Ndebele - Psalms

Chapter 1

1:1  Ubusisiwe umuntu ongahambi ngeseluleko sababi, ongemi endleleni yezoni, ongahlali esihlalweni sabagconayo;

1:2  kodwa intokozo yakhe isemlayweni weNkosi, uzindla ngomlayo wayo emini lebusuku.

1:3  Njalo uzakuba njengesihlahla esihlanyelwe emifuleni yamanzi, esithela isithelo saso ngesikhathi saso, ohlamvu laso kaliyikubuna; lakho konke akwenzayo kuzaphumelela.

1:4  Ababi kabanjalo, kodwa banjengamakhoba umoya owaphephulayo.

1:5  Ngakho ababi kabayikuma ekwahlulelweni, lezoni enhlanganweni yabalungileyo.

1:6  Ngoba iNkosi iyayazi indlela yabalungileyo, kodwa indlela yababi izabhubha.

Chapter 2

2:1  Kungani izizwe zixokozela, labantu benakana okuyize?

2:2  Amakhosi omhlaba azimisela, lababusi benza ugobe ndawonye bemelene leNkosi njalo bemelene logcotshiweyo wayo, besithi:

2:3  Asiqamule izibopho zabo, silahle intambo zabo zisuke kithi.

2:4  Ohlezi emazulwini uzahleka, iNkosi izabahleka usulu.

2:5  Khona izakhuluma kubo entukuthelweni yayo, ibethuse ngokuvutha kolaka lwayo.

2:6  Kube kanti mina ngibekile iNkosi yami phezu kweZiyoni, intaba yami engcwele.

2:7  Ngizalandisa ngesimiso: INkosi ithe kimi: Wena uyiNdodana yami, lamuhla ngikuzele.

2:8  Cela kimi, ngizanika izizwe zibe yilifa lakho, lemikhawulo yomhlaba ibe yimfuyo yakho.

2:9  Uzazephula ngentonga yensimbi, uziphahlaze njengembiza yebumba.

2:10  Ngakho-ke hlakaniphani makhosi, lilayeke bahluleli bomhlaba.

2:11  Ikhonzeni iNkosi ngokwesaba, lithokoze ngokuthuthumela,

2:12  liyange iNdodana, hlezi ithukuthele, libhubhe endleleni, nxa ulaka lwayo seluvutha kancinyane. Babusisiwe bonke abaphephela kuyo.

Chapter 3

3:1  Nkosi, zande kangakanani izitha zami! Banengi abangivukelayo.

3:2  Banengi abathi ngomphefumulo wami: Kakulasindiso lwakhe kuNkulunkulu. Sela*.

3:3  Kodwa wena Nkosi, uyisihlangu sami, udumo lwami, lomphakamisi wekhanda lami.

3:4  Ngakhala ngelizwi lami eNkosini, yasingiphendula isentabeni yayo engcwele. Sela*.

3:5  Mina ngalala phansi, ngajumeka; ngavuka, ngoba iNkosi yangisekela.

3:6  Kangiyikwesaba izinkulungwane ezilitshumi zabantu abangihanqileyo bemelana lami.

3:7  Vuka, Nkosi! Ngisindisa, Nkulunkulu wami. Ngoba zonke izitha zami uzitshayile emhlathini, wephule amazinyo ababi.

3:8  Usindiso ngolweNkosi. Isibusiso sakho siphezu kwabantu bakho. Sela*.

Chapter 4

4:1  Ngiphendula ekukhaleni kwami, Nkulunkulu wokulunga kwami. Ekucindezelweni wangenzela indawo ebanzi. Woba lomusa kimi, uzwe umkhuleko wami.

4:2  Madodana abantu, koze kube nini liphendula udumo lwami lube lihlazo, lithanda okuyize, lidinga amanga? Sela*.

4:3  Kodwa yazini ukuthi iNkosi izehlukanisele owesaba uNkulunkulu; iNkosi iyangizwa lapho ngikhala kuyo.

4:4  Thuthumelani, lingoni; khulumani lenhliziyo yenu embhedeni wenu, lithule. Sela*.

4:5  Nikelani imihlatshelo yokulunga, lithembe eNkosini.

4:6  Banengi abathi: Ngubani ozasitshengisa okuhle? Nkosi, phakamisela ukukhanya kobuso bakho phezu kwethu.

4:7  Ubeke intokozo enhliziyweni yami okwedlula isikhathi lapho amabele abo lewayini labo elitsha kwandile.

4:8  Ngizacambalala ngokuthula, khonokho ngilale ubuthongo, ngoba wena Nkosi wedwa uyangihlalisa ngokulondolozeka.

Chapter 5

5:1  Beka indlebe emazwini ami, Nkosi; unanzelele ukububula kwami.

5:2  Lalela ilizwi lokukhala kwami, Nkosi yami loNkulunkulu wami; ngoba ngikhuleka kuwe.

5:3  Nkosi, ekuseni uzalizwa ilizwi lami; ekuseni ngizahlela umkhuleko wami ngakuwe, ngilinde.

5:4  Ngoba kawusuye uNkulunkulu othokoza ebubini; omubi kayikuhlala lawe.

5:5  Abazikhukhumezayo kabayikuma phambi kwamehlo akho; uzonda bonke abenzi bobubi.

5:6  Uzababhubhisa abaqamba amanga. INkosi iyamenyanya umuntu wegazi lenkohliso.

5:7  Kodwa mina, ngizangena endlini yakho ngobukhulu besihawu sakho, ngikhothame ngikhangele ethempelini lakho elingcwele, ngokukwesaba.

5:8  Nkosi, ngikhokhelele ekulungeni kwakho ngenxa yezitha zami, wenze indlela yakho iqonde phambi kwami.

5:9  Ngoba kalikho iqiniso emlonyeni wazo, ingaphakathi yazo izinkohlakalo; umphimbo wazo ulingcwaba elivulekileyo, zibamba amehlo ngolimi lwazo.

5:10  Tshono uthi zilecala, Nkulunkulu, kaziwe ngamacebo azo; uzilahle ngenxa yobunengi beziphambeko zazo, ngoba zikuvukele.

5:11  Kodwa kabathabe bonke abathembela kuwe, bamemeze kokuphela ngentokozo, ngoba ubavikele; lalabo abathanda ibizo lakho kabajabule kuwe.

5:12  Ngoba wena Nkosi, uzabusisa olungileyo, uzamhanqa ngomusa njengesihlangu esikhulu.

Chapter 6

6:1  Nkosi, ungangikhuzi entukuthelweni yakho, ungangijezisi ekuvutheni kolaka lwakho.

6:2  Woba lomusa kimi, Nkosi, ngoba ngibuthakathaka. Nkosi, ngisilisa mina, ngoba amathambo ami ayakhathazeka.

6:3  Lomphefumulo wami ukhathazekile kakhulu: Kodwa wena, Nkosi, koze kube nini?

6:4  Phenduka, Nkosi, khulula umphefumulo wami; ungisindise ngenxa yomusa wakho.

6:5  Ngoba ekufeni kakukho ukukukhumbula; engcwabeni ngubani ozakubonga?

6:6  Ngikhathele yikububula kwami; ubusuku bonke ngintshezisa icansi lami, ngezinyembezi zami ngimanzise umbheda wami.

6:7  Ilihlo lami lidliwe ngenxa yosizi, liyaguga ngenxa yezitha zami zonke.

6:8  Sukani kimi, lonke benzi bobubi, ngoba iNkosi izwile ilizwi lokulila kwami.

6:9  INkosi izwile ukuncenga kwami; iNkosi izakwemukela umkhuleko wami.

6:10  Zonke izitha zami zizayangeka zitshaywe luvalo kakhulu; zizaphenduka, zihle ziyangeke.

Chapter 7

7:1  Nkosi, Nkulunkulu wami, ngiyathembela kuwe; ngisindisa kubo bonke abangizingelayo, ungikhulule.

7:2  Hlezi adabule umphefumulo wami njengesilwane, edabudabula, kungekho okhululayo.

7:3  Nkosi, Nkulunkulu wami, uba ngikwenzile lokhu, uba kukhona okubi ezandleni zami,

7:4  uba ngiphindisele okubi kosekuthuleni lami (kuphela ngaphanga oyisitha sami ngaphandle kwesizatho),

7:5  isitha kasizingele umphefumulo wami, siwufice, siyinyathelele impilo yami emhlabathini, senze udumo lwami luhlale ethulini. Sela*.

7:6  Vuka, Nkosi, ngolaka lwakho, ziphakamise ngenxa yentukuthelo yezitha zami; vuka ungimele; ulayile isahlulelo.

7:7  Ngakho inhlangano yezizwe izakuhanqa; buya ngaphezulu phezu kwayo.

7:8  INkosi izakwahlulela izizwe. Ngahlulela, Nkosi, njengokulunga kwami lanjengobuqotho bami obukimi.

7:9  Ake buphele ububi bababi, kodwa umqinise olungileyo, ngoba ohlola inhliziyo lezinso nguNkulunkulu olungileyo.

7:10  Isihlangu sami sikuNkulunkulu osindisa abaqotho enhliziyweni.

7:11  UNkulunkulu ngumahluleli olungileyo, njalo nguNkulunkulu othukuthelela omubi insuku zonke.

7:12  Uba engaphenduki, uzalola inkemba yakhe; useligobile idandili lakhe walilungisa.

7:13  Usemlungisele izikhali zokufa, wenzela abazingeli imitshoko yakhe etshisayo.

7:14  Khangela, uhelelwa ngobubi, akhulelwe yikona, azale amanga.

7:15  Agebhe umgodi awugubhe, abesewela egodini alenzileyo.

7:16  Ububi bakhe buzabuyela phezu kwekhanda lakhe, lodlame lwakhe lwehlele enkanda yakhe.

7:17  Ngizayidumisa iNkosi njengokulunga kwayo, ngihlabelele ibizo leNkosi ephezu konke.

Chapter 8

8:1  Nkosi, Nkosi yethu, lilenkazimulo kangakanani ibizo lakho emhlabeni wonke! Omise ubukhosi bakho ngaphezu kwamazulu.

8:2  Emlonyeni wezingane lowabamunyayo umisile amandla ngenxa yezitha zakho, ukuze uthulise isitha lomphindiseli.

8:3  Lapho ngikhangela amazulu akho, umsebenzi weminwe yakho, inyanga lenkanyezi owazimisayo,

8:4  uyini umuntu ukuthi umkhumbule, lendodana yomuntu ukuthi uyihambele?

8:5  Kanti wamenza waba ngaphansi kancinyane kulengilosi, wamethwesa umqhele wobukhosi lodumo.

8:6  Wamenza wabusa phezu kwemisebenzi yezandla zakho, konke wakubeka ngaphansi kwenyawo zakhe,

8:7  izimvu lenkabi zonke, kanye lezinyamazana zeganga,

8:8  inyoni zamazulu, lezinhlanzi zolwandle, okudlula ezindleleni zenlwandle.

8:9  Nkosi, Nkosi yethu, lilenkazimulo kangakani ibizo lakho emhlabeni wonke!

Chapter 9

9:1  Ngizakudumisa, Nkosi, ngenhliziyo yami yonke, ngilandise zonke izimangaliso zakho.

9:2  Ngizathaba ngithokoze kuwe, ngihlabele indumiso ebizweni lakho, wena oPhezukonke.

9:3  Lapho izitha zami zibuyela emuva, zizakuwa, zibhubhe phambi kwakho.

9:4  Ngoba ulimele ilungelo lami lodaba lwami, wahlala esihlalweni sobukhosi, wahlulela ngokulungileyo.

9:5  Uzikhuzile izizwe, wabhubhisa omubi; walesula ibizo labo kuze kube nini lanini.

9:6  Izitha ziphelile, izincithakalo eziphakade; uyidilizile imizi; ukukhunjulwa kwabo kubhubhe kanye labo.

9:7  Kodwa iNkosi izahlala kuze kube phakade, isihlalo sayo sobukhosi isilungisele isahlulelo.

9:8  Yona-ke izawahlulela umhlaba ngokulunga, ibagwebe abantu ngokuqonda.

9:9  Njalo iNkosi izakuba yisiphephelo socindezelweyo, isiphephelo ngezikhathi zokuhlupheka.

9:10  Labalaziyo ibizo lakho bazathemba kuwe, ngoba wena Nkosi, kawubatshiyanga abakudingayo.

9:11  Hlabelani indumiso eNkosini ehlezi eZiyoni, limemezele phakathi kwabantu izenzo zayo.

9:12  Nxa idinga igazi, iyabakhumbula, kayikhohlwa ukukhala kwabahlutshwayo.

9:13  Woba lomusa kimi, Nkosi, ubone uhlupho lwami oluvela kwabangizondayo, wena ongiphakamisayo emasangweni okufa,

9:14  ukuze ngilandise yonke indumiso yakho emasangweni endodakazi yeZiyoni, ngithokoze kusindiso lwakho.

9:15  Izizwe zitshone emgodini ezawenzayo, embuleni ezalithiyayo unyawo lwazo lubanjiwe.

9:16  INkosi izazisile, yenza isahlulelo; omubi uthiywe emsebenzini wezandla zakhe. Higayoni. Sela*.

9:17  Abakhohlakeleyo bazabuyela esihogweni, zonke izizwe ezimkhohlwayo uNkulunkulu.

9:18  Ngoba oswelayo kayikukhohlakala kokuphela; ithemba labayanga kaliyikunyamalala phakade.

9:19  Vuka, Nkosi, umuntu kanganqobi; izizwe kazigwetshwe phambi kwakho.

9:20  Zitshayise ngovalo, Nkosi, izizwe kazikwazi ukuthi zingabantu nje. Sela*.

Chapter 10

10:1  Nkosi, umeleni khatshana? Ucatshelani ezikhathini zokuhlupheka?

10:2  Omubi ekuzigqajeni uyamzingelisisa umyanga; kababanjwe ngamagobe abawacebileyo.

10:3  Ngoba omubi uyazikhukhumeza ngesifiso somphefumulo wakhe, uyasibusisa isihwaba, ayeyise iNkosi.

10:4  Omubi, ngokuzigqaja kobuso bakhe uthi: Kakubizi; kakho uNkulunkulu emicabangweni yakhe yonke.

10:5  Indlela zakhe ziqinile isikhathi sonke; izahlulelo zakho ziphakeme zikhatshana laye; izitha zakhe zonke uyazivuthela.

10:6  Uthi enhliziyweni yakhe: Kangiyikunyikinywa; ngoba esizukulwaneni lesizukulwana kangiyikuba sebunzimeni.

10:7  Umlomo wakhe ugcwele ukuthuka lezinkohliso lobuqili; ngaphansi kolimi lwakhe kukhona ukona lobubi.

10:8  Uhlezi endaweni yokucathama yemizi, ezindaweni ezisithekileyo ubulala ongelacala; amehlo akhe akhangele othithibeleyo ngasese.

10:9  Uyacatsha ekusithekeni njengesilwane ebhalwini lwaso; ucatshela ukumbamba ongumyanga, uyabamba ongumyanga ngokumhudulela embuleni lakhe.

10:10  Uyaqutha, uyakhothama, njalo umyanga awe ngokulamandla kwakhe.

10:11  Uthi enhliziyweni yakhe: UNkulunkulu ukhohliwe, ufihle ubuso bakhe, kasoze abone lanini.

10:12  Sukuma, Nkosi! Nkulunkulu, phakamisa isandla sakho, ungabakhohlwa abahluphekayo.

10:13  Kungani omubi edelela uNkulunkulu? Uthi enhliziyweni yakhe: Kawuyikukubiza.

10:14  Uyabona, ngoba wena uyakhangela ububi lenhlupheko, ukukubeka esandleni sakho. Umyanga uyazinikela kuwe; wena ungumsizi wezintandane.

10:15  Yephula ingalo yokhohlakeleyo lomubi; dinga inkohlakalo yakhe ukuze ungabe usayithola.

10:16  UJehova yiNkosi kuze kube nini lanini; izizwe zibhubhile elizweni layo.

10:17  Nkosi, uzwile isifiso sabathobekileyo, uzaqinisa inhliziyo yabo, wenze indlebe yakho izwe,

10:18  ukwahlulela intandane locindezelweyo, ukuze umuntu wasemhlabeni angabe esesabeka.

Chapter 11

11:1  Ngithembela eNkosini. Lingatsho njani emphefumulweni wami: Balekela entabeni yenu njengenyoni.

11:2  Ngoba, khangela, ababi bayagobisa idandili, balungisa umtshoko wabo entanjeni, ukuze batshoke emnyameni abaqotho ngenhliziyo.

11:3  Nxa izisekelo zidilizwa, angenzani olungileyo?

11:4  INkosi isethempelini layo elingcwele; iNkosi, isihlalo sayo sobukhosi sisemazulwini; amehlo ayo ayakhangela, inkophe zayo ziyahlola, abantwana babantu.

11:5  INkosi iyamhlola olungileyo, kodwa omubi lothanda ubudlwangudlwangu, umphefumulo wayo uyamzonda.

11:6  Uzanisa phezu kwababi imijibila, umlilo, lesolufa*, lomoya otshisayo, kuzakuba yisabelo senkezo yabo.

11:7  Ngoba ilungile iNkosi, iyathanda ukulunga; ubuso bayo buyabona oqotho.

Chapter 12

12:1  Siza, Nkosi, ngoba owesaba uNkulunkulu kasekho, ngoba abathembekileyo banyamalele basuka ebantwaneni babantu.

12:2  Bakhuluma okuyize, ngulowo lalowo lomakhelwane wakhe; indebe ezilalisayo, bakhuluma nganhliziyombili.

12:3  INkosi izaquma zonke indebe ezilalisayo, ulimi olukhuluma izinto zokuzidla;

12:4  abathi: Sizanqoba ngolimi lwethu, indebe zethu ngezethu; ngubani oyinkosi phezu kwethu?

12:5  Ngenxa yokubandezelwa kwabayanga, ngenxa yokububula kwabaswelayo, sengizavuka, kutsho iNkosi. Ngizabeka ekulondolozekeni amvuthelayo.

12:6  Amazwi eNkosi angamazwi ahlambulukileyo, isiliva esizanywe esithandweni senhlabathi, sihlanjululwe kasikhombisa.

12:7  Wena, Nkosi, uzabagcina, ubavikele kulesisizukulwana kuze kube nininini.

12:8  Ababi bayahambahamba inhlangothi zonke, lapho amanyala ephakanyiswa phakathi kwabantwana babantu.

Chapter 13

13:1  Koze kube nini, Nkosi, ungikhohlwa kokuphela? Koze kube nini ungifihlela ubuso bakho?

13:2  Koze kube nini ngizicebisa emphefumulweni wami, ngilosizi enhliziyweni yami insuku zonke? Koze kube nini isitha sami siphakanyiswa phezu kwami?

13:3  Khangela, ungiphendule, Nkosi, Nkulunkulu wami; khanyisa amehlo ami hlezi ngilale ubuthongo bokufa,

13:4  hlezi isitha sami sithi: Sengimehlule; labangihluphayo bathokoze lapho nginyikinywa.

13:5  Kodwa mina ngithembele emuseni wakho, inhliziyo yami izathaba ngosindiso lwakho.

13:6  Ngizayihlabelela iNkosi, ngoba ingenzele okuhle kakhulu.

Chapter 14

14:1  Isithutha sithi enhliziyweni yaso: KakulaNkulunkulu. Bonakele, benza imisebenzi eyenyanyekayo; kakho owenza okuhle.

14:2  INkosi yakhangela phansi isemazulwini phezu kwabantwana babantu, ukubona ukuthi ukhona yini oqedisisayo, odinga uNkulunkulu.

14:3  Baphambukile bonke, bebonke bonakele; kakho owenza okuhle, kakho loyedwa.

14:4  Kabazi yini bonke abenza okubi, abadla abantu bami njengoba besidla isinkwa? Kabayibizi iNkosi.

14:5  Lapho besaba lokwesaba, ngoba uNkulunkulu usesizukulwaneni solungileyo.

14:6  Liliyangisile icebo lomyanga, ngoba iNkosi iyisiphephelo sakhe.

14:7  Kungathi usindiso lukaIsrayeli lungavela eZiyoni! Lapho iNkosi ibuyisa ukuthunjwa kwabantu bayo, uJakobe uzathaba, uIsrayeli athokoze.

Chapter 15

15:1  Nkosi, ngubani ozahlala ethenteni lakho? Ngubani ozakwakha entabeni yakho engcwele?

15:2  Ngulowo ohamba ngobuqotho, lowenza okulungileyo, lokhuluma iqiniso enhliziyweni yakhe,

15:3  ongahlebiyo ngolimi lwakhe, ongenzi okubi kumngane wakhe, longaphakamiseli umakhelwane wakhe ihlazo;

15:4  olahliweyo uyenyanyeka emehlweni akhe, kodwa uyabahlonipha abayesabayo iNkosi; ofunga ngokuzilimaza, kodwa kaphenduki,

15:5  onganiki imali yakhe ukuthi azuze inzuzo, longemukeli umvuzo wokuthengwa ngongelacala. Owenza lezizinto kayikunyikinywa kuze kube nininini.

Chapter 16

16:1  Ngilondoloza, Nkulunkulu, ngoba ngithembela kuwe.

16:2  Ngithe eNkosini: UyiNkosi yami, ukulunga kwami kakufiki kuwe.

16:3  Kodwa kubangcwele abasemhlabeni, labahlekazi, ontokozo yami yonke ikubo.

16:4  Zizakwanda insizi zabagijimela omunye unkulunkulu; kangiyikunikela iminikelo yabo yokunathwayo yegazi; lamabizo abo kangiyikuwaphatha endebeni zami.

16:5  INkosi iyisabelo selifa lami lesenkezo yami; wena uphethe isabelo sami.

16:6  Imizila iwele kimi ezindaweni ezithokozisayo; yebo, ngilelifa elibukekayo.

16:7  Ngizayibonga iNkosi engelulekayo; lebusuku izinso zami ziyangiqondisa.

16:8  Ngibekile iNkosi phambi kwami njalonjalo; ngoba ingakwesokunene sami, kangiyikunyikinywa.

16:9  Ngakho inhliziyo yami iyathokoza, lodumo lwami luyajabula, lenyama yami izahlala ivikelekile.

16:10  Ngoba kawutshiyanga umphefumulo wami esihogweni, njalo kawuyikunikela ongcwele wakho ukuthi abone ukubola.

16:11  Uzangazisa indlela yempilo; ukugcwala kwentokozo kusebukhoneni bakho, ngakwesokunene sakho kukhona izinjabulo phakade.

Chapter 17

17:1  Zwana ukulunga, Nkosi, ulalele ukukhala kwami; ubeke indlebe emkhulekweni wami ongaphumi ezindebeni ezilenkohliso.

17:2  Ukwahlulelwa kwami kakuphume ebukhoneni bakho, amehlo akho kawabone izinto eziqondileyo.

17:3  Uyilingile inhliziyo yami, wangihambela ebusuku; ungihlolile, kawuficanga lutho; ngihlosile, umlomo wami kawuyikuphambuka.

17:4  Mayelana lezenzo zabantu, ngelizwi lendebe zakho, mina ngizinqandile ezindleleni zomchithi,

17:5  ukusekela izinyathelo zami emikhondweni yakho, ukuze inyawo zami zingatsheleli.

17:6  Mina ngikubizile, ngoba uzangiphendula, Nkulunkulu; beka indlebe yakho kimi, uzwe inkulumo yami.

17:7  Tshengisa ngokumangalisayo uthandolomusa wakho, wena osindisa ngesandla sakho sokunene labo abathembela kuwe kwabavukelayo.

17:8  Ngigcine njengenhlamvu yelihlo; ungifihle emthunzini wempiko zakho,

17:9  kubo ubuso bababi abangicindezelayo, izitha zempilo yami ezingihanqileyo.

17:10  Bayazivalela ngamahwahwa abo; ngomlomo wabo bakhuluma ngokuzigqaja.

17:11  Sebesihanqile emanyathelweni ethu; amehlo abo bawamise besithobele emhlabathini.

17:12  Unjengesilwane esikhuthalele ukudabula, lanjengesilwane esitsha esiquthileyo endaweni ezisithekileyo.

17:13  Vuka, Nkosi! Uhlangabeze ubuso bakhe, umphosele phansi. Khulula umphefumulo wami komubi, oyinkemba yakho,

17:14  kubo abantu, abayisandla sakho, Nkosi, ebantwini bomhlaba, osabelo sabo sikulokhukuphila, osisu sabo usigcwalisa ngokuligugu kwakho; bagcwele abantwana, njalo batshiyele izingane zabo okuseleyo kwabo.

17:15  Mina, ngizakhangela ubuso bakho ekulungeni, ngeneliswe yisimo sakho ekuphaphameni kwami.

Chapter 18

18:1  Ngizakuthanda, Nkosi, mandla ami.

18:2  INkosi ilidwala lami, lenqaba yami, lomkhululi wami; uNkulunkulu wami, idwala lami, engizaphephela kulo, isihlangu sami, lophondo losindiso lwami, inqaba yami ephakemeyo.

18:3  Ngizabiza iNkosi edumisekayo, ngakho ngizasindiswa ezitheni zami.

18:4  Izibopho zokufa zangizingelezela, lezikhukhula zobubi zangethusa.

18:5  Izibopho zesihogo zangigombolozela, imijibila yokufa yayiphambi kwami.

18:6  Ekuhluphekeni kwami ngayibiza iNkosi, ngakhala kuNkulunkulu wami; walizwa ilizwi lami esethempelini lakhe, lokukhala kwami kweza phambi kwakhe, endlebeni zakhe.

18:7  Khona umhlaba wazamazama, wanyikinyeka, lezisekelo zezintaba zaqhaqhazela, zazamazama, ngoba wayethukuthele.

18:8  Kwenyuka intuthu emakhaleni akhe, lomlilo ophuma emlonyeni wakhe waqothula; amalahle avuthiswa yiwo.

18:9  Wasekhothamisa amazulu, wehlela phansi, lomnyama onzima wawungaphansi kwenyawo zakhe.

18:10  Wasegada ikherubhi*, waphapha, wandiza phezu kwempiko zomoya.

18:11  Wamisa umnyama waba yindawo yakhe yensitha, idumba lakhe inhlangothi zonke zakhe, amanzi amnyama, amayezi amnyama omkhathi.

18:12  Ekukhazimuleni okuphambi kwakhe amayezi akhe amnyama edlula, isiqhotho lamalahle omlilo.

18:13  INkosi yasiduma emazulwini, oPhezukonke wazwakalisa ilizwi lakhe, isiqhotho lamalahle omlilo.

18:14  Yasithuma imitshoko yayo, yabachitha; lemibane eminengi, yabaphaphathekisa.

18:15  Khona kwabonakala imisele yamanzi, kwembulwa izisekelo zomhlaba ekusoleni kwakho, Nkosi, ekuvutheleni komoya wamakhala akho.

18:16  Yathuma iphezulu, yangibamba, yangenyula emanzini amanengi.

18:17  Yangophula esitheni sami esilamandla, lakibo abangizondayo, ngoba babelamandla kulami.

18:18  Babephambi kwami osukwini lwenhlupheko yami, kodwa iNkosi yaba yisisekelo sami.

18:19  Yangikhuphela endaweni ebanzi, yangikhulula ngoba yayithokoza ngami.

18:20  INkosi yangivuza njengokulunga kwami; yangibuyisela njengokuhlanzeka kwezandla zami.

18:21  Ngoba ngizilondolozile indlela zeNkosi, kangisukanga kuNkulunkulu wami ngenkohlakalo.

18:22  Ngoba zonke izahlulelo zayo zaziphambi kwami, lezimiso zayo kangiziphambulanga kimi.

18:23  Njalo ngangiqondile kuyo, ngizinqandile ebubini bami.

18:24  Ngakho iNkosi ingibuyisele njengokulunga kwami, njengokuhlanzeka kwezandla zami phambi kwamehlo ayo.

18:25  Kolesihawu uzaziveza ulesihawu; koqotho uzaziveza uqotho;

18:26  kohlanzekileyo uzaziveza uhlanzekile; lakophambukileyo uzaziveza uphambukile.

18:27  Ngoba wena uzabasindisa abantu abahlutshwayo; kodwa amehlo aphakemeyo uzawehlisela phansi.

18:28  Ngoba wena uzalumathisa isibane sami; iNkosi, uNkulunkulu wami, izakhanyisa ubumnyama bami.

18:29  Ngoba ngawe ngigijimile ngadabula phakathi kwebutho, langoNkulunkulu wami ngeqe umthangala.

18:30  UNkulunkulu, indlela yakhe iphelele; ilizwi leNkosi lihloliwe; uyisihlangu kubo bonke abaphephela kuye.

18:31  Ngoba ngubani onguNkulunkulu ngaphandle kweNkosi? Njalo ngubani olidwala ngaphandle kukaNkulunkulu wethu?

18:32  NguNkulunkulu ongibhincisa amandla, owenza indlela yami iphelele.

18:33  Owenza inyawo zami zibe njengezezimpala, wangimisa ezingqongeni zami.

18:34  Ofundisela izandla zami impi, ukuze idandili lethusi ligotshiswe zingalo zami.

18:35  Unginikile lesihlangu sosindiso lwakho, lesandla sakho sokunene singisekele, lobumnene bakho bungikhulisile.

18:36  Wenze zaba banzi izinyathelo zami ngaphansi kwami, ukuze inyawo zami zingatsheleli.

18:37  Ngixotshene lezitha zami, ngazifica, kangibuyanga ngaze ngaziqeda.

18:38  Ngazigwaza, zaze zehluleka ukuvuka, zawa ngaphansi kwenyawo zami.

18:39  Ngoba ungibhincise amandla kusenzelwa impi, wabakhothamisela phansi kwami abangivukelayo.

18:40  Unginike intamo yezitha zami, labo abangizondayo ngababhubhisa.

18:41  Bakhala, kodwa engekho umsindisi; eNkosini, kodwa kayibaphendulanga.

18:42  Ngasengibacholisisa njengothuli phambi komoya, ngabachitha njengodaka lwezitalada.

18:43  Wangikhulula ekuphikiseni kwabantu, wangimisa ngaba yinhloko yezizwe; abantu engangingabazi bangisebenzela.

18:44  Bangenela ukuzwa ngendlebe bazangilalela, abezizweni bazazithoba kimi ngokuzenzisa.

18:45  Abezizweni bazabuna, baphume ezinqabeni zabo bethuthumela.

18:46  INkosi iyaphila; njalo kalidunyiswe idwala lami, kaphakanyiswe uNkulunkulu wosindiso lwami.

18:47  UNkulunkulu onginika impindiselo, lowehlisela izizwe ngaphansi kwami;

18:48  ongikhulula ezitheni zami; yebo, phezu kwabangivukelayo wangiphakamisa, emuntwini wodlakela wangikhulula.

18:49  Ngenxa yalokhu ngizakudumisa, Nkosi, phakathi kwezizwe, ngihlabelele ibizo lakho indumiso.

18:50  Iyanika inkosi yayo usindiso olukhulu, isenzela ogcotshiweyo wayo umusa, kuDavida, lenzalweni yakhe kuze kube nininini.

Chapter 19

19:1  Amazulu alandisa ngodumo lukaNkulunkulu, lomkhathi utshumayela umsebenzi wezandla zakhe.

19:2  Usuku kusuku luphumisela inkulumo, lobusuku kubusuku butshengisa ulwazi.

19:3  Kakukho nkulumo, kawakho lamazwi, lapho ilizwi lawo elingezwakali khona.

19:4  Intambo yawo iphumele emhlabeni wonke, lamazwi awo emkhawulweni womhlaba. Ulimisele ilanga ithente kuwo.

19:5  Elinjengomyeni ephuma ekamelweni lakhe, lithokoza njengeqhawe ligijima endleleni.

19:6  Ukuphuma kwalo kusukela emkhawulweni wamazulu, lokuzingeleza kwalo kuze kube semikhawulweni yawo; njalo kakukho okufihliweyo ekutshiseni kwalo.

19:7  Umlayo weNkosi uphelele, uphendula umphefumulo; ubufakazi beNkosi buqinisile, buhlakaniphisa ongelalwazi;

19:8  izimiso zeNkosi zilungile, zithokozisa inhliziyo; umthetho weNkosi uhlambulukile, ukhanyisa amehlo.

19:9  Ukuyesaba iNkosi kuhlanzekile, kumi kuze kube nininini; izahlulelo zeNkosi ziliqiniso, zilungile ngokupheleleyo.

19:10  Ziyaloyiseka kakhulu kulegolide, yebo kulegolide elicwengekileyo elinengi; njalo zimnandi kuloluju lolujuluka ohlangeni loluju.

19:11  Futhi inceku yakho iyelulekwa ngazo; ekuzigcineni kulomvuzo omkhulu.

19:12  Ngubani oqedisisa iziphosiso zakhe? Ngikhulula kwezisithekileyo.

19:13  Igcine inceku yakho lezonweni zokuzincoma; kazingabusi phezu kwami. Khona ngizakuba ngoqondileyo, ngibe msulwa esiphambekweni esikhulu.

19:14  Amazwi omlomo wami lezizindlo zenhliziyo yami kakwemukeleke phambi kwakho, Nkosi, dwala lami lomhlengi wami.

Chapter 20

20:1  INkosi ikuphendule osukwini lokuhlupheka; ibizo likaNkulunkulu kaJakobe likuvikele.

20:2  Kayikuthumele usizo oluvela endaweni engcwele, ikusekele iseZiyoni.

20:3  Kayikhumbule yonke iminikelo yakho, njalo yemukele umnikelo wakho wokutshiswa. Sela*.

20:4  Ikunike njengokwenhliziyo yakho, njalo igcwalise icebo lakho lonke.

20:5  Simemeze ngentokozo esindisweni lwakho, lebizweni likaNkulunkulu wethu siphakamise iziboniso! INkosi igcwalise konke ukucela kwakho.

20:6  Sengisazi ukuthi iNkosi isindisa ogcotshiweyo wayo; izamphendula isemazulwini ayo angcwele ngamandla asindisayo esandla sayo sokunene.

20:7  Abanye bathembela enqoleni, labanye emabhizeni, kodwa thina sizakhumbula ibizo leNkosi uNkulunkulu wethu.

20:8  Bona bakhothanyisiwe bawa, kodwa thina sisukumile simi.

20:9  Jehova, sindisa; inkosi isiphendule osukwini lokukhala kwethu.

Chapter 21

21:1  Jehova, inkosi izajabula emandleni akho, lesindisweni lwakho izathaba kangakanani!

21:2  Uyinikile isifiso senhliziyo yayo, kawuyincitshanga isicelo sendebe zayo. Sela*.

21:3  Ngoba uyihlangabeze ngezibusiso zokuhle, wayethwesa umqhele wegolide elihle ekhanda layo.

21:4  Yacela impilo kuwe, wayinika yona, ubude bezinsuku kuze kube nini lanini.

21:5  Lukhulu udumo lwayo ekusindiseni kwakho, inkazimulo lobukhosi wakubeka phezu kwayo.

21:6  Ngoba uyenze yabusiseka kakhulu kuze kube nininini, uyayithokozisa ngenjabulo ebukhoneni bakho.

21:7  Ngoba inkosi ithembela kuJehova, langomusa woPhezukonke kayiyikunyikinywa.

21:8  Isandla sakho sizazithola zonke izitha zakho, lesandla sakho sokunene sizabathola labo abakuzondayo.

21:9  Uzabenza babe njengesithando somlilo esikhathini solaka lwakho. INkosi izabaginya ekuthukutheleni kwayo, lomlilo uzabaqothula.

21:10  Uzachitha isithelo sabo emhlabeni, lenzalo yabo phakathi kwabantwana babantu.

21:11  Ngoba bezimisela okubi bemelene lawe, beceba ugobe, bazakwehluleka.

21:12  Ngoba uzabafulathelisa, ngezintambo zedandili uzalungisa imitshoko imelane lobuso babo.

21:13  Phakama, Nkosi, ngamandla akho! Sizahlabela sidumise amandla akho.

Chapter 22

22:1  Nkulunkulu wami, Nkulunkulu wami, ungitshiyeleni na? Ukhatshana lokungisiza, lamazwi okubhonga kwami?

22:2  Nkulunkulu wami, ngiyakhala emini, kodwa kawungiphenduli, lebusuku, kodwa kangilakho ukuthula.

22:3  Kodwa wena ungcwele, ohlezi ezibongweni zikaIsrayeli.

22:4  Obaba bethu bathemba kuwe, bathemba, wasubakhulula.

22:5  Bakhala kuwe, bakhululwa; bathembela kuwe, kabayangekanga.

22:6  Kodwa ngingumswenya, kangisuye muntu, ihlazo labantu, ngeyiswa ngabantu.

22:7  Bonke abangibonayo bayangihleka usulu, bakhamisa indebe, banikine ikhanda,

22:8  besithi: Wathembela eNkosini; kayimkhulule, imophule, ngoba yathokoza kuye.

22:9  Kodwa nguwe owangikhupha esiswini, wangenza ngathemba ngisemabeleni kamama.

22:10  Ngalahlelwa phezu kwakho kusukela esizalweni; kusukela esiswini sikamama unguNkulunkulu wami.

22:11  Ungabi khatshana lami, ngoba uhlupho luseduze, ngoba kakho osizayo.

22:12  Izinkunzi ezinengi zingihanqile, ezilamandla zeBashani zingizingelezele.

22:13  Zangikhamisela umlomo wazo, isilwane esiphangayo lesibhongayo.

22:14  Ngithululiwe njengamanzi, lamathambo ami wonke ehlukene; inhliziyo yami injengengcino, incibilikile phakathi kwemibilini yami.

22:15  Amandla ami omile njengodengezi, lolimi lwami lunamathele emihlathini yami; ungibeke ethulini lokufa.

22:16  Ngoba izinja zingigombolozele; inhlangano yababi ingihanqile; izandla zami lenyawo zami bazibhobozile.

22:17  Ngingabala wonke amathambo ami; bona bayakhangela bayangijolozela.

22:18  Babelana izigqoko zami, benza inkatho yokuphosa ngezembatho zami.

22:19  Kodwa, wena Nkosi, ungabi khatshana; mandla ami, phangisa ukungisiza.

22:20  Khulula umphefumulo wami kuyo inkemba, wona wodwa owami emandleni enja.

22:21  Ngisindisa emlonyeni wesilwane; ngoba empondweni zezinyathi ungiphendule.

22:22  Ngizalandisa ibizo lakho kubafowethu, phakathi kwebandla ngizakudumisa.

22:23  Lina elesaba iNkosi, idumiseni; lonke nzalo kaJakobe, ihlonipheni; liyesabe, lonke nzalo kaIsrayeli.

22:24  Ngoba kayidelelanga kayinengwanga yinhlupheko yohluphekayo; njalo kayimfihlelanga ubuso bayo; kodwa lapho ekhala kuyo, yezwa.

22:25  Indumiso yami izakuba ngawe ebandleni elikhulu; ngizakhokha izifungo zami phambi kwabayesabayo.

22:26  Abamnene bazakudla basuthe; bazayidumisa iNkosi labo abayidingayo. Inhliziyo yenu izaphila kuze kube phakade.

