Geez - Exodus

Chapter 1

1:1  (ኦሪት ፡ ዘፀአት ።)ዝውእቱ ፡ አስማቲሆሙ ፡ ለደቂቀ ፡ እስራኤል ፡ እለ ፡ ቦኡ ፡ ብሔረ ፡ ግብጽ ፡ ምስለ ፡ ያዕቆብ ፡ አቡሆሙ ፡ [ለ]ለአሐዱ ፡ አሐዱ ፡ በበ ፡ አዕጻዲሆሙ ፡ ቦኡ ።

1:2  ሮቤል ፡ ወስምዖን ፡ ወሌዊ ፡ ወይሁዳ ።

1:3  ወይ[ሳኮ]ር ፡ ወዛቡሎን ፡ ወብንያም ።

1:4  ወዳን ፡ ወንፍታሌም ፡ ወጋድ ፡ ወአሴር ።

1:5  ወዮሴፍሰ ፡ ሀሎ ፡ ብሔረ ፡ ግብጽ ፡ ወኮነት ፡ ኵሉ ፡ ነፍስ ፡ እንተ ፡ እምያዕቆብ ፡ ፸፭ ።

1:6  ወሞተ ፡ ዮሴፍ ፡ ወኵሉ ፡ አኀዊሁ ፡ ወኵሉ ፡ ውእቱ ፡ ትውልድ ።

1:7  ወበዝኁ ፡ ደቂቀ ፡ እስራኤል ፡ ወመልኡ ፡ ወኮኑ ፡ ሕቁራነ ፡ ወጸንዑ ፡ ጥቀ ፡ ዕዙዘ ፡ ወመልአት ፡ ምድር ፡ እምኖሙ ።

1:8  ወተንሥአ ፡ ንጉሥ ፡ ካልእ ፡ ዲበ ፡ ግብጽ ፡ ዘአያአምሮ ፡ ለዮሴፍ ።

1:9  ወይቤሎሙ ፡ ለአሕዛብ ፡ ናሁ ፡ ሕዝበ ፡ ደቂቀ ፡ እስራኤል ፡ ዐቢይ ፡ ወብዙኅ ፡ ወይጸንዑነ ።

1:10  ንዑ ፡ ንጠበቦሙ ፡ እስመ ፡ እምከመ ፡ በዝኁ ፡ ወቦከመ ፡ በጽሐነ ፡ ፀብእ ፡ ይትዌሰኩ ፡ እሉኒ ፡ ዲበ ፡ ፀርነ ፡ ወይፀብኡነ ፡ ወይወፅኡ ፡ እምድርነ ።

1:11  ወሤመ ፡ ዲቤሆሙ ፡ ሊቃነ ፡ ገባር ፡ ከመ ፡ ይሣቅይዎሙ ፡ በግብር ፤ ወነደቁ ፡ አህጉረ ፡ ጽኑዓተ ፡ ለፈርዖን ፡ ፈቶ[ም ፡] ወራምሴ ፡ ወኦን ፡ እንተ ፡ ይእቲ ፡ ሀገረ ፡ ፀሐይ ።

1:12  ወበአምጣነ ፡ ይሣቅይዎሙ ፡ ከማሁ ፡ ይበዝኁ ፡ ወይጸንዑ ፡ ወያስቆርርዎሙ ፡ ግብጽ ፡ ለደቂቀ ፡ እስራኤል ።

1:13  ወይትኤገልዎሙ ፡ ግብጽ ፡ ለደቂቀ ፡ እስራኤል ፡ በሥቃይ ።

1:14  ወያጼዕሩ ፡ ሕይወተ ፡ ነፍሶሙ ፡ በግብር ፡ ዕፁብ ፡ በፅቡር ፡ ወበግንፋል ፡ ወበኵሉ ፡ ግብረ ፡ ሐቅል ፡ ወበኵሉ ፡ ግብር ፡ ዘይቀንይዎሙ ፡ በሥቃይ ።

1:15  ወይቤሎን ፡ ንጉሠ ፡ ግብጽ ፡ ለመወልደተ ፡ ዕብራይ ፡ ስማ ፡ ለአሐቲ ፡ ስፓ[ራ] ፡ ወስመ ፡ ካልእታ ፡ ፎሓ ።

1:16  ወይቤሎን ፡ ሶበ ፡ ታወልደሆን ፡ ለዕብራዊያት ፡ እምከመ ፡ በጽሐት ፡ ለወሊድ ፡ እመ ፡ ተባዕት ፡ ውእቱ ፡ ቅትላሁ ፡ ወእመሰ ፡ አንስት ፡ አውልዳሃ ።

1:17  ወፈርሃሁ ፡ ለእግዚአብሔር ፡ ዝኩ ፡ መወልደት ፡ ወኢገብራ ፡ በከመ ፡ አዘዞን ፡ ንጉሠ ፡ ግብጽ ፡ ወአሕየዋ ፡ ተባዕተ ።

1:18  ወጸውዖን ፡ ንጉሠ ፡ ግብጽ ፡ ለመወልዳት ፡ ወይቤሎን ፡ እፎኑ ፡ ከመ ፡ ትገብራ ፡ ከመዝ ፡ ወታ[ሐ]ይዋ ፡ ተባዕተ ።

1:19  ወይቤላሁ ፡ መወልደት ፡ ለፈርዖን ፡ አኮ ፡ ከመ ፡ አንስተ ፡ ግብጽ ፡ ዕብራዊያት ፤ እንበለ ፡ ትምጻእ ፡ መወልድ ፡ ይወልዳ ።

1:20  ወአሠነየ ፡ እግዚአብሔር ፡ ለመወልዳት ፡ ወመልአ ፡ ሕዝብ ፡ ወጸንዐ ፡ ጥቀ ።

1:21  ወእስመ ፡ ፈርሃሁ ፡ ለእግዚአብሔር ፡ መወልደት ፡ ገብራ ፡ አብያተ ።

1:22  ወአዘዘ ፡ ፈርዖን ፡ ለኵሉ ፡ ሕዝቡ ፡ ወይቤሎሙ ፡ ኵሎ ፡ ተባዕተ ፡ ዘይትወለድ ፡ ለዕብራይ ፡ ግርዎ ፡ ውስተ ፡ ተከዚ ፡ ወኵሎ ፡ አንስተ ፡ አሕይው ።

Chapter 2

2:1  ወሀሎ ፡ አሐዱ ፡ እምነገደ ፡ ሌዊ ፡ ዘነሥአ ፡ ሎቱ ፡ እምአዋልደ ፡ ሌዊ ፡ ብእሲተ ።

2:2  (ወነበረ ፡ ምስሌሃ ፡) ወፀንሰት ፡ ወወለደት ፡ ተባዕተ ፡ ወሶበ ፡ ርእይዎ ፡ ከመ ፡ ሠናይ ፡ አንበርዎ ፡ ሠለስተ ፡ አውራኀ ።

2:3  ወእስመ ፡ ስእኑ ፡ እንከ ፡ ኀቢኦቶ ፡ ነሥአት ፡ እሙ ፡ ነፍቀ ፡ ወቀብአታ ፡ አስፋሊጦ ፡ ወፒሳ ፡ ወወደየቶ ፡ ለውእቱ ፡ ሕፃን ፡ ውስቴቱ ፡ ወሤመቶ ፡ ውስተ ፡ ማዕዶት ፡ ኀበ ፡ ተከዚ ።

2:4  ወትኄውጽ ፡ እኅቱ ፡ እምርኁቅ ፡ ከመ ፡ ታእምር ፡ ምንት ፡ ትበጽሖ ።

2:5  ወወረደት ፡ ወለተ ፡ ፈርዖን ፡ ትትኀፀብ ፡ በውስተ ፡ ተከዚ ፡ ወአንሶሰዋ ፡ አዋልዲሃ ፡ ኀበ ፡ ተከዚ ፡ ወሶበ ፡ ርእየታ ፡ ለይእቲ ፡ ነፍቅ ፡ ውስተ ፡ ማዕዶት ፡ ፈነወት ፡ ወለታ ፡ ወአምጽአታ ።

2:6  ወከሠተታ ፡ ወትሬኢ ፡ ሕፃን ፡ ይበኪ ፡ ውስተ ፡ ውእቱ ፡ ነፍቅ ፡ ወምሕረቶ ፡ ወለተ ፡ ፈርዖን ፡ ወትቤ ፡ እምደቂቀ ፡ ዕብራዊያት ፡ ውእቱዝ ፡ ሕፃን ።

2:7  ወትቤላ ፡ እኅቱ ፡ ለውእቱ ፡ ሕፃን ፡ ለወለተ ፡ ፈርዖን ፡ ትፈቅዲኑ ፡ እጸውዕ ፡ ለኪ ፡ ብእሲተ ፡ ሐፃኒተ ፡ እምዕብራዊያት ፡ ወትሕፅኖ ፡ ለዝ ፡ ሕፃን ።

2:8  ወትቤላ ፡ ወለተ ፡ ፈርዖን ፡ ሑሪ ፡ ወመጽአት ፡ እንታክቲ ፡ ወለት ፡ ወጸውዐታ ፡ ለእሙ ፡ ለውእቱ ፡ ሕፃን ።

2:9  ወትቤላ ፡ ወለተ ፡ ፈርዖን ፡ ዕቀቢ ፡ ሊተ ፡ ዘሕፃነ ፡ ወሕፀንዮ ፡ ሊተ ፡ ወአነ ፡ እሁበኪ ፡ ዐስበኪ ፡ ወነሥአቶ ፡ ይእቲ ፡ ብእሲት ፡ ለውእቱ ፡ ሕፃን ፡ ወሐፀነቶ ።

2:10  ወሶበ ፡ ጸንዐ ፡ ውእቱ ፡ ሕፃን ፡ ወሰደቶ ፡ ኀበ ፡ ወለተ ፡ ፈርዖን ፡ ወኮና ፡ ወልዳ ፡ ወሰመየቶ ፡ ስሞ ፡ ሙሴ ፡ ወትቤ ፡ እስመ ፡ እማይ ፡ አውፃእክዎ ።

2:11  ወኮነ ፡ እምድኅረ ፡ ብዙኅ ፡ መዋዕል ፡ ልህቀ ፡ ሙሴ ፡ ወወፅአ ፡ ኀበ ፡ አኀዊሁ ፡ ወርእየ ፡ ሕማሞሙ ፡ ወረከበ ፡ ብእሲ ፡ ግብጻዊ ፡ ይዘብጦ ፡ ለ፩ዕብራዊ ፡ እምአኀዊሁ ፡ ደቂቀ ፡ እስራኤል ።

2:12  ወነጸረ ፡ ለፌ ፡ ወለፌ ፡ ወአልቦ ፡ ዘርእየ ፡ ወቀተሎ ፡ ለዝኩ ፡ ግብጻዊ ፡ ወደፈኖ ፡ ውስተ ፡ ኆጻ ።

2:13  ወወፅአ ፡ በሳኒታ ፡ ዕለት ፡ ወረከበ ፡ ክልኤተ ፡ ዕደወ ፡ ዕብራዊያን ፡ እንዘ ፡ ይትጋደሉ ፡ ወይቤሎ ፡ ሙሴ ፡ ለዘይገፍዕ ፡ ለምንት ፡ ትዘብጦ ፡ ለካልእከ ።

2:14  ወይቤሎ ፡ መኑ ፡ ሤመከ ፡ መልአከ ፡ ወመኰንነ ፡ ዲቤነ ፡ አው ፡ ትቅትለኒኑ ፡ ትፈቅድ ፡ አንተ ፡ በከመ ፡ ቀተልካሁ ፡ ለግብጻዊ ፡ ትማልም ፤ ወፈርሀ ፡ ሙሴ ፡ ወይቤ ፡ ከመዝኑ ፡ ክሡተ ፡ ኮነ ፡ ዝነገር ።

2:15  [ወሰምዐ ፡ ፈርዖን ፡ ዘንተ ፡ ነገረ ፡] ወፈቀደ ፡ ይቅትሎ ፡ (ፈርዖን ፡) ለሙሴ ፡ ወተግሕሠ ፡ ሙሴ ፡ እምገጸ ፡ ፈርዖን ፡ ወኀደረ ፡ ውስተ ፡ ምድረ ፡ ምድያም ፡ ወሶበ ፡ በጽሐ ፡ አሐተ ፡ ምድረ ፡ ምድያም ፡ ነበረ ፡ ዲበ ፡ ዐዘቅት ።

2:16  ወቦ ፡ [ለ]ማርየ ፡ ምድያም ፡ ፯አዋልደ ፡ ወይርዕያ ፡ አባግዐ ፡ አቡሆን ፡ ወሶበ ፡ መጽኣ ፡ ሔባ ፡ ሎንቶን ፡ እስከ ፡ መልኣ ፡ ገብላተ ፡ ከመ ፡ ያስትያ ፡ አባግዐ ፡ አቡሆን ።

2:17  ወሶበ ፡ መጽኡ ፡ ኖሎት ፡ አሰሰልዎን ፡ ወተንሥአ ፡ ሙሴ ፡ ወአድኀኖን ፡ ወአስተየ ፡ አባግዐ ።

2:18  ወሖራ ፡ ኀበ ፡ ራጕኤል ፡ አቡሆን ፡ ወይቤሎን ፡ እፎመ ፡ አፍጠንክን ፡ መጺአ ፡ ዮምሰ ።

2:19  ወይቤላሁ ፡ ብእሲ ፡ ግብጻዊ ፡ አድኀነነ ፡ እምኖሎት ፡ ወሔበ ፡ ለነ ፡ ወአስተየ ፡ አባግዒነ ።

2:20  ወይቤሎን ፡ ለአዋልዲሁ ፡ ወኢይቴ ፡ ውእቱ ፡ ወለምንት ፡ ከመዝ ፡ ኀደጋሁ ፡ ለብእሲ ፡ ጸውዓሁ ፡ ከመ ፡ ይብላዕ ፡ እክለ ።

2:21  ወኀደረ ፡ ሙሴ ፡ ኀበ ፡ ውእቱ ፡ ብእሲ ፡ ወወሀቦ ፡ ወለቶ ፡ ሲፕራ ፡ ለሙሴ ፡ ትኩኖ ፡ ብእሲተ ።

2:22  ወፀንሰት ፡ ይእቲ ፡ ብእሲት ፡ ወወለደት ፡ ወልደ ፡ ወሰመዮ ፡ ስሞ ፡ ሙሴ ፡ ጌርሳም ፡ ወይቤ ፡ እስመ ፡ ነግድ ፡ አነ ፡ በምድር ፡ ነኪር ። (ወካልአ ፡ ወለደ ፡ ወሰመዮ ፡ ኤልያዛር ፡ እንዘ ፡ ይብል ፡ ወአምላከ ፡ አቡየ ፡ ረዳኢየ ፡ አደኀነኒ ፡ እምእደ ፡ ፈርዖን ።)

2:23  ወእምድኅረ ፡ ብዙኅ ፡ መዋዕል ፡ ሞተ ፡ ንጉሠ ፡ ግብጽ ፡ ወግዕሩ ፡ ደቂቀ ፡ እስራኤል ፡ እምግብሮሙ ፡ ወአውየው ፡ ወዐርገ ፡ አውያቶሙ ፡ ኀበ ፡ እግዚአብሔር ፡ እምግብሮሙ ።

2:24  ወሰምዐ ፡ እግዚአብሔር ፡ ገዓሮሙ ፡ ወተዘከረ ፡ እግዚአብሔር ፡ መሐላሁ ፡ ዘኀበ ፡ አብርሃም ፡ ወይስሐቅ ፡ ወያዕቆብ ።

2:25  ወኀወጾሙ ፡ እግዚአብሔር ፡ ለደቂቀ ፡ እስራኤል ፡ ወተአምረ ፡ ሎሙ ።

Chapter 3

3:1  ወሀሎ ፡ ሙሴ ፡ ይርዒ ፡ አባግዐ ፡ ዮቶር ፡ ሐሙሁ ፡ ማርየ ፡ ምድያም ፡ ወወሰደ ፡ አባግዒሁ ፡ ሐቅለ ፡ ወበጽሐ ፡ ውስተ ፡ ኮሬብ ፡ ደብረ ፡ እግዚአብሔር ።

3:2  ወአስተርአዮ ፡ ለሙሴ ፡ መልአከ ፡ እግዚአብሔር ፡ በነደ ፡ እሳት ፡ እምዕፀት ፡ ወርእየ ፡ ሙሴ ፡ ከመ ፡ እምዕፀት ፡ ይነድድ ፡ እሳት ፡ ወዕፀታ ፡ ኢትውዒ ።

3:3  ወይቤ ፡ ሙሴ ፡ እብጻሕ ፡ እርአይ ፡ ዘራእየ ፡ ዐቢየ ፡ እፎ ፡ ከመ ፡ ኢትውዒ ፡ ዛዕፀት ።

3:4  ወሶበ ፡ ርእየ ፡ እግዚእ ፡ ከመ ፡ መጽአ ፡ ይርአይ ፡ ጸውዖ ፡ እግዚእ ፡ እምዕፀት ፡ ወይቤሎ ፡ ሙሴ ፡ ሙሴ ፡ ወይቤ ፡ ምንትኑ ፡ ውእቱ ።

3:5  ወይቤሎ ፡ ኢትቅረብ ፡ ዝየ ፡ ፍታኅ ፡ አሣእኒከ ፡ እምእገሪከ ፡ እስመ ፡ መካን ፡ እንተ ፡ አንተ ፡ ትቀውም ፡ ምድር ፡ ቅድስት ፡ ይእቲ ።

3:6  ወይቤሎ ፡ አነ ፡ ውእቱ ፡ አምላከ ፡ አቡከ ፡ አምላከ ፡ አብርሃም ፡ ወአምላከ ፡ ይስሐቅ ፡ ወአምለከ ፡ ያዕቆብ ፡ ወሜጠ ፡ ሙሴ ፡ ገጾ ፡ እስመ ፡ ፈርሀ ፡ ነጽሮ ፡ ቅድመ ፡ እግዚአብሔር ።

3:7  ወይቤሎ ፡ እግዚእ ፡ ለሙሴ ፡ ርእየ ፡ ርኢኩ ፡ ሥቃዮሙ ፡ ለሕዝብየ ፡ እለ ፡ ውስተ ፡ ግብጽ ፡ ወአውያቶሙ ፡ ሰማዕኩ ፡ እምነዳእተ ፡ ገባር ፡ ወአእመርኩ ፡ ጻዕሮሙ ።

3:8  ወወረድኩ ፡ ከመ ፡ አድኅኖሙ ፡ እምእደ ፡ ግብጽ ፡ ወእስዶሙ ፡ ውስተ ፡ ምድር ፡ ሠናይት ፡ ወብዝኅት ፡ ወአወፅኦሙ ፡ እምይእቲ ፡ ምድር ፡ ውስተ ፡ ምድር ፡ እንተ ፡ ትውኅዝ ፡ ሐሊበ ፡ ወመዓረ ፡ ውስተ ፡ መካኖሙ ፡ ለከናኔዎን ፡ ወለኬጤዎን ፡ ወለአሞሬዎን ፡ ወለፌሬዜዎን ፡ ወለኤዌዎን ፡ ወለጌ[ር]ጌሴዎን ፡ ወለኢያ[ቡ]ሴዎን ።

3:9  ወይእዜኒ ፡ ናሁ ፡ ገዓሮሙ ፡ ለደቂቀ ፡ እስራኤል ፡ በጽሐ ፡ ኀቤየ ፡ ወርኢኩ ፡ አነ ፡ ሥቃዮሙ ፡ ዘይሣቅይዎሙ ፡ ግብጽ ።

3:10  ወይእዜኒ ፡ ነዓ ፡ እፈኑከ ፡ ኀበ ፡ ፈርዖን ፡ ንጉሠ ፡ ግብጽ ፡ ወታወጽእ ፡ ሕዝብየ ፡ ደቂቀ ፡ እስራኤል ፡ እምድረ ፡ ግብጽ ።

3:11  ወይቤሎ ፡ ሙሴ ፡ ለእግዚአብሔር ፡ መኑ ፡ አነ ፡ ከመ ፡ እሑር ፡ ኀበ ፡ ፈርዖን ፡ ንጉሠ ፡ ግብጽ ፡ ወከመ ፡ አውጽኦሙ ፡ ለደቂቀ ፡ እስራኤል ፡ እምድረ ፡ ግብጽ ።

3:12  ወይቤሉ ፡ እግዚእ ፡ እስመ ፡ አነ ፡ ሀለውኩ ፡ ምስሌከ ፡ ወዝንቱ ፡ ተአምር ፡ ለከ ፡ ከመ ፡ አነ ፡ እፌንወከ ፡ ሶበ ፡ አውጻእካሆሙ ፡ ለሕዝብየ ፡ እምብሔረ ፡ ግብጽ ፡ ወትፀመድዎ ፡ ለእግዚአብሔር ፡ በዝ ፡ ደብር ።

3:13  ወይቤሎ ፡ ሙሴ ፡ ለእግዚአብሔር ፡ ወናሁ ፡ አነ ፡ አሐውር ፡ ኀበ ፡ ደቂቀ ፡ እስራኤል ፡ ወእብሎሙ ፡ አምለከ ፡ አበዊክሙ ፡ ፈነወኒ ፡ ኀቤክሙ ፡ ወይስ[እ]ሉኒ ፡ ስሞሂ ፡ ምንተ ፡ እብሎሙ ።

3:14  ወይቤሎ ፡ እግዚአብሔር ፡ አነ ፡ ውእቱ ፡ ዘሀሎ ፡ ወይቤሎ ፡ ከመዝ ፡ ትብሎሙ ፡ ለደቂቀ ፡ እስራኤል ፡ ዘሀሎ ፡ ፈነወኒ ፡ ኀቤክሙ ።

3:15  ወዓዲ ፡ ይቤሎ ፡ እግዚአብሔር ፡ ለሙሴ ፡ ከመዝ ፡ ትብሎሙ ፡ ለደቂቀ ፡ እስራኤል ፡ እግዚእ ፡ አምላከ ፡ አበዊክሙ ፡ ፈነወኒ ፡ ኀቤክሙ ፡ ዝውእቱ ፡ ስምየ ፡ ዘለዓለም ፡ ወዝክርየ ፡ ለትውልደ ፡ ትውልድ ።

3:16  ወመ[ጺአከ] ፡ አአስተጋብእ ፡ ርሥኣኒክሙ ፡ ለደቂቀ ፡ እስራኤል ፡ ወትብሎሙ ፡ እግዚእ ፡ አምላከ ፡ አበዊክሙ ፡ አስተርአየኒ ፡ አምላከ ፡ አብርሃም ፡ ወአምላከ ፡ ይስሐቅ ፡ ወአምላከ ፡ ያዕቆብ ፡ እንዘ ፡ ይብል ፡ ኀውጾ ፡ ኀወጽኩክሙ ፡ በእንተ ፡ ኵሉ ፡ እንተ ፡ በጽሐተክሙ ፡ በብሔረ ፡ ግብጽ ።

3:17  ወእቤ ፡ እንሣእክሙ ፡ እምሥቃየ ፡ ግብጽ ፡ ወአዐርገክሙ ፡ ውስተ ፡ ምድረ ፡ ከናኔዎን ፡ ወኬጤዎን ፡ ወኤዌዎን ፡ ወአሞሬዎን ፡ ወፌሬዜዎን ፡ ወጌርጌሴዎን ፡ ወኢያ[ቡ]ሴዎን ፡ ውስተ ፡ ምድር ፡ እንተ ፡ ትውኅዝ ፡ ሐሊበ ፡ ወመዓረ ።

3:18  ወይሰምዑ ፡ ቃለከ ፡ ወትበውእ ፡ አንተ ፡ ወአእሩገ ፡ እስራኤል ፡ ኀበ ፡ ንጉሠ ፡ ግብጽ ፡ ወትብሎ ፡ እግዚእ ፡ አምላከ ፡ ዕብራዊያን ፡ ጸውዐነ ፡ ወንሑር ፡ እንከ ፡ ምሕዋረ ፡ ሠሉስ ፡ ዕለት ፡ ውስተ ፡ ሐቅል ፡ ከመ ፡ ንሡዕ ፡ ለእግዚእ ፡ አምላክነ ።

3:19  ወአነ ፡ አአምር ፡ ከመ ፡ ኢያበውሐክሙ ፡ ፈርዖን ፡ ንጉሠ ፡ ግብጽ ፡ ትፃኡ ፡ እንበለ ፡ በእድ ፡ ጽንዕት ።

3:20  ወእሰፍሕ ፡ እዴየ ፡ ወእቀትሎሙ ፡ ለግብጽ ፡ በኵሉ ፡ መድምምየ ፡ ዘእገብር ፡ ቦሙ ፡ ወእምድኅረዝ ፡ ይፌንወክሙ ።

3:21  ወእሁቦ ፡ ሞገሰ ፡ ለዝ ፡ ሕዝብ ፡ ቅድሜሆሙ ፡ ለግብጽ ፡ ወአመ ፡ ተሐውሩ ፡ ኢትወፅኡ ፡ ዕራቃኒክሙ ።

3:22  አላ ፡ ታስተውሕስ ፡ ብእሲት ፡ እምጎራ ፡ ወእምኅደርታ ፡ ንዋየ ፡ ብሩር ፡ ወወርቅ ፡ ወልብስ ፡ ወደይዎ ፡ ዲበ ፡ ደቂቅክሙ ፡ ወዲበ ፡ አዋልዲክሙ ፡ ወተሐበልይዎሙ ፡ ለግብጽ ።

Chapter 4

4:1  ወአውሥአ ፡ ሙሴ ፡ ወይቤ ፡ ወእመኬ ፡ ኢአምኑኒ ፡ ወኢሰምዑ ፡ ቃልየ ፡ ወይቤሉኒ ፡ ኢያስተርአየከ ፡ እግዚእ ፡ ምንተ ፡ እብሎሙ ።

4:2  ወይቤሎ ፡ እግዚእ ፡ ለሙሴ ፡ ምንትዝ ፡ ዘውስተ ፡ እዴከ ፡ ወይቤ ፡ በትር ።

4:3  ወይቤሎ ፡ ግድፋ ፡ ውስተ ፡ ምድር ፡ [ወገደፋ ፡ ውስተ ፡ ምድር ፡] ወኮነት ፡ አርዌ ፡ ምድር ፡ ወጐየ ፡ ሙሴ ፡ እምኔሁ ።

4:4  ወይቤሎ ፡ እግዚእ ፡ ለሙሴ ፡ ስፋሕ ፡ እዴከ ፡ ወንሣእ ፡ በዘነቡ ፡ ወሰፍሐ ፡ እዴሁ ፡ ሙሴ ፡ ወነሥአ ፡ በዘነቡ ፡ ወኮነ ፡ በትረ ፡ ውስተ ፡ እዴሁ ።

4:5  ወይቤሎ ፡ ከመ ፡ ይእመኑከ ፡ ከመ ፡ አስተርአየከ ፡ እግዚእ ፡ አምላከ ፡ አበዊሆሙ ፡ አምላከ ፡ አብርሃም ፡ ወአምላከ ፡ ይስሐቅ ፡ ወአምላከ ፡ ያዕቆብ ።

4:6  ወይቤሎ ፡ እግዚእ ፡ ካዕበ ፡ ለሙሴ ፡ ደይ ፡ እዴከ ፡ ውስተ ፡ ሕፅንከ ፡ ወወደየ ፡ እዴሁ ፡ ውስተ ፡ ሕፅኑ ፡ ወይቤሎ ፡ አውፅእ ፡ እዴከ ፡ እምሕፅንከ ፡ ወአውፅአ ፡ እዴሁ ፡ እምሕፀኒሁ ፡ ወኮነት ፡ ጸዐዳ ፡ ኵለንታሃ ፡ ለምጽ ።

4:7  ወይቤሎ ፡ ካዕበ ፡ ደይ ፡ እዴከ ፡ ውስተ ፡ ሕፅንከ ፡ ወወደየ ፡ እዴሁ ፡ ውስተ ፡ ሕፀኒሁ ፡ ወዓዲ ፡ ይቤሎ ፡ አውጽእ ፡ እዴከ ፡ እምሕፅንከ ፡ ወአውጽአ ፡ እዴሁ ፡ እምሕፀኒሁ ፡ ወገብአት ፡ ከመ ፡ ኅብረ ፡ ሥጋሁ ።

4:8  ወይቤሎ ፡ እመ ፡ ኢአምኑከ ፡ ወኢሰምዑ ፡ ቃለከ ፡ በተአምር ፡ ዘቀዳሚ ፡ የአምኑ ፡ በቃለ ፡ ተአምሩ ፡ ለካልእ ።

4:9  ወእምከመ ፡ ኢአምኑ ፡ በእሉ ፡ ክልኤቱ ፡ ተአምር ፡ ወኢሰምዑ ፡ ቃለከ ፡ ትነሥእ ፡ እማየ ፡ ተከዚ ፡ ወትክዑ ፡ ውስተ ፡ የብስ ፡ ወይከውን ፡ ደመ ፡ ውስተ ፡ የብስ ፡ ዝኩ ፡ ማይ ፡ ዘነሣእከ ፡ እምተከዚ ።

4:10  ወይቤሎ ፡ ሙሴ ፡ ለእግዚእ ፡ ኣስተበቍዐከ ፡ እግዚኦ ፤ ቀዳሚየ ፡ ቃለ ፡ አልብየ ፡ ወትካትየ ፡ ወአይ ፡ እምአመ ፡ እእኅዝ ፡ [እን]ብብ ፡ ቍልዔከ ፤ ፀያፍ ፡ ወላእላአ ፡ ልሳን ፡ አነ ።

4:11  ወይቤሎ ፡ እግዚእ ፡ ለሙሴ ፡ መኑ ፡ ወሀቦ ፡ አፈ ፡ ለእጓለ ፡ እመሕያው ፡ ወመኑ ፡ ገብሮ ፡ በሃመ ፡ ወጽሙመ ፡ ወዘይሬኢ ፡ ወዕውረ ፡ ኢኮነሁ ፡ አነ ፡ እግዚእ ፡ እግዚአብሔር ።

4:12  ወይእዜኒ ፡ ሑር ፡ ወአነ ፡ እፈትሕ ፡ አፉከ ፡ ወአሌብወከ ፡ ዘሀለወከ ፡ ትንብብ ።

4:13  ወይቤ ፡ አስተበቍዐከ ፡ እግዚኦ ፤ ኅሥሥ ፡ ለከ ፡ ባዕደ ፡ ዘይክል ፡ ዘትልእክ ።

4:14  ወተምዐ ፡ መዐተ ፡ እግዚእ ፡ ዲበ ፡ ሙሴ ፡ ወይቤሎ ፡ አኮኑ ፡ ነዋ ፡ አሮን ፡ እኁከ ፡ ሌዋዊ ፡ ወአአምር ፡ ከመ ፡ ነቢበ ፡ ይነብብ ፡ ለከ ፤ ወናሁ ፡ ውእቱ ፡ ይወጽእ ፡ ይትቀበልከ ፡ ወይርአይከ ፡ ወይትፌሣሕ ።

4:15  ወትነግሮ ፡ ወትወዲ ፡ ቃልየ ፡ ውስተ ፡ አፉሁ ፡ ወአነ ፡ እፈትሕ ፡ አፉከ ፡ ወአፉሁ ፡ ወአሌብወክሙ ፡ ዘትገብሩ ።

4:16  ወውእቱ ፡ ይትናገር ፡ ለከ ፡ ኀበ ፡ ሕዝብ ፡ ወውእቱ ፡ ይኩንከ ፡ አፈ ፡ ወአንተ ፡ ትከውኖ ፡ ሎቱ ፡ ለኀበ ፡ እግዚአብሔር ።

4:17  ወለዛቲ ፡ በትር ፡ ንሥኣ ፡ ውስተ ፡ እዴከ ፡ እንተ ፡ ትገብር ፡ ባቲ ፡ ተአምረ ።

4:18  ወሖረ ፡ ሙሴ ፡ ወገብአ ፡ ኀበ ፡ ዮቶር ፡ ሐሙሁ ፡ ወይቤሎ ፡ አሐውር ፡ ወእገብእ ፡ ኀበ ፡ አ[ኀ]ዊየ ፡ እለ ፡ ውስተ ፡ ብሔረ ፡ ግብጽ ፡ ወእርአይ ፡ ለእመ ፡ ዓዲሆሙ ፡ ሕያዋን ፡ ወይቤሎ ፡ ዮቶር ፡ ለሙሴ ፡ ሑር ፡ በዳኅን ፤ ወእምድኅረ ፡ ብዙኅ ፡ መዋዕል ፡ ሞተ ፡ ንጉሠ ፡ ግብጽ ።

4:19  ወይቤሎ ፡ እግዚአብሔር ፡ ለሙሴ ፡ በምድረ ፡ ምድያም ፡ አዒ ፡ ወሑር ፡ ብሔረ ፡ ግብጽ ፡ እስመ ፡ ሞቱ ፡ ኵሎሙ ፡ እለ ፡ የኅሥ[ሥ]ዋ ፡ ለነፍስከ ።

4:20  ወነሥአ ፡ ሙሴ ፡ ብእሲቶ ፡ ወደቂቆ ፡ ወጸዐኖሙ ፡ ዲበ ፡ አእዱግ ፡ ወገብአ ፡ ብሔረ ፡ ግብጽ ፡ ወነሥአ ፡ ሙሴ ፡ ለእንታክቲ ፡ በትር ፡ እንተ ፡ እምኀበ ፡ እግዚአብሔር ፡ ውስተ ፡ እዴሁ ።

4:21  ወይቤሎ ፡ እግዚአብሔር ፡ ለሙሴ ፡ እንዘ ፡ ተሐውር ፡ ወትገብእ ፡ ብሔረ ፡ ግብጽ ፡ አእምር ፡ ኵሎ ፡ መድምምየ ፡ ዘወሀብኩከ ፡ ውስተ ፡ እደዊከ ፡ ከመ ፡ ትግበሮ ፡ ቅድሜሁ ፡ ለፈርዖን ፡ ወአነ ፡ ኣጸንዕ ፡ ልቦ ፡ ወኢይፌንዎ ፡ ለሕዝብ ።

4:22  ወአንተሰ ፡ ትብሎ ፡ ለፈርዖን ፡ ከመዝ ፡ ይቤ ፡ እግዚእ ፡ ወልድየ ፡ ዘበኵርየ ፡ ውእቱ ፡ እስራኤል ።

4:23  ወእብለከ ፡ ፈኑ ፡ ሕዝብየ ፡ ከመ ፡ ይፀመዱኒ ፡ ወአንተሰ ፡ ኢፈቀድከ ፡ ትፈንዎ ፡ አእምርኬ ፡ እንከ ፡ ከመ ፡ እቀትሎ ፡ አነ ፡ ለወልድከ ፡ ዘበኵርከ ።

4:24  ወኮነ ፡ በፍኖት ፡ በውስተ ፡ ማኅደር ፡ ተራከቦ ፡ መልአከ ፡ እግዚእ ፡ ወፈቀደ ፡ ይቅትሉ ።

4:25  ወነሥአት ፡ ሲፕራ ፡ መላጼ ፡ ወገዘረት ፡ ከተማ ፡ ነፍስቱ ፡ ለወልደ ፡ ወወ[ድ]ቀት ፡ ኀበ ፡ እገሪሁ ፡ ወትቤ ፡ ለይኩን ፡ ህየንቴሁ ፡ ዝደመ ፡ ግዝሮሁ ፡ ለወልድየ ።

4:26  ወሖረ ፡ እንከ ፡ እምኔሁ ፡ እስመ ፡ ትቤ ፡ ለይኩን ፡ ህየንቴሁ ፡ ዝደመ ፡ ግዝሮሁ ፡ ለወልድየ ።

4:27  ወይቤሎ ፡ እግዚእ ፡ ለአሮን ፡ ሑር ፡ ተቀበሎ ፡ ለሙሴ ፡ ውስተ ፡ ሐቅል ፡ ወሖረ ፡ ወተራከቦ ፡ በደብረ ፡ እግዚአብሔር ፡ ወተአምኆ ።

4:28  ወአይድዖ ፡ ሙሴ ፡ ለአሮን ፡ ኵሎ ፡ ቃለ ፡ እግዚእ ፡ ዘለአኮ ፡ ወኵሎ ፡ ተአምረ ፡ ዘአዘዞ ።

4:29  ወሖሩ ፡ ሙሴ ፡ ወአሮን ፡ ወአስተጋብኡ ፡ ኵሎ ፡ አእሩጎሙ ፡ ለደቂቀ ፡ እስራኤል ።

4:30  ወነገሮሙ ፡ አሮን ፡ ኵሎ ፡ ቃለ ፡ እንተ ፡ ነገሮ ፡ እግዚአብሔር ፡ ለሙሴ ፡ ወገብረ ፡ ተአምረ ፡ ቅድመ ፡ ሕዝብ ።

4:31  ወአምነ ፡ ሕንዝብ ፡ ወተፈሥሐ ፡ እስመ ፡ ሐወጾሙ ፡ እግዚአብሔር ፡ ለደቂቀ ፡ እስራኤል ፡ ወእስመ ፡ ርእየ ፡ ሥቃዮሙ ፡ ወአትሐተ ፡ ሕዝብ ፡ ርእሶ ፡ ወሰገደ ።

Chapter 5

5:1  ወእምድኅረዝ ፡ ቦኡ ፡ ሙሴ ፡ ወአሮን ፡ ኀበ ፡ ፈርዖን ፡ ወይቤልዎ ፡ ለፈርዖን ፡ ከመዝ ፡ ይቤ ፡ እግዚእ ፡ አምላከ ፡ እስራኤል ፡ ፈኑ ፡ ሕዝብየ ፡ ከመ ፡ ይግበሩ ፡ በዓልየ ፡ በሐቅል ።

5:2  ወይቤ ፡ ፈርዖን ፡ መኑ ፡ ውእቱ ፡ ዘእሰምዖ ፡ ቃሎ ፡ ከመ ፡ እፈንዎሙ ፡ ለደቂቀ ፡ እስራኤል ፤ ኢያአምሮሂ ፡ ለእግዚእ ፡ ወለእስራኤልሂ ፡ ኢይፌንዎ ።

5:3  ወይቤልዎ ፡ አምላከ ፡ ዕብራዊያን ፡ ጸውዐነ ፡ ንሑር ፡ እንከ ፡ ምሕዋረ ፡ ሠሉስ ፡ ዕለት ፡ ውስተ ፡ ሐቅል ፡ ከመ ፡ ንሡዕ ፡ ለእግዚእ ፡ ለአምላክነ ፡ ከመ ፡ ኢይርከበነ ፡ ሞት ፡ ወቀትል ።

5:4  ወይቤሎሙ ፡ ንጉሠ ፡ ግብጽ ፡ ለምንት ፡ ለክሙ ፡ ሙሴ ፡ ወአሮን ፡ ትገፈትእዎ ፡ ለዝንቱ ፡ ሕዝብ ፡ እምግብሩ ፡ ሑሩ ፡ ውስተ ፡ ግብርክሙ ።

5:5  ወይቤሎሙ ፡ ፈርዖን ፡ ናሁ ፡ ይእዜ ፡ ብዙኅ ፡ ወምሉእ ፡ አሕዛበ ፡ ምድር ፡ ቦሁ ፡ ዘናዐርፎሙ ፡ እምግብሮሙ ።

5:6  ወአዘዘ ፡ ፈርዖን ፡ ለነዳእተ ፡ ገባር ፡ ዘሕዝብ ፡ ወለጸሐፍት ፡ ወይቤሎሙ ።

5:7  እምይእዜ ፡ እንከ ፡ ኢተሀብዎሙ ፡ ዳግመ ፡ ሐሠረ ፡ ለሕዝብ ፡ ለገቢረ ፡ ግንፋል ፡ በከመ ፡ መዋዕለ ፡ ትካት ፡ ለሊሆሙ ፡ ይሑሩ ፡ ወያስተጋብኡ ፡ ሐሠረ ።

5:8  ወአምጣነ ፡ ጥብዖቶሙ ፡ ዘይገብሩ ፡ ግንፋለ ፡ ከማሁ ፡ ይግበሩ ፡ ኵሎ ፡ ዕለተ ፡ ወአልቦ ፡ ዘታኅጽጽዎሙ ፡ ወኢምንተኒ ፡ ዓዲ ፡ እመ ፡ ኢወሰክምዎሙ ፡ እስመ ፡ ፅሩዓን ፡ ጸርኁ ፡ ወይቤሉ ፡ ንሑር ፡ ወንሠውዕ ፡ ለእግዚእ ፡ አምላክነ ።

5:9  አክብዱ ፡ ግብሮሙ ፡ ለዝንቱ ፡ ሰብእ ፡ ወዘንተ ፡ ይሔልዩ ፡ ወኢይሔልዩ ፡ ነገረ ፡ ዘኢይበቍዕ ።

5:10  ወአጐጕእዎሙ ፡ ነዳእተ ፡ ሕዝብ ፡ ወጸሐፍት ፡ ወይቤልዎሙ ፡ ለሕዝብ ፡ ከመዝ ፡ ይቤ ፡ ፈርዖን ፡ ኢንሁበክሙ ፡ እንከ ፡ ኀሠረ ።

5:11  ለሊክሙ ፡ ሑሩ ፡ ወአስተጋብኡ ፡ ለክሙ ፡ ኀሠረ ፡ በኀበ ፡ ረከብክሙ ፡ ወአልቦ ፡ ዘያሐጸክሙ ፡ እምጥብዖትክሙ ፡ ወኢምንተ ።

5:12  ወተዘርወ ፡ ሕዝብ ፡ ውስተ ፡ ኵሉ ፡ ምድረ ፡ ግብጽ ፡ ከመ ፡ የአልዱ ፡ ሎሙ ፡ ብርዐ ፡ ለሐሠር ።

5:13  ወዝኩሰ ፡ ነዳእቶሙ ፡ ያጔጕእዎሙ ፡ ወይብልዎሙ ፡ ፈጽሙ ፡ ግብረክሙ ፡ ዘለለ ፡ ዕለትክሙ ፡ በከመ ፡ አመ ፡ ንሁበክሙ ፡ ኀሠረ ።

5:14  ወይ[ትቀሠ]ፉ ፡ ጸሐፍተ ፡ ነገዶሙ ፡ ለደቂቀ ፡ እስራኤል ፡ እለ ፡ ተሠይሙ ፡ ዲቤሆሙ ፡ በኀበ ፡ ዐበይተ ፡ ፈርዖን ፡ ወይቤልዎሙ ፡ ለምንት ፡ ኢትፌጽሙ ፡ ጥብዖተክሙ ፡ ግንፋለ ፡ በከመ ፡ ትካት ፡ ዮምኒ ።

5:15  ወቦኡ ፡ ጸሐፍቶሙ ፡ ለደቂቀ ፡ እስራኤል ፡ ወአውየው ፡ ኀበ ፡ ፈርዖን ፡ ወይቤሉ ፡ ለምንት ፡ ከመዝ ፡ ትሬስዮሙ ፡ ለአግብርቲከ ።

5:16  ኀሥረ ፡ ኢይሁብዎሙ ፡ ለአግብርቲከ ፡ ወይቤልዎሙ ፡ ግበሩ ፡ ግንፋለ ፡ ወናሁ ፡ አግብርቲከ ፡ ይትቀሠፉ ፡ ወይትገፋዕ ፡ ሕዝብከ ።

5:17  ወይቤሎሙ ፡ ዕሩፋን ፡ አንትሙ ፡ ወፅሩዓን ፡ ወበእንተ ፡ ዝንቱ ፡ ትብሉ ፡ ንሑር ፡ ወንሡዕ ፡ ለአምላክነ ።

5:18  ይእዜሂ ፡ ሑሩ ፡ ወግበሩ ፡ ሐሠረሰ ፡ ኢይሁቡክሙ ፡ ወጥብዖተሰ ፡ ግንፋልክሙ ፡ ታግብኡ ።

5:19  ወርእዩ ፡ ጸሐፍቶሙ ፡ ለደቂቀ ፡ እስራኤል ፡ ከመ ፡ በእከት ፡ ሀለው ፡ ወይቤሉ ፡ እምጥብዖትነሂ ፡ ዘለለ ፡ ዕለትነ ፡ ኢየኀጸነ ፡ ግንፋል ።

5:20  ወተራከብዎሙ ፡ ለሙሴ ፡ ወለአሮን ፡ እንዘ ፡ ይመጽኡ ፡ ፀአቶሙ ፡ እምኀበ ፡ ፈርዖን ።

5:21  ወይቤልዎሙ ፡ ይርአይ ፡ እግዚአብሔር ፡ ለነ ፡ ወይፍታሕ ፡ ከመ ፡ ገበርክምዎ ፡ ለፄናነ ፡ ሠቆራረ ፡ በቅድመ ፡ ፈርዖን ፡ ወበቅድመ ፡ ዐበይቱ ፡ ከመ ፡ ትመጥውዎ ፡ ሰይፈ ፡ ውስተ ፡ እዴሁ ፡ በዘ ፡ ይቀትለነ ።

5:22  ወገብአ ፡ ሙሴ ፡ ኀበ ፡ እግዚእ ፡ ወይቤ ፡ እግዚኦ ፡ ለምንት ፡ አሕሠምከ ፡ በዝ ፡ ሕዝብ ፡ ወለምንት ፡ ፈኖከኒ ።

5:23  እምአመ ፡ ሖርኩ ፡ ኀበ ፡ ፈርዖን ፡ እንግሮ ፡ በቃልከ ፡ አሕሠመ ፡ በሕዝብከ ፡ ወኢያድኀንካሁ ፡ ለዝ ፡ ሕዝብ ።

Chapter 6

6:1  ወይቤሎ ፡ እግዚእ ፡ ለሙሴ ፡ ናሁ ፡ ትሬኢ ፡ ዘእገብር ፡ በፈርዖን ፡ እስመ ፡ በእድ ፡ ጽንዕት ፡ ይፌንዎሙ ፡ ወበመዝራዕት ፡ ልዕልት ፡ ያወጽኦሙ ፡ እምድሩ ።

6:2  ወተናገሮ ፡ ለሙሴ ፡ እግዚአብሔር ፡ ወይቤሎ ፡ አነ ፡ ውእቱ ፡ እግዚእ ፤

6:3  ዘአስተርአይኩ ፡ ለአብርሃም ፡ ወለይስሐቅ ፡ ወለያዕቆብ ፡ እስመ ፡ አምላኮሙ ፡ አነ ፡ ወስምየ ፡ እግዚእ ፡ [ኢ]ያይዳዕክዎሙ ።

6:4  ወአቀምኩ ፡ መሐላየ ፡ ኀቤሆሙ ፡ ከመ ፡ እሁቦሙ ፡ ምድረ ፡ ከናአን ፡ ምድር ፡ እንተ ፡ ኀደሩ ፡ ውስቴታ ።

6:5  ወአነ ፡ ሰማዕኩ ፡ ገዓሮሙ ፡ ለደቂቀ ፡ እስራኤል ፡ እንተ ፡ ይቀንይዎሙ ፡ ግብጽ ፡ ወተዘከርኩ ፡ መሐላየ ።

6:6  አፍጥን ፡ በሎሙ ፡ ለደቂቀ ፡ እስራኤል ፡ አነ ፡ ውእቱ ፡ እግዚእ ፡ ወኣወጽአክሙ ፡ እምኀይሎሙ ፡ ለግብጽ ፡ ወእምቅንየቶሙ ፡ ወአድኅነክሙ ፡ ወእቤዝወክሙ ፡ በመዝራዕት ፡ ልዑል ፡ ወበኵነኔ ፡ ዐቢይ ።

6:7  ወእነሥአክሙ ፡ ሊተ ፡ ወእከውነክሙ ፡ አምላከ ፡ ወታእምሩ ፡ እንከ ፡ ከመ ፡ አነ ፡ ውእቱ ፡ እግዚእ ፡ አምላክክሙ ፡ ዘኣወጽአክሙ ፡ እምድረ ፡ ግብጽ ፡ ወእምኀይሎሙ ፡ ለግብጽ ።

6:8  ወእወስደክሙ ፡ ውስተ ፡ ምድር ፡ እንተ ፡ ሰፋሕኩ ፡ እዴየ ፡ ከመ ፡ አሀባ ፡ ለአብርሃም ፡ ወለይስሐቅ ፡ ወለያዕቆብ ፡ ወእሁበክምዋ ፡ ለክሙ ፡ በርስት ፡ አነ ፡ እግዚእ ።

6:9  ወነገሮሙ ፡ ሙሴ ፡ ከመዝ ፡ ለደቂቀ ፡ እስራኤል ፡ ወኢሰምዕዎ ፡ ለሙሴ ፡ እምዕንብዝና ፡ ነፍሶሙ ፡ ወእምዕጸበ ፡ ግብሮሙ ።

6:10  ወይቤሎ ፡ እግዚእ ፡ ለሙሴ ፤

6:11  ባእ ፡ ወንግሮ ፡ ለፈርዖን ፡ ንጉሠ ፡ ግብጽ ፡ ከመ ፡ ይፈንዎሙ ፡ ለደቂቀ ፡ እስራኤል ፡ እምድሩ ።

6:12  ወተናገረ ፡ ሙሴ ፡ ወይቤ ፡ ቅድመ ፡ እግዚእ ፡ ናሁ ፡ ደቂቀ ፡ እስራኤል ፡ ኢሰምዑኒ ፡ ፈርዖን ፡ እፎ ፡ ይሰምዐኒ ፡ ወአነ ፡ በሃም ።

6:13  ወይቤሎሙ ፡ እግዚእ ፡ ለሙሴ ፡ ወለአሮን ፡ ወአዘዞሙ ፡ ይበልዎ ፡ ለፈርዖን ፡ ንጉሠ ፡ ግብጽ ፡ ያውጽኦሙ ፡ ለደቂቀ ፡ እስራኤል ፡ እምድረ ፡ ግብጽ ።

6:14  ወእሉ ፡ እሙንቱ ፡ መላእክት ፡ በበ ፡ ቤተ ፡ አበዊሆሙ ፤

6:15  ደቂቀ ፡ ሮቤል ፡ በኵሩ ፡ ለእስራኤል ፡ ሄኖኅ ፡ ወፍሉሶ ፡ ወአስሮን ፡ ወ[ከር]ሚ ፡ ዝውእቱ ፡ ትውልዲሁ ፡ ለሮቤል ።

6:16  ደቂቀ ፡ ስምዖን ፡ የምኤል ፡ ወያሚን ፡ ወአኦድ ፡ ወያክን ፡ ወሳኦር ፡ ወሰኡል ፡ ዘእምነ ፡ (ፈኒስ ፡) [*ከናናዊት ፡*] ዝውእቱ ፡ ትውልዱ ፡ ለስምዖን ።

