Kapingamarangi - Psalms

Chapter 1

1:1  E-maluagina go tangada dela e-hagalee hagalongo gi digau huaidu, ge hagalee daudali nia hangaahai o digau hai mee hala, ge hagalee hagabuni-anga gi digau ala e-haga-balumee a God.

1:2  Gei e-tenetene-hua di-hagalongo gi-nia haganoho a Dimaadua, mo-di hagamaumau nia maa i-di boo mo-di aa.

1:3  Mee e-hai gadoo be-di laagau dela e-tomo i taalinga di monowai, dela e-huwa i dono madagoaa dela belee huwa-ai. Nia lau o di-maa hagalee mae. Nia mee a-maa ma-gaa-hai le e-kila humalia huogodoo.

1:4  Gei digau huaidu la-hagalee-loo e-hai beelaa. Digaula e-hai gadoo be nia lau-laagau maangoo ma-ga-iliili go di madangi.

1:5  Deenei-laa, digau ala e-haihai di huaidu ga-hagaduadua go God, ga-dugu-gee mo ana daangada donu.

1:6  Dimaadua le e-dagi ge e-abaaba digau ala e-haihai nia mee donu, gei digau huaidu le e-hula i-hongo di-nadau ala gi-di hagaduadua.

Chapter 2

2:1  Ma e-aha dela digau tuadimee e-haga-togotogomaalia bolo ginaadou e-hai-baahi? Ma e-aha dela nia daangada e-haganohonoho nadau hagamamaanadu balumee?

2:2  Nadau king mo nadau dagi e-haga-togotogomaalia bolo ginaadou e-hai-baahi gi Dimaadua mo dana king dela ne-hilihili.

2:3  Digaula e-helekai, “Gidaadou ga-haga-maahede gidaadou gi-daha mo nia haganoho meemaa, gaa-kili gi-daha mo gidaadou nia mogobuna meemaa ala e-dagi gidaadou!”

2:4  Di Tagi e-gadagada mai i dono lohongo-king i-di langi, ge e-helekai haga-balumee nia hagamaanadu digaula.

2:5  Gei Mee ga-helekai gi digaula i-lodo dono hagawelewele, gaa-hai digaula gi-mmaadagu huoloo i dono hagawelewele,

2:6  ga-helekai, “Au guu-dugu dagu king dela ne-hilihili gi-hongo dagu gonduu haga-madagu go Zion.”

2:7  Di king ga-helekai, “Au ga-haga-iloo nia mee a Dimaadua ala ne-helekai-ai. Mee ne-helekai-mai boloo, ‘Goe go dagu dama-daane. Dangi-nei gei Au guu-hai tamana ni-oou.

2:8  Dangi-mai, gei Au ga-gowadu gi-di-goe digau tuadimee huogodoo. Henuailala hagatau gaa-hai di mee ni-aau.

2:9  Goe ga-daaligi digaula gi togodogo baalanga. Goe ga-hagamaawa digaula gi-meheuheu dagidahi gadoo be-di loaabi hadu.’ ”

2:10  Malaa, goodou go nia king, goodou hagalongo gi dagu helekai, ge goodou go nia dagi o henuailala, goodou la-gi-hagalongo gi-di haga-iloo deenei:

2:11  Goodou hai-hegau gi Dimaadua mo-di mmaadagu, mo-di polepole,

2:12  mo-di pala gi Mee gi-de nnoo-aga di hagawelewele o-Maa hagalimalima, gei goodou gaa-mmade hagalimalima. E-haga-maluagina go digau huogodoo ala e-hula gi Mee bolo gi-abaaba-lia ginaadou.

Chapter 3

3:1  Meenei Dimaadua, ogu hagadaumee e-dogologowaahee, digau ala e-hai-baahi mai gi-di-au le e-dogologowaahee!

3:2  Digaula e-leelee i-di-au boloo, “God hagalee hagamaamaa a-mee.”

3:3  Meenei Dimaadua, Goe go dogu abaaba dela e-haga-dagaloaha au i-nia madagoaa huogodoo gi-daha mo ogu haingadaa, Goe dela ne-hai au gi-aali, gaa-hai labelaa au gi-manawa-maaloo.

3:4  Au e-gahigahi Dimaadua e-hagamaamaa au, gei Mee gu-hagamaamaa au mai i dono gonduu haga-madagu.

3:5  Au gaa-moe gi-lala gaa-kii, gei Dimaadua e-hagaloohi au i-di waalooloo o-di boo.

3:6  Au hagalee madagu i-nia hagadaumee e-mana ala e-haganiga-mai dogu gili i-nia baahi huogodoo.

3:7  Meenei Dimaadua, hanimoi! Meenei dogu God, haga-dagaloaha-ina au! Daaligidia ogu hagadaumee huogodoo gi-deai nadau mahi e-daaligi au ai.

3:8  Nia mogobuna o-di aali le e-lloomoi i-baahi o Dimaadua. Mee gi-haga-humalia-ina ana daangada.

Chapter 4

4:1  Hila-mai gi-di-au i dogu madagoaa ma-gaa-hai agu dalodalo, meenei God dogu Dangada Daa! Dogu madagoaa nogo haingadaa, gei Goe gu-hagamaamaa au. Goe gi-manawa-dumaalia mai dolomeenei, hagalongo-mai gi agu dalodalo.

4:2  Goodou go nia daangada, e-waalooloo behee go di-godou hai-baahi mai gi-di-au? E-waalooloo behee go di-godou haga-dahidamee nia mee ala ono hadinga ai, mo-di daudali nia kai tilikai?

4:3  Goodou gi-langahia bolo Dimaadua le e-hilihili digau ala e-donu, go digau e-hai-mee ginai Ia, gei Mee e-longono-Ia au ma-ga-gahigahi a-Mee.

4:4  Goodou polepole mo-di mmaadagu ge gi-dugua godou haihai huaidu. Goodou hagamaanadu gi-humalia di mee deenei, i godou madagoaa ma-gaa-moe deemuu i-hongo godou hada.

4:5  Goodou tigidaumaha gi Dimaadua i-nia tigidaumaha ala e-donu, mo-di hagadonu-ina a-Mee.

4:6  Digau dogologo e-dalodalo beenei: “Gaamai gi gimaadou labelaa gi no-nua o hagahumalia, meenei Dimaadua, Goe manawa-dumaalia-mai gi gimaadou!”

4:7  Gei di tene dela ne-gaamai Kooe gi-di-au, la-koia e-damanaiee laa-hongo nia tenetene o digau ala e-tene gi nadau ‘wheat’ mo nadau waini.

4:8  Dogu madagoaa ma-gaa-moe gi-lala, gei au e-kii i-lodo di aumaalia, idimaa Kooe, meenei Dimaadua, dela e-hagaloohi au.

Chapter 5

5:1  Meenei Dimaadua, hagalongo-mai gi agu helekai, mo-di hagalongo-mai gi dogu dogi.

5:2  Meenei dogu God mo dogu king, hagalongo-mai gi dagu dangidangi i-di hagamaamaa! Au e-dalodalo-adu gi-di-Goe, meenei Dimaadua.

5:3  Goe e-longono gi dogu lee i-di luada. Di madagoaa di laa ma-gaa-hobo, gei au ga-dalodalo, ga-talitali-adu di hui o dagu dalodalo.

5:4  Goe go di God dela e-hagalee tenetene gi-nia haihai hala. Goe hagalee dumaalia gi digau hai mee huaidu gi-lloomoi la oo mua.

5:5  Goe hagalee hiihai gi digau hagamuamua. Goe e-hagadugina gi digau huaidu huogodoo.

5:6  Goe e-hagammaa gi-daha digau hai-kai tilikai huogodoo. Goe hagalee hiihai gi digau daaligi dangada gii-mmade mo digau halahalau-dangada.

5:7  Idimaa go do aloho damanaiee dela ga-mee-iei au di-hanimoi gi-lodo doo hale, gaa-mee di-daumaha i-lodo doo hale haga-madagu, mo-di bala gi-lala e-hagalaamua Goe.

5:8  Meenei Dimaadua, ogu hagadaumee gu-dogologowaahee! Dagina au gii-mee au di-haga-gila-aga do manawa. Hagia-mai gi-di-au oo ala gii-mee au di-daudali Goe.

5:9  Au hagalee-loo e-hagadonu nia mee ogu hagadaumee ala e-helekai-ai. Di mee i-lodo digaula la-go di hiihai bolo e-daaligi tangada gii-made. Nia helekai digaula le e-humalia huoloo ge haga-manawa lamalia, malaa e-hontula i-nia halahalau-dangada huaidu.

5:10  Hagi-aga-ina mo-di hagaduadua-ina digaula, meenei God. Nadau hagamaanadu huaidu gii-bida hagahuaidu-ina ginaadou. Hagabagia digaula gi-daha mo oo mua, idimaa go nadau huaidu e-logowaahee mo nadau hai-baahi adu gi-di-Goe.

5:11  Digau huogodoo ala e-gida nadau gowaa e-pala-ai ginaadou gi doo baahi la-ga-tenetene, digaula ga-dadaahili tenetene i-nia madagoaa huogodoo. Abaaba-ina digau ala e-aloho i do ingoo, digaula e-tenetene idimaa Kooe.

5:12  Meenei Dimaadua, Goe e-hagamaluagina digau ala e-hagalongo adu gi-di-Goe. Do aloho e-abaaba digaula gadoo be-di mee abaaba.

Chapter 6

6:1  Meenei Dimaadua, Goe hudee hagawelewele mo-di wou-mai gi-di-au! Goe hudee hagaduadua-ina au i-lodo do hagawelewele!

6:2  Meenei Dimaadua, aloho-mai gi-di-au, au gu-deai ogu mahi ai. Haga-maaloo-ina au, idimaa au gu-bagege huoloo!

6:3  Dogu huaidina hagatau la-gu-i-lodo di haingadaa damanaiee. Meenei Dimaadua, Goe e-tali gi-waalooloo behee ga-hagamaamaa-laa au?

6:4  Meenei Dimaadua, Goe dumaalia hanimoi hagamaamaa-ina au. Haga-dagaloaha-ina au gi-daha mo-di made gi do dumaalia.

6:5  I-lodo tenua o digau mmade, tangada e-langahia Goe ai. Deai tangada e-hagaamu Goe i-di gowaa deelaa ai.

6:6  Au gu-deai ogu mahi ai i dogu manawa-gee huoloo. Nia boo huogodoo dogu moenge e-tiu i dogu dangidangi, dogu ulungi gu-uduhia i ogu dangi.

6:7  Au gu-deemee di-mmada. Ogu golomada la-gu-haga-hula i dogu dangidangi, dela ne-hidi-mai i ogu hagadaumee.

6:8  Goodou go digau huaidu, tuu gi-daha mo au! Dimaadua gu-longono-Ia au nogo dangidangi.

6:9  Mee e-hagalongo-mai gi dagu gahigahi hagamaamaa, gei Mee ga-hagagila dagu dalodalo.

6:10  Ogu hagadaumee ga-iloo di-nadau haga-langaadia i nadau magedaa. Digaula ga-limalima-hua ga-hinihini ga-hagabagi gi-daha.

Chapter 7

7:1  Meenei Dimaadua, go dogu God, au e-hanimoi gi-di-Goe gi-hagamaamaa-ina au. Haga-dagaloaha-ina au, daawa-ina au gi-daha mo digau ala e-waluwalu au.

7:2  Ma-ga-deeai, gei digaula gaa-hai gadoo be nia laion, gaa-lahi au gi-di gowaa dela e-deemee di-haga-maamaa au go tangada, ga-hahaahi au haga-ligiligi i-golo.

7:3  Meenei Dimaadua, go dogu God, maa au guu-hai dagu mee hala gi tei tangada, maa au gu-haga-huaidu dogu ihoo hagaaloho, be au gu-hai-anga gi dogu hagadaumee dahi mee huaidu, gei di-maa deai di mee ne-hai-mai ai, maa e-donu bolo au guu-hai dagu mee e-dahi i-nia mee aanei,

7:4  Meenei Dimaadua, go dogu God, maa au guu-hai dagu mee hala gi tei tangada, maa au gu-haga-huaidu dogu ihoo hagaaloho, be au gu-hai-anga gi dogu hagadaumee dahi mee huaidu, gei di-maa deai di mee ne-hai-mai ai, maa e-donu bolo au guu-hai dagu mee e-dahi i-nia mee aanei,

7:5  malaa, diagia au gi-halahala-ina go ogu hagadaumee gi-kumudia au. Diagia digaula gi-duuduu-dia au gi-daaligidia au gii-made gi-hudu-ina gii-moe i-hongo di gelegele.

7:6  Meenei Dimaadua, duu i-nua i-lodo do hagawelewele! Hai-baahi ang-gi nia hagawelewele o ogu hagadaumee, duu i-nua hagamaamaa-ina au! Di tonu deelaa go dau mee e-hiihai ginai.

7:7  Haga-dagabuli-ina-mai digau o-nia henua huogodoo. Dagia digaula mai i do lohongo i-nua.

7:8  Goe go Tangada Hai-gabunga o-nia daangada huogodoo. Meenei Dimaadua, hagamodongoohia-ina ogu donu i do madagoaa ma-ga-hagi-aga au. Goe e-iloo bolo au deai ogu huaidu ai.

7:9  Goe di God e-donu, dela e-hagi-aga madau hagabaubau mo madau hiihai. Dugua nia hai huaidu o digau hai-mee huaidu, huia digau ala e-humalia.

7:10  God go dogu hagaloohi, Mee e-haga-dagaloaha digau ala e-hagalongo ang-gi de-Ia.

7:11  God go tangada hai-gabunga e-donu, Mee e-nnoo-mau e-hagi-aga digau hai-mee huaidu.

7:12  Maa digaula hagalee huli nia hangaahai o nadau mouli, gei God gaa-olo dana hulumanu-dauwa gii-gaa, ga-haga-biga dana maalei gi-togomaalia.

7:13  Mee ga-dahi-aga ana goloo-dauwa daaligi-dangada, ga-madagiwi ana amu maalei ulaula.

7:14  Mmada malaa gi-nia hai o digau huaidu ala e-haganohonoho nadau hai huaidu i-lodo nadau manawa. Digaula e-haganohonoho nadau hai ala belee haga-huaidu nia daangada, mo-di halahalau-dangada.

7:15  Gei nia hele ala ne-haga-togomaalia go digaula belee hele digau ala i-golo, la-ga bida hele ginaadou.

7:16  Malaa, digaula e-bida daaligi go nadau hai huaidu ala ne-hai, gei e-bida haga-huaidu ginaadou go nadau hagawelewele.

7:17  Au e-danggee gi Dimaadua dela e-hai nia mee ala e-donu. Au e-daahili e-hagaamu Dimaadua, dela koia e-Aamua Huoloo.

Chapter 8

8:1  Meenei Dimaadua, go di-madau Dagi, oo mahi e-modongoohia i-nia madagoaa huogodoo i henuailala! O hagaamu guu-dau i-di langi.

8:2  Nia dama mo nia ligiana e-hagaamu labelaa Goe. Goe ne-haga-duu-aga dau abaaba ang-gi o hagadaumee, belee duuli digau huogodoo ala e-hai-baahi adu gi-di-Goe.

8:3  Dogu mmada gi-di langi dela ne-hai Kooe, mo-di malama mo nia heduu ala ne-dugu Kooe gi nadau lohongo,

8:4  gei au e-hagabaubau boloo, “Tangada la di-aha dela e-haa-manawa-iei Goe, tangada hua dangada, gei Goe e-madamada humalia-ai?”

8:5  Goe ne-hai a-mee gi-mada-dulii gi-lala i-di-Goe, gei Goe gu-hagauda gi mee di hau madamada king mo-di aamua.

8:6  Goe gu-haga-menege-aga a-mee belee dagi nia mee huogodoo. Goe ne-dugu a-mee gi-hongo nia mee huogodoo ala ne-hai Kooe,

8:7  nia siibi, mono kau, mono manu lodo-geinga huogodoo,

8:8  nia manu mamaangi mo nia iga, mo nia mee huogodoo ala i-lodo di moana.

8:9  Meenei Dimaadua, go di-madau Dagi, do ingoo le e-mahi gei e-aamua i-nia madagowaa huogodoo i henuailala!

Chapter 9

9:1  Meenei Dimaadua, au ga-hagaamu Goe mai i-lodo dogu manawa hagatau. Au ga-hagi-aga au hegau haga-goboina huogodoo ala ne-hai.

9:2  Au ga-daahili mo-di tenetene idimaa Kooe. Au ga-daahili e-hagaamu do ingoo, meenei God Koia e-Aamua Muginua.

9:3  Ogu hagadaumee ga-hula gaa-llele gi-daha i-di-Goe ma-ga-hanimoi, digaula gaa-too gi-lala gaa-mmade.

9:4  Goe e-hai-donu ge donu i au hagi-aga, Goe gu-hagi-aga bolo au e-donu.

9:5  Goe gu-hagi-aga hai-baahi gi digau o-di bouli, mo-di daaligi digau hai-mee huaidu gii-mmade. Deai tangada e-langahia digaula ai.

9:6  Madau hagadaumee gu-hagalee. Goe gu-oho nia waahale llauehe digaula, nia daangada gu-hagalee langahia digaula.

9:7  Dimaadua la di king dono hagaodi ai. Mee gu-haga-duu-aga dana gowaa hai-gabunga.

9:8  Mee e-dagi henuailala gii-donu, gei e-gabunga nia henua gi-di mee dela e-donu.

9:9  Dimaadua la-go di gowaa dela e-pala ginai digau ala e-lodo daamaha, di gowaa e-noho-ai di aumaalia i-lodo di madagoaa haingadaa.

9:10  Meenei Dimaadua, digau ala e-iloo-ginaadou Goe, ga-hagadagadagagee-adu gi-di-Goe. Goe hagalee diiagi di-ingoo-hua tangada dela ma-ga-hanadu gi-di-Goe.

9:11  Goodou daahili hagaamu-ina Dimaadua dela e-dagi i Zion! Hagi-aga-ina gi-nia henua huogodoo ma ni-aha ne-hai go Mee!

9:12  God e-langahia digau ala e-duadua. Mee hagalee de-langahia nia dangidangi digaula, gei Mee e-hagaduadua digau ala e-hai digaula haga-huaidu.

9:13  Meenei Dimaadua, dumaalia-mai! Mmada-malaa gi ogu dadaaligi ala e-hai go ogu hagadaumee mai gi-di-au! Meenei Dimaadua, daawa-ina au gi-daha mo-di made,

9:14  gii-mee au di-duu i-mua nia daangada o Jerusalem, e-hagi-anga gi digaula nia mee huogodoo ala e-hagaamu Goe ko-au. Au e-tenetene idimaa Goe dela gu-haga-dagaloaha au.

9:15  Digau o-di bouli la-guu-too gi-lodo nadau lua ne-geli. Digaula guu-bida kumi go nadau hele.

9:16  Dimaadua gu-hagamodongoohia Ia mai i dana hai dela e-gabunga nia daangada gii-donu, gei digau hai-mee huaidu guu-bida hele go nadau hegau.

9:17  Di made la-go di hagaodi gi-muli o-nia daangada huaidu huogodoo, mo-di hagaodi gi-muli o digau huogodoo ala e-haga-balumee a God.

9:18  Digau hagaloale la-hagalee de-langahia i-nia madagoaa huogodoo. Nadau hagadagadagagee la-hagalee mooho ga-hana-hua dee-odi.

9:19  Hanimoi, meenei Dimaadua! Goe hudee dugu-ang-gi nia daangada gi-hai-baahi adu! Laha-mai digau o-di bouli gi oo mua, hagi-aga-ina digaula.

9:20  Meenei Dimaadua, heia digaula gi-mmaadagu, heia digaula gi-iloo bolo ginaadou la nia daangada hua.

Chapter 10

10:1  Meenei Dimaadua, Goe e-haga-mogowaa Goe gi-daha mo gimaadou eiaha? Ma e-aha dela Goe e-hagammuni Goe i-di madagoaa gimaadou e-noho i-lodo madau haingadaa?

10:2  Digau huaidu e-bida hagaamu ginaadou ge e-dadaaligi digau hagaloale. Kumudia digaula gi-nia hele digaula ala ne-hai.

10:3  Digau huaidu le e-hagapuu gi nadau hiihai huaidu. Tangada haga-gailaa le e-hagahalaua ge e-haga-balumee Dimaadua.

10:4  Digau huaidu la-hagalee haga-dahidamee a Dimaadua. I-lodo-hua nadau hagamuamua gei digaula e-hagamaanadu bolo God la dono hadinga ai.

10:5  Digau huaidu le e-gila humalia i-nia mee huogodoo. Digaula e-deemee di-iloo di hagi-aga a God. Digaula e-haga-balumee nadau hagadaumee.

10:6  Digaula e-helekai i-lodo nadau manawa boloo: “Gimaadou e-deemee-loo di-hala. Gimaadou e-deemee-loo di-dau gi-lodo di haingadaa.”

10:7  Nadau helekai le e-honu i-nia hagahalaua, kai tilikai, ge nnelekai haga-madagudagu dangada. Digaula e-limalima di-helekai de-hiihai mo-di helekai huaidu.

10:8  Digaula e-balabala haga-mmuni i-lodo nia waahale lligi, e-talitali belee daaligi gii-mmade nia daangada humalia ala nadau ihala ne-hai-ai. Digaula e-daumada nia daangada ala nadau dangada e-hagamaamaa ai.

10:9  Digaula e-talitali i-lodo nadau gowaa ala e-pala-ai gadoo be-nia laion. Digaula e-pala hagammuni e-talitali digau hagaloale belee hele digaula gi-lodo nadau hele gaa-dada gi-daha.

10:10  Digau nadau hagamaamaa ai la-guu-mmoe i-hongo nia gelegele. Di maaloo o digau huaidu la-ne-haga-magedaa digaula.

10:11  Digau huaidu le e-helekai i ginaadou boloo: “God e-de-hei-e-Ia! Mee guu-pono ono golomada gu-de-gidee-Ia gimaadou!”

10:12  Meenei Dimaadua, hagaduadua-ina digau huaidu! Goe gi-langahia digau ala e-noho i-lodo di haingadaa.

10:13  Ma e-aha dela digau huaidu ga-mee-hua di-haga-balumee a God, ga-helekai i-lodo nadau manawa boloo: “Mee hagalee daaligi gimaadou!”?

10:14  Malaa, gei Goe e-mmada. Goe e-hagailongo nia haingadaa mono hagaduadua, ge gu-togomaalia i-nia madagoaa huogodoo belee hagamaamaa. Nia daangada hagaloale e-huli-adu gi-di-Goe. Goe e-hagamaamaa digau ala nadau hagamaamaa ai i-nia madagoaa huogodoo.

10:15  Daawa-ina gi-daha nia mogobuna o digau huaidu. Daaligidia digaula i-nia huaidu digaula ala ne-hai, gaa-dae-loo gi digaula gu-hagalee hai nia maa.

10:16  Dimaadua la di King dono hagaodi ai. Digau ala e-daumaha gi-nia god ala i-golo le e-hagammaa gi-daha mo dono henua.

10:17  Meenei Dimaadua, Goe ga-hagalongo gi-nia dalodalo o digau ala mugi-lala. Goe gaa-hai digaula gi-manawa-maaloo.

10:18  Goe ga-hagalongo gi-nia gahigahi o digau ala gu-lodo-huaidu mo digau ala guu-mmade nadau maadua. Goe ga-hagi-aga nia donu digaula bolo nia daangada dangada la-gi-hagalee haga-madagudagu digaula.

Chapter 11

11:1  Au e-hagadagadagagee gi Dimaadua dela e-haga-dagaloaha au. Goodou e-boiboi ala e-helekai-mai gi-di-au boloo, “Lele gi tomo nia gonduu gadoo be-di manu,

11:2  idimaa digau huaidu la-guu-hudi nadau maalei, gu-madagiwi nadau amu maalei mai i-lodo di gowaa bouli belee puu digau humalia.

11:3  Ma di mee e-mee di-hai go tangada humalia ai i-di madagoaa nia mee huogodoo gu-mooho.”

11:4  Dimaadua e-noho i-lodo dono hale haga-madagu. Mee dono lohongo-king i-di langi. Mee e-mmada-iha gi-nia daangada i-nia madagoaa huogodoo, e-iloo-Ia nia mee ala e-haihai go digaula.

11:5  Mee e-hagadina digau humalia mo digau huaidu be-di mee e-dahi. Mee e-hagadugina-Ia huoloo digau ala e-oho ana haganoho.

11:6  Mee e-hagadoo-iha dana ahi mo nia malala-gaa gi-hongo digau huaidu. Mee e-hagaduadua digaula gi-di madangi welengina.

11:7  Dimaadua le e-donu, Mee e-hiihai gi-nia hangahaihai donu. Digau ala e-hai nia maa la-ga-mouli i-mua o Mee.

Chapter 12

12:1  Meenei Dimaadua, hagamaamaa-ina gimaadou! Tangada humalia ne-dubu ai, tangada e-mee di-gidee digau humalia ai.

12:2  Digaula huogodoo e-haihai nadau kai-tilikai i nadau mehanga i-nia helekai halahalau.

12:3  Meenei Dimaadua, Goe dugua nia helekai halahalau o-nia daangada aalaa! Bondia nia ngudu ala e-helekai hagamuamua boloo:

12:4  “Gimaadou ga-helekai ga-kae-ai madau mee ala e-hiihai ginai. Gimaadou ga-helekai i madau mee ala e-hiihai ginai, tangada e-mee di-dugu gimaadou ai.”

12:5  Dimaadua e-helekai, “Dolomeenei gei Au ga-hanimoi, idimaa digau hagaloale la-gu-lodo-daamaha mo digau ala e-dadaaligi la-gu-dangidangi i nadau mmae. Au gaa-hai digaula gi-noho-baba mo-di noho manawa lamalia be-di mee dela e-hiihai ginai digaula.”

12:6  E-humalia gidaadou e-hagadagadagagee gi-nia hagababa a Dimaadua. Nia maa e-madammaa gadoo be nia silber ne-haga-madammaa nnolongo e-hidu gi-lodo di ahi.

12:7  Nia daangada huaidu la i-nia gowaa huogodoo. Nia daangada huogodoo e-haga-hagaamu nia mee ala e-huaidu. Meenei Dimaadua, benabena-ina gimaadou haga-humalia i-nia madagoaa huogodoo, mo-di hagaloohia gimaadou gi-daha mo digau ala beelaa.

12:8  Nia daangada huaidu la i-nia gowaa huogodoo. Nia daangada huogodoo e-haga-hagaamu nia mee ala e-huaidu. Meenei Dimaadua, benabena-ina gimaadou haga-humalia i-nia madagoaa huogodoo, mo-di hagaloohia gimaadou gi-daha mo digau ala beelaa.

Chapter 13

13:1  Meenei Dimaadua, e-waalooloo behee go do haga-delangahia-e-Goe au? E-de-langahia gaa-hana-hua beelaa? E-waalooloo behee go do hagammuni Goe i-di-au?

13:2  Au belee hai gii-noho waalooloo behee i-lodo ogu haingadaa? E-waalooloo behee go dogu manawa-gee i-di boo mo-di aa? E-waalooloo behee go ogu hagadaumee ala e-haga-magedaa au?

13:3  Meenei Dimaadua go dogu God, mmada-mai gi-di-au, helekai-mai gi agu helekai. Hagamaaloo-ina-aga au, hudee heia au gii-made.

13:4  Hudee heia ogu hagadaumee gi-helekai boloo, “Gidaadou gu-haga-magedaa a-mee.” Hudee heia digaula gii-mmada tene gi dogu doo gi-lala.

13:5  Au e-hagadagadagagee gi do manawa-aloho dee-modu. Au ga-tenetene idimaa Goe dela ga-haga-dagaloaha au.

13:6  Meenei Dimaadua, au ga-daahili adu gi-di-Goe, idimaa Goe dela e-humalia mai gi-di-au.

Chapter 14

14:1  Digau hagabaubau ihala e-helekai i-lodo nadau manawa boloo: “Ma hagalee di God ai.” Digaula huogodoo le e-huaidu, digaula guu-hai nia mee ala koia e-huaidu, tangada i digaula e-hai nia mee humalia ai.

14:2  Dimaadua e-mmada-ia i-di langi gi-nia daangada dangada be di-maa iai tangada e-kabemee, be ma iai tangada e-daumaha ang-gi de-Ia.

14:3  Malaa, digaula huogodoo guu-huli gi-daha, digaula huogodoo gu-huaidu be-di mee e-dahi, deai tangada i digaula e-hai di mee e-donu ai, tangada e-dahi ai.

14:4  Dimaadua ga-heeu, “Ma e-aha, digaula e-de-iloo? Digau huogodoo hai-mee huaidu aanei, la-hagalee kabemee? Digaula e-mouli-mai i nadau gaiaa agu daangada, gei digaula hagalee-loo e-dalodalo mai gi-di-Au.”

14:5  Malaa, digaula ga-mmaadagu huoloo, idimaa, God le e-madalia digau ala e-hagalongo gi Mee.

14:6  Digau hai-mee huaidu le e-haga-dee-kila nia haganoho o digau hila-gi-lala, gei Dimaadua la-go Mee dela e-madamada humalia i digaula.

14:7  Au e-hai dalodalo huoloo bolo di hagamouli o Israel la-gi-hanimoi i Zion. Di tenetene damanaiee gaa-hai go digau Israel, i-di madagoaa o Dimaadua ma-gaa-hai digaula gi-haadanga-lamalia labelaa!

Chapter 15

15:1  Meenei Dimaadua, ma koai dela e-mee di-ulu gi-lodo do Hale-Daumaha? Ma koai dela e-mee di-daumaha i-hongo dau gonduu haga-madagu go Zion?

15:2  Ma go digau ala e-hagalongo ang-gi God i-nia mee huogodoo, ge e-hai nia mee ala e-donu i-nia madagoaa huogodoo, ge e-helekai donu aga i-lodo nadau manawa,

15:3  ge hagalee helekai hagahuaidu nia daangada, ge hagalee hai nia mee huaidu gi nadau ihoo, ge hagalee helehelekai tamu i digau ala i nadau baahi,

15:4  ge e-hagadugina i digau ala gu-haga-balumee go God, ge e-hagalabagau-hua digau ala e-hagalongo ang-gi Dimaadua, ge e-haga-gila-aga ana mee ala ne-hagababa i-nia madagoaa huogodoo, ma e-aha maa e-haingadaa ang-gi ginaadou,

15:5  ge hagalee kumi nia wiini o nadau bahihadu ala ne-wanga gi tangada bolo e-hai-hegau-ai, ge hagalee hai digau hagamaamaa dilikai belee hai-baahi gi tangada deai ono huaidu ai, bolo gii-kumi nia teenedi a-maa. Malaa, tangada dela e-hai nia mee aanei le e-noho humalia ang-gi deia i-lodo nia haingadaa gaa-hana-hua beelaa.

Chapter 16

16:1  Meenei God, hagaloohi-ina au, ma Kooe hua dela e-hagadagadagagee ginai au.

16:2  Au e-helekai ang-gi Dimaadua, “Kooe hua go dogu Dagi. Nia mee huogodoo humalia ala i dogu baahi la-ne-loomoi i-di-Goe.”

16:3  E-humalia huoloo go nia daangada ala e-manawa-dahi ang-gi God! Au e-hiihai huoloo bolo au e-madalia digaula.

16:4  Digau ala e-hula gi-nia god ala i-golo le e-bida hagauda ang-gi ginaadou nia haingadaa e-logowaahee. Au hagalee madalia nia tigidaumaha ala e-hai go digaula. Au hagalee daumaha gi-nia god digaula.

16:5  Meenei Dimaadua, ma Kooe hua dela e-hai-mee ginai au, gei go Kooe hua dela e-gaamai agu mee huogodoo ala e-hiihai ginai au, gei go Kooe hua dela e-dadaahi dogu mouli.

16:6  E-humalia huoloo go au wanga-dehuia mai gi-di-au, e-humalia huoloo go nia maa!

16:7  Au e-hagaamu Dimaadua i Mee dela e-dagi au. Ma-gaa-boo gei dogu manawa e-haga-haga-iloo mai gi-di-au.

16:8  Au e-modongoohia bolo Dimaadua la-gu-madalia au i-nia madagoaa huogodoo. Mee i dogu baahi, deai di mee e-mee di-hagahuaidu au ai.

16:9  Deelaa di mee e-hagaamu-iei au ge e-tenetene, gei au gu-hagalongo-ia i-di-au gu-dagaloaha mai gi-daha mo-di haingadaa,

16:10  idimaa Goe dela e-abaaba au gi-daha mo-di mogobuna o-di made. Au gu-hai-hegau manawa-dahi adu gi-di-Goe, gei Goe ga-hagalee diiagi au gi-lodo tenua o digau mmade.

16:11  Goe ga-hagi-mai di ala dela e-hana gi-di mouli. Doo noho i dogu baahi le e-haga-honu au gi-di tenetene, ge e-hai au gi-tenetene gaa-hana-hua beelaa.

Chapter 17

17:1  Meenei Dimaadua, hagalongo-mai gi dagu dangidangi-adu di tonu. Hagalongo-mai gi dagu dangidangi i-di hagamaamaa. Hagalongo gi dagu dalodalo e-hai-mai i-lodo dogu manawa-donu.

17:2  Goe ga-hagi-aga bolo au e-donu, idimaa Goe e-iloo di mee dela e-donu.

17:3  Goe e-iloo dogu manawa. Ma-gaa-boo gei goe gu-hanimoi gi-di-au, gu-hagadina ogu lodo hagatau, gu-gidee-Goe bolo au ogu hiihai huaidu i ogu lodo ai. Au hagalee helekai huaidu,

17:4  be digau ala i-golo. Au gu-hagagila-aga au haganoho, gei au hagalee heehee i-di ala o digau ala e-noho llamu-dauwa.

17:5  Au e-heehee i-hongo oo ala i-nia madagoaa huogodoo, ge hagalee hana laa-daha.

17:6  Meenei God, au e-dalodalo-adu gi-di-Goe, idimaa Goe dela gu-helekai-mai. Malaa, huli-mai gi-di-au mo-di hagalongo-mai gi agu helekai.

17:7  Hagamodongoohia-ina-mai do aloho hagagoboina mo-di haga-dagaloaha-ina au. Au gu-benebene hagahumalia gi-daha mo ogu hagadaumee i-lala di malu o doo lima.

17:8  Abaaba-ina au gadoo be Goe ma-ga-abaaba o golomada. Hagammuni-ina au gi-lala di malu o bakau

17:9  gi-daha mo nia hai o digau huaidu. Nia hagadaumee daaligi dangada gii-made e-haganiga-mai i dogu gili.

17:10  Deai tumaalia i-baahi digaula ai, gei digaula e-helehelekai hagamuamua.

17:11  Digaula gu-haganiga au dolomeenei, e-gologolo au belee hudu gi-lala, i dogu madagoaa ma-gaa-mmada gi-daha.

17:12  Digaula e-hai gadoo be nia laion, e-talitali au belee hahaahi hagaligiligi.

17:13  Meenei Dimaadua, hanimoi! Hai-baahi gi ogu hagadaumee, gei gi-hagamagedaa-ina digaula! Daawa-ina au gi-daha mo digau huaidu gi dau hulumanu-dauwa.

17:14  Haga-dagaloaha-ina au gi-daha mo digau ala gu-hai-mee gi-nia mee huogodoo ala e-hiihai ginai ginaadou i henuailala. Daaligidia digaula gi taaligi dela gu-haga-togomaalia Kooe gi digaula. Heia nia dadaaligi gi-dohu-anga gi nadau dama, mo e-wanga labelaa gi-nia dama o-nia dama digaula.

17:15  Gei au ga-mmada-adu gi-di-Goe, idimaa au digi hai dagu mee hala. Dogu madagoaa ma-ga-ala-aga, gei au ga-tenetene, idimaa Goe dela i dogu baahi.

Chapter 18

18:1  Meenei Dimaadua, au e-aloho i-di-Goe! Goe dela go dogu Dangada Daa.

18:2  Dimaadua la-go dogu madaloohi, go Mee go dogu abaaba mau-dangihi. Dogu God la-go dogu hagaloohi, au e-benebene hagahumalia i-baahi o Mee. Mee e-abaaba au gadoo be-di mee abaaba. Mee e-daa-mai au gi-daha, ge e-benebene au.

18:3  Au e-gahigahi Dimaadua, gei Mee ga-daa-mai au gi-daha mo ogu hagadaumee. Hagaamu-ina Dimaadua!

18:4  Di hagalliga o-di made gu-haganiga-mai i dogu gili. Nia beau o-di haga-mooho gu-haga-holi au.

18:5  Di hagalliga o-di made gu-i-dogu baahi. Taalunga la-guu-lawa di-haganoho e-hele au.

18:6  Dogu madagoaa ne-haingadaa-mai gi-di-au, gei au gu-gahigahi Dimaadua. Au ne-gahigahi dogu God belee hagamaamaa-mai au, gei Mee gu-longono-Ia dogu lee mai i-lodo dono hale daumaha. Mee gu-longono-Ia dagu dangi-anga i-di hagamaamaa.

18:7  Henuailala gu-ngalungalua gu-lullulu. Nia hagamau o-nia gonduu gu-haga-moomoo gu-bolebole, idimaa God gu-hagawelewele.

18:8  Nia huiahi e-buu-mai i-lodo nia mada-uhi o-Maa. Di ulaula mo nia malala gaa e-ulu-mai i-lodo di ngudu o-Maa.

18:9  Mee gu-haahi di langi gi-mahuge, gu-haneia gi-lala madalia di gololangi luuli i-lala ono babaawae.

18:10  Mee gu-maangi-iha i-hongo dono dangada-di-langi e-hai ono bakau. Mee gu-maangi-iha i-hongo nia bakau o-di madangi.

18:11  Mee guu-gahu Ia gi-di bouli. Nia gololangi maadolu e-honu wai gu-haganiga i-di gili o-Maa.

18:12  Di uwa hadu-magalillili mo-di ahi e-monnono-iha mai di ila dela e-dabadaba i-mua o Mee, ga-haahi nia gololangi luuli aalaa.

18:13  Dimaadua ga-ngoloolo gadoo be-di lee atili mai i-di langi, gei di lee di God Koia e-Aamua la-gu-longono.

18:14  Mee guu-puu ana amu maalei, guu-hai ono hagadaumee gi-lellele dagidahi, gaa-hai nia ila gi-dabadaba gii-llele digaula.

18:15  Meenei Dimaadua, tua di baba o-di moana gu-gila-aga, di hagamau o henuailala gu-gila-aga labelaa, i do madagoaa ma-gu-hagawelewele-iei Goe gi o hagadaumee, gu-ngoloolo gi-nua gi digaula gi do hagawelewele.

18:16  Dimaadua gu-daahi-e-Ia dono lima i-di langi guu-kumi au. Mee gu-hudi-aga au gi-daha mo tua di moana.

18:17  Mee gu-haga-dagaloaha au gi-daha mo ogu hagadaumee maaloo dangihi, mo digau huogodoo ala e-hudiou mai gi-di-au. Digaula koia e-maaloo i-di-au.

18:18  Digaula gu-heebagi-mai gi-di-au i dogu madagoaa ne-tale gi-di haingadaa, gei Dimaadua gu-abaaba au.

18:19  Mee gu-hagamaamaa au gi-daha mo ogu haingadaa, gu-haga-dagaloaha au i dono manawa-tene mai gi-di-au.

18:20  Dimaadua e-hui au idimaa au dela e-hai nia mee ala e-donu. Mee e-haga-maluagina au idimaa au dela ogu huaidu ai.

18:21  Au gu-daudali nia haganoho a Dimaadua, au hagalee huli gi-daha mo dogu God.

18:22  Au gu-haga-gila-aga nia haganoho a-Maa huogodoo, au digi de-hagalongo gi-nia helekai a-Maa.

18:23  Mee e-iloo-Ia bolo au e-madammaa, mo dagu hai dela e-haga-mogowaa au gi-daha mo nia haihai huaidu.

18:24  Deelaa di mee a-Mee e-hui au i-di-au dela e-hai di mee dela e-donu, idimaa, Mee e-iloo-Ia bolo au deai ogu huaidu ai.

18:25  Meenei Dimaadua, Goe e-manawa-dahi ang-gi digau ala e-manawa-dahi adu gi-di-Goe. Goe e-humalia ang-gi digau ala e-humalia.

18:26  Goe e-madammaa ang-gi digau ala e-madammaa, gei Goe e-hai-baahi ang-gi digau ala e-hai nia mee huaidu.

18:27  Goe e-haga-dagaloaha digau ala e-manawa hila gi-lala, ge e-haga-hila gi-lala digau ala e-manawa hagamuamua.

18:28  Meenei Dimaadua, Goe gu-haga-maalama au. Goe guu-hai di bouli gii-maa gi-daha.

18:29  Goe guu-hai au gii-mahi bolo gii-mee au di-heebagi gi ogu hagadaumee mo e-gaamai nia mogobuna bolo gii-mee au di-haga-magedaa nia abaaba-dauwa digaula.

18:30  Di God deenei le e-humalia huoloo go nia mee a-Mee ala e-hai! Nia helekai a-Maa le e-mee di-hagadagadagagee ginai! Mee e-hai gadoo be-di mee abaaba ni digau huogodoo ala e-halahala a-Mee bolo e-abaaba ginaadou.

18:31  Dimaadua modogo-Ia dela go di God! Ma go God modogo-Ia dela go tadau Dangada Daa!

18:32  Mee go di God dela e-hai au gi maaloo, ge e-hagaloohi ogu ala i-nia haingadaa.

18:33  Mee ne-gaamai ogu wae bolo gii-lele au giibeni gadoo be-di ee, gei e-madamada humalia i-di-au i-hongo nia gonduu.

18:34  Mee e-hagawouwou au gi-di hai-dauwa, bolo gii-mee au di hai-hegau gi-di maalei dela koia e-maaloo.

18:35  Meenei Dimaadua, Goe e-abaaba au, gei e-haga-dagaloaha-mai au. Au hagamaamaa la-gu-haga-madamada au, gei o mogobuna la-gu-hagaloohi au hagahumalia.

18:36  Goe gu-duuli au bolo gi-dee kumi au, gei au digi hinga-loo.

18:37  Au e-waluwalu ogu hagadaumee gaa-kumi digaula. Au digi noho-loo gaa-dae gi dogu daaligi digaula gii-mmade.

18:38  Au guu-kili digaula gi-lala, gei digaula gu-deemee di-nadau tuu-aga. Digaula guu-kii magedaa i ogu mua.

18:39  Goe ne-hai au gi-maaloo bolo gii-mee au di-heebagi, gei ne-hai au gi-aali i ogu hagadaumee.

18:40  Goe ne-hai ogu hagadaumee gii-llele gi-daha mo au. Au e-daaligi gii-odi digau ala nogo hudiou-mai gi-di-au.

18:41  Digaula e-gahigahi nadau hagamaamaa, gei tangada e-haga-dagaloaha digaula ai. Digaula e-gahigahi a Dimaadua, gei Mee digi helekai gi digaula.

18:42  Au e-dagadagahi digaula bolo gii-hai gadoo be nia gelegele gohu ma-ga-ili go di madangi gi-daha. Au e-dagadagahi digaula be nia gelegele waiwai ala i-hongo nia ala.

18:43  Goe gu-haga-dagaloaha au gi-daha mo nia daangada hai-baahi, gaa-hai au gii-dagi nia henua. Nia daangada ala digi iloo-eau guu-hai agu hege dolomeenei.

18:44  Digau mai i-daha e-pala i ogu mua. Di madagoaa digaula ma-ga-longono-ginaadou au, gei digaula ga-daudali.

18:45  Digaula gu-manawa paagege ga-lloomoi gi-daha mo nadau abaaba dauwa mo-di polepole.

18:46  Dimaadua le e-mouli! Hagaamu-ina dogu Dangada Daa! Hagadele-ina di aamua huoloo o-di God dela gu-haga-dagaloaha au!

18:47  Mee go di God dela ne-hai au gi-aali i-hongo ogu hagadaumee. Ma go Mee dela ne-hai nia henua la-gii-noho i-lala ogu mogobuna,

18:48  ga-haga-dagaloaha au gi-daha mo ogu hagadaumee. Meenei Dimaadua, Goe e-hai au gi-aali i ogu hagadaumee, gei e-abaaba au gi-daha mo digau daaligi dangada.

18:49  Malaa, au e-hagaamu huoloo Goe i-baahi nia henua llauehe. Au e-daahili e-haga-hagaamu do ingoo.

18:50  Dimaadua e-hai dana king gi-aali haga-humalia. Mee e-hagamodongoohia-aga dono manawa aloho dee-odi ang-gi dana dangada dela ne-hilihili, ang-gi David mo dono hagadili ga-hana-hua deeodi.

Chapter 19

19:1  Di langi i-nua e-haga-modongoohia-mai gi gidaadou di madamada o God, ge e-haga-modongoohia nia mee ala ne-hai go Mee.

19:2  Di laangi-nei e-haga-iloo nia maa gi-di laangi nomuli, gei di boo-nei e-taanga nia maa gi-di boo nomuli.

19:3  Deai nia helekai be nia leelee e-hai ai, ge deai hogi di lee e-hagalongo ginai ai.

19:4  Gei nia helekai digaula guu-dau-loo i-nia madagowaa huogodoo i henuailala. God guu-hai dana gowaa i-di langi belee noho-ai di laa.

19:5  Ma-ga-luada gei di laa e-ulu-mai gi-daha gadoo be taane hai-lodo ma-ga-ulu gi-daha mo dono ruum, e-hai gadoo labelaa be tangada lele di hoiaa e-hiihai huoloo e-lele di hoiaa.

19:6  Mee e-daamada i-di mada o-di langi e-hana gi-di mada dela i-golo. Deai di mee e-ngala i-di welengina o-maa ai.

19:7  Nnaganoho o Dimaadua le e-humalia huoloo, e-hagamaaloo-aga haga-hoou nia manawa o-nia daangada. Nia helekai a Dimaadua le e-humalia e-mee di-hagadagadagagee ginai, e-haga-kabemee digau ala hagalee kabemee.

19:8  Nia haganoho o Dimaadua le e-donu, e-hai digau ala e-daudali nia maa gi-tenetene. Nia helekai a-Maa la-koia e-donu, e-haga-maalama nia hagabaubau o tangada.

19:9  Di hagalaamua a Dimaadua le e-humalia, e-hai gi-waalooloo gaa-hana-hua beelaa. Nia gabunga a Dimaadua le e-donu, nia maa le e-donu i-nia madagoaa huogodoo.

19:10  Nia gabunga a-Maa la-koia e-hagalabagau i-nia goolo ala koia e-humalia, ge koia e-maangala labelaa i-nia mee-maangala ala e-hai go nia lamu llauehe.

19:11  Au helekai le e-haga-maalama dau dangada hai-hegau deenei. Au e-kumi di hui o dogu daudali au helekai.

19:12  Deai tangada e-iloo-ia ono hala ai. Meenei Dimaadua, daawa au gi-daha mo nia ihala ala e-nngala!

19:13  Abaabalia au gi-daha mo nia huaidu ala e-modongoohia. Hudee heia au gii-dagi go nia maa, deelaa-laa gei au gaa-dohu, ga-mehede gi-daha mo-di huaidu.

19:14  Meenei Dimaadua, go dogu abaaba mo dogu hagamouli, hila-mai-mua gi agu helekai mo agu maanadu!

Chapter 20

20:1  Dimaadua gi-helekai-adu i do madagoaa ma-ga-haingadaa! Di God o Jacob la-gi duuli-ina goe!

20:2  Mee gi-hagau-ina mai dana hagamaamaa gi-di-goe mai i dono Hale Daumaha, gei gi-hagamaamaa-ina goe mai i-di Gonduu Zion.

20:3  Mee gi-daahi-aga-ina au tigidaumaha huogodoo, mo-di manawa-tene gi au tigidaumaha huogodoo.

20:4  Mee gi-gowadu gi-di-goe au mee ala e-hiihai ginai, gei gi-heia au haga-maanadu huogodoo gii-kila.

20:5  Gei gimaadou ga-wwolowwolo hagaamu tenetene gi doo aali, mo-di budu do hagalabagau mai di hagaamu di ingoo o tadau God. Dimaadua la-gi-helekai-adu gi au dangidangi huogodoo.

20:6  Dolomeenei, gei au gu-iloo-eau bolo Dimaadua e-wanga di mogobuna o-di aali gi dana king dela ne-hilihili. Mee e-helekai gi mee mai i dono lohongo haga-madagu i-di langi. Mee e-hai a-mee gi-aali i-lodo nia dauwa mai i ono mogobuna.

20:7  Hunu daangada e-hagadagadagagee gi nadau waga-dauwa hongo-henua, gei hunu daangada e-hagadagadagagee gi nadau hoodo. Gei gimaadou e-hagadagadagagee-hua gi-nia mogobuna o Dimaadua go di-madau God.

20:8  Nia daangada ala e-hai beelaa, la-ga-tibatiba gaa-tinga gi-lala, gei gidaadou gaa-tuu i-nua gaa-tuu mau-dangihi.

20:9  Meenei Dimaadua, hagamaamaa-ina di king gi-haga-magedaa ono hagadaumee. Goe helekai-mai gi gimaadou i madau madagoaa ma-ga-gahigahi Goe.

Chapter 21

21:1  Meenei Dimaadua, di-madau king gu-tenetene idimaa Goe dela ne-wanga gi mee di maaloo. Mee e-tenetene i-di-Goe dela ne-hai a-mee gi-aali.

21:2  Goe guu-wanga gi mee nia mee a-mee ala e-haa-manawa-ai. Goe gu-helekai gi tangidangi a-maa.

21:3  Goe gu-hanimoi gi mee mo au hagamaluagina humalia, gaa-wanga dau hau goolo gi-hongo di libogo o-maa.

21:4  Mee ne-dangi-adu gi-di-Goe di mouli, gei Goe guu-wanga gi mee di mouli duai ge waalooloo.

21:5  Nia madamada o dono ingoo le e-aamua, idimaa Goe dela gu-hagamaamaa a-mee. Goe ne-hai a-mee gii-hai di king e-dau gei e-mahi.

21:6  O hagamaluagina le e-madalia a-mee ga-hana-hua deeodi. Mee e-tenetene huoloo idimaa Goe dela e-madalia a-mee.

21:7  Di king le e-hagadagadagagee gi Dimaadua di Gowaa Aamua, gei mee gaa-noho baba mau-dangihi, idimaa go di manawa-aloho dee-modu Dimaadua i-mee.

21:8  Di king gaa-kumi ono hagadaumee huogodoo, mee gaa-kumi digau huogodoo ala e-hudiou ang-gi deia.

21:9  Mee ga-daaligi digaula gi-di ahi ulaula i dono madagoaa ma-ga-hanimoi. Dimaadua ga-hagammaa digaula gi-daha i dono hagawelewele, gei di ahi gaa-dudu digaula gii-wwele.

21:10  Deai tangada i-nia hagadili digaula e-mouli ai. Di king ga-daaligi digaula huogodoo gii-mmade.

21:11  Digaula ga-haga-noho di-nadau hai belee hai-baahi gi mee, gei digaula hagalee kila.

21:12  Mee gaa-puu ana amu maalei gi digaula, e-hai digaula gii-huli gi-muli gii-llele.

21:13  Gimaadou e-hagaamu Goe, meenei Dimaadua, idimaa go oo mahi! Gimaadou ga-daahili mo-di hagaamu o mogobuna.

Chapter 22

22:1  Dogu God, dogu God, Goe gu-diiagi au beleiaha? Au gu-dangidangi-adu i-di hagamaamaa, gei di hagamaamaa digi hanimoi.

22:2  Meenei dogu God, au gu-gahigahi Goe i-di aa, gei Goe hagalee helekai-mai. Ma-gaa-boo, gei au e-gahigahi labelaa, au hagalee noho.

22:3  Malaa, Goe dela go di God hagamadagudia dela e-noho i-hongo do lohongo, go Kooe dela e-haga-hagaamu go Israel.

22:4  Madau damana ala namua nogo hagadagadagagee adu gi-di-Goe, digaula e-hagadagadagagee adu gi-di-Goe, gei Goe e-haga-dagaloaha digaula.

22:5  Digaula nogo gahigahi Goe, gei digaula guu-too gi-daha mo-di haingadaa. Digaula nogo hagadagadagagee adu gi-di-Goe, gei di hagadagadagagee o digaula adu gi-di-Goe guu-gila.

22:6  Gei au gu-hagalee tangada, au e-hai be-di mee-maaloo dela e-de-hiihai ginai ge e-haga-balumee go digau huogodoo!

22:7  Digau huogodoo ala ma-ga-mmada-mai gi-di-au le e-hai nadau dadaagala i-di-au. Digaula e-hagatolotolo gi-daha nadau holole ge e-lialiagi nadau libogo,

22:8  mo-di helekai, “Goe gu-hagadagadagagee gi Dimaadua, gei Mee e-aha dela hagalee haga-dagaloaha goe? Maa nei bolo Dimaadua le e-hiihai adu gi-di-goe, Mee la e-aha dela hagalee hagamaamaa goe?”

22:9  Ma Kooe hua dela nogo benebene au i dogu madagoaa ne-haanau ai, gei di-maa Kooe labelaa dela nogo hagaloohi au i dogu madagoaa nogo ligiana.

22:10  Au nogo hagadagadagagee adu gi-di-Goe mai i dogu madagoaa ne-haanau ai, gei di-maa Kooe hua dela nogo hai di God ni-oogu i-nia madagoaa huogodoo.

22:11  Goe hudee haga-mogowaa-ina Goe gi-daha mo au! Nia haingadaa llauehe gu-hoohoo-mai, gei di-maa tangada e-hagamaamaa au ai.

22:12  Nia hagadaumee e-dogologowaahee e-haganiga au gadoo be nia kau-daane, digaula e-hai gadoo be nia kau-daane llamu-dauwa o Bashan.

22:13  Digaula e-hanga nadau ngudu be nia laion, e-wwolowwolo bolo ginaadou e-hahaahi au.

22:14  Au gu-deai ogu mahi ai, ogu mahi gu-hagalee gadoo be nia wai ala ne-malingi gi-hongo di gelegele. Ogu iwi huogodoo gu-monnono gi-daha mo nadau dudaginga, mo dogu hadu-manawa gu-waiwai gadoo be nia kiliidi.

22:15  Dogu akii gu-maangoo gadoo be nia gohu dogolia. Dogu holole gu-pigi-aga gi-baahi gi-nua dogu ngudu. Goe ne-diiagi au gi-lodo nia gohu dogolia bolo gii-made au.

22:16  Di buini gau huaidu e-haganiga mai i dogu gili gadoo be-di hagabuulinga paana e-mmui-mai gi-di-au. Digaula e-gadigadi ogu lima mo ogu wae.

22:17  Ogu iwi huogodoo gu-kila-mai haga-modongoohia. Ogu hagadaumee e-madamada-mai gi-di-au mo-di dadaumada au.

22:18  Digaula e-bilei gi ogu gahu, mo-di duwwe nia maa i ginaadou.

22:19  Meenei Dimaadua, Goe hudee haga-mogowaa-ina Goe gi-daha mo au! Goe hagalimalima mai, e-daa au gi-daha mo-di haingadaa!

22:20  Haga-dagaloaha-ina au gi-daha mo tulumanu-dauwa. Haga-dagaloaha-ina dogu mouli gi-daha mo nia paana aanei.