22:27  Imikhawulo yonke yomhlaba izakhumbula, iphendukele eNkosini; lezizukulwana zonke zezizwe zizakhonza phambi kwakho.

22:28  Ngoba umbuso ungoweNkosi, njalo iyabusa phakathi kwezizwe.

22:29  Bonke abakhulupheleyo bomhlaba bazakudla bakhonze; bonke abehlela othulini bazakhothama phambi kwayo, longagcini umphefumulo wakhe uphila.

22:30  Inzalo izayikhonza; izabalelwa eNkosini kuso isizukulwana.

22:31  Bazakuza bamemezele ukulunga kwayo ebantwini abazazalwa, ukuthi ikwenzile.

Chapter 23

23:1  INkosi ingumelusi wami, kangiyikuswela.

23:2  Iyangilalisa emadlelweni aluhlaza; iyangiholela emanzini okuphumula.

23:3  Ibuyisa umphefumulo wami, ingiholele endleleni zokulunga ngenxa yebizo layo.

23:4  Yebo, loba ngihamba esihotsheni sethunzi lokufa, kangiyikwesaba okubi, ngoba wena ulami; intonga yakho lodondolo lwakho, khona kuyangiduduza.

23:5  Uyalungisa itafula phambi kwami ngaphambi kwezitha zami; ugcoba ikhanda lami ngamafutha, inkezo yami iyaphuphuma.

23:6  Isibili okuhle lesihawu kuzangilandela insuku zonke zempilo yami; njalo ngizahlala endlini yeNkosi kuze kube nininini.

Chapter 24

24:1  Umhlaba ungoweNkosi, lokugcwala kwawo, ilizwe, labahlala kulo.

24:2  Ngoba yona yawusekela phezu kwezinlwandle, yawumisa phezu kwemifula.

24:3  Ngubani ozakwenyukela entabeni yeNkosi? Kumbe ngubani ozakuma endaweni yayo engcwele?

24:4  Ngulowo olezandla ezihlanzekileyo lenhliziyo emhlophe, ongaphakamiseli umphefumulo wakhe kokuyize longafungi ngenkohliso.

24:5  Uzakwemukela isibusiso eNkosini, lokulunga kuNkulunkulu wosindiso lwakhe.

24:6  Lesi yisizukulwana salabo abayidingayo, abadinga ubuso bakho, ngitsho Jakobe. Sela*.

24:7  Phakamisani inhloko zenu, lina masango, phakanyiswani, lina minyango yaphakade, ukuze kungene iNkosi yenkazimulo.

24:8  Ingubani liNkosi yenkazimulo? INkosi elamandla leliqhawe, iNkosi elamandla empini.

24:9  Phakamisani inhloko zenu, lina masango, yebo, phakamani, lina minyango yaphakade, ukuze kungene iNkosi yenkazimulo.

24:10  Ingubani liNkosi yenkazimulo? INkosi yamabandla, yiyo eyiNkosi yenkazimulo. Sela*.

Chapter 25

25:1  Kuwe, Nkosi, ngiphakamisela umphefumulo wami.

25:2  Nkulunkulu wami, ngithembela kuwe; kangingayangeki; izitha zami kazingathokozi phezu kwami.

25:3  Yebo, kungayangeki loyedwa kulabo abakulindelayo; kabayangeke labo abaphambukayo kungelasizatho.

25:4  Ngazisa izindlela zakho, Nkosi, ungifundise imikhondo yakho.

25:5  Ngikhokhelela eqinisweni lakho, ungifundise, ngoba unguNkulunkulu wosindiso lwami; ngilindele wena usuku lonke.

25:6  Khumbula izihawu zakho, Nkosi, lobubele bakho, ngoba kwakukhona kusukela phakade.

25:7  Ungazikhumbuli izono zobutsha bami leziphambeko zami; ngokomusa wakho wena ungikhumbule, ngenxa yokulunga kwakho, Nkosi.

25:8  INkosi ilungile iqondile; ngakho-ke izazifundisa izoni ngendlela.

25:9  Izabakhokhela abathobekileyo ekwahlulelweni, ibafundise abathobekileyo indlela yayo.

25:10  Zonke indlela zeNkosi zingumusa leqiniso kulabo abalondoloza isivumelwano sayo lezifakazelo zayo.

25:11  Ngenxa yebizo lakho, Nkosi, thethelela isiphambeko sami, ngoba sikhulu.

25:12  Nguwuphi umuntu owesaba iNkosi? Izamfundisa ngendlela ezayikhetha.

25:13  Umphefumulo wakhe uzahlala ebuhleni, lenzalo yakhe izalidla ilifa lelizwe.

25:14  Imfihlo yeNkosi ingeyabayesabayo, izabazisa isivumelwano sayo.

25:15  Amehlo ami ahlala eseNkosini, ngoba yiyo ezakhupha inyawo zami embuleni.

25:16  Phendukela kimi, ube lomusa kimi, ngoba ngilesizungu, ngihluphekile.

25:17  Inkathazo zenhliziyo yami zanda, ungikhuphe ezinhluphekweni zami.

25:18  Khangela inhlupheko yami losizi lwami, uthethelele zonke izono zami.

25:19  Khangela izitha zami ngoba zinengi, ziyangizonda ngenzondo elesihluku.

25:20  Londoloza umphefumulo wami, ungikhulule; kangingayangeki, ngoba ngiphephela kuwe.

25:21  Ubuqotho lokuqonda kakungilondoloze, ngoba ngilindele wena.

25:22  Nkulunkulu, hlenga uIsrayeli kuzo zonke inkathazo zakhe.

Chapter 26

26:1  Ngahlulela, Nkosi, ngoba mina ngihambe ngobuqotho bami, njalo ngithembele eNkosini, angiyikutshelela.

26:2  Ngihlola, Nkosi, ungilinge, uhlole izinso zami lenhliziyo yami.

26:3  Ngoba uthandolomusa wakho luphambi kwamehlo ami, njalo ngihambe eqinisweni lakho.

26:4  Kangihlalanga labantu benkohliso, kangihambelani labazenzisayo.

26:5  Ngiyizondile inhlangano yabenzi bobubi, kangihlali lababi.

26:6  Ngizageza izandla zami ngokungelacala, ngizingelezele ilathi lakho, Nkosi.

26:7  Ukuze ngizwakalise ngelizwi lokubonga, lokuze ngilandise zonke izenzo zakho ezimangalisayo.

26:8  Nkosi, ngiyayithanda inhlalo yendlu yakho, lendawo yokuhlala yenkazimulo yakho.

26:9  Ungabuthi umphefumulo wami kanye lezoni, kumbe impilo yami kanye labantu abomele igazi.

26:10  Ozandla zabo zilobubi, lesandla sabo sokunene sigcwele izivalamlomo.

26:11  Kodwa mina ngizahamba ngobuqotho bami; ngihlenga, ube lomusa kimi.

26:12  Unyawo lwami lumi endaweni elingeneyo; ngizayidumisa iNkosi emabandleni.

Chapter 27

27:1  INkosi iyikukhanya kwami losindiso lwami; ngizakwesaba bani? INkosi ingamandla empilo yami; ngizakwethuka bani?

27:2  Lapho ababi, izitha zami labamelana lami, besondela kimi ukudla inyama yami, bona bakhubeka bawa.

27:3  Loba ibutho lingamisa inkamba limelene lami, inhliziyo yami kayiyikwesaba; loba impi ingangivukela, kulokhu ngizathemba.

27:4  Into yinye engiyicela eNkosini, yiyo engizayidinga, yikuthi ngihlale endlini yeNkosi insuku zonke zempilo yami, ukuze ngibone ubuhle beNkosi, ngibuzisise ethempelini layo.

27:5  Ngoba izangifihla edumbeni layo ngosuku lobubi, ingifihle ekusithekeni kwethente layo, ingiphakamisele edwaleni.

27:6  Khathesi-ke ikhanda lami lizaphakanyiswa phezu kwezitha zami ezingihanqileyo; ngakho ngizanikela iminikelo yokuthaba ethenteni layo; ngizahlabela, yebo ngihlabele indumiso eNkosini.

27:7  Zwana, Nkosi, ilizwi lami lapho ngikhala, njalo ungihawukele, ungiphendule.

27:8  Uthe: Dingani ubuso bami. Inhliziyo yami yathi kuwe: Ubuso bakho, Nkosi, ngizabudinga.

27:9  Ungangifihleli ubuso bakho; ungayixotshi inceku yakho ngokuthukuthela; ubulusizo lwami; ungangitshiyi, ungangideli, Nkulunkulu wosindiso lwami.

27:10  Lapho umama lobaba bengitshiya, khona iNkosi izangemukela.

27:11  Ngifundisa indlela yakho, Nkosi, ungikhokhele endleleni eqondileyo, ngenxa yezitha zami.

27:12  Unganginikeli entandweni yezitha zami, ngoba abafakazi bamanga bangivukele, lovutha isihluku.

27:13  Ngangizaphela ngaphandle kokuthi ngakholwa ukuthi ngizabona okuhle kweNkosi elizweni labaphilayo.

27:14  Lindela iNkosi, ube lamandla, lenhliziyo yakho iqine, yebo, lindela iNkosi.

Chapter 28

28:1  Ngiyakhala kuwe, Nkosi; dwala lami, ungangithuleli, hlezi nxa ungithulela, ngifanane labehlela emgodini.

28:2  Zwana ilizwi lokuncenga kwami lapho ngikhala kuwe, lapho ngiphakamisela izandla zami endaweni yakho yelizwi engcwele.

28:3  Ungangihuduli kanye lababi njalo kanye labenzi bobubi, abakhuluma ukuthula labomakhelwane babo, kodwa ububi busenhliziyweni yabo.

28:4  Ubanike njengokwenza kwabo, lanjengobubi bezenzo zabo; ubanike njengokomsebenzi wezandla zabo, ubabuyisele isenzo sabo.

28:5  Ngoba kabayinanzi imisebenzi yeNkosi lokwenza kwezandla zayo, izababhidliza ingabakhi.

28:6  Kayibongwe iNkosi, ngoba ilizwile ilizwi lokuncenga kwami.

28:7  INkosi ingamandla ami lesihlangu sami; inhliziyo yami ithembela kuyo, ngiyasizwa; ngakho inhliziyo yami iyathokoza, ngiyidumise ngengoma yami.

28:8  INkosi ingamandla abo, njalo iyinqaba yezinsindiso zogcotshiweyo wayo.

28:9  Sindisa abantu bakho, ubusise ilifa lakho, beluse, ubaphakamise kuze kube nininini.

Chapter 29

29:1  Inikeni iNkosi, lina madodana abalamandla, inikeni iNkosi udumo lamandla.

29:2  Inikeni iNkosi udumo lwebizo layo, likhothame eNkosini ebuhleni bobungcwele.

29:3  Ilizwi leNkosi liphezu kwamanzi; uNkulunkulu wenkazimulo uyaduma; iNkosi iphezu kwamanzi amanengi.

29:4  Ilizwi leNkosi lilamandla, ilizwi leNkosi lilobukhosi.

29:5  Ilizwi leNkosi lephula imisedari, yebo, iNkosi yephula imisedari yeLebhanoni.

29:6  Yenza yona-ke iqolotshe njengethole, iLebhanoni leSiriyoni njengethole lenyathi.

29:7  Ilizwi leNkosi lidabula amalangabi omlilo.

29:8  Ilizwi leNkosi lizamazamisa inkangala, iNkosi izamazamisa inkangala yeKadeshi.

29:9  Ilizwi leNkosi lizalisa izimpala, lihlubule amahlathi; lethempelini layo konke kuthi: Udumo.

29:10  UJehova uhlezi phezu kukazamcolo, yebo, uJehova uhlezi eyiNkosi kuze kube nininini.

29:11  INkosi izanika abantu bayo amandla; iNkosi ibusise abantu bayo ngokuthula.

Chapter 30

30:1  Ngizakuphakamisa, Nkosi, ngoba ungenyusile, njalo kawuthokozisanga izitha zami ngami.

30:2  Nkosi Nkulunkulu wami, ngakhalela kuwe, wangisilisa.

30:3  Nkosi, uwukhuphulile umphefumulo wami engcwabeni, ungigcinile ngiphila, ukuze ngingehleli emgodini.

30:4  Hlabelelani eNkosini, lina bangcwele bayo, libonge ekukhunjulweni kobungcwele bayo.

30:5  Ngoba ukuthukuthela kwayo kungokwesikhatshana, impilo isemuseni wayo. Ukulila kungahlala kusihlwa, kanti ekuseni kulentokozo.

30:6  Mina-ke ngathi ekuphumeleleni kwami: Kangiyikunyikinywa laphakade.

30:7  Nkosi, ngomusa wakho wenzile intaba yami iqine; wabufihla ubuso bakho, ngahlupheka.

30:8  Ngakhala kuwe, Nkosi; ngancenga eNkosini.

30:9  Kulenzuzo bani egazini lami ekutshoneni kwami emgodini? Uthuli luzakudumisa na? Luzatshumayela iqiniso lakho yini?

30:10  Zwana, Nkosi, ube lomusa kimi; Nkosi, woba ngumsizi wami.

30:11  Uphendule ukukhala kwami kwaba yikusina; ukhuphile isaka lami, wangibhincisa intokozo,

30:12  ukuze udumo lwami luhlabele indumiso kuwe, lungathuli; Nkosi, Nkulunkulu wami, ngizakubonga kuze kube nininini.

Chapter 31

31:1  Kuwe, Nkosi, ngiyathemba, kangingayangeki lanini, ngikhulule ngokulunga kwakho.

31:2  Beka kimi indlebe yakho, ngikhulule masinyane, ube lidwala elilamandla kimi, indlu yezinqaba yokungisindisa.

31:3  Ngoba wena ulidwala lami lenqaba yami; ngakho ngenxa yebizo lakho ngikhokhela ungiqondise.

31:4  Ngikhupha embuleni abangithiye ngalo ensitha, ngoba uyinqaba yami.

31:5  Esandleni sakho ngibeka umoya wami; ungihlengile, Nkosi, Nkulunkulu weqiniso.

31:6  Ngibazondile labo abananzelela okuyize kwamanga; kodwa mina ngithembela eNkosini.

31:7  Ngizathaba ngithokoze emuseni wakho, ngoba ubonile uhlupho lwami, wazile umphefumulo wami ezinkathazweni.

31:8  Njalo kawungivalelanga esandleni sesitha, umise inyawo zami endaweni ebanzi.

31:9  Woba lomusa kimi, Nkosi, ngoba ngilohlupho; ilihlo lami liqedwa lusizi, umphefumulo wami lesisu sami.

31:10  Ngoba impilo yami iphela ngosizi, leminyaka yami ngokububula; amandla ami ayadeda ngenxa yeziphambeko zami, lamathambo ami ayaqedwa.

31:11  Sengilihlazo phakathi kwazo zonke izitha zami, kodwa ikakhulu kwabakhelene lami, sengiyikwesabeka kwabangejwayeleyo; abangibonayo ngaphandle bayangibalekela.

31:12  Bakhohlwe ngami njengofileyo enhliziyweni; nginjengesitsha esifileyo.

31:13  Ngoba ngizwile ukunyunda kwabanengi, ukwesaba inhlangothi zonke, becebisana bemelene lami, beceba ukuthatha impilo yami.

31:14  Kodwa mina ngithemba kuwe, Nkosi, ngithi: UnguNkulunkulu wami.

31:15  Izikhathi zami zisesandleni sakho; ngikhulula esandleni sezitha zami lakwabangizingelayo.

31:16  Khanyisa ubuso bakho phezu kwenceku yakho; ungisindise ngothando lwakho.

31:17  Nkosi, kangingayangeki, ngoba ngikubizile; kabayangeke ababi, bathule engcwabeni.

31:18  Kazithuliswe indebe zamanga, ezikhuluma kalukhuni zimelene lolungileyo ngokuzigqaja langokweyisa.

31:19  Kukhulu kangakanani ukulunga kwakho, okubekele labo abakwesabayo, okwenzela labo abathembela kuwe, phambi kwabantwana babantu!

31:20  Uzabafihla ekusithekeni kobukhona bakho basuke kumagobe omuntu, ubafihle ethenteni ekuphikisaneni kwenlimi.

31:21  Kayibongwe iNkosi, ngoba ingenzele uthando olumangalisayo emzini oyinqaba.

31:22  Ngoba mina ngathi ekuphangiseni kwami: Ngiqunyiwe ngasuswa phambi kwamehlo akho. Loba kunjalo uzwile ilizwi lokuncenga kwami ekukhaleni kwami kuwe.

31:23  Ithandeni iNkosi lonke bangcwele bayo. INkosi ilondoloza abathembekileyo, iyamphindisela kakhulukazi owenze ngokuzigqaja.

31:24  Qinani, izaqinisa inhliziyo yenu, lina lonke elithembela eNkosini.

Chapter 32

32:1  Ubusisiwe lowo osiphambeko sakhe sithethelelwe, osono sakhe sisitshekelwe.

32:2  Ubusisiwe umuntu iNkosi engambaleli ububi, lokungekho inkohliso emoyeni wakhe.

32:3  Lapho ngathula, amathambo ami aguga ngenxa yokubhonga kwami usuku lonke.

32:4  Ngoba emini lebusuku isandla sakho sasinzima phezu kwami; ubumanzi bami baguqulelwa ekomeni kwehlobo. Sela*.

32:5  Ngakwazisa isono sami, kangifihlanga isiphambeko sami, ngathi: Ngizavuma ngeziphambeko zami eNkosini. Wena wasuthethelela icala lesono sami. Sela*.

32:6  Ngenxa yalokhu ngulowo lalowo owesaba uNkulunkulu uzakhuleka kuwe ngesikhathi ongatholwa ngaso. Isibili, esikhukhuleni samanzi amakhulu kawayikufinyelela kuye.

32:7  Wena uyindawo yami yokucatsha, uyangilondoloza ekuhluphekeni, ungiphahle ngamahubo okukhululwa. Sela*.

32:8  Ngizakulaya ngikufundise endleleni ozahamba ngayo, ngizakweluleka, ilihlo lami libe phezu kwakho.

32:9  Ungabi njengebhiza, njengembongolo engelakuqedisisa, omlomo wayo onqandwa ngomkhala langetomu, hlezi kusondele kuwe.

32:10  Zinengi izinhlupheko zomubi, kodwa othembela eNkosini, umusa uzamphahla.

32:11  Jabulani eNkosini, lithabe, balungileyo; memezani ngokuthaba, lonke baqotho enhliziyweni.

Chapter 33

33:1  Thokozani eNkosini, balungileyo. Ukudumisa kubafanele abaqotho.

33:2  Dumisani iNkosi ngechacho, lihlabelele kuyo ngogubhu olulentambo ezilitshumi.

33:3  Ihlabeleleni ingoma entsha, litshaye kuhle ngenhlokomo.

33:4  Ngoba ilizwi leNkosi liqotho, lomsebenzi wayo wonke ngowobuqotho.

33:5  Ithanda ukulunga lesahlulelo; umhlaba ugcwele umusa weNkosi.

33:6  Ngelizwi leNkosi amazulu enziwa, lalo lonke ibutho lawo ngomoya womlomo wayo.

33:7  Ibuthelela amanzi olwandle njengenqumbi, ifake inziki eziphaleni.

33:8  Umhlaba wonke kawuyesabe iNkosi, bonke abakhileyo bomhlaba kabathuthumele ngayo.

33:9  Ngoba yona yakhuluma, kwaba khona; yona yalaya, kwema.

33:10  INkosi ichitha icebo lezizwe, iphuthisa imicabango yabantu.

33:11  Icebo leNkosi limi kuze kube nininini, imicabango yenhliziyo yayo ezizukulwaneni ngezizukulwana.

33:12  Sibusisiwe isizwe esiNkulunkulu waso yiNkosi, abantu ebakhethileyo baba yilifa layo.

33:13  INkosi iyakhangela phansi isemazulwini, ibone bonke abantwana babantu.

33:14  Isendaweni emisiweyo yokuhlala kwayo ikhangela bonke abakhileyo bomhlaba.

33:15  Ibumba inhliziyo yabo bonke, inanzelele zonke izenzo zabo.

33:16  Kayikho inkosi esindiswa yibunengi bebutho, iqhawe kalikhululwa ngamandla amakhulu.

33:17  Ibhiza liyize ekunqobeni, njalo kalikhululi ngobukhulu bamandla alo.

33:18  Khangela, ilihlo leNkosi liphezu kwabayesabayo, kwalabo abathembela emuseni wayo,

33:19  ukukhulula umphefumulo wabo ekufeni, lokubaphilisa endlaleni.

33:20  Umphefumulo wethu ulindela iNkosi; ilusizo lwethu lesihlangu sethu.

33:21  Ngoba inhliziyo yethu izathokoza kuyo, ngoba sithembele ebizweni layo elingcwele.

33:22  Umusa wakho, Nkosi, kawube phezu kwethu, njengokulindela kwethu kuwe.

Chapter 34

34:1  Ngizayibonga iNkosi ngesikhathi sonke; ukudunyiswa kwayo kuzahlala kusemlonyeni wami.

34:2  Umphefumulo wami uzazincoma eNkosini; abathobekileyo bazakuzwa bathokoze.

34:3  Ikhuliseni iNkosi kanye lami, asiliphakamise ibizo layo kanyekanye.

34:4  Ngayidinga iNkosi, yangiphendula, yasingikhulula kukho konke ukwesaba kwami.

34:5  Bakhangela kuyo, bakhazimula, lobuso babo kabubanga lenhloni.

34:6  Lo umyanga wakhala, leNkosi yezwa, yasimsindisa kuzo zonke inkathazo zakhe.

34:7  Ingilosi yeNkosi imisa inkamba izingelezele labo abayesabayo, ibakhulule.

34:8  Nambithanini libone ukuthi iNkosi ilungile. Ubusisiwe lowomuntu othembela kuyo.

34:9  Yesabeni iNkosi, bangcwele bayo, ngoba kakulakuswela kwabayesabayo.

34:10  Izilwane ezintsha ziyaswela zilambe, kodwa labo abayidingayo iNkosi kabasweli lutho oluhle.

34:11  Wozani, bantwana, lingilalele, ngizalifundisa ukwesaba iNkosi.

34:12  Ngubani umuntu ofisa impilo, othanda izinsuku ukuthi abone okuhle?

34:13  Londa ulimi lwakho kokubi, lendebe zakho ekukhulumeni inkohliso.

34:14  Suka kokubi, wenze okuhle, dinga ukuthula, kunxwanele.

34:15  Amehlo eNkosi akwabalungileyo, lezindlebe zayo kukukhala kwabo.

34:16  Ubuso beNkosi bumelene labenza okubi, ukuquma ukukhunjulwa kwabo kusuke emhlabeni.

34:17  Bakhala, iNkosi yezwa; iyabakhulula kuzo zonke izinhlupheko zabo.

34:18  INkosi iseduze labo abalenhliziyo ezephukileyo, iyabasindisa abalomoya odabukileyo.

34:19  Zinengi inhlupheko zolungileyo, kodwa iNkosi iyamkhulula kuzo zonke.

34:20  Iyawagcina wonke amathambo akhe, kakwaphulwa lelilodwa kuwo.

34:21  Okubi kuzambulala okhohlakeleyo; labazonda olungileyo bazalahlwa.

34:22  INkosi iyahlenga umphefumulo wenceku zayo; njalo bonke abathemba kuyo kabayikulahlwa.

Chapter 35

35:1  Phikisana, Nkosi, labaphikisana lami, ulwe labalwa lami.

35:2  Xhakalaza ihawu lesihlangu esikhulu, usukumele usizo lwami.

35:3  Hwatsha lomkhonto, uvimbe indlela umelane labangizingelayo; tshono emphefumulweni wami ukuthi: Ngilusindiso lwakho.

35:4  Kabayangeke babe lehlazo labo abadinga umphefumulo wami. Kabahlehliselwe emuva babe lenhloni labo abaceba ububi ngami.

35:5  Kababe njengamakhoba phambi komoya, lengilosi yeNkosi kayibadudule.

35:6  Indlela yabo kayibe mnyama itshelele, lengilosi yeNkosi ibaxotshe.

35:7  Ngoba kungelasizatho bangifihlele imbule labo emgodini, kungelasizatho bawugebhele umphefumulo wami.

35:8  Ukubhujiswa kakumjume, lembule lakhe alifihlileyo kalimbambe yena, awele kulo, ekubhujisweni.

35:9  Kodwa umphefumulo wami uzathokoza eNkosini, ujabule esindisweni lwayo.

35:10  Wonke amathambo ami azakuthi: Nkosi, ngubani onjengawe, okhulula umyanga kulowo olamandla kulaye, yebo, umyanga loswelayo komphangayo?

35:11  Abafakazi bamanga basukuma, bangibuza engingakwaziyo.

35:12  Bangibuyisela okubi endaweni yokuhle, umphefumulo wami ulahlekelwa.

35:13  Kanti mina, ekuguleni kwabo isembatho sami sasilisaka, ngathobisa umphefumulo wami ngokuzila ukudla, lomkhuleko wami wabuyela esifubeni sami.

35:14  Ngahamba ngokungathi ungumngane ngokungathi ungumfowethu; ngikhotheme kwezimnyama njengolilela unina.

35:15  Kodwa ekukhubekeni kwami bathokoza, babuthana ndawonye, abalahliweyo babuthana ndawonye bemelene lami, njalo ngangingakwazi; badabula kabemanga.

35:16  Kanye lababi abaklolodayo edilini, bangigedlela amazinyo abo.

35:17  Nkosi, uzabukela kuze kube nini? Buyisa umphefumulo wami ekubhubhiseni kwabo, wona wodwa owami emabhongweni ezilwane.

35:18  Ngizakubonga ebandleni elikhulu, ngikudumise phakathi kwabantu abanengi.

35:19  Bangajabuli ngami abayizitha zami ngamanga, kabangangificeli ilihlo labo abangizonda ngeze.

35:20  Ngoba kabakhulumi ukuthula, kodwa baceba amazwi enkohliso bemelene labachumileyo emhlabeni.

35:21  Kanti bangikhamisela kakhulu umlomo wabo bathi: Aha, aha, ilihlo lethu likubonile!

35:22  Nkosi, usukubonile; ungathuli. Nkosi, ungabi khatshana lami.

35:23  Zivuse, uvukele ilungelo lami, udaba lwami, Nkulunkulu wami leNkosi yami.

35:24  Ngahlulela, Nkosi Nkulunkulu wami, ngokulunga kwakho; kabangathokozi ngami.

35:25  Kabangatsho enhliziyweni yabo ukuthi: Hiya, yisifiso sethu! Bangatsho ukuthi: Simginyile.

35:26  Kabayangeke babe lenhloni ndawonye abajabula ngosizi lwami; bembathiswe ngenhloni lehlazo labo abazikhukhumeza ngami.

35:27  Kabamemeze ngenjabulo bathabe abaloyisa ukulunga kwami, yebo kabatsho njalonjaloukuthi: Kayikhuliswe iNkosi ethokoza ngokuhlala kuhle kwenceku yayo.

35:28  Lolimi lwami luzakhuluma ukulunga kwakho, usuku lonke indumiso yakho.

Chapter 36

36:1  Kulenkulumo yesiphambeko kokhohlakeleyo; ngaphakathi kwenhliziyo yami ngathi: Kakukho ukwesaba uNkulunkulu phambi kwamehlo akhe.

36:2  Ngoba uyazikhohlisa emehlweni akhe, ububi bakhe buze butholakale buzondeka.

36:3  Amazwi omlomo wakhe ayibubi lenkohliso; uyekele inhlakanipho ukwenza okuhle.

36:4  Uceba okubi embhedeni wakhe, azimise endleleni engalunganga, kakwali okubi.

36:5  Nkosi, umusa wakho usemazulwini, uthembeko lwakho luze lufike emayezini.

36:6  Ukulunga kwakho kunjengezintaba zikaNkulunkulu, izahlulelo zakho ziyinziki enkulu; uyalondoloza umuntu lenyamazana, Nkosi.

36:7  Luligugu kangakanani uthandolomusa wakho, Nkulunkulu! Ngakho abantwana babantu baphephela emthunzini wempiko zakho.

36:8  Bazasutha kakhulu ngamanono endlu yakho, ubanathise okomfula wentokozo yakho.

36:9  Ngoba ukuwe umthombo wempilo; ekukhanyeni kwakho sizabona ukukhanya.

36:10  Luqhubele phambili uthandolomusa wakho kulabo abakwaziyo, lokulunga kwakho kubo abaqotho enhliziyweni.

36:11  Unyawo lwabazigqajayo lungezi kimi, lesandla sababi singangixotshi.

36:12  Nampo abenzi bobubi sebewile, bawiselwe phansi, kabalakuvuka.

Chapter 37

37:1  Ungazikhathazi ngababi, ungabi lomhawu ngabenzi bobubi.

37:2  Ngoba bazaqunywa masinyane njengotshani, babune njengohlaza.

37:3  Themba eNkosini, wenze okuhle, uhlale elizweni, uzondle ngothembeko.

37:4  Zithokozise eNkosini, njalo izakunika iziloyiso zenhliziyo yakho.

37:5  Nikela indlela yakho eNkosini, uthembe kuyo; yona izakwenza.

37:6  Izaveza ukulunga kwakho njengokukhanya, lelungelo lakho njengemini enkulu.

37:7  Thula eNkosini, uyilindele; ungazikhathazi ngophumelelayo ngendlela yakhe, ngomuntu owenza amacebo amabi.

37:8  Yekela intukuthelo, utshiye ulaka; ungazikhathazi langokwenza okubi.

37:9  Ngoba ababi bazaqunywa, kodwa labo abalindele iNkosi bona bazakudla ilifa lelizwe.

37:10  Kuseyisikhatshana nje, omubi angabe esaba khona; loba uhlola indawo yakhe uyabe engasekho.

37:11  Kodwa abamnene bazakudla ilifa lelizwe, bazithokozise ngobunengi bokuthula.

37:12  Omubi uyaceba emelene lolungileyo, amgedlele amazinyo akhe.

37:13  INkosi izamhleka, ngoba iyabona ukuthi usuku lwakhe luyeza.

37:14  Ababi sebehwatshe inkemba, bagobise idandili labo, ukumlahla phansi umyanga loswelayo, ukubulala abaqotho ngendlela.

37:15  Inkemba yabo izangena kweyabo inhliziyo, kwephulwe amadandili abo.

37:16  Okuncinyane alakho olungileyo kungcono kulenotho yababi abanengi.

37:17  Ngoba ingalo zababi zizakwephulwa, kodwa iNkosi iyabasekela abalungileyo.

37:18  INkosi iyazazi izinsuku zabaqotho, lelifa labo lizakuba sephakadeni.

37:19  Kabayikuyangeka ngesikhathi esibi, langensuku zendlala bazasutha.

37:20  Kodwa ababi bazabhubha; lezitha zeNkosi zizanyamalala njengamafutha amawundlu, zinyamalale entuthwini.

37:21  Omubi uyeboleka, angabuyiseli, kodwa olungileyo uyahawukela, aphe.

37:22  Ngoba ababusiswe yiyo bazakudla ilifa lelizwe, kodwa abaqalekiswe yiyo bazaqunywa.

37:23  Izinyathelo zomuntu olungileyo ziqondiswa yiNkosi, iyathokoza endleleni yakhe.

37:24  Loba esiwa, kayikulahlwa phansi, ngoba iNkosi isekela isandla sakhe.

37:25  Ngangimutsha, sengimdala, kanti kangibonanga olungileyo etshiyiwe, lenzalo yakhe idinga ukudla.

37:26  Usuku lonke ulomusa, uyeboleka, lenzalo yakhe iyisibusiso.

37:27  Suka ebubini, wenze okuhle; uhlale kuze kube nininini.

37:28  Ngoba iNkosi ithanda isahlulelo, kayiyikubatshiya abangcwele bayo. Bazalondolozwa kuze kube nininini; kodwa inzalo yababi izaqunywa.

37:29  Abalungileyo bazakudla ilifa lelizwe, bahlale kulo kuze kube nininini.

37:30  Umlomo wolungileyo ukhuluma inhlakanipho, lolimi lwakhe lukhuluma isahlulelo.

37:31  Umlayo kaNkulunkulu wakhe usenhliziyweni yakhe; izinyathelo zakhe kazitsheleli.

37:32  Omubi uyamqaphela olungileyo, udinga ukumbulala.

37:33  INkosi kayiyikumyekela esandleni sakhe, kayiyikumlahla lapho esahlulelwa.

37:34  Lindela eNkosini, ugcine indlela yayo, izakuphakamisa ukuthi udle ilifa lelizwe; uzabona lapho ababi bequnywa.

37:35  Ngambona omubi elamandla amakhulu, eziqhelisa njengesihlahla semvelo esiluhlaza.

37:36  Kube kanti wedlula, khangela-ke, wayengasekho; yebo ngamdinga, kodwa katholakalanga.

37:37  Nanzelela opheleleyo, umbone oqotho, ngoba ukuphela kwalowomuntu kuyikuthula.

37:38  Kodwa abaphambukayo bazabhujiswa kanyekanye; ukuphela kwababi kuzaqunywa.

37:39  Kodwa usindiso lwabalungileyo luvela eNkosini, inqaba yabo esikhathini sokuhlupheka.

37:40  Njalo iNkosi izabasiza ibakhulule; izabakhulula kwababi, ibasindise, ngoba baphephela kuyo.

Chapter 38

38:1  Nkosi, ungangikhuzi entukuthelweni yakho, ungangijezisi ekuvutheni kolaka lwakho.

38:2  Ngoba imitshoko yakho ihlabe yatshona kimi, lesandla sakho sehle nzima phezu kwami.

38:3  Kakukho ukuphila enyameni yami ngenxa yentukuthelo yakho; kakukho ukuthula emathanjeni ami ngenxa yesono sami.

38:4  Ngoba iziphambeko zami zedlule phezu kwekhanda lami, njengomthwalo onzima zinzima kakhulu kimi.

38:5  Izilonda zami zilevumba zilobomvu ngenxa yobuthutha bami.

38:6  Ngigungubele, ngagotshiselwa phansi kakhulu, usuku lonke ngihamba ngikwezimnyama.

38:7  Ngoba ukhalo lwami lugcwele okutshileyo, njalo kakukho ukuphila enyameni yami.

38:8  Ngibuthakathaka ngichobozekile kakhulukazi, ngiyabhonga ngenxa yokububula kwenhliziyo yami.

38:9  Nkosi, sonke isiloyiso sami siphambi kwakho, lokububula kwami kakufihlakalanga kuwe.

38:10  Inhliziyo yami iyatshaya, amandla ami angitshiyile; lokukhanya kwamehlo ami lakho kakukho kimi.

38:11  Abangithandayo labangane bami bema ummango lenhlupheko yami, labakwethu bema khatshana lami.

38:12  Labo abadinga impilo yami bayangithiya, labo abadinga ukoniwa kwami bakhuluma izincithakalo, bezindla inkohliso usuku lonke.

38:13  Kodwa mina nginjengesacuthe, kangizwa, lanjengesimungulu, esingavuli umlomo waso.

38:14  Yebo, nginjengomuntu ongezwayo, okungekho ukuphikisa emlonyeni wakhe.

38:15  Ngoba kuwe, Nkosi, ngiyathemba; wena uzaphendula, Nkosi Nkulunkulu wami.

38:16  Ngoba ngathi: Hlezi bathokoze ngami, lapho unyawo lwami lutshelela, bazikhukhumeze bemelene lami.

38:17  Ngoba sengiseduze lokuwa, lobuhlungu bami buphambi kwami njalonjalo.

38:18  Ngoba ngizakwazisa ububi bami, ngizakhathazeka ngesono sami.

38:19  Kodwa izitha zami ziphilile zilamandla, labangizonda ngeze sebandile.

38:20  Abaphindisela okubi esikhundleni sokuhle bayizitha zami, ngoba nginxwanela okulungileyo.

38:21  Ungangitshiyi, Nkosi; Nkulunkulu wami, ungabi khatshana lami.

38:22  Phangisa ungisize, Nkosi, nsindiso yami.

Chapter 39

39:1  Ngathi: Ngizaqaphelisa izindlela zami, ukuze ngingoni ngolimi lwami; ngizagcina umlomo wami ngetomu, omubi esesekhona phambi kwami.

39:2  Ngaba yisimungulu ngokuthula; ngathula kokuhle; lokuhlupheka kwami kwavuswa.

39:3  Inhliziyo yami yatshisa phakathi kwami, ngisacabanga umlilo wavutha; ngakhuluma ngolimi lwami,

39:4  ngathi: Nkosi, ngazisa isiphetho sami lesilinganiso sensuku zami ukuthi siyini, ukuze ngazi ukuthi ngiyedlula kangakanani.

39:5  Khangela, wenze insuku zami zaba yibubanzi besandla, lobudala bami bunjengento engesilutho phambi kwakho; isibili ngulowo lalowomuntu ekumeni kwakhe uyize nje. Sela*.

39:6  Isibili, umuntu uhambahamba esesithunzini; isibili, bayakhathazeka ngeze; uyabuthelela, kodwa kazi ukuthi ngubani ozakubutha.

39:7  Pho-ke, ngilindeleni, Nkosi? Ithemba lami likuwe.

39:8  Ngikhulula kuzo zonke iziphambeko zami. Ungangenzi ihlazo lesithutha.

39:9  Ngaba yisimungulu, kangivulanga umlomo wami, ngoba wakwenza wena.

39:10  Susa uswazi lwakho kimi, ngoba ngiyaqedwa yisidutshulo sesandla sakho.

39:11  Lapho ulaya umuntu ngokukhuza ngenxa yesiphambeko, wenza ubuhle bakhe buncibilike njengenundu; isibili ngulowo lalowomuntu uyize. Sela*.

39:12  Zwana umkhuleko wami, Nkosi, ubeke indlebe ekukhaleni kwami; ungathuleli izinyembezi zami, ngoba ngingowemzini kuwe, ohlala njengowezizwe, njengabo bonke obaba.

39:13  Ungangihwaqeli ukuze ngihlumelele, ngingakasuki, ngingabe ngisaba khona.

Chapter 40

40:1  Ngalindela lokuyilindela iNkosi; yangithobela, yezwa ukukhala kwami.

40:2  Yangenyula emgodini ohlokomayo, exhaphozini lodaka, yabeka inyawo zami phezu kwedwala, yaqinisa izinyathelo zami.

40:3  Yafaka ingoma entsha emlonyeni wami, indumiso kuNkulunkulu wethu. Abanengi bazabona besabe, bathembe eNkosini.

40:4  Ubusisiwe umuntu oyenzayo iNkosi ibe lithemba lakhe, ongaphendukeli kwabazigqajayo, lalabo abaphendukela emangeni.

40:5  Minengi wena oyenzileyo, Nkosi, Nkulunkulu wami, imisebenzi yakho emangalisayo lemicabango yakho kithi; ingelandiswe ngokulandelana kuwe. Ngingayilandisa ngiyitsho, minengi kulokuthi ibalwe.

40:6  Umhlatshelo lomnikelo kawukufisi; izindlebe zami uzivulile; umnikelo wokutshiswa lomnikelo wesono kawuwubizi.

40:7  Ngasengisithi: Khangela, ngiyeza; emqulwini wogwalo kulotshiwe ngami.

