TpiKJPB - Genesis

Chapter 1

1:1  ¶ Long stat God i kamapim long nating heven na dispela graun.

1:2  Na dispela graun i no stap strong, na i stap nating. Na tudak i stap antap long pes bilong ples daunbilo. Na Spirit bilong God i muv antap long pes bilong ol wara.

1:3  ¶ Na God i tok, Larim lait i stap. Na lait i stap.

1:4  Na God i luksave long dispela lait, long dispela em i gutpela. Na God i brukim lait long tudak.

1:5  Na God i kolim lait De. Na Em i kolim tudak Nait. Na apinun tru na moning em i de namba wan.

1:6  ¶ Na God i tok, Larim wanpela spes i stap long namel bilong ol wara, na larim dispela brukim ol wara long ol wara.

1:7  Na God i wokim dispela spes, na brukim ol wara i stap aninit long spes long ol wara i stap antap long dispela spes. Na em i stap olsem.

1:8  Na God i kolim dispela spes Heven. Na apinun tru na moning em i de namba tu.

1:9  ¶ Na God i tok, Larim ol wara aninit long heven i ken bung wantaim long wanpela hap, na larim graun i drai i kamap ples klia. Na em i stap olsem.

1:10  Na God i kolim graun i drai Dispela Graun. Na ples ol wara i bung wantaim Em i kolim ol Solwara. Na God i luksave long dispela em i gutpela.

1:11  Na God i tok, Larim dispela graun i kamapim gras, sayor i karim pikinini kaikai, na prut diwai i karim prut i bihainim kain bilong en, husat pikinini kaikai bilong en i stap insait long em yet, antap long dispela graun. Na em i stap olsem.

1:12  Na dispela graun i kamapim gras, na sayor i karim pikinini kaikai i bihainim kain bilong en, na diwai i karim prut, husat pikinini kaikai bilong en i stap insait long em yet, i bihainim kain bilong en. Na God i luksave long dispela em i gutpela.

1:13  Na apinun tru na moning em i de namba tri.

1:14  ¶ Na God i tok, Larim ol lait i stap long dispela spes bilong heven bilong brukim de long nait. Na larim ol i stap bilong ol mak, na bilong ol taim God i makim bilong yia, na bilong ol de, na ol yia.

1:15  Na larim ol i stap bilong ol lait long dispela spes bilong heven, bilong givim lait antap long dispela graun. Na em i stap olsem.

1:16  Na God i wokim tupela bikpela lait. Lait i bikpela moa em i bilong bosim de, na lait i liklik moa em i bilong bosim nait. Em i wokim ol sta tu.

1:17  Na God i putim ol long dispela spes bilong heven bilong givim lait long dispela graun,

1:18  Na bilong bosim de na bosim nait, na bilong brukim lait long tudak. Na God i luksave long dispela em i gutpela.

1:19  Na apinun tru na moning em i de namba foa.

1:20  ¶ Na God i tok, Larim ol wara karim planti tru bilong samting i save muv husat i gat laip, na ol pisin husat i ken flai antap long dispela graun long spes i op bilong heven.

1:21  Na God i kamapim long nating ol bikpela weil, na olgeta samting i stap laip husat i muv, dispela ol wara i karim i planti tru, i bihainim ol kain bilong ol yet, na olgeta wan wan pisin i gat wing i bihainim kain bilong em yet. Na God i luksave long dispela em i gutpela.

1:22  Na God i blesim ol, i spik, Karim kaikai, na kamap planti moa, na pulapim ol wara insait long ol solwara, na larim ol pisin i kamap planti moa long dispela graun.

1:23  Na apinun tru na moning em i de namba faiv.

1:24  ¶ Na God i tok, Larim dispela graun karim samting i stap laip i bihainim kain bilong em yet, ol bulmakau samting, na samting i save wokabaut long bel, na animal bilong dispela graun i bihainim kain bilong em yet. Na em i stap olsem.

1:25  Na God i wokim animal bilong graun i bihainim ol kain bilong em yet, na ol bulmakau samting i bihainim ol kain bilong em yet, na olgeta wan wan samting i save wokabaut long bel antap long dispela graun i bihainim ol kain bilong em yet. Na God i luksave long dispela em i gutpela.

1:26  ¶ Na God i tok, Larim Yumi wokim man long piksa bilong Yumi, i bihainim lukluk bilong Yumi. Na larim ol i ken gat strong bilong bosim antap long ol pis bilong solwara, na antap long ol pisin bilong skai, na antap long ol bulmakau samting, na antap long olgeta dispela graun, na antap long olgeta samting i save wokabaut long bel antap long dispela graun.

1:27  Olsem tasol God i kamapim man long nating long piksa bilong Em Yet, long piksa bilong God Em i kamapim em long nating. Man na meri Em i kamapim tupela long nating.

1:28  Na God i blesim tupela, na God i tokim tupela, Karim planti kaikai, na kamap planti moa, na pulapim dispela graun, na bosim dispela. Na stap strong bilong bosim antap long ol pis bilong solwara, na antap long ol pisin bilong skai, na antap long olgeta wan wan samting i stap laip husat i save muv antap long dispela graun.

1:29  ¶ Na God i tok, Lukim, Mi bin givim yutupela olgeta wan wan sayor i save karim pikinini kaikai, dispela i stap antap long pes bilong dispela graun olgeta, na olgeta wan wan diwai, insait long husat i gat pikinini bilong diwai i karim pikinini kaikai. Long yutupela dispela bai stap bilong kaikai.

1:30  Na long olgeta wan wan animal bilong dispela graun, na long olgeta wan wan pisin bilong skai, na long olgeta wan wan samting i save wokabaut long bel long dispela graun, we laip i stap insait long en, Mi bin givim olgeta wan wan grinpela sayor bilong kaikai. Na em i stap olsem.

1:31  ¶ Na God i lukim olgeta wan wan samting Em i bin wokim, na, lukim, dispela em i gutpela tru. Na apinun tru na moning em i de namba sikis.

Chapter 2

2:1  ¶ Olsem tasol ol heven na dispela graun i pinis, na olgeta bikpela lain bilong ol.

2:2  Na long de namba seven God i pinisim wok bilong Em, dispela Em i bin wokim. Na Em i malolo long de namba seven long olgeta wok bilong Em, dispela Em i bin wokim.

2:3  Na God i blesim de namba seven, na mekim dispela i kamap holi. Bilong wanem, insait long en Em i bin malolo long olgeta wok bilong Em, dispela God i kamapim long nating na wokim.

2:4  ¶ Ol dispela em ol kamapim bilong ol heven na bilong dispela dispela graun taim God i kamapim ol long nating, long dispela de long God BIKPELA i wokim dispela graun na ol heven,

2:5  Na olgeta wan wan samting bilong planim bilong ples kunai long bipo em i stap insait long dispela graun, na olgeta wan wan sayor bilong bikpela gaden bipo em i go bikpela. Long wanem, God BIKPELA i no bin mekim ren long pundaun antap long dispela graun, na i no gat wanpela man bilong brukim graun.

2:6  Tasol sno wara i kamap long graun na givim wara long antap bilong olgeta hap bilong graun.

2:7  Na God BIKPELA i wokim man long das bilong dispela graun, na winim win bilong laip i go insait long tupela hul bilong nus bilong em. Na man i kamap tewel i stap laip.

2:8  ¶ Na God BIKPELA i planim wanpela gaden long hap sankamap insait long Iden. Na Em i putim long dispela hap dispela man husat Em i bin wokim.

2:9  Na ausait long graun God BIKPELA i mekim long go bikpela olgeta wan wan diwai i naispela bilong lukluk long en, na i gutpela bilong kaikai. Diwai bilong laip tu i stap insait long namel long gaden, na diwai bilong save long gutpela pasin na pasin nogut.

2:10  Na wanpela riva i lusim Iden i go ausait bilong givim wara long gaden. Na long dispela hap em i bruk, na kamap fopela het bilong wara.

2:11  Nem bilong namba wan em Paisan. Dispela em dispela husat i raunim olgeta hap bilong Havila, we gol i stap.

2:12  Na gol bilong dispela hap em i gutpela. Long dispela hap bedeliam na ston oneks i stap.

2:13  Na nem bilong namba tu riva em Gihon. Dispela stret em dispela husat i save raunim olgeta hap bilong Itiopia.

2:14  Na nem bilong namba tri riva em Hidikel. Dispela em dispela husat i go long sait sankamap bilong Asiria. Na namba foa riva em Yufretis.

2:15  Na God BIKPELA i kisim man, na putim em insait long gaden bilong Iden bilong wokim dispela na bilong lukautim dispela.

2:16  ¶ Na God BIKPELA i tok strong long dispela man, i spik, Long olgeta diwai bilong dispela gaden yu ken kaikai long laik bilong yu.

2:17  Tasol long diwai bilong save bilong gutpela pasin na pasin nogut, yu bai i no inap kaikai long en. Long wanem, long de yu kaikai long en, tru tumas, yu bai dai.

2:18  ¶ Na God BIKPELA i tok, Em i no gutpela long man i ken stap wanpis. Mi bai wokim bilong em wanpela helpim i fit stret long em.

2:19  Na ausait long graun God BIKPELA i wokim olgeta wan wan animal bilong ples kunai, na olgeta wan wan pisin bilong skai. Na Em i bringim ol long Adam bilong luksave long em bai i kolim ol wanem. Na wanem nem Adam i kolim olgeta wan wan samting i stap laip, dispela em i nem bilong en.

2:20  Na Adam i givim ol nem long olgeta bulmakau samting, na long ol pisin bilong skai, na long olgeta wan wan animal bilong ples kunai. Tasol long Adam, God i no lukim wanpela helpim i fit stret long em.

2:21  ¶ Na God BIKPELA i mekim wanpela slip i dai i dip tru long pundaun antap long Adam, na em i slip. Na Em i kisim wanpela bilong ol bun bilong banis bilong em, na pasim bodi gen i kisim ples bilong en.

2:22  Na dispela bun bilong banis, dispela God BIKPELA i bin kisim long man, Em i wokim i kamap wanpela meri, na bringim em i kam long man.

2:23  Na Adam i tok, Dispela nau em i bun bilong ol bun bilong mi, na bodi bilong bodi bilong mi. Ol bai kolim em Meri, bilong wanem, God i kisim em i kam ausait long Man.

2:24  Olsem na bai wanpela man i lusim papa bilong em na mama bilong em, na em bai holimpas strong meri bilong em. Na tupela bai stap wanpela bodi.

2:25  Na tupela i stap skin nating, dispela man na meri bilong em, na tupela i no sem.

Chapter 3

3:1  ¶ Nau, snek i gat tingting i antap tumas moa long olgeta wan wan animal bilong ples kunai husat God BIKPELA i bin wokim. Na em i tokim meri, Yes, ating God i tok, Yupela bai i no inap kaikai long olgeta diwai bilong gaden?

3:2  Na meri i tokim snek, Mipela i ken kaikai kaikai bilong ol diwai bilong gaden.

3:3  Tasol kaikai bilong dispela diwai i stap long namel bilong gaden, God i bin tok, Yupela bai i no inap kaikai long en, na tu yupela bai i no inap tasim dispela, nogut yupela i dai.

3:4  Na snek i tokim meri, Tru tumas, yupela bai i no inap dai.

3:5  Long wanem, God i save long de yupela i kaikai long en, nau ol ai bilong yupela bai op, na yupela bai stap olsem ol god, taim yupela i save long gutpela samting na samting nogut.

3:6  ¶ Na taim meri i luksave long dispela diwai i gutpela bilong kaikai, na long em i naispela long ol ai, na wanpela diwai wanpela i ken laikim bilong mekim em i kamap saveman, em i kisim kaikai long en, na em i bin kaikai, na givim tu long man bilong em wantaim em. Na em i bin kaikai.

3:7  Na ol ai bilong tupela i op, na tupela i save long ol i stap skin nating. Na tupela i samapim ol lip bilong diwai fik wantaim, na wokim ol epron bilong ol yet.

3:8  Na tupela i harim nek bilong God BIKPELA taim Em i wokabaut long gaden long taim kol liklik bilong de. Na Adam na meri bilong em i haitim ol yet long pes bilong God BIKPELA namel long ol diwai bilong gaden.

3:9  ¶ Na God BIKPELA i singaut long Adam, na tokim em, Yu stap we?

3:10  Na Adam i tok, Mi harim nek bilong Yu long gaden, na mi pret, bilong wanem, mi stap skin nating. Na mi haitim mi yet.

3:11  ¶ Na God i tok, Husat i tokim yu long yu stap skin nating? Yu bin kaikai long dispela diwai, we Mi givim tok strong long yu long yu no ken kaikai long en?

3:12  Na man i tok, Dispela meri husat Yu givim bilong stap wantaim mi, em i givim mi long dispela diwai, na mi bin kaikai.

3:13  Na God BIKPELA i tokim meri, Dispela yu bin mekim em i wanem samting? Na meri i tok, Snek i trikim mi, na mi bin kaikai.

3:14  ¶ Na God BIKPELA i tokim snek, Bikos yu bin mekim dispela, tok nogut i stap antap long yu antap moa long olgeta bulmakau samting, na antap moa long olgeta wan wan animal bilong ples kunai. Antap long bel bilong yu bai yu wokabaut, na bai yu kaikai das olgeta de long laip bilong yu.

3:15  Na Mi bai putim pasin birua namel long yu na meri, na namel long pikinini kaikai bilong yu na pikinini kaikai bilong em. Dispela bai bagarapim het bilong yu, na yu bai bagarapim lek bilong em.

3:16  ¶ Long meri Em i tok, Bel hevi bilong yu na hevi bilong yu taim yu kisim bel, Mi bai mekim i kamap planti moa tru. Long bel hevi yu bai karim ol pikinini. Na laik bilong yu bai stap long man bilong yu, na em bai bosim yu.

3:17  ¶ Na long Adam Em i tok, Bikos yu bin bihainim nek bilong meri bilong yu, na yu bin kaikai long dispela diwai, dispela Mi bin givim tok strong long yu, i spik, Yu bai i no inap kaikai long en, tok nogut i stap antap long dispela graun bilong tingim nem bilong yu. Long bel hevi bai yu kaikai long en olgeta de bilong laip bilong yu.

3:18  Ol rop i gat nil tu na ol gras nogut bai em i karim long yu. Na yu bai kaikai sayor bilong bikpela gaden.

3:19  Long tuhat bilong pes bilong yu bai yu kaikai bret, inap long yu go bek long graun. Long wanem, ausait long en Mi bin kisim yu. Long wanem, yu stap das, na yu bai go bek long das.

3:20  ¶ Na Adam i kolim nem bilong meri bilong em Iv. Bilong wanem, em i mama bilong olgeta i stap laip.

3:21  ¶ Na long Adam tu na long meri bilong em God BIKPELA i wokim ol saket bilong ol skin, na putim klos long ol.

3:22  ¶ Na God BIKPELA i tok, Lukim, man i kamap olsem wanpela bilong yumi, bilong save long gutpela samting na samting nogut. Na nau, nogut em i putim han bilong em i go ausait, na kisim tu bilong diwai bilong laip, na kaikai, na stap laip oltaim oltaim.

3:23  Olsem na God BIKPELA i salim em i go ausait long gaden bilong Iden, bilong brukim graun we God i kisim em long en.

3:24  Olsem tasol Em i ranim man i go ausait. Na Em i putim long hap sankamap bilong gaden bilong Iden ol Serupim, na wanpela bainat i paia, dispela i tanim nabaut long olgeta wan wan hap, bilong lukautim rot bilong diwai bilong laip.

Chapter 4

4:1  ¶ Na Adam i save long Iv, meri bilong em. Na em i kisim bel, na karim Ken, na tok, Mi bin kisim wanpela man long BIKPELA.

4:2  Na gen em i karim brata bilong en Ebel. Na Ebel em i man bilong lukautim sipsip, tasol Ken em i man bilong brukim graun long gaden.

4:3  ¶ Na taim taim i wok long ran em i kamap olsem, long Ken i bringim kaikai bilong graun long stap wanpela ofa i go long BIKPELA.

4:4  Na Ebel, em tu i bringim bilong ol namba wan pikinini bilong lain sipsip bilong em bilong ol gris bilong en. Na BIKPELA i bin lukluk wantaim amamas long Ebel na long ofa bilong em.

4:5  Tasol long Ken na long ofa bilong em Em i no bin lukluk wantaim amamas. Na Ken em i belhat nogut tru, na pes bilong em i pundaun.

4:6  ¶ Na BIKPELA i tokim Ken, Bilong wanem yu stap belhat tru? Na bilong wanem pes bilong yu i pundaun?

4:7  Sapos yu mekim gutpela pasin, ating Mi bai i no inap orait long yu? Na sapos yu no mekim gutpela pasin, orait sin i slip klostu long dua. Na laik bilong en bai stap long yu, na yu bai bosim em.

4:8  ¶ Na Ken i toktok wantaim Ebel, brata bilong em. Na em i kamap olsem, taim tupela i stap long ples kunai, long Ken i kirap na birua long Ebel, brata bilong em. Na em i kilim em i dai.

4:9  ¶ Na BIKPELA i tokim Ken, Brata bilong yu Ebel i stap we? Na em i tok, Mi no save. Mi man bilong lukautim brata bilong mi?

4:10  Na God i tok, Yu bin mekim wanem? Nek bilong blut bilong brata bilong yu i singaut long Mi long graun.

4:11  Na nau yu stap aninit long kot bilong dispela graun, husat i bin opim maus bilong em bilong kisim blut bilong brata bilong yu i kam long han bilong yu.

4:12  Taim yu brukim graun long gaden, em bai i no inap givim strong bilong en long yu i stat long nau i go. Long dispela graun bai yu stap man bilong ranawe na rabisman i bilong raun nating.

4:13  ¶ Na Ken i tokim BIKPELA, Mekim save bilong mi em bikpela moa long mi ken karim.

4:14  Lukim, Yu bin ranim mi i go ausait tude long pes bilong dispela graun. Na long pes bilong Yu bai mi stap hait. Na mi bai stap man i ranawe na rabisman i raun nating insait long dispela graun. Na em bai kamap olsem, long olgeta wan wan husat i lukim mi bai kilim mi i dai.

4:15  Na BIKPELA i tokim em, Olsem na husat man i kilim i dai Ken, Mi bai bekim pe antap long em sevenpela taim. Na BIKPELA i putim wanpela mak antap long Ken, nogut taim wanpela man i lukim em em i ken kilim em.

4:16  ¶ Na Ken i go ausait i lusim pes bilong BIKPEL, na em i stap long hap bilong Not, long hap sankamap bilong Iden.

4:17  Na Ken i save long meri bilong en. Na em i kisim bel, na karim Inok. Na em i wokim wanpela biktaun, na kolim nem bilong dispela biktaun, i bihainim nem bilong pikinini man bilong en, Inok.

4:18  Na long Inok meri i karim Irat. Na Irat i kamapim Mehujael. Na Mehujael i kamapim Metusael. Na Metusael i kamapim Lamek.

4:19  ¶ Na Lamek i maritim tupela meri. Nem bilong wanpela em Eda, na nem bilong arapela Sila.

4:20  Na Eda i karim Jebal. Em i papa bilong kain man i save stap long ol haus sel, na bilong kain man i gat ol bulmakau samting.

4:21  Na nem bilong brata bilong en em Jubal. Em i papa bilong olgeta kain man i save putim han long harp na organ.

4:22  Na Sila, em tu i karim Tubal-ken, wanpela man bilong skulim olgeta wan wan man i wokim samting long bras na ain. Na susa bilong Tubal-ken em Neama.

4:23  ¶ Na Lamek i tokim tupela meri bilong em, Eda na Sila, Harim nek bilong mi, Yutupela meri bilong Lamek, harim gut toktok bilong mi. Long wanem, mi bin kilim i dai wanpela man inap long bagarap bilong mi, na wanpela yangpela man inap long pen bilong mi.

4:24  Sapos God bai bekim pe long man i kilim i dai Ken sevenpela taim, tru tumas, long Lamek em bai 77-pela taim.

4:25  ¶ Na Adam i save gen long meri bilong em, na em i karim wanpela pikinini man, na kolim nem bilong em Set. Long wanem, God, em i tok, i bin makim narapela pikinini long mi bilong kisim ples bilong Ebel, husat Ken i kilim i dai.

4:26  Na long Set, long em tu meri bilong em i karim wanpela pikinini man. Na em i kolim nem bilong em Inos. Nau ol man i stat long singaut long nem bilong BIKPELA.

Chapter 5

5:1  ¶ Dispela em i buk bilong ol lain tumbuna bilong Adam. Long dispela de long God i kamapim man, Em i wokim em long luk olsem God.

5:2  Man na meri Em i kamapim ol long nating. Na Em i blesim ol, na kolim nem bilong ol Adam, long de Em i kamapim ol long nating.

5:3  Na Adam i stap laip 130 yia, na em i kamapim wanpela pikinini man i luk olsem em yet, i bihainim piksa bilong em. Na em i kolim nem bilong em Set.

5:4  Na ol de bilong Adam bihain long em i kamapim Set em i 800 yia. Na em i kamapim ol pikinini man na ol pikinini meri.

5:5  Na olgeta de long Adam i stap laip em i 930 yia, na em i dai.

5:6  ¶ Na Set i stap laip 105 yia, na em i kamapim Inos.

5:7  Na Set i stap laip bihain long em i kamapim Inos 807 yia, na kamapim ol pikinini man na ol pikinini meri.

5:8  Na olgeta de bilong Set em i 912 yia, na em i dai.

5:9  Na Inos i stap laip 90 yia, na em i kamapim Kenan.

5:10  Na Inos i stap laip bihain long em i kamapim Kenan 815 yia, na em i kamapim ol pikinini man na ol pikinini meri.

5:11  Na olgeta de bilong Inos em i 905 yia, na em i dai.

5:12  Na Kenan i stap laip 70 yia, na em i kamapim Mahalaliel.

5:13  Na Kenan i stap laip bihain long em i kamapim Mahalaliel 840 yia, na em i kamapim ol pikinini man na ol pikinini meri.

5:14  Na olgeta de bilong Kenan i em 910 yia, na em i dai.

5:15  Na Mahalaliel i stap laip 65 yia, na em i kamapim Jaret.

5:16  Na Mahalaliel i stap laip bihain long em i kamapim Jaret 830 yia, na em i kamapim ol pikinini man na ol pikinini meri.

5:17  Na olgeta de bilong Mahalaliel em i 895 yia, na em i dai.

5:18  Na Jaret i stap laip 162 yia, na em i kamapim Inok.

5:19  Na Jaret i stap laip bihain long em i kamapim Inok 800 yia, na em i kamapim ol pikinini man na ol pikinini meri.

5:20  Na olgeta de bilong Jaret em i 962 yia, na em i dai.

5:21  ¶ Na Inok i stap laip 65 yia, na em i kamapim Metusela.

5:22  Na Inok i wokabaut wantaim God bihain long em i kamapim Metusela 300 yia, na em i kamapim ol pikinini man na ol pikinini meri.

5:23  Na olgeta de bilong Inok em i 365 yia.

5:24  Na Inok i wokabaut wantaim God. Na em i no stap, long wanem, God i kisim em.

5:25  ¶ Na Metusela i stap laip 187 yia, na em i kamapim Lamek.

5:26  Na Metusela i stap laip bihain long em i kamapim Lamek 782 yia, na em i kamapim ol pikinini man na ol pikinini meri.

5:27  Na olgeta de bilong Metusela em i 969 yia, na em i dai.

5:28  ¶ Na Lamek i stap laip 182 yia, na em i kamapim wanpela pikinini man.

5:29  Na em i kolim nem bilong em Noa, i spik, Dispela stret bai givim bel isi long yumi long sait bilong wok bilong yumi na long hatwok bilong ol han bilong yumi, bilong wanem, BIKPELA i bin putim tok nogut antap dispela graun.

5:30  Na Lamek i stap laip bihain long em i kamapim Noa 595 yia, na em i kamapim ol pikinini man na ol pikinini meri.

5:31  Na olgeta de bilong Lamek em i 777 yia, na em i dai.

5:32  Na Noa i gat 500 krismas. Na Noa i kamapim Siem, Ham, na Jafet.

Chapter 6

6:1  ¶ Na em i kamap olsem, taim ol man i stat long kamap planti moa long pes bilong dispela graun, na ol meri i karim ol pikinini meri long ol,

6:2  Long ol pikinini man bilong God i lukim ol pikinini meri bilong ol man, long ol i naispela. Na ol i maritim ol meri bilong olgeta husat ol i makim.

6:3  ¶ Na BIKPELA i tok, Spirit bilong Mi bai i no inap pait wantaim man olgeta taim, long wanem, em tu i stap bodi. Tasol ol de bilong em bai stap 120 yia.

6:4  ¶ Long ol dispela de ol traipela man i stap long dispela graun. Na tu bihain long dispela, taim ol pikinini man bilong God i go long ol pikinini meri bilong ol man, na ol i karim ol pikinini long ol, ol dispela stret i kamap ol strongpela man husat i stap bilong bipo, ol man i gat biknem.

6:5  Na God i luksave long pasin nogut bilong man i bikpela long dispela graun, na long olgeta wan wan tingting nating bilong ol tingting bilong bel bilong em em i nogut tasol olgeta taim.

6:6  ¶ Na em i tanim bel bilong BIKPELA long Em i bin wokim man long dispela graun, na dispela i givim bel hevi long Em long bel bilong Em.

6:7  Na BIKPELA i tok, Mi bai bagarapim man olgeta husat Mi bin kamapim long nating i lusim pes bilong dispela graun, Man, na animal, na samting i wokabaut long bel, na ol pisin bilong skai wantaim. Long wanem, em i tanim bel bilong mi long Mi bin wokim ol.

6:8  ¶ Tasol Noa i painim marimari pinis long ol ai bilong BIKPELA.

6:9  Ol dispela em ol lain tumbuna bilong Noa. Noa em i wanpela stretpela man na inap tru long ol lain tumbuna bilong em, na Noa i wokabaut wantaim God.

6:10  Na Noa i kamapim tripela pikinini man, Siem, Ham, na Jafet.

6:11  ¶ Dispela graun tu i bagarap long ai bilong God, na dispela graun i pulap long pasin pait.

6:12  Na God i lukluk long dispela graun, na, lukim, em i bagarap. Long wanem, olgeta samting i gat bodi i bin bagarapim rot bilong em long dispela graun.

6:13  ¶ Na God i tokim Noa, Pinis bilong olgeta samting i gat bodi em i kamap long ai bilong Mi. Long wanem, dispela graun i pulap long pasin pait long wok bilong ol. Na, lukim, Mi bai bagarapim ol olgeta wantaim dispela graun.

6:14  Yu wokim wanpela sip long diwai gofa. Yu bai wokim ol rum insait long sip, na yu bai putim kolta long en long insait na ausait wantaim kolta.

6:15  Na dispela em i pasin, dispela yu bai wokim sip long en. Longpela bilong sip bai stap 300 kyubit, brait bilong en 50-pela kyubit, na antap bilong en 30-pela kyubit.

6:16  Yu bai wokim wanpela windo long sip, na long wanpela kyubit yu bai pinisim em antap. Na dua bilong sip yu bai putim insait long sait bilong en. Yu bai wokim dispela wantaim daunbilo, namba tu, na namba tri stori.

6:17  Na, lukim, Mi, Yes Mi, bringim wanpela tait bilong ol wara antap long dispela graun, bilong bagarapim olgeta bodi olgeta, we win bilong laip i stap, aninit long heven. Na olgeta wan wan samting, dispela i stap long dispela graun, bai dai.

6:18  Tasol wantaim yu bai Mi wokim kontrak bilong Mi. Na yu bai kam insait long sip, yu, na ol pikinini man bilong yu, na meri bilong yu, na ol meri bilong ol pikinini man bilong yu.

6:19  Na bilong olgeta wan wan samting i stap laip long olgeta kain bodi, tupela bilong olgeta wan wan kain yu bai bringim insait long sip, bilong lukautim ol long stap laip wantaim yu. Ol bai stap man na meri.

6:20  Bilong ol pisin i bihainim kain bilong ol, na bilong ol bulmakau samting i bihainim kain bilong ol, na bilong olgeta wan wan samting i wokabaut long bel bilong dispela graun i bihainim kain bilong ol, tupela bilong olgeta wan wan kain bai kam long yu, bilong lukautim ol i ken stap laip.

6:21  Na yu mas kisim i kam long yu bilong olgeta kaikai, dispela ol samting i save kaikai, na yu bai bungim dispela i kam long yu. Na dispela bai stap kaikai bilong yu, na bilong ol.

6:22  ¶ Olsem tasol Noa i mekim. Bilong bihainim olgeta tok strong bilong God, em i mekim olsem.

Chapter 7

7:1  ¶ Na BIKPELA i tokim Noa, Yu kam, na olgeta hauslain bilong yu, insait long sip. Long wanem, Mi bin luksave olsem yu stap stretpela long ai bilong Mi insait long dispela lain tumbuna.

7:2  Bilong olgeta wan wan animal i klin yu bai kisim i kam long yu sevenpela sevenpela, man wantaim meri bilong en. Na bilong ol animal husat i no klin yu bai kisim tupela, man na meri bilong en.

7:3  Bilong ol pisin tu bilong skai yu bai kisim sevenpela sevenpela, man na meri, bilong holimpas pikinini kaikai i stap laip antap long pes bilong dispela graun olgeta.

7:4  Long wanem, sevenpela de i stap yet, na Mi bai mekim ren long kam antap long dispela graun 40-pela de na 40-pela nait. Na olgeta wan wan samting i stap laip, dispela Mi bin wokim, bai Mi bagarapim olgeta i lusim pes bilong dispela graun.

7:5  ¶ Na Noa i mekim bilong bihainim olgeta dispela samting BIKPELA i tok strong long em.

7:6  Na Noa i gat 600 krismas taim tait bilong ol wara i stap antap long dispela graun.

7:7  Na Noa i go insait, na ol pikinini man bilong em, na meri bilong em, na ol meri bilong ol pikinini man bilong em, insait long sip, bilong wanem, tait bilong ol wara bai kam.

7:8  Bilong ol animal i klin, na bilong ol animal i no klin, na bilong ol pisin, na bilong olgeta wan wan samting husat i wokabaut long bel long graun,

7:9  Ol dispela i go insait tupela na tupela long Noa insait long sip i go, man na meri, olsem God i bin tok strong long Noa.

7:10  Na em i kamap olsem bihain long sevenpela de, long tait bilong ol wara i stap antap long dispela graun.

7:11  ¶ Long namba 600 yia bilong laip bilong Noa, long namba tu mun, long namba 17 de bilong mun, long dispela de stret God i brukim olgeta as bilong ai bilong wara i sut i stap daunbilo tru, na Em i opim ol windo bilong heven.

7:12  Na ren i stap antap long graun 40-pela de na 40-pela nait.

7:13  ¶ Long dispela de stret Noa, na Siem, na Ham, na Jafet, ol pikinini man bilong Noa, na meri bilong Noa, na tripela meri bilong ol pikinini man bilong Noa wantaim ol, i go insait long sip,

7:14  Ol, na olgeta wan wan animal i bihainim kain bilong em, na olgeta bulmakau samting i bihainim kain bilong ol, na olgeta wan wan samting i wokabaut long bel long antap long dispela graun i bihainim kain bilong em, na olgeta wan wan pisin i bihainim kain bilong em, olgeta wan wan pisin bilong olgeta wan wan kain.

7:15  Na ol i go insait i go long Noa insait long sip, tupela na tupela bilong olgeta samting i gat bodi,we win bilong laip i stap insait long ol.

7:16  Na ol husat i go insait, i go insait man na meri bilong olgeta samting i gat bodi, olsem God i tok strong long em. Na BIKPELA i pasim em insait.

7:17  ¶ Na tait i stap 40-pela de antap long dispela graun. Na ol wara i kamap bikpela moa, na karim sip i go antap, na ol wara i litimapim sip i lusim graun i go antap.

7:18  Na ol wara i win, na i kamap bikpela moa tru antap long dispela graun. Na sip i raun antap long pes bilong ol wara.

7:19  Na ol wara i win planti moa yet antap long dispela graun. Na wara i karamapim olgeta liklik maunten i antap, husat i stap aninit long olgeta hap bilong heven.

7:20  Ol wara i bin winim ol inap long 15-pela kyubit antap. Na wara i karamapim ol maunten.

7:21  ¶ Na olgeta samting i gat bodi i muv antap long dispela graun i dai, bilong ol pisin, na bilong ol bulmakau samting, na bilong ol animal, na bilong olgeta wan wan samting i wokabaut long bel antap long dispela graun, na olgeta wan wan man wantaim.

7:22  Olgeta insait long nus bilong husat i gat win bilong laip, bilong olgeta samting i stap long graun i drai, i dai.

7:23  Na olgeta wan wan samting i stap laip God i bagarapim olgeta, dispela i stap antap long pes bilong dispela graun, man, na ol bulmakau samting, na ol samting i wokabaut long bel, na ol pisin bilong heven wantaim. Na God i bagarapim ol olgeta long dispela graun. Na Noa tasol i stap laip, na ol husat i stap wantaim em insait long sip.

7:24  Na ol wara i win antap long dispela graun 150 de.

Chapter 8

8:1  ¶ Na God i tingim gen Noa, na olgeta wan wan samting i stap laip, na olgeta bulmakau samting i s tap wantaim em insait long sip. Na God i mekim wanpela win long ran antap long dispela graun, na ol wara i go daun.

8:2  God i pasim ai bilong wara i sut tu bilong daunbilo na ol windo bilong heven, na ren i kam long heven i pas.

8:3  Na ol wara i go bek i lusim pes bilong dispela graun olgeta taim. Na bihain long dispela 150 de ol wara i go daun.

8:4  ¶ Na sip i sindaun long namba seven mun, long namba 17 de bilong mun, antap long ol maunten bilong Ararat.

8:5  Na ol wara i wok long i go daun olgeta taim inap long namba ten mun. Long namba ten mun, long namba wan de bilong mun, ol i lukim ol het bilong ol maunten.

8:6  ¶ Na em i kamap olsem long pinis bilong 40-pela de, long Noa i opim windo bilong dispela sip em i bin wokim.

8:7  Na em i salim wanpela kotkot i go ausait, husat i kam i go ausait, inap long ol wara i drai pinis i lusim pes bilong dispela graun.

8:8  Na tu em i salim wanpela balus i lusim em i go, bilong luksave sapos ol wara i go daun pinis i lusim pes bilong dispela graun, o nogat.

8:9  Tasol dispela balus i no lukim ples bilong putim aninit bilong fut bilong en, na em i kam bek long Noa insait long sip, long wanem, ol wara i stap antap long pes bilong dispela graun olgeta. Nau em i putim han bilong em i go ausait, na kisim em, na pulim em i kam long em insait long sip.

8:10  Na em i stap yet arapela sevenpela de moa. Na gen em i salim pisin balus i go ausait long sip.

8:11  Na balus i kam insait long em long apinun tru. Na, harim, long maus bilong em gat wanpela lip bilong diwai oliv em i pulim i lusim diwai. Olsem na Noa i save long ol wara i go daun i lusim pes bilong dispela graun.

8:12  Na em i stap yet arapela sevenpela de. Na em i salim balus i go ausait, husat i no kam bek gen long em moa liklik.

8:13  ¶ Na em i kamap olsem long namba 601 yia, long namba wan mun, long namba wan de bilong mun, ol wara i go drai pinis i lusim pes bilong dispela graun. Na Noa i rausim karamap bilong sip, na em i lukluk, na, lukim, pes bilong dispela graun i drai.

8:14  Na long namba tu mun, long namba 27 de bilong mun, graun i drai pinis.

8:15  ¶ Na God i tokim Noa, i spik,

8:16  Go ausait long sip, yu, na meri bilong yu, na ol pikinini man bilong yu, na ol meri bilong ol pikinini man bilong yu wantaim yu.

8:17  Bringim i kam ausait wantaim yu olgeta wan wan samting i stap laip husat i stap wantaim yu, bilong olgeta samting i gat bodi, bilong ol pisin, na bilong ol bulmakau samting, na bilong olgeta wan wan samting husat i save wokabaut long bel antap long dispela graun wantaim, inap long ol i ken kamapim pikinini planti moa yet long dispela graun, na karim ol dispela pikinini, na kamap planti moa antap long dispela graun.

8:18  Na Noa i go ausait, na ol pikinini man bilong em, na meri bilong em, na ol meri bilong ol pikinini man bilong em wantaim em.

8:19  Olgeta wan wan animal, olgeta wan wan samting i wokabaut long bel, na olgeta wan wan pisin, na wanem kain samting i wokabaut long bel antap long dispela graun, i bihainim ol kain bilong ol, i go ausait long sip.

8:20  ¶ Na Noa i wokim wanpela alta i go long BIKPELA. Na em i kisim bilong olgeta wan wan animal i klin, na bilong olgeta wan wan pisin i klin, na ofaim ol ofa i kuk olgeta antap long paia.

8:21  Na BIKPELA i smelim wanpela switpela smel. Na, BIKPELA i tok insait long bel bilong Em, Mi bai i no inap putim tok nogut antap long graun moa liklik bilong tingim nem bilong man. Long wanem, tingting nating bilong bel bilong man em i nogut i stat long taim em i yangpela. Na tu bai Mi no inap paitim moa liklik olgeta wan wan samting i stap laip, olsem Mi bin mekim.

8:22  Taim dispela graun i stap yet, taim bilong planim pikinini kaikai na taim bilong kamautim kaikai, na taim kol na taim hat, na taim bilong biksan na taim bilong bikpela kol, na de na nait, bai i no inap pinis.

Chapter 9

9:1  ¶ Na God i blesim Noa na ol pikinini man bilong em, na tokim ol, Karim planti pikinini, na kamap planti moa, na pulapim dispela graun.

9:2  Na pret long yupela na pret tru long yupela bai stap antap long olgeta wan wan animal bilong dispela graun, na antap long olgeta wan wan pisin bilong skai, antap long olgeta samting i muv antap long dispela graun, na antap long olgeta pis bilong solwara. Mi givim ol i go long han bilong yupela.

9:3  Olgeta wan wan samting i muv husat i stap laip bai stap kaikai long yupela. Yes, olsem grinpela sayor Mi bin givim yupela olgeta samting.

