Pohnpeian - Isaiah

Chapter 1

1:1  Audepen pwuhk wet, iei mahsen kei duwen Suda oh Serusalem me Koht ketin kasalehiong Aiseia nein Eimwos ni mwehin nanmwarkien Suda pwukat: Usaia, Sodam, Ahas, oh Esekaia.

1:2  KAUN-O ketin mahsanih, “Sampah oh pahnlahng, kumwa rong dahme I mahmahsanih! Seri kan me I apwalihadahr kahngohdiongielahr.

1:3  Kou men kin ese kaunepe, oh ahs pwul men kin ese wasa me eh soumas kin kamwenge ie, ahpw mahn pwukat loalokong sang nei aramas akan, Israel. Re sohte wehwehki mehkot.”

1:4  Kumwail wehi dipan ehu me melahr; kumwail ohlahr oh wialahr aramas suwed! Dipamwail kan keseikumwaildier! Kumwail keselahr KAUN-O, Koht sarawien Israel; kumwail sohpeisangehr.

1:5  Dahme kumwail kin pwurupwurehngki amwail kahngohdiong Koht? Ia duwe, kumwail men ale lokolok me laudsang met? Moangamwail unsek kenspesengehr, oh mohngiongimwail unsek oh mwahlielimwail unsek soumwahulahr.

1:6  Sang ni moangamwail lel ni nehmwail, sohte wasa kis mwahu mie, a ihte, ohla, mwoula, oh kens me pile kereker. Amwail ohla kan sohte kin ale kamwahu, de sohte kin ale wini, de kidikidpene.

1:7  Sapwamwailo tehnlahr, amwail kahnimw kan luldahr; nindokon amwail kilikilang, mehn liki kan kaundahr sapwamwailo oh kauwelahr mehkoaros.

1:8  Serusalem kelehpw me luhwehdi, kahnimw ehu me nektehn lohdi-rasehng kisin pelien ihmw kis me mi nan mwetin wain, de nan mwetin kiuhri, kahnimw ehu me eh imwintihti kan kapilpenehr.

1:9  Ma KAUN-O Wasa Lapalap, sohte ketin kapitala ekei aramas ako, Serusalem uhdahn kamwomwmwomwlahr douluhl, duwehte Sodom oh Komora.

1:10  Serusalem, noumw kaun akan oh aramas akan duwehte mehn Sodom oh Komora. Kumwail rong dahme KAUN-O mahmahsanihong kumwail. Kumwail tehk mwahu padahk en atail Koht.

1:11  KAUN-O ketin mahsanih, “Da katepehiong ie tohtohn amwail mehn meirong kan? I solahr kin kupwurperenki amwail meirong isihs en sihpw wol kan, oh meirong en noumwail kou wih kan; I solahr kin kupwurperenki ntahn noumwail kouwol kan, sihmpwul kan oh kuht kan.

1:12  Ni amwail kin kodohn wia amwail kaudok ong ie, ihs me padahkihong kumwail en wahdo soahng pwukat! Ihs me peki kumwail en pwurupwururseli nan ei Tehnpas Sarawio?

1:13  Sohte katepen amwail kin wiahiong ie meirong; I pwohsuwedki amwail kin isik warpwohmwahu. I solahr kak kupwuramwahwih amwail Sarawien Maram Pwul kan, rahnen Sapad kan, oh amwail pokon sarawi kan, pwe re saminkilahr dipamwail kan. I kin kalahdeki amwail wiewia suwed kan, oh pil kamadipw kan.

1:14  I pil kalahdeki amwail Sarawien Maram Pwul kan oh amwail rahn sarawi kan; re katoutowihielahr, I pwangahkidahr.

1:15  “Ni amwail pahn kapahwei pehmwail pwe kumwail en kapakap, I sohte pahn tehk kumwail. Mehnda ma amwail kapakap me tohto oh reirei, ahpw I sohte pahn karongei kumwail, pwe nta milahr ni pehmwail kan.

1:16  Kumwail kamwakeleikumwailda. Kumwail tokedihsang amwail wiewia suwed pwukat mwohn silangi. Kumwail tokedihsang amwail wia me suwed,

1:17  oh esehla wia me pwung. Ngoangki pwe pwuhng pahrek en mie-sewese irail kan me milahr pahn kehnaudek, kihong pwung en me sepwoupwou kan, oh doarehla liohdi kan.”

1:18  KAUN-O pil mahsanih, “Kumwail kohdo kitail kapwungala mahs ire pwukat. Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh. Mehnda ma dipamwail wiahla mwahi weitahta douluhl, ahpw kumwail pahn pwetepwetala duwehla wunen sihpw.

1:19  Ma kumwail pahn peikiong ie, eri, kumwail pahn tungoale reken wahnsapwamwail;

1:20  ahpw ma kumwail pahn kahng dukiong ie, eri, kumwail uhdahn pahn mehla. Ngehi, KAUN-O, me mahmahsen.

1:21  Kahnimw me kin loalopwoat mahso wialahr lih suwed men! Mahso aramas pwung tohr me kin kousoan ie, a met sounkam aramas tohr.

1:22  Serusalem, mahs ke duwehte silper, ahpw met solahr katepomw.

1:23  Omw kaun akan me kahngohdi oh kin kompoakepahnki sounpirap akan; irail koaros kin perenki ale kisakis ahnsou koaros oh kin ale pweipwei ni ahl sapwung. Re sohte kin doarehla me sepwoupwou kan nan mwoalen kopwung de rong en liohdi kan ar repenpwung.

1:24  Eri, rong dahme KAUN-O, Wasa Lapalahpie, Koht manaman en Israel, ketin mahmahsanih, “I pahn dupukohng kumwail, ei imwintihti kan, oh kumwail solahr pahn kansensuwedih ie.

1:25  I pahn kauwong kumwail limei kat; I pahn kamwakelehki omw silper samin kisiniei mwehl, oh kihsang rehmw omw samin koaros.

1:26  I pahn kihong uhk kaun ekei oh sounkaweid kei me duwehte me ke kin ahneki mahs. Eri, Serusalem pahn adanekihla kahnimw pwung, oh loalopwoat.”

1:27  Pwehki KAUN-O eh ketin pwung, e pahn ketin doarehla Serusalem oh towe kan koaros me kolulahr oh weliakapwalahr;

1:28  ahpw e pahn ketin kamwomwala koaros me kin wia dihp oh kahngohdiong ih; e pahn ketin kemehla koaros me kin kesehla ih.

1:29  Kumwail pahn sarohkihdi amwail kin pwongih tuhke kan oh wiahda amwail mwetuwel sarawi kan.

1:30  Pwe kumwail pahn duwehla tuhke ohk pwoat me teh kan mengidihsang, oh duwehla mwetuwel me sohte pile.

1:31  Nin duwen dihpw meng eh kin luluda sang ni kisin lepin semwut okohk kis, iei duwen ohl kehlail kan ar pahn mwomwkihla arail wiewia suwed kan, oh sohte emen me pahn kak en katokihedi kamwomwmwomwla wet.

Chapter 2

2:1  Mahsen me Koht ketikihong Aiseia, nein Eimwos, me pid duwen Suda oh Serusalem.

2:2  Ni rahn ekei me pahn kohdo, nahnao, wasa me Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng rehi,

2:3  oh towe kan pahn kin nda, “Nna, kitail kohdalahng pohn dohlen KAUN-O, nan Tehnpas Sarawien Koht en Israel. E ahpw pahn ketin kasalehiong kitail kupwure, pwe kitail en keid nan sapwellime ahl akan. Pwe sapwellimen KAUN-O padahk kin kohsang Serusalem, oh e kin ketin mahseniong sapwellime aramas akan sang Saion.”

2:4  E pahn ketin wia kopwung ong wehi laud kan me kin uhpene. Eri, re pahn wekidohng neirail kedlahs akan ong ni mehn deipwel, oh neirail ketieu kan ong ni naipokos. Sohte ehu wehi pahn pwurehng pelianda ehu wehi, de pil kaunopada nair sounpei kan ong mahwen.

2:5  Eri, kumwail kadaudok en Seikop kan, kumwail kohdo, kitail keid nan marain me KAUN-O kin ketikihong kitail!

2:6  Maing Koht, komw ketin likidmelielahr sapwellimomwi aramas akan, kadaudok en Seikop kan! Sahpwo direkilahr tiahk en wunahni me mehn Palimese oh Pilisdia kin wiewia. Aramas akan kin wiewia tiahk en mehn liki kan.

2:7  Sapwarailo direkilahr silper oh kohl, oh sohte me kak wadekada uwen tohtohn arail dipwisou kesempwal akan. Sapwarailo direkilahr oahs, oh wararail werennansapw en mahwen kan sohte kak wadawad.

2:8  Sapwarailo direkilahr dikedik en eni kan, oh re kin pwongih mehkan me pein pehrail kin wiahda.

2:9  Irail koaros pahn sarohdi oh namenekla. Maing KAUN, komw dehr ketin mahkohng irail!

2:10  Re pahn rukula nan pwoaren paip akan pohn dohl takain kan de weirada pwoahr nan pwehl pwe re en song tangasang engieng en KAUN-O oh rukusang sapwellime manaman oh lingan!

2:11  Rahn ehu pahn leledo me aklapalap en aramas pahn imwisekla oh pohnmwahso en aramas pahn mwomwla. Eri, KAUN-O kelehpw me kaping pahn kowohng.

2:12  Ni rahno KAUN-O, Wasa Lapalap, pahn ketin katikitikihala aramas koaros me ahneki manaman, me aklapalap oh pohnmwahso.

2:13  E pahn ketin kamwomwala tuhke sidar reirei kan en Lepanon oh tuhke ohk koaros nan wehin Pasan.

2:14  E pahn ketin kapatapatahla nahna laud akan oh kisin dohl akan,

2:15  wasahn doulik ile koaros, oh kelen mahwen kehlail koaros.

2:16  E pahn pil ketin kakihrala sohp me keieu laud oh lingan akan.

2:17  Aklapalap en aramas pahn imwisekla, oh pohnmwahsohn aramas pahn mwomwla. Dikedik en eni kan pahn sohrala douluhl, oh sapwellimen KAUN-O lingan kelehpw me pahn sansal ni rahno.

2:18  Aklapalap en aramas pahn imwisekla, oh pohnmwahsohn aramas pahn mwomwla. Dikedik en eni kan pahn sohrala douluhl, oh sapwellimen KAUN-O lingan kelehpw me pahn sansal ni rahno.

2:19  Aramas akan pahn rukula nan pwoaren paip akan pohn dohl takain kan de weirada pwoahr nan pwehl pwe re en tangasang engieng en KAUN-O oh rukusang sapwellime manaman oh lingan, ni eh pahn ketido pwehn ketin itikada sampah.

2:20  Ni rahno eh pahn leledo, re pahn kesehla dikedik en eni kohl oh silper kan me re wiadahr, oh keseirailla wasa me pwehk oh kelumwud kan mihmi ie.

2:21  Ni ahnsou me KAUN-O pahn ketido pwehn ketin itikada sampah, aramas akan pahn rukula nan pwoahr akan oh nan pwoaren paip akan pohn dohl takain kan, pwe re en song tangasang sapwellime engieng oh rukusang sapwellime manaman oh lingan.

2:22  Eri, dehr koapworopworki aramas akan. Pwe dahme re kak wia?

Chapter 3

3:1  Eri, KAUN-O Wasa Lapalap, nektehn ketikihsang nan Serusalem oh Suda mehkoaros oh aramas koaros me aramas akan kin koapworopworki. E pahn ketikihsang kanarail kisin mwenge oh nimarail pihl kan,

3:2  neirail aramas ndand oh sounpei kan, arail sounkopwung kan oh arail soukohp akan, neirail sounkosetipw oh me lapalap en wehi kan,

3:3  arail kaunen sounpei oh kaunen aramas akan, arail kaunen koperment oh koaros me kin doadoahngki tiahk en akmanaman pwe re en kaunda mwekid kan.

3:4  KAUN-O pahn ketin mweidohng pwutak pwulopwul soakohiek kan en kaunirailda.

3:5  Aramas koaros pahn widiwidingpene nanpwungarail. Me pwulopwul kan pahn sohla wauneki me mah kan, oh aramas soh katepe kan sohte pahn wauneki arail kaun akan.

3:6  Ahnsou ehu pahn kohdo me peneinei ehute pahn pilada emen sang nan eh peneineiohte oh ndahng, “Kilang, kowe kelehpw me mie omw likou, eri, wiahla at kaun ni ahnsou apwal wet.”

3:7  Ahpw e pahn sapeng, nda, “Soh! I sohte kak sewesei kumwail. Sohte kenei mwenge oh pil sohte ei likou. Kumwail dehr wiahkiniehla amwail kaun!”

3:8  Ei, Serusalem pahn ohla! Suda pahn mwerpeseng! Mehkoaros me re kin nda oh wia kin uhwong KAUN-O; re kasalehda ni sansal duwen ar mwamwahlki pein Koht.

3:9  Arail lamalam pirek kan pahn wia mehn kadehdehparail. Diparail kan me sansal duwehte me tohn Sodom wiadahr. Re pahn ohla, oh pein irail me kahredohng pohrail apwal wet.

3:10  Aramas pwung kan pahn pereperen, oh mehkoaros pahn pweida mwahu rehrail. Re pahn pereperenki wahn ar doadoahk kan.

3:11  Ahpw aramas suwed kan pahn ohla; dahme re wiahiong aramas teikan pahn uhd wiawihong irail.

3:12  Irail kan me kin kihda mwohni kapwalihalahr nei aramas akan, oh me re kin pweipwandohng kan kauniraildahr. Nei aramas ako, amwail kaun akan kaweid suwedihkumwaillahr, pwe kumwail en sehsehla ahl me kumwail en weidla ie.

3:13  KAUN-O ketin onopadahr pwe en wia sapwellime kopwung; e ketin onopadahr pwe en ketin kadeik sapwellime aramas akan.

3:14  KAUN-O pahn ketikidohr me mah kan oh kaun akan en sapwellime aramas akan pwe en ketin kadeik irail. E ketin wiahda iren kedip wet: “Kumwail pirapahla mwetin wain kan, oh nan imwamwail kan direkilahr mehkan me kumwail kihsangehr me semwehmwe kan.

3:15  Sohte amwail pwung en kauwehla nei aramas akan oh widinge me semwehmwe kan. Ngehi, KAUN-O, Wasa Lapalahpie, me mahmahsen.”

3:16  KAUN-O ketin mahsanih, “Kilang uwen aklapalap en lihen Serusalem kan! Re kin aluhwei mas ile. Re kin kalakala ahnsou koaros. Re kin kakahk tikitik kohwei, luwou kin wie sekesek ni nehrail kan.

3:17  Ahpw I pahn kaloke irail-I pahn koakoahsang pitenmoangarail kan pwe re en moangamadala.”

3:18  Rahn ehu pahn leledo me KAUN-O pahn ketikihsang lihen Serusalem kan mehkoaros me re kin pohnmwahsohki-kapwat akan me re kin kihong ni nehrail, ni moangarail, ni tepinwararail,

3:19  oh ni pehrail kan. E pahn ketikihsang arail koaduhpwel

3:20  oh arail lisoarop akan; luwou en akamanam me kin mi ni pehrail kan oh ni kumwutirail kan;

3:21  neirail rihng kan me mi ni sendinpehrail oh ni tumwarail kan;

3:22  arail likou reirei kaselel kan, likouli kan, likou puhp kan, oh neirail pilihs kan;

3:23  arail likoun liki kan, arail angkasi silik kan, oh silik oh koaduhpwel reirei me kin mi pohn moangarail kan.

3:24  Re pahn pwohsuwedla, re sohla pahn kapwohtik; re sohla pahn katengki kateng kaselel, re pahn katengki sahl sakanakan akan; pitenmoangarail kan sohla pahn kaselel, re pahn moangamadala; re sohla pahn likawih likou kaselel, re pahn likawih likou deipin; arail kaselel pahn wekidekiong ni mehkot kanamenek!

3:25  Ei, ohl akan en kahnimwo, ohl me keieu kehlail kan pahn kamakamala nan mahwen.

3:26  Ewen kelen kahnimwo pahn mwahiei oh sengiseng, oh pein kahnimwo pahn duwehla lih emen me kilisou oh mwomwohd nan pwehl.

Chapter 4

4:1  Ni ahnsowo eh pahn leledo, lih isimen pahn parokedi ohl emen oh ndahng, “Se kak pein kamwenge oh kalikawih kiht, ahpw menlau pwoudikinkitada, pwe se en dehr namenengkihla at sohte pwopwoud.”

4:2  Ahnsou ehu pahn kohdo me KAUN-O pahn ketin kupwurehda pwe kisin tuhke kan oh tuhke laud koaros nan sahpwo en reireila oh kaselella. Mehn Israel koaros me mourla pahn perenkihda oh pohnmwahsohkihda wahntuhke kan me pwelen sahpwo pahn kapwarehda.

4:3  Aramas koaros me pahn luhwehdi nan Serusalem, me Koht ketin piladahr pwe re en mourla, pahn adanekihla aramas sarawi.

4:4  Sang ni sapwellimen Kaun-o manaman, e pahn ketin kadeikada oh kamwakelehda wehio oh widensang dipen Serusalem oh nta me kerediongehr wasao.

4:5  Eri, KAUN-O pahn ketikihdo pelien depwek pali ni rahn oh ediniei oh kisiniei marain nipwong, pohn Nahna Saion oh pohn aramas koaros me pahn pokonpene wasao. Sapwellimen Koht lingan pahn pere oh sinsile kahnimwo pwon.

4:6  Sapwellime lingan pahn perehsang kahnimwo karakar en ketipin oh wiahkihla wasao wasa onepek mwahu, wasahn rukusang keteu oh melimel.

Chapter 5

5:1  Kumwail rong pwe I pahn koulkihong kumwail koul pwoatet, koul pwoat duwen en kompoakepahi men eh mwetin wain: Mie en kompoakepahio eh mwetin wain ehu pohn dohl pwelmwahu ehu.

5:2  E ahpw deipwelihada oh akerasang takai kan loale; e ahpw padokediong loale tuhkehn wain me keieu kaselel. E kauwada wasahn doulik ehu nanwerengeo, oh weirada pwoahr ehu wasahn tiak kreip kan. E ahpw kin kasikasik kreip kaselel sang ni tuhkehn wain kan, ahpw ihte me e dolungada, kreip karer kei.

5:3  Eri, kompoakepahio ahpw mahsanih, “Kumwail mehn Serusalem oh Suda kan, kumwail kapwungala nanpwungen ngehi oh ei mwetin waino.

5:4  Mie mehkot me I sapwungala oh sohte wiahiong ei mwetin waino? Dahme kahrehda wah kan katingki oh sohte mwahu nin duwen me I kasikasik?

5:5  “Eri met, I pahn ndaiong kumwail dahme I pahn wiahiong ei mwetin wainet: I pahn kihsang kelepe; I pahn kauwehla kehl kan, pwe mahn lawalo kan en kangala oh tiakpeseng.

5:6  I pahn mweidala pwe en wiahla nanwel, sohte me pahn mwatih de apwalih; dihpw suwed oh takatek kan pahn kadirehla. I pahn koasoanehdi pwe depwek kan en dehr kalamwuriheki kisin dingiding en pihl kis.”

5:7  Israel iei sapwellimen KAUN-O, Wasa Lapalahpie, mwetin wain; oh mehn Suda kan, iei sapwellime tuhkehn wain me e ketin padokedi. E ketin kasikasik sang rehrail tiahk mwahu, ahpw kamaramas me re kapwarehda. E ketin kasikasik sang rehrail wiewia pwung, ahpw soh, pwe ngilen me re kapwalihalahr kan me peipeidohng.

5:8  Meid suwediong kumwail! Kumwail pwaindahr ihmw oh sahpw tohto pwehn kapatahiong mehkan me kumwail ahnekier. Kereniong meteikan pahn sohla wasahn ar kousoan, oh kumwail pahn kelehpwkilahr sahpwo.

5:9  I rongehr KAUN-O Wasa Lapalap eh mahsanih, “Ihmw pwukat koaros, me kalaimwun oh kaselel pahn tehnla oh ohla.

5:10  Mwetin wain kan nan sahpw eiker limau pahn kihda kalon en wain limaute. Kapakap en weren tuhke eisek pahn kapwarehda kapakap en kohn ehute.”

5:11  Meid suwediong kumwail! Kumwail kin pirida nimenseng oh tapihada nim sakau, oh kin sakasakau lel nipwong.

5:12  Kumwail kin kesekesengki arp oh damporin oh keseng pepeuk, oh niminim wain ni amwail kamadipw kan. Ahpw kumwail sohte wehwehki dahme KAUN-O ketin wiewia,

5:13  eri, kumwail pahn wisikasang nin duwen aramas selidi kei. Amwail kaun akan pahn mehkihla duhpek, oh aramas teikan pahn mehkihla ar men nimpil.

5:14  Wasahn me melahr akan men kadalleiraillahr, oh ewe sarapesengier. E pahn kadallehla soupeidi kan en Serusalem iangahki pokon en aramas me katakatairong.

5:15  Aramas koaros pahn namenekla, oh koaros me aklapalap pahn aktikitikla.

5:16  Ahpw KAUN-O, Wasa Lapalap, pahn ketin kasalehda sapwellime roson ni eh pahn ketin wia dahme pwung, oh e pahn ketin kasalehda sapwellime sarawi ni eh pahn ketin kadeikada sapwellime aramas akan.

5:17  Sihmpwul kan pahn kangkang reh kan oh sihpw pwulopwul kan pahn kangkang kisin tuhke kan nan mohn kahnimw kan.

5:18  Meid suwediong kumwail! Kumwail solahr kak saledeksang nan dipamwail kan.

5:19  Kumwail pahn nda, “KAUN-O en ketin mwadangodo oh wiahla dahme e ketin mahsanih me e pahn wia, pwe kitail en kak kilang. Koht sarawien Israel en ketin kapwaiada sapwellime koasoandi kan; kitail en kilang dahme e ketin kupwukupwure.”

5:20  Meid suwediong kumwail! Kumwail kin kahdaneki me suwed me mwahu oh me mwahu me suwed. Kumwail wekidohng rotorot ni marain oh marain ong ni rotorot. Kumwail wekidala mehkot katik pwehn memla oh mehkot mem pwehn katikala.

5:21  Meid suwediong kumwail! Kumwail kin kosekose me kumwail me loalokong, uhdahn koahiek.

5:22  Meid suwediong kumwail! Kumwail kin ndandkihla amwail kamam sakau! Me kommwad oh sohte kin masak mehkot ni ahnsoun doaloapene sakau kehlail kan!

5:23  Ahpw kisin pweipwei sapwung tikitik kis kin kahrehiong kumwail en kasaledekihala me dipadahr akan, oh sohte mweidohng me mwakelekel kan en ale pwuhng.

5:24  Eri met, duwen dihpw meng eh kin mwasikala nan kisiniei, iei duwen kalowemwail pahn mwoasoahngotala oh amwail mpwek pahn mengila oh sohrala, pwehki amwail soikalahr dahme KAUN-O Wasa Lapalap, Koht sarawien Israel, ketin padahkihong kitail.

5:25  KAUN-O ketin engieng pahn sapwellime aramas akan, oh ketin kapalahr lime pwehn kaloke irail. Nahna kan pahn rerada, oh paliweren me melahr akan pahn engiengpene nan ahl akan duwehte kihd. Engieng en KAUN-O sohte pahn tokedi, ahpw e pahn ketin kapahweite nin lime pwehn kalokaloke irail.

5:26  KAUN-O pahn ketin wiahda kilel ehu, kilel en eh pahn ketin malipe wehi doh ieu. E pahn ketin malipehki kapitie pwe re en patohdo sang ni imwin sampah. Oh iet irail samwodohr, wie pipihr kohdo.

5:27  Sohte emen rehrail me pwangada; sohte emen rehrail me dipekelekel. Re sohte mwahn lisoi de meirla. Sohte ehu kateng me mwer; sohte apwoat selin ar suht me ohla.

5:28  Neirail arep kan me keng, oh neirail kesik ketieu kan onopadahngehr en kesik. Pahnnehn neirail oahs akan kehlail duwehte takai, oh daiahn wararail werennansapw en mahwen kan marahra duwehte kisinieng.

5:29  Sounpei kan ngiringir duwehte laion kan me ahpwtehn kemehla mahn emen oh weuwalahng wasa me sohte emen kak en kihsang irail.

5:30  Ni rahno eh pahn leledo, re pahn ngiringir pohn Israel ni ngihl laud duwehte ngilen madau. Kitail kilang mahs wehiet! Rotorot oh kapwunod! Rotorot kadallelahr marain.

Chapter 6

6:1  Ni sounpar me Nanmwarki Usaia pwoula, I kilangada Kaun-o. E ket nan mwoale ile ieu, sapwellime likou ahpw kadirehla Tehnpas Sarawio.

6:2  Mwohmw mpwumpwul kei ahpw uh kapilpene, emenemen irail ahneki pehnpihr weneu: riau mehn koaduhpwaldi masarail kan, riau mehn kidimpene paliwararail kan, a riau arail mehn pihr.

6:3  Re ahpw kin kokoulki koul pwoatet: “Sarawi, sarawi, sarawi! KAUN-O, Wasa Lapalahpie, me sarawi! Sampah pwon direkilahr sapwellime lingaling.”

6:4  Ngilarail kan ahpw itikada poahsoan en Tehnpas Sarawio, oh ediniei kadirehla nan Tehnpas Sarawio.

6:5  I ahpw patohwan, “Solahr ei koapworopwor! I rialahr pwe ei lokaia koaros me samin, oh I kin mihmi nanpwungen aramas me au samin; ahpw mesei kilangehr Nanmwarkio, KAUN-O, Wasa Lapalahpie.”

6:6  Emen mwohmw mpwumpwul ko eri pihrdohng ie, wa mwoalus ngkingken ehu me e tipwahsang pohn pei sarawio.

6:7  Ih eri sairki eweiet mwoaluso, ketihtihki, “Pwehki met eh sairehr kilin ewomwen, omw sapwung kan pahn sohrasanguhkehr, oh dipomw kan pahn lapwadahr.”

6:8  Ngehi eri rongada kapitien Kaun-o me mahsanih, “Ihs me I pahn kadarala, oh ihs me pahn wia atail meninkeder?” I ahpw sapeng, patohwan, “Iet ngehi, Maing, komwi ketin poaroneiehla.”

6:9  Ih eri mahsanihong ie I en patohla oh padahkihong aramas akan duwen mahsen pwoatet: “Mehnda ma kumwail rong kanahieng, ahpw kumwail sohte pahn dehdehki; mehnda ma kumwail pahn kilang mwahu, ahpw kumwail sohte pahn ese dahme wiewiawi.”

6:10  E pil mahsanihong ie, “Ke pahn kakeptakaila kapehd en aramas pwukat, kaponehla salengarail kan, oh karotongehla masarail kan; pwe re dehr kilang, de rong, de dehdehki. Pwe ma re kilang de rong de dehdehki, re kakete sohpeidohng ie oh ale kamwahuparail.”

6:11  Ngehi eri patohwan, kalelapak, “Maing Kaun, ia erein met eh pahn wiawi?” A e ahpw mahsanih, “Kahnimw kan lao pahn ohla oh sohla towe-lao ihmw kan pahn tehnla-lao sahpwo pahn wiahla sapwtehn ehu.

6:12  I pahn kadohwanewei aramas pwukat pwe sahpwo pwon en tehnla douluhl.

6:13  Mehnda ma eisek kis ehun aramas pahn luhwehdi nan sahpwo, ahpw irail pil pahn iang mwomwla. Re pahn rasehng tuken tuhke pwoat.” (Tuken tuhke pwoatet kasalehda tepida kapw en sapwellimen Koht aramas akan.)

Chapter 7

7:1  Ni mwehin Nanmwarki Ahas, nein Sodam, Ahas pahpa kahlapki Usaia, mahwen ahpw wiawi. Resin, nanmwarki en Siria, oh Peka, nein Remalaia, nanmwarkien Israel, ira mahweniong Serusalem; ira ahpw sohte kak kalowehdi.

7:2  Ni nanmwarkien Suda eh karongehda me karis en Siria lelehr nan wehin Israel, ih oh sapwellime aramas koaros ahpw rerrerki ar masepwehkada, duwehte kisin tuhkehn nan kisinieng.

7:3  KAUN-O eri mahsanihong Aiseia, “Kohwei, kowe oh noumw pwutak Sear Sasup, . kumwa kohwei oh tuhwong Nanmwarki Ahas. Kumwa pahn tuhwong nanial wasa me sounwia likou kan kin doadoahk ie, ni imwin warawar me uhdihdo sang ni lehn poweo.

7:4  Ke ahpw ndaiong Ahas en mwasamwasahn, meleilei, oh en dehr masepwehk de nan kapehd tikitikla. Pwe engieng en Nanmwarki Resin oh mehn Siria kan, oh engieng en Nanmwarki Peka, sohte keper sang ediniei sang ni tuken tuhke riapwoat me ngkingken.

7:5  Pwe mehn Siria oh Israel, iangahki nanmwarkien Israel, irail inoukipene

7:6  pwe irail en kohla pelianda Suda oh kauwehla, oh itonehng mehn Suda kan re en iangirailla; re ahpw pahn kasapwilada nein Tapeel pwutako, pwe en wiahla nanmwarki.

7:7  “Ahpw ngehi, KAUN-O, mahsanih me met sohte pahn wiawi, e sohte pahn pweida;

7:8  pwe Siria kin koapworopworki Damaskus, oh Damaskus kin koapworopworki Nanmwarki Resin, ahpw nanmwarki Resin me luwet. Oh mwurin sounpar 65 Israel pahn mwomwla, sohla wia wehi ehu.

7:9  Pwe Israel kin koapworopworki kahnimw Sameria, oh Sameria kin koapworopworki Nanmwarki Peka, ahpw Nanmwarki Peka me luwet. “Ma kumwail sohte pahn pwoson, kumwail sohte pahn pweida.”

7:10  KAUN-O ahpw pwurehng mahsanihong Ahas,

7:11  “Peki kilel ehu sang rehn KAUN-O omw Koht; mehnda ma sang wasa loal en wasahn me melahr akan de sang nanleng wasa ileilehie.”

7:12  Ahas ahpw sapeng, patohwan, “I sohte pahn peki. I sohte pahn kasongosonge KAUN-O.”

7:13  Aiseia eri patohwan, “Eri, kumwail kadaudok en Nanmwarki Depit, kumwail karonge mahs. Kumwail sohte itarki amwail katikitikihalahr en aramas akan ar kanengamah? Kumwail pil men kasongosonge sapwellimen Koht kanengamah?

7:14  Eri, pein Kaun-o pahn ketikihong kumwail ehu kilelen. Peinakapw emen mie me liseiandahr. E pahn naitikihada nah pwutak emen, oh e pahn kamwarehki ‘Emanuel.’

7:15  Ni ahnsou me serio pahn esehla pein pilada dahme mwahu oh suwed, e pahn kin kangkang pwete oh sukehn loangalap.

7:16  Pwe mwohn ahnsou me serio pahn esehla pilada dahme mwahu oh suwed, sapwen nanmwarki riemeno me ke masak pahn tehnla.

7:17  “KAUN-O pahn ketikidohng pohmwail, oh pohn noumwail aramas akan, oh pohn peneinei en nanmwarkio, soangen rahn apwal ekei me suwed sang ni ahnsou me wehin Israel tohrohrala sang Suda-e pahn ketikihdo nanmwarkien Asiria!

7:18  “Ni ahnsowo, KAUN-O pahn ketin malipehdo mehn Isip kan, rasehng loahng kan sang nan kahng en pillap doh kan me kuspeneng nan Pillap Nail, oh mehn Asiria kan pahn kohdo rasehng loangalap akan.

7:19  Irail koaros pahn kohdo oh audehla nan wahu loal kan oh nan poaren paip kan, oh re pahn audehla wasa me tuhke tekatek kan mie oh nan sahpw mwahu kan.

7:20  “Ni ahnsowo, KAUN-O pahn ketin malipehdo sounseisei men sang palio Iupreitis, iei nanmwarkien Asiria, me pahn koakoahsang pitenmoangamwail oh wunen paliwaramwail, e pahn pil koakoahsang amwail alis kan.

7:21  “Ni ahnsowo, mehnda ma ohl emen pahn komourala koupwul tehmen oh kuht riemente,

7:22  uwen milik pwukat sang rehn mahn pwukat pahn itarohng eh anahn akan. Pwe koaros me pahn luhwehdi nan sahpwo pahn kin tungoale pwete oh sukehn loangalap.

7:23  Ni ahnsowo, mwetin wain kaselel kan, me ehuehu mwaht tuhkehn wain kid mi loale oh ehu mwetin wain konehng pweipweiki mwohni silper kid, pahn dipwidipwkihla tuhke tekatek oh dihpw suwed.

7:24  Aramas akan pahn kin kohla wasa pwuko, wa neirail kesik ketieu kan pwe re en kesik men. Eri, sahpwo pwon pahn diren dihpw suwed oh tekatek.

7:25  Dohl koaros me wahnsahpw akan poadidier ie mahs pahn dipwidipwkihla tuhke tekatek kahrehda sohla me pahn kohla wasa pwuko. Wasa pwukat pahn wiahla en kou kan wasahn mwenge, oh en sihpw kan wasahn kohkohseli.”

Chapter 8

8:1  Eri, KAUN-O ahpw mahsanihong ie, “Ale ehu pelien doaropwe laud oh ntingihediong loale ni nting dehde: ‘Pitipit en Kul, Pitipit en Adihada.’

8:2  Ke pahn ale sounkadehde koahiek riemen, iei samworo Uraia oh Sekaraia, nein Seperekaia.”

8:3  Eri, mwurin ekis ahnsou ei pwoud liseianda oh naitikihada pwutak emen. Eri, KAUN-O ahpw mahsanihong ie, “Kihong ede ‘Pitipit en Kul-Pitipit en Adihada.’

8:4  Pwe mwohn kisin pwutako eh pahn esehla nda ‘Ipa’ oh ‘Ino,’ nanmwarkien Asiria pahn kulihasang dipwisou koaros en Damaskus oh e pahn adihasang kepwe koaros en Sameria.”

8:5  KAUN-O ahpw ketin pwurehng mahsanihong ie,

8:6  “Pwehki aramas pwukat ar soikalahr Piletik Siloa . me kin pwilipwil nan Saion, oh rerrerki ar masak Nanmwarki Resin oh Nanmwarki Peka,

8:7  met kahredahr ngehi, Kaun-o, pahn kahrehdo nanmwarkien Asiria iangahki sapwellime karis kan, pwe en mahweniong Suda. Irail pahn kohdo, rasehng ahd kehlail en Pillap Iupreitis ni eh kin lapakehda oh kaduhdi wasa koaros ni keile kan.

8:8  Irail ahpw pahn pwillahng nan Suda nan lapake me pahn kohda lel ni tepinweren aramas oh kaduhala mehkoaros. Koht kin ketiket rehtail! Roson en lime ko pahn doandoare sapwatail.

8:9  Kumwail wehi kan, kumwail pokonpene ni amwail masepwehk. Kumwail rong, kumwail sahpw doh kan koaros, kumwail kaunopada amwail tehtehn mahwen nan amwail masepwehk. Ei, kumwail kaunopada amwail tehtehn mahwen nan amwail masepwehk.

8:10  Kumwail kak koasoanehdi amwail koasoandi kan, ahpw re sohte pahn pweida. Kumwail kak wie koasoakoasoi, ahpw sohte katepe, pwe Koht kin ketiket reht.

8:11  KAUN-O ketin mahsanihong ie ni sapwellime roson lapalahpie oh ketin kehkehlingkihong ie I en dehr idawehn elen aramas pwukat. E ahpw mahsanih,

8:12  “Ke dehr iang irail nan arail koasoandi kan; ke dehr masak mehkan me re kin masak.

8:13  Tamataman me ngehi, KAUN-O, Wasa Lapalahpie, me sarawi, ngehite me ke pahn lemmwiki.

8:14  Pwehki ei sarawi kowahlahpie, I wialahr takain kadipekelekel oh lidip ehu me pahn lidipihedi tohn wehin Suda oh Israel, iangahki tohn Serusalem.

8:15  Me tohto pahn dipekelekel, pwupwudi oh ohla. Re pahn lidipdi oh lohdi.”

8:16  Kumwail, nei tohnpadahk kan pahn sinsile oh kolokol mahsen kan me Koht ketikihong ie.

8:17  KAUN-O ketin karirihala pein ih sang sapwellime aramas akan, ahpw I pahn kasikasik oh awiawih.

8:18  Iet ngehi oh seri kan me KAUN-O ketikihong ie. Iei kiht kilel kei oh sansal mehlel kei ong mehn Israel sang rehn KAUN-O, Wasa Lapalahpie, me kin ket nan mwoale, Nahna Saion.