40:8  Ngiyathokoza ukwenza intando yakho, Nkulunkulu wami, lomlayo wakho uphakathi kwemibilini yami.

40:9  Ngitshumayele ukulunga ebandleni elikhulu; khangela, kangibambanga indebe zami, Nkosi, wena uyakwazi.

40:10  Ukulunga kwakho kangikufihlanga phakathi kwenhliziyo yami; ngikhulumile ngobuqotho bakho langosindiso lwakho; kangifihlanga uthandolomusa wakho leqiniso lakho ebandleni elikhulu.

40:11  Wena Nkosi, ungangigodleli isihawu sakho; uthandolomusa wakho leqiniso lakho kakungilondoloze njalonjalo.

40:12  Ngoba ububi obungebalwe bungihanqile, iziphambeko zami zingibambile, ukuze ngingabi lakho ukubona; zinengi okwedlula inwele zekhanda lami; ngakho inhliziyo yami ingitshiyile.

40:13  Thokoza, Nkosi, ukungikhulula. Nkosi, phangisa ukungisiza.

40:14  Kabayangeke babe lenhloni ndawonye abadinga umphefumulo wami ukuwuchitha; kababuyiselwe emuva bayangiswe abangifisela okubi.

40:15  Kabachitheke kube ngumvuzo wehlazo labo abathi kimi: Aha, aha!

40:16  Kabathabe bajabule kuwe bonke abakudingayo; abathanda usindiso lwakho kabatsho njalonjalo bathi: Kayikhuliswe iNkosi!

40:17  Kodwa ngingumyanga ngiyaswela; iNkosi iyangikhumbula; ungumsizi wami lomkhululi wami; Nkulunkulu wami, ungalibali.

Chapter 41

41:1  Ubusisiwe onanzelela obuthakathaka. INkosi izamkhulula ngosuku lobubi.

41:2  INkosi izamlondoloza, imgcine ephila; uzabusiswa emhlabeni; kawuyikumnikela entandweni yezitha zakhe.

41:3  INkosi izamsekela embhedeni wokugula kwakhe; wena uzaguqula lonke icansi lakhe emkhuhlaneni wakhe.

41:4  Mina ngathi: Nkosi, woba lomusa kimi, silisa umphefumulo wami, ngoba ngonile kuwe.

41:5  Izitha zami zikhuluma okubi ngami zisithi: Uzakufa nini, lebizo lakhe lichitheke?

41:6  Lalapho efika ukungibona, ukhuluma inkohliso; inhliziyo yakhe izibuthela okubi, esephumile phandle akhulume.

41:7  Bonke abangizondayo banyenyezelana bemelene lami, bangisongele ukungona.

41:8  Into embi inamathele kuye; njalo njengoba elele phansi kasayikuvuka.

41:9  Yebo, indoda yobungane bami engiyithembayo, ebikade isidla isinkwa sami, ingiphakamisele isithende imelene lami.

41:10  Kodwa, wena Nkosi, woba lomusa kimi, ungilulamise ukuze ngibaphindisele.

41:11  Ngalokhu ngiyazi ukuthi uyangithanda, ngoba isitha sami kasithabanga phezu kwami.

41:12  Kodwa mina, ungisekele ebuqothweni bami, wangimisa phambi kwakho kuze kube nininini.

41:13  Kayibongwe iNkosi, uNkulunkulu kaIsrayeli, kusukela phakade kuze kube phakade. Ameni, loAmeni.

Chapter 42

42:1  Njengalokhu indluzele inxwanele izifula zamanzi, ngokunjalo umphefumulo wami unxwanela wena, Nkulunkulu.

42:2  Umphefumulo wami womela uNkulunkulu, uNkulunkulu ophilayo. Ngizafika nini ngibonakale phambi kobuso bukaNkulunkulu?

42:3  Inyembezi zami beziyikudla kwami emini lebusuku, lapho besithi kimi usuku lonke: Ungaphi uNkulunkulu wakho?

42:4  Ngikhumbula lezizinto ngathulula umphefumulo wami phakathi kwami, ngoba ngadlula lexuku, ngaya labo endlini kaNkulunkulu ngelizwi lentokozo lendumiso, ixuku eligubha umkhosi.

42:5  Udanelani mphefumulo wami? Ukhathazekelani phakathi kwami? Themba kuNkulunkulu, ngoba ngisezamdumisa, ngosizo lobuso bakhe.

42:6  Nkulunkulu wami, umphefumulo wami udanile phakathi kwami; ngakho ngizakukhumbula ngiselizweni leJordani lelamaHermoni, ngisentabeni iMizari.

42:7  Inziki ibiza inziki ekuhlokomeni kwezimpophoma zakho; wonke amagagasi akho lamaza akho adlule phezu kwami.

42:8  Emini iNkosi izalaya uthandolomusa wayo, lebusuku ingoma yayo izakuba lami; umkhuleko wami kuNkulunkulu wempilo yami.

42:9  Ngizakuthi kuNkulunkulu, idwala lami: Ungikhohlweleni? Ngihambelani ngikwezimnyama ngenxa yocindezelo lwesitha?

42:10  Njengokuchoboza emathanjeni ami, izitha zami ziyangiklolodela, lapho zisithi kimi usuku lonke: Ungaphi uNkulunkulu wakho?

42:11  Udaneleni mphefumulo wami? Njalo ukhathazekelani phakathi kwami? Themba kuNkulunkulu, ngoba ngisezamdumisa, usindiso lobuso bami, loNkulunkulu wami.

Chapter 43

43:1  Ngahlulela, Nkulunkulu, umele udaba lwami esizweni esingesabi uNkulunkulu; ungikhulule emuntwini wenkohliso longalunganga.

43:2  Ngoba wena unguNkulunkulu wesiphephelo sami; ungilahleleni? Ngihambelani ngikwezimnyama ngenxa yocindezelo lwesitha?

43:3  Thumela ukukhanya kwakho leqiniso lakho, kungikhokhele, kungise entabeni yakho engcwele lemathabhanekeleni akho.

43:4  Khona ngizakuya elathini likaNkulunkulu, kuNkulunkulu injabulo yentokozo yami; yebo ngizakudumisa ngechacho, Nkulunkulu, Nkulunkulu wami.

43:5  Udanelani mphefumulo wami? Njalo ukhathazekelani phakathi kwami? Themba kuNkulunkulu, ngoba ngisezamdumisa, ukusiliswa kobuso bami, loNkulunkulu wami.

Chapter 44

44:1  Nkulunkulu, sizwile ngendlebe zethu, obaba basitshelile, umsebenzi owawenza ensukwini zabo, ensukwini zendulo.

44:2  Wena ngesandla sakho wazixotsha izizwe elifeni, wabahlanyela bona; wazihlupha izizwe, kodwa wabasabalalisa bona.

44:3  Ngoba kabadlanga ilifa lelizwe ngenkemba yabo, lengalo yabo kayibasindisanga, kodwa isandla sakho sokunene, lengalo yakho, lokukhanya kobuso bakho, ngoba wawubathanda.

44:4  Wena uyiNkosi yami, Nkulunkulu; laya ukukhululwa kukaJakobe.

44:5  Ngawe sizadudula izitha zethu; ngebizo lakho sizabanyathelela phansi abasivukelayo.

44:6  Ngoba kangithembeli kulo idandili lami, lenkemba yami kayiyikungisindisa.

44:7  Kodwa usisindisile ezitheni zethu, wayangisa abasizondayo.

44:8  KuNkulunkulu siyazincoma usuku lonke; lebizo lakho sizalidumisa kuze kube nininini. Sela*.

44:9  Kodwa ulahlile wasiyangisa, njalo kawuphumi lamabutho ethu.

44:10  Usenze ukuthi sibuyele emuva sisuka esitheni; labasizondayo baziphangela.

44:11  Usinikele njengezimvu zokudliwa, wasichithachitha phakathi kwezizwe.

44:12  Uthengisile abantu bakho ngokungelanotho, awuzuzanga lutho ngentengo yabo.

44:13  Usenze saba lihlazo kwabakhelene lathi, inhlekisa lendumazo kwabasiphahlileyo.

44:14  Usenze saba yisiga phakathi kwezizwe, ukunikinwa kwekhanda phakathi kwabantu.

44:15  Usuku lonke ukudunyazwa kwami kuphambi kwami, lehlazo lobuso bami lingigubuzele,

44:16  ngenxa yelizwi lomgconi lomhlambazi, ngenxa yesitha lomphindiseli.

44:17  Konke lokhu kusehlele, kube kanti kasikukhohlwanga, kasenzanga ngenkohliso esivumelwaneni sakho.

44:18  Inhliziyo yethu kayibuyelanga emuva, lezinyathelo zethu kaziphambukanga emkhondweni wakho,

44:19  lanxa usichobozile endaweni yamaganyana, usembese ngethunzi lokufa.

44:20  Uba besilikhohliwe ibizo likaNkulunkulu wethu, loba selulela izandla zethu kunkulunkulu wezizweni,

44:21  uNkulunkulu ubengayikukuhlola lokhu yini? Ngoba uyayazi imfihlo yenhliziyo.

44:22  Yebo, ngenxa yakho siyabulawa usuku lonke, kuthiwa sinjengezimvu zokuhlatshwa.

44:23  Phaphama, ulaleleni, Nkosi? Vuka, ungalahli kokuphela.

44:24  Ufihlelani ubuso bakho, ukhohlwe ukuhlupheka kwethu locindezelo lwethu?

44:25  Ngoba umphefumulo wethu ukhothamele othulini, isisu sethu sinamathela emhlabathini.

44:26  Sukumela usizo lwethu, usihlenge ngenxa yomusa wakho.

Chapter 45

45:1  Inhliziyo yami iphuphuma ngendaba enhle; ngikhuluma ngezinto engizenzele inkosi; ulimi lwami lulusiba lombhali ophangisayo.

45:2  Umuhle kulabantwana babantu; umusa uthululwe endebeni zakho; ngenxa yalokho uNkulunkulu ukubusisile kuze kube phakade.

45:3  Bhinca inkemba yakho emlenzeni, qhawe, udumo lwakho lobukhosi bakho.

45:4  Lebukhosini bakho gada uphumulele, ngenxa yeqiniso lobumnene bokulunga; lesandla sakho sokunene sikufundise izinto ezesabekayo.

45:5  Imitshoko yakho ibukhali enhliziyweni yezitha zenkosi; izizwe zizakuwa ngaphansi kwakho.

45:6  Isihlalo sakho sobukhosi, Nkulunkulu, ngesaphakade laphakade; intonga yakho yobukhosi iyintonga yobuqotho.

45:7  Uthanda ukulunga, njalo uzonda ububi; ngenxa yalokho uNkulunkulu, uNkulunkulu wakho, ukugcobile ngamafutha entokozo ngaphezu kwabanakwenu.

45:8  Izembatho zakho zonke ziqholiwe ngemure* lenhlaba lekhasiya*; ezigodlweni zempondo zendlovu abakwenze wathokoza ngazo.

45:9  Amadodakazi amakhosi aphakathi kwabesifazana bakho abadumileyo; indlovukazi imi esandleni sokunene sakho yembethe igolide leOfiri.

45:10  Zwana, ndodakazi, unakane, ubeke indlebe yakho; ukhohlwe abantu bakini lendlu kayihlo;

45:11  khona inkosi izalangatha ubuhle bakho; ngoba iyinkosi yakho, njalo khothama kuyo.

45:12  Lendodakazi yeTire ilesipho, labanothileyo ebantwini, bazancenga ubuso bakho.

45:13  Indodakazi yenkosi iyakhazimula yonke ngaphakathi, isembatho sayo singesegolide elelukiweyo.

45:14  Izalethwa enkosini yembethe isembatho esifekethisiweyo; izintombi eziyilandelayo, abangane bayo, zizalethwa kuwe.

45:15  Zizalethwa ngokuthaba lenjabulo, zizangena esigodlweni senkosi.

45:16  Esikhundleni saboyihlo kuzakuba ngamadodana akho, uzawabeka abe yiziphathamandla emhlabeni wonke.

45:17  Ibizo lakho ngizalenza likhunjulwe ezizukulwaneni zonke; ngenxa yalokho izizwe zizakudumisa kuze kube nini lanini.

Chapter 46

46:1  UNkulunkulu uyisiphephelo sethu lamandla ethu, uyatholwa elusizo kakhulu ekuhluphekeni.

46:2  Ngenxa yalokhu kasiyikwesaba ekuguqukeni komhlaba, lanxa izintaba zidilikela phakathi kwenlwandle.

46:3  Amanzi alo kawahlokome, akhaphazele, izintaba zizamazame ngokukhukhumala kwalo. Sela*.

46:4  Kulomfula, izifula zawo zithokozisa umuzi kaNkulunkulu, indawo engcwele yamathabhanekele oPhezukonke.

46:5  UNkulunkulu uphakathi kwawo, kawuyikunyikinywa; uNkulunkulu uzawusiza ngovivi lokusa.

46:6  Izizwe ziyaxokozela, imibuso izamazame; wakhupha ilizwi lakhe, umhlaba wancibilika.

46:7  INkosi yamabandla ilathi, uNkulunkulu kaJakobe uyinqaba yethu. Sela*.

46:8  Wozani libone imisebenzi yeNkosi, incithakalo eyenzileyo emhlabeni.

46:9  Yenza izimpi ziphele kuze kube semkhawulweni womhlaba; yephula idandili, iqumaqume umkhonto, itshise izinqola emlilweni.

46:10  Thulani, lazi ukuthi mina nginguNkulunkulu, ngizaphakanyiswa phakathi kwezizwe, ngiphakanyiswe emhlabeni.

46:11  INkosi yamabandla ilathi, uNkulunkulu kaJakobe uyinqaba yethu. Sela*.

Chapter 47

47:1  Tshayani isandla, zizwe zonke, hlokomani kuNkulunkulu ngelizwi lentokozo.

47:2  Ngoba iNkosi, oPhezukonke, iyesabeka, yiNkosi enkulu phezu komhlaba wonke.

47:3  Izakwehlisela abantu ngaphansi kwethu, lezizwe ngaphansi kwenyawo zethu.

47:4  Izasikhethela ilifa lethu, udumo lukaJakobe emthandayo. Sela*.

47:5  UNkulunkulu wenyukile ngokuhlokoma, iNkosi ngokukhala kophondo.

47:6  Hlabelani indumiso kuNkulunkulu, hlabelelani indumiso. Hlabelani indumiso eNkosini yethu, hlabelelani indumiso.

47:7  Ngoba uNkulunkulu uyiNkosi yomhlaba wonke; hlabelelani indumiso ngokuqedisisa.

47:8  UNkulunkulu uyabusa phezu kwezizwe; uNkulunkulu uhlezi esihlalweni sobukhosi sobungcwele bakhe.

47:9  Iziphathamandla zabantu zibuthene ndawonye, abantu bakaNkulunkulu kaAbrahama. Ngoba izihlangu zomhlaba zingezikaNkulunkulu; uphakeme kakhulu.

Chapter 48

48:1  Yinkulu iNkosi, ingeyokudunyiswa kakhulu emzini kaNkulunkulu wethu, intaba yobungcwele bayo.

48:2  Yinhle ngokuphakama, yintokozo emhlabeni wonke intaba yeZiyoni, enhlangothini zenyakatho, umuzi weNkosi enkulu.

48:3  Ezigodlweni zawo uNkulunkulu uyaziwa ukuthi uyinqaba.

48:4  Ngoba, khangela, amakhosi abuthana, adlula kanyekanye.

48:5  Wona awubona, ngokunjalo amangala, atshaywa luvalo, aphaphatheka.

48:6  Ukuthuthumela kwawabamba lapho, umhelo njengowesifazana obelethayo.

48:7  Ngomoya wempumalanga uphahlaza imikhumbi yeTarshishi.

48:8  Njengesikuzwileyo ngokunjalo sikubonile emzini weNkosi yamabandla, emzini kaNkulunkulu wethu; uNkulunkulu uzawumisa kuze kube nininini. Sela*.

48:9  Sizindle ngothandolomusa wakho, Nkulunkulu, phakathi kwethempeli lakho.

48:10  Njengalo ibizo lakho, Nkulunkulu, injalo indumiso yakho kuze kube semikhawulweni yomhlaba; isandla sakho sokunene sigcwele ukulunga.

48:11  Kayithokoze intaba yeZiyoni, amadodakazi akoJuda athabe, ngenxa yezahlulelo zakho.

48:12  Ibhodeni iZiyoni, liyizingeleze, libale imiphotshongo yayo,

48:13  liqaphelise umthangala wayo, lidabule lihlole izigodlo zayo, ukuze lilandisele isizukulwana esilandelayo.

48:14  Ngoba lo uNkulunkulu unguNkulunkulu wethu kuze kube nini lanini; yena uzasikhokhela kuze kube sekufeni.

Chapter 49

49:1  Zwanini lokhu lonke bantu. Bekani indlebe lonke bakhileyo bomhlaba,

49:2  bonke abantukazana labaphakemeyo, abanothileyo labayanga, ndawonye.

49:3  Umlomo wami uzakhuluma izinhlakanipho, lokuzindla kwenhliziyo yami kuzakuba yikuqedisisa.

49:4  Ngizabeka indlebe yami kuso isaga, ngizavula ilibho lami ngechacho.

49:5  Ngizakwesabelani ensukwini zobubi, nxa ububi babagwenxi bami buzangihanqa.

49:6  Abathemba ingcebo yabo, abazincoma ngobunengi benotho yabo,

49:7  umuntu kasoze ahlenge lokuhlenga umfowabo, kasoze amnike uNkulunkulu inhlawulo yakhe,

49:8  (ngoba uhlengo lomphefumulo wabo luligugu, futhi luyaphela laphakade)

49:9  ukuze ahlale ephila phakade, angaboni ukubola.

49:10  Ngoba ubona ukuthi abahlakaniphileyo bayafa, lokuthi isithutha kanye lesiphukuphuku bayabhubha, batshiyele inotho yabo abanye.

49:11  Umcabango wabo wangaphakathi uyikuthi izindlu zabo zizakuba ngezaphakade, izindawo zabo zokuhlala zibe ngezezizukulwana, babize amazwe ngamabizo abo.

49:12  Kodwa umuntu elodumo kayikuma, uyafanana lenyamazana ezibhubhayo.

49:13  Le indlela yabo iyibuthutha babo; kube kanti ababalandelayo bathokoza ngomlomo wabo. Sela*.

49:14  Njengezimvu bamiselwe ingcwaba, ukufa kuzabelusa; labaqotho bazababusa ekuseni, isimo sabo ngesokuqedwa lingcwaba ukuze bangabi lendawo yokuhlala.

49:15  Kodwa uNkulunkulu uzahlenga umphefumulo wami emandleni engcwaba, ngoba uzangemukela. Sela*.

49:16  Ungesabi nxa umuntu enotha, nxa udumo lwendlu yakhe lusanda;

49:17  ngoba ekufeni kwakhe kayikuthatha lutho, udumo lwakhe kaluyikwehla lumlandele.

49:18  Lanxa empilweni yakhe wabusisa umphefumulo wakhe, njalo bakudumisa nxa uzenzela okuhle,

49:19  uzakuya esizukulwaneni saboyise, kabayikubona ukukhanya kuze kube phakade.

49:20  Umuntu olodumo, engaqedisisi, unjengezinyamazana ezibhubhayo.

Chapter 50

50:1  USomandla, uNkulunkulu, iNkosi, ukhulumile, ubiza umhlaba kusukela ekuphumeni kwelanga kuze kube sekutshoneni kwalo.

50:2  EseZiyoni, ukuphelela kobuhle, uNkulunkulu ukhanyile.

50:3  UNkulunkulu wethu uzakuza, kayikuthula; umlilo phambi kwakhe uzaqothula, enhlangothini zonke zakhe kuzakuba lesiphepho esikhulu.

50:4  Uzabiza amazulu ephezulu, lomhlaba, ukwahlulela abantu bakhe.

50:5  Buthelani kimi abangcwele bami, abenza isivumelwano lami ngomhlatshelo.

50:6  Lamazulu azatshumayela ukulunga kwakhe, ngoba uNkulunkulu ngokwakhe ungumahluleli. Sela*.

50:7  Zwanini bantu bami, ngizakhuluma; Israyeli, ngizafakaza ngimelene lawe. NginguNkulunkulu, uNkulunkulu wakho.

50:8  Kangikusoli ngenxa yemihlatshelo yakho; leminikelo yakho yokutshiswa ihlala iphambi kwami.

50:9  Kangiyikuthatha ijongosi elivela emzini wakho, lezimpongo ezivela ezibayeni zakho.

50:10  Ngoba ngeyami yonke inyamazana yehlathi, izinkomo ezisentabeni eziyizinkulungwane.

50:11  Ngiyazazi izinyoni zonke zezintaba, lezilo zommango zikimi.

50:12  Uba bengilambile, bengingayikukutshela, ngoba umhlaba ngowami lokugcwala kwawo.

50:13  Ngizayidla yini inyama yezinkunzi, kumbe nginathe igazi lezimpongo?

50:14  Nikela kuNkulunkulu umhlatshelo wokubonga, ukhokhe izithembiso zakho koPhezukonke.

50:15  Ungibize osukwini lokuhlupheka, ngizakukhulula, ubusungidumisa.

50:16  Kodwa komubi uNkulunkulu uthi: Ulani lokuthi utshumayele izimiso zami, kumbe uthathe isivumelwano sami emlonyeni wakho?

50:17  Ngoba wena uzonda ukuqondiswa, ulahla amazwi ami emva kwakho.

50:18  Uba ubona isela, uthokozelana lalo, lesabelo sakho sisezifebeni.

50:19  Umlomo wakho uyawunikela ebubini, lolimi lwakho luqambe inkohliso.

50:20  Uhlala ukhulume umelene lomfowenu, uhlebe indodana kanyoko.

50:21  Lezizinto uzenzile, ngathula; wacabanga ukuthi nginjengawe kanye. Ngizakukhuza, ngikuhlele phambi kwamehlo akho.

50:22  Kuqapheleni-ke lokhu, lina elikhohlwa uNkulunkulu, hlezi ngilidabule, kungabi khona okukhululayo.

50:23  Onikela umnikelo wokubonga uyangidumisa; lolungisa indlela yakhe ngizambonisa usindiso lukaNkulunkulu.

Chapter 51

51:1  Ngihawukela, Nkulunkulu, ngokothandolomusa wakho; ngobunengi besihawu sakho yesula iziphambeko zami.

51:2  Ungigezisise ebubini bami, ungihlambulule esonweni sami.

51:3  Ngoba mina ngiyazivuma iziphambeko zami, lesono sami sihlezi siphambi kwami.

51:4  Ngonile kuwe, kuwe wedwa, ngenze okubi emehlweni akho, ukuze kuthiwe ulungile ekukhulumeni kwakho, uhlanzeke ekwahluleleni kwakho.

51:5  Khangela, ngazalelwa ebubini, lomama wangomulela esonweni.

51:6  Khangela, uthanda iqiniso endaweni ezingaphakathi; lekusithekeni ungenza ngazi inhlakanipho.

51:7  Ngihlanze ngehisope*, ngizahlambuluka; ngigezisa, ngizakuba mhlophe kuleliqhwa elikhithikileyo.

51:8  Ngizwise intokozo lenjabulo, ukuze athabe amathamboowachobozileyo.

51:9  Fihla ubuso bakho ezonweni zami, wesule zonke iziphambeko zami.

51:10  Nkulunkulu, dala kimi inhliziyo ehlambulukileyo, njalo uvuselele umoya oqinileyo phakathi kwami.

51:11  Ungangilahli ebusweni bakho, njalo ungasusi umoya wakho ongcwele kimi.

51:12  Buyisela kimi intokozo yosindiso lwakho, ungisekele ngomoya ovumayo.

51:13  Khona ngizafundisa abaphambukayo indlela zakho, lezoni zizaphendukela kuwe.

51:14  Ngikhulula ecaleni legazi, Nkulunkulu, Nkulunkulu wosindiso lwami, ulimi lwami luzahlabelela kakhulu ngokulunga kwakho.

51:15  Nkosi, vula indebe zami, lomlomo wami uzamemezela indumiso yakho.

51:16  Ngoba kawuthandi umhlatshelo, ngoba bengizawunika; kawuthokozi ngomnikelo wokutshiswa.

51:17  Imihlatshelo kaNkulunkulu ingumoya odabukileyo; inhliziyo edabukileyo leyephukileyo, Nkulunkulu, kawuyikuyidelela.

51:18  Yenzele iZiyoni okuhle ngokuthanda kwakho; uyakhe imiduli yeJerusalema.

51:19  Khona uzajabulela iminikelo yokulunga, umnikelo wokutshiswa, lomnikelo wonke; khona bezanikela amajongosi phezu kwelathi lakho.

Chapter 52

52:1  Uzincomelani ngokubi, qhawe? Umusa kaNkulunkulu ukulo lonke usuku.

52:2  Ulimi lwakho luceba konke ukuganga, njengensingo ebukhali, lwenza inkohliso.

52:3  Uthanda okubi kulokuhle; amanga kulokukhuluma iqiniso. Sela*.

52:4  Uthanda wonke amazwi okuginya, limi lwenkohliso.

52:5  UNkulunkulu laye uzakubhidliza phakade, akususe, akuhluthune ethenteni, akusiphune elizweni labaphilayo. Sela*.

52:6  Abalungileyo bazakubona besabe, bazamhleka, besithi:

52:7  Khangelani, umuntu ongamenzanga uNkulunkulu abe yinqaba yakhe, kodwa wathembela ebunengini benotho yakhe, eqinile ekugangeni kwakhe.

52:8  Kodwa nginjengesihlahla somhlwathi esiluhlaza endlini kaNkulunkulu. Ngiyathemba emuseni kaNkulunkulu phakade laphakade.

52:9  Ngizakudumisa kuze kube phakade ngoba ukwenzile. Ngizalindela ibizo lakho, ngoba lihle phambi kwabangcwele bakho.

Chapter 53

53:1  Isithutha sithi enhliziyweni yaso: KakulaNkulunkulu. Bonakele, benza ububi obunengekayo; kakho owenza okuhle.

53:2  UNkulunkulu wakhangela phansi esemazulwini phezu kwabantwana babantu, ukubona ukuthi ukhona yini oqedisisayo, odinga uNkulunkulu.

53:3  Bonke ngamunye wabo babuyele emuva, bonke bonakele; kakho owenza okuhle, kakho loyedwa.

53:4  Kabazi yini bonke abenzi bobubi, abadla abantu bami njengoba besidla isinkwa? Kababizi uNkulunkulu.

53:5  Lapho besaba lokwesaba, kungekho okwesabekayo. Ngoba uNkulunkulu uchithachithe amathambo akhe omisa inkamba emelane lawe; ubayangisile, ngoba uNkulunkulu ubadelile.

53:6  Kungathi insindiso zikaIsrayeli zingavela eZiyoni! Lapho uNkulunkulu ebuyisa ukuthunjwa kwabantu bakhe, uJakobe uzathaba, uIsrayeli athokoze.

Chapter 54

54:1  Nkulunkulu, ngisindisa ngebizo lakho, ungahlulele ngamandla akho.

54:2  Nkulunkulu, zwana umkhuleko wami, ubeke indlebe emazwini omlomo wami.

54:3  Ngoba abemzini bangivukele, abalolunya badinga umphefumulo wami, kababekanga uNkulunkulu phambi kwabo. Sela*.

54:4  Khangela, uNkulunkulu ungumsizi wami; iNkosi ilalabo abasekela umphefumulo wami.

54:5  Izaphindisela ububi ezitheni zami. Baqume ngeqiniso lakho.

54:6  Ngizanikela umhlatshelo kuwe ngokukhululeka, ngizadumisa ibizo lakho, Nkosi, ngoba lihle.

54:7  Ngoba ungikhulule ekuhluphekeni konke, lelihlo lami libonile isiloyiso sami ezitheni zami.

Chapter 55

55:1  Beka indlebe, Nkulunkulu, emkhulekweni wami, ungazifihli ekunxuseni kwami.

55:2  Lalela kimi, ungiphendule; ngiyazulazula ekukhalazeni kwami, ngenza umsindo,

55:3  ngenxa yelizwi lesitha, ngenxa yembandezelo yomubi; ngoba bangethwesa ububi, langentukuthelo bayangizonda.

55:4  Inhliziyo yami iyafutha phakathi kwami, lezethuso zokufa ziwele phezu kwami.

55:5  Uvalo lokuthuthumela kungifikele, lokwesaba okukhulu kungigubuzele.

55:6  Ngasengisithi: Kungathi ngabe ngilempiko njengejuba! Bengizaphaphela khatshana, ngiphumule.

55:7  Khangela, bengingabalekela khatshana ngihlale enkangala. Sela*.

55:8  Bengizaphangisisa ukuphunyuka kwami, ngisuke emoyeni ovunguzayo, esiphephweni.

55:9  Sanganisa, Nkosi, yehlukanisa ulimi lwabo. Ngoba ngibone udlakela lokuxabana emzini.

55:10  Emini lebusuku bayawubhoda phezu kwemithangala yawo; njalo ububi lenkathazo kuphakathi kwawo.

55:11  Inkohlakalo iphakathi kwawo; imbandezelo lenkohliso kakusuki emgwaqweni wawo.

55:12  Ngoba kakusisitha esingiyangisayo, uba kunjalo bengizakuthwala; kakusuye ongizondayo oziphakamisa phezu kwami; uba kunjalo bengizamcatshela.

55:13  Kodwa nguwe, umuntu olingana lami, umngane wami lowejwayelene lami.

55:14  Esasicebisana ngokumnandi sonke, saya endlini kaNkulunkulu silixuku.

55:15  Ukufa kakubazume, kabehlele esihogweni bephila, ngoba ububi busemizini yabo, phakathi kwabo.

55:16  Mina ngizabiza uNkulunkulu, iNkosi ingisindise-ke.

55:17  Kusihlwa lekuseni lemini ngizakhalaza ngikhale kakhulu, ibisilizwa ilizwi lami.

55:18  Ikhululile umphefumulo wami ngokuthula empini emelene lami, ngoba babebanengi kimi.

55:19  UNkulunkulu uzakuzwa, abahluphe, ngitsho yena obehlezi endulo. Sela*. Ngoba bengelazinguquko, ngakho kabamesabi uNkulunkulu.

55:20  Welule isandla sakhe kwabaxolelene laye, wasingcolisa isivumelwano sakhe.

55:21  Umlomo wakhe wawubutshelezi kulolaza, kanti inhliziyo yakhe yimpi; amazwi akhe abuthakathaka kulamafutha, kanti azinkemba ezihwatshiweyo.

55:22  Phosela umthwalo wakho phezu kweNkosi, yona izakusekela; kayiyikuvuma lanini ukuthi olungileyo anyikinywe.

55:23  Kodwa wena, Nkulunkulu, uzabehlisela emgodini wokubhujiswa; abantu begazi lenkohliso kabayikufinyelela lengxenyeni eyodwa kwezimbili yensuku zabo. Kodwa mina ngizathemba kuwe.

Chapter 56

56:1  Woba lomusa kimi, Nkulunkulu, ngoba umuntu ufuna ukungiginya; usuku lonke esilwa uyangicindezela.

56:2  Izitha zami zifuna ukungiginya usuku lonke, ngoba zinengi ezilwa zimelene lami ngokuziphakamisa.

56:3  Mhla ngisesaba, mina ngizathemba kuwe.

56:4  KuNkulunkulu ngizadumisa ilizwi lakhe, kuNkulunkulu ngiyathemba, angiyikwesaba. Inyama ingenzani kimi?

56:5  Usuku lonke baphambanisa amazwi ami; yonke imicabango yabo imelene lami ngokubi.

56:6  Bayabuthana, bagugube, bona baqaphelise izinyathelo zami, lapho belindele umphefumulo wami.

56:7  Bazaphunyuka yini ngobubi? Ekuthukutheleni wisela phansi abantu, Nkulunkulu.

56:8  Ukuzulazula kwami ukubalile; wena faka izinyembezi zami embodleleni yakho; kazikho ogwalweni lwakho yini?

56:9  Khona izitha zami zizabuyela emuva mhla ngibizayo. Ngiyakwazi lokhu ukuthi uNkulunkulu ukimi.

56:10  KuNkulunkulu ngizadumisa ilizwi, eNkosini ngizadumisa ilizwi.

56:11  KuNkulunkulu ngiyathemba, angiyikwesaba. Umuntu angenzani kimi?

56:12  Nkulunkulu, izifungo zakho ziphezu kwami; ngizabuyisela kuwe izindumiso.

56:13  Ngoba uwukhulule umphefumulo wami ekufeni, yebo, inyawo zami ekukhubekeni, ukuze ngihambe phambi kukaNkulunkulu ekukhanyeni kwabaphilayo.

Chapter 57

57:1  Ngihawukela, Nkulunkulu, ngihawukela, ngoba umphefumulo wami uthembela kuwe; yebo, emthunzini wempiko zakho ngizaphephela, zize zedlule incithakalo.

57:2  Ngizakhala kuNkulunkulu oPhezukonke, kuNkulunkulu ongiphelelisela khona.

57:3  Uzathumela esemazulwini, angisindise, ayangise ofuna ukungiginya. Sela*. UNkulunkulu uzathumela umusa wakhe leqiniso lakhe.

57:4  Umphefumulo uphakathi kwezilwane, ngilala phakathi kwabavuthayo, amadodana abantu, omazinyo abo ayimikhonto lemitshoko, lolimi lwabo luyinkemba ebukhali.

57:5  Phakama ngaphezu kwamazulu, Nkulunkulu; ubukhosi bakho bube phezu komhlaba wonke.

57:6  Balungisele izinyathelo zami imbule; umphefumulo wami ukhotheme; bagebhe igodi phambi kwami; bawele phakathi kwalo. Sela*.

57:7  Inhliziyo yami iqinisiwe, Nkulunkulu, inhliziyo yami iqinisiwe. Ngizahlabelela ngihube indumiso.

57:8  Vuka, dumo lwami! Vuka, gubhu lwezintambo lechacho! Ngizavusa ukusa.

57:9  Ngizakudumisa phakathi kwabantu, Nkosi, ngihlabelele kuwe phakathi kwezizwe.

57:10  Ngoba umusa wakho mkhulu kuze kube semazulwini, leqiniso lakho kuze kube semayezini.

57:11  Phakama ngaphezu kwamazulu, Nkulunkulu; ubukhosi bakho bube phezu komhlaba wonke.

Chapter 58

58:1  Isibili likhuluma okulungileyo yini, babusi? Lehlulela ngokuqonda yini, madodana abantu?

58:2  Yebo, enhliziyweni lenza okubi, lilinganisa udlakela lwezandla zenu emhlabeni.

58:3  Ababi baba ngabemzini kusukela esiswini, bayaduha kusukela esizalweni, beqamba amanga.

58:4  Ubuhlungu babo bunjengobuhlungu benyoka, banjengebululu elingezwayo, elivimba indlebe yalo,

58:5  ukuze lingezwa ilizwi labalumbi abalumba amalumbo ngokuhlakanipha.

58:6  Nkulunkulu, yephula amazinyo abo emlonyeni wabo, uphohloze amazinyo emihlathi yamabhongo ezilwane, Nkosi.

58:7  Kabancibilike njengamanzi agelezayo; nxa egobisa idandili lakhe ukutshoka umtshoko wakhe, babe njengabaqunywe iziqa.

58:8  Kahambe njengomnenke oncibilikayo; njengomphunzo owesifazana, kabangaliboni ilanga.

58:9  Imbiza zenu zingakaluzwa ukhuni lwameva, uzabaphephula esiphephweni njengabaphilayo njengentukuthelweni.

58:10  Olungileyo uzathokoza lapho ebona impindiselo, uzageza inyawo zakhe egazini lomubi.

58:11  Ukuze umuntu athi: Impela ukhona umvuzo wolungileyo; impela ukhona uNkulunkulu owahlulela emhlabeni.

Chapter 59

59:1  Ngikhulula ezitheni zami, Nkulunkulu wami, ungimise ngaphezu kwabangivukelayo.

59:2  Ngikhulula kubenzi bobubi, ungisindise ebantwini abomele igazi.

59:3  Ngoba, khangela, bacathamela umphefumulo wami; abalamandla bayangihlanganyela, kungekho siphambeko sami njalo kungekho sono sami, Nkosi.

59:4  Ngaphandle kwecala bayagijima bezilungisa. Vuka, ungisize, ubone.

59:5  Wena-ke, Nkosi Nkulunkulu wamabandla, Nkulunkulu kaIsrayeli; vuka ukuze uhambele zonke izizwe, ungahawukeli lamunye wabakhohlisayo ebubini. Sela*.

59:6  Bayabuyela kusihlwa, behlaba umkhulungwane njengenja, bezingelezela umuzi.

59:7  Khangela, bempompoloza ngomlomo wabo, inkemba zisendebeni zabo, ngoba bathi: Ngubani ozwayo?

59:8  Kodwa wena, Nkosi, uzabahleka, uzaziklolodela zonke izizwe.

59:9  Ngenxa yamandla akhe ngizalindela kuwe, ngoba uNkulunkulu uyinqaba yami.

59:10  UNkulunkulu womusa wami uzangandulela; uNkulunkulu uzangenza ngibone isiloyiso sami ezitheni zami.

59:11  Ungazibulali, hlezi abantu bakithi bakhohlwe; uzizulazulise ngamandla akho, uzehlisele phansi, wena sihlangu sethu, Nkosi.

59:12  Ngesono somlomo wazo, ngelizwi lendebe zazo, kazibanjwe ekuzigqajeni kwazo, langenxa yokuhlambaza lokuqamba amanga ezikukhulumayo.

59:13  Uziqede ngokuthukuthela, uziqede zingabi khona, ukuze bazi ukuthi uNkulunkulu uyabusa koJakobe, kuze kube sekupheleni komhlaba. Sela*.

59:14  Kababuyele-ke kusihlwa behlaba umkhulungwane njengenja, bezingelezela umuzi.

59:15  Bona kabazulazulele ukudla, nxa bengasuthanga kabalale.

59:16  Kodwa mina ngizahlabelela ngamandla akho; yebo, ngizahlabelela kakhulu ekuseni ngomusa wakho; ngoba ube yinqaba yami lesiphephelo sami ngosuku lokuhlupheka kwami.

59:17  Mandla ami, ngizahlabelela kuwe, ngoba uNkulunkulu uyinqaba yami, uNkulunkulu womusa wami.

Chapter 60

60:1  Nkulunkulu, ubusilahlile, wasibhidliza, wathukuthela; buyela kithi.

60:2  Uzamazamisile umhlaba, wawuqhekeza; silisa imikenke yawo, ngoba uyazamazama.

60:3  Abantu bakho ubabonisile okulukhuni; usinathise iwayini lokudiyazela.

60:4  Ubanikile labo abakwesabayo isiboniso, ukuze siphakanyiswe ngenxa yeqiniso. Sela*.

60:5  Ukuze abathandekayo bakho bakhululwe; sindisa ngesandla sakho sokunene, usiphendule.

60:6  UNkulunkulu ukhulumile ebungcweleni bakhe. Ngizathaba, ngilabe iShekema, ngilinganise isihotsha seSukothi.

