي دَرئلري، اَقاقئيا آغاجي،

35:8  چيراق اوچون ياغ، مسح ياغي و عطئرلي بوخور اوچون اَدوئيّه‌لر،

35:9  اِفودلا دؤشلويون اوستونه تاخيلان دامارلي عقئق و ساغاناق داشلاري.

35:10  آرانيزداکي اوره‌يي حئکمتله دولو هر آدام گلئب ربّئن نه امر اتدئيئني دوزلتسئن:

35:11  خيمه‌ني، اونون چاديريني، اؤرتويونو، گئره‌لرئني، چَرچئوه‌لرئني، دئرَکلرئني، سوتونلاريني و آلتليقلاريني؛

35:12  سانديغي و اونون دئرَکلرئني؛ کفّاره قاپاغيني، آراکَسمه پرده‌ني؛

35:13  مئزي، اونون دئرَکلرئني و بوتون لوازئماتيني؛ تقدئس چؤرکلرئني؛

35:14  ائشيق ورن چيراقداني، اونون لوازئماتيني، چيراقلاريني و ائشيق ياغيني؛

35:15  بوخور قوربانگاهيني و دئرَکلرئني؛ مسح ياغيني، عطئرلي بوخورو؛ خيمه‌نئن گئرئشي اوچون آراکَسمه‌ني؛

35:16  يانديرما قوربانلاري اوچون قورولان قوربانگاهي، اونون اوچون بورونج تورو، دئرَکلرئني و بوتون لوازئماتيني؛ بؤيوک لَيَني و اونون آلتليغيني؛

35:17  حيطئن پرده‌لرئني، سوتونلاريني و آلتليقلاريني؛ حيطئن دروازاسي اوچون آراکَسمه‌ني؛

35:18  خيمه‌نئن ميخلاريني؛ حيطئن ميخلاريني؛ اونلارين ائپلرئني؛

35:19  موقدّس يرده خئدمت اوچون توخونموش پالتارلاري: کاهئن هارونون موقدّس پالتارلاريني و اوغوللارينين کاهئنلئک اتمه پالتارلاريني."

35:20  ائسرايئللی‌لرئن بوتون جاماعاتي موسانين يانيندان چيخدي.

35:21  اوره‌يئنه قويولان و گؤيلو ائسته‌ين هر آدام گلئب حوضور چاديرينداکي ائش اوچون، اونون بوتون خئدمتي و موقدّس پالتارلار اوچون ربّه هدئيّه گتئردي.

35:22  کئشئلر و آروادلار، گؤيلو ائسته‌يَنلرئن هاميسي بزکلي سانجاقلار، گوشوارالار، اوزوکلر، گردنبندلر کئمي بوتون قيزيل اشيالاريني، ربّه تقدئم کئمي گتئردئلر. ربّه هدئيّه قيزيل تقدئم ادن هر کس

35:23  کئمده لاجورد، ارغواني و قيرميزي پارچا، نازئک کتان، کچي توکو، قيرميزي بويانميش قوچ دَرئلري و سو ائتي دَرئلري وار ائدي، بونلاري تقدئم اتدي.

35:24  ربّه هدئيّه اولاراق گوموش و بورونج گتئرن هر کس ده اونو تقدئم اتدي؛ کئمده اَقاقئيا آغاجي وار ائدي، اونو خئدمت ائشي اوچون تقدئم اتدي.

35:25  اوره‌يي حئکمتله دولو بوتون آروادلار اؤز اللري ائله اَيئردئيي لاجورد، ارغواني و قيرميزي ائپلئک و نازئک کتان ائپلئيي تقدئم اتدئلر؛

35:26  اورَکلردن بو ائشي گؤرمک ائسته‌ين باجاريقلي آروادلار کچي توکو اَيئردئلر.

35:27  خالقين باشچيلاري بونلاري تقدئم اتدئلر: اِفودلا دؤشلويون اوستونه تاخيلان دامارلي عقئق و ساغاناق داشلاريني،

35:28  چيراق، مسح ياغي و عطئرلي بوخور اوچون اَدوئيّه‌لر و ياغي.

35:29  ائسرايئل اؤولادلاريندان هر کئشي و آرواد کي، ربّئن موسا واسئطه‌سئله امر اتدئيي نه ائش اوچون تقدئم اتمک ائسته‌يئردي، ربّه اؤز گؤيلو ائله تقدئم گتئردي.

35:30  موسا ائسرايئل اؤولادلارينا ددي: "باخين، رب يهودا قبئله‌سئندن خور اوغلو اوري اوغلو بِصه‌لِه‌لي آدي ائله چاغيريب

35:31  و اونو تارينين روحو ائله، باجاريق، فراست، بئلئک و هر جور مهارتله دولدورموشدور کي،

35:32  او، قيزيللا، گوموشلا، بورونجله باجاريقلا ائشله‌سئن،

35:33  سيغيناقلار اوچون داش-قاش يونسون، آغاج اويسون، هر جور مهارتله باجاريق گؤرسده بئلسئن.

35:34  رب اونون و دان قبئله‌سئندن اَخئساماک اوغلو اوهولئبانين اورَکلرئنه باشقالاريني اؤيرَتمَک باجاريغيني قويموش،

35:35  اورَکلرئني حئکمتله دولدورموشدور کي، اويماچيليق، ناخيشچيليق، لاجورد، ارغواني و قيرميزي پارچادا و نازئک کتاندا ناخيش تئکمه‌سي، توخوجولوق، هر جور صَنَت باجارا بئلسئنلر.

