Kapingamarangi - Isaiah

Chapter 1

1:1  Di beebaa deenei le e-haga-honu i-nia helekai i-di gili o Judah mo Jerusalem, dela ne-hagagida go God gi Isaiah tama-daane Amoz i-di madagoaa o Uzziah, Jotham, Ahaz mo Hezekiah nogo king i Judah.

1:2  Dimaadua ga-helekai, “Henuailala mo-di langi i-nua gi-longono-e-goolua agu mee ala e-helekai-iei Au. Nia dama ala ne-madamada humalia-iei Au la-gu-hai-baahi mai gi-di-Au.

1:3  Nia kau e-iloo-ginaadou di-nadau dangada, nia ‘donkey’ e-iloo di gowaa dela e-haangai-ai ginaadou go nadau dagi. Gei agu daangada Israel e-de-iloo-ginaadou. Digaula digi modongoohia-ginaadou di-mee.”

1:4  Digau Israel, goodou tenua hai mee huaidu, la-ga-hagahuaidu! Goodou e-honu i-di manawa-huaidu ge e-hai hala. Godou huaidu gaa-hai goodou gii-tale gi-nia haingadaa. Goodou gu-de-hiihai gi Dimaadua, go di God dabuaahia o Israel, goodou guu-huli godou dua gi Mee.

1:5  Ma e-aha goodou e-hai-baahi? Goodou e-hiihai gi-di hagaduadua mada-damana? Israel, do libogo la-guu-hii gi-nia magibala, mo do manawa le e-magi.

1:6  Mai i do libogo gaa-tugi i oo wae hagalee di gowaa e-madammaa i do huaidina ai. Doo gili gu-gonogono-uli hagatau gi-nia moholehole, mo nia magibala. O magibala la-digi haga-madammaa-ina be digi nnoo-ina. Nia wanii ne-wanga gi-nia maa ai.

1:7  Digau Israel, godou gowaa gu-ono mee no-lodo ai, godou waahale guu-wele, guu-tugi i-di gelegele. Goodou ga-mmada-hua gi digau hua-gee gu-hai-mee gi godou gowaa, guu-hai godou mee huogodoo gi-mooho.

1:8  Jerusalem modogoia dela ne-dubu, di guongo dono duuli hagalee-loo e-mau, be tama hale hagaloohi dela e-duu i-lodo di hadagee-waini, be go tama gowaa haga-malu i-lodo di hadagee kiulii.

1:9  Dimaadua di Gowaa Aamua maa nei bolo Mee digi dugu hunu ana daangada gi-mouli hua igolo i Jerusalem, gei Jerusalem la-guu-hai gi-mooho hagatau, gadoo be-di hai dela ne-hai gi Sodom mo Gomorrah.

1:10  Jerusalem, au gau dagi mo au daangada e-hai gadoo be nia dagi o Sodom mo Gomorrah. Hagalongo gi-nia mee Dimaadua e-hagi-adu gi-di-goe. Hagalongo gi-nia mee tadau God e-aago-adu goe.

1:11  Mee e-helekai, “Goodou e-hagamaanadu bolo Au e-hiihai gi godou hai tigidaumaha e-logo ala e-tigidaumaha mai gi-di-Au? Au agu mee e-logo e-dohu i-nia siibi ala e-dutudu, e-hai di-godou tigidaumaha, mono kiliidi o godou manu hagalabagau. Au guu-buhi i-nia dodo o-nia kau-daane, nia siibi mono kuudi.

1:12  Ma koai dela ne-hai bolo gi-gaamai nia mee aanei i di-godou madagoaa e-lloomoi e-daumaha mai gi-di-Au? Ma koai dela ne-hiihai bolo goodou gi-dagadagahia dogu Hale Daumaha?

1:13  Di-godou gaamai godou tigidaumaha la deai dono hadinga ai. Au e-manauwwou nia hauiha ‘incense’ ala ne-dudu. Au hagalee hila ang-gi godou budu i-di Malama Hoou, mo godou Laangi-Sabad, mo godou hai-daumaha haga-puni gi-di gowaa e-dahi. Nia mee aanei la-guu-dagi go godou huaidu.

1:14  Au e-ginagina godou Budu o-di Malama Hoou, mo godou laangi dabu. Nia maa e-hagaduadua Au, ge e-haga-daamaha Au.

1:15  “Di-godou madagoaa ma-ga-dahi-aga godou lima i-di dalodalo, gei Au hagalee mmada-adu gi goodou. Tei mee hua be goodou e-dalodalo behee, Au hagalee hagalongo, idimaa, godou lima le e-buni dodo o-nia daangada ala ne-daaligi go goodou.

1:16  Haga-madammaa-ina godou huaidina gii-mmaa. Dugu-ina nia mee hala huogodoo ala nogo gidee-Au nogo hai go goodou. Uaa, dugu-ina godou hai hala,

1:17  mo-di kabe nia haihai e-donu. Hagamada e-hai di-mee dela e-donu. Hagamaamaa-ina digau ala gu-haadanga-balua. Heia di-mee dela e-donu ang-gi nia dama nadau maadua ai mo-di abaaba nia ahina guu-mmade nadau lodo.”

1:18  Dimaadua e-helekai boloo, “Dolomeenei gei gidaadou ga-helehelekai i tadau mehanga di-mee deenei gi-noho-baba. Ma e-aha maa goodou gu-angammee i godou huaidu, gei Au ga-gaugau goodou gi-madammaa-giagia be nia ‘snow’. Ma e-aha maa godou angammee la-gu-mmee agogo, gei goodou gaa-kene be nia gadinga.

1:19  Maa goodou ga-hagalongo mai gi-di-Au, gei goodou ga-miami i-nia huwa o-nia laagau humalia o-di guongo.

1:20  Maa goodou ga-de-hagalongo-mai gi-di-Au, gei goodou ga-daaligi go tulumanu-dauwa gaa-mmade. Ko-Au go Dimaadua dela ne-helekai.”

1:21  Di waahale dela nogo manawa-dahi i-mua, gu-daumaha gi-nia balu-god, guu-hai be-di ahina hai mee huaidu gu-hagalee manawa-dahi! I-mua digau hai mee donu nogo noho i-golo, gei dolomeenei digau hai mee huaidu guu-noho i-golo!

1:22  Jerusalem, goe nogo hai be nia silber, gei dolomeenei goe gu-balumee. Goe nogo hai be nia waini humalia, gei dolomeenei goe gu-hai-hua nia wai.

1:23  Oo dagi guu-hai nia daangada de-hagalongo, nia hoo ni digau gaiaadanga. Digaula e-kae nadau wanga-dehuia mo nadau hui halahalau mai baahi nia daangada ala i-golo, ge digaula e-tenetene-hua e-kae nia maa. Nadau madagoaa hai-gabunga, digaula hagalee hagamaamaa nia dama nadau maadua ai, ge hagalee hagalongo gi-nia ahina ala guu-mmade nadau lodo.

1:24  Malaa, dolomeenei hagalongo-malaa gi-di-mee di Tagi go Yihowah di Gowaa Aamua, go di God Mogobuna o Israel dela e-helekai, “Au ga-dugu-adu dogu hagawelewele-adu gi goodou, go ogu hagadaumee, gei goodou ga-hagalee hai Au gi manawa-gee labelaa.

1:25  Au ga-hai-baahi adu gi goodou. Au ga-haga-madammaa goodou be nia baalanga ala ma-gaa-dudu gi-madammaa, dela e-dudu gi-daha nia dogolia.

1:26  Au ga-gowadu gi goodou godou dagi mono gau ala e-haganoho-baba goodou gii-hai be digau ala namua-loo. Malaa, Jerusalem ga-haga-ingoo bolo di Waahale Hai-donu mo-di Waahale Manawa-dahi.”

1:27  Idimaa Dimaadua dela e-donu, Mee ga-benebene Jerusalem mo ono gau huogodoo ala guu-huli hoou.

1:28  Gei Mee ga-hagahuaidu digau huogodoo ala e-hai di huaidu ge e-hai-baahi ang-gi Mee. Mee ga-daaligi digau huogodoo ala e-diiagi a-Mee.

1:29  Gei goodou ga-langaadia i di-godou hai-daumaha ang-gi nia laagau-‘oak’ ala ne-dogi go goodou i-lodo godou hadagee-dabu.

1:30  Gei goodou gaa-hai be-di laagau-‘oak’ dela ma-gaa-mae ono lau, ge e-hai be-di hadagee deai dono dangada e-haga-nannanu ai.

1:31  Gadoo be-di geinga dela ma-ga-ulaula i-di mada-gologolo, e-hai be digau maaloo dangihi ala gaa-wwele i nadau haihai huaidu, tangada e-mee di-diinai di wele deelaa ai.

Chapter 2

2:1  Aanei nia helekai a God ala ne-wanga gi Isaiah di tama a Amoz i-di hai o Judah mo Jerusalem:

2:2  I-nia laangi ala ga-lloomoi, di gonduu dela e-duu-ai di Hale Daumaha gaa-hai di gonduu kaedahi duuduu i-nua i-nia gonduu huogodoo. Nia henua logowaahee ga-lloomoi gi-di gonduu deelaa.

2:3  Gei nia daangada o-nia henua aalaa ga-helekai, “Gidaadou gii-hula gi-nua gi-di gonduu Dimaadua, gi-di Hale Daumaha o-di God o Israel. Mee ga-aago-mai gi gidaadou ana mee ala e-hiihai bolo gidaadou gi-heia. Gidaadou ga-taele i nia ala ne-hilihili go Mee. Idimaa, nia agoago Dimaadua le e-lloomoi i Jerusalem. Mee e-helekai gi ana daangada mai i-hongo di Gonduu Zion.”

2:4  Mee gaa-dugu nia lagamaaloo i-mehanga nia henua llauehe. Digaula gaa-tugi nadau hulumanu-dauwa, gii-hai nia mee haga-maluu gelegele, gaa-tugi nadau daalo, gii-hai nia hulumanu hai-hadagee. Gei nia henua ga-hagalee heheebagi labelaa, be e-hagatogomaalia ang-gi nia dauwa.

2:5  Dolomeenei, goodou go di madawaawa Jacob, gidaadou ga-taele i-lodo di maalama dela ne-gaamai go Dimaadua gi gidaadou!

2:6  Meenei God, Goe gu-haga-delangahia au daangada, di hagadili o Jacob! Tenua la-guu-honu i-di hai-buubuu mai i-bahi-i-dua mo mai baahi Philistia. Nia daangada gu-daudali nia hangaahai digau tuadimee.

2:7  Nadau henua gu-baalahu silber mono goolo, gei nadau maluagina e-de-ngudu, nadau hoodo mono waga-dauwa e-hagalee odi.

2:8  Nadau henua e-honu nia ada balu-god, e-daumaha gi-nia ada-mee ala ne-hai gi nadau lima.

2:9  Digaula huogodoo ga-hagatee, ga-haga-langaadia. Dimaadua, hudee dumaalia gi digaula!

2:10  Digaula gaa-pala hagammuni gi-lodo nia bagungoo i-nia gonduu hadugalaa, be e-geli nadau lua gi-lodo di gelegele, e-pala hagammuni gi-daha mo-di hagawelewele a Dimaadua, mo ono madamada ge pala hagammuni i-nia mogobuna o-Maa.

2:11  Di laangi e-dau-mai, gei di hagalaamua ga-hagalee, nia hagamuamua o-nia daangada ga-daaligi gi-daha. Malaa, go Dimaadua hua dela e-hai ginai di hagaamu.

2:12  I-di laangi deelaa, Dimaadua di Gowaa Aamua ga-dugu-ia nia hagamuamua mo nia hagabalumee o-nia daangada aalaa iai nadau mogobuna.

2:13  Mee ga-hele gi-lala nia laagau-‘cedar’ ala e-tuu lloo i Lebanon mono laagau-‘oak’ huogodoo ala i Bashan,

2:14  ga-haga-bapaba nia gonduu mono gowaa nnoonua,

2:15  mono angulaa hagaloohi huogodoo ala e-duuduu i-nua, mo nia abaaba o-nia waahale gau-dauwa.

2:16  Mee ga-haga-abulu nia wagabaalii humalia ge llauehaa.

2:17  Nia haga-aamua ga-hagalee, nia hagamuamua o-nia daangada ga-daaligi gi-daha. Nia ada balu-god ga-hagalee kila-aga labelaa, Dimaadua modogoia ga-gila-aga i dono madamada i-di laangi deelaa.

2:18  Nia haga-aamua ga-hagalee, nia hagamuamua o-nia daangada ga-daaligi gi-daha. Nia ada balu-god ga-hagalee kila-aga labelaa, Dimaadua modogoia ga-gila-aga i dono madamada i-di laangi deelaa.

2:19  Nia daangada gaa-pala hagammuni gi-lodo nia bagungoo o-nia dama gonduu hadugalaa, be e-geli nadau bongoo gi-lodo tenua belee pala hagammuni gi-daha mo-di hagawelewele o Dimaadua i ono mahi mo ono madamada, i dono madagoaa e-hanimoi belee lulu henuailala.

2:20  Di laangi deelaa ma-ga-dau-mai, digaula gaa-kili gi-daha nadau ada balu-god ne-hai gi-nia goolo, mono silber, gi-lodo di gowaa bouli e-noho-ai nia manu lodo-gelegele mono koomoli.

2:21  Di madagoaa Dimaadua ga-hanimoi belee lulu henuailala, nia daangada gaa-pala hagammuni gi-lodo nia bagungoo mo nia luwa dama gonduu hadugalaa, e-hagamada e-llele gi-daha mo-di hagawelewele o-Maa, ge pala hagammuni i-nia mahi o dono madamada.

2:22  Hudee hagadagadagagee gi-nia daangada dangada. Digaula e-dahidaamee-adu?!

Chapter 3

3:1  Tagi go Yihowah di Gowaa Aamua ga-daa gi-daha nia mee huogodoo ala i Jerusalem mo Judah ala e-hagadagadagagee ginai nia daangada. Mee ga-daa gi-daha nadau meegai mo nadau wai,

3:2  nadau gau ala e-dau, gau-dauwa, gau hai-gabunga, soukohp, gau hagiaga mee, nadau gau aamua,

3:3  nadau dagi-dauwa, nia dagi o-nia daangada, nadau dagi oobidi, mo huogodoo ala e-hai-hegau gi-nia buubuu belee dagi nia mee ala e-kila-aga.

3:4  Dimaadua gaa-wanga nia dama-daane lligi gi-dagia nia daangada.

3:5  Nia daangada huogodoo ga-hagadau hai-hegau gi nadau madagoaa haingoohia e-kae nia hagahumalia digau ala gu-deemee. Nia damagiigi ga-hagalee hagalaamua digau mmaadua, gei nia balu-daangada ga-hagalee hagalaamua nadau dagi.

3:6  Dahi madagoaa e-dau-mai, gei dahi madahaanau ga-hilihili dahi dangada i nadau lodo, ga-helekai gi-mee boloo, “Kooe dela o goloo i-golo, goe gaa-dagi gidaadou i-lodo di madagoaa haingadaa dolomeenei.”

3:7  Gei mee ga-helekai, “Deeai, au e-deemee di-hagamaamaa goodou. Agu meegai ai, ogu goloo ai. Hudee dugu-mai gi-di-au gi-dagia goodou!”

3:8  Uaa, Jerusalem la-ga-mooho! Judah la-ga-meeheu gi-lala! Nadau helekai huogodoo mo nadau mee huogodoo ala e-hai le e-hai-baahi gi Dimaadua. Digaula e-helekai hagamadammaa e-hagahuaidu a God.

3:9  Nadau haga-maanadu hai-gee gaa-bida hagahuaidu ginaadou. Digaula e-hai-hala haga-madammaa be di hai o-nia daangada Sodom ne-hai. Digaula gaa-bida hagahuaidu ginaadou.

3:10  Digau ala e-mouli donu ga-tenetene, nia mee huogodoo gaa-kila humalia i nadau baahi. Digaula ga-tenetene gi-nia huwa o nadau ngalua.

3:11  Digau huaidu ga-mooho, nadau mee ala ne-hai gi-nia daangada ala i-golo, gaa-hai ang-gi ginaadou.

3:12  Digau hai ‘loan’ le e-haga-daamaha agu daangada, digau hai boibana e-halahalau digaula. Agu daangada nei, godou dagi e-dagi-gee goodou, ga-de-iloo di-godou ala dela belee hula-ai.

3:13  Dimaadua gu-hagatogomaalia e-hagiaga ana daangada.

3:14  Dimaadua ga-laha-mai digau mmaadua, mo nia dagi o ana daangada gi-di gowaa hai-gabunga. Mee ga-helekai hagiaga digaula, “Goodou gu-gaiaa nia hadagee waini, gei godou hale guu-honu nia mee digau hagaloale.

3:15  Godou donu ai bolo e-hagaduadua agu daangada, e-haga-hai-hegau digau hagaloale gi godou hiihai. Koau, go Tagi go Yihowah di Gowaa Aamua deenei e-helekai.”

3:16  Dimaadua ga-helekai, “Mmada gi-nia ahina Jerusalem ala e-hagapuu huoloo! Digaula e-heehee ge hila beelaa-nua nadau golomada, e-hagapuu i-nia madagoaa huogodoo, e-taele maalia loo, ge hagatangitangi nia hau o nadau wae.

3:17  Malaa, Au ga-hagaduadua digaula, gaa-dahi nadau libogo gi-ngaadihole.”

3:18  Di laangi ga-dau-mai, gei Dimaadua ga-daa gi-daha nia mee huogodoo ala e-hai nia ahina Jerusalem gi-hagapuu, aalaa go nia hau ala e-humu nadau wae, nadau libogo, nadau uwa,

3:19  mo nadau lima. Mee ga-daa gi-daha nadau gahu libogo,

3:20  nadau goobai, nia duu buubuu i-di gili nadau lima mo nadau huaidina,

3:21  nia buulei ala e-ulu i nadau madaalima mo nadau madauhi,

3:22  nadau gahu lloo humalia, gahu ahina, gahu laa-tua, nadau gada dugu bahihadu,

3:23  nadau gahu humalia, angkadi linen, mono gahu lloo e-gahu nadau libogo.

3:24  Digaula hagalee hagakala ginaadou, gaa-tongo. Digaula hagalee hai-hegau gi-nia duu madamada, gaa-nnoo nadau gahu-wae gi-nia loahi. Nia ngaahulu nadau libogo ga-mmoonono, ga-ngaadihole. Digaula ga-hagalee ulu i-nia gahu humalia, gaa-hai nia mee gahu balumee. Nadau madamada gaa-huli gaa-hai di haga-langaadia.

3:25  Nia daane o-di waahale, mo digau maaloo gaa-mmade i-lodo tauwa.

3:26  Digau ala i-di ngudu di abaaba di waahale ga-tangitangi, gei di waahale gaa-hai be-di ahina ma-gaa-noho i-hongo di gelegele, ono goloo ai.

Chapter 4

4:1  Di madagoaa deelaa ma-ga-dau-mai, gei nia ahina dogohidu gaa-kumi di-nadau daane e-dahi ga-helekai ginai, “Gimaadou e-mee di-bida haangai mo-di haga-gahu gimaadou, malaa, dumaalia-mai gi gimaadou, helekai bolo goe di lodo ni gimaadou, gi-dee haga-langaadia gimaadou, idimaa gimaadou madau lodo ai.”

4:2  Di madagoaa ga-dau-mai, Dimaadua ga-hagatomo nia laagau lligi mo llauehe i-lodo henua gi-llauehaa gi-madamada. Nia daangada huogodoo o Israel ala e-mouli ga-tenetene ge manawa lamalia gi-nia laagau ala e-huwa.

4:3  Digau huogodoo ala gaa-dubu i Jerusalem, ala ne-hilihili go God bolo e-mouli, ga-hagaingoo bolo digau dabuaahia.

4:4  Tagi ga-hagiaga ge haga-madammaa tenua deelaa mai i dono mogobuna, ge tono gi-daha nia huaidu o Jerusalem mo nia dodo ala ne-hali i-di gowaa deelaa.

4:5  I-hongo di gonduu Zion, mo i-hongo digau huogodoo ala gu-dagabuli i-golo, Dimaadua ga-hagau-mai dana gololangi i-di aa, di huiahi mo dono ahi maalama i-di boo. Di madamada o Dimaadua gaa-gahu ga-duuli di waahale hagatau.

4:6  Dono madamada ga-haga-malu di waahale gi-de-welengina i-di aa, gaa-hai di gowaa deelaa gii-noho i-di aumaalia, e-malu i-di uwa mono madangi.

Chapter 5

5:1  Hagalongo, gei Au ga-daahili adu gi goodou taahili deenei, taahili ni dogu ihoo hagaaloho mo dana hadagee-waini: “Dogu ihoo hagaaloho laa dana hadagee-waini i-hongo tama-gonduu e-humalia ono gelegele.

5:2  Mee e-haga-maluu nia gelegele, gaa-hili gi-daha nia hadu, gaa-dogi ana laagau-‘grape’ ala koia e-humalia, gaa-hau dana angulaa hagaloohi belee hagaloohi nia maa, gaa-geli dana luwa belee dagadagahi ana ‘grape’. Gaa-lawa, gei mee gaa-tali ana ‘grape’ bolo gii-lleu, gei nia ‘grape’ huogodoo le e-mmala.”

5:3  Gei dolomeenei, gei dogu ihoo ga-helekai, “Goodou ala go nia daangada ala e-noho i Jerusalem mo Judah, goodou gi-haga-donu-ina mau mehanga mo dagu hadagee-waini.

5:4  Ma iai di-mee i-golo dela digi hai ko-Au gi-di-maa? Deeai! Gei di-maa le e-aha dela e-huwa ana ‘grape’ mmala, hagalee nia ‘grape’ humalia be dagu mee nogo talitali?

5:5  “Deenei di-mee gaa-hai ko-Au gi dagu hadagee: Au ga-daa gi-daha di tuuli dela i-di gili di hadagee, gaa-oho gi-daha di abaaba dela e-abaaba di-maa, ga-diiagi di-maa gi-nia manu lodo-geinga gi-geina ge gi-hunahuna-ina.

5:6  Au ga-diiagi di-maa gii-tomo nia geinga-tolo no-lodo. Au ga-hagalee haga-madammaa nia manga-laagau-‘grape’, ge hagalee haga-maluu di gelegele. Au gaa-dugu nia geinga huaidu mono geinga duduia gii-gahu di-maa. Au gaa-hai nia uwa gi-dee too e-haga-magalillili di-maa.”

5:7  Israel la-go di hadagee-waini Dimaadua di Gowaa Aamua, gei nia daangada o Judah la-go nia laagau-‘grape’ ne-dogi go Mee. Mee nogo talitali bolo digaula gaa-hai-laa nia mee humalia, gei di-maa taaligi dangada dela ne-hai. Mee nogo talitali bolo digaula gaa-hai nia mee ala e-donu, gei nia lee o digau haadanga-balua e-tangi, e-hiihai gi nadau hagi-aga donu gi i-golo.

5:8  E-huaidu adu gi goodou ala e-hui godou hale mo godou gowaa belee hagapuni ang-gi nia mee ala gu-i-golo i godou baahi. Nomuli di gowaa i-golo ai belee noho-ai dahi dangada, kooe modo-gooe dela gaa-noho i-golo.

5:9  Au gu-longono Dimaadua di Gowaa Aamua e-helekai, “Nia hale llauehe ge humalia huogodoo aanei gaa-hai nia angaa-hale ga-mooho.

5:10  Nia laagau-‘grape’ e-tomo i-hongo nia gowaa nia ‘acre’ e-lima e-hai-hua nadau galon waini e-lima. Nia ulu-mee lii madangaholu gaa-huwa nadau ulu-mee meegai hua e-dahi.”

5:11  E-huaidu adu gi goodou, ala e-aala-aga i-nia luada ga-daamada ga-inuinu, ga-libaliba-loo gi-di hiahi.

5:12  Goodou e-hagadangidangi godou ‘harp’, ‘tambourine’ mono labaa, mo-di inuinu godou waini i godou hagamiami, gei goodou e-de-iloo be Dimaadua le e-hai dana-aha.

5:13  Malaa, goodou gaa-lahi gi-daha be digau lawalawa. Godou dagi gaa-mmade i nadau hiigai, gei digau ala i-golo gaa-mmade i nadau hieinu.

5:14  Di gowaa o digau mmade ga-hiigai gi digaula, dono ngudu guu-hanga gi-daha belee holo digau aamua o Jerusalem mo digau huogodoo ala e-hagalongoaa.

5:15  Digau huogodoo ga-langaadia, digau hagamuamua gaa-hila gi-lala.

5:16  Gei Dimaadua go di Gowaa Aamua ga-hagamodongoohia-aga dono aamua i dana hai nia mee ala e-donu, ga-hagamodongoohia-aga dono dabuaahia i dana hagiaga ana daangada.

5:17  I-lodo nia gowaa mooho o-nia waahale, nia dama-siibi e-gaigai nadau geinga tolo, gei nia kuudi lligi ga-gidee nadau gowaa e-miami-ai.

5:18  E-huaidu adu gi goodou! Goodou gu-deemee di-hagamaahede gi-daha mo godou huaidu.

5:19  Goodou e-helekai, “Dimaadua gi-hagalimalima gi-heia dana mee ne-helekai-ai belee hai, gii-mmada gidaadou. Di God dabuaahia o Israel gi-haga-gila-ina-aga dana bilaan, gi-gidee-gidaadou be di-maa di-aha dela ne-hagamaanadu go Mee.”

5:20  E-huaidu adu gi goodou! Goodou e-helekai bolo di huaidu la di humalia, gei di humalia la di huaidu. Goodou guu-huli di bouli gi-di maalama, gei di maalama gi-di bouli. Goodou guu-huli di-mee mmala gi-di mee maangala, di-mee maangala gi-di mee mmala.

5:21  E-huaidu adu gi goodou! Goodou e-hagabaubau bolo goodou e-iloo ge kabemee huoloo.

5:22  E-huaidu adu gi goodou! Goodou la digau hagamataane gi-nia loaabi waini! Goodou e-hagamataane gei e-hagalee mmaadagu i-di madagoaa ma-ga-unugi godou dagaao!

5:23  Malaa mai di hui halahalau, goodou gu-haga-dagaloaha digau huaidu, ge hagalee dumaalia-anga gi-di gau madammaa gii-kae di tonu.

5:24  Malaa dolomeenei, godou aga gaa-pala, godou akai ga-maangoo ga-angiangina gadoo be di geinga mangoo dela e-wele i-di ahi, idimaa goodou digi hagagila-aga nia mee a Dimaadua, di Gowaa Aamua, di God dabuaahia o Israel ne-aago-mai gi gidaadou.

5:25  Dimaadua gu-hagawelewele gi ana daangada, guu-holo gi-daha ono lima belee daaligi digaula. Nia gonduu ga-ngalungalua, gei nia huaidina digau ne-mmade ga-mmoemmoe i-hongo nia ala be nia geinga, malaa di hagawelewele o Dimaadua la-hagalee ngudu, gei ono lima e-holo gi-daha e-hagaduadua.

5:26  Dimaadua gaa-hai dana hagailoo gi-gahigahia-mai nia henua mogowaa, mee gaa-ngii gi digaula gi-lloomoi mai nia mada o henuailala. Gei aanei digaula gu-lloomoi hagalimalima.

5:27  Tangada i digaula ne-duadua gei ne-hinga ai. Digaula digi hagagemu, digi kii. Nadau duu digi maahede, nia uga doolii ne-mmodu ai.

5:28  Nadau amu maalei e-gaa huoloo, gei nadau maalei gu-togomaalia gaa-puu. Nia babaawae o nadau hoodo e-hamaaloo dangihi be nia hadu. Nia duaadiga o nadau kulumaa hoodo e-niga huoloo be di gawe-uwa.

5:29  Digau dauwa e-ngoloolo be nia laion ma-ga-daaligi nadau manu, gaa-dagi gi-di gowaa dela e-deemee di-lahi di-maa go tangada.

5:30  Di laangi deelaa ma-ga-dau-mai, digaula ga-ngoloolo i-hongo Israel, nadau lee e-ngoloolo be nia lee beau o-di moana. Mmada gi tenua deenei! Di bouli mo-di haga-manawagee! Di maalama gu-hagabugu go di bouli dongoeho.

Chapter 6

6:1  I-lodo di ngadau o-di king go Uzziah ne-made-ai, au guu-mmada gi Tagi dela nogo noho i-hongo dono lohongo-king i-di gowaa aamua ge nnoo-nua, gei dono gahu le e-haga-honu i-lodo di Hale Daumaha.

6:2  I-di gili o-Maa e-tuu-ai nia manu ulaula e-haga-daagoli a-Mee, di manu e-dahi e-ono ono bakau. Nia manu aanei e-gahu nadau golomada gi nadau bakau dagi-lua, mo nadau huaidina e-gahu gi nadau bakau dagi-lua, ge e-hai-hegau gi-nia bakau dagi-lua ala i-golo e-maangi-ai.

6:3  Nia maa e-hagadau wwolowwolo i nadau mehanga boloo, “E-dabu, e-dabu, e-dabu! Dimaadua go di Gowaa Aamua e-dabu! Dono madamada e-haga-honu henuailala.”

6:4  Nia lee o nadau wwolowwolo la-guu-hai di hagamau o-di Hale Daumaha gii-bole, gei di Hale Daumaha gu-haga-honu gi-nia huiahi.

6:5  Au ga-helekai, “Deai di hagadagadagagee mai gi-di-au ai! Au gu-iai di haadanga-balua idimaa nia helekai ala e-lloomoi i dogu malau-ngudu le e-huaidu huoloo, gei au e-noho i-baahi nia daangada ala iai nia helekai huaidu, gei au guu-mmada gi-di King, go Dimaadua di Gowaa Aamua.”

6:6  Malaa, di manu e-dahi i-nia manu ulaula aalaa ga-maangi-ia gi-di-au, e-dagidagi dana malala-gaa dela ne-kae go mee i-di gowaa dudu-tigidaumaha gi-di mee kabi-mee.

6:7  Mee ga-hagatale mai di malala-gaa deelaa gi ogu malau-ngudu, ga-helekai-mai, “Di mee deenei guu-tale i o malau-ngudu, malaa, dolomeenei oo hala la-gu-hagalee, gei o huaidu la-gu-maahede.”

6:8  Gei au ga-hagalongo gi Tagi e-helekai, “Ma koai dela e-hagau ko-Au? Ma koai dela e-hai tangada kae-hegau?” Gei au ga-helekai, “Ko-au dela gaa-hana! Hagau-ina au!”

6:9  Malaa, gei Mee ga-hai-mai gi-di-au gii-hana gi-nia daangada Israel, gi hagi-anga-ina nia helekai aanei boloo, “Ma e-aha maa goodou ga-longono, gei goodou hagalee modongoohia. Ma e-aha maa goodou ga-gidee, gei goodou hagalee iloo be nia maa ni aha ne-hai.”

6:10  Gei Mee ga-helekai-mai gi-di-au, “Heia nia maanadu digau aanei gi-hinihini, nadau dalinga gi longoduli, mo nadau golomada gi-dee gida, bolo gi-deemee di-gidee be e-longono be e-modongoohia. Maa nei bolo digaula ne-mee, gei digaula gu-huli-mai gi di-Au gu-haga-hili ginaadou.”

6:11  Au ga-heeu, “Meenei Tagi, ma e-duai behee go di-mee beenei?” Gei Mee ga-helekai-mai, “Gaa-dae-loo gi-nia waahale ma-ga-mooho gaa-hai di anga-guongo, gaa-dae-loo gi-nia hale ma-ga-diiagi, gaa-dae-loo gi nia gowaa ma-gaa-mmade.

6:12  Au ga-hagau nia daangada gii-hula gi-daha-loo mo-di gowaa, gaa-hai-laa tenua hagatau gii-mmade.

6:13  Be di-maa dahi dangada i-lodo digau dilongoholu e-dubu i-lodo di gowaa deelaa, le e-daaligi hua, gei mee gaa-hai-hua be tono laagau-‘oak’ dela ne-hele gi-lala.” (Di tono laagau la di ada-mee o taamada hoou o-nia daangada o God.)

Chapter 7

7:1  Di madagoaa di king go Ahaz, di tama ni Jotham mo-di tama-madua a Uzziah, nogo dagi Judah, gei tauwa ga-daamada. Rezin di king o Syria, mo Pekah di tama ni Remaliah, di king o Israel, ne-heebagi gi Jerusalem, malaa gu-deemee di-kumi di maa.

7:2  Di madagoaa telekai ne-dau i-di king o Judah bolo nia gau-dauwa o Syria guu-dau i-lodo nia guongo o Israel, gei mee mo ana daangada huogodoo gu-mmaadagu huoloo, gu-polepole be nia laagau ma-ga-haga-hahaangi go di madangi.

7:3  Dimaadua ga-helekai gi Isaiah, “Lahia dau dama-daane dela go Shear=Jashub, hula heetugi gi-di king go Ahaz. Goe ga-gidee a-mee i-hongo di ala i-di gowaa dela e-ngalua-ai digau hai-gahu, i-di hagaodi o-di aloalo dela e-lloo-ia-ai nia wai i-di monowai-geli dela i-baahi i-nua.

7:4  Helekai gi mee gi-kanakana, gii-haga-kila, gi-hudee madagu be uli-nia-gai. Di hagawelewele o-di king Rezin mo ana gau Syria mo-di king Pekah gu-hagalee-loo e-hagamadagudagu i-di huiahi o-nia ngudu laagau e-lua ala e-gaa.

7:5  Syria e-haga-puni gi Israel mo di-nadau king guu-hai nadau hagababa,

7:6  bolo ginaadou e-hula e-hai-baahi ang-gi Judah, e-hono digau Judah gii-dau madalia ginaadou, gaa-lawa gaa-dugu di tama-daane a Tabeel gi-hongo di lohongo-king.

7:7  “Malaa, gei Au go di Tagi go Yihowah e-haga-modongoohia bolo di mee deenei hagalee hai gii-gila.

7:8  Kaiaha? Idimaa, Syria gu-hagalee maaloo i Damascus, dela go dono waahale-dagi, gei Damascus hagalee maaloo i-di king go Rezin. I-di gili o Israel, i-lodo nia ngadau e-modoono maa-lima, gei di-maa ga-bagege ga-hagalee hai di guongo.

7:9  Israel gu-hagalee maaloo i Samaria dela go dono waahale-dagi, gei Samaria le e-hagalee maaloo i-di king go Pekah. “Maa goodou ga-hagalee tuu maaloo i godou hagadonu, gei goodou hogi la-ga-deemee di-tuu maaloo.”

7:10  Dimaadua ga-hagau ana helekai labelaa gi Ahaz, e-hai boloo,

7:11  “Dangi ang-gi Dimaadua dela go doo God gi-gowadu gi-di-goe di haga-modongoohia, maa e-mee-hua di-hanimoi i-baahi digau ala guu-mmade i-di gowaa llala i henuailala, be i-nua-loo i-di langi.”

7:12  Gei Ahaz ga-helekai boloo, “Au hagalee dangi-anga i-di haga-modongoohia. Au hagalee hiihai e-hagamada Dimaadua.”

7:13  Gei Isaiah ga-helekai gi-di mee deenei boloo, “Hagalongo-malaa, goe dela di hagadili ni di King David, ma e-huaidu huoloo i di-goe dela e-haga-de-nnoomaalia nia daangada. Goe e-haga-de-nnoomaalia a God labelaa?

7:14  Malaa, go Tagi lahua dela ga-gowadu gi-di-goe di haga-modongoohia: Dahi dama-ahina madammaa ga-hai-dama, ga-haanau dana dama-daane, gaa-gahi dono ingoo bolo Immanuel.

7:15  I-di madagoaa-hua dela e-madua-aga-iei Mee, Mee ga-hilihili di mee humalia gaa-bae di huaidu gi-daha, gei nia daangada ga-inuinu nia milugu gaa-gai nia mee-maangala-‘honey’.

7:16  Gei i-mua-hua di madagoaa deelaa ma-gaa-dae-mai, nia henua o-nia king e-lua ala e-madagu-iei goe, gaa-hai nia anggowaa.

7:17  “Dimaadua ga-hagaduadua goe mo au daangada, mo-di madawaawa o-di king hagatau gi-nia laangi haingadaa huoloo, i-hongo nia mee ala ne-kila-aga-mai i-di madagoaa tenua go Israel ne-wwae gi-daha mo Judah, gei Mee ga-laha-mai di king o Assyria.

7:18  “Di madagoaa deelaa, gei Dimaadua gaa-ngii e-hagadaba digau Egypt gi-lloomoi i-nia gowaa mogowaa-loo di monowai Nile be nia lamu-gulu, mo digau Assyria gi-lloomoi i di-nadau guongo be nia lamu-maangala.

7:19  Digaula ga-mmui-mai gi-di gowaa e-dahi ga-haga-honu nia gowaa-baba ala i-lodo di guongo, i-lodo nia bagungoo, i-lodo nia bae-hadu, gei digaula gaa-gahu nia geinga mo nia gowaa haangai-manu huogodoo.

7:20  “Di madagoaa deelaa ma-ga-dau-mai, gei di Tagi ga-hilihili-aga dana dangada dahi-libogo mai i digau ala e-noho i-di baahi dela i-golo o-di monowai go Euphrates, dela go di king aamua o Assyria, gaa-dahi gi-daha nia ngaahulu godou ngudu, mo nia ngaahulu o godou libogo mo godou gili.

7:21  “Di madagoaa deelaa ma-ga-dau-mai, gei tangada haangai-manu ga-hahaangai-hua dana kau e-dahi mono kuudi e-lua,

7:22  gei nia manu aanei gaa-hai nadau milugu logowaahee e-dohu gi-di hiihai o tangada deelaa. Digau dulii ala ne-dubu i-lodo tenua, e-dohu-hua labelaa i-di miami i-nia milugu mono mee-maangala-‘honey’.

7:23  “Di madagoaa deelaa ma-ga-dau-mai, gei nia hadagee-waini ala nogo huwa humalia i-mua, di hadagee e-dahi ono laagau-‘grape’ e-mana, gei tahidamee o di-maa la nia bahihadu silber e-mana, gei nia maa la-gaa-gahu go nia geinga duduia mono laagau huaidu.

7:24  Nia daangada gaa-hula gi-golo e-puu manu gi-nia amu-maalei mono maalei. Uaa, di guongo hagatau guu-tomo i-nia laagau duduia mono laagau huaidu.

7:25  Nia dama-gonduu huogodoo i-nia gowaa ala nogo dogi-ai nia hagadili, la-guu-gahu hagatau go di geinga duduia, gei deai tangada e-hana gi-golo ai, di gowaa la-gaa-hai di gowaa e-heehee-ai nia kau mono siibi no-lodo.”

Chapter 8

8:1  Dimaadua e-helekai-mai gi-di-au, “Kae-ina dau beebaa-wini damanaiee, hihia gi-hongo di-maa nia helekai aanei haga-llauehe boloo: ‘Limalima di-kumi, ge limalima di-kae.’

8:2  Laha-mai au daane dogolua hai-mee donu: go tangada hai-mee-dabu go Uriah, mo Zechariah di tama a Jeberechiah e-hai tadau daangada hagadoodonu.”

8:3  Muli-hua tama madagoaa bodobodo, gei dogu lodo ga-hai-dama. I-di madagoaa di-mau dama ne-haanau, gei Dimaadua ga-helekai-mai gi-di-au boloo, “Haga-ingoo-ina a-mee boloo: ‘Limalima di-kumi, ge limalima di-kae’.

8:4  I-mua tama-daane deelaa ga-iloo di-helekai boloo: ‘Maamaa’ mo ‘Baabaa’, gei nia maluagina a Damascus mo Samaria gaa-dada gaa-kae go di king Assyria.”

8:5  Dimaadua e-helekai-mai gi-di-au labelaa.

8:6  Mee ga-helekai, “Idimaa nia daangada aanei gu-haga-balumee di monowai kila o Shiloah, mo-di polepole i-mua di king o Assyria go Rezin mo King Pekah o Samaria,

8:7  Au dela go di Tagi ga-laha-mai di king o Assyria mo ana gau-dauwa huogodoo gii-hai tauwa gi Judah. Digaula ga-lloomoi be-di labagee e-mmidi i-di monowai Euphrates dela e-mmidi huoloo.

8:8  Digaula gaa-hula ga-haga-madammaa laa-lodo o Judah be-di labagee, e-nnoo-aga gi-nua-loo gaa-tugi nia bakau, ga-hagaholi nia mee huogodoo.” God le e-madalia gidaadou! Ono bakau gaa-holo gi-hongo tenua hagatau, ga-abaaba di-maa.

8:9  Goodou go nia henua llauehe, goodou haga-dagabuli-ina-mai goodou gi-di gowaa e-dahi mo-di mmaadagu. Goodou go nia gowaa mogowaa-loo i henuailala, goodou hagalongo-mai. Hagatogomaalia gi teebagi, mo-di mmaadagu! Uaa, hagatogomaalia ge gi-mmaadagu!

8:10  Heia godou hagamaanadu, gei nia maa hagalee kila. Helekai godou mee ala e-hiihai ginai, gei nia maa e-balumee, idimaa, God le e-madalia gimaadou.

8:11  Mai i ono mahi aamua, Dimaadua ga-helekai hagamahi mai gi-di-au bolo gi-hudee daudalia di ala dela e-daudali go nia daangada. Mee e-helekai boloo,

8:12  “Hudee heia goe gii-dau gi-nia hagamamaanadu o-nia daangada, ge hudee madagu i-nia mee ala e-mmaadagu-ai digaula.

8:13  Gi-langahia bolo ko-Au, go Dimaadua di Gowaa Aamua, Au e-dabu. Ma ko-Au hua dela belee madagu-iei goe.

8:14  Idimaa Au dela e-dabuaahia huoloo, Au e-hai be tadugalaa dela e-haga-hingahinga nia daangada, gei Au e-hai be-di hele dela e-kumi nia daangada o Judah mo Israel mo nia daangada o Jerusalem.

8:15  E-dogologowaahee ga-hingahinga gaa-too gi-lala ga-lauwa llauehe. Digaula gaa-kumi i-lodo di hele.”

8:16  Goodou go agu dama agoago, la digau belee madamada humalia ge daahi nia helekai a God ala ne-gaamai gi-di-au.

8:17  Dimaadua e-haga-ngala Ia i ana daangada, gei au e-hagadonu a-Mee, ge e-dugu dogu hagadagadagagee i-baahi o Mee.