60:7  Ngeyami iGileyadi, njalo ngowami uManase, loEfrayimi ungamandla ekhanda lami, uJuda ngumnikumthetho wami.

60:8  UMowabi ungumganu wami wokugezela; phezu kukaEdoma ngizaphosela inyathela lami; mayelana lami, wena Filisti, memeza ngokunqoba.

60:9  Ngubani ozangisa emzini oqinileyo? Ngubani ozangiholela eEdoma?

60:10  Kawusilahlanga yini, Nkulunkulu; kawuphumanga, Nkulunkulu, lamabutho ethu?

60:11  Siphe usizo ekuhlupheni, ngoba luyize uncedo lomuntu.

60:12  KuNkulunkulu sizakwenza ngobuqhawe, ngoba yena uzanyathelela phansi izitha zethu.

Chapter 61

61:1  Zwana, Nkulunkulu, ukukhala kwami, ulalele umkhuleko wami.

61:2  Ngisemkhawulweni womhlaba ngizakhala kuwe, inhliziyo yami isiphela amandla; ngikhokhelela edwaleni eliphakemeyo kulami.

61:3  Ngoba ubuyisiphephelo sami, inqaba eqinileyo kuso isitha.

61:4  Ngizahlala ethenteni lakho kuze kube nininini, ngiphephele kungubudo yempiko zakho. Sela*.

61:5  Ngoba wena, Nkulunkulu, uzwile izifungo zami, wanginika ilifa labesaba ibizo lakho.

61:6  Uzakwengeza izinsuku ezinsukwini zenkosi; iminyaka yayo izakuba njengesizukulwana lesizukulwana.

61:7  Kayihlale phambi kukaNkulunkulu kuze kube nininini; umise umusa leqiniso, ukuze kuyilondoloze.

61:8  Ngalokho ngizahlabela indumiso ebizweni lakho kuze kube nininini, ukuze ngigcwalise izifungo zami insuku ngensuku.

Chapter 62

62:1  Ngoqotho, umphefumulo wami uyamlindela uNkulunkulu ngokuthula; luvela kuye usindiso lwami.

62:2  Nguye kuphela olidwala lami losindiso lwami, inqaba yami; kangiyikunyikinywa kakhulu.

62:3  Koze kube nini liceba ububi limelene lomuntu? Lonke lizabulawa, njengomduli otshekileyo, uthango oludilikayo.

62:4  Baceba kuphela ukumwisa ekuphakameni kwakhe, bathokoza ngamanga; ngomlomo wabo bayabusisa, kodwa ngaphakathi kwabo bayathuka. Sela*.

62:5  Mphefumulo wami, lindela ngokuthula kuNkulunkulu kuphela; ngoba ithemba lami livela kuye.

62:6  Nguye kuphela olidwala lami losindiso lwami, inqaba yami; kangiyikunyikinywa.

62:7  LukuNkulunkulu usindiso lwami lodumo lwami, idwala lamandla ami, isiphephelo sami, kukuNkulunkulu.

62:8  Thembani kuye isikhathi sonke, lina bantu; lithulule inhliziyo yenu phambi kwakhe; uNkulunkulu uyisiphephelo sethu. Sela*.

62:9  Ngoqotho, abantukazana bayize, izikhulu ziyinkohliso; esilinganisweni balula kuleze bebonke.

62:10  Lingathembeli embandezelweni, lingamisi ithemba eliyize ekuphangeni; uba inotho isanda, lingabeki inhliziyo kuyo.

62:11  UNkulunkulu ukhulumile kwaba kanye, ngikuzwile lokhu kabili, ukuthi amandla angakaNkulunkulu.

62:12  Lomusa ungowakho, Nkosi; ngoba wena uyamphindisela wonke umuntu njengokomsebenzi wakhe.

Chapter 63

63:1  Nkulunkulu, unguNkulunkulu wami, ngizakudinga ngovivi; umphefumulo wami womela wena; inyama yami iyakulangatha, elizweni elomileyo leligagadekileyo, elingelamanzi.

63:2  Njengoba ngikubonile endaweni engcwele, ngibone amandla akho lobukhosi bakho.

63:3  Ngoba uthandolomusa wakho lungcono kulempilo; indebe zami zizakudumisa.

63:4  Ngokunjalo ngizakubonga ngisaphila, ngiphakamise izandla zami ebizweni lakho.

63:5  Umphefumulo wami uzasutha kungathi ngomnkantsho lamahwahwa, lomlomo wami uzadumisa ngezindebe ezithabisayo.

63:6  Lapho ngikukhumbula embhedeni wami, emilindweni yebusuku ngizindla ngawe.

63:7  Ngoba ubulusizo lwami, ngakho emthunzini wempiko zakho ngizahlabela ngithokoze.

63:8  Umphefumulo wami unamathele ekukulandeleni, isandla sakho sokunene siyangisekela.

63:9  Kodwa abadinga umphefumulo wami ukuwuchitha bazakuya ezindaweni zomhlaba eziphansi.

63:10  Bazanikelwa emandleni enkemba, babe yisabelo samakhanka.

63:11  Kodwa inkosi izathokoza kuNkulunkulu; wonke ofunga ngaye uzazincoma; kodwa umlomo wabaqamba amanga uzavalwa.

Chapter 64

64:1  Zwana, Nkulunkulu, ilizwi lami esikhalazweni sami, ulondoloze impilo yami ekwesabeni isitha.

64:2  Ungifihle ecebeni elifihliweyo lababi, ekuxokozeleni kwabenzi bobubi,

64:3  abalola ulimi lwabo njengenkemba, bagobise umtshoko wabo, ngitsho amazwi ababayo,

64:4  ukutshoka opheleleyo besekusithekeni; bahle bamtshoke, bengesabi.

64:5  Baziqinisa edabeni olubi, bekhuluma ngokuthiya, bathi: Ngubani ongayibona?

64:6  Badingisisa iziphambeko; silungile ngecebo elicetshwe ngobuqili; umcabango wangaphakathi womuntu kanye lenhliziyo kujulile.

64:7  Kodwa uNkulunkulu uzabatshoka ngomtshoko masinyane; bazalinyazwa.

64:8  Njalo bazakwenza olwabo ulimi luwele phezu kwabo; bonke abababonayo bazabaleka.

64:9  Labo bonke abantu bazakwesaba, batshumayele isenzo sikaNkulunkulu, baqedisise umsebenzi wakhe.

64:10  Olungileyo uzajabula eNkosini, aphephele kuyo; bonke abaqotho ngenhliziyo bazazincoma.

Chapter 65

65:1  Ukulinda ngokuthula kuyindumiso kuwe, Nkulunkulu, eZiyoni, lesifungo sizagcwaliswa kuwe.

65:2  Wena ozwa umkhuleko, yonke inyama izakuza kuwe.

65:3  Izinto zobubi zingehlule. Iziphambeko zethu, wena uzenzele inhlawulo yokuthula.

65:4  Ubusisiwe omkhethayo, omsondezayo ukuthi ahlale emagumeni akho. Sizasutha ngokuhle kwendlu yakho, ithempeli lakho elingcwele.

65:5  Ngezinto ezesabekayo uzasiphendula, Nkulunkulu wosindiso lwethu, themba lemikhawulo yonke yomhlaba, lelabakhatshana elwandle.

65:6  Omisa izintaba ngamandla akhe, ebhince amandla.

65:7  Othulisa ukuduma kwezinlwandle, lenhlokomo yamagagasi azo, lokuxokozela kwabantu.

65:8  Labakhileyo emikhawulweni bayesaba iziboniso zakho; wenza kuhlabele kuthokoze ukuphuma kokusa lokokuhlwa.

65:9  Uyahambela umhlaba uwuthelele, uwuvundise kakhulu; umfula kaNkulunkulu ugcwele amanzi; uyabalungisela amabele, lapho uwulungisa ngokunjalo.

65:10  Uyathelela kakhulu imisele yawo, ulalise imigelo yawo, uyithambise ngezihlambo, ubusise ukumila kwawo.

65:11  Uyethesa umnyaka ngomqhele wobuhle bakho; lemikhondo yakho ithonta amafutha.

65:12  Ithontela amadlelo eganga, lamaqaqa embethe intokozo.

65:13  Amadlelo embethe imihlambi, lezigodi zisitshekelwe ngamabele; kuyajabula kakhulu, njalo kuhlabele.

Chapter 66

66:1  Mhubeleni ngentokozo uNkulunkulu, mhlaba wonke.

66:2  Hlabelani ubukhosi bebizo lakhe, lenze udumo lwakhe lube lenkazimulo.

66:3  Tshonini kuNkulunkulu lithi: Yeka ukwesabeka kwezenzo zakho! Ngenxa yobukhulu bamandla akho izitha zakho zizakuthobela ngenkohliso.

66:4  Umhlaba wonke uzakukhonza, uhlabelele kuwe, bahlabelele ibizo lakho. Sela*.

66:5  Wozani libone izenzo zikaNkulunkulu; uyesabeka ekwenzeni ebantwaneni babantu.

66:6  Ulwandle waluphendula lwaba ngumhlaba owomileyo; bachapha umfula ngenyawo. Lapho sathokoza kuye.

66:7  Ubusa ngamandla akhe kuze kube nininini; amehlo akhe ayazilinda izizwe; abalenkani kabangaziphakamisi. Sela*.

66:8  Bongani uNkulunkulu, zizwe, lizwakalise ilizwi lendumiso yakhe.

66:9  Obeka umphefumulo wethu empilweni, ongavumanga ukuthi unyawo lwethu lutshelele.

66:10  Ngoba usihlolile, Nkulunkulu, wasicenga njengokucengwa kwesiliva.

66:11  Wasingenisa embuleni, wabeka inhlupheko enkalweni zethu.

66:12  Wenze abantu bagade phezu kwekhanda lethu; sadabula emlilweni lasemanzini, kodwa wasikhuphela endaweni elokunengi.

66:13  Ngizangena endlini yakho ngileminikelo yokutshiswa; ngizakhokha kuwe izifungo zami,

66:14  indebe zami eziziphumisileyo, lomlomo wami ozikhulumileyo ngisekuhluphekeni.

66:15  Ngizanikela kuwe iminikelo yokutshiswa yezinonileyo, kanye lempepha yezinqama; ngizanikela inkomo kanye lezimpongo. Sela*.

66:16  Wozani lizwe lina lonke elimesabayo uNkulunkulu, ngizalandisa akwenzele umphefumulo wami.

66:17  Ngakhala kuye ngomlomo wami, waphakanyiswa ngaphansi kolimi lwami.

66:18  Uba benginanze ububi enhliziyweni yami, ibingayikuzwa iNkosi.

66:19  Qotho uNkulunkulu uzwile, walalela ilizwi lomkhuleko wami.

66:20  Kabongwe uNkulunkulu, ongabuyiselanga emuva umkhuleko wami, kumbe umusa wakhe kimi.

Chapter 67

67:1  Nkulunkulu, woba lomusa kithi usibusise, ukhanyise ubuso bakho phezu kwethu. Sela*.

67:2  Ukuze indlela yakho yaziwe emhlabeni, usindiso lwakho ezizweni zonke.

67:3  Kazikudumise izizwe, Nkulunkulu, kabakudumise abantu bonke.

67:4  Izizwe kazijabule zihlabele ngentokozo, ngoba uzabahlulela abantu ngokuqonda, uhole izizwe emhlabeni. Sela*.

67:5  Kazikudumise izizwe, Nkulunkulu, kabakudumise abantu bonke.

67:6  Umhlaba uzathela izithelo zawo; uNkulunkulu, uNkulunkulu wethu uzasibusisa.

67:7  UNkulunkulu uzasibusisa, layo yonke imikhawulo yomhlaba izamesaba.

Chapter 68

68:1  UNkulunkulu kavuke, zihlakazeke izitha zakhe, labamzondayo babaleke phambi kwakhe.

68:2  Njengokuphetshethwa kwentuthu baphephethe; njengokuncibilikiswa kwengcino phambi komlilo, ababi kabachithwe phambi kukaNkulunkulu.

68:3  Kodwa abalungileyo kabajabule, bathabe phambi kukaNkulunkulu, njalo bathokoze ngentokozo.

68:4  Hlabelelani kuNkulunkulu, hlabelelani indumiso ebizweni lakhe, limphakamise lowo ogade esedlula emagcekeni enkangala ngebizo lakhe uJehova, njalo thokozani phambi kwakhe.

68:5  Unguyise wezintandane lomahluleli wabafelokazi, uNkulunkulu endaweni yakhe yokuhlala engcwele.

68:6  UNkulunkulu uhlalisa ababodwa emulini, ukhupha ababotshiweyo ebasa empumelelweni, kodwa abalenkani bahlala elizweni elomileyo.

68:7  Nkulunkulu, ekuphumeni kwakho phambi kwabantu bakho, ekuhambeni kwakho enkangala; Sela*:

68:8  Umhlaba wazamazama, lawo amazulu athontisa phambi kukaNkulunkulu, le iSinayi, phambi kukaNkulunkulu, uNkulunkulu kaIsrayeli.

68:9  Walinisa izulu elikhulu, Nkulunkulu; waliqinisa wena ilifa lakho selikhathele.

68:10  Ibandla lakho lahlala kulo; wamlungisela ngobuhle bakho oswelayo, Nkulunkulu.

68:11  INkosi yanika ilizwi; abesifazana ababika izindaba babelixuku elikhulu.

68:12  Amakhosi amabutho ayabaleka, ayabaleka. Owesifazana ohlezi ekhaya wayaba impango.

68:13  Lanxa lilala phakathi kwezibaya zezimvu, lizakuba njengempiko zejuba ezisitshekelwe ngesiliva, lezinsiba zalo ngegolide eliliganu.

68:14  Lapho uSomandla echitha amakhosi kulo, kwaba mhlophe njengeliqhwa elikhithikileyo eZalimoni.

68:15  Intaba yeBashani yintaba kaNkulunkulu, intaba elezingqonga, intaba yeBashani.

68:16  Likhangelelani ngomhawu, lina zintaba zezingqonga? Lintaba uNkulunkulu uyiloyisele ukuhlala kwakhe. Yebo, iNkosi izahlala kuyo kuze kube nininini.

68:17  Izinqola zikaNkulunkulu ziyizinkulungwane ezingamatshumi amabili, izinkulungwane zezinkulungwane, iNkosi iphakathi kwazo, iSinayi endaweni engcwele.

68:18  Wena wenyukele phezulu, wathumba abathunjiweyo; wemukela izipho ebantwini, yebo, lakwabalenkani; ukuze uJehova uNkulunkulu ahlale khona.

68:19  Kayibongwe iNkosi; isethwesa insuku ngensuku; uNkulunkulu ulusindiso lwethu. Sela*.

68:20  UNkulunkulu wethu unguNkulunkulu wezinsindiso; lakuJehova iNkosi kulokuphuma ekufeni.

68:21  Kodwa uNkulunkulu uzaphohloza ikhanda lezitha zakhe, ukhakhayi olulenwele lwalowo ohamba ezonweni zakhe.

68:22  INkosi yathi: Ngizababuyisa bevela eBashani, ngibabuyise bevela enzikini yolwandle,

68:23  ukuze inyawo zakho uzigxamuze egazini lezitha, inlimi zezinja zakho kulo.

68:24  Zibonile izindwendwe zakho, Nkulunkulu; izindwendwe zikaNkulunkulu wami, iNkosi yami, endaweni engcwele.

68:25  Ngaphambili kuhamba abahlabelayo, ngemuva abatshayi bamachacho, phakathi izintombi zitshaya izigubhu.

68:26  Bongani uNkulunkulu emabandleni, iNkosi, kuvela emthonjeni kaIsrayeli.

68:27  Nango uBhenjamini omncinyane umbusi wabo, iziphathamandla zikaJuda, inkundla yazo, iziphathamandla zikaZebuluni, iziphathamandla zikaNafithali.

68:28  UNkulunkulu wakho ulaye amandla akho; qinisa, Nkulunkulu, lokho osenzele khona.

68:29  Ngenxa yethempeli lakho eJerusalema amakhosi azakulethela isipho.

68:30  Sikhuze isilo somhlanga, umhlambi wezinkunzi kanye lamankonyana abantu, kuze kuthobeke kulenhlamvu zesiliva; ubahlakaze abantu abathokoza ezimpini.

68:31  Iziphathamandla zizakuza zivela eGibhithe; iEthiyophiya izakwelulela izandla zayo kuNkulunkulu ngokuphangisa.

68:32  Mibuso yomhlaba, hlabelelani kuNkulunkulu, lihlabelele indumiso eNkosini. Sela*.

68:33  Kuyo egade phezu kwamazulu amazulu awendulo; khangelani, iphumisa ilizwi layo, ilizwi elilamandla.

68:34  Phanini amandla kuNkulunkulu; ubukhosi bakhe buphezu kukaIsrayeli, lamandla akhe asemayezini.

68:35  Uyesabeka, Nkulunkulu, ezindaweni zakho ezingcwele; uNkulunkulu kaIsrayeli nguye onika abantu bakhe amandla lengalo. Kabongwe uNkulunkulu.

Chapter 69

69:1  Ngisindisa, Nkulunkulu, ngoba amanzi asengene kuwo umphefumulo.

69:2  Ngiyatshona odakeni olujulileyo, lapho okungelakuma khona; ngingene emanzini atshonayo, lapho impophoma iyangicwilisa.

69:3  Ngidiniwe yikukhala kwami, umphimbo wami womile qha; amehlo ami ayafiphala ekulindeleni uNkulunkulu wami.

69:4  Abangizondayo ngeze banengi okwedlula inwele zekhanda lami; abangangibhubhisa, izitha zami ngaphandle kwecala, balamandla. Lokho engingakwebanga ngasengikubuyisela.

69:5  Nkulunkulu, wena uyabazi ubuthutha bami, lezono zami kazifihlakalanga kuwe.

69:6  Kabangayangeki ngenxa yami labo abakulindeleyo, Nkosi Jehova wamabandla; bangadunyazwa ngenxa yami labo abakudingayo, Nkulunkulu kaIsrayeli.

69:7  Ngoba ngenxa yakho ngithwele ihlazo; inhloni zisibekele ubuso bami.

69:8  Sengaba ngowemzini kubafowethu, lowezizweni kubantwana bakamama.

69:9  Ngoba ukutshisekela indlu yakho kungidlile, lenhlamba yabakuhlambazayo iwele phezu kwami.

69:10  Ngasengilila ekuzileni ukudla komphefumulo wami, njalo kwaba yikudunyazwa kimi.

69:11  Ngasengisenza isaka isembatho sami, ngaba yisiga kibo.

69:12  Abahlezi esangweni bakhuluma ngami, njalo ngaba yingoma yabanatha okunathwayo okulamandla.

69:13  Kodwa mina umkhuleko wami ukuwe, Nkosi, ngesikhathi somusa, Nkulunkulu, ngobunengi besihawu sakho, ngiphendule, ngeqiniso losindiso lwakho.

69:14  Ungophule odakeni, ngingatshoni; ngikhululwe kwabangizondayo lenzikini yamanzi.

69:15  Impophoma yamanzi kayingangicwilisi, lenziki ingangiginyi, lomgodi ungavali umlomo wawo phezu kwami.

69:16  Ngiphendula, Nkosi, ngoba uthandolomusa wakho lulungile; ngobunengi besihawu sakho uphendukele kimi.

69:17  Njalo ungayifihleli ubuso bakho inceku yakho; ngoba ngiyahlupheka, phangisa ungiphendule.

69:18  Sondela emphefumulweni wami, uwuhlenge, ungikhulule ngenxa yezitha zami.

69:19  Wena uyakwazi ukuthukwa kwami lehlazo lami lokudunyazwa kwami; izitha zami zonke ziphambi kwakho.

69:20  Ukuthukwa kuyidabule inhliziyo yami, njalo ngibuthakathaka. Bengilindele ongangihawukela, kodwa wayengekho, labaduduzayo, kodwa kangibatholanga.

69:21  Basebengipha inyongo ibe yikudla kwami, lekomeni kwami banginathisa iviniga.

69:22  Itafula labo eliphambi kwabo kalibe ngumjibila, ibe yisifu sabonwabileyo.

69:23  Amehlo abo kawafiphale ukuze bangaboni, njalo wenze inkalo zabo zihlale zithuthumele.

69:24  Thela intukuthelo yakho phezu kwabo, lolaka lwakho oluvuthayo lubafice.

69:25  Indawo yabo yokuhlala kayibe lunxiwa, kungabi khona ohlala emathenteni abo.

69:26  Ngoba omtshayileyo wena bayamzingela, njalo baxoxa kube buhlungu kwabalinyazwe nguwe.

69:27  Yengezelela ukona ekoneni kwabo, ukuze bangangeni ekulungeni kwakho.

69:28  Kabesulwe ogwalweni lwabaphilayo, bangabalwa kanye labalungileyo.

69:29  Kodwa mina ngilusizi, ngiyafuthelwa; usindiso lwakho, Nkulunkulu, kalungimise phezulu ngivikelekile.

69:30  Ngizadumisa ibizo likaNkulunkulu ngehubo, ngimkhulise ngokubonga.

69:31  Kuzakuba kuhle-ke eNkosini okwedlula inkabi kumbe ijongosi elilempondo lenklagu.

69:32  Abathobekileyo bazabona, bathokoze; lina elidinga uNkulunkulu inhliziyo yenu izaphila.

69:33  Ngoba iNkosi iyabezwa abaswelayo, njalo kayideleli izibotshwa zayo.

69:34  Kakuthi amazulu lomhlaba kuyidumise, izinlwandle lakho konke okunyakaza phakathi kwazo.

69:35  Ngoba uNkulunkulu uzasindisa iZiyoni, ayakhe imizi yakoJuda; njalo bahlale khona badle ilifa layo.

69:36  Lenzalo yenceku zakhe izakudla ilifa layo, labathanda ibizo lakhe bazahlala kuyo.

Chapter 70

70:1  Nkulunkulu, ngophula, Nkosi, phangisa ungisize.

70:2  Kabayangeke babe lenhloni bonke abadinga umphefumulo wami; kababuyiselwe emuva bayangiswe abaloyisa ukulimala kwami.

70:3  Kababuyele emuva kube ngumvuzo wehlazo labo abathi: Aha, aha!

70:4  Kabathabe bajabule kuwe bonke abakudingayo; labathanda usindiso lwakho kabatsho njalo bathi: Kabe mkhulu uNkulunkulu!

70:5  Kodwa ngingumyanga njalo ngiyaswela; Nkulunkulu, phangisa uze kimi. Wena ungumsizi wami lomkhululi wami; Nkosi, ungaphuzi.

Chapter 71

71:1  Kuwe, Nkosi, ngiyaphephela; kangingayangeki lanininini.

71:2  Ngikhulula ngokulunga kwakho, ungophule; beka indlebe yakho kimi, ungisindise.

71:3  Woba lidwala lokuhlala kimi, ngiye kulo njalonjalo; ulayile ukungisindisa, ngoba ulidwala lami lenqaba yami.

71:4  Nkulunkulu wami, ngophula esandleni somubi lesandleni songalunganga lolesihluku.

71:5  Ngoba wena, ulithemba lami Nkosi, Jehova, ithemba lami kwasebutsheni bami.

71:6  Ngeyame kuwe kwasesizalweni; nguwe owangikhupha esiswini sikamama; indumiso yami ingawe njalonjalo.

71:7  Benginjengesimangaliso kwabanengi; kodwa wena uyisiphephelo sami esiqinileyo.

71:8  Umlomo wami kawugcwaliswe ngendumiso yakho, usuku lonke ngodumo lwakho.

71:9  Ungangilahli esikhathini sokuluphala, ungangitshiyi ekupheleni kwamandla ami.

71:10  Ngoba izitha zami zikhuluma zimelene lami, labacathamela umphefumulo wami bayacebisana,

71:11  besithi: UNkulunkulu umtshiyile; zingelani, limbambe, ngoba kakho okhululayo.

71:12  Nkulunkulu, ungabi khatshana lami; Nkulunkulu wami, phangisela usizo lwami.

71:13  Kabayangeke baphele abayizitha zomphefumulo wami, kabasitshekelwe yikuyangeka lehlazo labo abadinga ukoniwa kwami.

71:14  Kodwa mina ngizathemba njalonjalo, ngengeze ekudunyisweni kwakho konke.

71:15  Umlomo wami uzalandisa ukulunga kwakho, usuku lonke usindiso lwakho, ngoba kangiwazi amanani akho.

71:16  Ngizahamba emandleni eNkosi uJehova, ngiqambe ukulunga kwakho, okwakho kuphela.

71:17  Nkulunkulu, ungifundisile kusukela ebutsheni bami, njalo kuze kube khathesi ngitshumayele izimangaliso zakho.

71:18  Lalapho sengiluphele sengiyimpunga, Nkulunkulu, ungangitshiyi, ngize ngitshumayele ingalo yakho kuso isizukulwana, amandla akho kuye wonke ozakuza.

71:19  Lokulunga kwakho, Nkulunkulu, kufika ezingqongeni, owenze izinto ezinkulu; Nkulunkulu, ngubani onjengawe?

71:20  Ongenze ngabona inhlupheko ezinengi lezibuhlungu, uzangivuselela futhi, ungikhuphule futhi ezinzikini zomhlaba.

71:21  Uzakwandisa ubukhulu bami, ungiduduze inhlangothi zonke.

71:22  Lami ngizakudumisa ngogubhu lwezintambo, iqiniso lakho, Nkulunkulu wami; ngizahlabelela izibongo kuwe ngechacho, wena ongcwele kaIsrayeli.

71:23  Indebe zami zizamemeza ngentokozo lapho ngihlabelela kuwe, lomphefumulo wami owuhlengileyo.

71:24  Futhi ulimi lwami luzakhuluma ngokulunga kwakho usuku lonke, ngoba bayangekile, ngoba badumazeka, abadinga ukoniwa kwami.

Chapter 72

72:1  Nkulunkulu, nika inkosi izahlulelo zakho lokulunga kwakho endodaneni yenkosi.

72:2  Izakwehlulela abantu bakho ngokulunga, labayanga bakho ngokuqonda.

72:3  Izintaba zizalethela abantu ukuthula, lamaqaqa, ngokulunga.

72:4  Izakwahlulela abahluphekayo babantu, isindise abantwana babaswelayo, ifohloze umcindezeli.

72:5  Bazakwesaba wena lisekhona ilanga, isekhona lenyanga, kuzizukulwana ngezizukulwana.

72:6  Izakwehla njengezulu etshanini obugundiweyo, njengezihlambo ezithambisa umhlaba.

72:7  Ensukwini zayo olungileyo uzahluma; lokwanda kokuthula, ize ingabi khona inyanga.

72:8  Izabusa-ke kusukela elwandle kusiya elwandle, lakusukela emfuleni kusiya emikhawulweni yomhlaba.

72:9  Abahlala enkangala bazakhothama phambi kwayo; izitha zayo zizakhotha uthuli.

72:10  Amakhosi eTarshishi lawezihlengeni azaletha izipho, amakhosi eShebha leSeba asondeze izipho.

72:11  Amakhosi wonke azayikhothamela, izizwe zonke ziyikhonze.

72:12  Ngoba izamkhulula oswelayo ekhala, longumyanga, longelamsizi.

72:13  Izahawukela ongumyanga loswelayo, isindise imiphefumulo yabaswelayo.

72:14  Izahlenga umphefumulo wabo ecindezelweni ledlakeleni; legazi labo lizakuba ligugu emehlweni ayo.

72:15  Izaphila, inikwe okwegolide leShebha, ikhulekelwe njalonjalo, usuku lonke ibusiswe.

72:16  Kuzakuba khona inala yamabele elizweni ezingqongeni zezintaba; izithelo zawo zihatshazele njengeLebhanoni; labomuzi bazahluma njengotshani bomhlaba.

72:17  Ibizo layo lizakuba khona kuze kube phakade, lebizo layo lizakwanda lisekhona ilanga. Njalo bazabusiswa kuyo; izizwe zonke zizakuthi ibusisiwe.

72:18  Kayibongwe iNkosi uNkulunkulu, uNkulunkulu kaIsrayeli, onguye yedwa owenza imimangaliso.

72:19  Kalibusiswe ibizo lakhe elilodumo kuze kube nininini; umhlaba wonke ugcwaliswe ngodumo lwakhe. Ameni, loAmeni!

72:20  Imikhuleko kaDavida indodana kaJese isiphelile.

Chapter 73

73:1  Qotho uNkulunkulu ulungile kuIsrayeli, kulabo abahlambulukileyo enhliziyweni.

73:2  Kodwa mina inyawo zami zaphose zasuka, izinyathelo zami zaphose zatshelela.

73:3  Ngoba ngaba lomhawu ngabazikhukhumezayo, ngibona ukuphumelela kwababi.

73:4  Ngoba kakulazibopho ekufeni kwabo, kodwa amandla abo aqinile.

73:5  Kabakho enhluphekweni njengabanye abantu, njalo kabahlutshwa njengabanye abantu.

73:6  Ngakho-ke ukuzigqaja kuyabazungeza njengeketane, udlame luyabasibekela njengesembatho.

73:7  Amehlo abo aqumbile ngamafutha; iminakano yenhliziyo iyaphuphuma.

73:8  Bayakloloda, bakhulume ngobubi ngocindezelo; bakhuluma besekuphakameni.

73:9  Bamisa umlomo wabo umelene lamazulu, lolimi lwabo luhamba emhlabeni.

73:10  Ngakho abantu bakhe bayaphendukela lapha, lamanzi enkezo egcweleyo akhanyelwa bona.

73:11  Njalo bathi: UNkulunkulu wazi njani? Kukhona ulwazi yini koPhezukonke?

73:12  Khangela, laba ngabangelaNkulunkulu, kanti bayaphumelela elizweni, bandisa inotho.

73:13  Isibili ngihlambulule inhliziyo yami ngeze, ngageza izandla zami ngokungelacala.

73:14  Ngoba ngihlutshiwe usuku lonke, lesijeziso sami sisekuseni yonke.

73:15  Uba bengingathi: Ngizakhuluma ngokunje, khangela, ngabe ngisikhohlisile isizukulwana sabantwana bakho.

73:16  Lapho nganakana ukwazi lokhu, kwakubuhlungu emehlweni ami,

73:17  ngaze ngangena ezindlini ezingcwele zikaNkulunkulu; ngasengikuqedisisa ukuphela kwabo.

73:18  Isibili ubamisa endaweni ezitshelelayo, ubawisela ekubhujisweni.

73:19  Yeka ukuchitheka kwabo njengokucwayiza kwelihlo! Baphela baqedwe ngokwesabisayo.

73:20  Njengephupho ekuphaphameni, Nkosi, nxa uvuka uzadelela umfanekiso wabo.

73:21  Ngakho inhliziyo yami yaba buhlungu, ngahlatshwa ezinsweni zami.

73:22  Njalo ngaba yisiphukuphuku esingaziyo, ngaba njengenyamazana kuwe.

73:23  Kodwa mina ngihlezi ngilawe; ubambe isandla sami sokunene.

73:24  Uzangikhokhela ngeseluleko sakho, lemva kwalokho ungemukele enkazimulweni.

73:25  Ngilobani emazulwini ngaphandle kwakho? Njalo kakukho engikufisayo emhlabeni ngaphandle kwakho.

73:26  Inyama yami lenhliziyo yami kuyaphela; uNkulunkulu ulidwala lenhliziyo yami lesabelo sami kuze kube nininini.

73:27  Ngoba khangela, abakhatshana lawe bazabhubha; ubachithile bonke abaphingayo ngokusuka kuwe.

73:28  Kodwa mina kungilungele ukusondela kuNkulunkulu; ngibeke isiphephelo sami eNkosini uJehova, ukutshumayela zonke izenzo zakho.

Chapter 74

74:1  Nkulunkulu, usilahleleni kokuphela? Ulaka lwakho luvuthelani ngakuzo izimvu zedlelo lakho?

74:2  Khumbula ibandla lakho owalithenga endulo, intonga yelifa lakho owayihlengayo, le intaba yeZiyoni ohlala kuyo.

74:3  Phakamisa inyawo zakho ezincithakalweni eziqhubekayo, konke okubi izitha ezikwenzileyo endaweni engcwele.

74:4  Izitha zakho zibhongile phakathi kwezindawo zakho zokubuthanela, zamisa impawu zazo zibe zimpawu.

74:5  Umuntu waziwa njengophakamisa amahloka eguswini lezihlahla.

74:6  Kodwa khathesi zitshaye okubaziweyo kwayo ndawonye ngamahloka lezando.

74:7  Zinikele indlu yakho engcwele emlilweni, zangcolisa indawo yokuhlala yebizo lakho ngokuyiwisela emhlabathini.

74:8  Zathi enhliziyweni yazo: Kasibachithe ndawonye. Zatshisa zonke indawo zokubuthanela zikaNkulunkulu elizweni.

74:9  Impawu zethu kasiziboni; kakusekho mprofethi; kakho kithi owaziyo ukuthi koze kube nini.

74:10  Koze kube nini, Nkulunkulu, umcindezeli edelela? Isitha sizahlambaza ibizo lakho kokuphela yini?

74:11  Usifinyezeleni isandla sakho, yebo isandla sakho sokunene? Sikhuphe phakathi kwesifuba sakho.

74:12  Kanti uNkulunkulu uyiNkosi yami kusukela endulo, eyenza insindiso phakathi komhlaba.

74:13  Nguwe owehlukanisa ulwandle ngamandla akho; wafohloza amakhanda emigobho emanzini.

74:14  Nguwe owachoboza amakhanda kaLeviyathani*, wamnikela waba yikudla kwabantu enkangala.

74:15  Nguwe owaqhekeza umthombo lesifula, nguwe owomisa imifula egeleza njalo.

74:16  Usuku ngolwakho, lobusuku ngobakho; nguwe owamisa ukukhanya lelanga.

74:17  Nguwe owamisa yonke imikhawulo yomhlaba; nguwe owenza ihlobo lobusika.

74:18  Khumbula lokhu, isitha siyangisile, Nkosi, labantu abayizithutha bahlambazile ibizo lakho.

74:19  Ungawunikeli umphefumulo wejuba lakho ezinyamazaneni zendle; ungakhohlwa ixuku lezihlupheki zakho phakade.

74:20  Nanzelela isivumelwano; ngoba indawo ezimnyama zomhlaba zigcwele indawo zokuhlala zesihluku.

74:21  Kangabuyeli eyangekile ocindezelweyo; ohluphekayo loswelayo kabalidumise ibizo lakho.

74:22  Vuka, Nkulunkulu! Ulumele udaba lwakho, ukhumbule ihlazo lakho ngoyisiwula usuku lonke.

74:23  Ungakhohlwa ilizwi lezitha zakho, ukuxokozela kwabakuvukelayo kwenyuka njalonjalo.

Chapter 75

75:1  Siyakubonga, Nkulunkulu, siyabonga, ukuthi ibizo lakho liseduze, iyalandisa imisebenzi yakho emangalisayo.

75:2  Lapho ngisemukela isikhathi esimisiweyo ngizakwahlulela ngokuqonda.

75:3  Umhlaba labo bonke abakhileyo kuwo kuncibilikile; mina ngiqinisa insika zawo. Sela*.

75:4  Ngathi kwabayiziwula: Lingabi yiziwula. Lakwababi: Lingaphakamisi uphondo.

75:5  Lingaphakamiseli phezulu uphondo lwenu, lingakhulumi ngentamo elukhuni.

75:6  Ngoba ukuphakanyiswa kakuveli empumalanga kumbe entshonalanga njalo hatshi enkangala.

75:7  Kodwa uNkulunkulu ungumahluleli, uyehlisa omunye, aphakamise omunye.

75:8  Ngoba esandleni seNkosi kulenkezo; lewayini liphuphuma, ligcwele inhlanganiso; iyathulula okwalo; kodwa izibhidi zalo, ababi bonke bomhlaba bazazihluza bazinathe.

75:9  Kodwa mina ngizatshumayela njalonjalo, ngihlabele indumiso kuNkulunkulu kaJakobe.

75:10  Njalo zonke impondo zababi ngizaziquma; impondo zabalungileyo zizaphakanyiswa.

Chapter 76

76:1  UNkulunkulu uyaziwa koJuda; ibizo lakhe likhulu koIsrayeli.

76:2  Njalo idumba lakhe liseSalema, lendawo yakhe yokuhlala eZiyoni.

76:3  Lapho wephula imitshoko evuthayo yedandili, isihlangu, lenkemba, lempi. Sela*.

76:4  Uyakhazimula, ulobukhosi okwedlula izintaba zempango.

76:5  Baphangiwe abaqinileyo ngenhliziyo, balele ubuthongo babo; njalo kakho emaqhaweni othole izandla zawo.

76:6  Ekukhalimeni kwakho, Nkulunkulu kaJakobe, kokubili inqola lebhiza kulele ubuthongo obukhulu.

76:7  Wena, wena uyesabeka. Ngubani-ke ongema phambi kwakho kusukela esikhathini solaka lwakho?

76:8  Wenza isahlulelo sizwakale usemazulwini; umhlaba wesaba wathula,

76:9  mhla uNkulunkulu evukela isahlulelo, ukusindisa bonke abathobekileyo bomhlaba. Sela*.

76:10  Qotho, ulaka lomuntu luzakudumisa; uzazibhinca ngensalela yolaka.

76:11  Fungani, likhokhe eNkosini uNkulunkulu wenu, lonke eliyihanqileyo lilethe izipho kuye ofanele esatshwe.

76:12  Izaquma umoya weziphathamandla; iyesabeka emakhosini omhlaba.

Chapter 77

77:1  Ilizwi lami likuNkulunkulu, njalo ngiyakhala, ilizwi lami likuNkulunkulu, wasebeka indlebe kimi.

77:2  Osukwini lokuhlupheka kwami ngayidinga iNkosi; isandla sami selulwa ebusuku, kasiphezanga, umphefumulo wami wala ukududuzwa.

77:3  Ngamkhumbula uNkulunkulu, ngabubula; ngakhalaza, lomoya wami waphela amandla. Sela*.

77:4  Ubambe amehlo ami ukuthi angalali; ngakhathazeka, kangisakhulumanga.

77:5  Ngakhumbula insuku zasendulo, iminyaka yekadeni.

77:6  Ngakhumbula ingoma yami, ebusuku, ngakhuluma lenhliziyo yami, lomoya wami wahlolisisa.

77:7  INkosi izalahla kokuphela yini? Njalo kayiselakuphinda ibe lomusa yini?

77:8  Uthandolomusa wayo seluphelile kokuphela yini? Isithembiso sesiphelile kusukela kusizukulwana kusiya kusizukulwana na?

77:9  UNkulunkulu usekhohliwe ukuba lomusa yini? Usevalele isihawu sakhe ngolaka yini? Sela*.

77:10  Ngasengisithi: Lobu yibuthakathaka bami; iminyaka yesandla sokunene soPhezukonke.

77:11  Ngizakhumbula izenzo zeNkosi. Isibili, ngizakhumbula izimangaliso zakho ezindala.

77:12  Ngizazindla ngomsebenzi wakho wonke, ngikhulume ngezenzo zakho.

77:13  Nkulunkulu, indlela yakho isendaweni engcwele. Ngubani unkulunkulu omkhulu njengoNkulunkulu?