Chapter 36

36:1  بِصه‌لِل، اوهولئياب و هر باجاريقلي کي، رب موقدّس يرئن بئنا ائشئني اتمک اوچون اونلارا بو ائشي باجارماق اوچون حئکمت و فراست ورمئشدي، گرک رَبّين بوتون اونلارا امر اتدئيي کئمي ائشله‌سئنلر."

36:2  موسا بِصه‌لِل، اوهولئيابي و بوتون اورَکلري حئکمتله دولو يعني ربّئن اونلارين اورَکلرئنه حئکمت قويدوغو آداملاري، اورکدن بو ائشي گؤرمک ائسته‌ينلرئن هاميسيني چاغيردي.

36:3  اونلار موقدّس يرئن بئنا ائشئني گؤرمک اوچون ائسرايئل اؤولادلارينين بونا گؤره گتئردئيي بوتون هدئيّه‌لري موسانين يانيندان گؤتوردولر. ائسرايئل اؤولادلاري هر سحر اؤز گؤيلو ائله تقدئملر گتئرميه داوام ورئردئلر.

36:4  او واخت موقدّس يرئن بئناسي ائله مشغول اولان بوتون حئکمتلي صَنَتکارلار هر ائشئندن اَل چکئب،

36:5  موسانين يانينا گلدئلر و اونا ددئلر: "خالق ربّئن امر اتدئيي بئنا ائشي اوچون لازيم اولاندان داها چوخ شي گتئرئب."

36:6  موسا امر وردی و دوشَرگه‌ده اعلان اتدئردي کي، نه کئشي، نه ده آرواد موقدّس ير اوچون داها هدئيّه گتئرمه‌سئن. بلجه خالقين چوخ هدئيّه گتئرمه‌سئنه مانع اولدو.

36:7  چونکي بوتون ائشي گؤرمک اوچون لازيم اولان مئقداردان داها دا آرتيق وار ائدي.

36:8  ائشي گؤرمک اوچون اورکلري حئکمتله دولو بوتون آداملار، خيمه‌ني اون پرده‌دن دوزلتدئلر. پرده‌لر نفئس توخونموش نازئک کتاندان لاجورد، ارغواني و قيرميزي پارچادان، اوستونو ده کَرّوبلار شَکلئنده ناخيشلا دوزلتدئلر.

36:9  هر پرده‌نئن اوزونلوغو ائيئرمي سکّئز قول‌آچ، اِني ده دؤرد قول‌آچ ائدي. بوتون پرده‌لر همن اؤلچوده ائدي.

36:10  پرده‌لرئن بِشي بئربئرئنه بئرلَشدي. او بئري بِشي ده بئربئرئنه بئرلَشدي.

36:11  بئر بئرلَشمه‌نئن اوجوندا اولان پرده‌نئن قيراغيندا لاجورد ائلمه‌لر دوزلتدئلر؛ او بئري بئرلَشمه‌نئن اوج پرده‌سئنئن قيراغيندا دا بئربئرئنئن موقابئلئنده اولاراق، همن شکئلده ائلمه‌لر دوزلتدئلر.

36:12  بئر پرده‌يه اَلّي ائلمه، او بئري بئرلَشمَده‌کي پرده‌نئن قيراغيندا دا، اَلّي ائلمه بئربئرئنئن موقابئلئنده دوزلتدئلر.

36:13  قيزيلدان اَلّي گئره دوزلتدئلر، گئره‌لرله پرده‌لري بَرکئتدئلر و چاديري بئرلَشدئردئلر. بلجه، خيمه‌ بوتؤو اولدو.

36:14  خيمه‌ني اؤرتَن چادير اوچون کچي توکوندن اون بئر پرده دوزلتدئلر.

36:15  هر پرده‌نئن اوزونلوغو اوتوز قول‌آچ، اِني ده دؤرد قول‌آچ ائدي. اون بئر پرده بئر اؤلچوده ائدي.

36:16  بش پرده‌ني آيريجا، آلتي پرده‌ني ده آيريجا بئتئشدئردي.

36:17  بئر بئرلَشمه‌نئن قيراق پرده‌سئنئن قيراغيندا اَلّي ائلمه، او بئري بئرلَشمه‌نئن قيراق پرده‌سئنئن قيراغيندا دا اَلّي ائلمه دوزلتدي.

36:18  چاديري بئرلَشدئرئب بوتؤو اتمک اوچون بورونجدن اَلّي گئره دوزلتدي.

36:19  چادير اوچون قيرميزي بويانميش قوچ دَرئلرئندن بئر اؤرتوک و اونون اوستونده سو ائتي دَرئلرئندن آيري بئر اؤرتوک دوزلتدي.

36:20  خيمه‌ اوچون اَقاقئيا آغاجيندان دئک دوران چَرچئوه‌لر دوزلتدي.

36:21  هر چَرچئوه‌نئن اوزونلوغو اون قول‌آچ، اِني ده قول‌آچ ياريم ائدي.

36:22  هر چَرچئوه‌نئن اوستونده ائکي بئربئرئنه باغلانان گئره وار ائدي؛ خيمه‌نئن بوتون چَرچئوه‌لرئني بله دوزلتدي.