9:4  Tasol mit wantaim laip bilong en, dispela em i blut bilong en, bai yupela i no inap kaikai.

9:5  Na tru tumas, blut bilong yupela bilong ol laip bilong yupela bai Mi strong long askim long en. Long han bilong olgeta wan wan animal bai mi strong long askim long dispela, na long han bilong man. Long han bilong brata bilong olgeta wan wan man bai Mi strong long askim bilong long laip bilong man.

9:6  Husat man i kapsaitim blut bilong man, long man bai blut bilong em kapsait. Long wanem, long piksa bilong God Em i wokim man.

9:7  Na yupela, yupela karim kaikai, na kamap planti moa. Karim planti moa yet long dispela graun, na kamap planti moa insait long en.

9:8  ¶ Na God i tokim Noa, na ol pikinini man bilong em wantaim em, i spik,

9:9  Na Mi, lukim, Mi wokim kontrak bilong Mi wantaim yupela, na wantaim ol tumbuna pikinini bihain long yupela,

9:10  Na wantaim olgeta wan wan animal i stap laip husat i stap wantaim yupela, bilong ol pisin, bilong ol bulmakau samting, na bilong olgeta wan wan animal bilong dispela graun wantaim yupela, long olgeta husat i lusim sip i go ausait, long olgeta wan wan animal bilong dispela graun.

9:11  Na Mi bai wokim kontrak bilong Mi wantaim yupela. Na tu ol wara bilong wara tait bai i no inap bagarapim olgeta samting i gat bodi moa liklik. Na tu bai i no gat moa liklik wanpela tait bilong bagarapim olgeta dispela graun.

9:12  ¶ Na God i tok, Dispela em i mak bilong dispela kontrak Mi wokim namel long Mi na yupela na olgeta wan wan samting i stap laip, dispela i stap wantaim yupela, bilong ol lain tumbuna i no inap long pinis.

9:13  Mi putim renbo bilong Mi long klaut, na em bai stap wanpela mak bilong wanpela kontrak namel long Mi na dispela graun.

9:14  Na bai em i kamap olsem, Taim Mi bringim wanpela klaut antap long dispela graun, long bai ol man i lukim renbo long dispela klaut.

9:15  Na Mi bai tingim gen kontrak bilong Mi, dispela i stap namel long Mi na yupela na olgeta wan wan samting i stap laip long olgeta samting i gat bodi. Na ol wara bai i no inap kamap tait moa bilong bagarapim olgeta samting i gat bodi.

9:16  Na renbo bai i stap long klaut. Na Mi bai lukim dispela, inap long Mi ken holim tingting long dispela kontrak bilong oltaim namel long God na olgeta wan wan samting i stap laip bilong olgeta samting i gat bodi antap long dispela graun.

9:17  Na God i tokim Noa, Dispela em mak bilong kontrak, dispela Mi bin wokim namel long Mi na olgeta samting i gat bodi husat i stap antap long dispela graun.

9:18  ¶ Na ol pikinini man bilong Noa, husat i go ausait long sip, em Siem, na Ham, na Jafet. Na Ham em i papa bilong Kenan.

9:19  Ol dispela em tripela pikinini man bilong Noa. Na long ol, ol i karamapim dispela graun olgeta.

9:20  Na Noa i stat long stap wanpela man bilong lukautim gaden, na em i planim wanpela gaden wain.

9:21  Na em i dringim bilong dispela wain, na em i spak. Na em i stap skin nating insait long haus sel bilong em.

9:22  Na Ham, papa bilong Kenan, i lukim skin nating bilong papa bilong em, na tokim tupela brata bilong em ausait.

9:23  Na Siem wantaim Jafet i kisim wanpela klos, na slipim dispela antap long ol sol bilong han bilong tupela, na tanim baksait na wokabaut i go, na karamapim skin nating papa bilong ol. Na ol pes bilong ol i lukluk i go baksait, na ol i no lukim skin nating bilong papa bilong ol.

9:24  ¶ Na Noa i kirap long wain bilong em, na em i save wanem samting pikinini man bilong en i yangpela moa i bin mekim long em.

9:25  Na em i tok, Tok nogut i stap antap long Kenan. Wanpela wokboi bilong ol wokboi bai em i stap long ol brata bilong em.

9:26  Na em i tok, Blesing i stap long God BIKPELA bilong Siem, Na Kenan bai stap wokboi bilong em.

9:27  God bai mekim Jafet i kamap bikpela, na em bai stap long ol haus sel bilong Siem. Na Kenan bai stap wokboi bilong em.

9:28  ¶ Na Noa i stap laip bihain long tait 350 yia.

9:29  Na olgeta de bilong Noa em 950 yia, na em i dai.

Chapter 10

10:1  ¶ Nau ol dispela em ol lain tumbuna bilong ol pikinini man bilong Noa, Siem, Ham, na Jafet. Na long ol ol meri i karim ol pikinini man bihain long tait.

10:2  Ol pikinini man bilong Jafet, Gomer, na Megok, na Madai, na Javan, na Tubal, na Mesek, na Tiras.

10:3  Na ol pikinini man bilong Gomer, Askenas, na Rifat, na Togarma.

10:4  Na ol pikinini man bilong Javan, Elisa, na Tarsis, Kitim, na Dodanim.

10:5  Long ol dispela ol i brukim ol nambis bilong ol manmeri i no Ju long ol graun bilong ol. Olgeta wan wan i bihainim tok ples bilong em, i bihainim ol famili bilong ol, long ol kantri bilong ol.

10:6  ¶ Na ol pikinini man bilong Ham, Kus, na Misraim, na Fut, na Kenan.

10:7  Na ol pikinini man bilong Kus, Siba, na Havila, na Sapta, na Rama, na Sapteka. Na ol pikinini man bilong Rama, Siba, na Dedan.

10:8  Na Kus i kamapim Nimrot. Em i stat long kamap wanpela strongpela man long dispela graun.

10:9  Em i wanpela strongpela man bilong painim abus long ai bilong BIKPELA. Olsem na ol man i tok, Yes, olsem Nimrot, dispela strongpela man bilong painim abus long ai bilong BIKPELA.

10:10  Na stat bilong kingdom bilong en em Babel, na Erek, na Akat, na Kalne, long hap bilong Sinar.

10:11  Ausait long dispela hap Asur i go ausait, na wokim Niniva, na biktaun Rehobot, na Kala,

10:12  Na Resen namel long Niniva na Kala. Dispela stret em i wanpela biktaun tru.

10:13  Na Misraim i kamapim Ludim, na Anamim, na Lehabim, na Naftuhim,

10:14  Na Patrusim, na Kasluhim, (ausait long husat ol Filistin i kam,) na Kaptorim.

10:15  ¶ Na Kenan i kamapim Saidon, namba wan pikinini bilong em, na Het,

10:16  Na man Jebus, na man Amor, na man Girga,

10:17  Na man Hiv, na man Ark, na man Sini,

10:18  Na man Arvat, na man Sema, na man Hamat. Na bihain ol famili bilong ol lain Kenan i go nabaut ausait.

10:19  Na hap arere bilong ol lain Kenan em i stat long Saidon, olsem yu kam long Gerar, i go long Gasa, olsem yu go, i go long Sodom, na Gomora, na Atma, na Seboim, yes, i go long Lasa.

10:20  Ol dispela em ol pikinini man bilong Ham, i bihainim ol famili bilong ol, i bihainim ol tok ples bilong ol, insait long ol hap graun bilong ol, na insait long ol kantri bilong ol.

10:21  ¶ I go long Siem tu, tumbuna papa bilong olgeta pikinini bilong Eber, brata bilong Jafet, man i lapun moa, yes, long em meri i karim ol pikinini.

10:22  Ol pikinini bilong Siem, Elam, na Asur, na Arfaksat, na Lut, na Aram.

10:23  Na ol pikinini bilong Aram, Us, na Hul, na Geter, na Mas.

10:24  Na Arfaksat i kamapim Sala. Na Sala i kamapim Eber.

10:25  Na long Eber meri i karim tupela pikinini man. Nem bilong wanpela em Pelek. Long wanem, long ol de bilong em dispela graun i bruk. Na nem bilong brata bilong en em Joktan.

10:26  Na Joktan i kamapim Almodat, na Selep, na Hasarmavet, na Jera,

10:27  Na Hadoram, na Usal, na Dikla,

10:28  Na Obal, na Abimel, na Siba,

10:29  Na Ofir, na Havila, na Jobap. Olgeta ol dispela em ol pikinini man bilong Joktan.

10:30  Na ples bilong ol long stap i stat long Mesa, olsem yu go long Sefar, wanpela maunten long hap sankamap.

10:31  Ol dispela em ol pikinini man bilong Siem, i bihainim ol famili bilong ol, i bihainim ol tok ples bilong ol, long ol hap graun bilong ol, i bihainim ol kantri bilong ol.

10:32  Ol dispela em ol famili bilong ol pikinini man bilong Noa, i bihainim ol lain tumbuna bilong ol, long ol kantri bilong ol. Na long ol dispela ol kantri i bruk long dispela graun bihain long tait.

Chapter 11

11:1  ¶ Na olgeta dispela graun em i bilong wanpela tok ples, na bilong wanpela toktok.

11:2  Na em i kamap olsem, taim ol i lusim hap sankamap na wokabaut i go, long ol i lukim wanpela ples stret long hap bilong Sainar. Na ol i stap long dispela hap.

11:3  Na ol i tokim wanpela i go long narapela, Kaman, yumi wokim ol brik, na kukim ol tru. Na ol i yusim brik long senisim ston, na ol i bin yusim graun malumalu long senisim simen.

11:4  Na ol i tok, Kaman, yumi wokim wanpela biktaun na wanpela taua, husat antap bilong en i ken go inap long heven. Na yumi mekim wanpela nem bilong yumi, nogut yumi bruk nabaut long pes bilong dispela graun olgeta.

11:5  ¶ Na BIKPELA i kam daun bilong lukim dispela biktaun na dispela taua, dispela ol pikinini bilong ol man i wokim.

11:6  Na BIKPELA i tok, Lukim, ol manmeri i wanpela, na olgeta i gat wanpela tok ples. Na dispela ol i stat long mekim. Na nau i no gat wanpela samting bai i pasim ol, dispela ol i bin tingting strong long mekim.

11:7  Kaman, Yumi go daun, na long dispela hap paulim tok ples bilong ol, inap long ol i no inap save long toktok wanpela i go long ol arapela.

11:8  Olsem na BIKPELA i brukim ol nabaut i lusim dispela hap antap long pes bilong olgeta hap bilong dispela graun. Na ol i lusim wok bilong wokim dispela biktaun.

11:9  Olsem na ol i kolim nem bilong en Babel. Bilong wanem, long dispela hap BIKPELA i bin paulim tok ples bilong olgeta bilong dispela graun. Na long dispela hap BIKPELA i bin brukim ol nabaut antap long pes bilong dispela graun olgeta.

11:10  ¶ Ol dispela em ol lain tumbuna bilong Siem. Siem i gat 100 krismas, na em i kamapim Arfaksat, tupela yia bihain long tait.

11:11  Na Siem i stap laip bihain long em i kamapim Arfaksat 500 yia, na kamapim ol pikinini man na ol pikinini meri.

11:12  Na Arfaksat i stap laip 35-pela yia, na kamapim Sala.

11:13  Na Arfaksat i stap laip bihain long em i kamapim Sala 403 yia, na kamapim ol pikinini man na ol pikinini meri.

11:14  Na Sala i stap laip 30-pela yia, na kamapim Eber.

11:15  Na Sala i stap laip bihain long em i kamapim Eber 403 yia, na kamapim ol pikinini man na ol pikinini meri.

11:16  Na Eber i stap laip 34-pela yia, na kamapim Pelek.

11:17  Na Eber i stap laip bihain long em i kamapim Pelek 430 yia, na kamapim ol pikinini man na ol pikinini meri.

11:18  Na Pelek i stap laip 30-pela yia, na kamapim Reu.

11:19  Na Pelek i stap laip bihain long em i kamapim Reu 209 yia, na kamapim ol pikinini man na ol pikinini meri.

11:20  Na Reu i stap laip 32-pela yia, na kamapim Seruk.

11:21  Na Reu i stap laip bihain long em i kamapim Seruk 207 yia, na kamapim ol pikinini man na ol pikinini meri.

11:22  Na Seruk i stap laip 30-pela yia, na kamapim Nehor.

11:23  Na Seruk i stap laip bihain long em i kamapim Nehor 200 yia, na kamapim ol pikinini man na ol pikinini meri.

11:24  Na Nehor i stap laip 29-pela yia, na kamapim Tera.

11:25  Nehor i stap laip bihain long em i kamapim Tera 119 yia, na kamapim ol pikinini man na ol pikinini meri.

11:26  Na Tera i stap laip 70-pela yia, na kamapim Ebram, Nehor, na Haran.

11:27  ¶ Nau ol dispela em ol lain tumbuna bilong Tera. Tera i kamapim Ebram, Nehor, na Haran. Na Haran i kamapim Lot.

11:28  Na Haran i dai bipo long papa bilong em Tera long ples mama i karim em, long Ur bilong ol Kaldi.

11:29  Na Ebram na Nehor i kisim ol meri i kam long ol. Nem bilong meri bilong Ebram em Sarai. Na nem bilong meri bilong Nehor, Milka, pikinini meri bilong Haran, papa bilong Milka na papa bilong Iska.

11:30  Tasol Sarai i no inap long karim. Em i no gat wanpela pikinini.

11:31  Na Tera i kisim Ebram, pikinini man bilong em, na Lot, pikinini man bilong Haran, pikinini man bilong pikinini man bilong em, na Sarai, tambu pikinini meri bilong em, meri bilong pikinini man bilong em Ebram. Na ol i go ausait wantaim ol i lusim Ur bilong ol Kaldi, bilong go insait long hap bilong Kenan. Na ol i kamap long Haran, na stap long dispela hap.

11:32  Na ol de bilong Tera i em 205 yia. Na Tera i dai long Haran.

Chapter 12

12:1  ¶ Nau BIKPELA i bin tokim Ebram, Kisim yu yet i go ausait long kantri bilong yu, na lusim ol kandre bilong yu, na lusim hauslain bilong papa bilong yu, i go long wanpela hap graun, dispela Mi bai soim yu.

12:2  Na Mi bai mekim long yu wanpela bikpela kantri, na Mi bai blesim yu, na mekim nem bilong yu i kamap bikpela. Na yu bai stap wanpela blesing.

12:3  Na Mi bai blesim ol husat i blesim yu, na putim tok nogut antap long ol husat putim tok nogut antap long yu. Na insait long yu, olgeta famili bilong dispela graun bai kisim blesing.

12:4  ¶ Olsem na Ebram i lusim ples bilong em, olsem BIKPELA i bin tokim em. Na Lot i go wantaim em. Na Ebram i gat 75 krismas taim em i lusim Haran i go ausait.

12:5  Na Ebram i kisim Sarai, meri bilong em, na Lot, pikinini man bilong brata bilong em, na olgeta dispela kago ol i bin bungim, na ol dispela tewel ol i bin kisim long Haran. Na ol i go ausait i go long hap bilong Kenan. Na ol i kam long hap bilong Kenan.

12:6  ¶ Na Ebram i wokabaut namel long dispela hap graun i go long ples bilong Sikem, i go long ples bilong More. Na lain Kenan i stap nau long dispela hap graun.

12:7  Na BIKPELA i kamap ples klia long Ebram, na i tok, Bai Mi givim dispela hap graun long tumbuna pikinini bilong yu. Na long dispela hap em i wokim wanpela alta i go long BIKPELA, husat i bin kamap ples klia long em.

12:8  Na em i lusim dispela hap i go long wanpela maunten long hap sankamap bilong Betel, na sanapim haus sel bilong em, taim em i gat Betel long hap san i go daun, na Hai long hap sankamap. Na long dispela hap em i wokim wanpela alta i go long BIKPELA, na em i singaut long nem bilong BIKPELA.

12:9  Na Ebram i wokabaut i go, taim em i go yet long hap saut.

12:10  ¶ Na i gat wanpela bikpela taim hangre long dispela hap. Na Ebram i go daun long Isip bilong i stap waira long dispela hap. Long wanem, dispela bikpela taim hangre i strongpela long dispela hap.

12:11  Na em i kamap olsem, taim em i kam klostu bilong go insait long Isip, em i tokim Sarai, meri bilong em, Lukim nau, Mi save long yu stap wanpela naispela meri bilong lukluk long en.

12:12  Olsem na em bai kamap olsem, taim ol man Isip bai lukim yu, long ol bai tok, Dispela em i meri bilong em. Na ol bai kilim mi, tasol ol bai kisim bek yu i stap laip.

12:13  Toktok, mi askim plis, yu stap susa bilong mi. Inap long em i ken stap gut wantaim mi long sait bilong yu. Na tewel bilong mi bai stap laip bikos yu wokim olsem.

12:14  ¶ Na em i kamap olsem, long, taim Ebram i kam insait long Isip, ol man Isip i lukim dispela meri, long em i naispela tru.

12:15  Ol hetman tu bilong Fero i lukim em, na litimapim nem bilong em long ai bilong Fero. Na ol i kisim dispela meri i go insait long haus bilong Fero.

12:16  Na Fero i mekim gutpela pasin long Ebram bilong tingim nem bilong dispela meri. Na em i gat ol sipsip, na ol bulmakau man, na ol donki man, na ol wokboi, na ol wokmeri, na ol donki meri, na ol kemel.

12:17  Na BIKPELA i salim bikpela hevi long Fero na hauslain bilong em wantaim ol bikpela hevi tru, bilong tingim Sarai, meri bilong Ebram.

12:18  Na Fero i singautim Ebram, na tok, Dispela em wanem samting, dispela yu bin mekim long mi? Bilong wanem yu no bin tokim mi long em i meri bilong yu?

12:19  Bilong wanem yu tok, Em i susa bilong mi? Olsem tasol i gat sans long mi bin kisim em i kamap meri bilong mi. Olsem na nau yu lukim meri bilong yu, kisim em, na go long rot bilong yu.

12:20  Na Fero i tok strong long ol man bilong em long sait bilong em. Na ol i salim em i go, na meri bilong em, na olgeta samting em i gat.

Chapter 13

13:1  ¶ Na Ebram i go antap ausait long Isip, em, na meri bilong em, na olgeta samting em i gat, na Lot wantaim em, i go insait long hap saut.

13:2  Na Ebram em i maniman tru long ol bulmakau samting, long silva, na long gol.

13:3  Na em i go long ol wokabaut bilong em i lusim hap, yes, inap long Betel, i go long ples we haus sel bilong em i bin stap long stat, namel long Betel na Hai.

13:4  Em i go long ples bilong alta, dispela em i bin wokim long dispela hap long pastaim. Na long dispela hap Ebram i singaut long nem bilong BIKPELA.

13:5  ¶ Na Lot tu, husat i go wantaim Ebram, i gat ol lain sipsip, na ol lain bulmakau samting, na ol haus sel.

13:6  Na dispela hap graun i no inap long karim ol, inap long ol i ken stap wantaim. Long wanem, ol kago bilong ol i bikpela, inap long ol i no inap stap wantaim.

13:7  Na i gat wanpela pait namel long ol wokman bilong ol bulmakau samting bilong Ebram na ol wokman bilong ol bulmakau samting bilong Lot. Na lain Kenan na lain Peres i stap nau long dispela hap graun.

13:8  Na Ebram i tokim Lot, No ken larim pait i stap, mi askim plis long yu, namel long mi na yu, na namel long ol wokman i lukautim ol bulmakau bilong mi na ol wokman i lukautim ol bulmakau bilong yu. Long wanem, yumi stap ol brata.

13:9  Ating dispela graun olgeta i no stap long ai bilong yu? Brukim yu yet, mi askim plis long yu, i lusim mi. Sapos yu laik kisim han kais, orait bai mi go long han sut. O sapos yu lusim mi na go long han sut, orait bai mi go long han kais.

13:10  ¶ Na Lot i apim tupela ai bilong em na lukim olgeta ples stret bilong Jordan, long em i gat planti wara long olgeta wan wan hap, bipo BIKPELA i bagarapim Sodom na Gomora, yes, olsem gaden bilong BIKPELA, olsem hap bilong Isip, taim yu kam long Soar.

13:11  Nau Lot i makim bilong em olgeta ples stret bilong Jordan. Na Lot i wokabaut i go long hap sankamap. Na ol i brukim ol yet wanpela i lusim arapela.

13:12  Ebram i stap long hap bilong Kenan, na Lot i stap insait long ol biktaun bilong ples stret, na em i sanapim haus sel bilong em i lukluk i go long Sodom.

13:13  Tasol ol man bilong Sodom i stap ol man nogut na ol sinman long ai bilong BIKPELA planti moa yet.

13:14  ¶ Na BIKPELA i tokim Ebram, bihain long lot i lusim em, Apim nau tupela ai bilong yu, na lukluk long dispela ples we yu stap long en i go long hap not, na i go long hap saut, na i go long hap sankamap, na i go long hap san i go daun.

13:15  Long wanem, olgeta dispela hap graun yu lukim, long yu bai Mi givim dispela, na long tumbuna pikinini bilong yu inap oltaim oltaim.

13:16  Na Mi bai mekim ol tumbuna pikinini bilong yu olsem das bilong graun. Inap long sapos wanpela man i ken kaunim das bilong graun, orait bai ol i ken kaunim tumbuna pikinini bilong yu tu.

13:17  Kirap, wokabaut i go namel long dispela hap graun long longpela bilong en na long brait bilong en. Long wanem, Mi bai givim dispela long yu.

13:18  Nau Ebram i rausim haus sel bilong em, na kam na stap long ples stret bilong Mamri, dispela em stap long Hibron, na wokim long dispela hap wanpela alta i go long BIKPELA.

Chapter 14

14:1  ¶ Na em i kamap olsem long ol de bilong Amrafel, king bilong Sainar, na Ariok, king bilong Elasa, na Kedorlemer, king bilong Ilam, na Taidal, king bilong ol kantri,

14:2  Long ol dispela i wokim bikpela pait wantaim Bera, king bilong Sodom, na wantaim Birsa, king bilong Gomora, Sinap, king bilong Atma, na Semeber, king bilong Seboim na king bilong Bela, dispela em Soar.

14:3  Olgeta dispela i bung wantaim long ples daun bilong Sidim, dispela em i solwara sol.

14:4  12-pela yia ol i stap aninit long Kedorlemer, na long namba 13 yia ol i bikhet long em.

14:5  Na long namba 14 yia Kedorlemer i kam, na ol king husat i stap wantaim em, na paitim ol lain Refaim long Astarot Karnaim, na ol lain Sus long Ham, na ol lain Imim long Save Kiriataim,

14:6  Na ol lain Hor long maunten Sir bilong ol, inap long Elparan, dispela i stap klostu long ples i no gat man.

14:7  Na ol i go bek, na kam long En-mispat, dispela em Kedes, na paitim olgeta hap bilong kantri bilong ol lain Amalek, na tu ol lain Amor, husat i stap long Haseson-temar.

14:8  Na i gat i go ausait king bilong Sodom, na king bilong Gomora, na king bilong Atma, na king bilong Seboim, na king bilong Bela (dispela yet em Soar.) Na ol i bungim pait wantaim ol long ples daun bilong Sidim.

14:9  Ol i pait wantaim Kedorlemer, king bilong Ilam, na wantaim Taidal, king bilong ol kantri, na Amrafel, king bilong Sainar; na Ariok, king bilong Elasa. Fopela i pait wantaim faipela.

14:10  Na ples daun bilong Sidim i pulap long ol bikpela hul i gat graun malumalu. Na ol king bilong Sodom na Gomora i ranawe, na pundaun long dispela hap. Na ol husat i stap yet i ranawe i go long maunten.

14:11  Na ol i kisim i go olgeta kago bilong Sodom na Gomora, wantaim olgeta kaikai bilong ol, na go long rot bilong ol.

14:12  Na ol i kisim Lot, pikinini man bilong brata bilong Ebram, husat i stap long Sodom, na ol kago bilong em, na go.

14:13  ¶ Na i gat i kam wanpela husat i bin ranawe, na em i tokim man Hibru Ebram. Long wanem, em i stap long ples stret bilong man Amor Mamri, brata bilong Eskol, na brata bilong Aner. Na ol dispela i gat kontrak bilong wok wantaim wantaim Ebram.

14:14  Na taim Ebram i harim long ol i karim brata bilong em i go kalabus, em i givim ol samting bilong pait long ol wokboi bilong em em i bin skulim, husat mama bilong ol i bin karim long haus bilong em yet, 318, na ranim ol i go inap long Dan.

14:15  Na em i brukim em yet bilong birua long ol, em na ol wokboi bilong em, long nait, na paitim ol, na ran bihainim ol i go inap long Hoba, dispela i stap long han kais bilong Damaskas.

14:16  Na em i bringim bek olgeta kago, na tu em i bringim gen brata bilong em Lot, na ol kago bilong em, na ol meri tu, na ol manmeri.

14:17  ¶ Na king bilong Sodom i go ausait bilong bungim em bihain long em i kam bek long bikpela kilim i dai bilong Kedorlemer, na ol king husat stap wantaim em long ples daun bilong Save, dispela em i ples daun bilong king.

14:18  Na Melkisedek, king bilong Selem, i bringim bret na wain i kam ausait. Na em i pris bilong God i antap olgeta.

14:19  Na em i blesim em, na tok, Blesing i stap long Ebram long God i antap olgeta, husat i holimpas heven na dispela graun.

14:20  Na blesing i stap long God i antap olgeta, husat i bin givim ol birua bilong yu i go long han bilong yu. Na em i givim em ol namba ten hap bilong olgeta samting.

14:21  ¶ Na king bilong Sodom i tokim Ebram, Givim mi ol manmeri, na yu kisim ol kago long yu yet.

14:22  Na Ebram i tokim king bilong Sodom, Mi bin litimapim han bilong mi i go long BIKPELA, God i antap olgeta, husat i holimpas heven na dispela graun,

14:23  Long mi bai i no inap kisim long wanpela tret, yes, inap long wanpela string bilong su, na long mi bai i no inap kisim wanpela samting, dispela i bilong yu, nogut yu ken tok, Mi bin mekim Ebram long kamap maniman.

14:24  Ol dispela samting tasol ol yangpela man i kaikai tasol, na hap skel bilong ol man husat i go wantaim mi, Aner na Eskol na Mamri. Larim ol kisim hap skel bilong ol.

Chapter 15

15:1  ¶ Bihain long ol dispela samting tok bilong BIKPELA i kam long Ebram long wanpela driman samting, i spik, No ken pret, Ebram. Mi stap plang bilong yu, na bikpela pe bilong yu i planti moa yet.

15:2  ¶ Na Ebram i tok, GOD Bikpela, bai Yu givim wanem samting long mi, taim yumi luksave long mi no gat pikinini, na man bilong lukautim haus bilong mi em dispela Eliesar bilong Damaskas?

15:3  Na Ebram i tok, Lukim, long mi Yu no bin givim tumbuna pikinini. Na, harim, wanpela husat mama i karim insait long haus bilong mi em i pikinini i kisim samting long papa bilong mi.

15:4  Na, lukim, tok bilong BIKPELA i kam long em, i spik, Dispela bai i no inap stap pikinini bilong kisim samting long papa bilong yu. Tasol em husat bai kam ausait long rop bilong bel bilong yu yet bai stap pikinini bilong kisim samting long papa bilong yu.

15:5  Na Em i bringim em i go ausait, na tok, Lukluk nau i go long heven, na kaunim ol sta, sapos yu stap inap long kaunim ol. Na Em i tokim em, Olsem tasol bai ol tumbuna pikinini bilong yu i stap.

15:6  Na em i bilip long BIKPELA. Na Em i kaunim dispela bilong stap stretpela pasin long em.

15:7  ¶ Na Em i tokim em, Mi BIKPELA husat i bringim yu ausait long Ur bilong ol Kaldi, bilong givim yu dispela graun olsem samting papa i givim long pikinini.

15:8  Na em i tok, GOD Bikpela, olsem wanem bai mi save long bai mi kisim dispela olsem samting papa i givim long pikinini?

15:9  Na Em i tokim em, Kisim bilong Mi wanpela bulmakau meri i gat tripela krismas, na wanpela meme meri i gat tripela krismas, na wanpela sipsip man i gat tripela krismas, na wanpela balus turtel, na wanpela yangpela balus pidgin.

15:10  Na em i kisim olgeta dispela i kam long Em, na brukim ol long namel bilong ol, na slipim olgeta wan wan hap wanpela i pas klostu long narapela. Tasol ol pisin em i no brukim.

15:11  Na taim ol pisin i bin kam daun antap long ol dispela daibodi, Ebram i ranim ol i go.

15:12  ¶ Na taim san i wok long i go daun, wanpela slip i dip i kam antap long Ebram. Na, harim, wanpela bikpela tudak i pretim man nogut tru i pundaun antap long em.

15:13  Na Em i tokim Ebram, Save long em i tru tumas long tumbuna pikinini bilong yu bai i stap wanpela ausait man hap graun i no bilong ol, ol na bai stap aninit long ol. Na ol bai givim hevi long ol 400 yia.

15:14  Na tu dispela kantri, husat ol bai stap aninit long en, Mi bai jasim. Na bihain long en bai ol i kam ausait wantaim bikpela kago.

15:15  Na yu bai go long ol tumbuna papa bilong yu wantaim bel isi. Ol bai planim yu taim yu lapun tru.

15:16  Tasol long namba foa lain tumbuna ol bai kam hia gen. Long wanem, sin nogut bilong ol lain Amor em i no pulap yet.

15:17  ¶ Na em i kamap olsem, long, taim san i go daun, na em i tudak, lukim wanpela bikpela aven i smok, na wanpela lam i paia husat i go namel long ol dispela hap mit.

15:18  Long dispela de stret BIKPELA i wokim wanpela kontrak wantaim Ebram, i spik, Long tumbuna pikinini bilong yu Mi bin givim dispela hap, i stat long riva bilong Isip i go long bikpela riva, riva Yufretis,

15:19  Ol lain Ken, na ol lain Kenes, na ol lain Kadmon,

15:20  Na ol lain Hit, na ol lain Peres, na ol lain Refaim,

15:21  Na ol lain Amor, na ol lain Kenan, na ol lain Girga, na ol lain Jebus.

Chapter 16

16:1  ¶ Nau Sarai, meri bilong Ebram, i no karim pikinini long em. Na em i gat wanpela wokmeri, wanpela meri Isip, husat nem bilong en em Hegar.

16:2  Na Sarai i tokim Ebram, Lukim nau, BIKPELA i bin pasim mi long karim. Mi askim plis long yu, go insait i go long wokmeri bilong mi. Em i ken stap olsem long mi ken kisim ol pikinini long em. Na Ebram i bihainim nek bilong Sarai.

16:3  Na Sarai, meri bilong Ebram, i kisim Hegar, wokmeri bilong en, meri Isip, bihain long Ebram i stap tenpela yia long hap bilong Kenan, na givim em long man bilong em Ebram bilong stap meri bilong em.

16:4  ¶ Na em i go insait i go long Hegar, na em i kisim bel. Na taim em i luksave long em i bin kisim bel pinis, bosmeri bilong em i samting nating long ai bilong em.

16:5  Na Sarai i tokim Ebram, Rong bilong mi i stap antap long yu. Mi bin givim wokmeri bilong mi long bros bilong yu. Na taim em i luksave long em i bin kisim bel, mi stap samting nating long ai bilong em. BIKPELA i ken stap jas namel long mi na yu.

16:6  Tasol Ebram i tokim Sarai, Lukim, wokmeri bilong yu i stap long han bilong yu. Mekim long em olsem em i amamasim yu. Na taim Sarai i mekim pasin i hat tru long em, em i ranawe long pes bilong em.

16:7  ¶ Na ensel bilong BIKPELA i lukim em klostu long wanpela ai bilong wara i sut, long ples i no gat man, klostu long ai bilong wara i sut long rot i go long Sur.

16:8  Na Em i tok, Hegar, wokmeri bilong Sarai, yu kam long we? Na bai yu go we? Na em i tok, Mi ranawe long pes bilong bosmeri bilong mi, Sarai.

16:9  Na ensel bilong BIKPELA i tokim em, Go bek long bosmeri bilong yu, na yu putim yu yet aninit long tupela han bilong em.

16:10  ¶ Na ensel bilong BIKPELA i tokim em, Mi bai mekim tumbuna pikinini bilong yu i kamap planti moa planti moa yet, inap long ol bai i no inap long kaunim, long wanem, ol i bikpela lain tru.

16:11  Na ensel bilong BIKPELA i tokim em, Lukim, yu gat bel, na yu bai karim wanpela pikinini man, na yu bai kolim nem bilong em Ismael, bilong wanem, BIKPELA i bin harim long hevi bilong yu.

16:12  Na em bai stap wanpela wailman. Na han bilong em bai birua long olgeta wan wan man, na han bilong olgeta wan wan man bai birua long em. Na em bai stap long pes bilong olgeta brata bilong em.

16:13  Na em i kolim nem bilong BIKPELA husat toktok long em, Yu God i lukim mi. Long wanem, em i tok, Ating mi tu hia i bin lukluk i bihainim Em husat i lukim mi?

16:14  Olsem na ol i kolim dispela hul wara Biar-lahairoi. Lukim, em i stap namel long Kedes na Beret.

16:15  ¶ Na Hegar i karim long Ebram wanpela pikinini man. Na Ebram i kolim nem bilong pikinini man bilong em, husat Hegar i karim, Ismael.

16:16  Na Ebram i gat 86 krismas, taim Hegar i karim Ismael long Ebram.

Chapter 17

17:1  ¶ Na taim Ebram i gat 99 krismas, BIKPELA i kamap ples klia long Ebram, na toktok i go long em, Mi God i Gat Olgeta Strong. Wokabaut long pes bilong Mi, na yu stap inap tru.

17:2  Na Mi bai wokim kontrak bilong Mi namel long Mi na yu, na Mi bai mekim yu i kamap planti moa planti moa yet.

17:3  Na Ebram i pundaun long pes bilong em. Na God i toktok wantaim em, i spik,

17:4  ¶ Long sait bilong Mi, lukim, kontrak bilong Mi i stap wantaim yu, na yu bai stap papa bilong planti kantri.

17:5  Na tu ol bai i no inap kolim nem bilong yu Ebram moa, tasol nem bilong yu bai stap Ebraham. Long wanem, Mi bin mekim yu stap papa bilong planti kantri.

17:6  Na Mi bai mekim yu i karim planti kaikai planti moa yet, na Mi bai mekim ol kantri i kamaut long yu, na ol king bai i kamaut long yu.

17:7  ¶ Na Mi bai strongim kontrak bilong Mi namel long Mi na yu na tumbuna pikinini bilong yu bihain long yu long ol lain tumbuna bilong ol long wanpela kontrak bilong oltaim oltaim, long stap wanpela God long yu, na long tumbuna pikinini bilong yu i kam bihain long yu.

17:8  Na Mi bai givim long yu, na tumbuna pikinini bilong yu i kam bihain long yu, dispela hap graun we yu stap wanpela ausait man long en, olgeta hap bilong Kenan, bilong wanpela holimpas bilong oltaim oltaim. Na Mi bai stap God bilong ol.

17:9  Na God i tokim Ebraham, Olsem na yu bai holimpas kontrak bilong Mi, yu, na tumbuna pikinini bilong yu i kam bihain long yu long ol lain tumbuna bilong ol.

17:10  Dispela em kontrak bilong Mi, dispela yu bai holimpas, namel long Mi na yu na tumbuna pikinini i kam bihain long yu. Yupela bai katim skin bilong olgeta wan wan pikinini man namel long yupela.

17:11  Na yupela bai katim skin bilong laplap bilong sem bilong yupela. Na dispela bai stap wanpela mak bilong dispela kontrak namel long Mi na yupela.

17:12  Na em husat i gat etpela de yupela bai katim skin bilong em namel long yupela, olgeta wan wan pikinini man long lain tumbuna bilong yupela, em husat mama i karim long haus, o husat yupela i baim wantaim mani bilong wanpela bilong ol ausait man, husat no tumbuna pikinini bilong yu.

17:13  Em husat mama i karim insait long hauslain bilong yu, na em husat yupela i baim wantaim man, i gat nid long yupela i katim skin bilong em. Na kontrak bilong Mi bai stap insait long skin bilong yupela bilong wanpela kontrak bilong oltaim oltaim.

17:14  Na pikinini man husat ol i no katim skin, husat skin bilong laplap bilong sem bilong em ol i no katim, dispela tewel yupela bai rausim long lain manmeri bilong em. Em i bin brukim kontrak bilong Mi.

17:15  ¶ Na God i tokim Ebraham, Long sait bilong Sarai, meri bilong yu, yu bai i no inap kolim nem bilong em Sarai, tasol nem bilong em bai stap Sara.

17:16  Na Mi bai blesim em, na givim yu wanpela pikinini man tu long em. Yes, Mi bai blesim em, na em bai i stap wanpela mama bilong ol kantri. Ol king bilong ol manmeri bai i kamaut long em.

17:17  Nau Ebraham i pundaun long pes bilong en, na lap, na tok insait long bel bilong em, Bai meri i karim wanpela pikinini long em husat i gat 100 krismas? Na Sara, husat i gat 90-pela krismas, bai karim?

17:18  Na Ebraham i tokim God, O sapos Ismael i ken i stap laip long ai bilong Yu!

17:19  Na God i tok, Tru tumas, Sara, meri bilong yu, bai karim wanpela pikinini man long yu. Na yu bai kolim nem bilong em Aisak. Na Mi bai strongim kontrak bilong Mi wantaim bilong wanpela kontrak bilong oltaim oltaim, na wantaim tumbuna pikinini bilong em bihain long em.

17:20  Na long sait bilong Ismael, Mi bin harim yu. Lukim, Mi bin blesim em. Na Mi bai mekim em long karim kaikai, na Mi bai mekim em i kamap planti moa planti moa yet. 12-pela bikman bai em i kamapim, na Mi bai mekim em i kamap wanpela bikpela kantri.

17:21  Tasol kontrak bilong Mi bai Mi strongim wantaim Aisak, husat Sara bai karim long yu long dispela taim yet long yia bihain.

17:22  Na Em i lusim dispela taim bilong toktok wantaim em, na God i lusim Ebraham na i go antap.

