Ndebele - Job

Chapter 1

1:1  Kwakukhona indoda elizweni leUzi, ibizo layo lalinguJobe. Leyondoda yayiphelele-ke, iqondile, imesaba uNkulunkulu, ixwaya okubi.

1:2  Yasizalelwa amadodana ayisikhombisa lamadodakazi amathathu.

1:3  Lemfuyo yayo yayiyizimvu eziyizinkulungwane eziyisikhombisa, lamakamela ayizinkulungwane ezintathu, lezipane zenkabi ezingamakhulu amahlanu, labobabhemi abasikazi abangamakhulu amahlanu, lenceku ezinengi kakhulu. Ngakho lowomuntu wayemkhulu okwedlula bonke abantu bempumalanga.

1:4  Njalo amadodana akhe ahamba enza idili endlini yaleyo laleyo ngosuku lwayo; athuma abiza odadewabo abathathu ukuze badle banathe lawo.

1:5  Kwakusithi lapho esephelile amazopha ensuku zedili, uJobe athume, awangcwelise, avuke ekuseni kakhulu, anikele iminikelo yokutshiswa ngokwenani lawo wonke, ngoba uJobe wathi: Mhlawumbe amadodana ami onile, amthuka uNkulunkulu enhliziyweni yawo. Wenza njalo uJobe zonke izinsuku.

1:6  Kwasekusiba losuku lapho amadodana kaNkulunkulu eza ukuzimisa phambi kweNkosi, loSathane laye wafika phakathi kwawo.

1:7  INkosi yasisithi kuSathane: Uvela ngaphi? USathane wasephendula iNkosi wathi: Ekuzulazuleni emhlabeni lekuhambahambeni kuwo.

1:8  INkosi yasisithi kuSathane: Ubekile yini inhliziyo yakho encekwini yami uJobe, ngoba kakho onjengayo emhlabeni, umuntu opheleleyo loqondileyo, owesaba uNkulunkulu loxwaya ububi?

1:9  USathane wasephendula iNkosi wathi: UJobe umesabela ize uNkulunkulu yini?

1:10  Kawumbiyelanga yini yena lendlu yakhe lakho konke alakho inhlangothi zonke? Ubusisile umsebenzi wezandla zakhe, lezifuyo zakhe zanda kakhulu elizweni.

1:11  Kodwa isibili yelula isandla sakho khathesi, uthinte konke alakho; sibili uzakuthuka ebusweni bakho.

1:12  INkosi yasisithi kuSathane: Khangela konke alakho kusesandleni sakho; kuphela kuye ungeluleli isandla sakho. Wasephuma uSathane phambi kweNkosi.

1:13  Kwasekusiba losuku lapho amadodana lamadodakazi akhe ayesidla enatha iwayini endlini yomfowabo olizibulo.

1:14  Kwasekufika isithunywa kuJobe sathi: Inkabi bezilima labobabhemi besidla emaceleni azo;

1:15  kwasekutheleka amaShebha, akuthatha, atshaya izinceku ngobukhali benkemba, njalo yimi ngedwa kuphela engiphephileyo ukuze ngikubikele.

1:16  Lesi sisakhuluma, kwafika lesinye, sathi: Umlilo kaNkulunkulu uwile uvela emazulwini, watshisa izimvu lezinceku, waziqeda; njalo yimi ngedwa kuphela engiphephileyo ukuze ngikubikele.

1:17  Lesi sisakhuluma, kwafika lesinye, sathi: AmaKhaladiya amise amaxuku amathathu atheleka phezu kwamakamela, awathatha, atshaya izinceku ngobukhali benkemba, njalo yimi ngedwa kuphela engiphephileyo ukuze ngikubikele.

1:18  Lesi sisakhuluma, kwafika lesinye, sathi: Amadodana akho lamadodakazi akho bebesidla benatha iwayini endlini yomfowabo, izibulo.

1:19  Khangela-ke, umoya omkhulu wafika uvela ngaphetsheya kwenkangala, watshaya amagumbi womane endlu, yawela phezu kwamajaha, afa; njalo yimi ngedwa kuphela engiphephileyo ukuze ngikubikele.

1:20  UJobe wasesukuma, wadabula ibhatshi lakhe, waphuca ikhanda lakhe, wawa emhlabathini, wakhonza;

1:21  wasesithi: Ngaphuma ngize esiswini sikamama, njalo ngizabuyela khona ngize; iNkosi yapha, iNkosi ithethe; kalibusiswe ibizo leNkosi.

1:22  Kukho konke lokhu uJobe konanga, kambalelanga ubuwula uNkulunkulu.

Chapter 2

2:1  Kwakulosuku futhi lapho amadodana kaNkulunkulu afika ukuzimisa phambi kweNkosi, uSathane laye wafika phakathi kwawo ukuzimisa phambi kweNkosi.

2:2  INkosi yasisithi kuSathane: Uvela ngaphi? USathane wasephendula iNkosi wathi: Ekuzulazuleni emhlabeni lekuhambahambeni kuwo.

2:3  INkosi yasisithi kuSathane: Ubekile yini inhliziyo yakho encekwini yami uJobe? Ngoba kakho onjengaye emhlabeni, umuntu opheleleyo loqondileyo, owesaba uNkulunkulu, loxwaya ububi? Usabambelele kubo ubuqotho bakhe, lanxa ungivuse ukuze ngimchithe kungelasizatho.

2:4  USathane wasephendula iNkosi wathi: Isikhumba ngesikhumba, yebo, konke umuntu alakho uzakunikelela impilo yakhe.

2:5  Kodwa khathesi yelula isandla sakho, uthinte ithambo lakhe lenyama yakhe; isibili uzakuthuka ebusweni bakho.

2:6  INkosi yasisithi kuSathane: Khangela, usesandleni sakho; kodwa gcina impilo yakhe.

2:7  USathane wasephuma phambi kweNkosi, wamtshaya uJobe ngamathumba amabi, kusukela ngaphansi konyawo lwakhe kuze kube enkanda yakhe.

2:8  Wasezithathela udengezi ukuziphala ngalo, wahlala phakathi kwesilotha.

2:9  Umkakhe wasesithi kuye: Usabambelele yini kubuqotho bakho? Thuka uNkulunkulu, ufe.

2:10  Kodwa wathi kuye: Ukhuluma njengokukhuluma komunye wabesifazana abayiziwula. Kambe, sizakwemukela okuhle kuNkulunkulu, singemukeli lokubi yini? Kukho konke lokhu uJobe konanga ngendebe zakhe.

2:11  Abangane abathathu bakaJobe sebezwile ngakho konke lokhu okubi okumehleleyo, beza, lowo lalowo evela endaweni yakhe, uElifazi umThemani, loBilidadi umShuhi, loZofari umNahama; bavumelana ndawonye ukuthi beze bamkhalele bamduduze.

2:12  Lapho bephakamisa amehlo abo bekhatshana, kabamazanga, baphakamisa ilizwi labo, bakhala inyembezi, badabula ngulowo ibhatshi lakhe, bavuvuzela uthuli emakhanda abo ngasemazulwini.

2:13  Basebehlala laye emhlabathini insuku eziyisikhombisa lobusuku obuyisikhombisa, njalo kakho owakhuluma ilizwi kuye, ngoba babona ukuthi ubuhlungu bukhulu kakhulu.

Chapter 3

3:1  Emva kwalokho uJobe wavula umlomo wakhe, waqalekisa usuku lwakhe.

3:2  UJobe wasephendula wathi:

3:3  Kalubhubhe usuku engazalwa ngalo, lobusuku okwathiwa ngalo: Kukhulelwe umntwana wesilisa.

3:4  Lolosuku kalube ngumnyama, uNkulunkulu angalunanzi ephezulu, lokukhanya kungalukhanyisi.

3:5  Umnyama lethunzi lokufa kakuluhlenge, iyezi lihlale phezu kwalo, umnyama welanga ulwesabise.

3:6  Lobobusuku, umnyama ububambe, lungathokozi ensukwini zomnyaka, lungezi kunani lezinyanga.

3:7  Khangela, lobobusuku kabube yinyumba, umsindo wentokozo ungangeni kubo.

3:8  Kababuqalekise abaqalekisi bosuku, abalungele ukuvusa uLeviyathani*.

3:9  Zibe mnyama inkanyezi zokusa kwabo, bulindele ukukhanya, kodwa kungabi khona, bungaboni inkophe zokusa.

3:10  Ngoba bungavalanga iminyango yesisu sikamama wami, bungafihlanga usizi emehlweni ami.

3:11  Kungani ngingafanga kusukela esizalweni, ngiphele ekuphumeni kwami esiswini?

3:12  Kungani amadolo angandulela? Kungani lamabele ukuthi ngimunye?

3:13  Ngoba khathesi ngabe ngacambalala ngathula, ngalala, khona ngaba lokuphumula,

3:14  kanye lamakhosi labeluleki bomhlaba abazakhela amanxiwa,

3:15  kumbe kanye leziphathamandla ezazilegolide ezagcwalisa izindlu zazo ngesiliva.

3:16  Kumbe njengomphunzo ofihliweyo ngingabi khona, njengensane ezingabonanga ukukhanya.

3:17  Lapho ababi bayekela ukuhlupha, lapho abakhathele ngamandla bephumula.

3:18  Izibotshwa ziyaphumula ndawonye, kazizwa ilizwi lomcindezeli.

3:19  Omncinyane lomkhulu balapho, lesigqili sikhululekile enkosini yaso.

3:20  Kungani enika ukukhanya kohluphekayo, lempilo kwabalokubaba komphefumulo;

3:21  abalindele ukufa, kodwa kungekho, bekugebha kulenotho efihliweyo,

3:22  abathabayo kakhulu ngentokozo, bajabule lapho bethola ingcwaba?

3:23  Emuntwini yini, ondlela yakhe ifihliwe, uNkulunkulu ambiyeleyo?

3:24  Ngoba ukububula kwami kuza phambi kokudla kwami, lokubhonga kwami kuthululeka njengamanzi.

3:25  Ngoba engikwesabayo ngokwesaba sekungehlele, lengilovalo ngakho kufikile kimi.

3:26  Ngangingahlalisekanga, ngingaphumuli, ngingelakuthula, lohlupho lweza.

Chapter 4

4:1  UElifazi umThemani wasephendula wathi:

4:2  Uba sizama ilizwi kuwe, uzadabuka yini? Kodwa ngubani ongazibamba emazwini?

4:3  Khangela, uqondisile abanengi, waqinisa izandla ezibuthakathaka.

4:4  Amazwi akho amvusile okhubekayo, waqinisa amadolo axegayo.

4:5  Kodwa khathesi kufikile kuwe, uyadinwa; kuyakuthinta wena, utshaywa luvalo.

4:6  Ukwesaba kwakho uNkulunkulu kakusiso isibindi sakho yini, lobuqotho bendlela zakho ithemba lakho?

4:7  Akukhumbule, ngubani owake wachithwa engelacala? Kumbe abalungileyo bake baqunywa ngaphi?

4:8  Njengengikubonileyo, abalima ububi behlanyela udubo, bavuna khona.

4:9  Ngokuphephetha kukaNkulunkulu bayabhubha, langokuphefumula kwamakhala akhe bayaphela.

4:10  Ukubhonga kwesilwane, lelizwi lesilwane esesabekayo, lamazinyo amabhongo esilwane, kwephukile.

4:11  Isilwane esidala siyabhubha ngokuswela impango, lemidlwane yesilwanekazi isabalale.

4:12  Ngasenginyenyezelwa ilizwi, lendlebe yami yemukela okuncinyane kwalo.

4:13  Phakathi kwemicabango yemibono yebusuku, lapho ubuthongo obukhulu busehlela abantu,

4:14  ukwesaba kwangifikela lokuthuthumela okwenza ubunengi bamathambo ami baqhaqhazela.

4:15  Kwasekusedlula umoya ebusweni bami, loboya benyama yami bavuka.

4:16  Wema, kodwa angikuqondanga ukubonakala kwawo; isimo sasiphambi kwamehlo ami; kwathula, ngasengisizwa ilizwi lisithi:

4:17  Kambe umuntu angalunga okwedlula uNkulunkulu? Umuntu angahlambuluka okwedlula uMenzi wakhe yini?

4:18  Khangela, kazithembi inceku zakhe, lengilosi zakhe uthi zingabaphosisi.

4:19  Kangakanani abahlala endlini zebumba, abasisekelo sabo sisethulini, abachotshozwa phambi kwenundu.

4:20  Bakhandwa kusukela ekuseni kuze kube kusihlwa, kungelakunanzwa bayabhubha kuze kube nininini.

4:21  Ubuhle babo kabususwa labo yini? Bayafa kodwa bengalanhlakanipho.

Chapter 5

5:1  Ake umemeze, ukhona ongakuphendula yini? Uzaphendukela kuwuphi wabangcwele?

5:2  Ngoba ulaka luyasibulala isiwula, lomhawu ubulale isiphukuphuku.

5:3  Mina ngibone isiwula sigxila, kodwa ngahle ngaqalekisa indawo yaso yokuhlala.

5:4  Abantwana baso bakhatshana losindiso, bachothozwa esangweni, njalo kungekho umkhululi.

5:5  Osivuno saso olambileyo uyasidla, esithatha lemeveni, lomphangi uginya inotho yaso.

5:6  Ngoba usizi kaluveli ethulini, lenhlupheko kayihlumi emhlabathini.

5:7  Kube kanti umuntu uzalelwe inhlupheko njengoba inhlansi ziqhatshela phezulu.

5:8  Kodwa mina bengizadinga uNkulunkulu, lakuNkulunkulu bengizabeka udaba lwami.

5:9  Owenza izinto ezinkulu lezingelakuhlolwa, imimangaliso engelakubalwa.

5:10  Onika izulu ebusweni bomhlaba, athumele amanzi ebusweni bamaphandle,

5:11  ukuze abamise phezulu abaphansi, ukuze abalilayo baphakanyiselwe ekuvikelekeni.

5:12  Uchitha amacebo abalobuqili, ukuze izandla zabo zingenzi cebo.

5:13  Ubamba abahlakaniphileyo ebuqilini babo, ukuze icebo labangaqondanga liwiselwe phansi.

5:14  Bahlangana lomnyama emini, baphumputhe phakathi kwemini njengebusuku.

5:15  Kodwa ukhulula umyanga enkembeni, emlonyeni wabo, lesandleni solamandla.

5:16  Ngakho umyanga ulethemba, lobubi buzavala umlomo wabo.

5:17  Khangela, ubusisiwe lowomuntu uNkulunkulu amlayayo; ngakho ungadeleli ukukhuza kukaSomandla.

5:18  Ngoba yena uzwisa ubuhlungu, abuye abophe; uyalimaza, lezandla zakhe ziyapholisa.

5:19  Uzakukhulula enhluphekweni eziyisithupha, lakweziyisikhombisa ububi kabuyikukuthinta.

5:20  Endlaleni uzakuhlenga ekufeni, lempini emandleni enkemba.

5:21  Uzafihlelwa isiswepu solimi, njalo kawuyikwesaba incithakalo lapho ifika.

5:22  Uzahleka incithakalo lendlala, njalo kawuyikwesaba izilo zomhlaba.

5:23  Ngoba uzakuba lesivumelwano lamatshe eganga, lezilo zeganga zizakuba lokuthula lawe.

5:24  Njalo uzakwazi ukuthi ithente lakho lilokuthula, uzakwethekela indawo yakho yokuhlala ungasweli lutho.

5:25  Uzakwazi futhi ukuthi inzalo yakho izakuba nengi, lembewu yakho njengotshani bomhlaba.

5:26  Uzafika engcwabeni lakho usuluphele, njengenqumbi zamabele zisenyuka ngesikhathi sawo.

5:27  Khangela lokhu, sesikuhlolile; kunjalo. Kuzwe, uzazele wena.

Chapter 6

6:1  UJobe wasephendula wathi:

6:2  Kungathi ukudabuka kwami bekungalinganiswa lokulinganiswa, lenhlupheko yami ibekwe ndawonye esikalini!

6:3  Ngoba khathesi kungaba nzima kuletshebetshebe lolwandle. Ngenxa yalokho amazwi ami angawamawala.