8:19  Aramas akan pahn ndahng kumwail en kohwei oh kalelapak rehn sounwunani kan oh rehn sounketieni kan me kin wedewedei kemehn kouruhr. Re kin nda, “E konehng aramas en kalelapak rehn ngehn kan, oh ale kaweid rehn me melahr akan pwehn sewese me momour.”

8:20  A kumwail pahn sapengkin irail, “Kumwail rong dahme KAUN-O ketin padapadahkihong kumwail! Kumwail dehr rong sounketieni, pwe ar koasoi kan sohte kak sewese kumwail.”

8:21  Mehn Israel akan pahn kohkohseli nan sahpwo, re pahn pwupwudi oh duhpekla, oh ni ar pahn duhpekla, re pahn lingeringerda oh keriahla ar nanmwarki oh ar Koht. Mwehin ele re pahn saradalahng pahnlahng

8:22  de kilengdiong nanpwel, ahpw sohte mehkot me re pahn kilangada pwe ihte kahpwal oh rotorot, rotorot kamasepwehk ehu me pahn idawehnirailla. Sohte ahl ehu me re pahn kak pitkihsang nan soangen ahnsou apwal wet.

Chapter 9

9:1  Sapwen kadaudok en Sepulon oh Napdali sarohdier ahnsou ehu, ahpw ni ahnsou kohkohdo sahpw pwukat pahn waunla, sang ni Sehd Mediderenien lelahng sahpw palio Pillap Sordan ni palimese, iangahki Kalili wasa me mehn liki kan kin koukousoan ie.

9:2  Aramas akan me weweid nan rotorot kilangehr marain lapalap ehu. Marain ehu dakeradahr irail kan me kin mihmi nan sapwen seukoapworopwor.

9:3  Maing at Kaun, komw ketin kalaudelahr ar peren, oh kadirehkinirailla peren mwuledek. Re kin pereperenki wiepen nin limomwi kan, duwehte aramas akan me kin pereperenki ar kin dolung wahnsahpw, de peren en irail kan me kin nehkpeseng nanpwungarail dipwisou kan me lohdi nan mahwen;

9:4  pwehki omwi ketin kauwehla mehn wisik me katoutowihiraillahr, oh mete mehn wokih pwopwerail kan. Komw ketin kalowedier wehio me kin sakosakone sapwellimomwi aramas akan, duwehte omwi ketin kalowedier karis en Midian mahso.

9:5  Pwe en sounpei kan ar suht koaros, oh ar likou koaros me saminkilahr nta, pahn mwomwkihla kisiniei.

9:6  Kisin seri kis ipwidiongkitailehr! Neitail pwutak emen kohiengkitailehr! Oh e pahn ketin wiahla atail kaun. E pahn mwarenki, “Sounkaweid Kupwurokong,” “Koht, Wasa Lapalahpie,” “Sahm Poatopoat,” “Nanmwarkien Popohl.”

9:7  Sapwellime manaman pahn wie lapalapala, oh popohl pahn poatopoat nan sapwellime wehi. E pahn ketin kaunda wasa nin duwen kadaudok en Nanmwarki Depit, oh sapwellime manaman pahn poahsoankihda pwung oh pwuhng pahrek, sang met oh pil kohkohlahte. KAUN-O, Wasa Lapalahpie, ketin ngoangki kowahlap mepwukat koaros en pweida.

9:8  Kaun-o ahpw ketin wia kadeikepen wehin Israel, ong kadaudok en Seikop kan.

9:9  Mehn Israel koaros, koaros me kin kousoan nan kahnimw en Sameria, pahn ese me ih me ketin wiadahr met. Eri met, re aklapalapalahr oh pohnmwahsolahr. Re kin nda,

9:10  “Ihmw kan me wiawihkihda takai pwehl kan pwupwudier, ahpw kitail pahn onehkihda sapahl takai kehlail kan. Tuhke sikamor kan mehn wia lohlo kan paldihsangehr, eri, kitail pahn uhd wiliankihdi tuhke sidar keieu kaselel kan.”

9:11  KAUN-O ketin kamwakidadahr arail imwintihti kan pwe re en mahweniong irail.

9:12  Siria ni palimese oh Pilisdia ni palikapi sarapesengier pwe ira en kadallehla Israel. Eri, sapwelllimen KAUN-O engieng saikinte tokedi; e ketin kapakapahweite lime pwehn kaloke irail.

9:13  Mehn Israel saikinte koluhla; mehndahte duwen KAUN-O, Wasa Lapalap, eh ketin kaloke irail, re saikinte sohpeiong ih.

9:14  Ni rahnteieu me KAUN-O pahn ketin kaloke kaun akan en Israel oh towe kan; e pahn ketin lupukasang moangarail oh pwadaikirail kan.

9:15  Me mah oh waun kan me iei moangarail-oh pwadaikirail iei soukohp kan me kin wia padahk likamw!

9:16  Irail kan me kin kahluwa aramas pwukat kahluwaiong irail nan ahl sapwung oh kapingirailda douluhl.

9:17  Oh Kaun-o sohte pahn ketin mweidohng emen me pwulopwul pwukat en pitla, oh e sohte pahn ketin kupwur mahkohng emen liohdi pwukat oh seri sepwoupwou kan, pwehki aramas koaros solahr ar koht oh suwedlahr oh mehkoaros me re kin nda kin suwed. Eri, sapwellimen KAUN-O engieng saikinte tokedi; e pahn ketin kapakapahweite nin lime pwehn kaloke irail.

9:18  Suwedlahn aramas wie lullul rasehng kisiniei ehu me kin kamwomwala kisin dihpw kan oh dihpw tekatek kan. E luluda rasehng luludahn kisiniei nanwel me uhr en ediniei kin kohda sang ie.

9:19  Pwehki KAUN-O, Wasa Lapalap, ketin engiengdahr, sapwellime kalokolok luluda duwehte kisiniei ehu wasa koaros nan sahpwo pwon oh kamwomwala aramas akan, oh emenemen pahn anahne doare pein ih.

9:20  Wasa koaros nan sahpwo aramas kin poarseli oh kangala soangen mwenge koaros me re kin diar, ahpw re sohte kin itarki. Re pil kin kangala pein neirail seri kan!

9:21  Mehn Manase oh Epraim mahwenpene nanpwungarail, oh pil ehupene mahweniong Suda. Eri, sapwellimen KAUN-O engieng saikinte tokedi; e ketin kapakapahweite nin lime pwehn kaloke irail.

Chapter 10

10:1  Meid suwediong kumwail! Kumwail kin wiahda kosonned sapwung me kin kapwalihala nei aramas akan.

10:2  Kumwail ahpw kin irehdihsang me semwehmwe kan nan ar pwuhng. Met iei duwen amwail kin adihasang dipwisou kan me en liohdi oh me sepwopwou kan.

10:3  Dahme kumwail pahn wia ma Koht pahn ketin kalokei kumwail? Dahme kumwail pahn wia ma e pahn ketikihdo kahpwal sang nan wehi doh ieu? Ia wasa me kumwail pahn tangala ie pwe kumwail en rapahki sawas? Ia wasa me kumwail pahn ekihla ie amwail reken kepwe kan?

10:4  Kumwail pahn mehla nan mahwen de wisiksang nin duwen aramas selidi kei. Eri, sapwellimen KAUN-O engieng saikinte tokedi; e ketin kapakapahweite nin lime pwehn kaloke irail.

10:5  KAUN-O ketin mahsanih, “Asiria! I doadoahngki Asiria duwehte padda ehu pwe I en kalokehki irail kan me I engieng pah.

10:6  I kadaralahr Asiria pwehn mahweniong wehi ehu me sohte ar koht, aramas ekei me kahredahr ei engieng. I kadarirailla pwe re en kulihasang oh pirapahsang arail dipwisou kan oh tiakedi aramas akan rasehng pwelpar nanial akan.”

10:7  Ahpw pein nanmwarki lapalap en Asiria kupwukupwure koasoandi suwed ong irail. E kupwuredahr me e pahn kamwomwala wehi tohto.

10:8  E suweiki, mahsanih, “Emenemen nei kaunen sounpei lapalap akan iei nanmwarki men!

10:9  I kalowedier kahnimw kan en Kalno oh Karkemis, kahnimw kan en Amad oh Arpad. I kalowedier Sameria oh Damaskus.

10:10  I pil lella nan wehi pwuko oh kaloke irail kan me kin pwongih dikedik en eni kan, dikedik en eni me tohtohsang nein mehn Sameria oh Serusalem.

10:11  I kamwomwalahr Sameria oh eh dikedik en eni kan koaros, oh I pil pahn wiahiong Serusalem oh sansal likamw akan me re kin kaudokiong wasao.”

10:12  Ahpw Kaun-o ketin mahsanih, “Ni ei pahn kanekehla dahme I wiewia pohn Nahna Saion oh nan Serusalem, I pahn kalokehki nanmwarki lapalap en Asiria eh lokaiahn suwei oh pohnmwahso koaros.”

10:13  Nanmwarki lapalap en Asiria suweiki, mahsanih, “Ngehi me pein wiadahr mepwukat. I me kehlail oh loalokong oh koahiek. I kiedpesengier irepen wehi kan oh kihsang arail dipwisou kan. I tiakpesengier aramas akan me kin kousoan wasa pwuko rasehng kouwol men.

10:14  Wehi kan en sampah rasehng pesen menpihr ehu, oh I rikpene arail reken kepwe kan rasehng aramas ar kin rikpene kutohr en menpihr kan. Sohte mwahn menpihr men kamwakid eh pehnpihr pwehn karawankin ie; sohte kisin menpihr kis sarapeseng pwehn wering ie!”

10:15  Ahpw KAUN-O ketin mahsanih, “Kakete sile pwoat en nda me e kehlail sang aramas meno me wie doadoahngki? Ia duwe, rasaras kakete kesempwal sang aramas meno me wie rasaraski? Sohte padda pwoat kin pwekada aramas emen; a aramas me kin pwekada padda.”

10:16  KAUN-O, Wasa Lapalap, pahn ketin kadarodo soumwahu pwehn ketin kalokehki irail kan me medkilahr kisin tungoal mwahu kan. Kisiniei pahn wie lullul nan paliwararail kan sohte tokedi.

10:17  Koht, marain en Israel, pahn wiahla kisiniei. Koht sarawien Israel pahn ketin luluda, me ni rahnteieu pahn kamwasikahla mehkoaros, pil iangahki kisin tuhke oh tuhke tekatek kan.

10:18  Nanwel me tuhke tohto mie oh mwaht akan pahn mwomwla douluhl, duwehte soumwahu laud me kin kemehla aramas emen.

10:19  Tuhke malaulau pahn luhwehdi, me seri men pil pahn kakete wadekada.

10:20  Ahnsou ehu kohkohdo me mehn Israel ko me mourla pahn sohla koapworopworki wehio me kereniong kamwomwirailla. Re pahn uhdahn likihala KAUN-O, Koht sarawien Israel ni mehlel.

10:21  Me malaulau rehn mehn Israel kan me pahn sapahldohng arail Koht me manamahnie.

10:22  Mehndahte mehn Israel kan ar inenen tohto rasehng pihk en ni oaroahr, ahpw me malaulau me pahn sapahldo. Pwe mwomwlahn aramas wie neknekohng irail kan me konehng ale.

10:23  Ei, wasa koaros nan sahpwo pwon KAUN-O Wasa Lapalahpie, pahn ketin kamwomwala, nin duwen me e ketin mahsanih me e pahn ketin wia.

10:24  KAUN-O Wasa Lapalahpie ketin mahsanihong sapwellime aramas akan me kin kousoan nan Saion, “Kumwail dehr masak mehn Asiria kan, mehnda me re kalokei kumwail duwehte me mehn Isip ko kin epwehnki wia.

10:25  Mwurin ahnsou tehr kis I sohla pahn kalokei kumwail, I ahpw pahn uhd kamwomwirailla.

10:26  Ngehi, KAUN-O, Wasa Lapalap, pahn wokihkin irail nei mehn wowoki duwehte me I wiahiong mehn Midian ni Paip Orep. I pahn kaloke Asiria duwehte ei kaloke Isip.

10:27  Ni ahnsowo eh pahn leledo, I pahn kasaledekihkumwailla sang pahn manaman en Asiria, oh arail mehn wisik solahr pahn katoutouwih pohn pwopwomwail kan.”

10:28  Karis en imwintihtio kalowedier kahnimw Ai. Re dauliher Mikron! Re pwilikihdi ar dipwisou kan nan Mikmas!

10:29  Re kotelahr wasahn koto oh pahn pweidi nan Kepa! Tohn kisin kahnimw Rama masepwehkadahr, oh tohn kahnimw en Nanmwarki Sohl nan Kipea tangehrdoui.

10:30  Kumwail weriwer, tohn Kallim! Kumwail rong, tohn Laisa! Kumwail sapeng, tohn Anadod!

10:31  Mehn Madmena oh Kepim tangatangehr reperepen mour.

10:32  Rahnwet imwintihti ko miher nan kisin kahnimw en Nop, oh re roakoaroak kumwut ong Nahna Saion, nan kahnimw en Serusalem.

10:33  KAUN-O, Wasa Lapalap, pahn ketin keseiraildi rasehng rahntuhke me palasang ni tuhke pwoat. Me keieu aklapalap oh keieu ileile rehrail pahn lopidi oh namenekla.

10:34  KAUN-O pahn ketin lopukiraildi rasehng tuhke kan nanwerengen wel me sile kin lopukedi, pil duwehte tuhke me keieu kaselel kan en Lepanon eh kin raukedi.

Chapter 11

11:1  Kadaudok en Nanmwarki Depit rasehng tuhke pwoat me paldier; ahpw, duwen pons kapw kei kin wosada sang nin tuken tuhkeo, ih duwen nanmwarki kapw men pahn pwarada sang ni kadaudok en Nanmwarki Depit.

11:2  E pahn ketin kupwurokongki ngenen KAUN-O. E pahn ketin kaunkihda sapwellime aramas akan kupwurokong oh erpit. E pahn ketin mwahngih kupwur en KAUN-O oh lammwiki,

11:3  pwe e pahn ketin perenki kapwaiada kupwure. E sohte pahn ketin kadeikada sang ni me e kin mahsanihete de ketin karongehte.

11:4  E pahn ketin kadeik me semwehmwe kan nin duwen me pwung, oh doare pwungen me paisuwed kan. E pahn ketin kalokehki aramas akan oh kemehkihla me dipan akan sapwellime mahsen kan.

11:5  E pahn ketin kaunkihda sapwellime aramas akan pwuhng oh loalopwoat.

11:6  Kidi en wel kan oh sihpw kan pahn kousoanpene ni popohl, lepard kan pahn kin wendi mpen kisin kuht kan. Koupwul kan oh laion pwulopwul kan pahn kin mwengepene, oh kisin seri kan me pahn wia sileparail.

11:7  Kou kan oh pehr kan pahn kin mwengepene, neirail kan pahn kin wendipene ni popohl. Laion kan pahn kin kang dihpw duwehte kou kan.

11:8  Seri pwelel men sohte pahn ohla ma e pahn mwadong limwahn sineik pwoisin men.

11:9  Sohte meninkau de mehkot suwed pahn mie nan Saion, sapwellimen Koht dohl sarawio. Pwe sampah pahn direkihla kupwurokong en KAUN-O, duwehte madau eh kin direkihla pihl.

11:10  Rahn ehu pahn kohdo me nanmwarki kapw emen sang ni kadaudok en Depit pahn wiahla kilel ong wehi kan. Re pahn pokonpene nan sapwellime kahnimw oh kawauwih.

11:11  Ni rahno eh pahn leledo, Kaun-o pahn ketin pwurehng doadoahngki sapwellime manaman oh kasapahldohng nan uhdakarail sapwellime aramas me luhwehdi nan Asiria oh Isip, nan wehin Padros, Sudan, Elam, Papilonia, oh Amad, oh ni oaroahr kan oh ni kisin deke kan.

11:12  Kaun-o pahn ketin apihada pilaik ehu pwehn ketin kasalehiong wehi kan me e pahn pwurehng ketikipene mehn Israel oh Suda oh kapwureiraildo sang ni keimw pahieu en sampah.

11:13  Wehin Israel solahr pahn peiriniong Suda, oh Suda solahr pahn wia imwintihti en Israel.

11:14  Re pahn ehupene oh mahweniong Pilisdia ni palikapi oh wahsang en aramas akan me kin kousoan ni palimese ar dipwisou kesempwal kan. Re pahn kalowehdi mehn Edom oh Mohap, oh mehn Ammon pahn peikiong irail.

11:15  KAUN-O pahn ketin kamadahda Dahun Sues, oh ketikihdo kisinieng karakar ehu pwehn kamadahda Iupreitis, ihte piletik isipwoat me pahn luhwehdi, pwe aramas en kak keidla nan ngalangal.

11:16  E pahn mie ahllap pwoat sang nan Asiria ong sapwellime aramas akan en Israel me luhwehdi wasao, duwehte eh mie ahllap pwoat ong ar pahpa kahlap ako ni ahnsou me re mweselsang Isip.

Chapter 12

12:1  Rahn ehu pahn kohdo me aramas akan pahn koulki koul pwoatet, “I kapinga komwi, Maing KAUN! Komwi ketin engieng pahi, ahpw met komwi ketin kansenamwahwihiehla oh solahr ketin engieng.

12:2  Koht me ei sounkomour; I pahn liki oh sohte masak mehkot. KAUN-O me ketikihdo ei manaman oh ei kehl; iei ih me ei sounkomour.

12:3  Duwen pihl lemwulemwur eh kin kansenamwahwih me men nimpildahr, iei duwen sapwellimen Koht aramas akan ar pahn perenda ni eh pahn ketin komourirailla.”

12:4  Rahn ehu pahn kohdo me aramas akan pahn koulki koul pwoatet, “Kumwail kapingkalahngan ong KAUN-O! Kumwail likwerih pwehn ketin sewesei kumwail! Kumwail lohkiong wehi koaros wiepen nin lime kan! Kumwail lohkiong irail uwen sapwellime roson!

12:5  Kumwail kouliong KAUN-O pwehki wiepen nin lime lapalap akan. Sampah pwon en rong rohng pwukat.

12:6  Koaros me kin kousoan nan Saion en ngisingis oh kokoul! Koht sarawien Israel me manaman, oh e kin ketin ieiang sapwellime aramas akan.”

Chapter 13

13:1  Iet mahsen ehu duwen Papilon, me Aiseia, nein Eimwos patohwan sang rehn Koht.

13:2  Kumwail apihada pilaik en mahwen pohn dohl tehn ehu! Wering sounpei kan oh kapahda pehmwail ni ruwes eh pahn wiawi pwe kumwail en mahweniong ewen kelen kahnimw aklapalapo.

13:3  KAUN-O ketin malipedohr sapwellime sounpei dingngang kan pwe re en wia mahwen sarawi oh kaloke irail kan me e ketin engieng pah.

13:4  Kumwail rong mwoarong pohn nahna kan-ngilen lapalahn pokon en aramas ehu, ngilen wehi kan oh sahpw akan me pokopokonpene. KAUN en karis kan ketin kaukaunopada sapwellime sounpei kan ong mahwen.

13:5  Re kohkohdo sang nan sahpw doh kan me mi ni imwin sampah. KAUN-O ketiket kohdo pwehn kamwomwala wehi unsek.

13:6  Weriwerki amwail medek! Rahn en KAUN-O kerendohr, rahn me Wasa Lapalap pahn ketin kamwomwala wasa.

13:7  Pehn aramas koaros pahn mwoatoredi, oh nan kapehdirail pahn luwetala.

13:8  Irail koaros pahn masepwehkada oh ahneki medek mwuledek, rasehng medek en neitik. Re pahn salohda kilikilengpene nanpwungarail, oh masarail kan pahn weitahtahkihla ar namenek.

13:9  Rahn en KAUN-O pahn leledohr-rahn kamasepwehk en sapwellime engieng mwuledek. Sampah pahn tehnla, oh me dipan koaros pahn mwomwla.

13:10  Usu koaros pahn sohla linge, oh ketipin pahn rotorot ni eh pahn dakada, oh maram pahn sohla marain.

13:11  KAUN-O ketin mahsanih, “I pahn wadohng kahpwal pohn sampah oh kaloke aramas suwed koaros pwehki diparail kan. I pahn katikitikihala aramas koaros me aklapalap oh kaloke koaros me pohnmwahso oh lemei.

13:12  Irail me pahn luhwehdi kan pahn malaulau sang kohl.

13:13  I pahn karerehda nanleng, oh sampah pahn pwupwusang nan dewe ni rahn me ngehi, KAUN-O Wasa Lapalap, pahn kasalehda ei engieng.

13:14  “Mehn liki kan me koukousoan nan Papilon pahn sopolahng nan uhdakarail kan, tangpeseng duwehte tie kan me kin tangasang sounkesik kan, rasehng sihpw me sohte silepahr.

13:15  Mehmen me pahn lohdi pahn kamakamkihla kedlahs.

13:16  Nindokon ar pahn kilikilengwei sohte kak wia mehkot, neirail seri kan pahn kosdi mehla, imwarail kan pahn pehdsang, oh angkehlail pahn wiawihong arail pwoud kan.”

13:17  KAUN-O ketin mahsanih, “I pahn kamwakidada mehn Media kan pwe re en mahweniong Papilon. Re sohte kin kesempwalki silper oh sohte kin lohdi pahn songosong en kohl.

13:18  Re pahn kemehkihla mwahnakapw akan neirail arep oh kesik ketieu kan. Re sohte pahn mahkohng seri pwelel kan oh sohte pahn poakehla seri kan.

13:19  Papilonia iei wehi me keieu kaselel nanpwungen wehi koaros, oh towe kan kin pohnmwasohki. Ahpw ngehi, KAUN-O pahn kauwehla Papilon duwehte me I wiahiongehr Sodom oh Komora!

13:20  Sohte emen pahn pwurehng kousoan wasao. Sohte mehn Arepia men me seiseiloakseli pahn kauwada imwe impwal wasao, oh sohte silepen sihpw men pahn kamwenge nah pelinsihpw wasao.

13:21  E pahn wiahla wasahn kousoan en mahn en sapwtehn kan oh wasa me likoht kan pahn wia ie pasarail kan. Osris kan pahn kousoan wasao, oh kuht en wel kan pahn lusulusseli nan mohn ihmw kan.

13:22  Ngilen mahn lawalo kan pahn peipeido sang nan imwen doulik kan oh nan tehnpesen nanmwarki kan. En Papilon eh ahnsou kerendohr! Eh rahn akan kereniongehr imwisekla.”

Chapter 14

14:1  KAUN-O pahn ketin pwurehng kupwur kalahngan ong sapwellime mehn Israel kan oh ketin pilirailda pwe en ketin wiahkinirailla sapwellime. E pahn ketin mweidohng irail re en pwurehng kousoan nan sapwarail, oh mehn liki kan pahn patohdo iang irail kousoan wasao.

14:2  Wehi tohto pahn sewese mehn Israel kan pwe re en pwurodohng nan sahpw me KAUN-O ketikihongirailehr, oh wehi kan pahn wiahla lidu en Israel wasao. Irail kan me kalowedier Israel pahn uhd lohdi pahn mehn Israel, oh mehn Israel pahn uhd kaunda irail kan me kin kaloke irail mahs.

14:3  KAUN-O pahn ketin kamaiauwihada mehn Israel sang nan ar medek oh lokolok oh sang nan doadoahk mwuledek me re kin idihdohng re en wia.

14:4  Ni eh pahn ketin wia met, re pahn kin kapailoke nanmwarkien Papilon oh nda: “Nanmwarki lemeio pwupwudier! E solahr pahn pwurehng kahpwalihala emen!

14:5  KAUN-O ketin kaimwisekalahr manaman en kaun suwed kan

14:6  me kin kahpwalihala aramas akan ni ar lingeringer oh sohte kin tokedihsang kalokaloke wehi kan me re kalowehdi.

14:7  Eri, met sampah pwon pereperenkier ar kommoaldier oh popohl, oh koaros kin kokoulki koulen peren.

14:8  Tuhke saipres oh tuhke sidar kan en Lepanon perenkidahr sipallahn nanmwarkio, pwehki solahr emen kak en peleiraildi, mwurin eh sipallahr!

14:9  “Wasahn me melahr akan onopadahr en kasamwoh nanmwarkien Papilon. Ngenen irail ko me manaman nin sampah kamwakidadahr wasa. Ngenen nanmwarki kan ketida sang nan mwoalerail kan.

14:10  Irail koaros ahpw likwerlahng, patohwan, ‘Eri, komwi me pil luwet duwehte kiht! Komwi iei pil kiseht!

14:11  Komwi kin ketin ale wahu sang ni keseng arp kan, ahpw iet pwe komwi pil iangehr ket nan wasahn me melahr akan. Komwi wonohnehr nan peht mwoasoahngot oh pweipweikihdi pilangkes en mwahs.’ ”

14:12  Nanmwarkien Papilon, usuhn rahn lingan, komwi pwupwudihsangehr nanleng! Mahs komwi kin ketin kalowehdi wehi kan, ahpw met komwi lekdekdiongehr nanpwel.

14:13  Komwi koasoanedier me komwi pahn ketidahla nanleng oh ketikihdi mwoalomwi pohnangin usu me keieu ileile kan. Komwi kupwukupwure me komwi pahn ket nin duwen nanmwarki men pohn nahnao me mi ni paliepeng wasa me koht kan kin pokonpene ie.

14:14  Komwi mahsanih me komwi pahn ketidahla pohn depwek kan oh duwehla Wasa Lapalap.

14:15  Ahpw soh, pwe komwi ketidilahr wasa keieu loal nan wasahn me melahr akan.

14:16  Me melahr akan pahn sarapeseng oh kangkakil komwi. Re ahpw pahn kalelapak, “Ih ohlo met me kin itikada sampah oh karerehda wehi kan?

14:17  Ih ohlo met me kin kamwomwala kahnimw kan oh wiahkihla sampah sapwtehn ehu? Ih ohlo met me sohte mwahn kin kasaledekihala aramas akan me e salihedier de sohte kin mweidohng re en patopatohla nan uhdakarail kan?”

14:18  Nanmwarki koaros en sampah wonohnehr nan arail sousou lingan akan,

14:19  ahpw komwi sohte omwi sousou, oh kahlapomwi lekdeklahr pwehn matala. E wonohnehr pahn sounpei kan me melahr nan mahwen, iang irail lekdeklahng nan pwoahr en takai kan, oh tiatipesengier.

14:20  Pwehki omwi kauwelahr omwi wehi oh kemelahr pein sapwellimomwi aramas akan, komwi sohte pahn seridi duwehte nanmwarki teikan. Sohte emen kisehn omwi peneinei suwed kan pahn mourla.

14:21  Kamaramas en tepida! Sapwellimen nanmwarki menet pwutak kan pahn kamakamala pwehki dipen arail pahpa kahlap ako. Sohte emen rehrail pahn pwurehng kaunda sampah de kauwada arail kahnimw kan.

14:22  KAUN-O Wasa Lapalap ketin mahsanih, “I pahn mahweniong Papilon oh kauwehla. I sohte pahn luhwehkihdi mehkot-sohte seri, sohte emen pahn mourla. Ngehi, KAUN-O, me mahmahsen.

14:23  I pahn wiahkihla Papilon sahpw pwelmatak ehu, oh likoht kan pahn kousoanla wasao. I pahn koakoahki Papilon kepenok me pahn koakoahsang mehkoaros. Ngehi, KAUN-O, Wasa Lapalap, me mahmahsen.”

14:24  KAUN-O, Wasa Lapalap, ketin kahulahr mahsanih, “Dahme I koasoanedier pahn pweida. Dahme I kupwuredahr pahn uhdahn wiawi.

14:25  I pahn kamwomwala mehn Asiria kan nan sapwei sahpw Israel oh tiakirailpeseng pohn ei nahna kan. I pahn kasaledekihala nei aramas akan sang en mehn Asiria kan ar mehn wisik oh katoutou me re kin lokolongki.

14:26  Met iei ei koasoandi ong sampah, oh I kapalahr pehi kan pwe I en kaloke wehi kan.”

14:27  KAUN-O Wasa Lapalap ketin koasoanedier en wia met; e ketin kapalahr nin lime pwehn wia sapwellime kalokolok, oh sohte emen kak katokihedi.

14:28  Iet mahsen ehu me kalohkdahr nan sounpar me Nanmwarki Ahas ketin sipalla.

14:29  Mehn Pilisdia, mete me kin wokih kumwail ohlahr, ahpw sohte kahrepen amwail pahn nsenamwahula. Ni sineik men eh kin mehla, emen me suwed sang kin kohdo wiliandi. Kutohr en sineik men kin kasawa wiahda kemisik kamasepwehk men.

14:30  KAUN-O pahn ketin wia sounsilepen me semwehmwe kan en sapwellime aramas akan oh ketin mweidohng irail en ahneki mour onepek mwahu. Ahpw e pahn ketin kadarodo lehk lapalap ehu ong kumwail mehn Pilisdia, oh sohte emen rehmwail pahn mourla.

14:31  Kumwail weriwer oh peki sawas, kumwail kahnimw koaros en Pilisdia! Kumwail en rerrer, kumwail koaros! Pelien depwek en pwelpar pali kohkohdo sang paliepeng-iei karis ehu me sohte emen me masepwehk rehrail.

14:32  Ia duwen atail pahn sapeng meninkeder kan me kohdo rehtail sang Pilisdia? Kitail pahn ndahng irail me KAUN-O ketin kauwadahr Saion oh sapwellime aramas akan me wie lokolok pahn diar popohl wasao.

Chapter 15

15:1  Iet mahsen ehu duwen Mohap. Kahnimw kan en Ar oh Kir mwomwlahr pwohng teieu, oh sohte me mweseisei nan wehin Mohap.

15:2  Mehn Dipon kan doudalahngehr pohn dohlo pwe re en mwahieiki wasahn kaudoko. Mehn Mohap mwahmwahieiki kahnimw kan en Nepo oh Medepa; re sehkasangehr pitenmoangarail kan oh arail alis kan pwehki ar pahtou.

15:3  Aramas akan nanial akan likawidahr likoun nsensuwed; oh wasahn tuhpene en aramas akan oh pohn ihmw kan aramas akan wie mwahmwahiei oh sengiseng ie.

15:4  Mehn Espon oh Eleale weriwer, oh ngilen ar sengiseng peipeilahng wasa doh me duwehte Sahas. Sounpei kan pil rerrerki ar masepwehk; nan kapehdirail kan tikitiklahr.

15:5  Mohngiongiet pahtoukilahr Mohap! Aramas akan sopolahngehr nan kisin kahnimw Soar, oh nan Eklad Selisia. Ekei doudalahngehr ni ahl me kohdalahng Luhid, mwahmwahiei nindokon ar kohkohwei; ekei sopolahng Oronaim, wie sengiseng ni ngihl laud.

15:6  Piletik Nimrim madadahr, dihpw kan me mi limwah mengilahr, oh sohte kisin tuhke mour kis luhwehdi.

15:7  Aramas akan kotelahr Wahun Tuhke Willows, songosong en tangahki ar dipwisou kan koaros.

15:8  Wasa koaros ni irepen Mohap ngilen sengiseng peipeilahng ie. E pil peipeilahng nan kisin kahnimw Eklaim oh Peerelim.

15:9  Pillap akan weitahtahkihla nta nan kisin kahnimw en Dipon, oh Koht pil ketin nekinekidohng aramas akan me kin kousoan wasao mehkot me suwed sang kowahlap. Ei, lapalahn kamaramas pahn wiahwihong koaros me luhwehdi nan Mohap.

Chapter 16

16:1  Mehn Mohap ako kadarala sihmpwul men nin duwen kisakis ehu ong ih me ketin kakaun nan Serusalem, re kadarala sang nan kahnimw Sela nan sapwtehno.

16:2  Re ahpw awiawih ni keilen Pillap Arnon oh sehsehla soandi duwehte menpihr me kin kerewen sang nan pasarail.

16:3  Re ahpw ndahng mehn Suda, “Kumwail ndahdo mahs dahme se pahn wia. Kumwail doareikitala duwehte tuhke pwoat me mweteh kin kalamwurih wasa ni ahnsoun karakar en ketipin, oh mweidohng se en rukula pahn mwetehmwail. Kiht aramas ekei me sopohsangehr apwal; kumwail ekihkitala wasa me sohte emen kak diar kiht ie.

16:4  Mweidohng kiht se en patopato nan sapwamwail. Kumwail doareikitasang irail kan me men kamwomwkitala.” (Kahpwal oh mwomwla pahn imwisekla, oh irail kan me kahpwalihalahr wehiet pahn sohrala.

16:5  Eri, emen kisehn kadaudok en Depit pahn wiahla nanmwarki, oh e pahn ketin kaunda aramas akan ni loalopwoat oh limpoak. E pahn kin mwadang en wia dahme pwung, oh e pahn ketin tehk pwuhng pahrek en mie.)

16:6  Mehn Suda ahpw nda, “Se rongehr uwen aklapalap en mehn Mohap. Se wehwehki me re me pohnmwahso oh aklapalap, ahpw ar lokaiahn suwei kan sohte audepe.”

16:7  Mehn Mohap pahn sengiseng pwehki kahpwal akan me re lokolongki. Irail koaros pahn sengiseng ni ar pahn kin tamanda kisin tungoal mwahu kan me re kin tungoale nan kahnimw Kir Eres. E pahn sohla ar koapworopwor.

16:8  Mwetuwel kan limwahn Espon oh mwetin wain kan en Sipma mwomwlahr-mwetin wain pwuko me kin kasakawihala kaunen wehi kan. Mie ahnsou ehu me selin tuhkehn wain ko doulahng wasa doh me duwehte kahnimw Saser, oh doulahng palimesehn sapwtehno, oh pil lellahng ni palikapi palio Sehden Mehla.

16:9  Eri, met I mwahmwahieiki tuhkehn wain kan en Sipma duwehte ei mwahmwahieiki Saser. Pilenmesei kerkidier Espon oh Eleale, pwehki eh sohte ahnsoun dolung wahnsahpw me pahn kin kaparanda aramas akan.

16:10  Sohte emen me pereperen met nan sahpw kaselel wet. Sohte me ngisingis de kokoul nan mwetin wain kan. Sohte me tietiak kreip kan pwehn wiahkihda wain; ngilen peren imwiseklahr.

16:11  I weiweirengki ei pahtoukihla Mohap, mwahmwahieiki Kir Eres.

16:12  Mehn Mohap kan tihwohkilahr kolahng pohn ar nahnao ni wasahn kaudok kan oh ni ar tehnpas sarawi kan pwe re en kapakap, ahpw met pil sohte katepehiong irail.

16:13  Iet mahsen me KAUN-O ketin wia duwen Mohap mahs.

16:14  Eri, met KAUN-O ketin mahsanih, “Nan erein sounpar siluh, en Mohap reken kepwe pahn sohrala. Ni duwen tohtohn aramas, me malaulau me pahn mourla, ahpw re pahn luwetala.”

Chapter 17

17:1  KAUN-O ketin mahsanih, “Damaskus solahr pahn wia ehu kahnimw; e pahn wiahla mohn ihmw ehu.

17:2  Kahnimw kan en Siria pahn tehnla kohkohlahte. Re pahn wiahla wasahn kamwenge sihpw oh kou, oh sohte emen pahn karawansang irail wasao.

17:3  E pahn sohla poadoarepen Israel, oh Damaskus pahn sohla uhtohr. Mehn Siria kan me mourla pahn namenekla duwehte mehn Israel kan. Ngehi, KAUN-O Wasa Lapalap, me mahmahsen.”

17:4  KAUN-O ketin mahsanih, “Rahn ehu pahn kohdo me wehi lapalap en Israel pahn imwisekla, oh semwehmwe pahn wiliandi eh reken kepwe.

17:5  Israel pahn rasehng mwaht ehu me wahnwiht akan paldihsangehr oh rikirikpenesang; e pahn tehnla duwehte mwaht en nan Wahun Repaim ni ahnsoun dolung wahnsahpw.

17:6  Aramas malaulau me pahn mourla, oh Israel pahn rasehng tuhke olip pwoat me wah kan dondoalehr oh mehte riau de siluh luhwe nan kadoken tuhkeo, de me malaulau me luhwe ni rah karakarahk kan. Ngehi, KAUN-O, Koht en Israel, me mahmahsen.”

17:7  Ni rahno eh pahn leledo, aramas akan pahn sohpeiong peki sawas rehn Sounwiepeo, Koht sarawien Israel.

17:8  Re sohla pahn koapworopworki pei sarawi kan me re wiahkihda pehrail kan, de koapworopworki pein wiepen pehrail kan-kilel en koht lih Asera oh pei sarawien isik warpwohmwahu kan.

17:9  Ni rahno eh pahn leledo, kahnimw kehlail kan pahn tehnla oh wiahla mohn ihmw duwehte kahnimw kan me mehn Ip oh Amor keselahr ni ar sopohsangehr mehn Israel kan.

17:10  Israel, ke manokelahr Kohto me ketin kapitkumwailla oh doandoarei kumwail rasehng paipalap ehu. Ke ahpw wiahda mwetuwel sarawi kei pwe ke en pwongih koht en liki men.

