LinVB - Isaiah

Chapter 1

1:1  Yoka makambo ma Yuda mpe ma Yeruzalem, maye Izaya, mwa­na wa Amos, amonoki o limoni o eleko ya Ozia, Yotam, Akaz na Ezekia, bakonzi ba Yuda.

1:2  Yo likolo, yoka ; yo nse, fongola matoi, mpo Yawe akoloba boye : Naboti bana mpe nabokoli bango, kasi batombokeli ngai.

1:3  Ngombe eyebi nkolo wa yango, mpunda eyebi esika nkolo akopesaka yango bilei. Kasi Israel ayebi ngai te, bato ba ekolo ya ngai bazali na mayele te.

1:4  Mawa na bino, bato ba masumu, ekolo ya bato babe, libota lya bato bakosalaka mabe, bato babeba ! Botiki Yawe, botioli Mosantu wa Israel, bopesi ye mokongo.

1:5  Bolingi nabete bino lisusu, awa bokobi kotomboko ? Bozali kobele mitó, mitema mya bino milembi nye.

1:6  Banda nse ya makolo tee motó, nzoto mobimba ebebi : bobele matutu na mpota izali kofungwana, basukoli to bakangi yango te, basopeli yango mafuta mpe te.

1:7  Mokili mwa bino mokomi mopotu, bingumba bya bino biziki na móto ; o miso ma bino bauta bayibi mbuma ya bilanga bya bino ; binso bibebi.

1:8  Mawa na mwasi ya Sion okomi molako o elanga ya vino, lokola ndako ya mokengeli o ela­nga ya mbika, lokola engumba ezingami na ba­nguna.

1:9  Soko Yawe wa bokasi bonso abikisaki mwa ndambo ya bato te, mbele tosilaki lokola Sodoma, mbele tokomaki lokola Gomora.

1:10  Bino bakonzi ba Sodoma, boyoka liloba lya Yawe, bino bato ba Gomora, bofongola matoi na mateya ma Nza­mbe wa biso !

1:11  Yawe alobi : Nasala nini na mabo­nza ma bino ebele ? Nalembi na mabonza ma kotu­mba ma mpata babali mpe na mafuta ma bana ngombe. Nazali kosepela lisusu te na makila ma ngombe babali, ma bana mpata mpe ma ntaba babali.

1:12  Nani abyangi bino mpo bonyata lopango la ngai, ntango boyei mpo ya komilakisa o miso ma ngai ?

1:13  Botika koyela ngai mabonza ma mpamba, naboyi ata nsolo ya mango. Sanza ya sika, mikolo mya Sabato, makita… Naboyi biyenga bya bato bazangi bosembo.

1:14  Nayini sanza ya sika na biyenga bya bino, bikomeli ngai mokumba moye na­lingi komeme lisusu te.

1:15  Ntango botomboli maboko, na­ko­zipa miso. Ata bosambeli mingi, nakoyoka te, mpamba te, maboko ma bino matondi na makila.

1:16  Bosukola maboko, bomipetola, namono mabe ma bino lisusu te, botika kosala mabe.

1:17  Boyekola kosala malamu, boluka bosembo. Bosalisa baye banyokwami, bobatela mwana etike, bolongisa mwasi bozenge.

1:18  Yawe alobi : Boya mpo tosamba ! Ata masumu ma bino mazali motane lokola makila, makokoma peto lokola mbula ya mpembe, ata mazali motane lokola ngola, makokoma kitoko lokola nsuki ya mpata.

1:19  Soko bondimi kotosa ngai, bokolia mbuma ya mokili mwa bi­no.

1:20  Kasi soko boboyi kotosa mpe botomboki, bokokufa na mompanga. Yawe moto alobi bongo.

1:21  Boniboni mboka ya botosi ekomi lokola mwasi ndumba ? Mboka eye esantu mpe ya bose­mbo ekomi kotonda na babomi.

1:22  Palata ya yo ekomi na bosoto, vino ya yo ebongwani mai.

1:23  Bankumu ba bino batomboki, bayokani na bayibi. Banso balingi ’te bato bapesa ba­ngo makabo, bakowelaka mabonza. Bakolongisaka bana bitike te, bakoboyaka koyoka basi bazenge.

1:24  Yango wana, ngai Yawe Nzambe wa bokasi bonso, ngai, Nguya ya Israel, nalobi boye : Nakozongisela banguna mabe basalaki, nakobekola banguna ba ngai.

1:25  Loboko la ngai lokobete yo. Nakopetola yo na nkisi lokola bakopetolaka bibende, nakolongola bosoto bwa yo bonso.

1:26  Nakosala ’te bazuzi ba yo bakoma lokola baye ba kala, balaki ba yo bakoma mpe lokola ba­ye ba kala. Na nsima bakobyanga yo ‘Engu­mba ya bosembo’, mpe ‘Engumba ya lobokó’.

1:27  Sion akobika na bosambisi ye, baye na kati ya Sion bakobo­ngwana mitema bakobika mpo ya bose­mbo.

1:28  Bipumbulu na basumuki, banso elongo, bakosila, baye bakotika Yawe, bakokufa.

1:29  O ntango ena bokoyoka nsoni na gbukulu iye bokolingaka, mpe na bilanga bya ndunda bikosepelisaka bino.

1:30  Zambi bokokoma lokola gbukulu esila nkasa, lokola elanga ya ndunda ezangi mai.

1:31  Moto monene akokoma lokola matiti makauka, mpe misala mya ye mikozala lokola móto ; inso ibale ikozika elongo, mpe moto moko akokoka kozimisa móto mwango te.

Chapter 2

2:1  Yoka makambo ma Yuda na Yeruzalem, maye Izaya, mwana wa Amos, amonoki.

2:2  O mikolo mikoya ngomba ya nda­ko ya Yawe ekoleka ngomba inene na ike inso na lokumu. Bato ba bikolo binso bakokende kuna.

2:3  Bato ebele bakoya kuna mpe bakoloba : « Yakani, tobuta ngomba ya Yawe, tokende o ndako ya Nzambe wa Yakob, alakisa biso nzela ya ye mpe tokolanda yango. Solo, Mobeko mwa Nzambe mokouta o Sion, liloba lya Yawe likouta o Yeruzalem. »

2:4  Akosambisa bato ba bikolo binso, akozala zuzi wa bato ebele. Na mimpanga mya bango bakotula nkongo, mpe na makongo ma bango bakotula bibende mpo ya kokata mabelé. Bakotombola lisusu mimpanga te mpo ya kobunda na ekolo esusu, bakoyekola lisusu kobunda bitu­mba te.

2:5  Yakani, bino bato ba libota lya Yakob, tolanda mwinda mwa Yawe. Yawe akosambisa bato ba lolendo

2:6  Solo, obwaki ekolo ya yo, bato ba libota lya Yakobo. Ekolo ya bango etondi na bamoni-makambo, na banganga nkisi, lokola epai ya ba-Filisti, mpe na bauta.

2:7  Ekolo ya bango etondi na palata mpe na wolo, na nkita nsuka te, na farasa mpe na makalo ebele.

2:8  Ekolo eye etondi na bikeko bya banzambe ba lokuta, bakokumbamelaka biloko bango moko basali, bakokumisaka bikeko bisalemi na maboko ma bango.

2:9  Bakitisa bango, bato baye base­ngeli kokufa, olimbisa bango te.

2:10  Bokende o mibenga mya ngomba, bobombama o kati ya mabelé, mosika na Yawe mpe na nkembo ya bokonzi bwa ye.

2:11  Bakokitisa bato ba lolendo, mpe bato ba lofundo bakosambwa. O mokolo mona Yawe, se ye moko, akozwa lokumu.

2:12  Zambi mokolo moko Yawe wa bo­kasi bonso akosukisa bato banso ba lolendo mpe ba lofundo, akokitisa bato banso bamitomboli.

2:13  Akokweisa nzete ya sédere inso ya Libano, akosukisa nzete ya kambala inso ya Basan.

2:14  Akokitisa ngomba inene na ngomba ike inso itombwami.

2:15  Akobuka manongi malai manso mpe mapango manso ma bibo­mbamelo.

2:16  Akobungisa masuwa manso ma Tarsis na masuwa manso matondi na biloko.

2:17  Bakokitisa bato ba lolendo, mpe bato ba lofundo bakosambwa. O mokolo mona Yawe, se ye moko, akozwa lokumu,

2:18  kasi banzambe ebele ba lokuta bakolimwa.

2:19  Bakokoto o mibenga, o mabulu ma mabelé, mosika na Yawe mpe na nkembo ya bokonzi bwa ye, mokolo akoteleme mpo ya koni­ngisa mokili.

2:20  O mokolo mona bato bakobwakela mpoko na mangembo bikeko bya bango bya palata mpe bya wolo, biye basalaki mpo ya kokumbamela byango.

2:21  Bakokoto o mibenga mpe o mabulu ma ngomba mosika na Yawe mpe na nkembo ya bokonzi bwa ye, mokolo akoteleme mpo ya koni­ngisa mokili.

2:22  Botia mitema na bato te, mpo bazali se mpema : bango nde banani ?

Chapter 3

3:1  Mokonzi Yawe wa bokasi bonso akobotolo bato ba Yeruzalem mpe ba Yuda biloko binso bisengeli na bango, mampa na mai manso.

3:2  Akolongola elombe na soda wa bitumba, na zuzi, na profeta, na nganga nkisi na nkumu,

3:3  komanda wa basoda, nkumu na molaki, moto wa bwanya, moto wa ntoki na moloki.

3:4  « Nakotia bilenge bazala bayangeli ba bango, báyangela lokola bango moko balingi. »

3:5  Bato bakoyokisana mpasi mpe baye bazalaki baninga bakobetana. Bilenge babali bakoluka babange na makambo, bifaka bya bato bakoluka matata na bato ba lokumu.

3:6  Moto akokanga ndeko wa ye o ndako ya tata, akoloba : « Yo ozali naino na elamba, bongo zala mokonzi wa biso, tokopesa yo bokonzi o mboka eye ebebi nye. »

3:7  Kasi mosusu akoyanola : « Ngai nazali monganga te, o ndako ya ngai nazali na mampa te, elamba mpe te, bolubola ngai mokonzi wa ekolo te. »

3:8  Solo, Yeruzalem etuti libaku, Yuda ekwei, mpamba te, na maloba mpe na misala mya bango baluki se kotumola nkembo ya Ya­we.

3:9  Bilongi bya bango nsoni te bizali kofunda bango. Balakisi masumu polele lokola bato ba Sodoma, baluki kobomba mabe ma bango te ! Bango moko balingaki ’te mabe ma­kwela bango.

3:10  Boloba : Esengo na moto wa bose­mbo, mpo akozwa litomba mpo ya misala mya ye.

3:11  Kasi mawa na moto mabe, mpamba te, bakosala ye lokola ye moko asalaki.

3:12  E bato ba ngai, bato ba lokoso la mbongo bakonyokoloko bino, mpe bayangeli ba bino bakobotolo bino biloko. E bato ba ngai, bakambi ba bino bakobungisaka bino nzela, bakosalaka ’te bokoka kolanda nze­la ya bino te.

3:13  Kasi Yawe atelemi mpo ya kofu­nda bato, mpe mpo ya kosambisa bikolo bya bato.

3:14  Yawe akosambisa bakolo na bakonzi ba mboka boye : « Bino bato boliaki mbuma ya ela­nga ya vino, bobombi o ndako biloko biye bobotoli babola.

3:15  Nani alingisi bino konyata bato ba ekolo ya ngai, mpe konyokolo babola ? » Mokonzi, Yawe wa bokasi bonso, alobi bongo.

3:16  Yawe alobi boye : Tala lolendo la bilenge basi ba Siona : bazali kotombola mitó, kofina liso, kode­nda mpe kolelisa bikómo bya makolo.

3:17  Yawe akobelisa bilenge basi ba Siona mpanda o mitó, mpe akokokola mitó mya bango.

3:18  Mokolo mona Yawe akolongola biloko bya monzele, ngengele o makolo, bilili bya mwese na sanza,

3:19  biloko bya matoi, bikómo na matambala,

3:20  ngabuni na nsinga ya makolo, nsi­nga ya sapato, sanduku ya malasi mpe biloko bya bikelakela,

3:21  mpete ya misapi na biloko bya zolo,

3:22  bilamba bya monzele na milato mya mapeke, bilamba bya nkingo na mabenga ma kotia biloko,

3:23  talatala na bilamba bya malekani, bilamba bya motó na bikembiseli bakolataka o ntolo.

3:24  O mokolo mona bakobimisa nsolo ebe esika ya malasi, bakolata mokaba te, kasi nsinga mpamba, bakokanga nsuki te, kasi bakokokola bango mitó, bakolata elamba kitoko te, kasi se nkungulu, bakozala elongi kitoko te, kasi bakokata nzoloko na ebende ya móto.

3:25  Babali ba yo bakokufa na mo-mpanga, bilombe ba yo bakokweya o etumba.

3:26  O bizibeli bya mboka bakokimela mpe bakozala na lilaka. Awa babali batiki yo, okolala o mabelé.

Chapter 4

4:1  O mokolo mona basi nsambo bakowela mobali moko, bakoloba : « Tokolia mampa ma biso moko, tokolata bilamba bya biso moko, kasi ondima ’te tozala na nko­mbo ya yo, longola nsoni ya biso. »

4:2  O mokolo mona, eboto oyo Yawe akobimisa akopesa lokumu mpe nkembo na ekolo ya biso, mwana wa ekolo akozala lokumu mpe ese­ngo ya bato ba Israel babiki.

4:3  Baye banso batikali o Sion mpe babiki o Yeruzalem, bakobyanga bango basantu, nkombo ya baye banso ikokomama o Yeruzalem mpo bazala na bomoi.

4:4  Mokolo Yawe akosukola mbindo inso ya Sion, mpe akopetola Yeruzalem mpo ya makila masopani wana na mompepe mwa ye mokokata makambo mpe na eku­mbaki ekopelisa móto,

4:5  Yawe akotanda londende likolo lya ngomba Sion mobimba mpe lya bato bakosangana wana na moi ; na butu akobimisa molinga mokongenge lokola móto. Nke­mbo ya Yawe ekozipa bango ba­nso,

4:6  ekozala lokola ema, lokola ndako ya nkasa : ekopesa malili o ntango ya molunge makasi, mpe ekobatela bato o ntango ya ekumbaki mpe ya mbula.

Chapter 5

5:1  Tika nayembela moninga wa ngai nzembo, nzembo ya moninga mpo ya elanga ya ye ya vino. Moninga wa ngai azalaki na ela­nga ya vino o ngomba ya mabelé malamu.

5:2  Alongoli mabanga, akati elanga, mpe aloni wana nzete ya vino iye aponoki. O elanga eye atongi linongi, atimoli wana mpe ekamolelo ya vino. Akanisi ’te akozwa mbuma ya vino, kasi azwi bobele mbuma ngai.

5:3  Sikawa, bino bato ba Yeruzalem mpe ba Yuda, bokata likambo kati ya ngai na ela­nga ya ngai ya vino.

5:4  Eloko nini nakokaki kosala mpe nasali te ? Nakanisaki ’te nakozwa mbuma ya vino kitoko, mpo nini nazwi bobele mbuma ngai ?

5:5  Sikawa nakoyebisa bino ndenge nini nakosala na yango : nakolongola lopango mpo ’te nya­ma isilisa mbuma, nakobuka efelo mpo ’te bato ba­nyata yango.

5:6  Nakokomisa yango esobe mpa­mba, nakokata bitapi na matiti lisusu te ; se nzube na matiti mabe bikola wana, nakopekisa mampata manokisa mbula lisusu te.

5:7  Elanga ya Yawe wa bokasi bonso, nde libota lya Israel, mpe nzete eye ye aponoki, nde bato ba Yuda. Akanisaki ’te bakosala malamu, nzo­kande bazangaki bosembo, alukaki bosolo, kasi akuti se boleli bwa babola.

5:8  Mawa na bato bakotongaka ndako ebele, mpe na baye bakosombaka bila­nga bipai binso, balingi kozala se bango moko o mokili mpo moninga azwa lisusu esika ya kofanda te.

5:9  Nayoki na matoi ndai eye Yawe wa bokasi bonso alayi : Ya solo, ndako ebele ikobukana, bato bakofanda o ndako inene lisusu te.

5:10  Biteni zomi bya elanga bikopesa se milangi minei mya vino, sani zomi ya mbuma ya mampa ikobimisa se sani yoko.

5:11  Mawa na bato bakomeleka masanga makasi ut’o ntongo, mpe bakoumelaka kina butu na bolangwi vino.

5:12  Nzenze na lokombe, mbonda na mpiololo ikolelaka o ntango bazali komele mpe kolangwa. Kasi bakokebaka na misala mya Yawe te, bakomonoko mosala mwa maboko ma ye te.

5:13  Yango wana bato ba ngai bakoke-nde o boombo, zambi bazangi mayele. Bankumu ba ekolo bakokufa na nzala mpe basusu banso bakokufa na mposa ya mai.

5:14  Yango wana mboka ya bawa ekofungwama polele, ekofungola monoko monene ; bato banene ba ekolo bakokita wana, baye banso bazalaki kosepela mpe kolanda bisengo.

5:15  O ntango ena bakokitisa bato ba lolendo, mpe bato ba lofundo bakosambwa.

5:16  Yawe wa bokasi bonso akozwa lo­kumu mpo ya bosembo bwa ye, mpe Nzambe mosantu akolakisa bosantu mpe bosembo bwa ye.

5:17  Mokolo mona bana mpata bakolia o esobe ya bango, bana ntaba bakoluka bilei o mapa-ngo bango batiki.

5:18  Mawa na baye bazali kobenda bitumbu na makulu ma bokosi, mpe masumu lokola bakobendaka makalo.

5:19  Bango bakolobaka : « Tika asala no­ki, bongo tomono makambo alingi ko­sala. Mosantu wa Israel asala mosala moye alingi kosala, mpo toyeba mwango. »

5:20  Mawa na baye bakotangaka makambo mabe eloko malamu, mpe makambo malamu eloko ya mabe, baye bakotangaka molili mwinda, mpe mwinda molili, likambo lya bololo eloko elengi, mpe likambo elengi eloko ya bololo.

5:21  Mawa na baye bakomimonoko ba­to ba bwanya, mpe bakomikumisaka ’te bazali ba­to ba mayele.

5:22  Mawa na baye bazali bilombe mpo ya komele vino, baye bazali na mayele mingi ma kosangisa masanga na lotoko.

5:23  Bakolongisaka moto mabe soko apesi libonza, mpe bakopimaka moto semba ma­koki ma ye.

5:24  Yango wana, lokola móto mokosilisa matiti makauki, mpe lokola nkasa iye iziki ikoli-mwa, bakosuka lokola nzete ipoli na nki­nga, fulele ya yango ikokweya o nse. Mpamba te, baboyaki mobeko mwa Yawe wa bokasi bonso, bakinolaki liloba lya Mosantu wa Israel.

5:25  Yango wana Yawe asiliki mingi na ekolo ya ye, atomboli loboko mpe abeti ba­ngo, ngomba ikomi kolenge, mpe bibembe bya bango bilali lokola bosoto o balabala. Ata bongo, nkanda ya Yawe ekiti te, mpe azongisi loboko la ye naino te.

5:26  Na elembo Yawe abyangi bato ba ekolo mosika, abeti mpiololo mpo ya kosangisa bango o nsuka ya mokili, mpe tala, bazali koya noki mpenza.

5:27  Epai ya bango moto moko te oyo alembi nzoto to akwei, moko te oyo alali mpongi, to alongoli mokaba o loketo, to nsinga ya sapato ya ye ekatani.

5:28  Makula ma bango mazali bopotu mpe matimbo mabendami, matambi ma farasa ma bango mazali lokola mabanga ma móto, yika ya makalo lokola mompepe makasi.

5:29  Baleli lokola ntambwe mwasi, lokola bana ntambwe, ingali, ikangi nyama mpe ibendi yango : mpe moto moko te akoki kobotolo yango lisusu.

5:30  Mokolo mona bakogangela bango makasi mpenza ; ekozala lokola makeléle ma mbu enene. Oyo akotala mokili, akomono se molili mwa nsomo, mpo ya mampata maindo makozipa moi.

Chapter 6

6:1  O mobu mokonzi Ozia awei, namoni Yawe afandi o ngwe­nde enene, alati elamba elai elali o mabelé ma Tempelo.

6:2  Baserafim batelemi likolo lya ye. Moko moko azalaki na mapapu motoba : mabale ma bozipi elongi, mabale ma bozipi makolo, mabale ma bopimbwi.

6:3  Bazalaki kobelelana : « Yo mosantu, yo mosantu, yo mosantu, yo Yawe wa bokasi bonso ; nse mobimba etondi na nkembo ya yo ! »

6:4  Awa ba­zalaki koganga bongo, makonzi ma bizibeli mabandi koningana mpe Te­mpelo mobimba etondi na milinga.

6:5  Nalobi : « Mawa na ngai, nasuki e ! Mpamba te, ngai moto wa monoko mbindo nafandi o kati ya bato bazali na monoko mbindo, mpe miso ma ngai mamoni Mokonzi Yawe wa bokasi bonso. »

6:6  Serafim moko apimbwi epai ya ngai, o maboko azalaki na likala lya móto liye akamati o altare na lingato.

6:7  Atii lya­ngo o mbebu ya monoko mwa ngai, alobi : « Awa likala liye lisimbi mbebu ya yo, lisumu lya yo lilo­ngwi, mabe ma yo malimbami. »

6:8  Na nsima nayoki maloba ma Yawe, atuni : « Natinda nani ? Nani akozala ntoma wa ngai ? » Nayanoli ye : « Ngai oyo, tinda ngai. »

6:9  Alobi na ngai : « Kende koloba na bato boye : Matoi bokofongola, kasi bokososola te ; miso bokotala, kasi bokomono te.

6:10  Okomisa mitema mya bato baye lokola libanga, zipa matoi ma ba­ngo, kanga miso ma bango. Bongo bamono na miso te, bayoka na matoi te ! Mitema mya ba­ngo miyeba ntina te ! Bongo babongola mitema te, mpe babika te ! »

6:11  Natuni : « E Mokonzi, mikolo boni makambo maye makoumela ? » Azongiseli ngai : « Tee bingumba binso bikokufa, tee bato banso bakokima mboka mpe ndako ya bango, tee mabelé ma bango makobeba mpe makokoma mopotu,

6:12  tee Yawe akobengana bato mpe mokili mwa bango mokokoma mpamba mpe mokozala na bato lisusu te.

6:13  Mpe soko yoko ya zomi ya bato batikali, bango mpe bakosila lokola ekumu etikali ntango basili kokata gbukulu na wenge. Ekumu eye ekozala mboto esantu. »

Chapter 7

7:1  Ezalaki o eleko ya mokonzi Akaz, mwana wa Yotam, nkoko wa Ozia, mokonzi wa Yuda. Rason, mokonzi wa Aram, akei kobu­ndisa Yeruzalem, elongo na Peka, mwana wa Remalia, mokonzi wa Israel, kasi bakokaki kobotolo yango te.

7:2  Bayebisi bato ba ndako ya Davidi ’te bato ba Aram bayei kopika nganda o mokili mwa Efraim. Bongo mokonzi na bato banso ba Yeruzalem babandi kolenge lokola nzete ya zamba ikoninganaka o ntango ya mompepe.

7:3  Yawe alobi na Izaya : « Kende na mwana wa yo Sear-Yasub kokutana na Akaz. Bokokuta ye penepene na liziba lizali o liboso soko olandi nzela ya elanga ya Mosukoli bilamba.

7:4  Loba na ye boye : Kitisa motema ! Oba­nga te, olenge te na bomoni Rason wa Aram na mwana wa Remalia, mpo bazali kotoka na nkanda lokola nkoni esila móto, etikali se milinga.

7:5  Ba-Aram, ba-Efraim mwana wa Remalia bakani kosukisa bino, balobi :

7:6  « Tokende kobundisa bato ba Yuda, topanza bango ; tosilisa ba­ngo mpe totia wana mwana wa Tabeel azala mokonzi. »

7:7  Yango wana Yawe Nzambe alobi boye : Yango ekosalema te !

7:8  Mpamba te, Damasko ezali se mboka mokonzi ya Aram, mpe Rason azali se mokonzi wa Damasko. Etikali bobele mibu ntuku motoba na mitano Efraim ekozala lisusu ekolo ya bato te.

7:9  Samaria ezali se mboka mokonzi ya Efraim, mpe mwana wa Remalia azali se mokonzi wa Samaria. Soko botii mitema na ngai te, bokokoka bango te. »

7:10  Yawe alobi mpe na Akaz :

7:11  « Se­nge Yawe, Nzambe wa yo, elembo, euta o likolo to o nse ya mabelé. »

7:12  Akaz ayanoli : « Te, nakosenge eloko te, nakomeka Yawe te. »

7:13  Bo­ngo profeta Izaya alobi : « Boyoka, bato ba libota lya Davidi : bosili kolembisa bato, bolingi nde kolembisa Nzambe lokola ?

7:14  Yango wana Mokonzi yemei akolakisa bino elembo, yango eye : Elenge mwasi akweli zemi, akobota mwana mobali, akopesa ye nkombo Emanuel.

7:15  Mwana akomele mabéle mpe akolia mafuta ma nzoi tee akoyeba koboya bobe mpe kopono bolamu.

7:16  Liboso ’te mwana ayeba koboya bobe mpe kopono bolamu, mikili mya bakonzi baye babale bakobangisa yo mikosila bato.

7:17  Yawe akopesa yo ná ekolo ya yo, ná bato banso ba libota lya tata wa yo, mikolo lokola mimononi naino te ut’o eleko mikili mya Efraim na Yuda mikabwanaki (Mokonzi wa Asur). »

7:18  O mokolo mona Yawe akobenga nzinzi ikouta o nsuka ya ebale ya Ezipeti, mpe nzoi ikouta o mokili mwa Asur.

7:19  Yango inso ikoya mpe ikokende kofanda o mabwaku, o madusu ma mabanga, o kati ya nzube mpe o bisika bakomeleke mai.

7:20  Mokolo mona Mokonzi akodefa lotebu o ngambo ya Ebale, ye mokonzi wa Asur, mpo ya kokokola yo motó mpe kokata nsuki ya nzoto mpe ma­ndefu.

7:21  Mokolo mona moto na moto akobokolo ngombe mwasi mpe mpata ibale.

7:22  Bongo mabéle makozala mingi, bakolia manteka, baye batikali bakolia manteka mpe mafuta ma nzoi.

7:23  O mokolo mona, elanga ya nzete ya vino nkoto yoko, iye ikoki na mitako ya palata nkoto yoko, inso ikokoma nzube na nsende.

7:24  Bakoyingela wana se na makula mpe na litimbo, mpo mokili mobimba mokokoma se nzube na nsende.

7:25  O ngomba inso bazalaki kokata bilanga bakosala lisusu na nkongo te, mpo itondi na nzube mpe na nsende ; bakotinda ngombe wana mpe mpa­ta ikonyata yango.

Chapter 8

8:1  Yawe alobi na ngai : « Kamata libaya linene mpe koma wana nkoma na ekomeli ya ebende maloba maye : ‘Bobotoli boyei - Boyibi bobelemi’.

8:2  Mpe kamata banzeneneke ba solo : nganga Nzambe Uria mpe Zekaria, mwana wa Yeberikia. »

8:3  Na nsima nakei epai ya profeta mwasi ; akweli zemi mpe aboti mwana mobali. Yawe alobi na ngai : Pesa ye nkombo ‘Bobotoli boyei - Boyibi bobelemi’.

8:4  Mpo liboso ’te mwana ayeba koloba ‘tata’ to ‘mama’ bakoyela mokonzi wa Asur nkita ya Damasko mpe biloko ba-Samaria babotoli.

8:5  Yawe alobi mpe :

8:6  Awa bato ba ekolo eye bakinoli mai ma Silowe maye makotiolaka malembe, mpe balengi liboso lya Rason mpe mwana wa Remalia,

8:7  Mokonzi akoti­ndela bango mai ma Ebale makotiolaka makasi mpe ma bozindo : mokonzi wa Asur na nguya ya ye inso. Mai ma ebale eye makoleka mabongo mpe makosopana o mabelé ma mpembeni.

8:8  Mai mango makoleka tee o Yuda, makozindisa mokili mpe makokoma tee o nki­ngo, makotandema o ekolo ya yo mobimba, e Emanuel.

8:9  Bino bato ba bikolo, bobanga mpe boyoka nsomo, bofungola matoi, bino bato ba mikili mosika ! ata bomilengeli na etumba, bakolonga bino.

8:10  Mikano bokani mikosalema te, maye bokosakola makozala se mpamba, zambi ‘Nzambe azali na biso’.

8:11  Ntango Yawe akangi ngai na loboko mpe alobi bongo, akebisi ngai ’te nalanda nzela ya bato baye te :

8:12  « Botanga ‘boangeleli’ te maye bakotangaka mbala inso ‘boangeleli’ ; maye bango bakobangaka, boba­nga mango te ; boyoka nsomo te.

8:13  Bokotanga Yawe wa bokasi bonso mosantu, bobanga bobele ye, boyoka nsomo se mpo ya ye.

8:14  Ye akozalela mabota mabale ma Israel ndako esantu, libanga lya libaku liye bato bakotuta, libanga linene likokweisa bango ; akozalela bato ba Yeruzalem motambo mpe monyama.

8:15  Bato ebele bakotuta libaku, bako­kweya mpe bakozoka, bakokoto o motambo mpe bakokangema.

8:16  Oteya bayekoli ba ngai maloba maye, lokola mibombamo mya solo. »

8:17  Ngai nakozila Yawe oyo abombeli bato ba Yakobo elongi, mpe nakotia motema se na ye.

8:18  Tala ngai na mpe bana baye Nza­mbe apesi ngai, tokomi bile­mbo bya kokamwa o miso ma ba-Israel, biuti na Yawe wa bokasi bonso, oyo afandi o ngomba Sion.

8:19  Mpe soko bayebisi bino : « Boke­nde kotuna milimo mya bawa to bamoni-makambo baye bakolobaka na bonkutu, mpo bato banso bakotunaka banzambe ba bango, to bato bawa mpo ya kosalisa bato bazali na bomoi ! »

8:20  boyoka mpe bokeba na mateya mpe na malako ma ngai ! Mawa na moto akoloba bongo te, mpo bakoki koboya mateya mana te.

8:21  Bakoyengayenga o mokili mpe bakolembe na nzala. Mokolo bakokufa na nzala, bakosilika, bakotombela mokonzi wa ekolo na Nzambe bobe. Soko bakotala likolo

8:22  to bakotala o nse, bakomono bipai binso mpasi na molili, bakokangema na londende lokasi mpe na molili mwa nsomo.

8:23  Moto akokangema na molili moye, akokima wana te.

8:24  Kala Yawe asambwisaka mikili mya Zabulon na Neftali, kasi na nsima akobongisa nzela ya mbu na nkembo, kin’o ngambo ya Yordane mpe o bikolo bisusu.

Chapter 9

9:1  Bato batambolaki o molili bamoni mwinda monene, mwinda mongengeli bato bafa­ndaki o mokili mozangi moi.

9:2  Okolisi ekolo ya biso, otondisi bango na esengo. O miso ma yo bakomi kosepela lokola bato bauti kobuka mbuma o bilanga, lokola bato bazali kokabolana biloko babotoli o etumba.