77:14  Wena unguNkulunkulu owenza isimangaliso; wazisa amandla akho phakathi kwezizwe.

77:15  Ngengalo yakho uhlengile abantu bakho, amadodana kaJakobe loJosefa. Sela*.

77:16  Amanzi akubona, Nkulunkulu, amanzi akubona, ethuka; izinziki lazo zathuthumela.

77:17  Amayezi athulula amanzi, lezibhakabhaka zaduma; imitshoko yakho layo yaya le lale.

77:18  Ilizwi lokuduma kwakho lalisesivunguvungwini; imibane yakhanyisa umhlaba; lomhlaba wagedezela wazamazama.

77:19  Indlela yakho iselwandle, lomkhondo wakho emanzini amanengi, lezinyathelo zakho zazingaziwa.

77:20  Wakhokhela abantu bakho njengomhlambi ngesandla sikaMozisi loAroni.

Chapter 78

78:1  Lalelani, bantu bami, umthetho wami, libeke indlebe yenu emazwini omlomo wami.

78:2  Ngizavula umlomo wami ngomfanekiso, ngikhuphe izimfihlakalo zendulo,

78:3  esizizwileyo lesizaziyo, obaba abasitshela zona.

78:4  Kasiyikuzifihlela abantwana babo, kusizukulwana esilandelayo, silandisa izindumiso zeNkosi, lamandla ayo, lezimangaliso ezenzileyo.

78:5  Ngoba wamisa ubufakazi koJakobe, wabeka umlayo koIsrayeli, awulaya obaba, ukuze bawazise abantwana babo,

78:6  ukuze isizukulwana esilandelayo sazi, abantwana abazazalwa, basukume batshele abantwana babo,

78:7  ukuze babeke ithemba labo kuNkulunkulu, bangayikhohlwa imisebenzi kaNkulunkulu, kodwa bagcine imithetho yakhe;

78:8  njalo bangabi njengaboyise, isizukulwana esilenkani lesivukelayo, isizukulwana esingaqondisanga inhliziyo yaso, lesimoya waso ungathembekanga kuNkulunkulu.

78:9  Abantwana bakoEfrayimi, behlomile betshoka ngamadandili, babuyela emuva mhla wempi.

78:10  Kabasilondolozanga isivumelwano sikaNkulunkulu, bala ukuhamba emlayweni wakhe.

78:11  Bakhohlwa izenzo zakhe lezimangaliso zakhe ayebatshengisa zona.

78:12  Phambi kwaboyise wenza isimangaliso elizweni leGibhithe, egangeni leZowani.

78:13  Waqhekeza ulwandle, wabachaphisa, wenza amanzi ema njengenqumbi.

78:14  Wabakhokhela ngeyezi emini, lebusuku bonke ngokukhanya komlilo.

78:15  Waqhekeza amadwala enkangala, wabanathisa kungathi kuvela ezinzikini ezinkulu.

78:16  Waseveza izifula edwaleni, wenza amanzi ehla njengemifula.

78:17  Kodwa baphinda futhi ukona kuye, ngokumvukela oPhezukonke enkangala.

78:18  Bamlinga uNkulunkulu enhliziyweni yabo ngokucela ukudla kwenkanuko yabo.

78:19  Basebekhuluma bemelene loNkulunkulu bathi: UNkulunkulu angalungisa itafula enkangala yini?

78:20  Khangela, watshaya idwala, kwampompoza amanzi, lezifula zagabha; anganika lesinkwa yini? angalungisela abantu bakhe inyama na?

78:21  Ngakho iNkosi yezwa yathukuthela; umlilo wasubaselwa uJakobe, njalo lolaka lwavukela uIsrayeli,

78:22  ngoba kabakholwanga kuNkulunkulu, kabathembanga esindisweni lwakhe.

78:23  Lanxa walaya amayezi ngaphezulu, wavula iminyango yamazulu,

78:24  wabanisela imana ukuthi badle, wabapha amabele amazulu.

78:25  Umuntu wadla isinkwa sabalamandla; wabathumela ukudla ukuze basuthe.

78:26  Wenza umoya wempumalanga wavunguza emazulwini; langamandla akhe waqhuba umoya weningizimu.

78:27  Wasenisela phezu kwabo inyama njengothuli, lenyoni ezilempiko njengetshebetshebe lolwandle;

78:28  wazenza zawela phakathi kwenkamba yabo, zagombolozela indawo zabo zokuhlala.

78:29  Ngakho badla basutha kakhulu, ngoba wabalethela isiloyiso sabo.

78:30  Kabehlukananga lenkanuko yabo; ukudla kusesemlonyeni wabo,

78:31  ulaka lukaNkulunkulu lwaselubavukela, wabulala kwabakhulupheleyo babo, watshaya abakhethiweyo bakoIsrayeli.

78:32  Kulokhu konke bajinga besona, njalo kabakholwanga ngenxa yezimangaliso zakhe.

78:33  Ngakho waziqeda izinsuku zabo ngeze, leminyaka yabo ovalweni.

78:34  Lapho ebabulala, bamdinga, baphenduka, bamdingisisa uNkulunkulu.

78:35  Bakhumbula ukuthi uNkulunkulu ulidwala labo, loNkulunkulu oPhezukonke ungumhlengi wabo.

78:36  Kodwa bamyenga ngomlomo wabo, baqamba amanga kuye ngolimi lwabo.

78:37  Ngoba inhliziyo yabo yayingaqondanga kuye, njalo bengathembekanga esivumelwaneni sakhe.

78:38  Kodwa yena elesihawu wathethelela ububi babo, kababhubhisanga; yebo, kanengi walunqanda ulaka lwakhe, kakuvusanga konke ukuthukuthela kwakhe.

78:39  Ngoba wakhumbula ukuthi bayinyama, umoya odlulayo, ongabuyiyo.

78:40  Kanengi kangakanani bemvukela ehlane, bemdabukisa enkangala.

78:41  Yebo baphenduka bamlinga uNkulunkulu, bamdabukisa oNgcwele kaIsrayeli.

78:42  Kabasikhumbulanga isandla sakhe, usuku abahlenga ngalo esitheni.

78:43  Ukuthi wamisa njani izibonakaliso zakhe eGibhithe, lezimangaliso zakhe emmangweni weZowani,

78:44  lokuthi waphendula imifula yabo yaba ligazi, lezifula zabo, ukuze banganathi.

78:45  Wathumela phakathi kwabo umtshitshi wezibawu, ezabadlayo, lamaxoxo ababhubhisayo.

78:46  Wasenika imihogoyi isivuno sabo, lomsebenzi wabo isikhonyane.

78:47  Wabulala ivini labo ngesiqhotho, lemikhiwa yabo yesikhamore ngongqwaqwane.

78:48  Wasenikela izifuyo zabo esiqhothweni, lemihlambi yabo kuyo imibane.

78:49  Waphosela phezu kwabo ukuvutha kolaka lwakhe, ukuthukuthela, lokucunuka, lokuhlupheka, ngokuthuma izithunywa zobubi.

78:50  Walungisela ulaka lwakhe indlela, kanqandanga umphefumulo wabo ekufeni, kodwa wanikela impilo yabo kumatshayabhuqe wesifo.

78:51  Wasetshaya wonke amazibulo eGibhithe, okokuqala kwamandla emathenteni kaHamu.

78:52  Wasebakhupha abantu bakhe njengezimvu, wabakhokhela enkangala njengomhlambi.

78:53  Wasebakhokhela bephephile ukuze bangesabi; kodwa ulwandle lwasibekela izitha zabo.

78:54  Wasebafikisa emkhawulweni wendawo yakhe engcwele, le intaba, isandla sakhe sokunene esayizuzayo.

78:55  Wasebaxotsha abezizwe phambi kwabo; wababela ilifa ngomzila, wahlalisa izizwe zakoIsrayeli emathenteni azo.

78:56  Kanti bamlinga, bamvukela uNkulunkulu oPhezukonke, kabazigcinanga izifakazelo zakhe.

78:57  Kodwa babuyela emuva, benza ngokungathembeki njengaboyise, baphanjulwa njengedandili elikhohlisayo.

78:58  Ngoba bamthukuthelisa ngezindawo zabo eziphakemeyo, bavusa umona wakhe ngezithombe zabo ezibaziweyo.

78:59  UNkulunkulu esizwa wathukuthela, wamenyanya kakhulu uIsrayeli.

78:60  Ngakho walitshiya ithabhanekele leShilo, ithente alimisa phakathi kwabantu.

78:61  Wasenikela amandla akhe ekuthunjweni, lenkazimulo yakhe esandleni sesitha.

78:62  Wasenikela abantu bakhe enkembeni, waselithukuthelela ilifa lakhe.

78:63  Umlilo waqeda amajaha abo, lezintombi zabo kazihlatshelelwanga.

78:64  Abapristi babo bawa ngenkemba, labafelokazi babo kabalilanga.

78:65  Khona iNkosi yavuka njengobelele, njengeqhawe eliklabalala ngenxa yewayini.

78:66  Yazitshaya izitha zayo emuva, yazithela ihlazo phakade.

78:67  Yasilahla ithente likaJosefa, kayikhethanga isizwe sakoEfrayimi.

78:68  Kodwa yakhetha isizwe sakoJuda, intaba yeZiyoni eyithandayo.

78:69  Yayakha indlu yayo engcwele njengezingqonga, njengomhlaba ewusekeleyo kuze kube nininini.

78:70  Yasikhetha uDavida inceku yayo, yamthatha ezibayeni zezimvu;

78:71  ekulandeleni izimvukazi ezenyisayo, yamletha ukwelusa uJakobe abantu bayo, loIsrayeli ilifa layo.

78:72  Njalo wabelusa njengobuqotho benhliziyo yakhe, wabakhokhela ngobugabazi bezandla zakhe.

Chapter 79

79:1  Nkulunkulu, abezizwe sebengenile elifeni lakho; balingcolisile ithempeli lakho elingcwele; iJerusalema bayenze yaba zinqumbi.

79:2  Banikile izidumbu zezinceku zakho zaba yikudla kwenyoni zamazulu, inyama yabangcwele bakho kuzo izilo zomhlaba.

79:3  Balichithile igazi labo njengamanzi inhlangothi zonke zeJerusalema; njalo kakubanga khona ongcwabayo.

79:4  Sesibe yinhlamba kubomakhelwane bethu, inhlekisa loklolodelo kwabasiphahlileyo.

79:5  Koze kube nini, Nkosi? Uzathukuthela phakade yini? Ubukhwele bakho buzavutha njengomlilo yini?

79:6  Thulula ulaka lwakho phezu kwabezizwe abangakwaziyo, laphezu kwemibuso engabizi ibizo lakho.

79:7  Ngoba bamdlile uJakobe, lomuzi wakhe sebewenze unxiwa.

79:8  Ungakhumbuli umelene lathi izono zethu zendulo; isihawu sakho kasize masinyane phambi kwethu, ngoba sehliselwe phansi kakhulu.

79:9  Sisize, Nkulunkulu wosindiso lwethu, ngenxa yodumo lwebizo lakho; sikhulule, uhlawulele izono zethu, ngenxa yebizo lakho.

79:10  Kungani abezizwe bezakuthi: Ungaphi uNkulunkulu wabo? Kawaziwe phakathi kwezizwe phambi kwamehlo ethu, impindiselo yegazi lenceku zakho elachithwayo.

79:11  Ukububula kwezibotshwa kakuze phambi kwakho; njengobukhulu bengalo yakho ulondoloze abantwana bokufa.

79:12  Uphindisele omakhelwane bethu kasikhombisa esifubeni sabo ukuthuka kwabo, abakuthuka ngakho, Nkosi.

79:13  Khona thina abantu bakho, izimvu zedlelo lakho, sizakubonga kuze kube nininini, silandise udumo lwakho esizukulwaneni ngesizukulwana.

Chapter 80

80:1  Melusi kaIsrayeli, beka indlebe, okhokhela uJosefa njengomhlambi, ohlezi phakathi kwamakherubhi*, khanyisa.

80:2  Phambi kukaEfrayimi loBhenjamini loManase vusa amandla akho, uze ube lusindiso lwethu.

80:3  Siphendule, Nkulunkulu, wenze ubuso bakho bukhanye, ngakho sizasindiswa.

80:4  Nkosi Nkulunkulu wamabandla, koze kube nini uthukuthelela umkhuleko wabantu bakho?

80:5  Ubenze badla isinkwa sezinyembezi, wabanathisa izinyembezi ngesilinganiso.

80:6  Usenza sibe yingxabano kubomakhelwane bethu, lezitha zethu ziyahlekisana ngathi.

80:7  Siphendule, Nkulunkulu wamabandla, wenze ubuso bakho bukhanye, ngakho sizasindiswa.

80:8  Waliletha ivini livela eGibhithe, wazixotsha izizwe, walihlanyela lona.

80:9  Walungisa indawo phambi kwalo, wagxilisa impande zalo, laze lagcwala umhlaba.

80:10  Izintaba zembeswa ngomthunzi walo, lezingatsha zalo zinjengemisedari kaNkulunkulu.

80:11  Lanabisela ingatsha zalo elwandle, lamahlumela alo emfuleni.

80:12  Uyibhobozeleni imiduli yalo, ukuze balikhe bonke abadlula ngendlela?

80:13  Ingulube yasehlathini iyalihlikiza, lenyamazana yeganga iyalidla.

80:14  Nkulunkulu wamabandla, akubuyele, ukhangele phansi usemazulwini, ubone, wethekelele lelivini,

80:15  ngitsho isivini isandla sakho sokunene esasihlanyelayo, lendodanaowaziqinisela yona.

80:16  Sitshisiwe ngomlilo, saqunyelwa phansi; bayabhubha ngokukhuza kobuso bakho.

80:17  Isandla sakho kasibe phezu komuntu wesandla sakho sokunene, phezu kwendodana yomuntu, oziqinisele yona.

80:18  Ngakho kasiyikubuyela emuva sisuke kuwe; sivuselele, khona sizabiza ibizo lakho.

80:19  Nkosi, Nkulunkulu wamabandla, siphendule, wenze ubuso bakho bukhanye, ngakho sizasindiswa.

Chapter 81

81:1  Hlabelani kakhulu kuNkulunkulu amandla ethu, lihlokome ngentokozo kuNkulunkulu kaJakobe.

81:2  Thathani ingoma, lilethe isigujana, ichacho elimnandi kanye logubhu lwezintambo.

81:3  Vuthelani uphondo ekuthwaseni kwenyanga, esikhathini esimisiweyo, ngosuku lomkhosi wethu.

81:4  Ngoba lokho kuyisimiso kuIsrayeli, umthetho kaNkulunkulu kaJakobe.

81:5  Wakumisa kwaba yibufakazi kuJosefa, ekuphumeni kwakhe emelene lelizwe leGibhithe; ngezwa ulimi engingalwaziyo.

81:6  Ngasusa ihlombe lakhe emthwalweni; izandla zakhe zakhululwa ezimbizeni.

81:7  Wakhala usenhluphekweni, ngakukhulula; ngakuphendula ekusithekeni komdumo; ngakuhlola emanzini eMeriba. Sela*.

81:8  Zwana, sizwe sami, ngizafakaza kuwe, Israyeli, aluba ungangilalela.

81:9  Kakungabi khona phakathi kwakho unkulunkulu wezizweni, njalo ungakhonzi unkulunkulu wezizweni.

81:10  Mina ngiyiNkosi, uNkulunkulu wakho, owakwenyusa usuka elizweni leGibhithe. Khamisa umlomo wakho ube banzi, njalo ngizawugcwalisa.

81:11  Kodwa abantu bami kabalilalelanga ilizwi lami; loIsrayeli kavumelananga lami.

81:12  Ngakho ngabanikela enkanini yenhliziyo yabo, ukuze bahambe kumacebo abo.

81:13  Kungathi abantu bami bebengangilalela, uIsrayeli ahambe endleleni zami!

81:14  Masinyane bengingazehlisela phansi izitha zabo, ngiphendulele isandla sami kwabamelene labo.

81:15  Abayizondayo iNkosi bangatshotshobala phambi kwayo ngokuzenzisa, kodwa isikhathi sabo besizakuba phakade.

81:16  Wayezabondla ngamanono engqoloyi; njalo bengizakusuthisa ngoluju oluvela edwaleni.

Chapter 82

82:1  UNkulunkulu uyema enhlanganweni yabahluleli, uyahlulela phakathi kwabonkulunkulu.

82:2  Koze kube nini lisahlulela ngokungalunganga, lisemukela ubuso bababi? Sela*.

82:3  Yahlulelani umyanga lentandane, lilungisele ohluphekayo loswelayo.

82:4  Khululani umyanga loswelayo, libophule esandleni sababi.

82:5  Kabazi kabaqedisisi, baya le lale emnyameni; izisekelo zonke zomhlaba ziyazamazama.

82:6  Mina ngathi: Lingonkulunkulu, lonke lingamadodana oPhezukonke.

82:7  Kodwa lizakufa njengabantu, liwe njengesinye seziphathamandla.

82:8  Vuka, Nkulunkulu! wahlulele umhlaba; ngoba wena izizwe zonke ziyilifa lakho.

Chapter 83

83:1  Nkulunkulu, ungazithuleli; ungathuli, ungathi zwi, Nkulunkulu.

83:2  Ngoba, khangela, izitha zakho ziyaxokozela, labakuzondayo baphakamise ikhanda.

83:3  Benzela abantu bakho iseluleko sobuqili, bacebisana bemelene labafihliweyo bakho.

83:4  Bathi: Wozani, sibaqume, bangabi yisizwe, lebizo likaIsrayeli lingabe lisakhunjulwa.

83:5  Ngoba bacebisana nganhliziyonye, benza isivumelwano esimelana lawe;

83:6  amathente eEdoma, lamaIshmayeli; iMowabi, lamaHagari;

83:7  iGebali, leAmoni, leAmaleki; amaFilisti kanye labahlali beTire;

83:8  iAshuri layo isizihlanganise labo; bebeyingalo ebantwaneni bakaLothi. Sela*.

83:9  Yenza kubo njengeMidiyani, njengoSisera, njengoJabini, esifuleni iKishoni.

83:10  Babhubhela eEndori, baba ngumquba womhlabathi.

83:11  Yenza zona izikhulu zabo zibe njengoOrebi lanjengoZebi, lawo wonke amakhosana abo abe njengoZeba lanjengoZalimuna,

83:12  abathi: Kasizithathele amadlelo kaNkulunkulu abe ngawethu.

83:13  Nkulunkulu wami, benze babe njengokuhwithwayo, njengamakhoba phambi komoya,

83:14  njengomlilo utshisa ihlathi, lanjengelangabi lithungela izintaba.

83:15  Ngokunjalo baxotshe ngesivunguzane sakho, ubethuse ngesiphepho sakho.

83:16  Gcwalisa ubuso babo ngehlazo, ukuze balidinge ibizo lakho, Nkosi.

83:17  Kababe lenhloni bethuke kuze kube nininini, yebo, badunyazwe babhubhe.

83:18  Ukuze bazi ukuthi nguwe wedwa, obizo lakho nguJehova, oPhezukonke emhlabeni wonke.

Chapter 84

84:1  Athandeka kangakanani amathente akho, Nkosi yamabandla!

84:2  Umphefumulo wami uyalangatha, yebo ngitsho, uyaphela yikunxwanela amaguma eNkosi. Inhliziyo yami lenyama yami kuyakhala kuNkulunkulu ophilayo.

84:3  Intaka layo iyathola indlu, lenkonjane isidleke sayo, lapho engabeka khona abantwana bayo, amalathi akho, Nkosi yamabandla, Nkosi yami, loNkulunkulu wami.

84:4  Babusisiwe abahlala endlini yakho, bazahlala bedumisa wena. Sela*.

84:5  Ubusisiwe umuntu omandla akhe akuwe, okukhona imigwaqo emikhulu enhliziyweni yabo.

84:6  Abadabula isihotsha seBaka basenza sibe ngumthombo; yebo, insewula iyakugoqela ngezibusiso.

84:7  Bahamba besuka emandleni besiya emandleni, ngulowo lalowo abonakale phambi kukaNkulunkulu eZiyoni.

84:8  Nkosi Nkulunkulu wamabandla, zwana umkhuleko wami, ubeke indlebe, Nkulunkulu kaJakobe. Sela*.

84:9  Nkulunkulu, sihlangu sethu, khangela ubone ubuso bogcotshiweyo wakho.

84:10  Ngoba usuku emagumeni akho lungcono kulenkulungwane. Ngikhetha ukuba sembundwini womnyango endlini kaNkulunkulu wami kulokuhlala emathenteni enkohlakalo.

84:11  Ngoba iNkosi uNkulunkulu ililanga lesihlangu; iNkosi izakupha umusa lodumo; kayibagodleli okuhle abahamba ngobuqotho.

84:12  Nkosi yamabandla, ubusisiwe umuntu othemba kuwe.

Chapter 85

85:1  Nkosi, ubulomusa elizweni lakho. Ubuyisile ukuthunjwa kukaJakobe.

85:2  Wathethelela ububi babantu bakho, wasibekela zonke izono zabo. Sela*.

85:3  Ukususile konke ukuthukuthela kwakho, waphenduka ekuvutheni kolaka lwakho.

85:4  Siphendule, Nkulunkulu wosindiso lwethu, wenze ulaka lwakho kithi luphele.

85:5  Uzasithukuthelela kokuphela yini? Uzakwelulela ulaka lwakho esizukulwaneni lesizukulwana yini?

85:6  Kawuyikubuya usivuselele yini, ukuze abantu bakho bathokoze kuwe?

85:7  Sitshengise umusa wakho, Nkosi, usinike usindiso lwakho.

85:8  Ngizakuzwa lokho uNkulunkulu iNkosi azakukhuluma, ngoba uzakhuluma ukuthula ebantwini bakhe, lakwabangcwele bakhe, kodwa kabangabuyeli ebuwuleni.

85:9  Isibili usindiso lwakhe luseduze kulabo abamesabayo ukuze kuhlale udumo elizweni lakithi.

85:10  Umusa leqiniso kuyahlangabezana, ukulunga lokuthula kwangene.

85:11  Iqiniso lizaphuma emhlabeni, lokulunga kuzakhangela phansi kusemazulwini.

85:12  Yebo, iNkosi izanika okuhle, lelizwe lethu lizathela isivuno salo.

85:13  Ukulunga kuzahamba phambi kwayo, kwenzele izinyathelo zayo indlela.

Chapter 86

86:1  Beka indlebe yakho, Nkosi, ungiphendule, ngoba ngingumyanga, ngiyaswela.

86:2  Londoloza umphefumulo wami, ngoba ngiyamesaba uNkulunkulu; wena Nkulunkulu wami, sindisa inceku yakho ekuthembayo.

86:3  Woba lesihawu kimi, Nkosi, ngoba ngikhala kuwe usuku lonke.

86:4  Thokozisa umphefumulo wenceku yakho, ngoba kuwe, Nkosi, ngiyawuphakamisela umphefumulo wami.

86:5  Ngoba wena, Nkosi, ulungile, ungothethelelayo; umkhulu emuseni kubo bonke abakubizayo.

86:6  Beka indlebe, Nkosi, emkhulekweni wami; ulalele ilizwi lokuncenga kwami.

86:7  Ngosuku lokuhlupheka kwami ngizakhala kuwe, ngoba uzangiphendula.

86:8  Kakho ofanana lawe phakathi kwabonkulunkulu, Nkosi, njalo enjengemisebenzi yakho kayikho.

86:9  Izizwe zonke ozenzileyo zizakuza zikhothame phambi kwakho, Nkosi, zidumise ibizo lakho.

86:10  Ngoba wena umkhulu, wenza izinto ezimangalisayo, unguNkulunkulu wena wedwa.

86:11  Ngifundisa indlela yakho, Nkosi, ngizahamba eqinisweni lakho; hlanganisa inhliziyo yami ukuze yesabe ibizo lakho.

86:12  Ngizakudumisa, Nkosi Nkulunkulu wami, ngenhliziyo yami yonke; ngilidumise ibizo lakho kuze kube nininini.

86:13  Ngoba umusa wakho phezu kwami mkhulu; njalo wakhulula umphefumulo wami esihogweni esingaphansi kakhulu.

86:14  Nkulunkulu, abazigqajayo bangivukele, lemibuthano yabalobudlwangudlwangu idinga umphefumulo wami; njalo kabakubekanga phambi kwabo.

86:15  Kodwa wena, Nkosi, unguNkulunkulu olozwelo, lolesisa, ophuza ukuthukuthela, lomkhulu emuseni leqinisweni.

86:16  Phendukela kimi, ungihawukele; uyiphe inceku yakho amandla akho, usindise indodana yencekukazi yakho.

86:17  Ngenzela isiboniso sokuhle, ukuze labo abangizondayo babone bayangeke, ngoba wena, Nkosi, ungisizile wangiduduza.

Chapter 87

87:1  Isisekelo sayo siphezu kwentaba ezingcwele.

87:2  INkosi iyawathanda amasango eZiyoni kulazo zonke indawo zokuhlala zikaJakobe.

87:3  Izinto ezidumileyo zikhulunywa ngawe, muzi kaNkulunkulu! Sela*.

87:4  Ngizaqamba iRahabi leBhabhiloni kwabangaziyo; khangela, iFilisti leTire kanye leEthiyophiya; lo wazalelwa khona.

87:5  LangeZiyoni kuzakuthiwa: Lo lalowayana bazalelwa kuyo. LoPhezukonke uqobo uzayiqinisa.

87:6  INkosi izabala ekubhaleni kwayo abantu, ukuthi lo wazalelwa khona. Sela*.

87:7  Labahlabeleli kanye labagidi, yonke imithombo yami ikuwe.

Chapter 88

88:1  Nkosi Nkulunkulu wosindiso lwami, emini, ebusuku ngakhala phambi kwakho.

88:2  Umkhuleko wami kawuze phambi kwakho; beka indlebe yakho ekukhaleni kwami.

88:3  Ngoba umphefumulo wami ugcwele ukuhlupheka, lempilo yami ifinyelela engcwabeni.

88:4  Ngibalwa lalabo abehlela emgodini; nginjengomuntu ongelamandla.

88:5  Ngikhululwe phakathi kwabafileyo, nginjengababuleweyo abalele engcwabeni, ongasabakhumbuliyo; ngoba bequnyiwe basuswa esandleni sakho.

88:6  Ungifakile emgodini ongaphansi kakhulu, emnyameni, ekujuleni.

88:7  Intukuthelo yakho iyangeleka, langawo wonke amagagasi akho ungihluphile. Sela*.

88:8  Ususele khatshana lami abejwayelene lami; wangenza ngibe yisinengiso kubo; ngivalelwe, ngingephume.

88:9  Ilihlo lami liyaphela ngenxa yosizi. Ngikubizile lonke usuku, Nkosi, ngelulele izandla zami kuwe.

88:10  Abafileyo uyabenzela izimangaliso yini? Imimoya efileyo izavuka yini ikudumise? Sela*.

88:11  Uthando lwakho luzalandiswa yini engcwabeni? Ukuthembeka kwakho encithakalweni yini?

88:12  Izimangaliso zakho zizakwaziwa yini emnyameni? Lokulunga kwakho elizweni lokukhohlwa yini?

88:13  Kodwa mina, Nkosi, ngikhalile kuwe, lekuseni umkhuleko wami uzakuza phambi kwakho.

88:14  Nkosi, ulahlelani umphefumulo wami? Ubufihlelani ubuso bakho kimi?

88:15  Ngihluphekile ngingofayo kusukela ebutsheni, ngithwele ukwesabeka kwakho, ngikhathazekile.

88:16  Ulaka lwakho olutshisayo ludlulile phezu kwami, okwesabekayo kwakho kungiqedile.

88:17  Kungizingelezile njengamanzi usuku lonke, kungihanqile kanyekanye.

88:18  Ususele khatshana lami othandayo lomngane, abejwayelene lami basemnyameni.

Chapter 89

89:1  Ngizahlabela ngezisa zeNkosi, kuze kube nininini; ngomlomo wami ngizakwazisa ukuthembeka kwakho kusizukulwana lesizukulwana.

89:2  Ngoba ngithe: Umusa uzakwakhiwa kuze kube phakade; emazulwini ngokwawo uzaqinisa uthembeko lwakho.

89:3  Ngenze isivumelwano lomkhethwa wami, ngifungile kuDavida inceku yami.

89:4  Ngizaqinisa inzalo yakho kuze kube nininini, ngakhe isihlalo sakho sobukhosi esizukulwaneni lesizukulwana. Sela*.

89:5  Lamazulu azadumisa izimangaliso zakho, Nkosi, lalo uthembeko lwakho ebandleni labangcwele.

89:6  Ngoba ngubani esibhakabhakeni ongafananiswa leNkosi? Ngubani ofanana leNkosi phakathi kwamadodana abalamandla?

89:7  UNkulunkulu uyesabeka kakhulu emhlanganweni wabangcwele, njalo umele ukuhlonitshwa phezu kwabo bonke abamhanqileyo.

89:8  Nkosi Nkulunkulu wamabandla, ngubani olamandla njengawe, Nkosi? Lothembeko lwakho lukuhanqile.

89:9  Wena uyabusa ukukhukhumala kolwandle; lapho amagagasi alo ephakama wena uyawathulisa.

89:10  Wena wamchoboza uRahabi njengobuleweyo, wazihlakaza izitha zakho ngengalo yamandla akho.

89:11  Amazulu ngawakho, lomhlaba ngowakho; ilizwe lokugcwala kwalo, wena wakusekela.

89:12  Inyakatho leningizimu wakudala wena; iThabhori leHermoni kuzajabula ngebizo lakho.

89:13  Ulengalo elamandla, isandla sakho siqinile, isandla sakho sokunene siphakeme.

89:14  Ukulunga lesahlulelo kuyisisekelo sesihlalo sakho sobukhosi; umusa leqiniso kuhamba phambi kobuso bakho.

89:15  Babusisiwe abantu abawaziyo umsindo wentokozo; bazahamba ekukhanyeni kobuso bakho, Nkosi.

89:16  Ebizweni lakho bazathokoza usuku lonke, langokulunga kwakho bazaphakanyiswa.

89:17  Ngoba wena uludumo lwamandla abo; langomusa wakho uphondo lwethu luzaphakanyiswa.

89:18  Ngoba isihlangu sethu singeseNkosi, lenkosi yethu ingeyoNgcwele kaIsrayeli.

89:19  Khona wakhuluma ngombono kongcwele wakho, wathi: Ngibekile usizo phezu kweqhawe, ngimphakamisile okhethiweyo phakathi kwabantu.

89:20  Ngithole uDavida inceku yami, ngamafutha ami angcwele ngimgcobile,

89:21  osandla sami sizakuba laye siqinile, ingalo yami layo izamqinisa.

89:22  Isitha kasiyikumcindezela, lendodana yenkohlakalo kayiyikumhlupha.

89:23  Ngizazichoboza izitha zakhe phambi kobuso bakhe, ngihluphe abamzondayo.

89:24  Kodwa uthembeko lwami lomusa wami kuzakuba laye, lebizweni lami luzaphakanyiswa uphondo lwakhe.

89:25  Njalo ngizabeka isandla sakhe olwandle, lesandla sakhe sokunene emifuleni.

89:26  Yena uzangibiza ngokuthi: Wena ungubaba wami, uNkulunkulu wami, ledwala losindiso lwami.

89:27  Njalo mina ngizammisa abe lizibulo, aphakame kakhulu kulamakhosi omhlaba.

89:28  Ngizaligcinela umusa wami kuze kube nininini, lesivumelwano sami sizaqina kuye.

89:29  Njalo ngizamisa inzalo yakhe kuze kube nininini, lesihlalo sakhe sobukhosi njengensuku zamazulu.

89:30  Uba abantwana bakhe betshiya umlayo wami, bangahambi ngezahlulelo zami,

89:31  uba besephula izimiso zami, bengagcini imithetho yami,

89:32  ngizaphindisela iziphambeko zabo ngenduku, lesono sabo ngenswazi.

89:33  Kodwa kangiyikulususa du uthandolomusa wami kuye, ngingakhohlisi ngothembeko lwami.

89:34  Kangiyikwephula isivumelwano sami, lalokho okuphuma endebeni zami kangiyikukuguqula.

89:35  Ngafunga kwaba kanye ngobungcwele bami: Kangiyikuqamba amanga kuDavida.

89:36  Inzalo yakhe izakuba khona kuze kube nininini, lesihlalo sakhe sobukhosi njengelanga phambi kwami.

89:37  Sizaqiniswa njengenyanga kuze kube nininini, lobufakazi emayezini bumi buqinile. Sela*.

89:38  Kodwa wena usulahlile wala, wamthukuthelela ogcotshiweyo wakho.

89:39  Usenze ize isivumelwano senceku yakho; wangcolisa umqhele wakhe emhlabathini.

89:40  Uyibhobozile yonke imithangala yakhe, wazenza inqaba zakhe amanxiwa.

89:41  Bonke abadlula ngendlela bayamphanga; ulihlazo kubomakhelwane bakhe.

89:42  Usiphakamisile isandla sokunene sabamelene laye; wazithokozisa zonke izitha zakhe.

89:43  Futhi ubuyisele emuva ubukhali benkemba yakhe; kawumenzanga ame empini.

89:44  Uyiqedile inkazimulo yakhe, lesihlalo sakhe sobukhosi wasiphosela emhlabathini.

89:45  Ufinyezile insuku zobutsha bakhe, wamembesa ihlazo. Sela*.

89:46  Koze kube nini, Nkosi, ucatsha kuze kube phakade? Ulaka lwakho luvutha njengomlilo yini?

89:47  Khumbula ukuthi isikhathi sempilo yami singakanani; kungani wadalela ize bonke abantwana babantu?

89:48  Ngubani umuntu ophilayo ongaboni ukufa? Akhulule umphefumulo wakhe esandleni sengcwaba na? Sela*.

89:49  Zingaphi izisa zakho zakuqala, Nkosi, owazifunga kuDavida ngothembeko lwakho?

89:50  Khumbula, Nkosi, ihlazo lezinceku zakho, engilithwele esifubeni sami, elazo zonke izizwe ezinengi,

89:51  izitha zakho ezithuke ngalo, Nkosi, ezithuke ngalo izinyathelo zogcotshiweyo wakho.

89:52  Kayibongwe iNkosi kuze kube nininini. Ameni, loAmeni.

Chapter 90

90:1  Nkosi, wena ubuyindawo yethu yokuhlala kusizukulwana lesizukulwana.

90:2  Zingakazalwa intaba, kumbe uveze umhlaba lelizwe, ngitsho kusukela ephakadeni kuze kube sephakadeni wena unguNkulunkulu.

90:3  Uyambuyisela umuntu encithakalweni, uthi: Buyelani, bantwana babantu.

90:4  Ngoba iminyaka eyinkulungwane emehlweni akho injengelanga lezolo selidlulile, lanjengomlindo ebusuku.

90:5  Uyabakhukhula, banjengobuthongo, ekuseni banjengotshani obuhlumayo.

90:6  Ekuseni buyakhahlela, bukhule, ntambama buyasikwa, bubune.

90:7  Ngoba siqedwa yikuthukuthela kwakho, langolaka lwakho sibhujiswe.

90:8  Ubekile iziphambeko zethu phambi kwakho, izono zethu ezifihlakeleyo ekukhanyeni kobuso bakho.

90:9  Ngoba insuku zethu zonke ziyedlula elakeni lwakho; sichitha iminyaka yethu njengokubeka iphika.

90:10  Insuku zeminyaka yethu, kuleminyaka engamatshumi ayisikhombisa kuzo; njalo uba ngenxa yamandla zingamatshumi ayisificaminwembili, kanti ukuzigqaja kwayo kuyinhlupheko losizi, ngoba aphangisa aqunywe, sibe sesiphapha sinyamalale.

90:11  Ngubani owaziyo amandla okuthukuthela kwakho? Lanjengokwesabeka kwakho lunjalo ulaka lwakho.

90:12  Ngokunjalo sifundise ukubala insuku zethu, ukuze sizuze inhliziyo yenhlakanipho.

90:13  Phenduka, Nkosi! Koze kube nini? Hawukela izinceku zakho.

90:14  Sisuthise ekuseni ngomusa wakho, ukuze sithabe sijabule insuku zethu zonke.

90:15  Sithokozise njengokwensuku owasihlupha ngazo, iminyaka esabona okubi kuyo.

90:16  Umsebenzi wakho kawubonakale ezincekwini zakho, lenkazimulo yakho ebantwaneni bazo.

90:17  Ubuhle beNkosi, uNkulunkulu wethu, kabube phezu kwethu; uqinise umsebenzi wezandla zethu kithi, yebo, umsebenzi wezandla zethu uwuqinise.

Chapter 91

91:1  Ohlezi ekusithekeni koPhezukonke uzahlala emthunzini kaSomandla.

91:2  Ngizakuthi eNkosini: Uyisiphephelo sami lenqaba yami, uNkulunkulu wami, engithemba kuye.

91:3  Sibili yena uzakukhulula emjibileni womthiyi, kuye umatshayabhuqe wesifo obhubhisayo.

91:4  Uzakusibekela ngensiba zakhe, uzathembela langaphansi kwempiko zakhe; iqiniso lakhe liyisihlangu lehawu.

91:5  Kawuyikwesaba isesabiso sebusuku, umtshoko ophaphayo emini,

91:6  umatshayabhuqe wesifo ohambayo emnyameni, incithakalo ebhubhisayo emini enkulu.

91:7  Bazakuwa abayinkulungwane eceleni kwakho, labayizinkulungwane ezilitshumi ngakwesokunene sakho; kuwe kakuyikusondela.

91:8  Uzakhangela nje ngamehlo akho, ubone impindiselo kwababi.

91:9  Ngoba wena, Nkosi, uyisiphephelo sami; umenzile oPhezukonke waba yindawo yakho yokuhlala.

91:10  Kakulabubi obuzakwehlela, lenhlupheko kayiyikusondela ethenteni lakho.

91:11  Ngoba uzalaya ingilosi zakhe ngawe, ukuthi zikulondoloze endleleni zakho zonke.

91:12  Zizakuphatha ezandleni, hlezi utshayeke ngonyawo lwakho elitsheni.

91:13  Uzanyathela isilwane lebululu, uzagxoba ibhongo lesilwane, lomgobho.

91:14  Ngoba uyangithanda kakhulu, ngakho ngizamkhulula; ngizambeka phezulu, ngoba uyalazi ibizo lami.

91:15  Uzangibiza, njalo ngimphendule; ngibe laye ekuhluphekeni, ngimkhulule, ngimnike udumo.

91:16  Ngizamsuthisa ngobude bezinsuku, ngimtshengise usindiso lwami.

Chapter 92

92:1  Kuhle ukubonga iNkosi, lokuhlabela indumiso ebizweni lakho, wena oPhezukonke;

92:2  ukutshumayela uthandolomusa wakho ekuseni, lothembeko lwakho ebusuku bonke,

92:3  ngechacho elilentambo ezilitshumi, langogubhu lwezintambo, ngechacho elikhala kamnandi.

92:4  Ngoba ungithokozisile, Nkosi, ngomsebenzi wakho; ngizamemeza ngenjabulo ngemisebenzi yezandla zakho.

