CSlElizabeth - Genesis

Chapter 1

1:1  В начале сотвори Бог небо и землю.

1:2  Земля же бе невидима и неустроена, и тма верху бездны, и Дух Божий ношашеся верху воды.

1:3  И рече Бог: да будет свет. И бысть свет.

1:4  И виде Бог свет, яко добро, и разлучи Бог между светом и между тмою.

1:5  И нарече Бог свет день, а тму нарече нощь. И бысть вечер, и бысть утро, день един.

1:6  И рече Бог: да будет твердь посреде воды, и да будет разлучающи посреде воды и воды. И бысть тако.

1:7  И сотвори Бог твердь, и разлучи Бог между водою, яже бе под твердию, и между водою, яже бе над твердию.

1:8  И нарече Бог твердь небо. И виде Бог, яко добро. И бысть вечер, и бысть утро, день вторый.

1:9  И рече Бог: да соберется вода, яже под небесем, в собрание едино, и да явится суша. И бысть тако. И собрася вода, яже под небесем, в собрания своя, и явися суша.

1:10  И нарече Бог сушу землю, и собрания вод нарече моря. И виде Бог, яко добро.

1:11  И рече Бог: да прорастит земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И бысть тако.

1:12  И изнесе земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И виде Бог, яко добро.

1:13  И бысть вечер, и бысть утро, день третий.

1:14  И рече Бог: да будут светила на тверди небесней, освещати землю и разлучати между днем и между нощию: и да будут в знамения и во времена, и во дни и в лета,

1:15  и да будут в просвещение на тверди небесней, яко светити по земли. И бысть тако.

1:16  И сотвори Бог два светила великая: светило великое в начала дне, и светило меншее в начала нощи, и звезды:

1:17  и положи я Бог на тверди небесней, яко светити на землю,

1:18  и владети днем и нощию, и разлучати между светом и между тмою. И виде Бог, яко добро.

1:19  И бысть вечер, и бысть утро, день четвертый.

1:20  И рече Бог: да изведут воды гады душ живых, и птицы летающыя по земли, по тверди небесней. И бысть тако.

1:21  И сотвори Бог киты великия, и всяку душу животных гадов, яже изведоша воды по родом их, и всяку птицу пернату по роду. И виде Бог, яко добра.

1:22  И благослови я Бог, глаголя: раститеся и множитеся, и наполните воды, яже в морях, и птицы да умножатся на земли.

1:23  И бысть вечер, и бысть утро, день пятый.

1:24  И рече Бог: да изведет земля душу живу по роду, четвероногая и гады, и звери земли по роду. И бысть тако.

1:25  И сотвори Бог звери земли по роду, и скоты по роду их, и вся гады земли по роду их. И виде Бог, яко добра.

1:26  И рече Бог: сотворим человека по образу Нашему и по подобию, и да обладает рыбами морскими, и птицами небесными, (и зверми) и скотами, и всею землею, и всеми гады пресмыкающимися по земли.

1:27  И сотвори Бог человека, по образу Божию сотвори его: мужа и жену сотвори их.

1:28  И благослови их Бог, глаголя: раститеся и множитеся, и наполните землю, и господствуйте ею, и обладайте рыбами морскими, (и зверми) и птицами небесными, и всеми скотами, и всею землею, и всеми гадами пресмыкающимися по земли.

1:29  И рече Бог: се, дах вам всякую траву семенную сеющую семя, еже есть верху земли всея: и всякое древо, еже имать в себе плод семене семеннаго, вам будет в снедь:

1:30  и всем зверем земным, и всем птицам небесным, и всякому гаду пресмыкающемуся по земли, иже имать в себе душу живота, и всяку траву зелену в снедь. И бысть тако.

1:31  И виде Бог вся, елика сотвори: и се добра зело. И бысть вечер, и бысть утро, день шестый.

Chapter 2

2:1  И совершишася небо и земля, и все украшение их.

2:2  И соверши Бог в день шестый дела Своя, яже сотвори: и почи в день седмый от всех дел Своих, яже сотвори.

2:3  И благослови Бог день седмый, и освяти его: яко в той почи от всех дел Своих, яже начат Бог творити.

2:4  Сия книга бытия небесе и земли, егда бысть, в оньже день сотвори Господь Бог небо и землю,

2:5  и всякий злак селный, прежде даже быти на земли, и всякую траву селную, прежде даже прозябнути: не бо одожди Господь Бог на землю, и человек не бяше делати ю:

2:6  источник же исхождаше из земли и напаяше все лице земли.

2:7  И созда Бог человека, персть (взем) от земли, и вдуну в лице его дыхание жизни: и бысть человек в душу живу.

2:8  И насади Господь Бог рай во Едеме на востоцех, и введе тамо человека, егоже созда.

2:9  И прозябе Бог еще от земли всякое древо красное в видение и доброе в снедь: и древо жизни посреде рая, и древо еже ведети разуметелное добраго и лукаваго.

2:10  Река же исходит из Едема напаяти рай: оттуду разлучается в четыри начала.

2:11  Имя единей Фисон: сия окружающая всю землю Евилатскую: тамо убо есть злато.

2:12  Злато же оныя земли доброе: и тамо есть анфракс и камень зеленый.

2:13  И имя реце вторей Геон: сия окружающая всю землю Ефиопскую.

2:14  И река третия Тигр: сия проходящая прямо Ассириом. Река же четвертая Евфрат.

2:15  И взя Господь Бог человека, егоже созда, и введе его в рай Сладости, делати его и хранити.

2:16  И заповеда Господь Бог Адаму, глаголя: от всякаго древа, еже в раи, снедию снеси:

2:17  от древа же, еже разумети доброе и лукавое, не снесте от него: а в оньже аще день снесте от него, смертию умрете.

2:18  И рече Господь Бог: не добро быти человеку единому: сотворим ему помощника по нему.

2:19  И созда Бог еще от земли вся звери селныя и вся птицы небесныя, и приведе я ко Адаму видети, что наречет я: и всяко еже аще нарече Адам душу живу, сие имя ему.

2:20  И нарече Адам имена всем скотом, и всем птицам небесным, и всем зверем земным. Адаму же не обретеся помощник подобный ему.

2:21  И наложи Бог изступление на Адама, и успе: и взя едино от ребр его, и исполни плотию вместо его.

2:22  И созда Господь Бог ребро, еже взя от Адама, в жену, и приведе ю ко Адаму.

2:23  И рече Адам: се, ныне кость от костей моих и плоть от плоти моея: сия наречется жена, яко от мужа своего взята бысть сия.

2:24  Сего ради оставит человек отца своего и матерь и прилепится к жене своей, и будета два в плоть едину.

2:25  И беста оба нага, Адам же и жена его, и не стыдястася.

Chapter 3

3:1  Змий же бе мудрейший всех зверей сущих на земли, ихже сотвори Господь Бог. И рече змий жене: что яко рече Бог: да не ясте от всякаго древа райскаго?

3:2  И рече жена змию: от всякаго древа райскаго ясти будем:

3:3  от плода же древа, еже есть посреде рая, рече Бог, да не ясте от него, ниже прикоснетеся ему, да не умрете.

3:4  И рече змий жене: не смертию умрете:

3:5  ведяше бо Бог, яко в оньже аще день снесте от него, отверзутся очи ваши, и будете яко бози, ведяще доброе и лукавое.

3:6  И виде жена, яко добро древо в снедь и яко угодно очима видети и красно есть, еже разумети: и вземши от плода его яде, и даде мужу своему с собою, и ядоста.

3:7  И отверзошася очи обема, и разумеша, яко нази беша: и сшиста листвие смоковное, и сотвориста себе препоясания.

3:8  И услышаста глас Господа Бога ходяща в раи по полудни: и скрыстася Адам же и жена его от лица Господа Бога посреде древа райскаго.

3:9  И призва Господь Бог Адама и рече ему: Адаме, где еси?

3:10  И рече Ему: глас слышах Тебе ходяща в раи, и убояхся, яко наг есмь, и скрыхся.

3:11  И рече ему Бог: кто возвести тебе, яко наг еси, аще не бы от древа, егоже заповедах тебе сего единаго не ясти, от него ял еси?

3:12  И рече Адам: жена, юже дал еси со мною, та ми даде от древа, и ядох.

3:13  И рече Господь Бог жене: что сие сотворила еси? И рече жена: змий прельсти мя, и ядох.

3:14  И рече Господь Бог змию: яко сотворил еси сие, проклят ты от всех скотов и от всех зверей земных: на персех твоих и чреве ходити будеши, и землю снеси вся дни живота твоего:

3:15  и вражду положу между тобою и между женою, и между семенем твоим и между семенем тоя: той твою блюсти будет главу, и ты блюсти будеши его пяту.

3:16  И жене рече: умножая умножу печали твоя и воздыхания твоя: в болезнех родиши чада, и к мужу твоему обращение твое, и той тобою обладати будет.

3:17  И Адаму рече: яко послушал еси гласа жены твоея и ял еси от древа, егоже заповедах тебе сего единаго не ясти, от него ял еси: проклята земля в делех твоих, в печалех снеси тую вся дни живота твоего:

3:18  терния и волчцы возрастит тебе, и снеси траву селную:

3:19  в поте лица твоего снеси хлеб твой, дондеже возвратишися в землю, от неяже взят еси: яко земля еси, и в землю отидеши.

3:20  И нарече Адам имя жене своей Жизнь, яко та мати всех живущих.

3:21  И сотвори Господь Бог Адаму и жене его ризы кожаны, и облече их.

3:22  И рече Бог: се, Адам бысть яко един от Нас, еже разумети доброе и лукавое: и ныне да не когда прострет руку свою и возмет от древа жизни и снест, и жив будет во век.

3:23  И изгна его Господь Бог из рая Сладости делати землю, от неяже взят бысть.

3:24  И изрину Адама, и всели его прямо рая Сладости: и пристави Херувима, и пламенное оружие обращаемое, хранити путь древа жизни.

Chapter 4

4:1  Адам же позна Еву жену свою, и заченши роди Каина и рече: стяжах человека Богом.

4:2  И приложи родити брата его, Авеля. И бысть Авель пастырь овец, Каин же бе делаяй землю.

4:3  И бысть по днех, принесе Каин от плодов земли жертву Богу:

4:4  и Авель принесе и той от первородных овец своих и от туков их. И призре Бог на Авеля и на дары его:

4:5  на Каина же и на жертвы его не внят. И опечалися Каин зело, и испаде лице его.

4:6  И рече Господь Бог Каину: вскую прискорбен был еси? И вскую испаде лице твое?

4:7  Еда аще право принесл еси, право же не разделил еси, не согрешил ли еси? Умолкни: к тебе обращение его, и ты тем обладаеши.

4:8  И рече Каин ко Авелю брату своему: пойдем на поле. И бысть внегда быти им на поли, воста Каин на Авеля брата своего и уби его.

4:9  И рече Господь Бог ко Каину: где есть Авель брат твой? И рече: не вем: еда страж брату моему есмь аз?

4:10  И рече Господь: что сотворил еси сие? Глас крове брата твоего вопиет ко Мне от земли:

4:11  и ныне проклят ты на земли, яже разверзе уста своя прияти кровь брата твоего от руки твоея:

4:12  егда делаеши землю, и не приложит силы своея дати тебе: стеня и трясыйся будеши на земли.

4:13  И рече Каин ко Господу Богу: вящшая вина моя, еже оставитися ми:

4:14  аще изгониши мя днесь от лица земли, и от лица Твоего скрыюся, и буду стеня и трясыйся на земли, и будет, всяк обретаяй мя убиет мя.

4:15  И рече ему Господь Бог: не тако: всяк убивый Каина седмижды отмстится. И положи Господь Бог знамение на Каине, еже не убити его всякому обретающему его.

4:16  И изыде Каин от лица Божия и вселися в землю Наид, прямо Едему.

4:17  И позна Каин жену свою, и заченши роди Еноха. И бе зиждяй град, и именова град во имя сына своего Енох.

4:18  Родися же Еноху Гаидад: и Гаидад роди Малелеила: и Малелеил роди Мафусала: Мафусал же роди Ламеха.

4:19  И взя себе Ламех две жены: имя единей Ада и имя вторей Селла.

4:20  И роди Ада Иовила: сей бяше отец живущих в селениих скотопитателей.

4:21  И имя брату его Иувал: сей бяше показавый певницу и гусли.

4:22  Селла же и тая роди Фовела: сей бяше млатобиец, ковачь меди и железа: сестра же Фовелова Ноема.

4:23  Рече же Ламех своим женам: Ада и Селла, услышите глас мой, жены Ламеховы, внушите моя словеса: яко мужа убих в язву мне и юношу в струп мне:

4:24  яко седмицею отмстися от Каина, от Ламеха же седмьдесят седмицею.

4:25  Позна же Адам Еву жену свою: и заченши роди сына, и именова имя ему Сиф, глаголющи: воскреси бо ми Бог семя другое, вместо Авеля, егоже уби Каин.

4:26  И Сифу бысть сын: именова же имя ему Енос: сей упова призывати имя Господа Бога.

Chapter 5

5:1  Сия книга бытия человеча, в оньже день сотвори Бог Адама, по образу Божию сотвори его,

5:2  мужа и жену сотвори их и благослови их: и нарече имя ему Адам, в оньже день сотвори их.

5:3  Поживе же Адам лет двесте тридесять и роди сына по виду своему и по образу своему, и нарече имя ему Сиф.

5:4  Быша же дние Адамовы, яже поживе, по еже родити ему Сифа, лет седмь сот, и роди сыны и дщери.

5:5  И быша вси дние Адамовы, яже поживе, лет девять сот и тридесять: и умре.

5:6  Поживе же Сиф лет двесте пять и роди Еноса.

5:7  И поживе Сиф, по еже родити ему Еноса, лет седмь сот и седмь, и роди сыны и дщери.

5:8  И быша вси дние Сифовы лет девять сот и дванадесять: и умре.

5:9  И поживе Енос лет сто девятьдесят и роди Каинана.

5:10  И поживе Енос, по еже родити ему Каинана, лет седмь сот и пятьнадесять, и роди сыны и дщери.

5:11  И быша вси дние Еносовы лет девять сот и пять: и умре.

5:12  И поживе Каинан лет сто седмьдесят и роди Малелеила.

5:13  И поживе Каинан, по еже родити ему Малелеила, лет седмь сот и четыредесять, и роди сыны и дщери.

5:14  И быша вси дние Каинановы лет девять сот и десять: и умре.

5:15  И поживе Малелеил лет сто шестьдесят пять и роди Иареда.

5:16  И поживе Малелеил, по еже родити ему Иареда, лет седмь сот и тридесять, и роди сыны и дщери.

5:17  И быша вси дние Малелеиловы лет осмь сот и девятьдесят пять: и умре.

5:18  И поживе Иаред лет сто шестьдесят два и роди Еноха.

5:19  И поживе Иаред, по еже родити ему Еноха, лет осмь сот, и роди сыны и дщери.

5:20  И быша вси дние Иаредовы лет девять сот и шестьдесят два: и умре.

5:21  И поживе Енох лет сто шестьдесят пять и роди Мафусала.

5:22  Угоди же Енох Богу, и поживе Енох, по еже родити ему Мафусала, лет двесте, и роди сыны и дщери.

5:23  И быша вси дние Еноховы лет триста шестьдесят пять.

5:24  И угоди Енох Богу, и не обреташеся, зане преложи его Бог.

5:25  И поживе Мафусал лет сто осмьдесят седмь и роди Ламеха.

5:26  И поживе Мафусал, по еже родити ему Ламеха, лет седмь сот осмьдесят два, и роди сыны и дщери.

5:27  И быша вси дние Мафусаловы, яже поживе, лет девять сот и шестьдесят девять: и умре.

5:28  И поживе Ламех лет сто осмьдесят осмь и роди сына,

5:29  и нарече имя ему Ное, глаголя: сей упокоит нас от дел наших и от печали рук наших, и от земли, юже прокля Господь Бог.

5:30  И поживе Ламех, по еже родити ему Ноа, лет пять сот и шестьдесят пять, и роди сыны и дщери.

5:31  И быша вси дние Ламеховы лет седмь сот и пятьдесят три: и умре.

5:32  И бе Ное лет пяти сот, и роди сыны три, Сима, Хама, Иафефа.

Chapter 6

6:1  И бысть егда начаша человецы мнози бывати на земли, и дщери родишася им:

6:2  видевше же сынове Божии дщери человечи, яко добры суть, пояша себе жены от всех, яже избраша.

6:3  И рече Господь Бог: не имать Дух Мой пребывати в человецех сих во век, зане суть плоть: будут же дние их лет сто двадесять.

6:4  Исполини же бяху на земли во дни оны: и потом, егда вхождаху сынове Божии к дщерем человеческим, и раждаху себе: тии бяху исполини, иже от века, человецы именитии.

6:5  Видев же Господь Бог, яко умножишася злобы человеков на земли: и всяк помышляет в сердцы своем прилежно на злая во вся дни:

6:6  и помысли Бог, яко сотвори человека на земли, и размысли.

6:7  И рече Бог: потреблю человека, егоже сотворих, от лица земли, от человека даже до скота, и от гад даже до птиц небесных: зане размыслих, яко сотворих я.

6:8  Ное же обрете благодать пред Господем Богом.

6:9  Сия же бытия Ноева: Ное человек праведен совершен сый в роде своем, Богу угоди Ное.

6:10  Роди же Ное три сыны, Сима, Хама, Иафефа.

6:11  Растлеся же земля пред Богом, и наполнися земля неправды.

6:12  И виде Господь Бог землю, и бе растленна: яко растли всяка плоть путь свой на земли.

6:13  И рече Господь Бог Ною: время всякаго человека прииде пред Мя, яко исполнися земля неправды от них: и се, Аз погублю их и землю.

6:14  Сотвори убо себе ковчег от древ (негниющих) четвероуголных: гнезда сотвориши в ковчезе, и посмолиши его внутрьуду и внеуду смолою.

6:15  И тако сотвориши ковчег: трех сот лактей долгота ковчега, и пятидесяти лактей широта, и тридесяти лактей высота его.

6:16  Собирая сводом сотвориши ковчег, и в лакоть свершиши его свыше: дверь же ковчега сотвориши от страны: обиталища двокровна и трекровна сотвориши в нем.

6:17  Аз же, се, наведу потоп, воду на землю, погубити всяку плоть, в нейже есть дух жизни под небесем: и елика суть на земли, скончаются.

6:18  И поставлю завет Мой с тобою: внидеши же в ковчег ты и сынове твои, и жена твоя и жены сынов твоих с тобою.

6:19  И от всех скотов и от всех гад, и от всех зверей, и от всякия плоти, два два от всех введеши в ковчег, да питаеши с собою: мужеский пол и женский будут.

6:20  От всех птиц пернатых по роду, и от всех скотов по роду, и от всех гадов ползающих по земли по роду их, два два от всех внидут к тебе, питатися с тобою, мужеский пол и женский.

6:21  Ты же возми себе от всех брашен, яже имате ясти, и собереши к себе, и будут тебе и оным брашно.

6:22  И сотвори Ное вся елика заповеда ему Господь Бог, тако сотвори.

Chapter 7

7:1  И рече Господь Бог к Ною: вниди ты и весь дом твой в ковчег, яко тя видех праведна предо Мною в роде сем:

7:2  от скотов же чистых введи к себе седмь седмь, мужеский пол и женский: от скотов же нечистых два два, мужеский пол и женский:

7:3  и от птиц небесных чистых седмь седмь, мужеский пол и женский: и от всех птиц нечистых две две, мужеский пол и женский, препитати семя по всей земли:

7:4  еще бо дний седмь, Аз наведу дождь на землю четыредесять дний и четыредесять нощей: и потреблю всякое востание, еже сотворих, от лица всея земли.

7:5  И сотвори Ное вся, елика заповеда ему Господь Бог.

7:6  Ное же бе лет шести сот, и потоп водный бысть на земли.

7:7  Вниде же Ное и сынове его, и жена его и жены сынов его с ним в ковчег, воды ради потопа.

7:8  И от птиц чистых и от птиц нечистых, и от скот чистых и от скот нечистых, (и от зверей,) и от всех гадов пресмыкающихся по земли,

7:9  два два внидоша к Ною в ковчег, мужеский пол и женский, якоже заповеда (Господь) Бог Ною.

7:10  И бысть по седми днех, и вода потопная бысть на земли.

7:11  В шестьсотное лето в житии Ноеве, втораго месяца, в двадесять седмый день месяца, в день той разверзошася вси источницы бездны, и хляби небесныя отверзошася:

7:12  и бысть дождь на землю четыредесять дний и четыредесять нощей.

7:13  В день той вниде Ное, Сим, Хам, Иафеф, сынове Ноевы, и жена Ноева, и три жены сынов его с ним в ковчег.

7:14  И вси зверие земнии по роду, и вси скоти по роду, и всякий гад движущийся на земли по роду, и всякая птица пернатая по роду своему,

7:15  внидоша к Ною в ковчег два два, мужеский пол и женский, от всякия плоти, в нейже есть дух животный:

7:16  и входящая мужеский пол и женский от всякия плоти, внидоша к Ною в ковчег, якоже заповеда Господь Бог Ною: и затвори Господь Бог ковчег отвне его.

7:17  И бысть потоп четыредесять дний и четыредесять нощей на земли, и умножися вода и взя ковчег, и возвысися от земли:

7:18  и возмогаше вода, и умножашеся зело на земли, и ношашеся ковчег верху воды.

7:19  Вода же возмогаше зело зело на земли: и покры вся горы высокия, яже бяху под небесем:

7:20  пятьнадесять лактей горе возвысися вода, и покры вся горы высокия.

7:21  И умре всякая плоть движущаяся по земли птиц и скотов и зверей, и всякий гад движущийся на земли, и всякий человек,

7:22  и вся елика имут дыхание жизни, и все еже бе на суши умре.

7:23  И потребися всякое востание, еже бяше на лицы всея земли, от человека даже до скота и гадов и птиц небесных, и потребишася от земли: и оста Ное един, и иже с ним в ковчезе.

7:24  И возвысися вода над землею дний сто пятьдесят.

Chapter 8

8:1  И помяну Бог Ноа, и вся звери, и вся скоты, и вся птицы, и вся гады пресмыкающыяся, елика беху с ним в ковчезе: и наведе Бог дух на землю, и преста вода.

8:2  И заключишася источницы бездны и хляби небесныя: и удержася дождь от небесе.

8:3  И вспять пойде вода идущая от земли: и умаляшеся вода по сте пятидесятих днех.

8:4  И седе ковчег в месяц седмый, в двадесять седмый день месяца, на горах Араратских.

8:5  Вода же уходящи умаляшеся даже до десятаго месяца: и в десятый месяц, в первый день месяца явишася верси гор.

8:6  И бысть до четыредесятих днех отверзе Ное оконце ковчега, еже сотвори,

8:7  и посла врана (видети, аще уступила вода от лица земли): и изшед не возвратися, дондеже изсяче вода от земли.

8:8  И посла голубицу по нем видети, аще уступила вода от лица земли:

8:9  и не обретши голубица покоя ногама своима, возвратися к нему в ковчег, яко вода бяше по всему лицу всея земли: и простер руку свою, прият ю и внесе ю к себе в ковчег.

8:10  И премедлив еще седмь дний, паки посла голубицу из ковчега.

8:11  И возвратися к нему голубица к вечеру, и имеяше сучец масличен с листвием во устех своих: и позна Ное, яко уступи вода от лица земли.

8:12  И премедлив еще седмь дний других, паки посла голубицу, и не приложи возвратитися к нему потом.

8:13  И бысть в первое и шестьсотное лето жития Ноева, в первый день перваго месяца, изсяче вода от лица земли: и откры Ное покров ковчега, егоже сотвори, и виде, яко изсяче вода от лица земли.

8:14  В месяц же вторый, в двадесять седмый день месяца изсше земля.

8:15  И рече Господь Бог Ноеви, глаголя:

8:16  изыди из ковчега ты и жена твоя, и сынове твои и жены сынов твоих с тобою:

8:17  и вся звери, елицы суть с тобою, и всяку плоть от птиц даже до скотов, и всяк гад движущийся по земли изведи с собою: и раститеся и множитеся на земли.

8:18  И изыде Ное и жена его, и сынове его и жены сынов его с ним,

8:19  и вси зверие, и вси скоти, и вся птицы и вси гади движущиися по роду своему на земли изыдоша из ковчега.

8:20  И созда Ное жертвенник Господеви: и взя от всех скотов чистых и от всех птиц чистых и вознесе во всесожжение на жертвенник.

8:21  И обоня Господь воню благоухания. И рече Господь Бог размыслив: не приложу ктому прокляти землю за дела человеческая, зане прилежит помышление человеку прилежно на злая от юности его: не приложу убо ктому поразити всякую плоть живущую, якоже сотворих:

8:22  во вся дни земли сеятва и жатва, зима и зной, лето и весна, день и нощь не престанут.

