Azeri - Isaiah

Chapter 1

1:1  يهودا و اورشلئم باره‌سئنده آموص اوغلو اِشَعيايا گؤرونن رؤيا کي، يهودا پادشاهلاري عوزئيّا، يوتام، آخاز، و خئزقئيانين دؤورونده باش وردی.

1:2  ای گؤيلر، قولاق آسين، ای يِر اوزو، اشئت! چونکي رب بله ديئر: "اؤولادلار يتئشدئرئب بؤيوتموشم، آمّا اونلار منئم ضئدّئمه عوصيان ادئبلر.

1:3  اؤکوز يئيه‌سئني، اِششَک ده صاحئبئنئن يِملئيئني تاني‌يير، لاکئن ائسرايئل خالقي منی تانيمير، خالقيم آنلامير."

1:4  گوناه ادن مئلّتئن، شر ائشلر آلتيندا اولان خالقين، پئسلئک ادن نسلئن، فاسئد اؤولادلارين واي حالينا! اونلار ربّی ترک ادئبلر، ائسرايئلئن موقدّسئنه حقارتله باخيبلار، اوندان اوز دؤنده‌رئبلر.

1:5  نه اوچون گئنه ده دؤيوله‌سئنئز، نئيه عوصيان اتمکده داوام ادئرسئنئز؟ باش تامامن ناخوش، اورَک تامامن مرئض.

1:6  بدنئنئز تپه‌دن ديرناغاجاق ناخوشدور، بئر صاغ يِرئنئز يوخدور: يارالارينيز، زَده‌لرئنئز، تزه ضربه‌لرله وورولموش يارالارينيز، تمئزلَنمه‌مئش، ساريلماميش، مَلحَمله يوموشالديلماميشدير.

1:7  مملکتئنئز وئراندير، شهرلرئنئز اودلا يانيب، ياداِلّئ‌لر گؤزونوزون قاباغيندا‌ تورپاغينيزي يِيئب داغيديرلار. تورپاغينيز کئمسه‌سئز قاليب، سانکي ياد آداملار اوراني تالاييب.

1:8  صَحيون قيزي اوزوم باغينداکي چارداق کئمي، خئيار بوستانينداکي کوما کئمي، موحاصئره‌يه آلينميش شهر کئمي تک قاليب.

1:9  اگر قوشونلار ربّي، بئزئم خالقدان بئر نچه صاغ قالان آدام قويماسايدي، بئز سودوم کئمي اولارديق، گومورايا بَنزه‌يَردئک.

1:10  ای سودوم باشچيلاري، ربّئن سؤزونو اِشئدئن! سئز، ای گومورا خالقي، تاريميزين تعلئمئني اِشئدئن!

1:11  رب ديئر: "قوربانلارينيزين چوخلوغوندان منه نه؟ يانديرما قوچ قوربانلاريندان، کؤکَلمئش حيوانلارين پئيئندن دويموشام. گاميش، قوزو، کِچي قانيني ائسته‌مئرم.

1:12  حوضوروما گلرکن اَلئنئزده بونلاري گتئرمه‌يئنئزي کئم ائسته‌يئر؟ معبدئمئن صَحنلرئنه بوش يِره آياق باسيرسينيز.

1:13  منه آرتيق دَيَرسئز تقدئملر گتئرمه‌يئن، بوخور منده ائکراه يارادير. پئسلئکله دولو تزه آي مراسئملرئنئزه، سَبّت گونلرئنئزه، موقدّس ييغينلارينيزا دؤزه بئلمئرم!

1:14  تزه آي جشنلرئنئزدن، بايرام گونلرئنئزدن نئفرت ادئرم. بونلار منه يوک اولوبلار، اونلاري داشيماقدان يورولموشام.

1:15  بونا گؤره سئز اَل آچيب منه يالواراندا، گؤزلرئمي سئزه يوماجاغام. نه قدر چوخ دوعا اده‌سئنئز ده، گئنه قولاق آسماياجاغام. اَللرئنئز قانلا دولودور،

1:16  يويونون، اؤزلرئنئزي تمئزله‌يئن؛ گؤزومون قاباغيندا ائشلرئنئزي شردن اوزاقلاشديرين، پئسلئک اتمه‌يي بوراخين.

1:17  ياخشيليق اتمه‌يي اؤيره‌نئن، عدالتي آختارين، مظلوملاري قورتارين، يِتئمئن حاقّيني ورئن، دول آروادي حئمايت ادئن."

1:18  رب ديئر: "گلئن، ائندي بئربئرئمئزله بحث اِدَک، گوناهلارينيز قيپ‌قيرميزي پارچا کئمي گؤرونسه ده، اونلار قار کئمي آغ اولاجاق، توند قيرميزي رنگه چالسا دا، آغ يون کئمي آغ اولاجاق.

1:19  اگر سؤزه باخيب ائطاعت اده‌سئنئز، تورپاغين لاپ گؤزل بهره‌لرئندن يئيَرسئنئز.

1:20  آمّا اگر منی ردّ ادئب عاصي اولاسينيز، قيلينج سئزي اوداجاق." دوغرودان دا، بو سؤزلر ربّئن آغزيندان چيخيب.

1:21  گؤر ربّه وفالي اولان شهر نجه بئر فاحئشه‌يه دؤنوب! او شهر کي، عدالتله دولو ائدي! بئر زامان اورادا صالحلئک مَنزئل اتمئشدي، لاکئن ائندي قاتئل‌لرله دولودور!

1:22  گوموشونوز چوروفه چِورئلئب، شرابينيزا سو قاتيليب.

1:23  باشچيلارينيز عاصي اولوب اوغرولارلا اَلبئردئر. هر کس روشوَتي سِوئر، بَخشئش دالينجا قاچير. يِتئمئن حاقّيندان دئفاع اتمئرلر، دول آروادين مودافئعه‌سئنه قالخميرلار.

1:24  بونا گؤره ده رب، قوشونلارين پروردئگاري بله اعلان ادئر: ائسرايئلئن قادئر تاريسي بله اعلان ادئر: "دوشمنلرئمدن اؤزومو راحاتلاياجاغام، خصملرئمدن قئصاص آلاجاغام.

1:25  اَلئمي سنئن ضئدّئنه ده اوزاداجاغام، چوروفونو گئل‌آبي ائله آريديب، بوتون ناخالئصلئيئني سندن تمئزلَيه‌جيم.

1:26  او زامان حاکئملرئني اَوّلکي کئمي، مصلحتچئلرئني ده باشلانيشدا اولدوغو کئمي گری قايتاراجاغام. سنه تزه‌دن «صالحلئک شهري، وفالي شهر» ديئله‌جک."

1:27  صحيون عدالتله، تؤوبه ادن ساکئنلري صالحلئکله قورتولاجاق.

1:28  لاکئن عاصئلرله گوناهکارلار بئرلئکده هلاک اولاجاقلار، ربّی ترک ادنلر يوخ اولاجاقلار.

1:29  آرزو اتدئيئنئز پاليد آغاجلاريندان خجالت چکه‌جکسئنئز، سِچدئيئنئز باغلاردان اوتاناجاقسينيز.

1:30  چونکي سئز، يارپاقلاري سولموش چؤل پوسته‌سي آغاجينا، سوسوز باغا دؤنه‌جکسئنئز.

1:31  گوجلو آدام کتان قيرينتيسينا اوخشاياجاق، گؤردويو ائش جرقّه کئمي اولاجاق، بلجه ائکئسي بئرلئکده ياناجاق، اونلاري سؤندورَن ده اولماياجاق.

Chapter 2

2:1  آموص اوغلو اِشَعيانين يهودا و اورشلئم باره‌سئنده گؤردوکلري:

2:2  آخير گونلرده ربّئن اِوي اولان داغ، داغلارين باشچيسي کئمي مؤحکم دوراجاق، تپه‌لردن يوخاري اوجالاجاق. بوتون مئلّتلر اونا ساري گله‌جک.

2:3  چوخ خالقلار گلئب دئيه‌جک: "گلئن، ربّئن داغينا، يعقوبون تاريسينين اِوئنه قالخاق، قوي او بئزه اؤز يوللاريني اؤيرَتسئن، بئز ده اونون طرئقلري ائله گِدَک." چونکي شرئعت صحيوندان، ربّئن سؤزو اورشلئمدن ياييلاجاق.

2:4  مئلّتلر آراسيندا رب حؤکم اده‌جک، چوخ خالقلار حاقّيندا قرار چيخارداجاق. اونلار قيلينجلاري چکوجلارلا دؤيوب اونلاردان کوتان، نئزه‌لرئندن ده شَنه دوزه‌لده‌جکلر. مئلّت مئلّتئن ضئدّئنه قيلينج قالديرماياجاق، آرتيق موحارئبه اتمه‌يي اؤيرَنميه‌جک.

2:5  ای يعقوب نسلي، گلئن، ربّئن نوروندا گَزَک.

2:6  يارب، خالقيني، يعقوب نسلئني آتيبسان، چونکي اونلار شرقدن گلن مؤوهوماتلارا قوشولوبلار، فئلئسط بؤلگه‌سئنده ياشايانلار کئمي فالچيليق ادئرلر، اَجنبي‌لرله اَل‌بئر اولورلار.

2:7  اؤلکه‌لري قيزيل گوموشله دولو، خزئنه‌لرئنئن آخيري يوخدور. اؤلکه‌لري دؤيوش آتلارلا دولودور، دؤيوش عارابالاري ساييسيز-حسابسيزدير.

2:8  اؤلکه‌لري بوتلرله ده دولودور، اَل‌لرئنئن ائشئني، بارماقلارينين دوزلتدئکلرئني، پرستئش ادئرلر.

2:9  بونا گؤره ده هامي يِره سَرئله‌جک، هر کس دئز اوسته دوشدوروله‌جک. يارب، اونلاري باغيشلاما!

2:10  ربّئن دهشتئندن، عظمتئنئن شؤوکتئندن قاياليقلارا گدئن، تورپاق آلتيندا گئزله‌نئن.

2:11  آداملارين تکبّورلو باخيشلاري آلچالديلاجاق، ائنسانلارين تکبّورو قيريلاجاق، او گون آنجاق رب اوجالديلاجاق.

2:12  چونکي قوشونلار ربّئنئن بئر گونو اولاجاق کي، بوتون تکبّورلولري، لووغالاري، مغرورلاري آلچالتسين.

2:13  لوبنانين بوتون اوجا و ووقارلي سئدر آغاجلاريني محو اده‌جک، بوتون باشانين پاليدلاريني يوخ اده‌جک.

2:14  بوتون اوجا داغلاري، اوجا تپه‌لري،

2:15  بوتون اوجا بورجلري، قالا دوآرلاري يِرله يکسان اده‌جک،

2:16  بوتون تَرشئش گَمي‌لرئني، بوتون گؤزل گَمئلري يوخ اده‌جک.

2:17  آداملارين تکبّورو قيريلاجاق، ائنسانلارين تکبّورو آلچالديلاجاق، او گون فقط رب اوجالديلاجاق.

2:18  بوتلر کامئل آرادان گؤتوروله‌جک.

2:19  رب قالخيب يري لرزه‌يه سالاندا، اونون دهشتئندن، عظمتئنئن شؤوکتئندن، ائنسانلار قاياليقداکي ماغارالارا، يِرئن خندق‌لرئنه قاچيب گئره‌جکلر.

2:20  او گون ائنسانلار، پرستئش اوچون دوزلتمئش قيزيل و گوموش بوتلرئني گؤتوروب، کور سئچانلارين، خوفّاشلارين قاباغينا آتاجاقلار کي،

2:21  رب يري سارسيتماغا قالخارکَن اونون دهشتئندن، عظمتئنئن شؤوکتئندن، قاياليقداکي چاتلاقلارا، اوچوروملارداکي ياريقلارا گئرسئنلر.

2:22  نفسي بورنونون دِشئيئنده اولان فاني ائنسانا آرخالانمايين. اونون نه دَيَري وار کي؟

Chapter 3

3:1  باخ، قوشونلارين رب تاريسي اورشلئمدن و يهودادان هر بئر يارديم و کؤمه‌يي کَسه‌جک، يعني بوتون چؤرک و سويو

3:2  ائگئدلرله جنگاورلري، حاکئملرله پيغمبرلري، فالچيلارلا آغساقّاللاري،

3:3  اَلّي‌باشي‌لارلا آدلي-سانلي آداملاري، مصلحتچئلري ائله اوستا صَنَتچئلري، و ماهئر سحربازلاري آرادان گؤتوره‌جک.

3:4  اوشاقلاري اونلارين اوستونه باشچي قوياجاغام، کؤرپه‌لر اونلارا حؤکمرانليق اده‌جکلر.

3:5  خالق سئتم آلتيندا اولاجاق، ائنسان ائنسانا، قونشو قونشوسونا سئتم اده‌جک. جاوان قوجا ائله، عاوام آدام مؤحترم ائنسانلا حياسيز رفتار اده‌جک.

3:6  عايئله‌ده قارداش قارداشا ساريليب دئيه‌جک: "سنئن هچ اولماسا، اَينئنه گِيميه پالتارين وار. باشچيميز اول، قوي بو خاراباليقلار سنئن اَلئنئن آلتيندا اولسون!"

3:7  او گون بو آدام اعتئراض ادئب دئيه‌جک: "من يارالارينيزي ساريماغي باجارمارام، چونکي اِوئمده نه يمک، نه ده پالتار وار، منی خالقين باشچيسي قويمايين."

3:8  اونا گؤره کي، اورشلئم تئتره‌يئب، يهودا ييخيليب، چونکي سؤزلري و عمل‌لري ربّئن ضئدّئنه‌دئر، اِله کي، اونون شؤوکتلي حوضورونون ضئدّئنه عوصيان اتسئنلر.

3:9  اوزلرئنده‌کي ائفاده‌ اونلارين ضئدّئنه شهادت ورئر، سودوم کئمي گوناهلاريني آچيقجا دانيشيرلار، بونو گئزلَتمئرلر. واي اونلارين حالينا! چونکي بو فلاکتي، باشلارينا، اؤزلري گتئردئلر.

3:10  صالح آداملارا ديئن کي، اونلارا ياخشيليق ادئله‌جک، چونکي اونلار ياخشيليقلارينين بهره‌سئني يئيه‌جکلر.

3:11  پئس آدامين واي حالينا! اونا پئسلئک اولوناجاق، اِله‌دئيي عمل‌لري اؤز قاباغينا چيخاجاق.

3:12  ای خالقيم! اونلارا ظولم ادن، اوشاقلاردير، اونلارين اوستونه آروادلار حؤکم سورور! ای خالقيم! سنه يول گؤرسه‌دنلر، سني آزديريرلار، يوللاريني دولاشديريرلار!

3:13  رب محکمه‌سئني قورماق اوچون قالخير، خالقلاري موحاکئمه اتمک اوچون دورور.

3:14  رب خالقينين رهبرلرئني، باشچيلاريني محکمه‌يه گتئرئر: "سئزسئنئز اوزوم باغيني يِيئب اودان، کاسيبلاردان تالان اتدئيئنئز ماللا اِولرئنئزي دولدوران.

3:15  نه حاقلا خالقيمي آياق آلتيندا اَزئب يوخسوللارا عذاب ورئرسئنئز؟" بونو قوشونلارين پروردئگاري رب اعلان ادئر.

3:16  بوندان علاوه رب ديئر: "صَحيون قيزلاري تکبّورلودورلر، بويلانا-بويلانا گَزئرلر، گؤز-قاش اويناديرلار، قدملرئني نازلا آتيرلار، آياقلارينداکي خالخال‌لاري جئنگئلده‌دئب يِرئيئرلر.

3:17  بونا گؤره ده پروردئگار صَحيون قيزلارينين باشلارينا قوتور سالاجاق. رب عاييب يِرلرئني آچيب گؤرسده‌جک.

3:18  او گون پروردئگار توپوقلارا تاخيلان بئلرزئکلرئنئن، گونشچه‌لرئني، آيپارا شکئلي بويونباغي‌لارينين گؤزل‌لئيئني اونلاردان محو اده‌جک؛

3:19  گوشوارالاريني، قولباقلاريني، اؤرپَکلرئني،

3:20  باشليق‌لاريني، توپوقبَندلرئني، قورشاقلاريني، عطئرله دولو موجرولرئني، طئلسئملَنمئش بَزَک اشيالاريني،

3:21  اوزوکلرئني، بورون حالقالاريني،

3:22  بايرام شئنِل‌لرئني، اوست پالتارلاريني، اؤرتوکلرئني، پول چانتالاريني،

3:23  گوزگولرئني، کتان لئباسلاريني، باش سارقي‌لاريني و اؤرپَکلرئني اَللرئندن آلاجاق.

3:24  او واخت گؤزل عطئر ائيسي يرئنه، پئس قوخو، قورشاق عوضئنه ائپ، گؤزل دارانميش ساچ عوضئنه کِچَل باش، نفئس توخونموش پالتار عوضئنه چول گِيئنئله‌‌جک، گؤزل‌لئک عوضئنه داغلاما اولاجاق.

3:25  کئشئلرئنئز قيلينج آغزينا دوشوب ييخيلاجاقلار، ائگئدلرئنئز دؤيوشده محو اولاجاقلار.

3:26  صَحيونون دروازالاري ناله چکئب ياس توتاجاق، بو شهر ترک ادئلمئش، قورو يرده اوتوراجاق.

Chapter 4

4:1  او گون يدّي آرواد بئر کئشئنئن ياخاسيندان توتوب بله دئيه‌جک: "اؤز چؤره‌يئمئزي يِيئب، اؤز پالتاريميزي گِيئنه‌رئک، آنجاق آدين اوستوموزده اولسون، خجالتدن بئزي قورتار."

4:2  او گون ربّئن شاخه‌سي گؤزل و شؤوکتلي اولاجاق، ائسرايئل خالقيندان خئلاص اولوب صاغ قالانلار، تورپاغين وردئيي بهره ائله فخر ادئب شرفلنه‌جکلر.

4:3  صَحيوندا، يعني اورشلئمده صاغ قالانلارا، اورادا قيد اولونوب ياشايانلارا، "موقدّس" ديئله‌جک.

4:4  پروردئگار صَحيون قيزلارينين نجئسلئيئني يويان زامان، عدالت و آلوو روحو ائله اورشلئمي قاندان تمئزلَيه‌جک.

4:5  سونرا رب صَحيون داغينين هر يانيني، اورادا ييغيلانلارين اوستونو، گوندوز بولودلا، گجه ده توستو و پارلاق آلوولا اؤرته‌جک. حقئقتن، اونون عظمتي شهرئن اوستونه اؤرتوک اولاجاق.

4:6  بو، بئر چارداق، گوندوزون ائستئسئنده کؤلگه، طوفان اؤنونده، ياغيش قاباغيندا سيغيناجاق يري اولاجاق.

Chapter 5

5:1  قوي ائندي سِوگئلئمه بئر نغمه اوخويوم، اونون اوزوم باغي باره‌ده محبّت نغمه‌سئني: تورپاغين بار ورن بئر تپه‌سئنده، سِوگئلئمئن بئر اوزوم باغي واري ائدي.

5:2  او، تورپاغي بِل‌له‌يئب داشلاري کنارا آتدي، سِچمه مِينه‌لر اَکدي، اورتادا کشئکچي بورجو تئکدي، اوزوم سيخماق اوچون بئر چوخور قازدي، و باغين ياخشي اوزوم ورمه‌سئني گؤزله‌دي. آمّا باغ، ياوا اوزوم گتئردي.

5:3  "ائندي، ای اورشلئمده ياشايانلار، ای يهودا خالقي، منئمله اوزوم باغيمين آراسيندا حؤکم ادئن!

5:4  باغيم اوچون اتمه‌دئيئم نه قالدي؟ اوزوملويون باريني گؤزلَيَرکَن، نه اوچون باغيم ياوا اوزوم گتئردي؟

5:5  ائندي قوي من سئزه باغيملا نه اده‌جيئمي بئلدئرئم: چَپَرئني سؤکه‌جيم و مِينه‌لرئني حيوانلار يِيئب-قورتاراجاق، دوواريني ييخاجاغام و آياق آلتيندا تاپدالاناجاق.

5:6  اوراني وئرانه‌لئيه چِوئره‌جيم، اورا بودانماياجاق، بِل‌لَنمَيه‌جک. اورادا تئکان و قانقال بئته‌جک، بولودلارا دا امر اده‌جيم کي، اوستونه ياغيش ياغماسين."

5:7  چونکي قوشونلار ربّئنئن اوزوم باغي ائسرايئل نسلي‌دئر، يهودا آداملاري دا اونون سِوئملي مِينه‌لرئدئر! بلجه، او، عدالت گؤزله‌دي، آمّا باخ، قان تؤکمک گؤردو، او، صالحلئک گؤزله‌‌دي، آمّا باخ، پرئشانليق فريادي اشئتدي!

5:8  واي او آداملارين حالينا کي، يِر قالمايانا قدر اِوي اِوه، زَمئني زَمئيه بئرلَشدئرئرلر! اِله کي، سئز بو تورپاغين اورتاسيندا تک ياشاياسينيز!

5:9  قوشونلارين ربّئنئن بله آند ائچدئيئني اشئتمئشم: "حتّا بؤيوک و ياراشيقلي اِولر ده بومبوش قالاجاق، ائچئنده ياشايان اولماياجاق.

5:10  اوزوملويون اون ساحه‌سئندن آنجاق بئر بَت شراب حاصئل اولوناجاق، بئر حومِر توخومدان، بئر اِفا تاخيل عمله گله‌جک."

5:11  واي او آداملارين حالينا کي، سحر اِرکَن قالخيب عرق دالينا دوشورلر، گجه ياريسيناجاق شراب ائچئب کِفله‌نئرلر!

5:12  اونلارين ضئيافتلرئنده طنبور، چنگ، دف و ني چالينير، شراب ائچئلئر، لاکئن اونلار ربّئن گؤردويو ائشلره دئقّت اتمئرلر، عمل‌لرئنه باخميرلار!

5:13  بونا گؤره خالقيم معرئفتسئزلئيئندن اسئرلئيه گِدئر، اونون آدلي-سانلي آداملاري آجيندان اؤلور، عاوام دا سوسوزلوقدان يانير!

5:14  بونا گؤره اؤلولر دئياري بوغازيني گِنئشله‌دئب، آغزيني حددن آرتيق آچيب. اورشلئمئن آدلي-سانلي‌لاري، عاواملاري، سَس-کويله کِف ادن ائنسانلاري بو دئيارا اِنه‌جک.

5:15  عاوام آدام آلچالديلاجاق، آدلي-سانلي آدام دئزه دوشدوروله‌جک، تکبّورلو باخيشلار دا آلچالديلاجاق.

5:16  آمّا قوشونلارين ربّی عدالتده اوجالديلاجاق، موقدّس تاري اؤزونو صالحلئکده موقدّس گؤرسده‌جک.

5:17  او واخت قوزولار اؤز اوتلاقلارينداکي کئمي اوتلاياجاق، وارلي‌لارين وئرانه قالان اِولرئني، ياد اِللی‌لر آلاجاق.

5:18  واي او آداملارين حالينا کي، خاطاني يالانلا هؤرولموش ائپلرله چکئرلر، گوناهي دا عارابا ائپلري ائله!

5:19  اونلار ديئرلر: "قوي تاري تَلَس‌سئن، اؤز عملئني تِز حياتا کچئرتسئن، بئز ده گؤرَک. قوي ائسرايئلئن موقدّسئنئن نئيّتي عمله گتئرئلسئن کي، بونو بئلَک!"

5:20  واي او آداملارين حالينا کي، پئسه ياخشي، ياخشييا پئس ديئرلر، قارانليغي ائشيق، ائشيغي دا قارانليق ساييرلار، آجييا شئرئن، شئرئنه ده آجي ديئرلر!

5:21  واي او آداملارين حالينا کي، اؤزلرئني حئکمتلي سانيرلار، اؤزلرئني زئرک ساييرلار!

5:22  واي او آداملارين حالينا کي، شراب ائچمکده قهرمانديرلار، ائچکئلري قاريشديريب ائچمکده قووّتلي‌دئرلر!

5:23  واي او آداملارين حالينا کي، روشوت آليب تقصئرکارا برائت قازانديريرلار، حاقلي‌لارين حاقّيني اَلئندن آليرلار!

5:24  بلجه، نجه آلوو ساماني يِيئب بئتئرَر، نجه کولَش اود ائچئنده بئردن آليشيب يوخ اولار، اونلارين کؤکو ده اِله چورويوب گده‌جک، چئچکلري توز کئمي هاوايا سوورولاجاق؛ چونکي قوشونلار ربّئنئن قانونونو ردّ ادئبلر، ائسرايئلئن موقدّسئنئن سؤزونه حقارتله باخيبلار.

5:25  بونا گؤره ده ربّئن قضبي اؤز خالقينين ضئدّئنه آلوولانيب، اَلئني اونلارين ضئدّئنه اوزاديب و اونلاري ووروب. داغلار تئتره‌‌يئب، مِيئتلري زئبئل کئمي کوچه‌لره سَرئلئب. بوتون بونلار باش وردئيي حالدا، گئنه ده ربّئن قضبي سؤنمه‌يئب، اَلي حله ده جزالانديرماغا قالخيب.

5:26  رب اوزاقدا ياشايان مئلّتلره ده بئر بايراق قوراجاق، فئت سَسي ائله اونلاري يِر اوزونون بوجاقلاريندان سَسلَيه‌جک. باخ، بو مئلّتلر تزلئکله گله‌جکلر.

5:27  آرالاريندا يورولاني، بودره‌يَني اولماياجاق، نه ياتاني اولاجاق، نه ده يوخويا گده‌ني؛ بِلئنده‌کي کمر آچيلماميش قالاجاق، آياق‌قابي باغي قيريلماميش دوراجاق.

5:28  اونلارين اوخلاري ائتي، کامانلاري دا چکئلمئشدئر. آتلارينين ديرناقلاري چاخماق داشينا بَنزَر، دؤيوش عارابالارينين تَکَرلري فيرلانان يِل کئمئدئر.

5:29  اونلارين نعره‌سي دئشي آصلان کئمي‌دئر، جاوان شئر کئمي باغيرير، شئکاريني قاپيب گؤتورَرکَن خورولدايير، کئمسه اوولاريني پنجه‌لرئندن قورتارمير.

5:30  او گون اونلار ائسرايئلئن ضئدّئنه دهنزئن خورولتوسو کئمي گورلاياجاقلار. کئم اؤلکه‌يه باخسا، باخ، ظولمت و پرئشانليق گؤره‌جک. اونلارين بولودلاري ائله حتّا ائشيق اؤرتولوب ظولمت دوشه‌جک.

Chapter 6

6:1  پادشاه عوزئيّا اؤلَن ائل، من پروردئگاري گؤردوم. او، اوجا و عظمتلي تختده اوتورموش و پالتارلارينين اَته‌يي معبدئن دؤشَمه‌سئني اؤرتموشدو.

6:2  اونون باشي اوستونده سِرافلار دايانميشديلار. هر بئرئنئن آلتي قانادي وار ائدي. قانادلارينين ائکئسي ائله اوزلرئني اؤرتوردولر، ائکئسي ائله آياقلاريني اؤرتوردولر، ائکئسي ائله ده اوچوردولار.

6:3  بئري او بئرئني سَسله‌يئب ديئردي: "موقدّسدئر، موقدّسدئر، موقدّسدئر قوشونلار رَبّئ! بوتون ير اوزو اونون عظمتي ائله دولودور."

6:4  سِرافلارين سَسئندن قاپينين چرچئوه‌لري و کاندارلار تئتره‌دي، معبد توستو ائله دولدو.

6:5  او واخت ددئم: "واي منه، هلاک اولدوم! چونکي دوداقلاري نجئس بئر آدامام، هم ده نجئس دوداقلي آداملار آراسيندا ياشاييرام. چونکي گؤزلرئم پادشاهي، قوشونلار ربّئني گؤروب."

6:6  او واخت سِرافلاردان بئري منه طرف اوچدو، اَلئنده کؤز کؤمور وار ائدي کي، ماشا ائله قوربانگاهدان گؤتورموشدو.

6:7  او، کؤزله دوداقلاريما توخونوب ددي: "باخ، بو کؤز دوداقلارينا دَيئب؛ تقصئرئن سئلئنئب، گوناهين کفّاره اولونوب."

6:8  سونرا پروردئگارين سَسئني اشئتدئم: "کئمي گؤنده‌رئم؟ بئزئم اوچون کئم گده‌جک؟" او واخت ددئم: "من حاضيرام. منی گؤندَر."

6:9  او ددي: "گت، بو خالقا بونو چاتدير: «اشئتدئکجه اِشئده‌جکسئنئز، آمّا آنلاماياجاقسينيز، گؤردوکجه گؤره‌جکسئنئز، آمّا قانماياجاقسينيز.

6:10  بو خالقين اوره‌يئني کوتلَشدئر، قولاقلاريني کار ات، گؤزلرئني يوم، مبادا گؤزلري ائله گؤرسونلر، قولاقلاري ائله اشئتسئنلر، اورَکلري ائله آنلاسينلار، و منه ساري دؤنوب شفا تاپسينلار.»

6:11  او واخت ددئم: «نه واختاجاق، ای پروردئگار؟» او جاواب وردی: «او زاماناجاق کي، شهرلر خاراباليقلارا دؤنوب کئمسه‌سئز قاليب، اِولر آدامسيز، بو تورپاق دا بوسبوتون وئرانه‌يه دؤنوب.»

6:12  رب آداملاري چوخ اوزاقلارا کؤچوردوب، اؤلکه‌نئن آراسيندا ترک ادئلمئش يِرلر چوخدور.

6:13  خالقين اوندا بئري قالسا دا، اؤلکه يانيب محو اولاجاق. چؤل پوسته‌سي و پاليد آغاجي کئمي موقدّس نسئل کؤتويوندن چيخاجاق."

Chapter 7

7:1  عوزئيّا اوغلو يوتام اوغلو يهودا پادشاهي آخازين حؤکم سوردويو دؤورده، اَرام پادشاهي رِصئنله ائسرايئل پادشاهي رِمَليا اوغلو پِقَخ اورشلئمه هوجوم اتدئلر، آمّا اوراني آلا بئلمه‌دئلر.

7:2  داوود نسلئنه خبر ورئلدي کي، "اَراملي‌لار اِفرايئمده قوشون دوزه‌لدئب اوردو قوروبلار." پادشاهين و خالقين اوره‌يي، مِشه آغاجلاري کولَکدن تئتره‌يَن کئمي تئتره‌دي.

7:3  رب اِشَعيايا ددي: "ائندي آخازي پئشواز اتمک اوچون اوغلون شِعار-‌ياشوبلا بئرلئکده يوخاري حوووضون سو يولونون آخيرينا، پالتار آغاردان زَمئسئنه گِدن يولا چيخ."

7:4  اونا بله دِه: "دئقّتلي و ساکئت اول. قورخما! قوي اوره‌يئن بو ائکي توستوله‌نَن، ياريسي يانميش اودون پارچاسيندان يعني رِصئن، اَرام و رِمَليا اوغلونون آلوولانان قضبئندن قورخماسين!

7:5  چونکي اَرام، اِفرايئم و رِمَليا اوغلو سئزئن ضئدّئنئزه شر قوراراق بله ديئر:

7:6  «گلئن، يهودانين ضئدّئنه چيخاق و خالقي قورخودوب اؤلکه‌ني اَله کچئردک و طَبي‌اِل اوغلونو اورايا پادشاه قوياق.»"

7:7  بونا گؤره پروردئگار رب بله ديئر: "بو ائش اولماياجاق، باش توتماياجاق.

7:8  چونکي اَرامين پايتختي دَمَشقدئر، دَمَشقئن باشچيسي دا رِصئندئر. اِفرايئم آلتميش بش ائلدن سونرا دارماداغين ادئلئب، مئلّت اولاراق قالماياجاق.

7:9  اِفرايئمئن پايتختي سامئره‌ده‌دئر، سامئره‌نئن باشچيسي دا رِمَليانين اوغلودور. اگر ائماندا مؤحکم دورماياسينيز، داوام گتئره بئلمزسئنئز."

7:10  رب گئنه آخازلا دانيشيب اونا ددي:

7:11  "تارين ربدن بئر علامت ائسته؛ قوي اؤلولر دئياري قدر درئن يا دا گؤيلر قدر اوجا اولسون."

7:12  لاکئن آخاز جاواب وردی: "ائستمه‌جيم، ربّی ده ائمتاحان اتميه‌جيم."

7:13  بونون اوستوندن اِشَعيا بله ددي: "اِشئدئن، ای داوود نسلي! ائنسانلاري بِزدئرمه‌يئنئز بس مگر ديئل کي، منئم تاريمي دا بِزدئرئرسئنئز؟

7:14  بونا گؤره ده پروردئگار اؤزو سئزه بئر علامت وره‌جک: باخ، باکئره قيز بويلو اولوب اوغلان دوغاجاق، آديني عئمانوعِل قوياجاق.

7:15  بو اوشاق پئسي ياخشيدان آييران ياشا چاتديقدا، کره و بال يئيه‌جک.

7:16  آمّا بو اوشاق ياخشيني پئسدن آييران ياشا چاتمادان، سني دهشته سالان او ائکي پادشاهين تورپاقلاري بوش قالاجاق.

7:17  رب سنه، خالقينا، و آتا نسلئنه اِله گونلر گتئره‌جک کي، اِفرايئمئن يهودادان آيريلديغي بو گونه قدر گؤرونمه‌يئب. آشور پادشاهيني اوستونوزه گتئره‌جک.

7:18  او واخت گلنده رب فئت چالاجاق و مئصئر چايلارينين اوزاق يِرلرئنده ياشايان مئلچه‌يي، آشور تورپاقلاريندا ياشايان آريني سَسلَيه‌جک.

7:19  اونلار آخين-آخين گلئب درئن وادئلرده، قايا ياريقلاريندا، بوتون تئکانلي کوللوقلاردا، اوتلاقلاردا ساکئن اولاجاقلار.

7:20  او گون پروردئگار فَراتين او تاييندان اوجرَتله توتدوغو اولگوجله، يعني آشور پادشاهي ائله، ساچلارينيزي، باجاقلارينيزين توکلرئني و ساقّاللارينيزي قيرخاجاق.

7:21  او گون بئر بوزوولا بئر جوت قويون بَسله‌يَن

7:22  آلديغي بول سود نتئجه‌سئنده کره ياغي يئيه‌جک. اؤلکه‌ده قالان هر کس کره ياغي ائله بال يئيه‌جک.

7:23  او گون مئن گوموش دَيَرئنده مئن تَنَک اولان باغ، تئکانلي، قانقاللي چؤله دؤنه‌جک.

7:24  آداملار اورالاردان اوخلارلا، کامانلارلا کچه‌جکلر، چونکي اؤلکه‌نئن هر ياني تئکان و قانقاللا اؤرتولَنه‌جک.

7:25  او تپه‌لره کي، بئر واخت شوخوملانيب اَکئلَردي، هچ کس تئکان و قانقال قورخوسوندان گده بئلميه‌جک؛ اؤکوزلرئن گَزدئيي يِرلره، قويونلارين تاپدالاديغي يِرلره چِورئله‌جک."

Chapter 8

8:1  او واخت رب منه بله ددي: "بؤيوک بئر لؤوحه گؤتور و اوستونده آيدين حرفلرله ياز: مَهِر شَلال خاشبَز.

8:2  کاهئن اورئيا ائله يِبِرِکيا اوغلو زَکَرياني اؤزومه اِعتئبارلي شاهئد سِچه‌جيم."

8:3  سونرا من نَبئيه ائله ياخينليق اتدئم و او بويلو اولوب بئر اوغلان دوغدو. رب منه ددي: "اونون آديني مَهِر شَلال خاشبَز قوي.

8:4  چونکي کؤرپه «آتام، آنام» دِمه‌يي اؤيرَنمه‌دن، دَمَشقئن ثروتي و سامئره‌نئن قنئمتي آشور پادشاهينا آپاريلاجاق."

8:5  رب منئمله گئنه دا‌نيشيب بله ددی:

8:6  "بو خالق ساکئت آخان شئلواَخ سولاريني ردّ ادئب، رِصئنله رِمَليانين اوغلونا مِيل سالديقلارينا گؤره،

8:7  باخ، پروردئگار، فَراتين جوشان قودرتلي سولاريني، يعني آشور پادشاهي و اونون قووّتئني بو خالقين اوستونه گتئره‌جک. بو سولار اؤز ياتاقلاريندان يوخاري قالخاراق آشيب داشاجاق.

8:8  بو سولار يهوداني بورويوب باساجاق، اؤلکه‌نئن بوغازينا قدر چاتاجاق. قانادلارينين آچيليشي سنئن اؤلکه‌ني باشدان-باشا اؤرته‌جک، ای عئمانوعِل!"

8:9  قيريلين، ای خالقلار، دارماداغين اولون! ای يِر اوزونون بوتون اوزاق اؤلکه‌لري، اِشئدئن! دؤيوشه حاضيرلاشين و دارماداغين اولون! بلی، دؤيوشه حاضيرلاشين و دارماداغين اولون!

8:10  بئرلئکده مصلحتله‌شئن، لاکئن بوشا چيخاجاق؛ ائسته‌دئيئنئز قدر دانيشين، آمّا هچ بئر سؤز دوغرو اولماياجاق، چونکي تاري بئزئمله‌دئر.

8:11  رب گوجلو بئر قووّتله منئمله دانيشيب امر اتدي کي، بو خالقين توتدوغو يوللا گتمه‌يئم. و ددی:

8:12  "دِمَيه‌جکسئنئز: بو دسئسه‌دئر! بوتون او شيلر حاقّيندا کي، بو خالق اونو دسئسه چاغيرير. اونلارين قورخدوقلاريندان قورخمايين، لرزه‌يه گلمه‌يئن.

8:13  قوشونلار ربّئني موقدّس سايمالي‌سينيز، سئزئن قورخونوز او اولاجاق، سئزئن لرزه‌‌نئز او اولاجاق!

8:14  او، موقدّس مکان اولاجاق، آمّا ائسرايئلئن ائکي پادشاهليغينا ييخان داش و بودره‌مه قاياسي، اورشلئم ساکئنلرئنه تله و تور اولاجاق.

8:15  بئر چوخلاري بودره‌يه‌جکلر، ييخيليب قيريلاجاقلار، تله‌يه دوشوب اسئر آپاريلاجاقلار."

8:16  شهادتي ساخلا، تعلئمي شاگئردلرئم آراسيندا مؤهورله!

8:17  يعقوب نسلئندن اوزونو گئزله‌دن ربّی گؤزلَيه‌جيم؛ اونا اومئدله باخاجاغام.

8:18  باخ، من و ربّئن منه وردئيي اؤولادلار، ائسرايئلده قوشونلار ربّئنئن نئشانه‌لر و عجايئبلرئيئک، او رب کي، صحيون داغيندا ساکئندئر.

8:19  سئزه بعضی آداملار دئيَنده کي، «پيچيلداييب ميرتيلدايان جئندارلارلا، روح‌چاغيرانلارلا مصلحتله‌شئن»، اونلارا بله جاواب ورئن: «مگر خالق اؤز تاريسيندان مصلحت آلمامالي‌دير؟ دئرئلر باره‌سئنده مگر اؤلولردن مصلحت آلارلار؟

8:20  تارينين تعلئمئنه و شهادتئنه دؤنمَک گرک! اگر اونلار تارينين کلامي موطابئقئنه دانيشماسالار، اونلار اوچون نور شفقي ساچماياجاق.

8:21  اونلار چاره‌سئز و آج قاليب، اؤلکه‌ني دولانيب گَزه‌جکلر. آج قالاندا قضبلَنه‌جکلر، يوخارييا باخارکن پادشاهلاريني و اؤزلرئنئن تاريسيني لعنتلَيه‌جکلر.