92:5  Mikhulu kangakanani imisebenzi yakho, Nkosi! Izikile kakhulu imicabango yakho.

92:6  Isiphukuphuku kasazi, lesithutha kasikuqedisisi lokhu.

92:7  Lapho ababi behluma njengotshani, labo bonke abenzi bobubi bekhahlela, kuyikuze babhujiswe kuze kube phakade.

92:8  Kodwa wena, Nkosi, uphakeme kuze kube nininini.

92:9  Ngoba khangela, izitha zakho, Nkosi, ngoba khangela, izitha zakho zizabhubha; bonke abenzi bobubi bazachitheka.

92:10  Kodwa uzaphakamisa uphondo lwami njengolwenyathi; ngizagcotshwa ngamafutha amatsha.

92:11  Lelihlo lami lizabona isiloyiso sami ezitheni zami, indlebe zami zizakuzwa mayelana lababi abangivukelayo.

92:12  Olungileyo uzahluma njengesihlahla selala, akhule njengomsedari eLebhanoni.

92:13  Abahlanyelwe endlini yeNkosi, bazahluma emagumeni kaNkulunkulu wethu.

92:14  Bazabe belokhu bethela izithelo ebudaleni babo, bakhuluphale babeluhlaza,

92:15  ukutshumayela ukuthi iNkosi iqondile; ilidwala lami, njalo kakukho ukungalungi kiyo.

Chapter 93

93:1  INkosi iyabusa; yembethe ubukhosi; iNkosi yembethe amandla; izibhincisile. Umhlaba lawo uqinisiwe, kawuyikunyikinywa.

93:2  Isihlalo sakho sobukhosi samiswa kwasendulo; usukela ephakadeni.

93:3  Imifula iphakamisile, Nkosi, imifula iphakamise ukuholoba kwayo, imifula iphakamisile amagagasi ayo agubhazelayo.

93:4  INkosi ephakemeyo ilamandla kulokuduma kwamanzi amanengi, kulamagagasi olwandle agubhazayo alamandla.

93:5  Izifakazelo zakho ziqinisekile kakhulu; ubungcwele buyifanele indlu yakho, Nkosi, kuze kube ebudeni bezinsuku.

Chapter 94

94:1  Nkosi, Nkulunkulu wempindiselo, Nkulunkulu wempindiselo, khanyisa!

94:2  Phakama, Mahluleli womhlaba, uphindisele umvuzo kwabazigqajayo.

94:3  Nkosi, koze kube nini ababi, koze kube nini ababi begiya?

94:4  Bepopota, bekhuluma ngokuziphakamisa, bonke abenzi bobubi bezikhukhumeza?

94:5  Nkosi, bayabaphohloza abantu bakho, bayalihlupha ilifa lakho.

94:6  Babulala umfelokazi lowezizweni, lentandane bazibulale.

94:7  Kanti bathi: INkosi kayiboni, loNkulunkulu kaJakobe kananzi.

94:8  Qedisisani, lina bobunyamazana phakathi kwabantu; lani ziphukuphuku, lizahlakanipha nini?

94:9  Yena owagxumeka indlebe kezwa yini? Owabumba ilihlo kaboni yini?

94:10  Yena olaya izizwe kajezisi yini; yena ofundisa umuntu ulwazi, kazi yini?

94:11  INkosi iyayazi imicabango yomuntu ukuthi iyize.

94:12  Nkosi, ubusisiwe lowomuntu omlayayo, omfundisayo okomlayo wakho,

94:13  ukumphumuza ezinsukwini zobubi, kuze kugejelwe omubi umgodi.

94:14  Ngoba iNkosi kayiyikubalahla abantu bayo, kayiyikulitshiya ilifa layo.

94:15  Kodwa isahlulelo sizabuyela ekulungeni, labo bonke abaqotho enhliziyweni bazakulandela.

94:16  Ngubani ozangisukumela amelane lababi? Ngubani ozangimela kubenzi bobubi?

94:17  Uba iNkosi ibingesilo usizo lwami, umphefumulo wami ubuzaphosa uhlale ekuthuleni zwi.

94:18  Lapho ngathi: Unyawo lwami luyatshelela, umusa wakho, Nkosi, wangisekela.

94:19  Ebunengini bemicabango yami engaphakathi kwami induduzo zakho zithokozisa umphefumulo wami.

94:20  Isihlalo sobukhosi sobubi singahlanganyela lawe, sibumba inkohlakalo ngomthetho yini?

94:21  Bayahlangana ukumelana lomphefumulo wolungileyo, balahla igazi elingelacala.

94:22  Kodwa iNkosi iyinqaba yami, loNkulunkulu wami ulidwala lokuphephela kwami.

94:23  Izaphindisela phezu kwabo ububi babo, ibaqede enkohlakalweni yabo; iNkosi uNkulunkulu wethu izabaquma.

Chapter 95

95:1  Wozani, siyihlabelele iNkosi, senze umsindo wentokozo kulo idwala losindiso lwethu.

95:2  Kasize phambi kobuso bayo ngokubonga, senze umsindo wentokozo kuyo ngezihlabelelo.

95:3  Ngoba iNkosi inguNkulunkulu omkhulu, leNkosi enkulu phezu kwabonkulunkulu bonke.

95:4  Okusesandleni sayo indawo zomhlaba ezizikileyo, lezingqonga zezintaba zingezayo.

95:5  Olungolwayo ulwandle, yona-ke yalwenza, lezandla zayo zabumba umhlabathi owomileyo.

95:6  Wozani, sikhonze sikhothame, siguqe phambi kweNkosi, umenzi wethu.

95:7  Ngoba yona inguNkulunkulu wethu, thina-ke singabantu bedlelo layo, lezimvu zesandla sayo. Lamuhla uba lilizwa ilizwi layo,

95:8  lingayenzi ibe lukhuni inhliziyo yenu njengekuphikisaneni, njengesukwini lokulinga enkangala,

95:9  lapho oyihlo bangilinga bengihlola, yebo babona umsebenzi wami.

95:10  Iminyaka engamatshumi amane nganengwa yilesisizukulwana ngaze ngathi: Bangabantu abaduhayo enhliziyweni, bona kabazazi indlela zami.

95:11  Engafunga kubo ekuthukutheleni kwami, ngathi: Kabayikungena ekuphumuleni kwami.

Chapter 96

96:1  Hlabelani eNkosini ingoma entsha; hlabelelani eNkosini, mhlaba wonke.

96:2  Hlabelani eNkosini, lidumise ibizo layo, litshumayele usindiso lwayo insuku ngensuku.

96:3  Landisani udumo lwayo phakathi kwezizwe, izimangaliso zayo phakathi kwabantu bonke.

96:4  Ngoba yinkulu iNkosi, ifanele ukudunyiswa kakhulu, yona iyesabeka phezu kwabonkulunkulu bonke.

96:5  Ngoba bonke onkulunkulu bezizwe bayizithombe; kodwa iNkosi yenza amazulu.

96:6  Ubukhosi lenkazimulo kuphambi kwayo, amandla lobuhle kusendlini yayo engcwele.

96:7  Inikeni iNkosi, zizukulwana zezizwe, inikeni iNkosi udumo lamandla.

96:8  Inikeni iNkosi udumo lwebizo layo; lethani umnikelo, lingene emagumeni ayo.

96:9  Ikhonzeni iNkosi ebuhleni bobungcwele; lithuthumele phambi kwayo, mhlaba wonke.

96:10  Tshonini phakathi kwezizwe: INkosi iyabusa. Lomhlaba umisiwe, kawuyikunyikinyeka; izabahlulela abantu ngokuqonda.

96:11  Kawathokoze amazulu, lomhlaba ujabule; kaluhlokome ulwandle lokugcwala kwalo.

96:12  Iganga kalithabe lakho konke okukulo. Khona izihlahla zonke zegusu zizahlabela ngentokozo

96:13  phambi kweNkosi, ngoba iyeza, ngoba iyeza ukwahlulela umhlaba; izakwahlulela umhlaba ngokulunga, labantu ngeqiniso layo.

Chapter 97

97:1  INkosi iyabusa; kawuthokoze umhlaba, kazijabule izihlenge ezinengi.

97:2  Amayezi lomnyama kuyiphahlile; ukulunga lesahlulelo kuyisisekelo sesihlalo sayo sobukhosi.

97:3  Umlilo uhamba phambi kwayo, utshisa izitha zayo inhlangothi zonke.

97:4  Imibane yayo ikhanyisa umhlaba; umhlaba wabona, wathuthumela.

97:5  Izintaba zancibilika njengengcino phambi kweNkosi, phambi kweNkosi yomhlaba wonke.

97:6  Amazulu atshumayela ukulunga kwayo, labantu bonke babona inkazimulo yayo.

97:7  Bayayangeka bonke abakhonza izithombe, abazikhukhumeza ngezithixo; ikhonzeni, lonke bonkulunkulu.

97:8  IZiyoni yezwa, yathokoza, lamadodakazi akoJuda athaba ngenxa yezahlulelo zakho, Nkosi.

97:9  Ngoba wena, Nkosi, uphakeme phezu komhlaba wonke, uphakanyiswe kakhulu phezu kwabonkulunkulu bonke.

97:10  Lina elithanda iNkosi, zondani okubi; iyagcina imiphefumulo yabangcwele bayo, ibakhulule esandleni sababi.

97:11  Ukukhanya kuhlanyelelwe olungileyo, lentokozo abaqotho ngenhliziyo.

97:12  Thokozani eNkosini, lina balungileyo, libonge ekukhumbuleni ubungcwele bayo.

Chapter 98

98:1  Hlabelelani iNkosi ingoma entsha, ngoba yenzile izimangaliso; isandla sayo sokunene lengalo yayo engcwele kuyizuzele ukunqoba.

98:2  INkosi yazisile usindiso lwayo, yembule ukulunga kwayo emehlweni ezizwe.

98:3  Ikhumbule umusa wayo leqiniso layo kuyo indlu kaIsrayeli. Imikhawulo yonke yomhlaba ibonile usindiso lukaNkulunkulu wethu.

98:4  Hlokomani ngentokozo eNkosini, mhlaba wonke, lenze umsindo omkhulu, lithokoze, lihlabele indumiso.

98:5  Hlabelelani eNkosini ngechacho, ngechacho lelizwi lokuhlabelela.

98:6  Ngezimpondo langomsindo wophondo lwenqama hlokomani ngentokozo phambi kweNkosi, uJehova.

98:7  Kaluholobe ulwandle lokugcwala kwalo, umhlaba labahlala kuwo.

98:8  Imifula kayitshaye izandla, izintaba zihlabelele ndawonye ngentokozo

98:9  phambi kweNkosi, ngoba iyeza ukwahlulela umhlaba; izawahlulela umhlaba ngokulunga, lezizwe ngokuqonda.

Chapter 99

99:1  INkosi iyabusa; abantu kabathuthumele; ihlezi phakathi kwamakherubhi*; umhlaba kawuzamazame.

99:2  INkosi yinkulu eZiyoni; njalo iphakeme phezu kwezizwe zonke.

99:3  Kazidumise ibizo lakho elikhulu lelesabekayo; lingcwele lona.

99:4  Lamandla eNkosi athanda isahlulelo; wena umisa ukuqonda; wena wenza isahlulelo lokulunga kuJakobe.

99:5  Phakamisani iNkosi uNkulunkulu wethu, likhonze esenabelweni sezinyawo zayo. Ingcwele yona.

99:6  UMozisi loAroni phakathi kwabapristi bayo, loSamuweli phakathi kwababiza ibizo layo, babiza iNkosi, yona yasibaphendula.

99:7  Yakhuluma labo iphakathi kwensika yeyezi; bagcina izifakazelo zayo lesimiso eyabanika sona.

99:8  Nkosi Nkulunkulu wethu, wena wabaphendula; waba nguNkulunkulu obathethelelayo, lanxa uphindisela ezenzweni zabo.

99:9  Phakamisani iNkosi uNkulunkulu wethu, likhonze entabeni yayo engcwele; ngoba iNkosi uNkulunkulu wethu ingcwele.

Chapter 100

100:1  Hlabelelani iNkosi ngokuthaba, mhlaba wonke.

100:2  Ikhonzeni iNkosi ngenjabulo, wozani phambi kwayo ngokuhlabela ngentokozo.

100:3  Yazini ukuthi iNkosi inguNkulunkulu. Yiyo eyasenzayo, njalo ayisithi: singabantu bayo lezimvu zedlelo layo.

100:4  Ngenani emasangweni ayo ngokubonga, emagumeni ayo ngokudumisa. Ibongeni, lidumise ibizo layo.

100:5  Ngoba iNkosi ilungile; umusa wayo uhlezi kuze kube nininini, leqiniso layo esizukulwaneni lesizukulwana.

Chapter 101

101:1  Ngizahlabela ngomusa lesahlulelo; ngizahlabela kuwe, Nkosi.

101:2  Ngizaziphatha ngenhlakanipho ngendlela eqotho. Uzakuza nini kimi? Ngizahamba ngobuqotho benhliziyo yami phakathi kwendlu yami.

101:3  Kangiyikubeka phambi kwamehlo ami into embi. Ngiyakuzonda ukwenza kwabaphambukayo; kakuyikunamathela kimi.

101:4  Inhliziyo ephambeneyo izasuka kimi; kangiyikumazi omubi.

101:5  Ohleba umakhelwane wakhe ensitha, yena ngizamquma. Ophakeme ngamehlo, lolenhliziyo ezikhukhumezayo, yena kangiyikumvumela.

101:6  Amehlo ami azakuba kwabathembekileyo belizwe, ukuze bahlale lami. Ohamba endleleni eqotho, yena uzangikhonza.

101:7  Owenza inkohliso kayikuhlala phakathi kwendlu yami; okhuluma amanga kayikuma phambi kwamehlo ami.

101:8  Insuku zonke ekuseni ngizabaquma bonke ababi belizwe, ukuze ngibaqume basuke emzini weNkosi bonke abenzi bobubi.

Chapter 102

102:1  Nkosi, zwana umkhuleko wami, lokukhala kwami kakuze kuwe.

102:2  Ungangifihleli ubuso bakho osukwini lohlupho lwami; beka indlebe yakho kimi; mhla ngibiza ungiphendule masinyane.

102:3  Ngoba insuku zami ziyanyamalala njengentuthu, lamathambo ami ayatsha njengeziko.

102:4  Inhliziyo yami itshayiwe, yabuna njengotshani, ngaze ngakhohlwa ukudla isinkwa sami.

102:5  Ngenxa yelizwi lokububula kwami amathambo ami anamathela esikhumbeni sami.

102:6  Ngifanana lewunkwe yenkangala, senginjengesikhova sezindawo ezidilikileyo.

102:7  Ngiyalinda, senginjengenyoni ehlezi yodwa ephahleni.

102:8  Izitha zami ziyangithuka usuku lonke; abangihlanyelayo bafunga ngami.

102:9  Ngoba ngidle umlotha njengesinkwa, ngixubanise okunathwayo kwami lezinyembezi,

102:10  ngenxa yentukuthelo yakho lolaka lwakho; ngoba ungiphakamisile, wasungilahla phansi.

102:11  Insuku zami zinjengesithunzi eselulekayo, njalo mina ngiyabuna njengotshani.

102:12  Kodwa wena, Nkosi, uzahlala kuze kube nininini, lesikhumbuzo sakho kusizukulwana lesizukulwana.

102:13  Wena uzavuka uhawukele iZiyoni; ngoba isikhathi sokuyitshengisa umusa, yebo, isikhathi esimisiweyo sesifikile.

102:14  Ngoba inceku zakho ziyawathanda amatshe ayo, zilesihawu ethulini lwayo.

102:15  Khona izizwe zizalesaba ibizo leNkosi, lamakhosi wonke omhlaba udumo lwayo.

102:16  Lapho iNkosi izayakha iZiyoni, izabonakala enkazimulweni yayo.

102:17  Izaphendukela emkhulekweni wongelalutho, kayiyikudelela umthandazo wabo.

102:18  Lokhu kuzabhalelwa isizukulwana esilandelayo, labantu abazadalwa bazadumisa iNkosi.

102:19  Ngoba yakhangela phansi isekuphakameni kwendawo yayo engcwele; iNkosi isemazulwini yakhangela emhlabeni,

102:20  ukuzwa ukububula kwesibotshwa, ukukhulula abamiselwa ukufa;

102:21  ukulandisa ibizo leNkosi eZiyoni, lendumiso yayo eJerusalema,

102:22  lapho izizwe zibuthana ndawonye, lemibuso, ukuyikhonza iNkosi.

102:23  Yathoba amandla ami endleleni, yafinyeza insuku zami.

102:24  Ngathi: Nkulunkulu wami, ungangisusi phakathi kwensuku zami, iminyaka yakho isesizukulwaneni lezizukulwana.

102:25  Endulo wawusekela umhlaba, lamazulu angumsebenzi wezandla zakho.

102:26  Lokho kuzabhubha, kodwa wena uzakuma. Kuzaguga-ke konke njengesembatho, njengesigqoko uzakuguqula, njalo kuzaguqulwa.

102:27  Kodwa wena unguwe njalo, leminyaka yakho kayipheli.

102:28  Abantwana benceku zakho bazahlala, lenzalo yazo izaqiniswa phambi kwakho.

Chapter 103

103:1  Bonga iNkosi, mphefumulo wami, lakho konke okuphakathi kwami kubonge ibizo layo elingcwele.

103:2  Busisa iNkosi, mphefumulo wami, ungakhohlwa zonke izinzuzo zayo,

103:3  ethethelela zonke izono zakho, eyelapha zonke izifo zakho,

103:4  ehlenga impilo yakho ekubhujisweni, ekwethwesa umqhele womusa lezihawu,

103:5  esuthisa umlomo wakho ngokuhle, ukuze ubutsha bakho buvuswe njengobokhozi.

103:6  INkosi iyabenzela ukulunga lezahlulelo bonke abacindezelweyo.

103:7  Yamazisa uMozisi indlela zayo, abantwana bakoIsrayeli izenzo zayo.

103:8  INkosi ilesihawu lomusa, iyaphuza ukuthukuthela, njalo ivame ububele.

103:9  Kayiyikuphikisana njalonjalo, kayiyikugcina intukuthelo kuze kube nininini.

103:10  Kayisenzelanga njengokwezono zethu, kayisiphindiselanga njengokweziphambeko zethu.

103:11  Ngoba njengokuphakama kwamazulu ngaphezu komhlaba, umkhulu umusa wayo kubo abayesabayo.

103:12  Njengobukhatshana bempumalanga kuyo intshonalanga, ngokunjalo izisusele khatshana lathi iziphambeko zethu.

103:13  Njengoyise ehawukela abantwana, iNkosi iyabahawukela labo abayesabayo.

103:14  Ngoba iyakwazi ukubunjwa kwethu, ikhumbula ukuthi siluthuli.

103:15  Umuntu, insuku zakhe zinjengotshani; njengeluba leganga, ngokunjalo uyakhahlela.

103:16  Ngoba umoya wedlula phezu kwakhe, njalo angabikho, lendawo yakhe ingabe isamazi.

103:17  Kodwa umusa weNkosi usukela ephakadeni usiya ephakadeni phezu kwabayesabayo, lokulunga kwayo kuze kube sebantwaneni babantwana,

103:18  kubo abagcina isivumelwano sayo, lakubo abakhumbula imithetho yayo ukuyenza.

103:19  INkosi imisile isihlalo sayo sobukhosi emazulwini, lombuso wayo ubusa phezu kwakho konke.

103:20  Busisani iNkosi, lina zingilosi zayo, maqhawe alamandla, ezenza ilizwi layo, lilalela ilizwi lelizwi layo.

103:21  Bongani iNkosi, lonke mabandla ayo, zikhonzi zayo, ezenza intando yayo.

103:22  Bongani iNkosi, lonke misebenzi yayo, endaweni zonke zombuso wayo. Bonga iNkosi, mphefumulo wami.

Chapter 104

104:1  Bonga iNkosi, mphefumulo wami. Nkosi Nkulunkulu wami, umkhulu kakhulu; wembethe ubukhosi lodumo.

104:2  Ozembesa ngokukhanya njengesembatho, owendlala amazulu njengekhetheni.

104:3  Owabeka imijabo yamakamelo akhe aphezulu emanzini, owenza amayezi abe yinqola yakhe, ohamba phezu kwempiko zomoya.

104:4  Owenza izingilosi zakhe zibe yimimoya, izinceku zakhe zibe ngumlilo olamalangabi.

104:5  Wamisa umhlaba phezu kwezisekelo zawo, kawuyikuzanyazanyiswa phakade laphakade.

104:6  Wawugubuzela ngokujula njengesembatho; amanzi ema phezu kwezintaba.

104:7  Ekukhuzeni kwakho abaleka; elizwini lokuduma kwakho aphangisa asuka;

104:8  - zenyuka izintaba, zehla izihotsha - endaweni owawuwamisele wona.

104:9  Wamisa umngcele angewudlule, kawayikubuya agubuzele umhlaba.

104:10  Othumela imithombo ezihotsheni, yahamba phakathi kwezintaba.

104:11  Yanathisa yonke inyamazana yeganga, obabhemi beganga bacitsha ukoma kwabo.

104:12  Inyoni zamazulu zakhela emaceleni ayo, zizwakalisa ilizwi ziphakathi kwezingatsha.

104:13  Uthelela izintaba esemakamelweni akhe aphezulu; umhlaba usuthiswa ngesithelo semisebenzi yakho.

104:14  Umilisela izifuyo utshani, lemibhida yokusiza umuntu, ukuveza ukudla emhlabathini,

104:15  lewayini elithokozisa inhliziyo yomuntu, ukwenza ubuso bukhanye ngamafutha, lesinkwa esiqinisa inhliziyo yomuntu.

104:16  Ziyasutha izihlahla zeNkosi, imisedari yeLebhanoni eyayihlanyelayo.

104:17  Lapho inyoni ezakhela khona izidleke; ingabuzane, izihlahla zefiri ziyindlu yalo.

104:18  Intaba eziphakemeyo zingezamagogo, amadwala ayisiphephelo sezimbila.

104:19  Inyanga wayenzela izikhathi ezimisiweyo; ilanga liyazi ukutshona kwalo.

104:20  Wenza umnyama, kube sebusuku, phakathi kwabo kuphume yonke inyamazana yehlathi.

104:21  Izilwane ezintsha zibhongela impango, lokudinga ukudla kwazo kuNkulunkulu.

104:22  Ilanga liphuma, zibuthane, zilale ezikhundleni zazo.

104:23  Umuntu uphuma aye emsebenzini wakhe lemtshikatshikeni wakhe kuze kuhlwe.

104:24  Minengi kangakanani imisebenzi yakho, Nkosi! Yonke uyenze ngenhlakanipho; umhlaba ugcwele inotho yakho.

104:25  Lolulwandle olukhulu lolubanzi ngezinhlangothi, lapho okulezihuquzelayo khona ezingelakubalwa, izinto eziphilayo ezincinyane kanye lezinkulu.

104:26  Kuhamba khona imikhumbi, uLeviyathani* owambumbela ukuthi adlale kulo.

104:27  Zonke lezi zilindele kuwe, ukuthi uzinike ukudla kwazo ngesikhathi sazo.

104:28  Uyazinika, zibuthe; uvula isandla sakho, zisuthe okuhle.

104:29  Ufihla ubuso bakho, zikhathazeke; ususa umoya wazo, zife, zibuyele ethulini lwazo.

104:30  Uthumela umoya wakho, zidalwe; wenze bube butsha ubuso bomhlaba.

104:31  Udumo lweNkosi kalume kuze kube nininini; iNkosi kayithokoze ngemisebenzi yayo.

104:32  Ikhangela umhlaba, uthuthumele; ithinta izintaba, zithunqe.

104:33  Ngizahlabelela iNkosi ngisaphila; ngizahlabelela indumiso kuNkulunkulu wami nxa ngisekhona.

104:34  Ukuzindla kwami ngaye kuzakuba mnandi; mina ngizathokoza eNkosini.

104:35  Izoni kaziqedwe emhlabeni, kungabe kusaba khona ababi. Bonga iNkosi, mphefumulo wami. Dumisani iNkosi!

Chapter 105

105:1  Bongani iNkosi, libize ibizo layo, lazise phakathi kwezizwe izenzo zayo.

105:2  Hlabelelani kuyo, lihlabelele amahubo kuyo, likhulume ngezenzo zayo zonke ezimangalisayo.

105:3  Zincomeni ebizweni layo elingcwele; kayithokoze inhliziyo yabadinga iNkosi.

105:4  Dingani iNkosi lamandla ayo, lidinge ubuso bayo njalonjalo.

105:5  Khumbulani izenzo zayo ezimangalisayo eyazenzayo, izimangaliso zayo lezahlulelo zomlomo wayo,

105:6  nzalo kaAbrahama inceku yayo, bantwana bakaJakobe abakhethiweyo bayo.

105:7  Yona iyiNkosi uNkulunkulu wethu; izahlulelo zayo zisemhlabeni wonke.

105:8  Iyakhumbula isivumelwano sayo kuze kube nininini, ilizwi eyalilaya kuzizukulwana eziyinkulungwane,

105:9  eyasenza loAbrahama, lesifungo sayo kuIsaka;

105:10  eyasiqinisa kuJakobe saba yisimiso, kuIsrayeli saba yisivumelwano esilaphakade,

105:11  isithi: Ngizakunika wena ilizwe leKhanani, isabelo selifa lakho.

105:12  Besebalutshwana ngenani, yebo, bebalutshwana, labemzini kulo;

105:13  basebezula besuka esizweni besiya esizweni, besuka komunye umbuso besiya kwabanye abantu;

105:14  kayivumelanga muntu ukubahlupha; yasikhuza amakhosi ngenxa yabo,

105:15  isithi: Lingathinti abagcotshiweyo bami, lingoni abaprofethi bami.

105:16  Yasibiza indlala phezu kwelizwe, yephula udondolo lonke lwesinkwa.

105:17  Yathuma indoda phambi kwabo: UJosefa wathengiswa waba yisigqili.

105:18  Bazwisa ubuhlungu inyawo zakhe ngamaketane, yena ngokwakhe wafika ensimbini.

105:19  Kwaze kwaba yisikhathi sokufika kwelizwi lakhe, ilizwi likaJehova lamlinga.

105:20  Inkosi yathuma yamthukulula, umbusi wabantu wasemkhulula.

105:21  Yambeka waba yinkosi yendlu yayo, lombusi wemfuyo yayo yonke,

105:22  ukubopha iziphathamandla zayo ngokuthanda kwakhe, afundise abadala bakhe ukuhlakanipha.

105:23  UIsrayeli wasefika eGibhithe; uJakobe wahlala njengowezizwe elizweni lakoHamu.

105:24  Wenza abantu bayo bazale kakhulu, yabenza baba lamandla kulezitha zabo.

105:25  Yaphendula inhliziyo yabo ukuzonda abantu bayo, ukuthi baphathe inceku zayo ngobuqili.

105:26  Yasithuma uMozisi inceku yayo, uAroni eyayimkhethile.

105:27  Babeka phakathi kwabo izinto zezibonakaliso zayo, lezimangaliso elizweni lakoHamu.

105:28  Yathumela umnyama, yenza kwaba mnyama; njalo kabavukelanga ilizwi layo.

105:29  Yaphendula amanzi abo aba ligazi, yabulala inhlanzi zawo.

105:30  Ilizwe labo lanyakazela amaxoxo, emakamelweni amakhosi abo.

105:31  Yakhuluma, kwavela umtshitshi wezibawu, intwala emngceleni wabo wonke.

105:32  Yabanika isiqhotho saba lizulu, umlilo olamalangabi elizweni labo.

105:33  Yasitshaya isivini sabo lomkhiwa wabo, yephula izihlahla zomngcele wabo.

105:34  Yakhuluma, kwasekuvela isikhonyane lemihogoyi, okungelakubalwa,

105:35  okwaqeda yonke imibhida elizweni labo, kwaqeda isithelo somhlabathi wabo.

105:36  Yasitshaya amazibulo wonke elizweni labo, okokuqala kwamandla abo wonke.

105:37  Yasibakhupha belesiliva legolide, njalo kwakungekho owakhubekayo phakathi kwezizwe zabo.

105:38  IGibhithe yathokoza ekuphumeni kwabo, ngoba uvalo ngabo lwabehlela.

105:39  Yendlala iyezi laba yisisibekelo, lomlilo wokukhanyisa ebusuku.

105:40  Bacela, yasiletha izagwaca, yabasuthisa ngesinkwa samazulu.

105:41  Yavula idwala, kwampompoza amanzi; ahamba endaweni ezomileyo njengomfula.

105:42  Ngoba yakhumbula isithembiso sayo esingcwele, loAbrahama inceku yayo.

105:43  Yasikhupha abantu bayo ngentokozo, abakhethiweyo bayo ngenjabulo.

105:44  Yasibanika amazwe abezizwe, njalo badla ilifa lomtshikatshika wabantu,

105:45  ukuze bagcine izimiso zayo, balondoloze imilayo yayo. Dumisani iNkosi!

Chapter 106

106:1  Dumisani iNkosi! Ibongeni iNkosi ngoba ilungile, ngoba umusa wayo umi kuze kube nininini.

106:2  Ngubani ongalandisa izenzo ezilamandla zeNkosi, azwakalise yonke indumiso yayo?

106:3  Babusisiwe abagcina izahlulelo, owenza ukulunga ngaso sonke isikhathi.

106:4  Ngikhumbule, Nkosi, ngothando olalo kubantu bakho; ngethekelele ngosindiso lwakho;

106:5  ukuze ngibone okuhle kwabakhethiweyo bakho, ukuze ngithokoze entokozweni yesizwe sakho, ukuze ngizincome kanye lelifa lakho.

106:6  Sonile kanye labobaba, senze okubi, senza ngenkohlakalo.

106:7  Obaba eGibhithe kabaqedisisanga izimangaliso zakho; kabakhumbulanga ubunengi bezisa zakho; kodwa benza umvukela elwandle, eLwandle oluBomvu.

106:8  Loba kunjalo wabakhulula ngenxa yebizo lakhe, ukuze azise amandla akhe.

106:9  Wasekhuza uLwandle oluBomvu, lwatsha; wasebahambisa phakathi kwezinziki njengenkangala.

106:10  Wasebasindisa esandleni somzondi, wabahlenga esandleni sesitha.

106:11  Amanzi asibekela izitha zabo; kakusalanga loyedwa kuzo.

106:12  Basebekholwa amazwi akhe, bahlabelela indumiso yakhe.

106:13  Baphanga bakhohlwa imisebenzi yakhe, kabalindelanga iseluleko sakhe.

106:14  Kodwa bakhanuka lokukhanuka ehlane, bamlinga uNkulunkulu enkangala.

106:15  Wasebanika isicelo sabo, kodwa wathumela ukucaka emphefumulweni wabo.

106:16  Basebesiba lomhawu ngoMozisi enkambeni, ngoAroni ongcwele weNkosi.

106:17  Umhlaba wavuleka waginya uDathani, wasibekela iqembu likaAbiramu.

106:18  Lomlilo wavutha eqenjini labo, ilangabi latshisa abakhohlakeleyo.

106:19  Benza ithole eHorebe, bakhonza isithombe esibunjwe ngokuncibilikisa.

106:20  Basebeguqula inkazimulo yabo yaba yisifaniso senkabi edla utshani.

106:21  Bamkhohlwa uNkulunkulu umsindisi wabo, owayenze izinto ezinkulu eGibhithe,

106:22  izimangaliso elizweni likaHamu; izinto ezesabekayo eLwandle oluBomvu.

106:23  Ngakho wathi uzababhubhisa, ngaphandle kokuthi uMozisi okhethiweyo wakhe wayemile ekufohleni phambi kwakhe ukuphendula ulaka lwakhe ukuze angababhubhisi.

106:24  Yebo, baleyisa ilizwe elihle, kabalikholwanga ilizwi lakhe.

106:25  Kodwa bakhonona emathenteni abo, kabalilalelanga ilizwi leNkosi.

106:26  Ngakho waphakamisa isandla sakhe emelene labo, ukubawisa enkangala,

106:27  lokuwisa inzalo yabo phakathi kwezizwe, lokubahlakaza emazweni.

106:28  Basebezihlanganisa loBhali-Peyori, badla imihlatshelo yabafileyo.

106:29  Basebemthukuthelisa ngezenzo zabo, lenhlupheko yafohlela kibo.

106:30  Kwasekusukuma uPhinehasi, wenza isigwebo, inhlupheko yasimiswa.

106:31  Lokhu kwasekubalelwa kuye kube yikulunga, esizukulwaneni ngesizukulwana kuze kube nininini.

106:32  Basebemthukuthelisa emanzini empikisano, kwaze kwaba kubi kuMozisi ngenxa yabo.

106:33  Ngoba bacunula umoya wakhe, waze wakhuluma ngamawala ngendebe zakhe.

106:34  Kabazibhubhisanga izizwe, iNkosi eyayibatshele ngazo.

106:35  Kodwa bazihlanganisa lezizwe, bafunda imisebenzi yazo.

106:36  Basebekhonza izithombe zazo ezaba ngumjibila kubo.

106:37  Lamadodana abo lamadodakazi abo bawahlabela amadimoni.

106:38  Bachitha igazi elingelacala, igazi lamadodana abo lamadodakazi abo, abawahlabela izithombe zeKhanani; lelizwe langcoliswa ngegazi elinengi.

106:39  Basebengcola ngemisebenzi yabo, baphinga ngezenzo zabo.

106:40  Ngakho ulaka lweNkosi lwabavuthela abantu bayo, yanengwa yilifa layo.

106:41  Yabanikela esandleni sezizwe, lababazondayo bababusa.

106:42  Lezitha zabo zabacindezela, basebethotshiswa ngaphansi kwesandla sazo.

106:43  Yabakhulula kanengi; kodwa bona bayivukela ngecebo labo, behliswa ngobubi babo.

106:44  Loba kunjalo yabona ukuhlupheka kwabo, lapho isizwa ukukhala kwabo.

106:45  Yabakhumbulela isivumelwano sayo, yazisola njengobunengi bezisa zayo.

106:46  Yabanika izisa phambi kwabo bonke ababebathumbile.

106:47  Sisindise, Nkosi Nkulunkulu wethu, usibuthe sivela ezizweni, ukubonga ibizo lakho elingcwele, ukuzincoma endumisweni yakho.

106:48  Kayibongwe iNkosi, uNkulunkulu kaIsrayeli, kusukela phakade kuze kube sephakadeni! Abantu bonke kabathi: Ameni. Dumisani iNkosi!

Chapter 107

107:1  Ibongeni iNkosi, ngoba ilungile, ngoba umusa wayo umi kuze kube phakade.

107:2  Kabatsho njalo abahlengiweyo beNkosi ebahlengileyo esandleni sesitha.

107:3  Yababutha bevela emazweni, empumalanga lentshonalanga, enyakatho lelwandle.

107:4  Bazulazula enkangala endleleni yenhlane, kabatholanga umuzi wokuhlala.

107:5  Belambile njalo bomile, umphefumulo wabo waphela amandla phakathi kwabo.

107:6  Khona bakhala eNkosini ekuhluphekeni kwabo, yabakhulula ezinsizini zabo.

107:7  Yabakhokhela ngendlela eqondileyo, ukuze baye emzini wokuhlala.

107:8  Kabayidumise iNkosingomusa wayo langemisebenzi yayo emangalisayo ebantwaneni babantu!

107:9  Ngoba iyasuthisa umphefumulo olangathayo, lomphefumulo olambileyo iwugcwalisa ngokuhle.

107:10  Abahlala emnyameni lethunzini lokufa, bebotshiwe ensizini lensimbini,

107:11  ngoba bavukela amazwi kaNkulunkulu, badelela iseluleko soPhezukonke.

107:12  Ngakho wathoba inhliziyo yabo ngokuhlupheka; bakhubeka, njalo kwakungekho umsizi.

107:13  Khona bakhala eNkosini ekuhluphekeni kwabo, yabasindisa ezinsizini zabo.

107:14  Yabakhupha emnyameni lethunzini lokufa, yaqamula izibopho zabo.

107:15  Kabayidumise iNkosingomusa wayo, langemisebenzi yayo emangalisayo ebantwaneni babantu!

107:16  Ngoba yephule izivalo zethusi, yaquma imigoqo yensimbi.

107:17  Abayizithutha, ngenxa yendlela yeziphambeko zabo langenxa yezono zabo, bahlutshiwe.

107:18  Umphefumulo wabo wenyanya ukudla konke, basondela emasangweni okufa.

107:19  Khona bakhala eNkosini ekuhluphekeni kwabo, yabasindisa ezinsizini zabo.

107:20  Yathumela ilizwi layo, yabasilisa, yabakhulula emigodini yabo.

107:21  Kabayidumise iNkosingomusa wayo, langemisebenzi yayo emangalisayo ebantwaneni babantu!

107:22  Njalo kabahlabe imihlatshelo yokubonga, balandise izenzo zayo ngokuthaba.

107:23  Abehlela olwandle ngemikhumbi, abenza imisebenzi emanzini amakhulu;

107:24  laba babona izenzo zeNkosi, lemisebenzi yayo emangalisayo ekujuleni.

107:25  Ngoba iyakhuluma, ivuse isiphepho somoya, esiqubula amagagasi alo.

107:26  Benyukela emazulwini, behlele enzikini; umphefumulo wabo uncibilika ngosizi.

107:27  Bayadengezela bebhadazela njengesidakwa, lenhlakanipho yabo yonke iginyiwe.

107:28  Khona bakhala eNkosini ekuhluphekeni kwabo, yabakhupha ezinsizini zabo.

107:29  Yenza isiphepho sachuma, lamagagasi aso athula.

107:30  Basebethokoza ngoba ayesethule, yasibaholela ethekwini lesifiso sabo.

107:31  Kabayibonge iNkosingomusa wayo, langemisebenzi yayo emangalisayo ebantwaneni babantu!

107:32  Njalo kabayiphakamise ebandleni labantu, bayidumise esihlalweni sabadala!

107:33  Yenza imifula ibe yinkangala, lemithombo yamanzi ibe ngumhlabathi owomileyo,

107:34  umhlabathi ovundileyo ube lugwadule, ngenxa yobubi babahlezi kuwo.

107:35  Iphendula inkangala ibe yisiziba samanzi, lelizwe elomileyo libe yimithombo yamanzi.

107:36  Ihlalise khona abalambileyo, njalo bamise umuzi wokuhlala;

107:37  bahlanyele amasimu, bagxumeke izivini, ezithela izithelo zesivuno.

107:38  Njalo iyababusisa ukuze bande kakhulu, lezifuyo zabo kayizinciphisi.

107:39  Babuye banciphe, bathotshiswe ngocindezelo, ububi, losizi.

107:40  Ithela ukudelelwa phezu kweziphathamandla, ibazulisa enkangala, engelandlela.

107:41  Kube kanti ihlalisa phezulu umyanga ekuhluphekeni, enze insapho zibe njengomhlambi.

107:42  Abalungileyo bazabona bathokoze, lobubi bonke buzavala umlomo wabo.

107:43  Loba ngubani ohlakaniphileyo uzaqaphelisa lezizinto; labo bazaqedisisa izisa zeNkosi.

