Kapingamarangi - Genesis

Chapter 1

1:1  Taamada-loo God ne-hai di langi mo henuailala.

1:2  Henuailala la-digi haga-noho-ina dono ada ge e-dugu-hua lomo, deai ono mee i-golo ai. Di moana bagibagia guu-hii nia mee huogodoo gei guu-gahu hagatau go di bouli dongoeho, gei di Hagataalunga o God e-ngalungalua i-hongo nia wai.

1:3  Gei God ga-helekai, “Di maalama gi i-golo”, gei di maalama gu-i-golo.

1:4  Gei God guu-mmada bolo di maalama gu-humalia. Gei Mee gaa-wwae di maalama mo-di bouli,

1:5  ga-haga-ingoo di maalama bolo “di aa” ge di bouli ga-haga-ingoo bolo “di boo”. Gei di boo gaa-maa gi-daha ge di aa guu-dae-mai, deelaa la-go di laangi matagidagi.

1:6  Gei God ga-helekai, “Di mee-wwae-mee aholi gi i-golo, e-wwae nia wai ge e-daahi nia maa gii-noho nau gowaa dagidahi”, gei di-maa gu-i-golo. Gei God gaa-hai dana baahi mee-wwae-mee aholi e-wwae nia wai ala i-lala di-maa, mono wai ala i-hongo di-maa.

1:7  Gei God ga-helekai, “Di mee-wwae-mee aholi gi i-golo, e-wwae nia wai ge e-daahi nia maa gii-noho nau gowaa dagidahi”, gei di-maa gu-i-golo. Gei God gaa-hai dana baahi mee-wwae-mee aholi e-wwae nia wai ala i-lala di-maa, mono wai ala i-hongo di-maa.

1:8  Mee ga-haga-ingoo di baahi mee-wwae-mee aholi bolo “di langi”. Gei di boo gaa-maa gi-daha ge di luada ga-dau-mai, deelaa la-go togo-lua laangi.

1:9  Gei God ga-helekai, “Nia wai i-lala di langi gi-lloomoi gi-di gowaa e-dahi, gei tenua gi-gila-aga”, ge di-maa gu-i-golo.

1:10  Mee ga-haga-ingoo tenua bolo “henuailala”, gei nia wai ala ne-loomoi gi-di gowaa e-dahi ga-haga-ingoo go Mee bolo “tai”. Gei God guu-mmada bolo gu-humalia.

1:11  Gei Mee ga-helekai labelaa, “Henuailala gi-tomo-aga nnagadilinga laagau huogodoo ala e-huwa nia lii mono golee”, ge di-maa gu-i-golo.

1:12  Gei henuailala guu-tomo i-nia hagadilinga laagau huogodoo, gei God guu-mmada bolo gu-humalia.

1:13  Gei di boo gaa-maa gi-daha ge di aa gaa-dae-mai, deelaa la-go togo-dolu laangi.

1:14  Gei God ga-helekai, “Nia maahina gi-i-golo i-di gili di langi, e-wwae di aa mo-di boo, e-haga-modongoohia nia madagoaa, nia laangi mono ngadau.

1:15  Nia maa e-hai gi-maahina i-di gili di langi e-inaina henuailala”, ge nia maa gu-i-golo.

1:16  Gei God guu-hai ana maahina llauehe e-lua, di laa e-dagi di laangi, ge di malama e-dagi di boo. Mee guu-hai labelaa nia heduu.

1:17  Mee guu-dugu ana maahina i-di gili di langi belee inaina hongo henuailala,

1:18  e-dagi di aa mo-di boo, ge e-wwae di maalama mo-di bouli, gei God guu-mmada bolo gu-humalia.

1:19  Gei di boo gaa-maa gi-daha ge di aa gaa-dae-mai, deelaa la-go togo-haa laangi.

1:20  Gei God ga-helekai, “Di tai la-gii-honu i-nia hagadilinga mee mouli e-logo, gei di ahiaalangi la-gii-honu i-nia manu mamaangi.”

1:21  Gei God gaa-hai nia iga llauehaa mo nia hagadilinga manu mouli ala e-mouli i-lodo tai, mono hagadilinga manu mamaangi huogodoo gi i-golo. Gei God guu-mmada bolo gu-humalia.

1:22  Mee ga-haga-maluagina digaula, gaa-hai gi-nia manu mouli ala i-lodo di tai bolo gi-hagadili gii-logo gii-honu i-lodo tai, gaa-hai labelaa gi-nia manu mamaangi bolo gi-hagadili gii-logo.

1:23  Gei di boo gaa-maa gi-daha ge di aa gaa-dae-mai, deelaa la-go togo-lima laangi.

1:24  Gei God ga-helekai, “Henuailala gi-hagadili nia hagadilinga manu dolodolo huogodoo: nia manu gaidala mono manu lodo-geinga, llauehe mo lligi,” gei di-maa gu-i-golo.

1:25  Gei God guu-hai nia mee huogodoo, gei Mee guu-mmada bolo gu-humalia.

1:26  Gei God ga-helekai, “Dolomeenei gei Gidaadou gaa-hai tangada mouli be Gidaadou, gii-hai be Gidaadou. Digaula e-mogobuna i-hongo nia iga, nia manu mamaangi mono manu dolodolo huogodoo, nia manu gaidala mono manu lodo-geinga, llauehe mo lligi.”

1:27  Gei God gaa-hai tangada gii-hai be Ia, Mee gaa-hai taane mo-di ahina.

1:28  Gei God ga-haga-maluagina meemaa ga-helekai, “Heia gulu dama gii-logo, gei gulu hagadili ga-mouli i-hongo henuailala hagatau, gei henuailala gaa-dagi go digaula. Goolua gi-dagi-ina nia iga, nia manu mamaangi mono manu dolodolo huogodoo.

1:29  Au gu-hagatogomaalia nia lii-laagau huogodoo mono huwa-laagau huogodoo belee gai go goolua.

1:30  Gei nia manu lodo-geinga huogodoo mono manu mamaangi huogodoo e-gai nadau geinga-tolo mono lau-laagau.” Gei di-maa gu-i-golo.

1:31  God gaa-mmada gi ana mee huogodoo ala ne-hai, ge-Ia gu-tenetene huoloo. Gei di boo gaa-maa gi-daha ge di aa gaa-dae-mai, deelaa la-go togo-ono laangi.

Chapter 2

2:1  Nia mee huogodoo ala i-di gili di langi i-nua mo i henuailala-nei guu-lawa huogodoo.

2:2  Togo-hidu laangi gei God ne-haga-lawa ana mee huogodoo ala nogo hai, gaa-noho e-hagamolooloo.

2:3  Mee ga-hagadabu togo-hidu laangi gaa-dugu-gee bolo di laangi dabuaahia, idimaa, di laangi deelaa di laangi ne-haga-lawa-ai ana mee ala nogo hai huogodoo, ga-hagamolooloo.

2:4  Deelaa di hai ne-hai-ai nia mee huogodoo ala i-di langi i-nua mo i henuailala. Di madagoaa Yihowah=God ne-hai nia mee ala i-di langi i-nua mo henuailala,

2:5  gei di-maa nogo deai nia laagau tomo i henuailala ai, ge deai nia lii ne-matilitili ai, idimaa, Yihowah=God digi haga-doo dana uwa, ge deai tangada e-haala be e-haga-maluu di gelegele ai.

2:6  Gei nia wai le e-uwa-aga-hua i-lodo tenua ga-haga-tiu di gelegele.

2:7  Gei Yihowah=God gaa-kae ana gelegele i-di gelegele o tenua, ga-haga-noho dana dangada. Mee ga-ili ana madangi mouli gi-nia madauhi o-maa, gei tangada deelaa ga-daamada ga-mouli.

2:8  Gei Yihowah=God gaa-dogi dana hadagee i Eden, i-di bahi-i-dua, gaa-dugu dana daane dela ne-hai gii-noho i-di gowaa deelaa.

2:9  Mee gaa-hai nia hagadilinga laagau madamada huoloo gii-tomo i-golo, gii-huwa i-nia huwa-laagau humalia. Ge tungaalodo di hadagee deelaa, le e-duu-ai di laagau dela e-iai di mouli mo-di laagau dela e-hai gi-iloo-ai di humalia mo-di huaidu.

2:10  Di monowai e-hali i-lodo Eden e-haga-magalillili di hadagee deelaa, gei tua o Eden la-guu-wwae-haa guu-hai nia monowai e-haa.

2:11  Di monowai matagidagi la-go Pishon, e-hali di gili tenua go Havilah.

2:12  Nia goolo e-kida i tenua deelaa, mono daubigi-laagau ala e-hai nia lolo-kala, mono hadu ‘onyx’ dingidingia hagalabagau.

2:13  Di lua monowai la-go Gihon, e-hali di gili tenua o Cush.

2:14  Tolu monowai la-go Tigris, dela e-hali i-bahi-i-dua o Assyria, ge di haa monowai la-go di Euphrates.

2:15  Gei Yihowah=God gaa-dugu tangada gi-lodo di hadagee go Eden e-haga-maluu di-maa ge e-hagaloohi di-maa.

2:16  Mee ga-helekai gi mee, “Goe e-mee di-gai nia huwa-laagau huogodoo i-lodo di hadagee,

2:17  gei goe hudee geina nia huwa o-di laagau dela e-hai tangada gi-iloo di humalia mo-di huaidu. Maa goe gaa-gai di-maa, gei goe gaa-made-hua i-di laangi deelaa.”

2:18  Yihowah=God ga-helekai, “Ma hagalee humalia gi taane ma-gaa-noho modogoia. Au gaa-hai dagu dangada e-hoo a-mee, e-hagamaamaa a-mee.”

2:19  Gei Mee ga-dahi-aga ana gelegele i-hongo di gelegele tenua, gaa-hai ana manu dolodolo huogodoo mono manu mamaangi ga-laha-mai digaula gi tangada gii-mmada a-mee e-gahi ono ingoo, ge deelaa di hai o-nia manu ne-gahi nadau ingoo.

2:20  Gei tangada gaa-gahi nia ingoo nia manu mamaangi huogodoo mono manu dolodolo huogodoo, gei di-maa deai di manu i-lodo digaula e-humalia di hagamaamaa a-mee ai.

2:21  Gei Yihowah=God gaa-hai tangada la-gii-kii danu-mmoe gaa-daa dana iwi i-di wogowogo o-maa, ga-hagabuni di lohongo di-maa.

2:22  Gei Mee gaa-hai dana ahina gi-di iwi wogowogo, ga-laha-mai a-Mee gi taane.

2:23  Gei taane ga-helekai, “Deenei la-go dogu hagadilinga. Di iwi ne-daa i ogu iwi, ge nia goneiga ne-daa i ogu goneiga. Di ingoo o-maa go ‘di ahina’, idimaa mee ne-daa-mai i taane.”

2:24  Deelaa di mee a taane gaa-tanga gi-daha mo dono damana mo dono dinana, ga-buni-anga-hua gi dono lodo, meemaa dogolua gu-hai-hua di mee e-dahi.

2:25  Taane mo-di ahina nau goloo i nau gili ai, ge meemaa hagalee langaadia i ginaua.

Chapter 3

3:1  Di gihaa la-go di manu dela koia e-kabemee i-nia manu lodo-geinga ala ne-hai go Yihowah=God. Di gihaa ga-heeu gi-di ahina, “Ma e-donu bolo God gu-helekai-adu gi-di-goe bolo goe gi-hudee geina nia huwa o tei laagau i-nia laagau ala i-lodo di hadagee?”

3:2  Di ahina ga-helekai, “Gimaua e-mee-hua di-gai nia huwa o-nia laagau huogodoo ala i-lodo di hadagee,

3:3  dela-hua go di laagau dela e-duu i-tungaalodo di hadagee. God gu-helekai-mai gi gimaua bolo gi-hudee geina nia huwa o-di laagau deelaa, ge hudee bili ginai. Gimaua gaa-gai be gaa-bili gi di-maa, gei gimaua gaa-mmade.”

3:4  Gei di gihaa ga-helekai, “Deenaa la-hagalee donu, goolua hagalee mmade.

3:5  God ne-helekai beenaa, idimaa, Mee e-iloo-Ia bolo goolua ma-gaa-gai di-maa, gei goolua gaa-hai be God, ga-iloo nia mee ala e-humalia mono mee ala e-huaidu.”

3:6  Gei di ahina ga-gidee-ia bolo di laagau deelaa le e-madamada ge e-humalia huoloo ono huwa, bolo gaa-hai ia gi-kabemee, gei mee gaa-hagi ana huwa-laagau dulii gaa-gai. Gei mee gaa-wanga ana mee gi dono lodo, gaa-gai go mee labelaa.

3:7  Di madagoaa-hua meemaa ala ne-gai di huwa o-di laagau deelaa, gei meemaa gu-limalima gu-iloo nia mee, gei gu-iloo labelaa bolo ginaua deai nau goloo i nau gili ai, gei meemaa gaa-dui nau lau-laagau o-di laagau-‘fig’ gaa-gahu ginaua.

3:8  Di hiahi-hua deelaa, gei meemaa ga-longono-ginaua Yihowah=God dela e-haele i-lodo di hadagee, gei meemaa gaa-pala hagammuni i-Mee i-nia malu o-nia laagau.

3:9  Gei Yihowah=God gaa-wolo ga-gahi-mai taane boloo, “Goe i-hee?”

3:10  Gei mee ga-helekai, “Au gu-longono-eau Goe i-lodo di hadagee, gei au gu-madagu gaa-bala hagammuni i-di-Goe, i-di-au gu-deai ogu goloo i dogu gili ai.”

3:11  God ga-heeu, “Ma koai dela ne-hagi-adu gi-di-goe bolo goe deai o goloo i doo gili ai? Goe guu-gai di huwa-laagau dela ne-helekai-iei Au adu gi-di-goe bolo gi-hudee geina?”

3:12  Taane ga-helekai, “Ma go di ahina dela ne-dugu Kooe i dogu baahi dela ne-gaamai gi-di-au di huwa-laagau deelaa, gei au gaa-gai di-maa.”

3:13  Gei Yihowah=God ga-heeu gi-di ahina, “Goe ne-aha dela ne-hai di mee deenei?” Gei mee ga-helekai, “Ma go di gihaa dela ne-halahalau au, gei au gaa-gai di-maa.”

3:14  Gei Yihowah=God ga-helekai gi-di gihaa, “Goe ga-hagaduadua i-di gili di mee deenei. Ma kooe hua modogooe i-lodo nia manu dolodolo huogodoo dela e-hagahuaidu. Tugi dolomeenei gaa-hana, goe ga-dolodolo i do dinae, goe e-gai au dogolia gelegele i-di waalooloo o do mouli.

3:15  Au gaa-hai goolua mo-di ahina gi-hudiwou i gulu mehanga. Di hagadili o-maa mo do hagadili e-hudiwou i nadau mehanga i-nia madagoaa huogodoo. Di hagadili o-maa ga-dagadagahi do libogo, gei goe ga-gadigadi di muliwae o-maa.”

3:16  Gei Mee ga-helekai gi-di ahina, “Au ga-haga-uda do hagaduadua la-gi-nonua i do madagoaa ma-ga-hai-dama, gei di mmae o do haanau la-ga-damana. Goe ga-hiihai gi doo lodo hua igolo, gei goe gaa-dagi go mee.”

3:17  Gei Mee ga-helekai gi taane, “Goe dela ne-hagalongo gi doo lodo, gaa-gai di huwa-laagau dela ne-helekai-iei Au adu gi-di-goe bolo goe gi hudee geina. Idimaa goe dela ne-hai di mee deenei, malaa, di gelegele la-gu-haga-halauwa, gei goe e-hai-loo gi-ngalua hagamahi gi-nia gelegele gii-hai ana meegai gi-dohu-adu gi-di-goe i-di waalooloo do mouli.

3:18  Nia gelegele gaa-hai ana geinga tomo mono laagau duduia, gei goe gaa-gai au huwa-laagau lodo-geinga.

3:19  Goe e-hai-loo gi-hagamadabouli gii-too oo hee, e-hai di gelegele luuli gi-hagadili ana mee e-logo, gaa-dae-loo gi doo hana gi-muli gi-di gelegele dela ne-haga-noho-iei goe. Goe ne-hai gi-nia gelegele, gei goe gaa-hai labelaa nia gelegele.”

3:20  Adam gaa-gahi di ingoo dono lodo bolo Eve, idimaa mee go tinana o digau huogodoo ala e-mouli.

3:21  Gei Yihowah=God gaa-hai nia goloo-gahu o Adam mo dono lodo gi-nia gili-manu, gei Mee ga-haga-gahu meemaa.

3:22  Gei Yihowah=God ga-helekai, “Dolomeenei gei meemaa la-gu-hai-hua be Gidaadou, gei gu-iloo nia mee humalia mono mee huaidu. Hudee dumaalia ang-gi meemaa gii-gai nau mee i-nia huwa o-di laagau hagamouli, ga-mouli-hua beelaa.”

3:23  Gei Yihowah=God ga-hagabagi a meemaa gi-daha mo-di hadagee i Eden, gaa-hai taane deelaa gii-dogi ana mee i-di gelegele dela ne-hai-iei mee.

3:24  Gei Yihowah=God gaa-dugu ana daangada-di-langi hagaloohi mo dana hulumanu-dauwa ulaula dela e-liu gi-nia gowaa huogodoo i-di bahi-i-dua o-di hadagee. Di mee deenei le e-duuli gi-daha digau ala e-loomoi gi-hoohoo gi-di laagau hagamouli.

Chapter 4

4:1  Adam gaa-kii i-baahi dono lodo go Eve, gei mee ga-hai-dama. Mee ga-haanau dana dama-daane ga-helekai, “Mai i-di hagamaamaa Dimaadua, gei au guu-hai dagu dama-daane”, gei mee gaa-gahi di ingoo o-maa go Cain.

4:2  Muli-mai gei mee ga-haanau labelaa dana dama-daane go Abel. Abel gaa-hai tangada hagaloohi-siibi, gei Cain gaa-hai tangada dogi-mee.

4:3  Ga-noho-mai gi-muli, gei Cain ga-gaamai ana huwa-laagau i ana mee ala ne-hadi i dana gowaa dogi-mee, belee hai dana tigidaumaha ang-gi Dimaadua.

4:4  Gei Abel ga-gaamai dana dama-siibi dela ne-haanau matagidagi i ana siibi, ga-daaligi, gaa-wanga nia baahi ala koia e-humalia e-hai tigidaumaha. Dimaadua gu-manawa lamalia gi Abel mo dana tigidaumaha.

4:5  Gei Dimaadua gu-de-hiihai gi Cain mo dana tigidaumaha. Cain gu-manawa-gee huoloo guu-wou hagawelewele.

4:6  Gei Dimaadua ga-helekai gi Cain, “Goe e-hagawelewele di-aha? Ma e-aha dela o golomada le e-mmee be-di mee goe e-hagawelewele huoloo?

4:7  Goe nei-bolo ne-hai dau hai humalia, gei goe e-tenetene, gei di-maa dela goe ne-hai dau hai huaidu, gei di hala ga-tolo-adu gi do bontai. Di hala e-hiihai e-dagi goe, malaa gei goe belee hai gi-maaloo i di-maa.”

4:8  Gei Cain ga-helekai gi dono duaahina go Abel, “Gidaua ga-hula-laalaa gi-hongo di gowaa maalama.” Di madagoaa meemaa ne-dau i-di gowaa maalama, gei Cain ga-huli-adu gi dono duaahina, ga-daaligi a-mee gii-made.

4:9  Dimaadua ga-heeu gi Cain, “Dehee do duaahina go Abel?” Gei mee ga-helekai, “Au e-de-iloo. Ma e-aha? Ma ko-au dela belee madamada humalia i dogu duaahina-daane?”

4:10  Gei Dimaadua ga-helekai, “Goe ne-hai di huaidu mada-ngauhou deenei eimaha? Nia dodo o do duaahina le e-dangidangi-aga gi-di-Au i-lodo di gelegele, e-hai gadoo be-di lee e-gahigahi, e-hiihai gi-di tala di hui.

4:11  Au guu-dugu goe gi-lala di haga-halauwa, gu-deemee labelaa di hai au meegai i-di gelegele dela gu-uwa-aga nia dodo o do duaahina-daane, e-hai gadoo be-di mee guu-huge dono ngudu belee benebene a-mee i do madagoaa dela ne-daaligi a-mee.

4:12  Maa goe gaa-hai bolo goe e-dogi au laagau hagadili, gei di gelegele hagalee hai ana mee, gei goe e-heehee-waa, do gowaa e-noho-iei goe i henuailala ai.”

4:13  Gei Cain ga-helekai gi Dimaadua, “Di hagaduadua deenei le e-mada-kono dono kae ko-au.

4:14  Goe e-hagabagi au gi-daha mo tenua, ge e-hai au gi mogowaa-loo i-di-Goe. Au gaa-hai tangada dogu gowaa e-noho-iei au ai, ga-heehee hagaloale i-hongo henuailala, gei tei dangada hua ma-ga-gidee-ia au, gi-daaligidia au.”

4:15  Gei Dimaadua ga-helekai gi mee, “Deeai, maa tangada ga-daaligi goe, gei di-maa nia mouli e-hidu ala e-kae e-hui gi-muli.” Gei Dimaadua gaa-dugu dana maaga gi-hongo Cain bolo maa iai tangada gu-gidee-ia a-mee la-gi-hudee daaligidia a-mee.

4:16  Gei Cain gaa-hana gi-daha mo Dimaadua, gaa-noho i tenua go Nod dela i-bahi-i-dua o Eden.

4:17  Cain mo dono lodo guu-hai di-nau dama-daane go Enoch. Gei Cain gaa-hau dana waahale ga-haga-ingoo di waahale gi-di ingoo o dana dama.

4:18  Enoch gaa-hai dana dama-daane, gaa-gahi dono ingoo bolo Irad, deelaa go tamana o Mehujael, gei Mehujael gaa-hai dana dama-daane go Methushael, dela go tamana o Lamech.

4:19  Lamech ono lodo e-lua go Adah mo Zillah.

4:20  Adah ga-haanau dana dama-daane go Jabal, dela go tamana-madua ni digau ala e-benebene nadau manu, gei e-noho i-lodo nia hale-laa.

4:21  Tuaahina o-maa go Jubal, dela go tamana-madua ni nia daangada huogodoo ala e-daahili di ‘harp’ mo-di mee ngiingii-iliili.

4:22  Zillah ga-haanau dana dama-daane go Tubal=Cain, dela nogo hai ana hagadilinga goloo dogi mai nia baalanga-mmee mo nia baalanga. Tuaahina-ahina o Tubal=Cain la-go Naamah.

4:23  Lamech ga-helekai gi ono lodo, “Adah mo Zillah hagalongo-mai gi-di-au. Au gu-daaligi dagu damagiigi-daane guu-made i mee ne-hagamaawa au.

4:24  Maa nia mouli e-hidu ala e-kae i-di hui tangada ma-ga-daaligi a Cain, gei di-maa nia mouli e-mada-hidu maa-hidu ala e-kae go tangada ma-ga-daaligi au.”

4:25  Adam mo dono lodo guu-hai labelaa di-nau dama-daane, gei di ahina ga-helekai, “God gu-gaamai labelaa dagu dama-daane belee pono di lohongo o Abel dela ne-daaligi go Cain,” gei mee gaa-gahi di ingoo o-maa bolo Seth.

4:26  Seth gaa-hai dana dama-daane, gaa-gahi dono ingoo bolo go Enosh. Gei deelaa di madagoaa, nia daangada ga-daamada ga-hai-hegau i-di ingoo haga-madagu o Dimaadua i-di nadau hai-daumaha.

Chapter 5

5:1  Deenei di hagatau o-nia hagadili Adam. (Di madagoaa God ne-hai nia daangada, Mee ne-hai meemaa gii-hai be Ia.

5:2  Mee ne-hai meemaa taane mo-di ahina, ga-haga-humalia meemaa ga-haga-ingoo bolo “Nia Daangada”)

5:3  Adam ne-130 ono ngadau, gei mee guu-hai dana dama-daane e-hai be ia, ga-haga-ingoo a-mee bolo Seth.

5:4  Nomuli, Adam ga-mouli i-nia ngadau e-800, gaa-hai labelaa ana dama

5:5  gaa-made ono ngadau gu-930.

5:6  Seth ne-105 ono ngadau, gaa-hai dana dama-daane go Enosh,

5:7  ga-mouli i-nia ngadau e-807 gi-nomuli. Mee guu-hai labelaa ana dama

5:8  gaa-made ono ngadau gu-912.

5:9  Enosh ne-90 ono ngadau, gaa-hai dana dama-daane go Canaan,

5:10  ga-mouli i-nia ngadau e-815 gi-nomuli. Mee guu-hai labelaa ana dama

5:11  gaa-made ono ngadau gu-905.

5:12  Canaan ne-70, gaa-hai dana dama-daane go Mahalalel,

5:13  ga-mouli i-nia ngadau e-840 gi-nomuli. Mee guu-hai labelaa ana dama

5:14  gaa-made ono ngadau gu-910.

5:15  Mahalalel ne-65 ono ngadau, gaa-hai dana dama-daane go Jared,

5:16  ga-mouli i-nia ngadau e-830 gi-nomuli. Mee guu-hai labelaa ana dama

5:17  gaa-made ono ngadau gu-895.

5:18  Jared ne-162 ono ngadau, gaa-hai dana dama-daane go Enoch,

5:19  ga-mouli i-nia ngadau e-800 gi-nomuli. Mee guu-hai labelaa ana dama

5:20  gaa-made ono ngadau gu-962.

5:21  Enoch ne-65 ono ngadau, gaa-hai dana dama-daane go Methuselah.

5:22  Nomuli Enoch ga-mouli hai hoo gi God nia ngadau e-300, gaa-hai labelaa ana dama.

5:23  Mee gu-mouli gu-365 ono ngadau i dono madua.

5:24  Mee nogo mouli e-hai hoo ang-gi God, gaa-ngala, digi made, idimaa God guu-lahi a-mee gi-daha.

5:25  Methuselah ne-187 ono ngadau, gaa-hai dana dama-daane go Lamech,

5:26  ga-mouli i-nia ngadau e-782 gi-nomuli. Mee guu-hai labelaa ana dama

5:27  gaa-made ono ngadau gu-969.

5:28  Lamech ne-182 ono ngadau, mee guu-hai dana dama-daane,

5:29  ga-helekai, “Mai di gelegele dela ne-hagahalauwa go Dimaadua, di tama deenei ga-haga-dagaloaha gidaadou gi-daha mo tadau haingadaa.” Gei mee ga-haga-ingoo a-mee bolo Noah.

5:30  Lamech gu-mouli i-nia ngadau e-595 gi-nomuli. Mee guu-hai labelaa ana dama

5:31  gaa-made ono ngadau gu-777.

5:32  I-muli Noah ne-500 ono ngadau, mee gaa-hai ana dama-daane dogodolu go Shem, Ham mo Japheth.

Chapter 6

6:1  Di madagoaa nia daangada gu-modoho gi-daha gi-hongo henuailala, gu-hagadili nadau dama-ahina,

6:2  gei hunu dama a God gaa-mmada gi-nia dama-ahina aanei e-mmaadanga huoloo, gei digaula gu-hai nadau lodo gi nia ahina ala e-hiihai ginai.

6:3  Gei Dimaadua ga-helekai, “Au hagalee dumaalia gi-nia daangada gi-mouli-hua beelaa, digaula digau hua e-mouli gaa-mmade. Dolomeenei gaa-hana-hua beelaa, digaula hagalee mouli waalooloo laa-hongo nia ngadau e-lau-madalua-(120).”

6:4  I-lodo-hua nia laangi aalaa, ga nomuli labelaa, digau llauehaa nogo i-hongo henuailala, aalaa go nia dama nia ahina o henuailala mo digau di-langi. Digaula la digau maaloo gei nia daane labelaa e-dau namua-loo.

6:5  Di madagoaa Dimaadua ne-mmada bolo digau henuailala huogodoo la-gu-huaidu huoloo, mo nadau maanadu le e-huaidu huoloo i-nia madagoaa huogodoo,

6:6  gei Mee gu-tilikai hualaa i-de-Ia dela ne-hai digaula gaa-dugu gi henuailala. Mee guu-honu i-di lodo-huaidu,

6:7  dela ga-helekai-iei Mee boloo, “Au ga-haga-mmaa gi-daha agu daangada ala ne-hai, mo nia manu dolodolo mono manu mamaangi, i-di-Au gu-tilikai hualaa i dagu hai ne-hai nia maa.”

6:8  Gei Dimaadua le e-manawa lamalia gi Noah.

6:9  Deenei di kai o Noah. Mee ana dama-daane dogodolu, Shem, Ham mo Japheth. Noah tangada haihai mee donu, go mee hua dela nogo humalia i-di madagoaa deelaa. Mee e-mouli hai-hoo ang-gi God.

6:10  Deenei di kai o Noah. Mee ana dama-daane dogodolu, Shem, Ham mo Japheth. Noah tangada haihai mee donu, go mee hua dela nogo humalia i-di madagoaa deelaa. Mee e-mouli hai-hoo ang-gi God.

6:11  Gei digau huogodoo ala i-golo, la-digau hai mee huaidu i-mua nnadumada o God, gei di huaidu gu-modoho i-nia madagoaa huogodoo.

6:12  God gaa-mmada gi henuailala ga-gidee bolo ma-gu-huaidu, i digau huogodoo gu-mouli i-di mouli huaidu.

6:13  God ga-helekai gi Noah, “Au gu-hagamaanadu bolo Au ga-daaligi nia daangada huogodoo gi-mmademmade. Au ga-hagammaa digaula gi-daha, idimaa, henuailala la-gu-honu-hua i nadau hai huaidu.

6:14  Hauhia dau boodi gi-nia laagau mau, heia nia ruum i-no-lodo, gaa-hunu gi-nia ‘tar’ i-lodo mo tua, gi-dee-ulu nia wai gi-lodo.

6:15  Hauhia gi haa-lau madalima-(450) piidi di looloo, ge mada-hidu maa-lima-(75) piidi di palaha, ge madahaa maa-lima-(45) piidi tuuduu.

6:16  Heia di gahu tuatala di boodi, gei gi-heia di gowaa e-madangaholu maa-walu ‘inch’ i-mehanga di gahu tuatala mo nia baahi. Hauhia gi dolu ono hada, heia di bontai i-di baahi.

6:17  Au ga-haga-hali-mai agu wai gi henuailala gaa-hai henuailala gi-doloo, e-hagammaa gi-daha nia mee ala e-mouli huogodoo. Nia mee huogodoo i henuailala la-gaa-mmade,

6:18  gei Au gaa-hai dagu hagababa adu gi-di-goe. Hana gi-lodo di boodi, goe mo doo lodo mo au dama-daane mo nadau lodo.

6:19  Lahia dalia goe nia manu-daane mono manu-ahina gi-lodo di boodi mai i-nia hagadilinga manu hongo henua mono manu mamaangi, e-haga-mouli-ai digaula.

6:20  Lahia dalia goe nia manu-daane mono manu-ahina gi-lodo di boodi mai i-nia hagadilinga manu hongo henua mono manu mamaangi, e-haga-mouli-ai digaula.

6:21  Kae-ina nia hagadilinga meegai huogodoo e-gai go goodou mo nia manu aalaa.”

6:22  Malaa, Noah guu-hai gii-hai be nnelekai a God ala ne-hai gi mee.

Chapter 7

7:1  Dimaadua ga-helekai gi Noah, “Ulu gi-lodo di boodi mo digau doo hale huogodoo. Au gu-gidee-Au bolo ma kooe hua i-hongo henuailala hagatau dela e-hai au mee e-donu.

7:2  Kae-ina au haga-hai-lodo hagadilinga manu e-hidu madammaa, mo nia haga-hai-lodo manu dagidahi i-nia hagadilinga manu ala hagalee madammaa.

7:3  Kae-ina labelaa nia haga-hai-lodo e-hidu i-nia hagadilinga manu mamaangi. Heia di mee deenei e-daahi-ai nia manu huogodoo dolodolo mo mamaangi gi-mouli, e-hagadili labelaa i-hongo henuailala.

7:4  Nia laangi e-hidu i-golo, gei Au ga-hagau-mai dagu uwa dela gaa-doo nia aa mo nia boo e-mada-haa, e-daaligi nia mee huogodoo ala e-mouli ala ne-hai ko-Au.”

7:5  Noah guu-hai nia mee huogodoo Dimaadua ne-helekai gi mee bolo gi-heia.

7:6  Noah la-gu-ono-lau ono ngadau i-di madagoaa toloo ne-hanimoi gi henuailala.

7:7  Mee mo dono lodo mo ana dama-daane mo nadau lodo gu-ulu gi-lodo di boodi belee hula gi-daha mo toloo.

7:8  Nia manu-daane mo nia manu-ahina i-nia manu huogodoo dolodolo mo mamaangi, tei mee hua be nia manu madammaa be hagalee madammaa,

7:9  gu-ulu gi-lodo di boodi gi-baahi o Noah be nia helekai a God ne-hai.

7:10  Nia laangi e-hidu nomuli, gei toloo gaa-dau.

7:11  Di madagoaa Noah ne-ono-lau ono ngadau, i-di madangaholu maa-hidu laangi o-di lua malama, gei nia gowaa ala e-hali-mai nia wai o lala henuailala gu-mahuge mai nia wai, gei di langi i-nua gu-mahuge,

7:12  gei nia uwa guu-too gi henuailala nia aa mo nia boo e-mada-haa.

7:13  Di laangi deelaa, gei Noah mo dono lodo gaa-hula gi-lodo di boodi mo nau dama-daane dogodolu go Shem, Ham mo Japheth, mo nadau lodo.

7:14  Gei nia manu huogodoo gaa-hula dalia digaula, nia manu ala gaidala mo lodo-geinga, ala llauehe mo lligi, mono hagadilinga manu huogodoo ala e-mamaangi.

7:15  Nia manu-daane mono manu-ahina dagi-lua mai i-nia manu mouli huogodoo guu-hula gi-lodo di boodi i-muli o Noah,

7:16  guu-hai be nia helekai a God ala ne-hai. Gei Dimaadua guu-tai di bontai i-tua o Noah.

7:17  Toloo gu-hai-hua beelaa i-nia laangi mada-haa, gei nia wai la-gu-honu-hua di hagamaanu di boodi.

7:18  Nia wai la-ga-honu-aga, gei di boodi la-gu-maanu i-hongo tai.

7:19  Ma-gu-hontula huoloo dela guu-gahu nia gonduu ala i-nua-loo.

7:20  Ma e-honu-hua gi-nua gaa-tugi-loo i-nia piidi e-madalua maa-lima e-haa gi-hongo nia ulu nia gonduu.

7:21  Nia mee huogodoo ala e-mouli i-hongo henuailala la-guu-mmade. Nia manu mamaangi mono manu dolodolo mono daangada la-guu-mmade.

7:22  Nia mee huogodoo ala e-dogidogi i-hongo henuailala la-guu-mmade.

7:23  Dimaadua gu-hagahuaidu nia mee ala e-mouli, nia daangada, nia manu dolodolo mono manu mamaangi. Digau ala ne-dubu, la-go Noah mo digau ala i-baahi o-mee i-lodo di boodi.

7:24  Nia wai digi haneia gi-lala i-nia laangi e-lau-madalima.

Chapter 8

8:1  God hagalee de-langahia-Ia Noah mo nia manu huogodoo ala nogo i dono baahi i-lodo di boodi, gei Mee gaa-hai dana madangi gii-gono, gei nia wai la-ga-daamada ga-bagu-mai.

8:2  Nia madagoaa ala e-hali-mai nia wai i-lala henuailala mo nia bontai ala i-di langi la-guu-tai, gei nia uwa guu-maa,

8:3  gei nia wai la-gu-bagu-mai-loo maalia i-nia laangi e-lau-madalima.

8:4  I-di madangaholu maa-hidu laangi o-di hidu malama, gei di boodi la-gaa-dau i hongo di gonduu i-di goolongo gonduu go Ararat.

8:5  Gei nia wai le e-bagu-mai hua igolo, gei di tahi laangi o-di madangaholu malama, nia gonduu la-ga-kila-aga ono ulu.

8:6  Muli nia laangi e-mada-haa, gei Noah gaa-huge di bontai dulii di boodi,

8:7  ga-hagau dana manu-maangi-‘raven’. Mee digi maangi-mai labelaa, e-mamaangi hua igolo gaa-dae-loo gi-nia wai ga-odi-loo ga-hagalee.

8:8  Di madagoaa-hua deelaa, gei Noah ga-hagau dana mwuroi belee mmada be nia wai la-gu-bagu-ia.

8:9  Nia wai le e-honu hua igolo e-gahu tenua, gei di mwuroi la-digi gida dono gowaa e-dogo-ieia, geia ga-maangi labelaa gi-di boodi, gei Noah ga-daahi dono lima gi mee, ga-dahi-mai a-mee gi-lodo.

8:10  Mee gaa-tali labelaa ana laangi e-hidu, ga-hagau labelaa di mwuroi.

8:11  Di mwuroi ga-maangi-mai labelaa gi mee i-di hiahi, e-gaamai dana lau-olib i dono ngudu. Gei Noah gu-iloo-hua bolo nia wai la-guu-bagu.

8:12  Gei mee gaa-tali labelaa ana laangi e-hidu, ga-hagau labelaa di mwuroi. Tolongo deenei gei di mwuroi digi maangi-mai labelaa.

8:13  Noah ne-ono-lau maa-dahi ono ngadau di laangi matagidagi di tahi malama, gei nia wai la-gu-hagalee, gei Noah gaa-huge di uhi o-di boodi ga-madamada ga-gidee-ia bolo di gelegele la-gu-maangoo-mai.

8:14  Di madalua maa-hidu o-di lua malama, gei henuailala gu-maangoo hagatau.

8:15  God ga-helekai gi Noah,

8:16  “Ulu gi-daha mo-di boodi, mo doo lodo mo gulu dama-daane mo nadau lodo.

8:17  Lahia nia manu-mamaangi huogodoo, mono manu dolodolo dalia goe gi-hagadili digaula gi-modoho gi-hongo henuailala.”

8:18  Gei Noah mo dono lodo, ana dama-daane mo nadau lodo ga-ulu gi-daha mo-di boodi.

8:19  Nia manu dolodolo huogodoo mono manu mamaangi gu-ulu-mai gi-daha mo-di boodi i hagabuulinga manu.

8:20  Noah gaa-bae dana gowaa dudu-tigidaumaha ang-gi Dimaadua. Mee gaa-kae ana manu dagi-dahi mai i-lodo nia hagadilinga manu madammaa, nia manu dolodolo mono manu mamaangi, gaa-dudu nia maa i-hongo di gowaa dudu-tigidaumaha.

8:21  Di kala o tigidaumaha gu-haga-manawa lamalia Dimaadua, gei Ia ga-maanadu i ono lodo boloo, “Au hagalee e-hagahuaidu labelaa henuailala i-di gili nia huaidu o-nia daangada ala gaa-hai. Au gu-iloo-e-Au bolo daamada i-di madagoaa digaula nogo lligi, nia maanadu digaula nogo huaidu. Au hagalee hagammaa gi-daha labelaa nia mee mouli huogodoo, be dagu hai dela ne-hai tolongo deenei.

8:22  Di waalooloo o henuailala, ga-iai nia madagoaa e-dogi nia mee mo nia madagoaa e-hadi nia mee, nia madagoaa e-magalillili mo nia madagoaa mahanahana, nia boo mo nia aa.”

Chapter 9

9:1  God ne-haga-maluagina a Noah mo ana dama-daane, ga-helekai, “Heia godou dama gii-logo, gei godou hagadili ga-mouli i-hongo henuailala hagatau.

9:2  Nia manu dolodolo huogodoo mono manu mamaangi mono iga ga-mouli ga-mmaadagu i goodou. Digaula huogodoo la-gaa-noho i-lala godou mogobuna.

9:3  Dolomeenei goodou guu-mee-hua di-gai nia maa ngaadahi mono laagau-gai. Au e-gowadu nia mee huogodoo e-hai godou meegai.

9:4  Di mee dahi dela hagalee hai gii-gai go goodou, la-go nia goneiga manu ala ono dodo i ono lodo. Au e-bule di mee deenei, idimaa, di mouli la-i-lodo nia dodo.

9:5  Maa tangada gaa-daa di mouli o dahi dangada, tangada deelaa le e-hagaduadua. Gei Au e-hagaduadua di manu dela ma-gaa-daa di mouli o tangada, e-hagaduadua gi-di made.

9:6  Nia daangada la-ne-hai gii-hai be God, malaa, tangada ma-ga-daaligi dana dangada gii-made, geia e-daaligi labelaa go tuai dangada gii-made.

9:7  “Goodou heia godou dama gii-logo, gei godou hagadili ga-mouli i-hongo henuailala hagatau.”

