LinVB - Psalms

Chapter 1

1:1  Esengo na moto akoyokanaka te na bato baboya Nzambe, oyo akolandaka nzela ya babebisi te mpe akofandaka te o ntei ya baye bapusi koseke bato banso ;

1:2  oyo andimi kotosa mobeko mwa Mokonzi, mpe akokanisaka mwango butu moi.

1:3  Azali lokola nzete elonami penepene na mai, eye ekobotaka mbuma o eleko ya mbula mpe ekosila nkasa mokolo moko te. Manso ye akosala makotambola se malamu !

1:4  Bato baboya Nzambe bazali bongo soki te ! Bazali lokola nkasa mpamba itombwami na mompepe.

1:5  Bakobika soki te o mokolo mwa likambo, bato babe bakosangana na basemba te.

1:6  Mokonzi ayebi nzela ya bato ba bosembo, kasi nsuka ya nzela ya baye baboya Nzambe, se liwa.

Chapter 2

2:1  Mpo nini bapagano bakolemwaka boye ? Mpo nini bato bakosilikaka ntina te ?

2:2  Bakonzi na bankumu ba nse batomboki, bakaneli Nzambe na mpe Mesiya wa ye.

2:3  Bazali koloba : « Tokata minyololo mya biso ! Tobwaka mikumba mya biso o nse ! »

2:4  Oyo afandi o likolo aseki yango, Nzambe akosukisa bango lokola lisano.

2:5  Akosilikela bango mpe bakoyoka nsomo, na nkanda enene akoloba na bango :

2:6  « Ngai moko naponoki moto oyo azala mokonzi o Sion, ngomba esantu ya ngai. »

2:7  Nakosakola maloba Nzambe ayebisaki ngai. Alobaki na ngai : « Ozali Mwana wa ngai, ngai mpenza naboti yo lelo !

2:8  Senge ngai mpe nakopesa yo bikolo binso, okokoma mokonzi wa nse mobimba.

2:9  Okoyangela bango na montongo mwa ebende, okobuka bango lokola mbeki ya mabelé. »

2:10  Bakonzi ba bikolo, boyoka malamu sikawa ! Bayangeli ba mokili, bozwa mayele !

2:11  Bosalela Nzambe mpe bobanga ye.

2:12  Bokumisa ye na limemya linene, zambi soko asiliki, bino bosuki. Nkanda ya ye ezali ya mbalakaka. Esengo na baye bakotiaka mitema na ye.

Chapter 3

3:1  Nzembo ya Davidi o ntango akimi mwana wa ye Absalom (2 Sam 15,13-17).

3:2  Mokonzi, baye bakokanelaka ngai bazali mingi, baye bazali koluka ngai na makambo bazali ebele.

3:3  Bato mingi bazali kotongo ngai, balobi : « Nzambe wa ye akobikisa ye te ! »

3:4  Kasi yo Mokonzi, ozali nguba eye ekobatelaka ngai, yo lokumu la ngai, okopesa ngai mpiko.

3:5  Nabeleli Mokonzi na mongongo makasi, mpe ut’o ngomba ya ye esantu akondimela ngai.

3:6  Nakei kolala mpe mpongi ekangi ngai, nalamuki : Mokonzi azali kobatela ngai.

3:7  Ata bato ebele bazingi ngai, nabangi bango te.

3:8  E Mokonzi, teleme ! Yo Nzambe wa ngai, bikisa ngai ! Bete banguna ba ngai banso o litama, mpe buka bato baboya Nzambe mino.

3:9  Libiki liuti epai ya Mokonzi ! Yo moto okobenisaka bato ba ekolo ya yo !

Chapter 4

4:1  Ya kapita wa bayembi, na biyembeli bya nsinga. Nzembo ya Davidi.

4:2  Ondimela ngai, Mokonzi, ntango nazali kobelela yo, ozali Nzambe oyo akolongisa ngai ; o kati ya mpasi okobikisa ngai, yokela ngai mawa mpe ndima losambo la ngai.

4:3  Bino bato, mikolo boni bokosala motó makasi ? Mikolo boni bokolanda se makambo ma mpamba mpe bokowela kokosa bato na makambo ma lokuta ?

4:4  Boyeba ’te Mokonzi akosalisa ngai moto wa ye, soko nabeleli ye, akoyoka ngai !

4:5  Bobanga Nzambe mpe bokima masumu, bokanisa ye o ntango ya kimia ya butu.

4:6  Bobonzela Mokonzi mabonza mabongi na ye, mpe botia mitema na ye.

4:7  Bato baike bakomitunaka ’te : « Nani akopesa biso bolamu ? » E Mokonzi, lakisa biso elongi ya yo.

4:8  Otondisi motema mwa ngai na esengo enene, leka esengo ya bato bazwi mampa na vino ebele.

4:9  Nakolala na boboto mpe nakozwa mpongi noki, zambi se yo, Mokonzi, okobatelaka ngai.

Chapter 5

5:1  Ya kapita wa bayembi, na mpiololo. Nzembo ya Davidi.

5:2  E Mokonzi, tia matoi na maloba ma ngai, yoka boleli bwa ngai,

5:3  yoka ndenge nazali kobelela yo, e Mokonzi wa ngai mpe Nzambe wa ngai, nazali kobondela bobele yo.

5:4  E Mokonzi, ut’o ntongo okoyokaka lolaka la ngai, na ntongo nakomibonzaka na yo : nakotiaka motema se na yo.

5:5  Yo Nzambe okosepelaka na masumu ma bato te, mpe okoyambaka bato babe epai ya yo te.

5:6  Bato ba lolendo bakoki kobika o miso ma yo te ; okoyinaka bato banso bakosalaka mabe.

5:7  Okosilisaka bato bakobukaka lokuta ; Mokonzi akoyinaka babomi na baye bakokosaka baninga.

5:8  Kasi, mpo ya bolingi bwa yo bonene, ngai nakoki koyingela o ndako ya yo, kokumbama o boso bwa Tempelo ya yo esantu, mpe kokumbamela yo.

5:9  E Mokonzi, kamba ngai na bosembo bwa yo, ata banguna bazali kokanela ngai ; bongisela ngai nzela ya yo naleka.

5:10  O minoko mya bango liloba lya bosolo lizali te, o mitema bakani se kobebisa ; mingongo mya bango mizali lokola lilita polele, mpe minoko mya bango mitondi na maloba ma boleti.

5:11  E Nzambe, tumbola bango, mikano mya bango mikweisa bango. Bengana bango, zambi masumu ma bango maleki mingi, mpo batombokeli yo.

5:12  Baye banso baluki libiki epai ya yo basepela, bayoka nsai ntango inso, mpo okobatelaka bango, baye balingi nkombo ya yo baganga na esengo.

5:13  Yo Mokonzi, okobenisaka moto wa bosembo, bolingi bwa yo bokobatelaka ye lokola nguba.

Chapter 6

6:1  Ya kapita wa bayembi, na biyembeli bya nsinga mwambe. Nzembo ya Davidi.

6:2  E Mokonzi, palela ngai, kasi na nkanda te, bongisa ngai, kasi osilikela ngai te.

6:3  Yokela ngai mawa, Mokonzi, nazali makasi te, bikisa ngai, mpo nzoto mobimba elembi.

6:4  Motema mwa ngai mobulungani, Mokonzi, okoya kotala ngai ntango nini ?

6:5  Yaka, Mokonzi, mpe batela molimo mwa ngai, yo ozali motema bolingi, bikisa ngai.

6:6  Zambi nsima ya liwa moto akokanisa yo lisusu te, o mboka ya bawa nani akokumisa yo ?

6:7  Nalembi na boleli mikolo minso na butu, mbeto ya ngai epoli na mai ma miso.

6:8  Ya solo, miso ma ngai mateli mpo ya kolela, banyokoli balandi ngai tee nakomi mobange.

6:9  Bato babe banso balongwa, batika ngai, zambi Mokonzi akoyoka boleli bwa ngai.

6:10  Mokonzi akoyoka mabondeli ma ngai, mpe akondima losambo la ngai.

6:11  Banguna ba ngai banso bakima noki, banso bayoka nsoni na mbala yoko.

Chapter 7

7:1  Maloba ma Davidi. Ayembi nzembo eye mpo ya Kus, moto wa Benyamin (2 Sam 18,21-32).

7:2  E Mokonzi Nzambe wa ngai, yo ebombamelo ya ngai, bikisa ngai o maboko ma banguna banso, longisa ngai.

7:3  Baboma ngai te lokola nkosi ekobomaka nyama, bakanga ngai te, mpo nazali na mosalisi moko te.

7:4  E Mokonzi Nzambe wa ngai, soko nazali na likambo, mpe soko nayibaki na maboko ma ngai,

7:5  soko nazongisaki mabe na moto oyo asali ngai malamu, soko natikaki monyokoli akima,

7:6  monguna alanda ngai mpo akanga ngai, abwaka ngai o nse mpe anyata ngai mpe abebisa lokumu la ngai nye.

7:7  E Mokonzi, teleme na nkanda ya yo, sukisa bokasi bwa banguna ba ngai, zala penepene na ngai, yo Nkolo wa mibeko.

7:8  Bato ebele bazali kozinga yo, kuna o likolo ozala mokonzi wa bango !

7:9  E Nzambe, ozali zuzi wa bikolo binso, sambisa ngai, e Mokonzi, tala bosembo bwa ngai, oyebi ’te nazali na likambo lyoko te.

7:10  Sukisa mayele mabe ma basumuki, mpe lendisa bato ba bosembo, zambi yo Nzambe wa bosembo, oyebi bato banso kin’o kati ya mitema.

7:11  Nzambe azali nguba eye ekobatelaka ngai, ye mobikisi wa bato bazali na motema bosembo.

7:12  Nzambe akokataka makambo na bosembo, ye Nzambe akoki kotumbola bato ntango inso.

7:13  Soko moto akobongola motema te, akopelisa nkanda ya ye, akobenda nsinga ya litimbo mpo ya kobete,

7:14  akoluka bibuneli mpo ’te aboma ye, akobetele ye makula ma móto.

7:15  Moto atondi na mikano mya kosala mabe, ye moko akomilukela makambo ma mpasi.

7:16  Soko atimoli libulu lya bozindo, ye moko akokweya o libulu atimoli.

7:17  Mabe ma ye makozongela ye moko, nkanda ya ye ekokitela ye o motó.

7:18  Nakotondo Mokonzi mpo ya bosembo bwa ye, nakoyembela nkombo ya Nzambe wa nta likolo.

Chapter 8

8:1  Ya kapita wa bayembi, na eyembeli ya mboka Gat. Nzembo ya Davidi.

8:2  E Nzambe Mokonzi wa biso, nkombo ya yo eyebani o nse mobimba ; nkembo ya yo ekomi kin’o likolo mosika.

8:3  Nzembo eye bilenge na bana bake bakoyembelaka yo ekotela banguna o mitema, eyokisa nsoni na banguna mpe na baye batombokeli yo.

8:4  Soko natali likolo, mosala mwa maboko ma yo, sanza na mpe minzoto yo otiaka kuna,

8:5  moto nde eloko nini ’te okanisaka ye ? Mwana wa Adamu nde nani ’te obatelaka ye ?

8:6  Otondisi ye na nkembo mpe na lokumu, banzelu baleki ye se mwa moke.

8:7  Otii ye mokonzi wa bikelamo bya yo, otii binso o nse ya makolo ma ye :

8:8  mpata na ngombe inso, ná nyama ya zamba lokola,

8:9  ná ndeke ya likolo ná mbisi ya mai, ná binso bikozalaka o kati ya mbu.

8:10  E Nzambe Mokonzi wa biso, nkombo ya yo enene eyebani o nse mobimba !

Chapter 9

9:1  Ya kapita wa bayembi, na eyembeli ya nzenze. Nzembo ya Davidi.

9:2  E Mokonzi, nalingi kotondo yo na motema monso, násakola makamwa ma yo manso.

9:3  Náyoka esengo mpe násepela yo, náyembela nkombo ya Nzambe wa likolo.

9:4  Banguna ba ngai bazongi nsima, batuti libaku mpe basili o miso ma yo.

9:5  Ofandaki o ngwende ya yo lokola zuzi wa bosembo ntango osambisaki mpe olongisaki ngai.

9:6  Onyati bikolo mpe olimwisi bato babe, olongoli nkombo ya bango seko.

9:7  Banguna basili, bakufi libela, obomi mboka ya bango, nkombo ya bango ebungi.

9:8  Se bongo Mokonzi akoyangelaka seko, abongisi ngwende ya ye mpo ’te asambisa bato.

9:9  Ye akosambisaka mokili na bosembo, akokataka makambo ma bato bo ebongi.

9:10  Mokonzi azala ebombamelo ya bato banyokwami, o ntango ya mpasi bazwa libiki epai ya ye.

9:11  Baye bayebi nkombo ya yo bakotiaka elikya na yo, zambi baye baluki yo, Mokonzi, okotika bango te.

9:12  Boyembela Mokonzi, oyo akofandaka o Sion, bosakola bikela bya ye binene o bikolo binso.

9:13  Oyo akobekolaka mobomi wa bato ba ye akobosana boleli bwa bato ba mpasi te.

9:14  E Mokonzi, yokela ngai mawa, tala boniboni banguna basambwisi ngai, obikisa ngai o mboka ya bawa.

9:15  Bongo násakola bikela bya yo bya nkembo, násepela o Sion, mpo opesi ngai libiki.

9:16  Bapagano bakwei o libulu liye bango moko batimolaki, makolo ma bango makangemi o motambo batiaki na bobombami.

9:17  Mokonzi amilakisi mpe akati likambo seko, akangi moto mabe o motambo ye moko atiaki.

9:18  Basumuki bazonga o mboka ya bawa, elongo na baye banso batia Nzambe mpembeni.

9:19  Mokonzi akobosana mobola mokolo moko te, mpe elikya ya bato ba bosawa ezali na nsuka te.

9:20  E Mokonzi, teleme ! Moto alonga yo te ! Bapagano basambama o miso ma yo !

9:21  E Mokonzi, oyokisa bango nsomo, bayeba bongo ’te bazali se bato !

Chapter 10

10:1  E Mokonzi, mpo nini okotikalaka mosika ? Mpo nini obombami o ntango ya mpasi ?

10:2  Moto wa lofundo oyo akonyokoloko mobola ákangema o mitambo ye moko atiaki.

10:3  Moto aboya Nzambe akomikumisaka ’te azwi eloko alukaki, moto wa boluli akosekeke mpe akokinolaka Mokonzi.

10:4  Na lolendo la ye moto oyo akanisi etumbu te, amilobeli : « Nzambe azali te. »

10:5  Misala mya ye minso mikotambolaka malamu, yango wana akokinolaka yo, zuzi wa ye, mpe akomonelaka bato basusu banso.

10:6  O kati ya motema alobi : « Nakoki kokweya te, moto lokola ngai akoyoka mpasi mokolo moko te. »

10:7  Monoko mwa ye motondi na maloba ma mobondo, ma bokosi mpe ma lokuta, lolemu la ye lokobombaka bobe na masumu.

10:8  Penepene na lopango akobembeke, mpo ya koboma basemba na bonkutu. Miso ma ye se epai ya bato ba mawa.

10:9  Akomibombaka lokola nkosi o kati ya matiti : anongi moto wa mawa mpo ya kokanga ye, akokanga ye mpe akobenda ye o monyama mwa ye.

10:10  Akumbami mpe amilengeli malamu mpo akwela moto wa mawa o nzoto.

10:11  O kati ya motema alobi : « Nzambe abosani, amilakisi te, amoni yango te. »

10:12  E Mokonzi teleme ! E Nzambe tombola loboko, obosana bato ba mawa te !

10:13  Mpo nini mosumuki akokinolaka Nzambe na bolobi : « Nzambe akopesa etumbu te » ?

10:14  Nzokande, yo omoni mawa mpe mpasi ya bato, mpe okoluka nzela ya kosalisa ye. Moto motau akomitikaka o maboko ma yo, mpe yo okosalisaka mwana etike.

10:15  Silisa bokasi bwa moto azangi bosembo, mabe ma ye mamonono lisusu te.

10:16  Nzambe azali Mokonzi o bileko binso seko, bapagano balimwi o mokili mwa ye.

10:17  E Mokonzi, okondimaka mabondeli ma bato bake, okolendisaka bango mitema, okotandelaka bango matoi.

10:18  Okolongisaka mwana etike mpe moto anyokwami, moto, eloko euti o mabelé, ányokolo moninga lisusu te !

Chapter 11

11:1  Ya kapita wa bayembi. Nzembo ya Davidi. Mokonzi azali ebombamelo ya ngai. Bongo ndenge nini bokoki koloba na ngai : « Yo ndeke eke, kima o ngomba ya yo.

11:2  Tala bato babe babongisi litimbo, mpe batii makula ma bango o nsinga mpo ya kobetele bato ba motema semba o molili.

11:3  Soko ndako ebebi nye, moto semba akoki kosala nini ? »

11:4  Mokonzi azali o ndako ya ye esantu, Mokonzi atii ngwende ya ye o likolo ; miso ma ye makomonoko mitema mya bato.

11:5  Mokonzi akondimaka moto semba, kasi akoyinaka moto mabe alingi se bitumba.

11:6  Akonokisela bato babe mbula ya móto mpe akotinda mompepe mwa móto mpo ya kozikisa bango.

11:7  Mokonzi azali na bosembo, alingi misala mya bosembo, bato balingi bosolo bakomono elongi ya ye.

Chapter 12

12:1  Ya kapita wa bayembi, na biyembeli bya nsinga mwambe. Nzembo ya Davidi.

12:2  E Mokonzi, bikisa biso ! Bato bayambi yo basila, bato ba bosembo bazali lisusu te.

12:3  Mosala mwa bato, kokosa baninga, monoko sukali, kasi bazali na mitema mibale.

12:4  Mokonzi akangisa monoko mwa bakosi, akata lolemu la bato bakolobaka na lolendo.

12:5  Bakolobaka : « Tokobika mpo ya maloba ma biso, mbebu ikosalisa biso, nani akokoka biso ? »

12:6  Mpo ya babola banyokwami mpe baleli, Mokonzi alobi : « Ngai oyo, natelemi ! Nakobikisa baye bazali na mposa ya libiki. »

12:7  Maloba ma Mokonzi mazali maloba ma bosolo, lokola palata ebimi o mabelé eye bapetoli mbala nsambo.

12:8  Yo Mokonzi, okopanganaka na biso, obikisa biso o maboko ma bato baye,

12:9  ata bato babe bakolandaka nzela ya bango, mpe mobulu mokomi kotonda o mokili.

Chapter 13

13:1  Ya kapita wa bayembi. Nzembo ya Davidi.

13:2  Mokonzi, kin’o mokolo nini okobosana ngai ? Kin’o mokolo nini okobombela ngai elongi ya yo ?

13:3  Kin’o mokolo nini mpasi ekoswa ngai o motema mpe nakoyoka se mawa butu moi ? Kin’o mokolo nini monguna akolonga ngai ?

13:4  Mokonzi Nzambe wa ngai, tala mpe yanola ngai ! Námono mwinda mwa yo na miso mpo ’te nalala mpongi ya liwa te.

13:5  Monguna aloba te ’te : « Ngai nalongi ye » ; banyokoli baseke ngai te mpo naselumwi.

13:6  E Nzambe, natii motema na bolingi bwa yo. Nasepela awa nazwi libiki epai ya yo. Nayembela Mokonzi nzembo mpo ya malamu manso asali ngai.

Chapter 14

14:1  Ya kapita wa bayembi. Nzembo ya Davidi. Elema akomilobelaka : « Nzambe azali te ! » Misala mya ye mileki mabe na nsomo, ata moto moko wa bosembo azali lisusu te.

14:2  Ut’o likolo Mokonzi akotalaka bato mpo amono moto moko wa mayele, oyo aluki Nzambe naino.

14:3  Banso babunga nzela, babeba nye ; ata moto moko wa bosembo azali lisusu te.

14:4  Bango banso bayebi te ’te bakosalaka mabe ? Bakosilisaka bato ba ngai lokola bakoliaka mampa, bayebi Mokonzi lisusu te.

14:5  Kasi bakolenge na nsomo, mpo Nzambe alingi bato ba bosembo.

14:6  Ata bozali koseke mikano mya mobola, Mokonzi azali mobateli wa ye.

14:7  Nani akopesa Israel libiki ut’o Sion ? Mokolo Mokonzi akolongola bato ba ye o boombo, Yakob akoyoka esengo mpe Israel akosepela !

Chapter 15

15:1  Nzembo ya Davidi. E Mokonzi, nani akoki kofanda o ema ya yo ? Nani akoki kozala o ngomba ya yo esantu ?

15:2  Bobele moto wa ezalela elamu mpe wa bosembo, oyo akolobaka makambo ma solo mauti o motema mwa ye,

15:3  oyo ayebi kokanga monoko mpe asali bato mabe te, oyo asambwisi baninga te,

15:4  oyo akinoli moto wa nkanza, kasi akumisi baye bakobangaka Nzambe ; oyo awangani ndai ya ye te, ata ndai ena ekoyela ye mpasi,

15:5  oyo adefisi mosolo na elikya ya litomba te, mpe ayambi libonza te mpo ya kokitisa mobola. Moto akosalaka bongo, akokweya mokolo moko te.

Chapter 16

16:1  Losambo la Davidi. E Nzambe, batela ngai, mpo namibombi epai ya yo.

16:2  Nalobi na Nzambe : « Mokonzi wa ngai, bobele yo ! Bolamu bwa ngai, se yo ! »

16:3  Bato bakokumisaka bikeko bya nse eye, kasi ngai nasepeli na byango te.

16:4  Mpasi mingi ekokwela bato balingi kolanda byango. Ngai nakobomela byango nyama te mpe nakotanga nkombo ya byango na monoko te.

16:5  E Mokonzi, yo lisango mpe bomengo bwa ngai, libiki lya ngai lizali o maboko ma yo.

16:6  Okateli ngai lopango, oponi esika kitoko, lisango lya ngai lipusi bonzenga.

16:7  Nakokumisaka Mokonzi, oyo akopesaka ngai malako, ata na butu motema mokokebisaka ngai.

16:8  Ntango inso nakotalaka Mokonzi na miso, soko asimbi ngai na loboko, nakokweya te.

16:9  Yango wana nayoki esengo, motema mosepeli, ata nzoto ekozala na boboto,

16:10  mpo okondima te ’te nasuka o mboka ya bawa, okolinga mpe mondimi wa yo akita o lilita te.

16:11  Okolakisa ngai nzela ya bomoi bwa solo, okotondisa ngai na nsai enene o miso ma yo pene na yo okoyokisa ngai esengo seko.

Chapter 17

17:1  Losambo la Davidi. E Mokonzi, yoka bobeleli bwa ngai, tia matoi na boleli mpe na losambo la ngai, mpo monoko mwa ngai mozali na lokuta te.

17:2  Bobele yo okoki kokata likambo lya ngai malamu, yo okotalaka makambo na miso ma bosembo.

17:3  Otali ngai tee o kati ya motema, na butu oyei komeka ngai, kasi ozwi ngai na makanisi mabe te, nalobaki mabe moko te,

17:4  lokola bato bakosalaka ; nalandaki se nzela ya yo.

17:5  Nalandi se nzela eye olakisi ngai, bongo makolo ma ngai matuti libaku te.

17:6  Nabeleli yo, e Nzambe, ondimeli ngai, tandela ngai matoi mpe yoka maloba ma ngai.

17:7  Yo mobikisi wa baye bakimi banguna mpe bamibombi pene na yo, lakisa makamwa ma bolamu bwa yo.

17:8  Batela ngai lokola bakobatelaka mwana wa liso, bomba ngai o nse ya mapapu ma yo.

17:9  Nazala mosika na bato ba makambo makasi makasi, mosika na banguna bazingi ngai ntango inso.

17:10  Bango bazali motema libanga, bakolobaka se maloba ma lofundo.

17:11  Bakengi ngai, mpe na mbalakaka bazingi ngai, batali boniboni bakoki kokweisa ngai.

17:12  Bazali lokola nkosi elingi koboma nyama, lokola mwana wa nkosi abombami o matiti.

17:13  Teleme Mokonzi, kende kobunisa bango, kweisa bango ! Na mompanga mwa yo bikisa ngai o maboko ma banguna.

17:14  Na loboko la yo, Mokonzi, bengana bango o mokili, longola bango o ntei ya bato, balimwa o nse ! Otondisi bango libumu na biloko, bana ba bango mpe batondi, mpe bankoko ba bango bakozwa naino biloko bitikali.

17:15  Na bosembo bonso, námono elongi ya yo. Ntango nakolamuka, násepela kotala yo.

Chapter 18

18:1  Ya kapita wa bayembi. Ya Davidi, mosaleli wa Mokonzi. Ayembeli Mokonzi nzembo eye o mokolo Nzambe abikisi ye o maboko ma banguna ba ye banso mpe ma Saul (2 Sam 22).

18:2  Alobi boye : Nalingi yo, Mokonzi, yo bokasi bwa ngai,

18:3  Mokonzi akobatelaka ngai, ye ebombamelo ya ngai, Mobikisi wa ngai, Nzambe wa ngai. Ye libanga lya ngai, namibombi epai ya ye, ye nguba ya ngai, ebombamelo, bokasi mpe libiki.

18:4  Bakumisa ye ! Nabeleli Mokonzi mpe nabiki o maboko ma banguna.

18:5  Minyama mya liwa mikangi ngai, mai bozindo mayokisi ngai nsomo.

18:6  Minyama mya mboka ya bawa mikangi ngai, batieli ngai mitambo mya liwa.

18:7  Ntango nayoki nsomo nabeleli Mokonzi mpe nabengi Nzambe wa ngai. Ut’o Tempelo ya ye ayoki lolaka la ngai, boleli bwa ngai bokomi tee o matoi ma ye.

18:8  Mokili mobulungani mpe moningani, ngomba ilengi mpe ibukani mpo ya nkanda ya ye.

18:9  Zolo ya ye ebimisi milinga, monoko mwa ye mobimisi móto mokosilisa binso, mopelisi makala ma móto.

18:10  Akitisi likolo mpe ye moko akiti, atamboli likolo lya mampata maindo.

18:11  Abuteli kerubim mpe apimbwi, akatisi likolo na mapapu ma mompepe.

18:12  Amilatisi molili lokola elamba, amikangi na mampata maindo ebele.

18:13  Mwinda mongengi liboso lya ye, ut’o mampata anokisi mbula ya matandala mpe ya makala ma móto.

18:14  Ut’o likolo Mokonzi abetisi nkake, ayokisi lolaka la ye.

18:15  Abeteli banguna makula ma ye mpe akimisi bango, minkalali mya ye mipanzi bango.

18:16  Nse ya mai ma mbu ekomi komonono, makonzi ma mokili makomi polele mpo ya nkanda ya yo, Mokonzi, mpe mpema ya zolo ya yo.

18:17  Ut’o likolo atandi loboko mpe asimbi ngai, abendi ngai ut’o bozindo bwa mai manene.

18:18  Abikisi ngai o maboko ma monguna makasi, o maboko ma banyokoli baleki ngai na nguya.

18:19  O mokolo nalembi, babimeli ngai, kasi Mokonzi ayei kosalisa ngai.

18:20  Abimisi ngai wana mpe alendisi ngai, abikisi ngai mpo ya bolingi bwa ye bonene.

18:21  Mokonzi asali na ngai engebene na bosembo bwa ngai, asalisi ngai zambi nazalaki na maboko peto,

18:22  mpo nalandaki nzela ya Mokonzi, naboyaki monoko mwa Nzambe wa ngai te.

18:23  Nazalaki kotosa mibeko mya ye minso, mpe natiki nzela ya mitindo mya ye te.

18:24  O miso ma ye nazali na likambo lyoko te mpe namibateli mpo ’te nasala masumu te.

18:25  Mokonzi asali na ngai engebene na bosembo bwa ngai, mpo amoni ’te nazalaki na maboko peto.

18:26  Okolakisaka boboto na moto atosi bondeko bwa yo, mpe bolamu bwa yo na moto abongi nye.

18:27  Okomilakisaka peto na moto wa bopeto, kasi ozali na bokebi na moto alingi kokosa.

18:28  Okobikisaka bato banyokwami, kasi okokitisaka mitó mya bato ba lofundo.

18:29  Yo, Mokonzi, ozali mwinda mwa ngai, Nzambe wa ngai, tanisa molili moyeli ngai.

18:30  Na bokasi bwa yo nabuki lopango la banguna, na bokasi bwa Nzambe wa ngai napimbwi likolo lya efelo.

18:31  Nzela ya Nzambe ezali nzela ya bosembo, liloba lya Mokonzi lizali liloba lya bosolo, ye nguba ekobatelaka bato banso bakoluka libiki epai ya ye.

18:32  Nani azali Nzambe, bobele Mokonzi te ? Nani azali libanga, bobele Nzambe wa biso te ?

18:33  Ye Nzambe oyo akopesaka ngai nguya, mpe akosembolaka nzela ya ngai.

18:34  Akokomisaka ngai mbangu lokola mboloko mpe akotelemisaka ngai ngbi o nsonge ya ngomba.

18:35  Akolendisaka ngai mpo ya etumba, mpe maboko ma ngai mpo ya kobenda litimbo lya mbengi.

18:36  Ozali nguba mpe lisalisi lya ngai, na loboko la yo okolendisaka ngai, okondimelaka ngai na bolamu bonso.

18:37  Okobongiselaka ngai nzela, mpo makolo ma ngai matuta libaku te.

18:38  Nalandi banguna mpe nazwi bango. Nakozonga bobele soko nasilisi bango.

18:39  Nabeti bango, bakoki koteleme lisusu te, bakwei o nse ya makolo ma ngai.

18:40  Opesi ngai nguya o etumba, okitisi o boso bwa ngai baye bayei kobunisa ngai.

18:41  Okimisi banguna o miso ma ngai, mpe nasilisi baye bayinaki ngai.

18:42  Bagangi, kasi moto moko abikisi bango te, babeleli Mokonzi, kasi ayanoli te.

18:43  Naniki bango lokola mputulu epimbwi na mompepe, nanyati bango lokola potopoto ya balabala.

18:44  Obikisi ngai o maboko ma bato ba ekolo ya ngai batomboki, otii ngai mokonzi wa bikolo. Bato nayebaki liboso te, bakomi kosalela ngai ;

18:45  bampaya baluki kosepelisa ngai, batosi ngai noki mpenza ;

18:46  bana ba bikolo bisusu balembi, balengi mpe bakimi ebombamelo ya bango.

18:47  Mokonzi azala seko ! Ye libanga lya ngai ! Bakumisa Nzambe mobikisi wa ngai.

18:48  Ye Nzambe apesi ngai makasi ma kolonga banguna, akomisi bato ba bikolo bisusu basaleli ba ngai.

18:49  Obikisi ngai o nkanda ya banguna, osali ’te nalonga baye bayeli ngai etumba, mpe obikisi ngai o maboko ma banyokoli.

18:50  Yango wana nalingi kokumisa yo, Mokonzi, o bikolo binso, mpe koyembela nkombo ya yo nzembo :

18:51  « Alongisi mokonzi wa ye o bitumba biike, alakisi moponomi wa ye bolingi, mpe asalisi Davidi na libota lya ye seko. »

Chapter 19

19:1  Ya kapita wa bayembi. Nzembo ya Davidi.

19:2  Likolo likosakolaka nkembo ya Nzambe, mpe etando ya likolo ekolakisaka mosala mwa maboko ma ye.

19:3  Moi mokosangelaka moi nsango ya ye mpe butu bokoyebisaka nsango na butu.

19:4  Ata bikosololaka te, ata bikolobaka te, ata lolaka loko lokoyokanaka te,

19:5  nsango ekotambolaka o nse mobimba, maloba ma bango makoyokanaka tee nsuka ya mokili. Nzambe atongeli mwese ema kuna o likolo :

19:6  mwese mokobimaka lokola mobali oyo abali sika akobimaka o ndako, lokola elombe alingi kokoba nzela ya ye.

19:7  Mokobimaka epai etando ya likolo ebandi mpe mokotambolaka kin’o nsuka ya mokili, mokoyokisaka bikelamo binso molunge.

19:8  Mobeko mwa mokonzi mobongi nye, mokopesaka bato bomoi, maloba ma Mokonzi mazali maloba ma bosolo, makopesaka moto wa bosawa bwanya.

19:9  Mitindo mya Nzambe mizali semba, mikoyokisaka mitema esengo, bitinda bya Mokonzi bizali polele, bikopesaka miso mwinda.

19:10  Kobanga Nzambe eleki malamu, sikawa mpe o bileko binso, Mokonzi akokataka makambo bobele na bosolo, mikolo minso se na bosembo.

19:11  Maloba ma ye mazali na motuya, leka wolo kitoko mpenza, mazali elengi mingi, leka mafuta ma nzoi elengi.

19:12  Mosaleli wa yo akotia motema na mango, mpo kotosa mango ezali na litomba linene.

19:13  Solo, nani ayebi mabe ma ye moko ? Limbisa ngai mabe maye nayebi te.

19:14  Batela mosaleli wa yo akoma na lolendo te, lolendo lobebisa motema mwa ye te ! Nakoka bongo kotikala motema peto mpe kokima lisumu linene.

19:15  E Mokonzi, Yo libanga mpe mosikoli wa ngai, maloba maye makobima o monoko mwa ngai mpe maye nakomanyolaka o motema mwa ngai, makoka kosepelisa Yo !

Chapter 20

20:1  Ya kapita wa bayembi. Nzembo ya Davidi.

20:2  Mokonzi andimela yo o mokolo mwa mpasi, nkombo ya Nzambe wa Yakob ebatela yo.

20:3  Ut’o ndako ya ye esantu atindela yo lisalisi, mpe ut’o ngomba Sion alendisa yo.

20:4  Akundola o motema mabonza ma yo manso, andima na bolamu miboma otumbeli ye.

20:5  Akabela yo maye motema mwa yo molingi, mpe akokisa mikano mya yo minso.

20:6  Bongo tosepela lilonga lya yo, mpe totombola bendele ya mboka ya biso mpo ya Nzambe wa biso. Ye akokokisaka manso okosenge ye !

20:7  Sikawa nayebi ’te Nzambe akolongisaka moponomi wa ye ; ut’o esika ya ye esantu o likolo akoyanola ye, mpe na makamwa ma loboko la ye akobikisa ye.

20:8  Basusu bakotiaka elikya na makalo, basusu na farasa, biso tokobondelaka se nkombo ya Mokonzi Nzambe wa biso.

20:9  Bango bakolembe mpe bakokweya, kasi biso tokoteleme mpe tokopika mpende.

20:10  E Nzambe, longisa mokonzi wa biso ! Oyanola biso mokolo tokobondela yo.

Chapter 21

21:1  Ya kapita wa bayembi. Nzembo ya Davidi.

21:2  E Nzambe, mokonzi asepeli nguya ya yo, atondi na esengo awa alongi etumba.

21:3  Okokisi maye motema mwa ye molingaki, oboyi mabondeli ma monoko mwa ye te.

21:4  Osalisi ye na makabo ma yo manene, olatisi ye enkoti ya wolo o motó.

21:5  Asengi yo oumisa bomoi bwa ye, ondimeli ye, opesi ye mikolo mingi, ebele mpenza.

21:6  Azwi nkembo enene, mpo osalisi ye, otondisi ye na lokumu mpe na bokonzi.

21:7  Obenisi nkombo ya ye seko, osepelisi ye mpo ozali penepene na ye.

21:8  Soko mokonzi wa ekolo atii motema na Nzambe, Mokonzi wa likolo akosala ’te akolembe te.

21:9  Loboko la yo lokobete banguna ba ye banso, okokweisa banyokoli na loboko la yo la mobali.

21:10  Ntango okomilakisa, okotumba bango na móto, na nkanda Mokonzi akosilisa bango na móto.

21:11  Okolongola bana ba bango o mokili, okosilisa libota lya bango o ntei ya bato.

21:12  Ata bameki kosala yo mabe to bakaneli yo, bakokoka kosala eloko te :

21:13  okozongisa bango nsima, ntango okobendela bango litimbo lya yo.

21:14  E Mokonzi, teleme na nguya ya yo ! Tokoyembela bokasi bwa yo nzembo !

Chapter 22

22:1  Ya kapita wa bayembi. Lolenge loko na ‘Mbuli ya ntongo’. Nzembo ya Davidi.

22:2  Nzambe wa ngai, Nzambe wa ngai, mpo nini otiki ngai ? Ata nagangi makasi, otikali mosika na ngai.

22:3  E Nzambe, nabyanga yo na moi, okoyanola te, nabyanga yo na butu, okondimela ngai te.

22:4  Nzokande ofandi o ndako esantu, yo lokumu la Israel.

22:5  Bankoko ba biso batiaki mitema na yo, balikyaki na yo mpe obikisaki bango.

22:6  Babelelaki yo mpe bazwaki libiki, batiaki mitema na yo mpe basambwaki te.

22:7  Kasi ngai nazali lokola mpambó, moto te : bato batioli ngai, banso bakinoli ngai.

22:8  Baye bamoni ngai, bafingi ngai, baningisi mitó mpe baseki ngai boye :

22:9  « Atii elikya na Mokonzi, aya kobikisa ye ! Asalisa ye soko alingi ye solo ! »

22:10  Yo moto obimisaki ngai o libumu lya mama, mpe olalisaki ngai o bontolo bwa ye.

22:11  Mokolo babotaki ngai, batiaki ngai o maboko ma yo ; ut’o libumu lya mama, Nzambe wa ngai se yo.

22:12  Otikala mosika te, zambi likama liyei, moto moko te akosalisa ngai.

22:13  Ngombe babali ebele izingi ngai, nyama inene ya Basan iyei kokanga ngai.

22:14  Nkosi ileli na mposa ya koboma, ifungoli minoko minene mpo ya kolia ngai.

22:15  Nakomi lokola mai masopani o mabelé, minkuwa mya ngai minso mibukani. Motema mwa ngai mokomi lokola mafuta ma nzoi, mapanzani o kati ya nzoto ya ngai.

22:16  Mongongo mokauki lokola eteni ya mbeki, lolemu la ngai lokangemi o mbanga. Olalisi ngai o mputulu lokola moto awei.

22:17  Bato babe baike bakangeli ngai nzela, bayei kozinga ngai lokola mbwa ebele, batuboli ngai makolo na maboko.

22:18  Nakoki kotanga minkuwa mya ngai minso, bato bamoni ngai bayei kotala ngai.

22:19  Bakabelani bilamba bya ngai, babeti zeke mpo ya molato mwa ngai.

22:20  Kasi yo Nzambe, ozala mosika te, yo bokasi bwa ngai, yaka kosalisa ngai noki !

22:21  Bikisa bomoi bwa ngai, nakufa na mompanga te, batela ngai na manzaka ma mbwa !

22:22  Longola ngai o monoko mwa nkosi, nakufa na maseke ma nzale te.

22:23  Nakoyebisa bandeko ba ngai nkombo ya yo, nakokumisa yo o likita linene lya bato :

22:24  « Bino bato bokobangaka Mokonzi, bokumisa ye, bato ba libota lya Yakob, bopesa ye lokumu, bino banso bato ba Israel, bobanga ye !