17:23  ¶ Na Ebraham i kisim pikinini man bilong em Ismael, na olgeta husat ol meri i karim insait long hauslain bilong em, na olgeta husat em i baim wantaim mani bilong en, olgeta wan wan man namel long ol man bilong hauslain bilong Ebraham, na katim skin bilong laplap bilong sem bilong ol long dispela de stret, olsem God i bin tokim em.

17:24  Na Ebraham i gat 99 krismas, taim ol i katim skin bilong laplap bilong sem bilong em.

17:25  Na Ismael, pikinini man bilong em, i gat 13 krismas, taim ol i katim skin bilong laplap bilong sem bilong em.

17:26  Long dispela de stret ol i katim skin bilong Ebraham, na Ismael, pikinini man bilong em.

17:27  Na olgeta man bilong hauslain bilong em wantaim em, husat meri i karim long dispela hauslain, na husat em i baim wantaim mani long ol ausait man, ol i katim skin bilong ol wantaim em.

Chapter 18

18:1  ¶ Na BIKPELA i kamap ples klia long em long ol ples stret bilong Mamri. Na em i sindaun long dua bilong haus sel long taim bilong de san i hat moa.

18:2  Na em i apim tupela ai bilong em na i lukluk, na, harim, tripela man i sanap klostu long em. Na taim em i lukim ol, em i lusim dua bilong haus sel na ran bilong bungim ol, na lindaunim em yet i go long graun,

18:3  Na tok, Bikpela bilong mi, sapos nau mi bin painim pinis amamas long ai bilong Yu, mi askim Yu plis, Yu no ken lusim wokboi bilong Yu.

18:4  Larim mi go kisim liklik wara, mi askim yupela plis, na wasim ol lek bilong yupela, na yupela i ken malolo aninit long diwai.

18:5  Na mi bai go kisim wanpela hap bret, na yupela i ken givim bel isi long ol bel bilong yupela. Bihain long dispela yupela i bai lusim hia. Long wanem, olsem na yupela i kam long wokboi bilong yupela. Na ol i tok, Mekim olsem, olsem yu bin tok.

18:6  Na Ebraham i hariap i go insait long haus sel i go long Sara, na tok, Redim hariap tripela skel bilong naispela plaua, wokim dispela, na wokim ol liklik kek antap long ples paia.

18:7  Na Ebraham i ran i go long lain bulmakau, na kisim wanpela yangpela bulmakau i malumalu na gutpela, na givim dispela long wanpela yangpela man. Na em i hariap long redim dispela.

18:8  Na em i kisim bata na susu, na dispela yangpela bulmakau husat em i bin redim, na putim dispela long ai bilong ol. Na em i sanap klostu long ol aninit long diwai, na ol i bin kaikai.

18:9  ¶ Na ol i tokim em, Meri bilong yu Sara i stap we? Na em i tok, Lukim, insait long haus sel.

18:10  Na Em i tok, Tru tumas, Mi bai kam bek long yu long bihainim taim bilong laip. Na, harim, meri bilong yu Sara bai karim wanpela pikinini man. Na Sara i harim dispela insait long dua bilong haus sel, dispela i stap baksait bilong Em.

18:11  Nau Ebraham na Sara i lapun pinis na tupela i gat planti krismas pinis. Na pasin bilong ol meri i pinis long Sara.

18:12  Olsem na Sara i lap insait long em yet, i spik, Bihain long mi wok long kamap lapun pinis bai mi gat amamas, na taim bikman bilong mi i stap lapun tu?

18:13  Na BIKPELA i tokim Ebraham, Bilong wanem Sara i lap, i spik, Tru tumas, bai mi karim pikinini, husat i lapun pinis?

18:14  Ating i gat wanpela samting i hat tumas long BIKPELA? Long taim Mi makim Mi bai kam bek long yu, long bihainim taim bilong laip, na Sara bai karim wanpela pikinini man.

18:15  Na Sara i tok nogat, i spik, Mi no lap. Long wanem, em i pret. Na Em i tok, Nogat. Tasol yu bin lap.

18:16  ¶ Na ol man i kirap long dispela hap, na lukluk i go long Sodom. Na Ebraham i go wantaim ol bilong bringim ol i go long rot.

18:17  Na BIKPELA i tok, Bai Mi haitim long Ebraham dispela samting, dispela Mi mekim,

18:18  Taim yumi luksave long, tru tumas, Ebraham bai kamap wanpela bikpela na strongpela kantri, na olgeta kantri bilong dispela graun bai kisim blesing insait long em ?

18:19  Long wanem, Mi save long em, long em bai tok strong long ol pikinini bilong em na hauslain bilong em bihain long em, inap long ol bai holimpas pasin bilong BIKPELA, bilong mekim stretpela kot na pasin bilong jasim. Inap long BIKPELA i ken bringim antap long Ebraham dispela samting Em i bin toktok long sait bilong em.

18:20  Na BIKPELA i tok, Bikos krai bilong Sodom na Gomora i bikpela, na bikos sin bilong ol i strongpela tru,

18:21  Mi bai go daun nau, na luksave long ol i mekim olgeta samting bilong bihainim krai bilong en, o nogat, dispela i kam long Mi. Na sapos nogat, Mi bai save.

18:22  Na ol man i tanim ol pes bilong ol bilong lusim dispela ples, na go long Sodom. Tasol Ebraham i sanap yet long ai bilong BIKPELA.

18:23  ¶ Na Ebraham i go klostu, na tok, Ating Yu bai bagarapim olgeta ol stretpela man wantaim ol man nogut?

18:24  Sapos i gat 50-pela stretpela man insait long dispela biktaun, bai Yu bagarapim dispela ples olgeta tu na Yu no inap larim dispela ples i stap bilong tingim dispela 50-pela stretpela man husat i stap insait long en?

18:25  Dispela i stap longwe long Yu bilong mekim samting i bihainim dispela kain pasin, bilong kilim i dai ol stretpela man wantaim ol man nogut. Na inap long ol stretpela man i ken stap olsem ol man nogut, dispela i stap longwe long Yu? Ating Jas bilong dispela graun olgeta bai i no inap mekim stretpela pasin?

18:26  Na BIKPELA i tok, Sapos long lukim insait long Sodom 50-pela stretpela man insait long biktaun, orait Mi bai marimari long dispela ples olgeta bilong tingim ol.

18:27  Na Ebraham i bekim na i tok, Lukim nau, mi bin kisim antap bilong mi bilong toktok i go long Bikpela, husat i stap das na sit bilong paia tasol.

18:28  Sapos ol dispela bai sot long faipela bilong dispela 50-pela stretpela man, bai Yu bagarapim olgeta olgeta bilong dispela biktaun bikos faipela i sot? Na Em i tok, Sapos Mi lukim 45-pela, Mi bai i no inap bagarapim dispela olgeta.

18:29  Na Ebraham i toktok i go long Em gen tasol, na tok, Sapos Yu bai lukim 40-pela manmeri long dispela hap. Na Em i tok, Mi bai i no inap mekim dispela bilong tingim 40-pela.

18:30  Na em i tokim Em, O no ken larim Bikpela i ken kros, na mi bai tok, Sapos Yu lukim 30-pela long dispela hap. Na Em i tok, Mi bai i no inap mekim dispela, sapos Mi lukim 30-pela long dispela hap.

18:31  Na em i tok, Lukim nau, mi bin kisim antap long mi bilong toktok long Bikpela. Sapos Yu lukim 20-pela long dispela hap. Na Em i tok, Mi bai i no inap bagarapim dispela olgeta bilong tingim 20-pela.

18:32  Na em i tok, O no ken larim Bikpela i ken kros, na mi bai toktok yet dispela wanpela taim tasol. Sapos Yu lukim tenpela long dispela hap. Na Em i tok, Mi bai i no inap bagarapim dispela olgeta bilong tingim tenpela.

18:33  Na BIKPELA i go long rot bilong Em, taim stret long Em i bin lusim pasin bilong toktok poroman wantaim Ebraham. Na Ebraham i go bek long ples bilong en.

Chapter 19

19:1  ¶ Na long apinun tru, tupela ensel i kam long Sodom. Na Lot i sindaun long dua bilong banis bilong Sodom. Na taim Lot i lukim ol em i kirap bilong bungim ol. Na em i lindaunim em yet wantaim pes bilong em i go long graun.

19:2  Na em i tok, Lukim nau, ol bikman bilong mi, kam insait, mi askim yupela plis, insait long haus bilong wokboi bilong yupela, na stap yet long olgeta hap bilong nait, na wasim ol lek bilong yupela, na yupela i ken kirap long moningtaim tru, na go long ol rot bilong yupela. Na ol i tok, Nogat. Tasol mipela bai stap long rot olgeta taim bilong nait.

19:3  Na em i strong long tupela. Na ol i tanim i go insait long em, na go insait long haus bilong em. Na em i wokim wanpela bikpela kaikai bilong ol, na kukim bret i no gat yis, na ol i kaikai.

19:4  ¶ Tasol bipo long tupela i slipim ol yet, ol man bilong dispela biktaun, yes, ol man bilong Sodom, i raunim haus raun nabaut, lapun na yangpela wantaim, olgeta manmeri i kam long olgeta wan wan namba foa hap.

19:5  Na ol i singautim Lot, na tokim em, Tupela man husat i kam insait long yu long dispela nait i stap we? Bringim tupela long mipela, inap long mipela i ken save long tupela.

19:6  Na Lot i go ausait long dua i go long ol, na pasim dua bihain long em,

19:7  Na tok, Mi askim yupela plis, ol brata, no ken mekim pasin nogut olsem.

19:8  Lukim nau, mi gat tupela pikinini meri husat i no bin save long man. Larim mi, mi askim yupela plis, bringim tupela i kam ausait long yupela, na yupela mekim long ol olsem em i gutpela long ol ai bilong yupela. Tasol long dispela tupela man yupela i no ken mekim wanpela samting. Long wanem, olsem tasol ol i kam aninit long tewel bilong san bilong rup bilong mi.

19:9  Na ol i tok, Yu klia. Na ol i tok gen, Dispela wanpela man i kam hia bilong stap waira, na em i laik stap wanpela jas. Nau bai mipela mekim pasin i nogut moa long yu, moa long long ol. Na ol i pas pas tumas antap long dispela man, yes, Lot, na ol i kam klostu bilong brukim dua.

19:10  Tasol dispela tupela man i putim han bilong ol i go ausait, na pulim Lot i kam long ol insait long haus, na pasim dua.

19:11  Na ol i paitim ol man husat i stap klostu long dua bilong haus wantaim aipas, man nating na bikman wantaim, inap long ol i hatwokim ol yet bilong painim dua.

19:12  ¶ Na dispela tupela man i tokim Lot, Yu gat arapela hia tu? Tambu pikinini man, na ol pikinini man bilong yu, na ol pikinini meri bilong yu, na wanem samting yu gat insait long dispela biktaun, bringim ol i kam ausait long dispela ples.

19:13  Long wanem, mipela bai bagarapim dispela ples, bilong wanem, krai bilong ol i wok long kamap bikpela long pes bilong BIKPELA. Na BIKPELA i bin salim mipela bilong bagarapim dispela.

19:14  Na Lot i go ausait, na i toktok long ol tambu pikinini man bilong em, husat i maritim ol pikinini meri bilong em, na tok, Kirap, na yupela go ausait long dispela ples. Long wanem, BIKPELA bai bagarapim dispela biktaun olgeta. Tasol em i luk olsem man i wokim pani long daunim ol long ol tambu pikinini man bilong en.

19:15  ¶ Na taim moningtaim i kamap, nau tupela ensel i hariapim Lot, i spik, Kirap, kisim meri bilong yu, na tupela pikinini meri bilong yu, husat i stap hia. Nogut yu bagarap olgeta insait long sin nogut bilong dispela biktaun.

19:16  Na taim em i wet yet, tupela man i holimpas han bilong em, na han bilong meri bilong em, na han bilong tupela pikinini meri bilong em, taim BIKPELA i pulap long sori i go long em. Na ol i bringim em ausait, na putim em ausait long dispela biktaun.

19:17  Na em i kamap olsem, taim ol i bringim ol i kam ausait, long Em i tok, Ranawe bilong lukautim laip bilong yu. No ken lukluk i go baksait long yu, na tu yu no ken stap long olgeta hap bilong ples stret. Ranawe i go long maunten, nogut yu kisim bagarap olgeta.

19:18  Na Lot i tokim ol, O, i no ken olsem, Bikpela bilong mi.

19:19  Lukim nau, wokboi bilong Yu i bin kisim marimari long ai bilong Yu, na Yu bin mekim sori bilong yu i kamap bikpela moa, dispela Yu bin soim long mi taim Yu kisim bek laip bilong mi. Na mi no inap ranawe i go long dispela maunten, nogut samting nogut i kisim mi, na mi dai.

19:20  Lukim nau, dispela biktaun i klostu bilong ranawe i go long en, na em i wanpela liklik biktaun. O, larim mi ranawe i go long hap, (ating em i no wanpela liklik biktaun?) na tewel bilong mi bai stap laip.

19:21  Na Em i tokim em, Lukim, Mi bin tok orait long yu long dispela samting tu, inap long Mi bai i no inap tromoi i go daun dispela biktaun, dispela yu bin toktok long helpim.

19:22  Yu hariap, ranawe i go long hap. Long wanem, Mi no inap mekim wanpela samting inap long taim yu kamap pinis long hap. Olsem na ol i kolim nem bilong dispela biktaun Soar.

19:23  San i kamap pinis long dispela graun, taim Lot i go insait long Soar.

19:24  ¶ Nau BIKPELA i salim antap long Sodom na antap long Gomora ston salfa na paia olsem ren i kam long BIKPELA ausait long heven.

19:25  Na Em i tromoi i go daun ol dispela biktaun, na olgeta dispela graun stret, na olgeta manmeri bilong ol biktaun, na dispela samting i kamap antap long graun.

19:26  ¶ Tasol meri bilong em i lukluk i go bek taim em i stap long baksait bilong Lot, na meri i kamap wanpela pos sol.

19:27  ¶ Na Ebraham i kirap long moning tru i go long ples we em i bin sanap long ai bilong BIKPELA.

19:28  Na em i lukluk i go long Sodom na Gomora, na i go long olgeta hap bilong ples stret, na lukim, na, harim, smok bilong dispela hap graun i go antap olsem smok bilong wanpela ples bilong bikpela paia.

19:29  Na em i kamap olsem, taim God i bagarapim olgeta ol biktaun bilong ples stret, long God i tingim gen Ebraham, na Em i salim Lot ausait long namel bilong dispela bikpela tromoi i go daun, taim Em i tromoi i go daun ol dispela biktaun we Lot i bin stap.

19:30  ¶ Na Lot i go antap i go ausait long Soar, na stap long maunten, na tupela pikinini meri bilong em wantaim em. Long wanem, em i pret long stap long Soar. Na em i stap long wanpela hul i go insait long maunten, em na tupela pikinini meri bilong em.

19:31  Na namba wan pikinini i tokim pikinini i yangpela moa, Papa bilong yumi i lapun pinis, na i no gat wanpela man long dispela graun bilong kam long yumi i bihainim kastam bilong dispela graun olgeta.

19:32  Kaman, yumi mekim papa bilong yumi long dring wain, na bai yumi slip wantaim em, inap long yumi ken mekim i stap gut yet pikinini kaikai bilong papa bilong yumi.

19:33  Na tupela i mekim papa bilong ol long dring wain long dispela nait. Na namba wan pikinini i go insait, na slip wantaim papa bilong em. Na em i no save taim meri i slip, o taim em i kirap.

19:34  Na em i kamap olsem long de bihain, namba wan pikinini i tokim pikinini i yangpela moa, Lukim, asde nait mi slip wantaim papa bilong mi. Yumi mas mekim em i dring wain long dispela nait tu. Na yu go insait, na yu slip wantaim em, inap long yumi ken mekim i stap gut yet pikinini kaikai bilong papa bilong yumi.

19:35  Na tupela i mekim papa bilong ol i dring wain long dispela nait tu. Na pikinini i yangpela moa i kirap, na slip wantaim em. Na em i no save taim meri i slip, o taim em i kirap.

19:36  Olsem tasol tupela pikinini meri bilong Lot wantaim i kisim bel long papa bilong ol.

19:37  Na namba wan pikinini i karim wanpela pikinini man, na kolim nem bilong em Moap. Dispela stret em papa bilong ol lain Moap inap long tude.

19:38  Na pikinini i yangpela moa, em tu i karim wanpela pikinini man, na kolim nem bilong em Ben-ami. Dispela stret em i papa bilong ol pikinini bilong Amon inap long tude.

Chapter 20

20:1  ¶ Na Ebraham i lusim dispela hap i wokabaut i go long hap graun bilong hap saut, na stap namel long Kedes na Sur, na stap waira long Gerar.

20:2  Na Ebraham i toktok long sait bilong Sara, meri bilong em, Em i susa bilong mi. Na Abimelek, king bilong Gerar, i salim tok, na kisim Sara.

20:3  ¶ Tasol God i kam long Abimelek insait long wanpela driman long nait, na tokim em, Lukim, yu stap wanpela daiman tasol, long wanem, yu bin kisim dispela meri. Long wanem, em i meri bilong wanpela man.

20:4  Tasol Abimelek i no bin kam klostu long em. Na em i tok, Bikpela, ating Yu bai kilim i dai tu wanpela stretpela kantri?

20:5  Ating em i no bin tokim mi, Em i susa bilong mi? Na meri, yes, em em yet i bin tok, Em i brata bilong mi. Long pasin holi bilong bel bilong mi na pasin i no bin mekim rong bilong tupela han bilong mi mi bin mekim dispela.

20:6  Na God i tokim em insait long wanpela driman, Yes, Mi save long yu bin mekim olsem long pasin holi bilong bel bilong yu. Long wanem, Mi tu i pasim yu long mekim sin i birua long Mi. Olsem na Mi no larim yu tasim em.

20:7  Olsem na nau givim bek meri bilong em long dispela man. Long wanem, em i wanpela profet, na em bai beten long yu, na yu bai stap laip. Na sapos yu no givim bek meri, yu ken save long, tru tumas, yu bai dai, yu, na olgeta husat i bilong yu.

20:8  ¶ Olsem na Abimelek i kirap long moning tru, na singautim olgeta wokboi bilong en, na tokim olgeta ol dispela samting olgeta long ol ia bilong ol. Na ol man i pret tru.

20:9  Nau Abimelek i singautim Ebraham, na tokim em, Yu bin mekim wanem long mipela? Na mi bin mekim wanem samting bilong bagarapim bel bilong yu, inap long yu bringim antap long mi na antap long kingdom bilong mi wanpela bikpela sin? Yu bin mekim ol pasin long mi, dispela samting i no stret long man i mekim.

20:10  Na Abimelek i tokim Ebraham, Yu lukim wanem, inap long yu bin mekim dispela samting?

20:11  Na Ebraham i tok, Bilong wanem, mi ting olsem, Tru tumas, pret long God i no stap long dispela ples. Na ol bai kilim mi i dai bilong kisim meri bilong mi.

20:12  Na yet tru tumas, em i susa bilong mi. Em i pikinini meri bilong papa bilong mi, tasol em i no pikinini meri bilong mama bilong mi. Na em i kamap meri bilong mi.

20:13  Na em i kamap olsem, taim God i mekim mi long raun nating na lusim haus bilong papa bilong mi, long mi tokim em, Dispela em i dispela gutpela pasin yu bai soim i go long mi, long olgeta wan wan ples we yumi bai kam, yu bai tok long sait bilong mi, Em i brata bilong mi.

20:14  ¶ Na Abimelek i kisim ol sipsip, na ol bulmakau man, na ol wokboi, na ol wokmeri, na givim ol long Ebraham, na givim bek long em Sara, meri bilong em.

20:15  Na Abimelek i tok, Lukim, hap bilong mi i stap long ai bilong yu. Stap we em i amamasim bel bilong yu.

20:16  Na long Sara em i tok, Lukim, mi bin givim wan tausen hap silva long brata bilong yu. Lukim, em i stap long yu wanpela karamap bilong tupela ai bilong yu, i go long olgeta husat stap wantaim yu, na wantaim olgeta arapela. Olsem tasol em i krosim em.

20:17  Olsem na Ebraham i beten long God. Na God i oraitim sik bilong Abimelek, na meri bilong em, na ol wokmeri bilong em. Na ol i karim ol pikinini.

20:18  Long wanem, BIKPELA i bin pasim strong olgeta bel bilong ol meri long hauslain bilong Abimelek, bilong tingim Sara, meri bilong Ebraham.

Chapter 21

21:1  ¶ Na BIKPELA i go lukim Sara, olsem Em i bin tok. Na BIKPELA i mekim long Sara olsem Em i bin tok.

21:2  Long wanem, Sara i kisim bel, na karim long Ebraham wanpela pikinini man taim em i lapun, long dispela taim God i makim, dispela God i bin tokim em.

21:3  Na Ebraham i kolim nem bilong pikinini man bilong em husat meri i karim long em, husat Sara i karim long em, Aisak.

21:4  Na Ebraham i katim skin bilong pikinini man bilong em Aisak taim em i gat etpela de, olsem God i tok strong long em.

21:5  Na Ebraham i gat 100 krismas, taim meri i karim pikinini man bilong em Aisak long em.

21:6  Na Sara i tok, God i bin mekim mi lap, inap long olgeta husat i harim bai lap wantaim mi.

21:7  Na em i tok, Husat i bin inap long tokim Ebraham, long Sara bai givim susu long ol pikinini? Long wanem, mi bin karim long em wanpela pikinini man taim em i lapun.

21:8  Na dispela pikinini i stat long kamap bikpela, na em i lusim susu. Na Ebraham i wokim wanpela bikpela kaikai long dispela de stret long Aisak i lusim susu.

21:9  ¶ Na Sara i lukim pikinini man bilong meri Isip Hegar, dispela em i bin karim long Ebraham, i wokim pani long daunim.

21:10  Olsem na em i tokim Ebraham, Rausim dispela slevmeri na pikinini man bilong em. Long wanem, pikinini man bilong dispela slevmeri bai i no inap stap pikinini i kisim samting long papa wantaim pikinini man bilong mi, yes, wantaim Aisak.

21:11  Na dispela samting em i samting i hevi nogut tru long ai bilong Ebraham, bilong tingim pikinini man bilong en.

21:12  Na God i tokim Ebraham, No ken larim dispela stap samting i nogut tru long ai bilong yu, bilong tingim dispela manki, na bilong tingim slevmeri bilong yu. Long olgeta samting Sara i bin tokim yu, harim long nek bilong em. Long wanem, ol bai kolim tumbuna pikinini bilong yu insait long Aisak.

21:13  Na tu long pikinini man bilong dispela slevmeri bai Mi wokim wanpela kantri, bilong wanem, em i tumbuna pikinini bilong yu.

21:14  ¶ Na Ebraham i kirap long moning tru, na kisim bret, na wanpela skin meme bilong wara, na givim dispela long Hegar, taim em i putim dispela long sol bilong han bilong em, na dispela pikinini, na salim meri i go. Na Hegar i go, na raun nating long ples i no gat man bilong Biar-siba.

21:15  Na wara i pinis long skin meme, na em i tromoi dispela pikinini aninit long wanpela bilong ol liklik diwai.

21:16  Na em i go, na sindaunim em yet pas klostu long em longwe liklik, longwe olsem long man i ken sutim spia long banara. Long wanem, em i tok, No ken larim mi lukim dai bilong pikinini. Na em i sindaun pas klostu long em, na litimapim nek bilong em na krai tru.

21:17  Na God i harim nek bilong dispela manki. Na ensel bilong God i singaut long Hegar ausait long heven, na tokim em, Wanem samting i givim hevi long yu, Hegar? No ken pret. Long wanem, God i bin harim nek bilong dispela manki we em i stap.

21:18  Kirap, litimapim dispela manki, na holim em long han bilong yu. Long wanem, Mi bai mekim em wanpela bikpela kantri.

21:19  Na God i opim tupela ai bilong em, na em i lukim wanpela hul wara. Na em i go, na pulimapim skin meme wantaim wara, na givim long manki bilong dring.

21:20  Na God i stap wantaim dispela manki. Na em i kamap bikpela, na stap long ples i no gat man, na kamap wanpela man bilong sutim banara.

21:21  Na em i stap long ples i no gat man bilong Paran. Na mama bilong em i kisim wanpela meri bilong em ausait long hap bilong Isip.

21:22  ¶ Na em i kamap olsem long dispela taim, long Abimelek na Faikol, nambawan kepten bilong ami bilong em i tokim Ebraham, i spik, God i stap wantaim yu long olgeta samting yu mekim.

21:23  Olsem na nau wokim strongpela promis long mi hia long nem bilong God long yu bai i no inap mekim giaman pasin long mi, o long pikinini man bilong mi, o long pikinini man bilong pikinini man bilong mi. Tasol, bilong bihainim dispela gutpela pasin mi bin mekim long yu, yu bai mekim long mi, na long dispela hap graun we yu bin stap waira long en.

21:24  Na Ebraham i tok, Mi bai wokim strongpela promis.

21:25  Na Ebraham i krosim Abimelek, bilong tingim wanpela hul wara, dispela ol wokboi bilong Abimelek i bin tekewe wantaim pasin pait.

21:26  Na Abimelek i tok, Mi no save husat i bin mekim dispela samting. Na tu yu no bin tokim mi, na tu yet mi no harim tok long dispela, tude tasol.

21:27  Na Ebraham i kisim ol sipsip na ol bulmakau man, na givim ol long Abimelek. Na tupela wantaim i wokim wanpela kontrak.

21:28  Na Ebraham i putim sevenpela pikinini sipsip meri bilong lain sipsip long hap bilong ol yet.

21:29  Na Abimelek i tokim Ebraham, Wanem mining bilong ol dispela sevenpela pikinini sipsip meri, dispela yu bin putim long hap bilong ol yet?

21:30  Na Ebraham i tok, Long wanem, ol dispela sevenpela pikinini sipsip meri bai yu kisim long han bilong mi, inap long ol i ken stap witnes i go long mi, long mi bin digim dispela hul wara.

21:31  Olsem na em i kolim nem bilong dispela ples Biar-siba. Bilong wanem, long dispela hap tupela wantaim i bin wokim strongpela promis.

21:32  Olsem tasol ol i wokim wanpela kontrak long Biar-siba Nau Abimelek i kirap, na Faikol, nambawan kepten bilong ami bilong em, na tupela i go bek long hap bilong ol Filistin.

21:33  ¶ Na Ebraham i planim wanpela lain diwai long Biar-siba, na singaut long nem bilong BIKPELA long dispela hap, God bilong oltaim oltaim.

21:34  Na Ebraham i stap waira planti de long hap graun bilong ol Filistin.

Chapter 22

22:1  ¶ Na em i kamap olsem bihain long ol dispela samting, long God i bin traim Ebraham na tokim em, Ebraham. Na em i tok, Lukim, mi stap hia.

22:2  Na Em i tok, Kisim nau pikinini man bilong yu, dispela wanpela pikinini man bilong yu Aisak, husat yu laikim tru, na kisim yu yet i go long hap bilong Moraia. Na ofaim em long dispela hap bilong wanpela ofa i kuk olgeta antap long wanpela bilong ol maunten, dispela Mi bai tokim yu long en.

22:3  ¶ Na Ebraham i kirap long moning tru, na putim sia long donki bilong em, na kisim tupela bilong ol yangpela man bilong em wantaim em, na Aisak, pikinini man bilong em, na brukim diwai bilong ofa i kuk olgeta, na kirap, na go long dispela ples God i bin tokim em long en.

22:4  Nau long namba tri de Ebraham i litimapim tupela ai bilong em, na lukim dispela ples longwe.

22:5  Na Ebraham i tokim ol yangpela man bilong en, Yupela stap hia wantaim donki. Na mi na manki bai go long hap na lotu, na kam gen long yupela.

22:6  Na Ebraham i kisim diwai bilong ofa i kuk olgeta, na putim dispela antap long Aisak, pikinini man bilong em. Na em i kisim paia long han bilong em, na wanpela naip. Na tupela wantaim i go wantaim.

22:7  Na Aisak i tokim Ebraham, papa bilong em, i spik, Papa bilong mi. Na em i tok, Mi stap hia, pikinini man bilong mi. Na em i tok, Lukim paia na diwai. Tasol pikinini sipsip bilong wanpela ofa i kuk olgeta i stap we?

22:8  Na Ebraham i tok, Pikinini man bilong mi, God bai givim Em Yet wanpela pikinini sipsip bilong wanpela ofa i kuk olgeta. Olsem tasol tupela wantaim i go wantaim.

22:9  Na tupela i kamap long dispela ples God i bin tokim em long en. Na Ebraham i wokim wanpela alta long dispela hap, na slipim diwai lain, na pasim Aisak, pikinini man bilong em, na slipim em long alta antap long diwai.

22:10  Na Ebraham i stretim han bilong em i go ausait, na kisim naip bilong kilim i dai pikinini man bilong em.

22:11  ¶ Na ensel bilong BIKPELA i singaut long em long heven, na tok, Ebraham, Ebraham. Na em i tok, Mi stap hia.

22:12  Na Em i tok, No ken putim han bilong yu antap long dispela manki, na tu yu no ken mekim wanpela samting long em. Long wanem, nau Mi save long yu pret long God, taim Mi luksave long yu no bin holim bek long Mi pikinini man bilong yu, dispela wanpela pikinini man bilong yu tasol.

22:13  Na Ebraham i litimapim tupela ai bilong em, na lukluk, na lukim baksait long em wanpela sipsip man i pas long ol kom bilong em long wanpela ples bus i pas klostu klostu. Na Ebraham i go na kisim dispela sipsip man, na ofaim em i go antap bilong wanpela ofa i kuk olgeta bilong kisim ples bilong pikinini man bilong em.

22:14  Na Ebraham i kolim nem bilong dispela ples Jehova-jaira. Olsem ol i tok inap long tude, Long maunten bilong BIKPELA bai ol i lukim dispela.

22:15  ¶ Na ensel bilong BIKPELA i singaut long Ebraham ausait long heven namba tu taim,

22:16  Na tok, Long Mi Yet Mi bin wokim bikpela promis, BIKPELA i tok, Long wanem, bikos yu bin mekim dispela samting, na yu no bin holim bek pikinini man bilong yu, dispela wanpela pikinini man bilong yu tasol.

22:17  Long blesing Mi bai blesim yu, na long wok bilong mekim i kamap planti moa bai Mi mekim tumbuna pikinini bilong yu i kamap planti moa olsem ol sta bilong heven, na olsem dispela wesan i stap antap long nambis bilong solwara. Na tumbuna pikinini bilong yu bai holimpas dua bilong banis bilong ol birua bilong em.

22:18  Na long tumbuna pikinini bilong yu bai olgeta kantri bilong dispela graun kisim blesing. Bilong wanem, yu bin bihainim nek bilong Mi.

22:19  Olsem na Ebraham i go bek long ol yangpela man bilong em, na ol i kirap na go wantaim long Biar-siba. Na Ebraham i stap long Biar-siba.

22:20  ¶ Na em i kamap olsem bihain long ol dispela samting, long ol i tokim Ebraham, i spik, Lukim, Milka, em i bin karim tu ol pikinini long brata bilong yu Nehor.

22:21  Hus, namba wan pikinini man bilong em, na Bus, brata bilong em, na Kemuel, papa bilong Aram,

22:22  Na Keset, na Haso, na Pildas, na Jitlap, na Betyuel.

22:23  Na Betyuel i kamapim Rebeka. Ol dispela etpela Milka i bin karim long Nehor, brata bilong Ebraham.

22:24  Na namba tu lain meri bilong em, husat nem bilong en em Reuma, em i karim tu Teba, na Gaham, na Tahas, na Meaka.

Chapter 23

23:1  ¶ Na Sara i gat 127 krismas. Ol dispela em ol yia bilong laip bilong Sara.

23:2  Na Sara i dai long Kiriat-aba. Dispela stret em Hibron long hap bilong Kenan. Na Ebraham i kam bilong soim sori long Sara, na bilong krai sori long em.

23:3  ¶ Na Ebraham i sanap long ai bilong daimeri bilong em, na tokim ol pikinini man bilong Het, i spik,

23:4  Mi stap wanpela ausait man na wanpela waira wantaim yupela. Givim mi wanpela holimpas bilong wanpela matmat wantaim yupela, inap long mi ken planim daimeri bilong mi ausait long hap ai bilong mi i lukim.

23:5  Na ol pikinini bilong Het i bekim Ebraham, i spik long em,

23:6  Harim mipela, bikman bilong mi. Yu stap wanpela strongpela hetman namel long mipela. Long ol nambawan matmat bilong mipela yu laik makim, planim daimeri bilong yu. I no gat wanpela bilong mipela husat bai holim bek long yu matmat bilong em, tasol inap long yu ken planim daimeri bilong yu.

23:7  Na Ebraham i sanap, na lindaunim em yet long ol manmeri bilong dispela hap, yes, long ol pikinini bilong Het.

23:8  Na em i stori wantaim ol, i spik, Sapos em i stap tingting bilong yupela long mi ken planim daimeri bilong mi ausait long hap ai bilong mi i lukim, harim mi, na mekim strongpela askim bilong helpim mi long Efron, pikinini man bilong Sohar,

23:9  Inap long em i ken givim mi dispela hul i go insait long maunten bilong Makpela, dispela em i gat, dispela i stap long hap arere bilong ples kunai bilong em. Long hamas mani em i pe stret bilong en bai em i givim mi dispela bilong wanpela holimpas bilong wanpela ples matmat namel long yupela.

23:10  Na Efron i stap namel long ol pikinini bilong Het. Na man Hit Efron i bekim tok long Ebraham long ia bilong ol pikinini bilong Het, yes, bilong olgeta husat i go insait long dua bilong banis bilong biktaun bilong em, i spik,

23:11  Nogat, bikman bilong mi, harim mi. Dispela ples kunai mi givim yu, na dispela hul i go insait long maunten i stap insait long en, mi givim dispela long yu. Long pes bilong ol pikinini man bilong ol manmeri bilong mi mi givim dispela long yu. Planim daimeri bilong yu.

23:12  Na Ebraham i lindaunim em yet long ai bilong ol manmeri bilong dispela hap graun.

23:13  Na em i tokim Efron long ia bilong ol manmeri bilong dispela hap graun, i spik, Tasol sapos yu laik givim dispela, mi askim plis, harim mi. Mi bai givim yu mani long dispela ples kunai. Kisim dispela long mi, na bai mi planim daimeri bilong mi long dispela hap.

23:14  Na Efron i bekim Ebraham, i spik long em,

23:15  Bikman bilong mi, harim long mi. Pe bilong dispela hap graun em i inap long 400 sekel silva. Dispela em i wanem samting namel long mi na yu? Olsem na planim daimeri bilong yu.

23:16  ¶ Na Ebraham i harim long Efron, na Ebraham i skelim long Efron dispela silva, dispela em i bin kolim long ia bilong ol pikinini man bilong Het, 400 sekel silva, kain mani bilong nau wantaim ol bisnisman.

23:17  Na ples kunai bilong Efron, dispela i stap long Makpela, dispela i stap long ai bilong Mamri, dispela ples kunai, na dispela hul i go insait long maunten i stap long en, na olgeta dispela diwai i stap long ples kunai, dispela i stap long olgeta hap arere raun nabaut long en, ol i mekim i kamap tru olgeta

23:18  Bilong Ebraham bilong wanpela holimpas long pes bilong ol pikinini bilong Het, long ai bilong olgeta husat i go insait long dua bilong banis bilong biktaun bilong em.

23:19  Na bihain long dispela, Ebraham i planim Sara, meri bilong en, long hul i go insait long maunten bilong ples kunai bilong Makpela i stap long ai bilong Mamri. Dispela stret em Hebron long hap bilong Kenan.

23:20  Na dispela ples kunai, na dispela hul i go insait long maunten i stap long en, ol pikinini man bilong Het i mekim i kamap tru olgeta bilong Ebraham, bilong wanpela holimpas bilong stap wanpela ples matmat.

Chapter 24

24:1  ¶ Na Ebraham i lapun, na planti yia i mekim em lapun tru. Na BIKPELA i bin blesim Ebraham long olgeta samting.

24:2  Na Ebraham i tokim wokboi bilong em i lapun moa long ol arapela wokboi bilong hauslain bilong em, husat i bosim olgeta samting em i gat, Putim, mi askim yu plis, han bilong yu aninit long antap hap bilong lek bilong mi.

24:3  Na mi bai mekim yu wokim strongpela promis long nem bilong BIKPELA, God bilong heven, na God bilong dispela graun, inap long yu bai i no inap kisim wanpela meri i kam long pikinini man bilong mi long ol pikinini meri bilong ol lain Kenan, namel long husat mi stap.

24:4  Tasol yu mas i go long kantri bilong mi, na long kandre bilong mi, na kisim wanpela meri i kam long pikinini man bilong mi Aisak.

24:5  Na dispela wokboi i tokim em, Sapos i gat sans long dispela meri bai i no gat laik long bihainim mi i kam long dispela hap, ating mi mas bringim pikinini man bilong yu i go gen long dispela hap we yu kam long en?

24:6  Na Ebraham i tokim em, Yu lukaut gut long yu no bringim pikinini man bilong mi i go gen long hap.

24:7  God BIKPELA bilong heven, husat i kisim mi long hauslain bilong papa bilong mi, na long hap graun bilong kandre bilong mi, na husat i tokim mi, na husat i wokim strongpela promis long mi, i spik, Long tumbuna pikinini bilong yu bai Mi givim dispela graun. Em bai salim ensel bilong Em i go paslain long yu, na yu bai kisim wanpela meri i kam long pikinini man bilong mi long hap.

24:8  Na sapos dispela meri bai i no gat laik long bihainim yu, orait yu bai stap fri long dispela strongpela promis bilong mi. Tasol yu no ken bringim pikinini man bilong mi long hap gen.

24:9  Na dispela wokboi i putim han bilong en aninit long antap hap bilong lek bilong Ebraham, bikman bilong em, na wokim strongpela promis long em long dispela samting.

24:10  ¶ Na dispela wokboi i kisim tenpela kemel bilong ol kemel bilong bikman bilong em, na go. Bilong wanem, olgeta kago bilong bikman bilong em i stap long han bilong em. Na em i kirap, na i go long Mesopotemia, long biktaun bilong Nehor.

