Azeri - Job

Chapter 1

1:1  عوص دئياريندا اَيّوب آدلي بئر آدام وار ائدي. اَيّوب کامئل و دوز بئر آدام ائدي؛ تاريدان قورخوردو و پئسلئکدن اؤزونو اوزاق ساخلاييردي.

1:2  اونون يدّي اوغلو و اوچ قيزي وار ائدي.

1:3  دونيا ماليندان اونون يدّي مئن قويونو، اوچ مئن دَوه‌سي، بش يوز جوت اؤکوزو، بش يوز دئشي اِششه‌يي و بئر چوخ نؤکري وار ائدي؛ اله کي، شرقده ياشايان بوتون آداملاردان لاپ بؤيوک ائدي.

1:4  اونون اوغوللاري گدئب هَره‌سي اؤز نؤوبه‌سئنده اِوئنده ضئيافت ورَردئلر و آدام گؤنده‌رئب اوچ باجيلاريني دا چاغيرارديلار کي، اونلارلا يِيئب ائچسئنلر.

1:5  اونلارين ضئيافت گونلري بئر دؤور باشا چاتاندان سونرا اَيّوب گؤنده‌رئب اونلاري تقدئس اِدَردي و سحر اِرکَن قالخيب اونلارين هاميسينين ساييسينا گؤره يانديرما قورباني تقدئم اِدَردي. چونکي دئيَردي: "بَلکي اؤولادلاريم گوناه ادئب اورَکلرئنده تارييا لعنت اتمئشلر." و اَيّوب همئشه بله اِدَردي.

1:6  بئر گون ائلاهي وارليقلار اؤزلرئني تقدئم اتمک اوچون ربّئن حوضورونا گلدئلر و شيطان دا اونلارلا گلدي.

1:7  رب شيطانا ددي: "هارادان گلئرسن؟" شيطان ربّه جاواب ورئب ددي: "دونياني دولانماقدان، ائچئنده گَزمَکدن."

1:8  رب شيطانا ددي: "آيا قولوم اَيّوبا ياخشي بئر دئقَّت اتدئن؟ دونيادا اونون کئمي هچ کس يوخ! کامئل و دوز بئر آدام کي، تاريدان قورخار و پئسلئکدن اؤزونو اوزاق ساخلايار."

1:9  او زامان شيطان ربّه جاواب ورئب ددي: "مگر اَيّوب تاريدان بوشونا قورخور؟!

1:10  مگر سن اونون اطرافينا، اِوئنئن اطرافينا، بوتون وار-يوخونون اطرافينا حاصار چکمه‌يئبسن؟! اونون اَللرئنئن ائشئنه برکت ورئبسن کي، مالي يرده چوخاليب.

1:11  آمّا ائندي اَلئني اوزات و بوتون وار-يوخونو آرادان آپار. گؤزونون قاباغيندا سنه لعنت اده‌‌جک."

1:12  رب شيطانا ددي: "باخ، اونون بوتون وار-يوخو سنئن اَلئنده‌‌دئر، آنجاق اونون اؤزونه اَلئني اوزاتما!" بلجه شيطان ربّئن حوضوروندان اِشئيه چيخدي.

1:13  بئر گون، او زامان کي، اَيّوبون اوغوللاري و قيزلاري بؤيوک قارداشلارينين اِوئنده يِيئب شراب ائچئردئلر،

1:14  بئر قاصئد اَيّوبا گلئب ددي: "اؤکوزلر جوت سوروردولر، دئشي اِششَکلر ده اونلارين يانيندا اوتلاييرديلار.

1:15  او واخت سابالي‌لار هوجوم ادئب اونلاري آپارديلار و نؤکرلري قيلينج آغزيندان کچئرتدئلر. آنجاق تَک من قاچميشام کي، سنه خبر گتئرئم."

1:16  بو آدام حله دانيشيردي کي، آيري بئري گلئب ددي: "گؤيدن تارينين اودو دوشوب قويونلاري و نؤکرلري يانديردي و اونلاري تلف اتدي. آنجاق تَک من قاچميشام کي، سنه خبر گتئرئم."

1:17  بو آدام حله دانيشيردي کي، آيري بئري گلئب ددي: "کَلدانئلر اوچ دسته اولوب دَوه‌لرئن اوستونه هوجوم گتئردئلر و اونلاري گؤتوروب آپارديلار، نؤکرلري ده قيلينج آغزيندان کچئرتدئلر. آنجاق تَک من قاچميشام کي، سنه خبر گتئرئم."

1:18  بو آدام حله دانيشيردي کي، آيري بئري گلئب ددي: "اوغوللارين و قيزلارين بؤيوک قارداشلارينين اِوئنده يِيئب شراب ائچئردئلر کي،

1:19  بئردن صحرا طرفئندن گوجلو بئر يل گلئب اِوئن دؤرد کونجوندن اله ووردو کي، اِو جاوانلارين اوستونه ييخيلدي و اونلارين هاميسي اؤلدولر. آنجاق تَک من قاچميشام کي، سنه خبر گتئرئم."

1:20  او زامان اَيّوب قالخدي، جوبّه‌سئني ييرتدي، باشينين توکلرئني کَسدي، و يره دوشوب سجده اتدي.

1:21  و ددی: "آنامين قارنيندان لوت چيخديم، اورايا لوت ده گده‌رم. رب وردی، رب ده آلدي. ربّئن آدي موبارک اولسون."

1:22  بونلارين هاميسيندا اَيّوب گوناه اتمه‌دي و تارييا ياوا بئر سؤز دِمه‌دي.

Chapter 2

2:1  ائلاهي مؤوجودلار گئنه اؤزلرئني تقدئم اتمک اوچون ربّئن حوضورونا گلدئلر. شيطان دا اونلارلا گلدي کي، اؤزونو ربّئن حوضوروندا تقدئم اتسئن.

2:2  رب شيطانا ددي: "هارادان گلئرسئن؟" شيطان ربّه جاواب ورئب ددي: "دونياني دولانماقدان، ائچئنده گَزمَکدن."

2:3  رب شيطانا ددي: "آيا قولوم اَيّوبا بئر دئقّت اتدئن؟ دونيادا اونون کئمي هچ کس يوخ! کامئل و دوز بئر آدام کي، تاريدان قورخار و اؤزونو پئسلئکدن اوزاق ساخلايار. گرچی اونو هلاک اتمک اوچون منی سببسئز تحرئک اتدئن، لاکئن او حله ده کاماليندا ثابئت دورور."

2:4  شيطان ربّه جاواب ورئب ددي: "دَري عوضئنه دَري. ائنسان اؤز جانيندان اؤتري بوتون وار-يوخوندان کِچَر.

2:5  آمّا اَلئني بئر اوزاديب اونون سومويونه و اَتئنه دَي، گؤزونون قاباغيندا سنه لعنت اده‌‌جک."

2:6  رب شيطانا ددي: "باخ، او سنئن اَلئنده! آنجاق اونون جانيني آلما."

2:7  شيطان ربّئن حوضوروندان اِشئيه چيخدي و اَيّوبو، آياغينين آلتيندان تپه‌سئنه قدر، پئس چئبانلارلا ووردو.

2:8  اَيّوب اؤزونو قاشيماق اوچون بئر صاخسي پارچاسي گؤتوروب کول ائچئنده اوتوردو.

2:9  او واخت آروادي اونا ددي: "حله ده کاماليندا ثابئت دوروبسان؟ تاريني سؤو و اؤل باري."

2:10  آمّا اَيّوب اونا ددي: "آخماق آروادلارين بئري کئمي دانيشيرسان! تاريدان ياخشيليغي قبول اِدَک، آمّا يامانليغي قبول اتمه‌يک؟" و بونلارين هاميسيندا اَيّوب دئلي ائله هچ بئر گوناه اتمه‌دي. اَيّوبون اوچ دوستو

2:11  اَيّوبون اوچ دوستو تِيمانلي اِلئفَز، شوخلو بئلدَد، و نَعَماتلي صوفَر اونون باشينا گلن بوتون بلالاري اشئدئب، قرار وردئلر کی، هر بئري اؤز يرئندن اونون يانينا گلسئنلر و بئربئرلري ائله گؤروشدولر کي، بئرلئکده گدئب اونونلا همدرد اولسونلار و اونا تسلّی ورسئنلر.

2:12  اوزاقدان اَيّوبو گؤرنده اونو تانيماديلار و باغيريب هؤنکور-هؤنکور آغلاماغا باشلاديلار. هر بئري اؤز جوبّه‌سئني ييرتيب و گؤيه، باشلاري اوستونه تورپاق آتديلار.

2:13  اَيّوبلا يدّي گون يدّي گجه تورپاق اوستونده اوتوردولار. هچ بئري اونونلا بئر سؤز ده دانيشمادي، چونکي دردئنئن نه قدر بؤيوک اولدوغونو گؤردولر.

Chapter 3

3:1  بوندان سونرا اَيّوب آغزيني آچيب دوغولدوغو گونه لعنت اتدي.

3:2  و دئله گلئب ددی:

3:3  "کاش کي، من دوغولان گون يوخ اولايدي! او گجه ده يوخ اولايدي کي، ددئلر: «بطنده بئر اوغلان عمله گلدي!»

3:4  او گون قارا گله‌يدي، يوخاريدان تاري اونون قيدئنه قالمايايدي، او گون اوچون سحر آچيلمايايدي.

3:5  او گونو ظولمت و قارا قارانليق بورويه‌يدي، اوزونو بولود توتايدي، ائشيغيني قارانليق باتيرايدي.

3:6  او گجه‌يه گلئنجه، قارا قارانليق اونو قاپسين، ائلئن گونلري آراسيندان کَسئلسئن، آيلارين ساييسينا گئرمه‌سئن.

3:7  بلی، قوي او گجه سونسوز اولسون، اوندان شادليق سَسي اِشئدئلمه‌سئن.

3:8  قوي گونو لعنت ادنلر اونو لعنت اتسئنلر، اونلار کي، لئوياتاني اويانديرماقدا ماهئردئرلر.

3:9  قوي اونون سحر اولدوزلاري سؤنسون، ائشيغا اومئد باغلاسين، لاکئن اولماسين، فجرئن شوعاعلاريني گؤرمه‌سئن.

3:10  چونکي آنامين بطنئنئن قاپيلاريني اوستومه باغلامادي، سيخينتيني گؤزلرئمدن گئزلَتمه‌دي.

3:11  نه اوچون آنا بطنئنده اؤلمه‌دئم؟ آنامين قارنيندان چيخينجا آخير نفسئمي چکمه‌دئم؟

3:12  پئشوازيما نئيه دئزلر چيخدي؟ نئيه دؤشلر چيخدي کي، اونلاردان اَمئم؟

3:13  چونکي ائندي اوزانميش و ساکئت اولارديم، او زامان ياتميش و دئنجَلمئش اولارديم؛

3:14  دونيانين او پادشاهلار و موشاوئرلري ائله کي، اؤزلرئنه وئرانه‌لري تزه‌دن بئنا ادئرلر؛

3:15  يا دا قيزيلي اولان ريئسلرله کي، اِولرئني گوموشله دولدورورلار.

3:16  نه اوچون دوشموش اوشاق کئمي، ائشيق اوزونو اصلا گؤرمه‌يَن بئر کؤرپه کئمي، باسديريلماديم؟

3:17  اورادا شرور آداملار قضبلرئندن آرتيق دوشورلر، و يورغونلار راحاتلاريني تاپيرلار.

3:18  اورادا محبوسلار بئرلئکده راحاتلانيرلار، زئندانبانين دا قيشقيرتيسيني اشئتمئرلر.

3:19  کئچئک ده اورادير، بؤيوک ده اورادادير، قول دا آغاسيندان آزاددير.

3:20  نه اوچون فلاکته دوشموش آدام ائشيق اوزو، جانلاري آجي اولانلار دا حيات گؤرور؟

3:21  اونلار کي، اؤلومو آرزولاييرلار، آمّا گلمئر، اونو خزئنه آختارانلار کئمي قازيب آختاريرلار.

3:22  اونلار کي، قبئري تاپاندا اويناييب شادليق ادئرلر.

3:23  نه اوچون يولو گئزلي اولان آداما ائشيق ورئلئر، اونا کي، تاري اونون اطرافيني چَپَرله‌يئب؟

3:24  چونکي آه-زاريم چؤره‌يئمدن قاباق گلئر، و ناله‌لرئم سو کئمي تؤکولور.

3:25  قورخدوغوم شيلر باشيما گلئر، دهشت اتدئيئم شيلر اوستومه تؤکولور.

3:26  آرامليغيم يوخدور، ساکئتلئيئم يوخدور، راحاتليغيم يوخدور، آنجاق سيخينتي وار."

Chapter 4

4:1  او زامان تِيمانلي اِلئفَز جاواب ورئب ددی:

4:2  "اگر بئري سنه بئر سؤز دِسه، ائنجه‌‌يَرسن؟ آمّا کئم اؤزونو دانيشماقدان ساخلايا بئلر؟

4:3  باخ، سن چوخ آداملارا درس ورئبسن؛ ضعئف اَللره قووّت ورئبسن.

4:4  سؤزلرئن ييخيلاني قالديريب، اَسن دئزلري مؤحکمله‌دئبسن.

4:5  آمّا ائندي کي، سنئن اؤز باشينا گلئر، تابدان دوشوبسن، سنه توخونوب، اؤزونو ائتئرئبسن.

4:6  مگر سنئن بل باغلاديغين، تاريدان قورخدوغون ديئل؟ مگر اومئد باغلاديغين، اؤز يوللارينين کامالي ديئل؟

4:7  دوشون بئر آز: تقصئرسئز آدام مگر اولوب هلاک اولسون؟ هارادا دوز آداملار يوخ اولوبلار؟

4:8  منئم گؤردويومه گؤره، پئسلئيي شوخوملايانلار، زحمت توخومو سَپَنلر، اونو دا بئچَرلر.

4:9  تارينين نفسي ائله يوخ اولورلار، و قضبئنئن آلووو اونلاري اودور.

4:10  شئرئن نَرئلتئسي، آصلانين سَسي، جاوان شئرلرئن دئشلري کَسئلئر.

4:11  گوجلو آصلان، شئکاري اولماديغي اوچون، هلاک اولور، دئشي شئرئن بالالاري دا داغيلير.

4:12  منه گئزلئجه بئر سؤز گلدي، اوندان قولاغيم بئر پيچيلتي اشئتدي.

4:13  گجه رؤيالاريندان دوغان فئکئرلر ائچئنده، ائنسانلاري آغير يوخو باسان زامان،

4:14  اوستومه قورخو و تئتره‌مه گلدي، بوتون سوموکلرئمي لرزه‌يه سالدي.

4:15  اوزومون قاباغيندان بئر روح کچدي، بدنئمئن توکلري بئز-بئز دوردو.

4:16  او روح دوردو، لاکئن من گؤرونوشونو سِچه بئلمه‌دئم. گؤزلرئمئن قاباغيندا بئر شکئل وار ائدي؛ هر شي ساکئت ائدي، سونرا بئر سَس اشئتدئم:

4:17  مگر ائنسان تارينين حوضوروندا صالح اولا بئلر؟ مگر ائنسان خالئقئنئن حوضوروندا طاهئر اولا بئلر؟

4:18  باخ، او حتّا اؤز قوللارينا دا اعتئماد اتمَز، ملکلرئنده ده تقصئر تاپار.

4:19  بس گؤر نه قدر چوخ، پالچيق اِولرده ياشايانلاردا! اونلاردا کي، بونؤوره‌لري تورپاقدادير، اونلار کي، گووه‌دن تِز اَزئلئرلر.

4:20  سحرله آخشام آراسيندا محو اولورلار، کئمسه فرقئني ورمه‌دن يوخ اولورلار.

4:21  مگر چاديرلارينين ائپلري ائچلرئنده قوپاريلماييب؟ اؤلورلر، لاکئن حئکمتسئز.

Chapter 5

5:1  ائندي چاغير؛ آيا سنه جاواب ورن بئري وار؟ موقدّسلرئن هانسي بئرئنه اوز توتاجاقسان؟

5:2  دوغرودان دا، سفه آدامي قضب اؤلدورَر، ناداني دا حسد هلاک اِدَر.

5:3  من سفه آدامين کؤک سالديغيني گؤرونجه، درحال يوردونو لعنت اتدئم.

5:4  اؤولادلاري اَمئن-آمانليقدان اوزاقديرلار، محکمه دروازسيندا اَزئلئرلر، اونلاري قورتاران دا يوخدور.

5:5  سفه آدامين بئچدئيئني آج آدام يِيئر، اونو تئکانلار آراسيندان بله آلير. و ثروتئني سوسوز آدام اودماق ائسته‌يئر.

5:6  چونکي فلاکت يردن چيخماز، زحمت ده تورپاقدان بئتمَز؛

5:7  اله بئل کي، هاوايا آتيلان اود قورلاري‌دير، ائنسان زحمت اوچون دوغولور.

5:8  من اولسايديم، تاريني آختارارديم، ائشئمي ده تارييا تاپشيرارديم.

5:9  او، درک اتمه‌دئيئمئز بؤيوک ائشلر گؤرور، ساييسيز عجايئبلر!

5:10  ير اوستونه ياغيش ورئر، چؤللره سولار آخيردير.

5:11  آلچاقلاري اوجا يرلره قويور، ياسلي اولانلاري اَمئن-آمانليغا چيخاردير.

5:12  حئيله‌گر آداملارين تدبئرلرئني پوزور کي، اَللري هچ بئر ائش بِجَرمه‌سئن.

5:13  حئکمتلي آداملاري اؤز حئيله‌لرئنده توتور، کلکباز آداملارين تدبئرلرئني تز ييخير.

5:14  گوندوزلري قارانليغا دؤنور، گون اورتا واختي اَل سورته‌-سورته يِرئيئرلر، اله بئل کي، گجه‌دئر.

5:15  لاکئن او، مؤحتاج آدامي، اونلارين آغزينين قيلينجيندان، قودرتلي آدامين اَلئندن قورتارير.

5:16  اله کي، چاره‌سئز آدامين اومئدي اولسون، و عدالتسئزلئک آغزيني باغلاسين.

5:17  خوش او آدامين حالينا کي، تاري اونو مذمّت ادئر. اونا گؤره ده، قادئرئ-موطلقئن تأدئبئني حقئر گؤرمه.

5:18  چونکي او يارالايار، لاکئن باغلايار دا؛ او وورار، لاکئن اَللري شفا ورَر ده.

5:19  آلتي سيخينتيدان سني قورتارار؛ يِدّئسئنده بله هچ بئر زئيان سنه توخونماز.

5:20  قحطئده سني اؤلومدن، موحارئبه‌ده سني قيلينجين قودرتئندن گری آلار.

5:21  قامچيلايان دئللردن اوزاق قالارسان، هلاکت گلدئيي واخت دا قورخمازسان.

5:22  هلاکت و آجليق واختي گولرسن، و يرئن وحشي حيوانلاريندان قورخمازسان.

5:23  چونکي چؤلون داشلاري ائله عهدئن اولار، چؤلون وحشي حيوانلاري دا سنئنله باريش ائچئنده اولارلار.

5:24  بئلرسن کي، چاديرين سالاماتدير، مولکونو يوخلايارسان و بئر اَسکئک تاپمازسان.

5:25  بئلرسن کي، نسئلئن چوخ اولاجاقدير، و اؤولادلارين يرئن اوتو کئمي.

5:26  کامئل قوجاليقدا قبئره گلرسن، نجه کي، تاخيل دسته‌لري مؤوسومونده ييغيلير.

5:27  باخ، بئز بونو آراشديرميشيق؛ بله دئر، اونون اوچون ده، قولاق آس و اؤزون اوچون آنلا.

Chapter 6

6:1  او زامان اَيّوب جاواب ورئب ددي:

6:2  "کاشکي دردئم بئر چکئله‌يدي! بوتون فلاکتئم تَره‌زئيه قويولايدي!

6:3  او زامان دهنز قوموندان آغير گلردي؛ اونا گؤره ده، سؤزلرئم دئقّتسئزدئر.