8:22  سونرا يِره نظر سالاجاقلار، و باخ، سيخينتيدان، قارانليقدان، و قورخونج پرئشانليقدان باشقا هچ بئر شي گؤرميه‌جکلر. قالين ظولمته آتيلاجاقلار."

Chapter 9

9:1  لاکئن سيخينتي چکمئش خالق آرتيق ظولمتده قالماياجاق؛ تاري کِچمئشده زِبولون و نَفتالي بؤلگه‌لرئني ذلئل اتمئشدي، لاکئن گله‌جکده دهنز کناري يولوندا، اوردون چايينين او بئري تاييندا، و موختلئف مئلّتلر ياشايان جَلئله شرف وره‌جک.

9:2  ظولمتده ياشايان خالق بؤيوک بئر ائشيق گؤره‌جک. اؤلوم کؤلگه‌سي دئياريندا ساکئن اولانلارين اوستونه نور ساچاجاق.

9:3  يارب، مئلّتي چوخالديب سِوئنجلرئني آرتيراجاقسان، اَکئب-بئچَنلرئن فَرَحلَندئيي کئمي، قنئمت بؤلَنلرئن سِوئندئيي کئمي، اونلار دا سنئن حوضوروندا سِوئنه‌جکلر.

9:4  چونکي اونلارا يوک اولان يوغو، چئيئنلرئني دؤيَن دَيَنه‌يئني، اونلارا ظولم ادنلرئن دَيَنه‌يئني سينديريبسان؛ مئديانلي‌لارين باشلارينا گتئردئيئن گون کئمي.

9:5  چکمه‌لي جنگاورئن دؤيوشده گِيدئيي چکمه، قانا بولانميش پالتار يانديريلماق اوچون اولاجاق، اودا يِم اولاجاق.

9:6  چونکي بئزئم اوچون بئر کؤرپه دوغولاجاق، بئزه بئر اوغول ورئله‌جک، حاکئمئيّت اونون چئيئنلري اوستونده اولاجاق، اونون آدي اَعلا مصلحتچي، قودرتلي تاري، ابدی آتا، صولح شاهزاده‌سي چاغيريلاجاق.

9:7  حاکئمئيّتئنئن و اَمئن-آمانليغينين آرتماسينين آخيري اولماياجاق، او، داوودون تختي و سلطنتي اوستونده حؤکم سوره‌جک، او، حاکئمئيّتئني عدالتله و صالحلئکله ائندئدن ابده کئمي قوراجاق. قوشونلار ربّئن قيرتي بونو اده‌جک.

9:8  پروردئگار، يعقوبون ضئدّئنه بئر سؤز گؤنده‌رئر، و او ائسرايئلئن اوستونه دوشور.

9:9  بوتون خالق بونو بئلئر، يعني اِفرايئمئن و سامئره‌نئن ساکئنلري. بو مغرور و تکبّورلو خالق بله ديئر:

9:10  "کَرپئج اِولرئمئز ييخيليب، آمّا يونما داشدان اِولر تئکه‌رئک. وحشي انجئر آغاجلاري کَسئلئب، آمّا بئز اونلارين عوضئنه سئدر آغاجلاري اَکه‌رئک."

9:11  بونا گؤره رب، رِصئنئن خصملرئني اونلارين ضئدّئنه قالديرير، دوشمنلرئني دئرچَلدئر،

9:12  اَراملي‌لار شرقدن، فئلئسطلی‌لر قربدن؛ اونلار آغيزلاريني آچيب ائسرايئلي اودورلار. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.

9:13  آمّا خالق اونو جزالانديران ربّه طرف دؤنمور، قوشونلار ربّئني آختارمير.

9:14  بونا گؤره رب ائسرايئلدن باشي و قويروغو، هم خورما آغاجينين بوداغيني، هم ده قارغيني بئر گونده کَسئب آتير.

9:15  باش، آغساقّال و حؤرمتلي بئر کئشئدئر، قويروق دا يالان تعلئم ورن پيغمبردئر.

9:16  چونکي بو خالقا يول گؤرسدنلر اونلاري آزديريرلار، اونلارين يولو ائله گِدنلر قيريليرلار.

9:17  بونا گؤره ده پروردئگار اونلارين جاوانلارينا گؤره سِوئنمَيه‌جک، يِتئملرئن و دول آروادلارين حالينا يانماياجاق. چونکي هامي نجئسدئر، شر ائشلر گؤرور، هامينين آغزيندان آخماق سؤزلر چيخير. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.

9:18  چونکي پئسلئک اود کئمي آلوو چکئر، تئکانلا قانقالي يانديريب کول ادئر، مِشه‌ده‌کي کوللوقلاري دا اودا چکئر، توستو سوتونوندا گؤيه قالخيرلار.

9:19  قوشونلار ربّئن قضبي اؤلکه‌ني اود کئمي يانديرير، خالق آلوو اوچون يِمدئر، قارداش قارداشا رحم اتمئر.

9:20  صاغدا اولانلاري قاپيب يِيئرلر، آمّا حله ده آجديرلار، سولدا اولانلاري يِيئرلر، لاکئن دويمورلار؛ هر کس اؤز قولونون اَتئني يِيئر.

9:21  مِنَسّه اِفرايئمي اودور، اِفرايئم مِنَسّه‌ني. سونرا بئرلئکده يهودانين ضئدّئنه قالخيرلار. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.

Chapter 10

10:1  واي شر قايدالار قورانلارين حالينا، دايئمن عدالتسئز قانون قويانلارين،

10:2  يوخسوللاردان عدالتي اسئرگه‌‌‌يَنلرئن، خالقيمين کاسيبلارينين حاقّيني اَل‌لرئندن آلانلارين، دول آروادلاري سويانلارين، يِتئملرئن ماليني تالان ادنلرئن.

10:3  جزا گونو اوزاقلاردان باشينيزا بلا گلنده نه اده‌جکسئنئز؟ کؤمک اوچون کئمئن يانينا قاچاجاقسينيز؟ مال-دؤولتئنئزي هارادا ساخلاياجاقسينيز؟

10:4  اسئرلر آراسيندا اَيئلمکدن و يا اؤلدورولَنلر آراسيندا ييخيلماقدان آيري بئر چاره قالمايير. بوتون بونلار باش ورن حالدا، گئنه ده ربّئن قضبي سؤنمور، اَلي حله ده جزالانديرماغا قالخيب.

10:5  "واي، آشورون حالينا، او منئم قضب عصام، اونلارين اَلئنده‌کي دَيَنَک ده منئم قِيضئمدئر!

10:6  آشورو نجئس مئلّتئن اوستونه گؤندره‌جيم؛ قضبلَندئيئم خالقين اوستونه هوجوم اتمه‌يه، قارت اتمه‌يه، تالان مالي گؤتورميه گؤنده‌ره‌جيم. اونلاري کوچه‌لرده‌کي پالچيق کئمي تاپدالاماغا امر وره‌جيم.

10:7  آمّا آشور پادشاهي بوندان دا پئسئني دوشونور، محو ادئب بئر-بئر چوخ مئلّتئن کؤکونو کَسمه‌يي فئکئرله‌شئر.

10:8  او ديئر: «مگر سرکرده‌لرئمئن هاميسي پادشاهلار ديئل؟

10:9  مگر کَلنو، کَرکِمئش کئمي ديئل؟ خَمات، اَرپَد کئمي، سامئره ده دَمَشق کئمي؟

10:10  بوتپرست مملَکتلري نجه اَله کچئردئم، او مملکتلري کي، اورشلئمله سامئره‌دن داها چوخ اويما بوتلري وارلاري ائدي.

10:11  سامئره‌يه و اونون بوتلرئنه نه اتدئم، مگر اورشلئمه و اونون بوتلرئنه ده اِله اتمه‌رم؟»"

10:12  پروردئگار صحيون داغيندا و اورشلئمده ائشئني بئتئرندن سونرا بله دئيه‌جک: "آشور پادشاهيني، کئبئرلي اوره‌يئنه گؤره، تکبّورلو باخيشلارينا گؤره جزالانديرجاغام.

10:13  چونکي ديئب: «بونو من اَلئمئن گوجو ائله، حئکمتئمئن قووّتي ائله اتدئم. چونکي عاغيليم وار، خالقلارين سرحدلرئني يوخ اتدئم، خزئنه‌لرئني ده تالان اتدئم، گوجلو بئر جنگاور کئمي اونلارين ساکئنلرئني يِره ييخديم.

10:14  قوش يوواسينا چاتان کئمي، اَلئم خالقلارين وار-دؤولتئنه چاتدي. يئيه‌سئز يومورتالاري ييغان بئر شخص کئمي، بوتون دونياني ضبط اتدئم. قاناد چيرپان، آغزيني آچيب سَسئني چيخاردان بِله، اولمادي.»"

10:15  بالتا مگر اونو ائشلَده‌نئن قاباغيندا فخر اِدَر؟ اَره مگر اونو قالديرانين قاباغيندا کئبئرله‌نَر؟ سانکي دَيَنَک اونو گؤتوره‌ني ائشله‌دئر، اِله بئل آغاجدان دوزه‌لمئش دَيَنَک جانليني حرکت اتدئرئر.

10:16  بونا گؤره قوشونلار پروردئگاري رَب، آشورون گوجلو عسگرلرئنه اؤلومجول مرض گؤندره‌جک، اونون جلالي آلتيندا بئر اود توتوشوب آلوولانار.

10:17  ائسرايئلئن نورو اود، ائسرايئلئن موقدّسي آلوو اولاجاق. آشورون تئکانلار و قانقاللاريني بئر گونده يانديريب يوخ اده‌جک.

10:18  گؤزل مِشه‌لرئني، بار ورن باغلاريني، کامئل وئران اده‌جک، آغير ناخوشلوغا توتولان ائنسانين بوتون جاني کئمي اَرئيئب گده‌جک.

10:19  مِشه‌لرئنده قالان آغاجلارين سايي او قدر آزا اولاجاق کي، بئر اوشاق اونو سايا بئلر.

10:20  او گون ائسرايئلئن صاغ قالانلاري، يعقوبون نسلئندن خئلاص اولوب صاغ قالانلار، آرتيق اونلاري هلاک ادنلره بِل باغلاماياجاقلار. لاکئن، حقئقتن، ربّه، ائسرايئلئن موقدّسئنه بِل باغلاياجاقلار.

10:21  صاغ قالانلار يعقوب نسلئندن صاغ قالانلار قودرتلي تارييا طرف دونه‌جکلر.

10:22  ای ائسرايئل، خالقين دهنز قومو قدر چوخ اولسا بِله، اونلارين آراسيندان آنجاق بئر آزي دؤنه‌جک. توکَنمَز عدالتله داغيديلما حؤکمو ورئلئب.

10:23  قوشونلار پروردئگاري رب، داغيديلما حؤکمونو بوتون دونيادا يرئنه يتئره‌جک.

10:24  بونا گؤره ده قوشونلار پروردئگاري رب بله ديئر: "ای صحيوندا ياشايان خالقيم، مئصئرلی‌لرئن سنه اتدئيي کئمي، سني دَيَنَکله ووران، اوستونه دَيَنَک قالديران آشورلولاردان قورخما.

10:25  چونکي بو ياخيندا قضبئم سؤنه‌جک، حئدّتئم آشورلولارين محوئنه سبب اولاجاق."

10:26  قوشونلار ربّي، مئديانلي‌لاري عورِب قاياسيندا ووردوغو کئمي، اونلاري دا شاللاقلا ووراجاق. دَيَنه‌يي مئصئرلی‌لرئن ضئدّئنه نه جور دهنزئن اوستونه اوزاتدي، ائندي ده اِله اده‌جک.

10:27  او گون آشورون يوکو چئينئزدن، يوغو بوينونوزدان گؤتوروله‌جک. ياغدان اؤتری يوغ قيريلاجاق.

10:28  اونلار عَيّت شهرئنئن ضئدّئنه گلئبلر، مئگرونو کِچئبلر؛ مئکماسدا يوکلرئني بوشالديبلار.

10:29  اونلار کِچئدي کِچئبلر، و ديئرلر: «گِبَع بئزئم گجه قالاجاغيميز يِر اولاجاق، راما شهري دهشته دوشوب، شاعولون شهري گئبعه‌ده ياشايانلار قاچيبلار.

10:30  ای گلّئم قيزي، سَسئني اوجالت! ای لَيشا، قولاق آس، ای بِچارا عَناتوت!

10:31  مَدمِنا ساکئنلري قاچيب، گِبئم ساکئنلري سيغيناجاق يِر آختارير.

10:32  آمّا بو گون ائشغالچيلار نوبدا قالاجاقلار، صحيون شهرئنئن قورولدوغو داغا، اورشلئم تپه‌سئنه يومروق گؤرسه‌دئر.

10:33  باخ، قوشونلار پروردئگاري رب، دوشمنی وار گوجو ائله بوداقلار کئمي کَسه‌جک، لاپ اوجا آغاجلاري يِره سَره‌جک، کئبئرلی‌لري آلچالداجاق.

10:34  مِشه‌ده‌کي کوللوقلاري بالتا ائله کَسئب يِره سَره‌جک. لوبنان عظمتلي اولانين اَلي ائله ييخيلاجاق.

Chapter 11

11:1  يَسّه‌نئن کؤتويوندن تزه بئر شاخه چيخاجاق، کؤکوندن چيخان بئر بوداق بار وره‌جک.

11:2  ربّئن روحو، حئکمت و آنلاييش روحو، نصئحت و قودرت روحو، مَعرئفَت و ربّئن قورخوسو روحو اونون اوستونده اولاجاق.

11:3  او، ربّئن قورخوسوندا شادليق تاپاجاق. گؤزلرئنئن گؤردويو ائله حؤکم اتميه‌جک، قولاغي ائله اشئتدئيئنه گؤره قرار چيخارتماياجاق.

11:4  لاکئن او، يوخسوللارا عدالتله حؤکم اده‌جک، يِر اوزونده‌کي مظلوملارين ائشئنه ائنصافلا قرار چيخارداجاق. دونياني آغزينين دَيَنه‌يي ائله ووراجاق. پئس آداملاري آغزينين نفسي ائله اؤلدوره‌جک.

11:5  صالحلئک اونون بِلئنه قورشاق اولاجاق، صداقتي کمر کئمي تاخاجاق.

11:6  او گون قوردلا قوزو بئر يرده ياشاياجاق، پلنگله چَپئش بئرلئکده ياتاجاق، بوزوو، جاوان آصلان و بَسلَنمئش مال-حيوان يان-يانا دوراجاق، اونلاري کئچئک بئر اوشاق گوده‌جک.

11:7  ائنَکله آيي بئر يرده اوتلاياجاق، اونلارين بالالاري بئر يرده ياتاجاق، شئر ده اؤکوز کئمي سامان يئيه‌جک.

11:8  سود اَمن کؤرپه صاغير ائلانين يوواسي اوستونده اويناياجاق، سوددن کَسئلمئش اوشاق، اَلئني افعئنئن يوواسينا سالاجاق.

11:9  موقدّس داغيمين هچ بئر يِرئنده هچ کئمه ضرر دَيمَيه‌جک، هچ بئر کس او بئرئسئني محو اتميه‌جک، حقئقتن، سولار دهنزي نجه دولدورور، دونيا دا ربّئن مَعرئفتي ائله اِله دولاجاق.

11:10  او گون يَسّه‌نئن کؤکو خالقلارا بايراق اولاجاق، مئلّتلر اونا طرف يؤنَله‌جک، ساکئن اولدوغو يِر شؤوکتله دولاجاق.

11:11  او گون پروردئگار آشوردان، مئصئردن، پَتروسدان، کوشدان، عِيلامدان، شئنعاردان، خَماتدان و دهنزئن ساحئل‌لرئندن خالقينين صاغ قالانلاريني قورتارماق اوچون ائکئنجي دفه اَلئني اوزاداجاق.

11:12  مئلّتلر اوچون بايراق قالديراجاق، اسئر دوشموش ائسرايئل اؤولادلاريني ييغاجاق، داغيلميش يهودالي‌لاري دونيانين دؤرد بوجاغيندان بئر يِره گتئره‌جک.

11:13  اِفرايئمئن حسودلوغو يوخ اولاجاق، يهوداني سيخيشديرانلار محو اولاجاقلار. اِفرايئم يهودايا پاخيلّيق اتميه‌جک، يهودا اِفرايئمي سيخيشديرماياجاق.

11:14  اونلارين ائکئسي قربده فئلئسطلی‌لرئن اوستونه هوجوم اده‌جکلر، بئرلئکده شرقده ياشايانلارين وار-دؤولتئني قارت اده‌جکلر، اِدوم و موآب تورپاقلاريني ضبط اده‌جکلر، عَمّونلولار اونلارا تابع اولاجاقلار.

11:15  رب مئصئرده‌کي دهنزئن خلئجئني تامامن قوروداجاق. فَرات چايينين اوستونده اَلئني يِل‌له‌دئب يانريريب-ياخان يِل‌لر گتئره‌جک، او، چايي يدّي آرخا بؤله‌جک، آداملار اورادان چاريقلارلا کِچه بئله‌جکلر.

11:16  ربّئن آشوردا صاغ قالان خالقي اوچون بؤيوک بئر چيخيش يولو اولاجاق؛ نجه کي، ائسرايئل اؤولادلاري اوچون مئصئردن چيخان گون اولموشدو.

Chapter 12

12:1  او گون سن، بله دئيه‌جکسن: "يارب، سنه شوکور اده‌جيم! گرچي منه قضبله‌نئردئن، لاکئن قضبئن سؤندو، منه تسلّی ورئرسن.

12:2  باخ، تاري خئلاصيمدير، اونا اعتئماد اده‌جيم و قورخماياجاغام، چونکي رب تاري قووّتئم و نَغمَمدئر، او منئم خئلاصيم اولوب!"

12:3  سِوئنجله خئلاص چشمه‌لرئندن سو چکه‌جکسئنئز.

12:4  او گون بله دئيه‌جکسئنئز، «ربّه شوکور ادئن، اونون آديني چاغيرين، خالقلار آراسيندا اونون ائشلرئني بيان ادئن، اونون آدينين اوجاليغيني اونلارا خاطيرلادين.

12:5  ربّی ترنّومله پرستئش ادئن، چونکي او، مؤحتشم ائشلر گؤروب، قوي بوتون دونيا بونو بئلسئن!

12:6  ای صحيون ساکئنلري، سَسئنئزي اوجالدين، سِوئنجله چيغيرين، چونکي آرانيزداکي ائسرايئلئن موقدّسي بؤيوکدور.»

Chapter 13

13:1  آموص اوغلو اِشَعيايا بابئل حاقّيندا رؤيا ائله نازئل اولان ائخطار:

13:2  لوت داغين اوستونه بايراق سانجين! اونلاري بَرکدن سَسله‌يئن، اَل يِل‌له‌دئن کي، اونلار اصئلزاده‌لره آيريلان قاپيلاردان ائچه‌ري گئرسئنلر.

13:3  من موقدّسلرئمه امر ورمئشم، قضبئمي دوشمنلره تؤکمک اوچون جسور جنگاورلري، اوجاليغيملا فخر ادن ائگئدلري ده سَسله‌‌مئشم.

13:4  داغلارداکي ائزدئحامين گورولتوسونو اِشئدئن، بو، بؤيوک بئر خالقين سَسئنه بَنزَر. بئر يِره توپلانان سلطنتلرئن، مئلّتلرئن نئداسيني اِشئدئن! قوشونلار رَبّي، قوشونو دؤيوشه چاغيرير!

13:5  اونلار اوزاق اؤلکه‌دن، اوفوقلرئن او بئري طرفئندن گلئرلر. اؤلکه‌ني يِرله کامئل يِکسان اتمک اوچون رب و اونون قضبئنئن سئلاحي گلئر.

13:6  شئون ادئن، چونکي ربّئن گونو ياخيندير. او گون، قادئري-موطلق طرفئندن گلن قيرغين کئمي گلئر!

13:7  بونا گؤره هامينين اَللري يانينا دوشه‌جک، هر کس قورخوب اوره‌يئني يئيه‌جک.

13:8  اونلاري دهشت بورويه‌جک، درد و ائضطئراب اونلاري اؤزونده بوغاجاق، دوغان آرواد کئمي آغري چکه‌جکلر، تعجّوبله بئربئرلرئنه باخاجاقلار، اوزلري قيزاراجاق.

13:9  باخ، ربّئن آمانسيز، قضبلي و قِيضله دولو گونو ياخينلاشير کي، يري صحرايا دؤنده‌رسئن؛ او، اوراداکي گوناهکارلاري محو اده‌جک.

13:10  گؤيده‌کي اولدوزلار و بورجلر ائشيق ورميه‌جک، دوغان گونش قارالاجاق، آي نورونو ساچماياجاقدير.

13:11  رب ديئر: "بلجه دونياني شرارتئنه گؤره، پئس آداملاري تقصئرلرئنه گؤره جزالانديرجاغام. تکبّورلولرئن تکبّورونو ده قيراجاغام، ظاليملارين غورورونو آلچالداجاغام.

13:12  ائنساني خالئص قيزيلدان دا آز اده‌جيم، بشر اوفئر قيزيليندان داها دا نادئر حالدا تاپيلاجاق.

13:13  بونا گؤره ده من، قوشونلار ربّي، حئدّتلي قضبئمئن گونونده، قِيضئمله گؤيلري تئتره‌ده‌جيم، ير اوزو لرزه‌يه گله‌جک.

13:14  هر کس قووولان جيرانا، چوبانسيز قويونلارا دؤنه‌جک، اؤز خالقينين يانينا قاييداجاق، اؤز وطنئنه قاچاجاق.

13:15  ياخالانان هر کسئن بدني دلئک-دشئک اولاجاق، توتولان هر کس قيلينج آغزينا ورئله‌جک.

13:16  کؤرپه‌لري ده اونلارين گؤزلري قاباغيندا پارچالاناجاق، اِولري تالان اولوناجاق، آروادلارينين ناموسونا توخونولاجاق.

13:17  باخ، گوموشه قئيمت ورمه‌يَن، قيزيلي سِومه‌يَن مادلي‌لاري اونلارين ضئدّئنه قالديراجاغام.

13:18  اوخ جاوانلاري پارچالاياجاق، حتّا کؤرپه‌لره ده رحم اتميه‌جکلر، اوشاقلارا دا شفقت گؤرسدميه‌جکلر.

13:19  پادشاهليقلارين لاپ گؤزَلي اولان، کَلدانئلرئن جلالي اولان بابئل، تارينين سودوملا گوموراني داغيتديغي زامانا بَنزه‌يه‌جک.

13:20  اورادا بئر داها هچ کئم ياشاماياجاق، نسئلدن-نسله کئمسه ساکئن اولماياجاق. عَرَبلر چاديرلاريني اورادا قورماياجاقلار، چوبانلار دا سورولرئني اورادا ياتيرتماياجاقلار.

13:21  اورا وحشي حيوانلارين ياشاديغي يِر اولاجاق، اِولرئنده چاقّاللار قايناشاجاق، اورادا بايقوشلار مسکن سالاجاق، وحشي کِچئلر اويناشاجاق.

13:22  قالالاريندا جاناوارلار چيغيراجاق، گؤزَل سارايلاريندا چاقّاللار اولوياجاق. بابئلئن آخيري ياخينلاشاجاق، اونون گونلري تِز گلئب چاتاجاق."

Chapter 14

14:1  رب يعقوب نسلئنه رحم اده‌جک، ائسرايئل خالقيني گئنه سِچه‌جک، اونلاري اؤز تورپاقلاريندا ساکئن اده‌جک، ياداِلّي‌لر ده يعقوب نسلئنه قوشولاجاقلار و اونلارلا بئرلَشه‌جکلر.

14:2  آيري خالقلار ائسرايئل خالقيني آپاريب، اؤز يِرلرئنه گتئره‌جکلر. ائسرايئل خالقي ربّئن وردئيي تورپاقلاردا اونلاري اؤزلرئنه قول و کنئز اده‌جکلر؛ اونلاري اسئر آپارانلاري، اؤزلري اسئر اده‌جکلر و اونلارا ظولم ادنلرئن اوستونده حؤکم سوره‌جکلر.

14:3  رب سني آغريندان، سيخينتيدان، گؤردويون آغير ائشدن قورتاراندا،

14:4  بابئل پادشاهينا لاغ ادئب بله دئيه‌جکسن: "ظولمکارين آخيري گؤر نجه اولوب! قدّارليغين آخيري گؤر نجه اولوب!

14:5  رب پئس آداملارين دَيَنه‌يئني، حؤکمدارلارين عصاسيني قيريب.

14:6  او عصا کي، دايانمادان خالقلاري قضبله ووراردي، مئلّتلري قِيضله، آمانسيزجا اَزَردي.

14:7  ائندي آمّا بوتون دونيا ساکئتلئک و راحاتليق ائچئنده سِوئنجدن هاراي چکئر.

14:8  حتّا لوبنانين شام و سئدر آغاجلاري دا سنئن فلاکتئنه سِوئنه‌رَک ديئر: «سنئن اؤلوموندن بَري، هچ کئم بئزي کَسمَيه گلمئر.»

14:9  يِرئن آلتينداکي اؤلولر دئياري، سني پئشواز اتمک اوچون صبئرسئزدئر، اؤلولرئنئن روحو، يِر اوزونون اؤلَن بوتون باشچيلاري سنئن اوچون هيجانلي‌دير، مئلّتلرئن بوتون کِچمئش پادشاهلاري تختلرئندن آياغا قالديرير.

14:10  هامي جاواب ورئب سنه دئيه‌جک: «سن ده بئزئم کئمي ضعئف اولوبسان، بئزه بَنزه‌يئبسن!»

14:11  جاه-جلالين، چنگلرئنئن سَسي اؤلولر دئيارينا اِندئرئلئب. ياتاغين دا، يورغانين دا مِيئت قوردلاريدير.

14:12  ای سحر اولدوزو، طولوع اوغلو، گؤيلردن نجه يِره دوشوبسن! ای مئلّتلري ذلئل ادن، نجه ده يِره ييخيليبسان!

14:13  لاکئن سن اوره‌يئنده ددئن: «گؤيلره قالخاجاغام، تختئمي تارينين اولدوزلاري اوستونده اوجالارا يِرلَشدئره‌جيم، شئمالداکي اوجا يرده، ييغين داغيندا اوتوراجاغام،

14:14  اوجا بولودلارين اوستونه چيخاجاغام، اؤزومو حاق-تاعالا کئمي اده‌جيم.»

14:15  آنجاق اؤلولر دئيارينا، اؤلوم چوخورونون درئنلئيئنه اِندئرئله‌جکسن.

14:16  سني گؤرَنلر گؤزلرئني زئلّه‌يه‌جکلر، سنئن حاقّيندا دوشونوب دئيه‌جکلر: «دونياني تئتره‌دن، سلطنتلري لرزه‌يه سالان،

14:17  يِر اوزونو صحرايا چِوئرَن، شهرلرئني يِرله بئر ادن، محبوسلاري اِولرئنه بوراخمايان آدام، بو مگر ديئل؟»

14:18  بوتون مئلّتلرئن پادشاهلاري، هر بئري اؤز عظمتلي مزاريندا ياتير.

14:19  لاکئن سن قيريلميش بوداق کئمي قبرئندن کنارا، اوزاغا آتيليبسان، بئر چوخورون دئبئنه توللانان، بدنلري قيلينجلا دِشئلَن مِيئتلرله اؤرتولوبسن، آياق آلتيندا قالان لِش کئمي‌سن.

14:20  باشقالاري کئمي دفن اولماياجاقسان، چونکي اؤز اؤلکه‌ني داغيديب، اؤز خالقيني اؤلدوروبسن. پئسلئک ادن نسئل بئر داها خاطيرلانماياجاق.

14:21  آتالارينين گوناهينا گؤره اؤولادلاريني اؤلدورمک اوچون يِر حاضيرلايين کي، اونلار قالخيب دونيايا مالئک اولماسينلار، يِر اوزونو شهرلرله دولدورماسينلار."

14:22  قوشونلار ربّی اعلان ادئر: "بابئل خالقينين ضئدّئنه قالخاجاغام. بابئلئن آديني، صاغ قالانلاريني، اوغوللاريني و نسئل‌لرئني يوخ اده‌جيم." رب اعلان ادئر.

14:23  "بابئلي بايقوش يوواسينا، باتاقليغا چِوئره‌جيم و محو ادن سوپورگه ائله سوپوره‌جيم." قوشونلار ربّی اعلان ادئر.

14:24  قوشونلار ربّی آند ائچئب بله ديئر: "دوغرودان دا دوشوندويوم کئمي اولوب و نئيّت اتدئيئم کئمي اولاجاق.

14:25  اؤلکَمده آشورلولاري محو اده‌جيم و داغلاريمدا اونلاري تاپدالاياجاغام. سونرا خالقيم آشورون يوغوندان، و اونون چئيئنلرئنده‌کي يوکوندن قورتولاجاق.

14:26  بوتون دونيا اوچون حاضيرلانان تقدئر بودور؛ بوتون مئلّتلرئن ضئدّئنه قالخميش اَلئم بودور.

14:27  چونکي قوشونلار ربّی نئيّت ادئب، کئم اونو بوشا چيخاردا بئلر؟ قالخميش اَلئني کئم گری دؤنده‌ره بئلر؟"

14:28  پادشاه آخازين اؤلدويو ائلده بو وحي نازئل اولدو:

14:29  "ای بوتون فئلئسطلی‌لر، سِوئنمه‌يئن کي، سئزي دؤيَن دَيَنَک قيريليب؛ چونکي ائلانين کؤکوندن افعي عمله گله‌جک، اونون ثمره‌سي ده اوچان ائلان اولاجاق.

14:30  کاسيبلارين لاپ کاسيبي دوياجاق، مؤحتاجلار اَمئن-آمانليقدا دئنجَله‌جک. سئزئن کؤکونوزو قيتليقلا کَسه‌جيم، صاغ قالانلارينيز دا اؤلدوروله‌جک.

14:31  ای دروازا، شئون ات! ای شهر، آغلا! ای بوتون فئلئسطلی‌لر، باشدان-باشا اَرئيئن! چونکي شئمالدان توستو ياخينلاشير، دوشمن عسگرلري سيرا-سيرا گلئر."

14:32  مئلّتئن اِلچئلرئنه نه جاواب ورئله‌جک؟ "بو کي، رب صحيونون پايالاريني قويوب، اونون خالقينين مظلوملاري اورادا پناه تاپاجاق."

Chapter 15

15:1  موآب باره‌ده ائخطار: موآبين آر شهري بئر گجه‌يه خاراباليغا دؤندو، داغيلدي، موآبين قئر شهري بئر گجه‌يه وئرانه‌لئيه دؤندو، داغيلدي.

15:2  آغلاماق اوچون معبده، دئبونا، پرستئشگاهلارا گدئبلر. موآب خالقي نِبو و مِيدِبا اوچون شئون ادئر. ياس توتماق اوچون هامي ساچيني کَسئب، ساقّاليني قيرخيب.

15:3  چولا بورونه‌رَک کوچه‌لرده، داملاردا، ميدانلاردا هر کس شئون ادئر، گؤز ياشلاري سل کئمي آخير.

15:4  باغيرير خِشبون و اِلعالِه، سَسلري يَهَصه قدر اِشئدئلئر. بونا گؤره موآب عسگرلري شئون ادئر، جانلاري قورخو ائچئنده اَسئر.

15:5  اوره‌يئم موآب اوچون باغيرير، اورانين قاچقينلاري صوعَره، عِگلَت-شِلئشئيايا طرف قاچيب. آغلايا-آغلايا لوخئت يوخوشوندان چيخيرلار. خورونه‌يئم يولوندا محو اولدوقلاري اوچون آغلاييرلار.

15:6  چونکي نئمرئم سولاري قورودوغو اوچون، اوت سولدو، بئتکئلر قالمادي، آرتيق گؤي-گؤيَرتي يوخ اولدو.

15:7  بونا گؤره خالق، قازانديغي مال-دؤولتئني، ييغديغي ثروتئني سؤيودلر وادئسئندن کچئردئر.

15:8  خالقين آغلاشماسي موآب تورپاغيني بورويوب، فريادي اِگله‌يئمه‌جک، بِعِر-اِيلئمه‌جک چاتير.

15:9  چونکي دئمون سولاري قانلا دولودور؛ قطعن من دئمونون باشينا داها بَتَر بلا گتئره‌جيم، موآبدان قاچيب-قورتولانلارين اوستونه، اؤلکه‌ده صاغ قالانلارين اوستونه آصلان سالاجاغام.

Chapter 16

16:1  سِلَعدن صحرا يولو ائله صحيون قيزينين داغينا، اؤلکه‌نئن حؤکمدارينا خراج قوزولاري گؤنده‌رئن.

16:2  سونرا موآب قيزلاري يووالاريندان آتيلميش، اورا-بورا اوچان قوشلار کئمي، اَرنون چايينين کِچئدلرئنده اولاجاق.

16:3  "بئزه نصئحت ور، بئر قرار ور، گوندوزون گون اورتا ائستئسئنده اوستوموزه گجه کئمي کؤلگه سال، قووولانلاري گئزلَت، قاچقينلاري تسلئم اتمه.

16:4  قوي موآبدان قووولانلار سنئنله بئرلئکده ياشاسين، محو ادنلرئن اَلئندن اونلارا پناه يري اول." چونکي قارت ادن قورتاريب، قيرغين يوخدور، ظاليملار اؤلکه‌دن کامئل بئر شکئلده محو اولوبلار،

16:5  محبّت ائچئنده بئر تخت قورولاجاق، داوود نسلئندن بئر حاکئم صداقتله اونون اوستونده اوتوراجاق، عدالتي آختاراجاق. صالحلئيي تزلئکله يرئنه يتئره‌جک.

16:6  موآبلي‌لارين نه دره‌جه‌ده کئبئرله‌نئب لووغالانديقلاريني، نه جور تکبّورلو، مغرور و حئرصلي اولدوقلاريني اشئتدئک، بوش يِره فخر ادئرلر.

16:7  بونا گؤره موآب شئون اده‌‌جک؛ هر بئري موآب اوچون باغيراجاق. قئر-خَرِسِتئن کئشمئش لاواشالاريني يادا سالاراق اَزئله‌جکلر.

16:8  چونکي خِشبون زَمئلري، سئبما تَنَکلري قورودو. آيري مئلّتلرئن باشچيلاري اونون سِچمه بوداقلاريني قيريبلار؛ او بوداقلار کي، يَعزِره يِتئشئردي، صحرايا چاتيردي، شاخه‌لَنئب دهنزي آشيردي.

16:9  بونا گؤره يَعزِرده آغلايانلارلا، سئبما تَنَکلري اوچون آجي-آجي آغلاياجاغام. ای خِشبون و اِلعالِه، سئزي گؤز ياشلاري ائله ائسلانديراجاغام، چونکي سنئنن ياي مئوه‌لرئن اوچون اولان، سنئن محصول واختي ييغيلان بارين اوچون‌ اولان، شَن سَسلرئنئز کَسئلدي.

16:10  محصوللو زَمئدن شَنلئک و شادليق سَسي يوخ اولوب، اوزوملوکده نه نغمه‌لر اوخونور، نه ده شادليق نئدالاري سَسله‌نئر. اوزوم‌سيخانلاردا ائشله‌يَن يوخدور، اونلارين شَن سَسلرئني، من کَسمئشم.

16:11  بونا گؤره اوره‌يئم موآب اوچون طنبور کئمي ناله چکئر، قلبئم قئر-حارِس اوچون سيزلايير.

16:12  موآب خالقي پرستئشگاهلارينا گده‌رک اؤزونو يورور، دوعا اتمک اوچون موقدّس مکانينا گلئر، آمّا هر شي بوش‌-بوشونادير!

16:13  ربّئن موآب حاقّيندا کِچمئشده ددئيي سؤزو بودور.

16:14  آمّا ائندي رب دانيشير و بله ديئر: "تام اوچ ائلئن عرضئنده، ائشه آلينان فحله‌نئن سايديغينا موطابئق، موآبين شؤوکتي چوخ‌سايلي خالقي ائله بئرلئکده ذلئل اولاجاق، صاغ قالانلاري آزالاجاق، صاغ قالانلاري چوخ آز اولوب گوجسوز اولاجاق."

Chapter 17

17:1  دَمَشق باره‌ده ائخطار: باخ، دَمَشق عنقرئب شهر اولماقدان گؤتوروله‌جک، بئر ييغين خاراباليغا دؤنه‌جک.

17:2  عَروعِر شهرلري ترک اولوناجاق. اورالار سورولرئن اوتلاديغي يِر اولاجاق، اونلاري قورخودان اولماياجاق.

17:3  اِفرايئمده قالالي شهر قالماياجاق، دَمَشقئن حاکئمئيّتي يوخ اولاجاق، صاغ قالان اَراملي‌لار؛ اونلار ائسرايئل اؤولادلارينين قووّتي کئمي اولاجاقلار. بونو قوشونلار ربّی اعلان ادئر.

17:4  او گون يعقوب نسلئنئن شؤوکتي سؤنه‌جک، هاميسي بئر دَري، بئر سوموک قالاجاق.

17:5  حتّا اِله اولاجاق کي، اِله بئل بئچئنچي بئتَن تاخيلي بئچئر، باشاقلاري اَلي ائله ييغير، اِله اولاجاق کي، اِله بئل بئري باشاقلاري رِفايئم دره‌سئنده توپلايير.

17:6  چوخ آز باشاق بوراخيلاجاق؛ زيتون آغاجي سئلکه‌لَنَندن سونرا، تپه‌سئنده ائکي-اوچ زيتون قالديغي کئمي، بَهَرلي بوداقلاريندا دورد-بش زيتون قالديغي کئمي باشاقلار دا بله قالاجاق. بونو ائسرايئلئن تاريسي رب اعلان ادئر.

17:7  او گون ائنسان اؤز يارادانينا نظر سالاجاق، گؤزلري ائسرايئلئن موقدّسئني گؤره‌جک.

17:8  اَل‌لري ائله ياراتديغي قوربانگاهلارا باخماياجاق، بارماقلاري ائله دوزلتدئيئنه نظر سالماياجاق؛ نه اَشِرا بوتلرئنه، نه ده بوخور قوربانگاهلارينا.

17:9  او گون ائستِحکاملي شهرلري کؤللوکده ترک اولونموش يِرلر کئمي، يا دا ائسرايئل اؤولادلارينين قاباغيندا ترک اتدئيي بوداقلار کئمي اولاجاق. اؤلکه بئر وئرانه‌يه دؤنه‌جک.

17:10  چونکي سن، سنه قورتولوش ورن تاريني ياددان چيخارديبسان، پناهگاهين اولان قاياني خاطيرلاماييبسان. بونا گؤره ده سن اجنبي بوتلر اوچون باغ اَکئرسن، اؤزگه آغاجلارين بوداقلاريندان پيوند ادئرسن.

17:11  اونلاري اَکدئيئن گون بؤيودورسن، اِرته‌سي گون چئچکلَندئرئرسن، آمّا کَدَرلي، صاغالمايان آغريلي گونده محصول ورميه‌جکلر.

17:12  آه، چوخ‌سايلي خالقلارين گورولتوسو دهنزلرئن گورولتوسونه بَنزه‌يئر! مئلّتلرئن نعره‌سي گوجلو سولارين چاغلاييشينا اوخشار!

17:13  مئلّتلرئن سَسي بؤيوک سولارين گورولتوسونه بَنزه‌يئر، لاکئن تاري اونلاري توبئخ اده‌جک، اونلار اوزاقلارا قاچاجاقلار، کوله‌يئن قاباغيندا تپه‌لئکلرده‌کي سامان چؤپو کئمي، طوفانين قاباغيندا يووارلانان کولَش کئمي قووولاجاقلار.