36:23  خيمه اوچون چَرچئوه‌لر دوزلتدي؛ جنوب طرفي اوچون ائيئرمي چَرچئوه

36:24  و اونلارين آلتيندا قويولاجاق قيرخ گوموش آلتليق دوزلتدي؛ هر چَرچئوه‌نئن آلتيندا ائکي گئره‌سي اوچون ائکي آلتليق دوزَلدئلدي.

36:25  خيمه‌نئن ائکئنجي طرفي اوچون، شئمال سمتئنده ائيئرمي چَرچئوه

36:26  و قيرخ گوموش آلتليق، هر چَرچئوه‌نئن آلتيندا ائکي آلتليق، او بئرئسئنئن آلتيندا دا ائکي آلتليق دوزلتدي.

36:27  خيمه‌نئن قربه طرف اولان آرخاسي اوچون آلتي چَرچئوه دوزلتدي.

36:28  آمّا خيمه‌نئن آرخا کونجلري اوچون ائکي چَرچئوه دوزلتدي؛

36:29  بونلار آشاغيدا ائکي قات اولوب يوخاريدا بئرئنجي حالقايا تاخيلديلار؛ هر ائکي کونج اوچون اله ائکي چَرچئوه دوزلتدي.

36:30  بو سکّئز چَرچئوه اوچون اون آلتي گوموش آلتليق، هر چَرچئوه‌نئن آلتيندا دا ائکي آلتليق دوزَلدئلدي.

36:31  اَقاقئيا آغاجيندان دئرَکلر دوزلتدي: بش دئرَک خيمه‌نئن بئر طرفئنده‌کي چَرچئوه‌لر اوچون،

36:32  بش دئرَک ده خيمه‌نئن قربه طرف اولان آرخا طرفئنده‌‌کي چَرچئوه‌لر اوچون دوزَلدئلدي.

36:33  چَرچئوه‌لرئن اورتاسيندان بئر اوجدان او بئري اوجا قدر اوزانان اورتا دئرَک دوزلتدي.

36:34  چَرچئوه‌لري قيزيللا اؤرتدي؛ دئرَکلرئن کچدئيي حالقالاريني قيزيلدان دوزلتدي؛ دئرَکلري ده قيزيللا اؤرتدو.

36:35  پرده‌ني لاجورد، ارغواني و قيرميزي پارچا و نفئس توخونولموش نازئک کتاندان، اوستونو ده کَرّوبلار شَکلئنده ناخيشلا دوزلتدي.

36:36  اونون اوچون اَقاقئيا آغاجيندان دؤرد سوتون دوزلتدي و اونلاري قيزيللا اؤرتدو، اوستونده قيزيل قولّابلاري قويدو؛ اونلار اوچون دؤرد گوموش آلتليق تؤکدو.

36:37  چاديرين گئرئشي اوچون آراکَسمه‌ني لاجورد، ارغواني و قيرميزي پارچا و نفئس توخونموش نازئک کتاندان ناخيش تئکمه‌‌سئله دوزلتدي.

36:38  اونون بش سوتون و قولّابلاريني دا دوزلتدي؛ يوخاريلاريني و گئره‌لرئني قيزيللا اؤرتدو؛ بش آلتليق بورونجدن وار ائدي.

Chapter 37

37:1  بِصه‌لِل اَقاقئيا آغاجيندان سانديق دوزلتدي. سانديغين اوزونلوغو ائکي قول‌آچ ياريم، اِني قول‌آچ ياريم و بويو قول‌آچ ياريم ائدي.

37:2  اونو ائچَرئدن و چؤلدن خالئص قيزيللا اؤرتدو، اطرافينا دا قيزيل قالئب دوزلتدي.

37:3  اونون دؤرد آياغي اوچون دؤرد تؤکمه قيزيل حالقا، ائکي حالقاني بئر ياني اوچون، قالان ائکي حالقاني دا او بئري ياني اوچون دوزلتدي.

37:4  اَقاقئيا آغاجيندان دئرَکلر دوزَلدئب اوستونو قيزيللا اؤرتدو.

37:5  سانديغي داشيماق اوچون دئرَکلري سانديغين يانلارينداکي حالقالارا کچئرتدي.

37:6  خالئص قيزيلدان کفّاره قاپاغيني دوزلتدي؛ اوزونلوغو ائکي قول‌آچ ياريم، اِني ده قول‌آچ ياريم ائدي.

37:7  کفّاره قاپاغينين هر ائکي اوجو اوچون ياستيلانميش قيزيلدان ائکي کَرّوب دوزلتدي.

37:8  بئر کَرّوبو قاپاغين بئر اوجوندا، او بئرئسئني ده او بئري اوجوندا دوزلتدي؛ قاپاغين ائکي اوجوندا اولان کَرّوبلار اونونلا بئر حئصّه‌دن ائدي.

37:9  کَرّوبلار يوخاري طرف آچيلميش قانادلاري ائله کفّاره قاپاغيني اؤرتدولر. کَرّوبلارين اوزلري بئربئرئنئن موقابئلئنده قاپاغا طرف ائدي.

37:10  اَقاقئيا آغاجيندان بئر مئز دوزلتدي؛ اوزونلوغو ائکي قول‌آچ، اِني بئر قول‌آچ، بويو دا قول‌آچ ياريم ائدي.