8:18  Deenei au e-madalia agu dama ala ne-gaamai go Dimaadua gi-di-au. Dimaadua go di Gowaa Aamua, dela dono lohongo-king i-hongo di Gonduu Zion, ne-hagau-mai gimaadou e-pono ana helekai mo ana haga-modongoohia hagamouli gi digau Israel.

8:19  Gei nia daangada ga-helekai-adu gi goodou bolo gi-heheeu-ina nia helekai gi digau hai-buubuu, mono gau hai-ieidu, ala e-hai nadau balu-helekai haga-gadagada-dangada. Digaula ga-helekai boloo, “Nia daangada gi-heheeu nadau helekai gi-baahi nia hagataalunga mo-di dangi ang-gi digau mmade belee hagamaamaa digau ala e-mouli.”

8:20  Gei goodou ga-helekai gi digaula boloo, “Hagalongo-malaa gi-nia mee a Dimaadua e-aago goodou! Hudee hagalongo gi-nia hagataalunga, nia mee digaula ala e-helekai-ai le e-deemee di-daa di haingadaa deelaa gi-daha.”

8:21  Nia daangada Israel gaa-hula laa-lodo di gowaa deelaa, digaula ga-manawa-gee ge hiigai. Gei di madagoaa dela ga-hiigai-iei digaula mo nadau hagawelewele, gei digaula ga-haga-halauwa nadau king mo di-nadau God. Holongo digaula ga-mmada-aga gi-nua gi-di langi,

8:22  be gaa-mmada gi-lala gi-hongo di gelegele, gei digaula hagalee gidee-ginaadou di-mee, dela-hua go nia haingadaa mo-di bouli dongoeho dela e-daudali go digaula.

Chapter 9

9:1  Gei di-maa gu-deai di madagoaa e-llele hagammuni gi-daha mo nia haingadaa aanei ai. Tenua go Zebulun mo Naphtali la-gu-haga-balumee, gei di madagoaa gaa-dae-mai ga-hagalaamua labelaa go di gowaa deelaa, e-tugi i-di tai go Mediterranean gaa-hana-loo gi baahi i-dua gi-nia gowaa ala i-baahi gi-golo Jordan, ge tugi hogi i Galilee, go tenua ni digau tuadimee.

9:2  Digau ala nogo noho i-lodo di bouli, gu-gidee-ginaadou di maalama aamua. Di maalama gu-haga-maalama digau ala nogo noho i-lodo di bouli o-di made.

9:3  Meenei Dimaadua, Goe guu-wanga gi digaula di tenetene aamua. Goe guu-hai digaula gi-manawa tenetene. Digaula e-tenetene gi au mee ala ne-hai, e-hai be digau e-tenetene i di-nadau madagoaa ma-gaa-hadi tau-gai, be e-duwweduwwe nadau goloo ala ne-kumi i tauwa.

9:4  Digaula e-tenetene, idimaa, Goe ne-oho gi-daha nadau mee aamo-mee gi-de haga-daamaha digaula, mono baalanga ala nogo haga-mamaawa nadau bakau. Goe gu-haga-magedaa tenua dela nogo hagahuaidu au daangada, e-hai be dau haga-magedaa digau-dauwa o Midian namua-loo.

9:5  Digaula ga-tenetene, idimaa, nia suud huogodoo o-nia gau-dauwa ala ne-dagadagahi di-nadau henua, mo nadau goloo-gahu ala gu-bigibigi dodo ono gili, gaa-kili gi-lodo di ahi, gaa-ngudu.

9:6  Di Tama e-haanau-mai gi gidaadou! Di Tama e-gaamai gi gidaadou! Gei Mee gaa-hai tadau Dagi. Mee ga-haga-ingoo boloo, “Tagi Manawa-kabemee”, “God Mogobuna”, “Tamana dono Hagaodi ai”, “Tagi o-di Aumaalia”.

9:7  Dono mogobuna aamua ga-tomo-aga, dono henua gaa-noho i-di aumaalia. Mee gaa-dagi be-di king i-di lohongo o David. Dono mogobuna ga-haga-mau gi-di tonu mo-di hagi-aga e-humalia ge donu, tugi dolomeenei gaa-dae-loo gi-di hagaodi o-di madagoaa. Dimaadua di Gowaa Aamua e-hagamahi huoloo e-hai nia mee aanei huogodoo gi-kila-aga.

9:8  Dimaadua gu-hagiaga Israel, di hagadili o Jacob.

9:9  Nia daangada Israel huogodoo mo digau ala e-noho i-lodo di waahale Samaria ga-iloo bolo ma go Mee dela ne-hai di-mee deenei. Dolomeenei digaula gu-hagamuamua, gu-hagapuu, e-helekai,

9:10  “Nia hale ne-hai gi-nia hadu gelegele gu-hingahinga, gei gidaadou ga-hagaduu-aga nia maa gi-nia hadugalaa. Nia tanga laagau-‘sycamore’ guu-tuu gi-lala, malaa, gidaadou ga-koodai nia maa gi-nia laagau-‘cedar’ humalia huoloo.”

9:11  Dimaadua gu-haga-ngalungalua nadau hagadaumee bolo gi-heebagi gi digaula.

9:12  Syria i-bahi-i-dua gei Philistia i-bahi-i-dai guu-huge nau ngudu belee holo Israel. Malaa, di hagawelewele Dimaadua la-digi dugua, dono lima e-holo hua igolo e-hagahuaidu digau Israel.

9:13  Digau Israel digi huli hoou. Ma e-aha maa Dimaadua go di Gowaa Aamua e-hagahuaidu digaula, digaula digi huli gi-muli gi Mee.

9:14  I-lodo di laangi e-dahi, Dimaadua ga-hagahuaidu nia dagi Israel mo digau o-di guongo. Mee ga-duuduu gi-daha nia libogo mo nia hugu digaula.

9:15  Digau mmaadua mo digau aamua la aalaa go di libogo, gei di hugu la-go nia soukohp agoago tilikai,

9:16  ala e-dagi nia daangada gi-hula-gee, gei e-hagahinihini digaula giibeni.

9:17  Malaa Tagi ga-hagalee dumaalia gi dahi dama-daane gii-lele gi-daha, gei Mee ga-hagalee aloho i-nia ahina mmade nadau lodo mo nia damagiigi ala guu-mmade nadau maadua, idimaa nia daangada huogodoo gu-hagalee daumaha gi God gei gu-huaidu huoloo. Nadau helehelekai huogodoo le e-huaidu huoloo. Malaa, di hagawelewele Dimaadua la-digi dugua, dono lima e-holo hua igolo e-hagahuaidu digaula.

9:18  Nia huaidu o-nia daangada e-ulaula be-di ahi dela e-dudu ana madageinga mono geinga duduia. E-lalaula be-di ahi lodo-henua dela e-hanaga dono huiahi gi-nua.

9:19  Idimaa i-di hagawelewele Dimaadua di Gowaa Aamua, dono hagaduadua le e-lalaula be di ahi i-lodo tenua hagatau, gaa-dudu nia daangada. Tangada-nei gii-bida madamada humalia i dono huaidina.

9:20  I-lodo nia madagoaa huogodoo i tenua deelaa, nia daangada e-gumigumi ge gai nia hagadilinga mee huogodoo ala ma-gaa-kida, gei e-hagalee maaluu ginai. Digaula gaa-gai labelaa nadau dama donu!

9:21  Nia daangada o Manasseh mo nia daangada o Ephraim ga-heebagi i nadau mehanga, ga huli ga-heebagi gi Judah. Malaa, di hagawelewele o Dimaadua digi hagalawa-ina, gei Mee ga-dahi-aga gaa-holo dono lima belee hagaduadua digaula.

Chapter 10

10:1  E-huaidu huoloo adu gi goodou, i goodou ala e-hai nia haganoho hai-gee ala e-haga-haingadaa agu daangada.

10:2  Deenei di-godou hai e-duuli nia donu o digau hagaloale. Deenei di-godou hai e-kae nia goloo nia ahina nadau lodo ai mo nia damagiigi ala guu-mmade nadau maadua.

10:3  Ma di-aha gaa-hai go goodou, maa God ga-hagaduadua goodou? Ma di-aha gaa-hai go goodou, maa God ga-hagau-mai ana haingadaa mai tenua mogowaa-loo? Goodou gaa-llele gi-hee e-halahala di-godou hagamaamaa? Di gowaa i-hee ga-daalo hagammuni godou maluagina?

10:4  Goodou gaa-mmade i-lodo tauwa, be e-lahi go digaula be digau galabudi. Malaa, di hagawelewele Dimaadua la-digi dugua, dono lima e-holo hua igolo e-hagahuaidu goodou.

10:5  Dimaadua ga-helekai, “Assyria! Au e-haga-hai-hegau Assyria be nia goloo heebagi e-hagahuaidu digau ala e-hagawelewele ginai au.

10:6  Au gu-hagau Assyria belee heebagi gi-di guongo dela hagalee daumaha gi God, go nia daangada ala guu-hai au gi-hagawelewele. Au gu-hagau digaula belee kae ge gaiaa nia goloo nia daangada aalaa mo-di dagadagahi digaula i-hongo nia ala gadoo be nia gohu gelegele.”

10:7  Gei di king aamua o Assyria e-hagamaanadu huaidu bolo ia ga-daaligi nia henua llauehe e-logowaahee.

10:8  I dono hagaamu ia, ia ga-helekai boloo, “Tangada-nei mo tangada-nei i agu dagi-dauwa aamua la di king!

10:9  Au gu-hagamagedaa nia waahale o Calno mo Carchemish, nia waahale o Hamath mo Arpad. Au gu-hagamagedaa Samaria mo Damascus.

10:10  Au guu-dau i-nia henua llauehe, gu-hagaduadua digau ala e-daumaha gi-nia balu-ieidu, go nia ada balu-ieidu ala e-logo i-nia ada balu-ieidu o Samaria mo Jerusalem.

10:11  Au gu-oho gi-daha Samaria mo ono balu-ieidu huogodoo. Gei au gaa-oho labelaa Jerusalem mo nia ada-mee ala e-daumaha ginai digaula i-di gowaa deelaa.”

10:12  Gei Tagi ga-helekai, “Dogu madagoaa ma-gaa-lawa di hai agu mee i-hongo di Gonduu Zion mo i-lodo Jerusalem, Au ga-hagaduadua di king aamua o Assyria i ana helekai hagapuu ge hagamuamua.”

10:13  Di king aamua o Assyria e-helekai hagaamu ia, “Koau ne-hai nia mee huogodoo. Au e-maaloo, kabemee, ge iloo di hai nia mee. Au gu-hunahuna gi-daha nia hagageinga mehanga nnenua llauehe, guu-kae nia goloo ala nogo benebene go digaula. Au guu-hai gadoo be di kau-daane, gu-dagadagahi digau ala e-noho i-golo.

10:14  Nia henua henuailala guu-hai be di waahongo manu, au gu-hagabudu ngoohia nia maluagina digaula be tangada ma-ga-hagabudu ana ngogo. Deai di bakau ne-kabakaba ai belee hagamadagudagu au. Di ngudu ne-huge ai belee wolo-mai!”

10:15  Malaa Dimaadua e-helekai, “Talai le e-mee di-hai bolo ia mada-hagalabagau i tangada dela e-hai-hegau i-di-maa? Towaa le e-mee di-hai bolo ia e-mada-hagalabagau i tangada dela e-hai-hegau i-di-maa? Tugidugi e-hagalee dahiaga dana dangada, go tangada dela e-dahiaga tugidugi.”

10:16  Tagi, go Yihowah di Gowaa Aamua, ga-hagau mai dana magi e-hagaduadua digau ala e-miami humalia. Di ahi e-lalaula i-lodo nadau huaidina hagalee noho-loo.

10:17  God, go di maalama Israel, gaa-huli gaa-hai di ahi. Di God Dabuaahia o Israel gaa-hai di ahi, gaa-dudu nia mee huogodoo i-lodo di laangi hua e-dahi, hagapuni gi-nia laagau lligi mono laagau duduia.

10:18  Lodo henua tomo mo nia gowaa dogi-mee ga-hagammaa huogodoo gi-daha, gadoo be di magi pale e-hagammade nia daangada.

10:19  Nia laagau hua dulii gaa-dubu i-golo, tama dulii e-mee-hua di-dau nia maa.

10:20  Di madagoaa ga-dau-mai, gei nia daangada Israel ala ne-mouli, ga-hagalee hagadagadagagee gi tenua dela ne-hoohoo di-daaligi digaula gii-mmade. Digaula ga-manawa hagadagadagagee mo-di manawa donu gi Dimaadua, di God Dabuaahia Israel.

10:21  Digau dulii i digau Israel ga-lloomoi gi-muli gi di-nadau God aamua.

10:22  Ma e-aha maa digau Israel dolomeenei e-dogologowaahee be nia gelegele o tongotai, digau hua dulii ga-lloomoi gi-muli. Taaligi gu-togomaalia ang gi-nia daangada ala e-tau-anga.

10:23  Uaa, Tagi go Yihowah di Gowaa Aamua ga-haga-halauwa nia gowaa huogodoo o tenua, gii-hai be ana helekai.

10:24  Tagi go Yihowah di Gowaa Aamua e-helekai gi ana daangada ala e-noho i-lodo Zion, “Hudee mmaadagu i digau Assyria, ma e-aha maa digaula e-hai be digau Egypt i-di nadau hagahuaidu goodou.

10:25  I-lodo tama madagoaa dulii ma-gaa-lawa di hagahuaidu goodou, gei Au ga-daaligi digaula gi-daha.

10:26  Au, go Dimaadua di Gowaa Aamua, ga-hagamamaawa digaula gi dagu bida hali be dagu hai ne-hai gi-nia daangada o Midian i-di Hadu Oreb. Au ga-hagahuaidu Assyria be dagu hagahuaidu Egypt.

10:27  Di madagoaa dela ga-dau-mai, gei Au ga-hagamaahede goodou gi-daha mo nia mogobuna Assyria, gei nadau hagahuaidu ga-hagalee daamaha i-hongo godou bakau.”

10:28  Di buini-dauwa hagadaumee ne-hagamagedaa di waahale Ai! Digaula gu-diiagi Migron! Digaula guu-dugu nadau goloo i Michmash!

10:29  Digaula ne-diiagi taalinga di gonduu gaa-kii i Geba. Nia daangada di guongo Ramah gu-mmaadagu, gei nia daangada i-lodo di waahale o King Saul go Gibeah guu-llele gi-daha.

10:30  Wwolo, nia daangada o Gallim! Hagalongo, nia daangada Laishah! Helekai, nia daangada o Anathoth!

10:31  Nia daangada o Madmenah mo Gebim e-llele halahala nadau mouli.

10:32  Dangi-nei di hagadaumee la i-lodo di waahale Nob, e-lialiagi nadau lima gi-di Gonduu Zion, go di waahale Jerusalem.

10:33  Tagi go Yihowah di Gowaa Aamua ga-kili-eia digaula gi-lala ga-mamaawa be nia manga ne-dalai gi-daha mo-di laagau. Digau hagamuamua mo digau bida hagaamu ginaadou gaa-dugu-ia gi-lala ga-haga-langaadia.

10:34  Dimaadua gaa-hele digaula gi-lala be nia laagau i tungaalodo di waa-laagau, e-tingatinga gadoo be nia laagau humalia o Lebanon.

Chapter 11

11:1  Di hagatau o-di madawaawa David le e-hai be-di laagau dela ne-hele gi-lala. Gei di-maa e-matilitili-aga nia dama i-di gili di tono di laagau deelaa, e-hai be-di King hoou dela ma-ga-gila-aga i-lodo di madawaawa David.

11:2  Di Hagataalunga o Dimaadua gaa-wanga gi Mee di iloo-mee mo-di kabemee, mo-di hangaahai o-di dagi ana daangada. Gei Mee ga-iloo-Ia di manawa Dimaadua ga-hagalaamua a-Mee,

11:3  ga-gidee-Ia dono manawa-tenetene i dono hagalongo ang-gi Mee. Gei Mee hagalee hagi-aga ana mee ala e-gidee-Ia, be i ana mee ne-longono-ai.

11:4  Mee ga-hagi-aga digau ala e-hagaloale gi-di mee dela e-donu, ge-Ia ga-hagamaamaa digau ala nadau hagamaamaa-ai gii-donu. Gei Mee ga-hagaduadua ge ga-daaligi digau hai mee huaidu gii-mmade gi ana helekai.

11:5  Gei Mee gaa-dagi ana daangada gi-di tonu mo-di manawa-dahi.

11:6  Nia paana lodo-geinga mono siibi gaa-noho tenetene i-di gowaa e-dahi, nia manu ‘leopard’ ga-kiikii dalia nia damaa-kuudi, nia damaa-kau mono dama-laion ga-hahaangai i-di gowaa e-dahi, gei nia damagiigi lligi ga-benebene digaula.

11:7  Nia kau mono ‘bear’ ga-miami i-di gowaa e-dahi, mo nia damaa-kau mono dama-‘bear’ gaa-kii i-di gowaa e-dahi i-di aumaalia. Nia laion gaa-gai nia geinga ala e-gaigai go nia kau.

11:8  Gei tama dulii la-hagalee tale ang-gi di haingadaa, maa mee ga-haihai ana dadaagala i-baahi o-nia gihaa-poisin.

11:9  I-hongo Zion, di gonduu haga-madagu a God, deai di-mee e-hagahuaidu be e-daaligi i-golo ai, idimaa, henuailala gaa-honu i-di kabemee mai baahi Dimaadua, gadoo be-di moana dela e-honu i-nia wai.

11:10  Dahi laangi ga-dau-mai, di madagoaa di King hoou i-di hagadili o David gaa-hai di ada hagamodongoohia ang-gi nia henua llauehe ala i-golo. Digaula ga-dagabuli i dono waahale king, ga-hagalaamua a-Mee.

11:11  Di laangi deelaa ma-ga-dau-mai, gei Tagi ga-hai-hegau labelaa gi ono mogobuna e-laha-mai ana daangada ala ne-dubu i Assyria mo Egypt, i-lodo nnenua llauehe go Pathros, Ethiopia, Elam, Babylonia mo Hamath, mo i-nia dongotai mo nia henua o-di moana.

11:12  Dimaadua gaa-hudi dana hagallebe hagailoo gi nnenua llauehe bolo Ia ga-hagabudu labelaa digau Israel mo Judah ala ne-hagabagi gii-noho dagidahi gi-lloomoi gi-muli mai i-nia mada e-haa o henuailala.

11:13  Tenua Israel ga-hagalee dubua hua igolo gi Judah, gei Judah ga-hagalee hai di hagadaumee ni Israel.

11:14  Ngaadahi, digaula ga-heebagi gi digau Philistia i-bahi-i-dai, gaa-kae nia goloo digau ala e-noho i-bahi-i-dua. Digaula ga-hagamagedaa digau Edom mo Moab, gei digau Ammon ga-hagalongo gi digaula.

11:15  Dimaadua ga-hagabagu di madaawa o Suez, ga-hagau-mai dana madangi welengina e-hagamaangoo Euphrates, ga-hagahali-hua nia dama monowai lligi e-hidu, bolo gii-mee nia daangada di hula laalaa.

11:16  Di ala damana i-golo mai Assyria, ang-gi ana daangada Israel ala ne-dubu, gadoo be di ala damana ang-gi nadau maadua-mmaadua i nadau madagoaa ne-lloomoi i Egypt.

Chapter 12

12:1  Dahi laangi ga-dau-mai, gei nia daangada ga-daahili, “Gimaadou e-hagaamu Goe, meenei Dimaadua, Goe gu-hagawelewele-mai gi gimaadou, gei dolomeenei Goe e-haga-manawa lamalia gimaadou, gu-hagalee hagawelewele mai.

12:2  God go dogu hagamouli, au ga-hagadagadagagee gi-Mee ga-hagalee madagu. Dimaadua e-gaamai gi-di-au di mahi mo-di mogobuna, Mee go dogu hagamouli.

12:3  Gadoo be nia wai magalillili ma-ga-hagamanawa lamalia tangada hieinu, nia dama a God ga-tenetene gi nadau hagamouli.”

12:4  Di laangi ga-dau-mai, gei nia daangada ga-daahili, “Di-mee bolo mee gi Dimaadua! Gahigahia a-Mee gi-hagamaamaa-ina goe! Hagamodongoohia-ina gi henuailala ana mee ala ne-hai. Hagianga-ina gi digaula di aamua o-maa!

12:5  Daahili ang-gi Dimaadua i ana mee humalia huogodoo ala ne-hai. Henuailala hagatau gi-hagalongo gi-nia longo.

12:6  Nia daangada huogodoo i Zion gi-wwolowwolo dadaahili tenetene, di God dabuaahia o Israel le e-aamua, e-noho madalia ana daangada.”

Chapter 13

13:1  Deenei telekai mai baahi o God i-di hai o Babylon, dela ne-mmada ginai Isaiah, tama Amoz.

13:2  Huudia gi-nua tagallebe dauwa i-tomo di anga-gonduu! Wwolowwolo gi digau dauwa, daahia godou lima gi-nua, e-hai di hagailoo gi digaula gi-heebagi gi-nia bontai di waahale hagaamu ia.

13:3  Dimaadua gu-gahigahi ana gau-dauwa maaloo ge hagadagadagagee ginai, gi-heebagi tauwa dabuaahia, gei gi-hagaduadua-ina digau ala e-hagawelewele ginai Ia.

13:4  Hagalongo gi-di longoaa i-hongo nia gonduu, di lee o-di hagabuulinga dangada dogologo, go-di lee o nnenua llauehe mo nia mogobuna dagi e-hagapuni-mai. Dimaadua di Gowaa Aamua gu-hagatogomaalia ana gau-dauwa e-heebagi.

13:5  Digaula e-lloomoi i nnenua mogowaa-loo mai nia mada o henuailala. Dimaadua e-hanimoi belee oho gi-daha tenua hagatau i dono hagawelewele.

13:6  Wwolowwolo i godou mmae! Di laangi Dimaadua la-gu-hoohoo-mai, di laangi dela God Mogobuna e-hai dana daaligi.

13:7  Nia lima nia daangada huogodoo ga-maanuhia, nadau manawa maaloo ga-paagege.

13:8  Digaula huogodoo ga-mmaadagu huoloo, gaa-mmae huoloo be-di mmae o-di ahina ma-ga-haanau. Digaula ga-hilahila i nadau mehanga mmaadagu, nadau hadumada gaa-mmee i-nadau langaadia.

13:9  Di laangi Dimaadua le e-dau-mai, go-di laangi huaidu o dono hagawelewele dela e-deemee di-dugu. Henuailala gaa-hai di anggowaa, digau huaidu huogodoo ga-daaligi gi-daha.

13:10  Nia heduu huogodoo ga-hagalee maahina, di laa ga-bouli i-di madagoaa ma-gaa-hobo, gei di malama ga-bouli.

13:11  Dimaadua ga-helekai, “Au ga-gaamai di haingadaa gi henuailala, ga-daaligi nia daangada huaidu huogodoo i nadau hai-hala. Au gaa-dugu-iha nia hagamuamua o-nia daangada, ga-daaligi digau hagamuamua ge manawa huaidu.

13:12  Digau ala gaa-dubu la-ga hogoohi i-nia goolo.

13:13  Au gaa-lulu di langi, gei henuailala gaa-doo gi-daha mo dono lohongo i-di laangi deelaa, i-di madagoaa Au, go Dimaadua di Gowaa Aamua ma-ga-hagawelewele.

13:14  “Digau henua-gee ala e-noho i Babylon gaa-llele gi-daha gi nadau henua donu, ga-lellele dagidahi be nia ee ala e-llele gi-daha mo tangada puu ee, gadoo be siibi dono dangada hagaloohi ai.

13:15  Dahi dangada ma-gaa-kumi, le e-daalo gii-made.

13:16  Nadau dama lligi ga-daaligi gii-mmade i-mua nadau golomada, nadau hale ga-gaiaa, nadau lodo gaa-kumi go nia daane gaa-hai ginai nadau hiihai.”

13:17  Dimaadua ga-helekai, “Au ga-haga-ngalua digau Media gi-heebagi gi digau Babylon. Digaula ga-hagalee hagalabagau nia silber, ge hagalee hagamada go nia goolo.

13:18  Digaula ga-daaligi nia dama-daane gi nadau maalei mono amu maalei. Digaula ga-hagalee aloho i-nia ligiana, hagalee dumaalia gi-nia dama lligi.

13:19  Babylonia la tenua dela e-kaedahi humalia huoloo i-lodo nia henua huogodoo, gei digau tenua le e-hagapuu ginai. Gei Au go Dimaadua gaa-oho Babylon gadoo be dagu oho Sodom mo Gomorrah.

13:20  Deai tangada e-noho labelaa i-golo ai, tangada Arab e-haga-duu-aga dono hale i-golo ai, deai tangada hagaloohi siibi e-haangai ana siibi i-di gowaa deelaa ai.

13:21  Ma-gaa-hai di gowaa e-noho-ai nia manu lodo-henua, e-hai nia hale-ngogo o-nia manu-‘owl’. Nia manu-‘ostrich’ gaa-noho i-golo, gei nia kuudi lodo-henua ga-hobohobo laa-lodo nia gowaa mooho.

13:22  Nia hagadilinga lee manu-‘hyena’ mo ‘jackal’ e-longono mai i-lodo nia hale angulaa hagaloohi mo nia hale di king. Di madagoaa Babylon la-gu-dau-mai, ono laangi gu-hoohoo ga-hagaodi.”

Chapter 14

14:1  Dimaadua ga-aloho labelaa i ana daangada Israel, ga-hilihili-aga digaula belee hai ana daangada. Mee ga-dumaalia gi digaula gii-noho labelaa i nadau lohongo, gei digau tuadimee ga-lloomoi gaa-noho i-baahi digaula.

14:2  Nia henua llauehe e-logo ga-hagamaamaa digau Israel gi-lloomoi gi-muli gi tenua dela ne-wanga go Dimaadua gi digaula. Nnenua aalaa gaa-hai hege gi Israel. Di madagoaa deelaa gei Israel ga-hagamagedaa nnenua ala ne-hagamagedaa ia, ge nia daangada Israel gaa-dagi digau ala nogo hagaduadua ginaadou.

14:3  Dimaadua gaa-wanga di molooloo gi digau Israel mai nadau mmaemmae, duadua, mo nadau moomee kono ne-hono gi-heia.

14:4  Di madagoaa a-Mee gaa-hai di-mee deenei, digaula gi-haga-balumee-ina di king o Babylon, gi-helekai, “Di king huaidu gu-hagalee. Mee gu-deemee di-hagaduadua dana dangada labelaa!

14:5  Dimaadua gu-hagalawa nia mogobuna o-nia dagi huaidu

14:6  ala nogo hagaduadua nia daangada gi nadau hagawelewele, gei digi noho-loo di-nadau hagahuaidu nadau henua ala ne-hagamagedaa.

14:7  Dolomeenei henuailala hagatau gu-tenetene i nadau noho baba i-di aumaalia. Digau huogodoo e-dadaahili tenetene!

14:8  Nia laagau-‘cypress’, laagau-‘cedar’ gu-tenetene gi-di king ne-hagalee, idimaa i mee dela guu-hana, tangada e-hele digaula ai!

14:9  “Tenua digau mmade gu-togomaalia e-hagaahi-mai di king o Babylon. Nia ieidu o digau ala nogo mogobuna i henuailala e-haga-hinihini huoloo. Nia ieidu o-nia king e-tuu-aga i nadau lohongo king.

14:10  Digaula huogodoo e-gahigahi a-mee boloo, ‘Goe e-bagege be gimaadou, goe tangada ni gimaadou!

14:11  Goe nogo hagalaamua go nia taahili o-nia ‘harp’, dolomeenei gei goe gu-i-lodo tenua o digau mmade. Goe e-moe i-hongo di moenge honu ila, ge gahu gi-di ‘blanket’ e-honu badubadu.’

14:12  “Di king o Babylon, di heduu maahina o-di luada, goe guu-doo-iha gi-daha mo-di langi! I-mua, goe nogo hagamagedaa nia guongo ala i-golo, dolomeenei gei goe guu-hudu gi-lodo di gelegele.

14:13  Goe gu-hagamaanadu bolo goe gaa-gaga gi-di langi gi-bahi-i-nua nia heduu mugi-nua-loo, gaa-dugu do lohongo king. Goe gu-hagamaanadu bolo goe gaa-noho be di king i-hongo di gonduu dela i-bahi-i-ngeia, di gowaa e-dagabuli-ai nia god.

14:14  Goe gu-helekai bolo goe gaa-gaga gi-hongo nia gololangi gii-hai be-di Gowaa Aamua.

14:15  Gei deeai, goe guu-lahi gi-di gowaa kaedahi llala o tenua digau mmade.

14:16  “Digau mmade gaa-hanga nadau ngudu, ga-daumada goe i te-iloo. Digaula ga-heeu, ‘Ma go taane deenei dela ne-hagangalua henuailala, ga-haga-bolebole nia henua?

14:17  Ma go taane deenei dela ne-oho nia waahale gaa-hai henuailala gii-hai di anggowaa? Ma go mee deenei dela ne-dugu digau lawalawa gi-hudee hagamehede-ina, be e-hagau gi-muli gi nadau hale?’

14:18  “Nia king huogodoo o henuailala guu-mmoe i-lodo nadau daalunga madamada,

14:19  gei goe do daalunga ai, do huaidina e-hudu gi-daha gii-bala, gaa-beehi go nia huaidina digau dauwa ne-mmade i-lodo tauwa, gaa-hudu dalia digaula gi-lodo di luwa hadugalaa, ga-dagadagahi gi-lala.

14:20  Idimaa goe ne-hagahuaidu do henua, gaa-bida daaligi o daangada, gei goe hagalee danu be nia king ala i-golo. Tangada e-dahi i do madahaanau huaidu e-mouli ai.

14:21  Taaligi dangada la-gi-daamada-ina. Nia dama-daane di king deenei gaa-mmade, idimaa go nia hala o nadau maadua-mmaadua. Deai tangada i digaula e-dagi henuailala be e-gahu di-maa gi-nia waahale ai.”

14:22  Dimaadua di Gowaa Aamua ga-helekai, “Au ga-heebagi gi Babylon, ga-hagahuaidu digaula. Deai dahi mee e-dugu ai, nia dama ai, tangada e-dahi e-mouli ai. Ko-Au go Dimaadua ne-helekai.

14:23  Au gaa-hai Babylon gii-hai tenua gelegele tiu, gei nia ‘owl’ gaa-noho i-golo. Au ga-duidui Babylon gi-di puluumu, e-duidui nia mee huogodoo gi-daha. Au go Dimaadua di Gowaa Aamua ne-helekai.”

14:24  Dimaadua di Gowaa Aamua gu-hagamodu, “Di-mee dela gu-haganoho ko-Au, e-gila e-hai. Dagu mee dela ne-maanadu bolo e-hai, e-gila e-hai.

14:25  Au ga-daaligi digau Assyria i-lodo dogu henua go Israel, ga-dagadagahi digaula i-hongo agu gonduu. Au ga-hagamehede agu daangada mai digau Assyria ala ne-haga-daamaha digaula gi nadau mee aamo daamaha mo nadau mee nogo hagaduadua digaula.

14:26  Deenei dagu hagatogomaalia e-hai gi henuailala hagatau, Au guu-holo gi-daha ogu lima belee hagahuaidu nia henua llauehe.”

14:27  Dimaadua di Gowaa Aamua gu-hagatogomaalia e-hai di-mee deenei, guu-holo gi-daha ono lima belee hagahuaidu. Deai dahi dangada e-mee di-dugu a-Mee ai.

14:28  Deenei telekai ne-haga-iloo i-di ngadau di king Ahaz ne-made:

14:29  Digau Philistia, di laagau dela nogo hagamamaawa goodou, la-guu-hadi, gei deai dono hadinga ai ma goodou ga-manawa lamalia. Di madagoaa di gihaa ma-gaa-made, gei di gihaa koia e-mada-huaidu e-pono dono lohongo. Di ngogo gihaa ga-haanau dana ‘dragon’ mamaangi.

14:30  Dimaadua gaa-hai di hagaloohi o digau hagaloale o ana daangada, gaa-hai digaula gi-mouli i-di aumaalia. Gei Mee ga-hagau-mai tau hiigai damana gi goodou go digau o Philistia, gei deai dahi dangada i goodou e-mouli ai.

14:31  Wwolowwolo, dangidangi di hagamaamaa, goodou go-nia waahale huogodoo o Philistia, goodou gi-mmaadagu. Di gololangi gohu dogolia e-hanimoi i-ngeia, deenei di buini-dauwa deai dahi dangada i digaula e-madagu ai.

14:32  Gidaadou ga-helekai bolo-aha gi digau kae-hegau ala ne-hagau-mai i Philistia? Gidaadou ga-helekai bolo Dimaadua gu-hagaduu-aga Zion, gei ana daangada ala nogo hagaduadua, ga-gidee di aumaalia i-di gowaa deelaa.

Chapter 15

15:1  Deenei telekai di hai o Moab: Nia waahale Ar mo Kir gu-daaligi i-di boo hua e-dahi, deai di hagalongoaa i Moab ai.

15:2  Digau Dibon e-kaga gi-hongo di gonduu e-tangi i di-nadau gowaa hai-daumaha. Digau Moab e-tangi manawa-gee gi-nia waahale Nebo mo Medeba, digaula guu-dahi nadau libogo mo nadau ngudu i nadau manawa-gee.

15:3  Nia daangada i-hongo nia ala e-ulu nia goloo manawa-gee. Digaula e-tangitangi i-nia gowaa heheetugi-ai nia daangada, mo i-hongo nia duatala o-nia hale.

15:4  Nia daangada Heshbon mo Elealeh gu-tangitangi gi-nua, gu-longono haga-mogowaa, gaa-tugi-loo i Jahaz. Digau dauwa hogi gu-bolebole mmaadagu, gu-manawa paagege.

15:5  Dogu manawa e-dangi huoloo gi Moab! Nia daangada e-hula gi-di waahale Zoar mo Eglath=Shelishiya. Hunu daangada e-kaga adu i-di ala dela e-hana gi Luhith, e-hula ge tangitangi. Hunu daangada e-llele gi Horonaim, mo-di tangitangi gi-nua.

15:6  Di monowai Nimrim gu-maangoo, nia geinga tolo i taalinga di-maa guu-mae, di mee e-tomo i-dono gili ai.

15:7  Nia daangada e-hagamada e-llele gi-daha mo nadau goloo huogodoo laa-lodo di Gowaa Mehanga Gonduu o-nia ‘Willow’.

15:8  I-nia hagageinga huogodoo o Moab, di lee dangi e-longono. E-longono gi-nia waahale o Eglaim mo Beer=Elim.

15:9  I-di waahale o Dibon, di monowai guu-mmee dodo, gei Dimaadua dana mee i-golo e-koia e-huaidu e-hagatogomaalia gi-nia daangada ala i-golo. Uaa, taaligi damana gaa-hai gi-nia daangada huogodoo ala gaa-dubu i Moab.

Chapter 16

16:1  Mai di waahale Sela i-lodo di anggowaa, nia daangada o Moab gu-hagau di nadau siibi e-kisakis gi tangada dela e-dagi i Jerusalem.

16:2  Digaula ga-talitali i taalinga di monowai Arnon, e-heehee de-noho-baba gi-mua mo gi-muli, gadoo be nia manu ma-ga-hagabagi gi-daha mo nadau waehongo.

16:3  Digaula e-helekai gi-nia daangada o Judah, “Hagia-mai gi gimaadou nia mee ala belee hai. Abaabalia gimaadou, be dahi laagau dono malu magalillili i-di oodee, hagamolooloo-ina gimaadou gi-lala godou malu. Gimaadou digau llele hagammuni, benabena-ina gimaadou hagammuni.

16:4  Dumaalia-mai gimaadou gii-noho i-di-godou henua. Abaabalia gimaadou gi-daha mo digau ala e-hiihai e-daaligi gimaadou.” (Di hagaduadua mo taaligi la-ga-hagalawa, digau ala e-oho tenua la-ga-hagalee.

16:5  Tangada e-dahi i-di hagadili o David gaa-hai di king, gaa-dagi nia daangada i-di hagadonu mo-di aloho. Mee ga-limalima di hai di-mee dela e-donu, gaa-hai gi-modongoohia bolo di tonu e-hai gii-hai.)

16:6  Digau Judah ga-helekai, “Gimaadou gu-longono bolo digau Moab e-bida hagalaamua ginaadou. Gimaadou e-iloo di-nadau hagamuamua mo halahalau, malaa, nadau hagaamu ginaadou la-ono hadinga ai.”

16:7  Digau Moab ga-tangitangi idimaa go nadau haingadaa ala e-hagaduadua ginaadou. Digau huogodoo ga-tangitangi i-di nadau langahia nia meegai humalia nogo gai go ginaadou i-lodo di waahale o Kir=Heres. Digaula gu-deai nadau hagadagadagagee ai.

16:8  Nia hadagee hoohoo gi Heshbon mono hadagee waini o Sibmah la-guu-mmade, go nia hadagee ala nogo inuinu-ai nia dagi o nnenua gi-libaliba. Di madagoaa e-dahi, nia laagau waini guu-tomo gi-daha guu-dau di waahale Jazer, mo gi-dua gi-lodo di anggowaa, mo gi-dai gi-di baahi i-golo di Tai Mmade.

16:9  Au e-dangidangihia gi-nia laagau waini o Sibmah gadoo be dogu dangihia gi Jazer. Au e-halidangi gi Heshbon mo Elealeh, idimaa deai di hagi huwa-laagau e-hagatenetene nia daangada ai.

16:10  Tangada e-tenetene i-lodo di gowaa tomo humalia dolomeenei ai. Tangada e-wolowolo be dadaahili i-lodo nia hadagee waini ai. Tangada e-dagadagahi ana ‘grape’ e-hai nia waini ai. Nia wolowolo tenetene la-gu-hagaodi.

16:11  Ogu lodo gu-manawa-gee gi Moab, ge dangidangihia gi Kir=Heres.

16:12  Digau Moab e-hagamahi huoloo e-hulahula gi nadau gowaa daumaha i-tomo nia gonduu, mo i-lodo nadau hale daumaha, e-dalodalo, gei dono hadinga ang-gi digaula ai.

16:13  Aanei nnelekai Dimaadua ne-helekai-ai i Moab i-mua.

16:14  Dolomeenei Dimaadua e-helekai, “I-lodo nia ngadau e-dolu dogomaalia, di maluagina damana Moab ga-hagalee. Digau hogoohi i ana daangada dogologo ga-mouli, gei e-paagege.”

Chapter 17

17:1  Dimaadua e-helekai, “Damascus ga-hagalee, gaa-hai-hua di hagabae geinga.

17:2  Nia waahale o Syria ga ono daangada ai gaa-hana hua beelaa, gaa-hai nia gowaa miami siibi mono kau, deai tangada e-hagabagi digaula gi-daha ai.

17:3  Israel ga-deemee di-duuli ia, gei Damascus ga-deemee di-duu modogoia. Digau Syria ala ga-mouli gaa-hai digau haga-langaadia gadoo be Israel. Ko-Au go Dimaadua di Gowaa Aamua ne-helekai.”

17:4  Dimaadua e-helekai, “Di laangi e-dau-mai, gei di aamua of Israel ga-hagaodi, dono maluagina gaa-hai di hagaloale.

17:5  Israel gaa-hai gadoo be di gowaa ma-gaa-tuu ono laagau gaa-hagi ono huwa, gaa-hai di anggowaa be di gowaa mehanga gonduu i Rephaim dela ne-hagi ono huwa hogoohi-loo.

17:6  Digau hogoohi ga-mouli, gei Israel gaa-hai be-di laagau-olib dela ma-gaa-hagi ono huwa huogodoo, ga-hagadubu nia golee e-lua be e-dolu i tahuhu, be hunu huwa dulii ala e-daudau i-hongo nia manga mugi-lala. Ko-Au go Yihowah, go di God o Israel ne-helekai.”

17:7  Di laangi deelaa ma-ga-dau-mai, nia daangada gaa-huli gi God Dabuaahia o Israel, dela ne-hai nia mee huogodoo, bolo gi-hagamaamaa-ina ginaadou.

17:8  Digaula gu-hagalee gana gi-nia gowaa hai-tigidaumaha ala ne-bida hai gi nadau lima, be e-hagadonu di-nadau mee dela ne-hai gi nadau lima: ala go nia ada god-ahina Asherah mo nia gowaa dudu tigidaumaha lolo-kala.

17:9  Di laangi deelaa ma-ga-dau-mai, gei nia waahale maaloo gaa-hai nia angaa guongo, ga-diiagi gi-mooho be nia waahale ala ne-diiagi go digau Hivite mo digau Amor i nadau llele hagammuni i digau Israel.

17:10  Israel, goe gu-de-langahia-e-goe di God dela e-benebene ge duuli goe gadoo be-di hadu maaloo dangihi. Gei goe guu-dogi nia laagau i-lodo au hadagee dabu belee daumaha-iei goe gi-nia god tuadimee.

17:11  Ma e-aha ma-ga-matilitili gaa-hai ono akai i-di luada hua dela ne-dogi nia maa kooe, gei nia maa hagalee huwa. Nia haingadaa hua, mono hagammaemmae deemee di hagahili.

17:12  Nnenua maaloo gu-ngalungalua ngoloolo be di moana, gadoo be nia beau llauehe maaloo ma-ga-bagubaguu.

17:13  Nia henua llauehe e-lloomoi be nia beau maaloo, gei God gaa-dugu digaula, digaula gaa-hula gi-muli gaa-llele gadoo be nia gelegele gohu dogolia i-taalinga di gonduu, gadoo be di manga laagau e-hahaangi i-di madangi.

17:14  I-nia hiahi, digaula e-hagamadagudagu dangada, i-nia luada gu-hagalee. Deenei di-mee gaa-tale gi digau huogodoo ala e-gaiaa tadau henua.

Chapter 18

18:1  Tenua i-golo e-longono nia lee bakau e-kabakaba, i-baahi gi-golo nia monowai Ethiopia,

18:2  Mai tenua deelaa, digau aamua kae hegau e-llooia i-lodo di monowai Nile i-nia boodi ne-hai gi-nia laagau aalek. Digau hagau nei, hula gi-muli gi godou henua. Kaina di longo deenei gi godou henua dela e-waewae go nia monowai, gi godou daangada lloo ge malallali nadau gili, ala e-mmaadagu-ai nia daangada huogodoo henuailala.