17:14  آخشامچاغي، باخ، دهشت وار، سحر آچيلمادان يوخ اولورلار. بئزي سويانلارين عاقئبتي بو اولاجاق، بئزي قارت ادنلرئن آخيري بو اولاجاق.

Chapter 18

18:1  آه، قاناد ويزيلتي‌لاري اِشئدئلَن اؤلکه‌نئن واي حالينا! کوش چايلارينين او طرفئنده يِرلَشَن اؤلکه‌نئن.

18:2  او اؤلکه کي، دهنز يولو ائله، قاميش قاييقلاري ائله اِلچئلر گؤنده‌رئر! ای آياقدان جَلد قاصئدلر، يولا دوشون! چايلارلا بؤلونموش اؤلکه‌يه گدئن، اوجابويلو، پارلاق دَرئلي مئلّتئن، هر ياندا قورخو دوغوران خالقين، گوجلو و ائشغالچي مئلّتئن يانينا گدئن!

18:3  ای بوتون يِر اوزونده ياشايانلار! ای دونيا ساکئنلري! داغلارين اوستونه بايراق دئکه‌لَنده اونو گؤره‌جکسئنئز! کَره‌ناي چالينديقدا اونو اِشئده‌جکسئنئز!

18:4  چونکي رب منه بله ديئب: "ساکئتجه مسکنئمدن باخاجاغام؛ گونش شوعالاريندان يارانان قيزمارليق کئمي، بئچئن واختينين ائستي زامانيندا شِح دوماني کئمي."

18:5  چئچکلَنمه قورتاريب محصول ييغيميندان اَوّل اوزوملر قورا باغلاياندا، رب باغ قايچيلاري ائله بوداقلاري کَسه‌جک، ياييلميش بوداقلاري قيريب آتاجاق.

18:6  هاميسي داغين ييرتيجي قوشلارينا، يِرئن وحشي حيوانلارينين قاباغينا آتيلاجاق. يايدا ييرتيجي قوشلارا، قيشدا بوتون وحشي حيوانلارا يِم اولاجاق.

18:7  او واخت چايلارلا بؤلونموش اؤلکه اوجابويلو، پارلاق دَرئلي خالق، هر ياندا قورخو دوغوران خالق گوجلو و ائشغالچي مئلّت قوشونلار ربّئنه، قوشونلار ربّئن آديني قويدوغو يِره– صحيون داغينا خراج گتئره‌جک.

Chapter 19

19:1  مئصئر باره‌ده ائخطار: باخ، رب سورعَتله گِدن بولودون اوستونه مئنئب مئصئره گلئر. مئصئر بوتلري اونون قاباغيندا تئتره‌‌يه‌جک، مئصئرلی‌لرئن اورَکلري ائچلرئنده اَرئيه‌جک.

19:2  رب ديئر: "من مئصئرلی‌لري مئصئرلی‌لرئن ضئدّئنه قالديراجاغام، قارداش قارداشلا، قونشو قونشو ائله، شهر شهرله، اؤلکه‌ اؤلکه ائله ووروشاجاق.

19:3  او واخت مئصئرلی‌لرئن اورَکلري ائچلرئنده اوزوله‌جک؛ نئيّتلرئني بوشا چيخارداجاغام. اِله کي، اونلار بوتلردن، اؤلولرئن روحلاريندان، جئندارلاردان، روح‌چاغيرانلاردان مصلحت ائستَيه‌جکلر.

19:4  بوندان علاوه، مئصئرلی‌لري قدّار بئر آغايا تسلئم اده‌جيم، قووّتلي بئر پادشاه اوستلرئنده حؤکم سوره‌جکدئر." قوشونلارين رب تاريسي بله اعلان ادئر.

19:5  نئلئن سولاري آزالاجاق، چاي چکئلئب قوروياجاق.

19:6  کانال‌لاري ائيلَنه‌جک، مئصئرئن آرخلاري بوشاليب قوروياجاق، قاميشلار و قارغيلار چورويه‌جک.

19:7  نئل کناريندا، چايين قيراغينداکي قارغيلار، نئل بويونجا اَکئلمئش زَمئلر قوروياجاق، سوورولوب يوخ اولاجاق.

19:8  باليقچيلار ياس توتاجاقلار، نئله تئلوو آتانلارين هاميسي آغلاياجاقلار، سويا تور آتانلارين هاميسيني قوصّه بورويه‌جک،

19:9  بوندان علاوه، نازئک کتان اوستونده ائشله‌يَنلر، آغ بِز توخويانلار اومئدلرئني ائتئره‌جکلر.

19:10  مئصئرئن سوتونلاري قيريلاجاق، بوتون موزدلو ائشچئلر روحدان دوشه‌جک.

19:11  صوعَن شهرئنئن باشچيلاري نجه ده آخماقديرلار! فئرعونون حئکمتلي مصلحت ورنلرئنئن مصلحتي آخماقليقدير. سئز نجه فئرعونا دئيه بئلرسئنئز: "من حئکمتلی‌لرئن، قدئم پادشاهلارين نسلئنده‌نَم!؟"

19:12  بس سنئن حئکمتلي‌ آداملارين هارادادير؟ قوي سنه بئلدئرسئنلر، قوي آنلاسينلار کي، قوشونلار ربّی مئصئرئن ضئدّئنه نه حاضيرلاييب.

19:13  صوعَنئن باشچيلاري آخماق اولوبلار، نوف ريئسلري آلدانيبلار، مئصئر قبئله‌لرئنئن باشچيلاري، مئصئري يولدان آزديريبلار.

19:14  رب گئجلئک روحونو مئصئرئن ائچئنه قاتيب. اونلار مئصئري، بوتون اتدئکلرئنده آزديريبلار، بئر کِفلي کئمي کي، اؤز قوسدوغونون اطرافيندا هِل‌له‌نئر.

19:15  مئصئرده هچ کئم هچ بئر ائش گؤره بئلمَيه‌جک: نه باش، نه قويروق و نه خورما بوداغي، نه ده قاميش.

19:16  او گون مئصئرلی‌لر آروادلارا بَنزه‌يه‌جکلر و قوشونلار ربّئنئن اونلارين ضئدّئنه قالخان اَلئنئن قاباغيندا تئتره‌يئب دهشته گله‌جکلر.

19:17  يهودا تورپاغي مئصئرلی‌لري دهشته گتئره‌جک. قوشونلار ربّئن مئصئرئن ضئدّئنه حاضيرلاديغي نئيّته گؤره، يهودانين آديني اشئدن هر کس ولوله‌يه دوشه‌جک.

19:18  او گون مئصئرده بش شهر اولاجاق کي، کَنَعان دئلئنده دانيشيب قوشونلار ربّئن آدينا آند ائچه‌جک؛ اونلارين بئري هلاک شهري چاغيريلاجاق.

19:19  او گون مئصئر اؤلکه‌سئنئن اورتاسيندا ربّه بئر قوربانگاه قورولاجاق، سرحدئنده ده اونا سوتون تئکئله‌جک.

19:20  بو، مئصئر تورپاغيندا قوشونلار ربّئن علامتي و شهادتي اولاجاق؛ چونکي اونلار ظاليملاردان قورتولماق اوچون ربّه فرياد اده‌جکلر. و او، مئصئرلی‌لره بئر قورتاريجي و قهرمان گؤنده‌رئب اونلاري قورتاراجاق.

19:21  بلجه رب اؤزونو مئصئرلی‌لره تانيتديراجاق، اونلار دا او گون ربّی تانيياجاقلار. مئصئرلی‌لر ربّه قوربانلار و تقدئملرله پرستئش اده‌جکلر، ربّه نذئر-نئياز ادئب، يرئنه يتئره‌جکلر.

19:22  رب مئصئرلی‌لري ووراجاق و سونرا شفا وره‌جک. بلجه اونلار ربّه طرف دؤنه‌جکلر. رب اونلارين يالواريشينا جاواب وره‌جک و اونلاري صاغالداجاق.

19:23  او گون مئصئردن آشورا بؤيوک بئر يول اولاجاق. آشورلولار مئصئره، مئصئرلی‌لر ده آشورا گدئب گله‌جکلر. مئصئرلی‌لرله آشورلولار بئرلئکده پرستئش اده‌جکلر

19:24  او گون ائسرايئل مئصئر و آشورون يانيندا اوچونجو اؤلکه اولاجاق. اونلار يِرئن اورتاسيندا برکت اولاجاقلار.

19:25  قوشونلار ربّی اونلارا برکت ورئب دئيَر: "خالقيم مئصئر، ياراتديغيم آشور، ائرثئم ائسرايئل برکتلي اولسون."

Chapter 20

20:1  او ائلده کي، آشور پادشاهي سَرگونون امري ائله، قوشونونون باشچيسي اَشدودا هوجوم ادئب اوراني آلدي،

20:2  رب آموص اوغلو اِشَعيانين واسئطه‌سئله او واخت دانيشيب بله ددي: "گت، اَينئنده‌کي چولونو و آياغينداکي چاريقلاريني چيخارت.» اِشَعيا اِله ده اتدي، لوت و آياق‌يالين گَزميه باشلادي.

20:3  رب ددي: "مئصئر و کوش اوچون علامت و عئبرت اولاراق، قولوم اِشَعيا نجه اوچ ائل عرضئنده لوت و آياق‌يالين گَزئب،

20:4  اِله ده آشور پادشاهي مئصئري خجالت آلتيندا قويماق اوچون، مئصئرلی‌لري و کوشلولاري اسئر ادئب، جاوانلاري و قوجالاري لوت و آياق‌يالين، عاييب يِرلري آچيق آپاراجاق.

20:5  کوشا بِل باغلايان، مئصئرله فخر ادن خالق قورخاجاق و خجالته دوشه‌جک.

20:6  او گون بو ساحئل بويونجا يِرلَشَن اؤلکه‌نئن ساکئنلري دئيه‌جکلر: «باخ، بو دا اومئدئمئز! گؤر آشور پادشاهينين اَلئندن قورتولماق اوچون کؤمک آلماغا قاچديغيميز خالقين باشينا نه‌لر گلدي! بس بئز نه جور قورتولاجاغيق؟»"

Chapter 21

21:1  دهنز ساحئلئنده‌کي صحرا باره‌سئنده ائخطار: نِگِبدن نجه کولَکلر گلئر، صحرادان، دهشتلي اؤلکه‌دن ده اِله بئر فلاکت گلئر.

21:2  قورخولو بئر رؤيا منه گؤرسه‌دئلئب: خائن حله ده خائنلئک ادئر، محو ادن حله ده محو ادئر. ای عِيلام، چيخ! ای ماد، موحاصئره‌يه آل! اونون باعئث اولدوغو بوتون شئونلره آخير قويموشام.

21:3  بو دلئلدن بِلئم سانجي ائچئنده‌دئر؛ آغري منی، دوغان آرواد کئمي توتوب. اِله تئتره‌يئرم کي، اشئده بئلمئرم، اِله قورخودايام کي، گؤره بئلمئرم.

21:4  اوره‌يئم اسئر، دهشت منی بويورور. حسرتئني چکدئيئم شفق منی آرتيق قورخودور.

21:5  سوفره حاضيرلاييرلار، خالچالار سَرئرلر، يِيئب-ائچئرلر؛ "قالخين، ای سرکرده‌لر، قالخانلاري ياغلايين!"

21:6  چونکي پروردئگار منه بله ديئر: "گت، گؤزَتچي تعيئن ات، قوي او، گؤردوکلرئني خبر ورسئن.

21:7  آتلي‌لاري، جوت-جوت آتلي‌لاري، اِششَکلر فوجونو، دَوه‌لر فوجونو گؤرنده، قوي دئقّتله باخسين، چوخ دئقّتله."

21:8  او واخت گؤزَتچي باغيردي: "ای پروردئگار، کشئکچي بورجونده گوندوز دائم دورورام، هر گجه نؤوبمده کشئک چکئرم.

21:9  باخ، بئر آتلي فوجو گلئر، آتلي‌لار جوت-جوت." بئري ددي: "ييخيليب، بابئل ييخيليب! اونون آللاهلارينين بوتلري ده يِره دوشوب تئکه-تئکه اولوب."

21:10  ای خالقيم، ای خرمنده بوغدا کئمي دؤيولموش خالقيم! ائسرايئلئن تاريسي قوشونلار ربّئندن اشئتدئيئمي سئزه اعلان ادئرم.

21:11  دوما باره‌سئنده ائخطار: بئر نفر سِعئردن منی سَسله‌يئر: "ای گؤزَتچي، گجه‌دن نه قدر کچئب؟ ای گؤزَتچي، گجه‌دن نه قدر کچئب؟"

21:12  گؤزَتچي جاواب ورئر: "سحر گلئر، آمّا گجه ده گلئر. اگر سوروشاجاقسينيز، گئنه گلئن، سوروشون."

21:13  عَرَبئستان باره‌سئنده ائخطار: ای دِدان کاروانلاري، عَرَبئستان کوللوقلاريندا گرک گجه‌لَيه‌سئنئز!

21:14  ای تِيما ساکئنلري، سوسوزلاميشلارا سو گتئرئن! قاچيب قورتولانلارا چؤرک ورئن!

21:15  چونکي اونلار قيلينجدان، سييريلميش قيلينجدان، چکئلمئش اوخ-کاماندان، آغير دؤيوشدن قاچيبلار.

21:16  چونکي پروردئگار منه بله ددي: "بئر ائلئن عرضئنده، ائشه آلينان بئرئنئن بئر ائل سايديغينا موطابئق، قِدارين بوتون شؤوکتي آرادان گده‌جک.

21:17  اوخ‌آتانلاردان، قِدار نسلئنئن جنگاورلرئندن آز قالاجاق؛ چونکي ائسرايئلئن تاريسي رب بله ديئب.

Chapter 22

22:1  رؤيا دره‌سي باره‌سئنده ائخطار: ائندي سئزه نه اولوب کي، هامينيز داملارا چيخيبسينيز؟

22:2  ای سَس-کويلو، قيشقيران-باغيران، گورولتولو شهر، اؤلدورولَنلرئنئز نه قيلينجدان کچئردئلدي، نه ده دؤيوشلرده اؤلدورولدو.

22:3  باشچيلارينيزين هاميسي بئرلئکده قاچيبلار، اوخ-کامانسيز ياخالانيبلار؛ بوتون تاپيلانلارينين هاميسي بئرلئکده اسئر آپاريليبلار؛ گرچي اوزاقلارا قاچميشديلار.

22:4  بونا گؤره ديئرم: "گؤزلرئنئزي مندن گؤتورون، قويون آجي-آجي آغلاييم، خالقيمين قيزينين وئران اولدوغو اوچون، منه تسلّی ورميه جهد اتمه‌يئن."

22:5  چونکي رؤيا دره‌سئنده، قوشونلار تاريسي ربّئن دهشت، اَزمَک، و ائغتئشاش گونو وار، دووارلارين داغينتيسي و داغلارا فرياد نئدالاري چاتديغي گون گلئر.

22:6  عِيلاملي‌لار اوخدانلاريني توتدولار، آداملارلا دولو دؤيوش عارابالاري ائله، آتلي‌لاري ائله گلدئلر. قئر ساکئنلري قالخانلاريني آچديلار.

22:7  او واخت سنئن لاپ گؤزل دره‌لرئن، دؤيوش عارابالاري ائله دولو ائدي، آتلي‌لار شهر دروازانين قاباغينا دوزولدولر.

22:8  رب يهودانين دئفاع ائستِحکاملاريني گؤتوردو، او گون سئز "مِشه" آدلي اِوده ساخلانيلان سئلاحلارا بِل باغلادينيز.

22:9  داوودون شهرئنئن دووارلاريندا، دؤيوشدن دَلئک-دِشئک عمله گلدئيئني گؤردونوز، آشاغي حوووضا سو ييغدينيز.

22:10  سونرا اورشلئمده‌کي اِولري سايدينيز، شهر دووارينين تعمئري اوچون اِولري سؤکدونوز.

22:11  کؤهنه حوووضون سولاري اوچون، ائکي دووار آراسيندا سو آنباري دوزلتدئنئز. لاکئن بو ائشي گؤره‌نه بِل باغلامادينيز، بونو چوخدان حاضيرلايان تارييا دئقّت اتمه‌دئنئز.

22:12  اونا گؤره ده، او گون قوشونلار تاريسي رب، سئزي آغلاشمايا، ياس توتماغا، ساچينيزي يولماغا، چولا بورونميه چاغيردي.

22:13  آمّا بونون عوضئنه شادليق وار، شنلئک وار، مال-حيوان کسمه‌سي وار، قويون-کچي کسمه‌سي وار، اَت يمه‌سي و شراب ائچمه‌سي وار: "گلئن، يئيک و ائچک، چونکي صاباح اؤله​جيئک."

22:14  لاکئن قوشونلار ربّی اؤزونو منه آشکار اتدي، "قطعن بو گوناه سئزه اؤلَنه قدر اصلا باغيشلانماز!" قوشونلار تاريسي رب بله بويورور.

22:15  بلجه قوشونلار تاريسي رب ديئر: دور، او مهماندارين، ساراي ريئسي شِبنانين يانينا گت و دِه:

22:16  "سنئن بورادا نه ائشئن وار؟ بورادا کئمئن وار کي، بورادا، بو اوجادا يرده اؤزون اوچون قبئر قازيبسان؟ آيا قايانين ائچئنده اؤزونه مزار دوزه‌لدئبسن؟

22:17  باخ، ای کئشي، رب سني عنقرئب تَپَندن توللاياجاق، عنقرئب سني ياخالاياجاق.

22:18  توپ کئمي سني هِل‌لَده‌جک، گِن اؤلکه‌يه آتاجاق. اورادا اؤله‌جکسن، فخر اتدئيئن عارابالارين اورادا قالاجاق، آخي، اؤز آغانين اِوئني بي‌آبير ادئبسن!

22:19  سني وظئفندن عزل اده‌جيم، اوتوردوغون يردن آشاغي آتاجاغام.

22:20  او گون قولوم حئلقئيا اوغلو اِلياقئمي چاغيريب

22:21  سنئن پالتاريني اونا گيئندئره‌جيم، سنئن قورشاغيني اونون بِلئنه باغلاياجاغام، سنئن ائقتئداريني اونون ائختئيارينا وره‌جيم. بو آدام اورشلئم ساکئنلرئنه، يهودا خالقينا آتا اولاجاق.

22:22  سونرا داوود نسلئنئن آچاريني اونون چئينئندن آساجاغام، آچديغيني هچ کئم باغلايا بئلميه‌جک، باغلاديغيني هچ کئم آچا بئلميه‌جک.

22:23  من اونو پايا کئمي بَرک يِره ووراجاغام. و او، آتاسينين نسلی اوچون شؤوکت تختي اولاجاقدير.

22:24  آتاسينين نسلئنئن بوتون شؤوکتي اونون اوستوندن آسيلاجاق. نسلئن و اؤولادلارين شرفي، طاسلاردان طاباقلاراجاق، بوتون قاب-قاجاقلارين شؤوکتي بو پايا اوستوندن آسيلاجاق"

22:25  قوشونلار ربّی بيان ادئر: "او گون بَرک يِره وورولموش پايا اَسه‌جک، حتّا قيريليب- دوشه‌جک، اونون اوستونه آسيلان يوک ده يوخ اولاجاق." چونکي رب بله ديئب.

Chapter 23

23:1  صور باره‌سئنده ائخطار: ای تَرشئش گَمئلري، شئون ادئن، چونکي صور شهري اِولري ائله، بندرلري ائله بئرلئکده داغيلدي. کئتّئم تورپاغيندان بو حاقدا اونلارا خبر گلدي.

23:2  سئز، ای ساحئل ساکئنلري، سئز، ای صئدون تاجئرلري، ساکئت اولون! سئزئن قاصئدلرئنئز دهنزي کچدئلر

23:3  و چوخ سولار اوستونده ائدئلر. نئلئن تاخيلي، شئخورون محصولو؛ شهر مئلّتلرئن آل-وِر يري ائدي!

23:4  اوتان، ای صئدون! چونکي دهنز دانيشير، دهنز ساحئلئنده يِرلَشَن قالا بله ديئر: "من نه دوغوم آغريسي چکمئشم، نه ده دوغموشام، نه اوغلانلار يتئشدئرمئشم، نه ده قيزلار بؤيوتموشم."

23:5  صور حاقّيندا خبر مئصئره چاتاندا، مئصئرلی‌لرئن اورَکلري اوزوله‌جک.

23:6  ای ساحئل ساکئنلري، تَرشئشه طرف گدئن، شئون ادئن!

23:7  آيا بودور سنئن فخر اتدئيئن شهر؟ او کي، اونون کؤکو قدئمدندئر، آياقلاري دا اونو اوزاق يِرلره آپارير کي، اونلاري موستَملَکه اتسئن؟

23:8  تاجلار گيئندئرن صورون ضئدّئنه، بونلاري کئم حاضيرلاييب؟ آخي بو شهرئن تاجئرلري شاهزاده ائدئلر، آل-وِرچئلري دونيانين حؤرمتلي آداملاري ائدئلر.

23:9  قوشونلارين ربّی بونو حاضيرلاييب کي، هر جور گؤزل‌لئيئن تکبّورونو قيرسين، يِر اوزونون بوتون حؤرمتلي آداملاريني اوتانديرسين.

23:10  ای تَرشئش قيزي، اؤز تورپاقلاريندان نئل کئمي کچ، آرتيق سنه هچ بئر مانع يوخدور.

23:11  رب دهنزئن اوستونه اَلئني اوزاديب، سلطنتلري لرزه‌يه ساليب؛ کَنَعانين ائستِحکاملارينين داغيلماسي حاقّيندا امر ورئب.

23:12  رب ديئب: "ای دؤيولموش باکئره صئدون قيزي، سن بئر داها شادليقدان هاي-کوي سالماياجاقسان! قالخ، کئتّئمه کچ، آمّا اورادا دا جانينا راحاتليق تاپماياجاقسان."

23:13  کَلده‌لئلرئن اؤلکه‌سئنه باخ! او خالق آرتيق يوخدور؛ آشورلولار او اؤلکه‌ني وحشي حيوانلارين مسکنئنه دؤنده‌ردئلر. مَنجَنئقلرئني دئکدئلر، سارايلاريني داغيتديلار، بو دئياري وئرانه‌لئيه چِوئردئلر.

23:14  شئون ادئن، ای تَرشئش گَمئلري، چونکي ائستِحکامينيز داغيليب.

23:15  بوندان سونرا صور شهري، يتمئش ائل، بئر پادشاهين عؤمرو قدر، يادلاردا‌‌‌ن چيخاجاق. يتمئش ائل کچدئکدن سونرا، صورون دا باشينا فاحئشه آرواد اوچون بَستَله‌دئيي نغمه‌ده‌کي کئمي بله گله‌جک:

23:16  "ای يادلاردان چيخميش فاحئشه، طنبور سازيني اَلئنه آل، دولان شهري! گؤزل هاوالار چال، چوخ نغمه‌لر اوخو، قوي سني يادا سالسينلار!"

23:17  يتمئشئنجي ائلئن آخيريندا رب صور شهرئنئن گؤروشويونه گله‌جک. بو شهر گئنه ده فاحئشه‌لئک اوجرتئنه قاييداجاق و دونيانين بوتون سلطنتلري ائله فاحئشه‌لئک اده‌جک.

23:18  اونون فاحئشه‌لئک اوجرتئندن گلن گلئر ربّه وقف اولوناجاق؛ خزئنه‌لره قويولماياجاق، آنبارلارا ييغيلماياجاق. بو گلئر ربّئن حوضوروندا ساکئن اولان آداملارين يمه‌يئني و گؤزل گِيئمئني تأمئن اده‌جک.

Chapter 24

24:1  باخ، رب يِر اوزونو بوش قويوب خاراباليغا چِوئرئر، دونياني آلت-اوست ادئر، ساکئنلرئني داغيدير.

24:2  خالقلا کاهئن آراسيندا، نؤکرله آغاسي آراسيندا، کنئزله خانيمي آراسيندا، آليجي ائله ساتيجي آراسيندا، بورج ورنله بورج آلانين آراسيندا، سَلَمچي ائله بورج آلان آراسيندا هچ بئر فرق قويولماياجاق.

24:3  ير اوزو کامئل بوش قاليب خاراباليغا چِورئله‌جک. چونکي رب بله ديئب.

24:4  دونيا ساراليب سولور، ير اوزو قورويوب سولور. دونيانين اوستون‌منصبلي آداملاري ضعئف اولور.

24:5  دونيا دا ساکئنلرئنئن وسئله‌سي ائله نجئس اولدو، چونکي اونلار تارينين قانونلارينا عوصيان اتدئلر، قايدالاريني آياق آلتينا قويدولار، ابدی عهدي پوزدولار.

24:6  بو سببه گؤره، لعنت يِر اوزونو محو ادئر. يِر اوزونون ساکئنلري گوناهلارينين جزاسيني چکئر، بونا گؤره يِر اوزونون ساکئنلري يانير، و چوخ آز آدام صاغ قالير.

24:7  تزه شراب ماتم توتور، مِينه‌لر سولور، بوتون فَرَحلَنَن آداملار کَدَردن آه چکئر.

24:8  دَفلرئن شَن سَسي کَسئلئب، شَنلئک نئداسي اِشئدئلمئر، طنبورلارين نغمه‌سي گلمئر.

24:9  بئر داها نغمه اوخويوب شراب ائچمئرلر، ائچکئنئن دادي، ائچَنه آجي گلئر.

24:10  نئظامسيز شهر، خارابا قاليب؛ بوتون اِولر قيفيل‌لانيب، هچ کئم اورايا گئره بئلمئر.

24:11  شراب اوچون کوچه‌لرده قيشقير-باغير وار، بوتون سِوئنج نورو ظولمته چِورئلئب. دونيانين شَنلئيي کَسئلئب.

24:12  شهر وئران بوراخيليب، دروازالاري دارماداغيندير.

24:13  زيتون آغاجيندان زيتونلاري تؤکمَک اوچون آغاجي سئلکَله‌يئب دؤيَنده نجه اولور، اوزوم محصولو ييغيلاندان سونرا بوراخيلان سالخيملار نجه اولور، دونياداکي خالقلار دا اِله اولاجاق.

24:14  صاغ قالانلار سَسلرئني اوجالديرلار، شادليقدان هاراي چکئرلر، قربده ياشايانلار ربّئن عظمتئندن فرياد ادئرلر.

24:15  بونا گؤره، شرقده ياشايانلار، ربّی اوجالدين. دهنز ساحئل‌لرئنده ساکئن اولانلار، ائسرايئلئن تاريسي ربّئن آديني اوجالدين.

24:16  دونيانين لاپ اوزاق گوشه‌لرئندن ترنّوم نغمه‌سي اِشئدئرئک: "صالح اولانا عئزّت اولسون!" آمّا من ديئرم: "تلف اولورام، تلف اولورام، واي منه! خائنلر خائنلئکلرئنه داوام ورئرلر، بلی، خائنلر چوخ خائنلئکله رفتار ادئرلر!"

24:17  ای دونيادا ياشايانلار، دهشت، درئن چوخور و تله سئزي گؤزله‌يئر!

24:18  دهشته سالان خبردن قاچان، درئن چوخورا دوشه‌جک، درئن چوخوردان چيخا بئلَن، تله‌يه دوشه‌جک. چونکي گؤيلرئن پنجره‌لري آچيقدير، دونيانين بونؤوره‌لري تئتره‌يئر.

24:19  ير اوزو چاتلاييب، ير اوزو ياريليب، دونيا شئدّتله اسئر!

24:20  دونيا کِفلي کئمي آشا-آشا هِل‌له‌نئر، تالوار کئمي سئلکَله‌نئر، چونکي عاصئلئيي اونون اوستونده آغيردير، ييخيلاجاق و بئر داها قالخا بئلميه‌جک.

24:21  او گون رب گؤيده‌کي قوشونلاري يوخاريدا، يِر اوزونون پادشاهلاريني آشاغيدا جزالانديراجاق.

24:22  اونلار سئياهچالا محبوسلار کئمي ييغيلاجاقلار، زئندا‌ندا باغلي ساخلاناجاقلار، اوزون مودّت کچندن سونرا جزالاناجاقلار.

24:23  سونرا آي اوتاناجاق، گونش خجالت چکه‌جک. چونکي قوشونلار ربّی صحيون داغيندا، اورشلئمده حؤکم سوره‌جک. شؤوکتي آغساقّاللارينين گؤزو قاباغيندا اولاجاق.

Chapter 25

25:1  يارب، سن منئم تاريمسان، سني اوجالداجاغام، سنئن آدينا حمدلر اوخوياجاغام. چونکي سن قدئمدن بري مؤجوزه‌لرئني، نئيّتلرئني کامئل وفادارليقلا حياتا کچئردئبسن.

25:2  چونکي سن شهري بئر داش ييغينينا، ائستِحکاملي شهري خاراباليغا دؤنده‌رئبسن. او شهر ياد اِللی‌لرئن سارايي ائدي، اوندان اثر-علامت قالماييب، او بئر داها برپا اولونماز.

25:3  بونا گؤره قووّتلي خالقلار سني عئزّتلَندئره‌جک. قدّار مئلّتلره منصوب شهرلر سندن قورخاجاق.

25:4  چونکي سن يوخسولا سيغيناجاق، سيخينتي ائچئنده اولان مؤحتاجا پناهگاه، طوفان واختي چارداق، ائستئلئک واختي کؤلگه‌لئک اولوبسان. چونکي قدّارلارين نفسي دووارا چارپان طوفان کئمئدئر.

25:5  ياد اللی‌لرئن نعره‌سئني چؤل سيجاغي کئمي باسديريرسان؛ بولودون کؤلگه‌سي، سيجاغي نجه قيرير، قدّار آداملارين نغمه سَسلري اِله قيريلير.

25:6  بو داغدا قوشونلارين ربّی بوتون خالقلار اوچون لذئذ ضئيافت قوراجاق؛ ياغلي يمکلردن، گؤزل شرابلاردان عئبارت ضئيافت وره‌جک، اورادا لاپ لذئذ يمکلر، لاپ دادلي شرابلار اولاجاق.

25:7  بو داغدا بوتون خالقلارين اوستونده‌کي اؤرتويو، بوتون مئلّتلرئن اوستونه سَرئلَن توخونما اؤرتويو گؤتوره‌جک.

25:8  اؤلومو ابدی اولاراق يوخ اده‌جک، پروردئگار رب بوتون آداملارين اوزوندن گؤز ياشلاريني سئله‌جک، بوتون ير اوزوندن خالقينين روسوايچيليغيني گؤتوره‌جک. چونکي رب بله ديئب.

25:9  او گون دئيه‌جکلر: "باخ، بودور بئزئم تاريميز کي، نئجاتيميز اوچون اونا اومئد باغلاميشيق، بودور او رب کي، اونا اومئد باغلاميشيق؛ گلئن، سِوئنَک و بئزه ورن نئجاتيندا شادليق اِدَک!"

25:10  ربّئن اَلي بو داغين اوستونده قالاجاق، آمّا موآب پِيئنلئيه دوشَن سامان کئمي تاپداق آلتيندا قالاجاق.

25:11  نجه بئر اوزَن، اوزَرکَن، اَل-قول آتير، موآب دا پِيئنلئکده اِله اَل-قول آتاجاق، آمّا رب موآبين تکبّورونو اَللرئنئن فَندگئرلئيي ائله بئرلئکده آلچالداجاق.

25:12  او، سنئن ائستِحکاملاريني، اوجا دووارلاريني يِره اِندئره‌جک، داغيديب يِرله بئر اده‌جک.

Chapter 26

26:1  او گون يهودا دئياريندا بله نغمه اوخوناجاق: "قووّتلي شهرئمئز وار، تاري شهرئن اَمئن-آمانليغي اوچون دووارلار و سنگرلر قورور.

26:2  آچين شهرئن دروازالاريني، قويون وفالي قالان او صالح مئلّت ائچه‌ري گئرسئن.

26:3  دوشونجه‌لرئنده پايدار اولان آداملارا، سن کامئل باريش ورئرسن، چونکي اونلار سنه بِل باغلاييرلار.

26:4  ربّه همئشه بِل باغلايين، چونکي رب تاريدا، ابدی قاياميز وار.

26:5  چونکي او، يوخاري يِرلرده اوتورانلاري، اَل چاتمايان شهري آلچالديب؛ اونو آلچالدير، يِرله بئر ادئر، تورپاغا دؤنده‌رئر.

26:6  او شهر آياق آلتيندا تاپدالاناجاق؛ مظلوملارين آياقلاري، يوخسول‌لارين قدملري آلتيندا تاپدالاناجاق.

26:7  صالح آدامين يولو هاماردير؛ ای دوروست اولان تاري، صالح آدامين يولونو هامار ات.

26:8  دوغرودان دا، يارب، سنئن حؤکملرئنئن يولوندا، بئز سنه اومئد باغلاييريق، سنئن آدين، حتّا سنئن خاطئرَن جانيميزين ائسته‌يي‌دئر.

26:9  قلبئم گجه‌ سنئن اوچون حسرت چکئر، دوغرودان دا، روحوم ائچئمده جهدله سني آختارير. حؤکملرئن يِر اوزونده حياتا کِچدئکجه، دونيانين ساکئنلري صالحلئيي اؤيره‌نئر.

26:10  پئس آداما رحم ادئلسه ده، او، صالحلئيي اؤيرَنمئر، دوغرولوق اؤلکه‌سئنده حاقسيزليق ادئر، ربّئن عظمتئني گؤرمور.

26:11  يارب، اَلئني قالديريبسان، لاکئن اونلار بونو گؤرمورلر. اؤز خالقين اوچون گؤرستدئيئن قيرتي گؤروب اوتانيرلار. دوغرودان دا، سنئن دوشمنلرئني اود اوداجاق.

26:12  يارب، بئزه باريش ورن سنسن، اونا گؤره کي، بوتون ائشلرئمئزي سن بئزئم اوچون عمله گتئرئبسن.

26:13  ای تاريميز رب، سندن باشقا آغالار اوستوموزده حاکئم اولوبلار، لاکئن بئز فقط سنئن آديني ائقرار ادئرئک.

26:14  اؤلولر ياشاماياجاقلار، آيريلميش روحلار قالخماياجاقلار، چونکي سن اونلاري جزالانديريبسان، محو ادئبسن، اونلار حاقّيندا هر بئر خاطئره‌ني يوخ ادئبسن.

26:15  لاکئن سن بو مئلّتي چوخالديبسان، يارب! بو مئلّتي چوخالديبسان، سن شؤوکتلي‌سن. هر طرفه اؤلکه‌نئن سرحدلرئني گِنئشلَندئرئبسن."

26:16  يارب، اونلار بلايا دوشَنده سني آختارديلار. آنجاق ياواشجا بئر دوعا اده بئلردئلر، سنئن تَنبِهئن اونلارين اوستونده ائدي.

26:17  حامئله آرواد دوغوش واختينا ياخينلاشاندا، آغري چکئب قوورولاراق نجه قيشقيرار، بئز ده سنئن حوضوروندا اِله ائدئک، يارب!

26:18  بئز ده سانکي بويلو ائدئک، قوورولاراق آغري چکئردئک، لاکئن يِلدن باشقا بئر شي دوغماديق. دونيايا قورتولوش گتئره بئلمه‌دئک، دونيا ساکئنلرئني حياتا چاتديرا بئلمه‌دئک.

26:19  آمّا سنئن اؤلولرئن ياشاياجاق، بدنلري دئرئله‌جک. ای تورپاق آلتيندا ياتانلار، اويانين، سِوئنج نغمه‌سئني اوخويون، چونکي سنئن شِحئن سحر شِحئنه بنزه‌يئر، تورپاق آيريلميش روحلاري دئرچَلده‌جک.

26:20  ای خالقيم، گلئن، گئرئن اوتاقلارينيزا، قاپيلاري آرخانيزدان اؤرتون، ربّئن قِيضي کِچَنه‌جک، قيسا بئر زامان گئزله‌نئن!

26:21  چونکي باخ، رب يِر اوزونون ساکئنلرئني، قباحتلري اوزوندن جزالانديرماق اوچون، اؤز مسکنئندن گلئر. يِر اوتدوغو قاني اوزه چيخارداجاق، اؤلدورولَنلري آرتيق گئزلَتميه‌جک.

Chapter 27

27:1  او گون رب لِوياتانا، او قاچان ائلانا، بلی، لِوياتانا، او قيوريلان ائلانا آمانسيز، بؤيوک و قووّتلي قيلينجي ائله جزا وره‌جک، دهنزده‌کي اژداهاني اؤلدوره‌جک.

27:2  او گون: "بئر شراب اوزوم‌باغي، اونون باره‌سئنده اوخويون!

27:3  من رب، اونون قوروجوسويام، تِز-تِز اونو سولاييرام، گجه-گوندوز کِشئيئنده دورورام کي، هچ کس اونا ضرر يتئرمه‌سئن.

27:4  هچ قضبئم يوخدور، اگر کئمسه موحارئبه‌ده قاباغيما تئکان و قانقال قويسا، اونلاري آياق آلتيندا اَزه‌رم، هاميسيني اوددا يانديرارام.

27:5  و يا قوي منئم موحافئظه‌مدن بَرک توتسون، قوي منئمله باريشسين، قوي منئمله باريشسين."

27:6  گله‌جک گونلرده يعقوب نسلی کؤک سالاجاق، ائسرايئل گول آچيب چئچکلَنه‌جک، يِر اوزونو ميوه ‌ائله دولدوراجاقلار.

27:7  مگر رب، ائسرايئلي ووران دوشمنلري کئمي، اونو ووردو؟ و يا او، مگر ائسرايئل، اونو اؤلدورَنلرئن اؤلدورولدويو کئمي اؤلدو؟

27:8  سن اؤز خالقيني قوووب اسئرلئيه گؤندرمَکله اونلارلا چکئشدئن. شرق کولَه‌يي اَسن گون، رب اونلاري شئدّتلي يِلي ائله قوووب.

27:9  بونا گؤره، يعقوب نسلئنئن قباحتي بونونلا باغيشلاناجاق، گوناهين آرادان گؤتورولمه‌سئنئن تام باهاسي بو اولاجاق: بوتپرست قوربانگاهلارين داشلاري تاباشئر کئمي اووولاجاق، ائلاهه اَشِرا و بوخور قوربانگاهلاري بئر داها دئک قالماياجاق.

27:10  چونکي ائستِحکاملي شهر ترک ادئلئب، يورد، صحرا کئمي وئرانه و يئيه‌سئز قاليب. اورادا بوزوو اوتلاييب اوزاناجاق، اونون شاخه‌لرئني يئيه‌جک.

27:11  بوداقلار قورويوب قوپاريلاجاق، آروادلار گلئب اونلارلا اود قالاياجاقلار. بو خالق آغيلسيز اولدوغونا گؤره، اونلاري يارادان، اونلارا رحم اتميه‌جک، اونلارين خالئقي اونلارا ائلتئفات گؤرسدميه‌جک.

27:12  او گون رب فَرات چاييندان مئصئر دره‌سئنه قدر، خرمن دؤيَن کئمي، اؤز خرمنئني دؤيه‌جک، و سئز بئر-بئر توپلاناجاقسينيز، ای ائسرايئل اؤولادلاري!

27:13  او گون بؤيوک کَره‌ناي چاليناجاق، آشور تورپاغيندا ائتکئن دوشَنلر، مئصئره اسئر ادئلَنلر گلئب اورشلئمده، موقدّس داغدا، ربّه سجده اده‌جکلر.

Chapter 28

28:1  واي اِفرايئمئن کِفلی‌لرئنئن کئبئر تاجينا! شؤوکتلي گؤزل‌لئيئنئن سولان گولونه! او کي، بَهَرلي دره‌نئن باشيندا يِرله‌شيب، واي بو شهره کي، شرابا دوشکون اولانلارين کئبئري‌دئر.