6:4  چونکي قادئري-موطلقئن اوخلاري ائچئمده‌دئر؛ روحوم اونلارين زهرئني ائچئر، تارينين دهشتلري منئمله موحارئبه‌يه دوزولور.

6:5  اوت اولاندا وحشي اِششَک مگر آنقيرار؟ يِمي اولان اؤکوز مگر باغيرار؟

6:6  دوزسوز شئت يِمه‌يي مگر يمک اولار؟ يومورتا آغينين مگر بئر دادي وار؟

6:7  جانيم اونلارا توخونماغي بله ائسته‌مئر، اونلار منه ائيرنج يمک کئمي‌دئر.

6:8  کاش آرزوما چاتايديم! تاري منه حسرتئنده اولدوغومو وره‌يدي!

6:9  لوطف ادئب منی اَزسَيدي، اَلئندن جَلد اولوب منی کَسسَيدي ده.

6:10  بو منه بئر تسلّی اولاردي، آمانسيز عذابين ائچئنده شادليقلا اوينارديم، چونکي موقدّس اولانين سؤزلرئني دانماميشام.

6:11  نه گوجوم وار کي، گؤزله‌يئم؟ آخيريم ندئر کي، حياتيمي اوزاديم؟

6:12  مگر قووّتئم داشلارين قووّتي‌دئر؟ مگر جئسمئم بورونجدندئر؟

6:13  ائندي کي، باجاريق جانيمدان چيخيب گدئب، مگر اؤزومه کؤمک اتمه‌يه بئر قودرتئم وار؟

6:14  فلاکته دوشموش آداما دوستونون وفاسي گرک، حتّا قادئري-موطلقئن قورخوسونو بوراخميش اولسا بِله.

6:15  قارداشلاريم خيانت اتدئلر؛ بئر وادي کئمي، آخيب گدن چايلار کئمي.

6:16  بو وادئلر بوزلار اَرئيَنده داشير، قار سولارلا دولور.

6:17  ائستي زاماني گؤزدن ائتئرلر، سيجاغين چوخلوغوندا يرلرئندن يوخ اولورلار.

6:18  اونلارين يولوندان کاروانلار آزيرلار، کؤشَنه چيخيب اورادا هلاک اولورلار.

6:19  تِيمانين کاروانلاري باخيرلار، شِبانين موسافئرلري اونا اومئد باغلاييرلار.

6:20  پرئشانديرلار، چونکي اعتئماد اتمئشدئلر؛ اورايا گلدئلر و مات قالديلار.

6:21  سئز ده ائندي منه بله اولوبسونوز؛ موصئبتي گؤرجک قورخدونوز.

6:22  هچ اولوب سئزه دئيَم: «منه بئر شي ورئن؟» و يا «مال-دؤولَتئنئزدن منه روشوَت گؤندرئن؟»

6:23  و يا «منی دوشمن اَلئندن قورتارين؟» و يا «منی ظالئم اَلئندن گری آلين؟»

6:24  منه اؤيره‌دئن، من ده ساکئت قالارام؛ هارادا سهو اتدئيئمي منه بئلدئرئن.

6:25  صادئق سؤزلر نه آجي‌دير! لاکئن سئزئن دانلاغينيز نه‌يي دانلايير؟

6:26  سؤزلرئمي دانلاماق ائسته‌يئرسئنئز؟ چاره‌سئز بئر آدامين سؤزلرئني يل کئمي حساب ادئرسئنئز؟

6:27  دوغرودان دا کي، يِتئملر اوچون بله پوشک آتيرسينيز، و دوستونوزو ساتيرسينيز.

6:28  آمّا ائندي کَرَم ادئب منه بئر باخين؛ چونکي من اوزونوزه يالان دئيَن آدام ديئلم.

6:29  يالواريرام دؤنون، آتين حاقسيزليغي، حاقسيزليق اولسون. دوشونون: بو داعوادا من حاقلي‌يام.

6:30  مگر دئلئمده بئر حاقسيزليق وار؟ مگر آغزيم يامان شيلري آنلايا بئلمئر؟

Chapter 7

7:1  ائنسانين ير اوزونده‌کي حياتي مگر زحمت چکمک اوچون ديئل؟ مگر گونلري ده فَحله‌‌نئن گونلري کئمي ديئل؟

7:2  کؤلگه‌يه حسرت چکن قول کئمي، اوجرَتئنه اومئد باغلايان فَحله‌لر کئمي،

7:3  منه مئراث بوش آيلار ورئلدي، پاييما مشقّت گجه‌لر دوشدو.

7:4  ياتان زامان دوشونورَم: نه زامان قالخاجاغام؟ لاکئن گجه اوزوندور، و سحره قدر ائکي يانيما وورنوخورام.

7:5  بدنئمه قورد دوشوب، قابيقلانير دَرئم چاتلايير، چئرک آخيدير.

7:6  گونلرئم جولّانين مَکئيئندن داها سورعتلي گدئر، اومئدسئز آخيرينا چاتير.

7:7  خاطيرلا کي، حياتيم بئر نفسدير؛ گؤزلرئم بئر داها ياخشيليق گؤرميه‌جک.

7:8  منه باخانين گؤزو، منی داها گؤرميه‌جک؛ گؤزلرئن اوستومده اولاجاق، آمّا من اولماياجاغام.

7:9  بولود داغيليب گتدئيي کئمي، اؤلولر دئيارينا اِنَن بئر داها چيخماز؛

7:10  بئر داها اِوئنه دؤنمَز، يري ده آرتيق اونو تانيماز.

7:11  بونا گؤره آغزيمين قاباغيني آلماياجاغام؛ روحومون دارليغيني دئله گتئره‌جيم؛ جانيمين آجيليغيندان شئکايت اده‌جيم.

7:12  مگر من دهنزَم، مگر اَژداهايام کي، اوستومه گودوکچو قويورسان؟

7:13  اگر دئيَم: «ياتاغيم منی راحاتلار، دؤشه‌يئم شئکوه‌مي آزالدار»

7:14  او زامان منی يوخولارلا قورخودورسان، و رؤيالارلا جانيما ولوله ساليرسان.

7:15  اله کي، بوغولوب اؤلمه‌يه آرتيق راضي اولسون، و اؤلومو بو دردلردن داها سِوسئن.

7:16  حياتيمدان بِزمئشَم؛ اوزون عؤمور ائسته‌مئرم. مندن اَل چک؛ چونکي گونلرئم بئر نفس کئمي‌دئر.

7:17  ائنسان ندئر کي، اونو بو قدر بؤيودورسن، قيدئنه قاليرسان،

7:18  اونا هر سحر باش چکئرسن، هر آن اونو ائمتاحان ادئرسن؟

7:19  داها نه زاماناجاق گؤزونو اوستومدن گؤتورميه‌جکسن، تَک بوراخماياجاقسان کي، آغزيمين سويونو بئر اودوم؟

7:20  مگر گوناه اتمئشم؟ سنه نه اتمئشم، ای ائنسانا گودوکچو اولان؟ نه اوچون منی اؤزونه هدف ادئبسن؟ اله کي، سنئن اؤزونه بئر يوک اولموشام؟

7:21  نه اوچون عوصيانيمي باغيشلاميرسان و خاطامي دا اوستومدن گؤتورمورسن؟ بئر آزدان تورپاق آلتيندا ياتاجاغام، منی آختاراجاقسان، و من اولماياجاغام."

Chapter 8

8:1  او زامان شواَخلي بئلدَد جاواب ورئب ددی:

8:2  «نه واختا قدر بونلاري دئيه‌جکسن؟ آغزينين سؤزلري ده يِل کوله‌يي کئمي اولاجاق؟

8:3  مگر تاري عدالتي اَيَر؟ مگر قادئري-موطلق صالح اولاني اَيري اِدَر؟

8:4  بلکه اوغوللارين اونون ضئدّئنه گوناه ادئب، او دا اونلاري عوصيانلارينين اَلئنه ورئب.

8:5  اگر سن تاريني آختارسايدين، قادئري-موطلقه يالوارسايدين،

8:6  اگر طاهئر و دوز اولسايدين، يقئن کي، او دا سنه گؤره قالخاردي و حاقّين اولان يري سنه گری ورَردي.

8:7  باشلانيشين کئچئک اولسا دا، آخيرين چوخ بؤيوک اولار.

8:8  گل ائندي قدئم نسئل‌لردن بئر سوروش، آتالارينين نه آراشديرديقلاريني بئر دوشون.

8:9  بئز دونَنکي اؤولادلاريق، بئر شي بئلمئرئق. ير اوزونده‌کي گونلرئمئز آنجاق بئر کؤلگه کئمي‌دئر.

8:10  مگر اونلار سنه اؤيره‌دئب دِمَزلر؟ مگر اورَکلرئندن سؤزلر چيخارتمازلار؟

8:11  مگر باتاقليق اولمايان يرده قاميش بئتَر؟ مگر سو اولمايان يرده نِي بؤيويَر؟

8:12  حله ياشيل ائکَن، داها کَسئلمه‌دن، هر اوتدان قاباق قورويار.

8:13  تاريني اونودان هر کَسئن يولو بله‌دئر؛ تاريسيز آدامين اومئدي ده محو اولار.

8:14  تَوَکّول اتدئکلري قيريلار؛ بِل باغلاديقلاري اله بئل کي، حؤرومچک تورودور.

8:15  اِوئنه سؤيکَنَرکَن، اِوي اوچار. اوئندن بَرک توتارکَن، داغيلار.

8:16  گونون قاباغيندا ياشيل‌دير، بوداقلاري باغينين هر طرفئنه اوزانار.

8:17  کؤکلري داش ييغينلاري اوستونه حؤرولر؛ داشلار آراسيندا اؤزونه بئر ير آختارار.

8:18  آمّا يرئندن قوپاريلارکَن، ير اونو ائنکار ادئب دئيَر؛ سني هچ واخت گؤرمه‌مئشم.

8:19  باخ، اونون يولونون شادليغي بودور؛ اونون يرئنده، اؤزگه‌لري بئتَر.

8:20  باخ، تاري کامئل آدامي اؤزوندن ردّ اِتمَز، پئسلئک ادنلرئن ده اَلئندن توتماز.

8:21  سنئن آغزيني گئنه گولوشله، دوداقلاريني شادليق سَسي ائله دولدورار.

8:22  سندن نئفرت ادنلري روسوايچيليق بورويه‌جک، شرور آداملارين چاديري يوخ اولاجاقدير.»

Chapter 9

9:1  او زامان اَيّوب جاواب ورئب ددی:

9:2  «يقئن بئلئرم کي، بله‌دئر، لاکئن تارينين قاباغيندا ائنسان نجه حاقلي چيخا بئلر؟

9:3  اگر بئري اونونلا موباحئثه‌يه دورسا، اونون سؤزلرئنئن مئندن بئرئنه جاواب وره بئلمز.

9:4  اورَکده حئکمتلي و گوجده قووّتلي اولان اودور، کئم اونون قاباغيندا داياندي و سالامات قالدي؟

9:5  اودور کي، داغلاري يرئندن قالديرير، و اونلار بئلمئرلر، اونلاری قضبي ائله آلت-اوست اِدَر.

9:6  دونياني يرئندن تَرپه‌دن اودور، و اونون سوتونلاري اسئر؛

9:7  اودور کي، گونون چيخماماسينا امر ادئر، و اولدوزلارين ائشيغيني اؤرتوب مؤهورله‌يئر.

9:8  اودور کي، تَک باشينا گؤيلري سَرئر، و دهنزئن شپه‌لري اوستونه آياق باسير.

9:9  دوبّي-اکبر بورجونو، جبّار و ثورَيّا بورجونو، جنوبون بورجلرئني يارادان اودور.

9:10  اودور کي، عاغيلا سيغمايان بؤيوک شيلر، سايييا گلمه‌يَن عجايئب ائشلر گؤرور.

9:11  باخ، يانيمدان اِله کچر کي، اونو گؤرمه‌رم؛ کچئب گدر، هچ حئسّ اتمه‌رم.

9:12  باخ، قاپيب آپارسا، کئم اونا مانع اولار؟ کئم اونا «نه ادئرسن» دئيه بئلر؟

9:13  تاري قضبئني گری دؤنده‌رمز؛ اونون آلتيندا راحَبئن کؤمکچئلري اَيئلئرلر.

9:14  اوندا من نجه اونا جاواب وره بئله‌رم، حوضوروندا نجه سؤز تاپا بئله‌رم؟

9:15  حاقلي دا اولسام، اونا جاواب وره بئلمه‌رم؛ حؤکم اده‌نئمئن رحمئنه گرک يالواريم.

9:16  اگر اونو چاغيرام و منه جاواب ورسه ده، گئنه ائنانا بئلمه‌رم کي، سَسئمه قولاق آسيرميش.

9:17  چونکي منی طوفانلا اَزئر، سببسئز يارالاريمي چوخالدير.

9:18  نَفَسئمي آلماغا قويماياجاق، منی آجيليقلا دولدوراجاقدير.

9:19  اگر ائش قووّه‌ده‌دئر، باخ، قووّه‌لي اولان اودور. اگر ائش عدالتده‌دئر، کئم اونو محکمه‌يه چکه بئلر؟

9:20  صالح اولسام دا، آغزيم منی محکوم اده‌جک؛ کامئل اولسام دا، او منی تقصئرکار چيخارداجاق.

9:21  من کامئلم؛ اؤزومو هچ بئر شي سايميرام، حياتيما خور باخيرام.

9:22  هاميسي بئردئر؛ اونا گؤره دِيئرَم: او هم کامئل آدامي يوخ ادئر، هم ده شر آدامي.

9:23  اگر موصئبت قفئلدن اؤلوم گتئرسه، تقصئرسئزلرئن چاره‌سئزلئيئنه گولور.

9:24  دونيا شرئرئن اَلئنه ورئلئب؛ حاکئملرئنئن اوزونو اؤرتَن اودور. اگر او ديئل، بس کئمدئر؟

9:25  گونلرئم چاپاردان داها سورعتلي گدئر، بئر خيئر تاپمادان قاچيرلار.

9:26  قاميش قاييقلار کئمي کچئب گدئرلر؛ شئکارينين اوستونه هوجوم ادن قارا قوش کئمي‌دئرلر.

9:27  اگر دئيَم: شئکايتئمي اونودوم؛ قوصّه‌لي اوزومو دَيئشئب فرحله‌نئم،

9:28  گئنه ده چکدئيئم بوتون عذابلاردان قورخورام، چونکي منی تقصئرسئز سايماياجاغيني بئلئرم.

9:29  مادام کي، گئنه گوناهکار چيخاجاغام، بوشونا نئيه بله زحمت چکئم؟

9:30  اگر قار سويو ائله يويونسام، اَللرئمي گئلابي ائله تمئزله‌سم،

9:31  گئنه ده منی چئرکابا آتاجاقسان، پالتاريم بِله، مندن ائيره‌نئر.

9:32  چونکي او منئم کئمي بشر ديئل کي، اونا جاواب ورئم، و بئرلئکده مَحکَمه‌يه گِدَک.

9:33  آراميزدا بئر حؤکم ادن ده يوخ کي، اَلئني ائکئمئزئن اوستونه قويسون.

9:34  قوي تاري آغاجيني بئر اوستومدن گؤتورسون، قوي قورخوسو منی بئر دهشته سالماسين،

9:35  او زامان اوندان قورخمادان دانيشارديم. آمّا ائچئمده اِله ديئلم.

Chapter 10

10:1  جانيم حياتيمدان بِزئب؛ شئکايتئمي آزاد بوراخاجاغام، جانيمين آجيليغي ائله دانيشاجاغام.

10:2  تارييا دئيه‌جيم: «منی محکوم اتمه. بئر منه دِه گؤروم نئيه منئمله داعوا ادئرسن؟

10:3  مگر سنه خوشدور کي، ظولم اده‌سن؟ اَللرئنئن ائشئني خور گؤره‌سن؟ شرور آداملارين نئيّتلرئنه لوطف گؤزو ائله باخاسان؟

10:4  مگر سنده ائنسان گؤزلري وار؟ مگر سن ده ائنسان گؤردويو کئمي گؤرورسن؟

10:5  مگر گونلرئن ائنسان گونلري کئمي‌دئر، مگر ائل‌لرئن ائنسان ائل‌لري کئمي‌دئر کي،

10:6  خاطامي تفتئش ادئرسن، گوناهيمي آراشديريرسان؟

10:7  اؤزون بئلئرسن کي، شر آدام ديئلم، آمّا گئنه ده، منی سنئن اَلئندن قورتاران يوخدور.

10:8  سنئن اَللرئن منه شکئل وردی، منی ياراتدي؛ ائندي دؤنوب منی هلاک اده‌جکسن؟

10:9  خاطيرلا کي، منه پالچيق کئمي شکئل وردئن؛ ائندي منی گئنه تورپاغا دؤندره‌جکسن؟

10:10  مگر منی سود کئمي تؤکمه‌دئن؟ پِندئر کئمي سالمادين؟

10:11  مگر اَت و درئني اَينئمه گِيدئرمه‌دئن؟ منی سوموکلر و وَتَرلرله توخومادين؟

10:12  منه حيات وردئن، محبّت گؤرستدئن؛ قيدئمه قالماغين، روحومو حئفظ ادئب.

10:13  بونلاري اوره‌يئنده گئزلَتدئيئن حالدا، بئلئرم کي، نئيّتئن بو ائدي.

10:14  اگر گوناه اتسَيدئم، منی گوده‌ردئن، تقصئرئمي جزاسيز قويمازدين.

10:15  اگر شر بئر آدام اولسام، واي حاليما! حتّا اگر صالح آدام دا اولسام، باشيمي قالديرا بئلمئرم، چونکي خجالت ائچئنده‌يم، نجه ده ذلئلم.

10:16  اگر باشيمي قالديرسام، سن شئر کئمي منی شئکار اِدَرسن، گئنه ضئدّئمه قودرتئني گؤرسدَرسن.

10:17  تزه‌دن قاباغيما شاهئدلر چيخاردارسان، و اوستومه قضبئني آرتيرارسان، ضئدّئمه فوج-فوج قوشون چکرسن.

10:18  نه اوچون منی آنامين بطنئندن چيخارتدين؟ اؤلردئم و هچ بئر گؤز منی گؤرمزدي.

10:19  اولماميش کئمي اولارديم، آنا بطنئندن قبئره گؤتورولردئم.

10:20  مگر گونلرئم آز ديئل؟ آرتيق اَل چک مندن، بوراخ کي، بئر آز دئنجه‌لئم؛

10:21  گِدَر-گلمَز يِره، قارانليق و ظولمت دئيارينا گتمه‌دن قاباق،

10:22  ظولمَت دئيارينا، قارانليغين اؤزونه، ظولمته، قاريشيقليق دئيارينا، اورايا کي، ائشيغي قارانليق کئمي‌دئر.»"

Chapter 11

11:1  او زامان نِعمِاتلي صوفَر جاواب ورئب ددي:

11:2  «آيا بو قدر سؤز جاوابسيز قالسين؟ چوخ دانيشان آدام حاقلي ساييلسين؟

11:3  سنئن لافلارين قاباغيندا ائنسانلار ساکئت قالسين؟ رئشخند اده‌سن، هچ کس ده سني دانلاماسين؟

11:4  چونکي ديئرسن: «منئم تعلئمئم خالئصدئر، و سنئن گؤزونده طاهئرم.»

11:5  کاشکي تاري دانيشسايدي، آغزيني سنه آچسايدي

11:6  حئکمتئن سئرّئني سنه بئلدئرسَيدي! چونکي حئکمتئن ائکي اوزو وار. بئل کي، تاري تقصئرلرئنئن نچه‌سئندن کچئب.

11:7  آيا تارينين درئنلئيئني اؤلچه بئلرسن؟ قادئري موطلقئن نهايتلرئنه يِتئشه بئلرسن؟

11:8  گؤيلردن داها اوجادير، نه اده بئلرسن؟ اؤلولر دئياريندان داها درئندئر، نه آنلايا بئلرسن؟

11:9  اؤلچوسو يردن اوزوندور، دهنزدن گِنئش.