22:25  Akinolaki mobola moko te, aboyaki ye o mpasi ya ye te, abombelaki ye elongi te, kasi andimelaki oyo abelelaki ye. »

22:26  Nakosakola lokumu la yo o likita linene, nakokokisa bilako o miso ma baye bakobangaka ye.

22:27  Babola bakolia mpe bakotonda, baye bakoluka Mokonzi, bakokumisa ye, bakoumela na bomoi seko.

22:28  Bato banso bakokanisa lisusu Mokonzi, bato ba nse mobimba bakozongela ye, bato ba bikolo binso bakokumbamela ye.

22:29  Nzambe azali na bokonzi bonso, zambi akoyangelaka bato ba bikolo binso.

22:30  Bato banene ba mokili bakokumbamela ye, baye banso bazali na bomoi lisusu te mpe bakomi mputulu bakofukamela ye.

22:31  Bato bakoya nsima bakosalela Mokonzi, bakoyebisa nkombo ya ye o libota lya bango.

22:32  Bakoyebisa bankoko ba bango bosembo bwa ye ná mpe manso Mokonzi asali.

Chapter 23

23:1  Nzembo ya Davidi. Mokengeli wa ngai, se Mokonzi, nakozanga eloko yoko te.

23:2  Akopemisa ngai o esobe ya matiti kitoko, akokamba ngai o esika mai mazali.

23:3  Kuna akolendisa ngai motema. Mpo ya lokumu la nkombo ya ye akokamba ngai o nzela ya bosembo.

23:4  O molili mwa lobwaku nakobanga te, mpo ozali pene na ngai, mpe lingenda la yo likobatelaka ngai.

23:5  O miso ma banguna, otandeli ngai meza etondi na bilei ; osopeli ngai malasi o motó, otondisi mbeki ya ngai na vino.

23:6  Nakomono bolamu mpe nakosepela bomoi bwa ngai mobimba, kin’o mokolo nakofanda seko o ndako ya Mokonzi.

Chapter 24

24:1  Nzembo ya Davidi. Nzambe azali mokonzi wa nse mpe wa biloko binso, wa mokili mobimba mpe wa banso bafandi wana.

24:2  Ye moto atongaki mwango likolo lya mbu mpe apikaki mwango makasi likolo lya mai manene.

24:3  Nani akobuta ngomba ya Mokonzi mpo ateleme o esika esantu ya ye ?

24:4  Bobele moto oyo azali na maboko mpe na motema peto, oyo aluki kokosa baninga te, oyo akolayaka ndai ya lokuta te.

24:5  Ye moto akozwa bobenisi bwa Mokonzi mpe bolamu bwa Nzambe, mobikisi wa ye.

24:6  Tala ndenge bato bakolukaka ye basengeli kozala, bana ba Yakob bakolukaka ye se bongo.

24:7  E bino, bizibeli bya Tempelo, bofungwana, bino bizibeli bya kala bya Tempelo, bozibwana, mpo ’te Mokonzi wa nkembo ayingela !

24:8  Mokonzi wa nkembo, ye nani ? Ye Nzambe wa bokasi bonso mpe wa mpiko, ye Nzambe, elombe o etumba.

24:9  E bino, bizibeli bya Tempelo, bofungwana, bino, bizibeli bya kala bya Tempelo, bozibwana, bongo Mokonzi wa nkembo ayingela !

24:10  Nani nde Mokonzi oyo wa nkembo ? Ye Mokonzi wa mampinga ma likolo, ye Mokonzi wa nkembo.

Chapter 25

25:1  Nzembo ya Davidi. Natomboli motema epai ya yo, Mokonzi, yo Nzambe wa ngai.

25:2  Natii elikya ya ngai se na yo, nayoka nsoni te, banguna baseke ngai te !

25:3  Moto atii motema na yo, akoyoka nsoni te, kasi oyo akotalaka yo mpamba, ye moto akoyoka nsoni.

25:4  Mokonzi, olakisa ngai nzela nasengeli kolanda, oyebisa ngai maye olingi nasala.

25:5  Oteya ngai bosolo bwa yo ; okamba ngai, zambi mobikisi wa ngai, se yo ! Mikolo minso nakotia elikya na yo.

25:6  Yawe, okundola ngolu ya yo, bolingi bwa yo, bolingi bwa seko.

25:7  Obosana masumu mpe mabungi ma ngai ma bolenge, okanisa ngai se na motema bolingi.

25:8  Mokonzi aleki bolamu mpe bosembo, akolakisaka nzela na baye babungi.

25:9  Akokambaka bato ba bosawa o nzela ya bosembo, mpe akoteyaka bato ba mawa nzela ya ye.

25:10  Soko bato batosi mibeko mya bondeko bwa ye, Mokonzi akosala manso na bolingi mpe na bosembo.

25:11  Mokonzi, mpo ya nkombo ya yo, limbisa masumu ma ngai maleki mingi.

25:12  Moto abangi Mokonzi solo, Mokonzi akolakisa ye nzela asengeli kolanda.

25:13  Mikolo minso akozala na esengo, bana ba ye bakozala bankolo ba Ekolo.

25:14  Mokonzi akomiyebisa na baye bakobangaka ye, akolakisa bango bondeko.

25:15  Miso ma ngai makotala se epai ya Mokonzi, akobatela makolo ma ngai makangema o motambo te.

25:16  Obwakela ngai miso, oyokela ngai ngolu, ngai moto wa mawa, nazali se ngai moko.

25:17  Olongola bobangi o motema mwa ngai, obimisa ngai o esika ya minyoko.

25:18  Tala ndenge nazali na mpasi mpe na mawa, sukola mbindo inso ya masumu ma ngai.

25:19  Tala, banguna ba ngai bazali ebele, bayini ngai boyini mpenza !

25:20  Batela bomoi bwa ngai mpe bikisa ngai, yo mokengeli wa ngai, nayoka nsoni te.

25:21  Bosolo mpe bosembo bobatela ngai, natii motema na yo, Mokonzi.

25:22  E Nzambe, bikisa bato ba Israel o makambo manso ma mpasi !

Chapter 26

26:1  Nzembo ya Davidi. E Mokonzi, longisa ngai ; zambi nalandi se nzela ya bosembo, mpe natii motema na Mokonzi, nabungi te.

26:2  E Mokonzi, tala motema mpe ezalela ya ngai mpe meka ngai.

26:3  Nakanisi bolamu bwa yo ntango inso, natamboli nzela ya yo ya bosolo.

26:4  Nakofandaka esika yoko na bato ba lokuta te, nakokotoko o ndako ya bakibisi te.

26:5  Nayini lisanga lya bato babe, nakofandaka te o ndako ya bato baboya yo.

26:6  Nasukoli maboko zambi nasali mabe te ; natamboli zongazonga na altare ya yo, Mokonzi,

26:7  na boyembi nzembo ya botondi yo, mpe ya bosakoli makamwa ma yo manso.

26:8  E Mokonzi, nalingi ndako esika ofandi, esika eye okozwaka lokumu lonene.

26:9  Obwaka ngai esika yoko na basumuki te, mpe otia ngai o molongo mwa babomi te.

26:10  Maboko ma bango malingi kosala makambo mabe, matondi na mabonza mazangi bosembo.

26:11  Nazali na ezalela ya moto wa bosembo, sikola ngai, yokela ngai mawa.

26:12  Makolo ma ngai mapikami bobele o mabelé makasi, nákumisa yo, Mokonzi, o lisanga lya bato.

Chapter 27

27:1  Nzembo ya Davidi. Nzambe azali mwinda mpe libiki lya ngai, nabanga lisusu nini ? Nzambe akobatelaka bomoi bwa ngai, bongo nani akoki kobangisa ngai ?

27:2  Soko bato babe babimeli ngai, mpo ya kosilisa mpe koboma ngai, bango moko, banyokoli na banguna, bakoselumwa mpe bakokweya se wana.

27:3  Ata limpinga mobimba liyeli ngai, motema mwa ngai mokobanga te. Ata etumba makasi ebimeli ngai, nazali se na elikya.

27:4  Nasengi Nzambe mpo yoko, nalingi se yango : nafanda o ndako ya ye mikolo minso, nasepela bolingi bwa Mokonzi, nakende o ndako ya ye ya nkembo.

27:5  Zambi akobombela ngai esika o ndako ya ye o mikolo mpasi ekokwela ngai. Akobomba ngai o ema ya ye esantu, akotelemisa ngai o libanga linene.

27:6  Bongo nakoki kotombola motó likolo lya banguna bazingi ngai. Nakobonza mabonza ma bokumisi ye o ema ya ye. Nakoyemba mpe nakobinela Mokonzi.

27:7  Mokonzi, yoka ngai, nazali kobelela yo : ondimela ngai, oyanola ngai.

27:8  Motema motindi ’te naluka yo, naluki se elongi ya yo, Mokonzi.

27:9  Obombela ngai elongi ya yo te, obwaka mosaleli wa yo mpo ya nkanda te, zambi mosalisi wa ngai, se yo. E Nzambe, yo mobikisi wa ngai, oboya ngai te mpe otika ngai te.

27:10  Ata tata na mama baboyi ngai, yo, Mokonzi, okoyamba ngai se malamu.

27:11  E Mokonzi, lakisa ngai nzela ya yo, kamba ngai o nzela ya bosembo, zambi banyokoli ba ngai bazali baike.

27:12  Okaba ngai o maboko ma banguna te. Bato ba lokuta batelemi mpo ya kofunda ngai, bakani kosala ngai makambo makasi makasi.

27:13  Nayebi solo ’te nakomono bolamu bwa Nzambe o mokili mwa baye bazali na bomoi.

27:14  Tia elikya epai ya Mokonzi, zala makasi, lendisa motema, tia motema na Mokonzi.

Chapter 28

28:1  Nzembo ya Davidi. E Mokonzi, nabeleli yo. Yo libanga lya ngai, okanga matoi te ! Soko otikali nye, nakokoma lokola moto akiti o lilita.

28:2  Ndima losambo la ngai ntango nabondeli yo mpe natomboli maboko epai ya ndako ya yo esantu.

28:3  Obwaka ngai esika yoko na basumuki te, otia ngai o molongo mwa bato babe te. Na monoko bakolobaka makambo ma boboto, kasi o motema bakobombaka mabe bakani kosala.

28:4  Sala bango lokola bango moko basalaki, zongisela bango mabe maye bango moko basalaki, pesa bango lifuta likoki na misala mya bango.

28:5  Baboyi kondima bikela bya Mokonzi, bakotalaka mosala mwa maboko ma ye se mpamba. Nzambe akweisa bango, bateleme lisusu te.

28:6  Bakumisa Mokonzi, zambi andimi losambo la ngai.

28:7  Mokonzi azali bokasi mpe nguba ya ngai, natii motema na ye mpe asalisi ngai. Nayoki nsai mpe nakoyembela ye nzembo ya botondi.

28:8  Mokonzi azali bokasi bwa ekolo ya ye, azali ebombamelo ekobikisa mesiya wa ye.

28:9  Bikisa ekolo ya yo, benisa bato ba libota lya yo, kamba mpe yangela bango na lobiko.

Chapter 29

29:1  Nzembo ya Davidi. Bana ba Nzambe, bokumisa Mokonzi, bopesa Mokonzi nkembo na lokumu.

29:2  Bopesa Nzambe nkembo ekoki na nkombo ya ye. Bokumbamela ye o esika ya ye esantu.

29:3  Lolaka la Mokonzi loyokani likolo lya mbu, Nzambe wa nkembo abetisi nkake ya ye ; ye Mokonzi akoyangelaka mai manso ma mbu.

29:4  Lolaka la Nzambe lozali makasi, loleki nkembo.

29:5  Lolaka la Mokonzi lopasoli nzete inene ya Libano.

29:6  Apimbwisi ngomba ya Libano lokola mwana wa ngombe, mpe ngomba Sirio lokola mwana wa nzale.

29:7  Lolaka la Nzambe lobimisi minkalali mya móto.

29:8  Lolaka la Nzambe loningisi eliki, Mokonzi aningisi eliki ya Kades.

29:9  Lolaka la Nzambe loningisi nzete inene mpe lolongoli mposo ya nzete ike. O ndako ya ye banso bagangi : Nkembo !

29:10  Mokonzi afandi o ngwende ntango ya mpela enene, Nzambe afandi o ngwende bo mokonzi wa seko.

29:11  Nzambe akopesaka nguya na bato ba ekolo ya ye, akobenisaka bato ba ye na bopesi bango boboto.

Chapter 30

30:1  Nzembo o ntango ya bobenisi Tempelo (2 Sam 5,6-12). Nzembo ya Davidi.

30:2  E Mokonzi, nakumisi yo, zambi otelemisi ngai, olingaki banguna baseke ngai te.

30:3  E Mokonzi Nzambe wa ngai, nabeleli yo mpe obikisi ngai.

30:4  E Mokonzi, olongoli ngai o mboka ya bawa, ozongiseli ngai bomoi o ntango nakiti o lilita.

30:5  Bino banso bokolingaka Nzambe, boyembela ye, bokumisa ye mpe bosakola nkombo ya ye esantu.

30:6  Nkanda ya ye ekoumelaka te, bolingi bwa ye bozali bwa seko. Na butu bato baleli, na ntongo basepeli.

30:7  Na esengo nsuka te nalobaki boye : « Nakoki kokweya mokolo moko te. »

30:8  E Mokonzi, mpo ya bolamu bwa yo napikami makasi lokola ngomba ya mabanga ; kasi soko obombeli ngai elongi ya yo, nabulungani.

30:9  Yango wana nabeleli yo, Mokonzi, nabondeli yo, Nzambe, nalobi :

30:10  « Nákufa to nákita o lilita, okozwa na yango litomba nini ? Mabelé mpamba makoki nde kokumisa yo, to kosakola lobokó la yo o ntei ya bato ?

30:11  E Mokonzi, ndimela ngai mpe yokela ngai mawa, e Nzambe, yaka kosalisa ngai ! »

30:12  Okomisi mawa ma ngai libina lya esengo, olongoli ngai elamba ya mpili, olatisi ngai molato mwa eyenga.

30:13  Yango wana nakotika te koyembela yo, Mokonzi Nzambe wa ngai, nakokumisa yo ntango inso.

Chapter 31

31:1  Ya kapita wa bayembi. Nzembo ya Davidi.

31:2  E Mokonzi, ozali ebombamelo ya ngai, nayoka nsoni mokolo moko te. Bikisa ngai mpo ya bosembo bwa yo.

31:3  Tandela ngai matoi, salisa ngai noki. Zala libanga lya ngai esika nakoki kokima, zala ebombamelo ekobatela ngai.

31:4  Libanga mpe ebombamelo ya ngai, se yo, mpo ya nkombo ya yo, lakisa ngai nzela mpe kamba ngai.

31:5  Longola ngai o monyama batandeli ngai, zambi mobateli wa ngai, bobele yo.

31:6  Natiki molimo mwa ngai o maboko ma yo, yo moto obikisi ngai, Yo Mokonzi Nzambe wa bosolo.

31:7  Nayini bato bakokumisaka bikeko bya mpamba, ngai natii motema na Mokonzi.

31:8  Nabineli yo na esengo mpo ya bolingi bwa yo, zambi omoni mpasi ya ngai, oyebi bobangi bwa ngai.

31:9  Okabaki ngai o maboko ma banguna te, mpe obongiseli ngai nzela.

31:10  E Mokonzi, yokela ngai mawa, nanyokwami mingi, mawa mabebisi ngai miso, mongongo na libumu.

31:11  Bomoi bwa ngai bokosila bobele na mawa, mibu na mibu nazali se kokimela ; makasi ma ngai masili mpo ya masumu, minkuwa mya ngai mibebi nye.

31:12  Banguna bakofingaka ngai, baninga bakomi kobanga ngai ; bayebani bakoyokaka ngai nsomo, baye bakutani na ngai o nzela bakimi ngai.

31:13  Bakobosanaka ngai se lokola moto akufa, bakobwakaka ngai lokola mbeki ebolani.

31:14  Nakoyokaka bilobaloba bya bato, bipai binso nsomo na nsomo ! Bayokani mpo ya kosala ngai mabe, balingi koboma ngai.

31:15  Nzokande ngai natii motema na yo, Mokonzi, nalobi : Nzambe wa ngai, bobele yo !

31:16  Bomoi bwa ngai bozali o maboko ma yo, bikisa ngai o maboko ma baye bakaneli ngai.

31:17  Elongi ya yo engengele mosaleli wa yo, bikisa ngai mpo ya bolingi bwa yo.

31:18  E Mokonzi, nayoki nsoni te awa nazali kobelela yo, kasi baye baboya yo bayoka nsoni, bakende o mboka ya bawa mpe bakanga monoko.

31:19  Sukisa bato ba lokuta, batika koloba, baye bakotongoko moto wa bosembo, baye bakotiolaka ye na lolendo.

31:20  E Mokonzi, makabo ma yo maleki bonene, okopesaka mango na bato bakobangaka yo ; okokabaka mango na bato bakotiaka elikya na yo, mpo ’te bato ba nse bakoka komono mango.

31:21  Okobatelaka bango penepene na yo, mosika na mayele mabe ma bato. Okobombaka bango o ema ya yo, mosika na bato ba songisongi.

31:22  Bakumisa Mokonzi, mpo ya bolingi bwa ye, asali ngai makambo ma bokamwisi o engumba ezingami na lopango.

31:23  Mpe o ntango nayokaki nsomo nalobaki : « Balongoli ngai mosika o miso ma yo ! » Nzokande yo oyokaki losambo la ngai o ntango nazalaki kobelela yo.

31:24  Bolinga Mokonzi, bino bato ba ye banso, zambi akokengeleke baye bakoyambaka ye, kasi akozongisa mabe na bato ba lolendo.

31:25  Bolendisa mitema mpe bozala na mpiko, bino banso bokotiaka mitema na Mokonzi !

Chapter 32

32:1  Ya Davidi. Mateya. Esengo na moto azwi bolimbisi masumu, oyo Nzambe azipi mabe ma ye.

32:2  Esengo na moto oyo Mokonzi abosani mabe ma ye, mpe azali na mayele ma mokosi te.

32:3  Awa nakangi monoko, bokasi bwa ngai bokomi kosila na boleli ntango inso.

32:4  Butu moi loboko la yo lozalaki konyata ngai, motema mwa ngai mokauki lokola esobe eziki na móto.

32:5  Nasakoli lisumu lya ngai o miso ma yo, nabombeli yo mabe ma ngai te. Nalobi : Nakosakola masumu ma ngai na Mokonzi, mpe olimbisi ngai nyongo na masumu.

32:6  Bongo bato ba yo banso basambela yo o eleko bayoki nsomo ; mai makasi mazindisa bango te.

32:7  Ozali esika nakoki kobombama, okobatelaka ngai o ntango ya mpasi, okozingaka ngai na nzembo ya libiki.

32:8  Olobi na ngai : « Nakolakisa yo nzela okolanda, nakolanda yo na miso mpo ya kopesa yo malako. »

32:9  Osala lokola farasa to mpunda te, iye izangi mayele, ikotosaka bobele soko batii yango ebende o monoko ; basengeli kolakisa yango botosi, soki te, mabe makokwela yo !

32:10  Malozi maike makokwela mosumuki, kasi oyo akolikya na Mokonzi, akobombama o bondeko bwa ye.

32:11  Bosepela Mokonzi, boyoka nsai, bino basemba, bino bato ba motema semba, boyemba na esengo.

Chapter 33

33:1  Bino bato ba bosembo, boyembela Mokonzi, bato ba motema semba, bokumisa ye.

33:2  Botondo Nzambe na lokombe, boyembela ye nzembo na likembe lya nsinga zomi.

33:3  Boyembela ye nzembo ya sika, bobinela ye mpe bobetele ye maboko,

33:4  mpo liloba lya Mokonzi lizali liloba lya bosembo, misala mya ye minso, misala mya bosolo.

33:5  Apusi kolinga bosembo na bosolo, nse mobimba etondi na bolingi bwa Ye.

33:6  Mokonzi akeli likolo na liloba lya ye, na mpema ya ye akeli minzoto minso.

33:7  Asangisi mai ma mbu o esika yoko, atii mai manso ma mongwa o bibombelo.

33:8  O nse mobimba bato babanga Mokonzi, bato banso bakofandaka wana babanga ye !

33:9  Alobi se liloba lyoko mpe binso bikelami, atindi etinda mpe biloko binso bibimi.

33:10  Mokonzi abebisi mikano mya bato ba bikolo, abulinginyi mayele ma bango.

33:11  Kasi mokano mwa Nzambe mozali mwa seko, mpe makanisi ma ye makoumela mibu na mibu.

33:12  Esengo na bato baye Mokonzi azali Nzambe wa bango, baye yemei aponi ’te bazala ekolo ya ye.

33:13  Ut’o likolo Mokonzi akotalaka mpe akomonoko bato banso ba nse.

33:14  Ut’o esika akofandaka akokengeleke bato banso ba mokili.

33:15  Ye moto akeli mitema mya bango banso, yango wana ayebi misala mya bango minso.

33:16  Mokonzi moko te akolonga mpo ya basoda ba ye, elombe akobika mpo ya bokasi bwa ye te.

33:17  Farasa ekolongisa moto etumba te, bokasi bwa yango bokobikisa ye te.

33:18  Kasi Mokonzi akokengele baye bakobangaka ye, baye bakotiaka mitema na bolingi bwa ye.

33:19  Akobikisa bango o liwa mpe akolendisa bango o ntango ya nzala enene.

33:20  Biso tokozila se Mokonzi, oyo akosalisaka mpe akobatelaka biso, se ye !

33:21  Esengo ya mitema mya biso ekouta bobele na ye, elikya ya biso, nde nkombo ya ye nta bosantu.

33:22  Bolingi bwa yo, Mokonzi, bobatelaka biso, tokotiaka motema monso na yo.

Chapter 34

34:1  Nzembo ya Davidi. Akosaki ’te azali na ligboma o miso ma Akimelek. Oyo abengani ye mpe Davidi akei (1 Sam 21,11-16).

34:2  Nakotondo Mokonzi ntango inso, monoko mwa ngai mokokumisa ye seko.

34:3  Motema mwa ngai mokosepela yo, Mokonzi, bato bake basepela mpe bayoka nsai.

34:4  Bokumisa Mokonzi na ngai elongo, toyembela nkombo ya ye, biso banso lisanga.

34:5  Naluki Mokonzi mpe ayanoli ngai, abikisi ngai o makambo manso ma nsomo.

34:6  Elongi ya moto atali ye ekofungwana, ekomonisa nsoni ata moke te.

34:7  Moto mobola abeleli : Mokonzi ayoki ye mpe abikisi ye o nsomo ya ye.

34:8  Ntango inso anzelu wa Mokonzi akobatelaka mpe akokengeleke bato bakobangaka ye.

34:9  Botala mpe bokoyeba ’te Mokonzi apusi bolamu, esengo na moto abombami epai ya ye.

34:10  Bino bato ba ekolo ya ye esantu, bobanga Mokonzi, baye bakobanga ye bakokelela soki te.

34:11  Bato ba nkita bakomi kozanga biloko mpe bayoki nzala, kasi baye bakoluka Mokonzi bakokelela te.

34:12  E bana, yakani mpe yokani ngai, nakolakisa bino eloko nini bobangi Nzambe.

34:13  Yo moto olingi kozala na bomoi mpe koyoka esengo mikolo minso ?

34:14  Kengele lolemu la yo ’te loloba mabe te, keba na monoko ’te mobuka lokuta te.

34:15  Kima mabe mpe sala malamu, luka boboto mpe batela bwango !

34:16  Miso ma Mokonzi makotalaka bato ba bosembo, mpe matoi ma ye makoyokaka mabondeli ma bango.

34:17  Mokonzi akokengeke bato babe, akolongola nkombo ya bango o mokili.

34:18  Mokonzi akoyoka baye bakobelela ye, mpe akobikisa bango o mpasi ya bango inso.

34:19  Mokonzi azali penepene na oyo ayoki motema mawa, akobikisaka oyo alembi motema.

34:20  Makambo ma mpasi makokwelaka moto semba, kasi mbala inso Mokonzi akobikisa ye.

34:21  Mokonzi akobatelaka minkuwa mya ye minso, ata monkuwa moko mwa ye mokobukana te.

34:22  Moto mabe akokufa mpo ya mabe ma ye, oyo ayini moto semba akozwa etumbu.

34:23  Mokonzi akobikisaka basaleli ba ye, moto amibombi epai ya ye akozwa etumbu te.

Chapter 35

35:1  Nzembo ya Davidi. E Mokonzi, sambisa bato bafundi ngai, bunda na bato bayeli ngai etumba.

35:2  Lata molato mwa etumba mpe kamata nguba, teleme mpo ya kosalisa ngai.

35:3  Tombolela banguna ba ngai likongo mpe mompanga, loba na ngai : « Ngai moto nakobikisa yo. »

35:4  Bayoka nsoni mpe basambwa, baye banso baluki koboma ngai. Bazonga nsima mpe babulungana, baye banso bakani kosala ngai mabe.

35:5  Bazala lokola matiti mapimbwi na mompepe, mokolo anzelu wa Mokonzi akoya kobengana bango !

35:6  Nzela ya bango ezala molili mpe boselu, ntango anzelu wa Mokonzi akolanda bango.

35:7  Batandeli ngai monyama, ntina te, batimoli libulu mpo ’te bakweisa ngai.

35:8  Likambo linene likokwela bango na mbalakaka, bakokangema o monyama bango moko batiaki, bakokweya o libulu bango moko batimolaki.

35:9  Bongo motema mwa ngai mokosepela Mokonzi mpe nakobina na esengo mpo abikisi ngai.

35:10  Na motema monso nakoloba : « E Mokonzi, nani akokani na yo ? Okobikisaka moto moke o maboko ma elombe, mpe moto mobola o maboko ma moyibi. »

35:11  Banzeneneke ba lokuta babimeli ngai, batuni ngai makambo nayebi te.

35:12  Nasali bango malamu, bazongiseli ngai mabe, bato banso bakimi ngai.

35:13  Nzokande ngai, o ntango bazalaki kobele, nalataki ngoto, namikitisaki na bolali nzala, mpe natiki kosambela te.

35:14  Nazalaki kokende mpe kozonga lokola moto akolelaka moninga to ndeko ; na mawa manene nagumbami lokola moto alati mpili ya mama.

35:15  Ntango nakwei, basangani mpo ya koseke ngai, batioli ngai lokola bampaya, baye bayebi ngai te ;

35:16  batiki te koseke mpasi ya ngai na bolakisi mino.

35:17  Mokonzi, kin’o ntango nini okotala se mpamba ? Bikisa bomoi bwa ngai o mabe mana, batela nzoto ya ngai o manzaka ma nkosi.

35:18  Nakotondo yo o lisanga linene, nakokumisa yo o miso ma bato banso.

35:19  Banguna, bakosi baye, baseke mpasi ya ngai te ; baye bayini ngai ntina te, batika kofinana liso !

35:20  Bato baye bakolingaka boboto te, baluki se kokanela bato ba motema boboto.

35:21  Bafundi ngai na lokuta, balobi : « E yo, tomoni yango na miso ! »

35:22  E Nzambe, yo omoni nyonso, okanga matoi te, Mokonzi, ozala na ngai mosika te !

35:23  Lamuka mpe teleme mpo ya kosamba likambo lya ngai, Mokonzi Nzambe wa ngai, yaka kolongisa ngai.

35:24  E Mokonzi Nzambe wa ngai, kata likambo na bosembo, mpo ’te baseke ngai lisusu te.

35:25  Baloba te : « Biso bato tolongi » ; mpe bamilobela te : « Tosukisi ye mpenza ! »

35:26  Baye banso basepeli mpasi ya ngai, bayoka nsoni mpe basambwa, bakufa na nsoni mpe babulungana, baye bafundi ’te baleki ngai !

35:27  Kasi baye baluki kobikisa ngai, baganga na esengo, baloba ntango inso : « Mokonzi alongi, oyo alingi bolamu bwa mosaleli wa ye. »

35:28  Nakosakola ’te ozali na bosembo mpe nakokumisa yo mokolo na mokolo.

Chapter 36

36:1  Ya kapita wa bayembi. Ya mosaleli wa Mokonzi. Ya Davidi.

36:2  Nayebi makanisi mabe mazali o motema mwa mosumuki, o motema mwa ye amoni ntina ya kobanga Nzambe te.

36:3  Akomimonoko se moto malamu, bongo azali komono mabe ma ye moko te.

36:4  Ayebi se kotongo mpe kokosa bato, bwanya bozali na ye lisusu te.

36:5  O mbeto ya ye akokanaka se kosala mabe, alingi se kolanda nzela elamu te, aboyi kotika mabe ma ye.

36:6  E Mokonzi, bolingi bwa yo bokomi kin’o likolo, bosolo bwa yo kin’o mampata.

36:7  Bosembo bwa yo bopikami lokola ngomba ya Nzambe, bosambisi bwa yo bozindo bozali lokola lobwaku. E Mokonzi, okobatelaka bato na nyama.

36:8  E Nzambe, bolingi bwa yo bozali na motuya nsuka te ! Mapapu ma yo makobatelaka bana ba Adamu.

36:9  Okotondisaka bango na biloko ebele ya ndako ya yo, okomelisaka bango o ebale ya bolamu bwa yo ;

36:10  mpo ozali liziba lya bomoi bonso, mpo ya mwinda mwa yo tozali komono polele.

36:11  Lakisa bolingi bwa yo na bato bayebi yo, mpe bosembo bwa yo na bato ba motema semba.

36:12  Ondima te ’te bato ba lolendo banyata ngai, bato ba motema mabe babengana ngai te !

36:13  Tala, na mbalakaka bato babe bakwei, bakoki koteleme lisusu te.

Chapter 37

37:1  Ya Davidi. Bato babe, oyokela bango zuwa te, baye bazangi bosembo mpe te :

37:2  mosika te bakokauka lokola matiti, bakopolo lokola matiti mabesu.

37:3  Tia motema na Mokonzi mpe sala se malamu, bongo ofanda na boboto o mokili.

37:4  Luka esengo ya yo bobele epai ya Mokonzi, ye akopesa yo binso biye motema mwa yo molingi.

37:5  Tia bomoi bwa yo o maboko ma Mokonzi, tia elikya se na ye mpe akosalisa yo.

37:6  Akomonisa bosembo bwa yo polele lokola ntongo mpe bosolo bwa yo lokola moi na midi.

37:7  Zala motema mpio mpe tia elikya na Mokonzi, oyoka motema mpasi te soko basusu bazwi nkita noki, to soko balongi na mayele mabe.

37:8  Tika koyoka nkanda, tika mpe kosilika, kozala motema móto ekobebisaka motema.

37:9  Zambi bato babe bakosila nye, bato bakolikya o Mokonzi, bango nde bakozwa mokili.

37:10  Etikali moke mosumuki akozala lisusu te, ata oluki esika azali, okomono ye lisusu te.

37:11  Kasi bato babola bakozwa mokili, bakosepela na boboto nsuka te.

37:12  Soko moto mabe akaneli moto semba, mpe alakisi ye mino na nkanda,

37:13  Mokonzi akoseke ye, zambi asili amoni mokolo akozwa etumbu.

37:14  Bato babe babimisi mompanga, batandi litimbo mpo ’te baboma basemba, babola mpe baye bazali na makasi te.

37:15  Nzokande mompanga mokotubola mitema mya bango moko, matimbo ma bango makobukana.

37:16  Mwa mosolo moke mwa moto semba, moleki nkita enene ya mosumuki.

37:17  Zambi maboko ma mosumuki makobukana, kasi Mokonzi akolendisa basemba.

37:18  Nzambe akobatelaka bomoi bwa basemba, lisango lya bango likoumela seko.

37:19  O mikolo mya mpasi bakoyoka nsoni te, o mikolo mya nzala enene bakolia mpe bakotonda.

37:20  Nzokande basumuki bakokufa, banguna ba Nzambe bakosila, lokola matiti ma esobe mpe lokola milinga.

37:21  Moto mabe akodefa kasi akozongisaka te, moto semba azali motema ngolu mpe akokabaka.

37:22  Baye Nzambe akobenisa, bakozwa mokili. Baye akotombela bobe, bakokufa.

37:23  Mokonzi akokamba moto o nzela ya ye, soko ezalela ya ye esepelisi ye.

37:24  Soko akwei, akotikala kolala o mabelé te, zambi Mokonzi asili asimbi ye na loboko.

37:25  Nazalaki mwana, sikawa nakomi mobange, namoni naino te ’te Nzambe akotika basemba to bankoko ba bango bakende kosenge limpa.

37:26  Oyo akoyokaka ngolu, akodefisaka, libota lya ye likoumela seko !

37:27  Kima lisumu mpe sala malamu mpe okozwa esika ya kofanda seko.

37:28  Zambi Mokonzi alingi bosembo, akotika bato ba ye te, akobatelaka bango ntango inso ; kasi akosilisa bato babe na mpe libota lya bango mobimba.

37:29  Bato ba bosembo bakokoma bankolo ba Ekolo, bakofanda kuna mikolo minso seko.

37:30  Monoko mwa moto semba mokosakola bwanya, maloba ma ye se maloba ma bosembo.

37:31  Soko atosi mobeko mwa Nzambe na motema moko, makolo ma ye makozonga nsima te.

37:32  Baye baboya Nzambe bakonongoko moto wa bosembo, mpe bakolukaka mayele ma koboma ye.

37:33  Kasi Nzambe akotika ye o maboko ma bango te, akolingisa te ’te bakitisa ye o likambo.

37:34  Tia elikya na Mokonzi mpe landa nzela ya ye, ye akolendisa yo mpo okoma o Ekolo, mpe okomono ’te banyokoli bakosila.

37:35  Namonoki moto mabe akomi monyokoli, akoli se bokoli, lokola sédere ya Libano.

37:36  Na nsima, ntango naleki, azalaki lisusu te, asili alimwi, naluki ye, kasi namoni ye lisusu te.

37:37  Tala mpe bato babongi, bato ba bosembo, bato ba boboto bakozala na bana baike.

37:38  Kasi basumuki banso bakokufa, mpe libota lya baye baboya Nzambe likosila.

37:39  Libiki lya basemba likouta epai ya Mokonzi, ye azali ebombamelo ya bango o ntango ya nsomo.

37:40  Nzambe akosalisaka mpe akobatelaka bango, akolongola bango o maboko ma bato babe, akobikisa bango, mpo batii elikya na ye.

Chapter 38

38:1  Nzembo ya Davidi ; akundoli makambo ma kala.

38:2  E Mokonzi, otumbola ngai na nkanda te, opesa ngai etumbu na nkele te.

38:3  Ozokisi ngai na makula ma yo, obeti ngai makasi na loboko la yo.

38:4  Nzoto ya ngai mobimba ezoki mpo ya nkanda ya yo, minkuwa minso milembi mpo ya masumu ma ngai.

38:5  Nyongo ya masumu eleki motó mwa ngai, ekomi lokola mokumba monene nasengeli komeme.

38:6  Nakomi na mpota ilumbi lokola bipoli mpo ya bolema bwa ngai moko.

38:7  Nagumbami, nabukani mpe nalembi, nalati mawa ma ngai lokola mpili.

38:8  Motema mwa ngai moyoki molunge, nzoto mobimba ekomi mpota mpota.

38:9  Nabukani, bokasi bosili nye, motema motomboki mpe naleli makasi.

38:10  E Mokonzi, oyebi manso motema mwa ngai molingi, obungi bokimeli bwa ngai soki moke te.

38:11  Motema mokomi kobete makasi, nalembi, miso ma ngai makomi molili.

38:12  Bayebani na baninga ba ngai bakimi mpota ya ngai, ata bandeko balingi kokoma penepene na ngai te.

38:13  Baye balingi koboma ngai, batieli ngai mitambo ; baye baluki kosala ngai mabe, bakaneli ngai, mokolo na mokolo bakotongoko ngai.

38:14  Lokola moto akufa matoi, nalingi koyoka mango te, lokola ebubu nafungoli monoko te.

38:15  Nakomi lokola moto ayoki eloko te, mpe akoki kozongisa eyano te.

38:16  Elikya ya ngai, bobele yo, Mokonzi, yo okoyanola ngai, Mokonzi Nzambe wa ngai.

38:17  Namilobeli : « Baseke ngai te, baye bakosepelaka soko nakwei ! »

38:18  Nzokande nalingi nakweya, mpasi ezali se konyokolo ngai.

38:19  Solo, nandimi : nasakoli mabe ma ngai mpe nabangi mpo ya masumu ma ngai.

38:20  Banguna ba ngai bazali makasi, baye bayini ngai mpamba baleki mingi.

38:21  Baye bakozongiselaka ngai mabe ata nasali malamu, bafundi ngai soko nalingi kosala malamu.

38:22  E Mokonzi, otika ngai te, Nzambe wa ngai, otikala mosika na ngai te.

38:23  Yaka kosalisa ngai noki, yo Mokonzi mpe mobikisi wa ngai.

Chapter 39

39:1  Ya kapita wa bayembi, Yedutun. Nzembo ya Davidi.

39:2  Nalobaki : Nakobatela ezalela ya ngai, mpo ’te nasala mabe na monoko te, nakokanga monoko soko mosumuki azali pene na ngai.

39:3  Yango wana natikaki koloba, nafandaki nye ; nzokande bomengo bwa moto mabe boyokisi ngai mpasi.

39:4  Motema mwa ngai mokomaki móto, móto mopeli o motema ntango nakanisi yango, yango wana nafungoli monoko mpe nalobi :

39:5  « E Mokonzi, lakisa ngai mokolo nini nakokufa, mpe mikolo boni nakozala naino na bomoi, nayeba bongo ’te nazali bobele eloko mpamba.

39:6  Opesi ngai bomoi bokuse lokola loboko la moto, o miso ma yo mikolo mya ngai mizali eloko te. Solo, moto nyonso azali se mompepe :

39:7  nzela ya ye ezali se elilingi, nkita ya ye ekolimwa lokola mpema ; biloko asangisi, ayebi te nani akozwa byango. »

39:8  Yango wana, Mokonzi, nazila lisusu nini ? Nakotia elikya ya ngai se na yo.

39:9  Bikisa ngai o masumu manso, ondima te ’te bazoba batiola ngai.

39:10  Nakokanga monoko, nakoloba lisusu te, zambi yo moto osalaki bongo.

39:11  Ekoki bongo, tika kobete ngai, soki te nakokufa.

39:12  Okopalelaka moto mpo ’te obongisa ye, lokola mapaka okobebisaka biloko ye alingi ; solo, moto nyonso azali se mompepe mpamba !

39:13  E Mokonzi, yoka losambo la ngai, tia matoi na boleli bwa ngai, okanga matoi te, zambi o ndako ya yo nazali se mompaya, nazali koleka se boleki lokola bankoko ba ngai.

39:14  Tika kotala ngai mpo nayoka esengo lisusu liboso ’te nakende mpe nalimwa seko.

Chapter 40

40:1  Ya kapita wa bayembi. Nzembo ya Davidi.

40:2  Natiaki motema mobimba na Mokonzi, asunami epai ya ngai mpe ayoki boleli bwa ngai.

40:3  Alongoli ngai o libulu lya liwa, o esika ya potopoto epai nazindaki, atelemisi ngai lisusu o mabelé makasi mpe alendisi makolo ma ngai.

40:4  Atii o monoko mwa ngai nzembo ya sika nzembo ya bokumisi Nzambe wa biso. Moto nyonso ayeba yango mpe abanga, bongo atia motema na Mokonzi.