9:8  God ga-helekai gi Noah mo ana dama-daane,

9:9  “Dolomeenei, gei Au gaa-hai dagu hagababa adu gi goodou mo godou hagadili,

9:10  mono mee huogodoo ala e-mouli: nia manu mamaangi mono manu dolodolo mono mee huogodoo ala ne-ulu-mai madalia goodou gi-daha mo-di boodi.

9:11  Au e-hai dagu hagababa adu gi goodou gi-nia helekai aanei: Au e-hagababa bolo Au ga-hagalee daaligi labelaa nia mee ala e-mouli gi toloo, ge deai toloo labelaa e-hagahuaidu henuailala ai.

9:12  Di haga-modongoohia o-di hagababa dono hagaodi ai, dela e-hai-adu ko-Au gi goodou mono mee ala e-mouli huogodoo, la deenei:

9:13  Au ga-haga-duu dagu umada i-di gili nia gololangi, e-hai di haga-modongoohia o dagu hagababa ang-gi henuailala.

9:14  Dogu madagoaa ma-gaa-gahu di langi la-gi-nia gololangi, gei di umada ga-gila-aga,

9:15  gei Au e-mamaanadu dagu hagababa adu gi goodou mo nia manu dolodolo huogodoo, bolo toloo la-ga-hagalee daaligi labelaa nia manu ala e-mouli huogodoo.

9:16  Di madagoaa di umada ma-ga-gila-mai i-lodo nia gololangi, gei Au e-mmada gi-di-maa, gei Au e-langahia-e-Au di hagababa mau-dangihi i mehanga gimaadou mo nia mee ala e-mouli i henuailala.

9:17  Deelaa di haga-modongoohia o-di hagababa dela e-hai ko-Au gi-nia mee ala e-mouli huogodoo i henuailala.”

9:18  Nia dama-daane a Noah ala ne-ulu-mai gi-daha mo-di boodi la-go Shem, Ham mo Japheth. (Ham la-go tamana o Canaan).

9:19  Nia dama-daane dogodolu a Noah aanei la-go nia maadua-mmaadua o digau huogodoo o henuailala.

9:20  Noah la tangada hai-hadagee deelaa go tangada ne-daamada ne-dogi dana hadagee-waini matagidagi.

9:21  Muli o mee ne-inu ana waini, gei mee ga-libaliba gaa-daa ono goloo gi-daha, gaa-moe ono goloo ai i-lodo dono hale-laa.

9:22  Di madagoaa Ham dela go tamana o Canaan ne-mmada bolo dono damana gu-deai ono goloo i dono gili ai, gei mee gaa-hana ga-hagi-anga gi ono duaahina-daane dogolua.

9:23  Gei Shem mo Japheth gaa-kae di-nau heelua looloo, ga-daahi i nau dua i-hongo nau bakau. Meemaa ga-taele dua gi-di hale-laa, gaa-gahu di-nau damana, ge nau golomada e-huli gi-daha gi-dee-mmada-hua ginaua gi mee ono goloo i dono gili ai.

9:24  Di madagoaa Noah ne-ala-aga ga-iloo-ia di hai a dana dama-daane dulii dela ne-hai ang-gi-deia,

9:25  mee ga-helekai, “Di halauwa gu-i-hongo Canaan, mee gaa-hai di hege ni ono duaahina-daane.

9:26  Hagaamuina Dimaadua go di God o Shem. Canaan gaa-hai di hege ni Shem.

9:27  God gi-heia a Japheth gii-logo ana gowaa, dono hagadili gii-noho i-baahi nia dama a Shem, gei Canaan gii-hai di hege ni Japheth.”

9:28  Muli toloo damana ne-hai, gei Noah ne-mouli nia ngadau labelaa e-dolu lau-madalima-(350),

9:29  gei mee gaa-made, gei mee guu-hiwa lau madalima-(950) ono ngadau.

Chapter 10

10:1  Aanei nia hagadili o-nia dama-daane Noah, go Shem, Ham mo Japheth. Digau dogodolu aanei guu-hai nadau dama-daane i-muli toloo.

10:2  Nia dama-daane o Japheth la-go Gomer, Magog, Madai, Javan, Tubal, Meshech, mo Tiras. Digaula nia maadua-mmaadua ni digau ala e-hai-hegau gi nadau ingoo.

10:3  Nia hagadili Gomer la-nia daangada o Ashkenaz, Riphath mo Togarmah.

10:4  Nia hagadili o Javan la-go nia daangada o Elishah, Spain, Cyprus mo Rhodes.

10:5  Digaula nia maadua-mmaadua o-nia daangada ala e-noho i tongotai mo i-hongo nia henua. Aanei la-nia hagadili ni Japheth, e-noho i nadau madawaawa mo nnenua hai geegee, e-helehelekai i nadau helekai dagidahi.

10:6  Nia dama-daane o Ham la-go Cush, Egypt, Libya mo Canaan. Digaula la nia maadua-mmaadua ni digau ala e-hai-hegau gi nadau ingoo.

10:7  Nia hagadili o Cush la-nia daangada o Seba, Havilah, Sabtah, Raamah, mo Sabteca. Nia hagadili o Raamah la-nia daangada o Sheba mo Dedan.

10:8  Cush dana dama-daane go Nimrod, dela ne-hai tangada-dauwa aamua matagidagi o henuailala.

10:9  Mai di hagamaamaa Dimaadua, Nimrod guu-hai tangada e-iloo huoloo di puupuu mee, dela e-helekai-ai nia daangada, “Dimaadua gi-heia goe gii-hai be Nimrod dela e-iloo huoloo di puu mee!”

10:10  Matagidagi, tenua o-maa e-daabui-mai Babylon, Erech mo Accad, nia waahale e-dolu huogodoo aanei la i-lodo Babylonia.

10:11  Mai tenua deelaa, mee ne-hana gi Assyria, ga-haga-duu-aga nia waahale Nineveh, Rehoboth=Ir, Calah,

10:12  mo Resen, dela i-mehanga Nineveh mo-di waahale damana go Calah.

10:13  Nia hagadili o Egypt la-nia daangada o Lydia, Anam, Lehab, Naphtuh,

10:14  Pathrus, Casluh mo Crete, dela ne-hidi-mai-ai digau Philistia.

10:15  Nia dama-daane Canaan la-go Sidon, di ulu-madua, mo Heth. Digaula la-nia maadua-mmaadua o digau ala e-hai-hegau gi nau ingoo.

10:16  Canaan la-tamana-madua labelaa ni digau Jebus, Amor, Girgash,

10:17  Hivite, Arkite, Sinite,

10:18  Arvad, Zemar mo Hamath. Nia madawaawa Canaan le e-modoho gi-daha,

10:19  gaa-dau-adu-loo gi tagageinga o Canaan ga-daamada mai i Sidon i-bahi-i-ngeia, gaa-hana ngaaga gaa-dau i Gerar, hoohoo gi Gaza, ga-hanadu gi dua gi Sodom, Gomorrah, Admah, mo Zeboiim hoohoo gi Lasha.

10:20  Aanei la-nia hagadili o Ham, e-noho i-lodo nadau madawaawa mono henua geegee, e-helehelekai i nadau helekai dagidahi.

10:21  Shem, tuaahina madua o Japheth, la-tamana-madua o digau Hebrew huogodoo.

10:22  Nia dama-daane Shem la-go Elam, Asshur, Arpachshad, Lud mo Aram. Digaula la-nia maadua-mmaadua o digau ala e-hai-hegau gi nadau ingoo.

10:23  Nia hagadili o Aram la-nia daangada o Uz, Hul, Gether mo Meshech.

10:24  Arpachshad la-go tamana o Shelah, go tamana o Eber.

10:25  Eber ana dama-daane dogolua: e-dahi go Peleg, idimaa i-lodo dono madagoaa, digau henuailala la-gu-waewae, dono duaahina go Joktan.

10:26  Nia hagadili o Joktan la-nia daangada o Almodad, Sheleph, Hazarmaveth, Jerah,

10:27  Hadoram, Uzal, Diklah,

10:28  Obal, Abimael, Sheba

10:29  Ophir, Havilah mo Jobab. Digaula huogodoo ne-hagadili mai Joktan.

10:30  Tenua e-noho digaula e-daamada mai i Mesha gaa-hana gi Sephar i-lodo tenua gonduu i-bahi-i-dua.

10:31  Aanei la-nia hagadili o Shem e-noho i-lodo nia madawaawa mo nnenua geegee, e-helehelekai i nadau helekai dagidahi.

10:32  Digau huogodoo aanei la-nia hagadili ni Noah, e-noho i nnenua e-hagatau gii-hai be nia adu laini madawaawa hai geegee. I-muli toloo, nia daangada o henuailala huogodoo la-ne-hidi-mai i-nia dama-daane a Noah.

Chapter 11

11:1  Matagidagi, nia daangada o henuailala huogodoo nogo helekai be di-mee e-dahi, gei nogo hai-hegau-hua i-nia kai be-di mee e-dahi.

11:2  Digaula nogo heehee-hua digi noho baba i-di bahi-i-dai, ga-loomoi gi-di gowaa maalama i Babylonia, gaa-noho i-golo.

11:3  Digaula ga-helehelekai i nadau mehanga boloo, “Lloomoi, gidaadou gaa-hai tadau hadu hau-hale, gaa-hai gi-hamaaloo.” Gei digaula guu-hai nadau hadu hau-hale mono ‘tar’ belee hagapigipigi nia maa.

11:4  Digaula ga-helekai, “Gidaadou gaa-hau tadau waahale, e-hai dono angulaa dela e-hai gii-tugi i-di langi, e-haga-damana-ai tadau ingoo gi-hagalee modoho gidaadou laa-hongo henuailala.”

11:5  Gei Dimaadua ga-haneia belee mmada gi-di waahale mo dono angulaa dela e-hau go nia daangada,

11:6  gei Mee ga-helekai, “Dolomeenei digau aanei la digau hua be-di mee e-dahi, gei digaula e-helehelekai-hua i-di helekai e-dahi. Deenei la-go taamada o-di-nadau hai dela gaa-hai. Hoohoo-hua gei digaula gaa-mee di-hai di-ingoo-hua di mee dela e-hiihai ginai.

11:7  Gidaadou gaa-hula gi-lala e-hagahinihini nia helekai digaula gi-de-iloo-ginaadou nadau helekai i nadau mehanga.”

11:8  Gei Dimaadua gaa-hai digaula gi-modoho gi-hongo henuailala, gei digaula guu-dugu di moomee belee hau di-nadau waahale.

11:9  Di waahale le e-haga-ingoo bolo Babylon, idimaa, deelaa di gowaa Dimaadua ne-hagahinihini nia helekai digau huogodoo, gei mai i-di gowaa deelaa, gei Mee gaa-hai digaula gi-modoho-adu gi-hongo henuailala hagatau.

11:10  Aanei la-nia hagadili o Shem. Nia ngadau e-lua i-muli toloo, gei Shem gu-100 ono ngadau, guu-hai dana dama-daane go Arpachshad.

11:11  Nomuli gei mee ga-mouli nia ngadau e-500, gaa-hai labelaa ana dama.

11:12  Arpachshad ne-35 ono ngadau, gei mee gaa-hai dana dama-daane go Shelah.

11:13  Nomuli, mee ga-mouli nia ngadau e-403, gaa-hai labelaa ana dama.

11:14  Shelah ne-30 ono ngadau, gei mee gaa-hai dana dama-daane go Eber.

11:15  Nomuli, mee ga-mouli nia ngadau e-403, gaa-hai labelaa ana dama.

11:16  Eber ne-34 ono ngadau, gaa-hai dana dama-daane go Peleg.

11:17  Nomuli, mee ga-mouli nia ngadau e-430, gaa-hai labelaa ana dama.

11:18  Peleg ne-30 ono ngadau, gaa-hai dana dama-daane go Reu.

11:19  Nomuli, Peleg ga-mouli nia ngadau e-209, gaa-hai labelaa ana dama.

11:20  Reu ne-32 ono ngadau, gaa-hai dana dama-daane go Serug.

11:21  Nomuli, mee ga-mouli nia ngadau e-207, gaa-hai labelaa ana dama.

11:22  Serug ne-30 ono ngadau, gaa-hai dana dama-daane go Nahor.

11:23  Nomuli, mee ga-mouli nia ngadau e-200, gaa-hai labelaa ana dama.

11:24  Nahor ne-29 ono ngadau, gaa-hai dana dama-daane go Terah.

11:25  Nomuli, mee ga-mouli nia ngadau e-119, gaa-hai labelaa ana dama.

11:26  Muli Terah ne-70 ono ngadau, gei mee gaa-hai tamana ni Abram, Nahor mo Haran.

11:27  Deenei di hagadili o Terah, dela go tamana o Abram, Nahor mo Haran. Haran go tamana o Lot.

11:28  Haran ne-made i dono guongo donu go Ur i Babylonia, gei dono damana le e-mouli hua igolo.

11:29  Abram gaa-hai dono lodo gi Sarai, gei Nahor gaa-hai dono lodo gi Milcah, tama-ahina Haran, dela hogi tamana labelaa ni Iscah.

11:30  Gei-ogo Sarai di ahina dee-huwa.

11:31  Terah gaa-lahi dana dama-daane go Abram, mo tama-daane o dana dama-daane Haran go Lot, mo tama-ahina dau-aga go Sarai di lodo o Abram, ginaadou ne-hagatanga i-di waahale go Ur i Babylonia e-hula gi Canaan. Digaula ga-hula-loo gaa-dau i Haran, gaa-noho i-golo.

11:32  Terah gaa-made i-golo, gei mee gu-lua-lau maa-lima-(205) ono ngadau.

Chapter 12

12:1  Dimaadua ga-helekai gi Abram, “Diagia do henua, oo gau mo di guongo do damana, hana gi tenua dela ga-hagi-adu ko-Au gi-di-goe.

12:2  Au ga-gowadu do hagadili gi-dogologo, gaa-hai di-nadau henua damana. Au ga-haga-maluagina goe mo-di hai do ingoo gii-gila, gii-hai goe tangada maluagina.

12:3  Au ga-haga-maluagina digau ala e-haga-maluagina goe, ge e-haga-halauwa digau ala e-haga-halauwa goe. Gei Au ga-haga-maluagina nia henua huogodoo mai i doo gili.”

12:4  Abram ne-mada-hidu maa-lima-(75) ono ngadau, gei mee ga-hagatanga mai gi-daha mo Haran, be nia helekai a Dimaadua ala ne-hai gi mee bolo gi-heia, gei Lot guu-hana i-muli o mee.

12:5  Abram gaa-lahi dono lodo go Sarai, mo tama o dono duaahina go Lot, mo ono maluagina mo ana hege ala ne-hai-mee ginai i Haran, digaula e-hula gi tenua go Canaan. Di madagoaa digaula ne-dau i Canaan,

12:6  gei Abram gaa-hana laa-lodo tenua, gaa-dau-loo i-di laagau haga-madagu o Moreh, di gowaa dabu o Shechem. (Di madagoaa deelaa, digau Canaan nogo noho hua igolo i tenua deelaa.)

12:7  Dimaadua ga-haga-gida gi Abram, ga-helekai gi mee, “Deenei tenua dela gaa-wanga ko-Au gi do hagadili.” Gei Abram gaa-bae dana gowaa hai-tigidaumaha i-golo ang-gi Dimaadua dela ne-haga-gida gi mee.

12:8  Muli-hua di mee deelaa, gei mee gaa-hana gi-bahi-i-ngaaga gi-di gowaa gonduu i-bahi-i-dua di waahale go Bethel, gaa-hai dana gowaa e-noho-ai i-mehanga Bethel dela i-bahi-i-dai, mo Ai dela i-bahi-i-dua. Di gowaa deelaa, gei mee guu-bae labelaa dana gowaa hai-tigidaumaha e-daumaha-ai gi Dimaadua.

12:9  Nomuli gei mee ga-haga-menege, gaa-hana gi-nia gowaa ala i-golo adu gi-di bahi-i-ngaaga o Canaan.

12:10  Tau-magamaga i Canaan gu-huaidu huoloo, gei Abram ga-haga-menege labelaa gi ngaaga gi Egypt belee noho i-golo hagabalua.

12:11  Di madagoaa o mee dela bolo ga-ulu-adu gi tagageinga o Egypt, gei mee gaa-hai gi dono lodo go Sarai boloo, “Goe di ahina madanga.

12:12  Digau Egypt ga-mmada-adu gi-di-goe, ge digaula ga-hagabau bolo goe di lodo ni-oogu, ga-daaligi au gaa-dugu goe hagamouli.

12:13  Helekai gi digaula bolo goe tuaahina ni-oogu, gei digaula ga-benebene au hagahumalia, idimaa dela go kooe, gei digaula gaa-dugu au haga-mouli.”

12:14  Di madagoaa mee dela ne-ulu-adu gi tagageinga o Egypt, gei digau Egypt gu-gidee bolo di lodo o-maa e-madanga huoloo.

12:15  Hunu gau i digau ngalua o-di king o Egypt ga-gidee-ginaadou a-mee, ga-hagi-anga gi di king i-di madanga o-maa, gei Sarai guu-lahi go digaula gi-di gowaa e-noho-ai di king.

12:16  Di king gu-hagahumalia a Abram i-di gili di ahina deelaa, guu-wanga ana buini-siibi, mono kuudi, mono kau, mono ‘donkey’, mono hege, mono ‘camel’.

12:17  Idimaa di king dela guu-lahi a Sarai, gei Dimaadua ga-hagau dana magi huaidu gi-di king mo digau ala e-noho i-baahi di king.

12:18  Gei di king ga-gahi-aga a Abram ga-heeu gi mee, “Goe ne-hai dau-aha mai gi-di-au? Goe ne-aha dela digi helekai-mai bolo mee di lodo ni-oou?

12:19  Goe ne-aha dela ne-hai bolo mee tuaahina hua ni-oou, dela gei au gaa-lahi a-mee belee hai dogu lodo? Deenei doo lodo, lahia a-mee, gei goolua hula gi-daha.”

12:20  Di king gaa-hai dana haga-iloo gi ana daane, gei digaula gaa-lahi a Abram gi-daha mo tenua deelaa mo dono lodo mo ana mee huogodoo ala e-hai-mee ginai.

Chapter 13

13:1  Abram gu-hagatanga i Egypt gaa-hana gi ngeia gi-di bahi-i-ngaaga Canaan, mo dono lodo mo ana mee huogodoo ala e-hai-mee ginai, gei Lot guu-hana i-muli o-mee.

13:2  Abram tangada maluagina huoloo ana siibi, mo ana kuudi mono kau ngaadahi mono silber mono goolo.

13:3  Nomuli gei mee ga-hagadau-adu i-nia guongo ala i-golo, gaa-dau-loo i Bethel. Mee gaa-dau-adu-loo gi-di gowaa i-mehanga Bethel mo Ai, i-di gowaa nogo noho-iei mee i-mua,

13:4  gei ne-bae dana gowaa hai-tigidaumaha. Gei mee ga-daumaha ang-gi Dimaadua i-di gowaa deelaa.

13:5  Lot ana siibi labelaa, mono kuudi, mono kau, mo digau dono hale mono gau hai-hegau.

13:6  Malaa, tenua deelaa la-hagalee dohu ono geinga belee gai go nia manu meemaa, i meemaa e-logo nau manu.

13:7  Di lagamaaloo gaa-hai i-mehanga digau ala e-benebene nia manu a Abram mo digau ala e-benebene nia manu a Lot. (Di madagoaa deelaa gei digau Canaan mo digau Perizzite nogo noho hua igolo i tenua deelaa.)

13:8  Gei Abram ga-helekai gi Lot, “Gidaua e-hai-dangada, au daangada mo agu daangada hagalee belee lagalagamaaloo.

13:9  Malaa, gidaua gaa-wwae gidaua. Hilihilia di baahi tenua dela e-hiihai ginai goe, gaa-hana gi-di baahi dela e-hiihai ginai goe, gei au gaa-hana gi-di baahi dela i-golo.”

13:10  Lot ga-madamada gi-daha gaa-mmada gi-di gowaa i taalinga di monowai Jordan, ga-hanadu-loo gi Zoar, e-logo ono wai e-hai be-di Hadagee a Dimaadua, be e-hai be tenua go Egypt. (Deenei la i-mua Dimaadua ne-hagahuaidu Sodom mo Gomorrah.)

13:11  Gei Lot ga-hilihili di gowaa mehanga gonduu o Jordan bolo deelaa dana gowaa, geia ga-hagatanga gaa-hana gi-dua. Deelaa di hai meemaa ne-wwae ginaua.

13:12  Abram gaa-noho i tenua go Canaan, gei Lot gaa-noho i-baahi nia waahale ala i-lodo di gowaa baba, ga-haga-duu ana hale-laa hoohoo gi Sodom.

13:13  Di gau o-di waahale deelaa la digau huaidu gei gu-ihala ang-gi Dimaadua.

13:14  Muli o Lot ne-hagatanga, gei Dimaadua ga-helekai gi Abram, “Mmada-malaa gi-dua mo dai mo ngeia mo ngaaga mai i-di gowaa dela e-noho-iei goe.

13:15  Au ga-gowadu gi-di-goe mo do hagadili di gowaa dela e-mmada ginai goe, gaa-hai di gowaa ni-aau gaa-hana-hua beelaa.

13:16  Gei Au ga-gowadu do hagadili gi-dogologowaahee. Deai tangada e-mee di-dau digau o do hagadili ai, gei ma guu-mee di-dau, malaa e-haingoohia hogi di-dau nia mada-gelegele o-nia dogolia i-hongo henuailala.

13:17  Dolomeenei, gei goe ga-heehee ngeia mo ngaaga, dua mo dai, i-lodo dau gowaa, idimaa, ma-ga-gowadu ko-Au gi-di-goe.”

13:18  Abram gaa-dugu ono hale-laa la-gi-lala, gaa-hana gaa-noho hoohoo gi-nia laagau dabu ala i Mamre i Hebron, gaa-bae dana gowaa hai-tigidaumaha ang-gi Dimaadua i-golo.

Chapter 14

14:1  Nia king e-haa go Amraphel di king o Babylonia, Arioch di king o Ellasar, Chedorlaomer di king o Elam, mo Tidal di king o Goiim,

14:2  ne-hula ne-heebagi hai-baahi gi-nia king dogolima ala go Bera di king o Sodom, Birsha di king o Gomorrah, Shinab di king o Admah, Shemeber di king o Zeboiim mo-di king o Bela (be go Zoar).

14:3  Nia king e-lima aanei guu-buni ngaadahi gu-haga-puni nadau gau-dauwa i-di gowaa mehanga gonduu o Siddim, dela dolomeenei go di Tai Mmade.

14:4  Digaula nogo i-lala nia haganoho a Chedorlaomer i-nia ngadau madangaholu maa-lua, gei i-di madangaholu maa-dolu ngadau, digaula ga-hai-baahi gi mee.

14:5  I-di madangaholu maa-haa ngadau, gei Chedorlaomer mo ono ehoo ga-loomoi mo nadau gau-dauwa, ga-haga-magedaa digau Rephaim i Ashteroth=Karnaim, digau Zuzim i Ham, digau Emim i-di gowaa baba dela i Kiriathaim,

14:6  mo digau Horite i-lodo nia gonduu o Edom, ga-waluwalu digaula gi-mogowaa-loo gi El=Paran i taalinga di anggowaa.

14:7  Nomuli gei digaula ga-loomoi labelaa gi Kadesh (dela e-iloo labelaa bolo go En=Mishpat), gaa-kumi nia gowaa huogodoo o digau Amalek, gei gu-haga-magedaa digau Amor ala e-noho i Hazazon=Tamar.

14:8  Gei nia king o Sodom, Gomorrah, Admah, Zeboiim mo Bela gu-laha-aga nadau gau-dauwa belee heebagi i-di gowaa mehanga gonduu o Siddim, ga-heebagi hai-baahi

14:9  gi-nia king o Elam, Goiim, Babylonia mo Ellasar. Nia king e-lima e-hai-baahi gi-nia king e-haa.

14:10  Di gowaa baba deenei la-guu-honu i-nia lua dogolia-pigi-‘tar’. Di madagoaa nia king o Sodom mo Gomorrah ne-bolo e-llele gi-daha mo tauwa, gei meemaa gaa-too gi-lodo nia lua aalaa, gei nia king dogodolu ala i-golo guu-hula guu-llele hagammuni gi-hongo nia gonduu.

14:11  Nia king e-haa guu-kae nia mee huogodoo ala i Sodom mo Gomorrah ngaadahi mono meegai, guu-kae guu-hula.

14:12  Lot, dela go tama tuaahina o Abram, le e-noho i Sodom, gei digaula guu-lahi labelaa a-mee mo ono goloo huogodoo.

14:13  Gei di-maa tangada e-dahi guu-lele gi-daha mo-di gowaa deenei, gu-hagi-anga nia mee huogodoo ala ne-hai gi Abram, tangada Hebrew, dela nogo noho hoohoo gi-nia laagau dabu ala nia mee ni Mamre tangada Amor. Mamre mo ono duaahina-daane go Eshcol mo Aner la nia daangada i-di baahi Abram.

14:14  Di madagoaa o Abram ne-longono-ia bolo tama-daane o dono duaahina-daane la-guu-kumi go digaula, gei mee ga-haga-dagabuli-mai digau ala e-maaloo di-heebagi ala e-noho i dono gowaa, digau e-dolu-lau madangaholu maa-walu-(318), ga-waluwalu nia king e-haa gaa-dau-loo gi Dan.

14:15  Di gowaa deelaa, gei mee ga-waewae ana daangada i hagabuulinga, ga-heebagi gi nadau hagadaumee boo, ga-haga-magedaa digaula. Mee gu-waluwalu digaula loo gi Hobah i-baahi ngeia o Damascus,

14:16  gaa-kumi nia goloo huogodoo ala ne-kae go digaula. Mee gu-laha-mai labelaa tama-daane dono duaahina-daane go Lot mo ono goloo huogodoo mono ahina mo digau ne-kumi tauwa ala i-golo.

14:17  Abram ne-hanimoi i dono aali maaloo i tauwa ang-gi Chedorlaomer mono king ala i-golo, gei di king o Sodom ga-hanadu gi mee ga-heetugi gi mee i-di gowaa mehanga gonduu o Shaveh (e-haga-ingoo labelaa bolo “Di Gowaa Baba ni nia King”).

14:18  Gei Melchizedek, dela go di king o Salem, gei mee tangada hai-mee-dabu ni-di God Aamua Muginua, ga-gaamai ana palaawaa mono waini gi Abram,

14:19  ga-haga-maluagina a-mee ga-helekai, “Di God Aamua Muginua dela ne-hai di langi mo henuailala gi-haga-maluagina-ina a Abram!

14:20  Gidaadou la-gi-hagaamuina di God Aamua Muginua dela ne-hai goe gi-maaloo gi-hongo o hagadaumee!” Gei Abram guu-wanga gi mee dahi baahi madangaholu o-nia goloo huogodoo ala ne-kumi koia i tauwa.

14:21  Di king o Sodom ga-helekai gi Abram, “Heia au mee go nia goloo, gei goe ga-gaamai-hua go agu daangada.”

14:22  Abram ga-helekai, “Au e-hai dagu hagamodu i-mua o Dimaadua, go di God Aamua Muginua dela ne-hai di langi mo henuailala,

14:23  bolo au hagalee kae di-ingoo-hua di-mee i au mee, ge hagalee hogi di uga deleedu dulii-loo be taulagi toolii, gi-dee-mee di-helekai goe nomuli boloo, ‘Ma ko-au dela ne-hai Abram gi-maluagina.’

14:24  Au hagalee kae dagu mee belee hai di mee ni-aagu. Aalaa-hua go nia mee o agu daangada ala gu-hai-hegau-ai. Dumaalia gi-nia daangada ala i dogu baahi go Aner, Eshcol mo Mamre gii-kae nadau duhongo.”

Chapter 15

15:1  Muli di mee deenei, gei Abram gaa-hai dana moe hagagida, ga-hagalongo gi Dimaadua e-helekai ang-gi deia, “Abram, goe hudee madagu. Au ga-abaaba-laa goe gi-daha mo nia hagalliga, gei e-gowadu gi-di-goe di hui damana.”

15:2  Gei Abram ga-helekai, “Meenei Tagi go Yihowah, di humalia-aha e-gaamai Kooe be au agu dama ai? Dagu dangada e-boloagi ginai agu mee la go Eliezer, tangada o Damascus, dela-hua go mee dela e-kae ogu maluagina.

15:3  Goe digi gaamai agu dama, gei di hege hua e-dahi i-lodo agu hege dela ga-hai-mee gi agu mee.”

15:4  Nomuli gei mee ga-longono-ia Dimaadua e-helekai, “Di hege deenei go Eliezer la-hagalee hai-mee gi au mee. Dau dama donu dela di tama e-kae do maluagina.”

15:5  Dimaadua gaa-lahi a-mee gi-di malaelae, ga-helekai gi mee, “Mmada-malaa gi-di langi, hagamada-malaa daulia nia heduu. Do hagadili ga-logowaahee gadoo be nia maa.”

15:6  Abram gu-hagadonu Dimaadua, gei Dimaadua guu-hila ang-gi mee bolo mee e-donu i dono baahi, mai i-di hagadonu o-maa.

15:7  Gei Dimaadua ga-helekai gi mee, “Au go Yihowah dela ne-laha-mai goe gi-daha mo Ur i Babylonia belee gowadu gi-di-goe di gowaa deenei e-hai-mee ginai goe.”

15:8  Gei Abram ga-helekai, “Meenei Tagi go Yihowah, au e-iloo di-aha bolo ma-gaa-hai dagu gowaa?”

15:9  Gei Dimaadua ga-helekai, “Gaamai di kau e-dahi, ge dahi kuudi, ge dahi dama-siibi, e-dagi-dolu nadau ngadau, ge dahi mwuroi, ge dahi manu-‘pigeon’.”

15:10  Abram ga-gaamai nia manu aanei gi Dimaadua, ga-hahaahi-lua, gaa-dugu nia baahi e-huli-mai gi-lodo i-nia goolongo e-lua, gei mee digi hahaahia nia manu mamaangi.

15:11  Gei nia manu-mamaangi gai-manu ga-lloo-ia gi-hongo nia huaidina nia manu mmade aalaa, gei Abram ga-huiahi nia maa.

15:12  Di madagoaa di laa ne-ulu, gei Abram guu-kii danu-mmoe, gei mee gu-madagu huoloo, gei di bouli dongoeho huaidu guu-gahu a-mee.

15:13  Dimaadua ga-helekai gi mee, “Goe gi-iloo donu bolo do hagadili la-gaa-hai digau mai i-daha i-hongo tuai henua. Digaula gaa-hai nia hege gaa-hai hagahuaidu i-nia ngadau e-haa-lau.

15:14  Gei Au ga-hagaduadua tenua dela e-haga-hege digaula, gei di madagoaa digaula ga-hagatanga i tenua deelaa, digaula e-kae nadau maluagina damanaiee dalia ginaadou.

15:15  Gei goe deenaa le e-mouli gi-madumadua-loo, gaa-made i-di aumaalia gaa-danu.

15:16  Muli di haa adu-daangada gei do hagadili ga-lloomoi labelaa gi kinei, idimaa, Au hagalee hagabagi digau Amor, gaa-dae-loo gi di-nadau madagoaa ga-huaidu huoloo, gaa-hai digau e-hagaduadua.”

15:17  Di madagoaa di laa ne-ulu gei di-maa ga-bouli, gei di baalanga dunu-mee e-buu di huiahi ge tei lama-ulaula gaa-hula i-mehanga nia baahi manu ala ne-hahaahi.

15:18  Di madagoaa hua deelaa, gei Dimaadua gaa-hai dana hagababa gi Abram boloo, “Au e-hagababa bolo Au gaa-wanga tenua deenei huogodoo gi do hagadili, mai tagageinga o-di gowaa go Egypt gaa-huli gi-di monowai damana go Euphrates,

15:19  ngaadahi mo nia gowaa o digau Kenite, Kenizzite, Kadmon,

15:20  Hittite, Perizzite, Rephaim,

15:21  Amor, Canaan, Girgash mo digau Jebus.”

Chapter 16

16:1  Di lodo Abram go Sarai digi haanau ana dama gi mee, gei mee dana hege-ahina mai Egypt, dono ingoo go Hagar.

16:2  Gei Sarai ga-helekai gi Abram, “Dimaadua guu-dugu au bolo gi-dee-hai agu dama, gei goe de-ga-kii i-baahi dagu hege ahina? Holongo mee gaa-hai dana dama e-hai-ai dagu dama.” Abram guu-donu gi-di hai a Sarai ne-hai.

16:3  Gei Sarai gaa-wanga a Hagar gi mee gii-hai dono lodo-hege. (Di mee deenei ne-hai i-muli Abram ne-noho i Canaan i-nia ngadau e-madangaholu.)

16:4  Abram gaa-kii i-baahi Hagar, gei mee ga-hai-dama. Hagar ne-modongoohia bolo ia gu-hai-dama, gei mee ga-hagapuu gaa-hudi dono-wou gi Sarai.

16:5  Gei Sarai ga-helekai gi Abram, “Ma di mee hala ni-aau ne-hai dela Hagar guu-hudi dono-wou mai gi-di-au. Ma ko-au hua dela ne-gowadu a-mee gi-di-goe, nomuli gei mee ga-modongoohia bolo ia gu-hai-dama, gei mee gaa-hudi dono-wou mai gi-di-au. Dugu ang-gi Dimaadua gi-haga-donu-ina be di-ma koai dela e-donu, kooe be ko-au.”

16:6  Gei Abram ga-helekai, “E-humalia-hua, mee di hege ni-aau, gei e-noho i-lala do mogobuna. Heia dau hai dela e-hiihai ginai goe e-hai gi mee.” Gei Sarai gaa-hai a-mee hagahuaidu, gei Hagar gaa-hana gaa-lele gi-daha.

16:7  Tangada di-langi o Dimaadua, gu-heetugi gi Hagar i-baahi di monowai uwa-aga i-di anggowaa i-hongo di ala dela e-hana gi Shur.

16:8  Mee ga-helekai, “Hagar, goe di hege ni Sarai, goe ne-hanimoi i-hee, gei goe e-hana gi-hee?” Gei mee ga-helekai, “Au e-hana e-lele gi-daha mo dogu dagi.”

16:9  Gei tangada di-langi o Dimaadua ga-helekai, “Hana gi-muli gi mee, goe di hege ni mee.”

16:10  Gei tangada di-langi deelaa ga-helekai labelaa, “Au ga-gowadu gi-di-goe do hagadili gi-logowaahee, e-deemee di-dau go tangada.

16:11  Goe gaa-hai dau dama, gei goe gaa-gahi dono ingoo bolo Ishmael, idimaa, Dimaadua la-gu-longono-Ia do dangidangi lodo-huaidu.

16:12  Dau dama-daane la-ga-mouli gadoo be-di ‘donkey’-lodo-geinga, mee ga-hai-baahi gi digau huogodoo, ge digau huogodoo ga-hai-baahi gi mee, gei mee gaa-noho i-daha mo ono gau.”

16:13  Hagar ga-heeu ang-gi deia, “Au gu-mmada-hua donu gi God, gei au e-mouli hua igolo?” Gei mee gaa-gahi di ingoo o Dimaadua dela nogo helekai ang-gi deia, bolo “Di God dela e-Mmada”.

16:14  Deelaa di mee nia daangada e-haga-ingoo di monowai dela i-mehanga Kadesh mo Bered bolo Beer Lahai Roi, dono hadinga bolo “Di monowai o-di God mouli dela e-mmada-mai”.

16:15  Hagar ga-haanau dana dama-daane ang-gi Abram, gaa-gahi di ingoo o-maa bolo go Ishmael.

16:16  Abram gu-huowalu maa-ono-(86) ono ngadau di madagoaa Hagar ne-haanau dana dama-daane gi mee.

Chapter 17

17:1  Di madagoaa Abram ne-matiwa maa-hiwa ono ngadau, gei Dimaadua ga-haga-gida gi mee ga-helekai, “Au go di God Koia e-Aamua. Hagalongo-mai, heia nia mee ala e-donu i-nia madagoaa huogodoo.

17:2  Au gaa-hai dagu hagababa adu gi-di-goe ge e-gowadu gi-di-goe do hagadili gi-dogologo.”

17:3  Abram ga-bala gi-lala gii-tugi ono hadumada i-di gelegele, gei God ga-helekai,

17:4  “Au e-hai di hagababa deenei adu gi-di-goe: Au e-hagababa bolo goe gaa-hai tamana-madua ni nia henua e-logo.

17:5  Do ingoo la-ga-hagalee hai bolo Abram, gaa-hai bolo Abraham, idimaa Au gaa-hai goe tamana-madua ni nia henua e-logo.

17:6  Au ga-gowadu gi-di-goe do hagadili gi-dogologowaahee, digaula gaa-hai nia king. Do hagadili ga-dogologowaahee gaa-hai nia henua llauehe.

17:7  Au ga-daahi dagu hagababa adu gi-di-goe mo do hagadili i-di adu-dangada dela maalia gii-hai di hagababa dono hagaodi ai. Au gaa-hai di God ni-oou, ge di God labelaa ni do hagadili.

17:8  Au ga-gowadu gi-di-goe mo do hagadili tenua deenei dela e-noho-iei goe dolomeenei gei goe tangada mai i-daha. Tenua o Canaan hagatau gaa-hai tenua ni-oou mo do hagadili gaa-hana-hua beelaa, gei Au gaa-hai di God ni digaula.”

17:9  Gei God ga-duudagi ana helekai gi Abraham, “Goe e-hai gii-baba di-daudali di hagababa deenei i tau mehanga, goe mo do hagadili gi-muli.

17:10  Goe mo do hagadili e-hai gii-baba ngaadahi bolo e-sirkumsais nia daane huogodoo ala i godou lodo.

17:11  Tugi dolomeenei gaa-hana, gei goodou gi-sirkumsais nia dama-daane ma-ga-dagi-walu nadau laangi, ngaadahi mo nia hege ma-ga-haanau i godou guongo, mono hege ala ne-hui go goodou i digau mai i-daha. Deenei le e-haga-modongoohia bolo ma iai di hagababa i tadau mehanga.

17:12  Tugi dolomeenei gaa-hana, gei goodou gi-sirkumsais nia dama-daane ma-ga-dagi-walu nadau laangi, ngaadahi mo nia hege ma-ga-haanau i godou guongo, mono hege ala ne-hui go goodou i digau mai i-daha. Deenei le e-haga-modongoohia bolo ma iai di hagababa i tadau mehanga.

17:13  Tangada-nei mo tangada-nei la-gi-sirkumsais, deenei le e-hai di haga-modongoohia i godou huaidina bolo dagu hagababa adu gi-di-goe la dono hagaodi ai.

17:14  Taane dela digi sirkumsais la-ga-hagalee dugu ko-Au bolo mee tangada ni-aagu, idimaa mee digi daahia dagu hagababa ne-hai i mau mehanga.”

17:15  God ga-helekai labelaa gi Abraham, “Goe guu-lawa hudee gahia doo lodo bolo Sarai, dolomeenei gaa-hana gi-muli di ingoo o-maa go Sarah.

17:16  Au ga-haga-maluagina a-mee, gei Au ga-gowadu gi-di-goe dau dama-daane mai i-mee. Au ga-haga-maluagina a-mee i mee gaa-hai tinana ni nia henua e-logo, nia king e-kila-aga mai i dono hagadili.”

17:17  Abraham gaa-bala-loo gi-lala, ono hadumada guu-tale gi-di gelegele, ga-daamada ga-gadagada i ana maanadu boloo, “Taane le e-mee di hai dana dama, gei mee gu-madua guu-lau ono ngadau? Sarah e-mee di-hai dana dama, gei mee gu-matiwa ono ngadau?”

17:18  Gei mee ga-heeu gi God, “Goe e-aha dela hagalee dugu a Ishmael gii-kae di mogobuna e-hai-mee gi agu mee?”

17:19  Gei God ga-helekai, “Deeai, doo lodo go Sarah ga-haanau dana dama-daane, gei goe gaa-gahi di ingoo o-maa go Isaac. Au ga-daahi dagu hagababa ang-gi mee mo dono hagadili gaa-hana-hua beelaa, gaa-hai di hagababa dono hagaodi ai.

17:20  Au gu-longono dau dangi-mai gi-di-au i Ishmael, gei Au ga-haga-maluagina a-mee mo-di wanga gi mee nia dama e-logo, gei gi-dogologo labelaa dono hagadili. Mee gaa-hai tamana ni nia dama-daane king dilongoholu maa-lua, gei Au gaa-hai dagu henua damana mai i dono hagadili.

17:21  Gei Au ga-daahi dagu hagababa gi dau dama-daane go Isaac, dela ga-haanau mai go Sarah i-di madagoaa beenei i-di ngadau dela i-golo.”

17:22  God gaa-lawa-loo ana helehelekai gi Abraham, gei Mee ga-hagatanga i mee.