6:4  Ngoba imitshoko kaSomandla iphakathi kwami, obuhlungu bayo umoya wami uyabunatha; izesabiso zikaNkulunkulu ziyazihlela zimelene lami.

6:5  Ubabhemi weganga uyakhala yini esohlazeni, kumbe inkabi iyakhonya yini ekudleni kwayo?

6:6  Kambe okuduma kungadliwa kungelatshwayi? Kulokuhlabusa kokumhlophe kweqanda yini?

6:7  Umphefumulo wami uyala ukukuthinta, kunjengokudla kwami okunengekayo.

6:8  Kungathi isicelo sami singafika, njalo uNkulunkulu anginike ithemba lami,

6:9  ukuthi kumthokozise uNkulunkulu ukungichoboza, ayekele isandla sakhe, angiqume.

6:10  Khona kungahlala kube yinduduzo yami, bengingajabula ebuhlungwini obungayekeliyo; ngoba kangiwafihlanga amazwi oNgcwele.

6:11  Ayini amandla ami ukuze ngithembe? Lokuphela kwami kuyini ukuze ngelule impilo yami?

6:12  Amandla ami angamandla amatshe yini? Inyama yami ilithusi yini?

6:13  Usizo lwami kalukimi yini? Lenhlakanipho iyaxotshwa kimi yini?

6:14  Ohluphekayo nga ehawukelwa ngumngane wakhe, kodwa udela ukwesabeka kukaSomandla.

6:15  Abafowethu kabenzanga ngokuthembeka njengesifula, njengempophoma yezifula bayedlula,

6:16  ezimnyama ngenxa yongqwaqwane, okucatsha kizo iliqhwa elikhithikileyo.

6:17  Ngesikhathi sokufudumala kwazo ziyanyamalala, sekutshisa zicitshe endaweni yazo.

6:18  Imikhondo yendlela yazo iyajika, yenyukele enkangala ibhubhe.

6:19  Izihambi zeTema zakhangela, indwendwe zezihambi zeShebha zalindela kuyo.

6:20  Zaba lenhloni ngoba zazithembile, zafika kuyo zayangeka.

6:21  Ngoba khathesi kalisilutho; liyabona isesabiso, liyesaba.

6:22  Ngitshilo yini ukuthi: Lethani kimi? Kumbe: Phanini isipho ngenxa yami empahleni yenu?

6:23  Kumbe: Ngikhululani esandleni sesitha? Kumbe: Lingihlenge esandleni sabalesihluku?

6:24  Ngifundisani, khona mina ngizathula; lingenze ngiqedisise engiduhe khona.

6:25  Alamandla angakanani amazwi aqotho; kodwa ukusola okuvela kini kusolani?

6:26  Likhumbula amazwi okusola yini, lezinkulumo zophelelwe lithemba zingumoya?

6:27  Yebo, liziwisela phezu kwentandane, ligebhele umngane wenu umgodi.

6:28  Ngakho-ke, vumani lingikhangele, ngoba kuphambi kobuso benu nxa ngiqamba amanga.

6:29  Ake liphenduke, kungabi lobubi, yebo, libuye liphenduke, ukulunga kwami kukukho.

6:30  Kambe kukhona ububi olimini lwami? Ukunambitha kwami bekungehlukanise yini izinto ezimbi?

Chapter 7

7:1  Kakukho yini imfazo kumuntu emhlabeni, lensuku zakhe kazinjengensuku zoqhatshiweyo yini?

7:2  Njengesigqili sikhefuzelela umthunzi, lanjengesiqatshwa silindele iholo laso,

7:3  ngokunjalo mina ngidliswe ilifa lenyanga zeze, lobusuku bezinhlupheko bubalelwe mina.

7:4  Lapho ngilala phansi ngithi: Ngizavuka nini? Ngoba ubusuku bude, njalo ngigcwele ukutshukuma kuze kuse.

7:5  Inyama yami yembethe impethu lamagade othuli; isikhumba sami siyadabuka siyenyanyeka.

7:6  Insuku zami ziyaphangisa kuleselukiso someluki, ziphele kungelathemba.

7:7  Khumbula ukuthi impilo yami ingumoya; ilihlo lami kaliyikuphinda libone okuhle.

7:8  Ilihlo longibonayo kaliyikungibona futhi; amehlo akho aphezu kwami, kodwa ngizakuba ngingasekho.

7:9  Iyezi liyaphela linyamalale; ngokunjalo owehlela engcwabeni kayikwenyuka.

7:10  Kaphindi abuyele emzini wakhe, lendawo yakhe kayisayikumazi.

7:11  Ngakho mina kangiyikubamba umlomo wami; ngizakhuluma ekucindezelweni komoya wami, ngisole ekubabeni komphefumulo wami.

7:12  Ngilulwandle yini, kumbe isilo solwandle, ukuze lingibekele abalindi?

7:13  Lapho ngisithi: Umbheda wami uzangiduduza, icansi lami liphungule ukusola kwami;

7:14  ubusungiqhaqhazelisa ngamaphupho, angethuse ngemibono;

7:15  ukuze umphefumulo wami ukhethe ukuklinywa, ukufa kulamathambo ami.

7:16  Ngiyanengwa yikho, kangiyikuphila njalonjalo; ngiyekele, ngoba insuku zami ziyize.

7:17  Uyini umuntu ukuthi umkhulise, lokuthi ubeke inhliziyo yakho kuye,

7:18  lokuthi umhambele ikuseni yonke, umlinge sonke isikhathi?

7:19  Koze kube nini ungayekeli ukungiqaphela, ungangiyekeli ngize ngiginye amathe ami yini?

7:20  Ngonile, ngizakwenzani kuwe, wena mlindi wabantu? Ungimiseleni ngibe yinto yakho yokunenjwa, ngize ngibe ngumthwalo kimi?

7:21  Njalo kawuthetheleli ngani isiphambeko sami, ususe isono sami? Ngoba sengizalala phansi othulini; uzangidinga ngovivi, kodwa kangiyikuba khona.

Chapter 8

8:1  Wasephendula uBilidadi umShuhi wathi:

8:2  Koze kube nini ukhuluma lezizinto, lamazwi omlomo wakho abe ngumoya olamandla?

8:3  UNkulunkulu uyahlanekela isahlulelo yini? Kumbe uSomandla uyahlanekela ukulunga yini?

8:4  Uba abantwana bakho bonile kuye, yena usebalahlile emandleni esiphambeko sabo;

8:5  uba wena umdinga uNkulunkulu ngovivi, uncenge kuSomandla;

8:6  uba uhlambulukile, uqotho; isibili khathesi ubezavuka ngenxa yakho, aphumelelise indawo yokuhlala yokulunga kwakho.

8:7  Lanxa ukuqala kwakho bekukuncinyane, kube kanti isiphetho sakho sizakwanda kakhulu.

8:8  Ngoba ake ubuze esizukulwaneni sakuqala, uzilungisele isidingo saboyise.

8:9  Ngoba singabezolo, njalo kasazi, ngoba insuku zethu emhlabeni ziyisithunzi.

8:10  Kabayikukufundisa yini, bakutshele, bakhuphe amazwi enhliziyweni yabo?

8:11  Imihlanga ingakhula lapho okungelaxhaphozi khona yini? Ibhuma likhule lapho okungelamanzi khona?

8:12  Nxa lisebuluhlazeni balo lingakakhiwa, kube kanti libuna kuqala kwazo zonke izihlahlakazana.

8:13  Zinjalo indlela zabo bonke abamkhohlwayo uNkulunkulu, lethemba lomzenzisi lizabhubha.

8:14  Othemba lakhe lizaqunywa, lokuthemba kwakhe kuyibulembu besayobe.

8:15  Uyeyama endlini yakhe, kodwa kayimi; ubambelela kiyo, kodwa kayihlali.

8:16  Uluhlaza phambi kwelanga, lamahlumela akhe aphuma esivandeni sakhe.

8:17  Impande zakhe zithandele enqunjini; ubona indawo yamatshe.

8:18  Uba emchitha endaweni yakhe, izamphika ithi: Kangizange ngikubone.

8:19  Khangela, le yintokozo yendlela yakhe; njalo kuzakhula abanye emhlabathini.

8:20  Khangela, uNkulunkulu kayikumlahla opheleleyo, kabambi isandla sabenzi bobubi.

8:21  Aze agcwalise umlomo wakho ngohleko, lezindebe zakho ngokumemeza kwentokozo.

8:22  Abakuzondayo bazakwembeswa ngenhloni, lethente lababi lingabi khona.

Chapter 9

9:1  UJobe wasephendula wathi:

9:2  Ngeqiniso ngiyazi ukuthi kunjalo. Kodwa umuntu angalunga njani kuNkulunkulu?

9:3  Uba efisa ukuphikisana laye, kayikumphendula okukodwa phakathi kwenkulungwane.

9:4  Uhlakaniphile enhliziyweni, uqinile emandleni: Ngubani oziqinisileyo wamelana laye waphumelela?

9:5  Osusa izintaba njalo zingazi, ozigenqula entukuthelweni yakhe.

9:6  Onyikinya umhlaba awususe endaweni yawo, lensika zawo zizamazame.

9:7  Olaya ilanga ukuthi lingaphumi, avalele inkanyezi ngophawu.

9:8  Owendlala amazulu eyedwa, anyathele phezu kwezingqonga zolwandle.

9:9  Owenza iBhere, iziNja, lesiLimela, lamakamelo eningizimu.

9:10  Owenza izinto ezinkulu ezingelakuhlolwa, lezimangalisayo ezingelakubalwa.

9:11  Khangela, uyedlula phansi kwami ngingamboni, edlulele phambili ngingamuzwa.

9:12  Khangela, uyahluthuna, ngubani ongamnqanda? Ngubani ongathi kuye: Wenzani?

9:13  UNkulunkulu kayinqandi intukuthelo yakhe. Abasizi bakaRahabi bayakhothama phansi kwakhe.

9:14  Pho-ke, mina ngingamphendula ngithini, ngikhethe amazwi ami okuqondana laye?

9:15  Ebengingeke ngamphendula loba bengilungile; ngizacela isihawu kumahluleli wami.

9:16  Uba bengibizile, wangiphendula, bengingayikukholwa ukuthi ubekile indlebe elizwini lami.

9:17  Ngoba uyangihlifiza ngesiphepho, andise amanxeba ami kungelasizatho.

9:18  Kangivumeli ukukhokha umoya, kodwa engigcwalisa ngezinto ezibabayo.

9:19  Uba kungamandla, khangela, ulamandla. Njalo uba kungesahlulelo, ngubani ozangibiza?

9:20  Aluba ngilungile, umlomo wami uzangilahla; uba ngiphelele, uzakuthi ngonakele.

9:21  Ngiphelele, angikhathaleli umphefumulo wami, ngidelela impilo yami.

9:22  Kunye lokho, ngenxa yalokho ngithi: Uyabhubhisa olungileyo lomubi.

9:23  Lapho isiswepu sibulala ngokujumayo, uzahleka ukudangala kwabangelacala.

9:24  Umhlaba unikelwe esandleni somubi; wembesa ubuso babehluleli bawo. Uba kungenjalo, pho, ngubani?

9:25  Njalo insuku zami zilejubane kulesigijimi; ziyabaleka, kaziboni okuhle.

9:26  Ziyedlula njengezikepe zomhlanga, njengokhozi olutheleka empangweni.

9:27  Uba ngisithi: Ngizakhohlwa ukusola kwami, ngitshiye ukunyukumala kwami, ngithokoze,

9:28  ngiyesaba zonke insizi zami, ngiyazi ukuthi kawuyikungiphatha njengongelacala.

9:29  Ngilecala mina, pho, ngizatshikatshikelelani ize?

9:30  Uba ngizigezisa ngamanzi eliqhwa elikhithikileyo, ngihlambulule izandla zami ngesepa,

9:31  khona uzangiphosela emgodini, besengisenyanywa yizigqoko zami.

9:32  Ngoba kasuye umuntu njengami ukuze ngimphendule, ukuze siye ndawonye kusahlulelo.

9:33  Kakukho umqamuli phakathi kwethu ongabeka isandla sakhe phezu kwethu sobabili.

9:34  Kasuse uswazi lwakhe kimi, njalo uvalo ngaye lungangethusi.

9:35  Bengingakhuluma ngingamesabi, kodwa anginjalo ngokwami.

Chapter 10

10:1  Umphefumulo wami ukhathele yimpilo yami; ngizatshiya insolo yami phezu kwami; ngizakhuluma ekubabeni komphefumulo wami.

10:2  Ngizakuthi kuNkulunkulu: Ungangilahli; ngazisa ukuthi kungani uphikisana lami.

10:3  Kuhle yini kuwe ukuthi ucindezele, ukuthi udelele umsebenzi wezandla zakho, ukhanye phezu kwecebo lababi?

10:4  Ulamehlo enyama yini? Ubona njengokubona komuntu?

10:5  Insuku zakho zinjengensuku zomuntu na? Iminyaka yakho injengensuku zomuntu yini,

10:6  ukuthi udinge ngobubi bami, uhlolisise ngesono sami?

10:7  Ngoba usazi ukuthi kangikhohlakalanga, lokuthi kakho ongakhulula esandleni sakho.

10:8  Izandla zakho zangibumba zangenza kanyekanye inhlangothi zonke, kanti uyangichitha.

10:9  Ake ukhumbule ukuthi wangenza njengebumba. Pho, uzangibuyisela ethulini?

10:10  Kawungithululanga njengochago, wangijiyisa njengamasi yini?

10:11  Ungigqokise isigogo lenyama, wangihlanganisa ndawonye ngamathambo langemisipha.

10:12  Ungenzele impilo lomusa, lokunakekela kwakho kulondolozile umoya wami.

10:13  Kanti lezizinto uzifihlile enhliziyweni yakho; ngiyazi ukuthi lokhu kukuwe.

10:14  Uba ngisona, ungiqaphele, kawuyikungiyekela ngingelacala esonweni sami.

10:15  Uba ngimubi, maye kimi! Uba ngilungile, bengingayikuphakamisa ikhanda lami. Ngigcwele ihlazo, ngakho bona inhlupheko yami.

10:16  Ngoba kuyaziphakamisa; uyangizingela njengesilwane; ubuye uzenze okumangalisayo kimi.

10:17  Uyavuselela abafakazi bakho abamelene lami, wandise ulaka lwakho kimi; izinguquko lempi kulami.

10:18  Pho kungani wangikhupha esizalweni? Kungathi ngabe ngaphela, lelihlo lingangibonanga!

10:19  Ngangizakuba njengokungathi kangikho; ngangizathwalwa ngisuswe esizalweni ngisiwe engcwabeni.

10:20  Insuku zami kazinlutshwana yini? Khawula phela, ungiyekele ukuze ngithokoze kancinyane,

10:21  ngingakayi - ngingabuyi- elizweni lomnyama lethunzi lokufa,

10:22  ilizwe lomnyama, njengobumnyama, ithunzi lokufa, elingelahlelo, lokukhanya kunjengobumnyama.

Chapter 11

11:1  Wasephendula uZofari umNahama wathi:

11:2  Kambe kabuphendulwa yini ubunengi bamazwi? Njalo isilawuli singalungisiswa yini?

11:3  Ukulawula kwakho kuzathulisa abantu yini? Lapho ukloloda, kakho ongakuyangisa yini?

11:4  Ngoba uthe: Imfundiso yami ihlanzekile, ngihlambulukile emehlweni akho.

11:5  Kodwa-ke kungathi uNkulunkulu angakhuluma, avule indebe zakhe kuwe,

11:6  ukuze akwazise imfihlakalo zenhlakanipho, ukuthi ziphindwe kabili ngenhlakanipho eqotho. Yazi-ke ukuthi uNkulunkulu ubiza kuwe okulutshwana kulecala lakho.

11:7  Ungafumana ukujula kukaNkulunkulu na? Ungamfumana yini uSomandla kuze kube sekupheleleni?

11:8  Kuphakeme njengamazulu, ungenzani? Kutshonile kulesihogo, ungazini?

11:9  Isilinganiso sakho side kulomhlaba, sibanzi kulolwandle.

11:10  Uba esedlula avalele kumbe abuthanise, ngubani-ke ongamnqanda?

11:11  Ngoba yena uyabazi abantu abayize, uyabona ububi; ngakho kayikukuqaphelisa yini?