6:17  ወዝውእቱ ፡ አስማቲሆሙ ፡ ለደቂቀ ፡ ሌዊ ፡ በበዘመዶሙ ፡ ገርሶን ፡ ወቃዓት ፡ ወምራሪ ፡ ወዓመተ ፡ ሕይወቱ ፡ ለሌዊ ፡ ፻፴ወ፯ ።

6:18  ወእሉ ፡ እሙንቱ ፡ ደቂቀ ፡ ገርሶን ፡ ሎቤኒ ፡ ወሰሚዕ ፡ በቤተ ፡ አቡሆሙ ።

6:19  ወደቂቀ ፡ ቃዓት ፡ እምበረም ፡ ወይሳ[አ]ር ፡ ወክብሮን ፡ ወዖዝየል ፡ ወዓመተ ፡ ሕይወቱ ፡ ለቃዓት ፡ ፻ወ፴[ወ፫]ዓመት ።

6:20  ወደቂቀ ፡ ምራሪ ፡ መሑል ፡ ወሐሙስ ፤ እሉ ፡ እሙንቱ ፡ ትውልደ ፡ ቤተ ፡ ሌዊ ፡ በበዘመዶሙ ።

6:21  ወነሥአ ፡ ሎቱ ፡ እምበረም ፡ ብእሲተ ፡ ዮከብድ ፡ ወለተ ፡ እኁሁ ፡ ለአቡሁ ፡ ወወለደቶሙ ፡ ሎቱ ፡ ለአሮን ፡ ወለሙሴ ፡ ወለማርያ ፡ እኅቶሙ ፡ ወዓመተ ፡ ሕይወቱ ፡ ለእምበረም ፡ ፻፴ወ፯ዓመት ።

6:22  ወደቂቀ ፡ [ይ]ሳአር ፡ ቆሬ ፡ ወናፌግ ፡ ወዝክር ።

6:23  ወደቂቀ ፡ ዖዝ[የል] ፡ ሚሳኤል ፡ ወኤሊሳፌን ፡ ወሶተሪ ።

6:24  ወነሥአ ፡ ሎቱ ፡ አሮን ፡ ብእሲተ ፡ ኤሊሳቤጥ ፡ ወለተ ፡ አሚናዳብ ፡ እኅቱ ፡ ለነኣሶ ፡ ወወለደት ፡ ሎቱ ፡ ናዳብ ፡ ወአብዩድ ፡ ወአልዓዛር ፡ ወኢታማር ።

6:25  ደቂቀ ፡ ቆሬ ፡ ኣሴር ፡ ወሕልቃና ፡ ወአቢያሰፍ ፡ ዝውእቱ ፡ ትውልዱ ፡ ለቆሬ ።

6:26  ወአልአዛር ፡ ዘአሮን ፡ ነሥአ ፡ ሎቱ ፡ ብእሲተ ፡ እምአዋልደ ፡ ፉጢይን ፡ ወወለደቶ ፡ ሎቱ ፡ ለፈንሕስ ፤ ዝውእቱ ፡ ቀዳሚ ፡ ትውልዶሙ ፡ ለሌዋዊያን ፡ በበዘመዶሙ ።

6:27  እሉ ፡ እሙንቱ ፡ አሮን ፡ ወሙሴ ፡ እለ ፡ ይቤሎሙ ፡ እግዚአብሔር ፡ ያ[ው]ፅእዎሙ ፡ ለደቂቀ ፡ እስራኤል ፡ እምድረ ፡ ግብጽ ፡ ምስለ ፡ ኀይሎሙ ።

6:28  እሉ ፡ እሙንቱ ፡ እለ ፡ ተባሀልዎ ፡ ለፈርዖን ፡ ንጉሠ ፡ ግብጽ ፡ ከመ ፡ ያውፅኦሙ ፡ ለደቂቀ ፡ እስራኤል ፡ እምብሔረ ፡ ግብጽ ፡ ሙሴ ፡ ወአሮን ፡ እሙንቱ ።

6:29  በዕለት ፡ እንተ ፡ ተናገሮ ፡ እግዚእ ፡ ለሙሴ ፡ በምድረ ፡ ግብጽ ፤ ተናገሮ ፡ እግዚእ ፡ ለሙሴ ፡ ወይቤሎ ፡ አነ ፡ ውእቱ ፡ እግዚእ ፡ ንግሮ ፡ ለፈርዖን ፡ ንጉሠ ፡ ግብጽ ፡ ኵሎ ፡ ዘአነ ፡ እቤለከ ።

6:30  ወይቤሎ ፡ ሙሴ ፡ ለእግዚእ ፡ ናሁ ፡ ፀያፍ ፡ አነ ፡ እፎ ፡ ይሰምዐኒ ፡ ፈርዖን ።

Chapter 7

7:1  ወይቤሎ ፡ እግዚእ ፡ ለሙሴ ፡ ናሁ ፡ ረሰይኩከ ፡ አምላኮ ፡ ለፈርዖን ፡ ወአሮን ፡ እኁከ ፡ ይኩንከ ፡ ነቢየ ።

7:2  ወአንተሰ ፡ ንግር ፡ ኵሎ ፡ ዘአዘዝኩከ ፡ ወአሮን ፡ ለይንግሮ ፡ ለፈርዖን ፡ ከመ ፡ ይፈንዎሙ ፡ ለደቂቀ ፡ እስራኤል ፡ እምድሩ ።

7:3  ወአነ ፡ አጸንዕ ፡ ልቦ ፡ ለፈርዖን ፡ ወአበዝኅ ፡ ተአምርየ ፡ ወመድምምየ ፡ በምድረ ፡ ግብጽ ።

7:4  ወኢይሰምዐክሙ ፡ ፈርዖን ፡ ወእወዲ ፡ እዴየ ፡ ዲበ ፡ ብሔረ ፡ ግብጽ ፡ ወኣወጽኦሙ ፡ በኀይልየ ፡ ለሕዝብየ ፡ ለደቂቀ ፡ እስራኤል ፡ እምድረ ፡ ግብጽ ፡ በበቀል ፡ ዐቢይ ።

7:5  ወያአምሩ ፡ እንከ ፡ ኵሉ ፡ ግብጽ ፡ ከመ ፡ አነ ፡ ውእቱ ፡ እግዚእ ፡ ወእሰፍሕ ፡ እዴየ ፡ ዲበ ፡ [ብሔ]ረ ፡ ግብጽ ፡ ወአወፅኦሙ ፡ ለደቂቀ ፡ እስራኤል ፡ እማእከሎሙ ።

7:6  ወገብሩ ፡ ሙሴ ፡ ወአሮን ፡ በከመ ፡ አዘዞሙ ፡ እግዚእ ፡ ከማሁ ፡ ገብሩ ።

7:7  ወኮነ ፡ ለሙሴ ፡ ፹ዓም ፡ ወለአሮን ፡ ፹፫ዓም ፡ አመ ፡ ተናገርዎ ፡ ለፈርዖን ።

7:8  ወይቤሎሙ ፡ እግዚእ ፡ ለሙሴ ፡ ወለአሮን ፤

7:9  እመ ፡ ይቤለክሙ ፡ ፈርዖን ፡ ሀቡነ ፡ ተአምረ ፡ ወመድምመ ፡ በሎ ፡ ለአሮን ፡ እኁከ ፡ ንሥኣ ፡ ለዛ ፡ በትር ፡ ወግድፋ ፡ ቅድሜሁ ፡ ለፈርዖን ፡ ወቅድመ ፡ ዐበይቱ ፡ ወትከውን ፡ አርዌ ፡ ምድር ።

7:10  ወቦኡ ፡ ሙሴ ፡ ወአሮን ፡ ቅድመ ፡ ፈርዖን ፡ ወገብሩ ፡ ከማሁ ፡ በከመ ፡ አዘዞሙ ፡ እግዚአብሔር ፡ ወገደፈ ፡ አሮን ፡ በትሮ ፡ ቅድመ ፡ ፈርዖን ፡ ወቅድመ ፡ ዐበይቱ ፡ ወኮነት ፡ አርዌ ፡ ምድር ።

7:11  ወጸውዖሙ ፡ ፈርዖን ፡ ለጠቢባን ፡ ወለመሠርያን ፡ ወገብሩ ፡ ሐራስያነ ፡ ግብጽ ፡ በሥራያቲሆሙ ፡ ከማሆሙ ።

7:12  ወወገሩ ፡ አብትሮሙ ፡ ወኮነ ፡ አራዊተ ፡ ምድር ፡ ወውኅጠቶሙ ፡ በትረ ፡ አሮን ፡ ለአብትረ ፡ እልኩ ።

7:13  ወጸንዐ ፡ ልቡ ፡ ለፈርዖን ፡ ወአበየ ፡ ሰሚዐ ፡ በከመ ፡ ይቤ ፡ እግዚእ ።

7:14  ወይቤሎ ፡ እግዚእ ፡ ለሙሴ ፡ ከብደ ፡ ልቡ ፡ ለፈርዖን ፡ ከመ ፡ ኢይፈንዎሙ ፡ ለሕዝብ ።

7:15  ወሑር ፡ ኀበ ፡ ፈርዖን ፡ በጽባሕ ፡ ናሁ ፡ ኀበ ፡ ማይ ፡ ይወጽእ ፡ ውእቱ ፡ ወይቀውም ፡ ወተቀበሎ ፡ ዲበ ፡ ገበዘ ፡ ተከዚ ፡ ወእንታክቲ ፡ በትር ፡ እንተ ፡ ኮነት ፡ አርዌ ፡ ምድር ፡ ንሥኣ ፡ ውስተ ፡ እዴከ ።

7:16  ወበሎ ፡ እግዚእ ፡ አምላከ ፡ ዕብራዊያን ፡ ፈነወኒ ፡ ኀቤከ ፡ እንዘ ፡ ይብል ፡ ፈኑአ ፡ ሕዝቦ ፡ ከመ ፡ ይፀመድዎ ፡ በሐቅል ፡ ወናሁ ፡ ኢሰማዕኮ ፡ እስከ ፡ ዛቲ ።

7:17  ከመዝ ፡ ይቤ ፡ እግዚእ ፡ በዝንቱ ፡ ታአምር ፡ ከመ ፡ አነ ፡ ውእቱ ፡ እግዚእ ፡ አነ ፡ እዘብ[ጥ] ፡ በዛ ፡ በትር ፡ እንተ ፡ ውስተ ፡ እዴየ ፡ ዲበ ፡ ማይ ፡ ዘውስተ ፡ ተከዚ ፡ ወይከውን ፡ ደመ ።

7:18  ወይመውቱ ፡ ዓሣት ፡ ዘውስተ ፡ ተከዚ ፡ ወይጸይእ ፡ ተከዚ ፡ ወኢይክሉ ፡ ግብጽ ፡ ሰትየ ፡ ማይ ፡ እምተከዚ ።

7:19  ወይቤሎ ፡ እግዚእ ፡ ለሙሴ ፡ በሎ ፡ ለአሮን ፡ ንሥኣ ፡ ለበትርከ ፡ ወስፋሕ ፡ እዴከ ፡ ዲበ ፡ ማያተ ፡ ግብጽ ፡ ወዲበ ፡ አፍላጎሙ ፡ ወዲበ ፡ አሥራጊሆሙ ፡ ወዲበ ፡ አዕያጊሆሙ ፡ ወዲበ ፡ ኵሉ ፡ ምቅዋመ ፡ ማዮሙ ፡ ወይከውን ፡ ደመ ፡ ወኮነ ፡ ደም ፡ ውስተ ፡ ኵሉ ፡ ምድረ ፡ ግብጽ ፡ ውስተ ፡ ዕፀው ፡ ወውስተ ፡ እብን ።

7:20  ወገብሩ ፡ ከመዝ ፡ ሙሴ ፡ ወአሮን ፡ በከመ ፡ አዘዞሙ ፡ እግዚእ ፡ ወአልዐለ ፡ አሮን ፡ በትሮ ፡ ወዘበጠ ፡ ማየ ፡ ዘውስተ ፡ ተከዚ ፡ በቅድመ ፡ ፍርዖን ፡ ወበቅደመ ፡ ዐበይቱ ፡ ወኮነ ፡ ደመ ፡ ማይ ፡ ዘውስተ ፡ ተከዚ ።

7:21  ወሞተ ፡ ዓሣት ፡ ዘውስተ ፡ ተከዚ ፡ ወጼአ ፡ ተከዚ ፡ ወስእኑ ፡ ግብጽ ፡ ሰትየ ፡ ማይ ፡ እምተከዚ ፡ ወኮነ ፡ ደም ፡ ውስተ ፡ ኵሉ ፡ ምድረ ፡ ግብጽ ።

7:22  ወገብሩ ፡ ከማሁ ፡ ሐራሳዊያነ ፡ ግብጽ ፡ በሥራያቲሆሙ ፡ ወጸንዐ ፡ ልቡ ፡ ለፈርዖን ፡ ወአበየ ፡ ሰሚዖቶሙ ፡ በከመ ፡ ይቤ ፡ እግዚእ ።

7:23  ወገብአ ፡ ፈርዖን ፡ ወቦአ ፡ ቤቶ ፡ ወኢተንሥአ ፡ ልቡ ፡ ወበዝንቱ ።

7:24  ወከረዩ ፡ ኵሉ ፡ ግብጽ ፡ ዐውዶ ፡ ለትከዚ ፡ ከመ ፡ ይስተዩ ፡ ማየ ፡ ወስእኑ ፡ ሰትየ ፡ ማይ ፡ እምተከዚ ።

7:25  ወተፈጸመ ፡ ሰቡዐ ፡ ዕለት ፡ እምድኅረ ፡ ዘበጦ ፡ እግዚእ ፡ ለትከዚ ። ወይቤሎ ፡ እግዚእ ፡ ለሙሴ ፡ ባእ ፡ ኀበ ፡ ፈርዖን ፡ ወበሎ ፡ ከመዝ ፡ ይቤ ፡ እግዚእ ፡ ፈኑ ፡ ሕዝብየ ፡ ከመ ፡ ይፀመዱኒ ፡ (በሐቅል ።) ወእመ ፡ አበይከ ፡ አንተ ፡ ፈንዎቶ ፡ ናሁ ፡ አነ ፡ እዘብጥ ፡ ኵሎ ፡ አድባሪከ ፡ በቈርነናዓት ። ወይቀይእ ፡ ተከዚ ፡ ቈርነናዓተ ፡ ወየዐርግ ፡ ወይበውእ ፡ ውስተ ፡ ቤትከ ፡ ወውስተ ፡ ውሳጥያተ ፡ ጽርሕከ ፡ ወዲበ ፡ ዐራትከ ፡ ወውስተ ፡ አብያተ ፡ ዐበይትከ ፡ ወዲበ ፡ ሕዝብከ ፡ ወውስተ ፡ ሐሪጽከ ፡ ወውስተ ፡ እቶናቲከ ። ወዲቤከ ፡ ወዲበ ፡ ሕዝብከ ፡ ወዲበ ፡ ዐበይትከ ፡ የዐርግ ፡ ቈርነናዓት ።

Chapter 8

8:1  ወይቤሎ ፡ እግዚእ ፡ ለሙሴ ፡ በሎ ፡ ለአሮን ፡ እኁከ ፡ ስፋሕ ፡ በእዴከ ፡ በትረከ ፡ ዲበ ፡ አፍላግ ፡ ወዲበ ፡ አሥራግ ፡ ወዲበ ፡ አዕያግ ፡ ወአውፅእ ፡ ቈርነናዓተ ።

8:2  ወሰፍሐ ፡ አሮን ፡ እዴሁ ፡ ዲበ ፡ ማያተ ፡ ግብጽ ፡ ወአውጽአ ፡ ቈርነናዓተ ፡ ወዐርገ ፡ ቈርነናዓት ፡ ወከደኖ ፡ ለምድረ ፡ ግብጽ ።

8:3  ወገብሩ ፡ ከማሁ ፡ ሐራስያን ፡ በሥራያቲሆሙ ፡ ወአውጽኡ ፡ ቈርነናዓተ ፡ ዲበ ፡ ምድረ ፡ ግብጽ ።

8:4  ወጸውዖሙ ፡ ፈርዖን ፡ ለሙሴ ፡ ወለአሮን ፡ ወይቤሎሙ ፡ ጸልዩ ፡ ዲቤየ ፡ ኀበ ፡ እግዚእ ፡ ከመ ፡ ይሰስል ፡ ቈርነናዓት ፡ እምኔየ ፡ ወእምሕዝብየ ፡ ወእፌንዎ ፡ ለሕዝብ ፡ ወይሡዑ ፡ ለእግዚእ ።

8:5  ወይቤሎ ፡ ሙሴ ፡ ለፈርዖን ፡ ዐድመኒ ፡ ማዕዜ ፡ እጸሊ ፡ ዲቤከ ፡ ወዲበ ፡ ዐበይትከ ፡ ወዲበ ፡ ሕዝብከ ፡ ከመ ፡ ይማስን ፡ ቈርነናዓት ፡ እምኔከ ፡ ወእምሕዝብከ ፡ ወእምአብይቲክሙ ፡ እንበለ ፡ ውስተ ፡ ተከዚ ፡ ይተርፍ ።

8:6  ወይቤሎ ፡ ፈርዖን ፡ ለጌሠም ፡ ወይቤ ፡ ኦሆ ፡ በከመ ፡ ትቤ ፡ ከመ ፡ ታእምር ፡ ከመ ፡ አልቦ ፡ ባዕደ ፡ ዘእንበለ ፡ እግዚእ ።

8:7  ወይሴስል ፡ ቈርነናዓት ፡ እምኔከ ፡ ወእምአብያቲክሙ ፡ ወእምዐበይትከ ፡ ወእምሕዝብከ ፡ እንበለ ፡ ውስተ ፡ ተከዚ ፡ ይተርፍ ።

8:8  ወወፅኡ ፡ ሙሴ ፡ ወአሮን ፡ እምኀበ ፡ ፈርዖን ፡ ወአውየው ፡ ኀበ ፡ እግዚእ ፡ በእንተ ፡ ሙስና ፡ ቈርነናዓት ፡ በከመ ፡ አዘዘ ፡ ፈርዖን ።

8:9  ወገብረ ፡ እግዚእ ፡ በከመ ፡ ይቤ ፡ ሙሴ ፡ ወሞተ ፡ ቈርነናዓት ፡ እምአብያት ፡ ወእምአህጉር ፡ ወእምአሕቁል ።

8:10  ወአስተጋብእዎ ፡ ክምረ ፡ [ክምረ] ፡ ወጼአት ፡ ምድር ።

8:11  ወሶበ ፡ ርእየ ፡ ፈርዖን ፡ ከመ ፡ ኮነ ፡ ዕረፍት ፡ ከብደ ፡ ልቡ ፡ ወአበየ ፡ ሰሚዖቶሙ ፡ በከመ ፡ ነበበ ፡ እግዚእ ።

8:12  ወይቤሎ ፡ እግዚእ ፡ ለሙሴ ፡ በሎ ፡ ለአሮን ፡ ስፋሕ ፡ በእዴከ ፡ በትረከ ፡ ወዝብጥ ፡ መሬተ ፡ ምድር ፡ ወይወፅእ ፡ ጻጾት ፡ ዲበ ፡ ሰብእ ፡ ወዲበ ፡ እንስሳ ፡ ወዲበ ፡ ኵሉ ፡ ምድረ ፡ ግብጽ ።

8:13  ወሰፍሐ ፡ አሮን ፡ በእዴሁ ፡ በትሮ ፡ ወዘበጠ ፡ መሬተ ፡ ምድር ፡ ወወጽአ ፡ ጻጾት ፡ ዲበ ፡ ሰብእ ፡ ወዲበ ፡ እንስሳ ፡ ወውስተ ፡ ኵሉ ፡ መሬተ ፡ ምድር ፡ ወጽአት ፡ ጻጾት ፡ ውስተ ፡ ኵሉ ፡ ምድረ ፡ ግብጽ ።

8:14  ወገብሩ ፡ ከማሁ ፡ ሐራስያን ፡ በሥራያቲሆሙ ፡ ወአውጽኡ ፡ ጻጾተ ፡ ወስእኑ ፡ ወወጽአት ፡ ጻጾት ፡ ዲበ ፡ ሰብእ ፡ ወዲበ ፡ እንስሳ ።

8:15  ወይቤልዎ ፡ ሐራስያን ፡ ለፈርዖን ፡ አጽባዕተ ፡ እግዚአብሔር ፡ ውእቱ ፡ ዝንቱ ፡ ወጸንዐ ፡ ልቡ ፡ ለፈርዖን ፡ ወአበየ ፡ ሰሚዖቶሙ ፡ በከመ ፡ ነበበ ፡ እግዚእ ።

8:16  ወይቤሎ ፡ እግዚእ ፡ ለሙሴ ፡ ጊሥ ፡ በጽባሕ ፡ ወቁም ፡ ቅድሜሁ ፡ ለፈርዖን ፡ ናሁ ፡ ኀበ ፡ ማይ ፡ ይወጽእ ፡ ውእቱ ፡ ወበሎ ፡ ከመዝ ፡ ይቤ ፡ እግዚእ ፡ ፈኑ ፡ ሕዝብየ ፡ ከመ ፡ ይፀመዱኒ ።

8:17  ወእመ ፡ አበይከ ፡ ፈንዎተ ፡ ሕዝብየ ፡ ናሁ ፡ አነ ፡ እፌኑ ፡ ዲቤከ ፡ ወዲበ ፡ ዐበይትከ ፡ ወዲበ ፡ ሕዝብከ ፡ ወዲበ ፡ አብያቲከ ፡ ጽንጽያ ፡ ከልብ ፡ ወይመልእ ፡ አብያተ ፡ ግብጽ ፡ ጽንጽያ ፡ ከልብ ፡ ወውስተሂ ፡ ምድር ፡ እንተ ፡ ሀለው ፡ ውስቴታ ።

8:18  ወእሴባሕ ፡ በይእቲ ፡ ዕለት ፡ በምድረ ፡ ጌሴም ፡ እንተ ፡ ውስቴታ ፡ ሀለው ፡ ሕዝብየ ፡ ወኢይሄሉ ፡ ህየ ፡ ጽንጽያ ፡ ከልብ ፡ ከመ ፡ ታእምር ፡ ከመ ፡ አነ ፡ ውእቱ ፡ እግዚእ ፡ ለኵሉ ፡ ምድር ።

8:19  ወእፈልጥ ፡ ማእከለ ፡ ሕዝብየ ፡ ወማእከለ ፡ ሕዝብከ ፡ ወጌሠመ ፡ ይከውን ፡ ዝነገር ።

8:20  ወገብረ ፡ እግዚእ ፡ ከማሁ ፡ ወመጽአ ፡ ጽንጽያ ፡ ከልብ ፡ ወበዝኀ ፡ ውስተ ፡ አብያተ ፡ ፈርዖን ፡ ወውስተ ፡ አብያተ ፡ ዐበይቱ ፡ ወውስተ ፡ ኵሉ ፡ ምድረ ፡ ግብጽ ፡ ወማሰነት ፡ ምድር ፡ እምጽንጽያ ፡ ከልብ ።

8:21  ወጸውዖሙ ፡ ፈርዖን ፡ ለሙሴ ፡ ወለአሮን ፡ ወይቤሎሙ ፡ ሑሩ ፡ ሡፁ ፡ ለአምላክክሙ ፡ በዛ ፡ ምድር ።

8:22  ወይቤሎ ፡ ሙሴ ፡ ኢይትከሀል ፡ ከመዝ ፡ ይኩን ፡ እስመ ፡ ዘያሐርሙ ፡ ግብጽ ፡ ንሠውዕ ፡ ለአምላክነ ፡ ወእመ ፡ ሦዕነ ፡ ዘያሐርሙ ፡ ግብጽ ፡ በቅድሜሆሙ ፡ ይዌግሩነ ።

8:23  ምሕዋረ ፡ ሠሉስ ፡ ዕለት ፡ ንሑር ፡ ውስተ ፡ ሐቅል ፡ ወንሡዕ ፡ ለእግዚእ ፡ አምላክነ ፡ በከመ ፡ ይቤለነ ።

8:24  ወይቤሎ ፡ ፈርዖን ፡ አነ ፡ እፌንወክሙ ፡ ትሡዑ ፡ ለእግዚእ ፡ አምላክክሙ ፡ በሐቅል ፡ ወባሕቱ ፡ ኢትትኤተቱ ፡ ወርኁቀ ፡ ኢተሐውሩ ፡ ወጸልዩ ፡ እንከ ፡ ዲቤየ ፡ ኀበ ፡ እግዚእ ።

8:25  ወይቤሎ ፡ ሙሴ ፡ ናሁ ፡ አነ ፡ እወጽእ ፡ እምኀቤከ ፡ ወእጼሊ ፡ ኀበ ፡ እግዚአብሔር ፡ ወይሴስል ፡ ጽንጽያ ፡ ከልብ ፡ እምፈርዖን ፡ ወእምዐበይቱ ፡ ጌሠመ ፡ ወኢትድግም ፡ እንከ ፡ አስተአብዶ ፡ ከመ ፡ ኢትፈኑ ፡ ሕዝበ ፡ ይሡዑ ፡ ለእግዚእ ።

8:26  ወወፅአ ፡ ሙሴ ፡ እምኀበ ፡ ፈርዖን ፡ ወጸለየ ፡ ኀበ ፡ እግዚአብሔር ።

8:27  ወገብረ ፡ እግዚእ ፡ በከመ ፡ ይቤ ፡ ሙሴ ፡ ወአሰሰለ ፡ ጽንጽያ ፡ ከልብ ፡ እምፈርዖን ፡ ወእምዐበይቱ ፡ ወእምሕዝቡ ፡ ወኢተርፈ ፡ ወኢአሐቲ ።

8:28  ወአክበደ ፡ ልቦ ፡ ፈርዖን ፡ ወበዝንቱሂ ፡ ጊዜ ፡ ወአበየ ፡ ፈንዎተ ፡ ሕዝቦ ።

Chapter 9

9:1  ወይቤሎ ፡ እግዚእ ፡ ለሙሴ ፡ ባእ ፡ ኀበ ፡ ፈርዖን ፡ ወበሎ ፡ ከመዝ ፡ ይቤ ፡ እግዚእ ፡ አምላከ ፡ ዕብራዊያን ፡ ፈኑ ፡ ሕዝብየ ፡ ከመ ፡ ይፀመዱኒ ።

9:2  ወእመ ፡ አበይከ ፡ ፈንዎተ ፡ ሕዝብየ ፡ ወዓዲ ፡ አጽናዕኮሙ ፤

9:3  ናሁ ፡ እደ ፡ እግዚእ ፡ ትከውን ፡ ዲበ ፡ እንስሳከ ፡ ወዲበ ፡ ሐቅልከ ፡ ወዲበ ፡ አፍራስ ፡ ወዲበ ፡ አእዱግ ፡ ወዲበ ፡ አግማል ፡ ወዲበ ፡ አልህምት ፡ ወዲበ ፡ አባግዕ ፡ ሞት ፡ ዐቢይ ፡ ጥቀ ።

9:4  ወእሴባሕ ፡ አነ ፡ ማእከለ ፡ እንስሳ ፡ ግብጽ ፡ ወማእከለ ፡ እንስሳ ፡ እስራኤል ፡ ወኢይመውት ፡ እምኵሉ ፡ ዘደቂቀ ፡ እስራኤል ፡ ወኢምንት ።

9:5  ወወሀቦ ፡ እግዚአብሔር ፡ ዕድሜ ፡ ወይቤ ፡ ጌሠመ ፡ ይገብር ፡ እግዚእ ፡ ዘነገረ ፡ ዲበ ፡ ምድር ።

9:6  ወገብረ ፡ እግዚእ ፡ ዘነገረ ፡ በሳኒታ ፡ ወሞተ ፡ ኵሉ ፡ እንስሳ ፡ ግብጽ ፡ ወእምእንስሳ ፡ ደቂቀ ፡ እስራኤልሰ ፡ ኢሞተ ፡ ወኢአሐዱ ።

9:7  ወሶበ ፡ ርእየ ፡ ፈርዖን ፡ ከመ ፡ ኢሞተ ፡ እምእንስሳ ፡ ደቂቀ ፡ እስራኤል ፡ ወኢአሐዱ ፡ ከብደ ፡ ልቡ ፡ ለፈርዖን ፡ ወኢፈነዎ ፡ ለሕዝብ ።

9:8  ወይቤሎሙ ፡ እግዚእ ፡ ለሙሴ ፡ ወለአሮን ፡ ንሥኡ ፡ ለክሙ ፡ ምልአ ፡ እደዊክሙ ፡ ሐመደ ፡ እቶን ፡ ወይዝርዎ ፡ ሙሴ ፡ ውስተ ፡ ሰማይ ፡ በቅድመ ፡ ፈርዖን ፡ ወበቅድመ ፡ ዐበይቱ ።

9:9  ወይከውን ፡ ቆባር ፡ ውስተ ፡ ኵሉ ፡ ምድረ ፡ ግብጽ ፡ ወኩን ፡ ዲበ ፡ ሰብእ ፡ ወዲበ ፡ እንስሳ ፡ አጽልዕት ፡ ዘይፈልሕ ፡ ዲበ ፡ እጓለ ፡ እመሕይው ፡ ወዲበ ፡ ዘአርባዕቱ ፡ እግሩ ፡ በኵሉ ፡ ምድረ ፡ ግብጽ ።

9:10  ወነሥኡ ፡ ሐመደ ፡ እቶን ፡ በቅድመ ፡ ፈርዖን ፡ ወዘረዎ ፡ ሙሴ ፡ ውስተ ፡ ሰማይ ፡ ወኮነ ፡ አጽልዕተ ፡ ዘይፈልሕ ፡ ዲበ ፡ ሰብእ ፡ ወዲበ ፡ እንስሳ ።

9:11  ወስእኑ ፡ ሰብአ ፡ ሥራይ ፡ ቀዊመ ፡ ቅድመ ፡ ሙሴ ፡ በእንተ ፡ ጸልዕ ፡ እስመ ፡ አኀዘቶሙ ፡ ጸልዕ ፡ ለመሠርያን ፡ ወለኵሉ ፡ ምድረ ፡ ግብጽ ።

9:12  ወአጽንዐ ፡ እግዚእ ፡ ልቦ ፡ ለፈርዖን ፡ ወኢሰምዖሙ ፡ በከመ ፡ አዘዞ ፡ እግዚእ ፡ ለሙሴ ።

9:13  ወይቤሎ ፡ እግዚእ ፡ ለሙሴ ፡ ጊሥ ፡ በጽባሕ ፡ ወቁም ፡ ቅድሜሁ ፡ ለፈርዖን ፡ ወበሎ ፡ ከመዝ ፡ ይቤ ፡ እግዚእ ፡ አምለከ ፡ ዕብራዊያን ፡ ፈኑ ፡ ሕዝብየ ፡ ከመ ፡ ይፀመዱኒ ።

9:14  እስመ ፡ ይእዜ ፡ በዝ ፡ ጊዜ ፡ አነ ፡ እፌኑ ፡ ኵሎ ፡ መዐትየ ፡ ውስተ ፡ ልብከ ፡ ወለዐበይትከ ፡ ወለሕዝብከ ፡ ከመ ፡ ታእምር ፡ ከመ ፡ አልቦቱ ፡ ከማየ ፡ ውሰተ ፡ ኵሉ ፡ ምድር ።

9:15  ወይእዜ ፡ እፌኑ ፡ እዴየ ፡ ወእዘብጠከ ፡ ወለሕዝብከሂ ፡ ወእቀትለክሙ ፡ ወትትቀጠቀጥ ፡ እምድር ።

9:16  ወበእንተዝ ፡ ዐቀብኩከ ፡ ከመ ፡ ኣርኢ ፡ ብከ ፡ ጽንዕየ ፡ ወከመ ፡ ይትየዳዕ ፡ ስምየ ፡ ወስተ ፡ ኵሉ ፡ ምደር ።

9:17  ወዓዲከ ፡ አንተሰ ፡ ታጸንዕ ፡ ሕዝብየ ፡ ወኢትፌንዎሙ ፤

9:18  ናሁ ፡ አነ ፡ አዘንም ፡ ጌሠመ ፡ ዘጊዜ ፡ በረ[ደ] ፡ ብዙ[ኀ] ፡ ጥቀ ፡ ዘኢኮነ ፡ ከማሁ ፡ እምአመ ፡ ተፈጥረ ፡ ብሔረ ፡ ግብጽ ፡ እስከ ፡ ዛቲ ፡ ዕለት ።

9:19  ወይእዜኒ ፡ አፍጥን ፡ አስተጋብእ ፡ እንስሳከ ፡ ወኵሉ ፡ ዘብከ ፡ ውስተ ፡ ሐቅል ፡ እስመ ፡ ኵሉ ፡ ሰብእ ፡ ወእንስሳ ፡ ዘተረክበ ፡ ውስተ ፡ ሐቅል ፡ ወኢቦአ ፡ ቤተ ፡ ይወድቅ ፡ ዲቤሁ ፡ በረድ ፡ ወይመውት ።

9:20  ወዘፈርሀ ፡ ቃለ ፡ እግዚአብሔር ፡ እምዐበይተ ፡ ፈርዖን ፡ አስተጋብአ ፡ እንስሳሁ ፡ ውስተ ፡ አብያት ።

9:21  ወዘኢሐለየሰ ፡ በልቡ ፡ ቃለ ፡ እግዚአብሔር ፡ ኀደገ ፡ እንስሳሁ ፡ ውስተ ፡ ገዳም ።

9:22  ወይቤሎ ፡ እግዚአብሔር ፡ ለሙሴ ፡ ስፋሕ ፡ እዴከ ፡ ውስተ ፡ ሰማይ ፡ ወይኩን ፡ በረድ ፡ ዲበ ፡ ኵሉ ፡ ምድረ ፡ ግብጽ ፡ ዲበ ፡ ሰብእ ፡ ወዲበ ፡ እንስሳ ፡ ወዲበ ፡ ኵሉ ፡ ሣዕር ፡ ዘውስተ ፡ ምድር ።

9:23  ወሰፍሐ ፡ እዴሁ ፡ ሙሴ ፡ ውስተ ፡ ሰማይ ፡ ወወሀበ ፡ እግዚአብሔር ፡ ቃለ ፡ ወበረደ ፡ ወሮጸት ፡ እሳት ፡ ዲበ ፡ ምድር ፡ ወአዝነመ ፡ እግዚአብሔር ፡ በረደ ፡ ዲበ ፡ ኵሉ ፡ ምድረ ፡ ግብጽ ።

9:24  ወእሳቱ ፡ ይነድድ ፡ ውስተ ፡ በረዱ ፡ ወበረድሰ ፡ ብዙኅ ፡ ጥቀ ፡ ወዕዙዝ ፡ ዘኢኮነ ፡ ከማሁ ፡ እምአመ ፡ ተፈጥረ ፡ አሕዛብ ፡ ውስተ ፡ ብሔረ ፡ ግብጽ ።

9:25  ወቀተ[ለ] ፡ በረድ ፡ በኵሉ ፡ ምድረ ፡ ግብጽ ፡ እምሰብእ ፡ እስከ ፡ እንስሳ ፡ ወኵሎ ፡ ሣዕረ ፡ ዘውስተ ፡ ገዳም ፡ አማሰነ ፡ በረድ ፡ ወኵሎ ፡ ዕፀወ ፡ ዘውስተ ፡ ሐቅል ፡ ቀጥቀጠ ።

9:26  ዘእንበለ ፡ ምድረ ፡ ጌሤም ፡ ኀበ ፡ ሀለው ፡ ደቂቀ ፡ እስራኤል ፡ ኢወረደ ፡ በረድ ።

9:27  ወለአከ ፡ ፈርዖን ፡ ወጸውዖሙ ፡ ለሙሴ ፡ ወለአሮን ፡ ወይቤሎሙ ፡ አበስኩ ፡ ይእዜሂ ፡ እግዚአብሔር ፡ ጻድቅ ፡ ወአንሰ ፡ ወሕዝብየ ፡ ረሲዓን ።

9:28  ጸልዩ ፡ እነከሰ ፡ ኀበ ፡ እግዚአብሔር ፡ ወይህዳእ ፡ እንከ ፡ ወኢይኩን ፡ ቃለ ፡ እግዚአብሔር ፡ በረድሂ ፡ ወእሳትሂ ፤ ወእፌንወክሙ ፡ ወኢያነብረክሙ ፡ ዳግመ ።

9:29  ወይቤሎ ፡ ሙሴ ፡ ለፈርዖን ፡ ሶበ ፡ ወፃእኩ ፡ እምሀገር ፡ ኣሌዕል ፡ እደዊየ ፡ ኀበ ፡ እግዚአብሔር ፡ ወየሀድእ ፡ ቃል ፡ ወበረድኒ ፡ ወዝናምኒ ፡ አልቦ ፡ እንከ ፡ ከመ ፡ ታእምር ፡ ከመ ፡ ለእግዚአብሔር ፡ ይእቲ ፡ ምድር ።

9:30  ወአንተሰ ፡ ወዐበይትከ ፡ ኣአምር ፡ እምአመ ፡ ኮንክሙ ፡ ኢፈራህክምዎ ፡ ለእግዚአብሔር ።

9:31  ትለቤ ፡ ወስገም ፡ ትማስን ፡ ወስገምሰ ፡ እንበለ ፡ ይስበል ፡ [ተዘብጠ ፡] ወትለቤ ፡ በዘ ፡ አውጽአ ፡ ዘርአ ።

9:32  ወስርናይ ፡ ወዐተር ፡ ኢ[ተዘብጠ ፡] እስመ ፡ ብሱል ፡ ውእቱ ።

9:33  ወወፅአ ፡ ሙሴ ፡ እምኀበ ፡ ፈርዖን ፡ አፍአ ፡ እምሀገር ፡ ወአልዐለ ፡ እደዊሁ ፡ ኀበ ፡ እግዚአብሔር ፡ ወሀድአ ፡ ቃል ፡ ወበረድ ፡ ወዝናምሂ ፡ ኢነፍነፈ ፡ እንከ ፡ ዲበ ፡ ምድር ።

9:34  ወሶበ ፡ ርእየ ፡ ፈርዖን ፡ ከመ ፡ ሀድአ ፡ ዝናም ፡ ወበረድ ፡ ወቃል ፡ ወሰከ ፡ አብሶ ፡ ወአክበደ ፡ ልቦ ፡ ወለዐበይቱሂ ።

9:35  ወጸንዐ ፡ ልቡ ፡ ለፈርዖን ፡ ወኢፈነዎሙ ፡ ለደቂቀ ፡ እስራኤል ፡ በከመ ፡ ነገሮ ፡ እግዚአብሔር ፡ ለሙሴ ።

Chapter 10

10:1  ወይቤሎ ፡ እግዚአብሔር ፡ ለሙሴ ፡ ባእ ፡ ኀበ ፡ ፈርዖን ፡ እስመ ፡ አነ ፡ አክበድኩ ፡ ልቦ ፡ ወለዐበይቱሂ ፡ ከመ ፡ ዕሩየ ፡ ይምጻእ ፡ ተአምርየ ፡ ላዕሌሆሙ ።

10:2  ወከመ ፡ ትንግሩ ፡ ለደቂቅክሙ ፡ ወለደቂቀ ፡ ደቂቅክሙ ፡ ኵሎ ፡ ዘተሳለቁ ፡ በግብጽ ፡ ወተአምርየ ፡ ዘገበርኩ ፡ ቦሙ ፡ ወታእምሩ ፡ ከመ ፡ አነ ፡ ውእቱ ፡ እግዚአብሔር ።

10:3  ወቦኡ ፡ ሙሴ ፡ ወአሮን ፡ ቅድመ ፡ ፈርዖን ፡ ወይቤልዎ ፡ ከመዝ ፡ ይቤ ፡ እግዚአብሔር ፡ አምላከ ፡ ዕብራዊያን ፡ እስከ ፡ ምንትኑ ፡ ተአቢ ፡ ኀፊሮትየ ፡ ወኢትፌኑ ፡ ሕዝብየ ፡ ከመ ፡ ይፀመዱኒ ።

10:4  ወእመ ፡ አበይከ ፡ ፈንዎተ ፡ ሕዝብየ ፡ ናሁ ፡ አነ ፡ አመጽእ ፡ ጌሠመ ፡ ዘጊዜ ፡ አንበጣ ፡ ብዙኀ ፡ ዲበ ፡ ኵሉ ፡ አድባሪከ ።

10:5  ወይከድን ፡ ገጻ ፡ ለምድር ፡ ወኢትክል ፡ ርእዮታ ፡ ለምድር ፡ ወይበልዕ ፡ ኵሎ ፡ ተረፈ ፡ ዘተረፈ ፡ ውስተ ፡ ምድር ፡ ዘአትረፈ ፡ በረድ ፡ ወይበልዕ ፡ ኵሎ ፡ ዕፀ ፡ ዘአብቈልክሙ ፡ ውስተ ፡ ምድር ።

10:6  ወይመልእ ፡ አብያቲከ ፡ ወዘዐበይትከ ፡ ወኵሉ ፡ አብያተ ፡ ዘውስተ ፡ ምድረ ፡ ግብጽ ፡ ዘእምአመ ፡ ኮኑ ፡ ኢርእዩ ፡ አበዊከ ፡ ወኢእለ ፡ ቅድመ ፡ አማሑቶሙ ፡ እምአመ ፡ ተፈጥሩ ፡ ውስተ ፡ ምድር ፡ እስከ ፡ ዛዕለት ፤ ወተግሕሡ ፡ ወወፅኡ ፡ እምኀበ ፡ ፈርዖን ።

10:7  ወይቤልዎ ፡ ዐበይቱ ፡ ለፈርዖን ፡ እስከ ፡ ማእዜ ፡ ትከውን ፡ ዲቤነ ፡ ዛቲ ፡ ዕፅብት ፡ ፈኑ ፡ ሰብአ ፡ ከመ ፡ ይፀመድዎ ፡ ለእግዚአብሔር ፡ አምላኮሙ ፡ አው ፡ ታእምርኑ ፡ ትፈቅድ ፡ ከመ ፡ ተሐጕለት ፡ ግብጽ ።

10:8  ወጸውዕዎሙ ፡ ለሙሴ ፡ ወለአሮን ፡ ኀበ ፡ ፈርዖን ፡ ወይቤሎሙ ፡ (ፈርዖን ፡ ለሙሴ ፡ ወለአሮን ፡) ሑሩ ፡ ወተፀመዱ ፡ ለእግዚአብሔር ፡ አምላክክሙ ፡ ወባሕቱ ፡ መኑ ፡ ወመኑ ፡ አንትሙ ፡ እለ ፡ ተሐውሩ ።

10:9  ወይቤሎ ፡ ሙሴ ፡ ምስለ ፡ ወራዙቲነ ፡ ወአእሩጊነ ፡ ነሐውር ፡ ወምስለ ፡ ደቂቅነ ፡ ወአዋልዲነ ፡ ወአባግዒነ ፡ ወአልህምቲነ ፡ እስመ ፡ በዓለ ፡ እግዚአብሔር ፡ ውእቱ ፡ ዘአምላክነ ።

10:10  ወይቤሎሙ ፡ (ፈርዖን ፡ ለሙሴ ፡ ወለአሮን ፡) ይኩን ፡ ከመዝ ፡ እግዚአብሔር ፡ ምስሌክሙ ፤ ናሁ ፡ ኪያክሙሰ ፡ እፌንወክሙ ፡ ወንዋይክሙሂ ፡ አእምሩኬ ፡ ከመ ፡ እኪተ ፡ ትሔልዩ ።

10:11  ከመዝኑ ፡ የሐውር ፡ ሰብእ ፡ ይፀመዶ ፡ ለእግዚአብሔር ፡ ምንተ ፡ እንከ ፡ ተኀሡ ፤ ወአውፅእዎሙ ፡ አፍአ ፡ ለሙሴ ፡ ወለአሮን ፡ እምገጸ ፡ ፈርዖን ።

10:12  ወይቤሎ ፡ እግዚአብሔር ፡ ለሙሴ ፡ ስፋሕ ፡ እዴከ ፡ ዲበ ፡ ምድረ ፡ ግብጽ ፡ ወይዕረግ ፡ አንበጣ ፡ ዲበ ፡ ምድር ፡ ወይብላዕ ፡ ኵሎ ፡ ሣዕረ ፡ ምድር ፡ ወኵሎ ፡ ፍሬ ፡ ዕፅ ፡ ዘአትረፈ ፡ በረድ ።

10:13  ወአልዐለ ፡ ሙሴ ፡ በትሮ ፡ ውስተ ፡ ሰማይ ፡ ወአምጽአ ፡ እግዚአብሔር ፡ ነፋሰ ፡ አዜብ ፡ ላዕለ ፡ ምድር ፡ ኵልሄ ፡ ይእተ ፡ ዕለተ ፡ ወኵሎ ፡ ሌሊተ ፡ እስከ ፡ ጸብሐ ፡ ወዝኩ ፡ ነፋሰ ፡ አዜብ ፡ ነሥኦ ፡ ለአንበጣ ፤

10:14  ወወሰዶ ፡ ዲበ ፡ ኵሉ ፡ ምድረ ፡ ግብጽ ፡ ወነበረ ፡ ዲበ ፡ ኵሉ ፡ አድባረ ፡ ግብጽ ፡ ብዙኅ ፡ ጥቀ ፡ ወዕዙዝ ፡ ዘእምቅድሜሁ ፡ ኢኮነ ፡ ከማሁ ፡ አንበጣ ፡ ወእምድኅሬሁ ፡ አልቦቱ ፡ ከማሁ ።

10:15  ወከደነ ፡ ገጸ ፡ ምድር ፡ ወማሰነት ፡ ምድር ፡ ወበልዐ ፡ ኵሎ ፡ ሣዕረ ፡ ምድር ፡ ወኵሎ ፡ ፍሬ ፡ ዕፅ ፡ ዘተርፈ ፡ እምበረድ ፡ ወኢተርፈ ፡ ኀመልማል ፡ ውስተ ፡ ዕፀው ፡ ወኢአሐቲ ፡ ወኢውስተ ፡ ኵሉ ፡ ሣዕረ ፡ ሐቅል ፡ በኵሉ ፡ ምድረ ፡ ግብጽ ።

10:16  ወጐጕአ ፡ ፈርዖን ፡ ጸውዖቶሙ ፡ ለሙሴ ፡ ወለአሮን ፡ ወይቤሎሙ ፡ አበስኩ ፡ ቅድመ ፡ እግዚአብሔር ፡ አምላክክሙ ፡ ወዲቤክሙ ።

10:17  ተቀበሉ ፡ እንተ ፡ ይእዜኒ ፡ ዓዲ ፡ ዐበሳየ ፡ ወጸልዩ ፡ ኀበ ፡ እግዚአብሔር ፡ አምላክክሙ ፡ ወይሰስል ፡ እምኔየ ፡ ዝሞት ።

10:18  ወወፅአ ፡ ሙሴ ፡ እምኀበ ፡ ፈርዖን ፡ ወጸለየ ፡ ኀበ ፡ እግዚአብሔር ።

10:19  ወሜጠ ፡ እግዚአብሔር ፡ ነፋሰ ፡ እምባሕር ፡ ዐቢየ ፡ ወነሥኦ ፡ ለአንበጣ ፡ ወወሰዶ ፡ ውስተ ፡ ባሕረ ፡ [ኤ]ርትራ ፡ ወኢተርፈ ፡ ወኢአሐዱ ፡ አንበጣ ፡ ውስተ ፡ ኵሉ ፡ ምድረ ፡ ግብጽ ።

10:20  ወአጽንዐ ፡ እግዚአብሔር ፡ ልቦ ፡ ለፈርዖን ፡ ወኢፈነዎሙ ፡ ለደቂቀ ፡ እስራኤል ።

10:21  ወይቤሎ ፡ እግዚአብሔር ፡ ለሙሴ ፡ ስፋሕ ፡ እዴከ ፡ ውስተ ፡ ሰማይ ፡ ወይኩን ፡ ጽልመት ፡ ውስተ ፡ ምድረ ፡ ግብጽ ፡ ጽልመ[ት] ፡ ዘያመረስስ ።

10:22  ወሰፍሐ ፡ እዴሁ ፡ ሙሴ ፡ ውስተ ፡ ሰማይ ፡ ወኮነ ፡ ጽልመት ፡ ወቆባር ፡ ዲበ ፡ ኵሉ ፡ ምድረ ፡ ግብጽ ፡ ሠሉሰ ፡ ዕለተ ።

10:23  ወኢርእየ ፡ አሐዱ ፡ ካልኦ ፡ ወአልቦ ፡ ዘተንሥአ ፡ እምስካቡ ፡ ሠሉሰ ፡ ዕለተ ፡ ወለኵሉ ፡ ደቂቀ ፡ እስራኤልሰ ፡ በርሀ ፡ በኵሉ ፡ ኀበ ፡ ሀለው ።

10:24  ወጸውዖሙ ፡ ፈርዖን ፡ ለሙሴ ፡ ወለአሮን ፡ ወይቤሎሙ ፡ ሑሩ ፡ ወተፀመዱ ፡ ለእግዚአብሔር ፡ አምላክክሙ ፡ እንበለ ፡ አባግዒክሙ ፡ ወአልህምቲክሙ ፡ ዘተኀድጉ ፡ ወንዋይክሙሰ ፡ ትነሥኡ ፡ ምስሌክሙ ።

10:25  ወይቤሎ ፡ ሙሴ ፡ ለፈርዖን ፡ አልቦ ፡ አንተ ፡ ዓዲ ፡ ትሁበነ ፡ ለመሥዋዕት ፡ ዘንገብር ፡ ለእግዚአብሔር ፡ አምላክነ ።

10:26  ወእንስሳነሂ ፡ ይወፅእ ፡ ምስሌነ ፡ ወኢነኅድግ ፡ ወኢምንተ ፡ እስመ ፡ እምኔሁ ፡ ንነሥእ ፡ ለመሥዋዕተ ፡ እግዚአብሔር ፡ አምላክነ ፡ ወንሕነሰ ፡ ኢናአምር ፡ ምንት ፡ ተፅማዱ ፡ ለእግዚአብሔር ፡ አምላክነ ፡ እስከ ፡ ንበጽሖ ፡ ህየ ።