17:23  Di laangi hua deelaa, gei Abraham gu-hagalongo gi God, gu-sirkumsais dana dama-daane go Ishmael mo nia daane huogodoo ala i dono hale, ngaadahi mo nia hege ala ne-haanau i dono guongo mo ana hege ala ne-hui.

17:24  Abraham gu-matiwa maa-hiwa ono ngadau i dono sirkumsais.

17:25  Gei dana dama-daane go Ishmael la-gu-madangaholu maa-dolu ono ngadau.

17:26  Meemaa dogolua ne-sirkumsais i-di laangi e-dahi,

17:27  ngaadahi mo nia hege huogodoo a Abraham.

Chapter 18

18:1  Dimaadua gu-haga-gida gi Abraham hoohoo gi-nia laagau dabu ala i Mamre. Gei Abraham e-noho i-di ngudu di bontai dono hale-laa i-di madagoaa dela koia gu-welengina i-di laangi deelaa.

18:2  Mee ga-mmada-aga-hua ga-gidee-ia nia daane dogodolu e-tuu i-golo. Dono madagoaa hua dela ne-gidee-ia digaula, gei mee gu-du-gi-nua hagalimalima, guu-hana gi malaelae belee heetugi gi digaula, gaa-bala-loo gi-lala ono hadumada guu-tale i-di gelegele.

18:3  Mee ga-helekai, “Digau-nei, dumaalia-mai, goodou hudee diagia dogu hale gi-muli ge digi hagamolooloo-mai. Deenei au go di-godou hege.

18:4  Nnoo-mua gi-gaamai nia wai e-tono godou wae, goodou ga-hagamolooloo i kinei i-lala di laagau deenei.

18:5  Au ga-gaamai nia meegai dulii e-hai goodou gi-maaloo i-di godou hula i-di godou ala. Goodou gu-hagalaamua au i-di godou loomoi gi dogu hale e-noho-ai, dumaalia-mai-mua. Au e-hege-adu gi goodou.” Gei digaula ga-helekai, “Di mee hua bolo goe, gimaadou guu-donu-adu.”

18:6  Abraham ga-hagalimalima gi-lodo di hale-laa, ga-helekai gi Sarah, “Hagalimalima kae-ina au palaawaa ala koia e-humalia, heia au palaawaa.”

18:7  Gei mee gaa-lele gi-di hagabuulinga manu, ga-gowaga dana damaa-kau dulii dela e-bedi gei e-balabala ono goneiga, gaa-wanga gi tangada hai-hegau e-hagatogomaalia hagalimalima.

18:8  Mee gaa-kae ana milugu maangoo, mono milugu, mono goneiga tamaa-kau, gaa-higi gi-mua nia daane aalaa. Gei digaula ga-miami gei Abraham e-duu-hua i-baahi digaula i-lala di laagau.

18:9  Digaula ga-heeu gi mee, “Dehee doo lodo go Sarah?” Gei mee ga-helekai, “Mee i-lodo di hale-laa.”

18:10  Tangada e-dahi i digaula ga-helekai, “Nia malama e-hiwa i-golo, gei au ga-hanimoi labelaa, gei doo lodo go Sarah gaa-hai dana dama-daane.” Gei Sarah e-duu i-tua o-maa, i-di bontai di hale-laa, e-hagalongo gi mee.

18:11  Abraham mo Sarah gu-mmaadua huoloo, gei Sarah la-guu-noho gu-hagalee hai ono magi malama.

18:12  Sarah ga-gadagada-hua i ono lodo ga-helekai, “Dolomeenei gei au dela gu-madua gu-hai-gee, au e-mee di-hai dagu dama? Gei dogu lodo hogi la-gu-madumadua labelaa.”

18:13  Gei Dimaadua ga-heeu gi Abraham, “Ma e-aha dela Sarah e-gadagada e-helekai boloo, ‘E-hai behee? Au e-mee di-hai dagu dama gei au gu-madumadua huoloo?’

18:14  Ma iai di mee i-golo e-haingadaa i-baahi o Dimaadua? Au dela ne-hai bolo nia malama e-hiwa gei Au ga-hanimoi labelaa gei Sarah gaa-hai dana dama.”

18:15  Sarah gu-madagu, gei mee ga-hagammuni ana helekai, ga-helekai, “Au digi gadagada.” Gei Mee ga-helekai, “Ma kooe dela ne-gadagada.”

18:16  Gei nia daane ga-hagatanga gaa-hula gi-di gowaa dela e-mee di-mmada-ia ginaadou gi Sodom, gei Abraham gaa-hana i-muli digaula belee hagau digaula gii-hula i-di nadau ala.

18:17  Gei Dimaadua gaa-hai-anga-hua gi-de-Ia, “Au hagalee hagammuni i Abraham dagu mee dela gaa-hai.

18:18  Di hagadili a-maa gaa-hai tenua damana ge maaloo, gei Au ga-haga-maluagina nia henua huogodoo mai i-mee.

18:19  Au ne-hilihili a-mee belee hai a-mee gi-helekai gi ana dama-daane mo dono hagadili bolo ginaadou gi-hagalongo-mai gi di-Au, gei gi-heia nia mee ala e-humalia ge donu. Maa digaula gaa-hai beenei, gei Au gaa-hai nia mee huogodoo ala ne-hagababa ko-Au gi mee.”

18:20  Gei Dimaadua ga-helekai gi Abraham, “Ma iai nia helekai hagahuaidu e-hai-baahi gi Sodom mo Gomorrah, gei nadau huaidu gu-llauehaa.

18:21  Au e-hai gii-hana gi-lala e-mmada be-di hagahuaidu dela ne-hagalongo ginai Au le e-donu be deeai.”

18:22  Gei nia daane dogolua gu-hagatanga gu-lloo-adu beelaa gi Sodom, gei Dimaadua le e-noho-hua i-baahi o Abraham.

18:23  Abraham ga-menege ang-gi Dimaadua, ga-heeu gi Mee, “Goe ga-daaligi-hua digau humalia dalia digau huaidu?

18:24  Dolomaa ma-ga-iai digau humalia e-madalima i-lodo di waahale, gei Goe e-oho-hua di waahale hagatau deelaa? Goe hagalee gaa-dugu nia daangada o-di waahale e-hagamouli i-di gili digau madalima aalaa?

18:25  E-donu Goe hagalee daaligi digau humalia dalia digau huaidu! Di mee deelaa e-huaidu, Goe e-deemee di-hai beelaa! Maa goe guu-hai di-maa, gei digau humalia la-ga-daaligi dalia digau huaidu. Deelaa la di mee e-deemee di-hai! Tangada dela e-haga-donu ana mee huogodoo i henuailala, le e-hai gii-hai ana mee gii-donu hagahumalia.”

18:26  Gei Dimaadua ga-helekai, “Maa Au gaa-gida digau humalia e-madalima i Sodom, gei Au e-dugu-hua hagamouli nia daangada o-di waahale huogodoo mai i digaula.”

18:27  Abraham ga-helekai labelaa, “Meenei Tagi, hudee heheia-mua dagu helekai maaloo i dagu helehelekai adu gi-di-Goe. Au tangada hua, hagalee ogu donu-ai belee helehelekai i-di gili nia mee.

18:28  Gei dolomaa ma-ga-iai digau e-mada-haa maa-lima-hua e-humalia, hagalee digau madalima, gei Goe e-oho-hua di waahale dogomaalia idimaa dela digau dogolima gu-hogoohi-mai?” Gei Dimaadua ga-helekai, “Au hagalee e-oho di waahale maa Au ga-gidee digau humalia e-madahaa maa-lima.”

18:29  Abraham ga-helekai labelaa, “Dolomaa ma-gaa-hai digau hua e-mada-haa.” Gei Mee ga-helekai, “Au hagalee e-oho di-maa be di-maa digau e-mada-haa i-golo.”

18:30  Abraham ga-helekai, “Meenei Tagi, hudee heheia-mua, Goe hudee hagawelewele, au e-hai gi-helekai labelaa bolo ma e-hai behee, be dolomaa ma-ga-iai digau hua e-motolu?” Gei Mee ga-helekai, “Au hagalee e-oho di-maa maa Au gaa-gida agu gau motolu.”

18:31  Abraham ga-helekai, “Hudee heheia-loo agu helekai mada-maaloo ala e-helehelekai adu gi-di-Goe, meenei Tagi. Dolomaa ma-ga-iai-hua digau e-madalua.” Gei Mee ga-helekai, “Au hagalee e-oho di waahale be Au gaa-gida agu gau madalua.”

18:32  Abraham ga-helekai, “Hudee heheia-mua, Goe hudee hagawelewele mai gi-di-au, meenei Tagi, au gaa-hai-adu-hua dagu helekai hagamuliagina deenei: Ma e-hai behee, dolomaa ma-ga-iai digau hua dilongoholu i-golo?” Gei Mee ga-helekai, “Au hagalee e-oho di-maa be di-maa digau hua dilongoholu i-golo.”

18:33  Muli o Mee ne-lawa ana helekai gi Abraham, gei Dimaadua gaa-hana gi-daha mo mee, gei Abraham gaa-hana gi-muli gi dono guongo.

Chapter 19

19:1  Nia daangada di-langi dogolua ala ne-dau gi Sodom di hiahi deelaa, gei Lot le e-noho i-di ngudu di bontai di waahale. Mee dela hua ne-gidee-ia meemaa, gei mee ga-du-gi-nua, gaa-hana e-haga-heetugi gi meemaa, gaa-bala-loo gi-lala i-mua meemaa,

19:2  ga-helekai, “Meemaa-nei, au deenei e-hai gulu hegau. Hudee heheia-mua, loomoi gi dogu hale gi-gaugau gulu wae gaa-noho i di boo. Luada gei goolua gaa-ala haga-luada gaa-hula i-di gulu ala.” Gei meemaa ga-helekai, “Deeai, gimaua e-noho i ginei i di waahale.”

19:3  Gei mee e-hagamahi e-dangi-anga-hua gi meemaa, ga-nomuliagi-loo gei meemaa gaa-hula i-muli o mee gi dono hale. Lot gaa-hai gi ono gau hai-hegau gi-dunu-ina nadau palaawaa ge gi-hagatogomaalia-ina tagamiami gi-nia daangada mai i-daha aalaa. Ma-ne-lawa, gei meemaa gu-miami.

19:4  I-mua nia daangada mai i-daha aanei bolo gaa-kii, gei nia daane o Sodom gu-haganiga di hale, go nia daane huogodoo o-di waahale deelaa, digau lligi mo digau mmaadua.

19:5  Digaula gaa-wwolo gi Lot, ga-heeu, “Aahee nia daane ala ne-lloomoi belee noho i do baahi boo-nei? Laha-mai meemaa gi-di malaelae gi gimaadou!” Nia daane o Sodom e-hiihai e-hai di-madau huaidu gi meemaa.

19:6  Lot guu-hana gi malaelae guu-tai di bontai i dono dua,

19:7  ga-helekai gi digaula, “Nia hoo hagaaloho, au e-dangidangi-adu gi goodou bolo goodou gi-hudee heia di-godou hai huaidu damana beenaa.

19:8  Mmada-malaa, au agu dama-ahina dogolua madammaa i-golo. Au ga-laha-mai meemaa gaa-hai-laa ginai godou hiihai, gei hudee heia di-godou hai gi-nia daane aanei. Meemaa nia daangada mai i-daha i dogu hale e-benebene ko-au.”

19:9  Gei digaula ga-helekai, “Tuu i-daha mo gimaadou, kooe tangada mai i-daha! Goe koai dela bolo goe e-aago gimaadou? Tuu i-daha mo gimaadou, gi-dee-hai-adu gi-di-goe di mee koia e-huaidu i madau mee belee hai gi meemaa.” Digaula ga-hono-adu a Lot gi-muli, ga-mmaanege-adu belee oho di bontai.

19:10  Gei nia daane dogolua ala i-lodo di hale, gaa-hudi a Lot gi-lodo di hale gaa-tai di bontai.

19:11  Gei meemaa gaa-hai nia daane huogodoo ala i malaelae gi-dee-gida, gei digaula gu-deemee di-gidee-ginaadou di bontai.

19:12  Nia daangada dogolua ga-helekai gi Lot, “Maa goe oo gau labelaa i ginei, nia dama-daane, be nia dama-ahina, be nia daane dauaga, be tei dangada hua ni-oou e-noho i-lodo di waahale deenei, la-heia gii-hula gi-daha.

19:13  Idimaa, gimaua gaa-oho di gowaa deenei. Dimaadua gu-longono-Ia nia huaidu hai-baahi ang-gi digau aanei, ga-hagau-mai gimaua bolo gi-ohaa Sodom.”

19:14  Lot gaa-hana gi-nia daane ala belee hai-lodo gi ana dama-ahina, ga-helekai, “Hagalimalima, hula gi-daha mo ginei, Dimaadua gaa-oho di gowaa deenei.” Gei meemaa e-maanadu bolo mee e-hai ana dadaagala.

19:15  Heniheni-loo, gei nia daangada di-langi gaa-hai gi Lot gi-hagalimalima, ga-helekai, “Hagalimalima, lahia doo lodo mo au dama-ahina dogolua, hula gi-daha gi-dee-mmade-hua goodou i-di madagoaa di waahale dela ma-gaa-oho.”

19:16  Lot e-hagadaatagi. Malaa, Dimaadua e-dumaalia gi mee, deelaa-laa nia daane dogolua aalaa gaa-kumi nadau lima, gaa-lahi a-mee mo dono lodo mo ana dama-ahina dogolua, gaa-dagi digaula gi-daha mo-di waahale.

19:17  Gei tangada di-langi e-dahi ga-helekai, “Llele gi-mouli goodou! Hudee mmada gi-muli, ge hudee tuu i-di gowaa baba i-mehanga nia gonduu. Llele gi-nia gonduu lligi gi-dee mmade goodou!”

19:18  Gei Lot ga-helekai, “Meenei, dumaalia-mai, hudee heia gimaadou gii-hai beenaa.

19:19  Goe gu-dumaalia mai gi-di-au gu-haga-mouli au. Gei nia gonduu lligi le e-mogowaa-loo. Gei di hagahuaidu ga-dau-mai gi-di-au, gei au gaa-made-hua gei digi dau i-golo.

19:20  Goe e-gidee tama waahale deelaa? Deelaa e-humalia e-hoohoo-mai. Dumaalia-mai au e-hana gi-golo. Ma tama-gowaa hua dulii. Au hagalee lauwa i-golo.”

19:21  Gei tangada di-langi ga-helekai, “Deenaa e-humalia, au e-baba-hua. Au ga-hagalee oho di waahale deelaa.

19:22  Hagalimalima! Llele! Au e-deemee di hai dagu mee, e-tali-hua goodou gii-dau gi-golo.” Idimaa Lot dela e-haga-ingoo di waahale bolo di waahale dulii, gei di waahale deelaa la-guu-gahi dono ingoo bolo Zoar.

19:23  Di laa dela e-hobo i-di madagoaa Lot e-dau i Zoar.

19:24  Di madagoaa hua deelaa, gei Dimaadua ga-haga-doo dana uwa-‘sulphur’ wele gi-hongo nia waahale go Sodom mo Gomorrah.

19:25  Gu-oho nia maa mo-di gowaa maalama mehanga gonduu, ngaadahi mo nia daangada ala i-golo huogodoo, mono mee huogodoo ala e-tomo i-hongo di gowaa deelaa.

19:26  Gei di lodo o Lot guu-mmada gi-muli, geia gu-hamaaloo guu-hai tuludulu toolo.

19:27  Hagaluada-loo dono daiaa, gei Abraham guu-hana hagalimalima gi-di gowaa dela nogo duu-ieia i-mua o Dimaadua.

19:28  Mee ga-mmada-ia gi-lala gi Sodom mo Gomorrah, mo dono gowaa mehanga gonduu, gaa-mmada gi-di huiahi e-buu-aga i tenua deelaa, e-hai be-di huiahi e-buu-aga i-di ulaula damanaiee.

19:29  Di madagoaa God dela ne-oho nia waahale ala i-mehanga nia gonduu dela nogo noho-ai a Lot, gei mee gu-langahieia Abraham, gei e-dumaalia gi Lot gii-hana gi-daha mo-di haingadaa.

19:30  Idimaa Lot e-madagu i-di noho i Zoar, gei mee mo ana dama-ahina dogolua ga-haga-maanege gi-lodo nia gonduu lligi i-nua, gaa-noho i-lodo di bagungoo.

19:31  Tama-ahina-madua ga-helekai gi dono duaahina dulii boloo, “Tau damana la-ga-madumadua, gei di-maa taane ai i tenua deenei e-hai dono lodo mai gi gidaua gii-hai tau dama.

19:32  Hanimoi, gidaua gaa-hai tau damana la-gi-libaliba, gei gidaua gaa-kii i-baahi o-mee gii-hai tau dama mai i-mee.”

19:33  I-di boo hua deelaa, gei meemaa ga-haga-inu a-mee gi-nia waini, gei tama-ahina madua gaa-kii i-baahi o Lot. Gei Lot digi iloo-ia, idimaa, mee gu-libaliba huoloo.

19:34  Dono daiaa gei tama-ahina madua ga-helekai gi dono duaahina dulii boloo, “Au guu-kii i-baahi o-mee anaboo, gei gidaua gaa-hai a-mee gi-libaliba labelaa boo-nei, gei goe gaa-hana gaa-kii i-baahi o-mee. Gei gidaua gaa-hai tau dama mai baahi tau damana.”

19:35  Malaa, di boo deelaa, gei meemaa gaa-hai a-mee gi-libaliba, gei tama-ahina dulii gaa-kii i-baahi o Lot. Gei Lot digi iloo-ia, idimaa, mee gu-libaliba huoloo.

19:36  Di hai deenei ne-hai go nia dama-ahina dogolua a Lot, gu-hai-dama mai baahi di-nau damana donu.

19:37  Tama-ahina madua guu-hai dana dama-daane, gaa-gahi dono ingoo bolo Moab. Go mee dela tangada ne-daamada-ai digau Moab ala dangi-nei.

19:38  Tama-ahina dulii gaa-hai labelaa dana dama-daane, guu-wanga dono ingoo go mee go Ben=ammi. Go mee dela tangada ne-daamada-ai digau Ammon ala dangi-nei.

Chapter 20

20:1  Abraham ne-hagatanga i Mamre gaa-hana gi bahi-i-ngaaga Canaan, gaa-noho i-mehanga Kadesh mo Shur. Mai gi nomuli i dono noho i Gerar,

20:2  mee ga-helekai bolo dono lodo go Sarah la tuaahina-ahina ni-oono. Deelaa-laa King Abimelech o Gerar gaa-hai a Sarah gi-laha-mai gi-deia.

20:3  Dahi boo hua, God ne-hagagida gi mee i-lodo di midi ga-helekai, “Goe gaa-made, idimaa goe guu-lahi di ahina gei mee dono lodo i-golo.”

20:4  Gei Abimelech digi hanimoi gi-hoohoo gi mee, gei mee ga-helekai, “Meenei Tagi, au e-hai donu hua! Goe ga-daaligi au mo agu daangada?

20:5  Ma go Abraham la-hua dela ne-helekai bolo mee tuaahina-ahina ni-oono, gei di ahina gu-helekai labelaa beelaa. Au ne-hai di hai deenei i-lodo agu hagabaubau madammaa, au digi hai dagu mee hai-gee.”

20:6  God ga-helekai gi mee i-lodo di midi, “Uaa, Au e-iloo bolo goe ne-hai di-maa i-lodo au hagabaubau madammaa, gei Au ne-hai goe gi-dee-hala mai gi-di-Au ge digi dugu goe gii-bili gi-di ahina deelaa.

20:7  Malaa, dolomeenei, wanga-ina di ahina gi-muli gi dono lodo. Mee di soukohp, ga-dalodalo-laa gi hagalee made goe. Maa goe ga-hagalee wanga a-mee gi-muli, Au e-helekai gi-iloo-e-goe bolo goe gaa-made mo au daangada huogodoo.”

20:8  Luada-loo dono daiaa, Abimelech ga-gahi-mai ana dagi moomee huogodoo, ga-hagi-anga gi digaula di mee dela ne-hai, gei digaula gu-mmaadagu huoloo.

20:9  Gei Abimelech ga-gahi-mai a Abraham ga-heeu, “Ma di-aha dela ne-hai kooe mai gi gimaadou? Ma di mee hala-aha ne-hai-adu ko-au gaa-hai goe gi-gaamai di haingadaa gi-di-au mo dogu henua? Goe guu-hai di mee dela hagalee belee hai-mai gi-di-au.

20:10  Goe ne-hai di-maa eimaha?”

20:11  Abraham ga-helekai, “Au ne-hagabaubau bolo ma tangada i kinei e-madagu i God ai, gei digaula ga-daaligi au ga-kae dogu lodo.

20:12  E-donu au gu-helekai bolo mee tuaahina ni-oogu. Mee tama-ahina ni dogu damana, hagalee ni dogu dinana, gei au ne-lodo gi mee.

20:13  Malaa, di madagoaa a God ne-hagau au mai di hale dogu damana gi-lodo nnenua digau tuadimee, au ne-helekai gi-di ahina deenei boloo, ‘Goe gi-haga-laamua-ina au i au helekai gi-nia daangada huogodoo bolo au tuaahina-daane ni-oou.’ ”

20:14  Abimelech gaa-wanga Sarah gi Abraham mono siibi, nia kau, mono hege.

20:15  Gei mee ga-helekai gi Abraham, “Deenei dogu henua hagatau, noho i di-ingoo-hua di gowaa dela e-hiihai ginai goe.”

20:16  Mee ga-helekai gi Sarah, “Au e-wanga nia silber e-mana gi do duaahina-daane e-haga-donu gi digau huogodoo ala e-madalia goe bolo goe e-donu. Nia daangada huogodoo ga-iloo-laa bolo goe digi hai di hala.”

20:17  Mai di hai dela ne-hai gi Sarah di lodo o Abraham, Dimaadua guu-hai di-ingoo-hua di ahina i-lodo di madahaanau Abimelech gi-deemee di-hai nadau dama. Malaa, Abraham ga-dalodalo i Abimelech, gei God gu-haga-humalia Abimelech. God gu-haga-humalia labelaa dono lodo mo ana hege-ahina, gei digaula guu-mee di-hai nadau dama.

20:18  Mai di hai dela ne-hai gi Sarah di lodo o Abraham, Dimaadua guu-hai di-ingoo-hua di ahina i-lodo di madahaanau Abimelech gi-deemee di-hai nadau dama. Malaa, Abraham ga-dalodalo i Abimelech, gei God gu-haga-humalia Abimelech. God gu-haga-humalia labelaa dono lodo mo ana hege-ahina, gei digaula guu-mee di-hai nadau dama.

Chapter 21

21:1  Dimaadua gu-haga-maluagina a Sarah gii-hai be dana hagababa,

21:2  gei Sarah ga-hai-dama ga-haanau dana dama-daane gi Abraham i-di madagoaa o mee gu-madua. Tama-daane la-ne-haanau i-di madagoaa a God dela ne-hai bolo mee e-haanau-ai.

21:3  Abraham gaa-gahi di ingoo o-maa go Isaac.

21:4  Di madagoaa Isaac ne-walu ono laangi, gei Abraham ga-sirkumsais a-mee be nia helekai a God ne-hai.

21:5  Abraham la-guu-lau ono ngadau di madagoaa Isaac ne-haanau.

21:6  Sarah ga-helekai boloo, “God gu-gaamai gi-di-au di tene mo-di gadagada. Digau huogodoo ala ga-longono di mee deenei, la-ga-gadagada madalia au.”

21:7  Gei mee ga-helekai labelaa, “Ma koai dela e-helekai gi Abraham bolo Sarah ga-haga-uu ana dama? Gei deenei au dela gu-haanau gi mee dana dama-daane, gei mee gu-madumadua.”

21:8  Di tama la-gu-tomo-aga, gaa-dae-loo gi-di laangi di tama ne-daa gi-daha mo-di uu, gei Abraham guu-hai dana hagamiami damana.

21:9  Dahi laangi hua, gei Sarah gaa-mmada gi Ishmael dela ne-haanau go Hagar di hege-ahina mai Egypt gi Abraham, e-hai ana daagala ginaua mo Isaac di tama Sarah.

21:10  Gei mee ga-helekai gi Abraham, “Hagau-ina tama-ahina hege deenei mo dana dama la-gi-daha. Tama-daane o tama-ahina hege deenei la-hagalee hai dono duhongo i-di baahi do maluagina dela belee kae go tau dama go Isaac.”

21:11  Di mee deenei gu-haga-lodo-huaidu a Abraham huoloo, idimaa, Ishmael la tama-daane labelaa ni mee.

21:12  Gei God ga-helekai gi Abraham, “Goe hudee mamaanadu lodo-huaidu gi-di tama mo-di hege go Hagar. Heia-hua di hai a Sarah ma-gaa-hai-adu gi-di-goe, idimaa, do hagadili le e-daamada mai i Isaac.

21:13  Au e-wanga labelaa agu dama e-logo gi tama-daane a tama-ahina hege, gii-hai digaula di-nadau henua, idimaa, mee di tama labelaa ni-aau.”

21:14  Hagaluada-loo dono daiaa, gei Abraham gaa-wanga nia meegai gi Hagar mo tei budehede gili-kau e-honu i-nia wai. Mee gaa-dugu di tama la-gi-hongo di tua o-maa, ga-hagau a-mee gii-hana. Mee ga-hagatanga ga-hagadau i-lodo di anggowaa o Beersheba.

21:15  Di madagoaa nia wai la-ne-odi, gei mee gaa-dugu di tama la-gi-lala di laagau i-lodo geinga,

21:16  gaa-hana gaa-noho i-nia piidi e-dolu-lau mada-tanga i-daha mo mee. Mee ga-helekai ang-gi deia, “Au e-deemee di-mmada gi dagu dama e-made.” Dono madagoaa dela e-noho i-golo, gei mee ga-daamada gaa-dangi.

21:17  God gu-longono-Ia tama-daane e-dangidangi, gei tangada di-langi o God ga-helekai gi Hagar mai i-di langi boloo, “Hagar, goe e-lodo-huaidu di-aha? Goe hudee madagu. God gu-longono-Ia tama-daane dela e-dangidangi.

21:18  Du-gi-nua, hana, dahi-aga-ina a-mee mo-di heia a-mee gi-manawa lamalia. Au gaa-hai dagu henua damana mai i dono hagadili.”

21:19  Gei God gaa-huge nia golomada o Hagar, gei mee gaa-mmada gi-di monowai-geli, gei mee gaa-hana ga-haga-hau dana budehede gili-kau gi-nia wai, gaa-wanga nia mada-wai gi-di tama.

21:20  God nogo madalia di tama dono tomo-aga. Mee nogo noho i-lodo di Anggowaa o Paran, gaa-hai tangada e-iloo-ia huoloo di-kumi manu.

21:21  Tinana o-maa gaa-gida dana ahina o Egypt, guu-hai di lodo o Ishmael.

21:22  Di madagoaa deelaa, Abimelech guu-hana dalia Phicol, di tagi di buini-dauwa a-maa, ga-helekai gi Abraham, “God e-madalia goe i-nia mee huogodoo ala e-hai kooe.

21:23  Malaa, heia dau hagamodu i-mua o Dimaadua bolo goe ga-hagalee halahalau au, agu dama, be dogu hagadili. Au nogo hagalaamua goe, malaa, hagababa-mai bolo goe e-hagalaamua au mo tenua deenei e-noho-iei goe.”

21:24  Abraham ga-helekai, “Au e-hagababa beelaa.”

21:25  Abraham ga-helekai hagadonudonu gi Abimelech i-di gili di monowai ne-haga-anga ginai nia gau hai-hegau Abimelech.

21:26  Abimelech ga-helekai, “Au e-de-iloo ma koai ne-hai di hai deenei. Goe digi hagia-mai di-maa, deenei-hua dogu longono-eau di-maa.”

21:27  Abraham gaa-wanga gi Abimelech hunu siibi mono kau, gei meemaa gaa-hai di-nau hagababa.

21:28  Abraham ga-daa-mai ana dama-siibi e-hidu i dana hagabuulinga siibi,

21:29  gei Abimelech ga-heeu gi mee, “Ma nia mee e-hai di-aha?”

21:30  Abraham ga-helekai, “Kaina nia siibi e-hidu aanei. Goe gaa-hai di-mee deenei, gei goe gu-hagamodongoohia bolo ma ko-au dela ne-geli di monowai deenei.”

21:31  Di gowaa deelaa gu-haga-ingoo bolo Beersheba, idimaa deelaa di gowaa ne-hai di-nau hagababa.

21:32  I-muli di-nau hai di hagababa deenei i Beersheba, Abimelech mo Phicol gaa-hula gi-muli gi Philistia.

21:33  Abraham gaa-dogi dana laagau-‘tamarisk’ i Beersheba, ga-daumaha gi Yihowah, go di God dono hagaodi ai.

21:34  Abraham gaa-noho i Philistia di madagoaa e-waalooloo.

Chapter 22

22:1  Nomuli-mai, gei God ga-hagamada a Abraham, gaa-gahi a-mee, “Abraham!” Gei Abraham ga-helekai, “Deenei au!”

22:2  God ga-helekai, “Lahia dau dama-daane, dela go dau dama hua e-dahi go Isaac, dela koia e-aloho-iei goe. Hula gi tenua go Moriah. Tigidaumaha-ina a-mee mai gi-di-Au i-hongo di gonduu dela ga-hagi-adu ko-Au.”

22:3  Hagaluada-loo dono daiaa, gei Abraham gaa-hai ana dohomu ang-gi tigidaumaha, ga-haga-uda gi-hongo dana ‘donkey’, gaa-lahi a Isaac mono hege dogolua dalia ia. Digaula ga-daamada gaa-hula gi-di gowaa dela ne-hagi-anga go God gi mee.

22:4  I-di tolu laangi gei Abraham gaa-mmada gi-di gowaa deelaa e-gila-mai haga-mogowaa.

22:5  Gei mee ga-helekai gi-nia hege, “Noho i ginei, goodou mo-di ‘donkey’. Gimaua mo dagu dama-daane e-hula gi-golo, e-daumaha ga-loomoi labelaa gi goolua.”

22:6  Abraham ga-haga-uda nia dohomu dudu-tigidaumaha gi-hongo Isaac e-kae, geia e-kae dana hulumanu mo dana ahi. Di-nau lloo-adu hua beelaa,

22:7  gei Isaac ga-helekai, “Tamana!” Gei mee ga-helekai, “Deenei au, dagu dama.” Gei Isaac ga-heeu, “Au e-gidee bolo goe dau ahi, mono dohomu, gei dehee tama-siibi belee hai-tigidaumaha?”

22:8  Abraham ga-helekai, “Ma go God gaa-dugu-mai-laa di mee belee hai-ai tigidaumaha.” Gei meemaa dogolua gaa-hula.

22:9  Meemaa gaa-dau i-di gowaa a God dela ne-hagi-anga gi Abraham, gei mee gaa-bae dana gowaa dudu-tigidaumaha, ga-hagatau nia dohomu i nonua. Mee ga-lawalawa dana dama-daane go Isaac, gaa-dugu a-mee gi-hongo nia dohomu i-hongo di gowaa dudu-tigidaumaha.

22:10  Gei mee ga-dahi-aga dana hulumanu belee daaligi a-mee,

22:11  gei tangada-di-langi o Dimaadua gaa-gahi a-mee mai i-di langi boloo, “Abraham, Abraham!” Gei mee ga-helekai, “Deenei au, meenei.”

22:12  Gei tangada di-langi ga-helekai, “Hudee daaligidia di tama be e-hai dau hai gi mee. Dolomeenei gei au gu-iloo bolo goe e-hagalaamua a God, idimaa goe digi dumaanga dau dama hua e-dahi mai gi-di-au.”

22:13  Abraham ga-madamada gi-daha, gaa-mmada gi tama-siibi-daane dela e-lawe i ono madaagoo i-nia geinga. Mee gaa-hana ga-gaamai di-maa, gaa-hai dana tigidaumaha-dudu, e-pono di lohongo o dana dama-daane.

22:14  Abraham ga-haga-ingoo di gowaa deelaa bolo “Yihowah Jireh” Dae-mai-loo gi dangi-nei, gei nia daangada e-hai boloo, “Hongo di gonduu a Yihowah gaa-dugu-mai-laa.”

22:15  Tangada di-langi o Dimaadua ga-gahi-mai labelaa Abraham i-di lua holongo mai di langi,

22:16  ga-helekai boloo, “Deenei Au go Yihowah dela e-helekai, Au gaa-hai dagu hagababa hagamodudahi gi dogu ingoo donu, bolo Au gaa-hai goe gi-maluagina, idimaa goe digi dumaanga dau dama hua e-dahi mai gi-di-Au.

22:17  Au e-hai dagu hagababa bolo Au e-gowadu do hagadili gi-dogo-logowaahee gadoo be nia heduu ala i-di langi, be e-dogologo be nia gelegele ala i tongotai. Do hagadili la-ga-haga-magedaa nadau hagadaumee ge e-kae nadau waahale.

22:18  Nia henua huogodoo ga-tangi-mai gi-di-Au bolo gi-haga-maluagina-ina ginaadou be dagu hai dela ne-haga-maluagina do hagadili, idimaa goe gu-hagalongo-mai gi agu helekai.”

22:19  Nomuli, gei Abraham gaa-hana gi-muli gi-baahi ana gau hai-hegau, gaa-hula ginaadou ngaadahi gi Beersheba, di gowaa dela e-noho-ai Abraham.

22:20  Di madagoaa no-muli, Abraham guu-longo bolo Milcah gu-haanau ana dama dogowalu mai dono duaahina-daane go Nahor.

22:21  Uz di ulu-madua, Buz dono duaahina-daane, Kemuel go tamana o Aram,

22:22  Chesed, Hazo, Pildash, Jidlaph mo Bethuel,

22:23  tamana o Rebecca. Milcah ne-hai ana dama dogowalu aanei gi Nahor, tuaahina-daane Abraham.

22:24  Reumah, di lodo-hege a Nahor ne-haanau Tebah, Gaham, Tahash mo Maacah.

Chapter 23

23:1  Sarah ne-mouli nia ngadau e-lau-madalua maa-hidu (127).

23:2  Mee ne-made i Hebron, i tenua go Canaan, gei Abraham gu-lodo-huaidu gi di made o-maa.

23:3  Mee ga-hagatanga i-di gowaa e-moe-ai dono lodo, gaa-hana gi digau Hittite, ga-helekai,

23:4  “Au tangada tuadimee e-noho i kinei i godou baahi. Huia-mai tei gowaa gii-mee au di-danu dogu lodo.”

23:5  Digaula ga-helekai,

23:6  “Meenei, hagalongo-mai gi gimaadou, gimaadou e-mmada-adu bolo goe taane aamua gei e-mogobuna. Danumia doo lodo i taalunga dela e-kaedahi e-humalia i madau baahi. Tei gimaadou e-tenetene di-gowadu taalunga e-danu-iei mee.”

23:7  Abraham ga-bala gi-lala i-mua digaula,

23:8  ga-helekai, “Maa goodou e-hiihai gi-di-au e-danu dogu lodo i kinei, dumaalia, hai gi Ephron tama-daane a Zohar

23:9  gi-huia-mai di Bagungoo Machpelah dela e-hoohoo gi taalinga di gowaa o-maa. Dangi ang-gi mee gi-huia-mai di-maa gi-di hui o-di gowaa hagatau i godou mua e-hai dagu gowaa danu dangada.”

23:10  Ephron nogo noho dalia digau Hittite i-di gowaa hai dagabuli i-di bontai di abaaba di waahale, gei mee ga-helekai gi Abraham i-mua nia daangada huogodoo,

23:11  “Hagalongo-mai-mua meenei. Au e-gowadu di gowaa hagatau mo-di bagungoo no-lodo. I-mua ogu daangada donu, au ga-gowadu di-maa gii-mee goe di-danu doo lodo.”

23:12  Abraham gaa-bala gi-lala i-mua digau Hittite,

23:13  ga-helekai gi Ephron gi-longono nia daangada huogodoo, “Goe gi-dumaalia mai-mua, hagalongo-mai. Au e-hui di gowaa hagatau. Kaina di hui di-maa, gei au gaa-danu dogu lodo i-golo.”

23:14  Ephron ga-helekai,

23:15  “Meenei, di gowaa le e-hui gi-nia bahihadu-silber haa-lau-(400), gei nia bahi-hadu aalaa la di-aha i tau mehanga? Danu-mia doo lodo i-lodo di gowaa.”

23:16  Abraham guu-donu ginai, ga-pauna di hulu be-di helekai Ephron ne-hai i-mua digau dogologo aalaa ala go nia bahihadu-silber haa-lau-(400), e-hagatau gi-di hui dela e-hai-hegau-ai digau huihui mee.

23:17  Deelaa di hai o-di gowaa Ephron i Machpelah i-bahi-i-dua o Mamre ne-hai di gowaa ni Abraham. Di gowaa deelaa la iai di gowaa dogi mee mo di bagungoo no-lodo, mo nia laagau huogodoo e-tugi i taalinga di gowaa.

23:18  Di gowaa deenei guu-dugu go digau Hittite huogodoo ala nogo dagabuli bolo di gowaa ni Abraham.

23:19  Nomuli, gei Abraham gaa-danu dono lodo Sarah i-lodo di bagungoo deelaa i tenua Canaan.

23:20  Malaa, di gowaa digau Hittite mo dono bagungoo guu-hai di gowaa ni Abraham belee hai di gowaa danu dangada.

Chapter 24

24:1  Abraham gu-madumadua, gei Dimaadua gu-haga-maluagina a-mee i ana mee huogodoo ala e-hai.

24:2  Mee ga-helekai gi dana dangada hai-hegau dela madua, dela e-dagi ana mee huogodoo, boloo, “Dugu-ina doo lima i-mehanga ogu gadawae, heia dau hagamodudahi.

24:3  Au e-hiihai bolo goe gi-heia dau hagamodudahi i-di ingoo o Yihowah, di God o-di langi mo henuailala, bolo goe hagalee hilihili dau ahina e-hai di lodo dagu dama-daane i-lodo digau Canaan ala i-ginei.

24:4  Goe hana gi-muli gi tenua dela ne-haanau-iei au, e-laha-mai dau ahina dela e-hai di lodo dagu dama-daane go Isaac mai i-lodo ogu gau ala i-golo.”

24:5  Gei tangada hai-hegau ga-heeu, “Dolomaa tama-ahina la-ga-de-hiihai di-diiagi dono guongo, ga-hagalee hanimoi i ogu muli gi tenua deenei. Au ga-hagau dau dama-daane la-gi tenua dela ne-hanimoi-iei goe?”

24:6  Abraham ga-helekai, “Heia gi-humalia gi-dee-lahi-hua dagu dama-daane la-gi-golo.

24:7  Yihowah go di God o-di langi ne-laha-mai au gi-daha mo-di guongo o dogu damana mo-di gowaa o ogu gau. Mee guu-hai dana hagababa hagahumalia mai gi-di-au bolo Ia gaa-wanga tenua deenei gi dogu hagadili. Mee ga-hagau dana dangada-di-langi i oo mua gii-mee di-laha-mai dau ahina e-hai di lodo dagu dama-daane.

24:8  Tama-ahina ma-ga-de-hiihai di-hanimoi i oo muli, gei goe gu-i-daha mo-di hagababa deenei. Gei goe hude lahia dagu dama-daane gi-golo.”

24:9  Gei tangada hai-hegau gaa-dugu dono lima gi-mehanga nia gadawae o Abraham go dono dagi, gaa-hai dana hagababa hagamodudahi bolo ia gaa-hai nia mee a Abraham ala guu-hai ang-gi deia.

24:10  Tangada hai-hegau dela e-dagi nia goloo Abraham, ga-hagatogomaalia ana ‘camel’ madangaholu i-nia manu o dono dagi go Abraham, gaa-hana gi-di waahale dela nogo noho-ai a Nahor i bahi-i-ngeia Mesopotamia.

24:11  Mee ne-dau i-golo, gei mee gaa-hai nia ‘camel’ gi-togo-iha gi-lala i-baahi di monowai-geli i-daha mo-di waahale deelaa. Hiahi-ia di mee, la di madagoaa nia ahina e-loomoi e-kae nadau wai.

24:12  Mee ga-dalodalo, “Meenei Yihowah, di God o dogu dagi go Abraham, gaamai dogu haadanga-lamalia dangi-nei, gei daahia dau hagababa dela ne-hai ang-gi dogu dagi.

24:13  Deenei au i-di monowai-geli dela e-lolloomoi ginai nia ahina o di waahale deenei, e-lloomoi ginai e-kae nadau wai.