40:5  Esengo na moto oyo akolikya na Mokonzi, oyo alandi bato ba lolendo te, to baye babungami o nzela ya lokuta.

40:6  E Mokonzi Nzambe wa ngai, osalaki makamwa maike, maye obongiseli biso, moto moko te akokani na yo ! Nalingi kosakola mpe koloba mango lisusu, kasi maleki mingi, nakoki kotanga mango manso te.

40:7  Olingaki libonza to moboma te, kasi ofungolaki ngai matoi mpo ’te nayoka malamu, osengeki libonza lya kotumba to lya kofuta nyongo te.

40:8  Yango wana nalobi : « Ngai oyo nazali koya ! Eye ekomami o buku ekoki na ngai :

40:9  Nzambe wa ngai, nalingi kosala maye yo olingi, mobeko mwa yo mokomami kin’o kati ya motema. »

40:10  O lisanga linene nasakoli bosembo bwa Mokonzi, solo, nakangi monoko te, oyebi yango malamu.

40:11  Nabombi bosembo bwa yo o kati ya motema te, nasakoli lobokó mpe libiki lya yo. Nabangi kosolola bolingi na bosolo bwa yo te o lisanga linene lya bankumu.

40:12  Yo Mokonzi, opima ngai ngolu ya yo te, obatela ngai ntango inso na bolingi mpe na bosolo bwa yo.

40:13  Malozi maike mayeli ngai ntango inso, masumu ma ngai makweli ngai o motó, maleki boike, nakoki koyeba mango lisusu te, masumu maleki nsuki ya motó mwa ngai na boike, mpe motema mwa ngai molembi nye.

40:14  E Nzambe, ondima kobikisa ngai, e Mokonzi, yaka kosikola ngai noki.

40:15  Baye balingi koboma ngai basambwa mpe bayoka nsoni ! Baye basepeli na mpasi ya ngai bazonga nsima mpe bakima na nsoni !

40:16  Baye bawuloli ngai bakokende kobombama, bayoka nsoni !

40:17  Kasi bato banso bakolukaka yo, basepela mpe bayoka esengo mpo ya yo ! Baye banso balingi libiki lya yo, baloba ntango inso : « Nzambe azali monene ! »

40:18  Ngai nazali mobola mpe moto wa mawa, e Mokonzi, okanisaka ngai, Yo mosalisi mpe mobikisi wa ngai, e Nzambe wa ngai, oumela te.

Chapter 41

41:1  Ya kapita wa bayembi. Nzembo ya Davidi.

41:2  Esengo na moto akokanisaka babola na bato ba mawa : o mokolo mwa mpasi Mokonzi akobikisa ye.

41:3  Nzambe akobatela ye, akopesa ye bolamu o nse, akokaba ye o maboko ma banguna ba ye te.

41:4  Ntango akomi kobele, Mokonzi akosalisa ye, mpe akobikisa ye o bokono malalisi ye o mbeto.

41:5  Nalobaki : « Mokonzi, yokela ngai mawa ! Bikisa ngai, ata natumboli yo na masumu ma ngai ! »

41:6  Banguna batombeli ngai makambo mabe : « Akokufa mokolo nini mpo ’te nkombo ya ye esila ? »

41:7  Baye bayei kotala ngai, balobi makambo ma mpamba, kasi ekomi bango o libanda, batambwisi makambo ma ngai na motema mabe.

41:8  Baye bayini ngai bakomi kolobana malembe : « Azali kobele mpo masumu ma ye maleki,

41:9  mpasi makasi ekangi ye, akolongwa o mbeto lisusu te. »

41:10  Moto oyo nalingaki mpe natiaki motema na ye, oyo aliaki o meza ya ngai atombokeli ngai.

41:11  Kasi yo, Mokonzi, yokela ngai mawa, telemisa ngai, nakozongisela bango maye basali ngai.

41:12  Nakoyeba ’te olingi ngai solo soko monguna anyokoli ngai lisusu te.

41:13  Na lisalisi lya yo nakolenda lisusu mpe okopesa ngai bomoi o miso ma yo seko.

41:14  Bakumisa Mokonzi Nzambe wa Israel o bileko na bileko. Amen ! Amen !

Chapter 42

42:1  Ya kapita wa bayembi. Mateya ma bana ba Kore.

42:2  Lokola mbuli ekolukaka mai ma komele, motema mwa ngai mozali koluka yo, Nzambe.

42:3  Motema mwa ngai mozali koyoka mposa ya Nzambe, ye ntina ya bomoi bwa ngai ; mokolo nini nakokoma o miso ma Mokonzi ?

42:4  Butu moi nazali kolela, mpo mikolo minso bazali kotuna ngai : « Wapi Nzambe wa yo ? »

42:5  Soko nakanisi bongo, molimo mwa ngai mokomi kolela ; nazalaki kokende o ndako ya Nta-Likolo, o ndako ya Nzambe, elongo na bato ebele bayokaki nsai mpe bayembaki nzembo ya bokumisi.

42:6  Motema mwa ngai, mpo nini olembi boye ? Mpo nini ozali kokimela mpo ya ngai ? Tia elikya na Nzambe, nakokumisa ye lisusu, ye mobikisi mpe Nzambe wa ngai.

42:7  Motema mwa ngai molembi, nakanisi yo lisusu, ut’o mokili mwa Yordane mpe ngomba Ermon.

42:8  Mbonge ya mai ilandani na lokito, itomboki makasi mpo ya kozindisa ngai.

42:9  Mokonzi atindela ngai lisalisi lya ye na moi, mpe na butu nayembela Nzambe, ye ntina ya bomoi bwa ngai.

42:10  Nzambe azali libanga likobikisa ngai ; natuna ye : « Mpo nini obosani ngai ? Mpo nini nayoka se mawa ? Mpo nini nanyokwami bongo na banguna ? »

42:11  Banyokoli bazokisi ngai motema na mafinga, mikolo minso batuni ngai : « Wapi Nzambe wa yo ? »

42:12  Motema mwa ngai, mpo nini olembi boye ? Mpo nini ozali kokimela mpo ya ngai ? Tia elikya na Nzambe, nakokumisa ye lisusu, ye mobikisi mpe Nzambe wa ngai !

Chapter 43

43:1  E Nzambe, kata likambo lya ngai na bosembo, sambela ngai likambo lya ngai ! Bikisa ngai o maboko ma bakosi mpe o mitambo mya basuli.

43:2  E Nzambe, yo ebombamelo ya ngai te ? Bongo mpo nini oboyi ngai ? Ntina nini nayoka se mawa ? Mpo nini nanyokwami bongo na banguna ?

43:3  Lakisa ngai mwinda mpe bosolo bwa yo, yango ikamba ngai, ikende na ngai kin’o ngomba ya yo esantu, esika yo ofandi.

43:4  Bongo nakobeleme na altare ya Nzambe, ye ntina ya esengo ya ngai. Motema nsai nakoyembela ye na lokombe nzembo ya botondi Nzambe, Nzambe wa ngai.

43:5  Motema mwa ngai, mpo nini olembi boye ? Mpo nini ozali kokimela mpo ya ngai ? Tia elikya na Nzambe : nakokumisa ye lisusu, ye mobikisi wa ngai mpe Nzambe wa ngai !

Chapter 44

44:1  Ya kapita wa bayembi. Ya bana ba Kore. Mateya.

44:2  E Nzambe, toyokaki na matoi, bankoko bayebisaki biso maye osalaki o ntango ya bango, o mikolo mya kala.

44:3  Mpo ’te opesa bango esika ya kofanda, obengani bankolo ba mikili ; mpo ’te bakoma na bonsomi, onyokoli bato ba bikolo bisusu.

44:4  Bazwaki mokili na bokasi bwa mompanga te, balongaki etumba na bokasi bwa maboko te, kasi balongaki se na bokasi bwa loboko la yo la mobali mpe na mwinda mwa elongi ya yo, zambi olingaki bango.

44:5  E Nzambe, yo ozali Mokonzi wa ngai, opesaki etinda mpo ’te bato ba Yakob balonga.

44:6  Na bokasi bwa yo tokweisaki banguna ba biso, na lisalisi lya yo tonyataki baye bayelaki biso etumba.

44:7  Natiaki motema na litimbo lya ngai te, nalongaki bango na mompanga mwa ngai te.

44:8  Mpo ya yo tolongaki banguna ba biso, oyokisaki bango nsoni mpenza.

44:9  Toyembelaki Nzambe nzembo mikolo minso, tokumisaki nkombo ya yo ntango inso.

44:10  Nzokande obwaki mpe okitisaki biso, ozali kokamba basoda ba biso lisusu te.

44:11  Ozongisaki biso nsima o etumba bayelaki biso, na esengo banguna babotoli biso biloko.

44:12  Okabaki biso lokola nyama balingi baboma, opanzaki biso o kati ya bikolo bisusu.

44:13  Otekeki bato ba yo na motuya moke, mpe na mombongo mona ozwi litomba te.

44:14  Oyokisi biso nsoni o miso ma bato ba bikolo pene na biso, baye bafandi pene na biso bazali koseke mpe kotiola biso.

44:15  Nkombo ya biso ekomi nzembo o monoko mwa bampaya, bato ba bikolo bisusu bakokinolaka biso.

44:16  Mikolo minso nazali komono ndenge nasambwi, mpe nazipi elongi ya ngai mpo ya nsoni,

44:17  mpo ya baye bafingi mpe batuki ngai, balakisi ngai boyini mpe bobekoli.

44:18  Mana manso makwelaki biso, ata tobosanaki yo te, ata tobomaki bondeko na yo te.

44:19  Mitema mya biso miboyaki yo te, makolo ma biso malongwaki o nzela ya yo te.

44:20  Onyataki biso o ekolo ezangi mboka, ozipaki biso na molili mwa liwa.

44:21  Soko tobosanaki nkombo ya Nzambe wa biso, soko totandelaki nzambe wa lokuta maboko,

44:22  mbele Nzambe ayebaki yango, oyo ayebi maye manso mabombami o motema.

44:23  Mpo ya yo, balingi koboma biso mikolo minso mpe bakosalaka na biso lokola mpata iye balingi baboma.

44:24  E Mokonzi, lamuka, mpo nini olali mpongi ? Longwa o mpongi, obwaka biso seko te.

44:25  Mpo nini obombi elongi ya yo ? Obosani nde mpasi mpe minyoko mya biso ?

44:26  Tala, tokwei o kati ya mputulu, tolali banso mabumu o potopoto.

44:27  Teleme mpe yaka kosalisa biso, sikola biso mpo ya bolingi bwa yo !

Chapter 45

45:1  Ya kapita wa bayembi ; lolenge loko na ‘Fulele ya lisi’. Mateya ma bana ba Kore ; nzembo ya libala.

45:2  Motema mwa ngai mosepeli na nsango ya esengo, nakoyembela mokonzi nzembo ya ngai : lolemu la ngai lozali lokola ekomeli ya mokomi wa solo.

45:3  Oleki bato banso na kitoko, elongi ya yo engengi na bonzenga, yango wana Nzambe abenisi yo seko.

45:4  Elombe, kanga mompanga o loketo la yo, olata lokumu mpe nkembo ya yo.

45:5  Butela farasa mpe kende kobunda na mpiko, mpo ya kolongisa bosolo, boboto mpe bosembo. Sala misala mya nsomo na loboko la yo.

45:6  Bete makula mapotu ma yo, kweisa bato ba bikolo bisusu o nse ya makolo ma yo, lembisa banguna ba mokonzi.

45:7  Ngwende Nzambe apesi yo ekoumela seko, elembo ya bokonzi bwa yo, nde bosembo.

45:8  Olingi bosembo mpe oyini makambo mabe, yango wana Nzambe aponi yo mpo apakola yo mafuta ma esengo, leka baninga ba yo.

45:9  Bilamba bya yo bizali na nsolo mpimbo ya malasi, o ndako ya yo ya nkembo se miziki mya esengo.

45:10  O kati ya bilenge basi ba yo bana ba bakonzi bazali, mama mokonzi atelemi o loboko la yo la mobali, alati bilamba bitongami na wolo ya Ofir.

45:11  Yoka, elenge mwasi, tala mpe tia matoi, obosana ekolo mpe libota lya yo,

45:12  bongo mokonzi ndaluli bonzenga bwa yo ! Fukamela ye, zambi azali mokonzi wa yo.

45:13  Yo, elenge mwasi wa Tiro, bato banene bakoya kobondela yo na mabonza.

45:14  Na lipombo mwana wa mokonzi ayingeli o ndako, alati elamba etongami na nsinga ya wolo.

45:15  Bakembisi ye na biloko ndenge na ndenge, bakambi ye epai ya mokonzi. Bilenge basi, baninga ba ye, balandi ye, bakotisi bango epai ya mokonzi.

45:16  Bayei na bango na esengo enene, mpe banso bayingeli o ndako enene ya mokonzi.

45:17  Bana okobota bakokitana batata ba yo, okokomisa bango bakonzi o mokili mobimba.

45:18  Nakumisa nkombo ya yo o bileko binso, bato ba bikolo binso bakumisa yo seko.

Chapter 46

46:1  Ya kapita wa bayembi. Ya bana ba Kore ; bayemba yango na eyembeli ya mpiololo.

46:2  Nzambe azali ebombamelo mpe nguya ya biso, akosalisaka biso o mikolo mya mpasi.

46:3  Ata mokili moningani, tokobanga te, ata ngomba ikwei kin’o bozindo bwa mbu,

46:4  ata mai ma mbu matoki mpe matomboki, mpe ngomba ikomi kolenge makasi mpo ya mbonge.

46:5  Moluka moko mozali kosepelisa engumba ya Nzambe, esika nta esantu ya Mokonzi wa likolo.

46:6  Nzambe azali wana, o mboka ekoningana te, banda ntongo Nzambe akosalisaka yango.

46:7  Bikolo bitomboki mpe bakonzi bakwei, ye atomboli mongongo mpe mokili molengi.

46:8  Mokonzi wa bokasi bonso azali na biso, Nzambe wa Yakob azali ebombamelo ya biso.

46:9  Bokende kotala bikela bya Mokonzi, atondisi mokili na nsomo.

46:10  Asilisi bitumba o nse mobimba, abuki litimbo na likongo, atumbi makalo.

46:11  Agangi : « Ekoki bongo, boyeba ’te nazali Nzambe, nazali likolo lya bikolo binso, likolo lya nse mobimba. »

46:12  Mokonzi wa bokasi bonso azali na biso, Nzambe wa Yakob azali ebombamelo ya biso.

Chapter 47

47:1  Ya kapita wa bayembi. Ya bana ba Kore.

47:2  Bato ba bikolo binso, bobete maboko, boyembela Nzambe na esengo enene !

47:3  Zambi Nzambe, Mokonzi wa Likolo azali elombe, ye Mokonzi monene wa nse mobimba.

47:4  Asali ’te bato banso batosa biso, atii bango o nse ya makolo ma biso.

47:5  Aponeli biso mokili moko bo lisango, lokumu la Yakob, oyo akolingaka mingi.

47:6  Nzambe abuti o likolo mpe babeteli ye maboko, ye Mokonzi, babeteli ye mindule.

47:7  Boyembela Nzambe, boyemba, boyembela Mokonzi wa biso, boyemba.

47:8  Boyembela Nzambe nzembo ya bino, Ye mokonzi monene wa nse mobimba !

47:9  Nzambe akoyangelaka bikolo binso, afandi o ngwende ya ye esantu.

47:10  Bankumu ba bikolo bayei kosangana elongo na ekolo ya Nzambe wa Abarama. Solo, Nzambe azali mokonzi wa bankumu ba nse, ye aleki bango banso mosika.

Chapter 48

48:1  Nzembo ya bana ba Kore.

48:2  E Mokonzi, oleki bonene, bakumisa yo o engumba ya yo, Nzambe wa biso, o ngomba ya yo esantu.

48:3  Bato ba nse mobimba basepeli bonzenga bwa yo, ngomba Sion o Nordi, engumba ya mokonzi monene.

48:4  O ebombamelo ya Sion Nzambe amilakisi lokola mobateli wa engumba.

48:5  Tala, bakonzi bayokani, banso lisanga bayei kobunda.

48:6  Kasi emoni bango engumba, bayoki nsomo o mitema, babulungani mpe bakimi.

48:7  Babandi kolenge na mbalakaka, lokola mpasi ya mwasi alingi abota,

48:8  lokola mompepe makasi mwa Esti mobuki masuwa ma Tarsis.

48:9  Manso toyokaki liboso, tomoni mango sikawa, o engumba ya Nzambe wa biso, o engumba ya Mokonzi wa bokasi bonso ; Nzambe akobatelaka yango ntango inso.

48:10  E Nzambe, tokomanyolaka bolingi bwa yo o Tempelo ya yo esantu !

48:11  E Nzambe, nkombo mpe lokumu la yo ipalangani kin’o nsuka ya mokili. Na loboko la yo okobatelaka bosembo.

48:12  Ngomba Sion eyoki nsai enene, bingumba bya Yuda bipimbwi na esengo mpo ya motindo okokataka makambo.

48:13  Botambola zongazonga na Sion, mpe botanga manongi ma yango.

48:14  Botala lopango lonene lozingi engumba, botanga ndako ya yango inene, bongo bokoka kosakola na bankoko ba bino

48:15  ’te Nzambe oyo azali Nzambe wa biso seko, ye moto akoyangelaka biso.

Chapter 49

49:1  Ya kapita wa bayembi. Ya bana ba Kore.

49:2  Bato ba bikolo binso, boyoka likambo, bato ba nse mobimba, botia matoi,

49:3  bato bake ná bato ba lokumu, bato ba nkita ná babola !

49:4  Nalingi koloba maloba ma bwanya, mpe komanyola makanisi ma mayele o motema.

49:5  Nafungoli matoi mpo ’te nayoka liloba lya bwanya mpe nalimbola biyele na nzembo ya lokombe.

49:6  Mpo nini nabanga o mikolo mya mpasi, ntango bato babe bazingi ngai na mayele mabe,

49:7  baye bakotiaka mitema na nkita ya bango, mpe bakofundaka na mosolo mwa bango ?

49:8  Moto moko te akoki kosomba libiki, to kofuta Nzambe mpo ’te amisikola.

49:9  Ata moto akofuta mosolo boni mpo ’te abika, bomoi bwa ye bokosila se bosili.

49:10  Moto moko akoki nde kotikala na bomoi seko ? Bongo amono lilita lya ye mokolo moko te ?

49:11  Tokomonoko ’te bato ba bwanya bakokufa, se lokola bazoba na bato bazangi mayele. Bakotikela bato basusu biloko bya bango.

49:12  Ndako ya bango ya seko : lilita, bakofanda wana o bileko na bileko, ata bapesaki nkombo ya bango na mabelé ma bango.

49:13  Moto akoumela seko na nkita ya ye te, aulani na nyama eye bakobomaka.

49:14  Bato bakolikyaka na bango moko bakosuka se bongo, tala nsuka ya bato bakosepelaka na maloba ma bango moko.

49:15  Bakokende o mboka ya bawa lokola mpata, liwa likokoma mokengeli wa bango. Bakokita na mbalakaka o lilita, elili ya bango ekolimwa o mboka ya bawa, eye ekokoma ndako ya bango.

49:16  Kasi Nzambe akobikisa molimo mwa ngai, o mboka ya bawa akokamata ngai pene na ye.

49:17  Obanga lisusu te soko moto azwi nkita enene mpe soko akolisi nkembo ya ndako ya ye :

49:18  o ntango ya liwa akokende na eloko yoko te, mpe lokumu la ye lokolanda ye o lilita te.

49:19  O ntango ya bomoi azalaki komikumisa, mpo akomaki na lokumu na nkita azwaki,

49:20  kasi akokende bobele kokutana na bandeko ba ye, baye bakomono lisusu mwinda mokolo moko te.

49:21  Soko moto wa nkita akanisi lisusu eloko te, akosuka se lokola nyama eye bakobomaka.

Chapter 50

50:1  Nzembo ya Asaf. Nzambe wa banzambe, Mokonzi alingi aloba, abyangi bato banso ba nse, ut’o epai moi mokobimaka kin’o epai mokokitaka.

50:2  Ut’o Sion, ngomba kitoko, Nzambe azali kongenge.

50:3  Nzambe wa biso ayei, akotika kokanga monoko ! O boso bwa ye móto mozali kosilisa binso, mompepe makasi mozali kopepe zongazonga na ye.

50:4  Abyangi likolo na nse mpo ’te asamba makambo ma bato ba ye :

50:5  « Bosangisa basaleli ba ngai banso, baye babonzaki libonza mpo ya kokata bondeko na ngai. »

50:6  Likolo likosakola bosembo bwa ye : « Nzambe ye moko akozala zuzi ! »

50:7  « Boyoka, bino bato ba ngai, nakoloba ; Israel, nakofunda yo polele, ngai nazali Nzambe, Nzambe wa yo !

50:8  Nakofunda yo te mpo ya mabonza ma yo, nakoyokaka nsolo ya miboma mya yo ntango inso.

50:9  Nákamata nde ngombe o lopango la yo, to ntaba mobali ya etonga ya yo ?

50:10  Nyama inso ya zamba izali ya ngai, ná mpe nyama ebele ikozalaka o ngomba.

50:11  Nayebi ndeke inso ya ngomba, mpe nyama inso ya esobe izali ya ngai.

50:12  Soko nayokaki nzala, mbele nayebisaki yo te, mpo nse mobimba na biloko bya yango binso bizali bya ngai.

50:13  Ngai nakoliaka nde mosuni mwa ngombe ? Nakomeleke nde makila ma ntaba ?

50:14  Bonzela Nzambe libonza lya botondi ye, kokisa bilako olakelaki Nta-Likolo.

50:15  Obelela ngai o mikolo mya mpasi, mpo ’te nabikisa yo mpe okumisa ngai. »

50:16  Kasi Nzambe alobi na moto mabe : « Mpo nini okotangaka mibeko mya ngai mpe okokundolaka bondeko bwa ngai,

50:17  yo moto oboyi mobeko nyonso mpe obwaki maloba ma ngai ?

50:18  Soko omoni moyibi, okei koyokana na ye, mpe okofandaka esika yoko na bato ba ekobo.

50:19  Monoko mwa yo motondi na maloba mabe, mpe na lolemu ozali se kokosa.

50:20  Soko ofandi, otongi ndeko wa yo, obebisi lokumu la mwana wa mama wa yo.

50:21  Tala makambo okosalaka, bongo ngai naloba te ? Okanisi solo ’te nazali lokola yo ? Nakolakisa yo mabe ma yo polele.

50:22  Bino bato bokobosanaka Nzambe, bokeba ! Soko nakopesa bino etumbu, moto moko akobikisa bino te.

50:23  Oyo abonzi libonza mpo ya kotondo ngai, akokumisa ngai, oyo alandi nzela semba, nakobikisa ye. »

Chapter 51

51:1  Ya kapita wa bayembi. Nzembo ya Davidi.

51:2  O mokolo profeta Natan akei kopalela Davidi, zambi akendeki epai ya Betsabe (2 Sam 11-12).

51:3  E Nzambe, oleki bolamu, yokela ngai mawa ! Yo nta ngolu, olongola lisumu lya ngai !

51:4  Sukola mbindo ya ngai inso, petola ngai, zambi nasali lisumu.

51:5  Solo, nayebi ’te nasali mabe, ntango inso nakokanisaka mabe ma ngai.

51:6  Natumolaki yo mpenza na masumu, nasali maye mazali mabe o miso ma yo. Okokataka makambo na bosembo, okokitisa moto moko mpamba te.

51:7  Ut’o mokolo babotaki ngai, nazali moto mabe, ut’o libumu lya mama nazali mosumuki.

51:8  Kasi olingi ’te moto azala na bosolo, bongo lakisa bwanya bwa solo.

51:9  Sukola ngai na mai ma malasi, nakoma peto, petola ngai nakoma peto mpenza.

51:10  Sala ’te nayoka lisusu mingongo mya bato bazali na nsai, lendisa makolo ma ngai maye obukaki, nabina lisusu.

51:11  Otala masumu ma ngai lisusu te, longola mbindo ya mabe ma ngai manso.

51:12  E Nzambe, komisa motema mwa ngai peto, zongisela molimo mwa ngai nguya ya sika.

51:13  Obengana ngai mosika na yo te, opima ngai elimo ya yo esantu te.

51:14  Zongisela ngai esengo ya libiki lya yo, lendisa ngai, pesa ngai motema mwa mpiko.

51:15  Bongo nalakisa basumuki nzela ya yo, bato babungi nzela bazonga epai ya yo.

51:16  Nzambe mobikisi wa ngai, bikisa ngai o liwa, mpo ’te nasakola bosembo bwa yo na monoko.

51:17  Mokonzi, fungola monoko mwa ngai mpo nasakola lokumu la yo.

51:18  Okosepelaka te na miboma babonzeli yo, okoboyaka mabonza ma botumbi.

51:19  Libonza lya ngai, nde motema moyoki mawa, motema bosawa, motondi na mawa, e Nzambe, okoboyaka mwango te.

51:20  Opesa Sion bolamu mpo ya bolingi bwa yo bonene, otonga lisusu bifelo bya Yeruzalem.

51:21  Bongo okosepela lisusu na mabonza mpe na nyama batumbi, bana ba ngombe babonzi o altare ya yo.

Chapter 52

52:1  Ya kapita wa bayembi. Maloba ma Davidi.

52:2  O mokolo Doeg, moto wa Edom, ayei koyebisa Saul : « Davidi akoti o ndako ya Akimelek » (1 Sam 21,8).

52:3  Yo elombe, mpo nini okofundaka na mabe ma yo ? Bolingi bwa Nzambe bokosukaka te !

52:4  Okolukaka se kobebisa, lolemu la yo lozali lokola lotebu lopotu, lokolukaka se kokosa ntango inso.

52:5  Olingi kosala mabe, oboyi kosala malamu, olingi lokuta mingi, otiki maloba ma bosolo.

52:6  Olingi kozokisa mitema na maloba, mosala mwa lolemu la yo, se kokosa.

52:7  Yango wana Nzambe akonyata yo, akosukisa yo seko, akolongola yo o ema ya ye, akopikola yo o mokili mwa bato.

52:8  Emoni basemba bongo, bakolenge, bakoseke yo mpe bakoloba :

52:9  « Tala elombe aboyaki lisalisi lya Nzambe, azalaki kotia motema na nkita ya ye, mpe kofunda na mabe asalaki ! »

52:10  Kasi ngai nakotia elikya na bolingi bwa Nzambe seko, nazali lokola nzete ebesu ya oliva o ndako ya Nzambe.

52:11  Nakotondo yo ntango inso, zambi osali bongo, nakokumisa nkombo ya yo, mpo ozali nta bolamu na baye balingi yo.

Chapter 53

53:1  Ya kapita wa bayembi. O ntango ya bokono. Nzembo ya Davidi.

53:2  Bilema bakolobaka o kati ya motema : « Nzambe azali te ! » Babebi mpenza mpe bapusi kosala mabe ma nsomo, moto semba azali lisusu te.

53:3  Ut’o likolo Nzambe akotalaka bato, amono soko moto wa mayele azali, oyo akolukaka Nzambe.

53:4  Kasi banso babungi nzela, banso babebi, moto wa bosembo azali te, ata moko te.

53:5  Baye bakobomaka bato ba ngai bayebi te ’te bakosalaka mabe ? Bakoliaka bango lokola mampa, bakosambelaka Nzambe te !

53:6  Mokolo mosusu bakolenge na nsomo, ntina te. Nzambe akopanza minkuwa mya baye baboya ye. Bakoyokisa bango nsoni mokolo Nzambe akobwaka bango.

53:7  Mokolo nini libiki lya Israel likouta o Sion ? Mokolo Nzambe akozongisa bato bakendeki o boombo, Yakob akoyoka esengo, ba-Israel bakosepela !

Chapter 54

54:1  Ya kapita wa bayembi, na biyembeli bya nsinga. Mateya ma Davidi.

54:2  O mokolo bato ba Zif bayei koyebisa Saul : « Davidi abombami epai ya biso » (1 Sam 23,19).

54:3  E Nzambe, bikisa ngai mpo ya nkombo ya yo, longisa ngai na nguya ya yo.

54:4  E Nzambe, yoka losambo la ngai, tia matoi na maloba ma ngai !

54:5  Bato ba lofundo babimeli ngai, bato ba bitumba balingi koboma ngai, bango bakokumisaka Nzambe te.

54:6  Kasi tala, Nzambe ayei kosalisa ngai, Mokonzi azali na baye bakobatelaka bomoi bwa ngai.

54:7  Zongisela banyokoli ba ngai mabe ma bango, Mokonzi, mpo ya bosolo bwa yo, silisa bango !

54:8  Nakobonzela yo mabonza na motema moko, nakotondo nkombo ya yo nta bolamu,

54:9  mpo obikisi ngai o nsomo inso, mpe namoni banguna ba ngai basambwi.

Chapter 55

55:1  Ya kapita wa bayembi, na biyembeli bya nsinga. Mateya ma Davidi.

55:2  E Nzambe, yoka losambo la ngai, oboya mabondeli ma ngai te.

55:3  Ndima koyoka ngai mpe yanola ngai, natatabani mpo ya boleli.

55:4  Nalengi mpo ya migango mya banguna ba ngai mpe mpo ya bowuloli bwa baye baboya yo : bakaneli ngai makambo ebele, mpe bakobi kolanda ngai na nkanda enene.

55:5  Motema mwa ngai mokomi kolenge o bontolo bwa ngai, nsomo ya liwa ekangi ngai.

55:6  Bobangi mpe nsomo ikoteli ngai, nzoto mobimba ekomi kolenge,

55:7  mpe nalobi : « Nani akopesa ngai mapapu lokola ebenga, bongo napimbwa mpe nazwa esika ya bopemi ?

55:8  Mbele nakimi mosika mpenza, mpe nakei kofanda o eliki.

55:9  Mbele nazwi noki esika ya kobika o ntango mompepe mwa ekumbaki mongali. »

55:10  E Mokonzi, bulunginya maloba ma bango, zambi namoni se bitumba mpe boswani o engumba.

55:11  Butu moi bakolekaka o bifelo ; bosembo bozali wana te, se makambo mabe.

55:12  Bobe bopalangani wana, o zando bobele bitumba na bokosi.

55:13  Soko ezalaki monguna moto azalaki kofinga ngai, mbele nakokaki kondima yango. Moto ayini ngai, soko alukaki ngai na makambo, mbele nakimaki mosika na ye.

55:14  Kasi moto asali bongo, yo, moto lokola ngai, ndeko wa ngai, moninga wa ngai wa motema.

55:15  Tozalaki koyokana malamu, mpe kokende o ndako ya Nzambe nzela yoko.

55:16  Liwa likwela bango na mbalakaka, na nguya ya bango inso naino bakita o mboka ya bawa, mpo mabe maleki o esika bafandi.

55:17  Kasi ngai nazali kobelela Nzambe, Mokonzi oyo akobikisa ngai.

55:18  Na mpokwa, na ntongo mpe na midi, nakimeli mpe namileli na mawa tee ayoki lolaka la ngai.

55:19  Abikisi ngai o minyoko mpe apesi ngai boboto o ntango banguna ebele bayeli ngai.

55:20  Nzambe ayoka ngai mpe ayokisa bango nsoni, ye Mokonzi monene ut’o libandela. Bango bakoki kobongola mitema te, zambi bakobangaka Nzambe te.

55:21  Mosuli atomboli loboko mpo ya kobete baninga, abomi bondeko akataki na bango liboso ;

55:22  monoko mwa ye moleki manteka boselu, kasi o motema akokanaka se bitumba ; maloba ma ye maleki mafuta elengi, kasi makozokisa lokola mbeli epotu.

55:23  Tia mokumba mwa yo o maboko ma Mokonzi mpe ye akolendisa yo, akolingisa te ’te moto semba akweya seko.

55:24  Kasi baye bakobomaka mpe bakokosaka, yo Nzambe, okobwaka bango o libulu lya mboka ya bawa : bakosilisa ata ndambo ya mikolo mya bango te. Kasi ngai nakolikya na yo.

Chapter 56

56:1  Ya kapita wa bayembi. Ya Davidi. O ntango ba-Filisti bakangi ye o Gat (1 Sam 21,11-13).

56:2  E Nzambe, yokela ngai mawa ntango bayei kobunisa ngai, moi mobimba banyokoli bazali kotungisa ngai.

56:3  Banguna bakobunisaka ngai ntango inso, baye bakobimelaka ngai bazali baike.

56:4  Mokolo nazali kobanga, nakotia motema na yo.

56:5  Nakokumisa Nzambe mpo ya liloba lya ye ; nakolikya na Nzambe mpe nakobanga lisusu te ; bongo moto akoki kosala ngai nini ?

56:6  Mikolo minso bakobongolaka maloba ma ngai, bakani se kosala ngai mabe.

56:7  Babombami mpo ya konongo esika nakoleka, mpe mpo ya koboma ngai.

56:8  Awa basali mabe bongo, bakoki nde kobika ? E Nzambe, nkanda ya yo eboma bango !

56:9  E Nzambe, otangi mbala boni nasengelaki kokima, ekomami o buku ya yo, yamba mpizoli ya ngai o mbeki ya yo.

56:10  Soko nabengi yo, banguna ba ngai bakokima, mpo nayebi ’te Nzambe azali na ngai.

56:11  Nakokumisa Nzambe mpo ya liloba lya ye, ye Mokonzi, nakokumisa maloba ma ye.

56:12  Nakolikya na Nzambe mpe nakobanga te : bato bakoki kosala ngai nini ?

56:13  E Nzambe, nasengeli kokokisa bilako nalakelaki yo, nakobonzela yo mabonza ma botondi yo,

56:14  mpo obikisi ngai o maboko ma liwa ; obateli makolo ma ngai mpo ’te natuta libaku te, mpe natambola seko o miso ma yo, o kati ya mwinda mokongengeleke bato ba bomoi.

Chapter 57

57:1  Ya kapita wa bayembi ; lolenge loko na nzembo ‘Obebisa te’. Nzembo ya Davidi o mokolo akimaki Saul mpe akoti o mobenga. (Sam 24,1-9).

57:2  Mawa e ! E Nzambe, yokela ngai mawa, nakimi epai ya yo, nayei kobombama o nse ya mapapu ma yo tee ntango bolozi bokosila.

57:3  Nabeleli Nzambe oyo azali o likolo, Nzambe oyo akosalaka ngai se malamu.

57:4  Ut’o likolo atindela ngai libiki, asambwisa monyokoli wa ngai, atindela ngai bolingi mpe bosolo bwa ye.

57:5  Nakomi kolala o kati ya ntambwe ikoliaka bana ba bato. Mino ma bango lokola makongo mpe makula, lolemu la bango lokola mompanga basebi.

57:6  E Nzambe, omilakisa o nta likolo, nse mobimba etonda na nkembo ya yo !

57:7  O nzela batandelaki ngai monyama, balingaki koboma ngai. Batimolaki libulu liboso lya ngai, kasi bango moko bakwei o libulu lyango.

57:8  Sikawa motema mokiti, e Nzambe wa ngai, motema nye nakoyembela yo nzembo.

57:9  E nkembo ya ngai, lamuka ! E nzenze na lokombe, bolamuka, nayemba tee ntongo ekotana.

57:10  Mokonzi, nakokumisa yo o ntei ya bato, nakobetela yo nzenze o bikolo binso,

57:11  mpo bolingi bwa yo boleki likolo na bonene, bosolo bwa yo bobuti kin’o mampata.

57:12  E Nzambe, omilakisa o nta likolo, nse mobimba etonda na nkembo ya yo !

Chapter 58

58:1  Ya kapita wa bayembi : lolenge loko na nzembo ‘Obebisa te’. Nzembo ya Davidi.

58:2  Bato banene ba mokili bakosambaka nde na bosembo ? Bino bato, bokokataka makambo bo ebongi ?

58:3  Te, na nko bokosalaka maye mazangi bosembo, mpe bokotielaka bato mikumba lokola bino moko bolingi.

58:4  Babeba ut’o libumu lya mama, bato baye babe, babunga ut’o mbotama ya bango, bato baye ba lokuta ;

58:5  bazali na ngenge lokola ngenge ya nyoka, bakufi matoi lokola nyoka ekangi matoi

58:6  mpo ’te eyoka lolaka la nganga te, oyo ayebi kopesa ye mitindo mya ye.

58:7  E Nzambe, buka bango mino o monoko, e Mokonzi, longola mino ma bana ba nkosi.

58:8  Balimwa lokola mai ma mbeki masopani, babeba lokola matiti bato bakonyataka !

58:9  Balimwa lokola mbembé ekonyangwa o nzela, lokola zemi lisopani mpe likomono moi te !

58:10  Liboso ’te babimisa nzube lokola lolemu la nkoi, mobesu to mobesu te, nkanda elongola bango !

58:11  Moto semba akosepela mokolo bango bakozwa etumbu, akosukola makolo ma ye o makila ma baye baboya Nzambe.

58:12  Bakoloba : Solo, kozala moto semba ezali na litomba ; Nzambe azali, oyo akoyangelaka mokili na bosembo.

Chapter 59

59:1  Ya kapita wa bayembi. Ya Davidi. O ntango Saul atindi bato bakengele ndako ya Davidi mpo ’te baboma ye (1 Sam 19,11).

59:2  E Nzambe wa ngai, bikisa ngai o maboko ma banguna, batela ngai o ntei ya bato bayeli ngai etumba.

59:3  Bikisa ngai o maboko ma bato bakosalaka mabe, ma baye balingi koboma ngai.

59:4  Tala, bazali kokenge ngai, bato makasi bakaneli ngai, nzokande nasali lisumu te, mabe moko mpe te, e Nzambe.

59:5  Ata nazali na likambo lyoko te, bamilengeli mpo ’te babimela ngai. Lamuka, yaka kosalisa ngai mpe tala !

59:6  E Mokonzi, Nzambe wa bokasi bonso, Nzambe wa Israel, lamuka mpe pesa bampaya baye etumbu, oyokela basuli baye mawa te !

59:7  Na mpokwa bakozonga, bakolela lokola mbwa, bakoyengayenga o mboka mobimba.

59:8  Minoko mya bango mitondi na maloba ma lolendo, mbebu ya bango lokola mompanga basebi, balobi : « Nani moto akoyoka biso ? »

59:9  Kasi yo Mokonzi, okosekeke bango, okotiolaka bango banso.

59:10  Yo, nguya ya ngai, nakotala bobele yo ; solo, Nzambe azali ebombamelo ya ngai.

59:11  Nzambe wa bolingo akoya kosalisa ngai ; Nzambe akosala ’te nakoka banguna baye bayeli ngai.

59:12  Oboma bango te, mpo ’te bato ba ngai babosana te, kasi na nguya ya yo obengana mpe onyata bango, e Mokonzi, yo nguba ya biso.

59:13  Nyonso bakolobaka na monoko, ezali lisumu ; lofundo lokosukisa bango, mpo batuki Nzambe mpe bazali bato ba lokuta.

59:14  Silisa bango na nkanda ya yo, bazala lisusu te, bato bayeba bongo ’te Nzambe azali Mokonzi wa Yakob kin’o nsuka ya mokili.

59:15  Na mpokwa bakozonga, bakolela lokola mbwa, bakoyengayenga o mboka mobimba.