24:11  Na em i mekim ol kemel bilong em long brukim skru ausait long biktaun klostu long wanpela hul wara long taim bilong apinun tru, yes, taim long ol meri i go ausait na pulim wara i kam antap.

24:12  Na em i tok, O God BIKPELA bilong bikman bilong mi Ebraham, mi askim Yu plis, salim mi long hariap gutpela dispela de, na soim gutpela pasin long bikman bilong mi Ebraham.

24:13  Lukim, mi sanap hia klostu long hul wara. Na ol pikinini meri bilong ol man bilong dispela biktaun i kam ausait bilong pulim wara i kam antap.

24:14  Na larim em i kamap olsem, long dispela meri husat mi bai tok, Larim jak bilong yu i go daun, mi askim yu plis, inap long mi ken dring. Na em bai tok, Dring, na bai mi givim dring long ol kemel bilong yu tu. Larim dispela stret stap meri husat Yu bin makim long wokboi bilong Yu Aisak. Na long dispela mi bai save long Yu bin soim gutpela pasin long bikman bilong mi.

24:15  Na em i kamap olsem, bipo em i bin pinisim toktok, long, lukim, Rebeka i kam ausait, husat mama i bin karim long Betyuel, pikinini man bilong Milka, meri bilong Nehor, brata bilong Ebraham, wantaim jak bilong em antap long sol bilong han bilong em.

24:16  Na dispela yangpela meri i naispela tru bilong lukluk long en, wanpela meri i no bin slip wantaim man, na tu i no gat wanpela man i bin save long em. Na em i go daun long hul wara, na pulapim jak bilong em, na kam antap.

24:17  Na dispela wokboi i ran i go bungim em, na em i tok, Mi askim plis long yu, yu larim mi dring liklik wara long sospen bilong kisim wara bilong yu.

24:18  Na em i tok, Dring, bikman bilong mi. Na meri i hariap, na larim jak i go daun antap long han bilong em yet, na givim dring long em.

24:19  Na taim em i bin givim dring long em pinis, em i tok, Mi bai pulim wara i kam antap bilong ol kemel bilong yu tu, inap long ol i bin dring pinis.

24:20  Na em i hariap, na kapsaitim jak bilong em i go long ples bilong dring bilong animal, na ran i go gen long hul wara bilong pulim wara i kam antap, na pulim bilong olgeta kemel bilong em.

24:21  Na taim dispela man i tingting planti long meri em i pasim maus bilong em, long save sapos BIKPELA i bin mekim wokabaut bilong em long kamap gutpela o nogat.

24:22  Na em i kamap olsem, taim ol kemel i bin dring pinis, long dispela man i kisim wanpela ring gol bilong ia, hevi bilong en em namba tu hap bilong wanpela sekel, na tupela paspas bilong tupela han bilong em, hevi bilong ol em tenpela sekel bilong gol.

24:23  Na em i tok, Yu pikinini meri bilong husat? Tokim mi, mi askim yu plis, i gat spes long haus bilong papa bilong yu long mipela i ken stap long en?

24:24  Na meri i tokim em, Mi pikinini meri bilong Betyuel, pikinini man bilong Milka, husat em i karim long Nehor.

24:25  Na moa tu em i tokim em, Mipela i gat pipia stik wit samting na inap kaikai bilong animal wantaim, na spes bilong stap long en.

24:26  Na dispela man i lindaunim het bilong em na lotu long BIKPELA.

24:27  Na em i tok, Blesing i stap long God BIKPELA bilong bikman bilong mi Ebraham, husat i no larim bikman bilong mi long i no gat sori bilong Em na tok tru bilong Em olgeta. Taim mi stap long rot, BIKPELA i stiaim mi i go long haus bilong ol brata bilong bikman bilong mi.

24:28  Na dispela yangpela meri i ran, na tokim ol bilong hauslain bilong mama bilong en long ol dispela samting.

24:29  ¶ Na Rebeka i gat wanpela brata, na nem bilong en em Leban. Na Leban i ran i go long dispela man, i go long hul wara.

24:30  Na em i kamap olsem, taim em i lukim ring bilong ia na ol paspas antap long tupela han bilong susa bilong em, na taim em i harim ol toktok bilong Rebeka, susa bilong em, i spik, Dispela man i tok olsem long mi, long em i kam long dispela man. Na, lukim, em i sanap klostu long ol kemel long hul wara.

24:31  Na em i tok, Kam insait, yu man husat BIKPELA i blesim. Bilong wanem yu sanap ausait? Long wanem, mi bin redim haus, na spes bilong ol kemel.

24:32  Na dispela man i kam insait long haus. Na em i lusim ol let bilong ol kemel bilong em, na givim pipia stik wit samting na kaikai bilong animal long ol kemel, na wara bilong wasim lek bilong em, na ol lek bilong ol man husat i stap wantaim em.

24:33  Na ol i putim kaikai long ai bilong em bilong kaikai. Tasol em i tok, Mi bai i no inap kaikai, inap mi bin tokaut long wok bilong mi. Na em i tok, Yu toktok.

24:34  Na em i tok, Mi wokboi bilong Ebraham.

24:35  Na BIKPELA i bin blesim tru bikman bilong mi. Na em i kamap bikman tru. Na Em i bin givim em ol lain sipsip samting, na ol lain bulmakau samting, na silva, na gol, na ol wokboi, na ol wokmeri, na ol kemel, na ol donki.

24:36  Na Sara, meri bilong bikman bilong mi, i karim wanpela pikinini man long bikman bilong mi taim em i lapun. Na i go long em em i bin givim olgeta dispela samting em i gat.

24:37  Na bikman bilong mi i mekim mi wokim strongpela promis, i spik, Yu bai i no inap kisim wanpela meri long pikinini man bilong mi long ol pikinini meri bilong ol lain Kenan, long graun bilong husat mi stap.

24:38  Tasol yu bai go long hauslain bilong papa bilong mi, na long ol kandre bilong mi, na kisim wanpela meri i kam long pikinini man bilong mi.

24:39  Na mi tokim bikman bilong mi, Sapos i gat sans long dispela meri i no gat laik long bihainim mi.

24:40  Na em i tokim mi, BIKPELA, long ai bilong husat mi save wokabaut, bai salim ensel bilong Em wantaim yu, na mekim rot bilong yu long kamap gutpela. Na yu bai kisim wanpela meri bilong pikinini man bilong mi long ol kandre bilong mi, na bilong hauslain bilong papa bilong mi.

24:41  Nau bai yu stap fri long dispela strongpela promis bilong mi, taim yu kam long ol kandre bilong mi. Na sapos ol i no givim yu wanpela, yu bai stap fri long strongpela promis bilong mi.

24:42  Na mi kam tude long hul wara, na tok, O God BIKPELA bilong bikman bilong mi Ebraham, sapos nau Yu mekim rot bilong mi long kamap gutpela, dispela mi go long en,

24:43  Lukim, mi sanap klostu long hul bilong wara. Na em bai kamap olsem, long taim meri i no bin slip wantaim man i kam ausait bilong pulim wara i kam antap, na mi tokim em, Givim mi, mi askim yu plis, liklik wara long jak bilong yu bilong dring,

24:44  Na em i tokim mi, Yu dring, na mi bai pulim tu bilong ol kemel bilong yu wantaim, Larim dispela stret stap meri husat BIKPELA i bin makim bilong pikinini man bilong bikman bilong mi.

24:45  Na bipo mi bin pinisim toktok insait long bel bilong mi, lukim, Rebeka i kam ausait wantaim jak bilong em antap long sol bilong han bilong em. Na em i go daun long hul wara, na pulim wara i kam antap. Na mi tokim em, Larim mi dring, mi askim yu plis.

24:46  Na em i wokim hariap, na larim jak bilong em i go daun i lusim sol bilong han bilong em, na tok, Dring, na mi bai givim dring long ol kemel bilong yu tu. Olsem na mi bin dring, na em i mekim ol kemel dring tu.

24:47  Na mi askim em, na tok, Yu pikinini meri bilong husat? Na em i tok, Pikinini meri bilong Betyuel, pikinini man bilong Nehor, husat Milka i karim long em. Na mi putim ring bilong ia long pes bilong em, na ol paspas long ol han bilong em.

24:48  Na mi lindaunim het bilong mi, na lotuim BIKPELA, na blesim God BIKPELA bilong bikman bilong mi Ebraham, husat i bin stiaim mi long stretpela rot bilong kisim pikinini meri bilong brata bilong bikman bilong mi i go long pikinini man bilong em.

24:49  Na nau sapos yupela bai mekim gutpela pasin na tru tru wantaim bikman bilong mi, tokim mi. Na sapos nogat, tokim mi, inap long mi ken tanim long han sut o long han kais.

24:50  Nau Leban na Betyuel i bekim na tok, Dispela samting i kam long BIKPELA. Mipela i no inap toktok long yu nogut o gutpela.

24:51  Lukim, Rebeka i stap long ai bilong yu, kisim em, na go, na larim em stap meri bilong pikinini man bilong bikman bilong yu, olsem BIKPELA i bin toktok.

24:52  Na em i kamap olsem, long, taim wokboi bilong Ebraham i harim ol toktok bilong ol, em i lotu long BIKPELA taim em i lindaunim em yet i go long graun.

24:53  Na dispela wokboi i bringim ausait ol bilas i dia tru bilong silva, na ol bilas i dia tru bilong gol, na klos, na givim ol long Rebeka. Em i givim tu long brata bilong em na long mama bilong em ol samting i dia tumas.

24:54  ¶ Na ol i kaikai na dring, em na ol man husat i stap wantaim em, na ol i stap yet olgeta hap bilong nait. Na ol i kirap long moning, na em i tok, Salim mi i go long bikman bilong mi.

24:55  Na brata bilong meri na mama bilong em i tok, Larim dispela yangpela meri stap wantaim mipela sampela de, i no ken aninit long tenpela. Bihain long dispela em bai go.

24:56  Na em i tokim ol, No ken pasim mi, taim yumi luksave olsem BIKPELA i bin mekim rot bilong mi long kamap gutpela. Salim mi i go inap long mi ken go long bikman bilong mi.

24:57  Na ol i tok, Mipela bai singautim dispela yangpela meri, na askim long maus bilong em.

24:58  Na ol i singautim Rebeka, na tokim em, Yu bai go wantaim dispela man? Na em i tok, Mi bai go.

24:59  Na ol i salim Rebeka i go, susa bilong ol, na wasmeri bilong em, na wokboi bilong Ebraham, na ol man bilong em.

24:60  Na ol i blesim Rebeka, na tokim em, Yu susa bilong mipela, yu ken i kamap mama bilong ol tausen milien, na larim tumbuna pikinini bilong yu holimpas dua bilong banis bilong ol man i no laikim tru ol.

24:61  Na Rebeka i kirap, na ol yangpela meri bilong em, na ol i ran antap long ol kemel, na bihainim dispela man. Na dispela wokboi i kisim Rebeka, na go long rot bilong em.

24:62  ¶ Na Aisak i kam long rot bilong hul wara Lahairoi. Long wanem, em i save stap long hap graun bilong hap saut.

24:63  Na Aisak i go ausait bilong tingting strong long ples kunai long apinun tru. Na em i litimapim tupela ai bilong em, na lukim, na, lukim, ol kemel i kam.

24:64  Na Rebeka i litimapim tupela ai bilong en, na taim em i lukim Aisak, em i lusim kemel i go daun.

24:65  Long wanem, em i bin tokim dispela wokboi, Dispela em wanem man husat i wokabaut long ples kunai bilong bungim yumi? Na dispela wokboi i bin tok, Dispela em bikman bilong mi. Olsem na Rebeka i kisim wanpela laplap bilong pes, na karamapim em yet.

24:66  Na wokboi i tokim Aisak long olgeta samting em i bin mekim.

24:67  Na Aisak i bringim em i go insait long haus sel bilong mama bilong em Sara, na kisim Rebeka, na em i kamap meri bilong em. Na em i laikim em tru. Na Aisak i kisim bel isi bihain long dai bilong mama bilong em.

Chapter 25

25:1  ¶ Nau gen Ebraham i kisim wanpela meri, na nem bilong en em Ketura.

25:2  Na em i karim long em Simran, na Joksan, na Medan, na Midian, na Isbak, na Sua.

25:3  Na Joksan i kamapim Siba, na Dedan. Na ol pikinini man bilong Dedan em Asurim, na Letusim, na Leumim.

25:4  Na ol pikinini man bilong Midian, Ifa na Efer, na Hanok, na Abida, na Eldea. Olgeta dispela em ol pikinini bilong Ketura.

25:5  Na Ebraham i givim olgeta samting em i gat long Aisak.

25:6  Tasol long ol pikinini man bilong ol namba tu lain meri, husat Ebraham i gat, Ebraham i givim ol presen, na salim ol i go lusim Aisak, pikinini man bilong em, taim em i stap laip yet, i go long hap sankamap, i go long hap graun bilong hap sankamap.

25:7  Na ol dispela em ol de bilong ol yia bilong laip bilong Ebraham, dispela em i stap laip, 175 yia.

25:8  Na Ebraham i lusim spirit bilong em, na dai taim em i lapun tru, wanpela lapun man, i pulap long ol yia. Na em i go bungim ol lain bilong em.

25:9  Na tupela pikinini man bilong em Aisak na Ismael i planim em long dispela hul i go insait long maunten bilong Makpela, long ples kunai bilong Efron, pikinini man bilong man Hit Sohar, dispela i stap long ai bilong Mamri,

25:10  Dispela ples kunai Ebraham i baim long ol pikinini man bilong Het. Long dispela hap ol i planim Ebraham. na Sara, meri bilong em.

25:11  ¶ Na em i kamap olsem bihain long dai bilong Ebraham, long God i blesim pikinini man bilong em Aisak. Na Aisak i stap klostu long hul wara Lahairoi.

25:12  Nau ol dispela em ol lain tumbuna bilong Ismael, pikinini man bilong Ebraham, husat meri Isip Hegar, wokmeri bilong Sara, i karim long Ebraham.

25:13  Na ol dispela em ol nem bilong ol pikinini man bilong Ismel, long ol nem bilong ol, bilong bihainim ol lain tumbuna bilong ol. Namba wan pikinini bilong Ismael, Nebasot. Na Kedar, na Apdel, na Mipsam,

25:14  Na Misma, na Duma, na Masa,

25:15  Hadar, na Tema, Jetur, Nafis, na Kedema.

25:16  Ol dispela em ol pikinini man bilong Ismael, na ol dispela em ol nem bilong ol, long ol taun bilong ol, na long ol strongpela haus soldia bilong ol, 12-pela hetman bilong bihainim ol kantri bilong ol.

25:17  Na ol dispela em ol yia bilong laip bilong Ismael, 137 yia. Na em i lusim spirit bilong em na dai. Na em i go bungim ol lain bilong em.

25:18  Na ol i stap long Havila i go inap long Sua, dispela i stap long long ai bilong Isip, taim yu go long Asiria. Na em i dai long pes bilong olgeta brata bilong em.

25:19  ¶ Na ol dispela em ol lain tumbuna bilong Aisak, pikinini man bilong Ebraham. Ebraham i kamapim Aisak.

25:20  Na Aisak i gat 40-pela krismas taim em i kisim Rebeka long maritim, pikinini meri bilong man Siria Betyuel bilong Padan-aram, susa bilong man Siria Leban.

25:21  Na Aisak i mekim strongpela askim long BIKPELA long sait bilong meri bilong em, bilong wanem, em i no inap long karim. Na BIKPELA i harim strongpela askim bilong em, na Rebeka, meri bilong em, i kisim bel.

25:22  Na ol pikinini i pait wantaim insait long em. Na em i tok, Sapos em i stap olsem, bilong wanem mi stap olsem? Na em i go bilong askim long BIKPELA.

25:23  Na BIKPELA i tokim em, Tupela kantri i stap insait long bel bilong yu, na tupela kain lain manmeri bai lusim rop bilong bel bilong yu. Na wanpela lain manmeri bai stap strong moa long arapela lain manmeri. Na namba wan pikinini bai stap wokboi bilong pikinini i yangpela moa.

25:24  Na taim ol de bilong karim pikinini bilong em i kamap inap pinis, lukim, i gat twins i stap insait long bel bilong em.

25:25  Na namba wan i kamaut retpela, olgeta hap bodi i olsem wanpela klos i gat planti gras bilong man. Na ol i kolim nem bilong em Iso.

25:26  Na bihain long dispela brata bilong em i kamaut, na han bilong em i holimpas baksait bilong fut bilong Iso. Na ol i kolim nem bilong em Jekop. Na Aisak i gat 60 krismas, taim Rebeka i karim tupela.

25:27  Na tupela pikinini man i go bikpela. Na Iso em i gat save stret long painim abus, wanpela man bilong ples kunai. Na Jekop i man i no gat namba, taim em stap long ol haus sel.

25:28  Na Aisak i laikim tru Iso, bilong wanem, em i bin kaikai long abus bilong wail animal bilong em. Tasol Rebeka i laikim tru Jekop.

25:29  ¶ Na Jekop i boilim sup. Na Iso i kam long ples kunai, na em i hap i dai.

25:30  Na Iso i tokim Jekop, Givim kaikai long mi, mi askim yu plis, wantaim dispela retpela sup stret. Long wanem, mi hap i dai. Olsem na ol i kolim nem bilong em Idom.

25:31  Na Jekop i tok, Salim long mi tude rait bilong yu bilong namba wan pikinini.

25:32  Na Iso i tok, Lukim, mi stap klostu tru long dai. Na dispela rait bilong namba wan pikinini bai helpim mi olsem wanem?

25:33  Na Jekop i tok, Wokim strongpela promis long mi tude. Na em i wokim strongpela promis long em. Na em i salim long Jekop rait bilong em bilong namba wan pikinini.

25:34  Na Jekop i givim Iso bret na sup bilong ol lentel. Na em i bin kaikai na dring, na kirap, na go long rot bilong em. Olsem tasol Iso i tingim rait bilong em bilong namba wan pikinini em i samting nating.

Chapter 26

26:1  ¶ Na i gat wanpela bikpela taim hangre long dispela hap, i narapela long namba wan bikpela taim hangre i stap long ol de bilong Ebraham. Na Aisak i go long Abimelek, king bilong ol Filistin, long Gerar.

26:2  Na BIKPELA i kamap ples klia long em, na i tok, No ken i go daun long Isip. Stap long dispela hap graun Mi bai tokim yu long en.

26:3  Stap waira long dispela hap, na Mi bai stap wantaim yu, na Mi bai blesim yu. Long wanem, long yu, na long tumbuna pikinini bilong yu, Mi bai givim olgeta ol dispela kantri, na Mi bai inapim dispela strongpela promis Mi bin wokim long Ebraham, papa bilong yu.

26:4  Na Mi bai mekim tumbuna pikinini bilong yu long kamap planti olsem ol sta bilong heven, na Mi bai givim long tumbuna pikinini bilong yu olgeta ol dispela kantri. Na long tumbuna pikinini bilong yu olgeta kantri bilong dispela graun bai kisim blesing.

26:5  Bilong wanem, bikos Ebraham i bihainim nek bilong Mi, na holimpas tok strong bilong Mi, ol strongpela tok bilong Mi, ol lo Mi raitim, na ol lo bilong Mi.

26:6  ¶ Na Aisak i stap long Gerar.

26:7  Na ol man bilong dispela ples i askim em long meri bilong em. Na em i tok, Em i susa bilong mi. Long wanem, em i pret long tok, Em i meri bilong mi. Nogut, em i tok, ol man bilong dispela ples i ken kilim mi bilong kisim Rebeka. Bilong wanem, em i naispela bilong lukluk long en.

26:8  Na em i kamap olsem, taim em i bin stap longpela taim long dispela hap, long Abimelek, king bilong ol Filistin, i lukluk i go ausait long wanpela windo, na lukluk, na, lukim, Aisak i pilai wantaim Rebeka, meri bilong en.

26:9  Na Abimelek i singautim Aisak, na tok, Lukim, tru tumas, em i meri bilong yu. Na olsem wanem yu bin tok, Em i susa bilong mi? Na Aisak i tokim em, Bilong wanem, mi tok, Nogut mi dai long em.

26:10  Na Abimelek i tok, Dispela em i wanem samting yu bin mekim long mipela? I gat sans long wanpela bilong dispela lain i bin slip nating wantaim meri bilong yu, na yu bin bringim dispela rong i kam antap long mipela.

26:11  Na Abimelek i givim tok long olgeta manmeri bilong en, i spik, Em husat i tasim dispela man o meri bilong em, tru tumas, mi bai mekim em long dai.

26:12  ¶ Orait Aisak i planim long dispela hap, na kisim long dispela yia stret 100 taims. Na BIKPELA i blesim em.

26:13  Na dispela man i kamap bikman, na em i go het, na i kamap bikpela inap long em i kamap bikman tru.

26:14  Long wanem, em i gat holimpas bilong ol lain sipsip samting, na ol lain bulmakau samting, na bikpela namba tru bilong ol wokboi. Na ol Filistin i mangalim ol samting bilong em.

26:15  Long wanem, olgeta dispela hul wara ol wokboi bilong papa bilong em i bin digim long taim bilong Ebraham, papa bilong em, ol Filistin i bin pasim ol, na pulapim ol wantaim graun.

26:16  Na Abimelek i tokim Aisak, Go lusim mipela. Long wanem, yu stap strongpela moa long mipela.

26:17  Na Aisak i lusim dispela hap, na sanapim haus sel bilong em long ples daun bilong Gerar, na stap long dispela hap.

26:18  Na Aisak i digim gen ol hul wara bilong wara, dispela ol i bin digim long ol de bilong papa bilong em Ebraham. Long wanem, ol Filistin i bin pasim ol bihain long dai bilong Ebraham. Na em i kolim ol nem bilong ol i bihainim ol dispela nem long papa bilong em i bin kolim ol.

26:19  Na ol wokboi bilong Aisak i digim long ples daun, na painim pinis long dispela hap wanpela hul wara bilong wara i sut i kam ausait.

26:20  Na ol man bilong lukautim ol lain bulmakau samting bilong Gerar i bin pait wantaim ol man bilong lukautim ol lain bulmakau samting bilong Aisak, i spik, Dispela wara em bilong mipela. Na em i kolim nem bilong dispela hul wara Esek, bilong wanem, ol i pait wantaim em.

26:21  Na ol i digim narapela hul wara, na pait long dispela tu. Na em i kolim nem bilong en Sitna.

26:22  Na em i lusim dispela hap, na digim narapela hul wara. Na long dispela ol i no pait. Na em i kolim nem bilong en Rehobot. Na em i tok, Long wanem, nau BIKPELA i bin wokim spes bilong yumi, na bai yumi bai karim kaikai long dispela hap graun.

26:23  Na em i lusim dispela hap i go antap bilong go long Biar-siba

26:24  Na BIKPELA i kamap ples klia long em long dispela nait stret, na tok, Mi God bilong Ebraham, papa bilong yu. No ken pret, long wanem, Mi stap wantaim yu, na Mi bai blesim yu, na mekim tumbuna pikinini bilong yu kamap planti moa bilong tingim wokboi bilong Mi Ebraham.

26:25  Na em i wokim wanpela alta long dispela hap, na singaut long nem bilong BIKPELA, na sanapim haus sel bilong em long dispela hap. Na long dispela hap ol wokboi bilong Aisak i digim wanpela hul wara.

26:26  ¶ Na Abimelek i lusim Gerar na go long em, na Ahusat, wanpela pren bilong em, na Faikol, nambawan kepten bilong ami bilong em.

26:27  Na Aisak i tokim ol, Bilong wanem yupela i kam long mi, taim yumi luksave long yupela i no laikim mi tru, na yupela i bin salim mi i go long lusim yupela?

26:28  Na ol i tok, Mipela i luksave tru long BIKPELA i stap wantaim yu. Na mipela i tok, Larim i stap nau wanpela strongpela promis namel long yumi, yes, namel long mipela na yu, na larim mipela i wokim wanpela kontrak wantaim yu,

26:29  Inap long yu no bagarapim mipela, olsem mipela i no bin tasim yu, na olsem mipela i bin no bin mekim wanpela samting long yu, gut tasol, na mipela i bin salim yu i go wantaim bel isi. Yu stap nau man BIKPELA i blesim.

26:30  Na em i wokim wanpela bikpela kaikai bilong ol, na ol i bin kaikai na dring.

26:31  Na ol i kirap hariap long moning, na wokim strongpela promis wanpela i go long narapela. Na Aisak i salim ol i go, na ol i lusim em wantaim bel isi.

26:32  Na em i kamap olsem long dispela de yet, long ol wokboi bilong Aisak i kam, na tokim em long sait bilong dispela hul wara ol i bin digim, na tokim em, Mipela i painim pinis wara.

26:33  Na Aisak i kolim dispela Siba. Olsem na nem bilong dispela biktaun em Biar-siba inap long tude.

26:34  ¶ Na Iso i gat 40-pela krismas taim em i kisim Judit, pikinini meri bilong man Hit Beri, na Basemat pikinini meri bilong man Hit Elon, bilong kamap meri bilong em.

26:35  Husat i wanpela samting bilong givim hevi long tingting long Aisak na long Rebeka.

Chapter 27

27:1  ¶ Na em i kamap olsem, long taim Aisak i lapun, na tupela ai bilong em i no lait gut, inap long em i no inap lukluk, em i singautim Iso, namba wan pikinini man bilong en, na tokim em, Pikinini man bilong mi. Na em i tokim em, Lukim, mi stap hia.

27:2  Na em i tok, Lukim nau. Mi stap lapun, mi no save wanem de bai mi dai.

27:3  Olsem na nau kisim, mi askim yu plis, ol samting bilong pait bilong yu, paus bilong yu i holim ol spia na banara bilong yu, na go long ples kunai, na kisim bilong mi sampela abus bilong wail animal.

27:4  Na wokim bilong mi mit i gat gutpela test, kain olsem mi laikim tru, na bringim dispela long mi, inap long mi ken kaikai. Inap long tewel bilong mi i ken blesim yu bipo mi dai.

27:5  Na Rebeka i harim taim Aisak i toktok long Iso, pikinini man bilong em. Na Iso i go long ples kunai bilong painim abus bilong wail animal, na bilong bringim dispela.

27:6  ¶ Na Rebeka i tokim Jekop, pikinini man bilong em, i spik, Lukim, mi harim papa bilong yu tokim Iso, brata bilong yu, i spik,

27:7  Bringim mi abus bilong wail animal, na wokim bilong mi mit i gat gutpela test, inap long mi ken kaikai, na blesim yu long ai bilong BIKPELA bipo long dai bilong mi.

27:8  Olsem na, nau pikinini man bilong mi, bihainim nek bilong mi bilong bihainim dispela samting mi tok strong long yu.

27:9  Go nau long lain sipsip samting, na kisim i kam long mi long dispela hap tupela gutpela pikinini meme bilong ol meme. Na mi bai wokim mit i gat gutpela test bilong papa bilong yu, kain olsem em i laikim tru.

27:10  Na yu bai ken bringim dispela i go long papa bilong yu, inap long em i ken kaikai, na inap long em i ken blesim yu bipo long dai bilong em.

27:11  Na Jekop i tokim Rebeka, mama bilong en, Lukim, brata bilong mi Iso em i wanpela man i gat planti gras, na mi man skin i no rap liklik.

27:12  Sapos i gat sans long papa bilong mi bai pilim mi, na mi bai luk olsem long em olsem wanpela man bilong giaman. Na mi bai bringim wanpela tok nogut antap long mi, na i no wanpela blesing.

27:13  Na mama bilong em i tokim em, Tok nogut bilong yu bai stap antap long mi, pikinini man bilong mi. Tasol bihainim nek bilong mi, na go kisim tupela i kam long mi.

27:14  Na em i go, na kisim, na bringim ol long mama bilong em. Na mama bilong em i wokim mit i gat gutpela test, kain olsem papa bilong em i laikim tru.

27:15  Na Rebeka i kisim gutpela klos bilong namba wan pikinini man bilong em Iso, dispela i stap wantaim em long haus, na putim ol antap long Jekop, pikinini man bilong em i yangpela moa.

27:16  Na em i putim ol skin bilong ol pikinini meme bilong ol meme antap long tupela han bilong em, na antap long hap i no rap bilong nek bilong em.

27:17  Na em i givim dispela mit i gat gutpela test na bret, dispela em i bin wokim, i go long han bilong pikinini man bilong em Jekop.

27:18  ¶ Na em i kam long papa bilong em, na tok, Papa bilong mi. Na em i tok, Mi stap hia. Yu husat, pikinini man bilong mi?

27:19  Na Jekop i tokim papa bilong em, Mi Iso, namba wan pikinini bilong yu. Mi bin mekim bilong bihainim olsem yu bin tokim mi. Kirap, mi askim yu plis, sindaun na kaikai long abus bilong wail animal bilong mi, inap long tewel bilong yu i ken blesim mi.

27:20  Na Aisak i tokim pikinini man bilong em, Dispela i stap olsem wanem long yumi bin painim dispela hariap olsem, pikinini man bilong mi? Na em i tok, Bilong wanem, BIKPELA, God bilong yu, i bringim dispela i kam long mi.

27:21  Na Aisak i tokim Jekop, Kam klostu, mi askim yu plis, inap long mi ken pilim yu, pikinini man bilong mi, sapos yu stap pikinini man tru bilong mi Iso, o nogat.

27:22  Na Jekop i go klostu long Aisak, papa bilong en. Na em i pilim em, na tok, Nek em i nek bilong Jekop, tasol ol han em ol han bilong Iso.

27:23  Na em i no klia tru long em, bilong wanem, ol han bilong em i gat planti gras, olsem ol han bilong brata bilong em Iso. Olsem na em i blesim em.

27:24  Na em i tok, Ating tru tru yu pikinini man bilong mi Iso? Na em i tok, Em mi.

27:25  Na em i tok, Bringim kaikai klostu long mi, na mi bai kaikai bilong abus bilong wail animal bilong pikinini man bilong mi, inap tewel bilong mi i ken blesim yu. Na em i bringim dispela klostu long em, na em i bin kaikai. Na em i bringim em wain, na em i dring.

27:26  Na papa bilong em Aisak i tokim em, Kam klostu nau, na givim kis long mi, pikinini man bilong mi.

27:27  Na em i kam klostu, na givim kis long em. Na em i smelim smel bilong klos bilong em, na blesim em, na tok, Lukim, smel bilong pikinini man bilong mi i olsem smel bilong ples kunai, dispela BIKPELA i bin blesim.

27:28  Olsem na God i givim yu bilong liklik wara bilong nait bilong heven, na gris bilong graun, na planti bilong wit samting na wain.

27:29  Larim ol manmeri i ken wokim wok wokboi long yu, na ol kantri i ken lindaun long yu. Stap bikman antap long ol brata bilong yu, na larim ol pikinini man bilong mama bilong yu i ken lindaun long yu. Tok nogut i stap long olgeta wan wan husat i tok nogut long yu, na blesing i stap long em husat i blesim yu.

27:30  ¶ Na em i kamap olsem, long taim stret long Aisak i bin wokim wanpela pinis long blesim Jekop, na klostu yet long taim Jekop i go ausait i lusim pes bilong Aisak, papa bilong en, long Iso, brata bilong em, i kam insait long wok bilong em bilong painim abus.

27:31  Na em tu i bin wokim mit i gat gutpela test, na bringim dispela i go long papa bilong em, na tokim papa bilong em, Larim papa bilong mi kirap, na kaikai long abus bilong wail animal bilong pikinini man bilong em, inap long tewel bilong yu i ken blesim mi.

27:32  Na Aisak, papa bilong em, i tokim em, Yu husat? Na em i tok, Mi pikinini man bilong yu, namba wan pikinini bilong yu Iso.

27:33  Na Aisak i guria planti moa yet, na tok, Husat? Em husat i bin kisim abus bilong wail animal, na bringim dispela long mi, na mi bin kaikai bilong olgeta bipo yu kam, na bin blesim em, i stap we? Yes, na blesing bai stap long em.

27:34  Na taim Iso i harim ol toktok bilong papa bilong em, em i singaut wantaim wanpela krai i bikpela na i pait tru, na tokim papa bilong em, Blesim mi, yes, mi tu, O papa bilong mi.

27:35  Na em i tok, Brata bilong yu i kam wantaim tingting i antap tumas, na em i bin kisim i go blesing bilong yu.

27:36  Na em i tok, Ating em i no stret long kolim nem bilong em Jekop? Long wanem, em i bin kisim ples bilong mi dispela tupela taim. Em i kisim i go rait bilong mi bilong namba wan pikinini. Na, lukim, nau em i bin kisim i go blesing bilong mi. Na em i tok, Yu no bin holim bek wanpela blesing bilong mi?

27:37  Na Aisak i bekim na tokim Iso, Lukim, mi bin mekim em bikman bilong yu, na olgeta brata bilong em mi bin givim long em bilong stap ol wokboi bilong em. Na wantaim wit samting na wain mi bin strongim em. Na mi bai mekim wanem nau long yu, pikinini man bilong mi?

27:38  Na Iso i tokim papa bilong em, Yu gat wanpela blesing tasol, papa bilong mi? Blesim mi, yes, mi tu, O papa bilong mi. Na Iso i litimapim nek bilong em, na krai tru.

27:39  Na Aisak, papa bilong em, i bekim na tokim em, Lukim, ples bilong sindaun long en bilong yu bai stap dispela gris bilong dispela graun, na wara bilong nait bilong heven i kam daun long antap.

27:40  Na long bainat bilong yu bai yu stap laip, na yu bai wokim wok wokboi long brata bilong yu. Na em bai kamap olsem taim yu gat strong bilong bosim, long yu bai brukim dispela yok i lusim nek bilong yu.

27:41  ¶ Na Iso i no laikim tru Jekop, bilong tingim dispela blesing we papa bilong em i bin blesim em wantaim dispela. Na Iso i tok insait long bel bilong em, Ol de bilong krai sori long papa bilong mi i klostu. Bihain bai mi kilim i dai brata bilong mi Jekop.

27:42  Na ol i tokim Rebeka long ol dispela toktok bilong Iso, namba wan pikinini man bilong em. Na em i salim tok na singautim Jekop, pikinini man bilong em i yangpela moa, na tokim em, Lukim, brata bilong yu Iso, long sait bilong yu, i givim bel isi long em yet, taim em i wokim tingting long kilim yu.

27:43  Olsem na nau, pikinini man bilong mi, bihainim nek bilong mi. Na kirap, na yu ranawe i go long Leban, brata bilong mi, long Haran.

27:44  Na stap yet wantaim em sampela de, inap long belhat nogut tru bilong brata bilong yu i tanim i go,

27:45  Inap belhat bilong brata bilong yu i tanim i go lusim yu, na em i lusim tingting long dispela samting yu bin mekim long em. Bihain mi bai salim tok, na kisim yu i kam long dispela hap. Bilong wanem God i ken tekewe tu yutupela wantaim long mi long wanpela de?

27:46  Na Rebeka i tokim Aisak, Mi pilim les tru long laip bilong mi, bilong tingim ol pikinini meri Het. Sapos Jekop i kisim wanpela meri long ol pikinini meri bilong Het, kain olsem ol dispela husat i stap bilong ol pikinini meri bilong dispela hap, laip bilong mi bai mekim wanem gutpela samting long mi?

Chapter 28

28:1  ¶ Na Aisak i singautim Jekop, na blesim em, na givim tok long em, na tokim em, Yu bai i no inap kisim wanpela meri long ol pikinini meri bilong Kenan.

28:2  Kirap, go long Padan-aram, long haus bilong Betyuel, papa bilong mama bilong yu. Na yu kisim wanpela meri long hap long ol pikinini meri bilong Leban, brata bilong mama bilong yu.

28:3  Na God i Gat Olgeta Strong i ken blesim yu na mekim yu i karim planti kaikai, na mekim yu kamap planti moa, inap long yu ken kamap planti manmeri tru,

28:4  Na givim yu blesing bilong Ebraham, long yu, na long tumbuna pikinini bilong yu wantaim yu, inap long yu ken kisim dispela hap graun olsem samting papa i givim pikinini, we yu stap waira long en, dispela God i givim long Ebraham.

28:5  Na Aisak i salim Jekop i go. Na em i go long Padan-aram long Leban, pikinini man bilong man Siria Betyuel, brata bilong Rebeka, mama bilong Jekop na Iso.

28:6  ¶ Taim Iso i luksave long Aisak i bin blesim Jekop, na salim em i go long Padan-aram, bilong kisim wanpela meri long hap, na long taim em i blesim em em i bin givim wanpela tok long em, i spik, Yu bai i no inap kisim wanpela meri long ol pikinini meri bilong Kenan,

28:7  Na long Jekop i bihainim papa bilong em na mama bilong em, na em i go pinis long Padan-aram,

28:8  Na taim Iso i luksave long ol pikinini meri bilong Kenan i no amamasim Aisak, papa bilong en,

28:9  Nau Iso i go long Ismael na kisim i go long ol meri bilong em, dispela em i gat, Mahalat, pikinini meri bilong Ismael, pikinini man bilong Ebraham, susa bilong Nebasot, bilong stap meri bilong em.

28:10  ¶ Na Jekop i lusim Biar-siba i go ausait, na em i wok long go long Haran.

28:11  Na em i kamap long wanpela ples stret, na stap yet long dispela hap long olgeta hap bilong nait, bilong wanem, san i go daun pinis. Na em i kisim bilong ol ston bilong dispela ples na putim ol bilong ol pilo bilong em, na slipim bodi bilong em long dispela ples bilong slip.

28:12  Na em i driman, na lukim, wanpela lata i sanap long graun, na het bilong en i go inap long heven. Na lukim, ol ensel bilong God i wok long go antap na kam daun long en.

28:13  Na, lukim, BIKPELA i sanap antap long en, na tok, Mi God BIKPELA bilong Ebraham, tumbuna papa bilong yu, na Mi God bilong Aisak. Dispela hap we yu slip long en, long yu bai Mi givim dispela, na long tumbuna pikinini bilong yu.

28:14  Na tumbuna pikinini bilong yu bai stap olsem das bilong graun, na yu bai go op ausait long hap san i go daun, na long hap sankamap, na long not, na long saut. Na insait long yu na insait long tumbuna pikinini bilong yu bai olgeta famili bilong dispela graun kisim blesing.