18:3  Hagalongo, goodou huogodoo ala e-noho i henuailala! Daumadalia tagallebe dela e-hudi i-tomo nia gonduu! Hagalongo gi-di buu dela e-ili!

18:4  Dimaadua gu-helekai-mai, “Au ga-mmada-ia i-di langi deemuu gadoo be nia madaua magalillili o-nia boo mahanahana i-di madagoaa e-hadi taugai, be tohaaina deemuu o-di laa welengina o-di laangi.

18:5  I-mua nia ‘grape’ ma-ga-hagabudu, i-di madagoaa nia akai ga-monnono, nia ‘grape’ ga-mmaadua, di hagadaumee ga-daaligi ngoohia nia daangada Ethiopia be tulumanu ma-gaa-tuu ngoohia nia manga di laagau waini.

18:6  Nnuaidina nadau gau-dauwa ga-diiagi gi-nia manu mamaangi, mono manu lodo-geinga. I-di madagoaa mahanahana nia manu mamaangi gaa-gai nia maa, i-di madagoaa magalillili nia manu lodo-henua gaa-gai nia maa.”

18:7  Di madagoaa e-dau-mai, gei Dimaadua di Gowaa Aamua gaa-kumi ana wanga dehuia mai tenua deenei dela e-waewae go nia monowai llauehe, ono daangada lloo, e-malallali nadau gili, ala e-mmaadagu-ai nia daangada huogodoo henuailala. Digaula ga-lloomoi gi-di Gonduu Zion, di gowaa e-hagalaamua-ai di ingoo o Dimaadua di Gowaa Aamua.

Chapter 19

19:1  Deenei telekai di hai o Egypt. Dimaadua e-hanimoi hagalellele i-hongo di gololangi gi Egypt. Nia ada-god Egypt gu-bolebole i ono mua, nia daangada Egypt gu-manawa paagege nadau lodo.

19:2  Dimaadua e-helekai, “Au ga-hagangalua nia manawa o-nia daangada gi-heheebagi, nia hagahaanau ga-heheebagi, digau e-noho hoohoo ginaadou ga-heheebagi, nia waahale ala e-hagamahi e-dagi ga-heheebagi, nia king ala bolo ginaadou e-dagi ga-heheebagi gi-di lohongo be ma koai gaa-dagi.

19:3  Au ga-hunahuna nia haganohonoho digau Egypt, ga-hagahuaidu nadau hagadagadagagee. Digaula ga-halahala di hagamaamaa mai baahi nadau ada-god, ga-halahala digau ala e-leelee gi-di bouli gi-heeu-ina gi-nia hagataalunga digau mmade nadau hagamaamaa.

19:4  Au gaa-wanga digau Egypt gi-di king huaidu hagamuamua gi-dagi-ina digaula. Ko-Au, Dimaadua di Gowaa Aamua ne-helekai.”

19:5  Nia wai ga-hogoohi i-lodo di monowai Nile, ga-maangoo.

19:6  Nia madaawa di monowai ga-bagu-mai maalia ga-bilau. Nia laagau mono geinga gaa-mae ga-maangoo.

19:7  Nia hagadili huogodoo ala e-tomo i taalinga di monowai Nile ga-maangoo ga-angiangina gi-daha.

19:8  Digau huogodoo ala e-mouli mai i nadau wagadaha mai i-lodo di monowai Nile ga-manawa-gee ga-tangitangi, nadau goloo wagadaha ga-balumee-hua.

19:9  Digau ala e-hai nadau gahu ‘linen’ ga-deai nadau hagadagadagagee ai.

19:10  Digau llanga mee mo nia daane e-iloo di ngalua ga-manawa-gee ge lodo-huaidu.

19:11  Nia dagi o-di waahale Zoan le e-dadaulia! Digau kaedahi kabemee o Egypt e-wanga nadau hagamaanadu hagamaamaa dadaulia! Digaula e-helekai behee gi-di king bolo ginaadou ala e-daahi gi-muli nia lohongo o-nia king mo digau kabemee mai mua?

19:12  King o Egypt, aahee au gau hagamaamaa ala bolo e-koia e-iloo nia mee? Holongo digaula e-mee di hagi-adu nia mee a Dimaadua di Gowaa Aamua ala gu-haganoho ang-gi Egypt.

19:13  Nia dagi o Zoan mo Memphis le e-dadaulia. Digaula belee dagi tenua, gei digaula gu-dagi-gee di maa.

19:14  Dimaadua gu-haga-hinihini nadau hai helekai hagamaamaa, gaa-hidi-ai Egypt gaa-hai nia-mee hai-gee, ga-hingahinga be tangada libaliba i-hongo ono lualua.

19:15  Deai tangada i Egypt, tangada maluagina be hagaloale, hagalabagau be balu dangada, e-mee di-hagamaamaa ai.

19:16  Di madagoaa e-dau-mai, gei digau Egypt ga-mmaadagu ngoohia be nia ahina. Digaula ga-bolebole mmaadagu i-di nadau gidee Dimaadua di Gowaa Aamua e-holo dono lima belee hagaduadua digaula.

19:17  Digau Egypt ga-mmaadagu i Judah i-nia madagoaa huogodoo digaula e-maanadu di hagaodi gi-muli o nadau mouli dela gu-hagatogomaalia go Dimaadua di Gowaa Aamua.

19:18  Di madagoaa deelaa ma-ga-dau-mai, gei nia helekai Hebrew ga-hai-hegau i-lodo nia waahale e-lima i-lodo Egypt. Nia daangada i-di gowaa deelaa ga-hagamodu i-di ingoo Dimaadua di Gowaa Aamua. Di waahale e-dahi ga-hagaingoo bolo “Di waahale o-di Laa.”

19:19  Di madagoaa deelaa ma-ga-dau-mai, gei di gowaa hai tigidaumaha ang-gi Dimaadua gaa-duu i-lodo Egypt, tagabae hadu hagalangahia a-Mee gaa-duu i-di hagageinga o Egypt mo Israel.

19:20  Nia maa gaa-hai nia ada hagamodongoohia bolo Dimaadua di Gowaa Aamua la i-lodo Egypt. Di madagoaa nia daangada ala e-noho i-golo ga-hagaduadua, ga-gahigahi Dimaadua i-di hagamaamaa, gei Mee ga-hagau dana dangada e-haga-dagaloaha digaula.

19:21  Dimaadua ga-hagagida Ia gi-nia daangada o Egypt, digaula ga-hagalaamua, ga-daumaha gi Mee, ga-gaamai nadau kisakis mono tigidaumaha. Digaula gaa-hai nadau hagababa gi Mee mo-di hagagila-aga nadau hagababa ne-hai.

19:22  Dimaadua ga-hagaduadua nia daangada Egypt, nomuli ga-hagahili. Digaula gaa-huli gi Mee, Mee ga-longono nadau dangidangi ga-hagahili digaula.

19:23  Di madagoaa deelaa ma-ga-dau-mai, gei di ala damana gaa-hai mehanga Egypt mo Assyria. Nia daangada o-nia henua e-lua aanei ga-hagadau hulahula i-mehanga nnenua, ga-daumaha i-di gowaa e-dahi.

19:24  Di madagoaa deelaa ma-ga-dau-mai, gei Israel ga-aamua be Egypt mo Assyria, nia guongo e-dolu aanei gaa-hai nia haga-maluagina ni henuailala hagatau.

19:25  Dimaadua di Gowaa Aamua ga-hagamaluagina digaula, ga-helekai, “Au ga-hagamaluagina goe Egypt, go agu daangada, goe Assyria, go agu daangada ne-hai, mo goe Israel, go agu daangada ne-hilihili.”

Chapter 20

20:1  Sargon di king aamua o Assyria ga-hagau tagi dauwa aamua o Assyria gi-heebagi gi-di waahale Ashdod i Philistia.

20:2  Nia ngadau e-dolu nomua, Dimaadua gu-helekai gi Isaiah, di tama Amoz, gi-daawa-ina gi-daha ono suudi mo dono gahu manawa-gee. Gei mee gu-hagagila nnelekai Dimaadua, gu-heehee ono suudi ai, mo ono goloo ai.

20:3  Di madagoaa Ashdod ne-kumi, Dimaadua ga-helekai, “I-lodo nia ngadau e-dolu, dagu dangada hai-hegau Isaiah nogo heehee ono suudi ai, mo ono goloo ai. Deenei la-di hagamodongoohia dela gaa-hai ang-gi Egypt mo Ethiopia.

20:4  Di king o Assyria gaa-dagi digau galabudi nadau goloo ai, ala ne-kumi go mee i nnenua e-lua aanei. Digau mmaadua mo nia dama-daane ga-heehee nadau suudi ai, nadau goloo ai, nadau malau-dono, e-hagalangaadia Egypt.

20:5  Digau ala e-hagadagadagagee gi Ethiopia, ge hagaamu Egypt, gaa-tee ga-deai nadau hagadagadagagee, hagaamu ai.

20:6  Di madagoaa deelaa ma-ga-dau-mai, gei nia daangada ala e-noho i-tongotai Philistia ga-helekai, ‘Mmada gi digau ala nogo hagadagadagagee ginai gidaadou bolo ga-hagamaamaa-laa gidaadou gi-daha mo-di king Assyria! Gidaadou ga-mouli behee?’ ”

Chapter 21

21:1  Deenei telekai di hai o Babylon. Gadoo be di niga o-di madangi dela e-hagamadammaa di anggowaa, di haingadaa damana ga-hanimoi i tenua hagamadagudagu dangada.

21:2  Au guu-hai dagu moe i-nia mee huaidu e-gila-aga, e-mmada gi tangada e-wanga dono dangada donu e-hagahuaidu, e-mmada gi-di taaligi. Digau dauwa Elam, goodou heebagi! Digau dauwa Media, duuli-ina nia waahale! God ga-hagalawa di hagaduadua Babylon dela ne-hai.

21:3  Dagu mee ne-mmada ge ne-longono-eau i-lodo di moe la-gu-hagamadagudagu au huoloo, ge gu-hagammaemmae au, be di mmae o-di ahina haidama.

21:4  Dogu libogo guu-niga, gei au gu-bolebole madagu. Au gu-hiihai bolo di hiahi la-gi-dau-mai, gei di-maa digi hai ana mee, go di madagu hua.

21:5  I-lodo di moe, di hagamiami gu-hagatogomaalia, nia gahala guu-holo e-noho-ai digaula. Digaula e-miami ge inuinu, dahi hagailoo gaa-hai boloo, “Nia dagi gi-hagatogomaalia-ina hagalimalima godou goloo abaaba heebagi!”

21:6  Di Tagi ga-helekai-mai, “Hana, hagaduu-ina tangada hagaloohi, helekai gi-mee gi-haga-iloo-ina-mai nia mee ala ma-gaa-mmada ginai eia.

21:7  Maa ia ga-gidee nia daangada e-lloomoi i-hongo nia hoodo dau dogolua, mo nia daane e-lloomoi i-hongo nia ‘donkey’ mono ‘camel’, mee gii-mmada gi-humalia.”

21:8  Tangada hagaloohi gaa-wolo gi-nua, ga-helekai, “Meenei, au nogo hagaloohi di gowaa deenei i-di boo mo-di aa.”

21:9  Digi duai, gei aanei digaula gu-lloomoi i-hongo nia hoodo dau dogolua. Tangada hagaloohi ga-hagi-mai di longo boloo, “Babylon la-gu-mooho! Nia ada-mee ala nogo daumaha ginai digaula la-gu-momooho dagidahi gi-hongo di gelegele.”

21:10  Agu daangada Israel, goodou gu-nogunogu be nia huwa laagau palaawaa, malaa dolomeenei, au e-hagailoo-adu di longo humalia dela ne-hagalongo ginai au i-baahi Dimaadua di Gowaa Aamua, di God o Israel.

21:11  Deenei telekai di hai o Edom. Dahi dangada e-wolo ia i Edom gi-di-au boloo, “Tangada hagaloohi, di boo le e-lawa ma-gaa-hee? Hagia-mai be ma e-aa ma-gaa-hee.”

21:12  Au ga-helekai gi-mee, “Ma-gu-aa, gei di boo le e-hanimoi labelaa. Maa goe e-hiihai e-heeu labelaa, hanimoi gi-muli e-heeu.”

21:13  Deenei telekai di hai o Arabia. Nia daangada o Dedan, goodou ala e-heehee dagadagabuli i-lodo di anggowaa i-lodo tenua Arabia,

21:14  haga-inumia digau hieinu ala e-lloo-adu. Goodou digau tenua Tema, haangai-ina digau ala e-llele gi-daha gi-mouli digaula.

21:15  Nia daangada e-llele gi-daha mo nia hulumanu dauwa ala gu-togomaalia belee daaligi ginaadou, gi-daha mo nia maalei ala gu-togomaalia belee puupuu ginaadou, gi-daha mo nia hagalliga o tauwa.

21:16  Di Tagi ga-helekai-mai, “I-lodo-hua di ngadau e-dahi, di mogobuna di madawaawa Kedar ga-hagaodi.

21:17  Digau puu maalei ala go digau kaedahi hagamataane o Kedar, digau hua dulii i digaula gaa-dubu. Ko-Au go Yihowah, di God o Israel, ne-helekai.”

Chapter 22

22:1  Deenei telekai di hai o-di Gowaa Mehanga Gonduu o-di Moe. Ma di-aha ne-hai? Nia daangada huogodoo le e-aha ala e-hai nadau hagamiami i tomo nadau hale?

22:2  Di waahale hagatau gu-hinihini, gu-longoaa. Au daane ala ne-mmade i tauwa, hagalee ne-mmade heebagi.

22:3  Godou dagi dauwa huogodoo guu-llele gi-daha, guu-kumi-hua i-mua, gei digaula digi puu nadau amu maalei e-dahi.

22:4  Mmaanege gi-daha mo au, gii-dangi au gi agu daangada ala ne-mmade. Hudee hagamada e-haga-manawa lamalia au.

22:5  Deenei di madagoaa e-uli nia gai, hagamagedaa, hinihini i-lodo di Gowaa Mehanga Gonduu o-di Moe. Di Tagi, go Yihowah di Gowaa Aamua, ne-hagau-mai gi gidaadou di-madagoaa deenei. Nia abaaba o tadau waahale gu-mooho gi-lala, nia lee dangidangi gi-di hagamaamaa e-longono-eia i-lodo nia gonduu.

22:6  Digau dauwa tenua o Elam gu-llele-mai i-hongo nia hoodo, guu-hau ginaadou gi-nia maalei mono amu maalei. Digau dauwa tenua o Kir gu-togomaalia nadau goloo abaaba.

22:7  Nia gowaa tomo bapaba o Judah guu-honu waga-dauwa hongo-henua; digau dauwa hongo hoodo guu-tuu i-mua nia bontai o Jerusalem.

22:8  Nia duuli huogodoo o Judah gu-tingatinga gi-lala. I di-madagoaa deelaa, gei goodou guu-kae nia goloo heebagi gi-daha mo-di gowaa dugu goloo dauwa.

22:9  Goodou guu-gida nia gowaa mooho o-di abaaba Jerusalem belee hau. Goodou gu-hagadina nia hale huogodoo i-lodo Jerusalem, gu-oho hunu hale gi-lala, guu-kae nia hadu belee hau di abaaba di waahale. Idimaa goodou ala e-hiihai e-daahi nia wai,

22:10  Goodou guu-gida nia gowaa mooho o-di abaaba Jerusalem belee hau. Goodou gu-hagadina nia hale huogodoo i-lodo Jerusalem, gu-oho hunu hale gi-lala, guu-kae nia hadu belee hau di abaaba di waahale. Idimaa goodou ala e-hiihai e-daahi nia wai,

22:11  goodou guu-hau di gowaa dugu wai i-lodo di waahale belee daahi nia wai e-hali eia i-di monowai namua. Gei goodou digi hagalongo gi Dimaadua dela ne-haganoho di-mee deenei i-mua-loo, gaa-hai di-maa gii-gila.

22:12  Di Tagi, go Dimaadua di Gowaa Aamua, gu-gahigahi goodou bolo gi-tangitangi, gi-manawa-gee, gi-dahia godou libogo, ge gi-ulu nia goloo manawa-gee.

22:13  Gei di-godou mee ne-hai, goodou ne-gadagada gaa-hai godou hagamiami. Goodou gu-daaligi godou siibi mono kau gu-miami, gu-inu godou waini, gu-helekai boloo, “Gidaadou belee miami mo-di inuinu, idimaa daiaa gidaadou gaa-mmade.”

22:14  Dimaadua di Gowaa Aamua gaa-bida helekai-mai, “Di huaidu deenei ga-deemee di-dumaalia ginai i-di madagoaa e-mouli ginaadou. Au go Tagi, go Dimaadua di Gowaa Aamua, ne-helekai.”

22:15  Di Tagi, go Yihowah di Gowaa Aamua, gu-hagau au gi Shebna, di tagi madamada humalia di hale king, gi-helekai gi mee,

22:16  “Goe e-hagamaanadu bolo goe koai? O mogobuna i-golo dela e-geli dau daalunga gi-lodo di gonduu hadugalaa?

22:17  Ma e-aha maa goe e-hagalabagau, gei Dimaadua ga-dahi-aga goe gaa-hudu gi-daha.

22:18  Mee ga-dahi-aga goe be di bale, gaa-hudu gi-lodo dahi guongo mada damana, gei goe gaa-made i-baahi nia waga-dauwa hongo-henua ala nogo hagaamu kooe. Goe guu-hai di hagalangaadia gi-di hale o doo dagi.

22:19  Dimaadua gaa-daa goe gi-daha mo-di oobidi, gi-daha mo do lohongo aamua.”

22:20  Dimaadua ga-helekai gi Shebna, “Di madagoaa deelaa, gei Au ga-gahigahi dagu hege Eliakim tama-daane Hilkiah.

22:21  Au ga-haga-ulu a-mee gi doo gahu aamua mo doo duu, gaa-wanga gi-mee o mogobuna ala nogo hai-mee ginai. Mee gaa-hai be tamana o-nia daangada Jerusalem mo Judah.

22:22  Au gaa-wanga gi-mee nia mogobuna hagatau o-di king deelaa, dela go tangada mai di hagadili o David. Mee ga-hai-mee gi-nia gii o dono oobidi. Dana mee dela gaa-huge, deai tangada e-tai di-maa ai, gei dana mee dela gaa-tai, deai tangada e-mee di-huge di-maa ai.

22:23  Au gaa-dogi a-mee gii-mau gi dono lohongo be di laagau dogi daahi mee, gei mee gaa-hai di hagalaamua ni dono madahaanau.

22:24  “Malaa ono gau mo ana daangada ala e-benebene gaa-hai di hagadaamaha ni mee. Digaula gaa-hai be nia boolo mo nia baalanga ala e-daudau-eia i-di laagau, i-di nadau daulagi gi-mee.

22:25  Di madagoaa di-mee deenei ga-gila-aga, di laagau daudau-mee mau-dangihi gaa-hadi gaa-doo. Deelaa hogi di hagaodi o-nia mee huogodoo ala nogo daudau i-di-maa.” Aanei nnelekai Dimaadua.

Chapter 23

23:1  Deenei telekai di hai o Tyre. Goodou go-nia seelaa o-di moana, dangidangi manawa-gee! Di-godou gowaa daula wagabaalii go Tyre la-gu-oho gi-daha, nia hale mo dono awa la-gu-mooho. Di madagoaa goodou ga-lloomoi labelaa mai Cyprus, goodou ga-iloo nia longo.

23:2  Wwolowwolo manawa-gee, goodou go digau huihui mee o Sidon! Goodou gu-hagau godou daangada

23:3  laa-hongo di tai belee huihui nadau huwa-laagau ala e-tomo i-lodo Egypt, gaa-hui gi-daha gi-nia henua llauehe huogodoo.

23:4  Di waahale Sidon, goe gu-haga-langaadia! Tai mo-di moana llala guu-hudu goe gi-daha, ga-helekai, “Au digi hai agu dama, digi hagatomo-aga agu dama-daane mono dama-ahina.”

23:5  Digau hogi o Egypt ga-uli nadau gai, ga-manawa-gee i nadau longono bolo Tyre la-gu-mooho.

23:6  Goodou digau Phoenicia, wwolowwolo manawa-gee, llele gi Spain!

23:7  Ma e-donu bolo deenei di waahale tenetene o Tyre, dela ne-haga-duu-aga namua-loo? Ma deenei go-di waahale dela ne-hagau ana daangada gii-hula laa-hongo tai gi-nia gowaa ala i-baahi i-golo o tai e-haga-duu-aga nadau gowaa e-noho ai?

23:8  Ma koai dela ne-haganoho ana mee huogodoo aanei ala e-hai ang-gi Tyre, di waahale aamua, ono daangada dagi huihui-mee e-kaedahi e-hagalaamua go henuailala?

23:9  Dimaadua go di Gowaa Aamua ne-haganoho di-mee deenei belee dugu nadau manawa hagamuamua i-lodo nadau mee ala ne-hai, ge belee dugu-ia gi-lala nadau gau ala e-hagalaamua.

23:10  Goodou digau ala ne-hula e-noho i Spain, hula dogia godou gowaa! Ma deai tangada e-abaaba goodou igolo ai.

23:11  Dimaadua guu-holo gi-daha dono lima laa-hongo tai, guu-dugu gi-lala nia henua dagi. Mee gu-helekai bolo nia gowaa huihui mee o Phoenicia la-gi-ohaa gi-daha.

23:12  Di waahale Sidon, o hagatenetene la-gu-hagaodi, gei au daangada gu-hagaduadua. Ma e-aha maa digaula gaa-llele gi Cyprus, gei digaula digi too gi-daha mo-di haingadaa.

23:13  (Ma go digau Babylon, hagalee go digau Assyria, ala ne-hagau nadau manu lodo-geinga gi-ohaa Tyre. Ma go digau Babylon ala ne-hagaduu nadau angulaa heebagi, ga-oho gi-daha di abaaba o Tyre, ga-diiagi di waahale mooho.)

23:14  Goodou go nia seelaa i-hongo di moana, wwolowwolo manawa-gee. Di waahale dela nogo hagadagadagagee ginai goodou la-gu-oho gi-daha.

23:15  Di madagoaa e-dau-mai, gei Tyre ga-haga-delangahia i-lodo nia ngadau e-madahidu, di madagoaa e-mouli-ai di king. I-muli nia ngadau aalaa ma-gaa-lawa, Tyre gaa-hai be dahi ahina huihui dono huaidina i-lodo taahili:

23:16  Kaina dau ‘harp’, koe go di ahina huihui do huaidina dela gu-de-langahia nia daangada! Daahili labelaa i au daahili e-laha-mai labelaa nia daane.

23:17  I-muli nia ngadau e-madahidu aalaa, Dimaadua ga-dumaalia gi Tyre gi-huihui-mee labelaa, gei mee ga-haga-hai-hegau-eia gi-nia henua-dagi huogodoo o henuailala.

23:18  Nia bahihadu ala gaa-kumi go-mee mai dana huihui ana goloo la gaa-wanga go-mee gi Dimaadua. Mee hagalee e-daahi nia maa, gei digau ala e-daumaha gi Dimaadua ga hai-hegau gi-nia bahihadu a-maa e-hui nadau meegai mo nia goloo ala e-ulu ginaadou.

Chapter 24

24:1  Dimaadua ga-daaligi gi-daha henuailala gaa-hai di anggowaa. Mee ga-haga-haagee di baba henuailala, gaa-hai nia daangada gii-noho dagidahi laa-lodo henua.

24:2  Nia daangada huogodoo ga-hagaodi be di-mee e-dahi: digau hai-mee-dabu mo nia daangada, nia hege mo nadau dagi, digau ala e-hui nadau goloo mo digau ala e-huihui gi-daha nadau goloo, digau ala e-wanga nadau bahihadu e-boibana gi digau ala i-golo mo digau ala e-kae nia bahihadu mai digaula, digau maluagina mo digau hagaloale.

24:3  Henuailala ga-meheu ga-mooho. Dimaadua ne-helekai, gei di-maa gaa-gila.

24:4  Henuailala ga-maangoo gaa-mae, henuailala hagatau ga-bagege, henuailala mo-di langi gaa-pala.

24:5  Nia daangada gu-haga-gulugulua henuailala gi nadau oho nia haganoho a God, mo nadau hunahuna di hagababa deeodi dela ne-hai go-Mee.

24:6  Malaa, God gu-haga-halauwa henuailala. Ana daangada gu-hagaduadua gi nadau mee ala ne-hai. Nia daangada ala e-mouli e-hogoohi-mai.

24:7  Nia laagau-‘grape’ guu-mae, gei nia waini gu-hogoohi. Nia daangada huogodoo nogo tenetene i-mua gu-manawa-gee dolomeenei.

24:8  Nia lee hagatenetene daahili ‘harp’ mono ‘drum’ gu-hagalee.

24:9  Nia daahili hagatenetene inu waini la-gu-hagalee, tangada e-hiihai di inu nia waini ai.

24:10  Nia daangada huogodoo i-lodo di waahale deelaa gu-hinihini, guu-tai ginaadou gi-lodo nadau hale, gi-daha mo-di haingadaa deelaa.

24:11  Nia daangada gu-wwolowwolo i-hongo nia ala idimaa nia waini ai. Tenetene gu-hagalee gaa-hana hua beelaa, guu-ngala i tenua deelaa.

24:12  Di waahale gu-mooho, gei nia bontai nia abaaba gu-monnono.

24:13  Deenei di-mee gaa-hai i-lodo nia henua huogodoo i henuailala hagatau. Ma-gaa-hai be di hadi muligoo o-nia huwa laagau, nia huwa-olib ga-lullulu gii-odi i-tomo nia laagau, nia huwa ‘grape’ muliagina gaa-hagi gi-lala.

24:14  Digau ala ga-mouli ga-daahili tenetene. Digau mai baahi dai ga-helekai i-di mahi mogobuna o Dimaadua.

24:15  Digau mai baahi dua ga-hagaamu a-Mee. Nia daangada ala e-noho i-nia tongotai ga-hagaamu di ingoo o Yihowah, di God o Israel.

24:16  Mai nia gowaa mogowaa-loo o henuailala, gidaadou ga-longono nia daahili hagaamu Israel, go di golohenua dela e-donu. Gei au gu-deai dogu hagadagadagagee ai, gu-balumee-hua! Digau hagahuaidu dangada e-maaloo gi nadau hegau, nadau hagahuaidu dangada e-damana-mai i-nia madagoaa huogodoo.

24:17  Huogodoo hagalongo-mai gi-di-au! Nia mee hagamadagudagu dangada, nia luwa pogo llala, mo nia hele e-talitali goodou.

24:18  Tangada ma-gaa-lele gi-daha mo nia mee hagamadagudagu dangada, geia gaa-doo gi-lodo di luwa pogo llala. Maa tangada gaa-tanga gi-daha mo-di luwa pogo llala, geia gaa-kumi go di hele. Di uwa nngolo ga-doo-iha i-di langi, gei di hagamau o henuailala ga-ngalungalua.

24:19  Henuailala ga-magalagala, ga-lullulu ga-mahaa.

24:20  Henuailala ga-hahaagee be tangada libaliba, ga-inaina be di hale i-lodo di madangi gono. Henuailala gu-daamaha i ono huaidu, ga-mooho gi-lala, ga-deemee di duu-aga labelaa.

24:21  Di madagoaa e-dau-mai, gei Dimaadua ga-hagaduadua nia mogobuna baahi-nua mo nia dagi o henuailala.

24:22  God ga-hagabae nia king gi-di gowaa e-dahi, gadoo be digau galabudi i-lodo di luwa pogo llala. Mee gaa-haa digaula gi-lodo di hale galabudi gaa-dae-loo gi nadau madagoaa gaa-kae nadau hagaduadua.

24:23  Di malama ga-bouli, di laa ga-hagalee maahina, idimaa Dimaadua go di Gowaa Aamua gaa-king. Mee gaa-dagi i-lodo Jerusalem, i-hongo di Gonduu Zion, gei nia dagi o-nia daangada ga-gidee dono madamada.

Chapter 25

25:1  Dimaadua, Kooe go dogu God, au ga-hagalaamua Goe, ge hagaamu do ingoo. Goe ne-hai au mee hagagoboina huoloo, gu-hagagila-aga modudahi nia mee ala ne-haganoho Kooe mai taamada.

25:2  Goe guu-hai nia waahale gi-mooho, gu-oho nadau abaaba duuli. Nia hale king ala ne-hau go madau hagadaumee gu-hagalee gaa-hana-hua beelaa.

25:3  Digau o nnenua maaloo ga-hagaamu Goe, nia waahale o-nia henua hagamuamua mouli huaidu ga-mmaadagu i-di Goe.

25:4  Digau hagaloale mo digau nadau hagamaamaa ai ga-lloo-adu gi-di-Goe ga-hai-mee gi-di aumaalia i-di madagoaa haingadaa. Goe e-abaaba digaula gi-daha mo-di madangi gono, e-hagamalu digaula i-di welengina. Idimaa nia hagadaumee hagamuamua ga-dauwa be di madangi damana o-di magalillili,

25:5  be di welengina maaloo i-lodo henua maangoo. Gei Goe, meenei Dimaadua, gu-hagakila nia wwolowwolo o madau hagadaumee, guu-hai digaula gii-noho deemuu, gadoo be di gololangi e-hagamagalillili dana laangi welengina.

25:6  I-kinei, i-hongo di Gonduu Zion, Yihowah, di Gowaa Aamua, ga-hagatogomaalia dana hagamiami gi-nia henua llauehe huogodoo o henuailala, go tagamiami meegai kaedahi humalia mono waini kaedahi kala.

25:7  I-hongo di gonduu deenei, Mee ga-limalima di daa gi-daha nia gololangi haga-manawa-gee ala e-deheedehee i-hongo nia henua huogodoo.

25:8  Tagi go Yihowah gaa-oho di made gaa-hana hua beelaa. Mee ga-omo nia halidangi o-nia daangada huogodoo, ga-daa gi-daha di haga-langaadia o ana daangada i-nia gowaa huogodoo henuailala. Aanei nnelekai Dimaadua.

25:9  Di madagoaa nia mee aalaa ga-kila-aga, nia daangada huogodoo ga-helekai, “Go Mee go tadau God! Gidaadou gu-hagadagadagagee gi Mee, gei Mee gu-haga-dagaloaha gidaadou. Go Mee go Dimaadua. Gidaadou gu-hagadagadagagee gi Mee, dolomeenei gidaadou gu-tenetene huoloo idimaa Mee ne-haga-dagaloaha gidaadou.”

25:10  Dimaadua ga-benebene hagahumalia di Gonduu Zion, gei nia daangada o Moab ga-dagadagahi gi-lala, gadoo be nia geinga maangoo e-dagadagahi gi-lodo nia gulugulua hagauwwou.

25:11  Digaula e-holoholo nadau lima gi-daha be digau e-hagamada e-kau, gei God ga-haga-langaadia digaula, nadau lima ga-maanu, ga-abuabulu.

25:12  Mee gaa-oho gi-daha nia abaaba duuli o Moab ala e-duuduu i-nua, ga-hagahinga gi-lala gi-hongo di gelegele.

Chapter 26

26:1  Di laangi ga-dau-mai, gei nia daangada gaa-huwa taahili deenei i-lodo tenua go Judah: Tadau waahale e-maaloo! Dimaadua hua-modogoia dela e-madamada humalia i ono abaaba!

26:2  Huge-ina nia bontai di abaaba o-di waahale, haga-ulu-ina-mai nia guongo manawa-dahi, go digau ala e-hai nia mee e-donu.

26:3  Meenei Dimaadua, Goe e-wanga di aumaalia dohu gi digau ala e-manawa maaloo ge e-hagadonu Goe.

26:4  Hagadonu-ina Dimaadua gaa-hana hua beelaa, Mee ga-benebene gidaadou i-nia madagoaa huogodoo.

26:5  Mee guu-dugu gi-lala nia manawa digau ala bolo ginaadou nadau mee. Mee gu-oho di waahale maaloo nogo noho-ai digaula, gu-oho hagaligiligi nia abaaba duuli gii-hai nia gohu gelegele.

26:6  Digau nogo hagaduadua i-mua e-taele i-hongo di-maa, e-dagadagahi di-maa gi nadau wae.

26:7  Meenei Dimaadua, Goe gu-hagamalallali di ala gi digau humalia. Di ala dela e-taele digaula le e-baba.

26:8  Gimaadou e-daudali do hiihai ge hagadagadagagee hua adu gi-di-Goe. Ma go do ingoo dela e-hiihai e-hagalaamua go gimaadou.

26:9  I-di boo au e-haa-manawa i-di Goe aga i-lodo dogu manawa. Do madagoaa ga-hagiaga henuailala mo ana daangada, digaula ga-iloo di-mee dela e-donu.

26:10  Ma e-aha maa Goe e-manawa dumaalia gi digau huaidu, gei digaula digi kabe di hai di-mee dela e-donu. Ma e-aha maa digaula e-noho i-lodo tenua digau e-donu, gei digaula e-hai-hala hua igolo. Digaula e-de-hiihai e-hagadahidamee do aamua.

26:11  O hagadaumee e-de-iloo bolo Goe ga-hagaduadua ginaadou. Dimaadua, gi-hagalangaadia-ina, hagaduadua-ina digaula gi-di hagaduadua dela gu-hagatogomaalia Kooe. Hagamodongoohia-ina gi digaula tamanaiee o do aloho i au daangada.

26:12  Meenei Dimaadua, Goe ga-gaamai gi gimaadou di haadanga-lamalia. Nia mee huogodoo ala e-hai-mee ginai gimaadou, ne-kila-mai i au mee ala ne-hai.

26:13  Meenei Dimaadua di-madau God, gimaadou guu-dagi go nnenua gee, gei go do ingoo la-hua dela e-hagalaamua go gimaadou.

26:14  Dolomeenei digaula guu-mmade, hagalee mouli labelaa. Nadau mouli dangada hagalee mouli-aga, idimaa Goe gu-hagaduadua digaula gu-oho gi-daha. Tangada e-langahia digaula ai.

26:15  Meenei Dimaadua, Goe gu-hagatomo di-madau henua, gu-haga-damana nia baahi huogodoo. Deenei guu-hai Goe gi-aamua.

26:16  Meenei Dimaadua, Goe gu-hagaduadua au daangada, gei i-lodo nadau manawa-gee, digaula gu-dalodalo-adu gi-di-Goe.

26:17  Meenei Dimaadua, Goe guu-hai gimaadou gi-tangitangi gadoo be di ahina ma-gaa-dangi mmae i dono madagoaa ma-ga-haanau.

26:18  Gimaadou gu-duadua mmae, gei gimaadou digi haanau dahi mee. Gimaadou digi aali tauwa i madau henua. Gimaadou digi hau madau mee.

26:19  Ginaadou ala go madau daangada ala ne-mmade, ga-mouli labelaa! Nadau huaidina ga-mouli labelaa. Huogodoo ala e-kii i-lodo nadau daalunga, ga-aala-aga ga-daahili tenetene. Gadoo be-di magalillili o-di luada dela e-hagamagalillili henuailala, deenei di hai a Dimaadua ga-hagamouli-aga digau ala guu-mmade.

26:20  Agu daangada, ulu gi-lodo godou hale, hai-dia nia bontai. Pala hagammuni i-lodo tama madagoaa dulii, gaa-dae loo gi-di hagawelewele a God gaa-hili.

26:21  Dimaadua e-hanimoi i dono henua di-langi e-hagaduadua nia daangada henuailala i nadau ihala. Digau daaligi dangada ala ne-daaligi nadau daangada hagammuni i henuailala ga-hagamodongoohia-aga, gei di gelegele ga-hagalee daahi di-hagammuni digau ala ne-daaligi gii-mmade.

Chapter 27

27:1  I-di laangi deelaa, Dimaadua ga-hai-hegau gi ono mogobuna mo tulumanu dauwa daaligi dangada belee daaligi ‘Leviathan’, di manu dragon huaidu e-hulihuli ge haga-bigabiga, mo e-daaligi di manu damanaiee dela e-noho i-lodo di moana.

27:2  I-di laangi deelaa, gei Dimaadua ga-helekai i dana hadagee hagatenetene dangada boloo,

27:3  “Au e-daumada ge haga-magalillili di-maa i-nia madagoaa huogodoo. Au e-hagaloohi di-maa i-di boo mo-di aa, bolo gi-de hagahuaidu di-maa go tangada.

27:4  Au ga-hagalee hagawelewele labelaa gi-di hadagee waini. Maa nei bolo gu-iai nia laagau duduia be nia geinga duduia e-tomo-aga i-lodo, gei Au ga-daagi gi-daha gaa-dudu nia maa.

27:5  Maa nia hagadaumee o agu daangada ga-hiihai bolo au gi-abaaba-ina ginaadou, digaula gi-heia nadau noho-baba mai gi-di-Au. Uaa, heia nadau noho-baba mai gi-di-Au.”

27:6  I-nia laangi ga-lloomoi, di madawaawa o Israel ala go-di hagadili ni Jacob, ga-hagatolo ono aga be-di laagau, gaa-huwa ga-moholoholo, gei ono huwa ga-hagahonu henuailala.

27:7  Dimaadua digi hagaduadua kono Israel be dana hai ne-hagaduadua nia hagadaumee o Israel gii-kono, be digi mmade dogologo nia daangada Israel be nia daangada o ono hagadaumee.

27:8  Dimaadua gu-hagaduadua ana daangada mai dana hagau digaula gi-daha mo nadau henua. Mee ne-lahi digaula gi-daha gi-di madangi gono hagahalauwa mai baahi-dua.

27:9  Gei nia hala o digau Israel ga-dumaalia ginai i-di madagoaa hua nia hadu o-nia gowaa dudu tigidaumaha gaa-mama gi-ligiligi-loo gii-hai be nia gohu dogolia, nia gowaa dudu tigidaumaha lolo-kala gaa-hai gi-daha, gei nia ada god Asherah ga-hagalee.

27:10  Di waahale nogo duuli gu-mooho gi-lala, gu-diiagi be di anggowaa lodo-geinga. Guu-hai di gowaa e-noho-ai nia kau, di gowaa e-miami ge hagamolooloo-ai digaula.

27:11  Nia manga o-nia laagau guu-mae gu-hadihadi, gei nia ahina gu-hagabudu nia maa e-hai nia dohomu. Idimaa nia daangada gu-de-iloo nia mee, God dela ne-hai digaula, hagalee aloho gei hagalee dumaalia gi digaula.

27:12  I-di laangi deelaa, God ga-hagabudu ana daangada dagidahi mai Euphrates gaa-tugi-loo i tagageinga o Egypt gadoo be di hili nia palaawaa gi-daha mo ono gili.

27:13  Di laangi deelaa ma-ga-dau-mai, di labaa ga-iliili e-gahigahi-mai labelaa digau Israel huogodoo ala ne-lahi gaa-noho i Assyria mo Egypt. Digaula ga-lloomoi ga-daumaha ang-gi Dimaadua i-lodo Jerusalem i-hongo di gonduu dabuaahia.

Chapter 28

28:1  Tenua go Israel la-gu-hagahuaidu! Di madamada o-maa la-guu-mae, guu-hai be nia hau akai ala i-hongo nia libogo o nadau dagi libaliba. Nadau libogo hagamuamua gu-hagatulu gi-di lolo-kala, gei digaula e-kiikii, gu-libaliba balua.

28:2  Gei di Tagi dana dangada i-golo e-maaloo ge-mahi huoloo, gu-togomaalia di-heebagi gi digaula. Mee e-hanimoi be-di madangi uwa-hadu-magalillili, ge e-hai be-di uwa pada, ge e-hai be-di labagee mmidi huoloo dela e-hunahuna tenua deelaa gi-mooho.

28:3  Di hagamuamua o-nia dagi gai-dagaao aalaa ga-dagadagahi gi-lala ono babaawae.

28:4  Di madamada mae o-nia dagi hagamuamua aalaa ga-hagalee, gaa-hai be di huwa-‘fig’ i-mua di taamada o-di taugai, dela ma-ga-hagi-hua gaa-gai, gei nia maa ala dogo lleu hua.

28:5  Dahi laangi hua, gei Dimaadua di Gowaa Aamua gaa-hai be-di hau akai dela e-madamada huoloo ang-gi ana daangada ala nogo dubu i-golo.

28:6  Mee gaa-wanga gi digau hai-gabunga di hai o-di hagi-aga i-di tonu, gei Mee ga-hagamaaloo-aga digau ala e-duuli nia abaaba o-di waahale i tauwa.

28:7  Nia soukohp mono gau hai-mee-dabu hogi gu-libaliba dela gaa-hai-ai digaula gi-deemee di-heehee hagahuudonu. Digaula gu-inu nia waini mono dagaao maaloo gi-logowaahee, ga-hingahinga i-lodo nadau hinihini. Nia soukohp la-gu-libaliba huoloo gu-deemee di-modongoohia nia moe a God ala ne-hagau-mai. Gei nia gau hai-mee-dabu gu-libaliba huoloo, gu-deemee di-hai nia gabunga ala ne-gaamai gi digaula.

28:8  Nia deebele ala nogo noho-ai digaula la-guu-honu lualua, deai di gowaa e-madammaa ai.

28:9  Digaula e-hai nadau helekai hai-baahi mai gi-di-au, e-helekai boloo, “Ma koai dela e-hagamaanadu go taane deelaa bolo e-agoago koia? Ma koai dela bolo e-hiihai e-hagalongo gi ana helekai? Ana helekai e-humalia-hua gi-nia dama ala lligi-loo, dogo daa-hua i-di uu!

28:10  Mee bolo ia e-aago gidaadou mai i-nia aiu, mo-di hii nia bida lain, mo nia bida agoago.”

28:11  Maa goodou ga-hagalee hagalongo-mai gi-di-au, gei God ga-hai-hegau-laa gi-nia daangada mai i-daha ala e-helekai i nadau helekai-gee e-aago goodou.

28:12  Mee e-dumaalia-adu gi goodou di hagamolooloo mo-di noho manawa lamalia, gei goodou hagalee hiihai e-hagalongo gi Mee.

28:13  Deelaa-laa di-mee Dimaadua ga-aago goodou gi-nia aiu mono lain mono bida helekai, malaa, goodou ga-hingahinga i godou heehee. Goodou ga-lauwa, gaa-hele i-di hele, ge gaa-lahi gi-di hale-galabudi.