59:16  Bipai binso bakoluka biloko bya kolia, mpe soko batondi te, bakolela se boleli.

59:17  Kasi ngai nakoyembela nguya ya yo, na ntongo nakokumisa bolingi bwa yo, yo ebombamelo ya ngai, oyo akobatela ngai o mikolo nakoyoka nsomo.

59:18  Yo bokasi bwa ngai, nakoyembela yo ; ebombamelo ya ngai, Nzambe oyo akosalaka ngai se malamu.

Chapter 60

60:1  Ya kapita wa bayembi. Ya Davidi. Mpo ya koteya.

60:2  O ntango abundaki etumba na ba-Aram, ba-Mezopotamia mpe ba-Soba, mpe Yoab auti kolonga ba-Edom nkoto zomi na ibale o lobwaku la Mongwa (2 Sam 8).

60:3  E Nzambe obwaki biso, opanzi biso, osilikeli biso ; zongela biso !

60:4  Oningisaki mokili, opasolaki mwango ; bongisa bisika bibebi, zambi mokili mobukani.

60:5  Oyokisaki bato ba yo mpasi mingi, omelisaki biso vino eleki makasi.

60:6  Kasi opesaki bato bakobangaka yo bendele mpo ’te bakima baye bakobetele bango makula.

60:7  Mpo ’te bato ba yo ba bolingo babika salisa bango na bokasi bwa loboko la yo, yanola biso.

60:8  O ndako ya ye esantu Nzambe alobaki : « Nasepeli mingi, nakokabola mokili mwa Sikem, mpe nakomeka lobwaku la Sukot na nsinga.

60:9  Mikili mya Galaad na Manase, mikili mya ngai, mokili mwa Efraim mokozala enkoti ya motó mwa ngai, mokili mwa Yuda, montongo mwa ngai,

60:10  mokili mwa Moab, sani ya kosukola nzoto. Nakobwaka sapato o mokili mwa Edom. Nakoyokisa ba-Filisti mogango mwa etumba ! »

60:11  Nani akoyingisa ngai o mboka ezingami na lopango makasi ? Nani akokamba ngai o mokili mwa Edom ?

60:12  E Nzambe, obwaki biso solo ? E Nzambe, okokamba mampinga ma biso lisusu te ?

60:13  Salisa biso o ntango ya minyoko, zambi lisalisi lya bato lizali bobele mpamba.

60:14  Elongo na Nzambe tokosala makamwa, ye moto akonyata banyokoli ba biso.

Chapter 61

61:1  Ya kapita wa bayembi ; na eyembeli ya nsinga. Ya Davidi.

61:2  E Nzambe, yoka boleli bwa ngai, tia matoi na losambo la ngai !

61:3  Ut’o ndelo ya mokili nakobelela yo, mpo motema mwa ngai molembi mpenza. Otombola ngai o nsonge ya libanga lileki ngai na bosanda.

61:4  Solo, ozali ebombamelo ya ngai mpe linongi makasi o miso ma banguna.

61:5  Nalingi kofanda o ema ya yo seko, koluka bobateli o nse ya mapapu ma yo.

61:6  Yo Nzambe, oyebi maye motema mwa ngai molingi, mpe okopesaka bato babangi yo maye basengi yo.

61:7  Na bomoi bwa mokonzi bakisa mikolo, mpo ’te aumela mibu miike o mokili.

61:8  Afanda o ngwende ya ye o miso ma Nzambe seko, batela ye na bolingi mpe na bosolo bwa yo.

61:9  Bongo nakoyembela nkombo ya yo ntango inso, mpe nakokokisa bilako bya ngai mokolo na mokolo.

Chapter 62

62:1  Ya kapita wa bayembi, ya Yedutun. Nzembo ya Davidi.

62:2  Motema mwa ngai mokopema se epai ya Nzambe, libiki lya ngai likouta se epai ya ye.

62:3  Ye azali libanga mpe libiki lya ngai, ebombamelo ya ngai, nakotelengana te.

62:4  Mikolo boni naino bokobundisa moto azali se ye moko, mpe bokoluka koboma ye, bino banso lisanga, mpo ya kokweisa ye lokola efelo etengemi, mpe koboma ye lokola lopango losili lobukani.

62:5  Bakani se kokweisa moto ; esengo ya bango, se kokosa bato. Na monoko bakolobaka maloba ma bobenisi, kasi na motema bakobeteleke moto mobondo.

62:6  Motema mwa ngai mopema epai ya Nzambe, zambi bobele ye azali elikya ya ngai.

62:7  Ye azali libanga mpe libiki lya ngai, ebombamelo ya ngai, nakotelengana te.

62:8  Bobele ye Nzambe azali libiki mpe lokumu la ngai, Nzambe azali libanga mpe ebombamelo ya ngai.

62:9  Bino bato, botia mitema na ye ntango inso, bofungolela ye mitema mya bino. Nzambe azali ebombamelo ya biso.

62:10  Bato bake bazali se mpema mpamba, bato banene bakolekaka se boleki. Soko batii bango banso elongo o emekeli, bakokoka ata na bozito bwa mompepe te.

62:11  Boluka kosala bato makambo na makasi te, bomiyokisa mpasi te mpo ya kobotolo bato biloko. Soko bokomi na nkita enene, botia mitema na yango te !

62:12  Nzambe alobaki se mbala yoko, ngai nayokaki mbala ibale ’te : « Nzambe aleki bokasi,

62:13  Mokonzi, yo bolingi bwa solo » ; « okofutaka moto nyonso engebene na mosala mwa ye. »

Chapter 63

63:1  Nzembo ya Davidi o ntango azalaki o eliki ya Yuda (1 Sam 23,14).

63:2  Nakolukaka yo Nzambe, yo Nzambe wa ngai, molimo mwa ngai mozali na mposa na yo ; nzoto ya ngai eyoki mposa makasi na yo, ekomi lokola elanga ekauki mpe esila mai.

63:3  Nalingi kokende kotala yo o ndako esantu, namono nguya mpe nkembo ya yo.

63:4  Bolingi bwa yo boleki bomoi bwa nzoto, nakosakola nkembo ya yo na mbebu ya ngai.

63:5  Nalingi kokumisa yo bomoi bwa ngai mobimba, mpe kotombola maboko mpo ya nkombo ya yo.

63:6  Nakotonda na bolamu bwa yo lokola moto alei malamu, motema nsai nakokumisa yo.

63:7  Ntango nalali o mbeto, nakanisi se yo, awa mpongi eyei te, nasambeli yo.

63:8  Yo moto oyei kosalisa ngai, na esengo namibombi o nse ya mapapu ma yo.

63:9  Molimo mwa ngai mokangana na yo, okobatelaka ngai na loboko la yo la mobali.

63:10  Bato baye balingi koboma ngai bakita o mabelé bozindo !

63:11  Bakufa na mompanga, minsole miya kolia bibembe bya bango !

63:12  Kasi mokonzi wa ekolo akosepela Nzambe. Moto akotia motema na ye akozwa bolamu mokolo bato ba lokuta bakokanga monoko.

Chapter 64

64:1  Ya kapita wa bayembi. Nzembo ya Davidi.

64:2  E Nzambe, yoka ngai moto nazali kokimela, batela ngai o ntango nazali kobanga monguna.

64:3  Bomba ngai mosika na bato bakaneli ngai, mosika na likita lya bato bakosalaka mabe.

64:4  Bapelisi lolemu la bango lokola mompanga, maloba ma bango lokola makula ma ngenge,

64:5  mpo ’te bazokisa moto semba na bonkutu, babete ye na mbalakaka, babangi te.

64:6  Balendisani o makambo mabe, bayokani mpo ya kotia mitambo, bamilobeli : « Nani akomono myango ? »

64:7  Baluki mayele ma kosala mabe, moto na moto abombi mokano mabe o motema mwa ye.

64:8  Kasi Nzambe akobetele bango likula, mpe na mbalakaka bakozoka mpota.

64:9  Maloba ma bango makweisi bango moko. Baye banso bamoni bongo baningisi mitó.

64:10  O ntango ena banso bakobanga, bakondima ’te Nzambe asali bongo, bakoyeba ntina ya mosala mwa ye.

64:11  Moto semba akoyoka nsai o mboka Mokonzi, akobombama epai ya ye, mpe bato banso ba motema bosembo bakosepela.

Chapter 65

65:1  Ya kapita wa bayembi. Nzembo ya Davidi.

65:2  E Nzambe, ebongi bakumisa yo o Sion, bato bakokisa bilako balakelaki yo.

65:3  Bato banso bakoki kokoma epai ya yo, zambi okoyokaka losambo la bango.

65:4  Masumu ma biso maleki mingi, kasi yo okolimbisaka mango.

65:5  Esengo na moto oyo yo oponi, mpo ’te afanda o lopango la yo. Totonda na biloko bya ndako ya yo, na biloko bisantu bya Tempelo ya yo.

65:6  Na makamwa ma bosembo okolobaka na biso, yo Nzambe mobikisi wa biso, ozali elikya ya bato ba nse mobimba kin’o nsuka ya mbu enene.

65:7  Na nguya ya yo opiki ngomba makasi, omizingi na nguya ya yo.

65:8  Okokitisaka makeléle ma mbu mpe ma mbonge, na mpe makeléle ma bato batombokeli yo.

65:9  Makamwa ma yo makoyokisaka bato ba mikili mosika nsomo ; epai moi mokobimaka mpe epai mokokitaka, bikela bya yo bikoyokisaka bato esengo.

65:10  Okoyaka kotala nse mpe okonokiselaka yango mbula, okotondisaka yango na biloko ebele. Na mai matondi o moluka mwa Nzambe, okobongisaka mabelé mpo ’te mabota mbuma ya mampa.

65:11  Okosopaka mai mpe okolalisaka mabelé, okonokisaka mbula mpe okotoisaka milona.

65:12  Mobu na mobu okokokisaka makabo ma yo : bipai binso olekaki bilanga biboti mbuma mingi ;

65:13  o esobe ekauki matiti mazwi mai, esengo emononi o ngomba inso ;

65:14  bisobe binso bitondi na bibwele, bilanga binso na mbuma ya mampa ; bipai binso se esengo, se nzembo !

Chapter 66

66:1  Ya kapita wa bayembi. Nzembo. O mokili mobimba bobetele Nzambe maboko,

66:2  boyembela nkombo ya ye nzembo, bokembela mpe bokumisa ye.

66:3  Boloba na Nzambe : « Osali bikela binene, nguya ya yo eleki, banguna bakomi kobondela yo.

66:4  Bato ba nse mobimba bakumbameli yo, bayembi mpo ya lokumu la nkombo ya yo. »

66:5  Yakani kotala bikela bya Nzambe, biye bikoyokisaka bato nsomo.

66:6  Akaukisaki mbu, ekomi mabelé makasi, mpo ’te bato bakatisa ebale na makolo. Bongo, esengo ya biso se ye !

66:7  Akoyangela seko na nguya enene ! Miso ma ye makokengeleke bikolo binso, baye batombokeli ye bakomeka lisusu te.

66:8  Bato ba bikolo binso, bokumisa Nzambe wa biso, boyemba nzembo ya kokumisa ye.

66:9  Oyo akabeli biso bomoi akobatelaka makolo ma biso mpo totuta libaku te.

66:10  Solo, omekaki biso, e Nzambe, opetolaki biso lokola bakopetolaka palata,

66:11  okotisaki biso o motambo, okangaki loketo la biso makasi,

66:12  olingisaki ’te bato banyata mitó mya biso, tozikaki na móto, tozindaki o mai, kasi na nsima okambaki biso o esika ya bopemi.

66:13  Nayei kotumba mabonza o ndako ya yo, nayei kokokisa bilako bya ngai,

66:14  biye nalakelaki yo na monoko, biye nasakolaki o ntango nayokaki nsomo.

66:15  Nakotumbela yo miboma mya mafuta, milinga mya mpata babali, mpe nakobonza ngombe na ntaba babali.

66:16  Yakani koyoka bino banso bokobangaka Nzambe, nayebisa bino lisolo lya manso ye asali ngai.

66:17  Ntango nazalaki kobondela ye, nabandaki kosakola lokumu la ye.

66:18  Soko o motema nakanaki kosala mabe, mbele Mokonzi andimaki losambo la ngai te.

66:19  Kasi Nzambe andimelaki ngai, ayokaki mabondeli ma ngai.

66:20  Lokumu na Nzambe, oyo andimaki losambo la ngai mpe apimaki ngai bolingi bwa ye te !

Chapter 67

67:1  Ya kapita wa bayembi ; na biyembeli bya nsinga.

67:2  Nzambe ayokela biso mawa mpe abenisa biso, angengisela biso elongi ya ye !

67:3  Bato banso ba nse bayeba nzela ya yo, bikolo binso bimono libiki lya yo.

67:4  Bato banso bakumisa yo, Nzambe, bato banso batondo yo !

67:5  Bato ba mikili minso bayemba na esengo, mpo okosambisaka na bosembo mpe okokambaka bikolo binso bya nse.

67:6  Bato banso bakumisa yo, Nzambe, bato banso batondo yo !

67:7  Bilanga biboti mbuma, Nzambe, Nzambe wa biso, abenisi biso.

67:8  Nzambe abenisa biso mpe bato ba nse mobimba babanga ye !

Chapter 68

68:1  Ya kapita wa bayembi. Nzembo ya Davidi.

68:2  Nzambe ateleme, banguna ba ye bapanzana, bato bayini ye bakima elongi ya ye.

68:3  O miso ma Nzambe balimwa lokola milinga, lokola mafuta ma nzoi makonyangwaka o móto, bato babe basila o miso ma yo, Nzambe.

68:4  Kasi bato ba bosembo basepela o boso bwa Nzambe, bayembela ye mpe babina na esengo.

68:5  Boyembela Nzambe, bokumisa nkombo ya ye ; bokumisa Oyo akotambolaka likolo lya mampata, nkombo ya ye Mokonzi, bobinela ye.

68:6  Ye Nzambe o ndako ya ye esantu, azali tata wa bana bitike, mpe molobeli wa basi bakufeli babali.

68:7  Ye akopesa baye bazangi ndako esika ya kofanda, akozongisela baombo bonsomi na esengo ; kasi bato batombokeli ye bakofanda o eliki.

68:8  E Nzambe, ntango okendeki o boso bwa bato ba yo, mpe okambaki bango o eliki,

68:9  mokili moninganaki o miso ma Nzambe mpe likolo linokisaki mbula, o miso ma Nzambe, Nzambe wa Israel.

68:10  E Nzambe, otindelaki bango makabo ma yo maike lokola mbula, mpe olendisaki bato ba yo balembeki.

68:11  E Nzambe, yo moto opesaki bango esika ya kofanda, eye obongiselaki babola, mpo ya bolamu bwa yo.

68:12  Mokonzi atindaki bantoma na nsango eye : « Mokonzi apanzaki limpinga linene. »

68:13  Bakonzi na basoda ba bango bakimaki mbangu, basi babandaki kokabolana biloko :

68:14  mapapu ma bibenga makembami na palata, mpe nsala ya byango na wolo. Bongo bokotikala se o lopango la bibwele ?

68:15  Ntango Mokonzi apanzi bakonzi banene, mbula ya matandala enoki o ngomba Salmon.

68:16  Ngomba ya Basan, ngomba ya Nzambe, ngomba ya Basan, ngomba ya nsonge ilai.

68:17  Bino ngomba isanda, mpo nini boyoki zuwa ? Mpo nini boluli ngomba eye Nzambe aponi mpo ’te afanda ? Solo, Mokonzi akozala kuna seko.

68:18  Nzambe azali na makalo ma etumba nkoto na nkoto, ut’o ngomba Sinai ayaki o ndako ya ye esantu.

68:19  Obutaki ngomba Sion, okangaki bato bo baombo, osengeki bato mabonza, ata baye batombokoki, mpo ’te ozala na ndako ya kofanda, e Mokonzi Nzambe.

68:20  Bakumisa Mokonzi mokolo na mokolo, Nzambe, mobikisi wa biso, akopanganaka na biso.

68:21  Ye azali Nzambe oyo akosalisaka biso ; Mokonzi Nzambe akobikisaka biso o liwa.

68:22  Ye Nzambe akopasolaka mitó mya banguna ba ye, mpe mya bato bakosalaka mabe.

68:23  Mokonzi alobi : « Nakolongola bango o Basan, nakobenda baye bazindi o bozindo bwa mbu,

68:24  mpo ’te otia lokolo o makila ma bango, mpe mbwa ya yo ilia nsuni ya banguna. »

68:25  E Nzambe, bamoni milongo mya bato ba yo, milongo mya Nzambe, Mokonzi wa ngai, bayingeli na nkembo o Tempelo.

68:26  Bayembi liboso, bato ba miziki nsima, o kati ya bango bilenge basi bazali kobete mbonda.

68:27  Banso lisanga bakumisi Nzambe, ye Mokonzi, liziba lya libiki lya Israel.

68:28  Bato ba Benyamin mozimi bakei liboso, nsima bankumu ba Yuda, bankumu ba Zabulon mpe ba Neftali na milato minzenga.

68:29  E Nzambe, omonisa nguya ya yo, nguya eye olakisaki biso.

68:30  Ut’o Tempelo ya yo o ngomba ya Yeruzalem bakonzi bakoya kobonzela yo mabonza !

68:31  Bangisa ngando ebombami o nsoló ya ebale, ngombe babali na bana ba ngombe, baye babondeli yo, palata o maboko ! Panza bato balingi se bitumba.

68:32  Bato banene bakouta o Ezipeti, bato ba Etiópia bakotandela Nzambe maboko.

68:33  Bino bakonzi ba nse, boyembela Nzambe, bobete miziki mpo ya kokumisa Mokonzi,

68:34  oyo akotambolaka o etando ya likolo. Boyoka mongongo mwa ye, mongongo makasi.

68:35  Bosakola bokasi bwa Nzambe, ye nkembo ya Israel ; bokasi bwa ye bozali o mampata :

68:36  Ye Nzambe wa nsomo o ndako ya ye esantu, Nzambe wa Israel oyo akopesaka bato ba ye nguya mpe mpiko. Bakumisa Nzambe !

Chapter 69

69:1  Ya kapita wa bayembi. Ya Davidi.

69:2  E Nzambe, obikisa ngai, mai makomeli ngai kin’o nkingo.

69:3  Nakomi kozinda o kati ya potopoto bozindo, nazwi esika ya kotia makolo te. Nakwei o mai bozindo, mosika te mai makasi makobenda ngai.

69:4  Nalembi na boleli, mongongo mokauki, miso ma ngai mateli na bozili Nzambe wa ngai.

69:5  Bato bakoyinaka ngai se mpamba, baleki nsuki ya motó mwa ngai na boike. Baye bakonyokoloko ngai ntina te, baleki ngai na bokasi. Eloko nayibi te, nazongisa yango boniboni ?

69:6  E Nzambe, oyebi bozoba bwa ngai, mabe ma ngai mabombami o miso ma yo te.

69:7  E Mokonzi wa bokasi bonso, bato bakolikya na yo bayoka nsoni mpo ya ngai te ! Baye bakoluka yo, Nzambe wa Israel, basambwa mpo ya ngai te !

69:8  Bobele mpo ya yo nandimi mafinga, nandimi ’te nsoni emonono o elongi ya ngai.

69:9  Mpo ya yo nakomi mouta o miso ma bandeko ba ngai, bana ba mama wa ngai bayebi ngai lisusu te.

69:10  Mposa ya kokumisa ndako ya yo ekoteli ngai, mafinga bafingi yo, makweli ngai.

69:11  Soko namiyokisi mpasi na bolali nzala, bakomi kofinga ngai.

69:12  Soko nalati ngoto ya lilaka, bakomi koseke ngai o lisapo,

69:13  mpe kotonga ngai tee o zando ; bameli masanga batii ngai na nzembo.

69:14  Kasi ngai nakobi kosambela yo, Mokonzi : ntango ya kondimela ngai ekoki. E Nzambe, mpo ya bolingi bonene bwa yo, oyanola ngai, mpo ozali mobikisi wa solo.

69:15  Longola ngai o potopoto mpo nazinda te, nalongwa o maboko ma bato bakoyinaka ngai, nabika o mai bozindo.

69:16  Mai makasi mabenda ngai te, libulu limele ngai te, monoko mwa libulu mokangema likolo lya ngai te.

69:17  E Mokonzi, oyanola ngai, zambi bolingi bwa yo boleki bolamu, mpo ya ngolu ya yo enene, ondima kotala ngai.

69:18  Bombela mosaleli wa yo elongi ya yo te ; nanyokwami mingi, yanola ngai noki.

69:19  Bikisa ngai na banguna, yaka pene na ngai mpo ya kosikola ngai.

69:20  Oyebi ’te nasambwi mingi, lokumu la ngai lobebi, bayokisi ngai nsoni mingi ; oyebi banguna ba ngai banso.

69:21  Mafinga malembisi ngai motema, nazoki mpenza, nazalaki na elikya ’te bakoyokela ngai mawa, kasi se mpamba, naluki bato babondo ngai, kasi nazwi bango te.

69:22  Batii ngenge o bilei bya ngai, mpe ntango nayoki mposa ya mai, bamelisaki ngai masanga ngai.

69:23  Meza ya bango ékomela bango motambo, bilei biike bitiela bango libaku.

69:24  Miso ma bango makoma molili, bamono lisusu te, mikongo mya bango migumbama seko.

69:25  Kitisela bango nkanda ya yo enene, móto mwa nkele ya yo mozikisa bango.

69:26  Nganda ya bango ekoma eliki, biema bya bango bizanga bato,

69:27  mpo banyokoli moto oyo osili obeteki, babakiseli moto oyo obeteki mpasi.

69:28  Obakisela bango etumbu esusu, olimbisa bango nyongo te.

69:29  Baboma nkombo ya bango o buku ya bomoi, balongola bango o molongo mwa basemba.

69:30  E Nzambe, mobikisi wa ngai, lendisa ngai, mpo nasambwi mpe nanyokwami.

69:31  Nakoyembela nkombo ya Nzambe nzembo, nakokumisa mpe nakotondo ye.

69:32  Yango ekosepelisa Nzambe, leka libonza lya ngombe, ngombe mobali na maseke mpe na matambi.

69:33  Bato banyokwami bakomono bongo mpe bakosepela ; bino bato bokolukaka Nzambe, bolenda o mitema !

69:34  Mokonzi akondimelaka babola, bato ba ye bakangemi o boloko, akokinolaka bango te.

69:35  Likolo na nse, bobetele ye maboko, ná mbu ná nyama inso izali wana.

69:36  Boyeba ’te Nzambe akobikisa Sion, akotonga lisusu bingumba bya Yuda, bakozala bankolo ba ekolo mpe bakofanda wana.

69:37  Basaleli ba ye bakozwa mabelé ma bango, baye balingi nkombo ya ye, bakofanda wana seko.

Chapter 70

70:1  Ya kapita wa bayembi. Ya Davidi.

70:2  E Nzambe, yaka kosalisa ngai noki, E Mokonzi, salisa ngai !

70:3  Baye balingi koboma ngai bayoka nsoni ; baye balingi ’te nayoka mpasi bazonga nsima mpe bakima na nsoni.

70:4  Baye bawuloli ngai, basambwa mpe bazonga na nsoni.

70:5  Kasi bato banso bakolukaka yo, basepela mpe bayoka esengo. Baye bandimi libiki lya yo, baloba ntango inso : « Nzambe azali monene ! »

70:6  Kasi ngai, mobola mpe moto wa mawa, e Nzambe, yaka noki epai ya ngai. Ozali mosalisi mpe mobikisi wa ngai, yo Mokonzi, yaka, oumela te !

Chapter 71

71:1  E Mokonzi, namibombi epai ya yo, nasambwa lisusu mokolo moko te !

71:2  Na bosembo bwa yo okoya kobikisa ngai, tia matoi epai ya ngai mpe bikisa ngai.

71:3  Zala libanga esika nakoki kobombama, lopango lokoki kobatela ngai ; okani kobikisa ngai, zambi ozali libanga mpe ebombamelo ya ngai.

71:4  E Nzambe, obikisa ngai o maboko ma moto mabe, o maboko ma bakosi bakonyokoloko ngai.

71:5  Elikya ya ngai se yo, Mokonzi Nzambe, ut’o bomwana nakotiaka motema na yo.

71:6  Uta babotaki ngai nakolukaka lisalisi epai ya yo, yo bokasi bwa ngai ut’o libumu lya mama. Nakokumisaka yo ntango inso !

71:7  Bato baike bakokamwaka na mpasi ya ngai, kasi yo ozali ebombamelo ya ngai.

71:8  Monoko mwa ngai mozali se kokumisa yo, moi mobimba nazali kosakola nkembo ya yo.

71:9  Obwaka ngai te, awa nakomi mobange, otika ngai te awa bokasi bwa ngai bokomi kosila :

71:10  banguna bakotongoko ngai, baye balingi koboma ngai bayokani, balobi :

71:11  « Nzambe atiki ye, tonyokolo ye, tokanga ye, moto akobikisa ye azali te. »

71:12  E Nzambe, ozala mosika na ngai te, Nzambe wa ngai, yaka kosalisa ngai noki.

71:13  Baye bakotielaka ngai mitambo, bayoka nsoni, baye balingi koyokisa ngai mpasi, basambwa.

71:14  Kasi ngai nakobwaka elikya te, nakokoba se koyemba lokumu la yo.

71:15  Mikolo minso nakosakola bosembo bwa yo, mpe ndenge obikisaki ngai. Mokolo moko te nakoyeba yango inso.

71:16  Nakosakola bikela binene bya Mokonzi, nakoyebisa ’te bobele yo ozali na bosembo.

71:17  E Nzambe, oteyaki ngai ut’o bomwana, tee lelo nazali kosakola makamwa ma yo.

71:18  Tala, nakomi mobange, nakokisi mibu miike, otika ngai te, e Nzambe ; na bato bakoya nsima nasakola bikela bya yo mpe nguya ya yo.

71:19  E Nzambe, bosembo bwa yo boleki bonene ! Yo moto osalaki mambi manene, e Nzambe nani akokani na yo ?

71:20  Yo moto oyokisi ngai mpasi mpe malozi maike, okozongisela ngai bomoi, okozonga mpo ’te olongola ngai o mboka ya bawa.

71:21  Okobakisela ngai mikolo, mpe okobondo motema mwa ngai.

71:22  Bongo na nzenze ya ngai nakotondo yo mpo ya bolingi bwa yo, Nzambe wa ngai, nakobetele yo lokombe, yo Mosantu wa Israel.

71:23  Na monoko nakoyembela yo na nsai, molimo mwa ngai mosepela, zambi osikoli ngai.

71:24  Lolemu la ngai lokokumisa bosembo bwa yo ntango inso : baye baluki kosala ngai mabe bayoka nsoni mpe basambwa !

Chapter 72

72:1  Ya Salomo. E Nzambe, pesa mokonzi bwanya bwa yo, pesa bosembo bwa yo na mwana wa mokonzi,

72:2  ayangela bato ba yo na bosembo, akata makambo ma babola bo ebongi.

72:3  Bino, ngomba inene na ngomba ike, boyela bato ba ekolo boboto mpe bosembo.

72:4  Akata makambo ma bato bake na bosembo, abikisa babola mpe anyata banyokoli.

72:5  Bato babanga yo o bileko binso seko, mikolo minso sanza na mwese ikongala.

72:6  Aulana na mbula ekonokelaka bilanga, mpe na mai makopolisaka mabelé.

72:7  O eleko ya ye bosembo bokongala, mpe boboto bokozala tee sanza ekolimwa.

72:8  Akokonza ut’o mbu yoko kin’o mbu esusu, ut’o Ebale enene tee nsuka ya mokili.

72:9  Bato ba eliki bakumbamela ye, banguna ba ye bakolete mputulu.

72:10  Bakonzi ba Tarsis mpe ba bisanga mosika bakofuta ye mpako, bakonzi ba Saba na Seba bakoyela ye mabonza.

72:11  Bakonzi banso bakokumbamela ye, bato ba bikolo binso bakosalela ye.

72:12  Akobikisa mobola oyo abeleli ye, ná mpe moto moke azangi lisalisi.

72:13  Akoyokela moto motau mpe mobola mawa, akobikisa baye bakeleli.

72:14  Akobikisa bango o etumba mpe o minyoko, o miso ma ye bomoi bwa bango bozala na motuya mingi.

72:15  Azala seko ! Bapesa ye wolo ya Saba, bakosambelela ye ntango inso, butu moi bakobenisa ye.

72:16  Mbuma ya mampa itonda o mokili, kin’o nsonge ya ngomba, ebele lokola nzete ya Libano, ikoyikana lokola matiti o bilanga.

72:17  Bakumisa nkombo ya ye seko, nkombo ya ye eyebana o nse mobimba ! Bato banso bazwa bolamu mpo ya ye, o bikolo binso batanga ye moto wa esengo.

72:18  Bakumisa Mokonzi, Nzambe wa Israel, zambi se ye moko akosalaka makamwisi !

72:19  Bakumisa nkombo ya ye ya nkembo seko, nse mobimba etonda na nkembo ya ye ! Amen ! Amen !

72:20  Tala nsuka ya nsambo ya Davidi, mwana wa Yese.

Chapter 73

73:1  Nzembo ya Asaf. Ya solo, Nzambe akolakisaka Israel bolamu, Mokonzi alingi bato ba motema peto.

73:2  Etikalaki moke nakweya o nzela, etikalaki se moke naselumwa,

73:3  mpo nayokelaki bato bazangi mayele zuwa, na bomoni bomengo bwa baye baboya Nzambe.

73:4  Basengeli komitungisa te : nzoto kolongonu, bakomileisaka malamu ;

73:5  bakoyokaka mpasi te lokola bato basusu, mabe makokwelaka bango te lokola baninga ba bango.

73:6  Yango wana bakovimbaka na lolendo, balingi se makambo makasi makasi.

73:7  Nzoto mafuta ya bango elakisi motema mabe, bokosi botondi o mitema mya bango.

73:8  Balingi mingi koseke, koloba makambo mabe, mpe komikumisa na bokasi bwa bango.

73:9  Na monoko mwa bango bakotukaka Nzambe, mpe na lolemu la bango bakokinolaka bato banso.

73:10  Yango wana bato ba ngai balandi nzela ena, eye ekopesa bango bisengo ebele lokola mai.

73:11  Bakolobaka : « Nzambe akomono yango, solo ? Oyo azali o likolo ayebi nde eloko ? »

73:12  Botala bango, baye baboya Nzambe : na motema mpio bakokobaka kokongolo nkita.

73:13  Bongo ntina nini nábomba motema peto mpe nálakisa ’te nazali na likambo lyoko te ?

73:14  Mokolo na mokolo nazalaki koyoka mpasi, ntongo inso bapesaki ngai etumbu.

73:15  Soko nandimaki koloba lokola bango, mbele nasulaki libota lya bana ba yo.

73:16  Namekaki bongo koyeba ntina : komono bango bongo eyokisi ngai mpasi mingi !

73:17  Kasi o mokolo nakoyingela o ndako esantu ya Nzambe, nakomono polele boniboni bango bakosuka.

73:18  O nzela eye otiaki bango, bakoselumwa, mpe osali ’te bakweya o lobwaku.

73:19  Mpe na mbalakaka esili na bango, basuki, bakufi liwa lya nsomo !

73:20  E Mokonzi, lokola ndoto elimwi na ntongo, olamuki mpe obengani elili bya bango.

73:21  Ntango nakomaki koyoka bololo mpe mawa makotelaki ngai tee o minkuwa,

73:22  lokola zoba nayebaki ntina te, nakomaki lokola nyama o miso ma yo.

73:23  Nzokande nazali ntango inso pene na yo te ? Ozalaki kosimba ngai na loboko,

73:24  okokambaka ngai na malako ma yo, mpe na nsima okoyamba ngai o esika ya nkembo.

73:25  Soki yo te, nakokuta nde nani kuna o likolo ? Lokola nazali na yo awa o nse, naluka nani lisusu ?

73:26  Nzoto elembi, mpe motema lokola, na boluki yo, Nzambe, yo libanga mpe mobateli wa ngai seko.

73:27  Ya solo, bato bakimi yo, bakokufa ; okosilisa baye baboyi koyeba yo.

73:28  Nakozwa bolamu penepene na Nzambe, naluki libiki epai ya Mokonzi Nzambe mpo ’te nasakola bikela bya ye binso.

Chapter 74

74:1  Mateya ma Asaf. E Nzambe, mpo nini obwaki biso seko ? Mpo nini osilikeli mpata ya etonga ya yo ?

74:2  Kanisa libota yo oponoki ut’o libandela, ekolo eye osikolaki mpo ’te ezala mokili mwa yo, ngomba Sion esika oyei kofanda.

74:3  Kende kotala bisika bina bikufi nye ; o esika ya yo esantu monguna abebisi binso.

74:4  O esika tokutanaki na yo, banguna bagangi makasi, kuna batiaki bendele bo bilembo bya bango.

74:5  Bazalaki kobete na epasoli, lokola balingaki kopasola nzete ya zamba.

74:6  Babuki bikeko binso tosalaki, bakati byango na mbeli mpe na ebeteli.

74:7  Batumbi ndako ya yo esantu, babuki mpe basantoli ndako ya nkombo ya yo.

74:8  Bamilobeli : « Toboma yango na mbala yoko ! » Batumbi ndako inso ya losambo o ekolo.

74:9  Bendele ya biso imononi lisusu te, baprofeta mpe te, mpe moto moko te ayebi soko ekosuka boni.

74:10  E Nzambe, mikolo boni monyokoli akotuka yo naino ? Monguna akosantola nkombo ya yo nde seko ?

74:11  Mpo nini ozongisi loboko la yo ? Mpo nini obombi loboko la yo la mobali ?

74:12  Nzokande, e Nzambe, Mokonzi wa ngai uta ebandela, yo mobikisi wa bato ba ekolo ya biso,

74:13  na bokasi bwa yo opasolaki mai ma mbu, opasolaki mitó mya bibuki bya nyama ya mai.

74:14  Yo moto onyataki motó mwa Ngando enene, okomisaki mwango bilei bya nyama ya zamba.

74:15  Otimolaki maziba mpe miluka, okaukisaki bibale bizangi mai mokolo moko te.

74:16  Yo nkolo wa moi mpe wa butu, yo moto okeli sanza na mwese.

74:17  Okati ndelo ya mokili epai na epai, okaboli eleko ya molunge mpe eleko ya mpio.

74:18  Okundola ’te monguna akotukaka yo, Mokonzi, ekolo ya bilema bakofingaka nkombo ya yo.

74:19  Pekisa kombekombe ilia ebenga ya yo te, obosana bato ba yo te, awa bazali koyoka mpasi.

74:20  Okundola bondeko okataki na biso, bipai binso o ekolo ya biso mibenga mitondi na babomi.

74:21  Moto anyokwami asambwa lisusu te, mobola na moto wa mpasi bakumisa nkombo ya yo !

74:22  Teleme, e Nzambe, omilakisa, kanisa ’te elema akotukaka yo mikolo minso !

74:23  Obosana migango mya banguna ba yo te, makeléle ma baye bayini yo mazali se kongala.

Chapter 75

75:1  Ya kapita wa bayembi, lolenge loko na ‘Obebisa te’. Nzembo ya Asaf.

75:2  E Nzambe, totondi yo mingi mpenza, tokumisi nkombo ya yo mpe tosakoli makamwa ma yo.

75:3  « Ngai Nzambe nakosamba makambo na bosembo, o mokolo elaka ya ngai ekokoka.

75:4  Ata mokili mokwei na bato banso bazali wana, ngai moto napikaki makonzi makumbi mwango.

75:5  Nalobaki na bato ba lofundo : Botika kofunda ! mpe na baye baboyi ngai : Botika kobete ntolo !

75:6  Botika kotombola mapeke, mpe koloba na bovimbisi ntolo ! »

75:7  Libiki likouta o Esti to o Westi te, o eliki te, o ngomba mpe te.

75:8  Bobele Nzambe akosambisa bato, akokitisa moko, akotombola mosusu.

75:9  Mokonzi asimbi nkeni o maboko etondi na vino mpe na masanga bololo, akosopela bango, bato babe ba mokili, bakomele mango mpe bakosilisa manso.

75:10  Mpe ngai nakosakola yango ntango inso, nakoyembela Nzambe wa Yakob ;

75:11  nakobuka bokasi bwa basumuki mpe nakolongisa bato ba bosembo.

Chapter 76

76:1  Ya kapita wa bayembi ; na biyembeli bya nsinga. Nzembo ya Asaf.

76:2  Nzambe ayebani o mokili mwa Yuda, o Israel nkombo ya ye ezali na lokumu.

76:3  Ema ya ye etongami o Salem, ndako ya ye o ngomba Sion.

76:4  Kuna abuki makula na litimbo, nguba, mimpanga na bibuneli binso.

76:5  Ozali kongenge mpo ya mwinda mwa nkembo ya yo, mpo ya biloko ebele obotoloki banguna.

76:6  Bilombe banso balalaki mpongi ya seko, babuni ba mpiko bakokaki na bitumba lisusu te.

76:7  Yo Nzambe wa Yakob, okaneli bango, farasa na makalo ma bango ikangemi wana.

76:8  Yo Nzambe wa nsomo, nani akoki na yo soko nkanda ya yo enene engali ?

76:9  Ut’o likolo okati likambo, opesi mibeko ; o nse bato banso babangi mpe bakangi minoko,

76:10  ntango Nzambe atelemi mpo ’te akata makambo, mpe abikisa bato ba bosawa banso ba mokili.

76:11  Nkanda ya bato ekopesa yo lokumu, baye babiki o Nkanda ya yo bakokembisa yo.

76:12  Bolakela Mokonzi Nzambe wa bino bilako, bokokisa byango ; bino baye bozingi Nzambe wa nsomo, bobonzela ye mabonza ma bino.

76:13  Ye akokataka mpema ya bankumu banene, ye akobangisaka bakonzi ba nse.

Chapter 77

77:1  Ya kapita wa bayembi ; ya Yedutun. Nzembo ya Asaf.

77:2  Nabengi Nzambe na mongongo makasi, nabeleli Nzambe mpo ayoka ngai.

77:3  O ntango ya nsomo naluki Mokonzi. Butu mobimba natandi maboko, nalembi te, mpe nalingi te ’te moto abondo ngai.

77:4  Nakanisi Nzambe mpe nabandi kokimela, soko namanyoli mingi, motema mwa ngai mokomi kolembe.

77:5  Opekisi ngai kokanga miso, mayele ma ngai mabulungani, nakoki koloba te.

77:6  Nakanisi mikolo mya kala, nakundoli mibu mileki.

77:7  Na butu nazali komitungisa, nakanisi mingi mpe nazali komituna :

77:8  Mokonzi akoboya biso, solo ? Akolakisa biso bolamu bwa ye lisusu te ?

77:9  Bolingi bwa ye bosili nde libela ? Akotindela biso maloba ma ye lisusu te ?

77:10  Nzambe abosani koyokela biso mawa, solo ? Bongo akangi nde motema mpo ya nkanda ?

77:11  Namilobeli : « Mpo eyokisi ngai mpasi, yango eye : Nzambe akopangana na biso lisusu te ! »

77:12  Nakundoli bikela binene bya Mokonzi mpe makamwisi ma ye ma kala.

77:13  Nakanisi lisusu misala mya yo minene, namanyoli myango mbala na mbala.