11:12  Ngoba umuntu oyisiphukuphuku angaba lokuqedisisa, lanxa umuntu engazalwa njengethole likababhemi weganga.

11:13  Uba wena ulungisa inhliziyo yakho, welulele izandla zakho kuye,

11:14  uba ububi busesandleni sakho, bubeke khatshana, lobubi kabungahlali emathenteni akho.

11:15  Ngoba lapho uzaphakamisa ubuso bakho ungelasici, njalo uqine, ungesabi.

11:16  Ngoba wena uzakhohlwa usizi lwakho, ulukhumbule njengamanzi asedlulile.

11:17  Lobude bempilo yakho buzakhanya kulemini enkulu; loba kulomnyama kuzakuba njengekuseni.

11:18  Njalo uzakuba lethemba ngoba kulethemba; uzagebha, uzalala ngokuvikeleka.

11:19  Uzalala, njalo kakho ozakwethusa, labanengi bazancenga phambi kwakho.

11:20  Kodwa amehlo ababi azafiphala, lesiphephelo sizachitheka kubo, lethemba labo lizakuba yikuphela komphefumulo.

Chapter 12

12:1  Wasephendula uJobe wathi:

12:2  Ngoba isibili lingabantu, lenhlakanipho izakufa lani.

12:3  Lami ngilengqondo njengani, kangiphansi kulani. Njalo ngubani ongelazo izinto ezinje?

12:4  Ngiyinhlekisa kumngane wami, obiza kuNkulunkulu amphendule; olungileyo oqondileyo uyinhlekisa.

12:5  Uyisibane esidelelekayo emnakanweni wowonwabileyo; ulungele ukutshelela ngonyawo.

12:6  Amathente abaphangi alokuthula, labamthukuthelisayo uNkulunkulu bavikelekile, kulowo oletha uNkulunkulu esandleni sakhe.

12:7  Kodwa-ke buza khathesi inyamazana, zizakufundisa, lenyoni zamazulu, zizakutshela.

12:8  Kumbe khuluma lomhlaba, uzakufundisa, lenhlanzi zolwandle zizakulandisela.

12:9  Ngubani ongaziyo phakathi kwakho konke lokhu ukuthi isandla sikaJehova sikwenzile lokhu?

12:10  Okusesandleni sakhe umphefumulo wakho konke okuphilayo, lomoya wayo yonke inyama yomuntu.

12:11  Indlebe kayihloli yini amazwi, njengolwanga luzinambithela ukudla?

12:12  Kwabadala kakhulu kulenhlakanipho, lebudeni bezinsuku kulokuqedisisa.

12:13  Kuye kukhona inhlakanipho lamandla, uleseluleko lokuqedisisa.

12:14  Khangela, udiliza, kungabe kusakhiwa; uvalela umuntu, kungabe kusavulwa.

12:15  Khangela, uvimbela amanzi, atshe; abesewathuma, agenqule umhlaba.

12:16  Kuye kukhona amandla lenhlakanipho; okhohlisiweyo lomkhohlisi bangabakhe.

12:17  Ukhupha abeluleki bahambe behlutshulwe, enze abehluleli babe yizithutha.

12:18  Uthukulula isibopho samakhosi, abophe umbhinco enkalweni zawo.

12:19  Ukhupha abapristi bahambe behlutshulwe, awise abalamandla.

12:20  Uphambula inkulumo yabathembekileyo, asuse ukuqedisisa kwabasebekhulile.

12:21  Uthela ukudelela phezu kweziphathamandla, axegise umbhinco wabalamandla.

12:22  Wembula izinto ezijulileyo ezisemnyameni, akhuphele ekukhanyeni ithunzi lokufa.

12:23  Enze izizwe zibe zinkulu, abesezichitha; andise izizwe, abesezisusa.

12:24  Ususa inhliziyo yenhloko zabantu bomhlaba, aziduhise enkangala engelandlela.

12:25  Ziphumputhe emnyameni kungelakukhanya, uzenza zidiyazele njengodakiweyo.

Chapter 13

13:1  Khangela, konke ilihlo lami likubonile, indlebe yami izwile yakuqedisisa.

13:2  Njengokolwazi lwenu lami ngiyakwazi; kangiphansi kulani.

13:3  Kodwa mina ngizakhuluma loSomandla, ngifisa ukuqondisana loNkulunkulu.

13:4  Kodwa lina-ke ligcona ngamanga, lonke lingabelaphi abangelamsebenzi.

13:5  Kungathi ngabe liyathula lithi zwi; lokhu kube yinhlakanipho kini!

13:6  Ake lizwe ukuzivikela kwami, lilalele impikiso zendebe zami.

13:7  Lizamkhulumela uNkulunkulu ngokubi, limkhulumele ngenkohliso yini?

13:8  Lizakwemukela ubuso bakhe, lizammela yini uNkulunkulu?

13:9  Kuzakuba kuhle yini lapho elihlola? Lizamkhohlisa yini njengokhohlisa umuntu?

13:10  Isibili uzalisola, uba lisemukela ubuso ensitha.

13:11  Ubukhulu bakhe kabulethusi yini, lokwesabeka kwakhe kulehlele?

13:12  Izikhumbuzo zenu ziyizaga zomlotha, izivikelo zenu ziyizivikelo zebumba.

13:13  Thulani lingiyekele, ukuze ngikhulume mina; kungehlele loba kuyini.

13:14  Ngizayithathelani inyama yami ngamazinyo ami, ngibeke impilo yami esandleni sami?

13:15  Lanxa ezangibulala, ngizathemba kuye. Kanti ngizazimela indlela zami phambi kwakhe.

13:16  Njalo uzakuba lusindiso lwami; ngoba umzenzisi kayikuza phambi kwakhe.

13:17  Zwisisani ilizwi lami, lengcazelo yami ngendlebe zenu.

13:18  Khangelani-ke, sengilubeke kuhle udaba lwami, ngiyazi ukuthi mina ngizalungisiswa.

13:19  Ngubani lowo ozaphikisana lami? Nxa khathesi ngithula ngizaphela.

13:20  Kuphela ungenzi izinto ezimbili kimi; khona ngingayikucatshela ubuso bakho.

13:21  Susela khatshana lami isandla sakho, lokwesabeka kwakho kungangethusi.

13:22  Ubusungibiza, mina ngizaphendula; kumbe ngikhulume, ungiphendule.

13:23  Zingaki iziphambeko lezono engilazo? Ngazisa isiphambeko sami lesono sami.

13:24  Ufihlelani ubuso bakho, ungiphathe njengesitha sakho?

13:25  Uzakwethusa yini ihlamvu eliphephethekayo? Njalo uzaxotshana lomule owomileyo yini?

13:26  Ngoba ubale izinto ezibabayo umelene lami, wangenza ngadla ilifa leziphambeko zobutsha bami.

13:27  Ufake lenyawo zami esigodweni, waqaphela zonke indlela zami, wazidweba uluphawu empandeni zezinyawo zami.

13:28  Yena-ke njengokubolileyo uyaguga, njengesembatho inundu esidlayo.

Chapter 14

14:1  Umuntu, ozelwe ngowesifazana ulensuku ezimfitshane, ezigcwele inhlupheko.

14:2  Uyavela njengeluba, abune, abaleke njengesithunzi, akemi.

14:3  Kambe onjalo umvulela amehlo akho, ungingenise ekwahlulelweni kanye lawe.

14:4  Ngubani ongaveza okuhlambulukileyo kokungcolileyo? Kakho loyedwa.

14:5  Lokhu insuku zakhe zimisiwe, inani lenyanga zakhe likuwe, ummisele imingcele yakhe angeyedlule;

14:6  ungamkhangeli, ukuze aphumule, aze athokoze ngosuku lwakhe njengesiqatshwa.

14:7  Ngoba kukhona ithemba esihlahleni uba siganyulwa ukuthi sizabuya sihlume, lokuthi ihlumela laso kaliyikuphela.

14:8  Lanxa impande yaso isiba ndala emhlabeni, lesiphunzi saso sifele emhlabathini,

14:9  ngephunga lamanzi sizahluma, senze ingatsha njengesithombo.

14:10  Kodwa umuntu uyafa alaliswe phansi, yebo, umuntu uyaphela, ungaphi-ke?

14:11  Amanzi ayemuka elwandle, lomfula uyoma utshe,

14:12  ngokunjalo umuntu uyalala phansi angavuki; kuze kuthi amazulu angabikho, bangavuki, kumbe bangaphatshanyiswa ebuthongweni babo.

14:13  Kungathi ungangifihla engcwabeni, ungithukuze, ize iphenduke intukuthelo yakho, ungimisele isikhathi esimisiweyo, ungikhumbule!

14:14  Uba umuntu esifa, uzabuya aphile yini? Zonke insuku zemfazo yami ngizalinda, kuze kufike ukukhululwa kwami.

14:15  Uzabiza, mina-ke ngizasabela, uzalangatha umsebenzi wezandla zakho.

14:16  Kanti khathesi uyazibala izinyathelo zami; kawuyikuqaphelisa ngesono sami yini?

14:17  Isiphambeko sami sinanyekwe esikhwameni, wasusibekela isono sami.

14:18  Isibili-ke intaba ewayo iyabhidlika, ledwala liyasuswa endaweni yalo.

14:19  Amanzi ayaguguda amatshe, impophoma zawo ziyakhukhula ubhuqu lomhlaba. Uyachitha-ke ithemba lomuntu.

14:20  Uyamehlula phakade, adlule; uyaguqula ubuso bakhe, umxotshe.

14:21  Amadodana akhe ayadunyiswa, kodwa engakwazi; kumbe ayehliselwa phansi, kodwa angakunanzeleli.

14:22  Kodwa inyama yakhe kuye isebuhlungwini, lomphefumulo wakhe kuye uyalila.

Chapter 15

15:1  Wasephendula uElifazi umThemani wathi:

15:2  Ohlakaniphileyo angaphendula yini ulwazi olungumoya, agcwalise isisu sakhe ngomoya wempumalanga?

15:3  Aphikise ngamazwi angasizi lutho, langenkulumo ezingelanzuzo yini?

15:4  Yebo, wena uyachitha ukwesaba, uvimbela umkhuleko phambi kukaNkulunkulu.

15:5  Ngoba umlomo wakho ufundisa ububi bakho, ukhethe ulimi lwamaqili.

15:6  Umlomo wakho uyakulahla, kayisimi; yebo, indebe zakho ziyafakaza ngawe.

15:7  Ungumuntu wokuqala owazalwayo yini? Kumbe wazalwa mandulo kwamaqaqa yini?

15:8  Uzwile yini icebo langasese likaNkulunkulu? Kumbe uzigodlele inhlakanipho yini?

15:9  Kuyini okwaziyo esingakwaziyo? Kuyini okuqedisisayo okungekho kithi?

15:10  Kukhona phakathi kwethu lempunga lekhehla, omdala ngensuku kuloyihlo.

15:11  Zincinyane yini kuwe induduzo zikaNkulunkulu, lelizwi elikhulunywa kuhle lawe?

15:12  Kungani inhliziyo yakho ikumukisa? Njalo kungani amehlo akho ephayiza,

15:13  ukuthi uphendule umoya wakho umelane loNkulunkulu, ukhuphe amazwi anje emlonyeni wakho?

15:14  Umuntu uyini ukuthi abe ngohlambulukileyo, lozelwe ngowesifazana ukuthi abe ngolungileyo?

15:15  Khangela, kathembeli kwabangcwele bakhe, lamazulu kawahlambulukanga emehlweni akhe.

15:16  Kukangakanani umuntu onengekayo lowonakeleyo, onatha ububi njengamanzi!

15:17  Ngizakutshengisa, ungilalele, lengikubonileyo ngizakulandisa,

15:18  lokho izihlakaniphi ezikukhulumileyo kusukela kuboyise, njalo kazikufihlanga,

15:19  okwanikwa kuzo zodwa ilizwe, lokungadlulanga izihambi phakathi kwazo.

15:20  Insuku zonke zokhohlakeleyo uzizwisa ubuhlungu, lenani leminyaka ebekelelwe umcindezeli.

15:21  Umsindo wezethuso usendlebeni zakhe; empumelelweni umchithi uzamfikela.

15:22  Kakholwa ukuthi uzaphenduka emnyameni, kodwa ukuthi ulindelwe yinkemba.

15:23  Uzulela ukudla. Kungaphi? Uyazi ukuthi usuku lobumnyama lulungisiwe esandleni sakhe.

15:24  Uhlupho losizi kuyamethusa, kumehlule njengenkosi elungele impi.

15:25  Ngoba welule isandla sakhe emelene loNkulunkulu, wenza ngamandla ukumelana loSomandla.

15:26  Wagijima emelene laye ngentamo, ngohlonzi lwamaqhubu ezihlangu zakhe.

15:27  Ngoba wambomboza ubuso bakhe ngamafutha akhe, wenza ukhalo lwakhukhumala ngamafutha.

15:28  Uhlala emizini echithekileyo, izindlu abangahlali kuzo, ezilungele ukuba zinqumbi.

15:29  Kayikunotha, lenotho yakhe kayiyikuma, lenzuzo yakhe kayiyikusabalala emhlabeni.

15:30  Kayikusuka emnyameni; ilangabi lizakomisa ihlumela lakhe, njalo uzasuka ngokuphefumula komoya wakhe.

15:31  Oduhisiweyo kangathembeli ezenini, ngoba ize lizakuba ngumvuzo wakhe.

15:32  Kuzafezwa kungakabi lusuku lwakhe, logatsha lwakhe aluyikuba luhlaza.

15:33  Uzawohloza izithelo zakhe ezingavuthwanga njengevini, athintithe impoko zakhe njengesihlahla somhlwathi.

15:34  Ngoba inhlangano yabazenzisi izakuba ngengelazithelo, lomlilo uzaqothula amathente ezivalamlomo.

15:35  Bamitha uhlupho, bazale isono, lesizalo sabo silungisa inkohliso.

Chapter 16

16:1  Wasephendula uJobe wathi:

16:2  Ngizwile izinto ezinengi ezinje; lingabaduduzi abakhathazayo lina lonke.

16:3  Kuzakuba lesiphetho yini emazwini angumoya? Kumbe kuyini okulicunulayo ukuthi liphendule?

16:4  Lami bengingakhuluma njengani uba umphefumulo wenu ubusendaweni yomphefumulo wami; bengingabuthelela amazwi phezu kwenu, ngilinikinele ikhanda lami.

16:5  Bengingaliqinisa ngomlomo wami, lokunyikinyeka kwendebe zami bekungadedisaubuhlungu benu.

16:6  Uba ngikhuluma, ubuhlungu bami kabudedi; uba ngiyekela, kuyini okusuka kimi?

16:7  Kodwa khathesi ungidinisile yena, wena uchithile yonke inhlangano yami.

16:8  Ungitshwabhanisile, kube yibufakazi, lokucaka kwami kungivukele, kuyafakaza ebusweni bami.

16:9  Ulaka lwakhe luyangidwengula, njalo uyangizonda; ungigedlela amazinyo akhe; isitha sami singicijisela amehlo aso.

16:10  Bangikhamisela umlomo wabo, bangiwakala esihlathini ngokuyangisa, bengihlanganyela ndawonye.

16:11  UNkulunkulu unginikele kokhohlakeleyo, wangiphosela ezandleni zababi.

16:12  Ngangonwabile, kodwa wangichoboza, wangidumela ngentamo, wangiphahlaza, wangimisa ngaba yinto yakhe yokunenjwa.

16:13  Abatshoki bakhe bangigombolozela; uqhekeze izinso zami, engayekeli, wachithela emhlabathini inyongo yami.

16:14  Wangivodloza ngokuvodlovodloza, wagijimela kimi njengeqhawe.

16:15  Ngathunga isaka phezu kwesikhumba sami, ngathukuza uphondo lwami othulini.

16:16  Ubuso bami bubomvu ngokukhala, lenkotsheni zami kulethunzi lokufa,

16:17  lanxa kungekho isihluku ezandleni zami, lomkhuleko wami uhlanzekile.

16:18  Mhlaba, ungaligqibeli igazi lami, lokukhala kwami kakungabi landawo.

16:19  Lakhathesi, khangelani, ubufakazi bami busemazulwini, lomfakazi wami usezindaweni eziphakemeyo.