11:10  اگر آرادان بئر کچه، توتوب باغلايا، اگر موحاکئمه‌يه چکه، کئم قاباغيني آلا بئلر؟

11:11  چونکي او، يالانچيلاري تاني‌يير؛ حاقسيزليغي گؤرن واخت، اونو درک ادئر؟

11:12  نه زامان وحشي اِششَک ائنسان دوغسا، آخماق دا آغيلّي اولار.

11:13  اگر سن اوره‌يئني دوز اده‌سن، اَللرئني اونون طرفئنه اوزادارسان.

11:14  اگر اَللرئنده تقصئر وار، اوندان اَل چک. قويما پئسلئک سنئن چاديريندا ساکئن اولسون.

11:15  دوغرودان دا، او زامان باشيني اوتانمادان دئک توتارسان، صاغ-سالامات، قورخوسوز ياشايارسان.

11:16  دار گونونو اونودارسان؛ اونو آخيب گتمئش سولار کئمي يادا سالارسان.

11:17  حياتين گون‌اورتانين گونشئندن داها ائشيقلي اولار، قارانليغين سحر کئمي آچيلار.

11:18  سن آرخايين اولارسان، چونکي اومئدئن وار. موحافئظت اولونارسان و امئن-آمانليقدا ياتارسان.

11:19  ياتارسان و هچ کس سني قورخوتماز؛ سنئن لوطفونو بئر چوخلاري آرزولار.

11:20  لاکئن پئس آداملارين گؤزلري قارالاجاق؛ پناه يرلري اولماياجاق، اومئدلري ده آخير نفسلرئني چکمک اولاجاقدير.»

Chapter 12

12:1  او زامان اَيّوب جاواب ورئب ددی:

12:2  «دوغروردان دا خالق سئزسئنئز، سئز اؤلَنده حئکمت ده اؤله‌جک!

12:3  سئزئن قدر منئم ده عاغليم وار؛ سئزدن ده هچ اَسکئک ديئلم. بو جور شيلري کئم بئلمئر؟!

12:4  دوستولاريما لاغ سببي اولموشام، من کي، تاريني چاغيريب جاواب اِشئدَردئم؛ عادئل و کامئل آدام لاغا دؤنوب!

12:5  راحاتليقدا اولان آدام فلاکتي بوش بئر شي سايير، آياغي سوروشَنلر اوچون فلاکت حاضير دايانير.

12:6  تالانچي‌لارين چاديرلاريندا راحاتليق وار، تاريني قضبلَندئرَنلر اَمئن-آمانليقداديرلار، اونلار تارييا يوخ، اؤز قوللارينا بِل باغلاييرلار.

12:7  گل، حيوانلاردان سوروش، سنه اؤيره‌دَرلر؛ گؤيون قوشلاريندان سوروش، سنه دئيَرلر.

12:8  تورپاغا دِه، سنه بئلدئرَر؛ دهنزئن باليقلاري دا سنه خبر ورَرلر.

12:9  بونلارين هانسي بئري بئلمئر کي، بونو ربّئن اَلي ادئب؟!

12:10  او رب کي، هر ياشايانين جاني، بوتون ائنسانلارين نفسي اونون اَلئنده‌دئر.

12:11  يِمه‌يئن داديني داماق دادان کئمي، قولاق دا سؤزلري مگر اِلَجه ائمتاحان اتمَز؟!

12:12  حئکمت آغساقّاللاردادير، فهم ده اوزون عؤمورلولرده.

12:13  حئکمت و قودرت اوندا وار، تدبئر و فهم اوندادير.

12:14  باخ، اونون ييخديغي تزه‌دن قايريلا بئلمز؛ قاپيني بئرئنئن اوزونه باغلاسا، داها آچيلماز.

12:15  باخ، سولاري کَسسه، قوراقليق اولار؛ سولاري بوراخسا، دونياني سل آپارار.

12:16  قودرت و حئکمت اوندادير، آزان دا اونوندور، آزديران دا اونوندور.

12:17  مشورت ورنلري سويولموش گؤندرَر، و حاکئملري آخماق اِدَر.

12:18  پادشاهلارين باغلاديغي باغي آچار، و بِل‌لرئنه قورشاق سالار.

12:19  کاهئنلري تالان اتدئرَر، ثابئت قالانلاري دا ييخار.

12:20  مؤعتبر مشورتچئلري ساکئت اِدَر، آغساقّاللارين عاغليني آلار.

12:21  اصئلزاده‌لرئن اوستونه حقارت ياغديرار، گوجلولرئن قورشاغيني چيخاردار.

12:22  قارانليغين درئنلرئني گؤز قاباغينا قويار، و ظولمتي ائشيغا چيخاردار.

12:23  مئلّتلري بؤيوک اِدَر، سونرا دا اونلاري محو اِدَر؛ مئلّتلري بؤيودَر، سونرا دا هئدايت اِدَر.

12:24  دونيانين خالقينا ريئس اولانلارين عاغليني آلار، و يولو اولمايان بئر چؤلده اونلاري سرگردان اِدَر.

12:25  ائشيقسيز قارانليقدا اَل سورته-سورته يِرئيَرلر، و اونلاري کِفلي آشا-آشا گَزدئرَر.

Chapter 13

13:1  باخ، گؤزوم بونون هاميسيني گؤروب، قولاقلاريم بونو اشئدئب و آنلاييب دا.

13:2  سئزئن بئلدئيئنئزي من ده بئلئرم. سئزدن هچ اَسکئک ده ديئلم.

13:3  لاکئن ائسته‌يئرم قادئري-موطلقله دانيشيم، تاري ائله داعوالاشيم.

13:4  آمّا سئز يالان دوزورسونوز، هامينيز دا دَيَرسئز حکئملرسئنئز.

13:5  کاشکي سئز کامئل ساکئت قالسايدينيز؛ اوندا حئکمتلي گؤرونَردئنئز!

13:6  ائندي بحثئمي بئر اشئدئن، دئلئمئن ائدّئعاسينا ياخشي قولاق آسين.

13:7  مگر تاري اوچون حاقسيز سؤزلر دانيشاجاقسينيز؟ مگر اونون اوچون يالان دئيه‌جکسئنئز؟

13:8  مگر اونون طرفئني توتاجاقسينيز؟ اونون داعواسيني مگر سئز اده‌جکسئنئز؟

13:9  اگر سئزي تَفتئش اتسه، ياخشي اولار؟ ائنساني آلداتديغينيز کئمي، مگر اونو دا آلداداجاقسينيز؟

13:10  اگر اونون طرفئني گئزلي توتاسينيز، البتّه کي، سئزي تنبه اِدَر.

13:11  مگر اونون شؤوکتي سئزي واهئمه‌يه سالمير؟ دهشتي مگر اوستونوزه دوشمور؟

13:12  فئکرئنئزده‌ ساخلاديقلارينيز کول قدر دَيَرسئزدئر، مودافئعه‌لرئنئز پالچيغا دَيمَز.

13:13  ساکئت قالين کي، بئر دانيشيم، اوندان سونرا قوي باشيما نه گلئر، گلسئن.

13:14  نه اوچون اَتئمي دئشئمه، جانيمي دا اَلئمه آليم؟

13:15  منی اؤلدورسه ده، اونا اومئد باغلاياجاغام. آمّا گئنه ده يوللاريمدان اؤتري اونون حوضوروندا دئفاع اده‌جيم.

13:16  اصلئنده بو منئم نئجاتيم اولاجاق، چونکي تارييا ائنانمايان بئر آدام اونون حوضورونا گلمز.

13:17  سؤزومه دئقّتله قولاق آسين، قوي اعلان اتدئکلرئم قولاقلارينيزي دولدورسون.

13:18  باخين، موحاکئمه‌يه حاضيرلاميشام، حاقلي چيخاجاغيمي دا بئلئرم.

13:19  کئم منئمله داعوايا دوراجاق؟ چونکي او واخت ساکئت اولوب اؤله‌رم.

13:20  آنجاق بو ائکي شيي لوطف ات، اوندا سنئن اوزوندن گئزلَنمه‌رم.

13:21  اَلئني اوستومدن گؤتور، و قويما کي، سنئن دهشتئن منی قورخوتسون.

13:22  او زامان چاغير، جاواب وره‌رم؛ يا دا من دانيشيم، سونرا سن جاواب ور.

13:23  خاطالاريم و گوناهلاريم نه قدردئر؟ منه عوصيانيمي و گوناهيمي بئلدئر.

13:24  نئيه اوزونو گئزله‌دئرسن، منی دوشمنئن ساييرسان؟

13:25  مگر يِلئن قوپارتديغي يارپاغي قورخوداجاقسان؟ مگر قورو سامان چؤپونو قووالاياجاقسان؟

13:26  چونکي منئم ضئدّئمه آجي شيلر يازيرسان، جاوانليغيمين خاطالاريني منه مئراث ورئرسن.

13:27  آياقلاريما کونده وورورسان، بوتون يوللاريما گؤز قويورسان، قدملرئمه حدّ تعيئن ادئرسن.

13:28  اونا گؤره چوروموش بئر شي کئمي تلف اولورام، گووه يِمئش پالتار کئمي‌يم.

Chapter 14

14:1  آرواددان دوغولان ائنسانين حياتي قيسادير، سيخينتي ائله دولودور.

14:2  چئچک کئمي آچار و سولار، کؤلگه کئمي قاچار و دورماز.

14:3  مگر سن گؤزلرئني بله اولان بئرئنه دئکئرسن؟ موحاکئمه اتمک اوچون حوضورونا گتئرئرسن؟

14:4  کثئفدن تمئزي کئم چيخاردا بئلر؟ هچ کئم!

14:5  ائنسانين گونلري تعيئن اولونوب، آيلارينين ساييسي سنه بلّي‌دئر، اونون حودودونو سن قويوبسان کي، اوندان کچه بئلمز.

14:6  اوندان گؤزونو چک و اونو بوراخ کي، گونونو بئتئرَن بئر زحمتکش کئمي بئر آز دئنجَلسئن،

14:7  بئر آغاج اوچون حله ده اومئد وار؛ کَسئلسه، گئنه ده بئتَر، زوغلاري دا اَسکئلمَز.

14:8  کؤکو يرده قوجالسا دا، کؤتويو تورپاقدا اؤلموش اولسا دا،

14:9  سويون ائيسئندن چئچکله‌نر، تزه اکئلمئش آغاج کئمي شاخه‌لر ورَر.

14:10  آمّا ائنسان اؤلر و دَمَر ياتار. آخير نفسئني چکر و يوخ اولار.

14:11  نجه کي، دهنزدن سولار چيخيب گدر چايلار آزاليب قورويار،

14:12  ائنسان دا ياتاري، بئر داها قالماز، گؤيلرئن يوخ اولماسينا قدر اويانماز، يوخولاريندان دا اويانديريلماز.

14:13  کاشکي منی اؤلولر دئياريندا گئزلَده‌يدئن، قضبئن کچنه‌جک منی اؤرته‌يدئن، منه مؤهلت وره‌يدئن، سونرا منی يادا سالايدين.

14:14  ائنسان اگر اؤلسه، بئر داها مگر دئرئلر؟ نؤوبتئم چاتانا قدر، بو عذابدان قورتارماق اوچون هر گون گؤزلَيه‌جيم.

14:15  منی چاغيراجاقسان، من ده سنه جاواب وره‌جيم؛ اَللرئنئن ائشئنه آرزو چکه‌جکسن.

14:16  او زامان قدملرئمي ساياجاقسان، گوناهيمي نظره آلماياجاقسان.

14:17  عوصيانيم توربايا سالينيب مؤهورلَنه‌جک، گوناهيمين اوستونو اؤرته‌جکسن.

14:18  آمّا داغين اوچوب داغيلماسي کئمي، قايانين يرئندن قوپماسي کئمي،

14:19  سو داشلاري يووارلاديغي کئمي، سِل‌لر تورپاغي يويوب آپارديغي کئمي، سن ده ائنسانين اومئدئني بله يوخ ادئرسن.

14:20  اونو همئشه‌لئک مغلوب ادئرسن، و کؤچوب گدئر؛ گؤروشونو دَيئشدئرئب يولا ساليرسان.

14:21  اوغوللاري عئزّت قازانسالار دا، اونون خبري اولماز، ذئلّته دوشَنده ده، هچ نه‌يي باشا دوشمَز.

14:22  آنجاق اؤز بدنئنئن آغريسيني چکئر، و آنجاق اؤزو اوچون ياس توتور.»

Chapter 15

15:1  او زامان تِيمانلي اِلئفَز جاواب ورئب ددی:

15:2  «مگر حئکمتلي بئر آدام هاوايي علمله جاواب وِرَر؟ مگر قارنيني شرق يِلي ائله دولدورار؟

15:3  مگر فايداسيز صؤحبتله، دَيَرسئز سؤزلرله موباحئثه اِدَر؟

15:4  آمّا سن تاري قورخوسونو بله قيراغا قويورسان، و تارينين حوضوروندا دوشونمه‌يه مانع اولورسان.

15:5  چونکي سنئن آغزين گوناهدان درس آلير، و حئيله‌گرلرئن دئلئني سِچئرسن.

15:6  سني محکوم ادن من ديئلم، اؤز دئلئندئر؛ دوداقلارين سنئن ضئدّئنه شهادت ورئر.

15:7  مگر ائلک دوغولان آدام سن ائدئن؟ يوخسا داغلاردان دا اوّل سن اولوبسان؟

15:8  مگر تارينين گئزلي مشورتئني اشئدئبسن؟ تَکجه اؤزونو مگر حئکمتلي ساييرسان؟

15:9  سن نه‌يي بئلئرسن کي، بئز اونو بئلمئرئک؟ سن نه آنلاييرسان کي، بئز آنلاميريق؟

15:10  آراميزدا هم ساچي آغارميش وار، هم ده ياشلي؛ سنئن آتاندان دا ياشلي.

15:11  مگر سنه تارينين تسلّي‌لري، ددئيي خوش سؤزلر کئفايت ديئل؟

15:12  نئيه قلبئن سني بله آزديرير؟ گؤزلرئندن شئمشک چاخير؟

15:13  اله کي، روحونو تارينين ضئدّئنه دؤنده‌رئرسن، و آغزيندان بله سؤزلر چيخارديرسان؟

15:14  ائنسان نه‌دئر کي، طاهئر اولسون؟ آرواددان دوغولان کئمدئر کي، صالح اولسون؟

15:15  باخ، او اؤز موقدّسلرئنه بله اعتئبار اتمئر، گؤيلر بله اونون گؤزونده طاهئر ديئل.

15:16  حاقسيزليغي سو کئمي ائچَن ائيرنج، کورلانميش ائنسانا او، مگر اعتئبار اِدَر؟

15:17  منه قولاق آس، سنه دِيئم؛ گؤردويومو سنه بيان اده‌جيم.

15:18  حئکمتلي آداملارين ددئکلرئني، آتالاريندان آليب گئزلَتمه‌دئيي شيلري.

15:19  او آتالار کي، اؤلکه آنجاق اونلارا ورئلمئشدي، آرالارينا ياداِللي گئرمه‌مئشدي.

15:20  پئس آدام حياتي بويو عذاب چکئر، قدّار آدام اوچون آنبار اولموش ائل‌لر ساييلي‌دير.

15:21  دهشتلر سَسي اونون قولاغيندادير، هر شي ياخشي گؤرونَرکَن، محو ادن اونا هوجوم ادئر.

15:22  قارانليقدان قاچاجاغينا ائنانماز، اونو قيلينج گؤزلر.

15:23  «هارادادير؟» ديئب چؤرک اوچون آوارا گَزَر قارا گونلرئنئن يانيندا اولدوغونو بئلر.

15:24  دارليق و مشقت اونو قورخودار، هوجوم اتميه حاضيرلانميش بئر پادشاه کئمي اونا قالئب گلر.

15:25  چونکي اَلئني تارينين ضئدّئنه اوزاديب، و قادئري-موطلقله دئکباشلي رفتار ادئر.

15:26  دئکباشليقلا اونون اوستونه يوگورور؛ ائري قوبّه‌لي قالخانيني توتوب.

15:27  اوزونو ياغلا اؤرتوب و قارنيني پئي باسيب،

15:28  وئرانه شهرلرده، کئمسه‌سئز، يرله يکسان اولان وئرانه‌لرده، عاقئبتي داغيلماق اولان اِولرده سالئن اولاجاق.

15:29  بئر داها وارلي اولماياجاق، ثروتي داوام گتئرميه‌جک. مال‌لاري اؤلکه‌ني بوروميه‌جک.

15:30  قارانليقدان قاچماياجاق، زوغلاريني اود آلووو قوروداجاق، و تارينين آغزينين نفسي ائله يوخ اولاجاق.

15:31  قوي بوش شيه بِل باغلاماسين، اؤزونو آلداتماسين؛ چونکي عوضي بوشلوق اولاجاق.

15:32  واختيندان قاباق ائشي باشا گله‌جک، بوداغي گؤيَرميه‌جک.

15:33  قوراسي تؤکولَن اوزوم آغاجي کئمي، چئچه‌يي تؤکولَن زيتون آغاجي کئمي اولاجاق.

15:34  چونکي تارييا ائنانمايان جاماعات قيصير اولار. روشوَتخورلارين چاديريني اود يانديريب يوخ اِدَر.

15:35  بلايا حامئله اولوب شر دوغار، قارينلاري حئيله حاضيرلايار.»

Chapter 16

16:1  او زامان اَيّوب جاواب ورئب ددی:

16:2  «بله شيلردن چوخ اشئتمئشم؛ هامينيز بدبخت تسلّی ورنلرسئنئز.

16:3  آيا هاوايي سؤزلرئن آخيري يوخ؟ سئزي نه شي جاواب ورميه مجبور ادئر؟

16:4  سئزئن يِرئنئزده اولسايديم، من ده اله دانيشا بئلردئم. ضئدّئنئزه سؤزلر دوزوب باشيمي دا سئزه تَرپه‌ده بئلردئم.

16:5  آغزيم اورَکلَندئرئجي سؤزلر دئيردي، و دوداقلاريمدان تؤکولَن تسلّی دردئنئزي آزالدا بئلردي.

16:6  دانيشسام بله، دردئم آزالماز، دانيشماسام دا، اوندان نه اَسکئلر؟

16:7  آمّا ائندي تاري منی طاقتدن ساليب؛ بوتون منئمله اولانلاري دارماداغين ادئب.

16:8  منی باغلاييبسان و او منه شاهئد اولوب؛ ضعئفلئيئم ده اوزومه قالخيب ضئدّئمه شهادت ورئر.

16:9  قضبي ائله منی ييرتيب، يره چيرپيب، دئشلرئني منه قيجيرديب؛ دوشمنئم گؤزونو منه دئکئبدئر.

16:10  آغيزلاريني اوستومه بوزوبلر، ياناغيما حقارتله ووروبلار؛ ضئدّئمه بئربئرلري ائله بئرله‌شئبلر.

16:11  تاري منی ائنصافسيزلارين اَلئنه ورئب؛ شر آداملارين اَلئنه ساليب.

16:12  راحات ياشاييرديم، لاکئن منی پرئشان اتدي، بوينومدان توتوب منی پارچالادي. منی اؤزونه هدف قويدو.

16:13  اوخچولاري اطرافيمي آليرلار، آمان ورمه‌دن بؤيرَکلرئمي دِشئر؛ صَفرامي يره تؤکور.

16:14  بدنئمده يارا اوستوندن يارا وورور؛ جنگاور کئمي اوستومه يوگورور.

16:15  دَرئمئن اوستونه چول تئکمئشم، ذئلّت تورپاغينا اوتورموشام.

16:16  آغلاماقدان اوزوم قيزارير، کئرپئکلرئمئن اوستونه ظولمت دوشوب؛

16:17  اَللرئمده ظاليمليق يوخ ائکَن، دوعام خالئص اولدوغو حالدا.

16:18  ای تورپاق، قانيمين اوستونو اؤرتمه، فرياديمي هچ ير ساخلاماسين.

16:19  لاپ ائندئدن، باخ، شاهئدئم گؤيلرده‌دئر. مندن دئفاع ادن اوجالاردادير.

16:20  دوستلاريم منی اَله سااليرلار، گؤزلرئم تارييا باخيب آغلايير.