77:14  E Nzambe, nzela ya yo, izali isantu ; nzambe mosusu azali nde, monene lokola yo ?

77:15  Se yo, Nzambe, osali makamwa ma solo, mpe olakisi bato ba bikolo binso nguya ya yo.

77:16  Osikolaki ekolo ya yo na bokasi bwa loboko la yo, obikisaki bana ba Yakob mpe ba Yozefu.

77:17  Mai ma mbu mamonoki yo, Nzambe, mai mamonoki yo malengeki mpe bozindo bwa mai boninganaki ;

77:18  mampata manokisaki mbula mpe mayokisaki makeléle, mpe minkalali mitindamaki lokola makula ma móto.

77:19  O ntango nkake ezalaki kobete, minkalali mizalaki kongengele mokili, nse mobimba elengeki mpe eninganaki.

77:20  Opasolaki nzela o kati ya mai ma mbu, olekaki o kati ya mai bozindo, mpe moto moko te amoni esika olekaki.

77:21  Okambaki bato ba yo lokola etonga ya mpata na maboko ma Moze mpe ma Arone.

Chapter 78

78:1  Mateya ma Asaf. E bato ba ngai, boyoka mateya ma ngai, botia matoi na maloba ma monoko mwa ngai.

78:2  Nakofungola monoko mpo ya koloba na miulani, nakokundola maye Nzambe asalaki liboso.

78:3  Maye toyokaki, toyebi mango ; maye bankoko ba biso basololaki biso,

78:4  tokobombela bana ba biso mango te ; tokosolola mango na mabota makoya nsima : nkombo inso ya lokumu la Mokonzi, nguya ya ye, mpe makamwa asalaki.

78:5  Alakisaki bana ba Yakob mitindo mya ye, apesaki Israel mobeko. Apesaki batata ba biso etinda ’te balakisa mango na bana ba bango,

78:6  mpo ’te bana bakobotama nsima bayeba, bankoko bakobotama nsima ya bango mpe bayeba. Bateleme mpe balekisa nsango epai ya bana ba bango ;

78:7  mpo ’te batia elikya na Nzambe, babosana bikela binene bya Nzambe te, mpe batosa mibeko mya ye,

78:8  mpo ’te bakoma lokola batata ba bango te, bato ba lolendo mpe batomboki, libota lya bato ba motema moko te, baye baboyaki kotia mitema na Nzambe.

78:9  Bana ba Efraim bayebaki kobunda na litimbo solo, kasi o mokolo mwa etumba bakimaki.

78:10  Babomaki bondeko na Nzambe, baboyaki kolanda nzela ya mibeko mya ye.

78:11  Babosanaki bikela bya ye na makamwa alakisaki bango.

78:12  O miso ma bankoko Nzambe asalaki makamwa, o mokili mwa Ezipeti, o mabelé ma Tanis.

78:13  Apasolaki mai ma mbu mpo ’te bakoma o ngambo, atelemisaki mai lokola efelo.

78:14  Na moi akambaki bango na limpata, na butu atambwisaki bango na mwinda mwa móto.

78:15  Apasolaki mabanga o eliki, amelisaki bango mai maike lokola ebale.

78:16  Abimisaki mai o libanga, mpe mai makomaki kotiyola lokola ebale.

78:17  Nzokande bakobaki kosala masumu o miso ma ye mpe kotombokela Nta-Likolo o eliki.

78:18  Balingaki komeka Nzambe, basengeki bilei lokola bango moko balingaki,

78:19  batombokoki na Nzambe mpe balobaki : « Nzambe akoki nde kopesa bilei o eliki ?

78:20  Solo, abeteki libanga mpe mai mabimaki, mai masopanaki lokola ebale enene ; kasi akoki nde kopesa mampa lokola, mpe kokabolela bato ba ye nyama balia ? »

78:21  Eyokaki Mokonzi bongo, asilikaki mpenza, móto mopelaki likolo lya Yakob, nkanda ekwelaki Israel,

78:22  mpamba te, bazalaki koyamba Nzambe te, mpe bazalaki na elikya ya kobika mpo ya ye te.

78:23  Apesaki mampata ma likolo etinda, afungolaki bizibeli bya likolo.

78:24  Mpo ya koleisa bango anokisaki mbula ya manu, akabelaki bango mbuma ya mampa mauti o likolo.

78:25  Bato banso bakomaki kolia mampa ma banzelu, atindelaki bango bilei biike tee batondaki.

78:26  O likolo abimisaki mompepe mwa Esti, na nguya ya ye atindaki mompepe mwa Sudi.

78:27  Akitiselaki bango nyama ya kolia, mingi lokola mputulu, mpe ndeke mingi, ebele lokola zelo ya mbu.

78:28  Nyama ina ikweyaki o nganda ya bango, zongazonga na biema bya bango.

78:29  Baliaki, bameleki mpe batondaki ; apesaki bango bilei lokola balingaki.

78:30  Mposa ya bango esilaki naino te, ata bazalaki na bilei o minoko.

78:31  Yango wana Nzambe ayokelaki bango nkanda ; o kati ya bango abomaki bilombe, asilisaki bilenge na banzenga ba Israel.

78:32  Ata bongo, basumukaki lisusu, batiaki se ntembe na makamwisi ma ye.

78:33  Abotoloki bango bomoi na mbala yoko, mibu mya bango misilaki bobele o kati ya nsomo.

78:34  Ntango Nzambe azalaki koboma bango, balukaki ye, babongolaki mitema mpe bazongelaki ye.

78:35  Bakanisaki lisusu ’te Nzambe azali libanga lya bango, ’te Nzambe wa likolo azalaki mobikisi wa bango.

78:36  Kasi na monoko bazalaki kokosa ye, mpe na lolemu bazalaki kobukela ye lokuta.

78:37  Bandimaki ye na motema moko te, mpe batiaki ntembe na bondeko bwa ye.

78:38  Kasi ye ayokelaki bango ngolu, alimbisaki bango, abomaki bango te. Akangaki motema mbala na mbala, mpe alandaki nkanda ya motema te.

78:39  Akundolaki o motema ’te bazalaki bobele bato, lokola mpema mpamba ekolimwaka mpe ekozongaka te.

78:40  Mbala mingi batombokoki na ye o eliki, mpe batumolaki ye o bisika bato bakofandaka te.

78:41  Babandaki lisusu komeka Nzambe mpe koyokisa Mosantu wa Israel mawa.

78:42  Babosanaki misala mya loboko la ye, o mokolo abikisaki bango o maboko ma banguna :

78:43  alakisaki bilembo o Ezipeti mpe makamwisi o Tanis.

78:44  Abongolaki mai ma ebale mpe ma miluka, akomisaki mango makila, mpo ’te bakoka komele mango te.

78:45  Atindelaki bango mpese isilisa binso, na magbololo matungisa bango.

78:46  Atindaki mapalela masilisa bilanga bya bango, na makélele mabebisa mosala mwa bango.

78:47  Abomaki bilanga bya vino na mbula ya matandala, mpe nzete ya sikomore na mpio makasi.

78:48  Atindaki ’te mbula ya matandala ekwela ngombe ya bango mpe minkalali mibetele bibwele bya bango.

78:49  Abwakelaki bango móto mwa nkanda ya ye, ayokelaki bango nkanda enene, eyokisaki bango nsomo : atindelaki bango bantoma baye bayokisa bango mpasi.

78:50  Amitikaki na nkanda ya ye, abikisaki bango o liwa te, kasi atikaki bango bakufa na bokono bobe.

78:51  Abomaki bana ba yambo banso o Ezipeti, banzenga kitoko o biema bya Kam.

78:52  Kasi akambaki bana ba ye lokola mpata, atambwisaki bango o eliki lokola etonga.

78:53  Akambaki bango malamu, babangaki eloko te, o ntango mai ma mbu mazalaki kozindisa banguna.

78:54  Akotisaki bango o mokili mwa ye mosantu, o ngomba eye bazwaki na bokasi bwa loboko la ye.

78:55  Abenganaki bapagano o boso bwa bango, akabelaki bango mabelé mpo ’te bafanda, afandisaki mabota ma Israel o biema bya banguna.

78:56  Batombokoki lisusu mpe bamekaki Nzambe wa Nta-Likolo. Baboyaki kotosa mibeko mya ye.

78:57  Bapengwaki mpe baboyaki ye, lokola bankoko basalaka, bawanganaki ye lokola litimbo liboyi kobete.

78:58  Batumolaki ye na bokumisi banzambe basusu, bayokisaki ye zuwa na bikeko bya bango.

78:59  Eyokaki Nzambe bongo, asilikaki, aboyaki ba-Israel libela.

78:60  Alongwaki o ndako ya ye o Silo, atikaki ema esika afandaki o ntei ya bato.

78:61  Akabaki Sanduku ya Bondeko ekende o boombo, elembo ya nkembo ya ye ekomi o maboko ma banguna.

78:62  Atikaki bato ba ye bakufa na mompanga, asilikaki na bato ba ekolo ya ye.

78:63  Móto mosilisaki banzenga ba bango, mpe bilenge basi bayokaki nzembo ya libala lisusu te.

78:64  Banganga Nzambe bawaki na mompanga, mpe basi ba bango bayembaki nzembo ya lilaka lisusu te.

78:65  Mpe Mokonzi alamukaki lokola moto auti kolala mpongi, lokola soda ameli vino mpe azwi mpiko ya sika.

78:66  Abeteki mpe akimisaki banguna ba bango, mpe ayokisaki bango nsoni seko.

78:67  Aboyaki kofanda o ema ya Yozefu, alingaki kopono libota lya Efraim lisusu te ;

78:68  kasi aponoki libota lya Yuda, aponoki ngomba Sion eye alingaki.

78:69  Atongaki esika ya ye esantu o bosanda lokola likolo, epikama makasi lokola mokili, moye akelaki.

78:70  Aponoki Davidi azala mosaleli wa ye, alongolaki ye o lopango la bibwele ;

78:71  abengaki ye ntango azalaki koleisa mpata, akomisaki ye mokengeli wa Yakob, ekolo ya ye, azala mobokoli wa Israel, libota lya ye.

78:72  Ye abokoloki bango na motema moko mpenza, mpe akambaki bango na bwanya mpe na mayele.

Chapter 79

79:1  Nzembo ya Asaf. E Nzambe, bapagano bakoti o ekolo ya yo, babebisi Tempelo ya yo esantu, bakomisi Yeruzalem mopotu monene.

79:2  Babwaki bibembe bya basaleli ba yo bo bilei bya ndeke, nzoto ya bato ba yo ikomi bilei bya nyama ya zamba.

79:3  Makila ma bango masopani o Yeruzalem mobimba, mpe moto akokunda bango azalaki te.

79:4  Bato ba bikolo bya penepene bakofingaka biso, o bikolo bisusu bakotiolaka mpe bakosekeke biso.

79:5  Mokonzi, nkanda ya yo ekoumela mikolo boni ? Mpe zuwa lya yo linene likosila ntango nini ?

79:6  Silikela bato ba bikolo bisusu bayebi yo te na mpe bato ba mikili bakobondelaka nkombo ya yo te.

79:7  Mpo bango basilisi bato ba Yakob na kolia, babebisi mokili mwa yo nye.

79:8  Ofutisa biso masumu ma bankoko te, lakisa biso ngolu ya yo, mpo mawa maleki.

79:9  Salisa biso, Nzambe mobikisi wa biso, mpo ya lokumu la nkombo ya yo. Bikisa biso, limbisa masumu ma biso mpo ya nkombo ya yo.

79:10  Olinga te ’te bato ba bikolo bisusu baloba : « Nzambe wa bango azali wapi ? » Olakisa bango polele o miso ma biso ’te okozongisa mabe na bato basopaki makila ma basaleli ba yo !

79:11  Yoka boleli bwa bato bakangemi o boombo ; na bokasi bwa yo bikisa baye bazali kobunda na liwa !

79:12  Bato ba bikolo bisusu bayokisi yo mpasi, Mokonzi, zongisela bango mbala nsambo mafinga bafingaki yo.

79:13  Mpe biso, ekolo ya yo, mpata ya etonga ya yo, tokotondo yo ntango inso, mpe tokosakola lokumu la yo o bileko binso.

Chapter 80

80:1  Ya kapita wa bayembi. Maloba ma Asaf. Nzembo.

80:2  E mokengeli wa Israel, oyoka : yo moto okokambaka libota lya Yozefu lokola etonga, awa ofandi likolo lya bakerubim,

80:3  omiyebisa na Efraim, Benyamin na Manase ; lakisa nguya ya yo mpe yaka kosalisa biso !

80:4  E Nzambe, bongola mitema mya biso, lakisa elongi ya yo mpe tokobika.

80:5  E Mokonzi wa bokasi bonso, mikolo boni okosilikela bato ba yo bazali kobondela yo ?

80:6  Okomisi mpizoli bilei bya biso, mpe omelisi biso se kopo etondi na yango.

80:7  Okomisi biso ntina ya boswani ya bikolo bisusu, banguna ba biso bakomi koseke biso.

80:8  E Nzambe wa bokasi bonso, bongola mitema mya biso, lakisa elongi ya yo mpe tokobika.

80:9  Biso elanga ya nzete ya vino, eye olongolaki o Ezipeti, obenganaki bato ba bikolo bisusu mpo ya kolona biso awa.

80:10  Obongiseli biso esika mpo topikama makasi, mpe totonda o mokili mwa bango.

80:11  Ngomba inso iyei kozipama na nkasa ya nzete ya yango, bitapi bya yango bikoli lokola nzete enene ya Nzambe.

80:12  Bitapi bya yango bitandani kin’o mbu, mpe bana ba yango bakimi kin’o Ebale enene.

80:13  Mpo nini obukaki lopango la elanga ena, bongo bato banso bakoleka wana babuka mbuma,

80:14  nsombo ya zamba ibebisa yango, mpe nyama ya esobe ilia nkasa ya yango ?

80:15  E Nzambe wa bokasi bonso, ozongela biso. Ut’o likolo oya kotala mpe omono, yingela o elanga ya yo ya nzete ya vino :

80:16  obatela yango, yo moto olonaki yango, yaka kosalisa mwana oyo alendi mpo ya yo.

80:17  Bato batumbi yango lokola matiti mabe ; soko otali bango na miso makasi, banso bakokufa.

80:18  Na nguya ya yo batela moto oyo yo moko oponoki, batela mpe mwana oyo yo olendisaki.

80:19  Mpe bongo, biso tokolongwa epai ya yo lisusu te, zongisela biso bomoi, tokumisa nkombo ya yo.

80:20  Mokonzi Nzambe wa bokasi bonso, bongola mitema mya biso, lakisa elongi ya yo mpe tokobika.

Chapter 81

81:1  Ya kapita wa bayembi ; na eyembeli ya mboka Gat. Nzembo ya Asaf.

81:2  Boganga na nsai mpo ya Nzambe, nguya ya biso, bobetele Nzambe wa Yakob maboko.

81:3  Bobanda nzembo, bobete mbonda, bolelisa lokombe na nzenze.

81:4  Bobete mindule o mokolo mwa yambo mwa sanza, o mokolo sanza engali : eyenga ya biso.

81:5  Ezali mobeko Israel azwi, motindo Nzambe wa Yakob apesi.

81:6  Atindaki bana ba Yozefu mobeko mona, o ntango babimaki o mokili mwa Ezipeti. Nayoki lokota loye loyokani naino te :

81:7  « Nalongoli mokumba o mapeke ma ye, maboko ma ye makitisi ekoló eye azalaki kokumba.

81:8  Ntango olelaki mpo ya mpasi, nabikisaki yo, nayanolaki yo o kati ya mompepe makasi, mpe namekaki yo motema penepene na mai ma Meriba.

81:9  Bato ba ngai, boyoka ngai, nakebisi bino, Israel, ndima koyoka maloba ma ngai !

81:10  Okoki kozala na nzambe wa ekolo esusu te, okumbamela nzambe mosusu te.

81:11  Ngai nazali Mokonzi Nzambe wa yo, oyo abimisaki yo o mokili mwa Ezipeti ; fungola monoko polele, ngai nakotondisa mwango.

81:12  Bato ba ngai bayokaki maloba ma ngai te, Israel aboyaki kotosa ngai.

81:13  Bongo natikaki bango na lolendo o motema, balandaki bobele nzela bango moko balingaki.

81:14  Soko bato ba ngai balingaki koyoka ngai, soko Israel alingaki kolanda nzela ya ngai,

81:15  mbele nasukisi banguna noki mpenza, mbele nabandi kobete banyokoli ba Israel,

81:16  mbele bato bayini Mokonzi bakobondela ye, mpe bakoyoka nsomo seko.

81:17  Mbele Mokonzi aleisi Israel mampa ma motuya mpe atondisi ye na mafuta elengi ma nzoi. »

Chapter 82

82:1  Nzembo ya Asaf. Nzambe atelemi o likita lya bankumu o likolo, o kati ya bazuzi azali kosamba makambo :

82:2  « Bino bazuzi, mikolo boni naino bokozanga bosembo, mpe bokondimela baye basali mabe ?

82:3  Bokata makambo ma bato bake na bana bitike na bosembo, bobatela moto wa mpasi na moto akeleli.

82:4  Bobikisa moto motau na mobola, bolongola bango o maboko ma bato bakosalaka mabe.

82:5  Bango bayebi eloko te, bayoki ntina te, batamboli o kati ya molili ; makonzi manso ma mokili mabulungani.

82:6  Ngai nalobaki : ‘Bino banzambe, bino banso bozali bana ba Nta-Likolo’.

82:7  Nzokande, bino mpe bokokufa lokola bato banso, bokokweya lokola bankumu banso. »

82:8  E Nzambe, teleme ! Zala zuzi wa mokili, zambi okoyangelaka bikolo binso.

Chapter 83

83:1  Nzembo ya Asaf.

83:2  E Nzambe, otika kotala biso bobele na miso, tika kopema mpe kofanda nye, e Nzambe !

83:3  Yoka banguna ba yo bazali konunganunga, bato bakoyinaka yo, batomboli mitó na lolendo.

83:4  Baluki ekolo ya yo na makambo, bakaneli bato ba yo ba bolingo.

83:5  Balobi : « Tokende koboma ekolo ya bango, moto moko te atanga lisusu nkombo ya Israel ! »

83:6  Banso motema moko bayokani bongo mpe bakati bondeko mpo ya kobunda na yo :

83:7  bato ba Edom na bato ba Ismael, bato ba Moab na bato ba Agar,

83:8  bato ba Gebal, ba Amon mpe ba Amalek, ba Filisti mpe ba Tiro.

83:9  Ata ba-Asur balandi bango, mpe bapesi maboko na bana ba Lot.

83:10  Sala na bango lokola osalaki na Madian, na Sisera mpe na Yabin pene na ebale ya Kison.

83:11  Babomamaki o Endor, bibembe bya bango bikomaki bipolu bya bilanga.

83:12  Okomisa bankumu ba bango lokola Oreb na Zeeb, bayangeli ba bango lokola Zeba na Salmuna,

83:13  baye balobaki : « Biso tokobotolo mikili mya Nzambe ! »

83:14  E Nzambe wa ngai, pimbwisa bango lokola nkasa, lokola mputulu etombwami na mompepe.

83:15  Lokola móto mokozikisa zamba, lokola móto mosilisa ngomba,

83:16  tinda mompepe makasi molanda bango, ekumbaki ya yo eyokisa bango nsomo.

83:17  Tondisa bilongi bya bango na nsoni, mpo ’te baluka nkombo ya yo, e Mokonzi.

83:18  Bayoki nsoni na nsomo seko, bakufa na nsoni, basila libela ;

83:19  bayeba ’te se yo ozali na nkombo ya Mokonzi, yo moko Nta-Likolo o mokili mobimba.

Chapter 84

84:1  Ya kapita wa bayembi ; na eyembeli ya mboka Gat. Nzembo ya bana ba Kore.

84:2  E Mokonzi wa bokasi bonso, kofanda o ndako ya yo ezali elengi mingi !

84:3  Nawei na mposa ya kozala o lopango la Mokonzi. Na esengo enene motema mozali kobelela Nzambe wa bomoi.

84:4  Ata ndeke eke ekozwaka ndako, nyampeke ekozwaka zumbu mpo ya kobomba bana ba yango, penepene na altare ya yo, Nzambe wa bokasi bonso, yo Mokonzi wa ngai mpe Nzambe wa ngai !

84:5  Esengo na bato bakozalaka o ndako ya yo, baye bakoki kokumisa yo ntango inso !

84:6  Esengo na bato bazwi bokasi mpo ya yo, kokende losambo o engumba esantu ekosepelisaka bango.

84:7  Ntango bakolekaka o lobwaku la Boleli, bakomeleke mai ma liziba, mbula ya yambo ekotoisa milona mya yango.

84:8  Bakokoba se kotambola na mpiko ya sika kin’o bakobima o Sion o boso bwa Nzambe.

84:9  Mokonzi wa bokasi bonso, yoka losambo la ngai, Nzambe wa Yakob, tia matoi.

84:10  E Nzambe, yo nguba ya biso, tala, tala elongi ya mesiya wa yo.

84:11  Kofanda mokolo moko o lopango la yo eleki mikolo nkoto na elengi, naponi kozala pene na ezibeli ya ndako ya Nzambe, naboyi kofanda o ema ya bato babe.

84:12  Solo, Mokonzi Nzambe azali lopango mpe nguba, Mokonzi akokabaka bolamu mpe nkembo, akopima makabo ma ye te na bato ba bosembo.

84:13  E Mokonzi wa bokasi bonso, esengo na moto akotia motema na yo !

Chapter 85

85:1  Ya kapita wa bayembi. Nzembo ya bana ba Kore.

85:2  E Mokonzi, olakisi ekolo ya yo bolingi, ozongisi bana ba Yakob bakendeki o boombo ;

85:3  olimbisi mabe ma bato ba yo, okundi masumu ma bango manso.

85:4  Otiki koyokela bango nkanda, ozimisi móto mwa nkele ya yo.

85:5  E Nzambe, Mokonzi wa biso, bongola mitema mya biso, tika kobombela biso nkanda.

85:6  Okosilikela biso nde seko ? Okolakisa biso nkele o bileko binso ?

85:7  Yo moto okolendisaka bomoi bwa biso te ? Mpo ’te bato ba yo basepela yo,

85:8  e Mokonzi, olakisa biso bolingi bwa yo, opesa biso libiki lya yo.

85:9  Nalingi koyoka maloba ma Mokonzi Nzambe, maloba ma ye, maloba ma boboto, ona bato ba ye mpe baye bayambi ye, mpo ’te bazonga lisusu o nzela ya bolema te.

85:10  Etikali moke abikisa baye bakobangaka ye mpe nkembo ya ye ezonga o ekolo ya biso.

85:11  Bolingi na Bosolo bikutani, Boboto na Bosembo bizwani.

85:12  Bosolo bokobanda komonono o ntei ya bato, ut’o likolo Bosembo bokokitela bango.

85:13  Mokonzi yemei akopesa biso bolamu, mpe mokili mwa biso mokobota mbuma.

85:14  Bosembo bokotambola o boso bwa ye, mpe bokobongisela ye nzela.

Chapter 86

86:1  Losambo la Davidi. E Mokonzi, otia matoi mpe oyanola ngai, nazali mobola, moto wa mawa.

86:2  Batela bomoi bwa ngai, moto wa yo. E Nzambe, bikisa ngai, mosaleli wa yo, natii motema na yo.

86:3  E Mokonzi, yokela ngai mawa, moi mobimba nazali kobelela yo.

86:4  Yokisa motema mwa mosaleli wa yo esengo. nakotombola motema mwa ngai epai ya yo, e Mokonzi.

86:5  E Mokonzi, ozali motema ngolu mpe bolamu, okolakisaka bolingi na baye bakobelela yo.

86:6  E Mokonzi, yoka losambo la ngai, yokemela mabondeli ma ngai.

86:7  O ntango nayoki nsomo, nakobyanga yo, zambi yo, Mokonzi, okoyanola ngai.

86:8  Nzambe mosusu akokani na yo azali te, mosala moko te mokoki na misala mya yo.

86:9  Mokonzi, bato ba bikolo binso bakoya kokumbamela yo, bakoya kokumisa nkombo ya yo,

86:10  zambi bobele yo, Nzambe, ozali monene mpe okosalaka makamwa.

86:11  E Mokonzi, lakisa ngai nzela ya yo, bongo nalanda bobele bosolo bwa yo, nabanga nkombo ya yo na motema moko.

86:12  E Mokonzi Nzambe wa ngai, natondi yo, nakokumisa nkombo ya yo o bileko binso,

86:13  zambi olingi ngai na bolingi bonene, olongoli ngai o libulu lya mboka ya bawa.

86:14  E Nzambe, bato ba lofundo babimeli ngai, bato ba bitumba baluki koboma ngai, baye bakokanisaka yo soki moke te.

86:15  Yo Mokonzi, Nzambe wa bolamu mpe wa ngolu, okosilikaka noki te, yo nta bolingi mpe lobokó,

86:16  bongola miso epai ya ngai, yokela ngai mawa ! Pesa ngai, mosaleli wa yo, nguya ya yo, mpe bikisa ngai, mwana wa mosali wa yo.

86:17  Lakisa ngai elembo ya bolingi bwa yo ; bongo banguna bakomono yango bakoyoka nsoni, zambi yo, Mokonzi, osalisi mpe obondi ngai.

Chapter 87

87:1  Nzembo ya bana ba Kore. Mokonzi atongi Sion o ngomba isantu,

87:2  alingi bizibeli bya ye leka ndako inso ya Yakob.

87:3  Balobaki maloba ma bokumisi mpo ya yo, engumba ya Nzambe :

87:4  « Natangi Rakab mpe Babilon o kati ya baye bayebi ngai. O Filistia, o Tiro to o Etiópia oyo to oyo abotami. »

87:5  Kasi mpo ya Sion bakolobaka : « Moto nyonso abotami wana, mpo Nzambe wa Nta-Likolo akelaki yango. »

87:6  O buku ya bikolo Mokonzi akomi boye : « Oyo azali mwana mboka. »

87:7  Banso bakoyemba mpe bakobina : « Manso mazali na ngai, mauti se epai ya yo ! »

Chapter 88

88:1  Nzembo ya bana ba Kore. Ya kapita wa bayembi. Maloba ma Eman, mwana wa Zera (1 Mkl 2,6).

88:2  E Mokonzi Nzambe, na moi nabeleli yo, na butu namileli epai ya yo.

88:3  Losambo la ngai lokoma tee epai ya yo, tia matoi na boleli bwa ngai,

88:4  mpo motema mwa ngai motondi na mawa, nakomi penepene na mboka ya bawa.

88:5  Batangi ngai o molongo mwa bato basili kokunda, natikali na makasi lisusu te.

88:6  Nasili nakomi o kati ya bawa, lokola bibembe bilali o malita, biye okokanisaka lisusu te, mpo bikabwani na yo libela.

88:7  Ozindisi ngai o bozindo bwa mboka ya bawa, o kati ya molili mpe o lobwaku.

88:8  Nkanda ya yo enyati ngai, osopeli ngai yango lokola mai ma mbonge.

88:9  Olongoli ngai mosika na baye bayebi ngai, o miso ma bango okomisi ngai eloko ya nsomo. Nakangemi, nzela ya kobima ezali te.

88:10  Miso ma ngai malembi mpo ya mawa. Moi mobimba nakobyangaka yo, Mokonzi, mpe nakotandelaka yo maboko :

88:11  « Okosalaka nde makamwa mpo ya bawei ? Bato bawei bakoteleme nde mpo ya kokumisa yo ?

88:12  O malita bakosakolaka nde bolingi bwa yo ? O mboka ya bawa bakotangaka nde lobokó la yo ?

88:13  Bakoyebaka nde makamwa ma yo o kati ya molili, mpe bosembo bwa yo o mboka ya bawa ? »

88:14  Kasi nakobelelaka yo, Mokonzi, na ntongo losambo la ngai lokobutaka epai ya yo.

88:15  E Mokonzi, mpo nini obwaki ngai ? Mpo nini obombeli ngai elongi ya yo ?

88:16  Nazali na mpasi, ut’o bomwana mpema esileli ngai, oyokisi ngai nsomo, nakangi motema tee nalembi.

88:17  Nkanda ya yo inso ikweli ngai, makambo ma yo ma nsomo manyati ngai,

88:18  mazingi ngai mikolo minso lokola mai, mayeli ngai bipai binso.

88:19  Olongoli bandeko na bayebani epai ya ngai ; moninga wa ngai, nde molili.

Chapter 89

89:1  Maloba ma Etan, mwana wa Zera.

89:2  Nakoyembela bolingi bwa Mokonzi seko, o bileko binso nakosakola lobokó la yo.

89:3  Olobaki : « Bolingi bwa yo, bolingi bwa seko », opikaki lobokó la yo o likolo.

89:4  Nakataki bondeko na moto oyo naponoki, nalayelaki Davidi, mosaleli wa ngai, ndai eye :

89:5  « Nakosala ’te libota lya yo lizala na bokonzi seko, nakotongela yo ngwende o bileko na bileko. »

89:6  Ba-likolo bakotondoko yo, Mokonzi, mpo ya makamwa ma yo, bakoyembelaka lobokó la yo o likita lya basantu.

89:7  Kuna o likolo nani akokani na yo, Mokonzi ? O kati ya banzambe basusu nani azali lokola Mokonzi ?

89:8  O likita lya basantu Nzambe aleki nsomo, aleki na bonene mpe na bokasi baye bazingi ye.

89:9  E Mokonzi Nzambe wa bokasi bonso, nani azali lokola yo ? Ozali nta bokasi, nta lobokó !

89:10  Yo moto okokitisaka lolendo la mbu, okolembisaka mbonge soko mbu etomboki.

89:11  Yo moto olongaki mpe opasolaki ebuki ya mbisi, opanzaki banguna ba yo na bokasi bwa loboko la yo.

89:12  Yo nkolo wa likolo, yo nkolo wa nse, okelaki mokili na biloko binso bizali wana.

89:13  O Nordi mpe o Sudi, okelaki binso, ngomba Ermon na Tabor ikoyembelaka nkombo ya yo.

89:14  Loboko la yo lozali na nguya enene, loboko la yo la mobali nta bokasi lokolongaka binso.

89:15  Ngwende ya yo epikami o bosembo, bolingi mpe lobokó bikotambolaka o boso bwa yo.

89:16  Esengo na bato bakokumisaka yo na nzembo ! Bakotambolaka o mwinda mwa elongi ya yo, Mokonzi !

89:17  Mpo ya nkombo ya yo bakoyokaka nsai ntango inso, lokumu la bango, nde bosembo bwa yo.

89:18  Yo, ntina ya bokasi bwa bango, okolendisaka biso na bolamu bwa yo.

89:19  Nzambe akolendisaka mobateli wa biso, Mosantu wa Israel, nguya ya mokonzi wa biso.

89:20  Kala olobaka na bayambi ba yo o ndoto : « Napesi elombe moko lisalisi lya ngai, natomboli elenge moko wa ekolo ya ngai.

89:21  Nazwi Davidi, mosaleli wa ngai, napakoli ye mafuta masantu ma bokonzi.

89:22  Na loboko la ngai nakolendisa ye, loboko la ngai lokopesa ye makasi.

89:23  Monguna moko te akolonga ye na mbalakaka, moto wa motema mabe akonyokolo ye te.

89:24  Nakonyata banguna ba ye banso, nakokweisa baye bakoyinaka ye.

89:25  Bolamu na lobokó la ngai bikozala na ye, akolonga mpo ya nkombo ya ngai.

89:26  Nakokomisa ye mokonzi wa mbu, akozala mpe mokonzi wa bibale.

89:27  Ye akobenga ngai na nkombo ‘Tata wa ngai, Nzambe wa ngai, libanga likobikisa ngai !’

89:28  Bongo nakokomisa ye mwana wa yambo, akoleka bakonzi banso ba nse.

89:29  Nakolakisa ye bolingi bwa ngai seko, bondeko bwa biso na ye bokokufa te.

89:30  Nakoumisa libota lya ye seko, mpe ngwende ya ye ekoumela seko.

89:31  Soko bana ba ye batiki mobeko mwa ngai, mpe baboyi kolanda nzela ya ngai,

89:32  soko babuki mitindo mya ngai, mpe batosi bitinda bya ngai te,

89:33  nakotumbola bango na fimbo mpo ya masumu ma bango, mpe nakobete bango mpo ya mabe ma bango.

89:34  Nzokande nakopima bango bolingi bwa ngai te, nakotika bango ata moke te.

89:35  Nakoboma bondeko bwa ngai te, nakobongola maloba ma monoko mwa ngai te.

89:36  Ngai Mosantu nalayi ndai mbala yoko, nakoki kokosa Davidi soki moke te !

89:37  Nakoumisa libota lya ye seko, mpe ngwende ya ye ekozala lokola mwese o miso ma ngai,

89:38  lokola sanza etiami seko, lokola elembo ya seko o ntei ya mampata. »

89:39  Nzokande obwaki, obengani mpe osilikeli mesiya wa yo.

89:40  Owangani bondeko okataki na mosaleli wa yo, obwaki enkoti ya ye ya bokonzi o nse.

89:41  Obukibuki mapango ma ye, mpe obebisi bibombamelo bya ye.

89:42  Bato banso baleki o nzela, bayibeli ye biloko, bato ba penepene bakomi kofinga ye.

89:43  Olendisi bato bayeli ye etumba, osepelisi banguna ba ye banso ;

89:44  obuki mpe mompanga mwa ye o libanga ; otiki kosalisa ye o ntango ya etumba.

89:45  Obotoli ye montongo mwa bokonzi, mpe okweisi ngwende ya ye.

89:46  Okutoli mikolo mya bolenge bwa ye, oyokisi ye nsoni mingi.

89:47  Mikolo boni, e Mokonzi, okomibomba naino ? Kin’o nsuka ? Móto mwa nkanda ya yo mokopela nde seko ?

89:48  Kanisa ’te nakoumela na bomoi mingi te ; moto yo okeli akofanda awa se mwa mikolo.

89:49  Nani moto akozala na bomoi seko mpe akokufa te ? Nani akoki kokima soko mboka ya bawa ekangi ye ?

89:50  E Mokonzi, wapi bolingi olakisaka kala ? Olayelaki Davidi ’te okotika ye te.

89:51  A Mokonzi, kanisa nsoni eye bayokisaki mosaleli wa yo, mpe mafinga bafingaki ngai matondi o motema mwa ngai.

89:52  E Mokonzi, banguna ba yo bafingi mesiya wa yo o bisika binso azalaki koleka !

89:53  Bakumisa Mokonzi seko ! Amen ! Amen !

Chapter 90

90:1  Losambo la Moze, moto wa Nzambe. Mokonzi, ozali ebombamelo ya biso uta kala.

90:2  Liboso ’te ngomba, mabelé na mokili bikelama, yo ozali Nzambe, banda kala kin’o bileko binso.

90:3  Yo okotindaka bato bazonga o mabelé, okolobakaka « Mwana wa bato, zonga o mabelé ! »

90:4  O miso ma yo, mibu nkoto mizali lokola mokolo moko, mokolekaka noki lokola ngonga ya nsuka ya butu.

90:5  Okolongolaka bato o mokili, lokola ndoto ekosilaka na ntongo, lokola lititi lya mokolo moko :

90:6  likoli na ntongo, kasi liumeli te, na mpokwa likauki mpe likufi.

90:7  Mpo ya nkanda ya yo tokoumela te, nkele ya yo ekoyokisa biso nsomo.

90:8  Okotia mabe ma biso polele o miso ma yo, mpe okotia mabe ma biso mabombami o mwinda mwa elongi ya yo.

90:9  Mpo ya nkanda ya yo, mikolo mikolekaka noki, mpe mibu mya biso mikolimwaka lokola mpema mpamba.

90:10  Bomoi bwa biso bokoumelaka mibu ntuku nsambo to mibu ntuku mwambe, soko moto azali makasi. Mikolo mingi, se mpasi na mawa, mizali koleka mbangu mpe biso tozali kokende.

90:11  Nani ayebi nguya ya nkanda ya yo, mpe mokolo nini nkele ya yo ekosila ?

90:12  Lakisa biso kotanga mikolo mya biso, mpo ’te mitema mya biso mikoma na bwanya.

90:13  Zonga Mokonzi ! Mikolo boni okozila naino ? Yokela basaleli ba yo mawa.

90:14  Uta ntongo lakisa biso bolingi bwa yo, mpe mokolo na mokolo tokozala na esengo.

90:15  Oumisa esengo ya biso mikolo mingi, mikokana na mikolo tozwaki etumbu mpe mibu miike toyokaki mpasi.

90:16  Basaleli ba yo bamono bikela bya yo, bana ba bango bamono nkembo ya yo !

90:17  Bolamu bwa Mokonzi Nzambe wa biso bozala na biso ! Benisa biso mpe lendisa misala mya maboko ma biso !

Chapter 91

91:1  Yo moto obombami o mboka ya Nta-Likolo, mpe ofandi pene na Nzambe wa bokasi bonso,

91:2  loba na Mokonzi : « Ozali ebombamelo ya ngai, yo Nzambe wa ngai, nakotia motema na yo. »

91:3  Ye akolongola yo o monyama mwa mobomi nyama mpe akobikisa yo o bokono bobe.

91:4  Akozipa yo na mapapu ma ye, okobombama o nse ya nsala ya ye. Bondeko bwa ye bozala nguba mpe molato mwa etumba.

91:5  Na butu okoyoka nsomo te, okobanga likula te, liye bakobeteke na moi,

91:6  okobanga bokono bobe te, boye bokongalaka na molili, to malali makobelisaka bato ata na midi.

91:7  Ata bato nkoto bakokweya penepene na yo, to bato nkoto zomi bakokweya epai ya loboko la yo la mobali, yo moko okozwa likambo te.

91:8  Fungola bobele miso mpe tala mpe okomono lifuta bato babe bakozwaka.

91:9  Oyebi ’te Mokonzi azali ebombamelo ya yo, Nzambe wa likolo azali ndako ya yo ;

91:10  makambo mabe makoki kokwela yo te, bokono bokobeleme na ema ya yo te,

91:11  zambi Nzambe akotinda banzelu ba ye bakengele yo o nzela ya yo inso.

91:12  Bakomeme yo o maboko ma bango, mpo ’te lokolo la yo lotuta libaku te.

91:13  Okotambola likolo lya nkosi na nyoka, okonyata mwana wa nkosi na ngando.

91:14  « Awa akolingaka ngai, nakobikisa ye, nakobatela ye, mpo ayebi nkombo ya ngai.

91:15  Soko abengi ngai, nakoyanola ye, nakozala na ye o ntango akoyoka mpasi, nakobikisa ye mpe nakopesa ye lokumu.

91:16  Nakopesa ye mikolo mingi mpe nakosala ’te amono libiki lya ngai. »

Chapter 92

92:1  Nzembo ya mokolo mwa sabato.

92:2  Ebongi batondo Mokonzi botondi mpe bayembela nkombo ya yo, Nta-Likolo.

92:3  Basakola bolingi bwa yo na nta ntongo, mpe bakumisa lobokó la yo butu mobimba,

92:4  na lokombe lonene mpe na nzenze elongo na likembe.

92:5  Oyokisi ngai nsai enene, Mokonzi, na bikela bya yo, na bomoni bikela bya yo nagangi :

92:6  « E Mokonzi, bikela bya yo bileki binene, makanisi ma yo maleki bozindo ! »

92:7  Moto wa bolema ayebi mango te, oyo azangi mayele ayebi ntina soki te.