16:20  Abangane bami bayangiklolodela; ilihlo lami liyathonta kuNkulunkulu.

16:21  Kungathi kungaba khona ongamlamulela umuntu kuNkulunkulu, njengendodana yomuntu kumngane wayo.

16:22  Ngoba iminyaka emilutshwana izafika, njalo ngizahamba ngendlela engingayikubuya ngayo.

Chapter 17

17:1  Umoya wami wonakele, insuku zami zicitshiwe, amangcwaba ngawami.

17:2  Kabakho lami yini abaklolodayo, lelihlo lami lichitha ubusuku ekuvukeleni kwabo?

17:3  Akubeke isibambiso sami kuwe; ngubani yena ozatshaya esandleni sami?

17:4  Ngoba inhliziyo yabo uyifihlele ukuqedisisa; ngenxa yalokhu kawuyikubaphakamisa.

17:5  Okhuluma ngokuyenga kubangane, lamehlo abantwana bakhe azafiphala.

17:6  Njalo ungimise ngaba yisaga sezizwe, ngaze ngaba ngokhafulelwayo phambi kwazo.

17:7  Njalo ilihlo lami lifiphele ngosizi, lamalunga ami anjengesithunzi wonke.

17:8  Abaqotho bazakwethuswa yikho, longelacala uvukela ongamesabiyo uNkulunkulu.

17:9  Lolungileyo uzabambelela endleleni yakhe, lolezandla ezihlambulukileyo uzakwengeza amandla.

17:10  Kodwa-ke lina lonke, phendukani ake libuye, ngoba kangitholi ohlakaniphileyo phakathi kwenu.

17:11  Insuku zami zedlule, amacebo ami adabuke phakathi, lezifiso zenhliziyo yami.

17:12  Bamisa ubusuku bube yimini; ukukhanya kuseduze phambi kobumnyama.

17:13  Uba ngilinda, ingcwaba lizakuba yindlu yami; ngendlala umbheda wami emnyameni.

17:14  Ngibiza ingcwaba ngisithi: Wena ungubaba; impethu ngisithi: Umama lodadewethu.

17:15  Pho-ke ithemba lami lingaphi? Yebo, ithemba lami ngubani ozalibona?

17:16  Kuzakwehlela kumijabo yengcwaba, lapho sizaphumula khona ndawonye enhlabathini.

Chapter 18

18:1  Wasephendula uBilidadi umShuhi wathi:

18:2  Koze kube nini libekela amazwi imigibe? Nanzelelani, lemva kwalokho sikhulume.

18:3  Kungani sithiwa sizinyamazana, singcolile emehlweni enu?

18:4  Udwengula umphefumulo wakhe ngokuthukuthela kwakhe. Umhlaba uzatshiywa ngenxa yakho yini, loba idwala lisuswe endaweni yalo?

18:5  Yebo, ukukhanya kwabakhohlakeleyo kuzacitshwa, lenhlansi yomlilo wakhe kayiyikukhanya.

18:6  Ukukhanya kuzafiphala ethenteni lakhe, lesibane sakhe ngaphezu kwakhe sizacitshwa.

18:7  Izinyathelo zamandla akhe zizafinyezwa, lecebo lakhe lizamwisela phansi.

18:8  Ngoba uzaphoselwa embuleni zinyawo zakhe, ahambe phezu kwembule.

18:9  Umjibila uzambamba isithende, isihitshela sizamkhulela.

18:10  Igoda lakhe lifihlwe emhlabathini, lomjibila wakhe endleleni.

18:11  Izesabiso zizamethusa inhlangothi zonke, zixotshane laye enyaweni zakhe.

18:12  Amandla akhe azaqedwa yindlala, lengozi ilindele ukukhubeka kwakhe.

18:13  Kuzakudla ingxenye zesikhumba sakhe; izibulo lokufa lidle ingxenye zakhe.

18:14  Ithemba lakhe lizahluthunwa ethenteni lakhe, njalo kumenze aye enkosini yezesabiso.

18:15  Kuzahlala ethenteni lakhe elingeyisilo lakhe; isolufa izavuvuzelwa phezu kwendawo yakhe yokuhlala.

18:16  Impande zakhe zizakoma ngaphansi, logatsha lwakhe lubune ngaphezulu.

18:17  Ukukhunjulwa kwakhe kuzabhubha emhlabeni, angabi labizo ezitaladeni.

18:18  Bazamfuqa bamsuse ekukhanyeni bamuse emnyameni, bamxotshe emhlabeni.

18:19  Kayikuba lenzalo lasizukulwana ebantwini bakibo; kakuyikuba lansali endaweni zakhe zokuhlala.

18:20  Abalandelayo bazakwethuswa lusuku lwakhe, labokuqala bazabanjwa yisesabiso.

18:21  Isibili zinjalo indawo zokuhlala zomubi, njalo yiyo le indawo yongamaziyo uNkulunkulu.

Chapter 19

19:1  Wasephendula uJobe wathi:

19:2  Koze kube nini lihlupha umphefumulo wami, lingiphahlaza ngamazwi?

19:3  Lezizikhathi ezilitshumi lingithela ngehlazo; kalilanhloni, lingiphatha kubi.

19:4  Uba-ke kuliqiniso ukuthi ngiduhile, ukuduha kwami kuzahlala lami.

19:5  Uba isibili lizikhukhumeza phezu kwami, liphikisane lami ngehlazo lami,

19:6  yazini-ke ukuthi nguNkulunkulu ongihlanekeleyo, wangigombolozela ngembule lakhe.

19:7  Khangela, ngiyamemeza ngithi: Okubi! Kodwa kangiphendulwa. Ngicela usizo, kodwa akulasahlulelo.

19:8  Uyivalile indlela yami ngomduli ukuze ngingedluli, wamisa umnyama emikhondweni yami.

19:9  Ungihlubule udumo lwami, wasusa umqhele wekhanda lami.

19:10  Ungibhidlizile inhlangothi zonke, sengihambile, ulisiphule ithemba lami njengesihlahla.

19:11  Ulumathisile ulaka lwakhe kimi, ungibale njengezitha zakhe kuye.

19:12  Amabutho akhe afika kanyekanye, abuthelela indlela yawo emelene lami, amisa inkamba agombolozela ithente lami.

19:13  Ubeke abafowethu khatshana lami, labangaziyo isibili sebengabemzini kimi.

19:14  Izihlobo zami zinyamalele, labazana lami bangikhohliwe.

19:15  Abahlala endlini yami lencekukazi zami bangibala njengowezizwe; ngingumfokazi emehlweni abo.

19:16  Ngabiza inceku yami, kodwa kayiphendulanga; ngayincenga ngomlomo wami.

19:17  Umoya wami uyenyanyeka kumkami, sengiyisinengiso kumadodana esizalo sami.

19:18  Labantwana abancinyane bayangidelela; ngasukuma, basebekhuluma bemelene lami.

19:19  Bonke abantu besifuba sami banengwa yimi, labo ebengibathanda sebengiphendukele.

19:20  Ithambo lami linamathelana lesikhumba sami lenyama yami, njalo ngiphephe ngesikhumba samazinyo ami.

19:21  Ngihawukelani, ngihawukelani, lina bangane bami; ngoba isandla sikaNkulunkulu singithintile.

19:22  Lingizingelelani njengoNkulunkulu, lingeneliswa yinyama yami?

19:23  Kungathi ngabe khathesi amazwi ami abhaliwe! Kungathi ngabe acindezelwe egwalweni!

19:24  Ngabe abazwe ngepheni yensimbi langomnuso edwaleni kuze kube nininini!

19:25  Ngoba mina ngiyazi ukuthi umhlengi wami uyaphila, lekupheleni uzakuma emhlabathini.

19:26  Lapho sekutshabalalise lokhu emva kwesikhumba sami, kanti enyameni yami ngizambona uNkulunkulu,

19:27  mina engizazibonela yena, lamehlo ami azabona, hatshi omunye. Izinso zami seziphelile ngaphakathi kwami.

19:28  Kodwa lithi: Kungani simzingela? Ngoba impande yendaba itholakala kimi.

19:29  Lina yesabeni inkemba, ngoba ulaka luletha izijeziso zenkemba, ukuze lazi ukuthi sikhona isahlulelo.

Chapter 20

20:1  Wasephendula uZofari umNahama wathi:

20:2  Ngakho imicabango yami ingenza ngiphendule, langenxa yokuphangisa kwami phakathi kwami.

20:3  Ngizwile isijeziso sehlazo lami, lomoya wokuqedisisa kwami ungenza ngiphendule.

20:4  Uyakwazi lokhu yini, kusukela endulo, selokhu kwabekwa umuntu emhlabeni,

20:5  ukuthi injabulo yababi imfitshane, lentokozo yomzenzisi ngeyesikhatshana nje?

20:6  Loba ubukhosi bakhe busenyukela emazulwini, lekhanda lakhe lifinyelela emayezini,

20:7  uzabhubha phakade njengobulongwe bakhe; labo abambonileyo bathi: Ungaphi?

20:8  Uzaphapha njengephupho, bangabe besamthola; yebo, uzaxotshwa njengombono webusuku.

20:9  Ilihlo elike lambona aliyikuphinda, lendawo yakhe kayisayikumbona.

20:10  Abantwana bakhe bazadinga ukuthokozisa abayanga, lezandla zakhe zibuyisele inotho yakhe.

20:11  Amathambo akhe ayegcwele ubutsha bakhe, kodwa azalala kanye laye enhlabathini.

20:12  Uba ububi bumnandi emlonyeni wakhe, ebufihla ngaphansi kolimi lwakhe,

20:13  ebugodla, engabuyekeli, kodwa ebugcina phakathi komlomo wakhe,

20:14  ukudla kwakhe kuzaphenduka esiswini sakhe, kuzakuba yibuhlungu bezinyoka phakathi kwakhe.

20:15  Uginye inotho, kodwa uzayihlanza; uNkulunkulu uzayikhupha esiswini sakhe.

20:16  Uzamunya ubuhlungu bezinyoka, lolimi lwebululu luzambulala.

20:17  Kayikubona izifula, imifula, izifudlana zoluju lolaza.

20:18  Uzabuyisela lokho akusebenzelayo, angakuginyi; njengokwenotho izakuba njalo inhlawulo, njalo kayikuthokoza.

20:19  Ngoba ubacindezele wabadela abayanga, waphanga indlu abengayakhanga.

20:20  Ngoba kakwazi ukuthula esiswini sakhe, kayikusindisa lutho kusifiso sakhe.

20:21  Kakuyikusala lutho ekudleni kwakhe; ngenxa yalokhu okuhle kwakhe kakuyikuma.

20:22  Ekugcwaleni kokwanela kwakhe uzakuba lencindezelo; sonke isandla sohluphekayo sizamfikela.

20:23  Kuzakuthi lapho egcwalisa isisu sakhe, uNkulunkulu athumele kuye ukuvutha kwentukuthelo yakhe, akunise phezu kwakhe ekudleni kwakhe.

20:24  Uzabalekela isikhali sensimbi, idandili lethusi lizamhlaba.

20:25  Uyalihwatsha, liphume emhlana, lokubenyezelayo kuzaphuma enyongweni yakhe; izesabiso ziphezu kwakhe.

20:26  Ubumnyama bonke bugcinelwe izinto zakhe ezibekelelweyo; umlilo ongavuthelwayo uzamqeda; kuzakuba kubi kunsali ethenteni lakhe.

20:27  Amazulu azakwembula ububi bakhe, lomhlaba umvukele.

20:28  Ukwanda kwendlu yakhe kuzanyamalala, kukhukhulwe osukwini lwentukuthelo yakhe.

20:29  Lesi yisabelo somuntu omubi esivela kuNkulunkulu, lelifa alimiselwa nguNkulunkulu.

Chapter 21

21:1  Wasephendula uJobe wathi:

21:2  Zwanini lilalele ilizwi lami, lalokho kube zinduduzo zenu.

21:3  Ngibekezelelani, ukuthi mina ngikhulume; lemva kokukhuluma kwami lingakloloda.

21:4  Mina-ke ukusola kwami kusemuntwini yini? Kodwa uba kunjalo, kungani umoya wami ungekhathazeke?

21:5  Ngikhangelani, likhakhamale, libeke isandla phezu komlomo.

21:6  Yebo, lapho ngikhumbula, ngitshaywa luvalo, lokuthuthumela kubamba inyama yami.

21:7  Ababi baphilelani, babe badala, yebo, bakhule emandleni?

21:8  Inzalo yabo izinze phambi kwabo kanye labo, lembewu yabo emehlweni abo.

21:9  Izindlu zabo zilokuthula kungelakwesaba, loswazi lukaNkulunkulu kaluphezu kwabo.

21:10  Inkunzi yakhe iyakhwela ingaphuthi; inkomokazi yakhe iyazala, ingaphunzi.

21:11  Bakhupha abantwanyana babo njengomhlambi, labantwana babo bayagida.

21:12  Baphakamisa ilizwi ngesigujana lechacho, bathokoze ngelizwi lomhlanga.

21:13  Bachitha insuku zabo ngokuhle, behlele engcwabeni ngokucwayiza kwelihlo.

21:14  Babesebesithi kuNkulunkulu: Suka kithi; ngoba kasifisi ulwazi lwendlela zakho.

21:15  Uyini uSomandla ukuthi simkhonze? Sizazuzani uba simncenga?

21:16  Khangela, okuhle kwabo kakukho esandleni sabo; icebo lababi likhatshana lami.

21:17  Kukangaki isibane sababi sicitshwa, kusiza ukuchitheka kwabo phezu kwabo! UNkulunkulu ubabela ubuhlungu elakeni lwakhe.

21:18  Banjengamahlanga phambi komoya, lanjengomule isiphepho esiwuphephulayo.

21:19  UNkulunkulu ubekela abantwana bakhe usizi lwakhe. Uyamvuza, njalo uzakwazi.

21:20  Amehlo akhe azabona ukuchitheka kwakhe, anathe okolaka lukaSomandla.

21:21  Ngoba iyini intokozo yakhe endlini yakhe emva kwakhe, lapho inani lenyanga zakhe liqunywa?

21:22  Kukhona ongafundisa uNkulunkulu ulwazi yini? Ngoba yena wehlulela abaphezulu.

21:23  Lo uyafa esemandleni akhe apheleleyo, yena wonke onwabile, elokuthula.

21:24  Iziphathelo zakhe zigcwele uchago, lomnkantsho wamathambo akhe umanzi.

21:25  Lomunye ufa elomphefumulo obabayo, engadlanga kokuhle.

21:26  Balala ndawonye ethulini, lempethu zibasibekele.

21:27  Khangelani, ngiyayazi imicabango yenu, lamacebo eliwaceba limelene lami.

21:28  Ngoba lithi: Ingaphi indlu yesiphathamandla? Njalo lingaphi ithente lendawo zababi zokuhlala?

21:29  Kalibabuzanga yini abadlula ngendlela, njalo kalinanzeleli iziboniso zabo?

21:30  Ukuthi omubi uyekelwa osukwini lokubhujiswa; bazalethwa osukwini lwezintukuthelo.

21:31  Ngubani ozamtshela indlela yakhe ebusweni? Ngubani ozamphindisela ngakwenzileyo?

21:32  Kanti yena uzasiwa engcwabeni, lilindwe idundulu.

21:33  Amagade esihotsha amnandi kuye, njalo udonsa wonke umuntu emva kwakhe, njengoba bengelakubalwa abaphambi kwakhe.

21:34  Pho lizangiduduza njani ngeze, ngoba empendulweni zenu kusele inkohliso?

Chapter 22

22:1  Wasephendula uElifazi umThemani wathi:

22:2  Umuntu angaba losizo kuNkulunkulu yini, ngoba ohlakaniphileyo elusizo kuye ngokwakhe?

22:3  Kuyintokozo yini kuSomandla ukuthi ulungile? Kumbe inzuzo kuye ukuthi uphelelise indlela zakho?

22:4  Uzakusola yini ngenxa yokwesaba kwakho? Uzangena lawe kusahlulelo.

22:5  Ububi bakho kabubukhulu yini, lezono zakho kazilakuphela?

22:6  Ngoba uthethe isibambiso kubafowenu kungelasizatho, wahlubula abanqunu izigqoko.

22:7  Kawumnathisanga amanzi odiniweyo, lolambileyo umgodlele ukudla.