10:27  ወአጽንዐ ፡ እግዚአብሔር ፡ ልቦ ፡ ለፈርዖን ፡ ወአበየ ፡ ፈንዎቶሙ ፡ ለደቂቀ ፡ እስራኤል ።

10:28  ወይቤሎ ፡ ፈርዖን ፡ ለሙሴ ፡ ሑር ፡ እምኀቤየ ፡ ወዑቅ ፡ ርእሰከ ፡ ዳግመ ፡ እንከ ፡ እመ ፡ ርኢከ ፡ ገጽየ ፡ ወእምከመ ፡ ርኢኩከ ፡ ዳግመ ፡ ትመውት ።

10:29  ወይቤሉ ፡ ሙሴ ፡ ኦሆ ፡ ኢያስተርእየከ ፡ እንከ ፡ ውስተ ፡ ገጽከ ።

Chapter 11

11:1  ወይቤሎ ፡ እግዚአብሔር ፡ ለሙሴ ፡ ዓዲ ፡ አሐተ ፡ መቅሠፍተ ፡ አመጽእ ፡ ዲበ ፡ ፈርዖን ፡ ወዲበ ፡ ግብጽ ፡ ወእምድኅረዝ ፡ ይፌንወክሙ ፡ እምዝየ ፡ ወአመ ፡ ይፌንወክሙ ፡ ምስለ ፡ ኵሉ ፡ ፀአ[ተ] ፡ ያወፅአክሙ ።

11:2  ወንግሮሙ ፡ ጽምሚተ ፡ በእዝኖሙ ፡ ለሕዝብ ፡ ወያስተውሕስ ፡ አሐዱ ፡ እምካልኡ ፡ ወብእሲት ፡ እምካልእታ ፡ ንዋየ ፡ ብሩር ፡ ወወርቅ ፡ ወልብ[ስ] ።

11:3  ወወሀቦሙ ፡ እግዚአብሔር ፡ ለሕዝብ ፡ ሞገሰ ፡ ቅድመ ፡ ግብጽ ፡ ወአውሐስዎሙ ፡ ወዝ ፡ ሙሴ ፡ ብእሴ ፡ ዐቢየ ፡ ኮነ ፡ ጥቀ ፡ ቅድመ ፡ ግብጽ ፡ ወቅድመ ፡ ፈርዖን ፡ ወቅድመ ፡ ዐበይቱ ።

11:4  ወይቤ ፡ ሙሴ ፡ ከመዝ ፡ ይቤ ፡ እግዚአብሔር ፡ መንፈቀ ፡ ሌሊት ፡ እበውእ ፡ አነ ፡ ማእከለ ፡ ግብጽ ።

11:5  ወይመውት ፡ ኵሉ ፡ በኵር ፡ በምድረ ፡ ግብጽ ፡ እምበኵረ ፡ ፈርዖን ፡ ዘይነብር ፡ ውስተ ፡ መንበረ ፡ መንግሥት ፡ እስከ ፡ በኵረ ፡ አመት ፡ እንተ ፡ ትነብር ፡ ዲበ ፡ ማኅረፅ ፡ ወእስከ ፡ ኵሉ ፡ በኵረ ፡ እንስሳ ።

11:6  ወይከውን ፡ ጽራኅ ፡ ዐቢይ ፡ በኵሉ ፡ ምድረ ፡ ግብጽ ፡ ዘከማሁ ፡ ኢኮነ ፡ ወኢይከውን ፡ እንከ ፡ ዘከማሁ ።

11:7  ወለኵሉ ፡ ደቂቀ ፡ እስራኤል ፡ ከልብ ፡ ጥቀ ፡ ኢይልሕሶሙ ፡ በልሳኑ ፡ እምሰብኡ ፡ እስከ ፡ እንስሳሁ ፡ ከመ ፡ ታእምር ፡ መጠነ ፡ ይሴባሕ ፡ እግዚአብሔር ፡ ማእከለ ፡ ግብጽ ፡ ወማእከለ ፡ እስራኤል ።

11:8  ወይወርዱ ፡ ኵሎሙ ፡ እሉ ፡ ደቂቅ ፡ ኀቤየ ፡ ወይሰግዱ ፡ ሊተ ፡ ወይብሉኒ ፡ ፃእ ፡ አንተ ፡ ወሕዝብከ ፡ ይእዜ ፡ እምዛ ፡ ምድር ፡ ወእምድኅረዝ ፡ እወጽእ ፡ ወወፅአ ፡ ሙሴ ፡ እምኀበ ፡ ፈርዖን ፡ በመዐት ።

11:9  ወይቤሎ ፡ እግዚአብሔር ፡ ለሙሴ ፡ ኢይሰምዐክሙ ፡ ፈርዖን ፡ ከመ ፡ አብዝኅ ፡ ተአምርየ ፡ ወመድምምየ ፡ በምድረ ፡ ግብጽ ።

11:10  ወሙሴ ፡ ወአሮን ፡ ገብሩ ፡ ኵሉ ፡ መድምመ ፡ በቅድመ ፡ ፈርዖን ፡ ወአጽንዐ ፡ እግዚአብሔር ፡ ልቦ ፡ ለፈርዖን ፡ ወአበየ ፡ ፈንዎቶሙ ፡ ለደቂቀ ፡ እስራኤል ፡ እምድረ ፡ ግብጽ ።

Chapter 12

12:1  ወይቤሎሙ ፡ እግዚአብሔር ፡ ለሙሴ ፡ ወለአሮን ፡ በምድረ ፡ ግብጽ ፤

12:2  ዝወርኅ ፡ ቀደማየ ፡ አውራኅ ፡ ይኩንክሙ ፡ ወአቅድምዎ ፡ እምአውራኅ ፡ ዓመት ።

12:3  ወንግር ፡ ለኵሉ ፡ ማኅበረ ፡ ደቂቀ ፡ እስራኤል ፡ ወበሎሙ ፡ በዐሡሩ ፡ ለዝ ፡ ወርኅ ፡ ይንሣእ ፡ ሎቱ ፡ ብእሲ ፡ ብእሲ ፡ በግዐ ፡ በበ ፡ ቤ[ተ] ፡ ዘመዱ ፡ ወለለ ፡ ማኅደሩ ፡ በግዐ ።

12:4  ወለእመ ፡ ውኁዳን ፡ እሙንቱ ፡ እለ ፡ ውስተ ፡ ቤት ፡ ወኢይዌድኡ ፡ አሐደ ፡ በግዐ ፡ ይንሣእ ፡ ምስሌሁ ፡ ካልአ ፡ ዘጎሩ ፡ በኊል[ቍ] ፡ ዘነፍስ ፡ ለለ ፡ አሐዱ ፡ አሐዱ ፡ ዘየአክሎ ፡ ከመ ፡ ይወድኡ ።

12:5  በግዐ ፡ ፍጹመ ፡ ተባዕተ ፡ ዘዓመት ፡ ይኩንክሙ ፡ እመራይ ፡ ትነሥኡ ፡ ማሕስአ ።

12:6  ወዕቁበ ፡ ይኩንክሙ ፡ እስከ ፡ ፲ወ፬ለዝ ፡ ወርኅ ፡ ወየሐርድዎ ፡ ኵሉ ፡ ብዝኀ ፡ ማኅበሮሙ ፡ ለደቂቀ ፡ እስራኤል ፡ ፍና ፡ ሰርክ ።

12:7  ወይንሥኡ ፡ እምደሙ ፡ ወይደዩ ፡ ውስተ ፡ ራግዛት ፡ ክልኤቱ ፡ ወውስተ ፡ መርፈቁ ፡ ለውእቱ ፡ ቤት ፡ ኀበ ፡ ይበልዕዎ ።

12:8  ወይበልዑ ፡ ሥጋሁ ፡ በዝ ፡ ሌሊት ፡ ጥብሶ ፡ በእሳት ፡ ወናእተ ፡ ምስለ ፡ ሐምለ ፡ ብሒእ ፡ ትበልዑ ።

12:9  ወኢትብልዑ ፡ እምኔሁ ፡ ጥራየ ፡ ወኢብስሎ ፡ በማይ ፡ እንበለ ፡ ጥብሶ ፡ በእሳት ፡ ርእሶ ፡ ምስለ ፡ እገሪሁ ።

12:10  ወትዌድእዎ ፡ ወኢታተርፉ ፡ እምኔሁ ፡ ለነግህ ፡ ወዐጽሞ ፡ ኢትስብሩ ፡ እምኔሁ ፡ ወለእመቦ ፡ ዘተርፈ ፡ እምኔሁ ፡ ለነግህ ፡ አውዕይዎ ፡ በእሳት ።

12:11  ወከመዝ ፡ ወባሕቱ ፡ ብልዕዎ ፡ እንዘ ፡ ቅኑት ፡ ሐቌክሙ ፡ ወአሣእኒክሙ ፡ ውስተ ፡ እገሪክሙ ፡ ወቀስታማቲክሙ ፡ ውስተ ፡ እደዊክሙ ፡ ወትበልዕዎ ፡ እንዘ ፡ ትጔጕኡ ፡ እስመ ፡ ፋሲካሁ ፡ ለእግዚአብሔር ፡ ውእቱ ።

12:12  ወእመጽእ ፡ ውስተ ፡ ምድረ ፡ ግብጽ ፡ በዛ ፡ ሌሊት ፡ ወእቀትል ፡ ኵሎ ፡ በኵረ ፡ በምድረ ፡ ግብጽ ፡ እምሰብእ ፡ እስከ ፡ እንስሳ ፡ ወእገብር ፡ በቀለ ፡ እምኵሉ ፡ አማልክተ ፡ ግብጽ ፡ አነ ፡ እግዚአብሔር ።

12:13  ወይኩን ፡ ዝደም ፡ ተአምረ ፡ ለክሙ ፡ ውስተ ፡ አብያት ፡ ኀበ ፡ ሀለውክሙ ፡ ህየ ፡ ወእሬእዮ ፡ ለውእቱ ፡ ደም ፡ ወእከድነክሙ ፡ ወኢይከውን ፡ ዲቤክሙ ፡ መቅሠፍት ፡ ለተቀጥቅጦ ፡ ሶበ ፡ አምጻእክዋ ፡ ዲበ ፡ ምድረ ፡ ግብጽ ።

12:14  ወትኩንክሙ ፡ ዛዕለት ፡ ተዝካረ ፡ ወትገብሩ ፡ በዓለ ፡ እግዚአብሔር ፡ ባቲ ፡ በመዋዕሊክሙ ፡ ሕገ ፡ ዘለዓለም ፡ በዓልክሙ ፡ ይእቲ ።

12:15  ሰቡዐ ፡ ዕለተ ፡ ናእተ ፡ ትበልዑ ፡ ወአመ ፡ ቀዳሚት ፡ ዕለት ፡ ታማስኑ ፡ ብሑአ ፡ እምአብያቲክሙ ፡ ወኵሉ ፡ ዘበልዐ ፡ ብሑአ ፡ ለትሠሮ ፡ ይእቲ ፡ ነፍስ ፡ እምእስራኤል ፡ እምዕለት ፡ ቀዳሚት ፡ እስከ ፡ ዕለት ፡ ሳብዕት ።

12:16  ወዕለት ፡ ቀዳሚት ፡ ትሰመይ ፡ ቅድስተ ፡ ወዕለት ፡ ሳብዕት ፡ ትኩንክሙ ፡ ቅድስተ ፡ ወኵሎ ፡ ግብረ ፡ ሐሪስ ፡ ኢትግበሩ ፡ ቦንቱ ፡ ዘእንበለ ፡ ኵሉ ፡ ዘይትገበሩ ፡ ለኵሉ ፡ ነፍስ ፡ ዘባሕቲቱ ፡ ይትገበር ፡ ለክሙ ።

12:17  ወዕቀብዋ ፡ ለዛቲ ፡ ትእዛዝ ፡ እስመ ፡ በዛቲ ፡ ዕለት ፡ አውፅኦ ፡ ለኀይልክሙ ፡ እምድረ ፡ ግብጽ ፡ ወትገብርዋ ፡ ለዛቲ ፡ ዕለት ፡ በዓላቲክሙ ፡ ሕገ ፡ ዘለዓለም ።

12:18  ወትቀድሙ ፡ ትእኅዙ ፡ እምዕለተ ፡ ዐሡሩ ፡ ወረቡዑ ፡ ለዝ ፡ ወርኅ ፡ ዘትቀድሙ ፡ እምሰርኩ ፡ ትበልዑ ፡ ናእተ ፡ እስከ ፡ አመ ፡ ፳ወ፩ለዝ ፡ ወርኅ ፡ እስከ ፡ ሰርክ ።

12:19  ሰቡዐ ፡ ዕለተ ፡ ብሑእ ፡ ኢይትረከብ ፡ ውስተ ፡ አብያቲክሙ ፡ ወኵሉ ፡ ዘበልዐ ፡ ብሑአ ፡ ለትሠሮ ፡ ይእቲ ፡ ነፍስ ፡ እማኅበረ ፡ እስራኤል ፡ እምግዩር ፡ ወእምዘ ፡ ፍጥረቱ ፡ እምድርክሙ ።

12:20  ኵሎ ፡ ብሑአ ፡ ኢትብልዑ ፡ በኵሉ ፡ መኃድሪክሙ ፡ ናእተ ፡ ብልዑ ።

12:21  ወጸውዖሙ ፡ ሙሴ ፡ ለኵሉ ፡ አዕሩገ ፡ እስራኤል ፡ ወይቤሎሙ ፡ ሑሩ ፡ ንሥኡ ፡ ለክሙ ፡ በግዐ ፡ በበዘመድክሙ ፡ ወሕርዱ ፡ ለፋሲካ ።

12:22  ወንሥኡ ፡ እስረተ ፡ አዞብ ፡ ወጽብኅዎ ፡ እምዝኩ ፡ ደም ፡ ዘኀበ ፡ ኆኅት ፡ ወሢምዎ ፡ ውስተ ፡ መርፈቅ ፡ ወዲበ ፡ ክልኤሆሙ ፡ ራግዛት ፡ እምውእቱ ፡ ደም ፡ ዘኀበ ፡ ኆኅት ፡ ለውእቱ ፡ ቤት ፡ [ወአንትሙ ፡ ኢትፃኡ ፡ እምውእቱ ፡ ቤት ፡] እስከ ፡ ይጸብሕ ።

12:23  ወይመጽእ ፡ እግዚአብሔር ፡ ከመ ፡ ይቅትሎሙ ፡ ለግብጽ ፡ ወይሬእዮ ፡ ለውእቱ ፡ ደም ፡ ውስተ ፡ መርፈቅ ፡ ወውስተ ፡ ክልኤሆሙ ፡ ራግዛት ፡ ወይትዐደዋ ፡ እግዚአብሔር ፡ ለይእቲ ፡ ኆኅት ፡ ወኢየኀድጎ ፡ ለቀታሊ ፡ ይባእ ፡ ውስተ ፡ አብያቲክሙ ፡ ከመ ፡ ይቅትል ።

12:24  ወዕቀቡ ፡ ዘሕገ ፡ ይኩንክሙ ፡ ወለውሉድክሙ ፡ ለዓለም ።

12:25  ወእመ ፡ ቦእክሙ ፡ ውስተ ፡ ምድር ፡ እንተ ፡ ይሁበክሙ ፡ እግዚአብሔር ፡ ለክሙ ፡ ዘነበበ ፡ ዕቀብዋ ፡ ለዛቲ ፡ ሥርዐት ።

12:26  ወእመ ፡ ይቤለክሙ ፡ ውሉድክሙ ፡ ምንትኑ ፡ ዛቲ ፡ ሥርዐት ፤

12:27  ትብልዎሙ ፡ መሥዋዕተ ፡ ፋሲካሁ ፡ ዝንቱ ፡ ለእግዚአብሔር ፡ ዘከደነ ፡ አብያቲሆሙ ፡ ለደቂቀ ፡ እስራኤል ፡ በምድረ ፡ ግብጽ ፡ ኣመ ፡ ቀተሎሙ ፡ ልግብጽ ፡ ወአድኀነ ፡ አብያቲነ ፡ ወደነነ ፡ ሕዝብ ፡ ወሰገደ ።

12:28  ወሖሩ ፡ ወገብሩ ፡ ደቂቀ ፡ እስራኤል ፡ በከመ ፡ አዘዞሙ ፡ እግዚአብሔር ፡ ለሙሴ ፡ ወለአሮን ፡ ከማሁ ፡ ገብሩ ።

12:29  ወሶበ ፡ ኮነ ፡ መንፈቀ ፡ ሌሊት ፡ ቀተለ ፡ እግዚአብሔር ፡ ኵሎ ፡ በኵረ ፡ በምድረ ፡ ግብጽ ፡ እምበኵረ ፡ ፈርዖን ፡ ዘይነብር ፡ ዲበ ፡ መንበረ ፡ መንግሥት ፡ እስከ ፡ በኵረ ፡ ፄዋዊት ፡ ቀዳሒት ፡ ወኵሎ ፡ በኵረ ፡ እንስሳ ።

12:30  ወተንሥአ ፡ ፈርዖን ፡ በሌሊት ፡ ወኵሉ ፡ ዐበይቱ ፡ ወኵሉ ፡ ግብጽ ፡ ወኮነ ፡ አውያት ፡ ዐቢይ ፡ በኵሉ ፡ ምድረ ፡ ግብጽ ፡ እስመ ፡ አልቦ ፡ ቤተ ፡ ዘአልቦ ፡ ውስቴቶን ፡ ምውተ ።

12:31  ወጸውዖሙ ፡ ፈርዖን ፡ ለሙሴ ፡ ወለአሮን ፡ በሌሊት ፡ ወይቤሎሙ ፡ ተንሥኡ ፡ ወፃኡ ፡ እምሕዝብየ ፡ አንትሙሂ ፡ ወደቂቀ ፡ እስራኤልሂ ፡ ወሑሩ ፡ ወተፀመድዎ ፡ ለእግዚአብሔር ፡ አምላክክሙ ፡ በከመ ፡ ትቤሉ ።

12:32  አባግዒክሙሂ ፡ ወአልህምቲክሙ ፡ ንሥኡ ፡ ወሑሩ ፡ ወባርኩኒ ፡ ኪያየ ።

12:33  ወአጽሐብዎሙ ፡ ግብጽ ፡ ለሕዝበ ፡ እስራኤል ፡ ከመ ፡ ፍጡነ ፡ ያውፅእዎሙ ፡ እምድረ ፡ ግብጽ ፡ እስመ ፡ ይቤሉ ፡ ኵልነ ፡ ንመውት ።

12:34  ወነሥኡ ፡ ሕዝብ ፡ ሐሪጾሙ ፡ እንበለ ፡ ይትበሓእ ፡ ብሑኦሙ ፡ ዕቁረ ፡ በአልባሲሆሙ ፡ ዲበ ፡ መታክፎሙ ።

12:35  ወገብሩ ፡ ደቂቀ ፡ እስራኤል ፡ በከመ ፡ አዘዞሙ ፡ ሙሴ ፡ ወአስተውሐሱ ፡ እምግብጽ ፡ ንዋየ ፡ ብሩር ፡ ወወርቅ ፡ ወልብስ ።

12:36  ወወሀቦሙ ፡ እግዚአብሔር ፡ ሞገሰ ፡ ለሕዝበ ፡ እስራኤል ፡ በቅድሜሆሙ ፡ ለግብጽ ፡ ወአውሐስዎሙ ፡ ወሐብለይዎሙ ፡ ለግብጽ ።

12:37  ወግዕዙ ፡ ደቂቀ ፡ እስራኤል ፡ እምራምሴ ፡ ውስተ ፡ ሶኮታ ፡ ፷፻-፻አጋር ፡ ዕደው ፡ ዘእንበለ ፡ ዘምስለ ፡ ንዋይ ።

12:38  ወዘ[ተ]ደመረ ፡ ዘዐርገ ፡ ምስሌሆሙ ፡ ብዙኅ ፡ ወበግዕ ፡ ወላህም ፡ ወእንስሳ ፡ ብዙኅ ፡ ጥቀ ።

12:39  ወሐበዙ ፡ ሐሪጾሙ ፡ ዘአውጽኡ ፡ እምግብጽ ፡ ወገብርዎ ፡ ዳፍንተ ፡ ናእተ ፡ እስመ ፡ እንበለ ፡ ያብሕኡ ፡ አውጽእዎሙ ፡ ግብጽ ፡ ወኢክህሉ ፡ ነቢረ ፡ ወኢገብሩ ፡ ሎሙ ፡ ሥንቀ ፡ ለፍኖት ።

12:40  ወኅድረቶሙ ፡ ለደቂቀ ፡ እስራኤል ፡ ዘነበሩ ፡ ምድረ ፡ ግብጽ ፡ ወምድረ ፡ ከናአን ፡ እሙንቱ ፡ ወአበዊሆሙ ፡ ፬፻፴ዓመት ።

12:41  ወኮነ ፡ እምድኅረ ፡ ፬፻፴ዓመት ፡ ወፅአ ፡ ኵሉ ፡ ኀይለ ፡ እግዚአብሔር ፡ እምድረ ፡ ግብጽ ፡ ሌሊተ ።

12:42  እምቅድመ ፡ ዕቅበቱ ፡ ውእቱ ፡ ለእግዚአብሔር ፡ ከመ ፡ ያውጽኦሙ ፡ እምድረ ፡ ግብጽ ፡ ወኪያሃ ፡ ሌሊተ ፡ ይእቲ ፡ ቅድመ ፡ ዕቅበቱ ፡ ለእግዚአብሔር ፡ ከመ ፡ የሀልው ፡ ኵሉ ፡ ደቂቀ ፡ እስራኤል ፡ በትውልዶሙ ።

12:43  ወይቤሎሙ ፡ እግዚአብሔር ፡ ለሙሴ ፡ ወለአሮን ፡ ዝውእቱ ፡ ሕጉ ፡ ለፋሲካ ፡ ኵሉ ፡ ዘእምባዕድ ፡ ዘመድ ፡ ኢይብላዕ ፡ እምኔሁ ።

12:44  ወኵሉ ፡ ገብር ፡ ዘኮነ ፡ ወዘበሤጥ ፡ ትገዝርዎ ፡ ወይእተ ፡ ጊዜ ፡ ይበልዕ ፡ እምኔሁ ።

12:45  ኀደሪ ፡ ወገባኢ ፡ ኢይብላዕ ፡ እምኔሁ ።

12:46  ወበአሐዱ ፡ ቤት ፡ ይትበላዕ ፡ ወኢታውጽኡ ፡ አፍአ ፡ እምቤት ፡ እምውእቱ ፡ ሥጋ ፡ ወዐጽሞሂ ፡ ኢትስብሩ ።

12:47  ወኵሉ ፡ ማኅበረ ፡ እስራኤል ፡ ለይግበሮ ።

12:48  ወእመቦ ፡ ዘመጽአ ፡ ኀቤክሙ ፡ ግዩር ፡ ወገብረ ፡ ፋሱካሁ ፡ ለእግዚአብሔር ፡ ትገዝር ፡ ኵሎ ፡ ተባዕቶ ፡ ወይእተ ፡ ጊዜ ፡ ይሀውእ ፡ ይግሀሮ ፡ ወይከውነክሙ ፡ ከመ ፡ ትውልደ ፡ ብሔሩ ፡ ወኵሉ ፡ ቈላፍ ፡ ኢይብላዕ ፡ እምኔሁ ።

12:49  አሐዱ ፡ ሕግ ፡ ይኩን ፡ ለሐቃል ፡ ወለግዩር ፡ (ወ)ለዘይመጽእ ፡ ኀቤክሙ ።

12:50  ወገብሩ ፡ ደቂቀ ፡ እስራኤል ፡ በከመ ፡ አዘዞሙ ፡ እግዚአብሔር ፡ ለሙሴ ፡ ወለአሮን ፡ ከማሁ ፡ ገብሩ ።

12:51  ወኮነ ፡ በይእቲ ፡ ዕለት ፡ አውጽኦሙ ፡ እግዚአብሔር ፡ ለደቂቀ ፡ እስራኤል ፡ እምድረ ፡ ግብጽ ፡ ምስለ ፡ ኀይሎሙ ።

Chapter 13

13:1  ወይቤሎ ፡ እግዚአብሔር ፡ ለሙሴ ፤

13:2  ቀድስ ፡ ሊተ ፡ ኵሎ ፡ በኵረ ፡ ቀዳሚ ፡ ውሉድ ፡ ዘይፈትሕ ፡ ኵሎ ፡ ሕምሰ ፡ እምደቂቀ ፡ እስራኤል ፡ እምሰብእ ፡ እስከነ ፡ እንስሳ ፡ ሊተ ፡ ውእቱ ።

13:3  ወይቤሎሙ ፡ ሙሴ ፡ ለሕዝብ ፡ ተዘከርዋ ፡ ለዛቲ ፡ ዕለት ፡ እንተ ፡ ባቲ ፡ ወፃእክሙ ፡ እምብሔረ ፡ ግብጽ ፡ እምቤት ፡ ቅንየት ፡ እስመ ፡ በእድ ፡ ጽንዕት ፡ አውፅአክሙ ፡ እግዚአብሔር ፡ እምዝየ ፡ ወኢትብልዑ ፡ ብሑአ ።

13:4  እስመ ፡ በዛቲ ፡ ዕለት ፡ ትወጽኡ ፡ አንትሙ ፡ በወርኀ ፡ ሃሌሉያ ፡ (ኔሳን) ።

13:5  ወእመ ፡ ወሰደክሙ ፡ እግዚአብሔር ፡ ውስተ ፡ ምድረ ፡ ከናኔዎን ፡ ወኬጤዎን ፡ ወአሞሬዎን ፡ ወኤዌዎን ፡ ወኢያ[ቡ]ሴዎን ፡ ወጌርጌሴዎን ፡ ወፌሬዜዎን ፡ ዘመሐለ ፡ ከመ ፡ የሀቦሙ ፡ ለአበዊክሙ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ፡ ወተዘከርዋ ፡ ለዛቲ ፡ ሥርዐት ፡ በዝ ፡ ወርኅ ።

13:6  ሰዱሰ ፡ ዕለተ ፡ ትበልዑ ፡ ናእተ ፡ ወሳብዕት ፡ ዕለት ፡ በዓሉ ፡ ለእግዚአብሔር ።

13:7  ናእተ ፡ ትበልዑ ፡ ሰቡዐ ፡ ዕለተ ፡ ወኢያስተርኢክሙ ፡ ብሑእ ፡ ወኢየሀሉ ፡ ብሕእት ፡ ውስተ ፡ ኵሉ ፡ አድባሪክሙ ።

13:8  ወትዜንዎ ፡ ለወልድከ ፡ በይእቲ ፡ ዕለት ፡ ወትብሎ ፡ በእንተዝ ፡ ገብሮ ፡ እግዚእ ፡ እግዚአብሔር ፡ ገብሮ ፡ ሊተ ፡ አመ ፡ ወፃእኩ ፡ እምብሔረ ፡ ግብጽ ፤

13:9  ከመ ፡ ይኩን ፡ ለከ ፡ ተአምረ ፡ ውስተ ፡ እደዊከ ፡ ወተዝካረ ፡ ቅድመ ፡ አዕይንቲከ ፡ ወከመ ፡ ይኩን ፡ ሕጉ ፡ ለእግዚአብሔር ፡ ውስተ ፡ አፉከ ፡ እስመ ፡ በእድ ፡ ጽንዕት ፡ አውፅአከ ፡ እግዚአብሔር ፡ እምግብጽ ።

13:10  ወዕቀብዎ ፡ ለዝንቱ ፡ ሕግ ፡ በበጊዜሁ ፡ እምዕለት ፡ ለዕለት ።

13:11  ወሶበ ፡ ወሰደከ ፡ እግዚአብሔር ፡ ውስተ ፡ ምድረ ፡ ከናኔዎን ፡ እንተ ፡ መሐለ ፡ ለአበዊከ ፡ ወወሀበካሃ ፤

13:12  ትፍልጥ ፡ ኵሎ ፡ ዘይፈትሕ ፡ ሕምሰ ፡ እመራዕይከ ፡ ወእምእንስሳከ ፡ ዘተወልደ ፡ ተባዕተ ፡ ለእግዚአብሔር ።

13:13  ወኵሉ ፡ ዘይፈትሕ ፡ ሕምሰ ፡ [እድግት] ፡ ትዌልጦ ፡ በበግዕ ፡ ወእመ ፡ ኢወለጥካሁ ፡ ትቤዝዎ ፡ ወኵሎ ፡ በኵረ ፡ ተባዕት ፡ እምውሉድከ ፡ ትቤዝዎ ።

13:14  ወእመ ፡ ተስእለከ ፡ ወልድከ ፡ እምድኅረዝ ፡ ወይቤለከ ፡ ምንተ ፡ ውእቱዝ ፡ ወትብሎ ፡ እስመ ፡ በእድ ፡ ጽንዕት ፡ አውፅአነ ፡ እግዚአብሔር ፡ እምድረ ፡ ግብጽ ፡ እምቤተ ፡ ቅንየት ።

13:15  አመ ፡ አበየ ፡ ፈርዖን ፡ ፈንዎተነ ፡ ቀተለ ፡ ኵሎ ፡ በኵረ ፡ በምድረ ፡ ግብጽ ፡ እምበኵረ ፡ ሰብእ ፡ እስከ ፡ እንስሳ ፡ ወበእንተዝ ፡ አነ ፡ እሠውዕ ፡ ለእግዚአብሔር ፡ ኵሎ ፡ ተባዕተ ፡ ዘይፈትሕ ፡ ሕምሰ ፡ ወኵሎ ፡ በኵረ ፡ ውሉድየ ፡ እቤዙ ።

13:16  ወይኩን ፡ ተአም[ረ] ፡ ውስተ ፡ እዴከ ፡ ወዘኢይሴስል ፡ እምቅድመ ፡ ዐይንከ ፡ እስመ ፡ በእድ ፡ ጽንዕት ፡ አውጽአነ ፡ እግዚአብሔር ።

13:17  ወሶበ ፡ ፈነዎሙ ፡ ፈርዖን ፡ ለሕዝብ ፡ ኢመርሖሙ ፡ እግዚአብሔር ፡ ፍኖተ ፡ ፍልስ[ጥኤ]ም ፡ እስመ ፡ ቅርብት ፡ ይእቲ ፡ እስመ ፡ ይቤ ፡ እግዚአብሔር ፡ ዮጊ ፡ ይኔስሕ ፡ እምከመ ፡ ርእየ ፡ ቀትለ ፡ ወይገብእ ፡ ውስተ ፡ ግብጽ ።

13:18  ወዐገቶሙ ፡ እግዚአብሔር ፡ ለሕዝብ ፡ ላዕለ ፡ ፍኖተ ፡ ሐቅለ ፡ ባሕረ ፡ [ኤ]ርትራ ፤ ወበኀምስ ፡ ትውልድ ፡ ዐርጉ ፡ ደቂቀ ፡ እስራኤል ፡ እምድረ ፡ ግብጽ ።

13:19  ወነሥአ ፡ ሙሴ ፡ አዕጽምቲሁ ፡ ለዮሴፍ ፡ ምስሌሁ ፡ እስመ ፡ መሐላ ፡ አምሐሎሙ ፡ ለደቂቀ ፡ እስራኤል ፡ ወይቤሎሙ ፡ አመ ፡ ኀውጾ ፡ ይኄውጸክሙ ፡ እግዚአብሔር ፡ ንሥኡ ፡ አዕጽምትየ ፡ ወአውጽኡ ፡ ምስሌክሙ ፡ እምዝየ ።

13:20  ወግዕዙ ፡ ደቂቀ ፡ እስራኤል ፡ እምሶኮት ፡ ወሐደሩ ፡ ውስተ ፡ ኦቶ[ም] ፡ ዘመንገለ ፡ በድው ።

13:21  ወእግዚአብሔር ፡ ይመርሖሙ ፡ መዓልተ ፡ በዐምደ ፡ ደመና ፡ ወሌሊተ ፡ በዐምደ ፡ እሳት ።

13:22  ወኢሰሰለ ፡ ዐምደ ፡ ደመና ፡ መዓልተ ፡ ወኢዐምደ ፡ እሳት ፡ ሌሊተ ፡ እምቅድመ ፡ ኵሉ ፡ ሕዝብ ።

Chapter 14

14:1  ወይቤሎ ፡ እግዚአብሔር ፡ ለሙሴ ፤ በሎሙ ፡ ለደቂቀ ፡ እስራኤል ፡ ወይግብኡ ፡ ወይኅድሩ ፡ አንጻረ ፡ ኢጴውሎስ ፡ ማእከለ ፡ መግዱሎ ፡ ወማእከለ ፡ ባሕር ፡ መንገለ ፡ [ብ]ዕልሴፎን ፡ ቅድሜሆሙ ፡ ኀደሩ ፡ ኀበ ፡ ባሕር ።

14:2  ወይብል ፡ ፈርዖን ፡ በእንተ ፡ ደቂቀ ፡ እስራኤል ፡ ሳኰዩ ፡ እ[ሙ]ንቱ ፡ ውስተ ፡ ምድር ፡ አርከበቶሙ ፡ ሐቅል ።

14:3  ወአነ ፡ አጸንዕ ፡ ልቦ ፡ ለፈርዖን ፡ ወይዴግኖሙ ፡ እምድኅሬሆሙ ፡ ወእሴባሕ ፡ አነ ፡ በፈርዖን ፡ ወበኵሉ ፡ ሐራሁ ፡ ወይእምሩ ፡ ኵሉ ፡ ግብጽ ፡ ከመ ፡ አነ ፡ ውእቱ ፡ እግዚአብሔር ፤

14:4  ወገብሩ ፡ ከማሁ ።

14:5  ወዜነውዎ ፡ ለንጉሠ ፡ ግብጽ ፡ ከመ ፡ ነፍጸ ፡ ሕዝብ ፡ ወተመይጠ ፡ ልቡ ፡ ለፈርዖን ፡ ወዘዐበይቱ ፡ ዲበ ፡ ሕዝብ ፡ ወይቤ ፡ ምንትኑዝ ፡ ዘገበርነ ፡ ከመ ፡ ንፈንዎሙ ፡ ለደቂቀ ፡ እስራኤል ፡ ከመ ፡ ኢይትቀነዩ ፡ ለነ ።

14:6  ወአንሥአ ፡ ፈርዖን ፡ ኵሎ ፡ ሰረገላቲሁ ፡ ወኵሎ ፡ ሕዝቦ ፡ አስተጋብአ ፡ ምስሌሁ ።

14:7  ወነሥአ ፡ ፯፻ሰረገላ ፡ ኅሩየ ፡ ወኵሉ ፡ አፍራሶሙ ፡ ለግብጽ ፡ ወሠለሶሙ ፡ ለኵሉ ።

14:8  ወአጽንዐ ፡ እግዚአብሔር ፡ ልቦ ፡ ለፈርዖን ፡ ለንጉሠ ፡ ግብጽ ፡ ወዴገነ ፡ ድኅሬሆሙ ፡ ለደቂቀ ፡ እስራኤል ፡ ወደቂቀ ፡ እስራኤልሰ ፡ የሐውሩ ፡ በእድ ፡ ልዕልት ።

14:9  ወዴገንዎሙ ፡ ግብጽ ፡ እምድኅሬሆሙ ፡ ወረከብዎሙ ፡ በኀበ ፡ ተዓየኑ ፡ መንገለ ፡ ባሕር ፡ ወኵሉ ፡ ፈረስ ፡ ወኵሉ ፡ ሰረገላ ፡ ፈርዖን ፡ ወሐራሁ ፡ አንጻረ ፡ እጰውሊዮስ ፡ መንገለ ፡ ብዕለ ፡ ሴፎን ።

14:10  ወተንሥአ ፡ ፈርዖን ፡ ወነጸሩ ፡ ደቂቀ ፡ እስራኤል ፡ ወርእይዎሙ ፡ ወይግዕዙ ፡ ግብጽ ፡ ድኅሬሆሙ ፡ ወፈርሁ ፡ ጥቀ ፡ ወአውየው ፡ ደቂቀ ፡ እስራኤል ፡ ኀበ ፡ እግዚአብሔር ።

14:11  ወይቤልዎ ፡ ለሙሴ ፡ ዝ[ኅ]ርነሂ ፡ ከመ ፡ ኢየሀሉ ፡ ውስተ ፡ ብሔረ ፡ ግብጽ ፡ አውጻእከነ ፡ ትቅትለነ ፡ ውስተ ፡ በድው ፡ ወምንትኑዝ ፡ ዘገበርከ ፡ ላዕሌነ ፡ ዘአውጻእከነ ፡ እምብሔረ ፡ ግብጽ ።

14:12  አኮሁ ፡ ዝውእቱ ፡ ቃልነ ፡ ዘንቤለከ ፡ በብሔረ ፡ ግብጽ ፡ ኅድገነ ፡ ንትቀነይ ፡ ለግብጽ ፡ እስመ ፡ ይኄይሰነ ፡ ተቀንዮተ ፡ ለግብጽ ፡ እመዊት ፡ በበድው ።

14:13  ወይቤሎሙ ፡ ሙሴ ፡ ለሕዝብ ፡ ተአመኑ ፡ ወቁሙ ፡ ወትርአዩ ፡ መድኀኒተ ፡ እምኀበ ፡ እግዚአብሔር ፡ እንተ ፡ ይገብር ፡ ለነ ፡ ዮም ፡ እስመ ፡ ከመ ፡ ትሬእይዎሙ ፡ ዮም ፡ ለግብጽ ፡ ዳግመ ፡ ኢትሬእይዎሙ ፡ እንከ ፡ ጕንዱየ ፡ ለዓለም ።

14:14  ወእግዚአብሔር ፡ ይፀብእ ፡ ለክሙ ፡ ወአንትሙሰ ፡ አርምሙ ።

14:15  ወይቤሎ ፡ እግዚአብሔር ፡ ለሙሴ ፡ ለምንት ፡ ትጸርሕ ፡ ኀቤየ ፡ በሎሙ ፡ ለደቂቀ ፡ እስራኤል ፡ ይንድኡ ፡ እንስሳሆሙ ።

14:16  ወአንተሰ ፡ ንሣእ ፡ በትረከ ፡ ወስፋሕ ፡ እዴከ ፡ ዲበ ፡ ባሕር ፡ ወዝብጣ ፡ ወይባኡ ፡ ደቂቀ ፡ እስራኤል ፡ ውስተ ፡ ማእከለ ፡ ባሕር ፡ ላዕለ ፡ የብስ ።

14:17  ወናሁ ፡ አነ ፡ አጸንዕ ፡ ልቦ ፡ ለፈርዖን ፡ ወለኵሉ ፡ ግብጽ ፡ ወይበውኡ ፡ ድኅሬሆሙ ፡ ወእሴባሕ ፡ አነ ፡ በፈርዖን ፡ ወበኵሉ ፡ ሐራሁ ፡ ወበሰረገላቲሁ ፡ ወበኵሉ ፡ አፍራሲሁ ።

14:18  ወያእምሩ ፡ ኵሉ ፡ ግብጽ ፡ ከመ ፡ አነ ፡ እግዚአብሔር ፡ ተሰቢሕየ ፡ በፈርዖን ፡ ወበሰረገላሁ ፡ ወበኵሉ ፡ አፍራሲሁ ።

14:19  ወሰሰለ ፡ መልአከ ፡ እግዚአብሔር ፡ ዘየሐውር ፡ ቅድመ ፡ ትዕይንቶሙ ፡ ለደቂቀ ፡ እስራኤል ፡ ወቆመ ፡ እምድኅሬሆሙ ፡ ወሰሰለ ፡ ዐምደ ፡ ደመና ፡ እምቅድሜሆሙ ፡ ወቆመ ፡ እምድኅሬሆም ።

14:20  ወቦአ ፡ ማእከለ ፡ ትዕይንቶሙ ፡ ለግብጽ ፡ ወማእከለ ፡ ትዕይንቶሙ ፡ ለእስራኤል ፡ ወኮነ ፡ ቆባር ፡ ወጽልመት ፡ ወኢተደመሩ ፡ በበይናቲሆሙ ፡ ኵለንታሃ ፡ ሌሊተ ።

14:21  ወሰፍሐ ፡ ሙሴ ፡ እዴሁ ፡ ዲበ ፡ ባሕር ፡ ወአምጽአ ፡ ላዕለ ፡ ባሕር ፡ ነፋሰ ፡ አዜብ ፡ (ላዕለ ፡ ባሕር ፡) ጽኑዐ ፡ ኵሉ ፡ ሌሊተ ፡ ወገብራ ፡ ለባሕር ፡ የብሰ ፡ ወሠጠጦ ፡ ለማይ ።

14:22  ወቦኡ ፡ ደቂቀ ፡ እስራኤል ፡ ማእከለ ፡ ባሕር ፡ ላዕለ ፡ የብስ ፡ ወማይሰ ፡ ኮነ ፡ አረፍተ ፡ በየማኖሙ ፡ ወአረፍተ ፡ በፀጋሞሙ ።

14:23  ወዴገንዎሙ ፡ ግብጽ ፡ ወቦኡ ፡ ድኅሬሆሙ ፡ ወኵሉ ፡ አፍራሰ ፡ ፈርዖን ፡ ወሰረገላቲሁ ፡ ወመስተጽዕናን ፡ ቦኡ ፡ ማእከለ ፡ ባሕር ።

14:24  ወሶበ ፡ ኮነ ፡ ዕቅበተ ፡ ሌሊት ፡ እንተ ፡ አፈ ፡ ጽባሕ ፡ ወነጸረ ፡ እግዚአብሔር ፡ ውስተ ፡ ትዕይንቶሙ ፡ ለግብጽ ፡ በዐምደ ፡ እሳት ፡ ወደመና ፡ ወአዘዘ ፡ ላዕለ ፡ ትዕይንተ ፡ ግብጽ ።

14:25  ወአሰረ ፡ ማእሰርተ ፡ ሰረገላቲሆሙ ፡ ወወሰዶሙ ፡ በሥቃይ ፡ ወይቤሉ ፡ ግብጽ ፡ ንንፈጽ ፡ እምገጾሙ ፡ ለእስራኤል ፡ እስመ ፡ እግዚአብሔር ፡ ይፅብዕ ፡ ሎሙ ።

14:26  ወይቤሎ ፡ እግዚአብሔር ፡ ለሙሴ ፡ ስፋሕ ፡ እዴከ ፡ ዲበ ፡ ባሕር ፡ ወይትገባእ ፡ ማይ ፡ ዲበ ፡ ግብጽ ፡ ወዲበ ፡ ሰረገላቲሁ ፡ ወዲበ ፡ መስተጽዕናኒሆሙ ።

14:27  ወሰፍሐ ፡ ሙሴ ፡ እዴሁ ፡ ዲበ ፡ ባሕር ፡ ወከደኖሙ ፡ ባሕር ፡ በዕለቱ ፡ ወዐገቶሙ ፡ እምድኅር ፡ ወጐዩ ፡ ግብጽ ፡ ውስተ ፡ ባሕር ፡ ወነገፎሙ ፡ እግዚአብሔር ፡ ለግብጽ ፡ ማእከለ ፡ ባሕር ።

14:28  ወተመይጠ ፡ ባሕር ፡ ወተሰጥሙ ፡ ምስለ ፡ ሰረገላቲሆሙ ፡ ወ[መስተጽዕና]ኒሆሙ ፡ ወኵሉ ፡ ኀይሉ ፡ ለፈርዖን ፡ በከመ ፡ መጽኡ ፡ ውስተ ፡ ባሕር ፡ ወአልቦ ፡ ዘተርፈ ፡ እምእለ ፡ መጽኡ ፡ ኵሎሙ ፡ ወኢአሐዱ ።

14:29  ወውሉደ ፡ እስራኤል ፡ ሖሩ ፡ ውስተ ፡ ይብስት ፡ ባሕር ፡ ወባሕር ፡ አረፍተ ፡ ኮኖሙ ፡ እምይምን ፡ ወእምፅግም ።

14:30  ወአድኀኖሙ ፡ እግዚአብሔር ፡ ለእስራኤል ፡ በይእቲ ፡ ዕለት ፡ እምውስተ ፡ እዴሆሙ ፡ ለግብጽ ፡ ወርእዩ ፡ እስራኤል ፡ ከመ ፡ ሞቱ ፡ ግብጽ ፡ በውስተ ፡ ድንጋጉ ፡ ለባሕር ።

14:31  ወርእዩ ፡ እስራኤል ፡ እደ ፡ ዐቢየ ፡ ዘገብረ ፡ እግዚአብሔር ፡ ለግብጽ ፡ ወፈርሀ ፡ ሕዝብ ፡ እግዚአብሔር ፡ ወአምኑ ፡ በእግዚአብሔር ፡ ወሙሴሃኒ ፡ አዕበዩ ፡ ላእኮ ፡ ለእግዚአብሔር ።

Chapter 15

15:1  ወባረከ ፡ ዘቡራኬ ፡ ሙሴ ፡ ወውሉደ ፡ እስራኤል ፡ ለእግዚአብሔር ፡ በፍትሐተ ፡ ቃል ፡ ንባርኮ ፡ ለእግዚአብሔር ፡ እስመ ፡ ክበር ፡ ውእቱ ፡ ወሎቱ ፡ ይደሉ ፡ ስባሔ ፤ ፈረሰ ፡ ወመስተፅዕኖ ፡ ወረወ ፡ ውስተ ፡ ባሕር ።

15:2  ረዳኢየ ፡ ወመ[ሰው]ረ ፡ ኮነኒ ፡ ለአድኅኖትየ ፤ ውእቱ ፡ አምለኪየ ፡ ወእሴብሖ ፤ አምላኩ ፡ ልአቡየ ፡ ወአሌዕሎ ።

15:3  እግዚአብሔር ፡ ይቀጠቅጥ ፡ ፀብአ ፡ ወእግዚአብሔር ፡ ስሙ ።

15:4  ሰረገላቲሁ ፡ ለፈርዖን ፡ ወሰራዊቶ ፡ ወረወ ፡ ውስተ ፡ ባሕር ፡ ኅሩያነ ፡ ወመስተጽዕናነ ፡ በመሥልስት ፡ ወተሰጥሙ ፡ ውስተ ፡ ባሕረ ፡ ኤርትራ ።

15:5  ወደፈኖሙ ፡ ማዕበል ፡ ወተሰጥሙ ፡ ውስተ ፡ ቀላይ ፡ ከመ ፡ እብን ።

15:6  የማንከ ፡ እግዚኦ ፡ ተሰብሐ ፡ በኀይል ፤ የማነ ፡ እዴከ ፡ እግዚኦ ፡ ሠረወቶሙ ፡ ለፀር ።

15:7  ወበብዝኀ ፡ ስብሐቲከ ፡ ቀጥቀጥኮሙ ፡ ለጸላዕትከ ፤ ፈነውከ ፡ መዐተከ ፡ ወበልዖሙ ፡ ከመ ፡ ብርዕ ።

15:8  ወበመንፈሰ ፡ መዐትከ ፡ ቆመ ፡ ማይ ፤ ወጠግአ ፡ ከመ ፡ እረፍት ፡ ማይ ፤ ወረግአ ፡ ማዕበል ፡ በማእከለ ፡ ባሕር ።

15:9  ወይቤ ፡ ጸላኢ ፡ ዴጊንየ ፡ እእኅዞሙ ፤ እትካፈል ፡ ምህርካ ፡ ወአጸግባ ፡ ለነፍስየ ፤ እቀትል ፡ በመጥባሕትየ ፡ ወእኴንን ፡ በእዴየ ።

15:10  ፈነውከ ፡ መንፈሰከ ፡ ወደፈኖሙ ፡ ባሕር ፤ ወተሠጥሙ ፡ ከመ ፡ ዐረር ፡ ውስተ ፡ ማይ ፡ ብዙኅ ።

15:11  መኑ ፡ ይመስለከ ፡ እምነ ፡ አማልክት ፡ እግዚኦ ፤ ወመኑ ፡ ከማከ ፡ ስቡሕ ፡ በውስተ ፡ ቅዱሳን ፤ መንክር ፡ ስብሐቲከ ፡ ወትገብር ፡ መድምመ ።

15:12  ሰፋሕከ ፡ የማነከ ፡ ወውሕጠቶሙ ፡ ምደር ።

15:13  ወመራሕኮሙ ፡ ለሕዝብከ ፡ እለ ፡ ቤዘውከ ፤ ወአስተፈሣሕከ ፡ በኀይልከ ፡ ተረፈ ፡ መቅደስከ ።

15:14  ሰምዑ ፡ አሕዛብ ፡ ወተምዕዑ ፤ ወአኀዞሙ ፡ ማሕምም ፡ ለእለ ፡ ይነብሩ ፡ ፍልስጥኤም ።

15:15  ወይእተ ፡ አሚረ ፡ መምዑ ፡ መሳፍንተ ፡ ኤዶም ፤ ወአኀዞሙ ፡ ረዓድ ፡ ለመላእክተ ፡ ሞአብ ፤ ወተመስው ፡ ኵሎሙ ፡ እለ ፡ ይነብሩ ፡ ከናአን ።

15:16  ወአኀዞሙ ፡ ፍርሀት ፡ ወረዓድ ፤ ኀይለ ፡ መዝራዕትከ ፡ ጸንዐ ፡ እምኰኵሕ ፤ እስከ ፡ የኀልፍ ፡ ሕዝ[ብ]ከ ፡ እግዚኦ ፡ እስከ ፡ የኀልፍ ፡ ሕዝ[ብ]ከ ፤ ዝንቱ ፡ ሕዝብ ፡ ዘቤዞከ ።

15:17  ወወሰድኮሙ ፡ [ወተከልኮሙ ፡] ውስተ ፡ ደብረ ፡ መቅደስከ ፤ ውስተ ፡ ድልው ፡ ማኅደርከ ፡ እግዚኦ ፡ ዘገበርከ ፤ ቅዱስ ፡ እግዚኦ ፡ ዘአስተደለወ ፡ እደዊከ ።

15:18  ይነግሥ ፡ እግዚአብሔር ፡ ለዓለም ፡ ወለዓለመ ፡ ዓለም ፡ ወዓዲ ።

15:19  እስመ ፡ ቦአ ፡ ሰረገላተ ፡ ፈርዖን ፡ ምስለ ፡ አፍራሲሁ ፡ ወመስተጽዕናን ፡ ውስተ ፡ ባሕር ፡ ወአስተጋብአ ፡ ላዕሌሆሙ ፡ እግዚአብሔር ፡ ማየ ፡ ባሕር ፡ ወደቂቀ ፡ እስራኤልሰ ፡ ኀለፉ ፡ እንተ ፡ የብስ ፡ በማእከለ ፡ ባሕር ።