16:21  ائنسان قونشوسو اوچون يالوارديغي کئمي، بئري ده من ائنساندان اؤتري قوي تارييا يالوارسين.

16:22  چونکي بئر نچه ائل کِچَندن سونرا، گدر-گِتمَز يولا گده‌جيم.

Chapter 17

17:1  روحوم پرئشاندير، گونلرئمئن نورو سؤنور. قبئر منی گؤزله‌يئر.

17:2  دوغرودان دا اطرافيما اَله سالانلار ييغيليرلار، و گؤزلرئم اونلارين دوشمنچئلئيئني گؤرور.

17:3  ائندي منئم حاقّيمدا سن اؤزون قضاوت ات؛ کئم وار کي، منه ضامئن اولسون؟!

17:4  چونکي سن اونلارين قلبئني آنلاييش اوچون باغلاييبسان، اونا گؤره ده قويماياجاقسان کي، اونلار اوجالسينلار.

17:5  او آداملار کي، پاي اوچون دوستلارينا خيانت ادئرلر، اؤولادلارينين گؤزلرئنئن نورو سؤنه‌جک.

17:6  تاري منی خالقلارا مثل ادئب، آداملار گلئب اوزونه توپورورلر.

17:7  قوصّه‌دن گؤزومون نورو قاراليب، بوتون اعضالاريم کؤلگه کئمي‌دئر.

17:8  دوز آداملار بونا حيرانديرلار، و گوناهسيزلار اؤزلرئني دئنسئزلرئن ضئدّئنه قالديريرلار.

17:9  آمّا گئنه ده صالح آدام اؤز يولونو توتور، اَلي تمئز اولان دا گتدئکجه قووّتله‌نئر.

17:10  لاکئن ائندي سئز هامينيز گئنه گلئن، و آرانيزدا حئکمتلي بئر آدام تاپمارام.

17:11  گونلرئم کچئب، نئيّتئنده اولدوقلاريم، اوره‌يئمئن ائستَکلري پَرَن-پَرَن دوشوب.

17:12  اونلار گجه‌ني گوندوزه دؤنده‌رئرلر، ظولمته "ائشيق ياخيندير" ديئرلر.

17:13  اگر اؤلولر دئياريني اِوئم کئمي گؤزله‌سم، ياتاغيمي قارانليقدا سَرسَم،

17:14  اگر قبره "سن آتامسان"، قوردا دا "آنام-باجيم سنسن" دِسَم،

17:15  اوندا بس اومئدئم هاني؟ کئم منه بئر اومئد گؤرَر؟

17:16  مگر اومئد منئمله اؤلولر دئيارينا دوشَر؟ بئرلئکده تورپاغا اِنه‌رئک؟»

Chapter 18

18:1  او زامان شواَخلي بئلدَد جاواب ورئب ددی:

18:2  «نه زامانا قدر سؤز شئکارينا چيخاجاقسينيز؟ آنلاقلي اولون، سونراسي دانيشاريق.

18:3  نئيه حيوانا بَنزه‌يک؟ گؤزلرئنئزه آخماق کئمي گؤرونَک؟

18:4  ای سن، اؤزونو قضبئنده دئدئب- داغيدان، سنئن خاطئرئن اوچون بو دونيا مگر ترک اولوناجاق؟ و يا قايا يرئندن چيخاجاق؟

18:5  البتّه کي، شر آدامين نورو سؤنه‌جک، و اودونون آلووو ائشيق ورميه‌جک.

18:6  چاديريندا نور قارانليغا دؤنه‌جک، يانينداکي دا سؤنه‌جکدئر.

18:7  گوجلو قدملري گوجدن دوشه‌جک، و اونو ييخان اؤز فَندي اولاجاقدير.

18:8  چونکي اؤز آياقلاري اونو تورا سالاجاق، اؤز آياغي ائله تله‌يه دوشه‌جک.

18:9  کمند اونو توپوغوندان توتاجاق، تله آچيليب اونو قاپاجاق.

18:10  اونون اوچون تورپاقدا گئزلي کمند سَرئلئب، يولو اوستونده ده تله قورولوب.

18:11  دهشت اونو هر طرفدن بورويَر، هر قدمئنده اونو تعقئب اِدَر.

18:12  آجليق قووّه‌تئني يِيئب قورتاراجاق، يانيندا فلاکت حاضير داياناجاق.

18:13  دَرئسئني آزار يئيه‌جک، اؤلومون ائلک اؤولادي اعضالاريني يِيئب ائشئني بئتئره‌جک.

18:14  امئن-آمانليق چاديريندان کَسئلئب آتيلاجاق، و دهشتلر پادشاهينين يانينا آپاريلاجاق.

18:15  چاديريندا اونا عاييد هچ نه اولماياجاق، يوردونا گوگورد ياغاجاق.

18:16  آلتدان کؤکلري قوروياجاق، اوستدن ده بوداقلاري سولاجاق.

18:17  ير اوزوندن ذئکري کَسئله‌جک، محلّه-کوچه‌ده ده آدي ياددان چيخاجاق.

18:18  ائشيقدان قارانليغا سوروله‌جک، دونيا خالقينين آراسيندان قووولاجاق.

18:19  خالقي آراسيندا نه اؤولادي اولاجاق، نه نسلي، مسکنئنده بئر کئمسه‌سي قالماياجاق.

18:20  قربده ياشايانلار اونون حالينا مات قالاجاقلار، شرقده ياشايانلاري دا دهشت بورويه‌جک.

18:21  دوغرودان دا کي، ائنصافسيزلارين مسکني بله‌دئر، تاريني تانيمايانلارين يري ده بودور.

Chapter 19

19:1  او زامان اَيّوب جاواب ورئب ددي:

19:2  «نه واختاجاق منی ائنجئده‌جکسئنئز، سؤزلرله منی اَزه‌جکسئنئز؟

19:3  اون دفه‌دئر کي، منی تحقئر ادئرسئنئز، منه ياوا رفتار اتمه‌يئنئزدن ده اوتانميرسينيز.

19:4  اگر دوغرودان آزميش دا اولسام، بو آنجاق اؤز تقصئرئمدئر.

19:5  اگر اؤزونوزو حقئقتن مندن اوستون توتورسونوز، عِيبئمي اوزومه وورورسونوز،

19:6  بئلئن کي، تاري منه حاقسيزليق ادئب، هر طرفدن منی تورونا ساليب.

19:7  باخين، "ظولمدور" ديئب باغيريرام، لاکئن جاواب آلميرام. کؤمک اوچون فرياد ادئرم، آمّا عدالت يوخدور.

19:8  يولوما دئوار چکئب کي، کِچه بئلمه‌يئم؛ يوللاريمي قارانليغا ساليب.

19:9  شرفئمي اَينئمدن سويوندوروب، باشيمدان تاجي گؤتوروب.

19:10  هر ياندان منی ييخير، اَلدن گدئرم؛ اومئدئمي آغاج کئمي کؤکوندن چيخارديب.

19:11  قضبئني ضئدّئمه توتوشدوروب، منی اؤزونه دوشمن ساييب.

19:12  قوشونلاري اوستومه بئرلئکده گلئرلر، ضئدّئمه يوللاريني ساهمانلاييرلار، چاديريمين اطرافيندا يِرله‌شئرلر.

19:13  قارداشلاريمي مندن اوزاقلاشديريب، تانيشلاريم منه کامئل ياد اولوبلار.

19:14  قوحوملاريم مندن اَل چکئبلر، ياخين دوستلاريم منی اونودوبلار.

19:15  اِوئمده ياشايانلار و کنئزلرئم منی اؤزگه ساييرلار، اونلارين گؤزلرئنده قرئب اولموشام.

19:16  قولومو چاغيريرام، آغيز آچيب يالوارسام بله، جاواب ورمئر.

19:17  نفسئمدن آرواديمين دا زَهله‌سي گدئر، اؤز قارداشلاريم دا مندن ائيره‌نئر.

19:18  کئچئک اوشاقلار بله منه حقارت ادئرلر، آياغا قالخديغيم زامان ضئدّئمه دانيشيرلار.

19:19  بوتون صمئمي دوستلاريم مندن ائکراه ادئرلر، سِودئکلرئم ده ضئدّئمه دوروبلار.

19:20  سوموکلرئم دَرئمه، اَتئمه ياپيشيب، دئشئمئن دَرئسي ائله آنجاق قاچميشام.

19:21  منه يازيغينيز گلسئن، يازيغينيز گلسئن، سئز ای دوستلاريم، چونکي تارينين اَلي منی ووروب.

19:22  نه اوچون سئز ده منه تاري کئمي ائشکَنجه ورئرسئنئز، نئيه اَتئمدن دويمورسونوز؟

19:23  کاشکي سؤزلرئم يازيلسايدي! کاشکي کئتابدا قيد اولسايدي!

19:24  دمئر قلم و قورغوشونلا همئشه‌لئک قايادا حَکّ اولسايدي!

19:25  لاکئن من، بئلئرم کي، قورتاريجيم دئرئدئر، آخيردا او، ير اوستونده داياناجاق.

19:26  دَرئم يوخ اولاندان سونرا، اَتئم اولمادان دا تاريني گؤره‌جيم.

19:27  اؤزوم، اؤز گؤزلرئمله اونو گؤره‌جيم، اؤزوم، اؤزگه‌سي يوخ! نجه اوره‌يئم باغريمدا اوزولور!

19:28  اگر دئيه‌سئنئز؛ «ائشئن کؤکو اوندادير، نجه اونا ائشکَنجه ورَک؟»

19:29  اوندا اؤزونوز ده قيلينجدان قورخون؛ چونکي قضب قيلينج جزاسي گتئرَر، اِله کي، موکافاتين وار اولدوغونو بئله‌سئنئز.»

Chapter 20

20:1  او زامان نِعَماتلي صوفَر جاواب ورئب ددی:

20:2  «ائچئمده اولان فئکئرلرئمه گؤره جاواب ورميه مجبورام.

20:3  منی اوتانديران بئر مذَمّتي اشئتدئم، دَرکئمئن روحو منی جاواب ورميه چکئر.

20:4  مگر بونو قدئم زاماندان، ائنسانين ير اوزونه قويولدوغو زاماندان بئلمئرسن کي،

20:5  شر آدامين ظفري قيسادير، دئنسئز آدامين دا شادليغي بئر آنليق؟

20:6  بويو گؤيلره چاتسا دا، باشي بولودلارا دَيسه ده،

20:7  همئشه‌لئک يوخ اولاجاق، اؤز فضله‌سي کئمي. اونو گؤرموش اولانلار «او هارادادير؟» دئيَرلر.

20:8  يوخو کئمي اوچار، بئر داها تاپيلماز. گجه رؤياسي کئمي يوخ اولار.

20:9  اونو گؤرَن گؤزلر بئر داها اونو گؤرمزلر، ياشاديغي يرده آرتيق گؤرونمز.

20:10  اوغوللاري فاغيرلارين مرحمتئني آرزولار، و ثروتئني اؤز اَللري گری ورَر.

20:11  سوموکلري جاوانليق آلووو ائله دولو اولدوغو حالدا، اونونلا تورپاقدا ياتار.

20:12  پئسلئک آغزينا شئرئن گلسه ده، اونو دئلئنئن آلتيندا گئزلَتسه ده،

20:13  اونا آرزو چکسه ده، داماغينين آلتيندا ساخلاسا دا،

20:14  يِدئيي يمک قارنيندا دَيئشئلر، ائچئنده افعي زهرئنه دؤنَر.

20:15  ثروتلري اودور، لاکئن اونلاري قوساجاق؛ تاري اونلاري اونون قارنيندان اِشئيه چيخارداجاق.

20:16  افعي ائلانلارين زهرئني اَمَر؛ افعي ائلانين دئلي اونو اؤلدورَر.

20:17  سو آرخلاريني، بال و آيران چايلاريني گؤرمَز

20:18  قازانديغيني گری ورَر و اونلاري اودا بئلمز؛ تئجارتئنئن منفعتئندن لذّت آپارا بئلمز.

20:19  چونکي فاغيرلارا ظولم ادئب، و اونلاري بوراخيب؛ اؤزو تئکمه‌دئيي اِوي زورلا قصب ادئب.

20:20  ائچئنده آرامليغي اولماديغي اوچون، آرزو اتدئيي هچ بئر شيي ساخلامير.

20:21  يِمه‌يي اوچون اونا هچ بئر شي قالماييب، اونا گؤره ده خوشبختلئيي داوام گتئرمز.

20:22  بوللوغونون دولولوغوندا بله دارليق چکه‌جک؛ بوتون فلاکت اَلي اونون ضئدّئنه قالخاجاقدير.

20:23  قارنيني دولدوران واخت، تاري شئدّتلي قضبئني اونون اوستونه گؤندره‌جک، و اونون جانينا ياغديراجاقدير.

20:24  دَمئر سئلاحدان بلکه ده قاچا بئلسئن، لاکئن بورونج اوخ اونو دَلئب-دِشه‌جک.

20:25  اوخ اونو دَلئب کچه‌جک و اونون بدنئندن چيخاجاق؛ پاريلدايان اوجو اونون جئيه‌رئندن چيخاجاق. دهشتلر اونون اوستونده‌دئر.

20:26  خزئنه‌لرئنئن عاقئبتي قارانليق اولاجاق، اوفورولمه‌مئش اود اونو يِيئب قورتاراجاق، و چاديريندا قالانلاري دا يانديريب-ياخاجاق.

20:27  اونون خاطاسيني گؤيلر آشکارا چيخارداجاق، ير اونون ضئدّئنه قالخاجاق.

20:28  اِوئنئن محصولو سورولوب گؤتوروله‌جک، تارينين قضبي گونونده آخيب گده‌جکدئر.

20:29  پئس آدامين تاريدان آلديغي پاي بودور، اونون اوچون تاريدان تعيئن اولونان مئراث بودور.»

Chapter 21

21:1  او واخت اَيّوب جاواب ورئب ددي:

21:2  "سؤزلرئمه دئقّتله قولاق آسين، سئز بونونلا منه تسلّی ورئن.

21:3  منه بئر دؤزون، من ده دانيشيم، من دانيشاندان سونرا لاغ ادئن.

21:4  يا من، مگر منئم شئکايتئم بئر ائنسانادير؟ نجه صبئرسئز اولماييم؟

21:5  منه باخيب مات قالين، اَلئنئزي آغزينيزين اوستونه قويون.

21:6  بونو حتّا خاطيرلاياندا دا دهشت منی بورويور؛ بدنئمه اَسمه دوشور.

21:7  نه اوچون پئس آداملار ياشاييرلار؟ ياشلانديقجا نئيه گوجلري آرتير؟

21:8  نسئل‌لري يانلاريندا، اؤولادلاري دا گؤزلرئنئن قاباغيندا اونلارلا برقراردير،

21:9  اِولري امئن-آمانليقدادير، قورخودان اوزاقدير، تارينين دَيَنه‌يي ده اونلارا دَيمئر.

21:10  اؤکوزلري جوتله‌شئر و ائنه‌يي ردّ اتمئر، ائنکلري ده دوغور و سَقَطي اولمور.

21:11  بالالاريني سورو کئمي يولا سالير، اوشاقلاري اويناشير.

21:12  دف و طنبور سَسي ائله اوخويورلار، ني نغمه‌سي ائله شادليق ادئرلر.

21:13  گونلرئني کفله کچئردئرلر، و اؤلولر دئيارينا بئر آندا اِنئرلر.

21:14  تارييا ديئرلر: «بئزدن اوزاق اول! ائسته‌مئرئک يوللاريني بله بئلک.

21:15  قادئري-موطلق کئمدئر کي، بئز اونا قوللوق اِدَک؟ اونا دوعا اتمه‌يئن نه فايداسي وار؟!»

21:16  باخ، اونلارين خوشبختلئکلري اؤز اَللرئنده ديئل؛ شر آداملارين مشورتي قوي مندن ائراق اولسون!

21:17  نچه دفه اولوب کي، پئس آداملارين چيراغي سؤنسون؟ يا دا باشلارينا فلاکتلري گلسئن؟ مگر تاري اؤز قضبئنده اونلارا هلاکتي پاي ورئر؟

21:18  مگر اونلار يِل سوووران سامان کئمي دئرلر؟ مگر طوفان اونلاري سامان چؤپو کئمي گؤتوروب آپارير؟

21:19  ديئرسئنئز: «تاري آتانين جزاسيني اؤولادلارينا چکدئرئر. قوي تاري جزاسيني ورسئن کي، بونو بئلسئن.

21:20  قوي اؤز هلاکتئني گؤزلري ائله گؤرسون، قوي قادئري-موطلقئن قضبئندن ائچسئن.

21:21  چونکي آيلارينين سايي کَسئلدئيي واخت، اؤزوندن سونرا اِو اهلي اوچون نه‌يئن قيدئنه قالار؟

21:22  مگر تارييا معرئفت اؤيرَتمَک اولار، اونا کي، حتّا لاپ اوجا منصب صاحئبلرئنه حؤکم ادئر؟

21:23  بئري گوجونون کامئللئيئنده اؤلور، چوخ راحات و راضي؛

21:24  يانلاري ياغلا دولو! سوموکلري ائلئکلي!

21:25  بئري ده جان آجيليغي ائچئنده اؤلور، ياخشي بئر شي اصلا دادماميش اؤلور.

21:26  ائکئسي ده تورپاقدا ياتير، ائکئسئنئن ده بدنئني قورد باسير.

21:27  باخين، بئلئرم نه فئکئرده‌سئنئز، قَصدئنئز ضئدّئمه اولماقدير.

21:28  چونکي ديئرسئنئز: «هاني آغا آدامين اِوي؟ هاني پئس آداملارين چاديري، ساکئن اولدوغو يرلر هارادادير؟»

21:29  يولدان کِچَنلردن مگر سوروشماييبسينيز؟ مگر اونلارين شهادتلرئنه قولاق آسماييبسينيز کي،

21:30  پئس آدام فلاکت گونوندن ساخلانير، و قضب گونونده اونا يول گؤرسدئله‌جک؟!

21:31  کئم اونون عمللرئني اوزونه ووراجاق؟ کئم اونون اتدئکلرئنئن جزاسيني وره‌جک؟

21:32  قبئرئستانا آپاريلارکَن، قبئرئن اوستونه گودوکچو قويارلار.

21:33  وادئنئن تورپاغي اونو نازلا بورويَر؛ هرکس اونون داليسينا دوشَر، قاباغيندا گِدنلرئن ده ساييسي چوخدور.

21:34  بس نجه سئز منه عبث يره تسلّی ورئرسئنئز؟ سئزئن جاوابلارينيزدان قالان شي آنجاق يالاندير."

Chapter 22

22:1  او زامان تِيمانلي اِلئفَز جاواب ورئب ددی:

22:2  "مگر ائنسان تارييا فايدالي اولا بئلر؟ حئکمتلي بئر آدام دا مگر اونا فايدا ورَر؟

22:3  سنئن صالح اولدوغوندان قادئري-موطلق نه لذّت آلير؟ يوللارينين کامئل اولدوغونون اونا نه قازانجي وار؟

22:4  سني تنبه اتمه‌سي، موبارئزه آپارماسي مگر اونا گؤرستدئيئن حؤرمته گؤره‌دئر؟

22:5  مگر پئسلئيئن بؤيوک ديئل؟ مگر تقصئرئن حدسئز ديئل؟

22:6  سببسئز قارداشلاريندان گئروو آلدين، اونلاري پالتارلاريندان سويوب لوت بوراخدين.

22:7  يورغونا بئر ائچئم سو ورمه‌دئن، آج آدامدان چؤره‌يي اسئرگه‌دئن.

22:8  لاکئن ير قودرتلي آدامينکي‌دير، حؤرمتلي آدام اوندا ساکئن اولور.

22:9  دول آروادلاري اَلي-بوش يولا سالدين، يِتئملرئن قووّتئني سينديردين.

22:10  بوندان اؤترودور کي، هر يانيني تله آليب، قفئلدن گلن قورخو سني دهشته ساليب.

22:11  ظولمت سني اله بورويوب کي، گؤره بئلمئرسن، سِل‌لرده بوغولورسان.