28:2  باخ، ربّئن گوجلو و قووّتلي بئر آدامي وار. او، بَرک ياغان دولو کئمي، بلا گتئرن طوفان کئمي، هر شيي يولوندا محو ادن سل کئمي گلئر، اَلي ائله او شهري يِره چيرپاجاق.

28:3  اِفرايئمئن کِفلی‌لرئنئن کئبئر تاجي آياق آلتيندا تاپدالانير.

28:4  محصوللو دره‌نئن باشيندا يِرلَشَن شهر، اونون شؤوکتلي گؤزل‌لئيئنئن سولان گولو، يايدان قاباق عمله گلن کال انجئر کئمي اولاجاق کي، اونو گؤرَن تِز دَرئب يئيه‌جک.

28:5  او گون قوشونلارين رَبّي، صاغ قالان خالقي اوچون، گؤزل‌ بئر تاج، شؤوکتلي بئر چَلَنگ اولاجاق.

28:6  حؤکم کورسوسونده اوتورانا عدالت روحو، شهر دروازالاريني مودافئعه ادنلره قودرت وره‌جک.

28:7  بونلار دا شرابدان هِل‌له‌نئرلر، عَرَقدن آشا- آشا گِدئرلر: هم کاهئن، هم نبي عَرَقدن هِل‌له‌نئرلر، شراب اونلاري گئجَلدئب، عَرَق اونلاري آشيرير: رؤيالار گؤرَن زامان کِفلي‌دئرلر، حؤکم ادن زامان کِفلئلئکدن هِل‌له‌نئرلر.

28:8  بوتون سوفره‌لر کثئف قوسماقلا دولودور، بولانماميش بئر يِر يوخدور!

28:9  "بو آدام کئمه معرئفت اؤيره‌دئر؟ پيامي کئمه آچيقلايير؟ سوددن کَسئلمئش، آنا دؤشوندن آيريلميش کؤرپه اوشاقلارا مگر؟

28:10  چونکي رب ديئر: "امر اوستونه امر، امر اوستونه امر، قايدا اوستونه قايدا، قايدا اوستونه قايدا، بئر آز بورادا، بئر آز اورادا."

28:11  دوغرودان دا رب بو خالقلا دانيشاجاق؛ پلتک دوداقلارلا، ياد دئل‌له.

28:12  او کي، اونلارا ددي: "راحاتليق بودور، يورغونلارا دئنجلئک ورئن." و "ائستئراحت ادئن." آمّا اونلار اشئتمَک ائستَمه‌دئلر.

28:13  بونا گؤره ده، ربّئن سؤزو اونلار اوچون بو اولاجاق: "امر اوستونه امر، امر اوستونه امر، قايدا اوستونه قايدا، قايدا اوستونه قايدا، بئر آز بورادا، بئر آز اورادا." کي، گتسئنلر و آرخاسي اوسته ييخيلسينلار، قيريلسينلار، تله‌يه دوشوب اسئر اولسونلار.

28:14  بونا گؤره ده، ای رئشخندچئلر، اورشلئمده اولان بو خالقين رهبرلري، ربّئن سؤزونه قولاق آسين!

28:15  مادام کي سئز دِدئنئز: "اؤلومله عهد باغلاميشيق، اؤلولر دئياري ائله راضيليغا گلمئشئک، اؤلکه‌يه بؤيوک بلا گلنده، بئزه ضرر ورميه‌جک، چونکي يالاني اؤزوموزه سيغيناجاق اتمئشئک، حئيله‌نئن آرخاسيندا گئزلَنمئشئک."

28:16  بونا گؤره ده پروردئگار رب ديئر: باخ، صحيوندا بونؤوره داشي، مؤحکم داش، قئيمتلي گوشه‌داشي قويورام. اونا ائنانان پرئشان اولماياجاق.

28:17  عدالتي اؤلچو، صالحلئيي شاقول اده‌جيم. يالان سيغيناجاغيني دولو محو اده‌جک، گئزلَندئيئنئز يِرلري سِللر يويوب آپاراجاق.

28:18  اؤلومله باغلاديغينيز عهد لغو اولوناجاق، اؤلولر دئياري ائله راضيليغينيز قووّه‌دن دوشه‌جک. اؤلکه‌يه بؤيوک بلا گلنده، سئزي تاپدالاياجاق.

28:19  بو بلا هر گلدئيئنده سئزي سوپوروب گؤتوره‌جک. او سحر به سحر، گجه گوندوزون هر واختي کچه‌جک. بو خبري آنلايان دهشته بورونه‌جک.

28:20  ياتاق اوزانماق اوچون قيسا، يورغان بورونمک اوچون دار اولاجاق.

28:21  چونکي رب پِراصئم داغيندا اتدئيي کئمي قالخاجاق، گئبعون دره‌سئنده‌کي کئمي قضبلَنه‌جک. او اؤز ائشئني، قِيري-عادي ائشئني يرئنه يتئره‌جک! اؤز عملئني، نامعلوم عملئني حياتا کچئرده‌جک.

28:22  بونا گؤره ده رئشخند اتمه‌يئن، يوخسا زنجئرلرئنئز داها دا آغيرلاشار. چونکي قوشونلارين ربّی پروردئگاردان اشئتمئشم کي، بوتون يِر اوزونون محو اولماسينا قطعي بئر شکئلده قرار ورئلئب.

28:23  قولاق آسين، سَسئمي اِشئدئن، قولاق ورئن و دِدئيئمي اِشئدئن.

28:24  مگر اَکئنچي، اَکئن اَکمک اوچون، دورمادان يري شوخوملاماز؟ مگر دورمادان تورپاقدا شيريم آچيب هامارلاماز؟

28:25  مگر تورپاغي هامارلاياندان سونرا، شويود و زئره‌ني سَپمَز؟ مگر بوغداني ردئفله، آرپاني آييرديغي يِره، قيرميزي بوغداني دا اونون يانينا اَکمَز؟

28:26  چونکي تاريسي اونا نصئحت وِرَر، اونو ياخشي اؤيره‌دَر.

28:27  چونکي شويودو خرمنده وَل‌له دؤيمَزلر، زئره‌نئن اوستونه ده عارابا تَکَرلري ائله سورمَزلر.

28:28  بوغدا چؤرک اوچون گرک خرمنده دؤيولسون؛ بونا گؤره ده اَکئنچي اونو ابده کئمي دؤيمَز. اگر عاراباسينين تَکَرلرئني ده اوستوندن کچئرتسه، آتلاري بوغداني اَزمَز.

28:29  بو دا قوشونلارين ربّئندن گلئر. اونون مصلحتي عالي، حئکمتي بؤيوکدور.

Chapter 29

29:1  واي سنه، ای اَري‌اِل، ای اَري‌اِل، داوودون بئر زامان اوردوگاه قوردوغو شهر! ائلي، ائله قات! بايراملارين سيرايا دورسون.

29:2  اَري‌اِله دارليق گتئره‌جيم، او، شئون و ماتم شهري اولاجاق. منئم اوچون اَري‌اِل کئمي اولاجاق.

29:3  سنئن ضئدّئنه اطرافيندا اوردوگاه قوراجاغام، اطرافينا ائستِحکاملار دوزه‌جيم، سنئن ضئدّئنه دؤيوش بورجلری تئکه‌جيم.

29:4  او واخت آلچالديلاجاقسان، يردن دانيشاجاقسان، توز-تورپاق ائچئندن سَسئن بوغوق-بوغوق گله‌جک، سَسئن اؤلو سَسي کئمي يردن، سؤزلرئن پيچيلتي کئمي تورپاغين آلتيندان چيخاجاق.

29:5  آمّا دوشمنلرئنئن فوجو نارين توز کئمي، قورخونج آداملارين قوشونلاري سوورولموش سامان چؤپو کئمي اولاجاق. بو، قَفلَتَن، بئر آن ائچئنده باش وره‌جک.

29:6  قوشونلارين ربّئنئن تَنبِهي سنه گؤي گورولتوسو ائله، زلزله ائله، بؤيوک سَس-کويله، فيرلانان يِل‌له، طوفانلا، هر شيي محو ادن اودلا گله‌جک.

29:7  سونرا اَري‌اِلئن ضئدّئنه دؤيوشَن بوتون مئلّتلردن فوجلار، اونا و قالاسينين ضئدّئنه ساواشانلارين هاميسي، اونا ظولم ادنلر بئر رؤيا کئمي، گجه گؤرونَن يوخو کئمي يوخ اولاجاقلار.

29:8  يوخودا چؤرک يِدئيئني گؤرَن آج آدام کئمي اولاجاق، باخ، يِيئر؛ لاکئن اويانديقدا، گئنه آجدير. يوخودا سو ائچدئيئني گؤرَن سوسوز آدام کئمي اولاجاق، و باخ، ائچئر، لاکئن اويانديقدا، گئنه سوسوزلوقدان يانير. بله اولاجاق او مئلّتلرئن فوجلاري دا کي، صحيون داغينين ضئدّئنه دؤيوشورلر.

29:9  مات قالين، حيرتله‌نئن، گؤزونوزو کور ادئن، کور اولون. اونلار کِفلي اولورلار، لاکئن شرابدان يوخ، هِل‌له‌نئرلر، لاکئن عرقدن يوخ.

29:10  چونکي رب سئزئن اوستونوزه آغير يوخو روحو ساليب، او سئزئن گؤزلرئنئزي يوموب، ای پيغمبرلر؛ او سئزئن باشلارينيزي اؤرتوب، ای گؤروجولر.

29:11  بوتون بو رؤيا سئزئن اوچون موهورلَنمئش کئتابين سؤزلري کئمي اولاجاق کي، اوخوماغي باجارانا بونو ورئب دئيَنده: "خاهئش ادئرم، بونو اوخو!" جاواب وره‌جک: "اوخويا بئلمه‌رم، چونکي مؤهورلودور."

29:12  سونرا کئتابي اوخويا بئلمه‌يَنه ورئب دئيَنده کي: "خاهئش ادئرم، بونو اوخو"، جاواب وره‌جک: "من اوخوماغي بئلمئرم."

29:13  سونرا پروردئگار ددی: "چونکي بو خالق منه دئلي ائله ياخينلاشيب، دوداقلاري ائله منه حؤرمت ادئر، آمّا قلبلرئني مندن چوخ اوزاق ادئر، اونلارين منه حؤرمت اتمکلري ائنسانلاردان اؤيرَندئکلري امرلردن گلئر.

29:14  بونا گؤره، باخ، من بئر داها بو خالق اوچون تزه مؤجوزه، اِعجازلي شيلر اده‌جيم، و حئکمتلی‌لرئنئن حئکمتي محو اولاجاق، عاغيلّي‌لارين آغيلي يوخ اولاجاقدير."

29:15  واي او آداملارين حالينا کي، اؤز نئيّتلرئني رَبدن درئن بئر شکئلده گئزله‌دئرلر! و عمل‌لري قارانليقدا باش ورئر. و ديئرلر: "بئزي کئم گؤرور؟" يا دا "بئزي کئم تاني‌يير؟"

29:16  سئز هر شيي تَرسه دوشونورسونوز! مگر کوزه‌گري گئل‌له بئر توتماق اولار؟ مگر دوزه‌لدئلَن شي، اونو دوزه‌لدن باره‌ده دئيه بئلر: "او منی دوزه‌لتمه‌دي"؟ شکئل تاپميش، مگر اونا شکئل ورن باره‌ده دئيه بئلر: "او هچ نه آنلامير"؟

29:17  لوبنان تزلئکله مگر محصوللو زَمئيه، محصوللو زَمي ده مگر مِشه‌يه دؤنميه‌جک؟

29:18  او گون کارلار کئتابداکي سؤزلري اِشئده‌جکلر، کورلارين گؤزلري ظولمت و قارانليقلاريندان گؤره‌جک.

29:19  ذلئل‌لر ده ربده شادليقلاريني آرتيراجاقلار، مؤحتاج ائنسانلار ائسرايئلئن موقدّسئنده شادليق اده‌جکلر.

29:20  چونکي ظولمکار يوخ اولاجاق، رئشخند ادن محو اولاجاق. دوغرودان دا بوتون پئسلئک نئيّتئنده اولانلار کَسئب آتيلاجاقلار.

29:21  اونلار آيريسينا بؤهتان آتانلارديرلار، شهر دروازاسيندا حاکئمه تله قورانلارديرلار، حاقلي‌نين حاقّيني ناحاق يِره تحرئف ادنلردئرلر.

29:22  بونا گؤره ده ائبراهئمي قورتاران رب، يعقوب نسلئنه بله ديئر: "يعقوب نسلی آرتيق اوتانماياجاق، اوزلري ده سارالماياجاقدير.

29:23  اَلئمله ياراتديغيم اؤولادلاريني آرالاريندا گؤرنده، آديمي موقدّس توتاجاقلار؛ دوغرودان دا يعقوبون موقدّسئني تقدئس اده‌جکلر، ائسرايئلئن تاريسيندان قورخاجاقلار.

29:24  فئکئرلرئنده آزميش اولانلار حقئقتي تانيياجاقلار، مذمّت ادنلر تعلئمي قبول اده‌جکلر"

Chapter 30

30:1  رب اعلان ادئر: "واي بو دئکباش اؤولادلارين حالينا، منئم نئيّتلرئمي يوخ، اؤز نئيّتلرئني قورورلار، راضيلاشما ادئرلر، لاکئن منئم روحوما موناسئب يوخ، اِله کي، گوناه اوستونه گوناه آرتيرسينلار.

30:2  مندن مصلحت آلمادان مئصئره گدئرلر، فئرعونون اَمئن-آمانليغينا پناه آپاريرلار، مئصئرئن کؤلگه‌سي آلتيندا سيغيناجاق يِر آختاريرلار.

30:3  بونا گؤره فئرعونون حئمايه‌سي سئزئن خجالتئنئز اولاجاق، مئصئر کؤلگه‌سي آلتينداکي سيغيناجاق، سئزئن روسوايچيليغينيزا چِورئله‌جک.

30:4  چونکي باشچيلاري صوعَنده‌دئرلر، اِلچئلري خانِسه يتئشئرلر.

30:5  اونلارا فايداسي اولمايان بئر خالقا گؤره هامي اوتاناجاق. او خالق کي، اونلارا نه کؤمکدئر، نه ده فايدا، آنجاق خجالت و روسوايچيليق."

30:6  نِگِب حيوانلاري باره‌سئنده ائخطار: دارليق و ناراحات بئر تورپاقدان، اِرکَک و دئشي آصلانلارين، افعئلر و اوچان ائلانلارين ياشاديغي يردن، اونلار مال-دؤولَتئني اِششَکلرئن بِلئنه، خزئنه‌لرئني دَوه‌لرئن حورگونجونه يوکله‌يئب کچئرلر، و اونلارا فايداسي اولمايان خالق اوچون آپاريرلار.

30:7  حتّا مئصئرئن کؤمه‌يي ده بوش و فايداسيزدير، بونا گؤره ده من مئصئره "تنبل‌ رَهَب" آديني قويموشام.

30:8  ائندي گت، سنه دِدئيئمي اونلارين قاباغيندا بئر لؤوحه‌يه ياز، بئر طومارا ياز کي، گله‌جکده، همئشه‌لئک بئر شاهئد اولسون.

30:9  چونکي بو، عاصي بئر خالق، يالانچيلار نسلي‌دئر، ربّئن قانونونا قولاق آسماق ائستَمه‌يَن بئر نسئلدئر.

30:10  اونلار گؤروجولره ديئرلر: «بئر داها رؤيالار گرک گؤرميه‌سئنئز»، پيغمبرلره ده ديئرلر: «بئزئم اوچون دوزگون شيلر حاقّيندا نبئلئک گرک اتميه‌سئنئز. بئزه شئرئن سؤزلر دانيشين، ساختا شيلر نبئلئک ادئن.

30:11  يولوموزا مانع اولمايين، يولدان چکئلئن، قويون بئر داها ائسرايئلئن موقدّسي باره‌ده اشئتمه‌يک.»"

30:12  بونا گؤره ده ائسرايئلئن موقدّسي بله ديئر: "بو سؤزو ردّ اتدئيئنئزه گؤره، ظولم و يالانا اِعتئماد ادئب بِل باغلاديغينيزا گؤره،

30:13  بو قباحت سئزئن اوچون اوجا دوواردا عمله گلن چاتلاغا بَنزه‌يئر؛ بله دووار بئردن‌بئره، بئر آن ائچئنده ييخيلار.

30:14  اونون ييخيلماسي کوزه‌گرئن قيريلميش بئر کوزه‌سي کئمي اولار، اِله شئدّتلي پارچالانار کي، اوجاقدان اود گؤتورمک اوچون، يا دا حوووضدان سو چکمک اوچون يِتَرلي بئر تئکه قالماز."

30:15  پروردئگار رب، ائسرايئلئن موقدّسي بله بويوروب: "تؤوبه ادئب راحاتليق تاپاندا، خئلاص اولارسينيز، سئزئن قووّتئنئز ساکئت اولماقدادير، ائنانماقدادير." لاکئن سئز بونو ائسته‌مئرسئنئز.

30:16  سئز دِدئنئز: «خِير، آتلارا مئنئب قاچاجاغيق.» بونا گؤره سئز قاچمالي اولاجاقسينيز. «چِوئک آتلارا مئنه‌جَيئک.» بونا گؤره تعقئبچئلرئنئز ده چِوئک اولاجاقلار.

30:17  مئن نفر بئر نفرئن تهدئدئندن قاچاجاق، بش نفرئن تهدئدئندن هامينيز قاچاجاقسينيز. او قدر کي، داغين باشينداکي بئر بايراق کئمی، تپه‌ده‌کي بئر علامت کئمی قالاسينيز."

30:18  آمّا رب سئزه ائلتئفات گؤرسدمک اوچون حسرت چکئر، اوجالاردا گؤزله‌يئر کي، سئزه شَفقَت گؤرسدسئن. چونکي رب عادئل تاري‌دير، اونو ائنتئظارلا گؤزله‌يَنلر نه بختوردئرلر!

30:19  ای اورشلئمده ياشايانلار، ای صحيون خالقي، سئز آرتيق آغلاماياجاقسينيز. فرياد اتدئکده رب قطعن سئزه ائلتئفات گؤرسده‌جک؛ فريادينيزي اشئتدئکده، سئزه جاواب وره‌جک.

30:20  گَرچي رب سئزه عذاب چؤره‌يئني و سئتم سويونو ورئب، لاکئن او، سئزئن موعلّئمئنئز، اؤزونو آرتيق سئزدن گئزلَتميه‌جک. اونو گؤزونوزله گؤره‌جکسئنئز.

30:21  صاغا يا دا سولا دؤندوکده، قولاقلارينيز آرخادان بئر سَس اِشئده‌جک: "يول بودور، گدئن بو يولا."

30:22  او واخت سئز گوموشله اؤرتولَن اويما بوتلرئنئزي، قيزيل‌لا اؤرتولموش تؤکمه بوتلرئنئزي نجئس حساب اده‌جکسئنئز. اونلاري نجئس بئر شيي آتديغينيز کئمي آتاجاقسينيز و اونلارا دئيه‌جکسئنئز: "ردّ اولون!"

30:23  سونرا رب يِره اَکدئيئنئز توخوم اوچون ياغيش وره‌جک و تورپاغين وردئيي چؤرک بول و برکتلي اولاجاق. او گون مال-حيوانينيز گِنئش اوتلاقلاردا اوتلاياجاق.

30:24  تورپاغي شوخوملايان اؤکوزلرله اِششَکلر کورَکله، شَنه ائله سوورولموش دوزلانميش يِم يئيه‌جکلر.

30:25  او بؤيوک مغلوبئيّت گونونده، قالا بورجلري يِره چؤکَنده، هر اوجا داغدان و هر اوجا تپه‌دن سو آرخلاري آخاجاق.

30:26  رب اؤز خالقينين يارالاريني ساريديغي گون، ضربه‌سي ائله آچديغي يارالارينا شفا ورن گون، آي ائشيغي گونش پاريلتيسي کئمي اولاجاق، گونشئن ده ائشيغي يدّي گونون ائشيغي کئمی يدّي قات آرتيق پارلاياجاق.

30:27  باخ، ربّئن آدي اوزاق بئر يردن گلئر، قضبي يانار اود کئمي‌دئر، توستوسو چوخ قَلئظ؛ آغزي قضبله دولودور، دئلي سانکي هر شيي محو ادن آلوودور.

30:28  اونون نفسي داشان سل کئمي‌دئر کي، ائنسانين بوغازيناجاق چاتيب. اِله کي، مئلّتلري اَلَکده سئلکَتسئن و دَيَرسئزلري آييرسين، و خالقلارين آغزينا يولدان آزديران يويَن تاخسين.

30:29  آمّا سئز موقدّس بايرام گجه‌سي کئمي نغمه‌لر اوخوياجاقسينيز. ربّئن داغينا، ائسرايئلئن قاياسينا نِي چالاراق چيخان کئمی، اوره‌يئنئز شادلاناجاق.

30:30  رب قودرتلي سَسئني اشئتدئره‌جک، حئدّتلي قضبله، هر شيي يانديران آلوولا، طوفانلا، بولود پارتلاماسي ائله، دولو ائله قولونون قودرتئني گؤرسده‌جک.

30:31  رب دَيَنه‌يي ائله ووراندا، آشور ربّئن سَسئندن واهئمه‌يه گله‌جک.

30:32  ربّئن اونلارا اِندئردئيي دَيَنه‌يئنئن هر ضربه‌سئني، دفلر و طنبورلار نغمه‌سي موشايئعت اده‌جک. موحارئبه‌ده سئلاحلار چکئب اونلارلا ووروشاجاق.

30:33  چونکي توفِت چوخدان حاضيردير، دوغرودان دا پادشاه اوچون حاضيرلانيب. اونو درئن و گِنئش ادئب؛ اود قالاسي چوخلو اودونلارلا؛ ربّئن نفسي گوگورد آخيني کئمي اونو يانديرار.

Chapter 31

31:1  واي او آداملارين حالينا کي، کؤمک اوچون مئصئره طرف اِنئرلر، آتلارا بِل باغلاييرلار، عارابالارينين چوخلوغونا، آتلي‌لارين گوجونه بِل باغلاييرلار! لاکئن ائسرايئلئن موقدّسئنه باخميرلار، ربّی آختارميرلار!

31:2  آمّا رب تام حئکمته مالئکدئر و بلا گتئرر، اؤز سؤزلرئني گری گؤتورمز، لاکئن پئسلئک ادن آداملارين اِوئنه، شر قورانلارا کؤمک ادنلرئن ضئدّئنه قالخار.

31:3  مئصئرلی‌لر تاري يوخ، ائنسانديرلار، آتلاري دا اَتدئر، روح ديئل. بونا گؤره، رب اؤز اَلئني اوزاداجاق، کؤمک ادن ييخيلاجاق، کؤمک آلان ييخيلاجاق، اونلارين هاميسي بئرلئکده محو اولاجاقلار.

31:4  چونکي رب منه بله ديئر: "شئر و يا جاوان آصلان نجه اؤز شئکاري اوستونه نعره چکنده، بئر دسته چوبان اونون ضئدّئنه هاراي چکميه باشلايير، نجه آصلان اونلارين سَسلرئندن قورخمور، قيشقيريقلارينا محل قويمور. قوشونلارين ربّی ده اِله اِنه‌جک، صحيون داغيندا و اونون تپه‌لرئنده دؤيوشه‌جکدئر.

31:5  قوشونلارين رَبّي، قاناد آچميش قوشلار کئمي اورشلئمي قوروياجاق، مودافئعه اده‌جک، اونو قورتاراجاق، اونو اسئرگَيه‌جک، خئلاص اده‌جکدئر."

31:6  ای ائسرايئل اؤولادلاري، اونا چوخ عاصي اولدوغونوز ربّه طرف، دؤنون!

31:7  چونکي او گون هر بئرئنئز، گوناهکار اَل‌لرئنئزله دوزه‌لتدئيئنئز قيزيل و گوموش بوتلرئنئزي اؤزوزدن آتاجاقسينيز.

31:8  "آشورلولار قيلينجدان محو اولاجاقلار، لاکئن ائنسان قيلينجيندان يوخ. اونلار قيلينج آغزينا ورئله‌جکلر، آمّا بو، ائنسان قيلينجي اولماياجاق. قيلينجدان قاچا بئلميه‌جکلر، جاوانلاري دا ياخالانيب قول اولاجاقلار.

31:9  اونلارين قايا داشي دهشت اوزوندن ييخيلاجاق؛ سرکرده‌لري بايراغي گؤرونجه ولوله‌يه دوشه‌جکلر." بونو او رب ديئر کي، آلووو صحيوندا، اوجاغي اورشلئمده‌دئر.

Chapter 32

32:1  باخ، بئر پادشاه صالحلئکله سلطنت اده‌جک، باشچيلار عدالتله حؤکم سوره‌جکلر.

32:2  اونلارين هر بئري کولَک قاباغيندا بئر پناهگاه، طوفان قاباغيندا بئر سيغيناجاق اولاجاق. قوراقليقدا بولاقلار، جان‌سيخيجي تورپاقدا، کؤلگه سالان بؤيوک قايا کئمي اولاجاق.

32:3  او واخت گؤرَنلرئن گؤزلري بئر داها يومولماياجاق، اشئدنلرئن قولاقلاري قولاق آساجاق.

32:4  تَلَسنلرئن آغلي معرئفتي آنلاياجاق، پلتَکلرئن دئلي آچيق-آيدين دانيشماغا تَلَسه‌جک.

32:5  آرتيق آخماق آداما عالئجناب ديئلميه‌جک، خَسئس آدامي دا سخاوتلي ائنسان سايماياجاقلار.

32:6  چونکي آخماق سَفِه-سَفِه دانيشير، اوره‌يئنئن نئيّتي پئسلئک اتمکدئر. اونون ائشي شرارت اتمکدئر، ربّئن ضئدّئنه ياوا دانيشماقدير، آجلاري آج بوراخماق، سوسوزلاري سوسوز قويماقدير.

32:7  آلچاق آدامين سئلاحلاري شردئر. او، حئيله ائشله‌دئر کي، يالان سؤزلرله مظلوم آدامي محو اتسئن، گرچي او مؤحتاج، داعواسيندا حاقلي‌دير.

32:8  آمّا اَصئلزاده آدام عالي نئيّتلر قورار. و عالي نئيّتلرله برقرار قالار.

32:9  ای لاقيد آروادلار، قالخين، سَسئمي اِشئدئن! ای لاقيد قيزلار، سؤزومو اِشئدئن!

32:10  ای لاقيد آروادلار، سئز بئر ائل نچه گوندن سونرا ائضطئرابا دوشه‌جکسئنئز، چونکي باغدا محصول قورتاراجاق، ميوه ييغيمي اولماياجاق.

32:11  اَسئن، ای لاقيد آروادلار؛ ائضطئرابا دوشون، ای لاقيد قيزلار؛ پالتارلارينيزي چيخاردين، سويونون، بِلئنئزه چول قورشايين.

32:12  گؤزل زَمئلر، محصوللو مِينه‌لر اوچون سئنه‌لرئنئزه وورون.

32:13  چونکي خالقيمين تورپاغيندا تئکانلي کوللار بئته‌جک؛ بلی، بوتون شَن اِولر اوچون، صفالي شهر اوچون سئنه‌لرئنئزه دؤيون.

32:14  چونکي ساراي ترک ادئلئب، ائزدئحاملي شهر بوش قاليب، تپه ائله کشئکچي بورجو ابدئلئک ماغارالارا چِورئلئب؛ وحشي اِششَکلرئن خوشلارينا گلن يِر اولوب، سورولره اوتلاق يري اولوب.

32:15  بونلار يوخاريدان اوستوموزه روح تؤکولَنه‌جک داوام اده‌جک. او واخت صحرا محصوللو زَمئيه، محصوللو زَمي ده، مِشه‌ ساييلاجاق.

32:16  سونرا عدالت صحرادا ساکئن اولاجاق، صالحلئک محصوللو زَمئده ياشاياجاق.

32:17  صالحلئيئن عملي اَمئن-آمانليق، نتئجه‌سي ده ابدی اَرامليق و آرخايينليق اولاجاق.

32:18  او واخت خالقيم اَمئن-آمانليق ائچئنده اِولرئنده، خطَرسئز مسکنده، راحات يِرلرده ياشاياجاق.

32:19  مِشه‌لر دوشَنده دولو ياغاجاق، شهر يِرله بئر اولاجاق.

32:20  سئز نه بختور اولاجاقسينيز، سئز کي، بوتون سولار قيراغيندا اَکئرسئنئز، سئز کي، اؤکوزو و اِششه‌يي آزاد بوراخيرسينيز.

Chapter 33

33:1  واي سنئن حالينا، ای محو ادن، آمّا اؤزو محو اولمايان ائنسان! واي حالينا، ای خائن آدام، هرچند سنئن ضئدّئنه هچ کس خيانت اتمه‌دي! سن محو ادئب قورتاران زامان، اؤزون ده محو اولاجاقسان؛ سن خائن عمل‌لرئندن دؤنَنده، باشقا آداملار سنئنله خيانتله رفتار اده‌جکلر.

33:2  يارب، بئزه ائلتئفات گؤرسد؛ چونکي سنه اومئد اتمئشئک. هر سحر اونلارين قووّتي اول، دارليق زاماندا دا بئزئم نئجاتيميز.

33:3  سنئن قودرتلي سَسئندن خالقلار قاچيرلار، سن آياغا قالخارکَن، مئلّتلر پَرَن-پَرَن اولورلار.

33:4  چَيئرتکه‌لر زمئني نه جور تالان ادئرلر، ای مئلّتلر، قنئمتئنئز ده او جور تالان اولاجاق. مالينيزين اوستونه چَيئرتکه ييغيني کئمي جوماجاقلار.

33:5  رب اوجادير، چونکي او اوجالاردا ساکئندئر، صحيونو عدالت و صالحلئکله دولدوروب.

33:6  او، ياشاديغينيز دؤورون بونؤوره‌سي‌دئر، قورتولوشون، حئکمتئن و بئلئيئن خزئنه‌سي‌دئر، ربّئن قورخوسو اونون خزئنه‌سي‌دئر.

33:7  باخ، مئلّتلرئن ائگئدلري کوچه‌لرده باغيريرلار. صولح قاصئدلري هؤنکوروب آغلاييرلار.

33:8  يوللار بوشاليب، سَيّاحلار آرتيق يوخدور. دوشمن عهدي پوزوب، شاهئدلري خور گؤرور، ائنساني هچ سايير.

33:9  اؤلکه ياس توتور، ضعئفله‌يئر، لوبنان خجئل اولوب، سولوب، شارون صحرايا دؤنور، باشان و کَرمِلئن آغاجلاري يارپاقلاريني تؤکور.

33:10  رب ديئر: "ائندي قالخاجاغام، ائندي اوجالاجاغام، ائندي اوجالاجاغام.

33:11  سامانا بويلو اولوبسونوز، کولَش دوغاجاقسينيز، نفسئنئز سئزي محو ادن آلوو کئمي اوداجاق.

33:12  خالقلار يانيب کول اولاجاقلار، کَسئلئب اوددا يانديريلان تئکانلي بوتالارا اوخشاياجاقلار.

33:13  ای اوزاقدا ياشايانلار، نه اِله‌دئيئمي اِشئدئن، ای ياخيندا ياشايانلار، منئم گوجومو بئلئن."

33:14  صحيونداکي گوناهکارلار دهشته دوشوبلر، تاريسيزلاري لرزه‌ بورويوب: "هر شيي محو ادن آلووون يانيندا، هانسيميز ياشايا بئله‌رئک؟ ابدی يانان اودون يانيندا، هانسيميز ياشايا بئله‌رئک؟"

33:15  او کي، صالحلئک يولو ائله گِدئر و دوغرو سؤزلر دانيشير، او کي، قدّارليقلا اَلده ادئلَن قازانجي ردّ ادئر، اَلئني روشوتدن اوزاق توتور، قولاقلاريني قان تؤکمک باره‌ده اِشتئميه باغلايير، گؤزلرئني پئسلئيه باخماقدان يومور.

33:16  او اوجاليقلاردا ساکئن اولاجاق، قايالارين قالالاري اونون پناهي اولاجاق. چؤره‌يي اونا ورئله‌جک، سويو اونا تأمئن اولوناجاق.

33:17  سنئن گؤزلرئن پادشاهي گؤزل‌لئيي ائله گؤره‌جک، اوجسوز-بوجاقسيز اؤلکه‌ني سِير اده‌جک.

33:18  اوره‌يئن دهشت حاقّيندا فئکئرلَشه‌جک؛ "هارادادير حساب ادن؟ هارادادير چَکَن؟ هارادادير بورجلري سايان؟"

33:19  آنلاشيلماز، ياد دئلده دانيشان رحمسئز بئر خالقي داها گؤرميه‌جکسن.

33:20  بايراملار کچئرتدئيئمئز شهره، صحيونا باخ! گؤزلرئن اورشلئمي، باريش مسکنئني، تئتره‌مز چاديري گؤره‌جک. اونون پايالاري هچ واخت سؤکولميه‌جک، کَندئرلرئنئن هچ بئري قيريلماياجاق.

33:21  اورادا عظمتلي رب بئزئم اوچون اولاجاق؛ چايلار و گِنئش آرخالار يِري! اورادان آوارلي قاييقلار، بؤيوک گَمئلر کچه بئلمزلر.

33:22  چونکي بئزه حؤکم ادن ربدئر، بئزه قانون قويان ربدئر، بئزئم پادشاهيميز ربدئر، اودور بئزي قورتاران.

33:23  گَمئلرئنئن ائپلري آچيلميش ساللاندي، دَکَلي يِرئنده مؤحکم دايانا بئلمئر. يِلکَنلري آچيلمير. او واخت بؤيوک تالان مالي پايلاناجاق، حتّا توپال آداملار دا تالان اده‌جک.

33:24  هچ بئر صحيون ساکئني "ناخوشام" دِمَيه‌جک، اورادا ياشايان خالقين گوناهلاري باغيشلاناجاق.

Chapter 34

34:1  ای مئلّتلر، ياخين گلئن کي، اِشئده‌سئنئز، قولاق آسين، ای خالقلار! قوي يِر و اوندا اولانلارين هاميسي، دونيا و اونون بوتون يتئرمه‌لري، قولاق آسسين!

34:2  چونکي ربّئن قضبي بوتون مئلّتلرئن ضئدّئنه‌دئر، اونون قِيضي اونلارين بوتون قوشونلارينين ضئدّئنه‌دئر. اونلارين هاميسيني محو ادئب، اونلاري اؤلوم اَلئنه ورئب.

34:3  بلجه اونلارين اؤلولري کنارا آتيلاجاق، مِيئتلرئندن عوفونت قالخاجاق، داغلار اونلارين قانينا بولاناجاق.

34:4  بوتون گؤي فوجلاري چورويه‌جک، گؤيلر بئر طومار کئمي بوکوله‌جک. گؤي اولدوزلاري مِينه يارپاغي کئمي، انجئر يارپاغي کئمي دوشه‌جک، ساراليب سولاجاق.

34:5  "چونکي قيلينجيم گؤيلرده دويونجاق ائچئب، ائندي او، حؤکم اتمک اوچون اِدومون اوستونه اِنئر، او خالقلارين اوستونه کي، من اونلاري هلاکته مخصوص اتمئشم."

34:6  ربّئن قيلينجي قانلا، قوزو و اِرکَک کچي قاني ائله دويوب، قوچ بؤيرَکلرئنئن ياغي ائله پئي باغلاييب. چونکي ربّئن بوصرادا بئر قورباني وار، اِدوم تورپاغيندا بؤيوک بئر قيرغيني وار.

34:7  اونلارلا بئرلئکده چؤل اؤکوزلري، جاوان گاميشلار گوجلولري ائله يِره سَرئله‌جکلر. تورپاقلاري قانلا دوياجاق، ير اوزو پئي باغلاياجاق.

34:8  چونکي ربّئن قئصاص گونو وار، صحيونون داعواسي اوچون، عوض آلما ائلي وار.

34:9  اِدومون آخار سولاري قَطرانا، تورپاغي گوگورده دؤنه‌جک، اؤلکه‌نئن هر طرفي يانان قَطران اولاجاق.

34:10  قَطران گجه-گوندوز سؤنميه‌جک، توستوسو همئشه قالخاجاق. بو تورپاق نسئلدن-نسله وئران قالاجاق، عصرلر بويو اورادان بئر کس کِچميه‌جک.

34:11  اورا بايقوشلارلا کئرپئلرئن ساکئن اولدوغو يِر اولاجاق، بؤيوک بايقوشلارلا قارغالار اورادا ياشاياجاقلار. رب اِدوم اوستونه قارماقاريشيقليق ائپئني، وئرانه‌لئک شاقولونو سالاجاق.

34:12  اورادا هچ بئر آدلي-سانلي آدام قالماياجاق کي، اورا پادشاهليق چاغيريلسين. بوتون باشچيلاري هچ اولاجاق.

34:13  ائستِحکاملي بورجلرئنده تئکانلار، قالالي شهرلرئنده ده گئجئتکَن و قارا چالي بئته‌جک. اورا چاقّاللارين يوردو، بايقوشلارين يوواسي اولاجاق.

34:14  وحشي حيوانلارلا جاناوارلار اورادا گؤروشه‌جک، وحشي کِچئلر بئربئرئني سَسلَيه‌جک، قولِيباني اورادا ساکئن اولوب راحات يِر تاپاجاق.

34:15  اوخ ائلاني اورادا يووا قوراجاق، يومورتلاياجاق، اؤز کؤلگه‌سي آلتيندا بالالار چيخارداجاق. چالاغانلار دا اورادا جوت-جوت ييغيشاجاقلار.

34:16  ربّئن کئتابيني آراشديرين، اوخويون: بونلاردان هچ بئري اَسکئک اولماياجاق، هر بئر دئشي حيوان اؤز جوتونو تاپاجاق، چونکي بو امر ربّئن آغزيندان چيخيب، روحو دا اونلاري ييغيب.

34:17  رب اؤزو اونلار اوچون پوشک آتيب، اَلي ائله اؤلکه‌ني اؤلچوب، اونلارا پايلاييب. اونلار بو اؤلکه‌يه همئشه‌لئک مالئک اولاجاقلار، نسئلدن-نسله بورادا ياشاياجاقلار.

Chapter 35

35:1  صحرا و قورو تورپاق سِوئنه‌جک، چؤل شادلاناجاق، نرگئس کئمي چئچکلَنه‌جک.

35:2  هر يان گول آچاجاق، شادلاناجاق، سِوئنجدن نغمه اوخوياجاق. لوبنانين شؤوکتي، کَرمِل و شارونون جاه-جلالي اونا ورئله‌جک. ائنسانلار ربّئن عئزّتئني، تاريميزين عظمتئني گؤره‌جکلر.

35:3  ضعئف اَل‌لره قووّت ورئن، اَسن دئزلري مؤحکملَندئرئن.

35:4  اورَکلرئنده قورخانلارا ديئن: "جسارتله‌نئن، قورخمايين! باخ، تارينيز ائنتئقام آلماق اوچون گلئر، قئصاص آلماق اوچون گلئر. او گلئب سئزه قورتولوش وره‌جک!"

35:5  او واخت کورلارين گؤزلري آچيلاجاق، کارلارين قولاقلاري آچيلاجاق،

35:6  او واخت آخساقلار مارال کئمي آتيليب دوشه‌جکلر، لال‌لارين دئلي شادليقلا نغمه اوخوياجاق، چونکي صحرادا بولاقلار فيشقيراجاق، قورو تورپاقدا چايلار آخاجاق.

35:7  قيزقين قوم حوووضا، سوسوز تورپاق سو بولاقلارينا چِورئله‌جک. چاقّاللارين راحاتلاديغي يِرلرده، اوت، قاميش و بوتا بئته‌جک.