15:20  ወነሥአት ፡ ማርያ ፡ ነቢያዊት ፡ እኅቱ ፡ ለአሮን ፡ ከበሮ ፡ ውስተ ፡ እዴሃ ፡ ወወፅኣ ፡ ኵሎን ፡ አንስት ፡ ድኅሬሃ ፡ በከበሮ ፡ ወቡራኬ ።

15:21  ወቀደመት ፡ ማርይ ፡ ወትቤ ፡ ንባርክ ፡ እግዚአብሔር ፡ ይትነከር ፡ ውእቱ ፡ ይትነከር ፤ ፈረሰ ፡ ወዘይፄዐን ፡ ላዕሌሁ ፡ ወረዎሙ ፡ ውስተ ፡ ባሕር ።

15:22  ወአውጽአ ፡ ሙሴ ፡ ውሉደ ፡ እስራኤል ፡ እምባሕር ፡ ዕሙቅ ፡ ወወሰዶሙ ፡ ውስተ ፡ ገዳም ፡ ዘሱር ፡ ወግዕዙ ፡ ሠሉሰ ፡ ዕለተ ፡ ገዳመ ፡ ወኢረከቡ ፡ ማየ ፡ ከመ ፡ ይስተዩ ፡ በምራ ።

15:23  ወስእኑ ፡ ሰትየ ፡ እምራ ፡ እስመ ፡ መሪር ፡ ማዩ ፡ ወበእንተ ፡ ከማሁ ፡ ተሰምየ ፡ ውእቱ ፡ ፍና ፡ መሪር ።

15:24  ወአንጐርጐሩ ፡ ሕዝብ ፡ ወይቤሉ ፡ ምንተ ፡ ንሰቲ ።

15:25  ወአውየወ ፡ ሙሴ ፡ ኀበ ፡ ፈጣሪ ፡ ወአርአዮ ፡ እግዚአብሔር ፡ ዕፀ ፡ ወወደዮ ፡ ውስተ ፡ ማይ ፡ ወጥዕመ ፡ ማዩ ፤ ወበህየ ፡ አርአዮ ፡ ጽድቀ ፡ ወፍትሐ ፡ ወአ[መከሮ ።

15:26  ወ]ይቤ ፡ ለእመ ፡ ትሰምዕ ፡ ወታጸምእ ፡ ቃለ ፡ እግዚአብሔር ፡ ዘፈጣሪከ ፡ ወጽድቀ ፡ ትገብር ፡ በቅድሜሁ ፡ ወታጸምእ ፡ ትእዛዘ ፡ ዘአዘዘከ ፡ ኵሎ ፡ ደዌ ፡ ዘአምጻእኩ ፡ ሎሙ ፡ ለግብጽ ፡ [ኢይ]ፌኑ ፡ ላዕሌከ ፡ አነ ፡ እግዚአብሔር ፡ መሓኪከ ።

15:27  ወበጽሑ ፡ ኤሌም ፡ ወሀለው ፡ ህየ ፡ ፲፪ዐይ[ን] ፡ ዘቦ ፡ ዐዘቅተ ፡ ወ፸ጸበራተ ፡ ተመርት ፡ ጠቃ ፡ ማያት ፡ በቀልቶን ።

Chapter 16

16:1  ወግዕዙ ፡ እምኤ[ሌም] ፡ ወመጽኡ ፡ ኵሉ ፡ ደቂቀ ፡ እስራኤል ፡ ውስተ ፡ ገዳም ፡ ዘሲ[ን] ፡ ወውእቱ ፡ ማእከለ ፡ ኤ[ሌ]ም ፡ ወሲና ፡ አመ ፡ ዐሡር ፡ ወኀሙስ ፡ ዕለት ፡ ለካልእ ፡ ወርኅ ፡ [እምዘ ፡] ወፅኡ ፡ እምድረ ፡ ግብጽ ።

16:2  ወአንጐርጐረ ፡ ኵሉ ፡ ሕዝብ ፡ ውሉደ ፡ እስራኤል ፡ በላዕለ ፡ ሙሴ ፡ ወአሮን ።

16:3  ወይቤልዎሙ ፡ ውሉደ ፡ እስራኤል ፡ ሶበ ፡ ሞትነ ፡ በመቅሠፍተ ፡ እግዚአብሔር ፡ በምድረ ፡ ግብጽ ፡ አመ ፡ ንነብር ፡ ጠቃ ፡ ጸሀርት ፡ ዘሥጋ ፡ ወንበልዕ ፡ ኅብስተ ፡ እስከ ፡ ንጸግብ ፤ አምጻእከነ ፡ አንተ ፡ ውስተዝ ፡ ገዳም ፡ ከመ ፡ ትቅትል ፡ ኵለነ ፡ በኀበ ፡ ተጋባእነ ።

16:4  ወይቤሎ ፡ እግዚአብሔር ፡ ለሙሴ ፡ ናሁ ፡ አነ ፡ ኣወርድ ፡ ለክሙ ፡ ኅብስተ ፡ እምሰማይ ፡ ወይምጻእ ፡ ሕዝብ ፡ ወያስተጋብእ ፡ ለለ ፡ ዕለት ፡ ከመ ፡ አመክሮሙ ፡ ለእመ ፡ የሐውሩ ፡ በሕግየ ፡ ወእመ ፡ አልቦ ።

16:5  ወአመ ፡ ዕለተ ፡ ዐርብ ፡ ያስተዳልው ፡ ዘአብኡ ፡ ይኩኖሙ ፡ ካዕበተ ፡ ለለዕለት ፡ ወዘአስተጋብ[ኡ ፡] ዘልፈ ፡ ለለዕለቱ ።

16:6  ወይቤሉ ፡ ሙሴ ፡ ወአሮን ፡ ለኵሉ ፡ ሕዝበ ፡ እስራኤል ፡ እምሰርክ ፡ ታአምሩ ፡ ከመ ፡ እግዚአብሔር ፡ አውፅአክሙ ፡ እምድረ ፡ ግብጽ ።

16:7  ወነግህ ፡ ትሬእዩ ፡ ኀይለ ፡ እግዚአብሔር ፡ ሰሚዖ ፡ ነጐርጓረክሙ ፡ እግዚአብሔር ፡ ወንሕነ ፡ ምንት ፡ ንሕነ ፡ ዘታንጐረጕሩ ፡ በላዕሌነ ።

16:8  ወይቤ ፡ ሙሴ ፡ ሰርከ ፡ ይሁበክሙ ፡ እግዚአብሔር ፡ ሥጋ ፡ ትብልዑ ፡ ወነግህ ፡ ኅብስተ ፡ እስከ ፡ ትጸግቡ ፡ እስመ ፡ ሰምዐ ፡ እግዚአብሔር ፡ ነጐርጓረክሙ ፡ ነጐርጓር ፡ ዘታንጐረጕሩ ፡ አንትሙ ፡ በላዕሌነ ፡ ወንሕነ ፡ ምንት ፡ ንሕነ ፡ ወዝ ፡ ነጐርጓርክሙ ፡ አኮ ፡ በላዕሌነ ፡ ዘታንጐረጕሩ ፡ [አላ ፡ በ]ላዕለ ፡ ፈጣሪ ።

16:9  ወይቤ ፡ ሙሴ ፡ ለአሮን ፡ በል ፡ ለኵሉ ፡ ኀበ ፡ ተጋብኡ ፡ ውሉደ ፡ እስራኤል ፡ ቅረቡ ፡ ቅድመ ፡ ፈጣሪ ፡ እስመ ፡ ሰምዐ ፡ ነጐርጓረክሙ ።

16:10  ወሶበ ፡ ይትናገር ፡ አሮን ፡ ለኵሉ ፡ ኀበ ፡ ተጋብኡ ፡ ውሉደ ፡ እስራኤል ፡ ወተመይጡ ፡ ውስተ ፡ ገዳም ፡ ወሠርሐ ፡ እግዚአብሔር ፡ ተርእ[የ ፡] በደመና ።

16:11  ወይቤ ፡ እግዚአብሔር ፡ ለሙሴ ፤

16:12  ሰማዕኩ ፡ ነጐርጓሮሙ ፡ ለውሉደ ፡ እስራኤል ፡ ወበሎሙ ፡ ሰርከ ፡ ትበልዑ ፡ ሥጋ ፡ ወጸቢሖ ፡ ትጸግቡ ፡ ኅብስተ ፡ ወታአምሩ ፡ ከመ ፡ አነ ፡ እግዚአብሔር ፡ ፈጣሬ ፡ ዚአክሙ ።

16:13  ወመስየ ፡ ወመጽአ ፡ ፍርፍርት ፡ ወከደነ ፡ ኵሎ ፡ ትዕይንቶሙ ፡ ወነግሀ ፡ እንዘ ፡ የኀድግ ፡ ህቦ ፡ በኵርጓኔ ፡ ትዕይንቶሙ ፤

16:14  እምፍጽመ ፡ ገዳም ፡ ድቁቅ ፡ ከመ ፡ ተቅዳ ፡ ወጸዐዳ ፡ ከመ ፡ አስሐትያ ፡ ውስተ ፡ ምድር ።

16:15  ወርእዩ ፡ ውሉደ ፡ እስራኤል ፡ ወይቤ ፡ ብእሲ ፡ ለካልኡ ፡ ምንት ፡ ውእቱዝ ፡ እስመ ፡ ኢያአምሩ ፡ ወይቤሎሙ ፡ ሙሴ ፡ ዝውእቱ ፡ ኅብስት ፡ ዘወሀበክሙ ፡ እግዚአብሔር ፡ ከመ ፡ ትብልዑ ።

16:16  ዝውእቱ ፡ ቃል ፡ ዘይቤ ፡ እግዚአብሔር ፡ አስተጋብኡ ፡ እምውስቴቱ ፡ በንዋይክሙ ፡ ለለ ፡ ብእሲ ፡ በበ ፡ ኊልቈ ፡ ሰብኡ ፡ ለለርእሱ ፡ በንዋዩ ፡ ለያስተጋብእ ።

16:17  ወገብሩ ፡ ከማሁ ፡ ውሉደ ፡ እስራኤል ፤ አስተጋብኡ ፡ ዘብዙኅኒ ፡ ወዘሕዳጥኒ ።

16:18  ወሰፈሩ ፡ በጎሞር ፡ ወኢፈድፈደ ፡ ለዘ ፡ ብዙኀ ፡ አስተጋብአ ፡ ወኢኀጸጸ ፡ ለዘ ፡ ኅዳጠ ፡ አስተጋብአ ፤ ብእሲ ፡ ብእሲ ፡ ለለማኅደሩ ፡ አስቲጋብአ ።

16:19  ወይቤሎሙ ፡ ሙሴ ፡ ለደቂቀ ፡ እስራኤል ፡ ወኢታትርፉ ፡ ለጌሠም ።

16:20  ወኢሰምዕዎ ፡ ለሙሴ ፡ ወአቤቱ ፡ ለነግህ ፡ ወዐጽየ ፡ ወጼአ ፡ ወተምዐ ፡ ሙሴ ፡ በላዕሌሆሙ ።

16:21  ወአስተጋብኡ ፡ በበነግህ ፡ ለለርእሱ ፡ ወእምከመ ፡ ሞቀ ፡ ፀሐይ ፡ ይምሁ ።

16:22  ወበዕለተ ፡ ዐርብ ፡ ያስተጋብኡ ፡ ካዕበተ ፡ ጎሞር ፡ ለለአሐዱ ፡ ወቦአ ፡ ኵሉ ፡ መኳንንተ ፡ ማኅበር ፡ ወይቤልዎ ፡ ለሙሴ ።

16:23  ወይቤሎሙ ፡ ሙሴ ፡ ዝውእቱ ፡ ዘይቤሎሙ ፡ ሙሴ ፡ ሰንበተ ፡ ዕረፍት ፡ ወቡርክት ፡ ለእግዚአብሔር ፡ ጌሠመ ፤ ዘትግበሩ ፡ ሀለወክሙ ፡ ግበሩ ፤ ወዘታብስሉ ፡ ሀለወክሙ ፡ አብስሉ ፤ ወዘተርፈ ፡ አትርፉ ።

16:24  ወአትረፉ ፡ ለነግህ ፡ በከመ ፡ አዘዘ ፡ ሙሴ ፡ ወኢጼአ ፡ ወዕጼሂ ፡ ኢተፈጥረ ፡ በላዕሌሁ ።

16:25  ወይቤሎሙ ፡ ሙሴ ፡ ብልዑ ፡ ዮም ፡ እስመ ፡ ዮም ፡ ሰንበት ፡ ዘእግዚአብሔር ፡ ኢትረክቡ ፡ በገዳም ።

16:26  ሰዱሰ ፡ ዕለተ ፡ ታስተጋብኡ ፡ ወአመ ፡ ሳብዕት ፡ ዕለት ፡ ሰንበት ፡ አሜሃ ፡ ኢትረክቡ ።

16:27  ወአመ ፡ ሳብዕት ፡ ዕለት ፡ ቦዘወፅአ ፡ እምውስተ ፡ ሕዝብ ፡ ከመ ፡ ያስተጋብእ ፡ ወኢረከበ ።

16:28  ወይቤሎ ፡ እግዚአብሔር ፡ ለሙሴ ፡ እስከ ፡ ማእዜ ፡ ተአብዩ ፡ ትእዛዝየ ፡ ሰሚዐ ፡ ወሕግየ ።

16:29  ርእዩ ፡ እግዚአብሔር ፡ ወሀበክሙ ፡ ዘዕለተ ፡ ሰንበት ፡ በእንተዝ ፡ ወሀበክሙ ፡ በዕለተ ፡ ዐርብ ፡ ምሳሐ ፡ ለክልኤ ፡ ዕለት ፡ ወይንበር ፡ ብእሲ ፡ ብእሲ ፡ ውስተ ፡ ማኅደሩ ፡ ወኢይፃእ ፡ እምንባሪሁ ፡ አመ ፡ ዕለተ ፡ ሰንበት ።

16:30  ወአሰንበተ ፡ ሕዝብ ፡ በዕለተ ፡ ሰንበት ።

16:31  ወሰመይዎ ፡ ውሉደ ፡ እስራኤል ፡ መና ፡ ወከመ ፡ ፍሬ ፡ ተቅዳ ፡ ጸዐዳ ፡ ወጣዕሙ ፡ ከመ ፡ ኢያተ ፡ መዓር ።

16:32  ወይቤ ፡ ሙሴ ፡ ዝቃል ፡ ዘአዘዘ ፡ እግዚአብሔር ፡ ከመ ፡ ትምልኡ ፡ ጎሞር ፡ መና ፡ ውስተ ፡ መሣይምቲክሙ ፡ ለዘመድክሙ ፡ ከመ ፡ ይርአዩ ፡ ኅብስተ ፡ ዘበላዕክሙ ፡ አንትሙ ፡ በገዳም ፡ አመ ፡ አውፅአክሙ ፡ እግዚአብሔር ፡ እምድረ ፡ ግብጽ ።

16:33  ወይቤሎ ፡ ሙሴ ፡ ለአሮን ፡ ንሣእ ፡ ቈጽለ ፡ ወርቅ ፡ አሐተ ፡ ረቃቀ ፡ ወግሉ ፡ ባቲ ፡ ጎሞር ፡ ዘመና ፡ ወታነብራ ፡ ቅድመ ፡ እግዚአብሔር ፡ ለደኃሪ ፡ መዋዕል ፡ ለአዝማዲክሙ ።

16:34  እስመ ፡ ከመዝ ፡ አዘዞ ፡ እግዚአብሔር ፡ ለሙሴ ፡ [ወአንበሮ ፡ አሮን ፡] በቅድመ ፡ መርጡል ፡ ከመ ፡ ይትዐቀብ ።

16:35  [ወ]ውሉደ ፡ እስራኤል ፡ በልዑ ፡ መና ፡ ፴ክረምተ ፡ እስከ ፡ ይበጽሑ ፡ ምድረ ፡ ኀበ ፡ ያነብሮሙ ፡ በልዑ ፡ መና ፡ እስከ ፡ ይበጽሑ ፡ ደወለ ፡ ፊኒቅ ።

16:36  ወጎሞር ፡ ዐሠርቱ ፡ እድ ፡ ዘ፫መስፈርት ፡ ይእቲ ።

Chapter 17

17:1  ወአንሥአ ፡ ትዕይንቶሙ ፡ ኵሉ ፡ ውሉደ ፡ እስራኤል ፡ እምገዳም ፡ ዘ[ሲ]ን ፡ በበ ፡ ትዕይንቶሙ ፡ በቃለ ፡ እግዚአብሔር ፡ ወበጽሑ ፡ ራፊድ ፡ ወአልቦ ፡ ህየ ፡ ዘይሰቲ ፡ ማየ ።

17:2  ወግእዞ ፡ ሕዝብ ፡ ለሙሴ ፡ ወይቤልዎ ፡ ሀበነ ፡ ማየ ፡ ዘንሰቲ ፡ ወይቤሎሙ ፡ ሙሴ ፡ ምንተ ፡ ትግእዙ ፡ ኪያየ ፡ ወታሜክርዎ ፡ ለእግዚአብሔር ።

17:3  ወጸምኡ ፡ በህየ ፡ ሕዝብ ፡ ማየ ፡ ወአጐርጐርዎ ፡ ለሙሴ ፡ ወይቤልዎ ፡ ለምንት ፡ አውጻእከነ ፡ እምግብጽ ፡ ከመ ፡ ትቅትለነ ፡ ምስለ ፡ ውሉድነ ፡ ወምስለ ፡ እንስሳነ ፡ በጽምእ ።

17:4  ወጸርኀ ፡ ሙሴ ፡ ኀበ ፡ እግዚአብሔር ፡ ውይቤ ፡ ሚእገብሮ ፡ ለዝ ፡ ሕዝብ ፡ ንስቲተ ፡ ክመ ፡ ተርፎሙ ፡ ወይዌግሩኒ ፡ በእብን ።

17:5  ወይቤሎ ፡ እግዚአብሔር ፡ ለሙሴ ፡ ቅድሜሆሙ ፡ ሑር ፡ ለሕዝብ ፡ ወንሣእ ፡ ምስሌከ ፡ መላህቅተ ፡ ሕዝብ ፡ ወበትረከ ፡ በዘ ፡ ቦቱ ፡ ዘበጥከ ፡ ፈለገ ፡ ፅብጥ ፡ በእዴከ ።

17:6  ወትመጽእ ፡ ለፌ ፡ ኀበ ፡ አነ ፡ እቀውም ፡ ለፌ ፡ መንገለ ፡ ኰኵሕ ፡ ዘኮሬብ ፡ ወትዘብጦ ፡ ለኰኵሕ ፡ ወይወፅእ ፡ በውስቴቱ ፡ ማይ ፡ ወይስተይ ፡ ሕዝብ ፤ ወገብረ ፡ ሙሴ ፡ በከመ ፡ አዘዞ ፡ እግዚአብሔር ፡ በቅድሜሆሙ ፡ ለውሉደ ፡ እስራኤል ።

17:7  ወሰመዮ ፡ ለውእቱ ፡ ፍና ፡ መንሱት ፡ ወጋእዝ ፡ በእንተ ፡ ግእዘት ፡ ዘግእዝዎ ፡ ውሉደ ፡ እስራኤል ፡ ወአመከሩ ፡ ፈጣሬ ፡ ኵሉ ፡ ወይቤሉ ፡ ለእመ ፡ ሀሎ ፡ እግዚአብሔር ፡ ወለእመ ፡ ኢሀሎ ፡ ምስሌነ ።

17:8  ወመጽአ ፡ ዐማሌቅ ፡ ወይትቃተል ፡ በራፊድ ።

17:9  ወይቤ ፡ ሙሴ ፡ ለኢየሱስ ፡ ኅረይ ፡ ለከ ፡ ዕደወ ፡ ወፃእ ፡ ወተአኀዞ ፡ ለዐማሌቅ ፡ ጌሠመ ፡ ወናሁ ፡ አነ ፡ እቀውም ፡ ዲበ ፡ ርእሰ ፡ ወግር ፡ ወበትር ፡ ዘእግዚአብሔር ፡ ውስተ ፡ እዴየ ።

17:10  ወገብረ ፡ ኢየሱስ ፡ በከመ ፡ አዘዞ ፡ ሙሴ ፡ ወተራከቦ ፡ ለዐማሌቅ ፡ ወሙሴ ፡ ወአሮን ፡ ወሆር ፡ ዐርጉ ፡ ውስተ ፡ ርእሳ ፡ ለወግር ።

17:11  ወሶበ ፡ ያነሥእ ፡ ሙሴ ፡ እደዊሁ ፡ ይወፅእ ፡ እስራኤል ፡ ወሶበ ፡ የዐጽብ ፡ ሙሴ ፡ ያወርድ ፡ እደዊሁ ፡ ወይትወፅኡ ፡ እስራኤል ።

17:12  ወእደዊሁ ፡ ለሙሴ ፡ ክቡድ ፡ ወአንበሩ ፡ እብነ ፡ ሎቱ ፡ ወይነብሩ ፡ ላዕሌሆን ፡ አሮን ፡ ወሆር ፡ ወይጸውሩ ፡ እደዊሁ ፡ ለሙሴ ፡ አሐዱ ፡ በለፌ ፡ ወአሐዱ ፡ በለፌ ፡ ወቆማ ፡ እደዊሁ ፡ ለሙሴ ፡ ርቡባቲሆን ፡ እስከ ፡ ዕርበተ ፡ ፀሐይ ።

17:13  ወሜጦሙ ፡ ኢየሱስ ፡ ለዐማሌቅ ፡ ምሰለ ፡ ሕዝቡ ፡ ወቀተሎሙ ፡ በኅፂን ።

17:14  ወይቤሎ ፡ እግዚአብሔር ፡ ለሙሲ ፡ ጸሐፍዛ ፡ ለተዝካር ፡ ወአይድዖ ፡ ለኢየሱስ ፡ ድምሳሴ ፡ እደመስሶሙ ፡ ለዐማሌቅ ፡ እምታሕተ ፡ ሰማይ ።

17:15  ወአሕነጸ ፡ ሙሴ ፡ ምሥዋዐ ፡ ለእግዚአብሔር ፡ ወሰመዮ ፡ ስሞ ፡ ምምሕፃን ፤

17:16  እስመ ፡ በእድ ፡ ኅብእት ፡ ይፀብኦሙ ፡ እግዚአብሔር ፡ ለዐማሌቅ ፡ ለዘመደ ፡ ዘመድ ።

Chapter 18

18:1  ወሰምዐ ፡ ዮቶር ፡ ሠዋዒ ፡ ዘእምድያም ፡ ሐሙሁ ፡ ለሙሴ ፡ ኵሎ ፡ ዘገብረ ፡ እግዚአብሔር ፡ ለእስራኤል ፡ ለሕዝቡ ፡ ወአውፅኦሙ ፡ እግዚአብሔር ፡ ለእስራኤል ፡ እምግብጽ ።

18:2  ወነሥአ ፡ ዮቶር ፡ ሐሙሁ ፡ ለሙሴ ፡ [ሲፕ]ራሃ ፡ ብእሲቶ ፡ ለሙሴ ፡ እምዘ ፡ ኀደጋ ፤

18:3  [ወ፪ደቂቆ ፡] ወስሙ ፡ ለወልደ ፡ ሙሴ ፡ ለአሐዱ ፡ ጌርሳም ፡ ወይቤ ፡ እስመ ፡ ፈላሲ ፡ አነ ፡ በምድረ ፡ ባዕድ ፡ ወስሙ ፡ ለካልእ ፡ ወልዱ ፡ ኤልያዛር ፡ [ወይቤ ፡] ፈጣሪ ፡ ዘአቡየ ፡ ረዳኢየ ፡ ወአድኅነኒ ፡ እምእዴሁ ፡ ለፈርዖን ።

18:4  ወመጽአ ፡ ዮቶር ፡ ሐሙሁ ፡ ለሙሴ ፡ ወደቁ ፡ ወብእሲቱ ፡ ኀበ ፡ ሙሴ ፡ ገዳመ ፡ ኀበ ፡ ኅደሩ ፡ ጕንደ ፡ ደብር ፡ ዘእግዚአብሔር ።

18:5  ወይቤልዎ ፡ ለሙሴ ፡ ናሁ ፡ ዮቶር ፡ ሐሙከ ፡ ይበጽሕ ፡ ኀቤከ ፡ ወብእሲትከ ፡ ወክልኤሆሙ ፡ ደቂቅከ ።

18:6  ወወፅአ ፡ ሙሴ ፡ ወተቀበሎ ፡ ለሐሙሁ ፡ ወአምኆ ፡ ወሰአሞ ፡ ወተአምኁ ፡ በበይናቲሆሙ ፡ ወቦኡ ፡ ትዕይንተ ።

18:7  ወዜነዎ ፡ ሙሴ ፡ ለሐሙሁ ፡ ኵሎ ፡ ዘገብሮ ፡ እግዚአብሔር ፡ ለፈርዖን ፡ ወለግብጽ ፡ በእንተ ፡ እስራኤል ፡ ወኵሎ ፡ ሕማመ ፡ ዘከመ ፡ ሐሙ ፡ በፍኖት ፡ ወዘከመ ፡ አድኀኖሙ ፡ እግዚአብሔር ።

18:8  ወደንገፀ ፡ ዮቶር ፡ በኵሉ ፡ ዘገብረ ፡ ሎሙ ፡ እግዚአብሔር ፡ ወአድኀኖሙ ፡ እምእደ ፡ ግብጽ ፡ ወእምእደ ፡ ፈርዖን ።

18:9  ወይቤ ፡ ዮቶር ፡ ቡሩክ ፡ እግዚአብሔር ፡ ዘአድኀነ ፡ ሕዝቦ ፡ እምእደ ፡ ግብጽ ፡ ወእምእደ ፡ ፈርዖን ።

18:10  እምይእዜ ፡ አእመርኩ ፡ ከመ ፡ ዐቢይ ፡ እግዚአብሔር ፡ እምኵሉ ፡ አማልክት ፡ በበይነዝ ፡ ተኰነኑ ፡ ሎሙ ።

18:11  ወነሥአ ፡ ዮቶር ፡ ሐሙሁ ፡ ለሙሴ ፡ ወገብረ ፡ በጽድቅ ፡ መሥዋዕተ ፡ ለእግዚአብሔር ፡ ወመጽአ ፡ አሮን ፡ ወሊቃነ ፡ ሕዝብ ፡ ዘእስራኤል ፡ ከመ ፡ ይብልዑ ፡ ኅብስተ ፡ ምስለ ፡ ሐመ ፡ ሙሴ ፡ በቅድመ ፡ እግዚአብሔር ።

18:12  ወአመ ፡ ሳኒታ ፡ ነበረ ፡ ሙሴ ፡ ይኰንን ፡ ሕዝበ ፡ ወይጸንሕ ፡ ሕዝብ ፡ ሙሴሃ ፡ እምነግህ ፡ እስከ ፡ ሰርክ ።

18:13  ወርእየ ፡ ዮቶር ፡ ኵሉ ፡ ዘይገብር ፡ በላዕለ ፡ ሕዝብ ፡ ወይቤሎ ፡ ዮቶር ፡ ለሙሴ ፡ ምንትኑዝ ፡ ዘትገብር ፡ በሕዝብ ፡ ባሕቲትከ ፡ ትነብር ፡ ወኵሉ ፡ ሕዝብ ፡ ይቀውም ፡ እምነግህ ፡ እስከ ፡ ሰርክ ።

18:14  ወይቤ ፡ ሙሴ ፡ ለሐሙሁ ፡ እስመ ፡ ይመጽእ ፡ ኀቤየ ፡ ሕዝብ ፡ ወይስእል ፡ ፍትሐ ፡ በኀበ ፡ እግዚአብሔር ።

18:15  እምከመ ፡ ተጋአዙሂ ፡ ይመጽኡ ፡ ኀቤየ ፡ እፍትሖሙ ፡ አስተናጺሕየ ፡ ለለአሐዱ ፡ አሐዱ ፡ ኵነኔ ፡ እግዚአብሔር ፡ ወሕጎ ።

18:16  ወይቤሎ ፡ ሐሙሁ ፡ ለሙሴ ፡ አኮ ፡ ርቱዕ ፡ ዘአንተ ፡ ትገብር ፡ ዝነገር ፡ ዐቢይ ።

18:17  ሕማመ ፡ ተሐምም ፡ አንተ ፡ ወኵሉ ፡ ሕዝብ ፡ ዘሀሎ ፡ ምስሌከ ፤ ይከብደከ ፡ [ዝቃል ፡] ወኢትክል ፡ ባሕቲትከ ፡ ገቢሮተ ።

18:18  ወይእዜኒ ፡ ስምዐኒ ፡ ወአነ ፡ አመክረከ ፡ ወእግዚአብሔር ፡ የሀሉ ፡ ምስሌከ ፡ ወኩኖሙ ፡ አንተ ፡ ለሕዝብ ፡ በኀበ ፡ እግዚአብሔር ፡ ወታብትክ ፡ ቃሎሙ ፡ በኀበ ፡ እግዚአብሔር ።

18:19  ወአስምዖሙ ፡ ትእዛዞ ፡ ለእግዚአብሔር ፡ ወሕጎ ፡ ወትዜንዎሙ ፡ ፍኖቶ ፡ በእለ ፡ [የሐውሩ ፡] በውስቴቶሙ ፡ ወግብረ ፡ ዘይገብሩ ።

18:20  ወአንተሂ ፡ ለሊከ ፡ ምክር ፡ እምውስተ ፡ ኵሉ ፡ ሕዝብ ፡ ኅያላን ፡ ዕደወ ፡ ጻድቃነ ፡ ሰብአ ፡ እለ ፡ ይጸልኡ ፡ ትዕቢተ ፡ ወሢም ፡ ሎሙ ፡ መኰንነ ፡ ለ፲፻ወለምእት ፡ ወለኀምሳ ፡ ወለዐሠርቱ ።

18:21  ወይኰንኑ ፡ ሕዝበ ፡ ኵሎ ፡ ሰዐተ ፡ ወቃለ ፡ ዘዐጸቦሙ ፡ ያዕርጉ ፡ ኀቤከ ፡ ወቀሊለ ፡ ኵነኔ ፡ እሙንቱ ፡ ይኰንኑ ፡ ወያቀልሉከ ፡ ወያርድኡከ ።

18:22  ወዝ ፡ ቃልየ ፡ ለእመ ፡ ገበርከ ፡ ያኄይለከ ፡ እግዚአብሔር ፡ ወትክል ፡ ኰንኖ ፡ ወዝሕዝብ ፡ ይግባእ ፡ ውስተ ፡ ምንባሪሁ ፡ በፍሥሓ ።

18:23  ወሰምዐ ፡ ሙሴ ፡ ቃለ ፡ ሐሙሁ ፡ ወገብረ ፡ በከመ ፡ ይቤሎ ።

18:24  ወኀርየ ፡ ሙሴ ፡ ዕደወ ፡ ዘይክል ፡ እምውስተ ፡ ኵሉ ፡ እስራኤል ፡ ወሤመ ፡ ውስቴቶሙ ፡ መኰንነ ፡ ለ፲፻ወዘ፻ወዘ፶ወዘ፲ ።

18:25  ወይኰንኑ ፡ ኵሎ ፡ ሕዝበ ፡ ኵላ ፡ ሰዐተ ፡ ወዘዐጸቦሙ ፡ ኵነኔ ፡ ያዕርጉ ፡ ኀበ ፡ ሙሴ ፡ ወቀሊለ ፡ ኵነኔ ፡ እሙንቱ ፡ ይፍትሑ ።

18:26  ወፈነወ ፡ ሙሴ ፡ ሐማሁ ፡ ውስተ ፡ ምድሩ ፡ [ወ]ኅለፈ ።

Chapter 19

19:1  ወበሣልስ ፡ ወርኅ ፡ እምዘ ፡ ወፅኡ ፡ ውሉዶ ፡ እስራኤል ፡ እምድረ ፡ ግብጽ ፡ በዛ ፡ ዕለት ፡ መጽኡ ፡ ወስተ ፡ ገዳም ፡ ዘሲና ።

19:2  ወወፅኡ ፡ እምራፈድ ፡ ወበጽሑ ፡ ውስተ ፡ ገዳም ፡ ዘሲና ፡ ወኀደሩ ፡ ህየ ፡ እስራኤል ፡ መንጸረ ፡ ደብሩ ።

19:3  ወሙሴ ፡ ዐርገ ፡ ውስተ ፡ ደብረ ፡ እግዚአብሔር ፡ ወጸውዖ ፡ እግዚአብሔር ፡ ለሙሴ ፡ እምዲበ ፡ ደብር ፡ ወይቤሉ ፡ በሎሙ ፡ ለቤተ ፡ ያዕቆብ ፡ ወዜንዎሙ ፡ ለውሉደ ፡ እስራኤል ።

19:4  አንትሙ ፡ ርኢክሙ ፡ መጠነ ፡ ገበርክዎሙ ፡ ለግብጽ ፡ ወነሣእኩክሙ ፡ ከመዘ ፡ ክንፈ ፡ ጕዛ ፡ ወአቅረብኩክሙ ፡ ኀቤየ ።

19:5  ወይእዜሂ ፡ ለእመ ፡ ሰማዕክሙኒ ፡ ቃልየ ፡ ወዐቀብክሙ ፡ ትእዛዝየ ፡ ትኩኑኒ ፡ ሕዝበ ፡ ዘጽድቅ ፡ እምውስተ ፡ ኵሉ ፡ ሕዝብ ፡ እስመ ፡ ዚአየ ፡ ይእቲ ፡ ኵለንታሃ ፡ ምድር ።

19:6  ወአንትሙ ፡ ትኩኑኒ ፡ እለ ፡ መንግሥት ፡ እለ ፡ ትሠውዑ ፡ ሊተ ፡ ሕዝብ ፡ ዘጽድቅ ፤ ዘቃለ ፡ አይድዖሙ ፡ ለውሉደ ፡ እስራኤል ።

19:7  ወመጽአ ፡ ሙሴ ፡ ወጸውዐ ፡ ሊቃነ ፡ ሕዝብ ፡ ወአይድዖሙ ፡ ዘኵሎ ፡ ቃለ ፡ ዘአዘዞሙ ፡ እግዚአብሔር ።

19:8  ወአውሥኡ ፡ ኵሉ ፡ ሕዝብ ፡ በ፩ቃል ፡ ወይቤሉ ፡ ኵሎ ፡ ዘአዘዘነ ፡ እግዚአብሔር ፡ ንገብር ፡ ወንሰምዕ ፡ ወአዕረገ ፡ ሙሴ ፡ ቃለ ፡ ሕዝብ ፡ ኀበ ፡ እግዚአብሔር ።

19:9  ወይቤሎ ፡ እግዚአብሔር ፡ ለሙሴ ፡ እመጽእ ፡ አነ ፡ ኀቤከ ፡ በዐምደ ፡ ደመና ፡ ከመ ፡ ይስማዕ ፡ ሕዝብ ፡ እንዘ ፡ እትናገር ፡ ምስሌከ ፡ ወይእመኑ ፡ በላዕሌከ ፡ ለዓለመ ፡ ዓለም ፡ ወአይድዐ ፡ ሙሴ ፡ ቃለ ፡ ሕዝብ ፡ ኀበ ፡ እግዚአብሔር ።

19:10  ወይቤሎ ፡ እግዚአብሔር ፡ ለሙሴ ፡ ወሪደከ ፡ ኰንን ፡ ሕዝበ ፡ ወያንጽሑ ፡ ርእሶሙ ፡ ዮም ፡ ወጌሠመ ፡ ወይ[ኅፅቡ]፡ አልባሲሆሙ ።

19:11  ወይፅንሑ ፡ ድልዋኒሆሙ ፡ ለአመ ፡ ሣልስት ፡ ዕለት ፡ እስመ ፡ አመ ፡ ሣልስት ፡ ይወርድ ፡ እግዚአብሔር ፡ ዲበ ፡ ደብር ፡ ዘሲና ፡ በቅድሜሆሙ ፡ ለሕዝብ ።

19:12  ወትክፍል ፡ ሕዝበ ፡ ይዑድዋ ፡ ወለይትዓቀቡ ፡ ኢይዕረጉ ፡ ውስተ ፡ ደብር ፡ ወኵሉ ፡ ዘለከፎ ፡ ለደብር ፡ በሞት ፡ ለይሙት ።

19:13  ወእደዊሆሙኒ ፡ ኢያርእዩ ፤ በእብን ፡ ለይትወገሩ ፡ ወእማእኮ ፡ በሞፀፍ ፡ ለይተወፀፉ ፤ ወለእመ ፡ እንስሳ ፡ ወለእመ ፡ ሰብእ ፡ ኢይሕዮ ፤ እምከመ ፡ ቃለ ፡ መጥቅዕ ፡ ወደመና ፡ ኀለፈ ፡ እምደብር ፡ ይዕርጉ ፡ ዲበ ፡ ደብር ።

19:14  ወወረደ ፡ ሙሴ ፡ እምዲበ ፡ ደብር ፡ ኀበ ፡ ሕዝብ ፡ ወባረኮሙ ፡ ወኀፀቡ ፡ አልባሲሆሙ ።

19:15  ወይቤ ፡ ለሕዝብ ፡ ተደለው ፡ ለሠሉስ ፡ ዕለት ፡ ወኢትቅረቡ ፡ አንስተ ።

19:16  ወአመ ፡ ሣልስት ፡ ዕለት ፡ ገይሰክሙ ፡ በጽባሕ ፡ ወናሁ ፡ ትሰምዑ ፡ ቃለ ፡ ወመብረቀ ፡ ወደመና ፡ ወጊሜ ፡ በደብሩ ፡ ለሲና ፡ ቃለ ፡ መጥቅዕ ፡ ዐቢይ ፡ ድምፅ ፡ ወደንገፀ ፡ ኵሉ ፡ ሕዝብ ፡ በውስተ ፡ ትዕይንት ።

19:17  ወአውፅአ ፡ ሙሴ ፡ ሕዝበ ፡ ይትራከብ ፡ ምስለ ፡ ፈጣሪ ፡ እምትዕይንት ፡ ወበጽሑ ፡ ኀበ ፡ ደብር ።

19:18  ወደብረ ፡ ሲና ፡ ይጠይስ ፡ ኵለንታሁ ፡ እስመ ፡ ወረደ ፡ እግዚአብሔር ፡ ውሰቴታ ፡ በእሳት ፡ ወይወፅእ ፡ በውስቴታ ፡ ከመ ፡ ጢስ ፡ ዘእምእቶን ፡ ወደንገፀ ፡ ኵሉ ፡ ሕዝብ ፡ ጥቀ ።

19:19  ወይደምፅ ፡ ድምፀ ፡ መጥቅዕ ፡ እንዘ ፡ ይበልሕ ፡ ይኄይል ፡ ጥቀ ፡ ወሙሴ ፡ ይትናገር ፡ ወእግዚአብሔር ፡ ያወሥኦ ፡ በቃሉ ።

19:20  ወወረደ ፡ እግዚአብሔር ፡ ደብረ ፡ ሲና ፡ ውስተ ፡ ከተማሁ ፡ ለደብር ፡ ወዐርገ ፡ ሙሴ ።

19:21  ወይቤሎ ፡ እግዚአብሔር ፡ ለሙሴ ፡ ረድ ፡ ወአይድዖሙ ፡ ለሕዝብ ፡ ኢይቅረቡ ፡ ኀበ ፡ እግዚአብሔር ፡ ለጠይቆ ፡ ኢይደቅ ፡ በውስቴቶሙ ፡ ብዙኅ ።

19:22  ወሠዋዕት ፡ እለ ፡ ይቄርቡ ፡ ለእግዚእ ፡ እግዚአብሔር ፡ ይትባረኩ ፡ ኢይኅለቅ ፡ እምላዕሌሆሙ ፡ እግዚአብሔር ።

19:23  ወይቤሎ ፡ ሙሴ ፡ ለእግዚአብሔር ፡ ኢይክል ፡ ሕዝብ ፡ ዐሪገ ፡ ውስተ ፡ ደብረ ፡ ሲና ፡ እስመ ፡ አስማዕከነ ፡ ወትቤለነ ፡ ኢትልክፉ ፡ ደብረ ፡ ወትባርክዎ ።

19:24  ወይቤሎ ፡ እግዚአብሔር ፡ ለሙሴ ፡ ሑር ፡ ወረድ ፡ ወዕረግ ፡ አንተ ፡ ወአሮን ፡ ምስሌከ ፤ ወሠዋዕት[ሰ] ፡ [ወሕዝብ ፡] ኢይትኀየሉ ፡ ዐሪገ ፡ ኀበ ፡ እግዚአብሔር ፤ ያሐጕል ፡ እግዚአብሔር ፡ እምውስቴቶሙ ።

19:25  ወወረደ ፡ ሙሴ ፡ ኀበ ፡ ሕዝብ ፡ ወይቤሎሙ ።

Chapter 20

20:1  ወነበበ ፡ እግዚአብሔር ፡ ኵሎ ፡ ዘቃለ ፡ ወይቤ ።

20:2  አነ ፡ ውእቱ ፡ እግዚእ ፡ እግዚአብሔር ፡ ዘአውፃእኩክሙ ፡ እምድረ ፡ ግብጽ ፡ እምቤተ ፡ ምቅናይክሙ ።

20:3  ኢታምልክ ፡ አማልክተ ፡ ዘእንበሌየ ።

20:4  ወኢትግበር ፡ ለከ ፡ አምላከ ፡ ከመዘ ፡ በውስተ ፡ ሰማይ ፡ በላዕሉ ፡ ወከመዘ ፡ በውስተ ፡ ምድር ፡ በታሕቱ ፡ ወበውስተ ፡ ማያት ፡ ዘበታሕቴሃ ፡ ለምድር ።

20:5  ኢትስግድ ፡ ሎሙ ፡ ወኢታምልኮሙ ፡ እስመ ፡ አነ ፡ እግዚእ ፡ እግዚአብሔር ፡ ዚአከ ፤ እግዚአብሔር ፡ ቀናኢ ፡ አነ ፡ ዘእፈዲ ፡ ኀጢአተ ፡ አብ ፡ ለውሉድ ፡ እስከ ፡ ሣልስት ፡ ወራብዕት ፡ ትውልድ ፡ ለእለ ፡ ይጸልዑኒ ።

20:6  ወእገብር ፡ ምሕረተ ፡ ለለ፲፻ለእለ ፡ ያፈቅሩኒ ፡ ወትእዛዝየ ፡ እለ ፡ የዐቅቡ ፡ ወለእለ ፡ የዐቅቡ ፡ ሕግየ ።

20:7  ኢትምሐል ፡ ስመ ፡ እግዚአብሔር ፡ ፈጣሪከ ፡ በሐሰት ፡ እስመ ፡ ኢያነጽሕ ፡ እግዚአብሔር ፡ ዘይነሥእ ፡ ስሞ ፡ በሐሰት ።

20:8  ተዘከር ፡ ዕለተ ፡ ሰንበት ፡ አጽድቆታ ።

20:9  ሰዱሰ ፡ ዕለተ ፡ ግበር ፡ ተግበረ ፡ ቦቱ ፡ ኵሎ ፡ ትካ[ዘ]ከ ።

20:10  ወበሳብዕት ፡ ዕለት ፡ ሰንበት ፡ ለእግዚአብሔር ፡ ለእግዚእከ ፡ ኢትግበሩ ፡ ባቲ ፡ ወኢምንተ ፡ ግብረ ፡ ኢአንተ ፡ ወኢወልድከ ፡ ወኢወለትከ ፡ ወኢአድግከ ፡ ወኢኵሉ ፡ እንስሳከ ፡ ወኢፈላሲ ፡ ዘይነብር ፡ ኀቤከ ።

20:11  እስመ ፡ በሰዱስ ፡ ዕለት ፡ ገብረ ፡ እግዚአብሔር ፡ ሰማየ ፡ ወምድረ ፡ ወባሕረ ፡ ወኵሎ ፡ ዘውስቴቱ ፡ ወአዕረፈ ፡ አመ ፡ ሳብዕት ፡ ዕለት ፤ በበይነዝ ፡ ባረካ ፡ እግዚአብሔር ፡ ለሳብዕት ፡ ዕለት ፡ ወአጽደቃ ።

20:12  አክብር ፡ አባከ ፡ ወእመከ ፡ ከመ ፡ ይኩንከ ፡ ጽድቀ ፤ ብዙኀ ፡ ዕለተ ፡ ትረክብ ፡ በውስተ ፡ ምድር ፡ ዘጻድቅት ፡ ውእቱ ፡ እግዚእ ፡ እግዚአብሔር ፡ የሀብከ ።

20:13  ኢትቅትል ።

20:14  ኢትዘሙ ።

20:15  ኢትስርቅ ።

20:16  ስምዐ ፡ በሐሰት ፡ ኢትስማዕ ፡ ለቢጽከ ፡ ስምዐ ፡ በሐሰት ።

20:17  ኢትፍቶ ፡ ብእሲተ ፡ ካልእከ ፤ ኢትፍቶ ፡ ቤቶ ፡ ለካልእከ ፡ ወኢገራህቶ ፡ ወኢገብሮ ፡ ወኢአመቶ ፡ ወኢላህሞ ፡ ወኢብዕራዊሁ ፡ ወኢኵሎ ፡ በውስተ ፡ እንስሳሁ ፡ ዘአጥረየ ፡ አጥርዮ ፡ ቢጽከ ።

20:18  ወኵሉ ፡ ሕዝብ ፡ ይሬኢ ፡ ቃለ ፡ ወብርሃነ ፡ ዘለንጰስ ፡ ወቃለ ፡ ዘመጥቅዕ ፡ ወደብሩ ፡ ይጠይስ ፡ ወፈሪሆ ፡ ኵሉ ፡ ሕዝብ ፡ ቆመ ፡ ርኁቀ ።

20:19  ወይቤልዎ ፡ ለሙሴ ፡ አንተ ፡ ተናገር ፡ ምስሌነ ፡ ወይትናገር ፡ እግዚአብሔር ፡ ምስሌከ ፡ ከመ ፡ ኢንሙት ።

20:20  ወይቤሎሙ ፡ ሙሴ ፡ በእንተዝ ፡ ከመ ፡ ያመክርክሙ ፡ መጽአ ፡ እግዚአብሔር ፡ ኀቤክሙ ፡ ከመ ፡ ይኅድር ፡ ፍርሀተ ፡ ዚአሁ ፡ ላዕሌክሙ ፡ ከመ ፡ ኢተአብሱ ።

20:21  ወይቀውም ፡ ሕዝብ ፡ ርሑቀ ፡ ወሙሴ ፡ ቦአ ፡ ውስተ ፡ ጣቃ ፡ ኀበ ፡ ሀለወ ፡ እግዚአብሔር ።

20:22  ወይቤሎ ፡ እግዚአብሔር ፡ ለሙሴ ፡ በሎሙ ፡ ለቤተ ፡ ያዕቆብ ፡ ወዜንዎሙ ፡ ለውሉደ ፡ እስራኤል ፡ ከመ ፡ እምሰማይ ፡ ተናገርኩክሙ ።

20:23  ኢታምልኩ ፡ አምላከ ፡ ዘብሩር ፡ ወኢታምልኩ ፡ አምላከ ፡ ዘወርቅ ፡ ወኢትግበሩ ፡ ለክሙ ፡ ዘከመዝ ፡ አምላከ ።

20:24  ምሥዋዐ ፡ በውስተ ፡ ምድር ፡ ግበር ፡ ሊተ ፡ [ወሡዕ ፡] በውስቴታ ፡ መባ[አ]ክሙ ፡ ወቤዛክሙ ፡ በግዐ ፡ ወአልህምተ ፡ በኵሉ ፡ መካን ፡ በኀበ ፡ ሰመይኩ ፡ ስምየ ፡ በህየ ፡ ወእመጽእ ፡ ኀቤከ ፡ [ወእባርከከ ።]

20:25  ወለእመ ፡ [ምሥዋዐ ፡] ዘእብን ፡ ገበርከ ፡ ሊተ ፡ ኢትንድቆሙ ፡ ፈጺሐከ ፡ [እስመ ፡ መጥባሕተከ ፡ አንበርከ ፡ ላዕሌሁ ፡ ወአርኰስከ ።]

20:26  ኢታዕርግ ፡ መዓርገ ፡ በውስተ ፡ ምሥዋዕየ ፡ ኢይትከሠት ፡ ምኅፋሪከ ፡ በህየ ።

Chapter 21

21:1  ወዝኒ ፡ ጽድቅ ፡ ውእቱ ፡ አለብዎሙ ፡ ይትዐቀቡ ።

21:2  ለእመ ፡ አጥረይከ ፡ ገብረ ፡ አይሁዳዌ ፡ ቅንዮ ፡ ፯ክረምተ ፡ ወበሳብዕ ፡ ክረምት ፡ አግዕዞ ፡ በከንቱ ።

21:3  ለእመ ፡ ባሕቲቶ ፡ አጥረይከ ፡ ባሕቲቱ ፡ ይፃእ ፤ ወለእመ ፡ ምስለ ፡ ብእሲቱ ፡ አጥረይኮ ፡ ምስለ ፡ ብእሲቱ ፡ ይ[ፃ]እ ።

21:4  ወለእመ ፡ ወሀቦ ፡ እግዚኡ ፡ ብእሲተ ፡ ወወለደት ፡ ሎቱ ፡ ሮሰ ፡ ወአዋልደ ፡ ብእሲቱ ፡ ወደቂቁ ፡ ይትቀነዩ ፡ ለእግዚኡ ፡ ወውእቱ ፡ ባሕቲቱ ፡ ይግዕዝ ።

21:5  ወለእመ ፡ ይቤ ፡ ገብርከ ፡ አፍቀርኩ ፡ እግዚእየ ፡ (ወእግዚእትየ ፡) ወብእሲትየ ፡ ወደቂቅየ ፡ ኢይፈቅድ ፡ ግዕዛነ ፤

21:6  ይስዶ ፡ እግዚኡ ፡ ቤተ ፡ ምኵናነ ፡ ፈጣሪ ፡ ወያቅርቦ ፡ ኆኅተ ፡ ኀበ ፡ መድረክ ፡ ወይስቍሮ ፡ እግዚኡ ፡ [እዝኖ ፡] በመስፌ ፡ ወይትቂነይ ፡ ሎቱ ፡ ዝሉፈ ።

21:7  ወለእመቦ ፡ ዘአስተዋሰበ ፡ ኢትጸጐጕ ፡ በከመ ፡ ያጸጕጓ ፡ አእማት ።

21:8  ወለእመ ፡ ኢያሥመረት ፡ ለእግዚኣ ፡ ለሊሃ ፡ ዘአምነት ፡ ያድኅና ፡ ወለሕዝብ ፡ ለካልእ ፡ እግዚእ ፡ ኀበ ፡ ፈቀደ ፡ ይሠይጣ ፡ እስመ ፡ ለሊሃ ፡ ፈቀደት ።