92:8  Ata baye boboya Nzambe bakokolaka lokola matiti, ata baye bakosala mabe bakozwaka bomengo, mokolo moko ekosila na bango seko.

92:9  Kasi yo, Nzambe, ozali Mokonzi seko.

92:10  Tala banguna ba yo, Mokonzi, banguna ba yo bakokufa, baye bakosalaka mabe bakopanzana.

92:11  Opesi ngai bokasi bwa ngombe mobali, opakoli ngai mafuta ma sika.

92:12  Miso ma ngai mamoni baye bazali konongo ngai, matoi ma ngai mayoki maloba ma bato babe.

92:13  Moto semba akokola lokola nzete ya mbila, akolenda lokola sédere ya Libano.

92:14  Oyo alonami o ndako ya Mokonzi, akokola o lopango la Nzambe wa biso.

92:15  Ata nzete ekomeli, ekobota naino mbuma, ekokauka te, ekotikala se mobesu,

92:16  mpo ’te asakola bosembo bwa Mokonzi : « Ye libanga lya ngai, akokosaka te ! »

Chapter 93

93:1  Nzambe azali moyangeli, Mokonzi wa nkembo, azingami na nguya ya ye.

93:2  Abongisi mokili mobimba, mopikami makasi, mokoningana te. Ut’o ebandela otongi ngwende ya yo, ut’o bileko binso ozali.

93:3  E Nzambe, mbonge ya ebale itomboki, mai ma ebale mangalisi lokito lonene, mayokisi mingongo minene.

93:4  Nzambe wa likolo aleki mango na bokasi, nkembo ya ye eleki lokito la mbonge ya mbu.

93:5  Maloba ma yo mazali maloba ma bosolo, e Mokonzi, osantisi ndako ya yo seko.

Chapter 94

94:1  E Mokonzi, Nzambe wa bobekoli, omilakisa, Nzambe wa bobekoli !

94:2  Teleme, yo zuzi wa nse mobimba, pesa bato ba lolendo etumbu ebongi na bango.

94:3  E Mokonzi, mikolo boni naino okondima ’te bato baboya yo bakomitombola mpe bakolonga ?

94:4  Bakolobaka se maloba ma lolendo, bayebi se kofunda na mabe ma bango.

94:5  Bakonyataka bato ba ekolo ya yo, Mokonzi, mpe bakonyokoloko bato ba libota lya yo ;

94:6  bakokataka nkingo ya basi bakufeli babali mpe ya bampaya, mpe bakobomaka bana bitike !

94:7  Bakanisi ’te : « Mokonzi amoni yango te, Nzambe wa Yakob akebi na yango te. »

94:8  Bokanisa malamu, bino bazoba, bato bazangi mayele, bokozwa mango mokolo nini ?

94:9  Oyo asalaki litoi, akoyoka te to ? Oyo akelaki liso, akoki komono te, solo ?

94:10  Oyo akopalelaka bikolo, akoki kopesa etumbu te ? Oyo ateyaki bato maye basengeli koyeba, ezali ye te ?

94:11  Mokonzi ayebi makanisi ma bato, ayebi ’te mazali se mpamba.

94:12  Esengo na moto oyo yo okopalela, e Mokonzi, moto oyo okoteyaka mobeko mwa yo,

94:13  mpo ’te akoka kopema o mikolo mya mpasi, o ntango bazali kotimola libulu mpo ya basumuki.

94:14  Zambi Mokonzi akotika bato ba ekolo ya ye te, mpe akobosana bato ba libota lya ye te.

94:15  Mokolo bakokata makambo na bosembo, bato banso ba motema semba bakosepela.

94:16  Nani akosambela ngai soko nazwi likambo na bato babe ? Nani akosala ’te bato bazangi bosembo balonga ngai te ?

94:17  Soko Mokonzi ayaki kosalisa ngai te, mbele nasili kokita o mboka ya bawa.

94:18  O ntango namilobeli : « Nalingi nakwei », bolingi bwa yo, e Mokonzi, bolendisi ngai.

94:19  O ntango matungisi ebele mayeli ngai, mabondi ma yo masepelisi motema mwa ngai.

94:20  Okoki kondima ’te bato bazangi bosembo bazala bazuzi, bongo bapesa bitumbu biye mobeko motindi te ?

94:21  Bango balingi koboma moto semba, mpe kokitisa moto azali na likambo te.

94:22  Kasi Mokonzi azali ebombamelo ya ngai, Nzambe wa ngai, ye libanga esika nakomibombaka.

94:23  Akozongisela bango mabe ma bango moko, mayele mabe ma bango makosukisa bango, Mokonzi Nzambe wa biso akokangisa bango monoko.

Chapter 95

95:1  Yakani e, tolakisa Mokonzi esengo ya biso, tobetele ye maboko, ye Libanga likobikisa biso.

95:2  Tokende epai ya ye mpe totondo ye, toyembela ye mpe tobetele ye mbonda.

95:3  Solo, Mokonzi azali Nzambe monene, ye Mokonzi monene aleki banzambe banso.

95:4  Bisika bizindo bya nse bizali o maboko ma ye, nsonge ya ngomba izali mpe ya ye.

95:5  Mbu ezali ya ye, ye moto akeli yango, mokili mpe mozali mosala mwa maboko ma ye.

95:6  Toyingela, togumbama, tokumbamela ye, tofukamela Nzambe oyo asali biso.

95:7  Ye azali Nzambe wa biso, biso tozali bato ba ekolo ya ye, ye mokengeli, biso mpata ya etonga ya ye. Boyoka lolaka la ye lelo :

95:8  « Bozala na motema mabe te lokola o Meriba, ntango bozalaki o mboka Masa o eliki,

95:9  ntango bankoko bamekaki ngai na matumoli ma bango, ata bamonoki bikela bya ngai !

95:10  Mibu ntuku inei nayokaki bango mpi, yango wana nalobi : Bazali se kotelengana, baboyi koyeba nzela ya ngai.

95:11  Bongo nalayi ndai na nkanda o motema : mokolo moko te bakozwa bopemi nalakelaki bango. »

Chapter 96

96:1  Boyembela Mokonzi nzembo ya sika ! Bato banso ba nse, boyembela Nzambe !

96:2  Boyembela Mokonzi, bokumisa nkombo ya ye ! Mokolo na mokolo bosakola libiki liuti epai ya ye !

96:3  Bosangela bikolo binso nkembo ya ye, boyebisa bato banso makamwisi ma ye !

96:4  Bakumisa ye, Mokonzi nta bonene, ye nta nsomo, aleki banzambe banso.

96:5  Banzambe basusu banso bazali biloko mpamba ! Bobele ye Mokonzi akeli likolo.

96:6  O mboka ye, se lokumu na nkembo, o ndako ya ye esantu, se bokasi na bokonzi.

96:7  Bokumisa Mokonzi, bato ba bikolo binso, bokumisa Mokonzi mpo ya nkembo mpe bokasi bwa ye.

96:8  Bopesa Mokonzi nkembo ekoki na nkombo ya ye, boya na mabonza, boyingela o lopango la ye.

96:9  Bokumbamela Mokonzi, ye nta bosantu. Bato ba nse banso, bolenge o miso ma ye !

96:10  Boloba na bapagano : « Nzambe azali Mokonzi ! Molóngó mopikami makasi mokoningana te. Ye akosambisa bikolo binso na bosembo. »

96:11  Likolo lisepela ! Mokili moyoka esengo ! Mbu na binso bizali wana biganga makasi !

96:12  Bilanga binso na mbuma ya byango bisepela, nzete inso ya zamba iganga na esengo,

96:13  o boso bwa Mokonzi, zambi azali koya ; akoya kosambisa mokili mobimba : akosambisa mokili na bosembo, mpe akokamba bato na bosolo bwa ye.

Chapter 97

97:1  Nzambe azali Mokonzi ! Bato ba nse basepela, bato ba bisanga binso bayoka esengo !

97:2  Molili na mampata bizingi ye, bosembo na bosolo, nde makonzi ma ngwende ya ye.

97:3  Móto motamboli o boso bwa ye, mozikisi banguna zongazonga na ye.

97:4  Minkalali mya ye mingengeli mokili, nse emoni bongo mpe eningani.

97:5  Ngomba inyangwi lokola mafuta ma nzoi o miso ma Mokonzi wa nse mobimba.

97:6  Likolo lisakoli bosembo bwa ye mpe bato ba bikolo binso bamoni nkembo ya ye.

97:7  Bato bakokumisaka bikeko bayoka nsoni, baye bakomikumisaka na biloko bya mpamba, banzambe banso ba lokuta, bafukamela ye.

97:8  O Sion bayoki yango mpe basepeli, o binguma binso bya Yuda bayoki esengo, mpo okati makambo ma bango, e Mokonzi.

97:9  Bobele yo, Nzambe, oleki binso o nse mobimba, leka banzambe banso mosika.

97:10  Bino bato bolingi Mokonzi, boyina bobe. Akobatelaka bomoi bwa basaleli ba ye, akobikisaka bango o maboko ma bato babe.

97:11  Moi mokongengele bato ba bosembo mpe bato ba motema semba bakoyoka esengo.

97:12  Bino basemba, bosepela Mokonzi mpe bokumisa nkombo ya ye esantu.

Chapter 98

98:1  Nzembo. Boyembela Mokonzi nzembo ya sika, zambi asali makamwisi manene. Alongi etumba na loboko la ye la mobali, loboko la ye nta bosantu.

98:2  Mokonzi alakisi libiki lya ye, ayebisi bapagano bosembo bwa ye.

98:3  Akundoli bolingi mpe lobokó la ye ona libota lya Israel. Tee nsuka ya mokili bato banso bamoni ndenge Nzambe ayeli bango libiki.

98:4  Bato ba nse mobimba, bobetele Mokonzi maboko, boganga migango mya esengo !

98:5  Bobetele Mokonzi nzenze, boyembela ye na biyembeli ;

98:6  bobete mindule mpe bolelisa liseke lya ngombe, bobete maboko o boso bwa Mokonzi Nzambe.

98:7  Mbu na binso bizali wana, biganga, na mpe bato banso ba mokili.

98:8  Bibale binso bibete maboko mpe ngomba inso iganga na esengo,

98:9  o boso bwa Nzambe, zambi azali koya kosamba makambo ma bato banso. Akosambisa bato ba mokili na bosembo, bato ba bikolo binso na bosolo.

Chapter 99

99:1  Nzambe azali Mokonzi ; bato ba bikolo, balenge ! Afandi likolo lya bakerubim, mokili moningani.

99:2  Mokonzi azali o Sion, azali nta monene, aleki bikolo binso.

99:3  Bakumisa nkombo ya yo enene mpe ya nsomo : « Mokonzi azali mosantu mpe na nguya enene.

99:4  Azali Mokonzi oyo akolingaka bosembo. » Yo moto otii bosembo mpe bosolo o mokili, opesi ekolo ya Yakob mibeko mya bosembo.

99:5  Bokumisa Nzambe Mokonzi wa biso, bofukama o boso bwa ebonga ya makolo ma ye, zambi azali mosantu.

99:6  Moze na Arone bazalaki banganga ba ye, mpe Samuel azalaki kobondela nkombo ya ye ; basambelaki Nzambe mpe ye ayanolaki bango.

99:7  Ut’o limpata Mokonzi azalaki koloba na bango, batosaki maloba ma ye na mibeko apesaki bango.

99:8  Yo, Mokonzi Nzambe wa biso, oyanolaki bango, omilakisaki Nzambe wa motema ngolu, kasi otumbolaki bango mpo ya mabe ma bango.

99:9  Boyembela Mokonzi Nzambe wa biso, bokumbamela ye o ngomba ya ye esantu : Mokonzi Nzambe wa biso azali mosantu.

Chapter 100

100:1  Nzembo ya botondi Nzambe. Bato banso ba nse, boyembela Mokonzi,

100:2  bosalela Mokonzi na nsai o mitema ; bobeleme na ye na nzembo ya esengo !

100:3  Boyeba ’te Mokonzi azali Nzambe ; ye akeli biso, tozali bato ba ye, libota lya ye, mpata ya etonga ya ye.

100:4  Bobeleme na monoko mwa lopango la ye, boyingela o lopango la ye na nzembo. Botondo ye mpe bokumisa nkombo ya ye :

100:5  « Mokonzi aleki bolamu, bolingi bwa ye, bolingi bwa seko, lobokó la ye lokoumela seko. »

Chapter 101

101:1  Nzembo ya Davidi. Nalingi kokumisa bolingi mpe bosembo bwa yo, e Mokonzi, nalingi koyembela yo nzembo.

101:2  Nalingi kokoma na ezalela ebongi nye ; ntango nini okoya kotala ngai ? Nakozala se motema semba o libota lya ngai.

101:3  Nandimi mabe o miso ma ngai soki te, nayini ezalela ya bato bapengwi, bakoki kobungisa ngai nzela te.

101:4  Moto wa mayele mabe alongwa mosika na ngai, nalingi koyeba moto mabe te.

101:5  Nakokangisa monoko mwa moto akotongoko baninga ; oyo akotalaka bato basusu na miso ma lolendo mpe moto wa lofundo, naboyi bango.

101:6  Nakoponoko se basemba ba ekolo, bafanda penepene na ngai. Se moto alandi nzela ebongi nye ndakoki kozala mosaleli wa ngai.

101:7  Mokosi afanda o ndako ya ngai te, moto wa lokuta akoki kokoma o miso ma ngai te.

101:8  Mokolo na mokolo nakosukisa bato babe o mokili, nakosilisa bato babe banso o engumba ya Mokonzi.

Chapter 102

102:1  Losambo la moto wa mawa o ntango alingi akweya mpe amileli o miso ma Mokonzi.

102:2  E Mokonzi, yoka losambo la ngai, bobeleli bwa ngai bokoma epai ya yo.

102:3  Obombela ngai elongi ya yo te o mokolo nakomi na mpasi. Tandela ngai matoi mokolo nabengi yo, yanola ngai noki !

102:4  Zambi mikolo mya ngai milimwi lokola milinga, mpe minkuwa mya ngai miziki lokola nkoni batumbi.

102:5  Motema mwa ngai mokomi lokola matiti makauka, nazali kobosana kolia mampa ma ngai.

102:6  Nazali bobele kolela mpe kokimela, natikali se minkuwa mpamba.

102:7  Nakomi lokola esulungutu o eliki, nazali lokola libeke lifandi o mopotu.

102:8  Mpongi ekimi ngai, nazali kokimela, lokola ndeke efandi o motondo mwa ndako.

102:9  Banguna bakotumolaka ngai mikolo minso, na nkombo ya ngai bakotombelaka bato bobe.

102:10  Nakomi kolia mputulu lokola mampa, mpe mpizoli ya miso izali kotanga o kopo ya ngai.

102:11  Osilikeli ngai, oyokeli ngai nkanda enene, otomboli ngai mpe obwaki ngai mosika !

102:12  Mikolo mya ngai mikosila lokola elilingi, ngai moko nakokauka lokola matiti.

102:13  Kasi, Mokonzi, yo okoyangelaka seko, o bileko binso bakotanga nkombo ya yo !

102:14  Okoteleme mpe okoyokela Sion mawa, zambi elaka ya koyokela ye ngolu ekoki ; ya solo, ntango ekoki.

102:15  Basaleli ba yo balingi mabanga ma mboka ya bango, awa bamoni mboka ekufi, bayoki mawa.

102:16  Bato ba bikolo bakobanga nkombo ya Mokonzi, bakonzi banso ba nse bakobanga nkembo ya yo.

102:17  O mokolo Mokonzi akotonga Sion lisusu akomilakisa na nkembo ya ye ;

102:18  akondima losambo la baye babotoli bango biloko, mpe akokinola losambo la bango te.

102:19  Bakoma makambo maye mpo ya bato bakoya nsima, bongo ekolo ya sika ekumisa Mokonzi.

102:20  Ut’o esika ya ye esantu Mokonzi asunami, ut’o likolo atali mokili

102:21  mpo ’te ayoka boleli bwa bato bakendeki o boombo, mpe abikisa baye bazali kobunda na liwa.

102:22  Bakosakola nkombo ya Mokonzi o Sion, bakokumisa ye o Yeruzalem.

102:23  O ntango ena bato ba bikolo mpe ba mikili minso bakosangana mpo ’te basalela Mokonzi.

102:24  Asilisi bokasi bwa ngai, naino nasukisi mobembo te, akutoli mikolo mya ngai.

102:25  Nabondeli ye : « E Nzambe, okamata ngai o kati ya bomoi bwa ngai te, mibu mya yo mikoumela seko.

102:26  Okelaka mokili kala mpenza, likolo lizali mosala mwa maboko ma yo.

102:27  Ata byango bikosila, yo okotikala, binso bikobeba lokola elamba ; okotika byango lokola bakotikaka elamba, okobongolaka byango lokola bakobongolaka bilamba.

102:28  Kasi yo okobongwanaka te, mibu mya yo mikosila te.

102:29  Basaleli ba yo bakozwa mboka mpo ’te bafanda, libota lya bango likoumela seko o miso ma yo. »

Chapter 103

103:1  Nzembo ya Davidi. Molimo mwa ngai, kumisa Mokonzi, na motema monso kumisa nkombo ya ye esantu.

103:2  Molimo mwa ngai, kumisa Mokonzi, mpe obosana malamu ma ye te.

103:3  Ye akolimbisaka mabe ma yo manso, ye akobikisaka yo o bokono bonso.

103:4  Ye akobikisaka bomoi bwa yo o libulu lya liwa, mpe akolakisaka yo bolingi na ngolu.

103:5  Akotondisaka yo na makabo ma ye, akozongisela yo bokasi bwa bolenge lokola engondo.

103:6  Bikela bya Mokonzi, bikela bya bosembo, akolongisaka bato banso banyokwami.

103:7  Ayebisaka Moze mikano mya ye, mpe alakisaka ba-Israel bikela bya ye binene.

103:8  Mokonzi azali nta bolamu mpe ngolu, akosilikaka noki te, atondi na bolingi.

103:9  Nkele ya ye ekoumelaka te, akobombela bato nkanda seko te.

103:10  Akosalaka biso engebene na mabe ma biso te, akozongiselaka biso matumoli ma biso te.

103:11  Lokola etando ya likolo ezipi mokili mobimba, bolingi bwa ye bokobatelaka baye bakobangaka ye.

103:12  Lokola nsuka yoko ya mokili ezali mosika na nsuka esusu, se bongo Nzambe akobwaka masumu ma biso mosika.

103:13  Lokola tata akolingaka bana ba ye, Mokonzi mpe akolingaka baye bakobangaka ye.

103:14  Ayebi botau bwa biso, ayebi ’te tozali se mputulu.

103:15  Bomoi bwa moto bozali lokola bomoi bwa lititi, moto akokolaka lokola fulele ya bilanga :

103:16  soko mompepe mopepeli ye, azali lisusu te ; esika azalaki, akomonono lisusu te.

103:17  Mokonzi akolingaka seko bato bakobangaka ye, mpe akolakisaka bana mpe bankoko ba bango bosembo,

103:18  baye bakomemyaka bondeko bwa ye, mpe bayebi ’te basengeli kosala maye ye alingi.

103:19  Mokonzi apiki ngwende ya ye o likolo, bokonzi bwa ye boleki biloko binso.

103:20  Bino banzelu ba Mokonzi, bokumisa ye, bino bilombe, bokokisa bitinda bya ye, botosa noki soko ayokisi lolaka la ye.

103:21  Bino, mampinga ma Mokonzi, bokumisa ye, bozali basaleli ba ye, bokosalaka maye ye alingi.

103:22  Bino bikelamo bya ye binso, bokumisa Mokonzi, o bisika binso bya bokonzi bwa ye. Molimo mwa ngai, kumisa Mokonzi.

Chapter 104

104:1  Molimo mwa ngai, kumisa Mokonzi ! Mokonzi Nzambe wa ngai, opusi bonene ! Molato mwa yo, nkembo mpe lokumu la yo,

104:2  mwinda mozingi yo lokola monkoto, otandi etando ya likolo lokola ema,

104:3  otongi ndako ya yo likolo lya mai. Okomisi mampata ma likolo likalo lya yo, mpe okopimbwaka na mapapu ma mompepe.

104:4  Okotindaka mompepe lokola ntoma wa yo, minkalali mizali basaleli ba yo.

104:5  Opiki mokili o makonzi makasi, mokoki koningana te o bileko na bileko.

104:6  Olatisi mwango mbu lokola elamba, mai makomaki kin’o nsonge ya ngomba.

104:7  Mai makimi ntango okaneli mango, malengi mpo ya nsomo ya nkake ya yo ;

104:8  ngomba ibuti mpe mabwaku makiti, o bisika otindaki byango.

104:9  Otii ndelo esika mai makoki koleka te, mazonga kozindisa mokili lisusu te.

104:10  Okotindaka mai ma maziba o miluka, mápasola nzela o kati ya ngomba,

104:11  mámelisa nyama ya zamba, mpe másilisa mposa ya mpunda ya ngomba.

104:12  Penepene na mai ndeke ikotongaka zumbu, ikoyembaka wana o bitapi bya nzete.

104:13  Ut’o ndako ya yo okonoiselaka ngomba mbula, okomelisaka mabelé mbula eye otangisi.

104:14  Okotoisaka matiti mazala bilei bya ngombe, okotoisaka mpe mbuma ya mampa iye bato bakolonaka mpo ya kolia.

104:15  Vino ekoyokisaka moto esengo o motema, mafuta makongengisa elongi ya ye mpe mampa makolendisaka ye.

104:16  Nzete ya Mokonzi ikolendaka na mai omelisi yango, sédere ya Libano iye Mokonzimei alonaki.

104:17  Ndeke ikotongaka zumbu wana, nkongi ekofandaka o nsonge ya yango.

104:18  Ngomba ilai izali mokili mwa ntaba ya ngomba, mabulu ma ngomba, mboka ya bisende.

104:19  Osalaki sanza mpo ya kolakisa bileko, mwese moyebi ngonga ya kokita.

104:20  Ebimisi yo molili, butu boindi, mpe nyama inso ya zamba ikomi kobima.

104:21  Bana ba nkosi baleli, bakomi koluka nyama mpe kosenge Nzambe bilei bya bango.

104:22  Etani ntongo, balongwi, bakei kolala o mabulu ma bango,

104:23  ntango moto abimi mpo ’te akende o bilanga mpe asala mosala mwa ye tee mpokwa.

104:24  Mokonzi, bikela bya yo bizali mingi ! Osali byango na bwanya, otondisi mokili na biloko.

104:25  Tala mbu enene, ekosuka wapi ? Etondi na mbisi, mbisi inene na ike.

104:26  Masuwa makotambolaka se wana, esika Leviatan azali, oyo osalaki mpo ’te osakana na ye.

104:27  Bikelamo biye binso bikotiaka elikya na yo mpo ’te okabela byango biloko o ntango ya kolia.

104:28  Soko obwakeli bango, bango balokoti, soko ofungoli maboko, bango batondi.

104:29  Soko obombi elongi, bango bakomi kobanga, soko obotoli bango mpema, bakufi mpe bazongi o mabelé.

104:30  Soko otindi mpema ya yo, basusu bakobotama, mpe bikelamo bya sika bikotonda o mokili.

104:31  Nkembo ya Mokonzi ezala o bileko binso, Mokonzi ayoka esengo na bikelamo bya ye.

104:32  Soko atali mokili, mokili moningani, soko asimbi ngomba, milinga mibimi.

104:33  Nalingi koyembela Mokonzi bomoi bwa ngai mobimba, mpe kobetele Nzambe wa ngai miziki tee liwa lya ngai.

104:34  Maloba ma ngai masepelisa ye, esengo ya ngai, se Mokonzi !

104:35  Bato baboya yo basila o mokili, bato babe bazala lisusu te. Molimo mwa ngai, kumisa Mokonzi ! Aleluya !

Chapter 105

105:1  Bokumisa Mokonzi, bosakola nkombo ya ye, boyebisa bato banso bikela bya ye !

105:2  Boyembela ye, bokumisa ye, bomanyola makamwisi ma ye manso.

105:3  Bosepela Nkombo ya ye esantu, lokumu la bino, bino bato bokolukaka Mokonzi, boyoka nsai.

105:4  Boluka Mokonzi na mpe nguya ya ye, bomeka kozala ntango inso penepene na ye.

105:5  Bokundola makamwisi ma ye, makamwa ma ye na boyangeli bwa ye,

105:6  bino bato ba libota lya Abarama, mosaleli wa ye, bino bana ba Yakob, moto ye apono.

105:7  Ye Mokonzi, azali Nzambe wa biso, ye akokataka makambo o nse mobimba.

105:8  Akokanisaka bondeko bwa ye ntango inso, elako ona nkoto na nkoto ya bato,

105:9  bondeko akataka na Abarama, na mpe ndai alayelaka Izaka.

105:10  Akomisi bwango mobeko mpo ya Yakob, bondeko bwa seko na bato ba Israel,

105:11  na maloba maye : « Nakopesa bino mokili, nakokabela bino mabelé ma Kanana bo lisango. »

105:12  O ntango ena bazalaki se liboke like lya bato, bazalaki bato baike te, se bampaya.

105:13  Bazalaki kolekaleka o bikolo biike, kotika mokili moko mpo ya kokende epai esusu.

105:14  Kasi alingisaki te ’te banyokolo bango, mpo ya bango apesi bakonzi basusu etumbu.

105:15  Alobi : « Botika bato baye babonzami na ngai, bosala baprofeta ba ngai mabe te ! »

105:16  Atindi nzala enene o mokili, abebisi bilanga binso bya mbuma ya mampa.

105:17  Atindi moto moko o boso bwa bango, Yozefu, oyo atekemi lokola moombo.

105:18  Bakangi ye minyololo o makolo, batii ye nkamba ya bibende o nkingo,

105:19  kin’o mokolo Mokonzi akokisi maloba ma ye, ntango makambo alobaki mayei kosalema.

105:20  Mokonzi Farao atindi ’te balongola ye minyololo, mokonzi wa bikolo mingi abikisi ye o boloko.

105:21  Atii ye moyangeli wa ndako ya ye, mpe nkolo wa biloko bya ye binso,

105:22  mpo ’te bankumu ba ekolo batosa ye, mpe ateya balaki ba mokonzi bwanya.

105:23  Bobele bongo ba-Israel bakomi o Ezipeti, Yakob akei kofanda o ekolo ya Kam.

105:24  Nzambe asalisi ekolo ya ye mpo ’te babota mingi, bakomi koleka banguna ba bango na bokasi.

105:25  Abebisi mitema mya banguna mpo bayina bato ba ye, mpe batungisa basaleli ba ye.

105:26  O ntango ena atindi Moze, mosaleli wa ye, na mpe Arone, moto amiponeli.

105:27  Na maboko ma bango asali misala minene miye alobaki, makamwisi o ekolo ya Kam.

105:28  Atindi molili mpe molili moyei, kasi baboyi kotosa maloba ma ye.

105:29  Akomisi mai ma bango makila, mpe abomisi mbisi ya bango inso o mai.

105:30  Mokili mwa bango motondi na magbololo, tee o ndako ya bakonzi ba bango.

105:31  Alobi lisusu mpe nzinzi iyei mingi na mpe nkungi o ekolo ya bango mobimba.

105:32  Mbula atindeli bango ezalaki mbula ya matandala, atindi mpe móto mwa minkalali o mokili mwa bango ;

105:33  abebisi nzete ya vino mpe ya figi, abuki nzete inso o mokili mwa bango.

105:34  Alobi lisusu mpe mapalela mayei, na makélele ebele makoki na botangi te,

105:35  masilisi matiti manso o mokili mwa bango, na mpe ndunda inso ya bilanga bya bango.

105:36  Abomi bana ba yambo banso ba ekolo, bana babali ba yambo ba mabota ma bango.

105:37  Abimisi bato ba ye, bamemi palata na wolo, mpe moto moko te atikali nsima.

105:38  Awa babimi, bato ba Ezipeti basepeli, zambi nsomo ekangaki bango.

105:39  Akitisi limpata mpo ya kobatela bango na moi, apelisi móto mópesa bango mwinda na butu.

105:40  Basengi bilei, atindeli bango bisosolo, atondisi bango na mampa mauti o likolo.

105:41  Apasoli libanga mpe mai mabimi, makatisi eliki lokola moluka.

105:42  Akundoli o motema liloba lya ye lisantu, elako alakelaki Abarama, mosaleli wa ye :

105:43  abimisi bato ba ye na esengo enene, bato ye aponoki bazalaki koganga na nsai.

105:44  Akabeli bango mabelé ma bato ba bikolo bisusu, bazwi bongo mbuma ya bilanga bya bango.

105:45  Asali maye manso mpo ’te bamemya bitinda bya ye mpe batosa mibeko mya ye. Aleluya !

Chapter 106

106:1  Aleluia ! Botondo Nzambe, zambi aleki bolamu ; bolingi bwa ye, bolingi bwa seko !

106:2  Nani akoki kosakola misala minene mya Mokonzi, kokumisa ye bo ebongi ?

106:3  Esengo na baye bakolandaka nzela semba, baye bakosalaka ntango inso misala mya bosembo !

106:4  Mokonzi, okanisa ngai, mpo ya bolingi okolingaka ekolo ya yo, oyela ngai libiki,

106:5  namono esengo ya baponomi ba yo, nasepela mpe nazwa nkembo elongo na bana ba yo.

106:6  Tosali masumu se lokola bankoko ba biso, tobungi nzela, towangani yo.

106:7  Bankoko ba biso bazalaki o Ezipeti, bayokaki ntina ya makamwisi ma yo te ; babosanaki bolingi bwa yo bonene, batombokoki na Nta-Likolo pene na Mbu Etane.

106:8  Mokonzi abikisi bango mpo ya nkombo ya ye, mpo ya kolakisa bango nguya ya ye.

106:9  Akaneli Mbu Etane mpe mai makauki, alekisi bango o mai, lokola o eliki.

106:10  Abikisi bango o maboko ma banguna, asikoli bango o maboko ma banyokoli.

106:11  Mai mayei kozipa banguna ba bango, ata moko te abiki.

106:12  Mokolo mona bayambi maloba ma ye, mpe bakumisi ye na nzembo.

106:13  Kasi babosani noki bikela bya ye binso, bazili ata elako ya ye te.

106:14  O eliki balandi se mposa ya biloko, o mokili moye mozangi biloko, bameki Nzambe.

106:15  Apesi bango biloko biye basengi, atondisi bango tee bayoki byango mpi.

106:16  O nganda bayokeli Moze na Arone, mobonzami na Mokonzi, zuwa.

106:17  Mabelé mafungwami mpe mameli Datan, makundi Abiram na baninga ba ye.

106:18  Móto mopeli likolo lya bango, mololi mozikisi bato baye batomboki.

106:19  O ngomba Oreb basali ekeko ya mwana wa ngombe, bakumbameli ekeko eye batulaki.

106:20  Batiki Nzambe wa bango wa lokumu lonene, mpo ya ekeko ya ngombe, eye ekoliaka matiti.

106:21  Babosani Nzambe, oyo abikisaki bango, oyo akelaki mambi manene o Ezipeti,

106:22  oyo alakisaki makamwisi o ekolo ya Kam mpe mambi ma nsomo pene na Mbu Etane.

106:23  Akani ’te asilisa bango nye, kasi Moze, molingami wa ye, asambeli mpo ya bango o boso bwa Nzambe ’te atika koboma bango na nkanda.

106:24  Baboyi mokili motondi na biloko elengi, zambi bandimi maloba ma ye te.

106:25  Batombokeli ye o biema bya bango, baboyi maloba ma Mokonzi.

106:26  Mokonzi atomboli loboko mpo ya kolaya ndai ’te akoboma bango banso o eliki,

106:27  akopanza bana ba bango o bikolo bisusu mpe akopalinginya bango o ntei ya bapagano.

106:28  Bakei kondima boombo bwa nzambe Baal-Peor, balei mabonza bakobonzelaka bawa,

106:29  bayokisi ye nkanda na mabe ma bango kina etumbu ya nsomo ekweli bango.

106:30  Ntango ena Pinekas atelemi, abongisi likambo, mpe etumbu esili.

106:31  Yango nde ekomisi ye moto wa bosembo, o bileko binso bato bakokanisa ye.

106:32  Epai ya mai ma Meriba bayokisi Nzambe nkanda lisusu ; Moze azwi likambo se mpo ya bango :

106:33  awa bayokisi ye motema bololo, Moze alobi maloba maye akanisi malamu te.

106:34  Basilisi bapagano na koboma te, baye Mokonzi atangelaki bango.

106:35  Basangani na bapagano mpe balandi mimeseno mya bango.

106:36  Bakumisi bikeko bya banzambe ba bango, mpe bakwei bongo o motambo :

106:37  babomi bana ba bango, babali na basi, babonzi bango na bazabolo.

106:38  Basopi makila ma bana basali likambo te, makila ma bana ba bango, babali na basi, baye babonzeli bikeko bya Kanana ; basantoli bongo mokili na makila masopami.

106:39  Bakomi na mbindo na makambo maye, basali mabe lokola mwasi abebisi libala.

106:40  Mokonzi asilikeli bato ba ye na nkanda enene, ayoki bato ba libota lya ye mpi.

106:41  Akabi bango o maboko ma bikolo bisusu, banguna bakomi bakonzi ba bango.

106:42  Bato ba bikolo bisusu bakomi konyokolo bango, mpe batieli bango mikumba minene.

106:43  Mokonzi abikisi bango mbala mingi mpenza, kasi bango bayoki te, bakobi se kosala mabe.

106:44  Atali malozi ma bango mpe ayoki mawa, awa ayoki boleli bwa bango.

106:45  Akanisi bondeko akataka na bango ; mpo ya bolingi bwa ye ayoki lisusu ngolu,

106:46  asali ’te baye banso bakangaki bango baombo bayokela bango ngolu.

106:47  E Mokonzi Nzambe wa biso, bikisa biso, sangisa biso ut’o bikolo binso mpo tokumisa nkombo ya yo esantu mpe tosepela na bokumisi yo.

106:48  Bakumisa Mokonzi Nzambe wa Israel o bileko binso seko. Mpe bato banso bandima : Amen ! Aleluya !

Chapter 107

107:1  Botondo Nzambe, zambi aleki bolamu, bolingi bwa ye, bolingi bwa seko !

107:2  Bato banso Mokonzi abikisi, baloba yango polele, baye ye abikisi o maboko ma banyokoli ;

107:3  asangisi bango ut’o bikolo bya Esti, Westi, Nordi mpe Sudi.

107:4  Bazalaki koyengayenga o eliki, esika bato bazalaki te, bamonoki nzela yoko te ekolakisa mboka ya bato.

107:5  Bayokaki nzala mpe mposa ya mai, bokasi bwa nzoto bosilelaki bango nye.

107:6  O ntango bayoki mpasi babeleli Mokonzi, ye abikisi bango o nsomo ya bango.

107:7  Alakisi bango nzela semba, bakoma bongo o mboka esika bato bazali.

107:8  Batondo Mokonzi mpo ya bolingi bwa ye, mpo ya makamwisi manso asalaki mpo ya bato :

107:9  amelisi bato bakufi na mposa ya mai mpe atondisi baye bakufi na nzala.

107:10  Basusu bafandaki o kati ya molili, bakangemaki na minyololo mya ebende ;

107:11  zambi baboyaki koyoka maloba ma Nzambe, mpe batalaki mikano mya Nta-Likolo mpamba.

107:12  Ayokisi bango motema mpasi, bango bakwei, mpe moto moko asalisi bango te.

107:13  O ntango bayoki mpasi babeleli Mokonzi, ye abikisi bango o nsomo ya bango.

107:14  Alongoli bango o molili mwa mboka ya bawa, akati minyololo mya bango.

107:15  Batondo Mokonzi mpo ya bolingi bwa ye, mpo ya makamwisi manso asalaki mpo ya bato :

107:16  abuki bizibeli bya mbengi na mpe bikangeli bya ebende.

107:17  Basusu bakomaki bilema mpo ya mabe basalaki, bakomaki na mpasi mpo ya masumu ma bango,

107:18  bayokaki ata mposa ya kolia te, bakomaki penepene na mboka ya bawa.

107:19  O ntango bayoki mpasi babeleli Mokonzi, ye abikisi bango o nsomo ya bango.

107:20  Atindi liloba lya ye, abikisi bango, alongoli bango o libulu lya liwa.

107:21  Batondo Mokonzi mpo ya bolingi bwa ye, mpo ya makamwisi manso asalaki mpo ya bato !

107:22  Babonzela ye mabonza ma botondi, bakumisa bikela bya ye na nzembo ya nsai !

107:23  Basusu bakendeki na masuwa o mbu, mpe bazalaki kosala mombongo kuna ;

107:24  bamonoki na miso maye Mokonzi asalaki na mpe makamwisi ma ye o mbu bozindo.

107:25  Mpo ya liloba lya ye mompepe makasi moyei mpe motomboli mbonge ya mai.

107:26  Batombwami o likolo, bakwei o bozindo, balembi mpenza mpo ya mpasi ena.

107:27  Bandingbandingbi lokola bato bameli masanga mpe mayele masileli bango nye.

107:28  O ntango bayoki mpasi babeleli Mokonzi, ye abikisi bango o nsomo ya bango.

107:29  Akitisi ekumbaki mpe alembisi mompepe mpe mbonge ikomi kolala nye.

107:30  Emoni bango ’te mai makomi nye, basepeli ; Nzambe akomisi bango o libongo liye balingi koseme.

107:31  Batondo Mokonzi mpo ya bolingi bwa ye, mpo ya makamwisi manso asalaki mpo ya bato !

107:32  Bakembisa ye o likita linene lya bato ba ekolo, bakumisa ye o likita lya bakolo ba mboka !

107:33  Mokonzi abongoli ebale ekoma eliki, abongoli liziba likoma esika ezanga mai,

107:34  mabelé malamu makoma mabelé ma mongwa mpo ya mabe ma bato bafandi wana.

107:35  Abongoli eliki ekoma etima ya mai mpe mokili mozangi mai mokoma esika ya maziba.

107:36  Asalisi bato bazalaki kokufa na nzala, mpo batonga mboka, esika bakoki kofanda.

107:37  Baloni milona o bilanga na nzete ya vino, babuki mbuma.

107:38  Nzambe abenisi bango, bakomi ebele, bibwele bya bango bikomi mpe mingi.

107:39  Na nsima, mpo ya minyoko, mpasi mpe malozi, batikali lisusu mingi te, bakomi kolembe.

107:40  Ayokisi bankumu ba bango nsoni mpenza, abungisi bango o esobe enene ezangi nzela.

107:41  Kasi abateli babola o ntango ya mpasi, apesi bango bana ebele lokola etonga ya mpata.

107:42  Ekomono bato ba bosembo bongo, bakosepela, mpe bato banso ba lokuta bakokanga monoko.

107:43  Soko ozali moto wa bwanya, kanisa makambo maye, mpe yeba ntina ya bolingi bwa Mokonzi.

Chapter 108

108:1  Nzembo ya Davidi.

108:2  E Nzambe, motema mwa ngai mokiti sikawa, lokumu la ngai, nde : koyembela yo nzembo.

108:3  Bino, lokombe na nzenze, bolamuka, nabyanga ntongo !