22:21  Daawa au gi-daha mo nia laion aanei. Au gu-deai dogu hagamaamaa i-mua nia kau-daane llamu-dauwa aanei ai.

22:22  Au ga-hagi-anga do ingoo gi ogu duaahina. Au ga-hagaamu Goe i-lodo nadau hagabuulinga daangada,

22:23  ga-helekai boloo, “Goodou go nia daane hai-hegau a Dimaadua, goodou hagaamuina a-Mee! Goodou go di hagadili ni Jacob, goodou hagalaamua-ina a-Mee! Goodou go digau Israel, goodou daumaha gi Mee!

22:24  Mee hagalee diiagi digau hagaloale, be e-haga-balumee nia hagaduadua digaula. Mee hagalee huli gi-daha mo digaula, Mee e-hila ang-gi digaula i-di nadau madagoaa ma-ga-gahigahi a-Mee.”

22:25  Au ga-hagaamu Goe i-lodo nia hagabuulinga llauehe. Au gaa-hai agu tigidaumaha ala ne-hagababa-adu ko-au i-mua digau ala e-daumaha adu gi-di-Goe.

22:26  Digau hagaloale gaa-gai nadau hagabae mee ala e-hiihai ginai. Digau ala e-lloomoi gi Dimaadua ga-hagaamu a-Mee. Digaula la-gi-haadanga-lamalia gaa-hana-hua beelaa!

22:27  Nia henua huogodoo ga-langahia a Dimaadua. Digaula ga-maaliu-mai gi Mee mai i-nia mada huogodoo o henuailala. Nia hagadilinga daangada-henua huogodoo ga-daumaha gi Mee.

22:28  Dimaadua la di king, go Mee e-dagi nia henua.

22:29  Nia daangada hagamuamua huogodoo gaa-pala gi Mee. Nia daangada dangada huogodoo gaa-pala gi-mua o Mee.

22:30  Nia adu-daangada huogodoo ala ga-lloo-aga dagidilaangi ga-hai-hegau gi Mee. Digaula ga-hagi-anga gi nia madahaanau ala ga-lloo-aga maalia di hai o Dimaadua.

22:31  Nia daangada ala digi haanau ga-hagalongo boloo, “Di Tagi gu-benebene ana daangada!”

Chapter 23

23:1  Dimaadua go dogu Hagaloohi. Au guu-dohu i-nia mee huogodoo.

23:2  Mee e-hai au gi-hagamolooloo i-lodo di gowaa geinga-tolo humalia, gaa-dagi au gi-nia monowai madammaa.

23:3  Mee e-hagamaaloo-aga au, e-dagi au i-lodo nia ala e-donu, e-hagalaamua-ai dono ingoo.

23:4  Meenei Dimaadua, ma e-aha maa au gaa-hana i-lodo di gowaa bouli dongoeho, gei au hagalee madagu, idimaa Goe dela e-madalia au. Dau madaagoo mo dau dogodogo hagaloohi-siibi e-hagaloohi au.

23:5  Goe e-hagatogomaalia dau hagamiami mai gi-di-au i-di gowaa dela e-mee di-mmada-ai ogu hagadaumee huogodoo mai gi-di-au. Goe e-hagalaamua au mo-di hagatulu dogu libogo gi-nia lolo-kala, mo-di haga-hau dagu ibu gii-honu.

23:6  Au gu-iloo bolo o humalia mo do aloho la-ga-noho-mau madalia au i-nia laangi huogodoo ala e-mouli-iei au, gei au gaa-noho i doo hale i-di waalooloo o dogu mouli.

Chapter 24

24:1  Henuailala mono hagahonu huogodoo i ono lodo la nia mee ni Dimaadua. Henuailala mono mee huogodoo ala e-mouli i-nonua la nia mee ni Mee.

24:2  Mee ne-hau di-maa i-hongo di moana llala i-lala henuailala, ga-haga-noho dono hagamau i-lodo di moana llala.

24:3  Ma koai dela e-tau di hana gi-nua gi-di gonduu a Dimaadua? Ma koai dela e-mee di-ulu gi-lodo di Hale Haga-madagu a-Maa?

24:4  Ma go digau ala e-madammaa nadau hangaahai mo nadau maanadu, ge hagalee daumaha gi-nia balu-god, ge hagalee hai nadau hagababa tilikai.

24:5  Dimaadua ga-haga-maluagina digaula ga-haga-dagaloaha digaula. God ga-haga-waalanga bolo digaula deai nadau huaidu ai.

24:6  Ma go digau ala beenei ala e-lloomoi gi God, ala e-lloomoi gi-mua di God o Jacob.

24:7  Goodou hugee nia bontai di abaaba di waahale, hugee nia bontai ala mai anadilaangi, gi-ulu di King Aamua gi-lodo!

24:8  Di King Aamua deenei la-koai? Go Dimaadua, Mee e-maaloo ge mogobuna! Dimaadua dela koia e-maaloo i-lodo nia dauwa.

24:9  Goodou hugee nia bontai di abaaba di waahale, hugee nia bontai ala mai anadilaangi, gi-ulu di King Aamua gi-lodo!

24:10  Di King Aamua deenei la-koai? Go Dimaadua di Gowaa Aamua, go Mee dela go di King Aamua!

Chapter 25

25:1  Meenei Dimaadua, au e-dalodalo adu gi-di-Goe.

25:2  Au e-hagadagadagagee-adu gi-di-Goe, meenei dogu God. Haga-dagaloaha-ina au gi-daha mo-di hagalangaadia o-di magedaa. Hudee heia ogu hagadaumee gii-mmada tene i-di-au!

25:3  Digau ala e-hagadagadagagee adu gi-di-Goe la-hagalee magedaa, gei digau ala e-hai-baahi adu gi-di-Goe, ala digau ga-magedaa.

25:4  Meenei Dimaadua, aago-ina-mai gi-di-au oo ala. Heia au gi-iloo nia maa.

25:5  Aago-ina au dagu hai dela e-mouli-iei au gii-hai be dau hiihai dela belee mouli-iei au, idimaa, Goe go dogu God dela e-haga-dagaloaha au. Au e-hagadagadagagee-adu gi-di-Goe i-nia laangi huogodoo.

25:6  Meenei Dimaadua, gi-langahia-e-Goe do dumaalia mo do manawa aloho dee-modu dela ne-hagamodongoohia-aga Kooe i-mua-loo.

25:7  Dumaalia-mai gi-di-au i ogu huaidu mo agu mee hai-hala ala ne-hai i dogu madagoaa damagiigi. Gi-langahia-e-Goe au, meenei Dimaadua, i-lodo do manawa-aloho deeodi mo o humalia huoloo.

25:8  Idimaa Dimaadua le e-donu gei e-humalia, Mee e-aago digau huaidu gi-di ala dela belee hai gi-daudali go digaula.

25:9  Mee e-dagi digau ala e-hila gi-lala gi-di ala dela e-donu, gei e-aago digaula gi dono manawa.

25:10  Mee e-dagi digau huogodoo ala e-daudali ana hagababa, mo-di daudali ana helekai gi dono manawa-dahi mo-di aloho.

25:11  Meenei Dimaadua, haga-gila-ina-aga au hagababa, dumaalia-mai gi ogu huaidu, idimaa, ogu huaidu la-gu-logowaahee.

25:12  Digau ala e-hagalaamua Dimaadua ga-iloo mai baahi o Mee di ala dela belee daudali go ginaadou.

25:13  Digaula ga-haadanga-lamalia i-nia madagoaa huogodoo, gei nia hagadili digaula ga-hai-mee gi tenua deelaa.

25:14  Dimaadua le e-hagadau-ihoo gi digau ala e-hagalongo ang-gi de-Ia, gei e-haga-mau-dangihi ana hagababa ang-gi digaula.

25:15  Au e-halahala dogu hagamaamaa gi baahi Dimaadua i-nia madagoaa huogodoo, gei Mee e-haga-dagaloaha au gi-daha mo-di haingadaa.

25:16  Meenei Dimaadua, huli-mai gi-di-au mo-di dumaalia-mai gi-di-au, idimaa, au gu-modogoau ge gu-bagege.

25:17  Hagamaamaa-ina au i ogu de-nnoomaalia, mo-di haga-dagaloaha-ina au gi-daha mo ogu haingadaa huogodoo.

25:18  Goe hagamaanadu-ina ogu haingadaa mo ogu duadua, gei gi-dumaalia-mai gi ogu huaidu huogodoo.

25:19  Mmada gi-di logo o ogu hagadaumee. Mmada gi tamanaiee o nadau hagadugina mai gi-di-au.

25:20  Hagaloohia au mo-di benabena-ina au. Hagaloohi au gi-dee magedaa au. Au e-hanadu gi-di-Goe gii-noho au i-di aumaalia.

25:21  Ogu humalia mo ogu donu la-gi-hagaloohia au, idimaa, au dela e-hagadagadagagee-adu gi-di-Goe.

25:22  Meenei God, haga-dagaloaha-ina au daangada ala go digau Israel gi-daha mo nadau haingadaa huogodoo.

Chapter 26

26:1  Meenei Dimaadua, haga-iloo-ina bolo au ogu huaidu ai, idimaa, au e-hai nia mee ala e-donu, gei e-hagadagadagagee huoloo adu gi-di-Goe.

26:2  Meenei Dimaadua, hagadina-ina au mo-di hagamada-ina au. Hagiaga-ina ogu hiihai mo ogu hagabaubau.

26:3  Do manawa-aloho dee-modu dela e-dagi au. Do manawa-dahi dela e-dagi au i-nia madagoaa huogodoo.

26:4  Au hagalee hagabuni gi digau ala balumee, gei au dagu mee e-hai ang-gi digau halahalau-dangada ai.

26:5  Au e-hagadugina gi digau ala e-haihai di huaidu, gei au hagalee noho i-baahi digau huaidu.

26:6  Meenei Dimaadua, au e-tono ogu lima e-hagamodongoohia bolo au ogu ihala ai, ge e-hai agu daumaha e-hana haganiga dau gowaa hai tigidaumaha.

26:7  Au e-daahili danggee, gei e-hagi-anga au hegau hagagoboina.

26:8  Meenei Dimaadua, au e-aloho i-di hale dela e-noho-iei Goe, di gowaa dela e-noho-ai do madamada.

26:9  Hudee daaligidia au madalia digau hai mee hala. Hudee daaligidia au be digau daaligi dangada gii-mmade,

26:10  nia daangada ala e-hai mee huaidu i-nia madagoaa huogodoo, ge e-hagatogomaalia i-nia madagoaa huogodoo e-kae nia bahihadu haganeene.

26:11  Gei au, au e-hai nia mee ala e-donu. Dumaalia-mai gi-di-au, haga-dagaloaha-ina au!

26:12  Au gu-benebene hagahumalia gi-daha mo nia hagadilinga mee hagalliga huogodoo. Au e-hagaamu Dimaadua i-mua ana hagabuulinga daangada.

Chapter 27

27:1  Dimaadua go dogu haga-maalama mo dogu hagamouli! Au hagalee e-madagu i dahi dangada. Dimaadua e-abaaba au gi-daha mo nia mee hagalliga huogodoo. Au hagalee madagu i dahi mee.

27:2  Maa digau huaidu ga-heebagi-mai gi-di-au belee daaligi au gii-made, digaula ga-tibatiba gaa-tinga gi-lala.

27:3  Ma e-aha maa digau dauwa dogologowaahee ga-haganiga-mai i dogu gili, gei au hagalee madagu. Ma e-aha maa ogu hagadaumee ga-heebagi-mai gi-di-au, gei au e-hagadagadagagee hua igolo gi God.

27:4  Di mee hua e-dahi dela e-dangi-iei-au gi Dimaadua, di mee hua e-dahi dela e-hiihai ginai au: bolo au gii-noho i-lodo di hale o Dimaadua i-di waalooloo o dogu mouli, gii-mmada au gi nia madamada o-Maa, ge e-dangi gi Mee gi-aago-ina-mai au dagu hai dela belee hai.

27:5  I-lodo nia madagoaa haingadaa, gei Mee ga-abaaba au. Mee ga-hagaloohi au i-lodo dono Hale Daumaha, gaa-dugu au gi-hongo di gonduu duuduu i-nua.

27:6  Malaa, gei au ga-aali i ogu hagadaumee ala i dogu gili. Au gaa-hai dagu tigidaumaha mo-di wolowolo tenetene i-lodo dono Hale Daumaha. Au ga-daahili, au ga-hagaamu Dimaadua.

27:7  Meenei Dimaadua, hagalongo-mai i dogu madagoaa ma-ga-gahigahi Goe! Goe manawa-dumaalia-mai, helekai-mai!

27:8  Do madagoaa ne-helekai boloo, “Hanimoi daumaha-mai!” gei au ga-helekai, “Meenei Dimaadua, au ga-hanadu.”

27:9  Goe hudee heia Goe gii-ngala i-di-au! Meenei God, go dogu Hagamouli, Goe hudee hagawelewele-mai, Goe hudee diagia dau dangada hai-hegau deenei. Goe go dogu Hagamaamaa, Goe hudee huli gi-daha mo au, Goe hudee diagi-ina au.

27:10  Dogu damana mo dogu dinana holongo e-mee di-diiagi au, gei Dimaadua e-benebene au.

27:11  Meenei Dimaadua, aago-ina au gi au mee ala e-hiihai bolo au gi-heia. Dagia au i-hongo di ala huudonu, idimaa, ogu hagadaumee le e-dogologo.

27:12  Goe hudee diagia au gi ogu hagadaumee ala e-heebagi-mai gi-di-au i nadau helekai hagamadagudagu mono helekai tilikai.

27:13  Gei deeai, au e-iloo bolo au e-mouli-hua bolo gii-mmada au gi-di humalia o Dimaadua i-lodo dogu mouli-nei.

27:14  Hagadagadagagee gi Dimaadua! Hagadonu, hudee manawa bagege! Hagadagadagagee gi Dimaadua!

Chapter 28

28:1  Meenei Dimaadua, dogu Dangada Daa, au e-gahigahi Goe. Hagalongo-mai gi dagu dangidangi! Maa nei bolo Goe digi helekai-mai, gei au ga-madalia digau ala e-hula gi-lala gi tenua o digau mmade.

28:2  Hagalongo-mai i dogu madagoaa ma-ga-dangi-adu di hagamaamaa, i dogu madagoaa ma-ga-dahi-aga ogu lima gi doo Hale Dabuaahia.

28:3  Hudee heia au gii-made madalia digau huaidu, mo madalia digau hai mee huaidu, ala go nia hagadilinga daangada ala e-hai nadau helekai humalia huoloo, gei nadau manawa le e-honu i-nia halahalau dangada.

28:4  Daaligidia digaula gi-nia mee digaula ala ne-hai, mo nia huaidu digaula ala ne-hai. Daaligidia digaula i-nia mee huogodoo huaidu digaula ala ne-hai. Wanga-ina gi digaula nia mee ala e-tau ang-gi digaula!

28:5  Digaula e-de-heia-ginaadou nia mee a Dimaadua ne-hai, be go nia mee a-Mee ala ne-hai. Malaa, Mee ga-daaligi digaula ga-hagammaa digaula gi-daha.

28:6  Goodou hagaamu-ina Dimaadua, i Mee dela gu-longono-Ia dagu gahigahi hagamaamaa ne-hai.

28:7  Dimaadua e-hagaloohi gei e-abaaba au. Au e-hagadagadagagee gi Mee. Mee e-hagamaamaa au gei e-hai au gi-tenetene. Au e-hagaamu a-Mee gi-nia daahili haga-tenetene.

28:8  Dimaadua e-hagaloohi ana daangada, Mee e-abaaba ge e-haga-dagaloaha dana king dela ne-hilihili.

28:9  Meenei Dimaadua, haga-dagaloaha-ina au daangada, hagamaluagina-ina digau ala nia daangada ni-aau. Dagia digaula be-di hagaloohi siibi, gei Goe gi-madamada humalia i digaula gaa-hana-hua beelaa.

Chapter 29

29:1  Hagaamu-ina Dimaadua, goodou go nia dama a God ala i-di langi. Hagaamu-ina nia madamada o-Maa mono mogobuna.

29:2  Hagaamu-ina di ingoo madamada o Dimaadua. Pala gi-lala gi-mua Tangada Haga-madagu ma-ga-hanimoi.

29:3  Di lee o Dimaadua e-hanimoi i-hongo tai. Di God madamada e-helekai be-di lee atili, di lee o-Maa e-tataanga i-hongo di moana.

29:4  Di lee o Dimaadua le e-mogobuna ge e-mahi huoloo.

29:5  Di lee o Dimaadua e-oho nia laagau-‘cedar’, go nia ‘cedar’ o Lebanon.

29:6  Mee e-hai nia Gonduu o Lebanon gi-hobohobo gadoo be nia damaa-kau, gaa-hai di Gonduu Hermon gii-hobo gadoo be tamaa-kau-daane.

29:7  Di lee o Dimaadua e-hai di ila gii-daba.

29:8  Di lee o-Maa e-hai di anggowaa gi-lullulu. Mee e-lullulu di Anggowaa o Kadesh.

29:9  Di lee o Dimaadua e-lullulu nia laagau llauehe, gaa-hai nia lau-laagau la-gi-monnono i-di madagoaa nia daangada huogodoo ala i-lodo di Hale Daumaha a-Maa e-wwolowwolo boloo: “Haga-madamada-ina a God!”

29:10  Dimaadua e-dagi nia wai llala, Mee e-dagi gadoo be-di king gaa-hana-hua beelaa.

29:11  Dimaadua e-haga-maaloo-aga ana daangada, ga-haga-maluagina digaula gii-noho i-di aumaalia.

Chapter 30

30:1  Au e-hagaamu Goe, meenei Dimaadua, idimaa Goe dela ne-haga-dagaloaha au, ne-hai ogu hagadaumee gi-de gadagada haganneennee au.

30:2  Au ne-dangidangi-adu gi-di-Goe belee hagamaamaa au, meenei Dimaadua, go dogu God, gei Goe hogi gu-hagamaaloo-aga au.

30:3  Goe gu-benebene au gi-daha mo taalunga. Dogu hana-hua gi-baahi digau mmade, gei Goe guu-hai au gi-mouli.

30:4  Goodou go nia daangada huogodoo a-Mee ala e-manawa-dahi, goodou daahili hagaamu-ina Dimaadua. Gi-langahia-e-goodou nia mee a Tangada Haga-madagudia ala ne-hai, ga-danggee gi Mee!

30:5  Di hagawelewele o-Maa le e-hai-hua hagabalua, gei tumaalia o-Maa le e-waalooloo be-di waalooloo o-di mouli o tangada. Nia wai dangi e-mee di hali i-di boo, gei di tenetene le e-hanimoi i-di luada.

30:6  Au ne-hagalongo-iha i ogu lodo bolo au guu-tanga gi-daha mo nia haingadaa, gei au ga-helekai i-lodo dogu manawa boloo, “Au gu-deemee-loo di-magedaa.”

30:7  Goe gu-humalia huoloo mai gi-di-au, meenei Dimaadua, Goe gu-duuli au gadoo be-di abaaba dauwa i-hongo di gonduu. Ga-nomuli, gei Goe gaa-bala hagammuni i-di-au, gei au gu-madagu.

30:8  Au gu-gahigahi Goe, meenei Dimaadua, au gu-dangidangi i-di hagamaamaa adu gi-di-Goe, ga-helekai,

30:9  “Ma di-aha e-kae Kooe i-di-au, maa au ma-gaa-made? Ma nia hagahumalia-aha e-kae Kooe i-di-au, maa au ma-gaa-bala i-lodo taalunga? E-hai behee, digau ala guu-mmade le e-mee di-hagaamu Goe? Digaula e-mee di-hagadele di hai o do dumaalia deeodi?

30:10  Hagalongo-mai gi-di-au, meenei Dimaadua, mo-di manawa-dumaalia mai gi-di-au! Meenei Dimaadua, hagamaamaa-ina au!”

30:11  Goe guu-huli dogu manawa-gee guu-hai au gi-gaalege tenetene. Goe gu-daa gi-daha dogu manawa-gee guu-hii au gi-di tenetene.

30:12  Malaa, au hagalee bolo ga-noho-hua deemuu, au ga-daahili e-hagaamu Goe. Meenei Dimaadua, Goe la di God ni-oogu, au ga-danggee-adu gi-di-Goe ga-hana-hua deeodi.

Chapter 31

31:1  Au e-hanadu gi-di-Goe, meenei Dimaadua, belee hagaloohi Kooe. Goe hudee heia au gi-magedaa. Goe di God e-donu, au e-dangi-adu gi-di-Goe gi-haga-dagaloaha-ina au!

31:2  Hagalongo-mai! Haga-dagaloaha-ina au dolomeenei! Goe gii-hai dogu gowaa e-bala-iei au bolo gi-hagaloohi au Kooe, Goe go dogu hagaloohi e-haga-dagaloaha au.

31:3  Goe go dogu gowaa e-hagamalu-iei au, mo dogu haga-dagaloaha. Aago-ina au mo-di dagia au e-hagalaamua-ai do ingoo.

31:4  Benabena-ina au gi-daha mo-di hele dela gu-haganoho mai gi-di-au. Duulia au gi-daha mo nia haingadaa.

31:5  Au gu-dugu-adu au gi-di-Goe gi-madamada humalia-ai. Goe ga-haga-dagaloaha au, meenei Dimaadua, Goe la di God manawa-dahi.

31:6  Goe e-de-hiihai gi digau ala e-daumaha gi-nia balu god tilikai, gei au e-hagadagadagagee adu gi-di-Goe.

31:7  Au ga-manawa lamalia mo-di tenetene, idimaa go do manawa-aloho dee-modu. Goe e-gidee ogu hagaduadua, Goe e-iloo ogu haingadaa.

31:8  Goe digi hai ogu hagadaumee gi-kumudia au. Goe gu-gaamai gi-di-au di moholo gii-hana gi-nia gowaa ala e-hiihai ginai au.

31:9  Dumaalia-mai gi-di-au, meenei Dimaadua, idimaa au gu-haingadaa-mai gi-di-au. Ogu golomada gu-duadua di dangidangi. Au gu-ogu mahi ai.

31:10  Au gu-ogu mahi ai i dogu manawa-gee, mo dogu dangidangi gu-haga-bodobodo-mai dogu mouli. Au gu-bagege mai i ogu haingadaa huogodoo, ogu iwi gu-paagege labelaa.

31:11  Ogu hagadaumee huogodoo, gei e-donu go digau ala i dogu baahi, le e-haga-balumee au. Digau ala e-iloo-ginaadou au le e-mmaadagu i-di-au. Digaula ma-ga-mmada-mai gi-di-au i-hongo di ala, le e-hula e-llele gi-daha.

31:12  Nia daangada huogodoo gu-de-langahia-e-ginaadou au, e-hai bolo au guu-made. Au guu-hai gadoo be-di balumee ne-hudu gi-daha.

31:13  Au e-longono nia leelee hagamoolee o ogu hagadaumee dogologowaahee. Di madagu gu-i ogu daha! Digaula e-haga-noho di-nadau hai dela belee hai-baahi mai gi-di-au, belee daaligi au gii-made.

31:14  Gei au e-hagadagadagagee-hua adu gi-di-Goe, meenei Dimaadua, Kooe go dogu God!

31:15  Goe e-madamada humalia i-di-au i-nia madagoaa huogodoo. Haga-dagaloaha-ina au gi-daha mo ogu hagadaumee, gi-daha mo digau ala e-hagahuaidu au.

31:16  Mmada-mai gi dau dangada hai-hegau deenei i-di manawa-dumaalia. Haga-dagaloaha-ina au gi do manawa-aloho dee-modu.

31:17  Au e-dangidangi-adu gi-di-Goe, meenei Dimaadua. Goe hudee heia au gi-langaadia. Heia digau huaidu gi-langaadia, digaula gi-hula-hua deemuu gi-lala gi tenua o digau mmade.

31:18  Heia digau hai-kai-tilikai aalaa gii-noho deemuu, digau hagamuamua huogodoo mo digau haga-balumee dangada, digau ala e-haga-balumee digau ala e-donu.

31:19  E-haga-goboina huoloo go nia mee humalia ala e-benebene Kooe ang-gi digau ala e-hagalaamua Goe! Digau huogodoo gu-iloo bolo Goe e-humalia huoloo, ge e-benebene mo-di abaaba hagahumalia digau ala e-hagadagadagagee adu gi-di-Goe.

31:20  Goe e-hagammuni digaula hagahumalia i-mua o hadumada gi-daha mo nia haganohonoho o-nia daangada. Goe e-hagammuni digaula gi-lodo di gowaa humalia gi-daha mo nia helekai huaidu o nadau hagadaumee.

31:21  Hagaamu-ina Dimaadua! E-hagagoboina huoloo behee go Mee dela ne-hagamodongoohia-mai dono aloho gi-di-au i-di madagoaa ogu hagadaumee la-ne-hii-mai i dogu gili ga-heebagi-mai.

31:22  Au gu-madagu huoloo, gu-maanadu bolo Mee guu-hudu au gi-daha, ge deeai, Mee gu-longono-Ia dagu dangi i dogu madagoaa ne-gahigahi a-Mee belee hagamaamaa au.

31:23  Aloho i Dimaadua, goodou huogodoo ala go ana daangada manawa-dahi! Dimaadua e-abaaba digau ala e-manawa-dahi! Gei Mee e-hagaduadua digau ala e-hagamuamua gii-tau gi nadau mee hala ala ne-hai.

31:24  Goodou huogodoo ala e-hagadagadagagee gi Dimaadua, goodou gi-maaloo mo-di hagamahi.

Chapter 32

32:1  E-maluagina go tangada dela gu-maahede ono huaidu, gu-haga-de-langahia ono hala go God.

32:2  E-maluagina go tangada dela hagalee hai-baahi ginai a Dimaadua i ana mee hala ne-hai, gei mee gu-mehede gi-daha mo nia hagadilinga halahalau huogodoo.

32:3  Dogu madagoaa dela digi haagia ogu huaidu, gei au nogo dangidangi duadua i-di boo mo-di aa.

32:4  Meenei Dimaadua, Goe nogo hagaduadua au i-di boo mo-di aa, au gu-deai ogu mahi ai, guu-hai gadoo be nia magalillili o-di luada ma-ga-maangoo i-di welengina o-di madagoaa mahanahana.

32:5  Malaa, gei au gu-haagi-aga ogu huaidu adu gi-di-Goe. Au digi hagammuni agu mee hai-hala ala ne-hai. Au gu-hagamaanadu bolo au e-haagi-adu nia maa gi-di-Goe, gei Goe gu-dumaalia mai gi-di-au i ogu huaidu huogodoo.

32:6  Malaa, au daangada huogodoo ala e-manawa-dahi gi-dalodalo-adu gi-di-Goe i nadau madagoaa haingadaa. Di madagoaa o-di haingadaa dela e-hai be-di labagee damana ma-gaa-hai, gei di-maa hagalee tale gi digaula.

32:7  Goe la-go dogu gowaa dela e-bala hagammuni ginai au. Goe ga-haga-dagaloaha au gi-daha mo nia haingadaa. Au ga-daahili mo-di hagaamu dau hagamouli, idimaa Goe dela e-abaaba au.

32:8  Dimaadua ga-helekai, “Au ga-hagi-adu gi-di-goe di ala dela e-hana-iei goe. Au ga-aago goe ga-hagamaamaa goe.

32:9  Goe hudee hai be-di hoodo, be-di ‘donkey’ dela hagalee e-iloo nia mee, dela-hua e-humalia e-wanga di baalanga mo dono loahi gi-di ngudu o-maa gi-hagalongo a-mee adu gi-di-goe.”

32:10  Tangada hai-mee huaidu le e-hai gi-hagaduadua, gei tangada dela e-hagadagadagagee gi Dimaadua la-gu-abaaba go Mee gi dono manawa-aloho dee-modu.

32:11  Goodou go digau ala guu-donu, goodou huogodoo gi-manawa lamalia gi-tenetene gi-nia mee a Dimaadua ala ne-hai. Goodou go digau ala e-hagalongo gi Mee, goodou wwolowwolo tenetene!

Chapter 33

33:1  Goodou huogodoo ala guu-donu, wwolowwolo mo-di tenetene gi-nia mee a Dimaadua ala ne-hai. Goodou huogodoo ala e-hagalongo gi Mee, hagaamuina a-Mee!

33:2  Hagaamuina Dimaadua gi godou mee hai-daahili, daahili gi Mee i-nia uga o godou ‘harp’.

33:3  Goodou daahili gi Mee i taahili hoou. Daahili gi Mee i-nia lee humalia mai i godou mee hai-daahili mo-di wwolowwolo tenetene!

33:4  Idimaa, nia helekai a Dimaadua le e-donu, Mee e-manawa-dahi i ana mee huogodoo ala e-hai.

33:5  Dimaadua le e-aloho di tonu mo-di hai-hegau donu. Henuailala guu-honu i dono manawa-aloho dee-modu.

33:6  Di langi la-ne-hai go Dimaadua gi ana helekai, gei-ogo di laa, di malama mono heduu la-ne-hai labelaa gi ana helekai.

33:7  Mee ne-hagabuni-mai nia moana huogodoo gi-di gowaa e-dahi, gaa-tai nia hagahonu di moana gi-lodo nia gowaa benebene-mee.

33:8  Digau huogodoo o henuailala, goodou gi-mmaadagu i Dimaadua! Nia daangada huogodoo o henuailala, goodou hagalaamua-ina a-Mee!

33:9  Mee ne-helekai, gei henuailala guu-gila. Mee ne-helekai-hua, gei nia mee huogodoo gu-kila-aga.

33:10  Dimaadua e-haga-dee-kila nia hagataele o-nia henua, ga-haga-mmaa gi-daha nia hagabaubau digaula.

33:11  Gei ana hagabaubau e-noho-hua beelaa. Nia hagataele a-Maa ang-gi dono hiihai le e-noho-hua beelaa.

33:12  E-maluagina go tenua dela di-nadau God la-go Dimaadua. E-maluagina go nia daangada ala guu-hili go Mee bolo e-hai ana daangada!

33:13  Dimaadua e-mmada-iha i-di langi, e-daumada gidaadou go nia daangada huogodoo.

33:14  Mee e-daumada digau huogodoo ala e-noho i henuailala mai i dono lohongo aamua.

33:15  Ma go Mee dela e-hai nia daangada gii-mee di-hagabaubau, gei Mee e-iloo-Ia nia mee huogodoo ala e-hai go digaula.

33:16  Di king la-hagalee aali mai i ana gau-dauwa ala e-maaloo. Tangada-dauwa la-hagalee aali mai i dono maaloo.

33:17  Nia hoodo ala i tauwa la-hagalee hai ana mee gi-di aali, nia maaloo digaula le e-deemee di-hagamouli ginaadou.

33:18  Dimaadua e-hagaloohi digau ala e-hagalongo ang-gi de-Ia, digau ala e-hagadagadagagee gi dono manawa-aloho dee-modu.

33:19  Mee e-haga-dagaloaha digaula gi-daha mo-di made. Mee e-hagamouli digaula i-lodo tau-magamaga.

33:20  Dimaadua la-go tadau hagadagadagagee, go Mee go tadau hagaloohi mo tadau hagamaamaa.

33:21  Gidaadou e-tenetene mai i Mee. Gidaadou e-hagadagadagagee gi dono ingoo dabu.

33:22  Meenei Dimaadua, do manawa-aloho dee-modu gii-noho i madau baahi, i gimaadou ala e-hagadagadagagee-hua adu gi-di-Goe.

Chapter 34

34:1  Au ga-danggee gi Dimaadua i-nia madagoaa huogodoo. Au hagalee dugu dogu hagahagaamu a-Mee.

34:2  Au ga-hagaamu a-Mee i-nia mee a-Maa ala ne-hai. Goodou ala gu-haga-daamaha, goodou hagalongo mo-di manawa lamalia!

34:3  Hagadele-ina di aamua o Dimaadua madalia au, gidaadou gi-buni-mai gi-di gowaa e-dahi e-hagaamu dono ingoo!

34:4  Au gu-dalodalo gi Dimaadua, gei Mee gu-hila-mai gi-di-au. Mee gu-hagamehede au gi-daha mo ogu mmaadagu huogodoo.

34:5  Digau ala e-manawa-gee gaa-mmada gi Mee ga-manawa lamalia. Digaula hagalee manawa-gee labelaa.

34:6  Digau ala nadau hagamaamaa ai, ga-gahigahi a-Mee, gei Mee e-hila ang-gi digaula. Mee e-haga-dagaloaha digaula gi-daha mo nadau haingadaa huogodoo.

34:7  Dana dangada di-langi e-hagaloohi digau ala e-hagalabagau a Dimaadua, ge e-daa digaula gi-daha mo nia mee balua.

34:8  Goodou tei gii-bida halahala-ina be Dimaadua le e-humalia behee. E-maluagina go tangada dela guu-gida dono hagaloohi i-baahi o Mee.

34:9  Goodou ala go ana daangada huogodoo, hagalaamua-ina a Dimaadua. Digau ala e-hagalongo gi Mee, le e-hai-mee gi-nia mee ala e-hiihai ginai digaula.

34:10  Nia laion hogi le e-hiigai idimaa nadau meegai ai, gei digau ala e-hagalongo ang-gi Dimaadua la-gaa-dohu i nadau mee humalia huogodoo.

34:11  Ogu ihoo hagaaloho damagiigi, lloomoi hagalongo-mai gi-di-au, gei au ga-aago goodou gi-di hai dela e-hagalaamua a Dimaadua.

34:12  Goodou e-hiihai e-manawa lamalia i-lodo godou mouli? Goodou e-hiihai gi-mouli waalooloo mo-di tenetene?

34:13  Malaa, goodou hudee helekai huaidu ge hudee helekai tilikai.

34:14  Maaliu-mai gi-daha mo nia hai-mee huaidu, heia go nia mee ala e-humalia. Haga-mahi dadaahia-hua beelaa di noho-baba aga i godou manawa hagatau.

34:15  Dimaadua le e-madamada humalia i digau ala e-donu, ge e-hagalongo gi-nia dangidangi digaula.

34:16  Gei Mee e-hai-baahi gi digau ala e-hai nia mee huaidu. Digaula ma-gaa-mmade, gei tangada e-langahia digaula ai.

34:17  Digau ala e-hai nia mee donu ma-ga-dangidangi gi Dimaadua, gei Mee e-hagalongo, Mee e-daa digaula gi-daha mo nadau haingadaa huogodoo.

34:18  Dimaadua le e-noho i-baahi digau ala gu-manawa-paagege, Mee e-haga-dagaloaha digau ala gu-deai nadau hagadagadagagee ai.

34:19  Digau humalia le e-tale ginai nia haingadaa e-logo, gei Dimaadua e-haga-dagaloaha digaula gi-daha mo nia maa huogodoo.

34:20  Dimaadua e-benebene digaula hagahumalia, di iwi e-mooho i-nia iwi digaula ai.

34:21  Di mee huaidu le e-daaligi tangada huaidu, gei digau ala e-hudi nadau wou gi digau ala e-donu, le e-hagaduadua.

34:22  Dimaadua le e-haga-dagaloaha ana daangada, gei digau ala e-hula gi Mee bolo gi-hagaloohia ginaadou la-ga-mouli.

Chapter 35

35:1  Meenei Dimaadua, hai-baahi ang-gi digau ala e-hai-baahi-mai gi-di-au, heebagi gi digau ala e-heebagi-mai gi-di-au!

35:2  Dahi-aga-ina dau mee abaaba mo au goloo-dauwa, hanimoi e-haga-dagaloaha au.

35:3  Dahi-aga-ina dau daalo mo dau dalai-dauwa, hai-baahi gi digau ala e-waluwalu au. Hagababa bolo Goe ga-haga-dagaloaha au.

35:4  Digau ala bolo ginaadou e-hagamada e-daaligi au gii-made la-heia gi-magedaa gi-langaadia! Digau ala e-hagatogomaalia bolo ginaadou e-hai-baahi-mai gi-di-au la-heia gii-huli gi-muli gi-hinihini!

35:5  Heia digaula gii-hai be nia geinga maangoo ma-ga-iliili go di madangi i-di madagoaa tangada-di-langi o Dimaadua ma-ga-waluwalu digaula!

35:6  Heia nia ala digaula gi-bouli ge gi-malali i-di madagoaa tangada di langi o Dimaadua ma-gaa-kili digaula gi-lala!

35:7  Digaula guu-dugu di-nadau hele belee hele-iei au, gei au dagu mee hala ne-hai gi digaula ai, mo-di geli di-nadau lua llala belee kumi au.

35:8  Malaa, taaligi gaa-hai-hua gi digaula gei digaula de-iloo. Digaula gaa-bida kumi go nadau hele gaa-too gi-lala, gaa-mmade!

35:9  Malaa, gei au ga-manawa lamalia, idimaa go Dimaadua. Au ga-tenetene, idimaa Mee dela gu-haga-dagaloaha au.

35:10  Au ga-helekai gi Dimaadua mai i-lodo dogu manawa hagatau boloo, “Ma tangada e-hai be Goe ai. Goe e-abaaba digau paagege i digau maaloo, mo digau hagaloale i digau ala e-hai haga-huaidu digaula.”

35:11  Digau huaidu e-hai nadau haga-modongoohia hai-baahi mai gi-di-au, ge e-haga-huaidu au gi-nia mee hala ala e-de-iloo-eau.

35:12  Digaula e-hui-mai gi agu hegau humalia gi-nia huaidu, malaa, au gu-bagege ogu lodo.

35:13  Malaa, di madagoaa digaula nogo magi, gei au gu-ulu ogu goloo manawa-gee, gaa-bida noho hagaonge belee hagaduadua au. Au e-bala gi-lala e-dalodalo,

35:14  gadoo be au e-dalodalo i dogu ihoo haga-tenetene, be go dogu duaahina-daane. Au e-heehee manawa-gee bala gi-mua, gadoo be tangada ma-ga-manawa-gee gi dono dinana ne-made.

35:15  Malaa, dogu madagoaa nogo i-lodo di haingadaa, gei digaula gu-tenetene, ga-mmui-mai gi dogu baahi, ga-haganneennee au. Digau tuadimee e-dadaaligi au ge hagalee lawa di-nadau haga-mamaawa au.

35:16  Digaula e-mmada haga-gulugulua-mai gi-di-au gadoo be tangada ma-ga-gadagada haganneennee tangada habehabe.

35:17  Meenei Dimaadua, e-waalooloo behee go do daumada-hua au gei deai dau mee e-hai-mai gi-di-au ai? Haga-dagaloaha-ina au gi-daha mo teebagi digaula. Haga-dagaloaha-ina au gi-daha mo nia laion aanei!

35:18  Gei au ga-danggee-adu gi-di-Goe i-lodo au hagabuulinga daangada. Au ga-hagaamu Goe i-mua digaula huogodoo.

35:19  Hudee heia ogu hagadaumee mo digau hai-kai tilikai aalaa gii-mmada tene gi dogu magedaa. Hudee heia digau hagadugina i-di-au dono hadinga ai la-gi-tenetene gadagada haganneennee gi dogu manawa-gee.

35:20  Digaula hagalee leelee hagahumalia, gei digaula e-dili nadau hagadilinga kai-tilikai huogodoo i digau ala e-noho hagahumalia.

35:21  Digaula e-wwolo gi-nua e-hagahuaidu au boloo, “Gimaadou guu-mmada gi dau mee dela ne-hai!”

35:22  Gei Goe, meenei Dimaadua, gu-gidee-Goe nia mee aanei. Malaa, gei Goe hudee noho deemuu, meenei Dimaadua. Goe hudee hagamogowaa-ina Goe i-di-au!

35:23  Meenei Dimaadua, du-gi-nua, haga-dagaloaha-ina au. Meenei dogu God, du-gi-nua hagamaamaa-ina au i-lodo dogu gabunga.

35:24  Meenei Dimaadua, Kooe dela e-donu, hagamodongoohia-aga-ina bolo au ogu huaidu ai. Hudee heia ogu hagadaumee gi-tenetene gi dogu haingadaa.

35:25  Goe hudee heia digaula gi-helekai boloo: “Mee gu-doo gi-daha. Deelaa tadau mee nogo hiihai ginai!”

35:26  Digau ala nogo mmada tene gi dogu dadaaligi, la-heia gi-magedaa gi-hinihini. Digau ala e-hai bolo ginaadou la-koia e-humalia i-di-au la-gi-langaadia gi-balumee.

35:27  Gei digau ala e-hiihai e-mmada gi-di tonu humalia o dogu gabunga la-gi-momoogo tenetene mo-di tataanga-ina telekai deenei: “Dimaadua le e-aamua huoloo! Mee e-manawa-tene gi dana dangada hai-hegau dela guu-gila.”

35:28  Malaa, au ga-hagadele ang-gi nia daangada bolo Goe di God e-donu, mo-di hagaamu Goe mai luada gaa-dae-loo gi-di hiahi.

Chapter 36

36:1  Di huaidu le e-mouli i-lodo nia manawa o digau huaidu. Digaula gu-haga-balumee a God ge gu-hagalee hagalabagau a-Mee.

36:2  Idimaa digaula e-hai bolo ginaadou nia mee, e-hagabaubau bolo God la-hagalee gidee nadau ihala belee hagi-aga ginaadou.

36:3  Nadau helekai le e-honu i-nia huaidu, ge e-honu i-nia kai-tilikai. Digaula gu-hagalee hai nia mee ala e-humalia ge donu.

36:4  Digaula e-hai nadau hagataele huaidu i nadau madagoaa ma-gaa-kii i-hongo nadau moenge. Deai nadau mee humalia e-hai ai, digaula hagalee kili gi-daha di-ingoo-hua di mee huaidu.

36:5  Meenei Dimaadua, do manawa-aloho dee-modu la-guu-tugi-loo i-di langi. Do manawa-dahi gu-haga-honu i-lala di langi.

36:6  Oo donu la-koia e-duuduu i-nua gadoo be nia gonduu. Dau hagi-aga le e-llala gadoo be-di llala o-di moana. Nia daangada mono manu le e-madamada humalia-iei Goe.

36:7  Meenei God, e-dahidamee behee go do manawa-aloho dee-modu! Gimaadou guu-gida madau gowaa e-duuli-ai gimaadou i-lala di malu o bakau.

36:8  Gimaadou e-hai madau hagamiami gi au hagabae meegai ala ne-dahi-aga, gaa-hai gimaadou gi-inu-mai i-nia monowai o do dumaalia.

36:9  Ma dela-hua Kooe dela go di hagamau o-nia mouli huogodoo. Idimaa go do maalama, gimaadou gaa-mee di-mmada gi-di maalama.

36:10  Dudagia-adu beelaa do manawa-aloho dee-modu ang-gi digau ala e-iloo-ginaadou Goe, gei gi-heia di humalia ang-gi digau ala e-donu.

36:11  Hudee heia digau hagamuamua gi-heebagi-mai gi-di-au be go digau huaidu e-hai au gii-lele gi-daha.

36:12  Mmada malaa gi digau huaidu ala ne-monnono. Digaula e-mmoemmoe i-golo, e-deemee di nnoo i-nua.

Chapter 37

37:1  Goe hudee de-nnoomaalia i digau ala e-huaidu. Goe hudee dubua ang-gi digau ala e-hai nadau mee-hala.

37:2  Idimaa, digaula e-limalima-hua di-hagalee, gadoo be nia geinga ala gu-maangoo. Digaula gaa-mmade gadoo be nia laagau ne-mae.

37:3  Hagadagadagagee gi Dimaadua mo-di hai nia mee humalia, gei goe gaa-noho i-hongo tenua dela hagalee lliga i di-maa.

37:4  Halahala-ina doo tene gi-baahi o Dimaadua, gei Mee ga-gowadu gi-di-goe dau mee dela e-manawa-iei goe.

37:5  Wanga-ina do huaidina gi Dimaadua, hagadagadagagee gi Mee, gei Mee ga-hagamaamaa goe.

37:6  Mee gaa-hai au hegau donu gi-dingidingia gadoo be-di laa.

37:7  Manawa-hagakono mo-di talitali maalia di mee a Dimaadua dela gaa-hai. Goe hudee de-nnoomaalia gi digau ala guu-noho humalia i nadau haihai ala ma-gaa-hai, be go digau ala e-kila humalia nadau hagataele huaidu.

37:8  Hudee de-nnoomaalia be e-hagawelewele. Goe gaa-hai beelaa, gei goe gaa-tale gi-di haingadaa.

37:9  Digau ala e-gana gi Dimaadua ga-hai-mee gi tenua deelaa, gei digau ala e-hai nia mee huaidu la-ga-hagabagi gi-daha.

37:10  Hoohoo-mai-hua, gei digau hai mee huaidu ga-hagalee. Goe ga-halahala digaula, gei goe hagalee gidee digaula.

37:11  Gei-ogo digau ala e-manawa hila-gi-lala, la aalaa digau ga-hai-mee gi tenua deelaa, gaa-noho maluagina mo-di tenetene gei e-noho i-di aumaalia.

37:12  Digau huaidu le e-haganoho di-nadau hai dela bolo e-hai-baahi gi digau ala e-humalia, ge e-daumada digaula hagadugina.

37:13  Malaa, di Tagi e-gadagada gi digau ala e-hai mee huaidu, idimaa, Mee e-iloo-Ia bolo digaula gu-hoohoo-hua ga-hagalee.

37:14  Digau ala e-hai nia mee huaidu e-haga-mmuu-aga nadau hulumanu-dauwa, mo-di hagatogomaalia nadau maalei belee daaligi digau hagaloale mo digau ala e-noho huaidu ang-gi ginaadou, e-daaligi gii-mmade digau ala e-hai nadau mee donu.

37:15  Malaa, digaula gaa-bida daaligi-hua gi nadau hulumanu-dauwa donu, gei nia maalei digaula ga-hadihadi.

37:16  Nia mee dulii ala e-hai-mee ginai tangada humalia, la-koia e-dahidamee i-nia maluagina o digau hai-mee huaidu dogologo,

37:17  idimaa, Dimaadua la-ga-daa gi-daha nia maaloo o digau ala e-hai nia mee huaidu, ga-hagaloohi digau ala e-humalia.

37:18  Dimaadua le e-madamada humalia-hua i digau ala e-hagalongo ang-gi de-Ia. Gei-ogo digaula ga-hai-mee gi tenua deelaa, gaa-hana-hua beelaa.

37:19  I-lodo di madagoaa haingadaa, gei digaula hagalee e-huaidu ang-gi ginaadou. I-lodo di madagoaa tau-magamaga, gei digaula e-logo-hua nadau meegai.

37:20  Gei-ogo digau ala e-hai nia mee huaidu la-gaa-mmade, nia hagadaumee a Dimaadua la-ga-hagalee gadoo be nia akai ala i-lodo henua. Digaula ga-hagalee gadoo be nia huiahi.

37:21  Digau huaidu le e-kae nadau mee boibana, hagalee hui, gei digau humalia e-dumaalia i nadau wanga-dehuia.

37:22  Digau ala gu-haga-maluagina go Dimaadua la aalaa digau ga-hai-mee gi tenua deelaa, gei digau ala gu-haga-halauwa go Dimaadua, le e-hagabagi gi-daha.

37:23  Dimaadua le e-dagi gidaadou i-di ala dela belee hula-ai gidaadou, ge e-abaaba digau ala e-haga-tenetene dono manawa.

37:24  Maa digaula ga-monnono, digaula hagalee bolo ga-mmoe-hua beelaa i-lodo di gelegele, idimaa Dimaadua ga-haga-noho-aga digaula gi-nua.

37:25  Au gu-madumadua dolomeenei, au gu-mouli waalooloo, gei au digi mmada-loo gi-nia daangada humalia gu-diiagi go Dimaadua, be go nia dama digaula e-tangitangi gi-nia daangada i-nia meegai.

37:26  Nia madagoaa huogodoo, gei digaula e-dumaalia, e-wanga nadau bahihadu gi-nia daangada e-hai-hegau-ai, gei nadau dama la-guu-hai di haga-maluagina ni digaula

37:27  Maaliu-mai gi-daha mo nia mee huaidu, heia nia mee humalia, gei do hagadili gaa-noho i tenua deelaa, gaa-hana-hua beelaa,

37:28  idimaa, Dimaadua le e-aloho di mee dela e-donu, gei Mee hagalee diiagi ana daangada ala e-manawa-dahi. Nia madagoaa huogodoo, gei Mee e-hagaloohi digaula gei di hagadili ni digau hai mee huaidu le e-hagabagi gi-daha.

37:29  Digau ala e-haihai nia mee donu ga-hai-mee gi tenua deelaa, gaa-noho i tenua deelaa gaa-hana-hua beelaa.

37:30  Nia helekai o tangada humalia le e-honu i-nia kabemee, mee e-helehelekai i-di tonu i-nia madagoaa huogodoo.

37:31  Nia haganoho o dono God le e-benebene i-lodo dono manawa, gei mee hagalee tanga gi-daha mo nia maa.

37:32  Tangada huaidu le e-dadaumada tangada humalia belee hagamada e-daaligi a-mee gii-made,

37:33  gei-ogo Dimaadua hagalee diiagi a-mee gi ono hagadaumee, be e-diiagi-hua a-mee gii-hai ono hai go digaula i dono madagoaa ma-gaa-hai ono gabunga.

37:34  Hagadagadagagee gi Dimaadua mo-di hagalongo ang-gi ana haganoho, gei Mee ga-hagalabagau goe ga-gowadu gi-di-goe tenua deelaa, gei goe gaa-mmada gi digau huaidu ala ga-hagabagi gi-daha.

37:35  Au gu-gidee tangada hai mee huaidu ge hagamuamua huoloo. Mee koia e-duuduu i-hongo nia daangada gadoo be-di laagau-‘cedar’ o Lebanon.

37:36  Nomuli, gei au gu-hana-laalaa i-di gowaa deelaa, gei mee gu-de-igolo. Au gu-halahala a-mee, gei au digi gidee a-mee.

37:37  Haga-dina-ina tangada humalia, mmada gi tangada e-haihai nia mee donu: tangada dela e-noho i-di aumaalia la-dono hagadili i-golo.

37:38  Gei digau ala e-haihai nia huaidu le e-daaligi gi-daha, gei nia hagadili ni digaula le e-haga-mmaa gi-daha.

37:39  Dimaadua le e-haga-dagaloaha digau ala e-haihai nia mee donu, ge e-madamada humalia i digaula i-lodo nia madagoaa haingadaa.

37:40  Mee e-hagamaamaa digaula ge e-haga-dagaloaha digaula. Mee e-haga-dagaloaha digaula gi-daha mo digau huaidu, idimaa, digaula e-hula gi Mee bolo gi abaaba ginaadou.

Chapter 38

38:1  Meenei Dimaadua, Goe hudee daaligidia au i do madagoaa ma-ga-hagawelewele!

38:2  Goe guu-hai au gi-lauwa i au amu maalei. Goe gu-hagamaawa au gi-hinga gi-lala.

38:3  Au guu-mmae huoloo i-di-Goe dela e-hagawelewele-mai. Dogu huaidina hagatau guu-magi idimaa go ogu huaidu.

38:4  Au gu-melemu i-lodo di mmidi o ogu huaidu. Ogu huaidu gu-daamaha-iaa gu-deemee di-aamo.

38:5  Idimaa au nogo dadaulia, ogu magibala gu-bilau guu-bala.

38:6  Au gu-biga-iha gi-mua, au guu-moe baabaa gi-lala. Au e-manawa-gee mai luada gaa-dae-loo gi-di boo.

38:7  Au guu-wele i-di welengina o dogu huaidina, gei au gu-hoohoo gaa-made.

38:8  Au gu-deai ogu mahi ai, gei gu-maanuhia. Dogu manawa gu-i-lodo di haingadaa, gei au e-nnguu huoloo i dogu mmae.

38:9  Meenei Tagi, Goe e-iloo dagu mee dela e-hidihidi ginai au. Goe gu-longono ogu lee mmae huogodoo.

38:10  Dogu hadu-manawa e-pompomu, ogu mahi gu-hagalee, ogu golomada gu-dee-gida.

38:11  Ogu ihoo hagaaloho mo ogu gau ala e-hoohoo-mai gi-di-au gu-hagalee lloomoi gi dogu baahi, idimaa go ogu magibala. Ogu madahaanau hogi gu-hagalee hagahoohoo-mai gi-di-au.

38:12  Digau ala e-hiihai bolo ginaadou e-daaligi au gii-made la-guu-dugu nadau hele belee hele-iei au, mo digau ala belee hagahuaidu au gi-huaidu la-gu-haga-madagudagu au bolo gii-hai au gi-hagalee. Digaula hagalee-loo e-dugu di-nadau hai dela belee hai-baahi mai gi-di-au.

38:13  Au e-hai gadoo be tangada longoduli dela e-deemee di-hagalongo, e-hai gadoo be tangada e-deemee di-leelee dela e-deemee di-helekai.

38:14  Au e-hai gadoo be tangada dela hagalee helekai gi-nia heeu, idimaa mee e-de-longono.

38:15  Gei au e-hagadagadagagee adu gi-di-Goe, meenei Dimaadua. Gei Goe, meenei dogu Dagi go dogu God, Goe ga-helekai-mai-laa.

38:16  Hudee heia ogu hagadaumee gii-mmada tene gi dogu haingadaa. Hudee heia digaula gi-hagapuu gi dogu hinga gi-lala.

38:17  Au gu-hoohoo gaa-doo, gei au e-mmae huoloo.

38:18  Au e-haagi ogu huaidu ala e-hagahonu au gi-uli ogu gai.

38:19  Ogu hagadaumee le e-maaloo-dangihi, e-dogologowaahee digau ala e-hagadugina-e-ginaadou i-di-au, gei au dagu mee hala ne-hai gi digaula ai.

38:20  Digau ala e-hui di huaidu gi agu haihai humalia le e-hai-baahi mai gi-di-au, idimaa, au e-hagamahi e-hai di mee dela e-donu.

38:21  Meenei Dimaadua, hudee diagia au. Meenei dogu God, hudee haga-mogowaa-ina Goe gi-daha mo au!

38:22  Meenei Dimaadua, dogu Dangada Daa, hagamaamaa-ina-mai au dolomeenei!

Chapter 39

39:1  Au ga-helekai, “Au gaa-pula i-di-au i agu mee ala ma-gaa-hai, ge hagalee dumaalia gi dogu holole gi-heia au gii-hala. Au hagalee helekai i dahi mee i-di madagoaa digau huaidu e-hoohoo-mai.”

39:2  Au guu-noho deemuu hagalee helekai, ma e-aha maa di mee humalia! Gei dogu hagaduadua le e-gonua-mai.

39:3  Dogu de-nnoomaalia gu-damanaiee huoloo i ogu lodo. Dogu noho-hua ge mamaanadu, gei dogu de-nnoomaalia e-damana-mai, gei au gu-deemee dagu noho bolo hagalee heeu,

39:4  “Meenei Dimaadua, au e-mouli waalooloo behee? Ma-gaa-hee gei au gaa-made? Hagia-mai gi-di-au be dogu mouli le e-hagaodi ma-gaa-hee?

39:5  “Goe ne-hai dogu mouli bolo gi-bodobodo behee? Di waalooloo o dogu mouli le e-hai be-di balumee i-mua o hadumada. Ma e-donu-hua bolo di mouli o tangada le e-hai gadoo be-di oloolo madangi,

39:6  be e-hai be-di malu. Madau mee huogodoo ala e-hai le e-maa gi-daha. Gimaadou e-benebene madau maluagina ge de-iloo be ma koai dela ga-hai-mee gi-nia maa.