Chapter 9

9:1  И благослови Бог Ноа и сыны его и рече им: раститеся и множитеся, и наполните землю и обладайте ею:

9:2  и страх и трепет ваш будет на всех зверех земных (и на всех скотех земных,) на всех птицах небесных и на всех движущихся по земли и на всех рыбах морских: в руце вашы вдах (я).

9:3  И всякое движущееся, еже есть живо, вам будет в снедь: яко зелие травное дах вам все.

9:4  Точию мяса в крови души да не снесте.

9:5  Крови бо вашей, душ ваших, от руки всякаго зверя изыщу (ея): и от руки человека брата изыщу ея.

9:6  Проливаяй кровь человечу, в ея место его пролиется: яко во образ Божий сотворих человека.

9:7  Вы же раститеся и множитеся, и наполните землю, и множитеся на ней.

9:8  И рече Бог Ноеви и сыном его с ним, глаголя:

9:9  се, Аз поставляю завет Мой вам и семени вашему по вас,

9:10  и всякой души живущей с вами от птиц и от скот и всем зверем земным, елика с вами (суть) от всех изшедших из ковчега:

9:11  и поставлю завет Мой с вами: и не умрет всяка плоть ктому от воды потопныя, и ктому не будет потоп водный, еже истлити всю землю.

9:12  И рече Господь Бог Ноеви: сие знамение завета, еже Аз даю между Мною и вами, и между всякою душею живою, яже есть с вами, в роды вечныя:

9:13  дугу Мою полагаю во облаце, и будет в знамение завета (вечнаго) между Мною и землею.

9:14  И будет егда наведу облаки на землю, явится дуга Моя во облаце:

9:15  и помяну завет Мой, иже есть между Мною и вами, и между всякою душею живущею во всякой плоти, и не будет ктому вода в потоп, яко потребити всяку плоть.

9:16  И будет дуга Моя во облаце: и узрю ю, еже помянути завет вечный между Мною и землею, и между всякою душею живущею во всякой плоти, яже есть на земли.

9:17  И рече Бог Ноеви: сие знамение завета, егоже положих между Мною и между всякою плотию, яже есть на земли.

9:18  Быша же сынове Ноевы изшедшии из ковчега, Сим, Хам, Иафеф: Хам же бяше отец Ханаань.

9:19  Трие сии суть сынове Ноевы: от сих разсеяшася по всей земли.

9:20  И начат Ное человек делатель (быти) земли, и насади виноград:

9:21  и испи от вина, и упися, и обнажися в дому своем.

9:22  И виде Хам отец Ханаань наготу отца своего, и изшед вон поведа обема братома своима.

9:23  И вземше сим и Иафеф ризу, возложиша (ю) на обе раме свои, и идоша вспять зряще, и покрыша наготу отца своего: и лице их вспять зря, и наготы отца своего не видеша.

9:24  Истрезвися же Ное от вина, и разуме елика сотвори ему сын его юнейший,

9:25  и рече: проклят (буди) Ханаан отрок: раб будет братиям своим.

9:26  И рече: благословен Господь Бог Симов: и будет Ханаан отрок раб ему:

9:27  да распространит Бог Иафефа, и да вселится в селениих Симовых, и да будет Ханаан раб ему.

9:28  Поживе же Ное по потопе лет триста пятьдесят.

9:29  И быша вси дние Ноевы лет девять сот пятьдесят: и умре.

Chapter 10

10:1  Сия же (суть) бытия сынов Ноевых, Сима, Хама, Иафефа. И родишася им сынове по потопе.

10:2  Сынове Иафефовы: Гамер и Магог, и Мадай и Иован, и Елиса и Фовел, и Мосох и Фирас.

10:3  Сынове же Гамеровы: Асханас и Рифаф и Форгама.

10:4  Сынове же Иовани: Елиса и Фарсис, Китийстии и Родийстии.

10:5  От сих разделишася острови языков (всех) в земли их: кийждо по языку в племенех своих и в народех своих.

10:6  Сынове же Хамовы: Хус и Месраин, Фуд и Ханаан.

10:7  Сынове Хусовы: Сава и Евила, и Савафа и Регма, и Савафака. Сынове же Регмановы: Сава и Дадан.

10:8  Хус же роди Неврода: сей начат быти исполин на земли:

10:9  сей бе исполин ловец пред Господем Богом: сего ради рекут: яко Неврод исполин ловец пред Господем.

10:10  И бысть начало царства его Вавилон и Орех, и Архад и Халанни на земли Сеннаар.

10:11  От земли тоя изыде Ассур: и созда Ниневию, и Роовоф град, и Халах.

10:12  И Дасем между Ниневиею и между Халахом: сей есть град великий.

10:13  Месраин же роди Лудиима и Неффалима, и Енеметиима и Лавиима,

10:14  и Патросониима и Хасмониима, отнюдуже изыде Филистиим, и Гаффориима.

10:15  Ханаан же роди Сидона первенца (своего) и Хеттеа,

10:16  и Иевусеа и Аморреа, и Гергесеа

10:17  и Евеа, и Арукеа и Асеннеа,

10:18  и Арадиа и Самареа, и Амафию. И посем разсеяшася племена Хананейская:

10:19  и быша пределы Хананейстии от Сидона даже приити до Герара и Газы, идуще даже до Содома и Гоморры, до Адамы и Севоима, даже до Даса.

10:20  Сии сынове Хамовы в племенех своих, по языком своим, в странах своих и в народех своих.

10:21  И Симу родися и тому, отцу всех сынов Еверовых, брату Иафефа старейшаго.

10:22  Сынове Симовы: Елам и Ассур, и Арфаксад и Луд, и Арам и Каинан.

10:23  И сынове Арамли: Ос и Ул, и Гатер и Мосох.

10:24  И Арфаксад роди Каинана, Каинан же роди Салу, Сала же роди Евера.

10:25  И родистася Еверу два сына: имя единому Фалек: во дни бо его разделися земля: и имя брату его Иектан.

10:26  Иектан же роди Елмодада и Салефа, и Сармофа и Иараха,

10:27  и Одорра и Евила и Декла,

10:28  и Евала и Авимаила и Совева,

10:29  и Уфира и Евила и Иовава: вси сии сынове Иектановы.

10:30  И бысть селение их от Маси даже приити до Сафира, горы восточныя.

10:31  Сии сынове Симовы, в племенех своих, по языком их, в странах их и в народех их.

10:32  Сия племена сынов Ноевых по родом их, по языком их: от сих разсеяшася острови языков на земли по потопе.

Chapter 11

11:1  И бе вся земля устне едине, и глас един всем.

11:2  И бысть внегда поити им от восток, обретоша поле в земли Сеннаарстей и вселишася тамо.

11:3  И рече человек ближнему своему: приидите, сотворим плинфы и испечем их огнем. И бысть им плинфа в камень, и брение вместо мела.

11:4  И рекоша: приидите, созиждем себе град и столп, егоже верх будет даже до небесе: и сотворим себе имя, прежде неже разсеятися нам по лицу всея земли.

11:5  И сниде Господь видети град и столп, егоже созидаша сынове человечестии.

11:6  И рече Господь: се, род един, и устне едине всех, и сие начаша творити: и ныне не оскудеют от них вся, елика аще восхотят творити.

11:7  Приидите, и сошедше смесим тамо язык их, да не услышат кийждо гласа ближняго (своего).

11:8  И разсея их оттуду Господь по лицу всея земли: и престаша зиждуще град и столп.

11:9  Сего ради наречеся имя его Смешение, яко тамо смеси Господь устна всея земли, и оттуду разсея их Господь по лицу всея земли.

11:10  И сия бытия Симова: и бяше Сим сын ста лет, егда роди Арфаксада, во второе лето по потопе:

11:11  и поживе Сим, повнегда родити ему Арфаксада, лет пять сот и роди сыны и дщери: и умре.

11:12  И поживе Арфаксад лет сто тридесять пять и роди Каинана:

11:13  и поживе Арфаксад, повнегда родити ему Каинана, лет триста тридесять и роди сыны и дщери: и умре. И поживе Каинан лет сто тридесять и роди Салу: и поживе Каинан, повнегда родити ему Салу, лет триста тридесять и роди сыны и дщери: и умре.

11:14  И поживе Сала лет сто тридесять и роди Евера:

11:15  и поживе Сала, повнегда родити ему Евера, лет триста тридесять и роди сыны и дщери: и умре.

11:16  И поживе Евер лет сто тридесять четыри и роди Фалека:

11:17  и поживе Евер, повнегда родити ему Фалека, лет триста седмьдесят и роди сыны и дщери: и умре.

11:18  И поживе Фалек лет сто тридесять и роди Рагава:

11:19  и поживе Фалек, повнегда родити ему Рагава, лет двесте девять и роди сыны и дщери: и умре.

11:20  И поживе Рагав лет сто тридесять два и роди Серуха:

11:21  и поживе Рагав, повнегда родити ему Серуха, лет двесте седмь и роди сыны и дщери: и умре.

11:22  И поживе Серух лет сто тридесять и роди Нахора:

11:23  и поживе Серух, повнегда родити ему Нахора, лет двесте и роди сыны и дщери: и умре.

11:24  И поживе Нахор лет седмьдесят девять и роди Фарру:

11:25  и поживе Нахор, повнегда родити ему Фарру, лет сто двадесять девять и роди сыны и дщери: и умре.

11:26  И поживе Фарра лет седмьдесят и роди Аврама и Нахора и Аррана.

11:27  Сия же бытия Фарры: Фарра роди Аврама и Нахора и Аррана. Арран же роди Лота:

11:28  и умре Арран пред Фаррою отцем своим в земли, в нейже родися, в стране Халдейстей.

11:29  И пояста Аврам и Нахор себе жены: и имя жене Аврамли Сара, и имя жене Нахорове Мельха, дщи Арраня: сей есть отец Мельхин и отец Есхин.

11:30  Бяше же Сара неплоды и не раждаше детей.

11:31  И поят Фарра Аврама сына своего и Лота сына Арраня, сына сына своего, и Сару сноху свою, жену Аврама сына своего: и изведе я из земли Халдейския ити на землю Ханаанску: и приидоша даже до Харрана и вселишася тамо.

11:32  Быша же вси дние Фаррины в земли Харрани лет двесте пять: и умре Фарра в Харране.

Chapter 12

12:1  И рече Господь Авраму: изыди от земли твоея, и от рода твоего, и от дому отца твоего, и иди в землю, юже ти покажу:

12:2  и сотворю тя в язык велий, и благословлю тя, и возвеличу имя твое, и будеши благословен:

12:3  и благословлю благословящыя тя, и кленушыя тя проклену: и благословятся о тебе вся племена земная.

12:4  И иде Аврам, якоже глагола ему Господь, и идяше с ним Лот: Аврам же бе лет седмидесяти пяти, егда изыде от (земли) Харран.

12:5  И поят Аврам Сару жену свою, и Лота сына брата своего, и вся имения своя, елика стяжаша, и всякую душу, юже стяжаша в Харране: и изыдоша поити в землю Ханааню.

12:6  И пройде Аврам землю в долготу ея даже до места Сихем, до дуба Высокаго: Хананее же тогда живяху на земли (той).

12:7  И явися Господь Авраму и рече ему: семени твоему дам землю сию. И созда тамо Аврам жертвенник Господу явльшемуся ему.

12:8  И отступи оттуду в гору на восток (лицем) прямо Вефилю, и постави тамо кущу свою в Вефили при мори, и Агге к востоком: и созда тамо жертвенник Господу, и призва во имя Господа (явльшася ему).

12:9  И воздвижеся Аврам, и шед ополчися в пустыни.

12:10  И бысть глад на земли: и сниде Аврам во Египет вселитися тамо, яко одоле глад на земли.

12:11  Бысть же егда приближися Аврам внити во Египет, рече Аврам Саре жене своей: вем аз, яко жена добролична еси:

12:12  будет убо егда увидят тя Египтяне, рекут, яко жена его есть сия: и убиют мя, тебе же снабдят:

12:13  рцы убо, яко сестра ему есмь, да добро мне будет тебе ради, и будет жива душа моя тебе ради.

12:14  Бысть же егда вниде Аврам во Египет, видевше Египтяне жену его, яко добра бяше зело,

12:15  и видеша ю князи фараони и похвалиша ю пред фараоном, и введоша ю в дом фараонов.

12:16  И Авраму добре бяше ея ради: и быша ему овцы и телцы и ослы, и рабы и рабыни, и мски и велблюды.

12:17  И мучи Господь казньми великими и лютыми фараона и дом его Сары ради жены Аврамли.

12:18  Призвав же фараон Аврама, рече ему: что сие сотворил еси мне, яко не поведал ми еси, яко жена твоя есть?

12:19  Вскую рекл еси, яко сестра ми есть? И поях ю себе в жену. И ныне се, жена твоя пред тобою: поемь ю отиди.

12:20  И заповеда фараон мужем о Авраме, проводити его и жену его, и вся, елика быша его, и Лота с ним.

Chapter 13

13:1  Изыде же Аврам от Египта сам и жена его, и вся, елика его, и Лот с ним в пустыню.

13:2  Аврам же бяше богат зело скоты и сребром и златом.

13:3  И иде отнюдуже прииде, в пустыню до Вефила, до места, идеже бе ему куща первее, между Вефилем и между Агге,

13:4  на место жертвенника, идеже сотвори его первее: и призва тамо Аврам имя Господне.

13:5  И Лоту ходящу со Аврамом бяху овцы, и волы, и кущы.

13:6  И не вмещаше их земля жити вкупе, яко имения их бяху многа: и не можаху жити вкупе.

13:7  И бысть распря между пастухи скота Аврамля и между пастухи скота Лотова: Хананее же и Ферезее тогда живяху на земли (той).

13:8  Рече же Аврам Лоту: да не будет распря между мною и тобою, и между пастухи твоими и между пастухи моими, яко человецы братия мы есмы:

13:9  не се ли вся земля пред тобою есть? Отлучися ты от мене: аще ты на лево, аз на десно: аще же ты на десно, аз на лево.

13:10  И возвед Лот очи свои, виде всю окрестную страну Иорданскую, яко вся напаяема бяше водою, прежде неже низвратити Богу Содом и Гоморр, яко рай Божий, и яко земля Египетска, даже приити до Зогора:

13:11  и избра себе Лот всю окрестную страну Иорданскую, и отиде Лот от востока: и разлучистася кийждо от брата своего.

13:12  Аврам же вселися в земли Ханаанстей, Лот же вселися во граде окрестных стран и вселися в Содоме.

13:13  Человецы же сущии в Содоме зли и грешни пред Богом зело.

13:14  Бог же рече Авраму, повнегда разлучитися Лоту от него: воззри очима твоима и виждь от места, идеже ты ныне еси, к северу, и ливе, и к востоку, и морю:

13:15  яко всю землю, юже ты видиши, тебе дам ю и семени твоему во веки,

13:16  и сотворю семя твое, яко песок земный: аще кто может исчести песок земный, то и семя твое изочтет:

13:17  востав проиди землю в долготу ея и в широту: яко тебе дам ю и семени твоему во век.

13:18  И отселився Аврам, пришед вселися у дуба Мамврийскаго, иже бяше в Хевроне: и созда ту жертвенник Господу.

Chapter 14

14:1  Бысть же в царство Амарфала царя Сеннаарска, и Ариох царь Елласарск, и Ходоллогомор царь Еламск, и Фаргал царь языческий

14:2  сотвориша рать с Валлою царем Содомским и с Варсою царем Гоморрским, и с Сеннааром царем Адамы и с симовором царем Севоимским, и с царем Валаки: сия есть Сигор.

14:3  Вси сии совещашася на юдоль Сланую: сие есть море Сланое.

14:4  Дванадесять лет тии работаша Ходоллогомору: третияго же надесять лета отступиша.

14:5  И в четвертое надесять лето, прииде Ходоллогомор, и цари иже с ним, и изсекоша Исполинов сущих во Астарофе и в Карнаине, и языки крепки вкупе с ними, и омеов, иже в Сави граде,

14:6  и Хорреов, иже в горах Сиирских, даже до Теревинфа Фарана, иже есть в пустыни.

14:7  И возвратившеся приидоша ко источнику Судному, иже есть Кадис: и ссекоша вся князи Амаликовы, и Аморреов живущих во Асасанфамаре.

14:8  Изыде же царь Содомский и царь Гоморрский, и царь Адаманский и царь Севоимский, и царь Валаки, сия есть Сигор: и ополчишася противу их на брань во юдоли Сланой,

14:9  на Ходоллогомора царя Еламска и Фаргала царя языческа, и Амарфала царя Сеннаарска и Ариоха царя Елласарска: четыри цари на пять.

14:10  Юдоль же Сланая имяше кладязи смоляныя. И побеже царь Содомский и царь Гоморрский, и падоша тамо: оставшиися же бежаша в горняя (и одержаша я).

14:11  Взяша же вся конныя Содомския и Гоморрския и вся брашна их, и отидоша.

14:12  Взяша же и Лота сына брата Аврамова и имение его, и отидоша: бе бо в Содомех живый.

14:13  Пришед же един от уцелевших, возвести Авраму пришелцу, иже живяше у дуба Мамврийскаго, Аморреа брата Есхоля и брата Авнаня, иже беша союзницы Аврамовы.

14:14  Слышав же Аврам, яко пленен бысть Лот братаничь его, сочте домочадцы своя триста и осмьнадесять, и погна вслед их даже до Дана.

14:15  И нападе на ня нощию сам и отроцы его (с ним): и порази их и гони их даже до Ховала, иже есть ошуюю Дамаска:

14:16  и возврати вся конныя Содомския, и Лота сына брата своего возврати, и вся имения его, и жены, и люди.

14:17  Изыде же царь Содомский в сретение ему, повнегда возвратитися ему от сеча Ходоллогоморскаго, и царей сущих с ним, в юдоль Савину: сие же бяше поле царево:

14:18  и Мелхиседек царь Салимский изнесе хлебы и вино: бяше же священник Бога Вышняго.

14:19  И благослови Аврама, и рече: благословен Аврам Богом Вышним, иже созда небо и землю:

14:20  и благословен Бог Вышний, Иже предаде враги твоя под руки тебе. И даде ему десятину Аврам от всего.

14:21  Рече же царь Содомский ко Авраму: даждь ми мужы, а кони возми себе.

14:22  Рече же Аврам к царю Содомску: воздвигну руку мою ко Господу Богу Вышнему, иже сотвори небо и землю:

14:23  аще от нити до ременя сапожнаго возму от всего твоего, да не речеши, яко аз обогатих Аврама:

14:24  кроме сих, яже снедоша отроцы, и части мужей, иже ходиша со мною, Есхол, Авнан, Мамврий: сии да возмут части (своя).

Chapter 15

15:1  По глаголех же сих, бысть слово Господне ко Авраму в видении нощию, глаголя: не бойся, Авраме: Аз защищаю тя, мзда твоя многа будет зело.

15:2  Глагола же Аврам: Владыко Господи, что ми даси? Аз же отпущаюся безчаден: сын же масек домочадицы моея, сей Дамаск Елиезер.

15:3  И рече Аврам: понеже мне не дал еси семене, домочадец же мой наследник мой будет.

15:4  И абие глас Господень бысть к нему, глаголющий: не будет сей наследник твой, но иже изыдет из тебе, той будет наследник тебе.

15:5  Изведе же его вон и рече ему: воззри на небо и изочти звезды, аще возможеши исчести я. И рече: тако будет семя твое.

15:6  И верова Аврам Богу, и вменися ему в правду.

15:7  Рече же к нему: Аз (есмь) Бог изведый тя от страны Халдейския, яко дати тебе землю сию наследствовати.

15:8  И рече: Владыко Господи, по чесому уразумею, яко наследити ю имам?

15:9  Рече же к нему: возми Мне юницу трилетну и козу трилетну и овна трилетна, и горлицу и голубя.

15:10  Взя же он вся сия и раздели я на полы, и положи я противолична едина ко другому: птиц же не раздели.

15:11  Слетеша же птицы на телеса растесаная их: и седе близу их Аврам.

15:12  Заходящу же солнцу, ужас нападе на Аврама, и се, страх темен велий нападе нань.

15:13  И речено бысть ко Авраму: ведый увеси, яко преселно будет семя твое в земли не своей, и поработят я, и озлобят я, и смирят я лет четыриста:

15:14  языку же, емуже поработают, сужду Аз: по сих же изыдут семо со имением многим:

15:15  ты же отидеши ко отцем твоим в мире, препитан в старости добрей:

15:16  в четвертем же роде возвратятся семо: не бо исполнишася греси Аморреов до ныне.

15:17  Егда же бысть солнце на западе, пламень бысть: и се, пещь дымящися, и свещы огненны, яже проидоша между растесании сими.

15:18  В день той завеща Господь Авраму завет, глаголя: семени твоему дам землю сию от реки Египетския даже до реки великия Евфрата:

15:19  Кенеов и Кенезеов и Кедмонеов,

15:20  и Хеттеов и Ферезеов и Рафаинов,

15:21  и Аморреов и Хананеов, и Евеов и Гергесеов и Иевусеов.

Chapter 16

16:1  Сара же жена Аврамля не раждаше ему: бяше же ей раба Египтяныня, ейже имя Агарь.

16:2  Рече же Сара ко Авраму: се, заключи мя Господь, еже не раждати: вниди убо к рабе моей, да чада сотворю от нея. Послуша же Аврам гласа Сарина.

16:3  И поимши Сара жена Аврамля Агарь Египтяныню рабу свою, по десяти летех вселения Аврамля в земли Ханаани, даде ю в жену Авраму мужу своему.

16:4  И вниде ко Агари, и зачат: и виде, яко во чреве имать, и укорена бысть госпожа (ея) пред нею.

16:5  И рече Сара ко Авраму: обида ми от тебе: аз дах рабу мою в недро твое: она же видевши, яко во чреве имать, укорена бых пред нею: суди Бог между мною и тобою.

16:6  Рече же Аврам к Саре: се, раба твоя в руку твоею: твори ей, якоже ти есть угодно. И озлоби ю Сара: и отбеже от лица ея.

16:7  И обрете ю Ангел Господень у источника воды в пустыни, у источника на пути Сур.

16:8  И рече ей Ангел Господень: Агарь, рабо Сарина, откуду идеши и камо грядеши? И рече: от лица Сары госпожи моея аз бегу.

16:9  Рече же ей Ангел Господень: возвратися к госпоже своей и покорися под руку ея.

16:10  И рече ей Ангел Господень: умножая умножу семя твое, и не сочтется от множества.

16:11  И рече ей Ангел Господень: се, ты во чреве имаши и родиши сына, и наречеши имя ему Исмаил: яко услыша Господь смирение твое:

16:12  сей будет селный человек: руце его на всех, и руки всех на него, и пред лицем всея братии своея вселится.

16:13  И призва Агарь имя Господа глаголющаго к ней: Ты Бог призревый на мя: яко рече: ибо предо мною видех явльшагося мне.

16:14  Сего ради прозва кладязь той: Кладязь, идеже предо мною видех: се между Кадисом и между Варадом.

16:15  И роди Агарь Авраму сына, и нарече Аврам имя сыну своему, егоже роди ему Агарь, Исмаил.

16:16  Аврам же бе лет осмидесяти шести, егда роди Агарь Авраму Исмаила.

Chapter 17

17:1  Бысть же Авраму лет девятьдесят девять: и явися Господь Авраму и рече ему: Аз есмь Бог твой, благоугождай предо Мною и буди непорочен:

17:2  и положу завет Мой между Мною и между тобою: и умножу тя зело.

17:3  И паде Аврам на лицы своем, и рече ему Бог, глаголя:

17:4  и Аз се, завет Мой с тобою, и будеши отец множества языков:

17:5  и не наречется ктому имя твое Аврам, но будет имя твое Авраам: яко отца многих языков положих тя:

17:6  и возращу тя зело зело, и положу тя в народы, и царие из тебе изыдут:

17:7  и поставлю завет Мой между Мною и между тобою, и между семенем твоим по тебе в роды их, в завет вечен, да буду тебе Бог и семени твоему по тебе:

17:8  и дам тебе и семени твоему по тебе землю, в нейже обитаеши, всю землю Ханааню во одержание вечное, и буду им Бог.

17:9  И рече Бог ко Аврааму: ты же завет Мой соблюдеши, ты и семя твое по тебе в роды их.

17:10  И сей завет, егоже соблюдеши между Мною и вами, и между семенем твоим по тебе в роды их: обрежется от вас всяк мужеск пол,

17:11  и обрежете плоть крайнюю вашу, и будет в знамение завета между Мною и вами.

17:12  И младенец осми дний обрежется вам, всяк мужеский пол в родех ваших: и домочадец, и купленый от всякаго сына чуждаго, иже несть от семене твоего: обрезанием обрежется домочадец дому твоего и купленый.

17:13  И будет завет Мой на плоти вашей в завет вечен.

17:14  Необрезаный же мужеский пол, иже не обрежет плоти крайния своея в день осмый, погубится душа та от рода своего: яко завет Мой разори.

17:15  И рече Бог Аврааму: Сара жена твоя не наречется имя ея Сара, но Сарра будет имя ей:

17:16  благословлю же ю и дам тебе от нея чадо: и благословлю е, и будет в языки, и царие языков из него будут.