9:3  Zambi obuki ekangiseli ekangaki bango, lingenda liye babeteki bango o mapeke, na fimbo ya kapita wa banyokoli, obuki yango lokola o mikolo mya Madian.

9:4  Bikoto binso bizalaki konyata mabelé na makeléle, minkoto minso mibebi na makila, batumbi byango, binso bisili na móto.

9:5  Mpamba te, baboteli biso mwana moko, bapesi biso mwana mobali. Bokonzi bozali o mapeke ma ye. Bakobyanga ye na nkombo iye : « Molaki wa solo, Nzambe wa bokasi bonso, Tata wa lobiko, Mokonzi wa boboto. »

9:6  Bokonzi mpe boboto bokosuka te mpo ya ngwende ya Davidi o mikolo akozala mokonzi ; akoyangela bato ba ye na bose­mbo mpe na boboto. Banda lelo tee o bileko binso Yawe wa bokasi bonso, na bolingi bwa ye, akosala bongo.

9:7  Mokonzi atindeli Yakobo liloba, liloba lya ye likweli Israel.

9:8  Bato ba ekolo mobimba bayebi lyango, ná ba-Efraim ná ba-Samaria. Kasi na lofundo mpe na lolendo lonene balobaki :

9:9  « Ata biliki ikwei, tokotonga na mabanga manene, ata bakati nzete ya figi, tokolona nzete ya sedere ! »

9:10  Kasi Yawe atindeli bango monguna Rason, atindeli bango banyokoli babundisa bango :

9:11  ba-Aram o Esti, ba-Filisti o Westi, bango balei Israel na lokoso la ba­ngo. Kasi nkanda ya Yawe esili te, na lo­boko la ye azali kokanela ba­ngo naino.

9:12  Kasi bato bazongi te epai ya oyo abeteki bango, baluki Yawe te, oyo azali na bokasi bonso.

9:13  Yango wana Yawe akateli Israel motó na mokila, akati ná nkéle ná mbila se o mokolo moko.

9:14  Mokóló wa mboka na nkumu, bango nde motó, profeta oyo akoteyaka lokuta, ye mokila.

9:15  Bakambi ba ekolo babungisi bato ba bango nzela, mpe bato ba ba­ngo bakomi kotelengana.

9:16  Yango wana Mokonzi akoyokela lisusu bilenge, bana bitike, na basi bazenge ba ye ngolu te. Mpamba te, bango banso babebi mpe bazali basumuki, bakolobalobaka se ma­loba mazangi ntina. Kasi nkanda ya Yawe esili te, na loboko la ye azali kokanela bango naino.

9:17  Solo, mabe ma bango makomi lokola móto mokosilisa nzube na nse­nde mpe mokotumba nzete inso ya zamba, mpe milinga mikobuta o likolo.

9:18  Mpo ya nkele ya Yawe wa bokasi bonso ekolo ebebi mpe bato bakomi kozika na móto. Moto moko akoyokela ndeko wa ye mawa te.

9:19  Bayibi o loboko la mobali, bazali se na nzala, balei o loboko la mwasi, kasi batondi te. Moto nyonso alei monsuni mwa ndeko wa ye.

9:20  Manase alei Efraim, Efraim alei Manase. Banso babale babundisi Yuda. Kasi nkanda ya Yawe esili te, na loboko la ye azali kokanela bango naino.

Chapter 10

10:1  Mawa na baye bakobimisaka mibeko mibe, mpe bakokomaka bitinda bikoyokisa bato mpasi.

10:2  Bakopimaka bongo babola makoki ma bango mpe bato ba ngai biye bisengeli na bango ; bakoyibelaka basi bazenge biloko, mpe bakobotoloko bana bitike biloko.

10:3  Bino bokosala nini o mokolo bakokata makambo, o mokolo mpasi ekouta na bato ba mosika ? Bokokima epai ya nani mpo ya kozwa lisalisi ? Bokobomba nkita ya bino epai ya nani ?

10:4  Mokolo mona bokogumbama lokola baombo mpe bokokufa o nta­ngo ya bitumba. Kasi nkele ya Yawe esili te, na loboko la ye azali kokanela ba­ngo naino.

10:5  Mawa na Asur, fimbo ya nkanda ya ngai, lingenda lya nkele o maboko ma ngai.

10:6  Natindaki Asur akende kobundisa ekolo ya basumuki, akende kotumbola ekolo ya bato bayokisi ngai nkanda, ayiba mpe abotolo bango biloko, anyata bango lokola potopoto o nzela.

10:7  Kasi ye azalaki na makanisi mana te, azalaki na mikano misusu o motema : alingaki se koboma bato mpe kobebisa bikolo mingi.

10:8  Amilobelaki : « Bakomanda ba ngai banso bazali makasi lokola bakonzi te ?

10:9  Nabotoli Kalno lokola Karkemis, Amat lokola Arpad, mpe Samaria lokola Damasko.

10:10  Soko nakamati bikolo bya bato bakokumisaka bikeko, leka biye bya Yeruzalem mpe bya Samaria.

10:11  Maye nasali na Samaria mpe na banzambe ba ye, nakosala bongo na Yeruzalem mpe na bikeko bya ye. »

10:12  Mokolo Mokonzi akosilisa mosala mwa ye o ngomba Sion mpe o Yeruzalem, akopesa mokonzi wa lolendo wa Asur etumbu, mpo ya maye asali na miso ma lofundo.

10:13  Mpo Asur alobaki : « Nasali bongo na makasi, na mayele mpe na bwanya bwa ngai moko. Napusi ndelo ya bikolo bisusu nsima, nabotoli bango nkita, nalongoli bakonzi o ngwende ya bango, ngai elombe !

10:14  Nabotoli nkita ya bikolo bisusu lokola bakokamataka zumbu lya ndeke. Nakamati mokili mwa bango mobimba, lokola bakokamataka makei maye ndeke etiki ; ndeke yoko te etandaki mapapu, to efungoli monoko mpo ya kolela. »

10:15  Nsoka éfunda nde o miso ma oyo akokataka nzete ? Mosumani mómikumisa o miso ma oyo akosalaka na mwango ? Fimbo ekoki kotinda oyo abeti na yango ? Lingenda likoki nde kotombola moto asimbi lyango ?

10:16  Yango wana, Yawe wa bokasi bonso akokondisa bato bazali nzoto mafuta ; móto mokozikisa lipombo lya ye, mpe mokosilisa binso lokola móto monene.

10:17  Mwinda mwa Israel mokokoma móto monene, mpe Mosantu wa ye akopela lokola móto, mokotumba mpe mokosilisa nzube na matiti ma ye o mokolo moko.

10:18  Nzete ya ye ebele mpe elanga ya ye, Yawe akosilisa yango inso nye, lokola moto wa malali alingi akufa.

10:19  Nzete iye itikali o zamba lya ye, ikozala se moke, ata mwana moke ndakoki kotanga yango.

10:20  O mokolo mona bato bakotikala o Israel mpe ba libota lya Yakobo, bakotika kotia mitema na monyokoli wa bango, kasi bakotia elikya na Yawe, Mosantu wa Israel.

10:21  Ndambo ya bato ba Yuda bakotikala bakozongela Nzambe wa bokasi.

10:22  E Israel, ata bato ba yo bazalaki mingi lokola zelo o libongo, baye bakozonga bakozala se moke. Basili bakani koboma ekolo : bose­mbo bokomonono malamu.

10:23  Mpamba te, Yawe wa bokasi bo­nso asili akati likambo ’te baboma mokili mobimba nye.

10:24  Yango wana Yawe Nzambe wa bokasi bonso alobi boye : E bino bato ba ngai, bokofandaka o ngo­mba Sion, bobanga bato ba Asur te, awa babeti bino fimbo mpe batomboli lingenda lokola bato ba Ezipeti basalaki.

10:25  Mpamba te, etikali moke, mwa mo­ke mpenza, natika koyoka nka­nda ; kasi nakosilisa bango na nkele ya ngai.

10:26  Yawe wa bokasi bonso akobete ba­ngo fimbo, lokola abeteki bato ba Madian penepene na ngomba Oreb, lokola asalaki na ba-Ezipeti nta­ngo atombolaki lingenda lya ye likolo lya mbu.

10:27  O mokolo mona mokumba ba-Asur batielaki yo mokolongwa o mapeke ma yo, mpe ekangiseli ya bango ekolongwa o nkingo ya yo.

10:28  Bato ba Asur bakei kobundisa Ayat, bakatisi Migron, bakitisi biloko bya bango o Mikmas.

10:29  Baleki o kati ya ngomba, balobi : « Lelo na butu tokopika nganda o Geba. » Bato ba Rama balengi, bato ba Gibea ya Saul bakimi.

10:30  E mwana wa Galim, ganga makasi ! Yo Lais, keba ! Bino bato ba Anatot, boyanola ye !

10:31  Bato ba Madmena bakimi, bato ba Gebim bakei kobombama.

10:32  Lelo bakopema o mboka Nob, bakokanela bato ba Sion na ngomba Yeruzalem.

10:33  Yawe Nzambe wa bokasi bonso akokata bitapi na makasi, biye bileki bolai, akosilisa byango nye ; biye bipusi lokumu, akokitisa bya­ngo.

10:34  Nzete ilai ya zamba ikokatema na soka, mpe loboko la Nzambe lokokweisa Libano.

Chapter 11

11:1  Etapi ekobima o ekumu ya Yese, nzete ya sika ekobima o nkinga ya ye.

11:2  Elimo wa Yawe akofandela ye : elimo wa bwanya mpe wa mayele, elimo wa malako mpe wa nguya, elimo wa boyebi mpe wa bobangi Yawe.

11:3  Bobangi Yawe bokokamba ye : akotala makambo se na libanda te, akokata makambo te lokola matoi ma ye makoyoka.

11:4  Akosambisa bato batau na bose­mbo, akobatela makoki ma babola. Akobete banyokoli na maloba ma ye, akoboma bato babe na mpema ya ye.

11:5  Bosembo bokozala mokaba o loketo la ye, mpe bosolo bokozala nsinga ya ko­kanga bilamba bya ye.

11:6  Ngombolo ekofanda esika yoko na mpata, nkoi ekolala esika yoko na mwana ntaba, mwana ngombe na mwana nta­mbwe bakolia esika yoko, mwana moke akokoka kokamba yango.

11:7  Ngombe na ngombolo ikolia matiti esika yoko, bana ba yango bakolala esika yoko, ntambwe na ngombe ikolia matiti makauki.

11:8  Mwana moke akosakana o libulu lya nyoka, mwana moke akokotisa loboko o lidusu lya etupa.

11:9  O ngomba esantu ya ngai bato bakoyokisana mpasi lisusu te, zambi ekolo mobimba ekotonda na boyebi Nzambe, lokola mbu etondi na mai.

11:10  O mokolo mona eboto ya Yese akozala elembo o kati ya bikolo bya mokili. Bato ba bikolo bakoluka ye, mpe mboka ya ye ekozala na nkembo.

11:11  O mokolo mona Mokonzi akotanda loboko lisusu mpo ya kosikola bato batikali ba ekolo ya ye, baye bapanzanaki o Asur mpe o Ezipeti, o mikili mya Patros, mya Kus mpe mya Elam, o Sinear, o Amat mpe o bisanga bya mbu.

11:12  Akotikela bato ba bikolo bisusu elembo, akosangisa ba-Israel ba­nso bakangemaki o boombo, akozongisa bato banso ba Yuda bapa­nzanaki ut’o nsuka inei ya nse mobinda.

11:13  Efraim akotika zuwa mpe banyokoli ba Yuda bakosila ; Efraim ako­bundisa Yuda lisusu te, mpe Yuda akonyokolo Efraim lisusu te.

11:14  Bakokende kobundisa ba-Filisti o Westi, bango lisanga bakobotolo bato ba Esti biloko. Bakoyangela ba-Edom na ba-Moab, mpe ba-Amon bakotosa bango.

11:15  Yawe akokaukisa mai ma mbu ya Ezipeti, akotanda loboko epai ya ebale Efrate : na nguya ya mpema ya ye akokabola mai o miluka nsambo, mpe akolekisa bato ba ye mapapa o makolo.

11:16  Baye batikali mpe babiki o Asur bakozwa nzela polele, lokola ezalaki ntango ba-Israel babimaki o Ezipeti.

Chapter 12

12:1  O mokolo mona okoloba boye : Nakumisi yo, Yawe, zambi oyokelaki ngai nkanda ; kasi nkanda ya yo ekiti, mpe obo-ndi ngai.

12:2  Ye azali Nzambe mpe Mobikisi wa ngai, natii motema na ye, nabangi lisusu te ; Yawe azali nguya mpe ntina ya esengo ya ngai, ye moto abikisi ngai.

12:3  Bokotoka mai na nsai o maziba ma libiki.

12:4  O mokolo mona bokoloba boye : Bokumisa Yawe mpe bobondela nkombo ya ye, bosangela bato ba bikolo bikela bya ye, bosakola nkombo ya ye nta bonene.

12:5  Boyembela Yawe, mpo asali ma­mbi manene, o nse mobimba bayeba yango.

12:6  Bino bato ba Sion, boganga mpe bosepela, mpo Mosantu wa Israel amilakisi monene o ntei ya bino !

Chapter 13

13:1  Makambo makokwela Babilone, maye Izaya, mwana wa Amos, amoni :

13:2  Botia bendele o nsonge ya ngo­mba ezangi nzete, boganga migango mya etumba, mpe bobya­nga ba­ngo na loboko mpo ’te baya penepene na bizibeli bya ba­nkumu.

13:3  Ngai napesi babuni ba ngai basa­ntu bitinda, na nkanda ya ngai nabyangi bato ba ngai ba mpiko, nasangisi bilombe ba ngai ba bitumba.

13:4  Boyoka makeléle o ngomba, lokola makeléle ma bato ebele. Boyoka lokito la bato ba bikolo basangani. Yawe wa bokasi bonso akotala bato ba ye bakei etumba.

13:5  Bauti o ekolo mosika, o nsuka ya mokili, Yawe elongo na basoda ba nkanda ya ye, mpo ya kobebisa mokili mobimba.

13:6  Bolela na mawa, zambi mokolo mwa Yawe mokomi penepene, lokola mobebisi Nzambe wa bokasi akosilisa mokili mobimba.

13:7  Yango wana maboko manso makomi kolembe, bato banso ba­bwaki elikya.

13:8  Bayoki nsomo, mpasi na malozi ikweli bango, bapilingani lokola mwasi alingi abota, batalani na nsomo, bilongi bya bango biteli.

13:9  Tala, mokolo mwa Yawe mozali koya, mawa te, mokoya na nka­nda eleki makasi mpo ya kosilisa mokili mpe koboma basumuki.

13:10  Minzoto minene mpe mike mizali kongenge lisusu te. Banda ntongo etani, mwese mokomi molili mpe sanza ezali kopesa lisusu mwinda te.

13:11  Nakopesa bato banso etumbu mpo ya mabe ma bango, nakotumbola basumuki mpo ya masumu ma ba­ngo. Nakosukisa bato ba lole­ndo, nakosukisa lofundo la ba­nyokoli.

13:12  Nakosilisa bato mpo bakoma moke lokola wolo kitoko, bazala moke lokola wolo ya Ofir.

13:13  Yango wana nakoningisa likolo mpe mokili mokolenge o mako­nzi ma mwango, o mokolo Yawe wa bokasi bonso akolakisa nkanda, o mokolo akotokisa nkele ya ye.

13:14  Ekozala lokola mboloko ekimi likama, mpe lokola etonga ya mpata izali na mokengeli te, moto na moto akozonga epai ya bato ba ye, mpe akokima o mokili mwa ye moko.

13:15  Bakotubola ata nini bakokuta o nzela, mpe oyo bakokanga akokufa na mompanga.

13:16  Bakonyata bana bake o miso ma baboti ba bango, bakobuka ndako ya bango, bakobebisa basi ba ba­ngo.

13:17  Nakotinda ba-Medi bakende ko­bunda na bango, bato baye bayebi motuya mwa palata te, mpe bakokinolaka ata wolo.

13:18  Matimbo ma bango makosilisa bilenge ba bango, bakoyokela bana mawa te, bakoyokela ata bana bake ngolu te.

13:19  Mpe Babilone, nsuka ya bingu­mba binso, ekembiseli mpe litu­ndu lya ba-Kaldea, ekokoma lokola Sodoma na Gomora, Nza­mbe akosilisa yango.

13:20  Mokolo moko lisusu te bato bakokende kofanda kuna, ata ba­nko­ko ba bango te. Mo-Arabu akopika nganda kuna lisusu te, bakengeli ba mpata mpe bakopema kuna te.

13:21  Nyama ya zamba ikofanda kuna, bisulungutu bikotonda o ndako ya bango, maligbanga ikokende kofanda kuna, mpe ntaba babali ikokende kobina kuna.

13:22  Ngombolo ikobyangana o ndako ya bakonzi, mpe mbulu ikolela o ndako ya masano, mpamba te, elaka ya ye esili ekoki, etikali mikolo mingi lisusu te.

Chapter 14

14:1  Yawe akoyokela Yakobo mawa, akopono Israel lisusu. Akozongisa bango o mabelé ma bango moko. Bampaya bakoya kofanda na bango elongo mpe bakosangana na libota lya Yakobo.

14:2  Bato bakokamba bango mpe bako­tika bango o ekolo ya bango moko. Bato ba Israel bakoyamba ba­ngo o mokili mwa Yawe, bakokomisa bango basali babali na basali basi. Bakokanga o boombo baye bakangaki bango liboso, mpe bakoyangela baye banyokoloki bango liboso.

14:3  Mokolo Yawe akopemisa yo, nsima ya mpasi, minyoko na boombo esika okangemaki,

14:4  bokoyemba nzembo eye ya mbokela mpo ya mokonzi wa Babilone : Ndenge nini lolendo la monyokoli losuki boye ?

14:5  Yawe abuki montongo mwa bato babe, lingenda lya banyokoli.

14:6  Moto oyo azalaki kobete bato, mawa te, na nkanda enene anyokoloki bikolo, alembeki te.

14:7  Nse mobimba ekomi sikawa na kimia, bato banso bakoganga na esengo.

14:8  Ata nzete ya sipresi ikosepela mpo okwei, awa olali wana o nse, nzete ya sedere ya Libano ikoloba : Ba­nda olali bayei lisusu te mpo ya kokata biso.

14:9  O mboka ya bawa bakosepela mpe mpo ya yo o mokolo bakoyoka nsango ’te ozali koya. Mpo ya yo balamusi bato bawa, baye bazalaki bato banene ba nse, batelemisi bakonzi ba bikolo o ngwe­nde ya bango.

14:10  Banso lisanga bakoyamba yo mpe bakoloba : « Yo mpe osuki mabe se lokola biso, okomi ndenge yoko na biso !

14:11  Okiti o mboka ya bawa na lipo­mbo, mpe na miziki mya nzenze ya yo. Okomi kolala o litoko lya mpambo, mpe ozipami na bola­ngiti bwa nkusu.

14:12  Yo monzoto mwa ntongo, mwa­na wa moi mobimi, ndenge nini obwa­kemi okwei o nse, yo moto ozalaki kolonga bikolo binso ?

14:13  Omilobelaki : ‘Nakobuta o likolo, nakotia ngwende likolo lya mi­nzoto mya Nzambe, nakofanda o ngomba ya likita lya banzambe, o nsonge ya Nordi.

14:14  Nakobuta tee likolo lya mampata, nalingi kokokana na Nzambe wa Nta Likolo.’

14:15  Kasi babwaki yo o mboka ya bawa, o nta bozindo bwa libulu linene. »

14:16  Baye bamoni yo bongo, batali yo malamu, mpe bamituni : « Ye nde oyo azalaki kolengisa mokili, mpe koningisa bakonzi ?

14:17  Oyo akomisaki mokili lokola eliki, oyo abebisaki bingumba binso, oyo aboyaki kozongisa baombo o ekolo ya bango ? »

14:18  Bakonzi banso ba mokili bazali kopema na lokumu, moto na moto o lilita lya ye.

14:19  Kasi yo, babwaki yo o libanda lya lilita, lokola etapi ekauka, lokola ebembe eye banyati, o nse ya bato bakufaki na mompanga. Ba­ngo bakundami likolo lya maba­nga,

14:20  kasi okosangana na bango o lilita te, zambi obebisi ekolo ya yo, obomi bato ba yo. Bakotanga nkombo ya bato baye babe lisusu te.

14:21  Bomilengele mpo ya koboma bana ba ye, mpo ya mabe ma batata ba bango. Bateleme lisusu te mpo ya kobotolo mokili, mpe batondisa mokili mobimba na bingumba te.

14:22  Yawe wa bokasi bonso alobi boye : Nakobimela bango, nakobebisa Babilone, ata nkombo ekotikala te, ata moto moko akotikala te ! Yawe alobi bongo.

14:23  Engumba ekokoma potopoto, eko­tonda na ngulu ya zamba, nakosilisa Babilone, ekokufa libela. Yawe wa bokasi bonso alobi bongo.

14:24  Yawe wa bokasi bonso alayi ndai eye : Maye manso nakanaki o motema, makosalema, maye nalingi kosala ekokokisama :

14:25  nakosukisa bato ba Asur o mokili mwa ngai, nakonyata bango o ngomba ya ngai. Nakolongola eka­ngiseli batiaki o nkingo ya bato, nakolongola mokumba batiaki o mapeke ma bato.

14:26  Yango likambo nakani kosala mokili mobimba, yango etumbu nakopesa bikolo binso.

14:27  Awa Yawe wa bokasi bonso akani bongo, nani akopekisa ye ? Awa atomboli loboko, nani akoki kokitisa lango ?

14:28  O mobu Akaz awei, basakoli maloba maye :

14:29  Bino bato ba Filisti mobimba, bosepela te, awa Nzambe abuki lingenda lizalaki kobete bino. Zambi nyoka ekufi ekobota etupa, mpe etupa yango ekobota ngando ya mapapu.

14:30  Babola bakufi na nzala bakozwa bilei, mpe bato bakeleli bakozwa esika ya kofanda kimia, kasi bato ba libota lya yo bakokufa na nzala, mpe nakoboma bana ba yo banso.

14:31  Yo ezibeli ya mboka, lela ! Yo engu­mba, ganga na mawa ! Filisti mobimba, oningana na nsomo, zambi molinga mozali kouta epai ya Nordi, o molongo mwa basoda ba bango moto moko akimi te.

14:32  Tozongisela bantoma ba ekolo ena eyano nini ? Tokoloba ’te Yawe abongisi Sion, mpe babola ba ekolo ya ye bakobombama wana.

Chapter 15

15:1  Maloba ma bokaneli Moab : na butu babebisi Ar-Moab, babomi yango nye, na butu babebisi Kir-Moab, mboka mobimba ekufi.

15:2  Bato ba Dibon bakei o tempelo mpo ’te balela o esika ya losambo. Ba-Moab bakei kolela o ngomba Nebo mpe o Medeba, bakokoli mitó, bakati mandefu.

15:3  O balabala bato banso balati mpili, banso baleli o mitondo mya ndako mpe o wenze, banso bamileli na mai o miso.

15:4  Bato ba Esbon na Eleale bazali koganga. Lolaka la bango loyokani tee Yakas. Yango wana basoda banso ba Moa­b balengi mpe mitema mya bango mibebi nye.

15:5  Motema mwa ye moleli mpo ya Moab. Baye bakimi bakomi o Soar mpe o Eglat-Selisia. Babuti ngomba ya Lukit mpe baleli mpe o nzela ya Koronaim baga­ngi makasi.

15:6  Mai manso ma Nimrim makomi mabelé mpamba, matiti manso makauki mpe makokola lisusu te, matiti mabesu mazali lisusu te.

15:7  Yango wana mwa biloko bitikali na bango, bamemi byango o ngambo ya moluka mwa Wenge.

15:8  Makeléle ma bango mayokani o mokili mwa Moab, bato bayoki mingongo mya ba­ngo tee Eglaim, bayoki boleli bwa bango tee Beer-Elim.

15:9  Mai ma moluka mwa Dibon matondi na makila, mpe nakobakisela naino Dibon mpasi esusu : nakotinda ntambwe mpo ya kosilisa bato ba Moab, mpo ya kosukisa baye batikali o mokili mona.

Chapter 16

16:1  Botindela nkolo wa mokili mwana mpata, ut’o Sela epai ya eliki kin’o ngo­mba Sion.

16:2  Penepene na moleka mwa moluka Arnon, bilenge basi ba Moab batelemi lokola ndeke, lokola bana ndeke bato babengani o zumbu lya yango.

16:3  Bakoloba : « Bosangana likita, bokata likambo noki ! Elilingi ya yo ezipa bango na midi lokola na butu, bomba bongo baye bapalangani mpe baye bakimi bazali kokima bakangema te.

16:4  Yamba epai ya yo ba-Moab baye bakimi, bikisa bango o maboko ma mobebisi. Mokolo bakonyokolo bino lisusu te, babebisi bakosila mpe banguna ba­kotika ekolo,

16:5  ngwende ekotiama wana mpo ya baye batosi mibeko : moto akofanda o ngwende eye o ema ya Davidi, nde mokonzi wa motema lobokó, oyo akolinga bosolo mpe akobatela bosembo na mpila. »

16:6  Toyoki ndenge ba-Moab bazali na lolendo, lolendo ndelo te, ndenge bakobeteke ntolo na lofundo, bakobangaka eloko te, mpe bakolobaka makambo mazangi ntina.

16:7  Sikawa ba-Moab bakolela ekolo ya bango, banso elongo bakokimela. Awa bakokanisa minkate mya mbuma ya vino ya Kir-Kareset, bakoyoka mitema nsomo mpe bakokimela,

16:8  zambi bilanga bya nzete ya vino bya Kesbon bikufi. Bakonzi ba nse babebisi nzete ya bilanga bya vino ya Sibma, biye bikomaki tee Yazer, kin’o eliki, bitapi bya byango bitandemaki mosika, leka Mbu ya Liwa.

16:9  Yango wana, lokola Yazer, nakolela bilanga bya Sibma, nakotangisela Esbon na Eleale mai ma miso. O ntango bobuki mbuma ya vino mpe ya bilanga banguna bayokisaki migango mya etumba.

16:10  Esengo esili o bilanga bya nzete ya mbuma, o bilanga bya vino bazali kosepela mpe koyemba lisusu te, bakamoli lisusu mbuma ya vino te, batiki kosepela.

16:11  Yango wana, ntango nakanisi Moab, motema mwa ngai mozali kolenge lokola nzenze mpe kobete makasi mpo ya Kir-Keres.

16:12  Ata ba-Moab bakomilembisa nta­ngo bakokende kosambela o ngo­mba, ata bakobondela o esika esantu, bakozwa eloko te.

16:13  Yawe alobaki bongo mpo ya Moab.

16:14  Kasi sikawa Yawe alobi boye : Etikali mibu misato, ndenge basali bakotangaka, lokumu la Moab lokosila, ata bazali ebele.

Chapter 17

17:1  Maloba ma bokaneli Damasko. Damasko ekozala engumba lisusu te, ekokoma se esika ya mabanga.

17:2  Bakotika bingumba bya bango seko, bibwele bikozala wana, bikopema wana, moto moko te akobengana byango.

17:3  Bibombamelo bya Efraim bikosila, o Damasko mokonzi akozala lisusu te. Ekosukela ba-Aram baye bakotikala se lokola ba-Israel. Yawe wa bokasi bonso alobi bongo.

17:4  O mokolo mona lokumu la Yakobo lokosila, nzoto ya ye mafuta ekokondo.

17:5  Ekozala lokola eleko ya kobuka mbuma ya mampa, o ntango bakosangisaka mitó mya mbuma o maboke, lokola bakolokotoko mbuma o lo­bwaku la Refaim.

17:6  Se mwa mbuma ya oliva ikotikala nsima ya bobuki, bobele mbuma isato to ibale o nsonge ya nzete, mbuma itano to inei o bitapi bya yango. Yawe, Nzambe wa Israel alobi bongo.

17:7  O mokolo mona bato bakotala Mozalisi wa bango, bakotombela miso epai ya Mosantu wa Israel.

17:8  Bakotala lisusu bitumbelo te, biye basalaki na maboko, makonzi masantu na bitumbelo bya malasi mpe te, biloko biye misapi mya bango misalaki.

17:9  O mokolo mona bibombamelo bya bino bikokoma mipotu, se lokola biye bya ba-Amor na ba-Ivi ntango bakimaki ba-Israel kokima. Moto moko akotikala wana lisusu te.

17:10  Solo, obosani Nzambe oyo abikisi yo, okanisi lisusu Mobateli wa yo te. Yango wana olonaki mbuma elengi mpe ndunda iuti o ekolo esusu.

17:11  O mokolo oloni yango, osili komono mbuma ibimi, mpe banda ntongo mbuma ibimisi fulele, kasi ikobeba, mpe okobuka mbuma yoko te mpe okokoka kobo­ngisa yango te.

17:12  Mawa e ! Yoka makeléle ma bato ebele, lokola lokito la mai ma mbu matomboki, makeléle ma bato ebele lokola mai manene.

17:13  Bikolo bikotomboko lokola mbo-nge ya mai, kasi ntango Nzambe akaneli ba­ngo bakokima mosika, lokola matiti o ngomba makotombwamaka na mompepe ; lokola mputulu ekopanzanaka na ekumbaki.

17:14  Na mpokwa bakoyoka nsomo, na ntongo bakozala lisusu te. Bato babotoli biso biloko bakosuka se bongo, baye babebisi mboka ya biso bakosila se bongo.

Chapter 18

18:1  Mawa na yo, ekolo esika mapapu ma makélele makoyanaka, o ngambo ya bibale bya Kush.

18:2  Yo moto okotindaka bantoma o nzela ya mbu, o bibei bisalemi na nkekele mpe na nkasa. Bokende mbangu, bino bantoma, epai ya bato balai na lomposo ngola, baye bato bakobangaka bipai binso, bato baye ba nguya balingi koya­ngela nse, o mokili mopaswani na bibale.

18:3  Bino banso bato ba nse, bino bato bofandi o bikolo binso, bokomono ndenge bakotombola bendele o ngomba, bokoyoka ndenge bakobete mi­ndule !

18:4  Mpo Yawe alobi na ngai boye : Nakofanda kimia mpe nakotala ut’o esika nazali, lokola molunge o ntango ya moi makasi, lokola limpata o ntango bakobukaka mbuma na moi makasi.

18:5  Liboso lya kobuka mbuma, o eleko fulele isili, o ntango fulele ikomi mbuma iteli, bakokutolaka bitapi na mbeli, mpe bakolongolaka bitapi bileki mingi.

18:6  Byango binso bikozala bya bi­ngo­ndo bya ngomba mpe bya nyama ya zamba. Bingondo bikofanda wana o eleko ya moi mpe nyama ya zamba o eleko ya mpio.

18:7  O mokolo mona bakobonzela Yawe wa bokasi bonso mabonza, bato balai na lomposo ngola, baye bato bakobangaka bipai binso, bato baye ba nguya balingi koya­ngela nse, bato ba mokili moye mo­paswani na bibale bakoyela Yawe wa bokasi bonso mabonza o esika bakokumisaka nkombo ya ye, o ngomba Sion.

Chapter 19

19:1  Maloba ma bokaneli Ezipeti. Yawe ayei o Ezipeti, ata­mboli likolo lya limpata. O boso bwa ye banzambe ba mpa­mba ba Ezipeti bakolengeke, mpe mitema mya ba-Ezipeti mikolembeke.