39:7  “Malaa, e-hai behee? Ma koai dela ga-hagadagadagagee ginai au, meenei di Tagi? Ma dela-hua Kooe dela e-hagadagadagagee ginai au.

39:8  Haga-dagaloaha-ina au gi-daha mo ogu huaidu huogodoo. Hudee heia digau dadaulia gi-haganneennee-ina au.

39:9  Au gaa-noho deemuu, hagalee hai dagu helekai, idimaa, ma Kooe dela ne-hai au gi-duadua beenei.

39:10  Hudee daaligidia au labelaa! Au gu-hoohoo bolo gaa-made, ne-hagamaawa Kooe.

39:11  Goe e-daaligi madau huaidu gi doo wou. E-hai gadoo be-di hingodo, Goe e-oho nia mee ala e-aloho-ai gimaadou. Ma e-donu-hua bolo gimaadou le e-hai be-di oloolo madangi!

39:12  “Hagalongo-mai gi dagu dalodalo, meenei Dimaadua, hagalongo gi dagu gahigahi. Hagamaamaa-ina au i dogu madagoaa ma-ga-dangidangi. Idimaa, au la tangada hua mai i-daha gadoo be ogu maadua-mmaadua ala i-mua, e-noho-hua hagabodobodo i-mua o hadumada.

39:13  Heia au gii-noho modogoau gi-tenetene tama madagoaa hagabalua i-mua dogu hana gi-daha ga-hagalee.”

Chapter 40

40:1  Au e-talitali dogu hagamaamaa mai i-baahi o Dimaadua, gei Mee gu-hagalongo-mai, gu-longono-Ia dagu dangi.

40:2  Mee ne-hudi-aga au gi-daha mo-di bongoo hagalliga-dangada, gi-daha mo-di gelegele waiwai llala. Mee ne-dugu au gi-hongo di hadugalaa, guu-hai au gii-duu hagahumalia.

40:3  Mee ne-aago-mai gi-di-au dana daahili hoou, taahili e-hagaamu-ai tadau God. Digau dogologo ala gaa-mmada gi-di mee deenei, ga-mmaadagu ga-hagadagadagagee gi Dimaadua.

40:4  E-maluagina go tangada dela e-hagadagadagagee gi Dimaadua, mee hagalee huli gi-nia balu-god, ge hagalee madalia digau ala e-daumaha gi-nia balu-god tilikai.

40:5  Meenei Dimaadua, go di-madau God, Goe guu-hai au mee haga-goboina e-logowaahee huoloo mai gi gimaadou! Ma deai tangada e-hai be Goe ai! Goe guu-hai au haganoho e-logowaahee gei e-humalia huoloo mai gi gimaadou! Au e-deemee di-hai bolo e-helekai nia maa huogodoo, di hulu nia maa e-logowaahee e-deemee di-dau!

40:6  Goe hagalee hiihai gi-nia tigidaumaha mono wanga-dehuia, gei Goe e-de-hei-e-Goe nia manu ala e-dudu hagadogomaalia i-hongo di gowaa dudu-tigidaumaha, be go nia tigidaumaha ala e-wwede nia huaidu. Gei deeai, Goe ne-gaamai ogu dalinga aanei belee hagalongo-iei au adu gi-di-Goe.

40:7  Malaa, gei au ga-helekai, “Deenei au, dau hai dela e-aago au la i-lodo di beebaa haganoho.

40:8  Meenei dogu God, au e-hiihai huoloo e-hai do manawa! Au e-dadaahi au agoago i-lodo dogu manawa.”

40:9  Meenei Dimaadua, i-lodo nia madagoaa ala e-dagadagabuli-ai au daangada huogodoo, gei au e-hagadele di longo humalia o dau hai dela ne-hagamouli gimaadou. Goe e-iloo-hua bolo au hagalee-loo e-noho di-hagihagi-anga au helekai.

40:10  Au hagalee hagammuni i ogu lodo di longo humalia hagamouli deelaa. Nia madagoaa huogodoo, gei au gu-hagadele do manawa-dahi mo dau hagamaamaa. Au gu-hagalee noho deemuu i-lodo au daangada ala ma-ga-dagabuli, gei au gu-helehelekai-aga i-di hai o do manawa-dahi mo do aloho dee-modu.

40:11  Meenei Dimaadua, au e-iloo bolo Goe hagalee dugu do dumaalia huoloo mai gi-di-au. Do aloho mo do manawa-dahi ga-benebene-laa au i-nia madagoaa huogodoo.

40:12  Nia huaidu e-logowaahee e-haganiga-mai i dogu gili, e-logowaahee e-deemee di-dau! Ogu huaidu guu-kumi au, gei au gu-deemee di-mmada gi-daha, ma koia e-logowaahee i-nia ngaahulu o dogu libogo, ogu lodo gu-manawa-bagege.

40:13  Meenei Dimaadua, haga-dagaloaha-ina au! Hagamaamaa-ina mai au dolomeenei!

40:14  Digau ala bolo ginaadou e-daaligi au gii-made, la-gi-paagege mo-di hinihini. Digau ala e-tenetene gi ogu haingadaa, la-gii-hula gi-muli gi-langaadia.

40:15  Digau ala e-haganneennee au, la-gi-uli nadau gai i nadau paagege.

40:16  Gei-ogo digau ala e-lloomoi gi-di-Goe, la-gi-manawa lamalia mo-di tenetene. Digau huogodoo ala e-danggee adu gi-di-Goe i dau hagamouli, la-gi-helehelekai i-nia madagoaa huogodoo boloo, “Dimaadua la-koia e-aamua!”

40:17  Meenei dogu Dagi, au e-bagege ge e-hagaloale, gei Goe digi de-langahia au. Goe go dogu God mo dogu Dangada Hagamouli. Hagalimalima-mai, hagamaamaa-ina au!

Chapter 41

41:1  E-maluagina go digau ala e-de-nnoomaalia i digau hagaloale. Dimaadua ga-hagamaamaa digaula i nadau madagoaa ma-ga-haingadaa.

41:2  Dimaadua ga-abaaba digaula mo-di benebene nadau mouli. Mee gaa-hai digaula gi-tenetene i tenua deelaa, ge hagalee diiagi digaula gi-lodo nia mogobuna o nadau hagadaumee.

41:3  Dimaadua ga-hagamaamaa digaula ma-gaa-magi, gaa-hai digaula gi-maaloo.

41:4  Gei au ga-helekai, “Meenei Dimaadua, au guu-hai dagu ihala adu gi-di-Goe. Dumaalia-mai gi-di-au, hagahili-ina au.”

41:5  Ogu hagadaumee e-helekai huaidu i-di-au. Digaula e-hiihai bolo au gii-made gi-daha gi-de-langahia.

41:6  Digau ala e-lloomoi e-heetugi mai gi-di-au la-hagalee hai nadau mee donu mai gi-di-au. Digaula e-halahala-hua nadau helekai huaidu i-di-au, gaa-hula ga-hagadele gi-nia madagowaa huogodoo.

41:7  Digau ala e-hagadugina-e-ginaadou au le e-leelee hagamoolee i nadau mehanga i-di-au. Digaula e-hagamamaanadu nadau mee huaidu i-di-au.

41:8  Digaula e-helekai boloo, “Mee guu-magi pale huoloo. Mee e-deemee di-hana gi-daha mo dono moenge labelaa.”

41:9  Dogu ihoo hagaaloho dela gu-hagadagadagagee huoloo ginai au, gei e-miami gimaua ngaadahi, guu-huli e-hai-baahi labelaa mai gi-di-au.

41:10  Meenei Dimaadua, Goe dumaalia-mai gi-di-au, hagamaaloo-ina-aga au, gei au gaa-tala di hui gi ogu hagadaumee.

41:11  Digaula ga-hagalee maaloo i-di-au, gei au ga-iloo bolo Goe e-manawa tenetene mai gi-di-au.

41:12  Goe ga-hagamaamaa au, idimaa au dela e-hai nia mee ala e-donu, gei Goe ga-benebene au i doo baahi gaa-hana-hua beelaa.

41:13  Hagaamu-ina Dimaadua, di God o Israel! Hagaamu-ina a-Mee dolomeenei ga-hana-hua dono hagaodi ai! Amen! Amen!

Chapter 42

42:1  Meenei God, dogu hidihidi adu gi-di-goe le e-hai gadoo be-di ee ma-ga-hidihidi bolo ia e-inu nia wai magalillili mai i-nia dama-monowai mmidi.

42:2  Au e-hidihidi adu gi-di-Goe, go di God mouli. Ma-gaa-hee gei au gaa-mee di-hanadu e-daumaha i oo mua?

42:3  Au e-dangidangi i-di boo mo-di aa, nia dangi ogu golomada aalaa hua go agu mee ala e-gai. Ogu hagadaumee e-haganneennee au e-heheeu-mai i-nia madagoaa huogodoo boloo, “Doo God la i-hee?”

42:4  Ogu lodo gu-manawa-gee i dogu madagoaa e-maanadu-mai di madagoaa i-mua, i dogu madagoaa nogo hana madalia digau dogologo gi-di hale o God, nogo dagi digaula ala nogo hula mo-di tenetene, dadaahili mo-di wwolowwolo hagaamu a God.

42:5  Au e-manawa-gee huoloo beleiaha? Au e-de-nnoomaalia huoloo beleiaha? Ge deeai, au ga-hagadagadagagee-hua gi God, gei au ga-hagaamu labelaa a-Mee, dela go dogu Dangada Hagamouli mo dogu God.

42:6  Ogu lodo gu-de-nnoomaalia i dagu gowaa dela e-mogowaa-loo i Mee. Au e-longono di ngoloolo o-nia monowai-doo di Gonduu Hermon mo-di Gonduu Mizar ala e-mmidi-iha gi Jordan. Mee ne-hagau-mai gi ogu lodo nia beau o-di manawa-gee, ga-mmidi-mai gi-di-au gadoo be-di labagee. Malaa, au ga-langahia a-Mee.

42:7  Ogu lodo gu-de-nnoomaalia i dagu gowaa dela e-mogowaa-loo i Mee. Au e-longono di ngoloolo o-nia monowai-doo di Gonduu Hermon mo-di Gonduu Mizar ala e-mmidi-iha gi Jordan. Mee ne-hagau-mai gi ogu lodo nia beau o-di manawa-gee, ga-mmidi-mai gi-di-au gadoo be-di labagee. Malaa, au ga-langahia a-Mee.

42:8  Dimaadua gi-haga-gida-mai dono manawa-aloho deemodu i-di aa, gi-dadaahili au ma-gaa-boo, gi-dalodalo au gi God dela ne-gaamai gi-di-au dogu mouli.

42:9  Au e-helekai gi God, dogu Dangada Daa, e-hai boloo: “Goe gu-de-langahia au beleiaha? Ma e-aha dela au e-hai-loo gi-hagaduadua gi-haga-mmaemmae go ogu hagadaumee?”

42:10  Au gu-beehi go nia helekai haganneennee digaula, e-heheeu-mai boloo: “Doo God la i-hee?”

42:11  Au e-manawa-gee huoloo beleiaha? Au e-de-nnoomaalia huoloo beleiaha? Ge deeai, au ga-hagadagadagagee-hua gi God, gei au ga-hagaamu labelaa a-Mee, dela go dogu Dangada Hagamouli mo dogu God.

Chapter 43

43:1  Meenei God, haga-modongoohia-ina bolo au ogu huaidu ai, gei Goe gi-hagamaamaa-ina au i dagu gabunga e-hai-baahi gi digau huaidu. Duulia au gi-daha mo digau hai-kai tilikai mo digau hai mee huaidu!

43:2  Goe go dogu hagaloohi, Goe ne-diiagi au beleiaha? Ma e-aha dela au e-hai-loo gi-hagaduadua gi-haga-mmaemmae go ogu hagadaumee?

43:3  Hagau-ina-mai do maalama mo-di tonu e-dagi au, ge lahi labelaa au gi-muli gi dau gonduu haga-madagu go Zion, gi-di gowaa dela e-noho-iei Goe.

43:4  Meenei God, au ga-hana-laa gi dau gowaa dudu-tigidaumaha. Ma deelaa-hua Kooe dela go di gowaa iai dogu tene. Meenei God, au ga-daahili i-di ‘harp’ e-hagaamu Goe, dela go dogu God.

43:5  Au e-manawa-gee huoloo beleiaha? Au e-de-nnoomaalia huoloo beleiaha? Ge deeai, au ga-hagadagadagagee-hua gi God, gei au ga-hagaamu labelaa a-Mee, dela go dogu Dangada Hagamouli mo dogu God.

Chapter 44

44:1  Meenei God, gimaadou gu-hagalongo gi madau dalinga, madau maadua-mmaadua gu-hagi-mai gi gimaadou di hai o-nia mee hagagoboina ala ne-hai Kooe i nadau madagoaa i-mua,

44:2  i dau hai dela ne-hagabagi digau o-di bouli gi-daha, ga-haga-noho au daangada gi-hongo tenua digaula, mo dau hai dela ne-daaligi nia henua ala i-golo, ga-haga-maluagina au daangada ala ne-hilihili.

44:3  Au daangada digi kumudia nia henua aalaa gi nadau hulumanu-dauwa, digaula hagalee ne-aali i nadau hagadaumee mai i nadau mahi, gei mai-hua i oo mahi mo o mogobuna, mo mai i do madalia digaula dela gu-hagamodongoohia bolo Goe e-aloho i digaula.

44:4  Goe go dogu king mo dogu God. Goe e-hai au daangada gi-aali.

44:5  Gimaadou e-haga-magedaa madau hagadaumee gi oo mahi.

44:6  Au hagalee hagadagadagagee gi dagu maalei be go dagu hulumanu-dauwa bolo dela ga-haga-dagaloaha au.

44:7  Gei Kooe hua dela ne-haga-dagaloaha gimaadou gi-daha mo madau hagadaumee, ge gu-haga-magedaa digau ala e-hagadugina-e-ginaadou mai gi gimaadou.

44:8  Gimaadou ga-hagaamu Goe i-nia madagoaa huogodoo, ge danggee-adu gi-di-Goe ga-hana-hua deeodi.

44:9  Gei dolomeenei, Goe gu-diiagi gimaadou gi-magedaa. Goe gu-hagalee madalia madau gau-dauwa.

44:10  Goe ne-hai gimaadou gii-llele gi-daha mo madau hagadaumee, madau goloo guu-kae go digaula.

44:11  Goe ne-hai gimaadou gi-dadaaligidia gadoo be nia siibi. Goe ne-hagamodoho gi-daha gimaadou gi-nia henua mai i-daha.

44:12  Goe ne-hui au daangada donu gi-di hui dulii be-di mee digaula hagalee-loo e-dahidamee.

44:13  Madau gau ala i madau baahi e-mmada gi dau hai dela ne-hai-mai gi gimaadou, gei digaula ga-haganneennee gimaadou ga-gadagada mai gi gimaadou.

44:14  Goe guu-hai gimaadou gii-hai nia mee haga-gadagada dangada i-baahi nia daangada. Digaula e-gadagada ge lialiagi nadau libogo mai gi gimaadou.

44:15  Nia madagoaa huogodoo, gei au gu-haga-balumee, au gu-langaadia huoloo

44:16  i dogu longono-eau nia gadagada mono helekai haganneennee mai baahi ogu hagadaumee mo digau ala e-hagadugina-e-ginaadou i-di-au.

44:17  Nia mee huogodoo aanei gu-hai-mai gi gimaadou, ma e-aha maa gimaadou digi de-langahia Goe, be e-oho au hagababa ala ne-hai Kooe mai gi gimaadou.

44:18  Gimaadou digi diagia Goe, gimaadou digi de-hagalongo gi au haganoho.

44:19  Gei goe guu-kili gimaadou gi-daha gi-baahi nia manu lodo-henua. Goe gu-diiagi gimaadou gi-lodo di bouli dongoeho.

44:20  Maa nei bolo gimaadou guu-dugu di-madau hai-daumaha-adu gi-di-Goe, go di-madau God, ga-dalodalo gi-di god huagee,

44:21  gei Goe gu-iloo-hua, idimaa Goe e-iloo-hua madau maanadu ala e-nngala.

44:22  Idimaa Kooe dela ne-hidi-ai gimaadou e-dadaaligi gii-mmade i-nia madagoaa huogodoo, e-hai gadoo be nia siibi ma-ga-daaligi.

44:23  Ala-aga, meenei Dimaadua! Goe e-kii eiaha? Nnoo i-nua! Hudee diagia gimaadou beelaa!

44:24  Goe e-hagammuni Goe i gimaadou eiaha? Goe hudee de-langahia madau dadaaligi mo madau haingadaa!

44:25  Gimaadou gu-monnono gi-lodo nia gelegele. Gimaadou gu-magedaa gu-mmoemmoe i-lodo nia dogolia.

44:26  Hanimoi hagamaamaa-ina gimaadou! Haga-dagaloaha-ina gimaadou idimaa go do manawa-aloho dee-modu!

Chapter 45

45:1  Nia helekai humalia gu-haga-honu i-lodo agu maanadu i dogu madagoaa e-hai taahili hagaamu deenei ang-gi-di king. Dogu holole gu-togomaalia e-daahili taahili deenei, gadoo be-di pensil o tangada hihi mee humalia.

45:2  Goe e-koia e-madanga i-baahi nia daane. Nia helekai humalia le e-lloomoi i-hongo o malau-ngudu. God gu-haga-maluagina goe i-nia madagoaa huogodoo.

45:3  Meenei di king maaloo, nnoodia dau hulumanu-dauwa gi doo gaba. Goe e-honu i-nia maaloo ge madamada huoloo!

45:4  Hanadu goe i-lodo nia madamada o doo aali, e-abaaba nia mee ala e-donu ge humalia! Oo mahi gaa-hai goe gi-aali.

45:5  Au amu maalei le e-gaa, nia maa ga-daalo nia hadu-manawa o hagadaumee. Nia henua llauehe gaa-pala gi-lala i-mua oo wae.

45:6  Teenua king dela ne-gowadu go God gi-di-goe le e-waalooloo gaa-hana-hua beelaa dono hagaodi ai. Goe e-dagi au daangada gi-di tonu.

45:7  Goe e-aloho di mee dela e-donu, ge e-hagadugina nia mee ala e-huaidu. Deelaa di mee a God, go doo God, ne-hidi-ai ga-hilihili goe, ga-llingi-iha gi oo nua di tene dela koia e-damana i-di tene o-nia king ala i-golo.

45:8  Oo gahu e-kala gi-nia lolo-kala-‘myrrh’ mono lolo-kala-‘aloe’. Digau daahili e-hai nadau katangi i-lodo doo hale dela guu-humu gi-nia ‘ivory’.

45:9  Madalia nia ahina hagalabagau o doo hale la-go nia dama-ahina o-nia king, gei i-di baahi gau-donu o do lohongo king e-duu-ai di queen dela e-humu gi-nia goolo ala koia e-humalia.

45:10  Meenei tama-ahina hagababa di king, hagalongo gi dagu helekai dela gaa-hai: Haga-de-langahia-ina au daangada mo oo gau.

45:11  Do madanga gaa-hai di king gi-hiihai-adu. Mee di tagi ni-oou, goe gi-hagalongo gi mee.

45:12  Digau Tyre ga-gowaga nadau wanga-dehuia gi-di-goe. Digau maluagina ga-hagamada belee hai goe gi-hiihai ang-gi ginaadou.

45:13  Tama-ahina hagababa di king la i-lodo di hale king, mee e-madanga huoloo! Di gahu o-maa la-ne-hai gi-nia deleedu goolo.

45:14  Di madagoaa a-mee ne-laagei gi-nia gahu madamada, gei mee guu-lahi gi-baahi di king, e-hula e-dagi ginaadou mo nia dama-ahina madammaa, digaula e-laha-mai labelaa gi-di king.

45:15  Digaula ga-ulu gi-lodo di hale di king mo-di tenetene manawa lamalia.

45:16  Meenei dogu king, goe ga-dogologowaahee au dama-daane ala e-pono o maadua ala namua e-hai nia king, gei goe gaa-hai digaula gii-dagi henuailala hagatau.

45:17  Dagu daahili deenei e-hai nia daangada gi-langalangahia-e-ginaadou au mee ala ne-hai gaa-hana-hua beelaa dono hagaodi ai, gei nia daangada huogodoo ga-hagaamu goe i-nia madagoaa huogodoo ala ga-lloomoi.

Chapter 46

46:1  God go tadau abaaba mo tadau mahi, dela e-togomaalia e-hagamaamaa gidaadou i-lodo nia madagoaa haingadaa.

46:2  Malaa, gidaadou gi-hudee mmaadagu, ma e-aha maa henuailala ga-ngalungalua mo nia gonduu ga-monnono gi-lodo di moana llala,

46:3  ma e-aha maa nia beau o-di moana ga-ngoloolo, gei nia gonduu ga-lullulu go nia beau llauehe.

46:4  Di monowai mmidi i-golo dela e-haga-tenetene-ai di waahale damana a God, di hale haga-madagu o Tangada Aamua Muginua.

46:5  God le e-noho i-lodo di waahale damana deelaa, e-deemee-loo di-haga-mooho. Hagaluada-loo, gei Mee e-hanimoi e-hagamaamaa di-maa.

46:6  Nia henua llauehe gu-mmaadagu huoloo, nia henua king gu-ngalungalua. God le e-helekai-hua gi-nua, gei henuailala gu-waiwai.

46:7  Yihowah Koia e-Aamua le e-noho i tadau baahi. Di God o Jacob la deelaa go tadau gowaa e-pala ginai gidaadou.

46:8  Lloomoi, gii-mmada goodou gi-nia mee a Dimaadua ala ne-hai. Mmada gi-nia hagadilinga mee haga-goboina a-Mee ala ne-hai i henuailala.

46:9  Mee e-dugu nia dauwa huogodoo i-hongo henuailala, Mee e-hadihadi nia maalei ge e-oho nia daalo hai-dauwa, ge e-dudu nia mee abaaba.

46:10  Mee e-helekai, “Goodou dugua godou dauwa, gei gi-iloo bolo Au go God, dela e-koia e-aamua i-baahi nia henua, ge koia e-aamua i-hongo henuailala.”

46:11  Yihowah Koia e-Aamua le e-noho i tadau baahi. Di God o Jacob la deelaa go tadau gowaa e-pala ginai gidaadou.

Chapter 47

47:1  Nia daangada huogodoo, goodou paapaa-ina godou lima tenetene! Hagaamuina a God loo gi-nua gi-nia daahili tenetene!

47:2  Yihowah Aamua Muginua la-koia e-hagamadagudia huoloo. Mee di King Aamua dela e-dagi henuailala hagatau.

47:3  Ma go Mee dela ne-hai gidaadou gii-mee di-maaloo i-hongo nia daangada. Mee ne-hai gidaadou gii-dagi nia henua.

47:4  Ma go Mee dela ne-hilihili dana henua mai gi gidaadou belee noho-ai, di maluagina madamada ni-di hagadili Jacob dela e-aloho-ieia.

47:5  God e-hana gi-nua gi dono lohongo. Nia lee wwolowwolo tenetene mo nia labaa e-iliili i-di madagoaa o Dimaadua e-hana gi-nua.

47:6  Daahili hagaamuina a God. Daahili hagaamuina tadau King!

47:7  God la di king ni henuailala hagatau. Hagaamuina a-Mee gi-nia daahili!

47:8  God le e-noho i-hongo dono lohongo haga-madagu, Mee e-dagi nia henua llauehe.

47:9  Nia dagi o-nia henua e-dagabuli madalia nia daangada o-di God o Abraham. Mee koia e-maaloo i-hongo digau-dauwa huogodoo. Mee e-dagi nia mee huogodoo.

Chapter 48

48:1  Dimaadua le e-aamua huoloo gei e-humalia belee hagaamu giibeni a-Mee i-lodo di waahale tadau God, i-hongo dana gonduu haga-madagu.

48:2  Zion, di gonduu a God, le e-duuduu i-nua ge e-humalia. Di waahale o-di King Aamua le e-haga-tenetene henuailala hagatau.

48:3  God gu-hagamodongoohia bolo ma di gowaa noho baba i-di aumaalia la i dono baahi i-lodo di abaaba o-di waahale deenei.

48:4  Nia king gu-dagabuli-mai belee heebagi gi-di Gonduu Zion.

48:5  Di madagoaa-hua digaula ne-mmada gi-di-maa, digaula gu-goboina. Digaula gu-mmaadagu guu-llele gi-daha.

48:6  Digaula gu-mmaadagu huoloo gu-uli nadau gai, e-hai gadoo be-di ahina ma-ga-hoohoo ga-haanau,

48:7  e-hai gadoo be nia wagabaalii ma-ga-huduhudu go nia beau i-lodo di madangi gono.

48:8  Gimaadou gu-longono nia mee a God ala ne-hai, gei dolomeenei gimaadou guu-mmada gi-di-maa i-lodo di waahale o di-madau God, go Yihowah di Gowaa Aamua. Mee ga-benebene di waahale deenei ga-hana-hua dono hagaodi ai.

48:9  Meenei God, i-lodo do Hale Daumaha, gimaadou e-hagabaubau di hai o do manawa-aloho dee-modu.

48:10  Nia gowaa huogodoo nia daangada e-haga-hagaamu Goe, oo longo guu-dele i-hongo henuailala hagatau. Goe e-dagi i-di tonu.

48:11  Digau huogodoo o Zion la-gi-manawa-tenetene! Goe e-hai dau hagi-aga gi-di mee dela e-donu. Nia waahale o Judah la-gi-tenetene!

48:12  Nia daangada a God, goodou hula haganiga a Zion, daulia di hulu o-nia angulaa.

48:13  Hagadina-ina nia abaaba, mo-di hagamada-ina nia abaaba-dauwa, gii-mee goodou di-hagi-anga gi nia adu-daangada ala nomuli:

48:14  “Di God deenei la di God ni gidaadou gaa-hana-hua beelaa dono hagaodi ai. Mee gaa-dagi gidaadou i-di waalooloo o-nia madagoaa ala ga-lloomoi maalia.”

Chapter 49

49:1  Goodou go nia daangada huogodoo hagalongo gi-di mee deenei! Digau ala i-nia madagowaa huogodoo, goodou hagalongo,

49:2  goodou go digau aamua mo digau lligi, digau maluagina mo digau hagaloale.

49:3  Agu hagamaanadu la-ga-modongoohia: Au ga-helekai i-nia helekai kabemee.

49:4  Au ga-hagalongo gii-donu gi-nia bida helekai kabemee, ga-haga-modongoohia nia hadinga nia maa i dogu madagoaa ma-ga-badubadu di ‘harp’.

49:5  Au hagalee madagu i-di madagoaa ma-ga-haingadaa, i dogu madagoaa ma-ga-duuli go ogu hagadaumee,

49:6  go digau huaidu ala e-hagadagadagagee gi nadau maluagina, ge e-hagapuu gi nadau goloo ala e-logowaahee.

49:7  Gimaadou e-deemee di bida daa gimaadou gi-daha mo-di haingadaa, gei e-deemee labelaa di-hui ang-gi God di hui o madau mouli.

49:8  Idimaa, di hui o-di mouli o tangada le e-damanaiee huoloo. Madau mee ala e-mee di-hui la-hagalee-loo e-dohu

49:9  di-daa gimaadou gi-daha mo taalunga, bolo gi-mouli gimaadou gaa-hana-hua beelaa.

49:10  Di-ingoo-hua tangada e-mee di-mmada bolo digau kabemee le e-mmade labelaa, gadoo be digau dadaulia mo digau boiboi. Nia hagadili digaula ga-hai-mee gi-nia maluagina digaula.

49:11  Nia daalunga digaula ala nia hale digaula ga-hana-hua deeodi, aalaa nia gowaa e-noho-ai digaula gaa-hana-hua beelaa, ma e-aha maa digaula nogo hai-mee gi-nia gowaa i-mua.

49:12  Tadau mahi le e-deemee di-daa gidaadou gi-daha mo-di made. Gidaadou e-mmade-hua gadoo be nia manu.

49:13  Mmada be ma di-aha dela gaa-hai ang-gi digau ala e-bida hagadagadagagee ang-gi ginaadou, mo-di hagaodi gi-muli o digau ala e-tenetene gi nadau goloo.

49:14  Digaula guu-lawa di haga-noho bolo digaula gaa-mmade gadoo be nia siibi. Di made dela gaa-hai di hagaloohi o digaula. Ma-ga-luada, gei digau ala e-haihai nia mee donu ga-aali i-hongo digaula. Nia huaidina digaula e-limalima di-pala i-lodo tenua o digau mmade, e-mogowaa mo nadau guongo.

49:15  Gei God ga-haga-dagaloaha au. Mee gaa-daa au gi-daha mo-di mogobuna o-di made!

49:16  Hudee manawa-logo maa tangada ma-ga-maluagina, maa nia maluagina o-maa ga-logo-mai ga-logowaahee.

49:17  Mee e-deemee di-kae nia maa madalia ia i dono madagoaa ma-gaa-made. Nia maluagina o-maa hagalee hula madalia a-mee gi-lodo taalunga.

49:18  Ma e-aha maa tangada e-manawa lamalia gi dono mouli, ga-hagaamu go nia daangada i mee dela e-gila humalia,

49:19  gei mee gaa-made ga-madalia ono maadua-mmaadua ala e-noho i-di gowaa bouli dongoeho dela e-waalooloo-beelaa dono hagaodi ai.

49:20  Tadau aamua le e-deemee di-daa gidaadou gi-daha mo-di made. Gidaadou e-mmade-hua gadoo be nia manu.

Chapter 50

50:1  Dimaadua, go di God Aamua Huoloo, e-helekai ang-gi henuailala hagatau e-tugi i-bahi gi-dua gaa-hana gi bahi-i-dai.

50:2  Di madamada o God le e-mamaahina-mai i Zion, go-di waahale madamada hagatau.

50:3  Tadau God e-hanimoi, malaa, hagalee hanimoi deemuu. Di ahi maaloo e-ulaula i-mua o Mee, di madangi maaloo e-haganiga i-di gili o Mee.

50:4  Mee ga-gahigahi di langi mo henuailala belee hai ono hagadootonu e-mmada ang-gi-de-Ia dela e-gabunga ana daangada.

50:5  Mee ga-helekai, “Haga-dagabuli-ina-mai agu daangada manawa-dahi gi dogu baahi, go digau ala ne-hai nadau hagababa mai gi-di-Au mai i nadau tigidaumaha ne-hai.”

50:6  Di langi e-hagamodongoohia bolo God le e-donu, ma go Mee dela tangada hai-gabunga.

50:7  “Hagalongo, go agu daangada, gei Au ga-helekai. Au gaa-hai dagu hagamodongoohia hai-baahi adu gi-di-goe, Israel. Au go God, go doo God.

50:8  Au hagalee gabunga goe i au tigidaumaha mo nia tigidaumaha dudu ala e-haihai kooe mai gi-di-Au i-nia madagoaa huogodoo.

50:9  Au hagalee hiihai e-kae agu kau-daane mai i dau abaaba, be-nia kuudi mai i-lodo dau hagabuulinga kuudi.

50:10  Nia manu huogodoo ala i-lodo henua mono kau ala i-tomo nia gonduu e-mana la nia mee ni-aagu.

50:11  Nia manu mamaangi huogodoo mono mee huogodoo ala e-mouli i-lodo henua la nia mee ni-aagu.

50:12  “Maa nei bolo Au ma-ga-hiigai, Au hagalee madau agu meegai adu gi-di-goe, idimaa, henuailala mono mee huogodoo ala i-no-lodo la nia mee ni-aagu.

50:13  E-hai behee? Au e-gai nia goneiga kau-daane, be e-inu nia dodo kuudi?

50:14  Heia dau tigidaumaha danggee ang-gi God, mo-di wanga gi-di Gowaa Aamua au mee huogodoo ala ne-hagababa ang-gi Mee.

50:15  Gahigahi-ina Au i-do madagoaa haingadaa, gei Au ga-haga-dagaloaha goe, gei goe ga-hagaamu Au.”

50:16  Gei God ga-helekai gi digau huaidu, “Goodou e-aha ala e-agoago agu haganoho? Goodou e-aha ala e-leelee i agu hagababa?

50:17  Goe e-de-hiihai gi-di-Au dela e-aago goe, goe guu-kili gi-daha agu haganoho.

50:18  Goe e-hagadau-ihoo gi digau gaiaadanga huogodoo ala ma-ga-gidee-goe, gei goe e-hagadaubuni ang-gi nia daane mono ahina mouli be nia manu.

50:19  “Nia madagoaa huogodoo gei goe e-helehelekai huaidu, gei goe hagalee madugidugia di-helekai tilikai.

50:20  Goe e-hai-baahi gi oo gau donu, ge e-halahala au huaidu gi-digaula.

50:21  Goe guu-hai nia mee huogodoo aanei, gei Au nogo noho-hua deemuu, malaa, goe e-hai bolo Au e-hai gadoo be goe. Gei dolomeenei, gei Au ga-haga-donu-adu gi-di-goe, ga-hagamodongoohia haga-mmaa adu gi-di-goe.

50:22  “Goodou ala e-haga-balumee au, hagalongo-mai. Maa goodou hagalee hagalongo, gei Au ga-daaligi goodou gi-daha, deai tangada e-mee di haga-dagaloaha goodou ai.

50:23  Di danggee la tigidaumaha dela e-hagalaamua Au, gei Au ga-haga-dagaloaha digau huogodoo ala e-hagalongo mai gi-di-Au.”

Chapter 51

51:1  Meenei God, Goe dumaalia-mai gi-di-au, mai i do manawa-aloho dee-odi. Goe weedee ogu huaidu gi-daha mo au mai i do dumaalia aamua.

51:2  Gaugau-ina gi-daha mo au ogu huaidu huogodoo, haga-madammaa-ina gi-daha ogu huaidu!

51:3  Au e-iloo ogu huaidu, ogu huaidu e-modongoohia-eau i-nia madagoaa huogodoo.

51:4  Au guu-hai dagu ihala, gu-hai-baahi adu gi-di-Goe, ma go Kooe hua dela ne-hai-baahi ginai au. Au guu-hai di mee huaidu dela guu-hai Kooe bolo di huaidu. Malaa, Goe e-donu-hua ma-ga-hagi-aga au, gei e-donu-hua ma-ga-haga-donu-mai au bolo au e-hala.

51:5  Au tangada hua huaidu mai i dogu laangi ne-haanau-ai. Au ne-haanau-mai, gei au tangada hua huaidu.

51:6  Goe e-hiihai gi-di manawa madammaa ge e-donu. Haga-honu-ina ogu hagamaanadu gi do kabemee.

51:7  Daawa-ina gi-daha ogu huaidu, gei au ga-madammaa. Gaugau-ina au, gei au koia ga-madammaa-giagia i-nia ‘snow’.

51:8  Heia au gi-hagalongo gi-nia lee tenetene mo manawa lamalia. Ma e-aha maa Goe gu-haga-mooho ogu dudaginga mo ogu iwi, gei au ga-manawa lamalia-laa.

51:9  Huli gi-daha mo ogu huaidu, weedee ogu huaidu huogodoo.

51:10  Meenei God, heia-mai gi ogu lodo di manawa madammaa, gaamai gi ogu lodo di hagataalunga hoou ge manawa-dahi.

51:11  Hudee hudu-ina au gi-daha mo Goe. Hudee daawa-ina dau Hagataalunga-Dabu la-gi-daha mo au.

51:12  Gaamai labelaa di tenetene dela e-hanimoi i do hagamouli. Heia au gi-hiihai e-hagalongo-adu gi-di-Goe.

51:13  Gei au ga-aago au haganoho gi digau huaidu, gei digaula ga-maaliu-mai gi-di-Goe.

51:14  Meenei God dogu Hagamouli, Haga-dagaloaha-ina dogu mouli, gei au ga-manawa lamalia ga-hagadele oo donu.

51:15  Meenei Dimaadua, hagamaamaa-ina au gii-mee au di-helekai, gei au ga-hagaamu Goe.

51:16  Goe hagalee hiihai gi-nia tigidaumaha, maa nei bolo Goe e-hiihai, gei au gaa-hai-adu gi-di-Goe. Goe hagalee e-manawa-tene gi-nia tigidaumaha-dudu.

51:17  Meenei God, dagu tigidaumaha la-go di maaliu donu o dogu manawa. Goe hagalee bae gi-daha di maliu donu o dogu manawa mo dogu manawa hila-gi-lala.

51:18  Meenei God, Goe gi-manawa-dumaalia gi Zion. Hagamaamaa-ina a-mee. Hauhia labelaa nia abaaba o Jerusalem.

51:19  Malaa, gei Goe ga-manawa-tene gi-nia tigidaumaha ala e-donu mo madau tigidaumaha-dudu, gei nia kau-daane ga-tigidaumaha i-hongo dau gowaa dudu-tigidaumaha.

Chapter 52

52:1  Goe taane maaloo, ma e-aha dela goe e-galanga gi au huaidu ala e-hai? Di manawa-dahi o God la dono hagaodi ai.

52:2  Goe e-haganoho au hai belee hagahuaidu digau ala i-golo. Do holole e-gaa be tulumanu dahi ngudu. Nia madagoaa huogodoo gei goe e-dili au kai tilikai.

52:3  Goe e-hagalabagau nia hangaahai huaidu laa-hongo nia hangaahai humalia, mo nia kai tilikai laa-hongo nia kai e-donu.

52:4  Goe e-hiihai e-hagahuaidu nia daangada gi au helekai, goe tangada hai kai tilikai!

52:5  Malaa, God ga-haga-huaidu goe gi-mooho gaa-hana-hua beelaa. Mee gaa-kumi goe gaa-dada-mai goe gi-daha mo do guongo. Mee gaa-daa goe gi-daha mo tenua o digau mouli.

52:6  Digau ala e-hai di tonu gaa-mmada gi-di mee deenei ma-gaa-hai, ga-mmaadagu. Digaula ga-gadagada adu gi-di-goe ga-helekai,

52:7  “Mmada, deenei tangada nogo hagalee hagadagadagagee gi-nia hagamaamaa a God, nogo hagadagadagagee-hua gi ono goloo ala e-logo, gei e-halahala ono hagahumalia gi-nia hangaahai huaidu mono kai tilikai.”

52:8  Gei au, au e-hai gadoo be-di laagau-olib e-tomo i-lodo di hale o God. Au e-hagadagadagagee gi-di aloho dee-modu o-maa, gaa-hana-hua beelaa dono hagaodi ai.

52:9  Au ga-danggee adu gi-di-Goe i-nia madagoaa huogodoo, meenei God, i au mee ala ne-hai. Au ga-hagadele gi-mua au daangada bolo Goe e-humalia.

Chapter 53

53:1  Digau dadaulia e-helekai i-lodo nadau manawa boloo, “Ma hagalee di God ai.” Digaula huogodoo guu-huli-gee mo-di tonu, digaula guu-hai nia mee ala koia e-huaidu, tangada i digaula e-hai nia mee humalia ai.

53:2  God e-mmada-iha i-di langi gi nia daangada be di-maa iai tangada i-golo e-kabemee, be di-maa tangada e-daumaha ang-gi de-Ia.

53:3  Malaa, digaula huogodoo guu-huli gi-daha, digaula gu-huaidu huogodoo be-di mee e-dahi. Tangada e-dahi i digaula e-hai nia mee e-donu ai, hagalee hua tangada e-dahi ai.

53:4  God ga-heeu, “Ma e-aha, digaula e-de-iloo? Digau huogodoo hai-mee huaidu aanei, la hagalee kabemee? Digaula e-mouli-mai i nadau gaiaa agu daangada, gei digaula hagalee-loo e-dalodalo mai gi-di-Au.”

53:5  Malaa, digaula ga-mmaadagu huoloo, tagadilinga madagu ne-hai beelaa mai mua gaa-dae-mai-loo gi dangi-nei ai, idimaa, God ga-haga-malae nia iwi nia hagadaumee o ana daangada. God gu-diiagi digaula, gei Israel ga-haga-magedaa digaula.

53:6  Au e-hai dalodalo huoloo bolo di aali la-gi-hanimoi gi Israel mai i Zion. Digau Israel ga-tenetene hualaa behee i-di madagoaa a God ma-gaa-hai digaula gi-haadanga-lamalia labelaa!

Chapter 54

54:1  Meenei God, haga-dagaloaha-ina au gi o maaloo. Hagamehede-ina au gi oo mahi!

54:2  Meenei God, hagalongo-mai gi dagu dalodalo. Hagalongo-mai gi agu helekai!

54:3  Digau hagamuamua e-lloomoi e-heebagi-mai gi-di-au. Digau hagawelewele e-hagamada bolo ginaadou e-daaligi au gii-made, nia hagadilinga daangada ala hagalee e-hagalaamua a God.

54:4  Gei God go dogu hagamaamaa. Di Tagi go dogu dangada daa.

54:5  God gi-daaligidia ogu hagadaumee i-nia hegau huaidu digaula ala e-hai. Mee ga-daaligi digaula gi-daha, idimaa Mee e-manawa-dahi.

54:6  Meenei Dimaadua, au gaa-hai dagu tigidaumaha adu gi-di-Goe mo-di tenetene. Au gaa-hai dagu hagaamu adu gi-di-Goe, idimaa Goe dela e-humalia.

54:7  Goe dela ne-haga-dagaloaha au gi-daha mo ogu haingadaa huogodoo, gei au gu-gidee ogu hagadaumee ala ne-paagege.

Chapter 55

55:1  Meenei God, hagalongo-mai gi dagu dalodalo. Goe hudee huli gi-daha mo dagu dangidangi!

55:2  Hagalongo-mai mo-di helekai-mai. Au gu-duadua i dogu de-nnoomaalia.

55:3  Au gu-madagu huoloo i-nia lee haga-madagudagu-dangada o ogu hagadaumee. Au gu-beehi go digau huaidu ala e-hai au haga-huaidu. Digaula e-gaamai gi-di-au di haingadaa; digaula e-hagawelewele mai gi-di-au, ge hagadugina-ginaadou au.

55:4  Au gu-madagu huoloo, di madagu o-di made gu-daamaha i ogu lodo.

55:5  Di madagu mo-di bolebole guu-honu i ogu lodo. Au gu-madagu huoloo.

55:6  Au bolo gii-hai hualaa ogu bakau be-di mwuroi, gi-maangi au gi-daha, gii-gida dogu gowaa e-hagamolooloo-iei au.

55:7  Au ga-maangi gi-mogowaa-loo, gaa-hai dogu guongo i-lodo di anggowaa.

55:8  Au ga-halahala dagu gowaa hagalimalima e-bala-iei au i-di madangi damana mo-di madangi gono.

55:9  Meenei Tagi, hagahinihini-ina nia helekai o ogu hagadaumee! Au e-mmada gi-nia daangada e-hai be digau e-dadaaligi nadau daangada, ge hagalongoaa i-lodo di waahale.

55:10  Boo mo aa nia haihai huaidu e-hula e-haganiga i-hongo di abaaba di waahale deelaa, e-haga-honu di-maa gi-nia huaidu llauehe mono haingadaa llauehe.

55:11  Di haga-mooho la i-nia madagowaa huogodoo. I-hongo nia ala guu-honu i-nia halahalau mo nia hagahuaidu.

55:12  Maa nei bolo di hagadaumee e-haganneennee au, gei au e-manawa balabala hua ginai, gei di-maa di hoo ni-oogu ma-ga-haga-balumee au, gei au e-mee di-hana gi-daha mo mee.

55:13  Gei di-maa kooe dela go dogu ihoo ngalua mo dogu ihoo hagaaloho donu.

55:14  Gidaua nogo hagabooboo i tau mehanga i-di aloho, nogo daumaha i-di gowaa e-dahi i-lodo di Hale Daumaha.

55:15  Heia ogu hagadaumee gii-mmade i-mua nadau madagoaa belee mmade-ai. Digaula gi-hula-hua mouli gi-lodo tenua o digau mmade! Di huaidu la i-lodo nia hale digaula mo i-lodo nia manawa digaula.

55:16  Gei au ga-gahigahi Dimaadua go God belee hagamaamaa au, gei Mee ga-haga-dagaloaha au.

55:17  Luada, oodee, mo hiahi agu tamu mo-di dangi i-lodo dogu manawa guu-dau i-mua o Mee, gei Mee ga-hagalongo gi dogu lee.

55:18  Mee ga-laha-mai au hagahumalia gi-daha mai teebagi dela nogo heebagi-iei au gi ogu hagadaumee dogologowaahee.

55:19  God dela nogo dagi mai-loo namua ga-hagalongo-mai gi-di-au, ga-haga-magedaa digaula, idimaa digaula hagalee hiihai e-huli hoou, gei hagalee e-mmaadagu i Mee.

55:20  Dogu ihoo i-mua gu-hai-baahi gi ono ehoo hagaaloho. Mee gu-oho ana hagababa.

55:21  Nia helekai a-maa e-kala, gei i-lodo dono manawa le e-honu di hagadugina. Nia helekai a-maa e-hagalongo hagamanawa lamalia ginai be-nia lolo, gei nia maa e-gaa gadoo be tulumanu dauwa.

55:22  Dugua ang-gi Dimaadua o haingadaa, gei Mee ga-haga-dagaloaha goe. Mee hagalee e-hai digau ala e-hai di tonu gi-magedaa.

55:23  Gei Goe, meenei God, gaa-lahi digau daaligi-dangada gii-mmade mo digau hai-kai tilikai gi-lodo nadau daalunga i-mua digaula ma-gaa-tugi i tungaalodo o nadau mouli. Gei au ga-hagadagadagagee-adu gi-di-Goe.

Chapter 56

56:1  Meenei God, dumaalia-mai gi-di-au, idimaa au gu-i-lodo di haingadaa damana. Ogu hagadaumee e-hagahuaidu au i-nia madagoaa huogodoo.

56:2  Di laangi dogomaalia gei ogu hagadaumee e-hai-baahi-mai gi-di-au. E-dogologo digau e-heebagi hai-baahi mai gi-di-au.

56:3  Meenei Dimaadua di Gowaa Aamua, dogu madagoaa ma-ga-madagu, gei au e-hagadagadagagee adu gi-di-Goe.

56:4  Au e-hagadagadagagee gi God, gei au hagalee e-madagu. Au e-hagaamu a-Mee i-nia mee a-Mee ala ne-hagababa. Ma di-aha e-mee di hai go tangada mai gi-di-au?!

56:5  Ogu hagadaumee e-gaamai gi-di-au nia haingadaa i-lodo di laangi dogomaalia, digaula e-hagabaubau di-nadau hai dela belee haga-huaidu au i-nia madagoaa huogodoo!

56:6  Digaula e-dagabuli hagammuni i-lodo nia gowaa nngala, e-dadaumada agu mee huogodoo ala e-hai, e-hiihai e-daaligi au gii-made.

56:7  Meenei God, daaligidia digaula i nadau hai huaidu. Haga-magedaa-ina nia daangada aalaa gi do hagawelewele!

56:8  Goe e-iloo-hua be au e-haingadaa behee. Goe gu-hagailongo di logo o ogu wai dangi. Nia maa digi hihia Kooe gi-lodo dau beebaa?

56:9  Di laangi dela ma-ga-gahigahi Goe ko-au, gei ogu hagadaumee ga-hagadiga gi-muli, gaa-hula gaa-llele. Au e-iloo di mee deenei, idimaa God la i dogu baahi,

56:10  ma go Dimaadua, dela e-hagahagaamu ko-au ana hagababa.

56:11  Ma go Mee dela e-hagadagadagagee ginai au, gei au ga-hagalee madagu. Ma di-aha e-mee di hai go tangada mai gi-di-au?!

56:12  Meenei God, au ga-tigidaumaha-adu gi-di-Goe agu mee ala ne-hagababa. Au ga-gowadu gi-di-Goe dagu tigidaumaha danggee,

56:13  idimaa Goe dela ne-haga-dagaloaha au gi-daha mo-di made, gei ne-hai au gi-hagalee magedaa. Malaa, au ga-heehee i-mua o God, i-lodo di maalama dela e-maahina i-hongo nia daangada.

Chapter 57

57:1  Dumaalia-mai gi-di-au, meenei God, dumaalia-mai, idimaa au e-hanadu e-halahala dogu hagamaamaa gi doo baahi. I-lala di malu oo lima e-gida-ai dogu abaaba gaa-dae-loo gi-di lawa o-nia haingadaa huogodoo.

57:2  Au e-gahigahi dogu God dela i-di Gowaa Aamua, di God dela e-hagahumalia au gi agu mee ala e-hiihai ginai huogodoo.

57:3  Mee ga-helekai-mai i-di langi, ga-haga-dagaloaha au. Mee ga-haga-magedaa digau ala e-hagahuaidu au. God ga-hagamodongoohia-mai dono aloho dee-modu mo dono manawa-dahi.

57:4  Ogu hagadaumee gu-haganiga-mai dogu gili, e-hai gadoo be nia laion gai-dangada. Nia niha digaula e-hai gadoo be nia daalo mono amu maalei. Nia holole digaula e-hai gadoo be nia hulumanu-dauwa gaa.

57:5  Meenei God, hagamodongoohia-ina do aamua i-di langi, mo do madamada i-hongo henuailala hagatau.

57:6  Ogu hagadaumee guu-holo di-nadau gubenge belee kumi au. Au gu-deai dogu hagadagadagagee ai. Digaula guu-geli di-nadau luwa i ogu mua bolo gii-doo au gi no-lodo, gei di-maa go digaula ne-monnono gi-lodo.

57:7  Meenei God, dogu hagadagadagagee guu-dohu, gei au ga-daahili mo-di hagaamu Goe!

57:8  Dogu hagataalunga, ala-aga! Dagu ‘harp’ mo dagu ‘lyre’, aala-aga! Au ga-hangahanga di laa gii-ala.

57:9  Meenei dogu Dagi, au ga-danggee-adu gi-di-Goe i-mehanga nia henua. Au ga-hagaamu Goe i-baahi nia daangada.

57:10  Do aloho dee-modu guu-dau i-nia madagowaa huogodoo i-di langi. Do manawa-dahi guu-tugi i-lala di langi.

57:11  Hagamodongoohia-ina oo mahi aamua i-di langi, meenei God, mo do madamada gi-hongo henuailala hagatau.

Chapter 58

58:1  Goodou go nia dagi le e-gabunga godou mee gii-donu? Goodou e-gabunga nia daangada huogodoo gi-tungaadahi?

58:2  Deeai, goodou e-hagabaubau-hua nia huaidu ala e-mee di hai go goodou, gei e-hai godou huaidu daaligi dangada i-hongo tenua.

58:3  Digau hai mee huaidu le e-nnoo-mau e-hai nadau mee hala i-lodo nadau madagoaa ala e-mouli-ai. Digaula e-hai nadau kai-tilikai mai-loo i-di laangi dela ne-haanau-ai ginaadou.

58:4  Digaula e-honu i-nia poisin gadoo be nia gihaa lodo-geinga. Digaula e-pono nadau dalinga gadoo be-di gihaa ‘cobra’ dela e-longoduli,

58:5  dela e-de-longono-ia di lee o tangada hai daahili haga-gaidala, be taahili o tangada hai mogobuna.

58:6  Meenei God, oho-ina nia niha o-nia laion llamu-dauwa aanei.

58:7  Heia digaula gi-hagalee, gadoo be nia wai ma-gaa-dui gi-daha. Heia digaula gi-dagadagahi gi-hongo di ala, gadoo be nia geinga laagau.

58:8  Heia digaula gii-hai be nia ‘snail’ ma-gaa-bala gaa-hai nia gelegele. Heia digaula gii-hai gadoo be-di ligiana dela ma-ga-haanau-mai made dela digi gidee-ia di maalama.

58:9  I-mua digaula ma-ga-iloo-e-ginaadou di-maa, gei digaula gaa-hele gi-lala, gadoo be nia geinga laagau. Gei God ga-hagawelewele ga-ili digaula gi-daha gei digaula e-mouli.

58:10  Digau ala e-haihai nia mee donu ga-tenetene i-di nadau madagoaa ma-gaa-mmada gi digau huaidu ma-ga-daaligi. Digaula ga-taele laa-lodo nia dodo o digau huaidu.

58:11  Nia daangada ga-helekai, “Ma e-donu-hua bolo digau ala e-hai nia mee ala e-donu le e-kumi nadau hui. Ma e-donu bolo ma iai di God i-golo dela e-hagi-aga henuailala.”

Chapter 59

59:1  Meenei dogu God, haga-dagaloaha-ina au gi-daha mo ogu hagadaumee. Abaaba-ina au gi-daha mo digau ala e-hai-baahi mai gi-di-au!

59:2  Haga-dagaloaha-ina au gi-daha mo digau huaidu aalaa. Daawa-ina au gi-daha mo digau daaligi-dangada aalaa!

59:3  Mmada, digaula e-talitali belee daaligi au gii-made. Digau maaloo e-dagabuli belee hai-baahi mai gi-di-au. Hagalee idimaa au ne-hai dagu huaidu be ne-hai dagu mee hala,

59:4  be di hala dulii guu-hai ko-au, meenei Dimaadua, dela e-llele-iei digaula e-hagatogomaalia belee heebagi-mai gi-di-au.

59:5  Duu gi-nua, meenei Yihowah go di God Koia e-Aamua, hanimoi hagamaamaa-ina au. Meenei di God o Israel, goe bida mmada-hua Goe gi-di-au! Duu gi-nua, daaligidia digau o-di bouli. Hudee dumaalia gi digau huaidu halahalau dangada!

59:6  Digaula e-lloomoi labelaa ma-ga-hiahi, e-heehee i-lodo di waahale mo-di nguunguu gadoo be nia paana.

59:7  Hagalongo-malaa gi-nia haganneennee digaula, mo nia haga-huaidu digaula. Nia holole digaula e-hai be nia hulumanu-dauwa i-lodo nadau ngudu. Digaula e-hagabaubau bolo ma tangada e-hagalongo gi ginaadou ai.

59:8  Gei Goe e-gadagada gi digaula, meenei Dimaadua. Goe e-dugu digau o-di bouli bolo ma nia balumee.

59:9  Au e-hagadagadagagee gi oo mahi, meenei God, Goe go dagu gowaa e-bala ginai au.

59:10  Dogu God e-aloho i-di-au, gei ga-hanimoi gi-di-au. Mee gaa-hai au gii-mmada gi ogu hagadaumee ma-ga-magedaa.

59:11  Meenei God, hudee daaligidia digaula gi-dee de-langahia agu daangada. Gei Goe heia digaula gii-hula gi-lellele dagidahi gi oo mahi. Hagamagedaa-ina digaula, meenei Dimaadua, go-di-madau abaaba.

59:12  Di huaidu la i-hongo nia malau-ngudu digaula. Nia helekai huogodoo digaula le e-huaidu huoloo. Heia nia helekai digaula gi-hele-ina digaula i-lodo nadau hagapuu! Idimaa digaula e-hai nadau haga-halauwa ge e-hai nadau kai-tilikai,

59:13  daaligidia digaula gi do hagawelewele. Daaligidia digaula gii-odi. Gei digau huogodoo ga-iloo bolo ma go God dela e-dagi Israel, gaa-hana-loo gi-nia mada o henuailala.

59:14  Ogu hagadaumee e-lloomoi labelaa ma-ga-hiahi, e-heehee i-lodo nia waahale mo-di nguunguu gadoo be nia paana,

59:15  e-hai be nia paana ma-ga-halaangaa dolohi, e-halahala nadau meegai mo-di nguunguu maa ginaadou ma-ga-hagalee kida nadau mee.