17:17  И паде Авраам на лице свое, и посмеяся, и рече в мысли своей, глаголя: еда столетному (мужу) родится сын? Еда и Сарра девятидесяти лет (сущи) родит?

17:18  Рече же Авраам к Богу: Исмаил сей да живет пред Тобою.

17:19  Рече же Бог ко Аврааму: воистинну, се, Сарра жена твоя родит тебе сына, и наречеши имя ему Исаак: и поставлю завет Мой с ним в завет вечен, да буду ему в Бога и семени его по нем.

17:20  О Исмаиле же се послушах тебе: и се благослових его, и возращу его, и умножу его зело: дванадесять языки родит: и дам его в язык велий.

17:21  Завет же Мой поставлю со Исааком, егоже родит тебе Сарра, во время сие, в лето второе.

17:22  Сконча же (Бог) глаголя к нему, и взыде Бог от Авраама.

17:23  И поя Авраам Исмаила сына своего, и вся домочадцы своя и вся купленыя, и весь мужеск пол мужей, иже в дому Авраамли, и обреза плоть крайнюю их во время дне того, якоже глагола ему Бог.

17:24  Авраам же девятидесяти девяти лет бяше, егда обреза плоть крайнюю свою.

17:25  Исмаил же сын его бяше лет трехнадесяти, егда обреза плоть крайнюю свою.

17:26  Во время (же) дне онаго обрезася Авраам и Исмаил сын его,

17:27  и вси мужие дому его, и домочадцы (его) и куплении от инородных языков, и обреза я.

Chapter 18

18:1  Явися же ему Бог у дуба Мамврийска, седящу ему пред дверми сени своея в полудни.

18:2  Воззрев же очима своима, виде, и се, трие мужие стояху над ним: и видев притече в сретение им от дверей сени своея: и поклонися до земли

18:3  и рече: Господи, аще убо обретох благодать пред Тобою, не мини раба Твоего:

18:4  да принесется вода и омыются ноги ваши, и прохладитеся под древом:

18:5  и принесу хлеб, да ясте, и посем пойдете в путь свой, егоже ради уклонистеся к рабу вашему. И рекоша: тако сотвори, якоже глаголал еси.

18:6  И потщася Авраам в сень к Сарре и рече ей: ускори и смеси три меры муки чисты, и сотвори потребники.

18:7  И тече Авраам ко кравам, и взя телца млада и добра, и даде рабу, и ускори приготовити е.

18:8  И взя масло, и млеко, и телца, егоже приготова: и предложи им, и ядоша: сам же стояше пред ними под древом.

18:9  Рече же к нему: где Сарра жена твоя? Он же отвещав, рече: се, в сени.

18:10  Рече же: (се) возвращаяся прииду к тебе во время сие в часы, и родит сына Сарра жена твоя. Сарра же услыша пред дверми сени сущи за ним.

18:11  Авраам же и Сарра стара (беста,) заматеревшая во днех: и престаша Сарре бывати женская.

18:12  Разсмеяся же Сарра в себе, глаголющи: не у было ми убо доселе, господин же мой стар.

18:13  И рече Господь ко Аврааму: что яко разсмеяся Сарра в себе, глаголющи: еда истинно рожду? Аз же состарехся.

18:14  Еда изнеможет у Бога слово? В сие время возвращуся к тебе в часы, и будет Сарре сын.

18:15  Отречеся же Сарра, глаголющи: не разсмеяхся: убояся бо. И рече ей: ни, но разсмеялася еси.

18:16  Воставше же оттуду мужие, воззреша на лице Содома и Гоморра: Авраам же идяше с ними, провождая их.

18:17  Господь же рече: еда утаю Аз от Авраама раба Моего, яже Аз творю?

18:18  Авраам же бывая будет в язык велик и мног, и благословятся о нем вси языцы земнии:

18:19  вем бо, яко заповесть сыном своим и дому своему по себе, и сохранят пути Господни творити правду и суд, яко да наведет Господь на Авраама вся, елика глагола к нему.

18:20  Рече же Господь: вопль Содомский и Гоморрский умножися ко Мне, и греси их велицы зело:

18:21  сошед убо узрю, аще по воплю их грядущему ко Мне совершаются: аще же ни, да разумею.

18:22  И обратившеся оттуду мужие, приидоша в Содом: Авраам же еще бяше стояй пред Господем.

18:23  И приближився Авраам, рече: погубиши ли праведнаго с нечестивым, и будет праведник яко нечестивый?

18:24  Аще будут пятьдесят праведницы во граде, погубиши ли я? Не пощадиши ли всего места пятидесяти ради праведных, аще будут в нем?

18:25  Никакоже Ты сотвориши по глаголу сему, еже убити праведника с нечестивым, и будет праведник яко нечестивый: никакоже, Судяй всей земли, не сотвориши ли суда?

18:26  Рече же Господь: аще будут в Содомех пятьдесят праведницы во граде, оставлю весь град и все место их ради.

18:27  И отвещав Авраам, рече: ныне начах глаголати ко Господу моему, аз же есмь земля и пепел:

18:28  аще же умалятся пятьдесят праведницы в четыредесять пять, погубиши ли четыредесяти пятих ради весь град? И рече: не погублю, аще обрящу тамо четыредесять пять.

18:29  И приложи еще глаголати к Нему, и рече: аще же обрящутся тамо четыредесять? И рече: не погублю ради четыредесяти.

18:30  И рече: что, Господи, аще возглаголю? Аще же обрящется тамо тридесять? И рече: не погублю тридесятих ради.

18:31  И рече: понеже имам глаголати ко Господу: аще же обрящутся тамо двадесять? И рече: не погублю, аще обрящутся тамо двадесять.

18:32  И рече: что, Господи, аще возглаголю еще единою? Аще же обрящутся тамо десять? И рече: не погублю десятих ради.

18:33  Отиде же Господь, яко преста глаголя ко Аврааму: и Авраам возвратися на место свое.

Chapter 19

19:1  Приидоста же два Ангела в Содом в вечер: Лот же седяше пред враты Содомскими. Видев же Лот, воста в сретение им и поклонися лицем на землю

19:2  и рече: се, господие, уклонитеся в дом раба вашего и почийте, и омыйте ноги вашя, и обутреневавше отидете в путь свой. Реша же: ни, но на стогне почием.

19:3  И принуди я, и уклонишася к нему, и внидоша в дом его: и сотвори им учреждение, и опресноки испече им, и ядоша.

19:4  Пред спанием же мужие града Содомляне оыдоша дом, от юноши даже до старца, весь народ вкупе:

19:5  и иззываху Лота, и глаголаху к нему: где суть мужие вшедшии к тебе нощию? Изведи я к нам, да будем с ними.

19:6  Изыде же Лот к ним в преддверие, двери же затвори за собою.

19:7  Рече же к ним: никакоже, братие, не дейте зла:

19:8  суть же ми две дщери, яже не познаша мужа: изведу их к вам, и творите им, якоже угодно есть вам: точию мужем сим не сотворите обиды, того бо ради внидоша под кров дому моего.

19:9  Реша же ему: отиди отсюду: пришел еси (семо) обитати, еда ли и суд судити? Ныне убо тя озлобим паче, нежели оных. И насилствоваша мужа Лота зело, и приближишася разбити двери.

19:10  Простерше же мужие руки, вовлекоша Лота к себе в храмину, и двери храмины заключиша:

19:11  мужы же, сущыя пред дверми дому, поразиша слепотою от мала даже до велика: и разслабишася ищуще дверий.

19:12  Реша же мужие к Лоту: суть ли тебе зде зятие или сынове или дщери? Или аще кто тебе ин есть во граде, изведи (я) от места сего:

19:13  яко мы погубляем место сие, понеже возвысися вопль их пред Господем, и посла нас Господь истребити его.

19:14  Изыде же Лот и глагола к зятем своим, поимшым дщери его, и рече: востаните и изыдите от места сего, яко погубляет Господь град. Возмнеся же играти пред зятьми своими.

19:15  Егда же утро бысть, понуждаху Ангели Лота, глаголюще: востав, поими жену твою и две дщери твоя, яже имаши, и изыди, да не и ты погибнеши со беззаконми града.

19:16  И смутишася, и взяша Ангели за руку его, и за руку жену его, и за руки двух дщерей его, понеже пощаде и Господь.

19:17  И бысть егда изведоша я вон, и реша: спасая спасай твою душу: не озирайся вспять, ниже постой во всем пределе (сем): в горе спасайся, да не когда купно ят будеши.

19:18  Рече же Лот к ним: молюся, Господи,

19:19  понеже обрете раб Твой милость пред Тобою, и возвеличил еси правду Твою, юже твориши на мне, еже жити души моей: аз же не возмогу спастися в горе, да не когда постигнут мя злая, и умру:

19:20  се, град сей близ еже убежати ми тамо, иже есть мал, и тамо спасуся: не мал ли есть? И жива будет душа моя Тебе ради.

19:21  И рече ему: се, удивихся лицу твоему, и о словеси сем, еже не погубити града, о немже глаголал еси:

19:22  потщися убо спастися тамо: не возмогу бо сотворити дела, дондеже внидеши тамо: сего ради прозва имя граду тому Сигор.

19:23  Солнце взыде над землю, Лот же вниде в Сигор.

19:24  И Господь одожди на Содом и Гоморр жупел, и огнь от Господа с небесе.

19:25  И преврати грады сия, и всю окрестную страну, и вся живущыя во градех, и вся прозябающая от земли.

19:26  И озреся жена его вспять, и бысть столп слан.

19:27  Востав же Авраам заутра (иде) на место, идеже стояше пред Господем,

19:28  и воззре на лице Содома и Гоморра, и на лице окрестныя страны, и виде: и се, восхождаше пламень от земли, аки дым пещный.

19:29  И бысть егда преврати Бог вся грады страны тоя, помяну Бог Авраама и изсла Лота от среды превращения, егда преврати Господь грады, в нихже живяше Лот.

19:30  Изыде же Лот от Сигора, и седе в горе сам, и две дщери его с ним: убояся бо жити в Сигоре: и вселися в пещеру сам и дщери его с ним.

19:31  Рече же старейшая к юнейшей: отец наш стар, и никтоже есть на земли, иже внидет к нам, якоже обычно всей земли:

19:32  гряди убо, упоим отца нашего вином и преспим с ним, и возставим от отца нашего семя.

19:33  Упоиша же отца своего вином в нощи оней: и вшедши старейшая, преспа со отцем своим тоя нощи: и не поразуме он, егда преспа и егда воста.

19:34  Бысть же наутрие, и рече старейшая к юнейшей: се, (аз) преспах вчера со отцем нашим: упоим его вином и в сию нощь, и вшедши преспи с ним, и возставим от отца нашего семя.

19:35  Упоиша же и в ту нощь отца своего вином: и вшедши юнейшая преспа со отцем своим: и не поразуме он, егда преспа и егда воста.

19:36  И зачаша обе дщери Лотовы от отца своего:

19:37  и роди старейшая сына и нарече имя ему Моав, глаголющи: от отца моего. Сей отец Моавитом даже до нынешняго дне.

19:38  Роди же юнейшая сына и нарече имя ему Амман, глаголющи: сын рода моего. Сей отец Амманитом до нынешняго дне.

Chapter 20

20:1  И пойде оттуду Авраам на землю полуденную и вселися между Кадисом и между Суром: и обита в Герарех.

20:2  Рече же Авраам о Сарре жене своей, яко сестра ми есть: убояся бо рещи, яко жена ми есть, да не когда убиют его мужие градстии ея ради. Посла же Авимелех царь Герарский и взя Сарру.

20:3  И прииде Бог ко Авимелеху нощию во сне и рече ему: се, ты умираеши жены ради сея, юже поял еси: сия же есть сожителствующая мужу.

20:4  Авимелех же не прикоснуся ей и рече: Господи, язык неведущий и праведен погубиши ли?

20:5  Не сам ли ми рече: сестра ми есть? И сия ми рече: брат ми есть? Чистым сердцем и в правде рук сотворих сие.

20:6  Рече же ему Бог во сне: и Аз познах, яко чистым сердцем сотворил еси сие, и пощадех тя, да не согрешиши ко Мне: сего ради не попустих ти коснутися ея:

20:7  ныне же отдаждь жену мужу, яко пророк есть, и помолится о тебе, и жив будеши: аще же не отдаси, веждь, яко умреши ты и вся твоя.

20:8  И воста рано Авимелех, и призва вся отроки своя, и глагола словеса сия вся во ушы их: убояшася же вси человецы зело.

20:9  И призва Авимелех Авраама и рече ему: что сие сотворил еси нам? Еда что согрешихом тебе, яко навел еси на мя и на царство мое грех велик? Дело, еже никтоже сотвори, сотворил еси мне.

20:10  И рече Авимелех Аврааму: что умыслив, сотворил еси сие?

20:11  Рече же Авраам: рекох бо: негли несть благочестия на месте сем: и убиют мя жены ради моея:

20:12  ибо истинно сестра ми есть по отцу, а не по матери: бысть же ми в жену:

20:13  и бысть егда изведе мя Бог от дому отца моего, и рех ей: правду сию сотвориши ми: во всяко место, идеже аще приидем, тамо рцы о мне, яко брат ми есть.

20:14  Взя же Авимелех тысящу дидрахм (сребра), и овцы, и телцы, и рабы, и рабыни, и даде Аврааму: и отдаде ему Сарру жену его.

20:15  И рече Авимелех Аврааму: се, земля моя пред тобою: идеже аще тебе угодно есть, вселися.

20:16  Сарре же рече: се, дах тысящу дидрахм брату твоему: сия будут тебе в честь лица твоего, и всем, яже суть с тобою, и во всем истинствуй.

20:17  Помолися же Авраам Богу, и исцели Бог Авимелеха и жену его и рабыни его, и начаша раждати:

20:18  яко заключая заключи Господь от внеуду всяка ложесна в дому Авимелеха, Сарры ради жены Авраамли.

Chapter 21

21:1  И Господь посети Сарру, якоже рече: и сотвори Господь Сарре, якоже глагола.

21:2  И заченши Сарра роди Аврааму сына в старости, во время, якоже глагола ему Господь:

21:3  и нарече Авраам имя сыну своему рождшемуся ему, егоже роди ему Сарра, Исаак:

21:4  обреза же Авраам Исаака во осмый день, якоже заповеда ему Бог.

21:5  Авраам же бе ста лет, егда бысть ему Исаак сын его.

21:6  Рече же Сарра: смех мне сотвори Господь: иже бо аще услышит, обрадуется со Мною.

21:7  И рече: кто возвестит Аврааму, яко млеком питает отроча Сарра, яко родих сына в старости моей?

21:8  И возрасте отроча, и отдоено бысть: и сотвори Авраам учреждение велие, в оньже день отдоися Исаак сын его.

21:9  Видевши же Сарра сына Агари Египтяныни, иже бысть Аврааму, играюща со Исааком сыном своим,

21:10  и рече Аврааму: изжени рабу сию и сына ея: не наследит бо сын рабы сея с сыном моим Исааком.

21:11  Жесток же явися глагол сей зело пред Авраамом о сыне его Исмаиле.

21:12  И рече Бог Аврааму: да не будет жестоко пред тобою о отроце и о рабыни: вся елика аще речет тебе Сарра, слушай гласа ея: яко во Исааце наречется тебе семя:

21:13  сына же рабыни сея в язык велик сотворю его, яко семя твое есть.

21:14  Воста же Авраам заутра и взя хлебы и мех воды, и даде Агари: и возложи на плещы ея отроча и отпусти ю. Отшедши же заблуждаше в пустыни, у кладязя Клятвеннаго:

21:15  оскуде же вода из меха: и поверже отроча под елию единою.

21:16  Отшедши же седяше прямо ему издалече, якоже дострелити из лука: рече бо: да не вижду смерти детища моего. И седе прямо ему издалече. Воскричав же отроча, восплакася:

21:17  услыша же Бог глас отрочате от места, идеже бяше: и воззва Ангел Божий Агарь с небесе и рече ей: что есть, Агарь? Не бойся: услыша бо Бог глас отрочища от места, идеже есть:

21:18  востани и поими отроча, и ими рукою твоею его: в язык бо велик сотворю его.

21:19  И отверзе Бог очи ея, и узре кладязь воды живы: и иде, и налия мех воды, и напои отроча.

21:20  И бяше Бог со отрочатем, и возрасте, и вселися в пустыни, и бысть стрелец.

21:21  И поселися в пустыни Фаран: и поят ему мати его жену от земли Египетския.

21:22  Бысть же в то время, и рече Авимелех, и Охозаф невестоводитель его, и Фихол воевода силы его, ко Аврааму, глаголя: Бог с тобою во всех, яже твориши:

21:23  ныне убо кленися ми Богом, не обидети мене, ниже семене моего, ниже имене моего: но по правде, юже сотворих с тобою, сотвориши со мною и земли, идеже ты вселился еси на ней.

21:24  И рече Авраам: аз кленуся.

21:25  И обличи Авраам Авимелеха о кладязех водных, яже отяша отроцы Авимелеховы.

21:26  И рече ему Авимелех: не ведех, кто сотвори тебе вещь сию: ниже ты ми поведал еси, ниже аз слышах, токмо днесь.

21:27  И взя Авраам овцы и юнцы и даде Авимелеху: и завещаста оба завет.

21:28  И постави Авраам седмь агниц овчих единых.

21:29  И рече Авимелех Аврааму: что суть седмь агницы овец сих, яже поставил еси едины?

21:30  И рече Авраам: яко седмь сих агниц возмеши у мене, да будут ми во свидетелство, яко аз ископах кладязь сей.

21:31  Сего ради наименова имя месту тому кладязь Клятвенный: яко тамо клястася оба

21:32  и завещаста завет у кладязя Клятвеннаго. Воста же Авимелех, и Охозаф невестоводитель его, и Фихол воевода силы его, и возвратишася в землю Филистимску.

21:33  И насади Авраам ниву у кладязя Клятвеннаго, и призва ту имя Господа, Бога вечнаго.

21:34  Обита же Авраам в земли Филистимстей дни многи.

Chapter 22

22:1  И бысть по глаголех сих, Бог искушаше Авраама и рече ему: Аврааме, Аврааме. И рече: се аз.

22:2  И рече: поими сына твоего возлюбленнаго, егоже возлюбил еси, Исаака, и иди на землю Высоку и вознеси его тамо во всесожжение, на едину от гор, ихже ти реку.

22:3  Востав же Авраам утро, оседла осля свое: поят же с собою два отрочища и Исаака сына своего: и растнив дрова во всесожжение, востав иде, и прииде на место, еже рече ему Бог, в третий день.

22:4  И воззрев Авраам очима своима, виде место издалече.

22:5  И рече Авраам отроком своим: сядите зде со ослятем: аз же и детищь пойдем до онде, и поклонившеся возвратимся к вам.

22:6  Взя же Авраам дрова всесожжения и возложи на Исаака сына своего: взя же в руки и огнь, и ножь, и идоста оба вкупе.

22:7  Рече же Исаак ко Аврааму отцу своему: отче. Он же рече: что есть, чадо? Рече же: се, огнь и дрова, где есть овча еже во всесожжение?

22:8  Рече же Авраам: Бог узрит Себе овча во всесожжение, чадо. Шедша же оба вкупе,

22:9  приидоста на место, еже рече ему Бог: и созда тамо Авраам жертвенник и возложи дрова: и связав Исаака сына своего, возложи его на жертвенник верху дров.

22:10  И простре Авраам руку свою, взяти ножь, заклати сына своего.

22:11  И воззва и Ангел Господень с небесе, и рече: Аврааме, Аврааме. Он же рече: се, аз.

22:12  И рече: да не возложиши руки твоея на отрочища, ниже да сотвориши ему что: ныне бо познах, яко боишися ты Бога, и не пощадел еси сына твоего возлюбленнаго Мене ради.

22:13  И воззрев Авраам очима своима виде, и се, овен един держимый рогама в саде савек: и иде Авраам, и взя овна, и вознесе его во всесожжение вместо Исаака сына своего.

22:14  И нарече Авраам имя месту тому: Господь виде: да рекут днесь: на горе Господь явися.

22:15  И воззва Ангел Господень Авраама вторицею с небесе,

22:16  глаголя: Мною Самем кляхся, глаголет Господь, егоже ради сотворил еси глагол сей и не пощадел еси сына твоего возлюбленнаго Мене ради:

22:17  воистинну благословя благословлю тя, и умножая умножу семя твое, яко звезды небесныя, и яко песок вскрай моря: и наследит семя твое грады супостатов,

22:18  и благословятся о семени твоем вси языцы земнии, занеже послушал еси гласа Моего.

22:19  Возвратися же Авраам ко отроком своим, и воставше идоша купно ко кладязю Клятвенному: и вселися Авраам у кладязя Клятвеннаго.

22:20  Бысть же по глаголех сих, и поведаша Аврааму, глаголюще: се, роди Мелха и та сыны брату твоему Нахору,

22:21  Окса первенца, и Вавкса брата его, и Камуила отца Сирска,

22:22  и Хазада, и Азава, и Фалдеса, и Елдафа, и Вафуила:

22:23  Вафуил же роди Ревекку: осмь сии сынове, ихже роди Мелха Нахору брату Авраамлю:

22:24  и наложница его, ейже имя Ревма, роди и сия Тавека, и Таама, и Тохоса, и Моха.

Chapter 23

23:1  Бысть же житие Саррино лет сто двадесять седмь.

23:2  И умре Сарра во граде Арвоце, иже есть в раздолии: сей есть Хеврон в земли Ханаанстей. Прииде же Авраам рыдати по Сарре и плакати.

23:3  И воста Авраам от мертвеца своего и рече сыном Хеттеовым, глаголя:

23:4  преселник и пришлец аз есмь у вас, дадите ми убо стяжание гроба между вами, да погребу мертвеца моего от мене.

23:5  Отвещаша же сынове Хеттеовы ко Аврааму, глаголюще: ни, господине:

23:6  послушай же нас: царь от Бога ты еси в нас: во избранных гробех наших погреби мертвеца твоего: никтоже бо от нас возбранит гроба своего от тебе, еже погребсти мертвеца твоего тамо.

23:7  Востав же Авраам поклонися народу земли, сыном Хеттеовым,

23:8  и рече к ним Авраам, глаголя: аще имате в души вашей, яко погребсти мертвеца моего от лица моего, послушайте мене и рцыте о мне Ефрону Саарову:

23:9  и да даст ми пещеру Сугубую, яже есть его, сущую на части села его: сребром достойным да даст ми ю у вас в стяжание гроба.

23:10  Ефрон же седяше посреде сынов Хеттеовых. Отвещав же Ефрон Хеттейский ко Аврааму, рече слышащым сыном Хеттеовым и всем приходящым во град, глаголя:

23:11  у мене буди, господине, и послушай мене: село и пещеру яже в нем, тебе даю: пред всеми гражданы моими дах тебе, погреби мертвеца твоего.

23:12  И поклонися Авраам пред народом земли

23:13  и рече Ефрону во ушеса пред всем народом земли: понеже по мне еси, послушай мене: сребро села возми у мене, и погребу мертвеца моего тамо.

23:14  Отвеща же Ефрон Аврааму, глаголя:

23:15  ни, господине: слышах бо, яко земля четырех сот дидрахм сребра: но что было бы сие между мною и тобою? Ты же мертвеца твоего погреби.

23:16  И послуша Авраам Ефрона, и даде Авраам Ефрону сребро, еже глагола во ушеса сынов Хеттеовых, четыре ста дидрахм сребра искушена купцами.

23:17  И бысть село Ефроново, еже бе в Сугубей пещере, еже есть лицем к Мамврии, село и пещера яже бе в нем, и всякое древо, иже бе на селе, и все еже есть в пределех его окрест,

23:18  Аврааму (бысть) в стяжание пред сыны Хеттеовыми и пред всеми приходящими во град.

23:19  По сих погребе Авраам Сарру жену свою в пещере селней Сугубей, яже есть противу Мамврии: сия есть Хеврон в земли Ханаанстей.

23:20  И утверждено есть село и пещера, яже бе на нем, Аврааму в стяжание гроба от сынов Хеттеовых.

Chapter 24

24:1  Авраам же бяше стар, заматеревший во днех: и Господь благослови Авраама во всех.

24:2  И рече Авраам рабу своему старейшему дому своего, обладающему всеми его: положи руку твою под стегно мое,

24:3  и заклену тя Господем Богом небесе и Богом земли, да не поймеши сыну моему Исааку жены от дщерей Хананейских, с нимиже аз живу в них:

24:4  но токмо на землю мою, идеже родихся, пойдеши, и ко племени моему, и поймеши жену сыну моему Исааку оттуду.

24:5  Рече же к нему раб: еда убо не восхощет ити жена вслед со мною на землю сию, возвращу ли сына твоего в землю, от неяже изшел еси?

24:6  Рече же к нему Авраам: внемли себе, да не возвратиши сына моего онамо.