19:2  Nakobebisa boyokani o kati ya bato ba Ezipeti, baninga bakobundisana, mboka na bikolo bikobundisana.

19:3  Mayele ya Ezipeti ekosila, nakobebisa mikano mya bango, Bakotuna bikeko, bamoni-maka­mbo, milimo mya bawa na banganga ba bango.

19:4  Nakokaba ba-Ezipeti o maboko ma mokonzi mabe, moto wa nkanda enene akoyangela bango. Yawe Nzambe wa bokasi bonso alobi bongo.

19:5  Mai manso makolongwa o mbu enene, ebale ekokauka mpe ekosila mai.

19:6  Nzela ya mai ikolumba nsolo ebe, o mingala mya Ezipeti mai makokita mpe makosila, nsoló na matiti penepene na mai makokauka.

19:7  Matiti ma mabongo ma ebale Nil, binso bikokolaka penepene na ebale bikokauka, bikopanzana, bi­kosila.

19:8  Babomi mbisi bakokimela, baye bakobwakaka ndobo o Nil bakomilela, baye bakobwakaka monyama o mai bakolembe.

19:9  Baye bakolonaka mbuma ikopesa nsinga ya bilamba, na baye bakotongaka malekani ba­kosuka.

19:10  Mitema mya batongi bilamba mikolembe, baye bakosalaka mpo ya kozwa lifuta bakozala na mawa.

19:11  Bayangeli ba Soan bazali bazoba, balaki ba bwanya ba Farao baza­ngi mayele. Ndenge nini bokoki koloba na Farao : « Ngai mwana wa moto wa bwa­nya, moto wa libota lya bako­nzi ? »

19:12  Bato ba yo ba bwanya bakei wapi ? Balakisa mpe bayebisa yo eloko nini Nzambe wa bokasi bonso akani kosala Ezipeti.

19:13  Bankumu ba Soan bazali bazoba mpenza, bankumu ba Memfis bakomikosaka, bakonzi ba mabota babungisi bato ba Ezipeti nzela.

19:14  Yawe abebisi mayele ma bango. Babungisi ba-Ezipeti o misala mya bango minso, bakomi lokola momeli masanga azali kosanza.

19:15  O Ezipeti bakolonga lisusu o mosala moko te, ezala mokonzi to moto moke, akobimisa mosala moko te.

19:16  O mokolo mona bato ba-Ezipeti bakokoma lokola basi ; bakobanga mpe bakolenge ntango Yawe wa bo­kasi bonso akokanela bango mpe akotombola loboko mpo ya kobete bango.

19:17  Ekolo ya Yuda ekobangisa bato ba Ezipeti. Ata mpo ya nko­mbo ya Yuda mpamba bakoyoka nsomo, mpo bayebi ’te Yawe wa bokasi bonso akaneli bango.

19:18  O mokolo mona bato ba bingumba bitano bya Ezipeti bakolobaka lokota la ba-Kanana mpe bakolayela Yawe wa bokasi bonso ndai ya botosi. ‘Engumba ya Mwese’ ekozala moko wa bingumba biye.

19:19  O mokolo mona bakotonga altare mpo ya kokumisa Yawe o kati ya mokili mwa Ezipeti mpe bakotelemisa likonzi mpo ya Yawe o ndelo ya mokili.

19:20  Yango ekozala elembo mpe ndakisa ya Yawe wa bokasi bonso o Ezipeti. Mokolo bakobelela Yawe ntango bako­nyo­kwama, Yawe akotindela bango mo­bikisi oyo akobatela mpe akosikola bango.

19:21  Yawe akomilakisa na bato ba-Ezipeti, mpe bato ba-Ezipeti ba­koyeba Yawe o mokolo mona. Bakobonzela ye mabonza na miboma, bakolakela Yawe bilako mpe bakokokisa byango.

19:22  Yawe akobete ba-Ezipeti, kasi na nsima akobikisa bango. Bakozongela Yawe, mpe Yawe akondimela bango mpe akobikisa bango.

19:23  O mokolo mona nzela enene ekobanda o Ezipeti mpe ekokende tee Asur. Ba-Asur bakokende o Ezipeti mpe ba-Ezipeti bakokende o Asur. Bango babale, Ezipeti na Asur, bakosalela Yawe.

19:24  O mokolo mona Israel ekozala ekolo ya bisato, elongo na Ezipeti mpe na Asur, eye ekozwa bobenisi bwa Nzambe.

19:25  Yawe wa bokasi bonso akobenisa bango na maloba maye : « Bozwa bolamu, yo Ezipeti ekolo ya ngai, yo Asur mosala mwa maboko ma ngai, yo Israel mokili mwa ngai mpenza. »

Chapter 20

20:1  O mobu mokonzi monene wa basoda ba Sargon, mokonzi wa Asur, ayaki kobunda na Asdod mpe kobotolo yango,

20:2  Yawe alobi na Izaya, mwana wa Amos, boye : « Kende, olongola saki oka­ngi o loketo, mpe longola mapapa olati o makolo. » Izaya asali bongo, atamboli bolumbu mpe makolo ngulu.

20:3  Yawe alobi : « Lokola mosaleli wa ngai Izaya atamboli bolu­mbu mpe makolo ngulu mibu misato mobimba, mpo azala elembo mpe likebisi ona bato ba Ezipeti na Kus,

20:4  se bongo mokonzi wa Asur, aka­mba baombo ba Ezipeti mpe bato ba Kus baye bakangemi o boombo, mpe atambwisa bango ba­nso bolumbu, makolo ngulu, masoko polele, bilenge na babange, mpo ya kolakisa ’te Ezipeti esengeli koyoka nsoni !

20:5  Bakoyoka nsomo mpe nsoni, mpo batiaki elikya na Kus mpe bakumisaki Ezipeti.

20:6  O mokolo mona bato baye ba mokili pene na mbu bakoloba : “Tala makambo makweli baye tolukaki lisalisi epai ya bango mpo ya kokima mokonzi wa Asur. Sikawa ndenge nini biso tokobika ?” »

Chapter 21

21:1  Maloba ma bokaneli eliki penepene na mbu. Lokola mompepe mokasi mokolekaka likolo lya Negeb, monguna akouta o eliki, mokili mwa nsomo.

21:2  Bayebisi ngai limoni lya nsomo : « Mosuli akosulaka, mobebisi ako­bebisaka, bato ba Elam, boyoka ! Ba-Medi, bokende kobunda ! » Nalingi bokimeli bwa bato bosila.

21:3  Yango wana motema mwa ngai molengi, malozi makangi ngai lokola mwasi azali kobota. Mayele ma ngai mabulungani, nazali koyoka eloko te, mpo ya nsomo nayoki nakomono lisusu eloko te.

21:4  Nazali motema likolo mpenza, nakomi kolenge na nsomo. Nalingaki komono ’te moi mosila, kasi butu bokomi kobangisa ngai.

21:5  Babongisi meza, batandi elamba, balei, bameli. Bino bakonzi, boteleme, bopakola nguba mafuta.

21:6  Mpamba te, Mokonzi alobi na ngai boye : « Kende kotia sinzili, ayebisa ma­ye amoni.

21:7  Soko amoni makalo mabendami na farasa ibale, basoda basusu babuteli mpunda, basusu babuteli kamela, atala malamu, akeba mpenza ! »

21:8  Monongi agangi boye : « E Mokonzi, moi mobimba natelemi o linongi, butu mobimba nazali kokengele.

21:9  Tala, farasa na batambwisi bazali koya, babale babale. » Na nsima alobi lisusu : « Babilone ekwei ! Babilone ekwei ! Bikeko binso bya banzambe bibukani, bilali o nse. »

21:10  Banyati yo lokola bakotutaka mbu­ma o etutelo, Yawe wa bokasi bonso, Nzambe wa Israel ayebisi ngai, mpe ngai nakosakola bino yango !

21:11  Maloba ma bokaneli Edom : Moto moko abeleli ngai ut’o Seir, alobi : « Sinzili, butu bokoumela naino mingi, bokosila ntango nini ? »

21:12  Sinzili ayanoli : « Ntongo elingi etana, kasi ezali naino butu, soko bolingi, botuna mituna, kasi bozonga nsima. »

21:13  Maloba ma bokaneli Arabia. Bino bato ba Dedan, bolala o esobe na butu.

21:14  Bato bakufi na mposa ya mai o nzela, bokende kopesa bango mai. Bato bakimi etumba, bokende kopesa bango mampa, bino bato ba Teman.

21:15  Mpamba te, bakimi mimpanga mya banguna, bakimi matimbo mpe etumba engali makasi.

21:16  Bongo Mokonzi alobi na ngai boye : Etikali mobu moko, ndenge basoda bakotangaka, mpe lokumu la bato ba Kedar lokosila.

21:17  Bato ba litimbo ba Kedar bazalaki mingi, bakotikala se moke mpenza : Yawe Nzambe wa Israel alobi bongo.

Chapter 22

22:1  Maloba ma bokaneli ‘Lobwaku la Limoni’ : Mpo nini bozali kobuta motondo mwa ndako,

22:2  bato ba mboka ya mobulu, ya makeléle mpe ya bisengo ? Bato ba yo bakufi basuki na mo­mpanga te, babomi bango o ntango ya etu­mba te.

22:3  Bakomanda ba bino bakimi banso elongo, bakangemi baombo, ata babeteki makula te. Ata bakimaki mosika, bakangi ba­ngo banso.

22:4  Yango wana nalobi boye : « Bolongwa pene na ngai, botika ngai nalela makasi, bomeka kobondo ngai te, awa ekolo ya bato ba ngai ebebi. »

22:5  Mpo lelo ezali mokolo mwa bokimi, mwa nsomo mpe mwa mobulu­nga­no, mwango nde mosala mwa Yawe Mokonzi wa bokasi bonso o lo­bwaku la Limoni. Babuki efelo ya mboka, bato bazalaki kobelela epai ya ngomba.

22:6  Ba-Elam bakamati libenga lya makula, bayei na makalo mpe babuteli farasa, mpe bato ba Kir babimisi nguba ya bango.

22:7  Mabwaku ma yo kitoko matondi na makalo, mpe bato ba farasa batelemi o bizibeli bya mboka.

22:8  Balongoli o Yuda binso bikoki kobatela mokili. O mokolo mona botali bibuneli bya Ndako ya Zamba.

22:9  Bomoni malusu ebele o efelo ya Mboka ya Davidi. Bosangisi mai manso o ebombelo o kati ya mboka.

22:10  Botangi ndako inso ya Yeruzalem, bobuki ndako mpo ya kolendisa ebombamelo.

22:11  Botimoli libulu o kati ya bifelo bibale mpo ya kobomba mai ma liziba lya kala. Kasi boboyi kotala oyo asalaki mana manso, oyo abongisaki mango uta kala.

22:12  O mokolo mona Yawe Nzambe wa bokasi bonso abengi bino mpo ’te bolela, bokimela, bokokola mitó mpe bolata ngoto.

22:13  Kasi bozali kosepela mpe koyoka bisengo, bozali koboma ngombe na mpata, kolia minsuni, komele vino mpe bolobi : « Tolia mpe tomele, mpo lobi tokokufa ! »

22:14  Yawe wa bokasi bonso ayebisi ngai boye : « Nakolimbisa bino lisumu lyango te, tee liwa ! » Yawe Nzambe wa bokasi bonso alobi bongo.

22:15  Yawe Nzambe wa bokasi bonso alobi boye : Kende epai ya nkumu Sebna, moyangeli wa ndako ya mokonzi, oyo azali komikatela lilita o mabanga ma ngomba,

22:16  mpe tuna ye : « Awa ozali na biloko nini ? Ozali nde na bandeko mpo ’te okata lilita o mabanga ? » Mpamba te, azali kotonga lilita o ngomba, azali kokata mabanga mpo ya kolala wana libela.

22:17  Tala, Yawe akobwaka yo, mobali, akokanga yo lokola bakokangaka liboke.

22:18  Akokomisa yo lokola ndembo, okosuka o mokili mosusu mosika. Okokufa wana elongo na makalo ma yo kitoko, okoyokisa libota lya mokonzi wa yo nsoni.

22:19  Nakolongola yo o mosala mwa bo­yangeli, nakobotolo yo esika ya yo.

22:20  Bobele o mokolo mona nakobya­nga mosaleli wa ngai Eliakim, mwana wa Kilkia.

22:21  Nakolatisa ye molato mwa yo, nakokanga mokaba mwa yo o loketo la ye, nakotia bokonzi bwa yo o maboko ma ye. Akozala tata wa bato ba Yeruzalem mpe wa libota lya Yuda mobimba.

22:22  Nakopesa ye mafungola ma ndako ya Davidi : soko afungoli ndako, moto moko akokanga te, soko akangi yango, moto moko akofungola te.

22:23  Nakopika ye makasi lokola bakobakaka nsete o efelo, mpe ye akopesa libota lya tata wa ye ngwende ya lokumu.

22:24  Bana na bankoko ba ye bakoka-ngema na yango lokola bitapi binene na bike bikangemi na nzete, lokola biloko bike bya ndako, kopo na mbeki.

22:25  O mokolo mona, Yawe Nzambe wa bokasi bonso akoloba : Nsete eye babaki makasi o efelo, ekolongwa, biloko binso bikokweya mpe bikobeba. Solo, Yawe alobi bongo.

Chapter 23

23:1  Maloba ma bokaneli Tiro. Bino, masuwa ma Tarsis, bolela, zambi ndako ya Tiro ibebi nye. Bayoki yango o ntango balongwi o esanga Sipro.

23:2  Bato ba libongo lya mbu enene, bokamwa, bato ba mombongo ba Sidoni, ba­ntoma ba bino, bazalaki kokatisa mbu

23:3  mpe mai manene. Mbisi ya Nil izwelaki bino nkita, bino bato bazalaki mombongo o bikolo binso.

23:4  Yo Sidoni, yoka nsoni, yo mboka mobateli ya mbu. Mbu enene elobi boye : « Nayoki mpasi te mpe naboti mwana te, naleisi bana babali te, nabokoli bana basi te. »

23:5  Mokolo bato ba Ezipeti bakoyoka nsango, bakolenge mpo ya likambo likweli Tiro.

23:6  Bino bato bokofandaka penepene na mbu, bokima epai ya Tarsis mpe boga­nga makasi !

23:7  Yango nde mboka ya bino ya bisengo, mboka eye ebandaki o mikolo mya kala, eye etindaki bato mpo ya kofanda mosika ?

23:8  Bongo nani akaneli Tiro maka­mbo mabe boye, mboka eye ezalaki kotia bakonzi ba sika bipai binso, mboka esika bato ba mombongo bazalaki bankumu, esika bakomi bato banene mpo ya mosala mwa bango ?

23:9  Yawe wa bokasi bonso moto akati likambo bongo, mpo ya kosukisa lolendo la bato ba lokumu, mpo ya kokitisa bato banene ba­nso ba mokili.

23:10  E bino bato ba Tarsis, bokende kokata bilanga, lokola bakosalaka penepene na eba­le Nil, zambi libongo lya masuwa lizali lisusu te.

23:11  Yawe atandi loboko la ye likolo lya mbu, aningisi mikili mya bakonzi ; Yawe atindi ’te babebisa bibo­mba­melo bya Kanana.

23:12  Alobi : Yo elenge mwasi, Sidoni, ngondo oyo banyokoli, osepela lisusu te. Teleme mpe kende kofanda o esa­nga Sipro, kasi kuna mpe okozwa esika ya kopema malamu te.

23:13  Tala ekolo ya ba-Kaldea, ekolo eku­fi nye, ba-Asur bakomisi yango mboka ya nyama ya eliki. Bato batongi manongi masanda mpo ya kokengele mboka, babuki bibombamelo bikasi, ba-Asur bakomisi yango mopotu monene.

23:14  Bino masuwa ma Tarsis, bolela makasi, mpamba te, ebombamelo ya bino ekufi nye.

23:15  O mokolo mona bakobosana Tiro mibu ntuku nsambo, elaka eye mokonzi akoki koumela o boko­nzi. Nsima ya mibu ntuku nsa­mbo, ekosalema na Tiro lokola ba­koyembaka o nzembo eye ya mwasi ndumba :

23:16  « Kamata nzenze mpe katisa mboka mobimba, yo mwasi ndumba, oyo bato babosani. Meka kobete kitoko mpe yemba nzembo ya yo lisusu mpo ’te bato bakoma kokanisa yo lisusu. »

23:17  Nsima ya mibu ntuku nsambo Yawe akoya kotala Tiro, mpe Tiro akozonga na mosala mwa ye mwa kala, akosala bondumba na bikolo binso bya nse.

23:18  Kasi matomba mpe lifuta lya ye makokabama na Yawe. Bakokongolo mosolo mpe bakobomba mwango o bibombelo te, kasi bakopesa mwango na bato bakobanga Yawe mpo ’te bakoka kolia malamu mpe kolata kitoko.

Chapter 24

24:1  Yawe akobebisa mokili, akosilisa mpe akobulinginya mwango, mpe akopanza bato ba­nso :

24:2  Nganga Nzambe na mosaleli wa ye, Mokolo mosali na mosaleli wa ye, mama wa ndako na mosaleli wa ye moteki na mosombi, modefisi na modefi, na moto wa nyongo na nkolo wa nyongo.

24:3  Mokili mokobeba nye, bakoyiba biloko binso, zambi Yawe akati likambo se bongo.

24:4  Mokili mokolela mpe mokokufa, nse mobimba ekobeba mpe ekozonga nsima, bato banene ba mokili bakolembe.

24:5  Mokili mokobeba mpo ya bato bakofandaka wana, mpamba te, babuki mibeko, babongoli bitinda, babomi bonde­ko bwa seko.

24:6  Yango wana etumbu ekongala o mokili : bato banso bakofanda wana bakoyoka mpasi. Bongo bato baike bakosila o mokili, baye bakotikala bakozala mingi te.

24:7  Vino ya sika ezali na lilaka, elanga ya vino ebebi, bato banso bazalaki kosepela bakomi kokimela.

24:8  Lokito la nsai la mbonda loyokani lisusu te, makeléle ma bato basepeli masili, elengi ya kobete nzenze ezali lisusu te.

24:9  Bakomeleke lisusu vino te, nzembo ya esengo esili, masanga elengi makomeli bameli bololo.

24:10  Bato bazali lisusu mingi te o engu­mba, ekomi mopotu, bizibeli bya ndako inso bikangemi.

24:11  Bakomi kobelela o balabala mpo ya kosenge vino, esengo ezali lisusu te, basepeli lisusu o ekolo te.

24:12  Engumba mobimba ekomi mopotu, mpe ezibeli enene ya engumba ebe­bi nye.

24:13  Esalemi na bikolo bya nse lokola nzete ya oliva esila mbuma, lokola nzete ya vino etikali mpa­mba nsima ya bobuki mbuma.

24:14  Baye banso batikali bagangi na nsai mpe bayembeli nkembo ya Yawe. Ut’o epai ya Westi bakembeli ye,

24:15  epai moi mokobimaka bayembeli ye, o bisanga bya mbu bakumisi nko­mbo ya Yawe Nzambe wa Israel.

24:16  Ut’o nsuka ya mokili toyoki nze-mbo ya bato : « Bapesa Nzambe wa bosembo nke­mbo ! » Kasi nalobi : « Nalembi, nakoki lisusu te, mawa na ngai ! Basuli bakosi ngai, basali ngai mabe mpenza ! »

24:17  Bino bato ba mokili, bokoyoka nsomo, bokokweya o mabulu, bokoka­ngema o mitambo.

24:18  Oyo akokima makeléle ma nsomo, akokweya o libulu, moto akolongwa o libulu, akokoto o motambo. Maziba ma likolo makofungwana mpe makonzi ma mokili makoni-ngana.

24:19  Mokili mokobukana, mokoningana mpe mokolenge, mabelé makopaswana biteni biteni.

24:20  Mokili mokotelengana lokola mo­meli masanga, mokoningana lokola esasa, mokokweya mpo ya mokumba mwa masumu, mokoteleme lisusu te.

24:21  Mokolo mona Yawe akobundisa li­mpinga lya likolo, mpe awa o nse na bakonzi banso.

24:22  Bakosangisa bango, bakokanga bango o libulu, bakobwaka bango o boloko. Nsima ya mibu miike bakotu­mbo­la bango.

24:23  Sanza ekoyoka nsoni mpe mwese mokosambwa, zambi Yawe wa bokasi bonso ako­yangela o ngomba Sion mpe o Yeruzalem. Mpe nkembo ya ye ekongenge o miso ma bakolo ba mboka.

Chapter 25

25:1  E Yawe, ozali Nzambe wa ngai, nakokumisa yo, mpe nakoyembela nkombo ya yo, za­mbi okokisi mikano mya yo mya kokamwa, miye okanaka ut’o kala na bosolo, mikobongwana te.

25:2  Okomisi engumba ya bango mopiko mwa mabanga : ezingamaki na mapango, ekomi mopotu monene. Ebombamelo ya bampaya ezali lisusu engumba te, bakoto­nga yango lisusu mokolo moko te.

25:3  Yango wana bato ba ekolo eye enene, baye banyokoli bikolo bisusu, basengeli kondima yo, kobanga mpe kokumisa yo.

25:4  Mpo ozali bokasi bwa bato batau, yo bokasi bwa babola o ntango bakeleli, ozali esika bato bakobo­mbama ntango ya mbula, esika ba­to bakoluka mpio o ntango ya molunge, zambi nkanda ya ba­nyokoli ezali lokola mbula o eleko ya mpio.

25:5  Lokola moi makasi mokokaukisa mabelé, osukisi migango mya ese­ngo mya bauta ; lokola limpata likoyokisa mpio ntango ya molu­nge, osukisi nzembo ya lilonga ya banyokoli.

25:6  Yawe wa bokasi bonso akolambela bato ba bikolo binso o ngomba eye limpati lya nyama mafuta mpe lya vino elengi : bakolia nyama ya petepete, bakomele vino ela­mu.

25:7  O ngomba eye akolongola elamba eye ezalaki kozipa bato ba bikolo binso, eye etandamaki likolo lya bato banso.

25:8  Yawe akolimwisa liwa seko. Yawe Nzambe akolongola mpizoli o miso ma bato banso. O nse mobimba akolongola nsoni ya bato ba ye ; yemei Yawe alobi bongo.

25:9  O mokolo mona bato bakoloba : Nzambe wa biso ye wana, ye oyo totiaki mitema ’te akobikisa biso, ye Yawe oyo tozalaki kolikya na ye. Tosepela mpe toyemba, zambi ye abikisi biso.

25:10  Loboko la Yawe lokobatela ngo­mba eye, kasi Moab anyatemi o mokili mwa ye, lokola matiti o libulu lya bipoli.

25:11  O esika ena Moab atandi maboko, lokola moto akati mai atandi ma­ngo. Kasi Nzambe akosilisa lole­ndo la Moab, ata akosala mayele ndenge nini.

25:12  Akobuka bifelo bya ebombamelo ya yo, akokweisa byango, ako­bwa­ka byango o nse.

Chapter 26

26:1  O mokolo mona bakoyemba nzembo eye o ekolo ya Yuda : « Tozali na ebombamelo. Nzambe azingi yango na efelo mpe na lopango mpo ya kobatela biso.

26:2  Fungola bizibeli bya mboka mpo bato ba bosembo mpe ba lobokó bakoto.

26:3  Okopesa bango esika ya boboto mpe ya kimia, zambi bakotiaka elikya na yo.

26:4  Botia mitema na Nzambe seko, ye Yawe azali libanga likoninganaka mokolo moko te.

26:5  Akitisi baye bakofandaka o ngo­mba, abomi engumba esanda, akweisi yango o nse, abwaki ya­ngo o mabelé.

26:6  Bato ba bosawa na bato batau bakonyata yango na makolo. »

26:7  Nzela ya moto wa bosembo ezali mabunu mabunu te : yo moto oko­bongiselaka ye nzela.

26:8  O nzela eye otindi biso tolanda, tozali se kotia elikya na yo, Yawe, motema mwa biso mokokanisa se nkombo ya yo.

26:9  Na butu nakolula yo na motema monso, nakoluka yo na mayele ma ngai manso. O mokolo okokata makambo ma mokili, bato ba nse bakoyeba bosembo bwa yo.

26:10  Soko balimbisi moto mabe, akoyekola bosembo te, o mokili mwa bosembo akosala mabe, mpe akomono bonene bwa Yawe te.

26:11  E Yawe, loboko na yo ezali likolo, kasi bakomono yango te. Mokolo moko bakoyeba ndenge olingi bato ba yo, bango bakoyoka nsoni, bakosila na móto okopelisa mpo ya banguna ba yo.

26:12  E Yawe, yo okopesaka biso boboto, mosala mwa biso, yo moto okokokisa mwango.

26:13  Yawe Nzambe wa biso, bakonzi basusu bayangelaki biso, kasi biso toyebi se yo, toyebi bobele nkombo ya yo.

26:14  Bato bawei bakosekwa te, bibembe bikoteleme te, yo opesi bango etumbu mpe obomi bango, mpe olongoli nkombo ya bango o mokili !

26:15  E Yawe, okomisi ekolo ya biso enene, okolisi yango mpo ya lokumu la yo, obakiseli biso mikili misusu.

26:16  E Yawe, toluki yo o ntango ya mpasi, tobeleli yo o ntango opesi biso bitumbu.

26:17  E Yawe, o miso ma yo tozali lokola mwasi akwelaki zemi mpe alingi abota, oyo apilingani mpe agangi mpo ya mpasi ya ye.

26:18  Ezalaki lokola tokwelaki zemi mpe toyoki mpasi ya kobota, kasi tobotaki se mompepe, tozweli ekolo litomba te, topesi mokili bana te.

26:19  Bawei ba yo bakosekwa, bibembe bya bato ba biso bikosekwa. Baye banso balali o mabelé, bakolamuka na nsai enene, mpo yo ozali mamio ma ntongo makopesaka bomoi, yango wana mokili mokozongisela bawa bomoi.

26:20  Bino bato ba ekolo ya ngai, boke­nde, bokoto o ndako mpe bokanga ezi­beli nsima ya bino ; bobombama mwa mikolo tee nka­nda ekosila.

26:21  Mpo Yawe akobima o ndako ya ye mpo apesa bato ba nse etumbu mpo ya mabe ma bango, mabelé makomonisa makila ma­nso masopani o mokili, mpe makozipa baye babomami lisusu te.

Chapter 27

27:1  O mokolo mona Yawe akokamata mompanga mwa ye mopotu, monene na mokasi, akobundisa Leviatan, nyoka eye ekokimaka mbangu, Leviatan, nyoka eye ya mayele mabe, akoboma ebuki ya ngando, eye ekozalaka o mbu.

27:2  O mokolo mona boyembela ela­nga kitoko ya vino nzembo.

27:3  Ngai Yawe nazali mobateli wa ya­ngo, nakosopela yango mai ntango inso. Nakokengele yango butu moi mpo ’te babebisa yango te.

27:4  Nkanda ya ngai esili, kasi soko nakuti nzube na nsende, nakobundisa yango mpe nakotu­mba yango inso.

27:5  Oyo akoluka bobateli epai ya ngai mpe boyokani na ngai, tokozala na ye bondeko.

27:6  O mikolo mina Yakobo akozala na ntina ya sika, Israel akozala nzete ekobota fulele ; mokili mobimba mokotonda na mbuma ya ye.

27:7  Nzambe abeti bango nde lokola abeteki banguna ba ye ? Abomi bango nde lokola asilisaki banyokoli ba ye ?

27:8  Akati likambo lya banyokoli, abengani bango, na mpema ya ye alongoli bango lokola mompepe mwa Esti.

27:9  Bobele bongo masumu ma Yakobo makolongwa, mpe akozwa bolimbisi soko aboyi mango : liboso abuka mabanga manso ma altare, makoma lokola mabanga baniki, abwaka nzete ya nkisi mpe akata bitumbelo bya mpaka ya malasi.

27:10  Mpamba te, engumba enene ekomi mopotu, bato banso bakimi, ekomi eliki, esika bana ba ngombe bakolia matiti, bakolala, mpe esika bakolia bitapi bya nzete ike.

27:11  Soko bitapi bya nzete bikauki, bakobuka byango, basi bakoya kotumba byango. Ya solo, bato ba ekolo eye baza­ngi mayele, yango wana Mozalisi akoyokela bango mawa te, oyo ayemi bango, akoyokela ba­ngo ngolu te.

27:12  O mokolo mona Yawe akotuta mbuma ya ye, banda ebale Efrate tee ebale ya Ezipeti, kasi mokolo moko akosangisa bino, bana ba Israel, moko moko.

27:13  O mokolo mona bakobete mo­ndule monene : baye batelenganaki o mokili mwa Asur, bakozonga, baye bakendeki boombo o mokili mwa Ezipeti bakokubamela Yawe o ngomba esantu ya Yeruzalem.

Chapter 28

28:1  Mawa na bino, bilombe ba balangwa ba Efraim, bokomi lokola fulele kitoko isili ikauki o ngomba likolo lya lo­bwaku lonzenga, itiami o mitó mya bato balangwi vino.

28:2  Tala Mokonzi akotinda elombe, moto wa nguya enene, lokola mbula ya matandala, lokola ekumbaki ekobebisaka, lokola mpela enene mpenza : akobwaka bango o nse na nguya enene.

28:3  Bato bakonyata bango na makolo, bilombe ba lolendo, balangwi ba Efraim ;

28:4  bakosala na fulele eye esila kitoko, eye ezalaki o likolo lya lobwaku lonzenga, lokola na mbuma ya figi eteli noki : moto amoni yango, akobuka mpe akolia yango.

28:5  O mokolo mona Yawe wa bokasi bonso akozala enkoti enzenga ya lokumu ya bato ba ye batikali.

28:6  Akolakisa bosembo na baye bakosambaka makambo, akozala bokasi bwa baye bakobe­ngana banguna kin’o bizibeli bya mboka.

28:7  Banganga Nzambe na baprofeta balangwi masanga, bakomi kodingbadingba mpo bameli lotoko mingi, masanga mabebisi mayele ma bango. O ntango bakomonoko bimonela, mayele makimi, o ntango bakokataka makambo, mayele matamboli.

28:8  Meza inso itondi na biloko basanzi, bisika binso bikomi na bosoto. Bakanisi :

28:9  « Ye Izaya alingi koteya nani, to kolimbola mango na nani ? Na bana baye balongoli o mabéle se sika ? »

28:10  Akolobaka bobele : « Yaka awa, ke­nde kuna, mobeko awa, mobeko kuna ; eti­nda awa, etinda kuna, kopekisa awa, kopekisa kuna. »

28:11  Ya solo, Mokonzi alobi na bato ba ekolo eye na mbebu ikokekuma mpe na lokota la bampaya.

28:12  Alobaki na bango : « Boya awa, oyo alembi apema awa, eye ezali solo esika ya kimia. » Kasi balingaki koyoka te.

28:13  Yango wana Yawe akoloba na bango boye : « Yaka awa, kende kuna ; mobeko awa, mobeko kuna, etinda awa, etinda kuna, kopekisa awa, kopekisa kuna. » Yango wana o ntango bakota­mbola, bakokweya makalekale, bakobukana makolo, bakokoto o motambo mpe bakokangema wana.

28:14  Sikawa boyoka maloba ma Yawe, bino bato boyebi se koloba maloba ma koseke, bino bayangeli ba ekolo eye ya Yeruzalem.