37:11  اونو خالئص قيزيللا اؤرتدو، اطرافينا قيزيل قالئب دوزلتدي.

37:12  اطرافيندا بئر اوووج اِنئنده يان لؤوحه‌لري دوزلتدي؛ اونلارين اطرافينا دا قيزيل قالئب دوزلتدي.

37:13  مئز اوچون دؤرد قيزيل حالقا تؤکدو، حالقالاري اونون دؤرد آياغينداکي دؤرد کونجه بَرکئتدي.

37:14  حالقالار يان لؤوحه‌لره ياخين اولاراق مئزي آپاران دئرَکلرئن کچدئيي يرلر ائدي.

37:15  مئزي آپارماق اوچون دئرَکلري اَقاقئيا آغاجيندان دوزلتدي و اونلاري قيزيللا اؤرتدو.

37:16  مئزئن اوستونده اولان لوازئماتي، نئمچه‌لري و قابلاري، مايع تقدئملرئنئن تؤکولمه‌سي اوچون سَهَنگلري، و کاسالاري خالئص قيزيلدان دوزلتدي.

37:17  چيراقداني خالئص قيزيلدان دوزلتدي. بو چيراقدان ياستيلانميش قيزيلدان ائدي؛ پاياسي، مئله‌لري، پئيالالاري، قؤنچه‌لري و گوللري اونونلا بئر حئصّه‌دن ائدي.

37:18  چيراقدانين يانلاريندان آلتي شاخه يعني اونون بئر يانيندان اوچ شاخه، او بئري يانيندان دا اوچ شاخه چيخدي.

37:19  بئر بوداقدا بادام چئچه‌يئنه بَنزَر اوچ پئيالا، بئر قؤنچه و بئر گول، او بئري بوداقدا دا بادام چئچه‌يئنه بَنزَر اوچ پئيالا، بئر قؤنچه، و بئر گول دوزلتدي؛ چيراغدانين بوتون آلتي بوداقلاري اله ائدي.

37:20  چيراقداندا بادام چئچه‌يئنه بَنزَر دؤرد پئيالا، قؤنچه‌لر و گول‌لر وار ائدي.

37:21  چيراقداندان چيخان بوداقلارين بئرئنجي جوتونون آلتيندا بئر قؤنچه وار ائدي. چيراقداندان چيخان بوداقلارين ائکئنجي جوتونون آلتيندا بئر قؤنچه، و چيراقداندان چيخان بوداقلارين اوچونجو جوتون آلتيندا بئر قؤنچه وار ائدي. چيراقداندان چيخان بوتون آلتي بوداقدا بله وار ائدي.

37:22  قؤنچه‌لري و بوداقلاري اونونلا بئر حئصّه‌دن ائدي، يعني هاميسي ياستيلانميش خالئص قيزيلدان ائدي.

37:23  اونون اوچون يدّي چيراق دوزلتدي. پئلته ماشالاري و سئنی‌لري ده خالئص قيزيلدان ائدي.

37:24  چيراقداني و اونون بوتون لوازئماتيني بئر تالانت خالئص قيزيلدان دوزلتدي.

37:25  اَقاقئيا آغاجيندان بوخور اوچون قوربانگاه دوزلتدي؛ مورَبّع شَکلئنده ائدي؛ اوزونلوغو بئر قول‌آچ، اِني بئر قول‌آچ، بويو دا ائکي قول‌آچ ائدي. بوينوزلاري اونونلا بئر حئصّه‌دن ائدي.

37:26  اونون اوستونو، هر يانيني و بوينوزلاريني خالئص قيزيللا اؤرتدو، اطرافينا قيزيل زولاق قويدو.

37:27  بئربئرئنئن موقابئلئنده اولان ائکي يانلاردا، قالئبئن آلتيندا ائکي قيزيل حالقا دوزلتدي کي، اونو آپاران دئرَکلر، اونلارين ائچئنه کچسئنلر.

37:28  دئرَکلري اَقاقئيا آغاجيندان دوزَلدئب اونلاري قيزيللا اؤرتدو.

37:29  عطرئيّاتچينين ائشي اولان موقدّس مسح ياغيني و عطئرلي بوخورو دا حاضيرلادي.

Chapter 38

38:1  يانديرما قورباني اوچون، قورولان قوربانگاهي اَقاقئيا آغاجيندان دوزلتدي: اوزونلوغو بش قول‌آچ، اِني ده بش قول‌آچ، موربّع شکلئنده، بويو دا اوچ قول‌آچ ائدي.

38:2  قوربانگاهين دؤرد کونجونده اونونلا بئر حئصّه‌دن اولان دؤرد بوينوز دوزلتدي، اوستونو بورونجله اؤرتدو.

38:3  قوربانگاهين لوازئماتيني، ياغ و کول قابلاريني، کورَکلري، لَيَنچه‌لري، چَنگل‌لري و خَکَندازلاري، هر شيي بورونجدن دوزلتدي.

38:4  قوربانگاه اوچون بورونجدن تور شبکه دوزلتدي کي، کناريندان آشاغي‌يا، اونون ياريسينا قدر يتئشئردي.

38:5  بورونج تورون دؤرد بوجاغيندا دئرَکلرئن کچدئيي دؤرد حالقاني تؤکدو.

