Kapingamarangi - Job

Chapter 1

1:1  Dahi daane dono ingoo go Job, e-noho i Uz. Mee e-daumaha ang-gi God ge manawa-dahi. Mee tangada humalia, e-hagaligaliga i-daha mo nia huaidu.

1:2  Mee ana dama-daane dogohidu ge dogodolu dama-ahina.

1:3  Mee ana siibi e-hidu-mana-(7,000), ge dolu-mana-(3,000) ‘camel’, ge dahi mana-(1,000) kau, ge lima-lau-(500) ‘donkey’. Mee ana gau ngalua dogologo, gei di-maa go mee labelaa dela koia e-maluagina i-nia henua i bahi-i-dua.

1:4  Nia dama-daane Job e-hagadau haihai nadau hagamiami. Nia madagoaa digaula ma-gaa-hai nadau hagamiami, digaula e-haga-gahi-mai labelaa nadau duaahina-ahina dogodolu gi nadau hagamiami.

1:5  Nia luada o dono daiaa o-nia hagamiami, gei Job e-ala haga-luada-loo, e-hai dana tigidaumaha i ana dama huogodoo, e-haga-madammaa digaula. Mee e-haihai di mee deenei, idimaa, mee e-hagabaubau bolo holongo ana dama gu-hai-hala ang-gi God ge gu-hai-baahi gi Mee gei digaula e-de-iloo.

1:6  Dahi laangi hua, nia daangada di-langi ga-hagagila gi-mua o Dimaadua, gei Setan nogo i-baahi digaula labelaa i-di madagoaa deelaa.

1:7  Dimaadua ga-helekai gi mee, “Goe nogo hai dau-aha?” Setan ga-helekai, “Au nogo-heehee-hua i-nia gowaa huogodoo, e-haganiga henuailala.”

1:8  Dimaadua ga-heeu gi mee, “Goe gu-gidee dagu dangada hai-hegau go Job? Deai dahi dangada i-hongo henuailala e-manawa-dahi ge e-humalia be mee ai. Mee e-daumaha-mai gi-di-Au, gei mee e-hagaligaliga huoloo gi-dee-hai dana mee huaidu.”

1:9  Setan ga-heeu, “Job le e-mee di-daumaha hua igolo adu gi-di-Goe maa mee ga ono hagahumalia mai doo baahi ai?

1:10  Nia madagoaa huogodoo Goe e-benebene a-mee mo digau dono hale mo ana mee huogodoo. Gei Goe e-hagahumalia ana mee huogodoo ala e-hai, gei Goe guu-wanga gi mee nia mee e-logo, nia manu a-maa guu-logo i-lodo henua.

1:11  Malaa, dolomaa Goe gaa-daa gi-daha nia mee huogodoo mo mee, gei mee ga-hagahuaidu Goe i oo mua!”

1:12  Dimaadua ga-helekai gi Setan, “Nia mee a-maa huogodoo gu-i-lala o mogobuna, malaa, goe hudee hagahuaidu-ina tuaidina o-maa.” Malaa, Setan gaa-hana gi-daha mo Dimaadua.

1:13  Dahi laangi hua, nia dama Job ne-hai di-nadau hagamiami i-di hale di tama madua.

1:14  Tangada kae-hegau ga-lele-ia gi Job, ga-helekai, “Gimaadou nogo hagamaluu di hadagee gi-nia kau, gei nia ‘donkey’ nogo i-lodo nia geinga hoohoo-mai,

1:15  gei digau Sabea ga-lloomoi, ga-daaligi nia maa ga-gaiaa nia maa. Digaula gu-daaligi au gau ngalua huogodoo, ko-au hua modogoau dela ne-lele hagammuni belee hagi-adu gi-di-goe!”

1:16  Mee dela bolo ga-hagaodi ana helekai, gei tuai dangada hai-hegau ga-hanaga labelaa ga-helekai: “Di ila guu-daba, gu-daaligi nia siibi guu-mmade, gei digau hagaloohi-siibi huogodoo guu-mmade, gei ko-au hua modogoau dela ne-lele hagammuni belee hagi-adu gi-di-goe!”

1:17  Mee deelaa bolo ga-hagaodi ana helekai, gei tuai dangada hai-hegau ga-hanaga labelaa ga-helekai, “Nia buini-dauwa e-dolu o digau Chaldea gu-heebagi-mai gi gimaadou, guu-kae nia ‘camel’, gu-daaligi au gau ngalua huogodoo guu-mmade, ko-au hua modogoau dela ne-lele hagammuni belee hagi-adu gi-di-goe.”

1:18  Mee deelaa bolo ga-hagaodi ana helekai, gei tuai dangada hai-hegau ga-hanimoi ga-helekai labelaa, “Au dama nogo-hai di-nadau hagamiami i-di hale dau dama-daane madua,

1:19  malaa di madangi ne-gono-mai i-hongo di anggowaa gaa-ili di hale gii-hinga, gu-daaligi digaula huogodoo gii-mmade, ko-au hua modogoau dela ne-lele hagammuni belee hagi-adu gi-di-goe.”

1:20  Job gu-manawa-gee, ga-du-gi-nua ga-hahaahi ono goloo. Mee gaa-dahi dono libogo ga-haga-hinga-ia gi-hongo di gelegele.

1:21  Mee ga-helekai, “Au ne-haanau-mai, gei agu mee ai, gei au gaa-made deai agu mee ai. Dimaadua ne-gaamai gi-di-au, gei dolomeenei, Mee guu-kae nia maa gi-daha mo au. Dono ingoo gi-hagalaamua-ina!”

1:22  Ma e-aha maa nia mee huogodoo ala ne-hai, gei Job digi hai-hala i-di hagaanga nia huaidu gi God.

Chapter 2

2:1  Dahi laangi i-golo, gei nia daangada di-langi e-haga-gida mai labelaa gi-mua o Dimaadua, gei Setan i-baahi digaula.

2:2  Dimaadua ga-heeu gi mee, “Goe nogo i-hee?” Setan ga-helekai, “Au nogo heehee-hua i-nia gowaa huogodoo e-haganiga henuailala.”

2:3  Dimaadua ga-heeu gi mee, “Goe gu-modongoohia dagu dangada hai-hegau go Job? Ma tangada i henuailala e-manawa-dahi ge humalia be mee ai. Mee e-daumaha-mai gi-di-Au, gei mee e-hagaligaliga huoloo gi-dee-hai dana mee huaidu. Goe ne hai Au gii-dugu adu a-mee gi-hagahuaidu-ina gei dono hadinga humalia ai, gei Job le e-manawa-dahi hua igolo.”

2:4  Setan ga-helekai, “Tangada le e-wanga gi-daha ana mee huogodoo e-haga-dagaloaha dono mouli.

2:5  Malaa, dolomaa Goe gaa-hai a-mee gii-mmae dono huaidina, gei mee ga-hagahuaidu Goe i-mua o golomada!”

2:6  Gei Dimaadua ga-helekai gi Setan, “E-humalia, dolomeenei gei mee gu-i-lala o mogobuna, malaa, goe hudee daaligidia a-mee gii-made.”

2:7  Malaa, Setan gaa-hana gi daha mo Dimaadua, gaa-hai nia magibala gi-moholehole i-di gili Job.

2:8  Job gaa-hana gaa-noho i-baahi di hagabae geinga, ga-dahi-mai dana baahi mee loloaabi belee haluhalu ono magibala.

2:9  Di lodo o-maa ga-helekai gi mee, “Goe e-maaloo hua igolo do manawa-dahi digi hai-gee? Goe de-ga-hagahuaidu a God gii-made goe?”

2:10  Job ga-helekai, “Goe e-leelee balumee deai ono hadinga ai! Di madagoaa God ne-gaamai gi gidaua tau mee humalia, gidaua ne-hai-mee-hua gi-nia maa. Malaa, gidaua e-de-hiihai di-aha maa mee ga-gaamai gi gidaua nia haingadaa?” Malaa, nia haingadaa huogodoo aanei e-hagaduadua-iei Job, gei Job digi helekai dahi mee hai-baahi gi God.

2:11  Di madagoaa nia hoo Job dogodolu ala go Eliphaz mai di waahale Teman, mo Bildad mai di guongo Shuah, mo Zophar mai di guongo Naamah ne-longono-ginaadou bolo Job gu-duadua ang-gi deia, digaula ga-maanadu bolo ginaadou e-hula e-haga-manawa lamalia a-mee.

2:12  Di-nadau madagoaa hua ne-hula ga-gidee-ginaadou Job haga-mogowaa, gei digaula digi modongoohia-ginaadou bolo ma go mee. Di madagoaa digaula ne-modongoohia bolo ma go mee, digaula gu-manawa-gee huoloo, gu-hahaahi nadau goloo, ge guu-wanga nadau gelegele dogolia gi nadau libogo e-haga-modongoohia nadau manawa-gee.

2:13  Gaa-noho i golo i-hongo di gelegele i-baahi o mee i-nia laangi e-hidu ge hidu boo, hagalee leelee, idimaa digaula gu-modongoohia di manawa-gee o-maa gu-damanaiee.

Chapter 3

3:1  Muli mai, gei Job ga-daamada ga-hagahuaidu di laangi dela ne-haanau-ieia, ga-helekai,

3:2  “Meenei God, hagahalaua-ina di laangi dela ne-haanau-iei au. Hagahalaua-ina di boo dela ne-hagadili au!

3:3  “Meenei God, hagahalaua-ina di laangi dela ne-haanau-iei au. Hagahalaua-ina di boo dela ne-hagadili au!

3:4  Meenei God, heia di laangi deelaa la-gi-bouli dongoeho. Goe haga-de-langahia-ina di laangi deelaa. Hudee heia di maalama gii-ina di laangi deelaa.

3:5  Heia di laangi deelaa gii-hai di laangi haga-manawa-gee ge bouli dongoeho. Nia gololangi gi-duulia di maalama o-di laa.

3:6  Kaabee di boo deelaa gi-daha mo-di ngadau. Haga-de-langahia-ina, hudee daulia dalia nia laangi.

3:7  Gi-heia di boo deelaa gi ono huwa ai, gei deai dono tene no-lodo ai.

3:8  Hai gi digau hai-mogobuna gi-hagahalaua-ina di laangi deelaa, aalaa go digau ala e-iloo di benebene di manu dragon go ‘Leviathan’.

3:9  Abaaba-ina di heduu luada gi-de-maahina. Hudee wanga-ina di hagadagadagagee o-di luada gi-di boo deelaa.

3:10  Hagahalaua-ina di boo deelaa, dela go di boo ne-haanau-iei au no-lodo, idimaa, ma gu-haga-uda-mai gi-di-au nia haingadaa mo-di manawa-gee.

3:11  “Au bolo gii-made-hua i-lodo tinae o dogu dinana be gii-made-hua i dogu madagoaa ne-haanau.

3:12  Dogu dinana ne-daahi au i-hongo ono wae eiaha? Mee ne-aha dela ne-haangai au gi ono weuu?

3:13  Maa nei bolo au ne-made i-di madagoaa deelaa, gei au gu-molooloo dolomeenei,

3:14  e-kii be nia king mo nia dagi ala ne-hau nia hale nia king ala gu-mooho dolomeenei,

3:15  be e-kii be nia dama-daane di king ala ne-haa nadau hale gi-nia goolo mono silber,

3:16  be e-kii be-di tama dela ne-haanau dono mouli ai.

3:17  I lodo nia daalunga, digau huaidu gu-hagalee hai nadau huaidu, gei nia daane nogo ngalua duadua gu-hagamolooloo-hua.

3:18  Digau galabudi guu-noho labelaa i-di aumaalia, gu-hagalee longono labelaa nia wwolowwolo mo nia hagahooho o digau hagaloohi.

3:19  Digau huogodoo la i-golo, go digau ala e-iloo nia daangada mo digau ala e-de-iloo nia daangada. Nia hege la-gu-maahede gi-daha mo nadau dagi.

3:20  “Ma e-aha dela nia daangada e-hai gi-mouli i-lodo di mouli huaidu? Ma e-aha dela e-wanga di maalama gi digau ala e-manawa-gee?

3:21  Digaula e-tali-hua nadau mmade, gei di made hagalee tale ang-gi digaula. Digaula e-hiihai gi taalunga i-nia maluagina ala i-golo.

3:22  Digaula hagalee tenetene gaa-dae-loo gi di-nadau mmade gaa-danu.

3:23  God e-dugu hagammuni nadau mouli maalia, ge abaaba digaula i-nia baahi huogodoo.

3:24  I-di madagoaa miami, gei au e-manawa-gee. Au e-deemee di-ngala i dogu lodo-huaidu.

3:25  Nia mee huogodoo ala e-mmaadagu-iei au ge-hagamadagudagu e-kila-aga i dogu baahi.

3:26  Au hagalee noho i-di aumaalia, hagalee molooloo, ogu haingadaa hagalee e-odi.”

Chapter 4

4:1  Eliphaz, tangada mai Teman, ga-helekai, “Meenei Job, goe hagalee ga-manawa-gee, maa au ga-leelee-adu gi-di-goe? Au gu-deemee di-noho hua dee-muu.

4:2  Eliphaz, tangada mai Teman, ga-helekai, “Meenei Job, goe hagalee ga-manawa-gee, maa au ga-leelee-adu gi-di-goe? Au gu-deemee di-noho hua dee-muu.

4:3  Goe gu-aago au daangada dogologowaahee, gei e-hagamaaloo-aga labelaa nia lima digau ala e-paagege.

4:4  Di madagoaa tangada ne-duadua ga-bagege gaa-hinga, gei au helekai e-hagamaaloo-aga a-mee gi-duu-aga labelaa.

4:5  Dolomeenei di madagoaa ni-oou e-tale ginai nia haingadaa, gei goe gu-manawa-gee, gu-deemee di-duu maaloo gi-di hagamada.

4:6  Goe gu-daumaha ang-gi God, gei do mouli gu-madammaa huoloo, gei dehee-laa do manawa-maaloo mo do hagadagadagagee dolomeenei?

4:7  Haga-maanadu-ina malaa, ma iai tangada e-donu guu-hudu gi-daha?

4:8  Au gu-gidee nia daangada ala e-dogi nadau mee huaidu, ge e-haga-nonnono nadau huaidu gadoo be nia lii-laagau gi-lodo nia gelegele, gei digaula e-hagi nia huwa o nadau huaidu mo nadau hangahaihai huaidu.

4:9  God e-hagahuaidu digaula gi dono hagawelewele gadoo be-di madangi maaloo.

4:10  Digau huaidu e-ngoloolo nadau lee, ge wwolowwolo gadoo be nia laion, gei God ga-haga-deemuu digaula ga-hadihadi nia niha digaula.

4:11  Digaula gaa-mmade gadoo be nia laion nadau mee e-daaligi gii-made ai, ge nadau mee e-gai ai, gei nia dama digaula ga-modoho gi-daha.

4:12  “Dahi lee ne-hanimoi be-di lee haga-moolee, gei au gu-deemee di-longono hagahumalia.

4:13  Di lee deelaa la-guu-hai gadoo be-di midi hagamadagudagu-dangada dela ne-oho dogu moe.

4:14  Au gu-madagu gu-homouli ogu lodo, gei dogu huaidina hagatau gu-bolebole i dogu madagu.

4:15  Di angiangi guu-tale-mai gi ogu golomada, gei dogu gili guu-wwana i dogu madagu.

4:16  Au gu-gidee di mee dela e-duu i ogu mua, gei au e-daumada di-maa e-de-iloo-e-au be di-maa di-aha. Gei au ga-longono di lee dela e-hanimoi i-di gowaa dela e-kila-loo, e-helekai boloo:

4:17  ‘Ma iai tangada-dangada i-golo e-mee di-donu i-mua nia hadumada o God, be e-madammaa i-mua nia hadumada o Tangada dela ne-hai a-mee?

4:18  God hagalee hagadonu ana gau hai-hegau ala i-di langi, Mee guu-gida ana huaidu i-baahi ana gau di-langi.

4:19  Malaa, dehee-laa dana hai ga-hagadonu ana mee ne-hai gi ono lima mai i-nia gelegele, nia mee o-di gohu gelegele ala e-mee hua di llomi be-di bege.

4:20  Tangada e-mee di mouli luada, gaa-made i-mua di hiahi, deai tangada e-iloo-ia ai.

4:21  Nia mee huogodoo ala e-hai-mee ginai mee la-gu-hagalee, mee guu-made, gei mee digi iloo nia mee.’

Chapter 5

5:1  “Job, wolo-malaa be di-maa tangada i-golo e-longono-ia goe. Ma iai tangada di-langi i-golo e-huli ginai goe?

5:2  Di manawa-logo gaa-made iei goe, mo tee-hiihai la nia mee dadaulia, ono hadinga ai ma-gaa-hai.

5:3  Au gu-gidee bolo ma go digau boiboi ala hagalee mmaadagu i-di mee, gei au gu-limalima-hua guu-dangi ang-gi God gi-hagahuaidu-ina nia lohongo digaula.

5:4  Nia dama digaula e-noho i-lodo di haingadaa i-nia madagoaa huogodoo, idimaa, tangada e-hagamaamaa digaula i-nia gowaa hai-gabunga ai.

5:5  Digau hiigai gaa-gai nia huwa-laagau o digau ala boiboi, mono golee-laagau labelaa ala e-tomo-aga mehanga nia geinga duduia, gei-ogo digau ala e-hieinu ga-hiihai gi-nia goloo digaula.

5:6  Di huaidu la-hagalee tomo i-lodo di gelegele, ge di haingadaa la-hagalee tomo-aga i-lodo di gelegele.

5:7  Deeai! Tangada e-gaamai ono haingadaa gi-deia, gadoo be nia mada-gologolo ala e-baehabaeha-aga i-di ahi dela e-ulaula.

5:8  Maa nei bolo au kooe, au e-huli-hua gi God mo-di hagi-anga gi Mee dogu haingadaa.

5:9  Gidaua e-de-iloo nia mee haga-goboina a-Maa ala e-hai, gei ono mogobuna haga-goboina deai ono hagaodi ai.

5:10  Mee e-haga-doo dana uwa gi-hongo tenua, gei Mee e-haga-tiu nia hadagee.

5:11  E-donu, ma go God dela e-haga-duu-aga digau humalia hila gi-lala, ge e-wanga di tenetene gi digau ala e-manawa-gee.

5:12  Go Mee dela e-haga-ihala nia hagamamaanadu huaidu digau kabemee, ge e-kumi digau kabemee i-lodo nadau hegau gi-deemee di-humalia nadau hegau.

5:13  Go Mee dela e-haga-ihala nia hagamamaanadu huaidu digau kabemee, ge e-kumi digau kabemee i-lodo nadau hegau gi-deemee di-humalia nadau hegau.

5:14  Gei di maa le e-oodee, gei digaula e-haahaa nadau ala be digau i-lodo di bouli dongoeho.

5:15  Gei God e-duuli digau hagaloale gi-daha mo nadau mmade, e-duuli digaula gi-daha mo digau ala e-haga-daamaha digaula.

5:16  Mee e-wanga di hagadagadagagee gi digau hagaloale, ge e-pono nia ngudu o digau huaidu.

5:17  “E-maluagina go tangada dela e-haga-donu go God gii-donu! Hudee hagawelewele maa God Mogobuna ga-haga-donu goe gii-donu.

5:18  God e-hagahili nia moholehole ala ne-hai go Mee, ono lima e-haga-mmae goe, gei ono lima e-hagahili.

5:19  Nia madagoaa e-hagadau gi-muli, gei Mee e-benebene goe gi-daha mo-di huaidu.

5:20  Di madagoaa hiigai ma-ga-dau-mai, gei Mee e-benebene do mouli, gei i-lodo nia dauwa, gei Mee e-duuli goe gi-dee-made.

5:21  God ga-daa-mai goe gi-daha mo nia hai kai-tilikai ala e-hagahuaidu goe, gei Mee ga-benebene goe gi-daha mo-di madagoaa huaidu ma-ga-dau-mai.

5:22  Goe ga-gadagada i-di madagoaa huaidu mo hiigai, ge hagalee madagu i-nia manu lodo-geinga.

5:23  Dau hadagee ne-hagamaluu ga-deai ono hadu ai, gei nia manu lodo-geinga ga-hagalee daaligi goe.

5:24  Goe gaa-noho i-di aumaalia i-lodo do hale-laa. Do madagoaa dela gaa-mmada gi au siibi, gei goe ga-gidee bolo au siibi la-gu-benebene hagahumalia.

5:25  Goe gaa-hai au dama dogologowaahee gadoo be nia lau-geinga-tolo i-lodo di gowaa geinga-tolo.

5:26  Goe ga-mouli gaa-dae-loo gi do madagoaa e-madua, e-hai gadoo be nia ‘wheat’ lleu e-tomo-aga gaa-dae-loo gi tau-hagi.

5:27  Job, gimaadou gu-iloo di mee deenei i-lodo di waalooloo madau hai-hegau, gei di-maa e-donu, deelaa-laa, goe dolomeenei gii-donu-adu gi oo lodo bolo ma e-hai beenei.”

Chapter 6

6:1  Gei Job ga-helekai-anga,

6:2  “Maa nei bolo ogu haingadaa mo ogu lodo huaidu la-ne-pauna gi-di mee pauna mee,

6:3  e-koia e-daamaha i-nia gelegele o lodo tai. Deenei-laa, goodou hudee lodo homouli gi agu helekai balumee.

6:4  God Mogobuna gu-puu-mai au gi-di amu maalei, gei nia poisin o-di amu maalei deenei gu-modoho i-lodo dogu huaidina hagatau. God gu-hagatau gi-lala ana mee belee hai-baahi-mai gi-di-au e-hagamadagudagu au.

6:5  Di manu ‘donkey’ e-tenetene huoloo i dono gaigai ana geinga-tolo, gei di kau e-gaigai ana geinga maangoo le e-deemuu.

6:6  Gei di maa koai dela e-mee di-gai nia meegai ala ono toolo ai? Dehee di kala o-di mee kene o-di ngogo?

6:7  Au gu-hagalee e-hiihai gi-nia meegai beenei, gei au e-magi ma-gaa-gai nia maa.

6:8  “Ma e-aha dela God hagalee e-gaamai gi-di-au dagu mee dela ne-dangi-ai gi Mee? E-aha dela hagalee e-helekai-mai gi dagu dalodalo?

6:9  Mee hagalee dela hua bolo Ia ga-daaligi au gii-made!