59:16  Gei au ga-daahili i-di hai oo mahi. Nia luada huogodoo gei au ga-daahili gi-nua i-di hai o do aloho dee-modu. Goe go dagu gowaa dela e-bala-iei au, gei di abaaba ni-oogu i dogu madagoaa ma-ga-haingadaa.

59:17  Au ga-hagaamu Goe, go dogu Dangada Daa, dagu gowaa e-bala-ginai au la-go God, di God dela e-aloho i-di-au.

Chapter 60

60:1  Meenei God, goe gu-diiagi gimaadou, gu-haga-magedaa gimaadou. Goe nogo hagawelewele-mai gi gimaadou, malaa dolomeenei huli-mai gi gimaadou.

60:2  Goe ne-hai tenua gi-ngalungalua, ga-haahi di-maa gi-mahuge. Hagahumalia-ina nia gowaa mooho aanei, idimaa ma gu-monnono dagidahi.

60:3  Goe ne-hai au daangada gi-hagaduadua gii-kono. Gimaadou gu-heehee haga-inaina be digau ne-inu nadau dagaao gu-libaliba.

60:4  Goe gu-haga-iloo gi digau ala e-hagalaamua Goe, bolo gii-mee di-llele digaula gi-daha mo taaligi.

60:5  Haga-dagaloaha-ina gimaadou gi oo mahi. Helekai-mai gi madau dalodalo, gei au daangada ala e-aloho-ai gaa-mee di-dagaloaha.

60:6  God gu-helekai mai i-hongo dono lohongo haga-madagu boloo, “Idimaa dela Au gu-aali, Au ga-hahaahi Shechem, gaa-duwwe di gowaa mehanga gonduu o Sukkoth gi agu daangada.

60:7  Gilead la ni-aagu, mo Manasseh labelaa. Ephraim la-go dagu goobai-dauwa, gei Judah la-go dagu dogodogo king.

60:8  Gei Au ga-haga-hai-hegau a Moab be dagu boolo gaugau, gei Au gaa-kili ogu suudi la-gi-hongo Edom, e-hagailongo di-maa bolo ma di mee ni-aagu. Digau Philistia le e-hagamaanadu bolo ginaadou ga-wwolowwolo aali i ogu nua?”

60:9  Meenei God, ma koai dela gaa-lahi au gi-lodo di waahale mau-dangihi? Ma koai dela gaa-dagi au gi Edom?

60:10  Ma e-donu bolo Goe dela hua gu-diiagi gimaadou? Goe hagalee hana madalia madau gau-dauwa?

60:11  Hagamaamaa-ina gimaadou e-heebagi gi nia hagadaumee. Nia hagamaamaa o-nia daangada-dangada le e-balumee gei deai ono hadinga ai.

60:12  Maa God ga-madalia gidaadou, gei gidaadou ga-aali. Mee ga-daaligi tadau hagadaumee.

Chapter 61

61:1  Meenei God, hagalongo-mai gi dagu gahigahi. Hagalongo-mai gi dagu dalodalo!

61:2  I-lodo-hua dogu manawa-gee mo dogu mogowaa i dogu guongo, gei au e-gahigahi Goe! Lahia au gi-di gowaa dela e-noho-iei au humalia,

61:3  idimaa Goe go dogu abaaba, dogu Dangada daa maaloo dela e-hai-baahi gi ogu hagadaumee.

61:4  Heia au gii-noho i-lodo doo hale dabu i-di waalooloo o dogu mouli, mo-di noho humalia i-lala di malu o bakau.

61:5  Meenei God, Goe gu-longono agu hagababa, gei Goe gu-gaamai gi-di-au nia mee o digau ala e-hagalaamua Goe.

61:6  Haga-waalooloo-ina di mouli o-di king. Heia a-mee gi-mouli-hua beelaa!

61:7  Meenei God, heia a-mee gi-dagi-hua beelaa i oo mua gaa-hana-hua beelaa, dono hagaodi ai. Abaaba-ina a-mee gi do aloho dee-modu mo do manawa-dahi.

61:8  Gei au ga-dadaahili-laa i-nia madagoaa huogodoo e-hagaamu Goe, i dogu madagoaa ma-gaa-hai agu tigidaumaha i-nia laangi huogodoo adu gi-di-Goe i agu mee ala ne-hagababa.

Chapter 62

62:1  Au e-noho deemuu e-talitali gi God gi-haga-dagaloaha au, deelaa-hua go Mee dela e-hagadagadagagee ginai au.

62:2  Ma go Mee hua dela e-abaaba au ge e-haga-dagaloaha au. Mee go dogu Dangada Daa, deai tangada e-mee di-haga-magedaa au ai.

62:3  E-waalooloo behee go goodou huogodoo ala ma-ga-heheebagi gi taane dela gu-bagege gadoo be-di abaaba gu-mooho?

62:4  Goodou e-hiihai-hua belee dugu-iha a-mee gi-lala, gi-daha mo dono lohongo aamua. Goodou e-tenetene gi-nia helekai tilikai. Goodou e-hai godou helekai haga-maluagina, gei i-lodo godou manawa, goodou e-haga-halauwa a-mee.

62:5  Ma go God hua dela e-gana ginai au, deelaa-hua go Mee e-hagadagadagagee ginai au.

62:6  Go Mee hua dela e-abaaba gei e-haga-dagaloaha au. Mee go dogu Dangada Daa, malaa au e-deemee-loo di-magedaa.

62:7  Dogu hagamouli mo dogu hagalaamua le e-hai mai i-baahi o God. Mee go dogu abaaba mau-dangihi, Mee go dogu gowaa e-bala-iei au.

62:8  Agu daangada, goodou hagadagadagagee gi God i-nia madagoaa huogodoo. Hagi-anga-ina gi Mee godou haingadaa huogodoo, idimaa Mee go tadau gowaa e-pala-iei gidaadou.

62:9  Nia daangada huogodoo le e-hai gadoo be nia madangi ne-dogi go tangada. Digau aamua mo digau mugi-lala huogodoo e-balumee-hua be-di mee e-dahi. Digaula ga-pauna la-hagalee daamaha, digaula e-koia e-maamaa i-nia madangi ala ma-gaa-dogi go tangada.

62:10  Goodou hudee kana gi-di hagawelewele. Hudee hagadagadagagee bolo goodou ga-maluagina i godou gaiaa ala e-hai. Ma e-aha maa godou maluagina le e-logowaahee-mai, gei goodou hudee hagadagadagagee gi-nia maa.

62:11  Au gu-hagalongo haga-logo gi God e-helehelekai bolo nia mogobuna la nia mee ni-aana,

62:12  bolo dono aloho la dono hagaodi ai. Meenei Tagi, ma deelaa-hua Kooe dela e-hui nia daangada gii-hai be nadau hegau ala nogo hai.

Chapter 63

63:1  Meenei God, Goe di God ni-oogu, gei au e-hidihidi i-di-Goe. Dogu huaidina mo dogu hagataalunga hagatau e-hiihai huoloo adu gi-di-Goe, e-hai gadoo be tenua ne-maangoo deai ono wai ai.

63:2  Heia au gi-mmada-adu gi-di-Goe i-lodo do gowaa haga-madagu. Heia au gii-mmada be Goe e-maaloo ge e-madamada behee.

63:3  Au ga-hagaamu Goe, idimaa, do aloho mau-dangihi e-koia e-humalia i-di mouli.

63:4  Au ga-danggee-adu gi-di-Goe i-di waalooloo o dogu mouli. Au ga-daahi-aga ogu lima e-dalodalo-adu gi-di-Goe.

63:5  Dogu hagataalunga ga-miami ga-maaluu gadoo be tangada dela ne-miami i tagamiami damana, gei au ga-daahili-adu gi-di-Goe nia daahili hagaamu.

63:6  Dogu moe-hua i-hongo dogu hada, gei au ga-langahia-eau Goe. Di boo hagatau gei au e-mamaanadu-mai Goe,

63:7  idimaa, Goe dela nogo hagamaamaa au i-nia madagoaa huogodoo. Au e-daahili tenetene i-lala di malu o bakau.

63:8  Dogu hagataalunga e-pigi-adu gi-di-Goe, gei doo lima gau-donu e-daahi au.

63:9  Digau ala bolo ginaadou e-daaligi au la-gaa-hula gi-lala gi-di gowaa o digau mmade.

63:10  Digaula ga-daaligi i-lodo tauwa, gei nia huaidina digaula gaa-gai go nia paana lodo-geinga.

63:11  Gei-ogo di king ga-tenetene, idimaa, God ne-hai a-mee gi-aali. Digau ala ne-hai nadau hagababa i-di ingoo o God la-ga-hagaamu a-Mee, gei nia ngudu o digau hai-kai tilikai gaa-pono.

Chapter 64

64:1  Meenei God, au gu-i-lodo di haingadaa, hagalongo-mai gi dagu dalodalo! Au gu-madagu i ogu hagadaumee, haga-dagaloaha-ina dogu mouli!

64:2  Abaaba-ina au gi-daha mo nia hagahuaidu o digau huaidu, mo nia hagabuulinga daangada huaidu.

64:3  Digaula e-olo nadau holole gii-gaa be tulumanu-dauwa, gei e-puu nadau helekai huaidu gadoo be nia amu maalei.

64:4  Digaula e-limalima di hagadele nadau kai-tilikai, ge hagalee langaadia. Digaula e-oho digau humalia gi nadau tamu, ge hagalee mmaadagu.

64:5  Digaula e-hagadaubuni i-lodo nadau hagabaubau huaidu, digaula e-helehelekai be dehee di gowaa e-dugu ginai nadau hele. Digaula e-hai boloo, “Tangada e-mee di-gidee nia maa ai.”

64:6  Digaula e-haganoho nadau hai huaidu ga-helekai, “Gidaadou gu-haganoho hagahumalia tadau hai huaidu dela belee hai.” Di manawa mo nia hagamaanadu o tangada le e-nngala.

64:7  Malaa, God gaa-puu ana amu maalei gi digaula, digaula gu-limalima-hua di lauwa.

64:8  Mee ga-daaligi digaula idimaa go nia helekai aalaa. Digau huogodoo ala ma-gaa-mmada gi digaula la-ga-lialiagi nadau libogo.

64:9  Digaula huogodoo ga-mmaadagu, digaula ga-hagabaubau di mee a God dela ne-hai, ga kaikai ana mee ne-hai.

64:10  Digau huogodoo ala e-donu la-ga-tenetene gi-di mee a Dimaadua dela ne-hai. Digaula ga-gidee di-nadau gowaa e-pala-ai ge noho manawa lamalia i-baahi o Mee. Digau huogodoo ala e-humalia la-ga-haga-hagaamu a-Mee.

Chapter 65

65:1  Meenei God, ma e-humalia bolo gimaadou e-hagaamu Goe i Zion, mo-di hagakila madau hagababa ala ne-hai-adu gi-di-Goe,

65:2  idimaa Goe dela e-haga-kila-aga madau dangidangi. Nia daangada huogodoo ga-lloo-adu gi-di-Goe

65:3  mai i nadau huaidu. Di madagoaa-hua o madau huaidu ala gu-mada-maaloo i gimaadou, gei Goe gu-dumaalia-mai gi gimaadou.

65:4  E-maluagina go digau ala e-hilihili Kooe, ga-laha-mai gaa-noho i-lodo do gowaa haga-madagu! Gimaadou ga-manawa lamalia gi-nia humalia o doo hale, di haga-maluagina o do Hale Daumaha haga-madagu.

65:5  Goe ne-longono madau dangidangi ga-hagamaamaa gimaadou gi-aali, Goe e-hagamouli gimaadou gi au hegau haga-goboina. Nia daangada o-nia henua huogodoo mo nia dama henua ala i-daha e-hagadagadagagee-adu gi-di-Goe.

65:6  Goe ne-haga-noho nia gonduu gi nadau lohongo gi o mogobuna. Nia hegau aanei e-haga-modongoohia o mogobuna aamua.

65:7  Goe e-hagakila nia ngoloolo o-nia moana mo nia lee o-nia beau. Goe e-hagakila nia ngongooaa o-nia daangada.

65:8  Nia daangada huogodoo i henuailala gu-mmaadagu i au hegau haga-goboina ala ne-hai. Au hegau ala ne-hai gu-hagahidi-ai nia daangada mai i-di mada o henuailala gaa-hana gi-di mada dela i-golo gi-momoogo tenetene.

65:9  Goe e-haga-modongoohia do aloho i-nia henua i dau hai dela e-haga-doo-iha di uwa. Goe e-haga-honu di-maa gi-nia huwa-laagau mo nia gelegele humalia. Goe e-haga-honu nia dama monowai mmidi gi-nia wai. Goe e-wanga gi henuailala nia huwa-laagau. Deenei dau hai e-hai nia maa:

65:10  Goe e-gaamai dau uwa nngolo gi-hongo nia gowaa ala gu-hagamaluu, ga-haga-magalillili di gelegele gi-nia wai. Goe e-haga-tiutiu di gelegele gi-nia uwa nngolo, gaa-hai nia dama-laagau gii-tomo.

65:11  Goe e-gaamai gi gimaadou nia huwa-laagau e-logo, idimaa Goe dela e-humalia! Nia gowaa huogodoo ala e-hana ginai Goe, aalaa hogi nia gowaa ala iai nia goloo e-logo.

65:12  Nia manu dolodolo guu-honu i-hongo nia gowaa maalama, nia daalinga nia gonduu guu-gahu gi-di tenetene.

65:13  Nia gowaa maalama guu-gahu go nia siibi. Nia gowaa baba guu-honu i-nia ‘wheat’. Nia mee huogodoo e-momoogo gei e-dadaahili tenetene.

Chapter 66

66:1  Nia daangada huogodoo gi-momoogo tenetene mo-di haga-hagaamu a God!

66:2  Goodou daahili gi-nia madamada o dono ingoo. Goodou hagaamu-ina a-Mee gi-nia daahili hagaamu!

66:3  Helekai gi God boloo, “Au mee ala ne-hai le e-haga-goboina huoloo! Au mogobuna le e-aamua huoloo dela e-hidi-ai o hagadaumee e-pala gi-lala mmaadagu i oo mua.

66:4  Digau huogodoo i-hongo henuailala e-daumaha-adu gi-di-Goe, digaula e-daahili-adu gi-di-Goe i-nia daahili hagaamu, e-daahili e-hagaamu do ingoo.”

66:5  Lloomoi gii-mmada goodou gi-nia mee a God ala ne-hai, nia hegau haga-goboina a-Mee ala ne-hai ang-gi nia daangada.

66:6  Mee ne-huli di moana gii-hai tenua maangoo. Tadau maadua-mmaadua nogo taele i-lala i-lodo di monowai. I-di gowaa deelaa, gei gidaadou gu-tenetene huoloo gi-di mee a-Mee dela ne-hai.

66:7  Mee e-dagi gi ono mogobuna gaa-hana-hua beelaa, gei Mee e-dadaumada nia henua llauehe. Digau ala e-de-hiihai e-hagalongo la-gi-hudee hai-baahi gi Mee.

66:8  Goodou go nia daangada o-nia henua huogodoo, hagaamu-ina di-madau God. Nia lee o godou hagaamu gi-heia gi-longono gi-nia madagowaa huogodoo.

66:9  Mee e-benebene gidaadou gi-dee-mmade, ge hagalee hai gidaadou gii-too gi-lala.

66:10  Meenei God, Goe gu-hagamada gimaadou, gadoo be nia silber e-haga-madammaa gi-di ahi, deelaa dau hai gu-hagamada gimaadou.

66:11  Goe guu-hai gimaadou gi-monnono gi-lodo di hele, ga-haga-uda gi-hongo madau dua nia mee daamaha.

66:12  Goe guu-hai gimaadou gi-dagadagahi go madau hagadaumee. Gimaadou guu-hula i-lodo di ahi mo-di labagee, gei dolomeenei gei Goe gu-laha-mai gimaadou gi-lodo di gowaa noho i-di aumaalia.

66:13  Au ga-gaamai dagu tigidaumaha dudu gi doo hale. Au ga-gowadu gi-di-Goe dagu mee dela ne-hagababa.

66:14  Au ga-gowadu gi-di-Goe agu mee ala ne-hai-iei au bolo e-gowadu i dogu madagoaa nogo i-lodo di haingadaa.

66:15  Au ga-gaamai agu siibi e-dudu i-hongo di gowaa dudu-tigidaumaha, gei au ga-tigidaumaha adu gi-di-Goe nia kau-daane mo nia kuudi, gei nia huiahi o-nia tigidaumaha aalaa gaa-hula gi-nua gi-di langi.

66:16  Lloomoi hagalongo, go goodou huogodoo ala e-hagalaamua a God, gei au ga-hagi-adu di mee a-Mee dela ne-hai-mai gi-di-au.

66:17  Au gu-gahigahi a-Mee belee hagamaamaa au. Au gu-daahili gu-hagaamu a-Mee.

66:18  Maa au gu-haga-de-iloo-eau ogu huaidu, gei di Tagi hagalee hagalongo-mai gi-di-au.

66:19  God gu-longono-Ia au, Mee gu-longono-Ia dagu dalodalo.

66:20  Au e-hagaamu a God, idimaa Mee digi hudua gi-daha dagu dalodalo, be e-dugu dono manawa aloho deemodu i-di-au.

Chapter 67

67:1  Meenei God, Goe dumaalia-mai gi gimaadou, haga-maluagina-ina gimaadou. Goe gi-haga-maalama-ina gimaadou gi o hadumada,

67:2  gi-iloo-ai digau huogodoo o henuailala di ala o do manawa, ge gi-iloo nia henua huogodoo dau hagamouli.

67:3  Nia daangada la-gi-hagaamuina Goe, meenei God. Nia daangada huogodoo la-gi-hagaamuina Goe!

67:4  Nia henua huogodoo gi-manawa lamalia ge gi-daahili tenetene, idimaa Goe dela e-gabunga nia daangada gii-donu, ge e-dagi nia henua huogodoo i henuailala.

67:5  Nia daangada gi-hagaamuina Goe, meenei God. Nia daangada huogodoo la-gi-hagaamuina Goe!

67:6  Tadau henua guu-huwa tau-gai, God dela go tadau God gu-haga-maluagina gidaadou.

67:7  God gu-haga-maluagina gidaadou. Nia daangada huogodoo ala i henuailala hagatau la-gi-hagalaamua-ina a-Mee.

Chapter 68

68:1  God ga-du-gi-nua ga-hagamaaheu gi-daha ono hagadaumee. Digau ala e-de-hiihai gi Mee, la-ga-magedaa gaa-hula gaa-llele.

68:2  E-hai gadoo be nia huiahi ma-ga-ili gi-daha, deelaa gadoo di hai a-Mee ma-ga-hagabagi digaula gi-daha. E-hai be nia ‘wax’ ma-ga-waiwai i-mua di ahi, deelaa gadoo digau huaidu ma-ga-hagalee i-mua o God.

68:3  Gei digau ala e-donu le e-manawa lamalia ge tenetene i-mua o Mee. Digaula e-tenetene mo-di wwolowwolo tenetene.

68:4  Daahili ang-gi God, daahili hagaamu-ina di ingoo o-Maa. Hagatogomaalia-ina di ala o Mee dela e-hana i-hongo nia gololangi. Di ingoo o-Maa go Yihowah, goodou tenetene i-mua o Mee!

68:5  God dela e-noho i-lodo dono hale dabu, le e-madamada humalia i-nia dama ala gu-deai nadau maadua ai, mo e-abaaba nia ahina ala guu-mmade nadau lodo.

68:6  Mee e-wanga gi digau ala e-hagaloale nia gowaa digaula e-noho-ai, gei e-dagi digau galabudi gi-daha gi-lodo di gowaa moholo mo-di tenetene, gei digau ala e-hai-baahi la-gaa-noho i-lodo tenua maangoo.

68:7  Meenei God, do madagoaa nogo dagi au daangada, mo do madagoaa nogo hana i-lodo di anggowaa,

68:8  gei henuailala nogo ngalungalua, nia uwa guu-too-iha i-di langi, idimaa go di hanimoi o-di God dela nogo helehelekai i tomo di Gonduu o Sinai, di hanimoi o-di God o Israel.

68:9  Goe gu-haga-doo-iha dau uwa nngolo belee hagahumalia au henua ala gu-maangoo.

68:10  Au daangada gu-haga-noho nadau guongo i-golo, idimaa go do humalia dela ne-hagahumalia digau hagaloale.

68:11  Di Tagi ne-helekai, gei nia ahina dogologowaahee guu-kae di longo boloo:

68:12  “Nia king mo nadau gau-dauwa guu-hula guu-llele gi-daha!” Nia ahina ala i nadau guongo gu-duwweduwwe nadau goloo ala ne-kumi:

68:13  ala go nia ada mwuroi guu-hii gi-nia silber, nia bakau digaula e-dabadaba i-nia goolo humalia. Ma e-aha dela hunu gau i goodou e-noho-hua i-lodo nia abaaba siibi i-di laangi nogo hai-tauwa?

68:14  Di madagoaa o God Mogobuna ne-hai nia king gi-lellele dagidahi i-hongo di Gonduu Zalmon, Mee guu-hai nia ‘snow’ gi-monnono i-golo.

68:15  E-aamua huoloo behee go di Gonduu Bashan, di gonduu e-logo ono ulu gonduu!

68:16  Goodou go nia ulu gonduu haga-madagu le e-aha ala e-mmada-iha haga-balumee gi-hongo di gonduu a God dela ne-hilihili belee noho-ai? Dimaadua la-gaa-noho i-golo gaa-hana-hua beelaa!

68:17  Di Tagi ga-hanimoi i Sinai gi-lodo di gowaa haga-madagu mo ana waga-dauwa hongo-henua e-logowaahee.

68:18  Mee gaa-hana gi-nua gi-nia gowaa nnoo-nua, e-lahi ana gau galabudi dogologo madalia Ia, gei Mee e-kumi ana wanga-dehuia mai digau ala e-hai-baahi. Yihowah=God gaa-noho i-golo.

68:19  Hagaamu-ina di Tagi, dela e-aamo tadau hagadaamaha i-nia laangi huogodoo. Mee go di God dela e-haga-dagaloaha gidaadou.

68:20  Tadau God la di God dela e-haga-mouli gidaadou. Mee go Yihowah, go tadau Dagi, dela e-daa-mai gidaadou gi-daha mo-di made.

68:21  Ma e-donu bolo God ga-haga-mamaawa nia libogo o ono hagadaumee gi-momooho hagalligi, go digau ala e-manawa hamaaloo i-lodo nadau haihai huaidu.

68:22  Di Tagi gu-helekai, “Au ga-laha-mai labelaa gi muli o hagadaumee i Bashan, Au ga-laha-mai labelaa digaula mai tua di moana,

68:23  gii-mee goe di-haele i-lodo nia dodo digaula, gii-mee labelaa au paana di-tobotobo nadau mee ala e-hiihai ginai.”

68:24  Meenei God, do haele aali la-guu-mmada ginai digau huogodoo, di hula dagi a God, go dogu king, gi-lodo dono lohongo haga-madagu.

68:25  Digau ala e-huwa nadau daahili le e-hula i-mua, digau ala e-hai nadau gatangi e-hula i-muli, mugi-lodo la-go nia dama-ahina ala e-haga-tangitangi nadau ‘tambourine’.

68:26  “Goodou hagaamu-ina a God i-lodo nia dagabuli o ana daangada. Hagaamu-ina Dimaadua, goodou huogodoo go di hagadili ni Jacob!”

68:27  Matagidagi go Benjamin di madawaawa mulibee, ga-nomuli go nia dagi o Judah mo nadau hagabuulinga daangada, ga-nomuli go nia dagi Zebulun mo Naphtali.

68:28  Meenei God, hagamodongoohia-ina-aga o mogobuna, nia mogobuna ala nogo hai Kooe i madau baahi,

68:29  mai i do Hale Daumaha i Jerusalem, i-di gowaa dela e-gaamai ginai nia wanga-dehuia o-nia king gi-di-Goe.

68:30  Wou gi Egypt, go di manu llamu-dauwa dela i-lodo nia aalek. Wou gi-nia henua, ala go nia hagabuulinga kau-daane mo nadau dama, gaa-dae-loo gi digaula huogodoo gaa-pala gi-lala mo-di gowadu dehuia gi-di-Goe nadau silber. Heia digau ala e-hiihai bolo ginaadou e-hai nadau dauwa gi-lellele dagidahi!

68:31  Nia daangada oobidi ga-lloomoi i Egypt. Digau Ethiopia ga-daahi-aga nadau lima e-dalodalo ang-gi God.

68:32  Goodou go nia henua llauehe huogodoo o henuailala, daahili ang-gi God, daahili hagaamu-ina di Tagi,

68:33  dela e-noho i-lala di langi, go di langi dela namua. Hagalongo gi-di lee o-Maa dela e-wolo ngoloolo.

68:34  Goodou hagadele-ina nia mogobuna o God, mo dono dagi be-di king i-hongo Israel, mo ono mogobuna ala i-lala di langi.

68:35  E-haga-madagudagu-dia huoloo go God i dono madagoaa ma-ga-hanimoi i dono lohongo haga-madagu, go di God o Israel! Mee e-wanga di maaloo mono mogobuna gi ana daangada. Hagaamu-ina a God!

Chapter 69

69:1  Meenei dogu God, haga-dagaloaha-ina au! Nia wai gu-honu-aga guu-dau i dogu uwa.

69:2  Au gu-abulu gi-lodo di gowaa gelegele waiwai llala, deai di gowaa e-togo ginai au ai. Au gu-dau-mai gi-di moana llala, gei nia beau ala gaa-hai au gi-melemu.

69:3  Au gu-duadua gu-maanuhia di gahigahi do hagamaamaa. Dogu akii la-guu-mmae. Ogu golomada gu-maanu di halahala do hagamaamaa.

69:4  Digau ala e-hagadugina-e-ginaadou au gei dono hadinga ai, le e-dogologowaahee i-nia ngaahulu o dogu libogo. Ogu hagadaumee le e-hai-baahi mai gi-di-au i nadau helekai tilikai. Digaula e-maaloo huoloo ge e-hiihai bolo ginaadou e-daaligi au gii-made. Digaula e-huuhuli-mai au bolo au gi-wanga agu goloo ala hagalee nia mee ne-gaiaa.

69:5  Meenei God, ogu ihala la-hagalee nngala i oo mua. Goe e-iloo-hua dogu boiboi.

69:6  Meenei Tagi, go Yihowah di Gowaa Aamua, Goe hudee heia au gi-haga-langaadia digau ala e-hagadagadagagee adu gi-di-Goe. Meenei di God o Israel, hudee heia au gi-hagatee-ina digau ala e-daumaha adu gi-di-Goe.

69:7  Au gu-haganneennee go nia daangada mai i do ingoo, malaa, au gu-langaadia huoloo.

69:8  Au guu-hai gadoo be tangada mai i-daha i-baahi ogu duaahina, ge guu-hai gadoo be tangada henua-gee i-baahi dogu madahaanau.

69:9  Dogu haa-manawa i-nia madamada o do Hale Daumaha la-guu-gaa i ogu lodo gadoo be-di ahi. Nia haganneennee ala e-hai-adu gi-di-Goe le e-dau labelaa i-di-au.

69:10  Au e-manawa hila-gi-lala i dogu noho hagaonge, gei nia daangada e-haganneennee au.

69:11  Au e-ulu di gahu haga-manawa-gee, gei digaula e-gadagada-mai gi-di-au.

69:12  Digaula e-leelee i-di-au i-hongo nia ala. Digau libaliba e-dili nadau daahili i-di-au.

69:13  Gei au, au ga-dalodalo adu gi-di-Goe, meenei Dimaadua. Helekai-mai gi-di-au i do madagoaa dela gu-hiihai ginai, meenei God. Helekai-mai gi-di-au, mai i do aloho aamua, ge idimaa Goe dela e-dadaahi-hua dau hagababa dela bolo Goe e-hagamouli au.

69:14  Hagamaamaa-ina au gi-de-abulu gi-lodo di gelegele waiwai. Haga-dagaloaha-ina au i ogu hagadaumee, haga-dagaloaha-ina au gi-daha mo-di moana llala.

69:15  Hudee heia au gii-gahu go nia wai mmidi. Hudee heia au gi-melemu gi tua di moana, be e-abulu gi-lodo taalunga.

69:16  Meenei Dimaadua, hagalongo-mai mua gi-di-au mai i tumaalia o do aloho dee-odi. Goe huli-mai mua gi-di-au mai i do manawa dumaalia aamua.

69:17  Goe hudee hagammuni-ina Goe i dau dangada hai-hegau deenei. Au guu-noho i-lodo di haingadaa damanaiee, hagamaamaa-ina au dolomeenei!

69:18  Hanimoi gi-di-au, haga-dagaloaha-ina au. Goe daawa au gi-daha mo ogu hagadaumee.

69:19  Goe dela e-iloo nia helekai haganneennee ala e-hai-mai gi-di-au mo dogu haga-balumee mo dogu haga-langaadia. Goe dela e-gidee ogu hagadaumee huogodoo.

69:20  Nia haganneennee gu-oho dogu manawa, deai di mee e-mee di-hagamaamaa au ai. Au gu-hiihai huoloo bolo tangada gi-hagamaamaa-ina dogu manawa-gee, gei di-maa hagalee. Au ne-halahala dagu dangada belee haga-manawa lamalia au, gei au digi gidee.

69:21  Dogu madagoaa nogo hiigai, gei digaula ga-gaamai gi-di-au nia poisin. Au nogo hieinu, gei digaula ga-gaamai gi-di-au nia ‘vinegar’.

69:22  Nia hagamiami digaula la-gi-heia nia mee e-hagahuaidu digaula. Nia hagamiami digaula la-gi-heia nia mee haadanga-balua ang-gi ginaadou.

69:23  Hagabouli-ina nia golomada digaula! Heia nia dua digaula gi-paagege i-nia madagoaa huogodoo!

69:24  Goe llingi-iha do hagawelewele gi-hongo digaula. hagahuaidu-ina digaula gi do hagawelewele.

69:25  Nia gowaa ala e-noho-ai digaula gi-diagia gii-hai nia gowaa lomo. Hudee heia tangada e-dahi gi-mouli i-lodo nadau hale-laa.

69:26  Digaula e-hagahuaidu au daangada ala ne-hagaduadua Kooe. Digaula e-helehelekai i-di hagaduadua o au daangada ala ne-haga-mmaemmae Kooe.

69:27  Hagailongo-ina nia huaidu huogodoo digaula. Hudee heia digaula gi-hai-mee gi dau hagamouli.

69:28  Nia ingoo digaula la-gi-tono-ina gi-daha mo-di beebaa ingoo o digau ala e-haga-mouli. Hudee daulia digaula gi-baahi au daangada donu.

69:29  Malaa, au guu-noho i-lodo dogu mmae mo dogu manawa-gee. Dahi-aga-ina au, meenei God, haga-dagaloaha-ina au!

69:30  Au ga-hagaamu di ingoo o God gi taahili. Au ga-hagadele nia humalia o-Maa gi dagu hai-danggee gi Mee.

69:31  Deenei di mee ga-haga-manawa lamalia a Dimaadua i-hongo nia tigidaumaha ala e-hai gi-nia kau, koia i-hongo di tigidaumaha dela e-hai gi-di kau-daane damanaiee.

69:32  Digau ala e-manawa-daamaha gaa-mmada gi-di hai deenei, ga-manawa lamalia. Digau ala e-daumaha ang-gi God ga-manawa-maaloo.

69:33  Dimaadua e-hagalongo ang-gi digau ala gu-deai nadau mee ai, gei mee hagalee e-de-langahia ana daangada ala i-lodo di hale galabudi.

69:34  Di langi mo henuailala mo-di moana mono hagahonu huogodoo i-no-lodo, goodou huogodoo hagaamuina a God.

69:35  Mee ga-haga-dagaloaha Jerusalem, gaa-hau haga-hoou nia waahale o Judah. Nia daangada donu a-Maa gaa-noho i-golo ga-hai-mee gi tenua deelaa.

69:36  Di hagadili ni ana gau hai-hegau ga-hai-mee gi tenua deelaa, mo digau ala e-aloho i God gaa-noho i-di gowaa deelaa.

Chapter 70

70:1  Meenei God, haga-dagaloaha-ina au! Meenei Dimaadua, hagamaamaa-ina mai au dolomeenei!

70:2  Heia digau ala e-hagamada bolo ginaadou e-daaligi au gii-made, la-gi-paagege mo-di hinihini. Heia digau ala e-tenetene gi ogu haingadaa, la-gii-hula gi-muli gi-langaadia.

70:3  Heia digau ala e-haganneennee au la-gi-uli nadau gai i nadau paagege.

70:4  Heia digau huogodoo ala e-lloomoi gi-di-Goe la-gi-manawa lamalia mo-di tenetene. Heia digau ala e-danggee adu gi-di-Goe i dau hagamouli, la-gi-helehelekai i-nia madagoaa huogodoo boloo, “God la-koia e-aamua!”

70:5  Meenei God, au e-bagege ge e-hagaloale. Hanimoi gi-di-au hagalimalima. Goe go Dimaadua, go dogu Dangada hagamouli. Hagalimalima-mai e-hagamaamaa au!

Chapter 71

71:1  Meenei Dimaadua, au e-hanadu gi-di-Goe e-abaaba Kooe. Goe hudee heia au gi-magedaa!

71:2  Idimaa Goe dela e-donu, hagamaamaa-ina au, haga-dagaloaha-ina au. Hagalongo-mai, daawa-ina au gi-daha mo-di haingadaa!

71:3  Goe gii-hai di hadugalaa bala hagammuni mau-dangihi ni-oogu, mo-di gowaa abaaba mau-dangihi dela e-abaaba au. Goe go dogu gowaa e-bala ginai au mo dogu haga-dagaloaha.

71:4  Meenei dogu God, haga-dagaloaha-mai au gi-daha mo digau huaidu, mo nia mogobuna o digau huaidu ge hagamuamua.

71:5  Meenei dogu Dagi go Yihowah, ma Kooe hua dela e-hagadagadagagee ginai au. Ma Kooe hua dela nogo kana ginai au mai-loo i dogu damagiigi.

71:6  Au nogo kana-adu hua gi-di-Goe mai i-lodo dogu mouli hagatau. Goe nogo abaaba au mai-loo dogu laangi ne-haanau-ai. Au ga-hagaamu Goe i-nia madagoaa huogodoo!

71:7  Dogu mouli la-guu-hai di ada-mee hagamodongoohia e-daudali go digau dogologo, idimaa Goe go dogu Dangada Daa maaloo.

71:8  Au e-haga-hagaamu Goe mai-loo luada gaa-dae-loo gi-di boo, mo-di hagadele di hai o madamada.

71:9  Goe hudee diagina au dela gu-madumadua. Goe hudee hudua au gi-daha dolomeenei dela gu-bagege beenei.

71:10  Ogu hagadaumee e-hiihai bolo ginaadou e-daaligi au gii-made, digaula e-helehelekai i nadau mehanga e-haganohonoho di-nadau hai dela belee hai-baahi mai gi-di-au.

71:11  Digaula e-helekai, “God gu-diiagi a-mee. Gidaadou gaa-hula i-muli o-mee e-kumi a-mee, ma hagalee tangada e-haga-dagaloaha a-mee ai.”

71:12  Meenei God, hudee haga-mogowaa-ina Goe gi-daha mo au. Meenei God, hagamaamaa-ina au dolomeenei!

71:13  Digau ala e-hiihai bolo ginaadou e-heebagi-mai gi-di-au, la-gi-hagamagedaa-ina gi-daaligidia. Digau ala e-hagamada e-haga-mmaemmae au, la-gi-langaadia gi-haadanga-balua.

71:14  Nia madagoaa huogodoo gei au ga-hagadagadagagee-adu gi-di-Goe, au ga-haga-hagaamu Goe gi-nonua-loo.

71:15  Au ga-hagadeledele di hai o do humalia, au ga-helehelekai i-di hai o dau hagamouli, mai luada gaa-dae-loo gi-di boo, ma e-aha maa au e-dee-dohu di-modongoohia di-maa.

71:16  Au ga hana i-lodo nia mahi o dogu Dagi go Yihowah. Au ga-hagadele di hai o do humalia, go do humalia la-hua.

71:17  Goe gu-aago au mai dogu madagoaa nogo damagiigi, gei au e-hagadele hua igolo di hai o au hegau haga-goboina.

71:18  Dolomeenei gei au gu-madumadua mo dogu libogo gu-hinaa, meenei God, Goe hudee diiagia au! Goe gi-madalia au i dogu madagoaa dela e-hagadele di hai o mogobuna mo oo mahi ang-gi nia adu-daangada huogodoo ala ma-ga-lloomoi.

71:19  Meenei God, oo donu le-e-dau i-nua-loo. Goe guu-hai au hegau hagalabagau huoloo, ma deai tangada e-hai be Goe ai.

71:20  Goe gu-gaamai gi-di-au di haingadaa mo-di dadaaligi, gei Goe gaa-hai labelaa au gi-maaloo. Goe ga-benebene au gi-dee-made.

71:21  Goe gaa-hai au gi-aamua gi-nonua gaa-hana-hua beelaa. Goe ga-haga-manawa lamalia labelaa au.

71:22  Au ga-hagaamu Goe gi dagu ‘harp’, meenei dogu God, au ga-hagaamu do manawa-dahi. Au ga-badubadu dagu ‘harp’ mo-di daahili-adu gi-di-goe i taahili hagaamu adu gi-di-Goe go Tangada Haga-madagu o Israel.

71:23  Au ga-wolowolo mo-di tenetene i dogu madagoaa ma-gaa-hai agu gatangi adu gi-di Goe. Dogu huaidina hagatau ga-daahili, idimaa Goe dela ne-haga-dagaloaha au.

71:24  Au ga-hagadeledele di hai o oo donu mai luada gaa-hana-loo gi-di boo, idimaa digau ala bolo ginaadou e-hagahuaidu au, la-gu-magedaa gu-hagalangaadia.

Chapter 72

72:1  Meenei God, goe gi-aago-ina di king i dana hai ana gabunga, gii-donu gii-hai be oo donu. Goe gi-dugua-anga oo donu gi mee,

72:2  gii-mee-ai dana dagi au daangada gi-di tonu, mo digau ala e-daamaha gii-hai be-di mee e-dahi.

72:3  Di haadanga-lamalia mo-di noho i-di aumaalia la-gii-noho i-lodo tenua deenei, gei nia donu o nnaganoho la-gii-dau ang-gi digau huogodoo o tenua deenei.

72:4  Di king la-gi-gabunga-ina digau ala e-hagaloale gii-donu, gi-hagamaamaa-ina digau ala gu-haadanga-balua, gei gi-hagahuaidu-ina digau ala e-haga-daamaha digaula.

72:5  Au daangada la-gi-daumaha adu gi-di-Goe, i-di waalooloo o-di laa e-maalama, mo-di waalooloo o-di malama dela e-haga-mamaalama-ai tenua gaa-hana-hua beelaa.

72:6  Di king la-gii-hai gadoo be-di uwa dela e-doo gi-hongo di gelegele, gei gii-hai gadoo be nia wai o-di uwa ala ma-gaa-too gi-hongo tenua.

72:7  Di tonu o nnaganoho la-gii-gila humalia i-lodo dono madagoaa, gei di haadanga-lamalia gii-noho-beelaa i-di waalooloo o-di malama dela e-haga-maalama-ai tenua.

72:8  Di hagageinga o dono henua le e-tugi i-di mada o-di tai gaa-tugi i-di tai dela i-golo, mai di monowai go Euphrates gaa-tugi i-di mada o henuailala.

72:9  Digau o lodo henua gaa-pala gi-lala i ono mua, mo nia hagadaumee o-maa gaa-pala gi-lala gi-hongo di gelegele.

72:10  Nia king o Spain mo nia waa-henua gaa-wanga gi mee nadau wanga-dehuia, gei nia king o Sheba mo Seba ga-gaamai nadau mee tigidaumaha gi mee.

72:11  Nia king o-nia henua huogodoo gaa-pala gi-lala i-mua o mee, mo nia henua huogodoo ga-hai-hegau gi mee.

72:12  Idimaa, mee e-haga-dagaloaha digau hagaloale ala e-gahigahi a mee, mo digau ala gu-haadanga-balua mo digau ala gu-deai nadau hagamaamaa ai.

72:13  Mee e-manawa-dumaalia ang-gi digau paagege mo digau hagaloale, gei e-abaaba nia mouli o digau ala gu-haadanga-balua.

72:14  Mee gaa-daa digaula gi-daha mo nadau hai hagahuaidu mo nadau dadaaligi. Nadau mouli le e-hagalabagau i dono baahi.

72:15  Di king gi-mouli waalooloo! Digau Sheba gi-wanga-ina gi mee nia goolo. Nia daangada gii-hai dalodalo i mee i-nia madagoaa huogodoo. Di haga-maluagina mai baahi o God gi-madalia ia, dolomeenei gaa-hana-hua beelaa!

72:16  Nia laagau hai-palaawaa gii-logo i-lodo tenua deenei. Nia hagadili ni tenua gii-logo i tomo nia gonduu, gei nia huwa o tenua gi-dau-logo gadoo be nia laagau o Lebanon, Digau o-nia waahale gi-dogologowaahee gadoo be nia geinga o lodo-henua.

72:17  Di ingoo di king gi-noho-hua beelaa dono hagaodi ai. Ono humalia gii-noho-beelaa i-di waalooloo o-di laa dela e-maahina. Nia henua huogodoo gi-tangi-anga gi God gi-hagahumalia-ina ginaadou, gii-hai be dana hagahumalia di king.

72:18  Gidaadou gi-hagaamuina a Yihowah=God, dela go di God o digau Israel, idimaa ma go Mee dela e-hai ana mee haga-goboina aanei.

72:19  Gidaadou gi-hagaamuina di madamada o dono ingoo gaa-hana-hua beelaa! Dono madamada gi-haga-honu-ina henuailala hagatau! Amen! Amen!

72:20  Deenei di hagaodi o-nia dalodalo a David go di tama Jesse.

Chapter 73

73:1  Ma e-donu, God le e-humalia ang-gi digau Israel, ang-gi digau ala e-madammaa nadau lodo.

73:2  Dogu hagadagadagagee gu-hoohoo-hua bolo ga-hagalee. Dogu hagadonu la di mee hua-dulii bolo ga-hagalee,

73:3  idimaa, au gu-dubua gi digau hagamuamua i dogu gidee-au digau huaidu e-noho manawa lamalia ang-gi ginaadou.

73:4  Nia hagadilinga hagaduadua hagalee tale gi digaula. Digaula e-maaloo, hagalee magi.

73:5  Digaula hagalee haingadaa ang-gi ginaadou be digau ala i-golo. Digaula hagalee tale gi-nia haingadaa gadoo be digau ala i-golo.

73:6  Di hagamuamua dela e-laagei digaula le e-hai gadoo be-di hau-uwa, mo-di hagahinihini le e-hai gadoo be-di gahu laa-daha.

73:7  Nia manawa digaula e-malingi-mai nia huaidu, gei lodo digaula e-honu i-nia hagabaubau huaidu.

73:8  Digaula e-gadagada gi digau ala i-golo gei e-helehelekai i-nia mee huaidu. Digaula e-hagamuamua e-hagatataele nadau hai huaidu belee haga-daamaha digau ala i-golo.

73:9  Digaula e-helehelekai huaidu i God dela i-di langi, ge e-hai nadau haganoho maaloo ang-gi digau huogodoo i henuailala.

73:10  Malaa, nia daangada a God hogi ga-daudali digaula, ga-hagadonu nia mee huogodoo ala e-helehelekai-ai digaula.

73:11  Digaula e-helekai, “God le e-de-iloo-ia! Tangada di Gowaa Aamua la-hagalee gidee-ia!”

73:12  Deenei di hai o digau huaidu. Digaula e-maluagina, ge nadau maluagina e-logo-mai.

73:13  Malaa e-hai behee? E-balumee-hua go dogu mouli madammaa ge digi hai dagu huaidu?

73:14  Meenei God, au gu-duadua i-di laangi dogomaalia, gei Goe gu-hagaduadua au i-nia luada huogodoo.

73:15  Maa au gu-helekai nia hagadilinga mee beenei, malaa, au gu-hagalee hai be tangada ni au daangada.

73:16  Au gu-hagamada gu-hagabaubau di haingadaa deenei bolo gii-donu ginai au, gei di-maa gu-haingadaa huoloo mai gi-di-au,

73:17  gaa-dae-loo gi dogu madagoaa ne-hana gi-lodo do Hale Daumaha. Gei au guu-donu-laa gi-di mee dela gaa-hai ang-gi digau ala e-huaidu.

73:18  Goe gaa-dugu digaula gi-di gowaa malali e-hai digaula gi-monnono gii-mmade!

73:19  Digaula ga-daaligi hagalimalima, digaula gaa-mmade i-di made hagamadagudagu dangada huoloo.

73:20  Meenei dogu Dagi, digaula e-hai gadoo be-di midi dela ma-gaa-ngala i-di luada. Do madagoaa ma-ga-ala-aga, gei digaula gu-hagalee.

73:21  Di madagoaa-hua o agu maanadu ne-huaidu, gei au gu-manawa-gee labelaa,

73:22  au gu-dadaulia gadoo be-di manu. Au gu-hagalee modongoohia-eau Goe.

73:23  Gei deeai. Au e-noho i doo baahi i-nia madagoaa huogodoo, gei Goe e-kumi dogu lima.

73:24  Au agoago e-dagi au gi-di ala o do manawa, di laangi hagaodi, gei Goe ga-benebene au gi-lodo o madamada.

73:25  Au dogu dangada i-di langi ai, deelaa-hua Kooe. Ma deai di mee i henuailala e-hiihai ginai au i-daha mo Goe ai.

73:26  Dogu hagamaanadu mo dogu huaidina e-mee di-paagege, gei God dela go ogu mahi, deelaa-hua go Mee e-hiihai ginai au gaa-hana-hua beelaa.

73:27  Au guu-donu-mai gi-di-au bolo digau ala ga-diiagi Goe la-ga-hagalee. Goe ga-daaligi digau ala hagalee manawa-dahi adu gi-di-Goe.

73:28  Gei mai gi-di-au: ma koia e-humalia ma au ga-hoohoo gi God, e-gida-ai dogu hagaloohi gi-baahi di Tagi go Yihowah, ge e-hagadele nia mee huogodoo a-Mee ala ne-hai!

Chapter 74

74:1  Meenei God, Goe gu-diiagi gimaadou beenei beleiaha? Goe ga-hagawelewele-hua beenaa gi au daangada donu gaa-hana-hua beelaa dono hagaodi ai?

74:2  Goe gi-langahia-e-Goe au daangada ala ne-hilihili Kooe i-mua-loo belee hai nia daangada ni-aau, ala ne-hagamehede Kooe mai gi-daha mo nadau noho hege belee hai do madawaawa. Goe gi-langahia di Gonduu Zion, dela nogo noho-iei Goe i-mua.

74:3  Hanimoi gii-mmada Goe gi-nia gowaa mooho aanei. Madau hagadaumee gu-oho nia mee huogodoo i-lodo di Hale Daumaha.

74:4  O hagadaumee ne-wwolowwolo i-lodo do Hale Daumaha bolo ginaadou gu-aali. Digaula guu-hudi gi-nua nadau hagallebe i-golo, e-hai-ai di hagailongo ni-di aali.

74:5  Digaula guu-hai gadoo be digau hele laagau, e-duuduu nadau laagau gi-nia dalai.

74:6  Digaula gu-hahaahi nia haaligi laubaba gi-nia dalai mono haamaa llauehe.

74:7  Digaula gu-oho do Hale Daumaha, guu-dudu di-maa gii-wele, gu-haga-milimilia di gowaa dela e-hagalaamua-ai au daangada do ingoo.

74:8  Digaula gu-hiihai bolo ginaadou e-hai gimaadou hagahuaidu, digaula guu-dudu nia gowaa haga-madagu huogodoo ala i-lodo tenua deenei.

74:9  Tadau ada-mee haga-madagu huogodoo gu-hagalee. Nia soukohp gu-hagalee labelaa, gu-deai hogi tangada e-iloo-ia be-di hai deenei le e-waalooloo behee ai.

74:10  Meenei God, e-waalooloo behee go madau hagadaumee di-nadau haganneennee Goe? Digaula e-mee di-haga-balumee do ingoo gaa-hana-hua beelaa?

74:11  Goe e-aha dela hagalee hagamaamaa gimaadou? Oo lima e-dugu gi doo dua eimaha?

74:12  Meenei God, Goe nogo hai di king ni gimaadou mai-loo i taamada. Goe nogo haga-dagaloaha gimaadou i-nia holongo e-logowaahee.

74:13  Goe ne-wwae di tai gi oo mahi aamua, ga-haga-mamaawa nia libogo o-di manu haga-madagudagu-dangada o lodo tai.

74:14  Goe gu-dagadagahi nia libogo o-di manu dragon go ‘Leviathan’ ga-haangai nia manu lodo-henua gi tuaidina o-maa.

74:15  Goe ne-hai nia wai gii-mmidi, ge ne-hai nia monowai llauehe gi-maangoo.

74:16  Goe ne-hai di aa mo-di boo, ge ne-haga-noho di laa mo-di malama gi nau lohongo.

74:17  Goe ne-haga-noho au madagoaa gi henuailala, ge ne-hai di madagoaa mahanahana mo-di madagoaa magalillili.

74:18  Meenei Dimaadua, gi-langahia bolo o hagadaumee le e-gadagada adu gi-di-goe. Digaula la digau huaidu gei digaula e-hagawelewele adu gi-di Goe.

74:19  Goe hudee diagia au daangada ala gu-deai nadau hagamaamaa ai gi nadau hagadaumee hagamuamua. Goe hudee de-langahia au daangada ala e-hagaduadua!

74:20  Goe gi-langahia dau hagababa dela ne-hai-mai gi gimaadou. Ma iai taaligi dangada gii-made e-haihai i-lodo nia gowaa bouli o tenua deenei.

74:21  Goe hudee heia digau ala guu-noho i-lodo nadau hagahuaidu gi-langaadia. Goe heia digau ala e-hagaloale mo digau haadanga-balua gi hagaamu-ina Goe.

74:22  Meenei God, du-gi-nua, abaaba-ina Goe! Goe gi-langahia bolo digau huaidu le e-gadagada adu gi-di-goe mai-loo luada gaa-hana-loo gi-di boo.

74:23  Hudee de-langahia nia wwolowwolo hagawelewele o hagadaumee, nia hagalongoaa ala e-haihai go digaula la-hagalee noho.

Chapter 75

75:1  Meenei God, gimaadou e-hai danggee adu gi-di-Goe, gimaadou e-danggee-adu gi-di-Goe! Gimaadou e-hagadele di hai o do aamua mo-di hagadele au hegau haga-goboina ala ne-hai.

75:2  God e-helekai, “Au gu-haganoho dagu madagoaa belee hai dagu gabunga, gei Au gaa-hai dagu gabunga gi-di hai dela e-donu.

75:3  Ma e-aha maa nia mee huogodoo i henuailala ga-bolebole, mo henuailala hagatau ga-ngalungalua, gei Au gaa-hai di hagamau o henuailala gi-mau-dangihi.

75:4  Au e-helekai gi digau huaidu bolo ginaadou gi-hudee hagamuamua.

75:5  Au e-helekai gi digaula bolo gi-dugua nadau helehelekai hagapuu.”

75:6  Di gabunga la-hagalee haneiha i-dua, be e-hanaga i-dai, be mai ngeia be mai ngaaga.

75:7  Ma go God dela go tangada hai-gabunga, gei i-baahi o God hunu gau e-hagi-aga e-dadaaligi, gei hunu gau e-hagamehede.

75:8  Dimaadua e-daahi dana ibu i-lodo dono lima, guu-honu nia waini maaloo o dono hagawelewele. Mee gaa-llingi nia maa gi digau huaidu huogodoo gi-inumia, digaula ga-inu nia maa gii-odi.

75:9  Gei au hagalee-loo e-noho dagu helehelekai i-di hai o-di God a Jacob, be e-noho di-dadaahili gi Mee e-hagahagaamu a-Mee.

75:10  Mee gaa-oho nia mogobuna o digau huaidu, gei nia mogobuna o digau ala e-donu la-gaa-hai gi-llauehe-aga.

Chapter 76

76:1  Digau Judah e-iloo-e-ginaadou a God, di ingoo o-Maa e-hagalabagau huoloo i-baahi digau Israel.

76:2  Di guongo o-Maa la i Jerusalem, Mee e-noho i-tomo di Gonduu Zion.

76:3  Nia amu maalei o-nia hagadaumee la-gu-hadihadi go Mee i-golo, mo nadau mee abaaba mono hulumanu-dauwa mo nia goloo-dauwa huogodoo ala i-golo.

76:4  E-madamada huoloo behee Kooe, meenei God! E-madamada huoloo behee go do hanimoi labelaa gi-muli i-tomo nia gonduu, i-di gowaa dela nogo haga-magedaa-ai o hagadaumee Kooe.

76:5  Nia goloo digau-dauwa maaloo-dangihi la-guu-aau huogodoo gi-daha, dolomeenei digaula guu-kii di kii o digau mmade. Nia maaloo digaula mono hai-mee gu-ono hadinga ai.

76:6  Meenei di God o Jacob, do madagoaa ne-wou gi digaula, gei nia hoodo digaula mo digau ala e-hula nia maa guu-tinga gi-lala gi-hongo di gelegele guu-mmade.

76:7  Malaa, nia daangada huogodoo la-gu-mmaadagu i-di-Goe, meenei Dimaadua. Tangada e-dahi e-mee di-duu i oo mua ai, i do madagoaa ma-ga-hagawelewele.

76:8  Goe guu-hai dau hagi-aga gi-modongoohia mai i-di langi, malaa, henuailala la-gu-mmaadagu guu-noho deemuu,

76:9  Do madagoaa ne-duu-aga, nogo haga-modongoohia-aga di tonu o dau gabunga, belee haga-dagaloaha digau huogodoo ala e-noho daamaha ang-gi ginaadou i henuailala.

76:10  Di hagawelewele o-nia daangada gaa-huli ga-hagaamu Goe. Digau huogodoo ala ne-dubu i tauwa ga-daumaha-adu gi-di-Goe.

76:11  Wanga-ina gi Yihowah, go di-godou God, godou mee ala ne-hagababa gi Mee. Goodou go nia henua llauehe ala e-hoohoo-mai, goodou gaamai godou wanga-dehuia gi Mee. God e-hai nia daangada gi-mmaadagu i-de-Ia.

76:12  Mee e-haga-menege-iha nia dagi ala e-hagamuamua, gaa-hai nia king o henuailala gi-mmaadagu.

Chapter 77

77:1  Au e-dangi gi-nua a God. Au e-gahigahi a-Mee la-gi-nua, gei Mee gu-longono-Ia au.

77:2  I-lodo di madagoaa haingadaa, gei au e-dalodalo ang-gi Tagi. I-di boo dogomaalia, gei au e-daahi-aga ogu lima gi-nua e-dalodalo, gei au e-deemee di-manawa lamalia.

77:3  Dogu madagoaa ma-ga-hagamaanadu a God, gei au e-manawa dogu uhi. Dogu madagoaa ma-ga-hagamamaanadu, gei au e-manawa-bagege ogu lodo.