108:4  E Mokonzi, nalingi kokumisa yo o ntei ya bato banso, koyembela yo nzembo o bikolo binso.

108:5  Zambi bolingi bwa yo boleki likolo na bonene, bosolo bwa yo bobuti kin’o mampata.

108:6  E Nzambe, teleme kuna o likolo, nse mobimba etonda na nkembo ya yo !

108:7  Mpo ’te bato ba yo ba bolingo babika, bikisa bango na bokasi bwa yo, yanola biso !

108:8  O Ndako ya ye esantu Nzambe alobaki : « Nakoyoka esengo, nakokabola Sikem mpe nakomeka lobwaku la Sukot na nsinga.

108:9  Mikili mya Galaad na Manase, mikozala mya ngai, Efraim ekozala enkoti ya ngai o etumba, Yuda, montongo mwa ngai mwa bokonzi.

108:10  Moab ekozala sani ya kosukola nzoto, o mokili mwa Edom nakotia lokolo, nakonyata ba-Filisti mpe nakobina likwei. »

108:11  Nani akokomisa ngai o engumba ezingami makasi, nani akokamba ngai kin’o mokili mwa Edom ?

108:12  Bobele yo Nzambe. Kasi obwaki biso, okokambaka basoda ba yo lisusu te.

108:13  Lendisa biso o etumba na banguna, zambi lisalisi lya bato lizali se mpamba !

108:14  Elongo na Nzambe tokosala makambo manene, ye moto akonyata banyokoli ba biso.

Chapter 109

109:1  Ya kapita wa bayembi. Nzembo ya Davidi. E Nzambe, nakokumisa yo, yanola ngai,

109:2  Banguna bafungoli monoko mpo ya kotongo mpe kokosa ngai. Babimiseli ngai bobele maloba ma lokuta.

109:3  Zongazonga na ngai se maloba ma boyini, bayeli ngai etumba ntina te.

109:4  Nalakisi bango bondeko, bango bafundi ngai, nzokande natiki kosambela te.

109:5  Nasali bango malamu, bazongiseli ngai mabe, naluki boyokani na bango, bakomi koyina ngai.

109:6  « Tindela monguna wa ngai moto mabe, abimela ye, mofundi ateleme o loboko la ye la mobali.

109:7  Basambisa ye, bakitisa ye, batala losambo la ye lokola lisumu.

109:8  Bakutola mikolo mya bomoi bwa ye, moto mosusu akamata mosala mwa ye ;

109:9  bana ba ye bázanga tata, mpe mwasi wa ye azanga mobali !

109:10  Bana ba ye batelengana, bakoma kosengesenge, babengana bango o ndako eye ekomi mopotu !

109:11  Modefisi mosolo abotolo ye biloko binso mpe mouta ayiba matomba ma mosala mwa ye !

109:12  Moto moko asala ye malamu lisusu te, bana ye atiki, moto moko ayokela bango mawa te !

109:13  Bana, bankoko na bankokolo ba ye banso bakufa, bato bakoya nsima bayeba nkombo ya ye te !

109:14  Mokonzi abosana masumu ma bankoko ba ye te, mpe alimbisa lisumu lya mama wa ye te !

109:15  Akundola mabe ma ye ntango inso mpo ’te alongola nkombo ya ye o mokili ! »

109:16  Alingaki kosala baninga malamu te, anyokoli mobola mpe moto wa mawa, kin’o liwa ayokisi bango mpasi o motema.

109:17  Abeteleki bato basusu mobondo, babetele ye lokola. Aboyaki kobenisa bato, azanga bobenisi sikawa.

109:18  Mondingo moye alataki lokola elamba, mokotela ye lokola mai o misopo, kin’o minkuwa mya ye lokola mafuta.

109:19  Alata mondingo lokola elamba, mokanga ye seko lokola mokaba o loketo.

109:20  Ezala etumbu Mokonzi akopesa bato bafundi ngai mpe baye banso bakotombelaka ngai bobe.

109:21  Kasi, Mokonzi, salisa ngai mpo ya nkombo ya yo. Bolingi bwa yo boleki bonene, bikisa ngai.

109:22  Nazali mobola mpe moto wa mawa, motema mwa ngai mozoki mpota.

109:23  Nalingi nalimwa noki lokola elilingi, lokola mapalela matombwami na mompepe.

109:24  Bolali nzala bolembisi ngai, nakondi mingi, nzoto ya ngai ezangi mafuta.

109:25  Nkombo ya ngai ekomi lifinga o minoko mya bango, baye bamoni ngai, baningisi mitó.

109:26  E Mokonzi Nzambe wa ngai, yaka kosalisa ngai. Mpo ya bolingi bwa yo bonene, bikisa ngai.

109:27  Bato bayeba ’te yo moto osali bongo, yo Mokonzi okeli bikela binene.

109:28  Bango bakobete mobondo, kasi yo okobenisa, banyokoli ba ngai bayoka nsoni, ngai, mosaleli wa yo, nasepela !

109:29  Baye bafundi ngai basambwa, nsoni ezinga bango lokola elamba !

109:30  Nakotondo Mokonzi na mongongo makasi, nakokumisa ye o miso ma bato banso,

109:31  zambi azali penepene na mobola mpo ’te abikisa ye o maboko ma bazuzi ba ye.

Chapter 110

110:1  Nzembo ya Davidi. Yawe alobi na Mokonzi wa ngai : « Fanda o loboko la ngai la mobali, tee nakokweisa banguna ba yo, bakoma ebonga ya kotia makolo ma yo. »

110:2  Bokonzi bwa yo bokopalangana ut’o Sion, okokonza banguna banso.

110:3  Bato ba yo bakolanda yo mokolo okokende etumba, bilenge bangengi lokola mamio ma ntongo basangani o mboka yo.

110:4  Nzambe alayaki ndai, akobongola maloba ma ye te : « Ozali nganga Nzambe seko, se lokola Melkisedek. »

110:5  Mokonzi wa ngai akozala penepene na ngai, akonyata bakonzi o mokolo mwa nkanda ya ye.

110:6  Akosambisa bikolo binso, akopasola bango mitó, akotondisa mokili mobimba na bibembe.

110:7  O nzela eye akoleka, akomele mai ma moluka, yango wana akotombola motó.

Chapter 111

111:1  Aleluya ! Natondi Mokonzi na motema monso, o ntei ya bato ba bosembo basangani likita.

111:2  Bikela binso bya Mokonzi bileki bonene ; baye basepeli na byango, bakomanyolaka byango.

111:3  Mosala mwa ye moleki bonene mpe bonzenga, bosembo bwa ye bokoumela seko.

111:4  Apesi biso mikolo tokanisa makamwisi ma ye, solo, Mokonzi azali motema boboto mpe ngolu.

111:5  Akoleisaka baye bakobangaka ye, akokanisaka seko bondeko akataki na bango.

111:6  Akolakisaka bango nguya ya bikela bya ye, akokabelaka bango mabelé ma mikili misusu.

111:7  Akosalaka manso na bolamu mpe na bosolo, mibeko mya ye mikoki kobongwana te,

111:8  mitikala o bileko binso seko, misalemi na bosembo mpe na bosolo.

111:9  Apesi bato ba ekolo ya ye libiki, bondeko bwa ye bokoumela seko. Nkombo ya ye esantu ekoyokisaka nsomo.

111:10  Bwanya bwa solo, bobangi Mokonzi ! Bato bakosalaka bongo bazali bato ba mayele. Nkembo ya Nzambe ekoumela seko !

Chapter 112

112:1  Aleluya ! Esengo na moto akobangaka Mokonzi mpe akotosaka mibeko mya ye na motema moko.

112:2  Akozala na libota linene awa o mokili, Nzambe akobenisaka mabota ma bato ba bosembo.

112:3  Akozwa nkita, ndako ya ye ekotonda na biloko, bolamu bwa ye bokosila mokolo moko te.

112:4  O kati ya molili moto semba akomonisa mwinda ; azali motema ngolu, akoyokelaka baninga mawa.

112:5  Akosalisaka bango mpe akodefisaka bango mosolo. Akobongisaka makambo ma ye bo ebongi.

112:6  Moto semba akotelengana mokolo moko te, nkombo ya ye ekotikala o bileko na bileko.

112:7  Nsango ya mawa ekobangisaka ye te, azali motema mpiko mpe akolikya na Mokonzi.

112:8  Azali bobele motema mpio, akobanga eloko te kin’o mokolo akomonela banguna ba ye.

112:9  Azali moto wa likabo, akosalisaka babola ; bosembo bwa ye bokosila mokolo moko te, akokoma moto monene na lokumu la solo.

112:10  Soko mosumuki amoni ye, akoyoka zuwa, akolia mino, nkanda ya ye ekolia ye. Mposa ya bato babe ekolongisa bango te.

Chapter 113

113:1  Aleluya ! Basaleli ba Mokonzi, bokumisa ye, boyembela nkombo ya Mokonzi !

113:2  Bato banso bakumisa nkombo ya Mokonzi, sikawa mpe o bileko binso seko !

113:3  Ut’o Esti kin’o Westi bato banso bakumisa nkombo ya Mokonzi.

113:4  Mokonzi akoyangelaka bikolo binso, nkembo ya ye eleki likolo na mosika.

113:5  Nani akokani na Mokonzi, Nzambe wa biso ? Ye afandi o ngwende kuna o likolo,

113:6  mpe ut’o likolo akotalaka likolo na nse.

113:7  Akotelemisa moto motau akwei o mputulu mpe akolongola mobola o esika ya potopoto.

113:8  Akofandisa ye o esika ya bankumu, esika yoko na bankumu ba ekolo ya ye.

113:9  Akopesa mwasi ekomba ndako, akoyokisa ye esengo ya kozala mama wa bana.

Chapter 114

114:1  O eleko bato ba Israel babimaki o Ezipeti mpe libota lya Yakob o ekolo ya bampaya,

114:2  Mokonzi aponi Yuda bo esika ya ye esantu, mpe Israel bo mabelé ma ye.

114:3  Mai ma mbu mamoni bongo mpe makimi mbangu, mai ma Yordane makomi kozonga nsima.

114:4  Ngomba ipimbwi lokola mpata babali, mpe ngomba ike lokola bana ba mpata.

114:5  E mai ma mbu, mpo nini okimi bongo ? Mai ma Yordane, mpo nini ozongi nsima ?

114:6  Bino ngomba inene, mpo nini bopimbwi lokola mpata babali, mpe ngomba ike lokola bana ba mpata ?

114:7  E mokili, oningana o miso ma Mokonzi, olenge o boso bwa elongi ya Nzambe wa Yakob,

114:8  oyo akobongolaka libanga linene likoma etima, mpe libanga like likoma liziba lya mai.

Chapter 115

115:1  E Mokonzi, okumisa biso te, okumisa biso te, kasi kumisa nkombo ya yo, mpo ya bolingi mpe lobokó bwa yo.

115:2  Bato ba bikolo batika koloba : « Nzambe wa bango azali wapi ? »

115:3  Nzambe wa biso azali o likolo, manso alingi kosala, akosala mango.

115:4  Bikeko bya bango, se palata na wolo, bisalemi se na maboko ma bato.

115:5  Bizali na monoko, kasi bikolobaka te, bizali na miso, kasi bikomonoko te,

115:6  bizali na matoi, kasi bikoyokaka te, bizali na zolo, kasi bikolumbutaka te.

115:7  Bizali na maboko, kasi bikosimbaka eloko te, bizali na makolo, kasi bikoki kotambola te, bizali na mongongo, kasi bikoyokisaka lolaka te.

115:8  Bato basali byango bakokoma lokola byango ná baye bakotiaka mitema na byango.

115:9  Bato ba Israel, botia mitema na Mokonzi, mosalisi mpe mobateli wa bino, se ye !

115:10  Bato ba Arone, botia mitema na Mokonzi, mosalisi mpe mobateli wa bino, se ye !

115:11  Baye bakobangaka Mokonzi, batia mitema na ye, mosalisi mpe mobateli wa bino, se ye !

115:12  Mokonzi akokanisaka biso, akobenisa biso, akobenisa ekolo ya bato ba Israel, akobenisa libota lya bana ba Arone,

115:13  akobenisa baye bakobangaka Mokonzi, ná bato banene ná bato bake.

115:14  Mokonzi akokolisa mabota ma bino, akobenisa bino ná mpe bana ba bino.

115:15  Mokonzi abenisa bino, ye mozalisi wa likolo na nse !

115:16  Likolo lizali lya Mokonzi, kasi apesi mokili o maboko ma bato.

115:17  Bato bawei bakopesaka Mokonzi lokumu te, ata moko te wa baye bakiti o mboka ya bawa.

115:18  Kasi biso bato tozali na bomoi, tokokumisaka Mokonzi, lelo mpe o bileko binso. Aleluya !

Chapter 116

116:1  Nakolingaka Mokonzi, zambi akoyokaka mabondeli ma ngai.

116:2  Mbala inso nabelelaki ye, atandelaki ngai matoi.

116:3  Ntango nakomaki penepene na liwa, mpe motambo mwa limfelo mokangaki ngai, ntango nayokaki nsomo mpe nabangaki,

116:4  nabelelaki nkombo ya Mokonzi : « E Mokonzi, bikisa molimo mwa ngai ! »

116:5  Mokonzi azali nta bosembo, nta ngolu, Nzambe wa biso azali nta bolamu.

116:6  Mokonzi akobatelaka bato bake : ntango nalembeki, abikisi ngai.

116:7  Nakitisi motema, nabangi lisusu te, zambi Mokonzi asali ngai malamu :

116:8  abikisi molimo mwa ngai o liwa, alongoli ngai mai o miso, mpe asalisi ngai nakweya te.

116:9  Nakotambola o miso ma Mokonzi, o ntei ya bato bazali na bomoi.

116:10  Nazalaki na elikya, ata ntango nalobaki : « Ngai nazali nsuka ya bato ba mawa. »

116:11  O ntango mayele masilelaki ngai, nalobaki : « Bato banso se bato ba lokuta. »

116:12  Ndenge nini nakoki kozongisela Mokonzi malamu manso ye asalaki ngai ?

116:13  Nakotombola nkeni ya libiki, mpe nakotanga nkombo ya Mokonzi.

116:14  Nakokokisa bilako nalakelaki Mokonzi o miso ma bato banso ba ekolo ya ye.

116:15  Liwa lya bato balingi Mokonzi lileki motuya o miso ma ye.

116:16  E Mokonzi, nazali mosaleli wa yo, mwana wa mosaleli wa yo wa mwasi, ofungoli nsinga izalaki kokanga ngai.

116:17  Nakobonzela yo libonza lya botondi yo, mpe nakotanga nkombo ya Mokonzi.

116:18  Nakokokisa bilako nalakelaki Mokonzi o miso ma bato banso ba ekolo ya ye,

116:19  o lopango la ndako ya Mokonzi, o kati ya Yeruzalem, engumba ya yo. Aleluya !

Chapter 117

117:1  Bato ba bikolo binso, bokumisa Mokonzi, o mikili minso boyembela ye nzembo !

117:2  Akolingaka biso bolingi boleki bonene, bosolo bwa Mokonzi bokoumela seko. Aleluya !

Chapter 118

118:1  Botondo Mokonzi, zambi aleki bolamu, bolingi bwa ye, bolingi bwa seko !

118:2  Bato ba ekolo ya Israel baloba : Bolingi bwa ye, bolingi bwa seko !

118:3  Bato ba libota lya Arone baloba : Bolingi bwa ye, bolingi bwa seko !

118:4  Baye bakobangaka Mokonzi baloba : Bolingi bwa ye, bolingi bwa seko !

118:5  Ntango nayokaki nsomo, nabelelaki Mokonzi, andimeli ngai mpe abikisi ngai.

118:6  Mokonzi azali na ngai, nakobanga lisusu te, bato bakoki kosala ngai nini ?

118:7  Mokonzi azali na ngai, azali kosalisa ngai ; yango wana nakoki kobanga banguna ba ngai te.

118:8  Kobombama epai ya Nzambe eleki malamu, kotia motema na bato ezali mpamba.

118:9  Kobombama epai ya Nzambe eleki malamu, kotia motema na bato banene ezali mpamba.

118:10  Bapagano banso bazingaki ngai, napanzi bango o nkombo ya Mokonzi.

118:11  Bazingaki ngai, bakangaki ngai makasi, napanzi bango o nkombo ya Mokonzi.

118:12  Bayaki kozinga ngai ebele lokola nzoi, basili lokola nzube iziki na móto, napanzi bango o nkombo ya Mokonzi.

118:13  Batindisaki ngai mpo ’te baboma ngai, kasi Mokonzi ayei kosalisa ngai.

118:14  Nzambe azali bokasi bwa ngai, nakoyembelaka ye, mpo azali mobikisi wa ngai.

118:15  O biema bya basemba bagangi na nsai : « Loboko la Nzambe losali mambi manene,

118:16  loboko la Nzambe losali makasi, loboko la Nzambe losali mambi manene ! »

118:17  Solo, nakokufa te, nakozala na bomoi, mpe nakokumisa bikela bya Mokonzi.

118:18  Apesaki ngai etumbu mbala mingi, kasi andimaki te ’te nakufa.

118:19  Fungolela ngai bizibeli bya ndako ya bosembo, nakoyingela mpe nakotondo Mokonzi.

118:20  Ezibeli ya ndako ya Mokonzi ezali awa, esika bato ba bosembo bakoyingela.

118:21  Natondi yo zambi ondimeli ngai, yo mobikisi wa ngai.

118:22  Libanga liye batongi-ndako baboyaki likomi libanga lya nse lya ndako mobimba.

118:23  Tala mosala Mokonzi asalaki, tomoni mwango na miso mpe tokamwi.

118:24  Mokonzi akeli mokolo mwa lelo mpo tosepela mpe toyoka nsai.

118:25  E Nzambe, pesa biso libiki, pesa e ! E Mokonzi, pesa biso lilonga, pesa e !

118:26  O nkombo ya Mokonzi babenisa oyo akoya ! Ut’o ndako ya Mokonzi tokokumisa yo.

118:27  Mokonzi azali Nzambe, ye mwinda mwa biso, totambola milongo, mandalala o maboko, tobeleme na matumu ma altare.

118:28  Natondi yo, Nzambe wa ngai, nakumisi yo, natondi yo, mpo ondimeli ngai, obikisi ngai.

118:29  Botondo Mokonzi, zambi aleki bolamu, bolingi bwa ye, bolingi bwa seko !

Chapter 119

119:1  Esengo na bato balandi nzela ebongi nye mpe bamemyi Mobeko mwa Mokonzi.

119:2  Esengo na baye batosi mitindo mya ye, baye baluki ye na motema moko,

119:3  basali mabe soki te, mpe balandi bobele nzela ya ye !

119:4  Yo moto otindi mitindo mya yo mpo ’te bato batosa myango nye.

119:5  Nátambola o nzela ya ngai na mpiko, násala se mpo ilingi yo.

119:6  Soko natosi mitindo mya yo, nakoyoka nsoni mokolo moko te.

119:7  Nakotondo yo na motema semba, zambi nakoyeba mibeko mya yo mya bosembo.

119:8  Nakosala manso yo olingi, otika ngai seko te.

119:9  Boniboni elenge mobali akoki kotikala na bopeto ? Bobele soko atosi maloba ma yo.

119:10  Naluki yo na motema monso, nálongwa o nzela ya mibeko mya yo te.

119:11  Nabombaki bilako bya yo o motema, mpo ’te nasala lisumu o miso ma yo te.

119:12  Bato bakumisa yo, Mokonzi, lakisa ngai maye yo olingi !

119:13  Na mbebu ya ngai nasili natangi mateya manso mauti o monoko mwa yo.

119:14  Nayoki esengo o nzela ya mibeko mya yo, natali nkita ya biloko nsima.

119:15  Nalingi komanyola mitindo mya yo, mpe kokeba o nzela olakisi ngai.

119:16  Nakosepelaka na maye yo olingi, nakoki kobosana maloba ma yo te.

119:17  Salisa ngai, mosaleli wa yo, mpo ’te nabika, nakotosa maloba ma yo manso.

119:18  Fungola ngai miso, bongo namono makamwisi ma mobeko mwa yo.

119:19  Nazali se mompaya awa o nse, obombela ngai mitindo mya yo te.

119:20  Molimo mwa ngai mowei na mposa ya koyeba bitinda bya yo ntango inso.

119:21  Okokanelaka bato ba lolendo basali mabe, baye batiki nzela ya mibeko mya yo.

119:22  Longola bato bazali kofinga mpe kokinola ngai, zambi nakotosaka malako ma yo manso.

119:23  Ata bankumu balingi kosambisa ngai, ngai mosaleli wa yo nakomanyola maye yo olingi.

119:24  Malako ma yo mazali esengo ya ngai, makolakisaka ngai nzela eye nálanda.

119:25  Molimo mwa ngai molali o mputulu, lendisa ngai lokola olakelaki ngai.

119:26  Awa nayebisi yo nzela ya ngai, oyanoli ngai, lakisa ngai maye yo olingi.

119:27  Salisa ngai nayeba nzela ya mitindo mya yo, mpe nakomanyola makamwisi ma yo.

119:28  Mai mabimeli ngai o miso mpo ya mawa, telemisa ngai lisusu lokola olakelaki ngai.

119:29  Longola ngai o nzela ya lokuta, ndima ’te nakoka kolanda nzela ya mibeko mya yo.

119:30  Nandimi kolanda nzela ya bosolo, nandimi kotosa mateya ma yo.

119:31  Nandimi mibeko mya yo na motema monso, e Mokonzi, nayoka nsoni te.

119:32  Nakolandaka nzela ya mitindo mya yo, zambi yo moto oteyi ngai yango.

119:33  E Mokonzi, lakisa ngai nzela ya mibeko mya yo, nalingi kolanda yango kin’o nsuka.

119:34  Pesa ngai bwanya natosa mibeko mya yo, namemya myango na motema moko.

119:35  Kamba ngai o nzela ya mitindo mya yo, zambi nayoki myango elengi mingi.

119:36  Yokisa motema mwa ngai mposa ya malako ma yo, nalanda mposa ya mosolo soki te.

119:37  Batela miso ma ngai malula biloko mpamba te, nazwa bomoi mpo ya mitindo mya yo.

119:38  Kokisa elako olakelaki mosaleli wa yo ná mpe baye bakobangaka yo.

119:39  Longola mafinga ma bato, maye nakoyokaka nsomo, zambi nakoyambaka mateya ma yo na esengo.

119:40  Solo, nalingaki bitinda bya yo mingi, lendisa ngai mpo ya bosembo bwa yo.

119:41  E Mokonzi, kabela ngai bolingi bwa yo, mpe libiki lokola olakelaki.

119:42  Bongo nakoka koyanola baye bafingi ngai, zambi nakotiaka motema na liloba lya yo.

119:43  Salisa ngai naloba se maloba ma bosolo, mpo natii elikya na ndenge okokataka makambo.

119:44  Nátosa mibeko mya yo ntango inso mpe o bileko na bileko seko.

119:45  Nakoyoka esengo na bolandi nzela ya yo, zambi nalingi kotosa mitindo mya yo.

119:46  Nakosakola malako ma yo o miso ma bakonzi, nakoyoka nsoni soki moke te.

119:47  Mitindo mya yo miyokisi ngai esengo enene, nalingi myango na motema moko.

119:48  Nakotanda maboko epai ya bitinda bya yo, mpe nakomanyola maye yo olingi.

119:49  Kanisa lisusu elako olakelaki mosaleli wa yo, eye elendisaki elikya ya ngai.

119:50  Maloba ma yo mabondi ngai o ntango ya mawa, elako ya yo ekolendisa ngai.

119:51  Bato ba lolendo batumoli ngai mingi, kasi natiki nzela ya mibeko mya yo te.

119:52  E Mokonzi, nakundoli mateya ma yo ma kala, maye mazali kobondo ngai.

119:53  Nayoki nkanda enene mpo ya bato baboyi yo, baye batiki nzela ya mibeko mya yo.

119:54  Nakoyokaka mibeko mya yo elengi lokola nzembo, o ndako ya ngai esika nazali se mompaya.

119:55  E Mokonzi, na butu nakokanisaka nkombo ya yo, mpe nakotosaka mibeko mya yo.

119:56  Kotosa mitindo mya yo ntango inso, ezali lotomo la ngai lonene.

119:57  E Mokonzi, nakoloba yango lisusu : bolamu bwa ngai, se kondima maloba ma yo.

119:58  Na motema monso naluki kobondo yo, yokela ngai ngolu lokola olakelaki.

119:59  Nakomitunaka mpo ya ezalela ya ngai, mpo nazongela nzela ya malako ma yo.

119:60  Nalekisi ntango mpamba te, naumeli te mpo ya kotosa mitindo mya yo.

119:61  Bato babe batandeli ngai minyama, kasi nabosani mibeko mya yo te.

119:62  O kati ya butu natelemi mpo ya kotondo yo, zambi okoyangelaka manso na bosembo.

119:63  Nazali motema moko na bato bakobangaka yo, baye bakotosaka mitindo mya yo.

119:64  Mokili motondi na bolingi bwa yo, Mokonzi, bongo olakisa ngai maye yo olingi.

119:65  Osalaki ngai, mosaleli wa yo, malamu, lokola olakelaki, Mokonzi.

119:66  Lakisa ngai bwanya mpe mayele, zambi natii motema na mitindo mya yo.

119:67  Yambo ’te nasambwa, nabungaki nzela, kasi sikawa nakotosa maye otindi.

119:68  Ozali motema malamu mpe okosalaka se malamu, lakisa ngai maye yo olingi.

119:69  Bato ba lolendo bakotongoko ngai, kasi ngai nakotosa mitindo mya yo na motema monso.

119:70  Eloko yoko ekokotelaka bango o mitema te, kasi ngai nakosepelaka na mibeko mya yo.

119:71  Mawa nayokaki masali ngai malamu, nabandi koyeba bongo mibeko mya yo.

119:72  Mobeko mobimi o monoko mwa yo moleki bolamu, moleki wolo na palata nkoto na nkoto.

119:73  Maboko ma yo mayemaki mpe makelaki ngai, pesa ngai bwanya nayeba mitindo mya yo.

119:74  Bato babangi yo basepeli na bomoni ngai, zambi natii elikya na maloba ma yo.

119:75  Mokonzi, nayebi ’te mateya ma yo mazali semba, oyebi ntina nini oyokisi ngai mpasi.

119:76  Bolingi bwa yo bobondo motema mwa ngai, lokola olakelaki mosaleli wa yo.

119:77  Ngolu ya yo ekitela ngai mpe nakobika, zambi mibeko mya yo mizali ntina ya esengo ya ngai.

119:78  Bato ba lolendo, baye bafundi ngai na lokuta, basambwa, ngai nakomanyola se mitindo mya yo.

119:79  Bato babangi yo bazongela ngai, baye bayebi malako ma yo.

119:80  Motema mwa ngai mokangana na mibeko mya yo, nayoka nsoni mokolo moko te.

119:81  Kin’o nsuka nakozila libiki lya yo, natii motema na liloba lya yo.

119:82  Miso ma ngai mateli na boluki elako ya yo, mokolo nini okoya kobondo ngai ?

119:83  Nakomi lokola libenga liindi na milinga, kasi nabosani mitindo mya yo soki te.

119:84  Mikolo boni naino mosaleli wa yo asengeli kozila mpo ’te ósambisa banyokoli ba ngai ?

119:85  Bato ba lolendo batimolaki libulu, bango bato baboyi mibeko mya yo.

119:86  Otindi mitindo mya yo minso se na bosolo, bikisa ngai o maboko ma baye banyokoli ngai ntina te.

119:87  Etikalaki moke ’te bakomisa ngai penepene na nsuka, kasi ngai natiki bitinda bya yo te.

119:88  Lendisa ngai mpo ya bolamu bwa yo, mpe nakotosa malako ma yo.

119:89  Mokonzi, liloba lya yo likoumela seko, likoki kobongwana o likolo te.

119:90  Bosolo bwa yo bozali o bileko na bileko, mokili mopikami lokola okelaki mwango.

119:91  Molóngó mobimba mokotambolaka lokola otindi, zambi binso bikosalelaka yo.

119:92  Soko nayokaki mibeko mya yo elengi te, mbele nakufaki o kati ya mawa.

119:93  Nábosana bitinda bya yo mokolo moko te, zambi okolendisaka ngai na byango.

119:94  Nazali moto wa yo, bikisa ngai ! Ntango inso nalingi koyeba mitindo mya yo.

119:95  Bato babe banongi ngai mpo ’te babungisa ngai, kasi ngai nalingi kokeba na malako ma yo.

119:96  Namoni ’te malamu manso mazali na nsuka, kasi mobeko mwa yo mozali na nsuka te !

119:97  Napusi kolinga mibeko mya yo, nakomanyolaka myango mikolo minso.

119:98  Mitindo mya yo mipesi ngai bwanya bonene leka banguna, zambi mikosalisaka ngai ntango inso.

119:99  Naleki balakisi ba ngai banso na mayele, zambi nakomanyolaka maloba ma yo.

119:100  Naleki bakolo ba mboka banso na bwanya, zambi nakotosaka mitindo mya yo.

119:101  Nakokimaka nzela ibe inso, mpo ’te natosa liloba lya yo.

119:102  Nalongwi o nzela ya mateya ma yo te, zambi yo moto olakisi ngai mango.

119:103  Nayoki elako ya yo elengi mingi, leka mafuta ma nzoi o monoko !

119:104  Nakomi na bwanya mpo ya mitindo mya yo, nayini nzela inso ya lokuta.

119:105  Maloba ma yo makolakisaka ngai nzela, mazali mwinda, moye nakoki kolanda.

119:106  Nalayaki ndai, nakowangana yango te, ’te nakotosa mitindo mya yo mipusi bosembo.

119:107  Mokonzi, nazindi o kati ya mawa, lendisa ngai lokola olakelaki.

119:108  Mokonzi, yamba bilako bya ngai bo libonza, lakisa ngai mateya ma yo.

119:109  Nakomitikaka o maboko ma yo ntango inso, nakoki kobosana mibeko mya yo te.

119:110  Ata bato babe batieli ngai motambo, natiki nzela ya mitindo mya yo te.

119:111  Lisango lya ngai, malako ma yo, mazali ntina ya esengo o motema mwa ngai.

119:112  Nasali makasi mpo ’te nakokisa maye olingi, seko, tee nsuka.

119:113  Nayini bato ba mitema mibale, nalingi mobeko mwa yo.

119:114  Ozali ebombamelo mpe nguba ya ngai, natii elikya na maloba ma yo.

119:115  Bino bato babe, bolongwa pene na ngai, nalingi kotosa mibeko mya Nzambe wa ngai !

119:116  Lendisa ngai mpo ’te nabika lokola olakelaki, natii motema na yo, nayoka nsoni te.

119:117  Ndima kosalisa ngai mpe nakobika, kosala maye olingi ekosepelisa ngai.

119:118  Okokinolaka baye baboyi mitindo mya yo, zambi mayele ma bango, se mayele ma lokuta.

119:119  Okotalaka bato babe banso lokola eloko egugi, yango wana ngai nalingi mateya ma yo.

119:120  Mpo ya yo nayoki nsomo, nzoto ya ngai ekomi kolenge, nabangi maloba ma yo manso.

119:121  Nasali se mambi ma bosembo, otika ngai o maboko ma banyokoli ba ngai te.

119:122  Salisa mpe batela ngai, mosaleli wa yo, mpo ’te bato ba lolendo banyokolo ngai te.

119:123  Miso ma ngai mateli na bozili libiki lya yo, mpo ya elako ya yo ya bosembo.

119:124  Sala mosaleli wa yo engebene na bolingi bwa yo, lakisa ngai maye yo olingi.

119:125  Nazali mosaleli wa yo, pesa ngai bwanya, bongo nakoyeba ntina ya malako ma yo.

119:126  Eleko ekoki, Mokonzi, ebongi omilakisa, zambi bato babuki mibeko mya yo.

119:127  Napusi kolinga mitindo mya yo, leka wolo, wolo peto mpenza.

119:128  Nakani kotosa mibeko mya yo minso, nayini nzela inso ya lokuta.

119:129  Mateya ma yo, makamwisi ma solo, yango wana nabombi myango o motema.

119:130  Moto ayoki maloba ma yo akozwa mayele, bato ba bosawa bayebi ntina ya mango.

119:131  Nafungoli monoko mpe nabendi mpema, mpo nayoki mposa ya mitindo mya yo.

119:132  Otala ngai mpe oyokela ngai mawa, lokola okosalaka na baye balingi nkombo ya yo.

119:133  Mpo ya elako ya yo, lendisa makolo ma ngai, mpo ’te mabe makweisa ngai te.

119:134  Bikisa ngai ntango bato balingi kotinda ngai na makasi, bongo nakoka kotosa mitindo mya yo.

119:135  Lakisa mosaleli wa yo elongi ya yo nta bonzenga, yebisa ngai maye yo olingi.

119:136  Miso ma ngai matangi mpizoli ebele mpo ya bato bakotosaka mibeko mya yo te.

119:137  E Mokonzi, ozali nta bosembo, okokataka makambo bo ebongi.

119:138  Okopesaka malako ma yo ma bosembo, mazali maloba ma bosolo.

119:139  Nawei na mposa ya kosalela yo, zambi banguna ba ngai babosani maloba ma yo.

119:140  Elako ya yo ezali ya lokuta soki te, ngai, mosaleli wa yo, nalingi yango.

119:141  Ata nazali eloko mpamba, ata bakinoli ngai, nabosani mitindo mya yo te.

119:142  Bosembo bwa yo, bosembo bwa seko, mobeko mwa yo mozali bosolo.

119:143  Ata mawa manene mpe nsomo ikangi ngai, nakosepelaka se na mitindo mya yo.

119:144  Malako ma yo mazali na bosembo seko, pesa ngai bwanya mpe nakobika.

119:145  Mokonzi, nabeleli yo makasi, yanola ngai, zambi nakosala maye yo olingi.

119:146  Nabengi yo, yaka kobikisa ngai, mpe nakotosa malako ma yo.

119:147  Yambo ’te ntongo etana, nabandi kobondela yo, natii elikya na liloba lya yo.

119:148  Butu boindi naino te, miso polele, nakomi komanyola elako ya yo.

119:149  Mpo ya bolingi bwa yo, oyoka lolaka la ngai, Mokonzi, lendisa ngai na malako ma yo.

119:150  Babelemi, banyokoli baye bakaneli ngai, balongwi o nzela ya mibeko mya yo.

119:151  Mokonzi, yo ozali penepene na ngai, mpe mitindo mya yo minso mizali mya bosolo.

119:152  Uta kala nayebi ’te opesi mitindo mya yo, bo mibeko mya seko.

119:153  Otala mawa ma ngai mpe bikisa ngai, mpo nabosani mibeko mya yo te.

119:154  Samba likambo lya ngai mpe longisa ngai, lendisa ngai mpo ya elako ya yo.

119:155  Libiki lizali mosika na bato babe, zambi bakopanganaka te na maye yo olingi.

119:156  Mokonzi, omeseni koyokela bato ngolu. Lendisa ngai na malako ma yo.

119:157  Banyokoli mpe banguna ba ngai bazali baike, kasi ngai natiki kotosa malako ma yo te.

119:158  Namonoki bapengwi mpe nayoki bango mpi, batosi maloba ma yo te.

119:159  Mokonzi, tala soko nalingi bitinda bya yo solo, lendisa ngai mpo ya bolingi bwa yo.

119:160  Maloba ma yo, maloba ma bosolo, malako ma yo mazali ma bosembo, seko.

119:161  Bankumu banyokoli ngai ntina te, kasi nazalaki kobanga bobele maloba ma yo.

119:162  Nayoki esengo mpo ya elako ya yo, lokola moto azwi nkita enene.

119:163  Nayini maloba ma lokuta, nalingi mango soki te, nalingi se mibeko mya yo.

119:164  Mokolo na mokolo nakokumisaka yo mbala nsambo, mpo mateya ma yo mapusi bosembo.

119:165  Okokabelaka bato balingi mibeko mya yo boboto, bakotuta libaku mokolo moko te.

119:166  E Mokonzi, naluki libiki epai ya yo, nakotosaka mitindo mya yo.

119:167  Nakomemyaka malako ma yo, nakokanganaka na mango na motema monso.

119:168  Nakotosaka mitindo mpe malako ma yo, yo oyebi nzela ya ngai inso.

119:169  E Mokonzi, bobeleli bwa ngai bokoma epai ya yo, pesa ngai bwanya engebene na elako ya yo.

119:170  Mabondeli ma ngai mabuta epai ya yo, bikisa ngai lokola olakelaki.

119:171  Mbebu ya ngai isakola lokumu la yo, zambi olakisi ngai maye yo olingi.

119:172  Monoko mwa ngai moyemba nzembo ya elako ya yo, zambi mitindo mya yo mizali nta bosembo !

119:173  Tandela ngai loboko mpo ya kosalisa ngai, zambi naponi se nzela ya mitindo mya yo.

119:174  Mokonzi, naluki libiki se epai ya yo ; esengo ya ngai, mibeko mya yo.

119:175  Nazala makasi mpo ’te nakumisa yo, salisa ngai na mateya ma yo.

119:176  Ngai, mpata ebungami, natelengani, yaka kokamata ngai, mosaleli wa yo. Omoni ’te nabosani mitindo mya yo te.

Chapter 120

120:1  Nzembo ya boyingeli o Tempelo. Nsomo ekangi ngai, nabeleli Mokonzi, mpe Mokonzi andimeli ngai.

120:2  E Mokonzi, bikisa ngai o kati ya bato ba lokuta, baye bakotongaka baninga.

120:3  Eloko nini Nzambe akopesa bino, bato ba songisongi ?

120:4  Akozokisa bino na makula na nsonge epotu, akozikisa bino na makala ma móto.

120:5  Mawa na ngai moto nasengeli kofanda o mokili mwa ba-Mesek, mpe kolala o biema bya ba-Kedar.

120:6  Nasili naumeli mikolo mileki mingi o kati ya bato bakoyinaka boboto.

120:7  Ngai, ata nalobi likambo lya boboto, bango balingi se etumba.

Chapter 121

121:1  Nzembo o ntango ya boyingeli o Tempelo. Natomboli miso epai ya ngomba, lisalisi lya ngai likouta wapi ?

121:2  Nakozwa lisalisi se epai ya Nzambe, ye Mozalisi wa likolo na nse.

121:3  Alingisa te ’te otuta libaku na makolo, mobateli wa yo alala mpongi te !

121:4  Te, akokangaka miso te, mobateli wa Israel akolalaka mpongi te.

121:5  Mokonzi akobatelaka yo ntango inso, Mokonzi akotikalaka seko penepene na yo.

121:6  Na moi mwese mokoyokisa yo mpasi te, na butu sanza mpe te.

121:7  Nzambe akobatelaka yo o mabe manso, akokengeleke molimo mwa yo.

121:8  Mokonzi akokengeleke bokei mpe bozongi bwa yo, banda lelo kin’o lobiko.

Chapter 122

122:1  Nzembo o ntango ya boyingeli o Tempelo. Ya Davidi. Nayokaki nsai enene ntango balobaki na ngai : « Tokende o ndako ya Mokonzi ! »

122:2  Tosili tokomi, totelemi o bizibeli bya yo, Yeruzalem !