6:10  Maa nei bolo au gu-iloo bolo Mee ga-daaligi au gii-made, gei au dela ga-tenetene huoloo, ma e-aha maa au gaa-mmae huoloo. Au hagalee e-hai-baahi gi ana mee ala gu-haga-noho belee hai.

6:11  Aahee ogu mahi ala belee mee di-mouli-iei au? Ma e-aha dela au e-mouli hua igolo, ge deai dogu hagadagadagagee ai?

6:12  E-hai behee? Au tangada hua ne-hai-mai i-di hadugalaa? Dogu huaidina la-ne-hai-hua gi-di baalanga-mmee?

6:13  Deai ogu mahi bolo gaa-mee di-haga-dagaloaha au ai. Deai di gowaa e-huli ginai au bolo e-dangi-anga i-di hagamaamaa.

6:14  “I-lodo di haingadaa beenei, gei au e-hiihai gi ogu ihoo manawa-dahi, ma e-aha maa au gu-diiagi a God be deeai.

6:15  Gei goodou go ogu ihoo hagaaloho, goodou gu-halahalau au gadoo be nia dama monowai ala e-maangoo i-di madagoaa hagalee doo di uwa.

6:16  Nia monowai lligi aalaa guu-honu i-nia ‘snow’ mono ais,

6:17  malaa, di madagoaa mahanahana, gei nia maa gu-hagalee, gei nia monowai aalaa la-guu-bagu gu-maangoo.

6:18  Digau heehee i-lodo henua gu-dee-gidee-ginaadou nia wai, digaula ga-nngalanngala-hua dagidahi ga-mmademmade-hua i-lodo di-anggowaa.

6:19  Nia buini dangada mai i Sheba mo Tema e-hula e-halahala nia wai,

6:20  gei nadau hagadagadagagee la-gu-hagalee i-baahi nia monowai lligi ala gu-maangoo.

6:21  Goodou e-hai gadoo be nia dama monowai aalaa mai gi-di-au, goodou gu-gidee dogu duadua, gei goodou gu-hagadautugi gi-muli i godou mmaadagu.

6:22  E-hai bolo e-aha? Au gi-hai-adu gi goodou bolo gi-gaamai tei mee dehuia, be e-hui ang-gi tangada i-di hagangalua ihala belee hai-ai di mee e-hagamaamaa-mai au,

6:23  be e-daa au gi-daha mo ogu hagadaumee be tagi hagamuamua?

6:24  “Goodou hagamodongoohia-ina-mai gi-di-au ogu ihala, gei au gaa-noho deemuu ga-hagalongo-adu gi goodou.

6:25  Nia helekai ala e-donu la-koia e-maaloo, gei godou helekai la-deai ono hadinga ai.

6:26  Goodou e-hagamaanadu bolo agu helekai le e-hai-hua be-di madangi, gei dehee tadinga i-di godou helekai gi agu helekai bolo e-deai ono hagadagadagagee ai?

6:27  Goodou ga-bilei ‘dice’ gi nia hege nadau maadua ai, ge haga-maluagina goodou mai i godou ihoo hagaaloho!

6:28  Goodou mmada-mai gi ogu golomada-nei, au hagalee helekai tilikai.

6:29  Goodou gu-iehe gei gu-mogowaa-loo gi-mua, goodou gii-lawa gi-daha mo godou haihai hai-gee. Goodou hudee hagi-aga-ina au, au e-donu-hua.

6:30  Goodou e-hagabau bolo au e-tilikai, goodou e-hagamaanadu bolo au e-de-iloo-eau di mee dela e-donu mo-di mee hai-gee.

Chapter 7

7:1  “Di mouli o tangada le e-hai gadoo be-di moomee ne-hono ang-gi tangada-dauwa, e-hai gadoo be-di moomee haingadaa gi tuaidina.

7:2  E-hai gadoo be-di hege dela e-hiihai huoloo gi-di gowaa dela e-malu ge magalillili, e-hai gadoo be tangada ngalua dela e-talitali dono hui.

7:3  Nia malama e-hagadau-mai e-odi gi-muli gei deai di mee e-mouli ginai au ai. Nia boo huogodoo e-gaamai gi-di-au di manawa-gee.

7:4  Dogu madagoaa ma-gaa-moe gi-lala belee kii, gei nia aawaa e-duainau huoloo. Au e-dagadaga i-di boo dogomaalia e-talitali di maalama o-di luada.

7:5  Dogu huaidina guu-honu ila, guu-honu i-nia magibala. Nia uugau e-halihali-mai i ogu magibala.

7:6  Ogu laangi e-odi gi-daha deai di hagadagadagagee ai, e-limalima dono odi gadoo be-di limalima o-di iwi di maatiin dui-mee.

7:7  “Meenei God, gi-langahia bolo dogu mouli le e-hai gadoo be-di dogi e-dahi, dogu tene la-gu-hagaodi.

7:8  Goe e-daumada au dolomeenei, maalia gei Goe ga-de-gidee-e-Goe au. Maa Goe ga-halahala au, gei au gu-hagalee.

7:9  Tangada dela gaa-made, gu-hagalee hanimoi labelaa, e-hai gadoo be-di baahi gololangi dela ma-ga-hagalee i-golo guu-ngala gi-daha. Digau ala nogo iloo-ginaadou digaula, la-gu-de-langahia digaula.

7:10  Tangada dela gaa-made, gu-hagalee hanimoi labelaa, e-hai gadoo be-di baahi gololangi dela ma-ga-hagalee i-golo guu-ngala gi-daha. Digau ala nogo iloo-ginaadou digaula, la-gu-de-langahia digaula.

7:11  Deeai, au hagalee e-noho deemuu! Au gu-hagawelewele huoloo, guu-mmala ogu lodo, au e-hai-loo gi-helekai.

7:12  “Goe e-aha dela e-loloohi au? Goe guu-hai au bolo au e-hai gadoo be-di iga damanaiee lodo moana?

7:13  Au gaa-moe gi-lala belee hagamolooloo, au e-halahala be di-maa di-aha dela e-mee di-hagahumalia dogu mmae.

7:14  Gei Goe e-hai au gi-madagu i au midi. Goe ne-hai-hua au gii-hai agu moe mo nia midi huaidu,

7:15  dela ga-hidi-mai-iei au bolo au e-mademade au gi-daha mo-di mouli huaidu dela i-lodo tuaidina nei.

7:16  Deai dagu mee e-gana ginai au ai. Au gu-duadua di mouli. Goe gi-diagia-hua au, gu-hagalee dahidamee dogu mouli.

7:17  “Ma e-aha dela Goe e-hagalabagau nia daangada dangada? Goe e-aha dela e-hagalongo gi nadau helekai?

7:18  Goe e-hagadina digaula i-nia luada huogodoo, ge hagamada digaula i-nia madagoaa huogodoo.

7:19  E-hai behee, Goe e-deemee di-huli gi-daha mo au i tama madagoaa, bolo gii-mee au di-holo agu haawale?

7:20  E-hai behee, Goe e-lodo-huaidu gi ogu huaidu, ma Kooe dela e-lawalawa nia daangada? Goe e-aha dela e-hai au di mee e-hagamada-mee? E-hai behee, au guu-hai di mee aamo-mee dela e-daamaha adu gi-di-Goe?

7:21  E-hai behee, Goe e-deemee di-dumaalia-mai gi-di-au i ogu huaidu? Goe e-deemee di-haga-de-langahia ogu hai-hala? Au gu-hoohoo dogu hana gi-lodo dogu daalunga, gei au ga-hagalee i do madagoaa dela ma-ga-halahala-mai au.”

Chapter 8

8:1  Bildad tangada Shuah ga-helekai:

8:2  “Goe guu-lawa i au helehelekai ono hadinga ai?

8:3  God hagalee e-huli dana hagi-aga. Mee hagalee e-dugu di hai nia mee ala e-donu.

8:4  Au dama guu-hai di huaidu ang-gi God, deelaa ne-hidi-ai a-Mee gu-hagaduadua digaula gi-tau-anga.

8:5  Deenei-laa, huli-ang-gi Mee, dangidangi ang-gi God Mogobuna.

8:6  Maa nei bolo goe e-donu gei e-madammaa, gei God ga-haneia ga-hagamaamaa goe, mo-di gowadu labelaa gi-di-goe digau o doo hale gadoo be-di hui.

8:7  O maluagina huogodoo ala ne-hagalee, gaa-hai-hua nia balumee, e-hagalee tau-anga gi nia mee a God ala ma-ga-gowadu gi-di-goe.

8:8  “Hagamaanadu-ina-malaa tama-madagoaa dulii di iloo-mee o digau i-mua. Hagabaubau-ina-malaa nia mee ala e-donu ala nogo iloo-ai tadau damana ala i-mua.

8:9  Tadau mouli le e-bodobodo-hua, deai tadau mee e-iloo-gidaadou ai. Gidaadou e-hai gadoo be-di malu gololangi dela e-malu-adu i-hongo henuailala.

8:10  Gei nia daane kabemee o-di gowaa namua gi-aago-ina goe, hagalongo gi nadau helekai:

8:11  ‘Nia aalek e-deemee di tomo i-di gowaa dela ono wai ai, e-deemee labelaa di-tomo i-di gowaa dela ono gelegele waiwai ai.

8:12  Maa nia wai la-gaa-bagu ga-maangoo, go nia maa ala e-mmade i-mua, gei nia maa e-lligi-loo e-deemee di hele bolo e-hai di mee e-hai-hegau-ai.

8:13  Digau ala nadau God ai, le e-hai gadoo be nia aalek aanei. Nadau hagadagadagagee e-limalima dono hagalee i-di madagoaa ginaadou ma-ga-de-langahia-e-ginaadou a God.

8:14  Digaula e-hagadagadagagee-hua gi-di uga weleweleina o-di bagaigee.

8:15  Maa digaula ga-mmoe-adu gi hongo di hale o-di bagaigee, di hale o-di bagaigee e-mee di-daahi-aga digaula? Maa digaula gaa-kumi di uga o-di weleweleina, di uga deelaa e-mee di-daahi digaula gii-mee di-tuu hua igolo?’

8:16  “Tangada huaidu le e-hai gadoo be tama-laagau dela e-tomo ngoohia i-di gowaa dela e-dii ginai di laa, e-hai gadoo be tama-laagau dela e-dolodolo-adu gi-lodo di hadagee.

8:17  Nia aga o-nia maa gu-daabui ana hadu guu-kumi nia hadu gi-mau-dangihi.

8:18  Gei di madagoaa nia maa ga-daagi gi-daha, tangada e-modongoohia bolo ma nia laagau nogo i-golo ai.

8:19  Uaa, deelaa di mee o digau huaidu e-tene ginai. Gei hunu gau ala i-golo ga-loomoi gaa-noho i-nia lohongo digaula.

8:20  “God hagalee e-de-langahia digau ala e-manawa-dahi, be hagalee e-hagamaamaa digau huaidu.

8:21  Gei Mee gaa-hila-adu gi-di-goe bolo goe gii-mee labelaa di-gadagada mo-di tenetene.

8:22  Gei Mee ga-haga-langaadia digau ala e-dee-hiihai adu gi-di-goe, gei nia hale o digau haihai huaidu la-ga-hagalee.”

Chapter 9

9:1  Gei Job ga-helekai-anga:

9:2  “Uaa, au gu-longono nia mee aanaa i-mua. Malaa e-hai behee, tangada le e-mee di wiini i God?

9:3  Dehee di hai o tangada e-mee di-lagamaaloo gi Mee? Mee e-mee di-heeu ana hagadilinga heeu e-mana ala e-deemee di-helekai ginai tangada.

9:4  God la-koia e-kabemee gei e-mogobuna, tangada e-mee di-hai-baahi ang-gi Mee ai.

9:5  Mee e-mee-hua di haga-menegenege ana gonduu, gaa-oho labelaa nia maa gi dono hagawelewele, gei tangada e-iloo dana hai ma-gaa-hai ai.

9:6  God gaa-hai tenua gi-ngalungalua, ga-haga-ngalungalua di gelegele, ga-haga-ngalua nia togo ala e-daahi henuailala.

9:7  Mee e-mee di-dugu di laa dela belee hobo-aga, nia heduu gi-de-maahina i-di boo.

9:8  Deai tangada ne-hagamaamaa a God dela ne-hai di langi ai, be ne-dagahi di iga damanaiee dela i-lodo di moana.

9:9  God ne-haganoho ana heduu gi-di gili di langi, di Ibu Damana, di Waga Dogodolu, mo Madaligi, mo nia heduu ala i-di baahi la ngaaga.

9:10  Gidaadou e-dee-iloo di hai a Mee dela e-hai ana mee hagagoboina, ana mogobuna e-deemee di odi.

9:11  “God e-hanadu laalaa, gei au e-de-gidee-au a-Mee.

9:12  Mee gaa-kae dana mee dela e-hiihai ginai, gei tangada e-mee di-dugu a-Mee ai. Deai tangada labelaa e-mee di-heeu gi Mee boloo, ‘Goe e-hai dau-aha?’

9:13  Di hagawelewele o God le e-noho mau. Mee e-daaligi ono hagadaumee ala e-hagamaamaa Rahab, di manu damanaiee i-lodo di moana, e-hai-baahi ang-gi Mee.

9:14  Dehee dagu hai e-helekai ang-gi God? Au ga-helekai bolo-aha?

9:15  Au tangada madammaa, dagu mee la-hua dela belee hai, au e-dangi tumaalia ang-gi God, go dogu Dangada Hai-gabunga.

9:16  Ma e-aha maa Mee ga-dumaalia-mai gi-di-au bolo au gi-helekai, gei au e-hagalee-hagadonu bolo Mee ga hagalongo gi agu helekai.

9:17  Mee e-hagau-mai dana madangi maaloo belee daaligi au, deai dono hadinga ai.

9:18  Gei Mee hagalee dumaalia mai gi-di-au gii-dogi, gei gu-hagahonu dogu mouli gii-honu i-di lodo-huaidu.

9:19  Au ga-hagamada e-hono gi Mee? E-hagamada e-hono a God? Au gaa-kae a-Mee gi-di gowaa hai-gabunga? Ma koai dela e-mee di-lahi a-Mee gi-di gowaa hai-gabunga?

9:20  Au e-madammaa gei e-manawa-dahi, gei agu helekai la di lee o tangada huaidu. Nia mee huogodoo ala e-helekai-iei au, e-hai be nia mee e-hagi-aga au.

9:21  Au e-madammaa, gei au hagalee-loo e-hagadahidamee-loo. Au guu-buhi di mouli. Deai dahi mee e-hagadahidamee ko-au ai. Madammaa be huaidu, God e-haga-huaidu-hua gidaadou.

9:22  Au e-madammaa, gei au hagalee-loo e-hagadahidamee-loo. Au guu-buhi di mouli. Deai dahi mee e-hagadahidamee ko-au ai. Madammaa be huaidu, God e-haga-huaidu-hua gidaadou.

9:23  Di madagoaa tangada madammaa ma-gaa-made haga-limalima, gei God e-gadagada ginai.

9:24  God guu-dugu henuailala gi digau huaidu. Mee gu-haga-dee-gida nia golomada o digau hai-gabunga huogodoo. Gei di-maa hagalee ni God ne-hai, malaa ni-ai ne-hai?

9:25  “Nia laangi le e-odi hua hagalimalima ge deai di laangi e-dahi e-humalia ai.

9:26  Dogu mouli le e-hai gadoo be-di waga dela koia e-lele huoloo, e-lele gadoo be-di ‘eagle’ dela ma-ga-hagadii-anga-ia gi-hongo dana ‘rabbit’ dela e-kumi.

9:27  Maa au gaa-gono gada, ga-hagamada bolo e-haga-delangahia ogu mmae, gei ogu maanuhia huogodoo e-loomoi gi-di-au belee hai au gi-madagu, gei au gu-iloo bolo God la-hagalee e-dugu au bolo au e-madammaa.

9:28  Maa au gaa-gono gada, ga-hagamada bolo e-haga-delangahia ogu mmae, gei ogu maanuhia huogodoo e-loomoi gi-di-au belee hai au gi-madagu, gei au gu-iloo bolo God la-hagalee e-dugu au bolo au e-madammaa.

9:29  Idimaa au dela guu-hai tangada huaidu, malaa e-hai ginai dagu-aha?

9:30  Deai di ‘soap’ e-dahi e-mee di-tono ogu huaidu ai.

9:31  God guu-hudu au gi-lodo di luwa gulugulua, gei ogu goloo hogi gu-langaadia i-di-au.

9:32  Maa nei bolo God la tangada, gei au e-mee-hua di-helekai-anga. Gimaua gaa-hula gi-di gowaa hai-gabunga belee hagadonu mau mehanga.

9:33  Gei deai tangada e-mee di-ulu-adu gi mau mehanga ai, tangada e-mee di-hagadonu i mau mehanga mo God ai.

9:34  Meenei God, Goe gi-hagalawa-ina do hagaduadua mai au! Goe gi-daawa gi-daha au hai haga-madagudagu-dangada!

9:35  Au hagalee e-madagu. Au ga-helekai, idimaa au e-iloo ogu lodo.

Chapter 10

10:1  “Au guu-buhi di mouli, hagalongo gi agu helekai mai i-lodo dogu manawa-gee.

10:2  Hudee hagahuaidu-ina au, meenei God. Goe hagia-mai be di-maa di huaidu-aha ne-hai ko-au?

10:3  Ma e-donu Goe e-tenetene gi dau hagaduadua au? E-de-hiihai gi au mee ala ne-hai? Ga-nomuli ga-gadagada gi-nia mee o digau huaidu ala ne-haganoho?

10:4  Goe e-gidee nia mee be di-madau gidee?

10:5  Do mouli le e-bodobodo gadoo be nia mouli o gimaadou daangada dangada?

10:6  Ma e-aha dela Goe e-hagailongo ogu huaidu huogodoo, gei e-halahala ogu ihala huogodoo?

10:7  Goe e-iloo-hua bolo au ogu huaidu ai, gei tangada e-mee di-daa au gi-daha mo doo lima ai.

10:8  “Aalaa go oo lima ala ne-hai au, gei dolomeenei go oo lima la-hua ala e-daaligi au.

10:9  Goe gi-langahia bolo Goe ne-hai au mai i-nia gelegele, gei Goe ga-dagadagahi labelaa au bolo gii-hai au nia gelegele labelaa?

10:10  Goe ne-haga-maaloo dogu damana bolo gii-mee di-hagadili au. Goe ne-haga-tomo-aga au i-lodo tinae o dogu dinana.

10:11  Goe guu-wanga nia iwi mono goneiga gi dogu huaidina, gaa-hii ogu iwi gi nia goneiga mo-di gili.

10:12  Goe ne-gaamai gi-di-au di mouli mo-di manawa-aloho, mo dau abaaba mai au dela gu-dadaahi au.

10:13  Dolomeenei gei au gu-iloo bolo i-di madagoaa hagatau deelaa, gei Goe nogo hagamaanadu dau hai dela belee haga-huaidu au.

10:14  Gei Goe nogo hagadinadina-mai au be au e-hai dagu mee huaidu, bolo gei Goe ga-hagalee e-dumaalia-mai.

10:15  Maa au gaa-hai di huaidu, gei au ga-gidee dogu haingadaa mai i doo baahi. Maa au gaa-hai di humalia, deai di hagaamu mai i doo baahi ai. Au gu-hagaloale huoloo gei gu-langaadia huoloo.

10:16  Maa au ga-haadanga lamalia hagadahi, gei Goe ga-waluwalu au gadoo be-di laion, gei Goe e-hai hogi au mogobuna belee haga-huaidu au.

10:17  Nia madagoaa huogodoo gei Goe au gau hagamodongoohia belee hai-baahi mai gi-di-au. Do hagawelewele mai gi-di-au le e-damana-mai i-nia madagoaa huogodoo, gei Goe e-haganohonoho dau mee i-nia madagoaa huogodoo bolo Goe e-hagahuaidu au.

10:18  “Meenei God, Goe ne-aha dela ne-dumaalia-mai gi-di-au gi-haanau-mai? E-humalia maa nei bolo au gii-made gi-daha i-mua nia daangada ala ma-gaa-mmada mai gi-di-au.

10:19  Dogu hagahuudonu mai i tinae o dogu dinana gaa-hana gi-lodo taalunga, e-koia e-humalia i dogu haanau-mai.

10:20  Dogu mouli la-digi hoohoo bolo ga-hagaodi? Goe gi-diagia-hua au! Goe dumaalia-mai gi-di-au e-hai-ai ogu tene i-lodo di madagoaa dulii dela e-dubu i-golo i dogu mouli.

10:21  Au gu-hoohoo ga-hagatanga gaa-hana hagalee e-hanimoi labelaa, e-hana gi tenua o-di bouli dongoeho gei e-lodo-huaidu,

10:22  tenua bouli dongoehe, manawa gee, gei e-hinihini, di gowaa dela e-maalama guu-huli guu-hai di bouli dongoeho.”

Chapter 11

11:1  Zophar tangada Naamah ga-helekai boloo:

11:2  “E-hai behee, deai dahi dangada e-mee di-helekai-anga gi nia helekai balumee aanaa ai? Nnagadilinga helekai e-logo beenaa le e-mee di-hai goe gii-donu?

11:3  Job, goe e-hagamaanadu bolo gimaadou e-deemee di-helekai-anga gi au helekai? Goe e-hagamaanadu bolo au helekai balumee gaa-hai gimaadou gii-noho deemuu?

11:4  Goe bolo au helekai le e-donu, gei goe e-hai bolo goe e-madammaa-hua i-mua nnadumada o God.

11:5  Au bolo gi-gidee hualaa God dela ma-ga-helekai-adu gi-di-goe!

11:6  Mee ga-hagi-adu gi-di-goe i-nia hagadilinga e-logo i-di hai o-di iloo-mee, gei nia mee labelaa i-golo ala e-deemee i-baahi o-nia daangada. God e-hagaduadua goe hagabalua i-nia mee ala e-tau-adu gi-di-goe.

11:7  “Goe e-mee di modongoohia-e-goe di hagaodi mo-di geinga o-di aamua mo-di mogobuna o God?

11:8  Deai di hagageinga i-di langi ang-gi God ai, goe e-deiloo-e-goe tagageinga deelaa. God e-iloo-Ia tenua o digau mmade, gei goe e-deiloo-e-goe tenua deelaa.