77:4  God guu-hai au gii-ala i-di boo dogomaalia. Au gu-de-nnoomaalia, gu-deemee dagu helekai.

77:5  Au e-maanadu nia laangi ala ne-hula, gei e-langalangahia-eau nia ngadau ala i-mua.

77:6  I-di waalooloo di boo, gei au e-hagabaubau huoloo nia mee aanei i ogu lodo, mo-di hagamamaanadu mo-di heheeu mai gi ogu lodo boloo,

77:7  “Dimaadua gaa-mee-hua di-diiagi gidaadou beelaa? Mee gu-hagalee-hua e-tenetene labelaa mai gi gidaadou?

77:8  Mee gu-hagalee-hua e-aloho i gidaadou? Nia hagababa a-Maa la-gu-hagalee haga-kila-aga?

77:9  Ma e-aha, God la-gu-de-langahia-e-Ia bolo Ia belee dumaalia huoloo? Ma e-aha, di hagawelewele la-guu-pono di lohongo di aloho o-Maa?”

77:10  Malaa, gei au ga-helekai, “Deenei di mee koia gu-haga-manawa-gee au: Di Gowaa Aamua la-gu-deai ono mogobuna ai.”

77:11  Meenei Dimaadua, au ga-langahia-eau au mee ala ne-hai. Au ga-haawa-eau au hagadilinga mee haga-goboina ala ne-hai i-mua-loo.

77:12  Au e-hagamamaanadu au mee huogodoo ala ne-hai. Au e-hagamamaanadu au hegau mogobuna huogodoo.

77:13  Meenei God, au mee huogodoo ala e-hai le e-dabu. Ma di god i-golo e-aamua be Goe ai.

77:14  Ma kooe hua go di God dela e-hai au mogobuna, Goe gu-hagamodongoohia-aga o mogobuna ang-gi nia daangada.

77:15  Goe ne-haga-dagaloaha au daangada gi o mogobuna, ala go di hagadili ni Jacob mo Joseph.

77:16  Meenei God, di madagoaa nia wai ne-mmada-adu gi-di-Goe, nia maa gu-mmaadagu, di moana gu-bolebole.

77:17  Nia gololangi gu-malingi-iha nia uwa, nia atili gu-haluihalulu mai i-lala di langi, nia ila gu-dabadaba i-nia madagoaa huogodoo.

77:18  Di lee o au atili gu-haluihalulu, gei henuailala gu-maahina i au ila ala e-dabadaba. Henuailala gu-bolebole gu-ngalungalua.

77:19  Goe gu-haele i-lodo nia beau, Goe e-hana laa-lodo di moana llala, gei o lohongo babaawae le e-de-gidee.

77:20  Goe ne-dagi au daangada gadoo be tangada hagaloohi siibi i-lala nia madamada humalia o Moses mo Aaron.

Chapter 78

78:1  Agu daangada, goodou hagalongo gi agu agoago, hagalongo gi-humalia gi agu mee ala ga-helekai-iei au.

78:2  Au ga-helekai i-nia ala agoago hagatautau, ga-hagamodongoohia gi digaula nia mee huogodoo ala hagalee modongoohia mai loo i-mua-loo,

78:3  nia mee ala gu-longo-ai gidaadou ge gu-iloo-ai, nia mee ala gu-hagi-mai go tadau maadua-mmaadua mai gi gidaadou.

78:4  Gidaadou hagalee haga-mmuni nia maa i tadau dama. Gidaadou e-hagi-anga nia maa gi-nia adu-daangada ala ga-lloomoi i-golo, i-di hai o-nia mogobuna o Dimaadua mo nia mee llauehe a-Mee ala ne-hai, mo nia hagadilinga mogobuna haga-goboina ala ne-hai go Mee.

78:5  Mee guu-wanga ana haganoho gi digau Israel mono haganoho ang-gi di hagadili ni Jacob. Mee gu-hagamodongoohia gi tadau damana ala namua bolo gi-aago-ina ana haganoho gi nadau dama,

78:6  bolo gi-iloo-ai nia adu-daangada ala e-loomoi maalia, gei digaula ga-aago labelaa nia maa gi nadau dama.

78:7  Maa gaa-hai beenei gei digaula ga-hagadagadagagee labelaa gi God, ga-hagalee de-langahia nia mee a-Mee ala ne-hai, gei digaula ga-haga-gila-aga nia haganoho a-Maa i-nia madagoaa huogodoo.

78:8  Digaula ga-hagalee hai be nadau maadua-mmaadua, ala gu-hai-baahi gei gu-de-hagalongo, gei nadau hagadagadagagee gi God la-gu-hagalee maaloo, gei gu-hagalee manawa-dahi gi Mee.

78:9  Digau Ephraim, e-kae nadau maalei mono amu maalei, guu-hula guu-llele gi-daha i-di laangi dela ne-hai tauwa.

78:10  Digaula hagalee haga-kila-aga nadau hagababa ala ne-hai ang-gi God. Digaula hagalee hiihai bolo ginaadou e-daudali nia haganoho a-Maa.

78:11  Digaula gu-de-langahia-e-ginaadou nia mee a-Maa ala ne-hai, nia mogobuna ala nogo mmada ginai digaula nogo hai go Mee.

78:12  Di madagoaa nadau maadua-mmaadua nogo mmada ginai, God nogo hai ana mogobuna i-di gowaa mehanga gonduu o Zoan i tenua go Egypt.

78:13  Mee ne-wwae di tai gaa-lahi digaula laa-lodo di-maa. Mee ne-hai nia wai gii-tuu gi-nua gadoo be-nia abaaba.

78:14  I-di aa, gei Mee e-lahi digaula i-lala di gololangi, i-di boo, gei Mee e-lahi digaula i-lala di maahina o-di ahi.

78:15  Mee ne-haahi di hadugalaa i-lodo di anggowaa, gaa-wanga nia wai gi digaula mai i-lodo di-maa.

78:16  Mee ne-hai nia wai gi-malingi-mai gi-daha mo-di hadugalaa, gaa-hai nia wai gii-mmidi be-di monowai damana.

78:17  Gei digaula gi-mua-hua i-lodo nadau hai huaidu e-hai-baahi gi God, gei digaula nogo hai-baahi gi di Gowaa Aamua i-lodo di anggowaa.

78:18  Digaula nogo hagamada a God gi nadau hiihai e-madamadau nadau meegai ala e-hiihai ginai.

78:19  Digaula e-helekai hai-baahi gi God boloo, “God e-mee di-gaamai gi gidaadou nia meegai i-lodo di anggowaa deenei?

78:20  Ma e-donu bolo Mee gu-hagamaawa dana hadugalaa, gei nia wai gu-malingi-mai i-di hadugalaa. Malaa, Mee e-mee di-gaamai hogi gi gidaadou nia palaawaa mo-di wanga gi ana daangada nia goneiga?”

78:21  Malaa, Dimaadua gu-hagawelewele ne-hagalongo gi-nia helekai digaula, gei Mee gu-daaligi ana daangada gi-di ahi, gei di hagawelewele o-Maa gi digaula la-gi-nonua-mai,

78:22  idimaa digaula hagalee hagadagadagagee gi Mee, ge hagalee hagadonu bolo ma go Mee dela e-haga-dagaloaha digaula.

78:23  Gei Mee ga-helekai gi-lala di-langi i-nua bolo nia bontai di langi la-gi-maahuge.

78:24  Mee gaa-wanga gi digaula nia huwa palaawaa mai i-di langi, mai i dana goweia nia ‘manna’ gi digaula gi-geina.

78:25  Malaa, digaula gu-miami nia meegai o digau di-langi, gei God guu-wanga gi digaula nia mee huogodoo ala e-hiihai ginai digaula.

78:26  Mee guu-hai labelaa di madangi gii-gono mai dua, gu-haga-ngalungalua di madangi gii-gono mai i-bahi-i-ngaaga gi ono mogobuna,

78:27  gu-hagau-mai ana manu mamaangi e-logowaahee gadoo be nia gelegele o tongotai gi ana daangada.

78:28  Nia manu la-gu-monnono gi-lodo di waahale mo i-di gili nia hale-laa.

78:29  Malaa, nia daangada gu-miami gu-maaluu. God guu-wanga gi digaula nia mee digaula ala e-hiihai ginai.

78:30  Di madagoaa-hua digaula digi mene i nadau mee ala e-hiihai ginai, e-miami hua igolo,

78:31  gei God gu-hagawelewele gi digaula, gu-daaligi gii-mmade nia daane digaula ala e-koia e-maaloo, go nia dama-daane humalia o Israel.

78:32  Ma e-aha maa Mee guu-hai nia mee aanei, gei nia daangada e-hai hua igolo di huaidu. Ma e-aha maa digaula guu-mmada gi-nia mogobuna a-Mee ala ne-hai, gei digaula hagalee hagadagadagagee gi Mee.

78:33  Malaa, Mee guu-hai nia mouli digaula gi-hagalee, gadoo be-di madangi ma-gaa-dogi go tangada, mo nia mouli digaula gi-mada-limalima.

78:34  Di madagoaa-hua o Mee dela ne-daaligi hunu gau i digaula gii-mmade, gei digau ala ne-dubu-igolo gaa-huli ang-gi Mee, digaula gu-maaliu nadau lodo gu-dalodalo hagamahi gi Mee.

78:35  Digaula gu-langahia bolo God la-go di-nadau abaaba, gu-langahia bolo di Gowaa Aamua dela ne-hagamaamaa ginaadou.

78:36  Gei nia helekai huogodoo digaula le e-tilikai-hua, di mee digaula ma-ga-helekai-ai la-hagalee donu.

78:37  Digaula hagalee manawa-dahi gi Mee, ge hagalee manawa-dahi gi di-nadau hagababa dela ne-hai gi mee.

78:38  Malaa, God la-gu-dumaalia huoloo gi ana daangada. Mee gu-dumaalia gi-nia huaidu digaula, digi daaligidia digaula gii-mmade. Nia holongo e-logo gei Mee e-hagakono-hua dono hagawelewele gi-dee-gila-aga.

78:39  Idimaa Mee e-langahia-e-Ia bolo digaula la nia daangada hua dangada, e-hai gadoo be-di madangi dela e-angiangi ga-hagalee.

78:40  E-logowaahee behee go nia hai-baahi o digaula gi Mee i-lodo di anggowaa! Nia holongo e-hia digaula ne-hai a-Mee gi-manawa-gee!

78:41  Nia madagoaa e-logo digaula e-hagammada a God, e-haga-manawa-gee di God Dabuaahia o Israel.

78:42  Digaula gu-de-langahia-e-ginaadou ana mogobuna aamua, mo-di laangi dela ne-haga-dagaloaha ginaadou go-Mee gi-daha mo nadau hagadaumee,

78:43  gei nogo hai ana hegau hagagoboina mono mogobuna i-lodo di gowaa mehanga gonduu o Zoan i tenua go Egypt.

78:44  Mee guu-huli nia monowai gii-hai nia dodo, gei digau Egypt gu-deai nadau wai e-inu ai.

78:45  Mee gu-hagau-mai ana lamu belee haga-mmaemmae digaula, mono kailuu belee haga-huaidu tenua.

78:46  Mee gu-hagau-mai nia ‘locust’ belee gai nia huwa-laagau digaula, gei e-haga-huaidu nia gowaa digaula.

78:47  Mee gu-daaligi gii-mmade nia laagau-waini mo nia laagau-‘fig’ gi-di uwa hadu magalillili.

78:48  Mee gu-daaligi nia kau digaula gii-mmade gi-di uwa hadu magalillili, mo nia hagabuulinga manu digaula gi-di ila.

78:49  Mee guu-hai digaula gii-tale gi-di haingadaa, mai dono daaligi digaula gi dono hagawelewele, e-hai gadoo be tangada kae hegau ne-hanimoi belee daaligi nia daangada gii-mmade.

78:50  Mee digi dugua dono hagawelewele, be e-dugu-hua digaula haga-mouli, gei Mee gu-daaligi digaula gi taumagi.

78:51  Mee gu-daaligi nia ulu-mmaadua dama-daane huogodoo o-nia madahaanau huogodoo o digau Egypt gii-mmade.

78:52  Nomuli, gei Mee gu-laha-mai ana dama gadoo be tangada hagaloohi siibi, gaa-dagi digaula laa-lodo di anggowaa.

78:53  Mee guu-dagi digaula hagahumalia, gei digaula gu-hagalee mmaadagu. Gei di moana guu-gahu nia hagadaumee digaula.

78:54  Mee gu-laha-mai digaula gi dono henua haga-madagu, gi-di gonduu dela ne-kumi ko-Ia.

78:55  Mee gu-hagabagi gi-daha digau o-nia guongo aalaa i-di madagoaa o ana daangada ala nogo hula. Mee guu-duwwe nia gowaa digau o tenua deelaa la i-nia madawaawa Israel, gaa-wanga nia guongo digaula gi ana daangada.

78:56  Gei digaula gu-hai-baahi gi God di Gowaa Aamua, ga-hagamada a-mee. Digaula digi daudali nia helekai a-maa,

78:57  gei digaula e-hai-baahi, gei e-de-hagalongo gadoo be nadau maadua-mmaadua, gu-hagalee kana ginai gadoo be-di amu maalei biga.

78:58  Digaula guu-hai a-Mee gi-hagawelewele gi nadau gowaa hai daumaha o digau bouli, ngaadahi mo nadau balu god.

78:59  God gu-hagawelewele huoloo dono mmada gi-di hai deenei, gaa-hidi-iei Mee guu-kili gi-daha ana daangada.

78:60  Mee gu-diiagi dono lohongo dela i Shiloh, di gowaa a-mee nogo noho-ai i tadau baahi i-mua.

78:61  Mee guu-dugu-anga gi tadau hagadaumee gi-kaina Tebedebe o-di Hagababa, dela go di hagamodongoohia nia mogobuna o-Maa mono madamada.

78:62  Mee gu-hagawelewele gi ana daangada donu, guu-hai digaula gi-daaligidia go nadau hagadaumee gii-mmade.

78:63  Nia dama-daane gu-daaligi guu-mmade i-lodo tauwa, nia dama-ahina gu-nadau daangada e-lodo ginai ai.

78:64  Digau hai-mee-dabu guu-mmade i taaligi, gei nia lodo digaula gu-hagalee dumaalia ginai e-hai nadau hangihangi.

78:65  Hagamuliagina, di Tagi guu-ala-aga be tangada nogo kii. Mee guu-hai gadoo be taane maaloo ne-inu ana dagaao ga-molongi.

78:66  Mee guu-hai ono hagadaumee gi-lellele dagidahi mo-di langaadia paagege, gaa-hana-hua beelaa.

78:67  Mee guu-hudu gi-daha di madawaawa Joseph. Mee digi hilihilia di madawaawa Ephraim.

78:68  Gei Mee gu-hilihili-hua di madawaawa Judah, mo-di Gonduu Zion dela e-koia e-aloho-iei Mee.

78:69  Di gowaa deelaa guu-hau dono Hale Daumaha, gadoo be dono lohongo dela i-di langi. Mee guu-hai di-maa gii-mau gadoo be henuailala, bolo gi-mau-dangihi gaa-hana-hua beelaa.

78:70  Mee gu-hilihili dana dangada hai-hegau go David, gu-laha-mai a-mee i-di gowaa haangai manu,

78:71  i-di gowaa a-Mee nogo hagaloohi ana manu, gaa-hai a-mee gii-hai di king o Israel, belee hai di hagaloohi-siibi o-nia daangada a God.

78:72  David gu-madamada humalia i digaula hagahumalia huoloo, gaa-dagi digaula gi-di kabemee hai-mee.

Chapter 79

79:1  Meenei God, digau o-di bouli gu-ulu-mai gi-lodo do henua. Digaula gu-haga-milimilia doo hale haga-madagu, gu-oho Jerusalem gi-mooho hagatau.

79:2  Digaula guu-wanga nia huaidina o au daangada gi-nia manu mamaangi gi-geina, mo nia huaidina o au daangada hai-hegau gi-nia manu llamu-dauwa o lodo henua gi-geina.

79:3  Digaula gu-haga-hali nia dodo o au daangada gadoo be nia wai. Nia dodo guu-mmidi gadoo be nia wai laa-lodo Jerusalem hagatau, tangada ne-dubu i-golo bolo e-danu digau ala ne-mmade ai.

79:4  Nia guongo ala i madau baahi e-haga-balumee gimaadou. Digaula e-gadagada-mai gi gimaadou mo-di haganneennee gimaadou.

79:5  Meenei Dimaadua, Goe deelaa-hua ga-hagawelewele-mai gi gimaadou gaa-hana-hua beelaa? Do hagawelewele la-ga-wele-hua beelaa be-di ahi?

79:6  Huluhia do hagawelewele la-gi-nia henua ala hagalee daumaha adu gi-di-Goe, mo ang-gi nia daangada ala hagalee dalodalo adu gi-di-Goe.

79:7  Idimaa digaula la-ne-daaligi au daangada. Digaula guu-hai hagahuaidu do henua.

79:8  Hudee daaligidia gimaadou idimaa go nia huaidu o madau damana-mmaadua. Dumaalia-mai gi gimaadou dolomeenei. Madau hagadagadagagee huogodoo la-gu-hagalee.

79:9  Meenei God, hagamaamaa-ina gimaadou, haga-dagaloaha-ina gimaadou. Daawa-mai gimaadou mo-di dumaalia-mai gi gimaadou madau huaidu, e-hagalaamua-ai do ingoo.

79:10  Ma e-aha dela nia daangada e-heheeu-mai gi gimaadou boloo, “Di-godou God la i-hee?” Heia gimaadou gi-mmada-adu gi-di-Goe e-daaligi digau ala ne-haga-hali nia dodo o au gau hai-hegau.

79:11  Hagalongo gi-nia nnguu manawa-gee o digau galabudi, hagamehede-ina gi o mogobuna aamua digau ala belee daaligi gii-mmade.

79:12  Meenei Tagi, heia di tala di hui nnolongo haga-hidu ang-gi nia daangada o-nia guongo ala e-haganiga gimaadou i-nia helekai huaidu huogodoo digaula ala ne-hai-adu gi-di-Goe.

79:13  Gei gimaadou, ala go au daangada, ala go nia siibi o dau hagabuulinga siibi, ga-danggee-adu gi-di-Goe, gaa-hana-hua beelaa, mo-di hagaamu Goe i-nia madagoaa huogodoo i-nia laangi ala gi-maalia.

Chapter 80

80:1  Meenei di Hagaloohi o Israel, hagalongo-mai gi gimaadou. Goe go Tagi o dau hagabuulinga siibi, hagalongo-mai mua gi gimaadou. Goe dela e-noho i-hongo do lohongo-king i-hongo nia ada manu hai ono bakau.

80:2  Haga-gida-ina-mai Goe gi-nia madawaawa Ephraim, Benjamin mo Manasseh. Haga-modongoohia-ina-mai gi gimaadou oo mahi. Hanimoi, haga-dagaloaha-ina gimaadou!

80:3  Meenei God, laha-adu gimaadou gi-muli! Goe haga-maalama-ina gimaadou gi o hadumada, gei gimaadou ga-mouli!

80:4  Meenei Yihowah go di God Koia e-Aamua, e-waalooloo behee go do hagawelewele gi-nia dalodalo o au daangada?

80:5  Goe ne-gaamai gi gimaadou di manawa-gee bolo gi-geina, mo-di ibu damana dela e-honu-ai nia wai-dangi bolo gi-inumia.

80:6  Goe ne-hai nia henua ala i madau daha gi-heebagi i-hongo madau henua. Madau hagadaumee e-haganneennee gimaadou.

80:7  Meenei di God Koia e-Aamua, laha-adu gimaadou gi-muli! Goe haga-maalama-ina gimaadou gi o hadumada, gei gimaadou ga-mouli!

80:8  Goe ne-gaamai dau laagau-‘grape’ i Egypt, ga-hagabagi gi-daha digau ala i-golo ala nogo noho i tenua, gaa-dogi di laagau deelaa i tenua digaula.

80:9  Goe ne-haala dau madagowaa belee tomo-aga-ai di-maa. Nia aga o di-maa gu-hula-loo gi-lala gu-modoho i-lodo tenua gu-haga-honu tenua.

80:10  Nia gonduu guu-gahu go di-maa gi dono malu, nia manga di-maa guu-gahu nia laagau-‘cedar’ lloowehaa.

80:11  Nia manga di-maa gu-lloo-adu gi-di tai go Mediterranean, ga-hanadu-loo gi-di monowai go Euphrates.

80:12  Goe ne-oho di abaaba dela e-haganiga di-maa eimaha? Nia daangada ma-ga-hula-laalaa, le e-mee-hua di-gaiaa nia huwa o di-maa.

80:13  Nia biigi lodo-geinga e-dagadagahi di-maa, nia manu lodo-geinga e-miami mai i di-maa.

80:14  Meenei di God Koia e-Aamua, huli-mai gi gimaadou! Mmada-iha i-di langi i-nua mai gi gimaadou. Hanimoi, haga-dagaloaha-ina au daangada!

80:15  Hanimoi haga-dagaloaha-ina di laagau-‘grape’ deenei dela ne-dogi Kooe, tama-laagau-‘grape’ dulii deenei ne-hai Kooe gii-tomo maaloo-dangihi!

80:16  Madau hagadaumee guu-dudu di-maa guu-hele di-maa gi-lala. Hagawelewele gi digaula, daaligidia digaula!

80:17  Benabena-ina mo-di hagaloohi-ina au daangada ala ne-hilihili, nia daangada ala ne-hai Kooe gi-maaloo.

80:18  Gimaadou hagalee huli labelaa gi-daha mo Goe. Haga-maaloo-ina-aga gimaadou, gei gimaadou ga-hagahagaamu do ingoo.

80:19  Meenei Yihowah go di God Koia e-Aamua, laha-adu gimaadou gi-muli! Goe haga-maalama-ina gimaadou gi o hadumada, gei gimaadou ga-mouli!

Chapter 81

81:1  Goodou wwolowwolo tenetene ang-gi God go tadau Daangada Daa. Daahili hagaamu-ina di God o Jacob!

81:2  Langia-aga godou daahili mo-di hagatangitangi godou ‘tambourine’. Heia godou lee daahili humalia gi-nia ‘harp’ mono ‘lyre’.

81:3  Ili-hia di labaa ang-gi tagamiami, i-di madagoaa di malama gila gi-dai mo-di malama honu.

81:4  Deenei la taganoho o Israel, di mee ne-haganoho mai baahi di God o Jacob.

81:5  Mee ne-wanga gi-nia daangada Israel taganoho deenei i dono madagoaa nogo heebagi gi tenua go Egypt. Au e-hagalongo gi-di lee e-helekai, e-de-iloo-eau be mee koai, e-hai boloo,

81:6  “Au ne-daa gi-daha godou mee ala nogo aamo go goodou i goodou dua, ga-daa-mai goodou gi-daha mo godou ngalua kono.

81:7  Godou madagoaa ne-huaidu-adu gi goodou, gei goodou gu-gahigahi Au, gei Au gu-haga-dagaloaha goodou. Au gu-goou-adu gi goodou mai i dogu gowaa dela e-bala-iei Au i-lodo di madangi maaloo. Au gu-hagamada goodou i-di monowai uwa-aga i Meribah.

81:8  Agu daangada, hagalongo-mai gi dagu hagailoo. Digau Israel, Au e-hiihai huoloo behee bolo goodou belee hagalongo-mai gi-di-Au!

81:9  Goodou hudee daumaha-loo gi-nia god ala i-golo.

81:10  Au go Yihowah, go di godou God, dela ne-laha-mai goodou gi-daha mo Egypt. Hanga-ina godou ngudu gi daha, gei Au ga-haangai goodou.

81:11  “Gei agu daangada hagalee hiihai e-hagalongo-mai gi-di-Au. Israel gu-hagalee daudali agu helekai.

81:12  Gei Au gu-diiagi-hua digaula gi-lodo nadau manawa de-hagalongo gi-heia nadau mee ala e-hiihai ginai.

81:13  Au bolo agu daangada la belee hagalongo-mai gi-di-Au, gei Au e-hiihai bolo digaula belee daudali agu helekai,

81:14  gei Au ga-hagalimalima ga haga-magedaa nia hagadaumee digaula, gaa-kumi digau huogodoo ala e-hai-baahi gi digaula.

81:15  Digau ala e-hudi nadau wou mai gi-di-Au la-ga-mmaadagu gaa-pala gi-lala i ogu mua. Nadau hagaduadua le e-hana-hua beelaa, hagalee lawa.

81:16  Gei Au ga-haangai goodou gi-nia palaawaa ala e-koia e-humalia, gaa-hai goodou gi-maaluu gi-nia mee-maangala lamu llauehe!”

Chapter 82

82:1  God e-dagi nia dagabuli o-di langi, i-lodo nia dagabuli o-nia god, gei Mee e-hai dana maanadu boloo,

82:2  “Goodou hudee heia godou gabunga hai-gee, goodou hudee hegeege-ina digau huaidu!

82:3  Hagamaamaa-ina nia donu o digau ala e-hagaloale mo nia dama ala gu-deai nadau maadua ai. Hai-gabunga gi-humalia gi digau ala nadau mee ai mo digau ala nadau hagamaamaa ai.

82:4  Hagadagaloaha-ina digaula gi-daha mo nia mogobuna o digau huaidu.

82:5  “Goodou e-de-iloo beleiaha? Goodou e-de-kabemee beleiaha! Goodou e-hala huoloo, deelaa di mee ne-hidi-ai nia donu gu-hagalee gi-daha mo henuailala-nei.

82:6  Gei Au guu-hai bolo goodou la nia god, goodou huogodoo la nia dama ni di Gowaa Aamua huoloo.

82:7  Malaa, goodou la-gaa-mmade gadoo be nia daangada dangada. Godou mouli la-ga-hagalee gadoo be nia mouli nia dama-daane di king.”

82:8  Meenei God, hanimoi e-dagi henuailala. Nia henua llauehe huogodoo la nia mee ni-aau.

Chapter 83

83:1  Meenei God, goe hudee noho deemuu. Goe hudee noho de-ngalungalua be noho hagakila!

83:2  Mmada! O hagadaumee la-gu-hagalongoaa, gei digau ala e-hudi nadau wou adu gi-di-Goe le e-hai-baahi.

83:3  Digaula e-haganohonoho hagammuni di-nadau hai dela belee hai-baahi gi au daangada. Digaula e-hai-baahi gi au daangada ala e-abaaba Kooe.

83:4  Digaula e-hai boloo, “Lloomoi, gidaadou gaa-oho nia henua digaula, gi-de-langahia Israel gaa-hana-hua beelaa.”

83:5  Digaula guu-baba gi di-nadau hai dela ne-haganoho guu-buni ngaadahi bolo ginaadou e-hai-baahi adu gi-di-Goe.

83:6  Digau aanei la-go digau Edom mo digau Ishmael, digau Moab mo digau Hagri,

83:7  digau Gebal, Ammon, mo Amalek, mo digau Philistia mo Tyre.

83:8  Assyria guu-buni gi digaula labelaa, tenua maaloo dela e-hagamaamaa digau Ammon mo digau Moab, ala go nia hagadili o Lot.

83:9  Heia gi digaula be dau hai dela ne-hai ang-gi digau Midian, mo ang-gi Sisera mo Jabin i-taalinga di Monowai Kishon.

83:10  Goe gu-haga-magedaa digaula i Endor, gei nia huaidina digaula guu-pala i-hongo di gelegele.

83:11  Heia ang-gi nia dagi digaula be dau hai dela ne-hai ang-gi Oreb mo Zeeb. Goe haga-magedaa-ina nia dagi digaula huogodoo be dau hai dela ne-hai ang-gi Zebah mo Zalmunna,

83:12  ala ne-hai boloo, “Gidaua gaa-kae tenua o God deelaa e-hai tau henua.”

83:13  Meenei God, mmaga-ina digaula gadoo be nia gelegele, be nia geinga laagau ala ma-ga-ili go di madangi gi-daha.

83:14  Hagabagia digaula gi-daha gi dau madangi gono, gadoo be-di ahi ma-gaa-dudu nia laagau i-lodo henua. Haga-madagudagu-ina digaula gi dau madangi maaloo, gadoo be-di ulaula ma-gaa-dudu nia gonduu gii-wele.

83:15  Hagabagia digaula gi-daha gi dau madangi gono, gadoo be-di ahi ma-gaa-dudu nia laagau i-lodo henua. Haga-madagudagu-ina digaula gi dau madangi maaloo, gadoo be-di ulaula ma-gaa-dudu nia gonduu gii-wele.

83:16  Meenei Dimaadua, heia digaula gi-langaadia, ge gi-modongoohia-e-ginaadou bolo Goe e-maaloo dangihi.

83:17  Heia digaula gi-magedaa mo-di mmaadagu huoloo gaa-hana-hua beelaa. Heia digaula gii-mmade i-lodo nadau langaadia huoloo.

83:18  Heia digaula gi-iloo bolo ma Kooe hua modo-Gooe dela go Yihowah, di Tagi aamua o-nia mee huogodoo i henuailala.

Chapter 84

84:1  Au e-aloho huoloo i do Hale Daumaha, meenei Yihowah Koia e-Aamua.

84:2  Au gu-hiihai huoloo bolo au gi-i-golo! Au gu-hidihidi bolo au e-noho i-lodo di Hale o Dimaadua. Dogu huaidina hagatau e-daahili tenetene ang-gi di God mouli.

84:3  Nia hagabuulinga manu lligi hogi guu-hai nadau waehongo, ge guu-hai nadau hale i-golo. Digaula e-benebene nadau dama i-baahi au gowaa hai-tigidaumaha, meenei Yihowah Koia e-Aamua, go dogu king mo dogu God.

84:4  E-tenetene huoloo go digau ala e-noho i-lodo doo Hale, e-dadaahili hagahagaamu Goe i-nia madagoaa huogodoo.

84:5  E-tenetene huoloo go digau ala ne-wanga ginai oo mahi, ala e-hiihai huoloo e-hula gi-di Gonduu Zion.

84:6  I di-nadau madagoaa e-lloo-adu laa-lodo di gowaa maangoo baba i Baca, gei di-maa guu-hai di gowaa e-hali-ai nia monowai. Gei nia uwa o-di madagoaa ga-uwauwa guu-nngolo huoloo gu-haga-honu di gowaa deelaa.

84:7  Digaula gu-tomo-aga gei gu-maaloo-mai i-di nadau lloo-adu, gei digaula ga-gidee di God o-nia god i-hongo Zion.

84:8  Meenei Yihowah go di God Koia e-Aamua, hagalongo-mai gi agu dalodalo. Meenei di God o Jacob, hagalongo-mai!

84:9  Meenei God, goe gi-hagahumalia-ina di-madau king, di king dela ne-hilihili Kooe.

84:10  Di laangi hua e-dahi i-lodo do Hale Daumaha, la-koia e-humalia i-nia laangi e-mana-(1,000) i-nia madagoaa ala i-golo. Dogu duu i-di ngudu di bontai di abaaba o-di Hale o dogu God, la-koia e-humalia i-di noho i-lodo nia hale o digau huaidu.

84:11  Yihowah=God la-go Mee hua go tadau duuli mo tadau king madamada, dela e-hagahumalia gidaadou i tumaalia mo-di hagalabagau. Mee e-hiihai e-wanga nia mee humalia ang-gi digau ala e-haihai di tonu.

84:12  Meenei Dimaadua Koia e-Aamua, e-tenetene huoloo go digau ala e-hagadagadagagee adu gi-di-Goe!

Chapter 85

85:1  Meenei Dimaadua, Goe nogo manawa-dumaalia huoloo gi dau henua. Goe ne-hai Israel gi-maluagina labelaa.

85:2  Goe gu-dumaalia nia huaidu o au daangada, mo-di dumaalia gi digaula nia hala digaula huogodoo.

85:3  Goe gu-hagalee hagawelewele gi digaula, gu-daahi-hua do hagawelewele damanaiee.

85:4  Meenei God di-madau Dangada Hagamouli, laha-mai gimaadou gi-muli gi doo baahi, dugua do manawa dee-hiihai mai gi gimaadou!

85:5  Goe ga-hagawelewele-hua mai gi gimaadou gaa-hana-hua beelaa? Do hagawelewele la-hagalee dugu?

85:6  Heia gimaadou gi-maaloo labelaa, gei gimaadou, ala go au daangada, ga-hagaamu Goe.

85:7  Meenei Dimaadua, hagamodongoohia-ina mai gi gimaadou do manawa aloho, dumaalia-mai gi gimaadou do hagamouli.

85:8  Au e-hagalongo gi-nia mee a Yihowah go God ala e-helekai-ai. Mee e-hagababa-mai gi gidaadou, ala go ana daangada, di aumaalia, maa gidaadou hagalee hula labelaa gi-muli gi tadau hangahaihai dadaulia.

85:9  Ma e-donu bolo Mee ga-hagamouli digau ala e-hagalaamua Ia, gei di madamada o dono hagamouli gaa-noho i tadau henua.

85:10  Di aloho mo-di manawa-dahi gaa-buni, di tonu mo-di aumaalia ga-bulubulu-mai.

85:11  Tadau manawa-dahi gaa-tugi i-nua mai henuailala, gei di tonu o God ga-mmada-iha i-di langi.

85:12  Dimaadua gaa-hai gidaadou gi-haadanga-lamalia, gei tadau henua gaa-huwa dau-logo.

85:13  Di tonu la-gaa-hana i-mua Dimaadua, e-hagatogomaalia di ala o-Maa.

Chapter 86

86:1  Meenei Dimaadua, hagalongo-mai, helekai-mai, idimaa au gu-bagege, gu-deai dogu hagamaamaa ai.

86:2  Haga-dagaloaha-ina au gi-daha mo-di made, idimaa au e-manawa-dahi adu gi-di-Goe. Haga-dagaloaha-ina au, idimaa au tangada hai-hegau ni-aau, gei au e-hagadagadagagee adu gi-di-Goe.

86:3  Goe di God ni-oogu, malaa, Goe gi-manawa-dumaalia-mai gi-di-au. Au e-dalodalo adu gi-di-Goe mai i-nia luada gaa-hana gi-di boo.

86:4  Meenei dogu Dagi, heia dau dangada hai-hegau deenei gi-tenetene, idimaa au dela e-hai-aga agu dalodalo gi-di-Goe.

86:5  Goe e-humalia-mai gi gimaadou ge e-manawa-dumaalia, gei e-honu i-di aloho dee-modu ang-gi digau huogodoo ala e-dalodalo adu gi-di-Goe.

86:6  Meenei Dimaadua, hagalongo-mai gi dagu dalodalo, hagalongo-mai gi dagu gahigahi i-di hagamaamaa.

86:7  Au e-gahigahi Goe i-nia madagoaa haingadaa, idimaa Goe dela e-haga-gila agu dalodalo.

86:8  Ma deai di god e-hai be Goe ai, meenei Tagi, ma tangada ne-hai ana mee be au mee ala ne-hai ai.

86:9  Nnenua llauehe huogodoo ala ne-hai Kooe ga-lloomoi, ga-pala-adu gi-di-Goe. Digaula ga-hagaamu do ingoo.

86:10  Goe e-mogobuna ge e-hai au hagadilinga mee hagagoboina, ma deelaa-hua Kooe di God.

86:11  Aago-ina au, meenei Dimaadua, gi au mee ala e-hiihai ginai belee hai ko-au, gei au ga-hagalongo-adu gi-di-Goe mo-di manawa-dahi. Aago-ina au gi-di hai dela e-hai-hegau adu gi-di-Goe mai i-lodo dogu manawa hagatau.

86:12  Meenei dogu Dagi go dogu God, au ga-hagaamu Goe mai i-lodo dogu manawa hagatau. Au ga-hagalaamua do ingoo gaa-hana-hua beelaa.

86:13  Idimaa e-damanaiee hualaa behee go do aloho deemodu i-di-au! Goe ne-haga-dagaloaha au gi-daha mo taalunga.

86:14  Meenei God, nia daangada hagamuamua gu-lloomoi belee hai-baahi mai gi-di-au. Di buini gau huaidu e-hagamada bolo ginaadou e-daaligi au gii-made, ala go nia daangada ala hagalee hagalongo-adu gi-di-Goe.

86:15  Gei goe, meenei dogu Dagi, Goe di God dumaalia huoloo ge aloho, Goe e-manawa hagakono ge humalia i-nia madagoaa huogodoo mo-di manawa-dahi.

86:16  Huli-mai gi-di-au, dumaalia-mai gi-di-au. Haga-maaloo-ina-aga au mo-di haga-dagaloaha-ina au, idimaa au e-hai-hegau-adu gi-di-Goe, gadoo be dogu dinana.

86:17  Meenei Dimaadua, haga-modongoohia-ina mai gi-di-au di hai o o humalia, gei digau ala e-hagadugina-e-ginaadou au la-ga-langaadia ma-ga-mmada-adu gi dau hai dela ma-ga-haga-manawa lamalia au, mo-di hagamaamaa au.

Chapter 87

87:1  Dimaadua guu-hau dana waahale damana i-hongo di gonduu haga-madagu.

87:2  Mee koia e-aloho di waahale damana go Jerusalem i-nia waahale llauehe o Israel ala i-golo.

87:3  Kooe go di waahale damana a God, hagalongo gi-nia mee humalia a God ala e-helekai i-di-goe,

87:4  “Dogu madagoaa ma-gaa-hihi gi-lala nia ingoo o-nia henua ala e-hagalongo-mai gi-di-Au, gei Au gaa-dau Egypt mo Babylonia madalia. Au gaa-dau labelaa digau Philistia, mo Tyre mo Ethiopia gi-baahi digau Jerusalem.”

87:5  Nia daangada huogodoo ga-helekai i-di gili o Zion, bolo nia henua huogodoo la-ne-daamada mai i-golo, gei Tangada Aamua Muginua gaa-hai a-mee gi-maaloo.

87:6  Dimaadua gaa-hihi nia ingoo digau o-nia henua ala i-golo gi-lodo dana beebaa, gaa-hai digaula huogodoo gii-hai nia daangada donu o Jerusalem.

87:7  Digaula e-gonigoni mo-di dadaahili boloo, “Zion deelaa di gowaa e-daamada-ai tadau hagahumalia!”

Chapter 88

88:1  Meenei Dimaadua, go dogu God mo dogu Dangada Hagamouli, au e-dangidangi mai luada gaa-hana-loo gi-di boo, ma-gaa-boo gei au ga-hanimoi gi oo mua.

88:2  Hagalongo-mai gi dagu dalodalo. Hagalongo-mai gi dagu dangidangi i-di hagamaamaa!

88:3  Nia haingadaa e-logowaahee guu-tale mai gi-di-au, gei au gu-hoohoo gaa-made.

88:4  Au guu-hai gadoo be digau huogodoo ala i-golo ala gu-hoohoo gaa-mmade, ogu mahi huogodoo la-gu-hagalee.

88:5  Au guu-hudu gi-daha gi-baahi digau mmade. Au guu-hai gadoo be digau ala ne-daaligi ala e-mmoe i-lodo nadau daalunga, go digau ala gu-haga-de-langahia Kooe, ala gu-deemee di-kae nadau hagamaamaa mai i doo baahi.

88:6  Goe guu-hudu au gi-lodo di tua o taalunga, gi-lodo di luwa llala ge bouli dongoeho.

88:7  Do hagawelewele mai gi-di-au la-gu-daamaha huoloo i ogu nua, gei au gu-beehi gi-lala nia beau o-di hagawelewele deenei.

88:8  Goe ne-hai ogu ihoo hagaaloho gi-diiagi au. Goe guu-hai au gii-hai di mee huaidu i-baahi digaula. Au guu-tai gi-lodo gu-deemee di-ulu gi-daha.

88:9  Ogu golomada gu-paagege idimaa au gu-duadua. Meenei Dimaadua, nia laangi huogodoo gei au e-gahigahi Goe, ge e-daahi-aga ogu lima gi-di-Goe e-dalodalo.

88:10  E-hai behee? Goe e-hai au mogobuna ang-gi digau ala guu-mmade? Digaula ga-mouli-aga ga-hagaamu Goe?

88:11  Digau mmade ala i-lodo nia daalunga le e-helehelekai i-di hai o do aloho waalooloo ang-gi ginaadou, be e-helehelekai i-di hai o do manawa-dahi ang-gi ginaadou i-lodo tenua o digau mmade?

88:12  E-hai behee, o mogobuna gu-modongoohia i-lodo di gowaa bouli, be go do dumaalia i-lodo tenua o digau ala gu-haga-de-langahia?

88:13  Meenei Dimaadua, au e-gahigahi Goe belee hagamaamaa au. Nia luada huogodoo gei au e-dalodalo adu gi-di-Goe.

88:14  Meenei Dimaadua, Goe guu-hudu au gi-daha beleiaha? Goe guu-huli gi-daha mo au beleiaha?

88:15  Mai i dogu damagiigi, gei au nogo mmaemmae gu-hoohoo bolo gaa-made. Au gu-deai ogu mahi ai, gu-deemee di-hagakono-mai i au hagaduadua.

88:16  Do hagawelewele damanaiee gu-hagahuaidu au, dau dadaaligi bolo gaa-hai au gii-made.

88:17  I-di waalooloo di laangi dogomaalia, gei nia maa e-haganiga mai i dogu gili gadoo be-di mmidi o-di labagee. Nia maa e-haganiga mai i dogu gili i-nia baahi huogodoo.

88:18  Goe guu-hai hogi ogu ihoo hagaaloho gi-diiagi au. Malaa, di bouli dongoeho la deelaa-hua go dogu ihoo.

Chapter 89

89:1  Meenei Dimaadua, au ga-daahili i do aloho dee-odi gaa-hana-hua beelaa. Au ga-hagadele di hai o do manawa-dahi gaa-hana-hua beelaa.

89:2  Au e-iloo bolo do aloho la-deai dono hagaodi ai, gei do manawa-dahi le e-hai-hua beelaa, hagalee hulihuli-loo e-hai gadoo be-di langi.

89:3  Goe gu-helekai, “Au guu-hai dagu hagababa ang-gi dagu dangada ne-hilihili-aga. Au ne-hagababa ang-gi dagu dangada hai-hegau go David boloo,

89:4  ‘Tangada mai i-lodo do madawaawa gaa-hai di king i-nia madagoaa huogodoo. Au ga-madamada humalia do madawaawa-king gi-mau-dangihi gaa-hana-hua beelaa.’ ”

89:5  Meenei Dimaadua, digau o-di langi e-dadaahili i-nia mee haga-goboina ala e-hai Kooe. Digau ala e-dabu e-daahili e-haga-hagaamu do manawa-dahi.

89:6  Meenei Dimaadua, ma deai tangada i-di langi i-nua e-hai be Goe ai. Ma deai tangada di langi e-tungaadahi adu gi-di-Goe ai.

89:7  Tagabuulinga o digau ala e-dabu le e-mmaadagu i-di-Goe, digaula huogodoo e-hagalaamua Goe.

89:8  Meenei Yihowah go di God Koia e-Aamua, ma deai tangada ono mogobuna be Goe ai. Meenei Dimaadua, ma Kooe hua dela e-manawa-dahi-hua i-nia mee huogodoo.

89:9  Ma Kooe dela e-dagi di moana maaloo, gei go Kooe dela e-mee di-hagakila nia beau llauehaa.

89:10  Kooe dela ne-haga-magedaa di manu hagamadagudagu-dangada go Rahab, ga-daaligi a-mee gii-made. Ma Kooe dela ne-haga-magedaa o hagadaumee i oo mahi aamua.

89:11  Di langi i-nua la di mee ni-aau, mo henuailala labelaa. Ma Kooe dela ne-hai henuailala mo ono haga-honu huogodoo.

89:12  Kooe dela ne-hai bahi-i-ngeia mo bahi-i-ngaaga. Di Gonduu Tabor mo-di Gonduu Hermon e-dadaahili mo-di tenetene adu gi-di-Goe.

89:13  E-damanaiee go o mogobuna, gei e-aamua huoloo go oo mahi!

89:14  Do henua e-hagamau gi-di tonu mo-di hai-hegau donu. Di aloho mo-di manawa-dahi e-modongoohia-aga i-nia mee huogodoo ala guu-lawa-ai dau hai.

89:15  E-maluagina go nia daangada ala e-daumaha adu gi-di-Goe gi-nia daahili, ala e-mouli i-di maalama o do dumaalia!

89:16  Digaula e-tenetene mai-loo luada gaa-dae-loo gi-di boo i-di gili do ingoo, ge e-haga-hagaamu do dumaalia damanaiee.

89:17  Goe gu-gaamai gi gimaadou di mogobuna damanaiee bolo gi-aali i-nia madagoaa huogodoo. Ma go do aloho dela ne-hidi-mai-ai gimaadou ga-aali.

89:18  Meenei Dimaadua, ma Kooe dela ne-dugu-mai gi gimaadou di-madau hagaloohi. Go Kooe dela go di God Dabu o Israel dela ne-dugu-mai gi gimaadou di-madau king.

89:19  I-lodo-hua di moe dela adu gi-mua gei Goe gu-helekai gi au gau hai-hegau manawa-dahi boloo, “Au gu-hagamaamaa tangada-dauwa e-dau, gei Au gu-hilihili-aga dagu dangada i-lodo nia daangada, gaa-wanga gi mee dono lohongo-king.

89:20  Au gu-haga-noho-aga dagu dangada hai-hegau go David belee hai di king i dagu hagatulu a-mee gi-di lolo dabuaahia.

89:21  Ogu mahi ga-madalia a-mee i-nia madagoaa huogodoo, gei ogu mogobuna ga-hagamaaloo a-mee.

89:22  Ono hagadaumee ga-deemee-loo di-nadau hai-baahi-anga, gei digau huaidu ga-deemee di-aali i mee.

89:23  Au ga-dagadagahi gi-lala ono hagadaumee, gei e-daaligi gi-daha digau huogodoo ala e-de-hiihai gi mee.

89:24  Au e-aloho i mee, gei e-hagalaamua a-mee, gei Au gaa-hai a-mee gi-aali i ono hagadaumee i-nia madagoaa huogodoo.

89:25  Au ga-haga-damanaiee dono henua, tugi i-di Tai Mediterranean gaa-tugi i-di Monowai Euphrates.

89:26  Gei mee ga-helekai-mai gi-di-Au, ‘Kooe go dogu damana go dogu God. Kooe go dogu hagaloohi mo dogu hagamouli.’

89:27  Gei Au gaa-dugu a-mee bolo dagu dama-madua, dela e-aamua i-nia king huogodoo.

89:28  Gei Au e-dadaahi-hua dagu hagababa dela ne-hai gi mee i-nia madagoaa huogodoo, di hagababa deenei e-hana-hua beelaa, deai dono hagaodi ai.

89:29  Tangada mai i dono madawaawa gaa-hai di king i-nia madagoaa huogodoo, dono henua le e-noho-hua beelaa i-di waalooloo o-di langi i-nua.

89:30  “Gei maa dono madawaawa ga-de-hagalongo gi agu haganoho, gei hagalee daudali agu mee ala ne-haga-noho,

89:31  gei maa digaula ga-haga-balumee-hua agu helekai, ge hagalee hogi e-haga-kila-aga agu haganoho,

89:32  malaa, gei Au ga-hagaduadua digaula i nadau huaidu. Gei Au ga-daaligi digaula i nadau ihala.

89:33  Gei Au hagalee modu dogu aloho i David, be e-haga-hala dagu hagababa dela ne-hai gi mee.

89:34  Au hagalee e-oho dagu hagababa dela ne-hai ang-gi mee, be e-daa dahi mee i-di hagababa dela ne-hai ang-gi mee.

89:35  “Au gu-hagamodu hagadahi i dogu ingoo dabu boloo: Au hagalee-loo e-hai-kai tilikai ang-gi David.

89:36  Dono madawaawa e-hana-hua beelaa i-nia madagoaa huogodoo, gei Au ga-hagaloohi dono henua i-di waalooloo o-di maahina o-di laa.

89:37  Dono lohongo-king gaa-noho mau-hua beelaa be-di malama, dela e-gila-mai hua beelaa i-lala di langi.”

89:38  Meenei God, Goe e-hagawelewele gi dau king dela ne-hilihili-aga, Goe guu-hudu a-mee gi-daha, guu-dugu gi-daha mo Goe.

89:39  Goe gu-oho dau hagababa dela ne-hai ang-gi dau dangada hai-hegau, gei guu-hudu gi-lala dono hau-king gi-lodo di gelegele.

89:40  Goe gu-oho gi-lala di abaaba o dono waahale, gei gu-oho hogi dana gowaa hai-dauwa.

89:41  Digau huogodoo ala ma-ga-hula-laalaa, digaula e-gagaiaa nia goloo a-maa, gei digau ala i dono baahi e-gadagada gi mee.

89:42  Gei Goe guu-dugu ang-gi ono hagadaumee di mogobuna o-di aali, gei guu-hai digaula huogodoo gi-tenetene.

89:43  Ma Kooe dela ne-hai ana goloo-dauwa gi deai ono hadinga ai, gaa-hai a-mee gi-magedaa i-lodo tauwa.

89:44  Gei Goe dela ne-daa dono dogodogo-king, gaa-hudu di lohongo-king o-maa gi-lodo nia gelegele.

89:45  Goe ne-hai a-mee gi-madumadua i-mua dono madagoaa, gaa-dugu-anga di haadanga-balua gi mee.

89:46  Meenei Dimaadua, Goe ga-haga-ngala Goe gaa-hana-hua beelaa? Malaa, e-waalooloo behee go do hagawelewele dela ma-ga-ulaula gadoo be-di ahi?

89:47  Goe gi-langahia di bodobodo o dogu mouli. Goe gi-langahia bolo Goe ne-hai gimaadou nia daangada hua dangada!

89:48  Ma koai dela e-mee di-mouli hagalee made? Ma koai dela e-mee di-bida daa ia gi-daha mo dono daalunga?

89:49  Meenei di-madau Dagi, aahee nia haga-modongoohia namua i-di hai o do aloho? Aahee au hagababa ala ne-hai ang-gi David?

89:50  Goe hudee de-langahia digau ala ne-haganneennee au, go dau dangada hai-hegau, mo dogu manawa-hagakono gi-nia haganneennee huogodoo o digau bouli.

89:51  Meenei Dimaadua, o hagadaumee e-haganneennee dau king dela ne-hilihili-aga! Digaula e-haganneennee a-mee i-nia madagoaa huogodoo ala ma-gaa-hana ginai mee.

89:52  Hagaamuina Dimaadua gaa-hana-hua beelaa! Amen! Amen!

Chapter 90

90:1  Meenei Tagi, Goe go di-madau gowaa nogo noho-ai i-nia madagoaa huogodoo.

90:2  I-mua dau hai nia gonduu mo dau hai henuailala, Goe go di God dee-odi, gei go di God e-noho dono hagaodi ai, gaa-hana-hua beelaa.

90:3  Goe dela ne-helekai-mai gi gimaadou bolo gii-hula labelaa gi-di gowaa dela nogo iei gimaadou. Goe e-huli gimaadou gii-hai labelaa nia gelegele.

90:4  Nia ngadau e-mana i doo baahi le e-hai-hua be-di laangi e-dahi, e-hai gadoo be anaahi, dela gu-doo gi-daha, e-hai gadoo be-di aawaa bodobodo o-di boo.

90:5  Goe e-haga-mmaa gimaadou gi-daha be-di labagee, di waalooloo o madau mouli le e-bodobodo-hua be-di midi. Di waalooloo o madau mouli e-hai gadoo be nia geinga-tolo ala e-tomo-aga i-di luada,

90:6  gaa-tomo, ga-moholoholo gi-daha, ga-maangoo hiahi, gaa-mmade.

90:7  Go do hagawelewele dela e-kili-iei gimaadou gi-daha. Gimaadou gu-mmaadagu huoloo i do hagawelewele damanaiee mai gi gimaadou.

90:8  Goe guu-dugu madau huaidu i oo mua, madau huaidu ala e-de-gidee, gei Goe e-gidee nia maa.

90:9  Madau mouli la-gu-podo-mai i do hagawelewele, gei e-limalima dono maa gi-daha, e-hai gadoo be-di lee haga-moolee.

90:10  Di waalooloo o madau mouli la nia ngadau hua e-mada-hidu, e-mee di-hana e-tugi e-huowalu maa gimaadou e-mouli maaloo, gei di waalooloo o madau mouli ga-hidi-mai-iei gimaadou gaa-noho dee-baba ge haingadaa. Di mouli e-limalima dono hagaodi gei gimaadou ga-hagalee.

90:11  Koai gu-hagalongo-ia i-deia di mahi o do hagawelewele? Koai e-iloo-ia di madagu o do hagawelewele dela ma-ga-gaamai?

90:12  Aago-ina-mai gi gimaadou be dehee di bodobodo o madau mouli, gei gimaadou ga-kabemee.

90:13  Dehee di waalooloo o do hagawelewele? Meenei Dimaadua, goe gi-hila-mai gi gimaadou, go au gau hai-hegau!

90:14  Haga-honu-ina gimaadou gi do aloho dee-odi i-nia luada, gii-mee-ai gimaadou di-daahili mo-di tenetene i-di waalooloo o madau mouli.

90:15  Gaamai gi gimaadou di noho manawa lamalia, gi-tungaadahi gi dau hai dela ne-hai gimaadou gi-manawa-gee i-di waalooloo o di-madau madagoaa nogo noho i-lodo di haingadaa.

90:16  Dugua-mai gi gimaadou, ala go au gau hai-hegau, gi-gidee-gimaadou o hangahaihai mogobuna. Heia madau hagadili gi-gidee-ginaadou do maaloo madamada.

90:17  Meenei Tagi go di-madau God, dau hagahumalia gi-madalia gimaadou. Heia gimaadou gii-gila i madau mee huogodoo ala e-haihai!

Chapter 91

91:1  Be koai e-dugu-anga ia gi Dimaadua e-benebene, geia gaa-noho i-lala nia madamada humalia o Dimaadua Koia e-Aamua.

91:2  Tangada deelaa e-mee di-helekai gi Mee, “Goe go dogu Dangada Daa mo dogu Abaaba. Goe go dogu God, dela e-hagadagadagagee ginai au.”

91:3  Mee ga-benebene-mai goe gi-daha mo nia mee hagalliga huogodoo ala e-de-gidee, ge mai gi-daha mo nia hagadilinga magi huogodoo ala ga-hidi-mai-iei goe gaa-made.

91:4  Mee gaa-gahu goe gi ono bakau, gei Mee ga-benebene goe hagahumalia. Dono manawa-dahi ga-benebene mo-di abaaba goe.

91:5  Gei goe ga-hagalee madagu i-nia mee balua i-di boo, be nia heebagi hagalimalima i-di aa,

91:6  be nia hagadilinga magi ala e-tale-adu hagalimalima i-lodo di bouli, be go nia hagadilinga mee huaidu ala e-daaligi dangada gii-made i-lodo di maalama o-di aa.

91:7  Dolomaa, nia daangada e-mana gaa-tinga gi-lala i doo baahi guu-mmade, e-madangaholu-mana dangada guu-mmade i doo gili hagatau, gei goe hagalee lauwa.

91:8  Goe gaa-mmada ga-gidee nia daangada huaidu ala ma-ga-hagaduadua.

91:9  Goe guu-hai Dimaadua go doo duuli, guu-hai Dimaadua Aamua Muginua di abaaba ni-oou.