28:14  Gei goodou, go digau hagamuamua ala e-dagi nia daangada aanei i Jerusalem, hagalongo gi-nia mee a Dimaadua ala e-helekai-ai.

28:15  Goodou e-helehelekai hagaamu goodou, bolo ma go goodou ne-hai godou hagababa gi digau ala guu-mmade, gei guu-hai godou hagamodu gi-di gowaa o digau mmade. Goodou e-hai bolo goodou hagalee tale ang-gi di haingadaa dela ma-ga-hanimoi, idimaa, goodou nogo gana gi-nia kai dilikai mo halahalau-dangada belee benebene goodou.

28:16  Deenei di-mee a Tagi go Yihowah e-helekai-ai dolomeenei, “Au gaa-dugu i-lodo Zion di hagamau dela e-hamaaloo-dangihi ge mau-dangihi. I-lodo di-maa, Au gaa-dugu di hadu madaaduge hamaaloo, dela e-hihi ginai nia helekai aanei: ‘Di hagadonu dela e-mau-dangihi le e-hagakono di manawa labelaa.’

28:17  Di tonu la-gaa-hai i-di lain dela e-hagatau di hagamau, mo-di hai-mee e-donu la-gaa-hai di lain dela e-haga-huudonu-aga di hale.” Nia madangi-uwa-hadu-magalillili ga-duidui gi-daha nia hai-kai-tilikai huogodoo ala e-hagadagadagagee ginai goodou, gei di labagee gaa-oho gi-daha di abaaba dela e-noho hagammuni goodou.

28:18  Di hagababa dela ne-hai go goodou gi-di made la-gaa-hai gi-daha, di godou hagababa dela ne-hai gi tenua digau mmade gaa-dugu-hua. Di madagoaa haingadaa ma-gaa-dau-adu gi goodou, goodou gaa-too gi no-lodo.

28:19  Nia maa ga-tale-adu gi goodou i-nia luada huogodoo, ga-hagaduadua goodou i-di boo mo-di aa. Nia helekai hoou mai baahi o God gaa-hai goodou gi-uli godou gai i godou mmaadagu.

28:20  Goodou gaa-hai be dahi daane dela e-helekai-ai i-lodo di Beebaa Agoago Podo bolo e-hagamada e-kii i-hongo di moenge bodobodo e-dee-tau gii-mee di kii humalia, di ‘blanket’ huukaa e-deemee di gahu a-mee hagatau.

28:21  Dimaadua ga-heebagi be dana hai i-di Gonduu Perazim mo i-lodo di gowaa mehanga gonduu o Gibeon, belee hagagila dana mee ne-hagamaanadu belee hai, ma e-aha maa ono hangahaihai le e-hai be di mee hagagoboina dangada. Mee gaa-hai gii-lawa dana moomee, di moomee e-de-iloo tangada.

28:22  Hudee gadagada gi agu helekai hagailoo ala e-gowadu koau gi goodou! Maa goodou ga-gadagada, gei di-maa ga-haingadaa adu gi goodou di llele gi-daha. Au gu-longono di hilihili Yihowah, di Gowaa Aamua, bolo gaa-oho tenua hagatau.

28:23  Hagalongo gi-humalia gi agu helekai ala e-hagi-adu gi goodou.

28:24  Deai tangada dogi hadagee e-hagamaluu dana hadagee i-nia madagoaa huogodoo gei gu-togomaalia belee dogi di-maa.

28:25  I-muli dana hagatogomaalia di gelegele, gei mee gaa-dogi nia lii-laagau ‘dill’ mo ‘cumin’. Mee e-dogi nia ‘wheat’ mono ‘barley’ i-nia goolongo, gei taalinga di hadagee, mee e-dogi nia lii-laagau ala i-golo.

28:26  Mee gu-iloo di hai dana moomee, idimaa God gu-aago a-mee.

28:27  Mee digi hai-hegau gi-nia goloo daamaha e-hagamamaawa gi-daha nia lii ‘dill’ be ‘cumin’, gei e-hai-hegau gi-nia laagau maamaa ala e-tau-anga.

28:28  Mee hagalee haga-huaidu nia palaawaa ‘wheat’ i dana hagamamaawa nia maa i-di waalooloo, mee e-iloo di-haganiga dana kulumaa laa-hongo nia maa ge hagalee hai nia hadu-‘wheat’ gi-huaidu.

28:29  Nia iloo huogodoo aanei e-lloomoi i-baahi Yihowah, di Gowaa Aamua. Nia haganohonoho a God ala e-hai le e-honu i-di kabemee, e-gila i-nia madagoaa huogodoo!

Chapter 29

29:1  Jerusalem di gowaa dudu-tigidaumaha a God la-ga-mooho! Di waahale dela nogo noho-ai David la-ga-mooho! Heia tuai ngadau e-dahi be lua gi-dau-mai mo gii-hana, mo ono hagamiami llauehe,

29:2  gei God ga-hagau-mai-laa dana haingadaa damana gi-hongo di waahale dela e-hagaingoo bolo “Di Gowaa Dudu Tigidaumaha a God.” Tangidangi manawa gee gaa-hai, gei di waahale dogomaalia gaa-hai be di gowaa dudu tigidaumaha ne-gahu gi-nia dodo.

29:3  God ga-heebagi gi-di waahale deelaa, ga-haganiga dono gili, ga-duuli di-maa.

29:4  Jerusalem gaa-hai be di ieidu dela e-duadua-aga i-lodo di gelegele bolo ia e-leelee, tama-lee e-lee-mai i-lodo di gohu dogolia.

29:5  Jerusalem, digau mai daha huogodoo ala nogo heebagi-adu gi-di-goe la-ga-ili gi-daha be nia gohu dogolia, gei nadau gau-dauwa hagamadagudagu-dangada ga-angiangina gi-daha be nia geinga maangoo. Limalima-hua gei e-hagahomouli,

29:6  Yihowah, di Gowaa Aamua, ga-haga-dagaloaha goe i-di hamuhamumu lee atili, mo-di lullulu o tenua. Mee ga-hagau-mai dana madangi gono mo-di ahi maaloo.

29:7  Nomuli, gei nia buini dauwa huogodoo o-nia henua llauehe ga-heebagi gi-di waahale o di gowaa dudu tigidaumaha Dimaadua, nadau goloo heebagi, nadau goloo-huogodoo ga-de-i-golo gaa-hai be di midi, gadoo be di-mee ne-hagamaanadu i-di boo.

29:8  Nia henua llauehe huogodoo ala ga-dagabuli belee heebagi gi Jerusalem, gaa-hai gadoo be taane hiigai e-midi bolo ia e-miami, ga-ala-aga hiigai, be gaa-hai be tangada hieinu e-midi bolo ia e-inu, ga-ala-aga dono akii le e-maangoo.

29:9  Heia goodou gi-dadaulia! Heia goodou gi-dee-gida. Haga-libaliba-ina-hua goodou, ma e-aha maa nia waini ai! Haga-hingahinga-ina-hua goodou, ma e-aha maa di madaua dagaao ai.

29:10  Dimaadua guu-hai goodou gi-moloaa, bolo gii-kii danu mmoe. Nia soukohp belee hai nia golomada o-nia daangada, gei Dimaadua gu-haga-dee-gida digaula.

29:11  Nia hadinga o-nia mee kokohp ga-hagammuni i goodou, gaa-hai be di beebaa dela ma-gaa-tai. Maa goe gaa-kae di-maa gi tangada e-iloo di-dau gi-daulia, mee ga-helekai-hua bolo ia e-deemee, idimaa ma e-tai.

29:12  Maa goe gaa-kae di-maa gi tangada e-de-iloo di-dau gi-daulia, mee ga-helekai-hua bolo ia e-de-iloo di-dau.

29:13  Dimaadua ga-helekai, “Nia daangada aanei e-hai bolo ginaadou e-daumaha-mai gi-di-Au, gei nadau helekai la ono hadinga ai, nadau manawa la i-tuai gowaa hua. Nadau hai-daumaha la-hagalee di-mee, la nia haganoho dangada hua mo nia hangaahai mouli o tenua ala ne-hagamaumau ga-daahi go-digaula.

29:14  Malaa, Au ga-hagahomouli digaula gi dagu hagamamaawa hagagoboina. Ginaadou ala e-kabemee la-gaa-huli gii-hai digau dadaulia, nadau iloo ga ono hadinga ai.”

29:15  Digau ala e-hagamada e-hagammuni nadau haganohonoho i Dimaadua la-ga-halauwa! Digaula e-hai nadau mee hagammuni, e-hagamaanadu bolo ma tangada e-gidee ginaadou ai, be e-iloo nadau mee ala e-hai ai.

29:16  Digaula guu-huli nia mee huogodoo gi-hai-gee. Ma di-aha dela koia e-hagalabagau: go tangada dela e-hai ana loaabi gi-nia gelegele pigi, be go nia gelegele pigi ala e-hai nia loaabi? Di-mee tangada dela ne-hai le e-deemee di-helekai gi tangada dela ne-hai di-maa boloo, “Goe digi heia au,” be e-helekai boloo, “Goe e-de-iloo dau mee dela e-hai!”

29:17  Gadoo be telekai dela e-hai boloo: ‘Hagalimalima-hua, gei nia gowaa lodo-henua geinga gaa-hai nia gowaa dogi-mee, gei nia gowaa dogi-mee gaa-hai labelaa nia gowaa geinga lodo-henua.’

29:18  Di laangi deelaa ma-ga-dau-mai, digau longoduli ga-longono di beebaa e-dau gi-nua, gei digau dee-gida ala nogo noho i-lodo di bouli ga-maahuge nadau golomada ga-gidee.

29:19  Digau hagaloale mo digau hila gi-lala ga-gidee labelaa di hagatenetene dela e-wanga go Dimaadua, di God Dabuaahia o Israel gi digaula.

29:20  Digau ala e-hagaduadua nia daangada, ge hagabalumee a God ga-hagalawa gi-daha. Digau hai-hala huogodoo ga-daaligi gi-daha.

29:21  God ga-daaligi gi-daha digau ala e-hagahuaidu nia ingoo o-nia daangada ala i-golo, go digau ala e-duuli di hagaduadua o digau hai-huaidu, mo digau ala e-helekai kai tilikai e-duuli digau ala e-donu belee kae di tonu.

29:22  Dolomeenei Dimaadua, di God of Israel dela ne-benebene Abraham gi-daha mo-di haingadaa, e-helekai, “Agu daangada, goodou ga-hagalee hagabalumee hua igolo, ga-hagalee hagalangaadia.

29:23  Di-godou madagoaa ma-ga-gidee agu dama ala ma-ga-gowadu, gei goodou ga-iloo-laa bolo Au go di God Dabuaahia o Israel. Goodou ga-hagalaamua dogu ingoo, ga-hagamadagu Au.

29:24  Digau dadaulia gaa-kabe di iloo-mee, digau e-helehelekai hai-baahi ga-tenetene di-kae nadau aago.”

Chapter 30

30:1  Dimaadua gu-helekai, “Digau ala e-dagi Judah la-gu-halauwa, idimaa, digaula nogo hai-baahi-mai gi-di-Au. Digaula e-daudali nia hagabaubau ala hagalee ne-hai ko-Au, mo-di sain nia hagababa ala e-hai-baahi gi dogu hiihai, dela e-hagabudu nia huaidu gi-hongo nia huaidu ala i-golo.

30:2  Digaula e-hula gi Egypt e-halahala di-nadau hagamaamaa, gei digaula digi tangi-mai i dagu hagamaamaa. Digaula e-hiihai bolo Egypt gi-madamada humalia i ginaadou, malaa, digaula gu-hagadagadagagee gi-di king o Egypt.

30:3  Di king la-ono mogobuna e-hagamaamaa digaula ai, gei di hagamaamaa mai baahi o Egypt gaa-huli gaa-hai di haingadaa.

30:4  Ma e-aha maa digau pono o digau Judah guu-dau i Egypt i-nia guongo go Zoan mo Hanes,

30:5  gei nia daangada o Judah ga-haga-langaadia i di-nadau hagadagadagagee gi tenua dono hadinga gi digaula ai. Tenua deelaa le e-deemee di hagamaamaa digaula i di-nadau madagoaa e-hiihai gi-di hagamaamaa.”

30:6  Deenei go telekai a God i-di gili nia manu ala i-lodo di anggowaa dela i-bahi-i-ngaaga o Israel: “Nia gau pono o Israel e-hula i-lodo tenua haingadaa mo-di hagamadagudagu-dangada, di gowaa dela e-noho-ai nia laion, mo nia gihaa-poisin, ge e-mamaangi-ai nia manu-‘dragon’. Digaula ne-haga-uda nadau ‘donkey’ mono ‘camel’ gi-nia kisakis hui-ngadaa ang-gi tenua dela e-deemee di-wanga gi digaula nadau hagamaamaa.

30:7  Di hagamaamaa dela e-wanga go Egypt la dono hadinga ai, gei Au gu-haga-ingoo a Egypt bolo ‘Di dragon’ dono hagalliga ai.”

30:8  God gu-hagi-mai gi-di-au, bolo au gi-hihia gi-lala nia hangahaihai o-nia daangada, gii-hai di-mee e-haga-modongoohia be digaula e-huaidu behee.

30:9  Digaula e-hai-baahi i-nia madagoaa huogodoo ang-gi Dimaadua, e-hai-kai-tilikai, hagalee hiihai e-hagalongo gi-nia mee a Dimaadua ala e-agoago-ai.

30:10  Digaula e-helekai gi-nia soukohp bolo gii-noho dee-muu, e-helekai boloo, “Hudee helekai-mai gi gimaadou i-di gili nia mee ala e-donu. Helekai-mai gi gimaadou madau mee e-hiihai e-hagalongo. Gimaadou gi-hai-mee-hua gi madau hiihai.

30:11  Tuu gi-daha mo di-madau ala, hudee duulia di-madau ala. Gimaadou hagalee hiihai e-hagalongo i-di hai o-di God Dabu o Israel.”

30:12  Gei deenei di-mee di God Dabu o Israel e-helekai-ai boloo, “Goodou gu-haga-angaa-mee agu mee ala ne-hagi-adu, gei goodou e-hagadagadagagee-hua gi godou haihai huaidu mo godou halahalau-dangada.

30:13  Goodou gu-ihala, goodou e-hagatau gi-di abaaba duuduu i-nua, e-magala dono dungaalodo ga-tugi i-lala, dela e-hoohoo-hua ga-meheu gi-lala.

30:14  Goodou ga-meheu dagidahi be-di baalanga ne-hai gi-nia gelegele, ga-mooho haga-ligiligi, ge deai di-mee e-dubu ai e-mee di-hai-hegau-ai, e-taa nia mee malala-gaa, be e-huai mai nia wai i-di monowai-geli.”

30:15  Di Tagi go Yihowah, go di God Dabu o Israel, e-helekai gi-nia daangada, “Lloomoi gi-muli, hagadonu-ina Au. Gei goodou ga-maaloo, ge ga-noho-mau.” Gei goodou ne-de-hiihai di-hai di-maa.

30:16  Di mee ne-hai, goodou ne-hagamaanadu bolo gaa-llele hagammuni i godou hagadaumee i-nia hoodo ala e-kaedahi e-llele giibeni. E-donu, dela hua di-mee bolo gi-heia, llele hagammuni dela di-mee e-hai gii-hai go goodou! Goodou e-hagabau bolo godou hoodo le e-llele giibeni, gei digau ala e-waluwalu goodou le e-llele hua e-tanga i-daha!

30:17  Goodou digau e-mana gaa-llele gi-daha i di-godou mmada gi tangada-dauwa hagadaumee e-dahi, mono gau-dauwa dogolima e-mee-hua di haga-lellele goodou huogodoo hagammuni. Deai di-mee gaa-dubu i godou gau-dauwa ai, dela-hua go di bou hua e-dahi o tagallebe dela i-di ulu tama-gonduu.

30:18  Gei-ogo Dimaadua e-tali goodou e-hiihai e-aloho-adu gi goodou. Mee gu-togomaalia belee dumaalia-adu gi goodou di aumaalia gi godou nua, idimaa, Mee e-haihai nia mee ala e-donu i-nia madagoaa huogodoo. E-maluagina go digau ala e-hagadagadagagee gi Dimaadua.

30:19  Goodou ala e-noho i Jerusalem, goodou ga-hagalee tangitangi hua igolo. Dimaadua e-manawa aloho, di-godou madagoaa ma-ga-tangi gi-Mee i-di hagamaamaa, gei Mee ga-hagamaamaa goodou.

30:20  Tagi gaa-hai goodou gii-tale gi-nia madagoaa haingadaa, gei Mee ga-i-golo e-aago goodou, gei goodou hagalee bolo ga-halahala a-Mee.

30:21  Maa goodou ga-hula-gee mo-di ala, ga-taele gi-di baahi dau-donu be dau-ihala, goodou ga-longono dono lee e-helekai mai i-muli boloo, “Deenei di ala. Daudalia di-maa.”

30:22  Goodou ga-gulugulua i godou ada balu-ieidu ala ne-hai gi-nia silber mono goolo, gaa-kili gi-daha mo-di wwolo, “Tuu gi-daha mo madau mua!”

30:23  Di-godou madagoaa ma-gaa-dogi godou meegai, Tagi ga-hagadoo dana uwa ga-hagatomo-aga nia maa gii-huwa humalia, ga-gowadu di gowaa damana e-miami-ai godou manu.

30:24  Nia kau mono ‘donkey’ ala e-hagamaluu godou hadagee ga-miami nia geinga tolo koia e-humalia.

30:25  I-di laangi deelaa, gei nia gowaa duuli ala e-noho-ai godou hagadaumee gaa-kumi, gei digaula gu-daaligi gii-mmade, gei nia wai gaa-hali-mai i-nia gonduu huogodoo mono gowaa nnoonua huogodoo.

30:26  Di malama ga-maahina huoloo be di laa, gei di laa ga-maahina maaloo holongo hagahidu gi-nonua i dono maahina donu, gadoo be di maahina o-nia laangi e-hidu ne-hagapuni. Nia mee huogodoo aanei ga-gila-aga i-di madagoaa Dimaadua gaa-hii nia gowaa moholehole, ga-hagahili nia magi-bala ala ne-wanga go-Mee gi ana daangada.

30:27  Di mogobuna mo-di madamada o Dimaadua e-mee di-gidee haga-mogowaa. Di ahi mo dono huiahi e-hagamodongoohia dono hagawelewele. Mee ga-leelee gei ana helekai e-ulaula be di ahi.

30:28  Mee e-hagau di madangi i ono mua be toloo dela e-kae nia-mee huogodoo gi-daha. Mee gaa-oho nia henua huogodoo, ga-hagalawa nadau haganohonoho huaidu.

30:29  Malaa, goodou go nia dama Dimaadua, ga-tenetene ga-dadaahili be di-godou hai dela ma-ga-tene i-di boo i-di budu o-di laangi dabu damana. Goodou ga-tenetene be digau ala e-taele ge daahili tenetene i-di-nadau hula gi-di Hale Daumaha o Dimaadua, di tuuli of Israel.

30:30  Dimaadua ga-dumaalia gi-nia daangada huogodoo gi-longono dono lee aamua, gi-longono nia mahi o dono hagawelewele. Nia ulaula ahi, nia atili nia uwa-hadu-magalillili, mo-di uwa pada gaa-hai.

30:31  Digau Assyria ga-mmaadagu i-di nadau longono di lee Dimaadua, di-nadau longono nia mahi o dono hagaduadua.

30:32  Di madagoaa Dimaadua ga-hagaduadua digaula, gei ana daangada ga-dadaahili gi nadau mee huwa daahili ‘harp’ mono ‘drum’. Ma go Dimaadua ga-dauwa hai-baahi gi digau Assyria.

30:33  Di gowaa la-ne-hagatogomaalia i-mua-loo belee hai di ahi e-dudu di king aamua o Assyria. Di gowaa le e-llala ge palaha, gu-hagabae ginai nia laagau nonua. Dimaadua gaa-dogi gi dono ngudu di ahi e-dudu di-maa gi-lalaula.

Chapter 31

31:1  Digau ala e-hula gi Egypt e-halahala di-hagamaamaa la-gu-halauwa! Digaula e-hagadagadagagee gi-nia mee o digau-dauwa o Egypt: nia hoodo, nia waga-dauwa hongo-henua, mono gau-dauwa. Gei digaula hagalee hagadagadagagee gi Dimaadua, go di God Dabu o Israel, be e-tangi gi Mee di hagamaamaa.

31:2  Mee e-iloo-Ia ana mee ala e-hai! Mee ga-hagau-mai dana haingadaa, ga-haga-gila-aga dana hagababa bolo Ia ga-hagaduadua digau huaidu mo digau ala e-hagamaamaa digaula.

31:3  Digau Egypt la-hagalee nia god, digaula la nia daangada-dangada hua. Nadau hoodo le e-hai-hua be nia hoodo ala i-golo ala e-mee di-mmade. Di madagoaa Dimaadua ma-ga-haga-ngalua dono manawa, gei-ogo tenua dela nogo maaloo la-ga-mooho gi-daha, gei tenua dela nogo bagege dela nogo hagamaamaa go digaula la-gaa-hinga gi-lala. Nia henua e-lua aanei la-ga-mooho ngaadahi.

31:4  Dimaadua ga-helekai-mai, “Tei mee hua be nia daangada hagaloohi-siibi e-haga-hohooho ge e-wwolowwolo gi-nua, digaula e-deemee di-hai di laion gi-madagu, gii-lele gi-daha mo dana manu dela ne-daaligi. E-hai labelaa be di-maa, deai di-mee e-dahi e-mee di-dugu Au, dela go Dimaadua di Gowaa Aamua, i dagu benebene di Gonduu Zion ai.

31:5  Gadoo be-di manu ma-ga-duuli ana dama i-lodo dono hale-ngogo, dela gadoo Au, go Dimaadua di Gowaa Aamua, e-benebene ge e-duuli Jerusalem gi-daha mo-di haingadaa.

31:6  “Nia daangada Israel, goodou guu-hai godou huaidu mai gi-di-Au, ge gu-hai-baahi-mai gi-di-Au. Dolomeenei, lloomoi gi-muli gi-di-Au!

31:7  Di madagoaa e-dau-mai, gei goodou gaa-kili gi-daha godou ada balu-god ala ne-hai go goodou gi-nia silber mono goolo.

31:8  Assyria la-ga-mooho i-lodo tauwa dela hagalee mai nia mahi o-nia daangada. Digau Assyria gaa-llele gi-daha mo tauwa, gei nadau dama-daane gaa-hai digau e-hege.

31:9  Di-nadau king aamua gaa-lele gi-daha mo tauwa deelaa, gei ana dagi-dauwa aamua ga-mmaadagu huoloo, ga-diiagi nadau hagallebe-dauwa.” Aanei nnelekai Yihowah, go Dimaadua dela e-daumaha ginai i Jerusalem, gei dana ahi e-ulaula i Zion e-dudu-ai nia tigidaumaha.

Chapter 32

32:1  Dahi laangi hua, gei di-maa gaa-hai dahi king dela e-dagi ana mee i-di tonu, gei nia dagi o tenua gaa-dagi i-di ala dela e-donu.

32:2  Tangada-nei mo tangada-nei i digaula gaa-hai gadoo be-di gowaa haga-malu i-di madangi damana. Digaula gaa-hai be nia monowai ala e-mmidi i-lodo di anggowaa, gaa-hai be-di malu o-di hadugalaa damanaiee dela i-lodo di gowaa welengina.

32:3  Nadau golomada mo nadau dalinga ga-maahuge gi-nia hiihai o-nia daangada.

32:4  Digaula gaa-dugu nadau manawa de-hagakono, gei digaula ga-ngalungalua i-lodo nadau iloo-ginaadou, mo-di helehelekai haga-madammaa nadau maanadu.

32:5  Deai tangada e-hagamaanadu bolo tangada dadaulia le e-aamua ai, be e-helekai bolo tangada haga-magiaa le e-donu-hua.

32:6  Tangada dadaulia e-helehelekai balumee, ge e-hagamamaanadu ana mee huaidu belee hai. Ana mee ala e-hai mo nia helekai ala e-helekai-ai, le e-hagahuaidu Dimaadua, gei mee hagalee-loo e-haangai digau ala e-hiigai, be e-wanga ana mee gi digau ala e-hieinu belee inu.

32:7  Tangada haga-magiaa le e-huaidu ge e-hai ana mee huaidu. Mee e-hagamamaanadu belee hagahuaidu digau ala e-hagaloale gi-nia helekai tilikai belee duuli digaula gi-daha mo-di hai-mee gi nadau donu.

32:8  Gei tangada aamua e-ngalungalua i-nia mee ala e-donu, ge e-duu gii-mau i-lodo nia mee ala e-donu.

32:9  Goodou go nia ahina ala gu-mouli haingoohia, ala hagalee de-nnoomaalia, goodou hagalongo gi agu mee ala ga-helekai-iei au.

32:10  Dolomeenei gei goodou e-manawa lamalia, malaa, di madagoaa beenei i-di ngadau dela ga-hanimoi, gei goodou ga-polepole i-di manawa-gee, idimaa, ma-ga-hagalee nia ‘grape’ e-hadi go goodou ai.

32:11  Goodou nogo noho i-lodo di mouli haingoohia, hagalee de-nnoomaalia, gei dolomeenei goodou gi-polepole mo-di mmaadagu! Daawa-ina gi-daha godou goloo-gahu, noodia nia gahu lodo-huaidu gi godou huaidina.

32:12  Dugidugia godou hadahada i godou lodo-huaidu, idimaa, nia hadagee tomo mo nia hadagee-waini la-gu-hagahuaidu,

32:13  mo nia geinga duduia mono geinga huaidu la-guu-tomo i-lodo nia gowaa agu daangada. Goodou la-gi-tangi i-nia hale huogodoo ala nogo noho-ai digau ala e-tenetene, mo-di waahale dela nogo honu i nadau mouli tenetene.

32:14  Di hale o-di king hogi ga-deai ono gau no-lodo ai, mo-di waahale damana la-gaa-huli gaa-hai di anggowaa. Nia hale noho mo nia angulaa hagaloohi ala nogo loohi digaula, la-ga-mooho gi-daha gaa-hana-hua beelaa. Nia ‘donkey’-lodo-geinga ga-nohonoho i-golo, gei nia siibi gaa-hula ga-miami i-di gowaa deelaa.

32:15  Gaa-dae-loo gi-di madagoaa a God ga-hagau-mai dana Hagataalunga. Di gelegele huaidu deelaa gaa-hai di gelegele humalia, gei nia gowaa aalaa, gaa-tomo gaa-hai nadau huwa humalia huoloo.

32:16  Tenua hagatau la-gaa-honu i-di tonu, gei di hagi-aga donu la-gaa-hai,

32:17  idimaa nia daangada huogodoo gaa-hai nia mee ala e-donu, gei di aumaalia mo-di noho haga-molooloo ga-i-golo gaa-hana-hua beelaa.

32:18  Nia daangada a God ga-hagalee de-nnoomaalia, mo nadau hale gaa-noho di aumaalia mo-di noho humalia.

32:19  Ma e-aha maa nia uwa-hadu-magalillili ga-monnono i-lodo di waa-laagau, gei di waahale damana la-ga-mooho gi-lala,

32:20  gei goodou ga-haga-maluagina huoloo gi godou wai logowaahee ang-gi nia hagadili. Godou ‘donkey’ mo godou kau gaa-mee di-taele i-di aumaalia i nadau gowaa haangai.

Chapter 33

33:1  Madau hagadaumee la-gu-halauwa! Digaula ne-gaiaa ge ne-hagahuaidu gimaadou, ma e-aha maa hagalee tangada e-dahi ne-gaiaa digaula be ne-hagahuaidu digaula ai. Nadau madagoaa e-gaiaa be e-hagahuaidu ga-hagaodi, malaa, digaula gaa-kae di hagaduadua o nadau gaiaadanga mo nadau hagahuaidu.

33:2  Meenei Dimaadua, dumaalia-mai gi gimaadou! Gimaadou gu-dugu-adu di-madau hagadagadagagee gi-di-Goe. Abaabalia gimaadou i-nia laangi huogodoo, ge hagamaamaa-ina gimaadou i-lodo nia madagoaa haingadaa.

33:3  Do madagoaa dela e-heebagi-iei Goe i gimaadou, gei nia henua llauehe guu-llele gi-daha mo-di lee ngoloolo o tauwa.

33:4  Gei nadau goloo guu-daa, guu-kae gadoo be nia goloo ne-kumi i tauwa.

33:5  Dimaadua e-aamua huoloo! Mee e-dagi nia mee huogodoo, Mee ga-haga-honu Jerusalem gi ono donu huudonu.

33:6  Gei Mee gaa-dugu-anga ono mahi gi tenua deenei gii-noho waalooloo. Mee e-benebene ana daangada i-nia madagoaa huogodoo, ge e-wanga gi digaula di kabemee mo-di iloo nia mee. Di maluagina kaedahi hagalabagau dela e-hai-mee ginai digaula, la-go di-nadau hagalaamua Dimaadua.

33:7  Nia daane maaloo e-gahigahi nadau hagamaamaa. Nia dagi pono ala belee gaamai di aumaalia, le e-tangi lodo-huaidu huoloo.

33:8  Nia ala llauehe la-gu-haga-lliga gu-hagalee hula nia daangada nonua. Nia hagababa la-gu-mooho, gu-hagalee daudali. Nia daangada huogodoo la-guu-hai bolo ginaadou gu-balumee-hua.

33:9  Tenua la-gu-balumee-hua guu-hai di anggowaa. Di waa-laagau o Lebanon la-guu-mae, di gowaa tomo humalia go Sharon la-guu-hai be-di anggowaa, ge i-lodo tenua go Bashan mo i-hongo di Gonduu Carmel nia lau o-nia laagau la-gu-monnono.

33:10  Dimaadua e-helekai gi-nia henua llauehe, “Dolomeenei gei Au ga-ngalua. Au ga-haga-modongoohia-aga dogu maaloo.

33:11  Goodou e-hai godou balu-hagamaanadu, gei godou mee huogodoo ala e-hai go goodou, le e-balumee-hua. Dogu hagataalunga le e-hagatau gi-di ahi dela gaa-dudu goodou.

33:12  Goodou ga-mooho gi-daha be nia hadugalaa ne-wwele gii-hai nia lehu, gadoo be nia geinga duduia ne-wwele gaa-hai nia lehu.

33:13  Heia digau ala e-hoohoo-mai mo digau ala mogowaa-loo gi-longono agu mee ala ne-hai, ge gi-modongoohia-ina agu mogobuna.”

33:14  Digau hai mee huaidu o Zion la-gu-polepole i nadau mmaadagu. Digaula e-helekai boloo, “Di hagi-aga o God le e-hai be-di ahi dela e-ulaula gaa-hana-hua beelaa. Ma koai dela e-mee di-mouli i-di ahi beelaa?”

33:15  Goodou e-mee di-mouli maa goodou ga-helekai donu ge e-hai nia mee ala e-donu. Goodou hudee hai-hegau gi godou mahi belee halahalau-ai digau hagaloale, ge hudee hai-mee gi-nia hui halahalau ala e-hai goodou gi-huaidu. Hudee madalia digau ala e-maanadu di daaligi dangada gii-mmade, be ala e-haihai nadau mee ihala.

33:16  Gei goodou gaa-hai digau e-benebene, gei goodou gaa-hai digau e-duuli gi-mau-dangihi. Goodou godou meegai mo godou wai-inu i-golo.

33:17  Goodou gaa-mmada labelaa gi-di king i-lodo dono madamada e-dagi tenua damanaiee dela e-moholo gi-nia madagoaa huogodoo.

33:18  Godou mmaadagu i digau hagabudu dagitedi mo digau haganuunuu la-ga-hai-hua di-mee haga-langahia.

33:19  Goodou ga-hagalee mmada labelaa gi-nia gau hagamuamua mai i-daha, ala nogo helehelekai nia helekai e-de-iloo-e-goodou.

33:20  Goodou mmada gi Zion, di guongo dela e-budu go gidaadou i tadau hagamiami taumaha. Goodou mmada gi Jerusalem, di waahale dela gaa-noho-ai gidaadou i-di aumaalia. Ma gaa-hai gadoo be-di hale-laa dela hagalee ngalungalua, dela e-deemee di-daagi-aga ono duludulu, ono loahi e-mau-dangihi.

33:21  Dimaadua ga-haga-modongoohia-mai gi gidaadou dono madamada. Gidaadou gaa-noho i taalinga nia monowai palahaiee mono dama-monowai, gei nia wagabaalii hagadaumee hagalee deledele laa-lodo nia maa.

33:22  Nia goloo-deledele huogodoo ala i-hongo nia wagabaalii aalaa, ga-balumee-hua. Nadau laa le e-deemee di-moholo. Gidaadou gaa-kumi nia goloo huogodoo o-nia gau-dauwa hagadaumee, gei nia goloo ga-logowaahee, nia gau habehabe hogi gaa-mee di-hai-mee gi-nia maa. Ma go Dimaadua dela gaa-hai tadau king. Mee gaa-dagi gidaadou, ge e-abaaba gidaadou.

33:23  Nia goloo-deledele huogodoo ala i-hongo nia wagabaalii aalaa, ga-balumee-hua. Nadau laa le e-deemee di-moholo. Gidaadou gaa-kumi nia goloo huogodoo o-nia gau-dauwa hagadaumee, gei nia goloo ga-logowaahee, nia gau habehabe hogi gaa-mee di-hai-mee gi-nia maa. Ma go Dimaadua dela gaa-hai tadau king. Mee gaa-dagi gidaadou, ge e-abaaba gidaadou.

33:24  Deai tangada e-dahi e-noho i-lodo tadau henua gaa-mee di-hai labelaa bolo ia e-magi ai, ge nia huaidu huogodoo la-gu-maahede.

Chapter 34

34:1  Nia daangada o-nia henua huogodoo, goodou lloomoi. Henuailala hagatau mo ono daangada huogodoo gi-dagabuli-mai gi-kinei e-hagalongo.

34:2  Dimaadua e-hagawelewele gi-nia henua huogodoo mo nadau buini dauwa. Mee gu-haga-halauwa digaula gii-mmade.

34:3  Nia huaidina digaula ga-hagalee danu, e-mmoemmoe-hua gaa-pala ga-bilau, gei nia gonduu ga-mmee dodo.

34:4  Di laa, di malama mono heduu ga-mooho hagaligiligi gaa-hai gadoo be nia gohu gelegele. Di langi ga-hagalee be di lau-beebaa dela ne-wini gi-daha, gei nia heduu ga-monnono be nia lau laagau ma-ga-monnono i-di laagau-‘grape’ be di laagau-‘fig’.

34:5  Dimaadua gu-hagatogomaalia dana hulumanu dauwa i-di langi, gei dolomeenei ga-daaligi Edom, nia daangada ala ne-haga-halauwa go Mee bolo gii-mmade.

34:6  Dana hulumanu dauwa gaa-gahu gi-nia dodo mono kiliidi o digaula, gadoo be nia dodo mono kiliidi o-nia siibi mono kuudi ala e-tigidaumaha. Dimaadua gaa-hai dana tigidaumaha i-lodo di waahale o Bozrah, gaa-hai taaligi dangada huaidu huoloo i-lodo tenua go Edom.

34:7  Nia daangada ga-tingatinga ga-mmademmade be nia kau mono damaa-kau daane, gei henuailala ga-mmee i-nia dodo gaa-gahu gi-nia kiliidi.

34:8  Deenei di madagoaa Dimaadua ga-haga-dagaloaha Zion ga-hagamagedaa ono hagadaumee.

34:9  Nia monowai Edom gaa-huli gaa-hai nia ‘tar’, gei nia gelegele gaa-huli gaa-hai nia ‘sulfur’. Tenua hagatau ga-ulaula be nia ‘tar’,

34:10  ga-ulaula boo mo aa, gei di huiahi gaa-gohu gaa-hana-hua beelaa. Tenua gaa-hai di anggowaa ga-hagadau gi-muli, e-deai tangada e-hana labelaa laalaa ai.

34:11  Nia manu ‘owl’ mono ‘raven’ gaa-noho i-lodo tenua. Dimaadua gaa-hai di-maa gi hai di anggowaa labelaa, be di-maa i-mua nia mee huogodoo ala ne-hai.

34:12  Di king ga-hagalee dagi dana henua, gei nia dagi ga-hagalee.

34:13  Nia laagau duduia mono geinga gaa-tomo i-nia gowaa huogodoo mo i-lodo nia waahale duuli, nia ‘jackal’ mono ‘owl’ gaa-noho i-golo.

34:14  Nia manu lodo-geinga ga-heehee i-golo, gei nia ieidu ga-hagadau gahigahi ginaadou. Di manu hagamadagudagu dangada o-di boo ga-hanimoi e-halahala dana gowaa e-hagamolooloo-ai.

34:15  Nia manu-‘owl’ gaa-hai nadau waehongo, gaa-dugu nadau ngogo, gaa-paa nia dama, ga-benebene digaula hagahumalia i-di gowaa deelaa. Nia manu-‘vulture’ ga-dagabuli i-golo ga-hagadau gi-muli.

34:16  Halahala-ina gi-lodo di beebaa Dimaadua nia manu mouli, daulia be nia helekai le e-hai bolo-aha. E-deai dahi manu i-nia manu aanei e-hagalee ai, gei deai dahi manu i-nia manu aanei gaa-dono ihoo ai. Dimaadua gu-helekai bolo ma e-hai beenei, go Mee hua ga-hagapuni digaula.

34:17  Dimaadua ga-waewae tenua i ginaadou, gaa-wanga nadau duhongo. Digaula gaa-noho i-lodo tenua ga-hagadau gi-muli, gei di-maa gaa-hai tenua ni digaula gaa-hana hua beelaa.

Chapter 35

35:1  Di anggowaa ga-tenetene, gei nia akai laagau lodo-geinga gaa-tomo i-nia balu gowaa.

35:2  Di anggowaa ga-dadaahili ga-wolowolo i dono tenetene, gei di-maa ga-madamada be nia Gonduu o Lebanon, gaa-hai ono gelegele humalia be-di gowaa go Carmel mo Sharon. Nia daangada huogodoo ga-gidee di madamada o Dimaadua, gaa-mmada labelaa gi ono mahi mo ono mogobuna aamua.

35:3  Haga-maaloo-ina nia lima o digau ala gu-duadua, mo nia wae o digau ala gu-bolebole i nadau paagege.

35:4  Hagi-anga-ina gi digau huogodoo ala gu-paagege nadau manawa boloo, “Gi-maaloo, hudee mmaadagu. Di-godou God ga-hanimoi ga-hagamaamaa goodou, e-hanimoi e-hagaduadua godou hagadaumee.”

35:5  Digau dee-gida gaa-mee di-gidee, mo digau longoduli ga-longono.

35:6  Digau habehabe la-ga-hobohobo ga-gaalege, mo digau ala e-deemee di-leelee ga-wwolowwolo i nadau tenetene. Nia aloalo o-di monowai ga-mmidi-mai laa-lodo di anggowaa.

35:7  Gei nia gelegele wwele gaa-huli gaa-hai tama-monowai, gei nia gowaa ala maangoo ga-haga-honu gi-nia monowai e-uwa-aga. Nia gowaa ala nogo noho-ai nia manu lodo-geinga-‘jackal’ gaa-hai nia wai, ga-tomo-ai nia geinga-tolo mono aalek.

35:8  Gei di-maa gaa-hai di ala looloo i-golo e-haga-ingoo bolo “Di Ala o-di Dabuaahia”, deai tangada huaidu e-hana i-di ala deelaa ai. Deai digau dadaulia e-mee di-dagi-gee digau ala e-hula i-hongo di-maa ai.

35:9  Nia laion e-noho i-golo ai, nia manu lodo-geinga huaidu e-heehee i-golo ai. Go digau ala ne-haga-dagaloaha go Dimaadua, aalaa go digau ala ga-taele gi-hongo di ala deelaa.

35:10  Digaula gaa-dau i Jerusalem i-lodo nadau tenetene, e-dadaahili mo-di wwolowwolo i nadau tenetene. Digaula ga-tenetene gaa-hana-hua beelaa, gu-maahede gi-daha mo nia manawa-gee mono haga-daamaha, gaa-hana-hua beelaa.

Chapter 36

36:1  I-lodo di madangaholu maa-haa ngadau a Hezekiah nogo king i Judah, gei Sennacherib, di king aamua o Assyria ga-heebagi gi-nia waahale duuli maaloo o Judah gaa-kumi digaula.

36:2  Mee ga-hagau dana dangada-dauwa aamua bolo gi-hagatanga mo dana buini dauwa damana i Lachish gii-hula gi Jerusalem gi-helekai gi-di King Hezekiah bolo mee gi-hudee heebagi, gi-dugu-ina-hua eia gi ginaadou. Tangada-dauwa aamua gu-duuli di ala dela e-hana gi-di gowaa e-noho-ai digau dui-gahu, i-baahi di aloalo dela e-hali eia nia wai mai di monowai nonua.

36:3  Nia daangada o Judah dogodolu ne-lloomoi belee heetugi gi mee: go tangada dela e-dagi di hale king go Eliakim tama-daane o Hilkiah, tangada hihi go Shebna, mo tangada dela e-hagailongo nia mee gi-lala go Joah, tama-daane a Asaph.

36:4  Tangada-dauwa dagi aamua o Assyria gu-hagi-anga gi digaula bolo di king aamua o Assyria e-hiihai gi-iloo ma di-aha dela ne-hidi-ai di King Hezekiah gaa-bida hagadagadagagee ang-gi deia.

36:5  Mee ga-heeu, “Goodou e-hagamaanadu bolo nia helekai le e-mee di pono nia kabemee dauwa mono mahi? Ma koai dela e-hagamaanadu go koodou bolo ia ga-hagamaamaa goodou e-hai-baahi gi Assyria?

36:6  Goodou e-talitali Egypt gi-hagamaamaa-ina goodou, malaa, di hagamaamaa deelaa le e-hai gadoo be di manga laagau e-dogodogo-iei goe gaa-hadi ga-daalo doo lima. Di king o Egypt le e-hai gadoo beelaa i-di madagoaa dahi dangada ma-gaa-gana gi mee.”

36:7  Tangada-dauwa aamua Assyria ga-duudagi-adu, “Be goodou ga-hagi-mai bolo goodou e-gana gi Dimaadua di-godou God? Ma go nia gowaa dugu-mee dabuaahia mono gowaa dudu tigidaumaha a Dimaadua ala ne-oho gi-daha go Hezekiah i-di madagoaa o mee ne-hagi-anga gi-nia daangada o Judah mo Jerusalem bolo gi-daumaha gi-di gowaa dudu tigidaumaha hua e-dahi.