11:9  Di aamua o God la-koia e-damanaiee i henuailala, e-koia e-palaha i-di moana.

11:10  Maa God gaa-lahi goe gi-di gowaa hai-gabunga, ko-ai e-mee di-dugu a-Mee?

11:11  God e-iloo-Ia be ma ko-ai dela e-balumee. Mee e-gidee-Ia nadau haihai huaidu huogodoo.

11:12  Digau dadaulia ga-daamada ga-kabemee i-di madagoaa o-nia ‘donkey’ lodo-geinga ala ga-haanau gaidala.

11:13  “Job, huluhia oo lodo gii-donu, huli-anga gi God.

11:14  Kilia nia mee huaidu gi-daha mo doo hale.

11:15  Huli gi digau o henuailala i-di lodo maaloo mo-di maudangihi.

11:16  Gei o haingadaa gaa-mmaa gi-daha mo au hagamamaanadu, e-hai gadoo be di labagee dela ma-ga-hagalee, gei deai tangada e-langahia-eia dahi mee ai.

11:17  Gei do mouli la-ga-maalama gadoo be-di maalama o-di laa i-di oodee, gei di bouli o do mouli la-ga-maalama gadoo be-di maalama o-di heniheni.

11:18  Gei goe ga-dagaloaha i-nia haingadaa, gaa-noho i-di hagadagadagagee. God ga-benebene-laa goe gaa-hai goe gi-molooloo.

11:19  Goe ga-deai do madagu i o hagadaumee ai. Digau dogologo ga-tangi-adu gi-di-goe i-di hagamaamaa.

11:20  Gei digau huaidu la-ga-hilahila gi-daha i nadau uli nadau gai, gu-iloo ang-gi ginaadou bolo ma gu-deai di gowaa i-golo e-dagaloaha ginaadou ai. Di mee hua e-dahi dela e-iloo-ginaadou la-go di made dela ga-dau-mai.”

Chapter 12

12:1  Gei Job ga-helekai-anga,

12:2  “Uaa, goodou go nia lee o-nia daangada. Di madagoaa goodou ma-gaa-mmade, gei di iloo-mee la-ga-hagalee labelaa dalia goodou.

12:3  Agu hagamaanadu la-koia i-hongo godou hagamaanadu, gei au hogi hagalee i godou lala. Digau huogodoo e-iloo-ginaadou godou helekai ala ne-hai.

12:4  Ogu ihoo hagaaloho e-gadagada mai gi-di-au, digaula e-gadagada, ma e-aha maa au e-donu ge e-madammaa. Gei di madagoaa i-golo God ne-helekai gi agu dalodalo.

12:5  Deai godou haingadaa ai, dela e-hidi-ai goodou e-hai daagala i-di-au. Goodou e-hagamaawa tangada dela bolo gaa-hinga.

12:6  Gei digau gaiaa, mo digau nadau god ai, e-mouli i-di aumaalia, ma e-aha maa di-nadau god la-dela-hua go nadau maaloo.

12:7  “Nia mee e-logo belee kuulu go nia manu mamaangi mono manu dolodolo adu gi goodou.

12:8  Tangi-anga gi nia mee mouli o henuailala mo lodo di moana i nadau iloo-mee.

12:9  Nia mee huogodoo e-iloo-ginaadou bolo ginaadou ne-hai go nia lima Dimaadua.

12:10  Ma go God dela e-dagi nia mouli o-nia mee huogodoo. Nia mouli o-nia mee huogodoo la i-lodo ono lima.

12:11  E-hai gadoo be tolole dela e-tene gi-deia dela ma-gaa-momi nia meegai, godou dalinga e-tenetene labelaa di hagalongo gi nnelekai.

12:12  “Digau mmaadua nadau kabemee i-golo, gei God e-hai-mee gi-di kabemee mo nia mogobuna. Digau mmaadua nadau iloo-mee i-golo, gei God e-hai-mee gi-di iloo-mee mo nia mogobuna ala e-hagangalua-ai nia mee.

12:13  “Digau mmaadua nadau kabemee i-golo, gei God e-hai-mee gi-di kabemee mo nia mogobuna. Digau mmaadua nadau iloo-mee i-golo, gei God e-hai-mee gi-di iloo-mee mo nia mogobuna ala e-hagangalua-ai nia mee.

12:14  Maa God gaa-oho gi-lala nia mee, malaa ko-ai dela e-mee di hagaduu-aga nia maa? Ko-ai dela e-mee di-hagamehede digau ala ne-galabudi go God?

12:15  Di tau maangoo gaa-hai, God ne-daahi di uwa gi-dee-doo. Di labagee gaa-hai, God ne-hagamehede nia wai gii-hali.

12:16  “God le e-maaloo, gei e-aali i-nia madagoaa huogodoo. Digau gu-halahalau mo digau halahalau dangada la-guu-too gi-lodo ono mogobuna.

12:17  Mee gaa-daa gi-daha nia iloo-mee o digau ala e-dagi, gaa-hai digaula gii-hai be digau e-laba,

12:18  ga-hagamenege gi-lala di king, gaa-hai tangada galabudi.

12:19  Mee ga-hagamenege-ia gi-lala digau hai-mee-dabu mo digau aamua.

12:20  Mee gaa-hai gi-deemuu nia dagi ala e-hagadagadagagee ginai nia daangada, gaa-daa gi-daha nia iloo o digau mmaadua.

12:21  Mee gaa-hai digau aamua gi-langaadia, gaa-daa nia maaloo o-nia dagi.

12:22  Mee ga-haga-maalama di gowaa dela e-bouli dongoeho be-di made.

12:23  Mee ga-haga-maaloo dangihi ge wanga di mogobuna gi-nia henua llauehe, ga-nomuli gei Mee gaa-oho ge haga-magedaa digaula.

12:24  Mee gaa-hai nia dagi la-gi-boiboi, gaa-hai digaula gi-heehee laba i-lodo henua ga-nngalanngala.

12:25  Digaula e-haahaa nadau lima i-lodo di bouli o-di boo, e-hingahinga gadoo be digau libaliba.

Chapter 13

13:1  “Nia mee huogodoo ala e-helekai-ai goodou gu-hagalongo ginai au i-mua. Gei au gu-iloo huogodoo, au koia e-iloo i-nia mee ala e-iloo-e-goodou. Au hagalee i godou lala.

13:2  “Nia mee huogodoo ala e-helekai-ai goodou gu-hagalongo ginai au i-mua. Gei au gu-iloo huogodoo, au koia e-iloo i-nia mee ala e-iloo-e-goodou. Au hagalee i godou lala.

13:3  Au e-hai ogu donu ang-gi God Mogobuna, hagalee e-hai-adu gi goodou. Au e-hiihai e-lagamaalooo i ogu donu ang-gi Mee.

13:4  Goodou e-gahu godou dee-iloo gi godou kai-tilikai. Goodou e-hai gadoo be tangada hagahili magi dela e-deemee di-hagahili tangada magi.

13:5  Hudee helekai, gei tangada ga-hagamaanadu bolo goodou digau kabemee!

13:6  “Goodou hagalongo, gei au ga-hagi-aga dagu mee dela belee gabunga.

13:7  Goodou e-aha ala e-kai-tilikai, goodou e-hagabau bolo godou hai-kai tilikai e-humalia ang-gi God?

13:8  Goodou e-hagamada belee duuli a-Mee? Goodou ga-hagamaamaa dana baahi i-lodo di gowaa hai-gabunga?

13:9  Maa God ga-haneia ga-hagadina goodou, Mee gaa-gida ana mee humalia i godou baahi? Goodou e-hagamaanadu bolo goodou e-mee-hua di-halahalau a God, gadoo be di-godou halahalau nia daangada?

13:10  Ma e-aha maa godou hai-baahi-anga le e-ngala, malaa Mee e-gabunga goodou.

13:11  Ono mogobuna gaa-haa godou lodo gii-honu i-di mmaadagu.

13:12  Godou agoago podo la ono hadinga ai, e-hai gadoo be nia lehu. Godou lagamaaloo le e-paagege gadoo be-di mugamuga.

13:13  Noho deemuu, dugua-mai gi-di-au gi-helekai, gei au e-hadi-hua nia huwa o agu helekai.

13:14  “Au gu-togomaalia bolo au ga-de-hagahuodia dogu mouli.

13:15  Au gu-deai dogu hagadagadagagee ai, malaa e-hai behee maa God ga-daaligi au? Gei au ga-hagi-anga gi Mee tadinga dogu gabunga.

13:16  Holongo deenei di hai ga-dagaloaha-iei au, idimaa, deai tangada huaidu e-mee di-duu maaloo i-mua o God ai.

13:17  Deenei-laa, goodou hagalongo gi agu helekai, godou dalinga gi-kae-ina agu mee ala ga-hagamodongoohia-adu.

13:18  Au gu-togomaalia belee hagi-aga ogu donu, idimaa au e-iloo bolo au e-donu.

13:19  “Meenei God, Goe dela ga-hanimoi belee hagamodongoohia-aga ogu huaidu? Maa Goe gaa-hai beenei, gei au gaa-noho deemuu gaa-made.

13:20  Goe dumaalia-mai gi-di-au e-madau agu mee e-lua. Goe gi-dumaalia-mai, gei au hagalee e-bala hagammuni i-di-Goe:

13:21  Goe gii-lawa i do hagaduadua au, ge hudee hagahuaidu-ina au gi-di madagu huaidu.

13:22  “Helekai i-mua, meenei God, gei au ga-helekai-adu. Be ko-au e-helekai, gei Goe ga-helekai-mai gi agu helekai.

13:23  Aahee ogu huaidu? Dehee dagu mee hala ne-hai? Di hala behee dela ne-huaidu-iei au?

13:24  “Goe e-aha dela gu-hagangala i-di-au? Goe e-aha dela e-dugu au be-di hagadaumee?

13:25  Goe e-hagamada belee hagamadagudagu au? Au hagalee di mee, au di mada-geinga hua. Goe e-heebagi gi-di madageinga maangoo.

13:26  “Goe e-hagailongo nia mee huaidu hai-baahi-mai gi-di-au, guu-hai au gi-daahi gi-muli hogi nia hai-hala o dogu mouli dama-daane.

13:27  Goe gu-lawalawa ogu wae gi taula baalanga, gei Goe e-hagadina ogu heehee huogodoo, gei e-hagadina hogi nia lohongo ogu babaawae.

13:28  Idimaa go di hai deenei, malaa, gei au tangada hua gu-mooho gadoo be-di laagau bobo, e-hai gadoo be-di gahu dela ne-gai go-nia hingodo.

Chapter 14

14:1  “Gidaadou huogodoo ne-haanau-mai paagege tadau mahi ai. Gidaadou huogodoo e-mouli be-di mee e-dahi i-lodo tadau haingadaa.

14:2  Gidaadou e-tomo limalima-hua mo-di mae be nia akai, gei gidaadou e-nngala limalima gadoo be nia malu-mee.

14:3  “Meenei God, e-hai behee? Goe gaa-hila-mai gi-di-au, be Goe gaa-wanga au gi-lodo di hagi-aga ga-hagi-aga au?

14:4  Ma deai di mee madammaa e-mee di-hanimoi i-di mee dela e-dogolia be tangada ai.

14:5  Di waalooloo o dono mouli la-gu-modongoohia-hua i-mua, di hulu o-nia malama ala e-mouli-iei mee la-guu-lawa di-dugu, gei e-deemee di-huli.

14:6  Goe mmada gi-daha mo mee, diagia a-mee modogoia, be mee e-mee di-mouli i-lodo di haingadaa o dono mouli.

14:7  “Ma iai di hagadagadagagee i-golo ang-gi di tono laagau dela guu-hele gi-lala, ma e-mee di-mouli labelaa gaa-huwa.

14:8  Ono aga ga-madumadua gei tuaidina o-maa gaa-made i-lodo di gelegele,

14:9  gei di-maa ga-hagatiu gi-nia wai, gei di-maa ga-matili-aga be-di laagau hoou.

14:10  Gei tangada gaa-made, la dela-hua gu-hagaodi i-golo. Mee guu-made la dela-hua gu-hagalee.

14:11  E-hai gadoo be nia monowai ala gu-hagalee mmidi, mo e-hai labelaa be nia monowai llauehe ala gu-maangoo.

14:12  Nia daangada dangada gaa-mmade la hagalee mmouli-aga. Digaula hagalee e-aala-aga labelaa gaa-dae-loo gi-di langi gaa-lawa. Digaula ga-hagalee-loo e-aala-aga mai i nadau moe.

14:13  “Au e-hiihai bolo Goe gi-hagammuni-ina au i-lodo tenua o digau mmade. Heia au gii-ngala gaa-dae-loo gi do hagawelewele gaa-lawa, gei Goe gaa-hai do madagoaa dela e-langahia-e-Goe au.

14:14  Tangada ma-gaa-made, le e-mee di-mouli-aga labelaa? Malaa, au e-tali di madagoaa dela e-humalia, e-tali di madagoaa haingadaa la-gii-lawa.

14:15  Gei Goe ga-gahigahi-mai-laa, gei au ga-helekai-adu, gei Goe ga-tenetene-mai gi-di-au dela ne-hai Kooe.

14:16  Gei Goe ga-dadaumada ogu heehee huogodoo, gei Goe hagalee hagailongo agu mee hala ala e-haihai ko-au.

14:17  Gei Goe gaa-wwede huogodoo ogu ihala gaa-dugu gi-daha, gaa-tono huogodoo ogu ihala ala ne-hai gi-daha.

14:18  “Di madagoaa i-golo, gei nia gonduu la-ga-doloo gi-lala, gei nia gowaa helemodu ga-mmaanege gi-daha.

14:19  Nia wai gaa-hai nia hadugalaa gi-monnono gi-lala, nia uwa gaa-mmili gi-daha nia gelegele, gei Goe e-hai beelaa, e-daa gi-daha di hagadagadagagee o tangada i-di gili dono mouli.

14:20  O mogobuna e-maaloo i tangada, e-hagau a-mee gii-hana-hua hagadahi, ono golomada guu-huli-hua gi-di made.

14:21  Nia dama a-maa e-kae di-nadau hagalaamua, gei mee e-de-iloo-ia. Digaula e-haadanga-balua, gei di-maa tangada e-hagi-anga gi mee ai.

14:22  Di mmae o dono huaidina la dela-hua dana mee e-longono-ai, mo-di manawa-gee dela i ono lodo.”

Chapter 15

15:1  Eliphaz tangada mai Teman ga-helekai boloo:

15:2  “Job, au helekai la-deai ono hadinga ai.

15:3  Deai dahi dangada kabemee e-mee di-helehelekai be au helekai aanaa e-leelee-iei goe ai, be e-duuli ia gi-nia helekai ala e-de-iloo ono hadinga.

15:4  Maa nei bolo e-hai-hua be au helekai aanaa, malaa deai tangada e-madagu i God ai, gei deai tangada e-dalodalo gi God ai.

15:5  Do mouli huaidu le e-hagamodongoohia go au helekai. Goe e-hagamada bolo goe e-gahu goe gi au helekai kabemee.

15:6  Ma hagalee ko-au dela e-haga-huaidu goe, go koe hua dela e-bida haga-huaidu goe i au helekai ala e-leelee-iei goe.

15:7  “Goe e-hagabau bolo ma kooe dela ne-haanau matagidagi i henuailala? Goe nogo i-golo i-di madagoaa God dela ne-haganoho nia gonduu?

15:8  Goe gu-hagalongo gi-di bilaan a God dela ne-haganoho? Go kooe hua modogoe dela e-hai-mee gi-di iloo-mee o-nia daangada?

15:9  Dahi mee igolo ai bolo kooe hua e-iloo gei gimaadou e-de-iloo.

15:10  Gimaadou ne-kabe madau iloo mai baahi digau mmaadua, go digau ala ne-haanau-mai i-mua do damana.

15:11  “God e-hiihai bolo e-hagamanawa lamalia goe, gei goe e-aha dela e-dagalili? Gimaadou e-helekai i-di ingoo o God i-di lee humalia, mo-di noho-baba.

15:12  Gei goe gu-ngalua do manawa ga-daumada hagawelewele mai gi gimaadou.

15:13  Goe gu-hagawelewele gi God, gu helekai huaidu i-Mee.

15:14  “Ma iai tangada i-golo bolo ia e-madammaa? Ma iai tangada i-golo bolo ia e-donu i-mua o God?

15:15  God hagalee hagadonu hogi ana gau di-langi, idimaa digaula hagalee e-madammaa i ono mua.

15:16  Gei nia daangada e-inu nia huaidu gadoo be nia wai. Uaa, nia daangada gu-huaidu, digaula la-digau balumee-hua.

15:17  “Deenei-laa, Job, hagalongo-mai, au ga helekai i agu mee ala e-iloo.

15:18  Digau kabemee gu-aago-mai au gi-nia mee ala e-donu, ala ne-kabe-mai i-baahi nadau damana ala i-mua, digaula digi hagammuni dahi mee gi-daha mo au.

15:19  Deai tangada tuadimee ne-noho i-baahi digaula ai, gei deai tangada i digaula ne-dagi digaula gi-daha mo God ai.

15:20  “Tangada huaidu dela e-hagaduadua nia daangada, ga-hagaduadua i-di waalooloo o dono mouli.

15:21  Nia hagadilinga lee hagamadagudagu dangada e-ulu gi-lodo dono dalinga. Digau gaiaa ga-heebagi gi-mee i dono madagoaa e-mamaanadu bolo ia guu-noho i-di aumaalia.

15:22  Deai dono hagadagadagagee ai bolo ia e-mee di-doo gi-daha mo-di bouli, idimaa tulumanu-dauwa i-golo e-talitali belee daaligi a-mee.

15:23  Nia manu mamaangi luuli gai-dangada i-lodo di anggowaa, e-noho talitali belee gai tuaidina o-maa.

15:24  Di haingadaa guu-gahu a-mee gadoo be-di king maaloo mogobuna, e-talitali belee hai tauwa.

15:25  “Deenei la-go di hui o digau ala ma-gaa-llomi nadau lima ang-gi God, belee heebagi ang-gi God Mogobuna.

15:26  Tangada deelaa le e-hagamuamua, e-hai-baahi, gei e-de-hagalongo, gei e-maaloo di-duu e-daahi dana mee abaaba ia, e-hana e-heebagi ang-gi God.

15:27  Tangada deelaa le e-hagamuamua, e-hai-baahi, gei e-de-hagalongo, gei e-maaloo di-duu e-daahi dana mee abaaba ia, e-hana e-heebagi ang-gi God.

15:28  “Deenei la-go tangada dela ne haga-magedaa nia waahale, gaa-kae nia hale nia daangada ne-llele gi-daha. Malaa, go tauwa dela e-oho nia waahale mono hale aalaa.

15:29  Mee hagalee waalooloo ono maluagina, ono goloo e-limalima-hua di-odi gi-daha e-hai gadoo be dono ada i-hongo di gelegele ma-ga-hagalee.

15:30  Mee hagalee tanga gi-daha mo-di bouli, mee e-hai gadoo be-di laagau dela ma-gaa-wele ono manga gei di madangi gaa-ili gi-daha ono huwa.

15:31  Maa mee ga-boiboi ga-hagadonu-hua di huaidu, malaa dono hui la dela hua go di huaidu.

15:32  I-mua dono madagoaa ma-ga-dau-mai, mee ga-maangoo gadoo be-di manga laagau dela gu-maangoo gu-hagalee e-matili-aga labelaa.

15:33  E-hai be-di laagau-waini dela e-monnono ono golee modo, be-di laagau-olib dela ono huwa gu-malingi gi-lala.

15:34  Digau nadau god ai la-ga-hagalee nadau hagadili. Di ahi gaa-dudu nia hale o digau ala ne-kumi nadau hui hala mai i nadau ngalua hala.

15:35  Aanei la nnagadilinga daangada ala e-haganohonoho nadau hai huaidu, nia manawa digaula le e-honu i-nia huaidu i-nia madagoaa huogodoo.”

Chapter 16

16:1  Gei Job ga-helekai-anga,

16:2  “Au gu-longono nia helekai aanaa i-mua, gei godou helekai haga-manawa lamalia ala ne-hai-mai gi-di-au, la-gu-hai-hua di mee e-mmae mai gi-di-au.

16:3  Goodou ga helehelekai ga-hana-hua beelaa? Godou helekai le deai ono hagaodi ai?

16:4  Maa nei bolo goodou ne-noho i dogu lohongo, gei au gaa-noho i-godou lohongo, malaa, au e-mee di-helekai i-nia mee huogodoo ala e-helehelekai-ai goodou. Au e-mee di-lialiagi dogu libogo gadoo be tangada kabemee mo-di leelee logo adu gi goodou.

16:5  Au e-mee di-haga-maaloo-aga goodou gi agu helekai aago, mo-di haihai agu helekai haga-tenetene adu gi goodou.

16:6  “Gei agu helekai le e-deemee di-hai nia helekai hagamaamaa, gei dogu noho deemuu le e-deemee di-hagahili dogu mmae.

16:7  Meenei God, Goe gu-hagadugina-mai gi-di-au. Goe gu-daaligi digau o dogu hale huogodoo gii-mmade.

16:8  Goe guu-kumi au, Goe go dogu hagadaumee. Ogu iwi mo dogu gili ala e-dubu i-golo, gei nia daangada guu-hai di-maa bolo di mee e-hagamodongoohia-ai ogu huaidu.

16:9  “God e-hagihagi dogu huaidina la-gi-mooho i dono hagawelewele, ge e-daumada-mai au haga-huaidu.

16:10  Nia daangada e-hai daagala mai gi-di-au. Digaula gu-haganiga au gi nadau lodo mo-di paapaa ogu golomada.

16:11  God guu-dugu au gi-lodo nia lima o digau huaidu.

16:12  I-mua gei au nogo mouli i-di aumaalia, gei God guu-llomi dogu uwa, gu hagamaawa au, mo-di hai au haga-huaidu. God guu-hai au be-di gowaa e-hagamada hagabaeha,

16:13  mo-di puu-mai ana amu maalei mai i-nia gowaa huogodoo, nia amu ala gaa-dau i-di-au le e-haga-huaidu au, gei deai dono aloho i-di-au ai.

16:14  Mee gu-haga-huaidu au haga-logowaahee. Mee ga-puu-mai au gadoo be tangada-dauwa dela gu-dadaulia-hua i-dono hagawelewele.