24:7  Господь Бог небесе и Бог земли, Иже поя мя из дому отца моего и от земли, в нейже родихся, Иже глагола мне и Иже кляся мне, глаголя: тебе дам землю сию и семени твоему, Той послет Ангела Своего пред тобою, и поймеши жену сыну моему Исааку оттуду:

24:8  аще же не восхощет жена поити с тобою в землю сию, чист будеши от заклятия моего: точию сына моего не возврати тамо.

24:9  И положи раб руку свою под стегно Авраама господина своего, и кляся ему о словеси сем.

24:10  И взя раб десять велблюд от велблюд господина своего, и от всех благ господина своего с собою, и востав иде в Месопотамию во град Нахоров:

24:11  и постави велблюды вне града у кладязя воднаго под вечер, егда исходят (жены) почерпати воды,

24:12  и рече: Господи, Боже господина моего Авраама, благоустрой предо мною днесь, и сотвори милость с господином моим Авраамом:

24:13  се, аз стах у кладязя воднаго, дщери же живущих во граде исходят почерпати воды:

24:14  и будет девица, ейже аз реку: преклони водонос твой, да пию, и речет ми: пий ты, и велблюды твоя напою, дондеже напиются: сию уготовал еси рабу Твоему Исааку: и по сему увем, яко сотворил еси милость с господином моим Авраамом.

24:15  И бысть прежде неже скончати ему глаголющу во уме своем, и се, Ревекка исхождаше, яже родися Вафуилу, сыну Мелхи жены Нахора, брата же Авраамля, держащи водонос на рамех своих:

24:16  девица же бяше доброзрачна зело: дева бе, муж не позна ея. Сошедши же на кладязь, наполни водонос свой и взыде.

24:17  Тече же раб во сретение ей и рече: напой мя мало водою от водоноса твоего.

24:18  Сия же рече: пий, господине. И потщася, и сня водонос на мышца своя, и напои его, дондеже напися.

24:19  И рече: и велблюдом твоим налию, дондеже вси напиются.

24:20  И потщася, и испраздни водонос в поило: и тече паки на кладязь почерпнути воды, и влия велблюдом всем.

24:21  Человек же выразумеваше ю и помолчеваше, да уразумеет, аще благоустрои Бог путь ему, или ни.

24:22  Бысть же егда престаша вси велблюды пиюще, взя человек усерязи златы весом по драхме и два запястия на руки ея: десять златниц вес их.

24:23  И вопроси ю и рече: чия еси дщерь? Повеждь ми, аще есть у отца твоего место нам витати?

24:24  Она же рече ему: дщерь Вафуилева есмь (сына) Мелхина, егоже роди Нахору.

24:25  И рече ему: и плевы и сена много у нас, и место витати.

24:26  И благословив человек, поклонися Господу

24:27  и рече: благословен Господь Бог господина моего Авраама, Иже не остави правды Своея и истины от господина моего: и мене благоустрои Господь в дом брата господина моего.

24:28  И текши девица в дом матере своея, поведа по глаголом сим.

24:29  Ревекце же бяше брат, емуже имя Лаван: и тече Лаван к человеку вон на кладязь.

24:30  И бысть егда виде усерязи, и запястия на руку сестры своея, и егда слыша словеса Ревекки сестры своея, глаголющия: сице глагола мне человек: и прииде к человеку, стоящу ему у велблюд у кладязя,

24:31  и рече ему: гряди, вниди благословенный от Господа, почто стоиши вне? Аз же уготовах храмину и место велблюдом.

24:32  И вниде человек в дом, и разседла велблюды, и даде плевы и сено велблюдом, и воду умыти нозе его, и ноги мужем, иже бяху с ним:

24:33  и предложи им хлебы ясти, и рече: не ям, дондеже возглаголю словеса моя. И рече: глаголи.

24:34  И рече: раб Авраамль есмь аз:

24:35  Господь же благослови господина моего зело, и возвысися: и даде ему овцы и телцы, сребро и злато, рабы и рабыни, и велблюды и ослы:

24:36  и роди Сарра, жена господина моего, сына единаго господину моему, состаревшемуся ему, и даде ему елика имяше:

24:37  и закля мя господин мой, глаголя: не поймеши жены сыну моему от дщерей Хананейских, в нихже аз обитаю в земли их:

24:38  но в дом отца моего пойдеши, и в племя мое, и поймеши жену сыну моему оттуду:

24:39  рех же (аз) господину моему: а егда не восхощет жена со мною ити?

24:40  И рече ми: Господь Бог, Емуже благоугодих пред ним, он послет Ангела Своего с тобою и благоустроит путь твой, и поймеши жену сыну моему от племене моего и от дому отца моего:

24:41  тогда будеши чист от заклинания моего: егда бо дойдеши в племя мое, и не дадят ти, и будеши чист от заклинания моего:

24:42  и пришед днесь на кладязь, рекох: Господи, Боже господина моего Авраама, аще Ты благоустрояеши путь мой, в оньже ныне аз иду:

24:43  се, аз стах у кладязя воднаго, и дщери граждан исходят почерпати воды: и будет девица, ейже аще аз реку: напой мя от водоноса твоего мало водою:

24:44  и речет ми: и ты пий, и велблюдом твоим влию: сия (будет) жена, юже уготова Господь рабу Своему Исааку: и по сему уразумею, яко сотворил еси милость господину моему Аврааму.

24:45  И бысть прежде неже скончати мне глаголющу во уме своем, абие Ревекка исхождаше держащи водонос на раму, и сниде на кладязь, и почерпе воды: и рекох ей: напой мя.

24:46  И потщавшися сня водонос с себе на мышцу свою и рече: пий ты, и велблюды твоя напою. И напихся, и велблюды моя напои.

24:47  И вопросих ю и рекох: чия еси дщерь? Повеждь ми. Она же рече: дщерь Вафуилева есмь сына Нахорова, егоже роди ему Мелха. И дах ей усерязи, и запястия на руце ея,

24:48  и благоволив поклонихся Господу: и благослових Господа Бога господина моего Авраама, Иже благоустрои мя на пути истины пояти дщерь брата господина моего сыну его:

24:49  аще убо сотворите вы милость и правду к господину моему: аще же ни, поведите ми: да обращуся или на десно, или на лево.

24:50  Отвещавша же Лаван и Вафуил, рекоста: от Господа прииде дело сие: не возможем ти противу рещи зло или благо:

24:51  се, Ревекка пред тобою: поемь ю, иди: и да будет жена сыну господина твоего, якоже глагола Господь.

24:52  Бысть же егда услыша раб Авраамль словеса сия, поклонися до земли Господу.

24:53  И изнес раб сосуды златы и сребряны и ризы, даде Ревекце: и дары даде брату ея и матери ея.

24:54  И ядоша и пиша и той и мужие, иже бяху с ним, и почиша. И востав заутра, рече: отпустите мя, да отиду к господину моему.

24:55  Реша же братия ея и мати: да пребудет девица с нами яко десять дний, и посем пойдет.

24:56  Он же рече к ним: не держите мя, Господь бо благоустрои путь мой во мне: отпустите мя, да иду к господину моему.

24:57  Они же реша: призовем девицу и вопросим ея изоуст.

24:58  И призваша Ревекку и реша ей: пойдеши ли с человеком сим? Она же рече: пойду.

24:59  И отпустиша Ревекку сестру свою, и имения ея, и раба Авраамля, и иже с ним быша.

24:60  И благословиша Ревекку и реша ей: сестра наша еси, буди в тысящы тем, и да наследит семя твое грады супостат.

24:61  Воставши же Ревекка и рабыни ея, вседоша на велблюды и поидоша с человеком. И поим раб Ревекку, отиде.

24:62  Исаак же прехождаше сквозе пустыню у кладязя Видения: сам же живяше на земли на полудне.

24:63  И изыде Исаак поглумитися на поле к вечеру, и воззрев очима своима, виде велблюды идущыя.

24:64  И воззревши Ревекка очима своима, виде Исаака: и изскочи с велблюда.

24:65  И рече рабу: кто есть человек оный, иже идет по полю во сретение нам? Рече же раб: сей есть господин мой. Она же вземши ризу летнюю, облечеся.

24:66  И поведа раб Исааку вся словеса, яже сотвори.

24:67  Вниде же Исаак в дом матере своея, и поя Ревекку, и бысть ему жена: и возлюби ю, и утешися Исаак по Сарре матери своей.

Chapter 25

25:1  Приложив же Авраам, поя жену, ейже имя Хеттура:

25:2  роди же ему Зомврана и Иезана, и Мадала и Мадиама, и Иесвока и Соиена.

25:3  Иезан же роди Савана и Фамана и Дедана. Сынове же Дедани быша: Рагуил и Навдеил, и Асуриим и Латусиим и Лаомим.

25:4  Сынове же Мадиамли: Ефар и афир, и Енох и Авида и Елдага. Вси сии быша сынове Хеттурины.

25:5  Даде же Авраам вся своя имения Исааку сыну своему:

25:6  сыном же наложниц своих даде Авраам дары и отпусти я от Исаака сына своего, еще жив сый, к востоку на землю восточную.

25:7  Сия же лета дний жития Авраамля, елика поживе, лет сто седмьдесят пять:

25:8  и ослабев умре Авраам в старости добрей, старец исполнен дний, и приложися к людем своим.

25:9  И погребоша его Исаак и Исмаил два сынове его в пещере Сугубей, на селе Ефронове сына Саарова Хеттеанина, еже есть прямо Мамврии,

25:10  на селе и в пещере, юже притяжа Авраам от сынов Хеттеовых: тамо погребоша Авраама и Сарру жену его.

25:11  Бысть же по умертвии Авраамли, благослови Бог Исаака сына его: и вселися Исаак у кладязя Видения.

25:12  Сия же бытия Исмаила сына Авраамля, егоже роди Агарь Египтяныня, раба Саррина, Аврааму:

25:13  и сия имена сынов Исмаилих, по именом родов его: первенец Исмаилов Наваиоф, и Кидар и Навдеил, и Массам

25:14  и Масма, и Дума и Масси,

25:15  и Ходдан и Феман, и Иетур и Нафес и Кедма.

25:16  Сии суть сынове Исмаили: и сия имена их в скиниях их и в селех их: дванадесять князи в языцех их.

25:17  И сия лета жития Исмаилова, сто тридесять седмь лет: и ослабев умре, и приложися к роду своему.

25:18  Вселися же от Евилата даже до Сура, иже есть в лице Египту, даже доити ко Ассириом: пред лицем всех братий своих вселися.

25:19  И сия бытия Исаака сына Авраамля: Авраам роди Исаака.

25:20  Бяше же Исаак лет четыредесяти, егда поя Ревекку дщерь Вафуила Сирина от Месопотамии Сирския, сестру Лавана Сирина, себе в жену.

25:21  Моляшеся же Исаак Господеви о Ревекце жене своей, яко неплоды бяше: послуша же его Бог, и зачат во утробе Ревекка жена его.

25:22  Играста же младенца в ней, и рече: аще тако ми хощет быти, почто ми сие? И иде вопрошати Господа.

25:23  И рече ей Господь: два языка во утробе твоей суть, и двои людие от утробы твоея разлучатся: и людие людий превзыдут, и болший поработает меншему.

25:24  И исполнишася дние родити ей, и бяху сей близнята во утробе ея:

25:25  изыде же сын первенец чермен, весь, яко кожа, космат: и нарече имя ему Исав:

25:26  и посем изыде брат его, рука же его придержася пяте Исавове: и нарече имя ему Иаков. Исааку же бе шестьдесят лет, егда роди их Ревекка.

25:27  Возрастоша же юноши: и бысть Исав человек ведый ловити, селный: Иаков же бысть человек нелукав, живый в дому.

25:28  И возлюби Исаак Исава, яко ловитва его бяше брашно ему: Ревекка же любляше Иакова.

25:29  Свари же Иаков варение: и прииде Исав с поля изнемог,

25:30  и рече Исав Иакову: напитай мя варением сочива сего, яко изнемогаю. Сего ради прозвася имя ему Едом.

25:31  И рече Иаков Исаву: отдаждь ми днесь первенство свое.

25:32  Рече же Исав: се, аз иду умрети, и вскую ми первенство сие?

25:33  И рече Иаков ему: кленися ми днесь. И кляся ему, и отдаде Исав Иакову первенство свое.

25:34  Иаков же даде Исаву хлеб и варение сочевно: яде же и пи, и востав отиде: и нивочтоже вмени себе Исав первенство.

Chapter 26

26:1  Бысть же глад на земли, кроме глада бывшаго прежде во время Авраамле. Отиде же Исаак ко Авимелеху царю Филистимску в Герар:

26:2  явися же ему Господь и рече: не ходи во Египет, вселися же в земли, в нейже ти реку,

26:3  и обитай в земли той, и буду с тобою, и благословлю тя: тебе бо и семени твоему дам всю землю сию и поставлю клятву Мою, еюже кляхся Аврааму отцу твоему:

26:4  и умножу семя твое, яко звезды небесныя, и дам семени твоему всю землю сию: и благословятся о семени твоем вси языцы земнии:

26:5  понеже послуша отец твой Авраам Моего гласа и соблюде заповеди Моя и повеления Моя, и оправдания Моя и законы Моя.

26:6  Вселися же Исаак в Герарех.

26:7  Вопросиша же мужие места того о Ревекце жене его, и рече: сестра ми есть. Убояся бо рещи, яко жена ми есть, да не когда убиют его мужие места того Ревекки ради, понеже бе доброзрачна.

26:8  Бысть же много время тамо: и приникнув Авимелех царь Герарский окном, виде Исаака играюща с Ревеккою женою своею.

26:9  Призва же Авимелех Исаака и рече ему: убо жена твоя есть? Почто рекл еси, яко сестра ми есть? Рече же ему Исаак: рех бо, да не умру ея ради.

26:10  Рече же ему Авимелех: что сие сотворил еси нам? Вмале не бысть некто от рода моего с женою твоею, и навел бы еси на ны неведение.

26:11  Заповеда же Авимелех всем людем своим, глаголя: всяк, иже прикоснется мужу сему, или жене его, смерти повинен будет.

26:12  Сея же Исаак в земли той, и приобрете в то лето стократный плод ячменя: благослови же его Господь.

26:13  И возвысися человек, и преуспевая болший бываше, дондеже велик бысть зело.

26:14  Быша же ему скоти овец и скоти волов и земледелия многа. Позавидеша же ему Филистимляне:

26:15  и вся кладязи, яже ископаша раби отца его, во время отца его, заградиша я Филистимляне и наполниша тыя землею.

26:16  Рече же Авимелех ко Исааку: отиди от нас, яко силнейший сотворился еси от нас зело.

26:17  И отиде оттуду Исаак и обита в дебри Герарстей, и вселися тамо.

26:18  И паки Исаак ископа кладязи водныя, яже ископаша раби Авраама отца его, и заградиша тыя Филистимляне, по умертвии Авраама отца его: и прозва им имена, по именам, имиже прозва Авраам отец его.

26:19  И ископаша раби Исааковы в дебри Герарстей, и обретоша тамо кладязь воды живы.

26:20  И пряхуся пастырие Герарстии с пастырми Исааковыми, глаголюще: наша есть вода. И прозва имя кладязю тому Обида: обидяху бо его.

26:21  Отшед же оттуду Исаак, ископа кладязь другий. Пряхуся же и о том: и прозва имя ему Вражда.

26:22  Отшед же оттуду, ископа кладязь другий. И не пряхуся о том, и прозва имя ему Пространство, глаголя: яко ныне распространи Господь нам и возрасти нас на земли.

26:23  Взыде же оттуду ко кладязю Клятвенному:

26:24  и явися ему Господь в ту нощь и рече: Аз есмь Бог Авраама отца твоего, не бойся, с тобою бо есмь: и благословлю тя, и умножу семя твое Авраама ради отца твоего.

26:25  И созда тамо жертвенник, и призва имя Господне: и постави тамо скинию свою: ископаша же тамо раби Исааковы кладязь в дебри Герарстей.

26:26  И Авимелех прииде к нему от Герар, и Охозаф невестоводитель его, и Фихол воевода сил его.

26:27  И рече им Исаак: вскую приидосте ко мне? Вы же возненавидесте мене и отсласте мя от себе.

26:28  Они же реша: видевше узрехом, яко бе Господь с тобою, и рехом: буди клятва между нами и между тобою, и завещаим с тобою завет,

26:29  да не сотвориши с нами зла, якоже не возгнушахомся тобою мы, и якоже сотворихом тебе добро, и отпустихом тя с миром: и ныне благословен ты от Господа.

26:30  И сотвори им пир, и ядоша и пиша.

26:31  И воставше заутра, клятся кийждо ближнему: и отпусти я Исаак, и отидоша от него здравы.

26:32  Бысть же в той день, и пришедше раби Исааковы поведаша ему о кладязе, егоже ископаша, и рекоша: не обретохом воды.

26:33  И прозва его Клятва. Сего ради прозва имя граду оному кладязь Клятвенный, даже до днешняго дне.

26:34  Бяше же Исав лет четыредесяти: и поя жену Иудифу, дщерь Веоха Хеттеина, и Васемафу, дщерь Елона Хеттеина.

26:35  И быша противящеся Исаакови и Ревекце.

Chapter 27

27:1  Бысть же, повнегда состаретися Исаакови, и притупишася очи его еже видети: и призва Исава сына своего старейшаго, и рече ему: сыне мой. И рече: се, аз.

27:2  И рече Исаак: се, состарехся, и не вем дне скончания моего:

27:3  ныне убо возми орудие твое, тул же и лук, и изыди на поле, и улови ми лов:

27:4  и сотвори ми снеди, якоже люблю аз: и принеси ми, да ям, яко да благословит тя душа моя, прежде даже не умру.

27:5  Ревекка же слыша глаголюща Исаака ко Исаву сыну своему. Изыде же Исав на поле уловити лов отцу своему.

27:6  Ревекка же рече ко Иакову сыну своему меншему: се, аз слышах отца твоего беседующа ко Исаву брату твоему, глаголюща:

27:7  принеси ми лов, и сотвори ми снеди, да ядый благословлю тя пред Господем, прежде неже умрети ми:

27:8  ныне убо, сыне мой, послушай мене, якоже аз заповедаю ти:

27:9  и шед во овцы, поими мне оттуду два козлища мягка и добра, и сотворю я снеди отцу твоему, якоже любит:

27:10  и внесеши отцу твоему, и будет ясти, яко да благословит тя отец твой, прежде даже не умрет.

27:11  Рече же Иаков к Ревекце матери своей: Исав брат мой есть муж космат, Аз же муж гладкий:

27:12  да не како осяжет мя отец мой, и буду пред ним яко презираяй, и наведу на себе клятву, а не благословение.

27:13  Рече же ему мати: на мне клятва твоя, чадо: точию послушай гласа моего, и шед принеси ми.

27:14  Шед же взя и принесе матери, и сотвори мати его снеди, якоже любляше отец его.

27:15  И вземши Ревекка одежду Исава сына своего старейшаго добрую, яже бысть у нея в дому, облече оною Иакова сына своего меншаго,

27:16  и кожицами козлячими обложи мышцы его, и нагое выи его:

27:17  и даде снеди и хлебы, яже сотвори, в руце Иакову сыну своему.

27:18  И внесе отцу своему и рече: отче. Он же рече: се, аз: кто еси ты, чадо?

27:19  И рече Иаков отцу: аз Исав первенец твой, сотворих, якоже рекл ми еси: востав сяди и яждь от лова моего, яко да благословит мя душа твоя.

27:20  Рече же Исаак сыну своему: что сие, еже скоро обрел еси, о чадо? Он же рече: еже даде Господь Бог твой предо мною.

27:21  Рече же Исаак Иакову: приближися ко мне, и осяжу тя, чадо, аще ты еси сын мой Исав, или ни.

27:22  Приближися же Иаков ко Исааку отцу своему, и осяза его и рече: глас убо глас Иаковль, руце же руце Исавове.

27:23  И не позна его: бесте бо руце его, яко руце Исава брата его космате. И благослови его

27:24  и рече: ты ли еси сын мой Исав? Он же рече: аз.

27:25  И рече: принеси ми, и ям от лова твоего, чадо, да благословит тя душа моя. И принесе ему, и яде, и принесе ему вино, и пи.

27:26  И рече ему Исаак отец его: приближися ко мне и облобызай мя, чадо.

27:27  И приближився лобыза его: и обоня воню риз его, и благослови его и рече: се, воня сына моего, яко воня нивы исполнены, юже благослови Господь:

27:28  и да даст тебе Бог от росы небесныя и от тука земли, и множество пшеницы и вина:

27:29  и да поработают тебе языцы, и да поклонятся тебе князи, и буди господин брату твоему, и поклонятся тебе сынове отца твоего: проклинаяй тя проклят, благословляяй же тя благословен.

27:30  И бысть по еже престати Исааку благословляющу Иакова сына своего: и бысть егда изыде Иаков от лица Исаака отца своего, и Исав брат его прииде с ловитвы.

27:31  Сотвори же и той снеди и принесе отцу своему, и рече отцу: да востанет отец мой, и да яст от лова сына своего, яко да благословит мя душа твоя.

27:32  И рече ему Исаак отец его: кто еси ты? Он же рече: аз есмь сын твой первенец Исав.

27:33  Ужасеся же Исаак ужасом велиим зело и рече: кто убо уловивый мне лов и принесый ми? И ядох от всех, прежде неже приити тебе, и благослових его, и благословен будет.

27:34  Бысть же егда услыша Исав глаголы отца своего Исаака, возопи гласом велиим и горьким зело, и рече: благослови убо и мене, отче.

27:35  Рече же ему: пришед брат твой с лестию, взя благословение твое.

27:36  И рече (Исав): праведно наречеся имя ему Иаков: запя бо мя се уже вторицею, и первенство мое взя, и ныне взя благословение мое. И рече Исав отцу своему: не оставил ли еси (и) мне благословения, отче?

27:37  Отвещав же Исаак, рече Исаву: аще господина его сотворих тебе, и всю братию его сотворих рабы ему, пшеницею и вином утвердих его: тебе же что сотворю, чадо?

27:38  Рече же Исав ко отцу своему: еда едино есть благословение у тебе, отче? Благослови убо и мене, отче. Умилившуся же Исааку, возопи гласом велиим Исав и восплакася.

27:39  Отвещав же Исаак отец его, рече ему: се, от тука земли будет вселение твое, и от росы небесныя свыше:

27:40  и мечем твоим жити будеши, и брату твоему поработаеши: будет же (время) егда низложиши и отрешиши ярем его от выи твоея.

27:41  И враждоваше Исав на Иакова о благословении, имже благослови его отец его. Рече же Исав во уме своем: да приближатся дние плача отца моего, да бых убил Иакова брата моего.

27:42  Возвещена же быша Ревекце словеса Исава сына ея старейшаго: и пославши призва Иакова сына своего юнейшаго и рече ему: се, Исав брат твой грозит тебе убити тя:

27:43  ныне убо, чадо, послушай моего гласа, и востав бежи в Месопотамию к Лавану брату моему в Харран,

27:44  и поживи с ним дни некия, дондеже отвратится ярость и гнев брата твоего от тебе,

27:45  и забудет яже ему сотворил еси, и пославши приведу тя оттуду, да не когда безчадна буду от обоих вас в день един.

27:46  Рече же Ревекка ко Исааку: стужих си жизнию моею дщерей ради сынов Хеттейских: аще поймет Иаков жену от дщерей земли сея, то вскую ми жити?

Chapter 28

28:1  Призвав же Исаак Иакова, благослови его и заповеда ему, глаголя: да не поймеши жены от дщерей Хананейских:

28:2  востав отбежи в Месопотамию в дом Вафуила отца матере твоея, и поими себе оттуду жену от дщерей Лавана брата матере твоея:

28:3  Бог же мой да благословит тя и возрастит тя и умножит тя, и будеши в собрания языков:

28:4  и да даст тебе благословение Авраама отца моего, тебе и семени твоему по тебе наследити землю обитания твоего, юже даде Бог Аврааму.

28:5  Посла же Исаак Иакова: и отиде в Месопотамию к Лавану сыну Вафуила Сирина, к брату же Ревекки матере Иаковли и Исавли.

28:6  Виде же Исав, яко благослови Исаак Иакова и посла в Месопотамию сирскую пояти оттуду себе жену, егда благослови его и заповеда ему, глаголя: да не поймеши жены от дщерей Хананейских.

28:7  И послуша Иаков отца и матере своея, и отиде в Месопотамию сирскую.

28:8  Видев же Исав, яко злы суть дщери Хананейския пред Исааком отцем его,

28:9  отиде Исав ко Исмаилу и взя Маелефу дщерь Исмаила сына Авраамля, сестру Навеофову, жену к женам своим.

28:10  И отиде Иаков от кладязя Клятвеннаго и иде в Харран,

28:11  и обрете место и успе тамо, зайде бо солнце: и взя от камения места (того) и положи в возглавие себе, и спа на месте онем.