38:6  اَقاقئيا آغاجيندان دئرَکلر دوزَلدئب، اوستونو بورونجله اؤرتدو.

38:7  قوربانگاهي آپارماق اوچون دئرَکلري اونون هر ائکي يانينداکي حالقالارا تاخدي. قوربانگاهين ائچي بوش ائدي و اونو تاختادان دوزلتدي.

38:8  بؤيوک لَيه‌ني و اونون بورونج آلتليغيني حوضور چاديرينين گئرئشئنده خئدمت ادن آروادلارين گوزگولرئندن دوزلتدي.

38:9  ربّئن خيمه‌سئنئن حيطئني دوزلتدي. حيطئن جنوب طرفئنده، بئر طرف اوچون، اوزونلوغو يوز قول‌آچ اولان پرده‌لر وار ائدي کي، نازئک کتاندان نفئس توخونموشدو.

38:10  اونلارين ائيئرمي دئره‌يي و ائيئرمي آلتليغي بورونجدن ائدي، دئرَکلرئن قولّابلاري و بندلري ده گوموشدن ائدي.

38:11  شئمال طرفي اوچون، اوزونلوغو يوز قول‌آچ اولان پرده‌لر وار ائدي، پرده‌لرئن ائيئرمي دئره‌يي و ائيئرمي آلتليغي بورونجدن ائدي، دئرَکلرئن قولّابلاري و بندلري ده گوموشدن ائدي.

38:12  قرب طرفئنده اَلّي قول‌آچ پرده وار ائدي؛ اونون اون دئره‌يي و اون آلتليغي وار ائدي. دئرَکلرئن قولّابلاري و بندلري ده گوموشدن ائدي.

38:13  شرق طرفئنده ده حيطئن اِني اَلّي قول‌آچ ائدي.

38:14  دروازانين بئر طرفي اوچون اوزونلوغو اون بش قول‌آچ پرده‌لر وار ائدي؛ و اونلارين اوچ دئره‌يي و اوچ آلتليغي وار ائدي؛

38:15  دروازانين او بئري طرفي ده بله ائدي. حيطئن دروازاسينين هر ائکي طرفي اوچون اوزونلوغو اون بش قول‌آچ پرده‌لر وار ائدي کي، اونلارين اوچ دئره‌يي و اوچ آلتليغي وار ائدي.

38:16  حيطئن بوتون اطراف پرده‌لري نفئس توخونموش نازئک کتاندان،

38:17  دئرَکلرئن آلتليقلاري بورونجدن، دئرَکلرئن قولّابلاري و بندلري گوموشدن، باشليقلارين اؤرتويو ده گوموشدن ائدي؛ حيطئن بوتون دئرَکلري گوموشله بندلَندئلر.

38:18  حيطئن دروازاسينين ناخيش تئکمه‌لي آراکَسمه‌سي لاجورد، ارغواني و قيرميزي پارچادان و نفئس توخونموش نازئک کتاندان ائدي؛ اوزونلوغو ائيئرمي قول‌آچ، بويو دا حَيَطئن پرده‌لري کئمي بش قول‌آچ ائدي.

38:19  اونون دؤرد دئره‌يي و دؤرد آلتليغي بورونجدن، قولّابلاري گوموشدن، باشليقلارينين اؤرتويو و بندلري ده گوموشدن ائدي.

38:20  خيمه‌نئن و حيطئن بوتون اطراف ميخلاري بورونجدن ائدي.

38:21  بودور شهادت خيمه‌سئنئن لوازئماتينين حسابي کي، لاوئلی‌لر موسانين امري ائله کاهئن هارونون اوغلو ائتامارين باشچيليغي آلتيندا خئدمت اوچون اونلارا مشغول ائدئلر.

38:22  يهودا قبئله‌سئندن خور اوغلو اوري اوغلو بِصه‌لِل ربّئن موسايا نه امر اتدئيئني دوزلتدي.

38:23  اونونلا چاليشان دان قبئله‌سئندن اولان اَخئسامَک اوغلو اوهولئياب اويماچيليق، ناخيشچيليق، لاجورد، ارغواني و قيرميزي پارچادا و نازئک کتاندا ناخيش تئکمه‌سي ائشي باجاريردي.

38:24  موقدّس يِرئن بوتون بئناسي اوچون ائشله‌نن قيزيلين، يعني يِللَتمه تقدئمي اولاراق هدئيّه ورئلن قيزيلين چکئسي موقدّس مکانين شِکِلئنه گؤره ائيئرمي دوقّوز تالانت يدّي يوز اوتوز شِکِل ائدي.

38:25  جاماعاتين سئياهي‌يا آليناندا وردئيي گوموشون چکئسي موقدّس مکانين شِکِلئنه گؤره يوز تالانت و مئن يدّي يوز يتمئش بش شِکِل ائدي.

38:26  بو، ساييلميش آداملارا داخئل اولان هر کَس، ائيئرمي ياشيندا و اوندان يوخاري اولان ۶۰۳۵۵۰ کئشي اوچون آدامباشي بئر بِکا، يعني موقدّس مکانين شِکِلئنئن اؤلچوسونه گؤره ياريم شِکِل ائدي.

38:27  موقدّس يِرئن آلتليقلاريني و پرده‌نئن آلتليقلاريني تؤکمَک ائشئنه يوز تالانت گوموش: يوز آلتليق اوچون يوز تالانت، يعني هر آلتليق اوچون بئر تالانت گوموش ائشلَندي.