36:8  Au gaa-hai dagu hagababa adu gi-di-goe i-di ingoo o-di king aamua. Au ga-gowadu gi-di-goe nia hoodo e-lua mana, maa goe e-mee di-halahala nia daane dogologo beelaa e-llele nia maa!

36:9  Goodou hagalee-loo e-tau-anga gi dahi dangada, ma e-aha maa tangada deelaa le e-mugi-lala-loo digau aamua o Assyria, gei goodou e-gana gi digau Egypt gi-hagau-adu godou waga-dauwa mono daangada llele hoodo.

36:10  Goodou e-hagamaanadu bolo au ne-dauwa gi godou henua gaa-oho di-maa laa-daha mo-di hagamaamaa Dimaadua? Ma go Dimaadua hua ne-helekai-mai bolo gi-heebagi gi-ohoina di-godou henua.”

36:11  Gei Eliakim, Shebna, mo Joah ga-helekai gi tagi dauwa aamua, “Helekai-mai i nnelekai Aram. Gimaadou e-iloo-hua. Hudee helekai Hebrew. Nia daangada huogodoo i-hongo di abaaba le e-hagalongo.”

36:12  Mee ga-helekai, “Goodou e-hagamaanadu bolo ma go goodou hua mo-di king ala ne-hidi-ai di king aamua ga-hagau-mai au belee helekai ginai nia mee aanei? Deai, au e-helekai labelaa gi-nia daangada ala e-noho i-hongo di abaaba, ala gaa-gai nadau mee hagauwwou, ga-inu nadau mimi, gadoo be goodou.”

36:13  Gei tangada aamua dagi dauwa ga-du-gi-nua gaa-wolo i nnelekai Hebrew, “Hagalongo gi nnelekai di king aamua o Assyria e-hagi-adu.

36:14  Mee e-helekai hagailoo-adu gi goodou bolo gi-hudee dumaalia gi Hezekiah gi-halahalau-ina goodou. Hezekiah e-deemee di-haga-dagaloaha goodou.

36:15  Hudee dumaalia gi-mee gi-heia goodou gii-gana gi Dimaadua. Hudee maanadu bolo Dimaadua ga-haga-dagaloaha goodou, gaa-dugu di-madau buini dauwa Assyria gi-dee kumi di-godou waahale.

36:16  Hudee hagalongo gi Hezekiah! Di king aamua o Assyria e-helekai hiihai bolo goodou gi-lloomoi gi-daha mo-di waahale, gi-dugua goodou gi-lala ogu mogobuna. Goodou ga-dumaalia ginai gi-miami nia ‘grape’ mai godou laagau-‘grape’ donu, nia ‘fig’ mai godou laagau-‘fig’ donu, ga-inu nia wai mai godou monowai geli donu,

36:17  gaa-dae-loo gi-di king aamua ga-haganoho goodou labelaa gi-lodo tenua dela e-hai gadoo be di-godou henua donu, di gowaa e-tomo nia laagau-waini e-inu goodou, nia huwa laagau hai palaawaa.

36:18  Hudee dumaalia gi Hezekiah gi-halahalau-ina goodou gi-hagamaanadu bolo Dimaadua ga-haga-dagaloaha goodou. Ma e-donu bolo nia god o-nia henua ala i-golo gu-haga-dagaloaha nadau henua gi-daha mo-di king aamua o Assyria?

36:19  Aahee-laa digaula dolomeenei: nia god o Hamath mo Arpad? Aahee nia god o Sepharvaim? Ma iai di god gu-benebene a Samaria?

36:20  Ana-hee dahi god o-nia god o-nia henua ne-haga-dagaloaha nadau henua gi-daha mo di-madau king aamua? Malaa, ma di-aha dela e-hai goodou gi-hagamaanadu bolo Dimaadua e-mee di-haga-dagaloaha Jerusalem?”

36:21  Nia daangada guu-noho deemuu be nnelekai King Hezekiah ne-hagi-anga gi digaula, digaula digi helekai dahi helekai.

36:22  Gei Eliakim, Shebna mo Joah ga-hahaahi nadau gahu i nadau lodo-huaidu, gaa-hula ga-hagi-anga gi-di king nia helekai tagi dauwa aamua Assyria ne-hai.

Chapter 37

37:1  Di madagoaa hua King Hezekiah ne-longono nia helekai aanei, gei mee gu-hahaahi ono gahu gu-manawa gee, gu-ulu ono gahu manawa-gee, gaa-hana gi-di Hale Daumaha Dimaadua.

37:2  Mee ga-hagau Eliakim, tagi madamada humalia di hale di king, Shebna, tangada hihi o-di gowaa hai-gabunga, mo digau hai-mee-dabu mmaadua gi soukohp Isaiah, tama-daane o Amoz. Digaula nogo ulu labelaa nia gahu lodo-huaidu.

37:3  Aanei nia helekai ne-hagi-anga go mee gi digaula bolo gi-wanga-ina gi soukohp Isaiah: “Dangi-nei di laangi o-di hagaduadua, gidaadou gu-hagaduadua, gu-haga-langaadia. Gidaadou guu-hai be di ahina ma-ga-hoohoo ga-haanau, gei e-bagege huoloo dono haanau.

37:4  Di king aamua o Assyria gu-hagau-mai dana dangada-dauwa aamua belee helehelekai hagahuaidu di God dela e-mouli. Dimaadua go doo God gi-longono nia helekai hagahuaidu aanei, gei gi-daaligidia digau ala ne-helekai beenei. Dalodalo ang-gi God i tadau daangada ala e-mouli hua igolo.”

37:5  Di madagoaa soukohp Isaiah ne-longono nnelekai King Hezekiah,

37:6  mee gu-hagau gi-muli ana helekai: “Dimaadua e-helekai-adu bolo hudee dugu ang-gi digau Assyria gi-hagamadagudagu-ina goe i nadau helekai bolo Mee e-deemee di-haga-dagaloaha goodou.

37:7  Dimaadua gaa-hai di king aamua gi-longono nia hagaboo ala e-hai a-mee gii-hana gi-muli gi dono henua donu, gei Dimaadua ga-daaligi a-mee gii-made i-golo.”

37:8  Tagi dauwa aamua gu-longono bolo di king aamua gu-hagatanga i Lachish, guu-hana gu-dauwa gi-di waahale Libnah dela e-hoohoo gi Lachish, gei mee gaa-hana belee heetugi gi mee.

37:9  Nia helekai guu-dau i digau Assyria bolo di buini dauwa Egypt dela e-dagi go King Tirhakah o Ethiopia e-hanimoi belee heebagi gi digaula. Di madagoaa di king aamua ne-longono di-mee deenei, mee gu-hagau dana lede gi King Hezekiah o Judah,

37:10  e-hagi-anga gi mee boloo: “Di god dela e-hagadagadagagee ginai goe guu-hagi-adu gi-di-goe bolo goe ga-hagalee kumi ko-au, malaa, hudee heia di-mee deenei gi-halahalau-ina goe.

37:11  Goe gu-longono di hai a di king aamua Assyria dela e-hai gi tenua dela gu-hilihili go-mee belee oho. Goe e-hagamaanadu bolo goe hagalee tale gi-di-mee deenei?

37:12  Ogu maadua-mmaadua gu-oho nia waahale Gozan, Haran, mo Rezeph, gu-daaligi digau o Beth=Eden ala nogo noho i Telassar, ge deai di god o-nia waahale aalaa ne-haga-dagaloaha digaula ai.

37:13  Nia king o-nia waahale o Hamath, Arpad, Sepharvaim, Hena, mo Ivvah la i-hee?”

37:14  King Hezekiah gaa-daa di lede mai digau hagau gaa-dau di-maa, gei mee gaa-hana gi-di Hale Daumaha, gaa-dugu di lede gi-golo i-mua o Dimaadua,

37:15  ga-dalodalo,

37:16  “Yihowah, di Gowaa Aamua, di God o Israel dela e-noho i-hongo nia ada-manu hai ono bakau, Kooe modo-Gooe go di God, e-dagi nia henua huogodoo o henuailala. Goe ne-hai henuailala mo-di langi.

37:17  Meenei Dimaadua, hagalongo-mai gi gimaadou, mmada gi-di-mee dela e-hai-mai gi gimaadou. Hagalongo gi-nia mee huogodoo a Sennacherib ala e-helekai-ai e-haga-huaidu Goe, go-di God mouli.

37:18  Dimaadua, gimaadou huogodoo e-iloo bolo nia king aamua o Assyria gu-oho gi-daha nia henua e-logo, guu-hai nia anggowaa,

37:19  guu-dudu nadau god, ala hagalee nia god donu, nia ada laagau hua mono hadu ne-hai gi-nia lima.

37:20  Dimaadua, go di-madau God, dolomeenei abaabalia gimaadou gi-daha mo digau Assyria, gii-mee di-iloo nia henua huogodoo o henuailala bolo ma Kooe hua dela go di God.”

37:21  Isaiah ga-hagailoo gi King Hezekiah bolo Dimaadua gu-longono dana dalodalo,

37:22  gu-helekai, “Sennacherib, di waahale Jerusalem ga-gadagada-adu gi-di-goe, ga-haga-balumee goe.

37:23  Ma koai dela e-hagamaanadu kooe bolo e-hagahuaidu ge haga-balumee? Goe gu-haga-balumee Au, go di God Dabuaahia o Israel.

37:24  Goe ne-hagau-mai au gau kae-hegau belee hagaamu goe mai gi-di-Au, bolo au waga-dauwa hongo-henua gu-hagamagedaa nia gonduu kaedahi duuduu i-nua o Lebanon. Goe gu-helekai hagaamu bolo i-di gowaa deelaa, goe guu-hele gi-lala nia laagau-‘cedar’ kaedahi lloowehaa, mo nia laagau-‘cypress’ kaedahi humalia, gei goe dela bolo goe guu-dau i taluiha o-di waa-laagau dela i lodo-henua.

37:25  Goe e-hagaamu goe bolo goe guu-geli nia monowai geli ge gu-inu nia wai i-lodo tenua digau mai i-daha, gei nia wae o au gau-dauwa gu-dagahi di monowai Nile gi-baguia.

37:26  “Goodou digi longono bolo Au ne-haganoho nia mee huogodoo aanei i-mua loo? Dolomeenei, gei Au guu-hai nia maa gii-gila. Au ne-gowadu di mogobuna e-huli nia waahale duuli maaloo gii-hai nia hagabae hadu.

37:27  Nia daangada nogo noho i-golo la nadau mahi ai, gu-mmaadagu gu-nadau hagamaanadu ai. Digaula guu-hai be nia geinga-tolo i-lodo di gowaa, be nia geinga e-tomo i-tua di hale i-di madagoaa di madangi welengina e-hanimoi i dua, ga-ili nia maa gi-daha.

37:28  “Malaa, Au e-iloo goe hagatau, au mee ala e-hai, mo-di gowaa dela e-hana ginai goe. Au e-iloo do hagawelewele maaloo hai-baahi mai.

37:29  Au gu-iloo di hagailoo o do hagawelewele mo do hagamuamua, gei dolomeenei gei-Au gaa-wanga dagu buulei gi doo uhi, mo-di maadau gi doo ngudu, gaa-dagi goe gi-muli i-di ala dela ne-hanimoi-iei goe.”

37:30  Gei Isaiah ga-helekai gi King Hezekiah, “Deenei di hagamodongoohia o-di mee dela gaa-hai. Di ngadau deenei mo-di ngadau nomuli, goodou e-miami-hua nia huwa-laagau lodo-henua, malaa, di ngadau nomuli goodou gaa-mee di dogi godou meegai gaa-hagi, gaa-dogi godou laagau-‘grape’, gaa-gai godou ‘grape’.

37:31  Digau ala ne-dubu i Judah gaa-tomo humalia gadoo be nia laagau ala e-tomo llala nadau aga gi-lodo di gelegele, gaa-huwa-mai ono meegai.

37:32  Nia daangada gaa-noho i-lodo Jerusalem mo i-hongo di Gonduu Zion, digaula ga-mouli, idimaa Yihowah, di Gowaa Aamua, gu-haganoho bolo nia mee aanei e-hai gii-gila.

37:33  “Deenei telekai a Dimaadua ne-helekai-ai i-di king aamua o Assyria: ‘Mee hagalee e-ulu ge hagalee puu dana amu maalei e-dahi gi-di waahale deenei. Digau dauwa mo nadau duuli e-lloomoi gi-hoohoo gi-di waahale ai, gei nia hagabae duuli e-hau i-di gili di-maa ai.

37:34  Mee gaa-hana gi-muli i-di ala dela ne-hanimoi-iei mee, hagalee ulu gi-lodo di waahale deenei. Ko-Au go Dimaadua dela ne-helekai.

37:35  Au ga-duuli di waahale deenei, ga-benebene humalia di-maa, e-hagagila di hagalaamua o dogu ingoo mo dagu hagababa ne-hai gi dagu dangada hai-hegau go David.’ ”

37:36  Tangada di-langi o Dimaadua guu-hana gi-di gowaa e-noho digau dauwa Assyria, gu-daaligi digau dauwa e-lau mo huowalu maa-lima mana-(185,000). Heniheni-loo luada dono daiaa, digaula guu-mmade huogodoo, gu-moemoe i-golo.

37:37  Gei di king aamua Sennacherib o Assyria guu-hana gi-muli gi Nineveh.

37:38  Dahi laangi hua, i dono madagoaa nogo daumaha i-lodo di hale daumaha o dono god Nisroch, dogolua dama-daane i ana dama-daane, go Adrammelech mo Sharezer, gu-daalo a-mee gii-made gi nau hulumanu dauwa, gaa-hula gaa-llele hagammuni gi tenua go Ararat. Tuai dama-daane i ana dama-daane, go Esarhaddon guu-pono di lohongo king aamua o dono damana.

Chapter 38

38:1  Hoohoo gi-di madagoaa deenei, King Hezekiah guu-magi hoohoo-hua bolo gaa-made. Soukohp Isaiah, tama-daane Amoz, guu-hana belee mmada a-mee, ga-helekai gi-mee, “Dimaadua e-helekai-adu bolo goe gi-hagatogomaalia-ina nia mee huogodoo, idimaa, doo magi la-hagalee hili. Hagatogomaalia-ina goe gaa-made.”

38:2  Hezekiah ga-huli-adu gi-di abaaba ga-dalodalo,

38:3  “Dimaadua, Goe e-langahia bolo au nogo hai-hegau-adu gi-di-Goe i-di manawa-dahi mo-di tonu, ge hagamahi i-nia madagoaa huogodoo e-hagagila-aga do manawa.” Gei mee ga-daamada ga-dangidangihia.

38:4  Dimaadua ga-helekai gi Isaiah

38:5  gii-hana gi-muli gi Hezekiah, gi-helekai gi-mee, “Ko-Au go Yihowah, di God o do damana-madua David, Au gu-longono au dalodalo gu-gidee oo dangi. Au ga-dumaalia-adu nia ngadau e-madangaholu maa-lima gi-mada-waalooloo do mouli.

38:6  Au gaa-daa goe mo-di waahale deenei gi-daha mo-di king aamua o Assyria, ga-benebene hagahumalia gi-muli di waahale.”

38:7  Isaiah ga-helekai, “Dimaadua ga-gowadu gi-di-goe di hagamodongoohia e-hagadootonu bolo Mee ga-daahi dana hagababa.

38:8  I-hongo di gaagenge dela ne-hai go King Ahaz, Dimaadua gaa-hai di malu gii-hana gi-muli nia habodo e-madangaholu.” Gei e-donu, di malu gu-menege gi-muli nia habodo e-madangaholu.

38:9  I-muli hua Hezekiah ne-hili dono magi, mee gaa-hihi dana daahili hagaamu deenei:

38:10  Au gu-hagamaanadu bolo i-di madagoaa maaloo o dogu mouli, gei au guu-hana gi-di henua o digau mmade. Hagalee-loo e-mouli dogu mouli.

38:11  Au e-hagamaanadu bolo i-lodo tenua o digau mouli, au ga-deemee labelaa di mmada gi Dimaadua go Yihowah, be dahi dangada dela e-mouli.

38:12  Dogu mouli guu-tuu gi-daha gu-hagalawa, gadoo be di hale-laa dela e-dugu gi-lala, gadoo be di gahu dela e-tuu-mai di masiini llanga gahu. Au gu-hagamaanadu bolo God gu-hagalawa dogu mouli.

38:13  I-di boo hagatau gei au gu-dangidangi mo ogu mmae, gadoo be di laion dela e-hadihadi ogu iwi. Au gu-hagamaanadu bolo God gu-hagalawa dogu mouli.

38:14  Dogu lee gu-maeha gei gu-bagege, gei au gu-nguunguu be di mwuroi. Ogu golomada gu-maanu di mmada gi-di langi. Meenei Tagi, haga-dagaloaha-ina au gi-daha mo nia haingadaa huogodoo aanei.

38:15  Gei au belee helekai bolo-aha? Dimaadua ne-hai di-mee deenei. Au e-manawa-gee, ge deemee di-kii.

38:16  Meenei Tagi, au ga-mouli-adu gi-di-Goe hua modo-Gooe. Hagahili-ina au, heia au gi-mouli.

38:17  Dogu manawa-gee gaa-huli gaa-hai di aumaalia. Goe gu-haga-dagaloaha dogu mouli gi-daha mo nia haingadaa, Goe gu-dumaalia gi ogu huaidu huogodoo.

38:18  Tangada i-lodo tenua o digau mmade e-mee di-hagaamu Goe ai. Digau mmade e-deemee di hagadonu do manawa-dahi.

38:19  Ma go digau mouli ala e-hagaamu Goe, be dagu hagaamu Goe dolomeenei. Nia damana e-hagi-anga gi nadau dama i dau hai dela e-manawa-dahi.

38:20  Dimaadua, Goe gu-hagahili au. Gimaadou ga-daahili i-nia ‘harp’ e-hagaamu Goe. Daahili hagaamu i-lodo dau Hale Daumaha i-di waalooloo o madau mouli.

38:21  Isaiah ne-hagi-anga gi-di king gi-dugua di walee ne-hai gi-nia huwa-‘fig’ gi-hongo dono magi buu, geia gaa-hili.

38:22  King Hezekiah ga-heeu, “Di hagamodongoohia-aha e-hagadootonu bolo au gaa-mee di hana gi-di Hale Daumaha Dimaadua?”

Chapter 39

39:1  I-di madagoaa hua deelaa, gei di king o Babylonia go Merodach=Baladan, tama-daane o Baladan, ne-longono bolo King Hezekiah la-guu-magi, gei mee ga-hagau gi-mee dana lede mo dana kisakis.

39:2  Hezekiah gu-hagahi-mai digau hagau gu-hagi-anga gi digaula ono maluagina: ana silber mono goolo, ana mee hagakala meegai mono lolo hagakala, mo ono goloo-dauwa huogodoo. E-deai dahi mee i-lodo ana gowaa benebene-mee be i tuai gowaa i-lodo dono henua king digi hagi-anga go-mee gi digaula ai.

39:3  Soukohp Isaiah gaa-hana gi-di King Hezekiah, ga-heeu, “Nia daane aanei ne-lloomoi i-hee, ge ne-helekai bolo-aha adu gi-di-goe?” Hezekiah ga-helekai, “Digaula ne-lloomoi i tenua mogowaa, ne-lloomoi i Babylonia.”

39:4  “Ma di-aha ne-mmada ginai digaula i-lodo di gowaa hale king?” “Digaula gu-gidee nia mee huogodoo. Deai dahi mee i-lodo nia gowaa benebene-mee digi hagi-anga ko-au gi digaula ai.”

39:5  Isaiah ga-hagi-anga gi-di king, “Yihowah, di Gowaa Aamua, e-helekai boloo,

39:6  ‘Di madagoaa e-dau-mai, gei nia mee huogodoo i-lodo doo hale king, nia mee huogodoo o maadua-mmaadua nogo benebene, gaa-tugi-mai gi dangi-nei, la-gaa-kae gi-daha gi Babylon. Deai dahi mee e-dubu ai.

39:7  Hunu gau i o hagadili donu gaa-lahi ga-teletele nadau goloo, ga-hai-hege i-lodo di gowaa hale king o Babylon.’ ”

39:8  King Hezekiah ne-modongoohia bolo tadinga le e-hai bolo di aumaalia mo-di noho-baba i dono madagoaa e-mouli-ai, gei mee ga-helekai, “Tegau dela ne-gaamai kooe mai baahi Dimaadua le e-humalia.”

Chapter 40

40:1  “Haga-manawa lamalia-ina agu daangada,” deenei la-go tadau God e-helehelekai, “Haga-manawa lamalia-ina digaula.

40:2  Haga-maaloo-ina-aga nia daangada o Jerusalem, hagi-anga-ina gi digaula bolo gu-duainau nadau hagaduadua, gei dolomeenei nadau huaidu la-gu-maahede. Au ne-hagaduadua digaula i nadau huaidu huogodoo.”

40:3  Di lee e-wolowolo boloo, “Hagatogomaalia-ina di ala i-lodo di anggowaa ang-gi Dimaadua. Haga-aadee-ina di ala i-lodo di anggowaa e-haele-ai tadau God.

40:4  Haga-honu-ina nia mehanga gonduu, hagababa-ina nia gonduu, nia dama-gonduu la-gi-malallali, gei nia gowaa dungadunga la-heia gii-baba.

40:5  Gei di madamada o Dimaadua la-ga-modongoohia-aga, gei nia daangada huogodoo ga-gidee-ginaadou di-maa. Ma go Dimaadua dela ne-hagababa dana mee deenei.”

40:6  Di lee e-wolowolo boloo, “Hagadele-ina ana helekai!” Gei au ga-heeu, “Nia helekai bolo-aha e-hagadele ko-au?” “Hagadele-ina bolo nia daangada huogodoo le e-hai be nia geinga-tolo, digaula hagalee mouli duai i-nia akai lodo-geinga.

40:7  Nia geinga mono akai e-popo i-di madagoaa Dimaadua ga-ili nia maa gi dono madangi. Nia daangada le e-hai gadoo beenei, hagalee maaloo i-nia geinga.

40:8  Uaa, nia geinga mo ono akai le e-popo, gei-ogo nia helekai o tadau God e-noho-hua beelaa.”

40:9  Jerusalem, hana gi-tomo di gonduu duuduu i-nua, hagadele-ina di longo humalia! Zion, wolowolo gi-nua i doo lee gahigahi! Hagadele-ina di longo humalia ge hudee madagu. Hagi-anga-ina gi-nia waahale o Judah bolo di-nadau God ga-hanimoi!

40:10  Di Tagi go Yihowah ga-hanimoi gaa-dagi gi-nia mogobuna, e-laha-mai madalia Ia digau ala ne-haga-dagaloaha ko-Ia.

40:11  Mee ga-benebene dana hagabuulinga-siibi be tangada hagaloohi-siibi. Mee ga-hagabudu nia dama gi-di gowaa e-dahi, gaa-lahi digaula i-hongo ono lima, gei Mee ga-dagi-mai nia dinana digaula hagahumalia i ono muli.

40:12  Ma iai tangada i-golo e-mee di-hagatau di moana gi-lodo ono babaalima be e-hagatau di langi i-nua gi ono lima? Ma iai tangada i-golo e-mee di-haa nia gelegele o henuailala gi-lodo di ibu, be e-pauna nia gonduu mono gowaa noho-nua gi-hongo di-mee manamana-mee?

40:13  Ma iai tangada i-golo e-mee di-helekai gi Dimaadua bolo gi-heia nia mee belee hai? Ma koai dela e-mee di-aago a-Mee be e-mee di-helekai gi Mee bolo gi-daudalia?

40:14  Ma iai tangada i-golo e-mee di-daudali dono manawa go Dimaadua, gaa-kabe gi-iloo ge gi-modongoohia a-Mee nia mee ala belee hai?

40:15  Nia henua llauehe la-hagalee nia mee ang-gi Dimaadua, e-hai-hua be nia madaua-wai. Nia henua ala e-mogowaa le e-maamaa be nia gohu gelegele.

40:16  Nia manu huogodoo lodo-geinga o Lebanon la-hagalee dohu di tigidaumaha ang-gi tadau God, gei nia laagau ala i-golo la-hagalee dohu di akaa di ahi e-dudu nia tigidaumaha.

40:17  Nia henua la-hagalee di mee gi Mee, nadau hadinga gi Mee ai.

40:18  Ma koai dela e-hagatau ang-gi God? Dehee dau hai e-haga-modongoohia a-Mee?

40:19  Mee hagalee hai be-di ada-balu-god dela ne-hai go nia daangada, dela ne-hai go digau hai-baalanga i di-nadau hii di maa gi-nia goolo, ga-haga-noho i-hongo di gowaa silber.

40:20  Tangada dela e-deemee di-hui ana goolo be nia silber, geia e-halahala ana laagau ala hagalee bala, geia ga-halahala dana dangada paa-mee dela e-mee di-paa di ada-balu-god, ga-haga-duu gii-mau gi-dee hinga.

40:21  Goe e-de-iloo-e-goe? Digi hagia-adu gi-di-goe nia mee ne-hai namua? Goe digi hagalongo gi-di hai o henuailala ne-daamada?

40:22  Maa ne-hai go Mee dela e-noho i-hongo dono lohongo-king i-bahi-i-nua o henuailala mo i-mugi-nua di ahiaalangi, gei nia daangada ala i-bahi-i-lala e-mmada hagalligi-loo ginai be nia loada. Mee ne-holo gi-daha di langi i-nua gii-hai gadoo be-di gahu dela e-hai be-di hale-laa dela e-noho-ai nia daangada.

40:23  Mee ga-daa gi-daha nia mogobuna o-nia dagi o-nia guongo, gaa-hai digaula gi-hagalee nia mee.

40:24  Digaula e-hai gadoo be nia laagau ala dogo tomo-aga lligi, ala hua dogo matilitili ono aga. Di madagoaa Dimaadua ga-hagau-mai dana madangi, gei nia maa ga-maangoo ga-angiangina be nia geinga maangoo.

40:25  Ma koai dela e-hagatau gi God dabuaahia? Ma iai tangada i-golo e-hai be mee?

40:26  Mmada gi-di gili di langi i-nua. Ma koai dela ne-hai nia heduu ala e-mmada ginai goodou? Go Mee go tangada dela e-dagi digaula be digau-dauwa. Mee e-iloo be nia heduu e-hia aalaa, ge e-haga-ingoo digaula gi nadau ingoo! Deai di heduu e-dahi e-ngala ai, mai i ono mogobuna dela e-maaloo huoloo!

40:27  Israel, goe e-aha dela e-hai oo donu gi Dimaadua bolo Mee e-de-iloo-Ia o haingadaa be e-dehei-e-Ia do madagoaa nia daangada ma-ga-hagahuaidu goe?

40:28  Goe e-de-iloo-e-goe? Goe digi hagalongo? Dimaadua dela go di God dono hagaodi ai. Mee ne-hai henuailala hagatau, Mee hagalee duadua be e-buhi. Deai tangada e-iloo ana maanadu ai.

40:29  Mee e-hagamaaloo-aga digau ala e-paagege ge e-duadua.

40:30  Nia dama ala e-lligi, ga-paagege labelaa. Nia dama-daane e-mee di-too i nadau paagege.

40:31  Gei digau ala e-hagadonu Dimaadua i nadau hagamaamaa, ga-gidee-ginaadou di hagamaaloo-aga hoou. Digaula ga-maangi gi-nua i-hongo nadau bakau be nia manu-‘eagle’. Digaula gaa-llele hagalee maanu, digaula ga-haele hagalee paagege.

Chapter 41

41:1  God e-helekai boloo, “Gii-noho dee-muu, hagalongo-mai gi-di-Au, goodou go nia henua mogowaa-loo! Hagatogomaalia e-haga-modongoohia godou baahi i-di gowaa hai-gabunga. Goodou godou madagoaa e-helekai-iei goodou. Lloomoi gi-di gowaa e-dahi e-hilihili be koai dela e-donu.

41:2  “Ma koai dela ne-laha-mai tagi-dauwa mai i-bahi-i-dua, mo-di hai a-mee gi-aali i-nia gowaa huogodoo ala e-hana ginai mee? Ma koai dela ne-wanga gi mee di aali i-hongo nia king mono henua huogodoo? Dana hulumanu-dauwa e-daaligi digaula gi-lala be nia gohu gelegele. Ana amu-maalei gaa-tale i digaula gaa-hai digaula gi-mamaangi be nia geinga popo e-angiangina i-di madangi.

41:3  Gei mee e-waluwalu digaula hua beelaa, e-haele i-di aumaalia, dono lauwa ai, geia e-limalima huoloo dela hagalee tale ono wae gi-di gelegele.

41:4  Gei di-ma koai dela ne-hai di-mee deenei gii-gila? Ma koai dela ne-hagamaanadu ana adu-daangada i nadau hagangalungalua mai taamada? Ko-Au go Dimaadua nogo i-golo i taamada-loo, gei Au go Dimaadua dela ga-i-golo i-di madagoaa ga-hagaodi.

41:5  “Nia daangada ala i-nia henua mogowaa-loo gu-gidee-ginaadou agu mee ala ne-hai. Digaula gu-mmaadagu gu-polepole. Digaula ga-dagabuli-mai gi-di gowaa e-dahi ga-lloomoi.

41:6  Nia daangada gu-wouwou ginaadou di ngalua ga-hagadau-maamaa ge e-hagadau hagamaaloo-aga ginaadou.

41:7  Tangada paa-mee e-helekai gi tangada tugi-goolo boloo, ‘Gu-humalia huoloo go dau moomee!’ Taane dela e-haluhalu dana ada-mee ga-hagamaaloo-aga tangada dela e-dogi di-maa gi-di gowaa e-dahi gi-nia baalanga. Meemaa ga-helekai, ‘Di haga-punipuni-mai gu-humalia!’ Meemaa gaa-dogi di balu-ada-mee deelaa gi dono lohongo.

41:8  “Gei goe, go Israel, go dagu dangada hai-hegau, goodou ala go agu daangada ala ne-hilihili, go di madawaawa Abraham, go dogu ihoo hagaaloho.

41:9  Au ne-laha-mai goodou i-nia mada o henuailala, Au ne-haga-gahi goodou haga-mogowaa-loo i-nia madaaduge, ga-helekai-adu gi goodou boloo, ‘Goodou go agu gau hai-hegau.’ Au digi haga-de-iloo-e-Au goodou. Au ne-hilihili goodou.

41:10  Hudee mmaadagu, Au e-madalia goodou. Au go di-godou God. Hudee uli-godou-gai, Au gaa-hai goodou gi-maaloo ge e-hagamaamaa goodou. Au ga-duuli goodou gi-daha mo godou haingadaa, gei e-benebene goodou.

41:11  “Digau huogodoo ala e-hagawelewele-adu gi goodou, ga-iloo-ginaadou di langaadia di-nadau magedaa. Digau ala e-heebagi-adu gi goodou la-gaa-mmade.

41:12  Ma e-aha maa goodou ga-halahala godou hagadaumee, gei goodou ga-deemee di-gida digaula. Digau ala e-hai-tauwa adu gi goodou, ga-de-i-golo i henuailala.

41:13  Au go Dimaadua, go di-godou God. Au e-hagamaaloo-aga goodou, ge e-hagi-adu gi goodou bolo gi-hudee mmaadagu, Au ga-hagamaamaa goodou.”

41:14  Dimaadua e-helekai boloo, “Goodou go digau Israel, ma e-aha maa goodou e-lligi ge e-paagege, goodou hudee mmaadagu, Au ga-hagamaamaa goodou. Au go di God Dabu o Israel, ko-Au dela e-benebene goodou.

41:15  Au gaa-hai goodou gii-hai be-di laubaba hili-meegai, dela e-gaa ono ngudu ge hoou. Goodou gaa-olo nia gonduu ga-mooho gi-lala. Nia gowaa nnoonua gaa-oho gi-ligiligi-loo gaa-hai nia gohu gelegele.

41:16  Goodou ga-mmaga-aga nia maa gi-di ahiaalangi, gei di madangi ga-ili nia maa gi-daha, gei di madangi damana gaa-oho nia maa dagidahi-loo. Gei goodou ga-tenetene, idimaa Au dela go di-godou God. Goodou ga-hagaamu Au, dela go di God Dabuaahia o Israel.

41:17  “Di madagoaa agu daangada ala ga-halahala nadau wai e-inu, i nadau akii la-gu-maangoo i di-nadau hieinu, gei Au go Dimaadua ga-hagagila nadau dalodalo. Au di God o Israel ga-hagalee-loo di-de-langahia digaula.

41:18  Au gaa-hai nia monowai gii-mmidi laa-lodo nia gonduu ala e-maangoo, ga-haga-hali agu wai laa-lodo nia gowaa mehanga nia gonduu. Au gaa-hai di anggowaa gii-hai nia monowai, gei nia henua ala maangoo gi-hali-eia nia wai no-lodo.

41:19  Au gaa-hai nia laagau-‘cedar’, mono laagau-‘acacia’, ‘myrtle’ mono laagau-olib la-gii-tomo i-lodo di anggowaa. Nia waa-laagau gaa-tomo i-lodo nia henua maangoo, aalaa go nia laagau-‘pine’, ‘juniper’ mono ‘cypress’.

41:20  Nia daangada ga-gidee-ginaadou ga-iloo-ginaadou bolo ma ko-Au, go Dimaadua dela ne-hai nia maa. Digaula ga-modongoohia-ginaadou bolo di God Dabuaahia o Israel la-ne-hai nia mee aanei gii-kila.”

41:21  Dimaadua, di king o Israel e-helekai nia mee aanei boloo, “Goodou go nia god o-nia henua llauehe, haga-gila-aga-ina godou donu. Gaamai godou lagamaaloo ala i godou baahi.

41:22  Lloomoi gi kinei, haga-modongoohia-ina-aga nia mee ala ga-kila-aga, gi-iloo-ai gidaadou be nia maa e-kila-aga ma-gaa-hee. Haga-donudonu-ina gi-di gowaa hai-gabunga i-nia mee ala ne-too gi-daha, gei gi-hagia-mai gi gimaadou ono hadinga.

41:23  Hagia-mai gi gimaadou nia mee ala ma-ga-lloomoi maalia, gei gimaadou ga-iloo bolo goodou nia god! Heia-mai nia mee humalia be heia di haingadaa mai gi gimaadou. Heia gimaadou gi-uli madau gai gi-mmaadagu!

41:24  Goodou mo godou mee huogodoo ala e-hai la-hagalee nia mee. Digau ala e-daumaha adu gi goodou le e-gulugulua huoloo!

41:25  “Au gu-hilihili dagu daane dela e-noho i-di bahi-i-dua. Au gaa-hai a-mee gii-hai dana dauwa adu gi goodou mai i-bahi-i-ngeia. Mee dela e-dagadagahi nia dagi gadoo be nia gelegele gulugulua, gadoo be tangada hai pileedi-hadu e-dagadagahi ana gelegele hai-pileedi.

41:26  Ma koai i goodou gu-haga-modongoohia bolo di-mee deenei e-gila, gei gidaadou gaa-mee di-helekai bolo goodou e-donu? Deai tangada i goodou ne-helekai i di-maa ai!

41:27  Au go Dimaadua dela ne-hagi-anga matagidagi-loo gi Zion di longo deenei. Au gu-hagau dagu dangada kae-hegau gi Jerusalem gi-helekai boloo, ‘Au daangada le e-lloomoi! Digaula e-lloomoi gi nadau guongo!’

41:28  Gei Au gaa-mmada gi-hongo nia god aalaa, tangada e-dahi i digaula e-helekai ai, tangada e-dahi ne-helekai-mai gi agu heeu ai.

41:29  Nia god aanei huogodoo le e-balumee-hua. Digaula e-deemee di-hai nadau mee, nia ada-mee aanei la nadau mahi ai, nadau mogobuna ai!”

Chapter 42

42:1  Dimaadua e-helekai boloo, “Deenei go dagu Dangada Hai-hegau dela e-hagamaaloo-aga ko-Au, dagu Dangada dela ne-hilihili-aga gei e-aloho-iei Au gei e-tene ginai Au. Mee gu-haga-honu ko-Au gi dogu Hagataalunga, gei Mee gaa-wanga gi-nia henua llauehe huogodoo di hai o-di tonu.

42:2  Mee hagalee wolowolo be e-haga-hohooho, be e-agoago gi-nua i-hongo nia ala.

42:3  Mee hagalee hadi gi-daha di aalek dela e-biga, be e-diinai di malama dela ga-hoohoo gaa-made. Mee e-wanga gi-nia daangada di tonu dee-odi.

42:4  Mee hagalee hudu gi-daha dono hagadagadagagee be hagalee manawa-bagege. Mee ga-haga-duu-aga di tonu i henuailala. Nia henua ala e-mogowaa-loo e-talitali gei e-hidihidi gi-nia agoago a-Maa.”

42:5  Dimaadua go God dela ne-hai di langi gaa-haa gi ono hagahonu. Mee dela ne-hai henuailala mo nia mee ala e-mouli huogodoo no-lodo. Mee guu-wanga nia mouli gi-dogidogi nia daangada huogodoo. Gei dolomeenei gei-ogo Dimaadua go God ga-helekai gi dana Dangada Hai-hegau boloo,

42:6  “Au go Dimaadua ne-gahi-mai Goe, ga-gowadu gi-di-Goe di mogobuna bolo di tonu la-gii-gila i-hongo henuailala. Mai doo baahi, gei Au gaa-hai dagu hagababa gi-nia daangada huogodoo. Mai doo baahi, gei Au ga-haga-maalama nia henua llauehe.

42:7  Goe gaa-huge nia golomada o digau dee-gida, ga-haga-maahede digau ala e-noho i-lodo di bouli o-di hale-galabudi.

42:8  “Ko-Au modogo-Au dela go Yihowah, deelaa go dogu ingoo. Deai di god i-golo e-hai-mee ngaadahi gi dogu madamada ai. Au hagalee dumaalia gi dahi ada-mee e-hai-mee ngaadahi gi dogu hagaamu.

42:9  Nia mee ala nogo haga-modongoohia ko-Au, la-gu-kila-aga guu-donu. Dolomeenei, gei Au e-hagi-adu nia mee hoou i-mua nia maa ma-ga-kila-mai.”

42:10  Huwa-ina taahili hoou ang-gi Dimaadua. Daahili hagaamuina a-Mee go henuailala hagatau. Hagaamuina a-Mee go goodou ala e-deledele i-di moana. Hagaamuina a-Mee go nia mee huogodoo ala e-mouli i-lodo tai! Gi-daahili-ina go goodou go nia henua ala e-mogowaa-loo mo goodou go digau ala e-noho i-golo!

42:11  Heia di anggowaa mo ono waahale gi-hagaamuina a God. Heia digau Kedar gi-hagaamuina a-Mee. Heia digau ala e-noho i-lodo di waahale o Sela gi-wwolowwolo i-di tenetene mai i-tomo nia gonduu!

42:12  Heia digau ala e-noho i-nia henua haga-mogowaa gi-haga-hagaamuina mo-di haga-madamada Dimaadua.

42:13  Dimaadua e-hana e-hai dana dauwa gadoo be tangada-dauwa. Mee gu-togomaalia ge e-hagadaba di tauwa. Mee gaa-wolo gi-nua, ga-daamada tauwa. Mee e-haga-modongoohia-aga dono mogobuna dela e-hai-baahi ang-gi ono hagadaumee.

42:14  Dimaadua e-helekai boloo, “Gu-waalooloo dagu noho dee-muu, Au digi helekai gi agu daangada. Gei dolomeenei di madagoaa e-haga-ngalua guu-dau-mai, Au ga-wolowolo gi-nua be-di ahina ma-ga-haanau.

42:15  Au gaa-oho gi-daha nia dama-gonduu mono gonduu nnoonua, ga-haga-maangoo nia geinga mono laagau. Au gaa-huli nia monowai gii-hai nia anggowaa, gaa-hai nia monowai gi-maangoo.

42:16  “Au gaa-dagi agu daangada ala e-dee-gida gi-nia ala digi hula-ai digaula mai i-mua. Au gaa-huli nadau bouli dongoeho gi-di maalama, gaa-hai nia gowaa dungadunga gi malallali i-mua digaula. Aanei go agu hagababa ala e-daahi beelaa ko-Au.

42:17  Gei-ogo digau huogodoo ala e-hagadonu nia ada-mee, ala e-haga-ingoo nia ada-mee bolo nadau god, la-ga-haga-langaadia, gaa-tee.”

42:18  Dimaadua e-helekai boloo, “Goodou go digau ala e-longoduli, hagalongo! Goodou ala e-dee-gida, mmada maalia!

42:19  Ma iai tangada i-golo e-mada-dee-gida i dagu dangada hai-hegau, ge e-mada-longoduli i dagu dangada kae-hegau dela ne-hagau ko-Au?

42:20  Israel, goodou gu-gidee nia mee logowaahee, gei di-maa e-hai dono hadinga bolo-aha adu gi goodou? Goodou la-godou dalinga i-golo belee hagalongo ai, gei nia maa ni-aha ala ne-longono-ai goodou?”

42:21  Dimaadua la di God dela e-manawa-tene i-di hagamouli, malaa Mee e-haga-duu-aga ana haganoho mo ana agoago, gei Mee e-hiihai gi ana daangada gi-hagalaamua-ina nia maa.

42:22  Gei dolomeenei ana daangada la-guu-kumi i tauwa. Digaula la-guu-tai i-lodo nia hale-galabudi i-lodo di gelegele gei gu-daalo hagammuni i-lodo nia hale-galabudi. Digaula guu-hai digau guu-kumi i tauwa, deai tangada e-hanimoi gi digaula belee hagamaamaa digaula ai.

42:23  Ma iai tangada i goodou e-hagalongo gi-di mee deenei? E-hai behee? Tugi dolomeenei gaa-huli gi-muli, goodou ga-hagalongo hagahumalia?

42:24  Ma koai dela ne-wanga a Israel gi digau gaiaa? Ma go tuaidina hua Dimaadua dela ne-hai-baahi ginai gidaadou i tadau haihai huaidu. Gidaadou hagalee nogo mouli be dana hiihai bolo gidaadou gi-mouli-ai. Gidaadou hagalee nogo daudali ana agoago ne-gaamai gi gidaadou.