28:15  Bolobaki : « Biso tokati bondeko na liwa, toyokani na baye bazali o mboka ya bawa. Mokolo mpasi ekokwela mokili, ekosala biso eloko te, mpo lokuta lokomi esika biso tokobikaka, mpe tokoki kobombama na maloba ma bokosi. »

28:16  Nzokande Yawe Nzambe alobi boye : Nakotia o Sion libanga likoku­mba ndako, libanga lileki makasi, libanga lya motuya, liye bakotiaka o nse ya ndako. Oyo akotia motema na lyango, akokweya te.

28:17  Nakokamata bosolo bo emekeli ya bolai, bosembo bokozala lokola nsinga ya batongi ndako. Kasi mbula ya matandala ekolo­ngola lokuta loye lobikisaki bino, mpe mai ma mbula makozindisa embombamelo ya bino.

28:18  Mokolo mona bondeko bokataki na liwa, bokokufa, boyokani bwa bino na bato ba mboka ya bawa bokosila : Ntango mpasi ekokwela mokili, ekonyata bino.

28:19  Mbala inso ekoya, ekokanga bino ; ekokwela bino mikolo minso, butu moi. Koyoka ntina ya nsango eye ekoyokisa nsomo.

28:20  Mbeto ekoleka mokuse mpo ya kolala wana, bolangiti bokozala moke mpo ya komizipa na bwango.

28:21  Solo, Yawe akobima lokola o ngo­mba Perasim, akolenge na nkanda lokola o lo­bwaku la Gabaon, o mokolo akobanda kosala mosala mwa ye, moye mokokamwisa bato.

28:22  Bongo botika koseke, mbele minyololo mikokanga bino makasi. Mpamba te, Yawe Nzambe wa bo­kasi bonso ayebisi ngai ’te akani koboma ekolo mobimba.

28:23  Botia matoi mpe boyoka lolaka la ngai, bokanisa malamu mpe bondima maloba ma ngai.

28:24  Moto wa bilanga akotimolaka mabelé ntango inso ? Mosala mwa ye se kokata bilanga mpe kolalisa mabelé na nkanya ?

28:25  Ebongisi mpe elalisi ye mabelé, akobwaka mboto ya ngaingai mpe ya bitekuteku, akolona mbuma ya mampa na loso o milongo, mpe mbuma ya masangu o ndelo ya bilanga.

28:26  Nzambe moto alakisi ye mayele ma kosala bongo.

28:27  Bakotutaka mbuma ya ngaingai o eboka te, bakonyataka mbuma ya bitekuteku na yika ya likalo te. Kasi bakobeteke mbuma ya ngai-ngai na nzete mpe mbuma ya bitekuteku na li­ngenda.

28:28  Bakonikaka nde mbuma ya mampa ? Bakonyatanyata yango mpe te, kasi bakobete yango na mayele : bakolekisa farasa na yika ya likalo, kasi bakokeba ’te mbuma inikama te.

28:29  Yango mpe ezali likabo lya Yawe wa bokasi bonso, ye azali na malako malamu mpe na bwanya mingi.

Chapter 29

29:1  Mawa na yo, Ariel ! Ariel, engumba eye Davidi afanda­ki. Tika mibu milandana mpe bato basepela biyenga.

29:2  Kasi ngai nakoyokisa Ariel mpasi mingi, bato bakokimela mpe bakolela makasi, o miso ma ngai akozala se lokola etumbelo.

29:3  Nakopika nganda penepene na yo, nakozinga yo bipai binso, mpo ya kobundisa yo nakokangisa yo epai na epai.

29:4  Bakokitisa yo, okoloba lokola moto alali o mabelé, okoloba malembe lokola moto azindi o kati ya zelo, mongongo mwa yo lokola mo­ngongo mwa elima, maloba ma yo lokola maloba ma moto afandi o mabelé.

29:5  Banguna ebele bakoyela yo lokola mputulu, banyokoli mingi bakoyela yo lokola matiti makauki. Yango ekosalema se na mbalakaka.

29:6  Yawe wa bokasi bonso akoya epai ya yo na makeléle ma nkake, mokili mokoningana makasi, akoya na ekumbaki mpe na mbula makasi, o kati ya móto mokopela mpe mokosilisa binso.

29:7  Bato ba bikolo binso bakobunda na Ariel, baye bakobunda, bakonyokolo mpe bakozinga ye, bakozala lokola ndoto, lokola limoni na butu.

29:8  Lokola moto akufi na nzala mpe aloti ’te azali kolia, kasi o ntango alamuki azali se koyoka nzala ; to lokola moto akufi na mposa ya mai, aloti ’te azali komele, kasi o ntango alamuki, alembi mpe mongongo mokauki. Ekozala bobele bongo na bato ba bikolo binso, baye bayaki kobundisa ngomba Sion.

29:9  Bokotalana na bokamwi, bokokoma na lolanda mpe bokomono te. Bokolangwa, kasi mpo ya vino te, bokondingbandingba, kasi mpo ya masanga te.

29:10  Zambi Yawe atindeli bino elimo ekolalisa bino mpongi makasi. Akangi miso ma bino, baprofeta, azipi mitó mya bino na elamba, bamoni-makambo.

29:11  Ndimbola ya makambo manso maye bomonoki ekomeli bino lokola bikoma bya buku ekangemi makasi. Bakopesa buku yango na moto ayebi kotanga, mpe bakoloba na ye : « Tanga yango. » Kasi ako­loba : « Nayebi kotanga yango te, zambi buku ekangemi makasi. »

29:12  Na nsima bakopesa buku na moto ayebi kotanga te, mpe bakoloba na ye : « Tanga yango. » Kasi ye ako­yanola : « Nayebi kotanga te. »

29:13  Yawe alobi : Bato baye balingi ngai se na maloba, bakokumisaka ngai se na monoko, kasi mitema mya bango mizali mosika na ngai, bakobangaka ngai bobele mpo ya mobeko mwa bato, moye bato balakisi bango.

29:14  Yango wana nakokoba kolakisa bango makamwa, makambo makokamwisa bango, bongo bwanya bwa bato ba bwa­nya bokosila, mpe mayele ma bato ba mayele makolimwa.

29:15  Mawa na bato bakosalaka maka­mbo ma bonkutu mpo ya kobo­mbela Yawe mikano mya bango. Bakosalaka mango o kati ya molili mpe bakolobaka : « Nani azali komono biso, nani ayebi biso ? »

29:16  Yango nsuka ya mayele mabe mpe­nza ! Mosali mbeki aulani nde na mabelé lido ? Eloko ekoki nde koloba na mosali : « Yo osali ngai te » ? Mbeki ekoki nde koloba na moyemi : « Yo oyebi mosala te » ?

29:17  Etikali se mwa mikolo, ngomba Libano ekobongwana lopango la nzete ya mbuma, mpe lopango loye la nzete ya mbu­ma lokokoma lokola zamba.

29:18  O mokolo mona bato bakufi miso bakoyoka maloba ma buku, bato ba lolanda bakobika mpe miso ma bango makomono.

29:19  Bato bake bakoyoka esengo mpo ya Nzambe, mpe bato babola bakosepela Mosantu wa Israel.

29:20  Mpamba te, banyokoli bakozala lisusu te, mpe baye bayebi se koseke bakolimwa, baye bakolukaka kosala mabe bakolongola bango o mokili.

29:21  se bongo baye bakokitisaka baninga na maloba ma lokuta, na baye bakotielaka zuzi mota­mbo o esambi, na baye bakokweisaka bato ba bo­sembo.

29:22  Yango wana, Yawe Nzambe wa libota lya Yakobo, oyo asikolaki Abarama, alobi boye : Uta lelo bato ba Yakobo bakoyoka nsoni lisusu te, bakobanga likambo lyoko lisusu te,

29:23  Zambi ntango bakomono maye nakosala o kati ya bango, bakokumisa nkombo ya ngai. Solo, bakopesa Mosantu wa Yakobo lokumu, mpe bakobanga mingi o miso ma Nzambe wa Israel.

29:24  Baye babungisi mayele, bakozwa mayele ma sika, baye bapusi kolobaloba, bakondima kozwa mateya.

Chapter 30

30:1  Yawe alobi : Mawa na bato balolendo ! Bakani kosala makambo, kasi batuni ngai te, baluki koyokana na bato, kasi ngai nalingaki te, mpe babakisi bongo lisumu likolo lya lisumu.

30:2  Bakei o Ezipeti, kasi batuni ngai te, mpo baluka libiki epai ya Farao mpe bazwa esika ya kobombama o Ezipeti.

30:3  Kasi bobateli bwa Farao bokoyokisa bino nsoni, koluka libiki o Ezipeti ekosa­mbwisa bino.

30:4  Bankumu ba bino basili bakomi o Tanis, mpe bantoma ba bino bakomi o Kanes.

30:5  Bakoyoka nsoni, zambi bakosalisa bango te, bayebi kopesa bango lisalisi to litomba te, bakolembe bato baye bayebi se koyokisa nsoni.

30:6  Maloba ma bokaneli nyama ya Negeb. Bakatisi mokili mwa mpasi mpe mwa nsomo, mokili mwa ntambwe basi na babali ba nkele, mokili mwa bitupa na bibuki bya ngando. Batii nkita ya bango o mokongo mwa mpunda, bamemisi kamela biloko bya ba­ngo bya motuya mpo ya kokabela bato bakoki kosalisa bango te.

30:7  Lisalisi lya bato ba Ezipeti lizali mpamba lokola mompepe. Yango wana napesi Ezipeti nko­mbo eye : ‘Rakab, akosalaka mosala te’.

30:8  Sikawa, kende mpe koma yango o libaya, koma yango mpe o monkanda, mpo ezala seko o mikolo mikoya.

30:9  Bazali batomboki, bato ba lokuta, bato balingi koyoka mitindo mya Yawe te.

30:10  Na bamoni-makambo bakolobaka : « Botala te », mpe na baprofeta : « Biso tosengi te ’te bosakola makambo ma bosembo : boloba se maye makosepelisa bato, mpe bokosa na mamoni ma lokuta.

30:11  Bolongwa o nzela, botika balabala enene, bolongola Mosantu wa Israel o kati ya biso. »

30:12  Yango wana Mosantu wa Israel alobi boye : Bongo bino bokoboyaka liloba liye, bokondimaka makambo ma lokuta mpe ma kokosa.

30:13  Yango wana lisumu lina likozalela bino lokola monkaka mopasoli efelo, efelo ekokweya na mbala yoko na makeléle.

30:14  Ekozala lokola mbeki ya mabelé ekwei mpe ebolani biteni biteni, mawa te, mpe o kati ya biteni bina okoki kozwa eteni yoko te, eye ekoki na bokamati mwa makala ma móto, to na botoki mwa mai o libulu.

30:15  Mpamba te, Yawe Nzambe, Mosantu wa Israel, alobi boye : « Bokobika soko bobongoli mitema mpe bofandi kimia, elikya mpe kimia ekopesa bino bokasi. » Kasi bolingaki bongo te,

30:16  bolobi : « Te, tokokima na farasa ! » Malamu, ya solo bokokima. Lisusu : « Tokokima na farasa ya mbangu ! » Malamu, kasi baye bakolanda bino bakoleka bino na mbangu.

30:17  Bokaneli bwa moto moko bokolengisa bato nkoto, bokaneli bwa bato batano bokokimisa bino ; tee ekotikala se moko wa bino lokola likonzi lyoko o nsonge ya ngomba enene, to bendele yoko o ngomba eke.

30:18  Kasi Yawe akozila ngonga ya kolakisa bino bolamu, akoteleme mpe akoyokela bino ngolu, mpo Yawe azali Nzambe wa bosembo. Bato bakolikya na ye bakoyoka esengo !

30:19  Solo, bino bato ba Sion o Yeruzalem, bokolela lisusu te. Mokolo bokobelela, akolimbisa bino ; ekoyoka ye losambo la bino, akondimela bino.

30:20  Yawe akopesa bino mampa o nta­ngo ya mpasi, akopesa bino mai o ntango ya minyoko. Oyo akoteya bino akobombama lisusu te, mpe bokomono ye na miso.

30:21  Bokoyoka na matoi moto akoloba nsima ya bino : « Ata okokende o epai ya mwasi to o epai ya mobali, landa bobele nzela eye. »

30:22  Mokolo mona bokotala bikeko bya bino bo biloko mbindo, biye bopakolaki na palata to bokataki nko­ma, na bikeko bozipaki na wolo, bo biloko bosoto boko­bwaka byango, bokoloba : « Bolo­ngwa awa ! »

30:23  Nzambe akotindela bino mbula, mpo ya mbuma bokolona o bila­nga, mpo mampa na milona bikoma bilei biike mpe elengi. O mokolo mona bibwele bya bino bikolia o bisobe binene bya matiti kitoko.

30:24  Ngombe na mpunda iko­salela bino o bilanga, ikolia se bilei bizali na mongwa, biye bapupoli na nkanya mpe na lungu.

30:25  O mokolo mwa bobomi bonene manongi ma mboka makokweya, o ngomba inene mpe ike miluka mikotonda na mai mingi.

30:26  Mwi­nda mwa sanza mokozala makasi lokola mwa mwese, mpe mwese mokopesa mwinda mbala nsa­mbo. O mokolo mona Nzambe akokangisa mpota ya bato ba ye, mpe akobikisa baye bazokaki o etumba.

30:27  Talani ut’o mosika Nkombo ya Yawe ebelemi, móto na milinga milakisi nkanda ya ye enene, monoko mwa ye motondi na nkele, lolemu la ye lozali lokola móto mokosilisa binso.

30:28  Mpema ya ye ezali lokola mai matondisi moluka, soko moto akoti o mai, makokoma kin’o nkingo. Akoyongele bato babe na kayi­ngilu ya bobebisi, akotia ebende o monoko mwa bato mpo babunga nzela libela.

30:29  Bokoyemba lisusu lokola o nta­ngo ya eyenga, mpe esengo ekozala mingi o mitema mya bino, lokola o ntango bakobina na lomeko la mpiololo mpo ya kokoma o ngomba ya Yawe, libanga lya Israel.

30:30  Yawe akotombola lolaka la ye la nkembo, akolakisa lisusu bokasi bwa loboko la ye na nkele makasi mpe na móto mokosilisa binso, o ntei ya nkake, mbula makasi mpe mbula ya matandala.

30:31  Ba-Asur bakoyoka nsomo mpo ya lolaka la Yawe. Yawe akobete bango na lingenda.

30:32  Mbala inso Yawe akobete bango fimbo, bokoyoka miziki mya mbonda mpe mya nzenze. Yawe akobundisa ba­ngo.

30:33  Mpamba te, banda kala bapelisi etumbelo ya Tofet, eye babongiseli Molok ; zongazonga na yango libulu linene lizali, litondi na matiti mpe na nkoni. Lokola mbula ya mpaka, mpema ya Yawe ekopelisa móto mwango.

Chapter 31

31:1  Mawa na baye bakokendeke koluka lisalisi o Ezipeti. Bakotiaka elikya na farasa ya bango, na makalo mingi mpe na ebele ya basoda ba bango. Kasi bakotalaka Mosantu wa Israel te, bakotunaka Yawe te.

31:2  Nzokande Yawe ye mpe azali na mayele, akoki kotinda mpasi, ako­bo­ngolaka maloba ma ye te. Akoteleme mpo ya kobunda na libota lya bato babe mpe na baye bakosalisaka bango.

31:3  Moto wa Ezipeti azali se moto, azali nzambe te, farasa ya ye izali se minsuni, kasi elimo te. Mokolo Yawe akotanda loboko la ye, ba­nso bakokufa elongo : ná oyo akobatelaka ná oyo azwi bobateli.

31:4  Yawe alobi na ngai boye : Lokola ntambwe to mwana wa yango eka­ngi nyama, ata babyangi bake­ngeli ba mpata mpo ekima, nta­mbwe ekobanga te soko bagangi, ekoyoka nsomo te soko basali ma­keléle, se bongo Yawe wa bokasi bonso akokita mpo ya kobu­ndisa o Sion mpe ngomba eke.

31:5  Lokola ndeke ikopimbwaka, se bo­ngo Yawe wa bokasi bonso ako­batela Yeruzalem, akobatela mpe akokengele mboka, akosalisa mpe akobikisa bato.

31:6  E bato ba Israel, bozongela Moko­nzi, mpamba te, bosili botiki ye mosika.

31:7  O mokolo mona moto na moto akobwaka bikeko bya banzambe ba lokuta bisalemi na palata mpe na wolo, biye bosali na maboko ma bino basumuki.

31:8  Ba-Asur bakokufa na mompanga mwa bato te, mompanga mwa bato mokosilisa bango te ; bakokima mompanga, mpe bilenge ba ye bakokoma baombo.

31:9  Mokonzi wa bango akobanga mpe akokima, bakomanda ba bango bakotika bendele mpe bakokima. Elobi bongo Yawe, oyo azali na móto o Sion mpe na fulu ya móto o Yeruzalem.

Chapter 32

32:1  Soko mokonzi akoyangela bato na bosembo, mpe ba­nkumu bakolanda bosolo,

32:2  moto nyonso akozala lokola ebo-mbamelo o ntango ya mompepe, lokola esika ya kobombama o nta­ngo ya mbula makasi, lokola miluka mya mai o bisika mabelé makauki, lokola elilingi ya libanga linene o eliki.

32:3  Baye bazali na miso, bakomono malamu, baye bazali na matoi, bakoyokemela malamu.

32:4  Bato ba bibongolabongola bakobanda koyoka ntina, baye bazalaki kokekuma, bakoloba malamu.

32:5  Oyo azangi mayele, bakotanga ye lisusu nkumu te, mpe moyibi, bakobyanga ye moto wa lokumu te.

32:6  Mpamba te, zoba akolobaka se makambo mazangi ntina, akokanaka se kosala mabe, makambo ma ye mazangi bosembo ; na maloba ma ye akotukaka Yawe, akopimaka moto akufi na nzala bilei, akoboyaka komelisa moto akufi na mposa ya mai.

32:7  Mokosi akokanaka se kosala mabe, akolukaka nzela inso ya kokosa mobola, ata mobola oyo azali na likoki lya kosenge.

32:8  Kasi moto wa bosembo akolukaka se kosala malamu, makambo ma ye manso mabongi nye.

32:9  Bino basi ba lofundo, boyoka ngai, bino bilenge basi bokopa­nganaka na eloko te, botia matoi na maloba ma ngai.

32:10  Bino basi ba molumba bokokanisaka eloko te, etikali se mobu moko na mwa mikolo, bokolenge, mpamba te, bokobuka mbuma ya vino lisusu te, ntango ya kosangisa mbuma ekosila.

32:11  Boyoka nsomo, bino basi bokokanisaka eloko te, bolenge na nsomo, bino bopusi lolendo, bolongola bilamba kitoko mpe bokanga liputa o loketo.

32:12  Boyoka mitema mawa mpe bolela bilanga bya bino kitoko mpe nzete ya vino iye ikobotaka mbuma mingi.

32:13  Bolela mokili mwa bato ba ngai motondi na nzube, bolela ndako ya bisengo esika bato bakosepelaka.

32:14  Mpamba te, bato banso bakokima ndako ya lokumu, engumba ya makeléle mingi ekokoma mopotu, ndako ya Ofel na manongi makokoma mibenga seko ; mpunda ya zamba ikofanda mpe bibwele bikolia wana.

32:15  Ut’o likolo Elimo wa Nzambe ako­kitela biso, eliki ekobongwana elanga ya nzete, mpe elanga eye ekotonda na nzete lokola zamba.

32:16  Bosembo bokozala o eliki ena, mpe o elanga ya nzete bakosamba na bosembo.

32:17  Bosembo bona bokobota mbuma ya boboto, mpo ya bosembo bato bakofanda kimia libela.

32:18  Bato ba ngai bakofanda kuna na boboto, o ndako inene esika makeléle mazali te.

32:19  Kasi mbula ya matandala ekobebisa zamba lya banguna, mpe mboka ya bango ekokufa nye.

32:20  Bokoyoka esengo soko bokolona mboto penepene na mai, bokokoka koleisa ngombe na mpunda bipai binso.

Chapter 33

33:1  Mawa na yo, mobebisi oyo babebisi te, mawa na yo, mosuli oyo moto moko asulaki te. Tango okosilisa kobebisa, bakobebisa yo mpe, tango okosilisa koteka bato, bakoteka yo mpe.

33:2  E Yawe, yokela biso ngolu, tokolikya na yo. Ozala bokasi bwa biso banda ntongo, mpe libiki lya biso o mikolo mya mpasi.

33:3  Eyoki bato mongongo mwa yo, bakokima, soko otelemi, bato ba bikolo bakopanzana.

33:4  Bakosangisa biloko lokola mapalela makosalaka, bakowela byango lokola mbinzu ikowelaka nkasa.

33:5  Yawe, oyo afandi o likolo, azali nta bokasi, akokabelaka Sion bosembo mpe bolamu.

33:6  Yawe akoumisa bomoi bwa yo ; nkita ikobikisa yo, nde bwanya na boyebi. Bobangi Nzambe ezali nkita ya solo.

33:7  Talani bato ba Ariel bakomi koga-nga o nzela, bantoma ba boboto baleli mpizoli ya mawa.

33:8  Moto moko azali o balabala lisusu te, ata moto wa mobembo te. Baboyi bondeko bakataki, bakinoli banzeneneke, bamemyi lisusu moto moko te.

33:9  Ekolo ekomi na mawa, bato balembi, Libano ebebi, ekomi na nsoni, mokili mwa Saron mokomi esobe, nzete ya Basan mpe ya Karmel ibungisi nkasa.

33:10  Yawe alobi : « Sikawa nakoteleme, sikawa nakolakisa bato lokumu la ngai.

33:11  Bomemi zemi lya matiti makauki, bokobota matiti, mpema ya ngai ezali móto mokosilisa bino.

33:12  Bato ba bikolo bakozika lokola makala, bakotumbama lokola nzube ikauki.

33:13  Bino bato bozali mosika, boyoka makambo nasali, bino bato bozali penepene, boyeba nguya ya ngai. »

33:14  O Sion basumuki bakomi kobanga, nsomo enene ekangi bato babe. Nani wa biso ndakoki móto moye mokosilisa binso ? Nani akoki kofanda o móto makasi boye ?

33:15  Bobele moto oyo akolandaka nzela ya bosembo mpe akolobaka ma­kambo na bosolo, oyo akoboyaka mosolo mwa boyibi, oyo akotandaka loboko te mpo ya kozwa mabonza, oyo akokangaka matoi mpo ayoka maloba ma mobomi te mpe akokangaka miso mpo amono ma­kambo mabe te,

33:16  ye akofanda o mboka ya likolo, akobombama solo o ndako eto­ngami o mabanga, akozwa mampa ma kolia mpe mai ma komele.

33:17  Miso ma yo makomono mokonzi monene na bonzenga bwa ye, okomono ekolo enene mpenza.

33:18  Okokanisa lisusu makambo mayokisaki yo nsomo, okomilobela : « Wapi moto oyo azalaki kotanga mpe komeka bozito bwa biloko ? Wapi oyo azalaki kotanga bilenge ba mboka ? »

33:19  Okomono lisusu bato ba lofu­ndo wana te, baye bakolobaka lokota moto moko akoki koyeba te, lokota malonga te, lozali mpe na ntina te.

33:20  Otalaka Sion, esika tosepelaki biyenga bya biso, miso ma yo mamono Yeruzalem, esika ya kimia, ema eye bakolongola te ; bakolo­ngola piké ya yango te, bakokata nsinga ya yango te.

33:21  Kuna Yawe akolakisa nguya ya ye, kuna bibale mpe miluka minene mizali, bwato bonene na nkai bokoleka te, mpe masuwa manene makotambola te.

33:22  Zambi Yawe azali zuzi mpe mosa-mbisi wa biso, Yawe azali Moko­nzi wa biso, ye akobikisa biso.

33:23  Mikulu mya masuwa ma bino milembi, mikoki kotelemisa lisusu likonzi lya masuwa te, mikoki kotombola bendele lisusu te. O nta­ngo ena bato bakokabelana biloko biye babotoli, ata batengoli bakokende kokamata byango.

33:24  O Sion moto moko akoloba lisusu te : « Nazali kobele. » Bakoli­mbi­sa masumu ma bato bakofa­nda wana.

Chapter 34

34:1  Bato ba bikolo, boya penepene mpe boyoka, bino bato ba mokili, bofungola matoi. Nse mobimba na baye banso bafandi wana, boya koyoka elongo na bikelamo binso bizali o mokili.

34:2  Yawe asiliki na bato ba bikolo binso, asiliki na basoda ba bango banso, akani koboma bango, akabi bango mpo ’te bakufa.

34:3  Bato ba bango babomami bakokundama te, bibembe bya bango bikolumba nsolo ebe. Ngomba ya bango ikotangisa makila.

34:4  Minzoto minso mya likolo mikolimwa, likolo likolingama lokola lokasa la monkanda, mpe minzoto minso mikokweya lokola nkasa ya nzete ya vino i­kwei mpe ikauki mpe lokola nkasa ya nzete ya figi ikwei o nse.

34:5  Mompanga mwa Yawe momononi o likolo, bakokata na mwango ba-Edom, baye bakateli etumbu ya liwa.

34:6  Mompanga mwa Yawe motondi makila na mafuta, makila ma bana ngombe mpe ma ntaba babali na mafuta ma mpiko ya mpata babali. Zambi Nzambe alingi kobonza mo­boma o Bosra, alingi koboma bato mingi o mokili mwa Edom.

34:7  Bakoboma wana nzale, mpata ya mafuta na ngombe babali inene, makila ma bango makopanzana o mabelé ma bango, mokili mwa bango mokomele ma­futa ma bango.

34:8  Mpamba te, ezali mokolo Yawe akozongisa mabe, mobu moye akofutisa bato basali Sion mabe nyongo.

34:9  Miluka mya Edom mikobongwana fofolo, mabelé ma bango makobongwana mpaka, ekolo ya bango ekokoma bobele mpaka epeli móto.

34:10  Móto mona mokozima te, butu moi, milinga mya móto mikobuta nta­ngo inso, ekolo ya bango ekobeba seko, moto moko akoleka wana lisusu te.

34:11  Ekozala mokili mwa libeke na mboke, esulungutu na yanganga ikofanda wana ; Yawe akotandela mokili moye nsi­nga ya mobulungano mpe lomeko la bompamba.

34:12  Ntaba babali ikozala wana, bankumu bakosila, bakolubola mo­konzi lisusu te, bayangeli banso mpe bakosila.

34:13  O ndako inene okokuta se nkobo-ngo, bibombamelo bikotonda na nzube mpe na nsende. Bikokoma mobenga mwa ngo­mbolo, bikokoma mboka ya maligbanga.

34:14  Gambala ikokutana wana na ngo-mbolo mpe ntaba mobali ekobya­nga moninga wa yango. Zabolo ya mwasi akoluka wana esika ya kopema.

34:15  Bobele etupa ekofanda wana mpe ekobota makei, ekolalela makei mpe ekopasola mango mpe ekosangisa bana ba yango o malili. Kombekombe ikosangana mpe ikokutana wana.

34:16  Boluka o buku ya Yawe mpe botanga : « Ata nyama yoko ekozanga te. » Yawe atindi bongo, elimo wa ye akosangisa yango.

34:17  Yemei akati likambo lya yango bo­ngo, atii nsinga ya ye mpe akabeli ya­ngo mokili. Yango ikozala bankolo ba mokili mona seko, ikofanda wana mikolo minso seko.

Chapter 35

35:1  Eliki mpe mabelé makauka masepela, esobe eyoka es­e­ngo mpe nzete ya yango ibimisa nkasa,

35:2  ezala na fulele mingi, esepela mpe eganga na nsai. Bapesi yango lokumu lokola Libano, bonzenga lokola Karmel na Saron. Bakomono nkembo ya Yawe, Nza­mbe wa biso.

35:3  Bolendisa maboko malembi, bolendisa mabolongo mazali kolenge.

35:4  Boloba na bato babulungani : « Bozala na mpiko, bobanga eloko te. Nzambe wa bino akoya kobekola bato babe, ye moto akoya kobikisa bino. »

35:5  O ntango ena bato ba lolanda bakomono, bato bakufi matoi bakoyoka lisusu.

35:6  Batengoli bakopimbwa lokola mbo­loko, baye bayebi koloba te bakoganga na nsai. Mai ma miluka makobima o eliki, bitima bya mai bikozala o mokili mozangi mai.

35:7  Mabelé makauki makobongwana liziba lya mai, o mokili bato bakufi na mposa ya mai, maziba makobima. O bisika ngombolo ikofandaka, nsoló ikokola wana.

35:8  Nzela kitoko ekoleka wana, bakotanga yango nzela esantu. Moto mbindo akoleka wana lisusu te. Bobele bato ba Yawe bakoleka wana, bilema bakoyengayenga wana te.

35:9  Ntambwe ekozala wana te, bakokutana ma nyama ya zamba wana te, kasi bato basikwami bakotambola wana,

35:10  bato Nzambe abikisi bakozonga wana : bakoya o Sion na nzembo ya nsai, bakolakisa bilongi esengo nsuka te, bakozala na nsai mpe bakosepela mingi, mpo mawa na mpasi ikosila seko.

Chapter 36

36:1  O mobu mwa zomi na minei mwa bokonzi bwa Ezekia, Senakerib, mokonzi wa Asur, akei kobundisa bingumba bya Yuda mpe abotoli byango.

36:2  Ut’o Lakis mokonzi wa Asur atindi moyangeli wa ye epai ya mokonzi Ezekia o Yeruzalem, elongo na basoda ebele. Moyangeli atelemi penepene na nze­la ya mai euti o likolo, eye ekolanda balabala ekokende na elanga ya ‘Mosukoli bilamba’.

36:3  Eliakim, mwana wa Kilkia, ye mokengeli wa ndako ya mokonzi, na Sebna, mokonzi wa minkanda, na ntoma Yoa, mwana wa Asaf, bakei kokutana na ye.

36:4  Moyangeli alobi na bango : « Boloba na Ezekia boye : Mokonzi monene wa Asur alobi boye : Ozali kotia elikya na nani ?

36:5  Okanisi ’te maloba mpamba makoki na mayele mpe na mpiko mpo ya kolonga etu­mba ? Otii motema na nani mpo ’te otomboko na ngai ?

36:6  Okolikya ’te okozwa lisalisi epai ya Ezipeti, lititi lya nsoló libukani mpe likotubola loboko la moto akomilendisa na lyango. Ekosalema bongo na bato banso bakotiaka mitema na Farao, mokonzi wa Ezipeti.

36:7  Mbele bokoloba na ngai : “Totii elikya ya biso na Yawe Nzambe wa biso.” Kasi Ezekia, ye moto alo­ngo­li bisika binso bya kokumisa banzambe ba lokuta na bitumbelo binso, alobaki na bato ba Yuda mpe na Yeruzalem : “O boso bwa altare eye bosengeli kogumbama.”

36:8  Bete mondenge na nkolo wa ngai, mokonzi wa Asur. Nakopesa yo farasa nkoto ibale, soko okozwa bato bakobutelayango.

36:9  Okosala boniboni mpo ’te okimisa ata moko o kati ya basali mpamba ba mokonzi wa ngai ? Kasi otii motema na Ezipeti mpo ya kozwa makalo na bato ba farasa.