17:11  Ahpw mehnda ma re wa oh masalpeseng nimensengohte me ke padokedi, ahpw sohte me pahn dolung wah kan. Pwe ihte kahpwal oh medek mwuledek me pahn mie.

17:12  Wehi kehlail kei mwekididahr rasehng ngiringirisek en nan madau, rasehng ngilen pwuki kan me kin urada oh ngiringisek nan paina.

17:13  Wehi kan mwekimwekidier kohdo rasehng iloak en nan madau, Koht ahpw ketin angiangih irail, re ahpw pweiekla oh tangpeseng rasehng pwelpar ni keilen nahna ehu, rasehng dihpw meng nan elipip ehu.

17:14  Re kin kamasepwehk nin soutik, ahpw nimenseng re kin sohrala. Iei met duwen imwilahn aramas koaros me kin kauwehla sapwatail.

Chapter 18

18:1  Palio pillap akan en Sudan mie sahpw ehu wasa me ngilen pehnpihr kan kin peipeido sang ie.

18:2  Sang nan sahpwo meninkeder lapalap akan kin kohdi nan Pillap Nail dake pwoht me wiawihkihda ahlek. Kumwail pwurala, kumwail meninkeder kan! Kumwail wahla rohng pwoatet ong sapwamwailo me mi nanpwungen pillap akan, sahpw kehlail oh manaman, me towe kan reirei oh kil medendel, me aramas koaros en sampah kin masak.

18:3  Kumwail rong, kumwail koaros me kin kousoan nin sampah! Kumwail rapahkihda pilaik ehu me pahn wia kilel pwehn epida pohn kumwen nahna kan! Kumwail rong ngilen koronihda kan!

18:4  KAUN-O ketin mahsanihong ie, “I pahn mahsendihwei sang nanleng ni meleilei duwehte pwoaik en nipwong ni ahnsoun dolung wahnsahpw, oh ni meleilei duwehte marain en ketipin ni rahn.

18:5  Mwohn wahn wain kan ar pahn rikirikpene, ni ar pahn masalpeseng oh pwupwudier, oh wah kan mahlahr, imwintihtio pahn kamwomwala mehn Sudan rasehng naip pwoat eh kin pelehsang rahn wain kan.

18:6  Paliweren neirail sounpei kan pahn lekdekla rehn menpihr kan oh mahn lawalo kan. Ni ahnsoun karakar menpihr kan pahn kin kangkang irail, oh ni ahnsoun pou, mahn lawalo kan pahn pil uhd kangkang irail.”

18:7  Ahnsou ehu pahn kohdo me KAUN-O, Wasa Lapalap, pahn ketikihda kisakis kan sang nan sahpw wet me mi nanpwungen pillap akan, wehi kehlail oh manaman, me towe kan reirei oh kil medendel, me aramas en sampah koaros kin masak. Re pahn kohdo pohn Nahna Saion, wasa me kaudok kin wiawihong KAUN-O, Wasa Lapalap.

Chapter 19

19:1  Iet mahsen ehu duwen Isip. KAUN-O ketiket kodohng Isip, ket pohn pelien depwek pali. Dikedik en eni en Isip kan rerrer mwohn silangi oh nan kapehd en mehn Isip kan tikitikla.

19:2  KAUN-O ketin mahsanih, “I pahn kamwakidada mahwen nanpwungen mehn Isip kan, oh pirien kan pahn uhpene nanpwungarail, kompoakepah men pahn uhwong emen kompoakepah. Kahnimw kan pahn uhpene, oh me men wiahla nanmwarki kan pahn nantihong ihs me ahneki manaman en kaunda wasa.

19:3  I pahn kauwehla en mehn Isip ar koasoandi kan oh kauwehla ar koapworopwor. Re pahn peki neirail dikedik en eni kan en sewese irail, oh rapahki kaweid en sounwinahni kan oh peki ngehn en me melahr akan en kaweid irail.

19:4  I pahn pangalahng mehn Isip kan rehn kaun lemei men, rehn nanmwarki lemei men me pahn kaunirailda. Ngehi, KAUN-O, Wasa Lapalap, me mahmahsen.”

19:5  Pilen Nail pahn tikitikla, pihlo pahn kohkohdi oh madada.

19:6  Dahu kan en pillapo pahn pwohsuwedla ni pihlo eh pahn wie tikitikla. Ahlek oh kisin tuhke teikan pahn mengla,

19:7  oh wahnsahpw koaros me poadidi ni keilen Pillap Nail pahn mengla oh sohrala.

19:8  Koaros me kin mourki mwahmw akan en nan pillapo pahn nsensuwedla oh sengiseng; e pahn sohla katepen neirail kehs oh uhk en laid kan.

19:9  Irail kan me kin wiahda likou linen pahn pahtoula;

19:10  sounpahda likou oh tohndoadoahk koahiek kan pahn nsensuwedla oh pahtoula.

19:11  Pweipwei kei kaun akan en kahnimw Soan! Ohl akan me keieu kupwurokong nan Isip pahn kihda kaweid en aramas pweipwei! Ia duwen ar kak eimah patohwanohng nanmwarkio me irail me wiliandi aramas loalokong oh nanmwarki kan en kawao?

19:12  Nanmwarkien Isip, ia sapwellimomwi sounkaweid koahiek ko? Mweinele re pahn kak patohwanohng komwi soangen koasoandi kan me KAUN-O, Wasa Lapalap, ketin koasoanedier ong Isip.

19:13  Kaun akan en Soan oh Mempis me pweipwei. Re uhdahn pahn kaweid wehio, ahpw re wiahiong kaweid suwed.

19:14  KAUN-O ketin kupwurehda pwe re en kihda kaweid pingiping. Met kahrehda Isip eh kin wia mehkoaros ni sapwung oh sansasseli rasehng aramas sakaula men me kin sansasseli nan pein eh mwus.

19:15  Sohte emen nan Isip, me semwehmwe de kepwehpwe, ndand de soh, pahn kak en kihda sawas.

19:16  Rahn ehu pahn kohdo me mehn Isip kan pahn duwehla lih akan me masepwehk. Re pahn rerrerki ar masepwehk ni ar pahn kilang KAUN-O, Wasa Lapalap, eh pahn ketin kapahla nin lime pwe en ketin kaloke irail.

19:17  Mehn Isip pahn masakada Suda ahnsou koaros me aramas pahn kin katamankin irail koasoandien imwilahn ar mour me KAUN-O, Wasa Lapalap, ketin kaunopadahng irail.

19:18  Ni ahnsowo eh pahn leledo, aramas akan pahn lokaiahki lokaiahn Ipru nan kahnimw limau en Isip. Aramas akan wasao pahn wia arail kahula ni mwaren KAUN-O, Wasa Lapalap. Ehu kahnimw ko pahn adaneki, “Kahnimw en Ketipin.”

19:19  Ni ahnsowo eh pahn leledo, e pahn mie pei sarawi ehu ong KAUN-O nan wehin Isip oh uhr takai ehu me pahn kasarawihong ih ni irepen Isip.

19:20  Re pahn wia kilel en KAUN-O, Wasa Lapalap, eh ketiket nan Isip. Ni ahnsou me aramas akan wasao pahn mihla pahn kehnaudok oh peki sawas rehn KAUN-O, e pahn ketin kadarodo mehmen pwe en kapitirailla.

19:21  KAUN-O pahn ketin kasalehda pein ih ong mehn Isip kan, re ahpw pahn esehla oh kaudokiong, oh patohwandohng meirong oh kisakis kan. Re pahn kin wiahiong ih inou lap kan oh kapwaiada dahme re inoukidahr.

19:22  KAUN-O pahn ketin kaloke mehn Isip, ahpw mwuhr e pahn ketin kansenamwahwihirailla. Re pahn sohpeiong, oh e pahn ketin karonge ar kapakap akan oh kansenamwahwihirailla.

19:23  Ni ahnsowo eh pahn leledo, e pahn mie ahllap pwoat nanpwungen Isip oh Asiria. Tohn wehi riau wet pahn seiloakseli nanpwungen wehi pwukat, oh wehi riau pwukat pahn ehupene nan ar kaudok.

19:24  Ni ahnsowo eh pahn leledo, Israel pahn lapalapala pahrekiong Isip oh Asiria, oh wehi siluh pwukat pahn wiahla mehn kapai ehu ong sampah pwon.

19:25  KAUN-O, Wasa Lapalap, pahn ketin kapaiairailda oh mahsanih, “I pahn kapaiaiukada, Isip, nei aramas; kowe, Asiria, me I kapikada; oh kowe, Israel, nei aramas pilipil.”

Chapter 20

20:1  Sarkon, nanmwarki lapalap en Asiria, ahpw kadarala kaun lapalap en karis en Asiria pwe en mahweniong kahnimw Asdod nan Pilisdia.

20:2  Sounpar siluh mwowe KAUN-O ketin mahsanihongehr Aiseia, nein Eimwos en kapwuhrasang eh suht kan oh likoun nsensuwed me e likilikawih. E ahpw kapwaiada oh alialuseli kilisou oh sohte suht.

20:3  Ni ahnsou me Asdod lohdi, KAUN-O ahpw ketin mahsanih, “Nei ladu Aiseia kohkohseli kilisou oh sohte suht erein sounpar siluh. Met iei kilel ehu en dahme pahn pweida ong Isip oh Sudan.

20:4  Kaun lapalap en Asiria pahn ketikihla me selidi kan me e kalowehdi sang nan wehi riau pwukat, re pahn kilisou oh sohte suht. Me pwulopwul oh mah, re pahn alialu kohwei kilisou oh sohte suht, kawarail kan pahn sansalada, kahrehiong mehn Isip ar pahn namenekla.

20:5  Irail ko me koapworopworkihla Sudan oh suweiki duwen Isip pahn lesila, e pahn sohla arail koapworopwor.

20:6  Ni ahnsowo eh pahn leledo, aramas akan me kin kousoan ni oaroahr kan en Pilisdia pahn nda, ‘Kilang duwen aramas akan me kitail koapworopworki pwe re en doandoarei kitail sang nanmwarkien Asiria! Ia duwen atail pahn kak pitla?’ ”

Chapter 21

21:1  Iet mahsen ehu duwen Papilonia. Rasehng elipip ehu nan sapwtehn, apwal mwuledek ehu pahn kohsang nan sahpw kamasepwehk ehu.

21:2  I udiahlehr kaudiahl kamasepwehk ehu, kaudiahl en pengpengla oh mwomwla ehu. Karis en Elam, kumwail mahwen! Karis en Media, kumwail kapilpene kahnimw kan! Koht pahn ketin katokihedi kalokolok kan me Papilon wiadahr.

21:3  Dahme I kilang oh rongehr nan kaudiahlo kadirehkinielahr masepwehk oh medek, medek me rasehng medek en neitik.

21:4  Moangeiet sahlieldahr, oh I rerrerki ei masepwehk. I tihwohkilahr nin soutik en leledo, ahpw sohte mehkot mwahu e wadohng ie pwe kamasepwehkte.

21:5  Nan kaudiahlo kamadipw ehu kaunopadahr; lohs kan perekpeseng pwe tohn kaparo en mwohd loale. Re ahpw tungotungoal oh niminim, ruwes ehu pa mwadangete peido: “Opiser kan, kumwail kaunopada noumwail mehn sansar kan!”

21:6  Kaun-o eri ketin mahsanihong ie, “Kohwei oh kihdi emen silipe oh ndahng en pakairkihdo dahme e pahn kilang.

21:7  Ma e pahn kilang aramas ekei me dake oahs kohkohdo, wad riemen, oh ekei aramas dake ahs oh kamel, a en tehk mwahu mwomwarail.”

21:8  Sounsilasilo ahpw werida, nda, “Maing, I sinsile wasaht nipwong oh nin rahn.”

21:9  Iet re samwodohr! Aramas ekei kohkohdo dake oahs, wad riemen. Sounsilasilo ahpw pakairkihla, patohwan, “Papilon pwupwudier! Dikedik en eni koaros me re kin pwongih ohlahr oh pwupwudier nanpwel.”

21:10  Nei aramas en Israel kan, kumwail koakoahklahr rasehng wahn kohn, ahpw met I pakairkihong kumwail rongamwahu me I rongasangehr KAUN-O Wasa Lapalap, Koht en Israel.

21:11  Iet mahsen ehu duwen Edom. Aramas emen likwerdohng ie sang Edom, ketihtihki, “Sounsilepe, iahd me pwohnget pahn imwisekla? Ndadohng ie mahs iahd me e pahn rahnpeseng.”

21:12  I ahpw sapeng, nda, “Marain en rahn samwodohr, ahpw e pahn pil pwurehng pwongpene. Ma komw men pwurehng kalelapak, pwurodo oh kalelapak.”

21:13  Iet mahsen ehu duwen Arepia. Mehn Dedan kan, me seiseiloakseli oh pahn kauwada imwamwail impwal kan nan sapwtehn en Arepia,

21:14  kumwail kanampile aramas akan me kin pwarodo rehmwail. Kumwail tohn wehin Tema, kumwail kihong kisin tungoal aramas akan me sopolahr.

21:15  Aramas akan sopolahr pwe re en tangasang kedlahs me kaunopadahr en kemeirailla, sang kesik ketieu me kaunopadahr en kesik, sang keper koaros en mahwen.

21:16  KAUN-O eri ketin mahsanihong ie, “Nan erein sounpar teieu manaman en kadaudok en Kedar pahn imwisekla.

21:17  Sounkesik ketieu kan me keieu kommwad nan kadaudok en Kedar, ahpw me malaulau rehrail pahn luhwehdi. Ngehi, KAUN-O, Koht en Israel, me mahmahsen.”

Chapter 22

22:1  Iet mahsen ehu duwen Wahun Kaudiahl. Dahme wiewiawi? Dahme aramas koaros en kahnimwo wie kamakamadipwki pohn pwelengen imwarail kan?

22:2  Kahnimwo pwon pingidahr oh mwoarongadahr. Noumwail sounpei kan me melahr sohte mehkihla mahwen.

22:3  Amwail kaun akan tangehrdoaui oh lohdier mwohn ar saikinte kadar arep pwoat.

22:4  Eri, kumwail keiweisang ie met pwe I pahn mwahieiki nei aramas akan koaros me melahr. Kumwail dehpa song en kansenamwahwihiehla.

22:5  Ahnsou kamasepwehk ehu met, lohdi, oh pingiping nan Wahun Kaudiahl, oh KAUN-O Wasa Lapalahpie me ketin kadarodohng kitail. Kelen atail kahnimwo mweredier, oh ngilen peksawas peipeidohsang pohn dohl kan.

22:6  Sounpei kan sang nan wehin Elam tangatang kohdo dake oahs, tehtehn pehrail kesik ketieu oh arep. Sounpei kan sang nan wehin Kir onopadahr neirail mehn sansar kan.

22:7  Pwehl kaselel en nan wahu kan en Suda direkilahr werennansapw en mahwen; sounpei kan mi pohn oahs oh uh mwohn ewen kelen Serusalem.

22:8  Poadoarepen Israel koaros pwupwudier. Ni ahnsowo, kumwail pahn ale tehtehn mahwen sang wasahn nahk dipwisoun mahwen kan.

22:9  Kumwail diarada wasa kei ni kelen Serusalem me konehng onohnda sapahl. Kumwail dawih ihmw koaros nan Serusalem oh karangkehdi ekei ihmw kan pwe kumwail en kihsang takai kan mehn onehda kehl kan en kahnimwo.

22:10  Kumwail diarada wasa kei ni kelen Serusalem me konehng onohnda sapahl. Kumwail dawih ihmw koaros nan Serusalem oh karangkehdi ekei ihmw kan pwe kumwail en kihsang takai kan mehn onehda kehl kan en kahnimwo.

22:11  Kumwail wiahda ehu wasahn nahk pihl masloalen kahnimwo pwehn katokihedi kusukuslahn pihl sang nan pwarer meringo. Ahpw kumwail sohte kanahieng dehdehkihla me Koht, me ketin wiadahr mepwukat koaros kawao oh iei ih me ketin kupwurehda met en pweida.

22:12  Pein KAUN-O, Wasa Lapalap, ketin malimalipei kumwail pwe kumwail en mwahiei oh makimakiaki, kumwail en sehkasang pitenmoangamwail kan oh pwuhriong nan likoun nsensuwed.

22:13  Ahpw kumwail kokouruhr oh kamakamadipw. Kumwail kemehla sihpw kan oh kou kan pwe kumwail en tungoale, oh niminim wain. Kumwail ahpw nda, “Nna, kitail kamakamadipw oh sakasakau! Pwe lakapw kitail pahn mehla.”

22:14  KAUN-O, Wasa Lapalahpie, me pein mahsanihong ie, “Soangen suwed wet sohte pahn ale mahk erein ar mour. Ngehi, KAUN-O Wasa Lapalahpie, me mahmahsen.”

22:15  KAUN-O Wasa Lapalap ketin mahsanihong ie I en patohla rehn Sepna, sounapwalih tehnpaso, oh patohwanohng,

22:16  “Ke lemelemehiong me ihs kowe? Ke kihsang ia omw pwung en weirada omw sousou ni paip en dohlo?

22:17  Mweinele ke me kesempwal, ahpw KAUN-O pahn ketin pwekuhkada oh keseiukala.

22:18  E pahn ketin pwekuhkada duwehte mpwei ehu oh keseiukalahng nan ehu wehi me laud sang met. Ke pahn mehla wasao limwahn werennansapw en mahwen kan me ke kin pohnmwahsohki. Ke wialahr mehn kanamenek ong tohn tehnpesen omw soumaso.

22:19  KAUN-O pahn ketikihsang uhk nan deumw oh kasapwiluhkedi sang nan deumw ileile.”

22:20  KAUN-O ketin mahsanihong Sepna, “Ni ahnsowo eh pahn pweida, I pahn kadarala nei ladu Elaiakim, nein Ilkaia.

22:21  I pahn kapwatahkihda omw likou reirei oh omw kateng oh kihong manaman me ke ahneki mahs. E pahn duwehte pahpa men ong mehn Serusalem oh Suda.

22:22  I pahn kihong en ahneki manaman unsek pahn kupwur en nanmwarkio, me kisehn kadaudok en Depit. E pahn kolokol kih en wehi; dahme e pahn ritingada, sohte emen pahn ritingedi, oh dahme e pahn ritingedi, sohte emen pahn ritingada.

22:23  I pahn katengediong nan dehu ehu rasehng kisin tuhke me kin poasdiong ni mehkot, oh e pahn wia pwarer en wahu ong eh peneinei unsek.

22:24  “Ahpw kiseh oh eh peneinei koaros pahn wiahla mehn katoutou ehu ong ih. Re pahn kin mwotomwotou sang rasehng einpwoat oh pwohl kan me kin mwotomwotou sang ni tuhke pwoat!

22:25  Ni ahnsowo eh pahn pweida, kisin tuhke katengedio pahn mwerada oh pwupwudi. Oh met iei pahn imwiseklahn mehkoaros me mwotomwotou sang ie.” KAUN-O me mahmahsen.

Chapter 23

23:1  Iet mahsen ehu duwen Dair. Kumwail weriwerki amwail nsensuwed, kumwail sehla kan me mihmi nan madau! Dair, amwail kahnimw wasa kumwail kin peidi ie mwomwlahr; ihmw kan oh wap kan ohlahr. Nindokon waramwail sohp kan ar pwuropwurodohsang Saiprus, kumwail pahn rong rohng kan.

23:2  Kumwail weriwer, kumwail sounnetinet kan en Saidon! Kumwail kadaralahr ohl akan

23:3  pwe re en kotehla madau oh pwainda oh netikihla wahnsahpw kan me kin kohsang nan Isip oh wia doadoahk en pesines ong wehi teikan koaros.

23:4  Kahnimw Saidon, ke nameneklahr! Sehd oh madau loal akan keseiukalahr oh nda, “I sohte mwahn nainekihda seri men. I sohte mwahn apwalihada nei pwutak de serepein.”

23:5  Mehn Isip kan pil pahn luskihda oh nsensuwedla ni ar pahn rong me Dair mwomwlahr.

23:6  Kumwail weriwerki amwail nsensuwed, kumwail mehn Penisia! Kumwail song sopolahng Spein!

23:7  Mehlel me Dair met, kahnimw kapereno me kokoudahr mahso? Ih kahnimwo met, me kin kadarala aramas akan pwe re en kotehla sehd oh sapwasapwala wasa kan oh wiahkihla kisehn ar wehi?

23:8  Ihs me koasoanehdi en wadohng Dair mepwukat koaros, kahnimw lapalapo, me sounnetinet soupeidi kan me kin keieu wahu nin sampah?

23:9  KAUN-O Wasa Lapalap me ketin koasoanehdi. E ketin koasoanehdi pwe en katokihedi arail pohnmwahsohki mehkan me re wiadahr oh en kanamenekihala neirail ohl waun kan.

23:10  Kumwail kohwei oh koadoahkihada sahpwo, kumwail aramas akan me iang kousoanla nan kisin kahnimw kan nan Spein! Solahr emen me pahn doarei kumwail.

23:11  KAUN-O ketin kapalahr nin lime pohn sehd oh ketin kauwelahr wehi kan. E ketin koasoanedier me wasahn netinet laud kan en Penisia en kamwomwomwla.

23:12  Kahnimw Saidon, ahmw peren imwiseklahr, oh noumw aramas akan milahr pahn kehnaudek. Mehnda ma re sopolahng nan Saiprus, re sohte pahn pitsang apwal.

23:13  (Iei mehn Papilonia kan, kaidehn mehn Asiria, me mweidohng mahn lawalo en kauwehla Dair. Iei mehn Papilonia kan me kapilpene wasahn doulik kan, kamwerehdihsang kehl kehlail kan en Dair, oh kauwehla kahnimwo.)

23:14  Kumwail weriwerki amwail nsensuwed, kumwail sehla kan me mi nan madau! Kahnimw me kumwail kin koapworopworki mwomwlahr.

23:15  Ahnsou ehu pahn kohdo me Dair pahn manoknokla erein sounpar isihsek, erein ieias en nanmwarki men. Ni sounpar ako eh pahn imwisekla, Dair pahn duwehla lihen netiki paliwere men me mi nan koulo:

23:16  Ale noumw arp en, kowe kohwei pidakih kahnimwo, kowe lih tiahk suwed solahr me taman uhk! Pwurehng kesengki oh koulki omw koul kan pwehn kapwuredohng uhk ohl akan.

23:17  Ni ahnsou me sounpar isihseko pahn imwisekla, KAUN-O pahn pwurehng kupwurehiong Dair nan eh doadoahk en mahs, oh e pahn wia doadoahk en pesines ong wehi koaros nin sampah.

23:18  Mwohni kan me e pahn alehsang nan eh pesines pahn kasarawihong KAUN-O. E sohte pahn nekidala, pwe irail ko me kin kaudokiong KAUN-O pahn doadoahngki pwehn pwainda kisin tungoal oh likou me re anahne.

Chapter 24

24:1  KAUN-O pahn ketin kamwomwala sampah oh mweidohng en tehnla. E pahn ketin wekidedi oh kamwerepeseng towe kan.

24:2  Imwilahn aramas koaros pahn duwepenehte-samworo oh aramas akan, lidu oh soumas akan, me kin netikihla oh me kin pwainda kan, me kin kamangaiong emen mehkot oh me kin pekihda mehkot, me kepwehpwe oh semwehmwe.

24:3  Sampah pahn wonohn mwerpeseng oh ohla. KAUN-O ketin mahsenier oh audepen mahsen wet pahn pweida.

24:4  Sampah pahn madekengda oh mengidi; sampah pwon pahn luwetala; pahnlahng oh sampah pahn matala.

24:5  Aramas akan kasaminehkilahr sampah arail kauwelahr kosonned en Koht oh kauwehla inou poatopoat me e ketin wiadahr.

24:6  Eri, Koht ketin kerialahr sampah. Towe kan wie lokolongki dahme re wiadahr. Aramas akan me momour wie malamalaulaula.

24:7  Wahn wain kan mengilahr, oh wain malaulaulahr. Aramas koaros me kin pereperen mahso, met uhd nsensuwedlahr,

24:8  oh solahr ngilen neirail arp oh aip kaperen kan.

24:9  Solahr koul kaperen ni ahnsoun nim wain; solahr me iouki wain.

24:10  Mehkoaros nan kahnimwo pingidahr, oh aramas akan loakeiraildier nan imwarail kan sang apwal.

24:11  Aramas akan wie weriwerseli nanial akan pwe solahr wain. Peren sohralahr kohkohlahte; e sohrasangehr nan sahpwo.

24:12  Kahnimwo ohlahr, oh ewen kehl kan pwupwudier.

24:13  Ih met me pahn pweida nan wehi koaros wasa koaros nan sampah. E pahn rasehng ni keimwiseklahn rahnen dolung wahnsahpw, ni wahn olip kan eh dendersangehr ni tuhke kan oh keimwiseklahn kreip dendersangehr ni tuhkehn wain kan.

24:14  Irail kan me mourla pahn kokoulki ar peren. Irail kan ni Palikapi pahn koasoia uwen manaman en KAUN-O,

24:15  oh irail kan ni Palimese pahn kapinga. Aramas akan me kin kousoan ni oaroahr kan pahn kapinga KAUN-O, Koht en Israel.

24:16  Kitail pahn rong ngilen koulen kapingpen Israel, wehi pwungo, sang wasa me keieu doh kan en sampah. Ahpw sohte koapworopwor ong ie! I wie luweluwetala! Sounpang aramas akan uselahte wiewia arail tiahk en pang aramas, oh soangen tiahk pwukat suwesuwedla ahnsou koaros.

24:17  Kumwail rong ie, kumwail koaros! Mie soahng kamasepwehk kei, pwoahr loal kei, oh lidip kei me awiawih kumwail.

24:18  Mehmen me pahn song en tangasang me kamasepwehk pwukat pahn pwupwudiong nan ehu pwoahr loal, oh mehmen me pahn pitsang nan pwoahro pahn lohdi nan lidip. Keteu laud pahn mweredihsang pahnlahng, oh poahsoanen sampah pahn rerada.

24:19  Sampah pahn pwalpeseng oh itikekda oh mwerpeseng.

24:20  Sampah pahn wasawasasseli rasehng aramas sakaula men, ipihpirekseli rasehng kisin imwios nan melimel. Sampah toutoukilahr dipe kan; e pahn mweredi oh sohte pwurehng onohnda sapahl.

24:21  Ahnsou ehu pahn kohdo me KAUN-O pahn ketin kaloke me manaman en powe kan oh kaunen sampah kan.

24:22  Koht pahn ketikipene nanmwarki kan rasehng me selidi kei nan pwoahr loal ehu. E pahn ketikihong irail nan imweteng lao lel ahnsoun ar ale kalokolok.

24:23  Maram pahn rotorotala, oh ketipin sohla pahn dakada, pwehki KAUN-O, Wasa Lapalap pahn wiahla nanmwarki. E pahn ketin kakaun nan Serusalem pohn Nahna Saion, oh kaunen aramas akan pahn kilang sapwellime lingan.

Chapter 25

25:1  Maing KAUN, komwi me ei Koht; I pahn waunekin komwi oh kapinga mwaromwi. Komwi ketin wiadahr soahng kapwuriamwei kei; komwi ketin kapwaiada ni loalopwoat koasoandi kan me komwi ketin wiadahr kawao.

25:2  Komwi ketin wekidohng kahnimw kan ong ni mohn ihmw oh ketin kamwomwala arail kehl kehlail kan. Tehnpas akan me at imwintihti kan kauwadahr sohralahr kohkohlahte.

25:3  Tohn kahnimw kehlail kan pahn kapinga komwi; kahnimw en wehi lemei kan pahn masak komwi.

25:4  Me semwehmwe oh sohte sawasaparail kan pahn patolahng pahn kupwuromwi oh diar onepek mwahu ni ahnsou apwal. Komwi kin ketin pere irail sang melimel oh karakar en ketipin. Aramas lemei kan kin leledo rasehng melimel ni ahnsoun kopou,

25:5  rasehng karakar nan sahpw madekeng ehu. Ahpw, Maing KAUN, komwi me ketin katokihedi ewen at imwintihti kan; komwi kin ketin katokihedi weriwer en aramas lemei kan, rasehng pelien depwek pali eh kin kalamwurih rahn kakarakar.

25:6  Wasaht pohn Nahna Saion KAUN-O, Wasa Lapalap pahn ketin kaunopada kamadipw ehu ong wehi koaros nin sampah-kamadipw ehu me pahn direkihla kisin sak keieu kaselel oh wain keieu iou.

25:7  Iei wasaht me e pahn mwadangete ketikihsang depwek en pahtou me mihmi pohn wehi koaros.

25:8  KAUN-O, Wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros oh ketikihsang kanamenek me sapwellime aramas akan wie lokolongkier wasa koaros nin sampah. Pein KAUN-O me mahmahsen.

25:9  Ahnsou me mepwukat pahn pweida, aramas koaros pahn nda, “Iei ih me at Koht! Kitail koapworopworkilahr ih, oh e ketin kapitkitaillahr. Iei ih me KAUN-O! Kitail koapworopworkilahr ih, oh met kitail nsenamwahulahr oh pereperen pwehki eh ketin doareikitaillahr.”

25:10  KAUN-O pahn ketin sinsile Nahna Saion, ahpw mehn Mohap pahn tiatihdi rasehng dihpw meng eh kin tiatihdi nan pwise.

25:11  Re pahn kapahwei pehrail kan duwehte ar wie songosong en pampap, ahpw Koht pahn ketin kasaroweiraildi, oh pehrail kan pahn mwoatoredi.

25:12  E pahn ketin kauwehla kelen mahwen en Mohap iangahki arail kehl ile kan oh kesepwekeiraildiong nan pwelpar.

Chapter 26

26:1  Rahn ehu kohkohdo me aramas akan pahn koulki koul pwoatet nan wehin Suda: Atail kahnimwo me kehlail! Pein Koht me kin ketin sinsile kele kan!

26:2  Kumwail ritingada ewen kehl kan oh mweidohng wehi loalopwoato en pedolong, wehio me towe kan kin wia dahme pwung.

26:3  Maing KAUN, komwi me kin ketikihdo popohl mehlel ong irail kan me nan kapehd kehlail oh tengeteng oh kin likih komwi.

26:4  Kumwail likih KAUN-O kohkohlahte; e pahn ketin sinsilei kitail ahnsou koaros.

26:5  E ketin katikitikihala me aklapalap; e ketin kamwomwala kahnimw kehlailo me re kin kousoan loale, oh karangkehdi kehl kan nan pwelpar.

26:6  Irail kan me milahr pahn kehnaudek mahs, kekeidier powe met, oh tietiangki nehrail kan.

26:7  Maing KAUN, komwi ketin kainenehla elen aramas mwahu kan; ahl me re kin keid ie me patapat.

26:8  Se kin idawehn kupwuromwi, oh koapworopworkin komwi; komwihte me se kin kawohng at ineng koaros.

26:9  Mohngiongi kin tihwohkinkomwihla nipwong; ni omwi kin ketin kadeik sampah oh towe kan, irail koaros pahn esehla dahkot pwuhng.

26:10  Mehnda ma komwi kin ketin kupwur kadekohng aramas suwed kan, re sohte mwahn kin esehla wia dahme pwung. Pil met nan sapwen aramas pwung kan re kin wiewiahte me sapwung; re sohte kin men pohnese sapwellimomwi roson lapalap.

26:11  Sapwellimomwi imwintihti kan sohte ese me komwi pahn ketin kaloke irail. Maing KAUN, komwi ketin kasaroweiraildi oh mweidohng re en lokolok; mweidohng re en lokolongki kalokolok me komwi ketin kaunopadahr. Kasalehiong irail uwen sapwellimomwi limpoak ong sapwellimomwi aramas akan.

26:12  Maing KAUN, komwi pahn ketikihong kiht paiamwahu; mehkoaros me se pahn pweida loale iei wahn nin limomwi.

26:13  Maing KAUN, at Koht, wehi tohrohr kei kaunkitadahr, ahpw komwihte me at Koht.

26:14  Eri, met re melahr oh solahr pahn pwurehng mourda; ngenirail kan sohte pahn pwurodo, pwehki omwi ketin kalokeirailehr oh kamwomwiraillahr. Solahr emen me taman irail.

26:15  Maing KAUN, komwi ketin kairadahr at tungoal wehi, kalaudelahr sahpwet ni pali koaros; oh met kahrehiong komwi wahu.

26:16  Maing KAUN, komwi ketin kalokeier sapwellimomwi aramas akan, oh nan ar nsensuwed re ahpw kapakapohng komwi.

26:17  Maing KAUN, komwi ketin kupwuredahr pwe se en likwerwohng komwi, rasehng lih emen me kin weriwerki eh medek en neitik.

26:18  Se lokolongkier at medek oh weirek, ahpw sohte mehkot me se kaipwihedi. Se sohte mwahn kolowehdi mehkot ong sapwatet; sohte mehkot me se patohwan wiahda.

26:19  Irail kan sang rehn at tungoal aramas akan me melahr pahn pwurehng mourda! Paliwararail kan pahn pwurehng mourda. Koaros me memeir nan ar sousou pahn pwourda oh koulki koulen peren. Duwen pwoaik en menseng eh kin kalamwurih sampah, iei duwen KAUN-O eh pahn ketin kamourada me melahr akan.

26:20  Nei aramas akan, kumwail pedolong nan imwamwail kan, oh ritingedi wenihmw. Kumwail rukula mahs lao sapwellimen Koht engieng imwisekla.

26:21  KAUN-O pahn ketido sang nan mwoale pwehn ketin kalokehki tohn sampah diparail kan. Kamaramas akan me wiawiher nin sampah ni rir pahn sansalada, oh pwehl solahr pahn ekieki irail kan me kamakamalahr.

Chapter 27

27:1  Ni rahno KAUN-O pahn ketin doadoahngki sapwellime manaman oh kedlahs en kamaramas pwehn ketin kaloke Lepaiadan,. lapalahn kemisik kamasepwehko, oh kemehla mahn kamasepwehko me kin kousoan nan madau.

27:2  Ni rahno, KAUN-O pahn mahsanih duwen sapwellime mwetuwel en wain kapereno,

27:3  “I kin sinsile oh kalakalamwur ahnsou koaros, I kin sinsile nipwong oh nin rahn pwe aramas dehr kauwehla.

27:4  I solahr engieng pahn mwetin waino. Ma mie kisin tekatek de dihpw me pahn wosada loale, I pahn kihsang oh isikala douluhl.

27:5  Ahpw ma imwintihti en nei aramas akan men ale ei sawas, eri, re en peki mahk rehi. Ei, re en peki mahk rehi.”

27:6  Ni rahno ako eh pahn leledo, mehn Israel, me iei kadaudok en Seikop, pahn kadarala kalowe duwehte tuhke pwoat, re ahpw pahn mpwek oh masalpeseng. Wahrail ahpw pahn audehla sampah.

27:7  KAUN-O sohte ketikihong kalokolok mwuledek Israel, de aramas sohte tohto me mehla, duwehte me e ketin wiahiong eh imwintihti kan.

27:8  KAUN-O ketin kaloke sapwellime aramas akan ni eh ketin kalipeirailla. E ketin koakoahkiniralla kisinieng laud ehu sang ni palimese.

27:9  Ahpw Israel pahn ale mahkpen diparail kan ma pei sarawi takai en me rotorot akan pahn mweredi duwehla pweht, oh sohla sansal en koht lih Asera de sohla pei sarawi kan mehn isik warpwohmwahu.

27:10  Kahnimw me kehl kehlailo wialahr mohn kahnimw. E tehnlahr rasehng sapwtehn ehu. E wialahr wasahn kamwenge kou kan, wasa re kak kommoal oh mwengemwengeseli ie.

27:11  Rahntuhke kan mengidier oh rupwidier, oh lih akan kin wesepene mehn wia ar tuwi. Pwehki aramas akan ar sohte ese mehkot, Koht me ketin kapikirailda sohte pahn ketin poakeirailla de kupwur mahkohng irail.

27:12  Ni rahno, sang Iupreitis lel ni irepen Isip, KAUN-O pahn ketikipene sapwellime aramas akan wad emen, duwehte aramas ar kin poakihasang kilin wihd oh koasoakoasoakda.

27:13  Ni rahno eh pahn leledo, sowi pahn pepeuk pwehn kapwurehdo sang Asiria oh Isip mehn Israel koaros me kalipilipalahr wasa pwuko. Re pahn patohdo oh kaudokiong KAUN-O nan Serusalem, pohn sapwellime dohl sarawio.

Chapter 28

28:1  Meid suwediong wehin Israel! Lingan en wehio wie tikitiklahr, rasehng lingan en elin kapwat en arail soupeidi kan me sakaulahr. Ni ar aklapalap re kin usore leh pwohmwahu, ahpw re kin wonohnki ar ohnsakau.

28:2  Kaun-o ketin kaunopadahr emen me kehlail oh kommwad pwe en mahweniong irail. Ohl menet pahn pwarodo, rasehng keteu aihs takai, oh keteu mosul, rasehng lapake koaduhsinoipw; eri, e pahn kalowehdi sahpwo.