16:15  “Gei au e-dangi wawe gei e-ulu ogu goloo lodo-huaidu, gaa-noho gi-lala i-lodo nia gelegele pigi.

16:16  Au gu-dangidangi gaa-dae-loo gi ogu golomada guu-mmee, gu-haga-hula gei gu-luuli i-nia daalinga ogu golomada.

16:17  Gei au deai ogu huaidu i-di hai huaidu ai, gei agu hai dalodalo gi God le e-donu huoloo.

16:18  “Henuailala, goe hudee hagammuni-ina nia huaidu ala ne-hai-mai gi-di-au! Goe hudee dumaalia gi dogu lee dela e-hai ang-gi di gowaa hai-gabunga gii-noho deemuu!

16:19  Gei au e-iloo bolo ma tangada i-golo i-di langi dela e-madalia au e-hagamaamaa-mai au.

16:20  Ogu ihoo hagaaloho e-hai dadaagala mai gi-di-au. Ogu golomada e-halidangi ang-gi God.

16:21  Au e-hiihai bolo tangada gi-hagamaamaa-ina-mai au gi God, gadoo be tangada ma-ga-madau di hagamaamaa gi dono ehoo hagaaloho.

16:22  Ogu ngadau gu-hagadau gi-muli, gei au e-heehee i-di ala dela deai tangada e-mee di-hana gi-muli ai.

Chapter 17

17:1  “Di hagaodi o dogu mouli la-gu-hoohoo-mai-hua. Au gu-dogi-ngadaa, gei gu-deai nia mee i-golo mai gi-di-au ai, dela hua go taalunga.

17:2  Au gu-gidee nia daangada ala e-haganneennee au.

17:3  Meenei God, au e-donu, Goe gi-hila-mai gi agu helekai. Deai dahi dangada i-golo e-hagagila-aga agu helekai ala ma-ga-helekai-iei au ai.

17:4  Goe gu-haga-bouli nadau hagamaanadu bolo gi-de-longono-hua digaula gi nia helekai dahidamee. Goe hudee heia digaula gi-aali i-di-au.

17:5  I-lodo di agoago podo e-helekai i dahi dangada e-wanga gi-daha dono ihoo hagatenetene belee hui, gei ana dama gaa-tale gi-di hagaduadua.

17:6  Dolomeenei gei nia daangada e-hai-hegau gi-di bida agoago deenei belee hai-baahi mai gi-di-au. Digaula e-loomoi e-buibui nadau haawale mai gi ogu golomada.

17:7  Ogu lodo-huaidu gu-hidi-mai-iei au gu-dee-gida. Ogu lima mo ogu wae gu-hegehege-loo gadoo be-di malu o tangada.

17:8  Digau ala e-hai bolo ginaadou digau e-donu, e-obolima ang-gi ginaadou. Digaula e-hagi-aga au bolo au deai dogu God ai.

17:9  Digau ala e-hai bolo ginaadou e-humalia, digaula e-hagadonu bolo ginaadou e-donu.

17:10  Maa nei bolo digaula huogodoo ne-lloomoi gaa-tuu i-ogu mua, dahi dangada i digaula ne-gidee-au bolo e-kabemee ai.

17:11  “Ogu laangi la-guu-odi gi-daha, gei agu maanadu la-gu-hagalee gila. Dogu hagadagadagagee la-gu-hagalee.

17:12  Ogu ihoo hagaaloho e-haihai-mai bolo di boo la-go di aa. Digaula e-helekai-mai bolo di maalama la-gu-hoohoo-mai, gei au e-iloo bolo au e-noho-hua i-lodo di bouli.

17:13  Di mee dela e-hagadagadagagee ginai au la dela-hua go tenua o digau mmade, deelaa di gowaa gaa-moe-iei au no-lodo, gaa-kii i-lodo di bouli.

17:14  Gei au ga-haga-ingoo di luwa bolo go dogu damana, gei au ga-haga-ingoo nia ila ala gaa-gai au bolo go dogu dinana mo ogu duaahina-ahina.

17:15  Ma iai di hagadagadagagee i-golo mai gi-di-au? Ma koai dela e-gidee-ia di-maa?

17:16  Di hagadagadagagee la-hagalee e-hana madalia au i-di madagoaa dela ma-gaa-hana-iei au gi tenua o-digau mmade.”

Chapter 18

18:1  Bildad tangada Shuah ga helekai,

18:2  “Job, tagadilinga dangada be goe deenaa e-deemee di-noho deemuu? Maa nei bolo goe ne-noho deemuu ga-hagalongo-mai, gei gimaadou guu-mee di-helekai-adu gi-di-goe.

18:3  Goe e-hagamaanadu bolo gimaadou e-boiboi gadoo be nia kau?

18:4  Goe e-bida haga-mmae-hua goe gi do hagawelewele. E-hai behee? Henuailala gaa-hai di anga-henua-hua idimaa i do hagawelewele? E-hai behee? God ga-haga-ngalua nia gonduu gei goe ga-manawa lamalia?

18:5  Di maalama o tangada huaidu gaa-huli ga-bouli dongoeho. Di maalama deelaa ga-hagalee e-ulaula-aga labelaa.

18:6  Di maalama dela i-lodo dono hale le e-bouli.

18:7  I-mua digaula nogo tuu mau-dangihi, gei dolomeenei gei digaula gu-tingatinga, e-bida tingatinga gi-lala, idimaa digaula e-bida daudali nadau hagamaanadu.

18:8  Digaula e-taele laa-lodo di gubenge, gei nadau wae guu-llawe.

18:9  Di hele guu-hele nadau babaawae, gu-daahi digaula.

18:10  Di hele guu-danu i-lodo di gelegele, guu-dugu hagammuni i-hongo di ala digaula.

18:11  “Di madagu e-noho i nadau baahi e-talitali. Di madagu e-hana i nadau muli e-daudali nadau hanga-heehee.

18:12  Nogo maluagina huoloo i-mua, gei dolomeenei gei digaula gu-hiigai wawe. Di haingadaa e-noho i nadau baahi e-talitali.

18:13  Di magi huaidu huoloo guu-gahu nadau gili, gaa-hidi-ai nadau lima mo nadau wae guu-lleu.

18:14  Digaula gu-laha-mai gi-daha mo nadau hale ala nogo noho-ai i-di aumaalia, ga-dada-mai gi-mua di King o-di Made.

18:15  Dolomeenei guu-mee-hua di-noho di-ingoo-hua tangada i-lodo nia hale digaula, i-muli di-hagamadammaa di hale gi-nia ‘sulphur’.

18:16  Nia aga mo nia manga digaula la-guu-mae gu-maangoo.

18:17  Nadau longo gu-haga-odi-hua i-lodo nadau guongo mo i henuailala hagatau, deai tangada e-langahia-eia digaula ai.

18:18  Digaula ga-hagabagi gi-daha mo tenua o digau ala e-mouli, e-hagabagi gi-daha mo-di maalama gii-hula gi-lodo di bouli dongoeho.

18:19  Gu-deai nadau madawaawa ai, gei deai tangada ne-dubu i nadau guongo ai.

18:20  Daamada i-dua gaa-hana gaa-tugi i-dai, huogodoo ala gu-longono-ginaadou nadau hagaduadua, ga-bolebole huoloo i-di nadau mmaadagu.

18:21  Deenei di hai o-di hagaduadua o digau huaidu, di hagaduadua o digau ala hagalee e-hagalabagau a God.”

Chapter 19

19:1  Gei Job ga-helekai,

19:2  “Ma e-aha dela goodou e-haga-mmaemmae au gi nnelekai?

19:3  Nia madagoaa e-hagadau, gei goodou e-hai au hagahuaidu, hagalee langaadia di-godou hagaduadua au.

19:4  Ma e-aha maa au gu-ihala, le e-hai dana-aha adu gi goodou? E-mmae-adu gi goodou behee?

19:5  Goodou e-hagabau bolo goodou e-mada-humalia i-di-au, ge e-hai-bolo ogu haingadaa la nia mee e-haga-modongoohia ogu huaidu.

19:6  Goodou gi-iloo bolo ma go God dela ne-hai di mee deenei. Mee guu-hai dana hele belee kumi au,

19:7  gei au e-wolowolo i dogu hagaduadua deenei, gei di-maa tangada e-longono ai. Ma e-aha maa au e-dangidangi ogu donu, gei di-maa di tonu e-gidee au ai.

19:8  God gu-duuli dogu ala, gei au e-deemee di-hana laa-lodo. Mee gu-haga-de-gidee dogu ala gi-di bouli dongoeho.

19:9  Mee guu-kae ogu maluagina huogodoo, gu-hagahuaidu dogu ingoo.

19:10  Mee gu-hagahuaidu au i-nia gowaa huogodoo ala i dogu gili. Mee guu-daa gi-daha nia hagadagadagagee huogodoo ala i ogu lodo, gu-diiagi au gi-bagege gii-made.

19:11  God gu-damana dono hagawelewele-mai gi-di-au, guu-dugu au bolo di hagadaumee ni-oono.

19:12  Mee gu-hagau-mai ana gau-dauwa belee daaligi au, guu-geli di-nadau gowaa hai heebagi haganiga-mai dogu gili.

19:13  God guu-hai ogu duaahina gi-de-hiihai mai gi-di-au, au guu-hai tangada huagee i-baahi digau ala gu-iloo-ginaadou au.

19:14  Ogu gau mo ogu ihoo hagaaloho guu-hula gi-daha mo au.

19:15  Digau mai-i-daha ala nogo noho i dogu hale gu-de-langahia-e-ginaadou au, gei nia ahina ala e-ngalua mai gi-di-au, guu-hai au bolo au tangada huagee be tangada tuadimee.

19:16  Au ga-gahigahi dagu dangada hai-hegau, gei mee hagalee goou, gei au ga-dangidangi gi mee gi hagamaamaa-ina au, gei mee hagalee hagamaamaa au.

19:17  Gei dogu lodo e-de-hiihai gi-di llamu o dogu dogidogi, gei ogu duaahina-daane e-de-hiihai di-lloomoi gi-hoohoo-mai gi-di-au.

19:18  Nia damagiigi e-haga-balumee au, mo-di gadagada-mai gi-di-au i-di nadau madagoaa ma-ga-gidee-ginaadou au.

19:19  Ogu ihoo hagaaloho e-gulugulua i-di-au, digau ala e-koia e-aloho-iei au gu-hai-baahi mai gi-di-au.

19:20  Dogu gili gu-galugalua i-di gili ogu iwi, dogu mouli gu-hoohoo ga-ulu gi-daha mo au.

19:21  “Goodou ala go ogu ihoo hagaaloho,

19:22  Goodou e-aha ala e-hagahuaidu au be-di hai a God dela ne-hai-mai gi-di-au? Ma digi dohu go godou hagaduadua au?

19:23  Au e-hiihai huoloo bolo tangada gi-langahia agu helekai aanei, gaa-hihi gi-lodo di beebaa!

19:24  Be e-hihi gi-hongo di hadu gi-di mee paa-mee baalanga, e-hihi gii-noho nia maa beelaa gi-muli.

19:25  Gei au e-iloo bolo ma tangada i-di langi e-hanimoi e-hagamaamaa au.

19:26  I-muli hogi dogu gili ga-hunahuna go di magi, gei au gaa-mmada gi God.

19:27  Au gaa-mmada gi ogu golomada gi Mee, gei Mee hagalee hai be tangada henua-gee. “Dogu manawa gu-bagege, idimaa, goodou gu-helekai boloo,

19:28  ‘Dehee tadau hai e-mee di-hagaduadua a-mee?’ Goodou ne-halahala be di-maa di-aha dela gaa-mee di-godou hai-baahi mai gi-di-au.

19:29  Gei dolomeenei, goodou gi-mmaadagu i tulumanu-dauwa dela e-gaamai di hagawelewele o God i-di gili nia huaidu, bolo gi-iloo-e-goodou bolo ma Tangada i-golo dela e-hai dana hagi-aga.”

Chapter 20

20:1  Zophar, tangada o Naamah, ga-helekai,

20:2  “Job, goe gu-haga-deaadee au, au gu-hiihai bolo au ga-helekai gi au helekai.

20:3  Au helekai ala e-helekai-iei goe, guu-hai nia helekai lagamaaloo, gei au e-iloo dagu hai e-helekai-iei au adu gi-di-goe.

20:4  “E-donu bolo goe e-iloo-hua bolo mai i-taamada, i-di madagoaa dela ne-dugu tangada gi-hongo henuailala,

20:5  deai tangada huaidu e-noho manawa lamalia i-di madagoaa looloo ai.

20:6  Dolomaa digaula ga-tomo-aga ga-lloowehaa, gaa-tugi i-di langi, e-llauehaa huoloo nadau libogo e-taletale i-nia gololangi,

20:7  gei digaula gaa-ili gi-daha gadoo be nia gohu gelegele, gei digau ala e-iloo-ginaadou digaula, la-ga-gologolo be digaula ne-hula gi-hee.

20:8  Digaula gaa-mmaa gi-daha gadoo be-di midi, e-hai gadoo be-di moe i-di boo, gei gu-deemee di-mmada ginai labelaa.

20:9  Digau huaidu la-ga-hagalee i-nadau gowaa ala nogo noho-ai,

20:10  gei nadau dama gaa-hai di humalia e-hui-anga nia mee ala ne-gaiaa ang-gi digau hagaloale.

20:11  Nadau huaidina i-mua nogo maaloo, i-nadau madagoaa nogo dama-daane-ai, ge muli-hua tama-madagoaa dulii guu-huli guu-hai nia gelegele.

20:12  “Di huaidu la-koia e-maangala i-lodo nadau ngudu, e-dugu i-lala nadau holole belee mommomi go ginaadou i-di kala o di-maa.

20:13  “Di huaidu la-koia e-maangala i-lodo nadau ngudu, e-dugu i-lala nadau holole belee mommomi go ginaadou i-di kala o di-maa.

20:14  Gei i-lodo nadau dinae e-koia e-mmala gono huoloo, koia e-mmala laa-hongo nia mee poisin huogodoo ala i-golo.

20:15  Tangada huaidu ga-lualua-mai nia goloo ala ne-gaiaa koia. God gaa-daa labelaa gi-daha nia maa mai i-lodo dono dinae.

20:16  Nia mee o digau huaidu ala ne-holo le e-hai gadoo be nia poisin, e-daaligi digaula gadoo be tangada dela ne-kadi go di gihaa poisin.

20:17  Digaula hagalee e-mouli bolo gii-mmada ginaadou gi-nia monowai lolo-olib, be go di mmidi-mai o-nia wai milugu mono mee-maangala-‘honey’.

20:18  Digaula gaa-kae gi-muli nia mee huogodoo ala ne-ngalua ginai. Digaula gu-deai nadau madagoaa e-tenetene gi nadau maluagina ai,

20:19  idimaa i-di nadau haga-huaidu digau hagaloale, mo di-nadau haga-deiloo-ginaadou digaula, mo-di kae nia hale ala hagalee ne-hau go ginaadou.

20:20  Nadau hagagailaa le e-dee-dohu ang-gi ginaadou.

20:21  Digaula ga-miami, la-hagalee e-dubu nadau mee, gei dolomeenei gei nadau maluagina ga-haga-odi gi-daha.

20:22  I-di ulu gi-nua o nadau aali, taamaha o nadau haadanga balua gaa-beehi digaula.

20:23  Dugu-ang-gi digaula gi-geina nadau mee ala e-hiihai ginai! God ga-hagaduadua digaula i-dono hagawelewele damanaiee.

20:24  Di madagoaa digaula gaa-llele gi-daha mo tulumanu-dauwa baalanga, gei di maalei baalanga-mmee gaa-puu digaula.

20:25  Nia amu maalei gaa-weu gi-lodo nadau huaidina, gei nia dodo gaa-hali-mai i-nia ngudu nia amu maalei aalaa. Di madagu ga-haga-bolebole nia manawa digaula.

20:26  Nia mee huogodoo ala ne-benebene go digaula la-ga-mooho gi-daha. Di ahi hagalee ne-akaa gi-nia lima o tangada dangada, gaa-dudu digaula mo digau huogodoo o nadau hale.

20:27  Di langi ga-hagi-aga nadau ihala, henuailala ga-haga-modongoohia nadau huaidu.

20:28  Nadau maluagina huogodoo ga-mooho i-lodo di labagee o-di hagawelewele o God.

20:29  “Deenei di hui hagaduadua o digau huaidu, di hui dela guu-dugu go God ang-gi digau beenei.”

Chapter 21

21:1  Gei Job ga-helekai,

21:2  “Hagalongo gi agu helekai, deenei di haga-manawa lamalia e-dahi e-madau-adu gi goodou.

21:3  Dugua-mai dogu madagoaa e-helekai-iei au, ga-nomuli, gei goodou gaa-mee di-gadigadi godou malaungudu mai gi-di-au.

21:4  “I-dogu hai ogu donu, hagalee bolo e-hai ang-gi nia daangada dangada. Iai tadinga i-golo dela e-deemee di-noho deemuu-iei au.

21:5  Mmada-mai gi-di-au. E-dee-dohu di-godou daumada au mo-di noho deemuu i-godou lodo gologolo?

21:6  I-dogu haga-mamaanadu be di-maa di-aha dela ne-hai-mai gi-di-au, gei au gu-homouli huoloo mo-di bolebole i-dogu madagu.

21:7  “Ma e-aha dela God e-dumaalia ang-gi digau huaidu gi-mouli, e-dumaalia gi digaula gi-mouli duai gei gi-haadanga-lamalia?

21:8  Digaula guu-hai nadau dama, nadau dama gu-hagadili labelaa nadau dama, gei digaula e-mouli bolo gi-gidee-ginaadou digaula ala e-tomo-aga i-lala.

21:9  Gei God digi dugu-anga di haingadaa gi nadau hale, gei digaula e-mouli i-di mouli hagalee mmaadagu.

21:10  Gei nadau kau e-hagadili, hagalee mmademmade nadau dama.

21:11  Gei nadau dama e-lellele e-hai nadau dadaagala tenetene gadoo be nia dama-siibi,

21:12  e-gaalege gi-nia lee ‘harp’ mo nia lee o-nia mee ala e-iliili.

21:13  Digaula e-mouli i-di aumaalia, gaa-mmade ge hagalee nadau mmae ai.

21:14  “Digau huaidu e-hai ang-gi God gi-hudee haga-deaadee-ina ginaadou. Digaula hagalee e-hiihai bolo gi-iloo di manawa a God ang-gi ginaadou.

21:15  Digaula e-haga-mamaanadu bolo ginaadou hagalee e-hai-hegau gi God Mogobuna, gei e-hagalee e-humalia ang-gi ginaadou di hai dalodalo gi Mee.

21:16  Digaula e-haga-mamaanadu bolo ginaadou e-gila humalia hua mai i nadau mahi, gei au e-hagalee e-donu-loo gi nadau haga-mamaanadu.

21:17  “Di maalama o digau huaidu le e-mee di-diinai? Iei tangada i digaula guu-tale gi-di haingadaa? E-hai behee? God gu-hagaduadua digau ala huaidu gi dono hagawelewele,

21:18  gaa-ili digaula gadoo be nia geinga maangoo ne-ili go di madangi, be nia gohu i-lodo di madangi damana?

21:19  “Goodou e-haga-maanadu bolo God le e-hagaduadua di tama idimaa i-nia huaidu o dono damana. Deeai, God le e-hagaduadua-hua tangada huaidu gi ono huaidu, mo-di hagamodongoohia-aga bolo Ia e-hai di mee deenei idimaa i-nadau hai huaidu.

21:20  Digau huaidu gii-bida hai-mee gi-nadau hagaduadua. Digaula gi-longono-ginaadou di hagawelewele a God Mogobuna.

21:21  Di mouli o tangada ma-ga-hagaodi, le e-hai behee, ia e-haga-mamaanadu bolo ana dama le e-noho tenetene?

21:22  Ma iai tangada e-mee di-aago a God, dela e-hagadonu hogi gii-donu digau ala e-aamua?

21:23  “Hunu daangada e-mouli maaloo-hua gaa-dae-loo gi-di laangi o nadau mmade. Digaula e-mmade i-di manawa lamalia mo-di aumaalia, nadau huaidina e-tomo humalia i-nadau miami humalia.

21:24  “Hunu daangada e-mouli maaloo-hua gaa-dae-loo gi-di laangi o nadau mmade. Digaula e-mmade i-di manawa lamalia mo-di aumaalia, nadau huaidina e-tomo humalia i-nadau miami humalia.

21:25  Hunu daangada e-hagalee manawa lamalia. Digaula e-mouli gaa-mmade-hua i-lodo nadau lodo-huaidu.

21:26  Huogodoo e-hai be-di mee e-dahi, digaula huogodoo gaa-mmade gaa-danu gi-lala. Nia huaidina digaula huogodoo gaa-honu i-nia ila no-lodo.

21:27  “Au e-iloo godou hagamamaanadu huaidu e-hai-baahi mai gi-di-au.

21:28  Goodou e-heheeu boloo, ‘Dehee di hale o tangada aamua deenei, go taane dela nogo haihai nia mee huaidu?’

21:29  Goodou gu-helekai ang-gi digau ala e-heehee? Goodou e-de-iloo di hagailoo dela ne-gaamai go digaula?

21:30  I-di laangi dela e-hagaduadua nia daangada go God gi dono hagawelewele, gei digau huaidu e-dagaloaha i-nia madagoaa huogodoo.

21:31  Deai tangada e-hagi-aga tangada huaidu ai, be e-hui-anga nia mee huogodoo ala ne-hai go mee ai.

21:32  I-di madagoaa dela e-lahi-iei mee gi-di gowaa dela e-danu-ai digau mmade, go nia daalunga ala gu-hagaloohi hagahumalia,

21:33  di llongo dangada dogologo e-dagi e-hula gi taalunga, gei mee e-moe i-lodo nia gelegele balabala.

21:34  “Gei goodou! Goodou e-hagamada au gi godou helekai haga-manawa lamalia balumee! Godou helekai mai gi agu helekai le e-tilikai!”

Chapter 22

22:1  Eliphaz, tangada mai Teman, ga-helekai,

22:2  “Ma iei tangada igolo koia e-kabemee, e-dahidamee ang-gi God?

22:3  O hangaahai donu guu-hai di mee hagahumalia a God? Be o hangaahai humalia e-hagamaamaa a-Mee?

22:4  Hagalee go do hagamadagudia a God dela e-gabunga iei goe, ge e-lahi-iei goe gi-di gowaa hai-gabunga.