28:12  И сон виде: и се, лествица утверждена на земли, еяже глава досязаше до небесе, и Ангели Божии восхождаху и низхождаху по ней:

28:13  Господь же утверждашеся на ней и рече: Аз есмь Бог Авраама отца твоего и Бог Исаака, не бойся: земля, идеже ты спиши на ней, тебе дам ю и семени твоему:

28:14  и будет семя твое яко песок земный, и распространится на море, и ливу, и север, и на востоки: и благословятся о тебе вся колена земная и о семени твоем:

28:15  и се, Аз есмь с тобою, сохраняяй тя на всяком пути, аможе аще пойдеши, и возвращу тя в землю сию: яко не имам тебе оставити, дондеже сотворити ми вся, елика глаголах тебе.

28:16  И воста Иаков от сна своего и рече: яко есть Господь на месте сем, аз же не ведех.

28:17  И убояся и рече: яко страшно место сие: несть сие, но дом Божий, и сия врата небесная.

28:18  И воста Иаков заутра, и взя камень, егоже положи тамо в возглавие себе: и постави его в столп, и возлия елей верху его.

28:19  И прозва Иаков имя месту тому Дом Божий: Уламлуз же бе имя граду первее.

28:20  И положи Иаков обет, глаголя: аще будет Господь Бог со мною и сохранит мя на пути сем, в оньже аз иду, и даст ми хлеб ясти, и ризы облещися,

28:21  и возвратит мя здрава в дом отца моего, и будет Господь мне в Бога:

28:22  и камень сей, егоже поставих в столп, будет ми дом Божий, и от всех, яже ми даси, десятину одесятствую та Тебе.

Chapter 29

29:1  И востав Иаков на нозе, иде в землю восточную к Лавану сыну Вафуила Сирина, брату же Ревекки матере Иаковли и Исавли.

29:2  Узре же, и се, кладязь на поли: и бяху тамо три стада овец, почивающе при нем: от того бо кладязя напаяхуся стада. Камень же велий бяше над устием кладязя.

29:3  И собирахуся тамо вся стада: и отваляху камень от устия кладязя и напаяху овцы: и паки полагаху камень на устии кладязя на месте своем.

29:4  Рече же им Иаков: братия, откуду есте вы? Они же реша: от Харрана есмы.

29:5  Рече же им: знаете ли Лавана сына Нахорова? Они же реша: знаем.

29:6  Рече же им: здравствует ли? Они же реша: здравствует. И се, Рахиль дщи его идяше со овцами.

29:7  И рече Иаков: еще есть дне много, не у час собирати скота: напоивше овцы, шедше пасите.

29:8  Они же реша: не можем, дондеже соберутся вси пастуси и отвалят камень от устия кладязя, и напоим овцы.

29:9  Еще ему глаголющу к ним, и се, Рахиль дщи Лаваня грядяше со овцами отца своего: она бо пасяше овцы отца своего.

29:10  Бысть же яко узре Иаков Рахиль дщерь Лавана брата матере своея и овцы Лавана брата матере своея, и приступив Иаков отвали камень от устия кладязя:

29:11  и напои овцы Лавана брата матере своея, и целова Иаков Рахиль, и возопив гласом своим, восплакася:

29:12  и поведа Рахили, яко брат отца ея есть и яко сын Ревеккин есть. И текши поведа отцу своему по словесем сим.

29:13  Бысть же яко услыша Лаван имя Иакова сына сестры своея, тече во сретение ему и объемь его лобза, и введе его в дом свой. И поведа Лавану вся словеса сия.

29:14  И рече ему Лаван: от костей моих и от плоти моея еси ты. И бе с ним месяц дний.

29:15  Рече же Лаван Иакову: понеже брат мой еси ты, да не поработаеши мне туне: повеждь ми, что мзда твоя есть?

29:16  У Лавана же бесте две дщери: имя старейшей Лиа, имя же юнейшей Рахиль.

29:17  Очи же Лиины болезненны: Рахиль же бе добра видом и красна взором зело.

29:18  Возлюби же Иаков Рахиль. И рече: поработаю тебе седмь лет за Рахиль дщерь твою меншую.

29:19  Рече же ему Лаван: лучше ми тебе дати ю, нежели иному отдати мужеви: со мною живи.

29:20  И работа Иаков за Рахиль седмь лет: и быша пред ним яко малы дни, занеже любяше ю.

29:21  Рече же Иаков Лавану: даждь ми жену мою, понеже совершишася дние, да вниду к ней.

29:22  Собра же Лаван вся мужы места того, и сотвори брак.

29:23  И бысть вечер, и поемь Лаван Лию дщерь свою, введе ко Иакову: и вниде к ней Иаков.

29:24  Даде же Лаван Лии дщери своей Зелфу рабыню свою, ей в рабу.

29:25  Бысть же заутра, и се, бяше Лиа, и рече Иаков Лавану: что сие сотворил ми еси? Не Рахили ли ради работах у тебе? Вскую же обидел мя еси?

29:26  Отвеща же Лаван: несть тако в нашем месте вдати меншую прежде старейшия.

29:27  Скончай убо седмины сея, и дам ти и сию за дело, еже делаеши у мене еще седмь лет другия.

29:28  Сотвори же Иаков тако: и исполни седмины сея: и даде ему Лаван Рахиль дщерь свою ему в жену.

29:29  Даде же Лаван Рахили дщери своей Валлу рабу свою, ей в рабу.

29:30  И вниде (Иаков) к Рахили: возлюби же Рахиль паче, неже Лию: и работа ему седмь лет другия.

29:31  Видев же Господь Бог, яко ненавидима бяше Лиа, отверзе ложесна ея: Рахиль же бяше неплоды.

29:32  И зачат Лиа и роди сына Иакову: нарече же имя ему Рувим, глаголя: яко призре Господь на мое смирение и даде ми сына: ныне убо возлюбит мя муж мой.

29:33  И зачат паки Лиа и роди сына втораго Иакову и рече: зане услыша Господь, яко ненавидима есмь, и придаде ми и сего. И нарече имя ему Симеон.

29:34  И зачат еще и роди сына и рече: в нынешнее время у мене будет муж мой, родих бо ему три сыны. Сего ради нарече имя ему Левий.

29:35  И заченши еще роди сына и рече: ныне еще сие исповем Господу. Сего ради нарече имя ему Иуда, и преста раждати.

Chapter 30

30:1  Видевши же Рахиль, яко не роди Иакову, и поревнова Рахиль сестре своей и рече Иакову: даждь ми чада: аще же ни, умру аз.

30:2  Разгневався же Иаков на Рахиль, рече ей: еда вместо Бога аз есмь, Иже лиши тя плода утробнаго?

30:3  Рече же Рахиль Иакову: се, раба моя Валла: вниди к ней, и да родит на коленах моих, и чадо сотворю и аз от нея.

30:4  И даде ему Валлу рабу свою ему в жену: и вниде к ней Иаков.

30:5  И зача Валла раба Рахилина и роди Иакову сына.

30:6  И рече Рахиль: суди ми Бог и послуша гласа моего, и даде ми сына. Сего ради прозва имя ему Дан.

30:7  И зачат еще Валла раба Рахилина и роди сына втораго Иакову.

30:8  И рече Рахиль: подя мя Бог, и сравнихся с сестрою моею, и возмогох. И прозва имя его Неффалим.

30:9  Виде же Лиа, яко преста раждати, и взя Зелфу рабу свою и даде ю Иакову в жену: и вниде к ней.

30:10  И зачат Зелфа раба Лиина и роди Иакову сына.

30:11  И рече Лиа: благо мне случися. И нарече имя ему Гад.

30:12  И зачат еще Зелфа раба Лиина и роди Иакову сына втораго.

30:13  И рече Лиа: блажена аз, яко ублажат мя жены. И прозва имя ему Асир.

30:14  Иде же Рувим в день жатвы пшеницы и обрете яблока мандрагорова на поли, и принесе я к Лии матери своей. Рече же Рахиль к Лии сестре своей: даждь ми от мандрагоров сына твоего.

30:15  Рече же Лиа: не доволно ли тебе, яко взяла еси мужа моего? Еда и мандрагоры сына моего возмеши? Рече же Рахиль: не тако: да будет сея нощи с тобою за мандрагоры сына твоего.

30:16  Прииде же Иаков с поля в вечер, и изыде Лиа во сретение ему и рече: ко мне внидеши днесь: наяла бо тя есмь за мандрагоры сына моего. И бысть с нею тоя нощи.

30:17  И послуша Бог Лию, и заченши роди Иакову сына пятаго.

30:18  И рече Лиа: даде ми Бог мзду мою, зане дах рабу мою мужу моему. И прозва имя ему Иссахар, еже есть мзда.

30:19  И зачат еще Лиа и роди сына шестаго Иакову.

30:20  И рече Лиа: дарова ми Бог дар добр в нынешнее время: возлюбит мя муж мой: родих бо ему шесть сынов. И прозва имя ему Завулон.

30:21  И посем роди дщерь, и прозва имя ей Дина.

30:22  Помяну же Бог Рахиль, и услыша ю Бог, и отверзе утробу ея:

30:23  и заченши, роди Иакову сына. И рече Рахиль: отя Бог укоризну мою.

30:24  И нарече имя ему Иосиф, глаголющи: да придаст ми Бог сына другаго.

30:25  Бысть же яко роди Рахиль Иосифа, рече Иаков Лавану: отпусти мя, да иду на место мое и в землю мою:

30:26  отдаждь ми жены моя и дети моя, ихже ради работах тебе, да отиду: ты бо веси работу, юже работах ти.

30:27  Рече же ему Лаван: аще обретох благодать пред тобою: усмотрих бо, яко благослови мя Бог пришествием твоим:

30:28  раздели мзду свою у мене, и дам ти.

30:29  Рече же Иаков: ты веси, яже работах тебе, и колико бе скота твоего у мене:

30:30  мало бо бе елико твоего у мене и возрасте во множество: и благослови тя Господь пришествием моим: ныне убо когда сотворю и аз себе дом?

30:31  И рече к нему Лаван: что ти дам? Рече же ему Иаков: не даси ми ничтоже: аще сотвориши ми глагол сей, паки пасти имам овцы твоя, и сохраню:

30:32  оыди вся овцы твоя ныне и разлучи оттуду всякую овцу пелесую во овцах, и всяку беловатую и пеструю в козах, будет ми мзда (и будет мое):

30:33  и послушает мене правда моя во утрешний день, яко есть мзда моя пред тобою: все еже аще не будет пестро и беловатое в козах, и пелесо во овцах, за украденое будет мною.

30:34  Рече же ему Лаван: буди по словеси твоему.

30:35  И разлучи в той день козлы пестрыя и беловатыя, и вся козы пестрыя и беловатыя, и все еже бе пелесо во овцах, и все еже бяше белое в них: и даде в руце сыном своим:

30:36  и разстави путем трех дний, и между ими и между Иаковом: Иаков же пасяше овцы Лавановы оставшыяся.

30:37  Взя же Иаков себе жезл стиракинов зеленый, и орехов, и яворовый: и острога я Иаков пестрением белым, сострогая кору: являшеся же на жезлах белое, еже острога, пестро.

30:38  И положи жезлы, яже острога, в поилных корытех воды: да егда приидут овцы пити, пред жезлы пришедшым им пити, зачнут овцы по жезлом:

30:39  и зачинаху овцы по жезлом, и раждаху овцы беловатыя и пестрыя и пепеловидныя пестрыя.

30:40  Агницы же разлучи Иаков и постави прямо овцам овна беловатаго и всякое пестрое во агнцах: и разлучи себе стада по себе, и не смеси сих со овцами Лавановыми.

30:41  Бысть же во время, в неже зачинаху овцы во чреве приемлющя, положи Иаков жезлы пред овцами в корытех, еже зачинати им по жезлом:

30:42  егда же раждаху овцы, не полагаше: быша же неназнаменаныя Лавановы, а знаменаныя Иаковли.

30:43  И разбогате человек зело зело: и быша ему скоти мнози, и волове, и раби, и рабыни, и велблюды, и ослы.

Chapter 31

31:1  Слыша же Иаков словеса сынов Лавановых, глаголющих: взя Иаков вся яже отца нашего, и от сущих отца нашего сотвори всю славу сию.

31:2  И виде Иаков лице Лаване, и се не бяше к нему, яко вчера и третияго дне.

31:3  Рече же Господь ко Иакову: возвратися в землю отца твоего и в род твой, и буду с тобою.

31:4  Послав же Иаков, призва Лию и Рахиль на поле, идеже бяху стада,

31:5  и рече им: вижду аз лице отца вашего, яко несть ко мне, якоже вчера и третияго дне: Бог же отца моего бе со мною:

31:6  и вы сами весте, яко всею силою моею работах отцу вашему:

31:7  отец же ваш обиде мя и измени мзду мою десяти агнцев, но не даде ему Бог зла сотворити мне.

31:8  Аще сице речет: пестрыя, будет твоя мзда: и родятся вся овцы пестрыя. Аще же речет: белыя, будет твоя мзда: и родятся вся овцы белыя.

31:9  И отя Бог вся скоты отца вашего и даде я мне.

31:10  И бысть егда зачинаху овцы во чреве приемлющя, и видех очима моима во сне: и се, козлы и овны восходяще бяху на овцы и козы, беловатыя и пестрыя и пепеловидныя пестрыя.

31:11  И рече ми Ангел Божий во сне: Иакове. Аз же рех: что есть?

31:12  И рече: воззри очима твоима и виждь козлы и овны восходящыя на овцы и козы, белыя и пестрыя и пепеловидныя пестрыя: видех бо, елика тебе Лаван творит:

31:13  Аз есмь Бог явивыйся тебе на Месте Божии, идеже помазал Ми еси тамо столп, и обетовал Ми еси тамо обет: ныне убо востани и изыди от земли сея, и иди в землю рождения твоего, и буду с тобою.

31:14  И отвещавши Рахиль и Лиа, рекосте ему: еда есть нам еще часть или наследие в дому отца нашего?

31:15  Не яко ли чужыя вменихомся ему? Продаде бо нас и снеде снедию сребро наше:

31:16  все богатство и слава, юже отя Бог от отца нашего, нам будет и чадом нашым: ныне убо, елика тебе рече Бог, твори.

31:17  Востав же Иаков, взя жены своя и дети своя на велблюды,

31:18  и забра вся имения своя и вся стяжания, яже притяжа в Месопотамии, и вся своя, еже отити ко Исааку отцу своему в землю Ханаанскую.

31:19  Лаван же отиде острищи овцы своя: украде же Рахиль идолы отца своего.

31:20  Утаи же Иаков от Лавана Сирина, не поведати ему, яко уходит,

31:21  и отбеже сам, и вся яже его, и прейде реку, и взыде на гору Галаад.

31:22  Поведася же Лавану Сирину в третий день, яко бежа Иаков:

31:23  и поим сыны и братию свою с собою, гна вслед его путем седмь дний: и достиже его на горе Галаад.

31:24  Прииде же Бог к Лавану Сирину нощию во сне и рече ему: блюди себе, да не когда возглаголеши ко Иакову зла.

31:25  И постиже Лаван Иакова: Иаков же постави кущу свою на горе: Лаван же разстави братию свою на горе Галаад.

31:26  Рече же Лаван Иакову: что сотворил еси? Вскую тайно ушел еси и окрал еси мя, и отвел дщери моя, яко пленницы оружием?

31:27  И аще бы ми поведал еси, отпустил бых тя с веселием и с мусикиею, и тимпаны и гусльми:

31:28  и не сподобихся целовати детей моих и дщерей моих: ныне же несмысленно сотворил еси:

31:29  и ныне рука моя может озлобити тя. Но Бог отца твоего вчера рече ко мне, глаголя: блюди себе, да не когда возглаголеши ко Иакову зла.

31:30  Ныне убо отшел еси: желанием бо возжелал еси отити в дом отца твоего: вскую украл еси боги моя?

31:31  Отвещав же Иаков рече к Лавану: понеже убояхся: рех бо, да не како отимеши дщери твоя от мене, и вся моя.

31:32  И рече Иаков: у негоже аще обрящеши боги твоя, да не будет жив пред братиею нашею: узнавай, что есть твоего у мене, и возми. И не позна у него ничтоже: не ведяше же Иаков, яко Рахиль жена его украде я.

31:33  Вшед же Лаван, оыска в кущи Лиине, и не обрете. И изыде из кущи Лиины, и оыска кущу Иаковлю и в кущи двоих рабынь, и не обрете. Вниде же и в кущу Рахилину.

31:34  Рахиль же взя идолы и положи оныя под седло велблюже и седе на них,

31:35  и рече отцу своему: не имей себе тяжко, господине: не могу востати пред тобою, яко обычная женская ми суть. Иска же Лаван по всей кущи, и не обрете идолов.

31:36  Разгневася же Иаков и пряшеся с Лаваном. Отвещав же Иаков рече Лавану: кая неправда моя? И кий грех мой, яко погнал еси вслед мене,

31:37  и яко оыскал еси вся сосуды дому моего? Что обрел еси от всех сосудов дому твоего? Положи зде пред братиею твоею и братиею моею, и да разсудят между обема нама:

31:38  се, двадесять лет аз есмь с тобою: овцы твоя и козы твоя не быша без плода: овнов овец твоих не поядох:

31:39  звероядины не принесох к тебе: аз воздаях тебе от мене самаго татбины денныя и татбины нощныя:

31:40  бых во дни жегомь зноем, и студению в нощи, и отхождаше сон от очию моею:

31:41  се, мне двадесять лет аз есмь в дому твоем, работах тебе четыренадесять лет двух ради дщерей твоих и шесть лет за овцы твоя, и преобидел еси мзду мою десятию агницами:

31:42  аще не бы Бог отца моего Авраама, и страх Исаака был мне, ныне тща отпустил бы мя еси: смирение мое и труд руку моею увиде Бог, и обличи тя вчера.

31:43  Отвещав же Лаван, рече ко Иакову: дщери дщери моя и сынове сынове мои, и скоти скоти мои, и вся елика ты видиши моя суть и дщерей моих: что сотворю им днесь, или чадом их, яже родиста?

31:44  Ныне убо гряди, завещаим завет аз и ты: и будет во свидетелство между мною и тобою. Рече же ему Иаков: се, никтоже с нами есть: виждь, Бог свидетель между мною и тобою.

31:45  И взем Иаков камень, постави его в столп.

31:46  Рече же Иаков братии своей: соберите камение. И собраша камение и сотвориша холм: и ядоша, и пиша тамо на холме. Рече же ему Лаван: холм сей свидетелствует между мною и тобою днесь.

31:47  И прозва его Лаван холм Свидетелства: Иаков же прозва холм Свидетель.

31:48  Рече же Лаван ко Иакову: се, холм сей и столп, егоже поставих между мною и тобою, свидетелствует холм сей и свидетелствует столп сей: сего ради прозвася имя холм Свидетелствует,

31:49  и Видение, еже рече: да видит Бог между мною и тобою, яко отидем друг от друга:

31:50  аще смириши дщери моя, аще поймеши жены над дщери моя виждь, никтоже с нами есть видяй: Бог свидетель между мною и между тобою.

31:51  И рече Лаван Иакову: се, холм сей свидетель и столп сей:

31:52  аще бо аз не прейду к тебе, ниже ты да прейдеши ко мне холма сего и столпа сего со злобою:

31:53  Бог Авраамль и Бог Нахоров да судит между нама. И кляся Иаков страхом отца своего Исаака,

31:54  и пожре Иаков жертву на горе и воззва братию свою: ядоша же и пиша и спаша на горе.

31:55  Востав же Лаван заутра, лобыза сыны и дщери своя и благослови я: и возвратився Лаван, отиде на место свое.

Chapter 32

32:1  И Иаков иде в путь свой. И воззрев виде полк Божий воополчившийся: и сретоша его Ангели Божии.

32:2  Рече же Иаков, егда виде их: полк Божий сей. И прозва имя месту тому Полки.

32:3  Посла же Иаков послы пред собою ко Исаву брату своему в землю Сиир, в страну Едом,

32:4  и заповеда им глаголя: тако рцыте господину моему Исаву: тако глаголет раб твой Иаков: у Лавана обитах и умедлих даже до ныне:

32:5  и быша ми волове и ослы и овцы, и раби и рабыни: и послах поведати господину моему Исаву, дабы обрел раб твой благодать пред тобою.

32:6  И возвратишася послы ко Иакову, глаголюще: ходихом ко брату твоему Исаву, и се, сам идет во сретение тебе, и четыриста мужей с ним.

32:7  Убояся же Иаков зело и в недоумении бе: и раздели люди сущыя с собою, и волы и велблюды и овцы на два полка,

32:8  и рече Иаков: аще приидет Исав на един полк и изсечет и, будет вторый полк во спасении.

32:9  Рече же Иаков: Бог отца моего Авраама и Бог отца моего Исаака, Господи Боже, Ты рекий ми: иди в землю рождения твоего, и благо тебе сотворю:

32:10  довлеет ми от всея правды и от всея истины, юже сотворил еси рабу Твоему: с жезлом бо сим преидох Иордан сей, ныне же бех в два полка:

32:11  изми мя от руки брата моего, от руки Исава: яко боюся аз его, да не когда пришед убиет мя и матерь с чады:

32:12  ты же рекл еси: благо тебе сотворю и положу семя твое яко песок морский, иже не изочтется от множества.

32:13  И спа тамо нощи тоя, и взя, яже имяше дары, и посла Исаву брату своему:

32:14  коз двести, козлов двадесять, овец двести, овнов двадесять,

32:15  велблюдов дойных, и жребят их тридесять, волов четыредесять, юнцов десять, ослов двадесять и жребят десять:

32:16  и даде их рабом своим, (коеждо) стадо особо, и рече рабом своим: идите предо мною, и разстояние творите между стадом и стадом.

32:17  И заповеда первому глаголя: аще тя срящет Исав брат мой и вопросит тя глаголя: чий еси, и камо идеши, и чия сия, яже пред тобою идут?

32:18  Речеши: раба твоего Иакова: дары посла господину моему Исаву: и се, сам за нами (идет).

32:19  И заповеда первому, и второму, и третиему, и всем предидущым вслед стад сих глаголя: по словеси сему глаголите Исаву, егда обрящете его вы,

32:20  и рцыте: се, раб твой Иаков идет за нами: рече бо: укрощу лице его дарами предидущими его, и посем узрю лице его: негли бо приимет лице мое?

32:21  И предидяху дары пред лицем его, сам же преспа тоя нощи в полце.

32:22  Востав же тоя нощи, поя обе жены (своя) и обе рабыни и единонадесять сынов своих, и прейде брод Иавок:

32:23  и взя их, и прейде поток, и преведе вся своя.

32:24  Остася же Иаков един. И боряшеся с ним Человек даже до утра.

32:25  Виде же, яко не может противу ему: и прикоснуся широте стегна его: и отерпе широта стегна Иаковля, егда боряшеся с Ним.

32:26  И рече ему: пусти Мя: взыде бо заря. Он же рече: не пущу Тебе, аще не благословиши мене.

32:27  Рече же ему: что ти имя есть? Он же рече: Иаков.

32:28  И рече ему: не прозовется ктому имя твое Иаков, но Исраиль будет имя твое: понеже укрепился еси с Богом и с человеки силен будеши.

32:29  Вопроси же Иаков и рече: повеждь ми имя Твое. И рече: вскую сие вопрошаеши ты имене Моего? Еже чудно есть. И благослови его тамо.

32:30  И прозва Иаков имя месту тому Вид Божий: видех бо Бога лицем к лицу, и спасеся душа моя.

32:31  Возсия же ему солнце, егда прейде Вид Божий: он же хромаше стегном своим.

32:32  Сего ради не ядят сынове Израилевы жилы, яже отерпе, яже есть в широте стегна, даже до дне сего: понеже прикоснуся широте стегна Иаковли жилы, яже отерпе.

Chapter 33

33:1  Воззрев же Иаков очима своима, виде: и се, Исав брат его идый, и четыриста мужей с ним. И раздели Иаков дети Лии и Рахили и двум рабыням,

33:2  и постави обе рабыни и сыны их в первых, Лию же и дети ея позади, а Рахиль и Иосифа в последних:

33:3  сам же изыде первее пред ними и поклонися до земли седмижды, дондеже приближися к брату своему.

33:4  И притече Исав во сретение ему: и объемь его, припаде на выю его и облобыза его: и плакастася оба.

33:5  И воззрев Исав, виде жены и дети и рече: что сии тебе суть? Он же рече: дети, имиже помилова Бог раба твоего.

33:6  И приступиша рабыни и дети их и поклонишася:

33:7  и приступи Лиа и дети ея и поклонишася: посем же приступи Рахиль и Иосиф и поклонистася.

33:8  И рече: что сия тебе суть, полцы сии вси, яже сретох? Он же рече: да обрящет раб твой благодать пред тобою, господине.

33:9  Рече же Исав: суть мне многа, брате: да будут тебе твоя.

33:10  И рече Иаков: аще обретох благодать пред тобою, приими дары от руку моею: сего ради видех лице твое, яко бы аще кто видел лице Божие: и возблаговолиши о мне:

33:11  приими благословение мое, еже принесох тебе, яко помилова мя Бог, и суть ми вся. И принуди его, и взя.

33:12  И рече: воставше пойдем прямо.