36:10  Mpe awa nayei kobunda etumba mpo ya kobebisa ekolo eye, okanisi ’te Yawe andimi yango te ? Yawe moto alobaki na ngai : “Kende kobunda na bato ba mokili mona mpo ’te obebisa mwango !” »

36:11  Eliakim, Sebna na Yoa balobi na moyangeli : « Tobondeli yo, oloba na biso basaleli ba yo na lokota la ba-Aram, mpo toyebi lokota lango, kasi oloba na biso na lokota la Yudea te, bongo bato bazali o efelo ya engumba bayoka biso te. »

36:12  Kasi moyangeli ayanoli : « Okanisi ’te mo­konzi wa ngai atindi ngai naloba se na yo mpe na mokonzi wa yo ? Atindi ngai naloba mpe na bato bafandi o efelo ya engumba, mpo, se lokola bino, bango mpe bakosengela kolia nyei ya bango mpe komele masuba ma bango. »

36:13  Moyangeli atelemi mpe agangi makasi na lokota la Yudea, asakoli maloba maye : « Boyoka maloba ma mokonzi monene wa Asur.

36:14  Mokonzi alobi boye : Ezekia abuba bino te ! Akoki kobikisa bino te.

36:15  Ezekia atika koloba na bino ’te bosengeli kotia mitema na Yawe, atika koloba : « Ntembe te, Yawe ako­bikisa bino, engumba eye eko­kweya o maboko ma mokonzi wa Asur te. »

36:16  Boyoka Ezekia te, mpa­mba te, mokonzi wa Asur alobi boye : Bokata na ngai bondeko, bomikaba o maboko ma ngai, mpe moto na moto ndakoki kolia mbuma ya nzete ya vino na mbuma ya nzete ya figi, moto na moto akomele mai ma libulu lya ye moko.

36:17  Na nsima nakoya kokamata bino banso mpe nakotia bino o mokili mozali lokola mokili mwa bino, esika mbuma ya mampa mpe vino ya sika izali mi­ngi, mokili mwa mampa mpe mwa bilanga bya vino ebele.

36:18  Ezekia abuba bino te, aloba te : « Yawe akobikisa bino. » Banzambe ba mikili misusu babikisi nde bikolo bya ba­ngo o maboko ma mokonzi wa Asur ?

36:19  Wapi banzambe ba Amat mpe ba Arpad ? Wapi banzambe ba Sefarvayim ? Wapi banzambe ba ekolo ya Samaria ? Babikisi nde Samaria o maboko ma ngai ?

36:20  O kati ya ba­nzambe ba bikolo bina binso, wapi banza­mbe baye babikisi ekolo ya bango o maboko ma ngai ? Bongo Yawe akobikisa nde Yeruzalem ? »

36:21  Batikali nye mpe bazongisi liloba lyoko te, mpamba te, mokonzi alobaki na bango : « Bozongisela ye liloba te. »

36:22  Eliakim, mwana wa Kilkia, mokengeli wa ndako ya mo­konzi, Sebna, mokomi wa mi­nkanda, na ntoma Yoa, mwana wa Asaf, bazongi epai ya Ezekia, na bilamba bipaswani, mpe bayebisi ye maloba manso moyangeli alobaki.

Chapter 37

37:1  Eyoki mokonzi Ezekia maloba ma bango, apasoli bila­mba bya ye, alati ngoto mpe akei o Tempelo ya Yawe.

37:2  Atindi Eliakim, mokengeli wa ndako ya mokonzi, na Sebna, mokomi wa mi­nkanda, na bakolo ba banganga Nzambe ba­lata ngoto mpe bakende epai ya profeta Izaya, mwana wa Amos.

37:3  Balobi na ye : « Ezekia alobi boye : Mokolo mwa lelo mozali mokolo mwa nsomo, mwa etumbu mpe mwa nsoni ! Bana balingi babotama, kasi makasi ma kobota bango mazali te.

37:4  Yawe Nzambe wa yo ayoka maloba ma moyangeli, oyo nkolo wa ye, mokonzi wa Asur, atindaki mpo ya kofinga Nzambe wa bomoi, mpe Yawe Nzambe wa yo apesa ye etumbu mpo ya maloba maye Yawe ayokaki. Yo bondela Yawe mpo ya bato banso batikali. »

37:5  Basaleli ba mokonzi Ezekia bakei epai ya Izaya.

37:6  Oyo alobi na bango : « Boyebisa mokonzi wa bino : Yawe alobi boye : Obanga maloba maye te, maye oyokaki, mafinga maye basali ba mokonzi wa Asur balobaki na ngai.

37:7  Nakobuli­nginya mayele ma ye ; ekoyoka ye nsango ena akozonga o mokili mwa ye. Mpe o mokili mwa ye moko bakoboma ye na mompanga. »

37:8  Moyangeli ayokaki ’te mokonzi wa Asur alongwaki o Lakis, akei kokutana na ye ntango azalaki kobundisa Libna.

37:9  Ntango mokonzi ayokaki ’te Tiraka, mokonzi wa Kus, abandi komilengele mpo ya ko­bundisa ye, atindi bantoma epai ya Ezekia, baloba na ye :

37:10  « Boloba na Ezekia, mokonzi wa Yuda, boye : Nzambe wa yo, oyo otii motema na ye, akosa yo te na bolobi ’te : « Yeruzalem ekokweya o maboko ma mokonzi wa Asur te. »

37:11  Yo moko oyoki maye bakonzi ba Asur basalaki na bikolo binso, mpe ndenge babebisi byango. Bongo okanisi ’te okobika ?

37:12  Bankoko ba ngai basilisaki mokili mwa bato ba Gozan, Aran, Resef na bato ba Eden, baye bazalaki kofanda o Tel-Basar, banzambe ba bango babikisaki nde bango ?

37:13  Wa­pi mokonzi wa Amat, wa Arpad, wa Sefarvayim, wa Ena mpe wa Iva ? »

37:14  Ezekia akamati monkanda o ma­boko ma bantoma, atangi mwa­ngo. Na nsima akei o Tempelo ya Yawe mpe atii monkanda o miso ma Yawe.

37:15  Asambeli boye o miso maYawe :

37:16  « Yawe wa bokasi bo­nso, Nzambe wa Israel, yo okozalaka likolo lya bakerubim, bobele yo ozali Nzambe wa bakonzi ba­nso ba nse mobimba. Yo moto okelaki likolo na nse.

37:17  Mokonzi, otia matoi mpe oyoka ! Fungola miso mpe omono ! Yoka maloba ma Senakerib, oyo atindaki bato bafi­nga yo, Nzambe wa bomoi.

37:18  Solo, Mokonzi, bakonzi ba Asur basilisi bato ba bikolo binso.

37:19  Batumbi ba­nza­mbe ba bango na móto, kasi bazalaki banzambe te, se misala mya maboko ma bato, bikeko bya nzete to mabanga, mpe bakonzi ba Asur babomi byango.

37:20  Kasi sikawa, Yawe Nzambe wa biso, obikisa biso o maboko ma ye, mpo ’te bakonzi ba­nso ba nse mobimba bayeba ’te yo moko ozali Yawe Nzambe. »

37:21  Izaya, mwana wa Amos, atindi bato bayebisa Ezekia ‘te : « Moko­nzi Nzambe wa Israel alobi boye, mpo nayoki ’te obondeli ngai mpo ya likambo lya Senakerib, mokonzi wa Asur.

37:22  Yoka maloba ma bokaneli Yawe alobi : Bato ba Sion bakinoli yo, baseki yo ; bato ba Yeruzalem baningisi mitó nsima ya mokongo mwa yo.

37:23  Ofingi nani ? Otumoli nani ? Olobi maloba ma lofundo na nani ? Otomboli miso ma lolendo mpo ya kotala nani ? Osali bongo na Mosantu wa Israel.

37:24  Otindi basali bafinga Yawe. Olobi : « Na bokasi bwa makalo ma ngai nabuti ngomba, tee o nsonge ya nsuka ya Libano. Nakati sédere ilai mpe sipresi kitoko ya yango. Nakomi o nta nsonge ya yango, o lopango la nzete.

37:25  Ngai natimoli mpe nameli mai ma mikili misusu, na makolo ma ngai nakaukisi mi-ngala minso mya Ezipeti. »

37:26  Oyebi te ’te banda kala nakani kosala bongo ? Maye nalengeli ut’o kala, nakosala mango sikawa. Yo osengelaki kobebisa mboka izi­ngami makasi, etikala se mabanga mpamba.

37:27  Maboko ma bato ba mboka ina mazangaki makasi, banso bayoki nsomo mpe bakufi na nsoni, bazalaki lokola matiti mabesu o bilanga, lokola matiti mabe makokola o motondo mwa ndako, lokola nkasa ikauki na mompepe mwa Esti.

37:28  Soko otelemi to ofandi to obimi to okoti o ndako, nayebi, nayebi mpe ’te ozali kosilikela ngai.

37:29  Awa osiliki na ngai bongo, awa maloba ma yo ma lofundo makomi tee o matoi ma ngai, nakotia mpete ya ngai o zolo ya yo, mpe ekangiseli ya ngai ya ebende o mbebu ya yo, nakozongisa yo o nzela eye outaki.

37:30  Tala elembo eye nakopesa yo, Ezekia : O mobu moye bokolia mbuma ikweyaki o nse, o mobu mwa nsima bokolia biloko bikolaki byango moko. Kasi o mobu mwa misato bokolona mpe bokobuka mbuma, bokolona nzete ya vino mpe bokolia mbuma ya yango.

37:31  Bato ba libota lya Yuda baye bakotikala, bakobimisa nkinga ya sika o kati ya mabelé, mpe bakobota lisusu mbuma o bitapi.

37:32  Mpamba te, ndambo ya bato bakotikala o Yeruzalem, mpe ndambo ya bato bakobika o ngomba Sion. Yawe wa bokasi bonso akosala bongo na bolingi bwa ye.

37:33  Yango wana Yawe akaneli moko­nzi wa Asur na maloba maye : Akokoto o engumba eye te, akobetela yango makula te, akomibatela na nguba te mpo abu­nda na yango, akolalisa mabelé te mpo abuta o efelo.

37:34  Akozonga bobele nzela ayaki, akoyingela o engumba te. Yawe alobi bongo.

37:35  Ngai nakobatela engumba eye mpe nakobikisa yango, mpo ya nkombo ya ngai mpe mpo ya Davidi, mosaleli wa ngai. »

37:36  Anzelu wa Yawe abimi mpe aleki o nganda ya basoda ba Asur mpe abomi bato nkoto monkama na ntuku mwambe na itano. Na nto­ngo se bibembe bimononi !

37:37  Senakerib, mokonzi wa Asur, alongoli nganda mpe akei ; azongi o Ninive mpe atikali kuna.

37:38  Mokolo moko, ntango azalaki o tempelo koku­mba­mela Nisrok, nzambe wa ye, bana ba ye, Andramelek na Sareser, babomi ye na mompanga mpe bakimi o mokili mwa Ararat. Mwana wa ye Asaradon akitani ye.

Chapter 38

38:1  O mikolo mina Ezekia abeli makasi, bokono bwa liwa. Profeta Izaya, mwana wa Amos, akei kotala ye, alobi : « Yawe alobi boye : Bongisa makambo ma ndako ya yo, zambi okowa, okobika te. »

38:2  Ezekia abongoli elongi epai ya efelo ya ndako mpe abondeli Yawe, alobi :

38:3  « E Yawe, kanisa ’te nata­mbolaki o miso ma yo na motema lobokó mpe semba, mpe nasalaki maye makosepelisaka yo. » Mpe Ezekia abandi kolela mingi.

38:4  Yawe alobi na Izaya maloba maye :

38:5  « Kende mpe loba na Ezekia boye : Yawe, Nzambe wa nkoko wa yo Davidi, alobi boye : Nayoki losambo la yo mpe namoni mpizoli ya yo. Nakobakisa mibu zomi na mitano na bomoi bwa yo.

38:6  Nakobikisa yo na mpe engumba eye o maboko ma mokonzi wa Asur.

38:7  Tala elembo eye Yawe akolakisa yo ’te akosala maye alobaki.

38:8  O ebuteli ya ndako ya Akaz elilingi ya mwese esili ekiti mabaya zomi. Bo­ngo ngai nakosala ’te elilingi eye ebuta mabaya zomi. » Elilingi ya mwese ebuti mabaya zomi ya maye esilaki kokita liboso.

38:9  O ntango Ezekia, mokonzi wa Yuda, abiki o bokono, ayembi loyembo loye :

38:10  Namilobeli : Nakomi bobele o kati ya mikolo mya bomoi bwa ngai, mpe nazali kokende o mboka ya bawa ; bakofandisa ngai wana mibu miye mitikali.

38:11  Nakanisi : Nakomono Yawe lisusu te o mokili moye mwa bato, nakomono lisusu moto moko te wa bato bazali o mokili.

38:12  Babuki ndako ya ngai, ebwakemi mosika na ngai, lokola ema ya bakengeli ba mpata. Ozingi nsinga ya bomoi bwa ngai lokola motongi akosalaka. Nsinga ya bomoi bwa ngai ekatani. Na mokolo moko osukisi ngai.

38:13  Ekomi ntongo nasili nalembi, obuki ngai minkuwa lokola nta­mbwe, na mokolo moko osukisi ngai.

38:14  Nazali kolela lokola nyampeke, nazali kokimela lokola ebenga. Miso malembi kotala likolo. Nanyokwami mingi, Mokonzi, bi­kisa ngai.

38:15  Naloba nini, nayebisa ye nini, awa ye moto akosalaka maye ma­nso ? Nakosukisa mikolo mya ngai, na boyoki mpasi mingi mpenza.

38:16  Mokonzi azali penepene na bato ba ye, bakobika, elimo wa ye akopesa bango bomoi, yango wana okobikisa ngai, okobakisela ngai mikolo.

38:17  Mpasi ya ngai esili, nakomi na boboto, mpo obikisi ngai o libulu lya liwa, obwaki masumu ma ngai manso mosika.

38:18  O mboka ya bawa bakokumisaka yo te, bawei bakokembelaka nkembo ya yo te. Baye bakwei o libulu bakolikya lisusu na bolingi bwa yo te.

38:19  Bobele moto azali na bomoi akoki kokumisa yo, lokola ngai nakumisi yo lelo. Bobele tata akoki koyebisa bana ba ye ’te bolingi bwa yo bokoumela seko.

38:20  Yawe alingi abikisa ngai, tokoyembela yo na lokombe mikolo minso mya bomoi bwa biso o Tempelo ya yo, Yawe.

38:21  Izaya alobi : « Baya na limpa lya figi mpe batia lyango na mpota. Mpe mokonzi akobika. »

38:22  Ezekia alobi na Izaya : « Elembo nini okolakisa ngai mpo nayeba ’te nakokende lisusu o Tempelo ya Moko­nzi ? »

Chapter 39

39:1  O mikolo mina Merodak- Baladan, mwana wa Baladan, mokonzi wa Babilone, atindeli Ezekia minkanda na mabonza ; mpo ayokaki ’te Ezekia abeleki mpe abikaki.

39:2  Ezekia asepeli boyei bwa bantoma mpe alakisi bango bibombelo bya ye binso, esika azalaki kobomba palata na wolo, malasi, mafuta ma nsolo mpimbo, biloko bya mosala mpe binso bizalaki o bibombelo. Ezekia alakisi bango bi­loko binso bizalaki o ndako ya ye mpe o ekolo ya ye, abombi eloko te.

39:3  Profeta Izaya akei kotala moko­nzi Ezekia, atuni ye : « Bato baye ba­lobi na yo nini ? Bauti wapi ? » Ezekia azongisi : « Bauti o ekolo mo­sika, o Babilone. »

39:4  Izaya atuni : « O ndako ya yo bamoni biloko nini ? » Ezekia ayanoli : « Bamoni biloko binso bizali o ndako ya ngai, nalakisi bango biloko binso bizali o bibombelo bya ngai. »

39:5  Izaya alobi na Ezekia : « Yoka liloba lya Yawe wa bokasi bonso :

39:6  Mokolo mosusu biloko binso bya ndako ya yo mpe biye binso ba­nkoko ba yo bakongoloki tee lelo, bikokende o Babilone. Eloko yoko ekotikala te. Yawe alobi bongo.

39:7  Ba­kokanga bana basusu yo moko oboti, bakokende na bango o boombo, bakokomisa bango ba-eniki o ndako ya mokonzi wa Babilone. »

39:8  Ezekia alobi na Izaya : « Liloba lya Yawe olobi lizali lilamu. » O motema akanisi : « O mikolo mya boko­nzi bwa ngai bato bakofanda kimia. »

Chapter 40

40:1  Nzambe wa bino alobi boye : « Bobondo bato ba ngai.

40:2  Boloba na bato ba Yeruzalem mpo bandima na motema, bosakola o miso ma bango ’te boombo bosili, ’te etumbu, eye Yawe apesi bango, esili, etumbu eye enene bazwaki mpo ya masumu manso basalaki. »

40:3  Lolaka lozali kobelela boye : « Bobongisela Yawe nzela o eliki, bosembolela Nzambe wa bino balabala.

40:4  Botondisa mabwaku manso, bokitisa ngomba inso, ngomba ya nsonge ekoma esobe, mokili mwa ngomba eke mokoma lobwaku !

40:5  Nkembo ya Yawe ekomonono ba­to banso lisanga bakomono ya­ngo mpo Yawe asili alobi bongo. »

40:6  Nayoki lolaka la moto alobi : « Sakola ! » Ngai nazongisi : « Nasakola nini ? » (Moto ona alobi :) « Bato banso bazali se lokola matiti, bolamu bwa bango lokola fulele ya bilanga.

40:7  Matiti makauki, fulele esili o mokolo Yawe atindi mpema lokola mompepe. Solo, bato banso bazali se lokola lititi mpamba.

40:8  Lititi likokauka, fulele ekosila, kasi liloba lya Nzambe wa biso likoumela seko. »

40:9  Buta ngomba esanda, yo Sion, ntoma wa nsango ya esengo ! Tombola mongongo makasi, obanga te, yo Yeruzalem, ntoma wa nsango ya nsai, loba na bato ba bingumba bya Yuda : « Tala Nzambe wa bino. »

40:10  Yawe Nzambe akoya na nguya ya ye, akolakisa bokonzi bwa ye. Bato ye abikisi, nde lifuta lya ye mpe elembo ya lilonga lya ye.

40:11  Lokola mokengeli akoleisa mpata ya ye, akoyamba bana mpata o bontolo, akosangisa yango na loboko la ye, mpe akokamba bamama mpata malembe.

40:12  Nani ameki bozito bwa mai ma mbu na loboko ? Nani ameki bonene bwa likolo na misapi mya ye ? Nani ameki bozito bwa mabelé ma mokili o sani ? Nani ameki ngomba inene na ike o emekeli ya bozito ?

40:13  Nani apesi elimo wa Yawe biti­nda ? Nani alakisi ye to apesi ye malako ?

40:14  Yawe aluki mayele ma ye epai ya nani ? Nani alakisi ye kosamba maka­mbo ma bato ? Nani ateyi ye mpe ayebisi ye nzela ya bwanya ?

40:15  Bikolo binso bizali se bo litanga lya mai o katini, bizali se lokola mpumbulu ya zelo o emekeli. Tala bisanga bizali se na bozito lokola mputulu.

40:16  Nzete inso ya Libano ikokoka te mpo ya kopelisa móto, mpe nyama inso ikokoka te mpo ya kobonzela ye libonza.

40:17  O miso ma ye bikolo binso bizali se mpamba, akotalaka binso lokola mputulu, lokola biloko mpamba.

40:18  Okanisi ’te Nzambe azali lokola nani ? Ekeko nini eulani na ye ?

40:19  Moto wa ntoki akonyangwisa ebe­nde, akotula ekeko, akokembisa yango na wolo mpe akobakisa minyololo mya palata.

40:20  Mosali wa mayele, akopono mabaya malamu ma nze­te eye ekopoloko te, mpo asala ekeko eye ekokweya te.

40:21  Boyebi yango te ? Boyoki yango naino te ? Bayebisaki bino te ut’o libandela lya mokili ? Bongo boyebi te nani azalisaki mokili mobimba ?

40:22  Ye akofandaka kuna o etando ya likolo, mpe bato ba nse bazali se lokola mapalela. Ye atandi likolo lokola bakota­ndaka elamba, mpe alingoli lyango lokola ema ya kofanda.

40:23  Ye akokweisaka bankumu ba mokili, akokomisaka bazuzi ba nse bato ba mpamba.

40:24  Bazali lokola nzete ilonami bobele sika, lokola mbuma iye baloni se sika o mabelé, naino ikotisi nkinga o mabelé te. Soko apemeli yango mpema, ikokauka, ekumbaki ekoki kolongola yango lokola lititi.

40:25  Mosantu alobi : Bokanisi ’te ngai nani ? Nani akokani na ngai ?

40:26  Botombola miso mpe botala : Nani moto akeli minzoto ? Bobele oyo atiaki myango kuna o molongo mpe akobyangaka moko moko na nkombo. Bokasi bwa ye mpe nguya ya ye eleki bonene, ata monzoto moko mokozanga te.

40:27  Bino bato ba Yakobo, mpo nini bokolobaka, bino bato ba Israel, mpo nini bokosakolaka ‘te : « Yawe ayebi nzela ya biso te, Nzambe wa biso ayebi makambo ma biso te ? »

40:28  Boyebi yango te ? Boyoki yango naino te ? Yawe azali Nzambe wa lobiko. Ye moto akeli nse mobimba. Akolembeke te, akotikaka mosala mwa ye te, bwanya bwa ye bozali na nsuka te.

40:29  Akolendisaka baye balembi, akopesaka makasi na baye baza­ngi makasi.

40:30  Ata bilenge bakoki kolembe nye mpe kolengelenge.

40:31  Kasi bato bakotiaka mitema na Yawe bakozwa nguya ya sika, bakopimbwa lokola bingondo, bakopusana liboso mpe bakole­mbe soki te, bakotambola mbangu mpe bakozanga makasi te.

Chapter 41

41:1  Bino bisanga, botika makekéle mpe boyoka ngai, bino bato ba bikolo, bozwa nguya ya sika, bobeleme mpe boloba : Banso elongo tosamba.

41:2  Nani abimisi epai ya Esti moto oyo akolongaka bipai binso ? Nani akokabaka bato ba bikolo o maboko ma ye, nani akokweisaka bakonzi ba nse ? Na mopanga akokomisaka bango mputulu, na litimbo akopanzaka bango lokola matiti matombwami.

41:3  Akobengana bango mpe moto moko akosala ye mabe te, akoleka o nzela mpe akonyata mabelé makasi te.

41:4  Nani moto abongisi mana manso ? Bobele Oyo akobyangaka bato ut’o ebandela : ngai Yawe, nazali moto wa liboso mpe nakozala naino elongo na bato ba nsuka.

41:5  Bato ba bisanga bamoni mpe babangi, ata baye bazali o ndelo ya mokili balengi, babelemi mpe bayei.

41:6  Moto na moto asalisi moninga, mpe alobi na ndeko wa ye : « Lendisa motema ! »

41:7  Oyo akosalaka bikeko alendisi mo­tuli wa wolo, oyo akopetolaka wolo alendisi oyo akobete ebeteli, alobi mpo ya ebende : « Ebende ezali malamu », mpe abakisi nsete na ekeko mpo eningana te.

41:8  Kasi yo, Israel, mosaleli wa ngai, yo Yakobo, oyo ngai naponi, yo mwana wa libota lya Abarama, ndeko wa ngai,

41:9  nakamati yo o nsuka ya mokili, mpe ut’o mokili mosika nabyangi yo, nalobi na yo : « Ozali mosaleli wa ngai, naboyi yo te, kasi naponi yo. »

41:10  Obanga te, zambi nazali na yo, ozala motema likolo te, zambi nazali Nzambe wa yo. Napesi yo makasi mpe nasalisi yo, nalendisi yo mpe nasimbi yo na loboko la ngai la mobali.

41:11  Ya solo, baye banso bayokeli yo nkanda bakoyoka nsoni mpe bakosambwa. Baye bakolukaka yo na makambo, bakokoma bato mpamba mpe bakosuka.

41:12  Okoluka banguna ba yo, kasi okomono bango te. Baye bakobundisaka yo bakokoma bato mpamba mpe bakosuka.

41:13  Zambi ngai nazali Yawe Nzambe wa yo, nasimbi yo na loboko la ngai la mobali. Nalobi na yo : « Obanga te, ngai nakosalisa yo. »

41:14  Obanga te, mpambo Yakob, bino mpe, bato ba Israel. Yawe alobi : ‘Ngai nakosalisa yo, Ngai, Mosantu wa Israel, nakosikola yo’.

41:15  Ngai nakokomisa yo epasola mabelé, eloko ya sika ezali na mino mapotu, okonyata ngomba mpe okopasola yango, okopanza ngomba ike ikoma se mputulu ya matiti makauki.

41:16  Okopupola yango mpe mompepe mokopimbwisa yango, mompepe mokasi mokopanzola yango. Kasi yo okosepela Yawe, okoluka lokumu epai ya Mosantu wa Israel.

41:17  Bato babola na bato ba mawa bakoluka mai, kasi bakozwa te, lolemu la bango lokauki mpo ya mposa ya mai. Ngai, Yawe, nakondimela bango, ngai Nzambe wa Israel, nakotika bango te.

41:18  Nakotiyolisa miluka o bisika bizangi matiti, nakobimisa maziba o mabwaku, nakobongola eliki ekoma etima, nakotimola maziba o mabelé makauki.

41:19  Nakolona nzete ya sédere o eliki, na nzete ya akasia, ya mirte mpe ya oliva. Nakotia sipresi o esobe, na nzete ya kambala mpe ya wenge.

41:20  Bongo bato banso bamono mpe bayeba, batala mpe bandima ’te Yawe asali binso, ’te Mosantu wa Israel akeli bina binso.

41:21  Yawe alobi boye : Boyebisa maye bosengi, Mokonzi wa Yakob alobi : Bota­nga maye makoki kolongisa bino.

41:22  Bosakola mpe boyebisa biso makambo makoya. Bosakolaki nde maye masili masalemi ? Bongo tokeba na mango. To boyebisa biso maye makoya, mpo toyeba ndenge nini makosuka.

41:23  Bosakola makambo masengeli koya, bongo tokoyeba ’te bozali ba­nza­mbe solo ! Bosala malamu to mabe, mpo totala mango, mpe tokoba­nga bino.

41:24  Ya solo, bozali se mpamba, misala mya bino mizali mpe mpa­mba. Oyo andimi bino azali moto wa nsomo.

41:25  Nabyangi moto o mokili mwa Nordi mpe ayei, ut’o epai ya Esti nabyangi ye na nkombo. Akonyata bayangeli lokola potopoto, lokola moyemi mbeki akopotoko libazi.

41:26  Nani ayebisi yango ut’o kala mpo toyeba, mpe tondima ’te ezali ya solo ? Kasi moto moko alobaki ata liloba nini, to ayebisi ata nini, moto moko ayoki ata mwa liloba lya bino te.

41:27  Ngai moto nayebisi Sion liboso, mpe natindeli Yeruzalem ntoma wa nsango elamu.

41:28  Kasi natali bikeko, ata yoko emononi te, o kati ya byango ata yoko te ekoki kopesa lilako, to eyano soko natuni yango.

41:29  Bikeko binso bizali biloko mpa­mba, misala mya byango mizali mpe mpa­mba, bikeko bya bango bizali se mo-mpepe mpamba.

Chapter 42

42:1  Tala mosaleli wa ngai oyo nakolendisaka, naponi ye mpe nakosepelaka ye mingi. Nakitiseli ye elimo wa ngai, mpo ’te alakisa bikolo binso mibeko mya bosembo.

42:2  Akogangaka te, akotombolaka mo­ngongo te, akoyokisaka lolaka la ye o balabala te.

42:3  Soko monkekele mobukani, akokata mwango te, soko móto molembi, akozimisa mwango te, solo, akosakola mibeko mya bosembo.

42:4  Akolembeke te, akozongaka nsima te tee bosembo bwa ye bokopikama o nse mobimba, mpo bato ba bisanga balingi koyeba mibeko mya ye.

42:5  Yawe Nzambe alobi bongo. Ye akeli likolo mpe atandoli lyango, abongisi mabelé na mbuma ya ma­ngo inso, apesi bikelamo binso bizali wana mpema, mpe apesi binso bikotambolaka o nse bomoi :

42:6  « Ngai Yawe nabyangi yo ozala nze­neneke wa bosembo bwa ngai ; nasimbi yo na loboko mpe nabo­ngisi yo, naponi yo ozala moto wa bondeko na ekolo ya ngai mpe mwinda mwa bikolo binso :

42:7  ofungola miso ma baye bakufi miso, obikisa bato bakangemi o boombo, mpe obimisa baye bafandi o molili mwa boloko. »

42:8  Nkombo ya ngai nde Yawe ! Nakotikela moto mosusu nke­mbo ya ngai te, nakopesa banzambe basusu lokumu la ngai te.

42:9  Makambo ma liboso masili maleki, nakoyebisa bino makambo ma sika, nakoyebisa bino mango liboso ’te masalema.

42:10  Boyembela Yawe nzembo ya sika ! Boyembela nkembo ya ye o nse mobimba, bino bato bokotambolaka o mbu mpe binso bizali wana, na bino bato ba bisanga.

42:11  Bato bakofandaka o mboka ya eliki, bato ba nganda ya mokonzi Kedar, bato bakofandaka o ngomba ya mabanga, bayemba mpe baganga makasi ut’o nsonge ya ngomba.

42:12  Bakumisa nkombo ya Yawe, basakola nkembo ya ye o bisanga.

42:13  Yawe akei liboso lokola elombe, lokola soda wa mpiko enene, ayokisi migango mya etumba, amonisi bokasi bwa ye o miso ma banguna.

42:14  Yawe alobi : « Uta kala nafandaki nye, nalobaki eloko te, nazalaki koka­nga motema. Sikawa nakimeli lokola mwasi ali­ngi abota, nabendi mpema mpe nabimisi ya­ngo makasi.

42:15  Nakobebisa ngomba inene na ike, nakokaukisa matiti manso o esobe, nakobongola mingala minso mokili, nakokaukisa maziba masila mai.

42:16  Nakokamba bato ba lolanda o nzela iye bayebi te, nakotambwisa bango o nzela balekaki liboso te. Liboso lya bango nakokomisa mo­lili mwinda, mpe nakobongisa nzela ya maba­nga ikoma balabala kitoko. Nakosala bongo, nakotika bango te.

42:17  Bakozonga nsima, na nsoni mpe­nza, baye bakotiaka mitema na bikeko bya bango mpe bakolobaka : Bino bozali banzambe ba biso ! Bato ba Israel bazali na lolanda. »

42:18  Bino bato bokufi matoi, boyoka ! Bino bato ba lolanda, botala mpe bomono !

42:19  Nani akufa miso lokola mosali wa ngai ? Nani akufa matoi lokola ntoma oyo nakotinda ? Nani akufa miso lokola Molingami wa ngai ? Nani akufa matoi lokola Mosaleli wa Yawe ?

42:20  Omoni makambo mingi, kasi oke­bi na mango te, ofungoli matoi, kasi oyoki eloko te.

42:21  Yawe alingaki, mpo ya bosembo bwa ye, kopesa yo Mobeko monene mpe monzenga.