22:5  Deeai, Mee e-gabunga goe, idimaa goe gu-hai-hala huoloo, guu-hai nnagadilinga huaidu huogodoo.

22:6  Bolo gii-mee-ai di-hui di boibana o do duaahina adu gi-di-goe, goe guu-kae ono goloo huogodoo, deai di mee ne-dugu belee ulu-iei mee ai.

22:7  Goe gu-dumaanga nia wai ang-gi digau ala gu-duadua, gei gu dumaanga nia meegai gi digau hiigai.

22:8  Goe ne-hai-hegau gi o mogobuna mo do waawa aamua bolo goe gaa-dagi tenua deenei hagatau.

22:9  Hagalee go nia ahina ala guu-mmade nadau lodo ala digi hagamaamaa-ina kooe, gei goe gu-gaiaa ge hai haga-huaidu hogi nia dama nadau maadua ai.

22:10  Dolomeenei gu-iai nia hele e-logo gu-haganiga-mai i oo daha, gei goe gu-madagu hagalimalima.

22:11  E-koia e-bouli dongoeho huoloo, gei goe ga-de-gidee-goe gi-daha. Di labagee ga-mmidi-ia ga-haga-melemu goe.

22:12  “E-hai behee? God la-hagalee e-noho i-di langi i-nua-loo, e-mmada-ia i-hongo nia heduu, ma e-aha maa nia maa koia e-mogowaa-loo i-nua-loo?

22:13  Gei dolomeenei gei goe e-heeu boloo, ‘Ma di-aha dela e-iloo-ai a God? Mee e-noho e-ngala i-nia gololangi, malaa, dehee dana hai e-gabunga gidaadou?’

22:14  Goe e-hagamaanadu bolo nia gololangi maadolu higahiga ala gu-abaaba a-Mee bolo gi-de-gidee a-Mee gi-daha, i-dono madagoaa dela e-heehee i-lala di langi.

22:15  “Goe e-hagamaanadu bolo goe e-haele i-nia ala ala e-heehee-ai digau huaidu i-nia madagoaa huogodoo?

22:16  I-mua-hua di-nadau madagoaa ma-ga-dau-mai, gei digaula ga-taahee gi-daha i-di labagee.

22:17  Aanei nia hagadilinga daangada ala hagalee e-hiihai gi God, gei gu-hagadonu bolo deai dahi mee e-mee dana hai ang-gi ginaadou ai.

22:18  Malaa deenei go God dela ne-wanga gi digaula nadau maluagina. Au e-de-iloo nia hagamaanadu o digau huaidu.

22:19  Tangada humalia le e-tenetene gei tangada madammaa le e-gadagada i-nadau mmada gi digau huaidu ala e-hagaduadua.

22:20  Nia mee huogodoo ala gu-hai-mee ginai digau huaidu le e-mooho gi-daha, gei di ahi e-dudu nia mee huogodoo ala e-dubu i-golo.

22:21  “Deenei-laa, Job, dangidangi ang-gi God, gei gii-lawa dau dugu a-Mee bolo di hagadaumee ni-oou. Maa goe gaa-hai beenei, gei Mee ga-haga-maluagina goe.

22:22  Goe gi-kae-ina ana agoago, gei gi-dadaahia-hua beelaa i oo lodo.

22:23  Uaa, goe gi-haga-mau-lala, huli ang-gi God Mogobuna, gii-lawa gi-daha mo nia huaidu huogodoo ala e-haihai i-doo hale.

22:24  Kilia gi-daha au goolo huogodoo, kilia au goolo ala koia e-humalia gi-lodo di walowalo-wai dela guu-dugu baguia.

22:25  Heia a God Mogobuna gii-hai nia goolo ni-aau, heia a-Mee gii-hai nia silber ni-aau, e-hagabae gi-nua.

22:26  Goe ma-gaa-hai beenaa, gei goe ga-hagadonu a God i-nia madagoaa huogodoo, ga-gidee bolo ma go Mee dela go di hagamau o doo tene.

22:27  Do madagoaa ma-ga-dalodalo, gei Mee e-longono-Ia goe, gei goe ga-hagagila-aga nia hagababa huogodoo ala ne-hai kooe.

22:28  Gei nia mee huogodoo ala ma-gaa-hai kooe le e-kila humalia, gei di maalama ga-haga-maalama doo ala.

22:29  God e-hagamenege-ia gi-lala digau ala e-hagamuamua, gei e-haga-dagaloaha digau huogodoo ala e-hila gi-lala.

22:30  Gei Mee ga-haga-dagaloaha goe maa goe e-madammaa, ge o hangaahai le e-hai donu.”

Chapter 23

23:1  Gei Job ga-helekai,

23:2  “Au e-leelee logo hai-baahi gi God, Au gu-deemee di-hagakono dogu dangidangi mmae.

23:3  Au bolo gi-iloo di gowaa dela e-noho-iei Mee, gi-iloo di ala dela e-hana gi-baahi o-Mee.

23:4  Au ga-hagi-aga dagu gabunga i ono mua, ga-hagamodongoohia agu helekai hai-baahi.

23:5  Au e-hiihai gi-iloo ana helekai mo dana hai dela e-helekai gi dagu heeu.

23:6  E-hai behee? God ga hai-hegau gi ono mahi hagatau e-hai-baahi mai gi-di-au? Deeai, Mee e-hagalongo gi agu helekai.

23:7  Koau dela e-donu. Au e-mee di-hagadonudonu gimaua mo God, gei Mee ga-hagamodongoohia-aga dogu madammaa dolomeenei gaa-hana-hua beelaa.

23:8  “Au gu-halahala God i-di baahi-gi-dua, gei Mee hagalee i-golo. Au digi gidee-au a-Mee i-dogu halahala a-Mee i-di baahi-gi-dai.

23:9  God le e-hai ana moomee i-bahi-i-ngeia mo i-bahi-i-ngaaga, gei au e-de-gidee-au a-Mee.

23:10  Malaa deenei, God e-iloo ogu ala heehee huogodoo. Maa Mee ga-hagadina au, gei Mee ga-gidee-laa bolo au e-madammaa.

23:11  Au e-haele i-hongo ono ala ne-hagi-mai gi-di-au, gei hagalee e-geleu gi tei baahi.

23:12  Au e-haga-gila-aga ana haganoho i-nia madagoaa huogodoo. Au e-daudali-hua go dono hiihai, gei hagalee go dogu hiihai.

23:13  “Gei Mee hagalee e-huli dono manawa. Deai tangada e-mee di-hai-baahi-anga, be e-dugu di mee a-Mee dela ne-belee hai ai.

23:14  Gei Mee e-haga-gila-aga dana mee ne-haganoho belee hai-mai gi-di-au. Di mee ne-haganoho deenei la di mee mai i-nia mee e-logowaahee ala ne-haganoho-aga go Mee belee hai.

23:15  Au gu-bolebole huoloo i-dogu madagu i-mua ono hadumada.

23:16  God Mogobuna guu-lawa di-haga-bagege au. Ma go God gei hagalee go-di bouli dela e-madagu-iei au, ma e-aha maa go di bouli dela gu-haga-dee-gida ogu golomada.

23:17  God Mogobuna guu-lawa di-haga-bagege au. Ma go God gei hagalee go-di bouli dela e-madagu-iei au, ma e-aha maa go di bouli dela gu-haga-dee-gida ogu golomada.

Chapter 24

24:1  “God Mogobuna le aha dela hagalee dugu di madagoaa e-hai di gabunga, di laangi e-gabunga ana gau hai-hegau?

24:2  “Nia daangada e-negenege nadau haga-geinga belee haga-damana nadau gowaa. Digaula e-gaiaa nia siibi, e-kae gaa-dugu gi-lodo nadau hagabuulinga-siibi.

24:3  Digaula e-daa nia ‘donkey’ o digau nadau maadua ai, gei e-daahi di kau o-di ahina guu-made dono lodo, gaa-dae-loo gi-di ahina deelaa guu-hui dono boibana gii-odi.

24:4  Digaula e-duuli gi-daha nia donu digau hagaloale, mo-di hono-adu digaula gii-llele pala hagammuni.

24:5  “Malaa, digau hagaloale la-guu-hai gadoo be nia ‘donkey’ lodo-geinga, ala e-halahala nadau mee e-gai i-lodo nia anggowaa maangoo. Deai di gowaa i-golo ai e-mee di-gida nia mee e-gai go nadau dama.

24:6  Digaula e-gai nia hadagee ala hagalee ni ginaadou, gei digaula e-ogoogo nia golee nia hadagee o digau huaidu.

24:7  I-di boo, gei digaula e-kii hagalee e-gahu, deai nadau mee e-duuli di magalillili ai.

24:8  Digaula e-tuu i-di uwa dela e-doo-iha i tomo nia gonduu. Digaula ga-pala-adu gi-di malu o-nia hadugalaa e-haga-malu-ai ginaadou.

24:9  “Digau huaidu e-hai-hege nia dama nadau maadua ai, ge e-lahi nia dama digau hagaloale e-hui-ai nia boibana digaula.

24:10  Gei digau hagaloale e-heehee-hua nadau goloo e-gahu ginaadou ai. Digaula e-hadi nadau lii-‘wheat’, gei digaula e-hiigai huoloo.

24:11  Digaula e-tau nadau olib e-hai nia lolo, gei nia ‘grape’ e-hai nia waini, gei digaula e-hieinu huoloo.

24:12  I-lodo nia waahale iai digau gu-lauwa mo digau ala gaa-mmade le e-wwolowwolo, gei God e-haga-de-iloo nia dalodalo digaula.

24:13  “Digau i-golo hagalee hiihai gi-di maalama. Digaula e-de-iloo-ginaadou di-maalama, digaula hagalee e-hiihai e-hula gi-di gowaa maalama dela e-dagi ginaadou.

24:14  Digau daaligi dangada e-ala-aga hagaluada-loo, gaa-hula e-daaligi digau ala hagaloale, gei i-di boo, digaula e-hai-gaiaa.

24:15  Digau hai be-di manu e-talitali di bouli gi-dau-mai, digaula e-hagammuni nadau golomada bolo gi-de-iloo tangada.

24:16  Digau gaiaa le e-oho di hale i-di boo, di mee ga-maalama-mai digaula e-pala hagammuni i-di maalama.

24:17  Digaula e-mmaadagu i-di maalama o-di aa, gei digaula hagalee e-mmaadagu i-di bouli.

24:18  “Digau huaidu e-taahee gi-daha i-di labagee, gei nia gowaa digaula gu-i-lala di hagahalaua a God. Gei digaula gu-deemee di-hula e-ngalua i-lodo nadau gowaa dogi-waini.

24:19  E-hai gadoo be ‘snow’ ma-ga-hagalee i-di welengina o-di laa, deelaa gadoo di ala o tangada huaidu dela ma-ga-hagalee i tenua o digau ala e-mouli.

24:20  Gei nadau dinana gu-de-langahia-e-ginaadou hogi digaula. Digaula guu-gai go nia ila, gei guu-oho gadoo be nia laagau ma-gaa-tinga gi-lala.

24:21  Di hai deenei e-gila-aga, idimaa i nadau hai hagahuaidu nia ahina ala guu-mmade nadau lodo, gei hagalee e-hagalabagau nia ahina ala e-dee-huwa.

24:22  God e-daaligi digau aamua gi ono mahi. God ga-ngalua, gei digau huaidu gaa-mmade.

24:23  Holongo God ga-dumaalia ang-gi digaula gi-mouli, gei Mee e-daumada digaula i-nia madagoaa huogodoo.

24:24  Digau huaidu e-haadanga-lamalia-hua i tama-madagoaa bodobodo. No-muli-hua, gei digaula ga-maangoo gadoo be nia geinga, e-hai gadoo be nia laagau-‘wheat’ ala ne-tuu gi-lala.

24:25  Ma iai tangada i-golo e-haga-dilikai bolo di mee deenei la-hagalee e-donu? Ma iai tangada e-mee di-hagamodongoohia-aga bolo agu helekai la-hagalee e-donu?”

Chapter 25

25:1  Bildad tangada Shuah ga-helekai:

25:2  “God e-koia e-mogobuna. Nia daangada huogodoo gi-hagamadagudia a-Mee. Mee e-daahi dono henua i-di langi i-di aumaalia.

25:3  Ma iai tangada e-mee di-dau digau di-langi ala e-hege gi Mee? Ma iai di gowaa i-golo e-hagalee maalama i-di maahina a-Maa?

25:4  Ma iai tangada e-mee di-donu gei e-madammaa i-mua o God?

25:5  I dono mmada, di malama la-hagalee e-maahina ge nia heduu le-hagalee e-madammaa.

25:6  Malaa e-hai behee go tangada dangada, dela e-hai gadoo be-di badubadu, tama-manu geinga tolo dulii-loo? Dehee tahidamee o di mouli tangada i-mua o God?”

Chapter 26

26:1  Gei Job ga-helekai hai-baahi,

26:2  “Dehee dau hai e-hagamaamaa-mai au taane hagaloale ge bagege deenei!

26:3  Di hagamaamaa behee e-gaamai kooe gi-di-au dela e-de-iloo nia mee. Di kabemee aha e-mee di hagamodongoohia kooe!

26:4  Koai belee hagalongo gi au helekai? Koai dela ne-gowadu gi-di-goe nia helekai aanaa?”

26:5  “Nia hagataalunga o digau mmade e-bolebole i-lodo nia wai i-lala henuailala.

26:6  Tenua o digau mmade gu-mahuge ang-gi God. Deai dahi abaaba e-mee di-duuli ono golomada ai.

26:7  God gu-haga-palaha i-lala di-langi baahi laa-ngeia, gu daudau henuailala i-lodo di anga-ahiaalangi.

26:8  Deenei go di God dela ne-hagahonu nia gololangi gi-nia wai, ga-dadaahi nia maa bolo gi-de-daamaha gi-di baahi ga-malingi.

26:9  Mee e-haga-ngala di malama gi-nia gololangi.

26:10  Mee e-wwae di maalama mo-di bouli gi-di lain dela ne-hihi go Mee i-hongo di moana.

26:11  I dana helekai hai-baahi gi-nia duludulu ala e-togo-aga di langi gi-nua, digaula gu-bolebole gu-mmaadagu.

26:12  Ma go ono mahi ala ne-aali i-di moana, go ono lima mogobuna ala ne-daaligi-ai Rahab, dela go di manu hagamadagudagu dangada.

26:13  Ma go nia mahi o ono madangi ala ne-haga-madammaa lala di langi, mo dono lima dela ne-daaligi-ai di manu deelaa.

26:14  Gei nia mee aanei la-nia ada-mee hua ni ono mogobuna, aalaa-hua go ono lee moolee ala ne-longono gidaadou. Malaa, ko-ai e-iloo di tonu o-di aamua huoloo o God?”

Chapter 27

27:1  Job e-duudagi hua ana helekai,

27:2  “Au e-hagamodu i-di ingoo o God Mogobuna dela e-mouli dee-odi, dela ne-duuli gi-daha ogu donu, gaa-hai au gii-lodo huaidu huoloo,

27:3  i-di waalooloo a God e-dugu-mai ono madangi mouli,

27:4  ogu malau-ngudu-nei hagalee-loo e-helekai i-di mee huaidu, dogu holole-nei hagalee tilikai.

27:5  Au hagalee-loo e-helekai i goodou bolo godou helekai le e-donu. Au gaa-tai ogu lodo ga-helehelekai-hua i-dogu madammaa gaa-dae-loo gi-di laangi dela e-made-iei au.

27:6  Au hagalee lawa i dagu hagamodongoohia-aga ogu donu, idimaa di hagi-aga i ogu lodo le e-madammaa.

27:7  “Digau ala e-hai-baahi-mai gi-di-au e-kae di hagaduadua gadoo be digau huaidu, mo digau hagalee e-donu.

27:8  Dehee di hagadagadagagee o digau ala deai di-nadau God ai i-di madagoaa o God dela ma-ga-gahigahi-mai digaula?

27:9  Di madagoaa haingadaa ma-gaa-dau i digaula, e-hai behee? God e-longono nadau gahigahi?

27:10  Digaula belee hiihai huoloo gi-nia hagadilinga haga-tenetene a God ala ma-ga-haga-gila-aga, gei digaula belee dalodalo ang-gi God i-nia madagoaa huogodoo.

27:11  “Dumaalia-mai gi-di-au, gei au ga-hagi-adu gi goodou tamanaiee o-nia mogobuna o God, ga-hagamodongoohia-adu gi goodou nia mee o-di God Mogobuna ala gu-haganoho belee hai.

27:12  Gei deeai, goodou gu-iloo-hua-e-goodou. Malaa e-hai behee go goodou ala-hua e-hai godou balu-helekai?

27:13  “Deenei di hai a God Mogobuna dela e-hagaduadua digau huaidu, digau daaligi dangada.

27:14  Holongo digaula gu-hagadili nadau dama-daane e-logo, malaa digaula gaa-mmade huogodoo i-lodo tauwa. Nadau mee e-gai e-dee-dohu-loo gi nadau dama.

27:15  Digau ala gaa-tiba ga-mouli, gei digaula gaa-mmade i tau-magi, gei nadau lodo hagalee e-tangitangi gi digaula.

27:16  Digau huaidu e-logowaahee nadau silber e-deemee di-dau, gei nadau goloo koia e-logo i-nia mee o-nia daangada ala e-hiihai ginai.

27:17  Gei hunu gau humalia ala i-golo ga-ulu i-nia goloo aanei, gei hunu gau hai-mee-donu ga-hai-mee gi-nia silber aalaa.

27:18  Digau huaidu e-hau nadau hale e-hai gadoo be-di hale bagaigee, be tamaa-hale o tangada hai-hegau dela e-hagaloohi dana gowaa dogi-mee.

27:19  Dahi madagoaa-hua, gei digaula gaa-moe gi-lala i-lodo nadau maluagina, gei digaula ga-aala-aga gei nadau maluagina gu-de-igolo.

27:20  Di haingadaa damana gaa-tale gi digaula e-hai gadoo be-di labagee. Di madangi gaa-gono boo gaa-ili digaula gi-hagalee.

27:21  Di madangi ia i-dua gaa-ili digaula gi-daha mo nadau hale.

27:22  Di madangi ga-ili-mai i-hongo digaula, i-nadau madagoaa e-hagamahi bolo e-llele gi-daha, gei gu-deemee-loo di-llele.

27:23  Di madangi e-waluwalu digaula i-nadau llele gi-daha, e-hai digaula gi-mmaadagu huoloo i-di mogobuna dela e-haga-huaidu digaula.”

Chapter 28

28:1  Di gowaa i-golo e-mee di geli-aga nia silber. Di gowaa i-golo e-haga-madammaa-ai nia goolo.

28:2  Nia daangada e-geli-aga nia baalanga i-lodo nia gelegele, gei e-dunu nia hadu e-haga-hali-mai nia baalanga-mmee.

28:3  Nia daangada e-hula-loo gi-lodo nia gelegele i-di gowaa llala-loo. Digaula e-hula e-halahala-mee gi-lodo-loo henuailala, e-geli aga nadau hadu i-lodo di gowaa bouli dongoeho.

28:4  Digaula e-geli nadau bongoo gi-lala-loo bolo gii-gida-ai nadau hadu hagalabagau i-di gowaa e-mogowaa-loo i-daha mo-di gowaa dela e-noho-ai nia daangada, be i-di gowaa dela digi tale ginai di wae tangada. Digaula e-ngalua modo-ginaadou, deai tangada i-golo ai, e-kaga nia hali gi-lodo nia bongoo aalaa.

28:5  Nia meegai e-tomo-aga i henuailala, gei i-di gowaa mugi-lala i henuailala nia hadu le e-haga-mooho ge haga-gohugohu.

28:6  Nia hadu hagalabagau ‘sapphire’ e-hagahonu i-lodo nia hadu o henuailala, gei nia goolo la i-lodo nia gohu gelegele.

28:7  Deai dahi manu e-gidee di ala dela e-hana gi-di gowaa dela iai nia hadu hagalabagau ai, gei deai di ‘vulture’ e-maangi gi-golo ai.

28:8  Deai di laion be tei manu e-haele i-di ala lomo deenei ai.

28:9  Nia daangada e-geli-aga nadau hadu ala e-mau-dangihi, e-geli di gonduu gaa-tugi-loo i tono di gonduu.

28:10  I di-nadau geligeli i-lodo di bongoo deelaa, digaula e-kida nadau hadu hagalabagau.

28:11  Digaula e-geli-loo gi-lala gii-tugi nia wai, gaa-kae gi-di gowaa maalama nia mee ala nogo de-gidee.

28:12  Malaa, dehee-laa di gowaa dela e-gida-ai di kabemee? Malaa, dehee-laa tadau hai gaa-mee-ai di-agoago i-di iloo-mee?

28:13  Di kabemee e-deemee di-gida i-baahi o-nia daangada dangada. Deai tangada e-mee di-iloo di hai o-di hagalabagau o di-maa ai.

28:14  I-tua di moana mo i-lala di tai e-helekai bolo deai di kabemee i-nau baahi ai.

28:15  Deai tangada e-mee di-hui di-maa gi-nia silber mo-nia goolo ai.

28:16  Nia goolo mono hadu hagalabagau ala koia e-humalia huoloo le e-deemee di-hagatau ang-gi di hagalabagau o di-maa.

28:17  Di kabemee e-koia e-hagalabagau huoloo i-hongo nia goolo, i-hongo nia ibu goolo mo nia kalaadi ala koia e-humalia.

28:18  Di kabemee le e-koia e-hagalabagau huoloo i-hongo nia hagahonu o-di moana madamada, be nia hadu hagalabagau ala go nia ‘crystal’ mo nia ‘ruby’.

28:19  Nia hadu ‘topaz’ ala koia e-humalia mo nia goolo ala koia e-madammaa le e-deemee di-tongaadahi ang-gi di kabemee.

28:20  Malaa, dehee-laa di hagamau o-di kabemee? Malaa dehee-laa tadau hai e-aago-ai gidaadou gi-di kabemee?

28:21  Deai dahi mee mouli e-mee di-gidee di-maa ai, be nia manu mamaangi e-mee di-gidee-ginaadou di-maa ai.

28:22  Di hagahuaidu mo-di made hogi, meemaa e-helekai-hua bolo ginaua ne-hagalongo-hua gi-di kai o di-maa.