33:13  Рече же ему: господин мой весть, яко дети мои юны, овцы же и говяда бременны у мене: аще убо пожену я един день, измрет весь скот:

33:14  да предидет господин мой пред рабом своим: аз же укреплюся на пути умедлением шествия моего, еже предо мною, и якоже возмогут ити дети, дондеже прииду к господину моему в Сиир.

33:15  И рече Исав: оставлю с тобою от людий сущих со мною. Он же рече: вскую сие? Довлеет, яко обретох благодать пред тобою, господине.

33:16  Возвратися же Исав в том дни путем своим в Сиир:

33:17  и Иаков пойде в Кущы, и постави себе тамо храмины, и скоту своему сотвори кущы: сего ради нарече имя месту тому Кущы.

33:18  И прииде Иаков в салим град Сикимск, иже есть в земли Ханаанстей, егда прииде от Месопотамии Сирския, и ста пред лицем града:

33:19  и купи часть села, идеже постави кущу свою тамо, у Еммора отца Сихемля, стома агнцы:

33:20  и постави тамо жертвенник, и призва Бога Израилева.

Chapter 34

34:1  Изыде же Дина дщи Лиина, юже роди Иакову, познати дщери обитателей.

34:2  И виде ю Сихем сын Емморов Хорреанин, князь тоя земли: и поим ю, бысть с нею и смири ю:

34:3  и внят душею Дине дщери Иаковли, и возлюби девицу, и глагола к ней по мысли девицы.

34:4  Рече же Сихем ко Еммору отцу своему, глаголя: поими мне отроковицу сию в жену.

34:5  Иаков же слыша, яко оскверни сын Емморов Дину дщерь его: сынове же его бяху со скоты его на поли: премолча же Иаков, дондеже приити им.

34:6  Изыде же Еммор отец Сихемль ко Иакову глаголати к нему.

34:7  Сынове же Иаковли приидоша с поля: егда же услышаша, смутишася мужие, и жалостно им бысть зело, яко не лепо сотвори во Израили, быв со дщерию Иаковлею: и не будет сице.

34:8  И рече им Еммор, глаголя: Сихем сын мой избра душею дщерь вашу: дадите убо ю в жену ему:

34:9  и сосватайтеся с нами: дщери вашя дадите нам, и дщери нашя поимите сыновом своим,

34:10  и у нас населитеся: и се, земля пространна пред вами: населитеся и куплю дейте на ней, и притяжите на ней.

34:11  Рече же Сихем ко отцу ея и ко братиям ея: да обрящу благодать пред вами, и еже аще речете, дадим:

34:12  умножите вено зело, и дам, якоже речете ми: и дасте ми отроковицу сию в жену.

34:13  Отвещаша же сынове Иаковли Сихему и Еммору отцу его с лестию, и глаголаша к ним, яко оскверниша Дину сестру их.

34:14  И рекоста им Симеон и Левий, братия Динины (сынове Лии): не возможем сотворити глагола сего, дати сестру нашу человеку, иже имать крайнюю плоть необрезанну: есть бо укоризна нам:

34:15  токмо в сем уподобимся вам и вселимся у вас, аще будете якоже мы и вы, егда обрежете весь мужеск пол:

34:16  и дадим дщери нашя вам, и от дщерей ваших поймем себе жены и вселимся у вас, и будем яко един род:

34:17  аще же не послушаете нас, еже обрезатися, поимше дщерь нашу отидем.

34:18  И угодна быша словеса пред Еммором и пред Сихемом сыном Емморовым:

34:19  и не премедли юноша сотворити глагол сей: любяше бо дщерь Иаковлю. Сей же бяше славнейший всех, иже в дому отца его.

34:20  Прииде же Еммор и Сихем сын его пред врата града своего и глаголаста к мужем града своего, рекуще:

34:21  человецы сии мирни суть, с нами да населятся на земли и да куплю деют на ней: земля же се пространна пред ними: дщери их да поймем себе в жены, и дщери нашя дадим им:

34:22  в сем точию уподобятся нам человецы, еже жити с нами, яко быти людем единем: внегда обрезати нам весь мужеск пол, якоже и тии обрезани суть:

34:23  и скоти их и четвероногая, и имения их не наша ли будут? Точию в сем уподобимся им, и вселятся с нами.

34:24  И послушаша Еммора и Сихема сына его вси исходящии из врат града своего и обрезаша плоть крайнюю свою, всяк мужеск пол.

34:25  Бысть же в третий день, егда бяху в болезни, взяша два сына Иаковля Симеон и Левий, братия Динины, кийждо свой мечь, и внидоша во град безопасно и изсекоша весь мужеск пол:

34:26  Еммора же и Сихема сына его усекнуша острием меча, и взяша Дину от дому Сихема и изыдоша.

34:27  Сынове же Иаковли внидоша к побиенным и разграбиша град, в немже оскверниша Дину сестру их:

34:28  и овцы их и говяда их и ослы их, и елика бяху во граде, и елика бяху на поли, взяша:

34:29  и вся чада их и вся сосуды их и жены их плениша: и разграбиша, елика бяху во граде, и елика бяху в домех.

34:30  Рече же Иаков к Симеону и Левии: ненавистна мя сотвористе, яко злу мне быти всем живущым на земли, в Хананеах и Ферезеах, аз же мал есмь числом: и собравшеся на мя изсекут мя, и истреблен буду аз и дом мой.

34:31  Они же рекоша: аки блудницу ли возимеют сестру нашу?

Chapter 35

35:1  Рече же Бог ко Иакову: востав взыди на место Вефиль, и живи тамо, и сотвори тамо жертвенник Богу явльшемуся тебе, егда бежал еси от лица Исава брата твоего.

35:2  Рече же Иаков дому своему и всем иже с ним: поверзите боги чуждыя, иже с вами, от среды вас и очиститеся, и измените ризы своя:

35:3  и воставше взыдем в Вефиль и сотворим тамо жертвенник Богу послушавшему мене в день скорбения, Иже бе со мною и спасе мя на пути, в оньже ходих.

35:4  И вдаша Иакову боги чуждыя, иже бяху в руках их, и усерязи яже во ушесех их: и скры я Иаков под теревинфом иже в Сикимех: И погуби я до днешняго дне.

35:5  И воздвижеся Израиль от Сикимов, и бысть страх Божий на градех, иже окрест их: и не гнаша вслед сынов Израилевых.

35:6  Прииде же Иаков в Лузу, яже есть в земли Ханаанстей, яже есть Вефиль, сам и вси людие, иже бяху с ним,

35:7  и созда тамо жертвенник, и прозва имя месту тому Вефиль: тамо бо явися ему Бог, егда бежаше он от лица Исава брата своего.

35:8  Умре же Девора, доилица Ревеккина, и погребоша ю ниже Вефиля под дубом, и прозва имя ему дуб плача.

35:9  Явися же Бог Иакову еще в Лузе, егда прииде от Месопотамии Сирския, и благослови его Бог

35:10  и рече ему Бог: имя твое не прозовется ктому Иаков, но Израиль будет имя тебе. И нарече имя ему Израиль.

35:11  Рече же ему Бог: Аз Бог твой: расти и множися: языцы и собрания языков будут от тебе, и царие из чресл твоих изыдут:

35:12  и землю, юже дах Аврааму и Исааку, тебе дах ю, тебе будет, и семени твоему по тебе дам землю сию.

35:13  Взыде же Бог от него от места, идеже глагола с ним:

35:14  и постави Иаков столп на месте, идеже глагола с ним Бог, столп каменный, и пожре на нем жертву и возлия на него елей:

35:15  и прозва Иаков имя месту тому, идеже глагола с ним Бог, Вефиль.

35:16  (Востав же (Иаков) от Вефиля, и постави кущу свою далее столпа Гадер.) бысть же егда приближися к хаврафе приити до земли Ефрафа, роди Рахиль и возбедствова в рождении:

35:17  бысть же внегда жестоко ей родити, рече ей баба: дерзай, ибо сей тебе есть сын.

35:18  Бысть же егда оставляше ю душа, умираше бо, прозва имя ему Сын Болезни моея: отец же прозва имя ему Вениамин.

35:19  Умре же Рахиль, и погребоша ю на пути ипподрома Ефрафы: сия есть Вифлеем:

35:20  и постави Иаков столп на гробе ея: сей есть столп над гробом Рахилиным даже до дне сего.

35:21  Изыде же оттуду Израиль и постави кущу свою за столпом Гадер.

35:22  Бысть же егда вселися Израиль в земли той, иде Рувим и спа с Валлою, наложницею отца своего Иакова. И слыша Израиль, и зло явися пред ним. Беша же сынове Иаковли дванадесять.

35:23  Сынове Лиины: Рувим, первенец Иаковль, Симеон, Левий, Иуда, Иссахар, Завулон.

35:24  Сынове же Рахилины: Иосиф и Вениамин.

35:25  Сынове же Валлы, рабы Рахилины: Дан и Неффалим.

35:26  Сынове же Зелфы, рабы Лиины: Гад и Асир. Сии сынове Иаковли, иже родишася ему в Месопотамии Сирстей.

35:27  Прииде же Иаков ко Исааку отцу своему (еще живу сущу ему) в Мамврию, во Град Польный: сей есть Хеврон в земли Ханаанстей, идеже обита Авраам и Исаак.

35:28  Быша же дние Исааковы, яже поживе, сто осмьдесят лет:

35:29  и ослабев Исаак умре, и приложися к роду своему стар исполнь дний: и погребоста его Исав и Иаков, сынове его.

Chapter 36

36:1  Сии же родове Исавли, сей есть Едом.

36:2  Исав же поя себе жены от дщерей Хананейских: Аду, дщерь Елома Хеттеина, и Оливему, дщерь Ананю сына Севегона Евеина,

36:3  и Васемафу, дщерь Исмаилю, сестру Навеофову.

36:4  Роди же Ада Исаву Елифаса, и Васемаф роди Рагуила,

36:5  и Оливема роди Иеуса и Иеглома и Кореа: сии сынове Исавли, иже быша ему в земли Ханаанстей.

36:6  Поя же Исав жены своя и сыны своя и дщери своя, и вся телеса дому своего и вся имения своя и вся скоты, и вся, елика притяжа, и вся, елика приобрете в земли Ханаанстей, и отиде Исав из земли Ханаанския от лица Иакова брата своего:

36:7  бяху бо имения их многа, еже жити вкупе: и не можаше земля обитания их вместити их, от множества имений их.

36:8  Вселися же Исав на горе Сиир: Исав той есть Едом.

36:9  Сии же родове Исава, отца Едомля, на горе Сиир:

36:10  и сия имена сынов Исавлих: Елифас, сын Ады, жены Исавли, и Рагуил, сын Васемафы, жены Исавли.

36:11  Быша же Елифасу сынове: Феман, Омар, Софар, Гофом и Кенез.

36:12  Фамна же бяше наложница Елифаса, сына Исавля, и роди Елифасу Амалика: сии сынове Ады, жены Исавли.

36:13  Сии же сынове Рагуиловы: Нахоф, Заре, Соме и Мозе: сии быша сынове Васемафы, жены Исавли.

36:14  Сии же сынове Оливемы дщере Анани сына Севегоня, жены Исавли: роди же Исаву Иеуса и Иеглома и Кореа.

36:15  Сии старейшины сына Исавля, сынове Елифаса, первенца Исавля: старейшина Феман, старейшина Омар, старейшина Софар, старейшина Кенез,

36:16  старейшина Корей, старейшина Гофом, старейшина Амалик: сии старейшины Елифаса в земли Идумейстей, сии сынове Адины.

36:17  И сии сынове Рагуила, сына Исавля: старейшина Нахоф, старейшина Заре, старейшина Соме, старейшина Мозе: сии старейшины Рагуиловы в земли Едомстей, сии сынове Васемафы, жены Исавли.

36:18  Сии же сынове Оливемы, жены Исавли: старейшина Иеус, старейшина Иеглом, старейшина Корей: сии старейшины Оливемы, дщере Анани, жены Исавли,

36:19  сии сынове Исавли и сии старейшины их, сии суть сынове Едомли.

36:20  Сии же сынове Сиира Хорреова жившаго на земли: Лотан, Совал, Севегон, Ана

36:21  и Дисон, и Асар и Рисон: сии старейшины Хорреова сына Сиира в земли Едомстей.

36:22  Быша же сынове Лотани: Хорри и Еман, сестра же Лотаня Фамна.

36:23  Сии же сынове Соваловы: Голам и Манахаф, и Гевил и Софар и Омар.

36:24  И сии сынове Севегони: Аие и Ана: сей есть Ана, иже обрете иаминь в пустыни, егда пасяше подяремники Севегона, отца своего.

36:25  Сии же сынове Анани: Дисон и Оливема, дщи Ананя.

36:26  Сии же сынове Дисоновы: Амада и Асван, и Ифран и Харран.

36:27  Сии же сынове Асаровы: Валаам и Зукам, и Укам и Укан.

36:28  Сии же сынове Рисоновы: Ос и Аран.

36:29  Сии же старейшины Хорриовы: старейшина Лотан, старейшина Совал, старейшина Севегон, старейшина Ана,

36:30  старейшина Дисон, старейшина Асар, старейшина Рисон: сии старейшины Хорриовы во областех их в земли Едомли.

36:31  И сии царие царствовавшии во Едоме, прежде царствования царей во Израили:

36:32  и царствова во Едоме Валак, сын Веоров: имя же граду его Деннава.

36:33  Умре же Валак, и царь бысть по нем Иовав, сын Зарин от Восорры.

36:34  Умре же Иовав, и царь бысть по нем Асом от земли Феманони.

36:35  Умре же Асом, и бысть царь по нем Адад сын Варадов, иже изсече Мадиама на поли Моавли: имя же граду его Гетфем.

36:36  Умре же Адад, и царь бысть по нем Самада от Массеккаса.

36:37  Умре же Самада, и царь бысть по нем Саул из Роовофа, иже есть близ реки.

36:38  Умре же Саул, и царь бысть по нем Вааленнон, сын Аховорь.

36:39  Умре же Вааленнон сын Аховорь, и царь бысть по нем Арад, сын Варадов: и имя граду его Фогор, имя же жене его Метевеиль, дщерь Матраифа, сына Мезоовля.

36:40  Сия имена старейшин Исавлих в племенех их, по месту их, во странах их и в языцех их: старейшина Фамна, старейшина Гола, старейшина Иефер,

36:41  старейшина Оливема, старейшина Ила, старейшина Финон,

36:42  старейшина Кенез, старейшина Феман, старейшина Мазар,

36:43  старейшина Магедиил, старейшина Зафой: сии старейшины Едомли, живущии в земли притяжания их: сей Исав отец Едомль.

Chapter 37

37:1  Вселися же Иаков в земли, идеже обита Исаак, отец его, в земли Ханаани.

37:2  Сии же роди Иаковли. Иосиф же бяше седминадесяти лет, пасый овцы отца своего с братиею своею, юн сый, с сынми Валлы и с сынми Зелфы, жен отца своего: нанесоша же на Иосифа злу клевету ко Израилю отцу своему.

37:3  Иаков же любляше Иосифа паче всех сынов своих, яко сын в старости ему бысть: и сотвори ему ризу пестру.

37:4  Видевше же братия его, яко любит его отец паче всех сынов своих, возненавидеша его и не можаху глаголати к нему ничтоже мирно.

37:5  Видев же Иосиф сон, поведа и братии своей

37:6  и рече им: послушайте сна сего, егоже видех:

37:7  мнех вас вяжущих снопы среде поля: и воста мой сноп и ста прямо, ваши же снопы обратившеся поклонишася моему снопу.

37:8  Реша же ему братия его: еда царствуя царствовати будеши над нами, или господствуя господствовати будеши над нами? И приложиша еще ненавидети его снов ради его и ради словес его.

37:9  Виде же сон другий и поведа его отцу своему и братии своей, и рече: се, видех другий сон: аки бы солнце и луна и единонадесять звезд покланяхуся мне.

37:10  И запрети ему отец его и рече ему: что сон сей, егоже еси видел? Еда пришедше приидем аз и мати твоя и братия твоя поклонитися тебе до земли?

37:11  Позавидеша же ему братия его: отец же его соблюде слово сие.

37:12  Отидоша же братия его пасти овцы отца своего в Сихем.

37:13  И рече Израиль ко Иосифу: еда братия твоя не пасут в Сихеме? Гряди да послю тя к ним. Рече же ему: се, аз.

37:14  Рече же ему Израиль: шед, виждь, аще здравствуют братия твоя и овцы, и повеждь ми. И посла его от юдоли Хеврони. И прииде в Сихем:

37:15  и обрете его человек заблуждающа на поли: вопроси же его человек глаголя: чесого ищеши?

37:16  Он же рече: братии моея ищу: повеждь ми, где пасут.

37:17  Рече же ему человек: отидоша отсюду: слышах бо их глаголющих: пойдем в Дофаим. И иде Иосиф вслед братии своея и обрете я в Дофаиме.

37:18  Предузреша же его издалече, прежде приближения его к ним, и зле умыслиша убити его:

37:19  рече же кийждо к брату своему: се, сновидец оный идет:

37:20  ныне убо приидите, убием его и ввержим его во един от рвов, и речем: зверь лют снеде его: и узрим, что будут сония его.

37:21  Слышав же Рувим, отя его из рук их и рече: не убием его на души.

37:22  Рече же им Рувим: не пролийте крове, вверзите его во един от рвов сих, иже в пустыни, руки же не возложите на него: (тщашеся бо) яко да изымет его от рук их и отдаст его отцу своему.

37:23  Бысть же егда прииде Иосиф к братии своей, совлекоша со Иосифа ризу пеструю, яже на нем,

37:24  и поемше его ввергоша в ров: ров же тощь, воды не имяше.

37:25  И седоша ясти хлеб, и воззревше очима видеша, и се, путницы Исмаилтяне идяху от Галаада, и велблюды их полны фимиама и ритины и стакти: идяху же везуще во Египет.

37:26  Рече же Иуда ко братии своей: кая польза, аще убием брата нашего и скрыем кровь его?

37:27  Грядите продадим его Исмаилтяном сим: руце же наши да не будут на нем, яко брат наш и плоть наша есть. Послушаша же братия его.

37:28  И мимоидоша человецы Мадиамстии купцы: и извлекоша и возведоша Иосифа из рова, и продаша Иосифа Исмаилтяном на двадесять златниц. И поведоша Иосифа во Египет.

37:29  Возвратися же Рувим к рову и не узре Иосифа в рове: и растерза ризы своя,

37:30  и прииде ко братии своей и рече: отрочища несть, аз же камо иду ктому?

37:31  Вземше же ризу Иосифову, заклаша козлище от коз и помазаша ризу кровию:

37:32  и послаша ризу пеструю, и принесоша ко отцу своему и рекоша: сию обретохом: познавай, аще риза сына твоего есть, или ни?

37:33  И позна ю и рече: риза сына моего есть: зверь лют снеде его: зверь восхити Иосифа.

37:34  И растерза Иаков ризы своя, и возложи вретище на чресла своя, и плакашеся сына своего дни многи.

37:35  Собрашася же вси сынове его и дщери и приидоша утешити его: и не хотяше утешитися, глаголя: яко сниду к сыну моему сетуя во ад. И плакася о нем отец его.

37:36  Мадиане же продаша Иосифа во Египет Пентефрию евнуху фараонову, архимагиру.

Chapter 38

38:1  Бысть же в то время, отиде Иуда от братии своея и прииде к человеку некоему Одолламитину, емуже имя Ирас:

38:2  и виде тамо Иуда дщерь человека Хананейска, ейже имя Сава: и поят ю, и вниде к ней:

38:3  и заченши роди сына, и нарече имя ему Ир:

38:4  и заченши еще роди сына и нарече имя ему Авнан:

38:5  и приложивши роди сына (третияго) и нарече имя Силом: сия же бе в Хасве, егда роди сих.

38:6  И поя Иуда жену Иру первенцу своему, ейже имя Фамарь.

38:7  Бысть же Ир первенец Иудин зол пред Господем: и уби его Бог.

38:8  Рече же Иуда Авнану: вниди к жене брата твоего и совокупися с нею, и возстави семя брату твоему.

38:9  Познав же Авнан, яко не ему будет семя, бысть егда вхождаше к жене брата своего, проливаше (семя) на землю, еже не дати семене брату своему:

38:10  зло же явися пред Богом, яко сотвори сие: и умертви и сего.

38:11  Рече же Иуда Фамари, невестце своей (по смерти дву сынов своих): седи вдовою в дому отца твоего, дондеже велик будет Силом, сын мой. Рече бо (во уме си): да не когда умрет и сей, якоже и братия его. Отшедши же Фамарь, седяше в дому отца своего.

38:12  Умножишася же дние, и умре Сава жена Иудина. И утешився Иуда, взыде к стригущым овцы его сам, и Ирас пастырь его Одолламитин, во Фамну.

38:13  И возвестиша Фамари невестце его, глаголюще: се, свекор твой восходит во Фамну стрищи овцы своя.

38:14  Она же свергши ризы вдовства с себе, облечеся в ризу летнюю и украсися, и седе пред враты Енани, яже суть на пути Фамны: ведяше бо, яко велик бысть Силом: сей же не даде ея ему в жену.

38:15  И видев ю Иуда, возмне ю блудницу быти: покры бо лице свое, и не позна ея.

38:16  Уклонися же к ней путем и рече ей: попусти ми внити к себе. Не позна бо, яко невестка ему есть. Она же рече: что ми даси, аще внидеши ко мне?

38:17  Он же рече: аз тебе послю козлище коз от овец моих. Она же рече: аще даси ми залог, дондеже пришлеши.

38:18  Он же рече: кий залог тебе дам? Она же рече: перстень твой и гривну, и жезл иже в руце твоей. И даде ей, и вниде к ней, и зача во утробе от него.

38:19  И воставши отиде, и сверже ризу летнюю с себе и облечеся в ризы вдовства своего.

38:20  Посла же Иуда козлище от коз рукою пастыря своего Одолламитина взяти залог от жены, и не обрете ея.

38:21  Вопроси же мужей места того и рече им: где есть блудница бывшая во Енане на распутии? И реша: не бе зде блудница.

38:22  И возвратися ко Иуде и рече: не обретох: и человецы места того глаголют: несть зде блудницы.

38:23  Рече же Иуда: да имать та: но да не когда посмеются нам: аз убо послах козлище сие, ты же не обрел еси.

38:24  Бысть же по трех месяцех, поведаша Иуде, глаголюще: соблуди Фамарь невестка твоя, и се, во утробе имать от блуда. Рече же Иуда: изведите ю, и да сожгут ю.

38:25  Она же ведома посла к свекру своему, глаголющи: от человека, егоже сия суть, аз во утробе имам. И рече: познай, чий перстень и гривна и жезл сей.

38:26  Позна же Иуда и рече: оправдася Фамарь паче мене, яко не дах ея Силому сыну моему. И не приложи ктому познати ю.

38:27  Бысть же егда раждаше, и беста близнята во утробе ея.

38:28  Бысть же в рождении ея, един произнесе руку: вземши же баба навяза на руку его червлень, глаголющи: сей изыдет первый.

38:29  Егда же вовлече руку, и абие изыде брат его. Она же рече: что пресечеся тебе ради преграждение? И прозва имя ему Фарес.

38:30  И посем изыде брат его, емуже бе на руце его червлень: и прозва имя ему Зара.

Chapter 39

39:1  Иосиф же приведен бысть во Египет. И купи его Пентефрий евнух фараонов архимагир, муж Египтянин, от рук Исмаилтян, иже приведоша его тамо.

39:2  И бяше Господь со Иосифом: и бяше муж благополучен, и бысть в дому господина своего Египтянина.

39:3  Ведяше же господин его, яко Господь бе с ним, и елика творит, Господь благоустрояет в руку его.

39:4  И обрете Иосиф благодать пред господином своим и благоугоди ему: и постави его над домом своим, и вся, елика быша ему, даде в руки Иосифовы.

39:5  Бысть же егда постави его над домом своим и над всеми, елика имеяше, и благослови Господь дом Египтянина Иосифа ради: и бысть благословение Господне на всем имении его в дому и в селех его.

39:6  И предаде вся, елика быша ему, в руки Иосифовы: и не ведяше от сущих у себе ничтоже, кроме хлеба, егоже ядяше сам: и бяше Иосиф добр образом и красен взором зело.

39:7  И бысть по словесех сих, и возложи жена господина его очи своя на Иосифа и рече: пребуди со мною.

39:8  Он же не хотяше и рече жене господина своего: аще господин мой не весть мене ради ничтоже в дому своем, и вся, елика суть ему, вдаде в руце мои,

39:9  и ничто есть выше мене в дому сем, ниже изято бысть от мене чтолибо, кроме тебе, понеже ты жена ему еси: и како сотворю глагол злый сей и согрешу пред Богом?

39:10  Егда же Иосифу глаголаше день от дне, и не послушаше ея еже спати и быти с нею.