22:12  مگر تاري گؤيلرئن اوجالاريندا ديئل؟ لاپ اوزاق اولدوزلارا بئر نظر سال، گؤر نه قدر اوجالارداديرلار!

22:13  آمّا سن ديئرسن: «تاري نه بئلئر؟ مگر قالين قارانليق ائچئندن موحاکئمه اده بئلر؟

22:14  بولودلار اونا مانع اولور، اِله کي، گؤره بئلمئر. گؤي قوبّه‌سئنئن اوستونده گَزئر.»

22:15  پئس آداملارين گتدئيي قدئم يولو مگر توتاجاقسان؟

22:16  اونلار واختلاري چاتماميش قاپيلديلار، بونؤوره‌لرئني سل باسدي.

22:17  تارييا ددئلر: «بئزدن اوزاق اول! قادئري-موطلق بئزه نه اده‌بئلر؟»

22:18  آمّا گئنه ده تاري اِولرئني نعمتلرله دولدوردو؛ اونا گؤره قوي پئس آداملارين مشورتي مندن اوزاق اولسون!

22:19  صالح آداملار بونو گؤروب سِوئنئرلر، معصوم آداملار اونلاري لاغا قويورلار.

22:20  ديئرلر: «دوغرودان دا دوشمنلرئمئز هلاک اولورلار، و اونلاردان قالاني دا اود يِيئب اودور.»

22:21  ائندي تارييا باش اَي، اونونلا باريش؛ بلجه ياخشيليق سنه گلر.

22:22  اونون آغزيندان چيخان تعلئمي قبول ات، اونون سؤزلرئني اوره‌يئنده ساخلا.

22:23  اگر قادئري-موطلقئن طرفئنه دؤنه‌سن، اوّلکي حالينا دؤنَرسن؛ اگر حاقسيزليغي چاديريندان اوزاق اده‌سن،

22:24  قيزيليني تورپاغا قوياسان، اوفئرئن خالئص قيزيليني چايلارين داشلاري اوستونه آتاسان.

22:25  او زامان قادئري-موطلق سنئن قيزيلين اولار، خالئص گوموشون اولار.

22:26  او زامان قادئري-موطلقدن خوشلانارسان، و اوزونو تارييا قالديرارسان.

22:27  اونا دوعا اِدَرسن، سني اِشئدَر. اتدئيئن نذئرلري يرئنه يتئرَرسن.

22:28  قرار وردئيئن هر شي يرئنه يتئرئلر، يوللارينين اوستونه نور سَپئلر.

22:29  ائنسانلار سني آلچالداندا، سن «باش اوجاليغي‌دير» دئيَرسن، چونکي او باشي‌آشاغي آداملارا خئلاص ورَر.

22:30  او، گوناهسيز اولماياني بله قورتارار، سنئن اَللرئنئن تمئزلئيئنه گؤره گوناهکار خئلاص اولار."

Chapter 23

23:1  او زامان اَيّوب جاواب ورئب ددی:

23:2  "بو گون ده شئکايتئم آجي‌دير، ناله ائچئنده اولدوغوم حالدا، اَلي اوستومه آغيردير.

23:3  کاشکي بئلسَيدئم اونو هارادا تاپا بئله‌جيم، کاشکي اونون مسکنئنه گده بئلسَيدئم.

23:4  او زامان داعوامي اونون حوضوروندا آچارديم، دلئل‌لرئمي دالبادال دوزَردئم.

23:5  منه وره‌جيی جاوابي بئلردئم، منه دئيه‌جيي سؤزلري آنلايارديم.

23:6  قودرتئنئن بؤيوکلوغو ائله مگر منئمله داعوالاشاردي؟! خِير! يقئن سؤزومه قولاق آساردي.

23:7  اورادا دوز بئر آدام اونونلا دلئل‌له‌شَردي؛ من ده حؤکم اده‌نئمئن اَلئندن همئشه‌لئک قورتارارديم.

23:8  باخين، ائره‌لي گدئرم، اورادا ديئل. دالييا گدئرم، اونو تاپا بئلمئرم.

23:9  ائشله‌دئيي سول طرفه گدئرم، گؤزوم اونو سچمئر. ساغ طرفه دؤنور، اونو گؤره بئلمئرم.

23:10  آمّا توتدوغوم يولو او بئلئر؛ منی ائمتاحان ادن زامان، قيزيل کئمي چيخارام.

23:11  آياغيم اونون يولونو بَرک توتوب؛ يولونو توتموشام و اوندان دؤنمه‌مئشم.

23:12  دوداقلارينين امر اتدئيئندن آيريلماميشام؛ آغزينين سؤزلرئني، مؤحتاج اولدوغوم يمکدن داها چوخ دَيَر ورئب آنبار اتمئشم.

23:13  لاکئن اونون کئمي بئري يوخدور، کئم اونو دؤنده‌ره بئلر؟ جاني نه ائسته‌سه، اونو اِدَر.

23:14  منه تعيئن اولوناني يرئنه يتئرئر، و يانيندا بله حؤکملردن چوخ وار.

23:15  بونا گؤره‌دئر کي، حوضوروندا بله دهشتده‌يم، بونلاري دوشونَن واخت اوندان قورخورام.

23:16  تاري‌دير کي، اوره‌يئمئن قووّتئني قيريب، قادئري-موطلقدئر کي، منی دهشته ساليب؛

23:17  لاکئن نه قارانليق منی ساکئت ادئب، نه ده اوزومو بورويَن قالين ظولمت.

Chapter 24

24:1  نئيه قادئري-موطلق حؤکم اوچون زامان تعيئن اتمئر؟ نئيه اونو تاني‌يانلار حؤکم گونلرئني گؤرمورلر؟

24:2  بعضئلر حودودلاري يرلرئندن قالديريرلار؛ سورولري قصب ادئب اوتاريرلار.

24:3  يِتئملرئن اِششَکلرئني سوروب آپاريرلار؛ دول آروادين اؤکوزونو گئروو گؤتورولر.

24:4  مؤحتاجلاري يولدان چيخارديرلار؛ اؤلکه‌ده‌کي فاغيرلارين هاميسي گئزلَنمَيه مجبور اولور.

24:5  باخ، کاسيبلار چؤل اِششَکلري کئمي، يمک آختارماق اوچون اِرته‌دن ائشه چيخيرلار؛ اؤولادلاري اوچون چؤلده چؤرک آختاريرلار.

24:6  يِملرئني زَمئده بئچئرلر، پئس آدامين اوزوم باغيندان اوزوم قاليقلاريني ييغيرلار.

24:7  گجه‌ني پالتارسيز لوت کچئردئرلر، سويوقدا اوستلرئني اؤرتمَيه بئر شي تاپميرلار.

24:8  داغلارا ياغان ياغيشدان ائسلانيرلار، پناهسيزليقدان قاياني قوجاقلاييرلار.

24:9  يِتئم کؤرپه‌لري دؤشدن آييريرلار، فاغيرين کؤرپه‌سئني گئروو آليرلار.

24:10  بو يازيقلار پالتارسيز لوت دولانيرلار، آج اولا-اولا تاخيل دسته‌لرئني داشي‌ييرلار.

24:11  پئسلرئن چَپَرلري آراسيندا زيتون ياغي سيخيرلار، شراب اوچون اوزوم سيخيرلار، آمّا اؤزلري سوسوزلوقدان يانيرلار.

24:12  شهرلردن ائنسان ناله‌‌سي قالخير، يارالي جانلار کؤمک اوچون باغيريرلار، آمّا تاري حله ده حاقسيزليغي نظره آلمير.

24:13  آداملار وار کي، ائشيغين ضئدّئنه عوصيان ادئرلر؛ اونون يوللاريني تانيميرلار، طرئقلرئنده ده قالميرلار.

24:14  قاتئل گون باتاندا قالخير؛ فاغير و مؤحتاجي اؤلدورور، گجه واختي بئر اوغرويا بَنزه‌يئر.

24:15  زئناکارين گؤزو آخشام واختيني گؤزله‌يئر؛ دوشونور: «هچ بئر گؤز منی گؤرمَز.» اوز-گؤزونو گئزله‌دئر.

24:16  قارانليقدا اِولري ياريرلار، لاکئن گوندوزده گئزله‌نئرلر. بونلار ائشيغي تانيميرلار.

24:17  چونکي اونلارين سحري قالين قارانليقدير، ظولمتئن دهشتلري ائله آشناديرلار.

24:18  آمّا سولارين اوزونده کؤپويه بَنزَرلر، اونلارين پايي ير اوزونده ملعوندور؛ اوزوم باغلارينا قاييتمازلار.

24:19  نجه قوراقليق و ائستئلئک قار اَرئدئب اودار، اؤلولر دئياري دا گوناهکارلاري اله گؤتوروب آپارار.

24:20  آنا بطني اونو ياددان چيخاردار، قوردلار اوچون لذئذ يِم اولارلار. ائنصافسيز آدام آرتيق يادلارا دوشمَز، آمّا آغاج کئمي سينار.

24:21  سونسوز آروادا يامانليق اِدَرلر، دول آروادا هچ ياخشيليق اتمَزلر.

24:22  آمّا تاري قودرتي ائله گوجلولري آشاغي چکر؛ اؤزو قالخار، لاکئن هچ کس حياتيندان آرخايين اولماز.

24:23  تاري اونلارا امئن-آمانليق يارادير، و اونا آرخايين اولورلار. و گؤزلري اونلارين يوللاريندادير.

24:24  قيسا بئر مودّت اوچون اوجاليرلار، بئر آز سونرا يوخ اولورلار؛ آلچاديليرلار، و باشقا هر شي کئمي آلينيب گؤتورولورلر؛ سونبول‌لرئن باشي کئمي کَسئلئرلر.

24:25  ائندي اگر بله ديئل، کئم منی يالانچي چيخاردا بئلر؟ کئم سؤزومو دَيَرسئز اده بئلر؟"

Chapter 25

25:1  او زامان شواَخلي بئلدَد جاواب ورئب ددی:

25:2  "سلطنت و هيبت تارييا عاييددير؛ اوجا گؤيلرئنده نئظام قوران اودور.

25:3  مگر قوشونلارينين ساييسي وار؟ اونون ائشيغي کئمئن اوستونه دوشمَز؟

25:4  فاني ائنسان تارينين حوضوروندا نجه صالح چيخا بئلر؟ آرواددان دوغولان نجه طاهئر اولا بئلر؟

25:5  باخ، اونون گؤزونده آي بله پارلاق ديئل، اولدوزلار بله طاهئر ديئل‌لر.

25:6  بس تورپاق قوردونا بَنزَر ائنسان نجه اولا بئلر؟ ائنسان اؤولادي کي، آنجاق يرئن قوردودور."

Chapter 26

26:1  او زامان اَيّوب جاواب ورئب ددی:

26:2  "ضعئف آداما نه چوخ کؤمک اولدونوز! طاقتدن دوشن قولا نجه ده خئلاص وردئنئز!

26:3  حئکمتسئز آداما نجه مصلحت وردئنئز! اونا بصئرتي نه بول وردئنئز!

26:4  بو سؤزلري کئمه ديئرسن؟ سنئن آغزيندان کئمئن نفسي دانيشير؟

26:5  اؤلولر تئتره‌يئرلر، سولارين آلتيندا اولانلار، بوتون اونلاردا ياشايانلار لرزه‌يه گلئرلر.

26:6  تارينين حوضوروندا اؤلولر دئياري چيلپاق‌دير؛ هلاکت يرئنئن اؤرتوسو يوخدور.

26:7  بوش فضانين اوستونه شئمال گؤيلرئني سالير، يري هِچلئکدن آسير.

26:8  سولاري بولودلاريندا بوکور، اونلارين آغيرليغيندان بولودلار ييرتيلمير.

26:9  بَدئرلَنمئش آيين اوزونو اؤرتور، بولودلاريني اونون اوستونه چکئر.

26:10  سولارين اوستونه بئر سرحد چکئر، ائشيقلا قارانليغي بؤلور.

26:11  گؤيون سوتونلاري اسئرلر، اونون تأدئبئندن حيرته دوشورلر.

26:12  دهنزي قودرتي ائله چالخالادي، حئکمتي ائله راحَبي تئکه-تئکه اتدي.

26:13  اونون نفسي ائله گؤيلر آچيلير؛ اَلي قاچان ائلاني پارچالاييب.

26:14  باخ، بونلار آنجاق اتدئکلرئنئن بئر ذرّه‌سي‌دئر اوندان اشئتدئيئمئز ضعئف بئر پيچيلتي‌دير! لاکئن قودرتئنئن گورولتوسونو کئم آنلايا بئلر؟"

Chapter 27

27:1  اَيّوب گئنه موباحئثه‌سئنه داوام ورئب ددی:

27:2  "حاقّيمي اَلئمدن آلان او دئري تارييا، جانيمي آجي ادن قادئري موطلقه آند اولسون،

27:3  نه قدر ائچئمده حيات وار بورنومدا دا تارينين نفسي،

27:4  دوداقلاريم ناحاق سؤز دِمَيه‌جک، دئلئم ده هچ حئيله دانيشماياجاق.

27:5  حاشا کي، سئزئن دوغرو اولدوغونوزو تصدئق ادئم؛ آخير نفسئمه قدر کامئللئيئمدن اَل چکميه‌جيم.

27:6  صالحلئيئمدن بَرک ياپيشميشام، بوراخماياجاغام دا. اوره‌يئم هچ بئر گونوم اوچون منی مذمّت اتمئر.

27:7  قوي دوشمنئم پئس آداملارين گونونه دوشسون، حاقسيز آداملارا نجه‌دئر، منه ضئدّ اولانا دا اِله اولسون.

27:8  چونکي تاري، اونو تانيمايان آدامي کَسئب آتاندا، جانيني آلاندا، اونون اومئدي نه‌دئر؟

27:9  دارليغا دوشَنده، مگر تاري فرياديني اشئده‌جک؟

27:10  مگر قادئري موطلقده کِف اده‌جک؟ تاريني هر زامان چاغيراجاق؟

27:11  تارينين قودرتي حاقّيندا سئزه تعلئم وره‌جيم؛ قادئري موطلقده اولاني گئزلَتميه‌جيم.

27:12  باخين، سئزئن هامينيز اونو گؤروبسونوز؛ بس نئيه بوش سؤزلرله اؤزونوزو هچ ادئرسئنئز؟

27:13  شر آدامين تاريدان آلديغي پاي، ظالئم آداما قادئري موطلقدن يِتئشدئيي مئراث بودور:

27:14  گرچي اؤولادلاري چوخالير، لاکئن اونلارين قدري قيلينج آغزي‌دير؛ نسئللري ده دويونجا چؤرک تاپان اولماياجاق.

27:15  اونون نسلئندن قالاني اؤلوم باسديراجاق، دول آروادلاري دا آغلايا بئلميه‌جکلر.

27:16  قوم قدر گوموش ييغسا دا، تورپاق ذرّه‌لري قدر پالتار ييغسا دا،

27:17  اونون ييغديغيني صالح آدام گئيَر، گوموشو ده گوناهسيزلار بؤلر.

27:18  اِوئني گووه کئمي، قوروقچونون قوردوغو کوما کئمي بئنا اِدَر.

27:19  وارلي ياتار، آمّا بونو بئر داها اده بئلمز؛ گؤزلرئني آچار، و واريندان آرتيق اثر يوخ.

27:20  دهشتلر اونو سل کئمي بورويَر، طوفان دا گجه اونو قاپيب آپارار.

27:21  شرق يِلي اونو قالديريب سووورار، و او گتمئش اولار، چونکي اونو يرئندن سوپوروب آپارار.

27:22  اونو توللايار و رحم اتمز، يقئن کي، اونون اَلئندن قاچماغا جهد اِدَر.

27:23  اونا اَل چالار، يرئندن اونا فيشيلدايار.

Chapter 28

28:1  يقئن کي، گوموشون معدني وار، قيزيلين دا تصفئيه اتدئکلري يري.

28:2  دمئر تورپاقدان آلينير، مئس ده قايادان اَرئدئلئر.

28:3  ائنسان قارانليغا نهايت قويور. قارانليقدا، ظولمتده قاياني آخير حدّئنه قدر قازيب آختارير.

28:4  آداملارين ساکئن اولدوغو يردن اوزاق بئر دلئک آچير؛ ائنسان آياغي دَيمه‌يَن يرلرده. فاني ائنساندان اوزاقدا ساللانيب يِللَنه-يِللَنه قالير.

28:5  ير کي، اوندان چؤرک چيخير، دئبي اود کئمي آلت اوست اولور.

28:6  قايالاريندان لاجورد داشي چيخير، و اوندا قيزيل توزو وار.

28:7  اورانين يولونو شئکار قوشو دا بئلمئر، شاهئنئن گؤزو ده اوراني گؤرمه‌يئب.

28:8  مغرور وحشي حيوانلار اورايا آياق قويماييبلار، ييرتيجي آصلانلار دا اورادان کچمه‌يئب.

28:9  آدام اَلئني چاخماق داشينا اوزادير؛ داغلاري بونؤوره‌سئندن آلت-اوست ادئر.

28:10  قايالار ائچئندن تونل‌لر ياريب آچير، گؤزو هر جور قئيمتلي شيي گؤرور.

28:11  چايلارين آخينتيسينا سدّ چکئر؛ گئزلئني آشکارا چيخاردير.

28:12  آمّا حئکمتي هارادان تاپماق اولار؟ آنلاغين يري هارادادير؟

28:13  ائنسان اونون دَيَرئني بئلمئر، دئرئلر دئياريندا دا اونا راست گلمئر.

28:14  درئنلئکلر ديئر: «مَنده يوخدور.» دهنز ديئر: «مَنده ديئل.»

28:15  اونون عوضئنده خالئص قيزيل ورئله بئلمز، قئيمتي گوموشله اؤلچولمَز.

28:16  اونو اوفئر قيزيلي ائله قئيمتلَندئرمک اولماز، اونو دَيَرلي دامارلي عقئقله، لاجورد داشي ائله دَيَرلَندئرمک اولماز.

28:17  نه قيزيل اونا تاي اولار، نه ده گؤزل جام، خالئص قيزيل قابلار دا اونا عوض اولا بئلمز.

28:18  يانيندا مرجانين، بولّورون آدي چکئلمَز؛ حئکمتئن دَيَري مئروارئدن ده اوستوندور.

28:19  کوشون توپازي اونون تايي ديئل، اونون دَيَري خالئص قيزيللا اؤلچولمَز.

28:20  بس حئکمت هارادان گلئر؟ آنلاغين يري هارادادير؟

28:21  بلجه بوتون دئرئلرئن گؤزلرئندن گئزلي، گؤيون قوشلاريندان اؤرتولودور.

28:22  هلاکت يري ائله اؤلوم بله ديئر: قولاقلاريميز آنجاق سوراغيني اشئدئب.

28:23  اونون يولونو تاري آنلايير؛ يِرئني آنجاق او بئلئر.

28:24  چونکي يرئن او بئري اوجلارينا قدر باخير، و گؤيلرئن آلتينداکي هر شيي گؤرور.

28:25  يِله گوجونو تعيئن ادنده، سولاري اؤلچَنده،

28:26  ياغيشا قانون قوياندا، و ائلديريما يول آچاندا؛

28:27  حئکمته باخيب قئيمت قويدو؛ اونو برقرار ادئب، هم ده آراشديردي.

28:28  ائنسانا ددی: باخ، ربدن قورخماق حئکمتدئر، پئسلئکدن چکئلمک آنلاق‌دير!"

Chapter 29

29:1  اَيّوب گئنه اؤز موباحئثه‌سئنه داوام ورئب ددي:

29:2  "کاشکي قدئم آيلارداکي کئمي اولسايديم، تارينين منی حئفظ اتدئيي گونلرده‌کي کئمي؛

29:3  چيراغينين باشيم اوسته ائشيق ساچديغي، نوري ائله قارانليقدا گَزدئيئم گونلر.

29:4  کاشکي حياتيمين چئچکلي گونلري گری دؤنسَيدي؛ او زامان کي، تارينين دوستلوغو چاديريمين اوستونده ائدي،

29:5  او زامان کي، قادئري-موطلق حله منئمله ائدي، و اؤولادلاريم اطرافيمدا دولانيرديلار.