42:25  Gei Mee guu-hai gidaadou gi-longono di mahi o dono hagawelewele, ga-hagaduadua gidaadou gi-di duadua o-di tauwa. Dono hagawelewele la-gu-ulaula gadoo be-di ahi laa-lodo Israel. Gei gidaadou gu-de-iloo be di-maa di-aha dela ne-hai, gidaadou digi kabe di agoago deelaa.

Chapter 43

43:1  Israel, Dimaadua dela ne-hai goodou, e-helekai boloo, “Hudee mmaadagu, Au ga-haga-dagaloaha goodou. Au gu-gahigahi goodou i godou ingoo bolo goodou nia daangada ni-aagu.

43:2  Di madagoaa ma-ga-hula-ai goodou laa-lodo di moana, gei Au e-madalia goodou, gei nia haingadaa hagalee haga-aabulu goodou. Di madagoaa ma-ga-lloo-adu-ai goodou laa-lodo di ahi, gei goodou hagalee wwele, gei godou haingadaa llauehe hagalee haga-mmaemmae goodou.

43:3  Idimaa, Au go Dimaadua di-godou God, di God Dabuaahia o Israel dela e-benebene goodou. Au gaa-hui gi-daha Egypt gii-mee di-hagamehede goodou. Au gaa-hui gi-daha Ethiopia mo Seba labelaa.

43:4  Au gaa-hui gi-daha nia henua llauehe gi-benebene-ina godou mouli, idimaa, goodou e-dahidamee-mai gi-di-Au, dela e-aloho i goodou, e-gowadu gi goodou di aamua.

43:5  Hudee mmaadagu, Au e-madalia goodou! “Au ga-laha-mai godou daangada gi godou guongo, mai nia mada-mogowaa o henuailala, i-bahi-i-dua mo i-bahi-i-dai.

43:6  Au ga-helekai gi-di bahi-i-ngeia gi-hagau-ina digaula, gei Au gaa-hai gi-di bahi-i-ngaaga gi-hudee daahia digaula. Dugua agu daangada gi-lloomoi mai nia henua mogowaa i-nia mada o henuailala.

43:7  Digaula nia daangada ni-aagu, Au ne-hai digaula belee haga-madamada Au.”

43:8  Dimaadua e-helekai boloo, “Agu daangada la-gi-lloomoi gi-di gowaa hai-gabunga! Nadau golomada i-golo, gei digaula e-dee-gida. Nadau dalinga i-golo, gei digaula e-longoduli.

43:9  Haga-gahi-ina-mai nia henua llauehe gi-dagabuli-mai gi-di hagi-aga. Ma di god dehee dela e-mee di-kokohp nia mee ala ma-ga-kila-aga maalia? Ma di god koai i digaula dela ne-haga-modongoohia nia mee ala e-kila-aga dangi-nei? Heia nia god aanei gi-laha-mai nadau hagadoodonu, gi-hagadonu bolo ginaadou le e-donu, mo-di haga-modongoohia bolo nadau helekai le e-donu.

43:10  “Nia daangada Israel, goodou ala go ogu hagadoodonu. Au ne-hilihili goodou belee hai agu gau hai-hegau bolo gi-iloo-e-goodou Au, ge e-hagadonu Au, gi-modongoohia-goodou bolo ma ko-Au dela go di God. Deai di god i-daha mo Au ai, be nogo i-golo, be ga-i-golo, hagalee-loo!

43:11  “Au modogo-Au go Dimaadua, dela-hua ko-Au modogo-Au dela e-mee di-benebene goodou.

43:12  Au ne-kokohp nia mee ala ga-kila-aga, gaa-lawa, gei Au gu-hanimoi e-hagamaamaa goodou i godou haingadaa. Deai di god mai i-daha ne-hai beenei ai, goodou ala go ogu hagadoodonu.

43:13  Au go di God gaa-hana-hua beelaa. Deai tangada e-lele gi-daha mo ogu mogobuna ai. Deai tangada e-mee di-huli agu mee ala e-hai ai.”

43:14  Di God Dabuaahia o Israel, go Yihowah dela e-benebene goodou, e-helekai boloo, “Au ga-hagau dagu buini-dauwa gi Babylon, belee haga-dagaloaha goodou. Au gaa-oho gi-lala nia bontai di abaaba o-di waahale deelaa, mono lee wwolowwolo o ana daangada gaa-huli gi-di lee dangidangi.

43:15  Au go Yihowah go di-godou God Dabuaahia, Au ne-hai goodou, go Israel, gei Au go di-godou King.”

43:16  I-mua-loo Dimaadua ne-hai dana ala laa-lodo tai, ne-hai dana ala i-mehanga nia wai bagibagia.

43:17  Mee ne-dagi-mai di buini-dauwa maaloo dangihi gi-lodo di made, di buini-dauwa mono waga-hongo-henua mono hoodo. Digaula gu-monnono gi-lala digi tuu-aga gi-nua, gu-hagalee gadoo be-di malama ma-ga-diinai dono ulaula.

43:18  Gei Dimaadua e-helekai boloo, “Goodou hudee daahia nia haihai namua, be hudee mamaanadu-ina nia hangaahai ala nogo hai namua-loo.

43:19  Gii-mmada gi-di mee hoou dela gaa-hai ko-Au. Ma-guu-lawa di kila-aga, gei goodou e-gidee di-maa dolomeenei! Au gaa-hai dagu ala laa-lodo di anggowaa, ga-gowadu gi goodou nia monowai e-mmidi-laalaa.

43:20  Nia manu lodo-geinga hogi ga-hagalaamua nia manu-‘jackal’ mono ‘ostrich’ ga-hagahagaamu Au i dogu madagoaa dela ma-gaa-hai-ai agu monowai gii-hali laa-lodo di anggowaa e-inu go agu gau ala ne-hilihili.

43:21  Aalaa go digau ala ne-hai ko-Au belee hai agu daangada, digaula ga-hagahagaamu Au gi-nia daahili hagaamu!”

43:22  Dimaadua e-helekai boloo, “Goodou go digau Israel, goodou nogo buhi i di-Au, goodou digi daumaha mai gi-di-Au.

43:23  Goodou digi gaamai gi-di-Au godou tigidaumaha siibi dudu, goodou digi hagalaamua-ina Au gi godou hai tigidaumaha. Au digi haga-daamaha-ina goodou i godou hai tigidaumaha. Au digi hagaduadua-ina goodou i dagu dangi-adu gi goodou gi-daumaha-mai gi-di-Au gi godou ‘incense’.

43:24  Goodou digi huia godou ‘incense’ mai gi-di-Au, be e-haga-manawa lamalia Au gi-nia kiliidi o godou manu. Goodou ne-haga-daamaha Au gi godou huaidu, gei goodou ne-hai Au gi-hagawelewele gi godou ihala.

43:25  Gei deenei-laa, Au go Dimaadua dela e-dumaalia adu gi godou huaidu, Au e-hai di-mee deenei, idimaa ma ko-Au. Au ga-haga-de-langahia godou huaidu.

43:26  “Gidaadou gaa-hula gi-di gowaa hai-gabunga, gaamai di-godou helekai hagahuaidu! Haga-gila-aga-ina labelaa godou helekai bolo goodou godou ihala ai!

43:27  Di-godou damana-madua namua-loo nogo hai di huaidu, gei godou dagi nogo hai-hala mai gi-di-Au.

43:28  Godou dagi gu-haga-gulugulua dagu gowaa dabu. Gei-Au guu-hai a Israel gi-mooho damana, guu-hai agu daangada gii-hai digau e-tee ge langaadia.”

Chapter 44

44:1  Dimaadua e-helekai boloo, “Israel dagu dangada hai-hegau, hagalongo-malaa, agu daangada ala ne-hilihili, go di madawaawa Jacob.

44:2  Au go Dimaadua dela ne-hai goodou. Daamada i-di madagoaa dela ne-haanau-ai goodou, gei Au nogo hagamaamaa goodou. Hudee mmaadagu, goodou nia gau hai-hegau ni-aagu, agu daangada ne-hilihili ala e-aloho-iei-Au.

44:3  “Au gaa-wanga nia wai gi-nia henua ala e-hieinu, gaa-hai nia wai gii-mmidi laa-hongo di gelegele gowaa maangoo. Au gaa-llingi dogu Hagataalunga gi-hongo godou dama, mo dogu haga-maluagina gi-hongo do hagadili.

44:4  Digaula ga-tomo-aga hagahumalia be nia laagau ala e-tomo i-di magalillili o-nia wai, e-hai be nia laagau-‘willow’ ala e-tomo i-nia daalinga o-nia monowai ala e-mmidi ono wai.

44:5  “Tangada-nei mo tangada-nei, nia daangada ga-helekai boloo, ‘Au tangada ni Dimaadua.’ Digaula ga-lloomoi ga-buni-anga gi digau Israel. Tangada-nei mo tangada-nei gaa-hihi di ingoo Dimaadua i-di gili dono lima, ga-haga-ingoo-ia bolo ia tangada Israel.”

44:6  Dimaadua dela e-dagi ge e-abaaba a Israel, Dimaadua di Gowaa Aamua e-helekai-ai boloo, “Au go Taamada mo-di Hagaodi, go di God hua e-dahi, deai di god labelaa i-golo ai, dela-hua ko-Au.

44:7  Ma iai tangada i-golo e-mee di-hai agu mee ala ne-hai? Ma koai e-mee di-haga-modongoohia-aga nia mee huogodoo ala ne-belee hai mai taamada, gaa-dae-loo gi-di hagaodi o-di madagoaa?

44:8  Agu daangada-nei, goodou hudee mmaadagu! Goodou gu-iloo bolo mai i-di madagoaa namua ga-tugi-mai gi dolomeenei, Au gu-haga-modongoohia-aga nia mee ala ma-ga-kila-aga, gei goodou ala go agu hagadoodonu. Ma di god i-daha mo Au i-golo? Ma di god e-mogobuna i-golo dela digi longono-e-Au?”

44:9  Digau huogodoo ala e-hai nadau ada-mee la dono hadinga ai, mo nadau ada-god ala e-hai bolo nia mee hagalabagau, la nia balumee. Digau ala e-daumaha gi-nia god beenei, la digau deegida ge e-de-kabemee. Digaula ga-haga-langaadia.

44:10  E-balumee go di hai di ada-mee gi-nia baalanga gii-hai be dahi god e-daumaha ginai.

44:11  Digau huogodoo ala e-daumaha ang-gi di-maa la-ga-haga-langaadia. Digau ala e-hai nadau ada-mee la nia daangada balumee hua. Heia digaula gi-lloomoi gi-mua digau hai-gabunga. Digaula ga-mmaadagu huoloo, ga-langaadia.

44:12  Tangada hai-baalanga gaa-hai dana bida baalanga, gaa-dunu go mee i-hongo di ahi. Mee e-dugidugi dana haamaa gi dono lima maaloo huoloo, e-tugi di baalanga deelaa, gii-hai be-di ada dela e-hiihai ginai. Mee e-ngalua, gei mee gu-hiigai, hieinu ge gu-duadua.

44:13  Tangada paa-mee e-hagatau di laagau, mee ga-maaga di laagau deelaa, gii-hai di ada gi-di mee-hihi, ga-daadaa go mee gi ana goloo paa-mee, gaa-hai di-maa gii-hai di ada-daane, di ada-dangada madanga, gaa-dugu i-lodo dono hale.

44:14  Holongo mee ne-hele di laagau-‘cedar’ e-hai-hegau-iei-ia, be e-hilihili di laagau-‘oak’, be go di laagau-‘cypress’ i-lodo-henua. Be holongo mee gaa-dogi dana laagau-‘pine’, gaa-tali nia uwa e-hai di-maa gii-tomo.

44:15  Tangada e-hai-hegau gi-di bida di laagau deenei, e-hai-ai nia dohomu, ge e-hai-hegau gi-di bida dela i-golo, e-hai-ai dana ada-mee. Tangada e-akaa dana ahi gi-di bida o-di laagau e-haga-mahanahana ia ge dunu ana palaawaa, ge di bida dela i-golo e-hai dana ada-mee, e-daumaha gineia.

44:16  Tei bida i-di laagau deelaa e-hai dana ahi e-dunu ana goneiga gaa-gai gi-maaluu ia. Mee ne-haga-mahana-eia ga-helekai boloo, “E-humalia huoloo go di mahana. Di ahi humalia huoloo giibeni!”

44:17  Di bida o-di laagau dela ne-dubu i-golo, gaa-hai di ada-mee, gaa-bala ginai ga-daumaha ginai. Mee ga-dalodalo gi-di-maa, e-helekai boloo, “Goe dela go dogu god. Benabena-ina au!”

44:18  Nia hagadilinga daangada beelaa le e-dadaulia huoloo di iloo nadau mee ala e-hai. Digaula e-tai nadau golomada mo nadau hagamaanadu gi-de-iloo di tonu.

44:19  Tangada paa ada-mee e-deai dana hagamaanadu ai, bolo ia gaa-hai boloo, “Hunu malala i-di laagau ne-dudu ko-au, ne-dunu agu palaawaa, ge ne-lallala labelaa agu goneiga gaa-gai ko-au, gei nia mee ala ne-dubu i-di laagau deelaa, ne-hai dagu ada-mee. Gei deenei au e-bala gi-lala gi-mua di bida laagau!”

44:20  Di hagadilinga beenei e-hai be tangada e-gaigai ana luaahi, dono hagamamaanadu dadaulia e-koia e-damana, dela gaa-hidi-ai dono hagamaamaa le e-haingadaa huoloo, ge digi iloo-ia bolo di ada-mee dela e-dadaahi ko-ia, la-hagalee di god donu.

44:21  Dimaadua e-helekai boloo, “Israel, goe la-gi-langahia nia mee aanei. Langahia bolo goe tangada hai-hegau ni-aagu. Au ne-hai goe belee hai tangada hai-hegau ni-aagu, gei Au e-deemee-loo di-de-langahia-e-Au goe.

44:22  Au gu-duidui gi-daha o huaidu be nia gololangi. Hanimoi gi-muli gi dogu baahi, ma ko-Au dela e-hagamouli goe.”

44:23  Wwolo i-di tenetene, goodou go di langi! Wwolowwolo, goodou go nia gowaa nnoo-lala o henuailala! Wwolowwolo i-di tenetene, goodou go nia gonduu mono laagau huogodoo ala i-lodo-henua! Idimaa, Dimaadua gu-haga-gida dono madamada, i dana hagamouli digau Israel.

44:24  “Ma ko-Au go Yihowah go di-godou Dangada Hagamouli. Ma ko-Au dela ne-hai goodou. Au go Dimaadua, go Tangada ne-hai nia mee huogodoo. Ko-Au modogo-Au dela ne-hai di langi i-nua, gei deai tangada ne-hagamaamaa Au i dogu madagoaa ne-hai henuailala ai.

44:25  Ma ko-Au e-haga-dadaulia nia soukohp agoago tilikai, ge e-haga-de-gila nia agoago digau manamana lodo di ahiaalangi. Nia helekai o digau kabemee ne-haga-balumee ko-Au gaa-hai bolo nadau kabemee la nia de-kabemee.

44:26  Gei Au gaa-hai nia agoago o dagu dangada hai-hegau la-gii-kila gii-donu. Dogu madagoaa ma-ga-hagau-ai dagu dangada kae-hegau e-haga-kila-aga agu maanadu, malaa, Au e-hai nia maanadu aalaa la-gii-kila gii-donu. Au e-helekai gi Jerusalem bolo nia daangada gaa-noho i-golo labelaa. Au e-helekai gi-nia waahale o Judah bolo nia waahale gaa-hau labelaa. Nia waahale ala ne-mooho, la-ga-haga-duu-aga labelaa.

44:27  Au e-helekai hagadaba bolo Au ga-haga-maangoo di moana.

44:28  Au ga-helekai gi Cyrus boloo, ‘Kooe dela gaa-dagi, e-pono dogu lohongo. Goe gaa-hai nia mee ala e-hiihai ginai Au bolo gi-heia. Goe gaa-hai bolo Jerusalem gi-hauhia labelaa, gei-ogo di haga-mau o-di Hale Daumaha la-gi-daamada-ina.’ ”

Chapter 45

45:1  Dimaadua gu-hilihili a Cyrus belee hai di king. Mee ne-dongo a-mee belee haga-magedaa nia henua llauehe, Mee ne-hagau a-mee belee daa nia mogobuna o-nia king i-di dagi. Dimaadua gaa-huge nia bontai o-nia abaaba o-nia waahale aalaa gi mee. Dimaadua e-helekai gi Cyrus boloo,

45:2  “Ko-Au ga-hagatogomaalia doo ala, ga-haga-bapaba nia gonduu mono gowaa nnoonua. Au gaa-oho gi-daha nia bontai baalanga-mmee o-nia abaaba, gaa-oho gi-daha nia baalanga o-nia abaaba aalaa.

45:3  Au ga-gowadu nia maluagina mai i-nia gowaa bouli mo nia gowaa nngala, gei goe ga-iloo-laa bolo Au go Dimaadua, ko-Au go di God o Israel dela ne-gahi goe i do ingoo.

45:4  Au ne-hilihili goe belee hagamaamaa agu gau hai-hegau go Israel, go digau ala ne-hilihili ko-Au. Au gu-gowadu gi-di-goe di aamua gei goe digi iloo Au.

45:5  “Au go Dimaadua, deai di god i-golo ai. Au ga-gowadu gi-di-goe di mahi e-hai-hegau ginai goe, gei goe e-de-iloo Au.

45:6  Au e-hai di-mee deenei bolo nia daangada huogodoo i henuailala, mai i-di mada e-dahi gaa-tugi i-di mada i-golo, gi-iloo-ginaadou bolo ma ko-Au dela go Dimaadua, ge hagalee di god labelaa i-golo ai.

45:7  Au ne-hai di maalama mo-di bouli, Au e-gaamai di maluagina mo-di haadanga-balua. Au go Dimaadua e-hai nia mee huogodoo aanei.

45:8  Au ga-hagau-ia dagu mogobuna o-di aali i-di langi gadoo be-di uwa. Gei henuailala ga-mahuge belee kae di-maa, gei di hagahonu o-di mehede mo-di tonu ga-i nadau baahi. Au go Dimaadua dela gaa-hai di-mee deenei gii-gila.”

45:9  Ma iai di baalanga-hadu e-mee di-hai ono donu gi tangada dela ne-hai di-maa? Di baalanga le e-hai-hua be nia baalanga ala i-golo. Di baalanga e-mee di-heheeu gi tangada hai-baalanga be ia e-hai dana aha? Di baalanga e-mee di-hai ono donu gi tangada hai-baalanga bolo mee digi iloo-ia di hai di baalanga?

45:10  Ma iai tangada i-golo e-mee di-hai gi ono maadua bolo ia ne-hai beelaa eiaha? Deeai-loo!

45:11  Dimaadua go di God Dabuaahia o Israel dela ne-hai a Israel, gaa-hai nia mee gi-kila-aga maalia, e-helekai boloo, “Goe deai oo donu ai belee hai au heeu i-di gili agu dama, be e-helekai-mai gi-di-Au i agu mee ala belee hai!

45:12  Ma ko-Au dela ne-hai henuailala, ge ne-hai nia daangada gi-mouli no-lodo. Ma ko-Au dela ne-hai di langi i-nua mai i ogu mogobuna. Ko-Au dela e-huwahuwa di laa, di malama mo nia heduu.

45:13  Ma ko-Au dela ne-hagangalungalua a Cyrus gi-haga-gila-ina-aga agu mee, ge e-dugu agu mee gii-donu. Au ga-haga-huudonu nia ala huogodoo ala e-haele-iei mee. Mee gaa-hau haga-hoou dogu waahale go Jerusalem ga-haga-maahede agu daangada ala gu-galabudi. Deai tangada ne-haga-ngalua a-mee be e-hui halahalau gi mee gi-heia di-mee deenei ai. Go Dimaadua go di Gowaa Aamua dela ne-helekai.”

45:14  Dimaadua e-helekai gi Israel, “Di maluagina o Egypt mo Ethiopia gaa-hai nia mee ni-aau, mono daane llauehaa o Seba gaa-hai digau hai-hegau ni-aau. Digaula ga-daudali goe i di-nadau lawalawa gi nadau daula-baalanga, gaa-pala gi-lala adu gi-di-goe, ga-helekai boloo, ‘God le e-madalia goe, go Mee modogo-Ia dela go di God.

45:15  Di God o Israel dela e-haga-mouli ana daangada, la di God dela e-mee di-haga-ngala dono huaidina gi-de-gidee gidaadou.

45:16  Digau huogodoo ala e-hai nadau ada-mee la-gaa-hai digau e-tee ang-gi ginaadou, digaula huogodoo ga-langaadia.

45:17  Gei digau Israel la-gu-haga-mouli go Dimaadua, gei dono aali gaa-hana-hua beelaa, gei ana daangada la-ga-hagalee langaadia.’ ”

45:18  Dimaadua ne-hai di langi, ma go Mee dela go God! Go Mee dela ne-hai henuailala gi-i-golo, ge ne-hai henuailala gii-mau dangihi gi-noho-hua beelaa. Mee hagalee ne-hai di-maa gii-hai di anggowaa, Mee ne-hai di-maa belee noho-ai nia daangada. Ma hogi go Mee dela e-helekai boloo, “Au go Dimaadua, deai di god labelaa i-golo ai.

45:19  Au hagalee helehelekai hagammuni be e-daalo hagammuni dogu hagamaanadu. Au gu-hagalee hai gi digau Israel gi-halahala-ina Au i-lodo di anggowaa. Au go Dimaadua, Au e-helekai i-di tonu, Au e-haga-modongoohia di-mee dela e-donu.”

45:20  Dimaadua e-helekai boloo, “Lloomoi gi-di gowaa e-dahi, go nia daangada o nnenua llauehe, goodou huogodoo ala digi tale gi-di mooho o tenua aamua. Haga-modongoohia-ina goodou gi-di gowaa hai-gabunga. Nia daangada ala e-dagidagi nadau ada-mee laagau, ge e-hai dalodalo gi-nia god ala e-deemee di-haga-mouli ginaadou, nia daangada aalaa e-de-iloo-ginaadou nia mee!

45:21  Lloomoi, hagi-aga-ina godou donu gi-di gabunga. Digau ala gu-hagi-aga la-gi-helehelekai i nadau mehanga. Ma koai dela ne-haga-modongoohia-aga ana mee namua-loo bolo e-kila-aga? Ma hagalee ko-Au, dela go Dimaadua go di God dela e-haga-mouli nia daangada? Deai di god labelaa i-golo ai!

45:22  “Goodou go nia daangada huogodoo i-hongo henuailala, huli-mai gi-di-Au gi-mouli goodou. Ko-Au hua dela go di God, deai di god i-golo ai.

45:23  Dagu hagababa le e-donu, gei di-maa hagalee huli-loo. Au gu-hagamodu dagu hagababa mai i di-Au dogu huaidina. Digau huogodoo ga-lloomoi ga-dogoduli i ogu mua, ga-hagababa bolo ginaadou ga-hai-hegau modudahi mai gi-di-au.

45:24  “Digaula ga-helekai bolo ginaadou e-mee-hua di-gidee di aali mo-di mogobuna mai dogu baahi la-hua, gei-ogo digau ala e-ginagina i di-Au, la-ga-langaadia.

45:25  Ko-Au go Dimaadua dela ga-haga-dagaloaha digau o-di madawaawa Jacob huogodoo, gei digaula ga-hagahagaamu Au.

Chapter 46

46:1  “Deenei di hagaodi o-nia god o Babylon! Bel mo Nebo nogo daumaha ginai nia daangada, gei dolomeenei nia maa gu-haga-uda gi-hongo nia dua o-nia ‘donkey’, guu-hai nia mee aamo-mee daamaha ang-gi nia manu ala e-duadua.

46:2  Nia ada-mee aanei e-deemee di bida hagamouli ginaua. Nia maa guu-kumi guu-kae gi-daha. Deenei di hagaodi o-nia god o Babylon!

46:3  “Hagalongo-mai gi-di-Au, go goodou go di madawaawa Jacob, goodou go agu daangada ala ne-dubu. Au nogo madamada humalia i goodou mai di-godou madagoaa ne-haanau.

46:4  Au go di-godou God dela ga-madamada humalia i goodou, gaa-dae-loo gi godou mmaadua, ga-hinaa godou libogo. Au ne-hai goodou, ga-madamada humalia i goodou. Au ga-hagamaamaa goodou, ga-haga-dagaloaha goodou.”

46:5  Dimaadua e-helekai boloo, “Ma koai dela e-hagatau go goodou mai gi-di-Au? Ma iai tangada i-golo e-hai be Au?

46:6  Nia daangada gaa-huge nadau budehede gaa-dui gi-lala nadau goolo, digaula ga-manamana nadau silber gi-hongo nia pauna. Digaula ga-haga-ngalua di-nadau dangada tugi-mee belee hai-ai di-nadau god, gaa-lawa, ga-dogoduli gi-di-maa, ga-daumaha ginai.

46:7  Digaula ga-dahi-aga di-maa, ga-aamo, gaa-dugu i dono lohongo gii-duu i-golo, e-deemee di-menege gi-daha mo-di gowaa deelaa. Maa tangada ma-ga-dalodalo gi mee, gei mee hagalee helekai gi mee, be e-daa-mai a-mee gi-daha mo nia haingadaa.

46:8  “Goodou ala go digau huaidu, goodou gi-langahia agu mee ala ne-hai gi ogu lima.

46:9  Goodou gi-langahia nia mee ala ne-hai i-mua, goodou gi-haga-modongoohia-ina bolo ma ko-Au dela go God, gei di-maa deai di god e-hai be Au ai.

46:10  Mai-loo i-di matagidagi, Au gu-haga-modongoohia-aga nia mee ala e-kila-aga maalia. I-mua-loo, Au gu-haga-modongoohia-aga nia mee ala gaa-hai. Au gu-helekai bolo agu maanadu e-hai-loo gii-kila, gei Au ga-haga-gila-aga agu mee huogodoo ala ne-belee hai.

46:11  Au e-haga-gahi-mai taane i-bahi-i-dua, mee ga-maangi-mai be-di ‘hawk’, ga-haga-gila-aga agu mee ala ne-maanadu-aga. Au ne-helekai, gei di-maa gaa-gila.

46:12  “Goodou go digau hamaaloo godou manawa, goodou hagalongo-mai gi-di-Au, go goodou ala e-hagamaanadu bolo di aali le e-mogowaa-loo.

46:13  Au e-hai di laangi o-di aali gi-hoohoo-mai, maa hagalee mogowaa-loo. Dogu aali madamada la-hagalee haga-duai. Au ga-haga-mouli a Jerusalem, ga-hagalaamua a Israel i-di gowaa deelaa.”

Chapter 47

47:1  Dimaadua e-helekai, “Babylon, doo gi-lala mo do lohongo king, noho i-lodo nia gohu gelegele. I-mua gei goe nogo gili madammaa giagia be di waahale digi kumidia, malaa, dolomeenei gei goe gu-hagalee gili madammaa balabala, gu-gulugulua! Dolomeenei gei goe guu-hai di hege!

47:2  Haganiga-ina di hadu hai palaawaa! Oloina nia palaawaa! Daa gi-daha-ina di gahu o golomada! Daawa-ina gi-daha oo gahu madamada! Dahi-aga-ina do heelua galagala gi-nua gii-hana goe laa-lodo nia monowai lligi!

47:3  Nia daangada ga-mmada-adu gi-di-goe o goloo ai, ga-mmada-adu gi-di-goe e-hila gi-lala ge langaadia. Au gaa-hui goe gi-di hagaduadua, gei tangada e-dugu au ai.”

47:4  Di God Dabuaahia o Israel e-haga-dagaloaha gidaadou, dono ingoo go Yihowah, di Gowaa Aamua.

47:5  Dimaadua e-helekai gi Babylon, “Noho deemuu i-lodo di bouli dongoeho. Digaula ga-hagalee hagaingoo labelaa goe bolo di king-ahina o-nia henua!

47:6  Au gu-hagawelewele gi agu daangada. Au guu-dugu digaula be nia huai daangada: Au gu-dugu-adu digaula gi-lodo o mogobuna, gei goe digi dumaalia gi digaula, digau hogi mmaadua guu-hai kooe hagahuaidu.

47:7  Goe gu-hagabaubau bolo goe gaa-hai di king-ahina i-nia madagoaa huogodoo, gei goe digi hagamaanadu-ina nia mee aanei mai i-lodo do manawa, be e-hagamaanadu be di-maa ga-hagalawa behee.

47:8  “Goe dela e-aloho di mouli tenetene, hagalongo gi-di-mee deenei, goe e-hagamaanadu bolo goe guu-noho manawa lamalia ge hagalee tale gi-nia haingadaa. Goe e-hai bolo goe e-aamua be God, bolo tangada i-golo e-hai be goe ai. Goe gu-hagamaanadu bolo goe e-deemee di noho-hua modogoe, doo lodo ai, be hagalee manawa-gee i-di made o dau dama.

47:9  Malaa, i-lodo di madagoaa bodobodo, i-lodo di laangi hua e-dahi, nia mee e-lua aanei ga-gila-aga gaa-hai. Doo lodo mo au dama gaa-mmade ma e-aha maa goe e-hai-hegau gi au mogobuna buubuu huogodoo.

47:10  “Goe gu-hagadagadagagee-hua adu gi-di-goe i-lodo dau haihai di huaidu. Goe ne-hagamaanadu bolo tangada e-gidee goe ai. O kabemee mo o iloo gu-dagi-gee goe gi-daha, gei goe ga-helekai-adu gi-di-goe, ‘Au go God, tangada i-golo e-hai be au ai.’

47:11  Di halauwa gaa-tale adu gi-di-goe, au mogobuna buubuu e-deemee di-dugu di-maa. Di mooho gaa-tale adu gi-di-goe limalima, di mooho digi midi-iei goe!

47:12  Daahia-hua au mogobuna buubuu ala nogo hai-hegau-iei goe mai i do damagiigi. Holongo nia maa ga-hagamaamaa goe. Holongo ma-ga-hagamadagudagu o hagadaumee.

47:13  Goe oo mahi ai ma e-aha maa goe guu-kae nia helekai hagamaamaa. Heia au gau kabemee gi-lloomoi e-haga-dagaloaha goe, nia daangada ala e-kuulu gi-nia heduu, e-hagatautau nia baahi ahiaalangi o-di langi, e-hagamodongoohia nia mee ala ma-ga-kila-aga i-lodo nia malama ala e-hagadau.

47:14  “Digaula gaa-hai be nia geinga maangoo, di ahi gaa-dudu digaula gi wwele! Digaula ga-deemee di haga-dagaloaha ginaadou hogi, idimaa di lalaula le e-wele huoloo ang-gi digaula, hagalee di ahi haga-mahanahana dangada.

47:15  Dela-hua di-mee humalia a digau e-hai-adu bolo ginaadou la digau kabemee, ala nogo hagadagadagagee ginai goe i-lodo do mouli. Digaula huogodoo ga-diiagi goe gaa-hula nadau ala, tangada e-dubu ai bolo e-haga-dagaloaha goe.”

Chapter 48

48:1  Nia daangada Israel, goodou go di hagadili mai i Judah, hagalongo gi-di mee deenei: Goodou gu-dowangi i-di ingoo Dimaadua, guu-hai bolo goodou e-daumaha gi-di God o Israel, malaa, godou helekai huogodoo la ono hadinga ai.

48:2  Goodou e-helekai hagapuu bolo goodou nia daangada ni-di waahale dabuaahia, ge bolo goodou e-gana gi-di God o Israel, dono ingoo go Yihowah, di Gowaa Aamua.

48:3  Dimaadua e-helekai gi Israel, “I-mua-loo, Au gu-hagamodongoohia nia mee ala ma-ga-gila-aga maalia, gei gu-limalima-hua Au guu-hai nia maa gi-gila-aga.

48:4  Au gu-iloo bolo goodou ga-hagamodongoohia bolo goodou digau e-hamaaloo godou manawa, e-hamaaloo be di baalanga-‘iron’ ge hagalee hagalongo be di baalanga-mmee.

48:5  I-mua-loo, gei Au guu-hagi-adu di-godou mouli maalia, gu-hagamodongoohia nia mee ala ma-gaa-hai i-mua nia maa ma-ga-kila-aga, belee duuli goodou di helekai bolo godou balu ada-god ala ne-hai nia maa gi-gila-aga.

48:6  “Nia mee huogodoo ala ne-hagi-adu bolo ga-kila-aga, la-gu-kila-aga dolomeenei. Goodou belee haga-uaa bolo agu helekai ne-haga-dagu-aga le e-donu. Dolomeenei gei Au ga-hagi-adu nia mee hoou ala ma-ga-kila-aga, nia mee digi hagamodongoohia ko-Au i-mua.

48:7  Dolomeenei hua Au e-hai nia maa gi-kila-aga. Di-mee beenei ne-gila-aga i-mua ai. Maa nei-bolo ne-gila-aga, gei goodou e-hai bolo goodou gu-iloo hagatau nia maa.

48:8  Au gu-iloo bolo goodou hagalee ne-belee hagadonu ko-Au, i-nia madagoaa huogodoo goodou nogo hagaingoo bolo digau hai-baahi. Deelaa tadinga goodou digi longono-loo di-maa, ge dahi bida helekai ne-longono-goodou ai.

48:9  “Au e-hagakono dogu hagawelewele, e-hagalee daaligi goodou, gii-mee nia daangada di-hagaamu dogu ingoo.

48:10  Au gu-hagamada goodou i-lodo di ahi hagaduadua, be silber dela e-hagamadammaa i-lodo di ahi. Malaa, Au guu-gida bolo goodou e-balumee.

48:11  Agu mee ala e-hai le e-hai belee hagahumalia-hua Au. Au e-hagalee dumaalia gi dogu ingoo gi-haga-balumee-ina, be gi tei dangada gi-hai-mee labelaa gi-di madamada dela belee hai-mee ginai Au modogo-Au.”

48:12  Dimaadua e-helekai, “Israel, nia daangada ala ne-gahigahi ko-Au, hagalongo-mai gi-di-Au! Au go Taamada mo-di Hagaodi, go di God hua e-dahi!

48:13  Ogu lima ne-hai nia hagamau o henuailala, ga-hagamoholo di langi gi-daha. Dogu madagoaa e-hagagahi henuailala mo-di langi, meemaa e-limalima di-lloomoi gii-dau i-di-Au.

48:14  “Dagabuli-mai goodou huogodoo, hagalongo! Deai dahi god e-mee di-kokohp bolo tangada dela ne-hilihili ko-Au, ga-heebagi gi Babylon. Mee gaa-hai dagu mee dela e-hiihai ginai Au bolo gi-heia.

48:15  Ma ko-Au dela ne-helekai ga-gahigahi a-mee. Au ne-dagi a-mee gi-daha, gaa-wanga gi-mee di gila o ana mee huogodoo ala e-hai.

48:16  “Lloomoi gi-hoohoo-mai dolomeenei, hagalongo gi agu helekai. Mai taamada Au nogo leelee hagamadammaa, ge haga-gila agu helekai.” (Dolomeenei, Tagi go Yihowah gu-gaamai ono mogobuna gu-hagau-mai au.)

48:17  Di God Dabuaahia o Israel, Dimaadua dela e-haga-dagaloaha goodou ga-helekai, “Au go Dimaadua, di-godou God, e-hiihai e-aago goodou gi-humalia-adu, ge dagi goodou i-di ala dela belee hula-ai goodou.

48:18  “Maa nei-bolo goodou ne-hagalongo-hua gi agu helekai! Gei nia maluagina guu-hali-adu gi goodou be di monowai dela e-hagalee maangoo. Di aali ne-belee lloo-adu gi goodou be nia beau ala e-nnoo-mau e-bagubaguu i tongotai.

48:19  Godou hagadili gi-muli ne-belee logowaahee be nia gelegele, gei Au guu-hai bolo digaula e-hagalee-loo e-daaligi gi-daha.”

48:20  Hula gi-daha mo Babylon i-di aumaalia! Tenetene wwolowwolo, hagadele-ina di longo, heia di-maa gi-iloo i-nia gowaa huogodoo, “Dimaadua gu-haga-dagaloaha ana daangada hai-hegau Israel!”

48:21  Di madagoaa Dimaadua ne-dagi ana daangada laa-lodo di anggowaa welengina maangoo, digaula digi hieinu. Mee ne-hagahali ana wai mai di hadugalaa gi digaula. Mee ne-haahi-lua di hadu gei nia wai ga-malingi-mai gi-daha.

48:22  Dimaadua e-helekai, “Deai di noho di aumaalia ang-gi digau huaidu ai.”

Chapter 49

49:1  Hagalongo-mai malaa, goodou go nia daangada ala e-noho i-nia henua llauehe mogowaa-loo! I-mua dogu haanau, gei Dimaadua gu-hilihili au, ge gu-aalu-mai au bolo au e-hai dana dangada hai-hegau.

49:2  Mee guu-hai agu helekai gii-gaa be tulumanu-dauwa, gei Mee gu-abaaba au gi dono lima donu. Mee guu-hai au gii-hai be-di amu-maalei dela e-gaa, ge gu-togomaalia dono hai-hegau.

49:3  Mee gu-helekai-mai gi-di-au boloo, “Israel, kooe dela go dagu dangada hai-hegau, idimaa kooe, gei nia daangada ga-hagaamu Au.”

49:4  Au ga-helekai boloo, “Au gu-hagamadabouli, gei di-maa dono hagadagadagagee ginai ai. Au gu-hai-hegau i ogu mahi hagatau, gei di-maa digi hai ana mee.” Gei-au e-hagadagadagagee bolo Dimaadua ga-hagamaamaa au, gei Mee gaa-hui au i agu mee ala e-hai.

49:5  I-mua dogu haanau, gei Dimaadua gu-dongo au belee hai dana dangada hai-hegau e-laha-mai ana daangada gi-muli, belee laha-mai gi-muli digau Israel ala e-noho dagidahi. Dimaadua guu-hai au gi-aamua, ma go Mee dela di hagamau o ogu mahi.

49:6  Dimaadua e-helekai-mai gi-di-au boloo, “Dagu dangada hai-hegau, Au ga-gowadu gi-di-goe di moomee hagalabagau e-mada-aamua di-mee deenei. Hagalee belee haga-duu-aga-hua di madamada o agu daangada Israel ala ne-dubu, gei Au gaa-hai goe gii-hai tangada e-haga-maalama nia henua llauehe, gii-hai digau huogodoo henuailala gii-mee di-mouli.”

49:7  Di God Dabuaahia o Israel mo Tangada Hagamouli e-helekai gi mee dela e-haga-balumee go nia daangada, gei e-de-hiihai ginai nia henua llauehe, geia di hege ni digau dagi-henua. Dimaadua e-helekai gi mee boloo, “Nia king ga-gidee-ginaadou do mehede, gei digaula gaa-tuu gi-nua ga-haga-gila-aga nadau hagalaamua goe. Nia dama-king hogi ga-gidee-ginaadou di-maa, gei digaula gaa-pala gi-lala e-hagalaamua goe.” Di mee deenei gaa-gila, idimaa Dimaadua ne-hilihili dana dangada hai-hegau. Di God Dabuaahia o Israel e-daudali-hua ana hagababa ala ne-hai.

49:8  Dimaadua e-helekai gi ana daangada boloo, “Di madagoaa-hua dela gaa-dae-mai belee haga-dagaloaha goodou, Au ga-dumaalia-adu gi goodou, gei Au ga-haga-gila-aga godou mee ala e-tangi i-di hagamaamaa. Au ga-madamada humalia ge duuli goodou, gei Au gaa-hai di hagababa ang-gi nia daangada huogodoo mai i godou baahi. Au gaa-hai goodou gii-noho labelaa i di-godou guongo dela ne-dugu balumee dolomeenei.

49:9  Au ga-helekai gi-nia gau galabudi boloo, ‘Hula i-lodo tagalohaa!’ ge ang-gi digau ala e-noho i-lodo di bouli, ‘Lloomoi gi-di maalama!’ Digaula gaa-hai be nia siibi ala e-miamiami i-hongo nia dama-gonduu.

49:10  Digaula hagalee hiigai be e-hieinu. Di welengina o-di laa mo-di anggowaa ga-hagalee haga-mmaemmae digaula, idimaa, digaula gaa-dagi go tangada dela e-aloho i digaula. Mee gaa-dagi digaula gi-di gowaa dela e-uwa-aga-ai nia wai.

49:11  “Au gaa-hai agu ala laa-hongo nia gonduu, e-hagatogomaalia agu ala gi agu daangada e-hula nonua.

49:12  Agu daangada ga-lloomoi i-nia gowaa mogowaa-loo, mai mada-ngeia mo mada-gi-dai, mo mai i Aswan i-di mada-ngaaga.”

49:13  Di langi i-nua, goodou daahili mo-di tenetene! Henuailala, goodou wwolowwolo tenetene! Heia nia gonduu gi-hamuhamu gi-nia daahili! Idimaa, Dimaadua ga-haga-manawa lamalia ana daangada. Mee ga-dumaalia gi ana daangada ala e-hagaduadua.

49:14  Gei digau Jerusalem gu-helekai boloo, “Dimaadua guu-kili gimaadou gi-daha! Di Tagi gu-de-langahia-Ia gimaadou!”

49:15  Gei Dimaadua ga-helekai boloo, “Ma iai di ahina i-golo e-mee di-de-langahia dana dama ge hagalee e-aloho di tama dela ne-haanau koia? Ma e-aha maa tinana ma-ga-de-langahia dana dama, gei Au hagalee de-langahia goodou!

49:16  Jerusalem, Au e-deemee di-de-langahia goodou! Au guu-hihi godou ingoo i-hongo ogu babaalima.

49:17  “Jerusalem, digau ala ga-haga-duu-aga goe labelaa, ga-limalima-hua ga-lloomoi, gei digau ala ne-oho goe gaa-hula gi-daha mo goe.

49:18  Madamada-malaa be nia maa ni-aha ala e-kila-aga: Au daangada e-dagabuli-mai, digaula e-lloomoi gi-muli gi nadau guongo. Go di-maa Au dela go di God Mouli, deenei laa, goe ga-manawa-tene gi au daangada, goe ga-manawa-tene gadoo be-di ahina hai-lodo dela ma-gaa-tene gi ana mee ala e-humu ia.

49:19  “Do henua la-gu-mooho guu-hai di anggowaa, gei dolomeenei gei do henua gu-dulii-loo di noho digau ala e-lloomoi gi-golo. Gei digau ala ne-diiagi goe gi-mooho, la-ga-hagabagi gi-daha mo goodou.