91:10  Deai di haingadaa e-tale adu gi-di-goe ai, ge deai di hagaduadua e-hanimoi gi-hoohoo-adu gi do guongo ai.

91:11  God ga-dugu-adu ana daangada di-langi e-madamada humalia i-di-goe, e-abaaba goe i oo ala huogodoo ala e-haele-iei goe.

91:12  Digaula ga-daahi goe gi-nua gi nadau lima gi-dee-tugi-hua oo wae i-nia hadugalaa.

91:13  Goe ga-dagadagahi nia laion mono gihaa, nia laion llamu-dauwa mono gihaa poisin.

91:14  Dimaadua ga-helekai, “Au ga-benebene digau ala e-aloho i-di-Au, ge e-abaaba digau ala e-iloo-ginaadou au bolo au go Yihowah.

91:15  Digaula ma-gaa-gahi Au, gei Au gaa-hila ang-gi digaula. Digaula ma-gaa-tale gi-di haingadaa, gei Au ga-madalia digaula. Au ga-benebene digaula mai gi-daha, ga-hagalaamua digaula.

91:16  Au gaa-dugu ang-gi digaula gi-mouli waalooloo. Au ga-benebene digaula.”

Chapter 92

92:1  Ma e-humalia behee ma-ga-danggee-adu gi-di-Goe, meenei Dimaadua, ge daahili e-hagalaamua do ingoo, go di God di Gowaa Aamua,

92:2  gei e-hagadele di hai o do aloho dee-modu i-nia luada huogodoo, mo do manawa-dahi i-nia boo huogodoo,

92:3  ngaadahi mo nia lee o-nia uga o-nia mee hai-daahili, mo-di lee o-di ‘harp’.

92:4  Meenei Dimaadua, au hegau maaloo-dangihi guu-hai au gi-tenetene. Idimaa go au mee ala ne-hai, au e-daahili tenetene.

92:5  Meenei Dimaadua, au mee ala ne-hai le e-humalia huoloo! Au mee ala e-hagamaanadu Kooe le e-donu-ngadaa ginai gimaadou!

92:6  Deenei di mee a digau dadaulia e-deemee di-iloo-ai, ge digau ala e-de-kabemee e-deemee di-modongoohia, dela boloo:

92:7  Digau huaidu le e-mee di-tomo be nia geinga, ge digau ala e-hai nadau mee hala le e-mee di maluagina, malaa digaula e-daaligi gi-daha,

92:8  idimaa Kooe, meenei Dimaadua, dela di tagi aamua ga-hana-hua dono hagaodi ai.

92:9  Meenei Dimaadua, gimaadou e-iloo bolo o hagadaumee la-gaa-mmade, gei digau huaidu huogodoo la-ga-magedaa.

92:10  Goe guu-hai au gi-maaloo gadoo be-di kau llamu-dauwa. Goe gu-haga-humalia au gi-di tenetene damanaiee.

92:11  Au gu-gidee di hagamagedaa o ogu hagadaumee, gei gu-longono-eau nia tangitangi o digau ala ne-hai di huaidu mai gi-di-au.

92:12  Digau ala e-haihai nia mee donu la-gaa-tomo hagadubuagina gadoo be nia niu. Digaula gaa-tomo gadoo be nia laagau ‘cedar’ o Lebanon.

92:13  Digaula e-hai gadoo be nia laagau e-dogi i-lodo di hale a Dimaadua, e-tomo hagadubuagina i-lodo di Hale Daumaha o tadau God.

92:14  Digaula gu-mmaadua ge huwa daulogo hua igolo, gei e-tomo halatee i-nia madagoaa huogodoo be nia laagau hoou dogo-tomo-aga.

92:15  Deenei le e-hagamodongoohia bolo Dimaadua le e-donu, deai di mee e-hala i-baahi dogu Hagaloohi ai.

Chapter 93

93:1  Dimaadua la di King. Mee e-laagei gi-nia mahi mo nia madamada. Henuailala gu-mau-dangihi gi dono lohongo, gu-deemee di-ngalungalua.

93:2  Meenei Dimaadua, do lohongo-king la-nogo mau-dangihi mai loo i taamada, gaa-dae-mai gi dangi-nei, gei Goe nogo i-golo mai taamada.

93:3  Meenei Dimaadua, di llala di moana e-ngoloolo, digaula e-ngoloolo-loo gi-nua.

93:4  Dimaadua e-dagi di langi i ono mogobuna. Ono mogobuna koia e-mahi i-di ngoloolo o-di moana, ge koia e-maaloo i-nia beau llauehaa o-di moana.

93:5  Meenei Dimaadua, au haganoho le e-waalooloo-hua beelaa, gei do Hale Daumaha la-koia e-dabuaahia huoloo, gaa-hana-hua beelaa.

Chapter 94

94:1  Meenei Dimaadua, Goe go di God dela e-daaligi au daangada. Hagamodongoohia-ina-aga do hagawelewele!

94:2  Goe Tangada Hai-Gabunga o-nia daangada huogodoo. Du-gi-nua, wanga-ina gi digau hagamuamua nia mee ala e-tau ang-gi digaula!

94:3  E-waalooloo behee go digau huaidu ma-ga-manawa lamalia? E-waalooloo behee, meenei Dimaadua?

94:4  E-waalooloo behee go digau hai mee hala ma-ga-hagamuamua, mo-di hagapuu gi nadau hai-hai mee hala?

94:5  Meenei Dimaadua, digaula e-hai haga-huaidu au daangada, e-hagammaemmae au daangada.

94:6  Digaula gu-daaligi gii-mmade nia ahina ala guu-mmade nadau lodo mo nia dama ala nadau maadua ai, gei e-daaligi gii-mmade digau mai i-daha ala e-noho i-di-madau henua.

94:7  Digaula e-hai boloo, “Dimaadua hagalee mmada-mai gi gimaadou. Di God o Israel le e-de-gidee-Ia gimaadou.”

94:8  Agu daangada, goodou e-aha ala e-longo-buna gei e-dadaulia? Goodou e-kabemee ma-gaa-hee?

94:9  God ne-hai tadau dalinga, Mee e-deemee di-hagalongo? Mee ne-hai tadau golomada, Mee e-deemee di-mmada?

94:10  Mee e-hagaoho hagawelewele gi-nia daangada, Mee hagalee ga-daaligi digaula? Mee tangada agoago ni digau huogodoo, Mee ana kabemee ai?

94:11  Dimaadua e-iloo-Ia nadau mee ala e-hagamaanadu. Mee e-iloo-ia nia balu hagamaanadu ala i nadau lodo.

94:12  Meenei Dimaadua, e-tenetene hualaa behee go au daangada ala e-aago, digau ala e-aago Kooe gi au haganoho!

94:13  Goe guu-hai digaula gi-hagamolooloo gi-daha mo nia laangi haingadaa, gaa-dae-loo gi-di luwa dela guu-geli belee hele-ai digau huaidu.

94:14  Dimaadua la-hagalee kili gi-daha ana daangada. Mee hagalee diiagi ana daangada.

94:15  Di tonu gaa-gida labelaa i-lodo nia gowaa hai-gabunga, gei digau huogodoo ala e-humalia ga-hagamaamaa di-maa.

94:16  Ma koai dela gu-duu-aga e-hagamaamaa au e-hai-baahi gi digau huaidu? Ma koai dela gu-madalia au e-hai-baahi gi digau ala e-hai nadau mee huaidu?

94:17  Maa nei bolo Dimaadua la-ne-hagalee hagamaamaa au, gei au gu-limalima-hua di-hana gi tenua o digau mmade.

94:18  Au gu-helekai, “Au gaa-doo”, gei do aloho dee-modu gu-daahi au, Meenei Dimaadua.

94:19  Dogu madagoaa ma-ga-de-nnoomaalia ge hagabaubau e-logo, gei Goe e-hai au gi-manawa lamalia ge hai labelaa au gi-tenetene.

94:20  Goe hagalee hiihai gi digau hai-gabunga huaidu, ala e-hai nia mee ala e-bule go taganoho bolo hudee heia,

94:21  go digau ala e-haganohonoho nadau hai ala belee hai-baahi gi digau humalia, e-hagi-aga digaula e-daaligi gii-mmade.

94:22  Gei Dimaadua gu-hagamaamaa au, dogu God gu-abaaba au.

94:23  Mee ga-daaligi digaula i digaula ala ne-hai nadau hai huaidu, ga-haga-mmaa digaula gi-daha i-nia hala digaula ala ne-hai. Dimaadua go tadau God ga-daaligi la digaula gi-hagalee.

Chapter 95

95:1  Lloomoi, gidaadou e-hagaamu a Dimaadua! Gidaadou e-daahili hagaamu a God dela e-abaaba gidaadou!

95:2  Gidaadou gi-lloomoi gi-heia tadau danggee hagaamu i-mua o Mee, mo-di tenetene dadaahili nia daahili hagaamu.

95:3  Idimaa, Dimaadua la di God mogobuna, di King dela i-nua nia god huogodoo.

95:4  Go Mee dela e-dagi henuailala hagatau, e-tugi i-di gowaa llala i henuailala gaa-hana gi-di ulu nia gonduu.

95:5  Go Mee dela e-dagi di moana dela ne-hai go Mee, mono henua huogodoo ala ne-hai go Mee.

95:6  Lloomoi, gidaadou e-pala gi-lala e-daumaha gi Mee, gidaadou e-dogoduli i-mua o Dimaadua dela ne-hai gidaadou!

95:7  Mee go tadau God. Gidaadou ala go ana daangada e-madamada humalia-ai, gidaadou go ana hagabuulinga siibi ala e-hahaangai. Hagalongo dangi-nei gi ana helekai ala e-helekai-ai:

95:8  “Goodou hudee hamaaloo godou lodo, be-di hai o godou maadua-mmaadua i-mua ala nogo i Meribah, gadoo be nadau hai huaidu ala nogo haihai i-di anggowaa i Massah.

95:9  Digaula gu-gidee-ginaadou agu hegau mogobuna ala ne-hai ko-Au i nadau baahi, gei digaula gu-hagamada Au.

95:10  Au nogo hagawelewele gi digau aalaa i-nia ngadau e-mada-haa, gei Au gaa-hai: ‘Digaula e-huli nadau manawa gi-daha mo Au, gei digaula hagalee hagalongo gi agu haganoho!’

95:11  Au gu-hagawelewele guu-hai dagu hagababa mau-dangihi boloo: ‘Goodou hagalee-loo e-ulu gi-lodo tenua dela ne-hagababa ko-Au belee hagamolooloo-ai goodou i-no-lodo.’ ”

Chapter 96

96:1  Daahili ang-gi Dimaadua i taahili hoou! Goodou go digau huogodoo o henuailala, goodou daahili ang-gi Dimaadua!

96:2  Goodou daahili ang-gi Dimaadua mo-di hagahagaamuina dono ingoo! Goodou hagadele-ina di longo humalia i-nia laangi huogodoo bolo Mee dela ne-haga-dagaloaha gidaadou.

96:3  Goodou hagadele-ina ono madamada ang-gi nia henua, mo-di hai o ana hegau haga-goboina gi-nia daangada huogodoo.

96:4  Dimaadua le e-aamua ge e-humalia belee hai-loo gi-hagaamu huoloo giibeni. Mee belee hai gi-hagalabagau laa-hongo nia god huogodoo.

96:5  Nia god o-nia guongo huogodoo ala i-golo, la nia balu-god hua. Gei-ogo Dimaadua la-go Mee dela ne-hai di langi.

96:6  Nia madamada mono mahi e-haganiga i-di gili o-Maa. Nia mogobuna mono madamada e-haga-honu dono Hale Daumaha.

96:7  Digau huogodoo i henuailala, goodou hagaamuina Dimaadua. Goodou hagaamuina ono madamada mo ono mogobuna.

96:8  Goodou hagaamuina di ingoo madamada o Dimaadua. Goodou gaamai godou tigidaumaha, lloomoi gi-lodo dono Hale Daumaha.

96:9  Pala gi-lala i-mua o Mee dela e-dabu, i dono madagoaa dela ma-ga-hanimoi. Digau huogodoo i henuailala gi-polepole i-mua o Mee!

96:10  Goodou hagi-anga-ina gi-nia guongo huogodoo boloo, “Dimaadua la-go di King! Henuailala la-gu-haga-noho gi dono lohongo, gei e-deemee di-haga-ngalua. Dimaadua ga-hagi-aga nia daangada huogodoo i-di tonu.”

96:11  Henuailala mo-di langi, goolua tenetene! Di moana mo ono mee huogodoo ala i no-lodo, goodou ngoloolo.

96:12  Nia henua mo ono mee huogodoo ala i no-lodo, goodou tenetene! Nia laagau ala i lodo nia henua ga-wwolowwolo tenetene

96:13  i-di madagoaa o Dimaadua ma-ga-hanimoi e-dagi henuailala. Mee gaa-dagi digau henuailala gi-di tonu mo-di humalia.

Chapter 97

97:1  Dimaadua la di king! Henuailala gi-tenetene! Tenetene, goodou go nia henua o-di moana!

97:2  Nia gololangi mo-di bouli-dongoeho e-haganiga i-di gili o-Maa. Mee e-dagi ana mee gii-donu gi-humalia.

97:3  Di ahi e-hana i-mua o Mee, e-dudu nia hagadaumee o-Maa ala i-di gili o-Maa.

97:4  Di ila a-Maa gu-inaina henuailala. Henuailala guu-mmada gi-di-maa, gu-bolebole.

97:5  Nia gonduu gu-waiwai be nia kiliidi i-mua Dimaadua, i-mua di Tagi o henuailala huogodoo.

97:6  Di langi i-nua e-hagamodongoohia nia humalia o-Maa, nia daangada huogodoo e-mmada gi-nia madamada o-Maa.

97:7  Digau huogodoo ala e-daumaha gi-nia balu-god gu-haga-langaadia. Nia god huogodoo le e-pala gi-lala i-mua Dimaadua.

97:8  Digau Zion gu-manawa lamalia, nia waahale o Judah gu-tenetene, idimaa go dau hagi-aga, meenei Dimaadua.

97:9  Meenei Yihowah, Di Gowaa Aamua, Goe dela e-dagi henuailala hagatau, Goe koia e-aamua i-nia god huogodoo.

97:10  Dimaadua e-aloho i digau ala e-hagadugina di huaidu. Mee e-abaaba nia mouli o ana daangada. Mee e-daa digaula gi-daha mo nia mogobuna o digau huaidu.

97:11  Di maalama e-daha i-hongo digau ala e-donu, mo-di manawa lamalia i-hongo digau ala e-humalia.

97:12  Goodou huogodoo ala guu-donu la-gi-manawa lamalia idimaa go di hai a Dimaadua dela ne-hai adu gi goodou! Goodou gi-langahia di mee a God dabuaahia dela ne-hai mo-di danggee gi Mee.

Chapter 98

98:1  Daahili i-nia daahili hoou ang-gi Dimaadua. Mee ne-hai ana mogobuna haga-goboina! Mee ne-aali mai i ono mogobuna mo ono maaloo dabuaahia!

98:2  Dimaadua gu-haga-iloo dono aali, Mee gu-hagamodongoohia gi-nia henua llauehe dono mogobuna hagamouli.

98:3  Mee gu-daudali-hua dana hagababa dela ne-hai ang-gi digau Israel i-di manawa-dahi mo dono aloho dee-odi ang-gi digaula. Nia daangada huogodoo i-nia madagoaa huogodoo gu-gidee-ginaadou di aali o tadau God.

98:4  Goodou huogodoo ala i henuailala, daahili i-nia daahili haga-tenetene ang-gi Dimaadua. Hagaamu-ina a-Mee gi godou daahili mo-di wwolowwolo tenetene!

98:5  Daahili hagahagaamu-ina a Dimaadua! Daahili i godou harp!

98:6  Ili-hia godou labaa mo godou labaa madaagoo-manu, mo-di wwolowwolo tenetene ang-gi Dimaadua go tadau king!

98:7  Gei goodou, go nia moana mo ono mee huogodoo ala i ono lodo, goodou gi-ngoloolo. Henuailala mo ono mee huogodoo ala i ono nua, goodou daahili!

98:8  Goodou go nia monowai llauehe, goodou paapaa godou lima. Goodou go nia gonduu, goodou huogodoo daahili mo-di tenetene i-mua o Dimaadua,

98:9  idimaa Mee gaa-dagi nia daangada o henuailala gi-di tonu mo-di humalia.

Chapter 99

99:1  Dimaadua la di king, malaa nia daangada ga-bolebole mmaadagu. Mee e-noho i-hongo dono lohongo king i-hongo nia ada-manu hai ono bakau, malaa, henuailala ga-lullulu.

99:2  Dimaadua i Zion le e-mogobuna huoloo. Mee koia e-aamua i-hongo nia henua huogodoo.

99:3  Nia daangada huogodoo ga-hagaamu di aamua mo-di madamada o-di ingoo o-Maa. Mee e-dabuaahia!

99:4  Meenei di King Aamua, Goe e-aloho i-nia mee ala e-donu. Goe ne-haganoho ang-gi digau Israel gi-mouli i-di mouli dela e-donu. Goe ne-gaamai di tonu mo-di humalia.

99:5  Hagaamu-ina Dimaadua, go tadau God, mo-di daumaha gi Mee i-mua di lohongo king o-Maa! Mee e-dabuaahia!

99:6  Moses mo Aaron ala go ana daangada hai-mee-dabu aamua, gei Samuel la-go tangada dela ne-dalodalo gi Mee. Digaula ne-gahigahi a Dimaadua, gei Mee gu-helekai mai gi digaula.

99:7  Mee ne-helekai gi digaula mai i-di waduu gololangi. Digaula gu-haga-kila-aga nia haganoho mono helekai ala ne-wanga go Mee gi digaula.

99:8  Meenei Dimaadua, go di-madau God, Goe gu-helekai gi au daangada. Goe gu-hagamodongoohia gi digaula bolo Goe di God dela e-dumaalia, ma e-aha maa Goe e-dadaaligi digaula i-nia huaidu digaula.

99:9  Hagaamu-ina Dimaadua, go tadau God, mo-di daumaha i-hongo di gonduu haga-madagu! Dimaadua, go tadau God le e-dabuaahia huoloo!

Chapter 100

100:1  Nia daangada huogodoo o henuailala gi-daahili ang-gi Dimaadua!

100:2  Daumaha ang-gi Dimaadua i-di tenetene. Lloomoi gi-mua o Mee mo nia daahili tenetene!

100:3  Heia gi-iloo bolo Dimaadua la-go God. Ma go Mee dela ne-hai gidaadou, gei gidaadou la nia mee ni Mee. Gidaadou la nia daangada ni Mee, gidaadou la di hagabuulinga-siibi ni Mee.

100:4  Ulu-adu gi-lodo di Hale Daumaha mo-di daahili i-nia daahili danggee. Ulu-adu gi-lodo di gowaa di Hale Dabu mo-di daahili hagaamu. Heia godou danggee ang-gi Mee mo-di hagaamu a-Mee.

100:5  Dimaadua le e-humalia, dono aloho e-dee-modu, ge dono manawa-dahi e-waalooloo-hua beelaa dono hagaodi ai.

Chapter 101

101:1  Au e-daahili-adu gi-di-Goe, meenei Dimaadua, au e-daahili i-di hai o-di manawa-dahi mo-di tonu.

101:2  Au ga-hagamahi ga-daudali di mouli madammaa. Ma-gaa-hee gei Goe ga-hanimoi gi-di-au? Au ga-mouli i-di mouli madammaa i dogu hale,

101:3  ga hagalee dumaalia gi-nia huaidu gii-hai. Au e-de-hiihai gi-nia hegau o digau ala guu-huli gi-daha mo God, au hagalee hagabuni gi digaula.

101:4  Au hagalee hai-kai-tilikai, gei au hagalee hagabuni ang-gi digau hai mee huaidu.

101:5  Au gaa-dugu tangada dela e-leelee hagamoolee huaidu i digau ala i-golo. Au hagalee hagabuni ang-gi tangada dela e-hagamuamua ge e-hagaamu ia.

101:6  Au gaa-donu-hua gi digau ala e-manawa-dahi ang-gi God, gei e-hai digaula gii-noho madalia au i-lodo dogu hale king. Digau ala e-hai-hegau humalia aalaa la digau e-mee di-hai agu gau hai-hegau.

101:7  Tangada hai-kai-tilikai e-noho i-lodo dogu hale ai. Tangada halahalau-dangada e-mee di-duu i ogu mua ai.

101:8  Nia laangi huogodoo gei au ga-daaligi gii-mmade digau hai mee huaidu ala i-lodo tadau henua. Au ga-hagabagi digau huaidu gi-daha mo-di waahale o Dimaadua.

Chapter 102

102:1  Meenei Dimaadua, hagalongo-mai gi dagu dalodalo, hagalongo-mai gi dagu dangidangi i-di hagamaamaa!

102:2  Dogu madagoaa ma-ga-haingadaa-mai gi-di-au, gei Goe hudee huli gi-daha mo au! Hagalongo-mai gi-di-au, mo-di helekai-mai hagalimalima i dogu madagoaa ma-ga-gahigahi Goe.

102:3  Dogu mouli e-ngudu-mai gadoo be-di huiahi, dogu huaidina e-wele gadoo be-di ahi.

102:4  Au guu-mae gadoo be nia geinga ne-mae, au dogu hiihai bolo e-miami ai.

102:5  Au e-nnguu mmae huoloo, au gu-hagalee hai be-di mee, aalaa-hua go di gili mo nia iwi.

102:6  Au e-hai gadoo be-di manu mamaangi dela hagalee gaidala i-lodo di anggowaa, e-hai gadoo be-di ‘owl’ i-lodo di hale mooho.

102:7  Au e-moe e-ala, au guu-hai gadoo be-di manu mamaangi e-dogo modogoia i tuatala.

102:8  Di laangi dogomaalia gei ogu hagadaumee e-haganneennee au, digau ala e-gadagada hagabalumee au le e-haga-hai-hegau dogu ingoo gi-haga-halauwa nia mee.

102:9  Idimaa go do hagawelewele huoloo, nia luaahi la-guu-hai agu meegai, ogu wai-dangi gu-unugi gi agu wai ala e-inu. Goe ne-dahiaga au gaa-hudu au gi-daha.

102:10  Idimaa go do hagawelewele huoloo, nia luaahi la-guu-hai agu meegai, ogu wai-dangi gu-unugi gi agu wai ala e-inu. Goe ne-dahiaga au gaa-hudu au gi-daha.

102:11  Dogu mouli le e-hai gadoo be-di malu o-di hiahi. Au guu-hai gadoo be nia geinga-tolo ne-maangoo.

102:12  Gei Goe, meenei Dimaadua, la di king dono hagaodi ai. Nia adu-daangada huogodoo ga-langalangahia Goe.

102:13  Goe ga-du-gi-nua ga-aloho i Zion. Ma-gu-dau-mai go do madagoaa dela belee hila gi mee, malaa, deenei di madagoaa humalia.

102:14  Au daangada hai-hegau e-aloho i Zion, ma e-aha maa mee gu-mooho. Digaula e-aloho i mee, ma e-aha maa mee gu-meheuheu dagidahi.

102:15  Nia daangada nia henua huogodoo ga-mmaadagu i Dimaadua, nia king huogodoo henuailala ga-mmaadagu i-nia mogobuna o-Maa.

102:16  Di madagoaa Dimaadua ma-gaa-hau labelaa Zion, gei Mee ga-hagamodongoohia-aga ono mahi aamua.

102:17  Mee ga-longono-ia ana daangada ala ne-kili gi-daha, ga-hagalongo gi-nia dalodalo digaula.

102:18  Hihia ang-gi nia adu-daangada ala e-lloo-aga maalia di hai o-nia mee a Dimaadua ala ne-hai, bolo nia daangada ala digi hagawoua di haanau la-gi-hagaamu a-Mee.

102:19  Dimaadua gu-mmada-ia i dono lohongo haga-madagu i-nua-loo, Mee gu-mmada-ia i-di langi i-nua gi henuailala.

102:20  Mee gu-longono-ia nia dangi-dangi manawa-gee o digau galabudi ga-haga-dagaloaha digau ala gu-haganoho bolo e-daaligi gii-mmade.

102:21  Gei di ingoo o-Maa ga-hagadele i-hongo Zion. Mee ga-hagaamu i Jerusalem,

102:22  i-di madagoaa nia daangada nia henua mo nia king ma-ga-dagabuli gi-di gowaa e-dahi, ga-dadaumaha gi Dimaadua.

102:23  Dimaadua guu-hai au gi-bagege, gei au e-dama-daane hua. Mee guu-hai dogu mouli gi-bodobodo.

102:24  Meenei God, Goe hudee daawa-ina dogu mouli gi-daha dolomeenei i-mua dogu madumadua. Meenei Dimaadua, Goe e-mouli-hua beelaa ga-hana-hua dono hagaodi ai.

102:25  Namua-loo gei Goe ne-hai henuailala, gei Goe ne-hai di langi i-nua gi oo lima donu.

102:26  Nia maa ga-hagalee, gei Goe e-noho hua igolo. Nia maa gaa-pobo gadoo be nia gahu. Goe gaa-kili nia maa gi-daha gadoo be nia gahu, gei nia maa ga-hagalee.

102:27  Gei Goe e-noho-hua beelaa i-nia madagoaa huogodoo, gei do mouli la-dono hagaodi ai.

102:28  Madau dama ga-mouli i-di aumaalia, di hagadili digaula ga-mouli mau-dangihi i-lala do madamada humalia.

Chapter 103

103:1  Dogu mouli-nei, hagaamuina Dimaadua! Dogu huaidina-nei, hagaamuina dono ingoo haga-madagu!

103:2  Dogu mouli-nei, hagaamuina Dimaadua, hudee de-langahia dono dumaalia.

103:3  Mee gu-haga-madammaa ogu huaidu huogodoo, ge e-hagahili ogu magi huogodoo.

103:4  Mee e-haga-dagaloaha au gi-daha mo taalunga, ga-hagahumalia au gi dono aloho mo tumaalia.

103:5  Mee e-haga-honu dogu mouli gi-nia mee humalia bolo gii-noho au beelaa dama-daane ge maaloo gadoo be-di ‘eagle’.

103:6  Dimaadua la tangada hai-gabunga e-hagamaamaa digau ala gu-haga-daamaha, gei e-wanga gi digaula nadau donu.

103:7  Mee gu-haga-modongoohia gi Moses ana hagamamaanadu, guu-hai digau Israel gii-mmada gi ana hegau mogobuna.

103:8  Dimaadua le e-dumaalia ge e-aloho, ge hagalee hagawelewele-ngoohia ge e-honu i-di aloho dee-odi.

103:9  Mee hagalee helekai hai-baahi gi-nia daangada i-nia madagoaa huogodoo. Mee hagalee hagawelewele gaa-hana-hua beelaa.

103:10  Mee hagalee hagaduadua gidaadou gii-tau gi tadau mee hala ala ne-hai, be e-hui gidaadou e-hagatau gi tadau ihala mo tadau huaidu ala ne-hai.

103:11  Tamanaiee o dono aloho i digau ala e-hagalabagau Ia, le e-hai gadoo be-di mogowaa gi-nua o-di langi mai i henuailala.

103:12  Dana hai dela ne-haga-mogowaa tadau huaidu gi-daha mo gidaadou, le e-hai gadoo be-di mogowaa i-mehanga o dua mo dai.

103:13  Di hai o tamana dela e-humalia gi ana dama, la deelaa gadoo di hai o Dimaadua dela e-humalia gi digau ala e-hagalabagau Ia.

103:14  Mee e-iloo-Ia nia mee ala ne-hai-ai gidaadou. Mee e-langahia bolo gidaadou la nia gelegele hua.

103:15  Gei gidaadou la nia daangada hua dangada, tadau mouli le e-hai gadoo be nia geinga-tolo. Gidaadou e-tomo ge e-huwa gadoo be-di akai lodo-henua,

103:16  gei di madangi ga-ili di-maa, gei di-maa gu-hagalee, tangada e-mmada labelaa gi-di-maa ai.

103:17  Gei di aloho o Dimaadua i digau ala e-hagalabagau Ia, le e-hai-hua be di-maa gaa-hana-hua beelaa. Gei di humalia o-Maa gaa-hana-hua beelaa ang-gi nia adu-daangada huogodoo

103:18  o digau ala e-daudali ana hagababa ge e-haga-gila-aga gii-donu ana haganoho.

103:19  Dimaadua la-gu-haga-noho dono lohongo-king i-di langi. Mee di King o-nia mee huogodoo.

103:20  Goodou hagaamuina Dimaadua, goodou go digau di-langi maaloo ge mogobuna ala e-daudali ana haganoho mo-di hagalongo gi ana helekai.

103:21  Goodou hagaamuina Dimaadua, goodou go nia mogobuna huogodoo o-di langi, goodou ala go ana gau-hai-hegau ala e-hai dono manawa!

103:22  Goodou hagaamuina Dimaadua, goodou go nia mee huogodoo a-Mee ala ne-hai, ala i-lodo nia gowaa huogodoo ala e-dagi go Mee. Dogu hagataalunga-nei, hagaamuina Dimaadua!

Chapter 104

104:1  Dogu hagataalunga-nei, hagaamuina Dimaadua! Meenei Dimaadua go dogu God, Goe e-aamua huoloo! Goe e-laagei gi-nia mogobuna mo nia madamada.

104:2  Goe e-gahu gi-di maalama. Goe ne-holo di langi be-di hale-laa,

104:3  gaa-hau dau hale i-nonua, i-hongo nia wai i-nua. Doo waga la aalaa go nia gololangi, gei Goe e-hana i-hongo di gololangi mo nia bakau o-di madangi.

104:4  Goe e-haga-hai-hegau nia madangi gadoo be nia daangada kae-hegau ni-aau, mo-di dabadaba o-di ila e-hai be nia hege ni-aau.

104:5  Goe ne-haga-noho henuailala gi-mau-dangihi gi-hongo dono hagamau, gei di-maa hagalee-loo e-ngalungalua gaa-hana-hua beelaa.

104:6  Goe ne-gahu henuailala gi-di moana gadoo be-di gahu laa-daha, gei nia wai guu-gahu nia gonduu.

104:7  Do madagoaa ne-hagabuhi gi-nia wai, gei nia maa guu-llele gi-daha. Digaula ne-longono dau hagadaba dela ne-hai, gaa-llele gi-daha.

104:8  Ma-ne-llele-ia i tomo nia gonduu e-llele gi-nia gowaa baba, gi-di gowaa dela ne-hagatogomaalia Kooe ang-gi nia maa.

104:9  Goe guu-dugu dau haga-geinga dela e-deemee di-hula nia maa nonua, e-duuli nia maa gi-dee-gahu labelaa henuailala.

104:10  Goe ne-hai nia monowai uwa-aga gii-hali gi-lodo nia gowaa baba, mo nia monowai e-mmidi i-mehanga nia gonduu.

104:11  Nia wai aanei le e-haga-inu nia manu ala i-lodo henua, deelaa di gowaa e-hagahili nia hieinu o-nia ‘donkey’-lodo-geinga.

104:12  Nia manu mamaangi e-hai nadau waehongo i-tomo nia laagau ala i taalinga nia monowai aalaa mo-di dadaahili.

104:13  Goe e-haga-doo dau uwa mai i-di langi gi-hongo nia gonduu, ga-haga-honu henuailala gi o maluagina.

104:14  Goe e-haga-tomo nia geinga-tolo ang-gi nia kau, gei nia laagau ang-gi nia daangada e-hai-hegau ai, bolo gii-mee-ai di hagatomo-aga di gai o tenua,

104:15  mo-di huwa mai nia waini ala e-haga-tenetene gimaadou, mo nia lolo-olib ala e-hagahumalia gimaadou, mo nia palaawaa ala e-hai gimaadou gi-maaloo.

104:16  Nia laagau-‘cedar’ o Lebanon gu-haga-magalillili hagahumalia, aalaa go nia laagau a Dimaadua ala ne-bida dogi go Mee.

104:17  Nia manu mamaangi e-hai nadau waehongo i-lodo nia laagau aalaa, gei nia maduge e-hai nadau waehongo i-tomo nia laagau-‘pine’.

104:18  Nia kuudi lodo-geinga e-noho i tomo nia gonduu i-nua, gei nia ‘rock badger’ e-pala hagammuni i-lodo nia hadugalaa.

104:19  Goe dela ne-hai di malama belee hagailongo nia malama o-di ngadau, gei di laa e-iloo-ia di madagoaa e-ulu-ai.

104:20  Goe ne-hai di boo, gei di madagoaa ma-ga-bouli, nia manu lodo-geinga huogodoo ga-lloomoi gi-daha.

104:21  Nia dama laion e-nguunguu i nadau madagoaa ma-ga-gumigumi nadau mee e-gai, ala ne-hagatogomaalia go God ang-gi digaula.

104:22  Di madagoaa di laa gaa-hobo, gei digaula gaa-hula gi nadau bongoo gaa-mmoe gi-lala.

104:23  Gei nia daangada gaa-hula gaa-hai nadau moomee, gaa-dae-loo gi-di hiahi.

104:24  Meenei Dimaadua, au mee ala ne-hai le e-logowaahee huoloo! Au mee huogodoo ala ne-hai la-ne-hai gi-di kabemee! Henuailala guu-honu i au manu ala ne-hai.

104:25  Dau moana e-damanaiee ge palaha, di gowaa dela e-noho-ai nia hagadilinga manu mono iga ala e-deemee di-dau, nia iga llauehe mono iga lligi.

104:26  Nia wagabaalii e-deledele i hongo di-maa, deelaa hogi di gowaa e-dadaagala-ai di manu dragon go ‘Leviathan’, di manu hagamadagudagu-dangada dela ne-hai Kooe.

104:27  Nia mee aalaa huogodoo e-hagadagadagagee-adu gi-di-Goe, bolo e-wanga nadau meegai i nadau madagoaa ma-ga-hiihai gi-nia maa.

104:28  Goe e-wanga nia maa gi digaula, gei digaula gaa-gai nia maa. Goe e-hagatogomaalia nia meegai, gei digaula ga-manawa lamalia.

104:29  Maa Goe gaa-huli gi-daha mo digaula, gei digaula ga-mmaadagu. Maa Goe ga-daa gi-daha do dogidogi mo digaula, gei digaula gaa-mmade gaa-hai labelaa nia gelegele ala ne-hai-ai digaula.

104:30  Malaa, maa Goe gaa-wanga do dogidogi gi digaula, gei digaula ga-mouli. Goe dela e-wanga gi henuailala di mouli hoou.

104:31  Nia madamada o Dimaadua gi-waalooloo-hua beelaa ga hana-hua dee-odi! Dimaadua gi-tenetene gi ana mee ala ne-hai!

104:32  Mee e-mmada-hua gi henuailala, gei henuailala ga-ngalungalua. Mee e-bili-hua gi-nia gonduu, gei nia gonduu gaa-gohu.

104:33  Au ga-daahili ang-gi Dimaadua i-di waalooloo o dogu mouli. Au ga-daahili e-hagaamu dogu God i-di waalooloo o dogu mouli.

104:34  Au e-hiihai bolo God gi-manawa-tene gi dagu daahili, idimaa, ma go Mee dela e-haga-manawa lamalia au.

104:35  Digau huaidu la-gi-daaligidia gi-daha mo henuailala, digau hai mee huaidu gi-heia gi-hagalee. Dogu hagataalunga-nei, hagaamuina Dimaadua! Hagaamuina Dimaadua!

Chapter 105

105:1  Goodou heia godou danggee gi Dimaadua, haga-dele-ina ono maaloo. Hagi-aga-ina gi-nia henua nia mee a-Mee ala ne-hai.

105:2  Daahili hagaamuina Dimaadua. Hagi-anga-ina nia mee haga-goboina a-Mee ala ne-hai.

105:3  Gidaadou gi-hagalaamua di ingoo dabu o-Maa. Digau huogodoo ala e-daumaha gi Mee gi-tenetene.

105:4  Hula gi Dimaadua, e-kae-ai godou hagamaamaa, mo-di dadaumaha gi Mee i-nia madagoaa huogodoo.

105:5  Goodou ala go di hagadili o Abraham, go dana dangada hai-hegau, goodou go di hagadili o Jacob, go taane dela ne-hilihili go Mee, goodou gi-langahia nia mogobuna haga-goboina a God ala ne-hai, mo nia hagamodu gabunga ala nogo hai go Mee.

105:6  Goodou ala go di hagadili o Abraham, go dana dangada hai-hegau, goodou go di hagadili o Jacob, go taane dela ne-hilihili go Mee, goodou gi-langahia nia mogobuna haga-goboina a God ala ne-hai, mo nia hagamodu gabunga ala nogo hai go Mee.

105:7  Mee go Dimaadua go tadau God. Nia helekai a-Maa le e-hai gi digau huogodoo ala i henuailala.

105:8  Mee ga-dadaahi-hua beelaa dana hagababa gaa-hana-hua beelaa, gei nia hagababa a-Maa le e-hai ang-gi nia adu-daangada e-mana-(1,000).

105:9  Mee ga-dadaahi-hua di hagababa dela ne-hai go Mee gi Abraham mo-di hagababa dela ne-hai gi Isaac.

105:10  Dimaadua la-guu-hai dana hagababa gi Jacob, di hagababa dela hua e-noho beelaa, dono hagaodi ai.

105:11  Mee ne-helekai, “Au ga-gowadu gi-di-goe tenua go Canaan, e-hai tenua ni-aau.”

105:12  Nia daangada a God la-nogo hogoohi, nogo noho i Canaan be digau henua-gee.

105:13  Digaula nogo tataele i-mehanga nia henua, i-mehanga tenua-nei mo tenua-nei.

105:14  Malaa, Dimaadua la-hagalee hai digaula gii-hai hagahuaidu go tangada, gei Mee gaa-bule nia king aalaa bolo gi-de-hagahuaidu digaula,

105:15  ga-helekai, “Goodou hudee hagahuaidu-ina agu gau hai-hegau ne-hilihili aanei. Hudee heia dahi mee huaidu gi agu soukohp.”

105:16  Dimaadua e-hagau-mai dana dau-magamaga gi-nia henua digaula, ga-daa gi-daha nia meegai huogodoo digaula.

105:17  Gei Mee ga-hagau dana daane i-mua digaula, go Joseph dela ne-hui gi-daha be-di hege.

105:18  Nia wae o-maa guu-nnoo gi-nia daula-baalanga, di uwa o-maa guu-nnoo gi-di baahi baalanga.

105:19  gaa-dae-loo gi-di kila-aga o ana kokohp ala ne-hai. Nia helekai o Dimaadua gu-haga-modongoohia bolo mee guu-donu.

105:20  Di king o Egypt gu-daa gi-daha a Joseph mo-di hale-galabudi, di tagi o-nia henua gu-hagamehede a-mee,

105:21  ga-haga-menege-aga a-mee gaa-dagi dono hale mo e-dagi dono henua hagatau.

105:22  Mee gu-aamua i-hongo nia dagi huogodoo a di king, ge e-aago nia gau hagamaamaa a di king.

105:23  Malaa, Jacob guu-hana gi Egypt guu-noho i tenua deelaa,

105:24  Dimaadua guu-hai digaula gi dogologowaahee, guu-hai digaula gi-mada-maaloo i nadau hagadaumee.

105:25  Mee guu-hai digau Egypt gi-hagadugina-e-ginaadou i ana daangada mo-di halahalau ana gau hai-hegau.

105:26  Malaa, Dimaadua gu-hagau ana daangada hai-hegau go Moses mo Aaron ne-hilihili ko-Ia.

105:27  Meemaa guu-hai nia hegau maaloo-dangihi a God, guu-hai nau mogobuna haga-goboina i Egypt.

105:28  Dimaadua guu-hai tenua deelaa gi-bouli dongoeho, gei digau Egypt digi hagalongo gi-nia helekai a-Maa.

105:29  Mee guu-huli nia wai o-nia monowai digaula gii-hai nia dodo, gu-daaligi huogodoo nia iga digaula gii-mmade.

105:30  Tenua digaula guu-honu kailuu, mo i-lodo hogi di hale o-di king.

105:31  God ne-helekai-hua, gei nia hagabae lamu mono lamu-gai-dangada guu-honu i-hongo tenua.

105:32  Mee ne-hagau-ia dana uwa-hadu-magalillili mo nia ila gi-hongo tenua digaula, hagalee di uwa wai.

105:33  Mee ne-hunahuna nia laagau-‘grape’ mo nia laagau ‘fig’ digaula, gu-oho gi-lala nia laagau huogodoo.

105:34  Mee ne-helekai-hua gei nia ‘locust’ gu-lloomoi, e-logowaahee huoloo e-deemee di-dau.

105:35  Digaula guu-gai nia laagau huogodoo o tenua deelaa, mo nia huwa-laagau.

105:36  Mee gu-daaligi nia ulu-mmaadua dama-daane o-nia madahaanau huogodoo o Egypt.

105:37  Gei mee ne-dagi-mai digau Israel gi-daha mo Egypt, e-gaamai nadau silber mono goolo, digaula huogodoo e-maaloo, deai tangada e-magi ai.

105:38  Digau Egypt gu-tenetene gi digaula ala ne-hula, idimaa, digaula gu-mmaadagu i digaula.

105:39  Dimaadua e-holo dana gololangi gi-hongo digaula, gei di ahi e-inaina digaula i-di boo.

105:40  Digaula ne-dangi gi Mee, gei Mee guu-wanga gi digaula nia manu-mamaangi ‘quail’ ge gu-haangai digaula gi-maaluu gi-nia palaawaa mai i-di langi.

105:41  Mee ne-huge di hadugalaa, gei nia wai gu-malingi-mai, guu-hali laa-lodo di anggowaa be-di monowai mmidi.

105:42  Mee e-langalangahia hua igolo dana hagababa haga-madagu dela ne-hai ang-gi dana dangada hai-hegau go Abraham.

105:43  Malaa, Mee guu-lahi ana daangada ala ne-hilihili la-gi-daha, gei digaula gu-daahili mo-di wwolowwolo tenetene.

105:44  Mee guu-wanga gi digaula nia henua o digau ala i-golo, gaa-dugu ang-gi digaula gi-hai-mee ginai,

105:45  bolo digaula gi-hagalongo gi ana haganoho, mo-di haga-kila-aga-ina ana helekai huogodoo. Hagaamuina Dimaadua!

Chapter 106

106:1  Hagaamuina Dimaadua! Goodou danggee ang-gi Dimaadua, i Mee dela e-humalia, di aloho o-Maa e-hana-hua beelaa.

106:2  Ma koai e-mee di-hagamodongoohia-aga nia hagadilinga mee hagagoboina huogodoo a-Mee ala ne-hai? Ma koai e-mee di-hagaamu a-Mee e-dohu?

106:3  E-hagamaluagina go digau ala e-daudali ana haganoho, digau ala e-hagagila-aga nia mee ala e-donu i-nia madagoaa huogodoo.

106:4  Meenei Dimaadua, Goe gi-langahia-e-Goe au i do madagoaa ma-ga-hagamaamaa au daangada. Do madagoaa ma-ga-haga-dagaloaha digaula, haga-dagaloaha-ina au labelaa.

106:5  Heia au gii-mmada gi-di haadanga-lamalia o au daangada, gei gi-tenetene au madalia di tenetene o au daangada, i-di hagamadamada haga-manawa-lamalia o digau ala gu-hai-mee ginai Goe.

106:6  Gimaadou gu-ihala gadoo be madau damana-mmaadua. Gimaadou gu-huaidu gei gu-ihala huoloo.

106:7  Tadau damana-mmaadua nogo i Egypt, digi donu gi-nia hegau haga-goboina a God ala nogo hai, digaula gu-de-langahia nia holongo e-logowaahee a-Mee ala ne-hagamodongoohia dono aloho i ginaadou. Digaula gu-hai-baahi gi di Gowaa Aamua i tongotai di Tai Mmee.

106:8  Gei Mee gu-haga-dagaloaha digaula gii-hai be dana hagababa dela ne-hai, belee hagamodongoohia ono mahi maaloo dangihi.

106:9  Mee ne-helekai-hua gi-di Tai Mmee, gei di-maa guu-bagu, gei Mee ne-lahi ana daangada laa-lodo di Tai Mmee i-di gowaa maangoo.

106:10  Mee ne-haga-dagaloaha digaula gi-daha mo digau ala e-hagawelewele gi digaula. Mee ne-daa-mai digaula gi-daha mo nadau hagadaumee.

106:11  Gei nia wai gu-hagamaalemu nia hagadaumee digaula, deai tangada i digaula ne-dubu i-golo ai.

106:12  Malaa, ana daangada gu-hagadonu-laa nia hagababa a-Maa ga-daahili hagaamu a-Mee.

106:13  Gei digaula gu-limalima-hua gu-de-langahia nia mee a-Mee ala ne-hai, gei digaula digi tali bolo e-hagalongo be Mee gaa-hai bolo-aha.

106:14  Digaula gu-aumidi huoloo gi-nia meegai i-lodo di anggowaa ga-hagamada a God.

106:15  Malaa, gei Mee guu-wanga gi digaula nia mee digaula ala ne-madau, gei Mee gu-hagau-mai labelaa di magi huaidu gi digaula.

106:16  Di madagoaa i-lodo di anggowaa, gei digaula ne-dubua gi Moses mo ang-gi Aaron, go tangada hai-hegau haga-madagu a Dimaadua,

106:17  gei henuailala gu-mahaa guu-holo a Dathan, gaa-danu a Abiram mo dono madahaanau.

106:18  Di ahi ga-haneia gi-hongo nia hoo digaula, gaa-dudu digau huaidu aalaa.

106:19  Digaula ne-hai di-nadau dama kau-daane goolo i Sinai, ga-daumaha gi-di balu god deelaa.

106:20  Digaula gu-koodai nia madamada o God gi-di ada di manu dela e-gai nia geinga-tolo.

106:21  Digaula gu-de-langahia di God dela ne-haga-dagaloaha ginaadou gi ono mogobuna mahi i Egypt,

106:22  mo nia hagadilinga mee hagagoboina huoloo ala ne-hai go Mee i tenua o-di madawaawa Ham, mono mee hagagoboina i-di Tai Mmee!

106:23  Di madagoaa a God ne-hai bolo Ia ga-daaligi ana daangada gi-daha, gei tangada hai-hegau a-Maa ne-hilihili, go Moses, ga-duu-aga ga-longilongi a God bolo gi-dugua dono hagawelewele dela belee daaligi digaula gii-mmade.

106:24  Malaa, digaula gu-hagalee hiihai e-ulu i tenua humalia deelaa i-di nadau de-hagadonu nia hagababa a God.

106:25  Digaula e-noho-hua i-lodo nadau hale-laa, gaa-hai-laa nadau tamu, hagalee hagalongo gi Dimaadua.

106:26  Malaa, Mee guu-hai dana hagamodu bolo Ia ga-daaligi digaula gii-mmade i-lodo di anggowaa,

106:27  ga-hagamodoho nia hagadili digaula gi-baahi digau tuadimee, gaa-hai digaula gii-mmade i-lodo nia henua mai i-daha.

106:28  Malaa, nia daangada a God gu-daumaha gi-di balu god Baal i Peor, ge guu-gai nia mee tigidaumaha ala ne-tigidaumaha gi-nia god ala nadau mouli ai.

106:29  Nia hagadilinga hai beenei digaula la-guu-hai a Dimaadua gi-hagawelewele, deelaa di mee ne-hidi-ai taumagi huaidu ne-hai gi digaula.

106:30  Gei Phinehas ga-du-gi-nua ga-hagaduadua nia daangada ala ne-hai nau mee hala, gei di magi huaidu deelaa guu-noho.

106:31  Tugi i-di laangi deelaa gaa-hana, gei di haga-langalangahia o-di mee dela ne-hai go Mee i-di laangi deelaa le e-haihai, gaa-hana-hua beelaa.

106:32  I-di monowai uwa-aga i Meribah, nia daangada guu-hai a Dimaadua gi-hagawelewele, gei Moses gu-haingadaa ang-gi deia i-di mee digaula dela ne-hai.

106:33  Digaula guu-hai a-mee gi-manawa-gee huoloo, dela di mee ne-hidi-ai-iei mee ne-helehelekai-hua gi-mua digi noho bolo e-hagabaubau.

106:34  Digaula digi daaligidia gii-mmade digau tuadimee, be-di hai a Dimaadua dela ne-hai ang-gi digaula bolo gi-heia,

106:35  gei digaula ne-hai nadau lodo gi digaula, mo-di hai nia hangaahai o-di bouli ala e-hai go digaula.

106:36  Nia daangada a God gu-daumaha ang-gi nia balu-god, deelaa di mee ne-hidi-ai gaa-mmade-iei digaula.

106:37  Digaula guu-wanga nadau dama-daane mono dama-ahina belee hai tigidaumaha gi-nia balu-god o digau Canaan.

106:38  Digaula gu-daaligi gii-mmade nia dama nadau huaidu ai, nia gelegele o tenua gu-haga-milimilia go digau daaligi dangada gii-mmade aalaa.

106:39  Digaula guu-hai ginaadou gi-milimilia mai i nadau hai milimilia ala ne-hai, mo nadau de-manawa-dahi ang-gi di-nadau God.

106:40  Malaa, gei Dimaadua gu-hagawelewele gi ana daangada, gu-de-hiihai huoloo gi digaula.

106:41  Mee gu-diiagi digaula gi-lodo nia mogobuna o digau tuadimee, nia hagadaumee digaula guu-dagi digaula.

106:42  Nia hagadaumee digaula guu-hai digaula hagahuaidu, digaula guu-noho i-lala nia mogobuna digaula.

106:43  Nia holongo e-logo a Dimaadua ne-haga-dagaloaha ana daangada, gei digaula gu-hilihili bolo ginaadou e-hai-baahi gi Mee, gu-hidi-ai digaula gu-mooho i nadau hai huaidu ala ne-hai.

106:44  Malaa, Dimaadua gu-hagalongo gi digaula ala ne-gahigahi Ia, gei Mee guu-mmada gi-di haingadaa digaula.

106:45  Idimaa go digaula, gei Mee gu-langahia-e-Ia dana hagababa, guu-huli dono manawa gu-hagamaamaa digaula, mai i dono aloho aamua.

106:46  Mee guu-hai digau ala e-hai hagahuaidu digaula la-gi-aloho i digaula.

106:47  Haga-dagaloaha-ina gimaadou, meenei Dimaadua go di-madau God, laha-mai gimaadou gi-daha mo nia henua digau tuadimee, gei gimaadou gaa-mee di-danggee-adu gi-di-Goe mo-di hagaamu do ingoo dabuaahia.

106:48  Hagaamu-ina Dimaadua, di God o Israel! Hagaamu-ina a-Mee dolomeenei gaa-hana-hua beelaa dono hagaodi ai! Digau huogodoo gi-helekai bolo Amen! Hagaamu-ina Dimaadua!

Chapter 107

107:1  Danggee ang-gi Dimaadua, i Mee dela e-humalia, dono aloho e-waalooloo gaa-hana-hua beelaa!

107:2  Goodou huogodoo ala gu-haga-mouli go Mee, goodou tataanga-ina nia helekai hagaamu a Dimaadua aanei. Mee ne-daa-mai goodou gi-daha mo godou hagadaumee,

107:3  ga laha-mai labelaa goodou mai i-nia henua mai i-daha, mai i-di bahi-i-dua mo dai, mo ngeia mo ngaaga.

107:4  Hunu daangada gu-heehee-hua i-lodo di anggowaa, di gowaa ono ala ai, gu-de-gidee-ginaadou di waahale belee noho-ai ginaadou.

107:5  Digaula gu-hiigai ge gu-hieinu, gu-deai nadau hagadagadagagee ai.

107:6  Digaula gu-gahigahi Dimaadua i-lodo nadau haingadaa, gei Mee gu-haga-dagaloaha digaula mai i nadau haingadaa.

107:7  Mee ne-dagi digaula i-di ala huudonu gi-di waahale dela belee noho-ai digaula.

107:8  Digaula e-hai-loo gi-danggee gi Dimaadua i dono aloho dee-odi, mo nia mogobuna haga-goboina a-Mee ala ne-hai ang-gi ginaadou.

107:9  Mee e-haga-inu digau ala e-hieinu, ge e-haangai digau ala e-hiigai gi-nia meegai humalia.

107:10  Hunu daangada nogo noho-hua i-golo i-lodo nadau manawa-gee mo i-lodo di bouli. Digaula nogo duadua ge lawalawa gi-nia tiini-baalanga,

107:11  idimaa, digaula ne-hai-baahi gi-nia haganoho di God Koia e-Aamua, gu-haga-balumee nia agoago a-Maa.

107:12  Digaula gu-nadau mahi ai i-nia moomee haingadaa ala e-hai go digaula. Digaula e-tingatinga gi-lala, tangada e-hagamaamaa digaula ai.

107:13  Gei digaula gu-gahigahi Dimaadua, gei Mee gu-haga-dagaloaha digaula gi-daha mo nadau hagaduadua.

107:14  Mee gu-laha-mai digaula gi-daha mo nadau manawa-gee mo-di bouli, gu-oho gi-mooho nia tiini-baalanga ala nogo lawalawa digaula.

107:15  Digaula e-hai-loo gi-danggee ang-gi Dimaadua i dono aloho dee-odi mo nia mogobuna haga-goboina a-Mee ala ne-hai ang-gi ginaadou.

107:16  Mee e-oho gi-mooho nia bontai baalanga-mmee, ge e-oho nia dagigoo nia bontai.

107:17  Hunu daangada gu-dadaulia, ge e-hagaduadua i nadau ihala, mo nadau haihai huaidu ala nogo hai.

107:18  Digaula gu-manauwwou huoloo i-nia meegai huogodoo, gu-hoohoo-hua gaa-mmade.

107:19  Gei digaula gu-gahigahi Dimaadua mai i-lodo nadau haingadaa, gei Mee gu-haga-dagaloaha digaula gi-daha mo nadau hagaduadua.

107:20  Mee gu-hagahumalia digaula gi ana helekai, ge e-daa-mai digaula gi-daha mo nadau daalunga.

107:21  Digaula e-hai-loo gi-danggee ang-gi Dimaadua i dono aloho dee-odi, mo nia mogobuna haga-goboina a-Mee ala ne-hai ang-gi ginaadou.

107:22  Digaula e-hai-loo gi-danggee ang-gi Mee gi-nia tigidaumaha, mo-di hagadeledele nia mee a-Mee ala ne-hai gi nadau daahili tenetene.

107:23  Hunu daangada guu-hula i-nia wagabaalii e-deledele i-hongo di moana, e-halahala nadau hagahumalia i-hongo tai.

107:24  Digaula gu-gidee-ginaadou nia mee a Dimaadua ala e-mee di-hai, nia mee haga-goboina ala ne-hai go Mee i-di moana.

107:25  Mee e-helekai-hua, gei di madangi damana guu-hai, gu-haga-llauehe nia beau.

107:26  Nia wagabaalii gu-dahi-aga-loo gi-nua gi-di ahiaalangi, guu-too-iha gi-lala gi-lodo di moana. I-lodo di madagoaa hagalliga beenei, gei nia daangada aalaa gu-nadau hagadagadagagee ai.

107:27  Digaula gu-tingatinga ge e-heehee hagainaina be digau libaliba. Di wouwou digaula i-hongo di moana la-gu-deai dono hadinga ai.

107:28  Digaula gu-gahigahi Dimaadua mai i-lodo nadau haingadaa, gei Mee gu-haga-dagaloaha digaula mai i nadau hagaduadua.