28:3  E pahn ketin tiakedi soupeidi aklapalap oh kamamsakau pwukat.

28:4  Sosohralahn lingan en soupeidi aklapalap pwukat pahn sohrala, rasehng keieun rahk en wahn tuhke pik me aramas kin dolungasang oh kangala ni eh ahpwtehn matada.

28:5  Rahn ehu pahn kohdo me KAUN-O, Wasa Lapalahpie, pahn wiahla elin kapwat lingan ehu en rohs me pahn kalinganahda me luhwehdi kan rehn sapwellime aramas akan.

28:6  E pahn ketikihong sounkopwung kan loalokong en wia kopwung, oh e pahn ketin kakehlahda nan kapehd en irail kan me kin doandoare ewen kelen kahnimw kan sang imwintihti kan.

28:7  Ahpw pil soukohp kan oh samworo kan sakaulahr douluhl, iei me re wasawasaskiseli. Uwen lauden wain oh sakau kehlail me re sakaukihla, kahrehda ar pingida oh pwumpwupwseli. En soukohp kan ar sakaula douluhl kahrehda ar sohte kak dehdehki audepen kaudiahl akan me Koht kin ketikihong irail, oh en samworo kan ar sakaula kahrehda ar sohte kak kapwungala irair en kopwung kan me kin wisikdohng irail.

28:8  Tehpel kan koaros me re kin mwohdehng saminkihla kisin mwenge kan me re kin mwuskihwei, oh sohte wasa kis mie me min oh mwakelekel.

28:9  Re kin kaulime ie, ndinda, “Ihs me e lemeleme en kihong eh padahk? Ihs me e lemeleme e uhdahn pahn anahne ale eh padahk? Pwe e mwahuwongete kohieng seri kan me ahpwtehn mweisang dihdi.

28:10  E kin songosong en oaretikihiong kitail padahk ni atail wehwehki, ahpw kin kapwukapwurehiong.”

28:11  Ma kumwail sohte men rong ie, eri, Koht pahn ketin doadoahngki mehn liki kan me lokaiahki ehu soangen lokaia, pwe re en padahkih kumwail.

28:12  E ketin mahsanihong kumwail koaros kumwail en kommoalla oh meleileidi, kumwail ahpw sohte men rong.

28:13  Iei me kahrehda KAUN-O pahn ketin oaretikihong kumwail sapwellime padahk mwahu, oh pahn kapwukapwurehiong. Eri, kumwail ahpw pahn dipekelekel ni kahk koaros me kumwail pahn wia. Kumwail pahn lipwalipwada, lohdi oh mihla nan selipamwail.

28:14  Eri, kumwail aramas aklapalap akan, me kin kakaun aramas pwukat nan Serusalem, kumwail rong dahme KAUN-O mahsanih.

28:15  Kumwail kin suweiki me dene kumwail wiahda inou ehu ong wasahn me melahr akan. Me dene kumwail pahn pitsang kahpwal laud ni eh pahn leledo, pwehki amwail koapworopworki amwail mour likamw oh widing pwe en doareikumwailla.

28:16  Eri, iet me KAUN-O, Wasa Lapalahpie, mahsanih: “I pahn kihdiong Saion poahsoan teng oh kehlail ehu. I ahpw pahn koasoanehdi takain pwukekeimw teng ehu, me lepin mahsen pwukat pahn ntinting powe, ‘Pwoson kehlail iei pwoson me pil kin dadaur.’

28:17  Eri, pwuhng me pahn wia mehn sosohng en poahsoan wet, oh lelepek me pahn wia mehn sosohng en kainenehda.” Eri, keteu aihs takai pahn koakoahsang likamw koaros me kumwail kin momourki, oh lapake pahn kamwomwala amwail wasahn rukula kan.”

28:18  Inou me kumwail wiahiongehr mehla pahn kasohrala, oh inou me kumwail wiahiong wasahn me melahr akan pahn kamala. Ni kahpwal eh pahn leledo, kumwail pahn lohdi.

28:19  E pahn lellel kumwail sohte kommoal, e pahn wiewiawi nimenseng koaros. Kumwail pahn wie lokolongki nipwong nin rahn. Mahsen kapw koaros sang rehn Koht pahn kahrehiong kumwail masepwehk mwuledek!

28:20  Kumwail pahn duwehte ohl meno nan mahsen audapan ko, me song en meirla nan peht ehu me mwotomwot ong paliwere, iangahki pilangkes tikitik ehu me sohte kak pwaindi paliwere.

28:21  KAUN-O pahn ketin wia sapwellime mahwen duwehte me e wiadahr nin Nahna Perasim oh nan wahun Kipeon, pwe en wia dahme e ketin kupwukupwure-kapwuriamwei wiepen nin lime. E pahn ketin kaimwisekala sapwellime doadoahk, doadoahk me kitail sohte kak wehwehki.

28:22  Kumwail dehr kouruhrki mehkan me I wie kehkehlingkihong kumwail! Ma kumwail pahn kouruhrki, e ahpwte pahn apwala ong kumwail en pitsang. I rongehr duwen sapwellimen KAUN-O Wasa Lapalap koasoandien kamwomwala wehiet pwon.

28:23  Kumwail rong dahme I ndinda; kumwail kanahieng rong dahme I ndindaiong kumwail.

28:24  Sohte soumwet men kin deideipwelih eh mwaht ahnsou koaros oh onopadahng en padok werentuhke.

28:25  Ni eh kin kaunopadahr pwehlo, e kin padokedi werentuhkehn doalo kisin mwenge kan, e kin padokedi kohn oh parli, oh padokedi soangen wahnsahpw teikan ni keilen eh mwahto.

28:26  E kin ese dahme e pahn wiahiong eh mwahto, pwehki Koht me ketin padahkihong.

28:27  E sohte mwahn kin doadoahngki lepin tuhke toutou pwehn poakiheki werentuhkehn doal mwenge kan, ahpw e kin doadoahngki kisin tuhke marahra.

28:28  E sohte kin kauwehla wahn kohn kan ni eh kin kamwakamwakele sohte tokedi, oh e ese duwen eh pahn kamwakele ni eh kin tangahki kuruma powe pwe en dehr kamwutepene wahn kohn kan.

28:29  Soangen kupwurokong pwukat koaros pwilisang rehn KAUN-O Wasa Lapalap. Koasoandi kan me sang rehn Koht me diren kupwurokong, oh kin pweida ahnsou koaros.

Chapter 29

29:1  Serusalem, pei sarawien Koht, pahn ohla! Kahnimw me Depit kauwada ie imwe impwal pahn ohla! Sounpar ehu de riau en leledo oh imwisekla, iangahki kamadipw oh sarawi lapalap akan,

29:2  oh Koht ahpw pahn ketikihdo kahpwal laud pohn kahnimwo me adaneki “Pei sarawien Koht.” Mwahiei oh sengiseng laud pahn mie, oh kahnimwo pwon pahn duwehla pei sarawi ehu me kidikidkihla nta.

29:3  Koht pahn ketin mahweniong kahnimwo, kapilpene, oh kalowehdi.

29:4  Serusalem pahn rasehng ngehn ehu me nannantihong en lokaia sang pahn pwehl, ngilikir peipeido sang nan pwelpar.

29:5  Serusalem, mehn liki koaros me pahn mahweniong uhk pahn koakoahkla rasehng pwelpar, oh neirail karis kan pahn masepwehkada oh pihrpeseng rasehng dihpw meng. Mwadangete ni sohte kasikpe,

29:6  KAUN-O, Wasa Lapalap, pahn ketin kapitkinuhkala posopos en nansapwe oh rerrer en sahpw. E pahn ketikihdo melimel oh kisiniei laud;

29:7  eri, karis en wehi kan me mahmahweniong kahnimw en pei sarawien Koht-arail tehtehn mahwen kan-mehkoaros-pahn sohrala rasehng ouraman ehu, rasehng madamadau ehu nipwong.

29:8  Wehi koaros me pokonpenehr pwe re en mahweniong Serusalem pahn rasehng aramas duhpeklahr emen me ouramandahr me e wie mwengemwenge, e ahpw pirida ni eh duhpek, de rasehng aramas emen me mehkilahr eh men nimpil, e ahpw ouramanda me e wie nimnimpil, e ahpw pirida nan kepinwere ngalangaladahr.

29:9  Kumwail wenla mwowe oh wiewia tiahk en pweipwei! Kumwail wenla mwowe oh wiewia tiahk en aramas maskun! Kumwail sakaula ni amwail sohte nim wain! Wasawasasseli ni amwail sohte nim dingiding ehu!

29:10  KAUN-O ketin kupwuredahr kumwail en lusulusoi, oh onopadahr kumwail en meirla oh meirkelikla. Soukohp kan me pahn wia pwoaren mesen aramas akan, ahpw Koht ketin kakunlahr masarail kan.

29:11  Wehwehn kaudiahl kan me wiawihongehr soukohp koaros pahn rirsang kumwail; e pahn rasehng pelien doaropwe ehu me sidahmplahr. Ma kumwail pahn walahng aramas emen me ese wadawad oh peki en wadekohng kumwail, e pahn nda me e sohte kak wadek pwehki eh sidahmpehr.

29:12  Ma kumwail pahn kihong aramas emen me sehse wadawad oh peki en wadekohng kumwail, e pahn ndahng kumwail me e sehse wadawad.

29:13  Kaun-o ketin mahsanih, “Aramas pwukat kin nda me re kin kaudokiong ie, ahpw sohte audepen ar koasoi kan, oh mohngiongirail dohsang ie. Mwomwen arail mour en souleng kin pwilisang kosonned oh tiahk en aramas, me re pein wadlikihala.

29:14  Eri, I pahn kaluskinirailda ei mwekid kapwuriamwei kan. Irail kan me loalokong pahn wiahla aramas pweipwei, oh arail koahiek koaros pahn sohla katepe.”

29:15  Irail kan me songosong en karirihala ar koasoandi kan sang KAUN-O pahn ohla! Re kin wiahda ar koasoandi kan ni rir oh lemeleme me sohte emen me kilang de ese dahme re wiewia.

29:16  Re kin wekidala mehkoaros. Mehnia me keieu kesempwal, sounwia einpwoat de pwehl en wiahda einpwoat? Mie mehkot me aramas wiahda kak ndahng aramaso, “Kaidehn kowe me wiaiehda”? De e kak ndahng aramaso, “Ke sohte ese dahme ke wiewia”?

29:17  Lepin kahso ketihtihki, mwurin ahnsou kis nanwel mosulo pahn wiahla wasahn mwetuwel, oh mwetuwelo pahn pwurehng nanwella.

29:18  Ni rahno eh pahn leledo, me salongopon kan pahn kak rong pwuhk ehu eh pahn wadawad ni ngihl laud, oh me maskun kan, me kin mihmi nan rotorot, pahn kilangada wasa.

29:19  Me semwehmwe oh aktikitik kan pahn pwurehng diar peren me kin pwilisang KAUN-O, Koht sarawien en Israel.

29:20  Met pahn wia imwilahn irail kan me kin kahpwalihala meteikan oh mwamwahliki Koht. Me dipan koaros pahn mwomwla.

29:21  Koht pahn ketin kaloke irail kan me kin kauwehla eden meteikan, irail kan me kin katokihedi kalokepen me dipan akan oh irail kan me kin kinehda likamw pwe aramas lelepek kan en dehr ale pwuhng.

29:22  Eri met, KAUN-O, Koht en Israel, me ketin kapitala Eipraam sang nan apwal, ketin mahsanih, “Nei aramas akan, kumwail solahr pahn namenek, masamwail kan solahr pahn pohpohsuwedki amwail namenek.

29:23  Ni amwail pahn kilang seri kan me I pahn kihong kumwail, eri, kumwail ahpw pahn esehla me ngehi iei Koht sarawien Israel. Kumwail pahn waunekin ie oh lemmwikiniehla.

29:24  Aramas pweipwei kan pahn esehla wehwehki, oh irail kan me kin lipilipahned pahn perenkihda ale padahk.”

Chapter 30

30:1  KAUN-O mahsanih, “Meid suwediong irail kan me kaunda Suda, pwehki ar kahngohdiong ie. Re kin kapwaiada koasoandi kei me kin uhwong kupwurei. Re kin katohtohwehla diparail kan.

30:2  Re kin rapahki sawasaparail sang Isip, ni ar sohte kin ale kaweid sang rehi. Re kin men Isip en doandoare irail, ihme kahrehda re kin koapworopworki nanmwarkien Isip.

30:3  Ahpw sohte sapwellimen nanmwarkio manaman en sewese irail, ihme kahrehda arail sawas sang Isip sohte pahn pweida, pwe kauparailte me pahn wiawi.

30:4  Mehnda ma weliaparail lellahngehr nan kahnimw Soan oh Anes nan Isip,

30:5  ahpw mehn Suda kan pahn koluhkihla ar koapworopworki wehio me keseulikilik, wehi me sohte kin sewese irail nan arail kasikasik sawas.”

30:6  Iet mahsen en Koht duwen mahn akan nan sapwtehn ni palieir: “Weliaparail kan pahn keid wasa keper, wasa me laion kan kin mihmi ie, iangahki sineik pwoisin oh sineik pihr kan. Neirail ahs oh kamel kan weuwa mehn kisakis pweilaud ong wehi ehu me sohte kak sewese irail.

30:7  Sohte katepen sawas me Isip kak kihda, ihme kahrehda I kihong Isip adamwahl wet, ‘Mahn Likemisek Sohte Keper.’ ”

30:8  Koht ketin mahsanihong ie I en ntingihedi nan pwuhk ehu duwen iren mouren aramas pwukat, pwe en wia kadehde poatopoat ong pein arail suwed.

30:9  Irail kin kahngohdiong Koht ahnsou koaros, likamw ahnsou koaros, oh kahng rong sapwellimen KAUN-O padahk ahnsou koaros.

30:10  Re kin ndahng soukohp kan en nennenla, oh kin ndahng irail, “Kumwail dehr padahkihong kiht dahme pwung. Ahpw kumwail padahkihong kiht dahme se kin men rong. Kumwail piseksang kiht pwe se pahn kolokolete nsenat.

30:11  Kumwail keisang mwoht, dehr kedirepwei kiht. Se soh mwahn men rong duwen amwail Koht sarawien Israel.”

30:12  Ahpw iet mahsen en Koht sarawien Israel: “Kumwail kin pohnsehse dahme I kin padahkihong kumwail, ahpw kumwail kin koapworopworkihte amwail kamaramas oh widing.

30:13  Kumwail dipadahr! Kumwail rasehng dihd ileile ehu me pwalpeseng sang powe lel pah; eri, kumwail pahn mwadang rengkidi.

30:14  Kumwail pahn pwaltikpeseng, rasehng sah me wiawihkihda pwehl, ohla douluhl oh sohte dipere ehu me aramas kak kolkihda mwoalus, de idipkihda kisin pihl kis sang nan pwarer.”

30:15  KAUN-O, Wasa Lapalahpie, Me Sarawien Israel, ketin mahsanihong aramas pwukat, “Kumwail pwurodo oh koapworopworkin ie, pwe kumwail en kehlailla oh saledeksang amwail kahpwal akan.” Ahpw kumwail kahng kapwaiada.

30:16  A ih me kumwail wiahn: kumwail koasoanehdi kumwail en tangasang amwail imwintihti kan ni amwail pahn dake oahs marahra kan. Eri, kumwail me pwung! Kumwail uhdahn anahne pitla. Kumwail lemeleme me noumwail oahs akan me marahra, ahpw me pwakipwakih kumwail kan marahrahsang.

30:17  Ma kumwail pahn kilang imwintihti men, a me kid rehmwail pahn tang; a ma me limmen, kumwail koaros pahn tangdoaui. Sohte emen noumwail sounpei kan pahn luhwe, ihte tuhkehn pilaik pwoat me pahn luhwehdi pohn dohlo.

30:18  Ahpw KAUN-O ketin kaunopada en kupwurmahk oh kalahngan ong kumwail, pwehki eh kin ketin wia me pwung ahnsou koaros. Meid pai irail kan me kin likih KAUN-O.

30:19  Kumwail kan me kin kousoan nan Serusalem solahr pahn mwahiei. KAUN-O me kupwurkalahngan, oh ni amwail pahn peki sapwellime sawas, e pahn ketin kupwurei kumwail.

30:20  KAUN-O pahn ketikihong kumwail nan apwal, ahpw pein ih pahn ket rehmwail pwe en ketin padahkih kumwail, oh kumwail solahr pahn rapahki ih.

30:21  Ma kumwail pahn salongasang nan ahlo oh kolahng ni palimeing de maun, kumwail pahn rong kapitie sang mwurimwail me mahsanih, “Iet ahlo. kumwail idawehn.”

30:22  Kumwail pahn ale noumwail dikedik en eni kan me wiawihkihda silper oh kohl, oh kesehla rasehng mehkot saut, oh weriwer, ndinda, “Kumwail pwulahkasang met!”

30:23  Ahnsou koaros me kumwail pahn padokedi wahnsahpw, Kaun-o pahn ketikihdo keteu pwehn kakairada oh pahn ketikihong kumwail wahnsahpw ngeder, oh wasahn kamwenge mahn pahn laud ong noumwail pelinmen kan.

30:24  Kou oh ahs akan me kin deipwelih amwail mwaht akan pahn kin kang reh me keieu mwahu oh kaselel.

30:25  Ni rahn me en amwail imwintihti kan kelen mahwen pahn lohdi oh towe kan kamakamala, pihl pahn pwilidohsang pohn nahna koaros oh dohl koaros.

30:26  Maram pahn marainla duwehte ketipin, oh ketipin pahn marainla pahn pak isipak, rasehng marain en rahn isuh me patpene nan rahn ehu. Mepwukat pahn pweida ni ahnsou me KAUN-O pahn ketin kidimala ohla kan oh kamwahwihala ohla kan me e ketikihongehr sapwellime aramas akan.

30:27  Sapwellimen KAUN-O manaman oh lingan kak sansalodo sang wasa doh. Kisiniei oh ediniei kin sansalada nan sapwellime engieng. E kin ketin mahsen, oh sapwellime mahsen kan kin lulda rasehng kisiniei.

30:28  E kin ketin kadarodo kisinieng mwowe rasehng lapake me kin kapeila mehkoaros. E kin ketin kapeila wehi koaros oh katokihedi arail koasoandi suwed kan.

30:29  Ahpw kumwail, sapwellimen Koht aramas akan, pahn pereperen oh kokoul duwehte me kumwail kin wia ni rahn sarawi lapalap ehu. Kumwail pahn pereperen duwehte irail kan me kin kesekesengki keseng pepeuk kohdalahng ni Tehnpas Sarawien KAUN-O, soundoarepen Israel.

30:30  KAUN-O pahn ketin kupwurehda pwe aramas koaros en rong kapitie oh kehn engin sapwellime engieng. Mpwulen kisiniei pahn mie, keteu aihs takai, pil depwek toatoal en melimel, oh keteu mosul.

30:31  Mehn Asiria pahn masepwehkada ni ar pahn rong kapitien KAUN-O oh kehn engin sapwellime kalokolok.

30:32  Nindokon KAUN-O eh pahn ketin kalokaloke irail sohte tokedi, sapwellime aramas akan pahn kesekesengki nair aip kan oh arp kan. Pein Koht me pahn ketin mahweniong mehn Asiria kan.

30:33  Mahsie wasa kis kaunopadahr pwe lapalahn kisiniei ehu en lulda oh kamwasikahla nanmwarki lapalap en Asiria. Wasao inenen loal oh tehlap, oh tuwi tohto koasoakoasoakdahr ie. Engin doauesen KAUN-O me pahn peuk pwe en kalulada.

Chapter 31

31:1  Irail ko me kin kasikasik sawasaparail sang Isip uhdahn pahn sohrala! Re kin koapworopworki en Isip eh kehlail ni oahs, werennansapw en mahwen, oh sounpei kan. Re ahpw sohte kin koapworopworki KAUN-O, Koht sarawien Israel, de peki sapwellime sawas.

31:2  E mwahngih dahme e ketin wiewia. Ihme e kin ketikihdo kahpwal akan. E kin ketin kapwaiada sapwellime mahsen en kalokolok, oh kin ketin kaloke aramas suwed kan, iangahki me kin sewese irail akan.

31:3  Mehn Isip kan kaidehn koht kei, pwe irail aramas! Neirail oahs akan sohte kehlailasang oahs teikan. Ni en KAUN-O eh pahn ketin kasalehda kupwure, wehi kehlailo pahn mwerpeseng, oh wehi luweto me e sewese pil pahn iang pwupwudi. Eri, ira koaros pahn ohla.

31:4  KAUN-O ahpw mahsanihong ie, “Duwen silepen sihpw men eh kin weriwering laion men sang rehn mahn emen me e kemelahr, oh laiono sohte kak masepwehkada tang; iei duwen eh sohte mehkot pahn kak kapweiekiehdi, KAUN-O, Wasa Lapalahpie, ni ei pahn kin sinsile oh doandoare Nahna Saion.

31:5  Oh pil duwen menpihr men kin komwkomwpwal nah kan, ih duwen ngehi, KAUN-O, Wasa Lapalahpie, pahn kin sinsile oh doandoare Serusalem.”

31:6  Koht ahpw mahsanih, “Mehn Israel akan, kumwail dipadahr oh pelianiedahr. Ahpw met, kumwail pwurodo rehi.

31:7  Ahnsou ehu pahn kohdo me kumwail koaros pahn kesehla dikedik en eni suwed kan me kumwail wiahkihda silper oh kohl.

31:8  Asiria pahn ohkihla mahwen, ahpw kaidehk sang ni kehlail en aramas. Mehn Asiria kan pahn tangasang nan mahwen; eri, neirail mwahnakapw akan pahn wiahla lidu.

31:9  Arail nanmwarki pahn masepwehkada oh tangdoaui; oh sapwellime kaunen sounpei kan pahn pil masepwehkada oh kesehla neirail pilaik en mahwen kan.” KAUN-O me mahmahsen--KAUN-O me kin ale kaudok nan Serusalem, oh sapwellime kisiniei kin lullul wasao pwehn isikala mehn meirong kan.

Chapter 32

32:1  Ahnsou ehu nanmwarki men pahn mie me inenen inen oh pwung, oh sapwellime kaunen wehi kan pahn kin kakaun ni pwungen kosonned.

32:2  Emenemen irail pahn rasehng wasahn ruksang kisinieng oh melimel. Re pahn rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.

32:3  Silangirail kan sohte pahn kin sohpeisang anahn en aramas akan, oh re pahn kin kanahieng karonge ngilen ar pekipek kan.

32:4  Kupwurarail kan solahr pahn kin sohte kanengamah, ahpw re pahn kin kasalehwei ar kupwurokong ni ar mwekid kan oh mahsanihwei ni mehlel audepen kupwurarail kan.

32:5  Sohte me pahn wiahki aramas pweipwei kan aramas waun, de koasoia me me mwersuwed kan me lelepek.

32:6  Pwe aramas pweipwei men kin lokolokaia mwahl lemelemehte me suwed. Koht kin ketin kalahdeki eh wiewia sapwung kan oh eh lokaia suwed kan. Aramas pweipwei sohte kin kamwenge me duhpeklahr akan de kanampile me kin men nimpildahr akan.

32:7  Aramas suwed men ih, oh e kin wia tiahk suwed kan. E kin koasoanehdi en kauwehkihla me semwehmwe kan likamw oh kin silehsang irail ar pwung kan.

32:8  Ahpw aramas waun kin lelepek oh dadaur ni tengeteng dahme pwung.

32:9  Kumwail lih akan me ahneki mour mwahu, me sohte kin pwunodki mehkot, kumwail rong dahme I pahn patohwan,

32:10  Ele kumwail nsenamwahu met, ahpw nan sounpar kohkohdo ni soangen ahnsou wet, kumwail pahn diren nsensuwedla, pwehki sohte wahn wain me kumwail pahn dolung.

32:11  Kumwail ahneki mour mwahu sang mahs kohdo, sohte kin pwunodki mehkot; ahpw met, kumwail en masepwehkada oh rerrer! Kumwail kapwuhrasang amwail likou kan, oh pirekipene mwein likou lukopamwail kan.

32:12  Ni amwail nsensuwed, kumwail pekir nan maremwaremwail kan oh sengiseng, pwe sapwamwail kan oh audepe kan, amwail mwetin wain kan kamwomwmwomwlahr,

32:13  oh sapwen nei aramas akan direkilahr dihpw tekatek oh dihpw suwed akan. Kumwail mwahieiki ihmw koaros me towe kan nsenamwahu oh mwahieiki kahnimwo me diren mour ie.

32:14  Pil tehnpaso pahn tehnla iangahki poahsoan kaunen kahnimwo. Ihmw kan oh kehl kehlail kan me kin doandoare irail pahn ohla kohkohlahte. Oh ahsen wel kan pahn kakahnseli wasa ko, oh sihpw kan pahn kin diar wasao kanarail kisin mwenge.

32:15  Ahpw iet Koht pahn ketin pwurehng kamwerediong pohtail sapwellime ngehn. Pwe sapwtehno pahn pwurehng pwelmwahula oh sahpw akan kawosehda wahnsahpw mwahu.

32:16  Wasa koaros nan sahpwo pwung oh pwuhng pahrek pahn kin mihla ie.

32:17  Pwehki aramas koaros pahn weweidki me pwung, oh popohl oh meleilei pahn kakaun kohkohlahte.

32:18  Imwen sapwellimen Koht aramas akan pahn kin diren popohl oh nsenamwahu, oh re sohte pahn kin pwunodki mehkot.

32:19  (Ahpw keteu aihs takai pahn kin mwerediong pohn tuhkehn wel kan oh kahnimwo pahn ohla.)

32:20  Ia uwen peren en koaros me kin padok wahnsahpw akan limwahn pihl akan oh mweidohng nair ahs oh pelinmen kan en sansaledekseli wasa pwuko.

Chapter 33

33:1  Meid suwediong at imwintihti kan! Re kauweikitalahr oh pirapahsangehr at dipwisou kan, mehnda ma sohte emen kiht me kauweirailla de pirapahsang irail mehkot. Ahpw arail ahnsoun wiakau oh pirap pahn imwisekla oh irail pahn uhd ale kalokolok en pirap oh wiakau.

33:2  Maing KAUN, komw ketin kupwurei kiht. Se patohwan koapworopworkin komwi. Komw ketin apwalih kiht rahn koaros oh ketin doareikitala ni ahnsou apwal.

33:3  Ni omwi kin ketin mahwenkin kiht, wehi kan kin tangasang ngilen ngirisek en mahwen.

33:4  Ar kepwe kan pehdsangirailehr oh lohdier duwehte dipwisou me kin lohdi nan mahwen.

33:5  Ia uwen lapalap en KAUN-O! E kin ketin kakaun mehkoaros. E pahn ketin kadirehkihla Serusalem sapwellime pwuhng oh inen;

33:6  e pahn ketikihong wehiet mour werei. Ahnsou koaros e kin ketin apwahpwalihki sapwellime aramas akan kisakis en kupwurokong oh erpit. Eri, soahng keieu kesempwal me re ahneki, iei lammwiki KAUN-O.

33:7  Ohl kommwad akan likilikwerih sawasaparail. Meninkeder kan me songosong en wahdo popohl wie sengiseng kowahlap.

33:8  Nan allap akan inenen keperlahr, me kahrehda sohte me kin seiloak ie. Inou lap nanpwungen wehi kan oh pwungpene kan ohlahr. Solahr waun nanpwungen aramas akan.

33:9  Sahpwo wonohnehr oh tehnlahr. Wel en Lepanon kan mengidier, oh wasa patapat en Saron duwelahr sapwtehn ehu, oh nan Pasan oh ni Nahna Karmel tehntuhke kan mahrdier.

33:10  KAUN-O ketin mahsanihong wehi kan, “Met I pahn mwekid! I pahn kasalehda uwen ei manaman.

33:11  Sohte pahn katepen koasoandi kan me kumwail kin koasoanehdi nan kapehdamwail, oh mehkoaros me kumwail pahn kin wia sohte pahn katepe. Ngeniet rasehng kisiniei me pahn kamwomwkumwailla..

33:12  Kumwail pahn mwerpeseng rasehng takai me kin isihsla pwehn wiahla pweht, rasehng dihpw tekatek me isihla wiahla pehs.

33:13  Kumwail koaros me mi wasa keren oh wasa doh kan, kumwail rong duwen ei wiewia kan oh pohnese duwen ei manaman.”

33:14  Aramas dipan en Saion kan rerrerki ar masepwehkadahr. Re ndinda, “Sapwellimen Koht kadeik duwehte kisiniei me kin mpwumpwul oh kamwakamwasik wasa kohkohlahte. Ihs rehtail me kak momour nan soangen kisiniei wet?”

33:15  Ahpw met kumwail kak mourla ma kumwail pahn kin lokaia mehlel oh wia dahme pwung. Kumwail dehr doadoahngki amwail kehl oh manaman pwe en pitihasang en me semwehmwe kan ar kepwe oh dehr ale pweipwei ni ahl sapwung. Dehr patehng irail kan me kin koasoakoasone re en kamaramas de wia soahng suwed teikan.

33:16  Eri, iei duwen amwail pahn pweida, sohte mwahn perki mehkot ong amwail mour, rasehng amwail poadoandoarki kehl kehlail oh ile. Pwe e pahn kin mie kisin tungoal rehmwail mehn tungoal oh pihl mehn nimpil.

33:17  Kumwail pahn pil pwurehng kilang nanmwarki men nan sapwellime lingan, ni eh pahn ketin kakaun sahpw ehu me inenen kalaimwuhnie.

33:18  Amwail kin masak sounrikdaksis en kawa ko oh lipoahrok en mehn liki ko pahn wiahla ouraman en mahs ehu.

33:19  Kumwail solahr pahn kilang mehn liki aklapalap akan me kumwail sohte kin wehwehki ar lokaia.

33:20  Kumwail sohpeila oh kilang Saion, kahnimw me kitail kin wia ie atail sarawi lapalap akan. Kumwail kilang Serusalem! Wasa me kitail pahn kousoan ie ni nsenamwahu oh meleilei. E pahn rasehng impwal ehu me sohte kak mwekid, me uhre kan sohte kak usuhsdahsang nan pwehl, oh selipe kan sohte kak mweipeseng.

33:21  KAUN-O pahn ketin kasalehiong kitail sapwellime lingan. Kitail pahn kousoanla limwahn pillap tehlap akan oh ni keilen piletik kan, ahpw weren imwintihti kan sohp sohte pahn seiloak wasa pwuko.

33:22  Koasoandien dipwisou kan pohn sohp akan pahn sohte katepe; serek kan solahr pahn kak doadoahk. Kitail pahn kulihasang en karis en imwintihti kan ar kepwe koaros. Oh pwehki eh pahn tohtohie kowahlap, me nehtuk kan pahn pil iang ale pweisarail. Pein KAUN-O pahn wiahla atail nanmwarki; oh e pahn ketin kakaun oh apwahpwalih kitail.

33:23  Koasoandien dipwisou kan pohn sohp akan pahn sohte katepe; serek kan solahr pahn kak doadoahk. Kitail pahn kulihasang en karis en imwintihti kan ar kepwe koaros. Oh pwehki eh pahn tohtohie kowahlap, me nehtuk kan pahn pil iang ale pweisarail. Pein KAUN-O pahn wiahla atail nanmwarki; oh e pahn ketin kakaun oh apwahpwalih kitail.

33:24  Sohte emen me kin kousoan nan sahpwo pahn kaulimkihla eh soumwahu, oh koaruhsie pahn ale lapwepen diparail kan koaros.

Chapter 34

34:1  Kumwail kohdo, kumwail tohn wehi koaros! Kumwail pokonpene oh rong. Sampah pwon oh aramas koaros me kin koukousoan loale en kohdo oh rong.

34:2  KAUN-O ketin engiengdahr pahn wehi koaros oh neirail karis kan. E ketin kerieiraillahr pwe re en mwomwla.

34:3  Paliwararail kan sohte pahn seridi, ahpw pahn wonohn wasao pwehn mwerpeseng oh matala; oh nahna kan pahn weitahtahkihla nta.

34:4  Ketipin, maram, oh usu kan pahn mwerpeseng wiahla pwelpar. Pahnlahng pahn sohrala rasehng pelien doaropwe ehu me limilimpene, oh usu kan pahn pwupwudi rasehng tehntuhke kan me pwumwpwupwudi sang nan tuhkehn wain de tuhke pik pwoat.

34:5  KAUN-O ketin kaunopadahr sapwellime kedlahs nanleng, eri, met e pahn ketin pelehki Edom, irail ko me e ketin kerialahr pwe re en mwomwla.

34:6  Sapwellime kedlahs pahn direkihla ntahrail oh wihrail, rasehng ntahn oh wih en sihmpwul oh kuht me kin wiahla mehn meirong. KAUN-O pahn ketin wia meirong wet nan kahnimw Posra; e pahn ketin wia lapalahn kamaramas ehu nan wehin Edom.

34:7  Aramas akan pahn pwupwudi mehla rasehng kou lawalo oh koupwul kan, oh sampah pahn weitahtahkihla nta oh wih kan.

34:8  Ih ahnsowo met me KAUN-O pahn ketin kapitala Saion oh kalowehdi eh imwintihti kan.

34:9  Pillap akan en Edom pahn wiahla tahr oh pwehlo pahn wiahla suwepel okohk. Sahpwo pwon pahn luluda rasehng tahr.

34:10  E pahn wie lullul nipwong nin rahn, oh ediediniei kohkohlahte. Sahpwo pahn tetehnla sang ehu dih lel ehu dih.

34:11  Likoht oh menpihr lawalo kan pahn sapwenikihla. KAUN-O pahn ketin pwurehng wiahkihla sapwtehn ehu, duwehte mwohn eh saikinte kapikipikda.

34:12  Sohte nanmwarki men me pahn kaunda sahpwo, oh kaun akan koaros pahn sohla mie.

34:13  Kisin tuhke tekatek oh dihpw kan pahn wosada nan tehnpas akan koaros oh ni kelen kisin kahnimw kan, oh mahn lawalo oh likoht kan pahn kousoanla ie.

34:14  Mahn lawalo kan pahn kohkohseli wasa pwuko, oh eni kan pahn kin likwerpene nanpwungarail. Eni wos lih emen pahn kin kohdo wasao pwehn rapahki wasahn eh kommoal.

34:15  Likoht kan pahn wiahda pasarail kan, kutoahredi oh kasawahdi, oh apwalihada wahrail kan wasao. Puldur kan pahn kohkohpene oh kousoanla wasao.

34:16  Kumwail rapahki nan sapwellimen KAUN-O pwuken mahn mour kan oh dahme pwuhko koasoia. Sohte emen rehn mahn pwukat me sohte pahn iang kousoan wasao, oh sohte emen me eh werek sohte pahn iang mi wasao. KAUN-O ketin koasoanedier pwe mepwukat en pweida; pein ih me pahn ketikinirailpene.

34:17  Iei Koht me pahn ketin nehkpeseng sahpwo nanpwungarail oh ketikihong pweisen emenemen. Re pahn kousoan nan sahpwo sang ehu dih lel ehu dih, oh e pahn wiahla sapwarail kohkohlahte.

Chapter 35

35:1  Sapwtehn pahn perenda, oh rohs akan pahn mpwek oh masalpeseng nan sahpw madekeng kan.

35:2  Sapwtehn pahn kokoul oh ngisingiski eh peren; e pahn linganla duwehte lingan en Nahna Lepanon kan, oh pwelmwahula duwehte mwaht akan en Karmel oh Saron. Aramas koaruhsie ahpw pahn udiahl lingan en Koht, re pahn kilang sapwellime roson oh manaman lapalahpie.

35:3  Kumwail kakehlahda pehrail kan me ngiralahr, oh nehrail kan me rerrerki ar luwet.

35:4  Kumwail ndaiong koaros me nan kapehd tikitiklahr, “Kumwail kehlail oh dehr masak! Koht pahn ketidohn kapitkumwailla, e pahn ketidohn kaloke amwail imwintihti kan.”

35:5  Iei ahnsowo me maskun kan pahn pehdpeseng, oh me salengepon kan pahn rongada wasa.

35:6  Me nehtuk kan pahn mwusikekda oh kahkahlek, oh me lohteng kan pahn ngisingiski ar peren. Pihl pahn kuspekda oh pwiliwei nan sapwtehn;

35:7  wasahn pihk karakar akan pahn wiahla lehn pihl, oh sahpw madekeng kan pahn audaudkihda pwarer en pihl. Wasa me daiker kan kin kousoan ie, dihpw oh ahlek pahn uhd wosada ie.

35:8  Allap pwoat pahn mihla wasao, me pahn adaneki “Ahl Sarawien Komour.” Sohte aramas dipan emen pahn keid ie; sohte aramas pweipwei men pahn kaweidsuwdihala irail kan me pahn kekeid ie.