29:6  او زامان کي، قدملرئم آيرانلا يويولوردو، قايا منئم اوچون ياغ بولاقلاري آخيرديردي.

29:7  من قاپيدان شهره چيخاندا، ميداندا کورسومو حاضيرلاياندا،

29:8  جاوانلار منی گؤروب گئزلَنَردئلر، ياشلي‌لار آياغا قالخيب دورارديلار.

29:9  ريئسلر صؤحبتدن دايانارديلار، اَللرئني آغيزلارينا قويارديلار.

29:10  امئرلرئن سَسي کَسئلردي، دئللري داماقلارينا ياپيشاردي.

29:11  قولاق منی اشئدن واخت، منی بَختَوَر چاغيراردي. گؤرَن گؤز ده منی تعرئفله‌يَردي.

29:12  چونکي کؤمَيه باغيران فاغيري، کؤمه‌يي اولمايان يِتئمي قورتارارديم.

29:13  اؤلوم آغزيندا اولانين خيئر-دوعاسي اوستومه گلردي، دول آروادين اوره‌يئني شادليقدان اوخوماغا قالديرارديم.

29:14  صالحلئيي گِيئنَردئم و منه ياراشاردي، عدالتئم منه جوبّه و تاج کئمي ائدي.

29:15  کورلارا گؤز ائدئم، توپاللارا آياق ائدئم.

29:16  مؤحتاجلارين آتاسي ائدئم، قرئبلرئن موشکول‌لرئنئن قيدئنه قالارديم.

29:17  ائنصافسيز آدامين چَنه‌سئني سينديرارديم، شئکاري اونون دئشلرئندن آلارديم.

29:18  دوشونَردئم: يووامدا اؤله‌جيم، گونلرئمي قوم قدر چوخالداجاغام.

29:19  کؤکوم سولار طرفئنه ياييلاجاق، بوداقلاريما شِح دوشه‌جک.

29:20  عئزّتئم يانيمدا تزه قالاجاق، و کامانيم اَلئمده تزه‌لَنه‌جک.

29:21  منه قولاق آسيب گؤزله‌يَردئلر؛ مشورتئم اوچون ساکئت قالارديلار.

29:22  هچ کئم سؤزومون اوستوندن سؤز دِمَزدي، سؤزلرئم اوستلرئنه تؤکولردي.

29:23  منی ياغيش کئمي گؤزله‌يردئلر، ياز ياغيشي کئمي سؤزلرئمي ائچَردئلر.

29:24  اوزلرئنه گولومسه‌يَنده، گؤزلرئنه ائنانمازديلار، و گولر اوزوم اونلارا جسارت وِرَردي.

29:25  اونلارين يولونو من سِچَردئم، ريئس کئمي اَيلَشَردئم، عسگرلرئن آراسيندا پادشاه کئمي اوتورارديم، ياسلي‌لارا تسلّی ورنه بَنزه‌يَردئم.

Chapter 30

30:1  آمّا ائندي ياشجا مندن کئچئکلر منه لاغ ادئرلر؛ او آداملار کي، آتالاريني هچ حساب ادئب سورومون ائتلري ائله قويماغا بله راضي اولمازديم.

30:2  اونلارين اَللرئنئن قووّتئندن منه نه فايدا اولاردي؟ گوج اونلاردان آرتيق گتمئشدي.

30:3  يوخسوللوقدان، آجليقدان آريقديرلار گجه قارانليغيندا چؤل-بئياباندا بئتکي کؤکو گَمئرئرلر.

30:4  کوللوقلاردان دوزلو بئتکئلر ييغيرلار، و يئيه‌جکلري سوپورگه کوللارينين کؤکودور.

30:5  خالق آراسيندان قووولورلار، اونلارين اوستونه اِله قيشقيريرلار کي، دئيه‌سن اوغرودورلار.

30:6  دهشتلي وادئلرده، يرئن دلئکلرئنده، قايالار آراسيندا ياشاييرلار.

30:7  کوللارين آراسيندان آنقيريرلار؛ قارا تئکانين آلتيندا دالدالانيرلار.

30:8  آخماقلارين، آدسيزلارين اؤولادلاري‌ديرلار، اؤلکه‌دن قووولموشدورلار.

30:9  ائندي من دئللرئنئن نغمه‌سي اولموشام؛ آغيزلاريندا مثل اولموشام.

30:10  مندن ائکراه ادئرلر، مندن اوزاق دورورلار، اوزومه توپورمکدن ده چکئنمئرلر.

30:11  ائندي کي، تاري کامانيمين ائپئني بوشلاييب و منی ذلئل ادئب، اونلار دا گؤزومون قاباغيندا جئلوولاريني آرتيق آتيبلار.

30:12  صاغيمدا زئل-زئبئل آداملار قالخيرلار؛ آياغيمي جايديريرلار، هلاک ادن يوللاريني منه طرف دوزَلدئرلر.

30:13  يولومو وئران ادئرلر، اونلارا کؤمک ادن بئري اولماسا دا، هلاکيما چاليشيرلار.

30:14  اله بئل کي، گِنئش بئر دلئکدن گلئرلر؛ وئرانه‌لئکدن اوستومه يووارلانيرلار.

30:15  دهشتلر اوستومه تؤکولور؛ شرفئمي يل کئمي سووورور، خوشبختلئيئم بولود کئمي کچئب گدئب.

30:16  ائندي جانيم ائچئمده اَرئيئر؛ ذلئللئک گونلري مندن بَرک ياپيشيب.

30:17  گجه‌لر سوموکلرئمي ائچئمده دِشئر، جانيمي گَمئرَن آغريلار هچ دايانمير.

30:18  تاري زورلا پالتاريمي اَينئمدن چيخاردير؛ مندن جوبّه‌مئن ياخاسي کئمي ياپيشير.

30:19  منی پالچيغا باتيرير، توزا دؤنموشَم، کوله دؤنموشَم.

30:20  کؤمک اوچون سنه باغيريرام، جاواب ورمئرسن. آياغا قالخيرام، منه بئر نظر ده سالميرسان.

30:21  منئم ضئدّئمه رحمسئزسن اَلئنئن گوجو ائله منی اَزئرسن.

30:22  منی قالديريب يل اوستونه مئندئرئرسن، طوفان ائچئنه ساليب دارماداغين ادئرسن.

30:23  بئلئرم کي، منی اؤلومه آپاراجاقسان؛ بوتون ياشايانلارا تعيئن اولونموش يره آپاراجاقسان.

30:24  ييخيلانين دوستو اولماز، موصئبتئنده کؤمک اوچون مگر باغيرمير؟

30:25  مگر من دارليغا دوشَنلر اوچون آغلامازديم؟! مگر اوره‌يئم فاغير اوچون يانمازدي؟!

30:26  ياخشيليق گؤزله‌دئم، يامانليق گلدي، ائشيق گؤزله‌دئم، قارانليق گلدي.

30:27  اوره‌يئم چيرپينير، راحاتليغي يوخدور، ذلئللئک گونلري يولومو کَسئب.

30:28  يوخدور بئر ائشيق اوجو، قارالا-قارالا گَزئرم، جاماعات آراسيندا دوروب کؤمک اوچون باغيريرام.

30:29  چاقّاللارا قارداش اولموشام، بايقوشلارا يولداش اولموشام.

30:30  دَرئم قاراليب اوستومدن تؤکولور؛ سوموکلرئم قيزديرمادان يانير.

30:31  طنبوروم ياس توتوب ناله چکئر، نِيئم زار-زار نيقّيلدايير.

Chapter 31

31:1  گؤزلرئمله عهد باغلاميشام؛ باکئره بئر قيزا نجه گؤز دئکه بئله‌رم؟

31:2  ائنسانين پايي يوخاريدا اولان تاريدان نه‌دئر؟ مئراثي اوجالاردا اولان قادئري-موطلقدن نه‌دئر؟

31:3  مگر حاقسيزلارين باشينا فلاکت گلمئر؟ مگر فئتنه‌کارلارين باشينا موصئبت گلمئر؟

31:4  مگر او، يوللاريمي گؤرمور؟ مگر او، هر قدمئمي سايمير؟

31:5  اگر يالانچيليقلا يرئمئشم، اگر آياغيم حئيله اوچون تَله‌سئب،

31:6  قوي تاري منی دوز بئر تَره‌زئده چکسئن کامئل اولدوغومو گؤرسون.

31:7  اگر قدملرئم يولدان آزيب، اگر اوره‌يئم گؤزلرئمئن دالينجا گدئب، يا دا اَللرئم لکه‌لي اولوب؛

31:8  قوي اوندا اَکدئيئمي يادلار يِسئن؛ اَکئنئم کؤکوندن چيخاريلسين.

31:9  اگر اوره‌يئم بئر آروادا توولانيب، اگر قونشومون قاپيسيندا گئزلَنمئشم،

31:10  قوي اوندا آرواديم اؤزگه بئر آدامين دَيئرمانيني دارتسين، اونونلا اؤزگه کئشئلر ياتسينلار.

31:11  چونکي بو بئر خباثت اولاردي؛ اله بئر فساد کي، حاکئملر اونو جزالانديرارديلار.

31:12  چونکي او، هلاکت يرئنه‌جک يانديريب ياخان بئری اولاردي؛ بوتون محصولومو کؤکوندن چيخارداردي.

31:13  اگر نؤکرلرئم و کنئزلرئمئن حاقّيني، منئمله داعوالي اولان زامان دانميشام،

31:14  تاري آياغا قالخاندا، من نه اده بئله‌رم؟ تفتئش ادنده اونا نه جاواب وره بئله‌رم؟

31:15  مگر آنا بطنئنده منی يارادان، اونلاري دا ياراتماييب؟ مگر ائکئمئزي ده بطنده بَزه‌يَن او ديئل؟

31:16  اگر فاغير آداملارين ائسته‌دئکلرئنه مانع اولموشام، اگر دول آروادين گؤزلرئنئن نورونو سؤندورموشم،

31:17  اگر چؤره‌يئمي تک باشينا يِمئشَم، يِتئملرله اونو پايلاشماميشام-

31:18  حال بو کي، جاواليغيمدان بَري يِتئملره آتاليق اتمئشم، دوغولاندان بَري دول آروادا يول گؤرستمئشم-

31:19  اگر بئر آدامي پالتارسيزليقدان اؤلوم حاليندا گؤرموشم، يا دا اؤرتويه مؤحتاج اولان بئر آدامي.

31:20  اگر اونون بِلي منه خيئر-دوعا ورمه‌يئب، اگر قويونلاريمين يونو ائله قيزيشماييب؛

31:21  اگر محکمه‌ده حامئلرئم اولدوغو اوچون، اَلئمي يِتئمئن ضئدّئنه قالديرميشام؛

31:22  قوي اوندا چئينئم يرئندن دوشسون و قولوم لوله‌سئندن سينسين.

31:23  چونکي تارينين بلاسيندان قورخورام، شؤوکتئنئن قاباغيندا دايانا بئلمه‌رم.

31:24  اگر قيزيلا اومئد باغلاميشام، يا دا خالئص قيزيلا «اومئدئم سنسن» دِمئشَم؛

31:25  اگر ثروتئمئن چوخلوغونا گؤره، يا دا اَلئمئن چوخ قازانديغينا گؤره سِوئنمئشَم؛

31:26  اگر گونه ائشيغيني شاخاندا، يا دا آيا شؤوکتي ائچئنده گِدنده باخميشام؛

31:27  و اوره‌يئم گئزلئجه آلدانيب و آغزيم اَلئمي اؤپوب؛

31:28  بو دا اله بئر فساددير کي، حاکئملر اونو جزالانديرارديلار، چونکي يوخاريدا اولان تاريني دانميش اولارديم.

31:29  اگر دوشمنلرئمئن بدبختلئيئنه سِوئنمئشَم، زحمت آلتينا دوشَنده فرحلَنمئشم-

31:30  حال بو کي، هچ کئمئن جانينا قارقيش اتمکله دئلئمه گوناه اتمه‌يه يول ورمه‌مئشم-

31:31  اگر چاديريمين خالقي هچ واخت دمه‌يئبلر کي، اَيّوبون وردئيي اَتئندن دويمايان کئم وار؟-

31:32  هچ بئر قرئب گجه‌ني چؤلده سحر اتمَزدي، قاپيم همئشه يولدان کِچَنلرئن اوزونه آچيق ائدي-

31:33  اگر تقصئرئمي گئزلَتمئشم، آدم کئمي عوصيانيمين اوستونو اؤرتموشم.

31:34  بؤيوک جاماعاتدان قورخدوغوم اوچون، اِلئن حقارتئندن دهشته گلدئيئم اوچون، دئنمه‌يئب قاپيدان اِشئيه چيخماميشام؛

31:35  کاشکي منی اشئدن بئري اولسايدي! بو سؤزومو تصدئق ادئرم؛ قوي قادئري-موطلق جاوابيمي ورسئن! ضئدّئمه بونو طومارا يازيب اَلئمه ورسئن.

31:36  شوبهه‌سئز بو طوماري چئينئمده داشييارديم؛ تاج کئمي باشيما قويارديم.

31:37  بوتون قدملرئمئن حسابيني اونا خبر وِرَردئم؛ امئر کئمي اونا ياخينلاشارديم.

31:38  اگر اَکئن تورپاغيم منئم ضئدّئمه فرياد ادئر، جوتون آچديغي ياريقلار اَلئمدن بئرلئکده آغلايير؛

31:39  اگر پولونو ورمه‌دن محصولونو يِمئشم، صاحئبلرئنئن اؤلومونه باعئث اولموشام؛

31:40  قوي اوندا بوغدا يرئنه تئکان، آرپا يرئنه خار-خاشاک بئتسئن." اَيّوبون سؤزلري باشا گلئر.

Chapter 32

32:1  بلجه بو اوچ کئشي اَيّوبا جاواب ورمکدن دايانديلار، چونکي او، اؤز نظرئنده صالح بئر آدام ائدي.

32:2  لاکئن رام نسلئندن بوزلو بَرَکِلئن اوغلو اِلئهونون قضبي اَيّوبون اوستونه آلوولاندي، چونکي اؤزونو تاريدان داها چوخ حاقلي حساب ادئردي.

32:3  اونون قضبي او اوچ دوستون اوستونه ده آلوولاندي، چونکي اَيّوبو محکوم اتدئيي حالدا، حله ده اونا بئر جاواب تاپا بئلمه‌مئشدئلر.

32:4  اِلئهو بوراجاق اَيّوبلا دانيشماغا گؤزله‌مئشدي، چونکي اونلار ياشدا اوندان بؤيوک ائدئلر.

32:5  لاکئن بو اوچ کئشئنين آغزيندا آرتيق جاواب اولماديغيني گؤرَن واخت، قضبي آلوولاندي.

32:6  بوزلو بَرَکِلئن اوغلو اِلئهو دانيشيب ددی: "ياشجا من کئچئيَم، آمّا سئز ياشلي؛ اونا گؤره ده چکئندئم، بئلدئيئمي سئزه دِمَکدن قورخدوم.

32:7  دوشوندوم: قوي اوزون عؤمور سورَنلر دانيشسينلار، قوي چوخ ائل‌لرئن شاهئدلري حئکمت اؤيرَتسئنلر.

32:8  آمّا دوغرودان دا ائنساندا روح وار، قادئري-موطلقئن نفسي ائنسانا آغيل ورئر.

32:9  حئکمت ياشدا اولماز، عدالتي درک اتمک، ياشا باخماز.

32:10  اونا گؤره ده ديئرم: منه قولاق آسين. قويون من ده بئلدئيئمي ديئم.

32:11  باخين، سئز دانيشارکن، من گؤزله‌دئم، نه دئيه‌جيئزي آختارارکن، من سئزئن دلئلرئنئزه قولاق آسديم.

32:12  سئزه چوخ دا دئقّت اتدئم، لاکئن سئزدن هچ بئرئنئز اَيّوبون سهو دانيشديغيني ثوبوت اتمه‌دئنئز، اونون سؤزلرئنه جاواب ورمه‌دئنئز.

32:13  دِمه‌يئن: حئکمت تاپميشيق، اونو ووران ائنسان يوخ، تاري‌دير.

32:14  اَيّوب سؤزلرئني منئم ضئدّئمه دوزمه‌يئب، من ده سئزئن سؤزلرئنئزله اونا جاواب وِرميه‌جيم.

32:15  اونلار آرتيق حيران‌ديرلار، جاوابسيز قاليبلار، دِميه بئر سؤزلري ده يوخدور.

32:16  ائندي کي، اونلار ساکئتدئرلر، ائندي کي، آرتيق جاوابسيز قاليبلار، من مگر گؤزله‌مه‌لي‌يَم؟!

32:17  من ده جاوابيمي وره‌جيم، من ده بئلدئيئمي گؤرسده‌جيم.

32:18  چونکي ائچئم سؤزله دولودور؛ ائچئمده‌کي روح منی سيخير.

32:19  آز قالير باغريم، آچيلماميش شراب کئمي‌، تزه تولوقلار کئمي چاتلاسين.

32:20  قوي دانيشيم، اؤزومو راحاتلاييم؛ قوي آغيز آچيب جاواب ورئم.

32:21  هچ کئمئن طرفئني توتماياجاغام، هچ کئمه ده يالتاقليق اتميه‌جيم.

32:22  چونکي يالتاقبازليغي بئلَن ديئلم، بئلسَيدئم، يارادانيم حياتيمي بئر آندا باشا گتئرَردي!

Chapter 33

33:1  ائندي اَيّوب، ددئيئمي اشئت، بوتون سؤزلرئمه قولاق آس.

33:2  باخ، آغزيمي آچيرام؛ آغزيمدا اولان دئلئم دانيشير.

33:3  سؤزلرئم اوره‌يئمئن صداقتئندن چيخير؛ دوداقلاريم دا معرئفتي بي‌رئيا ديئر.

33:4  تارينين روحو منی ياراديب، قادئري-موطلقئن نفسي منه حيات ورئب.

33:5  اگر اَلئندن گلئر، منه جاواب ور؛ قالخ و سؤزلرئني قاباغيمدا سيرايا دوز.

33:6  باخ، تارينين نظرئنده من ده سنئن کئمئيَم؛ من ده پالچيقدان يارانميشام.

33:7  دهشتئم سني قورخويا سالماسين؛ بو هوجوموم دا سنه آغير گلمه‌سئن.

33:8  حقئقتن، سَسئن حله قولاقلاريمدادير و سؤزونون سَسئني اشئتمئشم:

33:9  «پاکام، تقصئرسئزم، تمئزم، منده هچ بئر خاطا يوخدور.

33:10  باخ، او منئم ضئدّئمه بهانه آختارير، منی اؤزونه دوشمن سايير.

33:11  آياقلاريما کونده وورور، بوتون يوللاريما گؤز قويور.»

33:12  باخ، قوي سنه ديئم: سن بو باره‌ده حاقلي ديئلسن، چونکي تاري ائنساندان داها بؤيوکدور.

33:13  نه اوچون اوندان شئکايت ادئب ديئرسن کي، او، ائنسانين هچ بئر سؤزونه جاواب ورمز؟

33:14  چونکي تاري دانيشير؛ بو يوللا، او يوللا، حتّا اگر ائنسان اونو آنلاماسا دا.

33:15  يوخودا، گجه رؤياسيندا، ائنسانلاري آغير يوخو باساندا، ياتاق اوستونده يوخو ائچئنده اولاندا،

33:16  ائنسانلارين قولاغيني او زامان آچير، اونلاري تأدئبي ائله مؤهورله‌يئر کي،

33:17  ائنساني عملئندن دؤنده‌رسئن، اونو تکَبّوردن اوزاق اتسئن.

33:18  جانيني قويودان قورتارسين، حياتيني اؤلولر دئيارينا دوشمکدن ساخلاسين.

33:19  ائنسان ياتاغيندا دردله، سوموکلرئني کَسئلمه‌يَن سيزيلتي‌لارلا تنبه ادئر.

33:20  بله کي، حياتي يمکدن چکئنئر، جاني لذئذ يمکدن ائيره‌نئر.