28:15  Na, lukim, Mi stap wantaim yu, na Mi bai lukautim yu long olgeta ples we yu go, na Mi bai bringim yu i kam bek gen long dispela hap graun. Long wanem, Mi bai i no inap lusim yu, inap long Mi bin mekim dispela samting Mi bin toktok long yu long en.

28:16  ¶ Na Jekop i kirap ausait long slip bilong em, na em i tok, Tru tumas, BIKPELA i stap long dispela ples. Na mi no bin save.

28:17  Na em i pret, na tok, Dispela em i ples bilong pret tru olsem wanem! Dispela em i no arapela, tasol em i haus bilong God, na dispela em i dua bilong banis bilong heven.

28:18  Na Jekop i kirap long moning tru, na kisim dispela ston em i bin putim bilong ol pilo bilong em, na sanapim dispela bilong wanpela pos, na kapsaitim wel antap long en.

28:19  Na em i kolim nem bilong dispela ples Betel. Tasol nem bilong dispela biktaun ol i kolim Lus long pastaim.

28:20  Na Jekop i wokim strongpela promis long wanpela strongpela promis, i spik, Sapos God bai i stap wantaim mi, na bai lukautim mi long dispela rot, dispela mi go long en, na bai givim mi bret bilong kaikai, na klos bilong pasim,

28:21  Inap long mi bai kam gen long haus bilong papa bilong mi wantaim bel isi, orait bai BIKPELA i stap God bilong mi.

28:22  Na dispela ston, dispela mi bin sanapim bilong wanpela pos, bai stap haus bilong God. Na bilong olgeta samting dispela Yu bai givim mi, tru tumas, mi bai givim namba ten hap long Yu.

Chapter 29

29:1  ¶ Long dispela taim Jekop i go long wokabaut bilong em, na kam insait long hap graun bilong ol manmeri bilong hap sankamap.

29:2  Na em i lukluk, na lukim wanpela hul wara i stap long ples kunai, na, harim, tripela lain sipsip i slip i stap klostu long en. Long wanem, ausait long dispela hul wara ol i save givim wara long ol lain sipsip. Na wanpela bikpela ston i stap antap long maus bilong hul wara.

29:3  Na long dispela hap ol i save bungim olgeta lain sipsip. Na ol i save tantanim ston i lusim maus bilong hul wara, na givim wara long ol sipsip, na putim ston gen antap long maus bilong hul wara long ples bilong en.

29:4  Na Jekop i tokim ol, Ol brata bilong mi, yupela i bilong wanem hap? Na ol i tok, Mipela i bilong Haran.

29:5  Na em i tokim ol, Yupela i save long Leban, pikinini man bilong Nehor? Na ol i tok, Mipela i save long em.

29:6  Na em i tokim ol, Em i stap orait? Na ol i tok, Em i stap orait. Na, lukim, Resel, pikinini meri bilong em, i kam wantaim ol sipsip.

29:7  Na em i tok, Harim, san i stap antap yet, na tu em i no taim bilong ol bulmakau samting i ken bung wantaim. Yupela givim wara long ol sipsip, na go na givim kaikai long ol.

29:8  Na ol i tok, Mipela i no inap, inap long olgeta lain sipsip i bung wantaim, na inap long ol i tantanim ston i lusim maus bilong hul wara. Nau mipela i givim wara long ol sipsip.

29:9  ¶ Na taim em i toktok yet wantaim ol, Resel i kam wantaim ol sipsip bilong papa bilong em. Long wanem, em i save lukautim ol.

29:10  Na em i kamap olsem, taim Jekop i lukim Resel, pikinini meri bilong Leban, brata bilong mama bilong em, na ol sipsip bilong Leban, brata bilong mama bilong em, long Jekop i go klostu, na tantanim ston i lusim maus bilong hul wara, na givim wara long lain sipsip bilong Leban, brata bilong mama bilong em.

29:11  Na Jekop i givim kis long Resel, na litimapim nek bilong em, na krai tru.

29:12  Na Jekop i tokim Resel long em i brata bilong papa bilong em, na long em i pikinini man bilong Rebeka. Na em i ran na tokim papa bilong em.

29:13  Na em i kamap olsem, taim Leban i harim stori bilong Jekop, pikinini man bilong susa bilong em, long em i ran bilong bungim em, na holimpas em, na givim kis long em, na bringim em i kam long haus bilong em. Na em i tokim Leban long olgeta dispela samting.

29:14  Na Leban i tokim em, Tru tumas, yu bun bilong mi na bodi bilong mi. Na em i stap wantaim em long taim olsem wanpela mun.

29:15  ¶ Na Leban i tokim Jekop, Bikos yu stap brata bilong mi, olsem na ating yu mas mekim wok nating long mi? Tokim mi, pe bilong wok bilong yu bai stap wanem?

29:16  Na Leban i gat tupela pikinini meri. Nem bilong namba wan pikinini em Lia, na nem bilong pikinini i yangpela moa em Resel.

29:17  Lia i gat ai i no strong long man. Tasol Resel i naispela tru na i luk gutpela tru.

29:18  Na Jekop i laikim tru Resel. Na em i tok, Mi bai wokim wok wokboi long yu sevenpela yia bilong kisim Resel, pikinini meri bilong yu i yangpela moa.

29:19  Na Leban i tok, Em i mobeta long mi givim em long yu, long mi ken givim em long narapela man. Stap wantaim mi.

29:20  Na Jekop i wokim wok wokboi sevenpela yia bilong kisim Resel. Na ol i luk olsem long em olsem sampela de tasol, long dispela laikim tru em i gat long em.

29:21  Na Jekop i tokim Leban, Givim mi meri bilong mi, long wanem, mi inapim ol de bilong mi, inap long mi ken go insait i go long em.

29:22  Na Leban i bungim olgeta man bilong dispela ples wantaim, na wokim wanpela bikpela kaikai.

29:23  Na em i kamap olsem long apinun tru, long em i kisim Lia, pikinini meri bilong en, na bringim em i go long em. Na em i go insait i go long em.

29:24  Na Leban i givim long pikinini meri bilong em Lia Silpa, wokmeri bilong em, bilong wanpela wokmeri bilong em.

29:25  Na em i kamap olsem, long moningtaim, lukim, em i Lia. Na Jekop i tokim Leban, Dispela em i wanem samting yu bin mekim long mi? Ating mi no bin wokim wok wokboi wantaim yu bilong kisim Resel? Bilong wanem yu bin trikim mi?

29:26  Na Leban i tok, I no ken stap olsem long kantri bilong mipela, bilong givim pikinini meri i yangpela moa bipo long namba wan pikinini.

29:27  Inapim wik bilong em, na mipela bai givim yu dispela tu bilong dispela wok wokboi yu bai mekim yet wantaim mi sevenpela arapela yia moa.

29:28  Na Jekop i mekim olsem, na inapim wik bilong em. Na em i givim em Resel, pikinini meri bilong em bilong maritim tu.

29:29  Na Leban i givim long Resel, pikinini meri bilong em, Bilha, wokmeri bilong em, bilong i stap wokmeri bilong em.

29:30  Na em i go insait tu long i go long Resel, na em i laikim tru Resel tu moa long Lia, na wokim wok wokboi yet wantaim em sevenpela arapela yia.

29:31  ¶ Na taim BIKPELA i luksave long em i no laikim tru Lia, Em i opim bel bilong em. Tasol Resel i no inap karim pikinini.

29:32  Na Lia i kisim bel, na karim pikinini man, na em i kolim nem bilong em Ruben. Long wanem, em i tok, Tru tumas, BIKPELA i bin lukluk long taim hevi bilong mi. Olsem na nau man bilong mi bai laikim mi tru.

29:33  Na em i kisim bel gen na karim pikinini man. Na em i tok, Bikos BIKPELA i bin harim long em i no laikim mi tru, olsem na Em i bin givim mi dispela pikinini man tu. Na em i kolim nem bilong em Simion.

29:34  Na em i kisim bel gen na karim pikinini man. Na em i tok, Nau dispela taim man bilong mi bai pas wantaim mi, bilong wanem, mi bin karim tripela pikinini man long em. Olsem na em i kolim nem bilong em Livai.

29:35  Na em i kisim bel gen, na karim pikinini man. Na em i tok, Nau bai mi litimapim nem bilong BIKPELA. Olsem na em i kolim nem bilong em Juda. Na em i lusim wok bilong karim pikinini.

Chapter 30

30:1  ¶ Na taim Resel i lukim olsem, em i no karim ol pikinini long Jekop, Resel i mangal long susa bilong en i gat planti pikinini. Na em i tokim Jekop, Yu mas givim ol pikinini long mi. Sapos nogat bai mi dai pinis.

30:2  Na belhat bilong Jekop i kirap birua long Resel. Na em i tok, Ating mi kisim ples bilong God, husat i pasim long yu kaikai bilong bel?

30:3  Na em i tok, Lukim wokmeri bilong mi Bilha. Yu go insait na go long em. Na bai em i karim pikinini antap long skru bilong lek bilong mi. Olsem na mi tu i ken kisim ol pikinini long em.

30:4  Na em i givim em Bilha, wokmeri bilong en, em i kamap meri bilong em. Na Jekop i go insait na i go long em.

30:5  Na Bilha i kisim bel na karim pikinini man long Jekop.

30:6  Na Resel i tok, God i bin skelim mi olsem jas. Na tu Em i harim nek bilong mi na givim mi wanpela pikinini man. Olsem na em i kolim nem bilong em Dan.

30:7  Na Bilha, wokmeri bilong Resel, em i kisim bel gen. Na em i karim namba tu pikinini man long Jekop.

30:8  Na Resel i tok, Long ol pait i hatwok tru mi bin pait wantaim susa bilong mi. Na mi bin win. Na em i kolim nem bilong em Naptalai.

30:9  Na taim Lia i lukim olsem, em i no karim pikinini moa, orait em i kisim Silpa, wokmeri bilong en. Na em i givim em long Jekop na em i kamap meri bilong em.

30:10  Na Silpa, wokmeri bilong Lia, i karim pikinini man long Jekop.

30:11  Na Lia i tok, Wanpela ami i kam. Na em i kolim nem bilong em Gat.

30:12  Na Silpa, wokmeri bilong Lia, i karim namba tu pikinini man long Jekop.

30:13  Na Lia i tok, Mi amamas. Long wanem, ol pikinini meri bai kolim mi meri i kisim blesing. Na em i kolim nem bilong em Aser.

30:14  ¶ Na long taim bilong kisim wit, Ruben i go na lukim ol mandrek i stap long ples kunai. Na em i bringim ol i kam long mama bilong en Lia. Orait Resel i tokim Lia, Mi askim plis long yu long yu mas givim mi sampela bilong ol mandrek bilong pikinini man bilong yu.

30:15  Na Lia i tokim em, Yu bin tekewe man bilong mi, na ating dispela em i liklik samting, a? Na ating yu laik tekewe ol mandrek bilong pikinini man bilong mi tu, a? Na Resel i tok, Olsem na bai em i slip wantaim yu long dispela nait long baim ol mandrek bilong pikinini man bilong yu.

30:16  Na Jekop i lusim ples kunai long apinun tru, na Lia i go ausait bilong bungim em. Na em i tok, Yu mas kam insait na kam long mi. Long wanem, tru tumas, mi bin baim yu long ol mandrek bilong pikinini man bilong mi. Na em i slip wantaim em long dispela nait.

30:17  Na God i harim Lia. Na em i kisim bel, na em i karim namba faiv pikinini man long Jekop.

30:18  Na Lia i tok, God i bin givim mi pe bilong mi, bilong wanem, mi bin givim wokmeri bilong mi long man bilong mi. Na em i kolim nem bilong em Isaka.

30:19  Na Lia i kisim bel gen na karim namba sikis pikinini man long Jekop.

30:20  Na Lia i tok, God i bin givim mi gutpela pe bilong marit. Nau man bilong mi bai i stap wantaim mi, bilong wanem, mi bin karim sikispela pikinini man long em. Na em i kolim nem bilong em Sebyulan.

30:21  Na bihain em i karim pikinini meri. Na em i kolim nem bilong em Daina.

30:22  Na God i tingim gen Resel. Na God i harim Em, na Em i opim bel bilong em.

30:23  Na em i kisim bel na karim pikinini man. Na em i tok, God i bin tekewe samting bilong givim sem long mi.

30:24  Na em i kolim nem bilong em Josep. Na em i tok, BIKPELA bai skruim narapela pikinini man long mi.

30:25  ¶ Na em i kamap olsem, taim Resel i karim Josep pinis, Jekop i tokim Leban, Yu salim mi i go, bai mi ken i go long ples bilong mi yet, na long kantri bilong mi.

30:26  Yu mas givim mi ol meri bilong mi na ol pikinini bilong mi. Mi bin mekim wok long yu long kisim ol. Na yu mas larim mi go. Long wanem, yu save long wok bilong mi, em mi bin mekim long yu.

30:27  Na Leban i tokim em, Mi askim plis long yu, sapos mi kisim marimari long ai bilong yu, yu stap. Long wanem, mi lukim na mi kisim save olsem, long helpim yu, BIKPELA i bin blesim mi.

30:28  Na em i tok, Yu makim pe bilong wok bilong yu, na bai mi givim dispela.

30:29  Na em i tokim em, Yu save pasin bilong mi long mekim wok long yu, na pasin long ol sipsip samting bilong yu i stap wantaim mi.

30:30  Long wanem, taim mi no kam yet, yu holim liklik samting. Na nau em i kamap moa na i kamap planti samting tru. Na taim mi kam inap long nau, BIKPELA i bin blesim yu. Na nau wanem taim mi ken lukautim ol wanhaus bilong mi yet tu?

30:31  Na em i tok, Bai mi givim wanem samting long yu? Na Jekop i tok, Yu no ken givim wanpela samting long mi. Sapos yu mekim dispela samting long mi, bai mi givim kaikai long lain sipsip samting bilong yu na lukautim ol gen.

30:32  Nau bai mi wokabaut namel long lain sipsip na meme olgeta bilong yu. Na bai mi rausim long namel olgeta animal i gat makmak na kain kain mak na olgeta braunpela animal namel long ol sipsip. Na bai mi rausim ol animal i gat makmak na kain kain mak namel long ol meme. Na dispela kain bai i stap pe bilong mi.

30:33  Olsem bihain stretpela pasin bilong mi bai bekim tok olsem mausman bilong mi, long taim bilong kisim pe bilong mi em i kamap long pes bilong yu. Olgeta wan wan animal i no gat makmak o kain kain mak namel long ol meme na i no braunpela namel long ol sipsip, yu ken save mi bin stilim dispela sapos mi kisim.

30:34  Na Leban i tok, Lukim, mi laik em i ken i stap olsem tok bilong yu.

30:35  Na long dispela de Leban i rausim ol meme man i gat longpela mak nabaut na i gat kain kain mak. Na em i rausim olgeta meme meri i gat makmak na kain kain mak, wantaim olgeta wan wan i gat waitpela mak long en, na olgeta braunpela namel long ol sipsip. Na em i givim ol long han bilong ol pikinini man bilong en.

30:36  Na em i makim tripela de wokabaut namel long em yet na Jekop. Na Jekop i givim kaikai long ol arapela sipsip bilong Leban.

30:37  ¶ Na Jekop i kisim ol liklik han bilong grinpela diwai papla na bilong diwai hesel na diwai sesnat. Na em i rausim sampela hap skin bilong ol bilong wokim longpela waitpela mak i kamap ples klia long ol liklik han bilong ol diwai.

30:38  Na ol dispela liklik han bilong ol diwai em i bin rausim hap skin bilong ol, em i putim ol long ol baret long ol bokis wara bilong ol animal, long pes bilong ol lain sipsip samting, taim ol dispela lain i kam bilong dring. Olsem na ol i ken kisim bel taim ol i kam bilong dring.

30:39  Na ol lain sipsip samting i kisim bel long pes bilong ol liklik han bilong diwai. Na ol i karim ol animal i gat longpela mak nabaut na i gat makmak na kain kain mak.

30:40  Na Jekop i putim ol pikinini sipsip long narapela hap. Na em i putim ol pes bilong ol lain sipsip samting i lukim ol lain i gat longpela mak nabaut na i lukim olgeta braunpela sipsip long lain sipsip samting bilong Leban. Na em i putim ol lain sipsip samting bilong em yet long hap bilong ol yet. Na em i no putim ol wantaim ol animal bilong Leban.

30:41  Na em i kamap olsem, taim ol animal i strongpela moa i kisim bel, orait Jekop i putim ol dispela liklik han bilong diwai long ol baret long ai bilong ol animal, bai ol i ken kisim bel namel long ol liklik han bilong diwai.

30:42  Tasol taim ol animal i no gat strong, em i no putim ol. Olsem na ol animal i no gat strong ol i bilong Leban. Na ol animal i strongpela moa ol i bilong Jekop.

30:43  Na dispela man i kamap bikpela moa yet. Na em i gat planti bulmakau samting na ol wokmeri na ol wokboi na ol kemel na ol donki.

Chapter 31

31:1  ¶ Na em i harim ol tok bilong ol pikinini man bilong Leban. Ol i spik, Jekop i tekewe olgeta samting i bilong papa bilong mipela pastaim. Na long dispela samting i bilong papa pastaim bilong mipela em i bin kisim olgeta dispela glori.

31:2  Na Jekop i lukim pes bilong Leban. Na, lukim, em i no amamas long em olsem bipo.

31:3  Na BIKPELA i tokim Jekop, Yu go bek long hap graun bilong ol papa bilong yu na go bek long ol wanlain bilong yu. Na bai Mi stap wantaim yu.

31:4  Na Jekop i salim tok i go na singautim Resel na Lia i kam long ples kunai long lain sipsip samting bilong en.

31:5  Na em i tokim ol, Mi lukim pes bilong papa bilong yupela em i no amamas long mi olsem bipo. Tasol God bilong papa bilong mi Em i bin stap wantaim mi.

31:6  Na yupela i save olsem, long olgeta strong bilong mi, mi bin mekim wok long papa bilong yupela.

31:7  Na papa bilong yupela i bin giamanim mi na senisim pe bilong mi tenpela taim. Tasol God i no larim em i bagarapim mi.

31:8  Sapos em i tok olsem, Ol animal i gat makmak bai i stap pe bilong yu, orait olgeta animal i karim pikinini i gat makmak. Na sapos em i tok olsem, Ol animal i gat longpela mak nabaut ol bai i stap pe bilong yu, orait olgeta animal i karim pikinini i gat longpela mak nabaut.

31:9  Long dispela pasin God i bin tekewe ol animal bilong papa bilong yupela na givim ol long mi.

31:10  Na em i kamap olsem, taim ol animal i kisim bel, mi bin litimapim ol ai bilong mi. Na long wanpela driman mi lukim. Na, lukim, ol sipsip man i kalap long ol animal ol i gat longpela mak nabaut na ol makmak na kain kain mak.

31:11  Na ensel bilong God i tokim mi long wanpela driman, i spik, Jekop. Na mi tok, Mi stap hia.

31:12  Na em i tok, Nau yu mas litimapim ol ai bilong yu na lukim, olgeta sipsip man i kalap long ol animal ol i gat longpela mak nabaut na makmak na kain kain mak. Long wanem, Mi bin lukim olgeta samting Leban i save mekim long yu.

31:13  Mi God bilong Betel, we yu bin welim pos, na we yu bin promisim wanpela strongpela promis long Mi. Nau yu kirap na lusim dispela hap graun na go bek long hap graun bilong ol wanlain bilong yu.

31:14  Na Resel na Lia i bekim tok na tokim em, Ating sampela hap skel o samting i bilong papa em i laik givim mipela em i stap yet long haus bilong papa bilong mipela, a?

31:15  Ating em i makim mipela olsem ol meri bilong longwe ples? Long wanem, em i bin salim mipela na em i bin kaikai mani bilong mipela tu.

31:16  Long wanem, olgeta planti mani samting God i bin tekewe long papa bilong mipela, em bilong mipela na ol pikinini bilong mipela. Olsem na nau wanem samting God i bin tokim yu, yu mas mekim.

31:17  ¶ Na Jekop i kirap na putim ol pikinini man bilong en na ol meri bilong en antap long ol kemel.

31:18  Na em i karim i go olgeta bulmakau samting bilong en, na olgeta kago bilong en em i bin kisim. Em i karim i go ol dispela bulmakau samting bilong en, em i bin kisim ol long Padan-aram Na em i laik go long Aisak, papa bilong en, long hap graun bilong Kenan.

31:19  Na Leban i go bilong katim gras bilong ol sipsip bilong en. Na Resel i stilim ol god giaman bilong papa bilong en.

31:20  Na Jekop i lusim hait dispela ples, na Leban, man bilong Siria, em i no save. Long wanem em i no tokim em long em i ranawe.

31:21  Olsem na em i ranawe wantaim olgeta samting em i gat. Na em i kirap na brukim bikwara. Na em i putim pes bilong em i go long maunten Gileat.

31:22  Na long de namba tri ol i tokim Leban long Jekop i bin ranawe.

31:23  Na em i kisim ol brata bilong en i go wantaim em, na ol i hariap bilong kisim em inap sevenpela de wokabaut. Na ol i kamap long em long maunten Gileat.

31:24  Na long nait God i kamap long Leban, man bilong Siria, long wanpela driman. Na Em i tokim em, Yu was gut. Nogut yu mekim gutpela tok o tok nogut long Jekop.

31:25  ¶ Orait Leban i kamap long Jekop. Nau Jekop i bin sanapim haus sel bilong en long dispela maunten. Na Leban wantaim ol brata bilong en, ol i sanapim haus sel long maunten Gileat.

31:26  Na Leban i tokim Jekop, Yu bin mekim wanem, inap long yu bin lusim mi hait na mi no save, na yu karim i go ol pikinini meri bilong mi, olsem ol kalabusman ol i kisim wantaim bainat?

31:27  Bilong wanem yu bin ranawe hait, na lusim mi hait, na yu no bin tokim mi, inap long mi ken salim yu i go wantaim amamas, na wantaim ol song, wantaim tamburin, na wantaim harp?

31:28  Na yu no bin larim mi givim kis long ol pikinini man bilong mi na ol pikinini meri bilong mi? Nau yu bin mekim kranki pasin taim yu mekim olsem.

31:29  Strong i stap long han bilong mi bilong bagarapim yu. Tasol asde nait God bilong papa bilong yu i bin tokim mi, i spik, Yu was gut. Yu no ken mekim gutpela tok o tok nogut long Jekop.

31:30  Na nau yu ting yu mas i go, long wanem yu krai long lukim hauslain bilong papa bilong yu. Tasol bilong wanem yu bin stilim ol god bilong mi?

31:31  Na Jekop i bekim tok na tokim Leban, Long wanem, mi pret. Long wanem mi tok, ating yu strong na yu laik kisim long mi ol pikinini meri bilong yu.

31:32  Yu lukim ol god bilong yu i stap wantaim wanpela, orait em i no ken stap laip. Long ai bilong ol brata bilong yumi, yu ken lukim samting bilong yu i stap wantaim mi, na yu ken kisim dispela i go long yu. Long wanem Jekop i no save, Resel i bin stilim ol.

31:33  Na Leban i go insait long haus sel bilong Jekop, na insait long haus sel bilong Lia, na insait long ol haus sel bilong tupela wokmeri. Tasol em i no lukim ol. Bihain em i lusim haus sel bilong Lia na i go insait long haus sel bilong Resel.

31:34  Nau Resel i bin kisim ol god giaman na putim ol insait long sia bilong sindaun antap long kemel. Na em i sindaun antap long ol. Na Leban i wok long painim long olgeta hap bilong haus sel, tasol em i no lukim ol.

31:35  Na em i tokim papa bilong en, Bikman bilong mi, yu no ken bel hevi long mi no inap sanap long pes bilong yu. Long wanem, pasin bilong ol meri i stap long mi. Na em i wok long painim, tasol em i no lukim ol god giaman.

31:36  ¶ Na Jekop i belhat na i tok pait wantaim Leban. Na Jekop i bekim tok long Leban, na i tok, Mi sakim wanem lo? Mi mekim wanem sin long yu bin hariap tru long kamap long mi?

31:37  Yu bin lukluk long olgeta kago bilong mi, tasol yu bin lukim wanem samting bilong olgeta samting bilong haus bilong yu? Putim hia long ai bilong ol brata bilong mi na ol brata bilong yu, bai ol i ken skelim namel long yumi.

31:38  Mi bin i stap wantaim yu dispela 20 yia. Ol sipsip meri bilong yu na ol meme meri bilong yu, ol i no bin kisim bagarap na lusim ol pikinini bilong ol long taim i no stret. Na mi no bin kaikai ol sipsip man bilong lain sipsip bilong yu.

31:39  Dispela samting ol wel abus i bin bagarapim mi no bin karim i kam long yu. Mi bin karim hevi long dispela i lus. Yu bin askim em long han bilong mi, maski ol i bin stilim long de o ol i bin stilim long nait.

31:40  Mi bin stap olsem, long de, hat bilong san i kaikai mi olgeta. Na long nait ais i kaikai mi olgeta. Na slip i dai bilong mi i lusim tupela ai bilong mi.

31:41  Mi bin i stap olsem inap 20 yia long haus bilong yu. Mi bin mekim wok long yu inap 14 yia long kisim tupela pikinini meri bilong yu, na inap sikispela yia long kisim ol bulmakau samting bilong yu. Na tenpela taim yu bin senisim pe bilong mi.

31:42  God bilong papa bilong mi, em God bilong Ebraham, na pret bilong Aisak, na sapos Em i no bin stap wantaim mi, orait nau yu bin salim mi i go nating. Tasol God i bin lukim hevi bilong mi na hatwok bilong tupela han bilong mi, na asde nait Em i bin hatim yu.

31:43  ¶ Na Leban i bekim tok na tokim Jekop, Ol dispela pikinini meri i ol pikinini meri bilong mi. Na ol dispela pikinini i ol pikinini bilong mi. Na ol dispela bulmakau samting i ol bulmakau samting bilong mi. Na olgeta samting yu lukim em bilong mi. Na long dispela de mi ken mekim wanem long ol dispela pikinini meri bilong mi o long ol pikinini bilong ol, ol i bin karim ol?

31:44  Olsem na yu kam nau. Yumi ken wokim wanpela kontrak, mi wantaim yu. Na long em i ken stap wanpela witnes namel long mi na yu.

31:45  Na Jekop i kisim wanpela ston na putim em antap long i stap wanpela pos.

31:46  Na Jekop i tokim ol brata bilong en, Yupela bungim ol ston. Na ol i kisim ol ston na hipim ol. Na ol i kaikai long dispela hap antap long ol dispela ston ol i bin hipim.

31:47  Na Leban i kolim em Jegar-sahaduta. Tasol Jekop i kolim em Galet.

31:48  Na Leban i tok, Ol dispela ston ol i bin hipim em i wanpela witnes namel long mi na yu long dispela de. Olsem na ol i kolim nem bilong en Galet,

31:49  Na Mispa. Long wanem, em i tok, BIKPELA i ken was namel long mi na yu, taim yumi no stap wantaim.

31:50  Sapos yu givim bel hevi long ol pikinini meri bilong mi, o sapos yu kisim ol arapela meri i kamap meri bilong yu i narapela long ol pikinini meri bilong mi, orait i no gat man i stap wantaim yumi. Lukim, God i stap witnes namel long mi na yu.

31:51  Na Leban i tokim Jekop, Yu mas lukim ol dispela ston ol i bin hipim, na yu mas lukim dispela pos mi bin putim namel long mi na yu.

31:52  Ol dispela ston ol i bin hipim i ken stap witnes, na dispela pos i ken stap witnes olsem, bai mi no abrusim dispela hip ston bilong i kam long yu. Na bai yu no abrusim dispela hip ston na dispela pos long i kam long mi, long bagarapim mipela.

31:53  God bilong Ebraham, na God bilong Nehor, em God bilong papa bilong ol, Em i stap jas namel long yumi. Na Jekop i tok tru antap long pret bilong papa bilong en Aisak.

31:54  Na Jekop i ofaim sakrifais long dispela maunten. Na em i singautim ol brata bilong en bilong kaikai bret. Na ol i kaikai bret. Na ol i stap long dispela maunten long olgeta hap bilong dispela nait.

31:55  Na long moningtaim tru, Leban i kirap na i givim kis long ol pikinini man bilong en na ol pikinini meri bilong en. Na em i blesim ol. Na Leban i lusim ol, na i go bek long ples bilong en.

Chapter 32

32:1  ¶ Na Jekop i wokabaut i go long rot bilong em. Na ol ensel bilong God i bungim em.

32:2  Na taim Jekop i lukim ol, em i tok, Dispela em i ami bilong God. Na em i kolim nem bilong dispela ples Mahanaim.

32:3  ¶ Na Jekop i salim ol mausman i go pas long em. Ol i go long Iso, brata bilong em, long hap graun bilong Sir, em kantri bilong Idom.

32:4  Na em i givim strongpela tok long ol, i spik, Yupela i mas tok long bikman bilong mi Iso olsem, Wokboi bilong yu Jekop i tok olsem, Mi bin sindaun sampela taim wantaim Leban, na mi bin i stap long hap inap long nau.

32:5  Na mi gat ol bulmakau man, na ol donki, na ol sipsip samting, na ol wokboi, na ol wokmeri. Na mi bin salim man bilong tokim bikman bilong mi, bai mi ken kisim marimari long ai bilong yu.

32:6  Na ol mausman i kam bek long Jekop, na i spik, Mipela i kamap long brata bilong yu Iso. Na tu em i kam bilong bungim yu. Na 400 man i kam wantaim em.

32:7  Orait Jekop i pret nogut tru na i pilim hevi. Na em i brukim ol manmeri i stap wantaim em, na ol sipsip samting, na ol bulmakau, na ol kemel, em i brukim ol long tupela lain.

32:8  Na em i tok, Sapos Iso i kamap long wanpela lain na i paitim dispela, orait arapela lain i stap yet em i ken ranawe.

32:9  ¶ Na Jekop i tok, O God bilong papa bilong mi Ebraham, na God bilong papa bilong mi Aisak, em dispela BIKPELA i bin tokim mi olsem, Yu go bek long kantri bilong yu, na long ol wanlain bilong yu, na bai Mi mekim gutpela pasin long yu.

32:10  Mi no gutpela inap long kisim liklik hap bilong olgeta sori bilong Yu, na bilong olgeta tok tru Yu bin soim dispela long wokboi bilong Yu. Long wanem, long wokabaut stik bilong mi, mi bin brukim dispela Jordan. Na nau mi kamap tupela lain.

32:11  Mi askim plis long yu long yu mas tekewe mi long han bilong brata bilong mi, long han bilong Iso. Long wanem, mi pret long em. Nogut em bai kam na paitim mi na mama wantaim ol pikinini.

32:12  Na Yu bin tok, Tru tumas, bai Mi mekim gutpela pasin long yu. Na bai Mi mekim ol tumbuna pikinini bilong yu i kamap olsem wesan bilong solwara, man i no inap kaunim ol, long wanem, ol i planti tru.

32:13  ¶ Na long dispela nait yet, em i stap long dispela hap. Na long dispela samting i kam long han bilong en, em i kisim presen i go long Iso, brata bilong en.

32:14  Em i kisim 200 meme meri, na 20 meme man, na 200 sipsip meri, na 20 sipsip man,

32:15  Na 30 kemel meri wantaim ol pikinini bilong ol, na 40 bulmakau meri, na tenpela bulmakau man, na 20 donki meri, na tenpela yangpela donki.

32:16  Na em i givim ol long han bilong ol wokboi bilong en, olgeta wan wan lain long ples bilong ol yet. Na em i tokim ol wokboi bilong en, Yupela i mas brukim dispela hap paslain long mi. Na yupela i mas putim spes namel long arapela lain na arapela lain.

32:17  Na em i givim strongpela tok long man i go pas, na em i spik, Taim Iso brata bilong mi i bungim yu na em i askim yu, i spik, Yu bilong husat? Na yu go we? Na ol dispela i stap long pes bilong yu, ol i bilong husat?

32:18  Orait yu mas tok, Ol i bilong wokboi bilong yu Jekop. Em i wanpela presen em i salim i kam long bikman bilong mi Iso. Na, lukim, em tu i stap baksait long mipela.

32:19  Na em i givim wankain strongpela tok long namba tu man, na long namba tri man, na long olgeta man i bihainim ol lain animal. Na em i spik, Long dispela wankain pasin yupela i mas toktok long Iso, taim yupela i lukim em.

32:20  Na moa tu yupela i mas tok, Lukim, wokboi bilong yu Jekop i stap baksait long mipela. Long wanem, em i tok, Long dispela presen i go paslain long mi, bai mi mekim em i bel isi. Na bihain bai mi lukim pes bilong em, sapos em bai orait long kisim dispela long mi.

32:21  Olsem na dispela presen i go long hap paslain long em. Na em yet i stap long kem dispela nait.

32:22  Na long dispela nait em i kirap. Na em i kisim tupela meri bilong en, na tupela wokmeri bilong en, na 11-pela pikinini man bilong en, na em i brukim liklik wara Jabok.

32:23  Na em i kisim ol na salim ol i go long hapsait bilong liklik wara. Na em i salim i go hapsait ol samting bilong en.

32:24  ¶ Na Jekop tasol i stap. Na long dispela hap wanpela man i pait wantaim em inap long tulait i kamap.

32:25  Na taim em i lukim em i no winim em, orait em i tasim skru i antap bilong lek bilong em. Na skru i antap bilong lek bilong Jekop i lus, taim em i pait wantaim em.

32:26  Na em i tok, Larim mi go, long wanem, tulait i wok long kamap. Na em i tok, Mi no bai larim yu i go, sapos yu no blesim mi.

32:27  Na em i tokim em, Wanem em i nem bilong yu? Na em i tok, Jekop.

32:28  Na em i tok, Bai ol i no moa kolim nem bilong yu Jekop, nogat. Bai ol i kolim yu Isrel. Long wanem, olsem wanpela pikinini man bilong king, yu gat pawa wantaim God na wantaim man. Na yu bin win.

32:29  Na Jekop i askim em, na tok, Mi askim plis long yu long yu tokim mi long nem bilong yu. Na em i tok, Bilong wanem yu askim nem bilong mi? Na long dispela hap em i blesim em.

32:30  Na Jekop i kolim nem bilong dispela ples Peniel. Em i tok, Long wanem, mi bin lukim God long pes i lukim pes na mi stap laip yet.

32:31  Na taim em i brukim Penyuel, san i kamap long em, na em i wokabaut kranki long lek bilong en.

32:32  Olsem na inap long dispela de ol pikinini bilong Isrel i no save kaikai dispela rop bilong skru i bin kamap liklik. Em i stap long skru bilong lek. Bilong wanem, em i bin tasim skru i antap bilong lek bilong Jekop, long dispela rop bilong skru i bin kamap liklik.

Chapter 33

33:1  ¶ Na Jekop i litimapim tupela ai bilong en na lukluk. Na, lukim, Iso i kam na 400 man wantaim em. Na em i brukim ol pikinini i go long Lia, na i go long Resel, na i go long tupela wokmeri.

33:2  Na em i putim ol wokmeri wantaim ol pikinini bilong ol i go paslain. Na Lia wantaim ol pikinini bilong en i go bihain. Na Resel na Josep i go las.

33:3  Na em i brukim dispela hap na i go paslain long ol. Na em i lindaun long graun sevenpela taim, inap em i kam klostu long brata bilong en.

33:4  Na Iso i ran i kam bilong bungim em na holimpas em. Na em i lindaun klostu long nek bilong Jekop na givim kis long em. Na tupela i krai.

33:5  ¶ Na Iso i litimapim tupela ai bilong en na lukim ol meri na ol pikinini. Na em i tok, Ol dispela i stap wantaim yu, ol i husat? Na em i tok, Ol pikinini God i bin givim wokboi bilong yu long pasin i soim marimari bilong Em.

33:6  Orait ol wokmeri i kam klostu, ol wantaim ol pikinini bilong ol. Na ol i lindaun.

33:7  Na Lia tu wantaim ol pikinini bilong en, ol i kam klostu na lindaun. Na bihain Josep i kam klostu wantaim Resel, na ol i lindaun.

33:8  Na em i tok, Olgeta dispela animal mi bin bungim, yu ting long wanem samting na yu salim ol i kam? Na em i tok, Em bilong kisim marimari long ai bilong bikman bilong mi.

33:9  Na Iso i tok, Brata bilong mi, mi gat inap. Yu mas holimpas ol samting bilong yu i go long yu yet.

33:10  Na Jekop i tok, Nogat. Mi askim plis long yu sapos nau mi kisim marimari long ai bilong yu, orait yu mas kisim presen bilong mi long han bilong mi. Long wanem, mi bin lukim pes bilong yu, na i olsem mi bin lukim pes bilong God. Na yu bin amamas long mi.

33:11  Mi askim plis long yu, long you mas kisim dispela blesing mi bin bringim i kam long yu. Bilong wanem, God i bin mekim pasin i soim marimari long mi, na bilong wanem, mi gat inap. Na em i strong long em, na em i kisim.

33:12  Na Iso i tok, Yumi go long wokabaut bilong yumi. Yumi go, na bai mi go pas long yu.

33:13  Na Jekop i tokim em, bikman bilong mi i save, ol pikinini i no strong. Na ol lain sipsip samting na ol lain bulmakau samting i gat liklik pikinini ol i stap wantaim mi. Na sapos ol man i mekim ol i wokabaut planti long wanpela de, orait dispela lain sipsip samting olgeta bai i dai pinis.

33:14  Mi askim plis long yu olsem, bikman bilong mi i ken brukim dispela hap paslain long wokboi bilong en. Na bai mi go isi, bilong bihainim ol bulmakau samting i go paslain long mi na ol pikinini inap wokabaut, inap mi kamap long bikman bilong mi long Sir.

33:15  Na Iso i tok, Nau mi ken larim i stap wantaim yu sampela bilong ol lain i stap wantaim mi. Na em i tok, Bilong wanem? Yu mas larim mi kisim marimari long ai bilong bikman bilong mi.

33:16  ¶ Olsem na long dispela de, Iso i go bek long rot bilong en i go long Sir.

33:17  Na Jekop i wokabaut i go long Sukot. Na em i wokim wanpela haus bilong en. Na em i wokim ol haus win long ol bulmakau samting bilong en. Olsem na ol i kolim nem bilong dispela ples Sukot.