Chapter 108

108:1  Inhliziyo yami iqinile, Nkulunkulu. Ngizahlabelela ngitshotshe, ngitsho udumo lwami!

108:2  Vukani gubhu lwezintambo lechacho! Ngizavusa ukusa.

108:3  Ngizakudumisa, Nkosi, phakathi kwabantu, ngihlabele indumiso kuwe phakathi kwezizwe.

108:4  Ngoba umusa wakho mkhulu phezu kwamazulu, leqiniso lakho lifika emayezini.

108:5  Phakama, Nkulunkulu, ngaphezu kwamazulu, lobukhosi bakho phezu komhlaba wonke.

108:6  Ukuze abathandekayo bakho bakhululwe; sindisa ngesandla sakho sokunene, ungiphendule.

108:7  UNkulunkulu ukhulumile ebungcweleni bakhe. Ngizathaba, ngiyabe iShekema, ngilinganise isihotsha seSukothi.

108:8  Ngeyami iGileyadi, ngowami uManase, loEfrayimi ungamandla ekhanda lami, uJuda ungumnikumthetho wami.

108:9  UMowabi ungumganu wami wokugezela; phezu kukaEdoma ngizaphosela inyathela lami; phezu kweFilisti ngizamemeza ngokunqoba.

108:10  Ngubani ozangisa emzini oqinileyo? Ngubani ozangiholela eEdoma?

108:11  Kawusilahlanga yini, Nkulunkulu; kawuphumanga, Nkulunkulu, lamabutho ethu?

108:12  Siphe usizo ekuhlupheni, ngoba luyize uncedo lomuntu.

108:13  KuNkulunkulu sizakwenza ngobuqhawe, ngoba yena uzanyathelela phansi izitha zethu.

Chapter 109

109:1  Nkulunkulu wendumiso yami, ungathuli.

109:2  Ngoba umlomo wokhohlakeleyo lomlomo wenkohliso uvulekile umelene lami; bakhulume lami ngolimi lwamanga.

109:3  Bangihanqa ngamazwi enzondo, balwa bemelene lami kungelasizatho.

109:4  Esikhundleni sothando lwami bayizitha zami, kodwa mina ngisemkhulekweni.

109:5  Basebengibuyisela okubi esikhundleni sokuhle, lenzondo esikhundleni sothando lwami.

109:6  Umise omubi phezu kwakhe, loSathane kame ngakwesokunene sakhe.

109:7  Ekwahlulelweni kwakhe kaphume elecala; lomkhuleko wakhe ube yisono.

109:8  Insuku zakhe kazibe nlutshwana; omunye athathe isikhundla sakhe.

109:9  Abantwana bakhe kabangabi loyise, lomkakhe abe ngumfelokazi.

109:10  Abantwana bakhe kabazulazule bephanza isinkwa sabo, bacele bevela emanxiweni abo.

109:11  Umebolekisi kabambe konke alakho, labezizweni baphange izithelo zomsebenzi wakhe.

109:12  Kungabi khona omelulela umusa, futhi kungabi khona ozwela intandane zakhe.

109:13  Inzalo yakhe kayiqunywe, lebizo labo lesulwe esizukulwaneni esilandelayo.

109:14  Ububi baboyise bukhunjulwe eNkosini, lesono sikanina singesulwa.

109:15  Kabube phambi kweNkosi njalonjalo, ukuze aqume ukukhunjulwa kwabo kusuke emhlabeni.

109:16  Ngenxa yokuthi wayengakhumbuli ukwenza umusa, kodwa wazingela umuntu ohluphekayo longumyanga, lodabukileyo enhliziyweni ukumbulala.

109:17  Njengoba wathanda ukuqalekisa, ngakho kakwehlele kuye; njengoba wayengathandi ukubusisa, ngakho kakube khatshana laye.

109:18  Njengoba wagqoka isiqalekiso njengesigqoko sakhe, ngakho kakungene emibilini yakhe njengamanzi, lanjengamafutha emathanjeni akhe.

109:19  Kakube kuye njengesembatho azembesa ngaso, kube libhanti azibopha ngalo njalonjalo.

109:20  Lokhu kube ngumvuzo wezitha zami ovela eNkosini, lowalabo abakhuluma okubi ngomphefumulo wami.

109:21  Kodwa wena, Jehova, Nkosi, ngenzela ngenxa yebizo lakho; ngoba umusa wakho ulungile, ngikhulule.

109:22  Ngoba mina ngiyisihlupheki lomyanga, lenhliziyo yami ilimele phakathi kwami.

109:23  Ngedlula njengesithunzi sisiba side; ngizanyazanyiswe njengesikhonyane.

109:24  Amadolo ami ayaxega ngokuzila ukudla, lenyama yami isicakile iswela ukukhuluphala.

109:25  Mina sengibe lihlazo kubo, bengibona banikina ikhanda labo.

109:26  Ngisize, Nkosi, Nkulunkulu wami, ungisindise ngokomusa wakho.

109:27  Ukuze bazi ukuthi lesi yisandla sakho; wena, Nkosi, ukwenzile.

109:28  Kabathuke bona, kodwa wena ubusise; nxa bevuka kabayangeke, kodwa inceku yakho kayithabe.

109:29  Izitha zami kazigqokiswe ngehlazo, kazizigoqele ngenhloni zazo njengesembatho.

109:30  Ngizayibonga kakhulu iNkosi ngomlomo wami; njalo ngizayidumisa phakathi kwabanengi.

109:31  Ngoba izakuma ngakwesokunene komyanga, ukumsindisa kulabo abalahla umphefumulo wakhe.

Chapter 110

110:1  INkosi yathi eNkosini yami: Hlala ngakwesokunene sami, ngize ngenze izitha zakho zibe yisenabelo senyawo zakho.

110:2  INkosi izathuma intonga yamandla akho ivela eZiyoni. Busa phakathi kwezitha zakho.

110:3  Abantu bakho bazavuma ngosuku lwamandla akho, ebuhleni bobungcwele, kusukela esizalweni semadabukakusa kuza kuwe amazolo obutsha bakho.

110:4  INkosi ifungile, kayiyikuphenduka: Wena ungumpristi kuze kube nininini ngokwendlela kaMelkizedeki.

110:5  INkosi ngakwesokunene sakho izachoboza amakhosi osukwini lokuthukuthela kwayo.

110:6  Izakwehlulela phakathi kwezizwe, kugcwale izidumbu; izachoboza inhloko phezu kwelizwe elikhulu.

110:7  Izanatha esifuleni endleleni; ngakho-ke izaphakamisa ikhanda.

Chapter 111

111:1  Dumisani iNkosi! Ngizayibonga iNkosi ngenhliziyo yonke, emhlanganweni wabaqotho lebandleni.

111:2  Mikhulu imisebenzi yeNkosi, idingwa yilabo abathokoza ngayo.

111:3  Ulodumo lenkazimulo umsebenzi wayo, lokulunga kwayo kumi kuze kube nininini.

111:4  Yenzile izimangaliso zayo zikhunjulwe; iNkosi ilomusa lesihawu.

111:5  Iyabapha ukudla labo abayesabayo; iyakhumbula kuze kube phakade isivumelwano sayo.

111:6  Yazisile abantu bayo amandla emisebenzi yayo, ngokubanika ilifa lezizwe.

111:7  Imisebenzi yezandla zayo iliqiniso lokwehlulela; imithetho yayo yonke iqinisekile.

111:8  Isekelwe kuze kube phakade laphakade, yenziwa ngeqiniso langobuqotho.

111:9  Yathumela uhlengo ebantwini bayo; ilaye isivumelwano sayo kuze kube nininini; lingcwele liyesabeka ibizo layo.

111:10  Ukuyesaba iNkosi kuyikuqala kokuhlakanipha; balokuqedisisa okuhle bonke abayenzayo imilayo. Indumiso yayo imi kuze kube nininini.

Chapter 112

112:1  Dumisani iNkosi! Ubusisiwe umuntu oyesabayo iNkosi, othokoza kakhulu ngemithetho yayo.

112:2  Inzalo yakhe izakuba lamandla emhlabeni; isizukulwana sabaqotho sizabusiswa.

112:3  Imfuyo lenotho kuzakuba sendlini yakhe, lokulunga kwakhe kuzakuma kuze kube nininini.

112:4  Kuyabaphumela abaqotho ukukhanya emnyameni; ilomusa lesihawu lokulunga.

112:5  Umuntu olungileyo ngolesisa lowebolekisayo, wenza izindaba zakhe ngokulunga.

112:6  Ngoba kayikunyikinywa phakade; olungileyo uzakuba sekukhunjulweni kuze kube nininini.

112:7  Kayikwesaba umbiko omubi, inhliziyo yakhe iqinile, ithemba eNkosini.

112:8  Isekelwe inhliziyo yakhe, kayikwesaba, aze abone isiloyiso sakhe phezu kwezitha zakhe.

112:9  Uhlakazile, uyabanika abayanga; ukulunga kwakhe kumi kuze kube nininini; uphondo lwakhe luzaphakanyiswa ngodumo.

112:10  Omubi uyakubona, athukuthele; agedle amazinyo akhe, ancibilike; isifiso sababi sizabhubha.

Chapter 113

113:1  Dumisani iNkosi! Dumisani, zinceku zeNkosi, dumisani ibizo leNkosi.

113:2  Kalibongwe ibizo leNkosi kusukela khathesi njalo kuze kube nininini.

113:3  Kusukela ekuphumeni kwelanga kuze kube sekutshoneni kwalo ibizo leNkosi kalidunyiswe.

113:4  INkosi iphakeme phezu kwezizwe zonke, ubukhosi bayo buphezu kwamazulu.

113:5  Ngubani onjengeNkosi uNkulunkulu wethu, ehlezi phezulu,

113:6  ekhothama ukukhangela emazulwini lemhlabeni?

113:7  Iyamvusa umyanga ethulini, imphakamise osweleyo enqunjini yomquba,

113:8  ukuze imhlalise leziphathamandla, kanye leziphathamandla zabantu bayo.

113:9  Ihlalisa inyumba emzini, unina wabantwana othokozayo. Dumisani iNkosi!

Chapter 114

114:1  Ekuphumeni kukaIsrayeli eGibhithe, indlu kaJakobe ebantwini bolimi lwezizwe,

114:2  uJuda waba yindlu yakhe engcwele, uIsrayeli waba ngumbuso wakhe.

114:3  Ulwandle lwakubona lwabaleka, iJordani yabuyela emuva.

114:4  Intaba zaqolotsha njengezinqama, amaqaqa njengamawundlu.

114:5  Ulani wena lwandle, ukuthi ubaleke? Wena Jordani, ukuthi ubuyele emuva?

114:6  Lina zintaba, ukuthi liqolotshe njengezinqama? Lina maqaqa, njengamawundlu?

114:7  Thuthumela, mhlaba, phambi kweNkosi, phambi kukaNkulunkulu kaJakobe,

114:8  owaphendula idwalalibe lichibi lamanzi, ilitshe elilukhuni libe ngumthombo wamanzi.

Chapter 115

115:1  Kakungabi kithi, Nkosi, kakungabi kithi, kodwa ebizweni lakho nika udumo, ngenxa yomusa wakho, ngenxa yeqiniso lakho.

115:2  Kungani izizwe zizakuthi: Ungaphi pho uNkulunkulu wabo?

115:3  Kodwa uNkulunkulu wethu usemazulwini, wenza konke akuthandayo.

115:4  Izithombe zabo yisiliva legolide, umsebenzi wezandla zomuntu.

115:5  Zilomlomo, kodwa kazikhulumi; zilamehlo, kodwa kaziboni;

115:6  zilendlebe, kodwa kazizwa; zilempumulo, kodwa kazinuki;

115:7  zilezandla, kodwa kaziphathi; inyawo zilazo, kodwa kazihambi; kazikhulumi ngomphimbo wazo.

115:8  Abazenzayo kabafanane lazo, wonke othembela kuzo.

115:9  Israyeli, themba eNkosini. Ilusizo lwabo lesihlangu sabo.

115:10  Ndlu kaAroni, themba eNkosini. Ilusizo lwabo lesihlangu sabo.

115:11  Lina elesaba iNkosi, thembani eNkosini. Ilusizo lwabo lesihlangu sabo.

115:12  INkosi isikhumbule, izabusisa, ibusise indlu kaIsrayeli, ibusise indlu kaAroni;

115:13  izabusisa labo abayesabayo iNkosi, abancinyane kanye labakhulu.

115:14  INkosi izalandisa, lina labantwana benu.

115:15  Libusisiwe eNkosini, eyenza amazulu lomhlaba.

115:16  Amazulu, amazulu ngaweNkosi, kodwa umhlaba iwunike abantwana babantu.

115:17  Abafileyo kabayidumisi iNkosi, hatshi-ke loba ngubani owehlela ekuthuleni.

115:18  Kodwa thina sizayibonga iNkosi kusukela khathesi kuze kube nininini. Dumisani iNkosi!

Chapter 116

116:1  Ngiyayithanda iNkosi, ngoba izwile ilizwi lami, ukunxusa kwami.

116:2  Ngoba ibeke indlebe yayo kimi, ngakho ngizayibiza ensukwini zami.

116:3  Izibopho zokufa zangihanqa, lenhlungu zesihogo zangibamba; ngathola inhlupheko losizi.

116:4  Ngasengibiza ibizo leNkosi, ngathi: O Nkosi, khulula umphefumulo wami.

116:5  Ilomusa iNkosi, ilungile; ye, uNkulunkulu wethu ulesihawu.

116:6  INkosi iyabalondoloza abathobekileyo; ngehliselwa phansi, yasingisindisa.

116:7  Buyela, mphefumulo wami, ekuphumuleni kwakho, ngoba iNkosi ikuphethe ngomusa.

116:8  Ngoba ikhulule umphefumulo wami ekufeni, amehlo ami ezinyembezini, unyawo lwami ekuweni.

116:9  Ngizahamba phambi kweNkosi emazweni abaphilayo.

116:10  Ngakholwa, ngakho ngikhulumile. Mina ngahlupheka kakhulu.

116:11  Mina ngathi ekuphangiseni kwami: Wonke umuntu ungumqambimanga.

116:12  Ngizabuyiselani eNkosiningazo zonke inzuzo zayo kimi?

116:13  Ngizathatha inkezo yosindiso, ngibize ibizo leNkosi.

116:14  Ngizakhokha izifungo zami eNkosini, khathesi phambi kwabantu bayo bonke.

116:15  Kuligugu emehlweni eNkosi ukufa kwabangcwele bayo.

116:16  Hawu Nkosi, isibili ngiyinceku yakho, ngiyinceku yakho, indodana yencekukazi yakho; uthukulule izibopho zami.

116:17  Ngizakuhlabela umhlatshelo wokubonga, ngibize ibizo leNkosi.

116:18  Ngizakhokha izifungo zami eNkosini, khathesi phambi kwabantu bayo bonke,

116:19  emagumeni endlu yeNkosi, phakathi kwakho, Jerusalema. Dumisani iNkosi!

Chapter 117

117:1  Dumisani iNkosi, lina zizwe zonke, liyibabaze, lina bantu lonke.

117:2  Ngoba uthandolomusa wayo mkhulu kithi, leqiniso leNkosilimi kuze kube nininini. Dumisani iNkosi!

Chapter 118

118:1  Bongani iNkosi, ngoba ilungile, ngoba isihawu sayo simi kuze kube nininini.

118:2  Katsho uIsrayeli khathesi ukuthi isihawu sayo simi kuze kube nininini.

118:3  Kayitsho indlu kaAroni khathesi ukuthi isihawu sayo simi kuze kube nininini.

118:4  Kabatsho khathesi abayesabayo iNkosi ukuthi isihawu sayo simi kuze kube nininini.

118:5  Ngisesizini ngabiza iNkosi; iNkosi yangiphendula yangibeka endaweni ebanzi.

118:6  INkosi ingakimi, kangiyikwesaba; umuntu angenzani kimi?

118:7  INkosi ingakimi labangisizayo; ngakho mina ngizabona isiloyiso sami phezu kwabangizondayo.

118:8  Kungcono ukuphephela eNkosini kulokuthembela emuntwini.

118:9  Kungcono ukuphephela eNkosini kulokuthembela kuziphathamandla.

118:10  Zonke izizwe zangihanqa; kodwa ebizweni leNkosi ngizaziquma.

118:11  Zangihanqa, yebo zangihanqa; kodwa ebizweni leNkosi ngizaziquma.

118:12  Zangihanqa njengenyosi, zacitshwa njengomlilo wameva; kodwa ebizweni leNkosi ngizaziquma.

118:13  Wangigudlumeza lokugudlumeza ngize ngiwe; kodwa iNkosi yangisiza.

118:14  INkosi ingamandla lengoma yami, isibe lusindiso lwami.

118:15  Ilizwi lentokozo losindiso lisemathenteni abalungileyo; esokunene seNkosi senza ngamandla.

118:16  Esokunene seNkosi siphakanyisiwe, esokunene seNkosi senza ngamandla.

118:17  Kangiyikufa, kodwa ngizaphila, ngilandise imisebenzi yeNkosi.

118:18  INkosi ingijezisile kabuhlungu, kodwa kayinginikelanga ekufeni.

118:19  Ngivulelani amasango okulunga; ngingene ngawo, ngidumise iNkosi.

118:20  Yileli isango leNkosi; abalungileyo bazangena ngalo.

118:21  Ngizakudumisa, ngoba ungiphendule, usube lusindiso lwami.

118:22  Ilitshe abakhi abalalayo seliyinhloko yengonsi.

118:23  Lokhu kwenziwa yiNkosi, kuyamangalisa emehlweni ethu.

118:24  Lolu lusuku iNkosi eyalwenzayo, sizathaba sithokoze kulo.

118:25  Sindisa khathesi, Nkosi; ngiyakuncenga, ngiyakuncenga, Nkosi, khathesi unike impumelelo.

118:26  Ubusisiwe oza ngebizo leNkosi. Silibusisile sisendlini yeNkosi.

118:27  UNkulunkulu uyiNkosi, osinike ukukhanya. Bopha umnikelo womkhosi ngezibopho kuze kube sempondweni zelathi.

118:28  Wena unguNkulunkulu wami, ngizakudumisa; Nkulunkulu wami, ngizakuphakamisa.

118:29  Bongani iNkosi, ngoba ilungile; ngoba isihawu sayo simi kuze kube nininini.

Chapter 119

119:1  Babusisiwe abaqotho endleleni, abahamba emlayweni weNkosi.

119:2  Babusisiwe abagcina izifakazelo zayo, abayidinga ngenhliziyo yonke.

119:3  Njalo kabenzi okubi, bahamba endleleni zayo.

119:4  Wena usulayile ukugcina ngokukhuthala imithetho yakho.

119:5  Kungathi izindlela zami zingaqondiswa ukugcina izimiso zakho!

119:6  Khona ngingayikuyangeka, lapho nginanzelela yonke imithetho yakho.

119:7  Ngizakudumisa ngobuqotho benhliziyo, sengifunde izahlulelo zokulunga kwakho.

119:8  Ngizagcina izimiso zakho. Ungangitshiyi ngokupheleleyo.

119:9  Ijaha lingayihlanza ngani indlela yalo? Ngokuqaphela njengokwelizwi lakho.

119:10  Ngikudingile ngenhliziyo yami yonke; ungangiphambuli emithethweni yakho.

119:11  Ilizwi lakho ngilifihlile enhliziyweni yami, ukuze ngingoni kuwe.

119:12  Kawubongwe wena, Nkosi; ungifundise izimiso zakho.

119:13  Ngezindebe zami ngilandisile zonke izahlulelo zomlomo wakho.

119:14  Ngithokozile ngendlela yezifakazelo zakho njengaphezu kwenotho yonke.

119:15  Ngizazindla ngemithetho yakho, ngikhangele ezindleleni zakho.

119:16  Ngizazithokozisa ngezimiso zakho; kangiyikukhohlwa ilizwi lakho.

119:17  Iphathe kuhle inceku yakho, ukuze ngiphile ngigcine ilizwi lakho.

119:18  Vula amehlo ami ukuze ngibone izimangaliso ezivela emlayweni wakho.

119:19  Ngiyisihambi emhlabeni; ungangifihleli imithetho yakho.

119:20  Umphefumulo wami uyadabuka ngenxa yokulangathela izahlulelo zakho ngaso sonke isikhathi.

119:21  Ukhuzile abaziqakisayo abaqalekisiweyo, abaduha emithethweni yakho.

119:22  Susa kimi ihlazo lokudelela, ngoba ngigcinile izifakazelo zakho.

119:23  Iziphathamandla lazo zahlala zakhuluma zimelene lami; inceku yakho yazindla ngezimiso zakho.

119:24  Izifakazelo zakho lazo ziyintokozo yami, zingabeluleki bami.

119:25  Umphefumulo wami unamathele ethulini; ngivuselela ngokwelizwi lakho.

119:26  Ngilandisile indlela zami, wangiphendula. Ngifundisa izimiso zakho.

119:27  Ngenze ngiqedisise indlela yemithetho yakho, ukuze ngikhulume ngezenzo zakho ezimangalisayo.

119:28  Umphefumulo wami uyathonta ngenxa yosizi; ngiqinisa ngokwelizwi lakho.

119:29  Susa kimi indlela yamanga, unginike ngomusa umlayo wakho.

119:30  Ngikhethile indlela yeqiniso, ngibekile phambi kwami izahlulelo zakho.

119:31  Nginamathele ezifakazelweni zakho; Nkosi, ungangiyangisi.

119:32  Ngizagijima endleleni yemithetho yakho, ngoba uzakhulisa inhliziyo yami.

119:33  Ngifundisa, Nkosi, indlela yezimiso zakho, njalo ngizayigcinakuze kube sekupheleni.

119:34  Ngiphe ukuqedisisa ngibe sengigcina umlayo wakho, yebo ngiwulondoloze ngenhliziyo yonke.

119:35  Ngihambisa endleleni yemithetho yakho, ngoba ngiyathokoza ngayo.

119:36  Thobisela inhliziyo yami ezifakazelweni zakho, kungabi semhawini.

119:37  Susa amehlo ami ukuze angaboni okuyize; ungivuselele endleleni yakho.

119:38  Qinisa ilizwi lakho encekwini yakho ezinikele ukukwesaba.

119:39  Susa isigcono engisesabayo, ngoba izahlulelo zakho zilungile.

119:40  Khangela, ngiyalangatha imithetho yakho; ngivuselela ekulungeni kwakho.

119:41  Lezisa zakho kazize kimi, Nkosi, usindiso lwakho ngokwelizwi lakho.

119:42  Khona ngizakuba lakho ukuphendula ongithukayo, ngoba ngiyathembela elizwini lakho.

119:43  Njalo ungasusi ngokupheleleyo emlonyeni wami ilizwi leqiniso, ngoba ngithembele ezahlulelweni zakho.

119:44  Ngokunjalo ngizawugcina umlayo wakho njalonjalo, kuze kube phakade laphakade.

119:45  Ngizahamba ebubanzini, ngoba ngidinga imithetho yakho.

119:46  Njalo ngizakhuluma ngezifakazelo zakho phambi kwamakhosi, ngingayangeki.

119:47  Ngizithokozise ngemithetho yakho engiyithandileyo.

119:48  Ngizaphakamisela lezandla zami emithethweni yakho engiyithandileyo, ngizindle ngezimiso zakho.

119:49  Khumbula ilizwi encekwini yakho, ongenze ngathembela kulo.

119:50  Le yinduduzo yami ekuhluphekeni kwami, ngoba ilizwi lakho lingivuselele.

119:51  Abazigqajayo bangiklolodela kakhulukazi; kangiphambukanga emlayweni wakho.

119:52  Ngikhumbule izahlulelo zakho zasendulo, Nkosi, futhi ngiziduduzile.

119:53  Intukuthelo enkulu ingibambile ngenxa yababi abatshiya umlayo wakho.

119:54  Izimiso zakho zaba zingoma zami endlini yobuhambuma bami.

119:55  Ebusuku ngikhumbule ibizo lakho, Nkosi, ngigcine umlayo wakho.

119:56  Lokhu kwaba ngokwami ngoba ngigcinile imithetho yakho.

119:57  UJehova uyisabelo sami; ngithe ngizagcina amazwi akho.

119:58  Ngancenga ubuso bakho ngenhliziyo yonke; woba lomusa kimi ngokwelizwi lakho.

119:59  Ngazindla ngezindlela zami, ngaphendulela inyawo zami ezifakazelweni zakho.

119:60  Ngaphangisa, kangiphuzanga ukugcina imithetho yakho.

119:61  Amaxuku ababi angihanqile; kangikhohlwa umlayo wakho.

119:62  Phakathi kobusuku ngizavuka ukuze ngikubonge ngenxa yezahlulelo zokulunga kwakho.

119:63  Ngingumngane wabo bonke abakwesabayo, labagcina imithetho yakho.

119:64  Nkosi, umhlaba ugcwele umusa wakho; ngifundisa izimiso zakho.

119:65  Wenzele inceku yakho okuhle, Nkosi, ngokwelizwi lakho.

119:66  Ngifundisa ingqondo enhle lolwazi, ngoba ngikholwa imithetho yakho.

119:67  Ngingakahlupheki ngaduha, kodwa khathesi ngigcine ilizwi lakho.

119:68  Wena ulungile, wenza okulungileyo; ngifundisa izimiso zakho.

119:69  Abazigqajayo bangibhaceke ngamanga; ngenhliziyo yonke mina ngizagcina imithetho yakho.

119:70  Inhliziyo yabo inone njengamahwahwa; mina ngithokoza ngomlayo wakho.

119:71  Kungilungele ukuthi ngihlutshwe, ukuze ngifunde izimiso zakho.

119:72  Umlayo womlomo wakho ungcono kimi kulezinkulungwane zegolide lezesiliva.

119:73  Izandla zakho zingenzile, zangibumba; ngiphe ukuqedisisa ukuze ngifunde imithetho yakho.

119:74  Abakwesabayo bazangibona bathokoze, ngoba ngithembele elizwini lakho.

119:75  Ngiyazi, Nkosi, ukuthi izahlulelo zakho zilungile, lokuthi ungihluphile ngokuthembeka.

119:76  Umusa wakho ake ube yinduduzo yami njengokutsho kwakho encekwini yakho.

119:77  Izihawu zakho kazize kimi ukuze ngiphile, ngoba umlayo wakho uyintokozo yami.

119:78  Abazigqajayo kabayangeke, ngoba bangiphambukisa ngamanga; mina ngizazindla ngemithetho yakho.

119:79  Kabaphendukele kimi abakwesabayo, labazi izifakazelo zakho.

119:80  Inhliziyo yami kayiphelele ezimisweni zakho, ukuze ngingayangeki.

119:81  Umphefumulo wami uyaphela ngokulangatha usindiso lwakho; ngithembela elizwini lakho.

119:82  Amehlo ami ayafiphala ngokulangatha ilizwi lakho, ngisithi: Uzangiduduza nini?

119:83  Ngoba senginjengomgodla osentuthwini; kangikhohlwa izimiso zakho.

119:84  Zingaki insuku zenceku yakho? Uzakwenza nini isigwebo kwabangizingelayo?

119:85  Abazigqajayo bangigebhela imigodi, okungenjengokomlayo wakho.

119:86  Yonke imithetho yakho ithembekile; bangizingela ngamanga; ngisiza!

119:87  Baphosa bangiqeda emhlabeni, kodwa mina kangitshiyanga imithetho yakho.

119:88  Ngivuselela ngokomusa wakho; ngibe sengigcina isifakazelo somlomo wakho.

119:89  Laphakade, Nkosi, ilizwi lakho limi emazulwini.

119:90  Uthembeko lwakho lusesizukulwaneni lesizukulwana; wamisa umhlaba, usemi.

119:91  Ngokwezimiso zakho kusemi lamuhla, ngoba konke kuzinceku zakho.

119:92  Uba umlayo wakho ubungesizo intokozo zami, ngabe sengibhubhele ekuhluphekeni kwami.

119:93  Laphakade kangiyikukhohlwa imithetho yakho, ngoba ungivuselele ngayo.

119:94  Ngingowakho, ungisindise; ngoba ngiyidingile imithetho yakho.

119:95  Ababi bangilindele ukungibhubhisa; ngiyananzelela izifakazelo zakho.

119:96  Ngibonile ukucina kwakho konke ukuphelela, kodwa umlayo wakho ubanzi kakhulu.

119:97  Ngiwuthanda kangakanani umlayo wakho! Usuku lonke uyikuzindla kwami.

119:98  Ngemithetho yakho uyangihlakaniphisa kulezitha zami, ngoba ilami kuze kube nininini.

119:99  Ngilokuqedisisa kulabo bonke abafundisi bami, ngoba izifakazelo zakho ziyikuzindla kwami.

119:100  Ngiyaqedisisa kulabadala, ngoba ngigcina imithetho yakho.

119:101  Ngizinqandile inyawo zami kuyo yonke indlela embi, ukuze ngigcine ilizwi lakho.

119:102  Kangiphambukanga kuzahlulelo zakho, ngoba wena ungifundisile.

119:103  Amnandi kangakanani amazwi akho ekunambitheni kwami, okwedlula uluju emlonyeni wami!

119:104  Emithethweni yakho ngizuza ukuqedisisa; ngenxa yalokho ngizonda yonke indlela yamanga.

119:105  Ilizwi lakho liyisibane enyaweni lwami, lokukhanya endleleni yami.

119:106  Ngifungile, ngizakuqinisa, ukugcina izahlulelo zokulunga kwakho.

119:107  Ngiyahlupheka kakhulukazi; Nkosi, ngivuselela ngokwelizwi lakho.

119:108  Nkosi, yemukela iminikelo yesihle yomlomo wami, ungifundise izahlulelo zakho.

119:109  Umphefumulo wami usesandleni sami njalonjalo, kodwa kangikhohlwa umlayo wakho.

119:110  Ababi bangibekele umjibila, kodwa kangiduhanga emithethweni yakho.

119:111  Ngidle ilifa lezifakazelo zakho kuze kube nininini, ngoba ziyintokozo yenhliziyo yami.

119:112  Ngithobe inhliziyo yami ukwenza izimiso zakho njalonjalo, kuze kube sekupheleni.

119:113  Ngiyabazonda abanhliziyombili, kodwa umlayo wakho ngiyawuthanda.

119:114  Wena uyisiphephelo sami lesihlangu sami; ngithemba elizwini lakho.

119:115  Sukani kimi benzi bobubi, ngoba ngigcine imithetho kaNkulunkulu wami.

119:116  Ngisekela ngokwelizwi lakho ukuze ngiphile, ungangiyangisi ngethemba lami.

119:117  Ngisekela ngibe sengisindiswa, ngizananzelela izimiso zakho njalonjalo.

119:118  Uyabeyisa bonke abaduha ezimisweni zakho, ngoba ubuqili babo bungamanga.

119:119  Uyasusa bonke ababi bomhlaba njengamanyele; ngakho ngiyazithanda izifakazelo zakho.

119:120  Inyama yami iyathuthumela ngovalo ngawe, ngesaba izigwebo zakho.

119:121  Ngenzile ukwahlulela lokulunga; ungangiyekeli kubacindezeli bami.

119:122  Mela inceku yakho kube kuhle, abazigqajayo kabangangicindezeli.

119:123  Amehlo ami aphelela usindiso lwakho, lelizwi lokulunga kwakho.

119:124  Yenza encekwini yakho ngokomusa wakho, ungifundise izimiso zakho.

119:125  Ngiyinceku yakho; ngiphe ukuqedisisa, ukuze ngazi izifakazelo zakho.

119:126  Sekuyisikhathi seNkosi sokuthi isebenze, ngoba bawephule umlayo wakho.

119:127  Ngakho-ke ngiyayithanda imithetho yakho kakhulu kulegolide, yebo, kulegolide elicwengekileyo.

119:128  Ngalokho imithetho yakho yonke mayelana lazo zonke izinto ngiyibona iqondile; yonke indlela yamanga ngiyayizonda.

119:129  Izifakazelo zakho ziyamangalisa; ngakho-ke umphefumulo wami uyazigcina.

119:130  Ukuvulwa kwamazwi akho kuyakhanyisa, kunika ukuqedisisa kwabangelalwazi.

119:131  Ngavula umlomo wami, ngaphefuzela, ngoba ngalangazelela imithetho yakho.

119:132  Phendukela kimi, ube lomusa kimi, njengomkhuba kulabo abathanda ibizo lakho.

119:133  Qinisa izinyathelo zami ngelizwi lakho, njalo kabungabusi phezu kwami labubi.

119:134  Ngikhulula kucindezelo lwabantu, ukuze ngigcine imithetho yakho.

119:135  Khanyisa ubuso bakho phezu kwenceku yakho, ungifundise izimiso zakho.

119:136  Imifula yamanzi iyehla emehlweni ami, ngoba kabagcini umlayo wakho.

119:137  Wena, Nkosi, ulungile, ziqondile izahlulelo zakho.

119:138  Ulayile izifakazelo zakho ekulungeni lekuthembekeni okukhulu.

119:139  Ukutshiseka kwami kungiqedile, ngoba izitha zami zikhohlwe amazwi akho.

119:140  Ilizwi lakho licwengekile kakhulu; ngakho inceku yakho iyalithanda.

119:141  Ngimncinyane, ngidelelekile; imithetho yakho kangiyikhohlwa.

119:142  Ukulunga kwakho kuyikulunga kuze kube phakade, lomlayo wakho uliqiniso.

119:143  Ucindezelo lohlupho kungifumene; imithetho yakho izintokozo zami.

119:144  Ukulunga kwezifakazelo zakho kungokwaphakade; ngiphe ukuqedisisa ukuze ngiphile.

119:145  Ngakhala ngenhliziyo yami yonke; ngiphendula, Nkosi. Ngizagcina izimiso zakho.

119:146  Ngikhalela kuwe; ngisindisa, njalo ngizagcina izifakazelo zakho.

119:147  Ngandulela uvivi, ngakhala; ngathembela elizwini lakho.

119:148  Amehlo ami aqalela imilindo yobusuku, ukuze ngizindle elizwini lakho.

119:149  Zwana ilizwi lami ngokomusa wakho; Nkosi, ngivuselela ngokwesahlulelo sakho.

119:150  Bayasondela abazingeli bobubi, bakhatshana lomlayo wakho.

119:151  Wena useduze, Nkosi, lemithetho yakho yonke iliqiniso.

119:152  Sekukade ngisazi ngemilayo yakho ukuthi uyisekele kuze kube nininini.

119:153  Khangela ukuhlupheka kwami, ungikhulule, ngoba kangiwukhohlwa umlayo wakho.

119:154  Mela udaba lwami, ungihlenge; ngivuselela ngokwelizwi lakho.

119:155  Usindiso lukhatshana lababi, ngoba kabadingi izimiso zakho.

119:156  Izihawu zakho, Nkosi, zinkulu; ngivuselela ngokwezahlulelo zakho.

119:157  Banengi abangizingelayo labayizitha zami; kangiphambuki ezifakazelweni zakho.

119:158  Ngabona abaphambuki, ngacunuka, ngoba kabagcinanga ilizwi lakho.

119:159  Bona ukuthi ngiyayithanda imithetho yakho. Ngivuselela, Nkosi, ngokothandolomusa wakho.

119:160  Ilizwi lakho liliqiniso kwasekuqaleni, laso sonke isahlulelo sakho esilungileyo simi kuze kube nininini.

119:161  Iziphathamandla zingizingela kungelasizatho; kodwa inhliziyo yami ilovalo ngamazwi akho.

119:162  Ngiyathokoza ngelizwi lakho njengothole impango enkulu.

119:163  Amanga ngiyawazonda ngiyawenyanya; umlayo wakho ngiyawuthanda.

119:164  Kasikhombisa ngosuku ngiyakudumisa ngenxa yezahlulelo zakho ezilungileyo.

119:165  Balokuthula okukhulu abathanda umlayo wakho; njalo kakulasikhubekiso kubo.

119:166  Ngilindele usindiso lwakho, Nkosi, ngiyayenza imithetho yakho.

119:167  Umphefumulo wami uyazigcina izifakazelo zakho, ngiyazithanda kakhulu.

119:168  Ngiyagcina imithetho yakho lezifakazelo zakho, ngoba zonke indlela zami ziphambi kwakho.

119:169  Ukukhala kwami kakusondele kuwe, Nkosi; ngiphe ukuqedisisa ngokwelizwi lakho.

119:170  Ukuncenga kwami kakufike phambi kwakho; ngikhulula ngokwelizwi lakho.

119:171  Indebe zami zizathulula indumiso, ngoba ungifundisile izimiso zakho.

119:172  Ulimi lwami luzakhuluma ilizwi lakho, ngoba yonke imithetho yakho iyikulunga.

119:173  Isandla sakho kasibe lusizo lwami, ngoba ngikhethile imithetho yakho.

119:174  Ngiyalangazelela usindiso lwakho, Nkosi, lomlayo wakho uyintokozo yami.

119:175  Kawuphile umphefumulo wami, njalo uzakudumisa, lezahlulelo zakho zingisize.

119:176  Ngiduhile njengemvu elahlekileyo; dinga inceku yakho, ngoba kangikhohlwa imithetho yakho.

Chapter 120

120:1  Ekuhluphekeni kwami ngakhala eNkosini, yangiphendula.

120:2  Nkosi, khulula umphefumulo wami kundebe zamanga, kulimi lwenkohliso.

120:3  Uzanikwani, njalo kuzakwengezelelwani kuwe, limi lwenkohliso?

120:4  Imitshoko ebukhali yeqhawe, lamalahle avuthayo esihlahla serotemu*!

120:5  Maye kimi, ngoba ngihlala njengowezizwe koMesheki, ngihlala emathenteni eKedari!

120:6  Umphefumulo wami sekukade wahlala laye ozonda ukuthula.

120:7  Ngingowokuthula, kodwa lapho ngikhuluma, bangabempi.

Chapter 121

121:1  Ngizaphakamisela amehlo ami ezintabeni, lapho usizo lwami oluzavela khona.

121:2  Usizo lwami luvela eNkosini, eyenza amazulu lomhlaba.

121:3  Kayiyikuvuma ukuthi unyawo lwakho lutshelele; umlondolozi wakho kayikuwozela.

121:4  Khangela, umlondolozi kaIsrayeli kayikuwozela njalo kayikulala.

121:5  INkosi ingumlondolozi wakho; iNkosi ingumthunzi wakho esandleni sakho sokunene.

121:6  Ilanga kaliyikukutshaya emini, lenyanga ebusuku.

121:7  INkosi izakulondoloza kukho konke okubi; izalondoloza umphefumulo wakho.

121:8  INkosi izalondoloza ukuphuma kwakho lokungena kwakho, kusukela khathesi kuze kube phakade.

Chapter 122

122:1  Ngathokoza lapho besithi kimi: Kasiye endlini yeNkosi.

122:2  Inyawo zethu zimi emasangweni akho, Jerusalema.

122:3  IJerusalema yakhiwe njengomuzi ohlangeneyo ngokwawo,

122:4  lapho izizwe ezenyukela khona, izizwe zeNkosi, kubufakazi bukaIsrayeli, ukuze zibonge ibizo leNkosi.