49:20  Au daangada ala ne-haanau i-daha mo do henua, ga-helekai-hua tei laangi adu gi-di-goe boloo, ‘Tenua deenei la-gu-dulii-loo, gu-dee-oo, gimaadou e-hiihai e-noho i-di gowaa e-mada-damana.’

49:21  Gei goe ga-helekai-adu gi-di-goe boloo, ‘Ma koai dela ne-haanau nia dama aanei mai gi-di-au? Agu dama la-guu-nngala, gei au gu-deai agu dama ai. Au guu-kumi, guu-lahi gi-daha. Ma koai ne-laha-mai nia dama aanei gi kinei? Au gu-diiagi modogoau, gei nia dama aanei ne-lloomoi i-hee?’ ”

49:22  Di Tagi go Yihowah ga-helekai gi ana daangada boloo, “Au gaa-hai dagu haga-gida gi-nia henua llauehe, gei digaula ga-laha-mai au dama gi di-nadau guongo.

49:23  Nia king gaa-hai be nia damana ni-oou, gei nia queen gaa-hai be nia dinana. Digaula ga-dogoduli gi-lala i oo mua ga-hagalaamua goe. Digaula ga-haga-modongoohia nadau hila-gi-lala i nadau hagalaamua goe, gei goe ga-iloo bolo Au dela go Dimaadua, ge tangada dela ma-ga-hagadagadagagee mai gi-di-Au, ga-hagalee-loo e-manawa-gee.”

49:24  Ma iai tangada e-mee di-daa nia goloo ne-kumi gi-daha mo tangada-dauwa? Ma iai tangada e-mee di-hagamehede nia daangada galabudi gi-daha mo-di mogobuna tagi hagamuamua?

49:25  Dimaadua ga-helekai boloo, “Dela gadoo be-di mee dela gaa-hai. Digau galabudi o digau-dauwa gaa-lahi gi-daha, gei nia goloo ala ne-kumi i tauwa go tagi huaidu, gaa-kae go nia daangada. Au ga-heebagi gi digau ala e-heebagi adu, gei Au ga-hagamehede godou dama.

49:26  Au gaa-hai o hagadaumee gii-bida dadaaligidia hua ginaadou. Digaula ga-dadaulia-hua i di-nadau hagawelewele, ga-dadaaligi nia daangada. Nia daangada huogodoo ga-iloo-ginaadou bolo ma ko-Au go Dimaadua, go Tangada dela e-haga-mouli goodou, gei e-haga-dagaloaha goodou. Digaula ga-iloo-ginaadou bolo ma ko-Au go di God Koia e-Mogobuna o Israel.”

Chapter 50

50:1  Dimaadua e-helekai boloo, “Goodou e-hagamaanadu bolo Au ne-hagau agu daangada gi-daha, gadoo be taane ne-hudu gi-daha dono lodo? Ma e-hai beelaa, dehee-laa di beebaa hagadoodonu o-di haga-maewae taga-hai-lodo? Goodou e-hagamaanadu bolo Au ne-hui goodou gi-daha, gadoo be taane e-hui gi-daha ana dama gii-hai nia hege? Ge deeai, goodou ne-hula-hua gi-daha i di-godou hai huaidu, gei goodou ne-hagau gi-daha idimaa godou hai-hala ala ne-hai.

50:2  “Ma e-aha dela agu dama la-hagalee hagalongo-mai gi-di-Au i dogu madagoaa ma-gaa-hana belee daa-mai digaula gi-daha? Gei digaula le e-aha ala hagalee helekai-mai gi-di-Au i dagu gahigahi-mai digaula? E-hai behee: Au e-bagege di-daa-mai digaula? Au e-mee-hua di-haga-maangoo di moana gi agu helekai ge e-haga-bagu nia monowai gii-hai nia anggowaa, gei nia iga ala nogo i-lodo gaa-mmade i-nia wai ne-hagalee.

50:3  Au e-mee di-hai di gololangi gi-bouli gii-hai be-di bouli o-di lodo-huaidu o-di made.”

50:4  Di Tagi go Yihowah ne-aago-mai agu mee e-helekai-iei au gii-mee au di-hagamaaloo-aga digau ala gu-duadua. Nia luada huogodoo Mee e-hai au gi-haga-mahi gi-hagalongo au gi ana mee ala e-aago-mai au.

50:5  Di Tagi go Yihowah ne-gaamai gi-di-au di modongoohia, gei au hagalee hai-baahi gi Mee be e-huli gi-daha mo Mee.

50:6  Au guu-wanga dogu dua gi digau ala e-haga-mamaawa au. Au digi dugu-ina digaula i di-nadau hagahuaidu au, i di-nadau madagoaa dela ne-hudihudi nia ngaahulu o dogu ngudu, ge e-buibui haawale gi ogu golomada.

50:7  Nadau hagahuaidu au le e-deemee di-haga-mmaemmae au, idimaa go di Tagi go Yihowah dela e-hagamaamaa au. Au nogo hagakono huoloo i dogu hagamahi i digaula. Au e-iloo bolo au hagalee hai gii-tee,

50:8  idimaa, Dimaadua la-gu-hoohoo-mai, Mee ga-hagi-aga bolo ogu ihala ai. Ma iai tangada e-hai bolo ia e-hagahuaidu au? Heia a-mee gii-hula gimaadou gi-di gowaa hai-gabunga ngaadahi! Heia a-mee gi-hagahuaidu-ina au i-golo.

50:9  Di Tagi go Yihowah ga-abaaba au i dono huaidina, ge koai dela e-hagi-aga au bolo au e-ihala? Digau huogodoo nogo hagahuaidu au la-ga-hagalee, digaula ga-hagalee, gadoo be-di gahu dela guu-gai go nia hogobinu.

50:10  Goodou huogodoo ala e-hagalaamua Dimaadua ge daudali nnelekai o dana hege, holongo di ala dela e-taele-ai goodou le e-bouli, gei gi-hagadonu Dimaadua, hagadagadagagee gi-di-godou God.

50:11  Goodou huogodoo ala e-haganohonoho belee daaligi digau ala i-golo, goodou gaa-bida daaligi-hua go godou haganohonoho. Koia hua go Dimaadua gaa-hai di-mee deenei gii-gila, goodou ga-duadua kono.

Chapter 51

51:1  Dimaadua e-helekai, “Hagalongo-mai gi-di-Au, goodou ala e-hiihai e-hagamouli, ala e-lloomoi e-hiihai gi-di hagamaamaa. Hagamaanadu-ina di hadu dela ne-lloomoi-iai goodou, di gowaa mama hadu dela nogo mammama goodou.

51:2  Hagamaanadu-ina di-godou damana-madua go Abraham, mo Sarah ala go di-godou hagadili. Dogu madagoaa ne-gahigahi Abraham, mee ana dama ai, malaa, Au gu-haga-maluagina a-mee, guu-wanga gi-mee ana dama. Au guu-hai dono hagadili gi-logowaahee.

51:3  “Au ga-hagamodongoohia-aga dogu aloho gi Jerusalem, gi digau huogodoo ala e-noho i-lodo di guongo mooho deelaa. Ma e-aha maa dono henua guu-hai di anggowaa, gei Au gaa-hai di-maa gii-hai di hadagee, be di hadagee ne-dogi ko-Au i Eden. Di manawa lamalia mo-di tenetene ga-i-golo, mono daahili hagaamu mo-di mee-bolo-mee mai gi-di-Au.

51:4  “Agu daangada, hagalongo-mai gi agu helekai: Au e-wanga agu agoago gi-nia henua, agu haganoho ga-hagamaalama digaula.

51:5  Au ga-limalima dogu hanimoi e-haga-dagaloaha digaula. Di madagoaa o dogu aali gu-hoohoo mai. Ko-Au hua dela gaa-dagi nia henua. Nia henua mogowaa e-talitali Au gi-hanimoi, digaula e-talitali hagadagadagagee bolo Au ga-haga-dagaloaha ginaadou.

51:6  Mmada gi-di langi i-nua, mmada gi henuailala. Di langi ga-hagalee be di huiahi, henuailala ga-ngudu be di gahu bobo, gei ana daangada huogodoo gaa-mmade be nia lamu. Gei di hagamouli dela ga-gaamai ko-Au, e-noho-hua beelaa, dono hagaodi ai, gei dogu aali ga-hagalawa nia mee huogodoo.

51:7  “Goodou ala e-iloo nia mee ala e-donu ge gu-hagamau nadau manawa gi agu agoago, hagalongo-mai gi-di-Au. Goodou hudee mmaadagu i-di madagoaa nia daangada ma-ga-hagahuaidu goodou,

51:8  idimaa digaula gaa-hai be nia goloo ala e-gai go hingodo! Gei di hagamouli dela ga-gaamai ko-Au le e-noho-hua beelaa, dono hagaodi ai, gei dogu aali ga-i-golo i-nia madagoaa huogodoo.”

51:9  Dimaadua, ala-aga, hagamaamaa-ina gimaadou! Hai-hegau gi o mogobuna, haga-dagaloaha-ina gimaadou; be o mogobuna nogo hai-hegau-ai namua-loo. Ma kooe dela ne-tuu di manu damanaiee o lodo di moana go Rahab gi-ligilligi-loo.

51:10  Ma Kooe labelaa dela ne-hagamaangoo di tai, gaa-hai di ala laa-lodo nia wai, bolo gii-hula digau ala e-madamada humalia-ai-iei Goe nonua.

51:11  Digau ala ne-haga-dagaloaha Kooe i-di haingadaa gaa-dau-loo i Jerusalem, ga-manawa lamalia, ga-dadaahili, ga-wwolowwolo gi-nua tenetene. Digaula ga-tenetene gaa-hana-hua beelaa, ga-hagalee lodo-huaidu mo manawa-gee.

51:12  Dimaadua e-helekai, “Ma ko-Au dela e-hagamaaloo goodou. Goodou e-aha ala e-mmaadagu i tangada dela hua e-mouli gaa-made, dela dono hagadagadagagee ai be nia geinga-tolo?

51:13  Goodou gu-de-langahia Dimaadua dela ne-hai goodou, dela ne-holo gi-daha di langi, ga-haganoho nia hagamau o henuailala? Goodou e-aha ala e-mmaadagu i-di hagawelewele o digau ala e-hagaduadua goodou, digau ala gu-togomaalia belee daaligi goodou? Nadau hagawelewele e-deemee di-tale-adu gi goodou.

51:14  Digau ala e-lawalawa ga-limalima di moholo maahede ang-gi ginaadou, digaula ga-mouli duainau ga-maaluu ang-gi ginaadou nia meegai i-nia madagoaa huogodoo.

51:15  “Au go Dimaadua, go di-godou God. Au e-hagammidi di tai ge hagangoloolo nia beau. Dogu ingoo go Yihowah, di Gowaa Aamua!

51:16  Au ne-hagamoholo gi-daha di-langi, ga-haganoho nia hagamau o henuailala. Au e-helekai gi Jerusalem, ‘Koe go agu daangada! Au gu-gowadu gi-di-goe agu agoago, ge abaaba goe gi dogu lima.’ ”

51:17  Jerusalem, ala-aga, noho gi-nua hagatogomaalia! Goe gu-inu di ibu o-di hagaduadua dela ne-gowadu go Dimaadua i dono hagawelewele bolo gi-inumia. Goe gu-inu di-maa, guu-hai goe gi-hingahinga.

51:18  Tangada e-dagi goe ai, tangada i-lodo au daangada e-kumi doo lima e-lahi goe ai.

51:19  Nia halauwa e-lua e-tale-adu i tolongo e-dahi: Do henua ga-oho go tauwa, gei au daangada ga-hiigai. Deai tangada e-aloho i-di-goe ai.

51:20  I-nia madaaduge o-nia ala huogodoo, au daangada ga-hingahinga i nadau paagege. Digaula e-hai gadoo be di ee ma-gaa-kumi i-lodo di gubenge tangada puu manu. Digaula gu-longono di maaloo o-di hagawelewele o God.

51:21  Goodou go digau duadua o Jerusalem, goodou ala e-hingahinga be digau libaliba,

51:22  Dimaadua di-godou God e-abaaba goodou, ge helekai, “Au e-daa gi-daha mo goodou di ibu dela ne-gowadu i-lodo dogu hagawelewele. Goodou ga-hagalee inu nia waini e-hai goodou gi-hingahinga.

51:23  Au gaa-wanga nia maa gi digau ala e-hagaduadua goodou, gi digau ala ne-hai goodou gi-kiikii i-hongo nia ala, mo dagadagahi goodou be nia dogolia.”

Chapter 52

52:1  Jerusalem, goe gi-maaloo ge gi-aamua labelaa! Di Waahale Dabuaahia o Dimaadua, haga-ulu-ina goe gi-nia goloo ala madamada! Digau ala e-noho i-lodo di bouli hagalee e-ulu gi-lodo o bontai labelaa.

52:2  Jerusalem, badubadu-ina goe gi-mehede! Duu gi-nua gi-daha mo nia gelegele, noho gi-hongo do lohongo aamua! Wwede-ina nia daula baalanga ala nogo lawalawa goodou, goodou go digau Zion ala guu-kumi!

52:3  Di Tagi go Yihowah e-helekai gi ana daangada, “Di-godou madagoaa nogo hai nia hege, nia bahihadu e-hui goodou ai, gei dela hogi di hai nia mee e-hui goodou gi-maahede ai.

52:4  Di-godou madagoaa ne-hula-iei goodou gaa-noho i Egypt be digau mai i-daha, goodou ne-bida hula-hua i godou hiihai. Gei digau Assyria guu-lahi goodou gi-daha, deai nadau bahihadu ne-hui goodou ai.

52:5  Gei i-lodo Babylonia dolomeenei, goodou guu-hai digau gu-lawalawa labelaa, ge hagalee di-mee ne-hui-adu gi goodou ai, gadoo be-di hai dela nogo hai i-mua. Digau ala e-dagi goodou le e-hagaamu ginaadou ge e-helehelekai hagahuaidu, ge e-haga-balumee Au i-nia madagoaa huogodoo.

52:6  I-lodo di madagoaa dela gaa-dae-mai, goodou ga-haga-modongoohia bolo Au go God dela nogo helekai-adu gi goodou.”

52:7  E-madamada huoloo i tadau gidee-gidaadou tangada kae-hegau i dono hanimoi laa-hongo nia gonduu e-gaamai dana longo humalia, di longo o-di aumaalia. Mee e-haga-iloo di aali ge e-helekai gi Zion boloo, “Di-godou God la di king!”

52:8  Digau ala e-hagaloohi di waahale e-wwolowwolo, e-wwolowwolo i-di gowaa e-dahi i-di tenetene. Digaula e-gidee i nadau golomada di hanimoi gi-muli o Dimaadua gi Zion.

52:9  Goodou gi-wwolowwolo mo-di tenetene, goodou go digau Jerusalem dela ne-mooho! Dimaadua ga-daa-mai dono waahale, ga-haga-manawa lamalia ana daangada.

52:10  Dimaadua ga-hai-hegau gi ono mogobuna dabuaahia. Mee ga-hagamouli ana daangada, gei henuailala hagatau ga-gidee di mee deenei.

52:11  Heia goodou gi-hagatanga gi-daha mo Babylon, goodou huogodoo ala e-dagidagi nia goloo daumaha o-di Hale Daumaha. Hudee bilibili gi-nia goloo haga-milimilia. Heia goodou gii-dabu ge gi-hagatanga gi-daha.

52:12  Tolongo nei, gei goodou hudee hula hagalimalima, goodou hudee hagamada bolo e-llele hagammuni. Dimaadua dela go di-godou God gaa-dagi goodou, ga-madamada humalia i goodou i godou gili.

52:13  Dimaadua e-helekai boloo, “Dagu Dangada Hai-hegau gaa-donu i ana hegau. Mee ga-aamua huoloo.

52:14  Digau dogologowaahee gu-homouli huoloo i di-nadau mmada gi Mee. Mee gu-hai-gee dono huaidina dela gu-hagalee mmada ginai be tangada.

52:15  Gei dolomeenei nia henua llauehe logowaahee ga-goboina i di-nadau gidee tangada deelaa. Gei nia king la-ga-deemee di-leelee i di-nadau gidee-ginaadou a-Mee. Digaula gaa-mmada ga-modongoohia-ginaadou di-mee dela digi iloo-ginaadou.”

Chapter 53

53:1  Nia daangada ga-helekai boloo, “Ma koai dela belee hagadonu tadau longo dela e-hagi-aga dolomeenei? Ma koai dela gu-gidee nia mee Dimaadua ne-hai gi ono lima?

53:2  Di mee deenei la-go di hiihai ni Dimaadua bolo dana Dangada Hai-hegau le e-tomo be-di laagau dela e-taa ono aga gi-lodo di gelegele maangoo. Deai di-mee e-hagamadamada a Mee ai, e-deai di-mee e-hai gidaadou gi-hiihai gi Mee ai, e-deai di-mee e-haga-hoohoo gidaadou gi Mee ai.

53:3  Gidaadou gu-haga-balumee a-Mee, ge gu-haga-de-iloo-gidaadou a-Mee. Mee gu-duadua i dono hagaduadua ge mmae. Deai tangada e-dahi e-mmada gi Mee ai. Gidaadou gu-haga-de-iloo a-Mee guu-hai a-Mee be-di balumee.

53:4  “Gei Mee gu-duadua i-di hagaduadua dela belee hai di mee ni gidaadou, Mee guu-kae di mmae dela belee kae go gidaadou. Gei-ogo gidaadou nogo haga-mamaanadu bolo di hagaduadua o-Maa laa mai hua i-baahi o God.

53:5  Gei Mee gu-haga-mmaemmae mai i tadau huaidu, gu-dadaaligi i-nia huaidu ala ne-hai go gidaadou. Gei gidaadou ne-hai gii-donu go dono hagaduadua, ne-haga-hili go nia moholehole i dono gili.

53:6  Gidaadou huogodoo la-guu-hai gadoo be nia siibi ala ne-nngala. Tangada-nei mo tangada-nei i gidaadou guu-bida hana-hua i-de-ia, gei Dimaadua guu-hai a-Mee gii-kae di hagaduadua, di hagaduadua belee kae go gidaadou.

53:7  “Mee nogo hai go digaula hagahuaidu huoloo, gei Mee nogo dumaalia-hua ang-gi digaula, ge digi helekai i dahi helekai. Mee guu-hai gadoo be tama-siibi dela ma-ga-daaligi, ge guu-hai be-di siibi ma-gaa-hole dono gili, dela hagalee dangidangi.

53:8  Mee gu-lawalawa gu-gabunga gu-hai-loo gii-made, ge deai tangada nogo hila ang-gi Mee ai i dono madagoaa nogo hai ginai nia mee digaula. Mee gu-daaligi gii-made i-di gili nia huaidu o tadau daangada.

53:9  Mee guu-dugu gi-lodo taalunga dalia digau huaidu, mee guu-danu dalia digau maluagina, gei Mee digi hai-hala-loo, be e-helekai tilikai.”

53:10  Dimaadua e-helekai boloo, “Ma go dogu hiihai bolo Mee e-hagaduadua, dono made la di tigidaumaha dela e-hui-ai nia huaidu. Deelaa-laa gei Mee gaa-mee di-mmada gi ono madawaawa, Mee ga-mouli waalooloo, gei nia mee ala e-hiihai ginai Au la-gaa-kila mai dono baahi.

53:11  I-muli-hua di mouli o-di hagaduadua, gei Mee ga-tenetene labelaa huoloo, gei Mee ga-iloo bolo Ia hagalee ne-hagaduadua-hua balumee. Dagu Dangada Hai-hegau manawa-dahi dela e-aloho-iei Au, gaa-pono nia hagaduadua o digau dogologowaahee, gei Au ga-dumaalia gi digaula i-di gili o-Maa.

53:12  Malaa, gei Au gaa-wanga gi Mee di gowaa dela e-aamua, di gowaa dela i-hongo nia gowaa digau aamua ge mogobuna. Mee guu-wanga dono mouli, ge e-hai-mee ngaadahi gi dono haadanga-balua madalia digau hai mee hala. Mee guu-pono di lohongo o digau huaidu dogologowaahee, ga-dalodalo labelaa bolo digaula gii-hai digau e-maahede.”

Chapter 54

54:1  Jerusalem, goe guu-hai gadoo be-di ahina deai ana dama ai, dolomeenei gei goe guu-mee di-dadaahili mo-di wolowolo i do tenetene. Dolomeenei gei goe gaa-hai au dama dogologowaahee e-dogologo i-di ahina dela hagalee diiagi go dono lodo.

54:2  Haga-damana-ina di hale-laa dela e-noho-iei goe no-lodo, haga-lloo-ina ono loahi, haga-mau-dangihi-ina ono mee daahi hale.

54:3  Idimaa, goe ga-haga-damana nia baahi huogodoo o do guongo. Au daangada la-ga-lloomoi labelaa gi-muli gi-nia gowaa ala ne-kumi go nia henua llauehe. Nia anga-waahale la-ga-haga-honu gi-nia daangada.

54:4  Goe hudee madagu, goe ga-hagalee tee labelaa, goe ga-hagalee langaadia. Goe ga-de-langahia do haga-langaadia i do madagoaa nogo dama-ahina iei goe, mo do lodo-huaidu i do madagoaa nogo di ahina dela guu-made dono lodo.

54:5  Gei Tangada dela ne-hai goe, Ia gaa-hai be-di lodo ni-oou, di ingoo o-maa la-go Yihowah di Gowaa Aamua. Di God Dabuaahia o Israel ga-haga-mouli goe, go Mee dela di Tagi o henuailala hagatau.

54:6  Israel, goe e-hai gadoo be-di lodo dama-ahina, dela ne-hudu gi-daha go dono lodo, gei gu-manawa-gee huoloo. Malaa, Dimaadua e-haga-gahi-mai goe labelaa gi-de-Ia, ga-helekai boloo,

54:7  “Au ne-diiagi goe i-lodo tama-madagoaa bodobodo, ge mai i dogu aloho huoloo, Au ga-laha-mai goe gi-muli.

54:8  Au ne-huli gi-daha mo goe hagadulii i dogu hagawelewele, malaa, Au ga-hagi-adu dogu aloho adu gi-di-goe gaa-hana-hua beelaa.” Aanei la nnelekai mai baahi o Dimaadua, dela e-benebene goe.

54:9  “I-lodo di madagoaa o Noah, gei Au ne-hagababa bolo di toloo la-hagalee hai labelaa i henuailala. Dolomeenei, gei Au e-hagababa bolo Au hagalee hagawelewele adu gi-di-goe labelaa, Au hagalee hagawelewele be e-hagaduadua goe labelaa.

54:10  Ma e-aha maa nia gonduu mono gowaa nnoonua ga-mooho haga-ligiligi, gei dogu aloho i di-goe, hagalee e-odi. Au e-dadaahi-hua dagu hagababa i-di aumaalia gaa-hana-hua beelaa.” Ma go Dimaadua dela e-aloho i di-goe deenei e-helekai.

54:11  Dimaadua e-helekai boloo, “Jerusalem, goe go di waahale hagaduadua dono hagamaamaa ai, deai dono dangada e-haga-manawa lamalia goe ai. Au gaa-hau hoou labelaa do hagamau gi-nia hagadilinga hadu hagalabagau.

54:12  Au gaa-hau au angulaa gi-nia hadu mmee hagalabagau dono ingoo bolo ‘ruby’, gei nia bontai di abaaba gaa-hai gi-nia hadu ala e-pula be-di ahi, gei nia abaaba ala e-haganiga i doo gili e-hai labelaa gi-nia hadu hagalabagau.

54:13  “Gei Au go dogu huaidina ga-aago au daangada e-wanga gi digaula di haadanga-lamalia mo-di aumaalia.

54:14  Goe ga-maaloo mai i-di tonu mo-di hai nia mee ala e-donu, gei goe ga-duuli gi-daha mo digau haga-dogolege mo digau hagamadagudagu-dangada.

54:15  Ma iai tangada ga-heebagi adu gi-di-goe, gei goe gi-iloo bolo Au digi dumaalia-anga. Be koai hua dela e-heebagi adu gi-di-goe, geia gaa-doo gi-lala.

54:16  “Ma ko-Au dela ne-hai tangada tugi-baalanga dela e-akaa dana ahi, e-dunu nia baalanga, e-hai ana goloo hai-dauwa. Ma ko-Au labelaa dela ne-hai tangada-dauwa dela e-hai-hegau gi-nia goloo-dauwa aalaa belee daaligi dangada.

54:17  Gei di-maa hagalee, deai di-mee i-nia goloo-heebagi e-mee di-haga-mmae goe ai, gei goe gaa-mee di-helekai gi digau huogodoo ala e-hagahuaidu goe. Au ga-duuli agu daangada hai-hegau gaa-hai digaula gi-aali.” Nia helekai ni Dimaadua aanei.

Chapter 55

55:1  Dimaadua e-helekai boloo, “Goodou huogodoo ala gu-hieinu, goodou lloomoi, e-inu nia wai aanei! Goodou ala godou bahihadu e-hui godou meegai ai, goodou lloomoi e-hui godou palaawaa e-gai! Lloomoi e-hui godou waini mono milugu, ma deai ono hui ai.

55:2  Goodou e-aha ala e-hai-hegau gi godou bahihadu gi-nia mee ono hadinga adu gi goodou ai? Goodou e-aha ala e-hai-hegau gi godou hui, gei goodou e-hiigai hua igolo? Goodou hagalongo-mai gi-di-Au, ge heia agu mee ala e-helekai-iei Au, gei goodou ga-tenetene gi godou hagadilinga meegai humalia huogodoo.

55:3  “Agu daangada-nei, goodou hagalongo-mai gi-di-Au, ge lloomoi gi-di-Au. Lloomoi gi-di-Au gei goodou ga-mouli! Au gaa-hai dagu hagababa dela e-hana-hua beelaa gi goodou, ga-gowadu gi goodou nia maluagina ala ne-hagababa ko-Au gi David.

55:4  Au ne-hai a-mee di tagi aamua o-nia henua llauehe, gei Au ne-haga-modongoohia ogu mahi ang-gi digaula mai i mee.

55:5  Dolomeenei, gei goodou ga-haga-gahi-mai nia henua llauehe mai i-daha ala nogo de-iloo-ginaadou goodou, gei dolomeenei gei digaula ga-limalima-hua ga-lloomoi bolo ginaadou gi-madalia goe. Au dela go Dimaadua di-godou God, go di God Dabuaahia o Israel, gaa-hai nia mee aanei huogodoo gii-kila, Au ga-hagalaamua mo-di haga-madamada goodou.”

55:6  Huli ang-gi Dimaadua, dalodalo gi Mee i dono madagoaa e-hoohoo-mai hua igolo.

55:7  Digau huaidu gii-huli gi-daha mo nadau mouli huaidu, gei gi-huluhia nadau hagabaubau. Digaula gii-huli gi Dimaadua go tadau God, Mee tangada aloho ge e-limalima dana dumaalia.

55:8  Dimaadua e-helekai boloo, “Agu hagamamaanadu la-hagalee hai be godou hagamamaanadu, gei ogu hangaahai le e-hai-gee mo godou hangaahai.

55:9  Ogu hangaahai mo agu hagamamaanadu le e-mogowaa-loo i-bahi-i-nua i godou hagamamaanadu, be-di langi dela e-mogowaa-loo i-bahi-i-nua i henuailala.

55:10  “Agu helekai le e-hai be nia uwa mono ‘snow’ ala e-lloo-ia i-di langi gi henuailala belee haga-magalillili nia hagadili gii-tomo gii-huwa ono lii e-dogi gii-huwa labelaa e-gai.

55:11  Malaa, nia helekai ala e-helekai-iei Au, la-hagalee hai-gee mo dagu hai dela ne-haganoho-ai. Nia maa e-kila huogodoo be agu mee ala ne-helekai bolo e-hai.

55:12  “Goodou ga-hagatanga gi-daha mo Babylon i-lodo di tenetene, gei goodou gaa-dagi gi-daha mo-di waahale deelaa i-di aumaalia. Nia gonduu mono gowaa nnoonua gaa-moogo i nadau dadaahili, gei nia laagau ga-wwolowwolo i di-nadau tenetene.

55:13  Nia laagau-‘pine’ ga-tomo-aga i-nia gowaa ala e-tomo-ai nia laagau huaidu dolomeenei, gei nia laagau-‘myrtle’ ga-tomo-aga i-nia gowaa ala e-tomo-ai nia laagau duduia. Deenei la-go di haga-modongoohia dono hagaodi ai, ge e-haga-langahia agu mee ala ne-hai ko-Au, dela go Dimaadua.”

Chapter 56

56:1  Dimaadua e-helekai gi ana daangada, “Heia-hua go nia mee ala e-donu ge hai-donu, idimaa Au e-limalima-hua di haga-dagaloaha goodou.

56:2  Au ga-hagamaluagina digau ala e-hagalabagau di Laangi-Sabad i-nia madagoaa huogodoo, ge hagalee hai-hegau-gee gi-di-maa. Au ga-hagamaluagina digau ala hagalee haihai di huaidu.”

56:3  Tangada mai-i-daha dela gu-buni-anga gi nia daangada a Dimaadua, gi-de helekai, “Dimaadua ga-hagalee dumaalia-mai gi-di-au gi-daumaha dalia ana daangada.” Taane dela guu-tuu ono goloo, gi-de hagamaanadu bolo ia e-deemee di madalia nia daangada a God, idimaa ia e-deemee di hai ana dama.

56:4  Dimaadua e-helekai gi tangada beelaa, “Maa goe ga-hagalaamua Au mai dau hagalabagau di Laangi-Sabad, gaa-hai nia mee ala e-manawa lamalia ginai Au, ga-daudali agu haganoho manawa-dahi,

56:5  gei do ingoo ga-langahia mada-duai i-lodo di Hale Daumaha mo i-baahi nia daangada i-di goe ma-gaa-hai au dama-daane mono dama-ahina. Goe ga-deemee di de-langahia.”

56:6  Gei Dimaadua e-helekai gi digau mai i-daha ala ne-buni-anga gi ana daangada, ala e-aloho i-Mee, ge hai-hege gi-Mee, e-hagalabagau di Laangi-Sabad, ge daudali manawa-dahi dana hagababa:

56:7  “Au gaa-lahi goodou gi Zion, dagu gowaa nnoonua dabuaahia, ga-gowadu di tenetene i-lodo dogu hale hai-dalodalo, gaa-hila ang-gi godou hai-tigidaumaha i-hongo dogu gowaa dudu tigidaumaha. Dogu Hale Daumaha ga-hagaingoo bolo di hale hai-dalodalo ang gi-nia daangada o nnenua huogodoo.”

56:8  Di Tagi go Yihowah, dela ne-laha-mai ana daangada Israel gi nadau henua donu mai i-daha, gu-hagababa bolo Ia ga-laha-mai labelaa nia daangada ala i-golo e-hagapuni ang-gi digaula.

56:9  Dimaadua ne-helekai ang-gi nia henua mai i-daha bolo gi-lloomoi be nia manu lodo-geinga gi-holomia ana daangada.

56:10  Mee e-helekai, “Nia dagi huogodoo ala belee hagailoo gi agu daangada le e-dee-gida! Digaula e-de-iloo nia mee. Digaula e-hai be nia paana hagaloohi ala e-hagalee wwouwwou, digaula e-kiikii-hua e-haihai nadau midi. E-hiihai huoloo di kii!

56:11  Digaula le e-hai be nia paana hagagailaa ala e-dee dohu i-nia madagoaa huogodoo. Nia dagi aanei e-de-iloo di hagabaubau. Digaula huogodoo e-hai go nadau mee ala e-hiihai ginai, ge tei gi-halahala dono hagahumalia.

56:12  Digau inu dagaao e-helekai, ‘Gaa-hula e-gaamai tadau waini, e-inu nia waini huogodoo ala e-mee tadau inu! Daiaa ga-koia humalia i-di laangi go dangi-nei!’ ”

Chapter 57

57:1  Nia daangada humalia e-mmade, gei deai tangada e-dahi e-modongoohia ai be e-haa-manawa ai. Malaa, di-madagoaa digaula gaa-mmade, di lauwa damana e-tale ang-gi digaula ai.

57:2  Digau ala e-mouli humalia, ga-gidee di noho di aumaalia mo-di molooloo i-lodo di made.

57:3  Digau huaidu, goodou lloomoi gi-hagiaga goodou! Goodou e-hagalee humalia i digau hai buubuu, digau mouli hiihai be di manu, digau huihui nadau huaidina.

57:4  Ma koai ala e-gadagada ginai goodou? Digau kai tilikai, ma koai ala e-haganneennee go goodou?

57:5  Goodou e-daumaha gi-nia god hagadili-dama mai di-godou hai nnangaahai o taga-hai-lodo i-lala godou laagau dabu. Goodou e-tigidaumaha godou dama i-lodo nia bagungoo hadu ala e-hoohoo gi-nia dama monowai.

57:6  Goodou e-kae godou hadu malallali i-golo, ga-daumaha gi-nia maa be nia god. Goodou e-llingi godou waini e-hai godou tigidaumaha, ge hai godou tigidaumaha huwa-laagau gi-nia maa. Goodou e-hagamaanadu bolo Au e-tenetene gi godou mee aanei huogodoo ala e-hai?

57:7  Goodou e-hula gi-nia gonduu nnoonua e-hai godou tigidaumaha mo e-hai godou hiihai o taga-hai-lodo.

57:8  Goodou gu-hagaduu godou ada-god bouli i-baahi gi-lodo o godou bontai. Goodou gu-diiagi Au, goodou e-liagi godou goloo, guu-kaga gi-hongo godou moenge llauehe mo godou ihoo aaloho ala ne-hui go goodou belee kii goodou. I-di gowaa deelaa, goodou gu-daudali-hua godou hiihai huaidina.

57:9  Goodou gu-hagakala, guu-humu goodou, guu-hula e-daumaha gi-di god Molech. Goodou gu-hagau godou daangada kae-hegau haga-mogowaa, e-dau hogi gi tenua digau mmade, belee halahala godou god e-daumaha ginai.

57:10  Goodou gu-duadua di halahala nia balu-ieidu, gei hagalee noho-loo. Goodou e-hagamaanadu bolo godou balu-god e-hagamaaloo-aga goodou, gaa-hidi-ai goodou hagalee paagege.

57:11  Dimaadua e-helekai, “Nia god koai aanei ala e-mmaadagu-iai goodou, gaa-hidi-ai goodou ga-helekai tilikai ga-haga-delangahia goodou Au hagatau? Goodou guu-dugu di-godou hagalaamua Au, idimaa Au gu-waalooloo di noho deemuu?

57:12  Goodou e-hagamaanadu bolo godou mee ala e-hai le e-donu, gei Au ga-hagammada godou hangahaihai, gei godou balu-god ga-deemee di-hagamaamaa goodou.

57:13  Di-godou madagoaa ma-gaa-tangi di hagamaamaa, dugu-anga gi godou balu-god gi-haga-dagaloaha-ina goodou! Tama oloolo madangi gaa-lahi digaula gi-daha! Gei digau ala e-hagadonu au, gaa-noho i-lodo tenua, ga-daumaha-mai gi-di-Au i-lodo dogu Hale Daumaha.”

57:14  Dimaadua e-helekai, “Dugu-anga gi agu daangada gi-lloomoi labelaa gi-di-Au. Haga-mmaa-ina gi-daha mo digaula nia haga-deaadee huogodoo i-hongo di ala! Hauhia di ala, hagatogomaalia-ina!

57:15  “Au go-di God aamua ge dabuaahia, dela e-mouli gaa-hana hua beelaa. Au e-noho i-lodo di gowaa nnoonua ge dabuaahia, gei Au e-noho labelaa i-baahi nia daangada ala e-manawa hila gi-lala ge gu-huli hoou gi-daha mo nadau ihala, gii-mee-ai dagu hagaahe-mai nadau manawa maaloo mo nadau hagadagadagagee.

57:16  Au ne-wanga di mouli gi agu daangada, gei Au ga-hagalee dadaahi dogu hai-baahi gi digaula, ge hagalee hagawelewele gi digaula gaa-hana hua beelaa.

57:17  Au ne-hagawelewele gi digaula i nadau ihala mo nadau hagagailaa, gei Au gu-hagaduadua digaula, gu-diiagi digaula. Gei digaula gu-haga-hamaaloo nadau manawa, gu-hula-hua i nadau hiihai.

57:18  “Au gu-gidee di-nadau hangahaihai, malaa, Au ga-hagahili digaula. Au gaa-dagi ga-hagamaamaa digaula, ga-hagamanawa lamalia digau ala e-lodo-huaidu.

57:19  Au guu-dugu-anga di noho di aumaalia gi digau huogodoo, digau hoohoo-mai mo digau mogowaa! Au ga-hagamaaloo-aga agu daangada.

57:20  Malaa, digau huaidu le e-hai gadoo be di moana dela hagalee noho, ono beau e-deemee di-dugu, e-gaamai ana dogolia mono geinga.”

57:21  Dimaadua e-helekai boloo, “Di aumaalia ang-gi digau huaidu ai.”

Chapter 58

58:1  Dimaadua e-helekai boloo, “Wwolowwolo gi-nua i godou mee ala e-mee! Hagi-anga-ina gi agu daangada Israel nadau huaidu!

58:2  Digaula e-daumaha-mai gi-di-Au i-nia laangi huogodoo, e-haihai bolo ginaadou e-hagamahi gi-iloo-ginaadou ogu hangaahai mo-di haga-gila-aga agu haganoho. Digaula e-helekai bolo Au gi-wanga gi ginaadou nnaganoho ala e-donu, gei bolo digaula e-tenetene i di-nadau daumaha-mai gi-di-Au.”

58:3  Digaula e-heheeu boloo, “Gidaadou belee hagaonge eiaha, be Dimaadua hagalee hila-mai? Gidaadou e-bida hila-gi-lala tadau meegai ai beleiaha, be Mee hagalee longono-Ia gidaadou!” Dimaadua e-helekai gi digaula boloo, “Goodou gi-iloo bolo di-godou madagoaa ma-ga-hagaonge, gei goodou e-bida-hai-hua godou hiihai, ge e-haga-daamaha godou gau ngalua.

58:4  Di-godou hagaonge guu-hai goodou gi-hagamuamua, lagalagamaaloo ga-heheebagi. E-hai behee? Goodou e-hagamamaanadu bolo tagadilinga hagaonge beenei gaa-hai Au gi-hagalongo-adu gi godou dalodalo?

58:5  Di-godou madagoaa ma-ga-hagaonge, goodou e-bida hagahuaidu-hua goodou, e-pala-iha godou libogo gi-lala-loo, gadoo be-di aalek dela ma-gaa-biga, gei goodou gaa-holo godou gahu lodo-huaidu, ga-haga-nonnono godou luaahi gi-no-lodo, gaa-lawa ga-kiikii i-lodo nia luaahi. E-hai behee? Goodou e-hagamaanadu bolo deelaa go di hai o-di hagaonge? Goodou e-hagamaanadu bolo Au e-hiihai gi-di hagadilinga dela beenei?

58:6  “Gei deeai! Di hagadilinga hagaonge dela e-hiihai ginai Au, le e-hai beenei: Haga-mehede-ina nia daula-baalanga gi-daha mo digau ala ne-lawalawa, mo-di mee dela e-haga-daamaha di mouli o digau ala e-deemee di-hai nadau donu, gei gi-haga-mehede-ina digau ala e-noho i-lodo di haingadaa.

58:7  Duhaa ngaadahi au meegai i digau ala e-hiigai, ge huge-ina doo hale gi digau hagaloale ala nadau hale ai, wanga-ina au goloo gi digau ala nadau goloo e-ulu ai, gei goe hudee diagia dau hagamaamaa oo gau donu.

58:8  “Malaa, gei dogu manawa lamalia ga-haga-maalama-laa i oo nua be-di laa o-di luada, gei o lauwa ga-limalima ono hili. Au ga-madalia-laa goe ga-abaaba goe, gei Au ga-madalia goe, ga-abaaba goe i-nia madagoaa huogodoo.

58:9  Do madagoaa ma-ga-dalodalo, gei Au ga-helekai-adu. Do madagoaa ma-ga-gahigahi-mai Au, gei Au ga-helekai boloo, ‘Deenei Au’. “Maa goe ma-gaa-dugu o haga-daamaha i digau ala i-golo, mono haga-ngalungalua balumee huogodoo, mono hagadilinga helekai huaidu,

58:10  maa goe gaa-wanga nia meegai gi digau ala e-hiigai, ge ga-hagahumalia digau ala e-dee-dohu ang-gi ginaadou, gei di bouli dela i doo gili, gaa-huli gaa-hai di maalama o-di oodee o-di laangi.

58:11  Gei Au gaa-dagi goe i-nia madagoaa huogodoo, gei e-hagahumalia goe gi-nia mee ala e-humalia, gei Au gaa-hai goe gi-maaloo, hagalee magi. Goe gaa-hai be-di hadagee dela e-iai nia wai e-logo no-lodo, be-di monowai uwa-aga dela hagalee maangoo.

58:12  Au daangada ga-haga-duu-aga labelaa nia hale ala ne-mooho namua, gaa-hau labelaa gi-hongo di hagamau dela guu-lawa di-hau i-mua-loo. Goe ga-modongoohia bolo goe tangada dela e-hau haga-hoou nia abaaba mo nia hale ala ne-mooho i-mua.”

58:13  Dimaadua e-helekai boloo, “Maa goe ga-hagadabu di Laangi-Sabad gii-dabu, ge hagalee halahala-hua au mee ala e-hiihai ginai goe i-di laangi deelaa, maa goe gaa-hai dagu laangi dabu gii-hai di laangi haga-tenetene ge e-hagalaamua di-maa, hagalee heehee gi-daha, be e-ngalua, be e-helehelekai huaidu i-lodo di laangi deelaa,

58:14  malaa, goe ga-gidee di tenetene dela e-gila-mai i dogu baahi i dau hai-hegau mai gi-di-Au. Au gaa-hai goe gi-aamua i-hongo henuailala hagatau, gei goe ga-manawa lamalia gi tenua dela ne-wanga ko-Au gi do damana-madua go Jacob. Au go Dimaadua dela e-helehelekai.”

Chapter 59

59:1  Hudee hagabaubau bolo Dimaadua le e-bagege di haga-dagaloaha goodou, be e-longoduli di-hagalongo gi godou gahigahi di hagamaamaa!