35:9  Sohte laion emen pahn kousoan wasao; sohte mahn kommwad emen pahn kin kakahnseli wasao. Irail kan me KAUN-O ketin kapitalahr, iei irail me pahn kin keid ni ahl pwoatet.

35:10  Re pahn lellahng Serusalem pereperen, kokoul oh ngisingiski ar peren. Re pahn kin nsenamwahu kohkohlahte, saledek poatopoat sang nsensuwed oh pahtou.

Chapter 36

36:1  Ni kaeisek pahieun sounpar me Esekaia wiewiahki nanmwarkien Suda, Senakerip, nanmwarki lapalap en Asiria, mahweniong kahnimw kehlail kan en Suda oh kalowehdi.

36:2  E ahpw ketin koasoanehdi sapwellime kaun lapalap en karis kan en patohsang Lakis patolahng Serusalem iangaki karis en sounpei laud ehu pwe re en idingki Nanmwarki Esekaia en pekimahk. Lapalapo eri patohla patopato ni ahl me sounwia likou kan kin doadoahk ie, limwahn warawar me pihl kin tang loale sang nan pwarer en palipowe.

36:3  Mehn Suda silimen ahpw kohieila pwe re en tuhwong: Elaiakim, nein Ilkaia, lapalap me kin pwukoahki apwalih tehnpaso; Sepna, sounnting en nan tehnpaso; oh Soha, nein Asap, lapalap me kin pwukoahki apwalih pwuken wehi.

36:4  Lapalap en Asiriao patohwanohng irail me nanmwarki lapalapo men mwahngih ihs me Nanmwarki Esekaia nohn koapworopworki.

36:5  E ahpw idingkin irail, patohwan, “Kumwail kupwukupwure me mahsen kak en wiliandi manaman oh kehlail en sounpei? Ihs me kumwail kupwukupwure me pahn sewesei kumwail oh uhwong Asiria?

36:6  Kumwail kupwukupwure me Isip me pahn sewesei kumwail, ahpw met pahn rasehng amwail pahn doadoahngki ahlek pwoat pwehn wiahki sokon-e pahn timpeseng oh kauwehla nin limamwail kan. Met iei duwen mehmen eh kin koapworopworki nanmwarkien Isip.”

36:7  Lapalap en Asiriao ahpw usehla, patohwan, “De kumwail pahn mahsanihong ie me kumwail koapworopworki KAUN-O, amwail Koht? Iei sapwellimen Koht wasahn kaudok kan oh pei sarawi kan me Esekaia kamwomwala ni eh mahsanihong mehn Suda oh Serusalem en wia kaudok ni pei sarawi teieu.

36:8  I pahn wiahda ehu koasoandi ong kumwail ni mwaren nanmwarki lapalapo. I pahn patohwanohng kumwail oahs riekid ma kumwail pahn kak rapahkihda uwen sounpei me kak dake oahs pwukat.

36:9  Kumwail sohte pil kak pahrekiong sounpei me keieu tikitik nan Asiria, kumwail ahpw kupwukupwure me mehn Isip kan en kadarodohng kumwail werennansapw en mahwen oh sounpei.

36:10  Kumwail kupwukupwure me I mahweniong sapwellimamwail wehi oh kamwomwala ni sohte sawas sang rehn KAUN-O? Pein KAUN-O me mahsanihong ie I en mahweniong oh kamwomwala.”

36:11  Elaiakim, Sepna, oh Soha ahpw patohwanohng lapalapo, “Komw mahsen en Aramaik ong kiht. Pwe iei mahsen me se wehwehki. Komw dehr mahsen en Ipru pwe aramas koaros me patopato pohn kehlo iang wie rongorong.”

36:12  E ahpw sapeng, patohwan, “Kumwail lemeleme me ongete kumwail oh nanmwarkio me nanmwarki lapalapo ketin kadarodohng poaron pwukat koaros? Soh, I pil patopatohwan mepwukat ong aramas akan me patopato pohn kehlo, me pahn iang kang arail pwise oh kent, duwehte kumwail.”

36:13  Lapalapo eri kesihnenda oh weriweriki ni mahsen en Ipru, “Kumwail rong dahme nanmwarki lapalap en Asiria ketin mahmahsanihong kumwail.

36:14  E ketin mahsanih me kumwail en dehr mweidohng Esekaia en pitih kumwail. Esekaia sohte kak doareikumwailla.

36:15  Oh kumwail dehr kamehlele eh mahsen me dene kumwail en koapworopworki KAUN-O. Kumwail dehr lemeleme me KAUN-O pahn ketin doareikumwailla oh me e pahn ketin kapweiekidi nait karis en Asiria pwe se en dehr kalowehdi amwail kahnimw.

36:16  Kumwail dehr rong Esekaia! Nanmwarki lapalap en Asiria ketin mahsanih me kumwail en pedohisang nan kahnimw en oh pekimahk. Kumwail ahpw pahn kak tungoale kreip sang nan pein amwail mwetin wain kan oh wahntuhke pik sang nan pein amwail mwetin tuhke pik kan, oh nimpil sang ni pein amwail pwarer kan-

36:17  lao lel ahnsou me nanmwarki lapalapo pahn ketin koasoaneikumwaildi nan sahpw ehu me kereniong duwehte sapwamwailet, wasa me mwetin wain kan mi ie oh wahnsahpw mehn wiahda pilawa.

36:18  Kumwail dehr mweidohng Esekaia en pitihkin kumwail me KAUN-O pahn ketin doareikumwailla. Ia duwe, koht en wehi teikan doarehla ar wehi sang nanmwarki lapalap en Asiria?

36:19  Ia irail met, koht kan en Amad oh Arpad? Ia koht en Separpaim? Mie emen me doarehla Sameria?

36:20  Iahd me emen koht en wehi pwukat koaros doarehla ar wehi sang at nanmwarki lapalapo? Eri, dahme kumwail lemelemehki me KAUN-O kak ketin doarehla Serusalem?”

36:21  Aramas ako ahpw nennenlahte sohte mwekid, nin duwen me Nanmwarki Esekaia mahsanihong irail re en wia; re sohte patohwanda lepin pato ehu.

36:22  Elaiakim, Sepna, oh Soha ahpw tehrpeseng ar likou kan ni nsensuwed oh patohla patohwanohng nanmwarkio dahme lapalap en Asiria patohwanehr.

Chapter 37

37:1  Mwadangete mwurin Nanmwarki Esekaia eh ketin karongehda arail pakairo, e ahpw ketin tehrpeseng sapwellime likou kan uwen eh kupwursuwedla, e ahpw pwuhriong nan likoun nsensuwed, oh ketilahng nan Tehnpas Sarawien KAUN-O.

37:2  E ahpw ketin poaronehla Elaiakim, me kin pwukoahki apwalih tehnpaso, Sepna, sounnting en tehnpaso, oh samworo me keieu mah oh kadarala rehn soukohp Aiseia, nein Eimwos. Irail koaros mi nan likoun nsensuwed.

37:3  Iet mahsen me e ketikihong irail pwe re en patohwanohng Aiseia: “Rahnwet iei rahnen lokolok ehu; kitail aleier lokolok oh nameneklahr. Kitail rasehngehr lih emen me pahn kareniongehr neitik, ahpw luwetalahr solahr kak neitik.

37:4  Nanmwarki Lapalap en Asiria poaronedohr sapwellime lapalap emen pwehn lahlahwe Koht ieias. KAUN-O, omwi Koht en ketin karonge lahlahwe pwukat oh ketin kaloke irail kan me wia lokaia pwukat. Eri, komwi ketin kasakaski aramas akan me pahn luhwehdi.”

37:5  Ni ahnsou me Aiseia aleier poaron en Nanmwarki Esekaia,

37:6  e ahpw kadaralahng pasapeng wet: KAUN-O ketin mahsanihong komwi en dehr masak mehn Asiria kan me kakahski me dene KAUN-O sohte kak doareikomwihla.

37:7  KAUN-O pahn ketin kupwurehda pwe nanmwarki lapalapo en karongehda rohng pwoat me pahn kahrehiong eh pahn sapahllahng nan sapwellime wehi, oh KAUN-O pahn ketin kupwurehda pwe en kamakamala wasao.”

37:8  Lapalap en Asiriao ahpw rongada me nanmwarki lapalapo ketisangehr Lakis oh mahmahweniong kahnimw me keren Lipna; e ahpw patolahng reh wasao pwehn ale sapwellime kaweid.

37:9  Pakair ahpw lelohng mehn Asiria kan me karis en Isip ehu, me Tiraka, nanmwarkien Sudan ketin kakahluwa, ketidohn mahweniong irail. Ni nanmwarki lapalapo eh karongehda met, e ahpw ketin kadaralahng kisinlikou kis ong Esekaia,

37:10  nanmwarkien Suda, me mahsanih: “Koht me komwi kin koapworopworki ketin mahsanihong komwi me komwi sohte pahn mihla pahn ei manaman, ahpw komwi dehr kamehlele met.

37:11  Ia duwe, komwi karongeier dahme nanmwarki lapalap en Asiria kin wiahiong wehi ehu me e kin ketin kupwurehda en kamwomwala. Ia duwe, komwi kupwukupwure me komwi kak pitla?

37:12  Ei pahpa kahlap ako kauwelahr kahnimw Kosen, Aran, oh Resep, oh kemelahr tohn Pededen me kin kousoan nan Telassar, oh sohte emen ar koht ko me kak doareirailla.

37:13  Ia nanmwarki kan en kahnimw Amad, Arpad, Separpaim, Ena, oh Ippa?”

37:14  Nanmwarki Esekaia ahpw ketikihsang kisinlikowo rehn meninkedero oh wadek. Ih eri ketilahng ni Tehnpas Sarawio, ketikihdi kisinlikowo wasao mwohn silangin KAUN-O,

37:15  e ahpw loulou, mahsanih,

37:16  Maing KAUN, Wasa Lapalap, Koht en Israel, me ket pohn kerup kan, komwihte kelehpw me Koht, me ketin kakaun wehi koaros en sampah. Komwi ketin kapikadahr nanleng oh sampah.

37:17  Eri met, Maing KAUN, komwi ketin karongei kiht oh ketin mahsanih dahme wiewiawihong kiht. Komwi ketin karonge mehkoaros me Senakerip patohwan lahlahwe kin komwi, Koht ieias.

37:18  Kiht koaros patohwan ese, Maing KAUN, me nanmwarki lapalap en Asiria kamwomwalahr wehi tohto, oh wiahkilahr sapwtehn sapwarail kan,

37:19  oh isikalahr ar koht kan-me iei kaidehn uhdahn koht kei, ahpw ihte sansal kei en tuhke oh takai me wiawihkihda pehn aramas.

37:20  Eri met, Maing KAUN, komwi ketin doareikitasang nanmwarki lapalap en Asiria, pwe wehi koaros en sampah pahn esehla me komwihte me Koht.”

37:21  Aiseia eri kadaralahng Nanmwarki Esekaia pakair ehu, pasapengpen en nanmwarkio loulou.

37:22  KAUN-O ketin mahsanih, “Kahnimw Serusalem kouruhrkin uhk, Senakerip, oh kepitkin uhk.

37:23  Ihs me ke lemeleme me ke lahlahwe oh mwamwahliki? Ke sohte waunekin ie, Koht sarawien Israel.

37:24  Ke kadarodohr noumw ladu pwehn suweikihong ie duwen weromw werennansapw en mahwen kan eh kalowedier nahna keieu ile kan en Lepanon. Ke suweiki me ke peledier tuhke sidar me keieu reirei kan oh tuhke saipres me keieu kaselel kan, oh me ke lellahng nanwerengen wel kan.

37:25  Ke suweiki me ke weiradahr pwarer kei oh nimpilsangehr ni pilen sapwen liki kan, oh nehn noumw sounpei kan tiakehr oh kamadahda Pillap Nail.

37:26  “Ia duwe, ke sohte rong me ngehi me koasoanedier mepwukat kawao? Oh met I kapwaiadahr mepwukat. Ngehi me kihong uhk manaman en wekidohng kahnimw kehlail kan ong ni koasoakoasoak en kihd.

37:27  Aramas ako me kin kousoan wasa pwuko me luwet; re masepwehkada oh salohda. Re rasehng dihpw nan mwaht ehu de dihpw me wosada pohn ihmw ni kisinieng karakar en palimese eh kin ipir irail.

37:28  “Ahpw I ese mehkoaros duwen kowe, dahme ke kin wia oh wasa ke kin kohla ie. I ese uwen omw uhwong ie.

37:29  I aleier pakairpen omw lingeringer oh omw aklapalap, eri met, I pahn kihong kehs ni tumwomwen oh kapwureiukalahng ni ahl me ke keid ie kohdo.”

37:30  Aiseia eri patohwanohng Nanmwarki Esekaia, “Iet kilel en dahme pahn pweida. Nan sounpar wet oh sounpar kohkohdo ihte me kumwail pahn konokonote wahnsahpw en nanwel, ahpw nan sounpar en mwurio, kumwail ahpw pahn kak padokedi wahnsahpw oh dolung, oh padokedi tuhkehn wain oh konote kreip kan.

37:31  Irail kan me luhwehdi nan Suda pahn paiamwahu rasehng kisin tuhke me kin kadarala kalowe wasa loal pahn pwehl oh kadarala wah.

37:32  E pahn mie aramas nan Serusalem oh pohn Nahna Saion me pahn pil luhwehdi, pwehki KAUN-O Wasa Lapalap ketin koasoanedier mepwukat en pweida.

37:33  “Oh Iet dahme KAUN-O ketin mahsanih duwen nanmwarki lapalap en Asiria: ‘E sohte pahn pedolong nan kahnimw wet oh sohte arep pwoat me e pahn kadarohng ie. Sohte sounpei me wisik mehn sansar pahn kerendohng kahnimwo, oh sohte mehn poadoandoar pahn wiawihda kapilpene kahnimw wet.

37:34  E pahn pwurala keid ni ahl me e keid ie kohdo, ni eh sohte pahn pedolong nan kahnimw wet. Ngehi, KAUN-O, me mahmahsen.

37:35  I pahn doarehla oh sinsile kahnimw wet, pwe en wia kamwahupen mwarei oh pwehki inou me I wiahiongehr nei ladu Depit.’ ”

37:36  Tohnleng en KAUN-O men ahpw patolahng nan kahnimwpwal en mehn Asiria kan oh kemehla sounpei 185,000. Re ahpw wonohnpene oh melahr nin sohrahn en mandahn rahno.

37:37  Senakerip, nanmwarki lapalap en Asiria ahpw pwuralahng Ninipe.

37:38  Rahn ehu, nindokon eh wiewia eh kaudok nan tehnpesen eh koht Nisrok, sapwellime pwutak riemen, Adramelek oh Sareser, ahpw kemehkihla ih neira kedlahs kan oh ira sopolahng nan wehin Ararat. Pil emen sapwellime pwutak, Esaradon, me uhd wiliandi wiahla nanmwarki lapalap.

Chapter 38

38:1  Ni ahnsowo Nanmwarki Esekaia ketin luhmwuhmwda oh kereniong sipalla. Soukohp Aiseia, nein Eimwos, ahpw patohla pwe en tuhwong oh patohwanohng, “KAUN-O mahsanihong komwi en ketin koasoanehdi mehkoaros pwehki komwi sohte pahn pwurehng mwahula. Komwi onopada pwe komwi pahn sipalla.”

38:2  Esekaia eri sohpeila nin dihdo oh loulou, mahsanih,

38:3  “Maing KAUN, komw ketin tamataman me I kin papah komwi ni loalopwoat oh nan kapehd mehlel, oh I kin songosong ahnsou koaros en kapwaiada kupwuromwi.” E ahpw tentenihr kowahlap.

38:4  KAUN-O eri mahsanihong Aiseia

38:5  en pwurala rehn Esekaia oh patohwanohng, “Ngehi, KAUN-O, Koht en omw pahpa kahlap Depit, karongehier omw kapakap oh mahsaniher pilenmesomw; I pahn karairaila omw mour erein sounpar eisek limau.

38:6  I pahn doarehla kowe oh kahnimw en Serusalem sang nanmwarki lapalap en Asiria, oh I pahn usehla sinsile kahnimwo.”

38:7  Aiseia ahpw sapengki, “KAUN-O pahn ketikihdo ehu kilel me pahn kasalehda me e pahn ketin kapwaiada sapwellime inou.

38:8  Ni kehndake me Nanmwarki Ahas ketin wiahda, KAUN-O pahn ketin kupwurehda pwe mweteo en pwurala mwuri ni kahk eisek.” Mweteo eri pwurala mwuri ni kahk eisek.

38:9  Mwurin Esekaia eh rosonda sang sapwellime luhmwuhmwo, e ahpw ketin ntingihada koulen kaping pwoatet:

38:10  Ni ahnsou kaperen en ei mour I kihkihong me I kohkolahng nan wasahn me melahr akan, solahr momourki mour en samaph wet.

38:11  I kihkihong me nan sapwen me momour kan I solahr pahn pwurehng udiahl KAUN-O de aramas mour men.

38:12  Ei mour imwiseklahr, rasehng impwal ehu me kamweremwerdier, rasehng pelien likou ehu me sisetpesengier. I kihkihong me Koht me ketin katokedier mouri.

38:13  Pwohng ehu pwon I kin sengisengki ei medek, rasehng ma laion emen tehrpesengier tih kat. I kihkihong me Koht me ketin katokedier mouri.

38:14  Ngileiet tikitikla oh luwetala, ngilen pahtou rasehng ngilen mwuroi. Pwoaren mesei kat tihwohla kilikilengwohng nanleng. Maing KAUN, komwi ketin kapitiehsang kahpwal pwukat koaros.

38:15  Dahme I kak patohwan? KAUN-O me ketin wiahda mepwukat. Mohngiongiet ohlahr, oh I solahr kak meir.

38:16  Maing Kaun, I pahn momourkin komwi, komwihte me ei mour; komwi ketin kamwahwihiehla oh mweidohng I en momour.

38:17  Ei nsensuwed pahn wekideklahng ni popohl. Komwi ketin doarelahr ei mour sang me keper koaros; komwi ketin kupwur mahkikihong ie dipei kan koaros.

38:18  Sohte emen nan wasahn me melahr akan kak en kapinga komwi; me melahr akan sohte kak koapworopworki sapwellimomwi loalopwoat.

38:19  Iei me momour kan me kin kapinga komwi, nin duwen ei kapinga komwi met. Sahm akan kin padahkihong neirail kan duwen omwi loalopwoat.

38:20  Maing KAUN, komwi ketin kamwahwihielahr. Se pahn kesengki arp kan oh koulki koulen kapinga komwi, Se pahn kapinga komwi nan Tehnpas Sarawio erein at mour.

38:21  Aiseia eri patohwanohng nanmwarkio en ketikihong ni eh mpwos ko wahn pik me pitakatak, e ahpw pahn mwahula.

38:22  Nanmwarki Esekaia ahpw keinemwe, “Ia kilel me pahn kasalehda me I pahn kak kolahng ni Tehnpas Sarawio?”

Chapter 39

39:1  Kereniong ni ahnsowohte me nanmwarkien Papilonia, Merodak Paladan, nein Paladan pwutak, karongehda me Nanmwarki Esekaia ketin luhmwuhmw, ih eri kadaralahng kisinlikou ehu iangahki kisakis.

39:2  Esekaia eri kasamwoh meninkeder ko oh kasalehiong irail reken eh kepwe-sapwellime silper oh kohl, mehn doal mwenge, oh lehn wai kan, oh sapwellime dipwsoun mahwen. Sohte mehkot nan eh perehn nahk de wasa kis nan sapwellime wehi me e sohte ketin kasalehiong irail.

39:3  Soukohp Aiseia eri patohla reh oh kalelapak, patohwan, “Ia wasa me ohl pwukat patohsang ie oh dahme re patohwanohng komwi?” Esekaia ahpw sapeng, mahsanih, “Re kohsang nan sahpw doh ehu, me iei Papilonia.”

39:4  “Dahme re patohwan nan tehnpaso?” “Re kilang mehkoaros. Sohte mehkot nan perehn nahko me I sohte kasalehiong irail.”

39:5  Aiseia eri patohwanohng nanmwarkio, “KAUN-O Wasa Lapalap ketin mahsanih

39:6  me ahnsou ehu kohkohdo me mehkoaros nan tehnpaso, mehkoaros me omwi pahpa kahlap ako nekidalahr leledo rahnwet, pahn wisiklahng Papilonia. Sohte mehkot pahn luhwehdi.

39:7  Ekei kisehn kadaudokomwi kan pahn wisiksang oh wiahla ohl lekwosol pwehn re en papah nan tehnpesen nanmwarkien Papilonia.”

39:8  Nanmwarki Esekaia ahpw wehwehkihda me met wehwehki me erein eh mour popohl oh onepek mwahu pahn mie nan sapwellime wehi, e ahpw sapeng, mahsanih, “Rohng me komwi ketikihdo sang rehn KAUN-O me mwahu.”

Chapter 40

40:1  Atail Koht ketin mahsanih, “Kumwail koaloalamwahwihala nei aramas akan, kumwail koaloalamwahwihirailla!

40:2  Kumwail koangoangehda tohn Serusalem kan. Ndaiong irail me ar lokolok kan imwiseklahr, oh re aleier met lapwen diparail kan. Re aleier sang rehi kalokolok unsek en diparail kan koaros.”

40:3  Ngihl ehu kin likilikwer, “Kumwail kaunopadahng KAUN-O sapwellime ahl nan sapwtehn! Kumwail kainenehla wasa kan nan sapwtehn me atail Koht pahn ketin keid ie!

40:4  Audehda wahu koaros, kapatapatahla nahna koaros. Dohl kan pahn wiahla sahpw patapat, wasa sapahrek koaros pahn pahrekla.

40:5  Lingan en KAUN-O ahpw pahn sansalda, aramas koaros pahn udiahl sapwellime lingan. Pein KAUN-O me ketin inoukidahr met.”

40:6  Ngihl laud ehu me likilikwer, “Kumwail kalohkiseli!” I ahpw patohwan kalelapak, “Dahme I pahn kalohki?” A ngihlo mahsanih, “Lohkiseli duwen aramas koaros ar rasehngalahr dipwen nansapw akan; ar lingan sohte kin wereisang lingan en rohsen nanwel kan.

40:7  Dihpw kan kin mengila oh rohs akan kin pwupwudi ni engin silangin KAUN-O eh kin lel irail. Iei duwen aramas akan, ar sohte kehlailasang dipwen nansapw akan.

40:8  Ei, dihpw kin mengila oh rohs kin pwupwudi, ahpw mahsen en atail Koht kin mour poatopoat.”

40:9  Kohdawei, kowe Serusalem, pohn nahna ile; ke ahpw lohkiseli rohng kaperen wet! Kowe, Saion, ngihl laud likilikwerkiseli oh lohlohkiseli rohng kaperen wet! Ke dehr masak, a lohkihwei. Ndaiong kahnimw kan en Suda me ar Koht ketiket kohdo!

40:10  KAUN-O, Wasa Lapalahpie, pahn ketidohn kaunda ni roson lapalahpie, e pahn ketikihdo sapwellime kan me e ketin kapitalahr.

40:11  E pahn ketin apwalih sapwellime pelin sihpw duwehte silepen sihpw men; e pahn ketikipene sihmpwul kan, e pahn ketin apwalihekin irail nin lime; oh e pahn ketin kahre inarail kan ni keneinei.

40:12  Ia duwe, mie aramas emen me kak limakasang pilen madau, de sohngki pahnlahng tipwengenpeh? Mie me kak oarepenehng pwelen sampah nan kep ehu, de teneki dohl oh nahna kan pohn mehn tenek kan?

40:13  Mie aramas emen me kak patohwanohng KAUN-O dahme e pahn ketin wia? Ihs me kak patohwanohng padahk ehu de panawih?

40:14  Ihs me Koht kin ketin ale kaweid reh pwe en kin mwahngih oh dehdehkihla soahng kan, oh ketin padahngki duwen eh pahn ketin wiahda soahng kan?

40:15  Wehi kan wia mehkot mwahl mwohn silangin KAUN-O, rasehngete kisin dingiding en pihl kis; deke doh kan rasehng kisin weren pwelpar kei.

40:16  Mahn en nanwel koaros en Lepanon sohte itarohng en wiahla mehn meirong ong atail Koht, oh tuhke koaros en wasao me nohn malaulau en wia tuwien meirongo.

40:17  Wehi kan mwohn silangi rasehng sohte.

40:18  Eri, ihs me kumwail kak karasahiong atail Koht? Ia duwen amwail pahn koasoiahda mwomwe?

40:19  E sohte duwehte mwomwen koht likamw ehu me tohndoadoahk kan kin wiahda, oh sounsukmete kan kin kidimkipene kohl oh kidahng pohn dehu silper.

40:20  Aramas me sohte nah silper de kohl kin pilada soangen tuhke me sohte kak mwoasoahngotla. E kin rapahki tohndoadoahk koahiek men pwehn wiahkihda mwohmw ehu me sohte kak pwupwudi ohla.

40:21  Kumwail sohte ese? Koasoiepe seu wiawihiongkumwailehr mahso? Kumwail sohte kin rong duwen sampah eh tepin wiawihda?

40:22  E wiawihda sang nin limen ih me kin ketiket nan mwoale pohnangin sampah oh palio pahnlahng. tohn sampah kan mwohn silangi rasehng kisin katitik en nanwel kan. Ih me ketikipeseng pahnlahng rasehng kahdeng ehu, rasehng impwal ehu pwe aramas akan en kousoan pah.

40:23  Ih me kin ketin kasapwilidi kaunen wehi manaman akan, oh kin ketin kamwomwirailla.

40:24  Re kin rasehng kisin tuhke poadakapw akan me kin ahpwtehn wosada oh kadarala kalowe. Ni KAUN-O eh kin ketin kadar pohrail engin silangi, re kin mengidi oh pihrpeseng, duwehte tehndipw meng.

40:25  Ihs me kak pahrekiong Koht me sarawi? Mie emen tohrohr me duwehte ih?

40:26  Kumwail kilengdalahng pahnlahng! Ihs me ketin wiahda usu kan me kumwail kilikilang? Iei ih me kin ketin kawekaweid irail duwehte karis en sounpei ehu, iei ih me ketin mwahngih uwen tohtohn irail, oh kin ketin malipehkin irail koaros adarail. Iei duwen lapalap en sapwellime manaman- sohte ehu rehrail kak salongala!

40:27  Eri, Israel, dahme ke kaukaulimki, me dene KAUN-O sohte ketin mwahngih omw apwal akan, de sohte kupwurohki omw lokolongki pwuhng sapahrek?

40:28  Ke sehse? Ke sohte kin rong? Me KAUN-O, iei Koht soutuk; iei ih me ketin kapikada sampah pwon. E sohte mwahn kin ngirala de luwetala. Sohte emen kak dehdehki kupwure.

40:29  E kin ketin kakehlahda me luwet oh me pwangadahr kan.

40:30  Pil me pwulopwul kan kak luwetala, oh mwahnakapw kan kak pwupwukihdi eh sohla angirail.

40:31  Ahpw irail kan me kin koapworopworki KAUN-O, pahn onehda sapahl ar kehl. Re pahn kin kehlail, rasehng ikel kan; ni ar pahn kin tang, re sohte pahn pwangada; ni ar pahn kin alu, re sohte pahn luwetala.

Chapter 41

41:1  Koht ketin mahsanih, “Kumwail sahpw doh kan, kumwail nennenla oh rong ie! Kumwail onopada wia amwail karongorong mwohn mwoalen kopwung; kumwail pahn ahneki ahnsou mwahu en kasalehda amwail tungoal lamalam. Kitail ketpene oh kapwungada ihs me pwung.

41:2  “Ihs me ketikihdo sang palimese lapalap menen me sapwellimaniki manaman en powehdi, me kin kalowehdi wehi koaros me e kin ketla ie? Ihs me ketikihong manaman pwe en kak powehdi nanmwarki kan oh wehi kan? Sapwellime kedlahs kin peleiraildi likamwete irail pwelpar. Sapwellime arep kan kin pwakihirailpeseng rasehng dihpw meng nan kisinieng!

41:3  E ahpw kin pwakih irail, wonowonoweite ni onepek mwahu, inenen marahra me kahrehda aluweluwe kan sohte sair pwehl.

41:4  Ihs me wiahda pwe soahng pwukat en kak pweida? Ihs me koasoanehdi sang nin tapio mwekid en dih kan nin sampah? Ngehi, KAUN-O, ngehi me tepin mehkoaros, oh ngehi, KAUN-O Koht, ngehi me pahn imwilahn mehkoaros.

41:5  “Tohn sahpw doh kan kilangehr dahme I wiadahr; re masepwehkada oh rerrerki ar masak. Iei me irail koaros pokonkipene.

41:6  Tohndoadoahk koahiek kan kin sawaspene oh kin koangngoange emenemen.

41:7  Sounkou ihmw kin ndahng sounsukmete, ‘Keieu mwahu omw doadoahk.’ Me kin siselih sansal en eni kan kin koangngoange me kin pasurkipene nihl. Re kin nda, ‘Doadoahk mwahu ehu met’- re ahpw kin katengehkihdi nihl sansal en enio nan dewe.

41:8  “A kowe, Israel, ei ladu, kumwail nei aramas me I piladahr, kumwail kadaudok en kompoakepahi Eipraam.

41:9  Kumwail me I wahdosangehr ni imwin sampah, me I malipehdosangehr wasa keieu doh kan en sampah oh mahsanihong kumwail, ‘Ei ladu kumwail.’ I pilkumwaildahr, I sohte keseikumwailla.

41:10  Kumwail dehr masak, pwe I kin ieiang kumwail. Kumwail dehr perki mehkot, pwe ngehi me amwail Koht. I pahn kin kakehlakei kumwail oh sewesei kumwail; I pahn kin apwalih kumwail oh doareikumwailla.

41:11  “Irail kan me kin lingeringeriong kumwail, re pahn namenekla. Irail kan me kin mahweniong kumwail, re pahn mehla,

41:12  re pahn mwomwla oh sohrasang sampah.

41:13  Ngehi, KAUN-O, amwail Koht; ngehi me kin kakehlakei kumwail, oh mahmahsanihong kumwail, ‘Kumwail dehr masak, pwe I pahn sewesei kumwail.’ ”

41:14  KAUN-O ketin mahsanih, “Israel, nan omw tikitik oh luwet, ke dehr masak, pwe I pahn seweseiuk. Ngehi, Koht sarawien Israel, ngehi me kin doareiukala.

41:15  I pahn wiahkin uhk duwehte mehn koakoa wahn pilawa, rasehng mehn koakoahk me ngih kapw oh keng. Ke pahn koakoa nahna kan oh kauweirailla; dohl akan pahn patapatala wiahla pwelpar.

41:16  Ke pahn keseiraildahng nan wehwe; kisinieng pahn ipirirailla, oh melimel pahn kamwarakirailseli. A kowe, ke pahn pereperen, pwehki ngehi omw Koht; ke pahn kapikapinga ie, Koht sarawien Israel.

41:17  “Ni ahnsou me nei aramas akan pahn rapahki pihl nan arail anahn akan, oh kepinwararail kan pahn madekengkihda ar men nimpildahr, eri, ngehi, KAUN-O, I pahn karonge ar pekipek; ngehi, Koht en Israel, I sohte kak en keseirailla.

41:18  I pahn kapwilewei pillap akan nanpwungen dohl madekeng kan, oh kakusada pwarer en pihl nan wahu kan. I pahn wiahkihla sapwtehn kan lehn pihl, oh wasa madekeng kan ong ni utuhnpihl.

41:19  I pahn kawosehda tuhke sidar nan sapwtehn, iangahki tuhke akesia oh mirtil oh tuhke olip. Welin tuhke pahn pil wosada nan sahpw madekeng kan, soangen tuhke me kesempwal kan.

41:20  Aramas akan pahn kilang met, oh esehkihla me ngehi, KAUN-O, me ketin wiahda. Re pahn dehdehkihla me nin limen Koht sarawien Israel me wiahda mepwukat.”

41:21  KAUN-O, nanmwarkien Israel, ketin wia sapwellime poahngok, mahsanih, “Kumwail koht en wehi kan, kumwail kohdo oh kasalehda amwail pwung. Kumwail kasalehda amwail irair en kadehde kehlail me mie rehmwail.

41:22  Kumwail pwarodo met oh kohpada dahme pahn wiawi, pwe se en mwahngih ni ahnsou me e pahn pweida. Kawehwehda mwohn mwoalen kopwung wet irair en ahnsou me samwalahr ako, oh kawehwehiong kiht duwe.

41:23  Kumwail padahkihong kiht audepen ahnsou me pahn kohdo- se ahpw pahn ese me uhdahn koht kei kumwail! Kumwail wiahda mehkot mwahu, de kadarodohng kiht apwal laud ehu; me se pahn pwuriamweikihla oh masakada.

41:24  Kumwail oh mehkoaros me kumwail kin wia sohte katepe; irail kan me kin pwongih kumwail kan inenen kasaut!

41:25  “I piladahr ohl emen me kin kousoan palimese; I malipeier pwe en mahweniong kumwail sang ni paliepeng. E tiakedi kaunen wehi kan duwehte pwelmatak, duwehte sounwia dahl eh kin tiak pwelen wie dahl.

41:26  Ihs rehmwail me kohpada me irair wet pahn pweida, pwe se en mahsanih me kumwail me pwung? Sohte emen kumwail patohwanda mehkot duwen met; sohte me rongasang kumwail mehkot!

41:27  Ngehi, KAUN-O, iei me tepin ketikihong Saion pakair en rohng pwoatet. Ngehi me kadaralahng Serusalem meninkeder men pwe en pakairki, ketihtihki, ‘Iet re samwodohr! Noumwail aramas akan samwodohr!’

41:28  Eri, ni ei kilikilengseli nanpwungen koht akan, sohte emen irail kak patohwanda mehkot; sohte emen kak sapeng peidek ko me I keinemwe.

41:29  Eri, koht pwukat koaros patpene sohte katepe; sohte mehkot re kak wiahda oh sansalarail kan sohte audepe oh mehkot mwahl.”

Chapter 42

42:1  KAUN-O ketin mahsanih, “Iet ei laduwo me I kakehlahda- me I piladahr oh kin kupwurperenki. I audehkidahr ngeni, oh e pahn ketikihong wehi koaros pwuhng pahrek.

42:2  E sohte pahn ketin weriwer de mahsen ni ngihl laud, de kapahrek ni ngihl laud nanial akan.

42:3  E sohte pahn ketin katipwasang ahlek pwoat me raukdier, de kakunla lamp ehu me pahn kunlahr. E pahn ketikihong koaros pwuhng poatopoat.

42:4  E sohte pahn kesehla eh koapworopwor, de nan kapehd tikitikla, ahpw e pahn kauwada tiahk pwung nin sampah. Sahpw doh kan kin kasikasik sapwellime padahk kan.”

42:5  Koht ketin kapikada nanleng oh ketin audehla pahnlahng, e ketin wiahda sampah oh soahng momour kan koaros; e ketikihong mour oh ngehn ong aramas kan koaros. Eri, KAUN-O Koht, ketin mahsanihong sapwellime ladu,

42:6  “Ngehi, KAUN-O, I malipeiukodohr oh ketikihonguhkehr manaman pwe ke en kin tetehk pwuhng pwe en mie nin sampah. Pwehki kowe, I pahn wiahda inou ong aramas koaros; pwehki kowe, I pahn ketikihong marain wehi koaros.

42:7  Ke pahn kapehdpeseng me maskun kan, oh kasaledekihala me kin wonohn nan rotorot en imweteng kan.

42:8  “Ngehite me KAUN-O, omw Koht. Sohte emen koht pahn ahneki lingan en mwarei; I sohte pahn mweidohng koht likamw akan en iang ale kapingpei.

42:9  Mehkan me I kohpadahr, re pweidahr ahnsou wet. Met I pahn kasalehiong uhk irair kapw kei, mwohn ar pahn tepida wiawi.”

42:10  Kumwail koulkihong KAUN-O apwoat koul kapwen, kumwail tohn sampah koaros, kumwail koul kapikapinga ih! Kumwail kan me seiseiloak nan madau kan, kumwail kapinga KAUN-O; soahng mour kan koaros nan madau kan, kumwail kapinga KAUN-O! Kumwail sahpw doh kan, oh towe kan koaros, kumwail koul!

42:11  Sapwtehn oh kahnimw kan ie en kapinga Koht; mehn Kedar kan en pil iang kapinga ih! Tohn kahnimw Sela en ngisingiski ar peren oh ngihl laud kokoul sang pohn kumwen nahna kan.

42:12  Irail kan me kin kousoan nin sahpw doh kan, re en koul kapikapinga KAUN-O!

42:13  KAUN-O kin ketido pwehn mahwen rasehng sounpei men; e ketin onopadahr oh kupwur ngoangkilahr en mahwen. Ruwesen mahwen ngiringirisek sang nan doauese, e ketin kasalehda sapwellime manaman ong sapwellime imwintihti kan.