42:22  Kasi bayibeli mpe babotoli Israel biloko, mpe bakangi bango o mabulu mpe o boloko. Bayibi biloko bya bango mpe moto moko asalisi bango te, babotoli bango biloko mpe moto moko te alobi : Zongisa !

42:23  O kati ya bino nani atii matoi na maloba maye ? Nani akebi na mango mpo azwa mayele ma sika mpo ya mikolo mikoya ?

42:24  Nani akabi Yakob o maboko ma bayibi, mpe Israel o maboko ma baye bakobotoloko biloko ? Ezali bobele Yawe, mpo tobuki mibeko mya ye, toboyi kolanda nzela ya ye mpe kotosa Mobeko mwa ye.

42:25  Bongo alakisi Israel nkanda ya ye, atindeli bango bitumba bya nsomo. Móto mwa bitumba mozikisi ba­ngo, kasi bamoni ntina ya yango te, mpe bakebi na yango te.

Chapter 43

43:1  Kasi sikawa Yawe, oyo ake liyo, Yakob, oyo abongisi yo, Israel, alobi boye : Obanga te, zambi ngai nasikoli yo, nabyangi yo na nkombo ya yo, ozali wa ngai.

43:2  Mokolo okoleka o kati ya mai, nakozala na yo, mokolo okokatisa ebale, ekozi­ndi­sa yo te. Mokolo okotambola o kati ya móto, okozika te, mpe móto mokosilisa yo te.

43:3  Mpo ngai, Yawe, nazali Nzambe wa yo, Mosantu wa Israel, Mobikisi wa yo. Mpo ya kosikola yo napesi Ezipeti, na esika ya yo, napesi Kus na Seba.

43:4  Mpo ozali eloko ya motuya o miso ma ngai, nalingi yo mingi lokola eloko ya motuya. Nateki bato basusu mpo ya ko­zwa yo, mpe bikolo bisusu mpo ya kosikola bomoi bwa yo.

43:5  Obanga te, zambi nazali na yo. Ut’o Esti nakozongisa bino, ut’o Westi nakosangisa bino.

43:6  Nakoloba na bato ba Nordi : Bopesa bato ba ngai, mpe na bato ba Sudi : Botika bato ba ngai bakende ! Bozongisa bana babali ba ngai bapanzani mosika, na bana basi bapalangani kin’o nsu­ka ya mokili,

43:7  baye banso batangemi na nkombo ya ngai, baye ngai nakeli, nabokoli mpe nabongisi mpo ya lokumu la ngai.

43:8  Bimisa bato bazali na miso, kasi bazali komono te, mpe baye bazali na matoi, kasi bazali koyoka te.

43:9  Bato ba bikolo binso basangana, bato ba mikili minso baya kofa­nda esika yoko. Nani o kati ya bango asakolaki makambo mana, mpe ayebisaki biso maye masalemi liboso ? Babimisa banzeneneke mpo ’te balongisa bango, bongo toyoka mpe tokoka koloba : Ya solo, ezali bongo !

43:10  Yawe alobi : Bino bozali banzeneneke mpe basaleli ba ngai, ngai naponi bino mpo bokoka koyeba mpe koyamba ngai, mpe kondima solo ’te ezali ngai. Liboso lya ngai nzambe moko aza­laki te, mpe nsima ya ngai nzambe mosusu akozala te.

43:11  Ngai nazali Yawe, mobikisi mosusu azali te, bobele ngai.

43:12  Ngai moto nayebisi mpe nabikisi bino, ngai moto nasakoli bino liloba lya ngai, nzambe mosusu te. Bino bozali banzeneneke : bobele ngai nazali Nzambe. Yawe alobi bongo.

43:13  Nazali Nzambe ut’o libandela, moto moko te akoki kobotolo ngai ata eloko nini, moto moko te akoki kopekisa ngai kosala maye nalingi.

43:14  Yawe, mosikoli wa bino, Mosantu wa Israel, alobi boye : Mpo ya bino natindi moto moko o Babilone, nakokangola bikangeli binso, mpe bogangi bwa ba-Kaldea bokobongwana boleli.

43:15  Ngai nazali Yawe, Mosantu wa bino, nakeli Israel, ngai Mokonzi wa bino.

43:16  Yawe alobi boye : Oyo apasoli nzela o kati ya mbu, Oyo alekisi bino o kati ya mai makasi,

43:17  Oyo atindi bato ba makalo mpe ba farasa, elongo na limpinga linene mpenza bakende etumba : sikawa bakwei mpe bakoteleme lisusu te, basuki lokola esungi ezimi.

43:18  Bokanisa lisusu makambo ma kala te, botika kopangana na maye masili maleki.

43:19  Tala, nakobimisa makambo ma sika, mabandi komonono, bozali komono mango te ? Solo, nakopasola nzela o eliki, mongala mokotiyola o mokili mo­zalaki na mai te.

43:20  Nyama ya zamba ikopesa ngai lokumu, ngombolo na maligbanga ikondima ngai, mpo nakopesa mai o eliki, mingala mikotiyola o esobe, bongo bato ngai naponi bakoka komele.

43:21  Bato nabokoloki mpo ya ngai, bakosakola lokumu la ngai.

43:22  Kasi yo Yakob, obeleli ngai te, Israel, omilembisi mpo ya ngai te.

43:23  Otumbeli ngai mabonza ma bana ba mpata te, okumisi ngai na miboma mya bino te. Nasengeki yo mabonza ma bolei te, natungisi yo te mpo obonzela ngai mpaka ya malasi.

43:24  Osombeli ngai matiti ma nsoló te, mpe osepelisi ngai na mafuta ma miboma mya yo te. Kasi omemisi ngai mokumba mwa masumu ma yo, olembisi ngai motema na mabe ma yo.

43:25  Nzokande ngai, bobele ngai moto nakolimbisa mabe ma yo, mpe nakokanisa masumu ma yo lisusu te.

43:26  Salisa ngai nakanisa malamu, bo­ngo tokosamba, yo moko banda koloba mpo ’te okoka komilongisa.

43:27  Nkoko wa yo wa yambo asali mabe, baprofeta ba yo baboyi kotosa ngai.

43:28  Yango wana nalongoli bakambi o ndako esantu, natiki Yakob babebisa ye, mpe bafinga Israel.

Chapter 44

44:1  Sikawa yo Yakob, mosaleli wa ngai, yoka ngai, yo Israel, oyo naponi,

44:2  Yawe, oyo akelaki yo, oyo abongisi yo o libumu lya mama mpe akosalisaka yo, alobi bo­ngo : Obanga te, Yakob, mosaleli wa ngai, yo Yesurun, oyo naponi.

44:3  Zambi nakonokisa mbula o mabelé makauki, mpe nakolekisa miluka o mokili mozangi mai. Nakokitisela libota lya yo elimo wa ngai, nakobenisa bana na bankoko ba yo.

44:4  Bakokola lokola matiti, lokola nzete ya wenge penepene na moluka.

44:5  Moko akoloba : « Nazali wa Yawe », mosusu akoloba : « Ngai nazali wa libota lya Yakob. » Mosusu naino akokoma o loboko la ye : « Wa Yawe », mpe akomipesa nkombo ya lokumu ‘moto wa Israel’.

44:6  Yawe, Mokonzi wa Israel, Yawe wa bokasi bonso, mosikoli wa yo, alobi boye : Nazali wa yambo mpe wa nsuka, nzambe mosusu azali te, bobele ngai.

44:7  Oyo akanisi ’te akokani na ngai, aloba, asakola mpe alimbola makambo manso. Nani asilaki koyebisa maye mase-ngelaki kosalema banda eleko nakeli bato ? Bayebisa ngai maye makoya nsima.

44:8  Boyoka nsomo te, bobanga te ! Nayebisi mpe nasakoli bino ya­ngo uta kala te ? Bozali banzengeneke ba ngai : Nzambe mosusu azali nde ? Nazali se ngai moko te ? Mosusu oyo akobatelaka bino, nayebi ye te !

44:9  Bato bakosalaka bikeko bazali banso mpamba. Biloko biye balingi mingi boye, bizali na litomba soki te. Bizali batatoli ba bango : bikomonoko eloko te, biyebi eloko te, bikoyokisaka bango nsoni.

44:10  Oyo akati nzete to atuli ekeko ya bibe­nde, akozwa na yango litomba nini ?

44:11  Bato banso bakolandaka yango, bakoyoka nsoni mpe baye bakosalaka yango bazali bobele bato. Ba­ngo banso basangana mpe babima o miso ma ngai : bakoyoka nsomo mpe nsoni.

44:12  Motuli akotula ebende o makala ma móto, akobongisa yango na ebeteli, akotula yango na makasi ma loboko la ye. Na nsima akoyoka nzala mpe makasi ma ye makosila, mpe soko akomele mai te, nzoto ya ye ekokauka.

44:13  Oyo akokata ekeko ya nzete, akotia nsinga, akoyema elili na mpembe, akopalola yango na mbeli mpe akobongisa yango na bisaleli bya ye ; akoluka kosala ekeko kitoko ya moto mpo ya kotia yango o ndako.

44:14  Mpo ya yango akokata nzete ya sédere. Na nsima akokamata nzete ya wenge mpe ya kambala, alingi nzete yango ikoma makasi mpe ileka inso ya zamba ; akolona mpe nzete ya sipresi mpe mbula ekokolisa ya­ngo.

44:15  Biloko bina binso bikosalisa bato mpo ya kozwa nkoni, bongo bakamati yango mpo ya koyoto móto mpe kotumba yango mpo ya kolamba mampa. Kasi basusu bakokamata yango mpo ya komisalela nzambe oyo balingi kokumisa ; bakosala ekeko mpo ya kogumbamela yango.

44:16  Moto oyo akobwaka ndambo ya nkoni o móto, akokalinga wana mo-nsuni, akolia mwango mpe akoto­nda ; akoyoto móto mpe akoloba : « Nayoti móto, nayoki malamu mpe namoni mololi ! »

44:17  Mpe na ndambo ya nkoni etikali, akosala ekeko, nza­mbe wa ye, mpe akogumbamela ya­ngo, akokumisa yango mpe akobo­ndela yango mpe akoloba : « Bikisa ngai, zambi yo ozali nzambe wa ngai ! »

44:18  Solo, bayebi eloko te, bazali na mayele te, mpo bakufi miso, bakomono eloko te mpe mitema mya bango mazangi makanisi.

44:19  Moko te akanisa to azala na mayele ma koloba : « Natumbi ndambo ya nkoni o móto, nalambi wana mampa, nakalingi monsuni mpe nalei mwango ; na ndambo ya nkoni etikali nakosala ekeko mbindo mpe nakofukamela ndambo ya nkoni boye ! »

44:20  Moto atii motema na eloko mpamba, motema mwa ye mobungisi ye mayele. Akomibikisa te, mpe akomituna te : « Eloko nasimbi na maboko ezali eloko ya lokuta te ? »

44:21  Yo Yakob, okanisa makambo maye, yo Israel, ozali mosaleli wa ngai. Ngai moto nabongisi yo mpo osalela ngai, Israel, nakobosana yo mokolo moko te !

44:22  Nalongoli mabe ma yo lokola limpata likolimwa, nalimbisi masumu ma yo lokola londende lokosila. Zongela ngai, zambi nasikoli yo.

44:23  Bato ba likolo, boyemba na nsai, zambi Yawe asali mosala. Bato bazali o bozindo bwa mabelé, boganga makasi, bino ngomba, boyemba na esengo, yo mpe zamba na nzete ya yo inso, zambi Yawe asikoli Yakob, alakisi nkembo ya ye o Israel.

44:24  Yawe, oyo asikoli yo, oyo abongisi yo ut’o libumu lya mama, alobi boye : Ngai Yawe nakelaki biloko binso, ngai moko natandaki etando ya likolo, nabongisaki mokili mpe moto mo­ko asalisaki ngai te.

44:25  Ngai nakosukisaka bilembo bya maye makoya, nakotambwisaka mayele ma bamoni-makambo, nakozongisaka bato ba bwanya nsi­ma, mpe nakosalaka ’te mayele ma ba­ngo mabongwana bozoba.

44:26  Nakolendisaka maloba ma mosaleli wa ngai, mpe nakokokisaka mikano mya bantoma ba ngai. Ngai moto nakoloba na Yeruzalem : « Nakopesa yo bato mingi ! » mpe na bingumba bya Yuda : « Nakotonga bino lisusu ! Nakobongisa ndako ya byango ibukani. »

44:27  Nakoloba na mbu bozindo : « Kauka, nakokaukisa bibale bya yo binso. »

44:28  Nakoloba na Siro : « Ozali mokengeli wa mpata ya ngai. » Akosala maye manso ngai nalingi, akotinda ‘te : « Batonga Yeruzalem lisusu, mpe babongisa Tempelo. »

Chapter 45

45:1  Yawe alobi boye na Siro, oyo apakoli mafuta mpe asimbi na loboko la mobali, mpo ’te akweisa bikolo na etu­mba, abotolo bakonzi bibuneli bya ba­ngo, bongo bizibeli bya mboka bifungwama mpe bikangema lisusu te :

45:2  « Ngai nakotambola liboso lya yo, nakolalisa mokili mwa ngomba ngo­mba, nakobuka bizibeli bisalemi na mbengi, nakobuka bikangeli bya bibende.

45:3  Nakopesa yo biloko bya motuya bibombami, na nkita iye ibombami na bonkutu, mpo oyeba ’te ngai nazali Yawe, Nzambe wa Israel, oyo akotanga yo na nkombo ya yo.

45:4  Natangi yo na nkombo ya yo mpenza mpo ya mosaleli wa ngai Yakob mpe Israel, oyo naponi ; napesi yo lokumu, ata oyebi ngai te.

45:5  Nazali Yawe, moko akokani na ngai te, se ngai moko nazali Nzambe, mosusu azali te. Napesi yo bokasi, ata oyebi ngai te,

45:6  mpo ’te ut’o epai moi mokobimaka tee epai mokokitaka, bato bayeba ’te mosusu azali te, se ngai. Ngai nazali Nzambe, mosusu azali te.

45:7  Ngai nakeli moi, nakeli mpe molili, ngai nakopesaka boboto, mpe nakotindaka makambo ma mpasi. Ngai Yawe nakosalaka yango inso.

45:8  E likolo, ut’o esika ozali, tangisela biso mamio, mpe mampata manokisela biso bo­sembo. Mabelé mafungwama mpe mapesa biso libiki mpe makolisa bosembo. Ngai Yawe nakeli maye manso. »

45:9  Mawa na moto akowelaka ntembe na Mozalisi wa ye, yo mbeki mpamba o kati ya mbeki ya mabelé ! Potopoto ekoloba nde na moyemi : « Osali nini ? Eloko ozali kosala ezali na ntina yoko te ! »

45:10  Mawa na moto akotuna tata wa ye : « Mpo nini opesi ngai bomoi ? » mpe akotuna mama : « Mpo nini oboti ngai ? »

45:11  Yawe, Mosantu wa Israel, oyo abo­ngisi ye, alobi boye : Botuni ngai nsango ya bana ba ngai ? Bokopesa ngai nde bitinda mpo ya mosala mwa ngai ?

45:12  Ngai moto nakeli mokili mobimba, mpe nazalisi bato banso bafandi wana. Natandi etando ya likolo na maboko ma ngai, ngai nakotindaka minzoto bitinda bya ngai.

45:13  Ngai nabimisi Siro na bosembo bonso, nabongiseli ye nzela inso. Ye nde akotonga lisusu engumba ya ngai, akozongisa bato ba ngai bakendeki boombo, ata basikoli bango te to bafuti eloko te. Yawe wa bokasi bonso alobi bongo.

45:14  Yawe alobi boye : Bato ba mombongo ba Ezipeti mpe ba Kus, mpe bato balai ba Seba bakozala bato ba yo, bakolanda yo awa bakangemi na minyololo o nkingo, bakofukamela yo mpe bakosa­mbela boye : « Nzambe azali se epai ya yo, mosusu azali te, banzambe basusu bazali se mpa­mba ! »

45:15  Ya solo, ozali Nzambe oyo akomibombaka, yo Nzambe mpe Mobikisi wa Israel.

45:16  Baye banso bakosalaka bikeko bakokima na nsoni, banso elongo bakomi na nsoni mpe bakosambwa.

45:17  Israel akobika mpo ya Yawe, akobika seko. Bakoyokisa bino nsoni te, bakosambwisa bino lisusu te, o bileko na bileko.

45:18  Solo Yawe Mozalisi wa likolo, ye Nzambe oyo akeli mpe abo­ngisi mokili, abaki mwango, akeli mwango mpa­mba mpamba te, kasi asali ’te bato bakoka kofanda wana, alobi boye : Ngai nazali Yawe, mosusu azali te…

45:19  « Nalobi makambo na bonkutu te, o esika ya molili mpe te, nalobi na bato ba libota lya Yakob te : Boluka ngai o esika eloko ezali te. Ngai Yawe nakolobaka se na bosembo, nakosakolaka se makambo ma solo. »

45:20  Bino banso bobiki o etumba enene, bosangana, boya mpe bobeleme. Baye bakokumbaka bikeko bya nzete bayebi eloko te, na baye bakosambelaka nzambe oyo akoki kobikisa te.

45:21  Bosakola, bolakisa ’te bolongi mpe boyokana : Nani asili asakoli yango ? Nani moto ayebisi yango ut’o ntango ena ? Ngai Yawe te ? Ngai nazali Nzambe, mosusu azali te. Nazali Nzambe wa bosembo, oyo akobikisaka, mosusu azali te, bobele ngai.

45:22  Bomibongola epai ya ngai mpe bokobika, bino bato banso ba nse mobimba, zambi ngai nazali Nzambe, mosusu azali te !

45:23  Nakolaya ndai o nkombo ya ngai moko : maloba ma monoko mwa ngai mazali maloba ma bosolo, maloba ma ngai makobongwanaka te ! Bato banso bakofukamela ngai, banso bakolaya ndai na nkombo ya ngai bakoloba :

45:24  « Se Nzambe azali na nguya mpe akoki kolonga. » Baye banso batomboki na ye bakoya epai ya ye na nsoni.

45:25  Yawe akolongisa ekolo ya Israel ; ekozwa lokumu mpo ya ye.

Chapter 46

46:1  Bel egumbami, Nebo ekwei ; Mpunda na ngombe ikomemeke bikeko bya bango, nyama ya bango ilembi na bomemi mokumba mwango.

46:2  Binso bigumbami mpe bikwei, bikokaki kobikisa nyama te iye ikumbi byango, zambi yango moko izalaki koke­nde nzela ya boombo.

46:3  Bato ba libota lya Yakob, boyoka ngai, bino banso bobiki mpe botikali o libota lya Israel, namemeki bino banda mbotama ya bino, nabatelaki bino banda bomwana.

46:4  Tee bokonuna ngai nakobongwana te, tee bokokoma na nsuki mpembe nakolendisa bino, nasili nasali yango, namemeki bino, nakolendisa mpe nakobikisa bino.

46:5  Bino bokanisi ’te ngai nazali lokola nani ? Bino bokolobaka ’te ngai naulani na nani ?

46:6  Baye bakobimisaka wolo o libe­nga lya bango, mpe bakotiaka palata o emekeli, bakolukaka motuli mpo ya kosala ekeko ya nzambe, bakokumisa mpe bakogumbamela yango.

46:7  Bakomeme yango o mapeke, bakotia yango o esika ekoteleme malamu, ekoningana te. Soko bakobondela yango, ekopesa eyano te, ekoki kobikisa bango o ntango ya mpasi te.

46:8  Bokanisa yango malamu mpe bozala na mayele, bino batomboki, bokanisa o mitema ;

46:9  bokundolaka maye masalemi ut’o kala, zambi nazali Nzambe, mosusu azali te, ngai Nzambe, mosusu akokani na ngai te.

46:10  Ut’o libandela nakoyebisaka maye makoya, nakosakolaka mango liboso ’te ma­salema. Soko nakani mokano, nakokokisa mwango, manso nalingi kosala, nakosala ma­ngo.

46:11  Ut’o Esti nabyangi engondo, ut’o mokili mosika moto oyo akokokisa mokano mwa ngai. Mokano moye nakani, nakokokisa mwango, maye nalingi kosala, nakosala ma­ngo.

46:12  Boyoka ngai, bino bato ba lofundo, bino bato botikali mosika na bosembo.

46:13  Nakosala ’te bosembo bwa ngai bokoma penepene, mosika na bino te, libiki lya ngai likoumela te. Nakoyela Sion libiki, nakolakisa Israel nkembo ya ngai.

Chapter 47

47:1  Longwa o ngwende mpe fanda, e moseka, mwana wa Babilone. Yo mwana wa Kaldea, fanda o nse, o ngwende te, bakotanga yo lisusu mwana wa bi­sengo to monzele te.

47:2  Kamata libanga mpe nika fufu, fungola litambala lya yo, tombola elamba, lakisa makolo, katisa bibale.

47:3  Bamono bolumbu bwa yo, bongo oyoka nsoni, ngai nakozongisela yo mabe ma yo mpe moto moko akoya kopekisa ngai te.

47:4  Mobikisi wa biso, nkombo ya ye Yawe wa bokasi bonso, Mosantu wa Israel, alobi :

47:5  Fanda nye mpe koto o esika ya molili, yo mwana wa Kaldea, zambi bakotanga yo lisusu moko­nzi wa bikolo te.

47:6  Nasilikaki na bato ba ekolo ya ngai, nasambwisaki bato ba libota lya ngai, nakabaki bango o maboko ma yo. Kasi oyokeli bango mawa soki moke te, ata babange, okumbisi bango mokumba moleki bozito.

47:7  Olobaki : « Nakozala mokonzi seko ». Omanyoli makambo mana o motema te, maye makoya, okanisi mango te.

47:8  Yoka sikawa, yo mwasi wa bise­ngo, yo moto ofandi kimia mpe omilobeli : « Moto mosusu te, bobele ngai ! Nakozanga mobali te, bana mpe te ! »

47:9  Kasi mabe mana mabale mako­kwela yo na mbalakaka, se o mokolo moko : bana ba yo bakokufa, mobali wa yo mpe akokufa, na mbala yoko, ata ozali na nkisi mingi mpe ba­nganga ebele.

47:10  Okanisaki ’te okobika na mayele mabe ma yo, olobaki : « Moto moko amoni ngai te. » Bwanya bwa yo mpe boyebi bwa yo bobungisi yo, omilobelaki : « Nakotala se makambo ma ngai moko, ma bato basusu te. »

47:11  Likambo likokwela yo, okokoka kopekisa lyango te, mpasi ekoyela yo, okokoka kokima yango te, likama lya nsomo likokwela yo na mbalakaka, okoyeba te.

47:12  Fanda na nkisi mpe na banganga ebele, otii motema na yango banda bo-mwana. Mbele okozwa na yango mwa litomba, mpe okokoka kobangisa na yango bandoki.

47:13  Omilembisi nzoto na kotunatuna bango, bongo bamilakisa mpe babikisa yo, baye bakotalaka likolo mpe mi­nzoto, baye bakoyebisaka yo sanza na sanza maye makoya.

47:14  Bazali lokola matiti na móto, móto mokosilisa bango, bakoki komibikisa te. Bazali lokola móto mwa koyotela te, móto mwa kofanda penepene te.

47:15  Tala ndenge banganga baye bakosuka, baye omilembisi na bango banda bomwana. Bakotelengana moko moko o esika ya ye, ata moko te akobikisa yo.

Chapter 48

48:1  Bino bato ba libota lya Yakob, boyoka, bino bato bokomitangaka ba-Israel, bino bato bouti o libota lya Yuda mpe bokolayaka ndai na nkombo ya Yawe, bino bato bokobondelaka Nza­mbe wa Israel, kasi na botosi mpe na bosembo te,

48:2  ata bokomitangaka ‘bato ba engu­mba esantu’, mpe bokotiaka mitema na lisalisi lya Nzambe wa Israel, Yawe wa bokasi bonso.

48:3  Maye masalemaka nasilaki koyebisa mango liboso : mabimaki o monoko mwa ngai mpe nasakolaki mango, masalemi se o ntango nasali ma­ngo na mbalakaka,

48:4  mpo nayebaki ’te ozali motó makasi, na nkingo ya ebende, mpe na elongi ya mbengi.

48:5  Nayebisaki yo mango liboso, nasakolaki mango liboso ’te masalema, mpo oloba te ’te : « Ekeko ya ngai esali bongo, ekeko ya nzambe wa ngai ebongisi mango. »

48:6  Oyoki mpe omoni mana manso, okondima mango sikawa te ? Sikawa nakoyebisa yo makambo ma sika, maye mabombami, mayebani na yo te.

48:7  Nabimisi mango se sika, kala te ; tee lelo boyokaki mango te, bongo oloba te : « Nasili nayebi mango kala ! »

48:8  Oyoki mpe oyebi mango te, liboso otiaki matoi na mango te, mpo nayebi ’te ozali na botosi te, banda bomwana bakotangaka yo motomboki.

48:9  Mpo ya lokumu la nkombo ya ngai natiki koyoka nkanda nakitisi motema mpe nabomi yo te.

48:10  Napetoli yo, lokola bakopetolaka palata, nameki yo o móto mwa mpasi enene.

48:11  Nasali bongo mpo ya lokumu la ngai moko, mpo ’te basantola nkombo ya ngai te. Nakotikela moto mosusu lokumu la ngai te.

48:12  Yoka ngai, Yakob, na yo Israel oyo nabyangi, ngai moto wa yambo, ngai moto wa nsuka.

48:13  Solo, na nguya ya ngai nakeli mokili, na loboko la mobali natandi eta­ndo ya likolo : soko nabyangi yango, yango inso ibimeli ngai.

48:14  Bosangana bino banso mpe boyoka ! Nani o kati ya banzambe ayebisi yango ? Molingami wa ye akosala maye Yawe alingi kosala Babilone na libota lya ba-Kaldea.

48:15  Se ngai moto nalobi bongo, ngai nabyangi ye, nakomisi ye awa mpe ye akokokisa mikano mya ye.

48:16  Bobeleme na ngai mpe boyoka makambo maye : Ut’o ebandela nalobaki na bino na bonkutu te. Banda makambo mana masalemi, ngai nazali wana. Sikawa Mokonzi Yawe elongo na elimo wa ye batindi ngai. Yawe alingi se kosalisa bato ba ye

48:17  Yawe oyo akosikolaka yo, Mosantu wa Israel, alobi boye : Ngai nazali Yawe Nzambe wa yo, nakolakisaka yo maye makoki ko­bikisa yo, mpe nakokambaka yo o nzela ya yo inso.

48:18  Soko oyokaki mibeko mya ngai, mbele esengo eyelaki yo lokola mai ma ebale, mbele bosembo bwa yo bozalaki lokola mbonge ya mbu,

48:19  mbele bana ba yo bazalaki ebele lokola zelo, mbele bankoko ba yo bazalaki mi­ngi lokola mbuma ya zelo, mbele nkombo ya yo ekufaki te o miso ma ngai.

48:20  Botika Babilone, bokima ba-Ka­ldea ! Boganga na nsai mpe bosakola likambo liye bipai binso, bopalinginya lyango tee nsuka ya mokili : « Yawe asikoli mosaleli wa ye Yakob. »

48:21  Bakufi na mposa ya mai te o eliki esika akambaki bango. Abimiseli bango mai o libanga, apasoli libanga mpe mai matiyoli.

48:22  Yawe alobi : Basumuki bakozwa bolamu te.

Chapter 49

49:1  Bino bato ba bisanga, boyoka ngai, bino bato bofandi mosika, bofo­ngola matoi : Yawe abyangi ngai ut’o libumu lya mama wa ngai, atangi nkombo ya ngai liboso ’te nabotama.

49:2  Abongisi monoko mwa ngai lokola mopanga mopotu, abateli ngai o elilingi ya loboko la ye, akomisi ngai lokola likula lipotu, abombi ngai malamu o libenga lya ye lya makula.

49:3  Alobi na ngai : « Israel, ozali mosaleli wa ngai, nakozwa lokumu na mosala mwa yo. »

49:4  Mpe ngai nalobaki : Namilembisi se mpamba, nasilisi bokasi bwa nzoto mpo ya eloko mpamba. Nzokande Yawe akolongisa ngai, Nzambe akopesa ngai mbano.

49:5  Nazwi lokumu o miso ma Yawe, Nzambe azali bokasi bwa ngai. Mpe sikawa Yawe alobi, ye moto abongisi ngai o libumu lya mama, mpo ’te nazala mosaleli wa ye, bongo nazongisa bato ba Yakob o maboko ma ye, mpe nasangisa bato ba Israel o libota lyoko.

49:6  Alobi na ngai : « Ekoki te ’te ozala se mosaleli wa ngai, mpo ya kotombola mabota ma Yakob mpe kozongisa bato ba Israel babikaki o liwa. Nakokomisa yo mpe mwinda mwa bikolo binso, mpo ’te bato ba mokili mobimba babika. »

49:7  Yawe, Mobikisi mpe Mosantu wa Israel aloba boye na moto oyo atiolami mpe aboyami na bato banso, na oyo akomi moombo wa baya-ngeli babe : « Bakonzi banene bakomono yo mpe bakoteleme, bankumu mpe bakotala mpe bakogumbama o nse, mpo ya Yawe wa lobokó, Mosantu wa Israel, oyo aponi yo. »

49:8  Yawe alobi boye : O ntango nalakisaki bolingi, na­ndimeli yo, o mokolo mwa libiki, nasalisi yo. Nabongisi yo mpe naponi yo mpo ya kozala bondeko na bato baye, mpo ya kolendisa ekolo, kozongisela bato mabelé,

49:9  mpe koloba na baye bakangemi o boombo : « Bobima wana », mpe na baye bafandi o molili : « Bomilakisa ! » Lokola mpata ikozwaka bilei o nzela inso, bakozwa biloko o bisika bya mabanga.

49:10  Bakoyoka lisusu nzala mpe mposa ya mai te, molunge mwa moi mpe mwa zelo mokolembisa bango te, mpo oyo atondi na ngolu akoka­mba bango mpe akolakisa bango maziba ma mai ma mpio.

49:11  Nakopasola nzela o kati ya ngo­mba inso, mpe nakotondisa mabulu o nzela inso.

49:12  Tala, bauti mosika, basusu o Nordi mpe o Westi, basusu o Sinim.

49:13  Likolo, yemba nzembo, mokili sepela, ngomba boganga na nsai, zambi Yawe abondi bato ba ye, bato ba mawa, ayokeli bango ngolu.

49:14  Bato ba Sion balobaki : « Yawe atiki biso, Mokonzi wa biso abosani biso ! »

49:15  Mama akoki nde kobosana mwa­na oyo akonungisaka ? Akoki nde kotika kolinga mwana oyo amemeki o libumu ? Ata bamama bakoki kobosana bana ba bango, ngai nakobosana bino mokolo moko te !

49:16  Tala, nakomi nkombo ya yo o kati ya loboko la ngai, nakopanganaka na mboka ya yo ntango inso.

49:17  Bato bakotonga mboka ya yo bakoya noki, bato babotoloki mpe babebisaki yo ndebakei.

49:18  Bwaka miso zongazonga na yo mpe tala : bato banso basangani mpe bazali koya epai ya yo. Yawe alobi : Lokola nazali na bomoi, bango bakokembisa yo lokola eloko ya motuya, bakozala lokola liputa likobongisaka mwasi alingi abala.