22:8  Kodwa umuntu olengalo, umhlaba ungowakhe, lowemukeleka ebusweni wahlala kuwo.

22:9  Uxotshile abafelokazi bengelalutho, lengalo zezintandane zichotshoziwe.

22:10  Ngakho-ke imijibila ikuhanqile, lovalo luhle lwakwesabisa,

22:11  kumbe ubumnyama ukuze ungaboni, lesikhukhula samanzi sikusibekele.

22:12  UNkulunkulu kakho yini engqongeni yamazulu? Bona-ke ingqonga yezinkanyezi, ukuthi ziphakeme kangakanani.

22:13  Kanti uthi: UNkulunkulu wazini? Angahlulela yini engemuva komnyama onzima?

22:14  Amayezi amnyama ayisisibekelo sakhe ukuze angaboni, uhamba esigombolozini samazulu.

22:15  Usunanzelele indlela endala yini abantu ababi abanyathela kuyo?

22:16  Abahluthunwa kungakabi yisikhathi; uzamcolo wathululwa phezu kwesisekelo sabo.

22:17  Abathi kuNkulunkulu: Suka kithi. LoSomandla wayenzeni kubo?

22:18  Kanti yena wayegcwalise izindlu zabo ngokuhle; kodwa icebo labakhohlakeleyo likhatshana lami.

22:19  Abalungileyo bayakubona bathokoze, lomsulwa ubahleka usulu.

22:20  Isibili isitha sethu sichithiwe, lomlilo uqede insali yabo.

22:21  Ake wejwayelane laye, ube lokuthula, ngalokho okuhle kuzakuza kuwe.

22:22  Ake wemukele umlayo ovela emlonyeni wakhe, ubeke amazwi akhe enhliziyweni yakho.

22:23  Uba ubuyela kuSomandla, uzakwakhiwa, ususe okubi khatshana lamathente akho.

22:24  Ubusubeka igolide lakho othulini, legolide leOfiri elitsheni lezifula.

22:25  Ngakho uSomandla uzakuba ligolide lakho, lesiliva sakho esinengi.

22:26  Ngoba ngalesosikhathi uzazithokozisa ngoSomandla, uphakamisele ubuso bakho kuNkulunkulu.

22:27  Uzakhuleka kuye, akuzwe, ukhokhe izifungo zakho.

22:28  Uzaquma-ke udaba, luqiniseke kuwe, lokukhanya kukhanye endleleni zakho.

22:29  Nxa behliselwe phansi, ubususithi: Phezulu! Abesesindisa othobekileyo ngamehlo.

22:30  Uzamkhulula ongemsulwa; njalo ukhululwa ngokuhlanzeka kwezandla zakho.

Chapter 23

23:1  Wasephendula uJobe wathi:

23:2  Lalamuhla isikhalazo sami silokubaba; isandla sami sinzima phezu kokububula kwami.

23:3  Kungathi ngabe ngiyazi lapho engingamthola khona! Bengingeza enkundleni yakhe!

23:4  Ngibeke kuhle udaba lwami phambi kwakhe, ngigcwalise umlomo wami ngokuphikisa.

23:5  Bengingawazi amazwi azangiphendula ngawo, ngiqedisise azakutsho kimi.

23:6  Uzaphikisana lami ngobukhulu bamandla yini? Hatshi, kodwa uzabeka inhliziyo yakhe kimi.

23:7  Lapho oqotho angaphikisana laye; ngakho bengizaphepha phakade kumahluleli wami.

23:8  Khangelani ngiya phambili, kodwa kakho, lemuva, kodwa kangimboni.

23:9  Ngakwesokhohlo ekusebenzeni kwakhe, kodwa kangimboni; uyacatsha ngakwesokunene, kodwa kangimboni.

23:10  Kanti uyayazi indlela elami; kangihlole, ngizaphuma njengegolide.

23:11  Unyawo lwami lubambelele enyathelweni lakhe, ngiyigcinile indlela yakhe, kangiphambukanga.

23:12  Kangisukanga lemlayweni wezindebe zakhe, ngawalondoloza amazwi omlomo wakhe okwedlula isabelo sami.

23:13  Kodwa yena ukokukodwa, ngubani-ke ongambuyisela emuva? Lokho umphefumulo wakhe okufisayo uyakwenza.

23:14  Ngoba uzaphelelisa engikumiselweyo; lezinto ezinengi ezinjalo zikuye.

23:15  Ngenxa yalokho ngitshaywa luvalo phambi kwakhe; ngicabanga, ngiyamesaba.

23:16  Ngoba uNkulunkulu wenze inhliziyo yami yaphela amandla, loSomandla ungethusile.

23:17  Ngoba kangiqunywanga phambi komnyama, wagubuzela ubumnyama ebusweni bami.

Chapter 24

24:1  Kungani izikhathi zingafihlelwanga uSomandla, labamaziyo bengaboni insuku zakhe?

24:2  Bathuthukisa imingcele, baphange imihlambi bayeluse.

24:3  Baxotsha ubabhemi wezintandane, bathathe inkabi yomfelokazi ibe yisibambiso.

24:4  Baphambula abaswelayo emigwaqweni; abayanga bomhlaba bacatsha ndawonye.

24:5  Khangelani, bangobabhemi beganga enkangala, baphumela emsebenzini wabo, badinge impango ngovivi; inkangala ibe yikudla kwakhe lokwabantwana.

24:6  Emasimini bavuna ukudla kwakhe, bakhothoze esivinini somubi.

24:7  Balala beze ebusuku bengelasembatho, bengelasigubuzelo emqandweni.

24:8  Bamanzi ngezihlambo zezintaba, babambelela edwaleni ngoba bengelasiphephelo.

24:9  Bahluthuna intandane ebeleni, bathathe lesibambiso kumyanga.

24:10  Bahamba beze bengelasigqoko, labalambileyo bathwala isithungo.

24:11  Phakathi kwemiduli yabo bahluza amafutha, banyathela izikhamelo zewayini, kodwa bomile.

24:12  Abantu bayabubula besemzini, lomphefumulo wabalimeleyo uyakhala; kodwa uNkulunkulu kababaleli ukungalungi.

24:13  Bona baphakathi kwabavukela ukukhanya; kabazazi indlela zakhe, kabahlali emikhondweni yakhe.

24:14  Umbulali uyavuka ngovivi, abulale umyanga loswelayo; lebusuku unjengesela.

24:15  Lelihlo lesiphingi lilindela ukuhlwa, sisithi: Kakulalihlo elizangibona; sifake isimbombozo ebusweni baso.

24:16  Emnyameni ugebha aphutshele ezindlini abaziphawulele zona emini; kabakwazi ukukhanya.

24:17  Ngoba ikuseni kanyekanye ilithunzi lokufa kubo; uba besaziwa bakuzesabiso zethunzi lokufa.

24:18  Ulula phezu kobuso bamanzi; isabelo sabo siqalekisiwe emhlabeni; kaphendukeli endleleni yezivini.

24:19  Imbalela lokutshisa kuqeda amanzi eliqhwa elikhithikileyo, ngokunjalo ingcwaba abonileyo.

24:20  Isizalo sizamkhohlwa, impethu izammunya, engabe esakhunjulwa, lenkohlakalo izakwephulwa njengesihlahla.

24:21  Udla ngokuminza inyumba engazaliyo, kamenzeli okuhle umfelokazi.

24:22  Njalo udonsa abalamandla ngamandla akhe, uyavuka, njalo kungabi lolethemba lempilo.

24:23  Uyamnika ukuze alondolozeke, eseyama kukho, kodwa amehlo akhe aphezu kwendlela zabo.

24:24  Bayaphakanyiswa okwesikhatshana, babesebengasekho, behliselwa phansi, bavalelwe njengaye wonke, bayaqunywa njengesihloko sesikhwebu.

24:25  Uba-ke kungenjalo, ngubani ongangenza umqambimanga, enze inkulumo yami ibe yize?

Chapter 25

25:1  Wasephendula uBilidadi umShuhi wathi:

25:2  Ukubusa lokwesabeka kulaye; uyenza ukuthula endaweni zakhe eziphezulu.

25:3  Kukhona inani yini lamabutho akhe? Ngubani okungamphumeliyo ukukhanya kwakhe?

25:4  Pho umuntu angalunga njani kuNkulunkulu? Kumbe ozelwe ngowesifazana angahlambuluka njani?

25:5  Khangela kuze kube senyangeni, njalo kayikhazimuli, lezinkanyezi kazihlambulukanga emehlweni akhe.

25:6  Pho kangakanani umuntu oyimpethu, lendodana yomuntu engumswenya!

Chapter 26

26:1  Wasephendula uJobe wathi:

26:2  Umsize njani ongelamandla, wasindisa ingalo engelamandla?

26:3  Umeluleke njani ongelakuhlakanipha, watshumayela ngobunengi ulwazi oluqotho?

26:4  Utshele bani amazwi? Njalo ngumoya kabani ophume kuwe?

26:5  Abafileyo bayathuthumela ngaphansi kwamanzi, labahlali bawo.

26:6  Isihogo sinqunu phambi kwakhe, lencithakalo kayilasisibekelo.

26:7  Welulela inyakatho phezu kwendawo engelalutho, aphanyeke umhlaba phezu kweze.

26:8  Uyabophela amanzi emayezini akhe, kodwa amayezi kawadabuki ngaphansi kwawo.

26:9  Uyasibekela ubuso besihlalo sakhe sobukhosi, endlale iyezi phezu kwaso.

26:10  Udwebe umngcele oyisigombolozi phezu kobuso bamanzi, kuze kube sekucineni kokukhanya lomnyama.

26:11  Insika zamazulu ziyathuthumela, zethuswa yikukhuza kwakhe.

26:12  Ngamandla akhe uthulisa ulwandle, langenhlakanipho yakhe uphahlaza ukuziqhenya.

26:13  Ngomoya wakhe ucecise amazulu; isandla sakhe sagwaza inyoka ebalekayo.

26:14  Khangela, lokhu kungamaphethelo ezindlela zakhe; kodwa kuzwakala into encinyane kangakanani ngaye! Kanti umdumo wamandla akhe ngubani ongawuqedisisa?

Chapter 27

27:1  UJobe wasebuya ephakamisa isaga sakhe wathi:

27:2  Kuphila kukaNkulunkulu osuse ilungelo lami, loSomandla owenze umphefumulo wami wababa.

27:3  Isibili ngaso sonke isikhathi umphefumulo usekimi, lomoya kaNkulunkulu usemakhaleni ami,

27:4  oqotho indebe zami kaziyikukhuluma okubi, lolimi lwami sibili lungakhulumi inkohliso.

27:5  Kakube khatshana lami ukuthi ngithi lilungile; ngize ngiphele kangiyikususa ubuqotho bami kimi.

27:6  Ngizabambelela ekulungeni kwami ngingakuyekeli; inhliziyo yami kayiyikusola ensukwini zami.

27:7  Isitha sami kasibe njengomubi, longivukelayo njengongalunganga.

27:8  Ngoba liyini ithemba longamesabiyo uNkulunkulu, esequnyiwe, uNkulunkulu esekhuphile umphefumulo wakhe?

27:9  UNkulunkulu uzakuzwa yini ukukhala kwakhe, ukuhlupheka sekwehlele phezu kwakhe?

27:10  Uzazithokozisa yini ngoSomandla? Uzabiza uNkulunkulu yini sonke isikhathi?

27:11  Ngizalifundisa ngesandla sikaNkulunkulu; okukuSomandla kangiyikukufihla.

27:12  Khangela, lina lonke likubonile. Pho, kungani selibe yize lokuba yize ngokunjalo?

27:13  Lesi yisabelo somuntu omubi kuNkulunkulu, lelifa labalesihluku abalemukela kuSomandla.

27:14  Uba abantwana bakhe besanda, kungokwenkemba, lenzalo yakhe kayiyikusutha isinkwa.

27:15  Insali zakhe zizangcwatshwa ekufeni, labafelokazi bakhe kabayikukhala inyembezi.

27:16  Lanxa ebuthelela isiliva njengothuli, elungisa isigqoko njengodaka;

27:17  angalungisa, kodwa olungileyo uzasigqoka, longelacala uzakwaba isiliva.

27:18  Wakha indlu yakhe njengenundu, lanjengedumba umlindi alenzayo.

27:19  Ulala enothile, kodwa kabuthwa; uvula amehlo akhe, kasekho.

27:20  Izesabiso zizambamba njengamanzi; ebusuku isiphepho sizameba.

27:21  Umoya wempumalanga uzamthatha, ahambe, umphephule asuke endaweni yakhe.

27:22  Abesephosela phezu kwakhe angayekeli; phambi kwesandla sakhe uzabaleka isibili.

27:23  Abantu bazatshaya izandla zabo ngaye, bamncifele endaweni yakhe.

Chapter 28

28:1  Isibili kukhona umthapho wesiliva, lendawo yegolide abalicengayo.

28:2  Insimbi ithathwa enhlabathini, lethusi lincibilikiswa elitsheni.

28:3  Umisela umnyama umngcele, udingisisa kuze kube sekupheleleni konke, amatshe obumnyama lethunzi lokufa.

28:4  Uqhekeza umgodi khatshana lalapho okuhlala khona abantu, lapho abakhohlwe khona lunyawo; bayalenga bejikajika khatshana labantu.

28:5  Umhlaba, kuphuma ukudla kuwo, langaphansi kwawo kuphenduka kwangathi ngumlilo.

28:6  Amatshe awo ayindawo yesafire*, njalo ulothuli lwegolide.

28:7  Inyoni edla inyama kayiyazi indlela, lelihlo lelinqe kaliyibonanga.

28:8  Imidlwane yokuziqhenyayo kayiyinyathelanga, isilwane kasihambanga kuyo.

28:9  Uyelula isandla sakhe elitsheni elilukhuni, uyagenqula izintaba ezimpandeni.

28:10  Aqhekeze imisele emadwaleni, lelihlo lakhe libona konke okuligugu.

28:11  Uyabopha izifula zingathonti, lokufihlakeleyo ukukhuphela ekukhanyeni.

28:12  Kodwa inhlakanipho ingatholakala ivela ngaphi? Lendawo yokuqedisisa ingaphi?

28:13  Umuntu kalazi ixabiso lakho, njalo kakutholakali elizweni labaphilayo.

28:14  Ukujula kuthi: Kakukho kimi. Lolwandle luthi: Kakulami.

28:15  Igolide elihle lingenikwe endaweni yakho, lesiliva singelinganiselwe intengo yakho.

28:16  Kungelingane legolide leOfiri, le-onikse* eligugu, lesafire*.

28:17  Igolide lekristali* kungelingane lakho, futhi kungenaniswe ngesitsha segolide elicwengekileyo.

28:18  Ikorali* lekristali kakuyikukhunjulwa, ngoba intengo yenhlakanipho ingaphezu kwamatshe aligugu.

28:19  Itopazi* leEthiyophiya lingelinganiswe lakho, kungelingane legolide elicwengekileyo.

28:20  Pho, inhlakanipho ivela ngaphi? Lendawo yokuqedisisa ingaphi?

28:21  Ngoba kusithekile emehlweni abo bonke abaphilayo, kwafihlwa ezinyonini zamazulu.

28:22  Ukubhujiswa lokufa kuthi: Sizwile ngendlebe zethu umbiko wakho.

28:23  UNkulunkulu uyayiqedisisa indlela yakho, njalo yena uyayazi indawo yakho.

28:24  Ngoba yena uyakhangela kuze kube semikhawulweni yomhlaba, abone ngaphansi kwawo wonke amazulu.

28:25  Esenzela umoya isisindo, walinganisa amanzi ngesilinganiso.

28:26  Lapho esenzela izulu isimiso, lombane wokuduma indlela.

28:27  Ngalesosikhathi wakubona, walandisa ngakho; wakulungisa, yebo, wakuhlolisisa.

28:28  Wasesithi emuntwini: Khangela, ukwesaba iNkosi, lokhu kuyinhlakanipho, lokusuka ebubini kuyikuqedisisa.

Chapter 29

29:1  UJobe wasebuya ephakamisa isaga sakhe wathi:

29:2  Kungathi ngabe nginjengenyangeni zamandulo, njengensukwini uNkulunkulu angigcine ngazo,

29:3  lapho isibane sakhe sakhanya phezu kwekhanda lami; ngahamba emnyameni ngokukhanya kwakhe!