33:21  اَتي تؤکولور، گؤرونمَز حالا دوشور، و گؤرونمه‌يَن سوموکلري اوزه چيخير.

33:22  جاني قويويا، حياتي دا اؤلوم گتئرنلره ياخينلاشير.

33:23  اگر اونون اوچون مئن مَله‌يئن ائچئندن بئر مَلَک وار کي، اونا شفئع اولسون، اونا دوغرو اولاني دسئن،

33:24  او زامان تاري اونا رحم ادئب دئير: اونو قويويا دوشمکدن قورتار؛ اونون اوچون بئر فئدئيه تاپميشام.

33:25  او زامان بدني اوشاق بدني کئمي تزه‌له‌نَر؛ جاوانليق گونلرئنه قاييدار.

33:26  تارييا دوعا اِدَر، و اونون نظرئنده مقبول اولار. اوزونو شادليقلا گؤرَر، صالحلئيئني ده ائنسانا گری وِرَر.

33:27  او آدام ائنسانلار حوضوروندا اوخويوب دئير: گوناه اتمئشدئم، دوزو اَيري اتمئشدئم، لاکئن او، لايئق اولدوغوم جزاني منه ورمه‌دي.

33:28  جانيمي قويويا دوشمکدن قورتاردي، و حياتيم نورو گؤره‌جکدئر.

33:29  باخ، تاري بونلارين هاميسيني ائنسانا ادئر، ائکي دفه، حتّا اوچ دفه-

33:30  اله کي، اونون جانيني قويويا دوشمکدن قورتارسين، و حياتين نورو اونا ساچسين.

33:31  قولاق آس، اَيّوب. سؤزومو اشئت؛ ساکئت اول کي، دانيشيم.

33:32  اگر دِمَيه بئر سؤزون وار، منه جاواب ور؛ دانيش، چونکي سني حاقلي چيخارتماق ائسته‌يئرم.

33:33  آمّا اگر سؤزون يوخوندور، اوندا منه قولاق آس؛ ساکئت اول کي، سنه حئکمت اؤيره‌دئم."

Chapter 34

34:1  اِلئهو سؤزونه داوام ورئب ددی:

34:2  "سئز حئکمتلي کئشئلر، سؤزلرئمه قولاق آسين. سئز عارئف آداملار، منی اشئدئن.

34:3  چونکي نجه داماق، خؤره‌يئن داديني دادار، قولاق دا سؤزلري اله دادار.

34:4  گلئن، اؤزوموزه دوغرو اولاني سِچَک، گلئن، آراميزدا ياخشي اولاني بئلک.

34:5  چونکي اَيّوب ديئر: من صالح بئر آدامام، لاکئن تاري حاقّيمي اَلئمدن آليب؛

34:6  مگر حاقّيم باره‌ده يالان دانيشمالي‌يام؟ تقصئرسئز اولدوغوم حالدا، منه ووردوغو اوخ ياراسي شفاسيزدير.

34:7  اَيّوب کئمي کئم وار کي، کئنايه‌ني سو کئمي ائچسئن؟

34:8  فساد ادنلرله يولداشليق ادئر، شرارت ادنلرله آياق اولور.

34:9  چونکي ديئر: ائنسانا تاريني راضي اتمه‌يئن فايداسي يوخدور.

34:10  بونا گؤره، ای عاغيل صاحئبلري، منه قولاق آسين. حاشا کي، تاري پئسلئک اتسئن، حاشا کي، قادئري-موطلق حاقسيزليق اتسئن.

34:11  چونکي او، هر کَسئن عملئنئن عوضئني ورئر قازانديغيني باشينا گتئرئر.

34:12  دوغرودان دا کي، تاري پئسلئک اتمز، قادئري-موطلق عدالتي يولوندان چيخارتماز.

34:13  دونياني اونا کئم تسلئم اتدی؟ بوتون ير اوزونه اونو کئم تعيئن اِله‌دي؟

34:14  اگر قصدي بو اولسايدي، اگر روح و نفسئني اؤزونه گری چکسَيدي،

34:15  بئر آندا بوتون بشر يوخ اولاردي، ائنسان تورپاغا قاييداردي.

34:16  اگر آنلاغين وار، بونو اشئت؛ دِدئيئمه بئر قولاق آس.

34:17  مگر عدالتدن نئفرت ادن آدام سلطنت اده بئلر؟ مگر صالح و قادئر اولاني محکوم اده‌جکسئنئز؟

34:18  اونو کي، پادشاهلارا ديئر: سئز دَيَرسئزسئنئز، و آغالارا: سئز شَرورسونوز.

34:19  اونو کي، ريئسلردن طرفدارليق اتمز، وارليني فاغيردان اوستون توتماز، چونکي اونلارين هاميسي اونون اَللرئنئن ائشي‌دئر.

34:20  بئر آن ائچئنده اؤلورلر، گجه‌نئن ياريسيندا؛ تئتره‌يئب اؤلورلر؛ گوجلولر بله، اَل دَيمه‌مئش آرادان گؤتورولورلر.

34:21  تاري گؤزلرئني ائنسانلارين يولوندان چکمئر؛ آتديقلاري هر قدمي گؤرور.

34:22  اله قارانليق يوخدور، اله ظولمت يوخدور کي، شرارت ادنلر اورادا گئزلَنه بئلسئنلر.

34:23  تارينين احتئياجي يوخدور کي، ائنساني ائمتاحان اتسئن و موحاکئمه اتمک اوچون اونو حوضورونا گتئرسئن.

34:24  تفتئش اتمه‌دن، گوجلو ائنسانلاري قيرير، يرلرئنه اؤزگه آداملاري قويور.

34:25  چونکي اونلارين ائشلرئني بئلئر، بئر گجه اونلاري ييخير، اونلار اَزئلئرلر.

34:26  پئسلئکلري اوزوندن اونلاري اله تنبه ادئر کي، هامي گؤره بئلسئن.

34:27  چونکي اونا تابع اولماقدان دؤندولر، يوللارينين هچ بئرئني سايماديلار.

34:28  اله کي، يوخسولون فريادي اونون حوضورونا چاتدي، فاغيرلارين فرياديني اشئتدي.

34:29  آمّا اگر تاري ساکئت قالسا، کئم اونو محکوم اده بئلر؟ اگر او، اوزونو گئزلَتسه، کئم اونو گؤره بئلر، او هم بئر مئلّت، هم ده بئر نفرئن اوستونده‌دئر.

34:30  اله کي، دئنسئز آدام سلطنت اتمه‌سئن، خالقا تله قورماسين.

34:31  مگر بئري تارييا دئيه بئلئب کي، جزامي چکدئم، داها پئسلئک اتمه‌رم؟

34:32  گؤرمه‌دئيئمي سن منه گؤرسد؛ حاقسيزليق اتمئش اولسام دا، بئر داها اتمه‌رم.

34:33  اونو آتديغين حالدا، مگر سنه کِفئن ائسته‌يَن عوضي وِرَر؟ چونکي من يوخ، سن گرک سچه‌سن. اونا گؤره ده بئلدئيئني منه اعلان ات.

34:34  عاغيل صاحئبلري، منی اشئدن حئکمتلي آدام منه دئيه‌جک؛

34:35  اَيّوب عاوام-عاوام دا‌نيشير، سؤزلرئنئن معناسي يوخدور.

34:36  پئس آدام کئمي جاواب وردئيي اوچون، قوي اَيّوب، آخيراجاق ائمتاحان ادئلسئن.

34:37  چونکي گوناهينا عوصيان دا آرتيرير، آراميزدا اَل چاليب تاريني رئشخند ادئر، تارينين ضئدّئنه دانيشديقجا دانيشير."

Chapter 35

35:1  اِلئهو سؤزونه داوام ورئب ددي:

35:2  "آيا بونو ائنصاف ساييرسان؟ ديئرسن: من تاريدان داها چوخ صالحم؟

35:3  هم ده ديئرسن: بونون منه نه فايداسي اولاجاق؟ گوناه اتمه‌‌سم، نه قازانجيم اولاجاق؟

35:4  من سنه جاواب وره‌رم، هم سنه، هم ده دوستلارينا.

35:5  گؤيلره باخ و گؤر؛ نظر سال باشينين اوستونده‌کي بولودلارا.

35:6  اگر گوناه اده‌سن، بونون تارييا نه زئياني دَيَر؟ اگر تقصئرلرئن چوخالا، اونا نه اده‌جک؟

35:7  اگر صالح اولاسان، اونا نه ورئرسن؟ يا دا اَلئندن نه‌يي آليب گؤتورور؟

35:8  شرارتئن آنجاق سنئن کئمي ائنسانلارا زئيان وورور؛ صالحلئيئن ده ائنسان اؤولادي اوچوندور.

35:9  ائنسانلار ظولمون چوخلوغوندان فرياد ادئرلر؛ گوجلولرئن اَلئندن کؤمک اوچون باغيريرلار.

35:10  آمّا دئيَن يوخدور کي، «منی يارادان تاري بس هاني، هاني بئزه گجه‌لر نغمه‌لر اوخوتدوران؟»

35:11  او بئزه ير اوزونون حيوانلاريندان داها چوخ اؤيره‌دئر، بئزه گؤيده‌کي قوشلاردان داها چوخ حئکمت ورئر.

35:12  اورادا اونلار فرياد ادئرلر، لاکئن تاري پئس آداملارين تکَبّورو اوزوندن جاواب ورمئر.

35:13  اصلئنده تاري باطئل فريادا قولاق وِرمَز، قادئري-موطلق اونا اهمئيّت وِرمَز ده.

35:14  بس نه قدر آز سني اِشئدَر کي، اونو «گؤرمورم» ديئرسن؛ داعوان اونون حوضوروندادير، اونو گرک گؤزلَيه‌سن.

35:15  ائندي کي، اونون قضبي تنبه اتمئر، تقصئرئن چوخلوغونا دا باخمير،

35:16  اَيّوب آغزيني بوش يره يورور، عاوام-عاوام دانيشديقجا دانيشير."

Chapter 36

36:1  اِلئهو سؤزونه داوام ورئب ددي:

36:2  "بئر آز داها منه دؤز، سنه گؤرسده‌جيم کي، تاري باره‌ده ديئله‌جک چوخ سؤز وار.

36:3  گِنئش معلومات ييغاجاغام، يارادانيما حاق وره‌جيم.

36:4  آرخايين اول کي، سؤزلرئم يالان ديئل؛ سنئن يانيندا دايانان معرئفتده کامئل بئر آدامدير.

36:5  باخ، تاري گوجلودور، لاکئن هچ کسي خور گؤرمز. عاغيلين قووّتئنده گوجلودور.

36:6  پئس آداملاري ياشاتماز، آمّا فاغيرلارين حاقّيني وِرَر.

36:7  صالح آدامدان گؤزونو چکمز، اونو پادشاهلارلا تختده اوتوردار، ابده کئمي اوجالار.

36:8  اگر زنجئرله‌نئب، بدبختلئک ائپلرئنه توتولموش اولسالار،

36:9  او زامان اونلارا عمل‌لرئني و تقصئرلرئني بئلدئرَر، بئلدئرَر کي، تکَبّورلو رفتار ادئبلر.

36:10  قولاقلاريني تأدئبه آچار، پئسلئکدن دؤنمه‌لرئني امر اِدَر.

36:11  اگر قولاق آسالار و اونا خئدمت اده‌لر، گونلرئني خوشبختلئکده، ائللرئني ده ياخشيليقدا ياشارلار.

36:12  آمّا اگر قولاق آسماسالار، قيلينجلا محو اولاجاقلار، و معرئفتسئز اؤله‌جکلر.

36:13  تاريسيزلار اورَکلرئنده کئن ساخلاييرلار؛ اونلاري باغلاديغي زامان دا کؤمک اوچون باغيرميرلار.

36:14  جاوانليقلاريندا اؤلوب گِدَرلر، و حياتلاري فاسئقلر آراسيندا محو اولار.

36:15  ذلئل‌لري ذلئللئکلرئندن قورتارار، دارليق زامانيندا قولاقلاريني آچار.

36:16  بلی، سني دارليغين ائچئندن چيخاردار؛ گِنئش بئر يره، ياغلي يمکلرله بَزَنمئش سوفره‌يه چيخاردار.

36:17  آمّا سن شر آدامين داعواسي ائله دولوبسان، حؤکم و عدالت سني اسئر ادئب.

36:18  دئقّتلي اول کي، قضب سني لاغ ادن بئر آداما دؤنده‌رمه‌سئن، فئدئيه‌نئن بؤيوکلويو ده سني آزديرماسين.

36:19  مگر فريادين و يا قووّتئنئن بوتون گوجو سني دارليقدان قورتارار؟

36:20  او گجه‌يه آرزو چکمه کي، خالقلار يرلرئنده محو اولورلار.

36:21  دئقّتلي اول کي، شرارته دؤنميه‌سن؛ چونکي سن بونو ذلئل اولماقدان داها چوخ سچئبسن.

36:22  باخ، تاري اؤز قووّتئنده اوجالير. اونون کئمي موعلّئم کئم وار؟

36:23  اونون يولونو کئم اونا امر ادئب؟ کئم اونا «حاقسيزليق ادئبسن» دئيه بئلر؟

36:24  خاطيرلا کي، اونون ائشئني تعرئفليه‌سن؛ ائنسانلارين نغمه‌لرله اوخودوغو ائشيني مدح اتمه‌لي‌سن.

36:25  بوتون خالق اونو گؤروب، هامي بو ائشلره اوزاقدان باخير.

36:26  دوغرودان دا تاري بؤيوکدور، اونو تانيميريق؛ ائللرئنئن ساييني آراشديرماق اولماز.

36:27  سو دامجيلاريني يوخاري چکر، بوخاريندان ياغيش ياغديرار.

36:28  بو ياغيشلار بولودلاردان تؤکولور، آداملارين باشينا بوللوقلا سَپئلئر.

36:29  بولودلارين نجه ياييلماسيني، اونون چاديرينين گورولتوسونو کئم آنلايا بئلر؟

36:30  باخ، اطرافيندا شئمشَکلرئني چاخديرير، دهنزئن دئبئني دولدورور.

36:31  چونکي خالقلارا بونلارلا حؤکم اِدَر؛ يئيه‌جکلرئني بوللوقلا اونلارا وِرَر.

36:32  اَللرئني شئمشَکله اؤرتَر، و اونا امر اِدَر کي، هدفه دَيسئن.

36:33  گورولتوسو طوفانين گله‌جيئندن خبر ورئر، حتّا مال-حيوانلارا دا اونون ياخينلاشماسيني بئلدئرئر.

Chapter 37

37:1  بونا دا اوره‌يئم چيرپينير، يرئندن اوينايير.

37:2  اشئدئن! گورولده‌ين سَسئني، آغزيندان چيخان هارايي اشئدئن.

37:3  شئمشه‌يئني بوتون گؤيون آلتينا سالير، يرئن هر طرفئنه گؤنده‌رئر.

37:4  داليسيجا نعره چکئر؛ عظمتلي سَسي ائله گورولدايير. سَسي اشئدئلَنده ده شئمشه‌يئنئن قاباغيني آلمير.

37:5  تاري سَسي ائله عجئب بئر شکئلده گورولدايير؛ آنلايا بئلمه‌دئيئمئز بؤيوک ائشلر گؤرور.

37:6  قارا ديئر: يره ياغ! ياغيشا و شئدّتلي ياغان ياغيشا ديئر: شئدّتلي تؤکول!

37:7  هرکسئن اَلئني ائشدن ساخلايير، اله کي، ياراتديغي بوتون ائنسانلار اونون ائشئني بئلسئنلر.

37:8  حيوانلار يووالارينا چکئلئرلر؛ اؤز يرلرئنده قاليرلار.

37:9  اوتاغيندان فيرلانان يل گلئر، داغيلان يل‌لرئندن ده سويوق.

37:10  تارينين نفسي سولاري دوندورور گِنئش سولار بوز باغلاييرلار.

37:11  بولودلاري نَمله يوکله‌يئر، شئمشه‌يئني اونلارين ائچئندن يايير.

37:12  اونون رهبرلئيي ائله دؤنوب فيرلانيرلار، اله کي، ير اوزونده اونون امر اتدئکلرئني يرئنه يتئرسئنلر.

37:13  ائستر تنبه اوچون، ائستر دئياري اوچون، ائستر سِوگئسي اوچون بونون باش ورمه‌سئنه باعئث اولور.

37:14  بونو اشئت، اَيّوب: دايان و تارينين عجايئب ائشلرئني بئر دوشون.

37:15  آيا بئلئرسن کي، تاري بولودلارينا نجه نئظام قويور، شئمشَکدن نجه اود چيخاردير؟

37:16  آيا بولودلارين تارازليغيني، معرئفتده کامئل اولانين عجايئب ائشلرئني بئلئرسن؟

37:17  جنوب يلي، دئياري ساکئت ادن واخت، سن کي، ائستئدن پالتاريندا حالدان گدئرسن،

37:18  آيا سن ده اونون کئمي گؤي قوبّه‌سئني تؤکمه بورونج آيناسي کئمي سَره بئلئرسن؟

37:19  دِه بئزه اونا نه دئيَک؛ چونکي قارانليق سببئندن سؤزوموزو سيرايا دوزه بئلمئرئک.

37:20  آيا منئم دانيشماق ائستَمه‌يئم گرک اونا خبر ورئلسئن؟ مگر اولار کي، ائنسان اودولماغيني ائسته‌سئن؟

37:21  کولَک قورتاراندا، گؤيو تمئزله‌يَنده، گؤيده پارلايان ائشيغا هچ کئم باخا بئلمز.

37:22  شئمالدان قيزيل شؤوکتي ائله گلئر؛ تاري هيبتلي عظمتئنده گلئر.

37:23  بئز قادئري-موطلقي تاپا بئلمه‌رئک؛ قودرت و عدالتده او، بؤيوکدور. صداقتئنئن چوخلوغوندا او، هچ حاقسيزليق اتمز.

37:24  اونا گؤره ده، ائنسانلار اوندان قورخورلار، او، اورَکلرئنده حئکمتلي اولانلارا دا باخماز."

Chapter 38

38:1  او زامان رب فيرلانان يل ائچئندن اَيّوبا جاواب ورئب ددی:

38:2  "بو کئمدئر کي، معرئفتسئز سؤزلرله مشورتي قارالدير؟

38:3  ائندي کئشي کئمي بِلئني باغلا؛ سندن سوروشاجاغام، سن ده منه جاواب وره‌جکسن.

38:4  يرئن بونؤوره‌سئني من قويارکَن، سن هارادايدين؟ دِه منه، اگر آنلاغين وار.

38:5  ائندي کي، بئلئرسن، دِه گؤروم اونون اؤلچوسونو کئم قويدو؟ يا دا اؤلچو خطّئني اونون اوستونه کئم چکدی؟

38:6  پايالاري نه‌يئن اوستونه قويولدو؟ کونج داشيني کئم قويدو؟

38:7  او زامان سحر اولدوزلاري بئرلئکده اوخويوردولار و تارينين بوتون اؤولادلاري شادليقدان هاراي چکئردئلر.

38:8  دهنز بطندن چيخيب فيشقيرارکَن، اونو قاپيلار آراسيندا کئم باغلادي؟

38:9  او زامان کي، بولودلاري اونا پالتار اتدئم، اونو قالين قارانليقدا قونداق اتدئم؟

38:10  او زامان کي، سرحدئني اونا چکدئم، قاپيلاريني و چفته‌لرئني قويدوم؟

38:11  او زامان کي، ددئم: بورايا قدر گله‌جکسن، آرتيق يوخ، و سنئن مغرور شپه‌لرئن بورادا داياناجاق؟

38:12  عؤمرونده اولوب سحره امر اده‌سن شَفَقه يرئني گؤرسده‌سن؟

38:13  بله کي، ير اوزونو اوجلاريندان توتسون، شر آداملاري اوستوندن سئلکئب آتسين؟

38:14  اونون شکئلي دَيئشئر، مؤهور وورولاندا پالچيقدا عکسي قالان کئمي، پالتارداکي قيريشلار کئمي گؤزه گؤرونور.

38:15  پئس آداملارين ائشيغي باتيريلار، قالديرديقلاري قوللاري سينار.