35:8  اورادا بئر يول اولاجاق، بؤيوک بئر طرئق؛ او يول "موقدّسلئک يولو" آدلاناجاق. نجئس آدام اورادان کِچميه‌جک، او يول، ربّئن يولو ائله گِدن آدام اوچوندور. او يولدا يِرئيَنلر، حتّا آغيلسيز دا اولسالار، يولونو اصلا آزماياجاقلار.

35:9  اورادا شئرلر اولماياجاق، ييرتيجي حيوانلار او يولا چيخماياجاقلار، بونلار اورادا تاپيلماياجاقلار. آنجاق قورتولوش تاپانلار او يوللا گده‌جکلر.

35:10  ربّئن ساتين آلينميش آداملاري قاييداجاق، سِوئنجله نغمه اوخوياراق صحيونا گله‌جک. باشلاريندا ابدی شَنلئک اولاجاق، اونلار سِوئنج و شادليق تاپاجاقلار، کَدَر و قَم-قوصّه يوخ اولاجاق!

Chapter 36

36:1  خئزقئيانين پادشاهليغينين اون دؤردونجو ائلئنده، آشور پادشاهي سَنخِرئب، يهودانين بوتون قالالي شهرلرئنه هوجوم ادئب اونلاري آلدي.

36:2  آشور پادشاهي رَبشاقِه‌ني لاکئشدن بؤيوک قوشونلا اورشلئمه، پادشاه خئزقئيانين يانينا گؤندردي. رَبشاقه پالتار آغاردان زَمئسي يولونا، يوخاري حوووضون سو کمرئنئن يانينا قالخيب اورادا داياندي.

36:3  خئلقئيا اوغلو ساراي ريئسي اِلياقئم، مئرزه شِبنا و آساف اوغلو سالنامه‌چي يوآخ اونون قاباغينا چيخديلار.

36:4  رَبشاقِه اونلارا ددي: "ائندي خئزقئيايا ديئن: آشور پادشاهي، بؤيوک پادشاه بله ديئر: «نه‌يه بِل باغلاييرسان؟

36:5  آيا اِله دوشونورسن کي، بومبوش لافلار موحارئبه اوچون تدبئر و گوج اولا بئلر؟ ائندي سن کئمه بِل باغلاييرسان کي، منئم ضئدّئمه عوصيان ادئبسن؟

36:6  باخ، سن اَزئلمئش قاميش چوبوغونا، يعني مئصئره بِل باغلاييرسان. بئل کي، کئم اونا سؤيکَنسه، اوووجونا باتيب دِشَر. مئصئر پادشاهي فئرعون، اونا بِل باغلايانلارين هاميسي اوچون بله‌دئر.

36:7  بلکه منه دئيه‌سن: ‹بئز تاريميز ربّه بِل باغلاييريق.› مگر بو همئن تاري ديئلدي کي، خئزقئيا اونون پرستئشگاهلاريني و قوربانگاهلاريني آرادان قالديردي؟ مگر يهودالي‌لارا و اورشلئملی‌لره دِمه‌دي کي، ‹فقط بو قوربانگاهين قاباغيندا پرستئش ادئن›؟

36:8  ائندي آغام آشور پادشاهي ائله مَرجه گل: اگر سن ائکي مئن سوواري تاپا بئله‌سن، من سنه او قدر آت وره‌رم.

36:9  بس نجه اده بئلرسن کي، آغامين کئچئک قولو اولان بئر باشچيني دفع ادئب دؤيوش عارابالاري و آتلي‌لار اوچون مئصئره بِل باغلاياسان؟

36:10  مگر ائندي من بو تورپاغي وئران اتمه‌يه ربّئن ائسته‌يي ائله گلمه‌مئشم؟ رب منه ددي: ‹بو اؤلکه‌يه هوجوم آپار و اونو وئران ات.›»"

36:11  اِلياقئم، شِبنا و يوآخ رَبشاقِه‌يه ددئلر: "خاهئش ادئرئک، بو قوللارينلا اَرامي دئلئنده دانيش، بئز بو دئلي باشا دوشوروک. آنجاق دووار اوستونده‌کي خالقين اشئتدئيي يرده بئزئمله يهودي دئلئنده دانيشما."

36:12  لاکئن رَبشاقِه ددي: "مگر آغام منی گؤنده‌رئب کي، بو سؤزلري تَکجه سنئن آغانا و سنه دِيئم، و دووار اوستونده اوتوران بو آداملارا دِمه‌يئم کي، سئزئنله بئرلئکده نجئسلرئني يِيئب، سودوکلرئني ائچه‌جکلر؟"

36:13  او واخت رَبشاقِه دوروب يهودي دئلئنده اوجا سَسله باغيردي: "بؤيوک پادشاهين، آشور پادشاهينين سؤزونو اِشئدئن!

36:14  پادشاه بله ديئر: «قويمايين خئزقئيا سئزي آلداتسين، چونکي او، سئزي قورتارا بئلميه‌جک.

36:15  قويمايين خئزقئيا سئزي تارييا آرخايين ادئب دسئن: ‹رب بئزي قطعن قورتاراجاق و بو شهر آشور پادشاهينا تسلئم ادئلمَيه‌جک.›»

36:16  اونا قولاق آسمايين! چونکي آشور پادشاهي بله ديئر: «منئمله صولح باغلايين و يانيما گلئن. هر کس اؤز اوزوم آغاجينين و اؤز اَنجئر آغاجينين مِيوه‌سئندن يِيئب، اؤز قويوسونون سويوندان ائچسئن.

36:17  سونرا من گلئب سئزي اؤلکه‌نئزه بَنزَر بئر اؤلکه‌يه، بوغدا، تزه شراب، چؤرک و اوزوم باغلاري اولان بئر تورپاغا آپاراجاغام.

36:18  قويمايين خئزقئيا سئزي آزديريب دسئن: ‹رب بئزي قورتاراجاق.› مگر مئلّتلرئن آللاهلاريندان بئري، اؤز اؤلکه‌سئني آشور پادشاهينين اَلئندن قورتاردي؟

36:19  هاني خَماتين و اَرپادين آللاهلاري؟ هاني سِفَروايئمئن آللاهلاري؟ مگر اونلار سامئره‌ني منئم اَلئمدن قورتارديلار؟

36:20  بوتون بو آللاهلاردان هانسي اؤز اؤلکه‌سئني منئم اَلئمدن قورتاردي، کي رب ده اورشلئمي منئم اَلئمدن قورتارا بئلسئن؟»"

36:21  جاماعات ساکئت قالدي و اونون جاوابيندا هچ بئر سؤز دِمه‌دي. چونکي پادشاه امراتمئشدي: "اونا جاواب ورمه‌يئن."

36:22  خئلقئيا اوغلو ساراي ريئسي اِلياقئم، مئرزه شِبنا و آساف اوغلو سالنامه‌چي جيريلميش پالتارلاردا خئزقئيانين يانينا گلئب، رَبشاقِه‌نئن سؤزلرئني اونا چاتديرديلار.

Chapter 37

37:1  پادشاه خئزقئيا بونو اشئدنده پالتاريني جيردي و چولا بورونوب ربّئن معبدئنه گئردي.

37:2  سونرا ساراي ريئسي اِلياقئمي، مئرزه شِبناني و کاهئنلرئن آغساقّال‌لاريني چولا بورونموش حالدا آموص اوغلو پيغمبر اِشَعيانين يانينا گؤنده‌ردي.

37:3  اونلار اِشَعيايا ددئلر: "خئزقئيا بله ديئر: «بو گون دارليق، تحقئر و روسوايچيليق گونودور، چونکي اوشاقلارين دوغولما واختي چاتيب، آنجاق دوغماغا گوج يوخدور.

37:4  بلکه سنئن تارين رب رَبشاقِه‌نئن سؤزلرئني اِشئدَر، او آدامين سؤزلرئني کي، اونون آغاسي آشور پادشاهي اونو گؤنده‌رئب کي، ياشايان تاريني تحقئر اتسئن. تارين رب، اشئتدئيي سؤزلري توبئخ اِدَر؛ اونا گؤره ده قالانلار اوچون دوعا ات.»"

37:5  بلجه خئزقئيا پادشاهين نؤکرلري اِشَعيانين يانينا گلنده

37:6  اِشَعيا اونلارا ددي: "آغانيزا ديئن کي، رب بله ديئر: «اشئتدئيئن آشور پادشاهينين نؤکرلرئنئن سؤزلرئندن کي، اونونلا منه کوفر اتدئلر، قورخما.

37:7  باخ، من اونون ائچئنه اِله بئر روح قوياجاغام کي، بئر خبر اشئدئب اؤز اؤلکه‌سئنه قاييداجاق و اؤز اؤلکه‌سئنده اونو قيلينجلا اؤلدورتدوره‌جيم.»"

37:8  رَبشاقِه گری قاييديب آشور پادشاهينين لئبنا اوستونه هوجوم اتدئيئني گؤردو. چونکي لاکئشدن پادشاهين گری چکئلدئيئني اشئتمئشدي.

37:9  آشور پادشاهينا خبر چاتدي کي، "کوش پادشاهي تئرحاقا سنئن اوستونه ووروشماغا گلئب." او بونو اشئدنده خئزقئيانين يانينا قاصئدلر گؤنده‌رئب ددي:

37:10  "يهودا پادشاهي خئزقئيايا بله ديئن: «قويما بِل باغلاديغين تارين سني آلداديب دسئن: ‹اورشلئم آشور پادشاهين اَلئنه ورئلمَيه‌جک.›»

37:11  باخ، اشئدئبسن کي، آشور پادشاهلاري بوتون اؤلکه‌لره نه ادئبلر، اونلاري نجه وئران ادئبلر. مگر سن قورتولا بئله‌جکسن؟

37:12  آتالاريمين محو اتدئکلري مئلّتلرئن حتّا گوزانين، خارانين، رِصِفئن و تِلَسّاردا اولان عِدِنلی‌لرئن آللاهلاري اونلاري مگر قورتارديلار؟

37:13  هاني خَمات پادشاهي، اَرپاد پادشاهي، لاعئرئن، سِفَروايئمئن پادشاهي، هِنَعئن و عئوّانين پادشاهي؟"»

37:14  خئزقئيا مکتوبو قاصئدلرئن اَلئندن آليب اوخودو. او، ربّئن معبدئنه قالخيب مکتوبو ربّئن قاباغيندا يِره سَردي.

37:15  خئزقئيا ربّه دوعا ادئب ددي:

37:16  "ای کَرّوبلار اوستونه اوتوران قوشونلار ربّی اولان ائسرايئلئن تاريسي! بوتون دونيا پادشاهليقلارينين تاريسي آنجاق سنسن. گؤيو و يري سن ياراديبسان.

37:17  يارب، قولاق ور و اشئت. گؤزلرئني آچ و گؤر، يارب. سَنخِرئبئن بوتون سؤزلرئنه قولاق آس کي، وار اولان تارييا کوفر اتمک اوچون گؤنده‌رئب.

37:18  يارب، دوغرودور؛ آشور پادشاهلاري بوتون اؤلکه‌لري و اونلارين تورپاقلاريني محو ادئبلر،

37:19  آللاهلاريني اودا آتديلار. چونکي اونلار تاري ديئلدئلر، ائنسانلار اونلاري آغاج و داشدان دوزلتمئشدئلر. اونا گؤره ده آرادان گتدئلر.

37:20  ائندي، ای تاريميز رب، يالواريرام، بئزي اونون اَلئندن قورتار و بوتون دونيا پادشاهليقلاري بئلسئنلر کي، رب آنجاق سنسن"

37:21  او واخت آموص اوغلو اِشَعيا خئزقئيايا خبر گؤنده‌رئب ددي: "ائسرايئلئن تاريسي رب بله ديئر: «آشور پادشاهي سَنخِرئب باره‌ده منه دوعا اتدئن.»

37:22  اونون ضئدّئنه ربّئن ددئيي سؤز بودور: «باکئره صحيون قيزي سنه خور باخيب لاغ ادئر، اورشلئم قيزي سنئن آرخانجا باشيني تَرپه‌دئب.

37:23  کئمي سؤيوب کوفر ادئبسن؟ کئمئن ضئدّئنه سَسئني قالديريبسان؟ کئمه لووغاليقلا باخيبسان؟ ائسرايئلئن موقدّسئنه!

37:24  قاصئدلرئنئن واسئطه‌سئله ربّی تحقئر ادئبسن، ديئبسن: ‹چوخلو دؤيوش عارابالاريملا داغلارين زئروه‌سئنه، لوبنانين لاپ اوزاق يِرلرئنه چيخديم. اوجا سئدر آغاجلاريني، گؤزل شام آغاجلاريني کَسدئم، اوزاق تپه‌لرئنه، ثمره‌لي مِشه‌لرئنه گئردئم.

37:25  قويو قازديم و سولاريني ائچدئم، مئصئرئن بوتون چايلاريني آياغيمين داباني ائله قوروتدوم.›

37:26  مگر اشئتمه‌يئبسن کي، من چوخدان بو ائشي حاضيرلاديم، قدئمدن بَري اونون نقشه‌سئني چکدئم. ائندي يرئنه يتئرمئشم کي، سن قالالي شهرلري وئرانه‌لئيه چِوئره‌سن.

37:27  بونا گؤره بو شهرلرئن ساکئنلري ضعئفله‌دئلر، هراسا، خجالته دوشدولر. يِتئشمه‌مئشدن اوّل يانديريلان چؤل اوتو کئمي، گؤيَرتي کئمي، دامدا بؤيومه‌دن يانيب گِدن اوت کئمي اولدولار.

37:28  سنئن اوتوروشونو، گئرئشئنئ-چيخيشيني، منئم ضئدّئمه اولان حئدّتئني بئلئرم.

37:29  منئم ضئدّئمه حئدّتلَندئيئنه گؤره، لووغاليغين قولاغيما چاتديغينا گؤره، حالقامي بورنونا و جئلووومو آغزينا تاخاجاغام، سني گلدئيئن يوللا گری قايتاراجاغام.

37:30  سنئن اوچون علامت بو اولاجاق! بو ائل و گلن ائل اؤزو يِتئشَن باريني ييئن، آمّا اوچونجو ائل اَکئن ادئن، بئچئن ادئن، اوزوم باغلاري ساليب اونلارين بهره‌سئني ييئن.

37:31  يهودا نسلئندن خئلاص اولوب قالانلار، گئنه آشاغي‌يا طرف کؤک سالاجاقلار، يوخارييا طرف بهره وره‌جکلر.

37:32  چونکي قالانلار اورشلئمدن، خئلاص اولانلار صحيون داغيندان چيخاجاقلار. قوشونلار ربّئنئن قِيرَتي بونو اده‌جک.»

37:33  بونا گؤره رب آشور پادشاهي باره‌ده بله ديئر: «او بو شهره گئرميه‌جک، اورايا اوخ آتماياجاق، موقابئلئنه قالخانلا چيخماياجاق، قاباغيندا تورپاق قالاغي قورماياجاق.

37:34  آنجاق گلدئيي يوللا گری قاييداجاق، و بو شهره گئرميه‌جکدئر.» رب بله بويورور.

37:35  «من بو شهري اؤزوم اوچون، قولوم داوودون خاطئرئنه قورويوب خئلاص اده‌جيم.»"

37:36  ربّئن مَله‌يي چيخيب آشور اوردوگاهيندا يوز هشتاد بش مئن نفري قيردي. سحر اِرکَن قالخيب گؤردولر کي، اونلارين هاميسي اؤلدورولوب.

37:37  آشور پادشاهي سَنخِرئب گری چکئلئب گتدي و نِينَوادا قالدي.

37:38  او اؤز آللاهي نئسروکون معبدئنده پرستئش اِدَرکَن، اوغوللاري اَدرَم‌مِلِکله شَرِه‌سِر اونو قيلينجلا اؤلدوردولر و آرارات اؤلکه‌سئنه قاچديلار. سَنخِرئبئن يرئنه اوغلو اِسَرخَدّون پادشاه اولدو.

Chapter 38

38:1  او گونلرده خئزقئيا اؤلومجول ناخوشلادي. آموص اوغلو پيغمبر اِشَعيا اونون يانينا گلئب ددي: "رب بله ديئر: «اِوئنئن ائشلرئنئن تَرتئباتيني ور، چونکي ناخوشلوقدان صاغالماييب اؤله‌جکسن.»"

38:2  خئزقئيا اوزونو دووارا چِوئردي و ربّه دوعا ادئب ددي:

38:3  "يالواريرام، يارب، يادينا سال کي، نجه سنئن حوضوروندا وفالي و کامئل اورَکله ياشاميشام، نجه سنئن گؤزونده ياخشي اولان ائشلر اتمئشم." خئزقئيا آجي-آجي آغلادي.

38:4  او واخت ربّئن سؤزو اِشَعيايا نازئل اولدو:

38:5  "گت و خئزقئيايا دِه کي، آتان داوودون تاريسي رب بله ديئر: «سنئن دوعاني اشئتدئم، گؤز ياشلاريني گؤردوم. باخ، سنئن عؤمرونو اون بش ائل آرتيريرام.

38:6  سني و بو شهري آشور پادشاهينين اَلئندن قورتاراجاغام؛ بو شهري حئفظ اده‌جيم.

38:7  بو ربدن سنه بئر علامتدئر کي، بئله‌سن رب ددئيي سؤزه عمل اده‌جک:

38:8  باخ، اِله اده‌جيم کي، باتان گونشئن کؤلگه‌سي کي، آخازين تئکدئيي پئلّه‌کَنئن اوستونه دوشوب، اون قدم گری چکئلسئن.»" بلجه، گونش اِنمه درجه‌سئنده اون دره‌جه گری چکئلدي.

38:9  بودور يهودا پادشاهي خئزقئيانين يازديغي او زامان کي، ناخوشلاييب سونراسي دا اوندان صاغالميشدي:

38:10  "من اؤز-اؤزومه ددئم: عؤمرومون يارييا چاتديغي زامان، اؤلولر دئيارينين قاپيسيندان کِچمه‌لئيَم؛ حياتيمين قالان ائللرئندن محروم قالمالي‌يام."

38:11  ددئم: "ربّی دئرئلر دئياريندا، بلی، ربّی بئر داها گؤرميه‌جيم. بو دونيادا ياشايانلار آراسيندا آرتيق ائنسان اوزو گؤرميه‌جيم.

38:12  اِوئم چوبان چاديري کئمي داغيلدي، اَلئمدن آليندي. حياتيم دَزگاهدا توخونان ساپلار کئمي دؤور ادئردي، او منی بو دَزگاهدان کَسئر. بئر گونون ائچئنده اجلئمي چاتديريرسان.

38:13  سحره قدر آغريلاردان چيغيرديم، رب آصلان کئمی بوتون سوموکلرئمي قيرير. بئر گونون ائچئنده اجلئمي چاتديريرسان.

38:14  قارانقوش کئمي، دورنا کئمي چيغيريرام، گؤيرچئن کئمی ائنله‌يئرم. گؤيه باخماقدان گؤزلرئم يورولور. ای پروردئگار، ضامئنئم اول، سئتم آلتينا دوشموشم!

38:15  نه دِيئم؟ او منئمله دانيشيب، منه بونو ادن او اؤزودور. جانيما دوشَن بو آجي‌لاردان اؤتري بوتون ائل‌لرئم باره‌ده سرگردان قالاجاغام.

38:16  ای پروردئگار، آداملار بونلارلا ياشاييرلار، منئم روحومون حياتي بونلارين ائچئنده‌دئر. سالاماتليغي منه دؤندَر، ياشات مَني!

38:17  چکدئيئم او بؤيوک مشقّت منئم خِيرئمه اولدو. جا‌نيمي هِچلئک قويوسونا دوشمکدن قورتاران سَسسن، چونکي بوتون گوناهلاريمي آرخانا آتيبسان.

38:18  چونکي اؤلولر دئياري سنه شوکور اده بئلمز، اؤلوم سنه حمدلر دِمَز، قبئره دوشَنلر سنئن وفادارليغينا اومئد باغلايا بئلمز.

38:19  بو گون سنه اتدئيئم کئمي، دئرئلر، فقط دئرئلر سنه شوکور اِدَرلر. آتالار سنئن وفادارليغيني اؤولادلارينا تانيتديريرلار.

38:20  رب قطعن منه قورتولوش وره‌جک، عؤمروموز بويو ربّئن معبدئنده تِلّي سازلارلا، سنه نغمه‌لر چالاجاغيق."

38:21  اِشَعيا دمئشدي: "بئر انجئر کونده‌سي گؤتورون و چئبانين اوستونه قويون کي، پادشاه ساغالسين."

38:22  سونرا خئزقئيا دمئشدي: "ربّئن معبدئنه قالخماغيم اوچون علامت نه‌دئر؟"

Chapter 39

39:1  او زامان بابئل پادشاهي بَلَدان اوغلو مِرودَک‌بَلَدان، خئزقئيايا مکتوبلار و هدئيّه‌لر‌ گؤنده‌ردي، چونکي خئزقئيانين ناخوشلاديغيني و ساغالديغيني اشئتمئشدي.

39:2  بونلار خئزقئياني سِوئندئردي. او، خزئنه‌سئنده اولان شيلري يعني قيزيل-گوموشو، عطرئيّاتي، قئيمتلي ياغلاري، سئلاح آنبارينداکي بوتون اشيالاري اِلچئلره گؤرستدي. خئزقئيانين ساراييندا و بوتون پادشاهليغيندا اونلارا گؤرستمه‌دئيي بئر شي قالمادي.

39:3  او واخت اِشَعيا پيغمبر خئزقئيا پادشاهين يانينا گلئب، اوندان سوروشدو: "بو آداملار نه ددئلر؟ سنئن يانينا هارادان گلدئلر؟" خئزقئيا جاواب وردی: "اوزاق بئر اؤلکه‌دن، بابئلدن گلئبلر."

39:4  اِشَعيا ددي: "سنئن ساراييندا نه گؤروبلر؟" خئزقئيا جاواب وردی: "ساراييمدا اولان بوتون شيلري گؤروبلر. خزئنه‌لرئمده، اونلارا گؤرستمه‌دئيئم بئر شي قالمادي."

39:5  او واخت اِشَعيا خئزقئيايا ددي: "قوشونلار ربّئن سؤزونو اشئت:

39:6  «باخ، اِله گونلر گله‌جک کي، سنئن ساراييندا اولان هر شي و آتالارينين بو گونه قدر ييغديقلاري شيلر بابئله آپاريلاجاق، هچ نه قالماياجاق.» رب ديئر.

39:7  "سنئن نسلئندن اولان و سندن عمله گلن بعضی اوغوللاريني گؤتوروب آپاراجاقلار و اونلار بابئل پادشاهينين ساراييندا خاجه ادئله‌جکلر."

39:8  سونرا خئزقئيا اِشَعيايا ددي: "ددئيئن ربّئن سؤزو ياخشي‌دير." چونکي دوشونوردو: "هچ اولماسا منئم دؤورومده صولح و اَمئن-آمانليق اولاجاق."

Chapter 40

40:1  تارينيز ديئر: "تسلّی ورئن خالقيما، تسلّی ورئن!

40:2  اورشلئمه سؤزلر دانيشين! اونا ديئن کي، اسئرلئک دؤورون باشا چاتيب، تقصئرلرئنئن جزاسي ورئلئب، بوتون گوناهلارينا گؤره ربّئن اَلئندن ائکي‌قات جزا آليب."

40:3  بئر نفرئن نئدا سَسي گلئر: "صحرادا ربّئن يولونو حاضيرلايين، چؤلده تاريميزين کِچه‌جيي يِرلري هامار ادئن.

40:4  قوي هر دره اوجالديلسين، هر داغ و تپه آشاغي اِندئرئلسئن، قوي يولداکي اَيِرئلئکلر دوزَلسئن، کَله-کؤتور يِرلر هامار ادئلسئن.

40:5  او واخت ربّئن شؤوکتي آشکار اولوناجاق، بوتون بشر بونو بئرلئکده گؤره‌جک. چونکي ربّئن آغزي دانيشيب."

40:6  سَس ديئر: "نئدا ات!" جاواب وردی: "نه‌يي نئدا اِدئم؟" "بوتون بشر اوتا بَنزَر، اونلارين بوتون گؤزل‌لئيي چؤل چئچه‌يي کئمئدئر.

40:7  رَب، نفسئني اونلارين اوستونه اوفورَنده، اوت قورويار، چئچک سولار، حقئقتن، بو خالق اوتا اوخشار.

40:8  اوت قورويار، چئچک سولار، آمّا تاريميزين سؤزو ابده کئمي قالار."

40:9  ای صحيون، ياخشي خبرلري موژده گتئرن، اوجا داغا چيخ! ای اورشلئم، ياخشي خبرلري موژده گتئرن، اوجالت سَسئني، جار چک، قالدير سَسئني، قورخما. يهودا شهرلرئنه دِه: "بودور تارينيز!"

40:10  باخ، پروردئگار رب قودرتله گله‌جک، او، قودرتله حؤکم سوره‌جک، باخ، پاداشي اونونلادير، غرامتي قاباغيندادير.

40:11  او اؤز سوروسونو چوبان کئمي اوتاراجاق، قوزولاري قوجاغينا آلاجاق، باغريندا داشيياجاق، اَمزئکلی‌لري ياواش سوره‌جک.

40:12  کئم دهنزلري اووجو ائله، گؤيلري ده قاريشي ائله اؤلچوب؟ يِرئن تورپاغيني اؤلچو ائله، داغلاري قاپانلا، تپه‌لري ده تَره‌زي ائله چکئب؟

40:13  ربّئن روحونو کئم هئدايت ادئب؟ يا دا کئم اونا مصلحتچئسي اولاراق، مصلحت ورئب؟

40:14  او کئمدن مصلحت آليب و کئم اونا فهم ورئب؟ کئم اونا عدالت يولونو گؤرسه‌دئب، معرئفت اؤيره‌دئب؟ کئمدئر اونا فهم يولونو آنلادان؟

40:15  باخ، مئلّتلر وِدره‌ده بئر دامجي سو کئمئدئر، تَره‌زئده توز ذرّه‌سي کئمي ساييلار، باخ، جزئره‌لري ده توز کئمي گؤيه سووورور.

40:16  قوربانلاري يانديرماق اوچون لوبنان مِشه‌سي کئفايت ديئل، يانديرما قوربانلار اوچون اوراداکي حيوانلار بس ديئل.

40:17  ربّئن قاباغيندا بوتون مئلّتلر هچ بئر شيدئر، هچ بئر شيدن ده آشاغي‌دير، هچ نه‌يه دَيمَز.

40:18  بس اوندا تاريني کئمه بَنزه‌ده‌جکسن؟ اونو نه‌يه اوخشاداجاقسان؟

40:19  لاکئن بوته باخ، بئر صَنَتگَر اونو تؤکور، اوستونو زرگر قيزيللا اؤرتور، گوموش زنجئرلرله ده اونو بَزه‌يئر!

40:20  بله تقدئمي گتئره بئلمه‌يَن يوخسول آدام چورومه‌يَن بئر آغاج سِچئر، اؤزونه اوستا بئر صَنَتگَر تاپير کي، يِرئنده مؤحکم دوران بئر بوت دوزلتسئن.

40:21  مگر بئلمئرسئنئز؟ مگر اشئتمه‌يئبسئنئز؟ مگر باشلانيشدان بَري بونو سئزه بئلدئرمه‌يئبلر؟ دونيانين بونؤوره‌سي قويولدوقدان بَري مگر بونو درک اتمه‌يئبسئنئز؟

40:22  ربدئر کي، يِر قوبّه‌سئنئن يوخاريسيندا اوتورور، يِر اوزونده ياشايانلار چَيئرتکه کئمئدئرلر. گؤيلري پرده کئمي آچير، اونلاري ياشاماق اوچون چارداق کئمي آچير.

40:23  ربدئر کي، اَمئرلري هچ ادئر، دونيانين حؤکمدارلاريني هِچه اِندئرئر.

40:24  اونلار تزه اَکئلمئش، تزه سَپئلمئش، و تزه کؤک سالميشديرلار، گؤوده‌لري تزه‌جه کؤک سالميش آغاجلارا بَنزَر. ربّئن نفسي اونلاري قورودار، طوفان اونلاري سامان چؤپو کئمي سووورار.

40:25  "بس منی اوندا کئمه بَنزه‌دئرسئنئز کي، من اونا تاي اولوم؟" ديئر موقدّس اولان.

40:26  باشينيزي گؤيلره قالديرين، گؤرون بو اولدوزلاري کئم ياراديب؟ او کي، اونلارين فوجلاريني سيرايا دوزوب چيخاردير، اونلارين هاميسيني آدلاري ائله چاغيرير. قودرتئنئن عظمتئنه گؤره، گوجونون قودرتئنه گؤره، اونلاردان هچ بئري ده اَسکئک اولماز.

40:27  ای يعقوب نسلي، ای ائسرايئل، نه اوچون ديئرسن: "رب باشيما گلنلري گؤرمور، تاريم منئم حاقّيم اولان ائنصافي گؤزوندن قاچيردير؟"

40:28  مگر سن بئلمئرسن؟ مگر اشئتمه‌يئبسن؟ ابدی تاري، رب، بوتون دونياني يارادان، نه يورولور، نه ده طاقتدن دوشور، اونون آغلي درک ادئلمَزدئر.

40:29  او، يورغونلارا گوج وِرَر، طاقتسئزلرئن قووّتئني آرتيرار.

40:30  حتّا جاوانلار يورولارلار، طاقتدن دوشَرلر، ائگئدلر ده ييخيلارلار.

40:31  لاکئن ربّه اومئد باغلايانلار تزه قووّت آلارلار، قاناد آچيب قارتال کئمي اوجالارا اوچارلار، قاچاندا طاقتدن دوشمَزلر، يول گدئب يورولمازلار.

Chapter 41

41:1  رب ديئر: "ساکئت اولون حوضورومدا، ای ساحئللر! قوي خالقلار تزه گوج آلسينلار، قوي ياخينلاشسينلار، قوي دانيشسينلار، قوي حؤکم اوچون بئرلئکده ييغيشاق.

41:2  کئم شرقدن او آدامي قالديريب کي، صالحلئکده اونو خئدمت اوچون چاغيريب؟ مئلّتلري اونون ائختئيارينا قويور، پادشاهلاري موطئع ادئر. او اؤز قيلينجي ائله اونلاري تورپاغين توزونا چِوئرئر، کاماني ائله گؤيه سوورولان سامانا دؤنده‌رئر.

41:3  او اونلاري تعقئب ادئر، آياقلاريني باسماديغي يولدان صاغ-سالامات کچئر.

41:4  بونلاري کئم ادئب، کئم تاماملاييب؟ ازلدن بَري نسئل‌لري چاغيران کئمدئر؟ من، رب، بئرئنجئيم و آخيرينکيلارلا دا من اولاجاغام."

41:5  ساحئل‌لر بونو گؤروب قورخورلار، دونيانين اوجقار يِرلري لرزه‌يه دوشور. اونلار ياخينلاشيلار، گلئبلر،

41:6  هر کس قونشوسونا کؤمک ادئر، قارداشينا "جسور اول!" ديئر.

41:7  صَنَتگَر زرگري اورَکلَندئرئر، دمئري چکوجلا دوزله‌يَن، سنداني وورانا اورَک ورئر، "لَحئم ياخشي اولدو" ديئر. ميخلاري بَرکئدئر، اِله کي، بوت يِرئندن لاخلاماسين.

41:8  لاکئن سن، ای قولوم ائسرايئل، سِچدئيئم يعقوب نسلي، دوستوم ائبراهئمئن اؤولادلاري!

41:9  سني دونيانين اوجقار يِرلرئندن ييغميشام، لاپ اوزاق يِرلردن سَسله‌مئشم، دمئشم: "سن منئم قولومسان، سني سِچمئشم، ردّ اتمه‌مئشم."

41:10  قورخما، چونکي من سنئنله‌يم، دهشته گلمه، چونکي تارين منم. سني قووّتلَندئره‌جيم، سنه دوغرودان کؤمک اده‌جيم. صالح صاغ اَلئمله دوغرودان سني توتاجاغام.

41:11  باخ، سنه حئرصلَنَنلرئن هاميسي خجالت چکئب بي‌آبير اولاجاقلار، سنه ضئدّ چيخانلار هِچه چيخيب تلف اولاجاقلار.

41:12  سنئنله ساواشانلاري آختاراجاقسان، آمّا تاپا بئلميه‌جکسن، سنئنله ووروشانلار هچ اولاجاقلار، تاپيلماياجاقلار.

41:13  چونکي تارين رب منم، او کي، سنئن صاغ اَلئندن توتوب او کي، سنه "قورخما، سنه کؤمک اده‌جيم" ديئر.

41:14  "ای تورپاق قوردو اولان يعقوب نسلي، ای ائسرايئل اَهلي، قورخما! رب اعلان ادئر: "سنه کؤمک اده‌جيم. سني ساتين آليب قورتاران ائسرايئلئن موقدّسي‌دئر.

41:15  باخ، سني تزه، دئشلري ائتي خرمن دؤيَني اتمئشم. سن داغلاري دؤيوب اَزه‌جکسن، تپه‌لري سامان چؤپو کئمي سوووراجاقسان.

41:16  سن اونلاري سوووراجاقسان، يِل ده اونلاري آپاراجاق، طوفان اونلاري داغيداجاق، آمّا سن ربده سِوئنه‌جکسن، ائسرايئلئن موقدّسي ائله فخر اده‌جکسن.

41:17  مظلوملار و مؤحتاجلار سو آختاريرلار، آمّا تاپميرلار، دئل‌لري سوسوزلوقدان قورويور. من، رب، اونلارا جاواب وره‌جيم. من، ائسرايئلئن تاريسي، اونلاري ترک اتميه‌جيم.

41:18  لوت تپه‌لرئن باشيندا چايلار آچاجاغام، دره‌لرئن اورتاسيندا سو بولاقلاري آچاجاغام. صحراني گؤلمَچه‌يه، قوراق تورپاغي سو چشمه‌لرئنه چِوئره‌جيم.

41:19  صحرادا سئدر آغاجي، اَقاقئيا، مَرسئن و زيتون آغاجي اَکه‌جيم. قورو تورپاقدا شام، چئنار و سرو آغاجيني بئرلئکده سالاجاغام.

41:20  اِله کي، ائنسانلار گؤروب بئلسئنلر، فئکئرله‌شئب باشا دوشسونلر کي، بونو ادن ربّئن اَلئدئر، بونو يارادان ائسرايئلئن موقدّسي‌دئر.

41:21  رب ديئر: "داعوانيزي آچين، لاپ قووّتلي موباحئثه‌‌لرئنئزي ادئن." بونو يعقوبون پادشاهي ديئر.

41:22  بوتلرئنئزي گتئرئن و قوي اونلار نه اولاجاغيني بئزه بئلدئرسئنلر، اولوب کِچَنلري بئزه نقل اتسئنلر، اِله کي، اونلاري درئندن دوشونوب آخيريني اؤيرَنَک. و يا گله‌جيي بئزه خبر ورسئنلر.

41:23  ای بوتلر، بوندان سونرا باش ورن حادئثه‌لردن بئزه دانيشين، اِله کي، سئزئن تاري اولدوغونوزو بئلک! دوغرودان دا ياخشيليق يا دا پئسلئک ادئن کي، هاميميز قورخوب واهئمه‌يه دوشَک.

41:24  باخ، سئز هِچنه‌سئنئز، عمل‌لرئنئز ده هِچدئر. سئزي سِچَن ائيرنجدئر!

41:25  شئمالدان بئرئني قالديرميشام و گلئب؛ او، گونشئن چيخديغي يردن آديمي چيغيراجاق. دولوسچو گئلي تاپدالايان کئمي، او، حؤکمدارلاري پالچيق کئمي تاپدالاياجاق.

41:26  کئم بونو باشلانيشدان اعلان ادئب کي، بئز بئلک، يا دا قاباقکي زامانلاردان کي، بئز "او حاقلي‌دير" دئيک؟ قطعن بونو اعلان ادن يوخ ائدي، قطعن بونو بئلدئرن يوخ ائدي، قطعن سؤزلرئزي اشئدن ده يوخ ائدي.

41:27  من قاباقلار صحيونا "باخ گلئرلر" ددئم. اورشلئمه "موژده گتئره‌ني گؤنده‌رئرم" ددئم.

41:28  لاکئن باخديغيم زامان، هچ کئم يوخدور، آرالاريندا هچ مصلحت ورن يوخدور کي، سوروشدوغومدا جاواب وره‌بئلسئن.

41:29  باخ، هاميسي دَيَرسئزدئرلر، اتدئکلري ائشلر ده هِچدئر، ائنسانلارين تؤکمه بوتلري فقط يِلدئر، بوشلوقدور.

Chapter 42

42:1  باخ، منئم ساخلاديغيم، جانيم ائسته‌يَن سِچئلمئش قولوم! من اؤز روحومو اونون اوستونه قويموشام. او، مئلّتلره عدالت گتئره‌جک.

42:2  چيغيرماياجاق، سَسئني قالديرماياجاق، کوچه‌لرده سَسي اِشئدئلميه‌جک.

42:3  اَزئلمئش قاميشي قيرماياجاق، کؤزه‌رن پئلته‌ني سؤندورميه‌جک. او، عدالتي صداقتله ياياجاق.

42:4  او، يِر اوزونده عدالتي قوراياجاق، طاقتدن دوشميه‌جک، اَزئلميه‌جک، ساحئل‌نشئن خالقلار اونون قانونونا اومئد باغلاياجاقلار.

42:5  گؤيلري ياراديب اونلاري سَرَن، يري و اونون اوستونده‌کئلري دوزه‌لدن، دونياداکي آداملارا نفس ورن، يِر اوزونده گزن ائنسانلارا روح ورن، رب تاري بله ديئر:

42:6  "من رَبّم، من سني صالحلئيئمده چاغيرميشام، سني اَلئندن توتاجاغام، سني حئفظ اده‌جيم، سني خالق اوچون بئر عهد اده‌جيم، مئلّتلر اوچون بئر نور اده‌جيم کي،

42:7  کورلارين گؤزلرئني آچاسان، زئنداندان محبوسلاري، ظولمتده ياشايانلاري حبسخانادان آزاد اده‌سن.

42:8  من رَبّم، آديم بودور. اؤز شؤوکتئمي هچ کئمه ورمه‌رم، حمدلرئمي اويما بوتلره ورمه‌رم.

42:9  باخ، قاباقکي شيلر حياتا کچدي، ائندي من تزه شيلري خبر ورئرم، اونلار يِتئشمه‌مئشدن سئزه اعلان ادئرم."

42:10  ای دهنز سيّاحلاري، دهنزده‌کي بوتون جانلي‌لار، ساحئل‌نشئن خالقلار و اورادا ياشايانلار، ربّه تزه بئر نغمه اوخويون! دونيانين لاپ اوجقار يِرلرئندن اونا حمدلر اوخويون!

42:11  قوي صحرا و اوراداکي شهرلر، قِدار خالقي ياشايان کَندلر سَسلرئني اوجالتسينلار، قوي سِلَع ساکئنلري اوجادان اوخوسونلار، قوي داغلارين تپه‌سئندن شادليق هارايي چکسئنلر.

42:12  قوي اونلار ربّه عئزّت ورسئنلر، ساحئل‌لرده اونون حمدئني اعلان اتسئنلر.

42:13  رب جسور ائگئد کئمي چيخاجاق، جنگاور کئمي قيرته گله‌جک، چيغيريب دؤيوش نعره‌سي چکه‌جک، دوشمنلرئني مغلوب اده‌جک.

42:14  رب ديئر: "چوخ واختدير کي، دئنمئرم، ساکئت قالميشام، قاباغيمي آلميشام، آمّا ائندي دوغوش آغريسي چکن آرواد کئمي قيشقيراجاغام، تنگنفس اولوب زاريياجاغام.