33:18  Na Jekop i kam long Salem, wanpela biktaun bilong Sekem, em i stap long hap graun Kenan. Em i kam long Padan-aram na i sanapim haus sel bilong en klostu long dispela biktaun.

33:19  Na em i baim wanpela hap graun long ples kunai, long ples em i bin sanapim haus sel bilong en. Em i baim long 100 hap mani i go long han bilong ol pikinini bilong Hemor, papa bilong Sekem.

33:20  Na long dispela hap em i wokim wanpela alta, na em i kolim dispela El-elohe-Isrel.

Chapter 34

34:1  ¶ Na Daina, pikinini meri bilong Lia, em i karim em long Jekop, em i go bilong lukim ol pikinini meri bilong dispela hap graun.

34:2  Na taim Sekem, pikinini man bilong man Hiv Hemor, hetman bilong dispela kantri, i lukim em, em i kisim em. Na em i slip wantaim em, na mekim em i doti.

34:3  Na tewel bilong em i pas long Daina, pikinini meri bilong Jekop. Na em i laikim tru dispela yangpela meri. Na em i mekim gutpela tok long dispela yangpela meri.

34:4  Na Sekem i tokim papa bilong en Hemor, i spik, Yu mas kisim dispela yangpela meri bilong kamap meri bilong mi.

34:5  Na Jekop i harim tok long em i bin mekim Daina, pikinini meri bilong en, i kamap doti. Nau ol pikinini man bilong em, ol i stap long ples kunai wantaim ol bulmakau samting. Na Jekop i pasim maus inap long ol i kam.

34:6  ¶ Na Hemor, papa bilong Sekem, em i go long Jekop bilong toktok wantaim em.

34:7  Na ol pikinini man bilong Jekop i kam long lusim ples kunai taim ol i harim tok long dispela. Na ol dispela man i bel hevi na ol i gat bikpela belhat, bilong wanem, em i bin mekim pasin nogut long Isrel, taim em i slip wantaim pikinini meri bilong Jekop. Dispela samting man i no ken mekim.

34:8  Na Hemor i toktok wantaim ol, i spik, Tewel bilong pikinini man bilong mi Sekem em i krai long kisim pikinini meri bilong yupela. Mi askim plis long yupela long yupela i mas givim em long em bilong i stap meri bilong em.

34:9  Na yupela i mas mekim ol marit wantaim mipela. Na yupela i ken givim ol pikinini meri bilong yupela long mipela. Na yupela i ken kisim ol pikinini meri bilong mipela i kam long yupela.

34:10  Na yupela i ken stap wantaim mipela. Na dispela hap graun bai i stap long pes bilong yupela. Yupela i ken stap na wok bisnis long en, na yupela i ken kisim ol kago long en.

34:11  Na Sekem i tok long papa bilong dispela meri na long ol brata bilong em, Yupela i mas larim mi kisim marimari long ol ai bilong yupela. Na samting yupela bai tokim mi, em bai mi givim.

34:12  Yupela i ken askim mi long givim pe bilong meri na presen olsem olsem, na bai mi givim bilong bihainim tok yupela i mekim long mi. Tasol yupela i mas givim mi dispela yangpela meri bilong i kamap meri bilong mi.

34:13  Na ol pikinini man bilong Jekop i bekim tok giaman long Sekem na long Hemor, papa bilong em. Ol i tok olsem, bilong wanem, em i bin mekim Daina, susa bilong ol, i doti.

34:14  Na ol i tokim tupela, Mipela i no inap mekim dispela samting na givim susa bilong mipela long man i no bin katim skin. Long wanem, dispela i givim sem long mipela.

34:15  Tasol bai mipela i tok yes long yupela long dispela samting. Sapos yupela bai i stap olsem mipela, na olgeta wan wan man bilong yupela i katim skin,

34:16  Orait bai mipela i givim ol pikinini meri bilong mipela long yupela. Na bai mipela i kisim ol pikinini meri bilong yupela i kam long mipela. Na bai mipela i sindaun wantaim yupela. Na bai yumi kamap wanpela lain manmeri.

34:17  Tasol sapos yupela i no harim mipela na katim skin, orait bai mipela i kisim pikinini meri bilong mipela, na bai mipela i go.

34:18  ¶ Na ol tok bilong ol i amamasim Hemor na Sekem, pikinini man bilong Hemor.

34:19  Na dispela yangpela man i no wet long mekim dispela samting, bilong wanem, em i amamas long pikinini meri bilong Jekop. Na long pasin bilong kisim ona, em i winim olgeta wanhaus bilong papa bilong en.

34:20  Na Hemor na Sekem, pikinini man bilong en, tupela i kam long dua bilong banis bilong biktaun bilong ol. Na tupela i toktok wantaim ol man bilong biktaun bilong ol, i spik,

34:21  Ol dispela man i stap bel isi wantaim yumi. Olsem na yumi mas larim ol i stap long dispela hap, na wok bisnis insait long en. Long wanem, lukim, dispela em bikpela inap long ol. Larim yumi kisim ol pikinini meri bilong ol long i kamap ol meri bilong yumi, na larim yumi givim ol pikinini meri bilong yumi long ol.

34:22  Bai ol dispela man i tok yes long yumi long sindaun wantaim yumi na kamap wanpela lain manmeri sapos yumi mekim wanpela samting tasol. Sapos olgeta wan wan man namel long yumi i katim skin, olsem ol i bin katim skin, orait bai ol i tok yes.

34:23  Ating ol bulmakau samting bilong ol na ol kago bilong ol na olgeta wan wan animal bilong ol bai i kamap samting bilong yumi, a? Tasol yumi mas tok yes long ol, na bai ol i sindaun wantaim yumi.

34:24  Na olgeta wan wan man i save go ausait long dua bilong banis bilong biktaun bilong Hemor, ol i harim tok bilong Hemor na Sekem, pikinini man bilong em. Na olgeta wan wan man i katim skin. Em olgeta man i save go ausait long dua bilong banis bilong biktaun bilong en.

34:25  ¶ Na long de namba tri, taim ol i pilim pen, em i kamap olsem, tupela pikinini man bilong Jekop, em Simion na Livai, ol i brata bilong Daina, tupela wan wan i kisim bainat bilong en. Na tupela i no pret na i kam long dispela biktaun. Na ol i kilim i dai olgeta man na pikinini man.

34:26  Na long sap bilong bainat ol i kilim i dai Hemor na Sekem, pikinini man bilong em. Na ol i rausim Daina long haus bilong Sekem, na ol i go.

34:27  Ol pikinini man bilong Jekop i kamap long ol man ol i bin kilim i dai, na i karim i go ol kago bilong dispela biktaun, bilong wanem, ol i bin mekim susa bilong ol doti.

34:28  Ol i kisim i go ol sipsip bilong ol, na ol bulmakau man bilong ol, na ol donki bilong ol, na ol dispela samting i stap long biktaun, na ol dispela samting i stap long ples kunai,

34:29  Na olgeta mani samting bilong ol, na olgeta pikinini bilong ol. Na ol i kisim ol meri bilong ol i go kalabus. Na tu ol i karim i go, yes, em olgeta samting i stap insait long haus.

34:30  Na Jekop i tokim Simion na Livai, Yupela i bin givim hevi long mi na mekim mi i sting namel long ol manmeri bilong dispela hap graun, namel long ol lain Kenan na ol lain Peres. Na lain bilong mi i no planti, olsem na bai ol yet i bung wantaim bilong birua long mi na kilim i dai mi. Na bai mi kisim bagarap olgeta, mi wantaim ol wanhaus bilong mi.

34:31  Na ol i tok, Ating em i ken mekim kain pasin long susa bilong mipela, olsem ol i mekim long wanpela pamuk meri, a?

Chapter 35

35:1  ¶ Na God i tokim Jekop, Yu kirap. Yu mas go antap na go long Betel na sindaun long dispela hap. Na long dispela hap yu mas wokim wanpela alta long God, Em i bin kamap long ai bilong yu taim yu bin ranawe long pes bilong Iso, brata bilong yu.

35:2  Na Jekop i tok long ol wanhaus bilong en na long olgeta manmeri i stap wantaim em olsem, Yupela i mas rausim ol arapela god giaman i stap namel long yupela. Na yupela i mas stap klin na senisim ol klos bilong yupela.

35:3  Na yumi ken kirap na go antap long Betel. Na long dispela hap bai mi wokim wanpela alta long God. Em i bekim tok long mi long taim bilong hevi bilong mi. Na Em i stap wantaim mi long rot mi bin i go long en.

35:4  Na ol i givim long Jekop olgeta god giaman i stap long han bilong ol, na olgeta bilas bilong ia i stap long ia bilong ol. Na Jekop i haitim ol aninit long diwai ok i stap klostu long Sekem.

35:5  Na ol i bin wokabaut i go, na pret long God i stap long ol biktaun i stap nabaut long ol. Na ol i no ranim ol pikinini man bilong Jekop.

35:6  ¶ Olsem na Jekop i kam long Lus, em i stap long hap graun bilong Kenan, na em Betel. Em wantaim olgeta manmeri i stap wantaim em, ol i kam.

35:7  Na long dispela hap em i wokim wanpela alta. Na em i kolim dispela ples El-betel. Bilong wanem, God i kamap long ai bilong em long dispela hap, taim em i ranawe long pes bilong brata bilong en.

35:8  Tasol Debora, wokmeri bilong Rebeka i lukautim ol pikinini, em i dai pinis. Na ol i planim em daunbilo long Betel aninit long wanpela diwai ok. Na ol i kolim nem bilong dispela diwai Alon-bakut.

35:9  Na God i kamap long ai bilong Jekop gen, taim em i lusim Padan-aram Na Em i blesim em.

35:10  Na God i tok long em, Nem bilong yu Jekop. Ol i no moa bai kolim nem bilong yu Jekop, nogat. Tasol nem bilong yu bai i stap Isrel. Na Em i kolim nem bilong em Isrel.

35:11  Na God i tok long em, Mi God i Gat Olgeta Strong. Yu mas karim kaikai na kamap planti. Bai yu kamap wanpela kantri na bung bilong planti kantri. Na bai yu stap tumbuna bilong ol king.

35:12  Na dispela graun Mi bin givim Ebraham na Aisak, bai Mi givim long yu. Na bai Mi givim dispela hap graun long ol tumbuna pikinini bilong yu i kamap bihain long yu.

35:13  Na God i lusim em na i go antap long dispela ples Em i toktok wantaim em long en.

35:14  Na Jekop i sanapim wanpela pos long dispela ples Em i bin toktok wantaim Em long en, yes, wanpela ston olsem pos. Na em i kapsaitim wanpela ofa bilong dring long dispela. Na tu em i kapsaitim wel long dispela.

35:15  Na dispela ples God i bin toktok wantaim em long dispela hap, Jekop i kolim nem bilong en Betel.

35:16  ¶ Na ol i lusim Betel na wokabaut i go. Na rot i kam long Efrat em sotpela tasol. Na Resel i pilim pen, na em i gat hatwok long karim pikinini.

35:17  Na em i kamap olsem, taim em i hatwok, meri bilong helpim meri i karim pikinini em i tok long em, Yu no ken pret. Bai yu karim dispela pikinini man tu.

35:18  Na em i kamap olsem, taim tewel bilong em i laik lusim em (long wanem, em i dai pinis) em i kolim nem bilong em Benoni. Tasol papa bilong em i kolim em Benjamin.

35:19  Na Resel i dai pinis, na ol i planim em long rot i go long Efrat, em Betlehem.

35:20  Na Jekop i sanapim wanpela pos antap long matmat bilong em. Dispela em pos bilong matmat bilong Resel inap long dispela de.

35:21  ¶ Na Isrel i wokabaut i go. Na em i sanapim haus sel bilong en long hapsait bilong taua Eder.

35:22  Na em i kamap olsem, taim Isrel i sindaun i stap long dispela hap graun, Ruben i go na slip wantaim Bilha, wanpela nambatu lain meri bilong papa bilong en. Na Isrel i harim tok long dispela. Nau ol pikinini man bilong Jekop i 12-pela.

35:23  Ol pikinini man bilong Lia i olsem, Ruben, namba wan pikinini i kamap long Jekop, na Simion, na Livai, na Juda, na Isaka, na Sebyulan.

35:24  Ol pikinini man bilong Resel i Josep na Benjamin.

35:25  Na ol pikinini man bilong Bilha, wokmeri bilong Resel, i Dan na Naptalai.

35:26  Na ol pikinini man bilong Silpa, wokmeri bilong Lia i Gat na Asia. Ol dispela i ol pikinini man bilong Jekop, ol i kamap long em long Padan-aram

35:27  Na Jekop i kam long Aisak, papa bilong en, long Mamri, long biktaun Arba. Arba em Hibron, ples Ebraham na Aisak i bin i stap sampela taim.

35:28  Na ol de bilong Aisak i 180 krismas.

35:29  Na spirit bilong Aisak i lusim em na em i dai pinis. Na em i bungim lain tumbuna manmeri bilong en. Em i lapun na pulap long ol de. Na ol pikinini man bilong em, Iso na Jekop, ol i planim em.

Chapter 36

36:1  ¶ Nau ol dispela em ol lain tumbuna bilong Iso, husat em Idom.

36:2  Iso i kisim ol meri bilong em long ol pikinini meri bilong Kenan, Eda, pikinini meri bilong man Hit Elon, na Aholibama, pikinini meri bilong Ana, pikinini meri bilong man Hiv Sibeon,

36:3  Na Basemat, pikinini meri bilong Ismel, susa bilong Nebasot.

36:4  Na long Iso, Ada i karim Elifas, na Basemat i karim Reuel,

36:5  Na Aholibama i karim Jeus, na Jealam, na Kora. Ol dispela i ol pikinini man bilong Iso, ol meri i karim long em long hap graun bilong Kenan.

36:6  Na Iso i kisim ol meri bilong en, na ol pikinini man bilong en, na ol pikinini meri bilong en, na olgeta manmeri bilong haus bilong en, na ol bulmakau samting bilong en, na olgeta animal bilong en, na olgeta kago bilong en, em i bin kisim long hap graun bilong Kenan. Na em i lusim pes bilong brata bilong en Jekop na i go long hap graun nabaut.

36:7  Long wanem, ol planti mani samting bilong ol i planti tumas na ol i no ken stap wantaim. Na dispela hap graun, ol i stap man bilong longwe ples long en, em i no inap karim ol, bilong wanem, ol bulmakau samting bilong ol i planti tumas.

36:8  Olsem na Iso i sindaun i stap long maunten Sir. Iso em Idom.

36:9  ¶ Na ol dispela i ol lain pikinini na tumbuna pikinini bilong Iso, papa bilong ol lain Idom long maunten Sir.

36:10  Ol dispela i ol nem bilong ol pikinini man bilong Iso, Elifas, pikinini man bilong Ada, em meri bilong Iso, na Reuel, pikinini man bilong Basemat, em meri bilong Iso.

36:11  Na ol pikinini man bilong Elifas i Timan na Omar na Sefo na Gatam na Kenas.

36:12  Na Timna em nambatu lain meri bilong Elifas, pikinini man bilong Iso. Na em i karim Amalek long Elifas. Ol dispela i ol tumbuna pikinini man bilong Ada, meri bilong Iso.

36:13  Na ol dispela i ol pikinini man bilong Reuel, Nahat na Sira na Sama na Misa. Ol dispela i ol tumbuna pikinini man bilong Basemat, meri bilong Iso.

36:14  Na ol dispela i ol pikinini man bilong Aholibama, em pikinini meri bilong Ana, pikinini meri bilong Sibeon. Aholibama em meri bilong Iso. Na long Iso em i karim Jeus na Jealam na Kora.

36:15  Ol dispela man bilong ol pikinini man bilong Iso, ol i hetman. Ol pikinini man bilong Elifas, namba wan pikinini man bilong Iso i olsem, hetman Timan, na hetman Omar, na hetman Sefo, na hetman Kenas,

36:16  Na hetman Kora, na hetman Gatam, na hetman Amalek. Ol dispela i ol hetman i kam long Elifas long hap graun bilong Idom. Ol dispela i ol tumbuna pikinini man bilong Ada.

36:17  Na ol dispela i ol pikinini man bilong Reuel, pikinini man bilong Iso, hetman Nahat, na hetman Sira, na hetman Sama, na hetman Misa. Ol dispela i ol hetman i kam long Reuel long hap graun bilong Idom. Ol dispela i ol tumbuna pikinini man bilong Basemat, meri bilong Iso.

36:18  Na ol dispela i ol tumbuna pikinini man bilong Aholibama, meri bilong Iso, hetman Jeus, na hetman Jealam, na hetman Kora. Ol dispela i ol hetman i kam long Aholibama, pikinini meri bilong Ana na meri bilong Iso.

36:19  Ol dispela i ol pikinini man bilong Iso, em Idom, na ol dispela i ol hetman bilong ol.

36:20  ¶ Ol dispela i ol pikinini man bilong man Hor Sir, husat i stap long dispela hap graun, Lotan, na Sobal, na Sibeon, na Ana,

36:21  Na Dison, na Eser, na Disan. Dispela em ol hetman bilong ol lain Hor, ol pikinini man bilong Sir long hap graun bilong Idom.

36:22  Na ol pikinini bilong Lotan i Hori na Hemam. Na susa bilong Lotan i Timna.

36:23  Na ol pikinini bilong Sobal i ol dispela, Alvan, na Manahat, na Ebal, na Sefo, na Onam.

36:24  Na ol dispela i ol pikinini bilong Sibeon, Asa na Ana. Dispela em dispela Ana i bin lukim ol miul long ples i no gat man, taim em i givim kaikai long ol donki bilong Sibeon, papa bilong en.

36:25  Na ol pikinini bilong Ana i ol dispela, Dison, na Aholibama, em pikinini meri bilong Ana.

36:26  Na ol dispela i ol pikinini bilong Dison, Hemdan, na Es-ban, na Itran, na Keran.

36:27  Ol pikinini bilong Eser i ol dispela, Bilhan, na Savan, na Akan.

36:28  Ol pikinini bilong Disan i ol dispela, Us na Aran.

36:29  Ol dispela em ol hetman husat i kam long ol lain Hor, hetman Lotan, na hetman Sobal, na hetman Sibeon, na hetman Ana,

36:30  Na hetman Dison, na hetman Eser, na hetman Disan. Ol dispela i ol hetman i kam long Hor, namel long ol hetman bilong ol, long hap graun bilong Sir.

36:31  ¶ Na ol dispela i ol king i bosim ol kingdom long hap graun bilong Idom, taim wanpela king i no stap king yet antap long ol pikinini bilong Isrel.

36:32  Na Bela, pikinini man bilong Beor, em i bosim kingdom long Idom. Na nem bilong biktaun bilong en i Dinhaba.

36:33  Na Bela i dai pinis, na Jobap, pikinini man bilong Sira bilong Bosra, em i senisim em na kamap king.

36:34  Na Jobap i dai pinis, na Husam bilong hap graun bilong Temani i senisim em na bosim kingdom.

36:35  Na Husam i dai pinis. Na Hedat, pikinini man bilong Bedat, i senisim em na bosim kingdom. Hedat i bin paitim Midian long ples kunai bilong Moap. Na nem bilong biktaun bilong em i Avit.

36:36  Na Hedat i dai pinis, na Samla bilong Masreka i senisim em na kamap king.

36:37  Na Samla i dai pinis, na Sol bilong Rehobot klostu long bikwara, em i senisim em na bosim kingdom.

36:38  Na Sol i dai pinis, na Beal-henan, pikinini man bilong Akbor, i senisim em na bosim kingdom.

36:39  Na Beal-henan, pikinini man bilong Akbor, em i dai pinis. Na Hadar i senisim em na bosim kingdom. Na nem bilong biktaun bilong em i Pau. Na nem bilong meri bilong em i Mehetabel, pikinini meri bilong Matret, em pikinini meri bilong Mesahap.

36:40  Na ol dispela i ol nem bilong ol hetman i kam long Iso, bilong bihainim ol famili bilong ol, na long ol ples bilong ol, na long ol nem bilong ol. Ol i olsem, hetman Timna, na hetman Alva, na hetman Jetet,

36:41  Na hetman Aholibama, na hetman Ila, na hetman Pinon,

36:42  Na hetman Kenas, na hetman Teman, na hetman Mipsar,

36:43  Na hetman Makdiel, na hetman Iram. Ol dispela i ol hetman bilong Idom, bilong bihainim ol ples ol i sindaun long en long hap graun ol i holimpas. Em Iso, papa bilong ol lain Idom.

Chapter 37

37:1  ¶ Na Jekop i sindaun long dispela hap graun, papa bilong en i bin stap man bilong longwe ples long en. Em i sindaun long hap graun bilong Kenan.

37:2  Ol dispela i ol lain pikinini bilong Jekop. Josep i gat 17 krismas, na em wantaim ol brata bilong en ol i givim kaikai long lain sipsip. Na dispela manki i stap wantaim ol pikinini man bilong Bilha na ol pikinini man bilong Silpa, ol meri bilong papa bilong en. Na Josep i bringim tok nogut long ol i kam long papa bilong en.

37:3  Nau Israel i laikim tru Josep moa long em i laikim olgeta pikinini bilong em, bilong wanem, em i pikinini man i kamap taim em i lapun. Na em i wokim bilong em wanpela longpela saket i gat planti kala.

37:4  Na taim ol brata bilong em i lukim papa bilong ol i laikim tru em moa long em i laikim olgeta brata bilong em, orait ol i no laikim tru em. Na ol i no inap tok isi long em.

37:5  ¶ Na Josep i driman wanpela driman. Na em i tokim ol brata bilong en. Na ol i no laikim tru em moa yet.

37:6  Na em i tokim ol, Mi askim plis long yupela long yupela i mas harim dispela driman mi bin driman.

37:7  Long wanem, lukim, yumi pasim ol mekpas wit long gaden. Na, harim, mekpas bilong mi i kirap na i sanap stret tu. Na, lukim, ol mekpas bilong yupela i sanap nabaut, na ol i lindaun long mekpas bilong mi.

37:8  Na ol brata bilong en i tokim em, Ating tru bai yu stap olsem king bilong mipela, a? o ating tru bai yu bosim mipela, a? Na ol i no laikim tru em moa yet long ol driman bilong em na long ol tok bilong em.

37:9  Na em i driman narapela driman tu. Na em i tokim ol brata bilong en long dispela. Na em i tok, Lukim, mi driman wanpela driman moa. Na, lukim, san na mun na 11-pela sta i lindaun long mi.

37:10  Na em i tokaut long dispela long papa bilong en na ol brata bilong en. Na papa bilong en i hatim em, na tokim em, Dispela em i wanem kain driman yu bin driman? Ating tru mi na mama bilong yu na ol brata bilong yu mipela olgeta bai kam na lindaun i go long graun long yu, a?

37:11  Na ol brata bilong en i mangal long em. Tasol papa bilong en i tingting long dispela toktok.

37:12  ¶ Na ol brata bilong en i go bilong givim kaikai long lain sipsip bilong papa long Sekem.

37:13  Na Isrel i tokim Josep, Ating ol brata bilong yu i givim kaikai long lain sipsip long Sekem, a? Yu kam, na bai mi salim yu i go long ol. Na Josep i tokim em, Mi stap hia.

37:14  Na em i tokim em, Mi askim plis long yu long yu go na lukim ol brata bilong yu i stap gut na ol sipsip i stap gut o nogat. Na yu bringim tok i kam gen long mi. Olsem na em i salim em i lusim ples daun bilong Hibron na i go. Na em i kam long Sekem.

37:15  Na wanpela man i lukim em. Na, lukim, em i raun nating long ples kunai. Na dispela man i askim em, i spik, Yu wok long painim wanem samting?

37:16  Na em i tok, Mi wok long painim ol brata bilong mi. Mi askim plis long yu long yu tokim mi long ol i givim kaikai long ol lain sipsip bilong ol long wanem hap?

37:17  Na dispela man i tok, Ol i lusim hia. Long wanem, mi bin harim ol i tok, Yumi go long Dotan. Na Josep i go bihainim ol brata bilong en, na em i lukim ol long Dotan.

37:18  Na ol i lukim em i stap longwe. Yes, pastaim long em i kam klostu long ol, ol i pasim tok hait i birua long em long kilim em i dai.

37:19  Na ol i tok olsem namel long ol yet, Lukim, dispela man bilong driman i kam.

37:20  Olsem na kam nau, yumi kilim i dai em na tromoim em long wanpela hul. Na bai yumi tok olsem, Wanpela animal nogut i bin kaikai em. Na bai yumi lukim wanem samting bai i kamap long ol driman bilong em.

37:21  Na Ruben i harim dispela, na em i tekewe em long han bilong ol. Na em i tok, Yumi no ken kilim em i dai.

37:22  Na Ruben i tok long ol, Yupela i no ken kapsaitim blut, nogat. Yupela tromoim em i go long dispela hul, em i stap long ples i no gat man. Na yupela i no ken putim han long em. Em i tok olsem bai em i ken tekewe Josep long han bilong ol bilong givim em long papa bilong en gen.

37:23  ¶ Na em i kamap olsem, taim Josep i kamap long ol brata bilong en, ol i rausim saket bilong Josep, em dispela saket i gat planti kala na i stap long em.

37:24  Na ol i kisim em na tromoim em long wanpela hul. Na dispela hul i stap nating. Em i no gat wara long en.

37:25  Na ol i sindaun bilong kaikai bret. Na ol i litimapim ai bilong ol na lukluk. Na, lukim, wanpela lain bilong ol lain Ismael i lusim Gileat na kam wantaim ol kemel bilong ol. Na ol i karim samting i gat switpela smel, na marasin bilong sua, na sanda mur. Ol i karim dispela i go daun long Isip.

37:26  Na Juda i tokim ol brata bilong em, Sapos yumi kilim i dai brata bilong yumi, na haitim blut bilong em, dispela bai helpim yumi olsem wanem?

37:27  Kaman, na yumi salim em long ol lain Ismel, na no ken larim han bilong yumi stap antap long em. Long wanem, em i brata bilong yumi na wanblut bilong yumi. Na ol brata bilong en i tok em inap.

37:28  Nau i gat i kam klostu ol bisnisman bilong ol lain Midian. Na ol i pulim Josep i kam antap ausait long hul, na salim Josep long ol lain Ismel long 20-pela hap bilong silva. Na ol i bringim Josep i go long Isip.

37:29  Na Ruben i go bek long dispela hul. Na, lukim, Josep i no stap long hul. Na em i brukim klos bilong em.

37:30  Na em i go bek long ol brata bilong en, na tok, Dispela pikinini i no stap. Na mi, bai mi go we?

37:31  ¶ Na ol i kisim longpela saket bilong Josep. Na ol i kilim i dai wanpela pikinini bilong ol meme. Na ol i putim longpela saket long dispela blut.

37:32  Na ol i salim i go dispela longpela saket i gat planti kala. Na ol i bringim dispela i kam long papa bilong ol, na tok, Mipela i painim dispela pinis. Yu ken save nau, em longpela saket bilong pikinini man bilong yu, o nogat.

37:33  Na em i save long en na tok, Em longpela saket bilong pikinini man bilong mi. Wanpela animal nogut i bin kaikai em. Tru tumas, em i brukim Josep long planti hap.

37:34  Na Jekop i brukim klos bilong en, na em i pasim bek laplap long bel bilong en. Na em i krai sori planti de long pikinini man bilong en.

37:35  Na olgeta pikinini man bilong en na olgeta pikinini meri bilong en, ol i kirap bilong givim bel isi long em. Tasol em i no laik kisim bel isi. Na em i tok, Long wanem, bai mi krai sori na go daun long pikinini man bilong mi insait long matmat. Olsem dispela, papa bilong en i krai long em.

37:36  Na ol lain Midian i salim em i go long Isip i go long Potifar, wanpela ofisa bilong Fero, na kepten bilong ol soldia i lukautim Fero.

Chapter 38

38:1  ¶ Na long dispela taim em i kamap olsem, Juda i lusim ol brata bilong en na i go daun. Na em i tanim i go long wanpela man Adulam, husat nem bilong en em Hira.

38:2  Na Juda i lukim long dispela hap wanpela pikinini meri bilong wanpela man Kenan, husat nem bilong en em Sua. Na em i kisim em, na em i go long em.

38:3  Na em i kisim bel, na karim pikinini man. Na em i kolim nem bilong em Er.

38:4  Na em i kisim bel gen, na i karim pikinini man. Na em i kolim nem bilong em Onan.

38:5  Na gen yet em i kisim bel, na i karim pikinini man. Na em i kolim nem bilong em Sela. Na em i stap long Kesip, taim em i karim em.

38:6  Na Juda i kisim meri long givim long Er, namba wan pikinini bilong en. Nem bilong em i Temar

38:7  Na Er namba wan pikinini bilong Juda, em i man nogut long ai bilong BIKPELA. Na BIKPELA i kilim em i dai.

38:8  Na Juda i tokim Onan, Go insait long meri bilong brata bilong yu, na maritim em, na kirapim pikinini kaikai long brata bilong yu.

38:9  Na Onan i save long dispela pikinini kaikai i no inap bilong em. Na em i kamap olsem, taim em i insait long meri bilong brata bilong em, long em i kapsaitim dispela long graun, nogut long em i ken givim pikinini kaikai long brata bilong em.

38:10  Na dispela samting em i mekim, em i givim bel hevi long BIKPELA. Olsem na Em i kilim em i dai tu.

38:11  Olsem na Juda i tokim Temar, tambu pikinini meri bilong en, Yu meri man bilong en i dai pinis, na yu stap olsem long haus bilong papa bilong yu, inap Sela, pikinini man bilong mi, i kamap bikpela. Long wanem, em i tok, Nogut em i dai pinis tu, olsem ol brata bilong en. Na Temar i go na i sindaun long haus bilong papa bilong en.

38:12  ¶ Na long taim taim i ran, pikinini meri bilong Sua, meri bilong Juda, i dai pinis. Na Juda i kisim bel isi, na go long Timnat long ol wokman bilong em i katim gras bilong sipsip, em na pren bilong en man Adulam Hira.

38:13  Na ol i tokim Temar, i spik, Lukim tambu papa bilong yu i go long Timnat bilong katim gras bilong ol sipsip bilong em.

38:14  Na em i rausim ol klos bilong meri man bilong em i dai pinis. Na em i karamapim pes bilong en long laplap, na i karamapim bodi bilong em yet. Na em i go sindaun long wanpela ples klia, em i stap arere long rot i go long Timnat. Long wanem, em i lukim, Sila i kamap bikpela pinis, tasol ol i no givim em long em bilong i stap meri bilong em.

38:15  Taim Juda i lukim em, em i ting em i pamuk meri. Bilong wanem, em i karamapim pes bilong en.

38:16  Na em i tanim i go long em arere long rot. Na em i tok, Kaman. Mi askim plis long yu long yu mas larim mi i slip wantaim yu. (Long wanem, em i no save, em tambu pikinini meri bilong en.) Na meri i tok, Bai yu givim mi wanem samting, na bai yu ken slip wantaim mi?

38:17  Na Juda i tok, Bai mi salim i kam long yu wanpela pikinini bilong lain meme. Na meri i tok, Bai yu givim mi wanpela mak bilong promis, inap long yu salim em i kam, a?

38:18  Na em i tok, Bai mi givim wanem mak bilong promis long yu? Na em i tok, Samting bilong putim mak bilong yu, na ol paspas bilong yu, na wokabaut stik bilong yu i stap long han bilong yu. Na Juda i givim ol dispela long em. Na em i slip wantaim em. Na em i kisim bel long em.

38:19  Na meri i kirap na lusim em i go. Na em i rausim laplap bilong pes long em. Na em i pasim ol klos bilong meri man bilong em i dai pinis.

38:20  Na Juda i salim dispela pikinini meme long han bilong pren bilong em, dispela man Adulam, bilong kisim makmak bilong em long han bilong dispela meri. Tasol em i no lukim em.

38:21  Na em i askim ol man bilong dispela ples, i spik, Dispela pamuk meri i stap we, husat i bin stap ples klia arere long rot? Na ol i tok, I no gat pamuk meri long dispela ples.

38:22  Na em i go bek long Juda na tok, Mi no inap lukim em. Na tu ol man bilong dispela ples i tok, I no gat pamuk meri long dispela ples.

38:23  Na Juda i tok, Larim meri i kisim ol dispela i go long em. Nogut yumi sem. Lukim, mi salim dispela pikinini meme i go, na yu no bin lukim em.

38:24  ¶ Na em i kamap olsem, klostu tripela mun i go pinis, na ol i tokim Juda, i spik, Temar, tambu pikinini meri bilong yu, i bin mekim pasin pamuk. Na tu, lukim, em i gat bel long dispela pasin pamuk. Na Juda i tok, Bringim em i kam, na ol i ken kukim em.

38:25  Na taim ol i bringim em i kam, em i salim tok long tambu papa bilong en, i spik, Mi gat bel long man, ol dispela samting i bilong em. Na em i tok, Mi askim plis long yu long mas save ol dispela i bilong husat. Dispela samting bilong putim mak, na ol paspas, na wokabaut stik, ol i bilong husat.

38:26  Na Juda i tok yes long ol dispela i bilong em. Na em i tok, Stretpela pasin bilong em i winim stretpela pasin bilong mi. Bilong wanem, mi no givim em long Sila, pikinini man bilong mi. Na Juda i no slip moa wantaim em gen.

38:27  Na em i kamap olsem, long taim em i hatwok long karim pikinini, lukim, tupela pikinini i stap long bel bilong en.

38:28  Na em i kamap olsem, taim em i hatwok long karim pikinini, long wanpela i putim han bilong em i kam ausait. Na meri bilong helpim ol meri i karim pikinini i kisim na pasim wanpela skalet tret long han bilong em, i spik, Dispela i kam ausait pastaim.

38:29  Na em i kamap olsem, taim pikinini i pulim han bilong en i kam bek, lukim, brata bilong en i kamaut. Na meri bilong helpim i tok, Olsem wanem yu kamaut? Dispela pasin bilong brukim lain i stap long yu. Olsem na ol i kolim nem bilong em Fares.

38:30  Na bihain brata bilong em i kamaut. Na dispela skalet tret i stap long han bilong em. Na ol i kolim nem bilong em Sara.

Chapter 39

39:1  ¶ Na ol i bringim Josep i go daun long Isip. Na Potifar, em wanpela ofisa bilong Fero, na kepten bilong ol wasman, na man bilong Isip, em i baim em long ol han bilong ol lain Ismel. Ol i bin bringim em i kam daun long dispela hap.

39:2  Na BIKPELA i stap wantaim Josep. Na em i man ol samting em i mekim i kamap gutpela. Na em i stap long haus bilong bosman bilong en, em dispela man bilong Isip.

39:3  Na bosman bilong en i lukim olsem, BIKPELA i stap wantaim em na BIKPELA i mekim olgeta samting em i mekim i kamap gutpela long han bilong em.

39:4  Na Josep i kisim marimari long ai bilong em. Na em i mekim wok long em. Na em i makim em i stap man bilong lukautim haus bilong en. Na olgeta samting em i holim, em i putim long han bilong em.

39:5  Na em i kamap olsem, taim em i makim Josep i stap man i bosim bilong lukautim haus bilong en na olgeta samting em i gat, BIKPELA i stat long blesim haus bilong dispela man bilong Isip long helpim Josep. Na blesing bilong BIKPELA i stap antap long olgeta samting em i gat insait long haus na long gaden.

39:6  Na olgeta samting em i gat, em i larim i stap long han bilong Josep. Na em i no save long wanpela samting em i gat. Em i save long bret em i kaikai tasol. Na Josep em i man i luk naispela tru na em i gat strongpela bodi.

39:7  ¶ Na em i kamap olsem, bihain long ol dispela samting, meri bilong bosman bilong em i aigris long Josep. Na em i tok, Yu slip wantaim mi.

39:8  Tasol em i tok nogat. Na em i tok long meri bilong bosman bilong en, Lukim, bosman bilong mi i no save wanem samting i stap wantaim mi insait long haus. Na olgeta samting em i holim, em i bin putim long han bilong mi.

39:9  Long dispela haus, i no gat narapela i winim mi. Na tu em i no bin holimpas wanpela samting long mi, yu tasol, bilong wanem, yu meri bilong em. Olsem wanem nau mi ken mekim dispela bikpela pasin nogut, na mekim sin i birua long God?

39:10  Na em i kamap olsem, taim em i toktok long Josep olgeta wan wan de, Josep i no harim tok bilong em long slip wantaim em o long i stap wantaim em.

39:11  Na em i kamap olsem, klostu long dispela taim Josep i go insait long haus bilong mekim wok bilong en. Na i no gat narapela man bilong dispela haus i stap insait.

39:12  Na dispela meri i holimpas em long klos bilong em, na i spik, Yu slip wantaim mi. Na em i lusim klos bilong en long han bilong em na ranawe na i go ausait.

39:13  ¶ Na em i kamap olsem, taim meri i lukim, Josep i bin lusim klos bilong en long han bilong em, na em i ranawe,

39:14  Orait em i singautim ol man bilong haus bilong en. Na em i tokim ol, i spik, Lukim. Em i bin bringim wanpela Hibru i kam long yumi bilong mekim pani long daunim yumi. Em i kam long mi bilong slip wantaim mi. Na mi singaut bikmaus.

39:15  Na em i kamap olsem, taim em i harim mi litimapim nek bilong mi na singaut, em i lusim klos bilong en na i ranawe na i go ausait.

39:16  Na em i putim klos bilong Josep klostu long em, inap long bikman bilong em i kam.

39:17  Na em i toktok long em bilong bihainim ol dispela tok, i spik, Dispela wokboi Hibru, husat yu bin bringim i kam long yumi, i kam insait long wokim pani bilong daunim mi.

39:18  Na em i kamap olsem, taim mi litimapim nek bilong mi na singaut, em i lusim klos bilong en wantaim mi na i ranawe i go ausait.

39:19  ¶ Na em i kamap olsem, taim bosman bilong em i harim ol tok bilong meri bilong en, dispela em i tok long em, i spik, Dispela wokboi bilong yu i bin mekim long mi i bihainim dispela pasin, long belhat tru bilong en i kirap.

39:20  Na bosman bilong Josep i kisim em, na i putim em long kalabus, wanpela ples we ol i pasim ol kalabusman bilong king. Na em i stap long dispela hap insait long kalabus.