39:11  Бысть же сицевый некий день, и вниде Иосиф в дом делати дела своя, и никтоже бяше от сущих в дому внутрь:

39:12  и ухвати его за ризы, глаголющи: лязи со мною. И оставив ризы своя в руках ея, убеже и изыде вон.

39:13  И бысть егда виде, яко оставль ризы своя в руках ея, бежа и изыде вон:

39:14  и воззва сущих в дому и рече им глаголющи: видите, введе нам отрока Евреина наругатися нам: вниде ко мне, глаголя: преспи со мною: и возопих гласом великим:

39:15  и егда услыша он, яко возвысих глас мой и возопих, оставль ризы своя у мене, отбеже и изыде вон.

39:16  И удержа ризы у себе, дондеже прииде господин в дом свой.

39:17  И поведа ему по словесех сих, глаголющи: вниде ко мне отрок Евреин, егоже ввел еси к нам, поругатися мне, и рече ми: да буду с тобою:

39:18  егда же услыша, яко воздвигох глас мой и возопих, оставль ризы своя у мене, отбеже и изыде вон.

39:19  И бысть егда услыша господин его глаголы жены своея, елика рече к нему, глаголющи: сице сотвори ми отрок твой: и разгневася яростию,

39:20  и взем господин Иосифа, вверже его в темницу, в место, идеже узники царевы держатся тамо в твердыни.

39:21  И бяше Господь со Иосифом, и возлия на него милость, и даде ему благодать пред началным стражем темничным:

39:22  и вдаде старейшина стражей темницу в руце Иосифу и всех вверженых в темницу: и вся, елика творяху тамо, той бе творяй.

39:23  Старейшина же стражей темничных ничтоже бе ведый его ради: вся бо быша в руках Иосифовых, занеже Господь бяше с ним: и елика той творяше, Господь благопоспешаше в руку его.

Chapter 40

40:1  Бысть же по словесех сих, согреши старейшина винарск царя Египетска и старейшина житарск господину своему царю Египетскому.

40:2  И разгневася фараон на оба евнухи своя, на старейшину винарска и на старейшину житарска,

40:3  и вверже их в темницу во узилище, в место, идеже Иосиф ввержен бяше.

40:4  И вручи их старейшина темницы Иосифу, и предста им: и беста дни (некия) в темнице,

40:5  и видеста оба сон во едину нощь: видение же сонное старейшины винарска и старейшины житарска, иже беста царя Египетска, суще в темнице, бяше сие.

40:6  Вниде же к ним Иосиф заутра и виде их, и бяху смущени:

40:7  и вопрошаше евнухов фараоних, иже быша с ним в темнице, у господина своего, глаголя: что, яко лица ваша уныла днесь?

40:8  Они же реша ему: сон видехом, и разсуждаяй его несть. Рече же им Иосиф: еда не Богом изявление их есть? Поведите убо мне.

40:9  И поведа старейшина винарск сон свой Иосифу и рече: во сне моем бяше виноград предо мною:

40:10  в винограде же три леторасли, и той цветущь произнесе отрасли, зрелы грозды лозныя:

40:11  и чаша фараонова в руце моей: и взях грезн, и изжах оный в чашу, и дах чашу в руку фараоню.

40:12  И рече ему Иосиф: сие разсуждение сему: три леторасли три дни суть:

40:13  еще три дни, и помянет фараон сан твой, и паки поставит тя в старейшинство твое винарско, и подаси чашу фараону в руку его по сану твоему первому, якоже был еси виночерпчий:

40:14  но помяни мя тобою, егда благо ти будет, и сотвориши надо мною милость, и да помянеши о мне фараону, и изведеши мя от твердыни сея:

40:15  яко татьбою украден бых из земли Еврейския, и зде ничто зло сотворих, но ввергоша мя в ров сей.

40:16  И виде старейшина житарск, яко прямо разсуди, и рече Иосифу: и аз видех сон, и мняхся три кошницы хлебов держати на главе моей:

40:17  в кошнице же верхней от всех родов, яже фараон яст, дело хлебенное, и птицы небесныя ядяху тая от кошницы, яже на главе моей.

40:18  Отвещав же Иосиф, рече ему: сие разсуждение его: три кошницы три дние суть:

40:19  еще три дние, и отимет фараон главу твою от тебе и повесит тя на древе, и изядят птицы небесныя плоть твою от тебе.

40:20  Бысть же в день третий, день рождения бяше фараоня, и творяше пир всем отроком своим: и помяну старейшинство старейшины винарска и старейшинство старейшины житарска, посреде отрок своих:

40:21  и постави старейшину винарска в старейшинство его: и подаде чашу в руку фараоню:

40:22  старейшину же житарска повеси (на древе), якоже сказа има Иосиф.

40:23  И не помяну старейшина винарск Иосифа, но забы его.

Chapter 41

41:1  Бысть же по двою лету дний, фараон виде сон: мняшеся стояти при реце:

41:2  и се, аки из реки исхождаху седмь крав добры видом и избранны телесы, и пасяхуся по брегу:

41:3  другия же седмь крав изыдоша по сих из реки, злы видом и телесы худы, и пасяхуся с кравами по брегу речному:

41:4  и поядоша седмь кравы злыя и худыя телесы седмь крав добрых видом и избранных телесы: (и сия невидимы быша, яко внидоша в чресла их). Воста же фараон.

41:5  И виде сон вторый: и се, седмь класи исхождаху из стеблия единаго избранны и добры:

41:6  друзии же седмь класи тонцыи, истончени ветром, израстаху по них:

41:7  и пожроша седмь класи тонцыи и истончени ветром седмь класов избранных и полных. Воста же фараон, и бяше сон.

41:8  Бысть же заутра, и возмутися душа его: и послав, созва вся сказатели Египетския и вся мудрыя его: и поведа им фараон сон свой: и не бяше сказуяй того фараону.

41:9  И рече старейшина винарск к фараону, глаголя: грех мой воспоминаю днесь:

41:10  фараон разгневася на рабы своя и вверже нас в темницу в дому архимагира, мене и старейшину житарска:

41:11  и видехом сон оба единыя нощи аз и он, кийждо свой сон видехом:

41:12  бяше же тамо с нами юноша, отрок Евреин архимагиров, и поведахом ему, и разсуди нам:

41:13  бысть же, якоже сказа нам, тако и случися, мне паки быти во своем старейшинстве, а оному повешену.

41:14  Послав же фараон, призва Иосифа: и изведоша его из твердыни, и остригоша его, и измениша ризы ему, и прииде к фараону.

41:15  Рече же фараон Иосифу: сон видех, и сказуяй его несть: аз же слышах о тебе глаголющих, яко слышав сны разсуждаеши тыя.

41:16  Отвещав же Иосиф фараону, рече: без Бога не отвещается спасение фараону.

41:17  Рече же фараон Иосифу, глаголя: во сне моем мняхся стояти на брезе речнем:

41:18  и аки из реки исхождаху седмь кравы добры видом и избранны телесы, и пасяхуся по брегу:

41:19  и се, другия седмь крав исхождаху вслед их из реки, злы и недобры видом и худы телесы, яковых не виде таковых во всей земли Египетстей хуждших:

41:20  и изядоша седмь кравы злыя и худыя седмь крав первых добрых и избранных:

41:21  и внидоша во утробы их, и не явишася, яко внидоша во утробы их: и обличия их зла быша, яко и исперва. Востав же, (паки) уснух,

41:22  и видех паки во сне моем, и аки седмь класи исхождаху из единаго стеблия полны и добры:

41:23  друзии же седмь класи тонцыи и ветром истончени изницаху вслед их:

41:24  и пожроша седмь класи тонцыи и ветром истончени седмь класов добрых и полных. Рех убо сказателем, и не бысть поведаяй мне того.

41:25  И рече Иосиф фараону: сон фараонов един есть: елика Бог творит, показа фараону:

41:26  седмь кравы добрыя седмь лет суть: и седмь класи добрии седмь лет суть: сон фараонов един есть:

41:27  и седмь кравы худыя, яже изыдоша по сих, седмь лет суть, и седмь класи тонцыи и истончени ветром седмь лет суть: будут седмь лет глада:

41:28  слово же еже рех фараону, елика Бог творит, показа фараону:

41:29  се, седмь лет приходит, обилность многа во всей земли Египетстей:

41:30  приидут же седмь лет глада по сих, и забудут сытости будущия во всем Египте, и погубит глад землю,

41:31  и не познается обилие на земли от глада будущаго по сих: силен бо будет зело:

41:32  повторися же сон фараону дважды, яко истинно будет слово еже от Бога, и ускорит Бог сотворити оно:

41:33  ныне убо усмотри человека мудра и смыслена и постави его над землею Египетскою:

41:34  и да сотворит фараон и поставит местоначалники по земли, и да собирают пятую часть от всех плодов земли Египетския седми лет обилных,

41:35  и да соберут всякую пищу седми лет грядущих добрых сих: и да соберется пшеница под руку фараоню, пища во градех да хранится:

41:36  и будет пища соблюдена земли на седмь лет гладных, яже имут быти в земли Египетстей, да не потребится земля в гладе.

41:37  Угодно же бысть слово пред фараоном и пред всеми рабы его.

41:38  И рече фараон всем рабом своим: еда обрящем человека сицеваго, иже имать Духа Божия в себе?

41:39  Рече же фараон Иосифу: понеже показа Бог тебе вся сия, несть человека мудрейша и смысленнейша паче тебе:

41:40  ты будеши в дому моем, и уст твоих да послушают вси людие мои, разве престолом аз более тебе буду.

41:41  Рече же фараон Иосифу се, поставляю тя днесь над всею землею Египетскою.

41:42  И снем фараон перстень с руки своея, возложи его на руку Иосифову, и облече его в ризу червлену, и возложи гривну злату на выю его,

41:43  и всади его на колесницу свою вторую, и проповеда пред ним проповедник: и постави его над всею землею Египетскою.

41:44  Рече же фараон Иосифу: аз фараон: без тебе не воздвигнет руки своея никтоже во всей земли Египетстей.

41:45  И нарече фараон имя Иосифу Псонфомфаних: и даде ему Асенефу, дщерь Петефриа жреца Илиопольскаго, ему в жену.

41:46  Иосиф же бяше лет тридесяти, егда предста фараону царю Египетскому. Изыде же Иосиф от лица фараоня и пройде всю землю Египетскую.

41:47  И сотвори земля в седми летех обилну жатву.

41:48  И собра всякую пищу седми лет, в нихже бяше обилность в земли Египетстей: и положи пищу во градех: пищы поль града, сущих окрест его, положи в нем.

41:49  И собра Иосиф пшеницу яко песок морский многу зело, дондеже не можаху исчести: без числа бо бяше.

41:50  Иосифу же беста два сына, прежде пришествия седми лет гладных, ихже роди ему Асенефа, дщерь Петефриа жреца Илиопольска:

41:51  нарече же Иосиф имя первенцу Манассиа, (глаголя:) яко забыти мне сотвори Бог вся болезни моя, и вся, яже отца моего.

41:52  Имя же второму нарече Ефраим, (глаголя:) яко возрасти мя Бог в земли смирения моего.

41:53  Минуша же седмь лет обилных, яже быша в земли Египетстей,

41:54  и начаша седмь лет гладных приходити, якоже рече Иосиф. И бысть глад по всей земли: во всей же земли Египетстей быша хлебы.

41:55  И взалка вся земля Египетская: возопи же народ к фараону о хлебех. Рече же фараон всем Египтяном: идите ко Иосифу, и еже речет вам, сотворите.

41:56  И глад бяше на лицы всея земли. Отверзе же Иосиф вся житницы, и продаяше всем Египтяном:

41:57  и вся страны прихождаху во Египет, куповати ко Иосифу: обдержаше бо глад всю землю.

Chapter 42

42:1  Видев же Иаков, яко купля есть (пшеницы) во Египте, рече сыном своим: почто не радите?

42:2  Се, слышах, яко есть пшеница во Египте: идите тамо и купите нам мало пищи, да живи будем и не умрем.

42:3  Идоша же братия Иосифовы десять купити пшеницы во Египет.

42:4  Вениамина же, брата Иосифова, не отпусти с братиею его, рече бо: да не когда случится (на пути) ему зло.

42:5  Приидоша же сынове Израилевы купити с приходящими: бяше бо глад в земли Ханаанстей.

42:6  Иосиф же бяше князь земли: сей продаяше всем людем земли (тоя). Пришедше же братия Иосифовы, поклонишася ему лицем до земли.

42:7  Видев же Иосиф братию свою, позна: и отчуждашеся их, и глаголаше им жестоко, и рече им: откуду приидосте? Они же реша: от земли Ханаанския купити пищи.

42:8  Позна же Иосиф братию свою: они же не познаша его.

42:9  И помяну Иосиф сны своя, яже виде он: и рече им: соглядатаи есте, соглядати путий страны (сея) приидосте.

42:10  Они же реша: ни, господине, раби твои приидохом купити пищи:

42:11  вси есмы сынове единаго человека: мирницы есмы, не суть раби твои соглядатаи.

42:12  Рече же им: ни, но пути земли (сея) приидосте соглядати.

42:13  Они же реша: дванадесять есмы братия раби твои в земли Ханаани: и се, менший (от нас) со отцем нашим днесь, а другаго несть.

42:14  Рече же им Иосиф: сие есть, еже рекох вам, глаголя, яко соглядатаи есте:

42:15  в сем явитеся: тако ми здравия фараоня, не изыдете отсюду, аще брат ваш менший не приидет семо:

42:16  послите от себе единаго, и возмите брата вашего: вы же держими будите, дондеже яве будут словеса ваша, аще истинствуете, или ни: аще же ни, тако ми здравия фараоня, воистинну соглядатаи есте.

42:17  И даде я под стражу на три дни.

42:18  Рече же им в день третий: сие сотворите, и живи будете: Бога бо аз боюся:

42:19  аще мирницы есте, брат ваш да удержится един под стражею: сами же идите и отвезите купленую пшеницу вашу,

42:20  и брата вашего меншаго приведите ко мне, и верна будут словеса ваша: аще же ни, умрете. И сотвориша тако.

42:21  И рече кийждо к брату своему: ей, во гресех бо есмы брата ради нашего, яко презрехом скорбение души его, егда моляшеся нам, и не послушахом его: и сего ради прииде на ны скорбение сие.

42:22  Отвещав же Рувим, рече им: не рех ли вам, глаголя: не преобидите детища? И не послушасте мене: и се, кровь его взыскуется.

42:23  Тии же не ведеша, яко разумеет Иосиф: толмачь бо между ими бяше.

42:24  Отвратився же от них, проплакася Иосиф: и паки прииде к ним и рече им. И поя Симеона от них, и связа его пред ними.

42:25  Повеле же Иосиф наполнити сосуды их пшеницы и возвратити сребро их комуждо во вретище свое и дати им брашно на путь. И бысть им тако.

42:26  И возложивше пшеницу на ослы своя, отидоша оттуду.

42:27  Отрешив же един вретище свое дати пищу ослом своим, идеже сташа, и виде узол сребра своего, и бе верху устия вретищнаго.

42:28  И рече братии своей: возвращено ми есть сребро, и се, сие во вретищи моем. И ужасеся сердце их: и возмятошася, друг ко другу глаголюще: что сие сотвори Бог нам?

42:29  Приидоша же ко Иакову, отцу своему, в землю Ханааню и поведаша ему вся случившаяся им, глаголюще:

42:30  глагола муж господин земли (оныя) к нам жестоко и вверже нас в темницу, аки соглядаюших землю:

42:31  рехом же ему: мирницы есмы, несмы соглядатаи:

42:32  дванадесять братия есмы, сынове отца нашего: единаго несть, а менший со отцем нашим днесь в земли Ханаани:

42:33  рече же нам муж господин земли (тоя): по сему увем, яко мирницы есте: брата единаго оставите зде у мене, а купленую пшеницу дому вашему вземше отидите

42:34  и приведите ко мне брата вашего меншаго: и увем, яко не соглядатаи есте, но яко мирницы есте: и брата вашего отдам вам, и куплю творите в земли.

42:35  Бысть же егда испраздняху вретища своя, и бяше узол сребра во вретищи коегождо их: и видеша узлы сребра своего сами и отец их, и убояшася.

42:36  Рече же им Иаков отец их: мене безчадна сотвористе: Иосифа несть, Симеона несть, и Вениамина ли поймете? На мя быша сия вся.

42:37  Рече же Рувим отцу своему, глаголя: двоих сынов моих убий, аще не приведу его к тебе: даждь его в руце мои, и аз приведу его к тебе.

42:38  Он же рече: не пойдет сын мой с вами, яко брат его умре, и той един оста: и случится ему зло на пути, в оньже аще пойдете, и сведете старость мою с печалию во ад.

Chapter 43

43:1  Глад же одоле на земли.

43:2  Бысть же егда скончаша пшеницу ядуще, юже принесоша из Египта: и рече им отец их: паки шедше купите нам мало пищи.

43:3  Рече же ему Иуда, глаголя: клятвою засвидетелствова нам муж господин земли (тоя) глаголя: не узрите лица моего, аще брат ваш менший не приидет с вами:

43:4  аще убо послеши брата нашего с нами, пойдем и купим тебе пищи:

43:5  аще же не послеши брата нашего с нами, не пойдем: муж бо рече нам, глаголя: не узрите лица моего, аще брат ваш менший не приидет с вами.

43:6  Рече же Израиль: почто зло сотвористе ми, поведавше мужу, яко есть вам брат?

43:7  Они же реша: вопрошая вопроси нас муж и рода нашего, глаголя: аще еще отец ваш жив есть, и аще есть вам брат? И поведахом ему по вопросу сему: еда ведехом, яко речет нам: приведите брата вашего?

43:8  Рече же Иуда ко Израилю, отцу своему: отпусти отрочища со мною: и воставше пойдем, да живи будем и не умрем, и мы и ты и имение наше:

43:9  аз же возму его: от руку моею взыщи его: аще не приведу его к тебе, и поставлю его пред тобою, грешен буду к тебе вся дни:

43:10  аще бо быхом не умедлили, уже возвратилися бы дважды.

43:11  Рече же им Израиль отец их: аще тако есть, сие сотворите: возмите от плодов земных в сосуды своя и донесите человеку дары, ритину, мед, фимиама же и стакти, и теревинф и орехи:

43:12  и сребро сугубо возмите в руце свои, и сребро обретенное во вретищах ваших возвратите с собою, да не како неведение есть:

43:13  и брата своего поимите, и воставше идите к мужу:

43:14  Бог же мой да даст вам благодать пред мужем и отпустит брата вашего единаго, и Вениамина: аз бо якоже обезчадех, обезчадех.

43:15  Вземше же мужие дары сия, и сребро сугубое взяша в руце свои, и Вениамина: и воставше приидоша во Египет, и сташа пред Иосифом.

43:16  Виде же их Иосиф, и Вениамина брата своего единоматерня, и рече строителю дому своего: введи мужы (сия) в дом, и заколи от скота, и уготовай: со мною бо ясти имут мужие (сии) хлеб в полудне.

43:17  Сотвори же человек, якоже рече Иосиф, и введе мужы в дом Иосифов.

43:18  Видевше же мужие, яко введоша их в дом Иосифов, реша: сребра ради возвращеннаго во вретищах наших первее, вводят ны, еже бы оклеветати нас и нанести на ны, да поймут нас в рабы, и ослы нашя.

43:19  Приступивше же к человеку сущему над домом Иосифовым, рекоша ему при вратех дому,

43:20  глаголюще: молим тя, господине: приидохом первее купити пищи:

43:21  бысть же егда приидохом на стан и отрешихом вретища своя, и се, сребро коегождо во вретищи его: тое сребро наше весом возвратихом ныне руками нашими:

43:22  и сребро другое принесохом с собою купити пищи: не вемы, кто вложи сребро во вретища наша.

43:23  Рече же им: мир вам, не бойтеся: Бог ваш и Бог отец ваших даде вам сокровища во вретищах ваших: а сребро ваше за приятое имею. И изведе к ним Симеона:

43:24  и принесе воду омыти нозе им, и даде пажити ослом их.

43:25  Уготоваша же дары, дондеже приидет Иосиф в полудне: слышаша бо, яко тамо имать обедати.

43:26  Прииде же Иосиф в дом: и принесоша ему дары, яже имяху в руках своих, в дом: и поклонишася ему лицем до земли.

43:27  И вопроси их: здрави ли есте? И рече им: здрав ли есть отец ваш, старец, егоже рекосте, еще ли жив есть?

43:28  Они же рекоша: здрав есть раб твой, отец наш, еще жив есть. И рече: благословен человек оный Богу. И приникше поклонишася ему.

43:29  Воззрев же очима своима Иосиф, виде Вениамина брата своего единоматерня и рече: сей ли есть брат ваш юнейший, егоже рекосте ко мне привести? И рече: Бог да помилует тя, чадо.

43:30  Возмутися же Иосиф: подвижеся бо утроба его о брате своем, и искаше плакати: вшед же в ложницу, плакася тамо.

43:31  И умыв лице, изшед удержася и рече: предложите хлебы.

43:32  И предложиша ему единому, и оным особно, и Египтяном, иже с ним ядяху, особно: не можаху бо Египтяне ясти хлеба со Евреи: мерзость бо есть Египтяном (всяк пастух овчий).

43:33  Седоша же прямо ему первенец по старейшинству своему и менший по меншеству своему, и дивляхуся мужие кийждо ко брату своему:

43:34  и взяша части от него к себе: вящшая же бысть часть Вениаминова паче всех частей пятерицею, неже оных: пиша же и упишася с ним.

Chapter 44

44:1  И заповеда Иосиф домостроителю своему, глаголя: наполните вретища мужем пищи, елико могут понести: и вложите комуждо сребро верху устия вретища:

44:2  и чашу мою сребряную вложите во вретище меншаго, и цену пшеницы его. Бысть же по словеси Иосифову, якоже рече.

44:3  Утро возсия, и мужие отпустишася сами, и ослята их.

44:4  Изшедше же они из града, не отидоша далече: и рече Иосиф домостроителю своему: востав гони вслед мужей и постигни их, и рцы им: что яко воздасте (ми) злая за благая?

44:5  Вскую украдосте чашу мою сребряну? Не сия ли есть, из неяже пиет господин мой? Он же и волхвованием волхвует в ней: злая совершисте, яже сотвористе.

44:6  Обрет же их, рече им по словесем сим.

44:7  Они же реша ему: вскую глаголет господин словеса сия? Не буди рабом твоим сотворити по словеси сему:

44:8  аще сребро, еже обретохом во вретищах наших, возвратихом к тебе от земли Ханаани, како быхом украли из дому господина твоего сребро или злато?

44:9  У негоже аще обрящеши чашу от раб твоих, да умрет: и мы будем раби господину нашему.

44:10  Он же рече: и ныне, якоже глаголете, тако будет: у негоже аще обрящется чаша, будет мой раб, вы же будете чисти.

44:11  И потщашася, и сверже кийждо вретище свое на землю, и отверзоша кийждо вретище свое.

44:12  Изыска же от старейшаго зачен, дондеже прииде до меншаго, и обрете чашу во вретищи Вениамини.

44:13  И растерзаша ризы своя, и возложиша кийждо вретище свое на осля свое, и возвратишася во град.

44:14  Вниде же Иуда и братия его ко Иосифу, еще ему сущу ту, и падоша пред ним на землю.

44:15  Рече же им Иосиф: что дело сие сотвористе? Не ведасте ли, яко несть волхвователь человек, якоже аз?

44:16  Рече же Иуда: что отвещаем господину, или что возглаголем, или чим оправдимся? Бог же обрете неправду рабов твоих: се, мы есмы раби господину нашему, и мы, и у негоже обретеся чаша.

44:17  Рече же Иосиф: не буди ми сотворити глагол сей: муж, у негоже обретеся чаша, той будет ми раб: вы же поидите в целости ко отцу своему.

44:18  Приступив же к нему Иуда, рече: молю тя, господине, да речет раб твой слово пред тобою, и не прогневайся на раба твоего, яко ты еси по фараоне:

44:19  господине, ты вопрошал еси рабов твоих, глаголя: аще имате отца, или брата?

44:20  И рехом господину: есть нам отец стар, и отрочищь на старость менший ему, а брат его умре, он же един остася у матере своея, отец же возлюби его.

44:21  Ты же рекл еси рабом твоим: приведите его ко мне, да вижду его.

44:22  И рехом господину: не возможет отрочищь оставити отца своего: аще же оставит отца, умрет.

44:23  Ты же рекл еси рабом твоим: аще не приидет брат ваш менший с вами, не приложите ктому видети лица моего.

44:24  Бысть же егда приидохом к рабу твоему отцу нашему, поведахом ему словеса господина нашего,

44:25  рече же нам отец наш: идите паки и купите нам мало пищи.

44:26  Мы же рекохом: не возможем ити: но аще брат наш менший идет с нами, пойдем: ибо не возможем видети лице мужа, брату нашему меншему не сущу с нами.

44:27  Рече же раб твой, отец наш к нам: вы весте, яко двоих роди мне жена:

44:28  и отиде един от мене, и рекосте, яко зверем снеден бысть, и не видех его даже до ныне:

44:29  аще убо поймете и сего от лица моего, и случится ему зло на пути, и сведете старость мою с печалию во ад.