107:29  Mee ne-hagakila di madangi damana, gei nia beau guu-noho.

107:30  Digaula gu-manawa lamalia i-di madangi dela ne-kila, gei Mee gu-laha-mai digaula hagahumalia gi-di gowaa dela e-hiihai e-hula ginai digaula.

107:31  Digaula e-hai-loo gi-danggee ang-gi Dimaadua i dono aloho dee-odi, mo i-nia mogobuna haga-goboina a-Mee ala ne-hai ang-gi ginaadou.

107:32  Digaula e-hai-loo gi-hagadeledele nia humalia o-Maa i-lodo nia hagabuulinga daangada, mo-di hagaamu a-Mee i-mua nia dagabuli o-nia dagi.

107:33  Dimaadua ne-hai nia monowai uwa-aga gi-maangoo, gei guu-hai nia monowai lligi gi-hagalee hali nia wai.

107:34  Mee guu-hai tenua gelegele humalia gii-hai tenua toolo mmade, idimaa go nia huaidu o digau ala e-noho i-golo.

107:35  Mee guu-hai di anggowaa gii-hai nia monowai mmidi, ge guu-hai tenua maangoo gi-uwa-aga nia wai.

107:36  Mee guu-hai digau hiigai gii-noho i-golo, gei digaula guu-hau di-nadau waahale e-noho-ai ginaadou.

107:37  Digaula gu-hai-mee gi-di gowaa deelaa ge guu-dogi nadau waa-laagau-‘grape’ ala e-huwa humalia ge e-logowaahee.

107:38  Mee gu-haga-maluagina ana daangada, gei digaula gu-dogologowaahee nadau dama. Gei mee hagalee dugu nia manu digaula gi-hogoohi-mai.

107:39  Di madagoaa hua o-nia dama a God ala ne-paagege, gu-langaadia mai i-nia haingadaa mo nia hagaduadua,

107:40  malaa, Mee gu-haga-modongoohia-aga dono dee-hiihai ang-gi nia dagi ala ne-hai ana dama gii-too gi-lodo di haingadaa. Deelaa di mee a-Maa ne-hai digaula gi-heehee-hua i-lodo di anggowaa, di gowaa ono ala ai.

107:41  Gei Mee gu-daa-mai gi-daha digau hagaloale mo nadau haingadaa, guu-hai nadau madahaanau gi-logowaahee gadoo be nia hagabuulinga manu.

107:42  Digau ala e-haihai nia mee donu gaa-mmada gi-di hai deenei ga-manawa lamalia, gei digau ala e-huaidu le e-noho-hua deemuu.

107:43  Digau ala e-kabemee gi-hagamamaanadu-ina nia mee aanei, ge gi-hagamamaanadu-ina labelaa di aloho dee-odi o Dimaadua.

Chapter 108

108:1  Dogu hagadagadagagee la-guu-dohu, meenei Dimaadua! Au ga-daahili e-hagaamu Goe! Ala-aga, go dogu hagataalunga!

108:2  Ala-aga dagu ‘harp’ mo dagu ‘lyre’! Au ga-hangahanga di laa gii-ala.

108:3  Au ga-danggee-adu gi-di-Goe i-mehanga nia henua, meenei Dimaadua. Au ga-hagaamu Goe i-baahi nia daangada.

108:4  Do aloho dee-modu guu-dau i-nia madagowaa huogodoo i-baahi i-nua di langi. Do manawa-dahi guu-tugi i-lala di langi.

108:5  Hagamodongoohia-ina oo mahi aamua i-lala di langi, meenei God, mo o madamada gi-hongo henuailala hagatau.

108:6  Haga-dagaloaha-ina gimaadou gi oo mahi. Helekai-mai gi dagu dalodalo, gei au daangada ala e-aloho-ai gaa-mee di-dagaloaha.

108:7  God gu-helekai-mai i-hongo dono lohongo haga-madagu, ga-helekai, “Idimaa Au dela gu-aali, Au ga-hahaahi Shechem gaa-duwwe di gowaa mehanga gonduu o Sukkoth gi agu daangada.

108:8  Gilead la ni-aagu, mo Manasseh labelaa. Ephraim la-go dogu goobai-dauwa, gei Judah la-go dagu dogodogo king.

108:9  Au ga-haga-hai-hegau a Moab be dagu boolo gaugau, gaa-kili ogu suudi gi-hongo Edom, e-hagailongo di-maa bolo ma di mee ni-aagu. Au ga-wolowolo i-di wolowolo o-di aali i-hongo digau Philistia.”

108:10  Meenei God, ma koai dela gaa-lahi au gi-lodo di waahale mau-dangihi? Ma koai dela gaa-dagi au gi Edom?

108:11  Ma e-donu bolo Goe dela hua gu-diiagi gimaadou? Goe hagalee hana madalia madau gau-dauwa?

108:12  Hagamaamaa-ina gimaadou e-heebagi gi madau hagadaumee. Nia hagamaamaa o-nia daangada dangada le e-balumee-hua, ono hadinga ai.

108:13  Maa God ga-madalia gidaadou, gidaadou ga-aali. Mee ga-daaligi tadau hagadaumee.

Chapter 109

109:1  Meenei God, au e-hagaamu Goe, Goe hudee noho deemuu!

109:2  Digau huaidu mo digau hai-kai-tilikai e-hai-baahi-mai gi-di-au.

109:3  Digaula e-helekai nia mee huaidu i-di-au, gei e-hai-baahi-mai gi-di-au dono hadinga ai.

109:4  Digaula e-hai-baahi-mai gi-di-au ma e-aha maa au e-aloho i digaula, gei e-dalodalo i digaula.

109:5  Digaula e-hai hui gi-di huaidu i agu hegau humalia, gei e-hagadugina-ginaadou i-di-au dela e-aloho i ginaadou.

109:6  Dongo-ina dau dangada hai-gabunga huaidu e-gabunga dogu hagadaumee. Heia tangada i-nia hagadaumee o-maa e-hai-baahi gi mee.

109:7  Gabunga-ina a-mee gii-gida bolo mee gu-ihala. Nia dalodalo a-maa gii-hai labelaa bolo nia huaidu llauehe!

109:8  Di mouli o-maa gi-hagaodia haga-limalima. Heia tuai dangada e-kae tuhongo hegau a-maa!

109:9  Nia dama a-maa gii-hai nia dama nadau maadua ai, di lodo o-maa gii-hai di ahina dono lodo ai!

109:10  Nia dama a-maa gii-hai nia gau madamadau-mee, nadau hale ai, digaula gi-hagabagia gi-daha mo nia hale mooho ala e-noho-ai digaula!

109:11  Digau ala e-boibana ginai mee gi-kaina nia goloo o-maa huogodoo, digau mai i-daha gi-kaina nia mee huogodoo a-mee ala ne-ngalua ginai.

109:12  Tangada gi-hudee aloho i mee, be e-benebene nia dama a-maa ala ne-diiagi.

109:13  Di hagadili o-maa huogodoo gii-mmade, di ingoo o-maa gi-haga-de-langahia-ina i-nia adu-daangada ala ma-ga-loomoi maalia.

109:14  Dimaadua gi-langahia nia huaidu o-nia damana-mmaadua o-maa, gei gi-hudee dumaalia gi-nia huaidu o tinana o-maa.

109:15  Dimaadua gi-langahia nia huaidu digaula i-nia madagoaa huogodoo, digaula gi-haga-de-langahia hagamuliagina!

109:16  Taane deelaa la ono hagamaanadu i ono lodo bolo ia e-hai di humalia ai. Mee e-hagaduadua ge dadaaligi gii-mmade digau hagaloale mo digau ala e-noho manawa-gee mo digau ala e-noho haingadaa ang-gi ginaadou.

109:17  Mee gu-hiihai e-haga-halauwa nia daangada, heia a-mee gi-halauwa! Mee hagalee hiihai e-hagamaluagina nia daangada, tangada gi-de-hagamaluagina hua a-mee!

109:18  Mee gu-wouwou di-haga-halauwa nia daangada gadoo be dana wouwou di-ulu ono gahu. Nia haga-halauwa o-maa gi-ulu gi-lodo dono huaidina gadoo be nia wai, mo gi-lodo ono iwi gadoo be nia lolo!

109:19  Nia haga-halauwa o-maa gi-gahu-ina a-mee gadoo be nia gahu, nia madagoaa e-logo gei nia maa gi-nnoo-mau i-di gili o-maa gadoo be-di tuu!

109:20  Meenei Dimaadua, daaligidia ogu hagadaumee gii-hai be agu helekai ne-hai, aalaa go digau ala e-helekai nia hagadilinga mee huaidu beelaa e-hai-baahi mai gi-di-au!

109:21  Meenei Yihowah dogu Dagi, hagamaamaa-ina au e-hagalaamua do ingoo, haga-dagaloaha-ina au, idimaa go do aloho mo o humalia.

109:22  Au tangada hua hagaloale ge e-haadanga-balua. Dogu manawa guu-mmae huoloo.

109:23  Au gu-hoohoo bolo ga-hagalee gadoo be-di malu o-di hiahi. Au gu-ili gi-daha gadoo be-di manu hongo geinga tolo.

109:24  Ogu duli gu-paagege i-nia meegai ne-hagalee. Au gu-hagalee hai be-di mee, gu-hai-hua nia gili mono iwi.

109:25  Nia daangada ma-ga-mmada-mai gi-di-au, le e-gadagada mai gi-di-au. Digaula e-gadagada mo-di haga-dahudahuli nadau libogo.

109:26  Meenei Yihowah, go dogu God, hagamaamaa-ina mai au. Idimaa go do aloho waalooloo, Goe haga-dagaloaha-ina au!

109:27  Heia ogu hagadaumee gi-iloo bolo ma Kooe dela e-haga-dagaloaha au.

109:28  Holongo digaula e-haga-halauwa au, gei Goe ga-haga-maluagina au. Digaula ala e-heebagi mai gi-di-au la-heia gi-magedaa, gei au, go dau dangada hai-hegau, la-gi-tenetene.

109:29  Ogu hagadaumee la-heia gi-langaadia huoloo. Digaula la-heia gii-noho i-lodo nadau hagalangaadia gadoo be tangada ne-ulu gi-lodo dono gahu laa-daha.

109:30  Au gaa-hai dagu danggee gi-nua-loo gi Dimaadua. Au ga-hagaamu a-Mee i-lodo nia dagabuli daangada ma-gaa-hai,

109:31  idimaa mee dela gu-haga-dagaloaha ana daangada hagaloale mo-di daamai digaula gi-daha mo digau ala gu-hagi-anga digaula belee daaligi gii-mmade.

Chapter 110

110:1  Dimaadua gu-helekai gi-dogu dagi: “Noho i ginei i dogu baahi gau-donu gaa-dae-loo gi dogu madagoaa ma-gaa-dugu o hagadaumee gi-lala o babaawae.”

110:2  Dimaadua ga-haga-palaha o mogobuna-king e-dagi nia henua e-logo mai i Zion. Mee e-helekai, “Dagia o hagadaumee.

110:3  Doo laangi dela ma-ga-heebagi-iei Goe gi o hagadaumee, au daangada ga-hiihai e-heebagi madalia Goe. Au dama-daane ga-lloomoi gi-di-Goe i-hongo nia gonduu haga-madagu, gadoo be nia magalillili o-di luada.”

110:4  Dimaadua guu-hai dana hagababa hagamodu ge hagalee huli dono manawa: “Goe gaa-hai tangada hai-mee-dabu tugi dangi-nei gaa-hana-hua beelaa, i-di ala o Melchizedek.”

110:5  Tagi la-i doo baahi gau-donu. Di madagoaa a-Mee ma-ga-hagawelewele, gei Mee ga-daaligi nia king gii-mmade.

110:6  Mee ga-hagi-aga nia henua, ga-haga-honu nia gowaa hai-dauwa gi-nia gau mmade. Mee ga-haga-magedaa nia king i henuailala hagatau.

110:7  Di king ga-inu i tama-monowai i taalinga di ala, gaa-hai ono mahi, ga-duu-aga i-lodo dono aali.

Chapter 111

111:1  Hagaamu-ina Dimaadua! Au gaa-hai dagu danggee ang-gi Dimaadua mai i-lodo dogu manawa hagatau i-lodo nia dagabuli o ana daangada.

111:2  E-hagagoboina huoloo go nia hagadilinga mee ala e-haihai go Dimaadua! Digau huogodoo ala e-tenetene gi-nia maa le e-hiihai gi-iloo tadinga o-nia maa.

111:3  Nia mee huogodoo a-Maa ala e-hai le e-honu i-di hagalaamua mo nia hagalabagau. Nia donu o-Maa e-hana-hua beelaa.

111:4  Dimaadua hagalee hai gidaadou gi-de-langahia ana hegau haga-goboina. Mee e-humalia gei e-dumaalia.

111:5  Mee e-dahi-aga ana meegai gi digau ala e-hagalaamua Ia. Mee hagalee-loo e-de-langahia-e-Ia ana hagababa.

111:6  Mee gu-haga-modongoohia ana mogobuna gi ana daangada i dana hai dela ne-wanga gi digaula nia henua o digau tuadimee.

111:7  Mee e-manawa-dahi ge e-donu i-nia hagadilinga mee huogodoo a-Maa ala e-hai. Nia helekai a-Maa la-hagalee huli.

111:8  Nia maa e-waalooloo-hua beelaa i-nia madagoaa huogodoo. Nia maa e-hagamau mai di humalia mo-di tonu.

111:9  Mee ne-hagamehede ana daangada gaa-hai dana hagababa dono hagaodi ai gi digaula. Mee e-dabuaahia ge mogobuna!

111:10  Di ala dela e-hidi-ai di kabemee la dela e-hagalaamua Dimaadua. Mee e-kabemee di hai dana hagi-aga dela e-donu ang-gi digau huogodoo ala e-daudali ana haganoho. Mee belee hai gi-hagaamu gaa-hana-hua beelaa dono hagaodi ai.

Chapter 112

112:1  Hagaamu-ina Dimaadua! E-maluagina go tangada dela e-hagalaamua a Dimaadua, gei e-tenetene di-daudali ana haganoho.

112:2  Nia dama o taane humalia ga-hai-mee gi-nia mogobuna i-hongo tenua deelaa, dono hagadili ga-haga-maluagina go God.

112:3  Dono madahaanau ga-haadanga-lamalia ga-maluagina, gei mee ga-haadanga-lamalia-hua beelaa.

112:4  Di maalama e-maahina i-lodo di gowaa bouli ang-gi digau ala e-humalia, ang-gi digau ala e-dumaalia huoloo, ge manawa humalia, ge donu.

112:5  E-maluagina go tangada dela e-dumaalia di wanga ana mee gi-nia daangada e-hai-hegau-ai digaula i-di madagoaa bodobodo, ge e-hai-hegau donu i dana moomee huihui mee.

112:6  Tangada humalia la-hagalee magedaa. Nia daangada e-langahia-ginaadou a-mee i-nia madagoaa huogodoo.

112:7  Mee hagalee madagu ma-ga-hagalongo gi-nia longo huaidu. Di hagadonu o-maa e-maaloo, gei mee e-hagadagadagagee gi Dimaadua.

112:8  Mee hagalee e-de-nnoomaalia be e-madagu, mee e-hagadagadagagee bolo ia gaa-mmada gi ono hagadaumee ala ma-ga-magedaa.

112:9  Mee e-wanga-dehuia gi digau ala hagaloale, gei dono dumaalia e-hana-hua beelaa. Mee ga-hai-mee gi-nia mogobuna mo nia hagalaamua.

112:10  Digau huaidu gaa-mmada gi-di mee deenei mo-di hagawelewele. Nadau daumada ge hagadugina ga-hagalee, nia hagadagadagagee digaula gu-hagalee gaa-hana-hua beelaa!

Chapter 113

113:1  Hagaamu-ina Yihowah! Goodou ala go digau hai-hegau a Dimaadua, goodou hagaamu-ina di ingoo o-Maa!

113:2  Hagaamu-ina di ingoo o-Maa, dolomeenei gaa-hana-hua beelaa.

113:3  Mai baahi gi-dua gaa-hana gi-baahi gi-dai, goodou hagaamu-ina di ingoo Dimaadua!

113:4  Dimaadua e-dagi nia henua huogodoo, nia madamada o-Maa la i-hongo di langi i-nua.

113:5  Ma tangada e-hai be Dimaadua go tadau God ai. Mee e-noho i-nua-loo,

113:6  gei Mee e-bala-iha gi-lala e-mmada gi-di langi mo henuailala.

113:7  Mee e-dahi-aga digau hagaloale mai i-nia gelegele. Mee e-hagahumalia digau ala gu-nadau hagamaamaa ai gi-daha mo nadau haingadaa,

113:8  gaa-hai digaula gii-hai nia hoo ni digau aamua, go digau aamua ni ana daangada.

113:9  Mee e-hagalaamua nia ahina hagalee huwa ala e-noho i nadau hale, gaa-hai digaula gi-tenetene e-hai nadau dama. Hagaamu-ina Dimaadua!

Chapter 114

114:1  Di madagoaa digau Israel ne-hula gi-daha mo Egypt, di madagoaa di hagadili o Jacob ne-hagatanga gi-daha mo tenua deelaa,

114:2  gei Judah guu-hai nia daangada haga-madagu ni Tagi, gei Israel guu-hai nia mee ni Mee.

114:3  Di Tai Mmee ne-mmada-hua gaa-lele gi-daha, di monowai Jordan guu-noho hagalee mmidi.

114:4  Nia gonduu gu-hobohobo gadoo be nia kuudi, nia gonduu lligi gu-hobohobo haganiganiga be nia dama-siibi.

114:5  Di Tai Mmee, goe ne-lele gi-daha eiaha? Mo goe go Jordan, goe e-aha dela ne-noho hagalee mmidi?

114:6  Goodou go nia gonduu, goodou e-hobohobo be nia kuudi beleiaha? Mo goodou go nia gonduu lligi, goodou e-hobohobo haganiganiga be nia dama-siibi beleiaha?

114:7  Gei goe, go henuailala, goe gi-bolebole gi-di hanimoi o Tagi, goe gi-bolebole i-mua di God o Jacob,

114:8  dela ne-huli di hadugalaa gii-hai di monowai wai, mo nia hadu hamaaloo gi-hali-mai nia wai.

Chapter 115

115:1  Meenei Dimaadua, gimaadou e-hai-loo gi-hagalabagau Goe dela-hua Kooe, idimaa Goe dela e-manawa-dahi ge e-aloho i gimaadou i-nia madagoaa huogodoo. Gimaadou hagalee hai-loo gi-hagalabagau gimaadou.

115:2  Ma e-aha dela nia daangada bouli e-heheeu-mai gi gimaadou boloo, “Di-godou God la i-hee?”

115:3  Di-madau God le e-noho i-di langi. Mee e-hai-hua ana mee ala e-hiihai ginai.

115:4  Nia god digaula la-ne-hai gi-nia silber mono goolo, nia mee ne-hai go nia daangada gi nadau lima.

115:5  Digaula nadau ngudu i-golo, gei e-deemee di-leelee, nadau golomada i-golo, gei e-de-gidee nia mee.

115:6  Digaula nadau dalinga i-golo, gei hagalee longono nia mee, nadau uhi i-golo, gei e-deemee di-hagadungu nia mee.

115:7  Digaula nadau lima i-golo, gei e-deemee di-bili gi-di mee, nadau wae i-golo, gei e-deemee di-haele. Digaula nadau akii i-golo, gei e-deemee di-leelee.

115:8  Digau huogodoo ala e-hai nadau balu-god beenei, ge e-hagadagadagagee gi-nia maa, la-gaa-hai gadoo be nadau balu-god ala ne-hai.

115:9  Goodou go digau Israel, goodou gi-hagadagadagagee gi Dimaadua! Ma go Mee dela e-hagamaamaa ge e-hagaloohi goodou.

115:10  Goodou go digau hai-mee-dabu a Dimaadua, goodou gi-hagadagadagagee gi Mee! Ma go Mee dela e-hagamaamaa ge e-hagaloohi goodou.

115:11  Goodou go digau ala e-hagalaamua a Dimaadua, goodou gi-hagadagadagagee gi Mee! Ma go Mee dela e-hagamaamaa ge e-hagaloohi goodou.

115:12  Dimaadua le e-langahia-Ia gidaadou, gei Mee ga-haga-maluagina gidaadou. Mee ga-haga-maluagina digau Israel mo ana gau hai-mee-dabu huogodoo.

115:13  Mee ga-haga-maluagina digau huogodoo ala e-hagalaamua Ia, nia dahida daangada mono balu daangada.

115:14  Dimaadua gi-gowadu gi goodou nia dama gii-logo, goodou mo godou hagadili gi-muli!

115:15  Dimaadua dela ne-hai di langi mo henuailala, gi-haga-maluagina-ina goodou!

115:16  Ma go Dimaadua modogoia dela e-hai-mee gi-di langi, gei henuailala ne-wanga go Mee gi-nia daangada.

115:17  Digau ala guu-mmade la-hagalee hagaamu a Dimaadua, go digau ala e-hula gi-lala gi tenua noho deemuu.

115:18  Gei gidaadou, go digau ala e-mouli, gidaadou ga-danggee gi Mee dolomeenei ga-hana-hua dee-odi. Hagaamuina Dimaadua!

Chapter 116

116:1  Au e-aloho i Dimaadua, i Mee dela e-longono-Ia au. Mee e-longono-Ia agu dalodalo.

116:2  Mee e-hagalongo-mai gi-di-au, malaa, gei au ga-gahigahi a-Mee i-di waalooloo o dogu mouli.

116:3  Di hagalliga o-di made gu-haganiga-mai au, di madagu o taalunga gu-dau-mai gi-di-au. Di madagu mo te-nnoomaalia guu-honu i dogu baahi.

116:4  Gei au gu-gahigahi Dimaadua, ga-helekai, “Meenei Dimaadua, au-e-dangi-adu gi-di-Goe, haga-dagaloaha-ina au!”

116:5  Dimaadua le e-manawa dumaalia ge e-humalia, tadau God le e-honu i tumaalia.

116:6  Dimaadua le e-hagaloohi digau ala gu-deai nadau hagamaamaa ai. Mee gu-haga-dagaloaha au, i dogu madagoaa nogo i-lodo di gowaa hagalliga.

116:7  Dogu hagataalunga-nei, hagadagadagagee, idimaa, Dimaadua la-gu-humalia mai gi-di-au.

116:8  Dimaadua la-ne-haga-mouli au mai i-di made. Mee guu-dugu ogu halidangi, guu-hai au gi-maaloo.

116:9  Malaa, au e-heehee i-mua o Dimaadua i-lodo tenua digau mouli.

116:10  Dogu hagadonu le e-hana-hua beelaa, ma e-aha maa au gu-helekai boloo, “Au guu-noho i-lodo di haingadaa damana,”

116:11  mo dogu madagoaa ma-ga-madagu, ga-helekai, “Ma deai tangada e-mee di hagadagadagagee ginai au ai.”

116:12  Ma di-aha e-mee di-hui e-tigidaumaha ko-au gi Dimaadua, i-nia mee humalia huogodoo ala ne-hai-mai gi-di-au?

116:13  Au gaa-hai dagu tigidaumaha waini gi Dimaadua, e-hai-ai dagu danggee gi Mee dela ne-haga-dagaloaha au.

116:14  I-lodo di hagabuulinga o ana daangada huogodoo, gei au gaa-wanga gi Mee agu mee ala ne-hagababa.

116:15  Dimaadua le e-manawa-gee huoloo i tangada e-dahi i ana dama dela ma-gaa-made!

116:16  Meenei Dimaadua, au tangada hai-hegau ni-aau. Au e-hai-hegau-adu gi-di-Goe gadoo be di hai dogu dinana. Goe ne-haga-dagaloaha au gi-daha mo-di made.

116:17  Au ga-tigidaumaha-adu gi-di-Goe tigidaumaha o-di danggee, mo-di dalodalo-adu gi-di-Goe.

116:18  I-mua di hagabuulinga o au daangada huogodoo, i-lodo di gowaa dabu o do Hale Daumaha dela i Jerusalem, gei au ga-gowadu gi-di-Goe agu mee ala ne-hagababa. Hagaamuina Dimaadua!

116:19  I-mua di hagabuulinga o au daangada huogodoo, i-lodo di gowaa dabu o do Hale Daumaha dela i Jerusalem, gei au ga-gowadu gi-di-Goe agu mee ala ne-hagababa. Hagaamuina Dimaadua!

Chapter 117

117:1  Goodou go nia henua llauehe huogodoo, hagaamu-ina Dimaadua! Nia daangada huogodoo, hagaamu-ina a-Mee!

117:2  Idimaa di aloho o-Maa i gidaadou le e-maaloo, mo-di manawa-dahi o-Maa le e-waalooloo. Hagaamu-ina Dimaadua!

Chapter 118

118:1  Goodou danggee ang-gi Dimaadua i Mee dela e-humalia, gei dono aloho e-hana-hua beelaa.

118:2  Digau Israel gi-helekai boloo, “Dono aloho e-hana-hua beelaa.”

118:3  Digau hai-mee-dabu a Dimaadua gi-helekai boloo, “Dono aloho e-hana-hua beelaa.”

118:4  Digau huogodoo ala e-daumaha gi Dimaadua gi-helekai boloo, “Dono aloho e-hana-hua beelaa.”

118:5  Au ne-gahigahi Dimaadua mai i-lodo dogu haingadaa, gei Mee gu-hila-mai gi-di-au gu-hagamehede au.

118:6  Dimaadua le e-madalia au, au ga-hagalee madagu. Ma di-aha dela e-mee di-hai go tangada mai gi-di-au?

118:7  Ma go Dimaadua dela e-hagamaamaa au, au ga-mmada-hua gi ogu hagadaumee ala ga-paagege.

118:8  Ma koia e-humalia maa gidaadou ga-kana-hua gi Dimaadua laa-hongo tadau hagadagadagagee gi-nia daangada.

118:9  Ma koia e-humalia maa gidaadou ga-kana-hua gi Dimaadua laa-hongo tadau hagadagadagagee gi-nia dagi o henuailala.

118:10  Nia hagadaumee dogologowaahee gu-haganiga-mai i dogu gili, malaa, gei au gu-daaligi digaula gi-nia mogobuna o Dimaadua!

118:11  Digaula gu-haganiga-mai i dogu gili i-nia baahi huogodoo, malaa, gei au gu-daaligi digaula gi-nia mogobuna o Dimaadua!

118:12  Digaula gu-hii-mai i dogu gili gadoo be nia lamu, malaa, digaula gu-ulaula limalima guu-mmade gadoo be-di ahi geinga, malaa, gei au gu-daaligi digaula gi-di ingoo o Yihowah!

118:13  Digaula gu-heebagi-mai maaloo-dangihi, gei au gu-bagege, gei Dimaadua gu-hagamaamaa au.

118:14  Dimaadua guu-hai au gii-mahi ge maaloo. Mee gu-haga-dagaloaha au.

118:15  Goodou gi-hagalongo-malaa gi-di lee wwolowwolo tenetene o-di aali mai i-nia hale-laa o-nia daangada a God, dela boloo, “Nia mogobuna mahi o Dimaadua ala ne-hai di mee deenei!

118:16  Ma go nia mahi o-Maa ala ne-hai gidaadou gi-aali, nia mahi o-Maa ne-hai gidaadou gi-aali i-lodo tauwa!”

118:17  Au hagalee made, au ga-mouli, ga-hagadele di hai o-nia mee a Dimaadua ala ne-hai.

118:18  Mee gu-hagaduadua au gii-kono, gei Mee hagalee hai au gii-made.

118:19  Huge-ina-mai gi-di-au nia bontai di Hale Daumaha, gi-ulu au gi-lodo e-hai agu danggee gi Dimaadua!

118:20  Deenei di bontai o Dimaadua, ala-hua go digau ala e-donu e-mee di-ulu gi-lodo.

118:21  Au e-hagaamu Goe, Meenei Dimaadua, idimaa Goe dela gu-longono-e-Goe au, idimaa Goe dela ne-hai au gi-aali.

118:22  Di hadu dela ne-hudu gi daha go digau hau-hale bolo di balumee, la-guu-hai di hadu e-kaedahi e-hagalabagau.

118:23  Di mee deenei la-ne-hai mai baahi Dimaadua, e-haga-goboina mai gi gidaadou!

118:24  Dangi-nei la-go di laangi o Dimaadua ne-aali-ai. Gidaadou la-gi-tenetene mo-di budu momoogo tenetene!

118:25  Haga-dagaloaha-ina gimaadou, Meenei Dimaadua, haga-dagaloaha-ina gimaadou! Meenei Dimaadua, Goe gi-hagamaamaa-ina gimaadou gii-gila humalia gimaadou!

118:26  God gi-hagahumalia-ina a-mee dela e-hanimoi i-di ingoo o Dimaadua! Gimaadou e-hagaamu goodou mai i-lodo di Hale Daumaha o Dimaadua.

118:27  Dimaadua la-go God, Mee gu-humalia mai gi gidaadou. Goodou kae-ina godou manga-laagau i godou lima, daamada di budu mo-di taele haganiga di gowaa dudu tigidaumaha.

118:28  Ma Kooe dela go dogu God, au e-hai dagu danggee adu gi-di-Goe, gei au ga-hagadele do maaloo.

118:29  Goodou gi-danggee ang-gi Dimaadua, i Mee dela e-humalia, dono aloho e-hana-hua beelaa.

Chapter 119

119:1  E-maluagina go digau ala e-mouli madammaa, ge e-mouli gii-hai be nia haganoho a Dimaadua.

119:2  E-maluagina go digau ala e-daudali ana helekai, ge e-hagalongo gi Mee mai i-lodo nadau manawa hagatau.

119:3  Digaula hagalee hai nia mee hala, e-heehee-hua i-di ala Dimaadua.

119:4  Meenei Dimaadua, Goe ne-gaamai gi gimaadou au haganoho, ga-hai-mai gi gimaadou bolo gi-manawa-dahi di hagalongo gi-nia maa.

119:5  Au e-hagadagadagagee bolo au ga-manawa-dahi ga-dadaahi au helekai!

119:6  Maa au gaa-mmada gii-donu gi au haganoho huogodoo, gei au ga-hagalee langaadia.

119:7  Au ga-hagaamu Goe i-di manawa madammaa i dogu madagoaa ma-ga-iloo-eau di tonu o au haganoho.

119:8  Au ga-haga-gila-aga au haganoho, hudee hudu-ina au gi-daha!

119:9  Tama-daane e-mee di-benebene dono mouli gi-madammaa behee? Mai i-di daudali au haganoho.

119:10  Au e-hagamahi e-hai-hegau-adu gi-di-Goe mai i-lodo dogu manawa hagatau. Dugua au gi-dee-oho au haganoho.

119:11  Au e-dadaahi au haganoho i-lodo dogu manawa bolo gi-dee-hai dagu mee hala adu gi-di-goe.

119:12  Au e-hagaamu Goe, meenei Dimaadua. Aago-ina-mai gi-di-au oo ala.

119:13  Au ga-tataanga au haganoho huogodoo ala ne-goweia.

119:14  Au e-tenetene di-daudali au haganoho laa-hongo dogu hai-mee gi-nia maluagina e-logowaahee.

119:15  Au e-hagabaubau au haganoho, gei e-hagadinadina au agoago.

119:16  Au e-tenetene gi au haganoho, au hagalee e-de-langahia-eau au helekai.

119:17  Goe hila mai gi-di-au, go dau dangada hai-hegau, gi-mouli au e-haga-gila-aga au agoago.

119:18  Hugee ogu golomada, gi-gidee au nia hagadilinga mee hagagoboina ala i-lodo au haganoho.

119:19  Au e-noho-hua i henuailala i tama madagoaa haga-bodobodo. Goe hudee hagammuni-ina au haganoho i-di-au.

119:20  Dogu manawa e-mmae i dogu hidihidi, au e-hiihai gi-iloo-eau au hagi-aga i-nia madagoaa huogodoo.

119:21  Goe e-wou gi digau ala e-hagamuamua. Goe e-haga-halauwa digau ala e-hagalee daudali au helekai.

119:22  Hagamehede-ina au gi-daha mo nia haganneennee mo nia gadagada hagamuamua digaula, idimaa au gu-haga-gila-aga au haganoho.

119:23  Digau aamua e-dagabuli belee haganoho di-nadau hai-baahi mai, e-haga-huaidu au, gei au e-hagamaumau-hua au agoago.

119:24  Au aago e-hai au gi-tenetene, aalaa go ogu hagamaamaa.

119:25  Au gu-magedaa guu-moe i-lodo nia gelegele. Haga-maaloo-ina-aga au, gii-hai be dau hagababa dela ne-hai.

119:26  Au ne-haagi-adu agu mee huogodoo ala ne-hai, gei Goe gu-helekai-mai. Aago-ina-mai gi-di-au oo ala.

119:27  Hagamaamaa-ina au gi-iloo-eau au haganoho, gei au ga-hagamamaanadu di hai o au agoago hagagoboina.

119:28  Au e-noho ge manawa-gee. Hagamaaloo-ina-aga au gii-hai be au hagababa ala ne-hai.

119:29  Hudee heia au gii-hana i-di ala hai-gee, gei Goe manawa dumaalia mai gi-di-au, aago-ina au gi au haganoho!

119:30  Au gu-hilihili bolo au ga-hagalongo-adu. Au gu-daudali au haganoho gii-donu.

119:31  Meenei Dimaadua, au gu-daudali au mee ala ne-aago, Goe hudee heia au gi-langaadia.

119:32  Au ga-haga-limalima ga-daudali au helekai, idimaa Goe dela ga-haga-damana-aga dogu kabemee.

119:33  Meenei Dimaadua, aago-ina-mai gi-di-au tadinga o au haganoho, gei au ga-daudali nia maa i-nia madagoaa huogodoo.

119:34  Hagamodongoohia-ina-mai gi-di-au au haganoho, gei au ga-hagagila-aga nia maa mai i-lodo dogu manawa hagatau.

119:35  Dagia-hua au i-hongo nia ala o au haganoho, idimaa aalaa nia mee e-haga-manawa lamalia au.

119:36  Gaamai gi-di-au di hiihai dela e-hagagila-aga au haganoho, laa-hongo dogu hiihai gi-nia maluagina.

119:37  Heia au gi-de-hiihai gi-nia balu mee. Heia-mai di humalia be dau hagababa dela ne-hai.

119:38  Heia-mai gi-di-au au mee ala gu-hagababa bolo e-hai-mai gi-di-au, go dau dangada hai-hegau, go di hagababa dela ne-hai Kooe gi digau huogodoo ala e-hagalongo-adu gi-di-Goe.

119:39  Haga-dagaloaha-ina au gi-daha mo nia haganneennee ala e-madagu-iei au. Dau hagi-aga le e-hagagoboina huoloo!

119:40  Au e-hiihai e-daudali au helekai. Gaamai gi-di-au di mouli hoou, idimaa Goe dela e-donu.

119:41  Meenei Dimaadua, hagamodongoohia-ina-mai gi-di-au dau hai dela e-aloho i-di-au, mo-di haga-dagaloaha au gii-hai be dau hagababa dela ne-hai.

119:42  Gei au gaa-mee di-helekai gi digau ala e-haganneennee au, idimaa au e-hagadagadagagee gi au helekai.

119:43  Heia au gii-mee di-helekai donu i-nia madagoaa huogodoo, idimaa dogu hagadagadagagee la i-lodo au haganoho.

119:44  Au ga-hagagila-aga au haganoho i-nia madagoaa huogodoo, dolomeenei ga-hana-hua dono hagaodi ai.

119:45  Au ga-heehee moholo mai gi-di-au, idimaa au e-hagamahi e-daudali au agoago.

119:46  Au ga-hagadele au helekai gi-nia king, au hagalee langaadia.

119:47  Dogu madagoaa ma-ga-hagagila-aga au helekai, gei au e-tenetene, idimaa au e-haga-dahidaamee nia maa.

119:48  Au e-hagalaamua ge e-haga-dahidaamee au haganoho. Au ga-hagabaubau au helekai aago.

119:49  Gi-langahia-e-goe dau hagababa dela ne-hai mai gi-di-au, go dau dangada hai-hegau, ma guu-hai au gi-hagadagadagagee huoloo.

119:50  Dogu noho i-lodo ogu hagammaemmae, au gu-manawa lamalia hua, idimaa dau hagababa la-gu-benebene dogu mouli.

119:51  Digau hagamuamua le e-hagabalumee au, gei au digi huli gi-daha mo au haganoho.

119:52  Meenei Dimaadua, au e-langahia-eau au haganoho ala i-mua-loo. Malaa, aalaa nia mee e-haga-manawa lamalia au.

119:53  Au e-hagawelewele huoloo ma-gaa-mmada gi digau huaidu ma-gaa-oho au haganoho.

119:54  Au helekai la aalaa agu mee e-dadaahili i dogu mouli bodobodo i-hongo henuailala nei.

119:55  Meenei Dimaadua, ma-gaa-boo gei au e-langahia Goe, mo-di maanadu di hai o au haganoho.

119:56  Au e-gida dogu tenetene mai i dogu daudali au haganoho.

119:57  Meenei Dimaadua, ma deelaa-hua Kooe dela e-hiihai ginai au. Au gu-hagababa bolo au e-hagalongo gi au haganoho.

119:58  Au e-madau-adu gi-di-Goe mai i-lodo dogu manawa hagatau bolo Goe gi-dumaalia-mai gi-di-au, gii-hai be dau hagababa dela ne-hai.

119:59  Au gu-daamada gu-hagabaubau dagu hai dela e-mouli-iei au, gei au gu-hagababa bolo au ga-daudali au helekai aago.

119:60  Au hagalee hagaduai, au ga-hagalimalima ga-daudali au helekai.

119:61  Digau huaidu guu-dugu di-nadau hele belee hele au, gei au hagalee de-langahia au haganoho.

119:62  I-di madahidi-waelua di boo, gei au e-ala-aga e-hagaamu Goe, idimaa Goe dela e-gabunga au mee gii-donu.

119:63  Au di hoo ni digau huogodoo ala e-hai-hegau-adu gi-di-Goe, go digau huogodoo ala e-hagalongo ge e-daudali au haganoho.

119:64  Meenei Dimaadua, henuailala e-honu i do aloho dee-modu, aago-ina au gi au haganoho.

119:65  Meenei Dimaadua, Goe gu-hagagila-aga dau hagababa, gei Goe e-humalia-mai gi-di-au, go dau dangada hai-hegau.

119:66  Gaamai gi-di-au di iloo nia mee mo-di kabemee, idimaa au e-hagadonu au helekai.

119:67  I-mua dau hagaduadua au, gei au nogo hai agu mee hala, gei dolomeenei gei au gu-daudali au helekai.

119:68  Goe e-humalia, gei e-hai au mee humalia! Aago-ina au gi au helekai.

119:69  Digau hagamuamua guu-hai nadau helekai tilikai i-di-au, gei au e-daudali-hua au helekai mai i-lodo dogu manawa hagatau.

119:70  Digaula nadau iloo ai, gei au haganoho la aalaa nia mee e-haga-manawa lamalia au.

119:71  Ogu dadaaligi le e-humalia-mai gi-di-au, idimaa nia maa e-hai au gii-kabe au helekai.

119:72  Au haganoho ala ne-gaamai gi-di-au la-koia e-hagalabagau ko-au laa-hongo nia bahihadu huogodoo o henuailala.

119:73  Goe dela ne-hai au, gei Goe dela e-benebene au haga-humalia. Gaamai gi-di-au di kabemee, gi-iloo-eau au haganoho.

119:74  Digau ala e-hagalaamua Goe la-ga-manawa lamalia ma-ga-mmada-mai gi-di-au, idimaa au dela e-hagadonu au hagababa.

119:75  Meenei Dimaadua, au e-iloo bolo Goe e-hagi-aga au mee gi-di ala dela e-donu, gei Goe dela ne-daaligi au idimaa goe dela e-manawa-dahi.

119:76  Heia do aloho waalooloo gi-haga-manawa lamalia-ina au, gii-hai be dau hagababa dela ne-hai-mai gi-di-au, go dau dangada hai-hegau.

119:77  Goe gi-manawa-dumaalia mai gi-di-au, gei au ga-mouli, idimaa au haganoho la-aalaa nia mee e-haga-manawa lamalia au.

119:78  Heia digau ala e-hagamuamua la-gi-langaadia, idimaa digaula e-hai baahi mai gi-di-au, gei au, au ga-mamaanadu-hua au helekai aago.

119:79  Heia digau ala e-hagalaamua Goe la-gi-lloomoi gi-di-au, aalaa go digau huogodoo ala e-iloo-ginaadou au helekai.

119:80  Heia au gii-dohu di-daudali au haganoho gi-de-langaadia au i dogu magedaa.

119:81  Meenei Dimaadua, au gu-dogono huoloo dagu talitali Goe belee hagamouli au, gei au e-hagadonu huoloo au helekai.

119:82  Ogu golomada guu-pili di haga-daumada au mee ala ne-hagababa, gei au ga-heeu, “Goe e-hagamaamaa au ma-gaa-hee?”

119:83  Au gu-balumee gadoo be-di peege gili manu bobo ne-hudu gi-daha, malaa gei au hagalee de-langahia-eau au helekai.

119:84  Au belee hai-loo gii-tali waalooloo behee? Ma-gaa-hee gei Goe ga-daaligi digau ala e-haihai au haga-huaidu?

119:85  Digau hagamuamua ala hagalee hagagila-aga au haganoho la-guu-geli nadau luwa belee hele au.

119:86  Au haganoho huogodoo le e-donu. Hagamaamaa-ina au, idimaa nia daangada e-hagahuaidu au gi nadau helekai tilikai.

119:87  Digaula gu-hoohoo-hua bolo ga-daaligi au gii-made, gei au hagalee huli gi-daha mo au haganoho.

119:88  Idimaa go do aloho dee-modu, Goe hila-mai gi-di-au, gii-mee au di-daudali au haganoho.

119:89  Meenei Dimaadua, au helekai la-ga-waalooloo-hua beelaa, dono hagaodi ai. Nia maa e-tuu-mau i-di langi.

119:90  Do manawa-dahi le e-waalooloo-hua beelaa ang-gi nia madawaawaa huogodoo. Goe ne-dugu henuailala gi dono lohongo, gei di-maa gu-noho-hua beelaa.

119:91  Nia mee huogodoo e-noho-hua beelaa gi-dangi-nei idimaa go au helekai, idimaa nia mee huogodoo le e-hai-hegau adu gi-di-Goe.

119:92  Maa nei bolo au haganoho la-hagalee go nia mee ala e-hagatenetene au, malaa, au tangada hua guu-made i-lodo ogu hagammaemmae.

119:93  Au ga-hagalee de-langahia-eau au aago, idimaa Goe e-dadaahi-hua dogu mouli mai i-nia maa.

119:94  Haga-dagaloaha-ina au, idimaa au di mee ni-aau! Au gu-hagamahi bolo e-daudali au haganoho.

119:95  Digau huaidu e-talitali au belee daaligi gii-made, gei au gaa-haa au haganoho gi ogu lodo.

119:96  Au gu-iloo-eau bolo nia mee huogodoo la ono hagaodi gi-muli i-golo, gei au haganoho la ono hagaodi ai.

119:97  E-koia e-damanaiee go dogu aloho i au haganoho! Au e-mamaanadu nia maa mai luada gaa-dae-loo gi-di boo.

119:98  Au haganoho le e-madalia au i-nia madagoaa huogodoo, e-hai au gi-kabemee gi-hongo ogu hagadaumee.

119:99  Au gu-kabemee i-hongo ogu gau agoago huogodoo, idimaa, au dela e-hagamamaanadu au helekai aago.

119:100  Au e-iloo nia mee i-hongo digau ala mmaadua, idimaa, au dela e-haga-gila-aga au haganoho.

119:101  Au gu-haga-mogowaa au gi-daha mo nia hagadilinga hangaahai huaidu huogodoo, idimaa au dela e-hiihai e-hagalongo ang-gi au helekai.

119:102  Au hagalee huli gi-daha mo au haganoho, idimaa, ma Kooe hua dela e-aago-mai nia maa gi-di-au.

119:103  E-koia e-maangala go au helekai! Au helekai koia e-maangala i-hongo nia mee-maangala ala e-hai go nia lamu llauehe.

119:104  Au gu-kabemee mai i-di gili au haganoho, deelaa di mee e-hidi-iei au e-hagadugina huoloo gi-nia hagadilinga hangaahai huaidu huogodoo.

119:105  Au helekai la-go di malama dela e-dagi au, gei go di maalama dela e-ina dogu ala.

119:106  Au ga-hagagila-aga dagu hagababa dela bolo au ga-hagalongo gi au haganoho e-donu.

119:107  Meenei Dimaadua, ogu hagammaemmae la-gu-logowaahee! Goe dadaahia-hua beelaa dogu mouli, gii-hai be dau hagababa dela ne-hai.

119:108  Meenei Dimaadua, Goe hila-mai gi dagu dalodalo danggee, aago-ina-mai au gi au haganoho.

119:109  Au gu-dee-hagahuodia-eau dogu mouli, gei au digi de-langahia-eau au haganoho.

119:110  Digau huaidu guu-hai nadau hele belee hele au, gei au digi de-hagalongo gi au haganoho.

119:111  Au haganoho la-go dogu haga-maluagina ga-hana-hua dee-odi, ma go nia maa ala e-haga-tene dogu manawa.

119:112  Au gu-hagamaanadu i lodo dogu manawa bolo au ga-hagalongo gi au haganoho gaa-dae-loo gi dogu laangi dela e-made-iei au.

119:113  Au e-hagadugina i digau ala hagalee manawa-dahi-adu gi-di-Goe, gei au e-aloho i au haganoho.

119:114  Goe go dogu duuli mo dogu hagaloohi, au e-hagadagadagagee gi au hagababa.

119:115  Goodou go digau huaidu, goodou hula gi-daha mo au. Au ga-daudali nia haganoho a dogu God.

119:116  Hagamaaloo-ina-aga au, gii-hai be dau hagababa dela ne-hai, gei au ga-mouli. Goe hudee heia au gi-langaadia i-lodo dogu hagadagadagagee!

119:117  Daahia au, gei au ga-mouli humalia, gei au ga-daudali au haganoho i-nia madagoaa huogodoo.

119:118  Goe e-hagabalumee digau huogodoo ala hagalee e-daudali au haganoho. Nia hagamamaanadu tilikai digaula la ono hadinga ai.

119:119  Goe guu-dugu digau huaidu huogodoo bolo digau hua balumee, gei au e-haga-dahidamee au helekai.

119:120  Au gu-madagu i-di-Goe, au gu-madagu huoloo i dau gabunga.

119:121  Au guu-hai nia mee ala e-donu ge humalia. Goe hudee diagia au gi-lodo nia mogobuna o ogu hagadaumee!

119:122  Heia dau hagababa mai gi-di-au bolo Goe ga-hagamaamaa dau dangada hai-hegau. Goe hudee dugu-ina au gi digau hagamuamua gi-daaligidia.

119:123  Ogu golomada guu-pili di haga-daumada Goe dela belee hanimoi e-haga-dagaloaha au, di haga-dagaloaha dela ne-hagababa Kooe.

119:124  Heia-mai gi-di-au gii-hai be do aloho dee-modu, mo-di aago-ina-mai gi-di-au au haganoho.

119:125  Au go dau dangada hai-hegau, gaamai gi-di-au di kabemee, gi-iloo-eau au agoago.

119:126  Deenei la do madagoaa, meenei Dimaadua, belee daaligi digaula, idimaa nia daangada la-gu-de-hagalongo gi au haganoho.

119:127  Au e-haga-dahidamee au haganoho laa-hongo nia goolo, nia goolo ala e-kaedahi e-humalia.

119:128  Deelaa dagu mee e-daudali au aago huogodoo, gei e-hagadugina-eau nia ala huogodoo ala e-hala.

119:129  Au agoago le e-humalia huoloo. Au e-haga-kila-aga nia maa mai i-lodo dogu manawa hagatau.

119:130  Di haga-modongoohia o au agoago le e-hidi-mai-ai di maalama, ge e-hai digau ala de-kabemee gi-kabemee.

119:131  Au e-hanga dogu ngudu gi-daha mo-di dogidogi hagapodo i dogu hiihai huoloo gi au helekai.

119:132  Huli-mai gi-di-au mo-di manawa-dumaalia mai gi-di-au, be dau hai dela e-hai Kooe gi digau huogodoo ala e-aaloho i-di-Goe.

119:133  Goe gumidia au gi-dee-doo, gii-hai be dau hagababa dela ne-hai. Hudee heia au gii-kumi go di huaidu.

119:134  Haga-dagaloaha-ina au gi-daha mo digau ala e-hagahuaidu au, gii-mee au di-hagagila-aga au haganoho.

119:135  O hadumada la-gi-haga-maalama-ina au, go dau dangada hai-hegau, aago-ina au gi au haganoho.

119:136  Au e-dangi huoloo ogu lodo, idimaa nia daangada la-hagalee hagalongo gi au haganoho.

119:137  Meenei Dimaadua, Goe e-donu, gei au haganoho le e-donu.

119:138  Nia haganoho ala ne-gaamai Kooe le e-donu huoloo ge e-humalia.

119:139  Dogu hagawelewele guu-gaa i ogu lodo gadoo be-di ahi, idimaa go ogu hagadaumee ala e-haga-balumee au haganoho.

119:140  Au hagababa ala ne-hai-mai gi-di-au le e-donu huoloo! Au e-aloho huoloo i-nia maa!

119:141  Dogu huaidina la hagalee dahidamee, di balumee-hua, gei au hagalee de-langahia-eau au haganoho.

119:142  Oo donu le e-donu gaa-hana-hua beelaa, gei au haganoho le e-donu i-nia madagoaa huogodoo.

119:143  Au guu-honu i-nia haingadaa mo dee-baba, gei au haganoho e-hai au gi-tenetene.

119:144  Au aago-mai gi-di-au le e-donu i-nia madagoaa huogodoo. Gaamai gi-di-au di kabemee, gei au gaa-mee di-mouli.

119:145  Au e-gahigahi Goe mai i-lodo dogu manawa hagatau, meenei Dimaadua. Helekai-mai, gei au ga-hagalongo gi au helekai!

119:146  Au e-gahigahi Goe, haga-dagaloaha-ina au, gei au ga-hagagila-aga au haganoho.

119:147  I-mua di laa ma-gaa-hobo, gei au e-gahigahi Goe i-di hagamaamaa. Au e-hagadagadagagee huoloo gi au hagababa.

119:148  I-di waalooloo di boo, gei au e-moe hagaala-hia e-hagamamaanadu au aago.

119:149  Meenei Dimaadua, hagalongo mai gi-di-au, idimaa do aloho le e-waalooloo, hagamodongoohia-ina-mai gi-di-au do dumaalia, haga-mouli-ina au!

119:150  Ogu hagadaumee huaidu la-gu-lloomoi gu-hoohoo-mai, go digau ala hagalee-loo e-hagagila-aga au haganoho.

119:151  Gei goe e-hoohoo-mai gi dogu baahi, meenei Dimaadua, gei au helekai huogodoo le e-noho-hua beelaa.

119:152  Mai loo i-mua gei au gu-iloo-eau au aago. Goe ne-hai nia maa bolo gi-noho-hua waalooloo beelaa.

119:153  Mmada-mai gi dogu hagammaemmae, haga-dagaloaha-ina au, idimaa au digi huli gi-daha mo au haganoho.

119:154  Hagamaamaa-ina au i ogu donu, mo-di haga-dagaloaha-ina au. Benabena-ina dogu mouli gii-hai be dau hagababa dela ne-hai.

119:155  Digau huaidu la-hagalee mouli, i digaula ala hagalee daudali au haganoho.

119:156  Gei do aloho le e-aamua huoloo, meenei Dimaadua, hagamodongoohia-ina-mai do dumaalia mo-di hagamouli-ina au!

119:157  Ogu hagadaumee mo digau ala e-dadaaligi au le e-dogologowaahee, gei au hagalee huli gi-daha mo au haganoho.

119:158  Dogu madagoaa ma-gaa-mmada gi digau hagi-aga dangada aalaa, gei au e-hagawelewele huoloo, idimaa digaula hagalee hagagila-aga au haganoho.

119:159  Meenei Dimaadua, mmada-mai gi-di-au dela e-aloho i au aago. Do aloho la-hagalee huli, malaa goe haga-dagaloaha-ina au!

119:160  Di hagamau o au haganoho la-go di tonu, gei au gabunga huogodoo le e-donu ge dono hagaodi ai.

119:161  Digau aamua e-hai-baahi mai gi-di-au dono hadinga ai, gei au e-hagalaamua au haganoho.

119:162  Au e-tenetene huoloo gi au hagababa, e-tenetene gadoo be tangada ma-gaa-gida ana goloo hagalabagau.

119:163  Au e-hudi dogu wou ge e-hagadugina-eau i-nia helekai tilikai huogodoo, gei au e-haga-dahidamee au haganoho.

119:164  Au e-danggee-adu gi-di-goe haga-hidu i-lodo di laangi e-dahi, idimaa go au gabunga ala e-donu.

119:165  Digau ala e-haga-dahidamee au haganoho le e-noho i-di aumaalia, gei dei dahi mee e-mee di-hai digaula gii-tinga-ai.

119:166  Meenei Dimaadua, au e-talitali dau haga-dagaloaha, gei au e-haga-gila-aga au helekai ala ne-hai.

119:167  Au e-hagagila-aga au agoago, au e-aloho i-nia maa mai i-lodo dogu manawa hagatau.

119:168  Au e-hagalongo ang-gi au haganoho mo au helekai aago, Goe e-gidee agu mee huogodoo ala e-hai.

119:169  Meenei Dimaadua, dagu dangidangi madau di hagamaamaa la-heia gii-dau i-di-Goe! Gaamai gi-di-au di kabemee, gii-hai be dau hagababa dela ne-hai.

119:170  Hagalongo-mai gi dagu dalodalo, mo-di haga-dagaloaha-ina au gii-hai be dau hagababa dela ne-hai!

119:171  Au ga-hagahagaamu Goe i-nia madagoaa huogodoo, idimaa Goe dela e-aago au gi au haganoho.

119:172  Au ga-daahili i au haganoho, idimaa au haganoho le e-donu.

119:173  Goe e-hagatogomaalia i-nia madagoaa huogodoo belee hagamaamaa au, idimaa au dela e-daudali au haganoho.

119:174  Meenei Dimaadua, au e-hidihidi huoloo i dau hagamaamaa o-di haga-dagaloaha! Au haganoho la nia mee e-haga-manawa lamalia au.

119:175  Gaamai gi-di-au di mouli, gii-mee au di-hagaamu Goe. Au helekai aago gi-hagamaamaa-ina au.

119:176  Au e-heehee halaangaa gadoo be tama-siibi ne-ngala. Hanimoi halahala-ina au, go dau dangada hai-hegau, idimaa au digi huli gi-daha mo au haganoho.

Chapter 120

120:1  Dogu madagoaa ne-haingadaa mai gi-di-au, gei au ne-gahigahi a Dimaadua, gei Mee gu-helekai-mai.

120:2  Meenei Dimaadua, haga-dagaloaha-ina au gi-daha mo digau hai-kai tilikai, mo digau halahalau-dangada.

120:3  Goodou go digau hai-kai tilikai, ma di-aha dela gaa-hai go God adu gi goodou? Mee ga-daaligi goodou behee?