42:15  داغلاري، تپه‌لري داغيداجاغام، بوتون ياشيل‌ليقلاريني قوروداجاغام، چايلاري ساحئل‌لره چِوئره‌جيم، حوووضلاري قوروداجاغام.

42:16  کورلاري تانيماديقلاري يوللا آپاراجاغام، اونلارا بئلمه‌دئکلري يوللاردا بَلَد اولاجاغام. قارانليغي قاباقلاريندا ائشيغا، کَله-کؤتور يوللاري هامارليغا چِوئره‌جيم. بونلار او شيلردئر کي، اونلار اوچون اده‌جيم، اونلاري ترک اتميه‌جيم."

42:17  بوتلره بِل باغلايانلار، تؤکمه بوتلره "سئزسئز آللاهلاريميز" دئيَنلر، گری قايتاريليب بؤيوک بئر خجالت آلتيندا قالاجاقلار.

42:18  ای کارلار، اِشئدئن! ای کورلار، باخين، بلکه گؤره‌سئنئز!

42:19  قولومدان باشقا کور اولان مگر وار؟ گؤنده‌ردئيئم قاصئد باشقا کار اولان مگر وار؟ منئمله باريش ائچئنده اولاندان باشقا، يا دا ربّئن قولوندان باشقا کور اولان مگر وار؟

42:20  سئز چوخ شيلر گؤردونوز، آمّا نظره آلماييبسينيز، قولاقلارينيز آچيقدير، لاکئن هچ بئري اشئتمئر!"

42:21  رب اؤز صالحلئيئنئن خاطئرئنه خوشلادي کي، قانونو بؤيوک و شؤوکتلي اتسئن.

42:22  آمّا بو قارت اولونموش و سويولموش بئر خالقدير. هاميسي ماغارالاردا تله‌يه دوشوب، زئندانلاردا گئزله‌دئلئب. اونلار شئکار اولوبلار و قورتارانلاري يوخدور. اونلاري قارت ادئرلر، "گری قايتارين" دئين يوخدور.

42:23  سئزدن کئم بونا قولاق آساجاق، بوندان سونرا کئم قولاق آسيب اِشئده‌جک؟

42:24  يعقوب نسلئني کئم قارت اولونماغا قويدو؟ ائسرايئلي سويغونچولار اَلئنه کئم وردي؟ مگر رب ديئل کي، اونون ضئدّئنه گوناه اتدئلر، يوللاري ائله گتمک ائستمه‌دئلر، قانونوندان ائطاعت اتمه‌دئلر؟

42:25  بونا گؤره آلوولو قضبئني، دؤيوشون شئدّتئني اوستلرئنه ياغديردي. اود اونلاري دؤوره‌يه آلدي، آمّا اونلار آنلاماديلار، اونلاري يانديردي، آمّا اونا جئدّي فئکئر ورمه‌دئلر.

Chapter 43

43:1  آمّا ائندي، ای يعقوب، سني يارادان رب، ای ائسرايئل، سنه شکئل ورن رب بله ديئر: "قورخما، چونکي من سني ساتين آليب قورتارميشام، سني آدينلا چاغيرميشام، سن منئمسن!

43:2  درئن سولاردان کِچسن بِله، من سنئنله اولاجاغام، چايلاردان کچنده باتماياجاقسان، اودون ائچئندن کچنده بِله، يانماياجاقسان، آلوو سني محو اتميه‌جک.

43:3  چونکي من سنئن تارين ربّم، ائسرايئلئن موقدّسي‌يَم، سنئن خئلاصکارينام. مئصئري سنئن اوچون فئديه، کوش و سِبا اؤلکه‌لرئني سنئن آزادليغينين عوضئنه ورمئشم.

43:4  سن منئم نظرئمده دَيَرلي اولدوغونا گؤره، چوخ عزئز اولدوغونا گؤره، سني سِودئيئم اوچون، سنئن عوضئنه باشقا آداملاري، حياتين اوچون باشقا مئلّتلري وره‌جيم.

43:5  قورخما، چونکي من سنئنله‌يم، نسلئندن اولانلاري شرقدن گتئره‌جيم، سني قربدن بئر يِره ييغاجاغام.

43:6  شئمالا «اونلاري ور» دئيه‌جيم، جنوبا «اونلاري ساخلاما» دئيه‌جيم. اوغوللاريمي اوزاقلاردان، قيزلاريمي دونيانين اوجقار يِرلرئندن گتئر.

43:7  منئم آديملا چاغيريلان هر ائنساني، عئزّتئم اوچون ياراتديغيم، بلی، شکئل وردئيئم، ياراتديغيم هر بئر آدامي گتئر."

43:8  گؤزلري اولان حالدا کور خالقي، قولاقلاري اولان حالدا کار خالقي گتئر.

43:9  بوتون مئلّتلر بئر يِره ييغيليبلار، اِله کي، خالقلار توپلانسينلار. بونلاردان کئم بو سؤزو اعلان اده بئلر؟ اولوب-کچنلري بئزه کئم بئلدئرر؟ قوي شاهئدلرئني ائره‌لي گتئرئب برائت قازانسينلار، يا دا اشئدئب دسئنلر: "بو دوزدور."

43:10  رب اعلان ادئر: "سئزسئنئز منئم شاهئدلرئم، سِچدئيئم قولوم، اِله کي، منی تاني‌ييب، منه ائناناسينيز، منئم او اولدوغومو آنلاياسينيز. مندن اوّل هچ تاري مؤوجود اولماييب، مندن سونرا دا اولماياجاق.

43:11  منم رب، فقط منم، مندن باشقا قورتاريجي يوخدور.

43:12  منم کي، اعلان اتمئشم، قورتارميشام، بئلدئرمئشم، آرانيزدا هچ قرئب آللاه يوخ ائدي. سئزسئنئز شاهئدلرئم." رب اعلان ادئر، "تاري منم.

43:13  حتّا ازلدن بَري من اويام، منئم اَلئمدن قورتاران يوخدور. من بئر شي ادنده بونا کئم مانع اول بئلر؟"

43:14  سئزي ساتين آلان، ائسرايئلئن موقدّسي، رب بله ديئر: "سئزئن خاطئرئنئزه من بابئله قوشون گؤنده‌ره‌جيم. کَلدانئلري فخر اتدئکلري گَمئلرله قاچقينلارا دؤنده‌ره‌جيم.

43:15  من ربّم، سئزئن موقدّسئنئز اولان، ائسرايئلي يارادان، سئزئن پادشاه."

43:16  رب بله ديئر، او کي، دهنزده يول و گوجلو سولاردا طرئق آچير،

43:17  آتلارلا دؤيوش عارابا‌لاريني، ائگئد جنگاورلري ائله قوشونو بئرلئکده يولا چيخاردير؛ "اونلار ييخيليبلار، قالخا بئلمئرلر، باسديريليب، پئلته کئمي سؤندورولوبلر.

43:18  اوّلکي شيلري يادا سالمايين، کؤهنه حادئثه‌لر باره‌سئنده دوشونمه‌يئن.

43:19  باخ، من تزه بئر شي اده‌جيم، ائندي او باش وره‌جک، مگر سئز بونو باشا دوشميه‌جکسئنئز؟ بلی، من چؤللوکده يول سالاجاغام، قورو تورپاقدا چايلار ياراداجاغام.

43:20  چؤلون حيوانلاري، چاقّاللار و بايقوشلار منه عئزّت وره‌جکلر، چونکي صحرادا سو ورمئشم، کؤشَنده چايلار آچميشام کي، سِچدئيئم خالقا سو ورئم.

43:21  او خالق کي، اونا اؤزوم اوچون شکئل وردئم؛ منه حمدلر گتئرمک اوچون.

43:22  لاکئن سن، ای يعقوب نسلي، منئم آديمي چاغيرماييبسان، ای ائسرايئل، مندن بِزئبسن.

43:23  يانديرما قورباني اوچون منه قويونلاريندان گتئرمه‌يئبسن، قوربانلارينلا منه حؤرمت اتمه‌يئبسن. سنه تقدئملره گؤره يوک اولماميشام، کوندور تقدئملري ائله ده سني بِزدئرمه‌مئشم.

43:24  منئم اوچون پوللا گؤزل عطئرلي قاميش آلماييبسان، قوربانلارينين پئيي ائله منی دويدورماييبسان. عکسئنه، سن گوناهلاريني منه يوکله‌يئبسن، تقصئرلرئنله منی يوروبسان.

43:25  منم، بلی منم کي، اؤز خاطئرئمه گؤره تقصئرلرئني سئلئرَم، و گوناهلاريني دا يادا سالمارام.

43:26  ياديما سال، گل داعواميزي بئربئرمئزله بحث اِدَک، داعواني آچيقلا کي، بلکه بَرائت قازاناسان.

43:27  ائلک جَدّئن گوناها باتدي، سنئن طرفئندن دانيشانلار دا منه عاصي اولدولار.

43:28  بونا گؤره ده من، عئبادتگاهين رهبرلرئني نجئسلئيه وادار اده‌جيم. يعقوب نسلئني قيرغينا، ائسرايئلي ده رذالته محکوم اده‌جيم.

Chapter 44

44:1  ائندي آمّا، ای قولوم يعقوب نسلي، سِچدئيئم ائسرايئل، قولاق آس!

44:2  سني يارادان، آنا بطنئنده قورولوش ورن، ائمدادينا چاتاجاق اولان رب بله ديئر: "قورخما، ای قولوم، يعقوب نسلي، ای سِچدئيئم يِشورون!

44:3  چونکي سوسوزلاميش تورپاغي سولاياجاغام، قورو تورپاغا آرخلار آخيداجاغام، اؤولادلارينا روحومو تؤکه‌جيم، نسلئنه برکتئمي وره‌جيم.

44:4  اونلار اوتلار آراسيندا، آخار سولار کناريندا، سؤيود آغاجلاري کئمي بوي آتاجاقلار.

44:5  بئري «من ربّئنکئيَم» دئيه‌جک، او بئرئسي يعقوبون آدي ائله چاغيريلاجاق. آيري بئري ده اَلئنه «ربّئنکئيَم» يازاجاق، ائسرايئلئن آديني اؤزونه سوي آدي اولاراق گؤتوره‌جک.»"

44:6  رب، ائسرايئلئن پادشاهي، اونون ساتين آلاني، قوشونلارين ربّی بله ديئر: "من بئرئنجئيَم، من آخيرينجي‌يام، مندن باشقا تاري يوخدور.

44:7  منئم کئمي کئم وار؟ قوي خبر ورسئن، اعلان اتسئن؛ قدئم خالقيمي ياراتديغيمدان بَري اولوب- کچنلري، بوندان سونرا اولدوقلاريني قوي دا‌نيشيب نقل اتسئن، بلی، گله‌جک حادئثه‌لري بئلدئرئن!

44:8  قورخمايين، دهشته گلمه‌يئن، مگر بونو سئزه ازلدن بَري خبر ورئب اعلان اتمه‌دئم؟ سئز منئم شاهئدلرئمئزسئنئز! مندن باشقا مگر تاري وار؟ مگر باشقا بئر قايا وار؟ هِج بئرنئي تانيميرام."

44:9  بوتون بوتلري دوزه‌لدن آداملار باطئلدئرلر، و دَيَرلي اشيالاردان هچ بئر خيئر يوخدور. بوتلر، اونلارا قوللوق ادنلرئن شاهئدلري‌دئرلر. هچ بئر شي گؤرمورلر، هچ بئر شي بئلمئرلر. اونا گؤره ده اونلار خجالت آلتيندا قالاجاقلار.

44:10  کئم ائستر فايدا ورمه‌ين بئر آللاه، يا دا تؤکمه بئر بوت ياراتسين؟

44:11  باخ، بونلارين بوتون يولداشلاري خجالت آلتيندا قالاجاقلار، چونکي صَنَتگَرلرئن اؤزلري ده آنجاق ائنسانديرلار. قوي اونلارين هاميسي ييغيلسينلار، قوي هاميسي دورسونلار، قوي هاميسي دهشته دوشسونلر، قوي هاميسي بئرلئکده خجالت چکسئنلر.

44:12  دمئرچي آلَتئني گؤتوروب کؤمور اود اوستونده چاليشير، چکوجلا دمئره شکئل ورئر و گوجلو اَلي ائله اوستونده ائشله‌يئر. او، آج دا اولور و طاقتدن دوشور؛ سوسوز قاليب اوزولور.

44:13  دولگَر ائپله اؤلچور، آغاجي تاباشيرلا نئشانلايير. رَنده‌له‌يئر، ائسته‌نئلَن شکئله سالير، پَرگارلا دائره چکئر، ائنسان صورتي ورئر، ائنسان گؤزل‌لئيئنه بَنزَر دوزَلده‌رک، بئر بوت يارادير کي، اِوئنه قويسون.

44:14  ائنسان اؤزو اوچون سئدر آغاجلاري کَسئر، مِشه‌نئن آغاجلاريندان اؤزونه بئر شام آغاجي يا دا پاليد آغاجي سِچئر. شئمشاد آغاجي اَکئر و ياغيش اونو بؤيودور.

44:15  سونرا آغاج اودون يرئنه ائشله‌نئر. ائنسان اونلاردان بئر آزيني گؤتوروب يانديرير و اونونلا اؤزونو قيزديرير. سوبا دا يانديريب چؤرک پئشئرئر. هم ده اؤزونه بئر تاري دوزَلدئر و اونو پرستئش ادئر. اويما بئر بوت دوزَلدئر و اونون قاباغيندا يِره سَرئلئر.

44:16  اودونون ياريسيني اوددا يانديرير؛ آلوووندا اَت قيزاردير و قارنيني دويوراراق، اؤزونو ده قيزديريب ديئر: "آها، قيزديم، آلووون ائستئسئني حئسّ اتدئم!"

44:17  لاکئن آغاجين قاليغيندان اؤزونه تاري، بئر اويما بوت دوزَلدئر. اونون قاباغيندا يِره سَرئلئر و پرستئش ادئر؛ بو بوته دوعا ادئب يالوارير: "منی خئلاص ات، چونکي سنسن منئم تاريم!"

44:18  اونلار بئلمئرلر، درک اتمئرلر، چونکي گؤزلري ده، اورَکلري ده اِله باغلي‌دير کي، گؤره بئلمئرلر، آنلايا دا بئلمئرلر.

44:19  هچ بئري يادينا سالمير، فهم و آنلاغي دا يوخدور کي، دسئن: "اودونون ياريسيني يانديرديم، کؤمورونون اوستونده ده چؤرک پئشئردئم. اَت قيزارديرام، يِيئرَم. ائندي آيا اودونون قاليغيندان نجئس بئر شي دوزه‌لدئب بئر پارچا تاختانين قاباغيندا يِره سَرئلئم؟!"

44:20  بو، کول يمک کئمي دئر؛ آلدانميش اورَک اونو يولدان ساپديرير. جانيني قورتارا بئلمئر، دئيه ده بئلمئر: "صاغ اَلئمده‌‌کي مگر يالان ديئل؟"

44:21  "ای يعقوب نسلي، ای ائسرايئل، بو شيلري خاطيرلا، چونکي سن قولومسان؛ من سنه شکئل وردئم، سن منئم قولومسان، سني ياددان چيخارتمارام، ای ائسرايئل!

44:22  تقصئرلرئني قارا بولود کئمي، گوناهلاريني دا آغير دومان کئمي سئلمئشم. منه طرف دؤن، چونکي من سني ساتين آلميشام."

44:23  شادليقدان هاراي چکئن، ای گؤيلر، چونکي بونو ادن ربدئر! سِوئنجله ترنّوم ادئن، ای يِرئن درئنلئکلري، ای داغلار، ای مِشه، ای مِشه‌ده‌کي بوتون آغاجلار، سِوئنجدن هاراي چکئن، چونکي رب يعقوب نسلئني ساتين آليب، ائسرايئلده عئزّتئني آشکار ادئر.

44:24  سني ساتين آلان، آنا بطنئنده سنه قورولوش ورن رب ديئر: "منم، رَب، بوتون شيلري يارادان، گؤيلري تَکجه يايان، تکباشينا يِر اوزونو سَرَن،

44:25  يالانچي پيغمبرلرئن سحرلرئني بوشا چيخاردان، فالچيلاري آخماق ادن، حئکمتلی‌لري گری قايتاران، اونلارين بئلئيئني هِچه چِوئرَن،

44:26  قولونون سؤزلرئني تصدئق ادن، اِلچي‌لرئنئن سؤزلرئني دوغرو ادن. منم کي، اورشلئم اوچون ديئرَم: «بورادا ساکئنلري تزه‌دن ساکئن اولاجاق»، يهودا شهرلري اوچون ده: «بونلار تزه‌دن بئنا اولاجاق، خاراباليقلاريني تزه‌دن برپا اده‌جيم.»

44:27  منم کي، دهنزئن درئنلئيئنه ديئرم: «قورو! من چايلاريني قوروداجاغام.»

44:28  منم کي، کوروش حاقّيندا ديئرم: «او، چوبانيمدير، منه خوش اولان بوتون شيلري يرئنه يتئره‌جک.» اورشلئم حاقّيندا اعلان ادئر: «تزه‌دن بئنا اولاجاق»، معبد حاقّيندا دا ديئر: «بونؤورن قويولاجاق.»"

Chapter 45

45:1  رب مسح اتدئيي کوروشا، صاغ اَلئندن توتدوغو آداما بله ديئر: "اونون قاباغيندا مئلّتلره باش اَيدئره‌جيم، پادشاهلاري قووّتلرئندن محروم اده‌جيم، حوضوروندا قاپيلاري آچاجاغام، دروازالار قاباغيندا بئر داها باغلانماياجاق.

45:2  من سنئن قاباغيندا گدئب کَله-کؤتور يِرلري هامارليغا چِوئره‌جيم، بورونج قاپيلاري قيريب، دمئر قيفيللاري سينديراجاغام.

45:3  قارانليقدا گئزلَنمئش خزئنه‌لري، گئزلي يِرلرده ساخلانيلان ثروتلري سنه وره‌جيم کي، بئله‌سن: بو، منم، رب، سني آدينلا چاغيران ائسرايئلئن تاريسي‌.

45:4  قولوم يعقوبون، سِچدئيئم ائسرايئلئن خاطئرئنه سني آدينلا چاغيرميشام، و سنه سوي آدي ورمئشم. حال بو کي، سن منی تانيميردين.

45:5  رب منم، باشقاسي يوخدور، مندن باشقا تاري يوخدور. سني من گوجلَندئره‌جيم، حالبوکي منی تانيماييبسان.

45:6  اِله کي، گون‌دوغاندان گون‌باتانا قدر ائنسانلار بئلسئنلر کي، مندن باشقا هچ کئم يوخدور، رب منم، باشقاسي يوخدور.

45:7  نورو، قارانليغي، سالاماتليغي و فلاکتي يارادان منم، بوتون بونلاري ادن رب، منم.

45:8  ای گؤيلر، يوخاريدان داملايين، قوي بولودلار صالحلئک ياغديرسينلار، قوي تورپاق آچيلسين، خئلاص بهره‌سئني يِتئشدئرسئن، اونونلا بئرلئکده صالحلئک بئتسئن. بونلاري يارادان رب، منم."

45:9  ياراداني ائله چکئشه‌نئن واي حالينا! چکئشَن اؤزو ده ساخسي قابلار آراسيندا فقط بئر ساخسي‌دير. مگر پالچيق کوزه‌گره دئير: "نه دوزه‌لدئرسن؟" و يا ياراتديغين شي مگر دئير: "اونون اَللري يوخدور"؟

45:10  آتاسينا "دونيايا نه گتئردئن؟" دئيه‌نئن واي حالينا! آناسينا "نه جور بئر شي دوغدون؟" دئيه‌نئن واي حالينا!

45:11  ائسرايئلئن موقدّسي، اونو يارادان رب بله ديئر: "اؤولادلاريمين گله‌جيي حاقّيندا منه سوآل وره بئلرسئنئز مگر؟ گؤردوکلرئم ائشلر باره‌سئنده منه امر اده بئلرسئنئز مگر؟

45:12  دونياني يارادان، يِر اوزونده ياشايان آدامي دا يارادان منم. اَل‌لرئمله گؤيلري يايديم، امرئمله اونون بوتون فوجلاري قورولدو.

45:13  من کوروشو صالحلئکده قالديرميشام، يول‌لاريني هامار اده‌جيم. او، شهرئمي تئکه‌جک، اسئر اولونموش آداملاريمي فئديه‌سئز، بخشئشسئز آزاد اده‌جک." بونو قوشونلار ربّی ديئر.

45:14  رب بله ديئر: "مئصئرلی‌لرئن محصولو، کوشون تئجارت گلئري، اوجابويلو سِبالي‌لار يانينيزا گلئب قولونوز اولاجاقلار. اونلار دالينيزجا گده‌جکلر، بوخوولاناجاقلار. قاباغينيزدا تعظئم ادئب يالواراجاقلار: «تاري قطعن سئزئنله‌دئر و باشقا بئرئسي يوخدور. بوندان باشقا تاري يوخدور.»"

45:15  حقئقتن، سن اؤزونو گئزله‌دن بئر تاريسان، ای ائسرايئلئن تاريسي، ای قورتاريجي!

45:16  اونلارين هاميسي خجالت آلتيندا قالاجاقلار، بلی اوتاناجاقلار. بوت دوزَلدنلر بئرلئکده خجالت ائچئنده اوزاقلاشاجاقلار.

45:17  لاکئن ائسرايئله قورتولوشو رب ورئبدئر. بو قورتولوش ابده‌جک سوره‌جک. سن عصرلر بويو خجالت آلتيندا قالماياجاقسان، روسواي اولماياجاقسان.

45:18  چونکي گؤيلري يارادان رب بله ديئر! او همن تاري‌دير کي، دونيايا شکئل وردی، اونو ياراتدي، رب اونو برقرار اتدي و اونو بوش اولماق اوچون ياراتمادي، ياشاماق اوچون قوردو. و ديئر: "من رَبّم، باشقاسي يوخدور!

45:19  من گئزلئنده، قارانليق دونياسيندا دانيشماديم، يعقوب نسلئنه دِمه‌دئم کي، «منی قارماقاريشيق يرده آختارين.» دوغروسونو دئيَن، عدالتي اعلان ادن رب، منم.

45:20  ييغيشين، گلئن، بئر يِره توپلاشين، ای مئلّتلردن صاغ قالان کَسلر! تاختا بوتلري گَزدئرَنلر، خئلاص ورمه‌ين آللاهلارا دوعا ادنلرئن هچ فهمي يوخدور.

45:21  اعلان ادئن، ائشئنئزي تقدئم ادئن، دوغرودان دا قوي هاميسي بئرلئکده مصلحتلَشسئنلر. «بونو قدئمده کئم اعلان اتدي، کِچمئشده کئم بئلدئردي؟» بونو من رب، مگر دِمه‌دئم؟ مندن باشقا تاري، عدالتلي تاري و قورتاريجي يوخدور. مندن باشقاسي يوخدور.

45:22  ای دونيانين بوتون اوجقار يِرلرئنده ياشايانلار، منه طرف دؤنون و خئلاص اولون! چونکي من تارييام و باشقاسي يوخدور!

45:23  وارليغيم حاقّي آند ائچمئشم، آغزيمدان چيخان سؤز دوغرودور، بوشا چيخماز. هر دئز حوضورومدا ييخلاجاق، هر دئل منه آند ائچه‌جک.

45:24  منئم اوچون بله دئيه‌جکلر: "صالحلئک و قووّت فقط ربده‌دئر. ائنسانلار اونون يانينا گله‌جکلر، و بوتون اونا قضبلَنَنلر خجالت آلتيندا قالاجاقلار.

45:25  بوتون ائسرايئل نسلی ربده حاق قازاناجاق و عئزّتلَنه‌جکدئر.»"

Chapter 46

46:1  "بِل بوتو دئزه دوشوب، نِبو آللاهي اَيئلئر، بابئلئن بوتلري جاناوارلارا، مال-حيوانلارا يوکله‌نئب. داشيديغينير اشيالار آغيرديرلار، يورغون حيوانلارا يوکدورلر.

46:2  اونلار اَيئلدئلر، بئرلئکده دئز چؤکوبلر، يوک آلتيندا قورتولا بئلمه‌يئب اؤزلري اسئرلئيه آپاريليبلار.

46:3  قولاق آسين منه، ای يعقوب نسلي، ای بوتون ائسرايئل نسلئنئن صاغ قالانلاري! ای سئزلر کي، دوغدوغونوزدان بَري سئزي داشيميشام. بطندن داشيلميشسينيز.

46:4  حتّا سئزئن قوجاليق واختينيزاجاق دا، من اويام، ساچلارينيزين آغلاناجاق واختيناجاق دا، سئزي داشيياجاغام، سئزي من ياراتميشام، سئزي من داشيياجاغام. بلی، من سئزي داشيياجاغام و سئزي خئلاص اده‌جيم.

46:5  منی کئمله موقايئسه اده‌جکسئنئز، منی کئمله بئر توتاجاقسينيز، کئمه اوخشاداجاقسينيز کي، بئز اوخشار اولاق؟

46:6  پول کئسه‌سئندن قيزيل چيخاردانلار، تَره‌زئده گوموش چکنلر، بو پولدان زرگره آللاه دوزلتدئرَنلر، قاباغيندا يِره سَرئلئب پرستئش ادئرلر!

46:7  اونو چئيئنلرئنه يوکله‌يئب داشي‌ييرلار، يرئنه قويورلار. بلجه بوت دورور، يِرئندن تَرپَنمئر. اونا يالوارانا دا جاواب وره بئلمئر، اونو هچ بئر بلادان قورتارا بئلمئر.

46:8  ای عاصي ائنسانلار، بونو خاطيرلايين، آدام اولون، يادينيزدان چيخارتمايين!

46:9  قدئمدن بَري اولانلاري خاطيرلايين، چونکي تاري منم، باشقاسي يوخدور، منم تاري، منه بَنزَري يوخدور!

46:10  آخيري اوّلدن، باش ورمه‌مئش حادئثه‌لري ازلدن بئلدئرَن ديئر: «آماجيم باش توتاجاق، ائسته‌دئيئم بوتون شيلري يرئنه يتئره‌جيم.»

46:11  شرقدن بئر ييرتيجي قوشو، اوزاق دئياردان نئيّتئمي يرئنه يتئرَن آدامي چاغيريرام. دوغرودان دا بونلاري دِمئشم؛ دوغرودان دا اونلاري يرئنه يتئره‌جيم. من نئيّت اتمئشم، بونو قطعن يرئنه يتئره‌جيم.

46:12  ای صالحلئکدن اوزاق اولان دئکباش ائنسانلار! منی اِشئدئن!

46:13  صالحلئيئمي ياخينلاشديريرام، اوزاق ديئل، قورتولوشوم يوباتماياجاق. صحيوندا نئجات، ائسرايئلده شؤوکتئمي قوياجاغام.

Chapter 47

47:1  ای بابئلئن باکئره قيزي، دوش آشاغي، اوتور تورپاقدا. ای کَلده‌لئلرئن قيزي، آرتيق تخت يوخدور، اوتور قورو يرده. چونکي بوندان سونرا سني «ظرئف، نازلي» چاغيرماياجاقلار.

47:2  دَيئرمان داشلاريني گؤتور، اونو دارت. آچ اؤرپه‌يئني، قالدير پالتارينين اَته‌يئني، بالديرلاريني آچ، کِچ چايلاردان.

47:3  لوتلويون آچيلاجاق، عاييبين گؤرونه‌جک. من ائنتئقام آلاجاغام، هچ کئمي اسئرگَميه‌جيم."

47:4  بئزي ساتين آلان ائسرايئلئن موقدّسي‌دئر، اونون آدي قوشونلار ربّي‌دئر.

47:5  رب ديئر: "ای کَلده قيزي، قارانليغا چکئل، ساکئتجه اوتور! چونکي بوندان سونرا سني داها پادشاهليقلارين ملَکه‌سي چاغيرماياجاقلار!

47:6  اؤز خالقيما قضبلَندئم، ائرثئمي تحقئر ادئب سنئن اَل‌لرئنه وردئم. سن اونلارا رحم اتمه‌دئن، ياشلي‌لارا آغير يوغ يوکله‌دئن.

47:7  ددئن: «همئشه‌لئک ملکه اولاجاغام.» بونلاري اوره‌يئنه گتئرمه‌دئن، آخيريني دوشونمه‌دئن.

47:8  ائندي آمّا قولاق آس، ای اَمئن-آمانليقدا ياشايان هوسباز! سن اوره‌يئنده ديئرسن: «من منم، مندن باشقاسي يوخدور. هچ واخت دول قالماياجاغام، اؤولاد ائتئرمک دردئني چکميه‌جيم.»

47:9  لاکئن بو ائکي بلا بئر گونده قَفلَتَن باشينا گله‌جک: هم اؤولادلاريني ائتئره‌جک، هم ده دول قالاجاقسان. سنئن چوخلو جادولارينا باخماياراق، سنئن سِحرلرئنئن چوخلو قودرتئنه باخماياراق، بونلار بوتون شئدّتله سنئن باشينا گله‌جک.

47:10  پئسلئيئنده اَمئن-آمانليقدا قالاجاغيني دوشوندون، ددئن: «هچ کئم منی گؤرمور.» سنئن حئکمتئن و بئلئيئن سني آزديريب. چونکي اوره‌يئنده دوشونوبسن: «من منم، مندن باشقاسي يوخدور.»

47:11  لاکئن اوستونه بلا گله‌جک، اونون نجه قاباغيني آلاجاغيني بئلميه‌جکسن، عوضئني وره بئلمه‌دئيئن هلاکت سنئن باشينا دوشه‌جک؛ بئلمه‌دئيئن وئرانليق سنئن اوستونه قَفلَتَن گله‌جکدئر.

47:12  جاوان ياشلاريندان بَري، اَللَشدئيئن اووسونچولوغوندا و جادوگرلئيئنده قال. بلکه اونلاردان بئر خيئر گؤره‌سن، بلکه اونلارلا واهئمه‌ سالا بئلرسن!

47:13  آلديغين چوخ مصلحتلر سني اوزوب. قوي اولدوز فالينا باخانلار، مونجّئملر، تزه آي چيخاندا اولاجاق حادئثه‌لري بئلدئرَنلر، ائندي گلئب، سني باشينا گلن بلالاردان خئلاص اتسئنلر.

47:14  باخ، اونلار کولَش کئمي اولوبلار، اود اونلاري يانديرير. اؤزلرئني آلووون گوجوندن خئلاص اده بئلمئرلر. نه قيزيشماق اوچون بئر کؤمور اولاجاق، نه ده قاباغيندا اوتورولاجاق بئر اود.

47:15  سنئن ائشله‌دئيئن، جاوانليغيندان بَري آل-ور اتدئيئن آداملارين عاقئبَتي بله اولوب. هر کس اؤز يولوندا آوارا-سرگرداندير، سني خئلاص ادن يوخدور.

Chapter 48

48:1  ای يعقوب نسلي، ائسرايئلئن آدي ائله چاغيريلان، يهودانين بِلئندن گلن، ربّئن آدي ائله آند ائچن، ائسرايئل تاريسينين آديني اعتئراف ادن، آمّا بونا حقئقتله و صالحلئکله عمل اتمه‌ين نسئل، بونا قولاق آس!

48:2  چونکي اونلار اؤزلرئني موقدّس شهردن اولدوقلاريني ديئرلر، ائسرايئلئن تاريسينا بِل باغلاييرلار؛ اونون آدي قوشونلار ربّي‌دئر.

48:3  اولوب-کچنلري اوّلدن من اعلان اتدئم. بو سؤزلر آغزيمدان چيخدي و اونلاري من بئلدئردئم. قَفلَتَن عمل اتدئم و اونلار يرئنه يِتئشدي.

48:4  چونکي عئنادکار اولدوغونوزو بئلئرم، دمئر بويونلوسونوز، بورونج آلينليسينيز.

48:5  اونا گؤره ده بونلاري سئزه قدئمدن بَري بئلدئردئم، باش ورمه‌مئشدن سئزه خبر وردئم کي، دميه‌سئنئز: «بونو منئم بوتوم ادئب، اويما بوتوم، تؤکمه بوتوم بونلاري امر ادئب.»

48:6  بونو اشئدئبسئنئز، ائندي آمّا هاميسينا نظر سالين. و سئزلر، مگر بونو اعلان اتميه‌جکسئنئز؟ ائندي سئزه تزه شيلري، بئلمه‌دئيئنئز گئزلي شيلري بئلدئرئرم.

48:7  بونلار ائندي ياراديلير، کِچمئشده يوخ. سئز بونو بو گونه قدر اشئتمه‌يئبسئنئز، اونا گؤره دميه‌جکسئنئز: «باخ، بونو بئلئردئم.»

48:8  سئز بو حاقدا اشئتمه‌يئبسئنئز، خبرئنئز ده اولماييب، کِچمئشدن بَري قولاقلارينيز باغلي‌دير. چونکي سئزئن نه قدر خائن اولدوغونوزدان خبرئم وار، دوغوم گونوندن عاصي چاغيريليبسينيز.

48:9  آديمين خاطئرئنه قضبئمي يوباديرام، حمدئم اوچون قِيضئمئن قاباغيني آليرام کي، سئزي محو اتمه‌يئم.

48:10  باخ، من سئزي تمئزله‌مئشم، آمّا گوموش کئمي يوخ، سئزي فلاکت اوجاغيندا ائمتاحانا چکمئشم.

48:11  اؤز خاطئرئم اوچون، اؤز خاطئرئم اوچون عمل اده‌جيم. آخي نئيه منئم آديما کوفر ديئلسئن؟ من اؤز عئزّتئمي هچ کئمه ورمه‌رم.

48:12  قولاق آس منه، ای يعقوب نسلي، چاغيرديغيم ائسرايئل! من اويام، من بئرئنجئيم، من آخيرينجي‌يام دا.

48:13  دوغرودان دا منئم اَلئم يِرئن پايالاريني قويدو، صاغ اَلئم گؤيلري سَردي. من اونلاري چاغيراندا، اونلار بئرلئکده دورور.

48:14  هامينيز ييغيلين، اِشئدئن! بوتلردن هانسي‌دير بو شيلري اعلان ادن؟ ربّئن سِودئيي آدام، اونون بابئلئن ضئدّئنه اولان مقصدئني يرئنه يتئره‌جک، اونون اَلي کَلده‌لئلرئن ضئدّئنه قالخاجاق.

48:15  من، بلی من دانيشميشام، دوغرودان دا اونو چاغيرميشام، اونو گتئرمئشم، و او، اؤز يوللاريني اوغورلو اده‌جک.

48:16  منه ياخين گلئن، بونو اِشئدئن! باشلانيشدان بَري گئزلي دانيشماميشام، باش وردئيي واختدان اورادا ائدئم. و ائندي پروردئگار رب منی و روحونو گؤنده‌رئب."

48:17  سني ساتين آلان، ائسرايئلئن موقدّسي، رب بله ديئر: "تارين رب منم، او کي، سنئن خيرئنه سني اؤيره‌دئر، او کي، گِتمه‌لي اولدوغون يولدا سني آپارير.

48:18  کاش کي، سن منئم امرلرئمه دئقّت ورسَيدئن! او واخت رئفاهين چاي کئمي آخاردي، صالحلئيئن دهنزئن شپه‌لري کئمي اولاردي.

48:19  نسلئن دهنز قومو کئمي، اؤولادلارين قوم دنه‌لري کئمي اولاردي. آدلاري منئم حوضورومدا نه پوزولاردي، نه ده سئلئنَردي."

48:20  بابئلدن چيخين! کَلدانئلرئن تورپاغيندان قاچين! سِوئنج سَسي ائله اعلان ادئن، بونو بئلدئرئن، دونيانين لاپ اوزاق يِرلرئنه بو خبري چاتديرين، ديئن: "رب اؤز قولو يعقوب نسلئني ساتين آليب."

48:21  صحرادان کِچَرکَن سوسوزلوق چکمه‌دئلر. رب اونلار اوچون قايادان سو آخيتدي، قاياني ياردي و اورادان سو فيشقيردي.

48:22  رب ديئر: "پئسلره هچ اَرامليق يوخدور."

Chapter 49

49:1  ای ساحئل‌لر، منی اِشئدئن! ای اوزاقدا ياشايان خالقلار، قولاق آسين! رب منی آنا بطنئندن چاغيردي، آنامين قارنيندان منه آد قويدو.

49:2  آغزيمي ائتي قيلينج کئمي ادئب، اَلئنئن کؤلگه‌سي آلتيندا منی گئزله‌دئب، او منی سِچمه اوخ دا ادئب اؤز اوخدانيندا ساخلاييب.

49:3  او منه بويوردو: "قولومسان، ای ائسرايئل، من سنده شؤوکتئمي گؤرسده‌جيم."

49:4  آمّا من ددئم: "من بوش يِره چاليشميشام، گوجومو هدر يِره تؤکموشم. لاکئن حله ده حاقّيم اولان عدالت، ربله‌دئر، اَجرئم تاريملا‌دير."

49:5  و ائندي رب بويورور، او رب کي، منه آنا بطنئنده قورولوش وردی کي، اونون قولو اولوم، يعقوب نسلئني اونا طرف قايتاريم، اِله کي، ائسرايئلي اونون حوضورونا ييغيلسين. چونکي من ربّئن گؤزونده حؤرمت قازانميشام، و قودرتئم تاريمدير.

49:6  او ديئر: "يعقوب قبئله‌لرئنئن برپاسي اوچون، ائسرايئلئن صاغ قالانلارينين گری قاييتماسي اوچون، قولوم اولماغين چوخ کئچئک بئر شي دئر. من سني مئلّتلره نور دا اده‌جيم کي، خئلاصيم دونيانين لاپ اوزاق يِرلرئنه ياييلسين."

49:7  ائسرايئلي ساتين آلان و اونون موقدّسي اولان رب آداملارين حقارتله باخديغي شخصه، مئلّتئن نئفرت اتدئيي، و حؤکمدارلارين قولو اولان شخصه بله ديئر: "پادشاهلار گؤروب قالخاجاقلار، امئرلر ده تعظئم اده‌جکلر، چونکي ائسرايئلئن موقدّسي، وفالي رب سني سِچئبدئر."

49:8  رب بله ديئر: "موناسئب واختدا سنه جاواب ورمئشم، خئلاص گونو سنه کؤمک اتمئشم؛ سني حئفظ اده‌جيم. سني خالقيم اوچون عهد اده‌جيم کي، داغيلميش اؤلکه‌ني برپا اده‌سن، ائرث اولاراق گئنه صاحئبلرئنه وره‌سن.

49:9  محبوسلارا ديئن: «چيخين»، ظولمتده اوتورانلارا ديئن: «اؤزونوزو گؤرسه‌دئن!» اونلار يول بويونجا قوزو کئمي بَسلَنه‌جکلر، هر چيلپاق تپه‌ده اوتلاق تاپاجاقلار.

49:10  اونلار نه آج، نه ده سوسوز قالاجاقلار، قيزمار ائستي و گونش اونلاري وورماياجاق. چونکي اونلارا مرحمتلي اولان يول گؤرسده‌جک، اونلاري بولاقلارا طرف هئدايت اده‌جک.

49:11  من بوتون داغلاريمي يولا دؤنده‌ره‌جيم، يوللاريمي هامار اده‌جيم.

49:12  باخ، خالقيم اوزاق يِرلردن، کئمي شئمالدان، کئمي قربدن، کئمي ده سئنئم اؤلکه‌سئندن گله‌جک.

49:13  شادليقدان هاراي چکئن، ای گؤيلر! ای يِر اوزو، فَرَحلَن! ای داغلار، شادليق نئدالارينا قوشولون! چونکي رب خالقينا تسلّی ورئب، ذلئل اولانلارينا رحم اده‌جک.

49:14  آمّا صحيون ددي: "رب منی ترک ادئب، پروردئگاريم منی ياددان چيخارديب."