42:14  Koht ketin mahsanih, “I nennenlahr ahnsou reirei; I sohte kin sapeng pekipek en nei aramas akan. Ahpw met e lelehr ahnsoun ei pahn mwekid; I ahpw ngihl laudida duwehte lih emen me medek en neitik lelehr.

42:15  I pahn kauwehla dohl oh nahna kan, oh I pahn karongehla dihpw oh tuhke kan. I pahn wiahkihla pillap akan sapwtehn, oh kamadahda leh kan.

42:16  “I pahn kahluwa nei aramas me maskun kan nan ahl akan me re sohte mwahn kin keid ie. I pahn kamarainihada rotorot me re mihmi loale, oh kainenehla ahl pirek kan me mi mwohrail. Iei mepwukat me I inoukidahr, oh I pahn kapwaiada ni soh peikasal.

42:17  Irail kan me kin koapworopworki dikedik en eni kan, oh kin wiahkin irail arail koht; re pahn sarohdi oh namenekla.”

42:18  KAUN-O ketin mahsanih, “Kumwail me salengepon kan, kumwail rong! Kumwail me maskun kan, kumwail pehdpeseng oh tehk mwahu!

42:19  Mie emen me maskun mehlel sang ei laduwo, oh salengepon sang nei meninkedero?

42:20  Israel, ke kilangehr soahng tohto, ahpw dahme ke sohte katapankihki? Mie salengomw mehn rong wasa, ahpw dahme ke sohte rongki?”

42:21  KAUN-O, iei Koht emen me kin ketin kupwurohki komourpen aramas, iei me e kin kupwurki irail en wauneki sapwellime kosonned oh padahk kan.

42:22  Ahpw met sapwellime kan lohdier nan lokolok laud; re lekdekiongehr nan imweteng kan, re wie ekiek nan kalapwus kan. E kulsangehr ar dipwisou kan oh pirapalahr, sohte emen mie mehn doareirailla.

42:23  Mie emen rehmwail me pahn rong irair wet? Sang met kohla kumwail pahn rong kanahieng?

42:24  Ihs me pangala Israel rehn aramas lipirap pwuko? Pwe pein KAUN-O, me kitail wie dihpiong! Kitail sohte men kapwaiada kupwure ong kitail, de sohte men peikiong sapwellime padahk kan!

42:25  Ihme e kupwuredahki en kapehmkin kitail roson en sapwellime engieng, oh ketin kalokehkin kitail kalokolok en mahwen. Sapwellime engieng, rasehng kisiniei, ih me kalullada Israel pwon, kitail ahpw sohte dehdehki dahme wiewiawi; kitail sohte alehdi padahkpen irair wet.

Chapter 43

43:1  Israel, KAUN-O me ketin kapikuhkada mahsanih, “Ke dehr masak, pwe I pahn doareiukala. I ekerkinuhkehr mwaromwen-nei kowe.

43:2  Ni omw pahn kotehwei pihl loal akan, I pahn ieiang uhk; omw apwal akan sohte pahn kakihruhkala. Ni omw pahn keidwei nan kisiniei, ke sohte pahn mwasingkihla; omw apwal laud akan sohte pahn kauweiukala.

43:3  Pwe iet ngehi, KAUN-O, omw Koht, Koht sarawien Israel, omw Sounkomour. I pahn pangala Isip pwe I en kapituhkala, I pil pahn pangala Sudan oh Sepa.

43:4  I pahn pangala wehi kan unsek pwe I en komouruhkala, pwehki ei nohn kesempwalkin uhk, oh pwehki ei poakohng uhk oh waunekin uhk.

43:5  Ke dehr masak-pwe I kin ieiang uhk! 1 “Sang wasa doh ni palimese lellahng wasa keieu doh ni palikapi, I pahn kapwurehdo noumw aramas akan nan dewerail.

43:6  I pahn mahsanihong mehn paliepeng re en kasaledekirailla, oh mehn palieir en dehr kin kolokol irail. Nei aramas akan en sapahldo sang ni sahpw doh kan, sang wasa koaros nin sampah.

43:7  Pwe iei irail nei aramas, oh I wiairailda pwe re en kin kalinganai ie.”

43:8  Koht ketin mahsanih, “Nei aramas akan en pwarodo ni mwoalen kopwung. Mie masarail, re ahpw sohte kin kilang wasa; mie salengarail, re ahpw sohte kin rong wasa.

43:9  Ekerodo wehi kan pwe re en iang wia kadeik. Ihs rehn arail koht kan me kak kohpada irair en ahnsou me pahn kohdo? Ihs rehrail me kohpadahr irair kan me pweidahr ahnsou wet? Re en kapwarehda arail sounkadehde kan me pahn kadehdehda arail pwuhng, me pahn kadehdehda mehlel en arail lokaia kan.

43:10  “Kumwail mehn Israel kan, kumwail me iei ei sounkadehde; I pilkumwaildahr nin duwen ei ladu men, pwe kumwail en eseiehla oh kamehlele ie, oh dehdehkihla me ngehite, me Koht. Sohte emen koht mie, pwe ngehite; sohte mwahn emen mie, pil sohte me pahn mie mwuhr.

43:11  “Ngehite me KAUN-O, ngehite me kak komourkumwailla.

43:12  I kohpadahr irair wet mahsie, I ahpw kodohn sewesei kumwail. Sohte kohten liki men wiahiong kumwail met; kumwail me ei sounkadehdehn irair wet.

43:13  Kumwail ese me ngehi Koht soutuk. Sohte me kak pitsang ei roson oh manaman; sohte me kak wekidala wiepen nin limei kan.”

43:14  KAUN-O, omw Sounkomour, Koht sarawien Israel, ketin mahsanih, “Pwe en kapituhkala, Israel, I pahn kadaralahng Papilon karis ehu; I pahn kauwehla wenihmwen kahnimwo, oh ngilen towe kan pahn wekiong ni mwahiei laud.

43:15  Ngehi, KAUN-O, omw Koht me sarawi. Ngehi me wieiukada, Israel, oh ngehi me omw nanmwarki.”

43:16  Mahsie KAUN-O ketin wiahda ahllap pwoat nan madau, oh ketin koasoanehdi wasahn kot nanpwungen pihl ile kan.

43:17  E ahpw ketin kahluwahla karis kalaimwun ehu pwe re en mwomwla, karis en werennasapw oh oahs kan. Re ahpw pwupwudi, sohla pwurehng pwourda, rasehng wihk en lamp ehu me kunlahr!

43:18  KAUN-O eri ketin mahsanih, “Ke dehr tengala nan mwekid en kawa ko, de medemedewehte dahme wiawiher kawao.

43:19  Ahpw tehk mwahu irair kapw me I pahn wiahda met. E wiewiawiher met-ke kakehr kilang! I pahn wiahda ahl pwoat kotehla sapwtehn, I pahn kihong uhk pwarer en pihl kei wasao.

43:20  Mahn lawalo kan pahn pil kapingahkin ie ei kapwilewehr pillap nan sapwtehn, pwe en kanampilehki nei aramas pilipildahr akan.

43:21  Irail nei aramas akan me I wiadahr ong ni kalinganpen mwarei, re pahn kin kokouliong ie oh kapikapinga ie.”

43:22  KAUN-O ketin mahsanih, “Israel, kaidehkin ngehi me ke kaudokiong pwe ke pwangahkiniedahr.

43:23  Ke sohte meirongkihong ie meirong isihs en sihpw; kaidehkin ngehi me ke waunekihki omw meirong kan. I sohte katoutouwihekin uhk omw mehn meirong kan, de kapwunodehkin uhk ei pekipeki meirong en warpwohmwahu.

43:24  Ke sohte pwainohng ie warpwohmwahu, de kaperenehkiniehda wihen noumwail mahn akan. Ahpw ke katoutouwihkin ie dipomw kan, oh kahngiangihkiniehda sapwung kan me ke wiadahr.

43:25  Eri, a ngehi, iei Koht me kin kupwur mahkihong uhk dipomw kan; I ahpw wiadahr met, pwehki eh ngehi iei ngehi. I sohte pahn kupwukupwure dipomw kan.

43:26  Eri, kitail ketila oh uh mwohn mwoalen kopwung; ke ahpw kasalehda omw iren kadip! Kasalehda audepen omw repenpwung pwe ke en kadehdehda ma kowe me pwung!

43:27  Omw pahpa kahlap en nin tapio . dipadahr; omw sounkaweid en kawa ko pil dipadahr mwohi.

43:28  Omw kaunen kawa ko kasaminelahr ei wasa sarawio. Ihme I mweidkihong Israel en ohla laud, pwe nei aramas akan en sarohdi oh namenekla.”

Chapter 44

44:1  KAUN-O ketin mahsanih, “Rong, Israel, ei ladu, nei aramas pilipil kan, kadaudok en Seikop.

44:2  Ngehi, KAUN-O, me ketin wieiukada; sang ni ahnsou me ke ipwidi, I kin seweseweseiuk. Ke dehr masak; pwe kowe ei ladu, ei wehi pilipil me I kin loalloale.

44:3  “I pahn kamwerehdiong pihl pohn sahpw me kin anahne pihl, I pahn kapwilewei piletik kan nan sahpw madekeng. I pahn kamwerehdiong ngeni pohn noumw seri kan, oh ei kapai pohn kadaudokomw kan.

44:4  Re pahn pweida oh kaparaparala rasehng dihpw me kelemwur mwahu, rasehng tuhke me adaneki willow kan me poad ni keilen piletik kan.

44:5  “Emenemen aramas akan pahn kin kose, nda, ‘Ngehi sapwellimen KAUN-O.’ Re pahn patehng oh iangala mehn Israel kan. Emenemen irail pahn palihediong ni peh mwaren KAUN-O, oh pahn kin nda, ‘Ngehi emen sapwellimen Koht.’

44:6  KAUN-O, me ketin kakaun oh apwahpwalih Israel, KAUN-O, Wasa Lapalahpie, ketin mahsanih met: “Ngehi me tapi, ngehi me imwi, Koht tehmen; sohte emen koht mie, ahpw ngehite.

44:7  Mie emen me kak wiahda me I wiadahr akan? Ihs kak kohpada ni dehde mehkan koaros me pahn pweida sang ni tepin kawa lel ni imwin kawa?

44:8  Kumwail dehr masak, kumwail nei aramas akan! Kumwail ese duwen sang kawao lel met, ei kohpadahr soahng kan mwohn ar pahn pweida, oh kumwail me ei sounkadehde! Mie emen koht tohrohr? Mie emen koht manaman me I saikinte rong duwe?”

44:9  Irail koaros me kin wiahda dikedik en eni kan sohte irail mehkot, oh koht kan me re kin nohn kesempwalki sohte kateparail. Irail kan me kin kaudokiong koht pwukat, maskun kei irail, oh soaloalokong kei-re pahn namenekla.

44:10  Pwe doadoahk soh-katepe ieu wiahkihda mete mwohmw ehu oh pwongih duwehte koht emen.

44:11  Koaros me pahn kin pwongih soangen mwohmw wet, re pahn sarohdi oh namenekla. Aramas me kin wiahda dikedik en eni pwukat, aramas ekei irail oh sohte irail mehkot. Re en pwarodo oh uh mwohn mwoalen kopwung-re pahn rerrer masepwehkada oh namenekla.

44:12  Sounsuk mete kin ale lepin mete oh isik pohn kisiniei. E kin doadoahngki peh me kehlail pwehn sukada meteo ong ni mwohmw ehu. E kin men mwengehda, men nimpilda, oh pwangada ni eh kin wie doadoahk.

44:13  Sounkou ihmw men kin sohng tuhke kan. E kin mahlenihkihdi takai pweht mwohmw ehu, oh parkihda nah dipwisoun doadoahk kan. E kin wiahda mwomwen aramas, mwohmw kaselel, pwe en kin kidahng nan imwe.

44:14  Mweinele aramas kak pelehdi tuhke sidar kan pwehn doadoahngki, de pilada soangen tuhke teikan sang nanwel. De e kak padokedi ehu soangen tuhke tohrohr oh awiawih keteu en mweredi pwe en kakairada.

44:15  Aramas emen kin doadoahngki elep en tuhke ko mehn wia tuwi, oh elep mehn wia dikedik en eni. E kak doadoahngki elep lepin tuhkeo mehn wia eh tuwihn rengireng oh mehn umwun pilawa. A elep e kin wiahkihda eh koht oh kin pwongih.

44:16  Ekei lepin tuhke ko e kin wiahki mehn seukisiniei; e kin umwunki kene uduk; e kin tungoale dahme e umwunda oh kin medkihla. E kin rengireng, oh nda, “Meid kansenamwahu karakar en kisiniei kaselel wet.”

44:17  A luhwen tuhkeo e ahpw kin wiahkihda eh koht, dikedik en eni; e ahpw kin poaridi oh pwongih. E kin kapakapohng, ndinda, “Komwi me ei koht, komw doareiehla!”

44:18  Soangen aramas pwukat me nohn pweipwei, re sohte dehdehki dahme re wiewia. Masarail kan oh kapehdirail kan me nohn rotorot ong me mehlelo.

44:19  Sounwia dikedik en eni kan sohte audeparail, pwe re sohte kin nda, “I umwkihla elep en tuhkeo, oh inimkihda mwoalus ko kenei pilawa oh uduk, oh luhwen tuhkeo I wiahkihda dikedik en eni. Eri, iet I poaridiong oh pwongih lepin tuhke lepet.”

44:20  Irair wet rasehng aramas eh kang pehs. Eh lamalam pweipwei me inenen laud, kahrehda sawasepe me inenen apwal. E sohte dehdehki me dikedik en eni me e kolokol kaidehkin uhdahn koht emen.

44:21  KAUN-O ketin mahsanih, “Israel, tamataman mepwukat; tamataman me ei ladu kowe, I wieiukada pwe ke en wiahla ei ladu, oh I sohte mwahn pahn manokeiukala.

44:22  I koakoahsangehr dipwomw kan, rasehng depwek me sohralahr. Pwurodo rehi, pwe ngehi me kin komouruhkala.”

44:23  Kumwail nanleng kan, kumwail ngisingis oh perenda! Wasa loal kan en sampah, kumwail ngisingis! Nahna kan oh tuhkehn nanwel koaros, kumwail ngisingis oh perenda! KAUN-O, ketin kasaledahr sapwellime roson lapalap ni eh ketin komourala sapwellime aramas en Israel kan.

44:24  “Ngehi KAUN-O, omw sounkomour; Ngehi me wieiukada. Ngehi KAUN-O, Sounwiepen mehkoaros. Ngehi kelehpw me wiahda lahng kan; ni ei wiahda sampah, sohte emen me sewese ie.

44:25  Ngehi me kin kapweipweila sounwunahni kan, oh kapwowihala audepen kokohp en sounkosetipw kan. I kin kasohwe lokaiahn me loalokong kan, oh kin kasalehda me ar loalokong iei soaloalokong.

44:26  A ni ei ladu eh kin kohpada mehkot, ni ei kin kadar nei meninkeder pwe en kasalehda ei koasoandi kan, I kin tehk mwahu pwe koasoandi pwukat oh kokohp pwukat en kin pweida. I kin mahsanihong Serusalem me aramas pahn pwurehng kousoanla wasao, oh kahnimw en Suda kan me pahn onohnsapahlda. Kahnimw pwukat pahn kokouda pohn mohn ihmw kan.

44:27  Ni ruwes ehute I kin kamadahda madau.

44:28  I mahsanihong Sairus, ‘Kowe me pahn wilianiehdi oh kaunda wasa, ke pahn kapwaiada mehkoaros me I kupwurki en wiawi; ke pahn koasoanehdi pwe Serusalem en onohnda sapahl, oh poahsoanen Tehnpas Sarawio en tepila.’ ”

Chapter 45

45:1  KAUN-O ketin pilada Sairus pwe en wiahla nanmwarki. E ketin pilada pwe en kalowehdi wehi kan; e ketin poaronehla pwe en kihsang en nanmwarki kan ar manaman en kaunda wasa; KAUN-O pahn ketin ritingadahng Sairus wenihmwen kahnimw kan. KAUN-O eri ketin mahsanihong Sairus,

45:2  “Pein ngehi pahn kaunopada alomw kan, kapatapatahla nahna oh dohl akan. I pahn rihspeseng wenihmw prons kan, oh lupukpeseng ar uhr mete kan.

45:3  I pahn kihong uhk dipwisou kesempwal kan me wie ekiek wasa rir kan; ke ahpw pahn esehkihla me iei ngehi, KAUN-O, me iei Koht en Israel me ketin ekerkin uhk mwaromwen.

45:4  I piluhkada pwe ke en sewese ei ladu Israel, wehi me I piladahr. Wahu laud ehu met me I wiahiong uhk, mehnda ma ke sohte mwahn ese ie.

45:5  “Ngehi KAUN-O, sohte pil emen Koht. I pahn ketikihong uhk kehlail me ke anahne, mehnda ma ke sohte mwahn ese ie.

45:6  I pahn wia met pwe aramas koaros, sang ni mesenleng lelohng ni kapi, en ese me iei ngehi KAUN-O, oh sohte emen mie palilahsang ie.

45:7  Ngehi me kin wiahda marain oh rotorot; ngehi me kin ketikihdo kapai oh kahpwal. Ngehi, KAUN-O, me kin wiahda soahng pwukat koaros.

45:8  I pahn kamwerehdi sang nanleng manaman en powehdi, rasehng keteu; sampah pahn audaudkihda oh direkihla; pwuhng oh saledek ahpw pahn kipehdi wasa koaros. Ngehi, KAUN-O, me pahn kin kapwaiada mepwukat koaros.”

45:9  Kakete sah me wiawihkihda pwehl en akamaiong sounwiepe, sah ehu me duwehte sah teikan? Pwelen saho sohte kak idek rehn sounwiepe dahme e wiewiahiong. Kakete sah ieu en kaulimki en sounwiepe eh soakoahiek?

45:10  Mie aramas emen me kak ndahng seme oh ine, “Dahme kumwa wiahkiniehda oh kihong ie soangen mwohmw wet?”

45:11  KAUN-O, Koht sarawien Israel, me kin ketin kapikada oh ketikihong mwohmw ong ni ahnsou kohkohdo kan, mahsanih, “Sohte amwail pwungen idek rehi duwen nei seri kan de padahkihong ie dahme I en wia!

45:12  Ngehi me wiahda sampah, oh kapikada aramas akan pwe re en kin kousoan ie. Sang ni ei manaman me I wiahkihda pwalang en lahng ehu powe. Ngehi me kin ireire mwekid en ketipin, maram, oh usu kan.

45:13  Pein ngehi me kamwakidada Sairus ni mwekid wet, pwe en kapwaiada ei koasoandien kapwungala mehkoaros. I pahn kainenehla ahl koaros me e pahn keid ie. E pahn onehda sapahl ei kahnimwo, Serusalem, oh kasaledekla nei aramas akan me wie sensel. Sohte aramas emen me koadoadoahkih de pwainohng en wia met.” KAUN-O, Wasa Lapalahpie, me mahmahsen.

45:14  KAUN-O ketin mahsanihong Israel, “Kowe me pahn ahneki kepwe kesempwal akan en Isip oh Sudan, oh ohl reirei kan en Sepa pahn wiahla omw ladu; re pahn kin idawehn uhk mi nan seliparail. Re pahn kin poaridi mwohmw oh sakarkihda, patohwan, ‘Koht ketin ieiang uhk-ihete me uhdahn Koht.

45:15  Koht en Israel, me kin komourala sapwellime aramas akan, iei Koht emen me kin ketin karirihala pein ih.’

45:16  Irail akan koaros me kin wiahda dikedik en eni pahn sarohdi; irail koaruhsie pahn namenekla.

45:17  Ahpw KAUN-O pahn ketin komourala Israel, oh lingan en powehdi pahn poatopoatete; tohn Israel kan sohte mwahn pahn namenekla.’ ”

45:18  KAUN-O ketin kapikada nanleng- iei ih me Koht! E ketin wiahda oh kapikada sampah- e ketin wiahda teng oh poatopoat. E sohte ketin wiahda ni mwomwen sapwtehn ehu, ahpw ni mwomwen wasa mwahu ong aramas en kousoan ie. Iei ih me ketin mahsanih, “Ngehi KAUN-O, oh sohte pil emen Koht.

45:19  I sohte mahsen ni rir, de ekihla koasoandien nan kupwurei. I sohte itonehng aramas en Israel kan en rapahkin ie nan sapwtehn. Ngehi KAUN-O, oh I kin mahsen mehlel; I kin kasalehda dahme pwung.”

45:20  KAUN-O ketin mahsanih, “Kumwail aramas en wehi kan, kumwail pokondo, kumwail me pitlahr nanpwungen wehi kan me ohlahr, kumwail pwarodo oh uh mwohn mwoalen kopwung. Irail kan me kin kapar iangahki arail dikedik en eni kan me wiawihkihda tuhke, oh kin kapakapohng koht kei me sohte kak komourirailla- irail pwukat sohte mwahn audepen nan kapehdirail.

45:21  Re en kohdo oh kasalehda arail repenpwung mwohn mwoalen kopwung; re en wie lamalampene nanpwungarail. Ihs me kohpada sang nin tapio duwen mepwukat ar pahn pweida ehu ahnsou me pahn kohdo? Kaidehkin ngehi, KAUN-O, Koht me kin komourala sapwellime aramas akan? Sohte emen Koht mie palilahsang ngehi.

45:22  “Kumwail koaros wasa koaros nin sampah, kumwail sohpeidohng ie pwe kumwail en ale komourpamwail. Ngehite me Koht, sohte pil emen.

45:23  Ei inou me uhdahn mehlel, oh e sohte kak wekidekla. I kahukihong kumwail mehlel ni mwarei: Aramas koaros pahn kohdo oh kelehpwikihdi mwohi oh inoukihda me re pahn loalopwoatohng ie.

45:24  “Re pahn nda me sang rehi kelehpw me re kak diar sang ie roson en powehdi oh kehlail; ahpw irail koaros me kin kailongkin ie pahn lokolongki ar namenek.

45:25  Ngehi, KAUN-O, I pahn kapitala kadaudok en Seikop koaros, oh re pahn kin kapikapingahkin ie.

Chapter 46

46:1  “Iei met imwilahn koht likamw akan en Papilon! Mahso aramas akan kin kaudokiong Pel oh Nepo, ahpw met ahs akan kin weuwa ira, ira wialahr wisik toutou ehu ong mahn akan me pwangadahr.

46:2  Dikedik en eni pwukat sohte kak pein doareirahla, ira wialahr dipwisou lohdi kei me wisiwisik kohla. Ei, iei imwilahn koht en Papilon kan!

46:3  “Kumwail kadaudok en Seikop, kumwail rong ie, kumwail nei aramas koaros me luhwe. I kin apwahpwalih kumwail sang ni amwail ipwidi.

46:4  Ngehi me amwail Koht, oh I pahn kin apwahpwalih kumwail lao kumwail likeilapala oh moangepwetala. Ngehi me wieikumwailda oh I pahn apwahpwalih kumwail; I pahn sewesei kumwail oh kapitkumwailla.”

46:5  KAUN-O mahsanih, “Ihs me kumwail pahn karasahiong ie? Mie emen me duwehte ngehi?

46:6  Aramas akan kin wakapeseng neirail pilihs kan oh wudekieisang kohl loale, oh kin tenekihda silper kan pohn mehn tenek kan. Irail kin pwainda sounsuk kohl pwe en en wiahda arail koht; re ahpw kin poaridi oh pwongih.

46:7  Re ahpw kin rowehla, oh koasoanediong nan dewe, e ahpw kin mihmihte wasao, nennenewei, sohte kak mwekid. Ma emen pahn kapakapohng, e sohte kak sapeng, de kapitasang aramaso nan eh apwal.

46:8  “Kumwail me dipan akan, kumwail tamataman wiepen nin limei.

46:9  Kumwail tamanda dahme wiawiher mahso; kumwail kadehdehda me ngehite me Koht, oh sohte pil emen me duwehte ngehi.

46:10  Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi. I mahsanih me ei koasoandi kan uhdahn pahn pweida, pwe mehkoaros me I kupwurki uhdahn pahn pweida.

46:11  I malipeier ohl emen sang ni palimese, e pahn pihrdo marahra rasehng likoht men oh kapwaiada ei koasoandi kan koaros. Ngehi me mahmahsen; eri, e pahn pweida.

46:12  “Kumwail aramas keptakai kan, kumwail rong ie, kumwail me kin lemeleme me amwail manaman en powehdi me dohsang kumwail.

46:13  I pahn kamwadangahdo rahnen amwail powehdi- e uhdahn kerendohr mehlel. Ei lingan en powehdi sohte pahn pwand, I pahn doarehla Serusalem oh kawauwihala Israel wasao.”

Chapter 47

47:1  KAUN-O ketin mahsanih, “Papilon doudihsang nan mwoalomwi, oh mwohndiong nan pwelpar nan pwehl. Mahs ke duwehte meipwon emen, kahnimw ehu me saikinte me kalowehdi, ahpw met ke solahr kil medendel oh kaselel! Met ke wialahr lidu men!

47:2  Kapir takain wia pilawa amas! Ngidarpene pilawa amas! Kihsang omw koaduhpwelen! Kapwuhrasang omw likou kaselel kan! Pwekada omw urohs en pwe ke en kotehwei pilitik kan!

47:3  Aramas akan pahn kilang duwen omw pahn kilisoula; re pahn kilang duwen omw pahn aktikitikla oh namenekla. I pahn ikihong uhk, oh sohte mehmen pahn katokihiehdi.”

47:4  Koht sarawien Israel ketin kasaledekihkitaillahr- mware iei KAUN-O, Wasa Lapalap.

47:5  KAUN-O ketin mahsanihong Papilon, “Nennenla kowe mwomwohd nan rotorot; re solahr pahn kahdanekin uhk lih nanmwarkien wehi kan!

47:6  I engiengdahr pahn nei aramas akan; I solahr wiahkin irail nei aramas; I kihongirailehr pahn omw manaman, ke ahpw sohte mahkohng irail; ke pil wiakauwelahr me mah kan.

47:7  Ke medemedewe me ke pahn wiewiahte lih nanmwarki men kohkohlahte, oh sohte kihdiong mepwukat nan kapehdomw de sohte medemedewe duwen imwilahn mepwukat koaros.

47:8  “Rong mahs, kowe, me kin poakohhg kansenamwahu kan en sampah, 2 kowe, me kin medemedewe me ke nsenamwahu oh sohte pahn diar apwal. Ke kosekose me ke me lapalap rasehng Koht- me dene sohte emen me duwehte kowe. Ke lemeleme me ke sohte pahn wiahla liohdi de lokolongki mehlahn noumw seri kan.

47:9  Ahpw ni ahnsou tehkis, ni rahnteieu, mepwukat koaros pahn pweida. Mehndahte soangen wunahni kan koaros me ke kin doadoahngki, omw pwoud oh noumw seri kan pahn mehsang uhk.

47:10  “Ke likih pein kowe nan omw wiewia suwed kan; 2 ke lemeleme me sohte me pahn kak kilang uhk. Omw erpit oh loalokong pahn kahreiukalahng nan ahl sapwung, ke ahpw mengimengloalki, ‘Ngehi me Koht- sohte emen me duwehte ngehi.’

47:11  Kahpwal pahn lelohng uhk, oh sohte ehu omw wunahni kan pahn kak katokihedi. Ohla laud pahn mwadangete lelohng uhk- soangen ohla me ke saikinte mwahn ouramanda!

47:12  Kolokol omw wunahni oh akmanaman akan me ke kin wie doadoahngki sang ni omw tikitik. Mweinele re pahn wia sawas ehu ong uhk; mweinele ke pahn kak en kamasakada omw imwintihti kan.

47:13  Sohte omw manaman mehndahte omw aleier kaweid kan. Mweidohng noumw aramas loalokong kan en kohdo oh doareiukala- soangen aramas akan me kin sukuhlki duwen usu kan, me kin iroirong pahnlahg kan oh kin ndahng uhk dahme pahn pweida rehmw nan ehuehu sounpwong.

47:14  “Re pahn rasehng dihpw meng, 2 oh kisiniei pahn isikirailla! Re sohte pahn pil kak pein doareirailla- oh mpwulen kisinieio pahn inenen karakar ong irail, kaidehn soangen kisiniei me pahn kansenamwahu ong irail ni arail pou.

47:15  Ih soangen kamwahu pwukat me re pahn wiahiong uhk- aramas loalokong kan me ke kin ale kaweid rehrail nan omw mour. Irail koaros pahn mweselsang uhk oh pein wiewia ar mwekid kan, oh sohte emen pahn luwehdi pwe en doareiukala.”

Chapter 48

48:1  Kumwail rong met, kumwail aramas en Israel kan, kumwail kan me kadaudok en Suda: Kumwail kin kahukihla ni mwaren KAUN-O, oh kosekose me kumwail kin kaudokiong Koht en Israel- ahpw amwail lokaia kan sohte mehlel.

48:2  Oh kumwail kin pohnmwahsohki oh koasoia me kumwail iei towe mehlel en kahnimw sarawio, oh dene kumwail kin koapworopworki Koht en Israel, me mware iei KAUN-O, Wasa Lapalap.

48:3  KAUN-O ketin mahsanihong Israel, “I kohpadahr mahsie dahme pahn wiawi; eri, I mwadangete kupwurehda pwe en pweida.

48:4  I esehte me ke pahn wia wehi ehu me keptakai, me tepinwer kekeluwak rasehng mete oh tumwomwen rasehng prons.

48:5  Ihme I kohpkidahr mahsie dahme pahn lelohng uhk, lohlohki mwekid kan mwohn ar pahn leledo, pwe ke en dehr kosekose me noumw dikedik en eni kan oh sansal likamw akan me kahredahr mepwukat eh pweida.

48:6  “Mehkoaros me I kohpadahr pweidahr; ke uhdahn pahn dehdehki mwahu me ei kohkohp kan me pwung. Eri, met I pahn ndahng uhk soahng kapw akan me pahn kohdo, mwekid kan me I sohte kasalehda mahs.

48:7  I ahpwtehn pahn kapwarehda mepwukat ahnsou wet; sohte mehkot me duwehte met me wiawiher mahs. Pwe ma I kasalehda mahs, ke pahn koasoia me dene ke eseier duwen mepwukat koaros.

48:8  I ese me sohte me kak likihiuk, ni omw wia aramas kahngohdi men ahnsou koaros. Ih kahrepen omw sohte mwahn rongki duwen met, oh sohte rohng ehu lelohng uhk.

48:9  “Pwe aramas akan en kapinga mwarei, me kahrehda ei kolokol ei engieng; I pahn kolokol oh sohte kauweiukala.

48:10  I sohnguhkehr nan kisiniei en lokolok, rasehng silper eh kin kamwakelda nan kisiniei. Ahpw I diaradahr me sohte katepomw.

48:11  Dahme I kin wia, kin wiawihong ni pein kawaupei- I sohte pahn mweidohng mwarei en sohla wauwi de mweidohng emen en iang ahneki lingan me uhdahn ahi oh ahi kelehpw.”

48:12  KAUN-O ketin mahsanih, “Rong, kowe Israel, aramas akan me I malipedohr! Ngehi me Koht, me tapi oh imwi, Koht metehmen!

48:13  Nin limei kat me wiadahr poahsoan kan en sampah oh sohngedi pahnlahng. Ni ei kin malipe sampah oh lahng, re ahpw kin mwadangete patohdo oh uh mwohi.

48:14  “Kumwail koaros, kumwail pokonpene oh rong! Sohte koht emen me kak kohpada me ohl me I piladahro pahn mahweniong Papilon; e pahn kapwaiada dahme I kupwurki en wia.

48:15  Ngehi me mahseniong oh malipehdo; Ngehi me kahluwa oh kupwurehda pwe en pweida.

48:16  “Eri, kumwail keido oh rong dahme I pahn mahsanih. Sang nin tapio I kin mahsen ni sansal oh kin kupwurehda pwe ei mahsen kan en kin pweida.” (Eri, met KAUN-O, Wasa Lapalahpie, ketikihiongieier sapwellime manaman oh ketin kadariedohr.)

48:17  Koht sarawien Israel, KAUN-O me omw sounkomour, mahsanih: “Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.

48:18  “Ma ke rongete ei kosonned akan! Eri, kupwuramwahu ahpw pahn pwilipwiliwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdohng ni oaroahr.

48:19  Kadaudokomw kan pahn tohto rasehng pihk en ni oaroahr, oh I pahn tetehk mwahu pwe re en dehr mwomwla.”

48:20  Eri, kumwail kohkohwei sang nan Papilon, kumwail saledekla! Kumwail weriwerki rohng kaperen wet; kumwail lohkiseli wasa koaros: “KAUN-O ketin doarelahr sapwellime ladu Israel!”

48:21  Ni ahnsou me KAUN-O ketin kahluwa sapwellime aramas akan kotehla wasa karakar ehu, nan sapwtehn madekeng, re sohte men nimpilda. E ketin kupwurehda pwe pihl en kusieisang nan paip ehu pwe re en nim; e ketin pwalangpeseng paipo, oh pihl ahpw kusieisang loale.

48:22  KAUN-O ketin mahsanih, “Sohte poadoarepen me dipan akan.”

Chapter 49

49:1  Kumwail tohn wehi doh kan, kumwail rong ie, kumwail aramas me kin kousoan wasa doh kan! Mwohn ei ipwidi, KAUN-O ketin piliedahr, oh ketin kilelehdi pwe I en wiahla sapwellime ladu.

49:2  E ketin kakengihala ei koasoi kan rasehng kedlahs keng; e ketin kasilehkin ie pein nin lime kan. E ketin wiahkiniehla arep pwoat, me imwkeng oh kin kaunopadahr ong doadoahk.

49:3  E mahsanihong ie, “Israel, kowe me ei ladu; pwehki kowe me aramas akan pahn kin kapingahkin ie.”

49:4  I ahpw patohwan, “I doadoahkehr, ahpw ia uwen eh sohte katepe! I wiahda uwen me I kak, ahpw sohte mwahn lipwen ei doadoahk.” Ahpw I kak koapworopworki KAUN-O pwe en ketin uhpalikin ie; e pahn ketin katingih ei doadoahk.

49:5  Mwohn ei ipwidi, KAUN-O, ketin piliedahr; e ketin wiahkin ie sapwellime ladu pwe I en kapwuredohng reh sapwellime aramas akan, mehn Israel kan me kin kousoanseli wasa kan nin sampah. KAUN-O ketin kawauwihielahr mwohn silangi; iei ih me pwarer en ei kehlail.

49:6  KAUN-O ketin mahsanihong ie, “I pahn kihong uhk, ei ladu, doadoahk kesempwal me lapasang met. Kaidehn ke pahn onehdahte sapahl lingan en aramas en Israel kan me luhwehdi, ahpw I pahn pil wiahkinuhkala mehn kamarainpen wehi kan- pwe tohn sampah koaros en kak mourla.”

49:7  Koht sarawien Israel oh sounkomour ketin mahsanihong ih me aramas kin mwamwahliki, me wehi kan kin kailongki oh me kin wia ladun kaun akan: “Nanmwarki kan lao pahn mahsanih omw saledeklahr, re pahn ketida pwe re en kasalehda ar waunekin uhk; soupeidi kan pahn pil mahsanih duwen kowe, re ahpw pahn pil poaridi pwe re en waunekin uhk.” 1 Eri, met pahn pweida, pwehki KAUN-O ketin pilada sapwellime ladu; Koht sarawien Israel kin ketin dadaurete sapwellime inou kan.

49:8  KAUN-O ketin mahsanihong sapwellime aramas akan, “Ni ahnsoun komour eh pahn leledo, I pahn sewesei kumwail, oh I pahn sapeng amwail kapakap en peksawas. I pahn apwahpwalih oh sinsilei kumwail, oh pwehki kumwail I pahn wiahda inou ehu ong aramas koaros. I pahn mweidohng pwe kumwail en pwurehng soandihla nan sapwamwail me ahnsou wet mwomwlahr.

49:9  I pahn mahsanihong me sensel kan, ‘Kumwail saledekla!” oh ong irail kan me mihmi nan rotorot, ‘Kumwail kodohng nan marain!’ Re pahn rasehng pelin sihpw kei me kin mwengemwengeseli pohn dohl kan;

49:10  re solahr pahn men mwengehda de men nimpilda. Ketipin oh karakar en nan sapwtehn solahr pahn kauwe irail, pwe re pahn kin idawehnseli ih me kin loalloale irail. E pahn kin kahreiraillahng ni pwarer en pihl kan.

49:11  “I pahn wiahda ahl lap pwoat me pahn kotehla nahna kan, oh kaunopada ahl ong nei aramas akan pwe re en keid ie.

49:12  Nei aramas akan ahpw pahn kohdo sang sahpw doh kan, sang paliepeng oh palikapi, oh sang Aswan ni palieir.”

49:13  Kumwail nanleng kan, kumwail koul! Sampah en ngisingiski eh peren! Nahna kan en pil iang koulki koulen kaping! KAUN-O pahn ketin koaloalamwahwihala sapwellime aramas akan; e pahn ketin kupwurkalahngan ong sapwellime kan me wie lokolok.