120:4  Mee ga-daaligi goodou gi-nia amu-maalei-gaa o tangada-dauwa, mo nia hadu wele mai i-lodo di imu!

120:5  Dogu noho i godou baahi le e-manawa-gee gadoo be dogu noho i Meshech be i-baahi digau Kedar.

120:6  Au guu-noho waalooloo huoloo i-baahi nia daangada ala e-de-hiihai di noho i-di aumaalia!

120:7  Dogu madagoaa ma-ga-helekai gi digaula i-di noho i-di aumaalia, digaula e-hiihai-hua bolo e-hai-tauwa.

Chapter 121

121:1  Au e-hila-aga gi tomo nia gonduu, dogu hagamaamaa la-ga-hanimoi i-hee?

121:2  Dogu hagamaamaa la-ga-hanimoi i-baahi o Dimaadua, dela ne-hai di langi mo henuailala.

121:3  Mee hagalee diiagi goe gii-doo. Do Hagaloohi la-hagalee kii.

121:4  Di Hagaloohi o Israel la-hagalee molemoe be e-kii!

121:5  Dimaadua ga-hagaloohi la goe. Mee e-noho i doo baahi belee madamada humalia i-di-goe.

121:6  Di laa hagalee mmae ana mee adu gi-di-goe i-di aa, be go di malama ma-gaa-boo.

121:7  Dimaadua ga-abaaba la goe gi-daha mo nia hagadilinga haingadaa huogodoo, Mee ga-benebene goe hagahumalia.

121:8  Mee ga-abaaba la goe i do hanimoi mo doo hana, dolomeenei gaa-hana-hua beelaa.

Chapter 122

122:1  Ogu lodo gu-manawa lamalia i-di madagoaa digaula ne-hai-mai gi-di-au boloo, “Gidaadou gaa-hula gi-di Hale o Dimaadua!”

122:2  Malaa, dolomeenei gimaadou gu-i-ginei, e-tuu i-lodo nia bontai o Jerusalem!

122:3  Jerusalem la di waahale ne-haga-hoou, di waahale madamada gei gu-haga-noho hagahumalia.

122:4  Deenei di gowaa e-lloomoi ginai nia madawaawa, go nia madawaawa Israel, e-hai nadau danggee ang-gi Dimaadua gii-hai be nia haganoho a-Maa.

122:5  Deenei di gowaa e-hai-ai nia gabunga, nia king o Israel e-gabunga nadau daangada.

122:6  Goodou dalodalo-ina Jerusalem gii-noho i-di aumaalia, boloo: “Digau ala e-aloho i-di-goe la-gii-noho manawa lamalia.

122:7  Di noho i-di aumaalia gii-gila i-lodo o abaaba mo-di noho humalia la-gii-gila i-lodo oo hale aamua.”

122:8  Au e-helekai gi Jerusalem, “Di noho i-di aumaalia gii-noho i doo baahi”, idimaa go ogu duaahina mo ogu ihoo hagaaloho.

122:9  Au e-dalodalo i ono haadanga-lamalia, idimaa dela go di gowaa e-iai di hale o Dimaadua go tadau God.

Chapter 123

123:1  Meenei Dimaadua, au e-daumada-aga Goe gi-di langi i do gowaa dela e-dagi.

123:2  E-hai gadoo be tangada hai-hegau daane be ahina dela e-gana gi dono dagi, deelaa gadoo di-madau hai e-gana-adu gi-di-Goe, meenei Dimaadua, gaa-dae-loo gi do dumaalia mai gi gimaadou.

123:3  Meenei Dimaadua, Goe dumaalia-mai, dumaalia-mai gi gimaadou. Gimaadou guu-hai haga-huaidu huoloo.

123:4  Gimaadou gu-waalooloo huoloo di-madau haganneennee go digau maluagina, mo-di haga-balumee go digau e-hagaamu ginaadou ala e-hai haga-huaidu gimaadou.

Chapter 124

124:1  Maa nei bolo Dimaadua digi huli-mai i tadau baahi? Digau Israel-nei, helekai-aga!

124:2  Maa nei bolo Dimaadua digi huli-mai i tadau baahi i-di madagoaa o tadau hagadaumee ne-heebagi-mai gi gidaadou,

124:3  gei digaula gaa-holo mouli gidaadou i nadau hagawelewele huoloo mai gi gidaadou,

124:4  gei gidaadou ga-daahee gi-daha i-di mmidi o-di monowai, nia wai guu-gahu gidaadou.

124:5  Nia wai mmidi gu-haga-maalemu gidaadou!

124:6  Gidaadou e-hai tadau danggee gi Dimaadua i Mee dela digi dugua-anga gidaadou gi tadau hagadaumee gi-daaligidia.

124:7  Gidaadou guu-too gi-daha, gadoo be-di manu mamaangi ne-doo gi-daha mo-di hele a tangada hele-manu. Di hele la-gu-mooho, gei gidaadou gu-maahede!

124:8  Tadau hagamaamaa le e-hanimoi i-baahi o Dimaadua dela ne-hai di langi mo henuailala.

Chapter 125

125:1  Digau ala e-hagadagadagagee gi Dimaadua, le e-hai gadoo be-di Gonduu Zion, dela e-deemee di-haga-ngalungalua, gei e-noho hua beelaa.

125:2  E-hai be nia gonduu ala e-daabui-mai di waahale damana o Jerusalem, deelaa gadoo di hai a God e-daabui-mai ana daangada dolomeenei, ga-hana-hua dono hagaodi ai.

125:3  Digau huaidu la-hagalee nnoo-mau e-dagi i-hongo tenua o digau humalia, maa nei bolo gaa-hai beelaa, gei digau ala humalia holongo gaa-hai nia mee huaidu.

125:4  Meenei Dimaadua, heia di humalia gi digau ala e-humalia, ala go digau ala e-hagagila-aga au haganoho.

125:5  Do madagoaa ma-ga-daaligi digau ala e-hai nia mee huaidu, daaligidia labelaa digau ala e-huli gi-daha mo oo ala. Di aumaalia gi-noho-hua beelaa i-baahi Israel!

Chapter 126

126:1  Di madagoaa-hua Dimaadua dela ne-laha-mai gidaadou gi-muli gi Jerusalem, gidaadou nogo hai gadoo be digau ne-hai nadau midi!

126:2  Gidaadou gu-gadagada huoloo! Gidaadou gu-dadaahili mo-di momoogo i tadau tenetene huoloo! Gei nia henua ala i-golo gu-helekai boloo, “Dimaadua guu-hai ana mee humalia huoloo gi digaula.”

126:3  E-donu, Mee guu-hai ana mee humalia huoloo mai gi gidaadou, gidaadou gu-tenetene huoloo!

126:4  Meenei Dimaadua, heia gimaadou gi-haadanga lamalia labelaa! gadoo be-di uwa ma-ga-gaamai ana wai gi-nia anga-monowai.

126:5  Digau ala e-dogi nadau hagadili mo-di tangitangi, la-gi-haadia nia huwa o nadau gowaa mo-di tenetene!

126:6  Digau ala e-kae nadau lii-laagau mo-di tangitangi, la-ga-lloomoi mo nia huwa o nadau gowaa mo-di daahili momoogo tenetene.

Chapter 127

127:1  Maa Dimaadua la-hagalee hau di hale, malaa, nia moomee o digau hau-hale le e-balumee hua. Maa Dimaadua la-hagalee abaaba di waahale, malaa, nia gau hagaloohi o-di waahale deelaa, le e-hagaloohi-hua balumee.

127:2  Ma e-balumee ma-ga-ngalua damana bolo e-halahala au mee e-hagahumalia do mouli, e-ala-aga-loo hagaluada ga-kii-loo boo. Idimaa, Dimaadua le e-wanga nia meegai gi ana daangada ala e-aloho-ai i-di madagoaa digaula e-kii.

127:3  Nia dama la nia wanga-dehuia mai baahi o Dimaadua, di haga-maluagina mai i-baahi o Mee.

127:4  Nia dama-daane o dahi daane i dono madagoaa nogo dama-daane, le e-hai gadoo be nia amu-maalei i-lodo di lima o tangada-dauwa.

127:5  E-maluagina go tangada dela e-logo ana amu-maalei beenei! Mee e-deemee-loo di-bagege i-di madagoaa a-mee ma-ga-heetugi gi ono hagadaumee i-lodo di gowaa hai-gabunga.

Chapter 128

128:1  E-maluagina go digau ala e-hagalongo gi Dimaadua, ge e-daudali ana haganoho.

128:2  Goe gaa-kae o hagahumalia mai i au hegau ala ne-hai. Goe ga-tenetene ga-humalia adu gi-di-goe.

128:3  Doo lodo gaa-hai gadoo be-di laagau-‘grape’ dela e-huwa daulogo i-lodo doo hale, gei au dama-daane gaa-hai gadoo be nia dama-laagau-olib ala e-haganiga dau deebele.

128:4  Taane dela e-hagalongo gi Dimaadua le e-hai-loo gi-haga-maluagina gadoo beenei.

128:5  Dimaadua gi-haga-maluagina-ina goe mai i Zion! Goe gii-mee hualaa di-mmada gi-di gila humalia o Jerusalem i-di waalooloo o do mouli!

128:6  Goe gi-mouli hualaa gii-mee goe di-mmada gi-nia dama o au dama! Di aumaalia gi-noho-hua beelaa i-baahi Israel!

Chapter 129

129:1  Israel, hagia-mai-malaa gi gimaadou be o hagadaumee nogo dadaaligi goe behee mai-loo i do damagiigi.

129:2  “Mai i dogu madagoaa nogo damagiigi, ogu hagadaumee nogo dadaaligi au haga-huaidu, malaa digaula digi haga-magedaa au.

129:3  Digaula guu-tuu dogu dua, gu-mahaa-loo gi-lodo, guu-hai gadoo be-di gowaa ne-geli belee dogi nia lii-laagau.

129:4  Gei Dimaadua, dela koia e-donu, gu-hagamehede au gi-daha mo-di noho hege.”

129:5  Digau huogodoo ala e-de-hiihai gi Zion la-gi-magedaa, gii-llele gi-muli mo-di langaadia.

129:6  Digaula huogodoo gii-hai gadoo be nia geinga-tolo e-tomo i tuatala di hale, ala e-maangoo-hua i-mua nia maa digi tomo llauehe.

129:7  Tangada e-hagabudu nia maa be e-kae nia maa ai.

129:8  Deai tangada e-hana laa-baahi nia maa e-helekai boloo: “Dimaadua gi-haga-maluagina goodou! Gimaadou e-haga-maluagina goodou i-di ingoo o Dimaadua.”

Chapter 130

130:1  Meenei Dimaadua, au e-gahigahi Goe mai i-lodo ogu haingadaa.

130:2  Meenei dogu Dagi, hagalongo-mai gi dagu dangidangi, Goe hagalongo-mai gi dagu gahigahi bolo Goe gi-hagamaamaa-ina mai au!

130:3  Maa Goe gu-hagailongo madau huaidu, malaa, ma koai dela e-mee di-lele gi-daha mo dau hagi-aga?

130:4  Gei Goe gu-dumaalia-mai gi gimaadou, bolo gi-mmaadagu gimaadou i-di-Goe.

130:5  Au e-talitali huoloo di hagamaamaa a Dimaadua. Au e-hagadagadagagee gi-nia helekai a-Maa.

130:6  Dogu talitali Dimaadua la-koia e-damana i-di talitali o digau hagaloohi boo ma-ga-talitali di maalama o-di luada. Uaa, koia e-damana i-di talitali o digau hagaloohi boo ma-ga-talitali di maalama o-di luada.

130:7  Goodou go digau Israel, goodou gi-hagadagadagagee gi Dimaadua, idimaa dono aloho le e-waalooloo, gei Mee e-hiihai e-haga-dagaloaha gidaadou i-nia madagoaa huogodoo.

130:8  Mee ga-haga-dagaloaha ana daangada Israel gi-daha mo nadau huaidu huogodoo.

Chapter 131

131:1  Meenei Dimaadua, au guu-dugu dogu hagamuamua, guu-huli gi-daha mo dogu hagapuu. Au hagalee e-de-nnoomaalia gi-nia mee hagalabagau, be go nia mee ala e-deemee dagu hai.

131:2  Gei au e-humalia-hua i dogu noho deemuu, mo-di noho i-di aumaalia. E-hai gadoo be-di tama e-moe deemuu i-hongo nia lima o dono dinana, deelaa gadoo dogu manawa dela e-noho deemuu i ogu lodo.

131:3  Israel, goe gi-hagadagadagagee-hua gi Dimaadua dangi-nei gaa-hana-hua beelaa!

Chapter 132

132:1  Meenei Dimaadua, Goe hudee de-langahia-e-Goe a David mo nia hagadilinga haingadaa huogodoo ala ne-hai ang-gi Mee.

132:2  Meenei Dimaadua, Goe gi-langahia-e-Goe di mee a-mee dela ne-hagababa, di hagababa a-mee dela ne-hai-adu gi-di-Goe, di Gowaa Aamua, di God o Jacob boloo:

132:3  “Au hagalee hana e-ulu gi-lodo dogu hale, be e-kii i-hongo dogu hada.

132:4  Au hagalee hagamolooloo be e-kii

132:5  gaa-dae-loo gi dagu hagatogomaalia dagu gowaa ang-gi Dimaadua, di hale e-noho-ai di Gowaa Aamua, di God o Jacob.”

132:6  Gimaadou gu-longono i Bethlehem i-di hai o Tebedebe o-di Hagababa, gei gimaadou guu-gida di-maa i-lodo di gowaa maalama i Jearim.

132:7  Gimaadou gu-helekai, “Gidaadou gaa-hula gi-di Hale o Dimaadua, gaa-hai tadau daumaha i-mua di lohongo o-Maa.”

132:8  Meenei Dimaadua, hanimoi gi-di Hale Daumaha, madalia Tebedebe o-di Hagababa, go di ada o mogobuna, e-noho i-kinei ga-hana-hua dono hagaodi ai.

132:9  Au daangada hai-mee-dabu gi-heia nia mee ala e-donu i-nia madagoaa huogodoo, au daangada gi-wwolowwolo tenetene!

132:10  Goe guu-hai dau hagababa gi dau dangada hai-hegau go David. Meenei Dimaadua, Goe hudee hudua gi-daha dau king dela ne-hilihili.

132:11  Goe guu-hai dau hagababa mau-dangihi gi David, go di hagababa dela hagalee huli Kooe: “Au gaa-hai di tama e-dahi i-lodo au dama-daane e-hai di king, mee gaa-dagi i oo muli.

132:12  Maa au dama-daane la-ga-manawa-dahi gi dagu hagababa mo agu haganoho ala ne-wanga gi digaula, gei nia dama-daane digaula gaa-noho labelaa gi-hongo do lohongo king.”

132:13  Dimaadua gu-hilihili a Zion, Mee e-hiihai e-hai dono hale i-di gowaa deelaa:

132:14  “Deenei di gowaa dela ga-noho-iei Au gaa-hana-hua beelaa, go di gowaa deenei dela e-hiihai ginai Au belee dagi.

132:15  Au ga-haga-maluagina a Zion gi-nia hagadilinga hagahumalia huogodoo ala e-hiihai ginai mee. Au gaa-hai digau hagaloale a-maa gi-maaluu gi-nia meegai.

132:16  Au ga-haga-maluagina digau hai-mee-dabu a-maa i-nia mee huogodoo ala e-hai go digaula, gei nia daangada a-maa ga-daahili mo-di wwolowwolo tenetene.

132:17  Go di gowaa deenei dela e-hagagila-aga-ai dagu dangada mai di hagadili o David e-hai di king aamua, gei Au ga-duudagi-adu-hua beelaa gi-muli nia mogobuna o dogu king dela ne-hilihili.

132:18  Au gaa-hai nia hagadaumee o-maa gi-langaadia huoloo, gei dono henua king gaa-gila humalia ge haadanga lamalia.”

Chapter 133

133:1  E-madamada hualaa behee ge haga-manawa lamalia hualaa behee go nia daangada a God ala e-mouli hagadau-buni!

133:2  E-hai gadoo be nia lolo hagatulu hagalabagau ma-gaa-hali-iha i-di libogo o Aaron, gaa-hali-iha gi-nia ngaahulu o dono ngudu, gaa-hali-iha gi-hongo di kala o dono gahu-lloo.

133:3  Ma e-hai gadoo be nia magalillili i-hongo di Gonduu o Hermon e-too gi-hongo nia gonduu lligi o Zion, idimaa deelaa di gowaa a Dimaadua ne-hagababa bolo e-gaamai ginai dana haga-maluagina, dela go di mouli dela dono hagaodi ai.

Chapter 134

134:1  Lloomoi, hagaamu-ina Dimaadua, goodou ala go digau hai-hegau a-Maa huogodoo, mo digau huogodoo ala e-hai nadau hegau boo i-lodo di Hale Daumaha a-Maa.

134:2  Daahia godou lima gi-nua mo-di dalodalo i-lodo dono Hale deelaa, mo-di hagaamu a Dimaadua!

134:3  Dimaadua dela ne-hai di langi mo henuailala, gi-haga-maluagina-ina goodou mai i Zion!

Chapter 135

135:1  Hagaamu-ina Dimaadua! Goodou ala go digau hai-hegau a Dimaadua, hagaamu-ina di ingoo o-Maa,

135:2  go goodou ala e-hai-hegau i-lodo di Hale o Dimaadua, go di Hale o tadau God.

135:3  Hagaamu-ina Dimaadua, idimaa Mee e-humalia. Daahili hagaamu-ina di ingoo o-Maa, idimaa Mee e-dumaalia.

135:4  Mee ne-hilihili a Jacob mo digau Israel belee hai nia mee ni-aana.

135:5  Au guu-donu-mai gi-di-au bolo Dimaadua le e-aamua, e-koia e-aamua i-hongo nia god huogodoo.

135:6  Mee e-hai ana mee huogodoo ala e-hiihai ginai i-di langi i-nua mo i henuailala, mo i-lodo di moana mo i-di gowaa llala.

135:7  Mee e-gaamai nia gololangi madangi gono i-nia mada o henuailala. Mee e-hai nia ila gi-dabadaba i-lodo di madangi gono, ge e-gaamai di madangi gi-daha mo dono lohongo nogo benebene-ai.

135:8  Mee gu-daaligi gii-mmade nia ulu-mmaadua huogodoo o Egypt, nia ulu-mmaadua daangada mono manu.

135:9  Mee guu-hai nia hagadilinga mogobuna haga-goboina i-di gowaa deelaa belee hagaduadua di king mo ana gau hai-hegau aamua.

135:10  Mee gu-daaligi ana daangada dogologowaahee mono king maaloo:

135:11  ala go Sihon, di king o digau Amor, mo Og, di king o Bashan, mo nia king huogodoo o Canaan.

135:12  Mee guu-wanga nia henua digaula gi ana daangada, guu-wanga nia maa gi Israel.

135:13  Meenei Dimaadua, gimaadou guu-dugu Goe bolo di God ni gimaadou i-nia madagoaa huogodoo. Nia hagadili huogodoo ga-langahia-e-ginaadou Goe.

135:14  Dimaadua ga-haga-dagaloaha ana daangada. Mee ga-manawa-aloho i ana gau hai-hegau.

135:15  Nia god o-nia henua la nia mee ne-hai gi-nia silber mo nia goolo, nia maa la-ne-hai gi-nia lima dangada.

135:16  Nia god digaula nadau ngudu i-golo, ge e-deemee di-leelee, nadau golomada i-golo, ge e-deemee di-mmada.

135:17  Digaula nadau dalinga i-golo, ge e-deemee di-hagalongo, digaula nadau ngudu i-golo, ge e-deemee labelaa di-dogidogi.

135:18  Digau huogodoo ala ne-hai nia maa gei e-hagadagadagagee gi-nia maa, la-gii-hai be nia balu-god ala ne-hai go ginaadou!

135:19  Hagaamu-ina Dimaadua, goodou go nia daangada Israel, hagaamu-ina a-Mee, goodou go digau hai-mee-dabu a God!

135:20  Hagaamu-ina Dimaadua, goodou go digau Levi, hagaamu-ina a-Mee, goodou huogodoo ala e-daumaha gi Mee!

135:21  Hagaamu-ina Dimaadua i Zion, i Jerusalem di guongo o-Maa. Hagaamu-ina Dimaadua!

Chapter 136

136:1  Danggee ang-gi Dimaadua, idimaa Mee e-humalia. Di aloho o-Maa hagalee modu.

136:2  Danggee gi-di God dela koia e-aamua i-nia god huogodoo. Di aloho o-Maa hagalee modu.

136:3  Danggee gi-di Tagi dela koia e-maaloo i-hongo nia dagi huogodoo. Di aloho o-Maa hagalee modu.

136:4  Go Mee modogoia dela e-hai ana mogobuna hagagoboina. Di aloho o-Maa hagalee modu.

136:5  Mee ne-hai di langi gi dono kabemee. Di aloho o-Maa hagalee modu.

136:6  Mee ne-hai henuailala gi-hongo nia wai llala. Di aloho o-Maa hagalee modu.

136:7  Mee ne-hai di laa mo-di malama. Di aloho o-Maa hagalee modu.

136:8  Di laa e-dagi di aa. Di aloho o-Maa hagalee modu.

136:9  Di malama mo nia heduu e-dagi di boo. Di aloho o-Maa hagalee modu.

136:10  Mee gu-daaligi gii-mmade nia ulu-mmaadua dama-daane digau Egypt. Di aloho o-Maa hagalee modu.

136:11  Mee guu-lahi digau Israel gi-daha mo Egypt, Di aloho o-Maa hagalee modu.

136:12  gi-nia mahi mo nia mogobuna mahi o-nia lima o-Maa. Di aloho o-Maa hagalee modu.

136:13  Mee gu-wwae-lua di Tai Mmee. Di aloho o-Maa hagalee modu.

136:14  Mee guu-lahi ana daangada laa-lodo di tai deelaa. Di aloho o-Maa hagalee modu.

136:15  Mee guu-hai di king o Egypt mo ana gau-dauwa gi-mmaalemu. Di aloho o-Maa hagalee modu.

136:16  Mee guu-lahi ana daangada laa-lodo di anggowaa. Di aloho o-Maa hagalee modu.

136:17  Mee gu-daaligi gii-mmade nia king maaloo-dangihi. Di aloho o-Maa hagalee modu.

136:18  Mee gu-daaligi gii-mmade nia king ala e-dau, Di aloho o-Maa hagalee modu.

136:19  ala go Sihon, di king o digau Amor, Di aloho o-Maa hagalee modu.

136:20  mo Og, di king o Bashan. Di aloho o-Maa hagalee modu.

136:21  Mee guu-wanga nia henua digaula gi ana daangada. Di aloho o-Maa hagalee modu.

136:22  Mee guu-wanga nia maa gi Israel, go dana dangada hai-hegau. Di aloho o-Maa hagalee modu.

136:23  Mee digi de-langahia-e-Ia gidaadou i tadau madagoaa ne-magedaa. Di aloho o-Maa hagalee modu.

136:24  Mee ne-haga-dagaloaha gidaadou gi-daha mo tadau hagadaumee. Di aloho o-Maa hagalee modu.

136:25  Mee ne-wanga nia meegai gi-nia manu mouli huogodoo. Di aloho o-Maa hagalee modu.

136:26  Goodou danggee ang-gi di God o-di langi. Di aloho o-Maa hagalee modu.

Chapter 137

137:1  Gimaadou nogo noho i taalinga nia monowai i Babylon, ga-maanadu mai Zion, ga-tangitangi.

137:2  Gimaadou gu-daudau madau ‘harp’ gi tomo nia laagau ala i madau baahi.

137:3  Digau ala ne-lahi gimaadou galabudi e-hai-mai gi gimaadou bolo gimaadou gi-daahili. Digau ala e-hagaduadua gimaadou le e-hai bolo gimaadou gi-haga-tenetene-ina ginaadou: “Daahili-mai gi gimaadou i-di hai o Zion.”

137:4  Gimaadou e-deemee-loo di-daahili i-lodo tenua o digau mai i-daha!

137:5  Au bolo au gi-deemee-hua-laa di-dadaahili i-di ‘harp’ maa au ga-de-langahia-eau goe, Jerusalem!

137:6  Au bolo au gi-deemee-hua-laa di-daahili labelaa maa au digi langahia-eau goe, gei digi hagamaanadu-ina goe bolo goe go dogu haga-tenetene!

137:7  Meenei Dimaadua, Goe gi-langahia di mee a digau Edom ne-hai i-di laangi dela ne-kumi-ai Jerusalem go madau hagadaumee. Goe gi-langahia telekai digaula dela ne-hai boloo, “Ohaa-ina gi-meheu gi-lala!”

137:8  Babylon, goe ga-mooho. E-maluagina go tangada dela e-tala di hui adu gi-di-goe i dau mee dela ne-hai-mai gi gimaadou.

137:9  E-maluagina go tangada dela e-kae au ligiana, ga-haga-mamaawa gi-di gili tadugalaa.

Chapter 138

138:1  Au e-danggee-adu gi-di-Goe, meenei Dimaadua, mai i-lodo dogu manawa hagatau. Au e-daahili-adu gi-di-Goe i taahili hagaamu i-mua nia god.

138:2  Au e-huli-adu gi do Hale Daumaha haga-madagu, e-bala gi-lala mo-di hagaamu do ingoo, idimaa go do aloho dee-modu mo do manawa-dahi, idimaa Goe gu-hagamodongoohia di hai o do ingoo mo au haganoho bolo e-aamua huoloo.

138:3  Goe gu-helekai-mai dogu madagoaa ne-gahigahi Goe. Goe gu-haga-maaloo-aga au gi oo mahi.

138:4  Meenei Dimaadua, nia king huogodoo ala i henuailala ga-hagaamu Goe, idimaa digaula gu-longono-ginaadou au hagababa.

138:5  Digaula ga-daahili gi dau mee dela ne-hai, mo do madamada aamua.

138:6  Ma e-aha maa Goe e-noho i-di gowaa i-nua-loo, gei Goe e-madamada humalia i digau ala e-lligi. Gei digau ala e-hagamuamua e-deemee di-nngala i oo mua.

138:7  Dogu madagoaa nogo haingadaa-mai gi-di-au, gei Goe gu-benebene au haga-humalia. Goe gu-hai-baahi gi ogu hagadaumee hagawelewele, ga-haga-dagaloaha au gi o mogobuna.

138:8  Goe gaa-hai au mee huogodoo ala guu-lawa dau hagababa. Meenei Dimaadua, do aloho la-hagalee modu. Hagalawa-ina au moomee ala guu-lawa i dau daamada.

Chapter 139

139:1  Meenei Dimaadua, Goe gu-hagadina au, gei gu-iloo-e-Goe au.

139:2  Goe e-iloo nia mee huogodoo ala e-hai ko-au, Goe e-modongoohia agu hagamaanadu mai i-di gowaa mogowaa.

139:3  Goe e-mmada-mai gi-di-au, be au e-ngalua be e-hagamolooloo. Goe e-iloo ogu hangahaihai huogodoo.

139:4  I-mua dagu helekai, gei Goe gu-iloo dagu helekai dela gaa-hai.

139:5  Goe e-haganiga au i-nia baahi huogodoo, Goe e-abaaba au gi oo mahi.

139:6  Do iloo-e-Goe au la koia e-haga-goboina huoloo mai gi-di-au, e-donu-ngadaa huoloo ginai au.

139:7  Ma dehee di gowaa e-mee di-hana ginai au, gei au gaa-tanga gi-daha mo do Hagataalunga? Di gowaa i-hee e-mee di-lele ginai au bolo gii-ngala au i-di-Goe?

139:8  Maa nei bolo au ne-hana gi-nua gi-di langi, gei Goe guu-noho i-golo. Maa nei bolo au ne-hana gi-di gowaa o digau mmade, gei Goe gu-i-golo.

139:9  Maa nei bolo au ne-maangi gi-dua-loo, be ne-noho i-di gowaa dela koia e-mogowaa loo gi dai,

139:10  gei Goe gu-i-golo i-nia gowaa aalaa belee dagi au, gei Goe gu-i-golo belee hagamaamaa au.

139:11  Maa nei bolo au ga-helekai gi-di bouli bolo gi-gahu-ina au, be go di maalama dela e-haganiga au gi-bouli,

139:12  malaa, di bouli dongoeho le e-deemee di-haga-bouli ana mee adu gi-di-Goe, gei di boo le e-maalama-hua be-di aa. Di bouli dongoeho mo-di maalama le e-hai-hua be-di mee e-dahi i doo baahi.

139:13  Goe ne-hai nia mee huogodoo o dogu huaidina, gei Goe ne-haga-noho au i-lodo tinae o dogu dinana.

139:14  Au e-hagaamu Goe i doo hai au hagahumalia ge haga-goboina, au mee huogodoo ala e-hai le e-haga-goboina gei e-humalia huoloo. Au gu-iloo-eau di mee deenei mai i-lodo dogu manawa hagatau.

139:15  Di madagoaa-hua ogu iwi ne-haga-noho hagahumalia gii-donu i lodo tinae o dogu dinana, ga-tomo-aga i-di gowaa ngala, gei Goe gu-iloo bolo au gu-i-golo.

139:16  I-mua dogu haanau, gei Goe gu-gidee au. Nia laangi ala e-mouli-iei au la-gu-hagailongo huogodoo gi-lodo dau beebaa, mo i-mua di daamada di laangi matagidagi o dogu mouli.

139:17  Meenei God, do manawa le e-modongoohia-ngadaa mai gi-di-au! E-logowaahee go au haga-mamaanadu!

139:18  Maa au gaa-hai bolo e-dau nia maa, ma koia e-logowaahee i-nia gelegele ala i tongotai! Au ne-ala-aga, gei au i doo baahi hua igolo.

139:19  Meenei God, au e-hiihai huoloo bolo Goe gi-daaligidia gii-mmade digau huaidu! Au e-hiihai huoloo bolo digau daaligi-dangada la-gii-hula gi-daha mo au!

139:20  Digaula e-helehelekai huaidu i-di-Goe. Digaula e-helekai hagahuaidu do ingoo.

139:21  Meenei Dimaadua, au e-hagadugina-eau digau ala e-hagadugina-e-ginaadou Goe! Au e-haga-balumee digau ala e-hai-baahi adu gi-di-Goe.

139:22  Au e-hagadugina huoloo i digaula. Au guu-dugu digaula bolo nia hagadaumee ni-oogu.

139:23  Meenei God, hagadina-ina au, gi-iloo-e-Goe dogu manawa. Hagamada-ina au, gi-iloo e-Goe agu hagamaanadu.

139:24  Halahala-ina be ma nia huaidu i dogu baahi, mo-di dagi au gi-di ala o-di mouli dee-odi.

Chapter 140

140:1  Meenei Dimaadua, haga-dagaloaha-ina au gi-daha mo digau huaidu. Benebene-ina au gi-daha mo digau daaligi dangada.

140:2  Digaula e-haga-tataele nadau mee huaidu i-nia madagoaa huogodoo, e-nnoo-mau e-hai nia daangada gi-lagamaaloo.

140:3  Nia holole digaula e-hai gadoo be nia holole gihaa daaligi dangada. Nia helekai digaula e-hai be nia poisin gihaa.

140:4  Meenei Dimaadua, abaabalia au gi-daha mo nia mogobuna o digau huaidu, duulia au gi-daha mo digau daaligi dangada ala bolo ginaadou e-hai au gii-doo.

140:5  Digau hagamuamua guu-hai di-nadau hele belee hele au. Digaula guu-dugu nadau hele i-nia daalinga nia ala belee kumi au.

140:6  Gei au ga-helekai gi Dimaadua, “Ma Kooe di God ni-oogu.” Meenei Dimaadua, hagalongo-mai gi dagu gahigahi i-di hagamaamaa!

140:7  Meenei dogu Dagi go Yihowah, dogu Dangada Hagamaamaa maaloo, Goe ne-duuli au i-lodo teebagi.

140:8  Meenei Dimaadua, Goe hudee wanga-ina gi digau huaidu nia mee digaula ala e-hiihai ginai, hudee heia nia hagatataele huaidu digaula gii-kila.

140:9  Goe hudee heia ogu hagadaumee gi-aali. Heia nia hagahuaidu digau ala e-hai-baahi-mai gi-di-au la-gii-hula gi-muli gi digaula.

140:10  Heia nia malala-gaa gi-monnono gi-hongo digaula, kilia digaula gi-lodo di luwa llala, gi-deemee di lloo-aga.

140:11  Hudee heia digau ala e-hai baahi tilikai gi-nia daangada la-gii-gila. Di huaidu la-gi-daaligidia gii-mmade digau daaligi dangada.

140:12  Meenei Dimaadua, au e-iloo bolo Goe e-hagamaamaa nia donu o digau hagaloale, mo nia donu o digau ala gu-haadanga-balua.

140:13  E-donu, digau ala e-haihai nia mee donu ga-hagaamu Goe. Digaula ga-mouli i oo mua.

Chapter 141

141:1  Au e-gahigahi Goe, meenei Dimaadua, hagamaamaa-ina au dolomeenei! Hagalongo-mai gi-di-au i dogu madagoaa ma-ga-gahigahi Goe.

141:2  Daahia-adu dagu dalodalo gadoo be nia ‘incense’, daahia-adu ogu lima ala e-daahi gi-nua e-dalodalo, gii-hai be dau hai dela e-daahi-adu tigidaumaha o-di hiahi.

141:3  Meenei Dimaadua, dugua dau dangada e-loohi dogu ngudu, dugua dau dangada-dauwa e-hagaloohi di bontai o dogu ngudu.

141:4  Abaaba-ina au gi-hagalee hiihai e-hai nia mee hala, be e-hagabuni gi digau huaidu i-lodo nadau haihai huaidu. Heia au gi-hagalee hana i-nia hagamiami digaula.

141:5  Tangada humalia e-mee di-hagaduadua au ge e-aago au i-di manawa-humalia, gei au hagalee tene gi digau huaidu e-hagalaamua au, idimaa agu dalodalo le e-hai-baahi gi-nia hegau huaidu digaula i-nia madagoaa huogodoo.

141:6  Di madagoaa nia dagi digaula ma-gaa-kili-ia gi-lala mai i-hongo nia hadugalaa duuduu i-nua, deelaa di madagoaa o-nia daangada ga-hagadonu-laa bolo agu helekai le e-donu.

141:7  Nia iwi digaula ga-malae i-hongo nadau daalunga gadoo be nia laagau ma-ga-hahaahi ga-duuduu hagalligi.

141:8  Meenei dogu Dagi go Yihowah, au e-hagadagadagagee-adu gi-di-Goe. Au e-halahala doo duuli, hudee diagia au gii-made!

141:9  Abaaba-ina au gi-daha mo nia hele digaula ala ne-hai belee hele au, mo nia hele o digau hai mee huaidu.

141:10  Digau huaidu la-heia gi-monnono gi-lodo nadau hele donu, gei au gii-hana hagahumalia.

Chapter 142

142:1  Au e-gahigahi a Dimaadua belee hagamaamaa au, e-madau hagamahi gi Mee.

142:2  Au e-hagi-anga gi Mee ogu dee-donu huogodoo. Au e-hagi-anga gi Mee ogu haingadaa huogodoo.

142:3  Dogu madagoaa hua ga-bagege ogu lodo, gei Mee e-iloo-Ia be ma di-aha dela e-humalia belee hai ko-au. Ogu hagadaumee guu-dugu hagammuni nadau hele belee hele au i-lodo nia ala e-haele-iei au.

142:4  Dogu madagoaa ne-mmada gi ogu daha, gei au gu-gidee bolo ma tangada i-golo bolo e-hagamaamaa au ai, ge tangada e-abaaba au ai, gei tangada hogi e-hagadahidamee au ai.

142:5  Meenei Dimaadua, au e-gahigahi Goe belee hagamaamaa au. Kooe, meenei Dimaadua, ma dela hua Kooe dela go dogu abaaba, ma dela hua Kooe dela e-hiihai ginai au i-lodo di mouli nei.

142:6  Hagalongo-mai gi dagu gahigahi di hagamaamaa, idimaa au gu-abulu gi-lodo di haingadaa. Haga-dagaloaha-ina au gi-daha mo ogu hagadaumee, digaula e-maaloo-dangihi balua i-di-au.

142:7  Hagamehede-ina au gi-daha mo ogu haingadaa, gei au ga-hagaamu Goe i-lodo nia dagadagabuli o au daangada, idimaa Goe dela e-dumaalia-mai gi-di-au.

Chapter 143

143:1  Meenei Dimaadua, hagalongo-mai gi dagu dalodalo! Hagalongo gi dagu dangidangi, idimaa Goe dela e-donu. Helekai-mai gi-di-au, idimaa Goe e-manawa-dahi.

143:2  Goe hudee hagi-aga-ina au, go dau dangada-hai-hegau, idimaa ma tangada e-donu i oo mua ai.

143:3  Ogu hagadaumee guu-kumi au gu-hagamagedaa. Digaula guu-dugu au gi-lodo di hale galabudi bouli dongoeho, au guu-hai gadoo be tangada guu-made i-mua-loo.

143:4  Ogu lodo gu-bagege, gei au gu-de-nnoomaalia huoloo.

143:5  Au e-langahia nia laangi ala ne-too gi-daha. Au e-hagabaubau i au mee huogodoo ala ne-hai, ge e-hagalangahia-mai gi-di-au au mee huogodoo ala ne-hai.

143:6  Au e-daahi-aga ogu lima gi-nua e-dalodalo-adu gi-di-Goe. Dogu hiihai huoloo adu gi-di-Goe le e-hai gadoo be nia gelegele maangoo ala e-hiihai huoloo gi-di uwa.

143:7  Meenei Dimaadua, helekai-mai gi-di-au dolomeenei! Au gu-dogu hagadagadagagee ai, Goe hudee hagammuni-ina Goe i-di-au, gi-dee-hana-hua au madalia digau ala e-hula gi-lala gi tenua o digau mmade.

143:8  Hagalangahia-ina-mai gi-di-au i-nia luada huogodoo di hai o do aloho deemodu, idimaa au e-hagadagadagagee-adu gi-di-Goe. Agu dalodalo e-lloo-aga gi-di-Goe. Hagia-mai gi-di-au di ala dela belee haele-iei au.

143:9  Meenei Dimaadua, au e-hanadu gi-di-Goe belee abaaba Kooe. Haga-dagaloaha-ina au gi-daha mo ogu hagadaumee.

143:10  Goe go dogu God, aago-ina au gi-di hai dela e-haga-gila-aga do manawa. Goe gi-manawa humalia mai gi-di-au, mo-di dagi au gi-lodo di ala dela e-donu.

143:11  Haga-dagaloaha-ina au, meenei Dimaadua, e-hagalaamua do ingoo. Haga-dagaloaha-ina au gi-daha mo ogu haingadaa gi do manawa humalia!

143:12  Idimaa go do aloho damanaiee i-di-au, daaligidia ogu hagadaumee gii-mmade, mo digau huogodoo ala e-hagahuaidu au, idimaa, au tangada hai-hegau ni-aau.

Chapter 144

144:1  Hagaamu-ina Dimaadua, go dogu Abaaba! Mee e-aago au gi-nia hegau o tauwa, ge e-hagatogomaalia au gi tauwa.

144:2  Mee go dogu Abaaba mo dogu Dangada Daa, go dogu gowaa e-bala ginai au mo dogu Dangada Hagamouli dela e-hagadagadagagee huoloo ginai au. Mee e-dugu nia henua gi-lala ogu mogobuna.

144:3  Meenei Dimaadua, tangada la di-aha dela Goe e-de-nnoomaalia ai, tangada hua dangada, gei Goe e-hagalongo gi mee?

144:4  Mee e-hai gadoo be-di oloolo madangi. Di waalooloo o dono mouli le e-hai gadoo be-di malu dela e-limalima-hua di-hagalee.

144:5  Meenei Dimaadua, hugee di langi gi-mahuge mo-di haneia gi-lala. Bili gi-nia gonduu, gei nia maa gaa-gohu-mai nia huiahi.

144:6  Heia nia ila gi-dabadaba, gi-lellele dagidahi o hagadaumee. Puugia au amu-maalei e-hagabagi digaula gii-hula gii-llele.

144:7  Daahia-mai doo lima, daahi-aga-ina au gi-daha mo nia wai llala, haga-dagaloaha-ina au. Haga-dagaloaha-ina au gi-daha mo digau henua-gee,

144:8  ala hagalee helekai donu ge e-hai nadau helekai tilikai i-lodo nadau hagamodu ne-hai.

144:9  Meenei Dimaadua, au ga-daahili-adu gi-di-Goe taahili hoou. Au ga-daahili i-di ‘harp’ mo-di daahili adu gi-di-Goe.

144:10  Goe e-hai nia king gi-aali i-lodo nia dauwa, ga-haga-dagaloaha dau dangada hai-hegau go David.

144:11  Haga-dagaloaha-ina au gi-daha mo ogu hagadaumee huaidu. Daawa-ina au gi-daha mo nia mogobuna o digau henua-gee, ala hagalee helekai donu, ge e-hai nadau helekai tilikai i-lodo nadau hagamodu ne-hai.

144:12  Madau dama-daane i nadau madagoaa ala e-dama-daane-ai gii-hai gadoo be nia laagau ala e-tomo maaloo. Madau dama-ahina gii-hai be-nia duludulu mmaadanga ala e-laagei nia madaaduge di hale di king.

144:13  Madau hale benebene meegai la-gii-honu i-nia hagadilinga huwa-laagau huogodoo. Nia siibi ala i-lodo madau gowaa la-gi-hahaanau nadau dama e-logowaahee.

144:14  Madau kau la-gi-hahaanau gi-logowaahee, di tama e-haanau ge digi dohu be e-ngala ai. Nia lee haga-manawa-gee hudee heia gii-hai i-hongo nia ala o madau waahale.

144:15  E-maluagina go nia daangada ala ma-gaa-hai ginai di hagamaluagina beenei! E-maluagina go nia daangada ala di-nadau God go Dimaadua!

Chapter 145

145:1  Meenei dogu God dela go di King, au ga-hagadele di hai oo mahi aamua, gei au ga-danggee-adu gi-di-Goe i-nia madagoaa huogodoo gaa-hana-hua beelaa.

145:2  Nia laangi huogodoo, gei au ga-danggee adu gi-di-Goe, gei au ga-hagaamu Goe gaa-hana-hua beelaa.

145:3  Dimaadua e-aamua ge humalia belee hagaamu giibeni, tangada e-iloo-ia tamanaiee aamua o-Maa ai.

145:4  Nia daangada ga-haga-modongoohia au mee huogodoo ala ne-hai ang-gi di adu-dangada nomuli, gei digaula ga-hagaamu o mogobuna. Digaula ga-hagadele di hai o au hegau mogobuna.

145:5  Digaula ga-helehelekai i-di hai o do madamada mo do aamua dee-odi. Gei au ga-hagabaubau huoloo i o hangaahai haga-goboina huoloo.

145:6  Nia daangada huogodoo ga-helehelekai i-di hai o-nia mee huogodoo ala ne-hai gi o mogobuna, gei au ga-hagadele di hai o do maaloo aamua.

145:7  Digaula ga-helehelekai i do humalia, gei e-dadaahili i-di hai o do dumaalia.

145:8  Dimaadua le e-koia e-aloho huoloo gei e-dumaalia, e-hagalee hagawelewele-ngoohia, gei e-honu i-di aloho dee-odi.

145:9  Mee e-humalia ang-gi nia daangada huogodoo, gei e-manawa-dumaalia gi ana mee huogodoo ala ne-hai.

145:10  Meenei Dimaadua, au mee huogodoo ala ne-hai Kooe ga-hagaamu Goe, gei au daangada huogodoo ga-danggee-adu gi-di-Goe.

145:11  Digaula ga-helehelekai i-di mahi madamada oo dagi dau golohenua, mo-di hai o mogobuna,

145:12  bolo gi-iloo-ai nia daangada huogodoo di hai o mogobuna, mo-di hai o-nia mahi madamada o do henua.

145:13  Di hai o-di dagi dau golohenua la dono hagaodi ai, gei Goe e-king gaa-hana-hua beelaa. Dimaadua le e-manawa-dahi-hua gi ana hagababa, gei e-dumaalia i ana hangahaihai huogodoo.

145:14  Gei mee e-hagamaamaa digau huogodoo ala guu-noho i-lodo di haingadaa, gei e-dahi-aga digau huogodoo ala guu-too gi-lala.

145:15  Digau ala e-mouli huogodoo, ginaadou e-mmada-adu mo-di hagadagadagagee-adu gi-di-Goe, gei Goe e-haangai digaula gii-hai be nadau hiihai.

145:16  Goe e-wanga gi digaula nadau mee ala e-dohu-anga, gei e-hagahumalia digaula gi-tau-anga gi nadau hiihai.

145:17  Dimaadua le e-donu i ana mee huogodoo ala e-hai, gei e-dumaalia i ana hangahaihai huogodoo.

145:18  Mee e-noho hoohoo gi digau huogodoo ala e-gahigahi a-Mee, go digau ala e-gahigahi a-Mee i-di tonu.

145:19  Mee e-wanga gii-dohu nia hiihai o digau huogodoo ala e-hagalabagau Ia, e-hagalongo gi nadau dangidangi, gei e-haga-mouli digaula.

145:20  Mee e-hagaloohi digau huogodoo ala e-aloho i-de-Ia, gei e-daaligi gi-daha digau huaidu huogodoo.

145:21  Au ga-hagaamu Dimaadua i-nia madagoaa huogodoo. Ana mee huogodoo ala ne-hai la-gi-hagaamuina dono ingoo dabuaahia i-nia madagoaa huogodoo gaa-hana-hua beelaa.

Chapter 146

146:1  Goodou gi-hagaamuina Dimaadua! Dogu hagataalunga-nei, hagaamuina Dimaadua!

146:2  Au ga-hagahagaamu a God i-di waalooloo o dogu mouli, gei au ga-daahili ang-gi dogu God i-di waalooloo o dogu mouli.

146:3  Goodou hudee hagadagadagagee gi digau aamua i henuailala, be tei dangada hua dela e-deemee di-haga-dagaloaha goodou.

146:4  Idimaa, digaula gaa-mmade gei digaula guu-hai hua nia gelegele, gei nadau mee ala bolo gi-heia hogi, gu-hagaodi i-di laangi hua deelaa.

146:5  E-maluagina go tangada dela ma-ga-hagamaamaa go di God o Jacob. E-maluagina go tangada dela e-hagadagadagagee gi Dimaadua dela go dono God,

146:6  dela ne-hai di langi mo henuailala mo-di moana mo nadau hagahonu huogodoo. Mee e-haga-gila-aga ana hagababa i-nia madagoaa huogodoo.

146:7  Mee e-haga-gila-aga nia donu o digau huogodoo ala guu-noho i-lala di hagaduadua, gei e-haangai digau huogodoo ala gu-hiigai. Dimaadua e-haga-dagaloaha digau ala guu-noho i-lodo di lawalawa,

146:8  gei e-huge nia golomada o digau ala gu-dee-gida. Mee e-haga-mahi-aga digau huogodoo ala gu-delouaa. Gei mee hogi e-aloho i digau ala e-donu.

146:9  Mee e-madamada humalia i digau mai-daha ala e-noho-gainga i-lodo tadau henua, gei Mee e-hagamaamaa nia ahina ala guu-mmade nadau lodo mo nia dama ala guu-mmade nadau maadua, gei e-hagahuaidu nia hagatataele o digau huaidu.

146:10  Dimaadua la-go di King gaa-hana-hua beelaa! Zion, doo God dela gaa-dagi gaa-hana-hua beelaa! Hagaamuina Dimaadua!

Chapter 147

147:1  Hagaamu-ina Dimaadua! Ma e-humalia ma-ga-daahili e-hagaamu tadau God. Ma koia e-humalia gei e-donu dela belee hagaamu a-Mee.

147:2  Dimaadua e-haga-duu-aga hoou Jerusalem. Mee e-laha-mai labelaa digau Israel ala ne-lahi galabudi.

147:3  Mee e-hagahili nia daangada ala gu-manawa-gee, gaa-hii nia gowaa digaula ala e-moholehole.

147:4  Go Mee dela ne-haga-noho di hulu heduu, e-gahi di ingoo di heduu-nei mo-di heduu-nei.

147:5  Tadau Dagi le e-aamua ge maaloo. Di kabemee o-Maa le e-deemee di-hagatau.

147:6  Mee e-dahi-aga digau ala e-manawa hila-gi-lala, ge e-dagadagahi digau huaidu gi-lodo nia gelegele.

147:7  Daahili i-nia daahili hagaamu ang-gi Dimaadua. Daahili i godou ‘harp’ ang-gi tadau God.

147:8  Mee e-hagamodoho nia gololangi i-lala di langi. Mee e-hai nia uwa gii-too gi henuailala, gaa-hai nia geinga-tolo gii-tomo i-tomo nia gonduu.

147:9  Mee e-wanga nia meegai gi-nia manu, ga-haangai nia manu-mamaangi-‘raven’ i nadau madagoaa ma-ga-tangitangi hiigai.

147:10  Mee hagalee manawa-tene gi-nia hoodo maaloo, be gi-nia daane-dauwa de-mmaadagu.

147:11  Mee e-manawa-tene-hua gi digau ala e-hagalaamua Ia, mo digau ala e-hagadagadagagee gi dono aloho dee-modu.

147:12  Jerusalem, hagaamuina Dimaadua! Zion, hagaamu-ina doo God!

147:13  Mee e-hagaloohi haga-humalia nia ngudu nia bontai o dau abaaba. Mee e-haga-maluagina au daangada.

147:14  Mee e-madamada humalia tagageinga o do henua, ga-haangai goodou gi-nia palaawaa ala koia e-humalia.

147:15  Mee ga-helekai gi henuailala, gei di mee a-Maa dela ne-helekai-ai le e-gila hagalimalima.

147:16  Mee e-holo nia ‘snow’ gadoo be-di ‘blanket’, ga-haga-nonnono nia magalillili gadoo be nia gelegele.

147:17  Mee e-haga-doo dana uwa-hadu magalillili gadoo be nia giligili. Deai tangada e-mee di-noho mahana i-lodo di magalillili ma-ga-hai-mai go Mee ai!

147:18  Mee e-helekai-hua gei nia koolii gu-waiwai. Mee gaa-hai di madangi gii-gono, gei nia wai ga-malingi.

147:19  Mee e-wanga ana helekai gi ana daangada, ana aago mo ana haganoho gi digau Israel.

147:20  Mee digi hai di mee deenei gi digau o-nia henua ala i-golo, digaula e-de-iloo-ginaadou ana haganoho. Hagaamu-ina Dimaadua!

Chapter 148

148:1  Goodou gi-hagaamuina Dimaadua! Goodou ala go digau ala e-noho i-nua, goodou hagaamuina Dimaadua mai i-di langi.

148:2  Goodou ala go ana gau di-langi, goodou huogodoo gi-hagaamuina a-Mee, goodou go dana buini-dauwa o di-langi, goodou huogodoo gi-hagaamuina a-Mee.

148:3  Goolua go di laa mo-di malama, goolua hagaamuina a-Mee. Goodou go nia heduu madamada, goodou gi-hagaamuina labelaa a-Mee.

148:4  Goodou go di langi dela i-nua-loo mo nia wai ala i-hongo di langi, goodou gi-hagaamuina a-Mee.

148:5  Nia maa huogodoo gi-hagaamuina di ingoo o Dimaadua! Idimaa, Mee ne-helekai-hua, gei nia maa guu-hai.

148:6  Mee ne-helekai-hua, gei nia mee guu-noho gi nadau lohongo, gaa-hana-hua beelaa, gei nia maa e-deemee di-de-hagalongo.

148:7  Goodou hagaamuina Dimaadua mai i henuailala, goodou ala go nia manu hagamadagudagu-dangada ala i-lodo di moana mo ala i-tua di moana,

148:8  mo goodou ala go di ila mo-di uwa-hadu-magalillili, nia ‘snow’ mo nia gololangi, mo nia madangi llauehe ala e-hagalongo gi ana helekai.

148:9  Goodou hagaamuina a-Mee, goodou ala go nia gowaa nnoonua mo nia gonduu, nia laagau ala e-huwa mo nia laagau o lodo-henua,

148:10  mo nia manu huogodoo, nia manu gaidala mono manu lodo-geinga, nia manu dolodolo mono manu mamaangi.

148:11  Goodou hagaamuina a-Mee, goodou ala go nia king mo digau huogodoo, nia dagi aamua mo digau huogodoo aamua ala i-golo,

148:12  mo goodou ala go nia dama-daane mo nia dama-ahina, digau mmaadua mo nia dama-lligi.

148:13  Digaula huogodoo gi-hagaamuina di ingoo o Dimaadua! Dono ingoo la-koia e-aamua huoloo i-nia ingoo huogodoo ala i-golo. Dono madamada e-noho i-hongo di langi mo henuailala.

148:14  Mee dela gu-hagamaaloo-aga dono henua, gei ana daangada huogodoo ga-hagaamu a-Mee, aalaa go digau Israel ala e-aloho huoloo iei Mee. Goodou gi-hagaamuina Dimaadua!

Chapter 149

149:1  Hagaamu-ina Dimaadua! Goodou daahili ang-gi Dimaadua i taahili hoou, hagaamu-ina a-Mee i-mua nia dagabuli o ana daangada manawa-dahi!

149:2  Israel, goe gi-manawa lamalia, idimaa go Mee dela ne-hai goe. Goodou, go nia daangada o Zion, goodou tenetene, idimaa go di-godou king!

149:3  Goodou gaalege hagaamuina di ingoo o-Maa. Goodou daahili gi godou ‘drum’ mono ‘harp’ e-hagahagaamu a-Mee.

149:4  Dimaadua e-manawa-tene gi ana daangada. Mee e-hagalaamua digau ala e-hila-gi-lala e-hai digaula gi-aali.

149:5  Nia daangada a God la-gi-tenetene idimaa ginaadou gu-aali, mo-di dadaahili tenetene i-di boo dogomaalia.

149:6  Digaula gii-wwolo gi-nua ma-ga-hagaamu a God, mo nadau hulumanu-dauwa gaa i nadau lima,

149:7  e-hagamagedaa nia henua ge e-daaligi nia daangada,

149:8  e-lawalawa nia king digaula gi-nia daula baalanga, gei nia dagi digaula e-lawalawa gi-nia daula baalanga mau,

149:9  e-daaligi nia henua llauehe gii-hai be-di hai dela gu-haga-noho go God. Deenei di aali o-nia daangada a God. Hagaamuina Dimaadua!

Chapter 150

150:1  Hagaamuina Dimaadua! Hagaamuina God i-lodo dono Hale Daumaha! Hagaamuina a-Mee i ono mahi i-di langi.

150:2  Hagaamuina a-Mee i ana mee haga-goboina ala ne-hai. Hagaamuina ono mahi aamua.

150:3  Hagaamuina a-Mee gi godou labaa. Hagaamuina a-Mee gi-nia ‘harp’ mono ‘lyre’.

150:4  Hagaamuina a-Mee gi-nia ‘drum’ mo nia gagaalege. Hagaamuina a-Mee gi-nia ‘harp’ mono mee ngiingii-iliili.

150:5  Hagaamuina a-Mee gi-nia ‘cymbal’. Hagaamuina a-Mee gi-nia lee maaloo o-nia ‘cymbal’.

150:6  Nia manu mo nia daangada mouli huogodoo, goodou hagaamuina Dimaadua! Hagaamuina Dimaadua!