38:28  مئن يدّي يوز يتمئش بش شِکِل گوموش ده سوتونلار اوچون قارماقلار دوزلتمَک، باشليقلاريني اؤرتمَک و اونلاري بندلمک اوچون ائشلَندي.

38:29  يِللَتمه تقدئمي اولاراق هدئيّه ورئلَن بورونجون چکئسي يتمئش تالانت و ائکي مئن دؤرد يوز شِکِل ائدي.

38:30  اوندان حوضور چاديري گئرئشئنئن آلتليقلاري، بورونج قوربانگاه، اوستونده‌کي بورونج تور، قوربانگاهين بوتون لوازئماتي

38:31  حيطئن اطراف آلتليقلاري، حيطئن دروازاسينين آلتليقلاري، خيمه‌نئن بوتون پايالاري و حيطئن بوتون اطراف ميخلاري دوزلتدي.

Chapter 39

39:1  هارونون موقدّس پالتارلاري و موقدّس يرده خئدمت اوچون توخونموش پالتارلاري لاجورد، ارغواني، و قيرميزي پارچادان حاضيرلاديلار، نجه کي، رب موسايا امراتمئشدي.

39:2  اِفودو قيزيلدان، لاجورد، ارغواني و قيرميزي پارچا و نفئس توخونموش نازئک کتاندان دوزلتدي.

39:3  قيزيل لؤوحه‌لري دؤيدولر و او، اونلاردان ساپلار کَسدي و اونلارلا لاجورد، ارغواني و قيرميزي پارچا و نازئک کتانين آراسينا نفئس توخونموش ناخيشلار تئکدئلر.

39:4  ائکي چئيئنلئک دوزلتدئلر کي، اِفودون هر ائکي اوجونو بئربئرئنه باغلاييردي.

39:5  اونو اوستوندن باغلايان ناخيشلي کمر، هَمن حئصّه‌دن يعني او دا قيزيلدان، لاجورد، ارغواني و قيرميزي پارچا و نفئس توخونموش نازئک کتاندان ائدي. نجه کي، رب موسايا امراتمئشدي.

39:6  دامارلی عقئق داشلاري کی، اونلارين اوستونده ائسرايئل اوغوللارينين آدلاري مؤهور اويماسي کئمي حکّ اولونموشدو و حؤرمه قيزيل ساغاناقلارا سالينميشدي،

39:7  اِفودون چئيئنلئکلرئنه تاخديلار. بونلار ائسرايئلئن اوغوللارينين خاطئره داشلاريدير. نجه کي، رب موسايا امراتمئشدي.

39:8  دؤشلويو ده اِفود کئمي ناخيشلي قيزيلدان، لاجورد، ارغواني و قيرميزي پارچا و نفئس توخونموش نازئک کتاندان دوزلتدي.

39:9  دؤشلوک موربّع شَکلئنده ائکي قات ائدي؛ اوزونلوغو بئر قاريش، اِني ده بئر قاريش دوزلتدئلر.

39:10  اوستونه دؤرد سيرا داش تاخديلار. بئرئنجي سيرا ياقوت، توپاز، زومرود؛

39:11  ائکئنجي سيرا فئروزه، لاجورد داشي و آغ عقئق؛

39:12  اوچونجو سيرا سئرکون، عقئق و آمِتئست؛

39:13  دؤردونجو سيرا زبرجد، دامارلي عقئق و يَشَم داشي ائدي. بو داشلار حؤرمه قيزيل ساغاناقلارا تاخيلدي.

39:14  داشلار ائسرايئلئن اوغوللارينين آدلارينا گؤره اون ائکي و اون ائکي قبئله اوچون نظرده توتولموشدو، هر بئر آدين اويما مؤهورو ائدي.

39:15  دؤشلوکده خالئص قيزيلدان ائپه بَنزَر بورما زنجئرلر قاييرديلار.

39:16  ائکي حؤرمه قيزيل ساغاناق و ائکي قيزيل حالقا دوزلتدئلر. ائکي حالقاني دؤشلويون ائکي اوجونا تاخديلار.

39:17  ائکي قيزيل ائپي دؤشلويون اوجلارينداکي ائکي حالقايا تاخديلار؛

39:18  ائپلرئن او بئري اوجلاريني ائکي حؤرمه ساغاناغا تاخيب، اِفودون چئيئنلئکلرئنئن قاباق طرفئنه باغلاديلار.

39:19  گئنه ده ائکي قيزيل حالقا دوزَلدئب، اونلاري دؤشلويون ائکي اوجونا، اِفودلا ياناشي ائچ قاتينا تاخديلار.

39:20  داها ائکي قيزيل حالقا دوزلتدئلر و اونلاري اِفودون چئيئنلئکلرئنئن قاباق طرفئنه، آشاغي‌يا، اِفودون ناخيشلي کمري ائله بئرلَشمه‌ اوستونه بَرکئتدئلر.

39:21  دؤشلوک حالقالاري ائله اِفودون حالقالاريني لاجورد قايتانلا باغلاييب، ناخيشلي اِفودون کمرئنئن اوستونه بَرکئتدئلر کي، دؤشلوک اِفوددان ساللانماسين. نجه کي، رب موسايا امراتمئشدي.