59:2  Gei di-maa go godou ihala ala e-hai a-Mee gi-de longono goodou. Ma go godou ihala ala e-wwae goodou gi-daha mo God i-di godou madagoaa ma-ga-hagamada e-daumaha gi-Mee.

59:3  Goodou e-ihala i godou helekai tilikai, hai-heebagi, ge daaligi dangada gii-made.

59:4  Goodou e-hula gi-di gowaa hai-gabunga, gei di tonu i godou baahi ai. Goodou e-hagadagadagagee gi-nia helekai tilikai bolo e-hai goodou gii-wiini. Goodou e-haganohonoho di-godou hai belee hagammaemae digau ala i-golo.

59:5  Nia haganohonoho huaidu ala e-hai go goodou le e-haga-halauwa huoloo be nia ngogo o-di gihaa poisin. Di ngogo ga-mahaa, gei di gihaa ga-ulu mai gi-daha!

59:6  Malaa, godou haganohonoho huaidu la ono humalia adu gi goodou ai. Nia maa e-balumee gadoo be di gahu ne-hai gi-nia weleweleina bagaigee.

59:7  Goodou e-haganohonoho godou mee huaidu i-nia madagoaa huogodoo, ge deemee di hagakono maalia di-hai nia maa. Goodou hagalee madugidugia di daaligi nia daangada nadau ihala ai. Goodou e-oho ge hagamooho nia gowaa huogodoo ala e-hula ginai goodou.

59:8  Nia daangada e-hagalee noho-baba i-nia gowaa ala e-hula ginai goodou. Godou mee huogodoo ala e-hai le e-hagalee donu. Goodou e-daudali di ala bigabiga, gei deai tangada e-haele di ala deelaa bolo ga-humalia-laa ai.

59:9  Nia daangada e-helekai, “Dolomeenei gimaadou gu-iloo tadinga o God dela e-hagalee haga-dagaloaha gimaadou gi-daha mo digau ala e-haga-huaidu gimaadou. Gimaadou e-hagadagadagagee gi-di maalama gi-hanimoi-laa-nei, gei di-maa go di bouli-hua,

59:10  gei gimaadou e-haahaa-hua be digau e-dee-gida. Gimaadou e-hingahinga i-di oodee be digau e-taele i-di boo, e-hai be digau i-lodo tenua bouli o digau mmade.

59:11  Gimaadou e-mmaadagu ge de-nnoomaalia. Gimaadou e-hiihai gi God gi-haga-dagaloaha gimaadou gi-daha mo-di hagaduadua mo nia hai-gee, malaa di-mee ne-hai ai.

59:12  “Dimaadua, madau ihala hai-baahi adu gi-di-Goe le e-logowaahee. Madau ihala le e-hagahuaidu gimaadou. Gimaadou e-iloo nia maa huogodoo.

59:13  Gimaadou gu-hai-baahi-adu gi-di-Goe, gu-diiagi Goe, gu-de-hiihai di-daudali Goe. Gimaadou gu-hagahuaidu digau ala i-golo, guu-huli gi-daha mo Goe. Madau hagabaubau le e-haigee, madau helekai le e-tilikai.

59:14  Di tonu gu-hagalee, di mee dela e-donu e-deemee di-hoohoo-mai. Di tonu e-hingahinga i-hongo nia ala, gei di mouli hai-donu gu-deai dono gowaa e-noho ai.

59:15  Di mouli hai-donu la-gu-dulii-loo, gei tangada dela e-dugu di haihai di huaidu la-ga-gidee bolo ia tangada e-tale ginai di huaidu mai baahi digau huaidu ala i-golo.” Dimaadua gu-gidee di-mee deenei, gei Mee gu-manawa-gee idimaa di tonu ai.

59:16  Mee gu-goboina i dono gidee-Ia bolo ma tangada e-hagamaamaa digau ala e-haingadaa ai. Mee ga-haga-hai-hegau ono mogobuna e-haga-dagaloaha digaula gaa-hai digaula gi-aali.

59:17  Mee ga-ulu i-di tonu be di gahu abaaba, mo-di mogobuna haga-dagaloaha be di goobai dauwa hamaaloo. Mee gaa-gahu Ia gi-di hiihai maaloo e-haganoho nia mee gii-donu, mo e-hagaduadua mo e-tala di hui nia hala ala e-haga-huaidu-ai nia daangada.

59:18  Mee ga-hagaduadua ono hagadaumee gii-hai be nadau mee ala ne-hai, mo ono hagadaumee hogi ala e-noho haga-mogowaa.

59:19  Mai di bahi-i-dua gaa-tugi di bahi-i-dai, nia daangada huogodoo ga-mmaadagu i-Mee mo ono mogobuna maaloo. Mee ga-hanimoi be di labagee, be di madangi gono maaloo.

59:20  Dimaadua e-helekai gi ana daangada, “Au ga-hanimoi gi Jerusalem e-duuli goodou ge haga-dagaloaha goodou huogodoo ala e-huli gi-daha mo godou huaidu.

59:21  Gei Au e-hai dagu hagababa adu gi goodou: Au gu-gowadu gi goodou ogu mogobuna mo agu agoago e-hai-mee ginai goodou gaa-hana hua beelaa, gei dolomeenei gaa-huli gi-muli, goodou la-gi-hagalongo daudali-mai Au, aago-ina godou dama mo godou hagadili gi-muli gi-hagalongo, daudali-ina Au i-nia madagoaa huogodoo ala e-lloomoi.”

Chapter 60

60:1  Jerusalem, goe duu gi-nua, ge gi-maahina gadoo be-di laa. Di madamada o Dimaadua gu-maahina gi oo nua!

60:2  Nia henua llauehe ala i-golo la-gaa-gahu go di bouli dongoeho, gei di maalama o Dimaadua ga-maahina gi oo nua, gei di madamada o-Maa ga-madalia goe.

60:3  Digau bouli ga-hiihai bolo e-hai-mee gi do maalama, nia king ga-hiihai e-hai-mee gi do madamada dela e-hai be-di laa dela ma-gaa-hobo.

60:4  Madamada-malaa i oo daha be nia maa ni-aha ala e-hai: Au daangada la-gu-hagadagabuli ginaadou ga-lloomoi gi nadau guongo! Au dama-daane ga-lloomoi haga-mogowaa, gei au dama-ahina la-ga-laha-mai be nia dama lligi.

60:5  Goe ga-gidee di-mee deenei, gei goe gaa-honu i-di tenetene. Goe ga-bolebole i dau homouli. Di maluagina o-nia henua llauehe ga-gowadu gi-di-goe, nadau maluagina ga-lloomoi i-hongo di moana.

60:6  Tagabuulinga dangada ala e-heehee i-nia ‘camel’ ga-lloomoi i Midian mo Ephah. Digaula e-lloomoi i Sheba, e-gaamai nadau goolo mono ‘incense’. Nia daangada ga-helehelekai i-di longo-humalia o-nia mee Dimaadua ne-hai.

60:7  Nia siibi huogodoo o Kedar mo Nebaioth la-ga-laha-mai gi goodou be nia tigidaumaha, ga-tigidaumaha gi-hongo di gowaa dudu-tigidaumaha belee haga-tenetene di manawa Dimaadua. Gei Dimaadua ga-haga-madamada dono Hale Daumaha gi-madamada i di-maa mai i-mua.

60:8  Ma nia wagabaalii aha ala e-mmaangi-mai be nia gololangi, e-hai be nia mwuroi ala e-lloomoi gi nadau hale?

60:9  Ma go nia wagabaalii ala e-lloomoi i-nia henua mogowaa-loo, e-laha-mai nia dama Dimaadua gi nadau guongo. Digaula e-gaamai nadau silber mono goolo madalia ginaadou, belee hagalaamua di ingoo Dimaadua, go di God Dabuaahia o Israel, dela ne-hai nia henua mai i-daha huogodoo gi-hagalaamua ana daangada.

60:10  Dimaadua e-helekai gi Jerusalem boloo, “Digau mai i-daha gaa-hau haga-hoou o abaaba, gei nia king ga-hai-hegau-adu gi-di-goe. Dogu madagoaa nogo hagawelewele-iei Au, gei Au gu-hagaduadua goe, gei dolomeenei, gei Au ga-haga-modongoohia-adu gi-di-goe dogu aloho mo dogu dumaalia.

60:11  Gei boo mo aa nia bontai dau abaaba e-dugu maahuge, gii-mee-ai di-gaamai nia maluagina o-nia king o-nia henua llauehe adu gi-di-goe.

60:12  Gei nia henua llauehe ala hagalee hai-hegau adu gi-di-goe, la-ga-oho gi-daha hagatau.

60:13  “Nia laagau-‘pine’, nia ‘juniper’, mo nia ‘cypress’, aalaa go nia laagau ala e-kaedahi mau-dangihi o lodo-henua o Lebanon, la-ga-gaamai ga-haga-hoou goe, go Jerusalem, e-hai dogu Hale Daumaha gi-madamada, gei gi-haga-madamada labelaa dogu waahale.

60:14  Gei nia dama o digau ala nogo hagahuaidu goe, ga-lloomoi gaa-pala gi-lala, e-haga-modongoohia nadau hagalaamua goe. Digau huogodoo ala nogo haga-balumee goe, la-ga-pala-adu gi-lala o babaawae. Digaula ga-haga-ingoo goe boloo: Di Waahale o Dimaadua, mo Zion, go di Waahale o-di God Dabuaahia o Israel.

60:15  “Goe ga-hagalee hudu gi-daha labelaa, gei e-de-hiihai ginai, di waahale dela gu-ono daangada ai, gei gu-mooho. Au gaa-hai goe gi-aamua ge gi-madamada, di gowaa dela e-hai di tenetene dee-odi.

60:16  Nnenua llauehe mono king ga-madamada humalia i di-goe, gadoo be tinana dela e-haga-uu-uu dana dama. Goe ga-iloo bolo ma ko-Au hua, go Dimaadua dela gu-haga-mouli goe, ge bolo ma go di God Mogobuna o Israel dela gu-hagamehede goe.

60:17  “Au ga-gowadu gi-di-goe nia goolo, e-pono nia baalanga-mmee. Gei Au ga-gowadu gi-di-goe nia silber mono baalanga-mmee, e-pono nia baalanga mono laagau. Au ga-gowadu gi-di-goe nia baalanga, e-pono di hadugalaa. Oo dagi ga-hagalee haga-daamaha goe. Au gaa-hai digaula gii-dagi i-di tonu mo-di aumaalia.

60:18  Gei nia hadungaa-lee o digau ala e-dadaaligi dangada la-ga-hagalee. Di haga-momooho dela nogo hai i-lodo godou gowaa, ga-hagalee gila labelaa, idimaa, Au ga-hagamaamaa goe, gaa-hai be-di abaaba e-duuli goe. Goe ga-hagahagaamu Au, i di-Au dela gu-haga-dagaloaha goe.

60:19  “Goe ga-hagalee hai-mee gi-di maalama o-di laa i-di aa, be e-hai-mee gi-di maalama o-di malama i-di boo, idimaa, Au go Dimaadua dela gaa-hai do haga-maalama dee-odi. Di maalama o dogu madamada ga-haga-maalama goe.

60:20  Au laangi manawa-gee la-ga-hagaodi. Au go Dimaadua dela gaa-hai do haga-maalama dee-odi dela e-mada-waalooloo i-di maalama o-di laa mo-di malama.

60:21  Au daangada huogodoo gaa-hai nia mee ala e-donu, ga-hai-mee gi nadau henua gaa-hana-hua beelaa. Ko-Au dela ne-dogi digaula be nia laagau. Ko-Au dela ne-hai digaula belee haga-modongoohia-aga dogu mogobuna ang-gi digau huogodoo.

60:22  Godou madahaanau ala lligi ge hila-gi-lala ga-aamua labelaa, gaa-hai gadoo be-di aamua tenua mogobuna. Di madagoaa humalia gaa-dae-mai, gei Au ga-haga-gila di-maa hagalimalima. Au go Dimaadua dela e-helehelekai!”

Chapter 61

61:1  Di Tagi go Yihowah ne-haga-honu au gi dono Hagataalunga. Mee ne-hilihili au ge ne-hagau-mai au belee hagadeledele di Longo-Humalia gi digau hagaloale, ge haga-manawa lamalia digau ala gu-manawa-haga-daamaha, ge e-hagadele ang-gi digau ala nogo lawalawa bolo digaula la-gi-maahede, mo ang-gi digau ala nogo i-lodo nia hale galabudi bolo digaula la-gi-maahede.

61:2  Mee ne-hagau-mai au belee haga-modongoohia bolo di madagoaa dela ga-haga-mouli-ai Dimaadua ana daangada la-gu-dae-mai, gei Mee ga-haga-magedaa nia hagadaumee digaula. Mee ne-hagau-mai au belee haga-manawa lamalia digau huogodoo ala e-lodo-huaidu,

61:3  ge belee wanga gi digau ala e-lodo-huaidu i Zion di tenetene mo-di manawa lamalia, ge e-huli nadau manawa-gee, e-wanga gi digaula taahili hagaamu, e-huli nadau lodo-huaidu. Digaula gaa-hai be nia laagau ala ne-bida dogi-hua go Dimaadua. Digaula huogodoo gaa-hai nia mee ala e-donu. Gei nia daangada ga-hagaamu Dimaadua i ana mee ala ne-hai.

61:4  Digaula gaa-haga-duu-aga hoou di waahale dela ne-mooho mai i-mua-loo.

61:5  Agu daangada-nei, digau mai-i-daha ga-hai-hegau adu gi goodou. Digaula ga-madamada humalia i au siibi, gaa-dogi godou gowaa, ga-huwahuwa i godou hadagee-waini.

61:6  Gei goodou ga-modongoohia bolo goodou nia daangada hai-mee-dabu ni Dimaadua, nia daangada hai-hegau ni tadau God. Gei goodou gaa-tene gi-nia maluagina o-nia henua llauehe, gaa-bida hagaamu goodou bolo ma nia mee ni goodou.

61:7  Godou langaadia mo godou tee la-ga-haga-lawa. Goodou gaa-noho i-lodo godou guongo donu, gei godou maluagina la-gaa-dua-lua, gei godou tenetene ga-waalooloo gaa-hana-hua beelaa.

61:8  Dimaadua e-helekai boloo, “Au e-aloho i-di tonu, gei Au e-hudi dogu wou gi-di haga-haingadaa mo nia hai huaidu. Au ga-manawa-dahi i dagu hui agu daangada, gaa-hai dagu hagababa modudahi dee-odi gi digaula.

61:9  Digaula gaa-hai digau e-dau i-mehanga nia henua llauehe. Digau huogodoo ala ga-gidee-ginaadou digaula ga-iloo bolo aalaa go agu daangada ala ne-haga-maluagina ko-Au.”

61:10  Jerusalem e-hagaamu Dimaadua i ana mee ala ne-hai. Mee e-ulu ono goloo be tama-ahina ma-gaa-hai dono lodo. Dimaadua ne-haga-gahu a-mee gi-di hagamouli mo-di aali.

61:11  Di Tagi go Yihowah ga-haga-mouli ana daangada, gei nia henua llauehe huogodoo ga-hagahagaamu a-Mee, gadoo be-di hai o-nia lii-laagau ala ga-hagadili ga-tomo-aga.

Chapter 62

62:1  Au ga-helekai e-hagamaaloo-aga Jerusalem, au hagalee noho deemuu gaa-dae-loo gi-di madagoaa a-mee gu-dagaloaha, dono aali ga-dabadaba be di ulaula di malama i-di boo.

62:2  Jerusalem, nia henua ga-gidee doo aali! Nia king huogodoo ga-gidee do madamada. Goe ga-hagaingoo gi-di ingoo hoou, di ingoo ne-gowadu-hua go Dimaadua.

62:3  Goe gaa-hai be di hau king madamada ang-gi Dimaadua.

62:4  Goe ga-hagalee hagaingoo labelaa bolo “Di Anga Gowaa”, do henua ga-hagalee hagaingoo bolo “Di Ahina Hai-lodo ne-Diiagi”. Do ingoo hoou gaa-hai bolo “God e-Manawa Tene gi-Mee”. Do henua ga-hagaingoo bolo “Tenetene Haga-hai-lodo”, idimaa, Dimaadua e-tenetene adu gi-di-goe, gaa-hai be taane hai-lodo ni do henua.

62:5  Gadoo be tama-daane e-lahi tama-ahina madammaa e-hai-lodo gi mee, Mee dela ne-hai goe ga-hai-lodo adu gi-di-goe. Gadoo be taane hai-lodo dela e-tenetene gi dono lodo, gei doo God ga-tenetene adu gi-di-goe.

62:6  Jerusalem, au ga-haganoho digau dauwa hagaloohi i-hongo au abaaba. Digaula e-hagalee hai gii-noho deemuu i-di aa mo-di boo. Digaula e-hai-loo gi-haga-langahia gi Dimaadua i ana hagababa, hudee dugu-anga gi-Mee gi-de-langahia nia maa.

62:7  Digaula gi-hudee heia a-Mee gi-haga-molooloo gaa-dae-loo gi dana hagahumalia labelaa Jerusalem, e-hai di-maa gii-hai di waahale e-hagaamu go henuailala hagatau.

62:8  Dimaadua guu-hai dana hagababa aga i-lodo dono manawa, mai ono mogobuna Mee ga-hagagila di-maa: “Godou huwa-laagau ga-hagalee hai nia meegai ni godou hagadaumee, gei digau nnenua mai i-daha ga-hagalee inu labelaa godou waini.

62:9  Malaa, goodou ala ne-dogi gaa-hagi nia huwa o godou laagau, goodou gaa-gai godou palaawaa, ga-hagaamu Dimaadua. Goodou ala nogo ngalua gaa-hagi godou ‘grape’, goodou ga-inu godou waini i-lodo di abaaba o dogu Hale Daumaha.”

62:10  Nia daangada o Jerusalem, hula gi-daha mo-di waahale, hauhia di ala ang-gi au daangada ala e-lloomoi labelaa gi-muli! Hagatogomaalia-ina di ala damana, hagamadammaa-ina nia hadu gi-daha! Daudau-ina gi-nua di hagailoo gii-iloo nia henua

62:11  bolo Dimaadua e-haga-iloo gi henuailala hagatau: “Hagi-anga-ina gi-nia daangada o Jerusalem bolo Dimaadua e-hanimoi, e-haga-dagaloaha goodou, e-lahamai dalia eia ana daangada ne-hagamouli.”

62:12  Goodou ga-hagaingoo bolo “Nia Daangada Dabuaahia ni God”, mo “Nia Daangada a Dimaadua ne-Hagadagaloaha”. Jerusalem ga-hagaingoo bolo “Di Waahale e-Aloho-ai a God”, mo “Di Waahale dela digi Diagia go Dimaadua.”

Chapter 63

63:1  “Ma koai dela e-hanimoi mai i-di waahale go Bozrah i-lodo Edom? Ma koai dela e-ulu nia goloo madamada mmee-agogo, dela e-hanimoi i-lodo ono mogobuna mo ono mahi?” Ma go Dimaadua, dela e-mogobuna di-haga-mouli, dela e-hanimoi e-haga-iloo dono aali.

63:2  “Nia goloo-gahu o-Maa le e-aha ala e-mmee-agogo gadoo be tangada nogo dagadagahi ana ‘grape’?”

63:3  Dimaadua ga-helekai, “Au nogo dagadagahi nia henua llauehe gadoo be nia ‘grape’, gei deai tangada ne-hanimoi e-hagamaamaa Au ai. Au ne-dagadagahi digaula i-lodo dogu hagawelewele, gei nadau dodo gu-haga-bigibigi ogu gahu.

63:4  Au gu-hagababa bolo di madagoaa dela belee haga-mouli agu daangada la-gu-dae-mai, deenei di madagoaa hogi belee hagaduadua nadau hagadaumee.

63:5  Au gu-homouli i dogu gidee bolo ma deai tangada e-hagamaamaa Au ai, gei dogu hagawelewele guu-hai Au gi-maaloo-dangihi, gei Au gu-maaloo.

63:6  I-lodo dogu hagawelewele, gei Au gu-dagadagahi nia henua llauehe huogodoo gi-mooho, Au guu-llingi gi-daha nadau dodo i-hongo di gelegele.”

63:7  Au ga-hagadele di hagahonu o-di aloho o Dimaadua. Au ga-hagaamu a-Mee i ana mee huogodoo ala ne-hai-mai gi gidaadou. Mee gu-haga-maluagina ana daangada Israel, mai i dono dumaalia mo dono aloho dela hagalee ngudu.

63:8  Dimaadua e-helekai boloo, “Digaula la nia daangada ni-aagu. Digaula ga-hagalee halahalau Au.” Malaa, gei Mee gu-haga-dagaloaha digaula

63:9  gi-daha mo nadau hagaduadua huogodoo. Hagalee go tangada di-langi, ma go Dimaadua donu dela ne-haga-dagaloaha digaula. I-lodo dono aloho mo dono manawa-dumaalia, Mee gu-haga-dagaloaha digaula, gei Mee nogo madamada humalia huoloo i digaula mai-loo i-mua.

63:10  Gei digaula gu-hai-baahi gi Mee, ge e-hai di Hagataalunga-Dabu o-maa gi-manawa-gee. Deelaa-laa Dimaadua gaa-hai di hagadaumee ni digaula, ga-heebagi gi digaula.

63:11  Gei digaula ga-langahia-e-ginaadou di madagoaa i-mua, nia laangi o Moses go tangada hai-hegau Dimaadua, gei digaula ga-heeu boloo, “Dimaadua la-i-hee dela ne-hagamouli nia dagi o ana daangada i-lodo di moana? Dimaadua la-i-hee dela ne-wanga dono Hagataalunga-Dabu gi Moses?

63:12  Dimaadua la-i-hee dela ne-wanga dono mogobuna aamua gi Moses, dela gu-wwae-lua nia wai o-di moana gii-mee di-dagi ana daangada mai di gowaa nogo hontula-wai, gu-hai-ai dono ingoo gi-modongoohia i-nia madagoaa huogodoo.”

63:13  Dimaadua ne-dagi digaula laa-lodo di tai, gei digaula e-haele be nia hoodo ala e-maaloo nadau wae, digaula hagalee hingahinga.

63:14  Dimaadua gu-haga-molooloo ana daangada, gadoo be nia kau ala ma-gaa-dagi gi-lodo di gowaa humalia ono geinga. Mee ne-dagi-mai ana daangada e-haga-aamua-ai dono ingoo.

63:15  Meenei Dimaadua, hila-mai gi gimaadou i do gowaa dela e-noho-iei Goe i-di langi, di gowaa madamada ge dabuaahia. Do hagamaanadu aloho i gimaadou le e-hai bolo-aha? Do mogobuna la-i-hee? Do manawa-dumaalia mo do aloho la-i-hee? Hudee haga-de-langahia-ina gimaadou.

63:16  Kooe dela go di-madau Damana. Madau damana-mmaadua go Abraham mo Jacob digi haga-modongoohia-ina-mai gi gimaadou. Meenei Dimaadua, ma Kooe dela go di-madau Damana dela e-haga-dagaloaha gimaadou mai i-mua-loo.

63:17  Ma e-aha dela Goe e-hai gimaadou gii-hula laa-daha mo oo ala? Goe e-aha dela e-hai gimaadou gi-lodo-hamaaloo ga-hula-iei gimaadou gi-daha mo Goe? Hanimoi labelaa gi gimaadou, mai i do aloho i digau ala e-hai-hegau-adu gi-di-Goe, ge mai i do aloho i-nia daangada ala nogo hai au daangada mai i-taamada-loo.

63:18  Gimaadou ala go au daangada dabuaahia, la-ne-hagabagi gi-daha go madau hagadaumee i-lodo tama-madagoaa hagadulii, digaula gu-dagadagahi gi-lala do lohongo dabuaahia.

63:19  Goe e-hai gimaadou gadoo be digau digi dagia Kooe, ge hagalee hai gimaadou be nia daangada ni-aau.

Chapter 64

64:1  Goe e-aha dela hagalee haahi di ahiaalangi gi-mahuge ga-haneia? Nia gonduu ga-gidee-ginaadou Goe, ga-polepole i di-nadau mmaadagu.

64:2  Digaula ga-polepole huoloo be nia wai ma-ga-kolokolo i-hongo di ahi wele. Hanimoi haga-gila-aga-ina do mogobuna ang-gi o hagadaumee, gaa-hai nia henua llauehe gi-polepole i do hanimoi!

64:3  Di madagoaa i-golo dela ne-hanimoi-iei Goe gaa-hai au mee hagamadagudagu-dangada ala digi iloo-ai gimaadou bolo nia mee beelaa gaa-hai, gei-ogo nia gonduu gu-gidee-ginaadou goe, gu-mmaadagu gu-polepole.

64:4  Ma deai tangada ne-longono be ne-gidee-ia di God be Goe ai, dela e-hai au mee beenei ang-gi digau ala e-hagadagadagagee adu gi-di-Goe.

64:5  Goe e-hila ang-gi digau ala e-manawa-tenetene i di-nadau hai-hegau gi-di mee dela e-donu, go digau ala e-langahia-e-ginaadou i au mee ala e-hiihai ginai Goe bolo ginaadou gi-heia i-lodo nadau mouli. Goe gu-hagawelewele-mai gi gimaadou, gei gimaadou e-haihai-hua madau huaidu. Ma e-aha maa Goe nogo hagawelewele huoloo mai gi gimaadou, gei gimaadou nogo daudali-hua madau hiihai hala mai-loo namua.

64:6  Gimaadou huogodoo la-guu-hai digau gu-huaidu, mo madau hangahaihai humalia le e-koia e-dogolia labelaa. Idimaa madau huaidu, gimaadou guu-hai be nia lau-laagau ala guu-mae, ala e-angiangina gi-nia madagoaa e-logo i-di madangi.

64:7  Deai tangada e-hai dalodalo adu gi-di-Goe ai, deai tangada e-hanimoi e-dangi dono hagamaamaa gi-di Goe ai. Goe guu-huli gi-daha mo gimaadou, guu-kili gimaadou gi-daha i madau huaidu.

64:8  Gei Goe go Dimaadua, ma Kooe dela go di-madau Damana. Gimaadou e-hai be nia gelegele pigi, gei Goe go tangada dela e-hai ana boolo gi-nia gelegele aalaa. Goe ne-hai gimaadou,

64:9  malaa, Goe hudee hagawelewele mai gi gimaadou be e-langalangahia madau huaidu gaa-hana-hua beelaa. Gimaadou nia daangada ni-aau, aloho-mai gi gimaadou!

64:10  Au waahale dabuaahia la-guu-hai be-di anggowaa, gei Jerusalem hogi la-guu-hai di anggowaa.

64:11  Di-madau Hale Daumaha, di gowaa dabuaahia ge madamada dela nogo hagahagaamu-iei Goe go madau maadua-mmaadua, la-gu-haga-mooho i-di wele o-di ahi, mono gowaa huogodoo ala e-aloho-ai gimaadou la-gu-mooho.

64:12  Meenei Dimaadua, Goe ga-noho-hua, dau mee e-hai gi-di mee deenei ai?! E-hai behee? Goe ga-diiagi gimaadou gii-too gi-lodo di hagaduadua dela koia e-damanaiee, e-deemee di-madau kae?!

Chapter 65

65:1  Dimaadua ga-helekai boloo, “Au gu-togomaalia bolo ga-helekai gi-nia dalodalo o agu daangada, gei digaula digi dalodalo. Au gu-togomaalia gii-gida Au go digaula, gei digaula digi hagamada e-halahala au. Di golohenua la-digi dalodalo-mai gi-di-Au, ma e-aha maa Au gu-togomaalia bolo ga-helekai boloo, ‘Deenei Au, Au ga-hagamaamaa goodou!’

65:2  Au gu-togomaalia i-nia madagoaa huogodoo bolo e-hila-anga gi agu daangada ala e-hamaaloo dangihi nadau manawa, ala e-haihai nadau mee hala, ge e-hai-hua nadau hiihai.

65:3  Digaula e-haihai-hua nadau mee haga-langaadia gi-hagawelewele au, e-hai nadau tigidaumaha i-nia tigidaumaha o digau ala e-noho i-lodo di bouli i-lodo nadau hadagee-dabu, ge e-dudu nadau ‘incense’ i-hongo nia gowaa dudu-tigidaumaha o digau bouli.

65:4  Digaula e-hula gi-nia bagungoo mono waa-daalunga i-di boo, bolo e-dangidangi ang-gi nia hagataalunga o digau mmade. Digaula e-gai nia goneiga biigi, ge e-inu nia wai o-nia goneiga ala gu-tigidaumaha ang-gi nia balu-ieidu.

65:5  Gei digaula ga-helekai gi digau ala i-golo boloo, ‘Goodou noho i-daha mo gimaadou. Gimaadou le e-dabu huoloo di taletale ginai goodou.’ Au go Dimaadua e-deemee di-hila-anga gi digau ala e-hai beelaa! Dogu hagawelewele la-guu-hai be-di ahi dela e-deemee di-made-loo.

65:6  “Au guu-lawa di-haganoho di-nadau hagaduadua, guu-hihi gi-lala. Au ga-hagalee de-langahia nadau mee ala ne-hai, gaa-hui gi-muli

65:7  nia huaidu digaula mo nia huaidu o nadau maadua-mmaadua. Digaula gu-dutudu nadau ‘incense’ i nadau gowaa tigidaumaha ang-gi nia balu-god i-tomo nia gonduu, gu-helekai huaidu i-di Au. Malaa, Au ga-hagaduadua digaula gii-tau gi nadau hegau nogo hai.”

65:8  Dimaadua e-helekai, “Tangada e-hagammaa gi-daha nia ‘grape’ humalia ai, deeai, digaula e-hai nadau waini gi-nia maa. Gei Au hogi ga-hagammaa gi-daha agu daangada huogodoo, ga-hagamouli digau ala e-hai-hegau mai gi-di-Au.

65:9  Au ga-hagamaluagina digau Israel ala e-dau gi-di madawaawa Judah, nadau hagadili ga-hai-gowaa gi dogu henua gonduu. Agu daangada ne-hilihili ala e-hai-hegau mai gi-di-Au gaa-noho i-golo.

65:10  Digaula ga-daumaha-mai gi-di-Au gaa-dagi nadau siibi mono kau gi-di gowaa haangai-manu bapaba o Sharon i-bahi-i-dai, mo i-lodo di ‘Gowaa Mehanga Gonduu di Haingadaa’ i-bahi-i-dua.

65:11  “Gei di-maa ga-hai-gee adu gi goodou ala e-diiagi Au, e-haga-de-iloo Zion, dagu gonduu dabuaahia, ga-daumaha gi Gad mo Meni, nia balu-god haadanga-lamalia mo haadanga-balua.

65:12  Ma go di haadanga-balua ga-mmade-iei goodou hagahuaidu, idimaa goodou digi helekai gi dagu gahigahi, gei digi hagalongo gi agu helekai. Goodou gu-hilihili bolo goodou hagalee hagalongo-mai gi-di-Au mo-di hai di huaidu.

65:13  Malaa, Au e-hagi-adu gi goodou bolo digau ala e-daumaha ge hagalongo mo-di daudali Au, la-ga-logowaahee nadau meegai mo nadau wai inu, gei goodou ga-hiigai ga-hieinu. Digaula ga-tenetene gei goodou ga-haga-langaadia.

65:14  Digaula ga-daahili tenetene, gei goodou ga-tangi manawa-gee.

65:15  Agu daangada ne-hilihili ga-hai-hegau gi godou ingoo e-hai be-di haga-halauwa. Au, go di Tagi go Yihowah ga-hagammade goodou. Gei Au gaa-wanga di ingoo hoou gi digau ala e-hagalongo mai gi-di-Au.

65:16  Be koai i-lodo tenua dela e-hiihai gi-di hagamaluagina, geia ga-halahala di hagamaluagina mai baahi di God Manawa-dahi. Be koai dela e-dowangi, geia ga-dowangi i-di ingoo di God Manawa-dahi. Nia haingadaa o di-madagoaa guu-too gi-daha gu-haga-de-langahia.”

65:17  Dimaadua e-helekai boloo, “Au gaa-hai henuailala hoou mo-di langi hoou. Nia mee huogodoo ala namua, ga-haga-de-langahia huogodoo.

65:18  Goodou la-gi-tenetene ge gi-hagaamuina i agu mee ala gaa-hai. Idimaa, Jerusalem hoou dela gaa-hai ko-au, la-gaa-honu i-di tenetene, gei nia daangada di waahale deelaa gaa-noho manawa lamalia.

65:19  Gei Au dogu huaidina gaa-honu i-di tenetene, idimaa go Jerusalem mo ana daangada. Deai di lee e-dangi i-di lodo-huaidu i-golo ai, deai tangada e-dangi di hagamaamaa ai.

65:20  Nia dama ga-hagalee mmade gei digaula e-ligiana, gei nia daangada huogodoo ga-mouli i nadau mouli hua beelaa. Tangada dela gaa-tugi ono ngadau e-lau, gei mee digi made, e-modongoohia bolo mee damagiigi hua, gei tangada dela digi tugi nia ngadau e-lau, gei mee gaa-made, e-modongoohia bolo tangada deelaa la-ne-haga-halauwa ko-Au.

65:21  Nia daangada ga-haga-duu-aga nadau hale ga-noho-ai ginaadou no-lodo, ge deai tangada hua-gee e-hai-hegau gi-di-maa ai. Digaula gaa-dogi nadau hadagee-waini ga-humalia ang-gi ginaadou i-nia ‘grape’ aalaa, ge deai tangada hua-gee e-kae nia maa ai. Agu daangada ga-mouli waalooloo gadoo be nia laagau. Digaula ga-manawa lamalia huoloo gi nadau mee ala ne-dogi.

65:22  Nia daangada ga-haga-duu-aga nadau hale ga-noho-ai ginaadou no-lodo, ge deai tangada hua-gee e-hai-hegau gi-di-maa ai. Digaula gaa-dogi nadau hadagee-waini ga-humalia ang-gi ginaadou i-nia ‘grape’ aalaa, ge deai tangada hua-gee e-kae nia maa ai. Agu daangada ga-mouli waalooloo gadoo be nia laagau. Digaula ga-manawa lamalia huoloo gi nadau mee ala ne-dogi.

65:23  Nadau moomee gaa-kila humalia, gei nadau dama ga-hagalee tale ang-gi di haingadaa, idimaa, Au ga-madamada humalia i digaula mo nadau hagadili la-gi-muli-loo.

65:24  I-mua-hua digaula ma-ga-haga-lawa-ai nadau dalodalo mai gi-di-Au, gei Au ga-haga-gila-aga nia mee huogodoo ala nogo tangi-iei digaula.

65:25  Nia paana lodo-geinga mono dama-siibi ga-miamiami i-di gowaa e-dahi, gei nia manu laion ga-miami e-gai tagangudu o-nia kau. Nia gihaa ga-hagalee hagamadagudagu-dangada labelaa. Deai di-mee huaidu be-di mee e-hagahuaidu i-hongo dogu gonduu haga-madagu ge dabuaahia go Zion ai.” Aanei la nnelekai mai baahi Dimaadua.

Chapter 66

66:1  Dimaadua ga-helekai boloo, “Di langi i-nua la-go dogu lohongo, gei henuailala go dagu mee haaligi wae. Ma di hale behee dela belee hau go goodou mai gi-di-Au? Ma di gowaa behee dela belee noho-iei Au no-lodo?

66:2  Ma ko-Au dogu huaidina dela ne-hai henuailala mo-di langi hagatau. Au e-tene ang-gi digau ala e-hila-gi-lala, ge e-huli hoou nadau manawa, go digau ala e-mmaadagu i-di-Au, ge e-hagalongo-mai gi-di-Au.

66:3  “Nia daangada e-hai-hua go nadau hiihai. Ma e-hai be di-mee e-dahi ang-gi digaula be ginaadou e-tigidaumaha di-nadau kau be tigidaumaha tangada, be ginaadou e-tigidaumaha di-nadau siibi be e-hadi di uwa di paana, be ginaadou e-tigidaumaha nadau huwa-laagau be nia dodo biigi, be ginaadou e-tigidaumaha gi-nia ‘incense’ be e-dalodalo gi-di balu god. Digaula e-tenetene i nadau hai-daumaha gulugulua.

66:4  Gei Au ga-gaamai digaula gi-hongo di mooho dela koia e-mmaadagu-ai digaula, idimaa tangada ne-helekai ai gi dagu gahigahi, be e-hagalongo gi agu helekai. Digaula gu-hilihili bolo ginaadou e-hagalee hagalongo-mai gi-di-Au gei e-hai di huaidu.”

66:5  Goodou ala e-mmaadagu ge hagalongo gi Dimaadua, hagalongo gi nnelekai a-Maa, “Idimaa goodou ala e-manawa-dahi mai gi-di-Au, hunu daangada donu o au daangada e-hai-baahi adu gi goodou, e-de-hiihai e-buni-adu gi goodou. Digaula e-hagahuaidu goodou ge helekai boloo, ‘Dugu-anga gi Dimaadua gi-hagamodongoohia dono aamua e-haga-dagaloaha goodou, gi-gidee-gimaadou goodou e-tenetene.’ Malaa, digaula la-ga-haga-langaadia!

66:6  Hagalongo! Di lee damana i-lodo di waahale dela e-hai-mai i-di Hale Daumaha, la-di lee o Dimaadua e-hagaduadua ono hagadaumee!

66:7  “Dogu waahale dabu le e-hai gadoo be di ahina ma-ga-limalima dono haanau, gei hagalee mmae.

66:8  Ma tangada gu-gidee be longono di-mee beenei i-golo? Ma tagabae daangada e-haanau i-lodo di laangi e-dahi? Zion ga-hagalee hagaduadua duai i-mua tagabae daangada ma-ga-haanau.

66:9  Goodou hudee hagamaanadu bolo Au gaa-hai agu daangada gi-hoohoo di-nadau haanau, gei hagalee hai digaula gi-haanau.” Dimaadua ne-helekai.

66:10  Tenetene dalia Jerusalem; manawa lamalia gi-mee, goodou huogodoo ala e-aloho di waahale deenei! Tenetene dalia a-mee dolomeenei, goodou huogodoo ala nogo manawa-gee gi-mee!

66:11  Goodou ga-tenetene gi ono maluagina, be tama dulii dela i-nia uu o dono dinana.

66:12  Dimaadua e-helekai, “Au ga-gowadu gi goodou di maluagina dela e-noho hua beelaa. Di maluagina o-nia henua ga-malingi-adu gi goodou be di monowai dela e-hagalee odi. Goodou gaa-hai be tama dulii dela e-haangai go dono dinana, ge dagidagi go-mee i-lodo ono lima, ge aloho huoloo iei mee.

66:13  Au ga-haga-manawa lamalia goodou i-lodo Jerusalem, gadoo be tinana dela e-haga-manawa lamalia dana dama.

66:14  Di-godou madagoaa ma-ga-gidee di-mee deenei e-hai, goodou ga-manawa tenetene, gaa-hai goodou gi-maaloo, gi hagalee magi. Gei goodou ga-iloo bolo ma ko-Au go Dimaadua e-hagamaamaa digau ala e-hagalongo mai gi-di-Au, gei Au e-hagamodongoohia dogu hagawelewele gi ogu hagadaumee.”

66:15  Dimaadua e-hanimoi mo dana ahi. Mee gaa-maangi-mai i-hongo nia bakau o-di madangi gono maaloo, e-hagaduadua digau ala e-hagawelewele ginai Mee.

66:16  Mee ga-hagaduadua nia daangada huogodoo o henuailala ala guu-mmada ginai Mee bolo gu-ihala, gi-di ahi mo tulumanu dauwa, gei nia daangada dogologo gaa-mmade.

66:17  Dimaadua e-helekai, “Di hagaodi gi-muli gu-hoohoo-mai ang-gi digau ala gu-haga-madammaa ginaadou ang-gi di hai-daumaha gi-nia balu-god, ala e-taele gi-nia hadagee dabu, ge e-gai nia goneiga biigi mono gimoo mo nia meegai gulugulua ala i-golo.

66:18  Au gu-iloo nadau hagamaanadu mo nadau hangahaihai. Au e-hanimoi e-hagabudu nia daangada o-nia henua huogodoo. Di madagoaa digaula ga-lloomoi gi-di gowaa e-dahi, digaula ga-gidee di maaloo o ogu mogobuna,

66:19  ga-iloo bolo ma ko-Au dela e-hagaduadua digaula. “Malaa, gei Au gaa-dugu hunu ginaadou gi-daha, ga-hagau digaula gi-lodo nia guongo mo nnenua mogowaa-loo ala digi longono-ginaadou ogu longo, ge digi gidee-ginaadou ogu mahi mo ogu mogobuna: Au ga-hagau digaula gi Spain, Libya, Lydia mo ana daangada puu maalei, mo gi Tubal mo Greece. Digaula ga-hagi-aga dogu aamua i-lodo nia henua aanei.

66:20  Digaula ga-laha-mai gi-muli godou ihoo henua huogodoo be di kisakis mai gi-di-Au, mai i-nia henua huogodoo. Digaula ga-laha-mai digaula i-hongo nia hoodo, ‘donkey’, ‘camel’, mo i-lodo nia waga hongo-henua mono kulumaa, gi dagu gowaa nnoonua dabuaahia i-lodo Jerusalem, gadoo be digau Israel ma-ga-gaamai nadau huwa laagau tigidaumaha gi-di Hale Daumaha i-lodo nia ulu-mee gu-hagammaa gi nadau haihai daumaha hagamadammaa.

66:21  Au gaa-hai hunu ginaadou gii-hai digau hai-mee-dabu mo digau Levi.

66:22  “Gadoo be di henuailala hoou mo-di langi hoou gaa-noho hua beelaa mai i ogu mogobuna, gei godou hagadili mo godou ingoo gaa-noho hua beelaa.

66:23  I-nia laangi hagamiami huogodoo o-di Malama Hoou mo nia Laangi-Sabad huogodoo, nia daangada o nnenua huogodoo ga-lloomoi e-daumaha-mai gi-di-Au i kinei i Jerusalem,” Dimaadua e-helekai.

66:24  “Di madagoaa digaula ga-hagatanga, digaula ga-gidee nia huaidina gau mmade o digau ala nogo hai-baahi mai gi-di-Au. Nia ila ala e-gai digaula ga-hagalee mmade, gei di ahi dela e-dudu digaula ga-hagalee made. Nia daangada huogodoo o henuailala ala ma-ga-mmada ginai, ga-manawa huaidu huoloo.”