24:14  Au ga-helekai gi tei digaula boloo, ‘Hudee heheia-mua, dugu-eia dau loloaabi mo-di dumaalia-mai gi-di-au, au e-inu.’ Maa mee ga-helekai boloo, ‘Inu, gei-au ga-gaamai labelaa agu wai gi au “camel”,’ gei au ga-iloo bolo ma go mee dela guu-dongo Kooe bolo e-hai di lodo dau dama hai-hegau go Isaac. Ma-gaa-hai beenei, gei au ga-iloo bolo Goe gu-daahi dau hagababa ang-gi dogu dagi.”

24:15  Mua dana haga-lawa dana dalodalo, gei Rebecca gaa-dau mo dana loloaabi i-hongo dono bakau. Mee go tama-ahina Bethuel, tama ni tuaahina-daane Abraham go Nahor mo dono lodo go Milcah.

24:16  Mee tama-ahina madanga huoloo, ge digi hai di huaidu, ge-madammaa. Mee ne-hana gi-di monowai i-lala, gaa-udu dana loloaabi wai, ga-hanaga.

24:17  Tangada hai-hegau gaa-lele gi mee, ga-helekai, “Hudee heheia-mua, heia au gi-inu nia wai i dau loloaabi.”

24:18  Gei mee ga-helekai, “Meenei, inu,” mo-di dugu-ia dana loloaabi i dono bakau, ga-daahi gi mee, gei mee ga-inu.

24:19  Mee dela ne-lawa, gei di ahina ga-helekai, “Au ga-huai-aga labelaa agu wai gi au ‘camel’, gaa-hai digaula gi-inu huogodoo i nadau mee ala e-hiihai ginai.”

24:20  Gei mee ga-haga-inu hagalimalima nia ‘camel’ a-maa, gaa-lele labelaa gi-di monowai e-gowaga labelaa ana wai gaa-dae-loo gi-nia ‘camel’ la-gu-inu huogodoo.

24:21  Gei taane le e-daumada a-mee dee-muu, e-mmada be Dimaadua gu-hagagila humalia dono hanimoi.

24:22  Di madagoaa nia ‘camel’ la-guu-lawa di-inu, gei taane ga-dahi-aga dana buulei goolo hui-ngadaa, gaa-wanga gi-di uhi o-maa, ge nia duu-lima goolo e-lua, gaa-wanga gi-nia lima o-maa.

24:23  Gei mee ga-helekai, “Hudee heheia-mua, hagia-mai be do damana la-go-ai, gei di-maa e-oo i-baahi o mee e-kii-ai gimaadou mo ogu ihoo ma-ga-boo-nei?”

24:24  Tama-ahina ga-helekai, “Dogu damana la-go Bethuel, go tama-daane Nahor mo Milcah.

24:25  Gei di-maa e-logo-hua nia geinga mono mee haangai manu i-di-madau hale, gei e-oo-hua di gowaa e-noho-ai goodou.”

24:26  Gei taane la-ga-dogoduli-iha gi-lala ga-daumaha gi Dimaadua,

24:27  mo-di helekai, “Au e-hagaamu Dimaadua, go di God o dogu dagi go Abraham, dela nogo daahi dana hagababa dela ne-hai ang-gi dogu dagi. Dimaadua gu-dugu-mai au gii-hana haga-huudonu gi-nia gau o dogu dagi.”

24:28  Tama-ahina deelaa gaa-lele gi-di hale dono dinana, ga-hagi-anga gi mee nia mee ala ne-hai huogodoo.

24:29  Gei Rebecca dono duaahina-daane go Laban. Gei Laban gaa-lele gi-di malaelae belee hana gi-di gowaa dela e-iai tangada hai-hegau Abraham.

24:30  Laban gu-gidee-ia di buulei uhi mo nia duu-lima ala e-ulu-ai dono duaahina-ahina, gei gu-hagalongo gi Rebecca e-hai nia helekai taane ne-hai ang-gi-deia, gei Laban gaa-hana gi tangada hai-hegau Abraham dela e-duu i-baahi ana ‘camel’ i-di monowai-geli,

24:31  ga-helekai, “Hanimoi i ogu muli, gaa-hula. Goe go taane dela ne-haga-maluagina go Dimaadua. Goe e-duu i ginei eiaha? Au dagu ruum gu-togomaalia adu gi-di-goe i-lodo dogu hale, gei iai di gowaa i-golo e-dugu-ai au ‘camel’.”

24:32  Gei taane gaa-hana gi-lodo di hale, gei Laban gaa-dugu gi-lala nia goloo o-nia ‘camel’, gaa-wanga nadau lau-laagau mono mee haangai manu gi digaula. Gaa-lawa ga-gaamai ana wai gi tangada hai-hegau Abraham mo ono ehoo e-tono nadau wae.

24:33  Di madagoaa nia meegai ala ne-gaamai, gei taane ga-helekai, “Au hagalee miami, ga-miami-laa i-muli agu helekai ala belee hai.” Laban ga-helekai, “Helekai goe.”

24:34  Mee ga-helekai, “Au tangada hai-hegau ni Abraham.

24:35  Dimaadua gu-haga-maluagina dogu dagi guu-hai a-mee gii-hai tangada maluagina. Mee guu-wanga ana llongo-siibi mo kuudi, nia kau, silber, goolo, mo ana hege-ahina mo daane, nia ‘camel’ mono ‘donkey’.

24:36  Sarah go di lodo dogu dagi ne-haanau dana dama-daane, gei mee gu-madua, gei dogu dagi guu-wanga ana mee huogodoo nogo hai-mee ginai la-gi mee.

24:37  Dogu dagi ne-hai au gii-hai dagu hagababa hagamodudahi, bolo au e-hagalongo ang-gi dana helekai hagalabagau. Mee ne-helekai, ‘Hudee hilihilia dau ahina i tenua go Canaan belee hai di lodo dagu dama-daane.

24:38  Goe e-hana gi-di madawaawa o dogu damana, mo ogu gau, ga-hilihili di lodo o dagu dama-daane.’

24:39  Gei-au ga-heeu gi dogu dagi, ‘Ma e-hai behee maa di ahina la-ga-hagalee hanimoi i ogu muli?’

24:40  Gei mee ga-helekai, ‘Dimaadua dela koia e-hagalongo ginai au i-nia madagoaa huogodoo, ga-hagau dana dangada di-langi dalia goe, gaa-hai goe gi-haadanga-lamalia. Goe ga-laha-mai di lodo dagu dama-daane mai i ogu gau donu, mai di hale o dogu damana.

24:41  Ma di ala hua e-dahi deenei dela e-hai goe gi-mehede gi-daha mo dau hagababa hagamodudahi: Maa goe gaa-hana gi ogu gau gei digaula ga-dumaanga, gei goe gu-mehede.’

24:42  “Dogu hanimoi gi-di monowai-geli dangi-nei, gei-au ga-dalodalo boloo, ‘Meenei Yihowah go di God o dogu dagi go Abraham, hudee heheia-mua, gaamai dogu haadanga-lamalia i agu mee ala e-hai.

24:43  Deenei au i-di monowai-geli. Maa iai tama-ahina gu-hanimoi belee kae ana wai, gei-au ga-helekai gi mee bolo au e-inu i dana loloaabi wai,

24:44  gei mee gu-hiihai gei gu-gaamai labelaa ana wai gi agu ‘camel’, deelaa-laa go mee dela gu-hilihili Kooe bolo dela di lodo o tama-daane o dogu dagi.’

24:45  I-mua di haga-lawa dagu dalodalo dee-muu, Rebecca ga-haneia mo dana loloaabi i-hongo dono bakau gaa-hana gi-lala gi-di monowai e-huai ana wai, gei-au ga-helekai gi mee, ‘Hudee heheia-mua, gaamai hunu wai e-inu.’

24:46  Gei mee gu-limalima-hua gu-dugu-iha dana loloaabi i dono bakau mo-di helekai, ‘Inu, gei-au ga-haga-inu labelaa au ‘camel’.’ Malaa, au ga-inu, gei mee ga-haga-inu agu ‘camel’.

24:47  Au ga-heeu gi mee, ‘Do damana la-go-ai?’ Gei mee ga-helekai, ‘Dogu damana la-go Bethuel, go tama-daane a Nahor mo Milcah.’ Gei-au gaa-wanga dagu buulei goolo gi-di uhi o-maa mono duu-lima gi ono lima.

24:48  Gei au ga-dogoduli gi-lala ga-daumaha gi Dimaadua. Au e-hagaamu Dimaadua go di God o dogu dagi go Abraham dela ne-lahi haga-huudonu au gi-nia gau o dogu dagi, dela gu-gidee-au tama-ahina ang-gi tama-daane o dogu dagi.

24:49  Dolomeenei, helekai-mai be maa goolua e-haga-gila di-gulu waawa ang-gi dogu dagi, ge e-hai a-mee hagahumalia, gei goolua ga-dumaalia. Be maa e-deeai, gei goolua gi-helekai haga-huudonu gi-iloo-eau be dehee dagu hai gaa-hai.”

24:50  Laban mo Bethuel ga-helekai, “Idimaa di mee deenei ne-hai-mai i-baahi Dimaadua, gei di-maa hagalee go gimaua belee hai di-mau hiihai.

24:51  Deenei Rebecca, lahia a-mee, hula. Heia a-mee gii-hai di lodo ni tama-daane o doo dagi gii-hai be nia helekai a Dimaadua ne-hai.”

24:52  Tangada hai-hegau Abraham deenei ne-longono-ia telekai deenei, gei mee gu-bala-loo gi-lala gu-daumaha gi Dimaadua.

24:53  Gei mee gaa-dugu-mai gi-daha ana goloo gahu mono silber mono hadu hagalabagau, gaa-wanga gi Rebecca, gei mee guu-wanga ana wanga-dehuia hui-ngadaa gi tuaahina-daane o-maa mo tinana o-maa.

24:54  Tangada hai-hegau Abraham mono daane ala i-baahi o mee ga-miami gei ga-inu, gaa-kii boo i-golo. Digaula ga-aala-aga luada, gei mee ga-helekai, “Dugua-mai au gii-hana labelaa gi dogu dagi.”

24:55  Gei-ogo tuaahina-daane o Rebecca mo tinana o-maa ga-helekai, “Dugu-ina ang-gi tama-ahina gii-noho i madau baahi i tabu e-dahi be nia laangi madangaholu, nomuli gei mee gaa-hana.”

24:56  Gei mee ga-helekai, “Hudee dugua gimaadou gii-noho. Dimaadua guu-hai dogu holongo-nei gii-gila humalia, dugua-mai au gii-hana gi dogu dagi.”

24:57  Gei meemaa ga-helekai, “Gahigahia-malaa tama-ahina gi-hagalongo gidaadou be mee e-helekai bolo-aha.”

24:58  Gei digaula ga-gahi-mai Rebecca, ga-heeu, “Goe e-hiihai e-hana i-muli taane deenei?” Gei mee ga-helekai, “Uaa.”

24:59  Gei meemaa gaa-dugu-anga Rebecca mo dana hege-ahina madua gii-hula i-muli tangada hai-hegau Abraham mo ono ehoo-daane.

24:60  Gei meemaa gaa-wanga di-nau hagaaloho haga-muliagina gi Rebecca i-nia helekai aanei: “Kooe go di-madau duaahina-ahina, goe gii-hai tinana ni digau dogologowaahee! Gei do hagadili gi-gumidia nia waahale o nadau hagadaumee!”

24:61  Rebecca mo ono ehoo dama-ahina gu-togomaalia guu-kaga gi-hongo nia ‘camel’ belee hula i-muli tangada hai-hegau Abraham, gei digaula ga-hagatanga.

24:62  Isaac gu-hanimoi gi lodo-geinga i Beer Lahai Roi, gei mee e-noho i Negev i-bahi-i-ngaaga o Canaan.

24:63  Mee guu-hana haga-hiahi-loo belee heehee i-lodo nia gowaa maalama, geia gaa-mmada gi-nia ‘camel’ e-loomoi.

24:64  Di madagoaa Rebecca ne-gidee-ia Isaac, gei mee gaa-doo gi-lala mo dana ‘camel’,

24:65  ga-heeu gi tangada hai-hegau Abraham, “Ma taane koai dela e-hanimoi gi gidaadou i-di gowaa maalama?” Tangada hai-hegau Abraham ga-helekai, “Mee go dogu dagi.” Gei Rebecca ga-dahi-aga dana mee-gahu-libogo, gaa-gahu ono golomada.

24:66  Tangada hai-hegau ga-hagi-anga gi Isaac ana mee ala ne-hai huogodoo.

24:67  Gei Isaac ga-laha-mai a Rebecca gi-lodo di hale-laa dela nogo noho-ai dono dinana go Sarah, gei Rebecca gaa-hai di lodo ni mee. Isaac gu-aloho i Rebecca, gei gu-haga-manawa lamalia ia i-muli dono dinana ne-made.

Chapter 25

25:1  Abraham guu-lodo labelaa gi tuai ahina, dono ingoo go Keturah.

25:2  Mee ne-haanau Zimran, Jokshan, Medan, Midian, Ishbak mo Shuah.

25:3  Jokshan la tamana ni Sheba mo Dedan, nia hagadili o Dedan la digau Ashur, Letush mo Leum.

25:4  Nia dama-daane a Midian go Ephah, Epher, Hanoch, Abida mo Eldaah. Huogodoo aanei la nia hagadili ni Keturah.

25:5  Abraham guu-dugu-anga ana mee huogodoo gi Isaac,

25:6  gei dono madagoaa nogo mouli hua igolo, mee guu-wanga ana wanga-dehuia gi ana dama-daane mai ono lodo ala i-golo. Nomuli, gei mee ga-hagau ana dama-daane aanei gi nnenua o dua, gi-daha mo dana dama-daane go Isaac.

25:7  Abraham ne-made, gei mee gu-175 ono ngadau.

25:8  Abraham ne-made, gei mee gu-175 ono ngadau.

25:9  Ana dama-daane go Isaac mo Ishmael guu-danu a mee i-di lua Machpelah i tenua bahi-i-dua Mamre dela nogo hai tenua ni Ephron, tama-daane Zohar, tangada Hittite.

25:10  Deenei go tenua Abraham ne-hui mai digau Hittite. Abraham mo dono lodo Sarah ne-danu i-golo.

25:11  I-muli di made o Abraham, God gu-haga-maluagina dana dama-daane Isaac dela nogo noho hoohoo gi Beer Lahai Roi.

25:12  Ishmael la tama ni Abraham mo Hagar, di ahina Egypt, di hege ni Sarah.

25:13  Aanei la ana dama-daane, e-hagatau gi nadau mmaadua: go Nebaioth, Kedar, Adbeel, Mibsam,

25:14  Mishma, Dumah, Massa,

25:15  Hadad, Tema, Jetur, Naphish mo Kedemah.

25:16  Digaula nia maadua-mmaadua o-nia madawaawa madangaholu maa-lua, ge nadau ingoo la ne-wanga gi nadau guongo mo nia gowaa e-noho-ai ginaadou.

25:17  Ishmael gu-137 ono ngadau gaa-made-laa.

25:18  Nia hagadili o Ishmael la nogo noho i-lodo tenua i-mehanga Havilah mo Shur, i-bahi-i-dua Egypt i-di ala gi Assyria. Digaula nogo noho i-daha mo nia hagadili o Abraham ala i-golo.

25:19  Deenei di kai o tama-daane Abraham go Isaac.

25:20  Isaac gu-mada-haa ono ngadau, gei mee gaa-lodo gi Rebecca, tama-ahina ni Bethuel (tangada mai Aram o Mesopotamia). Rebecca la tuaahina-ahina ni Laban.

25:21  Idimaa Rebecca di ahina dee-huwa, gei Isaac ga-dalodalo ang-gi Dimaadua i mee, gei Dimaadua ga-hagalongo gi mee, gei Rebecca ga-hai-dama.

25:22  Mee gu-hai-dama i-nia dama dogolua. I-mua di-nau haanau-mai, gei nia dama dogolua aalaa le e-hai di-nau honohono i ginaua i-lodo tinae di-nau dinana. Gei Rebecca ga-helekai, “Ma di-aha deenei ga-hai-mai gi-di-au beenei?” Gei mee ga-dalodalo ang-gi Dimaadua gi-haga-modongoohia ang-gi deia.

25:23  Gei Dimaadua ga-helekai-anga, “Nia madawaawa e-lua aanaa i-lodo do dinae. Goe ga-haanau-mai au daangada hagadau bebeehi ginaua. Di madawaawa e-dahi e-maaloo i-di madawaawa dela i-golo, tangada madua e-hege gi tangada dulii.”

25:24  Rebecca guu-dau gi dono madagoaa e-haanau-ai, gei mee ga-haanau-mai ana dama-daane dogolua.

25:25  Di tama i-mua le e-gono anga-mmee, gei dono gili le e-huluhulu, malaa, digaula gaa-gahi di ingoo o-maa go Esau.

25:26  Di tama nomuli ga-haanau, gei e-kumi di muliwae o Esau, digaula gaa-gahi di ingoo o-maa go Jacob. Isaac gu-modoono ono ngadau, gei nia dama aanei ga-haanau-mai.

25:27  Nia dama aanei ga-mmaadua-aga, gei Esau gaa-hai tangada modogologolo di puu manu, gu-hiihai-hua bolo ia e-noho-hua i-lodo henua, gei Jacob tangada noho dee-muu e-hiihai-hua bolo ia e-noho i-baahi dono hale.

25:28  Isaac e-hagalabagau huoloo Esau, i dono hiihai e-gaigai nia manu ala e-gowegoweia go mee, gei Rebecca e-hagalabagau huoloo Jacob.

25:29  Dahi laangi hua, gei Jacob e-dunu dana suub golee laagau, gei Esau ga-haneia i-lodo henua gu-hiigai huoloo,

25:30  ga-helekai gi Jacob, “Au gu-hiigai huoloo, gaamai hunu mee suub dulii i dau suub mmee deenaa.” (Deelaa di-mee e-haga-ingoo-iei mee bolo Edom.)

25:31  Jacob ga-helekai, “Au e-gowadu-hua gi-di-goe, maa goe ga-gaamai gi-di-au di maluagina o do madua.”

25:32  Esau ga-helekai, “Au gaa-made, dogu maluagina le e-hai dana humalia aha mai gi-di-au?”

25:33  Jacob ga-helekai, “Hagamodu-ina mai malaa gi-di-au bolo goe ga-gaamai gi-di-au di tonu o do maluagina.” Esau gaa-hai dana hagamodu ga-hagababa ang-gi Jacob di tonu o dono maluagina.

25:34  Malaa, Jacob gaa-wanga ana mee suub mono mee palaawaa, gei Esau ga-miami gaa-lawa, gei mee gaa-hana. Deenei di hai o Esau dono de-hagalabagau di tonu o-di maluagina o tama madua.

Chapter 26

26:1  Taumagamaga ne-hai labelaa i-hongo tenua i-muli taumagamaga ne-hai i-di madagoaa Abraham. Malaa Isaac gaa-hana gi Abimelech, di king o digau Philistia i Gerar.

26:2  Dimaadua ne-hagagida gi Isaac ga-helekai, “Hudee hana gi Egypt, noho-hua i tenua deenei, i-di gowaa dela ga-hagi-adu e-noho-ai.

26:3  Noho i kinei, gei Au ga-madalia goe ga-hagahumalia goe. Au ga-gowadu gi-di-goe mo o hagadili tenua deenei hagatau. Au ga-haga-gila dagu hagababa ne-hai gi do damana Abraham.

26:4  Au ga-gowadu o hagadili e-logo be nia heduu i-di langi, gaa-wanga gi digaula tenua deenei hagatau. Nnenua huogodoo ga-dangidangi-mai bolo gi-haga-humalia-ina ginaadou be dagu hagahumalia o hagadili.

26:5  Au ga-hagahumalia goe idimaa Abraham gu-hagalongo-mai gu-hagakila agu haganoho mo agu helekai.”

26:6  Gei Isaac guu-noho i Gerar.

26:7  Di madagoaa nia daane o tenua ne-heeu gi mee i-di lodo o-maa, gei mee ga-helekai bolo mee tuaahina ahina ni-oono. Mee hagalee helekai bolo mee di lodo ni-oono, idimaa mee e-madagu bolo nia daane aalaa ga-daaligi ia e-lahi a Rebecca dela e-madanga huoloo.

26:8  Isaac guu-noho waalooloo i-golo, gei di King Abimelech ga-mmada-ia i dono bontai dulii gi Isaac mo Rebecca e-hai di hiihai o tagahailodo.

26:9  Abimelech ga-gahi-mai a Isaac, ga-helekai, “E-donu! Mee di lodo ni-oou! Goe e-aha ne-helekai bolo mee tuaahina ahina ni-oou?” Isaac ga-helekai, “Au ne-hagabau bolo au ga-daaligi, maa au ga-helekai bolo mee di lodo ni-oogu.”

26:10  Abimelech ga-helekai, “Goe ne-hai dau-aha mai gi gimaadou? Dahi dangada i agu daane gu-haingoohia-hua di-kii i-baahi doo lodo, gei goe ga-hai-mee gi-di-madau ihala deelaa.”

26:11  Abimelech ga-aago ana daangada huogodoo, “Di-ingoo-hua tangada ma-ga-hagahuaidu taane deenei be go dono lodo le e-daaligi gii-made.”

26:12  Isaac gaa-dogi ana laagau huwa-meegai i-hongo tenua deelaa, malaa, i-lodo di ngadau deelaa mee ne-hadi ana huwa-laagau nnolongo e-lau laa-hongo ana mee ala ne-dogi, idimaa Dimaadua gu-haga-maluagina a-mee.

26:13  Mee ne-hagamaluagina hua igolo gaa-hai tangada maluagina.

26:14  Gei digau Philistia gu-dubua gi mee, idimaa mee nogo ana siibi mono kau e-logo mo ana gau hai-hegau e-dogologo.

26:15  Malaa, digau Philistia gaa-danu nia monowai digau hai-hegau Abraham ne-geli i dono madagoaa nogo mouli.

26:16  Abimelech ga-helekai gi Isaac, “Hana gi-daha mo tenua deenei. Goe gu-maaloo i gimaadou.”

26:17  Isaac ga-hagatanga gaa-hana, ga-hagaduu-aga dono waahale-laa i-di gowaa mehanga gonduu i Gerar, ga-noho-ai.

26:18  Gei mee gaa-geli labelaa nia monowai ne-geli i-di madagoaa Abraham, ala ne-danu go digau Philistia i-muli di made Abraham. Isaac ga-haga-ingoo nia maa gi-nia ingoo Abraham ne-gahi.

26:19  Digau hai-hegau Isaac gaa-geli di monowai i-golo, ga-gidee nia wai i-lodo di-maa.

26:20  Gei digau hagaloohi siibi o Gerar gu-lagamaaloo gi digau hagaloohi siibi Isaac, ga-helekai, “Nia wai aanei la nia wai ni gimaadou.” Gei Isaac gaa-gahi di monowai deenei Esek, (dono hadinga bolo ‘Lagamaaloo’).

26:21  Digau hai-hegau Isaac gaa-geli labelaa tuai monowai, gei di lagamaaloo guu-hai labelaa i di-maa, gei Isaac gaa-gahi di-maa bolo Sitnah, (dono hadinga bolo “Hai-baahi”).

26:22  Mee ga-menege gi-daha mo-di gowaa deelaa, gaa-geli labelaa dana monowai. Nia lagamaaloo ne-hai ai, gei mee ga-hagaingoo di-maa bolo Rehoboth, (dono hadinga bolo ‘Moholo’). Mee ga-helekai, “Dolomeenei Dimaadua gu-gaamai tadau moholo e-noho i-hongo tenua deenei, gei gidaadou ga-maluagina.”

26:23  Isaac ga-hagatanga gaa-hana gi Beersheba.

26:24  Di boo-hua deelaa, gei Dimaadua ga-hagagida gi-mee ga-helekai, “Au go di God o do damana go Abraham. Hudee madagu, Au e-madalia goe. Au ga-hagahumalia goe, ga-gowadu o hagadili gi-dogologo, idimaa i dagu hagababa gi dagu dangada hai-hegau go Abraham.”

26:25  Isaac gaa-hai dana gowaa hai tigidaumaha, ga-daumaha gi Dimaadua, ga-haga-duu-aga dana waahale-laa i-golo, gei ana gau hai-hegau gaa-geli labelaa tuai monowai.

26:26  Abimelech ga-hanimoi i Gerar mo dana dangada hagamaamaa go Ahuzzath, mo Phicol, tagi-dauwa o dana buini-dauwa, belee heetugi gi Isaac.

26:27  Isaac ga-heeu, “Goodou hagalee nogo hagadau-ihoo mai gi-di-au i-mua, guu-hai au gii-hana gi-daha mo di-godou henua. Gei dolomeenei, goodou e-loomoi e-heetugi mai gi-di-au eiaha?”

26:28  Digaula ga-helekai, “Dolomeenei gimaadou gu-iloo bolo Dimaadua la i do baahi, malaa, gimaadou e-hagabaubau bolo di hagababa humalia e-hai gii-hai i tadau mehanga. Gimaadou e-hiihai bolo goe gi-hagababa-mai

26:29  bolo goe hagalee haga-huaidu gimaadou, e-hai be gimaadou ala digi haga-huaidu goe. Gimaadou nogo humalia-adu gaa-dugu goe gii-hana haga-humalia. Dolomeenei la-gu-modongoohia bolo Dimaadua la-gu-haga-humalia goe.”

26:30  Isaac guu-hai dana hagamiami gi digaula, gu-miami gu-inuinu.

26:31  Luada-loo dono daiaa, gei meemaa gaa-hai nau hagababa hagamodudahi. Isaac gaa-hai dana hagamaewae gi digaula, gei digaula ga-hagatanga be nia hoo hagaaloho.

26:32  Di laangi-hua deelaa, digau hai-hegau Isaac ga-loomoi ga-hagi-anga gi Isaac di monowai ne-geli go ginaadou. Digaula e-helekai boloo, “Gimaadou gu-gidee nia wai.”

26:33  Gei Isaac gaa-gahi di monowai bolo ‘Beersheba’, (dono hadinga bolo ‘Di Monowai di Hagamodu’). Deelaa di hai di waahale Beersheba ne-hai dono ingoo.

26:34  Esau gu-madahaa ono ngadau, gei mee gaa-lodo gi-nia ahina Hittite dogolua go Judith tama-ahina a Beeri, mo Basemath tama-ahina a Elon.

26:35  Meemaa e-hagahuaidu di mouli Isaac mo Rebecca.

Chapter 27

27:1  Di madagoaa Isaac ne-madua gei gu-dee-gida, gei mee ga-gahi-mai dana dama-madua go Esau, ga-helekai, “Dagu dama-daane!” Esau ga-helekai, “Deenei au.”

27:2  Isaac ga-helekai, “Goe gu-iloo-hua bolo au gu-madua, gei gu-hoohoo gaa-made.

27:3  Kae-ina dau maalei mo ono daalo, hana gi-lodo henua, puugia dau manu, goweia e-gai ko-au.

27:4  Duna-ina gii-kala gii-hai be dogu hiihai, gaamai gi-di-au. I-muli-hua dogu gai nia maa, gei au gaa-hai-adu gi-di-goe dagu boloagi i-mua dogu made.”

27:5  Di madagoaa-hua Isaac dela e-leelee gi Esau, gei Rebecca e-hagalongo. I-muli-hua Esau dela ne-hana gi-lodo henua,

27:6  gei Rebecca ga-helekai gi Jacob, “Au gu-hagalongo gi do damana e-helekai gi Esau boloo,

27:7  ‘Hana, goweia dau manu, duna-ina mai gi-di-au. I-muli-hua dogu gai di-maa, gei au gaa-hai-adu gi-di-goe dagu boloagi i-mua nia hadumada o Dimaadua i-mua dogu made.’ ”

27:8  Rebecca ga-helekai-adu labelaa, “Dagu dama-daane, hagalongo-mai gi-di-au: Heia agu mee ala ga-hagi-adu gi-di-goe gi-heia.

27:9  Hana gi-baahi nia kuudi, goweia au kuudi pedi e-lua, gaamai gi-di-au, gei au gaa-dunu gii-kala gii-hai be-di hiihai o do damana.

27:10  Gaa-kae kooe gi mee gi-geina, gei mee gaa-hai-adu gi-di-goe dana boloagi i-mua dono made.”

27:11  Jacob ga-helekai gi dono dinana, “Goe e-iloo-hua bolo Esau la tangada huluhulu, gei au la tangada hua malallali dogu gili.

27:12  Dolomaa dogu damana gaa-bili-mai gi-di-au, ga-iloo-ia bolo au e-halahalau ia, gei mee ga-haga-halauwa au, ga-hagalee haga-maluagina au.”

27:13  Tinana o-maa ga-helekai gi mee, “Dagu dama-daane, o haga-halauwa la-gi-lloomoi gi-di-au. Hagalongo-mai-hua gi agu mee ala e-hai-adu, hana goweia nia kuudi gi-di-au.”

27:14  Gei Jacob gaa-hana ga-goweia nia kuudi gi dono dinana, gei dono dinana gaa-dunu nia maa gii-kala huoloo gii-hai be-di hiihai o Isaac.

27:15  Gei Rebecca ga-gaamai nia gahu humalia o Esau ala nogo benebene go mee i-lodo di hale, ga-haga-ulu-ginai Jacob,

27:16  ga-gaamai nia gili kuudi gaa-hii nia lima o-maa mo-di uwa o-maa.

27:17  Rebecca gaa-wanga gi mee taga-ngudu kala huoloo mono palaawaa dulii ala ne-dunu go mee.

27:18  Jacob gaa-hana gaa-kae nia maa gi dono damana, ga-helekai, “Tamana!” Isaac ga-helekai, “Deenei au. Goe go dagu dama-daane behee deenaa?”

27:19  Jacob ga-helekai-anga, “Ko-au go dau dama-daane madua go Esau. Au guu-hai au mee huogodoo ala bolo gi-heia. Nnoinua gii-gai au mee mada-goneiga ala ne-gaamai ko-au belee gai kooe, gi-heia-mai dau boloagi mai gi-di-au.”

27:20  Isaac ga-helekai, “Dagu dama-daane, goe ne-limalima ne-gida dau manu behee?” Jacob ga-helekai, “Dimaadua go doo God ne-hagamaamaa-mai au.”

27:21  Isaac ga-helekai gi Jacob, “Menege-mai-mua gi-bili-adu au gi-di-goe be di-maa e-donu bolo goe go Esau.”

27:22  Jacob ga-menege-adu gi-hoohoo gi dono damana, gei Isaac gaa-bili-adu gi Jacob ga-helekai, “Doo lee le e-hai gadoo be-di lee o Jacob, gei oo lima le e-hai gadoo be nia lima o Esau.”

27:23  Mee digi maanadu-loo bolo ma go Jacob deelaa, idimaa, nia lima o-maa e-huluhulu gadoo be nia lima o Esau. Malaa, Isaac belee haga-maluagina a-mee,

27:24  geia ga-heeu-adu labelaa, “Ma e-donu bolo goe go Esau?” Jacob ga-helekai, “Uaa, ma ko-au deenei.”

27:25  Isaac ga-helekai, “Gaamai-laa nia meegai. I-muli-hua dogu miami, gei au gaa-hai-adu gi-di-goe dagu boloagi.” Jacob ga-gaamai nia meegai gi mee, ga-gaamai labelaa ana waini belee inu go mee.

27:26  Gei tamana o-maa ga-helekai gi mee, “Menege-mai, hongia dogu uhi, dagu dama-daane.”

27:27  Di madagoaa-hua Jacob ne-menege-adu belee hongi-adu a-mee, gei Isaac ga-longono-ia di hauiha kala o-nia gahu o-maa, gei mee gaa-hai ang-gi mee dana boloagi, ga-helekai, “Di hauiha kala o dagu dama-daane le e-kala gadoo be tenua o Dimaadua dela gu-haga-maluagina.

27:28  God gi-dugu-adu gi-di-goe di magalillili o lala di langi, ga-haga-logowaahee nia hagahonu o do henua, ga-dugu-adu gi-di-goe taugai huwa-laagau mono waini.

27:29  Nia henua huogodoo gi-hege-adu gi-di-goe, gei nia daangada gi-pala-adu gi-di-goe, gei goe gaa-dagi do madawaawa, gei nia madawaawa o do dinana gi-pala-adu gi-di-goe. Digau huogodoo ala ma-ga-hagahuaidu goe, ginaadou e-kae di halauwa, gei digau huogodoo ala ma-ga-hagahumalia goe, ginaadou e-kae di haadanga-lamalia.”

27:30  Isaac gaa-lawa-loo dana haga-maluagina a Jacob, gei Jacob ga-hagatanga gaa-hana. Digi duai-hua, gei dono duaahina go Esau gaa-dau i dono haneia i-lodo henua.

27:31  Gaa-dunu dana manu la-gii-kala ga-gaamai gi dono damana, ga-helekai-anga, “Tamana, nnoinua, miami i agu goneiga ala ne-gaamai gi-di-goe, gei goe ga-hai-mai dau boloagi gi-di-au.”

27:32  Isaac ga-heeu-adu, “Goe ko-ai?” Gei mee ga-helekai, “Ko-au go dau dama-daane madua go Esau.”

27:33  Isaac ga-bolebole huoloo dono huaidina hagatau, ga-heeu, “Malaa ko-ai-laa dela ne-daaligi dana manu ga-gaamai gi-di-au? Guu-gai ko-au i-mua-hua do haneia. Gei au guu-wanga gi mee dogu maluagina hagatau, gu-hai-hua di mee ni mee gaa-hana-hua beelaa.”

27:34  Esau ga-iloo-ia bolo ma guu-hai beelaa, geia ga-daamada gaa-dangi, gaa-dangi-loo gi-nua-loo mo-di wawwawe huoloo, mo-di helekai, “Tamana, gaamai labelaa gi-di-au do maluagina!”

27:35  Isaac ga-helekai, “Do duaahina-daane gu-hanimoi gu-halahalau au, guu-kae do maluagina!”

27:36  Esau ga-helekai, “Deenei di holongo lua a-mee ne-halahalau au. Deelaa guu-tau gi dono ingoo go Jacob. Mee guu-kae di mogobuna o tama madua. Dolomeenei gei mee guu-kae dogu maluagina. E-hai behee tamana, goe digi dugua-mai dahi maluagina gi-di-au i-golo?”

27:37  Isaac ga-helekai, “Au guu-hai a-mee e-dagi goe. Au guu-hai ono duaahina huogodoo bolo gii-hai nia hege ni mee. Au guu-wanga gi mee taugai o-nia huwa-laagau mo nia waini, malaa dolomeenei gei au gu-deai dagu mee e-mee di-hai-adu gi-di-goe ai, dagu dama-daane!”

27:38  Esau ga-hagamahi ga-heeu, “Tamana, ma di maluagina hua e-dahi i do baahi? Gaamai labelaa gi-di-au!” mo-di dangi labelaa.

27:39  Isaac ga-helekai gi mee, “Do gowaa dela ga-noho-iei goe, gu-deai di hagahumalia mai i henuailala ai, gei deai hogi di haga-magalillili iha i-di langi ang-gi au gowaa dogi-mee ai.

27:40  Gei goe e-mouli-hua i dau hulumanu-dauwa, gei goe e-hege gi do duaahina-daane. Do madagoaa-hua dela ga-hai-baahi ang-gi do duaahina-daane, gei goe gu-hagalee di hege ni mee.”

27:41  Esau gu-de-hiihai huoloo gi Jacob, idimaa dono damana dela ne-wanga di maluagina gi Jacob, gei mee ga-helekai ang-gi deia boloo, “Tangihangi o-di made o dogu damana la-gu-hoohoo-mai-loo, gei au ga-daaligi Jacob i-di madagoaa deelaa.”

27:42  Rebecca ga-longono-ia nia helekai o Esau, gei mee ga-gahi-mai a Jacob, ga-helekai gi mee, “Do duaahina-daane go Esau la-guu-hai dana helekai bolo ia ga-daaligi goe.

27:43  Deenei-laa, dagu dama-daane, hagalongo-mai gi agu helekai: Goe hana dolomeenei gi-baahi dogu duaahina-daane go Laban i Haran.

27:44  Noho i-baahi o mee gi-hili-loo di hagawelewele o do duaahina-daane,

27:45  gei mee ga-de-langahia-ia dau mee dela ne-hai ang-gi deia. Gei au ga-hagau-adu dagu dangada e-laha-mai goe. Ma e-aha goolua gaa-hula gi-daha mo au i-di laangi hua e-dahi?”

27:46  Rebecca ga-helekai gi Isaac, “Au gu-de-hiihai huoloo gi-nia lodo tuadimee o Esau. Maa nei bolo Jacob e-lodo labelaa gi tei ahina Hittite, malaa e-humalia-hua au gii-made dolomeenei.”

Chapter 28

28:1  Isaac ga-gahi-mai a Jacob, gaa-hai dana hagaaloho gi mee, ga-helekai gi mee, “Goe hudee hai doo lodo gi tama-ahina o Canaan.

28:2  Goe hana gi Mesopotamia dela go tenua o do damana-madua go Bethuel, gaa-hai-laa doo lodo gi tama-ahina i-golo, di ahina i-nia dama-ahina o tuaahina-daane o do dinana go Laban.

28:3  God Koia e-Aamua gi-haga-maluagina-ina di-gulu haga-hai-lodo, gi-gowadu gi-di-goe au dama dogo-logowaahee, gei goe gaa-hai tamana o nia henua llauehe logowaahee!

28:4  Mee gi-haga-maluagina-ina goe mo do madawaawa be dana hai ne-haga-maluagina a Abraham, bolo goe gi-hai-mee gi tenua dela nogo noho-ai goe nonua, go tenua dela ne-wanga go Mee gi Abraham.”

28:5  Isaac ga-hagau a Jacob gi Mesopotamia gi-baahi o Laban dela go tama a Bethuel tangada o Aram. Laban go tuaahina-daane o Rebecca go tinana Jacob mo Esau.

28:6  Esau gu-iloo bolo Isaac gu-haga-maluagina a Jacob, gu-hagau a-mee gii-hana gi Mesopotamia gaa-hai-laa dono lodo i-golo, gei mee gu-iloo labelaa bolo Isaac ne-hai gi Jacob i dono madagoaa ne-haga-maluagina a-mee, bolo mee gi-hudee hai dono lodo gi-di ahina i-nia ahina o Canaan.

28:7  Mee gu-iloo labelaa bolo Jacob gu-hagalongo gi dono damana mo dono dinana ga-hagatanga gaa-hana gi Mesopotamia.

28:8  Malaa, Esau gu-modongoohia ang-gi deia bolo dono damana go Isaac la hagalee hiihai bolo ana dama-daane gii-hai nau lodo gi-nia ahina o Canaan.

28:9  Gei mee gaa-hana gi-baahi o Ishmael, dela go tama a Abraham, gaa-lodo gi tama-ahina Ishmael, dono ingoo go Mahalath, tuaahina-ahina o Nebaioth.

28:10  Jacob ga-hagatanga i Beersheba gaa-hana gi Haran.

28:11  Di laa gaa-hana ga-ulu, gei mee gaa-hai dana gowaa e-haga-molooloo-ai, gaa-moe gi-lala gaa-kii, e-ulungi gi-di hadugalaa,

28:12  gaa-hai dana midi bolo ia e-mmada gi-di gaagenge e-duu-aga i henuailala e-hana e-dau i-di langi, gei digau di-langi e-kaga gi-nua gei e-kaga-ia i-di gaagenge deelaa.

28:13  Gei Dimaadua e-duu i dono baahi ga-helekai, “Au go Yihowah go di God o Abraham mo Isaac. Au ga-gowadu gi-di-goe mo do madawaawa tenua deenei dela e-moe-iei goe nonua.

28:14  Digaula ga-hagadili ga-dogologowaahee be nia gelegele o henuailala. Digaula ga-momooho-adu gi-lodo nnenua mai i-daha ga-noho-ai, gei au ga-haga-maluagina nia henua huogodoo mai i-di-goe mo do hagadili.

28:15  Gi-langahia-laa e-goe bolo Au e-hana madalia goe, e-benebene goe i-lodo nia gowaa huogodoo ala ma-gaa-hana ginai goe, gei Au ga-laha-mai goe labelaa gi tenua deenei. Au hagalee diiagi goe, gaa-dae-loo gi agu mee ala ne-hagababa adu gi-di-goe la-gu-kila-aga.”

28:16  Jacob ga-ala-aga, ga-helekai, “Dimaadua la i-kinei! Mee e-noho i-kinei, gei au dela e-de-iloo-e-au!”

28:17  Gei mee gu-madagu huoloo mo-di helekai, “Di gowaa deenei la di gowaa hua hagamadagudagu dangada! Deenei di gowaa dela iei di hale a God. Deenei di gowaa dela e-huge-ai di bontai di langi!”

28:18  Jacob gaa-noho gi-nua haga-luada-loo, ga-haga-duu di hadu nogo ulungi-ieia gi-nua belee hai di hadu haga-langahia. Gei mee ga-hagatulu di hadu deenei la gi dana lolo-olib belee hagadabu di-maa ang-gi Dimaadua.