39:21  Tasol BIKPELA i stap wantaim Josep. Na Em i soim sori long em na givim pasin bilong laikim em long ai bilong man i lukautim kalabus.

39:22  Na man bilong lukautim kalabus i putim long han bilong Josep olgeta kalabusman i stap long kalabus. Na olgeta samting ol i mekim long dispela hap, em i man bilong mekim dispela.

39:23  Man bilong lukautim kalabus, em i no lukluk long wanpela samting i stap aninit long han bilong Josep. Bilong wanem, BIKPELA i stap wantaim em. Na dispela samting em i mekim, BIKPELA i mekim dispela i kamap gutpela.

Chapter 40

40:1  ¶ Na em i kamap olsem, bihain long ol dispela samting, man i lukautim kap bilong king bilong Isip na man i wokim bret, tupela i bin kirapim bel bilong bikman bilong ol, em king bilong Isip.

40:2  Na Fero i belhat tru na birua long tupela ofisa bilong en, long nambawan hetman bilong ol man i lukautim kap na long nambawan hetman bilong ol man i wokim bret.

40:3  Na em i putim ol long kalabus long haus bilong kepten bilong ol wasman. Em i putim ol long kalabus, em dispela ples Josep i pas long en.

40:4  Na kepten bilong ol wasman i givim tok long Josep long lukautim ol, na em i mekim wok long lukautim ol. Na ol i stap sampela taim long kalabus.

40:5  ¶ Na ol i driman wanpela driman. Tupela wan wan man i driman driman bilong en long wanpela nait. Tupela wan wan i driman bilong bihainim as mining bilong driman bilong en. Dispela man i lukautim kap na dispela man i wokim bret bilong king bilong Isip na ol i pas long kalabus, ol i driman.

40:6  Na long moningtaim Josep i kam long ol, na i lukluk long ol. Na, lukim, ol i bel hevi.

40:7  Na em i askim ol ofisa bilong Fero ol i stap wantaim em long kalabus bilong haus bilong bikman bilong en, na i spik, Bilong wanem tude pes bilong yutupela i bel hevi olsem?

40:8  Na ol i tokim em, Mipela i bin driman wanpela driman. Na i no gat man bilong telimautim as mining bilong en. Na Josep i tokim ol, Ating wok bilong telimautim ol as mining i no samting bilong God, a? Mi askim plis long yupela long tokim mi long ol.

40:9  Na nambawan hetman bilong lukautim kap em i telimautim driman bilong en long Josep. Na em i tokim em, Long driman bilong mi, lukim, wanpela diwai wain i stap long pes bilong mi.

40:10  Na long dispela diwai wain tripela han i stap. Na em i olsem pikinini bilong plaua i kamap. Na ol plaua bilong en i kamap. Na ol han plaua bilong en i karim pikinini wain i mau.

40:11  Na kap bilong Fero i stap long han bilong mi. Na mi kisim ol pikinini wain na mi kisim wara bilong ol i go long kap bilong Fero. Na mi givim dispela kap long han bilong Fero.

40:12  Na Josep i tokim em, Dispela em i as mining bilong en. Dispela tripela han i tripela de.

40:13  Na insait long tripela de Fero bai litimapim het bilong yu na putim yu gen long ples bilong yu. Na bai yu givim kap bilong Fero long han bilong en, olsem yu bin mekim bipo, taim yu bin stap man i lukautim kap bilong em.

40:14  Tasol yu mas tingting long mi, taim yu stap gut. Na mi askim plis long yu long yu soim gutpela pasin long mi. Na yu mas toksave long mi long Fero na bringim mi i go long lusim dispela haus.

40:15  Long wanem, tru tumas, ol i bin stilim mi long hap graun bilong ol Hibru. Na tu mi no bin mekim samting long hia, bai ol i mas putim mi long dispela hul kalabus.

40:16  Taim nambawan hetman bilong wokim bret i lukim dispela as mining i gutpela, em i tokim Josep, Mi tu mi stap long driman bilong mi. Na, lukim, mi gat tripela waitpela basket antap long het bilong mi.

40:17  Na insait long basket i stap antap moa i gat olgeta kain bret kek samting i go long Fero. Na ol pisin i kisim ol long basket i stap antap long het bilong mi, na ol i kaikai.

40:18  Na Josep i bekim tok, na i tok, Dispela em as mining bilong en. Dispela tripela basket i tripela de.

40:19  Na insait long tripela de Fero bai litimapim het bilong yu i lusim yu. Na bai em i hangamapim yu long wanpela diwai. Na ol pisin bai kaikai mit bilong bodi bilong yu.

40:20  ¶ Na em i kamap olsem, long namba tri de, em de mama bilong Fero i bin karim em, Fero i wokim wanpela bikpela kaikai bilong olgeta wokboi bilong en. Na namel long ol wokboi bilong en, em i litimapim het bilong nambawan hetman i lukautim kap na bilong nambawan hetman i wokim bret.

40:21  Na dispela nambawan hetman i lukautim kap, em i putim em gen long wok bilong lukautim kap. Na em i givim kap long han bilong Fero.

40:22  Tasol em i hangamapim nambawan hetman i wokim bret, olsem Josep i bin autim as mining long ol.

40:23  Tasol dispela nambawan man i lukautim kap, em i no holim tingting long Josep, tasol em i lusim tingting long em.

Chapter 41

41:1  ¶ Na em i kamap olsem, tupela yia i go pinis olgeta, na Fero i driman. Na, lukim, em i sanap arere long bikpela wara.

41:2  Na, lukim, sevenpela naispela patpela bulmakau i lusim bikpela wara i kam antap. Na ol i kisim kaikai long wanpela ples gras.

41:3  Na, lukim, sevenpela arapela bulmakau i bihainim ol i lusim bikpela wara na i kam antap. Ol i no naispela na i bun nating. Na ol i sanap klostu long ol arapela bulmakau long arere bilong bikpela wara.

41:4  Na ol bulmakau i no naispela na i bun nating ol i kaikai ol sevenpela naispela patpela bulmakau. Na Fero i kirap long slip i dai.

41:5  Na em i slip i dai gen na em i driman namba tu taim. Na, lukim, sevenpela bun bilong wit samting i kamap long wanpela stik bilong wit samting, ol i patpela na gutpela.

41:6  Na, lukim, sevenpela bun i bun nating na win bilong hap sankamap i bin bagarapim ol, ol i kamap bihain long ol.

41:7  Na dispela sevenpela bun i bun nating ol i kaikai ol sevenpela bun i patpela na i pulap. Na Fero i kirap. Na, lukim, em wanpela driman.

41:8  Na em i kamap olsem, long moningtaim spirit bilong en i hevi. Na em i salim tok i go na singautim olgeta man bilong wokim poisin bilong Isip na olgeta saveman bilong en. Na Fero i tokim ol long driman bilong en. Tasol i no gat wanpela inap telimautim as mining bilong ol long Fero.

41:9  ¶ Long dispela taim nambawan man bilong lukautim kap i tok long Fero, i spik, Dispela de mi tingim gen ol rong bilong mi.

41:10  Fero i stap belhat tru long ol wokboi bilong en. Na em i putim mi long kalabus long haus bilong kepten bilong ol wasman. Em i kalabusim mi wantaim nambawan man i wokim bret.

41:11  Na long wanpela nait mipela i driman wanpela driman, mi na em. Mitupela wan wan man i driman bilong bihainim as mining bilong driman bilong en.

41:12  Na wanpela yangpela man, wanpela Hibru, i stap wantaim mipela long dispela hap. Em i wokboi bilong kepten bilong ol wasman. Na mipela i tokim em, na em i telimautim as mining bilong ol driman bilong mipela. Em i bin telimautim as mining long mipela wan wan man, bilong bihainim driman bilong en.

41:13  Na em i kamap olsem, olsem em i bin telimautim as mining long mipela, olsem tasol em i kamap. Em i bin putim mi gen long wok bilong mi, na em i bin hangamapim em.

41:14  Orait nau Fero i salim tok i go na singautim Josep. Na kwiktaim ol i bringim em i kam na lusim dispela kalabus hul. Na em i rausim maus gras na senisim klos bilong en. Na em i kam long Fero.

41:15  Na Fero i tokim Josep, Mi bin driman wanpela driman. Na i no gat wanpela man inap telimautim as mining bilong en. Na mi bin harim tok long yu, yu inap save long driman na telimautim as mining bilong en.

41:16  Na Josep i bekim tok long Fero, i spik, I no stap long mi. God bai givim bekim bilong bel isi long Fero.

41:17  ¶ Na Fero i tokim Josep, Long driman bilong mi, lukim, mi sanap long arere bilong bikpela wara.

41:18  Na, lukim, sevenpela patpela naispela bulmakau i lusim bikpela wara na i kam antap. Na ol i kisim kaikai long wanpela ples gras.

41:19  Na, lukim, sevenpela arapela bulmakau i kam antap bihain long ol. Ol i rabis na i no naispela na i bun nating. Long olgeta hap graun bilong Isip, mi no bin lukim dispela kain nogut bipo.

41:20  Na ol bulmakau i bun nating na i no naispela ol i kaikai dispela sevenpela patpela bulmakau i kamap pastaim.

41:21  Na taim ol i kaikai ol dispela pinis, man i no inap save ol i bin kaikai ol, nogat. Ol i luk nogut yet olsem ol i stap bipo. Olsem na mi kirap.

41:22  Na long driman bilong mi, mi bin lukim. Na, lukim, sevenpela bun i kamap long wanpela stik, ol i pulap na gutpela.

41:23  Na, lukim, sevenpela bun i drai na i bun nating na win bilong hap sankamap i bin bagarapim ol, ol i kamap bihain long ol.

41:24  Na ol bun i bun nating ol i kaikai ol sevenpela gutpela bun. Na mi bin tokim ol man bilong wokim poisin long dispela, tasol i no gat wanpela inap tokaut long mi long en.

41:25  Na Josep i tokim Fero, Dispela driman bilong Fero i wanpela. God i bin soim Fero samting Em i laik mekim.

41:26  Dispela sevenpela gutpela bulmakau i sevenpela yia. Na dispela sevenpela gutpela bun i sevenpela yia. Dispela driman em wanpela.

41:27  Na dispela sevenpela bulmakau i bun nating na i no naispela na ol i kamap bihain long ol, ol i sevenpela yia. Na dispela sevenpela bun nating, win bilong hap sankamap i bin bagarapim ol, bai i sevenpela yia bilong bikpela hangre.

41:28  Dispela em samting mi bin tokim Fero. Samting God i laik mekim, em i soim long Fero.

41:29  Lukim, sevenpela yia bilong kisim planti samting tru bai i kamap long olgeta hap graun bilong Isip.

41:30  Na bihain long ol, sevenpela yia bilong bikpela hangre bai i kamap. Na long hap graun bilong Isip, ol bai lusim tingting long olgeta planti samting. Na dispela bikpela hangre bai bagarapim olgeta dispela hap graun.

41:31  Na long dispela hap graun, bai ol i no inap save long ol planti samting bikos dispela bikpela hangre i kamap bihain. Long wanem, em bai i stap nogut tru.

41:32  Na long wanem, long dispela driman i kamap dabol long Fero. Em i bikos God i strongim dispela samting, na klostu nau God bai mekim dispela i long kamap.

41:33  ¶ Olsem na nau Fero i mas painim wanpela man i gat gutpela tingting na i gat save tru. Na em i mas putim em long bosim dispela graun bilong Isip.

41:34  Fero i ken mekim olsem, na em i ken makim sampela ofisa bilong bosim dispela graun. Na long dispela sevenpela yia i gat planti samting, ol i ken kisim wanpela hap bilong ol faipela hap samting bilong dispela hap graun bilong Isip.

41:35  Na ol i ken bungim olgeta kaikai bilong ol dispela gutpela yia bai i kamap. Na ol i ken putim wit samting aninit long han bilong Fero. Na ol i ken lukautim kaikai long ol biktaun.

41:36  Na ol dispela kaikai bai i stap olsem samting ol i putim bilong holim long dispela hap graun bilong dispela sevenpela yia bilong bikpela hangre. Em bai i kamap long hap graun bilong Isip. Olsem na dispela hap graun i no ken bagarap olgeta long taim bilong hangre.

41:37  Na dispela samting i gutpela long ai bilong Fero, na long ai bilong olgeta wokboi bilong em.

41:38  Na Fero i tokim ol wokboi bilong en, Yumi inap long painim kain man olsem dispela, wanpela man insait long husat Spirit bilong God i stap?

41:39  Na Fero i tokim Josep, God i bin soim yu olgeta dispela samting, olsem na i no gat wanpela man i gat gutpela tingting na i gat save tru olsem yu.

41:40  Bai yu stap bosman bilong haus bilong mi. Na bai tok bilong yu i bosim olgeta manmeri bilong mi. Long sia king tasol bai mi winim yu.

41:41  Na Fero i tokim Josep, Lukim, mi bin putim yu long bosim olgeta graun bilong Isip.

41:42  Na Fero i rausim ring bilong en long han bilong en. Na em i putim em long han bilong Josep. Na Fero i pasim long em ol klos ol i wokim long naispela laplap, na em i putim wanpela sen gol nabaut long nek bilong en.

41:43  Na em i mekim Josep i kalap i go long namba tu karis bilong en. Na ol i go pas long em na i singaut, Yupela brukim skru. Na em i mekim em i stap hetman bilong olgeta graun bilong Isip.

41:44  Na Fero i tokim Josep, Mi Fero. Na sapos yu no stap, i no gat man bai i litimapim han o lek bilong en long olgeta graun bilong Isip.

41:45  Na Fero i kolim nem bilong Josep, Safnat-panea Na em i givim em Asenat i kamap meri bilong en. Em i pikinini meri bilong Poti-fera, pris bilong On. Na Josep i raun long olgeta graun bilong Isip.

41:46  ¶ Na Josep i gat 30 krismas taim em i sanap long pes bilong Fero, king bilong Isip. Na Josep i lusim pes bilong Fero, na em i go long olgeta graun bilong Isip.

41:47  Na long ol sevenpela yia i gat planti samting, graun i karim planti kaikai.

41:48  Na em i bungim olgeta kaikai bilong dispela sevenpela yia i stap long graun bilong Isip. Na em i putim dispela kaikai i stap long ol biktaun. Ol kaikai bilong gaden, em i stap nabaut long olgeta wan wan biktaun, em i putim i stap long dispela biktaun.

41:49  Na Josep i bungim ol wit samting i planti tru olsem wesan bilong nambis, inap long em i lusim pasin bilong kaunim. Long wanem, em i no gat namba.

41:50  Na dispela bikpela hangre i no kamap yet, na tupela pikinini man i kamap long Josep. Asenat, pikinini meri bilong Poti-fera, pris bilong On, em i bin karim tupela long em.

41:51  Na Josep i kolim nem bilong namba wan pikinini Manasa. Long wanem, God, em i tok, i bin mekim mi i lusim tingting long olgeta hatwok bilong mi na olgeta wanhaus bilong papa bilong mi.

41:52  Na em i kolim nem bilong namba tu pikinini Ifraim. Long wanem, God i bin mekim mi i karim kaikai long dispela hap graun bilong hevi bilong mi.

41:53  Na ol sevenpela yia bilong planti samting i stap long graun bilong Isip, em i pinis.

41:54  Na ol sevenpela yia bilong hangre i stat long kamap, bilong bihainim tok bilong Josep. Na dispela hangre i stap long olgeta hap graun. Tasol long olgeta hap bilong Isip, bret i stap.

41:55  Na taim olgeta manmeri bilong Isip i hangre, ol manmeri i krai long Fero long givim bret. Na Fero i tokim olgeta Isip, Yupela go long Josep. Samting em i tokim yupela long mekim, yupela i mas mekim.

41:56  Na dispela bikpela hangre i stap long olgeta hap bilong dispela graun. Na Josep i opim olgeta haus kaikai na i salim long ol Isip. Na dispela bikpela hangre i kamap nogut moa long hap graun bilong Isip.

41:57  Na olgeta kantri i kam long Isip long Josep bilong baim wit samting. Bilong wanem, dispela bikpela hangre i stap nogut tru olsem long olgeta hap graun.

Chapter 42

42:1  ¶ Nau taim Jekop i save wit samting i stap long Isip, Jekop i tokim ol pikinini man bilong en, Bilong wanem yupela wan wan i lukluk long ol arapela?

42:2  Na em i tok, Lukim. Mi bin harim tok long wit samting i stap long Isip. Yupela go daun long hap. Na yupela baim long yumi long hap, bai yumi ken i stap laip, na yumi no ken dai pinis.

42:3  Na tenpela brata bilong Josep i go daun bilong baim wit samting long Isip.

42:4  Tasol Benjamin, brata bilong Josep, Jekop i no salim em i go wantaim ol brata bilong em. Long wanem, em i tok, Nogut samting nogut i kamap long em.

42:5  Na ol pikinini man bilong Isrel i kam bilong baim wit samting namel long ol dispela man i kam. Long wanem, dispela bikpela hangre i stap long Kenan.

42:6  Na Josep i stap nambawan gavman bilong bosim dispela hap graun. Na em yet i salim wit samting long olgeta manmeri bilong dispela hap graun. Na ol brata bilong Josep i kam, na i lindaun long pes bilong em, na ol pes bilong ol i go long graun.

42:7  ¶ Na Josep i lukim ol brata bilong en. Na em i save long ol. Tasol em i mekim em yet i olsem man bilong longwe ples long ai bilong ol. Na em i toktok strong long ol. Na em i tokim ol, Yupela kam long wanem hap? Na ol i tok, Long hap graun bilong Kenan mipela i kam bilong baim kaikai.

42:8  Na Josep i save long ol brata bilong en, tasol ol i no save long em.

42:9  Na Josep i tingim ol driman em i bin driman long ol. Na em i tokim ol, Yupela i ol man bilong lukstil. Yupela i kam bilong lukim dispela graun i stap nating.

42:10  Na ol i tokim em, Nogat, bikman bilong mi. Ol wokboi bilong yu i kam bilong baim kaikai tasol.

42:11  Mipela olgeta i pikinini man bilong wanpela man. Mipela i ol man bilong mekim tok i tru. Ol wokboi bilong yu i no ol man bilong lukstil.

42:12  Na em i tokim ol, Nogat, yupela i kam bilong lukim dispela graun i stap nating tasol.

42:13  Na ol i tok, Ol wokboi bilong yu i 12-pela brata, ol pikinini man bilong wanpela man long hap graun bilong Kenan. Na, lukim, dispela de pikinini i yangpela moa i stap wantaim papa bilong mipela, na wanpela i no stap.

42:14  Na Josep i tok long ol, Dispela em dispela samting mi tokim yupela pinis, i spik, Yupela i ol man bilong lukstil.

42:15  Long dispela mi bai traim yupela. Long laip bilong Fero, yupela i no ken lusim hia i go, sapos brata bilong yu i yangpela moa em i no kam long hia.

42:16  Yupela salim wanpela bilong yupela i go, na em i ken kisim brata bilong yupela. Na mi bai holimpas yupela long kalabus. Bilong mi ken traim ol tok bilong yupela, tok tru i stap insait long yupela, o nogat. Sapos nogat, tru tumas, long laip bilong Fero, yupela i ol man bilong lukstil.

42:17  Na em i putim olgeta wantaim long kalabus inap tripela de.

42:18  Na long de namba tri Josep i tokim ol, Yupela mekim olsem, na yupela i ken stap laip. Long wanem, mi pret long God.

42:19  Sapos yupela i ol man i mekim tok i tru, ol i ken pasim wanpela bilong ol brata bilong yupela long haus bilong kalabus bilong yupela. Na yupela go na karim wit samting i go long daunim bikpela hangre bilong ol wanhaus bilong yupela.

42:20  Tasol yupela i mas bringim brata bilong yupela i yangpela moa i kam long mi. Olsem na yupela i ken soim ol tok bilong yupela i tru. Na bai yupela i no dai pinis. Na ol i mekim olsem.

42:21  ¶ Na ol wan wan i tok wanpela i go long arapela, Tru tumas, yumi gat asua long sait bilong brata bilong yumi, long dispela, yumi lukim taim hevi i krungutim tewel bilong em, taim em i askim yumi wantaim daun pasin, na yumi no laik harim. Olsem na dispela hevi i kamap antap long yumi.

42:22  Na Ruben i bekim tok long ol, i spik, Mi bin tok, yupela i no ken mekim sin na birua long dispela pikinini. Na yupela i no laik harim. Ating mi no bin tok olsem, a? Olsem na, lukim, God i gat askim long blut bilong em tu.

42:23  Na ol i no save, Josep i harim tok bilong ol. Long wanem, em i toktok long ol long man i save tanim tok.

42:24  Na em i tanim em yet nabaut i lusim ai bilong ol. Na em i krai na tanim gen long ol. Na em i toktok wantaim ol. Na em i kisim Simion long ol na pasim em long ai bilong ol.

42:25  Orait Josep i givim strongpela tok long pulimapim wit samting long ol bek bilong ol, na long bekim mani bilong olgeta wan wan man insait long bek bilong ol, na long givim kaikai long ol long helpim ol long rot. Na em i mekim olsem long ol.

42:26  Na ol i putim dispela wit samting antap long ol donki bilong ol, na ol i lusim dispela hap.

42:27  Na long haus pasindia wanpela i opim bek bilong en bilong givim kaikai long donki bilong en. Na em i lukim mani bilong en. Long wanem, lukim, em i stap long maus bilong bek.

42:28  Na em i tok long ol brata bilong en, Ol i bin bekim mani bilong mi. Na, harim, yes, em i stap long bek bilong mi. Na bel bilong ol i laik i dai. Na ol i pret. Na ol wan wan i spik long ol arapela olsem, Dispela samting God i bin mekim long yumi, em wanem samting?

42:29  ¶ Na ol i kam long Jekop, papa bilong ol, long hap graun bilong Kenan. Na ol i tokim em long olgeta samting i bin i kamap long ol, i spik,

42:30  Dispela man, em i bikman long dispela hap graun, em i tok strong long mipela. Na em i ting mipela i ol man bilong lukstil long dispela hap.

42:31  Na mipela i tok long em olsem, Mipela i ol man i mekim tok tru. Mipela i no man bilong lukstil.

42:32  Mipela i 12-pela brata, ol pikinini man bilong papa bilong mipela. Wanpela i no stap laip. Na long dispela de, yangpela moa i stap wantaim papa bilong mipela long hap graun bilong Kenan.

42:33  Na dispela man, dispela bikman bilong dispela kantri, i tokim mipela, Long dispela bai mi save long yupela i ol trupela man. Larim wanpela bilong ol brata bilong yupela i stap hia wantaim mi, na kisim kaikai bilong dispela bikpela hangre bilong ol hauslain bilong yupela, na yupela go.

42:34  Na bringim brata bilong yupela i yangpela moa long mi. Nau bai mi save long yupela i no stap ol man bilong lukstil, tasol long yupela i stap ol trupela man. Olsem na bai mi givim brata bilong yupela long yupela, na yupela i ken i kam i go long dispela hap graun.

42:35  Na em i bin kamap olsem, taim ol i rausim ol samting long ol bek bilong ol, lukim, paus mani bilong olgeta wan wan man i stap long bek bilong em. Na taim ol wantaim papa bilong ol i lukim ol paus mani, ol i pret.

42:36  Na Jekop, papa bilong ol, i tok long ol, Yupela i bin givim bel hevi long mi long ol pikinini bilong mi. Josep i no stap na Simion i no stap. Na yupela i laik tekewe Benjamin. Olgeta dispela samting i birua long mi.

42:37  Na Ruben i tok long papa bilong en, i spik, Yu ken kilim i dai tupela pikinini man bilong mi, sapos mi no bringim em i kam long yu. Yu givim em long han bilong mi, na bai mi bringim em i kam long yu gen.

42:38  Na em i tok, Pikinini man bilong mi bai em i no go daun wantaim yupela. Long wanem, brata bilong em i dai pinis, na em wanpela i stap. Sapos samting nogut i kamap long em long rot yupela i save go long en, orait bai yupela i bringim ol waitpela gras bilong mi i go long matmat wantaim bel hevi.

Chapter 43

43:1  ¶ Na dispela bikpela hangre i stap nogut tru long dispela hap graun.

43:2  Na em i kamap olsem, taim ol i bin kaikai olgeta dispela wit samting ol i bin bringim i kam long Isip, papa bilong ol i tokim ol, Yupela go gen, na yupela baim sampela kaikai bilong yumi.

43:3  Na Juda i tok long em, i spik, Dispela man i bin givim stretpela tok nogat long mipela, i spik, Yupela i no ken lukim pes bilong mi, sapos brata bilong yupela i no stap wantaim yupela.

43:4  Sapos yu salim brata bilong mipela i go wantaim mipela, orait bai mipela i go daun na baim kaikai bilong yu.

43:5  Tasol sapos yu no laik salim em i go, orait bai mipela i no go daun. Long wanem, dispela man i bin tokim mipela, Yupela i no ken lukim pes bilong mi, sapos brata bilong yupela i no stap wantaim yupela.

43:6  Na Isrel i tok, Bilong wanem yupela i bin mekim pasin nogut long mi olsem, na yupela i bin tokim dispela man, yupela i gat narapela brata tu?

43:7  Na ol i tok, Dispela man i askim mipela stret long sindaun bilong mipela, na long kandre bilong mipela, i spik, Papa bilong yupela i stap laip yet? Yupela i gat narapela brata? Na mipela i tokim em bilong bihainim pasin bilong ol dispela toktok. Ating mipela em inap long save tru long em bai tok, Bringim brata bilong yupela i kam daun?

43:8  Na Juda i tok long Isrel, papa bilong en, Yu salim dispela manki i go wantaim mi. Na bai mipela i kirap na i go. Na bai yumi ken i stap laip, na yumi no ken i dai pinis, mipela wantaim yu na ol pikinini bilong mipela tu.

43:9  Bai mi stap olsem promis long lukautim em. Long han bilong mi, yu ken askim long em. Sapos mi no bringim em i kam long yu, na sanapim em long pes bilong yu, orait mi ken karim dispela asua inap long oltaim oltaim.

43:10  Long wanem, sapos mipela i no bin wet, tru tumas, nau mipela i bin kam bek pinis namba tu taim.

43:11  ¶ Na papa bilong ol, Isrel, em i tok long ol, Sapos nau em i mas i stap olsem, orait yupela mekim olsem, long ol sospen graun bilong yupela, yupela kisim ol nambawan pikinini kaikai long dispela hap graun. Na yupela karim wanpela presen i go daun long dispela man. Yupela kisim i go liklik marasin bilong sua, na liklik hani, na ol kawawar samting, na sanda mur, na ol galip samting, na ol galip almon.

43:12  Na yupela i mas dabolim mani na kisim i go long han bilong yupela. Na dispela mani yupela i bin bringim i kam gen long maus bilong ol bek bilong yupela, em yupela i mas karim i go gen long han bilong yupela. Ating ol i bin mekim asua long dispela.

43:13  Na tu yupela i mas kisim i go brata bilong yupela. Na yupela i mas go gen long dispela man.

43:14  Na God i Gat Olgeta Strong i ken givim sori long yupela long pes bilong dispela man. Na bai em i ken salim i go arapela brata bilong yupela wantaim Benjamin. Sapos mi kisim bel hevi bilong lusim ol pikinini bilong mi, orait mi kisim bel hevi.

43:15  ¶ Na ol dispela man i kisim dispela presen. Na ol i dabolim mani na kisim long han bilong ol. Na ol i kisim Benjamin. Na ol i kirap na i go daun long Isip. Na ol i sanap long pes bilong Josep.

43:16  Na taim Josep i lukim Benjamin i stap wantaim ol, em i tok olsem long hetman bilong haus bilong en, Yu bringim ol dispela man i go long haus. Na yu kilim i dai wanpela animal na redim. Long wanem, ol dispela man bai i kaikai wantaim mi long belo.

43:17  Na dispela man i mekim olsem Josep i tok. Na dispela man i bringim ol man i go insait long haus bilong Josep.

43:18  Na ol man i pret, bilong wanem, em i bringim ol i kam insait long haus bilong Josep. Na ol i tok, Bikos ol i tingting long dispela mani ol i bin bekim long ol bek bilong yumi long namba wan taim, ol i bringim yumi i kam insait, bai em i ken painim rot bilong birua long yumi. Na ol i ken holimpas yumi na kisim yumi long i kamap ol slev. Na ol i ken kisim ol donki bilong yumi.

43:19  Na ol i kam klostu long man i lukautim haus bilong Josep. Na ol i toktok wantaim em klostu long dua bilong haus.

43:20  Na ol i tok, O bikman, tru tumas, mipela i bin kamdaun namba wan taim bilong baim kaikai.

43:21  Na em i kamap olsem, taim mipela i kamap long haus pasindia, mipela i opim ol bek bilong mipela. Na, lukim, mani bilong olgeta wan wan man i stap long maus bilong bek bilong em. Em mani stret bilong mipela, na mipela i bringim em i kam gen long han bilong mipela.

43:22  Na arapela mani tu, mipela i bringim i kamdaun long ol han bilong mipela bilong baim kaikai. Mipela i no inap save, husat i putim mani bilong mipela insait long ol bek bilong mipela.

43:23  Na em i tok, Bel isi i ken i stap wantaim yupela. Yupela i no ken pret. God bilong yupela, na God bilong papa bilong yupela, Em i bin givim samting i dia tru long yupela insait long ol bek bilong yupela. Mi bin holim mani bilong yupela. Na em i bringim Simion i kam long ol.

43:24  Na dispela man i bringim ol man i kam insait long haus bilong Josep. Na em i givim ol wara, na ol i wasim ol lek bilong ol. Na em i givim kaikai long ol donki bilong ol.

43:25  Na ol i redim dispela presen inap Josep i kam long belo. Long wanem, ol i harim long bai ol i kaikai bret long dispela hap.

43:26  ¶ Na taim Josep i kam long haus, ol i bringim i kam insait long haus dispela presen i stap long han bilong ol. Na ol i lindaun i go long graun long em.

43:27  Na em i askim ol long ol i stap olsem wanem, na em i tok, Papa bilong yupela, dispela lapun man husat yupela i toktok long en, em i orait? Em i stap laip yet?

43:28  Na ol i bekim tok, Wokboi bilong yu, papa bilong mipela, em i stap gutpela. Em i stap laip yet. Na ol i daunim ol het bilong ol na lindaun long em.

43:29  Na em i litimapim ai bilong en, na i lukim brata bilong en Benjamin, em pikinini man bilong mama bilong en. Na em i tok, Dispela em i yangpela brata bilong yupela, husat yupela i bin tokaut long em long mi? Na em i tok, God i ken soim marimari long yu, pikinini man bilong mi.

43:30  Na Josep i hariap i go. Long wanem, bel bilong em i krai long brata bilong en. Na em i painim ples bilong krai. Na em i go insait long rum bilong en, na i krai long dispela hap.

43:31  Na em i wasim pes bilong en, na i go ausait. Na em i pasim bel bilong en yet, na i tok, Yupela putim bret.

43:32  Na ol i putim long em long ples bilong em yet, na bilong ol long ples bilong ol yet, na bilong ol Isip i kaikai wantaim em long ples bilong ol yet. Bilong wanem, ol Isip i no ken kaikai bret wantaim ol Hibru. Long wanem, dispela em pasin i sting samting long ai bilong ol Isip.

43:33  Na long pes bilong em, ol i putim namba wan pikinini bilong bihainim namba bilong em. Na ol i putim yangpela moa olsem em i yangpela. Na ol man i tingting planti namel long ol yet.

43:34  Na em i kisim ol hap kaikai i stap long pes bilong em na i salim long ol. Tasol hap kaikai bilong Benjamin i winim ol arapela faipela taim. Na ol i dring, na ol i amamas wantaim em.

Chapter 44

44:1  ¶ Na em i givim strongpela tok long man i lukautim haus bilong en. Em i spik, Yu mas pulimapim kaikai long ol bek bilong ol man, mak olsem ol inap long karim. Na yu putim mani bilong olgeta wan wan man long maus bilong bek bilong em.

44:2  Na yu putim kap bilong mi, dispela kap silva, long maus bilong bek bilong man i yangpela moa. Na tu yu putim mani bilong wit samting bilong em. Na em i mekim bilong bihainim dispela tok Josep i autim.

44:3  Na taim tulait i kamap, ol i salim ol man i go. Ol i salim ol wantaim ol donki bilong ol i go.

44:4  Na taim ol i go ausait long biktaun pinis, na ol i no stap longwe yet, orait Josep i tok olsem long man i lukautim haus, Yu kirap na bihainim dispela ol man. Na taim yu kamap long ol, yu mas tokim ol, Bilong wanem yupela i bin bekim pasin nogut long givim pe long gutpela pasin?

44:5  Ating dispela i no dispela em samting bikman bilong mi i save dring long en, na tru tumas, we em i save mekim wok glasman long en? Yupela i bin mekim pasin nogut, taim yupela i mekim olsem.

44:6  Na em i kamap long ol, na em i autim dispela wankain tok long ol.

44:7  Na ol i tok long em, Bilong wanem bikman bilong mi i autim ol dispela tok? I no ken tru long ol wokboi bilong yu i mekim bilong bihainim dispela samting.

44:8  Lukim, dispela mani mipela i bin lukim long maus bilong ol bek bilong mipela, em mipela i bringim gen long hap graun bilong Kenan i kam long yu. Olsem wanem na mipela i ken stilim silva o gol long haus bilong bikman bilong yu?

44:9  Yu lukim dispela i stap wantaim husat namel long ol wokboi bilong yu, orait em i ken dai pinis. Na tu mipela bai i stap ol slev bilong bikman bilong mi.

44:10  Na em i tok, Nau tu em i ken kamap bilong bihainim ol tok bilong yupela. Mi lukim dispela i stap wantaim husat, bai em i stap wokboi bilong mi. Na bai yupela i no gat asua.

44:11  Na kwiktaim olgeta man wan wan i kisim bek bilong em i kam daun long graun. Na olgeta man wan wan i opim bek bilong em.

44:12  Na wokman bilong Josep i luksave, na em i stat long namba wan brata na i pinis long brata i yangpela moa. Na em i lukim kap long bek bilong Benjamin.

44:13  Na ol i brukim klos bilong ol. Na olgeta wan wan man i putim kago long donki bilong en, na ol i go bek insait long biktaun.

44:14  Na Juda wantaim ol brata bilong en, ol i kam long haus bilong Josep. Long wanem, em i stap yet long dispela hap. Na ol i pundaun long graun long pes bilong em.

44:15  Na Josep i tok long ol, Dispela em wanem kain pasin yupela i bin mekim? Ating yupela i no save long kain man olsem mi i ken mekim wok glasman?

44:16  Na Juda i tok, Mipela bai i tok wanem long bikman bilong mi? Bai mipela i autim wanem tok? O olsem wanem mipela i ken soim ples klia pasin bilong mipela yet? God i bin lukim sin nogut bilong ol wokboi bilong yu. Lukim, mipela i ol wokboi bilong bikman bilong mi. Mipela wantaim man ol i lukim dispela kap i stap wantaim em, mipela i ol wokboi.

44:17  Na Josep i tok, No ken tru long mi mekim olsem. Tasol dispela man, ol i bin lukim kap i stap long han bilong em, em bai i stap wokboi bilong mi. Na long yupela i olsem, yupela kirap wantaim bel isi na go long papa bilong yupela.

44:18  ¶ Orait Juda i kam klostu long em. Na em i tok, O bikman bilong mi, mi askim plis long yu long yu larim wokboi bilong yu i autim wanpela tok long ia bilong bikman bilong mi. Na yu no ken larim belhat bilong yu i kamap hatpela long birua long wokboi bilong yu. Long wanem, yes, yu stap olsem Fero.

44:19  bikman bilong mi i bin askim ol wokboi bilong en, i spik, Yupela i gat papa o brata?

44:20  Na mipela i bin tok long bikman bilong mi, Mipela i gat papa, em lapun man. Na wanpela pikinini i bin i kamap long em taim em i lapun, em i liklik pikinini. Na brata bilong em i dai pinis. Na em wanpela i stap bilong ol pikinini bilong mama bilong en. Na papa bilong en i laikim tru em.

44:21  Na yu bin tok long ol wokboi bilong yu, Yupela bringim em i kam daun long mi, bai mi ken lukluk long em.

44:22  Na mipela i bin tok long bikman bilong mi, Dispela manki i no inap lusim papa bilong en. Long wanem, sapos em i lusim papa bilong en, papa bilong en bai i dai pinis.

44:23  Na yu bin tok long ol wokboi bilong yu, Sapos brata bilong yupela i yangpela moa em i no kam daun wantaim yupela, orait yupela i no ken lukim pes bilong mi moa.

44:24  Na em i kamap olsem, taim mipela i kam antap long wokboi bilong yu, em papa bilong mipela, mipela i bin autim long em ol tok bilong bikman bilong mi.

44:25  Na papa bilong mipela i tok, Yupela go gen na baim liklik hap kaikai long yumi.

44:26  Na mipela i tok, Mipela i no inap go daun. Sapos brata bilong mipela i yangpela moa em i stap wantaim mipela, orait bai mipela i go daun. Long wanem, mipela i no ken lukim pes bilong dispela man, sapos brata bilong mipela i yangpela moa em i no stap wantaim mipela.

44:27  Na wokboi bilong yu, em papa bilong mi, em i tok long mipela, Yupela i save long dispela, meri bilong mi i bin karim tupela pikinini man long mi.

44:28  Na wanpela i lusim mi i go. Na mi bin tok, Tru tumas, samting i bin brukim em long planti hap. Na mi no bin lukim em moa.

44:29  Na sapos yu kisim dispela tu i lusim mi, na sapos samting nogut i kamap long em, orait bai yupela i bringim waitpela gras bilong mi i go long matmat wantaim bel hevi.

44:30  Olsem na nau taim mi kam long wokboi bilong yu, em papa bilong mi, na dispela manki i no stap wantaim mipela, na mipela i save laip bilong em i pas long laip bilong dispela manki,

44:31  Orait bai em i kamap olsem, taim em i lukim dispela manki i no stap wantaim mipela, orait bai em i dai pinis. Na ol wokboi bilong yu bai i bringim waitpela gras bilong wokboi bilong yu, em papa bilong mipela, em i go daun long matmat wantaim bel hevi.