29:4  Njengoba nganginjalo ensukwini zokuvuthwa kwami, lapho iseluleko sikaNkulunkulu sasiphezu kwethente lami,

29:5  lapho uSomandla wayeseselami, labantwana bami bengiphahlile,

29:6  lapho ngagezisa izinyathelo zami ngolaza, ledwala langithululela imifula yamafutha!

29:7  Lapho ngaphuma ngaya esangweni ngidabula umuzi, ngalungisa isihlalo sami emdangeni;

29:8  amajaha angibona, acatsha; lamaxhegu asukuma ema;

29:9  iziphathamandla zayekela ukukhuluma, zabeka isandla phezu komlomo wazo;

29:10  ilizwi labakhulu lacatsha, lolimi lwabo lwanamathela elwangeni lwabo.

29:11  Lapho indlebe isizwa yangibusisa, lelihlo libona langifakazela,

29:12  ngoba ngakhulula umyanga okhalayo, lentandane, longelamsizi.

29:13  Isibusiso sobhubhayo sehlele phezu kwami, njalo ngenza inhliziyo yomfelokazi ihlabele ngentokozo.

29:14  Ngembatha ukulunga, kwangembesa; isahlulelo sami saba njengesembatho lomqhele.

29:15  Ngangingamehlo koyisiphofu, ngangizinyawo kusiqhuli.

29:16  Nganginguyise wabayanga, lendaba engingayaziyo ngayihlolisisa.

29:17  Ngasengisephula umhlathi womubi, ngamenza alahle impango emazinyweni akhe.

29:18  Ngasengisithi: Ngizaphela lesidleke sami, ngandise insuku njengetshebetshebe.

29:19  Impande zami zinabele emanzini, lamazolo alale ubusuku ogatsheni lwami.

29:20  Udumo lwami lutsha kimi, ledandili lami laguquka esandleni sami.

29:21  Bangilalela, belindele, bathulela iseluleko sami.

29:22  Emva kwelizwi lami kabaphendulanga, lelizwi lami lathontela phezu kwabo.

29:23  Bangilindela njengezulu, lomlomo wabo bawukhamisela izulu lokucina.

29:24  Lapho ngibahlekela, kabakholwanga, lokukhanya kobuso bami kabakuwiselanga phansi.

29:25  Ngakhetha indlela yabo ngahlala ngiyinhloko, ngahlala njengenkosi phakathi kweviyo, njengoduduza abalilayo.

Chapter 30

30:1  Kodwa khathesi abatsha kulami ngensuku bayangihleka, oyise babo engangingabadelela ukubafaka lezinja zomhlambi wami.

30:2  Yebo, amandla ezandla zabo ayengaba yini kimi, ukuvuthwa kwabo sekuphelile?

30:3  Ngenswelo langendlala bajujukile, bangqathuze elizweni elomileyo, elalikade liyinkangala legwadule.

30:4  Abakha imibhida yetshwayi enkotheni, lempande yesihlahla serotemu* iyikudla kwabo.

30:5  Baxotshwa phakathi kwabantu; bamemeza ngabo kungathi lisela;

30:6  ukuthi bahlale eliweni lezihotsha, imigodi yenhlabathi, lamadwala.

30:7  Bayakhonya phakathi kwenkotha, babuthane phansi kokhula.

30:8  Bangabantwana beziphukuphuku, yebo abantwana abangelabizo; betshaywa, bexotshwa emhlabeni.

30:9  Khathesi sengiyingoma yabo, sengiyisiga sabo.

30:10  Banengwa yimi, bamela khatshana lami; kabayekeli ukungikhafulela ebusweni ngamathe.

30:11  Ngoba ukhulule intambo yami, wangicindezela, ngakho balahle itomu phambi kwami.

30:12  Ngakwesokunene abatsha bayasukuma, bafuqa inyawo zami, bangivusela indlela zabo zokubhubhisa.

30:13  Badiliza indlela yami, bancedisa ukuqhubela phambili incithakalo yami, kabalamncedisi.

30:14  Beza kungathi bafohlela esikhaleni esibanzi; phakathi kwencithakalo batheleka.

30:15  Izesabiso ziphendukele phezu kwami; baxotshana lodumo lwami njengomoya, lempumelelo yami yedlula njengeyezi.

30:16  Khathesi-ke umphefumulo wami uyazithulula phezu kwami; insuku zosizi zingibambile.

30:17  Ubusuku bugwaza amathambo ami phakathi kwami, lokungingqathuzayo kakuphumuli.

30:18  Ngobunengi bamandla akhe isembatho sami siyaguqulwa; uyangibhinca njengesiphika sebhatshi lami.

30:19  Ungiphosele odakeni, senginjengothuli lomlotha.

30:20  Ngiyakhala kuwe, kodwa kawungiphenduli; ngiyasukuma, unginanzelele nje.

30:21  Usuphenduke waba lesihluku kimi; ngamandla esandla sakho umelana lami.

30:22  Ungiphakamisela emoyeni, ungigadise kuwo, ungincibilikisele kusiphepho.

30:23  Ngoba ngiyazi ukuthi uzangibuyisela ekufeni, lendlini emiselwe bonke abaphilayo.

30:24  Kodwa umuntu kayikwelulela isandla engcwabeni, kumbe encithakalweni yakhe akhalele usizo.

30:25  Kangimkhalelanga inyembezi yini owayelensuku ezilukhuni, umphefumulo wami wadabuka ngongumyanga?

30:26  Lapho ngilindele okuhle, kweza okubi; lapho ngilindele ukukhanya, kweza umnyama.

30:27  Imibilini yami yabila, kayithulanga, lensuku zosizi zingandulele.

30:28  Ngahamba ngilila, kungelalanga; ngasukuma ebandleni ngakhalela usizo.

30:29  Ngingumfowabo wemigobho, lomngane wezintshe.

30:30  Isikhumba sami simnyama phezu kwami, lamathambo ami atshile ngokutshisa.

30:31  Ichacho lami selibe yisililo, lomhlanga wami uyilizwi labakhala inyembezi.

Chapter 31

31:1  Ngenza isivumelwano lamehlo ami; pho ngingananzelela njani intombi?

31:2  Ngoba siyini isabelo sikaNkulunkulu esivela phezulu, lelifa likaSomandla elivela endaweni eziphezulu?

31:3  Incithakalo kayisiyomubi yini, lengozi yabenzi bobubi?

31:4  Yena kaziboni yini indlela zami, abale zonke izinyathelo zami?

31:5  Uba ngihambe ngokuyize, kumbe unyawo lwami luphuthumele enkohlisweni,

31:6  kangilinganise ngesilinganiso esilungileyo, ukuze uNkulunkulu azi ubuqotho bami.

31:7  Uba inyathelo lami liphambukile endleleni, lenhliziyo yami yalandela amehlo ami, kumbe kunamathele isici ezandleni zami;

31:8  kangihlanyele, kodwa kudle omunye, lezilimo zami zisitshulwe.

31:9  Uba inhliziyo yami iyengwe ngowesifazana, kumbe ngacathama emnyango kamakhelwane wami,

31:10  umkami kacholele omunye, labanye kabaguqe phezu kwakhe.

31:11  Ngoba lokho kuyinkohlakalo, njalo kuyisono ngabahluleli.

31:12  Ngoba ngumlilo odla kuze kube yincithakalo, usiphule sonke isivuno sami.

31:13  Uba ngalile udaba lwenceku yami loba olwencekukazi yami, lapho ziphikisana lami,

31:14  pho ngizakwenzani lapho uNkulunkulu esukuma? Lalapho esethekela, ngizaphendulani kuye?

31:15  Lowo owangenza esiswini kamenzanga yena yini, lowasibumba esiswini munye?

31:16  Uba ngigodlele umyanga isifiso, kumbe ngifiphaze amehlo omfelokazi,

31:17  kumbe ngadla ucezu lwami ngedwa, ukuze intandane ingadli kulo

31:18  (ngoba kwasebutsheni bami yakhula lami nginjengoyise, ngamqondisa kusukela esizalweni sikamama),

31:19  uba ngabona obhubha ngenxa yokuswela isigqoko, loba umyanga engelasembatho,

31:20  uba inkalo zakhe zingangibusisanga, ngoba ekhudunyezwe yiboya bezimvu zami,

31:21  uba ngaphakamisa isandla sami ngimelene lentandane, lapho ngabona usizo lwami esangweni,

31:22  kaliwe ihlombe lami esiphangeni sami, lengalo yami iqamuke ethanjeni layo.

31:23  Ngoba incithakalo kaNkulunkulu yayiyisesabiso kimi, ngingenelisi ngenxa yobukhulu bakhe.

31:24  Uba ngenzile igolide laba lithemba lami, ngathi kugolide elihle: Themba lami.

31:25  Uba ngithokozile ngoba inotho yami inengi, langoba isandla sami sithole okunengi;

31:26  uba ngikhangele ilanga lapho libenyezela, loba inyanga ehamba enkazimulweni,

31:27  lenhliziyo yami yayengwa ensitha, kumbe isandla sami sange umlomo wami,

31:28  lalokho yisiphambeko phambi kwabehluleli, ngoba ngabe ngimphikile uNkulunkulu waphezulu.

31:29  Uba ngithokozile ngokuchitheka kongizondayo, kumbe ngajabula lapho ububi bumthola;

31:30  njalo ngingavumelanga umlomo wami ukuthi wone, ngokucela umphefumulo wakhe ngesiqalekiso;

31:31  uba abantu bethente lami bebengatshongo ukuthi: Hawu, aluba besilokwenyama yakhe, ngabe kasisuthanga.

31:32  Owemzini kazanga alale esitaladeni; iminyango yami ngayivulela isihambi.

31:33  Uba ngasibekela iziphambeko zami njengoAdamu, ngokufihla isono sami esifubeni sami.

31:34  Ngoba ngethuswa lixuku elikhulu, lokudelelwa ngabensendo kwangesabisa, ngakho ngathula, kangaze ngaphuma emnyango.

31:35  Kungathi ngabe ngilongangizwa! Khangelani uphawu lwami. Kungathi uSomandla angangiphendula, lokuthi ophikisana lami ngabe ubhale ugwalo!

31:36  Isibili, bengingaluthwala ehlombe lami, ngilubophe lube ngumqhele kimi.

31:37  Ngimtshele inani lezinyathelo zami, ngisondele kuye njengesiphathamandla.

31:38  Uba umhlaba wami ukhalile ngami, lemifolo yawo ililile ndawonye,

31:39  uba ngidlile amandla awo kungelamali, kumbe ngenza umphefumulo wabaniniwo uphele,

31:40  kakuhlume ukhula oluhlabayo endaweni yengqoloyi, lokhula olunukayo endaweni yebhali. Amazwi kaJobe asephelile.

Chapter 32

32:1  Lawomadoda amathathu aseyekela ukumphendula uJobe, ngoba wayelungile emehlweni akhe.

32:2  Lwaseluvutha ulaka lukaElihu indodana kaBarakeli umBuzi, owosendo lukaRamu. Ulaka lwakhe lwavuthela uJobe ngoba wazilungisisa yena kuloNkulunkulu.

32:3  Ulaka lwakhe lwabavuthela labo abangane bakhe abathathu, ngoba bengatholanga impendulo, kube kanti bamlahla uJobe.

32:4  Kodwa UElihu wayelindele uJobe ekhuluma, ngoba babebadala ngensuku kulaye.

32:5  UElihu esebonile ukuthi kwakungelampendulo emlonyeni walamadoda amathathu, ulaka lwakhe lwaseluvutha.

32:6  Ngakho uElihu indodana kaBarakeli umBuzi waphendula wathi: Mina ngingomncinyane ngezinsuku, lina-ke libadala; ngenxa yalokhu bengithikaza, ngesaba ukulitshela umcabango wami.

32:7  Ngathi: Kakukhulume izinsuku, lobunengi beminyaka bazise inhlakanipho.

32:8  Isibili umoya ukhona emuntwini, lokuphefumulela kukaSomandla kuyabanika ukuqedisisa.

32:9  Abakhulu kabahlakaniphi ngezikhathi zonke, labalupheleyo kabaqedisisi isahlulelo.

32:10  Ngakho ngithi: Lalelani kimi; lami ngizatshengisa umcabango wami.

32:11  Khangelani, bengiwalindele amazwi enu, ngabeka indlebe ekukhulumeni kwenu okuhlakaniphileyo, lisadinga amazwi.

32:12  Yebo, ngalilalela, khangelani-ke, kakho phakathi kwenu omvumisileyo uJobe, owaphenduleyo amazwi akhe.

32:13  Hlezi lithi: Sitholile inhlakanipho; nguNkulunkulu ozamxotsha, hatshi umuntu.

32:14  Kodwa kangihlelelanga amazwi, langamazwi enu kangiyikumphendula.

32:15  Badideka, kabasaphendulanga, basusa amazwi kubo.

32:16  Ngasengilinda, kodwa kabakhulumanga, ngoba bema, kabasaphendulanga.

32:17  Lami ngizaphendula ingxenye yami, lami ngitshengise umcabango wami.

32:18  Ngoba ngigcwele amazwi, umoya wesisu sami uyangiqhubezela.

32:19  Khangelani, isisu sami sinjengewayini engavulwanga, njengemigodla emitsha sizadabuka.

32:20  Ngizakhuluma ukuze ngiphefumule; ngivule indebe zami, ngiphendule.

32:21  Ake ngingaphakamisi ubuso bomuntu, ngingabizi umuntu ngebizo lokubamba amehlo.

32:22  Ngoba kangikwazi ukunika amabizo okubamba amehlo; masinyane umenzi wami angangisusa.

Chapter 33

33:1  Kube kanti-ke, Jobe, ake uzwe inkulumo zami, ubeke indlebe kuwo wonke amazwi ami.

33:2  Khangelani, sengivule umlomo wami, ulimi lwami lukhuluma emlonyeni wami.

33:3  Amazwi ami angawokuqonda kwenhliziyo yami, azakhuluma ulwazi lwendebe zami ngokuhlanzeka.

33:4  UMoya kaNkulunkulu wangenza, lokuphefumula kukaSomandla kwanginika impilo.

33:5  Uba ulakho ngiphendula; zihlele phambi kwami, uzimise.

33:6  Khangela, nginjengawe kuNkulunkulu, lami ngathatshwa ebumbeni.

33:7  Khangela, ukwethusa kwami kungakwethusi, lesandla sami singabi nzima phezu kwakho.

33:8  Isibili ukhulume endlebeni zami, ngezwa ilizwi lamazwi, uthi:

33:9  Ngimsulwa, kangilasiphambeko, ngihlanzekile, njalo kakulabubi kimi.

33:10  Khangela, uthola amathuba okumelana lami, ungibala njengesitha sakhe.

33:11  Ufaka inyawo zami esigodweni, aqaphele zonke indlela zami.

33:12  Khangela, kulokhu kawulunganga; ngizakuphendula, ngoba uNkulunkulu mkhulu kulomuntu.

33:13  Umphikiselani? Ngoba engaphenduli leyodwa yezindaba zakhe.

33:14  Ngoba uNkulunkulu ukhuluma kanye, yebo, kabili, engekho onanzayo.

33:15  Ephutsheni, kumbono webusuku, lapho ubuthongo obunzima busehlela abantu, ekuwozeleni embhedeni;

33:16  abesesembula indlebe yabantu, aphawule ukuqondiswa kwabo;

33:17  ukuze aphambule umuntu ekwenzenikwakhe, afihle ukuzigqaja emuntwini,

33:18  anqande umphefumulo wakhe egodini, lempilo yakhe ekwedluleni ngenkemba.

33:19  Njalo ujeziswa ngobuhlungu embhedeni wakhe, langokuqaqamba kwamathambo akhe okungapheliyo,

33:20  ize impilo yakhe inengwe yisinkwa, lomphefumulo wakhe yikudla okuloyisekayo.

33:21  Inyama yakhe iyaphela, ingabonakali, lamathambo akhe abekade engabonakali avele.

33:22  Lomphefumulo wakhe useduze legodi, lempilo yakhe kubabulali.