28:19  Gei mee ga-haga-ingoo di gowaa deelaa bolo Bethel. (I-mua gei di gowaa deelaa nogo haga-ingoo bolo Luz.)

28:20  Jacob gaa-hai dana hagababa haga-modudahi ang-gi Dimaadua boloo, “Maa Goe ga-madalia au mo-di benebene au i dogu ala dela e-hanadu-iei au, mo-di gaamai agu meegai mo agu goloo e-ulu-iei au,

28:21  maa Goe ga-laha-mai au labelaa gi-baahi dogu damana, gei Goe gaa-hai di God ni-oogu.

28:22  Di hadu haga-langahia dela ne-haga-duu-aga ko-au gi-nua, la-gaa-hai di gowaa dela e-dadaumaha-adu gi-di-Goe, gei au ga-tigitigidaumaha adu gi-di-Goe dahi baahi madangaholu i-nia mee huogodoo ala ma-ga-gaamai Kooe gi-di-au.”

Chapter 29

29:1  Jacob e-hanadu hua i-golo i dono ala dela e-hana gi-nia henua ala i-bahi-i-dua.

29:2  I dono hanadu-hua, geia gaa-mmada gi-di monowai-geli i-lodo di gowaa maalama, nia hagabuulinga-siibi e-dolu i-baahi di-maa, idimaa nia hagabuulinga-siibi le e-inu mai i-di monowai deenei. Di hadugalaa dela e-pono i-di ngudu di monowai deelaa le e-damana.

29:3  Di madagoaa-hua nia hagabuulinga-siibi huogodoo ma-ga-dagabuli-mai gi-golo, gei digau hagaloohi-siibi ga-hagadaga gi-daha di hadu deelaa, ga-haga-inu nadau siibi. Nomuli gei digaula ga-hagadaga-mai di hadu la gi dono lohongo.

29:4  Jacob ga-heeu ang-gi digau hagaloohi-siibi aalaa, “Ogu duaahina-nei, goodou digau o hee?” Gei digaula ga-helekai-anga, “Gimaadou digau Haran.”

29:5  Jacob ge-heeu-adu, “Goodou e-iloo Laban dela go tama a Nahor?” Gei digaula ga-helekai-anga, “Uaa, gimaadou e-iloo.”

29:6  Gei mee ga-heeu labelaa, “Mee e-humalia-hua?” Gei digaula ga-helekai-anga, “Uaa, mee e-maaloo-hua. Mmada, deenei dana dama-ahina go Rachel e-dagi-mai di hagabuulinga-siibi a-maa.”

29:7  Jacob ga-helekai, “Di laangi le e-oodee-hua i-golo, digi dau-mai di madagoaa e-laha-mai nia siibi gi-lodo di abaaba. Haga-inu godou siibi gaa-lahi labelaa digaula gi-di gowaa dela e-miami-ai digaula.”

29:8  Gei digaula ga-helekai-anga, “Gimaadou e-deemee, gaa-dae-loo gi-nia hagabuulinga-siibi huogodoo la-gu i-ginei, gei gimaadou gaa-mee di-hagadaga gi-daha di hadu deelaa, ga-haga-inu madau siibi.”

29:9  Di madagoaa-hua Jacob dela e-leelee hua igolo gi digaula, gei Rachel gu-dau-mai mo ana siibi.

29:10  Gei Jacob gaa-mmada gi Rachel mo-di hagabuulinga-siibi o tamana o-maa go Laban, gei mee ga-hanadu gi-di monowai, ga-hagadaga di hadu la-gi-daha, ga-haga-inu nia siibi a-maa.

29:11  Nomuli, gei Jacob ga-hanadu gi mee ga-hongihongi-adu a-mee mo-di dangi i dono tenetene,

29:12  ga-helekai gi Rachel, “Au tangada e-dau gi do damana, di tama ni Rebecca.” Rachel gaa-hana gaa-lele ga-hagi-anga gi dono damana.

29:13  Laban ga-iloo-ia bolo Jacob la di tama ni dono duaahina-ahina go Rebecca, gei mee gaa-hana gaa-lele belee haga-heetugi ang-gi mee, ga-bulubulu-adu a-mee mo-di hongi-adu a-mee, ga-laha-mai a-mee gi dono hale. Jacob ga-hagi-anga gi mee nia mee huogodoo ala ne-hai.

29:14  Laban ga-helekai, “E-donu bolo goe la di todo ni-oogu.” Jacob gaa-noho i-baahi o mee i-di malama e-dahi.

29:15  Laban ga-helekai gi Jacob, “Idimaa goe dela tangada e-dau-mai gi-di-au, malaa goe hagalee belee ngalua-mai gi-di-au ge doo hui ai. Dehee doo hui dela e-hiihai ginai goe?”

29:16  Laban ana dama-ahina dogolua i-golo, tangada madua dono ingoo go Leah, gei tangada dulii la-go Rachel.

29:17  Nia golomada o Leah la-hagalee-loo e-madanga, gei Rachel la-koia e-madanga ge humalia.

29:18  Jacob e-hiihai huoloo gi Rachel, dela gei mee ga-helekai gi Laban boloo, “Au ga-ngalua-adu gi-di-goe i-nia ngadau e-hidu, gei au gaa-hai dogu lodo gi Rachel.”

29:19  Laban ga-helekai, “Uaa, au e-hiihai e-gowadu a-mee gi-di-goe i dogu wanga a-mee gi tangada i-daha. Malaa, goe dela ga-noho-hua i-kinei.”

29:20  Jacob ga-ngalua gi Laban i Rachel i-nia ngadau e-hidu, gei nia ngadau e-hidu la-guu-hai be nia laangi hua dulii ang-gi deia, idimaa Jacob gu-hiihai huoloo gi Rachel.

29:21  Jacob ga-helekai gi Laban, “Goe dugua-mai gi-di-au a Rachel au gaa-lodo gi mee, idimaa di madagoaa la-gu-dau-mai.”

29:22  Laban gaa-hai dana hagamiami haga-hai-lodo, ga-gahi-mai digau huogodoo di guongo deelaa.

29:23  I-di boo hua deelaa, gei mee ga-laha-mai a Leah hagammuni, gaa-wanga gi Jacob e-pono di lohongo Rachel, gei Jacob gaa-kii i-baahi o mee.

29:24  (Laban ga-wanga dana hege-ahina go Zilpah gi Leah e-hai-ai di hege ni mee.)

29:25  Ga-hooaga luada, gei Jacob ga-iloo-ia bolo ma go Leah, gei Jacob gaa-hana gi Laban ga-helekai gi mee, “Dau maa di-aha dela ne-hai-mai gi-di-au beenei? Au ne-ngalua adu gi-di-goe bolo Rachel e-hai dogu lodo. Goe ne-halahalau au eiaha?”

29:26  Laban ga-helekai-anga, “Deenei di hai dela e-hai i-kinei. Gimaadou e-deemee di-hai di lodo tangada dulii i-mua tangada madua digi hai dono lodo.

29:27  Noho taalia maalia tabu e-dahi i-muli di hagadabu o taga-hai-lodo, gei au ga-gowadu-laa Rachel, maa goe ga-ngalua labelaa i-nia ngadau e-hidu i-golo.”

29:28  Jacob guu-baba ginai. I-muli-hua di tabu e-dahi o-di hagadabu di haga-hai-lodo la-ne-lawa, gei Laban gaa-wanga a Rachel gi Jacob.

29:29  (Laban ga-wanga dana hege-ahina go Bilhah gi Rachel e-hai-ai di hege ni mee.)

29:30  Jacob gaa-kii labelaa i-baahi o Rachel. Mee koia gu-hiihai huoloo gi mee i-hongo Leah. Nomuli, gei Jacob ga-ngalua gi Laban labelaa i-nia ngadau e-hidu i-golo.

29:31  Dimaadua gu-iloo-Ia bolo Jacob la-hagalee aloho-loo i Leah be dono aloho i Rachel, gei Mee gaa-hai Leah gii-mee di-hai ana dama, gei Rachel gi-dee-huwa.

29:32  Leah ga-hai-dama ga-haanau-mai dana dama-daane. Gei mee ga-helekai, “Dimaadua gu-iloo-Ia dogu haingadaa, dolomeenei gei dogu lodo ga-aloho i-di-au.” Gei mee gaa-gahi di ingoo o dana dama bolo “Reuben”.

29:33  Gei mee ga-hai-dama labelaa ga-haanau-mai dana dama-daane, gei mee ga-helekai, “Dimaadua gu-gaamai labelaa dana dama-daane deenei gi-di-au, idimaa Mee dela gu-hagalongo bolo Jacob e-dee moehoni-loo mai gi-di-au.” Gei mee gaa-gahi di ingoo o-maa bolo “Simeon”.

29:34  Gei mee ga-hai-dama labelaa ga-haanau-mai dana dama-daane, gei mee ga-helekai, “Deenei-laa gei dogu lodo ga-noho-mau i dogu baahi, idimaa dela au gu-haanau agu dama dogodolu.” Gei mee gaa-gahi di ingoo o dana dama bolo “Levi”.

29:35  Gei mee ga-hai-dama labelaa ga-haanau-mai dana dama-daane, gei mee ga-helekai, “Dolomeenei gei au ga-hagaamu a Dimaadua.” Gei mee gaa-gahi di ingoo o-maa bolo “Judah”, ga i-nomuli gei Leah gu-hagalee hai ana dama.

Chapter 30

30:1  Rachel ga-iloo-ia bolo ia e-deemee di-hai dana dama mai i Jacob, gaa-hai-hua ono dubua gi dono duaahina, mo-di helekai gi Jacob, “Gaamai tei dama, gi-dee-made-hua au.”

30:2  Jacob ga-hagabuhi-adu gi mee ga-helekai, “Au e-deemee di-pono di lohongo o God. Ma go Mee dela ne-hai goe gi-dee-huwa.”

30:3  Rachel ga-helekai gi mee, “Dagu hege deenei go Bilhah, hai-lodo goolua gi-haanau-mai dagu dama i mee. Deenei di hai gei au gaa-mee di-hai tinana ni-di tama mai i mee.”

30:4  Malaa, Rachel gaa-wanga a Bilhah gi Jacob, gei Jacob gaa-kii i-baahi o-mee.

30:5  Bilhah ga-hai-dama, ga-haanau-mai dana dama-daane.

30:6  Rachel ga-helekai, “God gu-haga-gila-aga dogu hiihai. Mee gu-haga-donu au, ge gu-longono-Ia agu dalodalo dela ga-gaamai dagu dama-daane.” Gei mee gaa-gahi di ingoo o-maa bolo “Dan”.

30:7  Bilhah ga-hai-dama labelaa ga-haanau-mai di lua dama-daane ang-gi Jacob.

30:8  Rachel ga-helekai, “Au gu-heebagi hagamahi gi dogu duaahina-ahina, gei au gu-maaloo i mee.” Gei mee gaa-gahi di ingoo o-maa bolo “Naphtali”.

30:9  Leah gu-modongoohia bolo ia gu-deemee labelaa di-hai ana dama, gei mee gaa-wanga dana hege go Zilpah gi Jacob gi-lodo ginai.

30:10  Zilpah ga-haanau-mai dana dama-daane mai Jacob.

30:11  Leah ga-helekai, “Au gu-haadanga-lamalia.” Gei mee gaa-gahi di ingoo o-maa bolo “Gad”.

30:12  Zilpah ga-haanau-mai labelaa dana dama-daane mai Jacob.

30:13  Gei Leah ga-helekai, “Au gu-tenetene huoloo. Dolomeenei gei nia ahina ga-gahigahi au bolo “Tenetene”.” Gei mee gaa-gahi di ingoo o-maa bolo “Asher”.

30:14  Di madagoaa o tau-‘wheat’ gu-mmaaduu gaa-tuu, gei Reuben gaa-hana gi-lodo henua, gaa-gida dana hagadilinga laagau dela e-haga-ingoo bolo ‘mandrake’, ga-goweia gi dono dinana go Leah. Rachel ga-helekai gi Leah, “Gaamai hunu mee i-nia ‘mandrake’ o dau dama-daane.”

30:15  Leah ga-helekai, “Goe digi dohu-adu gi-di-goe i dau lahi dogu lodo? Deenaa labelaa bolo goe e-kae nia ‘mandrake’ o dagu dama?” Rachel ga-helekai, “Maa goe ga-gaamai gi-di-au nia ‘mandrake’ o dau dama, gei goe gaa-mee di-kii goolua mo Jacob boo-nei.”

30:16  Di madagoaa-hua a Jacob ne-haneia i-lodo henua i-di hiahi di laangi deelaa, Leah gaa-hana ga-heetugi gi mee, ga-helekai gi mee, “Goe e-kii i dogu baahi ma-ga-boo-nei, goe guu-lawa di hui gi-nia ‘mandrake’ o dagu dama.” Malaa, Jacob gaa-kii i-baahi o-mee.

30:17  God ga-longono-Ia nia dalodalo a Leah, gei Leah ga-hai-dama i togolima dama ang-gi Jacob.

30:18  Leah ga-helekai, “God gu-hui-mai au, dela ne-wanga dagu hege gi dogu lodo.” Gei mee gaa-gahi di ingoo o-maa bolo “Issachar”.

30:19  Leah ga-hai-dama labelaa i togo-ono dama-daane mai Jacob.

30:20  Leah ga-helekai, “God gu-gaamai gi-di-au di kisakis humalia. Dolomeenei gei dogu lodo ga-hiihai-hua bolo ia e-noho-hua i dogu baahi, idimaa i mee dela guu-hai ana dama dogoono mai gi-di-au.” Gei mee gaa-gahi di ingoo o-maa bolo “Zebulun”.

30:21  Nomuli, gei Leah ga-haanau-mai dana dama-ahina. Gei mee gaa-gahi di ingoo o-maa bolo “Dinah”.

30:22  God e-langalangahia-hua Rachel, gu-longono hogi ana dalodalo, gaa-hai a-mee gii-mee di-hai ana dama.

30:23  Rachel ga-hai-dama ga-haanau-mai dana dama-daane, gei Rachel ga-helekai, “God guu-daa dogu hagalangaadia la-gi-daha, gu-gaamai dagu dama-daane.

30:24  Dimaadua bolo gi-gaamai hualaa dahi dama-daane labelaa.” Gei mee gaa-gahi di ingoo o-maa bolo “Joseph”.

30:25  I-muli di haanau Joseph, Jacob ga-helekai gi Laban, “Dugua-mai gii-hana au gi dogu guongo.

30:26  Gaamai ogu lodo mo nia dama ala ne-ngalua ginai au, gei au ga-hagatanga. Goe e-iloo di humalia dogu ngalua.”

30:27  Laban ga-helekai gi mee, “Au e-helekai-adu gi-di-goe bolo au gu-iloo mai nia hagamodongoohia mogobuna bolo Dimaadua gu-haga-maluagina au mai i-di-goe.

30:28  Hagia-mai ogu boibana, gei au ga-hui-adu.”

30:29  Jacob ga-helekai, “Goe e-iloo dogu ngalua mo-di tomo humalia au manu ala nogo madamada humalia-ei au.

30:30  Nia mee dulii nogo i do baahi i-mua dogu hanimoi la-guu-tomo guu-logo, idimaa Dimaadua gu-haga-humalia goe i-nia gowaa huogodoo ne-hana ginai au. Dolomeenei dogu madagoaa e-halahala dogu hiihai.”

30:31  Laban ga-heeu, “Au e-hui goe gi ni-aha?” Jacob ga-helekai, “Au hagalee hiihai gi-nia hui ogu ngalua. Au ga-duudagi-adu-hua dogu madamada humalia au manu, maa goe gaa-donu gi telekai deenei:

30:32  Dugua-mai gi-hagadina au manu huogodoo, gaa-kae nia dama-siibi luuli mo nia damaa-kuudi habuihabula huogodoo. Deenei hua di hui e-hiihai ginai au.

30:33  Tei laangi hua, gei goe ga-iloo-laa be au e-donu be deeai. Do madagoaa ma-ga-hagadina dogu hui, ga-gidee goe dahi kuudi hagalee habuihabula, be dahi siibi e-hagalee luuli, gei goe gu-modongoohia-hua bolo maa ne-gaiaa.”

30:34  Laban ga-helekai, “Au e-donu ginai. Gidaua ga-hai-hegau be dau helekai.”

30:35  Gei di laangi deelaa, Laban ne-daa gi-daha nia kuudi-daane habuihabula mo nia manu-ahina huogodoo ala e-habuihabula be e-genegene nadau gili. Mee gu-daa gi-daha labelaa nia siibi luuli huogodoo. Mee guu-hai ana dama-daane gi-madamada humalia i-nia maa,

30:36  gaa-hana gaa-kae nia manu aanei gi-mogowaa-loo mo Jacob, ga-haele nia laangi e-dolu. Jacob gu-madamada humalia i-nia manu a-maa ala ne-dubu.

30:37  Jacob ga-gaamai ana manga laagau mouli ‘poplar’, ‘almond’, mono laagau-‘plane’, ga-holehole gi-daha hunu gili, gi-habuihabula kene nia manga.

30:38  gei mee gaa-dugu nia manga aanei i-mua nia manu aalaa gi-baahi nadau gowaa e-inuinu-ai. Mee ne-dugu nia-maa i-golo idimaa nia manu e-hagadili i-di nadau madagoaa ga-loomoi e-inu.

30:39  Di madagoaa nia kuudi ma-ga-hagadili i-mua nia manga laagau ala gu-habuihabula kene, digaula ga-hahaanau nadau dama e-habuihabula ge hai nadau dongo.

30:40  Jacob gaa-wwae nia siibi gi-daha mo nia kuudi, gaa-hai digaula gii-huli gi-nia manu Laban ala e-luuli, ge hunu maa e-hai nadau dongo. Deenei di hai e-haga-tomo-aga ana manu i-daha mo nia manu a Laban.

30:41  Di madagoaa nia manu maaloo ma-ga-hagadili, Jacob gaa-dugu nia manga gi nadau mua i-di gowaa inuinu, gi-hagadili digaula i-lodo nia manga.

30:42  Gei mee digi dugu-ina nia manga gi-mua nia manu paagege. E-limalima-hua, Laban ga-hai-mee gi-nia manu paagege, gei Jacob ana manu maaloo.

30:43  Jacob gu-maluagina huoloo. Mee gu-hai-mee gi-nia buini manu e-logo, nia hege e-dogologo, nia ‘camel’ mo nia ‘donkey’.

Chapter 31

31:1  Jacob gu-longono-ia nia dama-daane a Laban e-helekai, “Jacob guu-kae nia mee huogodoo tadau damana. Mee guu-kae ono maluagina huogodoo mai nia mee tadau damana.”

31:2  Jacob gu-gidee labelaa bolo Laban gu-hagalee humalia ang-gi-deia be mee i nomua.

31:3  Dimaadua ga-helekai gi Jacob, “Hana gi-muli gi tenua do damana mo oo gau. Au ga-madalia laa goe.”

31:4  Jacob ga-haga-iloo gi Rachel mo Leah gi-heetugi gi-deia i-di gowaa maalama nia hagabuulinga manu.

31:5  Mee ga-helekai gi meemaa, “Au gu-gidee bolo di-gulu damana gu-hagalee humalia-mai be dana hai-mai i-mua, gei di God dogu damana la-nogo i dogu baahi.

31:6  Goolua e-iloo bolo au gu-ngalua gi-di-gulu damana i ogu mahi huogodoo.

31:7  Gei di-gulu damana e-totoolo-hua au ga-hulihuli dogu hui haga-madangaholu. God digi heia a-mee gi-hagahuaidu-ina au.

31:8  Laban ma-ga-helekai, ‘Nia kuudi e-hai nadau dongo e-hai doo hui,’ gei nia manu huogodoo e-haga-haanau nia dama nadau dongo. Mee ma-ga-helekai, ‘Nia kuudi e-hai nadau duu e-hai doo hui,’ gei nia hagabuulinga manu huogodoo e-haga-haanau nadau dama e-hai nadau duu.

31:9  God guu-daa nia hagabuulinga manu gi-daha mo di-gulu damana gu-gaamai gi-di-au.

31:10  “Di madagoaa hagadili, gei au guu-hai dagu midi bolo au e-mmada gi-nia kuudi-daane nogo hagadili le e-hai nadau duu, nadau dongo, ge e-habuihabulu.

31:11  Tangada di-langi o God ne-helekai-mai i-lodo di midi, ‘Jacob’, gei au ga-helekai, ‘Deenei au.’

31:12  Mee ga-helekai, ‘Mmada, nia kuudi-daane huogodoo ala e-hagadili le e-hai nadau duu, nadau dongo, ge e-habuihabula. Au e-hai di mee deenei, idimaa Au gu-gidee di hai Laban ne-hai-adu gi-di-goe.

31:13  Au go di God ne-haga-gida-adu i Bethel, di gowaa ne-haga-dabu-anga dau hadu hagalangahia gi-nia lolo-olib, gaa-hai dau hagamodu-mai gi-di-Au. Dolomeenei, hagatogomaalia hana gi-di gowaa ne-haanau-iei goe.’ ”

31:14  Rachel mo Leah ga-helekai gi Jacob, “Ma di-mee ne-dubu i-nia mee di-mau damana belee hai-mee ginai gimaua ai.

31:15  Mee e-hai gimaua be nia daangada henua-gee. Mee ne-hui gimaua gi-daha, dolomeenei gei mee gu-hai-hegau gi-nia bahihadu huogodoo ala ne-hui gimaua.

31:16  Nia maluagina huogodoo a God ne-kae i-di mau damana la nia mee ni-gimaua mo mau dama. Heia di-mee a God bolo gi-heia.”

31:17  Jacob ga-hagatogomaalia e-hana gi dono damana i Canaan. Mee ga-hagauda ana dama mo ono lodo gi-hongo nia ‘camel’, ga-hagau ana hagabuulinga manu huogodoo gii-hula i ono mua, dalia ana mee huogodoo ne-gaamai i Mesopotamia.

31:18  Jacob ga-hagatogomaalia e-hana gi dono damana i Canaan. Mee ga-hagauda ana dama mo ono lodo gi-hongo nia ‘camel’, ga-hagau ana hagabuulinga manu huogodoo gii-hula i ono mua, dalia ana mee huogodoo ne-gaamai i Mesopotamia.

31:19  Di madagoaa Laban ne-hana e-dahi nia ngaahulu ana siibi, Rachel ga-gaiaa nia balu-god di hale, nia god ni dono damana.

31:20  Jacob gu-halahalau Laban, idimaa mee digi haga-iloo bolo ia e-hana.

31:21  Jacob guu-kae ana mee huogodoo, ga-hagatanga hagalimalima. Mee ne-hanadu laa-lodo di Monowai Euphrates gaa-hana gi tenua gonduu Gilead.

31:22  I-muli nia laangi e-dolu, Laban ga-longono-ia bolo Jacob guu-lele.

31:23  Laban gaa-lahi ana daane ga-waluwalu Jacob i-nia laangi e-hidu, gaa-dae-adu gi mee i-lodo tenua gonduu Gilead.

31:24  God ga-hanimoi gi Laban i-lodo di midi di boo hua deelaa, ga-helekai, “Pula i-di goe gi-dee-hai dau mee huaidu gi Jacob.”

31:25  Jacob ne-hagaduu dono waahale-laa i-hongo di gonduu, gei Laban mo ono gau ga-hagaduu nadau waahale-laa i-lodo tenua gonduu Gilead.

31:26  Laban ga-helekai gi Jacob, “Goe ne-aha dela ne-halahalau au, gaa-lahi agu dama-ahina be nia ahina ne-kumi i-lodo tauwa?

31:27  Goe ne-aha ne-halahalau au gaa-lele gi-daha digi hagailoo-mai gi-di-au? Maa nei bolo goe ne-hagi-mai, gei au gu-hagau goe i-di tene mo-di dadaahili gi-nia mee huwa-daahili.

31:28  Goe digi heia au gi-hongi agu dama-ahina mo nau dama e-hai dagu hagaaloho. Deelaa la di hai dadaulia ne-hai kooe.

31:29  Au ogu donu i-golo e-haga-huaidu goe, gei anaboo di God o do damana gu-helekai-mai bolo au gi-hudee haga-huaidu-ina goe.

31:30  Au e-iloo bolo goe ne-hagatanga idimaa goe nogo hiihai e-hana gi do guongo, gei goe ne-gaiaa eimaha nia god dogu hale?”

31:31  Jacob ga-helekai, “Au nogo madagu bolo goe gaa-lahi au dama-ahina gi-daha mo au.

31:32  Maa goe ga-gidee dahi dangada i kinei ne-kae au god, mee e-daaligi gii-made. Halahala-ina di-ingoo-hua di-mee i au mee, kaina nia-maa, i-mua nnadumada tadau daane hagadootonu.” Jacob digi iloo bolo Rachel gu-gaiaa nia god a Laban.

31:33  Laban gaa-hana ga-halahala i-lodo di hale-laa Jacob, nomuli gaa-hana gi-lodo di hale-laa Leah mo-di hale-laa o-nia ahina-hege dogolua, gei digi gidee-ia ana god. Gei mee gaa-hana gi-lodo di hale-laa Rachel.

31:34  Rachel ne-kae nia god, gaa-haa gi-lodo di budehede di lohongo ‘camel’, gaa-noho gi-nonua. Laban ga-halahala i-lodo di hale-laa hagatau, digi gidee-ia nia maa.

31:35  Rachel ga-helekai gi dono damana, “Meenei dogu damana, hudee hagawelewele-mai gi-di-au, au e-deemee di-duu gi-nua i oo mua, au e-magi malama.” Laban ga-halahala, gei digi gidee-ia nia god dono hale.

31:36  Jacob ga-heeu hagawelewele, “Ma di hala-aha ne-hai ko-au? Taganoho behee ne-oho ko-au, ga-gowadu di tonu e-waluwalu au?

31:37  Dolomeenei gei goe dela gu-halahala-loo gi-lodo ogu goloo huogodoo, ma di-aha gu-gidee-goe bolo di-mee ni-aau? Dugua-mai gi kinei gi-gidee au daane mo agu daane, digaula ga-hilihili be koai i gidaua e-donu.

31:38  Au ne-noho i do baahi nia ngadau e-madalua, au siibi mo au kuudi gu-hahaanau gei au digi gai dagu siibi i au hagabuulinga manu.

31:39  Di madagoaa dahi siibi ma-ga-daaligi gii-made go nia manu lodo-geinga, di made siibi deelaa e-hagaanga-mai gi-di-au. Au digi hagamodongoohia-aga bolo hagalee di hala ni-oogu. Goe nogo hiihai bolo au gi-hagahumalia-ina nia mee huogodoo ala ne-gaiaa i-di boo mo-di aa.

31:40  Nnolongo e-logo au ne-hagaduadua i-di welengina i-di laangi mo i-di magalillili o-di boo. Au nogo deemee dagu kii.

31:41  Ma nogo hai beelaa i-nia ngadau madalua ala nogo iei au i do baahi. Nia ngadau e-madangaholu maa-haa, au nogo ngalua belee hai-mee gi au dama-ahina dogolua, ge nia ngadau e-ono ang-gi au manu. Gei goe hogi guu-huli ogu hui i-nia holongo e-madangaholu.

31:42  Maa nei bolo di God o ogu maadua, di God o Abraham mo Isaac, la-digi madalia au, gei goe gu-hagau au gi-daha, agu mee i-lodo ogu lima ai. Gei God gu-gidee ogu haingadaa mo-di moomee ne-hai ko-au, gei anaboo Mee guu-hai dana hagi-aga.”

31:43  Laban ga-helekai gi Jacob, “Nia ahina aanei la nia dama-ahina ni-aagu, nau dama mo nia buini-manu aanei la ni-aagu. Nia mee huogodoo e-gidee-goe i ginei la ni-aagu. Gei di-maa au dela e-deemee di-daahi agu dama-ahina mo nau dama,

31:44  au gu-togomaalia di-hai tau hagababa. Gidaua e-hai di hagabae-hadu e-haga-langahia tau hagababa.”

31:45  Jacob ga-hagaduu dana hadu gi-nua, e-hai di hagalangahia.

31:46  Mee ga-helekai gi ana daane gi-hagabudu-ina nadau hadu, ga-hagabae gi-nua. Nomuli, gei digaula ga-miami i-baahi tagabae hadu deelaa.

31:47  Laban ga-hagaingoo di-maa bolo Jegar=Sahadutha, gei Jacob ga-hagaingoo di-maa bolo Galeed.

31:48  Laban ga-helekai gi Jacob, “Di hagabae hadu deenei le e-hai di hagalangahia ni gidaua.” Deelaa dono hadinga ne-hagaingoo di-maa bolo Galeed.

31:49  Laban ga-helekai labelaa, “Dimaadua ga-mmada-mai-laa gi gidaua i tau madagoaa ma-ga-maewae.” Di gowaa deelaa gu-hagaingoo labelaa bolo Mizpah.

31:50  Laban ga-duudagi-adu ana helekai, “Maa goe gaa-hai hagahuaidu agu dama-ahina be maa goe gaa-lodo gi hunu huai ahina, eimaha-hogi ma au e-de-iloo, maanadu-ina bolo God le e-daumada gidaua.

31:51  Aanei la nia hadu ne-bae ko-au i tau mehanga, gei deenei di hadu haga-langahia.

31:52  Di bae hadu mo-di hadu haga-langahia la nia mee haga-langahia. Au e-deemee di-hana e-diiagi gi-muli di bae hadu belee heebagi-adu, gei goe hogi e-deemee di-diiagi gi-muli tagabae-hadu be go di hadu hagalangahia belee heebagi-mai.

31:53  Di God o Abraham mo-di God o Nahor e-hagiaga nia donu i tau mehanga.” Gei Jacob guu-hai dana hagamodu i-di ingoo di God e-daumaha ginai dono damana go Isaac, bolo ia ga-daudali di hagababa deenei.

31:54  Mee ga-daaligi dana manu, ga-tigidaumaha i-hongo di gonduu, ga-gahi-mai ana daangada gi-di miami. I-muli di-nadau miami, digaula gaa-kii di boo deelaa i-hongo di gonduu.

31:55  Luada-loo dono daiaa, Laban gaa-hongi nia dama ana dama-ahina mo ana dama-ahina e-hai di haga-maewae, ga-hagatanga gaa-hana gi dono guongo.

Chapter 32

32:1  Di madagoaa-hua Jacob e-hana i dono ala, gei mee ga-heetugi gi digau di-langi a God.

32:2  Dono madagoaa-hua ne-mmada gi digaula, gei mee ga-helekai, “Aanei digau-dauwa a God.” Gei mee ga-haga-ingoo di gowaa deelaa bolo “Mahanaim”.

32:3  Jacob ga-hagau ana daangada kae-hegau i ono mua gi dono duaahina-daane go Esau i-lodo di guongo go Seir, dela e-haga-ingoo labelaa bolo Edom.

32:4  Gaa-hai gi digaula bolo digaula gii-hula gi-helekai gi Esau boloo, “Deenei au go Jacob, dau dangada hai-hegau. Au e-hai dagu haga-modongoohia adu gi-di-goe, meenei dogu dagi Esau, bolo au nogo noho waalooloo i-baahi o Laban, gu-duai dogu hanimoi, gaa-dae-mai-loo gi dangi-nei.

32:5  Au agu hagabuulinga manu aanei i dogu baahi, nia kau mono ‘donkey’, siibi, kuudi mo digau hai-hegau, daane mo ahina. Au e-hai di haga-iloo deenei adu gi-di-goe, meenei, bolo goe gi-dumaalia-mai gi-di-au.”

32:6  Digau ala ne-hagau ga-loomoi labelaa gi-baahi o Jacob ga-helekai gi mee, “Gimaadou guu-hula guu-dau i-baahi do duaahina go Esau, malaa, mee ga-hanimoi mo ana daane e-haa-lau.”

32:7  Jacob gu-madagu huoloo gaa-wwae ana daangada ala i dono baahi mo ana manu huogodoo, nia siibi mono kau mono kuudi mono ‘camel’, gaa-hai nia buini e-lua,

32:8  gaa-hai ana maanadu i ono lodo boloo, “Maa Esau ga-heebagi gi dahi buini, gei di buini dela i-golo gaa-mee-hua di-llele gi-daha mo mee.”

32:9  Jacob ga-dalodalo, “Meenei di God o dogu damana madua go Abraham, mo-di God o dogu damana go Isaac, Goe gi-longono-e-Goe au! Meenei Dimaadua, Goe ne-helekai-mai bolo au gii-hana labelaa gi dogu henua mo ogu gau, gei Goe gu-hagababa bolo nia mee huogodoo la-gii-kila humalia.

32:10  Au e-dee-tau-loo gi-nia dumaalia huogodoo mo-di manawa-dahi dela ne-hai Kooe gi dau dangada hai-hegau deenei. Au ne-hanadu laa-lodo di monowai Jordan deai dagu mee e-dahi e-kae i dogu lima ai, dela-hua go dagu dogodogo i dogu lima, dolomeenei gei au gu-hanimoi labelaa gu-dagi-mai agu hagabuulinga e-lua dalia au.

32:11  Goe gi-hagadagaloaha-ina au gi-daha mo nia mogobuna o dogu duaahina go Esau. Au e-lliga huoloo gi-de-hanimoi-hua a-mee ga-hai-baahi-mai gi gimaadou, ga-hagahuaidu gimaadou huogodoo, nia ahina labelaa mo nadau dama.

32:12  Goe gi-langahia dau hagababa bolo Goe gaa-hai nia mee huogodoo gi-humalia-mai gi-di-au, gei gaa-hai dogu madawaawa gi-dogologowaahee dela e-deemee di-dau, e-dogologowaahee gadoo be nia gelegele o tongotai.”

32:13  I-muli-hua dono kii i-di boo i-di gowaa deelaa, gei mee gaa-hili ana goloo ala i dono baahi belee hai di kisakis ang-gi dono duaahina go Esau.

32:14  Malaa aanei di kisakis, kuudi-ahina e-lua-lau ge e-madalua kuudi-daane, nia siibi-ahina e-lua-lau ge e-madalua siibi-daane,

32:15  nia ‘camel’ dogo haanau e-motolu mo nadau dama, nia kau-ahina e-madahaa ge madangaholu kau-daane, nia ‘donkey’-ahina e-madalua ge madangaholu ‘donkey’-daane.

32:16  Gei mee gaa-wwae nia manu aanei gaa-hai nia buini-manu, gaa-wanga nia hagabuulinga dagidahi gi ana gau hai-hegau e-dagi nia maa, ga-helekai gi digaula, “Goodou hula i ogu mua, gei hudee haga-punia nia buini-manu la-gi-di gowaa e-dahi, gi-hula-hua beelaa, dugudugua dagidahi nia buini.”

32:17  Gei mee ga-helekai gi tangada dela e-hana i-mua, “Maa goe ga-heetugi ang-gi dogu duaahina go Esau, gei mee ga-heeu-adu gi-di-goe, ‘Doo dagi la-koai? Goe e-hana gi-hee? Nia manu ni-aai aanaa e-dagi kooe?’

32:18  Gei goe ga-helekai-anga, ‘Nia manu ni dau dangada hai-hegau go Jacob, dana kisakis dela belee hagau-adu gi-di-goe, dela go dono dagi go Esau. Gei mee le e-hanimoi i madau muli.’ ”

32:19  Gei Jacob ga-helekai-adu labelaa gi tangada nomuli go nnelekai la-hua, togodolu dangada nomuli go nnelekai la-hua, mo anga labelaa gi digau huogodoo ala e-dagi nia buini-manu, ga-helekai-adu gi digaula, “Aanei-hua nnelekai ala e-hai go goodou gi Esau i-di godou madagoaa ma-ga-heetugi gi mee.

32:20  Gei goodou gi-helekai labelaa gi mee boloo, ‘Dau dangada hai-hegau go Jacob e-hanimoi i madau muli.’ ” Jacob ga-hagamaanadu-hua i ono lodo boloo, “Au ga-haga-manawa lamalia di manawa o Esau gi agu kisakis ala guu-hula i ogu mua. Dono madagoaa dela ma-ga-heetugi-mai gi-di-au, holongo gei mee ga-dumaalia-mai gi-di-au.”

32:21  Gei Jacob ga-hagau ana kisakis i ono mua, gei mee gaa-kii i-lodo dono hale-laa i-di boo deelaa.

32:22  I-di boo-hua deelaa, gei Jacob ga-ala-aga gaa-lahi ono lodo dogolua, ono lodo-hege dogolua, mo ana dama dilongoholu maa-dahi ga-lloo-adu laa-lodo di Monowai Jabbok.

32:23  I-muli-hua di hagau digaula gi-di baahi i-golo di monowai, gei mee ga-hagau labelaa ana goloo huogodoo ala e-hai-mee ginai gi-di baahi i-golo di monowai.

32:24  Gei mee gaa-noho i-golo modogoia. Dahi daane ga-hanimoi ga-taudau gi mee gaa-dae-loo gi-di maalama aga di mee.

32:25  Taane deelaa ga-modongoohia ang-gi deia bolo ia e-deemee di maaloo i mee, gei taane deelaa gaa-tugi di gaba o Jacob, gei di iwi o-di gaba o-maa gu-ngalua gi-daha mo dono lohongo.

32:26  Gei taane deelaa ga-helekai gi mee, “Diagia au gii-hana, di-mee gu-maalama.” Jacob ga-helekai, “Au hagalee diiagi goe gaa-dae-loo gi do haga-maluagina au.”

32:27  Taane deelaa ga-heeu, “Do ingoo la-koai?” Jacob ga-helekai, “Jacob.”

32:28  Taane ga-helekai, “Do ingoo ga-hagalee hai bolo Jacob, idimaa goe dela gu-taudau gi God mo nia daangada, gei goe gu-aali, gei do ingoo gaa-gahi bolo “Israel”.”

32:29  Jacob ga-helekai-adu, “Hagia-mai malaa do ingoo.” Gei mee ga-helekai gi Jacob, “Goe e-aha dela e-hiihai bolo goe gi-iloo dogu ingoo?” Gei mee ga-haga-maluagina a Jacob.

32:30  Jacob ga-helekai, “Au guu-mmada gi-nia hadumada donu o God, gei au deenei hua e-mouli”, gei mee ga-haga-ingoo di gowaa deelaa bolo Peniel.

32:31  Di laa gaa-hobo, gei Jacob ga-hagatanga i Peniel, gei mee gu-habehabe i dono gaba la-guu-mmae.

32:32  Dangi-nei gei di madawaawa Israel hagalee gai di goneiga dela i-hongo tudaginga o-di gaba-manu, idimaa deelaa di goneiga ne-tugi go tangada i-di gaba o Jacob.

Chapter 33

33:1  Jacob gaa-mmada gi Esau e-hanimoi mo ana daane e-haa-lau, gei mee gaa-duhe nia dama lligi i Leah, Rachel mo nia lodo-hege dogolua.

33:2  Mee gaa-hai nia lodo-hege mo nau dama gii-hula i-mua, nomuli go Leah mo ana dama, muliagina go Rachel mo Joseph.

33:3  Jacob gaa-hana i-mua digaula, ga-bala gi-lala gi-hongo di gelegele hagahidu i dono hanimoi gi dono duaahina.

33:4  Gei Esau gaa-lele e-heetugi gi mee, ga-bulubulu gaa-hongi a-mee. Meemaa huogodoo gu-tangitangi.

33:5  Esau ga-madamada ga-gidee nia ahina mo nia dama ga-heeu, “Ma nia daangada koai aanei ala e-madalia goe?” Jacob ga-helekai, “Aanei la-go nia dama a God ne-gaamai i dono dumaalia mai gi-di-au.”

33:6  Gei nia lodo-hege ga-loomoi mo nau dama gaa-pala gi-lala.

33:7  Nomuli, gei Leah mo ana dama ga-loomoi, hagamuliagina-loo Joseph mo Rachel ga-loomoi gaa-pala gi-lala.

33:8  Esau ga-heeu, “Gei di buini dela ne-heetugi ginai au? Dono hadinga bolo-aha?” Jacob ga-helekai, “Ma di mee belee hai goe gi-hiihai-mai.”

33:9  Esau ga-helekai, “Dogu duaahina, au guu-dohu-mai gi-di-au. Benabena-ina nia mee ala i do baahi.”

33:10  Jacob ga-helekai, “Deeai, dumaalia, maa goe gu-dumaalia-mai, gumidia dagu wanga-dehuia. Dogu mmada gi o hadumada, au e-hai be tangada ne-mmada gi-nia hadumada a God, gei dolomeenei goe gu-humalia-mai gi-di-au.

33:11  Dumaalia gumidia di wanga-dehuia dela ne-gaamai ko-au gi-di-goe. God gu-humalia-mai gu-gaamai nia mee huogodoo ala hagalee i dogu baahi.” Jacob e-haihai gi mee bolo gi-kaina dana wanga-dehuia, gaa-dae gi mee gaa-kumi di-maa.