38:16  هچ اولوب دهنزئن منبعلرئنه بئر گده‌سن؟ درئنلرئن دئبئنده بئر گَزه‌سن؟

38:17  اولوب اؤلوم قاپيلاري سنه گؤرسه‌دئلسئن؟ ظولمت کؤلگه‌سئنئن دروازالاريني گؤروبسن؟

38:18  دونيانين گِنئشلئيئني آنلاييبسان؟ دِه گؤروم، اگر بوتون بونلاري بئلئرسن.

38:19  ائشيق مسکنئنه گدن يول هارادادير؟ قارانليغين اوتوردوغو ير هارادادير کي،

38:20  آليب اونلاري يرلرئنه آپاراسان؟ مگر اِولرئنئن يوللاريني بئلئرسن؟

38:21  البتّه کي، بئلئرسن، چونکي او زامان دوغولموشدون! سن چوخ ائل‌لر ياشاييبسان!

38:22  هچ اولوب قارين آنبارلارينا بئر گئره‌سن؟ دولونون آنبارلاريني بئر گؤره‌سن؟

38:23  من اونلاري دارليق زاماني اوچون، جنگ و موحارئبه گونلري اوچون ساخلاييرام.

38:24  هانسي يوللا ائشيق ياييلار؟ شرق يلئنئن اَسدئيي ير هارادادير؟

38:25  کئم سِل‌لر اوچون آرخ، ائلديريم اوچون يول آچدي کي،

38:26  آدام اولمايان دئياري، ائنسان ياشامايان چؤللري سولاسين؟

38:27  صحرالار-بئيابانلار دويونجا سو ائچسئن، و يردن ياشيل اوت گؤيَرتسئن؟

38:28  آيا ياغيشين آتاسي وار؟ شِح دامجيلاريني کئم ياراتدي؟

38:29  بوز کئمئن بطنئندن چيخيب؟ گؤيدن دوشَن شاختاني کئم دوغوب؟

38:30  سولار نه زامان داش کئمي بَرک اولور؟ درئنلرئن اوزو نه زامان دونور؟

38:31  آيا ثورَيّا اولدوزلاريني زنجئرلرله باغلايا بئلرسن؟ جبّارين باغلاريني آچا بئلرسن؟

38:32  آيا هر بورجو اؤز واختيندا چيخاردا بئلرسن؟ و يا دوبّي-اکبري اوغوللاري ائله بئرلئکده هئدايت اده بئلرسن؟

38:33  آيا گؤيلرئن قانونلاريني بئلئرسن؟ ير اوزونه اولارين حاکئمئيّتئني قورا بئلرسن؟

38:34  آيا سَسئني بولودلارا اوجالادا بئلرسن، اله کي، سو سِلي سني بوروسون؟

38:35  آيا شئمشَکلري گؤندره بئلرسن، اله کي، گدئب سنه دسئنلر: باخ، بوراداييق؟

38:36  اوره‌‌يه کئم حئکمت قويدو؟ و يا ذِهنه کئم آنلاق وردی؟

38:37  کئم بولودلاري حئکمتله سايا بئلر؟ گؤيلرئن کوپلرئني کئم بوشالدا بئلر؟

38:38  او زامان کي، تورپاق قورو پالچيق کئمي بَرکله‌يئر. و کَسَکلر بئربئرئنه ياپيشير؟

38:39  آيا دئشي شئر اوچون شئکاري سن اوولاييرسان و يا جاوان آصلانلارين آجليقلاريني سن دويورورسان،

38:40  او زامان کي، يووالاريندا اوتورورلار، و يا مِشه‌لئکده کمئنده ياتيرلار؟

38:41  قارغايا يِمه‌يئني کئم حاضيرلايير، او زامان کي، بالالاري تارينين درگاهينا باغيريرلار، و يمکلري اولماديغينا گؤره آوارا گَزئرلر؟

Chapter 39

39:1  آيا داغ کچي‌لرئنئن نه واخت دوغدوغونو بئلئرسن؟ ماراللارين بالالاريني دوغدوغونا باخيبسان؟

39:2  آيا اونلارين بويلو اولان آيلاريني سايا بئلئرسن؟ دوغاجاق واختلاريني دا بئلئرسن؟

39:3  دئزه دوشوب بالالاريني دوغارلار؛ آغري‌لاردان قورتارار.

39:4  بالالاري چؤلده بؤيويوب گوج آلار، گِدَر، گری قاييتماز.

39:5  چؤل اِشّيئني کئم آزاد بوراخدي؟ وحشي اِشّه‌يئن باغلاريني کئم آچدي؟

39:6  اونا چؤل‌لري مسکن من وردئم، شور چؤللري اونا يورد اتدئم.

39:7  شهرئن قالاباليغينا گولر، ناخيرچينين دا هاي-کويونو اشئتمَز.

39:8  گَزدئيي تپه‌لر اونون اوتلاغي‌دير. هر جور ياشيل گؤيَرتئني آختارار.

39:9  آيا چؤل اؤکوزو راضي اولار کي، سنه ائشله‌سئن؟ آيا گجه‌ني سنئن آخوروندا قالار؟

39:10  آيا جوت سورمک اوچون اونو جوته قوشا بئلرسن؟ آيا سنئن دالينجا دره‌لرده شيريم آچا بئلر؟

39:11  آيا اونون حدسئز گوجونه بِل باغلايا بئلرسن؟ اونا آغير ائش گؤردوره بئلرسن؟

39:12  آيا اونا اعتئبار اده بئلرسن کي، اَکئنئنئن محصولونو داشيسين، اونو خرمنه ييغسين؟

39:13  دَوه قوشو قانادلاريني شادليقلا چيرپار، لاکئن اونو لِيله‌يئن قانادي و پرلري ائله موقايئسه اتمک اولماز.

39:14  يرده يومورتالايير، اونلاري توز-تورپاق اوستونده قيزديرير.

39:15  ياديندان چيخاردير کي، بئر آياق اونلاري اَزه بئلر، چؤل حيوانلارينين آياغي آلتيندا قالار.

39:16  بالالاري ائله قَسوَتله رفتار اِدَر، اِله بئل کي، اؤزونونکو ديئل‌لر. چکدئيي زحمتئن بوشا چيخماسيندان قورخماز.

39:17  چونکي تاري اونا حئکمت ورمه‌يئب، آنلاقدان دا اونا پاي ورمه‌يئب.

39:18  آمّا گئنه ده قاچماق اوچون قاناد آچاندا هم آتا، هم ده آتلي‌يا گولر.

39:19  آيا آتا، گوجو سن ورئرسن؟ بوينونا دا يالالي قويان سنسن؟

39:20  آيا اونو چَيئرتکه کئمي سيچرادان سنسن؟ اونون شؤوکتلي کئشنَمه‌سي سَهملي‌دئر.

39:21  آياغينين ديرناغيني دره‌ده يره چيرپار، قووّتئندن کِف اِدَر، سئلاحلي‌لارين قاباغينا چيخار.

39:22  قورخويا گولر، هچ بئر شيدن قورخماز، قيلينج قاباغيندان دا دؤنمَز.

39:23  اونون اوستوندن اوخ، پاريلدايان نئزه و مئزراق شئمشَک کئمي کِچَر.

39:24  هيجان و قضبله يري-يوردو قاپار؛ کَره‌نايين سَسي گلدئکده يرئندن دئک آتيلار.

39:25  کَره‌ناي چالينان واخت "هئيّا" ديئب کئشنه‌يَر، موحارئبه‌نئن ائيسئني، سرکرده‌لرئن قيشقيرتيسيني، دؤيوشون نعره‌سئني اوزاقدان حئس اِدَر.

39:26  مگر قيرغي سنئن حئکمتئنله اوچور، قانادلاريني جنوب طرفئنه آچير؟

39:27  مگر قارتال سنئن امرلرئنله گؤيه قالخير، يوواسيني اوجالاردا قورور؟

39:28  قايادا ياشايار، قايانين اوجوندا، قايانين چاتلاقلاريندا مسکن توتار.

39:29  شئکاريني اورادان آختارار، گؤزلري اونو اوزاقدان گؤرَر.

39:30  بالالاري قان سومورَر؛ لِشلر هارادا اولسا، او دا اورادادير.

Chapter 40

40:1  سونرا رب اَيّوبا ددی:

40:2  "مگر تنبهه لايئق اولان آدام قادئري-موطلقله موباحئثه اده بئلر؟ قوي بونا تاريني مذمّت ادن جاواب ورسئن."

40:3  او زامان اَيّوب ربّه جاواب ورئب ددی:

40:4  "باخ، من ذلئل بئر آدامام، سنه نه جاواب ورئم؟ آغزيمي اَلئمله توتموشام.

40:5  بئر دفه دانيشديم، داها جاوابيم يوخدور، آرتيق ائکئنجي دفه نه دانيشيم."

40:6  او زامان رب فيرلانان يِلئن ائچئندن اَيّوبا جاواب ورئب ددی:

40:7  "ائندي کئشي کئمي بِلئني باغلا؛ سندن سوروشاجاغام، سن ده منه جاواب وره‌جکسن.

40:8  آيا عدالتئمي هچ ساياجاقسان؟ منی محکوم اده جکسن کي، اؤزونو حاقلي چيخارداسان؟

40:9  آيا تارينين قولو کئمي قولون وار؟ آيا اونون سَسي کئمي سن ده گورولده‌يه بئلرسن؟

40:10  اگر بله‌دئر، اؤزونو شؤوکت و حئشمته بورون، حؤرمت و عظمته گِيئن.

40:11  قوي قضبئنئن آلووو ساچسين، بوتون مغرور آداملارا باخ و اونلاري آلچالت.

40:12  بوتون مغرور آداملارا باخيب، اونلاري آشاغي اِندئر. پئس آداملاري اولدوقلاري يرده تَپئيئنئن آلتينا سال.

40:13  هاميسيني بئرلئکده تورپاق آلتيندا باسدير؛ اوزلرئني گئزلي يرده کَفَنه بورو.

40:14  او زامان من اؤزوم ده قبول اده‌رم کي، سنئن صاغ اَلئن سنه نئجات وِرَر.

40:15  سنئنله بئرلئکده ياراتديغيم بِهِموتا بئر باخ، اؤکوز کئمي اوت يِيئر.

40:16  گؤر بِلئنده نه قدر گوج وار، قارين عَضَله‌لري نجه مؤحکمدئر.

40:17  قويروغونو سئدر آغاجي کئمي دئکَر، بودلارينين وَتَرلري بئربئرئنه هؤرولوب.

40:18  سوموکلري بورونج لوله‌لري کئمي‌دئر، قابيرغالاري، اله بئل، دمئر تئرلردئر.

40:19  تارينين بؤيوک عمللرئنئن باش اثري اودور، آنجاق اونو يارادان‌دير کي، قيلينجلا اونا ياخينلاشا بئلر.

40:20  تپه‌لر محصوللاريني اونا ورئرلر، چؤلون بوتون حيوانلاري يانيندا اويناشيرلار.

40:21  سو زانباقلارينين آلتيندا، قاميشليقلارلا اؤرتولو باتاقليقلاردا ياتار.

40:22  سو زانباقلاري اوستونه کؤلگه سالار، دره‌نئن سؤيودلري اونو دؤوره‌له‌ير.

40:23  چايلار قايناشسادا، او قورخماز؛ اوردون چايي بوغازينا چاتسا دا، آرخايين‌دير.

40:24  گؤزلري آچيق ائکَن کئم اونو توتا بئلر؟! کئم اونو تله‌يه ساليب بورنونو دِشه بئلر؟!

Chapter 41

41:1  آيا لئوياتاني باليق قارماغي ائله چکه بئلرسن؟ و يا دئلئني قايتانلا باغلايا بئلرسن؟

41:2  آيا بورنونا ائپ تاخا بئلرسن؟ قارماقلا چَنه‌سئني دَله بئلرسن؟

41:3  آيا سنه دفه‌لرله يالوارار؟ سنئنله يوموشاق سؤزلر دانيشار؟

41:4  آيا سنئنله عهد باغلار کي، همئشه‌لئک سنئن قولون اولسون؟

41:5  آيا اونونلا دا، بئر قوشلا اويناديغين کئمي، اوينايا بئلرسن؟ بوينونا ائپ باغلاييب اونو قيزلارين اوچون آپارا بئلرسن؟

41:6  آيا تاجئرلر اونو آليب ساتارلار؟ آرالاريندا اونو بؤلوشَرلر؟

41:7  آيا دَرئسئني چَنگلللرله، باشيني دا باليقچي نِشتَرلري ائله دولدورا بئلرسن؟

41:8  اَلئني اوستونه بئر قوي؛ نه موبارئزه‌يه دوشه‌جيئني تصوّور ات؛ اوندا بو ائشي بئر داها اِتمَزسن.

41:9  باخ، اونو توتماق ائستيه‌نئن اومئدي بوشدور؛ مگر اونون بئر گؤرونوشو آدامي ييخماز؟!

41:10  اونو اوياتماق اوچون هچ کئمده جسارت يوخدور. بس کئم منئم قاباغيمدا دورا بئلر؟

41:11  کئم منه بئر شي ورئب کي، ائندي گرک گری قايتاريم؟ گؤيون آلتيندا اولان هر شي منئمدئر.

41:12  سؤزومو کَسمه‌يئب اونون عوضولرئندن، قودرتئندن و گؤزل گؤرونوشوندن دئيه‌جيم.

41:13  اونون ائکي‌قات زئرِهئني کئم دِشه بئلر؟ ائکي چَنه‌سئنئن آراسينا کئم جئلوو تاخا بئلر؟

41:14  اوزونون قاپيلاريني کئم آچا بئلر؟ دئشلرئنئن اطرافي دهشتلي‌دئر.

41:15  کوره‌يي قوبّه‌لي قالخانلارا اوخشايير، بئربئرئنه مؤحکم باغلانيب.

41:16  بئربئرلرئنه او قدر ياخين باغلانيبلار کي، آرالارينا هاوا بله کِچمَز.

41:17  بئربئرئنه ياپيشيقديرلار، بئربئرلرئنه اله ياپيشيبلار کي، اصلا آيريلمازلار.

41:18  آسقيراندا اود سيچرايير، گؤزلري سحر ائشيغي کئمي پار-پار يانير.

41:19  آغزيندان آلوولو مشعل‌لر چيخير؛ اود قورلاري سيچرايير.

41:20  بورنونون دِشئکلرئندن توستو چيخير، اِله بئل قازان قاينايير، قاميش يانير.

41:21  نفسئندن کؤمورلر کؤزه‌لئر، آغزيندان آلوو چيخير.

41:22  قووّت اونون بوينوندا ساکئندئر، دهشت ده قاباغيندا اوينايير.

41:23  اَتئنئن قاتلاري بئربئرئنه ياپيشيب، اوستونه اله بئتئشئب کي، اصلا تَرپَنمَز.

41:24  اوره‌يي داش کئمي بَرکدئر، دَيئرمانين آلت داشي کئمي بَرکدئر.

41:25  قالخماغيندان گوجلولر تئتره‌ير؛ دهشتدن حالدان گِدَرلر.

41:26  قيلينج اونا يِتئشسه ده، فايداسيزدير، نئزه، تئر، و مئزراق دا.

41:27  دمئري سامان چؤپو، بورونجو ده چوروموش اودون سايير.

41:28  کامان اوخو اونو قاچيردا بئلمز؛ اونا آتيلان ساپاند داشلاري سامانا دؤنَر.

41:29  دَيَنَکلري کولَش چؤپو سانير؛ مئزراقين ويييلتيسينا گولور.

41:30  قارنينين آلتي ائتي ساخسي پارچاسي کئمي‌دئر، پالچيق اوستوندن سورونن ائتي جيرجير کئمي ائز قويور.

41:31  درئنلئکلري بئر قازان کئمي قاينادير، دهنزي عطئر کوپونه دؤنده‌رئر.

41:32  آرخاسيندا پارلاق بئر ائز بوراخير؛ درئنلئيي ائنسان آغاران ساچا اوخشادير.

41:33  ير اوزونده تايي يوخدور، قورخوسوز بئر مخلوقدور.

41:34  هر اوجا شيي گؤرور؛ بوتون تکبّورلولره او پادشاه‌دير."

Chapter 42

42:1  او زامان اَيّوب ربّه جاواب ورئب ددی:

42:2  "بئلئرم، سن هر شيه قادئرسن، قصد اتدئکلرئنه مانع اولماق اولماز.

42:3  سوروشدون: «بو کئمدئر کي، معرئفتسئز سؤزلرله مشورتي قارالدير؟» دوغرودان دا کي، آنلاماديغيم شيلردن، آغليما سيغمايان عجايئبلردن دانيشديم.

42:4  بويوردون: «ائندي قولاق آس، دانيشاجاغام؛ سندن سوروشاجاغام، سن ده منه جاواب وره‌جکسن.»

42:5  سنئن حاقّيندا قولاقلاريملا اشئتمئشدئم، آمّا ائندي گؤزلرئم سني گؤروب.

42:6  اونا گؤره اؤزومدن زَهلَم گدئر، تورپاقدا، کولون ائچئنده تؤوبه ادئرم."

42:7  رب اَيّوبا بو سؤزلري دئيَندن سونرا، تِيمانلي اِلئفَزه ددي: "قضبئم سنئن ضئدّئنه و ائکي دوستلارينين ضئدّئنه آلوولانيب. چونکي سئز قولوم اَيّوب کئمي منئم حاقّيمدا دوغرو اولاني دِمه‌دئنئز.

42:8  ائندي اؤزونوز اوچون يدّي گاميش و يدّي قوچ آليب قولوم اَيّوبون يانينا گدئن و اؤزونوز اوچون يانديرما قوربانيني تقدئم ادئن. قولوم اَيّوب سئزئن اوچون دوعا اتسئن. من ده اونون دوعاسيني قبول ادئب، سئزئنله آخماقليغينيزا گؤره رفتار اتمه‌رم؛ چونکي سئز قولوم اَيّوب کئمي منئم حاقّيمدا دوغرو اولاني دِمه‌دئنئز."

42:9  بلجه تِيمانلي اِلئفَز، شواَخلي بئلدَد و نَعَماتلي صوفَر گدئب ربّئن اونلارا ددئکلرئني يرئنه يتئردئلر؛ و رب اَيّوبون دوعاسيني قبول اتدي.

42:10  اَيّوب دوستلاري اوچون دوعا ادندن سونرا، رب اوندان آلينديقلاريني اونا گری قايتاردي؛ رب اَيّوبا بوتون قاباکي ماليندان ائکي قات آرتيق مال- دؤولَت وردی.

42:11  اَيّوبون بوتون قارداشلاري و باجيلاري و بوتون اَوّلکي آشنالاري اونون يانينا گلئب اِوئنده اونونلا چؤرک يدئلر و اونون دردئنه شرئک اولدولار و ربّئن اونون باشينا گتئردئيي بوتون بلالاردان اؤتري اونا تسلّی وردئلر. هر بئري اونا بئر پارچا گوموش و بئر قيزيل حالقا وردی.

42:12  رب اَيّوبون آخير گونلرئني اَوّلکي گونلرئندن داها چوخ برکتلي اتدي؛ اونون ۱۴۰۰۰ قويونو، ۶۰۰۰ دَوه‌سي، ۱۰۰۰ جوت اؤکوزو، و ۱۰۰۰ دئشي اِشّه‌يي وار ائدي.

42:13  اَيّوبون يدّي اوغلو، اوچ قيزي اولدو.

42:14  بئرئنجئسئنئن آديني "يِمئما"، ائکئنجئسئنئن آديني "قِصئعا"، اوچوسونون آديني دا "قِرِن‌هَپّوک" قويدو.

42:15  بوتون اؤلکه‌ده اَيّوبون قيزلاري کئمي گؤزل آرواد هچ يوخ ائدي. آتالاري دا اونلارا قارداشلاري آراسيندا مئراث وردی.

42:16  بوندان سونرا اَيّوب ۱۴۰ ائل ياشادي و اؤولادلاريني و دؤرد نسئل اؤولادلاريني گؤردو.

42:17  اَيّوب قوجاليب عؤموردن دويموش اؤلدو.