49:15  آمّا رب ديئر: "آنا مگر سود اَمن کؤرپه‌سئني ياددان چيخاردار؟ بطنئندن چيخان اوغلونا مگر رحمسئز اولار؟ آنا اؤز کؤرپه‌سئني ياددان چيخارتسا بِله، من سني اصلا ياددان چيخارتمارام.

49:16  باخ، من سنئن آديني اوووجلاريمدا حَکّ اتمئشم، دووارلارين همئشه گؤزومون قاباغيمدادير.

49:17  اوغوللارين تَلَسئب يانينا گله‌جکلر، سني وئران اِدنلر، سني قارت ادنلر چيخيب-گده‌جکلر.

49:18  قالدير باشيني، باخ اطرافينا: اونلارين هاميسي ييغيليب يانينا گلئرلر. رب اعلان ادئر: من رب وارليغيما آند ائچئرم کي، اونلارين هاميسي سنئن اوچون بَر-بَزَک اولاجاق، بئر گلئن کئمي اونلاري تاخاجاقسان!

49:19  خاراباليغا، وئرانه‌لئيه دؤنموشدون، اؤلکَن يِرله بئر اولموشدو. آمّا ائندي بو تورپاق ساکئنلرئن اوچون دار اولاجاق، سني خارابا قويانلار سندن اوزاقدا دوراجاقلار.

49:20  سنئن اسئرلئکده دوغولموش اؤولادلارين سَسئني اوجالديب بله دئيه‌جکلر: «بو يِر بئزئم اوچون دار گلئر، ياشاماق اوچون بئزه يِر ور.»

49:21  او واخت سن قلبئنده دئيه‌جکسن: «آخي بونلاري منئم اوچون کئم دوغدو؟ چونکي اؤولادلاريمي ائتئرمئشم، سونسوزام، اسئر و سرگردانام. بس بونلاري کئم بؤيودوب؟ باخ، من تک-تنها قالميشديم، بس بونلار هارادان گلئب-چيخدي؟»"

49:22  پروردئگار رب بله ديئر: "باخ، من اَلئمي مئلّتلره قالديراجاغام، بايراغيمي خالقلارا قالديراجاغام. اونلار سنئن اوغوللاريني قوجاغيندا، قيزلاريني چئيئنلرئنده گتئره‌جکلر.

49:23  پادشاهلار سنه آتاليق، ملکه‌لر سنه آناليق اده‌جکلر. اوزو ‌اوسته يِره سَرئلئب سنه سجده اده‌جکلر، آياقلارينين توزونو يالاياجاقلار. او واخت بئله‌جکسن کي، من ربّم، منه بِل باغلايانلار اوتانماياجاقلار."

49:24  مگر گوجلونون اَلئندن قنئمت آلينا بئلر؟ قدّارين اَلئندن اسئرلر قورتولا بئلر؟

49:25  آمّا رب بله ديئر: "بلی، گوجلونون اَلئندن اسئرلر ده آليناجاق، قدّارين اَلئندن قنئمت ده گؤتوروله‌جک، سنئنله چکئشنله من چکئشه‌جيم، سنئن اؤولادلاريني من قورتاراجاغام.

49:26  سنه ظولم ادنلره اؤز اَتلرئني يِدئرده‌جيم، اؤز قانلاري ائله مست اولوب شئرئن شراب ائچَنلرئن حالينا دوشه‌جکلر. بلجه بوتون بشر بئله‌جک کي، سني قورتاران رب، منم. سني ساتين آلان، يعقوبون قودرتلي تاريسي، منم."

Chapter 50

50:1  رب بله ديئر: "بوشاديغيم آنانيزين طالاغي هارادادير؟ بورج ورنلرئمئن هانسي بئرئنه ساتديم سئزي؟ سئز شر عمل‌لرئنئزه گؤره ساتيلدينيز، عاصئلئيئنئزئن اوزوندن آنانيز قووولدو.

50:2  بس نه اوچون من گلنده هچ کئم اولمادي؟ من چاغيراندا نئيه جاواب ورن اولمادي؟ مگر منئم اَلئم ضعئفله‌يئب کي، خئلاص اتمه‌يه قادئر اولماسين؟ و يا منئم سئزي قورتارماغا گوجوم مگر چاتماز؟ باخين، من تَنبِهئمله دهنزي قورودورام، چايلاري صحرايا چِوئرئرم. سويون چاتيشمازليغيندان باليقلار ائيله‌نئر، سوسوزلوقدان اؤلور.

50:3  منم گؤيلري ظولمته بوروين، اونلاري ياس پالتارينا گِيئندئرن.»

50:4  پروردئگار رب منه اؤيرَنمئشلرئن دئلئني ورئب، اِله کي، يورغونلارا نجه سؤزله داياق اولماغي بئلئم. او هر سحر منی اويادير، قولاغيمي اويادير کي، اؤيرَنمئش بئري کئمي اِشئدئم.

50:5  پروردئگار رب قولاغيمي آچيب؛ من ناموطئع اولماديم، گری ده چکئلمه‌دئم.

50:6  منی دؤيَنلر اوچون بِلئمي آچديم، اوزومو، ساقّاليمي يولانلارا طرف اوزاتديم. تحقئرلردن، توپورجکلردن اوزومو گئزلَتمه‌دئم.

50:7  پروردئگار رب منه کؤمک اتدئيئنه گؤره اوتانماياجاغام. بونا گؤره ده اوزومو چاخماق داشي کئمي اتمئشم. بئلئرم ده کي، اصلا خجالت چکميه‌جيم.

50:8  منه حاق قازانديران ياخيندادير. منئمله کئم موباحئثه اده‌جک؟ قوي اوز-اوزه داياناق. منئم ضئدّئمه کئمئن بئر شئکايتي وار؟ قوي يانيما گلسئن.

50:9  باخ، منه کؤمک ادن، پروردئگار ربدئر. کئم منی تقصئرکار چيخاردا بئلر؟ باخ، اونلارين هاميسي پالتار کئمي کؤهنَله‌جکلر، اونلاري گووه يئيه‌جک.

50:10  آرانيزدا کئم وار کي، ربدن قورخور، اونون قولونون سؤزونه قولاق آسير؟ قارانليقدا نوردان محروم گَزئر؟ قوي او ربّئن آدينا بِل باغلاسين و تاريسينا آرخالانسين.

50:11  ای سئزلر کي، اود قالاييرسينيز، و اؤزونوزه جرقّه‌لری قورشاق ادئرسئنئز، يانديرديغينيز اودون ائشيغيندا، آلوولانديرديغينيز جرقّه‌نئن آراسيندا ياشايين. منئم اَلئمدن آلديغينيز پاي بو اولاجاق: عذاب ائچئنده ياتاجاقسينيز.

Chapter 51

51:1  ای صالحلئيي آختارانلار، ربّی آختارانلار، منی اِشئدئن! يونولدوغونوز قايايا، چيخاريلديغينيز چوخورون درئنلئيئنه باخين.

51:2  آتانيز ائبراهئمه، دردله سئزي دوغان سارايا باخين! چاغيرديغيمدا تَک بئر کئشي ائدي او، سونرا اونا برکت وردئم، نسلئني آرتيرديم.

51:3  دوغرودان دا رب صحيونا تسلّی وره‌جک اونون بوتون خاراباليقلارينا تسلّی وره‌جک. صحرالاريني عَدنه، چؤل‌لرئني ربّئن باغينا دؤندره‌جک. اورادا سِوئنج و شادليق تاپيلاجاق، شوکورلر، نغمه‌لر اوخوناجاق.

51:4  ای منئم خالقيم، منه قولاق آسين، ای منئم مئلّتئم، منی اِشئدئن! چونکي قانون مندن چيخاجاق، عدالتئمي نور کئمي خالقلارا احسان اده‌جيم.

51:5  صالحلئيئم ياخيندير، قورتولوشوم گلئر، منئم قولوم خالقلاري موحاکئمه اده‌جک. ساحئل‌نشئن خالقلار منی گؤزلَيه‌جکلر، منئم قولوما تَوَقّعله اومئد باغلاياجاقلار.

51:6  باشينيزي قالديريب گؤيلره نظر سالين، سونرا آشاغي‌يا، يِر اوزونه باخين. چونکي گؤيلر توستو کئمي داغيلاجاق، ير اوزو پالتار کئمي کؤهنَله‌جک. يِر اوزونون ساکئنلري مئلچک کئمي قيريلاجاقلار. لاکئن منئم خئلاصيم همئشه‌لئک اولاجاق، صالحلئيئمئن آخيري اولماياجاق.

51:7  ای صالحلئکدن خبردار اولانلار، قانونومو قلبلرئنده ساخلايان خالق، منه قولاق آسين! آداملارين مزمّتئندن قورخمايين، اونلارين سؤيوشلرئندن دهشته دوشمه‌يئن.

51:8  چونکي گووه اونلاري پالتار کئمي يئيه‌جک، قورد اونلاري يون کئمي يئيه‌جک. لاکئن منئم صالحلئيئم همئشه‌لئک اولاجاق، قورتولوشوم نسئل‌لر بويو دوراجاقدير.

51:9  اويان، اويان، گوجلَن، ای ربّئن قولو! قدئم زامانلارداکي کئمي اويان، اوّلکي نسئللرئن واختيندا اولدوغو کئمی! سن رَهَبي پارچا-پارچا اتمه‌دئن مگر؟ سو اژداهاسيني تئکه-تئکه اتمه‌دئن مگر؟

51:10  دهنزي، درئن سولاري قورودان سن ديئلدئن مگر؟ ساتين آلينان خالقين کِچمه‌سئندن اؤتری دهنزئن درئنلئکلرئني يولا چِوئرَن سن ديئلدئن مگر؟

51:11  ربّئن ساتين آلينميش آداملاري قاييداجاق، سِوئنجله نغمه اوخوياراق صحيونا گله‌جک. باشلاريندا ابدی شادليق اولاجاق، اونلار سِوئنج و شَنلئک تاپاجاقلار، کدر و قم-قوصّه يوخ اولاجاق.

51:12  رب ديئر: "سئزه تسلّی ورن منم، بلی منم. سئز کئمسئنئز کي، فاني ائنساندان قورخورسونوز؟ اوت کئمي سولان بشر اوغلوندان؟

51:13  سئزي يارادان، گؤيلري سَرَن، دونيانين پايالاريني قويان ربّی نجه ياددان چيخارديبسينيز کي، ظالئمئن قضبئندن بوتون گون دايانمادان قورخورسونوز، او ظالئم کي، اؤزونو سئزي محو اتمک اوچون حاضيرلايير؟ بس هاني ظالئمئن قضبي؟

51:14  ذلئل‌لر تزلئکله آزاد اولاجاقلار، سئاهچالدا اؤلمَيه‌جکلر، چؤرکلري ده اَسکئک اولماياجاق.

51:15  چونکي تارينيز رب منم. دهنزي گور شپه‌لرله چالخالايان منم. اونون آدي قوشونلار ربّي‌دئر.

51:16  من سؤزلرئمي سنئن آغزينا قويموشام و اَلئمئن کؤلگه‌سئنده سني گئزلَتمئشم کي، گؤيلري قوروم، دونيانين پايالاريني قويوم، و صحيونا «خالقيم سنسن» دِيئم."

51:17  دور آياغا، دور آياغا، قالخ، ای اورشلئم! ای سن کي ربّئن اَلئندن قضب پئياله‌سئني آليب ائچدئن. کِفلي‌لئک کاساسيني آخيرا قدر بوشالتدين.

51:18  دوغدوغون بوتون اوغوللاردان سنه يول گؤرسه‌دن اولمادي، بؤيوتدويون بوتون اوغوللاردان سنه داياق اولان اولمادي.

51:19  بو ائکي بلا سنئن باشينا گلئب؛ سنه کئم ياس توتاجاق؟ هلاکت، داغينتي، قيتليق و قيلينج! سنه نجه تسلّی ورئم؟

51:20  اؤولادلارين طاقتدن دوشوب، ربّئن قضبي، تارينين مزمّتي اوستلرئنده‌دئر. اونلار تله‌يه دوشموش بئر غزال کئمي چاره‌سئز هر کوچه باشيندا اوزانيب.

51:21  بونا گؤره ده، ای ذلئل اولموش اورشلئم، ای شرابسيز مست، بونو اشئت!

51:22  پروردئگارين رب، اؤز خالقيني مودافئعه ادن تارين بله ديئر: "باخ، کِفلئلئک پئياله‌سئني اَلئندن آلميشام. قضبئمئن کاساسيندان آرتيق ائچميه‌جکسن.

51:23  بو کاساني سنه ظولم ادنلرئن اَلئنه وره‌جيم. اونلارين اَلئنه کي، سنه ديئبلر: «يِره اوزان کي، اوستوندن کِچک.» سن ده آرخاني يِر کئمي، يول کئمي ادئردئن کي، کچسئنلر."

Chapter 52

52:1  اويان، اويان، ای صحيون، قودرتئنه بورون! ای موقدّس شهر، ای اورشلئم، شؤوکتلي پالتارلاريني گِيئن! چونکي ختنه‌سئزلر، نجئسلر سنئن دروازالاريندان آرتيق کِچميه‌جکلر.

52:2  اوست‌باشينداکي توزو چيرپ، قالخ، ای اورشلئم، تختئنه اوتور، زنجئري بوينوندان قير، ای اسئر آپاريلان صحيون قيزي!

52:3  رب بله ديئر: "سئز موفته ساتيلميشدينيز، موفته ده ساتين آليناجاقسينيز."

52:4  پروردئگار رب بله ديئر: "خالقيم ياشاماق اوچون اوّل‌لر مئصئره اِنمئشدي. سونرا آشورلولار اونلارا ناحاق يِره ظولم اتدئلر.

52:5  رب بويورور: خالقيم ناحاق يِره گؤتورولوب آپاريلدي، ائندي منئم بورادا نه‌يئم وار؟" گئنه رب بويورور: "باشچيلاري هورور، و آديما هر گون کوفر ديئلئر.

52:6  بونا گؤره خالقيم منئم آديمي تانيياجاق؛ بونا گؤره او گون، او منم کي، دانيشيب ديئر: «باخ منم.»"

52:7  خوش خبري گتئرن، داغلاري آشيب-گلن موژده‌چئنئن آياقلاري نجه ده گؤزلدئر! او، باريش اعلان ادئر، او، ياخشيليغين خوش خبرئني گتئرئر، قورتولوش اعلان ادئر، صحيون خالقينا "تارينيز سلطنت ادئر!" ديئر.

52:8  قولاق آسين! کشئکچئلرئنئز سَسلرئني اوجالديرلار، بئرلئکده شادليقلا اوخويورلار، چونکي ربّئن صحيونا قاييديشيني اؤز گؤزلري ائله گؤره‌جکلر.

52:9  ای اورشلئم خاراباليقلاري، شَنلئک ادئن، بئرلئکده شادليقلا اوخويون، چونکي رب خالقينا تسلّی ورئب، اورشلئمي ساتين آليب.

52:10  رب بوتون مئلّتلرئن گؤزلري قاباغيندا موقدّس قولونو چيرمالاييب، اِله کي، دونيانين بوتون اوجقار يِرلري تاريميزين گتئردئيي نئجاتي گؤرسونلر.

52:11  چکئلئن، چکئلئن، اورادان چيخين، نجئس شيلره توخونمايين، اونلارين آراسيندان چيخيب تمئزله‌نئن، ای ربّئن اشيالاريني داشييانلار!

52:12  لاکئن سئز تَلَسئک چيخماياجاقسينيز، قاچاق آداملار کئمي ده گتميه‌جکسئنئز، چونکي رب سئزئن قاباغينيزدا گده‌جک، ائسرايئلئن تاريسي سئزئن آرخانيزي قوروياجاق.

52:13  باخ، منئم قولوم اوغور قازاناجاق، او اوجالديلاجاق، اوجالديلاجاق، چوخ عئزّتلَنه‌جک.

52:14  چوخلاري اونون قاباغيندا مات قالدي. بلی، اونون گؤرونوشو بوزولدو کي، ائنسانا بَنزَر ياني قالمادي.

52:15  بلجه او چوخ مئلّتلري حيرته سالاجاق، اونون سببئندن پادشاهلار آغزيني يوماجاقلار. چونکي اونلار، اونلارا ديئلمه‌دئکلرئني گؤره‌جکلر، اشئتمه‌دئکلرئني آنلاياجاقلار.

Chapter 53

53:1  بئزئم خبرئمئزه کئم ائنانيب، ربّئن گوجو کئمه آشکار اولوب؟

53:2  او، ربّئن حوضوروندا بئر بوداق کئمي، قورو تورپاقدا بئتَن کؤک کئمي بؤيودو. اونون نه گؤرونوشو، نه عظمتي وار ائدي کي، اونا گؤز دئکَک. نه گؤزل‌لئيي وار ائدي کي، اونو آرزو اِدَک.

53:3  ائنسانلار طرفئندن تحقئر اولوندو، ردّ اولوندو، او قوصّه‌لر آدام ائدي، عذابين نه اولدوغونو بئلئردي، ائنسانلارين اوز چِوئردئيي بئري کئمي خور گؤرولدو. بئز اونا دَيَر ورمه‌دئک.

53:4  اصلئنده ناخوشلوقلاريميزي او چکدي، قوصّه‌لرئمئزي اؤزو داشيدي. بئز آمّا اونون تاري طرفئندن جزالانديريلديغيني، تاري طرفئندن وورولوب ذلئل اولدوغونو ظنّ اتدئک.

53:5  لاکئن بئزئم تقصئرلرئمئزه گؤره اونون بدني دِشئلدي، شر عمل‌لرئمئز اوزوندن او اَزئلدي، رئفاهيميز اوچون گرکلي اولان جزا اونا ورئلدي، و اونون يارالاري ائله بئز شفا تاپيريق.

53:6  هاميميز قويون کئمي يولو آزميشديق، هر بئرئمئز اؤز يولوموزلا گِدئردئک. لاکئن رب هاميميزين شر عمل‌لرئنئن يوکونو اونون اوستونه قويدو.

53:7  اونا ظولم اتدئلر، اونو ذلئل اتدئلر. آمّا گئنه ده آغزيني آچمادي. کَسئلميه آپاريلان قوزو کئمي، قويون قيرخانلارين قاباغيندا، دئلسئز-آغيزسيز قويون کئمي آغزيني آچمادي.

53:8  عدالتسئزلئکله محکوم اولوناراق اؤلومه آپاريلدي. اونون نسلی حاقّيندا کئم دوشوندو کي، خالقيمين عاصئلئيئنه گؤره، او اعدام اولوندو، دئرئلرئن اؤلکه‌سي آراسيندان آتيلدي.

53:9  هچ بئر قدّارليق اتمه‌دئيي حالدا، آغزيندان حئيله‌لي سؤز چيخماديغي حالدا، اونا پئش آداملارين يانيندا بئر قبر ورئلدي، آمّا اؤلدويونده دؤولَتلي بئر آدامين يانيندا ائدي.

53:10  آمّا رب اونون اَزئلمه‌سئنه، اونون عذاب چکمه‌سئنه مايئل اولدو. اؤز جا‌نيني تقصئر قورباني تقدئم اتدئکده، او، اؤز نسلئني گؤره‌جک، عؤمرونو اوزاداجاق، و ربّئن خوش ائسته‌يي اونون اَلي ائله اوغور تاپاجاق.

53:11  چکدئيي مَشَقّتئن نتئجه‌سئني گؤروب خوشنود اولاجاق، منئم قولوم، او صالح اولان، اؤز بئلئيي ائله چوخلارينا برائت قازانديراجاق، اونلارين شر عمل‌لرئنئن يوکونو اوستونه گؤتوره‌جکدئر.

53:12  بونا گؤره من اونا بؤيوک آداملارين آراسيندا پاي وره‌جيم. او، قنئمتي گوجلولرله بؤله‌جک. چونکي او، جا‌نيني فدا اتدي، تقصئرکارلارلا بئر ساييلدي؛ آمّا گئنه ده چوخ آداملارين گوناهيني اوستونه گؤتوردو، تقصئرکارلار اوچون شفاعت اتدي.

Chapter 54

54:1  "شادليقدان هاراي چک، ای سونسوز، ای قيصير آرواد! سِوئنج هارايي چک، سَسلَن، ای دوغوش آغريسي چکمه‌ين سن! چونکي ترک ادئلمئش آروادين اؤولادلاري، اَرلي آروادين اؤولادلاريندان چوخ اولاجاق." بونو رب ديئر.

54:2  "چاديرينين يِرئني گِنئشلَندئر، مسکنئنئن اؤرتوکلرئني اوزات، چکئنمه؛ ائپلرئني اوزات، پايالاريني وور.

54:3  چونکي صاغا و سولا ياييلاجاقسان، نسلئن مئلّتلره صاحئب اولاجاق، وئران قالميش شهرلرده تزه‌دن مسکن سالاجاق.

54:4  قورخما، چونکي اوتانماياجاقسان، اؤزونو آلچاق گؤرمه، چونکي روسواي اولماياجاقسان. جاوانليغين خجالتئني ياددان چيخارداجاقسان، بئر داها دا دول‌لوغونون روسوايچيليغيني يادينا سالماياجاقسان."

54:5  چونکي سني يارادان سنئن اَرئندئر، اونون آدي قوشونلار ربّي‌دئر. سني ساتين آلان ائسرايئلئن موقدّسي‌دئر، او کي، بوتون دونيانين تاريسي آدلانير.

54:6  تارين ديئر: "رب سني چاغيريب، آتيلميش و روحو اَزئلمئش، جاوان ياشيندا اَره گتمئش، سونرا دا ردّ اولونموش بئر آرواد کئمي.

54:7  بئر آن سني ترک اتدئم، آمّا بؤيوک شَفقَتله سني توپلاياجاغام.

54:8  آلوولانان قضبله بئر آن سندن اوزومو دؤنده‌ردئم، لاکئن ابدی محبّتئمله سنه شَفقَت گؤرسده‌جيم." بونو سني ساتين آلان، رب ديئر.

54:9  "بو، منئم اوچون نوحون گونلري کئمي‌دئر، او زامان کئمي کي، آند ائچدئم نوحون دؤورونده‌کي سل سولاري بئر داها يِر اوزونو اؤرتميه‌جک؛ ائندي ده آند ائچئرم کي، سنه قضبلَنميه‌جيم، سني مزمّت اتميه‌جيم.

54:10  داغلار بلکه ده يِرئندن جايسين، تپه‌لر بلکه ده تئتره‌سئنلر، لاکئن سنه اولان محبّتئم دَيئشمَز، صولح عهدئم يِرئندن جايماز." بونو سنه شَفقَت گؤرسه‌دن رب ديئر.

54:11  "ای طوفانا دوشموش، تسلّی تاپماميش يازيق شهر! باخ، سنئن داشلاريني عَقئقلرله، سنئن پايالاريني لاجورد داشلارلا قوياجاغام.

54:12  بورجلرئني ياقوتدان، دروازالاريني لعل-جواهئردن، بوتون دوواريني قئيمتلي داشلاردان حؤره‌جيم.

54:13  بوتون اؤولادلارين ربدن تَعلئم آلاجاقلار، اؤولادلارينين رئفاهي بؤيوک اولاجاق.

54:14  صالحلئکده مؤحکملَنه‌جکسن، ظولمدن اوزاق اولاجاقسان، چونکي قورخماياجاقسان. قورخو حئسّي سندن اوزاق اولاجاق، چونکي سنه ياخينلاشماياجاق.

54:15  سنه هوجوم ادن اولسا، بئل کي، بو مندن ديئل، سنه هوجوم ادن هر کس، سنه گؤره ييخيلاجاق.

54:16  باخ، اوددا کؤمورو کؤروکله‌يَن، اؤز ائشي اوچون سئلاح حاضيرلايان دمئرچئني من ياراتميشام؛ محو اتمک اوچون قيريجيني دا من ياراتميشام.

54:17  سنئن ضئدّئنه ائشله‌نَن هچ بئر سئلاح ائشه ياراماياجاق. محکمه‌ده سني تقصئرلَندئرن هر دئل محکوم اولوناجاق. ربّه قوللوق ادنلرئن ائرثي بله‌دئر. اونلارين دئفاعسي مندن گلئر." بونو رب بويورور.

Chapter 55

55:1  ای بوتون سوسوزلاميشلار، گلئن سولار يانينا! ای پولو اولمايانلار، گلئن، آلين و ييئن! گلئن، شرابي و سودو پولسوز آلين، عوضسئز آلين!

55:2  نه اوچون پولونوزو چؤرک اولمايان شيلره، قازانديغينيزي سئزي دويدورمايان شيلره خَرجله‌يئرسئنئز؟ منی دئقّتله اِشئدئن، ياخشي اولاني ييئن، جانينيز بوللوقدان لذّت آپارسين.

55:3  قولاق آسين، منئم يانيما گلئن، قولاق آسين کي، ياشاياسينيز. من داوودا گؤرستدئيئم صادئق مرحمتلره موطابئق، سئزئنله ابدی بئر عهد باغلاياجاغام!

55:4  باخ، من اونو خالقلارا شاهئد اتمئشم، خالقلارا باشچي و حؤکمدار قويموشام.

55:5  باخ، تانيماديغينيز بئر مئلّتي چاغيراجاقسينيز. تارينيز ربّه گؤره، ائسرايئلئن موقدّسئندن اؤتري، سئزي تانيمايان مئلّت قاچا- قاچا يانينيزا گله‌جک. چونکي رب سئزه عئزّت ورئب.

55:6  تاپماق فورصتي اولارکن ربّی آختارين، او ياخين ائکن اونو چاغيرين.

55:7  قوي پئس آدام اؤز يولونو، شر آدام اؤز فئکئرلرئني بوراخسين. قوي ربّه ساري دؤنسون و اوندان شَفقَت آلاجاق. قوي بئزئم تاريميزئن طرفئنه دؤنسون، چونکي بول-بول باغيشلاناجاق.

55:8  "چونکي منئم فئکئرلرئم سئزئن فئکئرلرئنئز ديئل، سئزئن يوللارينيز دا منئم يوللاريم ديئل." رب بويورور.

55:9  "چونکي گؤيلر ير اوزوندن نه ‌قدر اوجادير، منئم يوللاريم دا سئزئن يوللارينيزدان، منئم فئکئرلرئم ده سئزئن فئکئرلرئنئزدن او قدر اوجادير.

55:10  نجه گؤيدن ياغان ياغيش و قار تورپاغي سولامادان، يري محصولدار ادئب اَکئن بئتمه‌دن، اَکئنچئيه توخوم، يئيَنه چؤرک ورمه‌دن گؤيلره قاييتمير،

55:11  آغزيمدان چيخان کلمه ده بله‌دئر: بوش يِره يانيما قاييتماز، ائسته‌دئيئمي يرئنه يتئرمه‌يئنجه، اونو گؤنده‌ردئيئم ائشي باشا چاتديرمايينجا يانيما قاييتماز.

55:12  سِوئنجله چيخاجاقسينيز، باريشلا موشايئعت اولوناجاقسينيز، داغلار و تپه‌لر قاباغينيزدا شادليقلا اوخوياجاق، چؤلده‌کي بوتون آغاجلار اَل چالاجاق.

55:13  تئکانلي بوتا عوضئنه شام آغاجي، قانقال عوضئنه مَرسئن آغاجي بئته‌جک. بو، رب اوچون يادئگار اولاجاق، پوزولمايان ابدی بئر علامت اولاجاق."

Chapter 56

56:1  رب بله ديئر: "عدالتي حئفظ ادئن، صالحلئيه عمل ادئن. چونکي خئلاصيم ياخيندادير، صالحلئيئم تزلئکله آشکار اولوناجاق.

56:2  بونو ادن ائنسان، بونو مؤحکم توتان بشر اوغلو نه بختوردئر! او کي، سَبّت گونونو ساخلار، اونو نجئسله‌مَز، او کي، اَلئني هر جور شردن حئفظ اِدَر.

56:3  قوي ربّه بِل باغلايان هچ بئر ياداِللي دِمه‌سئن: «يقئن رب منی اؤز خالقيندان آييراجاق.» قوي هچ بئر خاجه دِمه‌سئن: «باخ، من قورو بئر آغاجام.»"

56:4  چونکي رب بله ديئر: "سَبّت گونلرئمي ساخلايان، منه خوش گلني سِچَن، عهدئمه وفالي قالان خاجه‌لره،

56:5  اِوئمده، دووارلاريمين آراسيندا اونلارا بئر يادئگار وره‌جيم، اوغوللاردان و قيزلاردان داها دا ياخشي؛ اونلارا سئلئنمَز و ابدی بئر آد وره‌جيم.

56:6  ياداِللي‌لره ده کي، ربّه قوشولورلار، اِله کي، اونا خئدمت اتسئنلر، ربّئن آديني سِوسئنلر، اونون قوللاري اولسونلار، سَبّت گونونو ساخلاييب اونو نجئسلَمه‌سئنلر، و عهدئمه وفالي قالسينلار،

56:7  حتّا اونلاري دا موقدّس داغيما گتئرئب دوعا اِوئمده اونلاري سِوئندئره‌جيم. اونلارين گتئردئکلري يانديرما قوربانلاري، اونلارين قوربانلاري قوربانگاهيمدا قبول اولوناجاق. چونکي منئم اِوئم بوتون خالقلار اوچون دوعا اِوي چاغيريلاجاق."

56:8  ائسرايئلئن داغيلميش اؤولادلاريني ييغان پروردئگار رب بله بويورور: "من ييغيلميشلارين يانينا باشقالاريني دا ييغاجاغام."

56:9  ای چؤلون بوتون وحشي حيوانلاري، ای مِشه‌نئن بوتون جاناوارلاري، يِمَيه گلئن!

56:10  خالقيمين کشئکچئلري کوردورلار، جاهئلدئرلر! اونلارين هاميسي هؤره بئلمه‌يَن لال ائتلردئرلر، اوزانيب رؤيا گؤرورلر، ياتماغي سِوئرلر!

56:11  آجگؤز، هچ دويمايان ائتلردئلر بونلار، آخماق چوبانلارديلار بونلار! هر کس اؤز يولونا دؤنوب، هر بئري آنجاق اؤز منفعتئني گودور!

56:12  بئربئرلرئنه ديئرلر: "گلئن، شراب گتئرَک، بول-بول عرق ائچک! صاباحکي گون ده بو گون کئمي، حتّا بوندان دا چوخ ياخشي اولاجاق!"

Chapter 57

57:1  "صالح آدام محو اولور و کئمسه‌نئن اوموروندا ديئل. مؤمئن آداملار دا کؤچوب گِدئر، آمّا هچ کئم آنلامير. چونکي صالح آدام پئسلئکدن قورتولور.

57:2  صالح آدام صولحه داخئل اولور، دوغرو يوللا گِدن، ياتاغيندا راحات ياتير.

57:3  آمّا سئز، ای جادوگر آروادين اؤولادلاري، فاحئشه و زئناکارلار نسلي، بورايا گلئن!

57:4  سئز کئمي مسخره‌يه قويورسونوز؟ آغيزينيزي کئمه گِن آچيرسينيز؟ کئمه دئل گؤرسه‌دئرسئنئز؟ مگر سئز عاصئلئيئن اؤولادلاري، حئيله‌نئن نسلی ديئلسئنئز؟

57:5  مگر سئز ديئلسئنئز کي، پاليد آغاجلاري آراسيندا، هر ياشيل آغاجين آلتيندا شهوتله آليشيب يانيرسينيز؟ مگر سئز ديئلسئنئز کي، دره‌لرده، قايا اويوقلاريندا، اؤولادلاري قوربان ادئرسئنئز؟

57:6  سئزئن پايينيز دره‌نئن هامار داشلاريندان دوزه‌لَن بوتلردئر. سئزئن پايينيز اونلاردير؛ بلی، اونلارين قاباغيندا مايع تقدئمي تؤکوبسونوز، تاخيل تقدئمي گتئرئبسئنئز. بونلارا گؤره مگر منئم اوره‌يئم رحمه گلر؟

57:7  ياتاغينيزي اوجا، اوجا داغدا ساليبسينيز، قوربانلارينيزي کَسمک اوچون ده اورايا دا چيخدينيز.

57:8  قاپيلارينيزا، قاپيلارين يان تاختالارينين آرخاسينا علامتئنئزي ووروبسونوز. منی ترک ادئب ياتاغينيزي گِنئش آچيبسينيز، اورادا اوزانيبسينيز، اويناشلارينيزلا سؤوده‌لَشئبسئنئز، بئرلئکده ياتماغا جان آتيبسينيز، اونلارين لوتلويونه تاماشا ادئبسئنئز!

57:9  ياغ و عطئرلري بول-بول ووراندان سونرا پادشاها ساري گدئبسئنئز. اِلچئلرئنئزي اوزاقلارا گؤنده‌رئبسئنئز، اؤزونوزو اؤلولر دئيارينا قدر اِندئرئبسئنئز.

57:10  اوزون يوللار سئزي طاقتدن سالدي. لاکئن سئز «بونون فايداسي يوخدور» دِمه‌دئنئز. گوجوزو تزه‌له‌يئب قالخدينيز، بونا گؤره ده حالدان گتمه‌دئنئز.

57:11  کئم سئزي قورخودوب دهشته سالدي کي، يالان دِدئنئز؟ منی يادا سالمادينيز، منی دوشونمه‌دئنئز؟ من اوزون بئر زامان ساکئت قالديغيما گؤره، سئز مندن قورخمورسونوز؟

57:12  من سئزئن صالحلئيئنئزي، اتدئيئنئز عمل‌لري آشکارا چيخارداجاغام، بونلارين سئزه خِيري اولماياجاق.

57:13  سئز فرياد ادنده، قوي بو ييغديغينيز بوتلر سئزي قورتارسين. آمّا اونلارين هاميسيني کولَک سوووروب آتاجاق، بئر نفس اونلاري يِرئندن تَرپه‌دئب آپاراجاق. لاکئن منه سيغينان، تورپاغي مئراث آلاجاق، موقدّس داغيمي مولک اده‌جک."

57:14  و ديئله‌جک: "تئکئن، تئکئن، يولو حاضيرلايين! خالقيمين يولونداکي مانعلري گؤتورون!"

57:15  چونکي اوجا و عظمتلي اولان، ابدی ياشايان، آدي موقدّس اولان، بله ديئر: "من اوجا و موقدّس يرده ساکئنَم، قلبي سينيق اولانلارلا‎يام، روحدان دوشوکلرله‌يم، اِله کي، روحدان دوشوکلرئن روحلاريني، قلبي سينيق آداملارين قلبلرئني تزه‌لَندئرئم.

57:16  چونکي همئشه چکئشئب قضبلَنميه‌جيم، يوخسا ياراتديغيم جانلي ائنسان قاباغيمدا دورا بئلمز.

57:17  طاماحکارليق گوناهينا گؤره قضبله‌نئب اونو جزالانديرديم، حئدّتله‌نئب اوزومو اوندان دؤنده‌ردئم. او اؤز يولونا دؤنوب گتدي.

57:18  يولونو گؤرموشم، آمّا اونا شفا وره‌جيم. اونا رهبرلئک اده‌جيم، اونا و اونونلا ياس توتانلارا تسلّی وره‌جيم.

57:19  آغيزلارين حمدئني ياراداجاغام. اوزاقداکيلارا و ياخينداکيلارا باريش اولسون، باريش اولسون." رب ديئر: "و من اونا شفا وره‌جيم."

57:20  لاکئن پئسلر شَپه‌لَنَن دهنز کئمي‌دئر، بو دهنز اَرام توتا بئلمز، اونون سولاري آشغال و پالچيق چيخاردار.

57:21  منئم تاريم ديئر: "پئسلره هچ اَرامليق يوخدور."

Chapter 58

58:1  "اوجا سَسله چيغير، چکئنمه؛ سَسئني کَره‌ناي سَسي کئمي اوجالت، خالقيما اونلارين تقصئرلرئني، يعقوب نسلئنه اونلارين گوناهلاريني بئلدئر!

58:2  اونلار هر گون منی آختاريرلار، منئم يوللاريمي بئلمَکدن کِف ادئرلر. اِله بئل کي، بو عملي‌صالح، تاريسينين حؤکموندن آيريلمايان مئلّت ائمئش. اونلار مندن عادئل حؤکملر آرزو ادئرلر، تارييا ياخينلاشماقدان کِف ادئرلر.

58:3  ديئرلر: «اوروج توتدوغوموزو نه اوچون گؤرمورسن، اؤزوموزو حلئم ادئرئک، آمّا سن فئکئر ورمئرسن؟» باخين، اوروج توتدوغونوز گون، سئز، ائسته‌دئيئنئزي ادئرسئنئز، بوتون ائشچئلرئنئزه ظولم ادئرسئنئز.

58:4  باخين، اوروجونوزو ساواشماقلا، داعوا ائله، يومروقلا، دؤيمَکله کچئردئرسئنئز. سئز، بو گونکي کئمي، اوروج توتماقلا ائسته‌مئرسئنئز کي، سَسئنئزي اوجالاردا اشئتدئره‌سئنئز.

58:5  مگر منئم سِچدئيئم اوروج بودور، بئر گون کي، آدام اؤزونو باشي آشاغي اتسئن؟ قاميش کئمي باشيني اَيسئن، اَينئنه چول گِيئب، کول اوستونده ياتسين؟ سئز بونو اوروج چاغيريرسينيز، هم ده ربّه مقبول اولان گون چاغيريرسينيز؟

58:6  مگر منئم ائسته‌دئيئم اوروج او ديئل کي، پئسلئيئن بوخوولاريني قيراسينيز، يوغون ائپلرئني آچاسينيز، سئتم آلتيندا اولانلاري آزاد اده‌سئنئز، و هر جور يوغو قيراسينيز؟

58:7  مگر او ديئل کي، يِدئيئنئز چؤره‌يي آجلا بؤلوشه‌سئنئز؟ بي‌خانومان کاسيبلاري اِوئنئزه گتئره‌سئنئز؟ لوت گؤرنده اونو گِيئندئره‌سئنئز، ياخينلارينيزدان کؤمه‌يئنئزي اسئرگَميه‌سئنئز؟

58:8  او واخت نورونوز شفق کئمي ساچاجاق، و تزلئکله شفا تاپاجاقسينيز، صالحلئيئنئز قاباغينيزدا گده‌جک، ربّئن عئزّتي سئزي آرخادان قوروياجاق.

58:9  او واخت ربّی چاغيراجاقسينيز، و رب سئزه جاواب وره‌جک. باغيراجاقسينيز، او سئزه «بورادايام» دئيه‌جک. اگر سئز يوغو آرانيزدان، بارماق اوزاتماغي و سؤزلر دِمه‌يي آرانيزدان ردّ اده‌سئنئز،

58:10  اگر اورَکدن آجلارين قيدئنه قالاسينيز، ذلئل‌لرئن احتئياجلاريني وره‌سئنئز، او واخت نورونوز قارانليقدا پارلاياجاق، قارانليغينيز گون اورتا ائشيغي کئمي نور ساچاجاق.

58:11  رب همئشه سئزه يول گؤرسده‌جک، قورو تورپاقلاردا سئزي دويوزدوراجاق، سوموکلرئنئزه قووّت وره‌جک. سئز ده سولانميش باغچا کئمي، سولاري هچ واخت اَسکئلمه‌ين بولاق کئمي اولاجاقسينيز.

58:12  سئزدن عمله گلنلر قدئم داغينتيلاري تئکه‌جکلر، نسئل‌لردن قالما پايالارين اوستونو سئز برپا اده‌جکسئنئز. سئزه خاراباليقلاري برپا ادنلر، جاماعاتين ياشاماسي اوچون کوچه‌لري تزه‌دن قورانلار ديئله‌جک.