33:12  Esau ga-helekai, “Hagatogomaalia gaa-hula. Au e-hana i oo mua.”

33:13  Jacob ga-helekai, “Goe e-iloo bolo nia dama le e-paagege, gei au e-hai gi-madamada humalia nia siibi, mo nia kau mo nadau dama. Maa digaula gaa-dagi ga-duadua i-lodo di laangi e-dahi, digaula huogodoo gaa-mmade.

33:14  Dumaalia hana i ogu mua, gei au ga-daudali-adu maalia i oo muli mo agu manu mo nia dama gii-dae-adu-loo gi-di-goe i Edom.”

33:15  Esau ga-helekai, “Dumaalia-mai gii-dugu hunu daane i agu daane i do baahi.” Jacob ga-helekai, “Di mee hagalee belee hai, au e-hiihai-hua bolo goe gi-hiihai-mai gi-di-au.”

33:16  Malaa, di laangi deelaa Esau ga-hagatanga gaa-hana gi Edom.

33:17  Gei Jacob gaa-hana gi Sukkoth, gaa-hau dono hale mo nia damaa-hale ang-gi ana manu. Deelaa di mee ne-haga-ingoo di gowaa deelaa bolo Sukkoth.

33:18  Dono hanimoi gi-muli mai Mesopotamia, Jacob guu-dau humalia i-di waahale Shechem i tenua go Canaan, ga-hagaduu-aga ono hale-laa hoohoo gi-di waahale.

33:19  Mee guu-hui di gowaa deelaa mai nia hagadili o Hamor, tamana o Shechem, gi-nia bahihadu-silber e-lau.

33:20  Gei mee gaa-hau dana gowaa hai tigidaumaha i-golo, ga-haga-ingoo di-maa bolo El Elohe Israel, (dono hadinga bolo “El, di God o Israel”).

Chapter 34

34:1  Dahi laangi hua, gei Dinah tama-ahina Jacob mo Leah, ne-madamada gi-baahi hunu ahina o Canaan.

34:2  Di madagoaa Shechem, tama-daane a Hamor, tangada Hivite go di tagi o-di gowaa deelaa, ne-mmada gi mee, Shechem gaa-lahi a-mee, ga-hagagila dono hiihai maaloo gi mee.

34:3  Shechem gu-gidee bolo mee tama-ahina humalia huoloo, gu-aloho i-mee, gu-hagamada belee hai a-mee gi-hiihai ang-gi deia.

34:4  Mee ga-helekai gi dono damana, “Au e-hiihai bolo goe gi-laha-mai Dinah e-hai dogu lodo.”

34:5  Jacob gu-longono bolo dana dama-ahina la-gu-haga-huaidu, gei mee digi hai dana mee, idimaa ana dama-daane nogo i-baahi nadau manu i-lodo geinga, gaa-dae-loo gi di-nadau loomoi.

34:6  Tamana Shechem guu-hana belee helekai gi Jacob,

34:7  i-di madagoaa-hua nia dama daane a Jacob ne-dau-mai i-lodo geinga. Di-nadau longono bolo Shechem gu-haga-huaidu tama-ahina Jacob, ge gu-haga-langaadia digau Israel, digaula gu-homouli ge gu-hagawelewele huoloo gi-di hai Shechem ne-hai.

34:8  Hamor ga-helekai gi Jacob, “Dagu dama-daane go Shechem gu-hiihai huoloo gi dau dama-ahina, dumaalia heia a-mee gi-lodo gi-mee.

34:9  Gidaua e-hai tau hagababa bolo e-dumaalia gi tau daangada gi-hai-lodo nadau mehanga.

34:10  Gei goodou gaa-mee di-noho i-di madau henua, i di-ingoo-hua di gowaa e-hiihai ginai, ga-moholo-adu di huihui godou mee, ge hai-mee gi-nia gowaa.”

34:11  Shechem ga-helekai gi tamana Dinah mo nia duaahina-daane o-maa, “Heia-mai di hai deenei, gei au ga-gowadu di-ingoo-hua di-mee dela e-hiihai ginai goodou.

34:12  Hagia-mai nia wanga-dehuia behee e-hiihai ginai goodou, dugua di hui o-maa gi-nua-loo be di-godou hiihai, malaa au e-gowadu di-ingoo-hua di-mee dela e-hiihai ginai goodou, maa goodou gaa-dugu-mai a-mee e-lodo ginai au.”

34:13  Idimaa Shechem dela ne-hagahuaidu di-nadau duaahina-ahina Dinah, nia dama-daane Jacob gu-hui-adu nnelekai Shechem mo dono damana go Hamor gi nnelekai halahalau dangada.

34:14  Digaula ga-helekai gi mee, “Gimaadou e-deemee di-hai di-madau duaahina-ahina gi-lodo gi tangada digi sirkumsais, e-haga-langaadia gimaadou.

34:15  Gimaadou e-donu-hua ginai, maa goodou ga-sirkumsais godou daane huogodoo gaa-hai goodou gii-hai be gimaadou.

34:16  Gei gimaadou gaa-donu-laa bolo e-lodo-adu gi goodou. Gimaadou gaa-noho i godou baahi gaa-hai be di-mee e-dahi.

34:17  Maa goodou ga-hagalee donu gi madau helekai bolo e-sirkumsais, gimaadou gaa-lahi a-mee gaa-hula gi-daha.”

34:18  Nia hai aanei e-hai be nia mee e-humalia gi Hamor mo dana dama-daane go Shechem,

34:19  gei tama-daane deenei gu-limalima-hua guu-hai gii-hai be nnelekai ne-hai, idimaa mee gu-aloho i tama-ahina Jacob. Shechem la-koia e-hagalabagau i-lodo dono madahaanau.

34:20  Hamor mo dana dama-daane go Shechem gaa-hula gi-di gowaa hai dagabuli di waahale, ga-hagi-anga gi nia daangada:

34:21  “Digau aanei la nia daangada humalia, goodou heia digaula gii-noho i tadau baahi ge gi-moholo ang-gi nadau heehee. Tenua le e-damana-hua di noho digaula. Heia gidaadou gi-lodo gi nadau dama-ahina gaa-wanga tadau dama-ahina e-lodo ginai digaula.

34:22  Gei digau aanei, la gaa-donu bolo e-noho i tadau baahi i-di mee hua e-dahi bolo tadau daane huogodoo e-sirkumsais gii-hai be digaula.

34:23  Gidaadou gii-donu ginai bolo digaula e-mee di-noho i tadau baahi, gei nia manu mono mee huogodoo digaula gaa-hai nia mee ni gidaadou!”

34:24  Nia daangada huogodoo o-di waahale guu-donu ang-gi nnelekai Hamor mo Shechem, gei nia daane huogodoo gu-sirkumsais.

34:25  Nia laangi e-dolu nomuli, nia daane nogo mmae hua igolo i-di nadau sirkumsais, gei nia dama-daane dogolua Jacob, go Simeon mo Levi, nia duaahina Dinah, gaa-kae nau hulumanu-dauwa, gaa-hula gi-lodo di waahale hagammuni, ga-daaligi nia daane huogodoo,

34:26  mo Hamor mo dana dama-daane Shechem. Meemaa gaa-lahi Dinah gi-daha mo-di hale Shechem, gaa-hula.

34:27  I-muli taaligi nia daane, nia dama-daane Jacob ala i-golo gaa-oho di waahale deelaa e-tala di hui o-di hagalangaadia di-nadau duaahina-ahina.

34:28  Digaula gaa-kae nia siibi, nia kau, nia manu-‘donkey’ mo nia mee huogodoo i-lodo di waahale mo i-lodo nia gowaa di waahale.

34:29  Digaula guu-kae nia mee dahidamee huogodoo, go nia ahina mo nia dama huogodoo, mo nia mee huogodoo i-lodo nia hale.

34:30  Jacob ga-helekai gi Simeon mo Levi, “Goolua guu-wanga au gi-lodo di haingadaa. Dolomeenei digau Canaan, digau Perizzite mo nia daangada huogodoo ala i-lodo tenua deenei ga-de-hiihai-mai gi-di-au. Au agu daane dogologo ai; maa digaula ga-hagapuni ga-hai-baahi mai gi-di-au, tadau madahaanau hagatau la-ga-mooho.”

34:31  Meemaa ga-helekai, “Gimaua e-deemee di-dumaalia gi digaula e-hai di-mau duaahina-ahina be-di ahina huihui dono huaidina.”

Chapter 35

35:1  God ga-helekai gi Jacob, “Hana gi Bethel dolomeenei, gaa-noho i-golo. Hagaduulia i-golo di gowaa hai tigidaumaha mai gi-di-Au, go di God dela ne-haga-gila-adu do madagoaa nogo lele gi-daha mo do duaahina go Esau.”

35:2  Jacob ga-helekai gi dono madahaanau mo digau huogodoo i dono baahi, “Kilia gi-daha nia god gee ala i godou baahi, haga-madammaa-ina goodou, ulu nia gahu mmaa.

35:3  Gidaadou ga-hagatanga gaa-hula gi Bethel, gei au ga-hagaduu-aga di gowaa hai-tigidaumaha ang-gi di God dela ne-hagamaamaa au i ogu haingadaa ge nogo madalia au i-nia gowaa huogodoo ne-hana ginai au.”

35:4  Digaula gaa-wanga gi Jacob nadau god gee huogodoo, mo nia buulei dalinga nogo ulu ginaadou. Gei Jacob gaa-danu nia maa i-lala di laagau-‘oak’ hoohoo gi Shechem.

35:5  Di madagoaa a Jacob mo ana dama-daane ne-daamada ga-hagatanga, di madagu damanaiee gu-i-hongo nia daangada o-nia waahale ala e-hoohoo-mai, gei digaula digi waluwalu-ina digaula.

35:6  Jacob ne-hanimoi mo ana daangada huogodoo gi Luz dela dolomeenei e-haga-ingoo bolo Bethel i Canaan.

35:7  Mee gaa-hau dana gowaa hai tigidaumaha i-golo, ga-haga-ingoo di gowaa gi-di God o Bethel, idimaa God gu-hagagila Ia gi mee i-golo i dono lele gi-daha mo dono duaahina.

35:8  Deborah, go di hege-ahina madua Rebecca, guu-made, gaa-danu i-lala di laagau-‘oak’ i-bahi-i-ngaaga Bethel. Deelaa di hai di laagau deelaa ne-hagaingoo bolo di “Laagau-‘Oak’ o-di Madatangi.”

35:9  Di madagoaa Jacob ne-hanimoi gi-muli i Mesopotamia, God ga-haga-gila gi mee labelaa, ga-haga-humalia a-mee.

35:10  God ga-helekai gi mee, “Do ingoo lago Jacob, gei dolomeenei gaa-huli gi-muli, do ingoo gaa-hai bolo Israel.” Malaa, God gu-hagaingoo a-mee bolo Israel.

35:11  God ga-helekai gi-mee, “Au go di God Mogobuna. Hagadilia gi-dogologo. Nia henua llauehe ga-hagadili-mai i-di-goe, gei goe gaa-hai tamana-madua o-nia king.

35:12  Au ga-gowadu tenua ne-wanga ko-Au gi Abraham mo Isaac, e-wanga labelaa gi o hagadili i oo muli.”

35:13  Nomuli, gei God gaa-hana gi-daha mo mee.

35:14  Gei Jacob ga-hagaduu-aga dana hadu hagalangahia i-golo, i-di gowaa dela ne-helekai a God gi mee, ga-hagatulu ginai nia waini mono lolo-olib e-haga-dabu di-maa.

35:15  Mee ga-hagaingoo di gowaa deelaa bolo Bethel.

35:16  Jacob mo dono madahaanau ga-hagatanga i Bethel. Di-nadau madagoaa e-mogowaa i Ephrath, Rachel gu-dau-mai dono madagoaa belee haanau, geia nogo mmae huoloo.

35:17  Dono mmae ne-damanaiee, di ahina hagahaanau a-maa ga-helekai gi-mee, “Rachel, goe hudee madagu, ma tama-daane labelaa.”

35:18  Gei Rachel e-dogi haga-muliagina idimaa mee dela la-gaa-made, gei mee gaa-gahi dana dama-daane bolo Benoni, gei tamana o-maa ga-haga-ingoo a-mee bolo Benjamin.

35:19  Di madagoaa Rachel ne-made, mee ne-danu i-baahi di ala e-hana gi Ephrath, di waahale e-hai bolo Bethlehem dolomeenei.

35:20  Jacob ga-hagaduu dana hadu hagalangahia i-golo, e-haga-ingoo-mai gi dangi-nei bolo di lua ni Rachel.

35:21  Jacob ga-hagamenege ga-hagaduu ono hale-laa di baahi gi-golo o-di angulaa i Eder.

35:22  Di madagoaa Jacob nogo noho i tenua deelaa, Reuben guu-hai di hai hagahailodo gi Bilhah, di ahina i-nia lodo-hege dono damana. Jacob ga-longono, gu-hagawelewele huoloo. Jacob la ana dama-daane e-madangaholu maa lua:

35:23  Nia dama-daane Leah: Reuben, tama-daane madua Jacob, Simeon, Levi, Judah, Issachar, mo Zebulun.

35:24  Nia dama daane Rachel: Joseph mo Benjamin.

35:25  Nia dama daane Bilhah, di hege Rachel: Dan mo Naphtali.

35:26  Nia dama daane Zilpah, di hege a Leah: Gad mo Asher. Nia dama-daane aanei ne-haanau i Mesopotamia.

35:27  Jacob gaa-hana gi dono damana go Isaac i Mamre, hoohoo gi Hebron, di gowaa nogo noho-ai Abraham mo Isaac.

35:28  Isaac nogo mouli nia ngadau e-180,

35:29  gaa-made i dono madua, ge ana dama-daane go Esau mo Jacob gaa-danu a-mee.

Chapter 36

36:1  Aanei nia hagadili o Esau e-hagaingoo labelaa bolo Edom.

36:2  Esau ne-lodo gi-nia ahina Canaan go Adah, tama-ahina ni Elon tangada Hittite, mo Oholibamah, tama-ahina ni Anah tama-daane ni Zibeon tangada Hivite,

36:3  mo Basemath, tama-ahina Ishmael ge tuaahina-ahina ni Nebaioth.

36:4  Adah ne-haanau Eliphaz, gei Basemath ne-haanau Reuel,

36:5  gei Oholibamah ne-haanau Jeush, Jalam mo Korah. Nia dama-daane huogodoo aanei la-ne-hagadili go Esau i Canaan.

36:6  Esau gaa-lahi ono lodo, ana dama-daane mono dama-ahina, nia daangada dono hale huogodoo, mo ana manu mo ana mee huogodoo ala ne-hai-mee ginai i dono noho i Canaan, gaa-hana gi-daha mo dono duaahina go Jacob gi tuai henua.

36:7  Mee ne-hana idimaa tenua nogo noho-ai ginaua mo Jacob gu-deemee di-benebene humalia ginaua. Meemaa guu-logo nau manu gu-deemee di-nau noho i-di gowaa e-dahi.

36:8  Esau gaa-noho i-lodo tenua gonduu go Edom.

36:9  Aanei la-nia hagadili o Esau, go tamana madua o digau Edom:

36:10  Adah di lodo Esau gu-haanau dana dama-daane go Eliphaz, ge Eliphaz guu-hai ana dama-daane dogolima go Teman, Omar, Zepho, Gatam, mo Kenaz. Eliphaz dono lodo labelaa go Timna dela gu-haanau dana dama-daane go Amalek. Di lodo o Esau go Basemath gu-haanau dana dama-daane go Reuel, ge Reuel ana dama-daane dogohaa go Nahath, Zerah, Shammah mo Mizzah.

36:11  Adah di lodo Esau gu-haanau dana dama-daane go Eliphaz, ge Eliphaz guu-hai ana dama-daane dogolima go Teman, Omar, Zepho, Gatam, mo Kenaz. Eliphaz dono lodo labelaa go Timna dela gu-haanau dana dama-daane go Amalek. Di lodo o Esau go Basemath gu-haanau dana dama-daane go Reuel, ge Reuel ana dama-daane dogohaa go Nahath, Zerah, Shammah mo Mizzah.

36:12  Adah di lodo Esau gu-haanau dana dama-daane go Eliphaz, ge Eliphaz guu-hai ana dama-daane dogolima go Teman, Omar, Zepho, Gatam, mo Kenaz. Eliphaz dono lodo labelaa go Timna dela gu-haanau dana dama-daane go Amalek. Di lodo o Esau go Basemath gu-haanau dana dama-daane go Reuel, ge Reuel ana dama-daane dogohaa go Nahath, Zerah, Shammah mo Mizzah.

36:13  Adah di lodo Esau gu-haanau dana dama-daane go Eliphaz, ge Eliphaz guu-hai ana dama-daane dogolima go Teman, Omar, Zepho, Gatam, mo Kenaz. Eliphaz dono lodo labelaa go Timna dela gu-haanau dana dama-daane go Amalek. Di lodo o Esau go Basemath gu-haanau dana dama-daane go Reuel, ge Reuel ana dama-daane dogohaa go Nahath, Zerah, Shammah mo Mizzah.

36:14  Di lodo Esau go Oholibamah, tama-ahina ni Anah tama-daane ni Zibeon, gu-haanau ana dama-daane dogodolu go Jeush, Jalam, mo Korah.

36:15  Aanei la nia madawaawa ne-hagadili mai Esau: Di ulumadua o Esau go Eliphaz la tamana-madua o-nia madawaawa aanei: Teman, Omar, Zepho, Kenaz,

36:16  Korah, Gatam, mo Amalek. Aanei la nia hagadili huogodoo mai Adah, di lodo a Esau.

36:17  Tama-daane Esau go Reuel la tamana-madua o-nia madawaawa aanei: Nahath, Zerah, Shammah, mo Mizzah. Aanei la nia hagadili huogodoo mai di lodo Esau go Basemath.

36:18  Aanei la nia madawaawa nia hagadili mai Esau mai dono lodo go Oholibamah, tama-ahina ni Anah: Jeush, Jalam mo Korah.

36:19  Nia madawaawa huogodoo aanei la-ne-hidi-mai i Esau.

36:20  Digau matagidagi tenua o Edom la-ne-daamada mai i-nia hagadili o Seir, tangada o Horite, ala ne-duhe gaa-hai nia madawaawa aanei: Lotan, Shobal, Zibeon, Anah, Dishon, Ezer mo Dishan.

36:21  Digau matagidagi tenua o Edom la-ne-daamada mai i-nia hagadili o Seir, tangada o Horite, ala ne-duhe gaa-hai nia madawaawa aanei: Lotan, Shobal, Zibeon, Anah, Dishon, Ezer mo Dishan.

36:22  Lotan la-go tamana-madua o-nia madahaanau llauehe o Hori mo Heman. (Lotan dono duaahina-ahina go Timna).

36:23  Shobal la tamana-madua ni nia madahaanau o Alvan, Manahath, Ebal, Shepho mo Onam.

36:24  Zibeon e-lua ana dama-daane, go Aiah mo Anah. (Anah la-tangada ne-gida ana monowai welengina lodo-geinga dono madagoaa nogo madamada humalia i-nia manu-‘donkey’ o dono damana.)

36:25  Anah la tamana ni Dishon, dela go tamana o-nia madahaanau llauehe o Hemdan, Eshban, Ithran mo Cheran. Anah dana dama-ahina labelaa go Oholibamah.

36:26  Anah la tamana ni Dishon, dela go tamana o-nia madahaanau llauehe o Hemdan, Eshban, Ithran mo Cheran. Anah dana dama-ahina labelaa go Oholibamah.

36:27  Ezer la tamana ni nia madahaanau llauehe o Bilhan, Zaavan mo Akan.

36:28  Dishan la tamana-madua o nia madahaanau llauehe o Uz mo Aran.

36:29  Aanei la nia madawaawa digau Horite i tenua go Edom: Lotan, Shobal, Zibeon, Anah, Dishon, Ezer mo Dishan.

36:30  Aanei la nia madawaawa digau Horite i tenua go Edom: Lotan, Shobal, Zibeon, Anah, Dishon, Ezer mo Dishan.

36:31  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:32  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:33  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:34  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:35  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:36  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:37  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:38  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:39  I-mua di madagoaa nia king o Israel, nia king aanei nogo hagadau e-dagi Edom: Bela tama-daane a Beor mai Dinhabah Jobab tama-daane a Zerah mai Bozrah Husham mai Teman Hadad tama-daane a Bedad mai Avith (mee ne-haga-magedaa digau Midian i-lodo tenua go Moab) Samlah mai Masrekah Shaul mai Rehoboth=i-Taalinga=di=Monowai Baal=Hanan tama-daane a Achbor Hadad mai Pau (dono lodo go Mehetabel, tama-ahina ni Matred, tama-ahina ni Mezahab)

36:40  Esau la tamana-madua o nia madawaawa Edom aanei: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, mo Iram. Di gowaa dela e-noho di madawaawa e-dahi i-nia madawaawa aanei le e-gahi gi-di ingoo o-di madawaawa.

36:41  Esau la tamana-madua o nia madawaawa Edom aanei: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, mo Iram. Di gowaa dela e-noho di madawaawa e-dahi i-nia madawaawa aanei le e-gahi gi-di ingoo o-di madawaawa.

36:42  Esau la tamana-madua o nia madawaawa Edom aanei: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, mo Iram. Di gowaa dela e-noho di madawaawa e-dahi i-nia madawaawa aanei le e-gahi gi-di ingoo o-di madawaawa.

36:43  Esau la tamana-madua o nia madawaawa Edom aanei: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, mo Iram. Di gowaa dela e-noho di madawaawa e-dahi i-nia madawaawa aanei le e-gahi gi-di ingoo o-di madawaawa.

Chapter 37

37:1  Jacob gaa-noho i Canaan, i tenua dela nogo noho-ai dono damana.

37:2  Deenei di kai o-nia dama a Jacob. Joseph tama-daane gu-madangaholu maa-hidu ono ngadau, gei mee e-hagaloohi nia siibi mono kuudi dalia ono duaahina ala go nia dama a Bilhah mo Zilpah, nia lodo-hege o tamana o-maa. Gei mee e-odi nia mee hala ala ne-hai go ono duaahina gi di-nadau damana.

37:3  Jacob e-aloho huoloo i Joseph i-hongo ana dama-daane huogodoo, idimaa, mee dela ne-haanau gei Jacob gu-madumadua. Gei mee gaa-hai dana gahu humalia gi Joseph, di gahu looloo gei e-lloo ono lima.

37:4  Gei nia duaahina o Joseph gaa-mmada bolo Jacob la-koia e-aloho huoloo i Joseph i nadau nua, gei digaula gu-de-hiihai gi Joseph, gu-hagalee hiihai e-leelee hagahumalia gi mee.

37:5  Dahi laangi-hua, gei Joseph gaa-hai dana midi, gei di madagoaa mee gaa-kai gi ono duaahina, digaula gu-hagawelewele huoloo gi mee.

37:6  Mee ga-helekai gi digaula, “Hagalongo-malaa gi-di midi dela ne-hai ko-au:

37:7  Gidaadou nogo i-lodo di gowaa dogi-mee. Gidaadou e-noonoo tadau uumee-‘wheat’, gei dagu uumee-‘wheat’ e-duu-donu gi-nua, gei godou uumee-‘wheat’ e-haganiga-mai daha e-pala gi dagu uumee-‘wheat’.”

37:8  Gei digaula ga-heeu-adu gi mee, “Goe e-hagamaanadu bolo goe gaa-hai di king e-dagi gimaadou?” Digaula gu-de-hiihai huoloo gi mee i dana midi deenei mo ana helekai ala ne-hai i nadau gili.

37:9  Joseph gaa-hai labelaa dana midi, gaa-kai ang-gi ono duaahina, “Au guu-hai labelaa dagu midi, bolo au e-mmada gi-di laa mo-di malama mo nia heduu e-madangaholu maa-dahi, ala e-pala gi-lala mai gi-di-au.”

37:10  Gei mee gaa-kai labelaa di midi deenei gi dono damana, gei dono damana ga-hagabuhi-adu gi mee, ga-helekai, “Dau maa di midi bolo-aha deenaa? Goe e-hagamaanadu bolo do dinana mo o duaahina-daane mo au bolo gimaadou gi-pala-adu gi di-goe?”

37:11  Nia duaahina-daane o-maa gu-dubua huoloo gi mee, gei dono damana e-noho gei e-mamaanadu beelaa nia mee aanei.

37:12  Nia duaahina o Joseph guu-hula gi Shechem, e-hagaloohi nia siibi o di-nadau damana.

37:13  Jacob ga-helekai gi Joseph, “Au e-hiihai bolo goe e-hana gi Shechem, gi-baahi o duaahina ala e-hagaloohi nadau manu i-golo.” Gei Joseph ga-helekai gi mee, “Au gu-togomaalia.”

37:14  Jacob ga-helekai gi Joseph, “Hana, mmada be o duaahina le e-humalia-hua, mo nia manu le e-humalia-hua. Hanimoi-laa gi-iloo-eau.” Malaa, Jacob ga-hagau a-mee i-di gowaa mehanga gonduu o Hebron. Joseph gaa-dau-adu-loo gi Shechem,

37:15  gei dahi daane ga-heetugi gi mee e-haele i-di gowaa deelaa, gei taane deelaa ga-heeu-adu gi mee, “Goe e-halahala dau-aha?”

37:16  Joseph ga-helekai-anga, “Au e-halahala ogu duaahina ala nogo hagaloohi nadau manu. Goe e-mee di-hagi-mai be digaula i-hee?”

37:17  Taane deelaa ga-helekai-anga, “Digaula dogo hagatanga. Au gu-hagalongo gi digaula bolo ginaadou e-hula gi Dothan.” Malaa, Joseph gaa-hana i-muli digaula, ga-gidee-ia digaula i Dothan.

37:18  Gei digaula gaa-mmada gi mee dela e-hanimoi haga-mogowaa. I-mua-hua dono dau-mai gi-baahi digaula, gei digaula guu-hai di-nadau hagababa bolo ginaadou ga-daaligi a-mee gii-made.

37:19  Digaula ga-helehelekai i-nadau mehanga boloo, “Tangada haihai-midi gu-hanimoi.

37:20  Gidaadou ga-daaligi a-mee gaa-hudu tuaidina o-maa gi-lodo di monowai-geli e-dahi i-nia monowai maangoo aanei. Gei gidaadou ga-helekai-laa bolo mee ne-daaligi go di manu lodo-geinga, gei gidaadou gaa-mmada-laa be nia midi a-mee ala nogo hai la-gaa-hai behee.”

37:21  Reuben ga-hagalongo gi-nia helekai digaula, gaa-hai dana hai belee hagamouli a-mee, ga-helekai gi digaula, “Gidaadou hagalee daaligi a-mee gii-made.

37:22  E-hudu-hua a-mee gi-lodo di monowai maangoo dela i-lodo di anggowaa deenei, hagalee haga-mmaemmae a-mee.” Reuben ne-belee daa a-mee i digaula, e-hagau a-mee gii-hana gi dono damana.

37:23  Di madagoaa-hua Joseph dela ne-dau-adu gi-baahi digaula, gei digaula ga-hahaahi di gahu o-maa dela e-hai ono tau gei e-lloo ono lima.

37:24  Digaula gaa-lahi a-mee gaa-hudu gi-lodo di monowai maangoo.

37:25  Di madagoaa-hua digaula ala e-miami, gei digaula ga-mmada-hua gi-di hagabuulinga Ishmael ala e-loomoi i Gilead e-hula gi Egypt. Nia ‘camel’ digaula e-kae nadau goloo hagalabagau, ala go nia mee haga-kala meegai, nia lolo kala hui-ngadaa mo nia ‘myrrh’.

37:26  Judah ga-helekai gi ono duaahina, “Tadau daaligi tadau duaahina gaa-lawa ga-hagammuni dono made, la dono humalia aha mai gi gidaadou?

37:27  Gidaadou gaa-hui a-mee gi digau Ishmael aanei, ga-hagalee daaligi a-mee, idimaa, mee tuaahina-daane donu ni gidaadou, di todo donu ni gidaadou.” Gei digaula guu-baba gi-di hai a-maa.

37:28  Di madagoaa-hua digau Midian huihui-mee aalaa ne-dau-mai gi-baahi digaula, gei digaula ga-hudi-aga a Joseph gi-daha mo-di monowai deelaa, gaa-hui a-mee gi digau Ishmael gi-nia silber e-madalua. Gei digau Ishmael gaa-lahi a-mee gi Egypt.

37:29  Di madagoaa o Reuben dela ga-haneia gi-di monowai deelaa, gei mee ga-gidee-ia bolo Joseph la-gu-hagalee i-golo. Gei mee ga-hahaahi ono gahu i dono manawa-gee.

37:30  Mee ga-haneia gi-baahi ono duaahina, ga-helekai gi digaula, “Joseph la-gu-hagalee. Dehee dagu hai gaa-hai?”

37:31  Gei digaula ga-daaligi di-nadau kuudi ga-hagatiu di gahu o Joseph gi-nia dodo kuudi.

37:32  Digaula gaa-kae di gahu gi di-nadau damana, ga-helekai gi mee, “Di mee deenei ne-gida go gimaadou. Mmada-malaa, ma hagalee go di gahu o dau dama-daane?”

37:33  Jacob ga-modongoohia-ia ga-helekai, “Uaa, go di gahu o-maa. Nia manu lodo-geinga gu-daaligi a-mee. Dagu dama go Joseph gu-hahaahi-hua hagaligiligi!”

37:34  Jacob gu-huaidu huoloo ono lodo, ga-hahaahi ono goloo, mo-di ulu ono goloo haga-manawa-gee, mo-di dangidangi huoloo i dana dama i-nia laangi e-logo.

37:35  Gei ana dama-daane huogodoo mo ana dama-ahina huogodoo ga-loomoi belee haga-manawa lamalia a-mee, gei mee hagalee hiihai gi-manawa lamalia, ga-helekai gi digaula, “Au e-dangidangi-hua beenei i dagu dama-daane, gaa-dae-loo gi dogu hana gi-baahi o-mee i-lodo tenua o digau mmade”, gei mee e-dangidangi hua igolo i dana dama-daane go Joseph.

37:36  Di madagoaa-hua deelaa, gei digau Midian la-guu-dau i Egypt, gei digaula gaa-hui a Joseph ang-gi Potiphar, tangada aamua ni-di king. Potiphar tangada dela e-dagi digau huogodoo ala e-hagaloohi di hale o-di king.

Chapter 38

38:1  Di madagoaa deelaa, Judah ga-hagatanga i-baahi ono duaahina-daane, gaa-hana gaa-noho i-baahi taane go Hirah, tangada di waahale Adullam.

38:2  Judah ga-heetugi gi tama-ahina Canaan i-golo, dono damana go Shua. Mee gaa-lodo gi mee,

38:3  gei mee ga-haanau dana dama-daane go Er.

38:4  Mee ga-hai-dama labelaa, ga-haanau dana dama-daane go Onan.

38:5  Mee guu-hai labelaa dana dama-daane go Shelah. Judah nogo i Achzib i-di madagoaa di haanau o tama-daane deelaa.

38:6  Judah gaa-hai dana dama-daane matagidagi gii-lodo Tamar.

38:7  Nia hagangalungalua o Er nogo huaidu gu-haga-manawa-gee Dimaadua, gei Mee ga-daaligi a Er gii-made.

38:8  Judah ga-helekai gi tuaahina Er go Onan, “Hana, kii i-baahi di lodo do duaahina, e-hai do waawa gi do duaahina gii-hai ono hagadili.”

38:9  Onan gu-iloo bolo nia dama ga-hagalee hai nia dama ni-aana, malaa, dono kii i-baahi di lodo dono duaahina, mee digi hai a-mee gi-hai-dama, malaa dono duaahina gu-ana dama ai.

38:10  Di hai a-mee deenei gu-de-hiihai labelaa ginai Dimaadua, gei mee gu-daaligi labelaa.

38:11  Judah ga-helekai gi-di lodo dana dama-daane go Tamar, “Hana gi-muli gi do damana, gaa-dae-loo gi-di tomo-aga dagu dama-daane go Shelah.” Mee ne-helekai beenei i mee e-madagu bolo Shelah ga-daaligi labelaa be ono duaahina. Malaa, Tamar guu-hana gi dono guongo.

38:12  Ga-nohonoho-hua, di lodo Judah gaa-made. I-muli di madagoaa manawa-gee guu-lawa, Judah mo dono ehoo go Hirah o Adullam, gaa-hula gi Timnah, di gowaa e-dahi-ai nia huluhulu o ana siibi.

38:13  Tangada ga-hagailoo gi Tamar bolo tamana dono lodo gaa-hana gi Timnah e-dahi ana siibi.

38:14  Gei mee ga-koodai ono gahu-ahina ala nogo uluulu-iei mee i-muli dono lodo ne-made, gaa-gahu ono golomada gaa-noho i-di ngudu di ala dela e-hana gi Enaim, di guongo i-di ala e-hana gi Timnah. Tamar gu-iloo-ia bolo tama-daane dulii a Judah go Shelah la-gu-madua, geia digi wanga-ina gi mee e-lodo ginai.

38:15  Di madagoaa Judah ne-mmada gi mee, mee ga-hagabau bolo mee di ahina huihui dono huaidina, i mee dela guu-gahu ono golomada.

38:16  Judah gaa-hana gi mee i taalinga di ala ga-helekai, “Goe e-hui e-hia?” (Mee digi iloo bolo mee go di lodo o dana dama-daane.) Di ahina ga-helekai, “Ma di-aha e-gaamai kooe gi-di-au?”

38:17  Mee ga-helekai, “Au ga-hagau-adu tamaa-kuudi i agu kuudi.” Di ahina ga-helekai, “E-humalia maa goe ga-gaamai dau mee e-pono di lohongo i-mua dau gaamai tamaa-kuudi.”

38:18  Judah ga-helekai, “Ma di-aha e-gowadu ko-au e-pono di lohongo gi-di hagababa?” Di ahina ga-helekai, “Go do hagailongo mo dono daulagi, mo togodogo dela e-dagidagi kooe.” Judah gaa-wanga nia maa gi mee, gei mee guu-kii i-baahi o-mee, gei mee gu-hai-dama.

38:19  Tamar gaa-hana gi dono guongo, ga-daa gi-daha dono gahu golomada, ga-ulu labelaa ono gahu-ahina guu-made dono lodo.

38:20  Judah ga-hagau dono ehoo go Hirah e-kae di kuudi, ga-gaamai nia mee di ahina ne-helekai-ai, gei Hirah gu-de-gidee a-mee.

38:21  Mee ga-heeu gi hunu daane i Enaim, “Dehee di ahina huihui dono huaidina dela nogo i-baahi di ala deenei?” Digaula ga-helekai, “Ma di ahina huihui dono huaidina nogo i kinei ai.”

38:22  Hirah ga-hanimoi gi Judah ga-helekai, “Au digi gidee a-mee. Nia daane di gowaa deelaa e-helekai bolo di ahina huihui dono huaidina nogo i-golo ai.”

38:23  Judah ga-helekai, “Dugua a-mee gi-hai-mee gi-nia mee aalaa. Gidaadou e-de-hiihai gi-nia daangada e-gadagada-mai gi gidaua. Au gu-hagamada belee hui a-mee, gei goe dela digi gidee a-mee.”

38:24  Nia malama e-dolu nomuli, tangada ga-hagi-anga gi Judah, “Di lodo dau dama-daane nogo hai be-di ahina huihui dono huaidina, gei mee gu-hai-dama dolomeenei.” Judah ga-helekai, “Laha-mai a-mee, duungia gii-made.”

38:25  Di-nadau lahi di ahina deelaa, gei mee ga-hagau-mai dana helekai gi tamana dono lodo, “Au ne-haga-hai-dama go taane dela ana mee aanei. Mmada be nia maa nia mee ni-aai: go di hagailongo mo dono daulagi mo togodogo deenei.”

38:26  Judah ga-modongoohia nia maa, ga-helekai, “Mee e-donu, gei au gu-magedaa i dogu waawa ang-gi mee. Au ne-belee humalia e-wanga a-mee gi dagu dama-daane go Shelah e-lodo ginai.” Gei Judah digi kii labelaa i-baahi o-mee.

38:27  Dono madagoaa belee haanau, digaula gu-iloo bolo mee ga-haanau ana dama dogolua i-di gowaa e-dahi.

38:28  Di madagoaa a-mee nogo mmae, di tama e-dahi ga-hanimoi dono lima, gei di ahina haga-haanau gaa-kumi di lima o-maa, gaa-nnoo gi teleedu, ga-helekai, “Deenei la-ne-haanau matagidagi.”

38:29  Di tama gaa-hudi dono lima gi-muli, gei dono duaahina-daane ga-haanau matagidagi. Gei di ahina haga-haanau ga-helekai, “Deenaa dau hai e-hagamahi gi-ulu goe gi-daha.” Mee gu-hagaingoo bolo Perez.

38:30  Dono duaahina gu-haanau, gei teleedu mmee i dono lima, gei mee gu-hagaingoo bolo Zerah.

Chapter 39

39:1  Digau Ishmael la-guu-lahi a Joseph gi Egypt, guu-hui gi tangada o Egypt go Potiphar, tangada aamua ni-di king, gei di tagi labelaa ni digau hagaloohi di hale o-di king.

39:2  Dimaadua le e-madalia a Joseph, guu-hai nia mee huogodoo a mee ala ma-gaa-hai la-gii-kila humalia. Mee e-noho i-di hale o dono dangada aamua o Egypt.

39:3  Potiphar la-gu-iloo-ia bolo Dimaadua le e-madalia a Joseph, idimaa, nia mee huogodoo a-mee ala ma-gaa-hai le e-kila-humalia.

39:4  Potiphar gu-tenetene huoloo gi Joseph dela e-hai-hegau humalia, ga-haga-menege-aga a-mee gaa-dagi dono hale mo ana mee huogodoo.

39:5  Daamada i-di madagoaa deelaa gaa-hana gi muli, gei Dimaadua gu-hagahumalia digau o-di hale Potiphar idimaa go Joseph. Gu-hagahumalia labelaa nia mee huogodoo ala i-lodo di hale o-maa, mo i-lodo nia gowaa a-maa.

39:6  Potiphar gaa-dugu-anga ana mee huogodoo gi Joseph gi-madamada humalia-ai, gu-deai dana mee e-haga-daadaamee gineia i-lodo dono hale ai, aalaa-hua go ana mee ala e-gai. Malaa, Joseph la tama-daane humalia dono huaidina gei e-madanga labelaa.

39:7  Mai gi-nomuli, gei di lodo o Potiphar gu-hiihai gi Joseph, gaa-dangi ang-gi mee bolo e-hula e-kii ginaua.

39:8  Gei Joseph digi hana, ga-helekai gi-di ahina deelaa, “Dogu dangada aamua dana mee e-haga-daadaamee gineia i-lodo di hale deenei ai, idimaa, mee e-hagadagadagagee-mai gi-di-au. Ana mee huogodoo gu-dugu-mai gi-di-au e-madamada humalia-iei au.

39:9  Ogu mogobuna i-lodo di hale deenei le e-hai gadoo be nia mogobuna o-maa, gei mee dana mee ne-dugu gi-daha mo au ai, dela-hua kooe, idimaa, goe dela di lodo o-maa. Malaa, au e-deemee-loo di-hai di mee hala mo-di huaidu damanaiee deenei i-mua o God!”

39:10  Di ahina deelaa e-dangidangi gi mee i-nia laangi e-logo, gei Joseph digi hana e-kii i-baahi o mee.

39:11  Dahi laangi-hua, gei Joseph ne-ulu-adu gi-lodo di hale belee hai ana hegau, gei nia hege o-di hale la-hagalee i-golo.

39:12  Di ahina deelaa gaa-kumi di gahu o Joseph ga-helekai, “Hanimoi e-kii gidaua!” Gei Joseph gaa-badu a-mee gi-daha gaa-lele gi malaelae, gei di gahu o-maa gu-diiagi i-baahi di ahina deelaa.

39:13  Di ahina deelaa ne-gidee bolo mee ne-lele gi malaelae la-digi kaina dono gahu,

39:14  gei mee ga-gahigahi-mai nia hege o-di hale, ga-helekai, “Mmada-malaa! Tangada o Hebrew deenei dela ne-laha-mai go dogu lodo gi tadau hale e-haganneennee gidaadou. Mee ne-ulu-mai gi-lodo dogu ruum belee kumi au, gei au ga-wolowolo gi-nua-loo.

39:15  Au ne-wolowolo gi-nua, gei mee gaa-lele gi malaelae, ga-diiagi dono gahu deenei i dogu baahi!”

39:16  Malaa, di ahina deelaa ga-benebene di gahu i dono baahi, gaa-dae-loo gi-di hanimoi o tangada aamua o Joseph.

39:17  Mee ga-hagi-anga gi mee go di kai la-hua, ga-helekai, “Dau hege dela go tangada o Hebrew, dela ne-laha-mai kooe gi kinei, ne-ulu-mai gi-lodo dogu ruum ga-gumigumi au.