39:22  اِفودون جوبّه‌سئني تامامن توخونما لاجورد پارچادان تئکدئلر.

39:23  جوبّه‌نئن اورتاسيندا ير تئکدئلر، اونون قيراغيندا جيريلماماق اوچون بئر ياخا توخودولار.

39:24  جوبّه‌نئن اَته‌يئنئن اطرافينا لاجورد، ارغواني و قيرميزي پارچادان و نفئس توخونموش کتاندان نارلار دوزدولر.

39:25  خالئص قيزيل زينقيروولار دوزَلدئب، جوبّه‌نئن اَته‌يي بويونجا نارلارين آراسينا تئکدئلر.

39:26  بلجه خئدمت جوبّه‌سئنئن اَته‌يي بويونجا اطرافيندا زينقيروو و نار، سئره ائله دوزولدو. نجه کي، رب موسايا امراتمئشدي.

39:27  هارون و اوغوللاري اوچون توخونما نازئک کتان خئرقه‌لري،

39:28  نفئس توخونموش نازئک کتاندان عمّامه، نازئک کتان پاپاقلاري، اَيئرمه نازئک کتان آلت پالتاري،

39:29  نفئس توخونموش نازئک کتان و لاجورد، ارغواني و قيرميزي پارچادان ناخيش تئکمه‌لي قورشاغي تئکدئلر. نجه کي، رب موسايا امراتمئشدي.

39:30  خالئص قيزيلدان موقدّس تاج اولان لؤوحه‌جئيي دوزلتدئلر و اونون اوستونده مؤهور اويماسي اولاراق "ربّه موقدّسدئر" يازيسيني يازديلار.

39:31  لاجورد قايتان تئکدئلر کي، اونو عمّامه‌نئن اوستونه قويسونلار. نجه کي، رب موسايا امراتمئشدي.

39:32  بلجه خيمه، يعني حوضور چاديري اوچون بوتون ائشلر باشا چاتدي. رب موسايا نجه امر اتمئشدي، ائسرايئل اؤولادلاري دا بو ائشي اِلَجه تاماملاديلار.

39:33  خيمه‌ني موسانين يانينا گتئردئلر. چاديريني و اونون بوتون لوازئماتيني، گئره‌لرئني، چَرچئوه‌لرئني، دئرَکلرئني، سوتونلاريني، آلتليقلاريني،

39:34  قيرميزي بويانميش قوچ دَرئلرئندن اؤرتويو، سو ائتي دَرئلرئندن دوزَلدئلمئش اؤرتويو، آراکَسمه پرده‌سئني،

39:35  شهادت سانديغي و اونون دئرَکلرئني، کفّاره قاپاغيني؛

39:36  مئزي و اونون لوازئماتيني؛ تقدئس چؤرکلرئني،

39:37  خالئص قيزيلدان چيراقداني، اونون دوزولموش چيراقلاريني و ائشيق ياغيني،

39:38  قيزيل قوربانگاهيني، مسح ياغيني، عطئرلي بوخورو، چاديرين گئرئش آراکَسمه‌سئني،

39:39  بورونج قوربانگاهيني، قوربانگاهين بورونج تورونو، اونون دئرَکلرئني و بوتون لوازئماتيني، بؤيوک لَيه‌ني و اونون آلتليغيني،

39:40  حيطئن پرده‌لرئني، سوتونلاريني و آلتليقلاريني، حيطئن دروازاسي اوچون آراکَسمه‌ني، اونون ائپلرئني و ميخلاريني، خيمه يعني حوضور چاديري و خيمه‌نئن عئبادتي اوچون بوتون اشيالاري،

39:41  موقدّس يرده خئدمت اوچون توخونموش پالتارلاري، کاهئن هارونون موقدّس پالتارلاري و اوغوللارينين کاهئنلئک اتمه پالتارلاري اونا گتئردئلر.

39:42  رب موسايا نجه امراتمئشدي، ائسرايئل اؤولادلاري دا بو ائشي اِلَجه تاماملاديلار.

39:43  موسا بوتون ائشلري نظردن کچئردئب گؤردو کي، اونلار بو ائشه ربّئن امر اتدئيي کئمي عمل ادئبلر. موسا اونلارا برکت وردی.

Chapter 40

40:1  رب موسايا ددي:

40:2  "بئرئنجي آيين بئرئنجي گونو ربّئن خيمه‌سئني يعني حوضور چاديريني قور.

40:3  شهادت سانديغي اورايا قوي و پرده ائله قاباغيني کَس.

40:4  سونرا مئزي گتئر، اوستونه اشيالاري دوز. چيراقداني گتئر، چيراقلاري دا قوراشدير.

40:5  بوخور اوچون قيزيل قوربانگاهي شهادت سانديغينين قاباغينا قوي. خيمه‌نئن گئرئش آراکَسمه‌سئني ده قور.

40:6  يانديرما قوربانلاري اوچون قورولان قوربانگاهي خيمه‌نئن يعني حوضور چاديرينين گئرئشئنئن موقابئلئنده يِرلَشدئر.

40:7  بؤيوک لَيه‌ني حوضور چاديري ائله قوربانگاهين آراسينا قوي، ائچئنه سو تؤک.

40:8  اطراف حيطي و حيطئن دروازاسينين آراکَسمه‌سئني قور.