28:23  Ma go God dela e-iloo di-maa, e-iloo di gowaa dela e-gida-ai di-maa,

28:24  idimaa Mee gu-gidee di hagalawa o henuailala, e-gidee nia mee huogodoo ala i-bahi-i-lala di langi.

28:25  Di madagoaa God ne-dugu-anga di mogobuna gi-di madangi, ge ne-hagamaanadu be-di moana le e-hai gi damana behee,

28:26  mo-di madagoaa God ne-hagamaanadu be-di uwa le e-hai gii-doo i-hee, mo-di ala o-nia gololangi o-di atili le e-hula-laa-hee,

28:27  deelaa di madagoaa o-Mee ga-gidee di kabemee, gei e-mmada be di-maa e-hagalabagau be-hee, gei Mee ga-hagamogobuna di-maa.

28:28  God ga-helekai gi nia daangada dangada, “Goodou gi-hagalabagau-ina di-godou Dagi, gei goodou ga-kabemee. Goodou gii-huli gi-daha mo-di huaidu, gei goodou ga-modongoohia nia mee.”

Chapter 29

29:1  Job ga-daamada ga-helekai labelaa,

29:2  “Au bolo dogu mouli-nei gii-hai hualaa be dogu mouli i-di madagoaa i-mua, i-di madagoaa a God dela nogo madamada humalia i-di-au.

29:3  God nogo madalia au i-nia madagoaa huogodoo, e-haga-maalama-mai au i-dogu heehee i-di bouli.

29:4  I-lodo nia laangi aalaa, gei au nogo humalia-mai gi-di-au. Tumaalia o God nogo madamada humalia dogu hale.

29:5  God Mogobuna nogo madalia au i-di madagoaa deelaa, gei agu dama gu-hii-mai i-ogu daha.

29:6  Agu kau mono kuudi gu-gaamai nia milugu e-logo, gei agu laagau-olib nogo tomo-aga i-lodo nia gelegele hadu-hadu.

29:7  Di madagoaa digau mmaadua o-di waahale ga-dagabuli, gei au guu-noho madalia digaula,

29:8  malaa, nia dama-daane ala ma-ga-gidee-ginaadou au, digaula e-hagapaa gi-daha mo au, gei digau mmaadua ma-ga-tuu-aga, e-hagalabagau au.

29:9  Gei nia dagi o-nia daangada gu-hagamodu nadau helehelekai,

29:10  mo digau hogi aamua hagalabagau la-guu-noho deemuu.

29:11  “Digau huogodoo ala ma-ga-gidee, be longono-ginaadou au, digaula e-helehelekai humalia i agu mee ala ne hai.

29:12  Tangada hagaloale ma-gaa-dangi di hagamaamaa, gei au gu-hagamaamaa a-mee. Au gu-hagamaamaa nia dama ala nadau maadua ai, ge deai nadau dangada e-hagamaamaa digaula ai.

29:13  Nia daangada guu-too gi-lodo di haingadaa huoloo, digaula nogo haga-hagaamu au. Au nogo hagamaamaa nia ahina nadau lodo ai, gi-iai di-nadau haga-humalia.

29:14  Di tonu la-nogo hai be-di gahu ni-oogu, gei di hai di-tonu la-nogo hai be-di gahu laa-daha mo-di hau ni-oogu.

29:15  Au go di golomada o tangada dee-gida, mo-di wae o tangada habehabe.

29:16  Au nogo hai be tamana ang-gi digau hagaloale, gei e-hegeege tangada mai i-daha ma-gaa-doo gi-lodo di haingadaa.

29:17  Au nogo abaaba nia mahi o digau huaidu gi-daha mo di-nadau mee dela belee hai.

29:18  “Au gu-hiihai bolo dogu mouli gi-waalooloo, gei au gii-made i-dogu hale i-di manawa-tenetene.

29:19  Au nogo hai gadoo be dahi laagau dela e-tale ono aga gi-lodo nia wai, ono lau ala e-tiu i-nia magalillili o-di luada.

29:20  Digau huogodoo nogo haga-hagaamu au i-nia madagoaa huogodoo, gei ogu mahi hagalee e-too i-di-au.

29:21  Dogu madagoaa nogo helekai-iei au, gei nia daangada gu-hagakila, e-hagalongo hagahumalia gi agu helekai.

29:22  Deai nadau mee e-hagapuni-anga i-dogu hagalawa agu helekai ai. Agu helekai guu-dau i-digaula gadoo be nia madaua o-di uwa ma-gaa-doo.

29:23  Digau huogodoo nogo hiihai gi-nia maa, e-hai gadoo be tangada dogi hadagee e-hiihai gi-di uwa ma-gaa-doo.

29:24  Au guu-gono gada gi digaula i-nadau madagoaa gu-deai nadau hagadagadagagee ai. Ogu haga-tenetene gu-haga-maaloo-aga digaula.

29:25  Au guu-kae di waawa-dagi, e-haganohonoho di hai e-hai nia hagataele, gei au guu-dagi digaula gadoo be-di king dela e-dagi ana gau-dauwa e-hula gi tauwa, gei e-haga-tenetene digaula i-lodo nadau hula uli nadau gai.

Chapter 30

30:1  “Digau ala e-lligi i-di-au, digaula e-gadagada i-di-au dolomeenei! Nadau damana la nia balu-daane hua, digi dumaalia gi digaula gi-madalia agu paana e-hagaloohi agu siibi.

30:2  Digaula digau huaidu, deai nadau hadinga ai, digaula e-paagege di hai agu hegau.

30:3  Digaula e-hagaloale huoloo gei e-hiigai, digaula e-mee-hua di-gai nia aga laagau ala gu-maangoo i-di boo i-lodo di gowaa lomo.

30:4  Digaula la digau e-daagi nia geinga lodo-henua gaa-gai, digaula e-gai hogi nia laagau ala nadau kala ai.

30:5  Nia daangada e-wwolowwolo e-hagabagi digaula gi-daha, e-hai gadoo be digau ala e-wwolo gi tangada gaiaa.

30:6  Digaula e-noho-hua i-lodo nia bongoo, i-lodo nia gowaa ne-geli i taalinga di gonduu.

30:7  Digaula nogo wwolowwolo gadoo be nia manu lodo-geinga, e-kii hagabiga i-lodo nia geinga.

30:8  Digaula la di buini balumee, gei hagalee e-dau! Digaula gu-hagabagi gi-daha mo tenua.

30:9  “Dolomeenei gei nia dama-daane digaula gu-lloomoi e-gadagada-mai gi-di-au, gei au hagalee di mee, deelaa-hua go nadau dadaagala.

30:10  Digaula e-gulugulua i-di-au, e-hagamaanadu bolo ginaadou e-humalia i-di-au. Digaula e-buibui nadau haawale mai gi ogu golomada.

30:11  Idimaa God dela ne-hai au gi-haadanga-balua, digaula e-hai-baahi mai gi-di-au i nadau hagawelewele huoloo.

30:12  Digau aanei e-hai-baahi mai gi-di-au i-nia gowaa huogodoo ala ma-gaa-hana ginai au. Digaula e-daudali au e-hagatogomaalia nadau hai huaidu belee hai-mai gi-di-au.

30:13  Digaula gu-duuli dogu ala bolo ginaadou ga-daaligi au. Deai tangada i-golo bolo gaa-mee di-dugu digaula ai.

30:14  Digaula gu-ulu gi-lodo nia bongoo ala i-di abaaba dela e-duuli au, mo-di tobo-ia gi ogu nua.

30:15  Au gu-bolebole huoloo i-dogu madagu. Dogu hangaahai aamua guu-maa gi-daha gadoo be-di oloolo madangi, ge dogu maluagina gu-hagalee gadoo be-di baahi gololangi.

30:16  “Dolomeenei, gei au gu-hoohoo gaa-made, deai tagaloaha i-dogu duadua-nei ai.

30:17  Ogu iwi huogodoo e-mmae i-di boo, di mmae dela e-dadaalo-mai au hagalee-loo e-lawa.

30:18  God guu-kumi dogu uwa, guu-dada ogu goloo gi-daha.

30:19  Mee guu-hudu au gi-lodo nia gelegele pigi, gei au hagalee e-humalia i-hongo nia gelegele waiwai.

30:20  “Meenei God, au gu-gahigahi Goe, gei Goe hagalee e-hila-mai. Gei au ga-dalodalo, gei Goe e-haga-de-iloo-Goe au.

30:21  Goe gu-hai-hua au haga-huaidu, gu-hagaduadua au gi o mogobuna huogodoo.

30:22  Goe guu-wanga au gi di madangi gi-ilia gi-daha, Goe gu-huduhudu au i-lodo di madangi damana.

30:23  Au gu-iloo bolo Goe gaa-wanga au gi-di made, i-di hagaodi gi-muli o-nia mee huogodoo ala e-mouli.

30:24  Goe e-aha dela e-heebagi gi tangada dela gu-mooho, dela-hua e-dangidangi di manawa-dumaalia?

30:25  E-hai behee? Au hagalee nogo madalia digau ala e-tangi i-di haingadaa, be nogo manawa-gee gi digau ala guu-too gi-lodo di hagaloale?

30:26  Au gu-hagadagadagagee gi-di tene mo-di maalama, gei di haingadaa mo-di bouli guu-dau i-di-au.

30:27  Au gu-mooho huoloo i-dogu hidi-gaagaa mo dogu mmae. Nia laangi huogodoo gei au e-duadua.

30:28  Au e-heehee-hua gei au e-honu i-di lodo-huaidu, deai dogu haga-maalama ai. Au e-duu i-lodo digau dogologo e-dangi dogu hagamaamaa.

30:29  Dogu lee la-guu-honu i-di manawa-gee gei e-buhi, guu-hai gadoo be-di lee o di paana lodo-geinga be go di lee ‘ostrich’.

30:30  Dogu gili gu-luuli, au guu-wele i-di magi welengina.

30:31  I-mua gei au nogo hagalongolongo gi-nia lee tenetene, gei dolomeenei gei au e-hagalongolongo gi-nia lee dangi-wawwawe mono hangihangi.

Chapter 31

31:1  “Au guu-hai dagu hagababa bolo au hagalee daumada di ahina i-nia maanadu huaidu.

31:2  Di God Mogobuna e-hai dana-aha mai gi gidaadou? Dehee di hai a-Mee e-hui tadau hangaahai?

31:3  Mee e-hagau-mai dana hagaduadua e-hagahuaidu digau ala e-hai nadau huaidu.

31:4  God e-iloo nia mee huogodoo ala e-hai ko-au, ge e-gidee ogu hanga-heehee huogodoo.

31:5  “Au e-hagamodu bolo au hagalee hai di huaidu ge hagalee hagamada e-halahalau tei dangada.

31:6  God la-gi-hagadina-ina au gi-di mee pauna-mee dela e-hai-donu, gi-gidee Ia be au e-humalia behee.

31:7  Maa nei bolo au guu-huli gi-daha mo-di ala dela e-donu, be dogu huaidina la-gu-hiihai gi-di huaidu, be ogu lima la-gu-dogolia gi-nia huaidu,

31:8  maa e-hai beelaa laa, daaligidia agu hagadili be wanga-ina agu mee ne-dogi gi nnuai daangada gi-geina.

31:9  “Maa nei bolo au gu-hiihai gi-di lodo o tangada dela i dogu baahi, ge gu-talitali hagammuni i-daha mo di bontai di ahina deelaa,

31:10  malaa, dogu lodo gi-heia nia meegai tuai daane, gei gii-kii labelaa i-hongo di moenge o tuai daane.

31:11  Nia huaidu ala beenei le e-haga-langaadia belee hui-hua gi-di made.

31:12  E-hai gadoo be-di ahi maaloo-dangihi dela e-dudu agu mee huogodoo ala e-hai-mee ginai au.

31:13  “Di madagoaa dagu dangada hai-hegau gaa-hai ono donu mai gi-di-au, gei au gu-hagalongo gi mee, ge guu-hai a-mee hagahumalia.

31:14  Maa nei bolo au hagalee ne-hai beelaa, gei au gaa-duu i-mua nnadumada o God behee? Au ga-helekai gi God bolo-aha, maa God ga-hanimoi belee hagi-aga au?

31:15  Di God dela ne-hai au i-lodo tinae dogu dinana, la-go Mee labelaa dela ne-hai agu daangada hai-hegau i-lodo nia dinae nadau dinana.

31:16  “Nia madagoaa huogodoo, gei au nogo hagamaamaa digau hagaloale, digi heia nia ahina nadau lodo ai gii-noho huaidu,

31:17  be nia dama nadau maadua ai gii-noho hiigai gei au e-maaluu.

31:18  I-lodo dogu mouli hagatau, au gu-benebene digaula.

31:19  Au ga-gidee tangada e-haingadaa ang-gi deia, e-deemee di hui ono goloo,

31:20  gei au e-wanga gi mee nia goloo ala ne-hai gi-nia ngaahulu ala ne-gaamai i-baahi agu siibi, gei mee ga-tenetene-aga i-lodo dono manawa ga-hagaamu au.

31:21  “Maa nei bolo au ne-halahalau di tama ono maadua ai, bolo au gaa-wiini i-lodo di gabunga,

31:22  malaa, ogu lima e-humalia-hua e-hadihadi, gii-mmodu gi-daha mo ogu bakau.

31:23  Idimaa au dela e-madagu nia hagaduadua a God, au e-deemee di hai di-mee beelaa.

31:24  “Au hagalee-loo e-hagadagadagagee gi-nia maluagina,

31:25  be e-hagapuu i ogu goloo ala gu-hai-mee ginai au i-lodo dogu lima.

31:26  Au digi daumaha ang-gi di laa i-lodo dono maalama, be-di malama i-lodo dono madamada.

31:27  Au digi hagamaanadu belee hagalaamua di laa be-di malama i-di hongi dogu lima e-haga-modongoohia bolo au e-hagalaamua nia maa.

31:28  Di huaidu dela e-hai beenei e-humalia-hua e-hagaduadua gi-di made, dela e-haga-de-iloo di God Mogobuna.

31:29  “Au digi manawa tenetene ang-gi ogu hagadaumee i-di nadau madagoaa e-haingadaa ang-gi ginaadou.

31:30  Au digi hai-hala i-di dalodalo bolo ginaadou gii-mmade.

31:31  Nia daane huogodoo ala e-ngalua-mai gi-di-au le e-iloo huogodoo bolo au e-hila ang-gi digau mai-daha huogodoo.

31:32  Au e-haga-ulu digau heehee mai mogowaa gi-lodo dogu hale, hagalee hai digaula gii-kii i-hongo nia ala.

31:33  “Nia daangada ala i-golo e-daalo hagammuni nadau mee hala, gei au hagalee hagammuni ogu huaidu.

31:34  Au hagalee-loo e-madagu i-nia daangada i nadau helekai, gei au digi noho dee-muu be e-noho-hua i-lodo dogu hale, i dogu madagu i nadau helekai hai-baahi mai gi-di-au.

31:35  “Ma hagalee tangada e-hagalongo gi agu helekai ala e-helekai-iei au ai? Au e-haga-donu bolo nia helekai huogodoo le e-donu. Di God Mogobuna la-gi-helekai-mai gi-di-au! Maa nei bolo nia helekai hagahuaidu mai baahi tangada dela e-hai-baahi mai gi-di-au la-guu-hihi gi-lala, gei au e-mee di-mmada gi-nia maa,

31:36  malaa, e-donu au e-tenetene di-dugu-aga nia maa gi-hongo dogu libogo gaa-hai be-di hau-king, ga-taiaga gi-nua gi-gidee digau huogodoo.

31:37  Au ga-hagi-anga gi God agu mee huogodoo ala ne-hai, ge daahi-aga dogu libogo gi-nua loo i ono mua.

31:38  “Maa nei bolo au ne-gaiaa di gowaa dela e-hai dagu hadagee i tangada dana gowaa donu,

31:39  be au ne-gai nia meegai ala e-tomo i-golo, gei gu-diiagi digau hai-hadagee gi-hiigai,

31:40  maa e-hai beelaa, le e-humalia-hua go nia geinga mono balu laagau gii-tomo i-lodo di hadagee deelaa, e-pono nia ‘barley’ mono ‘wheat’.” Nia helekai a Job gu-hagaodi.

Chapter 32

32:1  Idimaa Job gu-hagadonu bolo ia gu-madammaa, gei nia daane dogodolu aanei guu-lawa di-nadau helekai-anga gi mee.

32:2  Taane dono ingoo go Elihu e-noho i-di gowaa deelaa, ia gu-deemee di-hagakono dono hagawelewele, idimaa Job e-bida hai ono donu i-deia, ga-hagaanga nia mee huogodoo gi God. (Elihu tama-daane ni Barakel, tangada di madawaawa o Buz, tangada mai di madahaanau o Ram).

32:3  Elihu gu-hagawelewele labelaa gi-nia hoo hagaaloho dogodolu a Job ala gu-deemee di-helekai-anga gi-nia helekai Job, deenei la-guu-hai be-di mee bolo God le e-haigee.

32:4  Idimaa Elihu la-koia e-dulii i-lodo digaula, dela ne-hidi-ai-ei mee digi noho-loo gi-di lawa o nadau helehelekai.

32:5  I-dono gidee-ia bolo nia daane dogodolu aanei le e-deemee di-helekai gi-nia helekai Job, geia gu-hagawelewele huoloo,

32:6  ga-daamada ga-helekai, “Au e-dulii, gei goodou e-mmaadua, deenei-laa au gu-madagu dagu helekai-adu gi goodou i dagu mee dela e-maanadu.

32:7  Au e-hagamaanadu bolo ma go koodou ala belee helekai, goodou ala e-mmaadua belee hagadau hagamaamaa gi godou kabemee.

32:8  Di hagataalunga o God Mogobuna dela e-wanga gi-nia daangada di kabemee.

32:9  Hagalee go di madua o tangada dela gaa-hidi-ai a-mee ga-kabemee, be gaa-hidi-ai iei mee ga-iloo di tonu.

32:10  Gei dolomeenei gei au e-hiihai bolo goodou gi-hagalongo mai gi-di-au. Au ga-hagi-adu gi goodou dagu hagamaanadu.

32:11  “Au nogo noho deemuu nogo hagalongolongo gi godou helehelekai, mo-di talitali di-godou halahala nia helekai o-di kabemee.

32:12  Au guu-mmada haga-humalia, gei au gu-gidee bolo goodou digi gila humalia. Goodou digi haga-hai-gee nia mee a Job ala nogo helekai-ai.

32:13  Dehee di-godou hai dela e-helekai-ai goodou bolo goodou guu-gida di kabemee? Ma go God hua dela e-mee di-helekai gi Job, idimaa goodou ala gu-deemee.

32:14  Job ne-helekai-adu gi goodou, hagalee ne-helekai-mai gi-di-au, malaa dagu helekai gi-di heeu a-maa le-hagalee e-hai be di-godou helekai.

32:15  “Meenei Job, nadau helekai la-hagalee dono hagamaamaa ai. Deai nadau helekai e-helekai-adu gi-di-goe ai.

32:16  E-hai behee? Au gi-taalia-hua i goodou ala hua e-noho deemuu? Digaula e-tuu-hua i-golo deai nadau helekai e-hai ai.

32:17  Gei deeai! Au gaa-hai-hua go dagu helekai aagu, ga-helekai-adu i dagu mee dela ne-hagamaanadu.

32:18  Au gu-deemee di-noho deemuu, au gu-deemee di-dadaahi agu helekai.

32:19  Maa au ga-deai dogu madagoaa ai belee helekai-iei au, gei au e-hai gadoo be-di peege dugu-waini dela ne-hagahau gi-honutulu ga-mahaa.

32:20  Au gu-deemee di-hagakono, au e-hai-loo gi-helekai.

32:21  Au hagalee e-hegeege dahi dangada i-lodo tadau hagadonudonu nei. Au e-hagalee e-hagaamu dahi dangada.

32:22  Au e-de-iloo di hai nia helekai hagaamu. God gi-daaligidia au be maa au gaa-hai beenei.

Chapter 33

33:1  “Deenei laa, Job, goe hagalongo haga-humalia gi agu mee huogodoo ala ga-helekai-ai.

33:2  Au gu-togomaalia di-helekai-aga dagu maanadu.

33:3  Agu helekai huogodoo le e-donu, gei au e-helehelekai i-nia mee ala e-donu.

33:4  Di hagataalunga o God la-ne-hai au, gei di dogidogi o God Mogobuna ne-gaamai gi-di-au di mouli.

33:5  “Helekai-mai be goe e-mee. Hagatogomaalia-ina oo donu.

33:6  Gidaua e-tongaadahi-hua i-mua o God, gidaua ala ne-hai-mai i-nia gelegele.

33:7  Malaa, deai dau mee bolo goe ga-madagu i-di-au ai, au hagalee e-aali i-di goe.

33:8  “Malaa, deenei dagu mee ne-hagalongo-mai i-doo baahi:

33:9  ‘Au digi hai di huaidu, dagu mee hala ne-hai ai. Au e-madammaa, ogu huaidu ai.

33:10  Gei God ga-halahala di mee dela e-hai-baahi-mai gi-di-au, gaa-dugu au be-di hagadaumee ni-oono.

33:11  Mee ga-lawalawa ogu wae gi taula baalanga, gei Mee e-hagadina au i agu mee huogodoo ala e-hai ko-au.’

33:12  “Gei au e-hai-adu gi-di-goe, Job, goe e-hai-gee. God la-koia e-aamua i-nia daangada huogodoo.

33:13  Goe e-aha dela e-haga-huaidu a God bolo Mee hagalee e-helekai gi-nia helekai lagamaaloo o-nia daangada?

33:14  Ma e-aha maa God e-helehelekai i-nia madagoaa huogodoo, gei deai tangada e-hagalongo gi ana helekai ai.

33:15  I-di boo di madagoaa e-kii-ai nia daangada, God e-helekai gi digaula i-lodo nadau midi mo nadau moe.

33:16  Mee gaa-hai digaula gi-hagalongo gi ana helekai ala e-helekai-ai, gei digaula e-mmaadagu i ana helekai.

33:17  God e-helekai belee hai digaula gii-dugu di-nadau haihai huaidu, gei e-abaaba digaula gi-dee-hai digau hagamuamua.

33:18  Mee hagalee dumaalia gi digaula gi-daaligidia, Mee e-daa digaula gi-daha mo nadau mmade.

33:19  God e-hagadonu digaula gi-di magi, gaa-hai nadau huaidina gii-noho mmae.