39:18  Gei au ga-wolowolo gi-nua, gei mee gaa-hana gaa-lele gi malaelae, ga-diiagi dono gahu deenei i dogu baahi.”

39:19  Tangada aamua o Joseph gu-hagawelewele huoloo,

39:20  gaa-lahi a Joseph gaa-haa gi-lodo di hale-galabudi i-di gowaa dela e-dugu-ai digau galabudi a di king. Malaa, Joseph guu-noho i-lodo di hale galabudi deelaa.

39:21  Gei Dimaadua e-madalia-hua a Joseph e-hagahumalia a-mee, deelaa di mee ne-hidi-ai di tagi o-di hale-galabudi e-tenetene huoloo gi Joseph,

39:22  ga-haga-menege-aga a-mee belee madamada humalia digau huogodoo o-di hale-galabudi. Joseph guu-dagi nia mee huogodoo ala e-hai i-lodo di hale-galabudi deelaa.

39:23  Di tagi di hale-galabudi gu-hagalee madamada humalia i-nia mee, idimaa Joseph dela guu-hai nia maa, idimaa Dimaadua e-madalia a Joseph, e-hai nia hegau huogodoo a-mee ala e-hai la-gii-kila humalia.

Chapter 40

40:1  Mai gi nomuli, gei tangada dela e-madamada humalia nia waini o-di king o Egypt mo-di tagi dunu palaawaa o-di king guu-hai nau mee hala gi-di king.

40:2  Di king gu-hagawelewele gi meemaa,

40:3  gaa-lahi a meemaa gaa-haa gi-lodo di hale-galabudi i-lodo di hale o-di tagi o digau hagaloohi, i-di gowaa dela e-noho-ai a Joseph.

40:4  Meemaa guu-noho gu-duai i-lodo di hale galabudi deelaa, gei di tagi digau di hale galabudi ga-hagi-anga a meemaa gi Joseph e-madamada humalia-ai.

40:5  Dahi boo hua, gei tangada dela nogo madamada humalia nia waini o di king mo-di tagi dunu-palaawaa o-di king gaa-hai nau midi, nia midi meemaa e-hai-geegee.

40:6  Luada dono daiaa, gei Joseph ga-ulu gi-baahi o meemaa gaa-mmada gi meemaa e-hai be nia daangada e-manawa-gee,

40:7  ga-heeu gi meemaa, “Ma di-aha, goolua e-aha ala e-hai be nia daangada e-manawa-gee dangi-nei?”

40:8  Meemaa ga-helekai, “Gimaua guu-hai mau midi anaboo, gei deai tangada i ginei belee haga-modongoohia-mai mau midi ai.” Joseph ga-helekai, “Ma go God hua dela e-mee di-haga-modongoohia nia midi. Hagia-mai-malaa gulu midi.”

40:9  Tangada nogo madamada humalia nia waini o-di king ga-hagi-anga dana midi, ga-helekai, “Au ne-hai dagu midi boloo: Di laagau-‘grape’ e-duu i ogu mua,

40:10  e-hai ono manga e-dolu, ala ga-daamada ga-moholoholo ono lau, gaa-huwa, gu-mmaadua ono huwa.

40:11  Di ibu o-di king le e-daahi ko-au i-lodo dogu lima, malaa, au ga-gaamai nia golee-waini aalaa, gaa-tau gi-lodo di ibu gaa-wanga gi mee.”

40:12  Joseph ga-helekai gi mee, “Deenei tadinga o dau midi: Nia manga e-dolu la nia laangi e-dolu.

40:13  Nia laangi e-dolu i-golo, gei di king ga-hagamehede goe, ga-dumaalia-adu gi-di-goe, ga-haga-ngalua labelaa goe i do lohongo. Goe ga-wangawanga nia ibu a-maa be dau hai dela nogo hai i-mua i do madagoaa dela nogo hai tangada madamada humalia i-nia waini a-maa.

40:14  Goe gi-langahia au i do madagoaa dela ma-ga-humalia adu gi-di-goe. Hagalangahia-ina-laa au gi-di king, hagamaamaa-ina au gi-mehede au gi-daha mo-di hale-galabudi deenei.

40:15  Idimaa, au tangada ne-gaiaa mai i tenua o digau Hebrew, ga-dau-mai-loo gi kinei, gei au digi hai dagu mee huaidu bolo gaa-hidi-iei au gaa-hudu gi-lodo di hale-galabudi.”

40:16  Di tagi dunu-palaawaa ne-longono-ia di haga-modongoohia di midi deelaa le e-humalia, gei mee ga-helekai gi Joseph, “Au guu-hai labelaa dagu midi. Dagu midi le e-hai boloo: Au e-kae agu gada-palaawaa e-dolu i-hongo dogu libogo.

40:17  Di gada dela i-muginua le e-honu i-nia hagadilinga meegai huogodoo, nia meegai ni-di king, gei nia manu e-gaigai nia maa.”

40:18  Joseph ga-helekai gi mee, “Deenei tadinga o dau midi: Nia gada e-dolu le e-hai dono hadinga bolo nia laangi e-dolu i-golo.

40:19  Malaa, nia laangi e-dolu i-golo, gei di king gaa-daa goe gi-daha mo-di hale-galabudi, gaa-tuu gi-daha do libogo, ga-daudau do huaidina gi-tomo di laagau, gei nia manu gaa-gai o goneiga.”

40:20  Malaa, nia laangi e-dolu nomuli la-go di laangi o-di king ne-haanau-ai. Malaa, di king guu-hai dana hagamiami damana ang-gi ana gau aamua huogodoo, ga-gahi-mai dana dangada madamada humalia i-nia waini, mo dana dagi dunu-palaawaa, ga-laha-mai meemaa gi-mua ana gau aamua aalaa.

40:21  Mee ga-haga-menege-aga labelaa tangada dela e-madamada humalia i-nia waini gi dono lohongo,

40:22  gei ga-daudau di tagi hai-palaawaa gi-nua. Nia mee huogodoo guu-kila be nia helekai a Joseph ne-hai.

40:23  Malaa, tangada madamada humalia i-nia waini dela gu-humalia ang-gi deia, gei mee gu-de-langahia a Joseph.

Chapter 41

41:1  Nia ngadau e-lua nomuli, gei di king o Egypt gaa-hai dana midi boo bolo ia nogo duu i taalinga di monowai damana go Nile,

41:2  gei nia kau e-hidu pedi ga-lloo-aga i-lodo di monowai, e-gaigai nadau geingatolo i-taalinga di monowai.

41:3  Nomuli-hua, gei nia kau e-hidu ga-lloo-aga labelaa, nia kau hegehege-loo ge e-huaidu, ga-lloo-aga gi-baahi nia kau pedi i taalinga di monowai deelaa.

41:4  Nia kau hegehege aalaa la-ga-nnoo-adu gi-nia kau pedi aalaa, gaa-gai nia maa. Nomuli gei di king gaa-ala.

41:5  Mee gaa-kii labelaa, gaa-hai labelaa dana midi boloo: Nia ‘wheat’ e-hidu e-huwa-mai i-di laagau e-dahi, e-llauehe ge humalia, e-hai ono mee no-lodo.

41:6  Nomuli-hua, gei nia ‘wheat’ labelaa e-hidu ga-huwa-mai labelaa, ono mee no-lodo ai, ge guu-mae i-di madangi mahana o-di anggowaa.

41:7  Nia ‘wheat’ hegehege aanei ga-hagabugu gaa-holo nia ‘wheat’ e-hidu ala e-humalia. Di king la-ga-ala-aga, ga-iloo-ia bolo ia nogo hai ana midi.

41:8  Luada dono daiaa, gei mee guu-noho gu-de-nnoomaalia, gei mee ga-haga-dagabuli-mai digau hai-mogobuna mo digau kabemee huogodoo o Egypt, ga-hagi-anga gi digaula dana midi, gei di maa hagalee tangada e-mee di-haga-donu nia midi a-maa ai.

41:9  Tagi madamada humalia nia waini di king ga-helekai gi mee, “Dangi-nei, gei au e-haagi dagu mee hala dela ne-hai.

41:10  Do madagoaa dela ne-hagawelewele-mai gi gimaua mo dau dagi hai-palaawaa, goe gaa-lahi gimaua gaa-haa gi-lodo di hale-galabudi gi-baahi di tagi o digau hagaloohi.

41:11  Dahi boo hua, gei gimaua guu-hai mau midi, malaa, mau midi le e-hai-geegee ono hadinga.

41:12  Tama-daane o Hebrew nogo madalia gimaua i-lodo di hale-galabudi, di hege ni tagi o digau hagaloohi. Gimaua ne-hagi-anga mau midi gi mee, gei mee gu-haga-donu-mai gi gimaua mau midi.

41:13  Malaa, nia mee huogodoo guu-kila gadoo be-di hai a-mee ne-haga-donu: Au gu-hanaga labelaa gi dogu lohongo, gei tagi hai-palaawaa gu-daudau gi tomo di laagau.”

41:14  Di king ga-hagau dana dangada gi Joseph bolo gi-hanimoi gi dono baahi. Digaula ga-hagalimalima ga-daa-mai a Joseph gi-daha mo-di hale-galabudi, gaa-dahi dono ngudu, ga-koodai ono gahu, ga-laha-aga a-mee gi-mua di king.

41:15  Di king ga-helekai gi mee, “Au ne-hai dagu midi, malaa, deai tangada e-mee di-hagadonu dagu midi ai. Au ne-longo bolo goe e-mee di-haga-donu nia midi.”

41:16  Joseph ga-helekai, “Meenei di king, au e-deemee. Ma go God ga-haga-donu hagahumalia adu laa gi-di-goe dau midi.”

41:17  Di king ga-helekai, “Au ne-hai dagu midi bolo au e-duu i taalinga di monowai Nile.

41:18  Gei au gaa-mmada gi-nia kau pedi humalia e-hidu e-lloo-aga i-lodo di monowai deelaa, ga-gaigai nadau geingatolo i-taalinga di monowai.

41:19  Ga-nomuli, nia kau labelaa e-hidu ga-lloo-aga i-lodo di monowai, nia kau hegehege ge e-huaidu. Au digi mmada-loo gi-nia kau hegehege beelaa i-hongo Egypt hagatau.

41:20  Nia kau hegehege aalaa ga-nnoo-adu gi-nia kau pedi aalaa, gaa-gai nia maa.

41:21  Malaa, nomuli nia kau aalaa e-hegehege-hua be nia maa mai i-mua, digi hai be nia kau guu-gai nadau mee. Nomuli gei au gaa-ala.

41:22  “Gei au gaa-hai labelaa dagu midi, e-mmada gi-nia ‘wheat’ e-hidu e-huwa-mai i-di gili di laagau e-dahi, nia ‘wheat’ humalia ge llauehe.

41:23  Ga-nomuli nia ‘wheat’ labelaa e-hidu ga-huwa-mai labelaa i-di gili di laagau la-hua deelaa, nia ‘wheat’ aanei deai ono mee no-lodo ai, gei guu-mae i-di madangi mahana o-di anggowaa.

41:24  Gei nia ‘wheat’ huaidu aalaa gaa-gai nia ‘wheat’ humalia. “Au gu-hagi-anga agu midi gi digau hai-mogobuna, gei di-maa hagalee tangada i digaula ne-mee di-haga-donu agu midi ai.”

41:25  Joseph ga-helekai gi-di king, “Au midi e-lua aanaa, la dono hadinga hua e-dahi: God gu-haga-modongoohia-adu gi-di-goe dana mee dela gaa-hai.

41:26  Nia kau e-hidu pedi le e-hai dono hadinga bolo nia ngadau e-hidu, gei nia ‘wheat’ humalia e-hidu le e-hai dono hadinga bolo nia ngadau e-hidu. Nia mee aanei le e-hai-hua di-nau hadinga e-dahi.

41:27  Gei nia kau hegehege ala ne-lloo-aga muliagi, mo nia ‘wheat’ e-hidu ala deai ono mee no-lodo ai ala ne-mae i-di madangi mahana o di anggowaa, le e-hai dono hadinga bolo nia ngadau e-hidu o tau-magamaga damana.

41:28  Di mee deenei e-hai be dagu mee dela ne-hagi-adu gi-di-goe. God gu-haga-modongoohia-adu gi-di-goe dana mee dela gaa-hai.

41:29  Taugai damana gaa-hai i-hongo Egypt i-lodo nia ngadau e-hidu.

41:30  Ga-nomuli, gei tau-magamaga gaa-hai i-lodo nia ngadau e-hidu. Nia ngadau huogodoo ala nogo humalia ga-de-langahia, idimaa tau-magamaga ga-hagahuaidu tenua deenei.

41:31  Nia daangada ga-de-langahia-e-ginaadou taugai damana deelaa, idimaa, tau-magamaga dela gaa-hai le e-huaidu huoloo.

41:32  Tadinga o dau midi dela ne-hai haga-lua, go di-maa dela bolo God gu-haga-noho bolo nia mee ala nogo helekai-iei au adu gi-di-goe le e-kila-aga i-di madagoaa hoohoo-mai.

41:33  “Malaa, dolomeenei, gei goe ga-hilihili dau dangada kabemee ge e-iloo di hai nia mee, gei goe gaa-wanga gi mee di moomee dela e-madamada humalia i tenua deenei.

41:34  Gei goe ga-hilihili labelaa au daangada aamua e-hagabudu-mai e-dahi baahi e-lima mai i-nia huwa laagau i-lodo nia ngadau e-hidu o taugai.

41:35  Hai gi digaula bolo gi-hagabudu-ina nia huwa-laagau huogodoo ala i-lodo nia ngadau e-hidu o taugai ala ga-lloomoi. Haga-mogobuna-ina digaula gi-benabena-ina nia ‘wheat’ gi-lodo nia waahale llauehe gi-hagaloohi-ina.

41:36  Nia meegai aalaa le e-benebene ang-gi di hagahumalia o tenua i-lodo tau-magamaga o-nia ngadau e-hidu dela ma-gaa-hai i-hongo Egypt. Maa gaa-hai beenei, gei nia daangada hagalee hiigai.”

41:37  Di king mo ana gau aamua gu-haga-mogobuna di hagamaanadu deenei,

41:38  di king ga-helekai gi digaula, “Gidaadou e-deemee di-gida tadau dangada e-humalia i Joseph dela iai di Hagataalunga o God i-ono lodo.”

41:39  Di king ga-helekai gi Joseph, “God la-gu-haga-modongoohia-adu gi-di-goe nia mee huogodoo aanei, malaa, gu-modongoohia bolo ma deai taane i-golo e-kabemee ge iloo-ia nia mee i oo nua ai.

41:40  Au ga-haga-menege-aga goe e-dagi dogu henua. Agu daangada huogodoo ga-haga-kila-aga au haganoho. Deelaa-hua ko-au dela e-aamua i-di-goe ga-no-lala kooe.

41:41  Dolomeenei, gei au e-haga-menege-aga goe e-hai di gobinaa o Egypt hagatau.”

41:42  Di king ga-daa gi-daha dono buulei-king nogo i dono madaalima, gaa-wanga gi-di madaalima o Joseph, ga-haga-ulu a-mee gi-di gahu hagalamalia, gaa-wanga dana hau goolo gi-di uwa o-maa.

41:43  Gaa-wanga gi mee dono lua waga-hongo-henua e-hana-iei mee. Nia madaloohi o-di king e-hula i-mua o mee, mo-di wwolowwolo boloo, “Haga-aadee-ina di ala! Haga-aadee-ina di ala!” Malaa, Joseph gu-haga-menege-aga go di king guu-hai di gobinaa o Egypt hagatau.

41:44  Di king ga-helekai gi Joseph, “Au di king, deai tangada i-hongo Egypt hagatau e-dahi-aga dono lima be go dono wae ai, maa goe digi hai gi mee bolo gi-heia.”

41:45  Di king gaa-wanga di ingoo a Joseph bolo Zaphenath=Paneah, gaa-wanga gi mee di ahina go Asenath gi-lodo ginai mee, di ahina la tama-ahina ni Potiphera, tangada hai-mee-dabu ni-di waahale damana go Heliopolis. Joseph gu-motolu ono ngadau i-di madagoaa o mee ne-daamada ga-hai-hegau i-baahi di king o Egypt. Malaa, Joseph guu-hana gi-daha mo-di king guu-hana gu-haganiga i-hongo Egypt hagatau.

41:46  Di king gaa-wanga di ingoo a Joseph bolo Zaphenath=Paneah, gaa-wanga gi mee di ahina go Asenath gi-lodo ginai mee, di ahina la tama-ahina ni Potiphera, tangada hai-mee-dabu ni-di waahale damana go Heliopolis. Joseph gu-motolu ono ngadau i-di madagoaa o mee ne-daamada ga-hai-hegau i-baahi di king o Egypt. Malaa, Joseph guu-hana gi-daha mo-di king guu-hana gu-haganiga i-hongo Egypt hagatau.

41:47  I-lodo-hua nia ngadau e-hidu o taugai, gei di gai o tenua guu-huwa logowaahee.

41:48  Malaa, Joseph gu-hagabudu-mai nia huwa-laagau o tenua hagatau gi-lodo nia waahale llauehe. Malaa, di waahale-nei mo-di waahale-nei le e-hagabudu-hua ginai nia mee ala e-hoohoo ginai.

41:49  Nia huwa-‘wheat’ a Joseph ne-hagabudu la-gu-logowaahee gadoo be nia gelegele i tongotai. Mee gu-hagalee hagatau nia maa, idimaa ma gu-deemee di-hagatau.

41:50  I-mua-hua nia ngadau o tau-magamaga, gei Joseph guu-hai ana dama-daane dogolua gi Asenath.

41:51  Joseph ga-helekai, “God guu-hai au gi-de-langahia ogu hagaduadua mo digau o-di hale o dogu damana.” Mee gaa-gahi di ingoo o dana dama-daane matagidagi bolo Manasseh.

41:52  Mee ga-helekai labelaa boloo, “God gu-gaamai agu dama i-lodo tenua o ogu haingadaa.” Malaa, gei mee gaa-gahi di ingoo o dana lua dama bolo Ephraim.

41:53  Nia ngadau e-hidu o taugai i-hongo Egypt la-guu-odi,

41:54  gei nia ngadau e-hidu o tau-magamaga gu-daamada be nia helekai a Joseph ne-hai. Nia henua huogodoo ala i-daha mo Egypt la-guu-hai tau-magamaga damana, gei i-hongo Egypt la-nogo iai nia meegai i-golo.

41:55  Digau Egypt ma-ga-hiigai, gei digaula gaa-hula ga-tangi gi-di king i-nia meegai, gei di king ga-helekai gi digaula bolo gii-hula gi Joseph gi-heia nia mee a-mee ma-ga-hagi-anga gi ginaadou.

41:56  Tau-magamaga la-gu-huaidu huoloo i-hongo nia henua huogodoo, malaa, Joseph guu-huge nia hale-benebene-mee huogodoo, ga-huihui nia palaawaa aalaa gi digau Egypt.

41:57  Nia daangada i-nia madagowaa huogodoo i henuailala e-lloomoi gi Egypt e-hui nadau palaawaa gi Joseph, idimaa tau-magamaga la-guu-dau i-nia madagowaa huogodoo.

Chapter 42

42:1  Di madagoaa Jacob ne-iloo bolo nia meegai i Egypt, mee ga-helekai gi ana dama-daane, “Goodou de-ga-hai di-godou mee!

42:2  Au e-longo bolo nia meegai i Egypt, hula huia godou meegai e-daahi gidaadou gi-de-hiigai gaa-mmade.”

42:3  Gei nia duaahina-daane Joseph dilongoholu gaa-hula e-hui nia meegai i Egypt,

42:4  gei Jacob digi hagau-ina tuaahina a Joseph donu go Benjamin dalia digaula, idimaa mee e-madagu bolo di-mee huaidu gaa-tale gi-mee.

42:5  Nia dama-daane Jacob ne-loomoi dalia digau labelaa i-golo e-hui nadau meegai, idimaa tau-magamaga nogo hai i Canaan.

42:6  Joseph dela nogo hai di gobinaa o Egypt, nogo huihui ana meegai gi-nia daangada huogodoo o henuailala. Gei nia duaahina-daane Joseph gu-loomoi gaa-pala i-mua o mee, nadau golomada guu-tale gi-nia gelegele.

42:7  Di madagoaa Joseph ne-mmada gi ono duaahina-daane, mee gu-modongoohia digaula, gei mee gaa-hai be ia e-de-iloo digaula. Mee ga-heeu gi digaula hagawelewele, “Goodou ne-loomoi i-hee?” Digaula ga-helekai, “Gimaadou ne-loomoi i Canaan belee hui madau meegai.”

42:8  Joseph gu-modongoohia ono duaahina daane, gei digaula digi modongoohia a-mee.

42:9  Mee ne-langahia ana midi ne-hai i digaula, ga-helekai, “Goodou digau halahala mee hagammuni, goodou ne-loomoi belee halahala di gowaa e-bagege i-di madau henua.”

42:10  Digaula ga-helekai, “Meenei, deeai! Gimaadou ne-loomoi be nia hege ni-aau, belee hui madau meegai.

42:11  Gimaadou huogodoo tagahaanau daane. Gimaadou hagalee digau halahala-mee hagammuni. Meenei, gimaadou nia daane helekai donu.”

42:12  Joseph ga-helekai, “Deeai, goodou ne-loomoi belee halahala di gowaa e-bagege i-di madau henua.”

42:13  Digaula ga-helekai, “Meenei, gimaadou tagahaanau daane dilongoholu maa-lua ni taane e-dahi i Canaan. Tuaahina-daane e-dahi guu-made, ge tuaahina-daane dulii la i-baahi di-madau damana.”

42:14  Joseph ga-helekai, “E-hai-hua be dagu helekai, goodou digau halahala mee hagammuni.

42:15  Deenei di hai e-hagadina goodou: Au e-doangi i-di ingoo di king bolo goodou hagalee-loo e-hula go di-maa hua di-godou duaahina dulii la-gu-hanimoi gi kinei.

42:16  Tangada e-dahi i goodou e-hana e-laha-mai a-mee. Goodou ala i-golo e-noho i-lala di hagaloohi gaa-dae-loo gi-di tonu o godou helekai ga-hagi-aga goodou. Maa ga-deeai, e-donu be di king dela e-mouli, gei goodou aalaa hua go digau halahala-mee hagammuni.”

42:17  Joseph gaa-dugu digaula i-lodo di hale-galabudi nia laangi e-dolu.

42:18  Togo-dolu laangi, Joseph ga-helekai gi digaula, “Au tangada e-hagalaamua God, gei au gaa-hai goodou gi-mouli maa goodou gaa-hai beenei:

42:19  Goodou belee hagadina be goodou e-donu, tangada e-dahi i goodou gaa-noho i-lodo di hale-galabudi, di gowaa nogo noho-ai goodou, goodou ala i-golo gaa-kae nia meegai gi-di-godou madahaanau dela gu-hiigai.

42:20  Goodou e-hai gi-laha-mai di-godou duaahina dulii gi-di-au. Deenei di-mee ga-haga-donu bolo goodou nogo helekai di tonu, gei au ga-hagalee daaligi goodou gii-mmade.” Digaula guu-donu gi-di hai deenei,

42:21  ga-helekai i nadau mehanga, “Uaa, dolomeenei gidaadou e-hagaduadua, i-di gili tadau mee ne-hai gi tadau duaahina-daane. Gidaadou gu-gidee di haingadaa o-maa dono dangidangi i-di hagamaamaa, gei gidaadou digi hagalongo. Deenei-laa gidaadou gu-i-lodo di haingadaa dolomeenei.”

42:22  Reuben ga-helekai, “Au gu-helekai bolo goodou gi-hudee hagahuaidu-ina a-mee, gei goodou digi hagalongo. Dolomeenei gidaadou e-hui dono made.”

42:23  Joseph gu-iloo nadau helekai, gei digaula digi iloo, idimaa nadau helekai laa-nogo hagadonu go tangada gi mee.

42:24  Joseph ga-hagatanga gi-daha mo digaula gaa-dangi, ga-hanimoi labelaa ga-lawalawa Simeon i-mua digaula.

42:25  Joseph ga-helekai bolo gi-haawa-ina nia peege digaula gi-nia meegai gii-honu, wanga-ina nadau bahihadu ne-hui nia maa gi-lodo nadau peege huogodoo, ge gi-wanga-ina nadau meegai e-gai i-di-nadau hula. Nia mee aanei la-guu-hai.

42:26  Nia duaahina-daane ga-hagauda nadau meegai ne-hui gi-hongo nadau ‘donkey’ ga-hagatanga.

42:27  Di gowaa dela ne-noho gaa-kii-ai digaula i-di boo, tangada e-dahi i digaula gaa-huge dana peege belee haangai dana ‘donkey’, ga-gidee ana bahihadu i-di ulu gi-nua dana peege.

42:28  Mee gaa-wolo gi ono duaahina-daane, “Agu bahihadu la-gu-gaamai gi-muli, aanei i-lodo dagu peege.” Nadau manawa gu-ngaalua, gei gu-mmaadagu, ga-heeu, “God ne-hai dana-aha mai gi gidaadou?”

42:29  Di-nadau loomoi gi di-nadau damana go Jacob i Canaan, digaula ga-hagi-anga nia mee huogodoo ala ne-hai ang-gi ginaadou:

42:30  “Di gobinaa o Egypt gu-helekai-mai hagawelewele bolo gimaadou e-halahala hagammuni nia mee e-hai-baahi gi di-nadau henua.

42:31  Gimaadou ga-helekai, ‘Gimaadou hagalee digau halahala-mee hagammuni. Gimaadou digau hai mee donu.

42:32  Gimaadou tagahaanau daane dilongoholu maa-lua huogodoo. Tuaahina e-dahi guu-made, gei tuaahina kaedahi dulii i Canaan i-baahi di-madau damana.’

42:33  Taane deelaa ga-helekai, ‘Deenei dagu hai e-halahala be goodou digau e-donu: Goodou gaa-kae godou meegai gaa-hula gi-di-godou madahaanau dela gu-hiigai, kaina godou meegai, ge tangada e-dahi e-noho i dogu baahi.

42:34  Laha-mai di-godou duaahina-daane dulii gi-di-au, gei au ga-iloo bolo goodou hagalee digau halahala-mee hagammuni, gei digau e-donu. Au ga-gowadu di-godou duaahina gi-muli gi goodou, gei goodou gaa-mee di noho i ginei ga-huihui godou mee.’ ”

42:35  Digaula gaa-dui gi-daha nadau peege gei digaula huogodoo ga-gidee nadau bahihadu i-lodo nadau peege, gei digaula mo di-nadau damana gu-mmaadagu.

42:36  Di-nadau damana ga-helekai, “Goodou e-hiihai agu dama gi-hagalee huogodoo? Joseph gu-hagalee. Simeon hogi, gei dolomeenei goodou e-hiihai e-lahi a Benjamin. Ma ko-au dela e-duadua!”

42:37  Reuben ga-helekai gi dono damana, “Maa au ga-hagalee laha-mai Benjamin gi-di-goe, goe e-mee di-daaligi agu dama-daane dogolua gii-mmade. Dugua mai a-mee gi-di-au, gei au ga-laha-mai a-mee gi-muli gi-di-goe.”

42:38  Gei Jacob ga-helekai, “Dagu dama e-deemee di-hana i oo muli. Tuaahina o-maa guu-made, go mee hua guu-dubu. Dolomaa di-mee huaidu gaa-hai gi mee i godou hula. Au gu-madua gei di manawa-gee dela gaa-hai go goodou mai gi-di-au ga-daaligi au gii-made.”

Chapter 43

43:1  Taumagamaga i Canaan gu-huaidu huoloo,

43:2  malaa, di madahaanau Jacob guu-gai nia mee huogodoo ala ne-gaamai i Egypt, gei Jacob ga-helekai, “Hula gi-muli, huia hunu meegai mai gi gidaadou.”

43:3  Judah ga-helekai gi Jacob, “Taane deelaa gu-helekai maaloo bolo gimaadou e-deemee di-lloo-adu gi dono baahi go di-maa hua gimaadou ga-lahadu a Benjamin.

43:4  Maa goe ga-hiihai e-hagau a-mee dalia gimaadou, gimaadou gaa-hula gaa-hui au meegai.

43:5  Maa goe hagalee hiihai e-hagau a-mee, gimaadou hagalee hula, idimaa taane deelaa guu-hai bolo gimaadou e-deemee di-lloo-adu maa Benjamin la-hagalee i madau baahi.”

43:6  Jacob ga-helekai, “Goodou e-aha ala e-gaamai di haingadaa i-di godou helekai gi taane deelaa bolo di-godou duaahina labelaa i-golo?”

43:7  Digaula ga-helekai, “Go taane ne-helekai e-logo i gimaadou mo di-madau madahaanau, boloo, ‘Di-godou damana e-mouli hua igolo? Godou duaahina labelaa i-golo?’ Gimaadou ne-belee hai gii-hui nia heeu a-maa. Gimaadou e-iloo di-aha bolo mee ga-helekai bolo gi-laha-mai di-madau duaahina dalia gimaadou?”

43:8  Judah ga-helekai gi dono damana, “Hagau-ina tama-daane dalia au, gei gimaadou ga-hagatanga dolomeenei. Gei di-maa ga-hagalee tangada e-dahi e-hiigai ga-made-ai.

43:9  Au ga-dugu-adu dogu mouli, gei goe e-mee di-dugu-mai a-mee e-madamada humalia-iei au. Maa nei bolo au ga-hagalee laha-mai a-mee gi-muli, e-humalia, au gaa-kae di hala i-nia madagoaa huogodoo.

43:10  Maa gidaadou digi noho waalooloo beenei, gidaadou guu-hula ge gu-loomoi gi-muli hagalua dolomeenei!”

43:11  Tamana digaula ga-helekai, “Maa deenaa di hai gaa-hai, kaina-laa di-mee e-humalia huoloo i-hongo tadau gowaa e-hai di-wanga-dehuia gi-di gobinaa, nia mee be hunu lolo-kala hui-ngadaa, hunu mee-maangala, hunu mee haga-kala meegai, hunu golee-‘pistachio’, mo nia golee leu ‘almond’.

43:12  Haga-logo-ina godou bahihadu gi-holongo lua e-kae dalia goodou, idimaa goodou belee kae gi-muli nia bahihadu ne-gaamai gi-muli i-lodo godou peege. Holongo ma di mee hala ne-hai.

43:13  Lahia di-godou duaahina, gei goodou hagalimalima lloomoi gi-muli.

43:14  Di God Mogobuna gi-heia taane deelaa gi-dumaalia Benjamin mo di-godou duaahina dela i-golo adu gi goodou. Maa au belee hai gi-hagalee agu dama, malaa, au gii-hai beelaa.”

43:15  Digaula gaa-kae nadau kisakis mono bahihadu e-logo holongo-lua, gaa-hula gi Egypt guu-lahi a Benjamin. Digaula gaa-hula gi-mua o Joseph.

43:16  Di madagoaa Joseph ne-mmada gi Benjamin, Joseph ga-helekai gi-di tagi o ana gau hai-hegau, “Lahia digau aanei gi dogu hale. Digaula e-miami dalia au oodee, daaligi-dia di manu, hagatogomaalia-ina.”

43:17  Tangada hai-hegau guu-hai gii-hai be nia helekai a Joseph, guu-lahi digaula gi-di hale o-maa.

43:18  Di-nadau lahi gi-di hale, digaula gu-mmaadagu ga-hagamaanadu, “Gidaadou e-laha-mai gi kinei i-di gili nia bahihadu ala ne-gaamai gi-muli i-lodo tadau peege i-di matagidagi. Digau aanei la-ga-heebagi-mai gi gidaadou, gaa-kae tadau ‘donkey’, gaa-hai gidaadou gii-hai nia hege ni mee.”

43:19  Digaula ga-helekai gi-di tagi tangada hai-hegau i-baahi di bontai,

43:20  “Dumaalia-mai, gimaadou gu-loomoi gi kinei hagadahi i-mua e-hui madau meegai.

43:21  Di-madau hula gi-muli gi-di gowaa ne-hagaduu madau hale-laa, gaa-huge madau peege, ga-gidee madau bahihadu e-dugu mugi-nua i-lodo madau peege, dolomeenei gimaadou gu-gaamai nia bahihadu aanei gi-di-goe.

43:22  Gimaadou gu-gaamai labelaa madau bahihadu e-hui madau meegai. Gimaadou e-de-iloo be di-ma koai ne-dugu madau bahihadu gi-lodo madau peege.”

43:23  Tangada hai-hegau ga-helekai, “Hudee heie-e-goodou, hudee mmaadagu. E-hai be di-godou God, di God di-godou damana, ne-dugu godou bahihadu gi-lodo godou peege. Au guu-kumi nia hui o godou meegai.” Gei tangada hai-hegau ga-laha-mai Simeon gi digaula.

43:24  Tangada hai-hegau gaa-lahi digaula gi-lodo di hale, gaa-wanga nadau wai gaugau wae, ga-haangai nadau ‘donkey’.

43:25  Digaula ga-hagatogomaalia nadau wanga-dehuia e-wanga gi Joseph ma-gaa-dau oodee, i digaula gu-longono bolo ginaadou e-miami dalia Joseph.

43:26  Joseph ne-dau, digaula gaa-kae nia goloo gi-mee, gaa-pala gi-lala i-mua o-mee.

43:27  Joseph ga-heeu be ginaadou e-hai behee, ga-helekai, “Goodou ne-helekai i-di godou damana. Mee guu-hai behee? Mee e-mouli gei e-humalia?”

43:28  Digaula ga-helekai, “Dau dangada hai-hegau, di-madau damana e-mouli hua igolo, gei e-humalia.” Digaula gaa-pala gi-lala i-mua o-mee.

43:29  Di madagoaa Joseph ne-mmada gi Benjamin, ga-helekai, “Deenei di-godou duaahina dulii nogo helekai-ai goodou? God gi-hagahumalia-ina goe, go dagu dama-daane.”

43:30  Joseph gaa-hana gi-daha hagalimalima, idimaa dono manawa gu-aloho huoloo i dono duaahina. Mee bolo ga-daamada ga-dangidangi, gei mee gaa-hana gi-lodo dono ruum gaa-dangi.

43:31  I-muli Joseph ne-gaugau ono golomada, ia ga-ulu-mai gi-daha, ga-helekai bolo gi-taataa-ina nia meegai.

43:32  Joseph nogo noho i teebele e-dahi ge ono duaahina i tuai deebele. Digau Egypt nogo dau e-miami nogo noho i-di nadau deebele, idimaa e-hagalangaadia di-nadau noho dalia digau Hebrew e-miami i teebele.

43:33  Tagahaanau nogo noho i teebele e-huli-mai gi Joseph, e-hagatau daamada tangada madua gaa-hana gi tangada dulii. Di-nadau mmada gi-di hagatau beenei, digaula gu-gologolo huoloo.

43:34  Nia meegai ne-taa-mai i teebele Joseph, gei Benjamin ana meegai e-logo nia holongo e-lima i-hongo nia meegai ono duaahina. Digaula ga-miami mo-di inuinu dalia a-mee gaa-dae-loo gi nadau libaliba.

Chapter 44

44:1  Joseph ga-helekai gi-di tagi gau hai-hegau dono hale, “Haawa-ina nia meegai digaula gii-logo gi-lodo nadau peege gii-tugi nadau mee ala e-mee di-aamo. Wanga-ina nia bahihadu tangada-nei mo tangada-nei gi-di ulu dana peege.

44:2  Wanga-ina dagu ibu silber gi-lodo di ulu di peege o tuaahina daane dulii dalia nia bahihadu ne-hui ana meegai.” Di tagi gau hai-hegau guu-hai gii-hai be nnelekai.

44:3  Luada-loo dono daiaa, tagahaanau daane gaa-hula mo nadau manu-‘donkey’.

44:4  Digaula gaa-hula digi mogowaa, gei Joseph ga-helekai gi-di tagi gau hai-hegau dono hale, “Hagalimalima hula i-muli digau aalaa, heeu gi digaula: ‘Goodou ne-aha ala e-hui gi-muli di huaidu gi-di humalia?

44:5  Goodou e-aha ala ne-gaiaa di ibu silber o dogu dagi? Ma di ibu e-inuinu-ei mee gei e-hai ana hegau dabu. Goodou guu-hai di-godou ihala damana!’ ”

44:6  Tagi gau hai-hegau ne-dau-adu gi digaula, gei mee ga-helekai i nnelekai aanei labelaa.

44:7  Digaula ga-helekai gi mee, “Au helekai le e-hai bolo-aha? Gimaadou e-doangi bolo gimaadou digi hai di-mee beelaa.

44:8  Goe e-iloo bolo gimaadou gu-gaamai gi-muli nia bahihadu ne-kida i-nia ulu madau peege. Gimaadou belee gaiaa madau silber be nia goolo mai di hale doo dagi eimaha?

44:9  Meenei, maa tangada e-dahi i gimaadou guu-gida di mee deelaa i dono baahi, mee e-daaligi gii-made, gei gimaadou huogodoo e-hai godou hege.”

44:10  Tagi gau hai-hegau ga-helekai, “Au e-donu ginai, gei di-maa go tangada hua ne-kae di-maa e-hai dagu hege, gei goodou ala i-golo gaa-hula.”

44:11  Digaula gaa-dugu nadau peege hagalimalima gi-hongo nia gelegele, tei gii-huge dana peege.

44:12  Tagi digau hai-hegau a Joseph ga-halahala di-maa, daamada i tangada madua gaa-hana gi tangada dulii, gei di ibu ne-gida i-lodo di peege Benjamin.

44:13  Nia duaahina o-maa ga-hahaahi nadau gahu i nadau lodo-huaidu, ga-hagauda nadau ‘donkey’, gaa-hula gi-muli gi-di waahale.

44:14  Di-nadau dau-mai gi-di hale Joseph, gei mee nogo i-golo. Digaula gaa-pala gi-lala i-mua o mee.

44:15  Joseph ga-helekai, “Ma di-aha ne-hai go goodou? Goodou digi iloo bolo tangada i-di lohongo deenei le e-mee di-halahala goodou mai i ono mogobuna?”

44:16  Judah ga-helekai, “Meenei, gimaadou e-mee di-helekai-adu bolo-aha? Gimaadou e-mee di-lagamaaloo behee? Gimaadou e-mee di-haga-madammaa gimaadou behee? God gu-hagagila-mai madau ihala. Gimaadou huogodoo dolomeenei nia hege ni-aau, hagalee go tangada hua dela ne-gida-ai di ibu i dono baahi.”

44:17  Joseph ga-helekai, “Deeai, au hagalee-loo e-hai beenaa. Go tangada hua dela nogo iai dagu ibu i dono baahi e-hai dagu hege. Goodou ala i-golo hula gi-muli gi-di-godou damana.”

44:18  Judah gaa-hana gi-hoohoo gi Joseph, ga-helekai, “Meenei, hudee heheia, dumaalia-mai au e-helekai-adu. Hudee hagawelewele-mai, goe e-hai-hua be-di king.

44:19  Meenei, goe ne-heeu-mai gi gimaadou, ‘Di-godou damana mo di-godou duaahina-daane i-golo?’

44:20  Gimaadou ga-helekai, ‘Gimaadou di-madau damana gu-madua, mo tuaahina-daane dulii, dela ne-haanau gi mee gei mee gu-madua. Tuaahina-daane o tama-daane deelaa la-guu-made, go mee-hua dela e-mouli i-nia dama o-di ahina, gei tamana o-maa e-aloho huoloo i-mee.’

44:21  Meenei, goe ne-helekai-mai gi gimaadou gi-laha-mai a-mee gi-gidee-goe,

44:22  gei gimaadou ga-helekai bolo tama-daane la-deemee di-hagatanga gi-daha mo dono damana. Maa mee ga-hagatanga gi-daha, tamana o-maa la-gaa-made.

44:23  Gei goe ga-helekai, ‘Goodou ga-deemee di-loomoi labelaa gi dogu baahi, ma di-godou duaahina la-digi hanimoi i godou muli.’

44:24  “Di madagoaa gimaadou ne-hula gi-di-madau damana, gimaadou ga-hagi-anga au helekai.

44:25  Di-madau damana ga-helekai bolo gi-loomoi e-hui madau meegai dulii.

44:26  Gimaadou ga-helekai boloo, ‘Gimaadou e-deemee di-hula gi taane deelaa, go di-maa hua di-madau duaahina ga-madalia gimaadou. Gimaadou e-deemee di-hula ma di-madau duaahina-daane la-hagalee hana.’

44:27  Di-madau damana ga-helekai, ‘Goodou e-iloo bolo dogu lodo go Rachel ne-haanau-hua ana dama-daane dogolua mai gi-di-au.

44:28  Tangada e-dahi guu-hana gi-daha mo au. Holongo gu-gadigadi go nia manu lodo-geinga, idimaa au digi mmada gi mee i-muli dono laangi ne-hagatanga.