21:9  ወለእመ ፡ ፈቀደ ፡ ለወልዱ ፡ የሀባ ፡ ከመ ፡ እንተ ፡ አዋልድ ፡ ይረስያ ።

21:10  ወለእመ ፡ ካልእተ ፡ ነሥአ ፡ ሎቱ ፡ ዘባ ፡ ወአልባሲሃ ፡ [ይሁባ ፡] ወስምዐ ፡ ያሰምዕ ፡ ላቲ ፡ ከመ ፡ ኢየዐፃ ።

21:11  ወዘሠለስተ ፡ ለእመ ፡ ኢገብረ ፡ ላቲ ፡ ትፃእ ፡ እምኀቤሁ ፡ ዘእንበለ ፡ ቤዛ ።

21:12  ለእመቦ ፡ ዘአቍሰለ ፡ ካልኦ ፡ [ወሞተ ፡] በቍሰሊሁ ፡ ለይሙት ።

21:13  ለእሙ ፡ አቍሰለ ፡ እንዘ ፡ ኢይፈቅድ ፡ ወመጠዎ ፡ እግዚአብሔር ፡ በየማነ ፡ መቍሰሊ ፡ [አአም]ርከ ፡ ፍና ፡ ኀበ ፡ ይትመኀፀን ፡ ቀታሊ ።

21:14  ወለእመቦ ፡ ዘቈጸረ ፡ ከመ ፡ ይቅትል ፡ ጸላኢሁ ፡ ወተማኅፀነ ፡ ይንሥእዎ ፡ እምህየ ፡ ወይቅትልዎ ።

21:15  ዘይዘብጥ ፡ አባሁ ፡ ወእሞ ፡ ይትኰነን ፡ መዊተ ።

21:16  እመቦ ፡ ዘሰረቀ ፡ በውስተ ፡ ውሉደ ፡ እስራኤል ፡ ወረዲአክሙ ፡ አግባእክሙ ፡ በላዕለ ፡ ዘረከብክሙ ፡ ይትኰነን ፡ መዊተ ።

21:17  [ዘይረግም ፡ አባሁ ፡ ወእሞ ፡ ይትኰነን ፡ መዊተ ።]

21:18  ወለእመ ፡ ተላኰዩ ፡ ክልኤ ፡ ዕደው ፡ በበይኖሙ ፡ ወአቍሰለ ፡ ካልኦ ፡ ለእመኒ ፡ በእብን ፡ ወለእመኒ ፡ በበትር ፡ አስከቦ ፡ ውስተ ፡ ምስካብ ፡ (አልበ ፡ ተስናነ ፡ መቍሰሊ ፤)

21:19  ያንሶሱ ፡ ጽጐ ፡ በአቍስሎ ፡ በበትር ፡ ይድኅን ፡ መቍሰሊ ፡ ፅርዓቲሁ ፡ ለየሀቦ ፡ ወዐስቦ ፡ ለዐቃቤ ፡ ሥራይ ።

21:20  ለእመቦ ፡ ዘአቍሰለ ፡ ገብሮ ፡ ወአመቶ ፡ በበትር ፡ ወሞተ ፡ ይመውት ፡ መዊተ ፡ መቍሰሊ ።

21:21  ወበጽሐ ፡ አሐተ ፡ ዕለተ ፡ ወአመ ፡ ሳኒታ ፡ ይድኅን ፡ እመዊት ፡ እስመ ፡ ዚአሁ ፡ ብሩር ።

21:22  ወለእመ ፡ ተባአሱ ፡ ክልኤ ፡ ዕደው ፡ ወአቍሰሉ ፡ ብእሲተ ፡ ፅንስተ ፡ ወአድኀፀት ፡ ወምስለ ፡ ሰብእ ፡ አልቦ ፡ ያኅስርዎ ፡ እመ ፡ ዐርቀ ፡ ተዓረቀ ፡ ምታ ፡ እንዘ ፡ ያስተበቍዕ ።

21:23  ወለእመ ፡ አድኀፀት ፡ እንዘ ፡ ምሱለ ፡ ይፈዲ ፡ መንፈሰ ፡ ፍዳ ፡ መንፈስ ።

21:24  ዐይን ፡ ፍዳ ፡ ዐይን ፤ ስን ፡ ፍዳ ፡ ስን ፤ እድ ፡ ፍዳ ፡ እድ ፤ እግር ፡ ፍደ ፡ እግር ።

21:25  ዕየት ፡ ህየንተ ፡ ዕየት ፤ ፍቅአት ፡ ህየንተ ፡ ፍቅአት ፤ ቍስል ፡ ህየንተ ፡ ቍስል ።

21:26  ወለእመቦ ፡ ዘአቍሰለ ፡ ዐይነ ፡ ገብሩ ፡ ወእመሂ ፡ አመቱ ፡ ወአፀወሰ ፡ ያግዕዞሙ ፡ ቤዛ ፡ ዐይኖሙ ።

21:27  ወለእመ ፡ ሰበረ ፡ ፅርሰ ፡ ወስነ ፡ ዘገብሩ ፡ ወዘአመቱ ፡ ያግዕዞሙ ፡ ቤዛ ፡ ስኖሙ ።

21:28  ለእመ ፡ ወግአ ፡ ላህም ፡ ብእሴ ፡ ወብእሲተ ፡ ወቀተለ ፡ በእብን ፡ ይወግርዎ ፡ ላህሞ ፡ ወሥጋሁ ፡ ኢይበልዑ ፡ ወባዕለ ፡ ለህሙ ፡ ይድኅን ፡ እምኀጢአት ።

21:29  ወለእመ ፡ ወግአ ፡ ላህሙ ፡ ከመ ፡ ትማልም ፡ ወሣልስት ፡ ወአስምዑ ፡ ሎቱ ፡ ለእግዚኡ ፡ ወኢአማሰኖ ፡ ወቀተለ ፡ ብእሴ ፡ ወለእመሂ ፡ ብእሲት ፡ ላህመ ፡ ይወግሩ ፡ ወለእግዚኡኒ ፡ ይቅትሉ ።

21:30  ወለእመ ፡ ሰአልዎ ፡ ቤዛ ፡ ርእሱ ፡ የሀብ ፡ ቤዛ ፡ መንፈሱ ፡ እምቃለ ፡ ተካሀሉ ።

21:31  ወወግአ ፡ ውሉደ ፡ ሮሰ ፡ (ወደቀ ፡) ወአዋልደ ፡ ዘዐየኑ ፡ ያስተዋህብ ።

21:32  ወለእመ ፡ ገብረ ፡ ወለእመ ፡ አመተ ፡ ፴ብሩረ ፡ የሀብ ፡ ለእግዚአ ፡ አመት ፡ ዘዘክልኤቱ ፡ ወላህሙ ፡ ይትወገር ።

21:33  ወእመቦ ፡ ዘከሠተ ፡ ዐዘቅተ ፡ ወለእመሂ ፡ አክረየ ፡ ወኢከደኖ ፡ አፉሁ ፡ ወጸድፈ ፡ ውስቴቱ ፡ ላህም ፡ ወእመሂ ፡ አድግ ፤

21:34  እግዚአ ፡ ዐዘቅት ፡ ይፈዲ ፡ ወገደላሁ ፡ ውእቱ ፡ ይነሥእ ።

21:35  ወላህም ፡ ለእመ ፡ ወግአ ፡ ዘካልኡ ፡ ወሞተ ፡ አበ ፡ ላህሙ ፡ ይተክል ፡ ሎቱ ፡ ወእማእኮ ፡ ሤጦ ፡ ወገደላሆሙ ፡ ይትካፈሉ ።

21:36  ወለእመ ፡ ወጋኢ ፡ ላህሙ ፡ ከመ ፡ ትማልም ፡ ወሣልስት ፡ ወአስምዑ ፡ ሎቱ ፡ ይፈዲ ፡ ላህመ ፡ ተክለ ፡ ላህም ፡ ወገደላ ፡ ዘሞተ ፡ ውእቱ ፡ ይነሥእ ። ወለእመቦ ፡ ዘሰረቀ ፡ ላህመ ፡ ወእመሂ ፡ በግዐ ፡ ወጠብሐ ፡ ይተክል ፡ ህየንተ ፡ ፩ላህም ፡ ትኅምስተ ፡ ወለ፩በግዕ ፡ ትርብዕተ ።

Chapter 22

22:1  ወከሪዮ ፡ ሰራቂ ፡ ለእመ ፡ ቈስለ ፡ ሰራቂ ፡ ወሞተ ፡ ኢይኩኖ ፡ ቀቲለ ፡ ለዘቀተለ ።

22:2  ወሠረቀ ፡ ፀሐይ ፡ ዲበ ፡ በድን ፡ ይመውት ፡ ዘቀተሎ ፤ ወለእመ ፡ አልቦ ፡ ይሠየጥ ፡ ህየንተ ፡ ዘሰረቀ ።

22:3  ወለእመ ፡ አኀዝዎ ፡ ወረከቡ ፡ ውስተ ፡ እዴሁ ፡ ለዘሰረቀ ፡ እመሂ ፡ አድግ ፡ ወለእመሂ ፡ በግዕ ፡ ካዕበተ ፡ ይፈዲ ።

22:4  ወለእመ ፡ አብልዐ ፡ ገራህተ ፡ ሰብእ ፡ እንስሳሁ ፡ ወዐጸደ ፡ ወይን ፡ ወአብልዐ ፡ ገራውሀ ፡ ባዕድ ፡ ይትራዐይዎ ፡ አስማሮ ፡ ይፈዲ ፡ ወለእመሰ ፡ አግመረ ፡ ገራህተ ፡ እንዘ ፡ ይበልዕ ፡ በሰመረ ፡ ገራህቱ ፡ ይፈዲ ፡ ለእመሂ ፡ ዐጸደ ፡ ወይን ፡ በሰመረ ፡ ዐጸደ ፡ ወይን ፡ ይፈዲ ።

22:5  ወለእመ ፡ ወፅአ ፡ እሳት ፡ ወአኀዘ ፡ ገዳመ ፡ ወአውዐየ ፡ ዐጸደ ፡ ወእመሂ ፡ ክምረ ፡ ዘአውዐየ ፡ ይፈዲ ።

22:6  ወለእመቦ ፡ ዘአዕቀበ ፡ ብሩረ ፡ ወእመሂ ፡ ንዋይ ፡ ወተሰርቆ ፡ ለዘአዕቀብወ ፡ ወረከቦ ፡ ለዘሰረቆ ፡ ይፈዲ ፡ ካዕበተ ።

22:7  ወለእመ ፡ ኢረከቡ ፡ ሰራቄ ፡ ለይሑር ፡ ባዕለ ፡ ቤት ፡ ቅድመ ፡ ፈጣሪ ፡ ወይምሐል ፡ ማሕፀነ ፡ ዘአማሕፀንዎ ፡ ከመ ፡ ኢተኬነወ ፡ ወኢቈጸረ ፤

22:8  እመሂ ፡ ላህመ ፡ ወእመሂ ፡ አድገ ፡ ወእመሂ ፡ በግዐ ፡ በዘ ፡ ኀሠሥዎ ፡ በማኅፀ[ን ፡]ኀሠሥዎ ፤ በዘ ፡ ኮነ ፡ ከዊኖ ፡ በህየ ፡ ይኅልቆሙ ፡ በበይናቲሆሙ ፤ ወዘገደፈ ፡ ካዕበተ ፡ ይፈዲ ፡ ለማዕቀቢሁ ።

22:9  ወለእመቦ ፡ ዘወሀበ ፡ ለካልኡ ፡ ብዕራዌ ፡ እመሂ ፡ በግዐ ፡ ዘኮነ ፡ በውስቴቱ ፡ እንስሳ ፡ ወሞተ ፡ ወቈስለ ፡ ወእመሂ ፡ ማህረኩ ፡ ሎቱ ፡ ወአልቦ ፡ ዘአእመረ ፡ ሎቱ ፤

22:10  መሐላ ፡ ዘእግዚአብሔር ፡ ተርፈ ፡ ማእከሎሙ ፡ ከመ ፡ ተፈቲዎ ፡ ኢተኬነወ ፡ ተማኅፃኒ ፡ ወበበይነዝ ፡ ኢይፈዲ ፡ ዘተማኅፀነ ።

22:11  ወለእመ ፡ ሰረቅዎ ፡ ዘአዕቀብዎ ፡ ይፈዲ ፡ ለዘአዕቀቦ ።

22:12  ወለእመ ፡ አርዌ ፡ አኀዞ ፡ በገዳም ፡ ይመርሕ ፡ ገደላሁ ፡ ወኢይፈዲ ።

22:13  ወለእመ ፡ ተውሕስከ ፡ እምኀበ ፡ ቢጽከ ፡ ወተሰብረ ፡ ወሞተ ፡ ወኢሀሎ ፡ ወሓሲ ፡ እግዚአ ፡ ንዋይ ፡ ትፈዲ ።

22:14  [ወለእመ ፡ ሀሎ ፡ እግዚኡ ፡ ኢይፈዲ ፤] ወለእመ ፡ ገባኢሁ ፡ ውእቱ ፡ ዐስቦ ፡ ይፈዲ ።

22:15  ወለእመቦ ፡ ዘአስሐታ ፡ ለድንግል ፡ ወሰክበ ፡ ምስሌሃ ፡ እንዘ ፡ ይነሥእ ፡ ይነሥኣ ፡ ወትከውኖ ፡ ብእሲተ ።

22:16  ወለእመ ፡ ካልእ ፡ ምታ ፡ ከመ ፡ ኢየሀብዎ ፡ የሐፂ ፡ ሕፄሃ ፡ ይሁብ ፡ ለአቡሃ ፡ ሕፄ ፡ የሐፅይዎ ፡ ለድንግል ።

22:17  [ወዘሥራይ ፡ ኢይሕየው ።]

22:18  ኵሉ ፡ ዘየሐውር ፡ እንስሳ ፡ ኵነኔሁ ፡ መዊት ።

22:19  ዘይሠውዕ ፡ ለአማልክት ፡ ለይሠረው ፡ ዘእንበለ ፡ ለእግዚአብሔር ፡ ባሕቲቱ ።

22:20  ወኢታሕስሙ ፡ ለግዩር ፡ ወኢታጥቅዎ ፡ እስመ ፡ አንትሙሂ ፡ ግዩራነ ፡ ኮንክሙ ፡ በምድረ ፡ ግብጽ ።

22:21  ወለኵሉ ፡ እቤራት ፡ ወለእጓለ ፡ ማውታ ፡ ኢታሕስሙ ።

22:22  ወለእመ ፡ አሕሰምክሙ ፡ ሎሙ ፡ ወጸርሑ ፡ ወአውየው ፡ ኀቤየ ፡ ሰሚዐ ፡ እሰምዕ ፡ ገዓሮሙ ።

22:23  ወእትመዓዕ ፡ በመዐትየ ፡ ወእቀትለክሙ ፡ በኀፂን ፡ ወይከውናክሙ ፡ አንስቲያክሙ ፡ መበለት ፡ ወውሉድክሙ ፡ እጓለ ፡ ማውታ ።

22:24  ወለእመ ፡ ለቃሕከ ፡ ብሩረ ፡ ለነዳየ ፡ ሕዝብከ ፡ ኢታጥቆ ፡ ወኢትትራደዮ ።

22:25  ወእመ ፡ አእኀዘከ ፡ ልብሶ ፡ ቢጽከ ፡ እንበለ ፡ ይዕርብ ፡ [ፀሐይ ፡ አግብእ ፡ ሎቱ ።]

22:26  እስመ ፡ ይእቲ ፡ ባሕቲታ ፡ ዐራዙ ፡ ወ[ልብሰ ፡] ኀፍረቱ ፡ ሎቱ ፡ እስመ ፡ አልቦ ፡ በዘይበይት ፡ ወለእመ ፡ ግዕረ ፡ ኀቤየ ፡ እሰምዖ ፡ እስመ ፡ መሓሪ ፡ አነ ።

22:27  ለአማልክት ፡ ኢትሕሚ ፡ ወመኰንነ ፡ ሕዝብከ ፡ እኪተ ፡ ኢትበሎ ።

22:28  ከተማ ፡ ዐውድከ ፡ ወዘዐውድከ ፡ ኢታእኅር ፤ በኵረ ፡ ወልድከ ፡ ትሁበኒ ፡ ሊተ ።

22:29  ከማሁ ፡ ትገብር ፡ ሊተ ፡ ላህመከ ፡ ወበግዐከ ፡ ወአድገከ ፡ ሰቡዐ ፡ ይነብር ፡ ኀበ ፡ እሙ ፡ ወአመ ፡ ሳምንት ፡ ዕለት ፡ ትሁበኒ ፡ ሊተ ።

22:30  ወትከውኑኒ ፡ ዕደወ ፡ ቅዱሳነ ፡ ወሥጋ ፡ ገደላ ፡ አርዌ ፡ ኢትብልዑ ፡ ለከልብ ፡ ግድፍዎ ።

Chapter 23

23:1  ወውዴተ ፡ ዘሐሰት ፡ ኢትሰጠው ፡ ወኢትንበር ፡ ምስለ ፡ ዘይዔምፅ ፡ ከመ ፡ ኢትኩን ፡ መዐምፀ ፡ ስምዐ ።

23:2  ኢትደመር ፡ ምስለ ፡ ብዙኅ ፡ ለዐምዖ ፡ ወኢትትወሰክ ፡ ውስተ ፡ እለ ፡ ብዝኅ ፡ ለገሚፀ ፡ ፍትሕ ።

23:3  ወለነዳይ ፡ ኢትምሐር ፡ በፍትሕ ።

23:4  ወለእመ ፡ ረከብከ ፡ ላህመ ፡ ጸላኢከ ፡ ወእመሂ ፡ አድጎ ፡ ትመይጦ ፡ ወታገብኦ ፡ ሎቱ ።

23:5  ወለእመ ፡ ርኢከ ፡ አድገ ፡ ዘጸላኢከ ፡ [ዘኀየሎ ፡ ጾሩ ፡] ኢትትዐዶ ፡ አላ ፡ ታረድኦ ፡ ምስሌሁ ።

23:6  ወኢትሚጥ ፡ ፍትሐ ፡ ነዳይ ፡ ወበውስተ ፡ ፍትሕ ፡ ኢተዐምፅ ።

23:7  ወእምኵሉ ፡ ፍትሕ ፡ ዘዐመፃ ፡ ተገሐሥ ፤ ዘአልቦ ፡ ጌጋየ ፡ ወጻድቀ ፡ ኢትቅትል ፡ ወኃጥአ ፡ ኢታድኅ[ን] ።

23:8  ወሕልያነ ፡ ኢትንሣእ ፡ እስመ ፡ ሕልያን ፡ ያዐውር ፡ አዕይንቶሙ ፡ ወይመይጥ ፡ ቀለ ፡ ጽዱቀ ።

23:9  ወግዩራነ ፡ ኢትግፍዑ ፡ እስመ ፡ አንትሙ ፡ ታአምሩ ፡ መንፈሶ ፡ ለግዩራን ፡ እስመ ፡ አንትሙ ፡ ግዩራ[ነ ፡ ኮንክሙ ፡] በምድረ ፡ ግብጽ ።

23:10  ፯ክረምተ ፡ ዝራእ ፡ ገራህተከ ፡ ወአስተጋብእ ፡ ዘርአከ ።

23:11  ወበበሳብዕ ፡ ክረምት ፡ ኅድጋ ፡ ታዕርፍ ፡ ወይብልዓ ፡ ነዳየ ፡ ሕዝብከ ፡ ወዘተርፈ ፡ ይብላዕ ፡ አርዌ ፡ ዘገዳም ፡ ከመዝ ፡ ትገብር ፡ ዐጸደ ፡ ወይንከሂ ፡ ወዘይተከሂ ።

23:12  ሰዱሰ ፡ ዕለተ ፡ ትገብር ፡ ኵሎ ፡ ግብረከ ፡ ወአመ ፡ ሰቡዕ ፡ ዕለት ፡ ታዐርፍ ፡ ከመ ፡ ያፅርፍ ፡ ላህም[ከ ፡ ወአድግከ ፡] ወከመ ፡ ያስተንፍስ ፡ ወልደ ፡ አመትከ ፡ ወግዩር ።

23:13  ወኵሎ ፡ ዘነበብኩ ፡ ዕቀብ ፡ ወስመ ፡ ዘአማልክት ፡ ኢትዝክሩ ፡ ወኢትትናገሩ ፡ በአፉክሙ ።

23:14  ሠለስተ ፡ ሰዐተ ፡ ዘበዓልክሙ ፤

23:15  በዓ[ለ ፡] ዘአመ ፡ ሕግ ፡ ተዐቅቡ ፡ ሰቡዐ ፡ ዕለተ ፡ ትበልዑ ፡ ናእተ ፡ በከመ ፡ አዘዝኩክሙ ፡ በአውራኀ ፡ ሐደስት ፡ እስመ ፡ ቦቱ ፡ ወፃእክሙ ፡ እምግብጽ ፤ ኢትትረአይ ፡ በቅድሜየ ፡ ዕራቅከ ።

23:16  ወበዓለ ፡ ዘአመ ፡ ዐጺድ ፡ ዘቀዳሜ ፡ እክልከ ፡ ግበር ፡ በምግባርከ ፡ በውስተ ፡ ዘዘራእከ ፡ ገራህተከ ፡ ወበዓለ ፡ ዘፍጻሜ ፡ ዘአመ ፡ ወፃእከ ፡ ዘዓመተ ፡ በጉባኤ ፡ እምዘገበርከ ፡ እምውስተ ፡ ገራህትከ ።

23:17  ሠለስተ ፡ ዘመነ ፡ ይትረአይ ፡ ኵሉ ፡ ተባዕት ፡ በቅድሜየ ፡ እግዚእ ፡ እግዚአብሔር ፡ ዚአከ ።

23:18  ወኢትሡዕ ፡ ብሕአተ ፡ ደም ፡ በምሥዋዓቲየ ፡ ወኢይቢት ፡ ሥብሕ ፡ ዘበዓልየ ፡ አመ ፡ ሳኒታ ።

23:19  ቀዳሜ ፡ ፍሬ ፡ ገራውሂከ ፡ ታበውእ ፡ ቤቶ ፡ ለእግዚአብሔር ፡ ዚአከ ፡ ወኢታብስል ፡ ጣዕዋ ፡ በሐሊበ ፡ እሙ ።

23:20  ወናሁ ፡ እፌኑ ፡ መልአኪየ ፡ ቅድመ ፡ ገጽከ ፡ ከመ ፡ ይዕቀብከ ፡ በፍኖት ፡ ከመ ፡ ያብእከ ፡ ውስተ ፡ ምድር ፡ እንተ ፡ አስተዳለውኩ ፡ ለከ ።

23:21  ዕቂብ ፡ ርእሰከ ፡ ወስምዖ ፡ ወኢትእበዮ ፡ እስመ ፡ ኢየኀድገከ ፤ እሰመይ ፡ በላዕሌሁ ።

23:22  ለእመ ፡ ሰማዕከ ፡ ቃልየ ፡ ወዐቀብከ ፡ ኵሎ ፡ ዘእቤለከ ፡ እጸልእ ፡ ጸላኤከ ፡ ወእትጋየጽ ፡ ዘይትጋየጸከ ።

23:23  ለይሑር ፡ መልአኪየ ፡ እንዘ ፡ ይኴንነከ ፡ ወያብእከ ፡ ውስተ ፡ አሞሬዎን ፡ ወኬጤዎን ፡ ወፌሬዜዎን ፡ ወከናኔዎን ፡ ወጌርጌሴዎን ፡ ወኤዌዎን ፡ ወኢያ[ቡ]ሴዎን ፡ ወሕርጾሙ ።

23:24  ወኢትስግድ ፡ ለአማልክቲሆሙ ፡ ወኢታምልኮሙ ፡ ወኢትግበር ፡ ከመ ፡ ምግባሪሆሙ ፤ ነሢተ ፡ ትነሥቶሙ ፡ ወቀጥቅጦ ፡ ትቀጠቅጦሙ ፡ አዕማዲሆሙ ።

23:25  ወአም[ል]ክ ፡ እግዚአብሔር ፡ ፈጣሪከ ፤ ወእባርክ ፡ ኅብስተከ ፡ ወወይነከ ፡ ወማየከ ፡ ወአሴስል ፡ ፅበሰ ፡ እምላዕሌክሙ ።

23:26  አልቦ ፡ ዘኢይወልድ ፡ ወአልቦ ፡ መካነ ፡ በውስተ ፡ ምድርከ ፤ ኊልቈ ፡ መዋዕሊከ ፡ እፌጽም ፡ ለከ ።

23:27  ወፍርሀተ ፡ እፌኑ ፡ ሎቱ ፡ ለዚይጸንዐከ ፡ ወአደነግፅ ፡ ኵሎ ፡ አሕዛበ ፡ ውስተ ፡ እለ ፡ ቦእከ ፡ ላዕሌሆሙ ፤ አሀብከ ፡ ኵሎ ፡ ፀረከ ፡ ከመ ፡ ይጕ[የ]ዩከ ።

23:28  ወእፌኑ ፡ ዘያደነግዖሙ ፡ ቅድሜከ ፡ ለአሞሬዎን ፡ ያወጽኦሙ ፡ ወለኬጤዎን ፡ ወለኤዌዎን ፡ ወከናኔዎን ።

23:29  ወኢያወፅኦሙ ፡ በአሐቲ ፡ ዓመት ፡ ከመ ፡ ኢይኩን ፡ ምድር ፡ ዓፀ ፡ ወከመ ፡ ኢይብዛኅ ፡ በላዕሌከ ፡ አራዊተ ፡ ምድር ።

23:30  በበንስቲት ፡ አወፅኦሙ ፡ እምላዕሌከ ፡ እስከ ፡ አመ ፡ ትትባዛኅ ፡ ወትረሳ ፡ ለምድር ።

23:31  ወአንብር ፡ አድባሪከ ፡ እምባሕረ ፡ [ኤ]ርትራ ፡ እሰከ ፡ ባሕረ ፡ ፍልስጥኤም ፡ ወእምገዳም ፡ እስከ ፡ ፈለግ ፡ ዐቢይ ፡ ኤፍራጦስ ፡ ወእሜጡ ፡ ውስተ ፡ እደዊክሙ ፡ እለ ፡ ይነብሩ ፡ ውስተ ፡ ምድር ፡ ወአወፅኦሙ ፡ እምኔከ ።

23:32  ወኢተትኃደሮሙ ፡ ወለአማልክቲሆሙ ፡ ትኤዝዝ ።

23:33  ወኢይንበሩ ፡ ውስተ ፡ ምድርከ ፡ ከመ ፡ ኢይግበሩከ ፡ ተአብስ ፤ ለእመ ፡ አምለከ ፡ አማልክቲሆሙ ፡ እሙንቱ ፡ ይከውኑከ ፡ ዕቅፍተ ።

Chapter 24

24:1  ወይቤሎ ፡ እግዚአብሔር ፡ ለሙሴ ፡ ዕረግ ፡ አንተ ፡ ወአሮን ፡ ወናዳብ ፡ ወአብዩድ ፡ ወመላህቅተ ፡ ሕዝብ ፡ ፸ዘእስራኤል ፡ ወይስግዱ ፡ ለእግዚአብሔር ፡ እምርሑቅ ።

24:2  ወይቅረብ ፡ ሙሴ ፡ ባሕቲቱ ፡ ይቅረብ ፡ ኀበ ፡ እግዚአብሔር ፡ ወእሙንቱ ፡ ኢይቅረቡ ፡ ወሕዝብሂ ፡ ኢይዕረጉ ፡ ምስሌሆሙ ።

24:3  ወቦአ ፡ ሙሴ ፡ ወአይድዐ ፡ ለሕዝብ ፡ ኵሎ ፡ ቃለ ፡ እግዚአብሔር ፡ ወጽድቆ ፡ ወአውሥኡ ፡ ኵሉ ፡ ሕዝብ ፡ በ፩ቃል ፡ ወይቤሉ ፡ ኵሎ ፡ ቃለ ፡ ዘነበበ ፡ እግዚአብሔር ፡ ንገብር ፡ ወንሰምዕ ።

24:4  ወጸሐፈ ፡ ሙሴ ፡ ኵሎ ፡ ቃለ ፡ እግዚአብሔር ፡ ወገይሶ ፡ ሙሴ ፡ በጽባሕ ፡ ሐነጸ ፡ ምሥዋዐ ፡ ጠቃ ፡ ደብር ፡ ወ፲ወ፪እብን ፡ ውስተ ፡ ፲ወ፪ሕዝብ ፡ ዘእስራኤል ።

24:5  ወፈነወ ፡ ወራዙቶሙ ፡ ለውሉደ ፡ እስራኤል ፡ ወአዕረጉ ፡ መሥዋዕተ ፡ ወሦዑ ፡ መሥዋዕተ ፡ መድኀኒት ፡ ለእግዚአብሔር ፡ አልህምተ ።

24:6  ወነሥአ ፡ ሙሴ ፡ መንፈቀ ፡ ደሙ ፡ ወከዐወ ፡ ውስተ ፡ መቃልድ ፡ ወመንፈቀ ፡ ደሙ ፡ ከዐወ ፡ ውስተ ፡ መሥዋዕት ።

24:7  ወነሥአ ፡ ሙሴ ፡ መጽሐፈ ፡ ሕግ ፡ ወአንበበ ፡ ውስተ ፡ እዝነ ፡ ሕዝብ ፡ ወይቤሉ ፡ ኵሉ ፡ ዘነበበ ፡ እግዚአብሔር ፡ ንገብር ፡ ወንሰምዕ ።

24:8  ወነሥአ ፡ ሙሴ ፡ ደመ ፡ ወነዝኀ ፡ ሕዝበ ፡ ወይቤ ፡ ናሁ ፡ ደመ ፡ ሕግ ፡ ዘሐገገ ፡ ለክሙ ፡ እግዚአብሔር ፡ በእንተ ፡ ኵሉ ፡ ዝቃል ።

24:9  ወዐርጉ ፡ ሙሴ ፡ ወአሮን ፡ ወናዳብ ፡ ወአብዩድ ፡ ወ፸ሊቃነ ፡ እስራኤል ።

24:10  ወርእዩ ፡ መካነ ፡ ኀበ ፡ ይቀውም ፡ እግዚአብሔር ፡ ዘእስራኤል ፡ ወዘታሕተ ፡ እግሩ ፡ ከመ ፡ ግብረተ ፡ ግንፋል ፡ ዘስንፒር ፡ ወከመ ፡ ርእየተ ፡ ጽንዐ ፡ ሰማይ ፡ ሶበ ፡ ኀወጸት ።

24:11  ወኅሩያኒሆሙ ፡ ለእስራኤል ፡ ዘአልቦ ፡ ዘይመስሎሙ ፡ አስተርአዩ ፡ በመካን ፡ ዘእግዚአብሔር ፡ ወበልዑ ፡ ወሰትዩ ።

24:12  ወይቤሎ ፡ እግዚአብሔር ፡ ለሙሴ ፡ ዕረግ ፡ ኀቤየ ፡ ውስተ ፡ ደብር ፡ ወሀሉ ፡ ህየ ፡ ወአሀብከ ፡ ሰሊዳተ ፡ ዘእብን ፡ ዘሕግ ፡ ወትእዛዝ ፡ ዘጸሐፍኩ ፡ ትሕግግ ፡ ሎሙ ።

24:13  ወተንሥአ ፡ ሙሴ ፡ ወኢየሱስ ፡ ወዐርጉ ፡ ውስተ ፡ ደብረ ፡ እግዚአብሔር ።

24:14  ወይቤሎሙ ፡ ሙሴ ፡ ለሊቃን ፡ ኢትትዋከቱ ፡ እስከ ፡ ንሠወጥ ፡ ኀቤክሙ ፡ ወናሁ ፡ አሮን ፡ ወሆር ፡ ምስሌክሙ ፡ ለእመቦ ፡ ዘመጽአ ፡ ፍትሕ ፡ ይሑር ፡ ምስሌሆሙ ።

24:15  ወዐርገ ፡ ሙሴ ፡ ውስተ ፡ ደብር ፡ ወሰወረ ፡ ደብሮ ፡ ደመና ።

24:16  ወወረደ ፡ ሠርሑ ፡ ለእግዚአብሔር ፡ ውስተ ፡ ደብር ፡ ዘሲና ፡ ወሰወሮ ፡ ደመና ፡ ሰዱሰ ፡ ዕለተ ፡ ወጸውዖ ፡ እግዚአብሔር ፡ ለሙሴ ፡ በሳብዕት ፡ ዕለት ፡ እማእከለ ፡ ደመና ።

24:17  ወአርአያ ፡ ሥራሑ ፡ ለእግዚአብሔር ፡ ከመ ፡ ንደተ ፡ እሳት ፡ ሶበ ፡ ያንበለብል ፡ ውስተ ፡ ከተማሁ ፡ ለደብር ፡ በቅድሜሆሙ ፡ ለውሉደ ፡ እስራኤል ።

24:18  ወቦአ ፡ ሙሴ ፡ ማእከለ ፡ ደመና ፡ ወዐርገ ፡ ውስተ ፡ ደብር ፡ ወነበረ ፡ ፴ዕለተ ፡ ወ፴ሌሊተ ።

Chapter 25

25:1  ወይቤሎ ፡ እግዚአብሔር ፡ ለሙሴ ፡ ወይቤሎ ፤

25:2  በሎሙ ፡ ለውሉደ ፡ እስራኤል ፡ ወንሥኡ ፡ ሊተ ፡ እምውስተ ፡ ጥሪትክሙ ፡ መባአ ፡ ዘሐለይክሙ ፡ በውስተ ፡ ልብክሙ ፡ ንሣእ ፡ መባአ ።

25:3  ወዛቲ ፡ ይእቲ ፡ መባእ ፡ ዘትነሥኡ ፡ እምላዕሌሆሙ ፡ ወርቀ ፡ ወብሩረ ፤

25:4  ብርተ ፡ ወያክንተ ፤ ሜላተ ፡ ወነተ ፡ ክዑበ ፡ ወቡሶሰ ፡ ክዑበ ፡ ወጸጕረ ፡ ጠሊ ፤

25:5  ወማእሰ ፡ በግዕ ፡ ሕሡየ ፡ ወአምእስተ ፡ ዘሥርየቱ ፡ ሕብረ ፡ ያክንት ፡ ወዕፀ ፡ ዘኢይነቅዝ ፤

25:7  ወእብነ ፡ ስርድዮን ፡ ወእብነ ፡ ዘይትኀረው ፡ ኤጶሚዳ ፡ ጶዴሬ ።

25:8  ወትገብር ፡ ሌተ ፡ ምቅዳሰ ፡ ወእትረአይ ፡ በላዕሌክሙ ።

25:9  ወትገብር ፡ ሊተ ፡ ኵሎ ፡ ዘአነ ፡ አርእየክሙ ፡ በውስተ ፡ ደብር ፡ አርአያ ፡ ትዕይንት ፡ ወአርአያ ፡ ንዋያ ፡ ለትዕይንት ፡ ኵሉ ፡ ወከማሁ ፡ ትገብሩ ።

25:10  ወትገብር ፡ ሊተ ፡ ታቦተ ፡ ዘመርጡል ፡ ዘዕ[ፅ ፡ ዘ]ኢይነቅዝ ፡ ዘካዕበ ፡ እመት ፡ ወመንፈቀ ፡ እመት ፡ ኑኁ ፡ ወእመት ፡ ወመንፈቀ ፡ እመት ፡ ፅፍሑ ፡ ወእመት ፡ ወመንፈቀ ፡ እመት ፡ ቆሙ ።

25:11  ወትቀፍልዎ ፡ ወርቀ ፡ ንጹሐ ፡ እምውሳጤሁ ፡ ወእምአፍአሁ ፡ ወትቀፍልዋ ፡ ወትገብር ፡ በውስቴታ ፡ ማዕበለ ፡ ዘወርቀ ፡ ዘኊጻዳት ፡ እምዐውዳ ።

25:12  ወትዘብጥዋ ፡ ፅብነ ፡ አርባዕ ፡ ዘወርቅ ፡ ወታነብር ፡ ውስተ ፡ ፬ምስ[ማካ]ቲሃ ፡ ፅብነ ፡ ፪ውስተ ፡ መስመክ ፡ አሐዱ ፡ ወፅብነ ፡ ፪ውስተ ፡ ዳግም ፡ ምስማክ ።

25:13  ወትገብር ፡ ላቲ ፡ መጻውሪሃ ፡ እምዕፀ[ው ፡ ዘ]ኢይነቅዝ ፡ ወትቀፍሎ ፡ [በ]ወርቅ ።

25:14  ወታብእ ፡ ውስቴታ ፡ ድንባዛቲሃ ፡ ውስተ ፡ ዝኩ ፡ ፅብነ ፡ አርባዕ ፡ ውስተ ፡ እለ ፡ መሰመክ ፡ ዘታቦት ፡ መስከሚሃ ፡ ለታቦት ፡ በዘ ፡ ይሰክምዋ ፡ ቦቱ ።

25:15  [በአፅባን ፡] በዘ ፡ አዘዝኩክሙ ፡ ለይኩን ፡ ድንባዛት ፡ ይትወደድ ፡ ዘኢያንቀለቀል ።

25:16  ወትደዩ ፡ ውስተ ፡ ታቦት ፡ ትእዛዘ ፡ ዘአሀብከ ፡ ሀሎ ።

25:17  ወትገብር ፡ ላቲ ፡ መልዕልቴሃ ፡ ተድባበ ፡ ተውሳኮ ፡ ዘወርቅ ፡ ዘንጹሕ ፡ ዘካዕበ ፡ እመት ፡ ወመንፈቀ ፡ እመት ፡ [ኑኁ ፡] ወፅፍኁ ፡ እመት ፡ ወንፍቃ ።

25:18  ወትገብሩ ፡ ክልኤተ ፡ ኬሩቤን ፡ ቅፍሎ ፡ ወርቅ ፡ ፍሕቆ ፡ ወታነብሮን ፡ ኵለሄ ፡ ውስተ ፡ ምስማካቲ[ሁ] ፡ ለተድ[ባብ] ።

25:19  ይትገበር ፡ ኬሩብ ፡ አሐዱ ፡ እምዝ ፡ መስመክ ፡ ወኬሩብ ፡ አሐዱ ፡ እምዝ ፡ መስመክ ፡ ዘዳግም ፡ ዘተድባብ ፡ ወትገብሩ ፡ ክልኤሆሙ ፡ ኬሩብ ፡ ውስተ ፡ ክልኤሆን ፡ መስመክት ።

25:20  ይኩና ፡ ኬሩቤ[ን] ፡ እንዘ ፡ ይረብባ ፡ ክነፊሆን ፡ እመልዕልት ፡ እንዘ ፡ ይጼልላ ፡ በክነፊሆን ፡ መልዕልተ ፡ ተድባብ ፡ ወገጾን ፡ ይትናጸሩ ፡ በበይኖን ፡ በዲበ ፡ ተድባብ ፡ ግበር ፡ ከመዝ ፡ ገጾን ፡ ይትናጸሩ ፡ ለኬሩቤን ።

25:21  ወትዌጥሕ ፡ ተድባበ ፡ ዲበ ፡ ታቦት ፡ መልዕልቴሃ ፡ [ወውስተ ፡] ታቦት ፡ ትደይ ፡ ትእዛዘ ፡ ዘአነ ፡ እሁበከ ።

25:22  ወእትአመር ፡ ለከ ፡ በህየ ፡ ወእትናገረከ ፡ እምላዕሉ ፡ እምዲበ ፡ ተድባብ ፡ እማእከለ ፡ ክልኤቲ ፡ ኪሩቤን ፡ እምእለ ፡ ሀለዋ ፡ ውስተ ፡ ታቦት ፡ ዘመርጡር ፡ ኵሎ ፡ ትእዛዘ ፡ [ዘ]አዘዝኩ ፡ ለውሉደ ፡ እስራኤል ።

25:23  ወትገብር ፡ ሊተ ፡ ማእደ ፡ ዘወርቅ ፡ ንጹሕ ፡ ኑኁ ፡ ካዕበ ፡ እመት ፡ ወፅፍሑ ፡ እመት ፡ ወቆሙ ፡ እመት ፡ [ወመንፈቀ ፡ እመት ።]

25:24  ወግብራ ፡ ግብረ ፡ ማዕበል ፡ ዘወርቅ ፡ ዐውዳ ፡ ወትገብር ፡ ቀጸላሃ ፡ ፅብነ ፡ አርባዕ ።

25:25  ወትገብር ፡ ኊጻዳተ ፡ ዘማዕበል ፡ ለቀጸላሃ ።

25:26  ወግበር ፡ አርባዕተ ፡ ሕለቃተ ፡ ዘወርቅ ፡ ወአንብር ፡ ውስተ ፡ አርባዕቱ ፡ ፍና ፡ ዘእገሪሃ ፡ መንገለ ፡ ቀጸላሃ ።

25:27  ወይኩን ፡ አ[ፅባኒ]ሃ ፡ ቤተ ፡ ለምጽዋሪሃ ፡ ዘያነሥእ ፡ ማእደ ።

25:28  ወትገብር ፡ መጻውሪሃ ፡ እምዕ[ፅ ፡ ዘ]ኢይነቅዝ ፡ ወትቀፍሎ ፡ ንጹሐ ፡ ወርቀ ፡ ወቦቱ ፡ ይትገሐሥ ፡ ማእድ ።

25:29  ወትገብር ፡ መዓንፍቲሃ ፡ ወአጽሕልቲሃ ፡ ወቤተ ፡ መዋጽሕታ ፡ ወመስፈርታ ፡ በዘ ፡ ቦቱ ፡ ታወጽሕ ፡ ቦቱ ፡ እምንጹሕ ፡ ወርቅ ፡ ግበሮ ።

25:30  ወአንብር ፡ [ኅብስተ ፡] ዲበ ፡ ማእዱ ፡ በቅድሜየ ፡ ዘልፈ ።

25:31  ወትገብር ፡ ተቅዋመ ፡ ማኅቶታ ፡ እምወርቅ ፡ ንጹሕ ፡ ፍሕቆ ፡ ግበራ ፡ ተቅዋመ ፡ ማኅቶታ ፡ ዐምደ ፡ ወአብራዒሃ ፤ መኣኅዚሃ ፡ ወከባበ ፡ ርእሰ ፡ ወጽጌያቲሃ ፡ እምውስቴታ ፡ ይትገበር ።

25:32  ስድስቱ ፡ አብራዕ ፡ እለ ፡ ይትገበራ ፡ በገቦሃ ፤ ሠለስቱ ፡ አብራዕ ፡ ለተቅዋመ ፡ ማኅቶታ ፡ እምአሐዱ ፡ ፍናሃ ፡ ወሠለስቱ ፡ አብራዕ ፡ እምፍናሃ ፡ እምካልእ ።

25:33  ወሠለስቱ ፡ መኣኅዚሃ ፡ እለ ፡ ዮኀብራ ፡ ምስለ ፡ ፩ከባበ ፡ ርእሳ ፡ ጽጉይ ፤ ከማሁ ፡ ለስድስቲሆሙ ፡ አብራዕ ፡ ለእለ ፡ ይወጽኡ ፡ እምተቅዋመ ፡ ማኅቶት ።

25:34  ወለተቅዋመ ፡ ማኅቶታ ፡ መኣኅዚሃ ፡ አርባዕቱ ፡ [ወ]ጽጌያታ ፡ [ወከባበ ፡ ርእሳ] ።

25:35  ከባበ ፡ ርእሳ ፡ ማእከለ ፡ ክልኤቱ ፡ አብራዕ ፤ ከማሁ ፡ ለስድስቱሂ ፡ አብራዑ ፡ እለ ፡ ይወፅኡ ፡ እምውስተ ፡ ተቅዋመ ፡ ማኅቶት ።

25:36  ከባበ ፡ ርእሳ ፡ ወአብራዒሃ ፡ እምውስቴታ ፡ ይኩና ፤ ኵሎን ፡ ፍሕቆ ፡ እምአሐዱ ፡ ወርቅ ፡ ንጹሕ ።

25:37  ትገብር ፡ መኃትዊሃ ፡ ፯ወትሥራዕ ፡ መኃትወ ፡ ወያርእዩ ፡ እምአሐዱ ፡ ገጽ ።

25:38  ዘእምድኅሬሃ ፡ ወሥርዐታ ፡ እምወርቅ ፡ ንጹሕ ፡ ፍሕቆ ።

25:40  ዘትገብር ፡ ዘኵሎ ፡ ንቁያ ፡ አርአያ ፡ አርአይኩከ ፡ በደብር ።

Chapter 26

26:1  ወለደብተራ ፡ ትገብር ፡ ላቲ ፡ ፲ዐጸደ ፡ እምብሰስ ፡ ዕፁፍ ፡ ወእምሕብረ ፡ ያክንት ፡ ወሜላት ፡ ወነት ፡ [ዕፁፍ ፡] ኬሩቤን ፡ ወግብሩ ፡ ግብረ ፡ ማእነም ፡ ትገብርዎ ።

26:2  ወኑኁ ፡ ለዐጸዱ ፡ ለ፩ዐጸድ ፡ ፳ወ፷በእመት ፡ ወ፬በእመት ፡ ፅፍሑ ፡ ፩ዐጸድ ፡ በመስፈርቲሁ ፡ ከማሁ ፡ ለይኩን ።

26:3  ኀምስቱ ፡ አዕጻድ ፡ ይሳመካ ፡ አሐቲ ፡ ምስለ ፡ ካልእታ ፡ ትሳመክ ፡ ወኀምስቱ ፡ አዕጻድ ፡ ይሰናሰላ ፡ በበይናቲሆን ።

26:4  ወትገብር ፡ ሎንቱ ፡ መምሠጢሆን ፡ ዘሕብረ ፡ ያክንት ፡ ውስተ ፡ ከንፈረ ፡ ዐጸድ ፡ ውስተ ፡ ገጸ ፡ አፍአ ፡ ውስተ ፡ ዳግመ ፡ መብዋእት ።

26:5  ፶መማሥጠ ፡ ትገብር ፡ ላቲ ፡ ለአሐቲ ፡ ዐጸድ ፡ ወ፶መማሥጠ ፡ ተገብር ፡ እምአሐዱ ፡ ገ[ጸ] ፡ ዐጸድ ፡ እምድኅሬሃ ፡ ለዳግምት ፡ ዐጸድ ፤ ገጾን ፡ እንዘ ፡ ይሳመካ ፡ በበይኖን ።

26:6  ወግበር ፡ ኊጻዳተ ፡ ፶ዘወርቀ ፡ ወደምር ፡ አዕጻደ ፡ አሐተ ፡ ምስለ ፡ ካልእታ ፡ በኊጻደት ፡ ወይኩን ፡ ደብተራሁ ፡ አሐደ ።

26:7  ወትገብር ፡ ዘሠቅ ፡ ይሴውሮ ፡ እምላዕሉ ፡ ዲበ ፡ ደብተራ ፡ ዐሠርተ ፡ ወአሐደ ፡ ሠቀ ፡ ትገብር ።

26:8  ወለአሐቲ ፡ ሠቅ ፡ በእመት ፡ ኑኃ ፡ ፴ወፅፍኃ ፡ ርብዕ ፡ በእመት ፡ ለለአሐቲ ፡ ሠቅ ፡ ከመዝ ፡ አምጣኒሆን ።

26:9  ወደምር ፡ ፭ሠቀ ፡ [ወ፯ሠቀ ፡] ደምር ፡ በበይኖን ፡ ወዕፅፍ ፡ [ሳ]ድስተ ፡ ሠቀ ፡ እመንገለ ፡ ገጸ ፡ ደብተራ ።

26:10  ወትገብር ፡ መማሥጠ ፡ ፶ውስተከንፈረ ፡ ሠቅ ፡ ለአሐቲ ፡ ለእንተ ፡ ማእከል ፡ ድማሬ ፡ ሠቅ ፡ ወትገብር ፡ ፶መማሥጠ ፡ ውስተ ፡ ከንፈር ፡ ዘሠቅ ፡ አሐቲ ፡ ውስተ ፡ እንተ ፡ ትዴመር ፡ ቀዳሚተ ።

26:11  ወትገብር ፡ ኍጻዳተ ፡ ዘብርት ፡ ፶ወትዴምር ፡ ኊጻደተ ፡ ውስተ ፡ መማሥጥ ፡ ወታኀብር ፡ ሠቃተ ፡ ወይኩን ፡ አሐደ ።

26:12  ወታነብር ፡ ገጸ ፡ ዘይፈደፍድ ፡ እምሠቅ ፡ ዲበ ፡ ደብተራ ፡ ዘተርፈ ፡ ትከድን ፡ ዘይፈደፍድ ፡ እምውስተ ፡ አሥቃቀ ፡ ደብተራ ፡ ትከድን ፡ ከወላ ፡ ደብተራ ፤

26:13  እመተ ፡ እምውስተ ፡ ዘይተርፍ ፡ ሠቃተ ፡ ደብተራ ፡ ይከድን ፡ እምግደሚሁ ፡ ለደብተራ ፡ እምለፌ ፡ ወእምለፌ ፡ ይክድን ።

26:14  ወአግብር ፡ ዘትከድና ፡ ለደብተራ ፡ አምእስተ ፡ በግዕ ፡ ሕሡየ ፡ ወመንጦላዕታ ፡ ያክንተ ፡ እምገጸ ፡ ላዕሉ ።

26:15  ወአግብር ፡ [አዕማደ ፡] ደብተራ ፡ ዘዕ[ፅ ፡ ዘ]ኢይነቅዝ ።

26:16  ዘዕሥር ፡ በእመት ፡ ዐምዱ ፡ ፩ወፅፍሑ ፡ እመት ፡ ወንፍቃ ።

26:17  መስከምተ ፡ ሠርዌሁ ፡ ክልኤ ፡ ለ፩ዐምድ ፡ እንዘ ፡ ይሰከም ፡ ዐምድ ፡ ለዐምድ ፡ ከማሁ ፡ ግበር ፡ ለኵሉ ፡ ለዐምደ ፡ ደብተራ ።

26:18  ወአግብር ፡ አዕማደ ፡ ለደብተራ ፡ ፳ገጸ ፡ ምዕዋን ።

26:19  ወትገብር ፡ ሎሙ ፡ ዘብሩር ፡ [፵ስክትተ ፡] ትገብር ፡ ለ፳ዐምድ ፤ ክልኤ ፡ ስክትቱ ፡ ለዐምድ ፡ ፩[ለክልኤሆሙ ፡] ገጹ ፡ ወክልኤ ፡ ስክትቱ ፡ ለ፩ዐምድ ፡ ለክልኤሆሙ ፡ ገጹ ።