33:20  Tangada magi e-hagalee e-hiihai e-miami. Ma e-aha maa nia meegai le e-kala, gei mee e-dee-gai.

33:21  Dono huaidina e-hegehege-loo. Goe guu-mee-hua di-mmada gi-nia iwi o-maa.

33:22  Mee gu-hoohoo gi dono madagoaa dela e-hana-ai gi tenua o-digau mmade.

33:23  “Holongo tangada di langi ga-hanimoi e-hagamaamaa a-mee, tangada di langi e-dahi i-digau di-langi e-mana a God, e-haga-langahia gi mee dono duhongo hegau.

33:24  Mai dono dumaalia gei mee ga-helekai boloo, ‘Diagia a-mee! Mee e-hagalee e-hana gi tenua o-digau mmade. Deenei di hui e-hagamehede a-mee.’

33:25  Dono huaidina gaa-tomo hogi ga-dama-daane ge e-maaloo labelaa.

33:26  Mee ga-dalodalo, gei God ga-hagalongo, ga-hagagila talodalo a-maa. Mee ga-daumaha gi God i-di manawa tene, gei God ga-haga-humalia labelaa nia mee huogodoo ala i-baahi o-mee.

33:27  Gei mee ga-helekai-aga i-mua digau dogologo, ‘Au guu-hai di huaidu. Au deai dagu humalia ne-hai ai, gei God gu-haga-dagaloaha au.

33:28  Mee guu-dugu au gi-dee-hana gi tenua o-digau mmade, gei au deenei e-mouli hua igolo.’

33:29  “God e-tataanga e-haihai nia mee huogodoo aanei gi nia daangada.

33:30  Mee e-haga-dagaloaha di mouli o tangada, gaa-hai a-mee gii-noho i-di mouli tenetene.

33:31  “Deenei laa Job, hagalongo gi agu helekai. Noho deemuu gi-helekai au.

33:32  Maa goe dau helekai i-golo, helekai gi-hagalongo au, au e-tenetene i-dagu helekai bolo kooe dela e-donu.

33:33  Maa hagalee, noho deemuu hagalongo-mai, gei au ga-hagi-adu gi-di-goe di hai o-di kabemee.

Chapter 34

34:1  “Goodou go nia daangada ala koia e-kabemee gei e-daudonu, hagalongo gi agu mee ala ga-helekai-iei au.

34:2  “Goodou go nia daangada ala koia e-kabemee gei e-daudonu, hagalongo gi agu mee ala ga-helekai-iei au.

34:3  Goodou e-iloo nia meegai kala i-di-godou momi nia maa, gei goodou e-de-iloo nia helekai o-di kabemee ala ma-ga-hagalongo ginai goodou.

34:4  Deenei-laa, go gidaadou tei gii-bida hagamaanadu-ina di mee deenei.

34:5  Job guu-hai bolo ia e-madammaa-hua, dela bolo God digi dugu-anga gi-deia ono donu.

34:6  Gei mee ne-helekai boloo, ‘Dehee dagu hai e-mee di-helekai tilikai bolo au e-hala? Au gu-mooho haga-huaidu gei deai ogu huaidu ai.’

34:7  “Deai dahi dangada e-hai be Job ai! Mee hagalee-loo bolo ia e-hagalaamua a God.

34:8  Mee e-hiihai e-madalia digau hai-mee huaidu, e-hana madalia digau huaidu.

34:9  Mee e-helekai bolo e-deai dono hadinga ai go dono daudali di hiihai a God.

34:10  “Goodou hagalongo-mai gi-di-au, goodou ala e-kabemee! E-hai behee? God Mogobuna e-mee di hai di huaidu?

34:11  Deeai! Mee e-hui-ang-gi nia daangada gii-hai be nadau mee ala ne-hai, Mee e-hui-ang-gi digaula gi-tau-anga gi-nia mee digaula ne hai.

34:12  God Mogobuna e-deemee di hai di huaidu, gei Mee hagalee e-hai-hegau ihala gi tangada.

34:13  E-hai behee? God le e-gaamai ono mogobuna i-baahi tangada i-daha? Ma tangada i-golo ne-hai a-Mee gi-madamada-humalia henuailala?

34:14  Maa nei bolo God gaa-daa gi-daha di hagataalunga o-di mouli,

34:15  malaa, nia mee huogodoo ala e-mouli la-gaa-mmade, gaa-hai labelaa nia gelegele.

34:16  “Deenei-laa, goe hagalongo-mai, maa goe tangada kabemee.

34:17  E-hai behee? Goe e-hagi-aga nia donu o God? Goe e-hagamaanadu bolo Mee e-dee hiihai gi-di tonu?

34:18  God e-hagi-aga nia king mono gau aamua huogodoo maa digaula e-huaidu, deai nadau hadinga ai.

34:19  Mee hagalee e-huli-mai i-di baahi o-nia dagi, gei hagalee e-hiihai gi digau ala e-maluagina laa-hongo digau hagaloale. Idimaa go Mee dela ne-hai ana daangada huogodoo.

34:20  Tangada le e-mee-hua di-made limalima i-di boo. God le e-hagaduadua nia daangada, gaa-hidi-ai digaula ga-hagalee. E-haingoohia ang-gi Mee dono daaligi gii-mmade digau ala e-aamua.

34:21  Mee e-hagadina nia hanga-heehee o-nia daangada ala ma-ga-haihai.

34:22  Deai di bouli e-mee di-abaaba gi-daha tangada huaidu i-mua nia hadumada o God ai.

34:23  God la-hagalee bolo gaa-dugu dana madagoaa e-lloo-aga-ai nia daangada gi-dono baahi e-hagadonu go Mee.

34:24  God la-hagalee bolo e-hai dana halahala, e-daa gi-daha nia dagi e-pono gi nnuai daangada.

34:25  Idimaa Mee e-iloo nadau mee ala e-haihai, Mee gaa-kili digaula gi-daha, ga-dagadagahi digaula i-di boo.

34:26  Mee e-hagaduadua digau huaidu i-lodo di gowaa dela e-dogologo nia daangada,

34:27  idimaa digaula gu-huli-hua gi-daha, gu-diiagi ana haganoho huogodoo.

34:28  Digaula guu-hono digau hagaloale bolo digaula gi-dangidangi i-di hagamaamaa mai baahi o God. Gei Mee ga-hagalongo gi-nia dangidangi digaula.

34:29  “Maa God ga-hagamaanadu bolo Ia ga-hagalee e-hai ana mee, deai tangada e-mee di-haga-hai-gee a-Mee ai. Maa Mee gaa-hai gii-ngala ono hadumada, malaa, gu-deai di-hagamaamaa ang-gi nia daangada ai.

34:30  Deai dahi mee i-golo ai bolo gaa-mee di-hai go dahi henua, bolo e-daa-gi-daha nia mogobuna o digau huaidu ala e-dagi ginaadou.

34:31  “Job, goe gu-haagi o huaidu gi God, mo-di hai dau hagababa gi Mee bolo goe ga-hagalee e-hai di huaidu labelaa?

34:32  Goe gu-halahala gi-baahi o God au mee hala ala ne-hai, gei goe guu-donu bolo goe ga-hagalee hai di hala labelaa?

34:33  Idimaa goe dela hagalee e-donu gi-di mee a God dela ma-gaa-hai, goe e-talitali bolo Mee gi-haga-gila-ina-aga dau mee dela e-hiihai ginai? Ma kooe dela e-hai gii-hai dau mee, gei hagalee ko-au. Goe gi-helekai-mai gi gimaadou dolomeenei i-dau mee dela gu-hagamaanadu.

34:34  “Digau huogodoo ala iai nadau hagamaanadu i-golo, digaula gaa-donu ginai, gei tangada kabemee dela ma-ga-hagalongo-mai, ia ga-helekai-aga

34:35  bolo Job e-helehelekai-mai-hua i-dono de-iloo-ia. Nia mee huogodoo ala nogo helekai-iei mee le e-dee-modongoohia.

34:36  Goodou gi-hagabaubaulia nia mee a Job ala nogo helekai-ai. Goodou gaa-mmada bolo ana helekai huogodoo ala nogo helekai-ai le e-hai gadoo be nia helekai ni tangada hai-mee huaidu ne-hai.

34:37  Mee e-hagapuni-anga ono huaidu gi tee-hagalongo, ga-haga-huaidu a God i tadau mua huogodoo.

Chapter 35

35:1  “Job, e-huaidu go dau helekai bolo goe e-madammaa i-mua nnadumada o God,

35:2  “Job, e-huaidu go dau helekai bolo goe e-madammaa i-mua nnadumada o God,

35:3  be e-heeu gi God boloo, ‘Nia huaidu aha ala ne-hai ko-au adu gi-di-Goe? Dehee di humalia mai gi-di-au maa au ga-hagalee e-hai di huaidu?’

35:4  Au ga-helekai-adu gi au heeu mo nia heeu o ehoo.

35:5  “Goodou mmada gi di-langi! Mmada gi-nia gololangi ala i-nua-loo!

35:6  Maa goe gaa-hai di huaidu, o huaidu le e-haga-huaidu a God? Maa o huaidu la-gaa-logo, e-hai dana aha ang gi God?

35:7  Do mouli hai-donu le e-hagamaamaa God? Deai dahi mee e-hiihai ginai a God mai doo baahi ai.

35:8  Digau ala e-noho i-doo baahi le e-hagaduadua mai i-oo huaidu, gei di humalia dela e-hai kooe e-hagamaamaa digaula.

35:9  “Di madagoaa nia daangada ala ma-gaa-kae di hagaduadua, digaula e-tangitangi gi tangada gi-haga-dagaloaha-ina ginaadou.

35:10  Gei digaula digi huli-ang-gi God dela ne-hai ginaadou, dela e-wanga gi digaula di hagadagadagagee i-lodo di-nadau noho bouli i-lodo di manawa-gee.

35:11  Digaula hagalee huli-anga gi God dela ne hai gidaadou gi-kabemee laa-hongo dahi manu lodo henua be lodo di ahiaalangi.

35:12  Digaula e-tangi i-di hagamaamaa, gei God hagalee e-hagamaamaa digaula, idimaa i-digaula e-manawa hua i ginaadou gei e-huaidu.

35:13  Deai dono hadinga ai maa digaula gaa-tangi-anga gi God, God Mogobuna e-de-gidee, e-de-longonoia digaula.

35:14  “Job, goe nogo helekai bolo goe gu-deemee di-mmada gi God, taalia maalia, dau gabunga ga-i-mua o-Mee.

35:15  Goe e-hagamaanadu bolo God la-hagalee e-hai dana hagaduadua, hagalee mmada gi-humalia gi-di huaidu.

35:16  Dono hadinga ai maa goe ga-duudagi-adu-hua au helekai, ma e-modongoohia-hua bolo goe e-dee-iloo-e-goe nnelekai ala e-helekai-iei goe.

Chapter 36

36:1  “Hagakono-ina do manawa i-tama madagoaa bodobodo, ga-hagalongo-mai gi-di-au. Hagalongo gi dagu mee dela ga-helekai-ai i-di ingoo o God.

36:2  “Hagakono-ina do manawa i-tama madagoaa bodobodo, ga-hagalongo-mai gi-di-au. Hagalongo gi dagu mee dela ga-helekai-ai i-di ingoo o God.

36:3  Au e-iloo nia mee e-logo, gei au e-hai-hegau-hua gi agu mee ala e-iloo belee hagamodongoohia-aga bolo God dela ne-hai au le e-donu.

36:4  Deai di mee e-dahi e-tilikai i-lodo agu mee ala ga-helekai-iei au adu gi-di-goe ai. Tangada koia e-kabemee huoloo la i-doo baahi.

36:5  “God la-koia e-mahi! Mee e-hagalee e-de-hiihai gi dahi dangada. Deai dahi mee i-golo bolo ga-de-iloo-Ia ai.

36:6  E-hagalee e-dumaalia ang-gi tangada huaidu gi-mouli duai, gei Mee e-gabunga digau hagaloale i-di tonu.

36:7  Mee e-hagaloohi digau ala e-donu, gei e-dumaalia gi digaula gii-mee di-dagi nadau henua gadoo be-nia king, mo-di aamua ga-hana-hua beelaa.

36:8  Malaa, maa nia daangada le e-lawalawa gi taula baalanga, e-hagaduadua gi nadau mee ala ne-hai,

36:9  God e-hagamodongoohia ang-gi digaula nadau huaidu mo nadau haga-hagamuamua.

36:10  Mee gaa-hai dana hai gi-hagalongo nia daangada gi ana helekai hagalliga bolo gii-huli gi-daha mo nadau hai huaidu.

36:11  Maa digaula ga-hagalongo gi God, ga-hai-hegau-anga, gei digaula ga-haadanga-lamalia gaa-noho i-di aumaalia.

36:12  Maa digaula e-deeai, gei digaula gaa-mmade i-lodo nadau dadaulia. Digaula ga-tuu-adu laa-lodo tama monowai e-hula gi tenua o digau mmade.

36:13  “Digau ala deai nadau God ai, digaula e-hagawelewele-hua beelaa. Ma e-aha maa digaula gu i-lodo di hagaduadua, gei digaula hagalee e-dalodalo-anga i-di hagamaamaa.

36:14  Digaula e-mmade-hua i-lodo nadau madagoaa e-dama-daane-ai ginaadou, mo-di mooho haga-huaidu i nadau mouli haga-langaadia.

36:15  God e-aago nia daangada i-di hagaduadua ge hai-hegau i-di haingadaa e-hagamaahuge nadau golomada.

36:16  “God guu-daa goe gi-daha mo o haingadaa, guu-hai goe gi-tenetene gi o maluagina. Dau deebele guu-honu meegai nonua.

36:17  Gei dolomeenei gei goe guu-kae di hagaduadua dela e-tau-adu gi-di-goe.

36:18  Goe gii-pula i-di-goe gi-de-halahalau-hua goe gi-di hui halahalau, be go di maluagina dela gaa-dagi goe gi-mogowaa-loo gi-daha.

36:19  E-deai dono humalia adu gi-di-goe ai maa goe ga-dangi-anga i-di hagamaamaa. Oo mahi huogodoo e-deemee di-hagamaamaa goe dolomeenei.

36:20  Hudee hiihai gi-di boo bolo gi-limalima-mai, dela go-di madagoaa o-nia henua ala ga-mooho.

36:21  Gii-pula i-di-goe, hudee huli-anga gi-di huaidu. Goe ne-kae di hagaduadua belee abaaba goe gi-daha mo-di huaidu.

36:22  “Hagamaanadu-ina be dehee di maaloo dangihi o-nia mogobuna a God, dela go Mee go Tangada Agoago e-koia i-mugi-nua i digau huogodoo.

36:23  Deai tangada e-mee di-helekai ang-gi God bolo gi-heia dana mee ai, be e-hagaanga gi Mee bolo go Mee ne-hai di huaidu.

36:24  Di hagaamu a-Mee dela ne-hai ana mee huogodoo e-hai i-nia madagoaa huogodoo, gei goe hogi e-hai gi-hagaamu a-Mee.

36:25  Nia daangada huogodoo guu-mmada gi-nia mee a-Mee ala ne-hai, gei gidaadou e-mee di-mmada-hua mai haga-mogowaa-loo.

36:26  Gidaadou e-de-iloo donu dono aamua, mo-di geinga o ana ngadau.

36:27  “Deenei di God dela e-mee di-daa gi-daha nia wai o henuailala, gaa-huli gaa-hai nia madaua o-di uwa.

36:28  Mee e-haga-doo-ia dana uwa i-lodo nia gololangi belee haga-magalillili nia daangada o henuailala hagatau.

36:29  Deai tangada e-iloo di haga-ngalungalua o-nia gololangi ai, be-di ngoloolo o-di atili i-lodo nia gololangi, di gowaa dela e-noho-ai a God.

36:30  Mee ga-hagau dana ila gi-dabadaba i-lodo nia gololangi hagatau, gei tua o-di moana le e-bouli dongoeho-hua.

36:31  Malaa, deenei di hai o dana haangai nia daangada, gaa-dugu-mai ana meegai logowaahee.

36:32  Mee e-daahi tabadaba o-di ila i-lodo dono lima, gaa-hai ang-gi mee bolo gii-hana gi-di gowaa dela belee hai gii-dau-ai.

36:33  Di atili le e-hagailoo di madangi damana dela ga-dau-mai, gei nia kau e-iloo-ginaadou bolo di madangi ga-dau-mai.

Chapter 37

37:1  “Di madangi maaloo e-hai dogu manawa gi-haluihalulu-loo gi-nua.

37:2  Goodou huogodoo, hagalongo gi-di lee o God, di ngoloolo o-di atili mai i-lodo dono ngudu.

37:3  Mee e-hagau dana ila gii-daba i-lala di langi mai di mada o henuailala gaa-dau-adu-loo gi-di mada dela i-golo.

37:4  Di ngoloolo o dono lee la-gu-longono, dono lee atili e-haluihalulu i dono lee aamua, gei di ila e-dabadaba i-di madagoaa delaa.

37:5  Nia hagadilinga mee haga-goboina ga-kila-aga i-di madagoaa o God dela ma-ga-helekai, nia hagadilinga mee humalia ala e-de-iloo-gidaadou.

37:6  Mee gaa-hai nia ‘snow’ gii-too gi henuailala, ga-gaamai dana uwa nngolo huoloo,

37:7  e-dugu-ai nia moomee nia daangada, e-haga-modongoohia bolo Ia e-mee di hai beenei.

37:8  Nia manu lodo-geinga gaa-hula gi nadau gowaa e-noho-ai.

37:9  Di madangi maaloo le e-hanimoi i ngaaga, ga-gaamai di madangi magalillili mai ngeia.

37:10  Nia madangi mai i-lodo di ngudu o God e-haga-magalillili nia wai gii-hai nia ais, gaa-hai di tai gii-hai be nia kalaadi.

37:11  Di ila e-dabadaba mai i-lodo nia gololangi,

37:12  ala e-hagamaanege mai i-di hiihai a God. Nia maa e-hagakila-aga nia helekai huogodoo a God ala ma-ga-helekai-ai, i-nia madagowaa huogodoo i henuailala.

37:13  God e-hagadoo-ia dana uwa gi henuailala, holongo belee hagaduadua nia daangada, be e-haga-modongoohia gi-nia daangada dono manawa humalia.

37:14  “Noho deemuu, hagalongo Job, Hagamaanadu-ina nia mee humalia a God ala e-hai.

37:15  Goe e-iloo be dehee di hai a God e-helekai hua gei di ila ga-dabadaba mai i-lodo nia gololangi?

37:16  Goe e-iloo be dehee di hai o-nia gololangi ala e-deheedehee i-di langi, deenei tegau a God gi ono mahi hagagoboina?

37:17  Gei deeai, dela hua go koe dela e-hagaduadua gi-di welengina i-di madagoaa o-di madangi dela ma-gaa-gono-mai i ngaaga.

37:18  E-hai behee? Goe e-mee di-hagamaamaa a God e-hagadamana di-langi e-hagahamaaloo di-maa gii-hai be-di baalanga dingidingia hamaaloo?

37:19  Aago-ina gimaadou gi-nia helekai e-helekai ang-gi God; madau hagamaanadu gu-de-igolo, madau helekai ai.

37:20  Au hagalee e-dangi-anga gi God gi-dugua-mai e-helekai gi Mee. E-aha dela e-dugu-anga gi Mee di madagoaa humalia gi-daaligidia au?

37:21  “Deenei-laa, di maalama o-di langi gu-madamada, gu-laina dono mmada ginai gidaadou, di madangi gu-ili di langi gi-madammaa.

37:22  Di madamada e-gila-aga i-baahi la-ngaaga, gei di madamada o God e-haga-honu tadau lodo i-di madagu huoloo.

37:23  Di mogobuna o God la-koia e-maaloo dangihi, dela e-deemee di-hula-ai gidaadou gi-hoohoo gi Mee. Go Mee dela e-hai-donu gei e-donu i-ana hangaahai ang-gi nia daangada.

37:24  Deelaa ga-hidi-mai nia daangada huogodoo gu-mmaadagu i-Mee, gei e-haga-de-iloo digau huogodoo ala bolo ginaadou digau kabemee.”

Chapter 38

38:1  Dimaadua e-leelee-mai i-lodo di madangi gono maaloo gi Job,

38:2  “Goe ko-ai dela e-heeu-mai dogu iloo mee i au balu helekai ono hadinga ai?

38:3  Duu-i-nua be taane, helekai gi agu heeu ala ma-ga-heeu-adu.

38:4  Goe nogo i-hee i-di madagoaa Au ne-hai henuailala? Maa goe e-iloo nia mee e-logo, hagia-mai-laa.

38:5  Gei di-ma koai dela ne-hagamaanadu bolo henuailala le e-hai gi-damana beelaa? Ma koai dela ne-dagi dana mee hagatau-mee e-hagatautau di-maa? Goe e-iloo di heeu deenei?

38:6  Ma di-aha dela e-daahi nia duludulu ala e-daahi henuailala gi-huudonu? Ma koai dela ne-dugu dana hadu madaaduge e-hagamau henuailala?

38:7  I-di heniheni di laangi deelaa, nia heduu o-di luada gu-dadaahili i-di gowaa e-dahi, digau di-langi gu-wwolowwolo tenetene.

38:8  Ma koai dela ne-tai nia bontai ala nogo daahi di tai i-di madagoaa ne-biia-mai i-lodo tinae henuailala?

38:9  Ma ko-Au dela ne-gahu di tai gi-nia gololangi, gei ne-hii di-maa gi-di bouli dongoeho.

38:10  Au ne-maaga di haga-geinga o-di tai, gei ne-benebene di-maa gi-tua nia bontai ala guu-tai.

38:11  Ko-Au ne-helekai gi-di tai boloo, ‘Guu-tugi di gowaa dela e-hana ginai goe! I-kinei, o beau maaloo ga hagalee.’

38:12  “Job, i-lodo do mouli, goe guu-hai do holongo e-haga-heni di laangi?

38:13  Goe guu-hai di heniheni gi-daahia hua beelaa henuailala mo-di hagangalungalua digau huaidu gi-daha mo nadau gowaa nogo pala-ai?

38:14  Di maalama o-di aa e-hai nia gonduu mono gowaa baba gi-gila-mai gadoo be nia haduhadui o-di gahu, e-madammaa gadoo be-di maaga dela e-maaga i-hongo di gelegele.