49:19  Solo, ndako ya yo ikufi mpe mokili mobebi, awa mokomi moke, bato bakoki kofanda wana lisusu te, mpe baye bazalaki konyokolo yo bakolongwa.

49:20  Bana ba yo, baye okanisaki ’te babungi, bakoloba lisusu o matoi ma yo : « Mboka eleki moke mpo tofanda wana, lukela biso esika mpo ’te biso mpe tofanda. »

49:21  Mokolo mona okomilobela : « Nani aboteli ngai bana baye ? Nazangaki bana, nazalaki eko­mba, nakendeki boombo mpe babwakaki ngai, bongo bana baye, nani abokoli ba­ngo ? Nazalaki ngai moko, bango bazalaki nde wapi ? »

49:22  Mokonzi Yawe alobi boye : « Nakotombola loboko epai ya ba­to ba bikolo, nakotelemisa bendele mpo ’te ba­mono yango. Bakozongisela yo bana ba yo o maboko, bakomeme bana basi ba yo o mapeke.

49:23  Bakonzi bakozala batata babokoli ba yo, mpe bana basi ba bakonzi bakobokolo yo. Bakogumbamela yo bilongi o nse, bakoya kolete mputulu ya makolo ma yo. Bongo okoyeba ’te ngai nazali Yawe, baye bakotiaka elikya na ngai, bakoyoka nsoni te. »

49:24  Bakobotoloko nde elombe eloko akamati o etumba ? Moombo wa monyokoli, akoki nde kokima ?

49:25  Kasi Yawe alobi boye : Ya solo, bakobotolo elombe moombo wa ye, bakobikisa moto akomi moombo wa mobuni ! Moto aluki yo na likambo, nakoluka ye mpe na likambo, ngai moko nakobikisa bana ba yo.

49:26  Nakosala ’te banyokoli ba yo babomana mpe balangwa na makila ma ba­ngo moko. Bongo bato banso bakondima ’te ngai Yawe nazali mobikisi wa yo, ’te Nzambe wa bokasi bonso wa Yakob azali mosikoli wa yo !

Chapter 50

50:1  Yawe alobi boye : Wapi monkanda mwa bobomi libala, moye molakisi ’te naboyaki mama wa bino ? Nadefisi mbongo na nani mpo ’te natekele ye bino ? Solo, nateki bino mpo ya masumu ma bino, naboyi mama wa bino mpo ya mabe bosalaki ngai.

50:2  Awa nayaki, mpo nini nakuti moto moko te ? Awa nabyangi, mpo nini moto moko ayanoli te ? Loboko la ngai loleki nde mokuse mpo ya kosikola moto ? Nazangi nde makasi mpo ya kobikisa bato ? Soko nakaneli yango, mbu ekokauka, mpe bibale bikokoma eliki ; mbisi ya yango ikopolo mpo mai mazangi, ikokufa na mposa ya mai.

50:3  Nakoki koindisa likolo na ma-mpata, kozipa mango na ngoto bo elamba.

50:4  Mokonzi Nzambe ateyaki ngai nayeba koloba mpo ’te na maloba ma ngai nale­ndisa oyo alembi. Ntongo inso akofungolaka ngai matoi mpo ’te nayoka ye lokola moyekoli akoyokaka moteyi.

50:5  Mokonzi Yawe afungoli ngai matoi, mpe ngai naboyi te, nazongi nsima te.

50:6  Nalakisi mokongo na baye bazalaki kobete ngai, napesi matama na baye bazalaki kobila ngai mandefu, nabombi elongi te ntango baseki ngai mpe babwakeli ngai nsoi.

50:7  Mokonzi Yawe ayaki kosalisa ngai, yango wana nalembi te, mpe nakomisi elongi ya ngai lokola libanga, nayebaki ’te nakoyoka nsoni te.

50:8  Oyo akolongisa ngai azali penepene. Nani akofunda ngai ? Abima, tosamba biso na ye ! Nani akweisa ngai ? Abeleme mpe aloba !

50:9  Tala, Mokonzi Yawe akosalisa ngai, bongo nani akokitisa ngai o lika­mbo ? Banso bakosuka, bakokoma lokola elamba epaswani mpo eliami na mbombo.

50:10  Oyo o kati ya bino akobangaka Yawe, ayoka maloba ma Mosaleli ! Oyo atamboli o molili mpe amoni polele te, atia elikya na nkombo ya Yawe, asenge lisalisi lya Nzambe wa ye.

50:11  Kasi bino banso bato bopelisi móto mpe bokolukaka nkoni ikopelaka malamu, bokende kokoto o móto mwa bino, o nkoni iye bino moko bopelisaki. Loboko la ngai lokosala bino bo­ngo, bokokufa o esika eye ya malozi manene.

Chapter 51

51:1  Boyoka ngai, bino bato bokolukaka bosembo, bino bato bokolukaka Yawe. Botala ngomba ya mabanga esika boutaki, botala libulu lya mabanga esika babimisaki bino.

51:2  Botala Abarama tata wa bino, mpe Sara oyo abotaki bino. Azalaki se ye moko o ntango nabyangi ye, kasi nabenisi ye mpe nakomisi ye tata wa bana ebele.

51:3  Solo, Yawe ayokeli Sion mawa, na mpe ndako ya ye inso ibukani. Akokomisa eliki ya ye elanga ya Eden, mpe esobe ya ye paradizo ya Yawe. Kuna bakoyoka nsai, bakosepela, bakotondo Nzambe mpe bakoye­mba nzembo. Bosembo bwa Nzambe bokomonono

51:4  Bino bato ba ekolo ya ngai, boyoka ngai ; bino bato ba mboka ya ngai, bofongola matoi ! Mpamba te, Mobeko mouti na ngai, mpe bosembo bwa ngai bokozala mwinda mwa bato banso.

51:5  Na mbalakaka bosembo bwa ngai bokoya, libiki lya ngai likobima, na loboko la ngai nakosambisa ba­to ba bikolo. Bato ba bisanga bakotia mitema na ngai, bakotia elikya na loboko la ngai.

51:6  Botombola miso epai ya likolo, na nsima bokitisa miso mpe botala nse : likolo likolimwa lokola molinga, mpe mokili mokobeba lokola ela­mba eumeli, bato bafandi wana bakokufa lokola nsili. Kasi bosembo bwa ngai bokoumela seko mpe libiki lya ngai likosila mokolo moko te.

51:7  Bino bato boyebi bosembo, boyoka ngai, bino bato bokondimaka mobeko mwa ngai na motema moko, bobanga matumoli ma bato te, boyoka nsomo te soko batuki bino.

51:8  Zambi mbombo ikolia bango lokola ikoliaka bilamba, mpe nyama ike ikosilisa bango lokola ikoliaka ntokia. Kasi bosembo bwa ngai bokoumela seko mpe libiki lya ngai likosila mokolo moko te.

51:9  E loboko la Yawe, bima mpe lakisa nguya ya yo, omilakisa lokola o mikolo mya kala. Yo moto opasolaki Rakab te ? Yo moto otubolaki ebuki ya nga­ndo te ?

51:10  Yo moto okaukisaki mai ma Mbu Enene, yo moto opasolaki nzela o kati ya mbu mpo ya kolekisa wana bato baye osikolaki.

51:11  Baye Yawe abikisi bakozonga, bakoya o Sion, bakoganga na nsai, bakoyoka esengo nsuka te, bakotonda na esengo mpe na nsai, bakoyoka mpasi lisusu te, bakomilela lisusu te.

51:12  Ngai moko nakobondoko bino. Yo ozali nani mpo te obanga moto mpamba, mwana wa bato, oyo akolimwa lokola lititi ?

51:13  Bokobosana nde Yawe, Mozalisi wa bino, oyo atandi likolo mpe akeli mokili ? Bokolenge nde ntango inso mpo ya nkanda ya monyokoli, oyo alingi se kobebisa. Nkele ya monyokoli ekei wapi ?

51:14  Etikali moke batika moto oyo aka­ngemi, akokufa o libulu te, mpe akozanga bilei te.

51:15  Ngai nazali Yawe, Nzambe wa bino, oyo akotambwisaka mai mpe akongalisaka mbonge. Nkombo ya ngai, Yawe wa bokasi bonso.

51:16  Natii maloba ma ngai o monoko mwa bino, nabombi bino o ntei ya loboko la ngai ; natandi likolo mpe nakeli mokili mwa sika, nalobi na Sion : Yo ozali ekolo ya bato ba ngai.

51:17  Longwa o mpongi, lamuka mpe teleme, Yeruzalem ! Yawe amelisi yo nkeni ya nkanda ya ye, omeli nkeni ya nsomo mpe osilisi inso nye.

51:18  Moko te wa bana baye ye aboti akambi ye, moko te wa baye ye abokoli asi­mbi ye na loboko.

51:19  Makambo maye mabale ma mpasi makweli yo, kasi moto moko ayokeli yo mawa te. Babotoli mpe babebisi ekolo ya yo, oyoki nzala to okufi na mopanga, kasi nani abondi yo ?

51:20  Bana ba yo balembi mpe balali o nsuka ya balabala inso, lokola mboloko ekangemi o motambo, balangwi na nkanda ya Yawe, na bokaneli bwa Nzambe wa yo.

51:21  Yango wana, yoka naino likambo, yo mboka ya mawa, olangwi, kasi mpo ya vino te.

51:22  Mokonzi wa yo, Yawe Nzambe wa yo, mobateli wa ekolo ya yo, alobi boye : Nkeni eye ya bolangwi nakolo­ngola yango o loboko la yo, okomele nkeni ya nkele ya ngai lisusu te.

51:23  Nakotia nkeni eye o maboko ma banyokoli, baye balobaki na yo : « Lala o nse mpo biso toleka ! » Bongo bokomisaki mokongo mwa bino lokola nzela, lokola balabala mpo ’te bakoka ko­leka.

Chapter 52

52:1  E Sion, longwa o mpongi, lamuka, zala makasi ! Lata bilamba binzenga, Yeruzalem, engumba esantu, mpo bato basutu, bato mbindo bakoya lisusu o mbo­ka yo te.

52:2  E Yeruzalem, yo moombo, pupola mputulu mpe teleme, yo Sion, moombo, longola mi­nyo­lolo o nkingo !

52:3  Solo, Yawe Nzambe alobi boye : Bateki bino mpamba, basikoli bino kasi na mbongo te.

52:4  Ya solo, Yawe Nzambe alobi boye : Kala bato ba ngai bakendeki o Ezipeti mpe bafandaki kuna, na nsima ba-Asur banyokoli bango.

52:5  Kasi sikawa, natikali na nani ? Yawe alobi bongo. Bato ba ngai bakangemaki o boombo se mpamba, banyokoli bagangi migango mya lilonga, maloba ma Yawe, batioli nkombo ya ngai ntango inso, kolembe te.

52:6  Ya­ngo wana bato ba ngai bakoyeba nkombo ya ngai, o mokolo mona bakoyeba oyo akoloba : « Ngai oyo, nayei ! »

52:7  Makolo kitoko o likolo ya ngo­mba ya moto oyo akomema nsa­ngo ya kitoko, ya boboto. Akoyebisa ’te libiki likomi penepene ; akoloba na bato ba Sion : Nzambe wa bino azwi bokonzi !

52:8  Boyoka basinzili ba yo batomboli mongongo, banso lisanga bagangi na nsai, mpo bamoni na miso ma bango moko ’te Yawe azali kozonga o Sion.

52:9  Bino mabanga ma Yeruzalem mabebaki, banso elongo bosepela mpe boga­nga na nsai, mpo Yawe abondi ekolo ya ye, asikoli bato ba Yeruzalem.

52:10  O miso ma bato ba bikolo binso bya nse, Yawe nta bosantu alakisi bokasi bwa loboko la ye ; bato banso ba mikili mosika bamoni ’te Nzambe wa biso abikisi biso.

52:11  Bolongwa wana, bokende ! Bobima o esika ena, bosimba eloko mbindo na maboko te. Bobima o Babilone, bomipetola, bino bato bokomemeke biloko bya Yawe.

52:12  Bokokende mbangu mbangu te, bokolongwa te lokola bato bakimi mboka, zambi Yawe moto akotambola o boso bwa bino, mpe Nzambe wa Israel akokengele bato ba nsuka !

52:13  Mosaleli wa ngai akolonga, akozwa lokumu, akotombwama likolo.

52:14  Bato bakamwaki mingi na ndenge abebaki, mpo elongi ya ye ezalaki lisusu lo­kola ya moto te, aulanaki na moto lisusu te.

52:15  Se bongo bato ba bikolo bakoka-mwa mingi, bakonzi banene bakotikala nye, ba­kokanga monoko, ntango bakomono likambo liyebanaki na moto te, mpe bakotala na miso likambo ba­yokaki liboso te.

Chapter 53

53:1  Nani akokaki kondima maye bayebisi biso ’te Yawe ala­kisi bongo bokasi bwa loboko la ye ?

53:2  Ye akoli lokola lititi mpamba o miso ma Nzambe lokola monki­nga mwa nzete o mabelé makauki. Totali ye, azalaki na bonzenga te, azalaki te lokola tolingaki ’te azala.

53:3  Bato banso batiolaki mpe baboyaki ye, akomaki moto wa mpasi, oyo ame­seni na mawa, moto oyo bato balingi kotala te. Solo, tokinolaki ye mpe totalaki ye mpamba.

53:4  Nzokande, amemeki mpasi ya biso, andimaki kokumba malozi ma biso. Biso tokanisaki ’te Nzambe apesi ye etumbu, ’te Nzambe abeti ye mpe asa­mbwisi ye.

53:5  Kasi batubolaki ye mpo ya masumu ma biso, banyataki ye mpo ya mabe ma biso. Andimaki etumbu mpo ya kopesa biso boboto, solo, tobiki mpo ya mpota ya ye.

53:6  Biso banso tozalaki koyengaye­nga lokola mpata, moko moko azalaki koluka nzela ya ye moko mpe Yawe akumbisi ye mabe ma biso banso.

53:7  Banyokoli ye, amikitisi, afungoli monoko soki te. Lokola mwana wa mpata eye bakokende koboma, lokola mpata o maboko ma baye bakokata yango nsuki, atikali nye, afungoli monoko te.

53:8  Bakangi ye na makasi mpe basa­mbisi ye, kasi nani apangani na ye ? Balongoli ye o mokili mwa bato, babomi ye mpo ya mabe ma bato ba ekolo ya ye.

53:9  Bakundi ye o kati ya basumuki, lilita lya ye lizali o kati ya bato ba nkita, ata asali mabe mokolo moko te, mpe liloba lyoko lya lokuta libimaki o monoko mwa ye te.

53:10  Yawe andimi ’te ayoka bolozi bwa nsomo ; soko amikabi bo libonza lya ko-zwa bolimbisi masumu, akozala tata wa libota linene, akoumela na bomoi mikolo miike, mpo ya ye maye Yawe alingi makosalema.

53:11  Awa andimaki koyoka mpasi, akomono mwinda mpe akotonda na mwango. Na mpasi ya ye mosaleli semba wa ngai akokomisa bato baike ba­se­mba, mpo akomeme masumu ma bango.

53:12  Yango wana nakopesa ye lokumu o kati ya bato baike, akozwa biloko elongo na bakonzi banene, mpo amikabi mpenza na liwa, andimi kokoto o molongo mwa basumuki, ata amemi masumu ma bato ebele, mpe abondeli Nzambe mpo ya ba­sumuki.

Chapter 54

54:1  Yo ekomba, obotaki te, sikawa sepela, yo mwasi oyebaki mpasi ya kobota te, ganga na nsai, mpo Yawe alobi ’te bana ba mwasi azangaki mobali baleki bana ba mwasi wa libala na boike.

54:2  Bongisa esika ya ema ya yo, ekoma enene, tanda elamba ya ema o esika okofandaka, otala motuya te, bakisa nsinga ya kokanga mpe le-ndisa pike makasi,

54:3  mpo bokozala mingi bipai binso. Bana ba yo bakokoma bankolo ba bikolo bisusu, bakotondisa bingumba bisilaki bato.

54:4  Obanga te, bakoyokisa yo nsoni lisusu te ; oyoka nsoni te, zambi bakosa­mbwisa yo lisusu te. Okobosana nsoni oyokaki o nta­ngo ya bolenge, okokanisa nsoni lisusu te ya nta­ngo ozalaki mwasi bozenge.

54:5  Mpo Oyo akeli yo akozala mobali wa yo, nkombo ya ye Yawe wa bokasi bo­nso. Mosantu wa Israel, ye moto akosikola yo, nkombo ya ye Nzambe wa nse mobimba.

54:6  Ya solo, lokola mwasi aboyami na mobali wa ye, mpe motema mwa ye mokomi na mawa mingi, se bongo Yawe abyangi yo lisusu. Bakoboyaka nde mwasi wa bole­nge ? Nzambe wa yo alobi bongo.

54:7  Natikaki yo mwa mikolo, kasi nayoki motema mawa, bongo nakosangisa bana ba yo.

54:8  Mwa ntango nazalaki na nkele mi­ngi, nabombelaki yo elongi. Yawe Mosikoli wa yo alobi : Na bolingi nsuka te, nayokeli yo ngolu.

54:9  Se lokola o mikolo mya Nowe, ntango nalayaki ’te mai makozi­ndisa mokili lisusu te, nalayi ’te nakosilikela yo lisusu te, mpe nakokanela yo lisusu te.

54:10  Ata ngomba inene to ike ikoki koningana to kolongwa, nakotika kolinga yo mokolo moko te, bondeko kati ya biso na yo bokobeba mokolo moko te. Elobi bongo Yawe, oyo akoyokelaka yo ngolu.

54:11  Yo, mboka ya mawa, mimpepe mi­beteki yo, mpe moto moko abondoki yo te. O kati ya mabanga ma yo nakotia sima ya langi, nakotia mabanga ma yo ma nse o safir.

54:12  Nakokembisa manongi ma yo na diama, bizibeli bya yo na mabanga makongengeke mpe lopango mobi­mba na maba­nga ma motuya.

54:13  Yawe akoteya bana ba yo banso, bana ba yo bakozala na boboto.

54:14  Bakotonga yo likolo lya bosembo, bakonyokolo yo lisusu te, okobanga eloko te, okoyoka lisusu nsomo mokolo moko te.

54:15  Soko bakoyela yo etumba, ekozala mpo ya ngai te, oyo akosala yo mabe akosuka o miso ma yo.

54:16  Ngai moto nakeli motuli, oyo ako­pelisaka móto mwa makala mpe akobimisaka bisaleli mpo ya mosala mwa ye ; ngai mpe nakeli mobebisi mpo ’te abebisa.

54:17  Ata ebuneli nini batuli ekokoka ko­sala yo mabe te, okokweisa baye bakofunda yo o esambi. Tala ndenge basaleli ba Yawe bakolongaka. Ngai moto nakolongisa bango. Ya­we alobi bongo.

Chapter 55

55:1  Ya solo ! Bino banso boyoki mposa ya mai, boya esika mai ezali, boya ata bozali na mosolo te. Boya kosomba mbuma ya mampa mpe bolia, boya komele vino na mabéle, bokofuta te.

55:2  Mpo nini kobebisa mosolo na biloko bizali mampa te ? Mpe kopesa lifuta lya bino na bilei bikoleisa bino te ? Boyoka ngai mpe bokolia biloko elengi, bokosepela na bilei bilamu.

55:3  Botia matoi mpe boya epai ya ngai, bondima koyoka ngai mpe bokozala na bomoi. Nakokata na bino bondeko bwa seko, nakopesa bino bolamu lokola nalakeli Davidi.

55:4  Tala, natindaki ye azala ntoma epai ya bato, mpe mokonzi oyo akoyangela bikolo.

55:5  Okobyanga bato ba bikolo oyebaki liboso te, bato bayebaki yo te bakoya mba­ngu epai ya yo. Ekozala mpo ya Yawe Nzambe wa yo mpe Mosantu wa Israel akopesa yo lokumu lona.

55:6  Boluka Yawe ntango alingi komilakisa, bobondela ye ntango azali pene.

55:7  Moto mabe atika ezalela ya ye, moto akokanelaka baninga, abo­ngola makanisi ma ye, amibongola epai ya Yawe, oyo akoyokela ye mawa, azongela Nzambe wa biso, oyo apusi kolimbisa.

55:8  Yawe alobi : Makanisi ma bino ma­zali makanisi ma ngai te, mpe nzela ya ngai izali nzela ya bino te.

55:9  Lokola likolo lileki mokili na mosika, nzela ya ngai ileki nzela ya bino mosika, mpe makanisi ma ngai maleki makanisi ma bino.

55:10  Lokola mbula to mbula ya mpe­mbe ekoutaka o likolo mpe ekoki kozonga kuna o likolo te, soko epolisi mabelé te, mpe ebotisi mango mbuma te, mpo ezwela moloni mbuma ya sika mpe bato mampa mpo balia,

55:11  se bongo liloba liuti o monoko mwa ngai, likozongela ngai mpamba te, kasi likosala mosala moye ngai na­lingi mpe likokokisa maye ngai nati­ndi.

55:12  Solo, bokokende na esengo mpe bakozongisa bino na boboto. Ngomba inene na ike ikoganga na nsai mpe nzete inso ya esobe ikobete maboko.

55:13  Nzete ya sipresi ikokola o esika ya nzube, nzete ya mirta ikobima o esika ya nsende. Yango ekopesa Yawe lokumu lonene nsuka te, ekozala elembo ya seko, ekolo­ngwa mokolo moko te.

Chapter 56

56:1  Nzambe alobi boye : Botosa mibeko mpe bozala na bosembo, mpo libiki lya ngai likomi penepene, mpe bosembo bwa ngai bolingi bomonono.

56:2  Esengo na moto akosalaka bongo, esengo na mwana wa bato oyo ako­landaka nzela eye, oyo akosa­ntisaka mikolo mya Sabato mpe akotikaka mabe manso.

56:3  Mompaya, oyo amipesi na Yawe, aloba te : « Ntembe te, Yawe akotia ngai mpembeni. » Mpe eniki aloba te : « Nazali se nzete ekauki ! »

56:4  Mpamba te, Yawe alobi boye : ba-eniki bakomemyaka mikolo mya ngai mya Sabato, baye bakondimaka kosala maye makosepelisa ngai mpe bakotosaka bondeko bwa ngai,

56:5  o ndako mpe o lopango la ngai nakotelemisela bango likonzi, mpe nakopesa bango nkombo, iye ikoleka nkombo ya bana babali na bana basi. Nakopesa bango nko­mbo ya seko, ekolongwa mokolo moko te.

56:6  Bampaya baye bandimi kosalela Yawe, balingi nkombo ya Yawe mpe bakomi basaleli ba ye, baye bakosantisaka mikolo mya Sabato, bakosantolaka myango te, mpe bakotosaka bondeko bwa ngai,

56:7  nakokamba bango o ngomba ya ngai esantu, nakotondisa bango na nsai o ndako ya ngai ya losambo, nakondima mabonza na miboma mya bango o altare ya ngai, zambi ndako ya ngai ekotangema : ‘Ndako ya losambo ya bato ba bikolo binso’.

56:8  Mokonzi Yawe oyo akosangisa baombo ba Israel bapalangani, alobi boye : Nakobakisa naino bato basusu elongo na baye basili ba­sangani awa.

56:9  Bino, nyama inso ya esobe, mpe bino, nyama ya zamba, boya kolia.

56:10  Bakengeli ba bino bakufi miso, bango banso bayebi eloko te. Bazali mbwa ebubu, bayebi ko­gboma te, baloti ndoto baye balingi se kopema.

56:11  Bazali lokola mbwa lokoso, bakotondaka te. Bazali bakengeli, kasi bayebi eloko te. Banso bakolandaka nzela ya ba­ngo moko mpo ya koluka se bolamu bwa bango moko.

56:12  Bakobengaka baninga : « Boya, nakei kokamata vino, tomele mpe tolangwa, lobi ekozala lokola lelo, vino ekozala mingi mpenza ! »

Chapter 57

57:1  Soko moto semba akufi, moto moko te akopangana na ye ; soko babomi bato balamu moto moko akokeba na yango te. Moto semba akokufa mpo ya mabe ma bato,

57:2  kasi ye akokoto o boboto. Bato balandi nzela semba bakopema na boboto o mbeto ya bango.

57:3  Bino, bana ba mwasi wa likundu, bobeleme awa, bana ba libota lya bato ba bokali mpe ba bondumba.

57:4  Bozali nde koseke nani ? Bofungoli monoko monene mpe bobimisi lolemu mpo ya koseke nani ? Botondi na masumu, bino bato ba lokuta.

57:5  Bino bato bokosepelaka o nse ya nzete ya gbukulu, mpe o nse ya nzete inso ya nkasa ibesu, bokobomaka bana o mabwaku, mpe o mibenga mya mabanga.

57:6  Bolingi se koluka mabanga kitoko o mabwaku, mpo mazala bikeko bokokumisaka ! Bokobonzelaka byango mabonza ma bomeli, mpe mabonza masusu. Makambo mana makoki nde kosepelisa ngai ?

57:7  Otandi litoko lya yo o nsonge ya ngomba esanda, obuti kuna mpo ya kobonza moboma mwa yo.

57:8  Otii ekeko ya yo nsima ya monoko mwa ndako, solo, mosika na ngai olongoli bilamba, obuti mbeto ya yo mpe omilalisi wana. Oyokani na moto alingi ko­lala na yo mpe o ntango ena otali bolu­mbu bwa ye.

57:9  Obonzeli nzambe Melek mabo­nza ma mafuta, opanzi malasi ebele, otindi bantoma ba yo mosika, kin’o mboka ya bawa.

57:10  Olembi mpo otamboli mosika, kasi ata bongo okotikaka te. Nzoto ya yo ezwi lisusu makasi ma kala, yango wana elembeki soki te kosala mambi mabe.

57:11  Obangaki nani mpe oyokaki nsomo mpo ya nani mpo ’te okosa boye, okanisa ngai te, to opangana na ngai lisusu te ? Awa nalobaki eloko te mpe naka­ngaki miso, obangaki ngai lisusu te.

57:12  Sikawa nakoyebisa yo ’te tokosa-mba, mpe misala mya yo mizangi lito­mba.

57:13  Soko okoganga mpo ’te bikeko bya yo ebele bibikisa yo, mompepe mokolongola byango binso, ata mpema mpamba ekobengana byango. Kasi oyo akotia elikya na ngai, akokoto o mokili mwa ngai, mpe akokoma nkolo wa ngomba ya ngai esantu.

57:14  Bakoloba : Bolalisa mabelé, bobo-ngisa nzela, bolongola mabaku manso o nzela ya bato ba ngai.

57:15  Yawe wa Nta Likolo, Oyo akofandaka o ndako ekokufaka te, Oyo nkombo ya ye ezali esantu, alobi boye : « Nazali mosantu oyo afandi o likolo, kasi nazali mpe pene na bato ba mawa, mpe na baye banyokwami. Baye banyokwami na baye bazali na mawa, nakolendisa bango mitema.

57:16  Nakofunda mabe ma bato ntango inso te, nakolakisa nkanda mikolo minso te, soki te, mayele makosilela bango, mpe bato ngai moko nakelaki bakobeba.

57:17  Nayokaki nkanda mpo basali mabe mingi na lokoso, nabeteki bango na nkanda, kasi namibombaki, nzokande batomboki baye bakobi kolanda mposa ya motema.

57:18  Namoni mabe ma bango, kasi nakobikisa mpe nakokamba bango, nakobondo bango. O kati ya bango baye bazali na mawa

57:19  bakokumisa ngai na monoko : « Yawe alobi boye : Boboto bozala na baye bazali mosika mpe na baye bazali penepene. Nakobikisa ba­ngo. »

57:20  Kasi bato babe baulani na mbu eto­mboki, ekoki kotikala nye te mpe mbo­nge ya yango itindiki zelo na potopoto.

57:21  Nzambe wa ngai alobi boye : “Bato babe bakozwa boboto te !” »

Chapter 58

58:1  Yo, ganga makasi, obanga te, tombola mongongo lokola mo­ndule, yebisa bato ba ngai mabe ma ba­ngo, yebisa bato ba Yakob masumu ma bango.

58:2  Bakolukaka ngai mokolo na mokolo, balingi koyeba nzela ya ngai, bakomimonoko bato ba bosembo, baye bakitisaka mibeko mya Nza­mbe wa bango te. Bakosengeke ’te nakatela bango makambo na bosembo, mpe balingi kozala penepene na Nzambe.

58:3  « Mpo nini tomipima bilei, soko yo okomono yango te ? Mpo nini tomikitisa, soko oyebi yango te ? » Kasi o mikolo ya bopimi bilei bokosalaka mombongo mpe boko­nyokoloko basali ba bino.

58:4  Ntango bokomipimaka bilei bozali koswana, kowela mpe kobete baninga makofi makasi. Bolala nzala boye te mokolo bokobondela Nzambe wa likolo.

58:5  Yango nde komipima bilei iye eko­sepelisa ngai ? Yango nde ndenge moto asengeli komikitisa ? Soko bosunisi mitó lokola lititi, bolati nkungulu mpe bolali o mabelé, bokotangaka yango nde komipima bilei mpe mokolo mokosepelisa Yawe, solo ?

58:6  Ndenge ya komipima bilei ngai nalingi, yango eye : Kokangola minyololo mya baye bakangemi ntina te, kolongola mikumba o mapeke ma bato, kopesa bonsomi na baye bagu­mbami o boombo, kobukabuka bikangiseli binso,

58:7  kokabela baye bakufi na nzala bilei, kopesa babola baye bazangi ndako esika ya kolala, kolatisa bato bazali bolumbu, kokima bandeko ba libota lya bino te.

58:8  Bongo mwinda mwa bino mokotana lokola ntongo, mpota ya bino ekokangema noki. Bosembo bwa bino bokotambola liboso lya bino, mpe nkembo ya Yawe ekolanda bino.

58:9  Soko bobyangi Yawe, akoyanola bino, soko bobeleli ye, akoloba : Ngai oyo ! Soko botiki kotiela bato miku­mba, kokanela baninga mpe koloba maloba mabe,

58:10  soko bopesi mampa na moto ayoki nzala, soko bopesi bilei na moto anyo­kwami, mwinda mwa bino mokongenge o kati ya molili, mpe molili mwa bino mokobongwana moi mwa midi.

58:11  Yawe akokamba bino ntango inso, o bisika mabelé makauki akoto­ndisa mpe akolendisa bino. Bokokoma lokola elanga ya ndu­nda, lokola liziba lya mai, liye likosilaka mai te.

58:12  Bokotonga lisusu ndako ya bino iye ibukani, bokobongisa mabanga manene ma nse maye bankoko batika. Bakotanga bino na nkombo ‘Babongisi lopango’ mpe ‘baye babongisi balabala’.

58:13  Soko botiki kosantisa mokolo mwa Sabato, mpe kosala mombongo o mokolo mwa ngai mosantu, soko botangi Sabato ‘Mokolo mwa esengo’ mpe mokolo mosantu mwa Yawe ‘Mokolo mwa lokumu’, soko bosantisi mwango na botiki mibembo, soko botiki kopangana na makambo ma bino moko,

58:14  bokosepela na Yawe solo, mpe ngai nakotambwisa bino likolo lya nsonge ya mokili, mpe bokosepela mokili moye tata wa bino Yakob atikela bino. Yawe mei alobi bongo.

Chapter 59

59:1  Ya solo, loboko ya Yawe ezali ya kolembe te mpo ya ko­bi­ki­sa bino te, azali na matoi makoyokaka malamu.