44:30  Ныне убо аще пойду к рабу твоему, отцу же нашему, и отрочища не будет с нами: (душа же его связана есть с душею сего,)

44:31  и будет егда увидит он не суща отрочища с нами, умрет: и сведут раби твои старость раба твоего, отца же нашего, с печалию во ад:

44:32  раб бо твой от отца взя отрочища, глаголя: аще не приведу его к тебе и поставлю его пред тобою, грешен буду ко отцу вся дни.

44:33  Ныне убо пребуду тебе раб вместо отрочища, раб господину: отрочищь же да идет с братиею своею:

44:34  како бо пойду ко отцу, отрочищу не сущу с нами? Да не вижду злых, яже обрящут отца моего.

Chapter 45

45:1  И не можаше Иосиф удержатися всем предстоящым ему, но рече: отослите всех от мене. И не предстояше ни един Иосифу, егда познавашеся братии своей.

45:2  И испусти глас с плачем: слышаша же вси Египтяне, и слышано бысть в дому фараонове.

45:3  Рече же Иосиф братии своей: аз есмь Иосиф: еще ли отец мой жив есть? И не могоша братия отвещати ему: смутишася бо.

45:4  Рече же Иосиф братии своей: приближитеся ко мне. И приближишася. И рече: аз есмь Иосиф, брат ваш, егоже продасте во Египет:

45:5  ныне убо не скорбите, ниже жестоко вам да явится, яко продасте мя семо: на жизнь бо посла мя Бог пред вами:

45:6  сие бо второе лето глад на земли, и еще пять лет оста, в нихже не будет орания, ни жатвы:

45:7  посла бо мя Бог пред вами оставити вам останок на земли и препитати ваш останок велий:

45:8  ныне убо не вы посласте мя семо, но Бог: и сотвори мя яко отца фараону и господина всему дому его и князя всей земли Египетстей:

45:9  потщавшеся убо, взыдите ко отцу моему и рцыте ему: сия глаголет сын твой Иосиф: сотвори мя Бог господина всей земли Египетстей: сниди убо ко мне и не умедли:

45:10  и вселишися в земли Гесемли аравийстей, и будеши близ мене ты и сынове твои, и сынове сынов твоих, овцы твоя и волове твои, и елика суть твоя:

45:11  и препитаю тя тамо, еще бо пять лет будет глад на земли, да не погибнеши ты и сынове твои, и вся имения твоя.

45:12  Се, очи ваши видят, и очи Вениамина брата моего, яко уста моя глаголющая к вам:

45:13  возвестите убо отцу моему всю славу мою сущую во Египте, и елика видите: и ускоривше, приведите отца моего семо.

45:14  И напад на выю Вениамина, брата своего, плакася над ним, и Вениамин плакася на выи его.

45:15  И облобызав всю братию свою, плакася над ними: и по сих глаголаша к нему братия его.

45:16  И пронесеся глас в дому фараонове, глаголюще: приидоша братия Иосифова. Возрадовася же фараон и раби его.

45:17  Рече же фараон ко Иосифу: рцы братии своей: сие сотворите: наполните сосуды вашя (пшеницы) и идите в землю Ханааню,

45:18  и вземше отца вашего и имения ваша, приидите ко мне: и дам вам от всех благ Египетских, и снесте тук земли:

45:19  ты же заповеждь сия: взяти им колесницы от земли Египетския, детем их и женам их: и поимше отца своего, приидите:

45:20  и не пощадите очима сосудов ваших: вся бо благая Египетская вам будут.

45:21  Сотвориша же тако сынове Израилевы: даде же им Иосиф колесницы по повелению фараона царя (Египетска), и даде им брашно на путь:

45:22  и всем даде сугубы ризы, Вениамину же даде триста златниц и пятеры ризы пременныя:

45:23  и отцу своему посла такожде, и десять ослов везущих от всех благ Египетских, и десять мсков везущих хлебы на путь отцу его.

45:24  И отпусти братию свою. И отидоша. И рече им: не гневайтеся на пути.

45:25  Изыдоша же из Египта и приидоша в землю Ханааню ко Иакову отцу своему

45:26  и поведаша ему глаголюще: яко сын твой Иосиф жив есть, и он владеет над всею землею Египетскою. И ужасеся в мысли Иаков: не вероваше бо им.

45:27  Глаголаша же ему вся реченная от Иосифа, елика рече им. Узрев же колесницы, яже посла Иосиф, еже взяти его, оживе дух Иакова, отца их,

45:28  и рече Израиль: велико ми есть (сие), аще еще Иосиф сын мой жив есть: шед узрю его, прежде неже умрети ми.

Chapter 46

46:1  Востав же Израиль сам и вся сущая его, прииде ко кладязю Клятвенному и пожре жертву Богу отца своего Исаака.

46:2  Рече же Бог ко Израилю в видении нощию, глаголя: Иакове, Иакове. Он же рече: что есть?

46:3  Он же рече ему: Аз есмь Бог отцев твоих, не убойся изыти во Египет: в язык бо велий сотворю тя тамо:

46:4  и Аз сниду с тобою во Египет, и Аз возведу тя до конца: и Иосиф возложит руки своя на очи твои.

46:5  Воста же Иаков от кладязя Клятвеннаго, и взяша сынове Израиля отца своего, и стяжание, и жены своя на колесницы, яже посла Иосиф, взяти его:

46:6  и вземше имения своя и все стяжание, еже стяжаша в земли Ханаанстей, внидоша во Египет Иаков и все семя его с ним:

46:7  сынове и сынове сынов его с ним, дщери и дщери дщерей его, и все семя свое введе во Египет.

46:8  Сия же имена сынов Израилевых вшедших во Египет купно со Иаковом отцем своим: Иаков и сынове его: первенец Иаковль Рувим.

46:9  Сынове же Рувимли: Енох и Фаллос, Асрон и Харми.

46:10  Сынове же Симеони: Иемуил и Иамин, и Аод и Ахин, и Саар и Саул, сын Хананитидин.

46:11  Сынове же Левиини: Гирсон, Кааф и Мерарий.

46:12  Сынове же Иудины: Ир и Авнан, и Силом и Фарес и Зара: умроша же Ир и Авнан в земли Ханаани. Быша же сынове Фаресу: Есром и Иемуил.

46:13  Сынове же Иссахаровы: Фола и Фуа, и Асум и Самвран.

46:14  Сынове же Завулони: Серед и Аллон и Ахоил.

46:15  Сии сынове Лиини, ихже роди Иакову в Месопотамии Сирстей, и Дину дщерь его: всех душ сынов и дщерей тридесять три.

46:16  Сынове же Гадовы: Сафон и Ангис, и Саннис и Фасован, и Аидис и Ароидис и Ареилис.

46:17  Сынове же Асировы: Иемна и Ессуа, и Иеул и Вариа, и Сара сестра их. Сынове же Вариины: Ховор и Мелхиил.

46:18  Сии сынове Зелфины, юже даде Лаван Лии, дщери своей, яже роди сих Иакову, шестьнадесять душ.

46:19  Сынове же Рахили, жены Иаковли: Иосиф и Вениамин.

46:20  Быша же сынове Иосифу в земли Египетстей, ихже роди ему Асенефа, дщи Петефриа жреца Илиопольска, Манассию и Ефрема. Быша же сынове Манассиины, ихже роди ему наложница Сира, Махира. Махир же роди Галаада. Сынове же Ефраима, брата Манассиина: Суталаам и Таам. Сынове же Суталаамли, Едом.

46:21  Сынове же Вениамини: Вала и Ховор и Асфил. Быша же сынове Валовы: Гира и Ноеман, и Анхис и Рос, и Мамфим и Офимим. Гира же роди Арада.

46:22  Сии сынове Рахилины, ихже роди Иакову, всех душ осмьнадесять.

46:23  Сынове же Дановы: Асом.

46:24  Сынове же Неффалимли: Асиил и Гони, и Иссаар и Селлим.

46:25  Сии сынове Валлины, юже даде Лаван Рахили дщери своей, яже роди сих Иакову: всех душ седмь.

46:26  Всех же душ вшедших со Иаковом во Египет, яже изыдоша из чресл его, кроме жен сынов Иаковлих, всех душ шестьдесят шесть.

46:27  Сынове же Иосифовы, иже быша ему в земли Египетстей, душ девять: всех душ дому Иаковля, яже приидоша со Иаковом во Египет, душ седмьдесят пять.

46:28  Иуду же посла пред собою ко Иосифу срести его у Иройска града в земли Рамессийстей.

46:29  Впряг же Иосиф колесницы своя, изыде во сретение Израилю, отцу своему, ко Ироону граду: и явився ему, нападе на выю его и плакася плачем великим.

46:30  И рече Израиль ко Иосифу: да умру отныне, понеже видех лице твое: еще бо ты еси жив.

46:31  Рече же Иосиф ко братии своей: шед повем фараону и реку ему: братия моя и дом отца моего, иже быша в земли Ханаани, приидоша ко мне:

46:32  они же суть мужие пастуси, мужие бо скотопитателие быша: и скоты, и волы, и вся своя приведоша:

46:33  аще убо призовет вас фараон и речет вам: что дело ваше есть?

46:34  Рцыте: мужие скотопитателие есмы, раби твои, издетска даже до ныне, и мы и отцы наши: да вселитеся в земли Гесем аравийстей: мерзость бо есть Египтяном всяк пастух овчий.

Chapter 47

47:1  Пришед же Иосиф, поведа фараону глаголя: отец мой и братия моя, и скоти и волове их, и вся сущая их приидоша из земли Ханаани: и се, суть в земли Гесем.

47:2  От братий же своих поя пять мужей и постави их пред фараоном.

47:3  И рече фараон к братиям Иосифовым: что дело ваше? Они же реша фараону: пастуси овчии, раби твои, и мы и отцы наши отдетска и доселе.

47:4  Рекоша же фараону: обитати в земли приидохом, несть бо пажити скотом раб твоих: одоле бо глад на земли Ханаани: ныне убо да вселимся раби твои в земли Гесем.

47:5  И рече фараон Иосифу, глаголя: отец твой и братия твоя приидоша к тебе:

47:6  се, земля Египетская пред тобою есть: на лучшей земли посели отца твоего и братию твою, да вселятся в земли Гесем: аще же веси, яко суть в них мужие сильнии, постави их старейшины скотом моим. (приидоша же во Египет ко Иосифу Иаков и сынове его: и услыша фараон царь Египетский).

47:7  Введе же Иосиф Иакова отца своего и постави его пред фараоном, и благослови Иаков фараона.

47:8  Рече же фараон ко Иакову: колико лет дний жития твоего?

47:9  И рече Иаков фараону: дние лет жития моего, яже обитаю, сто тридесять лет: малы и злы быша дние лет жития моего: не достигоша во дни лет жития отец моих, яже дни обиташа.

47:10  И благословив Иаков фараона, отиде от него.

47:11  И всели Иосиф отца своего и братию свою, и даде им обдержание в земли Египетстей, на лучшей земли, в земли Рамессийстей, якоже повеле фараон.

47:12  И деляше Иосиф пшеницу отцу своему и братии своей и всему дому отца своего по числу лиц.

47:13  Пшеницы же не бяше во всей земли, одоле бо глад зело: скончавашеся же земля Египетская и земля Ханааня от глада.

47:14  Собра же Иосиф все сребро обретшееся в земли Египетстей и в земли Ханаани, за пшеницу, юже куповаху, и размеряше им пшеницу, и внесе Иосиф все сребро в дом фараонов.

47:15  И оскуде все сребро от земли Египетския и от земли Ханаанския: приидоша же вси Египтяне ко Иосифу, глаголюще: даждь нам хлебы, и вскую умираем пред тобою? Скончася бо сребро наше.

47:16  Рече же им Иосиф: пригоните скоты вашя, и дам вам хлебы за скоты вашя, аще скончася сребро ваше.

47:17  Пригнаша же скоты своя ко Иосифу, и даде им Иосиф хлебы за кони и за овцы, и за волы и за ослы, и прекорми их хлебами за вся скоты их в том лете.

47:18  Прейде же то лето, и приидоша к нему во второе лето и рекоша ему: да не како погибнем от господина нашего? Аще бо скончася сребро наше, и имение и скоты пред тобою, господине, и не остася нам пред господином нашим, точию едино тело и земля наша:

47:19  да не умрем убо пред тобою, и земля опустеет, купи нас и землю нашу хлебами: и будем мы и земля наша раби фараону: даждь семя, да посеем и живи будем, и не умрем, и земля не опустеет.

47:20  И купи Иосиф всю землю Египетскую фараону: продаша бо Египтяне землю свою фараону, ибо одоле им глад: и бысть земля фараону.

47:21  И люди поработи ему в рабы, от края предел Египетских даже до краев,

47:22  кроме земли жреческия токмо, тоя бо не купи Иосиф: даянием бо даде в дар жерцем фараон, и ядяху даяние, еже даде им фараон: сего ради не продаша земли своея.

47:23  Рече же Иосиф всем Египтяном: се, купих вас и землю вашу днесь фараону: возмите себе семена и сейте на земли:

47:24  и будут плоды ея, и да дасте пятую часть фараону, четыри же части будут вам самем в семена земли и на препитание вам и всем сущым в домех ваших.

47:25  И рекоша: оживил ны еси, обретохом благодать пред господином нашим, и будем раби фараону.

47:26  И устави им Иосиф заповедь даже до сего дне на земли Египетстей пятую часть даяти фараону, кроме земли жреческия: та точию не бяше фараоня.

47:27  Вселися же Израиль в земли Египетстей, на земли Гесем, и наследствоваше ю: и возрастоша, и умножишася зело.

47:28  Поживе же Иаков в земли Египетстей седмьнадесять лет: и быша дние Иаковли лет жизни его, сто четыредесять седмь лет.

47:29  Приближишася же дние Израилю еже умрети, и призва сына своего Иосифа и рече ему: аще обретох благодать пред тобою, подложи руку твою под стегно мое и сотвориши надо мною милость и истину, еже не погребсти мене во Египте,

47:30  но да почию со отцы моими: и изнесеши мя из Египта, и погребеши мя во гробе их. Он же рече: аз сотворю по словеси твоему.

47:31  Рече же: кленися мне. И клятся ему. И поклонися Израиль на конец жезла его.

Chapter 48

48:1  Бысть же по глаголех сих, и поведано бысть Иосифу, яко отец твой изнемогает: и поим два сына своя, Манассию и Ефрема, прииде ко Иакову.

48:2  Поведаша же Иакову, глаголюще: се, сын твой Иосиф грядет к тебе. И укрепився Израиль седе на одре,

48:3  и рече Иаков ко Иосифу: Бог мой явися мне в Лузе, в земли Ханаани, и благослови мя

48:4  и рече ми: се, Аз возращу тя и умножу тя, и сотворю тя в собрания языков: и дам ти землю сию и семени твоему по тебе во одержание вечное.

48:5  Ныне убо два сына твоя, иже быша тебе в земли Египетстей прежде пришествия моего к тебе во Египет, мои суть: Ефрем и Манассиа, аки Рувим и Симеон будут мне:

48:6  сыны же, яже аще родиши по сих, будут тебе: во имя братии своея призовутся ко жребиям оных:

48:7  аз же егда идях от Месопотамии Сирския, умре Рахиль мати твоя в земли Ханаани, приближающуся ми ко ипподрому Хаврафы земли, еже приити во Ефрафу: и погребох ю на пути ипподрома: сей есть Вифлеем.

48:8  Видев же Израиль сыны Иосифовы, рече: что тебе сии?

48:9  Рече же Иосиф отцу своему: сынове мои суть, яже даде ми Бог зде. И рече Иаков: приведи ми я, да благословлю их.

48:10  Очи же Израилю тяжко видеста от старости, и не можаше видети: и приближи их к нему, и лобза их, и объят я.

48:11  И рече Израиль ко Иосифу: се, лица твоего не лишихся, и се, показа ми Бог и семя твое.

48:12  И отведе их Иосиф от колен его, и поклонишася ему лицем до земли.

48:13  Поим же Иосиф два сына своя, Ефрема в десницу, прямо левицы Израиля, Манассию же в левую, прямо десницы Израилевы, приближи их к нему.

48:14  Простер же Израиль руку десную, возложи на главу Ефремлю, сей же бяше менший, а левую на главу Манассиину, пременив руце,

48:15  и благослови я и рече: Бог, Емуже благоугодиша отцы мои пред ним, Авраам и Исаак, Бог, Иже питает мя измлада даже до дне сего,

48:16  Ангел, иже мя избавляет от всех зол, да благословит детища сия, и прозовется в них имя мое, и имя отец моих, Авраама и Исаака, и да умножатся во множество многое на земли.

48:17  Видев же Иосиф, яко возложи отец его руку десную свою на главу Ефремлю, тяжко ему явися: и прия Иосиф руку отца своего отяти ю от главы Ефремли на главу Манассиину,

48:18  и рече Иосиф отцу своему: не тако, отче: сей бо (есть) первенец, возложи руку десную твою на главу его.

48:19  И не хотяше, но рече: вем, чадо, вем: и сей будет в люди, и сей вознесется: но брат его менший болий его будет, и семя его будет во множество языков.

48:20  И благослови я в том дни, глаголя: в вас благословится Израиль, глаголюще: да сотворит тя Бог якоже Ефрема и яко Манассию. И постави Ефрема вышше Манассии.

48:21  Рече же Израиль Иосифу: се, аз умираю, и будет Бог с вами, и возвратит вас от земли сея на землю отец ваших:

48:22  аз же даю ти Сикиму избранную свыше братии твоея, юже взях из руки Аморрейски мечем моим и луком.

Chapter 49

49:1  Призва же Иаков сыны своя и рече им: соберитеся, да возвещу вам, что срящет вас в последния дни:

49:2  соберитеся и послушайте мене, сынове Иаковли, послушайте Израиля, послушайте отца вашего.

49:3  Рувим, первенец мой, ты крепость моя и начало чад моих: жесток терпети и жесток упорник:

49:4  досадил еси яко вода, да не воскипиши: возшел бо еси на ложе отца твоего, тогда осквернил еси постелю, идеже возшел еси.

49:5  Симеон и Левий братия совершиста обиду от воли своея:

49:6  в совет их да не приидет душа моя, и к собранию их да не прилепятся внутренняя моя: яко во гневе своем избиста человеки, и в похоти своей пререзаста жилы юнца:

49:7  проклята ярость их, яко упорна, и гнев их, яко ожесточися: разделю их во Иакове и разсею их во Израили.

49:8  Иудо, тебе похвалят братия твоя, руце твои на плещу враг твоих: поклонятся тебе сынове отца твоего:

49:9  скимен львов Иуда: от леторасли, сыне мой, возшел еси: возлег уснул еси яко лев и яко скимен: кто возбудит его?

49:10  Не оскудеет князь от Иуды и вождь от чресл его, дондеже приидут отложеная Ему, и Той чаяние языков:

49:11  привязуяй к лозе жребя свое и к винничию жребца осляте своего, исперет вином одежду свою и кровию гроздия одеяние свое:

49:12  радостотворны очи его паче вина, и белы зубы его паче млека.

49:13  Завулон при мори вселится, и той на пристанищи кораблей, и прострется даже до Сидона.

49:14  Иссахар доброе возжела, почивая посреде пределов,

49:15  и видев покой, яко добр, и землю, яко тучна, подложи рамы свои на труд, и бысть муж земледелец.

49:16  Дан судити имать люди своя, яко и едино племя во Израили,

49:17  и да будет Дан змий на пути, седяй на распутии, угрызая пяту конску:

49:18  и падет конник вспять, спасения ждый Господня.

49:19  Гад, искушение искусит его: он же искусит того при ногах.

49:20  Асир, тучен его хлеб, и той даст пищу князем.

49:21  Неффалим стебль распущающаяся, издаяй во отрасли доброту.

49:22  Сын возращен Иосиф, сын возращен мой ревностный, сын мой юнейший, ко мне обратися:

49:23  на негоже советующе укоряху и наляцаху нань господие стреляний,

49:24  и сотрошася с крепостию луки их, и разслабеша жилы мышцей рук их, рукою сильнаго Иакова: оттуду укрепися Израиль от Бога отца твоего,

49:25  и поможе тебе Бог мой, и благослови тя благословением небесным свыше и благословением земли и имущия вся: благословения ради сосцев и ложесн,

49:26  благословения отца твоего и матере твоея: преодоле паче благословения гор пребывающих и благословения холмов вечных: будут на главе Иосифове и на версе (главы) братий, имиже обладаше.

49:27  Вениамин волк хищник, рано яст еще и на вечер дает пищу.

49:28  Вси сии сынове Иаковли дванадесять: и сия глагола им отец их, и благослови их: коегождо по благословению его благослови их,

49:29  и рече им: аз прилагаюся к людем моим: погребите мя со отцы моими в пещере, яже есть в селе Ефрона Хеттеанина,

49:30  в пещере Сугубей, яже прямо Мамврии в земли Ханаани, юже стяжа Авраам пещеру у Ефрона Хеттеанина в стяжание гроба.

49:31  Тамо погребоша Авраама и Сарру жену его, тамо погребоша Исаака и Ревекку жену его, тамо погребоша Лию,

49:32  в стяжании села и пещеры, яже есть в нем у сынов Хеттеовых.

49:33  И преста Иаков завещая сыном своим, и возложив Иаков нозе свои на одр умре, и приложися к людем своим.

Chapter 50

50:1  И припад Иосиф на лице отца своего, плакася (горько) о нем и облобыза его:

50:2  и повеле Иосиф рабом своим погребателем погребсти отца своего. И погребоша погребателие Израиля.

50:3  И исполнишася ему четыредесять дний: тако бо исчисляются дние погребения: и плакася его Египет седмьдесят дний.

50:4  Егда же преидоша дние плача, глагола Иосиф ко вельможам фараоновым, глаголя: аще обретох благодать пред вами, рцыте о мне во ушы фараону, глаголюще:

50:5  отец мой закля мя прежде скончания (своего), глаголя: во гробе, егоже ископах себе в земли Ханаани, тамо мя погреби: ныне убо возшед погребу отца моего и возвращуся. И рекоша фараону по словеси Иосифову.

50:6  И рече фараон ко Иосифу: взыди, погреби отца твоего, якоже закля тя.

50:7  И взыде Иосиф погребсти отца своего. И совзыдоша с ним вси раби фараони и старейшины дому его, и вси старейшины земли Египетския,

50:8  и весь дом Иосифов и братия его, и весь дом отца его и сродницы его: овцы же и волы оставиша в земли Гесем.

50:9  И совзыдоша с ним и колесницы и конницы, и бысть полк велик зело.

50:10  И приидоша на Гумно Атадово, еже есть об он пол Иордана, и рыдаша его рыданием велиим и крепким зело: и сотвори плачь отцу своему седмь дний.

50:11  И видеша жителие земли Ханаанския плачь на Гумне Атадове и реша: плачь велик сей есть Египтяном. Сего ради наречеся имя месту тому плачь Египетск, еже есть об он пол Иордана.

50:12  И сотвориша ему тако сынове его, якоже заповеда им.

50:13  И взяша его сынове его в землю Ханааню и погребоша его в пещере Сугубей, юже стяжа Авраам пещеру в стяжание гроба от Ефрона Хеттеанина, прямо Мамврии.

50:14  И возвратися Иосиф во Египет, сам и братия его и вси совозшедшии погребсти отца его.

50:15  Видевше же братия Иосифовы, яко умре отец их, реша: да не когда воспомянет злобу нашу Иосиф и воздаянием воздаст нам за вся злая, яже показахом ему.

50:16  И пришедше ко Иосифу рекоша: отец твой закля прежде кончины своея, глаголя:

50:17  тако рцыте Иосифу: остави им неправду и грех их, яко лукавая тебе показаша: и ныне приими неправду рабов Бога отца твоего. И плакася Иосиф, глаголющим им к нему.

50:18  И пришедше к нему рекоша: се, мы тебе раби.

50:19  И рече к ним Иосиф: не бойтеся, Божий бо есмь аз:

50:20  вы совещасте на мя злая, Бог же совеща о мне благая, дабы было якоже днесь, и препиталися бы людие мнози.

50:21  И рече им: не бойтеся, аз препитаю вас и домы вашя. И утеши их, и глагола им по сердцу их.

50:22  И вселися Иосиф во Египте сам и братия его и весь дом отца его: и поживе Иосиф лет сто десять.

50:23  И виде Иосиф Ефремли дети до третияго рода: и сынове Махира сына Манассиина родишася при бедрех Иосифовых.

50:24  И рече Иосиф братии своей, глаголя: аз умираю, посещением же посетит вас Бог и изведет вас от земли сея в землю, о нейже клятся Бог отцем нашым Аврааму, Исааку и Иакову.

50:25  И закля Иосиф сыны Израилевы, глаголя: в посещении, имже посетит вас Бог, совознесите и кости моя отсюду с вами.

50:26  И скончася Иосиф сый лет ста десяти: и погребоша его, и положиша в раце во Египте.