40:9  سونرا مسح ياغيني گؤتوروب، خيمه‌ني و ائچئنده‌کي هر شيي مسح ات؛ بلجه اونو و بوتون لوازئماتيني تقدئس ات کي، موقدّس اولسون.

40:10  يانديرما قوربانلاري اوچون قورولان قوربانگاهي، اونون لوازئماتيني مسح ات و قوربانگاهي تقدئس ات کي، او لاپ موقدّس اولاجاق.

40:11  بؤيوک لَيه‌ني و اونون آلتليغيني مسح ادئب، تقدئس ات.

40:12  هارونلا اوغوللاريني حوضور چاديرينين گئرئشئنه گتئر و اورادا سو ائله يويوندور.

40:13  هارونا موقدّس پالتارلار گِيئندئر. اونو مسح ادئب، تقدئس ات کي، منه کاهئنلئک اتسئن.

40:14  سونرا هارونون اوغوللاريني گتئرئب، اونلارا خئرقه‌لر گِيئندئر.

40:15  آتالاريني مسح اتدئيي کئمي اونلاري دا مسح ات کي، منه کاهئنلئک اتسئنلر. اونلار نسئلدن-نسله ابدی کاهئنلئک اوچون مسح اولوناجاقلار."

40:16  رب موسايا نجه امراتمئشدي، او دا بو جور اتدي.

40:17  بلجه ائکئنجي ائلئن، بئرئنجي آيين بئرئنجي گونونده خيمه قورولدو.

40:18  موسا خيمه‌ني قوردو: آلتليقلاريني قويدو، چَرچئوه‌لرئني بَرکئتدي، دئرَکلرئني قوردو و سوتونلاريني دئکَلتدي.

40:19  خيمه‌نئن اوستونه چادير سالدي، اونون اوستونه ده چاديرين اؤرتويونو قويدو. ربّئن موسايا امر اتدئيي کئمي اولدو.

40:20  بوندان سونرا او شهادت لؤوحه‌لرئني گؤتوروب، سانديغين ائچئنه قويدو. دئرَکلري سانديغا تاخدي، کفّاره قاپاغيني دا سانديغين اوستونه قويدو.

40:21  سانديغي خيمه‌نئن ائچئنه گتئردي و آراکَسمه پرده‌سئني قوروب، شهادت سانديغينين قاباغيني کَسدي. ربّئن موسايا امر اتدئيي کئمي اولدو.

40:22  مئزي حوضور چاديرينين ائچئنده، خيمه‌نئن شئمال طرفئنده، پرده‌نئن بايير طرفئندن يِرلَشدئردي.

40:23  اونون اوستونه ربّئن حوضوروندا چؤرک دوزدو. ربّئن موسايا امر اتدئيي کئمي اولدو.

40:24  چيراقداني دا حوضور چاديرينين ائچئنده، مئزئن موقابئلئنده، خيمه‌نئن جنوب طرفئنده يِرلَشدئردي.

40:25  چيراقلاريني دا ربّئن حوضوروندا قوراشديردي. ربّئن موسايا امر اتدئيي کئمي اولدو.

40:26  قيزيل قوربانگاهي دا حوضور چاديرينين ائچئنده، پرده‌نئن قاباغيندا يِرلَشدئردي؛

40:27  اونون اوستونده عطئرلي بوخور يانديردي. ربّئن موسايا امر اتدئيي کئمي اولدو.

40:28  خيمه‌نئن گئرئشئنده آراکَسمه‌ني قوردو.

40:29  يانديرما قوربانلاري اوچون قورولان قوربانگاهي، خيمه‌نئن، يعني حوضور چاديرينين گئرئشئنده يرلشدئردي؛ اونون اوستونده يانديرما قوربانيني و تاخيل تقدئمئني گتئردي. ربّئن موسايا امر اتدئيي کئمي اولدو.

40:30  بؤيوک لَيه‌ني حوضور چاديري ائله قوربانگاه آراسيندا يِرلَشدئرئب، ائچئنه يويونماق اوچون سو تؤکدو.

40:31  موسا، هارون و هارونون اوغوللاري اورادا اَل-آياقلاريني يودولار.

40:32  نه زامان حوضور چاديرينا گئردئلر، نه زامان قوربانگاها ياخينلاشديلار، ربّئن موسايا امر اتدئيي کئمي يويوندولار.

40:33  خيمه‌ ائله قوربانگاهين اطرافيندا حيطي قوردو و حيط دروازاسينين آراکَسمه‌سئني آسدي. بلجه موسا ائشلري تاماملادي.

40:34  او واخت بولود حوضور چاديريني بورودو و ربّئن جلالي خيمه‌ني دولدوردو.

40:35  موسا حوضور چاديرينا گئره بئلمه‌دي، چونکي بولود اونون اوستونده يرلشمئشدي و ربّئن جلالي خيمه‌ني دولدورموشدو.

40:36  ائسرايئل اؤولادلارينين بوتون سفري بويو بولود خيمه‌نئن اوستوندن قالخاندا يولا دوشَردئلر؛

40:37  لاکئن بولود قالخماياندا، قالخديغي گونه قدر يولا دوشمَزدئلر.

40:38  بوتون سفرلري بويو ائسرايئل اؤولادلارينين گؤزلري قاباغيندا گوندوز ربّئن بولودو خيمه‌نئن اوستونده، گجه‌لر ده اود بولودون ائچئنده ائدي.