44:29  Maa goodou gaa-lahi tama-daane deenei gi-daha mo au dolomeenei, gei mee gaa-tale gi-di haingadaa, di lodo-huaidu ne-hai go goodou mai gi-di-au la-ga-daaligi au gii-made, i dogu madua.’ ”

44:30  Judah ga-duudagi ana helekai, “Gei dolomeenei, meenei, maa au gaa-hana gi-muli gi dogu damana, gei tama-daane la-hagalee i dogu baahi, di madagoaa-hua dogu damana ga-gidee, gei dogu damana la-gaa-made-hua. Di mouli o-maa la i-lodo di mouli o tama-daane, gei mee gu-madua huoloo, di lodo-huaidu dela gaa-hai go gimaadou gi mee ga-daaligi a-mee gii-made.

44:31  Judah ga-duudagi ana helekai, “Gei dolomeenei, meenei, maa au gaa-hana gi-muli gi dogu damana, gei tama-daane la-hagalee i dogu baahi, di madagoaa-hua dogu damana ga-gidee, gei dogu damana la-gaa-made-hua. Di mouli o-maa la i-lodo di mouli o tama-daane, gei mee gu-madua huoloo, di lodo-huaidu dela gaa-hai go gimaadou gi mee ga-daaligi a-mee gii-made.

44:32  Au guu-wanga dogu mouli gi dogu damana i tama-daane deelaa. Au ne-helekai gi mee bolo maa au ga-hagalee laha-mai tama-daane gi-muli gi-deia, gei dogu mouli gaa-hai di hui ni di-maa.

44:33  Meenei, dumaalia-mai gi-di-au gaa-pono di lohongo tama-daane deelaa, gei au gaa-noho i kinei gaa-hai di hege ni-aau. Dugua a-mee gii-hana madalia ono duaahina-daane.

44:34  Dehee dagu hai e-hana gi-muli gi dogu damana ma tama-daane la-hagalee madalia au? Au e-deemee di-daumada di haingadaa deenei ma-gaa-hai gi dogu damana.”

Chapter 45

45:1  Joseph gu-deemee di-hagakono i-mua ana daangada hai-hegau, ga-helekai gi digaula huogodoo gii-hula gi-daha. Joseph nogo modogoia-hua i-di madagoaa a-mee ne-hagi-aga ia gi ono duaahina.

45:2  Joseph ne-dangi gi-nua, gei digau Egypt gu-longono, gei di longo guu-kae gi-di hale di king.

45:3  Joseph ga-helekai gi ono duaahina daane, “Au go Joseph. Dogu damana e-mouli?” Di madagoaa ono duaahina ne-longono nnelekai a-maa, digaula gu-homouli gu-mmaadagu, gu-deemee di-helekai.

45:4  Joseph ga-helekai, “Dumaalia, mmaanege gi-hoohoo-mai.” Digaula gu-mmaanege-mai, gei mee ga-helekai, “Au go di-godou duaahina go Joseph, dela ne-hui go goodou gi digau Egypt.

45:5  Goodou hudee lodo-huaidu be bida hagahuaidu goodou idimaa goodou ne-hui au i kinei. Ma go God ne-hagau-mai au i godou mua belee haga-humalia nia mouli nia daangada.

45:6  Deenei di lua ngadau o tau-magamaga i-hongo tenua. Nia ngadau e-lima e-lloomoi i tadau mua, tangada e-haga-maluu dana hadagee be e-hagi ana huwa-laagau ai.

45:7  God ne-hagau-mai au i godou mua belee benebene goodou gi-di hai humalia deenei, mo-di hagatogomaalia gi-dogomaalia goodou mo godou hagadili gi-mouli.

45:8  Malaa, hagalee go goodou ne-hagau-mai au gi kinei, go God. God guu-hai au gii-hai tangada kaedahi aamua ni-di king. Au e-dagi Egypt hagatau.

45:9  “Hula gi-muli hagalimalima, haga-iloo gi dogu damana bolo deenei telekai dana dama-daane go Joseph ne-helekai, ‘God guu-hai au di tagi o Egypt hagatau, hudee duai, hanimoi gi-di-au.

45:10  Goe e-mee di noho i Goshen, e-hoohoo-mai gi-di-au, kooe, au dama, nia dama au dama, au siibi, au kuudi, kau, mo au mee huogodoo.

45:11  Goe ma-gaa-noho i Goshen, au e-mee di-madamada humalia i-di-goe. Nia ngadau e-lima e-hai tau-magamaga hua igolo. Au hagalee hiihai bolo goe, do madahaanau mo au manu gi-hiigai.’ ”

45:12  Joseph ga-duudagi-adu dana kai, “Goodou huogodoo, mo goe go Benjamin, e-gidee bolo au go Joseph donu.

45:13  Hagi-anga-ina gi dogu damana ogu mogobuna dagi maaloo-dangihi i Egypt, mo godou mee huogodoo ne-mmada ginai. Laha-mai a-mee hagalimalima gi kinei.”

45:14  Joseph ga-bulubulu-mai dono duaahina go Benjamin, ga-daamada gaa-dangi. Benjamin guu-dangi labelaa mo-di hongihongi a-mee.

45:15  Dono madagoaa e-dangidangi hua igolo, gei Joseph ga-bulubulu-adu ono duaahina dagidahi ga-hongihongi. Nomuli ono duaahina ga-daamada ga-helekai gi Joseph.

45:16  Nia longo ne-dau di hale di king bolo nia duaahina Joseph la-gu-loomoi, di king mo ana dagi hai-hegau gu-tenetene.

45:17  Mee ga-helekai gi Joseph, “Helekai gi o duaahina gi-hagauda-ina nadau manu gii-hula gi-muli gi Canaan.

45:18  Heia digaula gi-lahamai di-nadau damana, mo nadau madahaanau gi-loomoi gi kinei. Au gaa-wanga gi digaula tenua e-kaedahi humalia i Egypt, gei digaula gaa-dohu gi-nia mee e-mouli-ai.

45:19  Helekai labelaa gi digaula gi-kaina nadau kulumaa mai i Egypt ang-gi nadau lodo mo nadau dama-lligi, gei gi-lahamai di-nadau damana dalia ginaadou.

45:20  Digaula hagalee heie-ginaadou nadau mee ala e-diiagi gi-muli, nia mee kaedahi humalia i Egypt la-gaa-hai nadau mee.”

45:21  Digaula guu-hai gii-hai be nnelekai. Joseph guu-wanga gi digaula nia kulumaa gii-hai be telekai di king ne-hai, mono meegai ang-gi di-nadau hula.

45:22  Joseph guu-wanga gi digaula huogodoo nia goloo gahu ulu-ai ginaadou, gei ang-gi Benjamin nia silber e-dolu-lau mono gahu e-lima.

45:23  Mee gu-hagau gi dono damana nia ‘donkey’ e-madangaholu, gu-hagauda ginai nia goloo humalia o Egypt, gei madangaholu ‘donkey’ ne-hagauda gi-nia huwa-laagau, palaawaa mo nia meegai ala i-golo ang-gi di-nadau hula.

45:24  Mee ga-hagau ono duaahina, ga-helekai hagamuliagina gi digaula, “Hudee lagalagamaaloo i-di godou hula.”

45:25  Digaula ga-hagatanga i Egypt, gaa-hula gi di-nadau damana i Canaan.

45:26  Digaula ga-helekai gi mee, “Joseph le e-mouli hua igolo. Mee e-dagi Egypt hagatau!” Jacob gu-homouli gu-deemee di-hagadonu digaula.

45:27  Di-nadau hagi-anga nnelekai huogodoo Joseph ne-hai ang-gi ginaadou, gei Jacob gaa-mmada gi-nia kulumaa Joseph ne-hagau-mai belee lahi ia gi Egypt, Jacob gu-manawa lamalia gi-daha mo dono homouli,

45:28  ga-helekai, “Dagu dama-daane le e-mouli hua igolo! Deenei hua dagu mee e-hiihai ginai, au e-hai gii-hana gii-mmada au gi mee i-mua dogu made.”

Chapter 46

46:1  Jacob ga-hagabudu-mai ana goloo huogodoo gaa-hana gi Beersheba, gaa-hai dana tigidaumaha i-golo gi-di God o dono damana go Isaac.

46:2  Boo gei God ga-helekai gi Jacob mai i-lodo di moe hagagida, “Jacob! Jacob!” Jacob ga-helekai, “Deenei au.”

46:3  God ga-helekai, “Au go God, go di God o do damana. Goe hudee madagu di-hana gi Egypt. Au gaa-hai-laa do madawaawa gi-dogologowaahee i tenua deelaa.

46:4  Au gaa-hana i oo muli gi Egypt. Au ga-laha-mai gi-muli do madawaawa gi kinei. Do madagoaa ma-gaa-made, gei Joseph e-noho i do baahi.”

46:5  Jacob ga-hagatanga i Beersheba. Nia dama-daane a-maa ne-haga-uda a Jacob mo nadau dama-lligi mo nadau lodo gi-hongo nia waga-hongo-henua a di king o Egypt ala ne-kae belee laha-mai digaula.

46:6  Digaula gaa-kae nadau manu mo nadau mee huogodoo ala e-hai-mee ginai ginaadou i Canaan, gaa-hula gi Egypt. Jacob guu-hana guu-lahi dono madawaawa hagatau gi Egypt,

46:7  go ana dama-daane mo ana dama-ahina, mo nia dama digaula.

46:8  Digau di madahaanau Jacob ne-hula dalia a-mee gi Egypt la-go dana dama-daane madua go Reuben

46:9  mo ana dama-daane: go Hanoch, Pallu, Hezron mo Carmi.

46:10  Simeon mo ana dama-daane: go Jemuel, Jamin, Ohad, Jachin, Zohar mo Shaul, tama-daane ni-di ahina Canaan.

46:11  Levi mo ana dama-daane: go Gershon, Kohath mo Merari.

46:12  Judah mo ana dama-daane: go Shelah, Perez mo Zerah (ana dama-daane i-golo go Er mo Onan guu-mmade i Canaan). Nia dama-daane Perez la-go Hezron mo Hamul.

46:13  Issachar mo ana dama-daane: go Tola, Puah, Jashub mo Shimron.

46:14  Zebulun mo ana dama-daane: go Sered, Elon mo Jahleel.

46:15  Aanei go nia dama-daane Leah mo Jacob ne-haanau i Mesopotamia mo tama-ahina go Dinah. Di hagadili Jacob ne-hai gi Leah huogodoo e-motolu maa-dolu-(33).

46:16  Gad mo ana dama-daane: go Zephon, Haggi, Shuni, Ezbon, Eri, Arod, mo Areli.

46:17  Asher mo ana dama-daane: go Imnah, Ishvah, Ishvi, Beriah, mo di-nadau duaahina-ahina go Serah. Nia dama-daane Beriah la-go Heber mo Malchiel.

46:18  Digau e-dilongoholu maa-ono-(16) aanei la-go nia hagadili Jacob mo Zilpah, di lodo-hege ne-wanga go Laban gi dana dama-ahina go Leah.

46:19  Di lodo Jacob go Rachel ne-haanau ana dama dogolua: go Joseph mo Benjamin.

46:20  I Egypt Joseph ana dama-daane dogolua go Manasseh mo Ephraim gi Asenath, tama-ahina ni Potiphera, tangada hai-mee-dabu i Heliopolis.

46:21  Nia dama-daane Benjamin go Bela, Becher, Ashbel, Gera, Naaman, Ehi, Rosh, Muppim, Huppim mo Ard.

46:22  Digau e-dilongoholu maa-haa-(14) aanei la-go nia hagadili Jacob mo Rachel.

46:23  Dan mo dana dama-daane go Hushim.

46:24  Naphtali mo ana dama-daane: go Jahzeel, Guni, Jezer, mo Shillem.

46:25  Digau dogohidu aanei la-go nia hagadili Jacob mo Bilhah, di lodo-hege ne-wanga go Laban gi dana dama-ahina go Rachel.

46:26  Togologo o-di madawaawa Jacob ala ne-hula gi Egypt le e-modoono maa-ono-(66), nia lodo o-nia dama-daane a-maa digi daulia.

46:27  Ga-haga-puni ang-gi nia dama-daane a Joseph dogolua ala ne-haanau i Egypt, gaa-hai digau o dono hale huogodoo e-mada-hidu-(70) ala ne-hula gi Egypt.

46:28  Jacob ga-hagau a Judah gii-hana gi-mua gi Joseph e-hai dana dangidangi gi mee bolo gi-heetugi ang-gi-deia i Goshen. Di-nadau dau-adu-hua gi-di gowaa deelaa,

46:29  gei Joseph gaa-gaga gi-hongo dono waga-hongo-henua gaa-hana gi Goshen belee heetugi gi dono damana. Dono madagoaa-hua ne-heetugi gi mee, mee ne-bulubulu-adu di uwa o dono damana, gaa-dangi, gu-dangidangi huoloo.

46:30  Jacob ga-helekai gi Joseph, “Dolomeenei gei au guu-mee-hua di-made, idimaa, au dela gu-gidee-au goe, gei gu-iloo bolo goe e-mouli hua igolo.”

46:31  Joseph ga-helekai gi ono duaahina-daane mo digau huogodoo o-di hale o dono damana boloo, “Au gaa-hana ga-hagi-anga gi di king bolo ogu duaahina mo digau huogodoo o-di hale o dogu damana ala nogo i Canaan la-gu-lloomoi gi dogu baahi.

46:32  Au ga-hagi-anga gi mee bolo goodou digau hagaloohi-siibi ge e-madamada humalia labelaa nia manu, ge goodou gu-gaamai godou hagabuulinga manu mo godou mee huogodoo ala e-hai-mee ginai goodou.

46:33  Maa di king ga-gahi-mai goodou, ga-heeu be goodou digau hai moomee aha,

46:34  gei goodou helekai gi mee bolo goodou digau madamada humalia i-nia manu mai i godou damagiigi be-di hai o di-godou damana mai i-mua nogo hai. Goodou ga-helekai beenei gi mee, gei mee gaa-dugu goodou gii-noho i tenua go Goshen.” Joseph ne-helekai beenei, idimaa digau Egypt hagalee hiihai gi digau hagaloohi-siibi.

Chapter 47

47:1  Joseph gaa-lahi ono duaahina-daane dogolima gaa-hula gi-baahi di king, ga-helekai gi-di king, “Dogu damana mo ogu duaahina-daane gu-lloomoi i Canaan mo nadau hagabuulinga-manu mo nadau mee huogodoo ala e-hai-mee ginai. Digaula dolomeenei la-gu-i tenua go Goshen.”

47:2  Nomuli gei mee ga-hagi-anga ono duaahina-daane gi-di king.

47:3  Di king ga-heeu gi digaula, “Goodou digau hai moomee aha?” Digaula ga-helekai, “Gimaadou digau hagaloohi-siibi gadoo be madau damana mmaadua.

47:4  Gimaadou ne-lloomoi belee noho i tenua deenei, idimaa, tau-magamaga i-lodo tenua go Canaan la-gu-huaidu huoloo, gu-deai nia meegai ang-gi madau hagabuulinga-manu ai. Dumaalia-mai gi gimaadou e-noho i Goshen.”

47:5  Di king ga-helekai gi Joseph, “Idimaa dela do damana mo o duaahina-daane ala guu-dau,

47:6  tenua go Egypt la tenua ni digaula. Heia digaula gii-noho i tenua go Goshen, deelaa di gowaa koia e-humalia. Gei di-maa nia daangada i digaula ala e-mee di-benebene nia hagabuulinga-manu, gei goe ga-hagi-anga agu manu la-gi digaula e-benebene.”

47:7  Joseph ga-laha-mai labelaa dono damana go Jacob, ga-hagi-anga gi di king. Jacob gu-haga-maluagina di king.

47:8  Di king ga-heeu gi mee, “O ngadau le e-hia?”

47:9  Jacob ga-helekai, “Dogu madagoaa nogo mouli-iei au nogo heehee la-guu-lau-motolu-(130) ogu ngadau. Nia ngadau aalaa le e-hogoohi ge e-haingadaa, ge hagalee logo be nia ngadau o ogu damana ala namua nogo heehee-ai.”

47:10  Jacob gaa-hai dana haga-maewae hagalabagau gi-di king, gaa-hana.

47:11  Nomuli gei Joseph ga-haga-noho dono damana mo ono duaahina i Egypt, gaa-wanga gi digaula tenua humalia e-hoohoo-adu gi-di waahale damana go Rameses, gii-hai be nia helekai di king.

47:12  Joseph e-hagahumalia dono damana mo ono duaahina mo digau huogodoo o-di hale o dono damana ala i-golo gi-nia meegai gii-dohu.

47:13  Tau-magamaga la-gu-huaidu huoloo i-nia gowaa huogodoo i henuailala, gei digau Egypt mo Canaan gu-hiigai.

47:14  Nia bahihadu huogodoo digau Egypt mo Canaan ala nogo huihui nadau ‘wheat’ gu-hagabudu go Joseph guu-kae guu-dugu i-lodo di hale o-di king.

47:15  Di madagoaa-hua o-nia bahihadu huogodoo o Egypt mo Canaan la-ne-odi, gei digau Egypt ga-lloomoi gi Joseph ga-helekai gi mee, “Gaamai madau mee e-gai gi-dee-mmade-hua gimaadou. Goe aloho-mai gi gimaadou, idimaa madau bahihadu la-guu-odi.”

47:16  Joseph ga-helekai gi digaula, “Gaamai godou hagabuulinga-manu, gei au ga-koodai nia maa gi-nia meegai, be godou bahihadu la-guu-odi.”

47:17  Digaula ga-gaamai nadau hoodo, siibi, kuudi, kau mono ‘donkey’ gi Joseph, gei mee ga-koodai nia maa gi-nia meegai. Di ngadau deelaa, gei mee ne-wanga nia meegai gi-nia daangada ne-koodai gi-nia manu.

47:18  Di ngadau nomuli, gei digaula gaa-hula labelaa gi mee ga-helekai, “Meenei, gimaadou hagalee hagammuni madau mee i-di-goe, bolo madau bahihadu la-guu-odi, mo madau manu aalaa-hua gu-gowadu gi-di-goe. Deai di mee labelaa i-golo belee gowadu gi-di-goe ai, aalaa-hua go madau huaidina mo madau gowaa ala i-golo.

47:19  Goe aloho-mai gi gimaadou, hudee diagia gimaadou beelaa gii-mmade. Hudee heia madau gowaa gi-diiagi. Huia gimaadou mo madau gowaa gi-nia meegai, gei gimaadou gaa-hai nia hege ni-di king, gei mee ga-hai-mee gi madau gowaa. Gaamai madau ‘wheat’ e-gai gi-mouli gimaadou, mono lii e-dogi go gimaadou i-lodo madau gowaa.”

47:20  Joseph guu-hui nia gowaa huogodoo ala i-hongo Egypt i-di ingoo di king. Digau Egypt huogodoo guu-hui gi-daha nadau gowaa, idimaa tau-magamaga la-gu-huaidu huoloo, malaa, nia henua huogodoo la-guu-hai nia henua ni-di king.

47:21  Joseph guu-hai digau Egypt huogodoo gii-hai nia hege.

47:22  Nia gowaa ala digi huia go Joseph, la-go nia gowaa o digau hai-mee-dabu. Digaula hagalee hai-loo bolo ginaadou e-hui nadau gowaa gi-daha, idimaa di king e-wanga gi digaula nia bahihadu hagamaamaa e-mouli-ai digaula.

47:23  Joseph ga-helekai gi-nia daangada, “Goodou mmada, au guu-hui goodou mo godou gowaa belee hai-mee ginai di king. Malaa, deenei laa godou lii e-kae e-dogi i-lodo godou hadagee.

47:24  Ma-gaa-dau gi godou madagoaa e-hadi-ai godou hadagee, gei goodou wanga-ina e-dahi baahi e-lima gi-di king. Nia mee ala i-golo, gaa-hai godou mee, e-dogi hunu maa ge hunu maa e-gai go goodou mo godou hale.”

47:25  Digaula ga-helekai, “Meenei, goe gu-hagamouli gimaadou. Goe gu-humalia mai gi gimaadou. Malaa, gimaadou gaa-hai nia hege ni-di king.”

47:26  Joseph ga-haga-duu-aga dana haganoho i-lodo tenua go Egypt, boloo: Dahi baahi e-lima o-nia mee huogodoo ala ma-ga-hadi-mai i-nia hadagee le e-kae gi-di king. Taganoho deenei le e-hai-hegau hua igolo dolomeenei. Aalaa-hua go nia gowaa o digau hai-mee-dabu ala digi hai-mee ginai di king.

47:27  Digau Israel guu-noho i Goshen i Egypt. Digaula gu-maluagina huoloo, gei nia dama digaula gu-dogologowaahee.

47:28  Di noho o Jacob i Egypt la-gu-madangaholu maa-hidu ono ngadau, gaa-dae-loo gi dono made, gei mee guu-lau-madahaa maa-hidu-(147) ono ngadau huogodoo.

47:29  Dono madagoaa dela gu-hoohoo gi dono made, gei mee ga-gahi-mai dana dama-daane go Joseph, ga-helekai gi mee, “Dugua doo lima gi-mehanga ogu gadawae. Heia dau hagababa hagamodu bolo goe hagalee danu au i Egypt.

47:30  Au e-hiihai bolo au e-danu i-di gowaa dela e-danu-ai ogu damana. Lahia au gi-daha mo Egypt, danumia au i-di gowaa dela ne-danu-ai digaula.” Joseph ga-helekai, “Au gaa-hai-laa gii-hai be au helekai.”

47:31  Jacob ga-helekai, “Heia dau hagamodu bolo goe ga-daudali di hagababa deenei.” Joseph guu-hai dana hagamodu, gei Jacob guu-hai dana danggee i-hongo di hada dela e-moe-iei mee.

Chapter 48

48:1  Nia laangi mai gi-nomuli, gei di haga-iloo guu-hai gi Joseph bolo dono damana la-gu-bagege. Gei mee gaa-lahi ana dama-daane dogolua go Manasseh mo Ephraim gaa-hula gi-baahi o Jacob.

48:2  Jacob ne-longono bolo dana dama-daane go Joseph la-gu-hanimoi belee mmada ang-gi deia, geia ga-haga-mahimahi-aga, ga-nnoo-i-nua i-hongo dono hada.

48:3  Jacob ga-helekai gi Joseph, “God Koia e-Aamua ne-haga-gida-mai gi-di-au i Luz i Canaan ga-haga-maluagina au.

48:4  Mee ne-helekai-mai gi-di-au boloo, ‘Au ga-haga-dogologowaahee au dama. Do hagadili ga-dogologowaahee. Au e-wanga tenua deenei gi digaula e-hai-mee ginai gaa-hana-hua beelaa.’ ”

48:5  Jacob ga-helekai labelaa, “Au dama-daane dogolua ala ne-haanau i Egypt i-mua dogu hanimoi gi kinei ala go Ephraim mo Manasseh, meemaa gaa-hai nia dama ni-aagu gadoo be Reuben mo Simeon.

48:6  Gei nia dama ala i-muli meemaa, la nia dama ni-aau. Digaula gaa-kae nadau duhongo mai i-nia duhongo a Ephraim mo Manasseh.

48:7  Au e-hai di mee deenei, idimaa dogu madagoaa nogo hanimoi i Mesopotamia, gei do dinana go Rachel guu-hai au gi-manawa-gee huoloo i dono made i Canaan, hoohoo-mai gi Ephrath. Au ne-danu a-mee i-golo i taalinga di ala dela e-hana gi Ephrath.” (Ephrath la-go Bethlehem dolomeenei.)

48:8  Jacob ne-mmada gi-nia dama-daane a Joseph ga-heeu, “Nia dama ni-aai aanei?”

48:9  Joseph ga-helekai, “Aanaa agu dama-daane ala ne-gaamai go God gi-di-au i Egypt.” Jacob ga-helekai, “Laha-mai meemaa gi-di-au gi-haga-maluagina meemaa ko-au.”

48:10  Nia golomada o Jacob la-gu-dee-gida i mee gu-madumadua, gu-hagalee gidee humalia. Malaa, Joseph la-ga-laha-mai ana dama-daane gi Jacob, gei Jacob ga-bulubulu meemaa ga-hongihongi.

48:11  Jacob ga-helekai gi Joseph, “Au dogu hagadagadagagee bolo au e-heetugi labelaa adu gi-di-goe ai, gei dolomeenei gei God guu-hai au gii-mmada gi au dama!”

48:12  Joseph ga-daa gi-daha nia dama-daane aalaa mo nia wae o Jacob, ga-bala gi-lala gi-hongo di gelegele i-mua o mee.

48:13  Joseph ne-dugu a Ephraim gi-di baahi gau-ihala o Jacob, ge Manasseh gi-di baahi gau-donu.

48:14  Gei Jacob ga-lawehagi ono lima gaa-dugu dono lima gau-donu gi-hongo di libogo o Ephraim ma e-aha maa mee go di tama dela e-dulii, gaa-dugu dono lima gau-ihala gi-hongo di libogo o Manasseh, go di tama madua.

48:15  Ga-haga-maluagina a Joseph ga-helekai, “Dogu God dela e-hai-hegau ginai ogu damana go Abraham mo Isaac, la-gi-haga-maluagina-ina nia dama-daane aanei! Di God dela e-dagidagi au gaa-dae-mai-loo gi dangi-nei, la-gi-haga-maluagina-ina meemaa!

48:16  Tangada di-langi dela ne-haga- dagaloaha au gi-daha mo nia mee huaidu huogodoo, la-gi-haga-maluagina-ina meemaa! Dogu ingoo mo nia ingoo o ogu damana go Abraham mo Isaac la-gii-noho-hua beelaa i-baahi nia dama-daane aanei! Nia dama meemaa la-gi-heia gi-dogologowaahee! Nia madawaawa meemaa la-gi-heia gi-dogologowaahee!”

48:17  Joseph ne-mmada gi dono damana dela ne-dugu dono lima gau-donu gi-hongo di libogo o Ephraim, gei mee gu-manawa-gee. Mee ga-daa gi-daha di lima o dono damana dela i-hongo di libogo o Ephraim, gaa-dugu gi-hongo di libogo o Manasseh,

48:18  ga-helekai gi dono damana, “Ma hagalee hai beenaa. Di tama madua la-deenei. Dugua doo lima gau-donu gi-hongo di libogo o-maa.”

48:19  Tamana o-maa ga-helekai, “Au e-iloo, dagu dama. Au e-iloo. Di hagadili ni Manasseh le e-dogologowaahee labelaa! Gei dono duaahina dulii la-koia e-dogologowaahee gi-nonua, dono hagadili gaa-hai nia henua llauehe!”

48:20  Di laangi hua deelaa, gei mee ne-haga-maluagina meemaa ga-helekai, “Digau Israel ga-haga-maluagina nadau daangada gi-gulu ingoo. Digaula ga-helekai boloo, ‘God gi-heia goodou gii-hai be Ephraim mo Manasseh.’ ” Deenei di hai a Jacob ne-dugu a Ephraim laa-mua a Manasseh.

48:21  Jacob ga-helekai gi Joseph, “Au gaa-made, gei God ga-madalia goe, gaa-lahi labelaa goe gi tenua o damana-mmaadua.

48:22  Au e-gowadu Shechem gi-di-goe, hagalee gi o duaahina, tenua humalia dono gelegele dela ne-kumi ko-au i digau Amor gi dagu hulumanu-dauwa mo dagu maalei.”

Chapter 49

49:1  Jacob ga-gahi-mai ana dama-daane, ga-helekai, “Goodou dagabuli-mai gi ogu mua. Au ga-hagi-adu gi goodou nia mee ala ga-kila-adu gi goodou i-nia madagoaa ala ga-lloomoi:

49:2  Goodou go nia dama a Jacob, goodou dagabuli-mai gi-di gowaa e-dahi. Hagalongo-mai gi-di-godou damana go Israel.

49:3  Reuben, goe go dagu dama-madua, goe go ogu mahi. Goe go di tama matagidagi o dogu madagoaa nogo dama-daane. Goe koia e-hagamuamua ge koia e-maaloo i-lodo agu dama-daane huogodoo.

49:4  Goe e-hai gadoo be-di mmidi o-di labagee, malaa, goe hagalee dahidamee, idimaa, goe dela ne-kii goolua mo dogu lodo-hege, gu-haga-milimilia di moenge o do damana.

49:5  Simeon mo Levi la-taga-haanau. Meemaa e-hai nau heebagi hagahuaidu gi nau hulumanu.

49:6  Au hagalee hagabuni gi meemaa i-lodo nau hagataele hagammuni. Au hagalee hana i-nia haga- dagabuli meemaa, idimaa, meemaa ne-daaligi nau daangada gii-mmade i-lodo nau hagawelewele. Meemaa ne-hadihadi nia wae nia kau-daane gi-habehabe, belee hai nau dadaagala gi-nia maa.

49:7  Meemaa gi-halauwa i-lodo nau hagawelewele, idimaa nia hagawelewele meemaa e-deemee di-dugu, dela e-hagamadagudagudia huoloo. Au ga-haga-modoho meemaa gi-lodo nia henua o Israel, ga-duwweduwwe meemaa laa-lodo digau Israel.

49:8  Judah, o duaahina-daane e-hagaamu goe. Goe e-kumi nia uwa o hagadaumee, e-maaloo i digaula. O duaahina gaa-pala gi-lala i oo mua.

49:9  Judah le e-hai gadoo be-di laion, e-daaligi dana manu, ga-hanimoi-laa gi dono gowaa e-noho ai, gaa-moe hagadaaholo gi-hongo di gelegele. Deai di mee maaloo e-haga-deaadee a-mee ai.

49:10  Judah ga-daahi togodogo-king, di mogobuna dela e-dagi nia mee le e-noho-hua i-baahi dono hagadili gaa-hana-hua beelaa. Nia henua ala i-golo ga-gaamai nadau dagitedi gi mee gaa-pala gi-mua o mee.

49:11  Mee e-daula dana ‘donkey’ gi-di laagau-‘grape’, gi-nia manga ala koia e-humalia. Mee e-gaugau ono gahu gi-nia waini mmee be nia dodo.

49:12  Nia golomada o-maa e-mada-luuli i-nia waini. Nia niha o-maa e-mada-kene i-nia milugu.

49:13  Zebulun gaa-noho i tongotai. Dono dongotai gaa-hai di gowaa e-dadaula nia wagabaalii. Dono guongo le e-damana-adu-loo gi Sidon.

49:14  Issachar la di ‘donkey’ maaloo e-moe i-mehanga ana mee ala e-kae.

49:15  Mee gaa-mmada bolo di gowaa hagamolooloo le e-humalia ge tenua le e-madamada, geia ga-haga-madabouli, gaa-kae ana mee, gei mee ga-haga-ngalua be-di hege.

49:16  Dan gaa-hai di tagi ni digau o dono henua, digaula gaa-hai gadoo be nia madawaawa Israel ala i-golo.

49:17  Dan le e-hai gadoo be-di gihaa i taalinga di ala, e-hai be-di gihaa poisin huaidu dela e-kii talitali i taalinga di ala, dela e-gadigadi nia wae ni hoodo gii-doo tangada dela i-nonua.

49:18  Meenei Dimaadua, au e-talitali do hagamouli.

49:19  Gad ga-heebagi ginai digau gaiaa, gei mee gaa-huli gi-muli ga-waluwalu digaula.

49:20  Tenua o Asher gaa-huwa nia huwa-laagau humalia. Mee e-dahi-aga nia meegai ala e-humalia e-tau ang-gi nia king.

49:21  Naphtali le e-hai gadoo be-di ee dela ne-hagamehede, dela e-hahaanau ana dama humalia.

49:22  Joseph le e-hai gadoo be-di ‘donkey’ lodo-geinga i taalinga tama-monowai uwa-aga, e-hai be tama-‘donkey’ lodo-geinga i taalinga di gonduu.

49:23  Nia hagadaumee o-maa e-heheebagi gi mee, e-waluwalu a-mee mo nadau maalei.

49:24  Gei mee gaa-puu dana maalei la-hagalee bolebole. Nia lima o-maa la-guu-hai gi-maaloo mai i-nia mogobuna mahi o-di God o Jacob, mo mai i-baahi di Hagaloohi-siibi, dela go di Hagaloohi o Israel.

49:25  Mee go di God o do damana dela e-hagamaamaa goe, di God Koia e-Aamua dela e-haga- maluagina goe gi-nia uwa mai i-di langi mo nia wai ala i-lala di gelegele o tenua, gei e-haga-maluagina goe gi-nia kau e-logowaahee, mo nia dama e-dogologowaahee,

49:26  gei e-haga-maluagina goe gi-nia ‘wheat’ mono huwa-laagau, gei e-haga-maluagina goe i-hongo nia gonduu namua, mai i-nia hagadilinga haga- manawa lamalia ala mai i-nia gonduu ala e-noho-hua beelaa hagalee ngala. Nia haga-maluagina aanei la-gii-noho i-hongo di libogo o Joseph, i-hongo di lae o tangada dela gu-dugu-hagalabagau laa-hongo ono duaahina-daane.

49:27  Benjamin le e-hai gadoo be-di paana lodo-geinga. Nia luada mo nia hiahi gei mee e-daaligi ana manu e-gai.”

49:28  Aanei nia madawaawa e-madangaholu maa-lua o Israel. Malaa, aanei nia helekai haga-maewae a tamana digaula ne-hai gi tangada-nei mo tangada-nei i ana dama-daane.

49:29  Jacob gaa-hai dana boloagi gi ana dama-daane, “Dolomeenei gei au gaa-hana gi-baahi ogu daangada ala ne-mmade. Goodou danumia au i-baahi ogu damana i-lodo di bongoo hadugalaa dela i-lodo di gowaa a Ephron tangada Hittite,

49:30  i Machpelah i-baahi gi-dua o Mamre i tenua go Canaan. Di bongoo hadugalaa deenei mo dono henua deenei ne-hui go Abraham mai i Ephron, belee hai di gowaa daalunga.

49:31  Deelaa di gowaa ne-danu-ai a Abraham mo dono lodo go Sarah, deelaa di gowaa ne-danu-ai a Isaac mo dono lodo go Rebecca, deelaa di gowaa ne-danu-ai a Leah ko-au.

49:32  Di gowaa mo-di bongoo hadugalaa ne-hui-mai i digau Hittite. Goodou danumia au i-golo.”

49:33  Jacob gaa-lawa-loo di-hai ana boloagi gi ana dama-daane, gei mee gaa-moe gi-lala, guu-made.

Chapter 50

50:1  Joseph ga-moe-adu gi-hongo dono damana, ga-bulubulu a mee, ga-dangidangi mo-di hongihongi nia hadumada o-maa.

50:2  Joseph gaa-hai gi-nia dogidaa bolo gi-wani-ina tuaidina o dono damana.

50:3  Digaula ga-waniwani tuaidina o-maa i-lodo nia laangi e-mada-haa, deelaa di waalooloo o-nia wanii ma-ga-wanii tangada made. Gei digau Egypt ga-tangitangi gi Jacob i-lodo nia laangi e-mada-hidu.

50:4  Di madagoaa tangihangi la-ne-doo gi-daha, gei Joseph ga-helekai gi digau aamua o-di king boloo, “Goodou hula, hai dagu hegau gi-di king boloo,

50:5  ‘Di madagoaa o dogu damana dela ga-hoohoo gaa-made, gei mee gu-dangi-mai gi-di-au bolo au gi-hagababa ang-gi deia bolo au gi-danumia ia i lodo taalunga dela guu-lawa di-hagatogomaalia ko-ia i Canaan. Gei goe dumaalia-mai gi-di-au, e-hana e-danu dogu damana ga-hanimoi-laa.’ ”

50:6  Di king ga-helekai, “Hana, danumia do damana, gii-hai be dau hagababa dela guu-hai.”

50:7  Malaa, Joseph guu-hana guu-danu dono damana. Digau aamua huogodoo di king, mo digau mmaadua, mo nia dagi huogodoo o Egypt guu-hula huogodoo madalia a Joseph.

50:8  Digau di hale o Joseph huogodoo mono duaahina-daane mo digau o-di hale o dono damana guu-hula labelaa dalia a mee. Aalaa-hua go nadau dama-lligi, mo nadau siibi, mo nia kuudi mono kau nogo noho-hua i-golo i Goshen.

50:9  Nia daangada e-hula i-muli o-mee i-nia waga-hongo-henua mono gau ala e-hula i-nia hoodo digau dogologowaahee ne-hula.

50:10  Di-nadau madagoaa ne-dau-mai gi-di gowaa haga-madammaa-‘wheat’ i Atad, i-baahi gi-dua o Jordan, digaula ga-tangitangi duainau i-golo gi Jacob, gei Joseph ga-hai-taumaha o-di manawa-gee i-golo i-lodo nia laangi e-hidu.

50:11  Digau Canaan ne-mmada gi digaula e-tangitangi i Atad, ga-helekai, “Taumaha tangihangi damanaiee dela e-hai go digau Egypt!” Deelaa ne-hidi-ai di gowaa deelaa ga-haga-ingoo bolo “Abel=Mizraim”.

50:12  Nia dama-daane a Jacob gu-haga-kila-aga di boloagi o di-nadau damana.

50:13  Digaula gaa-kae tuaidina o Jacob gi Canaan gaa-danu i-lodo taalunga i Machpelah i-bahi-i-dua o Mamre, di gowaa Abraham dela ne-hui i Ephron, tangada o Hittite, belee hai dana gowaa daalunga.

50:14  I-muli-hua a Joseph ne-danu dono damana, geia gaa-hana labelaa gi Egypt, ginaadou mo ono duaahina mo digau huogodoo ala ne-hula gi-di danu o Jacob.

50:15  I-muli-hua di made o tamana digaula, gei nia duaahina o Joseph ga-helekai, “Dolomaa Joseph e-dadaahi-hua i-golo dono hagawelewele mai gi gidaadou, gaa-hai dana hagababa bolo ia gaa-tala di hui mai gi gidaadou i tadau hai huaidu dela ne-hai gi mee.”

50:16  Digaula gaa-hai di-nadau hegau gi Joseph boloo, “I-mua tadau damana dela ne-made,

50:17  gei mee gu-boloagi-mai gi gimaadou bolo gimaadou gi-tangi-adu gi-di-goe boloo, ‘Goe gi-dumaalia ang-gi o duaahina, i-di huaidu digaula dela ne-hai adu gi-di-goe.’ Malaa, goe ga-aloho-mai gi gimaadou, ga-dumaalia-mai gi gimaadou i-di madau mee hai-hala dela ne-hai go gimaadou, aalaa go nia hege o-di God o do damana.” Joseph ga-longono-ia tegau deenei, geia guu-dangi huoloo i ono lodo.

50:18  Nia duaahina o Joseph gaa-tuu mai gi-mua o Joseph, gaa-pala gi-mua o mee, ga-helekai, “Aanei gimaadou go au hege.”

50:19  Joseph ga-helekai gi digaula, “Goodou hudee mmaadagu. Au e-deemee di-pono di lohongo o God.

50:20  Goodou ne-hai di-godou hagababa bolo goodou e-hai-mai gi-di-au di huaidu, gei God guu-huli di-maa gii-hai di mee humalia, belee hagahumalia-ai nia mouli o digau dogologowaahee ala e-mouli dolomeenei, mai i-di mee dela ne-hai.

50:21  Goodou hudee mmaadagu, au ga-madamada humalia i goodou mo godou dama.” Deelaa di hai a Joseph ne-haga-manawa lamalia digaula gi-nia helekai humalia aalaa, gei-ogo digaula gu-manawa lamalia.

50:22  Malaa, Joseph mo ono duaahina-daane mo digau o nadau hale, gaa-noho i-golo i Egypt. Joseph ne-made, gei mee gu-lau-madangaholu ono ngadau.

50:23  Dono madagoaa nogo mouli-ai, gei mee gu-gidee nia dama a Ephraim, mo nia dama o-nia dama a Ephraim. Mee gu-gidee labelaa nia dama a Machir di tama a Manasseh.

50:24  Joseph ga-helekai gi ono duaahina-daane, “Au gu-hoohoo gaa-made, gei God ga-madamada humalia i goodou, gaa-lahi goodou gi-daha mo tenua deenei, gaa-lahi gi tenua a-Mee dela ne-hagababa hagahumalia ang-gi Abraham, Isaac mo Jacob.”

50:25  Joseph gaa-hai dana dangidangi gi ono duaahina-daane bolo digaula e-hai di-nadau hagababa, ga-helekai, “Goodou heia di-godou hagababa mai gi-di-au, bolo goodou e-kae dogu huaidina madalia goodou gi Canaan i-di madagoaa a God ma-gaa-lahi goodou.”

50:26  Malaa, Joseph ne-made i Egypt, gei mee gu-lau-madangaholu ono ngadau. Digaula ga-wanii tuaidina o-maa, gaa-dugu gi-lodo tebedebe.