26:20  ወካልእ ፡ እምገጸ ፡ ዐረቢ ፡ ፳ዐምዱ ፤

26:21  ወስክትቶሙ ፡ ዘይጸውር ፡ አዕማደ ፡ ዘብሩር ፡ ፵ለለ፩ዐምድ ፡ ፪ስክትቱ ፡ ዘክልኤሆሙ ፡ ገጹ ።

26:22  ወእምድኅር ፡ እምገጸ ፡ ደብተራ ፡ ገጸ ፡ ባሕር ፡ ትገብር ፡ ፯አዕማደ ፤

26:23  ወክልኤተ ፡ ዐምደ ፡ ዓዲ ፡ ለማእዝን ፡ ለደብተራ ፡ እምድኅር ።

26:24  ወዕሩየ ፡ ይኩን ፡ እምታሕቱ ፡ ይድረግ ፡ ዕሩየ ፡ እምቅፍረ ፡ ዐምዱ ፡ አሐደ ፡ ድደ ፡ ይኩን ፤ ከማሁ ፡ ግበር ፡ ለክልኤሆን ፡ ማእዝን ፡ ዕሩያተ ፡ ይኩና ።

26:25  ወይኩን ፡ ሰማንቱ ፡ ዐምድ ፡ ወምዕማዱኒ ፡ ዘብሩር ፡ ፲ወ፯ለለ፩ዐምዱ ፡ ምዕማዱ ፡ ክልኤ ፡ ክልኤ ፡ ምዕማዱ ፡ ለ፩ዐምድ ፡ እምኵሉ ፡ ፍናሁ ።

26:26  ወትገብር ፡ መናስግተ ፡ እምዕ[ፅ ፡ ዘ]ኢይነቅዝ ፡ ፭ለ፩ዐምድ ፡ እምአሐዱ ፡ ገጸ ፡ ደብተራ ፤

26:27  ወኀምስቱ ፡ መንስጉ ፡ እመስመኪሃ ፡ ለደብተራ ፡ እም[ካልእ] ፡ ገጻ ፡ ወ፭መንስጋ ፡ ለአኃሪ ፡ ዐምድ ፡ እመስመከ ፡ ደብተራ ፡ ዘመንገለ ፡ ባሕር ።

26:28  ወመንስግ ፡ ዘማእከለ ፡ ዐምድ ፡ እንዘ ፡ ይለጽቅ ፡ እምአሐዱ ፡ መስመክ ፡ ውስተ ፡ ካልእ ፡ መስመክ ፡ ይዕዱ ።

26:29  ወአዕማዲሁ ፡ ይትቀፈሉ ፡ ወርቀ ፡ ወመማሥጠ ፡ መናስግቲሁ ፡ ይትቀፈል ፡ ወርቀ ።

26:30  ወተሐንጻ ፡ ለደብተራ ፡ በአርአያ ፡ አርአይኩከ ፡ በውስተ ፡ ደብር ።

26:31  ወትገብር ፡ ላቲ ፡ መንጦላዕታ ፡ ዘሕብረ ፡ ያክንት ፡ ወሜላት ፡ ወነት ፡ ክዑብ ፡ ወቢሰስ ፡ ፍቱል ፡ ወግብሩ ፡ ግብረ ፡ ማእነም ፡ ወግበሮ ፡ ኪሩቤን ።

26:32  ወአንብሮ ፡ ዲበ ፡ አርባዕቱ ፡ አዕማድ ፡ ዕ[ፅ ፡ ዘ]ኢይነቅዝ ፡ ቅፉላን ፡ በወርቅ ፡ ወውስተ ፡ አዕማዲሁኒ ፡ ወር[ቅ] ፡ ወአርእስቲሆን ፡ ወር[ቅ] ፡ ወመዓምዲሁ ፡ አርባዕቱ ፡ ዘብሩር ።

26:33  ወአንብር ፡ መንጦላዕተ ፡ ዲበ ፡ አዕማድ ፡ ወአብእ ፡ ህየ ፡ ወሳጢቶ ፡ ለመጦላዕት ፡ ታቦተ ፡ ዘመርጡር ፡ ወይፍልጥ ፡ መንጦላዕት ፡ ወሳ[ጤ] ፡ ወቀሠፋየ ፡ ቤተ ፡ ምቅዳስ ።

26:34  ወትሴውር ፡ መንጦላዕት ፡ ታቦተ ፡ ዘመርጡር ፡ በቤተ ፡ መቅደሰ ፡ ምቅዳስ ።

26:35  ወሥርዑ ፡ ማእደ ፡ ቅድመ ፡ መንጦላዕት ፡ ገጸ ፡ አፍአ ፡ በውስተ ፡ ደብተራ ፡ [ወተቅዋመ ፡ ማኅቶት ፡ አንጻረ ፡ ማእድ ፡] እምገጸ ፡ ዐረቢ ፡ ወትነብር ፡ ማእዱ ፡ እምገጸ ፡ ደብተራ ፡ መንገለ ፡ ምዕዋን ።

26:36  ወትገብር ፡ ላቲ ፡ መንጦላዕተ ፡ መምሠጠ ፡ እንተ ፡ ሕብረ ፡ ያክንት ፡ ወሜላት ፡ ወነት ፡ ክዑብ ፡ ወቢሶስ ፡ ክዑብ ፡ በብዑደ ፡ ግብረት ።

26:37  ወትገብሩ ፡ ለመንጦላዕት ፡ ኀምስተ ፡ አዕማደ ፡ ወትቀፍሎሙ ፡ ቅፍሎ ፡ ወርቀ ፡ ወአርእስቲሁኒ ፡ ወር[ቅ] ፡ ወትሰብክ ፡ ሎንቱ ፡ ፭መዓምደ ፡ ዘብርት ።

Chapter 27

27:1  ወአግብር ፡ ቤተ ፡ ምሥዋዕ ፡ እምዕ[ፅ ፡ ዘ]ኢይነቀዝ ፡ ዘኅምስ ፡ በእመት ፡ ኑኁ ፡ ወኅምስ ፡ በእመት ፡ ፅፍኁ ፤ ርቡዐ ፡ ይኩን ፡ ምሥዋዑ ፤ ወሥልስ ፡ በእመት ፡ ይኩን ፡ ቆሙ ።

27:2  ወአግብር ፡ መሥዋዕተ ፡ ወትገብሩ ፡ ሎቱ ፡ አቅርንተ ፡ ውስተ ፡ ፬መኣዝኒሁ ፤ ውስቴቱ ፡ ይፃእ ፡ አቅርንቲሆን ፡ ወቅፍልዎ ፡ በብርት ።

27:3  ወግበር ፡ ላቲ ፡ ቀጸላ ፡ ለመሥዋዕት ፡ [ወ]ምስዋሪሃ ፡ ወፍያላቲሃ ፡ ወመኈሥሠ ፡ ሥጋ ፡ ወመስወደ ፡ እሳት ፤ ኵሎ ፡ ትገብር ፡ ዘብርት ።

27:4  ወአግብር ፡ መጥበስቶ ፡ ሠቅሠቀ ፡ ከመ ፡ መሥገርተ ፡ ዐሣ ፡ ዘብርት ፡ ወአግብር ፡ ላቲ ፡ ለመጥበስት ፡ ፬ሕለቃተ ፡ አጻብዕ ፡ ዘብርት ፡ ውስተ ፡ ፬መኣዝኒሁ ።

27:5  ወታነብሮን ፡ ውስተ ፡ መጥበስት ፡ ዘቤተ ፡ መሥዋዕት ፡ ታሕተ ፡ ወይኩን ፡ መጥበስቱ ፡ መንፈቀ ፡ ቤተ ፡ መሥዋዕት ።

27:6  ወግበር ፡ መጻውርተ ፡ እምዕ[ፅ ፡ ዘ]ኢይነቅዝ ፡ ለቤተ ፡ መሥዋዕት ፡ ወትቀፍሎሙ ፡ ብርተ ።

27:7  ወታብእ ፡ መጽወርተ ፡ ውስተ ፡ ሕለቃት ፡ ወይኩን ፡ ውስተ ፡ ክልኤ ፡ ገበዋተ ፡ መሥዋዕት ፡ ሶበ ፡ ይጸውርዋ ።

27:8  ፍሉገ ፡ ይኩን ፡ ሰሊዳ[ሁ] ፡ ከማሁ ፡ ትገብርዎ ፡ በከመ ፡ አርአይኩክሙ ፡ በውስተ ፡ ደብር ፡ ከማሁ ፡ ግበር ።

27:9  ወግበር ፡ ላቲ ፡ ዐጸደ ፡ ለደብተራ ፡ ውስተ ፡ መስመክ ፡ ዘገጸ ፡ ዐረብ ፡ ምንደደ ፡ ለዐጸድ ፡ እምብሰስ ፡ ዕፁፍ ፡ ወኑኃ ፡ ምእት ፡ በእመት ፡ እምአሐዱ ፡ መስመክ ።

27:10  ወአዕማዲሁ ፡ ፳ወመዓምዲሁ ፡ ዘብርት ፡ ፳ወኊጻዳቲሁ ፡ ወጥነፊሁ ፡ ዘብሩር ።

27:11  ከመዝ ፡ ለይትገበር ፡ ለመስመክ ፡ ዘመንጸረ ፡ ምዕዋን ፡ ምንዳዱ ፡ ምእት ፡ በእመት ፡ ኑኁ ፤ አዕማዲሁ ፡ ፳[ወምዕማዲሁ ፡ ፳]ዘብርት ፤ ኊጻዳቲሁ ፡ ወጥነፊሁ ፡ ለዐምድ ፡ ወመዓምዲሁ ፡ ይትቀፈል ፡ በብሩር ።

27:12  ወፅፍኀ ፡ ዐ[ጸ]ዱ ፡ ዘገጸ ፡ ባሕር ፡ ለምንዳድ ፡ ፶በእመት ፤ ዐምዶሙ ፡ ዐምደ ፡ ዐሠርቱ ፡ ወምዕማዶሙ ፡ ፲ ።

27:13  ወፅፍኀ ፡ ዐጸዱ ፡ ዘገጸ ፡ ጽባሕ ፡ ፶በእመት ፤ ዐምዶሙ ፡ ዐሠርቱ ፡ ወምዕማዶሙ ፡ ፲ ።

27:14  ወዕሥር ፡ ወኅምስ ፡ በእመት ፡ ዘምንዳድ ፡ ኑኁ ፡ እምገጸ ፡ ፩መስመክት ፤ ዐምዶሙ ፡ ሠለስቱ ፡ ምዕማዶሙ ፡ ሠለስቱ ።

27:15  ወእምካልእ ፡ መስመክት ፡ ፲ወ፭በእመት ፡ ለምንዳድ ፡ ቆሙ ፤ ዐምዶሙ ፡ ፫ምዕማዶሙ ፡ ፫ ።

27:16  ወለመድረከ ፡ ዐጸዳ ፡ መንጦላዕታ ፡ ፳ኑኁ ፡ በእመት ፡ ዘያክንት ፡ ወሜላት ፡ ወነት ፡ ወቢሶስ ፡ ክዑብ ፡ ብዑደ ፡ ይኩን ፡ በግብረ ፡ መርፍእ ፤ አዕማዲሁ ፡ ፬ወመዓምዲሁ ፡ ፬ ።

27:17  ኵሉ ፡ ኤዕማድ ፡ ዘዐጸድ ፡ ይዑዱ ፡ ይትቀፈሉ ፡ ቅፍሎ ፡ ብሩር ፤ ወአርእስቲሆሙኒ ፡ ብሩር ፤ መዓምዲሆሙ ፡ ብርት ።

27:18  ወኑኀ ፡ ዐ[ጸ] ዱ ፡ ፻በእመት ፡ ወፅፍኁ ፡ ፶ወቆሙ ፡ ዘኅምስ ፡ በእመት ፡ እምብሶስ ፡ ክዑብ ፡ ወመዓምዲሆሙ ፡ ብርት ።

27:19  ወኵሉ ፡ ግብሩ ፡ ወኵሉ ፡ መጋብርቲሁ ፡ ወታክልተ ፡ ዐጸዱ ፡ [ብርት] ።

27:20  ወንተ ፡ አዝዞሙ ፡ ለውሉደ ፡ እስራኤል ፡ ወይንሥኡ ፡ ቅብአ ፡ ዘዘይት ፡ ዘቀዳሜ ፡ ቅሥመታ ፡ ንጹሐ ፡ ውጉአ ፡ ለብርሃን ፡ ከመ ፡ ያኅትው ፡ ማኅቶተ ፡ በውስተ ፡ ደብተራ ፡ በቤተ ፡ መቅደስ ።

27:21  አፍአ ፡ እመንጦላዕት ፡ ቅድመ ፡ ትእዛዝ ፡ ወያኀትው ፡ አሮን ፡ ወደቁ ፡ እምሰርክ ፡ እስከ ፡ ነግህ ፡ በቅድመ ፡ እግዚአብሔር ፡ ሕገ ፡ ለዝሉፉ ፡ ለትውልድክሙ ፡ ኀበ ፡ ውሉደ ፡ እስራኤል ።

Chapter 28

28:1  ወአቀርብ ፡ ኀቤከ ፡ አሮንሃ ፡ እኋከ ፡ ወውሉዶ ፡ እምውስተ ፡ ውሉደ ፡ እስራኤል ፡ ከመ ፡ ይሡዑ ፡ ሊተ ፡ አሮን ፡ ወናደብ ፡ ወአብዩድ ፡ [ወ]እልዓዛር ፡ ወይታማር ።

28:2  ወትገብር ፡ ዐራዘ ፡ ለአሮን ፡ ቅዱሰ ፡ ለክብር ፡ ወለሡራሔ ።

28:3  ፡ ወአንተ ፡ አይድዕ ፡ ለኵሉ ፡ ጠቢባን ፡ በልብ ፡ እለ ፡ መላእኩ ፡ ላዕሌሆሙ ፡ መንፈሰ ፡ ዘጥበብ ፡ እሙንቱ ፡ ይግበሩ ፡ ለዐራዘ ፡ ቅዱሰ ፡ ለቤተ ፡ ምቅዳስ ፡ በዘቦ ፡ ይቄድስ ፡ ኪያየ ።

28:4  ወዝውእቱ ፡ አልባስ ፡ ዘይገብሩ ፡ መልበስተ ፡ እንግድዓ ፡ ወትብልያ ፡ ዘመቅፈርት ፡ ወጶዴሬ ፡ ወመልበስ[ተ] ፡ ቍጽሮ ፡ ድርማንቀ ፡ ዘብእሲ ፡ ዘሐቌ ፡ ወቅናተ ፡ ወትገብሩ ፡ ሎቱ ፡ ለአሮን ፡ አልባሲሁ ፡ ቅዱሰ ፡ ወለደቁ ፡ በዘይሠውዑ ፡ ሊተ ።

28:5  ወእሙንቱ ፡ ይነሥኡ ፡ (ሊተ ፡) ወርቀ ፡ ወያክንተ ፡ ወሜላተ ፡ ወነተ ፡ ወቢሶሰ ።

28:6  ወይገብሩ ፡ ትብሌሁ ፡ እምብሶስ ፡ ክዑብ ፡ ግብሩ ፡ ግብረ ፡ ማእነም ፡ ብዑድ ።

28:7  ክልኤተ ፡ ይኩን ፡ ኤጴሙስ ፡ እለ ፡ ይትላጸቃ ፡ በበይኖን ፡ አሐቲ ፡ ዲበ ፡ አሐቲ ፡ እምክልኤሆሙ ፡ ገጽ ፡ ግብረቶን ።

28:8  ወእንመተ ፡ ትብላይሆን ፡ በላዕሌሆን ፡ እምግብረቶን ፡ ድሙራተ ፡ ይኩና ፡ ዘወርቅ ፡ ወያክንት ፡ ወሜላት ፡ ወነት ፡ ፍቱል ፡ ወቢሶስ ፡ ክዑብ ።

28:9  ወንሣእ ፡ ክልኤ ፡ እብነ ፡ መረግድ ፡ ወአኅርዎሙ ፡ አስማቲሆሙ ፡ ለውሉደ ፡ እስራኤል ።

28:10  ስድስቱ ፡ አስማት ፡ ውስተ ፡ ፩እብን ፡ ወሰድስቱ ፡ ውስተ ፡ ፩እብን ፡ በበአዝማዲሆሙ ።

28:11  ግበር ፡ ግብረ ፡ ዘኬንያ ፡ ኅርወተ ፡ ዐይነ ፡ ማኅተም ፡ ትገልፍ ፡ ክልኤሆሙ ፡ እብነ ፡ አስማተ ፡ ውሉደ ፡ እስራኤል ።

28:12  [ወታነብሮሙ ፡ ለ፪አዕባን ፡] ውስተ ፡ ክልኤሆሙ ፡ መታክፊሁ ፡ [ተዝካረ ፡ በእንተ ፡ ውሉደ ፡ እስራኤል ፡ ወይነሥእ ፡ አሮን ፡ አስማቲሆሙ ፡ በቅድመ ፡ እግዚአብሔር ፡ ላዕለ ፡ ፪መታክፊሁ ፡] ተዝካረ ፡ በእንቲአሆሙ ።

28:13  ወትገብር ፡ አራዊተ ፡ ምድር ፡ እምወርቅ ፡ ንጹሕ ።

28:14  ወአግብር ፡ ክልኤተ ፡ ጽነፈ ፡ እምወርቅ ፡ ንጹሕ ፡ ድሙረ ፡ ጽጋይ ፡ ግበር ፡ ፅፉረ ፡ ወአንብር ፡ ጽንፈ ፡ ፅፍሮ ፡ ዲበ ፡ አራዊተ ፡ ምድር ፡ በአምሳሊሆን ፡ እመንገለ ፡ ቅድም ።

28:15  ወትገብር ፡ [ሎግዮን ፡ ዘፍትሕ ፡ ግብረ ፡ ማእነም ፡ ብዑድ ፡] በሐሳበ ፡ መልበስቱ ፡ ትገብር ፡ ከማሁ ፡ በወርቅ ፡ ወበያክንት ፡ ወሜላት ፡ ወነት ፡ ክዑብ ፡ ወቢሶስ ፡ ክዑብ ።

28:16  ትገብሮ ፡ ር[ቡዐ] ፡ ወይኩን ፡ ዐፅፍ ፡ ዘእመት ፡ ኑኁ ፡ ወእመት ፡ ወርዱ ።

28:17  ወይትአነም ፡ በማእነም ፡ ወለለእብኑ ፡ አርባዕቱ ፡ ጾታሁ ፤ ጾታ ፡ ዘእብን ፡ ይትገበር ፡ ዘስርዲዮን ፡ ወዘትጳዝዮን ፡ ወዘመረግድ ፡ አሐዱ ፡ ጾታ ።

28:18  [ወካልእ ፡ ጾታ ፡] ዘእብኑ ፡ ከመ ፡ ፍሕም ፡ ወስንፒር ፡ ወኢያስጲስ ።

28:19  ወሣልስ ፡ ጾታ ፡ ዘለጊርዮን ፡ ወአቃጥስ ፡ ወአሜቲሶጥስ ።

28:20  ወራብዕ ፡ ጾታ ፡ በእብን ፡ ዘሕብረ ፡ ወርቅ ፡ ወብርሌ ፡ ወሳውም ፤ ወልቡጠ ፡ በወርቅ ፡ ወእሱረ ፡ በወርቅ ፡ ይኩን ፡ በበጾታሁ ።

28:21  ወእበኒሁ ፡ ይትገበር ፡ በአስማቲሆሙ ፡ ለውሉደ ፡ እስራኤል ፡ ዐሠርቱ ፡ ወክልኤቱ ፡ በበ ፡ አስማቲሆሙ ፤ ይትገለፍ ፡ ከመ ፡ ግልፈተ ፡ ዐይነ ፡ ማኅተም ፡ ለለስሙ ፡ ለ፲ወ፪ሕዝበ ፡ እስራኤል ።

28:22  ወትገብር ፡ [ለሎግዮን ፡] ጽነፊሁ ፡ ዘፅፍሮ ፡ ወፅፍሮሁ ፡ ከመ ፡ ዝርዚቅ ፡ ዘወርቅ ፡ ንጹሕ ።

28:23  ወይንሣእ ፡ አሮን ፡ አስማቲሆሙ ፡ ለውሉደ ፡ እስራኤል ፡ እምኀበ ፡ ይወፅእ ፡ ቃለ ፡ ፍትሕ ፡ ውስተ ፡ እንግድዓሁ ፡ እንዘ ፡ ይበውእ ፡ ቤተ ፡ መቅደስ ፡ ለተዝካር ፡ ቅድመ ፡ እግዚአብሔር ።

28:24  ወታነብር ፡ መንጸረ ፡ ይወፅእ ፡ [ፍትሕ ፡] አዝፋሪሁ ፡ ለስንሳሌሃ ፡ እምኵልሄ ፡ እምስማካቲሃ ፡ ወእምኵናኔ ፡ ታነብር ።

28:25  ወሥዕለ ፡ አራዊት ፡ ታነብር ፡ እምውስተ ፡ ክልኤሆሙ ፡ መታክፍ ፡ ዘመልበስት ፡ መንገለ ፡ ገጽ ።

28:26  ወታነብር ፡ መንገለ ፡ ምኵናን ፡ ዘፍትሕ ፡ ትእዛ[ዘ ፡] ወርት[ዐ] ፡ ወይትገበር ፡ ውስተ ፡ እንግድዓሁ ፡ ለአሮን ፡ ወሶበ ፡ ይበውእ ፡ ቤተ ፡ መቅደስ ፡ ቅድመ ፡ እግዚአብሔር ፡ ያብእ ፡ አሮን ፡ ፍትሖሙ ፡ ለውሉደ ፡ እስራኤል ፡ በውስተ ፡ እንግድዓሁ ፡ ቅድመ ፡ እግዚአብሔር ፡ ለዘልፍ ።

28:27  ወትገብር ፡ መልበስተ ፡ ዘጶዴሬ ፡ ዘኵለንታሁ ፡ በያክንት ።

28:28  ወአፈ ፡ መልበስቱ ፡ እምኔሁ ፡ ወይኩን ፡ ማእከለ ፡ በዐውደ ፡ አፈ ፡ መልበስቱ ፡ ይትገበር ፡ ግብረ ፡ ማእነም ፡ ወድማሬሁ ፡ እንሞ ፡ እምውስቴቱ ፡ ከመ ፡ ኢይትበተክ ።

28:29  ወትገብር ፡ በመልዕልቴሃ ፡ ወመትሕቴሃ ፡ ከመ ፡ ፍርየተ ፡ ሮማን ፡ ዘያክንት ፡ ወሜላት ፡ ወነት ፡ ዘፍትሎ ፡ ወቢሶስ ፡ ክዑብ ፡ መትሕተ ፡ መልበስት ፡ ክዑብ ፡ ኵሉ ፡ ዐውዱ ፡ ወሕብሩ ፡ ሕብረ ፡ ሮማን ፡ ዘወርቅ ፤ ወጸናጽል ፡ ማእከሎሙ ፡ ለእሉ ፡ በዐውዱ ።

28:30  ወሮማኑ ፡ ዘወርቅ ፡ ወጸናጽሊሆን ፡ ወጽጌሆን ፡ በናሕሰ ፡ መልበስቱ ፡ እምዐውዱ ።

28:31  ወይግበር ፡ አሮን ፡ ሶበ ፡ ይሠውዕ ፡ በቃል ፡ ዘይሰማዕ ፡ እንዘ ፡ ይበውእ ፡ ቤተ ፡ መቅደስ ፡ ቅድመ ፡ እግዚአብሔር ፡ ወእንዘሂ ፡ ይወፅእ ፡ ከማሁ ፡ ከመ ፡ ኢይሙት ።

28:32  ወትገብር ፡ ቈጽለ ፡ ወርቅ ፡ ረቃቀ ፡ እምወርቅ ፡ ንጹሕ ፡ ወትገብር ፡ ውሰቴቱ ፡ አርአያ ፡ ማኅተም ፡ ቅዱስ ፡ ለእግዚአብሔር ።

28:33  ወታነብራ ፡ ዲበ ፡ ዘሕብረ ፡ ያክንት ፡ ፍትሎ ፡ ወያነብርዋ ፡ ዲበ ፡ አርዌ ፡ ውስተ ፡ ፍጽሙ ፡ ለአርዌ ፡ ለትንበር ።

28:34  ወይኩን ፡ ውስተ ፡ ፍጽሙ ፡ ለአሮን ፡ ወይንሣእ ፡ አሮን ፡ ኀጢአተ ፡ ሕዝብ ፡ ለቅዱሳን ፡ እለ ፡ ቀደሱ ፡ ውሉደ ፡ እስራኤል ፡ እምኵሉ ፡ ሀብተ ፡ ቅድስናሆሙ ፡ ወይኩን ፡ ውስተ ፡ ፍጽሙ ፡ ለአሮን ፡ ስጥወ ፡ ለእግዚአብሔር ።

28:35  ወቍጽረተ ፡ ዐራዙ ፡ እምሶ[ቢስ] ፤ ወትገብር ፡ ማዕፈርተ ፡ ዘቢሶስ ፡ ወቅናተ ፡ ዘሕብር ፡ ግብረቱ ።

28:36  ወለደቂቀ ፡ አሮን ፡ ትገብር ፡ ሎሙ ፡ አልባሰ ፡ ወቅናታተ ፡ ወማዕፈርታተ ፡ ወይኩን ፡ ለክብር ፡ ወለአንክሮ ።

28:37  ወታለብሶ ፡ ለአሮን ፡ ለእኁከ ፡ ወለደቂቁሂ ፡ ምስሌሁ ፡ ወቅብኦሙ ፡ ወአፅኅዶሙ ፡ እደዊሆሙ ፡ ወእባርኮሙ ፡ ከመ ፡ ይሡዑ ፡ ሊተ ።

28:38  ወአግብር ፡ ሎሙ ፡ ድርማንቀ ፡ ዘዐጌ ፡ ከመ ፡ ይሰውሮሙ ፡ ምኅፋሪሆሙ ፡ ወኀበ ፡ ይከድና ፡ እምሐቌ ፡ እስከ ፡ መናቅእ ፡ ለይኩና ።

28:39  ወከማሁ ፡ ለይልበስ ፡ አሮን ፡ ወደቂቁ ፡ ሶበ ፡ ይበውእ ፡ ውስተ ፡ ደብተራ ፡ ዘመርጡል ፡ ወሶበ ፡ ይበውእ ፡ ይሡዕ ፡ ውስተ ፡ ምሥዋዕ ፡ ቤተ ፡ መቅደስ ፡ ወኢያምጽኡ ፡ ላዕሌሆሙ ፡ ኀጢአተ ፡ ከመ ፡ ኢይሙ[ቱ] ፤ ሕግ ፡ ለዘልፍ ፡ ሎቱ ፡ ወለፍሬሁ ፡ እምድኅሬሁ ።

Chapter 29

29:1  ወዝውእቱ ፡ ዘትገብር ፡ ሎሙ ፡ ከመ ፡ ትቀድሶሙ ፡ ከመ ፡ ይትለአኩኒ ፡ ወንሣእ ፡ ላህመ ፡ እምአልህምት ፡ ወአባግዐ ፡ ንጹሓተ ፡ ፪ ፤

29:2  ወ[ኅብ]ስተ ፡ ናእተ ፡ ልውሰ ፡ በቅብእ ፡ [ወጸራይቀ ፡ ናእት ፡ ዘበቅብእ ፡] ዘስንዳሌ ፡ እምስርናይ ፡ ትገብሮን ።

29:3  ወታነብሮ ፡ ዲበ ፡ ገሐፍት ፡ ወላህሞኒ ፡ ወክልኤ ፡ አባግዖ ፡ ታነብር ፡ [ዲበ ፡] ገሐፍት ።

29:4  ወለአሮን ፡ ወለ፪ደቂቁ ፡ ታቀርቦሙ ፡ ኀበ ፡ ኆኅተ ፡ ደብተራ ፡ ዘመርጡር ፡ ወተኀፅቦሙ ፡ በማይ ።

29:5  ወነሢአከ ፡ አልባሲሁ ፡ አል[ብ]ሶ ፡ ለአሮን ፡ እኁከ ፡ ወልብሱ ፡ ዘጶዴሬ ፡ ወመልበስቱ ፡ ትቀርብ ፡ ኀበ ፡ ማዕፈርት ።

29:6  ወቆብዖ ፡ ትወዲ ፡ ዲበ ፡ ርእሱ ፡ ወታነብር ፡ ቀጸላ ፡ ወርቅ ፡ ዲበ ፡ ቆብዑ ።

29:7  ወትነሥእ ፡ እምቅብእ ፡ ዘባረከ ፡ ወትክዑ ፡ ዲበ ፡ ርእሱ ።

29:8  ወለደቂቁኒ ፡ ታቀርቦሙ ፡ ወታለብሶሙ ፡ አልባሲሆሙ ።

29:9  ወታቀንቶሙ ፡ ቅናታቲሆሙ ፡ ወትወዲ ፡ ዲቤሆሙ ፡ ማዕፈርቶሙ ፡ ወይከውናሆሙ ፡ መሥዋዕተ ፡ ሊተ ፡ ለዓለም ፡ ወትፌጽም ፡ እደዊሁ ፡ ለአሮን ፡ ወእደወ ፡ ውሉዱ ።

29:10  ወታቀርብ ፡ ላህመ ፡ ኀበ ፡ ኆኅተ ፡ ደብተራ ፡ ዘመርጡር ፡ ወያነብሩ ፡ አሮን ፡ ወደቂቁ ፡ እደዊሆሙ ፡ ዲበ ፡ ርእሰ ፡ ላህሙ ፡ በቅድመ ፡ እግዚአብሔር ፡ በኀበ ፡ ኆኅተ ፡ ደብተራ ፡ ዘመርጡር ።

29:11  ወተሐርድ ፡ ላህሞ ፡ በቅድመ ፡ እግዚአብሔር ፡ በኀበ ፡ ኆኅተ ፡ ደብተራ ፡ ዘመርጡር ።

29:12  ወንሣእ ፡ እምውስተ ፡ ደመ ፡ ላህሙ ፡ ወትወዲ ፡ ውስተ ፡ አቅርንተ ፡ [ምሥዋዕ ፡] በአጽባዕትከ ፡ ወዘተርፈ ፡ ኵሎ ፡ ደሞ ፡ ከዐው ፡ ጠቃ ፡ [ምሥዋዕ ።]

29:13  ወትነሥእ ፡ ኵሎ ፡ ስብሐ ፡ ከርሡ ፡ ወከብዶ ፡ ወክልኤ ፡ ኵልያቶ ፡ [ወስብሐ ፡ ኵሊቱ ፡] ወታነብር ፡ ውስተ ፡ ምሥዋዕ ።

29:14  ወሥጋ ፡ ላህሙ ፡ ወማእሶ ፡ ወፅፍዖ ፡ ታውዒ ፡ አውፂአከ ፡ አፍአ ፡ እም[ትዕይንት ፡] እስመ ፡ ለኀጢአት ፡ ውእቱ ።

29:15  ወትነሥእ ፡ አሐደ ፡ በግዐ ፡ ወያነብሩ ፡ አሮን ፡ ወደቂቁ ፡ እደዊሆሙ ፡ ላዕለ ፡ ርእሰ ፡ በግዑ ።

29:16  ወተሐርደ ፡ ለውእቱ ፡ በግዕ ፡ ወትነሥእ ፡ ደሞ ፡ ወትክዑ ፡ ውስተ ፡ [ምሥዋዕ ፡] ውስተ ፡ ኵሉ ፡ ዐውዱ ፡ ትነሠንሦ ።

29:17  ወትጠብኆ ፡ በበ ፡ መሌሊቱ ፡ ውተኀፅብ ፡ ንዋየ ፡ ውስጡ ፡ ወእገሪሁ ፡ ወታነብር ፡ ርእሶ ፡ ውስተ ፡ ዘሌሌከ ።

29:18  ወታዐርግ ፡ ኵሎ ፡ በግዖ ፡ ውስተ ፡ መሥዋዕተ ፡ ቍርባን ፡ ለእግዚአብሔር ።

29:19  ወንሣእ ፡ በግዐ ፡ ካልአ ፡ ወያነብሩ ፡ አሮን ፡ ወደቂቁ ፡ እደዊሆሙ ፡ ላዕለ ፡ ርእሱ ።

29:20  ወሕርዶ ፡ ወንሣእ ፡ እምደሙ ፡ ወአንብር ፡ ውስተ ፡ ከተማ ፡ እዝኑ ፡ ለአሮን ፡ እንተ ፡ የማን ፡ ወውስተ ፡ ከተማ ፡ አጽባዕተ ፡ እዴሁ ፡ ዘየማን ፡ ወውስተ ፡ ከተማ ፡ አጽባዕተ ፡ እግሩ ፡ ዘየማን ፡ ወውስተ ፡ ከተማ ፡ እዘኒሆሙ ፡ ለደቂቀ ፡ አሮን ፡ ዘየማን ፡ ወውስተ ፡ ከተማ ፡ አጽባዕተ ፡ እደዊሆሙ ፡ ዘየማን ፡ ወውስተ ፡ ከተማ ፡ አጽባዕተ ፡ እገሪሆሙ ፡ ዘየማን ።

29:21  ወንሣእ ፡ እምውስተ ፡ ደም ፡ ዘመሥዋዕት ፡ ወእምውስተ ፡ ቅብእ ፡ ቡሩክ ፡ ወትነሠንሥ ፡ ላዕለ ፡ አሮን ፡ ወላዕለ ፡ አልባሲሁ ፡ ወእምድኅሬሁ ፡ ላዕለ ፡ ደቁ ፡ ወላዕለ ፡ አልባሲሆሙ ፡ ይትቀደስ ፡ ውእቱ ፡ ወዐራዙ ፡ ወደቁ ፡ ወዐራዞሙ ፡ ምስሌሆሙ ፤ ወደሞ ፡ ለውእቱ ፡ በግዕ ፡ ትክዑ ፡ [ውስተ ፡ ምሥዋዕ ፡] ዐውዶ ።

29:22  ወትነሥእ ፡ እምውእቱ ፡ በግዕ ፡ ሥብሖ ፡ ወትነሥእ ፡ ሥብሖ ፡ ለዘይገለብብ ፡ ከርሦ ፡ ወትነሥእ ፡ ከብዶ ፡ ወክልኤ ፡ ኵልያቶ ፡ ወሥብሐ ፡ ኵሊቱ ፡ ወትነሥእ ፡ እደሁ ፡ ዘየማን ፡ እስመ ፡ በዝ ፡ ይትፌጸም ፤

29:23  ወኅብስ[ተ] ፡ አሐ[ተ] ፡ ዘበቅብእ ፡ [ወ]ጸሪቀተ ፡ እምውሰተ ፡ ገሐፍት ፡ ዘውስቴቱ ፡ ንቡር ፡ ኵሉ ፡ ዘሤሙ ፡ ቅድመ ፡ እግዚአብሔር ።

29:24  ወታነብር ፡ ኵሎ ፡ ውስተ ፡ እዴሁ ፡ ለአሮን ፡ ወውስተ ፡ እደወ ፡ ደቂቁ ፡ ለአሮን ፡ ወትፈልጦሙ ፡ ፍልጠተ ፡ ለቅድመ ፡ እግዚአብሔር ።

29:25  ወትትሜጠዎ ፡ እምእደዊሆሙ ፡ ወትቄርቦ ፡ ውስተ ፡ መሥዋዕት ፡ ለመዐዛ ፡ ሠናይ ፡ ለቅድመ ፡ እግዚአብሔር ፡ ወፍርየት ፡ ውእቱ ፡ ለእግዚአብሔር ።

29:26  ወትነሥእ ፡ ተላዖ ፡ ለበግ[ዐ] ፡ ተፍጻሜት ፡ ዘውእቱ ፡ አሮን ፡ ወትፈልጦ ፡ ፍልጣነ ፡ በቅድመ ፡ እግዚአብሔር ፡ ወይኩንከ ፡ እንተ ፡ ባሕቲቱ ።

29:27  ወትቄድሶ ፡ ተላዖ ፡ ወትፈልጦ ፡ ወመዝራዕቶኒ ፡ ትፈልጥ ፡ በከመ ፡ ፈለጥከ ፡ አባግዐ ፡ ፍጻሜ ፡ እምኀበ ፡ አሮን ፡ ወእምኀበ ፡ ደቂቁ ።

29:28  ወይኩኖሙ ፡ ለአሮን ፡ ወለደቂቁ ፡ ሕ[ገ] ፡ ለዓለም ፡ በኀበ ፡ ውሉደ ፡ እስራኤል ፡ እስመ ፡ ፍልጣን ፡ ውእቱዝ ፡ ወፍልጣን ፡ ለይኩን ፡ በኀበ ፡ ውሉደ ፡ እስራኤል ፡ እምዝብሐተ ፡ ይዘብሑ ፡ ለፍርቃኖሙ ፡ ፍልጣን ፡ ለእግዚአብሔር ።

29:29  ወልብሰ ፡ ቅድሳቱ ፡ ለአሮን ፡ ለይኩን ፡ ለውሉዱ ፡ እምድኅሬሁ ፡ ከመ ፡ ይትቀብኡ ፡ ቦቱ ፡ ወከመ ፡ ይፈጽሙ ፡ እደዊሆሙ ።

29:30  ወሰቡዐ ፡ ዕለተ ፡ ለይልበሶ ፡ ካህን ፡ ዘህየንቴሁ ፡ እምውስተ ፡ ደቂቁ ፡ ዘይበውእ ፡ ውስተ ፡ ደብተራ ፡ ዘመርጡር ፡ ከመ ፡ ይሠየም ፡ ዝ ፡ ውስተ ፡ ቅዱሳን ።

29:31  ወበግ[ዐ] ፡ ዘተፍጻሜት ፡ ትነሥእ ፡ ወታበስል ፡ ሥጋሁ ፡ በመካን ፡ ቅዱስ ።

29:32  ወይበልዕ ፡ አሮን ፡ ወደቂቁ ፡ ሥጋ ፡ በግዕ ፡ ወኅብስተ ፡ ዘውስተ ፡ ገሐፍት ፡ በኀበ ፡ ኆኅተ ፡ ደብተራ ፡ ዘመርጡር ፤

29:33  ይብልዕዎ ፡ በኀበ ፡ ተቀደሰ ፡ በህየ ፡ ከመ ፡ ይፈጽም ፡ እደዊሆሙ ፡ ቀድሶቶሙ ፡ ወውሉደ ፡ ባዕድ ፡ ኢይብልዖ ፡ እስመ ፡ ቅዱስ ፡ ውእቱ ።

29:34  ወለእመ ፡ ተርፈ ፡ እምውስተ ፡ ሥጋ ፡ መሥዋዕት ፡ ዘተፍጻሜት ፡ ወእምኅብስትኒ ፡ እስከ ፡ ደገደግ ፡ ታውዕዮ ፡ በእሳት ፡ ለዘ ፡ ተርፈ ፡ ወኢትብላዕ ፡ እስመ ፡ ቅዱስ ፡ ውእቱ ።

29:35  ወትገብር ፡ ለአሮን ፡ ወለደቂቁ ፡ ከመዝ ፡ ኵሎ ፡ በከመ ፡ አዘዝኩከ ፡ ሰቡዐ ፡ ዕለተ ፡ ከመ ፡ ትፈጽም ፡ እደዊሆሙ ።

29:36  ወላህመ ፡ ዘእንበይነ ፡ ኀጢአት ፡ ትገብር ፡ በዕለት ፡ በዘ ፡ ቦቱ ፡ ታነጽሕ ፡ መሥዋዕተ ፡ ሶበ ፡ ትቄድስ ፡ ቦቱ ፡ ወትቀብኦ ።

29:37  ሰቡዐ ፡ ዕለተ ፡ ታነጽሖ ፡ ለምሥዋዕ ፡ ወትቄድ[ሶ] ፡ ወይኩን ፡ ምሥዋዒከ ፡ ቅዱሰ ፡ ቅዱሳን ፡ ወኵሉ ፡ ዘለከፎ ፡ ለውእቱ ፡ መሥዋዕት ፡ ለይትቀደስ ።

29:38  ወዝውእቱ ፡ ዘትገብር ፡ ለምሥዋዕ ፤ አባግዐ ፡ እለ ፡ አሐቲ ፡ ዓመቶሙ ፡ ንጹሓነ ፡ ፪ለዕለት ፡ ለወትር ፡ ወፍርየታ ፡ ዘወትር ፡ ዘበግዕ ።

29:39  ወአሐደ ፡ በግዐ ፡ ትገብር ፡ በጽባሕ ፡ ወአሐደ ፡ ፍና ፡ ሰርክ ።

29:40  ወ[ዐሥራ]ታ ፡ ለኢን ፡ ዘስንዳሌ ፡ ልፉጽ ፡ በቅብእ ፡ ወልቱም ፡ ወራብዕታ ፡ ለኢን ፤ [ወ]ሞጻሕተ ፡ ወይን ፡ ራብዕታ ፡ ለኢን ፡ ለ፩በግዕ ።

29:41  ወለካልእሰ ፡ በግዕ ፡ ዘትገብር ፡ ፍና ፡ ሰርክ ፡ በሐሳበ ፡ ምሥዋዕከ ፡ ዘነግሀ ፡ ትገብሮ ፡ ወከማሁ ፡ ሞጻሕተ ፡ ትገብር ፡ ለመዐዛ ፡ ሠናድ ፡ ወፍርየት ፡ ውእቱ ፡ ለእግዚአብሔር ።

29:42  መሥዋዕት ፡ ለወትር ፡ በትውልድክሙ ፡ በውስተ ፡ ኆኅተ ፡ ደብተራ ፡ ዘመርጡር ፡ በቅድመ ፡ እግዚአብሔር ፡ ወበዛቲ ፡ እትኤመር ፡ ለከ ፡ በህየ ፡ ከመ ፡ እንብብከ ።

29:43  ወእኤዝዝ ፡ በህየ ፡ ለውሉደ ፡ እስራኤል ፡ ወእት[ቄ]ደስ ፡ በክብርየ ።

29:44  ወእቄድሳ ፡ ለደብተራ ፡ መርጡር ፡ ወለምሥዋዒሃ ፡ ወለአሮን ፡ ወለደቂቁ ፡ እቄድሶሙ ፡ ከመ ፡ ይሡዑ ፡ ሊተ ።

29:45  ወእሰመይ ፡ በውሉደ ፡ እስራኤል ፡ ወእከውኖሙ ፡ አምላከ ።

29:46  ወያአምሩ ፡ ከመ ፡ አነ ፡ ውእቱ ፡ እግዚአብሔር ፡ አምላኮሙ ፡ ዘአውጻእክዎሙ ፡ እምድረ ፡ ግብጽ ፡ ከመ ፡ እሰመይ ፡ ሎሙ ፡ ወእኩኖሙ ፡ አምለኮሙ ።

Chapter 30

30:1  ወትገብር ፡ ሊተ ፡ መሥዋዕተ ፡ ዘዕጣን ፡ እምዕ[ፅ] ፡ ዘኢይነቅዝ ።

30:2  ዘእመት ፡ [ኑኁ ፡] ወእመት ፡ ፅፍኁ ፡ ርቡዐ ፡ ግበሮ ፡ ወካዕበ ፡ እመት ፡ ቆሙ ፡ ወእምውስቴ[ቱ] ፡ ይትገበር ፡ አቅርንቲሁ ።

30:3  ወትቀፍሎ ፡ ቅፍሎ ፡ ወርቅ ፡ ንጹሕ ፡ ወምድራ ፡ ወአረፍታ ፡ በዐውደ ፡ አቅርንቲሁ ፡ ወትገብር ፡ ላቲ ፡ ቀጸላ ፡ ዘየዐውድ ፡ ዘወርቅ ፡ በዐውዱ ።

30:4  ወክልኤ ፡ ሕለቃተ ፡ ወርቅ ፡ ንጹ[ሕ] ፡ ትገብር ፡ ላቲ ፡ እንተ ፡ ምዕዋደ ፡ ቀጸላሃ ፡ ውስተ ፡ ክልኤ ፡ ፍናዊሁ ፡ ትገብር ፡ ውስተ ፡ ክልኤሆን ፡ ገበዋቲሁ ፡ ወታጠንፎ ፡ በጥንፍ ፡ ወታወዲያ ፡ መማሥጠ ፡ በዘ ፡ ትመሥጦን ፡ ቦቱ ።

30:5  ወትገብር ፡ መማሥጢሆን ፡ እምዕ[ፅ ፡ ዘ]ኢይነቅዝ ፡ ወትቀፍሎን ፡ ቅፍሎ ፡ ዘወርቅ ።

30:6  ወታነብሮ ፡ ቅድመ ፡ መንጦላዕት ፡ ዘሀሎ ፡ ዲበ ፡ ታቦት ፡ ዘመርጡር ፡ [በ]ዘ ፡ እትኤመር ፡ በህየ ።

30:7  ወይዕጥን ፡ በውስቴቱ ፡ አሮን ፡ ዕጣነ ፡ ዘቅታሬ ፡ ደቂቅ ፡ በበነግህ ።

30:8  ወሶበ ፡ ይገብር ፡ መኃትወ ፡ [በበሰርክ ፡] ይዕጥን ፡ በውስቴቱ ፡ ዕጥነተ ፡ ዘለዘልፍ ፡ በቅድመ ፡ እግዚአብሔር ፡ በዳሮሙ ።

30:9  ወኢትደምሩ ፡ ውስቴቱ ፡ ዕጣነ ፡ ዘካልእ ፡ ቅታሬሁ ፤ ፍሬ ፡ ዘመሥዋዕት ፡ ወሞጻሕተ ፡ ኢታውጽኁ ፡ ዲቤሁ ።

30:10  ይትመሃለል ፡ አሮን ፡ በዲበ ፡ አቅርንቲሁ ፡ ለለዓመት ፡ ምዕረ ፡ እምውስተ ፡ ደም ፡ ዘያነጽሕ ፡ ኀጢአተ ፡ ምዕረ ፡ ለዓመት ፡ ይገብር ፡ ከመ ፡ ያንጽሕ ፡ በዳሮሙ ፡ ወቅዱሰ ፡ ቅዱሳን ፡ ውእቱ ፡ ለእግዚአብሔር ።

30:11  ወነበቦ ፡ እግዚአብሔር ፡ ለሙሴ ፡ ወይቤሎ ፤

30:12  ለእመ ፡ ነሣእከ ፡ ሕሊናሆሙ ፡ ለውሉደ ፡ እስራኤል ፡ አመ ፡ ትኄውጾሙ ፡ ለየሀብ ፡ ፩፩ቤዛ ፡ ነፍሱ ፡ ለእግዚአብሔር ፡ ወኢይምጻእ ፡ ላዕሌሆሙ ፡ ድቀት ፡ አመ ፡ ይኄውጾሙ ።

30:13  ዝውእቱ ፡ ዘይሁቡ ፡ ኵሉ ፡ እለ ፡ የሐውሩ ፡ ከመ ፡ ይትኅወጹ ፡ መንፈቁ ፡ ለዲድረክም ፡ ወውእቱ ፡ በከመ ፡ ዲድረክም ፡ ቅዱስ ፤ ፳[ኦቦሊ ፡] ዲድረክም ፡ ቅዱስ ፤ ወመንፈቁ ፡ ለዲድረክም ፡ ቍርባን ፡ ለእግዚአብሔር ።

30:14  ወኵሉ ፡ ዘየሐውር ፡ ከመ ፡ [ይትኀወጽ ፡] ዘእም፳ክራማቲሁ ፡ ወፈድፋደ ፡ ያበውኡ ፡ ቍርባኒሆሙ ፡ ለእግዚአብሔር ።

30:15  ባዕል ፡ ኢይወስክ ፡ ወነዳይ ፡ ኢ[ያ]ንትግ ፡ እምንፍቃሃ ፡ ለዲድረክም ፡ እለ ፡ ያበውኡ ፡ ቍርባኒሆሙ ፡ ለእግዚአብሔር ፡ ቤዛ ፡ ነፍሶሙ ።

30:16  ወትነሥእ ፡ ብሩረ ፡ ዘአብኡ ፡ ቍርባኒሆሙ ፡ ውሉደ ፡ እስራኤል ፡ ወትሁቦ ፡ ለምግባረ ፡ ደብተራ ፡ ዘመርጡር ፡ ወይኩኖሙ ፡ ለውሉደ ፡ እስራኤል ፡ ተዝካረ ፡ በቅድመ ፡ እግዚአብሔር ፡ ቤዛ ፡ ነፍሶሙ ።

30:17  ወነበቦ ፡ እግዚአብሔር ፡ ለሙሴ ፡ ወይቤሎ ፤

30:18  ግበር ፡ መቅለደ ፡ ዘብርት ፡ ወመንበሩኒ ፡ ዘብርት ፡ በዘ ፡ ይትኀፀቡ ፡ ወታነብሮ ፡ ማእከለ ፡ ደብተራ ፡ ዘመርጡር ፡ ወማእከለ ፡ ምሥዋዕ ፡ ወትሰውጥ ፡ ውስቴቱ ፡ ማየ ።

30:19  ወይትኀፀብ ፡ ቦቱ ፡ አሮን ፡ ወደቂቁ ፡ እምውስቴቱ ፡ እደዊሆሙ ፡ ወእገሪሆሙ ።

30:20  ሶበ ፡ ይበውኡ ፡ ደብተራ ፡ ዘመርጡር ፡ ይትኀፀቡ ፡ በማይ ፡ ከመ ፡ ኢይሙቱ ፡ ሶበ ፡ ይበውኡ ፡ ቤተ ፡ መቅደስ ፡ ከመ ፡ ይሡዑ ፡ ሶበ ፡ ያዐርጉ ፡ ምሥዋዐ ፡ ለእግዚአብሔር ፤

30:21  ይትኀፀቡ ፡ እደዊሆሙ ፡ ወእገሪሆሙ ፡ ከመ ፡ ኢይሙቱ ፡ ወይኩኖሙ ፡ ሕገ ፡ ዘለዓለም ፡ ሎሙ ፡ ወለዘመዶሙ ፡ እምድኅሬሁ ።