58:13  اگر سَبّت گونونده بودره‌مَيه‌سئنئز، موقدّس گونومده اؤز کِفئنئزه باخماياسينيز، سَبّت گونونو «شَن گون»، ربّئن موقدّس گونونو «شرفلي گون» چاغيراسينيز، اؤز يولونوزلا گتمه‌مَکله، ائسته‌دئيئنئزي اَلده اتمه‌مَکله، بوش‌بوغازليقلا مشغول اولماماقلا، او گونو عَزئز توتاسينيز،

58:14  او واخت رَبدن کِف اِدَرسئنئز، و من سئزي يِر اوزونون اوجا يِرلرئنه چيخاردارام، آتانيز يعقوبون پاييندان سئزي يِدئزدئره‌رم." چونکي ربّئن آغيزي دانيشيب.

Chapter 59

59:1  باخ، ربّئن اَلي قيسا ديئل کي، خئلاص اده بئلمه‌سئن، قولاغي کار ديئل کي، اِشئده بئلمه‌سئن.

59:2  لاکئن شر عمل‌لرئنئز تارينيزلا سئزئن آرانيزدا آيريليق ساليب. گوناهلارينيز سبب اولوب کي، اوزونو سئزدن دؤنده‌رسئن، اِله کي، اشئتمه‌سئن.

59:3  چونکي اَللرئنئز قانلا، بارماقلارينيز شر عمللرله نجئسله‌نئب. دوداقلارينيز يالان دانيشيب، دئلئنئز پئسلئک ميريلدانير.

59:4  محکمه‌ده عدالتله ائشه باخان يوخدور، دوغرولوقلا اؤزونو مودافئعه ادن يوخدور، بوش سؤزلره بِل باغلاييرلار، يالان دانيشيرلار، اَذئيّته بويلو اولوب پئسلئک دوغورلار.

59:5  افعي يومورتالارينين اوستونده ياتيب، حؤرومچک تورو توخويورلار. او يومورتالاردان يئيَن اؤلور، قيريلان يومورتالاردان ائلان چيخير.

59:6  اونلارين توخودوغو حؤرومچک توروندان پالتار چيخماز، توخودوقلاري ائله ده اؤزلرئني اؤرته بئلمزلر. اِله‌دئکلري عمللر شر عمل‌لردئر، اَللرئنده قدّارليق ائشلري وار.

59:7  آياقلاري پئس ائشلر اتمه‌يه تَله‌سئر، معصوملارين قانيني تؤکميه جَلددئرلر. فئکئرلري، نئيّتلري شر عمل‌لردئر، يوللاريندا هلاکت و وئرانه‌لئک وار.

59:8  باريش يولونو تانيميرلار، گتدئکلري يولدا عدالت يوخدور، يوللاريني اَيري ادئبلر، او يولدان گِدنلرئن هچ بئري باريش نه‌دئر، بئلمئر.

59:9  بونا گؤره عدالت بئزدن اوزاقلاشيب، صالحلئک بئزه يِتئشمئر. ائشيق اومئدئنده‌يئک، آمّا باخ، قارانليقداييق، آيدينليق گؤزله‌يئرئک، لاکئن ظولمتده يِرئيئرئک.

59:10  کور کئمي اَللرئمئزله دوواري يوخلاييريق، گؤزو گؤرمه‌يَنلر کئمي يولوموزو تاپماغا چاليشيريق. گون اورتا چاغي گجه واختي اولدوغو کئمي بودره‌يئرئک، گوجلولر آراسيندا اؤلولر کئمئيئک.

59:11  هاميميز آيي کئمي نَرئلده‌يئرئک، گؤيرچئن کئمي ائنئلده‌يئرئک. عدالت گؤزله‌يئرئک، لاکئن اصلا يوخدور. قورتولوش گؤزله‌يئرئک، آمّا بئزدن اوزاقدير.

59:12  چونکي تقصئرلرئمئز سنئن حوضوروندا چوخدور، گوناهلاريميز بئزئم ضئدّئمئزه شهادت ورئر. چونکي تقصئرلرئمئز بئزئمله‌دئر، شر عمل‌لرئمئزدن خبرداريق.

59:13  خاطا ادئرئک، ربّی ائنکار ادئرئک، تاريميزدان اوز دؤنده‌رئرئک، ظولمدن دانيشيريق، خيانتدن دانيشيريق، يالانلاري اوره‌يئمئزده گئزله‌دئب سونرا آشکارا چيخارديريق.

59:14  عدالت گری چکئلئر، صالحلئک اوزاقدا دورور، چونکي حقئقت شهر مِيدانيندا ييخيليب، دوروستلوک اَراميزا داخئل اولا بئلمئر.

59:15  بلی، حقئقت هچ بئر يرده يوخدور، شردن اوزاق دوران تالان اولونور. رب بونلاري گؤردو، عدالتئن يوخلوغو اونون خوشونا گلمه‌دي.

59:16  رب گؤردو کي، هچ کئم يوخدور، شفاعت اده‌نئن اولماديغينا گؤره او مات قالدي. او واخت اونون اؤز قولو اونا ظفر گتئردي، اؤز صالحلئيي اونا داياق اولدو.

59:17  او، صالحلئيي زئرِه کئمي گِيدي، قورتولوش دَبئلقه‌سئني باشينا تاخدي. قئصاص پالتارلاريني گِيدي، قيرت پالتارينا بوروندو.

59:18  او هر کسه عمل‌لرئنه گؤره عوض وره‌جک. دوشمنلرئنه قضبله، خصملرئنه، ساحئل‌لره قئصاصلا عوض وره‌جک.

59:19  بلجه قربدن شرقه‌جک آداملار ربّئن آديندان و اونون شؤوکتئندن قورخاجاقلار. چونکي دوشمن آزغين بئر چاي کئمي گلدئکده ربّئن نفسي اونو قوواجاق.

59:20  رب بويورور: "قورتاريجي صحيونا، يعقوب نسلئنئن تقصئرلرئندن دؤنَن اؤولادلارينين يانينا گله‌جک."

59:21  رب ديئر: "منه گلئنجه، بودور منئم اونلارلا اولان عهدئم: اوستونده‌کي روحوم، و آغزينا قويدوغوم سؤزلرئم، ائندئدن ابده کئمي، سنئن، اؤولادلارينين و نوه-نتئجه‌لرئنئن آغزيندان دوشمَيه‌جک."

Chapter 60

60:1  قالخ، ائشيقلان، چونکي نورون گلئب، ربّئن شؤوکتي سنئن اوستونه ساچير!

60:2  باخ، دونياني قارانليق، خالقلاري ظولمت بورويه‌جک. آمّا رب سنئن اوستونه نور ساچاجاق، شؤوکتي سني اَحاطه اده‌جک.

60:3  مئلّتلر سنئن نورونا، پادشاهلار اوستونه چؤکَن آيدينليغا طرف گله‌جکلر.

60:4  قالدير باشيني، باخ اطرافينا، اونلارين هاميسي ييغيليب يانينا گلئرلر! اوغوللارين اوزاقدان گله‌جک، قيزلارين قوجاقدا گتئرئله‌جک.

60:5  او واخت بونو گؤروب اوزون نور ساچاجاق، اوره‌يئن سِوئنجدن تِز-تِز چيرپيناجاق. چونکي دهنزئن وار-دؤولتي سنه گتئرئله‌جک، مئلّتلرئن ثروتي سنه گله‌جک.

60:6  دَوه سورولري، مئديانين، عِيفانين جمّازلاري تورپاقلاريني دولدوراجاق. بوتون شِبا خالقي گلئب قيزيل و کوندور گتئره‌جک، و ربّئن حمدلرئنئن خوش خبرئني اعلان اده‌جک.

60:7  قِدارين بوتون سورولري سنئن يانينا ييغيلاجاق، نِبايوتون قوچلاري سنه خئدمت اده‌جک، قوربانگاهيمدا منه مقبول اولان قوربانلار اولاجاقلار، و من عئزّتلي اِوئمي داها دا عئزّتلَندئره‌جيم.

60:8  کئمدئر بونلار کي، بولود کئمي، يووالارينا ياخينلاشان گؤيرچئن کئمي اوچوب گلئرلر؟

60:9  قطعن ساحئل‌‌لر منه اومئد باغلاياجاقلار؛ تَرشئش گَمئلري اوّل گله‌جکلر کي، سنئن اؤولادلاريني قيزيل وَگوموشلري ائله اوزاقدان گتئرسئنلر؛ تارين ربّئن آدي اوچون، سني عئزّتلَندئرَن ائسرايئلئن موقدّسي اوچون.

60:10  اجنبئلر دووارلاريني تئکه‌جکلر، پادشاهلاري سنه خئدمت اده‌جکلر. چونکي قضبئمده سني ووردوم، و لوطفومده سنه شَفقَت گؤرستمئشم.

60:11  دروازالارين همئشه آچيق قالاجاق، نه گجه، نه ده گوندوز قيفيل‌لاناجاق کي، مئلّتلرئن ثروتي سنه تقدئم اولسون، پادشاهلاري يانينا گتئرئلسئن.

60:12  چونکي سنه خئدمت اتمک ائستمه‌ين مئلّت و يا سلطنت محو اولاجاق، بلی، او مئلّتلر کامئل يوخ اولاجاقلار.

60:13  شام آغاجي، چئنار و سرو آغاجلاري کي، لوبنانين شان-شؤهرتي‌دئر، سنه گتئرئله‌جک کي، موقدّس مکانيمداکي يري گؤزل‌لَشدئرسئن، و آياق قويدوغوم يري شؤوکتلَندئرئم.

60:14  سني ذلئل ادنلرئن اؤولادلاري گلئب قاباغيندا تعظئم اده‌جکلر. سنه حقارتله باخانلارين هاميسي آياقلارينا دوشوب سنه سجده اده‌جکلر. سنه ربّئن شهري، ائسرايئلئن موقدّسئنئن صحيونو دئيه‌جکلر.

60:15  گرچي سني ترک ادئب سندن نئفرت اتدئلر، يانيندان هچ کئم کِچمئردي، آمّا ائندي من سني ابدی بئر فخر، نسئل‌لر بويو بئر شادليق اده‌جيم.

60:16  مئلّتلر و پادشاهلار بئر آنا کئمي سنه سود وره‌جکلر. او واخت بئله‌جکسن کي، من سني قورتاران ربّم، سني ساتين آلان، يعقوبون قودرتلي تاريسي.

60:17  سنه بورونج عوضئنه قيزيل، دمئر يرئنه گوموش، آغاج يرئنه بورونج، داش عوضئنه دمئر گتئره‌جيم. اَمئن-آمانليغي حؤکمدارين، صالحلئيي ده باشچيلارين تعيئن اده‌جيم.

60:18  سنئن تورپاغيندا بئر داها قدّارليق اِشئدئلميه‌جک، سرحدلرئنئن آراسيندا هلاکت و وئرانه‌لئک خبري اولماياجاق. دووارلاريني «خئلاص»، دروازالاريني دا «حمد» آدلانديراجاقسان.

60:19  آرتيق گوندوز گونش ائشيغين اولماياجاق، گجه آي سنه آيدينليق ورميه‌جک. چونکي رب ابدی نورون، تارين دا سنئن شؤوکتئن اولاجاق.

60:20  گونشئن بئر داها باتماياجاق، آيين گئزلَنميه‌جک، چونکي رب ابدی نورون اولاجاق، سنئن ياسلي گونلرئن قورتاراجاق.

60:21  او واخت بوتون خالقين صالح اولاجاق، تورپاغي همئشه‌لئک مولک آلاجاقلار. اونلار اَکدئيئم بوداقدير، اَلئمئن ائشي کي، اونونلا عئزّتلَنئم.

60:22  لاپ کئچئک عايئله‌دن بؤيوک نسئل عمله گله‌جک، آز سايلي نسئل قودرتلي مئلّت اولاجاق. من رب بونو اؤز واختيندا تِز اده‌جيم.

Chapter 61

61:1  پروردئگار ربّئن روحو اوستومده‌دئر، چونکي منی مسح ادئب کي، ذلئل اولموشلارا خوش خبري گتئرئم. او منی گؤنده‌رئب کي، قلبلري سينيق اولانلارين يارالاريني ساريييم، اسئرلره قورتولوش، محبوسلارا آزادليق اعلان اِدئم.

61:2  ربّئن لوطف ائلئني، تاريميزين قئصاص گونونو نئدا اِدئم، ياسلي‌لارين هاميسينا تسلّی ورئم،

61:3  صحيوندا ياس توتانلاري تأمئن اِدئم، کول يرئنه چَلَنگ، ماتم يرئنه شادليق گتئرن مسح ياغي ورئم، ضعئفلئک روحو عوضئنه، حمد پالتاريني بخش اِدئم. بلجه اونلار ربّئن اَکدئيي صالحلئک پاليد آغاجلاري چاغيريلاجاقلار کي، رب عئزّتلَنسئن.

61:4  او زامان اونلار قدئم داغينتيلاري بئنا اده‌جکلر، قاباقکي خاراباليقلاري برپا اده‌جکلر، نسئل‌لر بويو وئرانه قالميش شهرلري تزه‌دن قوراجاقلار.

61:5  ياداِللي‌لر گلئب سورولرئنئزي اوتاراجاقلار، اجنبئلر سئزه اَکئنچئلئک اده‌جکلر، سئزه اوزوملوکلرئنئزده باغبانليق اده‌جکلر.

61:6  آمّا سئز ربّئن کاهئنلري چاغيريليب، تاريميزين خئدمتچئلري آدلاناجاقسينيز. مئلّتلرئن ثروتئني يئيه‌جکسئنئز، اونلارين وار-دؤولتلري ائله فخر اده‌جکسئنئز.

61:7  چکدئيئنئز خجالت يرئنه ائکي قات شرف، روسوايچيليق عوضئنه اونلارين پايي اوستونه شادليقدان هاراي چکه‌جکسئنئز. بونا گؤره اونلار اؤلکه‌لرئنده ائکي قات مولک آلاجاقلار، سِوئنجلري ابدی اولاجاق.

61:8  چونکي من، رب، عدالتي سِوئرَم. سويغونچولوقدان، حاقسيزليقدان نئفرت ادئرم. البتّه کي، عمل‌لرئنه گؤره اونلارا حاقّيني وره‌جيم، اونلارلا ابدی عهد باغلاياجاغام.

61:9  نسئل‌لرئندن گلنلر مئلّتلر ائچئنده، اؤولادلاري خالقلار آراسيندا تانيناجاقلار. اونلاري گؤرَن هر کس اونلاري تانيياجاق، چونکي اونلار ربّئن برکت وردئيي نسئللردئرلر.

61:10  ربده چوخ شادليق اده‌جيم، تاريمدا اوره‌يئم شادليقدان جوشاجاق، چونکي چَلَنگله بَزَنمئش بَي کئمي، بَر-بَزَک تاخميش گلئن کئمي، منه قورتولوش پالتاري گِيئندئرئب، صالحلئک البسه‌سی ائله بورويوب.

61:11  تورپاق زوغلاريني نجه جوجَردئر، باغ اَکئلَن توخوملاري نجه يِتئشدئرئر، پروردئگار رب ده بوتون مئلّتلر قاباغيندا صالحلئيي و حمدي بله يِتئشدئره‌جک.

Chapter 62

62:1  صالحلئيي نور کئمي ساچاناجاق، قورتولوشو مشعل کئمي ياناناجاق، صحيونون خاطئرئنه ساکئت اولماياجاغام، اورشلئمئن خاطئرئنه ساکئت دورماياجاغام.

62:2  مئلّتلر سنئن صالحلئيئني، بوتون پادشاهلار سنئن شؤوکتئني گؤره‌جکلر، ربّئن آغزيندان چيخديغي، سنه وردئيي تزه آدلا چاغيريلاجاقسان.

62:3  سن ربّئن اَلئنده عئزّت تاجي، تارينين اووجوندا پادشاهليق چَلَنگي اولاجاقسان.

62:4  آرتيق سنه "آتيلميش"، اؤلکه‌نه ده "وئرانه قالميش" دِمَيه‌جکلر؛ عوضئنه سنه "خوشلانديغيم"، اؤلکه‌نه ده "اَرلي" ديئله‌جک. چونکي رب سندن خوشلانير، اؤلکَن ده اونونلا اِولي ساييلاجاق.

62:5  چونکي نجه بئر جاوان، باکئره بئر قيزلا اِوله‌نئر، اِلجه ده سنئن اوغولارين سنئنله اِولَنه‌جکلر. نجه بَي، گلئن اوزوندن شادليق ادئر، تارين دا سن اوچون اِله شادليق اده‌جک.

62:6  ای اورشلئم، دووارلارينين اوستونه من قارووولچولار قويموشام. گجه‌-گوندوز اونلار ساکئت اولماياجاقلار. ای سئزلر کی، ربّه سؤزونو خاطيرلاديرسينيز، ساکئت اولمايين؛

62:7  رب اورشلئمي برپا ادنه‌جک، اونو يِر اوزونون تعرئفه لايئق شهرئنه دؤنده‌رَنه‌جک، اونا راحاتليق ورمه‌يئن!

62:8  رب صاغ اَلئنه، گوجلو قولونا آند ائچئب: "سنئن تاخيليني بئر داها دوشمنلرئنه يِدئرتميه‌جيم، ياداِللي‌لر ده سنئن زحمتله سيخديغين شرابيني ائچميه‌جکلر.

62:9  آمّا تاخيلي ييغان يئيه‌جک، ربّه حمدلر اده‌جک. اوزومو ييغان شرابيني موقدّس مکانيمين صحنلرئنده ائچه‌جکدئر."

62:10  کِچئن، شهر دروازالاريندان کِچئن، خالق اوچون يول حاضيرلايين! تئکئن، يول سالين، داشلاري کنارا آتين، خالقلار اوچون بايراق قالديرين!

62:11  باخين، رب يِر اوزونون لاپ اوزاق يِرلرئنه اعلان ادئب: "صحيون قيزينا ديئن: «باخ، قورتولوشون گلئر، باخ، ربّئن پاداشي اونونلادير، بَخشئشي ده قاباغيندادير.»"

62:12  صحيون خالقينا "ربّئن ساتين آلديغي، موقدّس خالق" دئيه‌جکلر. سن، ای اورشلئم، "تارينين آختارديغي، ترک اولماميش شهر" آدلاناجاقسان.

Chapter 63

63:1  اِدومدان گلن، بوصرادان گلن بو، کئمدئر؟ بو کي، قيرميزي رنگئنه دؤنموش پالتارلار گِيئنئب؟ شؤوکتلي البسه ائچئنده، بؤيوک قودرتله يوروش ادئب گلئر؟ "او منم، صالحلئکده دانيشان، قورتارماغا قادئر اولان."

63:2  نه اوچون پالتارلارين قيرميزي‌دير؟ نه اوچون پالتارين بله قيرميزي اولوب؛ اِله بئل کي، سن اوزوم‌سيخاندا اوزوم سيخيردين؟

63:3  "اوزوم‌سيخاندا اوزومو تک سيخديم، يانيمدا خالقلاردان هچ کئم اولمادي. قضبئم ائچئنده اونلاري تاپدالاديم، قِيضئمله اونلاري آياقلاريمين آلتينا سالديم. قانلاري پالتارلاريما سيچراييب، بوتون پالتارلاريمي بولاشديرديم.

63:4  چونکي قئصاص گونو قلبئمده ائدي، خالقيمي ساتين آلديغيم ائل گلئب.

63:5  من باخديم، کؤمک ادن بئر کس يوخ ائدي، حيران قالميشديم و منئم طرفئمي ساخلايان يوخ ائدي، او واخت قولوم منه ظفر گتئردي، قِيضئم منه داياق اولدو.

63:6  قضب ائچئنده خالقلاري تاپدالاديم، قِيضئمله اونلاري مست اتدئم، قانلاريني يِره آخيتديم."

63:7  ربّئن مهرئبانليغيني، اونون حمدلره لايئق اولان ائشلرئني نقل اده‌جيم؛ بئزه باغيشلاديغي بوتون شيلر اوچون، ائسرايئل نسلئنه اتدئيي بؤيوک ياخشيليق اوچون کي، رحمتئنه گؤره، بؤيوک محبّتئنه گؤره بئزه ادئب.

63:8  رب ددي: "البتّه، اونلار منئم خالقيمديرلار، منی آلداتمايان اؤولادلاريمديرلار." بلجه اونلارا قورتاريجي اولدو.

63:9  اونلار اذئيّت چکدئکده، او دا اذئيّت چکدي. حوضوروندان گلن ملک اونلاري خئلاص اتدي؛ محبّتي و مرحمتي ائله اونلاري ساتين آلدي. بوتون کِچمئش گونلرده اونلاري گؤتوروب آپاردي.

63:10  لاکئن اونلار عوصيان اتدئلر، اونون موقدّس روحونو کَدَرلَندئردئلر. بونا گؤره رب ده اونلارين دوشمنی اولوب، اونلارين ضئدّئنه اؤزو دؤيوشدو.

63:11  سونرا خالق کِچمئش گونلري، ربّئن قولو موسانين دؤورونو يادا سالدي. اونلاري سوروسونون چوبانلاري ائله بئرلئکده دهنزدن کچئردن هارادادير؟ اونلارين ائچئنه موقدّس روحونو احسان ادن هاردادير؟

63:12  کئم باعئث اولدو کي، اونون او شؤوکتلي قولو، موسانين صاغ طرفئنده گتسئن؟ کئم سولاري اونلارين قاباغيندا ياريب بؤلدو کي، اؤزونه ابدی بئر آد قازانسين؟

63:13  کئم اونلاري درئنلئکلردن کچئردئب آپاردي؟ چؤلده چاپان بئر آت کئمي چاپديلار و اونلار ييخيلماديلار؛

63:14  ربّئن روحو اونلارا اِله راحاتليق وردی کي، اِله بئل ناخير اوتو بول اولان دره‌ده اوتاريلير. بلی، سن خالقينا يول گؤرستدئن کي، اؤزونه شؤوکتلي بئر آد قازاناسان.

63:15  يارب، گؤيلردن باخ، موقدّس، عئزّتلي، اوجا مسکنئندن بئزه نظر سال! هارادادير سنئن قيرتئن، گوجلو عمل‌لرئن؟ قلبئنده‌کي حسرتي، رحمي بئزدن اسئرگه‌يئرسن.

63:16  سنسن آتاميز. ائبراهئم بئزي تانيماسا دا، ائسرايئل بئزئم کئم اولدوغوموزو بئلمه‌سه ده، آتاميز سنسن، يارب، ازلدن بَري آدين بئزي ساتين‌آلاندير.

63:17  نه اوچون، يارب، بئزي يوللاريندان آزديريرسان، قلبلرئمئزي عئنادکار ادئرسن کي، سندن قورخماياق؟ قول‌لارينين خاطئرئنه، ائرثئن اولان قبئله‌لرئنئن خاطئرئنه گری دؤن.

63:18  موقدّس خالقين قيسا بئر مودّت اوچون سنئن موقدّس مکانينا صاحئب اولدو. آمّا ائندي اوراني دوشمنلرئمئزئن آياغي تاپدالايير.

63:19  اِله بئر خالقا بَنزه‌يئرئک کي، اِله بئل، هچ واخت سن بئزه حؤکمدار اولماييبسان، اِله بئل، بئز هچ واخت سنئن آدينلا چاغيريلماميشيق.

Chapter 64

64:1  يارب، کاش گؤيلري ياريب اِنَيدئن، اِله کي، داغلار حوضوروندا تئتره‌سئن!

64:2  آلوو کوللوغو يانديران کئمي، اود سويو قاينادان کئمي، آديني دوشمنلرئنه تانيتديرايدين کي، مئلّتلر حوضوروندا لرزه‌يه گلسئن!

64:3  سن گؤزلَمه‌دئيئمئز عظمتلي ائشلر ادنده، يِر اوزونه اِندئن، داغلار حوضوروندا تئتره‌دي.

64:4  اونا اومئد باغلايان اوچون بله ائشلر ادن تاريني، ازلدن بَري، سندن باشقاسيني نه گؤز گؤروب، نه ده قولاق اشئدئب.

64:5  صالح ائشلره شادليقلا عمل ادنلرئن، سنئن يوللارينلا گدئب سني خاطيرلايانلارين گؤروشويونه گلئرسن. باخ، سن قضبلي ائدئن، چونکي بئز گوناها باتديق، گوناهدا اوزون بئر مودّت ياشاديق؛ نجه خئلاص اولا بئله‌رئک؟!

64:6  هاميميز نجئس بئري کئمي اولموشوق، بوتون صالح عمل‌لرئمئز نجئس اَسکئيه بَنزه‌يئر. هاميميز يارپاق کئمي سولوروق، شر عمل‌لرئمئز بئزي کولَک کئمي سوووروب آپارير.

64:7  سنئن آديني چکَن يوخدور، سنه باغلانماق اوچون جان آتان بئري يوخدور. چونکي اوزونو بئزدن دؤنده‌رئبسن، بئزي شر عمل‌لرئمئزئن قودرتئنه تسلئم ادئبسن.

64:8  آمّا ائندي، يارب، سنسن آتاميز، بئز گئلئک، آمّا سن کوزه‌گر، بئز هاميميز سنئن اَلئنئن ائشئيئک.

64:9  يارب، چوخ قضبلنمه، شر عمل‌لرئمئزي هچ واخت خاطيرلاما، باخ، هاميميز سنئن خالقينيق، بونو نظره آل.

64:10  موقدّس شهرلرئن صحرايا، صحيون چؤللويه دؤنوب، اورشلئم وئران قاليب.

64:11  آتالاريميزين سنه حمد اتدئکلري يِر، موقدّس و گؤزل معبدئمئز اودلا يانيب؛ بوتون دَيَرلي شيلرئمئز خارابا قاليب.

64:12  بوتون بونلاردان سونرا، يارب، مگر گئنه ده اؤزونو اوزاق ساخلاياجاقسان؟ مگر ساکئت قاليب بئزي داها دا ذلئل اده‌جکسن؟

Chapter 65

65:1  "قوياجاغام کي، منی سوروشمايانلار منی تاپسينلار، قوياجاغام کي، منی آختارمايانلار منی تاپسينلار. آديملا چاغيريلمايان مئلّته ددئم: «بورادايام! بورادايام!»

65:2  پئس يوللا گِدن، اؤز دوشونجه‌لري ائله حرکت ادن، دئکباش بئر خالقا بوتون گون اَللرئمي اوزاتميشام،

65:3  او خالق کي، باغلاردا قوربان کَسئب، کَرپئجلرئن اوستونده بوخور يانديريب، گؤزوم قاباغيندا همئشه منی قيزديرير؛

65:4  قبئرئستانليقدا اوتوروب گئزلي يِرلرده گجه‌له‌يئر، دونگوز اَتي يِيئر، قابلاريندا حارام اَت قاينادير.

65:5  او خالق کي، بئربئرئنه ديئر: «اوزاق دور، منه ياخينلاشما، چونکي من سندن موقدّسم.» بونلار بورنوما توستودور، بئر اوددور کي، بوتون گون يانير.

65:6  باخ، قاباغيمدا بونلار يازيليب: من ساکئت اولماياجاغام، لاکئن اونلارين عوضئني وره‌جيم، عمل‌لرئني باشلارينا چِوئره‌جيم.

65:7  اونلارين تقصئرلرئنئن، آتالارينين دا تقصئرلرئنئن جزاسيني اونلارا چکدئره‌جيم." رب بويورور. "چونکي اونلار داغلارين باشيندا بوخور يانديريبلار، تپه‌لرئن باشيندا منه کوفر ديئبلر، اونا گؤره ده من اوّلکي عمل‌لرئني اؤلچوب، اونلارين عوضئني اونلارا چکدئره‌جيم."

65:8  رب بله ديئر: "نجه اوزوم سالخيميندا شئره تاپيلير و بئري ديئر: «سالخيمي محو اتمه‌يئن، چونکي ائچئنده برکت وار.» من ده قوللاريمين خاطئرئنه بله اده‌جيم کي، اونلارين هاميسيني محو اتمه‌يئم.

65:9  يعقوبدان نسئل يِتئشدئره‌جيم، يهودا نسلئندن داغلاريما وارئث چيخاجاق؛ بلی، سِچئلمئش خالقيم اوراني ائرث آلاجاق. منئم قوللاريم اورادا ساکئن اولاجاقلار.

65:10  منی آختاران خالقيم اوچون شارون سورولرئن اوتلاغي، عاکور دره‌سي مال-حيوانين راحاتلانديغي يِر اولاجاق.

65:11  لاکئن سئز، ای ربّی ترک ادنلر، موقدّس داغيمي ياددان چيخاردانلار، طالِع آللاهينا سوفره آچانلار، قئسمَت آللاهينا جاملاردا شراب تقدئم ادنلر،

65:12  من ده سئزي قيلينجا قئسمَت اده‌جيم، باشينيز کَسئلمَک اوچون، هامينيز بويون اَيه‌جکسئنئز. چونکي من چاغيرديم، لاکئن سئز جاواب ورمه‌دئنئز، من دانيشديم، لاکئن سئز قولاق آسمادينيز. گؤزومده پئس اولاني اتدئنئز، منه مقبول اولماياني سِچدئنئز."

65:13  بونا گؤره ده پروردئگار رب بله ديئر: "باخين، قوللاريم يئيه‌جکلر، آمّا سئز آج قالاجاقسينيز، باخين، قوللاريم ائچه‌جکلر، آمّا سئز سوسوز قالاجاقسينيز، باخين، قوللاريم سِوئنه‌جکلر، آمّا سئز اوتاناجاقسينيز.

65:14  باخين، قوللاريم شاد بئر اورَکله شادليق اده‌جکلر، آمّا سئز اورَک آغريسيندان قيشقيراجاقسينيز، کَدَرلي بئر روحلا اولوياجاقسينيز.

65:15  سئزئن آدينيز سِچئلمئش خالقيمين آغزيندا لعنت کئمي قالاجاق. پروردئگار رب سئزي اؤلدوره‌جک، لاکئن اؤز قوللارينا باشقا آد وره‌جکدئر.

65:16  چونکي اؤلکه‌ده کئم برکت ائسته‌سه، حقئقتئن تاريسي طرفئندن برکت آلاجاق؛ اؤلکه‌ده کئم آند ائچسه، حقئقتئن تاريسي طرفئندن آند ائچه‌جکدئر. چونکي کِچمئش اذئيّتلر ياددان چيخارديليب گؤزومون قاباغيندان گئزلي‌دئر.

65:17  چونکي باخ، من تزه گؤيلر و تزه بئر يِر ياراديرام. قاباقکي شيلر بئر داها خاطيرلانماياجاق، هچ يادا دوشميه‌جک.

65:18  ياراتديقلاريمدا همئشه سِوئنئن، شادليق ادئن. چونکي باخ، اورشلئمي شادليق اوچون، ساکئنلرئني سِوئنج اوچون ياراديرام.

65:19  من اورشلئم اوچون سِوئنه‌جيم، خالقيم اوچون شادلاناجاغام. اورادا بئر داها نه آغلاشما سَسي اولاجاق، نه ده فرياد سَسي اِشئدئله‌جک.

65:20  اوشاقلار آرتيق کؤرپه چاغلاريندا اؤلميه‌جکلر، اوزون عؤمور سورمه‌ين بئر قوجا اولماياجاق، چونکي يوز ياشيندا اؤلَنلر جاوان ساييلاجاقلار، يوز ياشينا چاتمايان گوناهکار، لعنت آلتيندا ساييلاجاق.

65:21  اونلار اِولر تئکئب اورادا ساکئن اولاجاقلار، اوزوم باغلاري اَکئب مِيوه‌سئندن يئيه‌جکلر.

65:22  تئکدئکلري اِوده اؤزگه‌لر ياشاماياجاق، اَکدئکلري باغين مِيوه‌لرئني باشقالاري يِميه‌جک. چونکي خالقيمين عؤمورو آغاجلار عؤمورو کئمي اوزون اولاجاق، سِچئلمئشلرئم اَللرئنئن ائشلرئندن کِف اده‌جکلر.

65:23  اونلار عبث يِره اَللَشميه‌جکلر، اؤولادلاري بلالارلا اوزلَشميه‌جکلر. چونکي اونلار ربّئن طرفئندن برکت آلانلارين نسلئدئرلر؛ اؤولادلاري دا اونلارلا.

65:24  اِله ده اولاجاق کي، اونلار منی چاغيرماميشدان، من اونلارا جاواب وره‌جيم، اونلار حله دانيشارکَن من اِشئده‌جيم.

65:25  قوردلا قوزو بئر يرده اوتلاياجاق، شئر اؤکوز کئمي سامان يئيه‌جک، و ائلانين يِدئيي تورپاق اولاجاق. موقدّس داغيمين هچ بئر يِرئنده هچ کئمه ضرر دَيميه‌جک، هچ بئر کس او بئرئسئني محو اَتميه‌جک." رب بله ديئر.

Chapter 66

66:1  رب بله ديئر: "گؤيلر منئم تختئمدئر، يِر آياقلاريمين آلتينداکي کَتئلدئر. هارادادير بس او اِو کي، سئز منه تئکه‌بئله‌سئنئز؟ هارادير او يِر کي، دئنجه‌لئم؟

66:2  چونکي بوتون بونلاري منئم اَلئم ياراتدي، هر شي بلجه وار اولدو." رب بويورور. "لاکئن من باشي‌آشاغي و روحو اَزئلمئش آداما، سؤزومون قاباغيندا تئتره‌ينه نظر سالارام.

66:3  آنجاق اؤکوز کَسن، آدام اؤلدورَن کئمئدئر، قوزونو قوربان کَسَن، ائتئن بوينونو قيران کئمي‌دئر، تاخيل تقدئمي گتئرن، دونگوز قانيني تقدئم ادن کئمي‌دئر، کوندور يانديران، بوته پرستئش ادن کئمي‌دئر. بلی، اونلار اؤز يوللاريني سِچئبلر، و جانلاري اؤز ائيرنج ائشلرئندن حظّ آلير.

66:4  من ده اونلاري تَنبه اتميه قرار وره‌جيم، قورخدوقلاري بلاني باشلارينا گتئره‌جيم. چونکي من چاغيرديم، لاکئن جاواب ورن يوخ ائدي، دانيشديم، لاکئن قولاق آسماديلار، گؤزومده پئس اولاني اتدئلر، منه مقبول اولماياني سِچدئلر."

66:5  ای ربّئن سؤزو قاباغيندا تئتره‌يَنلر، اونون ددئکلرئني اِشئدئن: "سئزدن نئفرت ادن قارداشلارينيز، منئم آديما گؤره سئزي اؤزلرئندن آتانلار ديئبلر: «قوي رَب، شؤوکتئني گؤرسدسئن کي، بئز ده سئزئن شادليغينيزا بئر باخاق.» لاکئن اونلار روسواي اولاجاقلار.

66:6  شهردن بئر نعره‌ سَسي، معبددن بئر سَس اِشئدئلئر! بو، دوشمنلرئندن قئصاص آلان ربّئن سَسي‌دئر.

66:7  آرواد آغري چکمه‌دن دوغدو، سانجيسي توتمادان بئر اوغلان اوشاغي دوغدو.

66:8  بله بئر شي کئم اشئدئب؟ بله شيلري کئم گؤروب؟ مگر بئر گونده اؤلکه عمله گلر؟ مگر بئر آندا بئر مئلّت دوغولار؟ آمّا صحيونون آغريسي توتدوقدا اوغوللاريني دوغدو.

66:9  مگر من دوغوش آنيناجاق گتئرئب دوغماغا گوج ورمه‌رم؟" رب ديئر. "دوغوش اوچون گوج ورن من، مگر بَطني باغلايارام؟" سنئن تارين ديئر.

66:10  "اورشلئمله بئرلئکده سِوئنئن، ای اونو سِوَنلر، هامينيز اونون اوچون شادليق ادئن. ای اورشلئم اوچون ياس توتانلار، اونونلا بئرلئکده جوشون، فَرَحله‌نئن!

66:11  اِله کي، سئز آنانيز اورشلئمئن دؤشلرئني اَمئب، تسلّی تاپاسينيز، دوياسينيز، اِله کي، اونون بول نعمتلرئندن داديب حظّ آلاسينيز."

66:12  چونکي رب بله ديئر: "باخين، من اَمئن-آمانليغي بئر چاي کئمی، مئلّتلرئن ثروتئني داشقين سل کئمي اونا ساري آخيديرام. سئز اوندان بَسلَنه‌جکسئنئز، قوجاغيندا آپاريلاجاقسينيز، دئزلرئنده نازلاناجاقسينيز.

66:13  اؤولادينا تسلّی ورن بئر آنا کئمي من سئزه تسلّی وره‌جيم. اورشلئمده تسلّی تاپاجاقسينيز.

66:14  او واخت بونلاري گؤره‌جکسئنئز؛ و اوره‌يئنئز سِوئنه‌جک؛ سوموکلرئنئز ياشيل اوت کئمي قووّتلَنه‌جک. ربّئن اَلي قوللارينين طرفئندن تانيناجاق، لاکئن قضبي دوشمنلرئنئن اوستونده‌ اولاجاقدير."

66:15  باخ، رب اود ائچئنده گلئر، اونون دؤيوش عارابالاري فيرلانان يِل کئمي‌دئر کي، قضبئني اودلو و تَنبِهي‌ اود آلووو کئمي تؤکسون.

66:16  چونکي رب بوتون بشري اودلا، قيلينجي ائله موحاکئمه اده‌جک، و اونون قيلينجي ائله ييخيلانلارين سايي چوخ اولاجاقدير.

66:17  "باغلارا گئرمک اوچون اؤزلرئني تقدئس ادئب تمئز ادنلر، اورتادا دورانين دالينجا گده‌رک، دونگوز، سئچان و باشقا نجئس حيوانلارين اَتئني يئيَنلرئن هاميسي محو اولاجاقلار." رب بويورور.

66:18  "چونکي من اونلارين عمل‌لرئني ده، فئکئرلرئني ده بئلئرم؛ او واخت يِتئشئر کي، بوتون مئلّتلري و دئل‌لري بئر يِره ييغيم. اونلار گلئب منئم شؤوکتئمي گؤره‌جکلر.

66:19  من آرالاريندا بئر علامت قوياجاغام. اونلاردان قاچيب-قورتولانلاري من باشقا مئلّتلره گؤندره‌جيم: تَرشئشه، پولا، ماهئر اوخ‌آتانلارين وطني لودا، توبَله، يونانا، شؤهرتئمي اشئتمه‌ين، شؤوکتئمي گؤرمه‌ين اوزاق ساحئل‌لره. و اونلار منئم شؤوکتئمي مئلّتلر آراسيندا اعلان اده‌جکلر.

66:20  ائسرايئل اؤولادلاري تاخيل تقدئملرئني تمئز قابلار ائچئنده ربّئن معبدئنه نجه گتئرئرلر، اونلار دا بوتون قارداشلارينيزي مئلّتلر آراسيندان تاخيل تقدئمي اولاراق آتلار بِلئنده، عارابالاردا، تخت‌روانلاردا، دَوه‌لر و قاطيرلار بِلئنده منئم موقدّس داغيم اورشلئمه گتئره‌جکلر." رب بويورور،

66:21  "اونلاردان بعضئسئني من کاهئن و لاوئلي سچه‌جيم."

66:22  "ياراتاجاغيم تزه گؤيلر و تزه يِر قاباغيمدا نجه دورور، سئزئن ده نسلئنئز و آدينيز بله دوراجاق." رب بويورور.

66:23  "هر تزه آي مراسئمئنده، هر سَبّت گونونده بوتون بشر گلئب قاباغيمدا سجده اده‌جک." رب ديئر.

66:24  "او واخت اونلار اِشئيه چيخاجاقلار، و منئم ضئدّئمه عاصي اولانلارين مِيئتلرئني گؤره‌جکلر. چونکي قوردلاري اؤلميه‌جک، اونلاري يانديران آلوو سؤنميه‌جک. و بوتون بشر اونلاردان ائيرَنه‌جک."