33:23  Uba kulesithunywa kanye laye, umlamuli, oyedwa phakathi kwenkulungwane, ukutshela umuntu ukuqonda kwakhe,

33:24  uzakuba lomusa kuye athi: Mkhulule ekwehleleni egodini, sengithole inhlawulo.

33:25  Inyama yakhe izakuba ntsha okwedlula ubutsha; abuyele ensukwini zobutsha bakhe.

33:26  Akhuleke kuNkulunkulu, ozakuba lesisa kuye, abone ubuso bakhe ngentokozo; ngoba uzabuyisela emuntwini ukulunga kwakhe.

33:27  Ukhangela ebantwini athi: Ngonile, ngahlanekela okulungileyo, kodwa kakungisizanga.

33:28  Uhlengile umphefumulo wami ekwedluleni egodini, lempilo yami izabona ukukhanya.

33:29  Khangelani, lezizinto uNkulunkulu uyazenza ngomuntu kabili kumbe kathathu,

33:30  ukuze abuyise umphefumulo wakhe egodini, ukuze akhanyiswe ngokukhanya kwabaphilayo.

33:31  Zwana, Jobe, ungilalele, uthule, njalo mina ngikhulume.

33:32  Uba kulamazwi, ungiphendule; khuluma, ngoba ngifisa ukutshengisa ukuthi ulungile.

33:33  Uba kungenjalo, wena ngilalela; thula, njalo ngizakufundisa inhlakanipho.

Chapter 34

34:1  Wasephendula uElihu wathi:

34:2  Zwanini amazwi ami, zihlakaniphi, lani zazi, libeke indlebe kimi.

34:3  Ngoba indlebe ihlola amazwi, njengolwanga lunambitha ukudla.

34:4  Asizikhetheleni isahlulelo; sazi phakathi kwethu okuhle.

34:5  Ngoba uJobe uthe: Ngilungile, kodwa uNkulunkulu ususe isahlulelo sami;

34:6  ngiqamba amanga ngimelene lelungelo lami; umtshoko wami kawelapheki, ngaphandle kwesiphambeko.

34:7  Nguwuphi umuntu onjengoJobe? Unatha ukuklolodelwa njengamanzi,

34:8  ahambahambe exukwini labenzi bobubi, ahambe labantu benkohlakalo.

34:9  Ngoba uthe: Kakumsizi umuntu nxa ethokoza ngoNkulunkulu.

34:10  Ngakho, bantu bengqondo, ngilalelani: Kakube khatshana loNkulunkulu ukwenza inkohlakalo, loSomandla ukwenza isiphambeko.

34:11  Ngoba umsebenzi womuntu uzawubuyisela kuye, amenze athole njengendlela yalowo lalowo.

34:12  Yebo, isibili uNkulunkulu kenzi okubi, njalo uSomandla kagobisi isehlulelo.

34:13  Ngubani owambeka phezu komhlaba? Kumbe ngubani owamisa umhlaba wonke?

34:14  Uba ebeka inhliziyo yakhe phezu kwakhe, uzabuthela umoya wakhe lomphefumulo wakhe kuye.

34:15  Inyama yonke ibizaphela kanyekanye, lomuntu abuyele ethulini.

34:16  Uba kulokuqedisisa-ke, zwana lokhu, ubeke indlebe elizwini lamazwi ami.

34:17  Kambe, ozonda isehlulelo ubengabusa yini? Kambe uzamlahla yini olungileyo kakhulu?

34:18  Angatsho yini enkosini: Mkhohlisi; kuziphathamandla: Lina abangelaNkulunkulu?

34:19  Kuye ongemukeli ubuso beziphathamandla, engananzi isinothi phambi komyanga? Ngoba bonke bangumsebenzi wezandla zakhe.

34:20  Bayafa ngesikhatshana; laphakathi kobusuku abantu bayaqhuqhiswa, bedlule; kuzasuswa olamandla kungelasandla.

34:21  Ngoba amehlo akhe aphezu kwendlela zomuntu, uyabona zonke izinyathelo zakhe.

34:22  Kakulamnyama njalo kakulathunzi lokufa lapho abenzi bobubi abangacatsha khona.

34:23  Ngoba kabi lokhu enaka umuntu, ukuthi aye kuNkulunkulu esahlulelweni.

34:24  Uyaphahlaza abalamandla kungahlolwanga, amise abanye endaweni zabo.

34:25  Ngakho uyayazi imisebenzi yabo, uyabagenqula ebusuku, bachotshozwe.

34:26  Uyabatshaya njengababi endaweni yababukelayo.

34:27  Ngenxa yokuthi bephambukile ekumlandeleni, bengananzanga leyodwa yezindlela zakhe,

34:28  baze benza ukukhala komyanga kufike kuye, njalo wakuzwa ukukhala kwabahluphekayo.

34:29  Lapho yena ethulisa, ngubani-ke ongaziphatha ngenkohliso? Lapho efihla ubuso, ngubani-ke ongambona? Loba esizweni loba emuntwini eyedwa.

34:30  Ukuze abantu abangabazenzisi bangabusi, ukuze bangabi yimijibila ebantwini.

34:31  Isibili uthe kuNkulunkulu: Ngithwele isijeziso, kangiyikona.

34:32  Lokhu engingakuboniyo ngifundise wena; uba ngenze okubi kangisayikukwenza futhi.

34:33  Uzaphindisela yini njengokuthanda kwakho, loba uyala, loba wena ukhetha, njalo kungesimi? Wazini-ke? Khuluma.

34:34  Abantu abalokuqedisisa bazakhuluma kimi, lomuntu ohlakaniphileyo uzangizwa.

34:35  UJobe ukhulume engelalwazi, lamazwi akhe kawalanhlakanipho.

34:36  Kungathi ngabe uJobe uyahlolwa kuze kube sekupheleni, ngenxa yempendulo zakhe njengabantu ababi.

34:37  Ngoba esonweni sakhe wengezelela ububi, etshaya izandla phakathi kwethu, esandisa amazwi akhe emelene loNkulunkulu.

Chapter 35

35:1  UElihu wasephendula wathi:

35:2  Ukhumbula ukuthi lokhu kuqondile yini? Uthe: Ukulunga kwami kwedlula okukaNkulunkulu.

35:3  Ngoba uthe kusizani kuwe, kungisizani okwedlula isono sami?

35:4  Mina ngizakuphendula, labangane bakho kanye lawe.

35:5  Khangela amazulu ubone; ukhangele amayezi, aphakeme kulawe.

35:6  Uba usona, wenzani kuye? Uba iziphambeko zakho zizinengi, wenzani kuye?

35:7  Uba ulungile, umnikani, kumbe wemukelani esandleni sakho?

35:8  Ububi bakho buthinta umuntu onjengawe, lokulunga kwakho indodana yomuntu.

35:9  Ngenxa yobunengi bencindezelo babenza bakhale; bayakhala ngenxa yengalo yabalamandla.

35:10  Kodwa kakho othi: Ungaphi uNkulunkulu umenzi wami, onika amahubo ebusuku,

35:11  osifundisa okwedlula inyamazana zomhlaba, asenze sihlakaniphe okwedlula inyoni zamazulu?

35:12  Lapho bayakhala, kodwa kaphenduli, ngenxa yokuzigqaja kwababi.

35:13  Isibili uNkulunkulu kayikuzwa ize, loSomandla kayikukunanza.

35:14  Yebo, lanxa usithi: Kawumboni, kanti isahlulelo siphambi kwakhe; ngakho umlindele.

35:15  Kodwa khathesi, ngoba intukuthelo yakhe ingajezisanga, laye kayikwejwayela kakhulu yini ukuziphakamisa?

35:16  Ngakho uJobe uvule umlomo wakhe ngeze, wandisa amazwi engelalwazi.

Chapter 36

36:1  UElihu waseqhubeka wathi:

36:2  Ngibekezelela kancinyane, ngizakubonisa ukuthi kuseselamazwi ngoNkulunkulu.

36:3  Ngizathatha ulwazi lwami luvela khatshana, nginike ukulunga kuMenzi wami.

36:4  Ngoba isibili amazwi ami kawayisiwo amanga; opheleleyo elwazini ulawe.

36:5  Khangela, uNkulunkulu ulamandla, njalo keyisi; mkhulu emandleni okuqedisisa.

36:6  Kayekeli omubi aphile, kodwa unika abayanga okulungileyo.

36:7  Kasusi amehlo akhe kolungileyo, kodwa balamakhosi esihlalweni sobukhosi; yebo, uyawahlalisa phakade, abesephakama.

36:8  Njalo uba bebotshiwe ngezibopho, bethunjwe ngezintambo zenhlupheko,

36:9  abesebatshela isenzo sabo, leziphambeko zabo, ukuthi zazilamandla.

36:10  Uyavula indlebe yabo ekulayweni, alaye baphenduke ebubini.

36:11  Uba belalela, bamkhonze, bazachitha insuku zabo kokuhle, leminyaka yabo ezintokozweni.

36:12  Kodwa uba bengalaleli, bazadlula ngomkhonto, baphele bengelalwazi.

36:13  Labangamesabiyo uNkulunkulu ngenhliziyo babuthelela intukuthelo; kabakhali esebabophile.

36:14  Umphefumulo wabo uzafela ebutsheni, lempilo yabo phakathi kwezinkotshana.

36:15  Uzakhulula ohluphekayo ekuhluphekeni kwakhe, avule indlebe yabo ecindezelweni.

36:16  Yebo, lawe wakuhuga ukuthi uphume emlonyeni wocindezelo uye endaweni ebanzi, okungelacindezelo kuyo, lokuphezu kwetafula lakho kuzagcwala amanono.

36:17  Kodwa ugcwalise isigwebo somubi; isigwebo lokulunga kukubambile.

36:18  Qaphela ulaka lungakuhugeli ekuklolodeni, lobukhulu benhlawulo bungakuphambuli.

36:19  Ubengalinganisa inotho yakho, ukuthi ubungebe ecindezelweni, lemizamo yonke elamandla?

36:20  Ungakhefuzeleli lobobusuku bokususwa kwabantu endaweni yabo.

36:21  Qaphela, ungaphendukeli ebubini, ngoba ukhethe lokho kulokuhlupheka.

36:22  Khangela, uNkulunkulu uziphakamisa ngamandla akhe; ngubani ongumfundisi njengaye?

36:23  Ngubani ommisele indlela yakhe? Kumbe ngubani othe: Wenze ububi?

36:24  Khumbula ukuthi ukhulise umsebenzi wakhe, abahlabela ngawo abantu.

36:25  Bonke abantu bayawubona; umuntu uyawukhangela ekhatshana.

36:26  Khangela, uNkulunkulu uphakeme, njalo kasimazi, lenani leminyaka yakhe kayilakuhlolwa.

36:27  Ngoba wenyusa amathonsi amanzi, ahlambulule izulu njengenkungu yawo;

36:28  amayezi alithululela phansi, lithonte kakhulu phezu komuntu.

36:29  Yebo, kukhona yini ongaqedisisa ukwendlaleka kwamayezi, umsindo wedumba lakhe?

36:30  Khangela, wendlala ukukhanya kwakhe phezu kwawo, agubuzele impande zolwandle.

36:31  Ngoba ngawo uyehlulela abantu, anike ukudla ngobunengi.

36:32  Ngezandla usibekela ukukhanya, abesekulaya ngalelo elingena phakathi.

36:33  Umdumo wakhe ubika ngakho, lenkomo ngenkungu eyenyukayo.

Chapter 37

37:1  Langenxa yalokho inhliziyo yami iyathuthumela, yeqe endaweni yayo.

37:2  Zwana lokuzwa umdumo welizwi lakhe, lomsindo ophuma emlonyeni wakhe.

37:3  Uyakukhulula ngaphansi kwamazulu wonke, lokukhanya kwakhe kuze kube semikhawulweni yomhlaba.

37:4  Emva kwalokho kubhonga ilizwi, uyaduma ngelizwi lokuphakama kwakhe, angakunqandi lapho kuzwakala ilizwi lakhe.

37:5  UNkulunkulu uyaduma ngelizwi lakhe ngokumangalisayo kakhulu, wenza izinto ezinkulu, esingeziqedisise.

37:6  Ngoba kuliqhwa elikhithikileyo uthi: Woba semhlabeni; lakuzihlambo zezulu, lakuzihlambo zezulu elikhulu lamandla akhe.

37:7  Uyanamathelisa isandla somuntu wonke, ukuze bazi bonke abantu bomsebenzi wakhe.

37:8  Inyamazana ziyangena emihomeni yazo, zihlale ezikhundleni zazo.

37:9  Isivunguzane siphuma ekamelweni leningizimu, lomqando emimoyeni yenyakatho.

37:10  Ngomoya kaNkulunkulu kunikwa ungqwaqwane, lamanzi abanzi abe yilitshe.

37:11  Njalo uthwalisa amayezi ngobumanzi, ahlakaze iyezi lokukhanya kwakhe.

37:12  Njalo lona liyajikajika liphenduka ngokuqondisa kwakhe, ukuze enze konke awalaye khona, ebusweni bomhlaba emhlabathini.

37:13  Loba ngoswazi, loba ngomhlaba wakhe, loba ngomusa, uyakufikisa.

37:14  Beka indlebe kukho, Jobe; mana, unanzelele imisebenzi emangalisayo kaNkulunkulu.

37:15  Uyazi yini ukuthi uNkulunkulu uwalungisa nini, enze ukukhanya kwamayezi akhe kukhanye?

37:16  Uyazi yini ukulengiswa kwamayezi, izimangaliso zopheleleyo elwazini?

37:17  Ukuthi izigqoko zakho zikhudumala njani, ekuthuliseni umhlaba ngomoya weningizimu?

37:18  Uwendlalile yini amayezi kanye laye, aqine njengesibuko esibunjiweyo ngokuncibilikisa?

37:19  Sifundise ukuthi sizakuthini kuye; singeke silungise lutho ngenxa yomnyama.

37:20  Kungalandiswa kuye yini ukuthi ngiyakhuluma? Uba umuntu engakhuluma, isibili uzaginywa.

37:21  Khathesi-ke kabakuboni ukukhanya okubenyezelayo okusemayezini, lapho umoya udlula uwahlambulula.

37:22  Igolide livela enyakatho. KuNkulunkulu kulobukhosi obesabekayo.

37:23  USomandla singemfumane; uphakeme ngamandla, langokwahlulela, njalo mkhulu ngokulunga; kacindezeli.

37:24  Ngakho abantu bayamesaba; kanaki wonke owabahlakaniphileyo ngenhliziyo.

Chapter 38

38:1  INkosi yasimphendula uJobe isesivunguzaneni yathi:

38:2  Ngubani lo ofiphaza iseluleko ngamazwi angelalwazi?

38:3  Bopha-ke ukhalo lwakho njengendoda, njalo ngizakubuza, njalo ungenze ngazi.

38:4  Wawungaphi lapho ngimisa izisekelo zomhlaba? Tshono uba usazi ukuqedisisa.

38:5  Ngubani owabeka izilinganiso zawo, uba ukwazi? Kumbe ngubani owelulela intambo yokulinganisa phezu kwawo?

38:6  Izisekelo zawo zamiswa phezu kwani? Kumbe ngubani owabeka ilitshe lawo lengonsi,

38:7  lapho inkanyezi zokusa zahlabela kanyekanye, lamadodana wonke kaNkulunkulu amemeza ngenjabulo?

38:8  Kumbe ngubani owavalela ulwandle ngezivalo, lapho lufohla luphuma esiswini,

38:9  lapho ngimisa iyezi laba yisembatho salo, lomnyama onzima waba yimbeleko yalo?

38:10  Njalo ngaluqumela isimiso, ngamisa imigoqo lezivalo,

38:11  ngathi: Uzafika kuze kube lapha, kodwa ungedluli, lalapha kuzamelana lokuzigqaja kwamagagasi akho.

38:12  Kusukela ensukwini zakho walawula ukusa yini, wenza ukudabuka kokusa ukuthi kwazi indawo yakho,

38:13  ukuthi kubambe imiphetho yomhlaba, ukuze kuthintithe ababi kuwo?

38:14  Kuyaguquka njengebumba lophawu lokunamathisela, kuzimisa njengesembatho.

38:15  Lakwababi ukukhanya kwabo kuyagodlwa, lengalo ephakemeyo iyephulwa.