122:5  Ngoba kumiswe khona izihlalo zobukhosi zesahlulelo, izihlalo zobukhosi zendlu kaDavida.

122:6  Khulekelani ukuthula kweJerusalema; bazaphumelela abakuthandayo.

122:7  Kakube khona ukuthula phakathi kwemiduli yakho, inhlalakahle ezigodlweni zakho.

122:8  Ngenxa yabafowethu labangane bami sengizakuthi: Ukuthula kakube phakathi kwakho.

122:9  Ngenxa yendlu yeNkosi uNkulunkulu wethu ngizakudingela okuhle.

Chapter 123

123:1  Ngiyaphakamisela kuwe amehlo ami, wena ohlezi emazulwini.

123:2  Khangela, njengalokhu amehlo ezinceku engasesandleni senkosi yazo, njengamehlo encekukazi engasesandleni senkosikazi yayo, ngokunjalo amehlo ethu angaseNkosini uNkulunkulu wethu, ize ibe lesihawu kithi.

123:3  Woba lesihawu kithi, Nkosi, woba lesihawu kithi, ngoba sigcwele kakhulu yikudelelwa.

123:4  Umphefumulo wethu ugcwele kakhulu yikukloloda kwabonwabileyo, yikudelela kwabazigqajayo.

Chapter 124

124:1  Uba kwakungesiNkosi eyayilathi, katsho-ke uIsrayeli;

124:2  uba kwakungesiNkosi eyayilathi, lapho abantu besivukela,

124:3  ngabe basiginya siphila, ekuvutheni kolaka lwabo kithi;

124:4  ngabe amanzi agijima phezu kwethu, lempophoma yedlula phezu komphefumulo wethu;

124:5  ngabe amanzi aqubukayo edlula phezu komphefumulo wethu.

124:6  Kayibongwe iNkosi, engasinikelanga ukuthi sibe yimpango emazinyweni abo.

124:7  Umphefumulo wethu uphunyukile njengenyoni emjibileni wabathiyi; umjibila uqamukile, thina sasesiphunyuka.

124:8  Usizo lwethu lusebizweni leNkosi eyenza amazulu lomhlaba.

Chapter 125

125:1  Labo abathembela eNkosini banjengentaba iZiyonienganyikinyekiyo, emi kuze kube phakade.

125:2  Njengezintaba ziyiphahlile iJerusalema, ngokunjalo iNkosi iyabaphahla abantu bayo kusukela kulesisikhathi kuze kube nininini.

125:3  Ngoba intonga yobukhosi yobubi kayiyikuhlala phezu kwesabelo sabalungileyo, ukuze abalungileyo bangeluleli izandla zabo kokubi.

125:4  Nkosi, yenza okuhle kubo abalungileyo lakubo abaqotho enhliziyweni zabo.

125:5  Kodwa labo abaphambukela ezindleleni zabo ezitshekileyo iNkosi izabenza bahambe labenzi bobubi. Ukuthula phezu kukaIsrayeli!

Chapter 126

126:1  Lapho iNkosi ibuyisa abathunjiweyo beZiyoni, saba njengabaphuphayo.

126:2  Umlomo wethu wasugcwala uhleko, lolimi lwethu ukuhlabelela. Basebesithi phakathi kwezizwe: INkosi ibenzele izinto ezinkulu.

126:3  INkosi isenzele izinto ezinkulu; siyathokoza.

126:4  Buyisa, Nkosi, ukuthunjwa kwethu, njengezifula zeningizimu.

126:5  Abahlanyela ngezinyembezi bazavuna ngentokozo.

126:6  Yena ohamba ahambe ekhala inyembezi, ephethe inhlanyelo yokuhlanyela, isibili uzabuya ethokoza, ethwele inyanda zakhe.

Chapter 127

127:1  Uba iNkosi ingayakhi indlu, basebenzela ize kiyo abayakhayo. Uba iNkosi ingawulondolozi umuzi, umlindi ulindela ize.

127:2  Kuyize kini ukuthi livuke ngovivi, lihlale kuze kube sebusuku, lidle ukudla kosizi; ngokunjalo iyamnika ubuthongo othandiweyo wayo.

127:3  Khangela, abantwana bayilifa leNkosi, isithelo sesizalo singumvuzo.

127:4  Njengemitshoko esandleni seqhawe, banjalo abantwana bobutsha.

127:5  Ibusisiwe indoda egcwalise umxhaka wayo ngabo; kabayikuyangeka ngoba bazakhuluma lezitha esangweni.

Chapter 128

128:1  Ubusisiwe wonke oyesabayo iNkosi, ohamba endleleni zayo.

128:2  Ngoba uzakudla umsebenzi wezandla zakho; uzathokoza, njalo kuzakuba kuhle kuwe.

128:3  Umkakho uzakuba njengevini elithelayo emaceleni endlu yakho, abantwana bakho bazakuba njengamahlumela omhlwathi bezingelezele itafula lakho.

128:4  Ngoba khangela, ngokunjalo izabusiswa indoda eyesabayo iNkosi.

128:5  INkosi izakubusisa iseZiyoni, njalo ubone okuhle kweJerusalema insuku zonke zempilo yakho,

128:6  yebo, uzabona abantwana babantwana bakho. Ukuthula kakube phezu kukaIsrayeli!

Chapter 129

129:1  Kanengi bangihluphile kusukela ebutsheni bami, katsho-ke uIsrayeli,

129:2  kanengi bangihluphile kusukela ebutsheni bami, kanti kabangehlulanga.

129:3  Abalimi balima emhlana wami, bayenza yaba mide imifolo yabo.

129:4  INkosi ilungile, iqumile intambo zababi.

129:5  Kabayangeke babuyiselwe emuva bonke abazonda iZiyoni.

129:6  Kababe njengotshani ephahleni, obubuna bungakakhuli,

129:7  ovunayo angagcwalisi ngabo isandla sakhe, lalowo obopha izithungo isifuba sakhe.

129:8  Labadlulayo bangatsho ukuthi: Isibusiso seNkosi kasibe phezu kwenu; siyalibusisa ebizweni leNkosi.

Chapter 130

130:1  Ngisenzikini ngakhalela kuwe, Nkosi.

130:2  Nkosi, zwana ilizwi lami, indlebe zakho zilalele ilizwi lokuncenga kwami.

130:3  Uba wena, Nkosi, uqaphela iziphambeko, Nkosi, ngubani ongema?

130:4  Kodwa kuwe kulothethelelo, ukuze wesatshwe.

130:5  Ngiyilindele iNkosi, umphefumulo wami ulindile, lelizwini layo ngiyathemba.

130:6  Umphefumulo wami ulindela iNkosi okwedlula abalindele ukusa, belindele ukusa.

130:7  UIsrayeli kathembele eNkosini; ngoba eNkosini kulothandolomusa, njalo kuyo kulohlengo olunengi.

130:8  Yona-ke izahlenga uIsrayeli kuzo zonke iziphambeko zakhe.

Chapter 131

131:1  Nkosi, inhliziyo yami kayikhukhumali, lamehlo ami kawaphakami, njalo kangihambi ezintweni ezinkulu lezintweni ezimangalisayo kakhulu kimi.

131:2  Sibili ngichumisile ngathulisa umphefumulo wami, njengolunyuliweyo kunina; umphefumulo wami unjengolunyuliweyo phakathi kwami.

131:3  UIsrayeli kathembele eNkosini kusukela khathesi kuze kube laphakade.

Chapter 132

132:1  Khumbula, Nkosi, uDavida, izinhlupheko zakhe zonke,

132:2  ukuthi wafunga eNkosini, wathembisa kuSomandla kaJakobe:

132:3  Qotho, kangiyikungena ethenteni lendlu yami, qotho, kangiyikwenyukela ecansini lombheda wami;

132:4  qotho, kangiyikunika amehlo ami ubuthongo, ukuwozela ezinkopheni zami,

132:5  ngize ngiyitholele iNkosi indawo, indawo zokuhlala uSomandla kaJakobe.

132:6  Khangela, sakuzwa eEfratha, sakuthola emasimini egusu.

132:7  Sizangena ezindlini zayo zokuhlala, sikhonze esenabelweni senyawo zayo.

132:8  Sukuma, Nkosi, uye ekuphumuleni kwakho, wena lomtshokotsho wamandla akho!

132:9  Abapristi bakho kabembeswe ukulunga, labangcwele bakho bathabe kakhulu.

132:10  Ngenxa yenceku yakho uDavida ungafulathelisi ubuso bogcotshiweyo wakho.

132:11  INkosi yafunga ngeqiniso kuDavida, kayiyikubuyela emuva kilo: Owesithelo sesizalo sakho ngizambeka esihlalweni sakho sobukhosi.

132:12  Uba abantwana bakho begcina isivumelwano sami lezifakazelo zami engizabafundisa zona, labantwana babo bazahlala esihlalweni sakho sobukhosi kuze kube nini lanini.

132:13  Ngoba iNkosi iyikhethile iZiyoni, iyifisile ibe yindawo yayo yokuhlala.

132:14  Le yindawo yami yokuphumula kuze kube nini lanini; lapha ngizahlala, ngoba ngiyifisile.

132:15  Ngizabusisa kakhulu ukudla kwayo, ngisuthise abayanga bayo ngesinkwa.

132:16  Labapristi bayo ngizabembathisa usindiso, labangcwele bayo bazahlabelela kakhulu ngenjabulo.

132:17  Lapho ngizahlumisa uphondo lukaDavida; ngimisele ogcotshiweyo wami isibane.

132:18  Izitha zakhe ngizazembathisa ihlazo, kodwa phezu kwakhe uzakhazimula umqhele wakhe wobukhosi.

Chapter 133

133:1  Khangela, kuhle kangakanani njalo kumnandi kangakanani ukuhlala kwabazalwane ndawonye ngitsho babe munye.

133:2  Kufanana lamafutha amahle phezu kwekhanda, ehlela endevini, indevu zikaAroni, ehlele emphethweni wezembatho zakhe,

133:3  njengamazolo eHermoni, ehlela entabeni zeZiyoni; ngoba lapho iNkosi yalaya isibusiso, impilo kuze kube phakade.

Chapter 134

134:1  Khangelani, libonge iNkosi lina lonke zinceku zeNkosi, elimi endlini yeNkosi ebusuku.

134:2  Phakamiselani izandla zenu endaweni engcwele, libonge iNkosi.

134:3  INkosi eyenza amazulu lomhlaba kayilibusise iseZiyoni.

Chapter 135

135:1  Dumisani iNkosi! Dumisani ibizo leNkosi, dumisani lina zinceku zeNkosi,

135:2  elimi endlini yeNkosi, emagumeni endlu kaNkulunkulu wethu.

135:3  Dumisani iNkosi, ngoba iNkosi ilungile; hlabelelani indumiso ebizweni layo, ngoba kumnandi.

135:4  Ngoba iNkosi izikhethele uJakobe, uIsrayeli abe ngokuligugu kwakhe okukhethekileyo.

135:5  Ngoba mina ngiyazi ukuthi iNkosi inkulu, ukuthi iNkosi yethu iphezu kwabo bonke onkulunkulu.

135:6  Konke iNkosi ekuthandayo iyakwenza, emazulwini lemhlabeni, ezinlwandle lenzikini zonke.

135:7  Yenza izinkungu zenyuke emikhawulweni yomhlaba, yenzela izulu imibane, ikhupha umoya eziphaleni zayo.

135:8  Eyatshaya izibulo leGibhithe, kusukela emuntwini kuze kube senyamazaneni.

135:9  Yathumela izibonakaliso lezimangaliso phakathi kwakho, Gibhithe, phezu kukaFaro laphezu kwenceku zakhe zonke.

135:10  Eyatshaya izizwe ezinengi, yabulala amakhosi alamandla,

135:11  uSihoni inkosi yamaAmori, loOgi inkosi yeBashani, layo yonke imibuso yeKhanani,

135:12  yanikela ilizwe labo laba yilifa, ilifa likaIsrayeli, isizwe sayo.

135:13  Nkosi, ibizo lakho limi kuze kube phakade, ukukhunjulwa kwakho, Nkosi, kusizukulwana ngesizukulwana.

135:14  Ngoba iNkosi izakwehlulela abantu bayo, izazisola mayelana lezinceku zayo.

135:15  Izithombe zezizwe ziyisiliva legolide, umsebenzi wezandla zomuntu.

135:16  Zilemilomo, kodwa kazikhulumi; zilamehlo, kodwa kaziboni;

135:17  zilendlebe, kodwa kazizwa; lomoya kawukho emlonyeni wazo.

135:18  Abazenzayo bafanana lazo, laye wonke othembela kuzo.

135:19  Wena ndlu kaIsrayeli, bongani iNkosi; wena ndlu kaAroni, bongani iNkosi;

135:20  wena ndlu kaLevi, bongani iNkosi. Lina eliyesabayo iNkosi, bongani iNkosi.

135:21  Kayibongwe iNkosi iseZiyoni, ehlala eJerusalema. Dumisani iNkosi!

Chapter 136

136:1  Bongani iNkosi ngoba ilungile, ngoba isihawu sayo simi kuze kube nininini.

136:2  Bongani uNkulunkulu wabonkulunkulu, ngoba isihawu sakhe simi kuze kube nininini.

136:3  Bongani iNkosi yamakhosi, ngoba isihawu sayo simi kuze kube nininini.

136:4  Yona yodwa eyenza izimangaliso ezinkulu, ngoba isihawu sayo simi kuze kube nininini;

136:5  eyenza amazulu ngokuhlakanipha, ngoba isihawu sayo simi kuze kube nininini;

136:6  eyendlala umhlaba phezu kwamanzi, ngoba isihawu sayo simi kuze kube nininini;

136:7  eyenza izikhanyiso ezinkulu, ngoba isihawu sayo simi kuze kube nininini;

136:8  ilanga ukubusa emini, ngoba isihawu sayo simi kuze kube nininini;

136:9  inyanga lezinkanyezi ukubusa ebusuku, ngoba isihawu sayo simi kuze kube nininini.

136:10  Yona eyatshaya amaGibhithe kumazibulo awo, ngoba isihawu sayo simi kuze kube nininini;

136:11  yakhupha uIsrayeli phakathi kwabo, ngoba isihawu sayo simi kuze kube nininini;

136:12  ngesandla esilamandla langengalo eyeluliweyo, ngoba isihawu sayo simi kuze kube nininini.

136:13  Yona eyehlukanisa uLwandle oluBomvu lwaba yiziqamu, ngoba isihawu sayo simi kuze kube nininini;

136:14  yenza uIsrayeli adabule phakathi kwalo, ngoba isihawu sayo simi kuze kube nininini;

136:15  kodwa yathintithela uFaro lebutho lakhe oLwandle oluBomvu, ngoba isihawu sayo simi kuze kube nininini.

136:16  Yona eyakhokhela abantu bayo enkangala, ngoba isihawu sayo simi kuze kube nininini.

136:17  Yona eyatshaya amakhosi amakhulu, ngoba isihawu sayo simi kuze kube nininini;

136:18  yabulala amakhosi adumileyo, ngoba isihawu sayo simi kuze kube nininini;

136:19  uSihoni inkosi yamaAmori, ngoba isihawu sayo simi kuze kube nininini;

136:20  loOgi inkosi yeBashani, ngoba isihawu sayo simi kuze kube nininini;

136:21  yanika ilizwe labo laba yilifa, ngoba isihawu sayo simi kuze kube nininini;

136:22  ilifa kuIsrayeli inceku yayo, ngoba isihawu sayo simi kuze kube nininini.

136:23  Eyasikhumbula ebuphansini bethu, ngoba isihawu sayo simi kuze kube nininini;

136:24  yasophula ezitheni zethu, ngoba isihawu sayo simi kuze kube nininini.

136:25  Enika yonke inyama ukudla, ngoba isihawu sayo simi kuze kube nininini.

136:26  Bongani uNkulunkulu wamazulu, ngoba isihawu sakhe simi kuze kube nininini.

Chapter 137

137:1  Emifuleni yeBhabhiloni sahlala phansi khona, yebo sakhala inyembezi, lapho sikhumbula iZiyoni.

137:2  Amachacho ethu sawaphanyeka eminyezaneni phakathi kwayo.

137:3  Ngoba khonapho abasithumbayo basicela amazwi engoma, labasimotshayo bacela injabulo besithi: Sihlabeleleni enye yezingoma zeZiyoni.

137:4  Singahlabela njani ingoma yeNkosi elizweni lemzini?

137:5  Uba ngikukhohlwa, Jerusalema, isandla sami sokunene kasikhohlwe ubungcitshi.

137:6  Ulimi lwami kalunamathele elwangeni lwami, uba ngingakukhumbuli, uba ngingaphakamisi iJerusalema phezu kwentokozo yami enkulu.

137:7  Khumbula, Nkosi, ngabantwana bakoEdoma, ngosuku lweJerusalema, abathi: Dilizani, dilizani, kuze kube sesisekelweni sayo.

137:8  Ndodakazi yeBhabhiloni, ozabhujiswa, ubusisiwe ozaphindisela kuwe isenzo osenze kithi.

137:9  Ubusisiwe ozabamba asakaze abantwana bakho edwaleni.

Chapter 138

138:1  Ngizakubonga ngenhliziyo yami yonke; phambi kwabonkulunkulu ngizakuhlabelela indumiso.

138:2  Ngizakhonza ngikhangele ngasethempelini lakho elingcwele, ngidumise ibizo lakho ngenxa yothando lwakho langenxa yobuqotho bakho; ngoba ukhulisile ilizwi lakho phezu kwalo lonke ibizo lakho.

138:3  Ngosuku engakhala ngalo wangiphendula, wangiqinisa ngamandla emphefumulweni wami.

138:4  Wonke amakhosi omhlaba azakudumisa, Nkosi, ngoba azwile amazwi omlomo wakho.

138:5  Yebo, azahlabelela ngezindlela zeNkosi, ngoba lukhulu udumo lweNkosi.

138:6  Loba iNkosi iphakeme, kube kanti iyabona othobekileyo; kodwa ozigqajayo iyamazi ekhatshana.

138:7  Loba ngihamba phakathi kwenhlupheko, uzangiphilisa; uzakwelula isandla sakho umelana lolaka lezitha zami, lesandla sakho sokunene sizangisindisa.

138:8  INkosi izaphelelisa okumayelana lami; uthando lwakho, Nkosi, lumi kuze kube nininini. Ungatshiyi imisebenzi yezandla zakho.

Chapter 139

139:1  Nkosi, ungihlolile, uyangazi.

139:2  Wena uyakwazi ukuhlala kwami lokusukuma kwami; uyaqedisisa imicabango yami ukhatshana.

139:3  Uyahlungula ukuhamba kwami lokulala kwami, uzejwayele indlela zami zonke.

139:4  Ngoba kalikho ilizwi elimini lwami, khangela Nkosi, usulazi lonke.

139:5  Ungizingelezile emuva langaphambili, ubeke isandla sakho phezu kwami.

139:6  Lolulwazi lumangalisa kakhulu kimi; luphakeme, kangilakho ukufinyelela kulo.

139:7  Ngizakuya ngaphi ngisuke kuMoya wakho? Kumbe ngizabalekela ngaphi ngisuke ebusweni bakho?

139:8  Uba ngisenyukela emazulwini, lapho ukhona; uba ngisendlala icansi lami esihogweni, khangela, ukhona.

139:9  Uba ngithatha amaphiko okusa, ngihlale emikhawulweni yolwandle,

139:10  lalapho isandla sakho sizangikhokhela, lesokunene sakho singibambe.

139:11  Uba ngisithi: Isibili umnyama uzangifihla, ngitsho ubusuku buzakuba yikukhanya kimi inhlangothi zonke.

139:12  Ngitsho umnyama kawufihli kuwe, kodwa ubusuku bukhanya njengemini; njengomnyama kunjalo ukukhanya kuwe.

139:13  Ngoba wena ungumnini wezinso zami, wangeluka esiswini sikamama.

139:14  Ngizakudumisa, ngenxa yokuthi ngenziwe ngokwesabekayo, ngokumangalisayo. Imisebenzi yakho iyamangalisa; lomphefumulo wami uyakwazi kuhle kakhulu.

139:15  Amathambo ami ayengafihlekanga kuwe, lapho ngangisenziwa ekusithekeni, ngenziwa ngobuciko ezindaweni ezizikileyo zomhlaba.

139:16  Amehlo akho abona ibumba lami; legwalweni lwakho zonke lezi zabhalwa, izinsuku okwabunjwa ngazo, kungakabikho lakunye kwakho.

139:17  Iligugu kangakanani-ke kimi imicabango yakho, O Nkulunkulu; bukhulu kangakanani ubunengi bayo!

139:18  Uba ngingayibala, minengi kuletshebetshebe. Lapho ngivuka, ngilokhu ngilawe.

139:19  Isibili uzambulala omubi, Nkulunkulu! Ngakho lina bantu abomele igazi sukani kimi;

139:20  abakhuluma ngenkohliso ngawe, ziphatha ngeze ibizo lakho, izitha zakho.

139:21  Kangibazondi yini, Nkosi, abakuzondayo, nginengwe ngabakuvukelayo?

139:22  Ngiyabazonda ngenzondo epheleleyo; sebeyizitha kimi.

139:23  Ngihlola, Nkulunkulu, uyazi inhliziyo yami; ngilinga, uyazi imicabango yami,

139:24  ubone ukuthi ikhona indlela embi kimi yini, ungikhokhele endleleni ephakade.

Chapter 140

140:1  Ngikhulula, Nkosi, emuntwini omubi, ungilondoloze emuntwini olesihluku,

140:2  abaceba izinto ezimbi enhliziyweni, usuku lonke babuthanela izimpi.

140:3  Balola ulimi lwabo njengenyoka, ubuhlungu bebululu bungaphansi kwendebe zabo. Sela*.

140:4  Ngilondoloze, Nkosi, ezandleni zomubi, ungivikele emuntwini olesihluku; abaceba ukuwisa inyawo zami.

140:5  Abazigqajayo bangifihlele umjibila, lezintambo, bendlala imbule eceleni kwendlela; bangibekela izithiyo. Sela*.

140:6  Ngithe eNkosini: Wena unguNkulunkulu wami. Beka indlebe elizwini lokuncenga kwami, Nkosi.

140:7  Jehova, Nkosi, mandla osindiso lwami, wembese ikhanda lami osukwini lwezikhali.

140:8  Unganiki, Nkosi, izifiso zomubi, ungaphumelelisi icebo lakhe elibi, hlezi baziphakamise. Sela*.

140:9  Ngekhanda labangihanqileyo, ububi bendebe zabo kabubembese.

140:10  Kakuthi amalahle atshisayo akhithikele phezu kwabo, ubawisela emlilweni, emigodini etshonayo, ukuze bangavuki.

140:11  Umuntu wolimi kangamiswa elizweni; umuntu olesihluku, ububi buzamzingela kube yikuwiswa kwakhe.

140:12  Ngiyazi ukuthi iNkosi izasebenza udaba lohluphekayo, ilungelo labayanga.

140:13  Isibili abalungileyo bazalidumisa ibizo lakho; abaqotho bazahlala ebusweni bakho.

Chapter 141

141:1  Nkosi, ngiyakhala kuwe; phangisa uze kimi; beka indlebe elizwini lami lapho ngikhala kuwe.

141:2  Umkhuleko wami kawumiswe njengempepha phambi kwakho, ukuphakanyiswa kwezandla zami njengomnikelo wakusihlwa.

141:3  Nkosi, bekela umlomo wami umlindi, gcina umnyango wendebe zami.

141:4  Ungaphenduleli inhliziyo yami entweni embi, ukuthi ngenze izenzo ezimbi kanye labantu abenza ububi, ngingadli ezibilibocweni zabo.

141:5  Olungileyo kangitshaye ethandwenilomusa, angisole; kuzakuba ngamafutha ekhanda, ikhanda lami kalingawali, ngoba lomkhuleko wami usezakuba sezinhluphekweni zabo.

141:6  Abahluleli babo baphoselwa emaceleni edwala, bazakuzwa amazwi ami ngoba amnandi.

141:7  Amathambo ethu ahlakazekile emlonyeni wengcwaba njengobandayo adabule emhlabathini.

141:8  Kodwa amehlo ami akuwe, Jehova, Nkosi; ngithembele kuwe; ungawuchayi umphefumulo wami.

141:9  Ngigcina emandleni omjibila abangibekele wona, lezithiyo zabenzi bobubi.

141:10  Ababi kabawele emambuleni abo kanye, ngize ngidlule mina.

Chapter 142

142:1  Ngakhalela eNkosini ngelizwi lami, ngelizwi lami eNkosini ngancenga.

142:2  Ngathulula isikhalazo sami phambi kwayo, ngatshengisa ukuhlupheka kwami phambi kwayo.

142:3  Lapho umoya wami uphela amandla phakathi kwami, wena wayazi indlela yami. Endleleni engihamba ngayo bangifihlele umjibila.

142:4  Khangela ngakwesokunene, ubone, kodwa wayengekho ongaziyo; isiphephelo sangehlula, kakho owakhathalela umphefumulo wami.

142:5  Ngakhalela kuwe, Nkosi, ngathi: Wena uyisiphephelo sami, isabelo sami elizweni labaphilayo.

142:6  Lalela ukukhala kwami, ngoba ngehliselwe phansi kakhulu. Ngikhulula kwabangizingelayo, ngoba balamandla kulami.

142:7  Khupha umphefumulo wami entolongweni, ukuze ngidumise ibizo lakho. Abalungileyo bazangibuthanela, ngoba uzangiphatha kuhle kakhulu.

Chapter 143

143:1  Nkosi, zwana umkhuleko wami, ubeke indlebe ekuncengeni kwami. Ungiphendule ngothembeko lwakho, ngokulunga kwakho.

143:2  Njalo ungangeni kusahlulelo lenceku yakho, ngoba phambi kobuso bakho kakho ophilayo ozalungisiswa.

143:3  Ngoba isitha sizingele umphefumulo wami, sacindezelela impilo yami emhlabathini, sangenza ngahlala emnyameni omkhulu, njengabakade bafa.

143:4  Ngakho umoya wami uphela amandla phakathi kwami, lenhliziyo yami ithithibele phakathi kwami.

143:5  Ngikhumbula insuku zekadeni, ngizindla ngazo zonke izenzo zakho, nginakane ngomsebenzi wezandla zakho.

143:6  Ngelulela izandla zami kuwe; umphefumulo wami womele wena njengomhlaba owomileyo. Sela*.

143:7  Phangisa ungiphendule, Nkosi; umoya wami uyaphela. Ungangifihleli ubuso bakho, hlezi ngibe njengalabo abehlela emgodini.

143:8  Ngizwisa uthandolomusa wakho ekuseni, ngoba ngiyathemba kuwe. Ungazise indlela engingahamba ngayo, ngoba ngiyaphakamisela kuwe umphefumulo wami.

143:9  Ngikhulula ezitheni zami, Nkosi; ngizifihlile kuwe.

143:10  Ngifundisa ukwenza intando yakho, ngoba wena unguNkulunkulu wami. UMoya wakho muhle, ngikhokhelele elizweni lokuqonda.

143:11  Ngenxa yebizo lakho, Nkosi, ngiphilisa. Ngokulunga kwakho khupha umphefumulo wami ekuhluphekeni.

143:12  Langomusa wakho chitha izitha zami, ubhubhise bonke abahlupha umphefumulo wami, ngoba ngiyinceku yakho.

Chapter 144

144:1  Kayibongwe iNkosi, idwala lami, efundisela izandla zami impi, iminwe yami ukulwa;

144:2  umusa wami, lenqaba yami, umphotshongo wami ophakemeyo, lomkhululi wami, isihlangu sami, lengiphephela kuyo, ethobisa abantu bami ngaphansi kwami.

144:3  Nkosi, umuntu uyini ukuthi umazi? Indodana yomuntu ukuthi uyinanze?

144:4  Umuntu unjengeze, insuku zakhe zinjengesithunzi esidlulayo.

144:5  Nkosi, khothamisa amazulu akho, wehle; thinta izintaba ukuze zithunqe.

144:6  Phazimisa umbane, ubachithe, uthumele imitshoko yakho, ubahlakaze.

144:7  Yelula isandla sakho uphezulu, ungikhulule, ungophule emanzini amanengi, esandleni sabantwana besizwe,

144:8  abamlomo wabo ukhuluma amanga, lesandla sabo sokunene singesokunene senkohliso.

144:9  Ngizahlabelela kuwe ingoma entsha, Nkulunkulu; ngizahlabelela indumiso kuwe ngogubhu olulentambo ezilitshumi.

144:10  Wena onika amakhosi usindiso, okhulula uDavida inceku yakho enkembeni embi.

144:11  Ngophula, ungikhulule esandleni sabantwana besizwe, abamlomo wabo ukhuluma amanga, lesandla sabo sokunene singesokunene senkohliso.

144:12  Ukuthi amadodana ethu abe njengezilimo ezikhula ebutsheni bazo, amadodakazi ethu njengamatshe engonsi abazwe njengomfanekiso wesigodlo!

144:13  Ukuthi iziphala zethu zigcwale ziveze uhlobo ngohlobo; izimvu zethu zizale izinkulungwane, yebo, izinkulungwane ezilitshumi emadlelweni ethu!

144:14  Ukuthi inkabi zethu zingathwaliswa, kungabi lokufohlela phakathi, njalo kungabi lokuphuma, kumbe kungabi lesililo ezitaladeni zethu!

144:15  Bayathaba abantu okunjalo kubo; bayathaba abantu abaNkulunkulu wabo yiNkosi.

Chapter 145

145:1  Ngizakuphakamisa, Nkulunkulu wami, Nkosi, ngibonge ibizo lakho kuze kube nini lanini.

145:2  Ngensuku zonke ngizakubonga, ngidumise ibizo lakho kuze kube nini lanini.

145:3  Yinkulu iNkosi, ifanele ukudunyiswa kakhulu, lobukhulu bayo kabuhloleki.

145:4  Isizukulwana ngesizukulwana sizababaza imisebenzi yakho, sitshumayele izenzo zakho ezilamandla.

145:5  Ngizakhuluma ngodumo lwakho olukhazimulayo lobukhosi bakho, langendaba zezimangaliso zakho.

145:6  Njalo bazakhuluma ngamandla ezenzo zakho ezesabekayo, lobukhulu bakho ngibulandise.

145:7  Bazathulula ngamazwi isikhumbuzo sokulunga kwakho okukhulu, bahlabele ngentokozo ngokulunga kwakho.

145:8  Ilomusa lesihawu iNkosi, iyaphuza ukuthukuthela, inkulu ngothando.

145:9  INkosi ilungile kubo bonke, lezihawu zayo ziphezu kwayo yonke imisebenzi yayo.

145:10  Imisebenzi yakho yonke izakudumisa, Nkosi, labangcwele bakho bazakubusisa.

145:11  Bazakhuluma ngenkazimulo yombuso wakho, balandise ngamandla akho.

145:12  Ukuze bazise abantwana babantu izenzo zayo ezilamandla, lenkazimulo yobukhosi bombuso wayo.

145:13  Umbuso wakho ungumbuso wamaphakade wonke, lokubusa kwakho kumi kuso sonke isizukulwana ngesizukulwana.

145:14  INkosi isekela bonke abawayo, iphakamise bonke abakhothemeyo.

145:15  Amehlo abo bonke alindele kuwe, wena-ke uyabanika ukudla kwabo ngesikhathi sakho.

145:16  Uyavula isandla sakho, usuthise isifiso sakho konke okuphilayo.

145:17  INkosi ilungile endleleni zayo zonke, njalo ilomusa emisebenzini yayo yonke.

145:18  INkosi iseduze labo bonke abayibizayo, labo bonke abayibiza ngeqiniso.

145:19  Yenza isifiso sabayesabayo, iyezwa ukukhala kwabo, ibasindise.

145:20  INkosi iyabalondoloza bonke abayithandayo; kodwa bonke ababi izababhubhisa.

145:21  Umlomo wami uzakhuluma indumiso yeNkosi, layo yonke inyama ibonge ibizo layo elingcwele kuze kube nini lanini.

Chapter 146

146:1  Dumisani iNkosi! Dumisa iNkosi, mphefumulo wami.

146:2  Ngizayidumisa iNkosi ngisaphila; ngizahlabelela indumiso kuNkulunkulu wami ngisesekhona.

146:3  Lingabeki ithemba lenu eziphathamandleni, endodaneni yomuntu okungekho kuyo usindiso.

146:4  Umoya wakhe uyaphuma, uyabuyela emhlabathini wakhe; ngalolosuku amacebo akhe ayaphela.

146:5  Ubusisiwe yena oloNkulunkulu kaJakobe ukuthi abe lusizo lwakhe, othemba lakhe liseNkosini uNkulunkulu wakhe,

146:6  owenza amazulu, lomhlaba, ulwandle, lakho konke okukukho, ogcina iqiniso kuze kube nininini,

146:7  owenzela abacindezelweyo isahlulelo, obaphayo ukudla abalambileyo. INkosi iyakhulula izibotshwa,

146:8  INkosi iyavula amehlo eziphofu; iNkosi iyabalulamisa abakhothemeyo; iNkosi iyabathanda abalungileyo.

146:9  INkosi ilondoloza abemzini, isekele intandane lomfelokazi; kodwa indlela yababi iyayigenqula.

146:10  INkosi izabusa kuze kube nininini, uNkulunkulu wakho, Ziyoni, kuze kube sesizukulwaneni ngesizukulwana. Dumisani iNkosi!

Chapter 147

147:1  Dumisani iNkosi, ngoba kuhle ukuhlabelela indumiso kuNkulunkulu wethu, ngoba kumnandi, indumiso ifanele.

147:2  INkosi iyayakha iJerusalema, iqoqe abahlakaziweyo bakoIsrayeli.

147:3  Yelapha abadabukileyo enhliziyweni, ibophe izinsizi zabo.

147:4  Ibala inani lezinkanyezi, izibize zonke ngamabizo.

147:5  Yinkulu iNkosi yethu, njalo ngeyamandla amakhulu; ukuqedisisa kwayo kakulakunaniswa.

147:6  INkosi iyaphakamisa abamnene, iyabawisela emhlabathini ababi.

147:7  Hlabelelani eNkosini ngokubonga; lihlabele indumiso kuNkulunkulu wethu ngechacho.

147:8  Eyembesa amazulu ngamayezi, elungisela umhlaba izulu, ekhulisa utshani ezintabeni,

147:9  enika inyamazana ukudla kwazo, amaphuphu ewabayi akhalayo.

147:10  Kayithokozi ngamandla ebhiza, kayijabuleli imilenze yomuntu.

147:11  INkosi ijabulela abayesabayo, labo abathembela emuseni wayo.

147:12  Babaza iNkosi, Jerusalema. Dumisa uNkulunkulu wakho, Ziyoni.

147:13  Ngoba iqinise imigoqo yamasango akho; ibusise abantwana bakho phakathi kwakho.

147:14  Iyenza ukuthula emingceleni yakho; ikusuthise ngamanono engqoloyi.

147:15  Iyathumela umthetho wayo emhlabeni; ilizwi layo ligijima ngesiqubu esikhulu.

147:16  Enika iliqhwa elikhithikileyo njengoboya bezimvu; ihaze ungqwaqwane njengomlotha.

147:17  Iyaphosa isiqhotho sayo njengezigaqa; ngubani ongema phambi komqando wayo?

147:18  Iyathumela ilizwi layo, ikuncibilikise; ivunguzise umoya wayo, amanzi ageleze.

147:19  Iyamemezela ilizwi layo kuJakobe, izimiso zayo lezahlulelo zayo kuIsrayeli.

147:20  Kayenzanga njalo lakusiphi isizwe; lezahlulelo zayo kazizazi. Dumisani iNkosi!

Chapter 148

148:1  Dumisani iNkosi! Dumisani iNkosi lisemazulwini, idumiseni endaweni eziphezulu.

148:2  Idumiseni lonke zingilosi zayo. Idumiseni lonke mabandla ayo.

148:3  Idumiseni langa lenyanga. Idumiseni lonke zinkanyezi ezikhanyayo.

148:4  Idumiseni mazulu amazulu, lani manzi aphezu kwamazulu.

148:5  Kakudumise ibizo leNkosi; ngoba yona yalaya, kwasekudalwa.

148:6  Yakumisa kuze kube nini lanini; yakhupha isimiso esingayikwedlula.

148:7  Dumisani iNkosi lisemhlabeni, migobho yolwandle, lani zinziki zonke,

148:8  mlilo lesiqhotho, liqhwa elikhithikileyo lenkungu, siphepho esenza ilizwi layo;

148:9  zintaba lamaqaqa wonke, zihlahla zezithelo lemisedari yonke,

148:10  zinyamazana zeganga lezifuyo zonke, zinto ezihuquzelayo lenyoni eziphaphayo.

148:11  Makhosi omhlaba, lani zizwe zonke, ziphathamandla, lani babusi bomhlaba,

148:12  majaha, lani-ke zintombi, maxhegu labatsha.

148:13  Kabadumise ibizo leNkosi, ngoba ibizo layo lodwa liphakeme; ubukhosi bayo buphezu komhlaba lamazulu.

148:14  Njalo iphakamisile uphondo lwabantu bayo, indumiso yabo bonke abangcwele bayo, eyabantwana bakoIsrayeli, abantu abaseduze layo. Dumisani iNkosi!

Chapter 149

149:1  Dumisani iNkosi! HIabelelani iNkosi ingoma entsha, indumiso yayo ebandleni labangcwele.

149:2  UIsrayeli kathokoze ngoMenzi wakhe, abantwana beZiyoni kabathabe eNkosini yabo.

149:3  Kabadumise ibizo layo ngokusina, kabayihlabelele indumiso ngesigujana lechacho.

149:4  Ngoba iNkosi iyathokoza ngabantu bayo; izacecisa abamnene ngosindiso.

149:5  Abangcwele kabathokoze ngendumiso, kabahlabelele ngenjabulo emibhedeni yabo.

149:6  Indumiso zikaNkulunkulu zisemphinjeni wabo, lenkemba esika nhlangothi mbili esandleni sabo,

149:7  ukuze benze impindiselo phezu kwabahedeni, izijeziso phezu kwezizwe,

149:8  ukuze babophe amakhosi azo ngamaketane, lezikhulu zazo ngezibopho zensimbi,

149:9  ukuze benze isahlulelo esibhaliweyo phezu kwazo. Loludumo abangcwele bayo bonke balalo. Dumisani iNkosi!

Chapter 150

150:1  Dumisani iNkosi! Dumisani uNkulunkulu endlini yakhe engcwele; mdumiseni emkhathini wamandla akhe.

150:2  Mdumiseni ngenxa yezenzo zakhe ezilamandla, limdumise ngenxa yobunengi bobukhulu bakhe.

150:3  Mdumiseni ngokuvuthelwa kophondo, limdumise ngogubhu lwezintambo lechacho,

150:4  limdumise ngesigujana langokusina, limdumise ngezinto zokuhlabelela ezilentambo langomhlanga,

150:5  limdumise ngensimbi ezincencethayo ezihlokomayo, limdumise ngensimbi ezincencethayo ezikhala kakhulu.

150:6  Konke okuphefumulayo kakudumise iNkosi. Dumisani iNkosi!