122:3  Yeruzalem, batongi yo bo engumba, o kati ya yo banso bazali motema moko.

122:4  Se bikolo bya Mokonzi bakobuta epai ya yo, mpo ’te ba-Israel batondo yo bo ebongi.

122:5  Bakosambisaka bato epai ya yo, ozali na ngwende ya libota lya Davidi.

122:6  Bosambela ’te ozwa boboto, Yeruzalem, bato balingi yo bazwa esika ya kopema.

122:7  Boboto bozala o lopango la yo ! Boboto o ntei ya mabota ma yo !

122:8  Nalingi bandeko na baninga ba ngai, yango wana nakotombela yo boboto.

122:9  Nalingi ndako ya Mokonzi Nzambe wa ngai, yango wana nakosambela mpo ya bolamu bwa yo !

Chapter 123

123:1  Nzembo o ntango ya boyingeli o Tempelo. Natomboli miso epai ya yo, kuna esika ozali o likolo.

123:2  Lokola mosali akotalaka mokonzi wa ye, lokola miso ma mosali mwasi akotalaka maboko ma mama wa ndako, biso mpe tokotala Mokonzi Nzambe wa biso kin’o mokolo akoyokela biso mawa.

123:3  Yokela biso mawa, Mokonzi, yokela biso mawa, zambi bato bakinoli biso mingi.

123:4  Tolembi na mafinga ma bato ba lolendo, tolembi na matumoli ma bato ba lofundo.

Chapter 124

124:1  Nzembo o ntango ya boyingeli o Tempelo. Ya Davidi. Soko Mokonzi asalisaki biso te, Israel aloba yango polele,

124:2  soko Mokonzi asalisaki biso te, ntango bato bayelaki biso etumba,

124:3  mbele baliaki biso mobesu, mpo ya nkanda ya bango enene.

124:4  Mbele tozindaki banso o mai mpe ebale enene emeleki biso ;

124:5  mbele biso banso tosilaki o mbonge ya nsomo ya mai makasi.

124:6  Tokumisa Mokonzi oyo abikisi biso, zambi alingaki te ’te balia biso.

124:7  Tozali na bomoi, tobiki o motambo, lokola ndeke ekimi monyama mwa mobomi ; monyama mopaswani mpe biso tobiki.

124:8  Lisalisi lya biso, se Mokonzi, ye mozalisi wa likolo na nse.

Chapter 125

125:1  Nzembo o ntango ya boyingeli o Tempelo. Moto akotiaka motema na Mokonzi, azali lokola ngomba Sion, ngomba ekoki koningana te, epikami makasi seko.

125:2  Yeruzalem ezingami na ngomba, se bongo Mokonzi akozinga bato ba ye, banda sikawa mpe seko.

125:3  Moto mabe akoyangela ekolo ya basemba mokolo moko te, mpo ’te bato ba motema bosembo baluka kosala mabe te.

125:4  Mokonzi, sala malamu na bato balamu, baye bazali na motema bosembo.

125:5  Kasi Mokonzi abengana bato ba mitema mibale elongo na baye banso bakosalaka mabe. Boboto bozala o Israel !

Chapter 126

126:1  Nzembo o ntango ya boyingeli o Tempelo. Mokolo Mokonzi alongolaki bato ba Sion o boombo, ezalaki na biso lokola ndoto.

126:2  Mokolo mona tozalaki koseke mpe koyemba nzembo. Mokolo mona bapagano bazalaki koloba : « Mokonzi asali bango mambi manene ! »

126:3  Solo, Mokonzi asali biso mambi manene, yango wana tozalaki na esengo enene.

126:4  Mokonzi, zongisa bandeko bakangemi o boombo, batonda awa lokola mai o miluka mya esobe.

126:5  Baye balonaki mboto na mai o miso, bakobuka mbuma na motema esengo.

126:6  Baye bakendeki na mawa, mboto ya kolona o maboko, bakozonga na esengo, maboke ma mbuma o mapeke.

Chapter 127

127:1  Nzembo o ntango ya boyingeli o Tempelo. Ya Salomo. Soko Mokonzi atongi ndako te, mosala mwa batongi mozali se mpamba. Soko Mokonzi akengeli engumba te, mosala mwa mokengeli mozali se mpamba.

127:2  Mpo nini okolamuka na nta ntongo, mpe okolala na butu noki te ? Okolia mampa ma yo bobele na mpasi, Mokonzi akopesaka mpe molingami wa ye, ata alali mpongi.

127:3  Kobota bana babali ezali likabo lya Mokonzi, libota lizali mbano ya ye.

127:4  Bana babali oboti o bolenge, bazali lokola makula o maboko ma mobuni.

127:5  Esengo na moto atondisi libenga na makula mana, akoyoka nsoni te mokolo bakofunda ye o esambi.

Chapter 128

128:1  Nzembo o ntango ya boyingeli o Tempelo. Esengo na bato banso bakobangaka Mokonzi mpe bakotambolaka o nzela ya ye !

128:2  Okobika na mosala mwa maboko ma yo, okozwa bolamu na esengo.

128:3  Mwasi wa yo akozala o kati ya ndako lokola elanga ya vino ekobotaka mingi. O meza ya yo bana bakozala ebele lokola mbuma o nzete ya oliva.

128:4  Tala makabo Nzambe akokabelaka moto akobangaka ye.

128:5  Mokonzi abenisa yo ut’o ngomba Sion mpo ’te omono Yeruzalem na esengo enene mikolo minso mya bomoi bwa yo ;

128:6  omono mpe bana ba bankoko ba yo ! Boboto bozala o Israel !

Chapter 129

129:1  Nzembo o ntango ya boyingeli o Tempelo. Uta bolenge banyokoli ngai mingi, Israel aloba yango polele,

129:2  uta bolenge banyokoli ngai mingi, kasi balongaki ngai te.

129:3  Lokola bato ba bilanga bakotimolaka mabelé, bakati mokongo mwa ngai mpota mpota.

129:4  Nzambe wa bosembo akati minyololo iye bato babe bakangaki ngai.

129:5  Bayoka nsoni mpe bazonga nsima, baye banso bayini ngomba Sion.

129:6  Bazala lokola matiti o motondo mwa ndako, makauki liboso ’te bakata mango.

129:7  Oyo akokata mango akozwa ndambo eke, oyo akokanga mango akozwa ata liboke te.

129:8  Bato bakoleka wana bakoloba te : « Mokonzi ábenisa mosala mwa bino ! » Tobenisi bino na nkombo ya Mokonzi.

Chapter 130

130:1  Nzembo o ntango ya boyingeli o Tempelo. Mokonzi, ut’o bozindo nazali kobelela yo :

130:2  Mokonzi, yoka lolaka la ngai ! Tandela ngai matoi ma yo, ondima bobeleli bwa ngai !

130:3  Soko otali masumu ma biso, Mokonzi, nani akobika e ?

130:4  Kasi okolimbisaka bato, yango wana bakobanga yo.

130:5  Nazali kolikya se na yo, Mokonzi, natii motema na liloba lya yo.

130:6  Lokola mokengeli azali kozila botani bwa ntongo, molimo mwa ngai motii elikya na Mokonzi. Lokola mokengeli azali kozila botani bwa ntongo,

130:7  Israel atia motema na libiki lya Mokonzi ! Mokonzi azali nta bolamu, ngolu ndelo te.

130:8  Ye moto akosikola bato ba Israel o masumu ma bango manso.

Chapter 131

131:1  Nzembo o ntango ya boyingeli o Tempelo. Ya Davidi. Mokonzi, nazali moto wa lolendo te, nakotombolaka motó na lofundo te. Naluki nzela ya kokoma moto monene te, to ya kosala maye maleki ngai na bokasi.

131:2  Nafandi se kimia, motema nye, lokola mwana moke o mokongo mwa mama wa ye ; se lokola mwana oyo, molimo mwa ngai mozali sikawa.

131:3  Israel, tia motema na Mokonzi Nzambe, sikawa mpe o bileko na bileko !

Chapter 132

132:1  Nzembo o ntango ya boyingeli o Tempelo. Mokonzi, kanisa Davidi, kanisa mpasi inso ayokaki na misala.

132:2  Ye mpenza alayelaki Mokonzi ndai, alakelaki Nta-Bokasi wa Yakob elako :

132:3  « Nakoyingela o ema ya ngai te, nakokende kopema o mbeto ya ngai te,

132:4  nakokanga miso te, nakolala mpongi te, nakopesa mango ntango ya kopema te,

132:5  kin’o mokolo nakozwela Mokonzi esika, ndako ya Nta-Bokasi wa Yakob ! »

132:6  O Efrata toyoki nsango ya Sanduku ya Bondeko, tokuti yango o bilanga bya Yaar.

132:7  Toyingela o ndako ya Mokonzi, tokumbama o boso bwa ebonga ya ye.

132:8  Teleme, Mokonzi, kende o esika ya bopemi, elongo na Sanduku ezali na nguya ya yo.

132:9  Banganga Nzambe bazala bato ba bosembo, bato ba yo bayemba na esengo.

132:10  Mpo ya mosaleli wa yo Davidi, olongola elongi epai ya mesiya wa yo te.

132:11  Mokonzi alayelaki Davidi ndai, akobuka yango mokolo moko te, alobaki : « Nakofandisa mwana moko wa libota lya yo o ngwende babongiseli yo.

132:12  Soko bana ba yo batosi bondeko bwa ngai mpe mibeko miye nateyaki bango, bankoko ba yo mpe bakozala bakonzi, bakofanda seko o ngwende babongiseli yo. »

132:13  Zambi Mokonzi aponi ngomba Sion, alingi ndako ya ye ezala wana, alobi :

132:14  « Esika ya ngai ya kopema ekozala wana, nakofanda wana seko, zambi nalingi yango.

132:15  Nakobenisa bato ba ye bazwa biloko biike, nakotondisa babola ba ye na biloko bya kolia.

132:16  Banganga Nzambe ba ye bakozwa libiki mpe bayambi ba ye banso bakoganga na nsai.

132:17  Nakobimisa molongi o libota lya Davidi, nakolengelele mesiya wa ngai mwinda.

132:18  Nakoyokisa banguna ba ye nsoni, enkoti ya bokonzi ekongenge o motó mwa ye. »

Chapter 133

133:1  Nzembo o ntango ya boyingeli o Tempelo. Ya Davidi. Talani esengo mpe bolamu kani, kofanda banso elongo bo bandeko !

133:2  Ezali lokola malasi ma nsolo mpimbo maye basopi o motó, matangi o mandefu, matangi o mandefu ma Arone, mpe o mokengé mwa molato mwa ye.

133:3  Ezali lokola mamio ma ngomba Ermon, mayei kokita o ngomba Sion. Kuna Mokonzi akopesa bobenisi, bomoi bokoumela seko.

Chapter 134

134:1  Nzembo o ntango ya boyingeli o Tempelo. Yakani kokumisa Mokonzi, bino banso basaleli ba Mokonzi. Bino bato bokosalaka o ndako ya Mokonzi, o lopango la ndako ya Nzambe wa biso.

134:2  Botombola maboko epai ya ndako esantu butu inso bokumisa Mokonzi.

134:3  Mokonzi abenisa bino ut’o Sion, ye mozalisi wa likolo na nse.

Chapter 135

135:1  Aleluya ! Bokumisa nkombo ya Mokonzi, bino basaleli ba Mokonzi, bokumisa ye.

135:2  Bino bato bokosalaka o ndako ya Mokonzi, o lopango la ndako ya Nzambe wa biso.

135:3  Bokumisa Mokonzi, zambi aleki bolamu, boyembela nkombo ya ye, aleki bolamu.

135:4  Mokonzi aponi libota lya Yakob, akomisi bato ba Israel ekolo ya ye.

135:5  Solo, nayebi ’te Mokonzi azali monene, Mokonzi wa biso aleki banzambe basusu banso.

135:6  Manso Mokonzi alingi kosala, akosala mango, o likolo mpe o nse, o mbu mpe o mai bozindo.

135:7  Akotambwisaka mampata ut’o nsuka ya mokili, mpe akotindaka minkalali mpo mbula enoka, akobimisaka mompepe o ebombelo ya ye.

135:8  Abomi bana ba yambo banso o Ezipeti, ná bana ba bato ná bana ba bibwele.

135:9  Alakisi bilembo mpe makamwisi maike o kati ya yo, mokili mwa Ezipeti, mpo ya kobangisa Farao na bato ba ye.

135:10  Atumboli bikolo biike, abomi bakonzi baleki bokasi :

135:11  Sikon, mokonzi wa ba-Amor, Og, mokonzi wa Basan, na bakonzi banso ba Kanana.

135:12  Mabelé abotoli bango, apesi mango na Israel bo lisango.

135:13  Mokonzi, bakumisa nkombo ya yo seko ! Mikolo minso batanga nkombo ya yo !

135:14  Zambi Mokonzi akosalaka bato ba ye malamu, akoyokelaka basaleli ba ye motema ngolu.

135:15  Bikeko bya bapagano bizali se palata na wolo, bisalemaki na maboko ma bato.

135:16  Bizali na monoko, kasi bikolobaka te, bizali na miso, kasi bikomonoko te,

135:17  bizali na matoi, kasi bikoyokaka te, bizali ata na mwa mpema o monoko te.

135:18  Bato basali bikeko bina bákokana na byango ná mpe baye banso bakotiaka mitema na byango.

135:19  Bato ba Israel, bokumisa Mokonzi, bato ba libota lya Arone, bokumisa Mokonzi,

135:20  bato ba libota lya Levi, bokumisa Mokonzi, bino banso bokobangaka Mokonzi, bokumisa ye.

135:21  Ut’o ngomba Sion bakumisa Mokonzi, bakumisa oyo afandi o Yeruzalem. Aleluya !

Chapter 136

136:1  Botondo Mokonzi, zambi aleki bolamu, bolingi bwa ye, bolingi bwa seko !

136:2  Botondo Nzambe wa banzambe banso, bolingi bwa ye, bolingi bwa seko !

136:3  Botondo Mokonzi wa bakonzi banso, bolingi bwa ye, bolingi bwa seko !

136:4  Bobele ye moto asali makamwa mpenza, bolingi bwa ye, bolingi bwa seko !

136:5  Akeli likolo na bwanya bonene, bolingi bwa ye, bolingi bwa seko !

136:6  Abaki mokili makasi likolo lya mai, bolingi bwa ye, bolingi bwa seko !

136:7  Ye moto akeli miinda minene, bolingi bwa ye, bolingi bwa seko !

136:8  Akeli mwese mpo ’te mongenge na moi, bolingi bwa ye, bolingi bwa seko !

136:9  Akeli sanza na minzoto mpo ’te mingenge na butu, bolingi bwa ye, bolingi bwa seko !

136:10  Abomi bana ba yambo ba Ezipeti, bolingi bwa ye, bolingi bwa seko !

136:11  Abimisi bato ba Israel o mokili mona, bolingi bwa ye, bolingi bwa seko !

136:12  Atandi loboko, alakisi bokasi bwa ye, bolingi bwa ye, bolingi bwa seko !

136:13  Apasoli Mbu Etane na biteni bibale, bolingi bwa ye, bolingi bwa seko !

136:14  Alekisi bana ba Israel o kati ya mbu, bolingi bwa ye, bolingi bwa seko !

136:15  Azindisi Farao na basoda ba ye o mbu, bolingi bwa ye, bolingi bwa seko !

136:16  Akambi bato ba ye o eliki, bolingi bwa ye, bolingi bwa seko !

136:17  Abeti bakonzi banene bobeti, bolingi bwa ye, bolingi bwa seko !

136:18  Abomi bakonzi baleki bokasi, bolingi bwa ye, bolingi bwa seko !

136:19  Abomi Sikon, mokonzi wa ba-Amor, bolingi bwa ye, bolingi bwa seko !

136:20  Abomi Og, mokonzi wa Basan, bolingi bwa ye, bolingi bwa seko !

136:21  Apesi ba-Israel mokili mona, bolingi bwa ye, bolingi bwa seko !

136:22  Mosaleli wa ye azwi mwango bo lisango, bolingi bwa ye, bolingi bwa seko !

136:23  Akanisi biso o ntango tosambwaki, bolingi bwa ye, bolingi bwa seko !

136:24  Abikisi biso o maboko ma banyokoli, bolingi bwa ye, bolingi bwa seko !

136:25  Akoleisaka binso bizali na bomoi, bolingi bwa ye, bolingi bwa seko !

136:26  Botondo Nzambe wa likolo, bolingi bwa ye, bolingi bwa seko !

Chapter 137

137:1  Tofandaki penepene na ebale ya Babilon, tozalaki kokanisa Sion mpe kolela.

137:2  Totingisaki nzenze ya biso o bitapi bya nzete izalaki wana.

137:3  Solo, baye balongaki biso balingaki ’te toyembela bango nzembo ; banyokoli basengeki biso ’te tosepelisa bango, balobaki : « Boyembela biso nzembo ya Sion ! »

137:4  Ndenge nini toyemba nzembo ya Nzambe wa biso o mokili mwa bampaya ?

137:5  Soko nabosani yo, Yeruzalem, malamu loboko la ngai la mobali lokauka !

137:6  Lolemu la ngai lokangema o edada soko natiki kokanisa yo, Yeruzalem, soko naluki liboso bolamu bwa yo te lokola esengo ya ngai ya solosolo.

137:7  Mokonzi, kanela bato ba Edom, kanisa mokolo babomaki Yeruzalem ; mokolo balobaki : « Toboma engumba ya bango ! Tobuka yango kin’o mabanga ma nse ! »

137:8  Yo, Babilon, ozali mobomi monene, bakumisa oyo akozongisela yo mabe osalaki biso.

137:9  Esengo na moto akokanga bana ba yo mpe akobwaka bango, mitó o libanga !

Chapter 138

138:1  Ya Davidi. Mokonzi, natondi yo na motema monso, banzambe basusu bamono ’te nazali koyembela yo.

138:2  Nakumbami o boso bwa Tempelo ya yo esantu. Nakumisi nkombo ya yo mpo ya bolingi mpe bosolo bwa yo, zambi maye olakelaki biso maleki nkembo ya yo na lokumu.

138:3  O mokolo nabelelaki yo, ondimelaki ngai, opesaki motema mwa ngai mpiko ya sika.

138:4  Bakonzi ba nse banso bakumisa yo, Mokonzi, zambi bayoki bilako olakelaki bato.

138:5  Bayembela Mokonzi mpo ya bikela bya ye : « Mokonzi azali na lokumu lonene !

138:6  Ut’o nta likolo akomonoko mobola, mpe ayebi moto wa lolendo noki. »

138:7  Okolendisa bomoi bwa ngai o ntango ya makama, okobatela ngai na nkanda ya banguna, okobikisa ngai na bokasi bwa yo.

138:8  Mokonzi akobongisela ngai makambo manso ; bolingi bwa Mokonzi, bolingi bwa seko, otika ngai te, ngai mosala mwa maboko ma yo.

Chapter 139

139:1  Ya kapita wa bayembi. Ya Davidi. Mokonzi, okotalaka motema mwa ngai, oyebi ngai mobimba solo.

139:2  Nafanda to nateleme, oyebi ; ut’o mosika oyebi makanisi ma ngai.

139:3  Natambola to nalala, ozali komono, oyebi nzela ya ngai inso.

139:4  Naino nabimisi liloba o monoko te, osili oyebi lyango, Mokonzi.

139:5  Okobatelaka ngai o liboso mpe o nsima, okosimbaka ngai na loboko la yo.

139:6  Bwanya bwa yo bonene bokokamwisaka biso, boleki mayele ma ngai mosika.

139:7  Nakende wapi mpo ’te nakoma mosika na yo ? Nabombama wapi mpo ’te nakima miso ma yo ?

139:8  Nabuta kin’o likolo ? Ozali wana ! Nakita o mboka ya bawa ? Ozali mpe kuna !

139:9  Napimbwa epai moi mokobimaka to nakende o nsuka ya mbu,

139:10  ata kuna loboko la yo lokokamba ngai, loboko la yo la mobali lokosimba ngai.

139:11  Náloba : « Ebongi molili mobomba ngai, penepene na ngai moi mobongwana butu ! »

139:12  Se mpamba : molili mokoki kobomba yo te, o miso ma yo butu bozali lokola moi, mpe molili lokola mwinda.

139:13  Yo moto okelaki ebandela ya bomoi bwa ngai, oyemaki ngai o libumu lya mama wa ngai.

139:14  Natondi yo mpo ya makamwa maye manso, nayebi malamu ’te bikela bya yo bileki binene.

139:15  Ozalaki komono ngai o kati ya libumu lya mama, ntango okelaki ngai na bonkutu, lokola o nse ya mabelé.

139:16  Nazalaki se moke, osilaki komono ngai, osilaki kokoma mikolo mya ngai minso o buku ya bomoi ; otangaki myango, naino mokolo moko mobandi te.

139:17  Koyeba mayele ma yo, Mokonzi, eleki kwokoso ; makanisi ma yo maleki ebele.

139:18  Nameka kotanga mango, nakoki te, maleki zelo na boike ; esilisi ngai kotanga, nakokuta se yo.

139:19  E Nzambe, soko olingi, boma bato baboyi yo ! Bino bato bokobomaka baninga, bolongwa epai ya ngai !

139:20  Bakotukaka yo na mayele mabe mpe bakokinolaka mikano mya yo.

139:21  E Mokonzi, baye bakoyinaka yo, náyina bango te ? Baye bakobunisaka yo, náyoka bango mpi te ?

139:22  Nayini bango boyini, bango banso bakomi banguna ba ngai mpe.

139:23  E Nzambe, tala ngai mpo oyeba motema mwa ngai, meka ngai mpo oyeba makanisi ma ngai.

139:24  Tala ngai soko nakolanda nzela ebe te, mpe kamba ngai o nzela ya lobiko.

Chapter 140

140:1  Ya kapita wa bayembi. Ya Davidi.

140:2  Mokonzi, bikisa ngai o maboko ma bato babe, batela ngai na bato ba bitumba.

140:3  Bakokanaka se kosala mabe, moi mobimba bakolukaka kobimisa bitumba.

140:4  Basebi lolemu la bango lokola nyoka ekosalaka, bakobombaka ngenge ya etupa o monoko.

140:5  Mokonzi, bikisa ngai o maboko ma bato babe, batela ngai na bato ba bitumba, baye bakani kokweisa ngai.

140:6  Bato ba lolendo babombi mitambo mpo bakanga ngai, batandi monyama o nzela ya ngai mpe batieli ngai mitambo.

140:7  Nalobi na Mokonzi : Yo ozali Nzambe wa ngai ! Nabondeli yo, Mokonzi, yoka losambo la ngai.

140:8  E Nzambe Mokonzi, yo nguya mpe libiki lya ngai, okobatelaka ngai o ntango ya etumba.

140:9  Mokonzi, maye basumuki balingi kosala, ondima mango te, bazwa nzela ya kokokisa mikano mya bango te, mpo ’te batombola mitó lisusu te.

140:10  Maloba mabe ma bango makwela bango moko.

140:11  Makala ma móto manokela bango lokola mbula, bakweya o bozindo mpe bateleme lisusu te.

140:12  Bato ba monoko mabe baumela o mokili te, bato balingi bitumba, bazwa makambo.

140:13  Nayebi ’te Mokonzi akolongisa bato ba mawa, mpe akotala na bosembo likambo lya babola.

140:14  Ntembe te, basemba bakokumisa nkombo ya yo, baye balingi yo bakozala o mboka yo.

Chapter 141

141:1  Nzembo ya Davidi. Nabeleli yo, Mokonzi, yaka kosalisa ngai, yoka lolaka la ngai, nazali kobelela yo.

141:2  Losambo la ngai lobuta kin’o epai ya yo, lokola milinga mya mpaka ya malasi. Nátombola maboko epai ya yo lokola libonza lya mpokwa.

141:3  Mokonzi, tia mokengeli o monoko mwa ngai, kengele ezibeli ya monoko mwa ngai.

141:4  Sala ’te maloba mabe mauta o motema mwa ngai te, nalanda nzela ya masumu te. Nasangana na bato babe te, nafanda na bango esika yoko o limpati te.

141:5  Nándima ’te moto semba atumbola ngai mpo ’te abongisa ngai ; nandima malete ma bato babe te ; esika bakosalaka mabe, nalendisa losambo.

141:6  Bábwaka bazuzi ba bango o kati ya mabanga, báyeba bongo ’te nalobaki mabe te :

141:7  « Minkuwa mya bango mikopanzana o mboka ya bawa, lokola libanga bapasoli likopanzanaka o mabelé. »

141:8  Mokonzi Nzambe, miso ma ngai se epai ya yo, nayei kobombama o mboka yo, bikisa ngai o liwa.

141:9  Bikisa ngai o motambo batandeli ngai, mpe batela ngai o mabe bakani kosala ngai.

141:10  Bato babe bakangema o minyama mya bango moko, kasi ngai nabika o nzela ya ngai.

Chapter 142

142:1  Maloba ma Davidi. Losambo o ntango azalaki o mobenga (1 Sam 24).

142:2  Nabengi Mokonzi, nabeleli ye, nabengi Mokonzi, nabondeli ye.

142:3  Namileli o miso ma ye, nayebisi ye nsomo nazali koyoka.

142:4  Mpema ekomi kosilela ngai, kasi yo oyebi nzela ya ngai : o nzela nalingi koleka batieli ngai motambo.

142:5  Natali epai ya loboko la mobali, ata moto moko ayebi ngai te. Naluki esika nini nakoki kobombama, moto moko apangani na ngai te.

142:6  Yango wana Mokonzi, nabeleli yo, nalobi : Yo ozali mobateli wa ngai, o mokili moye natii elikya se na yo !

142:7  Tia matoi na boleli bwa ngai, nazali na mawa manene mpenza. Longola ngai o maboko ma banyokoli, baye bakomi koleka ngai na bokasi.

142:8  Bimisa molimo mwa ngai o boloko mpo ’te natondo nkombo ya yo. Basemba báya kozinga ngai, bayeba malamu maye osali ngai.

Chapter 143

143:1  Nzembo ya Davidi. Mokonzi, yoka losambo la ngai, tia matoi na mabondeli ma ngai ; mpo ya lobokó mpe bosembo bwa yo, yanola ngai.

143:2  Osambisa ngai mosaleli wa yo te, zambi o miso ma yo moto moko azali na bosembo te.

143:3  Monguna alingi koboma ngai, abwaki ngai o nse mpe anyati ngai ; afandisi ngai o mboka ya molili lokola bato basili bawei.

143:4  Mpema ekomi kosilela ngai, nazali koyoka motema nsomo.

143:5  Nakundoli mikolo mya kala na maye manso osalaki, namanyoli misala mya maboko ma yo minso.

143:6  Natandeli yo maboko, nayoki yo mposa, lokola mabelé makauki makoyokaka mposa ya mai.

143:7  Yaka noki, Mokonzi, yanola ngai, zambi mpema ya ngai elingi esila. Obombela ngai elongi ya yo te, soki te nakokoma lokola bato bakiti o libulu.

143:8  Na nta ntongo olakisa ngai bolingi bwa yo, zambi natii elikya se na yo. Yebisa ngai nzela eye nasengeli kolanda, zambi motema mwa ngai molingi se yo.

143:9  Mokonzi, bikisa ngai o maboko ma banguna, nayei koluka esika ya kobombama epai ya yo.

143:10  Lakisa ngai, nasala maye makosepelisa yo, zambi yo ozali Nzambe wa ngai. Elimo ya yo ekamba ngai o nzela ezangi mabaku.

143:11  Mokonzi, mpo ya lokumu la nkombo ya yo, obatela bomoi bwa ngai ; mpo ya ngolu ya yo, obikisa ngai o ntango nakoyoka nsomo.

143:12  Mpo ya bolingi bwa yo, osilisa banguna ba ngai ; oboma banyokoli ba ngai banso, zambi ngai nazali mosaleli wa yo.

Chapter 144

144:1  Ya Davidi. Bakumisa Mokonzi, ye libanga lya ngai, akolakisaka ngai mayele ma kobunda etumba.

144:2  Ye bolingi mpe ebombamelo ya ngai, ye linongi mpe mobikisi wa ngai. Nakomibomba epai ya ye, nguba ya ngai, zambi akokaba bikolo bisusu o maboko ma ngai.

144:3  Mokonzi, moto nde eloko nini, mpo ’te ondima ye ? Mwana wa bato nde nani ’te okanisa ye ?

144:4  Moto azali lokola mompepe, mikolo mya ye mikolimwaka lokola elilingi.

144:5  Mokonzi, fungola likolo mpe kita, simba ngomba mpo ’te ibimisa milinga.

144:6  Tinda minkalali mpe panza banguna ba ngai, bete makula ma yo mpo ’te babulungana.

144:7  Ut’o likolo tanda loboko la yo mpe bikisa ngai, longola ngai o mai bozindo, o maboko ma bampaya.

144:8  Monoko mwa bango mozali se kokosa, bakolayaka se ndai ya lokuta.

144:9  E Nzambe, nakoyembela yo nzembo ya sika, nakobetele yo lokombe la nsinga zomi.

144:10  Yo moto okopesaka bakonzi lilonga, mpe obikisi Davidi mosaleli wa yo mpo ’te mompanga mobete ye te.

144:11  Bikisa ngai o maboko ma bampaya ; monoko mwa bango mozali se kokosa, bakolayaka se ndai ya lokuta.

144:12  Bana babali ba biso bazali lokola milona, bakoli malamu ut’o bomwana. Bana basi ba biso bazali lokola bilili o makonzi, biye bikokembisaka ndako ya bakonzi.

144:13  Bibombelo bya biso bitondi mpenza na mbuma ndenge na ndenge. Mpata ya biso ikoyikanaka nkoto na nkoto, tozali na bibwele ebele o mokili mwa biso.

144:14  Ngombe ya biso inso iyei mafuta. Bakobuka lopango la mboka lisusu te, banguna bakolonga biso lisusu te.

144:15  Esengo na bato bazwi bolamu bona, esengo na baye Mokonzi azali Nzambe wa bango.

Chapter 145

145:1  Nzembo ya Davidi. Nakokumisa yo, e Mokonzi Nzambe wa ngai ; nakoyembela nkombo ya yo mikolo minso seko.

145:2  Nakokumisa yo mokolo na mokolo, nakoyembela nkombo ya yo mikolo minso seko.

145:3  Mokonzi azali monene, bakumisa ye bokumisi ; bonene bwa ye bozali na ndelo te.

145:4  Bankoko bakosangela bana misala mya yo, bakosakola mpe bikela bya yo binene.

145:5  Bakosangela bato nkembo mpe lokumu la yo, mbala na mbala tokosolola lisolo lya makamwisi ma yo.

145:6  Tokoyebisa bokasi bwa yo bwa nsomo, mpe tokosakola bonene bwa yo.

145:7  Tokokundola bolamu bwa yo nsuka te, mpe tokokumisa bosembo bwa yo.

145:8  Mokonzi azali nta bolamu mpe ngolu, akosilikaka noki te mpe atondi na bolingi.

145:9  Mokonzi akolakisaka bato banso motema malamu, apusi kolinga bikelamo bya ye binso.

145:10  Mokonzi, bikelamo binso bitondo yo, bato ba yo banso bakembisa yo.

145:11  Basakola nkembo ya bokonzi bwa yo, basangela bikela bya yo binene.

145:12  Bato banso bayeba byango, mpe basakola bonene bwa nkembo ya bokonzi bwa yo.

145:13  Bokonzi bwa yo, bokonzi bwa bileko na bileko ; boyangeli bwa yo, boyangeli bwa seko. Manso Mokonzi akolobaka mazali ma solo, akosalaka manso se na bolingi.

145:14  Mokonzi akotelemisaka baye balingi bakweya, mpe akolendisaka baye balembi.

145:15  Miso ma banso epai ya yo, bakolikya ’te okopesa bango bilei o ntango ekoki.

145:16  Okofungolelaka bato maboko ma yo : okoleisaka mpe okotondisaka bango banso.

145:17  Mokonzi azali na bosembo o bikela bya ye binso, na bolingi o misala mya ye minso.

145:18  Mokonzi azali penepene na baye bakobelelaka ye, baye bakosambelaka ye na bosolo.

145:19  Akopesaka bato bakobanga ye maye balingi,

145:20  Mokonzi akobatelaka baye banso balingi ye, kasi akosilisa bato babe banso.

145:21  Monoko mwa ngai mosakola lokumu la Mokonzi, binso bizali na bomoi bikumisa nkombo ya ye esantu, o bileko binso seko !

Chapter 146

146:1  Aleluya ! Molimo mwa ngai, kumisa Mokonzi !

146:2  Nalingi kokumisa Mokonzi bomoi bwa ngai mobimba, koyembela Nzambe wa ngai mikolo minso kin’o liwa.

146:3  Botia mitema na bato banene te, bazali se bato, bakoki kobikisa te.

146:4  Mokolo bakokata motema, bakozonga o mabelé, mokolo mona mikano mya bango minso mikobeba.

146:5  Esengo na moto oyo Nzambe wa Yakob akosalisa, oyo atii elikya na Mokonzi Nzambe wa ye,

146:6  Ye azali mozalisi wa likolo na nse, oyo akeli mbu mpe biloko binso bizali wana. Azali na bosolo mikolo minso seko.

146:7  Akozongisela banyokwami bolamu, akoleisaka bato bakufi na nzala, Mokonzi akofungolaka minyololo mya baye bakangemi.

146:8  Mokonzi akofungolaka miso ma bato ba lolanda, Mokonzi akolendisaka baye balembi. Mokonzi alingi bato ba motema bosembo.

146:9  Mokonzi akobatelaka mompaya, akosalisaka mwana etike mpe mwasi bozenge, kasi akobulinginyaka nzela ya bato babe.

146:10  Nzambe akoyangelaka o bileko na bileko, azali Nzambe wa biso, bato ba Sion, seko.

Chapter 147

147:1  Aleluya ! Bokumisa Mokonzi ! Ebongi bayembela Nzambe wa biso, kokumisa ye eleki bolamu.

147:2  Mokonzi atongi Yeruzalem lisusu, asangisi bato ba Israel bapanzanaki.

147:3  Abikisi bato batondi na mawa, mpe akangi mpota ya baye bazoki.

147:4  Ayebi motango mwa minzoto minso, ayebi nkombo ya monzoto moko moko.

147:5  Mokonzi wa biso nta-bokasi azali monene, bwanya bwa ye bozali na nsuka te.

147:6  Mokonzi akotombola bato ba bosawa, kasi akokitisa basumuki kin’o mabelé.

147:7  Boyembela Mokonzi nzembo ya botondi, bobetele Nzambe wa biso lokombe.

147:8  Ye moto akotondisaka likolo na mampata, akonokiselaka mabelé mbula, akotoisaka matiti o ngomba na mpe ndunda bo bilei bya bato.

147:9  Akoleisaka bibwele matiti ma esobe, akotondisaka bana ba yanganga bazali kolela nzala.

147:10  Bokasi bwa farasa bokosepelisaka ye te, akotalaka bokasi bwa moto se mpamba.

147:11  Mokonzi akosepelaka na bato bakobangaka ye, baye bakotiaka mitema na bolingi bwa ye.

147:12  E Yeruzalem, sepela Mokonzi ! E Sion, kumisa Nzambe wa yo !

147:13  Alendisi bikangeli bya bizibeli bya yo, abenisi bana ba yo bazali o mboka yo.

147:14  Ye akoumisaka boboto o mokili mwa yo, akotondisaka yo na fufu ya mampa.

147:15  Akotindaka liloba lya ye o mokili, likokoma noki o bisika binso.

147:16  Akonokisaka mbula ya mpembe lokola ntokia, akopanzaka mamio ma mpio lokola mputulu.

147:17  Akobwaka matandala biteni na biteni : nani akoki na malili makasi ma ye ?

147:18  Etindi ye liloba, matandala makonyangwa, etindi ye mompepe, mai makomi kotiyola.

147:19  Ayebisi Yakob liloba lya ye, apesi Israel mibeko mpe mitindo mya ye.

147:20  Asali bongo na bikolo bisusu te, ata ekolo yoko eyebi mibeko mya ye te.

Chapter 148

148:1  Aleluya ! Ut’o likolo bokumisa Mokonzi, bokumisa ye o likolo lya mampata.

148:2  Banzelu ba ye banso, bokumisa ye, mampinga ma likolo manso, bokumisa ye !

148:3  Mwese na sanza, bokumisa ye, minzoto miye mikongengeke, bokumisa ye !

148:4  Bokumisa ye, binso bizali o nsuka ya likolo, na mpe mai manso mazali kuna !

148:5  Binso bikumisa nkombo ya Mokonzi, biye bikelami na liloba lya monoko mwa ye.

148:6  Asali ’te bipikama seko, apesi byango mobeko mokoki kobongwana te.

148:7  Bikelamo binso bya nse, bokumisa Mokonzi, mbisi inene na mpe bozindo bwa mai,

148:8  móto na mpio, mbula na londende, mompepe mwa ekumbaki mokotosaka bitinda bya ye,

148:9  ngomba inene na ngomba inso ike, nzete ya mbuma na nzete inso ya zamba,

148:10  nyama ya zamba na nyama inso ya mboka, nyama ikolandaka o mabelé na ndeke ikopimbwaka o likolo,

148:11  bakonzi ba nse na bato ba bikolo binso, bankumu na bayangeli banso ba mokili,

148:12  bilenge babali na bangondo, banuna banso elongo na bana bake,

148:13  bokumisa nkombo ya Mokonzi ! Se nkombo ya ye eleki lokumu, nkembo ya ye engengi o likolo mpe o nse !

148:14  Akolendisa nguya ya bato ba ekolo ya ye, ntina ya litundu ya balingami ba ye, bana ba Israel, bato ba ye seko.

Chapter 149

149:1  Aleluya ! Boyembela Mokonzi nzembo ya sika, bokumisa ye o lisanga lya bato ba ye.

149:2  Israel asepela mozalisi wa ye, bato ba Sion basepela Mokonzi wa bango.

149:3  Bakumisa nkombo ya ye na mabina, babetele ye lokombe na nzenze !

149:4  Zambi Mokonzi alingi ekolo ya ye mingi, akobikisa bato ba bosawa.

149:5  Bato ba ye basepela mpe bakumisa ye, baganga mpo ya esengo ut’o esika bazali.

149:6  Bayembela Nzambe nzembo na mongongo makasi, mompanga mopotu o maboko,

149:7  mpo ’te babekola mabe ma bato ba bikolo, mpe batumbola bato ba mikili misusu.

149:8  Bakanga bakonzi ba bango na minyololo, mpe bankumu na bikangeli bya bibende.

149:9  Basala na bango lokola ekomami : Tala lokumu la bato ba ye banso ! Aleluya !

Chapter 150

150:1  Aleluya ! Bokumisa Nzambe o ndako ya ye esantu, bokumisa ye o etando ya bokasi bwa ye,

150:2  bokumisa ye mpo ya bikela bya ye binene, bokumisa ye mpo ya bonene bwa nkembo ya ye !

150:3  Bokumisa ye na nzembo ya mondule, bokumisa ye na lokombe mpe na likembe,

150:4  bokumisa ye na mbonda mpe na mabina, bokumisa ye na nzenze mpe na mpiololo,

150:5  bokumisa ye na migbala mikoyokanaka mosika, bobetele ye migbala mya likwei !

150:6  Bikelamo binso bizali na bomoi bikumisa Mokonzi ! Aleluya !