38:15  Di maalama o-di laangi la-gu-maalama balua gi digau huaidu, e-duuli digaula gi-daha mo nadau hegau huaidu.

38:16  “Goe guu-hana gi-di gowaa iai nia monowai e-uwa-aga i tua di moana? Goe gu-haele i-hongo di baba di moana?

38:17  Ma iai tangada guu-hagi-adu gi-di-goe nia bontai o-di abaaba dela e-duuli tenua bouli o digau mmade?

38:18  Goe gu-iloo be tamanaiee o henuailala le e-damana behee? Hagia-mai-laa gi-di-Au be goe e-iloo.

38:19  “Goe e-iloo be-di maalama le e-hanimoi i-hee, be-di bouli la di mee e-daamada i-hee?

38:20  Goe e-mee di hagi-anga gi meemaa be e-mogowaa behee nau gowaa ala e-mee di hula ginai, be e-hagau meemaa gi-muli gi-di gowaa ne-lloomoi ai?

38:21  Au bolo goe e-mee-hua, idimaa, goe gu-madua, gei goe nogo i-golo i-di madagoaa henuailala ne-hai!

38:22  “Goe guu-hana gu-madamada i-lodo nia hale benebene-mee, nia gowaa ala e-dugu-ai agu ‘snow’ mono uwa-hadu-magalillili?

38:23  Au e-hagatogomaalia nia maa gi-nia madagoaa haingadaa mo nia laangi ala e-hai nia dauwa llauehe mo lligi.

38:24  Goe guu-hana gi-di gowaa dela e-hobo-aga-iai di laa, be-di gowaa dela e-gono-mai-ai di madangi dela e-haneia i-dua?

38:25  Ma koai dela ne-geli di madaawa dela e-malingi-ia nia uwa, gei ne-haga-aadee di ala gi-nia atili?

38:26  Ma koai dela ne-hai di uwa gii-doo i-di gowaa dela ono daangada ai?

38:27  Ma koai dela e-hagatiu di gowaa maangoo ge e-haga-inu di gowaa hieinu, e-hagatomo-aga nia geinga-tolo?

38:28  Nia uwa mono magalillili la nau damana i-golo?

38:29  Ma koai tinana o-nia ais mono uwa magalillili?

38:30  Ma di-aha dela e-huli nia wai gii-hai be-di hadu, ga-haga-hamaaloo i-hongo tai?

38:31  Goe e-mee di-nnoo nia heduu Madaligi gi-di gowaa e-dahi, be e-wwede di nnoo dela e-daahi nia heduu Waga-dogo-dolu?

38:32  Goe e-mee di-dagi nia heduu gi-lloomoi i nadau madagoaa donu, ge e-dagi nia heduu ala e-haga-ingoo bolo di Ibu Damana mo-di Ibu Dulii la-gii-hula gi nadau gowaa?

38:33  Goe e-iloo nia haganoho ala e-dagi di ahiaalangi, gei goe e-mee di-haga-hai-hegau nia haganoho aalaa gi henuailala?

38:34  “Goe e-mee di-wolo hagadaba gi nia gololangi gi-haga-tiulia goe gi-di uwa?

38:35  Maa goe ga-helekai gi-di ila gii-daba, di ila e-mee di-hanadu gi-di-goe ga-helekai adu boloo, ‘Deenei au, au gaa-hai dau hegau?’

38:36  Ma koai e-helekai gi-di manu-‘ibis’ bolo di monowai Nile ga-doloo, koai e-helekai gi-nia deduu-daane bolo di uwa gaa-doo?

38:37  Ma-koai dela e-mee di-iloo di-dau nia gololangi, be e-hulihuli nia maa hagabaahi gi-malingi nia uwa,

38:38  nia uwa ala e-haga-hamaaloo nia gelegele gii-hai nia bahi-mee hamaaloo?

38:39  “Goe e-mee di-halahala nia meegai ang-gi nia laion e-gai, ge e-hagamaaluu nia dama-laion,

38:40  i-di madagoaa digaula e-pala hagammuni i-lodo nadau bongoo, be e-togo e-talitali i-hongo nadau gowaa kiikii?

38:41  Ma koai dela e-haangai nia manu ‘raven’ i-di madagoaa digaula e-heehee hiigai, i-di madagoaa nia dama digaula gaa-tangi i-nia meegai?

Chapter 39

39:1  “Goe e-iloo di madagoaa o-nia kuudi lodo-geinga le e-haanau ma-gaa-hee? Goe guu-mmada gi-di ee lodo-geinga dono madagoaa e-haga-haanau ai?

39:2  Goe e-iloo be waalooloo behee nadau madagoaa e-dagidagi nadau dama i-lodo nadau dinae, gaa-dau loo gi-di laangi dela e-haanau ai?

39:3  Goe e-iloo di madagoaa digaula ga-hagahaa gaa-dugu-mai nadau dama gi-hongo henuailala?

39:4  Nadau dama e-tomo-aga ga-maaloo i-lodo geinga, digaula gaa-hula, hagalee loomoi labelaa gi-muli.

39:5  “Ma koai ne-dugu-anga di dagaloaha ang-gi nia ‘donkey’ lodo-geinga? Ma koai ne-haga-maahede digaula, gaa-hai digaula gi-heehee-hua?

39:6  Ma ko-Au dela ne-wanga gi digaula di anggowaa belee hai-ai nadau gowaa noho-ai, gaa-hai digaula gii-noho i-di gowaa baba dela e-mmala huoloo ono gelegele.

39:7  Digaula e-noho mogowaa-loo gi-daha mo-di longoaa o-nia waahale, deai tangada e-mee di-haga-gaidala digaula be e-hai digaula gii-mee di ngalua ai.

39:8  Nia gonduu la-go nia gowaa geinga e-miami-iai digaula, aalaa nia gowaa e-halahala nadau geinga e-gai.

39:9  “Di kau lodo-geinga le e-hiihai di-ngalua-adu gi-di-goe? Mee e-hiihai di-noho i-lodo dau gowaa dugu-manu i-di boo? Deeai!

39:10  Goe e-mee di-nnoo a-mee gi-di loahi, gaa-hai a-mee gi-haga-maluu au gelegele?

39:11  Goe e-mee di-hagadagadagagee gi ono mahi, ge e-dugu gi mee gi-heia au moomee daamaha?

39:12  Goe e-hagadagadagagee gi mee bolo mee e-gowadu au huwa-laagau, e-hagabudu nia maa gi-di gowaa hili meegai?

39:13  “E-limalima behee go nia bakau o-di manu-‘ostrich’ ma-ga-kabakaba! Gei di ‘ostrich’ e-maangi be-di maduge ai.

39:14  Di manu-‘ostrich’ e-dugu ono ngogo i-hongo di gelegele gi-di mahana o-di gelegele e-haga-mahana nia maa.

39:15  Mee e-de-hei-eia bolo ono ngogo la-ga-dagadagahi go tangada, be ono ngogo la-ga-hahaahi go di manu lodo-geinga.

39:16  Mee e-hai bolo ono ngogo la nia ngogo hua ni tuai manu, e-hagalee maanadu bolo ono dugu ana ngogo la-gu-hagauwwou.

39:17  Ma ko-Au dela ne-hai a-mee gi-dadaulia, digi wanga di kabemee gi mee.

39:18  Gei mee dela ga-daamada gaa-lele, mee e-lele hua-e-tanga i-nia hoodo ala e-lellele-ai nia daangada.

39:19  “Job, ma kooe dela ne-hai nia hoodo gi-maaloo, gaa-wanga nia ngaahulu gi-nia uwa digaula?

39:20  Ma kooe dela ne-hai digaula gii-tobo gi-nua be nia manu-‘locust’, gaa-hai nia daangada gi-mmaadagu i nadau lee dogi daamaha gi-nua?

39:21  Digaula e-hiihai e-dagadagahi di gelegele, ge digaula gaa-llele gi-lodo tauwa le e-llele gi nadau mahi hagatau.

39:22  Digaula e-deiloo tadinga telekai bolo madagu, deai tulumanu e-hai digaula gii-llele gi-muli ai.

39:23  Nia goloo-heebagi ala e-kae go tangada i-hongo di hoodo le e-hagalongoaa, gei e-dabadaba i-di laa.

39:24  Nia hoodo ga-gaehagaeha molongi gaa-llele gi-mua, di madagoaa di labaa gaa-ili digaula e-deemee di tuu de-ngalungalua.

39:25  Di labaa ma-ga-iliili, gei digaula e-dogi daamaha nguunguu, digaula e-mee di hagadungu tauwa i-mua di-nadau hoohoo-adu gi-di gowaa hai-tauwa. Digaula e-longono-ginaadou nia lee o-nia dagi-dauwa ala e-wwolowwolo.

39:26  “Di manu-‘hawk’ le e-kabe-mai i-di-goe dono hai e-maangi-ai i dono madagoaa dela e-holo ono bakau gaa-hana gi bahi-i-ngaaga?

39:27  Di manu-‘eagle’ le e-tali goe gi-hagadaba bolo gi-hauhia dono waehongo i-hongo di gonduu?

39:28  Mee e-hai dono waehongo i-hongo nia hadu ala e-duuduu i-nua, gaa-hai nia ulu gonduu ala e-gaa gi-nua di gowaa e-noho-ieia.

39:29  Mee gaa-noho i-golo, ga-daumada haga-mogowaa ana mee e-kumi e-gai.

39:30  Di gowaa dela iai nnuaidina nia manu mmade, nia ‘eagle’ e-dagabuli-mai gi-golo, gei nia dama-‘eagle’ e-inu nia dodo.”

Chapter 40

40:1  Dimaadua ga-helekai gi Job,

40:2  “Job, goe dela guu-hai baahi gi God Mogobuna, goe gaa-dugu eia do hiihai, be goe ga-helekai gi agu heeu?”

40:3  Job ga-helekai-anga,

40:4  “Au gu-helekai hua dadaulia, meenei Dimaadua. Ma nia-aha ala e-mee di-helekai-iei au? Au hagalee hagamada e-helekai nia mee ala i-golo.

40:5  Au gu-helekai e-logo i agu helekai belee helekai-ai.”

40:6  Dimaadua ga-leelee-mai i-lodo di madangi maaloo gi Job labelaa, boloo,

40:7  “Du-gi-nua be taane, helekai-mai gi agu heeu ala gaa-hai.

40:8  Goe e-hiihai e-hagamodongoohia-aga bolo Au e-hala, gaa-dugu Au bolo e-hai-gee gei e-dugu goe bolo e-donu?

40:9  Do maaloo le e-maaloo be ogu maaloo? Doo lee le e-mee di-ngoloolo be dogu lee?

40:10  Maa goe e-mee, du-gi-nua-laa i-lodo do aamua mo doo aali. Gahu-ina goe gi o goloo haga-madagu mo madamada.

40:11  Mmada gi digau ala e-hagapuu. Heia do hagawelewele gi digaula gii-hai digaula e-hila gi-lala.

40:12  Uaa, mmada gi digaula, dugua digaula gi-lala, hunahuna-ina digaula hua i-di gowaa dela e-tuu-ai digaula.

40:13  Danumia digaula huogodoo gi-lodo di gelegele. Nnoodia digaula gi-lodo tenua o digau mmade.

40:14  Gei Au ga-daamada ga-hagaamu goe i-di matagidagi, gaa-hai bolo kooe modogooe ne-kae di aali.

40:15  “Mmada gi-di manu haga-madagudagu-dangada go ‘Behemoth’. Ko-Au dela ne-hai a-mee, ko-Au dela ne-hai goe. Mee e-gai nia geinga be-di kau.

40:16  Di maaloo dela i-lodo dono huaidina le e-damanaiee, gei di mahi dono dinae le e-damanaiee!

40:17  Di hugu o-maa e-duu be-di laagau-‘cedar’, gei nia dama-maduu i-di gili ono wae e-maaloo.

40:18  Nia iwi o-maa e-mau-dangihi be nia baalanga-mmee, ge nia wae o-maa e-maaloo be nia baalanga.

40:19  Mee la di manu e-koia e-haga-goboina dangada i-nia manu huogodoo ala ne-hai ko-Au! Ma ko-Au dela ne-hai a-mee, dela e-mee di-haga-magedaa a-mee.

40:20  Nia geinga ala e-gai go mee e-tomo i-hongo nia gonduu i-di gowaa dela e-noho ai nia manu lodo-geinga e-dadaagala-ai.

40:21  Mee e-moe i-lala nia geinga duduia, ge e-noho hagammuni i-lodo di gowaa gelegele llebu i-mehanga nia aalek.

40:22  Nia geinga duduia mono laagau-‘willow’ i-nia daalinga nia monowai e-haga-malu a-mee.

40:23  Mee hagalee madagu i-di monowai mmidi. Mee e-noho dee-madagu i-di madagoaa nia wai Jordan gaa-biia gi-nia golomada o-maa.

40:24  Ma koai dela e-mee di-hai a-mee gi-dee-gida, be e-kumi a-mee? Ma koai dela e-mee di-kumi di ngudu o-maa i-lodo di hele?

Chapter 41

41:1  “Goe e-mee di-hudi di manu dragon go ‘Leviathan’ gi-di maadau, be e-nnoo dono holole gi-di loahi?

41:2  Goe e-mee di-daalo dau loahi laa-lodo di uhi o-maa, be e-hagalau ono gauwae gi-di maadau?

41:3  Mee gaa-dangi-adu bolo goe gi-diiagi ia gii-hana? Mee ga-helekai balabala-adu gi-di-goe?

41:4  Mee gaa-hai-adu dana hagababa, ga-hagamodu bolo ia e-hai-hegau-adu gaa-hana-hua beelaa?

41:5  Goe gaa-nnoo a-mee gadoo be-di manu mamaangi haga-gaidala, ge e-hai a-mee di-mee hagagoboina ni au dama-ahina hai-hegau?

41:6  Digau hai-waga-daha le e-hiihai e-hui a-mee? Digau huihui-mee e-duuduu a-mee ga-huihui gi-daha?

41:7  Goe e-mee di-daalo di baahi o-maa gi-nia daalo puu iga, be e-daalo di libogo o-maa gi taalo puu iga damana?

41:8  Goe ma-gaa-bili gi mee hagadahi, nomuli gei goe ga langahia dana heebagi, gu-de-hiihai bolo goe e-bili labelaa gi mee.

41:9  Tangada dela ga-gidee-ia di manu damanaiee deelaa ga-bagege gaa-hinga gi-hongo di gelegele.

41:10  Di manu damanaiee deelaa ma-ga-ala-aga, ga-llamu-dauwa, deai tangada e-mee di-duu gi-mua o mee ai.

41:11  Ma koai e-mee di-heebagi gi-mee gei hagalee halauwa? Hagalee tangada i henuailala e-mee ai.

41:12  Au ga-hagi-adu gi-di-goe di maaloo o-nia wae o-di manu damanaiee deelaa mo dono maaloo.

41:13  Deai tangada e-mee di-haahi gi-daha dono gahu laa-daha ai, be e-daalo di tuuli dela e-ulu-iei mee ai.

41:14  Ma koai dela e-mee di-huge di ngudu o-maa, dela e-hagatau-ai nia niha hagamadagudagu-dangada?

41:15  Dono dua ne-hai gi-nia goolongo abaaba duuli, e-pigi gi-di gowaa e-dahi e-hamaaloo be tadugalaa.

41:16  Nia maa e-hagapigi e-kadi huoloo gi-di gowaa e-dahi, di ahiaalangi e-mee di-ulu gi-mehanga ai.

41:17  E-pigi gi-di gowaa e-dahi e-mau-dangihi, deai di mee e-mee di-wwae nia maa gi-daha ai.

41:18  Di ila e-daba i-di madagoaa mee ga-tiaa, gei ono golomada e-maahina gadoo be-di laa dela e-hobo.

41:19  Di ulaula e-puu-mai i-lodo dono ngudu, gei nia modogologolo ahi e-llele-mai gi-daha.

41:20  Nia huiahi e-loloomoi i dono uhi, gadoo be nia huiahi o-nia aalek ala e-gaa i-lala di baalanga.

41:21  Dono dogi e-daamada dana ahi ulaula. Nia ulaula e-lloomoi i-lodo dono ngudu.

41:22  Dono uwa e-maaloo dangihi, ge digau huogodoo ala ga-heetugi gi mee le e-mmaadagu huoloo.

41:23  Deai di mee i dono gili e-maluu ai, dono gili e-hamaaloo hua be-di baalanga.

41:24  Dono manawa hamaaloo la-hagalee dono madagu ai, hagalee hagadautugi ge-hamaaloo dangihi be-di hadu mmili-‘wheat’.

41:25  Mee ga-manawa-aga gei digau ala koia e-maaloo hogi la-gu-uli nadau gai, gu-nadau hagamaamaa ai, gu-mmaadagu.

41:26  Deai tulumanu-dauwa e-mee di-haga-mohole dono gili ai. Deai taalo be-di amu e-mee di-haga-mmae a-mee ai.

41:27  Ang-gi mee, di baalanga le e-hai-hua be-di laagau maluu, ge di baalanga-mmee le e-maluu-hua be-di laagau bala.

41:28  Di amu-maalei e-hai a-mee gii-lele ai. Nia hadu ala e-dilidili a-mee le e-hai hua be nia mada-geinga.

41:29  Di laagau daaligi-dangada le e-hai labelaa be nia geinga, gei mee e-gadagada-hua gi-nia daalo ala e-kili ang-gi deia.

41:30  Nia ganauna ala i-hongo dono dinae e-hai gadoo be nia baahi baalanga mahaahaa; gei nia maa e-oho di gelegele llebu gadoo be-di baalanga haga-maluu gelegele.

41:31  Mee e-hai di tai gii-hai gadoo be nia wai ala e-dunu, gaa-hai ono buna gadoo be-di baalanga lolo.

41:32  Di hana o-maa guu-hai di ala dingidingia i ono muli, guu-hai di tai gi-abiabi kene.

41:33  Ma di mee e-hagatau gi mee i henuailala ai. Mee di manu deai dono madagu ai.

41:34  Mee e-de-hei-eia nia manu ala e-hagamuamua. Mee go di king o-nia manu lodo-geinga huogodoo.”

Chapter 42

42:1  Job ga-helekai gi Dimaadua,

42:2  “Meenei Dimaadua, au gu-iloo bolo ma Kooe dela e-kaedahi e-mogobuna, ma Kooe dela e-mee di-hai di-ingoo hua di mee dela e-hiihai ginai Goe.

42:3  Goe ne-heeu-mai be dagu hai la di-aha dela e-heeu-adu do iloo-mee, gei au tangada de-kabemee. Au ne-helekai i-nia mee digi modongoohia-eau, i-nia mee haga-goboina e-deemee di-iloo-eau.

42:4  Goe gu-hai-mai gi-di-au bolo au gi-hagalongo i-di madagoaa dela e-leelee-iei Goe, ge gi-helekai-adu gi au heeu.

42:5  Di madagoaa dela guu-doo gi-daha, au nogo iloo-hua nia mee au ne-longono i ogu dalinga. Gei dolomeenei, gei au gu-gidee Goe i ogu golomada.

42:6  Malaa, au gu-langaadia agu helekai huogodoo ala ne-helekai-ai, gaa-gahu au gi-nia dogolia mono luaahi, e-haga-modongoohia-ai bolo au guu-huli gi-daha mo ogu huaidu.”

42:7  I-muli-hua Dimaadua ne-lawa di-leelee gi Job, gei Mee ga-helekai gi Eliphaz, “Au gu-hagawelewele-adu gi-di-goe mo o ehoo dogolua, idimaa, goodou digi helekai donu i-di-Au, be-di hai dagu dangada hai-hegau go Job ne-hai.

42:8  Dolomeenei, kae-ina godou kau-daane e-hidu ge hidu siibi-daane gi Job, heia di-godou tigidaumaha be tigidaumaha ni-goodou e-hai-mai gi-di-Au. Gei Job ga-dalodalo i goodou, gei Au gaa-hila ang-gi ana dalodalo, ge hagalee hagahuaidu goodou gii-tau-anga gi-di godou hai dela ne-hai. Goodou digi helekai donu i-di Au, gadoo be dana hai ne-hai.”

42:9  Gei Eliphaz tangada Teman, Bildad tangada Shuah, mo Zophar tangada Naamah guu-hai be-di hai Dimaadua ne-helekai gi digaula, gei Dimaadua guu-hila-anga gi-nia dalodalo Job.

42:10  I-muli-hua Job nogo dalodalo i ono ehoo dogodolu aanei, gei Dimaadua guu-hila labelaa gi mee, gu-haga-maluagina labelaa a-mee holongo lua laa-hongo dono maluagina mai ana-dilaangi.

42:11  Nia duaahina-daane mo nia duaahina-ahina huogodoo a Job, mo ono ehoo hagaaloho huogodoo ala i-mua ga-lloomoi gi-baahi o-mee, gaa-hai di-nadau hagamiami damanaiee dalia a-mee i-di hale o-maa. Digaula e-haga-modongoohia-aga gi mee nadau aloho e-haga-manawa lamalia a-mee i-nia haingadaa huogodoo ala ne-dugu-anga go Dimaadua gi mee. Tangada-nei mo tangada-nei i digaula guu-wanga nadau bahihadu mono buulei goolo gi mee.

42:12  Gei Dimaadua gu-haga-maluagina a Job i-di hagaodi gi-muli o dono mouli, gu-haga-maluagina gi-nonua i-di maluagina o-maa matagidagi. Job gu-hai-mee gi-nia siibi e-madangaholu maa-haa mana-(14,000), ge ono mana-(6,000) ‘camel’, ge lua mana-(2,000) kau, ge dahi mana-(1,000) ‘donkey’.

42:13  Mee ana dama-daane dogohidu, ge dogodolu dama-ahina.

42:14  Mee ne-haga-ingoo dana dama-ahina madua bolo Jemimah, gei togolua dama-ahina bolo Keziah, gei tama-ahina muliagi loo go Keren=Happuch.

42:15  Ma nia ahina i henuailala e-mmaadanga be nia dama-ahina Job ai. Tamana digaula gu-hagagai digaula dalia nadau duaahina-daane.

42:16  I-muli-hua nia mee aanei, Job nogo mouli i henuailala nia ngadau e-lau-mada-haa-(140). Mee gu-gidee-ia nia dama ana dama, mo nia dama digaula.

42:17  Gei mee ne-made gu-madua huoloo.