30:22  ወነበቦ ፡ እግዚአብሔር ፡ ለሙሴ ፡ ወይቤሎ ፤

30:23  ወአንተኒ ፡ ንሣእ ፡ አፈዋተ ፡ ጽጌ ፡ ዘከርቤ ፡ ቅድወ ፡ ኀምስተ ፡ ምእተ ፡ ሰቅሎን ፡ ወቅናሞሙ ፡ ቅድወ ፡ በመንፈቀ ፡ ቀዳሚ ፡ ፪፻ወ፶ወቀጺመተ ፡ ቅድወ ፡ ፪፻ወ፶ ፤

30:24  ወአበሚ ፡ ፭፻በሰቅሎስ ፡ ቅዱስ ፡ ወቅብኡ ፡ እምዘይት ።

30:25  ወግበሮ ፡ ቅብአ ፡ ቅዱሰ ፡ ጽዒጠ ፡ ዘጸዓጢ ።

30:26  ወትቀብኦ ፡ እምኔሁ ፡ ለደብተራ ፡ መርጡር ፡ ወለታቦተ ፡ መርጡር ፤

30:27  ወለኵሉ ፡ ንዋዩ ፡ ወተቅዋመ ፡ ማኅቶቱ ፡ ወ[ለ]ኵሉ ፡ ንዋዩ ፡ ወቤተ ፡ ምሥዋዕ ፤

30:28  ወኀበ ፡ ይሠውዑ ፡ ወኵሎ ፡ ንዋዮ ፡ ወማእዶ ፡ ወኵሉ ፡ ንዋዮ ፡ ወመቅለደ ፡ ምስለ ፡ መንበሩ ።

30:29  ወትቄድሶሙ ፡ ወይኩኑ ፡ ቅዱሰ ፡ ቅዱሳን ፡ ወዘኪያሆን ፡ ለከፈ ፡ ለይትቀደስ ።

30:30  ወለአሮን ፡ ወለደቂቁ ፡ ቅብኦሙ ፡ ወቀድሶሙ ፡ ከመ ፡ ይሡዑ ፡ ሊተ ።

30:31  ወበሎሙ ፡ ለውሉደ ፡ እስራኤል ፡ ቅብእ ፡ ዘይትቀብኡ ፡ ቅዱሰ ፡ ለይኩን ፡ ማእከሌክሙ ፡ ዝቅብእ ፡ በትውልድክሙ ።

30:32  ወባዕድ ፡ ሰብእ ፡ ኢይትቀብኦ ፡ ወዝጽዒጥ ፡ ባዕድ ፡ ጸዓጢ ፡ ኢይግበሮ ፡ ወለክሙሂ ፡ ኢተግበሩ ፡ ዘከማሁ ፡ እስመ ፡ ቅዱስ ፡ ዝቅብእ ፡ ወቅዱሰ ፡ ለይኩን ፡ በኀቤክሙ ።

30:33  እመ ፡ ትገብርዎ ፡ ወዘወሀበ ፡ እምኔሁ ፡ ለባዕድ ፡ ዘመድ ፡ ለይሠሮ ፡ እምውስተ ፡ ሕዝቡ ።

30:34  ወይቤሎ ፡ እግዚአብሔር ፡ ለሙሴ ፡ ንሣእ ፡ ለከ ፡ አፈዋተ ፡ ማየ ፡ ልብን ፡ ወ[ቀ]ንአተ ፡ ቅድወ ፡ ወስኂነ ፡ ዘያንጸበርቅ ፡ ወኵሉ ፡ ዕሩየ ፡ ለይኩን ፡ ድልወቱ ።

30:35  ወይግበርዎ ፡ ዕጣነ ፡ ኬንያሁ ፡ ግብረተ ፡ ዕጣን ፡ ቅድው ፡ ግብረተ ፡ ንጹሐ ፡ ቅዱሰ ፡ ግበር ።

30:36  ወተሐርጽ ፡ እምኔሁ ፡ ድቂቀ ፡ ወታነብር ፡ ቅድመ ፡ ደብተራ ፡ ዘመርጡር ፡ በዘ ፡ ቦቱ ፡ እትኤመር ፡ ለከ ፡ እምህየ ፡ ወቅዱሰ ፡ ቅዱሳን ፡ ይኩንክሙ ፡ ዝዕጣን ።

30:37  [ወበዝ ፡ ግብረት ፡ ኢትግበሩ ፡ አርአያ ፡ ዝዕጣን ፡] ሕሩመ ፡ ይኩንክሙ ፡ ወቅዱሰ ፡ ለእግዚአብሔር ።

30:38  ወዘአግበረ ፡ እምኔሁ ፡ ከመ ፡ ያጼንዎ ፡ ለይማስን ፡ እምውስተ ፡ ሕዝቡ ።

Chapter 31

31:1  ወነበቦ ፡ እግዚአብሔር ፡ ለሙሴ ፡ ወይቤሎ ፤

31:2  ናሁ ፡ ተሰመይኩ ፡ በስመ ፡ ቤስልኤል ፡ ዘውሬ ፡ ወልደ ፡ ኦር ፡ ዘእምነገደ ፡ ይሁዳ ።

31:3  ወመላእክዎ ፡ መንፈሰ ፡ ቅዱሰ ፡ ወጥበበ ፡ ወአእምሮ ፡ ወዕቁም ፡ በኵሉ ፡ ምግባር ፡ ከመ ፡ የሐሊ ፤

31:4  ወይኩን ፡ ሊቀ ፡ ጸረብት ፡ ከመ ፡ ይግበር ፡ ወርቀ ፡ ወብሩረ ፡ ወብርተ ፡ ወዘሕብረ ፡ ያክንት ፡ ወሜላተ ፡ ወነተ ፡ ዘፍትሎ ፡ ወቢሶሰ ፡ ክዑበ ፤

31:5  ወግብረሂ ፡ እብን ፡ ውስተ ፡ ምግባር ፡ ወዘይጸርብ ፡ እምውስተ ፡ ዕፅ ፡ ከመ ፡ ይግበር ፡ በውስተ ፡ ኵሉ ፡ ምግባር ።

31:6  ወአነ ፡ ወሀብኩ ፡ ኤልያብሃ ፡ ዘአኪሰምክ ፡ ዘእምሕዝበ ፡ ዳን ፡ ወለኵሉ ፡ ጠቢበ ፡ ልብ ፡ ወሀብኩ ፡ አእምሮ ፡ ወይግበሩ ፡ ኵሎ ፡ ዘአዘዝኩከ ፤

31:7  ደብተራ ፡ ዘመርጡር ፡ ወታቦተ ፡ ዘሕርመት ፡ ወምኅዋ[ጸ] ፡ ዘላዕሌሃ ፡ ወንዋ[የ] ፡ ዘደብተራ ፤

31:8  ወመሥዋዕተ ፡ ወማእደ ፡ ወኵሎ ፡ ንዋያ ፡ ወተቅዋመ ፡ ማኅቶት ፡ ንጽሕተ ፡ ወኵሎ ፡ ንዋያ ፤

31:9  ወማዕከከ ፡ ወመንበሮ ፤

31:10  ወአልባሲሁ ፡ [ዘ]ግብሩ ፡ ለአሮን ፡ ወአልባሰ ፡ ደቂቁ ፡ በዘ ፡ ይገብሩ ፡ ግብረ ፡ ሊተ ፤

31:11  ወቅብ[አ] ፡ ዘይቀብኡ ፡ ወዕጣ[ነ] ፡ ዘየዐጥኑ ፡ ለመቅደስ ፡ ወኵሎ ፡ ዘእኤዝዘከ ፡ ይግበሩ ።

31:12  ወነበቦ ፡ እግዚአብሔር ፡ ለሙሴ ፡ ወይቤሎ ፤

31:13  ወአንተኒ ፡ አዝዞሙ ፡ ለደቂቀ ፡ እስራኤል ፡ ወበሎሙ ፡ ዑቁ ፡ ከመ ፡ [ትዕቀ]ቡ ፡ ሰንበትየ ፡ እስመ ፡ ትእምርት ፡ ውእቱ ፡ በኀቤየ ፡ ወበኀቤክሙኒ ፡ በትውልድክሙ ፡ ከመ ፡ ታእምሩ ፡ ከመ ፡ አነ ፡ ውእቱ ፡ እግዚአብሔር ፡ ዘእቄድሰክሙ ።

31:14  ወዕቀቡ ፡ ሰንበትየ ፡ እስመ ፡ ቅድስት ፡ ይእቲ ፡ ለክሙ ፡ ወዘአርኰሳ ፡ ሞተ ፡ ለይሙት ፤ ኵሉ ፡ ዘይገብር ፡ ባቲ ፡ ግብረ ፡ ለይሰሮ ፡ ይእቲ ፡ ነፍስ ፡ እምሕዝባ ።

31:15  ሰዱሰ ፡ ዕለተ ፡ ትገብር ፡ ግብረ ፡ ወበሳብዕት ፡ ዕለት ፡ ሰንበተ ፡ ዕረፍት ፡ ቅድስት ፡ ለእግዚአብሔር ፡ ኵሉ ፡ ዘይገብር ፡ ግብረ ፡ በዕለተ ፡ ሰንበት ፡ ሞተ ፡ እመዊት ፡ ይሙት ።

31:16  ወይዕቀቡ ፡ ደቂቀ ፡ እስራኤል ፡ ሰናብተ ፡ ከመ ፡ ይግበርዎን ፡ በዳሮሙ ።

31:17  ሥርዐት ፡ ይእቲ ፡ ለዓለም ፡ ሊተ ፡ ወለደቂቀ ፡ እስራኤል ፡ ተአምር ፡ ውእቱ ፡ ዘለዓለም ፡ እስመ ፡ በሰዱስ ፡ ዕለት ፡ ገብረ ፡ እግዚአብሔር ፡ ሰማየ ፡ ወምድረ ፡ ወበሳብዕት ፡ ዕለት ፡ ፈጸመ ፡ ወአዕረፈ ።

31:18  ወወሀቦ ፡ ለሙሴ ፡ ሶበ ፡ ፈጸመ ፡ ተናግሮ ፡ ምስሌሁ ፡ በደብረ ፡ ሲና ፡ ክልኤ ፡ ጽላተ ፡ ዘትእዛዝ ፡ ጽላተ ፡ ዘእብን ፡ ጽሑፋት ፡ በአጽባዕት ፡ እግዚአብሔር ።

Chapter 32

32:1  ወሶበ ፡ ርእየ ፡ ሕዝብ ፡ ከመ ፡ ጐንደየ ፡ ሙሴ ፡ ወሪደ ፡ እምደብር ፡ ተንሥአ ፡ ሕዝብ ፡ ላዕለ ፡ አሮን ፡ ወይቤልዎ ፡ ተንሥእ ፡ ወግበር ፡ ለነ ፡ አማልክተ ፡ እለ ፡ የሐውሩ ፡ ቅድሜነ ፡ እስመ ፡ ዝክቱ ፡ ብእሲ ፡ ሙሴ ፡ ዘአውፅአነ ፡ እምድረ ፡ ግብጽ ፡ ኢናአምር ፡ ምንተ ፡ ኮነ ።

32:2  ወይቤሎሙ ፡ አሮን ፡ ንሥኡ ፡ ሰርጐ ፡ [ወርቅ ፡] ዘውስተ ፡ እዝነ ፡ አንስቲያክሙ ፡ ወአዋልዲክሙ ፡ ወአምጽኡ ፡ ኀቤየ ።

32:3  ወነሥኡ ፡ ኵሉ ፡ ሕዝብ ፡ ሰርጐ ፡ ዘውስተ ፡ አእዛኒሆሙ ፡ ወአምጽኡ ፡ ኀበ ፡ አሮን ።

32:4  ወተመጠወ ፡ እምእደዊሆሙ ፡ ወመሰሎ ፡ በሥዕል ፡ ወገብሮ ፡ ላህመ ፡ ስብኮ ፡ ወይቤሉ ፡ እሉ ፡ እሙንቱ ፡ አማልክቲከ ፡ እስራኤል ፡ እለ ፡ አውፅኡከ ፡ እምድረ ፡ ግብጽ ።

32:5  ወሶበ ፡ ርእየ ፡ ኤሮን ፡ ነደቀ ፡ ምሥዋዐ ፡ አንጻሮ ፡ ወአዖደ ፡ አሮን ፡ እንዘ ፡ ይብል ፡ በዓለ ፡ እግዚእ ፡ ጌሠመ ።

32:6  ወጌሠ ፡ አሮን ፡ በሳኒታ ፡ ወአዕረገ ፡ መሥዋዕተ ፡ ወአብአ ፡ ቍርባነ ፡ ዘመሥዋዕተ ፡ ፍርቃን ፡ ወነበረ ፡ ሕዝብ ፡ ወይበልዑ ፡ ወይሰትዩ ፡ ወተንሥኡ ፡ ይትወነዩ ።

32:7  ወነበቦ ፡ እግዚአብሔር ፡ ለሙሴ ፡ ወይቤሎ ፡ ሑር ፡ ወአፍጥን ፡ ወሪደ ፡ እምዝየ ፡ እስመ ፡ አበሱ ፡ ሕዝብከ ፡ ዘአውፃእከ ፡ እምድረ ፡ ግብጽ ።

32:8  ወዐለው ፡ ፍጡነ ፡ እምነ ፡ ፍኖት ፡ እንተ ፡ አዘዝካሆሙ ፡ ወገብሩ ፡ ሎሙ ፡ ላህመ ፡ ወሰገዱ ፡ ሎቱ ፡ ወሦዑ ፡ ሎቱ ፡ ወይቤሉ ፡ እሉ ፡ እሙንቱ ፡ አማልክቲከ ፡ እስራኤል ፡ እለ ፡ አውፅኡከ ፡ እምድረ ፡ ግብጽ ።

32:10  ወይእዜኒ ፡ ኅድገኒ ፡ ወተምዒዕየ ፡ በመዐትየ ፡ እጥስዮሙ ፡ ወእሬስየከ ፡ ውስተ ፡ ሕዝብ ፡ ዐቢይ ።

32:11  ወሰአለ ፡ ሙሴ ፡ ቅድመ ፡ አምላኩ ፡ ወይቤ ፡ ለምንት ፡ እግዚኦ ፡ መዐተ ፡ ትትመዓዕ ፡ ላዕለ ፡ ሕዝብከ ፡ ዘአውፃእከ ፡ እምድረ ፡ ግብጽ ፡ በኀይል ፡ ልዑል ፡ ወበመዝራዕት ፡ ዐቢይ ።

32:12  ከመ ፡ ኢይበሉ ፡ ግብጽ ፡ በእኩይ ፡ ኤውፅኦሙ ፡ ከመ ፡ ይቅትሎሙ ፡ በውስተ ፡ አድባር ፡ ወያጥፍኦሙ ፡ እምውስተ ፡ ምድር ፡ አቍርር ፡ መዓተከ ፡ ዘተምዕዕከ ፡ ወመሓሬ ፡ ኩን ፡ ላዕለ ፡ እከዮሙ ፡ ለሕዝብከ ።

32:13  ተዘከር ፡ አብርሃምሃ ፡ ወይስሐቅሃ ፡ ወያዕቆብሃ ፡ አግብርቲከ ፡ እለ ፡ መሐልከ ፡ ሎሙ ፡ በርእስከ ፡ ወትቤሎሙ ፡ ብዙኀ ፡ አበዝኆ ፡ ለዘርእክሙ ፡ ከመ ፡ ከዋክብተ ፡ ሰማይ ፡ በብዝኅ ፡ ወኵሎ ፡ ዘንተ ፡ እሁብ ፡ ለዘርእክሙ ፡ ወይምልክዋ ፡ ለዓለም ።

32:14  ወሰረየ ፡ እግዚአብሔር ፡ በእንተ ፡ እኪት ፡ እንተ ፡ ይቤ ፡ ይግበር ፡ ላዕለ ፡ ሕዝቡ ።

32:15  ወተመይጠ ፡ ሙሴ ፡ ወወረደ ፡ እምውስተ ፡ ደብር ፡ ወ፪ጽላተ ፡ ዘትእዛዝ ፡ ውስተ ፡ እደዊሁ ፡ ጽላት ፡ ዘእብን ፡ ጽሑፋት ፡ እንተ ፡ ክልኤ ፡ ገበዋቲሆን ፡ እንተ ፡ ለፌኒ ፡ ወእንተ ፡ ለፌኒ ፡ ጽሑፋት ።

32:16  ወጽላቶን ፡ ግብረተ ፡ እግዚእ ፡ እማንቱ ፡ ወጽሕፈቶንሂ ፡ ጽሕፈተ ፡ እግዚአብሔር ፡ ውእቱ ፡ ግሉፍ ፡ ውስተ ፡ ጽሌሁ ።

32:17  ወሰሚዖ ፡ ዮሳዕ ፡ ቃለ ፡ ሕዝብ ፡ እንዘ ፡ ይጸርሑ ፡ ይቤሎ ፡ ለሙሴ ፡ [ድ]ምፀ ፡ ፀባኢት ፡ ውስተ ፡ ትዕይንት ።

32:18  ወይቤሎ ፡ ሙሴ ፡ ኢኮነ ፡ ዝንቱ ፡ ድምፅ ፡ ዘመላእክት ፡ እለ ፡ ይትኄየሉ ፡ ወኢኮነ ፡ ድምፀ ፡ መላእክተ ፡ ፀብእ ፡ አላ ፡ ድምፀ ፡ መላእክቱ ፡ ለወይን ፡ እሰምዕ ፡ አንሰ ።

32:19  ወሶበ ፡ ቀርበ ፡ ሙሴ ፡ ለትዕይንት ፡ ርእዮ ፡ ለውእቱ ፡ ላህም ፡ ወተውኔት ፡ ወተምዕዐ ፡ ሙሴ ፡ ወገደፎን ፡ እምውስተ ፡ እደዊሁ ፡ ለእልክቱ ፡ ክልኤ ፡ ጽላት ፡ ወቀጥቀጦን ፡ በታሕተ ፡ ደብር ።

32:20  ወነሥኦ ፡ ለውእቱ ፡ ላህም ፡ ዘገብሩ ፡ ወአውዐዮ ፡ በእሳት ፡ ወሐረጾ ፡ ወአድቀቆ ፡ ወዘረዎ ፡ ውስተ ፡ ማይ ፡ ወአስተዮሙ ፡ ኪያሁ ፡ ለደቂቀ ፡ እስራኤል ።

32:21  ወይቤሎ ፡ ሙሴ ፡ ለአሮን ፡ ምንተ ፡ ረሰይከ ፡ ዘንተ ፡ ሕዝበ ፡ ከመ ፡ ታምጽእ ፡ ላዕሌሆሙ ፡ ኀጢአተ ፡ ዐቢየ ።

32:22  ወይቤሎ ፡ አሮን ፡ ለሙሴ ፡ ኢተትመዓዕ ፡ እግዚእየ ፡ ለሊከ ፡ ታአምር ፡ ግዕዞሙ ፡ ለዝንቱ ፡ ሕዝብ ።

32:23  ሶበ ፡ ይቤሉኒ ፡ ግበር ፡ ለነ ፡ አማልክተ ፡ እለ ፡ የሐውሩ ፡ ቅድሜነ ፡ እስመ ፡ ዝክቱ ፡ ብእሲ ፡ ሙሴ ፡ ዘአውፅአነ ፡ እምድረ ፡ ግብጽ ፡ ኢናአምር ፡ ምንተ ፡ ኮነ ፤

32:24  ወእቤሎሙ ፡ ዘቦ ፡ እምኔክሙ ፡ ወርቀ ፡ አምጽኡ ፡ ወአምጽኡ ፡ ወወሀቡኒ ፡ ወወረውክዎ ፡ ውስተ ፡ እሳት ፡ ወወፅአ ፡ ዝንቱ ፡ ላህም ።

32:25  ወሶበ ፡ ርእየ ፡ ሙሴ ፡ ከመ ፡ ዐለው ፡ ሕዝብ ፡ ወአዕለዎሙ ፡ አሮን ፡ ወኮኑ ፡ ሣሕቀ ፡ ለጸላእቶሙ ፤

32:26  ወቆመ ፡ ሙሴ ፡ ውስተ ፡ አንቀጸ ፡ ትዕይንት ፡ ወይቤ ፡ ዘኀርየ ፡ እግዚአብሔር ፡ ይምጻእ ፡ ኀቤየ ፡ ወተጋብኡ ፡ ኀቤሁ ፡ ኵሎሙ ፡ ደቂቀ ፡ ሌዊ ።

32:27  ወይቤሎሙ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ አሐዱ ፡ አሐዱ ፡ ይጹር ፡ ሰይፎ ፡ ወብጽሑ ፡ እምአንቀጽ ፡ እስከ ፡ አንቀጸ ፡ ትዕይንት ፡ ወአሐዱ ፡ አሐዱ ፡ ይቅትል ፡ እኁሁ ፡ ወአሐዱ ፡ አሐዱ ፡ ይቅትል ፡ ካልኦ ፡ ወአሐዱ ፡ አሐዱ ፡ ይቅትል ፡ ዘቅሩቡ ።

32:28  ወገብሩ ፡ ደቂቀ ፡ ሌዊ ፡ በከመ ፡ ይቤሎሙ ፡ ሙሴ ፡ ወወድቀ ፡ እምውስተ ፡ ሕዝብ ፡ ይእተ ፡ አሚረ ፡ ፴፻ብእሲ ።

32:29  ወይቤሎሙ ፡ ሙሴ ፡ አንፈስክምዎ ፡ በእደዊክሙ ፡ ለእግዚአብሔር ፡ ዮም ፡ አሐዱ ፡ አሐዱ ፡ እምኔክሙ ፡ እምውሉዱ ፡ ወእምእኁሁ ፡ ከመ ፡ ትትወሀብ ፡ ላዕሌክሙ ፡ በረከት ።

32:30  ወኮነ ፡ በሳኒታ ፡ ወይቤሎሙ ፡ ሙሴ ፡ ለሕዝብ ፡ አንትሙ ፡ ጌገይክሙ ፡ ጌጋየ ፡ ዐቢየ ፡ ወይእዜኒ ፡ አዐርግ ፡ ኀበ ፡ እግዚአብሔር ፡ ከመ ፡ አስተስሪ ፡ ለክሙ ፡ ኀጢአተክሙ ።

32:31  ወገብአ ፡ ሙሴ ፡ ኀበ ፡ እግዚአብሔር ፡ ወይቤ ፡ እስእለከ ፡ እግዚኦ ፡ አባሲ ፡ ዝንቱ ፡ ሕዝብ ፡ አበሳ ፡ ዐቢየ ፡ ወገብሩ ፡ አማልክተ ፡ ዘወርቅ ።

32:32  ወይእዜኒ ፡ እመ ፡ ተኀደግ ፡ ሎሙ ፡ ዛተ ፡ ኀጢአተ ፡ ኅድግ ፡ ወእማእኮ ፡ ደምስስ ፡ ኪያየኒ ፡ እምነ ፡ መጽሐፍከ ፡ ዘጸሐፍከኒ ።

32:33  ወይቤሎ ፡ እግዚአብሔር ፡ ለሙሴ ፡ ለዝክቱ ፡ ዘአበሰ ፡ በቅድሜየ ፡ እደመስሶ ፡ እምውስተ ፡ መጽሐፍየ ።

32:34  ወይእዜኒ ፡ ሑር ፡ ወምርሖሙ ፡ ለዝንቱ ፡ ሕዝብ ፡ ውስተ ፡ መካን ፡ ዘእቤለከ ፡ ናሁ ፡ መልአኪየ ፡ የሐውር ፡ ቅድመ ፡ ገጽከ ፤ አመ ፡ ዕለተ ፡ እዋኅዮሙ ፡ ኣገብእ ፡ ላዕሌሆሙ ፡ ኀጢአቶሙ ።

32:35  ወቀተለ ፡ እግዚአብሔር ፡ እምሕዝብ ፡ በእንተ ፡ ዘገብሩ ፡ ላህመ ፡ ዘገብረ ፡ ሎሙ ፡ አሮን ።

Chapter 33

33:1  ወይቤሎ ፡ እግዚአብሔር ፡ ለሙሴ ፡ ሑር ፡ ወዕረግ ፡ እምዝየ ፡ አንተ ፡ ወሕዝብከ ፡ ዘአውፃእከ ፡ እምድረ ፡ ግብጽ ፡ ውስተ ፡ ምድር ፡ እንተ ፡ መሐልኩ ፡ ለአብርሃም ፡ ወለይስሐቅ ፡ ወለያዕቆብ ፡ እንዘ ፡ እብል ፡ ለዘርእክሙ ፡ እሁባ ።

33:2  ወእፌንዎ ፡ ለመልአኪየ ፡ ቅድሜከ ፡ ወያወፅኦሙ ፡ ለከናኔዎን ፡ ወለአሞሬዎን ፡ ወለኬጤዎን ፡ ወለፌሬዜዎን ፡ ወለጌርጌሴዎን ፡ ወለሔዌዎን ።

33:3  ወያበውአከ ፡ ውስተ ፡ ምድር ፡ እንተ ፡ ትውሕዝ ፡ ሐሊበ ፡ ወመዐረ ፡ ወኢየዐርግ ፡ ምስሌከ ፡ በእንተ ፡ ሕዝብከ ፡ እለ ፡ ያገዝፉ ፡ ክሳዶሙ ፡ ከመ ፡ ኢያኅልቆሙ ፡ በፍኖት ።

33:4  ወሶበ ፡ ሰምዐ ፡ ሕዝብ ፡ ዘንተ ፡ ነገረ ፡ እኩየ ፡ ላሐው ፡ ላሐ ።

33:5  ወይቤሎሙ ፡ እግዚእ ፡ ለደቂቀ ፡ እስራኤል ፡ አንትሙሰ ፡ ሕዝብ ፡ ዘያገዝፍ ፡ ክሳዶ ፡ አንትሙ ፡ ዑቁ ፡ ካልእተ ፡ መቅሠፍተ ፡ ኢያምጽእ ፡ ላዕሌክሙ ፡ ወአጠፍአክሙ ፤ ወይእዜኒ ፡ አሰስሉ ፡ አልባሰ ፡ ክብርክሙ ፡ ወሰርጐክሙ ፡ ወኣርእየክሙ ፡ ዘእሬስየክሙ ።

33:6  ወአሰሰሉ ፡ ደቂቀ ፡ እስራኤል ፡ ሰርጓቲሆሙ ፡ ወአልባሲሆሙ ፡ እምኀበ ፡ ደብረ ፡ ኮሬብ ።

33:7  ወነሥአ ፡ ሙሴ ፡ ደብተራሁ ፡ ወተከላ ፡ አፍአ ፡ እምትዕይንት ፡ ወርኁቀ ፡ እምትዕይንት ፡ ወተሰምየት ፡ ደብተራ ፡ ዘመርጡል ፤ ወእመቦ ፡ ዘፈቀዶ ፡ ለእግዚአብሔር ፡ የሐውር ፡ ኀበ ፡ ይእቲ ፡ ደብተራ ፡ አፍአ ፡ እምትዕይንት ።

33:8  ወሶበ ፡ የሐውር ፡ ሙሴ ፡ ይባእ ፡ ውስተ ፡ ይእቲ ፡ ደብተራ ፡ አፍአ ፡ እምትዕይንት ፡ ይቀውም ፡ ኵሉ ፡ ሕዝብ ፡ ወይኔጽር ፡ አሐዱ ፡ አሐዱ ፡ ኀበ ፡ ኆኅተ ፡ ደብተራሁ ፡ ወይሬእይዎ ፡ ለሙሴ ፡ ሶበ ፡ የሐውር ፡ እስከ ፡ ይበውእ ፡ ውስተ ፡ ደብተራ ።

33:9  ወእምከመ ፡ ቦአ ፡ ሙሴ ፡ ውስተ ፡ ደብተራ ፡ ይወርድ ፡ ዐምድ ፡ ዘደመና ፡ ወይቀውም ፡ ኀበ ፡ ኆኅተ ፡ ደብተራ ፡ ወይትናገሮ ፡ ለሙሴ ።

33:10  ወይሬእዮ ፡ ኵሉ ፡ ሕዝብ ፡ ለውእቱ ፡ ዐምድ ፡ ዘደመና ፡ እንዘ ፡ ይቀውም ፡ ኀበ ፡ ኆኅተ ፡ ደብተራ ፡ (ወይትናገር ፡ ምስለ ፡ ሙሴ ፡) ወቀዊሞሙ ፡ ኵሉ ፡ ሕዝብ ፡ ኀበ ፡ ኆኅተ ፡ ደባትሪሆሙ ፡ ይሰግዱ ።

33:11  ወይትናገሮ ፡ እግዚአብሔር ፡ ለሙሴ ፡ ገጸ ፡ በገጽ ፡ ከመ ፡ ዘይትናገር ፡ ምስለ ፡ ዓርኩ ፡ ወይገብእ ፡ ውስተ ፡ ትዕይንት ፡ ወፅሙዱ ፡ ዮሳዕ ፡ ወልደ ፡ ነዌ ፡ ወንኡስ ፡ ውእቱ ፡ ወኢይወፅእ ፡ እምትዕይንት ።

33:12  ወይቤሎ ፡ ሙሴ ፡ ለእግዚአብሔር ፡ ናሁ ፡ ትብለኒ ፡ አንተ ፡ ስዶ ፡ ለዝንቱ ፡ ሕዝብ ፡ ወአንተ ፡ ባሕቱ ፡ ኢነገርከኒ ፡ ዘትፌኑ ፡ ምስሌየ ፡ ወለሊከ ፡ ትቤለኒ ፡ ኪያከ ፡ አእመርኩ ፡ እምኵሉ ፡ ወረከብከ ፡ ሞገሰ ፡ በኀቤየ ።

33:13  ወለእመሰኬ ፡ ረከብኩ ፡ ሞገሰ ፡ በኀቤከ ፡ አስተርእየኒ ፡ ሊተ ፡ ገሃደ ፡ ወአእምር ፡ ወእርአይከ ፡ ከመ ፡ ይኩነኒ ፡ ረኪበ ፡ ሞገስ ፡ በቅድሜከ ፡ ወከመ ፡ አእምር ፡ ከመ ፡ ሕዝብከ ፡ ውእቱ ፡ ዝንቱ ፡ ሕዝብ ፡ ዐቢይ ።

33:14  ወይቤሎ ፡ እግዚአብሔር ፡ አነ ፡ አሐውር ፡ ቅድሜከ ፡ ወአዐርፈከ ።

33:15  ወይቤ ፡ ሙሴ ፡ እመ ፡ አንተ ፡ ለሊከ ፡ ኢተሐውር ፡ ምስሌነ ፡ ኢታውፅአኒ ፡ እምዝየ ።

33:16  ወእፎኬ ፡ ይትዐወቅ ፡ ከመ ፡ አማን ፡ ረከብኩ ፡ ሞገሰ ፡ በቅድሜከ ፡ አነኒ ፡ ወሕዝብከኒ ፡ እንበለ ፡ ሶበ ፡ ሖርከ ፡ ምስሌነ ፡ ወንከብር ፡ አነኒ ፡ ወሕዝብከኒ ፡ በኀበ ፡ ኵሉ ፡ አሕዛብ ፡ ዘሀሎ ፡ ውስተ ፡ ምድር ።

33:17  ወይቤሎ ፡ እግዚአብሔር ፡ ለሙሴ ፡ ወዘንተኒ ፡ ነገረከ ፡ ዘትቤለኒ ፡ እገብር ፡ እስመ ፡ ረከብከ ፡ ሞገሰ ፡ በቅድሜየ ፡ ወአአምረከ ፡ እምኵሉ ።

33:18  ወይቤሎ ፡ ሙሴ ፡ ለእግዚአብሔር ፡ አርእየኒ ፡ ስብሐቲከ ።

33:19  ወይቤሎ ፡ እግዚአብሔር ፡ ለሙሴ ፡ አነ ፡ አኀልፍ ፡ ቅድሜከ ፡ በስብሐቲየ ፡ ወእጼውዕ ፡ ስመ ፡ እግዚእ ፡ በቅድሜከ ፡ ወእምሕሮ ፡ ለዘምሕርክዎ ፡ ወእሣሀሎ ፡ ለዘ ፡ ተሣሀልክዎ ።

33:20  ወይቤሎ ፡ እግዚእ ፡ ለሙሴ ፡ ኢትክል ፡ ርእዮተ ፡ ገጽየሰ ፡ እስመ ፡ አልቦ ፡ ሰብእ ፡ ዘይሬኢ ፡ ገጽየ ፡ ወየሐዩ ።

33:21  ወይቤሎ ፡ እግዚአብሔር ፡ ለሙሴ ፡ ናሁ ፡ መካን ፡ ኀቤየ ፡ ወትቀውም ፡ ውስተ ፡ ኰኵሕ ፤

33:22  እስከ ፡ የሐልፍ ፡ ስብሐቲየ ፡ ወእሠይመከ ፡ ኀበ ፡ ስቍረተ ፡ ኰኵሕ ፡ ወእሴውር ፡ በእዴየ ፡ ላዕሌከ ፡ እስከ ፡ አኀልፍ ።

33:23  ወአሴስል ፡ እዴየ ፡ ወይእተ ፡ ጊዜ ፡ ትሬኢ ፡ ማዕዘርየ ፡ ወገጽየሰ ፡ ኢያስተርኢ ፡ ለከ ።

Chapter 34

34:1  ወይቤሎ ፡ እግዚአብሔር ፡ ለሙሴ ፡ ወቅር ፡ ለከ ፡ ክልኤ ፡ ጽላተ ፡ ዘእብን ፡ በከመ ፡ ቀዳምያት ፡ ወዕረግ ፡ ኀቤየ ፡ ውስተ ፡ ደብር ፡ ወእጽሕፍ ፡ ውስተ ፡ ውእቶን ፡ ጽላት ፡ ዝክተ ፡ ነገረ ፡ ዘሀሎ ፡ ውስተ ፡ ቀዳምያት ፡ ጽላት ፡ እለ ፡ ቀጥቀጥከ ።

34:2  ወኩን ፡ ድልወ ፡ ለነግህ ፡ ወተዐርግ ፡ ውስተ ፡ ደብረ ፡ ሲና ፡ ወቁመኒ ፡ ህየ ፡ ውስተ ፡ ርእሰ ፡ ደብር ።

34:3  ወአልቦ ፡ ዘየዐርግ ፡ ምስሌከ ፡ ወአልቦ ፡ ዘየሀሉ ፡ ውስተ ፡ ኵሉ ፡ ደብሩ ፡ ወአባግዕኒ ፡ ወአልህምትኒ ፡ ኢይትረዐዩ ፡ ቅሩቦ ፡ ለውእቱ ፡ ደብር ።

34:4  ወወቀረ ፡ ሙሴ ፡ ክልኤ ፡ ጽላተ ፡ እለ ፡ እብን ፡ በከመ ፡ ቀዳምያት ፡ ወጌሠ ፡ ሙሴ ፡ በጽባሕ ፡ ወዐርገ ፡ ውስተ ፡ ደብረ ፡ ሲና ፡ በከመ ፡ አዘዞ ፡ እግዚአብሔር ፡ ወነሥአ ፡ ሙሴ ፡ ምስሌሁ ፡ እልክተ ፡ ክልኤ ፡ ጽላተ ፡ እለ ፡ እብን ።

34:5  ወወረደ ፡ እግዚአብሔር ፡ በደመና ፡ ወቆመ ፡ ህየ ፡ ወጸወዐ ፡ በስመ ፡ እግዚእ ።

34:6  ወኀለፈ ፡ እግዚእ ፡ እንተ ፡ ቅድመ ፡ ገጹ ፡ ወስምየ ፡ እግዚእ ፡ እግዚአብሔር ፡ መሓሪ ፡ ወመስተሣህል ፡ ርኁቀ ፡ መዐት ፡ ወብዙኀ ፡ ምሕረት ፡ ወጻድቅ ፤

34:7  ዘየዐቅባ ፡ ለጽድቅ ፡ ወይገብር ፡ ምሕረተ ፡ ላዕለ ፡ አእላፍ ፡ ዘያሴስል ፡ ዐመፃ ፡ ወጌጋየ ፡ ወኀጢአተ ፡ ወለመአብስ ፡ ኢያነጽሖ ፡ ዘያገብእ ፡ ኀጣውአ ፡ አበው ፡ ላዕለ ፡ ውሉድ ፡ ወላፅለ ፡ ውሉደ ፡ ውሉድ ፡ ለዕለ ፡ ሣልስት ፡ ወራብዕት ፡ ትውልድ ።

34:8  ወጐጕአ ፡ ሙሴ ፡ ወደነነ ፡ ውስተ ፡ ምድር ፡ ወሰገደ ፡ ለእግዚአብሔር ።

34:9  ወይቤ ፡ ሙሴ ፡ ለእመ ፡ ረከብኩ ፡ ሞገሰ ፡ በቅድሜከ ፡ ይሑር ፡ እግዚእየ ፡ ምስሌነ ፡ እስመ ፡ ዝንቱ ፡ ሕዝብ ፡ ጽኑዐ ፡ ክሳድ ፡ ውእቱ ፡ ወተኀድግ ፡ አንተ ፡ ኀጣውኦ ፡ ወአበሳሁ ፡ ለሕዝብከ ፡ ወንከውን ፡ ለከ ።

34:10  ወይቤሎ ፡ እግዚአብሔር ፡ ለሙሴ ፡ ናሁ ፡ አነ ፡ እሠይም ፡ ለከ ፡ ኪዳነ ፡ በቅድመ ፡ ኵሉ ፡ ሕዝብከ ፡ ወእግብር ፡ ዐቢያተ ፡ ወክቡራተ ፡ ዘኢኮነ ፡ ውስተ ፡ ኵሉ ፡ ምድር ፡ ወውስተ ፡ ኵሉ ፡ አሕዛብ ፡ ወይሬኢ ፡ ኵሉ ፡ ሕዝብ ፡ ለእለ ፡ ውስቴቶሙ ፡ ሀሎከ ፡ ግብሩ ፡ ለእግዚአብሔር ፡ እስመ ፡ መድምም ፡ ውእቱ ፡ ዘአነ ፡ እገብር ፡ ለከ ።

34:11  ወዑቅ ፡ ባሕቱ ፡ አንተ ፡ ኵሎ ፡ ዘአነ ፡ እኤዝዘከ ፡ ናህ ፡ አነ ፡ ኣወፅኦሙ ፡ እምቅድመ ፡ ገጽክሙ ፡ ለአሞሬዎን ፡ ወለከናኔዎን ፡ ወለኬጤዎን ፡ ወለፌሬዜዎን ፡ ወለሔዌዎን ፡ ወለ[ኢ]ያቡሴዎን ።

34:12  ዑቅ ፡ እንከ ፡ ርእሰከ ፡ ከመ ፡ ኢትትማሐሉ ፡ ምስለ ፡ ውእቱ ፡ ሰብእ ፡ እለ ፡ ይተርፉ ፡ ውስተ ፡ ይእቲ ፡ ምድር ፡ እንተ ፡ ውስቴታ ፡ ትበውኡ ፡ ከመ ፡ ኢይኩን ፡ ጌጋይ ፡ ላዕሌክሙ ።

34:13  ምሥዋዓቲሆሙ ፡ ትነሥቱ ፡ ወምሰሊሆሙ ፡ ትሴበሩ ፡ ወአእዋሞሙ ፡ ትገዝሙ ፡ ወግልፎ ፡ አማልክቲሆሙ ፡ ታውዕዩ ፡ በእሳት ።

34:14  እስመ ፡ ኢትሰግዱ ፡ ለካልእ ፡ አምላክ ፡ እስመ ፡ እግዚእ ፡ እግዚአብሔር ፡ ቀናጺ ፡ ስሙ ፡ ወእግዚአብሔርሰ ፡ ቀናኢ ፡ ውእቱ ።

34:15  ዮጊ ፡ ትትማሐል ፡ ምስለ ፡ እለ ፡ ይነብሩ ፡ ውስተ ፡ ይእቲ ፡ ምድር ፡ ወይዜምው ፡ ድኅረ ፡ አማልክቲሆሙ ፡ ወይሠውዑ ፡ ለአማልክቲሆሙ ፡ ወይጼውዑከ ፡ ወትበልዕ ፡ እምውስተ ፡ መሥዋዕቶሙ ።

34:16  ወትነሥእ ፡ እምውስተ ፡ አዋልዲሆሙ ፡ ለደቂቅከ ፡ ወአዋልዲከ ፡ ትሁብ ፡ ለደቂቆሙ ፡ ወይዜምዋ ፡ አዋልዲከ ፡ ድኅረ ፡ አማልክቲሆሙ ፡ ወያዜምውዎሙ ፡ ለደቂቅከ ፡ ድኅረ ፡ አማልክቲሆሙ ።

34:17  ወአማልክተ ፡ ዘስብኮ ፡ ኢትግበር ፡ ለከ ።

34:18  ወሕገ ፡ ናእት ፡ ዕቀብ ፡ ሰቡዐ ፡ መዋዕለ ፡ ብላዕ ፡ ናእተ ፡ በከመ ፡ አዘዝኩከ ፡ በዘመኑ ፡ በወርኀ ፡ ሚያዝያ ፡ እስመ ፡ በወርኀ ፡ ሚያዝያ ፡ ወፃእከ ፡ እምድረ ፡ ግብጽ ።

34:19  ኵሉ ፡ ተባዕት ፡ ዘይፈትሕ ፡ ማኅፀነ ፡ ሊተ ፡ ውእቱ ፡ በኵሩ ፡ ለላህም ፡ ወበኵሩ ፡ ለበግዕ ።

34:20  ወበኵሩ ፡ ለአድግ ፡ ወትቤዝዎ ፡ በበግዕ ፡ ወእመሰ ፡ ኢቤዘውካሁ ፡ ሤጦ ፡ ትሁብ ፡ ወኵሎ ፡ በኵረ ፡ ውሉድከ ፡ ትቤዙ ፡ ወኢታስተርኢ ፡ ቅድሜየ ፡ ዕራቅከ ።

34:21  ሰዱሰ ፡ መዋዕለ ፡ ትገብር ፡ ግብረከ ፡ ወበሳብዕት ፡ ዕለት ፡ ታዐርፍ ፡ ታዐርፍ ፡ ዘርአ ፡ ወታዐርፍ ፡ ዐፂደ ።

34:22  ወበዓለ ፡ ሰንበት ፡ ትገብር ፡ ሊተ ፡ አመ ፡ ይቀድሙ ፡ ዐፂደ ፡ ስርናይ ፡ ወበዓለ ፡ ምኵራብ ፡ ማእከለ ፡ ዓመት ።

34:23  ሠለስተ ፡ ዘመነ ፡ ለዓመት ፡ ያስተርኢ ፡ ኵሉ ፡ ተባዕትከ ፡ ቅድመ ፡ እግዚአብሔር ፡ አምላከ ፡ እስራኤል ።

34:24  ወአመ ፡ አወፅኦሙ ፡ ለአሕዛብ ፡ እምቅድመ ፡ ገጽከ ፡ ወእሰፍሖ ፡ ለአድዋሊከ ፡ ወአልቦ ፡ ዘይፈትዋ ፡ መኑሂ ፡ ለምድርከ ፡ ወሶበ ፡ ተዐርግ ፡ ታስተርኢ ፡ ቅድመ ፡ እግዚአብሔር ፡ አምላክከ ፡ ሠለስተ ፡ ዘመነ ፡ ለዓመት ።

34:25  ኢትዝባሕ ፡ ብሑአ ፡ ደም ፡ መሥዋዕትየ ፡ ወኢይቢት ፡ ለነግህ ፡ [ዘዘብሑ ፡] ለበዓለ ፡ ፋሲካ ።

34:26  ቀዳሜ ፡ እክለ ፡ ምድርከ ፡ ትወስድ ፡ ቤተ ፡ እግዚአብሔር ፡ አምላክከ ፤ ወኢታብስል ፡ በግዐ ፡ እንዘ ፡ ይጠቡ ፡ ሐሊበ ፡ እሙ ።

34:27  ወይቤሎ ፡ እግዚአብሔር ፡ ለሙሴ ፡ ጸሐፍ ፡ ለከ ፡ ዘንተ ፡ ነገረ ፡ [እስመ ፡ በዝንቱ ፡ ነገር ፡] ኣቀውም ፡ ለከ ፡ ኪዳነ ፡ ወለእስራኤል ።

34:28  ወሀሎ ፡ ህየ ፡ ሙሴ ፡ ቅድመ ፡ እግዚአብሔር ፡ ፵ዕለተ ፡ ወ፵ሌሊተ ፤ እክለ ፡ ኢበልዐ ፡ ወማየ ፡ ኢሰትየ ፡ ወጸሐፈ ፡ ውስተ ፡ ጽላት ፡ ዘንተ ፡ ነገረ ፡ ፲ቃለ ።

34:29  ወሶበ ፡ ወረደ ፡ ሙሴ ፡ እምደብረ ፡ ሲና ፡ ወሀለዋ ፡ ክልኤ ፡ ጽላት ፡ ውስተ ፡ እደዊሁ ፡ ለሙሴ ፡ ወእንዘ ፡ ይወርድ ፡ እምውስተ ፡ ደብር ፡ ወኢያእመረ ፡ ሙሴ ፡ ከመ ፡ ተሰብሐ ፡ ሕብረ ፡ ገጹ ፡ እንዘ ፡ ይትናገር ፡ ምስለ ፡ እግዚአብሔር ።

34:30  ወሶበ ፡ ርእይዎ ፡ አሮን ፡ ወኵሉ ፡ ደቂቀ ፡ እስራኤል ፡ ለሙሴ ፡ ከመ ፡ ተሰብሐ ፡ ርእየተ ፡ ሕብረ ፡ ገጹ ፡ ፈርሁ ፡ ቀሪቦቶ ።

34:31  ወጸውዖሙ ፡ ሙሴ ፡ ወገብኡ ፡ ኀቤሁ ፡ አሮን ፡ ወኵሉ ፡ መኳንንተ ፡ ተዕይንት ፡ ወነገሮሙ ፡ ሙሴ ።

34:32  ወእምድኅረ ፡ ዝንቱ ፡ ቀርቡ ፡ ኀቤሁ ፡ ኵሉ ፡ ደቂቀ ፡ እስራኤል ፡ ወአዘዞሙ ፡ ኵሎ ፡ ዘነገሮ ፡ እግዚአብሔር ፡ በደብረ ፡ ሱና ።

34:33  ወሶበ ፡ አኅለቀ ፡ ተናግሮቶሙ ፡ ወደየ ፡ ላዕለ ፡ ገጹ ፡ ግልባቤ ፡ በዘ ፡ ይሴውር ፡ ገጾ ።

34:34  ወሶበ ፡ የሐውር ፡ ሙሴ ፡ ቅድመ ፡ እግዚአብሔር ፡ ከመ ፡ ይትናገሮ ፡ ያሴስል ፡ ግልባቤሁ ፡ እስከ ፡ ይወፅእ ፡ ወእምከመ ፡ ወፅአ ፡ ይነግሮሙ ፡ ለደቂቀ ፡ እስራኤል ፡ ኵሎ ፡ ዘአዘዞ ፡ እግዚአብሔር ።

34:35  ወርእዩ ፡ ደቂቀ ፡ እስራኤል ፡ ከመ ፡ ተሰብሐ ፡ ገጹ ፡ ለሙሴ ፡ ወከመ ፡ ወደየ ፡ ግልባቤ ፡ በዘ ፡ ይሴወር ፡ እስከ ፡ ይ[በው]እ ፡ ከመ ፡ ይትናገሮ ።

Chapter 35

35:1  ወአስተጋብኦሙ ፡ ሙሴ ፡ ለኵሉ ፡ ማኅበሮሙ ፡ ለደቂቀ ፡ እስራኤል ፡ ወይቤሎሙ ፡ ዝንቱ ፡ ውእቱ ፡ ነገር ፡ ዘይቤ ፡ እግዚአብሔር ፡ ከመ ፡ ትግበርዎ ።

35:2  ሰዱሰ ፡ መዋዕለ ፡ ትገብሩ ፡ ግብረክሙ ፡ ወበሳብዕት ፡ ዕለት ፡ ዕረፍት ፡ ቅድስት ፡ ሰንበት ፡ ዕረፍቱ ፡ ለእግዚአብሔር ፡ ኵሉ ፡ ዘይገብር ፡ ባቲ ፡ ግብረ ፡ ለይሙት ።

35:3  ወኢታንድዱ ፡ እሳተ ፡ በውስተ ፡ ኵሉ ፡ መኃድሪክሙ ፡ በዕለተ ፡ ሰናብትየ ፤ አነ ፡ እግዚአብሔር ።

35:4  ወይቤሎሙ ፡ ሙሴ ፡ ለኵሉ ፡ ማኅበሮሙ ፡ ለደቂቀ ፡ እስራኤል ፡ እንዘ ፡ ይብል ፡ ዝንቱ ፡ ውእቱ ፡ ቃል ፡ ዘአዘዘ ፡ እግዚአብሔር ፡ እንዘ ፡ ይብል ።

35:5  ንሥኡ ፡ እምኔሆሙ ፡ መባአ ፡ ለእግዚአብሔር ፡ ኵሎሙ ፡ ዘዘሐለዮሙ ፡ ልቦሙ ፡ ያምጽኡ ፡ እምቀዳሜ ፡ ንዋዮሙ ፡ (ወ)እምወርቅ ፡ ወእምብሩር ፡ ወእምብርት ፤