49:14  Ahpw tohn Serusalem kan nda, “KAUN-O ketin keseikitalahr. E ketin likidmelieikitalahr.”

49:15  KAUN-O eri sapeng, mahsanih, “Kakete lih emen en manokehla uhdahn nah seri pwelel, oh sohte poakepoake wahnedio? Mehnda ma nohno men kak manokehla nah seri, ahpw ngehi, I sohte kak manokeiukala.

49:16  Serusalem, I sohte kak manokeiukala! I ntingihdier mwaromw nan pehi kat.

49:17  “Irail ko me pahn oneiukada sapahl, re pahn leledo ni ahnsou mwadang, oh irail kan me kamwomwuhkalahr, re pahn mweselda.

49:18  Sarada oh kilang dahme wiewiawi! Noumw aramas akan pokonpenehr-re samwodohngehr rehmw! Nin duwen ngehi, Koht ieias, ke pahn pohnmwahsohki noumw aramas akan, duwehte lih kamwohd emen eh kin pohnmwahsohki eh kapwat akan.

49:19  “Sapwomwet ohlahr oh tehnlahr- ahpw met e pahn koaitlahr, pwehki aramas akan me kohkodohn kousoanla ie. Oh irail ko me kamwomwuhkalahr, re pahn lekdekla dohlahsang uhk.

49:20  Ehu rahn kohkohdo, noumw aramas akan me ipwidier ni ar kalipilipala pahn ndaiong uhk, ‘Sahpwet me nohn tikitikiong kitail- kitail uhdahn anahne kalaudlahn sahpw pwe kitail en kousoan ie!’

49:21  Kowe eri pahn mengimengloalki, ‘Ihs me kaipwidiong ie seri pwukat? I sohla neitik, I depwenlahr. I kalipilipalahr oh pekeuslahr- eri, ihs me apwalihada seri pwukat? I kin kalakalapwuk, sohte me kin tehk ie- eri, seri pwukat kohsang ia?’ ”

49:22  KAUN-O, Wasa Lapalahpie, ketin mahsanihong sapwellime aramas akan: “I pahn kapahwei limeiet pohn wehi kan, irail ahpw pahn kapwuredohng uhk noumw seri kan.

49:23  Nanmwarki kan pahn kin apwalihiuk duwehte pahpa men; lih nanmwarki kan pahn kin katungoaleiuk duwehte nohno men. Re pahn kin poaridi mwohmw oh waunekin uhk; re pahn kin kasalehda ar waunekin uhk ni aktikitik. Ke ahpw pahn dehdehkihla me ngehi me KAUN-O; oh irail kan me kin awiawih ei sawas, sohte pahn nsensuwedla.”

49:24  Ke kak adihasang sounpei men dipwisou me e kalowehdi nan mahwen? Ke kak kapitala kalapwus men sang rehn aramas lemei men?

49:25  KAUN-O ketin sapeng, mahsanih, “Ih me pahn wiawi en met. Me kalapwus kan pahn pehdsang rehn sounpei kan, oh dipwisou lohdi nan mahwen kan pahn pehdasang rehn aramas lemei meno. I pahn uhwong oh pelianda irail kan me pahn uhwong uhk, oh I pahn kapitala noumw seri kan.

49:26  I pahn mweidohng omw imwintihti kan en pein kemeirailpene; re pahn sahlielkihla ar lingeringer oh kamaramas. Aramas koaros ahpw pahn dehdehkihla me iei ngehi, KAUN-O, me kin komouruhkala oh kasaledekihiukala. Re pahn esehla me iei ngehi, Koht me manaman en Israel.”

Chapter 50

50:1  KAUN-O ketin mahsanih, “Ia duwe, kumwail lemeleme me I kadarala nei aramas akan, rasehng ohl emen me kesehla eh pwoud? Eri a, ia kisinlikoun kamweid? Kumwail lemeleme me I netikinkumwailla nin duwen lidu kei, rasehng ohl emen me kin netikihla nah kan pwe re en wiahla lidu? Soh! Pwe kumwail kalipilipala pwehki dipamwail kan; I kadarkumwailla pwehki amwail wiewia sapwung kan.

50:2  “Dahme nei seri kan sohte men dungkiong ie ni ei kolahng doareirailla? Dahme re sohte sapengki ni ei likweriong irail? Ia duwe, I nohn luwet oh sohte kak doareirailla? I kak kammadahkihda pilen madau mahsenteieu, oh kawekala pillap akan ong ni sapwtehn, pwe mwahmw akan loale en mehkihla eh solahr pihl.

50:3  I kak karotongehla pahnlahng, rasehng ma e mwahmwahieiki me melahr emen.”

50:4  KAUN-O, Wasa Lapalahpie, ketin padahkihong ie dahme I pahn patohwan, pwe I en kak kakehlahda me pwangadahr akan. Nimenseng koaros e kin ketin koangngoangehkin ie I en rong sapwellime padahk.

50:5  KAUN-O ketikihong ie ei dehdehki, oh I sohte kahngohdiong de sohpeisang.

50:6  I mweidohng irail en wokih pohnsewei, I sohte irehdi ar lahlahwe ie ni ar wus wunen ei alis oh kendipiong ni mesei.

50:7  Arail lahlahwe ie sohte kamedekeiehla, pwehki KAUN-O, Wasa Lapalahpie, kin ketin sewese ie. I nannantihongete ei kanengamahiong irail, pwe I ese me I sohte pahn namenekla;

50:8  pwe Koht kin ketin karanih ie, oh e pahn ketin kasalehda eh sohte dipei. Mie me eimahiong kedipe ie? Eri, se en ketila nan mwoalen kopwung! Mweidohng en kedipe ie wasao!

50:9  Pein KAUN-O me pahn ketin doare ie- eri, ihs me kak kadehdehda me mie ei sapwung? Me kedipe ie koaros pahn sohrala, rasehng likou me kul kan kangalahr.

50:10  Kumwail koaros me kin wauneki KAUN-O oh kin peikiong mahsen en sapwellime ladu, ahl me kumwail kekeid loale kakete mi nan rotorot mosul, ahpw kumwail likih KAUN-O, koapworopworki amwail Koht.

50:11  Kumwail koaros me koasoakoasone en kauwehla meteikan pahn pein ohkihla amwail koasoandi kan. Pein KAUN-O pahn koasoanehdi; kumwail pahn lelohng nan nsensuwed laud ehu.

Chapter 51

51:1  KAUN-O ketin mahsanih, “Kumwail rong ie, kumwail kan me men ale komour, kumwail kan me kin patohdo rehi pwe en rapahki sawas. Kumwail medemedewe paipalap me kumwail paldihsang ie, pwarer me kumwail pwilisangehr loale.

51:2  Kumwail medemedewe amwail pahpa kahlap, Eipraam, oh Sara, me kaipwihkumwaildi. Ni ei malipe Eipraam, sohte nah seri, I ahpw kapaiahda oh ketikihong nah seri; I kupwurehda pwe nah seri kan en tohto mehlel.

51:3  “I pahn kasalehda ei poakohng Serusalem, ong koaros me kin kousoan nan mohn ihmw kan en Serusalem. Mehnda sahpwo eh wia sapwtehn ehu, I pahn kupwurehda pwe en wiahla mwetuwel ehu, rasehng mwetuwel me I wiadahr nan Ihden. Peren oh nsenamwahu pahn mie wasao, oh koulen kaping kan oh kapingkalahngan kan ong ie.

51:4  “Kumwail rong ie, nei aramas akan, kumwail rong dahme I mahsanih: I Kihong ei padahk kan ong wehi kan; ei kosonned akan pahn kahredohng irail marain.

51:5  I pahn mwadang ketido oh komourirailla; ahnsou en ei powehdi kerendohr. Pein ngehi me pahn kaunda wehi kan. Sahpw doh kan awiawih ei pahn ketido; re awiawih ie ni koapworopwor pwe I en komourirailla.

51:6  Kumwail kilengdawohng nanleng; kumwail kilang sampah! Nanleng pahn sohrala rasehng ediniei; sampah pahn ohla rasehng likou mering, oh towe kan pahn mehla rasehng loahng kan. Ahpw komour me I pahn ketikihdo pahn poatopoat kohkohlahte; oh ei manaman en powehdi sohte pahn sohrala.

51:7  “Kumwail rong ie, kumwail kan me ese dahme pwung, me kolokol teng ei padahk kan nan kapehdomwail. Kumwail dehr masak aramas akan me kin kasarowei kumwail;

51:8  pwe re pahn sohrala rasehng likou me loangenmwet kangalahr! Ahpw komour me I pahn ketikihong kumwail pahn poatopoat kohkohlahte; ei manaman en powehdi sohte pahn sohrala.”

51:9  Maing KAUN, komwi ketin opala wasa, oh ketin sewesei kiht! Komwi ketin doadoahngki sapwellimomwi manaman oh ketin doareikitala; komwi ketin doadoahngki duwehte omwi ketin doadoahngkier kawao. Iei komwi me ketin doakoapeseng Rahap, mahn kamasepwehk en nansedo.

51:10  Iei komwi me pil ketin kamadahda sehdo oh ketin wiahda ahl kotehla pihlo, pwe irail kan me komwi ketin doandoare en kak kotehla.

51:11  Irail kan me komwi ketin kapitalahr pahn lellahng nan Serusalem ni peren kowahlap, kokoul oh ngisingiski arail peren. Re pahn pereperen kohkohlahte, saledeksang pahtou oh lokolok kohkohlate.

51:12  KAUN-O ketin mahsanih, “Iei ngehi me kakehleikumwailda. Eri, dahme kumwail pahn masangki aramas akan me uhdahn pahn mehla, oh mour mwotomwot duwehte dihpw?

51:13  Ia duwe, kumwail manokelahr KAUN-O me ketin wieikumwailda, me ketin sohngdier pahnlahng oh ketin koasoanedier poahsoan kan en sampah? Dahme kumwail pahn masamasangki poatopoat irail kan me kin kahpwalih kumwail, irail kan me kin onopadahr en kamwomwkumwailla? Arail lingeringer mwuledek solahr kak lelohng kumwail.

51:14  Irail kan me mihmi nan imweteng pahn mwadang kasaledekla; re pahn mour werei oh paieki soangen mwenge koaros me re anahne.

51:15  “Ngehi me KAUN-O, amwail Koht; ngehi me kamwakidada nan madau oh kupwurehda pwe iloak kan en pwungupwungidek. Mwarei iei KAUN-O, Wasa Lapalap!

51:16  Ngehi me sohngdier pahnlahng oh ketikihong poahsoan kan en sampah; I mahsanihong Serusalem, ‘Kowe me nei aramas! I ketikihonguhkehr ei padahk, oh I kin sinsilehkin uhk nin limei.’ ”

51:17  Pirida, kowe Serusalem! Pwourda oh kesihnenda! Ke nimalahr kep en lokolok me KAUN-O ketikihonguhkehr nan sapwellime engieng; ke ahpw nimalahr oh wasawasaskiseli.

51:18  Sohte emen me pahn kahluwaiuk, sohte emen nanpwungen noumw aramas akan me pahn kolada pehmwen.

51:19  Kahpwal riau lelohnguhkehr: sapwomwen ohkilahr mahwen, oh noumw aramas akan duhpeklahr. Sohte emen me men poakeiukala.

51:20  Ni keimw en ahl koaros, noumw aramas akan lipwolipwongmaski ar luwetalahr; re rasehng tie men me lohdier nan uhk ehu. Re pehmehr engin sapwellimen Koht engieng.

51:21  Kumwail mehn Serusalem kan me wie lokolok, kumwail wasawasasseli likamwete kumwail sakaulahr,

51:22  KAUN-O, amwail Koht, ketin doareikumwailla oh mahsanih, “I pahn kihsang kep me I kihonguhkehr nan ei engieng. Ke solahr pahn nim wain me kahredahr omw wasawasasseli.

51:23  I pahn uhd kihong irail kan me kahpwalihiukalahr, ong irail kan me kahredahr omw pwupwudiongehr nanial akan oh sok pohmw likamwete kowe pwehl.”

Chapter 52

52:1  Serusalem, pwurehng kehlailada oh lapalapala! Kahnimw sarawien Koht, kapwatkihda omw likou lingan akan. Me rotorot akan solahr pahn pwurehng pedolong nan ewen kelen omw kahnimw.

52:2  Serusalem, pein kasaledekihiukala! Uhdahsang nanpwel oh mwohndiong nan mwoalomw! Kamweidpeseng selipomw kan me senselihiuk, kowe, Saion, wehi lidu!

52:3  KAUN-O, Wasa Lapalahpie, ketin mahsanihong sapwellime aramas akan, “Ni ahnsou me kumwail wiahla lidu, sohte mwohni ieu me pwainkumwailda; pil sohte mwohni ieu mehn kasaledekihkumwailla.

52:4  Mahso kumwail kousoanla Isip nin duwen mehn liki kei, kumwail wiahier met sang ni pein nsenamwail. Asiria ahpw uhd weikumwailsang ni idihd oh sohte mwohni ieu me pwainkumwailda.

52:5  Oh met, soangen irairohte pil wiawi nan Papilonia: kumwail wialahr aramas selidi kei oh sohte mwohni ieu me pil pwainkumwailda. Koaros me kaunkumwaildahr kin suweiki oh koasoakoasoia oh wie mwamwahlikin ie ahnsou koaros.

52:6  Ni ahnsou kan me pahn kohdo, kumwail pahn wehwehkihla me ngehi, iei Koht, me mahseniongkumwailehr.”

52:7  Meid lingan oh kaselel atail udiahl meninkeder men ni eh kin kotehdo nahna kan wa kohdo rongamwahu, rongamwahu en popohl! E pakairki duwen manaman en powehdi, oh ndaiong Saion, “Omwi nanmwarki, iei Koht!”

52:8  Silepen kahnimwo kan wiahkinteieu werda, werkihda ar perenda kowahlap. Pwehki ar kilangki masarail kan sapahldohn KAUN-O nan Saion.

52:9  Kumwail mohn ihmw kan en Serusalem, kumwail koaros werda oh ngisingiski amwail peren! KAUN-O pahn ketin doarehla sapwellime kahnimwo oh kaloalamwahwihala sapwellime aramas akan.

52:10  KAUN-O pahn ketin doadoahngki sapwellime manaman sarawi; e pahn ketin komourala sapwellime aramas akan, oh sampah pokon pahn kilang duwen met.

52:11  Kumwail mwadang mweselsang Papilonia, kumwail koaros me weuwa dipwisoun Tehnpas Sarawio kan. Kumwail dehpa sair mehkot me keinepwi; . kumwail pein kamwakeleikumwailda oh mweselsang nan kahnimwet.

52:12  Ahnsou wet amwail mwesel sohte pahn wiawi ni karuaru; kumwail sohte pahn mwomwen tang de sopohla. KAUN-O, amwail Koht, pahn ketin kahluwai kumwail, oh ketin doandoareikumwailsang me suwed koaros.

52:13  KAUN-O ketin mahsanih, “Ei laduwo pahn pweida mwahu nan eh doadoahk; e pahn lapalapala oh waunla kowahlahpie.

52:14  Aramas tohtohie inenen pwuriamweikihla ni ar kilangada; pwe mwomwe inenen suwedsang mwomwen aramas, likamwete kaidehn aramas emen ih.

52:15  Eri, met wehi tohto pahn pil pwuriamweikihla uduhdiahl ladu menet; oh nanmwarki kan, nan ar pwuriamwei, sohla pahn kak mahsen. Re pahn mahsanihada oh mwahngihada mehkot reh me re sohte kin karonge oh mwahngih sang mahs kohdo.”

Chapter 53

53:1  Aramas akan ahpw sapeng, patohwan, “Ihs me pahn kamehlele dahme kitail kadehdedahret? Ihs me pahn kak marainkihla doadoahk en nin limen KAUN-O ni irair wet?

53:2  Iet kupwur en KAUN-O: sapwellime laduwo en keirda, rasehng kisin tuhke kis me kalewe kan wosada nan pwehl madekeng. Sohte wahu ehu de lingan ehu me mie reh, me kitail kak linganki oh inangih kilang. Sohte mehkot mwahu mie ni paliwere, me pahn kahrehiong atail men keiong mpe.

53:3  Kitail mwamwahliki oh sohpeisangehr sohte men kilang; ohlen lokolok men ih me ahnlahr soangen medek koaros. Sohte emen mie me men kilang- kitail kin pohnsehse pwe likamwete sohte mwahn ih mehkot.

53:4  “Ahpw, atail tungoal lokolok kan me e lokolongki, atail medek me e toutoukihla. Ni ahnsowo kitail medemedewe me Koht me ketikihong kalokolok wet.

53:5  Ahpw soh, dipatail kan me e lipwalipwkihda, oh atail wiewia suwed kan me e wowokihki. Lokolok wet kamwahwihkitailla, lipwen ohla kan ni paliwere kaunsekihkitailla.

53:6  Kitail koaros rasehng sihpw kei me salongalahr; emenemen kitail kin weweid nan nsene. Ahpw KAUN-O ketin kapwukoahki ih kalokepen dipatail kan, kalokolok me kitail koaros konehng ale.

53:7  “Ni eh wiemwahlla pahn aramas, e soh mwahn kin kaulimala, sohte mwahn kisin kaulim kis kin kohsang nan ewe. Rasehng sihmpwul men me nektehn kamakamala, rasehng sihpw men me nektehn seiseisang wune kan, e sohte mwahn nda mehkot.

53:8  E miher nan selipe, pakadeikadahr oh pakahrlahr pwe en kamakamala, oh sohte emen me kesempwalkihda dahme pahn wiawihong. E ahpw kamakamala pwehki dipen neitail aramas akan.

53:9  E ahpw nekinekdiong nan sousou ehu iang me dipan akan, oh seridi rehn me kepwehpwe kan, mehnda ma e sohte mwahn wiahda sapwung ehu, de likamw ehu kohsang nan ewe.”

53:10  KAUN-O ketin mahsanih, “Ngehi me kupwurehda en ale lokolok; pwe eh mehla, iei meirong ehu me pahn kahrehdo mahk oh kalahngan. Iei me e pahn kilangki kadaudoke kan; e pahn mour werei nin sampah, oh ei koasoandi pahn pweida pwehki ih.

53:11  Mwurin eh mour en lokolok, e pahn pwurehng perenda; e pahn esehda me eh lokolok kan sohte wiawi mwahl. Ei ladu loalopwoat me I kin kupwurperenki, me pahn toutoukihla lokolok en aramas ngeder oh pwehki ih me I pahn kupwur mahkikihong dipen aramas akan.

53:12  Me kahrehda I pahn wauneki oh ketikihong lengileng ehu, oh dehu ehu nanpwungen soupeidi oh me lapalap akan. E meirongkihla eh mour sang ni pein nsene, oh mweidala pein ih pwe en iang wadawadohng me dipan akan. E wilianla me dipan ngeder oh kasakaskin irail pwe re en ale mahkpen diparail kan.”

Chapter 54

54:1  Serusalem, ke rasehng lih emen me sohte nah seri, ahpw met, ke kakehr koul oh ngisingiski omw peren. Pwe met ke pahn naineki seri me tohtohsang lih me eh pwoud sohte kesehla.

54:2  Eri, kalaudehla imwomw impwal me ke kin kousoan loale; kareireila selipe kan oh katengehdi kisin lepin tuhkehn katenge kan!

54:3  Ke pahn kalaudehla irepen sapwomw ni pali koaros; pwe noumw aramas akan pahn pwurehng nan sahpw me wehin liki kan mihmi ie ahnsou wet. Kahnimw kan, me ahnsou wet sohte towe, pahn diren aramasala.

54:4  Ke dehr perki mehkot-ke solahr pahn pwurehng sarohdi; ke solahr pahn namenekla. Ke pahn manokehla omw soaloalopwoat nin duwen peinakapw pwopwoud men, oh omw loaleid nin duwen liohdi men.

54:5  Pwe ih me ketin kapikuhkada pahn rasehng omw pwoud- mware, iei KAUN-O, Wasa Lapalahpie. Koht sarawien Israel me pahn komouruhkala- ih me kaunepen sampah pwon.

54:6  Israel, ke rasehng lih pwopwoud pwulopwul men, me eh pwoud keselahr, oh me likideklahr. Ahpw met KAUN-O ketin malipeiuk, mahsanih,

54:7  “Erein ahnsoutehkis me I keseiukalahr; ahpw ni ei limpoak lapalahpie I pahn kapwureiukodohng rehi.

54:8  Ahnsou kis I sohpeisang uhk ni ei engieng; ahpw I pahn kasalehiong uhk ei limpoak poatopoat sang met kohla.” Iei duwen mahsen en KAUN-O me ketin komouruhkala.

54:9  “Ni mwehin Noha, I kahukilahr oh inoukidahr me I solahr pahn kauwehkihla sampah nohlik lapalap. Eri, I pil inoukihda met me I solahr pahn pwurehng engieng pahmw; I solahr pahn angiangihiuk de kalokeiuk.

54:10  Nahna kan oh dohl akan kakete re en mwerpeseng, ahpw ei limpoak ong uhk sohte kak en sohrala; I pahn dadaurete ei inoun popohl kohkohlahte.” Iei duwen mahsen en KAUN-O me ketin loalloaleiuk.

54:11  KAUN-O ketin mahsanih, “Serusalem, kahnimw en lokolok, me sohte sawasepe, me sohte mehmen me kak koaloalamwahwihiuk. I pahn onekihda sapahl poahsoan kan en omw kahnimw takai kesempwal.

54:12  I pahn kaukihda omw wasahn iroir kan kisin takai weitahta kesempwal me ede rupi, oh omw ewen kehl kan kisin takai me lingaling duwehte kisiniei, oh kehl kan me kapiluhkpene pahn kokoukihda takai kesempwal.

54:13  “Pein ngehi pahn padahkihong noumw aramas akan, oh ketikihong irail paiamwahu oh popohl.

54:14  Pwuhng oh inen pahn kakehleiukada. Ke pahn silasil mwahu sang pahn kehnaudek oh me kamasepwehk kan.

54:15  Ma mehmen pahn mahweniong uhk, ke en ese me kaidehn ngehi me mweidohng; oh mehmen me uhwong uhk oh pelianuhkada, e pahn pwupwudi.

54:16  “Ngehi me wiahda sounsuk mete kan, me kin saunda kisiniei en wiahda tehtehn mahwen. Ngehi me pil wiahda sounpei kan, me kin doadoahngki tehtehn mahwen kan mehn kemehla aramas.

54:17  Ahpw sohte tehtehn mahwen ehu pahn kak kauweiukala; oh ke pahn kak sapeng koaros me kin kedipeiuk. I pahn doarehla ei ladu kan, oh ketikihong irail roson en powehdi.” KAUN-O me mahmahsen.

Chapter 55

55:1  KAUN-O ketin mahsanih, “Kumwail koaros me men nimpildahr, kumwail kohdo- iet pwarer en pihlen! Kumwail me sohte noumwail mwohni, kumwail kohdo- kumwail pwainda amwail tungoal pilawa oh iang kepinkonot! Kumwail kohdo! Alehda amwail tungoal wain oh milik- kumwail sohte pahn pwain!

55:2  Dahme kumwail pahn kesehkihla noumwail mwohni kan ong ni mehkot me sohte pahn kaitarala amwail anahn? Dahme kumwail pahn kesehkihla wahn pwudowamwail kan ahpw kumwail sohte pahn medla? Kumwail rong ie oh kapwaiada dahme I pahn mahsanih, kumwail ahpw pahn nsenamwahukihla kisin tungoal me keieu kaselel sang koaros.

55:3  “Kumwail nei aramas akan, kumwail rong ie, oh kohdo rehi; kumwail kohdo rehi, I ahpw pahn komourkumwailla! I pahn kauwada inou poatopoat nanpwungatail, oh ketikihong kumwail kupwuramwahu me I inoukihong Depit.

55:4  I wiahkihla ih sounkaweid oh kaunen wehi kan, I kasalehda ei manaman ong wehi kan pwehki ih.

55:5  Eri, kumwail pahn ekerodo wehin liki kan me sohte kin esei kumwail mahso, ahpw met re pahn tangatang kodohn iangkumwailla! Ngehi, KAUN-O, amwail Koht, Koht sarawien Israel, pahn koasoanehdi pwe mepwukat koaros en pweida; I pahn kawauwihala oh kalinganaikumwailda.”

55:6  Kumwail sohpeiong KAUN-O oh kapakapohng nindokon eh sohte kin ketin dohsang kumwail.

55:7  Aramas suwed kan en sohpeisang ar mour suwed, oh wekidala ar lamalam. Re en sohpeiong KAUN-O, atail Koht; pwe ih me kupwurkalahngan oh kin mwadang mahkikihong kitail dipatail kan.

55:8  KAUN-O ketin mahsanih, “Audepen nan kupwurei sohte duwehte audepen amwail lamalam, oh ei wiewia kan sohte duwehte amwail wiewia kan.

55:9  Pwe duwen nanleng eh ileilesang sampah, ih duwen kupwurei oh wiewia kan eh ileilesang amwail kan.

55:10  “Ei mahsen kin rasehng sinoh oh keteu me kin mweredi sang pahnlahng pwe en kalamwurih sampah. E kin kawosehda oh kakairada wahnsahpw, oh pil kin kihong aramas werentuhke mehn poad oh kisin tungoal akan mehn tungoal.

55:11  Ih pil duwen mahsen me I kin kapwilewei- e pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.

55:12  “Eri, kumwail pahn mweselsang Papilon pereperen; kumwail pahn pakahrieisang nan kahnimwo ni popohl. Nahna kan oh dohl akan pahn direkihla ar koulen kaping, oh tuhkehn nansapw akan pahn ngisingiski ar peren.

55:13  Tuhke saipres kan pahn wosada wasa me tuhke suwed kan mie ahnsou wet; tuhke mirtel kan pahn wosada wiliandi dihpw tekatek kan. Eri, met pahn wia kilel ehu me pahn kin poatopoat kohkohlahte, mehn kataman ehu duwen dahme ngehi, KAUN-O, ketin wiadahr.”

Chapter 56

56:1  KAUN-O ketin mahsanihong sapwellime aramas akan, “Kumwail wia dahme pwung, pwe I pahn mwadang doareikumwailla.

56:2  I pahn kapaiahda irail kan me kin wauneki rahnen Sapad ahnsou koaros oh sohte kin kasaminehla. I pahn kapaiahda irail kan me sohte kin wia me suwed.”

56:3  Mehn liki men me towelahr sapwellimen KAUN-O aramas akan sohte pahn nda, “KAUN-O sohte pahn ketin mweidohng ie I en iang sapwellime aramas akan kaudok.” Ohl emen me wusole lekasang en dehr medemedewe me e sohte kak iang wiahla kisehn sapwellimen Koht aramas akan pwehki eh sohte kak wiahda seri.

56:4  KAUN-O ketin mahsanihong soangen aramas menet, “Ma ke pahn waunekin ie ni omw pahn kapwaiada rahnen Sapad, oh wia dahme pahn kaparanda kupwurei oh kolokol ei inou kan ni loalopwoat,

56:5  eri, katamanpen mwaromw pahn mihmihte nan ei Tehnpas Sarawio oh rehn nei aramas akan werei sang omw pahn naineki pwutak kei de serepein kei. Ke sohte pahn manoknokla.”

56:6  Oh KAUN-O ketin mahsanihong mehn liki kan me wiahla kisehn sapwellime aramas akan, me kin poakohng oh papah, me kin wauneki rahnen Sapad oh kolokol sapwellime inou kan ni loalopwoat:

56:7  “I pahn weikumwaillahng Saion, ei dohl sarawio, oh kihong kumwail peren nan ei tehnpas en kapakap, oh kupwurehla meirong kan me kumwail pahn wia pohn ei pei sarawio. Ei Tehnpas Sarawio pahn kahdaneki tehnpas en kapakap ong tohn wehi koaros.”

56:8  KAUN-O Wasa Lapalahpie, me ketikidohr sapwellime aramas en Israel kan sang ar kalipilipala, ketin inoukidahr me e pahn pil ketikihdo aramas teikan pwe re en iangala sapwellime aramas akan.

56:9  KAUN-O ketin mahsanihong wehin liki kan re en patohdo duwehte mahn lawalo kan oh kangala sapwellime aramas akan.

56:10  E ketin mahsanih, “Kaun akan koaros me uhdahn pahn kaweid nei aramas akan, irail maskun! Sohte mehkot me re ese. Re rasehng kidi me kin sinsile ihmw ahpw sohte kin ngong-re kin wononseli oh ouiouraman. Ia uwen ar kin ngoangkihte memeir!

56:11  Re rasehng kidi mehwo kan me sohte kin itarki kanarail mwenge. Kaun pwukat sohte kin wehwehki. Emenemen irail kin wiewia dahme e kin perenki oh kin rapahki pein kamwahupe kelehpw.

56:12  Aramas kamam sakau pwukat kin nda, ‘Kitail wahdo wain, oh nimala uwen me kitail kak! Lakapw pahn mwahusang rahnwet.’ ”

Chapter 57

57:1  Aramas lelepek kin mehla, oh sohte me kin wehwehki kahrepe de pil kesempwalki. Ahpw ni ar kin mehla, sohte paisuwed ehu kin lelohng irail.

57:2  Irail kan me kin mour lelepek kin diar popohl oh kommmoal ni ar kin mehla.

57:3  Kumwail me dipan akan, kumwail keido ale kadeikpamwail! Kumwail sohte mwahusang sounwunahni kan, me kin kamwahl akan, oh lihen netiki paliwararail kan.

57:4  Ihs me kumwail wie kokouruhrki? Kumwail aramas likamw akan, ihs me kumwail kapakapailoke?

57:5  Kumwail kin kaudokiong koht en kaparapar seri kan ni amwail kin wiewia nsenen pwopwoud pahn amwail tuhke sarawi kan. Kumwail kin meirongkihla noumwail seri kan nan pwoaren paip kan limwahn piletik kan.

57:6  Kumwail kin kihsang wasao kisin takai medendel kan oh kaudokiong nin duwen koht ekei. Kumwail kin wudekiong wain nin duwen meirong ong irail oh meirongkihong irail wahnsahpw. Kumwail lemeleme me mepwukat kin kaparanda kupwurei?

57:7  Kumwail kin kohla pohn nahna ileile kan pwe kumwail en wia meirong oh wia nsenen pwopwoud.

57:8  Kumwail kin koasoanehdi noumwail dikedik en eni kan nan imwamwail kan. Kumwail manokeiehla; kumwail kin kilisouda oh wendiong nan dewemwail kan rehn amwail mwohnlimpoak kan, me kumwail kihong mwohni pwe re en wendi rehmwail. Kumwail eri kin kamwakamwait amwail ineng suwed kan wasao.

57:9  Kumwail eri kin usorehla lehn wai oh lehn kei kan oh kohla kaudokiong koht Molek. Pwe kumwail en rapahki koht me kumwail pahn kaudokiong, kumwail kin kadarala meninkeder wasa doh kan, oh pil kin lellahng nan wasahn me melahr akan.

57:10  Kumwail kin pwangada raparapahkiseli koht teikan, ahpw kumwail sohte kin tokedi. Kumwail kin lemeleme me noumwail dikedik en eni kan kin kakehleikumwailda, ihme kahrehda amwail sohte kin luwetala.

57:11  KAUN-O ketin mahsanih, “Ihs koht pwukat me kumwail kin masak, kahrehda amwail kin lokaia likamw ong ie oh manokeiehla douluhl? Ia duwe, kumwail sohla waunekin ie pwehki ei nennenla ahnsou reirei sohte mahsen?

57:12  Kumwail lemeleme me amwail wiewia kan me pwung, ahpw I pahn kasalehda amwail wiewia kan, oh noumwail dikedik en eni kan sohte pahn kak sewesei kumwail.

57:13  Ni amwail pahn peki sawas, eri, noumwail dikedik en eni kan en doareikumwailla! Kisin engitik kis pahn kasohreirailla! Ahpw irail kan me likih ie pahn momour nan sahpwo oh pahn kaudokiong ie nan ei Tehnpas Sarawio.”

57:14  KAUN-O ketin mahsanih, “Nei aramas akan en pwurodo rehi. Kumwail kihsang mehn korompw koaros nan alarail! Kumwail wiahda ahl oh kaunopada!

57:15  “Ngehi Koht sarawi oh ileile, me ketin ieias kohkohlahte. I kin ketiket wasa ileile oh sarawi, ahpw I pil kin ketiket rehn aramas akan me aktikitik oh wiliakapwalahr, pwe I en kak kasapahldo arail koapworopwor oh likilik.

57:16  I kihong nei aramas akan mour, oh I solahr pahn kapwokohnekin irail sapwung kan de engieng pahrail kohkohlahte.

57:17  I engiengdahr pahrail pwehki diparail oh arail mehwo, ihme I kalokehkin irail oh keseirailla. Ahpw re me keptakai oh uselahte wiewia nsenarail.

57:18  “I kilangehr duwen ar mwekid kan, ahpw I pahn kakehleirailda. I pahn kahluwa irail oh sewese irail, oh I pahn kansenamwahwihala irail kan me kin sengiseng.

57:19  I mweidohng koaros ei popohl, koaros me kerendohng ie oh dohsang ie kan! I pahn kakehlahda nei aramas akan.

57:20  Ahpw aramas suwed kan rasehng iloak en nan madau me sohte kin tokedi, oh kin kahrehda kiried oh dihpw.

57:21  KAUN-O ketin mahsanih, “Sohte poadoarepen me dipan akan.”

Chapter 58

58:1  KAUN-O ketin mahsanih, “Kumwail ngisingis ni ngihl laud uwen amwail kak! Kumwail kasalehiong nei aramas akan diparail kan!

58:2  Re kin kaudokiong ie rahn koaros, kakahski me dene re kin kapwaiada ei kosoned akan oh wia dahme pwung. Re kin nda me re men I en ketikihong irail kosonned pwung kan, oh me re kin perenki pwongih ie.”

58:3  Aramas akan kin ndinda, “Dahme kitail pahn kaisihsolki, ni KAUN-O eh sohte mwahn kin mwahngih? Dahme kitail pahn kaisihsolki, ma e sohte pahn ketin tehk kitail?” Eri, KAUN-O ahpw ketin mahsanihong irail, “Iet me mehlelen, ni ahnsowohte me kumwail kin kaisihsol, kumwail kin pein raparapahki kamwahupamwail oh kin kahpwalihala noumwail tohndoadoahk kan.

58:4  Amwail kaisihsol kin kahrehiong amwail lemeila, oh kumwail kin akamai oh pei ahnsou koaros. Kumwail lemeleme me soangen kaisihsol wet pahn kamwakidada kupwureiet pwe I en karonge amwail pekipek kan?

58:5  Ni amwail kin kaisihsol, kumwail kin pein kalokei kumwail; kumwail kin poaridi, rasehng ahlek pwoat me penglahr, oh kumwail kin perekihdi likoun nsensuwed oh kamwerehdi pehs pwe kumwail en wendi loale. Ih soahng wet me kumwail kin kahdaneki kaisihsol? Kumwail lemeleme me I pahn kupwurperenki soahng wet?

58:6  “Ahpw ih soangen kaisihsol me I kin perenkien: kamweidpeseng sahl me pirpenehr irail kan me mihmi nan kehnaudek, oh kauwehla sahl me pirepenehr pwuhng, oh kasaledekala irail kan me mihmi nan apwal.

58:7  Mweidohng me semwehmwe kan en iang tungoale amwail kisin tungoal akan, oh langadahng imwamwail kan ong irail kan me sohte imwarail. Kalikawihada irail kan me sohte ar likou, oh dehr kahng sewesehda kisehmwail kan.

58:8  “Eri, ei kalahngan ahpw pahn dakerkumwailda, rasehng ketipin en nimenseng, oh amwail ohla kan ahpw pahn mwadang mwahula. I pahn kin ieiang kumwail ahnsou koaros pwe I en kin doandoarei kumwail; oh ei sawas pahn kin mi rehmwail ahnsou koaros.

58:9  Ni amwail pahn kin kapakap, I pahn kin karongei kumwail. Ni amwail pahn kin likweriong ie, I pahn kin sapeng kumwail. “Ma kumwail pahn katokihedi amwail kin kahpwalihala meteikan, soangen mwekid koaros en kamwamwahlih irail, oh soangen lokaia suwed koaros,

58:10  ma kumwail pahn katungoale me duhpeklahr akan oh kaitarala anahn en me sohte kin itar akan, iei ahnsou me rotorot me kapikapil kumwail pahn wekidekiong ni marain en rahn.

58:11  I ahpw pahn kin kahluwa kumwail oh audehkin kumwail kamwahu kan. I pahn kin kakehlakai kumwail. Kumwail pahn rasehngala mwetuwel ehu me diren pihl, pwarer ehu me sohte kin madada.

58:12  Noumwail aramas akan pahn onehda sapahl kahnimw kan me ohlahr, re pahn onehda sapahl pohn poahsoanen mahs akan. Kumwail ahpw pahn ndandkihla amwail kamwahwihala sapahl dahme ohlao, oh onehda sapahl ihmw ko me ohla.”