59:2  Bobele masumu ma bino makaboli bino na Nzambe, masumu ma bino mabombeli bino elongi ya ye, mpe akoyoka bino te.

59:3  Maboko ma bino matondi na makila, mpe misapi mya bino mibebi na masumu, mbebu ya bino ikosakolaka makambo ma lokuta, lolemu la bino lokobimisaka makambo ma kokosa.

59:4  Bakofundaka baninga na bose­mbo te, bakosambaka makambo na bosolo te. Bakolandaka makambo ma mpa­mba, balingi se kokosa, batondi na mabe mpe bakobotaka masumu.

59:5  Bakolalelaka makei ma etupa, bakotongaka bobele monyama mwa limpulututu. Moto oyo akolia makei mana, ako­kufa na mango, soko likei lipaswani, ekobima wana mwana wa nyoka.

59:6  Na mampulututu bakoki kosala elamba te, maye bakosalaka bakoki kolata ma­ngo te. Misala mya bango mizangi bose­mbo, bakobimisaka se makambo makasi makasi.

59:7  Makolo ma bango makolandaka se nzela ebe, bakopotaka mbangu mpo ya koboma bato bazali na likambo te, bakokanaka se kosala mabe, bakolukaka se kobebisa mpe kosilisa.

59:8  Bayebi nzela ya boboto te, nzela ya bango inso izangi bose­mbo. Bakokomisaka nzela ya bango mabunu mabunu, oyo akolandaka yango, ayebi boboto te.

59:9  Yango wana bosolo bozali mosika na biso mpe bosembo bozali o mi­tema mya biso te. Tolukaki moi mpe tala, butu boyei, tolukaki mwinda, kasi totamboli o molili.

59:10  Lokola bato ba lolanda tokosi­mbaka efelo, tozali kolukaluka nzela lokola mo­to azali na miso te. Tokotutaka libaku na midi lokola na mpokwa. Biso bato ba nzoto kolongonu tou­lani na bawei.

59:11  Banso tokolelaka lokola ngombolo, mpe tokokimelaka lokola bikokoba. Tokotiaka elikya ’te tokozwa bosembo, kasi se mpamba, tokanisaki ’te tokobika, kasi libiki lizali mosika na biso.

59:12  Zambi, tosali mabe maike o miso ma yo, mpe masumu ma biso mazali kofunda biso. Tokomemeke masumu o mitema mya biso, mpe toyebi mabe ma biso :

59:13  tozali batomboki, tokowanganaka Yawe, tokolongwaka o nzela ya Nzambe wa biso, tokolobaka makambo ma bitu­mba mpe ma botomboki, o mitema mya biso tokokanisaka makambo ma lokuta.

59:14  Tokobenganaka bosolo, mpe bosembo bozali mosika na biso. O makita ma bato bosembo bozangi mpe bakoboyaka maloba ma bosolo.

59:15  Lobokó lozali lisusu te, mpe moto akimi mabe, bakobotolo ye biloko. Yawe amoni yango mpe ayoki mabe mpo bosembo bozali lisusu te.

59:16  Yawe amoni ’te moto moko afu­ndi likambo lyango te, mpe akamwi na yango mingi. Yango wana loboko la ye losalisi ye, mpe bosembo bwa ye bolendisi ye.

59:17  Alati Bosembo bo molato mwa etumba, mpe Libiki bo enkoti ya ebende o motó. Amizingi na Bobekoli bo monkoto mwa etumba, mpe na Zuwa bo elamba enene.

59:18  Akozongisela bato banso ndenge basalaki, akolakisa banguna nkanda ya ye, mpe akotumbola banyokoli, ata baye bakofandaka o bisanga.

59:19  Epai moi mokokitaka bakobanga nkombo ya Yawe, epai moi mokobimaka bakobanga nkembo ya ye : akoya lokola ebale ekotiyolaka makasi, eye mpema ya Yawe ekotiyolisaka.

59:20  Kasi akoya lokola Mosikoli wa Sion, wa bato ba Yakob, baye bakoboya mabe ma bango. Yawe alobi bongo.

59:21  Yawe alobi boye : Tala bondeko nakokata na bango. Elimo wa ngai, oyo azali na yo, na mpe maloba ma ngai maye natii o monoko mwa yo, makolo­ngwa o monoko mwa yo te, to mpe o monoko mwa bana ba yo te, makolongwa mpe o monoko mwa ba­nkoko ba bankoko ba yo te, lelo mpe o bileko binso seko. Yawe alobi bongo.

Chapter 60

60:1  E Yeruzalem, teleme mpe ongenge, zambi mwinda mwa yo mobandi kotana, nkembo ya Yawe ebimeli yo.

60:2  Awa molili mozipi mokili mpe bato ba bikolo, Yawe abimeli yo, mpe nkembo ya ye emononi epai ya yo.

60:3  Bato ba bikolo bakolanda mwinda mwa yo, mpe bakonzi bakoluka bongengi bwa botani bwa yo.

60:4  Tombola miso mpe tala epai na epai, bato banso basangani bazali koya epai ya yo. Bana babali ba yo bauti mosika, bazongi, bana basi ba yo, bamemi bango o maboko.

60:5  Okomono bongo mpe okosepela mingi, motema mwa yo mokotonda na nsai. Bakoyela yo biloko bya motuya biye ebombami o mbu, bakomemela yo nkita ikouta o bikolo binso.

60:6  Kamela ebele ikoya kotondana epai ya yo, na bana ba kamela ba Madian mpe ba Efa, bato banso ba Saba bakoya na wolo mpe na malasi, bakosakola nkembo ya Yawe.

60:7  Bibwele binso bya Kedar bikoya epai ya yo, bakobonzela yo mpata babali ya Nebayot ; ikobuta altare ya ngai bo libonza likosepelisa ngai, nakokembisa Tempelo ya ngai lisusu.

60:8  Banani wana bazali kopimbwa lokola limpata, lokola bibenga bizali kozonga o ndako ya byango ?

60:9  Solo, bato ba bisanga bakotia eli­kya na ngai, masuwa ma Tarsis makoya liboso mpo ya kozongisa bana ba yo ba­uti mosika, bakoya na palata mpe na wolo, mpo ya lokumu la nkombo ya Yawe Nzambe wa yo, ye Mosantu wa Israel, oyo apesi yo nkembo.

60:10  Bampaya bakotonga bifelo bya yo lisusu, mpe bakonzi ba bango bakosalela yo. Ata nayokelaki yo nkanda mpe nabeteki yo, na bolamu bwa ngai nakoyokela yo ngolu.

60:11  Bizibeli bya mboka ya yo bikotikala polele, bikokangema lisusu te, butu moi, mpo ’te bato ba bikolo bayela yo nkita, bakokambama na bakonzi ba ba­ngo.

60:12  Bikolo na bakonzi baye bakosalela yo te, bakokufa, bakobebisa mikili mya bango.

60:13  Bakoyela yo nkembo ya Libano, sipresi, kambala na wenge, inso elo­ngo, mpo ya kokembisa ndako ya yo esantu, mpe kokumisa esika eye nakozalaka.

60:14  Bana ba banyokoli ba yo bakogu-mba mokongo, baye batiolaki yo bakokumbama o boso bwa yo. Bakotanga yo ‘Engumba ya Yawe, Sion ya Mosantu wa Israel’.

60:15  Ozalaki mopotu, bazalaki koyina yo, bayaki kotala yo te, kasi nakokomisa yo ntina ya litu­ndu, ntina ya esengo ya bato o bileko na bileko.

60:16  Okolia bilei bilamu bya bikolo bisusu, okozwa nkita ya bakonzi ba ba­ngo, mpe okoyeba ’te ngai Yawe nabikisi yo, ’te ngai Nzambe wa Yakob nasikoli yo.

60:17  Esika ya mbengi nakoyela yo wolo, esika ya bibende nakoyela yo palata, esika ya mabaya nakoyela yo mbengi, esika ya mabanga nakoyela yo bibende. Nakotia Boboto bo zuzi wa yo, mpe Bosembo bo moyangeli wa yo.

60:18  O ekolo ya yo bakobunda lisusu bitumba te, bakoyiba to bakobebisa wana lisusu te. Okotanga bifelo bya yo ‘Libiki’, mpe bizibeli bya mboka ya yo ‘Nkembo’.

60:19  Na moi mwese mokozala mwinda mwa yo te, na butu sanza ekongengele yo lisusu te : kasi Yawe akozala mwinda mwa yo seko, mpe Nzambe wa yo akozala nke­mbo ya yo.

60:20  Mwese mwa yo mokokita lisusu te, sanza ya yo ekolimwa lisusu te, zambi Yawe akozala mwinda mwa yo seko mpe mikolo mya lilaka lya yo mikosila.

60:21  O ekolo ya yo okokuta se bato ba bosembo, bakozala bankolo ba mokili seko. Ngai nalonaki bango, bazali mosala mwa ngai, bakolakisaka nkembo ya ngai.

60:22  Libota like likokoma na bato ebele, ekolo eye ezangi makasi ekokoma ekolo ya bato bakasi. Ngai Yawe, nakosala bongo noki o ntango ebongi.

Chapter 61

61:1  Elimo wa Yawe Nzambe akiteli ngai, zambi Yawe apakoli ngai mafuta. Atindi ngai nasangela babola nsa­ngo elamu, nakanga mpota ya baye bazoki mi­tema, nayebisa bato bakei boombo ’te bakozonga, mpe baye bakangemi o boloko ’te bakobima,

61:2  nasangela bato ’te mobu moye Yawe akolimbisa bato, ’te mokolo mwa bobekoli mwa Nza­mbe wa biso mobelemi, mpo ’te nabondo bato bazali na mawa,

61:3  nalatisa bato ba Sion enkoti ya nkembo, napakola bango mputulu te, kasi mafuta ma esengo, nalatisa bango monkoto mwa eye­nga o esika ya elamba ya mpili. Bakopesa bango nkombo : ‘Gbukulu ya bosembo’, nzete Yawe alonaki mpo azwa lokumu.

61:4  Bakotonga lisusu ndako ya kala ibukani, bakotelemisa lisusu ndako inene iye ikwei, bakobongisa lisusu mboka ya kala ibebi na matongi manso makweyaki o bileko bya kala.

61:5  Bampaya bakobokolo bibwele bya bino, bato bauti mosika bakokata bila­nga mpe nzete ya vino.

61:6  Bakopesa bino nkombo : ‘Banga­nga ba Yawe’, bakobyanga bino ‘Basaleli ba Nza­mbe wa biso’. Bokolia nkita ya bato ba bikolo bisusu, mpe bokomikumisa na biloko ebe­le bya bango.

61:7  B okoyoka nsoni lisusu te, kasi esengo nsuka te. Bakotumola bino lisusu te, kasi bokozwa biloko ebele o mokili mwa bango, mpe bokoyoka esengo ekosila lisusu te.

61:8  Mpo ngai Yawe nalingi bosembo, nayini boyibi mpe bokosi. Nakopesa bango lifuta likoki na bango, mpe nakokata na bango bondeko bwa seko.

61:9  Ekolo ya bango ekoyebana o ntei ya bikolo, bana ba bango bakozwa lokumu o mikili misusu. Baye banso bakomono bango, bakondima ’te bazali ekolo eye Yawe abenisi.

61:10  Nayoki nsai enene mpo ya Yawe, motema mwa ngai mosepeli Nza­mbe wa ngai, mpo alatisi ngai molato mwa libiki, atieli ngai monkoto mwa bosembo, se lokola mobali akolataka enkoti ya lokumu, mpe lokola mwasi oyo abali sika akolataka mayaka ma motuya.

61:11  Lokola mabelé makobimisaka nzete, mpe lokola elanga ekobotaka mbu­ma ya yango, se bongo Yawe akobotisa mbuma ya bosembo, akopesa lokumu o miso ma bato banso ba nse.

Chapter 62

62:1  Mpo ya Sion nakotika te koloba, mpo ya Yeruzalem, nakopema te, tee bosembo bwa ye bokotana lokola ntongo mpe libiki lya ye likongenge lokola mwinda.

62:2  Bato ba bikolo binso bakomono bosembo bwa yo mpe bakonzi banso bakomono nkembo ya yo. Bakopesa yo nkombo ya sika, Yawemei akopono nkombo eye.

62:3  Okozala enkoti ya lokumu o maboko ma Yawe, lokola enkoti ya bokonzi o maboko ma Nzambe wa yo.

62:4  Bakotanga yo lisusu ‘Etula’ te, mokili mwa yo bakotanga mwa­ngo lisusu ‘Mopotu’ te. Kasi bakobyanga yo ‘Mwasi wa bolingo’, mpe mokili mwa yo : ‘Mwasi wa libala’, mpo Yawe akosepelaka yo mingi, akobala ekolo ya yo lokola mwasi wa ye.

62:5  Lokola elenge mobali akobalaka mwasi wa ye, oyo akotonga yo akobala yo. Lokola mobali akosepelaka mwasi oyo abali, se bongo Nzambe wa yo akosepela yo.

62:6  E Yeruzalem, natii bakengeli o bifelo bya yo, mingongo mya bango miyokana butu moi : « Bosengeli kokundolela Yawe ma­kambo manso, bokoki kopema ata moke te.

62:7  Bopesa ye mpe nzela ya kopema te tee abongisi Yeruzalem mpe akomisi yango mboka ya lokumu o nse mobimba. »

62:8  Yawe alayi na loboko la ye la mobali : « Nakopesa banguna mbuma ya mampa ma yo lisusu te mpo balia. Awa omilembisi mpo ya kokata bilanga, bampaya bakomele lisusu vino ya yo te.

62:9  Kasi baye basangisi mbuma ya ma­mpa bakolia yango, na ntina ena bakokumisa Yawe ; baye basangisi mbuma ya vino ba­komele vino o lopango la Te­mpe­lo ya ye. »

62:10  Bobima, boleka o bizibeli bya mboka, bobongisela bato nzela : Bolalisa balabala patatalu, bolongola mabanga. Botombola bendele mpo ’te bato bamono yango.

62:11  Yawe alobi na bato ba nse mobi­mba : « Loba na bato ba Sion boye : Tala, libiki la yo ekomi pene, akoya na mbuma ya lilonga lya ye : bato alongoli o maboko ma ba­nguna bakoya liboso lya ye.

62:12  Bakotanga bango ‘Ekolo esantu’, ‘Bato Yawe asikoli’. Mpe bakotanga yo ‘Engumba ya bolingo’, ‘Engumba eye Nzambe atiki te’ ! »

Chapter 63

63:1  Nani oyo auti o Edom, oyo auti o Bosra na bilamba bitane ngwaa ? Amizingi na elamba kitoko mpe­nza, azali koya na makasi manso, alobi : « Ngai moto nakolobaka maloba ma bosembo, nazali na bokasi bwa kobikisa. »

63:2  –Mpo nini elamba ya yo ekomi motane ngwaa boye ? Mpo nini olati lokola moto azali kokamola vino ?

63:3  –Nazalaki se ngai moko o ekamelo, bato ba ekolo ya ngai bazalaki te, yango wana nanyati bango na nka­nda ya ngai, na nkele mingi natuti bango na makolo, makila ma bango makwei o bila­mba bya ngai mpe nabebisi molato mwa ngai mobimba.

63:4  Mpamba te, nalingaki kobekola mabe ma banguna mpe kobikisa bato ba ngai o mobu moye.

63:5  Natali, kasi moto moko ayei kosalisa ngai te, nakamwi mpo moto moko apesi ngai maboko te. Yango wana loboko la ngai losali makasi mpe nkele ya ngai esalisi ngai.

63:6  Na nkanda ya ngai nanyati bato ba bikolo, na nkele ya ngai nabuki bango, mpe nasopi makila ma bango.

63:7  Nalingi kokumisa bolingi bwa Ya­we, nakosakola bikela binene bya Nza­mbe, maye manso Yawe asalaki biso. Solo, alakisi ba-Israel bolamu bopusi, ayokeli bango ngolu mpe asalisi bango, akabeli bango makabo maike.

63:8  Alobaki : « Ya solo, bazali bato ba ekolo ya ngai, bana ba ngai bakokosaka te. » Azalaki Mobikisi wa bango

63:9  o makambo manso makwelaki ba­ngo. Atindi ntoma to anzelu te, kasi yemei abikisi bango, asikoli bango na bolingi mpe na ngolu ya ye. Azalaki kotombola mpe komeme bango mikolo minso.

63:10  Kasi bango bazalaki se kotomboko, bayokisi elimo santu wa ye mawa. Yango wana akomi monguna wa bango, mpe ye moko abundisi bango.

63:11  Bato bakundoli mikolo mya kala, Moze na bato ba ye. Batuni : Wapi Oyo abikisaki ba­ngo o mai ma mbu, Oyo azalaki mokengeli wa etonga ya ye ? Wapi Oyo akitiseli ye Elimo Sa­ntu wa ye ?

63:12  Wapi Oyo azalaki penepene na Moze mpe alakisi ye bokasi bwa loboko la ye ? Oyo akabolaki mai o miso ma bango, mpo azwa nkombo ya lokumu seko ?

63:13  Wapi Oyo alekisaki bango o mai bozindi lokola farasa o eliki ? Bazwaki likama lyoko te :

63:14  elimo wa Yawe akambi bango o esika ya kopema, lokola ngombe bakambi o lobwaku. Okambi bongo bato ba yo mpo ozwa nkombo ya lokumu.

63:15  Ut’o likolo tala mpe omono : ut’o ndako ya yo esantu mpe ya nkembo, tala. Wapi nde zuwa mpe nguya ya yo ? Mpo nini otiki koyokela ngai mawa mpe kolinga ngai ?

63:16  Nzokande ozali tata wa biso ! Abarama ayebi biso te, Israel akanisi biso lisusu te. Yo, Yawe, ozali Tata wa biso, ut’o kala tokotangaka yo Mobikisi wa biso.

63:17  E Yawe, mpo nini otiki biso toye-ngayenga mosika na yo, mpe ondimi ’te tobanga yo lisusu te, mpo tokomi mitema libanga ? Zonga lisusu, ndimela basaleli ba yo, bana ba mabota ma ekolo ya yo.

63:18  Bobele mwa ntango biso bato ba ekolo ya yo esantu tozalaki ba­nkolo ba mokili opesaki biso ; banguna ba biso banyati ndako ya yo esantu.

63:19  Okoyangelaka biso lisusu lokola liboso te, tokotangemaka na nkombo ya yo lisusu te. Soko okokaki kopasola likolo mpe kokita epai ya biso, mbele ngomba ininganaki o miso ma yo.

Chapter 64

64:1  Yaka lokola móto mokozikisaka nkoni to mokotokisaka mai. Okoka koyebisa banguna nko­mbo ya yo, mpo’ te bato ba bikolo babanga yo.

64:2  Bimisa makambo manene, maye bato bakokanisaka te,

64:3  mpe mayokani naino te. Ata mokolo moko te moto ayoki to amoni ’te nzambe mosusu asali bongo mpo ya bato batii mitema na ye, bobele yo osali bongo.

64:4  Okosalisaka baye basepeli maka­mbo ma bosembo, baye bakokanisaka yo na bolandi nzela ya yo. Kasi osilikeli biso mpo tosali masumu ; tozangaki bosembo, nzokande okobikisa biso.

64:5  Banso tokomaki na mbindo, misala mya biso mya bosembo mikomaki lokola elamba ya bosoto. Banso tokomi lokola nkasa ikauki, mpe masumu ma biso matambwisi biso lokola mompepe.

64:6  Moto moko te azali naino kobo­ndela Nkombo ya yo, to kotia motema na yo, mpamba te, obombeli biso elongi mpe otiki biso tokoma baombo ba masumu.

64:7  Nzokande, yo Yawe ozali Tata wa biso. Biso tozali mabelé lido o maboko ma yo, mpe yo ozali mosali mbeki, oyo ayemi biso.

64:8  E Yawe, osilikela biso mingi te, okundola mabe ma biso ntango inso te. Kasi tala biso : tozali banso ekolo ya yo.

64:9  Bingumba bisantu bya yo bikomi lokola eliki, Sion ekomi mopotu, Yeruzalem eko­mi mpamba.

64:10  Tempelo ya biso esantu mpe ya nkembo, esika bankoko ba biso bazalaki kokumisa yo, ekufi mpe eziki na móto : binso bizalaki kosepelisa biso bibebi.

64:11  E Yawe, okoki nde kokanga motema na makambo maye manso, mpe kotikala nye awa tozali koyoka nsoni ?

Chapter 65

65:1  Nandimaki kosalisa bato baye, kasi moto moko abelelaki ngai te ; bakokaki kokutana ngai, kasi moto moko alukaki ngai te. Ata moto moko wa bango abo­ndelaki nkombo ya ngai te, nalobaki : « Ngai oyo, nazali awa ! »

65:2  Mokolo na mokolo natandi maboko epai ya batomboki baye, baye bakolandaka nzela ya masumu lokola balingi.

65:3  Bato baye bakotumolaka ngai polele ntango inso : bakobonzaka mi­boma o mapango, bakotumbaka mpaka ya malasi o biriki,

65:4  bakofandaka o kati ya malita, na butu bakolalaka o molili mwa mibenga, bakoliaka minsuni mya ngu­lu, bakotiaka biloko mbindo o sani ya bango.

65:5  Bakolobaka : « Longwa wana, oya pene na ngai te, nasimbaki biloko bisantu. » Bato baye bakoyokisaka ngai nkanda lokola milinga mikoteli ngai o zolo, lokola móto mokozimaka te.

65:6  O boso bwa ngai ekomami boye : nakofanda nye te liboso ’te nazo­ngisela bango mabe ma bango,

65:7  mpo ya mabe ma bango mpe ma bankoko ba bango. Bazalaki kotumba mpaka o ngomba inene, mpe kotumola ngai o ngomba ike. Nakozongisela bango mabe mana manso. Yawe alobi bongo.

65:8  Yawe alobi boye : Lokola bako­zwa­ka mbuma ya vino mpe bakolobaka : « Bobwaka yango te, ezali naino malamu », se bongo nakosala na basaleli ba ngai ; nakosilisa bango banso te.

65:9  Nakobimisa o Yakob ekolo enene, nakokomisa bana ba Yuda bankolo ba ngomba ya ngai. Bato ngai naponi bakozwa mokili mona, basaleli ba ngai bakofanda wana.

65:10  Esobe ya Saron ekokoma esobe ya mpata, lobwaku la Akor lokokoma esika ngombe ikolia matiti, mpo ya bolamu bwa bato ba ngai bakoluka ngai.

65:11  Kasi bino baye botiki Yawe, bobosani ngomba ya ngai esantu, bokobongiselaka ekeko ya Gad meza mpe bokobonzelaka ekeko ya Meni libonza lya bomeli,

65:12  nakani koboma bino na mopanga, bongo bokogumba mokongo mpo baboma bino. Mpamba te, nabyangaki bino, kasi boyanolaki te, nalobaki na bino, kasi botiaki matoi te. Bosalaki maye mazali mabe o miso ma ngai, bolukaki kosala maye makosepelisaka ngai te.

65:13  Yango wana Yawe Nzambe alobi boye : Basaleli ba ngai bakolia, kasi bino bokokufa na nzala, basaleli ba ngai bakomele, bino bokoyoka mposa ya mai, basaleli ba ngai bakosepela, bino bokoyoka nsoni.

65:14  Basaleli ba ngai bakoganga na nsai, kasi bino bokolela mpo ya mpasi o motema, mpe bokokimela mpo ya mawa maleki.

65:15  Bato ngai naponi bakotanga nko­mbo iye bino bokotika lokola mafinga, bakoloba : « Yawe Nza­mbe aboma bino ! » Kasi akopesa basaleli ba ye nkombo esusu.

65:16  Moto nyonso akolinga kozwa bobenisi o mokili, asenge bwango na nkombo ya Nzambe wa bosolo. Oyo akolaya ndai o ekolo eye, asala bongo na nkombo ya Nza­mbe wa bosolo. Bato bakobosana bongo mpasi ya kala ; ngai nakokanisa yango lisusu te.

65:17  Nakokela likolo lya sika mpe mokili mwa sika, bato bakokanisa lisusu makambo ma kala te, bakobomba mango o motema lisusu te.

65:18  Yango wana bosepela mpe boyoka nsai mpo ya maye nakosala, mpo nakokomisa Yeruzalem engu­mba ya nsai, eye ekosepelisa bato ba ekolo ya ngai.

65:19  Nakoyoka nsai mpo ya Yeruzalem mpe nakosepela mpo ya bato ba ekolo ya ngai : Kuna moto moko akolela to akoganga lisusu te.

65:20  Mwana abotami sika akowa noki lisusu te, mpe mobange akokokisa mibu mya ye : oyo akokufa awa akokisi mibu monkama, loba ’te awei noki, mpe oyo akokufa liboso ’te akokisa mibu monkama, loba ’te batombeli ye bobe.

65:21  Bango moko bakofanda o ndako iye bakotonga, mpe bakolia mbuma ya nzete ya vino iye bango moko balonaki.

65:22  Bakotongela bato basusu ndako lisusu te, bakolonela lisusu moto mosusu mbuma te mpo ’te alia ; zambi bato ba ngai bakoumela na bomoi lokola nzete, bato ngai naponi bakosepela mosala mwa ba­ngo.

65:23  Bakomilembisa lisusu mpamba te, bakobota lisusu bana te mpo ’te bayoka makambo ma nsomo. Bakozala libota lya bato Yawe abenisi, se bongo na bana mpe na ba­nkoko ba bango.

65:24  Liboso ’te babyanga ngai, nayanoli bango, ezali bango naino koloba, nasili nandimeli bango.

65:25  Nkoi ekolia esika yoko na mwana wa mpata, ntambwe ekolia matiti lokola ngombe, mpe nyoka ekolia mputulu. Yawe alobi : O ngomba esantu ya ngai mobimba bakosala lisusu mabe te, bakobebisa ata nini lisusu te.

Chapter 66

66:1  Yawe alobi boye : Likolo lizali ngwende ya ngai mpe mokili mozali ebonga ya makolo ma ngai. Ndako nini bolingi kotongela ngai ? Wapi epai nakoki kozwa esika ya bopemi ?

66:2  Yawe alobi : Nakeli byango binso na maboko ma ngai, bina binso bizali bya ngai. Kasi nakotalaka mobola mpe moto wa mawa, na mpe oyo akobangaka liloba lya ngai.

66:3  Ekobomaka bango ngombe, bakoboma mpe moto ! Ekobomaka bango mpata, bakoboma mpe mbwa ! Ntango bakobonzaka makila ma ngulu, bakotumba mpe mpaka mpo ya kokumisa ekeko. Lokola bakoponoko nzela ya ba­ngo moko mpe bakosepelaka makambo ma bango ma nsomo,

66:4  Ngai mpe nakosepela mpasi ya ba­ngo, nakotindela bango makambo maye bakobangaka, mpamba te, ntango nabyangi ba­ngo, moto moko ayanoli te, ntango nalobi na bango, moto moko atiaki matoi te ; basalaki maye mazali mabe o miso ma ngai, baponoki maye makosepelisaka ngai te.

66:5  Boyoka liloba lya Yawe, bino bato bokobangaka liloba lya ye : Bandeko ba bino, baye bayini bino, babwaki bino mpo ya nkombo ya ngai, balobi : « Tika Yawe alakisa nkembo ya ye, bongo tomono esengo ya bino. » Kasi bakoyoka nsoni.

66:6  Boyoka lokito louti o engumba, boyoka lolaka louti o Tempelo : ezali lolaka la Yawe oyo apesi ba­nguna ba ye etumbu.

66:7  Naino Sion ayoki malozi te, asili aboti, mpasi ya kobota esali ye naino te, asili kobota mwana mobali.

66:8  Nani asili koyoka to komono likambo lya lolenge loye ? Bakoki nde kobota ekolo mobi­mba na mokolo moko ? Bakobotaka nde bato ba ekolo na mbala yoko ? Kasi Sion, ebandi ye koyoka mpasi ya kobota, asili aboti bana ba ye.

66:9  Yawe alobi : Nafungola nde libumu, bongo mwana abotama te ? Ngai moto nakopesaka mwana bo­moi, nakanga nde libumu ? Nzambe wa bino alobi bongo.

66:10  Boyoka nsai elongo na Yeruzalem, bosepela mpo ya ye, bino banso bolingi ye, bosepela elongo na ye, bino banso bozalaki kolela ye.

66:11  Bongo bomele mabéle ma ye mpe botonda, mabéle ma ye makobondo bino ; bomele mabéle na nsai enene, bolamu bwa bino bozali wana solo.

66:12  Yawe alobi boye : Nakokotisa boboto epai ya ye lokola ebale, mpe lokumu la bikolo lokola moluka motondi na mai. Bokonunga mabéle, bakomeme bino o loketo, bakofandisa bino o bibelo mpe bakosepelisa bino mingi mpenza.

66:13  Ngai mpe nakobondo bino, lokola mama akobondoko mwana wa ye : o Yeruzalem bokotonda na esengo.

66:14  Mokolo bokomono bongo, bokoyoka nsai, makasi ma nzoto makozongela bino. Yawe akolakisa basaleli ba ye nguya ya ye, mpe akolakisa banguna nkanda ya ye.

66:15  Tala, Yawe akoya o kati ya móto, mpe makalo ma ye makotambola mbangu lokola ekumbaki, akongalisa nkanda ya ye makasi, mpe akokanela bato na móto mopeli makasi.

66:16  Solo, Yawe akopesa bato banso etu­mbu, na móto mpe na mopanga mwa ye ; baye Yawe akosukisa bazali baike.

66:17  Baye bamisantisaki mpe bamipetolaki o bilanga, baye balandaki oyo abendi bango, baye baliaki monsuni mwa ngulu, nyama mbindo to mpoko, makanisi na misala mya bango minso mikosila na mbala yoko. Yawe alobi bongo !

66:18  Nakoya kosangisa bato ba bikolo binso mpe ba nkota inso, bakoya mpe bakomono nkembo ya ngai.

66:19  Nakopesa bango elembo : ba­ye bawei te, nakotinda bango o bikolo bisusu, epai ya Tarsis, Put, Lud, Mesek, Tubal na Yavan, epai ya bato ba bisanga mosika, epai ya bato bayoki nkombo ya ngai naino te. Bakosakola lokumu la ngai o bikolo bina binso.

66:20  Yawe alobi ’te bakozongisa bandeko ba bino ba­nso ut’o bikolo binso mpo ya kobonzela Yawe. Bakoya na bango na farasa, na makalo mpe na tipoi, bakomeme bango o mokongo mwa mpunda to kamela kin’o ngomba ya ngai esantu o Yeruzalem, lokola ba-Israel bakobonzaka mabonza o sani peto, o Tempelo ya Yawe.

66:21  O ntei ya bango nakopono banganga Nzambe na ba-Levi. Maloba ma Yawe.

66:22  Lokola likolo lya sika mpe mokili mwa sika, iye ngai nakeli ikotikala, Yawe alobi bongo, ekolo ya yo mpe nkombo ya yo ikotikala seko.

66:23  Banda sanza ya sika tee sanza ya sika esusu, banda mokolo mwa Sabato tee Sabato esusu, bato banso bakoya kokumbamela ngai. Maloba ma Yawe.

66:24  Baye bakobima o engumba, bakomono bibembe bya bato baye batombokaki na ngai. Nkusu ya bango ikokufa te, móto mwa bango mokozima te, bato banso bakoyoka bango mpi.