35:6  ወያክንት ፡ ፖፔራ ፡ ለይ ፡ ክዑብ ፡ ወሜላት ፡ ፍቱል ፡ ወጸጕረ ፡ ጠሊ ፤

35:7  ወማእሰ ፡ በግዕ ፡ ግቡረ ፡ መሃን ፡ ወመሃነ ፡ ም[ጺ]ጺት ፡ ወዕፀ ፡ ዘኢይነቅዝ ፤

35:8  ወእብነ ፡ ሶም ፡ ወዕንቈ ፡ ግልፎ ፡ ለዐፅፍ ፡ ወለጳዴሬ ።

35:9  ወኵሉ ፡ ጠቢበ ፡ ልብ ፡ ዘውስቴትክሙ ፡ ይምጻእ ፡ ወይግበር ፡ ኵሎ ፡ ዘአዘዘ ፡ እግዚአብሔር ፤

35:10  ደብተራ ፡ ወዐውዳ ፡ ወጠፈራ ፡ ወአፋኪያሃ ፡ ወመናስግቲሃ ፡ ወአዕማዲሃ ፤

35:11  ወታቦት ፡ ዘመርጡል ፡ ወምስዋሪሃ ፡ ወመንጦላዕታ ፤

35:12  ወዐውደ ፡ ዐጸድ ፡ ወአዕማዲሁ ፤

35:13  ወእብነ ፡ ዘመረግድ ፤

35:14  ወማእደ ፡ ወኵሎ ፡ ንዋያ ፤

35:15  ወተቅዋመ ፡ ማኅቶት ፡ ዘብርሃን ፡ ወኵሎ ፡ ንዋያ ፤

35:16  ወቅብአ ፡ ዘይቀብኡ ፡ ወዕጣነ ፡ ዘየዐጥኑ ፤

35:17  ወመምሠጠ ፡ ማዕጾ ፡ ዘደብተራ ፡ ወምሥዋዐ ፡ ወኵሎ ፡ ንዋዮ ፤

35:18  ወአልባሲሁ ፡ ለአሮን ፡ ካህን ፡ ወአልባሰ ፡ በዘ ፡ ይገብሩ ፡ በውስተ ፡ መቅደስ ፤

35:19  ወዐፅፎሙ ፡ ለደቂቀ ፡ አሮን ፡ ዘክህነቶሙ ።

35:20  ወወፅአ ፡ ኵሉ ፡ ማኅበሮሙ ፡ ለደቂቀ ፡ እስራኤል ፡ እምኀበ ፡ ሙሴ ።

35:21  ወአምጽኡ ፡ አሐዱ ፡ አሐዱ ፡ በከመ ፡ ሐለየ ፡ በልቡ ፡ ወበከመ ፡ ፈቀደ ፡ በነፍሱ ፡ አምጽኡ ፡ መባአ ፡ ለእግዚአብሔር ፡ ለኵሉ ፡ ግብረቱ ፡ ለደብተራ ፡ መርጡል ፡ ወለኵሉ ፡ መፍቀደ ፡ ወለኵሉ ፡ አልባስ ፡ ዘመቅደስ ።

35:22  ወአምጽኡ ፡ ዕደው ፡ ዘእምኀበ ፡ አንስትኒ ፡ ኵሉ ፡ በከመ ፡ ፈቀዶ ፡ ልቡ ፡ ወአምጽኡ ፡ መኃትምተኒ ፡ ወአውጻበ ፡ ወሕለቃተ ፡ ወሐብለታተ ፡ ወአውቃፈ ፡ ወኵ[ሎ] ፡ ሰር[ጐ] ፡ ዘወርቅ ።

35:23  ወኵሉ ፡ አምጽአ ፡ ወርቀ ፡ መባአ ፡ ለእግዚአብሔር ፡ ወኵሉ ፡ ዘረከበ ፡ ማእሰ ፡ በግዕ ፡ ግቡረ ፡ መሃን ፡ ወማእሰ ፡ ዘምጺጺት ።

35:24  ወአብአ ፡ ኵሉ ፡ ዘበፅዐ ፡ ብፅዓተ ፡ ብሩረ ፡ ወብርተ ፡ አምጽኡ ፡ መባአ ፡ ለእግዚአብሔር ፡ ወእምኀበ ፡ ተረክበ ፡ ዕፅ ፡ ዘኢይነቅዝ ፡ ለኵሉ ፡ ምግባረ ፡ መፍቀዳ ፡ ለደብተራ ፡ አምጽኡ ።

35:25  ወኵሉ ፡ ብእሲት ፡ ጠባበ ፡ ልብ ፡ እንተ ፡ ትክል ፡ ፈቲለ ፡ በእደዊሃ ፡ አምጽኣ ፡ ፈትለ ፡ ዘ[ያክንት ፡] ወሕብረ ፡ ከብድ ፡ ወለይ ፡ ወሜላት ።

35:26  ወኵሉ ፡ አንስት ፡ እለ ፡ ሐለያ ፡ በልቦን ፡ በጥበብ ፡ ፈተላሁ ፡ ለጸጕረ ፡ ጠሊ ።

35:27  ወመላእክትኒ ፡ አምጽኡ ፡ እብነ ፡ ዘመረግድ ፡ ወዕንቈ ፡ ዘተጽፋቅ ፡ ለዐፅፍ ፡ ወለዘውስተ ፡ መትከፍት ፡ ወለመፍቀደ ፡ ሥርዐቱ ፤

35:28  ወቅብአ ፡ ዘይትቀብኡ ፡ ወሞደዮ ፡ ለዕጣን ።

35:29  ወኵሉ ፡ ብእሲ ፡ ወብእሲት ፡ እለ ፡ ፈቀዶሙ ፡ ልቦሙ ፡ ከመ ፡ ያብኡ ፡ ወይግበሩ ፡ ኵሎ ፡ ግብረ ፡ ዘአዘዘ ፡ እግዚአብሔር ፡ ለሙሴ ፡ አምጽእዎሙ ፡ ደቂቀ ፡ እስራኤል ፡ መባአ ፡ ለእግዚአብሔር ።

35:30  ወይቤሎሙ ፡ ሙሴ ፡ ለደቂቀ ፡ እስራኤል ፡ ናሁ ፡ ጸውዖ ፡ እግዚአብሔር ፡ በስሙ ፡ ለቤሴሌእል ፡ ዘኡራ ፡ ወልደ ፡ ሖር ፡ እምነገደ ፡ ይሁዳ ።

35:31  ወመልአ ፡ መንፈሰ ፡ እግዚአብሔር ፡ ወጥበበ ፡ ወልቡና ፡ ወትምህርተ ፤

35:32  ከመ ፡ ይኩን ፡ ላዕለ ፡ ኵሉ ፡ ሊቀ ፡ ጸረብት ፡ ወይግበር ፡ ኵሎ ፡ ምግባረ ፡ ሊቀ ፡ ጸረብት ፡ ወይግበር ፡ ወርቀኒ ፡ ወብሩረኒ ፡ ወብርተኒ ፤

35:33  ወኪነ ፡ ዕንቍኒ ፡ ወይግበር ፡ ዕፀኒ ፡ ወይግበር ፡ ኵሎ ፡ ግብረ ፡ በጥበብ ።

35:34  ወይሜህር ፡ ወወደየ ፡ ውስተ ፡ ልቡ ፡ ሎቱኒ ፡ ወለኤሊያብ ፡ ዘአኪስመክ ፡ ዘእምነ ፡ ነገደ ፡ ዳን ።

35:35  ወመልኦሙ ፡ ጥበበ ፡ ልብ ፡ ከመ ፡ ያእምሩ ፡ ገቢረ ፡ ኵሎ ፡ ግብረ ፡ መቅደስ ፡ ዘይትአነም ፡ ከመ ፡ ይእንሙ ፡ በለይ ፡ ወሜላት ፡ ወከመ ፡ ይግበሩሂ ፡ ኵሎ ፡ ግብረ ፡ ጸረብት ፡ ዘዘዚአሁ ።

Chapter 36

36:1  ወገብሩ ፡ ቤሴሌእል ፡ ወኤሊያብ ፡ ወኵሉ ፡ ጠቢበ ፡ ልብ ፡ እለ ፡ ተውህበ ፡ ሎሙ ፡ ጥበብ ፡ ወአእምሮ ፡ ኵሎ ፡ ከመ ፡ ይግበሩ ፡ ኵሎ ፡ ግብረ ፡ መቅደስ ፡ ዘይትፈቀድ ፡ ኵሎ ፡ ዘአዘዘ ፡ እግዚአብሔር ።

36:2  ወጸውዖሙ ፡ ሙሴ ፡ ለቤሴሌእል ፡ ወለኤሊያብ ፡ ወለኵሎሙ ፡ እለ ፡ ቦሙ ፡ ጥበበ ፡ እለ ፡ ወሀቦሙ ፡ እግዚአብሔር ፡ አእምሮ ፡ ውስተ ፡ ልቦሙ ፡ ወኵሉ ፡ እለ ፡ በፈቃደ ፡ ልቦሙ ፡ ይገብሩ ፡ ከመ ፡ ይሑሩ ፡ ውስተ ፡ ዝንቱ ፡ ግብር ፡ ከመ ፡ ይፈጽምዎ ።

36:3  ወነሥ[ኡ] ፡ በኀበ ፡ ሙሴ ፡ መባአ ፡ ዘአብኡ ፡ ደቂቀ ፡ እስራኤል ፡ ለኵሉ ፡ ምግባረ ፡ መቅደስ ፡ ከመ ፡ ይግበሩ ፡ ወእሙንቱ ፡ ይትወከፉ ፡ ዓዲ ፡ ዘያበውኡ ፡ እምኀበ ፡ እለ ፡ ያመጽኡ ፡ ነግሀ ፡ ነግህ ።

36:4  ወመጺኦሙ ፡ ኵሉ ፡ ጠቢባን ፡ እለ ፡ ይገብሩ ፡ ግብረ ፡ መቅደስ ፡ አሐዱ ፡ አሐዱ ፡ በበ ፡ ምግባሪሁ ፡ ዘይገብር ፤

36:5  ወይቤልዎ ፡ ለሙሴ ፡ ብዙኅ ፡ መባእ ፡ ያበውእ ፡ ሕዝብ ፡ እምግብር ፡ ዘአዘዘ ፡ እግዚአብሔር ፡ ከመ ፡ ይትገበር ።

36:6  ወአዘዘ ፡ ሙሴ ፡ ወሰበከ ፡ ውስተ ፡ ትዕይንት ፡ ለዕድኒ ፡ ወለአንስትኒ ፡ እምይእዜ ፡ ኢይግበሩ ፡ መባአ ፡ ዘዐሥራት ፡ ዘመቅደስ ፡ ወተከልአ ፡ ሕዝብ ፡ እንከ ፡ አብኦ ።

36:7  እስመ ፡ አከሎሙ ፡ ለምግባረ ፡ ይገብሩ ፡ ወተርፎሙ ።

36:8  ወገብሩ ፡ ኵሉ ፡ ጠቢባን ፡ እለ ፡ ይገብሩ ፡ አልባሲሆሙ ፡ ለቅዱሳን ፡ ዘይከውኖ ፡ ለአሮን ፡ ለካህን ፡ በከመ ፡ አዘዞ ፡ እግዚአብሔር ፡ ለሙሴ ።

36:9  ወገብሩ ፡ ዘላዕለ ፡ መትከፍት ፡ ዘወርቅ ፡ ዘደረከኖ ፡ ወሕብረ ፡ ከብድ ፡ ወለይ ፡ ፍቱል ፡ ወሜላት ፡ ክዑብ ።

36:10  ወሰጠቅዎ ፡ ለቈጽለ ፡ ወርቅ ፡ ወገብርዎ ፡ አፍታለ ፡ ከመ ፡ ይትፈተል ፡ ምስለ ፡ ደረከኖ ፡ ወምስለ ፡ ሕብረ ፡ ከብድ ፡ ወምስለ ፡ ለይ ፡ ፍቱል ፡ ወምስለ ፡ ሜላት ፡ ክዑብ ፡ ግብረ ፡ ማእነም ።

36:11  ወገብርዎ ፡ ልብሰ ፡ መትከፍት ፡ ዘይወርድ ፡ ውስተ ፡ ክልኤሆን ፡ መታክፊሁ ፡ ግብረ ፡ ማእነም ፡ ዘበበይኑ ፡ ፅፉር ፤

36:12  ወእንተ ፡ ባሕቲትሁ ፡ ገብርዎ ፡ እምኔሁ ፡ በከመ ፡ ግብረቱ ፡ ዘወርቅ ፡ ወያክንት ፡ ወበሕብረ ፡ ከብድ ፡ ወበለይ ፡ ፍቱል ፡ ወበሜላት ፡ ክዑብ ፡ በከመ ፡ አዘዞ ፡ እግዚአብሔር ፡ ለሙሴ ።

36:13  ወገብሩ ፡ ኵሎ ፡ እብነ ፡ ዘመረግድ ፡ ወአውደድዎ ፡ ውስተ ፡ ወርቅ ፡ ወግሉፍ ፡ ከመ ፡ ግልፈተ ፡ ማኅተም ፡ በአስማቲሆሙ ፡ ለደቂቀ ፡ እስራኤል ።

36:14  ወወደይዎ ፡ ላዕለ ፡ መታክፍ ፡ ውስተ ፡ ልብሰ ፡ መትከፍት ፡ ዕንቈ ፡ ዘተዝካሮሙ ፡ ለደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለሙሴ ።

36:15  ወገብረ ፡ ልብሰ ፡ ሎግዮን ፡ ግብረ ፡ ማእነም ፡ ዕሡቀ ፡ ከመ ፡ ግብረተ ፡ ልብሰ ፡ መትከፍት ፡ በወርቅ ፡ ወበያክንት ፡ ወበሕብረ ፡ ከብድ ፡ ወለይ ፡ ፍቱል ፡ ወሜላት ፡ ክዑብ ።

36:16  ርቡዕ ፡ ወውጡሕ ፡ ውእቱ ፡ ልብሰ ፡ ሎግዮን ፡ ባዕ ፡ አውዱ ፡ ወባዕ ፡ ወርዱ ፡ እንዘ ፡ ውጡሕ ፡ ውእቱ ።

36:17  ወተአንመ ፡ ውስቴቱ ፡ አርባዕቱ ፡ ጾታ ፡ እንመተ ፡ ዘበዕንቍ ፡ አሐቲ ፡ ጾታ ፡ ዘበዕንቍ ፡ በሶም ፡ [ወ]ወራውሬ ፡ ወዘመረግድ ፡ ዝንቱ ፡ ዘአሐዱ ፡ ጾታ ።

36:18  ወዘካልእ ፡ ጾታ ፡ በቀይሕ ፡ ያክንት ፡ ወበጸሊም ፡ ያክንት ፡ ወበጥልም ።

36:19  ወሣልስ ፡ ጾታ ፡ በሊጊር ፡ ወአካጤ ፡ ወከርከዴን ።

36:20  ወራብዕ ፡ ጾታ ፡ በዕንቍ ፡ ዘሕብረ ፡ ወርቅ ፡ ወበብረሌ ፡ ወኦኒክዮን ፤

36:21  ወዕውድ ፡ በወርቅ ፡ ወእሱር ፡ በወርቅ ።

36:22  ወውእቱ ፡ ዕንቍ ፡ በአስማቲሆሙ ፡ ለደቂቀ ፡ እስራኤል ፡ ዐሥሩ ፡ ወክልኤ ፡ በበአስማቲሆሙ ፡ ወግሉፋት ፡ ከመ ፡ ግልፈተ ፡ ማኅተም ፡ ለለአሐዱ ፡ በበስሙ ፡ ውስተ ፡ ፲ወ፪አንጋድ ።

36:23  ወገብሩ ፡ ሎቱ ፡ ዘፈረ ፡ ዘልብሰ ፡ ሎግዮን ፡ ፅፉ[ረ] ፡ ግብረተ ፡ ፍትሎ ፡ ወወርቅ ፡ ንጹሕ ።

36:24  ወገብሩ ፡ ክልኤ ፡ ከባበ ፡ ጥውዮ ፡ ወክልኤ ፡ ሕለቃተ ፡ ወርቅ ።

36:25  ወወደይዎ ፡ ለውእቶን ፡ ክልኤ ፡ ሕለቃተ ፡ ወርቅ ፡ ውስተ ፡ ክልኤሆሙ ፡ ጽነፊሁ ፡ ለልብሰ ፡ ሎግዮን ።

36:26  ወወደይዎ ፡ ለዝክቱ ፡ ፅፍሮ ፡ ወርቅ ፡ ላዕለ ፡ እልክቱ ፡ ክልኤ ፡ ሕለቃት ፡ እምክልኤሆሙ ፡ ገበዋቱ ፡ ለልብሰ ፡ ሎግዮን ፡ ወውስተ ፡ ክልኤሆሙ ፡ ማኅበርቱ ፡ ክልኤቱ ፡ ፅፍሮ ።

36:27  ወአንበርዎ ፡ ላዕለ ፡ እልክቱ ፡ ክልኤ ፡ ?ከባበ ፡ ጥውዮ ፡ ወወደይዎ ፡ መንገለ ፡ መታክፉ ፡ ለልብሰ ፡ መትከፍት ፡ አንጻረ ፡ ቅድመ ፡ ገጹ ።

36:28  ወገብሩ ፡ ክልኤ ፡ ሕለቃተ ፡ ዘወርቅ ፤

36:29  ወአንበርዎ ፡ መንገለ ፡ ክልኤሆን ፡ መታክፉ ፡ ለልብሰ ፡ መትከፍት ፡ እምታሕቱ ፡ መንገለ ፡ ገጹ ፡ ኀበ ፡ ማኅበርቱ ፡ መልዕልተ ፡ እንመቱ ፡ ለልብሰ ፡ መትከፍት ።

36:30  ወአስተአኀዞ ፡ ለልብሰ ፡ ሎግዮን ፡ በሕለቃት ፡ ዘላዕሌሁ ፡ ውስተ ፡ ሕለቃት ፡ ዘልብሰ ፡ መትከፍት ፡ ወእኁዛን ፡ በያክንቶሙ ፡ ወፅፉራን ፡ በእንመት ፡ ለልብሰ ፡ መትከፍት ፡ ከመ ፡ ኢይንጦልል ፡ ልብሰ ፡ ሎግዮን ፡ እምውስተ ፡ ልብሰ ፡ መትከፍት ፡ በከመ ፡ አዘዞ ፡ እግዚአብሔር ፡ ለሙሴ ።

36:31  ወገብሩ ፡ ልብሰ ፡ ዘስሙ ፡ ሂጶዲጤን ፡ መትሕተ ፡ ልብሰ ፡ መትከፍት ፡ ግብረ ፡ ማእነም ፡ ዘኵሉ ፡ በደረከኖ ፤

36:32  ወፋእሙ ፡ ለልብሰ ፡ ሂጶዲጤን ፡ በመንገለ ፡ ማእከሉ ፡ እኑ[ም] ፡ በፅፍሮ ፡ ወበዐይን ፡ ዘዖዶ ፡ ወሩኬብ ።

36:33  ወገብሩ ፡ ውስተ ፡ ዘባኑ ፡ ለልብሰ ፡ ሂጶዲጤን ፡ መትሕቱ ፡ ከመ ፡ ጽጌ ፡ ሮማን ፡ ሶበ ፡ ትጸጊ ፡ በደረከኖ ፡ ወበሕብረ ፡ ከብድ ፡ ወበለይ ፡ ፍቱል ፡ ወበሜላት ፡ ክዑብ ።

36:34  ወገብሩ ፡ ጸናጽለ ፡ ዘወርቅ ፡ ወወደይዎ ፡ ለጸናጽሉ ፡ ውስተ ፡ ጽነፊሁ ፡ ለልብሰ ፡ ሂጶዲጤን ፡ ውስተ ፡ ዐውዱ ፡ ማእከለ ፡ ዝክቱ ፡ ፍሬ ፡ ሮማን ፤

36:35  ጸነጽለተ ፡ ወርቅ ፡ ዐውዱ ፡ ወፍሬ ፡ ሮማን ፡ ውስተ ፡ ጽንፉ ፡ ለልብሰ ፡ ሂጶዲጤን ፡ ውስተ ፡ ዐውዱ ፡ በዘቦ ፡ ይገብሩ ፡ በከመ ፡ አዘዞ ፡ እግዚአብሔር ፡ ለሙሴ ።

36:36  ወገብሩ ፡ አልባሰ ፡ ዐፅፍ ፡ ዘሜላት ፡ ግብረ ፡ ማእነም ፡ ለአሮን ፡ ወለደቂቁ ፤ ወልብሰ ፡ ቂዳርስ ፡ ዘሜላት ፡ ወልብሰ ፡ ሚጥራ ፡ ዘሜላት ፡ ወልብሰ ፡ ቃስ ፡ ዘሜላት ፡ ክዑብ ፤

36:37  ወቅናታቲሆሙ ፡ ዘሜላት ፡ ወዘደረከኖ ፡ ወዘሕብረ ፡ ከብድ ፡ ወዘለይ ፡ ፍቱል ፡ ወዕሡቅ ፡ ግብሩ ፡ በከመ ፡ አዘዞ ፡ እግዚአብሔር ፡ ለሙሴ ።

36:38  ወገብሩ ፡ ቈጽለ ፡ ወርቅ ፡ ፍሉጥ ፡ ለመቅደስ ፡ እምወርቅ ፡ ንጹሕ ። ወገብሩ ፡ እምኔሁ ፡ መጽሐፈ ፡ ወመሰልዎ ፡ በማኅተ[ም] ፡ ቅድሳቱ ፡ ለእግዚአብሔር ። ወወደዩ ፡ ሎቱ ፡ ነፅፈ ፡ ዘደረከኖ ፡ ከመ ፡ ይንበር ፡ መልዕልቶ ፡ ለልብሰ ፡ ሚጥራ ።

Chapter 37

37:1  ወገብሩ ፡ ላቲ ፡ ለእንታክቲ ፡ ደብተራ ፡ ዐሠርተ ፡ ዐጸደ ።

37:2  ወለለ፩ዐጸድ ፡ ኑኁ ፡ ፳ወ፰በእመት ፡ ወለለ፩ዐጸድ ፡ ረሐቡ ፡ ርብዕ ፡ በእመት ።

37:3  ወገብሩ ፡ መንጦላዕተ ፡ ዘደረከኖ ፡ ወዘሕብረ ፡ ከብድ ፡ ወበለይ ፡ ፍቱል ፡ ወበሜላት ፡ ክዑብ ፡ ግብረ ፡ ማእነም ፡ ወመሰሉ ፡ ውስቴቱ ፡ ኬሩቤን ።

37:4  ወወደይዎ ፡ ውስተ ፡ አርባዕቱ ፡ አዕማድ ፡ ዘኢይነቅዝ ፡ ቅፉላት ፡ በወርቅ ፡ ወአርእስቲሆንሂ ፡ ዘወርቅ ፡ ወመካይዲሆን ፡ አርባዕቱ ፡ ዘብሩር ።

37:5  ወገብሩ ፡ መንጦላዕተ ፡ ኆኅት ፡ ዘደብተራ ፡ መርጡል ፡ በደረከኖ ፡ ወበሕብረ ፡ ከብድ ፡ ወበለይ ፡ ፍቱል ፡ ወበሜላት ፡ ክዑብ ፡ ግብረ ፡ ማእነም ፡ ወመሰልዎ ፡ ኬሩቤን ።

37:6  ወአዕማዲሁ ፡ ኀምስቱ ፡ ወሕለቃቲሆን ፡ ወአርእስቲሆን ፡ ወጥነፊሆን ፡ ለበጥዎ ፡ በወርቅ ፡ ወመካይዲሆን ፡ ኀምስቱ ፡ ዘብርት ።

37:7  ወገብሩ ፡ ዐጸደ ፡ ዘመንገለ ፡ አዜብ ፡ ወልብሰ ፡ ዐውደ ፡ ዐጸዱ ፡ ዘሜላት ፡ ክዑብ ፡ ምእት ፡ በእመት ።

37:8  ወአዕማዲሁ ፡ ፳ወመካይዲሆን ፡ ፳ዘብርት ።

37:9  ወመንገለ ፡ መስዕኒ ፡ ምእት ፡ እመት ፡ ወአዕማዲሆሙ ፡ ፳ወመካይዲሆን ፡ ፳ዘብርት ።

37:10  ወዐጸድኒ ፡ ዘመንገለ ፡ ባሕር ፡ ፶በእመት ፡ ውእቱ ፡ ወ፲አዕማዱ ፡ ወመካይዲሆን ፡ ዐሠርቱ ።

37:11  ወዐጸድኒ ፡ ዘመንገለ ፡ ጽባሕ ፡ ፶በእመት ፡ ውእቱ ።

37:12  ወልብሱ ፡ ዘዕሥር ፡ ወኅምስ ፡ በእመት ፡ ዘመንገለ ፡ አዜብ ፡ ወአዕማዲሆሙ ፡ ሠለስቱ ፡ ወመካይዲሆን ፡ ሠለስቱ ።

37:13  ወውስተ ፡ ዘባኑ ፡ ለካልእ ፡ እምለፌኒ ፡ ወእምለፌኒ ፡ በደርገ ፡ አንቀጸ ፡ ዐጸድ ፡ ወአዕጻዲሁ ፡ ዘዘዕሥር ፡ ወኅምስ ፡ በእመት ፡ ወአዕማዲሆሙ ፡ ፫ወመካይዲሆን ፡ ፫ ።

37:14  ወኵሉ ፡ አልባሰ ፡ ዐጸዱ ፡ ዘሜላት ፡ ክዑብ ።

37:15  ወመከየደ ፡ አዕማዲሆሙ ፡ ዘብርት ፡ ወመጥበቅተ ፡ አዕማዲሆሙ ፡ ዘብሩር ፡ ወአርእስቲሆን ፡ ቅፉል ፡ በብሩር ፡ ወአዕማዲሁኒ ፡ ቅፉል ፡ በብሩር ፡ ኵላ ፡ አዕማደ ፡ ዐጸዱ ።

37:16  ወክዳኑ ፡ ለአንቀጸ ፡ ዐጸድ ፡ ዕሡቅ ፡ በደረከኖ ፡ ወበሕብረ ፡ ከብድ ፡ ወበለይ ፡ ፍቱል ፡ ወበሜላት ፡ ክዑብ ፡ ፳በእመት ፡ ኑኁ ፡ ወረሐበ ፡ ግድሙ ፡ ኅምስ ፡ በእመት ፡ ወይትማሰል ፡ በአልባሰ ፡ ዐውደ ፡ ዐጸድ ።

37:17  ወአዕማዲሁ ፡ አርባዕቱ ፡ ወመካይዲሆን ፡ አርባዕቱ ፡ ዘብርት ፡ ወመዋድዲሆን ፡ ዘብሩር ፡ ወአርእስቲሆን ፡ ቅፉል ፡ በብሩር ፡ ወአዕማዲሁኒ ፡ ቅፉል ፡ በብሩር ።

37:18  ወኵሉ ፡ መታክልተ ፡ ዐጸድ ፡ ዘብርት ።

37:19  ወከመዝ ፡ ሥርዐቱ ፡ ለደብተራ ፡ መርጡል ፡ በከመ ፡ ተአዘዘ ፡ ሙሴ ፡ እምኀበ ፡ እግዚአብሔር ፡ ከመ ፡ ይኩኖሙ ፡ ግብሮሙ ፡ ለሌዋውያን ፡ ከመ ፡ አእመረ ፡ ይታ[ማ]ር ፡ ወልዱ ፡ ለአሮን ፡ ካህን ።

37:20  ወቤሴሌእል ፡ ዘኡሪ ፡ ዘነገደ ፡ ይሁዳ ፡ ገብሩ ፡ በከመ ፡ አዘዞ ፡ እግዚአብሔር ፡ ለሙሴ ፤

37:21  ወኤልያብ ፡ ዘአክሲማክ ፡ ዘነገደ ፡ ዳን ፡ ዘኮነ ፡ ሊቀ ፡ ኬነት ፡ ዘማእነም ፡ ወዘበመርፍእ ፡ ወዘበዐሥቅ ፡ ከመ ፡ ይእነም ፡ ዘበለይ ፡ ወዘበሜላት ።

Chapter 38

38:1  ወገብረ ፡ ቤሴሌእል ፡ ታቦተ ፤

38:2  ወቀፈላ ፡ በወርቅ ፡ ንጹሕ ፡ እምአፍአሃ ፡ ወእምውስጣ ፡ ወገብረ ፡ ተድባበ ፡ ዘወርቅ ፡ ዘየዐውዳ ።

38:3  ወሰበከ ፡ ላቲ ፡ ሕለቃተ ፡ ዘወርቅ ፡ አርባዕተ ፡ ለአርባዕቱ ፡ ገበዋቲሃ ፡ ለ፩ኅብር ፡ ክልኤቱ ፡ ወለ፩ኅብር ፡ ክልኤቱ ።

38:4  መኣኅዝተ ፡ በዘይእኅዝዋ ፡ ሶበ ፡ ያነሥእዋ ።

38:5  ወገብረ ፡ ምሥሃለ ፡ መልዕልተ ፡ ታቦት ፡ በወርቅ ፡ ንጹሕ ።

38:6  ወገብረ ፡ ክልኤተ ፡ ኬሩቤን ፡ ዘወርቅ ፤

38:7  ፩ኬሩቤን ፡ ውስተ ፡ ጽንፈ ፡ ምሥሃል ፡ ወካልእ ፡ ኬሩቤን ፡ ውስተ ፡ ካልእ ፡ ጽንፈ ፡ ምሥሃል ።

38:8  ወይጼልሉ ፡ በክነፈሆሙ ፡ ዲበ ፡ ምሥሃል ።

38:9  ወገብረ ፡ ማእደ ፡ እንተ ፡ ቅድሜሃ ፡ ትነብር ፡ በወርቅ ፡ ንጹሕ ።

38:10  ወሰበከ ፡ ላቲ ፡ አርባዕተ ፡ ሕለቃተ ፡ ዘወርቅ ፤ ክልኤ ፡ ሕለቃት ፡ ውስተ ፡ ፩ኅብር ፤ መኣኅዝተ ፡ በዘ ፡ ይእኅዝዋ ፡ ሶበ ፡ ያነሥእዋ ።

38:11  ወገብረ ፡ መጻውርተ ፡ ለታቦት ፡ ወለማእድ ፡ ወ[ቀፈ]ሎሙ ፡ በወርቅ ።

38:12  ወገብ[ረ] ፡ ንዋየ ፡ ዘማእድ ፡ መጻብኀ ፡ ወአጽሕለ ፡ ወመዳምኀ ፡ ወመዋጽሐ ፡ በዘ ፡ ያወጽሑ ፡ ቦቱ ፡ ዘወርቅ ።

38:13  ወገብረ ፡ መናረተ ፡ እንተ ፡ ታኀቱ ፡ እንተ ፡ ወርቅ ፤

38:14  ጽንዕተ ፡ ተቅዋመ ፡ ማእከለ ፡ ወአዕጹቀ ፡ ገበዋቲሃ ፤

38:15  ወእምውስተ ፡ አዕጹቂሃ ፡ ሠርፀ ፡ ይወፅእ ፡ ፫እምለፌ ፡ ወ፫እምለፌ ፡ ወይትማሰሉ ፡ ኵሎሙ ።

38:16  ወመኃትዊሆሙ ፡ ዲበ ፡ ርእሶሙ ፡ ወከባባቲሁኒ ፡ እምውስቴቱ ፡ ወመኣኅዝቲሁኒ ፡ እምውስቴቱ ፡ ከመ ፡ ይንበር ፡ መኃትው ፡ ላዕሌሆሙ ፡ ወመንበረ ፡ መኃትው ፡ መልዕልተ ፡ ኵሎሙ ፡ ዘዲቤሆሙ ፡ ወጽኑዕ ፡ ውእቱ ፡ ወኵሉ ፡ ዘወርቅ ።

38:17  ወሰብዑ ፡ መኃትዊሃ ፡ ዲቤሃ ፡ ዘወርቅ ፡ ወበዘያሤንዩሂ ፡ መኃትዊሃ ፡ ኵሉ ፡ ዘወርቅ ።

38:18  ወውእቱ ፡ ለአዕማድኒ ፡ ዘአቅፈሎን ፡ በብሩር ፡ ወሰበከ ፡ ለአዕማዲሃ ፡ ሕለቃተ ፡ ዘወርቅ ፡ ወለመናስግቲሃ ፡ ቀፈሎሙ ፡ በወርቅ ፡ ወአዕማድኒ ፡ ዘመንጦላዕት ፡ ቀፈሎን ፡ በወርቅ ፡ ወመዋድዲሆሙኒ ፡ ገብረ ፡ ዘወርቅ ።

38:19  ወውእቱ ፡ ዘገብረ ፡ ኊጻዳተ ፡ ደብተራ ፡ ዘወርቅ ፡ ወኊጻዳተ ፡ ዐጸድኒ ፡ ወኊጻድኒ ፡ ዘቦ ፡ ይስሕቡ ፡ መንጦላዕተ ፡ ዘላዕሉ ፡ ዘብርት ።

38:20  ወውእቱ ፡ ዘሰበከ ፡ አርእስተ ፡ አዕማድ ፡ ዘብሩር ፡ ወአርእስተ ፡ አዕማድ ፡ ዘብርት ፡ ለኆኅተ ፡ ደብተራ ፡ ወለአንቀጸ ፡ ዐጸድ ፡ ወመዋድደኒ ፡ ገብረ ፡ ዘብሩር ፡ ዘመልዕልተ ፡ አዕማድ ፡ [ወውእቱ ፡ ዘቀፈሎንሂ ፡ በብሩር ።]

38:21  ወውእቱ ፡ ዘገብረ ፡ መታክለ ፡ ደብተራ ፡ ወመታክልተ ፡ ዐጸድኒ ፡ ዘብርት ።

38:22  ወውእቱ ፡ ዘገብረ ፡ ምሥዋዐ ፡ ዘብርት ፡ እምውስተ ፡ መሳውዶሙ ፡ ዘብርት ፡ ለሰብእ ፡ እለ ፡ አበሱ ፡ ምስለ ፡ ማኅበር ፡ እለ ፡ ቆሬ ።

38:23  ወውእቱ ፡ [ዘገብረ ፡] ኵ[ሎ] ፡ ንዋ[የ] ፡ ዘምሥዋዕ ፡ መከየደ ፡ ወመስወደ ፡ እሳቱ ፡ ወፍያላቱ ፡ ወበዘያወጽኡ ፡ ሥጋ ፡ ዘብርት ።

38:24  ወውእቱ ፡ ዘገብረ ፡ ድዳተ ፡ ለምሥዋዕ ፡ [ግ]ብረ ፡ ሠቅሠቀ ፡ እስከ ፡ መንፈቁ ፡ እምታሕቱ ፡ ይረክብ ፡ እሳተ ፡ ወወደየ ፡ ሎቱ ፡ አርባዕተ ፡ ሕለቃተ ፡ እምአርባዕቱ ፡ ገበዋቲሁ ፡ ለምሥዋዕ ፡ ዘብርት ፡ መኣኅዝተ ፡ ለምጽዋራቲሁ ፡ ዘቦቱ ፡ ያነሥእዎ ፡ ለምሥዋዕ ።

38:25  ወውእቱ ፡ ዘገብረ ፡ ቅብአ ፡ ቅዱሰ ፡ ዘይትቀብኡ ፡ ወውእቱ ፡ ዘገብረ ፡ አፈዋተ ፡ ዕጣን ፡ በንጹሕ ፡ ግብረ ፡ መሐልል ።

38:26  ወውእቱ ፡ ዘገብረ ፡ ማዕከ[ከ] ፡ ዘብርት ፡ ወመንበሪሁኒ ፡ ዘብርት ፡ እምነ ፡ መጻህይዮን ፡ ለእለ ፡ [ጾማ ፡] በኀበ ፡ አንቀጸ ፡ ደብተራ ፡ ዘመርጡል ፡ በዕለተ ፡ ተከልዋ ።

38:27  ወገብሮ ፡ ለውእቱ ፡ ማዕከክ ፡ ከመ ፡ ይትኀፀቡ ፡ ውስቴቱ ፡ ሙሴ ፡ ወአሮን ፡ ወደቂቁ ፡ እደዊሆሙ ፡ ወእገሪሆሙ ፡ ሶበ ፡ ይበውኡ ፡ ውስተ ፡ ደብተራ ፡ ዘመርጡል ፡ ወሶበ ፡ የሐውሩ ፡ ኀበ ፡ ምሥዋዕ ፡ ለገቢር ፡ ወይትኀፀቡ ፡ ውስቴቱ ፡ በከመ ፡ አዘዞ ፡ እግዚአብሔር ፡ ለሙሴ ።

Chapter 39

39:1  ወኵሉ ፡ ወርቅ ፡ ዘተገብረ ፡ ለግብረ ፡ ቅዱሳን ፡ ወርቅ ፡ ዐሥራተ ፡ ዘያበውኡ ፡ ወኮነ ፡ ፳ወ፱መካልይ ፡ ወ፯፻ወ፴ሰቅል ፡ በሰቅለ ፡ ቅዱሳን ።

39:2  ወብሩርኒ ፡ ዘመባእ ፡ ዘእምኀበ ፡ እለ ፡ አስተፋቀዱ ፡ ዕደው ፡ እምውስተ ፡ ትዕይንት ፡ ምእት ፡ መካልይ ፡ ወ፲ወ፯፻ወ፸ወ፭በመድሎተ ፡ ሰቅል ፤ ወድሪክሜ ፡ አሐቲ ፡ እንተ ፡ ርእ[ስ] ፡ መንፈቁ ፡ ለሰቅል ፡ በሰቅለ ፡ ቅዱሳን ።

39:3  ኵሉ ፡ ዘሖረ ፡ ውስተ ፡ ፍቅድ ፡ እም፳ዓም ፡ ወላዕሉ ፡ እምኔሁ ፡ አከለ ፡ ስሳ ፡ እልፈ ፡ ወሠላሳ ፡ ምእተ ፡ ወኀምስተ ፡ ምእተ ፡ ወኅምሳ ።

39:4  ወተገብረ ፡ ዝክቱ ፡ ፻መካልይ ፡ ዘብሩር ፡ ውስተ ፡ ስብከተ ፡ አርእስተ ፡ አዕማድ ፡ ዘደብተራ ፡ ወውስተ ፡ አርእስተ ፡ አዕማድ ፡ ዘመንጦላዕት ፤

39:5  ፻መካልይ ፡ ለ፻አርእስት ፤ በበአሐቲ ፡ መክሊት ፡ ለለአሐቲ ፡ ርእስ ።

39:6  ወዝክቱ ፡ ዐሠርቱ ፡ ምእት ፡ ወሰባዕቱ ፡ ምእት ፡ ወሰብዓ ፡ ወኀምስቱ ፡ ሰቅል ፡ ገብርዎ ፡ ለመዋድደ ፡ አዕማድ ፡ ወለበጥዎን ፡ በወርቅ ፡ አርእስቲሆን ፡ ወአሰርገውዎን ።

39:7  ወአከለ ፡ ብርት ፡ ዘመባእ ፡ አርባዕቱ ፡ ምእት ፡ ወሰብዓ ፡ መካልይ ፡ ወዕሥራ ፡ ምእት ፡ ወአርባዕቱ ፡ ምእት ፡ ሰቅል ።

39:8  ወገብረ ፡ እምውስቴቱ ፡ መንበረ ፡ ኆኅት ፡ ዘደብተራ ፡ መርጡል ፤

39:9  ወመንበረ ፡ ደብተራ ፡ ዘዐውዳ ፡ ወመንበረ ፡ አንቀጽ ፡ ዘዐጸድ ፡ ወመታክልተ ፡ [ደብተራ ፡ ወመታክልተ ፡] ዐውደ ፡ ዐጸድ ፤

39:10  ወመሳውልተ ፡ ብርት ፡ ዘዐውደ ፡ ምሥዋዕ ፡ ወኵሉ ፡ ንዋየ ፡ ምሥዋዕ ፡ ወኵሉ ፡ መጋብርት ፡ ዘደብተራ ፡ መርጡል ።

39:11  ወገብሩ ፡ ደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ።

39:12  ወዘተርፈ ፡ ወርቅ ፡ ዘመባእ ፡ ገብርዎ ፡ ንዋየ ፡ በዘ ፡ ይገብሩ ፡ ቅድመ ፡ እግዚአብሔር ።

39:13  ወዘተርፈ ፡ ደረከኖ ፡ ወሕብረ ፡ ከብድ ፡ ወለይ ፡ ገብርዎ ፡ አልባሰ ፡ በዘይገብር ፡ አሮን ፡ ከመ ፡ ይግበር ፡ ቦሙ ፡ በውስተ ፡ መቅደስ ።

39:14  ወአምጽእዎ ፡ አልባሲሁ ፡ ኀበ ፡ ሙሴ ፡ ወደብተራሂ ፡ ወንዋያ ፡ ወመናስግቲሃ ፡ ወአዕማዲሃ ፡ ወመካይዲሃ ፤

39:15  ወታቦተ ፡ እንተ ፡ ትእዛዝ ፡ ወመጻውርቲሃ ፡ ወምሥዋዐኒ ፡ ወኵሉ ፡ ንዋዮ ፤

39:16  ወቅብአ ፡ ዘይትቀብኡ ፡ ወዕጣነ ፡ ዘየዐጥኑ ፡ ወተቅዋመ ፡ ማኅቶት ፡ ንጽሕት ፤

39:17  ወመኃትዊሃ ፡ ወመኃትው ፡ በዘ ፡ በቱ ፡ ያኀትው ፡ ወቅብአ ፡ ማኅቶት ፤ Exo 39:18ወማእደ ፡ ዘይሠርዑ ፡ ወኵሎ ፡ ንዋያ ፡ ወኅብስተኒ ፡ ዘይሠርዑ ፤

39:19  ወአልባሰ ፡ ቅድሳት ፡ ዘአሮን ፡ ወአልባሰ ፡ ደቂቁኒ ፡ ዘክህነቶሙ ፤

39:20  ወሰራዊተ ፡ ዐጸድ ፡ ወአዕማዲሁ ፡ ወመካይዲሁ ፡ ወመንጦላዕተ ፡ ኆኅተ ፡ ደብተራ ፡ ወዘአንቀጸ ፡ ዐጸድኒ ፤

39:21  ወኵሎ ፡ ንዋየ ፡ ደብተራ ፡ ወኵሎ ፡ መጋብርቲሃ ፡ ወአንትዕ[ተ] ፡ ዝማእሰ ፡ በግዕ ፡ ግቡረ ፡ አዲም ፡ ወመካድንተ ፡ ዘአምእስተ ፡ ምጺጺት ፡ ወመካድንተ ፡ ባዕድኒ ፡ ወመታክልተኒ ፡ ወኵሎ ፡ መጋብርተ ፡ ዘምግባረ ፡ ደብተራ ፡ ዘመርጡል ።

39:22  ወኵሎ ፡ ዘአዘዞ ፡ እግዚአብሔር ፡ ለሙሴ ፡ ከማሁ ፡ ገብሩ ፡ ደቂቀ ፡ እስራኤል ፡ ኵሎ ፡ ሥርዐቶ ።

39:23  ወርእየ ፡ ሙሴ ፡ ኵሎ ፡ ዘተገብረ ፡ ወገብ[ሩ] ፡ በከመ ፡ አዘዞ ፡ እግዚአብሔር ፡ ለሙሴ ፡ ከማሁ ፡ ተገብረ ፡ ወባረኮሙ ፡ ሙሴ ።

Chapter 40

40:1  ወተናገሮ ፡ እግዚአብሔር ፡ ለሙሴ ፡ ወይቤሎ ፤

40:2  አመ ፡ ርእሰ ፡ ሠርቅ ፡ ዘቀዳሚ ፡ ወርኅ ፡ ትተክላ ፡ ለደብተራ ፡ መርጡል ።

40:3  ወታነብ[ራ] ፡ ለታቦተ ፡ መርጡል ፡ ወትከድና ፡ ለታቦት ፡ በመንጦላዕት ።

40:4  ወታበውእ ፡ ማእደ ፡ ወትሠርዓ ፡ በሥርዐታ ፡ ወታበውእ ፡ መናረተ ፡ ወትሠርዕ ፡ መኃትዊሃ ።

40:5  ወታነብር ፡ ማዕጠንተ ፡ ዘወርቅ ፡ በዘየዐጥኑ ፡ ቅድመ ፡ ታቦት ፡ ዘመርጡል ፡ ወትወዲ ፡ መንጦላዕተ ፡ ውስተ ፡ ኆኅተ ፡ ደብተራ ፡ ዘመርጡል ።

40:6  ወምሥዋ[ዐ] ፡ ዘውስቴቱ ፡ ይሠውዑ ፡ ታነብር ፡ መንገለ ፡ ኆኅተ ፡ ደብተራ ፡ ዘመርጡል ፡ ወትተክል ፡ ዐውደ ፡ ዐጸዱ ።

40:7  ወትነሥእ ፡ ቅብአ ፡ ዘቦቱ ፡ ይትቀብኡ ፡ ወትቀብኣ ፡ ለደብተራ ፡ ወኵሎ ፡ ዘውስቴታ ፡ ወት[ቄድሳ] ፡ ወኵሎ ፡ ንዋያ ፡ ወትከውን ፡ ቅድስተ ።

40:8  ወትቀብእ ፡ ምሥዋዐ ፡ ዘውስቴቱ ፡ ይሠውዑ ፡ ወኵሎ ፡ ንዋዮ ።

40:9  ወትቄድሶ ፡ ለምሥዋዕ ፡ ወይከውን ፡ ውእቱ ፡ ምሥዋዕ ፡ ቅዱሰ ፡ ለቅዱሳን ።

40:10  ወታ[መ]ጽኦሙ ፡ ለአሮን ፡ ወለደቂቁ ፡ ኆኅተ ፡ ደብተራ ፡ ዘመርጡል ፡ ወተኀፅቦሙ ፡ በማይ ።

40:11  ወታለብሶ ፡ ለአሮን ፡ አልባሰ ፡ ቅድሳት ፡ ወትቀብኦ ፡ ወትቄድሶ ፡ ወይከውነኒ ፡ ካህነ ።

40:12  ወታመጽእ ፡ ደቂቆኒ ፡ ወታለብሶሙ ፡ ውእተ ፡ አልባሰ ።

40:13  ወትቀብኦሙ ፡ በከመ ፡ ቀባእከ ፡ አባሆሙ ፡ ወይከውኑኒ ፡ ካህናተ ፡ ወይከውኖሙ ፡ ዝንቱ ፡ ቅብአት ፡ ለክህነት ፡ በመዋዕሊሆሙ ፡ ለዓለም ።

40:14  ወገብረ ፡ ሙሴ ፡ ኵሉ ፡ ዘአዘዞ ፡ እግዚአብሔር ፡ ከማሁ ፡ ገብረ ።

40:15  ወኮነ ፡ በቀዳሚ ፡ ወርኅ ፡ በካልእት ፡ ዓመት ፡ እምዘ ፡ ወፅኡ ፡ እምግብጽ ፡ አመ ፡ ርእሳ ፡ ለሠርቀ ፡ ወርኅ ፡ ተከልዋ ፡ ለይእቲ ፡ ደብተራ ።

40:16  ወተከላ ፡ ሙሴ ፡ ለደብተራ ፡ ወአስተናበረ ፡ አርእስቲሃ ፡ ወወደየ ፡ መናስግቲሃ ፡ ወአቀመ ፡ አዕማዲሃ ።

40:17  ወሰፍሐ ፡ አዕጻዲሃ ፡ ለደብተራ ፡ ወወደየ ፡ መክደና ፡ ለደብተራ ፡ መልዕልቴሃ ፡ በከመ ፡ አዘዞ ፡ እግዚአብሔር ፡ ለሙሴ ።

40:18  ወነሥኦን ፡ ለመጻሕፍተ ፡ ትእዛዝ ፡ ወወደዮን ፡ ውስጠ ፡ ወአንበረ ፡ መጻውርቲሁኒ ፡ ኀበ ፡ ታቦት ።

40:19  ወአብኣ ፡ ለታቦት ፡ ውስተ ፡ ደብተራ ፡ ወወደየ ፡ መክደነ ፡ መንጦላዕተ ፡ ወሰወራ ፡ ለታቦተ ፡ መርጡል ፡ በከመ ፡ አዘዞ ፡ እግዚአብሔር ፡ ለሙሴ ።

40:20  ወአንበራ ፡ ለማእድ ፡ ውስተ ፡ ደብተራ ፡ ዘመርጡል ፡ መንገለ ፡ ገቦሃ ፡ ዘመስዕ ፡ ለደብተራ ፡ መርጡል ፡ እምአፍአሁ ፡ ለመንጦላዕተ ፡ ደብተራ ።

40:21  ወሠርዐ ፡ ውስቴታ ፡ ኅብስተ ፡ ዘቍርባን ፡ ቅድመ ፡ እግዚአብሔር ፡ በከመ ፡ አዘዞ ፡ እግዚአብሔር ፡ ለሙሴ ።

40:22  ወአንበራ ፡ ለመናረት ፡ ውስተ ፡ ደብተራ ፡ ዘመርጡል ፡ ውስተ ፡ ገቦሃ ፡ ዘመንገለ ፡ አዜብ ፡ ለደብተራ ።

40:23  ወሠርዐ ፡ መኃትዊሃ ፡ ቅድመ ፡ እግዚአብሔር ፡ በከመ ፡ አዘዞ ፡ እግዚአብሔር ፡ ለሙሴ ።

40:24  ወአንበረ ፡ ማዕጠንተ ፡ ዘወርቅ ፡ ውስተ ፡ ደብተራ ፡ ዘመርጡል ፡ ቅድመ ፡ መንጦላዕት ።

40:25  ወዐጠነ ፡ ውስቴታ ፡ ዕጣነ ፡ ዘገብረ ፡ በከመ ፡ አዘዞ ፡ እግዚአብሔር ፡ ለሙሴ ።

40:26  ወምሥዋዕሰ ፡ ዘውስቴቱ ፡ ይሠውዑ ፡ [አንበረ ፡] ኀበ ፡ ኆኅተ ፡ ደብተራ ፡ ዘመርጡል ።

40:27  ወተከለ ፡ ዐጸደ ፡ ዐውደ ፡ ደብተራ ፡ ወዐውደ ፡ ምሥዋዕ ፡ ወፈጸመ ፡ ሙሴ ፡ ኵሎ ፡ ግብሮ ።

40:28  ወከደና ፡ ደመና ፡ ለደብተራ ፡ መርጡል ፡ ወስብሐተ ፡ እግዚአብሔር ፡ ተመልአት ፡ ደብተራ ።

40:29  ወስእነ ፡ ሙሴ ፡ በዊአ ፡ ውስተ ፡ ደብተራ ፡ መርጡል ፡ እስመ ፡ ጸለለ ፡ ደመና ፡ ወስብሐተ ፡ እግዚአብሔር ፡ ተመልአት ፡ ደብተራ ።

40:30  ወእምከመ ፡ ሰሰለ ፡ ደመና ፡ እምላዕለ ፡ ደብተራ ፡ ይግዕዙ ፡ ደቂቀ ፡ እስራኤል ፡ በመንገዶሙ ።

40:31  ወእመሰ ፡ ኢሰሰለ ፡ ደመና ፡ ኢይግዕዙ ፡ እስከ ፡ አመ ፡ ይሴስል ፡ ደመና ።

40:32  እስመ ፡ ደመና ፡ ይነብር ፡ ላዕለ ፡ ደብተራ ፡ መዓልተ ፡ ወእሳት ፡ ላዕሌሃ ፡ ሌሊተ ፡ ቅድመ ፡ ኵሉ ፡ እስራኤል ፡ በኵልሄ ፡ ኀበ ፡ ግዕዙ ።ተፈጸመ ፡ ኦሪት ፡ ዘፀአት ።