38:16  Usungenile emithonjeni yolwandle yini, wahamba usiya le lale ekudingeni inziki?

38:17  Amasango okufa wawembulelwa yini, wawabona amasango ethunzi lokufa?

38:18  Uqedisisile yini kuze kube sebubanzini bomhlaba? Tshono uba ukwazi konke.

38:19  Ingaphi indlela lapho okuhlala khona ukukhanya? Lomnyama, ingaphi indawo yawo,

38:20  ukuze ukuse emngceleni wakho, lokuthi uqedisise izindlela zomuzi wakho?

38:21  Uyazi, ngoba wawusuzelwe, lenani lensuku zakho likhulu.

38:22  Usungenile eziphaleni zeliqhwa elikhithikileyo yini, wabona iziphala zesiqhotho,

38:23  engizigodle kuze kube yisikhathi sokuhlupheka, kuze kube lusuku lokulwa lolwempi?

38:24  Ingaphi indlela lapho ukukhanya okwabiwa khona, umoya wempumalanga ohlakazeka khona emhlabeni?

38:25  Ngubani owehlukanisela impophoma indlela yamanzi, lendlela yombane wemidumo,

38:26  ukuthi line emhlabeni lapho okungelamuntu khona, enkangala okungelamuntu kuyo,

38:27  ukusuthisa inkangala legwadule, lokuhlumisa ukuphuma kotshani?

38:28  Izulu liloyise yini, kumbe ngubani owazala amathonsi amazolo?

38:29  Ungqwaqwane waphuma esiswini sikabani? Njalo ngubani owazala iliqhwa lamazulu?

38:30  Amanzi afihlakele njengelitshe, lobuso bokujula bujiyile.

38:31  Ungazibopha yini izibopho zesiLimela, kumbe uthukulule intambo zeziNja?

38:32  Ungakhupha yini izinkanyezi ngesikhathi sazo? Ungakhokhela yini iBhere kanye labantwana balo?

38:33  Uyazazi yini izimiso zamazulu, kumbe ungamisa umbuso wazo emhlabeni?

38:34  Ungaphakamisela yini ilizwi lakho emayezini, ukuthi ubunengi bamanzi bukusibekele?

38:35  Ungathuma yini imibane ukuthi ihambe, ithi kuwe: Khangela, silapha?

38:36  Ngubani owabeka inhlakanipho emibilini? Kumbe ngubani onike ukuqedisisa engqondweni?

38:37  Ngubani ongabala amayezi ngenhlakanipho? Njalo ngubani ongalalisa imbodlela zamazulu,

38:38  lapho uthuli luqina lube yizigaqa, lamagade anamathelane?

38:39  Ungasizingelela yini isilwane ukudla, kumbe usuthise ukulamba kwezilwane ezintsha,

38:40  lapho zicathame emihomeni, zihlala esikhundleni ukuthi zicathame?

38:41  Ngubani olungisela iwabayi ukudla kwalo, lapho amaphuphu alo ekhala kuNkulunkulu, ezulazula ngoba kungelakudla?

Chapter 39

39:1  Uyasazi yini isikhathi sokuzala kwamagogo edwala? Uyananzelela yini ukuhelelwa kwezimpala?

39:2  Ungazibala yini inyanga ezizigcwalisayo? Njalo uyasazi yini isikhathi sokuzala kwazo?

39:3  Zigoba, zizale abantwana bazo, zikhuphe imihelo yazo.

39:4  Amazinyane azo aqine akhule egangeni; asuke ahambe, angabuyi kuzo.

39:5  Ngubani owakhupha ubabhemi weganga ekhululekile? Njalo ngubani othukulule izibopho zikababhemi weganga,

39:6  engimmisele inkangala ibe ngumuzi wakhe, lesimunyu sibe zindawo zakhe zokuhlala?

39:7  Uhleka umsindo womuzi, angezwa imisindo yomtshayeli.

39:8  Udinga izintaba ezilidlelo lakhe, edinga elandela konke okuluhlaza.

39:9  Inyathi iyavuma yini ukukusebenzela? Izalala yini esibayeni sakho ebusuku?

39:10  Ungayibophela inyathi yini ngentambo yayo emfolweni? Ingabhuqa yini izihotsha emva kwakho?

39:11  Ungathembela kuyo yini ngoba amandla ayo makhulu? Ungayiyekelela yini umtshikatshika wakho?

39:12  Ungayikholwa yini ukuthi izabuyisa inhlanyelo yakho, njalo iyibuthele ebaleni lokubhulela lakho?

39:13  Impiko zezintshe ziyaphaphazela ngentokozo; kodwa zizimpiko lezinsiba zengabuzane yini?

39:14  Ngoba itshiya amaqanda ayo emhlabathini, iwakhudumeze othulini,

39:15  iyakhohlwa ukuthi unyawo lungawachoboza, lokuthi isilo seganga singawanyathela.

39:16  Iwaphatha kalukhuni amaphuphu ayo, kungathi kawayisiwo awayo; umtshikatshika wayo uyize, ingelakwesaba.

39:17  Ngoba uNkulunkulu wayithathela inhlakanipho, kayabelanga ukuqedisisa.

39:18  Lapho sekuyisikhathi iyaziphakamisela phezulu, ihleke ibhiza lomgadi walo.

39:19  Uzanika yini ibhiza amandla? Uyayigqokisa yini intamo yalo ngomhlonga oyephuzelayo?

39:20  Uyalenza leqe yini njengentethe? Ubukhosi bokukhala kwalo buyesabeka.

39:21  Liyaphanda esihotsheni, lithokoze ngamandla alo, liphume ukuhlangabeza izikhali.

39:22  Liyakuhleka ukwesaba, kalesabi, kaliphenduki phambi kwenkemba.

39:23  Phezu kwalo isamba semitshoko siyakhehlezela, umkhonto ophazimayo lomdikadika.

39:24  Ngokuqhuqha lokufutheka liginye umhlaba; kalikholwa ukuthi ngumsindo wophondo.

39:25  Ekukhaleni kophondo lithi: Aha! Linuke impi ikhatshana, umdumo wezinduna, lokumemeza.

39:26  Ukhozi luyaphapha yini ngokuqedisisa kwakho, luselulela impiko zalo eningizimu?

39:27  Ilinqe liyaqonga ngokulaya kwakho, lakhe isidleke salo engqongeni yini?

39:28  Lihlala lilale ebusuku edwaleni, engqongeni yedwala leyenqaba.

39:29  Lisuka lapho lidinga ukudla; amehlo alo abonela khatshana.

39:30  Lamaphuphu alo azitika ngegazi; lalapho okukhona ababuleweyo likhona.

Chapter 40

40:1  INkosi yasiphendula uJobe yathi:

40:2  Ophikisana loSomandla uzamqondisa yini? Osola uNkulunkulu kakuphendule.

40:3  UJobe waseyiphendula iNkosi wathi:

40:4  Khangela, ngiphansi; ngingakuphendula ngithini? Ngibeka isandla sami emlonyeni wami.

40:5  Ngikhulumile kanye, kodwa kangiyikuphendula; kumbe kabili, kodwa kangiyikuqhubeka.

40:6  INkosi yasimphendula uJobe isesivunguzaneni yathi:

40:7  Bopha khathesi ukhalo lwakho njengendoda; ngizakubuza, ubusungazisa.

40:8  Isibili, uzachitha isahlulelo sami yini? Ungilahle, ukuze ube ngolungileyo yini?

40:9  Njalo ulengalo yini njengoNkulunkulu? Kumbe ungaduma yini ngelizwi njengaye?

40:10  Khathesi zicecise ngobukhosi lokuphakama, uzembese ngodumo lenkazimulo.

40:11  Usabalalise intukuthelo zolaka lwakho, ukhangele wonke ozigqajayo, umthobise.

40:12  Khangela wonke ozigqajayo, umehlisele phansi, unyathelele phansi ababi endaweni yabo.

40:13  Ubafihle bonke ethulini, ubophe ubuso babo ngasese.

40:14  Khona lami ngizavuma kuwe, ukuthi isandla sakho sokunene singakusindisa.

40:15  Ake ukhangele imvubu engayenza kanye lawe; idla utshani njengenkabi.

40:16  Ake ukhangele, amandla ayo asekhalweni lwayo, lokuqina kwayo kusemisipheni yesisu sayo.

40:17  Iyagobisa umsila wayo njengomsedari; imisipha yemilenze yayo yelukene.

40:18  Amathambo ayo anjengempompi zethusi, amathambo ayo anjengemigoqo yensimbi.

40:19  Ingeyokuqala yezindlela zikaNkulunkulu; owayenzayo wasondeza inkemba yayo.

40:20  Ngoba intaba ziyayivezela ukudla, lapho okudlala khona inyamazana zonke zeganga.

40:21  Ilala phansi kwesihlahla esiluhlaza, ekusithekeni kwemihlanga lamaxhaphozi.

40:22  Izihlahla eziluhlaza ziyayisibekela ngomthunzi wazo; imidubu yesifula iyayiphahla.

40:23  Khangela, umfula uyayicindezela, kayiphangisi; ilesibindi lanxa iJordani ingaphuphumela emlonyeni wayo.

40:24  Ongayibamba yini ngamehlo ayo? Ongahlaba yini amakhala ayo ngemijibila?

Chapter 41

41:1  Ungamhudula yini uLeviyathani ngengwegwe, kumbe ulimi lwakhe ngentambo oyenza itshone?

41:2  Ungafaka yini umhlanga ekhaleni lakhe, kumbe ubhoboze umhlathi wakhe ngameva?

41:3  Uzakuncenga kanengi yini? Uzakhuluma lawe ngathambileyo yini?

41:4  Uzakwenza isivumelwano lawe yini? Uzamthatha abe yinceku kokuphela yini?

41:5  Uzadlala laye yini njengenyoni? Kumbe uzambophela amantombazana akho yini?

41:6  Abathengi bazathengiselana ngaye yini? Bazakwehlukaniselana ngaye yini phakathi kwabathengisayo?

41:7  Uzagcwalisa yini isikhumba sakhe ngezinhlendla, lekhanda lakhe ngemikhonto yenhlanzi?

41:8  Beka isandla sakho phezu kwakhe, khumbula impi, ungakwenzi futhi.

41:9  Khangela, ithemba lakhe lizakuba ngamanga. Laye uzaphoselwa phansi yini ngokumbona?

41:10  Kakho olesihluku sokuthi amvuse. Ngubani-ke yena ongazimisa phambi kwami?

41:11  Ngubani onganduleleyo ukuthi ngimbhadale? Okungaphansi kwamazulu wonke ngokwami.

41:12  Kangiyikuthula mayelana lezitho zakhe, lendaba yamandla akhe, lobuhle besimo sakhe.

41:13  Ngubani ongabonakalisa ubuso besembatho sakhe? Ngubani ongeza lamatomu akhe aphindwe kabili?

41:14  Ngubani ongavula iminyango yobuso bakhe? Amazinyo akhe ayesabeka inhlangothi zonke.

41:15  Imizila yamahawu akhe ilokuziqhenya, ivalelwe ngophawu oluqinisiweyo.

41:16  Elinye lisondele kwelinye, ukuze kungangeni umoya phakathi kwawo.

41:17  Ahlangene, abambana, ukuze angehlukaniswa.

41:18  Ukuthimula kwakhe kuphazima ukukhanya, lamehlo akhe anjengenkophe zemadabukakusa.

41:19  Emlonyeni wakhe kuphuma izihlanti, ziqhatshe ziphume inhlansi zomlilo.

41:20  Emakhaleni akhe kuphuma intuthu, njengembiza ebilayo lemihlanga.

41:21  Umoya wakhe uvuthela amalahle, lelangabi liphume emlonyeni wakhe.

41:22  Entanyeni yakhe kuhlala amandla, laphambi kwakhe kugiya usizi.

41:23  Amavinqo enyama yakhe anamathelene, aqinile kuye, kawanyikinyeki.

41:24  Inhliziyo yakhe iqinile njengelitshe, yebo, ilukhuni njengelitshe lokuchola elingaphansi.

41:25  Ekuvukeni kwakhe amaqhawe ayesaba, ngenxa yokwephulwa bayazihlambulula.

41:26  Ofinyelela kuye ngenkemba angeme, umkhonto, umtshoko, lomdikadika.

41:27  Uthatha insimbi njengotshani, ithusi njengogodo olubolileyo.

41:28  Umtshoko kawumenzi abaleke; amatshe esavutha aphendulwa nguye abe yizibi.

41:29  Isagila sitshaywa njengezibi; uhleka ukugenqeza komdikadika.

41:30  Ngaphansi kwakhe kulendengezi ezibukhali; wendlala izinto ezibukhali odakeni.

41:31  Wenza inziki zibile njengembiza, enze ulwandle lube njengembiza yamafutha.

41:32  Ngemva kwakhe wenza indlela ikhanye; inziki zingathiwa ziyimpunga.

41:33  Kakukho emhlabeni okufanana laye, owenziwa angabi lokwesaba.

41:34  Ukhangela konke okuphakemeyo; uyinkosi phezu kwabo bonke abantwana bokuzigqaja.

Chapter 42

42:1  UJobe waseyiphendula iNkosi wathi:

42:2  Ngiyazi ukuthi ungakwenza konke, lokuthi kakulacebo elingavinjelwa kuwe.

42:3  Ngubani lo ofiphaza iseluleko engelalwazi? Ngakho ngikhulumile lokho ebengingakuqedisisi, izinto ezimangalisayo kakhulu kimi, ebengingazazi.

42:4  Ake uzwe, ngizakhuluma mina. Ngizakubuza, njalo wenze ngazi.

42:5  Ngokuzwa kwendlebe ngikuzwile, kodwa khathesi ilihlo lami liyakubona.

42:6  Ngakho-ke ngiyazinenga, ngiyaphenduka ethulini lemlotheni.

42:7  Kwasekusithi iNkosi isikhulume lamazwi kuJobe, iNkosi yathi kuElifazi umThemani: Ulaka lwami luyavutha kuwe lakubangane bakho ababili, ngoba kalikhulumanga ngami okuqondileyo njengenceku yami uJobe.

42:8  Ngakho-ke zithatheleni amajongosi ayisikhombisa lenqama eziyisikhombisa, liye encekwini yami uJobe, lizinikelele umnikelo wokutshiswa, njalo uJobe inceku yami uzalikhulekela; ngoba isibili ngizakwemukela ubuso bakhe, ukuze ngingenzi kini njengobuthutha benu; ngoba kalikhulumanga ngami okuqondileyo njengenceku yami uJobe.

42:9  Ngakho bahamba oElifazi umThemani loBilidadi umShuhi loZofari umNahama, benza njengokutsho kweNkosi kubo; njalo iNkosi yemukela ubuso bukaJobe.

42:10  INkosi yasiphendula ukuthunjwa kukaJobe esekhulekele abangane bakhe; njalo iNkosi yengezelela konke uJobe ayelakho kuze kuphindwe kabili.

42:11  Kwasekufika kuye bonke abafowabo labo bonke odadewabo, labo bonke ababemazi mandulo, badla isinkwa laye endlini yakhe, bamkhalela, bamduduza ngakho konke okubi iNkosi eyayimehlisele khona; bamnika ngulowo lalowo uhlamvu lwemali, langulowo lalowo isongo legolide.

42:12  INkosi yasibusisa isiphetho sikaJobe okwedlula ukuqala kwakhe; ngoba waba lezimvu ezizinkulungwane ezilitshumi lane, lamakamela azinkulungwane eziyisithupha, lezipane zenkabi eziyinkulungwane, labobabhemi abasikazi abayinkulungwane.

42:13  Wasesiba lamadodana ayisikhombisa lamadodakazi amathathu.

42:14  Wasebiza ibizo leyokuqala wathi nguJemima, lebizo leyesibili wathi nguKeziya, lebizo leyesithathu wathi nguKereni-Hapuki.

42:15  Njalo kakutholakalanga abesifazana abahle njengamadodakazi kaJobe elizweni lonke; loyise wawanika ilifa phakathi kwabanewabo.

42:16  Lemva kwalokho uJobe waphila iminyaka elikhulu lamatshumi amane; wabona amadodana akhe, lamadodana amadodana akhe, kwaze kwaba yizizukulwana ezine.

42:17  UJobe wasesifa, emdala, enele ngezinsuku.