58:13  KAUN-O ketin mahsanih, “Ma kumwail pahn kin kasarawihala rahnen Sapad oh sohte rapahki mehkot rahno me mihmi ni pein kamwahupamwail, ma kumwail pahn kesempwalki ei rahn sarawi oh wauneki ni amwail sohte pahn seiloak, doadoahk, de koasoakoasoi mwahl,

58:14  eri, kumwail pahn diar peren oh nsenamwahu me kin kohsang ni doadoahk en papah ie. I pahn kawauwihkumwailla wasa koaros nin sampah; kumwail pahn nsenamwahukihla sahpw me I ketikihong Seikop, samamwailo. Ngehi, KAUN-O, me mahmahsen.”

Chapter 59

59:1  Kumwail dehr lemeleme me KAUN-O me nohn luwet pwehn komourkumwailla de nohn salongopon pwehn ketin karonge amwail likwer en pek sawas kan!

59:2  Pwehki dipamwail kan me kahrehda eh sohte ketin karongei kumwail. Iei dipamwail kan me katohrei kumwail sang Koht ni amwail kin song en kaudokiong.

59:3  Kumwail dipikidahr amwail lokaia likamw, pei eikek, oh kamaramas.

59:4  Kumwail kin kolahng nan mwoalen kopwung, ahpw sohte pwuhng rehmwail. Kumwail kin koapworopworki lokaia likamw pwe kumwail en pweida nan mwoalen kopwung. Kumwail kin kapwaiada amwail koasoandi kan pwehn kauwehla meteikan.

59:5  Koasoandi suwed kan me kumwail kin wiahda inenen suwed rasehng kutohr en sineik pwoisin. Pwalangpeseng ehu kutohren, sineik ahpw pahn pwedieisang loale! Ahpw amwail koasoandi suwed kan sohte pahn wia kamwahu ehu ong kumwail-pahn sohte katepe rasehng likou me wiawihkihda pesen likan!

59:6  Koasoandi suwed kan me kumwail kin wiahda inenen suwed rasehng kutohr en sineik pwoisin. Pwalangpeseng ehu kutohren, sineik ahpw pahn pwedieisang loale! Ahpw amwail koasoandi suwed kan sohte pahn wia kamwahu ehu ong kumwail-pahn sohte katepe rasehng likou me wiawihkihda pesen likan!

59:7  Kumwail kin koasoakoasone mehkot suwed ahnsou koaros, oh sohla kin kak kanengamahiong awiawih pwe kumwail en wiahla amwail koasoandi kan. Kumwail sohte kin peikasalki amwail kin kemehla aramas mwakelekel kan. Kumwail kin kauwehla wasa koaros me kumwail kin kohla ie,

59:8  oh sohte mehmen kak ahneki meleilei wasa me kumwail kin kohla ie. Mehkoaros me kumwail kin wia me sapwung. Kumwail kin idawehn ahl pirek, oh sohte emen me pahn keid nan ahlo pahn saledek sang lokolok.

59:9  Aramas ako ahpw patohwan, “Eri, met kitail eseier kahrepen Koht eh sohte ketin doareikitail sang irail kan me kahpwalihkitaillahr. Se koapworopworki marain me se kin kekeid loale, ahpw rotorotte me mie,

59:10  se ahpw kin dedehmseli wasa rasehng maskun men. Se kin dipekelekel nin souwas, likamwete nipwong, likamwete se mihmi nan sahpw rotorot en me melahr akan.

59:11  Se patohwan masepwehkada oh pahtoula. Se ngoangki Koht en ketin doareikitala sang kahpwal oh sapwung, ahpw sohte mehkot wiawi.

59:12  “Maing KAUN, dipat akan me nohn ngeder. Dipat akan kedipeikitadahr. Se wehwehki dipat akan koaros.

59:13  Se patohwan kahngohdiong komwi, soingkomwihla, oh kahng idawehn komwi. Se kahpwalihalahr meteikan oh sohpeisang komwi. At lamalam akan sohte mehlel; at lokaia kan me likamw.

59:14  Pwuhng sohralahr, oh pwung sohte kak kerendo. Mehlel kin dipekelekel ni wasahn tuhpene kan oh lelepek solahr kak dierek wasahn kopwung kan.

59:15  Lelepek tikitiklahr ihme kahrehda mehmen me tokedihsang eh wiewia suwed, pahn uhd mihla pahn apwal en wiewia suwed kan.” KAUN-O ketin mahsaniher mepwukat, e ahpw kupwursuwedkihla eh solahr pwuhng.

59:16  E ketin pwuriamweikihla duwen eh solahr emen pwehn sewese me milahr nan apwal. Eri, e pahn ketin doadoahngki pein sapwellime manaman pwehn kapitirailla oh ketikihong irail manaman en powehdi.

59:17  E pahn ketin pwuhriong nan pwuhng rasehng likou mete oh manaman en komourla rasehng lisoarop mete. E pahn ketin pwuhriong nan ineng kehlail en kapwungala mehkan oh en kaloke oh ikihong sapwung kan me aramas wie lokolongki.

59:18  E pahn ketin kaloke sapwellime imwintihti kan nin duwen ar wiewia kan, pil irail kan me mi nan sahpw doh kan.

59:19  Aramas koaros sang ni palimese lellahng ni palikapi pahn lemmwiki ih oh sapwellime roson lapalap. E pahn ketido rasehng lapake, rasehng kisinieng kehlail ehu.

59:20  KAUN-O ketin mahsanihong sapwellime aramas akan, “I pahn kodohng Serusalem pwe I en doareikumwailla oh kapitala kumwail koaros me sohpeisangehr dipamwail kan.

59:21  Oh I wiahiong kumwail inou ehu: I kihongkumwailehr ei manaman oh ei padahk kan pwe kumwail en ahnekihla kohkohlahte, oh sang met kohla kumwail pahn peikiong ie oh padahkihong noumwail seri kan oh kadaudokamwail kan en peikiong ie kohkohlahte.”

Chapter 60

60:1  Serusalem, uhda oh linganla, rasehng ketipin; lingaling en KAUN-O dakeruhkadahr.

60:2  Rotorot pahn kipehdi wehi teikan en sampah, ahpw ong kowe, marain en KAUN-O pahn kapiluhkpene. Lingan en sapwellime roson pahn ieiang uhk.

60:3  Wehi kan pahn men iangada paieki omw marain, oh nanmwarki kan pahn men iangada paieki lingan kapw en omw mour.

60:4  Kilengseli oh kilang dahme wiewiawi: noumw aramas akan pokonpenehr pwe re en pwarodohng rehmw! Noumw pwutak kan pahn kohdo sang nan sahpw doh kan; oh noumw serepein kan pahn pelikilik kohdo rasehng seri kei.

60:5  Ni omw pahn udiahl irair wet, ke pahn perenkihda kowahlap; oh kapehdomw pahn mwekidkihda omw peren. Kepwe kesempwal en wehin liki kan pahn wisikdohng rehmw, ar dipwisoun kapai kan pahn kotehdo madau kan pwe en pwilidi rehmw.

60:6  Pelin kamel kan sang Midian oh Epa pahn leledo. Re pahn kohdo sang Sipa, wa kohdo kohl oh warpwohmwahu. Aramas akan ahpw pahn lohkiseli kalahngan me Koht ketin wiadahr!

60:7  Pelin sihpw koaros en Kedar oh Nepaiod pahn pakahrdohng uhk pwe en kin wia omw mehn meirong oh meirongala pohn pei sarawio pwehn kaparanda kupwuren KAUN-O. KAUN-O pahn ketin kalinganahla Tehnpese Sarawio lingaling sang mahso.

60:8  Soahng da kei me tangatang kohdo likamwete depwek kei, likamwete mwuroi kei me pipihr pwurupwurodohng nan pasarail kan?

60:9  Iei sohp kei me tangatang kohdo sang sahpw doh kan; re weuwa kohdo sapwellimen Koht aramas akan ong nan uhdakarail. Re kohkohdo wisik silper oh kohl, mehn kawauwihala mwaren KAUN-O, Koht sarawien Israel, me ketin kupwurehda wehin liki kan koaros en wauneki sapwellime aramas akan.

60:10  KAUN-O eri ketin mahsanihong Serusalem, “Mehn liki kei pahn onehda sapahl omw kehl kan, oh ar nanmwarki kan pahn papahiuk. I kalokeiukehr mahso nan ei engieng, ahpw met I pahn kasalehiong uhk ei kalahngan oh limpoak.

60:11  Omw ewen kehl kan pahn kin langalang nin rahn nipwong, pwe nanmwarkien wehin liki kan en kin ketikidohng uhk ar kepwe kesempwal kan.

60:12  Ahpw wehi kan me sohte pahn kin uhpahiuk pahn kamwomwmwomwla douluhl.

60:13  “Soangen tuhke me adaneki pain, suniper, oh saipres, tuhke keieu kaselel en nanwelen Lepanon, pahn wisikdohng uhk, Serusalem, pwehn oneiukada sapahl, pwe en kalinganahla Tehnpesei Sarawio, oh pil kalinganahla ei kahnimwo.

60:14  Seri kan me nein irail ko me kapwalihkumwaillahr pahn kohdo oh poaridihsang uhk pwe re en waunekin uhk. Koaros me mwamwahlikin uhk mahso pahn pil poaridihsang uhk oh ekerkin uhk, ‘Kahnimw en KAUN-O,’ ‘Saion, kahnimw en Koht sarawien Israel.’

60:15  “Ke solahr pahn lekdekla, solahr me pahn kailongkin uhk duwehte kahnimw me tehnlahr, solahr towe. Pwe I pahn kasapwiluhkada oh kalinganaiukada, oh wiahkinuhkala wasahn peren kohkohlahte.

60:16  Wehi kan oh nanmwarki kan pahn kin kupwurohkin uhk, rasehng nohno men me kin nsenohki kadihdi nah seri. Ke ahpw pahn esehla me ngehi, KAUN-O, me komouruhkalahr, Koht manaman en Israel, me kapituhkalahr.

60:17  “I pahn ketikihong uhk kohl a kaidehn prons, silper oh prons a kaidehn mete oh tuhke, oh mete, kaidehn takai. Omw kaun akan solahr pahn kahpwalihiuk; pwe I pahn koasoanehdi pwe re en kakaun ni pwuhng oh popohl.

60:18  Solahr me pahn rong ngilen moromor de koasoiepen mahwen; kamwomwmwomwlahn sapwamwil solahr pahn pwurehng pweida nan amwail wehi; pwe I pahn seweseiuk oh doandoareiuk, duwehte kehl ehu; a ke ahpw pahn kin kapikapinga ie pwehki ei komouruhkalahr.

60:19  “Ke solahr pahn anahne ketipin en kamarainihiuk nin rahn de maram nipwong; pwe ngehi, KAUN-O, pahn kin wia kamarainpomw poatopoat. Marain en ei lingaling pahn kin dakedaker uhk oh kamakamarainihiuk.

60:20  Rahnen omw pahtou kan pahn imwisekla. A ngehi, KAUN-O, pahn kin wia kamarainpomw poatopoat, poatopoat sang ketipin oh maram.

60:21  Noumw aramas akan koaros pahn kin wia dahme pwung, oh re pahn sapwenikihla sahpwo kohkohlahte. Ngehi me padokiraildi, rasehng kisin tuhke kei, ngehi me wieirailda, pwe re en kasalehda roson en mwarei mwohn aramas koaros.

60:22  Pil peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me KAUN-O!”

Chapter 61

61:1  Ngenen KAUN-O ketier rehi. E ketin keieiedier pwe I en lohkiong me semwehmwe kan rongamwahu, I en kansenamwahwihala me nan kapehd toutoulahr akan, I en lohkiong me sensel kan ar saledek oh saledek ong irail kan me mihmi nan imweteng.

61:2  E ketin poaroneiehdo pwe I en lohkihda duwen ahnsou me KAUN-O pahn ketin komourala sapwelime aramas akan, oh ketin kalowehdi ar imwintihti kan. E ketin poaroneiehdo pwe I en koaloalamwahwihala koaros me kin pahtou kan.

61:3  I en kihong irail kan me kin nsensuwed nan Saion peren oh nsenamwahu, ahpw kaidehn pahtou. Re en pereperen kokoulki koulen kaping, ahpw kaidehn koulen kedepwidepw. Re pahn rasehng tuhke kan me pein KAUN-O ketin padokedier. Irail koaros pahn kin wia dahme pwung, oh kapikapingahki Koht wiepen nin lime kan.

61:4  Re pahn onehda sapahl kahnimw kan me ohlahr mahsie.

61:5  Mehn liki kan pahn papah kumwail, nei aramas akan. Re pahn apwalih noumwail pelinmen kan, oh wiahda mwetuwel nan sapwamwail oh apwalih amwail mwetin wain kan.

61:6  A kumwail, kumwail pahn wiahla samworoun KAUN-O, ladun atail Koht. Kumwail pahn nsenamwahukihla kepwe kesempwal en wehin liki kan, oh pohnmwahsohki me dene uhdahn amwail.

61:7  Amwail namenek oh saroh imwiseklahr. Kumwail pahn kousoanla nan uhdakamwail, oh amwail kepwe kesempwal kan pahn tohtohla pahn pak riau. Amwail peren pahn kin poatopoat kohkohlahte.

61:8  KAUN-O ketin mahsanih, “I kin poakohng dahme pwung, oh kin kalahdeki tiahk en kahpwalihala meteikan oh tiahk suwed. I pahn katingih ni loalopwoat nei aramas akan, oh wiahiong irail inou poatopoat ehu.

61:9  Re pahn ndandla nanpwungen wehin liki kan; oh koaros me pahn kilang irail re pahn ese me irail nei aramas akan me I kin loalloale oh kupwuramwahwih.”

61:10  Serusalem kin ngisingiski oh pereperenki soahng kan me KAUN-O ketin wiahiongehr. E rasehng lih kamwohd emen me kapwatkidahr eh likoun kapwopwoud. Koht ketin kalinganahkilahr Serusalem lingan en komour oh roson en powehdi.

61:11  KAUN-O, Wasa Lapalap, pahn ketin komourala sapwellime aramas akan, duwehte sahpw me kin kawosehda oh kakairada werentuhke kan, oh wehi koaros pahn kapikapinga ih.

Chapter 62

62:1  I pahn poahngok pwe I en koangngoange Serusalem; I sohte pahn nennenla lao e pahn mourla, oh eh powehdi lao pahn dakerada wasa rasehng ndil ehu nipwong.

62:2  Serusalem, wehi kan pahn kilang omw manaman en powehdi! Nanmwarki koaros pahn kilang omw lingan. Mwar kapw ehu pahn kohieng uhk, mwar ehu me pein KAUN-O pahn ketikihda.

62:3  Ke pahn rasehng sapwellimen KAUN-O nihn lingan.

62:4  Ke solahr pahn adaneki “Me Lekdeklahro,” de sapwomwen solahr pahn adaneki “Lih Kamwohd Lekdeklahro.” Mwar kapw me pahn kohieng uhk iei “Koht Ketin Kupwurperenki Lih Kamwohdo.” Sapwomwo pahn adanekihla “Pwopwoud Peren,” pwehki KAUN-O eh ketin kupwurperkenkin uhk oh pahn rasehng en sapwomwo eh pwoud.

62:5  Rasehng mwahnakapw emen me aledahr eh pwoud mweipwon emen, mehmen me wiaiukada pahn pwoudikin uhk. Nin duwen ohl kamwohd emen eh kin perenki lih kamwohdo iei duwen omw Koht eh ketin kupwurperenkin uhk.

62:6  Serusalem, I koasoanedier silepe kei pohn omw kehl kan; re sohte pahn nennenla nipwong de nin rahn. Re pahn kin katamanki KAUN-O sapwellime inou kan pwe en dehr likidmeliehla.

62:7  Re sohte pahn mweidohng en ketin kommoaldi lao e onehda sapahl Serusalem oh ketin wiahkihla kahnimw ehu me sampah pwon pahn kapinga.

62:8  KAUN-O ketin wiahda inou lap ehu, oh sang ni sapwellime manaman eh pahn ketin kapwaiada: “Amwail wahnsapw akan solahr pahn wia mehn tungoal ong amwail imwintihti kan, oh mehn liki kan solahr pahn nim amwail wain.

62:9  Ahpw kumwail me padokedi oh dolung amwail wahnsahpw pahn tungoale pilawa oh kapikapinga KAUN-O. Kumwail me apwalih oh rikpene kreip kan pahn nim wain nan kehl en ei Tehnpas Sarawio.”

62:10  Mehn Serusalem kan, kumwail pedohisang nan kahnimwo oh wiahda apwoat ahl ong amwail aramas akan me pahn sapahldo! Kumwail kaunopada apwoat ahllap; kumwail rikasang kisin takai kan loale! Kumwail wiahda ehu kilel ong wehi kan pwe re en ese

62:11  me KAUN-O wiewia sapwellime pakair ong sampah pokon: “Kumwail ndahng mehn Serusalem kan me KAUN-O ketiket kodohn komourkumwailla, ketiki kohdo aramas akan me e ketin kapitalahr.”

62:12  Kumwail pahn adaneki “Sapwellimen Koht Aramas Sarawi kan,” “Aramas akan me Koht Ketin Kamouralahr.” Serusalem pahn adanekihla “Kahnimw me KAUN-O Ketin Loalloale,” “Kahnimw me KAUN-O Sohte Likidmeliehla.”

Chapter 63

63:1  “Ihs memenet me ketiket kohdo sang Posra nan Edom? Ihs met me ket nan likou weitahta, me sang ni mwomwen eh mwekid, e kin kasalehda me e sapwellimaniki roson unsek oh manaman koaros?” Ih KAUN-O met, me sapwellimaniki manaman en komourala, me ketiket kodohn lohkihda sapwellime lingan en powehdi.

63:2  “Dahme e ketiki nan likou weitahta, likamwete aramas me kin tiakpeseng wahn wain pwehn wiahkihda wain?”

63:3  KAUN-O ketin sapeng, mahsanih, “I tiakpesengehr wehi kan duwehte wahn wain, oh sohte me kohdo sewese ie. I tiakirailpeseng nan ei engieng, oh ntahrail me reidala ei likou kat.

63:4  Ngehi eri koasoanehdi me ahnsoun komourala nei aramas akan leledohr; oh ih ahnsowo met ahnsoun kaloke ar imwintihti kan.

63:5  I ahpw pwuriamweikihla ni ei raparapahki mehmen mehn sewese ie, I ahpw sohte diar. Eri, ei engieng ahpw karosonihiehda, ngehi eri poweiraildi sang ni pein ei manaman.

63:6  Nan ei engieng I tiakedi wehi kan unsek oh kamwomwirailla. I ahpw pil kakerediong ntahrail nanpwel.”

63:7  I pahn lohkiseli limpoak poatopoat en KAUN-O; I pahn kapingahki mehkoaros me e ketin wiahiong kitail. E ketin kupwuramwahwihalahr sapwellime aramas en Israel kan pwehki sapwellime kalahngan oh limpoak poatopoat.

63:8  KAUN-O eri mahsanih, “Irail iei nei aramas; re sohte pahn pitih ie.” Ih eri ketin kapitirailla sang

63:9  nan ar lokolok koaros. Kaidehkin tohnleng men me kapitirailla, pwe pein KAUN-O. Sang sapwellime limpoak oh kalahngan me e ketin kapitkinirailla. Pwe mahso, e kin ketin apwalih irail ahnsou koaros;

63:10  ahpw re kin kahngohdiong oh kansensuwedihala mehlel. KAUN-O eri ketin wiahla ar imwintihti oh ketin mahweniong irail.

63:11  Irail ahpw tamanda rahnen mahs ako, ni mwehin Moses, ladun KAUN-O; re ahpw patohwan, “A ia KAUN-O me ketin kapitala sapwellime aramas ako sang nan Sehd Weitahtao? Ia KAUN-O me ketikihong Moses sapwellime ngehno?

63:12  Ia KAUN-O, me ketikihong Moses soangen manaman kapwuriamwei ko, me katohrepeseng pilen sehdo oh kahluwa sapwellime aramas ako loale, e ahpw ndandkihla sang rahno kohdo?” KAUN-O ahpw ketin kahreirail kotehla sehdo, re sokedi kehlail rasehng oahs, oh sohte mwahn dipekelekel.

63:13  Ia KAUN-O, me ketikihong Moses soangen manaman kapwuriamwei ko, me katohrepeseng pilen sehdo oh kahluwa sapwellime aramas ako loale, e ahpw ndandkihla sang rahno kohdo?” KAUN-O ahpw ketin kahreirail kotehla sehdo, re sokedi kehlail rasehng oahs, oh sohte mwahn dipekelekel.

63:14  Rasehng pelin kou kan me pakahrlahng nan sahpw mwahu, iei duwen KAUN-O eh ketin kammoalehdi sapwellime aramas akan. Iei duwen eh ketin kahluwa sapwellime kan, oh ketin kawauwihala mware.

63:15  Maing KAUN, komw ketin mahsendidohng kiht sang nanleng, wasa komw kin ketiket ie ni lingan oh sarawi lapalahpie. Ia sapwellimomwi kupwur ngoang en apwahpwalih kiht? Ia sapwellimomwi manaman lapalap? Ia sapwellimomwi limpoak oh kalahngan ong kiht? Komwi dehr ketin likidmelieikitala.

63:16  Pwe komwi me samat. Mehnda ma samat mehn mahs ako, Eipraam oh Seikop, sohte pohnese kiht, ahpw komwi, Maing KAUN, me uhdahn samat, me kin ketin kapitkitala ahnsou koaros.

63:17  Dahme komwi kin ketin mweidikihong se en pwupwusang nan elomwi kan? Dahme komwi ketin mweidikihong se en keptakaila oh sohpeisang komwi? Komw ketin sapahldohng kiht, sang ni omwi limpoak ong me kin patohwan papah komwi kan, oh pil pwehki aramas akan me komwi kin ketin sapwellimaniki sangete mahs lel rahnwet.

63:18  At imwintihti kan kauskitalahr ahnsou kis mahs, kiht, sapwellimomwi aramas sarawi kan; re tiakpesengehr mwoalomwi sarawio.

63:19  Komw ketin wiahkinkitalahr aramas ekei me komwi sohte mwahn kaunda, de sohte ketin sapwellimaniki.

Chapter 64

64:1  Dahme komw sohte ketin tehrkipeseng pweleng en lahng oh ketidihdo reht? Nahna kan pahn udiahl komwi oh rerrerki ar masangkomwihda.

64:2  Re pahn rerrer, rasehng pihl me kin pwoapwoail pohn kisiniei mwehl. Komw ketido oh ketin kasalehiong sapwellimomwi imwintihti kan omwi manaman, pwe wehi kan en masepwehkada rerrer mwohn silangmwi.

64:3  Mahso komw ketidohr oh ketin wiadahr soahng kapwuriamwei kei me se sohte mwahn kasikasik. Nahna kan udiahlehr komwi oh rerrerki ar masangkomwidahr.

64:4  Saikinte me kilang de rong Koht emen me duwehte komwi, me kin wiahda soahng pwukat ong irail kan me kin koapworopworkin komwi.

64:5  Komwi kin ketin kasamwo irail kan me kin perenki wia dahme pwung, me kin tamataman kupwuromwien ong ar mour. Komw ketin engiengda paht, ahpw se usehlahte kahngiangihkin komwi dipat akan; oh ni omwi engieng lapalap se dadaurete nan at sapwung kan sang mahs kohdo.

64:6  Kiht koaros dipadahr; pil at wiewia mwahu kan saminlahr kowahlap. Pwehki dipat akan se rasehng tehntuhke meng me kisinieng kin ipihpirseli.

64:7  Sohte me sohpeiong komwi oh kapakapohng komwi; sohte me patohdo peki sawas rehmwi. Komwi ketin sohpeisangkitehr oh keseikitalahr pwehki dipat akan.

64:8  Ahpw komwi me samat, Maing KAUN. Se rasehng pwehl, a komwi sounwia sah. Komwi me ketin wieikitada,

64:9  eri, komwi dehr nohn ketin engieng paht, de ketin kupwukupwure dipat akan kohkohlahte. Kiht me sapwellimomwi; eri, komw ketin kupwurei kiht.

64:10  Sapwellimomwi kahnimw sarawi kan duwelahr sapwtehn ehu.

64:11  At tungoal Tehnpas Sarawio, wasa sarawi oh kaselel, wasa me at pahpa kahlap ako kin kapinga komwi ie, e mwomwkilahr kisiniei; oh wasa koaros me se kin kesempwalki, ohlahr douluhl.

64:12  Maing KAUN, ni omwi mwahngih mepwukat, komw pahn ketin nennenlahte sopeimwekid? Komw pahn ketin mweidohng kiht se en lokolok laudsang me se kakohng?

Chapter 65

65:1  KAUN-O ketin mahsanih, “I kaunopadahr pwe I en sapeng kapakap en nei aramas akan, ahpw re sohte kapakap. I kaunopadahr pwe re en diar ie, ahpw re sohte mwahn song en rapahkin ie. Tohn ei wehi sohte kapakapohng ie, mehnda ma I onopadahr pwe I en sapengki ar kapakap, ‘Iet ngehi, I pahn sewesei kumwail.’

65:2  Ahnsou koaros I kin onopada pwe I en kasamwo aramas pwukat, me kin keptakai wiewia me sapwung oh weweid nan nsenarail.

65:3  Nan ar seunamenek, re kin usehlahte kahngiangihiehda. Re kin wia ar meirong en me rotorot akan nan mwetuwel sarawi kan . oh isik warpwohmwahu pohn pei sarawien me rotorot akan.

65:4  Re kin kohla ni pwoahr kan oh ni sousou kan nipwong pwe re en ale kaweid rehn me melahr akan. Aramas pwukat kin kang uduk en pwihk, oh kin nim pilen uduk kan me kin meirongala ni wasahn meirong en me rotorot akan.

65:5  Re ahpw kin ndaiong aramas teikan, ‘Kumwail keiweisang reht; se me sarawi mehlel oh sohte konehng kumwail en sair kiht!’ Eri, I kin kalahdeki soangen aramas pwukat-ei engieng pahrail rasehng kisiniei me sohte kin kunla.”

65:6  “I koasoanedier ar kalokolok kan, oh kalokepen ar sapwung kan ntingdier. I sohte pahn pohnsehsehla ar wiewia kan, ahpw I pahn kasapahl ong irail

65:7  pweinen diparail oh dipen ar pahpa kahlap ako. Re isikalahr warpwohmwahu wasahn kaudok en me rotorot akan pohn dohl kan oh lahlahwe ie. Ihme I pahn kalokehkin irail ni me konehng arail wiewia en mahs ako.”

65:8  KAUN-O ketin mahsanih, “Sohte me kin kauwehla kreip kan; pwe re kin wiahkihda wain. I sohte pahn pil kauwehla nei aramas akan koaros-I pahn komourala irail kan me kin papah ie.

65:9  I pahn kapaiahda mehn Israel kan me kisehn kadaudok en Suda, oh kadaudokarail kan pahn sapwenikihla nin limei nahnahn kan. Nei aramas pilipil kan, me kin papah ie, pahn kousoanla wasao.

65:10  Re pahn kaudokiong ie oh kahluwahla neirail sihpw oh kou kan pwe re en kamwenge irail nan Patapat en Saron ni palikapi oh nan Wahun Kahpwal ni palimese.

65:11  “Ahpw ong kumwail me sohpeisang ie, me pohnsehse Saion, ei dohl sarawio, oh kin pwongih Kad oh Meni, koht kan en paiamwahu oh paisuwed.

65:12  Kumwail pahn mehkihla mehla eikek, pwehki amwail sohte sapeng ni ei malipei kumwail de rong ei mahsen. Kumwail pilada en sapeikiong ie oh wia me suwed.

65:13  Eri, I mahsanihong kumwail me irail kan me kin pwongih ie oh peikiong ie pahn paieki kisin tungoal oh pihl tohto, a kumwail pahn duhpekla oh men nimpilda. Re pahn pereperen, a kumwail pahn sarohdi.

65:14  Re pahn kokoulki ar peren, a kumwail pahn sengiseng kowahlap.

65:15  Nei aramas pilipil kan pahn wiahkihla adamwail kan mehn keria. Ngehi, KAUN-0, Wasa Lapalahpie, pahn kemeikumwailla. Ahpw I pahn ketikihong mwar kapw ong irail kan me peikiong ie.

65:16  Mehmen me mi nan sahpwo me pahn peki kapai ehu pahn peki en ale kapai sang rehn Koht loalopwoato. Mehmen me pahn kahula, pahn kahukihla mwaren Koht loalopwoato. Kahpwal akan en mahs pahn sohrala oh manoknokla.

65:17  KAUN-O ketin mahsanih, “I pahn wiahda sampah kapw ehu oh lahng kapw ehu. Mehkoaros me pweidahr nan ahnsou samwalahr ako pahn manoknokla douluhl.

65:18  Kumwail nsenamwahukihla oh pereperenki kohkohlahte mehkan me I pahn wiahda. Serusalem kapw me I pahn wiahda pahn diren peren, oh towe kan pahn kin diren nsenamwahu.

65:19  Pein ngehi pahn kin kupwurperenki Serusalem oh towe kan. Sohte ngilen mwahiei pahn mie wasao, sohte ngilen peksawas.

65:20  Solahr seri pwelel pahn mehla ni ar pwelel, ahpw koaros pahn kaunsekala irepen ahnsoun ar mour. Irail kan me pahn lel sounpar 100, re pahn duwehte ma re aramas pwulopwul kei. Ma emen pahn mehla mwohn eh lel sounpar 100, met kasalehda me I kaloke.

65:21  Aramas akan pahn kauwada imwarail kan oh kousoanla loale-sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan-ahpw sohte emen tohrohr pahn kak adihasang ar wain. Nei aramas akan pahn mour werei, rasehng tuhke kei. Re pahn nsenamwahuki mehlel dipwisou kan me re koadoahkihada.

65:22  Aramas akan pahn kauwada imwarail kan oh kousoanla loale-sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan-ahpw sohte emen tohrohr pahn kak adihasang ar wain. Nei aramas akan pahn mour werei, rasehng tuhke kei. Re pahn nsenamwahuki mehlel dipwisou kan me re koadoahkihada.

65:23  Arail doadoahk kan pahn kin pweida mwahu, oh neirail seri kan sohte pahn diar paisuwed. Pwe I pahn kupwuramwahwih irail oh neirail seri kan erein dih kan koaros me pahn kohdo.

65:24  Pil mwohn arail pahn kaimwisekala ar kapakap akan rehi, I pahn kapwaiada ar pekipek kan.

65:25  Kidien wel kan oh sihmpwul kan pahn kin mwengepene; oh laion kan pahn iang kang kenen kou kan kisin mwenge. Sineik kan solahr pahn keper oh kamasepwehk. Pwe pohn Saion, ei dohl sarawio,. sohte mehkot suwed de meninkau kot pahn mie.”

Chapter 66

66:1  KAUN-O ketin mahsanih, “Nanleng iei mwoalei, oh sampah iei utupen aluweluwei kat. Eri, ia soangen tehnpas me kumwail kak kauwadahng ie, ia mwomwen wasa me I pahn kousoan ie?

66:2  Pwe pein ngehi me wiahda nanleng oh sampah oh audapara koaros! I kin kupwurperenki irail kan me aktikitik oh wiliakapwala, me kin lemmwikin ie oh peikiong ie.

66:3  “Aramas akan kin wiewia dahme re inengieng. Ong irail e duwepenehte ma re kemehla kou men nin duwen meirong de meirongkihla aramas emen; ma re patohwanda sihmpwul men de katimpeseng tepinweren kidi men; ma re patohwanda meirong en wahnsahpw de meirongki ntahn pwihk; ma re patohwanda warpwohmwahu de kapakapohng dikedik en eni. Re kin perenki wia mwomwen kaudok saut kan.

66:4  Eri, I pahn ketikidohng kahpwal pohrail-soahng kan me re keieu masak-pwehki sohte emen me sapeng ni ei malipe irail de rong ei mahsen. Re pilada re en sapeikiong ie oh wia me suwed.”

66:5  Kumwail rong dahme KAUN-O ketin mahsanih, kumwail kan me lemmwiki oh peikiong: “Pwehki amwail loalopwoatohng ie, ihme kahrehda ekei amwail aramas akan kailongkin kumwail oh sohte men patehng kumwail. Re kin kapailokei kumwail oh nda, ‘KAUN-O en ketin kasalehda sapwellime roson lapalap oh doareikumwailla, pwe se en kak kilang amwail pahn perenda.’ Ahpw pein irail pahn namenekla!

66:6  Kumwail rong! Mwoarong laud nan kahnimwo, mwoarong ni Tehnpas Sarawio, iei mwoarong en kalokolok me KAUN-O wiewiahiong sapwellime imwintihti kan!

66:7  “Ei kahnimw sarawio rasehng lih emen me mwadangete neitik ni eh sohte medek.

66:8  Mie mehmen me rongehr ire wet? Mie wehi ehu me ipwidi ni rahnteieu? Saion sohte pahn lokolok ahnsou werei, mwohn wehio eh pahn ipwidi.

66:9  Kumwail dehpa medemedewe me nei aramas akan pahn lel ni rahnen ar ipwidi, I ahpw pahn sohte mweidohng re en ipwidi.” KAUN-O, me mahmahsen.

66:10  Kumwail iang Serusalem perenda; kumwail perenkihda Serusalem, kumwail koaros me poakohng kahnimw wet! Kumwail iang ih perenda met, kumwail koaros me iang ih sengiseng mahs!

66:11  Kumwail pahn nsenamwahuki eh pai kan, rasehng seri men me wie dihdi rehn ine.

66:12  KAUN-O ketin mahsanih, “I pahn ketikihdo pai poatopoat; pai en wehi kan pahn pwilidohng kumwail rasehng pillap pwoat me sohte kin madada. Kumwail pahn rasehng seri men me ine kin apwahpwalih, tupwutupwenge, oh limlimpoakohng.

66:13  I pahn kansenamwahwihkumwailla nan Serusalem, nin duwen ihn men eh kin kahnsenamwahwih nah seri.

66:14  Ni amwail pahn kilang mepwukat eh pahn pweida, kumwail pahn nsenmwahu; kumwail pahn rosonkihda oh kehlailkihda. Kumwail eri pahn esehla me ngehi, KAUN-O, me sewesehda irail kan me peikiong ie, oh duwen ei kasalehiong ei engieng ei imwintihti kan.

66:15  KAUN-O pahn ketido iangahki kisiniei. E pahn ket pohn pehn melimel ehu pwehn ketin kaloke irail kan me e ketin engieng pah.

66:16  E pahn ketin kalokehki kisiniei oh kedlahs tohn sampah koaros me dipadahr-oh me ngeder pahn kamakamala.

66:17  KAUN-O ketin mahsanih, “Imwilahn irail kan me kamwakeleirailda ong ni kaudok en me rotorot akan kerendohr, me iang kaparalahng ni mwetuwel sarawi kan, oh me kang uduk en pwihk oh kitik oh soangen mwenge saut kan.

66:18  I mwahngih ar wiewia oh lamalam akan. I ketiket kodohn rikpene tohn wehi koaros. Ni ar pahn pokonpene, re pahn kilang dahme ei manaman kak wia

66:19  oh pahn esehla me ngehi me kaloke irail. “Ahpw I pahn kamourala ekei irail oh kadaralahng irail nan wehi kan oh sahpw doh kan me saikinte rong ei ndand de kilang ei roson lapalap oh manaman: ong Spein, Lipia, oh Lidia, iangahki neirail sounkesik ketieu kan, oh ong Tupal oh Krihs. Re ahpw pahn kalohki ei roson lapalap nanpwungen wehi pwukat.

66:20  Re pahn wahdo iangamwail tohn wehi kan sang wehi koaros nin duwen kisakis ehu ong ie. Re pahn weiraildohng pohn ei dohl sarawio nan Serusalem, re pahn dak oahs, kou, oh kamel, oh werennansapw oh kuruma, duwehte mehn Israel kan ar kin wadohng wahnsahpw en meirong ni Tehnpas Sarawio nan mehn deudeu mwakelekel ong kaudok.

66:21  I pahn wiahkihla ekei irail mehn Lipai oh samworo.

66:22  KAUN-O ketin mahsanih, “Nin duwen sampah kapw oh nanleng kapw eh pahn mihmi mwohn silangi, ih duwen kadaudokamwail kan oh adamwail pahn mihmi mwohn silangi.

66:23  Ni rahn Sarawien Maram Kapw oh rahnen Sapad koaros tohn wehi koaros pahn patohdo pwe re en kaudokiong ie wasaht, nan Serusalem.

66:24  Ni ar pahn mweselda, re pahn kilang paliweren me melahr kan me kahngohdiong ie. Mwahs kan me pahn kangkang paliwararail sohte pahn mehla, oh kisiniei me pahn isihsik paliwararail sohte pahn kunla. Aramas koaros pahn sautki kilang paliwararail kan.”