44:32  Long wanem, wokboi bilong yu i kamap promis long papa bilong mi long lukautim gut dispela manki. Na mi bin spik, Sapos mi no bringim em i kam gen long yu, orait bai mi karim asua oltaim oltaim long papa bilong mi.

44:33  Olsem na nau, mi askim plis long yu long larim wokboi bilong yu i stap slev long bikman bilong mi long sindaun i stap senis bilong dispela manki. Na yu ken larim dispela manki i go antap wantaim ol brata bilong en.

44:34  Long wanem, olsem wanem bai mi go antap long papa bilong mi, na dispela manki i no stap wantaim mi? Nogut mi lukim dispela samting nogut bai i kamap long papa bilong mi.

Chapter 45

45:1  ¶ Long dispela taim Josep i no inap pasim bel bilong en yet long pes bilong olgeta man i sanap klostu long em. Na em i singaut, Yupela mekim olgeta wan wan man i lusim mi na i go. Na i no gat wanpela man i sanap wantaim em, taim Josep i toksave long em yet long ol brata bilong en.

45:2  Na em i krai bikmaus. Na ol Isip na ol wanhaus bilong Fero ol i harim.

45:3  Na Josep i tok olsem long ol brata bilong en, Mi Josep. Papa bilong mi i stap laip yet? Na ol brata bilong en ol i no inap bekim tok long em. Long wanem, ol i kirap nogut tru long em i stap.

45:4  Na Josep i tok long ol brata bilong en, Mi askim plis long yupela long kam klostu long mi. Na ol i kam klostu. Na em i tok, Mi Josep, brata bilong yupela, yupela i bin salim mi long Isip.

45:5  Olsem na nau yupela i no ken bel hevi o kros long yupela yet, long yupela i bin salim mi long kamap wokboi nating long hia. Long wanem, God i salim mi i kam paslain long yupela bilong helpim man i stap laip.

45:6  Long wanem, dispela bikpela hangre i bin stap tupela yia long dispela hap graun. Na faipela yia i stap yet. Na wit samting bai i no karim pikinini na i no gat taim bilong kamautim kaikai long dispela taim.

45:7  Na God i salim mi i kam paslain long yupela bilong helpim ol pikinini bilong yupela i stap laip long dispela graun, na bilong kisim bek ol laip bilong yupela long wanpela bikpela kisim bek.

45:8  Olsem nau i no yupela i salim mi i kam long hia, nogat. Em God. Na Em i mekim mi i stap wanpela papa long Fero. Na mi stap bikman bilong olgeta wanhaus bilong em, na mi stap wanpela hetman long olgeta hap bilong Isip.

45:9  Yupela hariap na go antap na go long papa bilong mi. Na yupela tokim em olsem, Pikinini man bilong yu, Josep, em i tok olsem, God i bin mekim mi i stap bikman bilong olgeta Isip. Yu kam daun long mi. Yu no ken wet.

45:10  Na bai yu stap long hap graun bilong Gosen. Na bai yu stap klostu long mi. Yu na ol pikinini bilong yu, na ol pikinini bilong ol pikinini bilong yu, na ol lain sipsip samting bilong yu, na ol lain bulmakau samting bilong yu, na olgeta samting yu holim bai ol i stap.

45:11  Na bai mi givim kaikai long yu long dispela hap. Long wanem, faipela yia bilong bikpela hangre i stap yet. Nogut yu na ol wanhaus bilong yu, na olgeta samting yu gat, ol bai i kamap rabisman.

45:12  Na, lukim, ai bilong yupela i lukim na ai bilong brata bilong mi Benjamin i lukim em maus bilong mi i toktok long yupela.

45:13  Na yupela i ken tokim papa bilong mi long olgeta glori bilong mi long Isip, na long olgeta samting yupela i bin lukim. Na yupela i mas hariap na bringim papa bilong mi i kam daun hia.

45:14  Na em i krai long nek bilong brata bilong en Benjamin. Na Benjamin i krai long nek bilong em.

45:15  Na moa tu em i givim kis long olgeta brata bilong en, na em i krai long ol. Na bihain long dispela, ol brata bilong en i toktok wantaim em.

45:16  ¶ Na long haus bilong Fero ol i harim gutpela tok long dispela. Na ol i spik, Ol brata bilong Josep i bin i kam. Na Fero wantaim ol wokboi bilong em, ol i amamas tru.

45:17  Na Fero i tokim Josep, Yu tok olsem long ol brata bilong yu, Yupela mekim olsem, putim kago long ol animal bilong yupela na go. Yupela go long hap graun bilong Kenan.

45:18  Na yupela kisim papa bilong yupela na ol wanhaus bilong yupela, na yupela kam long mi. Na bai mi givim yupela ol gutpela samting bilong hap graun bilong Isip. Na yupela bai kaikai ol gutpela kaikai bilong dispela hap bilong graun.

45:19  Nau mi givim yupela strongpela tok. Yupela i mas mekim olsem, yupela i mas kisim ol karis i lusim Isip na i go. Em long karim ol liklik pikinini bilong yupela na ol meri bilong yupela. Na yupela i mas bringim papa bilong yupela na kam.

45:20  Na tu yupela i no ken tingting long ol samting bilong yupela. Long wanem, ol gutpela samting bilong olgeta hap graun bilong Isip em bilong yupela.

45:21  Na ol pikinini bilong Israel i mekim olsem. Na Josep i bin givim ol karis long ol, bilong bihainim strongpela tok bilong Fero. Na em i bin givim kaikai samting long ol long helpim ol long rot.

45:22  Long olgeta wan wan man bilong ol, em i givim nupela klos. Tasol long Benjamin em i givim 300 hap silva na faipela senis klos.

45:23  Na em i salim olsem long papa bilong en, tenpela donki i karim i go ol gutpela samting bilong Isip, na tenpela meri donki i karim i go wit samting na bret na kaikai long helpim papa bilong em long rot.

45:24  Olsem na em i salim ol brata bilong en i go, na ol i lusim em. Na em i tok long ol, Yupela lukaut. Nogut yupela i kirap na pait long rot.

45:25  ¶ Na ol i lusim Isip na i go antap. Na ol i kam long Jekop, papa bilong ol, long graun bilong Kenan.

45:26  Na ol i tokim em, i spik, Josep i stap laip yet, na em i stap nambawan gavman long olgeta hap bilong Isip. Na bel bilong Jekop i hap i dai, long wanem, em i no bilipim tok bilong ol.

45:27  Na ol i tokim em long olgeta tok bilong Josep, em i bin tokim ol. Na taim em i lukim ol karis Josep i bin salim i kam bilong karim em i go, spirit bilong Jekop, papa bilong ol, i kirap gen.

45:28  Na Isrel i tok, Em inap. Josep, pikinini man bilong mi, em i stap laip yet. Bai mi go na lukim em paslain long mi dai pinis.

Chapter 46

46:1  ¶ Na Isrel i kisim olgeta samting em i gat, na em i go long wokabaut bilong en. Na em i kam long Biar-siba, na em i ofaim ol sakrifais long God bilong papa bilong en Aisak.

46:2  Na God i toktok long Isrel long ol driman samting bilong nait. Na Em i tok, Jekop, Jekop. Na em i tok, Mi stap hia.

46:3  Na Em i tok, Mi God, God bilong papa bilong yu. No ken pret long go daun long Isip. Long wanem, long dispela hap bai Mi mekim yu i kamap wanpela bikpela kantri.

46:4  Bai Mi go daun wantaim yu long Isip. Na tu, tru tumas, bai Mi bringim yu i kam antap gen. Na Josep bai putim han bilong en long ai bilong yu.

46:5  ¶ Na Jekop i kirap na lusim Biar-siba. Na ol pikinini man bilong Isrel ol i karim i go Jekop, papa bilong ol, na ol pikinini bilong ol, na ol meri bilong ol. Ol i karim ol i go long ol karis Fero i bin salim i kam bilong karim em i go.

46:6  Na ol i kisim ol bulmakau samting bilong ol i go, na ol kago bilong ol, ol i bin kisim long graun bilong Kenan. Na ol i kam long Isip. Jekop wantaim olgeta pikinini na tumbuna pikinini bilong en wantaim em, ol i kam.

46:7  Ol pikinini man bilong en, na ol pikinini man bilong ol pikinini man bilong en, na ol pikinini meri bilong en, na ol pikinini meri bilong ol pikinini man bilong en, na olgeta tumbuna pikinini bilong en, em i bringim ol i kam long Isip wantaim em.

46:8  Na ol dispela i ol nem bilong ol pikinini bilong Isrel, ol i kam long Isip, em Jekop wantaim ol pikinini man bilong en. Ruben, em namba wan pikinini bilong Jekop.

46:9  Na ol pikinini man bilong Ruben i Henok, na Falu, na Hesron, na Karmi.

46:10  Na ol pikinini man bilong Simion i Jemyuel, na Jamin, na Ohat, na Jakin, na Sohar, na Saul, em pikinini man bilong wanpela meri Kenan.

46:11  Na ol pikinini man bilong Livai i Gerson na Kohat na Merari.

46:12  Na ol pikinini man bilong Juda i Er, na Onan, na Sela, na Fares, na Sira. Tasol Er na Onan i bin dai pinis long graun bilong Kenan. Na ol pikinini man bilong Fares i Hesron na Hamul.

46:13  Na ol pikinini man bilong Isakar i Tola, na Fuva, na Jop, na Simron.

46:14  Na ol pikinini man bilong Sebyulan i Seret, na Elon, na Jalel.

46:15  Ol dispela i pikinini man bilong Lia, em i karim long Jekop long Padan-aram, wantaim pikinini meri bilong en Daina. Namba bilong olgeta tewel bilong olgeta pikinini man bilong en na pikinini meri bilong en, em i 33.

46:16  Na ol pikinini man bilong Gat i Sifion, na Hagai, na Suni, na Esbon, na Eri, na Arodi, na Areli.

46:17  Na ol pikinini man bilong Asur i Jimna, na Isua, na Isui, na Beraia; na Sera, em susa bilong ol. Na ol pikinini man bilong Beraia i Heber na Malkiel.

46:18  Ol dispela i ol pikinini man bilong Silpa, Leban i bin givim em long Lia, pikinini meri bilong en. Na em i bin karim ol dispela long Jekop, yes, ol i 16-pela tewel.

46:19  Ol pikinini man bilong Resel, meri bilong Jekop, ol i Josep na Benjamin.

46:20  Na Manasa na Ifraim i kamap long Josep long hap graun bilong Isip. Asenat, pikinini meri bilong Poti-fera, pris bilong On, em i karim ol long em.

46:21  Na ol pikinini man bilong Benjamin i Bela, na Beker, na Asbel, na Gera, na Neaman, na Ehi, na Ros, na Mupim, na Hupim, na Art.

46:22  Ol dispela i ol pikinini man bilong Resel, ol i bin kamap long Jekop. Namba bilong olgeta tewel i 14.

46:23  Na ol pikinini man bilong Dan i Husim.

46:24  Na ol pikinini man bilong Naptalai i Jasel, na Guni, na Jeser, na Silem.

46:25  Ol dispela i ol pikinini man bilong Bilha, Leban i givim em long Resel, pikinini meri bilong en. Na em i karim ol dispela long Jekop. Namba bilong olgeta tewel i sevenpela.

46:26  Olgeta tewel i kam wantaim Jekop long Isip, ol i kam long bel bilong en, namba bilong olgeta tewel i 66. Dispela i no kaunim ol meri bilong ol pikinini man bilong Jekop.

46:27  Na ol pikinini man bilong Josep, ol i kamap long em long Isip, ol i tupela tewel. Olgeta tewel bilong haus bilong Jekop, ol i kam long Isip, ol i 70-pela.

46:28  ¶ Na em i salim Juda i go paslain long em long Josep, bilong soim rot long em i go long Gosen. Na ol i kam pinis long hap graun bilong Gosen.

46:29  Na Josep i redim karis bilong en, na em i go antap long Gosen bilong bungim Isrel, papa bilong en. Na em i soim em yet long em. Na em i pundaun long nek bilong em, na em i krai longpela taim long nek bilong em.

46:30  Na Isrel i tokim Josep, Nau mi ken i dai, bikos mi bin lukim pes bilong yu, bilong wanem, yu stap laip yet.

46:31  Na Josep i tok olsem long ol brata bilong en na long ol wanhaus bilong papa bilong en, Bai mi go antap na soim Fero. Na bai mi tokim em, Ol brata bilong mi, na ol wanhaus bilong papa bilong mi, ol i bin i stap long graun bilong Kenan, ol i kam pinis long mi.

46:32  Na ol dispela man i wasman bilong sipsip, long wanem, wok bilong ol em bilong givim kaikai long ol bulmakau samting. Na ol i bin bringim i kam ol lain sipsip samting, na ol lain bulmakau samting, na olgeta samting ol i gat.

46:33  Na em bai kamap olsem, taim Fero bai singautim yupela i kam, na em bai tok, Yupela i save mekim wanem kain wok?

46:34  Orait yupela i mas tok, I stat long taim mipela i yangpela na yes, i kam inap nau, wok bilong ol wokboi bilong yu em bilong lukautim ol bulmakau samting. Em wok bilong mipela wantaim ol papa bilong mipela tu. Na bai yupela i ken stap long hap graun bilong Gosen. Long wanem, olgeta wan wan wasman bilong sipsip em i sting samting long ai bilong ol Isip.

Chapter 47

47:1  ¶ Orait Josep i kam na tokim Fero, i spik, Papa bilong mi na ol brata bilong mi, na ol lain sipsip samting bilong ol na ol lain bulmakau samting bilong ol, na olgeta samting ol i gat, ol i lusim graun bilong Kenan na i kam. Na, lukim, ol i stap long hap graun Gosen.

47:2  Na em i kisim sampela bilong ol brata bilong en, yes, faipela man, na em i soim ol long Fero.

47:3  Na Fero i tok long ol brata bilong em, Yupela i save mekim wanem kain wok? Na ol i tok long Fero, Ol wokboi bilong yu i ol wasman bilong sipsip, mipela wantaim ol papa bilong mipela tu.

47:4  Na moa tu ol i tok long Fero, Mipela i kam bilong stap long dispela hap graun. Long wanem, ol wokboi bilong yu i no gat ples gras long ol lain sipsip bilong ol. Long wanem, bikpela hangre i stap nogut tru long graun bilong Kenan. Olsem na, mi askim plis long yu long nau yu ken larim ol wokboi bilong yu i stap long hap graun bilong Gosen.

47:5  Na Fero i tok long Josep, i spik, Papa bilong yu na ol brata bilong yu, ol i kam pinis long yu.

47:6  Graun bilong Isip i stap long pes bilong yu. Long nambawan hap bilong dispela graun, papa bilong yu na ol brata bilong yu i ken i stap. Ol i ken i stap long hap graun bilong Gosen. Na sapos yu save long sampela man namel long ol, ol inap wok strong, orait mekim ol i stap ol hetman bilong ol bulmakau samting bilong mi.

47:7  Na Josep i bringim Jekop, papa bilong en, i kam insait. Na em i putim em long pes bilong Fero. Na Jekop i blesim Fero.

47:8  Na Fero i tok long Jekop, Yu gat hamas krismas?

47:9  Na Jekop i tok long Fero, Ol de bilong ol krismas bilong mi stap waira i 130 krismas. Ol de bilong ol krismas bilong laip bilong mi ol i no planti na ol i nogut. Na ol i no bin kamap olsem ol de bilong ol krismas bilong laip bilong ol papa bilong mi long ol de bilong ol i stap waira.

47:10  Na Jekop i blesim Fero, na em i lusim pes bilong Fero na i go ausait.

47:11  Na Josep i putim papa bilong en na ol brata bilong en, na em i givim hap graun long ol long holimpas long graun bilong Isip, long nambawan hap bilong dispela graun, long hap graun bilong Rameses, olsem Fero i bin givim strongpela tok long mekim.

47:12  Na Josep i givim kaikai long papa bilong en na ol brata bilong en na olgeta wanhaus bilong papa bilong en. Em i givim bret bilong bihainim ol famili bilong ol i mas kisim.

47:13  ¶ Na i no gat bret long dispela hap olgeta. Long wanem, bikpela hangre i stap nogut tru. Olsem na graun bilong Isip na olgeta graun bilong Kenan i laik hap i dai long dispela bikpela hangre.

47:14  Na Josep i bungim olgeta mani i stap long hap graun bilong Isip na long hap graun bilong Kenan. Em long dispela wit samting ol i bin baim. Na Josep i bringim dispela mani i kam insait long haus bilong Fero.

47:15  Na taim mani i pinis long graun bilong Isip na long graun bilong Kenan, olgeta Isip i kam long Josep. Na ol i tok, Yu mas givim bret long mipela. Long wanem, bilong wanem mipela i mas i dai pinis long pes bilong yu? Long wanem, mani i pinis.

47:16  Na Josep i tok, Yupela mas givim ol bulmakau samting bilong yupela. Na bai mi givim kaikai long yupela long baim ol bulmakau samting bilong yupela, sapos mani i pinis.

47:17  Na ol i bringim ol bulmakau samting bilong ol i kam long Josep. Na Josep i givim bret long ol bilong senisim ol hos, na ol lain sipsip samting, na ol bulmakau bilong ol lain bulmakau, na ol donki. Na long dispela yia em i givim bret long ol bilong kaikai bilong senisim olgeta bulmakau samting bilong ol.

47:18  Taim dispela yia i pinis, ol i kam long em long namba tu yia. Na ol i tok long em, Bai mipela i no haitim dispela long bikman bilong mi. I olsem, mani bilong mipela i pinis. Na tu bikman bilong mi i holim ol lain bulmakau samting bilong mipela. I no gat narapela samting i stap long ai bilong bikman bilong mi. Ol bodi bilong mipela na ol graun bilong mipela, em tasol.

47:19  Olsem wanem mipela i mas i dai pinis long ai bilong yu, mipela na graun bilong mipela tu? Yu mas baim mipela na graun bilong mipela long bret. Na mipela wantaim graun bilong mipela bai i stap ol wokboi long Fero. Na yu mas givim pikinini kaikai long mipela, bai mipela i ken stap laip na mipela i no mas i dai pinis. Na bai dispela graun i no ken stap nating.

47:20  Na Josep i baim bilong Fero olgeta hap graun bilong Isip. Long wanem, olgeta wan wan man bilong Isip i salim gaden bilong en. Long wanem, bikpela hangre i stap antap long ol. Olsem na dispela graun i kamap graun bilong Fero.

47:21  Na long ol dispela manmeri, em i putim ol i go long ol biktaun i stat long wanpela sait bilong ol arere bilong graun bilong Isip na yes, em i go long arapela sait bilong en.

47:22  Hap graun bilong ol pris tasol, em i no baim. Long wanem, ol pris i gat hap skel Fero i makim long ol. Na ol i kaikai hap skel Fero i givim ol. Olsem na ol i no salim ol graun bilong ol.

47:23  Nau Josep i tokim ol manmeri, Lukim, dispela de mi bin baim yupela na graun bilong yupela i bilong Fero. Harim, pikinini kaikai i stap bilong helpim yupela, na yupela bai planim dispela graun.

47:24  Na bai em i kamap olsem, taim em i karim kaikai, yupela i mas brukim long faipela hap na givim wanpela hap long Fero. Na fopela hap bai i bilong yupela yet. Em long pikinini kaikai bilong planim long gaden, na long kaikai bilong yupela, na long ol wanhaus bilong yupela, na long kaikai bilong ol liklik pikinini bilong yupela.

47:25  Na ol i tok, Yu bin kisim bek ol laip bilong mipela. Yu mas larim mipela i kisim marimari long ai bilong bikman bilong mi. Na mipela bai i stap ol wokboi bilong Fero.

47:26  Na Josep i wokim dispela lo long hap graun bilong Isip inap long dispela de olsem, Fero i mas kisim wanpela hap bilong ol faipela hap. Graun bilong ol pris tasol, em i no kamap graun bilong Fero.

47:27  ¶ Na Isrel i stap long graun bilong Isip, long hap graun bilong Gosen. Na ol i holimpas long ol samting long en, na ol i kamap bikpela, na i kamap planti moa tru.

47:28  Na Jekop i sindaun long graun bilong Isip inap 17 krismas. Olsem na yia olgeta bilong Jekop i 147.

47:29  Na taim i kam klostu long Israel i mas dai pinis. Na em i singautim i kam pikinini man bilong en Josep. Na em i tokim em, Sapos nau mi bin kisim marimari long ai bilong yu, mi askim plis long yu long putim han bilong yu aninit long antap hap bilong lek bilong mi. Na yu soim gutpela pasin na pasin tru long mi. Mi askim plis long yu long yu no ken planim mi long Isip.

47:30  Tasol bai mi slip wantaim ol papa bilong mi. Na yu ken karim mi i lusim Isip na i go. Na yu ken planim mi long ples matmat bilong ol. Na em i tok, Bai mi mekim olsem yu tok.

47:31  Na em i tok, Yu mas tok tru antap long mi. Na em i tok tru antap long em. Na Isrel i lindaun long het bilong bet.

Chapter 48

48:1  ¶ Na em i kamap olsem, bihain long ol dispela samting, wanpela i tokim Josep, Lukim, papa bilong yu i sik. Na em i kisim tupela pikinini man bilong en, Manasa na Ifraim, i go wantaim em.

48:2  Na wanpela i tokim Jekop, na i tok, Lukim, pikinini man bilong yu Josep i kam long yu. Na Isrel i strongim em yet na i sindaun long bet.

48:3  Na Jekop i tok long Josep, God i Gat Olgeta Strong i bin kamap long mi long Lus long graun bilong Kenan. Na Em i bin blesim mi.

48:4  Na Em i tokim mi, Lukim, bai Mi mekim yu i karim planti kaikai na bai yu kamap planti. Na bai Mi mekim yu i kamap planti manmeri tru. Na bai Mi givim dispela graun long tumbuna pikinini bilong yu i kam bihain long yu bilong i stap samting bilong holimpas inap long oltaim oltaim.

48:5  Na nau tupela pikinini man bilong yu, Ifraim na Manasa, ol i bilong mi. Ol i kamap long yu long graun bilong Isip taim mi no kam yet long yu long Isip. Olsem Ruben na Simion, ol bai i stap pikinini bilong mi.

48:6  Na ol pikinini bilong yu, bai yu kamapim bihain long ol, ol bai i stap pikinini bilong yu. Na bai ol i kolim ol long nem bilong ol brata bilong ol, taim ol i kisim samting papa i givim ol.

48:7  Na long mi, taim mi bin lusim Padan i kam, Resel i dai pinis klostu long mi long rot long graun bilong Kenan. I gat liklik wokabaut tasol bilong i kam long Efrat. Na mi planim em long dispela hap long rot bilong Efrat. Dispela yet em Betlehem.

48:8  ¶ Na Isrel i lukim ol pikinini man bilong Josep. Na em i tok, Ol dispela i husat?

48:9  Na Josep i tok long papa bilong en, Ol i pikinini man bilong mi, God i bin givim ol long mi long dispela ples. Na em i tok, Mi askim plis long yu long bringim ol i kam long mi, na bai mi blesim ol.

48:10  Nau tupela ai bilong Isrel i lapun na i no lait gut, inap long em i no inap lukim samting. Na em i bringim ol i kam klostu long em. Na em i givim kis long ol, na holimpas ol.

48:11  Na Isrel i tokim Josep, Mi no bin tingting long lukim pes bilong yu. Na lukim, God i bin soim mi ol pikinini bilong yu tu.

48:12  Na Josep i bringim ol i lusim hap namel long ol skru bilong en. Na em i lindaun, na pes bilong em i go long graun.

48:13  Na Josep i kisim tupela, Ifraim long han sut bilong en i go long han kais bilong Isrel, na Manasa long han kais bilong en i go long han sut bilong Isrel. Na em i bringim tupela i go klostu long em.

48:14  Na Isrel i stretim han sut bilong en, na i putim antap long het bilong Ifraim, em i yangpela moa. Na em i putim han kais bilong en antap long het bilong Manasa. Em i save na em i stiaim han bilong em. Long wanem, Manasa em i namba wan pikinini.

48:15  Na em i blesim Josep, na i tok, Ol papa bilong mi, Ebraham na Aisak, ol i bin wokabaut long pes bilong God. Em dispela God i bin givim kaikai long mi long laip bilong mi olgeta, inap long dispela de.

48:16  Em dispela Ensel i bin baim bek mi long olgeta samting nogut. Em i ken blesim ol dispela manki. Na nem bilong mi i ken kamap nem bilong ol, wantaim nem bilong ol papa bilong mi, Ebraham na Aisak. Na ol i ken kamap planti manmeri tru namel long ol manmeri bilong dispela graun.

48:17  Na taim Josep i lukim papa bilong en i putim han sut antap long het bilong Ifraim, em i no amamas long dispela. Na em i holim han bilong papa bilong en antap, bilong rausim em i lusim het bilong Ifraim na putim i go long het bilong Manasa.

48:18  Na Josep i tok long papa bilong en, Nogat, papa bilong mi. Long wanem, dispela em namba wan pikinini. Yu mas putim han sut bilong yu antap long het bilong em.

48:19  Tasol papa bilong en i tok nogat, na i tok, Mi save, pikinini man bilong mi. Mi save. Em tu bai i kamap wanpela lain manmeri, na em tu bai i stap bikman. Tasol tru tumas, brata bilong em i yangpela moa bai i winim em, na bai tumbuna pikinini bilong em i kamap ol kantri i planti tru.

48:20  Na long dispela de em i blesim ol, i spik, Long yu Isrel bai i givim blesing, i spik, God i mekim yu i stap olsem Ifraim na olsem Manasa. Na em i putim Ifraim paslain long Manasa.

48:21  Na Isrel i tokim Josep, Lukim, mi laik i dai pinis. Tasol God bai stap wantaim yu. Na bai Em i bringim yu gen long hap graun bilong ol tumbuna papa bilong yu.

48:22  Na moa tu mi bin givim yu wanpela hap skel i antap long ol brata bilong yu, em mi bin kisim long bainat na long banara long han bilong lain Amor.

Chapter 49

49:1  ¶ Na Jekop i singaut long ol pikinini man bilong en, na i tok, Yupela bung wantaim, bai mi ken tokim yupela long dispela samting bai i kamap long yupela long ol las de.

49:2  Bungim yupela yet wantaim na harim, yupela pikinini man bilong Jekop. Na yupela harim tok bilong Isrel, papa bilong yupela.

49:3  Ruben, yu namba wan pikinini bilong mi. Yu strong bilong mi na stat bilong strong bilong mi. Yu winim ol brata long namba bilong yu. Na yu winim ol long pawa.

49:4  Olsem wara. yu no strong, yu bai i no inap kamap gutpela olgeta. Bilong wanem, yu bin go antap long bet bilong papa bilong yu. Nau yu mekim dispela doti. Em i go long bet bilong mi.

49:5  ¶ Simion na Livai i brata. Ol samting bilong mekim nogut long man i stap long ol ples bilong ol.

49:6  O tewel bilong mi, yu no ken i kam insait long tok hait bilong ol. Ona bilong mi, yu no ken pas wantaim ol, taim ol i bung. Long wanem, long belhat bilong ol, ol i bin kilim i dai wanpela man. Na long laik bilong ol yet, ol i bin brukim wanpela banis.

49:7  Belhat bilong ol i ken stap aninit long kot, long wanem, em i bin strong nogut tru. Na belhat tru bilong ol i ken stap aninit long kot, long wanem, em i bin mekim nogut long man. Bai mi brukim ol long Jekop, na brukim ol nabaut long Isrel.

49:8  ¶ Juda, yu wanpela man ol brata bilong yu bai i litimapim nem bilong en. Han bilong yu bai i stap long nek bilong ol birua bilong yu. Ol pikinini bilong papa bilong yu bai i lindaun long pes bilong yu.

49:9  Juda em i pikinini bilong wanpela laion. Pikinini man bilong mi, yu bin lusim abus yu bin kilim na kaikai, na yu bin i go antap. Em i sindaun long lek. Em i slip olsem wanpela laion, na olsem lapun laion. Husat bai i kirapim em?

49:10  Stik bilong king bai i no lusim Juda, na tu wanpela man i givim lo bai i no lusim hap namel long ol lek bilong em, inap Sailo i kam. Na ol manmeri bai bung long em.

49:11  Em bai i pasim pikinini donki bilong en i go long rop bilong diwai, na pikinini bilong donki bilong en long namba wan rop bilong diwai. Em i wasim ol klos bilong en long wain, na ol klos bilong en long blut bilong ol pikinini wain.

49:12  Wain bai i mekim ol ai bilong em i kamap retpela. Na susu bai i mekim ol tit bilong em i kamap waitpela.

49:13  ¶ Sebyulan bai i stap long pasis bilong solwara. Na bai em i stap wanpela pasis long ol sip. Na arere bilong graun bilong em bai i go inap long Saidon.

49:14  Isakar i wanpela strongpela donki i slip namel long tupela bek kago.

49:15  Na em i lukim, malolo i gutpela, na dispela hap graun i naispela. Na em i daunim sol bilong en bilong karim hevi. Na em i kamap wanpela wokboi nating long takis.

49:16  Dan bai i skelim olsem jas ol manmeri bilong en, olsem wanpela bilong ol lain bilong Isrel.

49:17  Dan bai i stap wanpela snek klostu long rot, na snek i gat marasin nogut long liklik rot. Em i kaikaim ol lek bilong hos, olsem na man i sindaun long en bai i pundaun long baksait bilong em.

49:18  O BIKPELA, mi bin wet long Yu kisim bek mi.

49:19  Tok i go long Gat, Wanpela lain bilong pait bai i winim em. Tasol bihain tru bai em i win.

49:20  Bret bilong em i lusim Aser bai i stap patpela. Na bai em i redim ol kaikai i gutpela tru bilong king.

49:21  Naptalai em wanpela haind ol i bin lusim. Em i save givim ol gutpela tok.

49:22  ¶ Josep em wanpela han bilong diwai i karim planti kaikai. Yes, em han bilong diwai i stap klostu long wanpela hul wara na i karim planti kaikai. Ol han bilong en i wokabaut antap long banis.

49:23  Ol man bilong sutim spia i bin givim bikpela hevi tru long em. Ol i bin sutim spia long em, na ol i no laikim tru em.

49:24  Tasol banara bilong em i stap strong, na ol han bilong han bilong em i kamap strong long ol han bilong strongpela God bilong Jekop. (Long dispela hap em dispela wasman bilong sipsip, dispela ston bilong Israel.)

49:25  Yes, em i kam long God bilong papa bilong yu, bai Em i helpim yu. Na em i kam long Man i Gat Olgeta Strong, bai Em i blesim yu long ol blesing bilong heven antap, na long ol blesing bilong ples daun tru i stap aninit, na long ol blesing bilong ol susu na bilong bel bilong mama.

49:26  Ol blesing bilong papa bilong yu i winim ol blesing bilong ol pikinini bilong mi inap long mak bilong ol liklik maunten i stap oltaim na i longwe moa. Ol bai i stap long antap bilong het bilong Josep na long antap bilong het bilong man i bin stap longwe long ol brata bilong en.

49:27  Benjamin bai i hangre nogut tru olsem wanpela weldok. Long moningtaim em bai kaikai abus em i kilim i dai. Na long nait bai em i brukim ol kago bilong pait.

49:28  ¶ Olgeta dispela i ol 12-pela lain bilong Isrel. Na dispela em dispela samting papa bilong ol i tokim ol na i bin blesim ol. Em i bin blesim olgeta wan wan bilong bihainim blesing bilong em.

49:29  Na em i givim tok long ol, na tokim ol, Mi bai bung wantaim ol lain tumbuna bilong mi. Planim mi wantaim ol tumbuna papa bilong mi long dispela hul long maunten i stap long ples kunai bilong man Het Efron,

49:30  Long hul long maunten i stap long ples kunai long Makpela, dispela i stap long ai bilong Mamre, long graun bilong Kenan, dispela Ebraham i baim wantaim ples kunai bilong Mat Hit Efron, bilong wanpela holimpas bilong stap ples matmat.

49:31  Long dispela hap ol i bin planim Ebraham na Sara, meri bilong em. Long dispela hap ol i bin planim Aisak na Rebeka, meri bilong em. Na long dispela hap mi bin planim Lia.

49:32  Dispela ples kunai wantaim hul long maunten i stap long en Ebraham i bin baim long ol pikinini bilong Het.

49:33  Na taim Jekop i pinisim wok long givim strongpela tok long ol pikinini man bilong en, em i putim ol lek bilong en insait long bet. Na spirit bilong en i lusim em, na em i go bung long lain tumbuna bilong em.

Chapter 50

50:1  ¶ Na Josep i pundaun antap long pes bilong papa bilong en. Na em i krai long em na givim kis long em.

50:2  Na Josep i givim strongpela tok long ol wokboi bilong en, ol i dokta, long putim marasin long bodi bilong papa bilong en long em i no ken sting. Na ol dokta i putim dispela marasin long bodi bilong Isrel.

50:3  Na em i stap inap long 40-pela de. Long wanem, ol man ol i putim marasin long bodi bilong en, ol i mas i stap olsem. Na ol Isip i krai sori long em inap long 70-pela de.

50:4  Na taim ol de bilong krai sori i pinis, Josep i tok long ol wanhaus bilong Fero, i spik, Sapos nau mi bin kisim marimari long ol ai bilong yupela mi askim plis long yupela long tok long ia bilong Fero, na spik,

50:5  Papa bilong mi i mekim mi tok tru antap, em i spik, Harim, mi laik i dai pinis. Yu mas planim mi long matmat bilong mi, em mi bin digim long mi long graun bilong Kenan. Olsem na nau mi askim plis long yu long larim mi go antap na planim papa bilong mi, na bai mi kam bek gen.

50:6  Na Fero i tok, Yu go antap, na yu planim papa bilong yu, olsem em i mekim yu tok tru antap long mekim.

50:7  ¶ Na Josep i go antap bilong planim papa bilong en. Na olgeta wokboi bilong Fero, na ol lapun hetman bilong haus bilong em, na olgeta lapun hetman bilong graun bilong Isip, ol i go antap wantaim em.

50:8  Na olgeta wanhaus bilong Josep, na ol brata bilong em, na ol wanhaus bilong papa bilong em, ol i go wantaim. Ol liklik pikinini na ol lain sipsip samting na ol lain bulmakau samting tasol, ol i bin larim i stap long hap graun bilong Gosen.

50:9  Na ol karis wantaim ol man i sindaun long hos, ol tu i go antap wantaim em. Em bikpela tru lain manmeri.

50:10  Na ol i kamap long ples bilong krungutim wit long Atat, em long hap sait bilong Jordan. Na long dispela hap ol i krai sori long bikpela krai i bikpela nogut tru. Na em i wokim wanpela krai sori bilong papa bilong en inap long sevenpela de.

50:11  Na taim ol manmeri bilong dispela hap, ol lain Kenan, i lukim dispela krai sori long plua bilong Atat, ol i tok, Dispela em i bikpela krai sori tru long ol lain Isip. Olsem na ol i kolim nem bilong en Ebel-misraim, dispela i stap hapsait long Jordan.

50:12  Na ol pikinini man bilong em, ol i mekim long em bilong bihainim strongpela tok bilong em long ol.

50:13  Long wanem, ol pikinini man bilong em i karim em i go long hap bilong Kenan, na planim em long hul long maunten bilong ples kunai bilong Makpela, dispela Ebraham i baim wantaim ples kunai bilong wanpela holimpas bilong stap ples matmat long man Hit Efron, long ai bilong Mamre.

50:14  Na Josep i go bek long Isip. Em wantaim ol brata bilong en, na olgeta i bin go antap wantaim em bilong planim papa bilong en, bihain long em i planim papa bilong en, ol i go bek.

50:15  ¶ Na taim ol brata bilong Josep i lukim papa bilong ol i dai pinis, ol i tok, Ating Josep bai i no laikim tru yumi. Na tru tumas, bai em i bekim long yumi olgeta pasin nogut yumi bin mekim long em.

50:16  Na ol i salim wanpela mausman i go long Josep. Na em i spik, Papa bilong yu i no dai pinis yet, na em i givim strongpela tok, i spik,

50:17  Yupela i mas tok olsem long Josep, Mi askim plis long yu nau long lusim pasin bilong ol brata bilong yu long kalapim lo na sin bilong ol. Long wanem, ol i bin mekim pasin nogut long yu. Na nau, mipela i askim plis long yu, yu lusim pasin bilong ol wokboi bilong God bilong papa bilong yu, ol i bin sakim lo. Na Josep i krai, taim ol i toktok long em.

50:18  Na ol brata bilong en tu ol i go na pundaun long pes bilong en. Na ol i tok, Lukim, mipela i ol wokboi bilong yu.

50:19  Na Josep i tokim ol, Yupela i no ken pret. Long wanem, ating mi stap senis bilong God, a?

50:20  Tasol mi tok long yupela, yupela i bin tingting long mekim pasin nogut long mi. Tasol God i tingting long em i kamap gutpela, bai em i ken i kamap olsem em i stap long dispela de. Em bilong kisim bek planti manmeri na ol i stap laip.

50:21  Olsem na nau yupela i no ken pret. Bai mi givim kaikai long yupela na ol liklik pikinini bilong yupela. Na em i givim bel isi long ol na em i mekim gutpela tok long ol.

50:22  ¶ Na Josep i stap long Isip, em wantaim wanhaus bilong papa bilong en. Na Josep i stap laip 110 krismas.

50:23  Na Josep i lukim ol tumbuna pikinini bilong Ifraim inap long namba tri lain. Na ol pikinini bilong Makir, pikinini man bilong Manasa, ol i sindaun long lek bilong Josep.

50:24  Na Josep i tokim ol brata bilong en, Mi laik i dai pinis. Na tru tumas, God bai kam lukim yupela. Na Em bai bringim yupela i lusim dispela hap graun, na i go long hap graun Em i bin tok tru antap long givim long Ebraham, na long Aisak, na long Jekop.

50:25  Na Josep i mekim ol pikinini bilong Isrel i tok tru antap, na em i spik, Tru tumas, God bai i kam lukim yupela. Na yupela i mas karim ol bun bilong mi i lusim hia na i go antap.

50:26  Olsem na Josep i dai pinis. Em i gat 110 krismas. Na ol i putim marasin long bodi bilong em long em i no ken sting. Na ol i putim em long wanpela bokis bilong daiman long Isip.